Thessalonia Aré̤lố Tôba

Thessalonia Aré̤lố Tôba

First Thessalonians

Tè̤hébè Ré̤ Dố Nyě

Vǐ̤ Thessalonia ma a htwǒ vǐ̤muố̤ tôvǐ̤ dố Macedonia ké̤phú, Romaké̤du a tè̤pốalè̤̌ tôvǐ̤. Paulu htecuố htuô̌ dố vǐ̤ Philippi rò a cuố me̤-ohtya ke prè̤zṳ̂́etè̤plò́mṳ tômṳ dố Thessalonia vǐ̤. Manárò Paulu hésodônyǎ pé̤ ǔ Krístu ari-akyǎ dố Judaphú má̤to tahe aklè̌ rò ǔ zṳ̂́enyá̤eka̤ è́kuô̌lǎ lǔ akhu-akhyě, Judaphú dố a thè́khwè́ kuô̌ Paulu atè̤me̤ yětahe thè́kháthè́hte Paulu. Paulu bè htecuốkyǎ bí vǐ̤ Thessalonia yěnuô rò a bè cuốkyǎ dố vǐ̤ Beroea. Dốkhyě bí a cuốtuố hò́ dố vǐ̤ Corinthia akǔ akhè̌nuô, Paulu ná a khǒbò́thyó Timothy dố a me̤ró̤lǔ tè̤ yětôprè̤ héluô̌ pé̤ Paulu ná Thessalonia prè̤zṳ̂́etè̤ plò́mṳphú tahe a tè̤ihtòonyǎ ari-akyǎ.

Paulu rǎcuố ré̤ Li Thessalonia yětôba ma a rǎ dyéhè̌dyére, dyéshyodyésò̌htya cuố pé̤ khyěthyá Thessalonia prè̤zṳ̂́etè̤ plò́mṳphú tahe. È hébwíhétaryě cuốpé̤ khyěthyá èthǐ atè̤zṳ̂́tè̤nyá̤ ná èthǐ atè̤mo̤ tahe. È rǎ dyéthè́né̤htya khyěthyá èthǐ ná bí è otố̤kuô̌ ná èthǐ akhè̌ a ohtwǒprè̤ me̤kryá꤮ phútě ari-akyǎ prè́. Htuô̌rò prè̤zṳ̂́etè̤ plò́mṳphú tahe sudyǎ lahyǎ ná Krístu ki hyǎ khyěthyá nyě̤phuốtôphuố ari-akyǎ. Rò èthǐ hé lahyǎ ná Krístuphú dố a thyěré̤ ná Krístu hyǎlya̤ pǎ tahenuô, thè́htwǒprè̤ tacṳ́prè̤ dố Krístu ki hyǎ dyé yěpǎnuô ma èthǐ ní̤bè kuô̌ pǎ è̌? Krístu ki hyǎkhyě bíkhè̌tě pǎ? Tè̤sudyǎ phúyě tahenuô, Paulu hésoluô̌ pé̤ èthǐ. Paulu phyéní̤ ashuốakhè̌ rò a hé pé̤ èthǐ, bí èthǐ opò̤́o Krístu ki hyǎ khyěthyá pǎ yěakhè̌nuô, èthǐ tǒ me̤ plehyǎ lǎ tè̤me̤ dố tè̤thuôtè̤krě akǔ, a hé èthǐ phúnuô.

Tè̤hébè tôtó̤ ná tôtó̤

Tè̤hébè ré̤ dố nyě 1:1

Tè̤hébwíhétaryě ná tè̤htuthè́htya 1:2-3:13

Dyéhè̌dyére Krístuphú tahe atè̤dya thè́plòthuôhtyě tahe 4:1-12

Ithyóithya ǔ ná Krístu ki hyǎ khyěthyá nyě̤phuốtôphuố ari-akyǎ 4:13-5:11

Tè̤dyéhè̌dyére dố khyě 5:12-22

Tè̤hébè dố khyě 5:23-28

¹Pè̤ ma Paulu, Sila,1:1 Dố Greek ngó̤ ma a hé ná “Silvano” ná Timothy. Pè̤ rǎcuố ró̤lǔ liyětôba dố thǐ Thessalonia prè̤zṳ̂́etè̤ plò́mṳphú tahe a o.

Thǐ Thessalonia prè̤zṳ̂́etè̤ plò́mṳphú tahe ma Phè̌ Cò́marya ná Byacè Jesǔ Krístu akayǎ tahe hò́. Tè̤bwítè̤taryě ná tè̤kacṳ́kabè́ ki okuô̌dû ná thǐ ní꤮.

Thessalonia Prè̤zṳ̂́etè̤ Plò́mṳphú Tahe A Tè̤ohtwǒprè̤ Ná A Tè̤zṳ̂́tè̤nyá̤

²Bí pè̤ kwǐcò́bè̌ dố thǐ lò̌꤮ plǐ gně akhè̌nuô, pè̤ hébwíhétaryě Cò́marya pwǒ̤꤮ tôphuố cò́. ³Dố thǐ tè̤zṳ̂́tè̤nyá̤ akhu-akhyě, thǐ me̤tè̤ ahtwǒahte, dố thǐ tè̤mo̤ní̤ ǔ akhu-akhyě, thǐ krṳ̂̌me̤ tè̤, rò dố thǐ o ná tè̤myásû̌ dố pè̤ Byacè Jesǔ Krístu alo̤ akhu-akhyě, thǐ khyáthè́plòhtǔbè́ tè̤me̤cyě̤me̤cṳ̂ thǐ tahe. Bí pè̤ kwǐcò́bè̌ dố pè̤ Phè̌ Cò́marya o akhè̌nuô, lò̌꤮ thǐ me̤tè̤ yětahenuô, pè̤ sǒtapa̤ pé̤pǎ cò́ to cò́.

⁴Puố̤vyá̤ dố Cò́marya mo̤ní̤ thǐ, pè̤ thè́gně ná thǐ ma kayǎ dố Cò́marya nwóhtyaní̤ thǐtahe hò́. ⁵Me̤těhérò pè̤ phyéhyǎ pé̤ thǐ tè̤thè́krṳ̂̌mila yěnuôma tû́prè́ pè̤ khǎu a tè̤hébè nuômá̤to. Tè̤thè́krṳ̂̌mila yěnuôma, a o ná a taryěshyosò̌, a o ná Thè́ Sǎsè̌ Byacè, a o ná tè̤zṳ̂́e lò̌lá̤takli tè̤thè́krṳ̂̌mila a tè̤cò́tè̤te̤ yětahe. Rò bí pè̤ okuô̌ ná thǐ akhè̌nuô, pè̤ ma kayǎ phútě tahenuôma, thǐ thè́gně htuô̌dûhò́. Yěnuôma pè̤ ohtwǒprè̤ pé̤ dố thǐ lé̤ní̤bwí ní̤taryě agně prè́. ⁶Thǐ myábû̌ pè̤ ná Byacè rò ǔ me̤cyě̤me̤cṳ̂ nyacò́ thǐ, manárò thǐ thè́krṳ̂̌thè́lò̌ phyésûpǎ tè̤thè́krṳ̂̌mila. Bí thǐ phyésû tè̤thè́krṳ̂̌mila akhè̌nuô, Thè́ Sǎsè̌ Byacè me̤ thè́krṳ̂̌thè́lò̌ pé̤ thǐ hò́. ⁷Phúnuôrò thǐ htwǒhtya pé̤hò́ kayǎ dố a zṳ̂́ka̤nyá̤ka̤ Krístu dố a o dố Macedonia ké̤kǔ nuôtahe ná Akaia ké̤kǔ nuôtahe alé̤myábû̌ hò́. ⁸Me̤těhérò Byacè a tè̤thè́krṳ̂̌mila dố thǐ hésodônyǎ pé̤ ǔ yěnuô, a luô̌ cuốtuố tû́prè́ dố Macedoniaké̤ ná Akaia ké̤kǔ nuômá̤to. Thǐmwi̤la dố thǐ zṳ̂́enyá̤e Cò́marya ari-akyǎ yěnuô, a luô̌pasǐ cuốtuố kuô̌lò̌ cò́hò́ dố khǎlé̤ pwǒ̤꤮ tôpho hò́. Phúnuôrò thǐ tè̤zṳ̂́ ari-akyǎ yěnuô pè̤ lo dônyǎ luô̌pé̤pǎ ǔ tôprè̤꤮ to hò́. ⁹Bí pè̤ hyǎ olě kuô̌ thǐ akhè̌nuô, thǐ è́mo̤sû lahyǎ pè̤ phútěnuô, lò̌꤮ kayǎ o bínuô tahe dônyǎ pé̤ lò̌plǐ hò́ pè̤. A dônyǎ pé̤ pè̤ ná thyáphú thǐ ki me̤kuô̌ Cò́marya dố a htwǒprè̤ rò acò́ate̤ má̤lakǒ yětôprè̤ a tè̤me̤nuô, thǐ vǐkyǎ kyǎ lò̌ cò́ thǐ tè̤cò́bè̌ prè̤zo̤ tahe cò́. ¹⁰Htuô̌rò Cò́marya aphúkhǔ Jesǔ dố aphè̌ me̤ kahtò htwǒprè̤ ka̤khyě khyěthyá lǔ dố tè̤thyě yětôprè̤ ki hyǎlya̤ khyěthyá dố mò́khu pǎnuô thǐ opò̤́myásû̌ lahyǎ phútě nuô èthǐ hé lò̌plǐ pé̤ pè̤. Jesǔ ma prè̤me̤lwóhteka̤ hò́ pè̤ ná Cò́marya a tè̤thè́plòdu dố a ki cirya ǔ pǎ yěnuô tôprè̤ a takhukǔ hò́.

Paulu Me̤tè̤ Dố Vǐ̤ Thessalonia Akǔ

¹Puố̤vyá̤thǐ, pè̤ cuốolě kuô̌ thǐ nuô, a lò̌kyǎdě ashuốakhè̌ má̤to. Abwítaryě oprè́ nuôma thǐ thè́gně dûhò́. ²Phú thǐ thè́gně htuô̌hò́nuôhò́, bí pè̤ hyǎ tyakuô̌hí dố thǐ oto akhè̌nuô, vǐ̤ Philippiphú tahe me̤cyě̤me̤cṳ̂ pè̤, htuô̌rò me̤thè́tarè̤̌ lò̌ pè̤. Ǔ me̤ takhwótakè dídyǎ tǎ̤tṳ̂̌ cò́ pè̤ tadû́rò thyáphú pè̤ ki hésodônyǎ ní̤pé̤ thǐ ná Cò́marya a tè̤thè́krṳ̂̌mila nuôrò, pè̤ Cò́marya dyéhò́ pè̤ tè̤khû̌hǎ hò́. ³Pè̤ dyéhè̌dyére thǐ ná thǐ ki zṳ̂́e tè̤thè́krṳ̂̌mila phúyěnuôma athû́ náto. Pè̤ tè̤tane̤ ma a mwǒ̤plǐthǐplo dố thǐkhu prè́, pè̤ cuố pṳ̌ lahǒ kuô̌ ná ǔ tôprè̤꤮ to. ⁴Pè̤ hébè prè́ phú atǒ Cò́marya athè́plò nuôprè́, me̤těhérò pè̤ myáhtye bènò́ htuô̌hò́ tè̤cyě̤tè̤cṳ̂ rò pè̤ thè́plò pyépé̤ to akhu-akhyě, a zṳ̂́e thè́lè̤ní̤ pè̤ rò a dyétǎ̤hò́ tè̤thè́krṳ̂̌mila yě dố pè̤ takhukǔ hò́. Pè̤ pṳ̌ hé phú atǒ kayǎ thè́plò nuômá̤to. Pè̤ pṳ̌ hé phú atǒ Cò́marya dố a ce̤myá pè̤ thè́plòyě tôprè̤ a tè̤thè́zṳ̂́ nuôprè́. ⁵Phú thǐ thè́gně htuô̌hò́nuôhò́, pè̤ hyǎ hébèhtuthè́ lahǒnò́ ná thǐ tôphuố꤮ to. Pè̤ thè́zṳ̂́ lò̤̌phǎe ní̤rû̌ní̤htè̌ rò pè̤ hyǎ cyé̤khocyé̤khá nò́ ná pè̤né̤ tôphuố꤮ to. Pè̤ me̤nò́kuô̌ ná phúyě to nuôma Cò́marya zṳ̌bè́ prè́. ⁶Thǐ bèbè, kayǎ dố aruô tahenuô bèbè, thyáphú a ki htuthè́ ní̤kuô̌ pè̤ rò pè̤ pṳ̌me̤ phúnuô má̤to.

⁷Pè̤ ma Krístu a Prè̤dônyǎphú tahe akhu-akhyě, pè̤ ki kwǐshyo tè̤ dố thǐo nuôma akòabè prè́, manárò pè̤ me̤phúnuôto. Bí pè̤ okuô̌ ná thǐ akhè̌nuô, pè̤ hébècè̤́hébènya̤ prè́ thǐ, thyáná muố̤tôprè̤ myání̤khwèní̤ dyé aphú tahe nuôprè́. ⁸Pè̤ yǒ mo̤ ní̤dyé nyacò́ thǐ, htuô̌rò thǐ htwǒ pè̤ khǒbò́thyó dố a mo̤nyacò́ pè̤ tahe akhu-akhyě, pè̤ taritaryǎ one pè̤né̤ dố pè̤ ki dyáso thè́gně tû́pé̤prè́ thǐ ná Cò́marya a tè̤thè́krṳ̂̌mila yě ari-akyǎ nuômá̤to, pè̤ o taritaryǎ one pó̤ cò́ pè̤né̤ ná pè̤ ki otố̤kuô̌ ná thǐ rò, phyécwó̤me̤cwó̤ kuô̌pó̤ cò́ thǐ. ⁹Puố̤vyá̤thǐ, pè̤ krṳ̂̌erya̤ nyacò́ tè̤ nuôma thǐ klyá tǒ̤ní̤pǎ prè́. Bí pè̤ hésodônyǎ pé̤ thǐ ná Cò́marya a tè̤thè́krṳ̂̌mila akhè̌nuô, thyáphú pè̤ ki buôe ní̤dyé pè̤ hò́kǔsè, htuô̌to thyáphú pè̤ ki me̤htuôme̤nyé tǎ thǐ tǎmé̤ nuôrò, pè̤ rya̤tè̤ mò̤́khíkhí mò̤́sè̌klè̌klè̌ cò́.

¹⁰Bí pè̤ otố̤kuô̌ ná thǐ prè̤zṳ̂́etè̤phú tahe akhè̌nuô, pè̤ ohtwǒprè̤ sǎsè̌, pè̤ ocò́ote̤, htuô̌rò pè̤ me̤tè̤thû́ to nuô thǐ thè́gnědûhò́. Pè̤ ma kayǎ phútě tahenuôma, thǐ ná Cò́marya ki khyáluô̌dûhò́ thǐthè́ hò́. ¹¹Pè̤ myákhwèní̤ thǐ yěnuô, a thyácò́ná phè̌ tôprè̤ myákhwè ní̤dyé aphú cò́ nuôma thǐ thè́gnědûhò́. ¹²Me̤těhérò thyáphú thǐ ki ohtwǒprè̤tǒ ohtwǒprè̤bè phú Cò́marya athè́plònuô rò pè̤ dyéhè̌dyére thǐ, pè̤ hébèmo̤hébèryá thǐ, pè̤ shyakrwǒ thǐkhyě pwǒ̤꤮ tôprè̤ cò́. Cò́marya ma prè̤ dố a è́nuô̌ thǐ dố ahtyěaké̤kǔ ná a taryěduhtǔ akǔ tôprè̤hò́.

¹³Bí thǐ ní̤huô̌ Cò́marya alǎ̤angó̤ dố pè̤ héso pé̤ thǐyě akhè̌nuô, thǐ phyésû è phú a o dố kayǎ a o rò a hyǎnuô má̤to, thǐ phyésû cò́ è phú a o dố Cò́marya a o rò a hyǎ nuô cò́. Phúnuô akhu-akhyě, pè̤ hébwíhétaryě Cò́marya pwǒ̤꤮ tôphuố cò́. Rò tè̤ritè̤kyǎ yěnuôma Cò́marya a tè̤ritè̤kyǎ má̤lakǒ cò́. Rò dố tè̤ritè̤kyǎ yě akhu-akhyě, Cò́marya nò̌ohtwǒprè̤ hò́ thǐ phú atǒ lǔthè́plò nuôhò́. ¹⁴Puố̤vyá̤thǐ, tè̤cuốhtwǒhtya tuố̤ané̤ ná thǐ phúyětahe me̤těhénuôma a thyáhò́ ná tè̤me̤htwǒhtya htuô̌hò́ ané̤ dố Cò́marya a prè̤zṳ̂́etè̤ plò́mṳphú dố a o dố Judaké̤kǔ nuôtahe hò́. Èthǐ yǒ htwǒ Jesǔ Krístu akayǎ tahe akhu-akhyěrò a htwǒhtya prè́. Thǐ myěcôphú me̤cyě̤me̤cṳ̂ ní̤dyé khyědû thǐ yěnuô a thyácò́hò́ ná Judaphú tahe me̤cyě̤me̤cṳ̂ ní̤dyé khyěthyádû prè̤zṳ̂́etè̤phú dố a o dố Judaké̤kǔ nuôtahe cò́ hò́. ¹⁵Judaphú tahe ma prè̤me̤thyě Byacè Jesǔ ná prè̤pro̤ tahe, htuô̌to a vè̤́htekyǎ pè̤. A me̤tǒ Cò́marya thè́plò to, htuô̌rò, a thè́htethè́hǎ lò̌ cò́ ǔpwǒ̤꤮ tôprè̤ cò́. ¹⁶Thyáphú Judaphú má̤to tahe ki ní̤bè kuô̌ tè̤me̤lwóhteka̤ agněnuôrò, pè̤ hésodônyǎ luô̌ pé̤kuô̌ hò́ èthǐ ná tè̤thè́krṳ̂̌mila hò́. Bínuôakhè̌ Judaphú tahe pṳ̌ me̤dídyǎ tǎ̤tṳ̂̌ pè̤. Phúnuôrò èthǐ me̤tè̤ tahenuô, a dyabǎhtyacǒmǒ ní̤dyé lò̌plǐ cò́ a tè̤thû́tè̤ora nuôtahe tuố̤ cò́dố lé̤dyahtya akhǎlé̤ opǎ cò́to hò́. Khǒnyá̤yě Cò́marya a tè̤thè́plòdu a tè̤cirya dố khyělố yěnuô a ki hyǎtuố̤hò́ dố èthǐ o hò́.

Paulu Thè́zṳ̂́ Cuốolěo Kuô̌ Thessalonia Prè̤zṳ̂́etè̤ Plò́mṳphú Tahe

¹⁷Manárò puố̤vyá̤thǐ, bí tè̤me̤cyě̤me̤cṳ̂ me̤ sipruốsipryǎkyǎ pè̤né̤klò̤́ ná thǐ né̤klò̤́yě taplô̤taplyáphú akhè̌yěnuô, pè̤ nethuô nyacò́ thǐ cò́. Pè̤ thè́zṳ̂́ myáhtye thǐ rò pè̤ cyé̤pryě̤cyé̤li̤ nyacò́. Pè̤né̤klò̤́ oye̤ ná thǐ tadû́rò pè̤ tè̤tane̤ tahe nuôma a ophûnyé ná thǐ prè́. ¹⁸Pè̤ thè́zṳ̂́ hyǎolě kuô̌pó̤lǎ thǐ. Vǎ má̤dû Paulu yě, vǎ yácû́ hyǎ tamǒmǒ kuô̌pó̤ cò́ dố thǐo tadû́rò khǐnéricyá̤ khuklò́ me̤dídyǎ tǎ̤tṳ̂̌ pè̤klyá. ¹⁹Mame̤těrò pè̤ thè́zṳ̂́ cuốolě kuô̌pó̤ nyacò́ thǐ hénuôma, thǐ yǒ o ná thǐ tè̤zṳ̂́ dố ashyo-asò̌ akhu-akhyě, pè̤ o ná tè̤myásû̌, pè̤ o ná tè̤thè́luố̤phòphû̌, rò bí Byacè Jesǔ Krístu hyǎ tônyěpǎnuô, thǐ htwǒhò́ pè̤ lé̤phyéhtyalô̌ní̤ pè̤ thè́plò dố anyěhyǎ pǎ hò́. ²⁰Thǐ ma pè̤ lé̤phyéhtyalô̌ pè̤ thè́plò ná pè̤ tè̤thè́luố̤phòphû̌ tahe hò́.

¹Dốkhyě tadûnuô pè̤ khyábè́ pǎ cò́to akhu-akhyě, pè̤ ki okyǎhò́ bí vǐ̤ Athenia akǔ yě hò́ pè̤ belya̤kyǎ pè̤ thè́plò phúnuô. ²Rò pè̤ thǔlya̤ Timothy dố thǐo, è ma pè̤ puố̤vyá̤ tôprè̤ rò a htwǒ Cò́marya prè̤me̤tè̤phú tôprè̤. A me̤tố̤kuô̌tè̤ ná pè̤, rò a hésodônyǎ pé̤ ǔ ná Krístu a tè̤thè́krṳ̂̌mila ari-akyǎ. Thyáphú a ki dyéhè̌dyérení̤ thǐ rò a ki shyakrwǒní̤ thǐ tè̤zṳ̂́tè̤nyá̤ akhyě nuôrò, pè̤ thǔlya̤ è dố thǐo. ³Ǔ yǒ me̤cyě̤me̤cṳ̂ thǐ akhu-akhyěrò thyáphú thǐ ki vǐkyǎ tǎ thǐ tè̤zṳ̂́tè̤nyá̤ tôprè̤꤮ tǎmé̤nuô, pè̤ nò̌hyǎ Timothy dố thǐo. Thǐ thè́gně ryáryádèdè hò́ ná Cò́marya taze-one dố pè̤ bè khyábè tè̤me̤cyě̤me̤cṳ̂ phúyě tahe nuôhò́. ⁴Me̤těhérò bí pè̤ okuô̌pǎ ná thǐ akhè̌nuô, pè̤ hé tamǒmǒ pé̤ htuô̌hò́ thǐ ná pè̤ ki khyábè tè̤me̤cyě̤me̤cṳ̂ phúyě nuô pǎ. A hyǎ htwǒhtya kryá꤮ ná thǐ phútěnuô thǐ myáhtyebè má̤lakǒ cò́hò́. ⁵Vǎ okhyǎ pǎto akhu-akhyě, thyáphú Timothy ki thè́gně ná thǐ oklò̤sò́mapǎ dố thǐ tè̤zṳ̂́ è̌, ma thǐ oma pǎ to è̌ nuô, vǎ thǔlya̤ lǔ dố thǐ o. Vǎ bèzò̤ ná khǐnéricyá̤ khuklò́ klyá ilo-ilyá nyǎ thǐ hò́. Htuô̌rò lò̌꤮ tè̤phyétè̤me̤ dố pè̤ me̤htuô̌ lò̌hò́ tahenuô, a ki kyǎdě lò̌nyǎhò́, vǎ bèzò̤ phúnuô.

⁶Manárò khǒnyá̤yě Timothy o dố thǐo rò a ka̤tuố̤ khyěthyáhò́ dố pè̤o hò́. Rò a ka̤ dônyǎ pé̤ pè̤ ná tè̤ritè̤kyǎ dố a mo̤ tahe. A héluô̌ pé̤ pè̤ ná thǐ tè̤zṳ̂́tè̤nyá̤ ná thǐ tè̤mo̤ tahe ari-akyǎ. Htuô̌to a héluô̌ pé̤ pè̤ ná thǐ thè́né̤htyabè pè̤ pwǒ̤꤮ tôphuố cò́, rò thǐ o ná tè̤thè́luố̤phòphû̌, htuô̌to thǐ nethuô myáhtyekuô̌ nyacò́ pè̤ phú pè̤ nethuô myáhtye thǐnuô, a dônyǎluô̌ pé̤ pè̤ phúnuô. ⁷Phúnuôrò puố̤vyá̤thǐ, bí pè̤ khyábè cò́ tè̤pyá̤tè̤sè̌ dố adu-azǎ̤ ná tè̤cyě̤tè̤cṳ̂ lò̌꤮ plǐ yětahe akhè̌ cò́nuôrò, thǐ zṳ̂́e thè́lè̤ní̤ pǎ Krístu akhu-akhyě, a ní̤hè̌ní̤re nyacò́ dố pè̤gně cò́. ⁸Me̤těhérò, dố thǐ ihtò klò̤ma dố Byacè akǔ akhu-akhyě, pè̤ ohtwǒprè̤ khǒnyá̤ yěnuô, phwǐ꤮ aphwǐamo̤hyǎ khyěthyá cò́ pè̤ hò́. ⁹Dố thǐ khukhyěrò, pè̤ hébwíhétaryě nyacò́ pè̤ Cò́marya rò pè̤ thè́krṳ̂̌thè́lò̌ lakálakǒ cò́ dố a mèthènyě cò́. Rò pè̤ thè́krṳ̂̌thè́lò̌ hébwíhétaryě Cò́marya yěnuô, a kò́ pé̤ pǎ cò́ to. ¹⁰Thyáphú pè̤ ki myáhtye tǎ̤sûbè́ khyěthyá ná thǐ rò pè̤ ki me̤cwó̤ è́htyapó̤ thǐ tè̤zṳ̂́ dố a lo tahenuôrò, pè̤ kwǐcò́bè̌ mò̤́khíkhí mò̤́sè̌klè̌klè̌ cò́.

¹¹Thyáphú pè̤ ki hyǎnò́ khyěthyá dố thǐo nuô, pè̤ Cò́marya dố a má̤ pè̤phè̌ sǐné̤ ní̤dû yětôprè̤ ná pè̤ Byacè Jesǔ yě ki taritaryǎ plǒhyǎ pé̤dû pè̤klyá pǎ ní꤮. ¹²Byacè ki me̤è́htya pé̤dû thǐ tè̤mo̤ní̤ lǔ rò, thǐ ki mo̤ lò̌thulò̌thè́ ní̤dyélǔ tôprè̤ ná tôprè̤, htuô̌rò thǐ ki mo̤è́htya ní̤kuô̌pó̤ kayǎ dố aruô tahe thyáná pè̤ mo̤ní̤ thǐnuô ní꤮. ¹³Bí pè̤ Byacè Jesǔ hyǎlya̤ tố̤ ná akayǎ sǎsè̌ tahe lò̌plǐ pǎ akhè̌nuô, thyáphú ǔ lé̤dya thǐ tè̤thû́ ki o pǎ tǎmé̤, htuô̌to thyáphú thǐ ki sǎsè̌ dố pè̤ Cò́marya ná pè̤phè̌ ní̤dû yětôprè̤ anyěhyǎ pǎnuô, a ki dyéshyodyésò̌ ní̤dyédû thǐ thè́plò ahè̌are ní꤮.

Tè̤ohtwǒprè̤ Dố Atǒ Cò́marya Thè́plò

¹Puố̤vyá̤ thǐ, dố khyělốnuô, thǐ tǒbè ohtwǒprè̤ tǒ ná Cò́marya athè́plò phútěnuô, pè̤ ithyó htuô̌hò́ thǐ hò́. Rò khǒnyá̤yě thǐ ohtwǒprè̤ nuôma a má̤hò́. Khǒnyá̤yě pè̤ kwǐthè́zò̤ thǐ rò pè̤ shyakrwǒní̤ thǐkhyě dố Byacè Jesǔ akhǎlé̤, thǐ ki me̤ plehyǎ è́htyaè́htya pó̤ phúnuô. ²Tè̤ dố pè̤ hé htuô̌hò́ thǐ ná thǐ tǒbè me̤ tahenuô, thǐ thè́gněhò́. Tè̤ yětahe nuôma Byacè Jesǔ dyatǎ̤ tè̤me̤ dố pè̤khu dố pè̤ tǒbè héso pé̤ thǐ prè́.

³Cò́marya thè́zṳ̂́ ná thǐ tè̤kahtòonyǎ thǐtahe ki mwǒ̤plǐthǐplo rò bè cuốthû́ní̤ prè̤mòprè̤khǔ taki꤮ to. ⁴Thǐ pwǒ̤꤮ tôprè̤ tǒbè pốtarílya̤ ní̤dyédû thǐné̤ ná tè̤ohtwǒprè̤ sǎsè̌ dố ǔ ki bezṳ̂́ní̤ thǐ tahe. ⁵Nò̌pố lya̤ní̤ tǎ thǐné̤ ná tè̤lṳ̂me̤mo̤ní̤ né̤tahe ná tè̤patápatô̌ a tè̤thè́zṳ̂́thè́lò̌ phú kayǎ dố a thè́gně kuô̌ǔ Cò́marya to nuôtahe tǎmé̤ ní꤮. ⁶Thǐ tǒbè me̤thû́ní̤ thǐ puố̤vyá̤ Krístuphú tahe ná tè̤ phúnuôtahe tôprè̤꤮ to. Thǐ tǒbè taklyé lahǒení̤ dố thǐ puố̤vyá̤ Krístuphú tahe akhu tôprè̤꤮ to. Kayǎ dố a me̤phúnuô tahenuô, Byacè ki cirya èthǐ pǎ. Phúyě tahenuô pè̤ hésodônyǎluô̌ pé̤ htuô̌lò̌hò́ thǐ, pè̤ dyérò̤dyéryě̤ htuô̌lò̌hò́ thǐ hò́. ⁷Me̤těhérò Cò́marya è́ pè̤ dố pè̤ ki bè ohtwǒprè̤ me̤thû́ prè̤mòprè̤khǔ agněnuô má̤to. Thyáphú pè̤ tè̤kahtòonyǎ thǐtahe ki mwǒ̤plǐthǐplo agněnuôrò, a è́ pè̤ prè́. ⁸Phúnuô akhu-akhyě, kayǎ tôprè̤prè̤ dố a htésû tè̤ithyóithya yěnuôma, a htésû prè̤lukayǎ má̤to. A htésûhò́ Cò́marya dố a dyé thǐ Thè́ Sǎsè̌ Byacè yětôprè̤ nuôhò́.

⁹Tè̤mo̤ní̤ puố̤vyá̤ dố a zṳ̂́ka̤nyá̤ka̤ tè̤ tahe ari-akyǎ nuô, pè̤ lo rǎ pé̤pǎ ná thǐ to hò́. Me̤těhérò tè̤ dố bè mo̤ ní̤dyé lǔ tôprè̤ ná tôprè̤ nuô thǐ né̤byacè ní̤dû, Cò́marya ithyóithya htuô̌dûhò́ thǐ hò́. ¹⁰Kihélakǒma thǐ mo̤ ní̤dyé lò̌plǐ thǐpuố̤thǐvyá̤ dố a o dố Macedoniaké̤ yě tôké̤lè̤̌ nuôtahe cò́. Manárò pè̤ shyakrwǒ kuô̌pó̤ thǐ ná thǐ ki mo̤ è́htya lốklò̌ pó̤ cò́ ná yěnuô ní.

¹¹Yácû́ ohtwǒprè̤ krṳ̂̌klè̌ pě̤dwǒ lahyǎ ná ǔ dố tè̤pwǒ̤꤮ tôcô akǔ ní꤮. Nè̤ tè̤ritè̤kyǎ má̤to tahenuô, cuốnuô̌ me̤súsá kuô̌ tǎ ǔ tǎmé̤ ní꤮. Phú pè̤ héso htuô̌hò́ thǐ nuô, pṳ̌epṳ̌rya̤ rò buôelya̤ ní̤dyédû lahyǎ thǐné̤ ní꤮. ¹²Thyáphú kayǎ dố a zṳ̂́enyá̤e kuô̌hí Cò́marya to tahe ki myáhtye thǐ tè̤ohtwǒprè̤ rò èthǐ ki bezṳ̂́ thǐ, htuô̌to tè̤ dố thǐ loe loǒ tahenuô, thyáphú thǐ ki thè́lè̤htyaní̤ tǎ ǔruô tǎmé̤nuô, me̤ lahyǎ phú pè̤ hé thǐ nuô ní꤮.

Byacè Atè̤hyǎ Khyěthyá

¹³Puố̤vyá̤thǐ, pè̤ thè́zṳ̂́ nò̌thè́gněkuô̌ thǐ ná kayǎ dố a zṳ̂́enyá̤etè̤ rò a thyě htuô̌hò́ nuôtahe ari-akyǎ. Phú kayǎ dố a tè̤myásû̌ okuô̌ǔ to nuôtahe thè́plè̤̌nebè nuô, pè̤ thè́zṳ̂́ nò̌htwǒ kuô̌ thǐ phúnuôto. ¹⁴Pè̤ zṳ̂́e ná Jesǔ thyěhtuô̌ rò a htwǒprè̤ ka̤khyě hò́. Phúnuôrò pè̤ zṳ̂́e ná shyé꤮ Jesǔ hyǎlya̤ khyěthyá pǎnuô, Cò́marya ki è́ka̤ otố̤kuô̌ khyěthyá kayǎ dố a zṳ̂́e Jesǔ rò a thyě htuô̌hò́ nuôtahe ná lǔ pǎ.4:14 Angó̤lasá dố aruô ma dố Jesǔ akhu-akhyě Cò́marya ki è́ka̤ kayǎ dố a thyě htuô̌hò́ tố̤ná Jesǔ nuôprè́.¹⁵Tè̤ dố pè̤ kíré̤ hé pé̤ pó̤ thǐyě tahenuôma, Byacè ithyóithya ná ané̤ ní̤dûcò́. A hé, shyé꤮ Byacè Jesǔ hyǎ khyěthyá akhè̌pǎnuô, pè̤ dố a ohtwǒprè̤ pǎ yětahenuô, pè̤ ka̤ kahtyaré̤ ná kayǎ dố a zṳ̂́e rò a thyě htuô̌hò́ nuôtahe má̤to. ¹⁶Me̤těhérò Byacè ané̤byacè ní̤dû ki o dố mò́khu rò hyǎlya̤ pǎ, rò a ki è́htǒtǎ̤ angó̤ tômû̌ pǎ. Htuô̌rò tanémò́khuphú a khuklò́dulố tôprè̤ ki è́htǒ hébètǎ̤ pǎ. Htuô̌rò ǔ ki ní̤huô̌ Cò́marya akwo̤ pra̤htya pǎ rò kayǎ dố a zṳ̂́e Krístu rò a thyě htuô̌hò́ tahenuô, a ki ihtò ka̤ré̤lố ǔ pǎ. ¹⁷Htuô̌rò pè̤ dố a ohtwǒprè̤pǎ yětahenuô, thyáphú pè̤ ki cuố myáhtyesû kuô̌ ná Byacè dố mò́lè̤̌ pǎnuôrò, Cò́marya ki cò̤̌htya tố̤kuô̌ pè̤ ná èthǐ dố ò́luố̤klè̌ pǎ. Htuô̌pǎrò pè̤ ki cuố otố̤kuô̌ ná Byacè tacṳ́prè̤ talèkrè́ pǎ. ¹⁸Phúnuô akhu-akhyě, dônyǎ mo̤ ní̤dyé khyě lahyǎ thǐ thè́plò ná tè̤ritè̤kyǎ yě tôprè̤ ná tôprè̤ ní꤮.

O Taritaryǎ One Thǐné̤ Ná Byacè Atè̤hyǎ Amò̤́nyě

¹Puố̤vyá̤thǐ, Byacè ki hyǎtǒ ana-alè̌ ashuốakhè̌ bíkhè̌tě pǎnuô pè̤ lo rǎ hésoluô̌ pé̤ ná thǐ to. ²Me̤těhérò thǐ thè́gně tǎ̤te̤ htuô̌dûhò́ ná Byacè hyǎ amò̤́nyě pǎnuô, athyáná prè̤ehuô hyǎ dố mò̤́khíkhè̌ nuô pǎ. ³Bí ǔ hé, “Ké̤thuôké̤krě hò́, tè̤bèzò̤bèthi o pǎ tohò́” ǔ hé hò́ phúyě akhè̌pǎnuô, tè̤pyétè̤kyǎ ki hyǎtuố̤khyé pé̤ èthǐ thyáná prè̤mò phúohò́sè̌ nuôpǎ rò èthǐ siplè́bè́ tôprè̤꤮ to pǎ.

⁴Manárò, puố̤vyá̤ thǐ, thǐ o dố tè̤khítè̤lò̤ alè̤̌ má̤to akhu-akhyě, Byacè hyǎ amò̤́nyě yěnuô, thǐ khyé tanyǎ̤tadè cò́ phú prè̤ehuô hyǎtuố̤khyé kuô̌ thǐ nuô to. ⁵Lò̌꤮ thǐyě tahe nuôma tè̤lǐ aphúkhǔ ná mò̤́sè̌klè̌ aphúkhǔ tahe. Pè̤ ma kayǎ mò̤́khímò̤́ne̤phú má̤toto, tè̤khítè̤lò̤phú má̤toto. ⁶Phúnuôrò pè̤ kò omyě sǒtapa̤ ní̤kuô̌ phú ǔruô tahe omyě sǒtapa̤ nuôto. Pè̤ tǒbè othǎklyǎ rò pốtarí ní̤dyédû pè̤né̤. ⁷Me̤těhérò kayǎ dố a omyěo tahenuô a omyěo dố mò̤́khíkhè̌, kayǎ dố a emṳ̂ǒpryá tahe nuôma a emṳ̂ǒpryá dố mò̤́khíkhè̌. ⁸Manárò pè̤ ma mò̤́sè̌klè̌phú tahe akhu-akhyě, pè̤ bè pốtarí ní̤dyédû pè̤né̤. Pè̤ tǒkò zṳ̂́e plehyǎlǎ Jesǔ rò pè̤ tǒkò mo̤ plehyǎ lǎní̤ ǔ. Pè̤ ki me̤phúnuô hérò athyáná pè̤ kû̌thyáhtya ní̤ hò́ pè̤ ca̤tò̤́htè́ dố a takè̤bíní̤ pè̤né̤ yěnuôhò́, htuô̌rò pè̤ tè̤myásû̌ dố Cò́marya ki me̤lwóhteka̤ pè̤ yěnuôma athyáná pè̤ klwǒ̤htya khuklwǒ̤ tò̤́htè́ dố a takè̤bí ní̤dyé pè̤ khuklò́ yěnuôhò́. ⁹Cò́marya nwóhtya pè̤ ná pè̤ ki khyábè a tè̤thè́plòdu a tè̤cirya yěnuô má̤to. Dố pè̤ Byacè Jesǔ Krístu khukhyěrò, a nwóhtya pè̤ ná pè̤ ki ní̤bè lǎhò́ tè̤me̤lwóhteka̤ yěnuôprè́. ¹⁰Pè̤ thyě bèbè, pè̤ htwǒprè̤ bèbè, thyáphú pè̤ ki otố̤kuô̌ ná ènuôrò, a khyáthyě pé̤hò́ dố pè̤gně hò́. ¹¹Phúnuôrò, dyéhè̌dyére khyělǔ tôprè̤ ná tôprè̤ rò me̤cwó̤lyě̤ me̤cwó̤kè khyělǔ tôprè̤ ná tôprè̤ phú thǐ me̤ hò́ khǒnyá̤ yěnuô ní꤮.

Tè̤ithyó Zṳ̌klyázṳ̌klǒ Ná Tè̤hémo̤héryá Dốkhyě Tadû

¹²Puố̤vyá̤thǐ, kayǎ dố a htwǒ thǐ khuklò́khuklyǎ dố Byacè akǔ rò a krṳ̂̌me̤ tè̤, a dyérò̤dyéryě̤ one pé̤ thǐklyá tahenuô pè̤ kwǐthè́zò̤ thǐ ná dyaduzṳ̂́nyá̤ lahyǎ kayǎ phúnuô tahe ní꤮. ¹³Dố èthǐ me̤ lahyǎ phúyě akhu-akhyě, dyaduzṳ̂́nyá̤ sǎprè̤́ èthǐ rò mo̤ lò̌thulò̌thè́ní̤ èthǐ ní꤮. Okrṳ̂̌oklè̌ ní̤dyé lǔ tôprè̤ ná tôprè̤ ní꤮. ¹⁴Puố̤vyá̤thǐ, pè̤ kwǐthè́zò̤ khyěthyá pó̤ thǐ, dyérò̤dyéryě̤ ní̤dû kayǎ taklělěbyá nuôtahe ní꤮. Htuô̌rò dyéhè̌dyére pé̤ kayǎ dố a taruô dûgně nuôtahe rò me̤cwó̤ pé̤kuô̌ kayǎ dố a hè̌cè̤́recè̤́ nuôtahe, htuô̌rò khyáthè́plòhtǔ pé̤ ǔ pwǒ̤꤮ tôprè̤ ní꤮. ¹⁵Nò̌me̤lyě̤ ka̤khyěsû tǎ kayǎ dố ǔ me̤thû́ lǔ nuôtahe tǎmé̤ ní꤮. Má̤tôkhónuô, yácû́ me̤ryá ní̤dyé lǔ tôprè̤ ná tôprè̤ pwǒ̤꤮ tôphuố rò yácû́ me̤ryá ní̤pé̤kuô̌ kayǎ dố aruô tahe ní꤮.

¹⁶Thè́luố̤phòphû̌ lahyǎ pwǒ̤꤮ phuốní꤮.

¹⁷Kwǐcò́bè̌ lahyǎ pwǒ̤꤮ tôphuố ní꤮.

¹⁸A htwǒhtya phútětě꤮ bèbè, tarú hébwíhétaryě lahyǎ Cò́marya pwǒ̤꤮ tôphuố ní꤮. Me̤těhérò, Cò́marya thè́plòo dố thǐ tǒme̤ phúnuô dố Jesǔ Krístu akǔ.

¹⁹Me̤pǐ̤ tǎ Thè́ Sǎsè̌ Byacè a tè̤kṳ́ká̤rúrya̤ tahe tǎmé̤ ní꤮. ²⁰Tane̤ patí tǎ prè̤pro̤ a tè̤hépro̤ one nuôtahe tǎmé̤ ní꤮. ²¹Ce̤myá htuô̌lò̌ tè̤pwǒ̤꤮ tôcô rò phyésûkuô̌ tè̤ dố aryá nuôtahe ní꤮. ²²Cuốvò̤ khè̌vò̤kyǎ lahyǎ tè̤mǔmyá̤ricyá̤ pwǒ̤꤮ tôcô ní꤮.

Paulu Kwǐcò́bè̌ Ná Cò́marya Ki Sò̌ri Thessalonia Prè̤zṳ̂́etè̤ Plò́mṳphú Tahe

²³Cò́marya dố a dyé pè̤ tè̤thuôtè̤krě yětôprè̤ ané̤byacè ní̤dû ki me̤sǎsè̌ lốbǎhtya dû thǐ ní꤮. Htuô̌to shyé꤮ pè̤ Byacè Jesǔ Krístu ki hyǎ khyěthyá pǎnuô, thyáphú ǔ ki dyacyá̤pǎ tǎ thǐ tè̤thû́ tǎmé̤ nuôrò, Cò́marya ki myákhwèní̤ lò̌kuô̌ pó̤dû thǐ né̤klò̤́ ná thǐthè́ ná thǐ thè́htwǒprè̤ pǎ ní꤮. ²⁴Cò́marya dố a è́ thǐ yětôprè̤nuô, a ki me̤ má̤lakǒ pé̤dû thǐ phúnuô pǎ, me̤těhérò è ma Cò́marya dố acò́ ná angó̤ tôprè̤.

²⁵Puố̤vyá̤thǐ, kwǐcò́bè̌ tuố̤ pé̤kuô̌ lahyǎ pè̤gně ní꤮. ²⁶Hémo̤héryá lò̌lò̌꤮ puố̤vyá̤ dố a zṳ̂́ka̤nyá̤ka̤tè̤ nuôtahe rò nuô̤mû́ní̤ lǔ tôprè̤ ná tôprè̤ dố tè̤nuô̤mû́ sǎsè̌ akǔnuô ní꤮. ²⁷Dố Byacè amwi̤ akǔ, vǎ nò̌tǎ̤ thǐ ná thǐ ki hốluô̌ pé̤ vǎ liyětôba dố puố̤vyá̤ dố a zṳ̂́ka̤nyá̤ka̤tè̤ pwǒ̤꤮ tôprè̤ a mèthènyě ní꤮.

²⁸Byacè Jesǔ Krístu abwíataryě ki okuô̌dû ná thǐ ní꤮.