1 Zhã

Zhã

sɛ́bɛ́ rɛ́ nã́yéé ré ń kɛ̃ mɔ́

Lyì nánzhəzhɔ̌ nʼê bùl bə̀ wɔ́ Yezu Kristə tùntúm Zhã ń kɛ̃ sɛ́bɛ́ rɛ́ tɛ̀bɛ́. Rə̀myɛ́ yi ní, lyì yʼà shí tɛ̃´ bə zɛ̃̀ bə zù Kristə-lyì bí wẽ́ bə̀ nʼê byili bi bə̀ Yezu də̀ Yi yé, bə̀ yə̀-bəlɔ̀lɔ́ wɔ̀rhɔ́ də̀ kɔn dɛ̀bɛ́ rə̀ bʼa ce Yi wɛ̀rhɛ́ kɔn lò nè yé, bə̀ Kristə-lò wɔ̌ ń wɛ̀rhɛ́ yààyàà. Wɔ́ rə̀myɛ́ yil Zhã kɛ̃ sɛ́bɛ́ rɛ́ tɛ̀bɛ́ n pə Kristə-lyì bí ni n mə n cící bi bə̀ bə̀ dɛ̃̌ bə̀ cìn ǹdə́ lyì bí bə̀myɛ́, n zɛ̃̀ n byili bi Kristə-lò páá gə́ wɔ́ lò ná-dwí yilə.

Zhã byili Kristə-lò páá tùntwə̃̀ə̃̀ gə́ mə̂ sə nə yə̀ nɛ́:

1. Ń wɔ́ lò mɔ̀bɔ́ ń ŋwɛ́nɛ́ pwẽ̀ wẽ́ ǹdə Yi cìcì gə́ wɔ́ pwẽ̀ cí ní (1.5–2.2).

2. Ń só ń dwã bɛ́ ǹdə Yezu gə́ pɔ nyí ní (2.3-17). Lò mɔ̀bɔ́ ń bə ń dwã bɛ́ só, ń bə Yi myɛ só yé, e jà ń yə̀l rə̀ pár yé (3.11-18; 4.7-21).

3. Ń wɔ́ lò mɔ̀bɔ́ ń nə́ ń zwẽ nyí bə̀ Yezu Kristə wɔ́ Yi Byǐ ń jǐrh numbyíní. Kristə-lò páá wɔ́ lò mɔ̀bɔ́ ń zhí Kristə ne, ń nə́ ń wɛ̀rhɛ́ Yi pùbùlə̀ (2.18-29; 3.19-24; 4.1-6; 5.1-12).

4. Ń də̀ lò mɔ̀bɔ́ ń gwẽ̌ cə̀ə̀lè ń nə́ ń wɛ̀rhɛ́ yə̀-bəlwàálɛ yé (3.1-10).

5. Ń wɔ́ lò mɔ̀bɔ́ Yi Eshirhə y ŋwɛ́nɛ́ ń wẽ́ (4.1-6).

Yi zɔ̀mɛ̀ rɛ́ nʼê pɛ nyǔ mə̀ tʼâ la zhɔ̌

¹Wɔ́ zɔ̀mɛ̀ rɛ́ rə̀ nʼê pɛ nyǔ mú yil nə́ rʼé kɛ̃ sɛ́bɛ́ rɛ́ tɛ̀bɛ́ nə́ la ába pɔ. Zɔ̀mɛ̀ rɛ́ rə̀myɛ́ jɛ̀nɛ̀ rə̀ ŋwɛ́nɛ́ ǹdə́ kaka yʼà gwẽ̌ tɛ̀nɛ́ yé. Rə̀ zɔ̀m nə́ nyɛ̀ɛ̀; nə́ cìcì nə rɛ ǹdə́ nə́ yírhə́; nə́ nyǐ ri náàcɛ̀nɛ́; nə́ zə nə́ jɛ̀rh nə́ dwə̀rh rè. ²Mɔ̀bɔ́ ń wɔ́ nyǔ mú mú byili ń cìnə̀. Nə́ nə mɔ, nə́ zɛ̃̀ nə́ rʼé byili zhə̀n ńmyɛ̌ mɔ̀bɔ́ ń wɔ́ nyǔ mə̀ tʼâ la zhɔ̌ mɔ́ shò-kwã nɛ́. Ń yà ń ŋwɛ́nɛ́ ń Da mɔ́ sõ, sə ń byili nə́ba ń cìnə̀, nə́ zɛ̃̀ nə́ rʼé bwə̀l ń yò w nə́ byili ába. ³Tɛ̀bɛ́ nə́ nyɛ̀ɛ̀ nə́ jʼâ nə ǹdə́ nə́ yírhə́ mó, wɔ́ rə̀myɛ́ nə́ rʼé byili ámyɛ nɛ, mùnì ga nə́myɛ̌ ǹdʼámyɛ̌ ga mù dwã nɛ nə́ yə̀ wu òdù, bə̀ nə́myɛ̌ ǹdə́ nə́ Da Yi ǹdə́ rə̀ Byǐ Yezu Kristə mù dwã nɛ nə́ wɔ́ wu òdù. ⁴Nə́ rʼé kɛ̃ sɛ́bɛ́ rɛ́ tɛ̀bɛ́ nə́ pɛ ába mùnì nə́myɛ̌ ǹdʼámyɛ̌ ga wu-nyɔ̃̀ w yə̀ námpúm.

Yi wɔ́ pwẽ̀ cí

⁵Nə́ nyɛ̀ɛ̀ Yezu Kristə nyú w bə̀ Yi wɔ́ pwẽ̀, cə-byṹ námpɔ́lɛ́ myɛ yə̀ rə̀ gùlí yé. Wɔ́ rə̀myɛ́ nə́ zɛ̃̀ nə́ rʼé bwə̀l nə́ byili ába. ⁶Nə́ gə nʼé wə̀l bə̀ nə́myɛ̌ ǹdə́ nə́ Da mɔ́ jǐrh wu òdù, nə́ jʼâ kʼá ŋwɛ́nɛ́ cə-byín wẽ́, wɔ́ kɔma nə́ rʼé gòmə̀, nə́ tɛ̀nɛ́ zhə̀n sɔ́má yó yé. ⁷Sə nə́ gə ŋwɛ́nɛ́ pwẽ̀ wə̀, ǹdə Yi cìcì gə́ ŋwɛ́nɛ́ pwẽ̀ w ta, sə́ nyǐ nə́ wɔ́ wu òdù, sə rə̀ Byǐ Yezu jal mɔ́ nʼê vùr nə́ yə̀-bəlwàálɛ́ gakó nə́ jǐrh wárhgáá.

⁸Nə́ gə nʼé wə̀l bə̀ nə́ bə yə̀-bəlwàálɛ zhe, wɔ́ nə́ cìn nə́ rʼé jə́jɛ̀rɛ́; zhə̀n tɛ̀nɛ́ nə́ wẽ́ yé. ⁹Yi wɔ́ zhə̀n ǹdə́ cángá cə́bal. Rə̀myɛ́ ce, nə́ gə nʼé byili ri nə́ dwə́ə́ré, rə̀ bʼa pə nə́ba rə̀ gakó sǔbri, sə rə̀ bʼa vùr lwɛlɛ tɛ̀bɛ́ rə̀ ŋwɛ́nɛ́ nə́ wẽ́ mó gakó nə́ jǐrh wárhgáá. ¹⁰Nə́ gə nʼé wə̀l bə̀ nə́ yə̀ yə̀-bəlwàálɛ wɛ̀rhɛ́, nə́ rʼé zə Yi nə́ yàl kɔma cə́bal; rə̀ zɔ̀mɛ̀ rɛ́ tɛ̀nɛ́ nə́ wẽ́ yé.

¹À byâ, à nʼâ kɛ̃ ywẽ̀ né nyɛ̀bɛ́ à la ába byilu, mùnì ga á bə̀kʼá wɛ̀rhɛ́ yə̀-bəlwàálɛ yé. Sə bá lò gə wɛ̀rhɛ́ yə̀-bəlɔ̀lɔ́ myɛ, nə́ zhe lò nə́ Da Yi yé né ń nə́ ń zwẽ nə́ nyí ni: wɔ́ Yezu Kristə. Ń bə dóó zhe, ²sə ń pɔ ń cìn n yə̀ vwĩ̀-kɔn mùnì ga nə́ nə nə́ dwə́ə́ré sǔbri; sə è də̀ nə́myɛ̌ dúdú dwə́ə́ré sǔbri nɔ yil yé, wɔ́ nə́myɛ̌ ǹdə́ lũ w púlə́púlə́ lyì bí dwə́ə́ré ga sǔbri nɔ yilə.

Swénénə nə́ swéné dwã

³Wɔ́ nə́ gə́ nʼé zwẽ Yi nyə́ né mó è ce nə́ lwar bə̀ nə́ yě rə̀ párá. ⁴Lò gə wò bə̀ ǹ yě Yi párá, ń jà ǹ tá ǹ zwẽ rə̀ nyə́ né, sə́ nyǐ ǹ wɔ́ kɔma cə́bal, zhə̀n tɛ̀nɛ́ ǹ wẽ́ yé. ⁵Sə lò mɔ̀bɔ́ ǹ nə́ ǹ zwẽ Yi nyə́ né, sə́ nyǐ rə̀ sónó w ŋwɛ́nɛ́ ǹ wẽ́ námpúm. Nyǐnə kɔn dɛ̀bɛ́ rə̀ ce nə́ wɔ̌ nə́ wə̀l bə̀ nə́ zù Yi: ⁶lò mɔ̀bɔ́ ǹ nə́ ǹ wə̀l bə̀ ǹ zù Yi, ǹ tùntwə̃̀ə̃̀ né mə̂ sə nə yə̀ ǹdə Yezu Kristə nyə̀ná nɛ́ ta.

⁷À dɔwabá nántwə̂rh, è də̀ nyí nándùl à nʼâ kɛ̃ à la ába pɔ yé. Wɔ́ nyí rí nándwə́l lé á nyɛ̀ɛ̀ kùr-ju yi ní ga mɔ́. Nyí rí nándwə́l lé rə̀myɛ́ mɔ́ wɔ́ zɔ̀mɛ̀ rɛ́ tɛ̀bɛ́ á nyɛ̀ɛ̀ kùr-ju yi ní ga mɔ́. ⁸Rə̀ jʼà wɔ́ nyí nándùl à nʼâ kɛ̃ à la ába pɔ. Yezu Kristə tùntwĩ̀ĩ̀ rí ǹdə́ ámyɛ̌ nyân dɛ́ ga nʼê byili bə̀ nyí rí rə̀myɛ́ mɔ́ wɔ́ zhə̀nà, bə̀ cə-byṹ w nʼê lyɛ̃, sə pwẽ̀ dé páá mɔ́ pú è nʼê yə̀rə́.

⁹Lò mɔ̀bɔ́ ǹ nə́ ǹ wə̀l bə̀ ǹmyɛ́ ŋwɛ́nɛ́ pwẽ̀ wə̀, ń jà ǹ nə́ ǹ súl ǹ da-byǐ, sə́ nyǐ ǹ gwẽ̌ ŋwɛ́nɛ́ cə-byṹ w wẽ́. ¹⁰Lò mɔ̀bɔ́ ǹ zhe sónó ǹdə́ ǹ da-byǐ, ǹ ŋwɛ́nɛ́ pwẽ̀ wə̀; kaka wàr rə̀ bʼa ce ń tu tɛ̃´ yé. ¹¹Lò mɔ̀bɔ́ ń súl ń da-byǐ, rə̀-ná-cí ŋwɛ́nɛ́ cə-byṹ wə, ń nə́ ń zhə̀l cə-byṹ wə. Cə-byṹ w ce n jǐrh lyìlyǒ, n zɛ̃̀ ń kə́ ń yə̀l ń gə́ la má yé.

Á bə̀kʼá swéné lũ w nyə̀ná nɛ́ yé

¹²À byâ, à nʼâ kɛ̃ sɛ́bɛ́ rɛ́ tɛ̀bɛ́ à la ába pɔ, á gə́ nɔ á yə̀-bəlwàálɛ́ sǔbri ǹdə́ Yezu Kristə yil lé jàn mɔ́ yilə.

¹³Dabá, à nʼâ kɛ̃ sɛ́bɛ́ rɛ́ tɛ̀bɛ́ à la ába pɔ, á gə́ lwar mɔ̀bɔ́ ń yàl nɛ́ kùr-ju yi ní ga mɔ́ pár mɔ́ yilə.

Ébwá-dàlá, à nʼâ kɛ̃ sɛ́bɛ́ rɛ́ tɛ̀bɛ́ à la ába pɔ, á gə́ ŋwɛ̀nɛ́ lwɛlɛ cə́bal mɔ́ mɔ́ yilə.

¹⁴À byâ, à nʼâ kɛ̃ sɛ́bɛ́ rɛ́ tɛ̀bɛ́ à la ába pɔ, á gə́ yě Da mɔ́ pár mɔ́ yilə.

Dabá, à nʼâ kɛ̃ sɛ́bɛ́ rɛ́ tɛ̀bɛ́ à la ába pɔ, á gə́ lwar mɔ̀bɔ́ ń yàl nɛ́ kùr-ju yi ní ga mɔ́ pár mɔ́ yilə.

Ébwá-dàlá, à nʼâ kɛ̃ sɛ́bɛ́ rɛ́ tɛ̀bɛ́ à la ába pɔ, á gə́ wɔ́ kàndar, Yi zɔ̀mɛ̀ rɛ́ jě á wẽ́, á gə́ ŋwɛ̀nɛ́ lwɛlɛ cə́bal mɔ́ mɔ́ yilə.

¹⁵Á bə̀kʼá swéné lũ w yé, sʼá bə̀kʼá swéné wẽ̀ dé tɛ̀bɛ́ rə̀ wɔ́ lũ w nyân mɔ́ myɛ yé. Lò mɔ̀bɔ́ ǹ só lũ wə́, sə́ nyǐ ǹ bə nə́ Da Yi só yé. ¹⁶Wẽ̀ dé tɛ̀bɛ́ rə̀ wɔ́ lũ w nyân dɛ́ mɔ́ wɔ́: shilə námməlwâlsɛ́, ǹdə́ wẽ̀ tɛ̀bɛ́ yírhə́ nə mɔ́ yâl, ǹdə́ jɛ̃̀ zhe kɔn cìn-byilu. Rə̀myɛ́ rə̀dù ga tʼâ shí Da mɔ́ sõ yé. Wɔ́ lũ w wẽ́ rə̀ nʼê shí ní. ¹⁷Lũ w nʼô lyɛ̃; wẽ̀ dé tɛ̀bɛ́ rə̀ ŋwɛ́nɛ́ ò wẽ́ rə̀ shil nʼê zal lyì bí mú myɛ nʼê lyɛ̃. Sə lò mɔ̀bɔ́ ń nə́ ń wɛ̀rhɛ́ Yi pùbùlə̀, rə̀-ná-cí já ń ŋwɛ́nɛ́ twéé gakó.

Kristə zwə̀ bé

¹⁸À byâ, lũ zhɔ̌ bwəlse. Á nyɛ̀ɛ̀ bə̀ Kristə zù-bal mɔ́ bànà. Sə èlâsɛ̃´, Kristə zwə̀ nánzhəzhɔ̌ pú è ŋwɛ́nɛ́. Wɔ́ rə̀myɛ́ è ce nə́ yě bə̀ lũ zhɔ̌ bwəlse. ¹⁹Bə̀ yʼà də̀ nə́myɛ̌ lyì yé. Wɔ́ rə̀myɛ́ è ce bə du nə́ wẽ́. Bə̀ gə yʼà wɔ́ nə́myɛ̌ lyì zhə̀nà, bə̀ yʼà bʼa mɛ̃ nə́ wẽ́. Sə bə̀ du nə́ wẽ́, mùnì ga e yə̀ pamparɛ̃ɛ̃ bə̀ bə̀myɛ́ mə̀dù ga yà ń də̀ nə́myɛ̌ lò yé.

²⁰Sə è gə wɔ́ ámyɛ̌ yilə, Eshirhə náàcɛ̀nɛ́ só á yó wə; sə wɔ́ Kristə ń ce e só á yó wə. Wɔ́ rə̀myɛ́ è ce ámyɛ̌ gakó yě zhə̀n dɛ́ yé-shò. ²¹È də̀ á yə̀l zhə̀n dɛ́ yé-shò yil à nʼâ kɛ̃ sɛ́bɛ́ rɛ́ tɛ̀bɛ́ à la ába pɔ yé. Wɔ́ á gə́ yě rə̀ yé-shò mó yilə. Á yě myɛ bə̀ kɔma tʼâ shí zhə̀n wẽ́ yé.

²²Lò mɔ̀bɔ́ ń nə́ ń wə̀l bə̀ Yezu də̀ Kristə mó, ńmyɛ̌ mɔ́ wɔ́ kɔ̀mɔ̀ w páá mɔ́, n jà ń wɔ́ Kristə zù-bal. Ń zhɔ̃̀ Da mɔ́ ǹdə́ Byǐ mú ga. ²³Lò mɔ̀bɔ́ ǹ zhɔ̃̀ Byǐ mú, wɔ́ ǹdə́ Da mɔ́ ga ǹ zhɔ̃̀wà. Lò mɔ̀bɔ́ ǹ bwə̀l ń byili bə̀ ǹ zù Byǐ mú, wɔ́ ǹdə Da mɔ́ ga ǹ zùwə̀.

²⁴Rə̀myɛ́ ce, zəna kɔn dɛ́ dɛ̀bɛ́ á nyɛ̀ɛ̀ kùr-ju yi ní ga mɔ́ á wun ní wẽ́ náàcɛ̀nɛ́. Dɛ̀bɛ́ á nyɛ̀ɛ̀ kùr-ju yi ní ga mɔ́ gə mɛ̃ á wẽ́, ámyɛ bʼâ yə̀ nɛ́ ǹdə́ Yi Byǐ mú ǹdə́ Da mɔ́ ga. ²⁵Kɔn dɛ̀bɛ́ Yezu Kristə bwəl nə́ba rə̀ nyí mú, wɔ́ nyǔ mə̀ tʼâ la zhɔ̌.

²⁶À nʼâ kɛ̃ sɛ́bɛ́ rɛ́ tɛ̀bɛ́ à la ába pɔ, mùnì ga á dɛ̃̀ á cìn ǹdə́ byɛ̀bɛ́ bə̀ nʼê yâl bə yǔr ába mó. ²⁷È gə wɔ́ ámyɛ̌ yilə, Kristə Eshirhə y ń ce e só á yó mó ŋwɛ́nɛ́ á wẽ́. Rə̀myɛ́ ce, è kʼê də̀ nyɔ́ɔ́ sə lò cèrhè ába yé, bə̀ Eshirhə y è só á yó mó nʼê byili ába kɔn gakó, sə dɛ̀bɛ́ è nʼê byili ába mó wɔ́ zhə̀nà, è tʼâ gòm kɔma yé. Rə̀myɛ́ ce, mɛ̃na Kristə wẽ́ ǹdə Eshirhə y gə́ cèrhè ába né.

²⁸À byâ, èlâsɛ̃´, mɛ̃na Kristə wẽ́, mùnì ń gə ká ń túwə́, sə nə́ jí bɛlɛ nə́ bʼé zhì ń yé né, nə́ bə̀kʼá jí cìzhìl yé. ²⁹Á yě bə̀ Kristə mó bə dóó zhe yé. Rə̀myɛ́ ce, lwarna bə̀ lò mɔ̀bɔ́ gakó ń nə́ ń wɛ̀rhɛ́ kɔn dɛ̀bɛ́ rə̀ wɔ́ cángá, rə̀-ná-cí wɔ́ Yi byǐ.

Nə́ wɔ́ Yi byâ zhə̀nà

¹Nyǐnə Da mɔ́ só nə́ba dɛ̃´dɛ̃´, n zɛ̃̀ ń nə́ ń byẽ̀ nə́ba bə̀ ń byâ. Sə nə́ wɔ́ Yi byâ zhə̀nà. Lũ w lyì bí gə́ yə̀ Yi pár lwar mɔ́ ce, bə̀ yə̀l nə́myɛ pár yé. ²À dɔwabá nántwə̂rh, nə́ wɔ́ Yi byâ èlâsɛ̃´. Nə́ gwẽ̌ yə̀l nə́ gə́ la nɛ́ yál pamparɛ̃ɛ̃ rə̀myɛ́ kwã nɛ́ yé. Sə nə́ yě bə̀ Kristə gə ká ń túwə́, nə́ bʼâ nə mɔ ǹdə ń gə́ wɔ́ nɛ́. Rə̀myɛ́ yó, nə́ bʼâ yə̀ ǹdə ń ta. ³Lò mɔ̀bɔ́ gakó ń nə́ ń dɛ̃̀ rə̀myɛ́ Kristə sõ, ń mə̂ sə n jǐrh wu-põ cí ǹdə Kristə cìcì gə́ wɔ́ wu-põ cə́bal nɛ́.

⁴Lò mɔ̀bɔ́ gakó ń nə́ ń wɛ̀rhɛ́ yə̀-bəlɔ̀lɔ́, ń tá ń nyàm Yi nyə́ né yé, bə̀ yə̀-bəlɔ̀lɔ́ wɔ̀rhɔ́, wɔ́ Yi nyə́ né cõ. ⁵Á yě bə̀ Yezu Kristə tú lũ w wẽ́ mùnì n vùr yə̀-bəlwàálɛ́, ń cìcì mú jà ń yə̀ yə̀-bəlɔ̀lɔ́ wɛ̀rhɛ́ yé. ⁶Lò mɔ̀bɔ́ gakó ń ŋwɛ́nɛ́ ǹdə́ Yezu Kristə, rə̀-ná-cí kə́ ń tá ń wɛ̀rhɛ́ yə̀-bəlwàálɛ yé. Lò mɔ̀bɔ́ ń gwẽ̌ cə̀ə̀lè ń nə́ ń wɛ̀rhɛ́ yə̀-bəlwàálɛ, rə̀-ná-cí yə̀ Kristə nɛ yé, ń yə̀l ń pár myɛ yé.

⁷À byâ, á bə̀kʼá yẽ̌ lò jə́jɛ̀rɛ́ ába yé. Lò mɔ̀bɔ́ ń nə́ ń wɛ̀rhɛ́ kɔn dɛ̀bɛ́ rə̀ wɔ́ cángá, ń wɔ́ wu-cángá cí ǹdə Kristə cìcì gə́ wɔ́ wu-cángá cə́bal nɛ́. ⁸Lò mɔ̀bɔ́ ń gwẽ̌ cə̀ə̀lè ń nə́ ń wɛ̀rhɛ́ yə̀-bəlwàálɛ, ń wɔ́ Shətana kwã-lò, bə̀ Shətana nʼê wɛ̀rhɛ́ yə̀-bəlwàálɛ kùr-ju yi ní ga, sə Yi Byǐ mú tú mùnì n zhìlì è tumə né.

⁹Lò mɔ̀bɔ́ gakó ǹ wɔ́ Yi byǐ, ǹ kə́ ǹ tá ǹ wɛ̀rhɛ́ yə̀-bəlwàálɛ yé, bə̀ Yi co rə̀ jàn dɛ́ ǹ wẽ́. Ǹ kə́ ǹ wàr ǹ wɛ̀rhɛ́ yə̀-bəlwàálɛ yé, bə̀ ǹ jǐrh Yi byǐ. ¹⁰Kɔn dɛ̀bɛ́ rə̀ nʼê pɔr Yi byâ bɛ́ ǹdə́ Shətana byâ bɛ́ dwã w mɔ́ wɔ́: lò mɔ̀bɔ́ ǹ tá ǹ twĩ̀ kɔn dɛ̀bɛ́ rə̀ wɔ́ cángá, ǹ bə ǹ dwã bɛ́ myɛ só, ǹmyɛ́ mɔ́ də̀ Yi byǐ yé.

Nə́ mə̂ sə nə́ swéné dwã

¹¹Zɔ̀mɛ̀ rɛ́ tɛ̀bɛ́ á nyɛ̀ɛ̀ kùr-ju yi ní ga mɔ́ nʼê wə̀l bə̀ nə́ swéné dwã. ¹²Nə́ bə mə̂ sə nə́ wɛ̀rhɛ́ ǹdə Kɛ̃ɛ̃ nɛ́ yé. Ń yà ń wɔ́ lwɛlɛ cə́bal mɔ́ kwã-lò, n zɛ̃̀ n gu ń nyɛ̃´ mɔ́. Wɔ́ byè yil ń gu mu? Ń sə̀pwà tùntwə̃̀ə̃̀ né yʼà də̀ cángá yé, ń nyɛ̃´ mɔ́ nyə̀ná né zɛ̃̀ nə yə̀ cángá.

¹³Da-byâ, lũ w kɔ̀bɔ́ lyì bí gə́ nʼê súl ába mó bə̀kʼa jàr ába yé. ¹⁴Sə nə́myɛ̌ gə́ só nə́ da-byâ bɛ́ mɔ́ ce, nə́ yě bə̀ nə́ du cu wẽ́ nə́ zù nyǔ wẽ́. Lò mɔ̀bɔ́ ǹ bə ǹ da-byǐ só, ǹ gwẽ̌ ŋwɛ́nɛ́ cu mú wẽ́. ¹⁵Lò mɔ̀bɔ́ gakó ǹ bə ǹ da-byǐ só, ǹ wɔ́ lyì-gurnə. Á jʼâ yě bə̀ lyì-gurnə bə nyǔ mə̀ tʼâ la zhɔ̌ zhe ń wẽ́ yé. ¹⁶Nə́ yě dõ sónó gə́ wɔ́ kɔn ná-dwí yilə, bə̀ Yezu Kristə pɔ ń myə̂l lé nə́ yilə. Nə́myɛ mə̂ sə nə́ pə nə́ myə̂l lé nə́ da-byâ bɛ́ yilə.

¹⁷Lò mɔ̀bɔ́ ǹ zhe, ń zɛ̃̀ ń nə ǹ da-byǐ ń nə́ ń nwɛ̀nɛ̀, ń jʼâ pyi ǹ yírhə́ ń yó, wɔ́ etər Yi sónó w bʼa tó né o yə̀ ǹ wẽ́? ¹⁸À byâ, nə́ bə mə̂ sə nə́ swéné dwã ǹdə́ nyì-gwàl ǹdə́ zɔ̀m-fwə̀r dúdú yé. Nə́ mə̂ sə nə́ swéné dwã ǹdə́ nə́ tùntwə̃̀ə̃̀ né. Wɔ́ nə́ tùntwə̃̀ə̃̀ né nə̀ mʼa byili bə̀ nə́ só dwã zhə̀nà.

¹⁹Wɔ́ rə̀myɛ́ dɛnnɛ nə́ bʼâ tó né nə́ lwar bə̀ nə́ wɔ́ zhə̀n dɛ́ lyì, mùnì ga nə́ wun ní jòm. ²⁰Bá nə́ gə tɛ́rɛ́ nə́ wẽ́ nə́ pwírí nə́ dó myɛ, nə́ yě bə̀ Yi jàn dɛ́ du nə́ tɔ́rɔ́ mɔ́, sə rə̀ yě kɔn gakó. ²¹À dɔwabá nántwə̂rh, nə́ wun ní gə yə̀ nə́ bùrsì kɛ́, nə́ bʼâ zə wu-jɔ̀ nə́ zhì Yi yé né. ²²Rə̀ bʼa pə nə́ba kɔn dɛ̀bɛ́ gakó nə́ rʼé lwə̀lə̀, nə́ gə́ nʼé zwẽ rə̀ nyə́ né, nə́ jʼâ nʼé wɛ̀rhɛ́ rə̀ pùbùlə̀ mó yilə. ²³Kɔn dɛ́ dɛ̀bɛ́ rə̀ pɔ nə́ba rə̀ nyí mú wɔ́ bə̀ nə́ zhí rə̀ Byǐ Yezu Kristə ne, sə nə́ swéné dwã ǹdə ń gə́ pɔ nə́ba nyí ní.

²⁴Lò mɔ̀bɔ́ ǹ nə́ ǹ zwẽ Yi nyə́ né, ǹ ŋwɛ́nɛ́ ǹdə́ Yi, sə Yi myɛ ŋwɛ́nɛ́ ǹdə́ mɔ́. Zhə̀nà, wɔ́ Eshirhə y Yi pɔ nə́ba mɔ́ è ce nə́ yě bə̀ rə̀ ŋwɛ́nɛ́ ǹdə́ nə́ba.

Kɔn dɛ̀bɛ́ è mʼa ce ń lwar Yi Eshirhə y ǹdə́ Kristə zù-bal mɔ́ éshìrhə́ y pár dwã wa

¹À dɔwabá nántwə̂rh, lyì bí byɛ̀bɛ́ bə̀ nʼê myìnì bə̀ dwã bɛ́ bə̀ bə̀myɛ́ wɔ́ Yi nyì-zwennə mó sú lũ w wẽ́. Rə̀myɛ́ ce, á bə̀kʼá zwẽ lyì bí byɛ̀bɛ́ gakó bə̀ nʼê wə̀l bə̀ Yi Eshirhə y ŋwɛ́nɛ́ bə̀myɛ́ wẽ́ mó zɔ̀mà nɛ́ yé. Zhìlìnə̀ á yala nɛ́ á pyà bə̀ yé-shò náàcɛ̀nɛ́, á nyǐ ǹdə́ è gə wɔ́ Yi Eshirhə y è ŋwɛ́nɛ́ bə̀ wẽ́ zhə̀nà. ²Nyǐnə á gə́ bʼâ tó né á lwar lò mɔ̀bɔ́ Yi Eshirhə y ŋwɛ́nɛ́ ń wẽ́ mó párá: lò mɔ̀bɔ́ gakó ǹ nə́ ǹ wə̀l bə̀ Yezu Kristə jǐrh numbyíní n bə̀ lũ w wẽ́ zhə̀nà, Yi Eshirhə y ŋwɛ́nɛ́ ǹ wẽ́. ³Sə lò mɔ̀bɔ́ gakó ǹ tá ǹ yâl ń zwẽ yò w òmyɛ́ Yezu Kristə shò-kwã nɛ́ mɔ́ nyí, Yi Eshirhə y tɛ̀nɛ́ ǹ wẽ́ yé. Wɔ́ Kristə zù-bal mɔ́ éshìrhə́ y è ŋwɛ́nɛ́ ǹ wẽ́. Á nyɛ̀ɛ̀ bə̀ nyǐ Kristə zù-bal mɔ́ mà n bà, sə èlâsɛ̃´, ń tú ń ŋwɛ́nɛ́ lũ w wẽ́.

⁴À byâ, ámyɛ̌ wɔ́ Yi lyì. Á jú bɛlɛ lyì bí byɛ̀bɛ́ bə̀ nʼê myìnì bə̀ dwã bɛ́ bə̀ bə̀myɛ́ wɔ́ Yi nyì-zwennə mó yó, bə̀ Eshirhə y kɛ̀bɛ́ è ŋwɛ́nɛ́ á wẽ́ mó jàn dɛ́ du kɛ̀bɛ́ è ŋwɛ́nɛ́ bə̀myɛ́ wẽ́ mó. ⁵Bə̀ gə́ wɔ́ lũ w lyì mú ce, bə̀ nʼê zɔ̀m ǹdə lũ w lyì bí ta. Rə̀myɛ́ ce, lũ w lyì bí nʼê cili bə̀ zɔ̀mà nɛ́. ⁶Sə nə́myɛ̌ wɔ́ Yi lyì. Lò mɔ̀bɔ́ ń yě Yi párá, ń nə́ ń cili nə́ zɔ̀mà nɛ́, sə lò mɔ̀bɔ́ ń yə̀l Yi párá, ń tá ń cili nə́ zɔ̀mà nɛ́ yé. Wɔ́ èta nə́ bʼâ tó né nə́ lwar zhə̀n Eshirhə y ǹdə́ yǔr éshìrhə́ y pár dwã wa.

Yi wɔ́ sónó

⁷À dɔwabá nántwə̂rh, swénénə nə́ swéné dwã, bə̀ sónó w wɔ́ Yi sõ ò nʼô shí ní. Lò mɔ̀bɔ́ gakó ǹ só ǹ dõ, ǹ wɔ́ Yi byǐ, ń jà ǹ yě Yi párá. ⁸Lò mɔ̀bɔ́ ǹ bə ǹ dõ só, ǹ yə̀l Yi pár yé, bə̀ Yi wɔ́ sónó. ⁹Nyǐnə Yi gə́ byili nə́ba rə̀ sónó w né: rə̀ ce rə̀ byì-dùwə̀ y bə̀ lũ w wə, mùnì nə́ tó ńmyɛ̌ dɛnnɛ nə́ nə nyǔ. ¹⁰Sə sónó w òmyɛ́ də̀ nə́myɛ̌ nə́ swéné Yi yé. Wɔ́ Yi rə̀ swéné nə́ba, rə ce rə̀ Byǐ mú bà, n pə ń cìn n yə̀ vwĩ̀ kɔn, mùnì Yi pə nə́ba nə́ dwə́ə́ré sǔbri ń vwĩ̀ rí jàn yilə.

¹¹À dɔwabá nántwə̂rh, Yi gə́ só nə́ba èta mɔ́ ce, nə́myɛ mə̂ sə nə́ swéné dwã. ¹²Lò lò gwẽ̌ yə̀ Yi nɛ ǹdə́ ń yírhə́ yé. Sə nə́ gə só dwã, rə̀ ŋwɛ́nɛ́ ǹdə́ nə́ba, rə̀ sónó w myɛ ŋwɛ́nɛ́ nə́ wẽ́ námpúm.

¹³Nə́ gə́ tó mə̀gã̌ nə́ yě bə̀ nə́ ŋwɛ́nɛ́ ǹdə́ Yi, sə Yi myɛ ŋwɛ́nɛ́ ǹdə́ nə́ba mɔ́ wɔ́, rə̀ gə́ ce rə̀ Eshirhə y ŋwɛ́nɛ́ ǹdə́ nə́ba mɔ́. ¹⁴Nə́ Da Yi ce ń Byǐ mú bə̀ lũ w vwârh yilə. Nə́ nɔ rə̀myɛ́ ǹdə́ nə́ yírhə́, nə́ zɛ̃̀ nə́ rʼé byili ri zhə̀nà. ¹⁵Lò mɔ̀bɔ́ ǹ nə́ ǹ wə̀l bə̀ Yezu wɔ́ Yi Byǐ, Yi ŋwɛ́nɛ́ ǹdə́ mɔ́, sə ǹmyɛ ŋwɛ́nɛ́ ǹdə́ Yi. ¹⁶Nə́myɛ̌ yě sónó w kɔ̀bɔ́ Yi bʼe swéné nə́ba mɔ́ gə́ wɔ́ nɛ́, sə nə́ rʼé zwẽ ò nyí.

Yi wɔ́ sónó. Lò mɔ̀bɔ́ ǹ ŋwɛ́nɛ́ sónó wẽ́, ǹ ŋwɛ́nɛ́ ǹdə́ Yi, sə Yi ŋwɛ́nɛ́ ǹdə́ ǹmyɛ. ¹⁷Sónó gə ŋwɛ́nɛ́ nə́ wẽ́ námpúm, nə́ tʼá la ywẽ dǔr bùrsí dɛ̃ rɛ́ yù w yé, bə̀ nə́ tùntwə̃̀ə̃̀ né lũ w kɔ̀bɔ́ wẽ́ mó nyɛ̌ ǹdə Yezu Kristə nyə̀ná nɛ́ ta. ¹⁸Sónó gə ŋwɛ́nɛ́ mə̀gã̌ zhə̀n zhə̀nà, ywẽ tɛ̀nɛ́ gàà yé, bə̀ sónó w páá mɔ́ nʼô vùr ywẽ. Lò mɔ̀bɔ́ ń nə́ ń dùr ywẽ bə sónó w páá mɔ́ zhe yé, bə̀ wɔ́ còrhò-tum rə̀ nʼê zə ywẽ rə̀ twí.

¹⁹Nə́myɛ̌ só dwã, bə̀ Yi jɛ̀nɛ̀ rə swéné nə́ba. ²⁰Lò gə wò bə̀ ǹ só Yi, ń jà ǹ bə ǹ da-byǐ só, wɔ́ kɔma, bə̀ ǹ wàr ǹ bʼâ swéné Yi rí ǹ yírhə́ bə nɛ mɔ́, ń jà ǹ bə ǹ da-byǐ mú ǹ yírhə́ nə mɔ́ só yé. ²¹Kristə cìcì pɔ nə́ba nyí n wɔ̀: “Lò mɔ̀bɔ́ ǹ só Yi, ǹ mə̂ sə́ swéné ǹ da-byǐ myɛ.”

Ǹ gə zwẽ nyí bə̀ Yezu wɔ́ Yi Byǐ, ǹ bʼâ jí bɛlɛ lũ w yó

¹Lò mɔ̀bɔ́ gakó ǹ nə́ ǹ zwẽ nyí bə̀ Yezu wɔ́ Kristə, sə́ nyǐ ǹ wɔ́ Yi byǐ. Lò mɔ̀bɔ́ ǹ só nə́ Da Yi, ǹ só rə̀ byâ bɛ́ myɛ. ²Nə́ gə́ só Yi, nə́ rʼé zwẽ rə̀ nyə́ né mó ce, nə́ yě bə̀ nə́ só byɛ̀bɛ́ bə̀ wɔ́ rə̀ byâ bɛ́ mɔ́. ³Nə́ gə nʼé zwẽ Yi nyə́ né, rə̀myɛ́ nʼê byili bə̀ nə́ só re. Rə̀ nyə́ né zõ bə zum ǹdə́ nə́ba yé. ⁴Lò mɔ̀bɔ́ gakó ǹ wɔ́ Yi byǐ, ǹ nə́ ǹ jí bɛlɛ lũ w yó, sə wɔ́ nə́ Yi-ni-zhú mú è ce nə́ rʼé jí bɛlɛ ò yó. ⁵Lò mɔ̀bɔ́ ǹ nə́ ǹ zwẽ nyí bə̀ Yezu wɔ́ Yi Byǐ, wɔ́ ǹmyɛ́ dúdú ǹ nə́ ǹ jí bɛlɛ ò yó.

Kɔn dɛ̀bɛ́ rə̀ ce nə́ yě bə̀ Yezu wɔ́ Yi Byǐ mú

⁶Yezu Kristə wɔ́ lò mɔ̀bɔ́ ń tó nɛ̃̌ ǹdə́ jal dɛnnɛ n bà. Sə è də̀ nɛ̃̌ dúdú yé; wɔ́ nɛ̃̌ ǹdə́ jal ga. Eshirhə náàcɛ̀nɛ́ wɔ́ rə̀myɛ́ zhə̀n-cínnə, bʼè tʼâ gòm kɔma gaga yé. ⁷Zhə̀n-cínnə bé wɔ́ bə̀tɔ̀: ⁸wɔ́ Eshirhə ǹdə́ nɛ̃̌ ǹdə́ jal. Bə̀myɛ́ bə̀tɔ̀ y ga nyí wɔ́ rə̀dù. ⁹Numbyínsi gə wɔ́ zhə̀n-cínnə yò yilə, nə́ rʼé zwẽ ò nyí. Yi byili zhə̀n rə̀ Byǐ mú shò-kwã nɛ́, sə rə̀ zhə̀n-byilu mú du numbyínə́ bé nyân mɔ́. ¹⁰Lò mɔ̀bɔ́ ǹ zù Yi Byǐ mú, ǹ zhe zhə̀n-cṹ mú mə̀myɛ́ mɔ́ ǹ wẽ́. Sə lò mɔ̀bɔ́ ń tá ń zwẽ Yi nyí ni, rə̀-ná-cí nə́ ń zə Yi ń yàl kɔma cə́bal, bə̀ ń tá ń zwẽ zhə̀n dɛ́ tɛ̀bɛ́ rə̀ byili rə̀ Byǐ mú shò-kwã nɛ́ mɔ́ yé. ¹¹Zhə̀n-byilu mú mə̀myɛ́ mɔ́ wɔ́, Yi gə́ pɔ nə́ba nyǔ mə̀ tʼâ la zhɔ̌ mɔ́, sə wɔ́ rə̀ Byǐ mú dɛnnɛ rə̀ tó né rə pə mɔ nə́ba. ¹²Lò mɔ̀bɔ́ Yi Byǐ mú ŋwɛ́nɛ́ ǹ wẽ́, ǹ zhe nyǔ mú mə̀myɛ́ mɔ́, sə lò mɔ̀bɔ́ Yi Byǐ mú tɛ̀nɛ́ ǹ wẽ́, ǹ bə nyǔ mú mə̀myɛ́ mɔ́ zhe yé.

Kɔn dɛ̀bɛ́ Kristə-lò mə̂ sə́ lwar

¹³À nʼâ kɛ̃ sɛ́bɛ́ rɛ́ tɛ̀bɛ́ à la ába pɔ, mùnì á lwar bʼâmyɛ̌ byɛ̀bɛ́ á zù Yi Byǐ mú mú zhe nyǔ mə̀ tʼâ la zhɔ̌. ¹⁴Nə́ zhe Yi zhə̀n námpúm bə̀ nə́ gə lwə̀l lè kɔn dɛ̀bɛ́ rə̀ wɔ́ rə̀myɛ́ cìcì pùbùlə̀, rə̀ nʼê cili. ¹⁵Nə́ yě bə̀ nə́ gə nʼé lwə̀l Yi gakó, rə̀ nʼê cili. Rə̀myɛ́ ce, nə́ yě bə̀ kɔn dɛ̀bɛ́ gakó nə́ rʼé lwə̀l mó, nə́ yʼa nə rɛ.

¹⁶Ǹ gə nɔ ǹ da-byǐ ń nə́ ń wɛ̀rhɛ́ yə̀-bəlɔ̀lɔ́ kɔ̀bɔ́ ò tʼâ cĩ́ lò cu sɔ́má yó, sə́ lwə̀l Yi ń yilə, bə̀ Yi bʼa pɔ̃ nyǔ, ǹdə́ ń yə̀-bəlɔ̀lɔ́ w gə wàr ò cĩ́ lò cu sɔ́má yó zhə̀nà. Yə̀-bəlɔ̀lɔ́ ŋwɛ́nɛ́ ò wɔ̌ ò cĩ́ lò cu sɔ́má yó, sə è də̀ òmyɛ́ mɔ́ yil à wò bə̀ lwə̂lnə Yi yé. ¹⁷Tùntùm-bəlwɛ̀lɛ́ dwí gakó wɔ́ yə̀-bəlɔ̀lɔ́, sə è də̀ yə̀-bəlwàálɛ́ ga rə̀ wɔ̌ rə̀ cĩ́ lò cu sɔ́má yó yé.

¹⁸Nə́ yě bə̀ Yi Byǐ mú nə́ ń yìlì byɛ̀bɛ́ gakó bə̀ wɔ́ Yi byâ bɛ́ mɔ́, bə̀ kʼê tʼâ wɛ̀rhɛ́ yə̀-bəlɔ̀lɔ́ yé, bə̀ lwɛlɛ cə́bal mɔ́ bə bə̀ yàlà zhe yé.

¹⁹Nə́ yě bə̀ nə́myɛ̌ wɔ́ Yi lyì, sə lũ w púlə́púlə́ wɔ́ lwɛlɛ cə́bal mɔ́ ń cǐ wə.

²⁰Nə́ yě bə̀ Yi Byǐ Yezu Kristə tú n pul nə́ surhə, mùnì nə́ lwar Yi rí tɛ̀bɛ́ rə̀ wɔ́ zhə̀n mɔ́ párá. Sə nə́ mù dwã nɛ ǹdə́ rɛ ń jàn yilə, ńmyɛ̌ mɔ̀bɔ́ ń wɔ́ Yi zhə̀nà, ń nə́ ń pɛ nyǔ mə̀ tʼâ la zhɔ̌ mɔ́.

²¹À byâ, dɛ̃̌na á cìnə̀, á bə̀kʼá cèrhé wẽ̀ dé tɛ̀bɛ́ rə̀ də̀ Yi mú yé.