’Sɛbhɛ wa ’paa Eblenya yoo
-Lagɔnyɩma wa mɩa ’klɩyɩe ’wʋpalɩda, wa ’ka wa ’kʋayli ’paa ’gbʋ wa yia ’sɛbhɛ nɩ cɛlɩ. Wee ’sɛbhɛ slolua we -aɩn nɩɩ, *Klisɩ ka -amɩaa ’gbʋ tlɩ. We ’dɛɛ ’gbʋ, -a ’nɩ ’maslɛɛn mneni -a ’ka ’slaka -putu -sa -Lagɔ -yla. Mʋ gba ’yaa -aɩn -yla *’wʋsuslolue sʋaa ’sɛbhɛɛ nʋkpla -nyɩma -wa zʋa -Lagɔ dlɩ -gʋ bhabhaa -gʋgbʋ.
1-Zezuu gbɛgbɛɩn -Lagɔ gbalɩa -slɛɛn -aɩn -yla
1 Bha mɩa, -amɩaa dʋkpasɩ -yla -Lagɔ gbaa ɔ gbʋʋ -falɩpanyaa gbɛgbɛɩn. Ɔ ka wa -yla gbʋ gba -zakpa duun, we -yɔ sɔɔ ’yli -bhlo -bhlo lʋ. 2 -Slɛɛn, -lu weee bhɩa bhla, ɔ ’Yuu gbɛgbɛɩn ɔ gbalɩa aɩn -yla. Ɔɔ ’Yu gbɛgbɛɩn ɔ -laa dʋdʋ la, ’ɩn ɔ nɛɛ nɩɩ, mɔ yia -lu weee ’yɩa. 3 Sa -Lagɔ mɩa, ɔ ka we -aɩn -slolu, ’ɩn ɔmɔ mɩ ’ya ’sa. Ɔ wɛlɩɩ ’tɩtɛ nya ɔ kaa dʋdʋ. Ɔ ka nyɩmaa gbʋnyuu -bhasa, ’ɩn ɔ -dɩa ’tɩtɛ -ka -Lagɔɔ lilisɔlʋ la.
-Lagɔɔ ’Yu ’yli ɔ -zi ’anzɩnya
4 Nɩɩ, ɔɔ Yu mɩa, ’kadʋ -we -Lagɔ -zɛlɩa ɔ, sa we -zia ’anzɩnyaa -nʋ ’wʋ, ’sa -bhlokpadɛ ’ŋnɩ -we ɔ ’yɩa ɔ kwɛɛ -mʋʋ -zia ’anzɩnyaa ’ŋnɩ ’wʋ.
5 ’Lee, -Lagɔ ka -slɔ ’anzɩ yabhlo -yla gbaɛ:
«-Ɩn mɩ na ’Yu nya, nɩɩ -zɛɛn,
ɩn ka -na Dide -zɛɛ»?
Yaayɩɩ:
«Ɔ Dide na yia -zɛa, ’ɩn ɔmɔ ’ka na ’Yu -zɛɛ»?
6 Da -Lagɔ tiea ɔ ’Yu tɩanʋ dʋdʋ -gʋ, ɔ nɛɛ:
«-Lagɔɔ ’anzɩ weee -gbli ’wlu la ɔ ’yu.»
7 Nɩɩ, -we -Lagɔ gbaa ’anzɩnyaa da, mʋ nɩ:
«-Pɩpɛ ’bhisa ’anzɩnya yia na lubho nʋa,
-kosuu mɩɔ ’bhisa we yia we nʋa.»
8 ’Ɩn -Lagɔ nɛɛ ɔ ’Yu -yla:
«-Mɩ -Lagɔ, -mɩ yia nyɩma ’wlulapɩlɩa
’ylɩ weee -nʋ nya.
Sa -na pɩlɩa nyɩma ’wlu la we tɩklɩɩ.
9 -We mɩa tɩklɩɩ, ’mʋ -ɩn ’yɩbhaa.
Gbʋnyuu mɩa, ’wʋ -na nyɛa we,
we ’dɛɛ ’gbʋ, -Lagɔ, -na -Lagɔ,
ɔ yia -bha -mɩ -sa ɔ -nʋ nya.
’Ɩn, ɔ yia -mɩ ’mʋna yeli -na ’bɩ -zɔnʋʋ ’nyɛnyɩe nya,
we ’ka -na nɔnɔnyaa -nʋ ’wʋzi.»
10 -Lagɔ nɛɛ ’yaɛ:
«Nyɩmaa -Kanyɔ, -lu weee gwedɩda,
-mɩ mɩa,
-mɩ -laa dʋdʋ la,
’ɩn -ɩn yia yalɩ lɛnʋ -na sɔ nya.
11 We ’dɛ weee mɩa,
’plɩa we yia.
’Ɩn, -mɩ mɩa,
-ɩn mɩ -bha ’ylɩ weee nya.
-Bana ’bhisa we ’dɛ weee yia gɔa,
12 ’naa ’bhisa -na yia we glɩa.
Gbʋzɔnʋ -wa,
’naa ’bhisa -na yia we ’bhitia.
’Ɩn -mɩ, -ɩ’ɩn ’bhiti,
-na ’yliyɔgagɩe ’nɩ bhloluda -ka.»
13 -Lagɔ ’nɩ -slɔ ’anzɩ yabhlo -yla gbaɛ:
«Yi na lilisɔlʋ ladɩlɩa,
’ɩn ɩn ’ka -na tʋnyɩma -na bhʋ zɔ lapalɩ.»
14 ’Anzɩnya mɩa, zuzunya -we nʋa -Lagɔɔ lubho, ’mʋ we ’dɛ weee -mɩa. We ’nɩ mʋʋ? Nɩɩ, ’mʋ -Lagɔ tiea nyɩma -wa ɔ ’kaa gbʋ ’wʋsa, we ’ka wa kwalɩ.
2Gbʋwʋsasɩe ’kadʋ
1 We ’dɛɛ ’gbʋ, wɛlɩ -we -a ’nʋa, -a zʋ we ’yliyɔ ’nanʋʋ, we ’nɩ -mʋʋ, ’ɩn -a bhʋlʋa ’yoo -zɔnʋ -gʋla. 2 Wɛlɩ -we -Lagɔ zʋa ’anzɩnya ŋwɛɛ, nyɩma ka we ’jiyibheli nɩɩ, we mɩ gbʋzɔnʋ nya. Tɔlʋa ’nɩ we -bha zʋ, tɔlʋa ’nɩ we ’nʋŋwɛ zʋ, ’ɩn -Lagɔ yia wa -kaslʋ ’wʋpa wa lɛnʋgbʋʋ ’gbʋ.
3 We -ka ’sa -mɩ, ’bhie, -amɩa -ka -Lagɔɔ ’sasʋkpa gbʋwʋsasɩe ’kadʋ yɔlʋkpalɩ nɩ, ’lee, sa -a ’na ’ka -kaslʋnyɩma nya -mɩa? Wee gbʋwʋsasɩe mɩa, Nyɩmaa -Kanyɔ gbaa we gbʋ tɩa. -Mʋʋ ’bɩgʋ, -wa ’nʋa wee gbʋ wa yia we -gʋ nɔ, ’ɩn wa yia -aɩn -slolu nɩɩ, we mɩ gbʋzɔnʋ nya.
4 -Lagɔɔ ’dɛ ka ’ya wee gbʋ gwelʋpa. Gbʋ ’kadɩ -yɔ gwɛdigbʋʋ ’yli -bhlo -bhlo nya ɔ ’palɩa we gwelʋ, we -yɔ ɔ Zuzu ’Pʋpaa ’tɩtɛɛ ’yli -bhlo -bhlo -we ɔ dlilia ɔ dʋmagbʋ nya, we nya.
5 Nɩɩ, dʋdʋ -we mɩa yida, we gbʋ -a gbaa. -Lagɔ ’nɩ ’anzɩnya ’tɩtɛ ’nyɛ we -gʋ. 6 -Lagɔwɛlɩɩ bɛta yabhlo nɛɛ:
«-Lagɔ, nyɔɔ nyɩmɛ -mɩ,
’ɩn -na pʋpalɩ ɔ -gʋ dlɩ laa?
’Ɩn nyɔɔ nyɩmɛɛ ’yu -mɩ,
’ɩn -na mnazɩ ɔ -yɔgbʋa?
7 -Ɩn ka ɔ ’anzɩnya zɔ -galɩ bhla -sɛlɛɛ -nʋ nya.
-Ɩn ka ɔ ’ŋnɩ -mnɩnɩ, -ɩn ka -bha ɔ -zʋ,
8 ’ɩn -ɩn yia ɔ ’tɩtɛ ’nyɛ -lu weee -gʋ.»
-Lagɔ ka nyɩmɛ ’tɩtɛ ’nyɛ -lu weee -gʋ, -mʋʋ ji -wa nɩɩ, ɔ pɩlɩ -lu weee ’wlu la, ’ɩn -zɛɛn ylɩ nya, -a yɩ we -yɔ nɩɩ, nyɩmɛ ’nɩ -slɔ ’tɩtɛ -ka -lu weee -gʋ. 9 -We -a yɩa -yɔ mʋ nɩ: nɩɩ, -Zezu ka ’anzɩnya zɔ -galɩ bhla -sɛlɛɛ -nʋ nya, ’ɩn -Lagɔɔ ’nanɩ nya ɔ ’ka tlɩ nyɩma weee ’gbʋ. Nɩɩ, ɔ ka tlɩtlɩee sɩasɩe ŋwɛ ’yɩɩ ’gbʋ, -a yɩa -slɛɛn ɔ -yɔ, -zugba ɔ ’ŋnɩ mnɩ, ’ɩn wa zʋ -bha ɔ.
10 -Ɔ -laa dʋdʋ la, -Lagɔ -wa, ’ɩn mɔ kaa we ’dɛ weee la. We ’dɛɛ ’gbʋ, we mɛnɩ nɩɩ, ɔ gbalɩ -Zezuu tɩklɩmɩmɩe -mɔɔ sɩasɩe ’wʋ, -mɔɔ ’ka ’yuaa -zlo ɔ ’ŋnɩmnɩe ’wʋkwa. Nɩɩ, mɔ saa wa gbʋ ’wʋ.
11 Nɩɩ, -Zezu -ɔ wlʋlʋa -mɔ nyɩma -yɔ -wa ɔ wlʋlʋa -mɔ, wa ’dɛ weee ka Dide -bhlo. We ’dɛɛ ’gbʋ -Zezu -ka wa la bhelia nɩ, we’e ’bhalɩ ɔ zʋ. 12 -Zezu nɛɛ -slɛɛn -Lagɔ -yla:
«-Na -gʋgbʋ na yia na bhelia -yla gbaa.
-Mɔ nyɩmaa -zlo nyɩdɩ,
-na ’ŋnɩ na yia bhlɩa.»
13 Ɔ nɛɛ ’yaɛ:
«-Amɩ mɩa, -Lagɔ -gʋ na yia na dlɩ zʋa.»
We ’bɩgʋ:
«-Amɩ mɩ -bha, ɩn -yɔ ’yua,
-wa -Lagɔ ’nyɛa ’mɩ yoo.»
14 Waa yua mɩa, yɩcɛ -yɔ ’pɩɔn wa gbɔlʋa ’wʋ. We ’dɛɛ ’gbʋ -Zezuu ’dɛbhie -gbolu yia nyɩmɛ -zɛ wa ’bhisa, ’ɩn ɔ yia tlɩ ɔ ’ka *’Kuzu, -we kaa tlɩtlɩee ’tɩtɛ kwɛɛ, lu. 15 Nɩɩ, nyɩma ’wlʋ galɩ, wa mɩ tlɩtlɩe sɔda dʋdʋ -gʋʋ ’gbʋ. -Zezuu tlɩtlɩe ka wa gaylo ’wʋsa. 16 We -slɛɛn ’vayɩ nɩɩ, we ’nɩ ’anzɩnya ɔ yi ’wʋsaa, nɩɩ, *Ablaamʋʋ ’yua ɔ yia ’wʋsaa. 17 -We mɩa dɛɛ ’gbʋ, ɔ ’ka yaa ɔ bhelia nya ’wʋwlʋ sɔ weee lʋ, ’ɩn *-Lagɔbʋbɔnyaa -kanyɔ ’kadʋ kaa nyazɩdlɩ, -ɔ nʋa -Lagɔlubho ’nanʋʋ, ɔ ’ka we -zɛ wa -yla. ’Sa ɔ nʋa, ’ɩn -Lagɔ tɩa nyɩmaa gbʋnyuu ’wʋ. 18 Nɩɩ, -Zezuu ’dɛ ka sɩa bhabha, ’ɩn ’Kuzu yia ɔ layla. We ’dɛɛ ’gbʋ, -wa ’Kuzu -ka laylaa yi, ɔ mneni ɔ ’ka wa ’wʋsa.
3-Zezu ’yli ɔ -zi *Moizɩ
1 Na -Lagɔbhelia, amɩa weee -wa -Lagɔ laa, a yla ɔɔ -Zezu. ’Mɔ ɔ tiea, -amɩaa dlɩzʋgbʋ -we -a gbaa, -mɔɔ ’ka we -Lagɔbʋbɔnyaa -kanyɔ ’kadʋ -zɛ. 2 Sa *Moizɩ nʋ bhaa -Lagɔɔ lubho ’nanʋʋ -mɔ -Lagɔɔ -budu zɔ, ’sa -Zezu nʋa ɔnʋʋ lubho -we -Lagɔ ’nyɛa ɔ. 3 Nɩɩ, -ɔ ’sʋbhaa -budu, ’mɔ wa zʋa -bha we ’ka -buduu ’dɛbhie -zi. ’Sa -bhlokpadɛ, -Zezu mɩ -bhazʋsa ɔ ’ka Moizɩ -zi. 4 -Budu, -we -ka -mɩ, we ka wenʋʋ ’sʋbhanyɔ. ’Ɩn -ɔ ’sʋbhaa -lu weee, -Lagɔ -wa. 5 Bha mɩa, Moizɩ -wa lubhonʋnyɔ -zɔnʋ -mɔ -Lagɔɔ -buduu -kpabhie zɔ. -We -Lagɔ ’kaa gba, ’mʋ ɔ gbaa. 6 -Slɛɛn, Klisɩ -wa ’Yu -ɔ -wa wee -Lagɔɔ -buduu -kanyɔ. Wee -budu mɩa, -amɩa -wa, -zugba we -ka nɩɩ, -a ’tɛ dlɩ, ’ɩn -we -a dɩa dlɩ ’wʋ we’e ’bhalɩ -aɩn zʋ.
-Lagɔnyɩmaa nyapɛlɩda
7 Nɩɩ, Zuzu ’Pʋpa nɛɛ:
«A -ka -zɛɛn -Lagɔɔ gbagbawɛlɩ ’nʋ,
8 a ’na ’tɛmanɩ amɩaa dlɩ la -nɩ,
nɛɛ da a -sɔlʋa zlɩmɛ -Lagɔ -yɔ ’wʋ da bɛblɛɛ,
’ɩn a yia ɔ layla, we ’bhisa -nɩ.
9 -Mɔ wee da bɛblɛɛ,
-we ɩn nʋa lɛ -zʋ glʋ ’sɔ zɔ,
amɩaa dʋkpasɩ ka we -yɔyɩ.
We mɩ ’sa ’bhie, wa yia ’mɩ layla.
10 We ’dɛɛ ’gbʋ ɩn yia wa -yɔ ’cɛpalɩ.
’Ɩn ɩn nɛɛ na ’dɛ -ylaɛ:
‹Waa nyɩma mɩa dɛ,
’kɔmʋʋ wa mnɔa wa ’wlukʋʋn lapʋpalɩe nya,
wa’a ŋwnu na gbagbawɛlɩ ’wʋ.›
11 Ɩn ’paa ’cɛ, ’ɩn ɩn yia bi:
‹Ɩn nɛɛ nɩɩ, nyapɛlɩda ɩn mnazɩa la wa -yla,
wa ’na ’ka -bha pla.› »
12 Bheliaɩn, a nʋ ’nanʋʋ, -mʋʋ yi ’wlʋ nɩɩ, aɩn glaa nyɩmɛ yabhlogbɔɔɔ plɛ ’nyuu -yɔ ɔ -Lagɔ dlɩgʋsasɩee ’gbʋ ɔ ’bhʋ ’yliyɔga -Lagɔ ’bɩ. 13 A ’pʋpalɩ ’kʋayli ’ylɩ weee nya, wee ’ylɩnya -we *-Lagɔsɛbhɛ laa «-zɛɛn», we nya, gbʋnyuu yi aɩn glaa nyɩmɛ yabhlogbɔɔ -dawli ’wʋnʋ, ’ɩn ɔ yi -Lagɔ -yla yukwli sumanɩ. 14 -A -ka Klisɩ dlɩ -gʋ zʋda -tʋ we ’ka we gwedɩda ’bhʋ we ’ka we bhloluda nyni, -zugba -a mɩ Klisɩɩ nɔnɔnya nya.
15 A ligbe nɩɩ, -Lagɔwɛlɩ nɛɛ:
«A -ka -zɛɛn -Lagɔɔ gbagbawɛlɩ ’nʋ,
a ’na ’tɛmanɩ dlɩ la -nɩ,
da a sɔlʋa ɔ -yɔ ’wʋ, we ’bhisa -nɩ.»
16 ’Lee, nyɔɔ -nyɩma ’nʋ -Lagɔɔ gbagbawɛlɩ, ’ɩn wa yi ɔ -yɔwʋsɔlʋa? -Wa weee Moizɩ -saa gayloflii Ezipʋtʋ -dʋdʋ -gʋ, ma -wa. 17 ’Lee, nyɔɔ -yɔ -Lagɔ palɩ ’cɛ -zʋ glʋ ’sɔ zɔa? -Wa weee nʋa gbʋnyuu lɛ, ’ɩn wa yia da bɛblɛɛ tlɩlɩ, ma -wa. 18 -Lagɔ bia, ɔ nɛɛ: «Nyapɛlɩda ɩn mnazɩa la wa -yla, wa ’na ’ka -bha pla.» ’Lee, -mama ɔ sa ’ŋnɩa? -Wa ’nɩa ɔ ’nʋŋwɛ zʋ, ma -wa. 19 -A ka we ’jiyibheli nɩɩ, wa ’nɩ -Lagɔ dlɩ -gʋ zʋ, we ’gbʋ wa ’nɩa wee nyapɛlɩdaa plaplɩe mneni.
41 -Lagɔ ka wɛlɩ wla nɩɩ, nyapɛlɩda ɔ mnazɩa la, -mɔ -a yia plaa. Nɩɩ, a nʋ ’nanʋʋ -mʋʋ yi ’wlʋ nɩɩ, aɩn glaa nyɩmɛ yabhlogbɔɔ bhlɩ -bha -plaplɩe. 2 Wa ka -aɩn -yla -Lagɔgbʋ gba, -amɩaa dʋkpasɩ ’bhisa. Nɩɩ, wa ’nʋa we, we bhe wa -gbɛ, -we ka gbʋ -wa, wa ’nɩ wee wɛlɩ ’wʋŋwnu dlɩzʋzʋe nya. 3 -Mʋmʋ -ka -amɩa, -amɩa -wa zʋa -Lagɔ dlɩ -gʋ nɩ, nyapɛlɩda -we ɔ mnazɩa la, -mɔ -a plaa. -Lagɔ nɛɛ we daɛ:
«Da ɩn mɩa ’cɛ ’pada,
-bha ɩn bia nɩɩ,
nyapɛlɩda ɩn mnazɩa la wa -yla,
wa ’na ’ka -mɔ pla.»
’Sa ɔ gbaa, ’ɩn -zugba ɔnʋʋ lubho ka -nanʋ dʋdʋʋ lalalɩe -gʋ ’wlubhalɩ. 4 Nɩɩ, -mɔ -Lagɔwɛlɩ ’wʋ, ’ylɩ gbesɔnʋʋ -gʋgbʋ we gbaa: «-Lagɔ nʋa lubho weee, wee ’ylɩ gbesɔɔ zlɩ ɔ nyapɛa.» 5 Wee gbʋ -bhlokpadɛ -Lagɔ gbaa:
«Nɩɩ, nyapɛlɩda ɩn mnazɩa la wa -yla,
wa ’na ’ka -mɔ pla.»
6 -Wa ’nʋa tɩada -Lagɔgbʋ, wa ’nɩ we -yɔŋwnu, we ’dɛɛ ’gbʋ, nyapɛlɩda -Lagɔ mnazɩa la, wa ’nɩ -mɔ pla. Nɩɩ, tɔlʋa mneni wa ’ka -mɔ pla. 7 We ’dɛɛ ’gbʋ -Lagɔ yia ’ylɩ yabhlo -bhasa. Wee ’ylɩ ɔ laa «-zɛɛn.» Wee ylɩ mɩa, ɔ ka bha -mɔ ’yugbɛɩn *Izlaɛlɩnyɩmaa ’wlulapɩlɩnyɔ *-Davidɩ ’wʋplɩlɩ, ’ɩn ɔ yia we -gʋgbʋ gba. -A ka bha we -yɔyɩ, ɔ nɛɛ ɔ wɛlɩ ’wʋ nɩɩ:
«A -ka -zɛɛn -Lagɔɔ gbagbawɛlɩ ’nʋ,
a ’na ’tɛmanɩ amɩaa dlɩ la -nɩ.»
8 Nyapɛlɩda, -we ka -gʋgbʋ -Lagɔ gbaa, we -ka yaa nɩɩ, *-Zozue ka nyɩma we ’wʋkwa, -Lagɔ ’na ’ka yaa -mɔ ’yugbɛɩn ’ylɩ -putuu -gʋgbʋ gba. 9 -Mʋʋ ji -wa nɩɩ, -Lagɔnyɩmaa nyapɛlɩda mɩ -bha, ’ylɩ gbesɔnʋ -we nya -Lagɔ nyapɛa, we -yɔ we ’wʋwlʋ. 10 -Lagɔ nʋa lubho, ’ɩn ɔ yia nyapɛ. ’Sa -bhlokpadɛ, nyapɛlɩda -we -Lagɔ mnazɩa la, -ɔ -ka -bha pla, nyapɛa -mɔɔ yi ’yaa. 11 We ’dɛɛ ’gbʋ, -a fa -mɔ ’kʋa la, ’ɩn -a ’ka wee nyapɛlɩda pla. -A ’yɩ ’klɩ, -mʋʋ yi ’wlʋ nɩɩ, -aɩn glaa nyɩmɛ yabhlogbɔɔ bhli ɔ ’nɩ -Lagɔ ’nʋŋwɛ zʋʋ ’gbʋ, Izlaɛlɩnyɩma ’bhisa.
12 -Lagɔwɛlɩ -ga ’yliyɔ, ’ɩn we kaa ’tɩtɛ ’wʋ. We ’nɛ we -zi ’ylisɔ -tʋgʋgblɛ. Nyɩmɛɛ ku zɔ we plaa, ’ɩn da ɔ zuzu -yɔ ɔ nyapɛlɩ suslolua ’wʋ, ’ɩn we sɩsalɩa -bha ’yli, ’ɩn we sɩsalɩ ’yaa ’lalii ’ylijɩjlɩda -yɔ we bnʋ ’yli. Nyɩmɛɛ ’wlukʋʋn lapʋpalɩgbʋ -yɔ ɔ dlɩwʋnyniluu gbʋ we bhua ’wʋ. 13 -Lu weee -we ɔ -laa la -we ’kaa zizeda -mɩ ɔ ’yu, we ’nɩ -mɩ. We ’dɛ weee mɩ ɔ ’yu, ɔ ’yli yɩ we -yɔ. Ɔ -yla -a yia -amɩaa lɛnʋgbʋ weee gbaa.
-Zezu -wa -Lagɔbʋbɔnyaa -kanyɔ ’kadʋ
14 -A ka *-Lagɔbʋbɔnyaa -kanyɔ ’kadʋ, ɔ ’tɛ la. Mɔ mnɩa -Lagɔɔ -gbɛ. Mɔ -wa -Lagɔɔ ’Yu -Zezu. We ’dɛɛ ’gbʋ, -we -a zʋa dlɩ -gʋ, -a kpa we la. 15 -Amɩaa -Lagɔbʋbɔnyaa -kanyɔ ’kadʋ mɩa, -a -ka sɩada -mɩ, ɔ mneni ɔ -yɔ -a ka sɩa dabʋdʋ, ’ɩn ɔ ’ka -amɩaa ’wʋyɔlʋe ’wʋlanʋ. Nɩɩ, ’Kuzu ka ɔ layla sɔ weee lʋ -aɩn ’bhisa, ’ɩn ɔmɔ ’nɩ gbʋnyuu lɛnʋ. 16 We ’dɛɛ ’gbʋ, -a -yɔ dlɩɩ ’wʋtɛlo nyni -Lagɔɔ ’ŋnɩmnɩkpe -yɔla. -Bhɛdɛ mɩa, ɔ ’nanɩdlɩ mɩ -bha. -A -ka -bha nyni, ’ɩn -Lagɔ yɩlɩa -aɩn nyazɩ, ’ɩn ɔ saa -aɩn ’wʋ -amɩaa sɩasɩa bhla ’nanɩdlɩ nya.
51 -Lagɔbʋbɔnyaa -kanyɔ ’kadʋ -mɔmɔ -ka -mɩ, nyɩma glaa wa -saa ɔ, ’ɩn ɔ nʋa -Lagɔlubho nyɩma -yla. Mɔ wlaa -li -yɔ ’slaka nyɩmaa gbʋnyuu ’gbʋ. 2 Ɔɔ -Lagɔbʋbɔnyaa -kanyɔɔ dɛ mɩa, ɔ ’nɩ ’wʋtɛ. We ’dɛɛ ’gbʋ -wa ’nɩa gbʋ -yi, -wa mnɔa, ɔ mneni ɔ ’ka wa gbɛgbɛɩn gbʋ kpa sayibheli. 3 Ɔ ’dɛ ’nɩ ’wʋtɛɛ ’gbʋ, we ’nɩ nɩɩ, nyɩmaa gbʋnyuu -yɔ -slaka -bhlogbɔɔ ɔ ’ka -sa, nɩɩ, ɔ ’dɛɛ -yɔ -nʋ klaa ’ya. 4 -Ɔ ’kaa ɔ ’dɛɛ ’ylimanɩe nya ɔ ’dɛ -sa -Lagɔbʋbɔnyaa -kanyɔ nya, ɔ ’nɩ -mɩ. -Lagɔ -bhlogbɔɔ mnenia ɔ ’ka nyɩmɛ *-Lagɔbʋbɔnyaa -kanyɔ -zɛlɩ *-Awlɔɔn ’bhisa.
5 ’Sa -bhlokpadɛ, Klisɩ ’nɩ ɔ ’dɛ ’ylimanɩ, ɔ ’nɩ ɔ ’dɛ la -Lagɔbʋbɔnyaa -kanyɔ ’kadʋ. -Lagɔ gbaa ɔ -ylaɛ:
«Na ’Yu -ɩn -mɩa, nɩɩ,
-zɛɛn ɩn ka -na Dide -zɛ.»
6 -Lagɔ nɛɛ ’ya -Lagɔsɛbhɛɛ bɛta -putu ’wʋɛ:
«Mɛlɩkisedɛkɩɩ -bho *-Lagɔbʋbɔnyɔ -ɩn -mɩa,
’ylɩ weee -nʋ nya.»
7 Da Klisɩ mɩa dʋdʋ -gʋ nɩ, ’ɩn ɔ yia -Lagɔ bhubhoe. -Mɔ ɔ bhubhoe wɛlɩ ’wʋ, -Lagɔ ɔ -zlalɩa -li, ’wʋkpɩkpɩe -yɔ wie nya. -Lagɔ -ɔ mnenia ɔ ’ka ɔ tlɩtlɩe gwevlalɩ, ’mɔ ɔ bhubhoea. ’Ɩn ɔ pɩlɩ -Lagɔ zɔlaa ’gbʋ, -mɔɔ yia ɔ yukwli pʋlʋ. 8 Klisɩ mɩa dɛ nɩ, -Lagɔɔ Yu -wa. We mɩ ’sa ’bhie, ’ɩn ɔ yia ɔ sɩasɩe ’wʋ -Lagɔɔ ’nʋŋwɛzʋzʋe ’kpɩa. 9 Ɔ tɩklɩmɩmɩe gbaa, nyɩma weee -wa zʋa ɔ ’nʋŋwɛ, ’ɩn ɔ yia wa Gbʋwʋsanyɔ -zɛ, ’ylɩ weee -nʋ nya. 10 ’Ɩn -Lagɔ yia ɔ -bhasa ɔ bʋbɔnyaa -kanyɔ ’kadʋ nya, Mɛlɩkisedɛkɩɩ lɛnʋgbʋʋ sɔlʋ.
A li lililu ’tɩtɛ
11 Wee gbʋ nɩ -gʋ, gbʋ -duun -a yia gbaa. Nɩɩ, a’a ’nʋ gbʋ ’wʋla slʋɩ, we ’gbʋ amɩaa gbʋʋ ’ji -yla gbagbɩe -kalɩ -yɔ. 12 Amɩaa ’bɩ ka -Lagɔgbʋ -yɔwʋgwlɛ. A mneni a ’ka yaa -slɛɛn gbʋslolunya -zɛ ’bhie, amɩa ’ka yaa -mʋʋ lɛnʋ, we mɩ tɛɩn nɩɩ, wa -slolu aɩn -Lagɔwɛlɩɩ tɩanʋ. Amɩa ’kaa lililu ’tɩtɛ li, amɩa mɩa nyɩtɩnyu ’nyɛda. 13 -Ɔ tʋa nyɩtɩnyu ’nyɛda, ’yuyolu -wa. Ɔ ’nɩ gbʋzɔnʋ -yɔ gbʋnyuu -yɔsɩsalɩ sa -yi. 14 ’Ɩn lililu ’tɩtɛ mɩa, nyɩma kpasɩɩ -nʋ -wa. Gbʋ weee -we ’wʋ wa ’plɩlɩa, we ka wa ’wlukʋʋn latɛmanɩ, ’ɩn wa yia gbʋnyuu -yɔ gbʋzɔnʋʋ -yɔsɩsalɩe ’kpɩa.
61 We ’dɛɛ ’gbʋ, Klisɩɩ -gʋgbʋʋ sloluee gwedɩlɩda mɩa, -a ’na -tʋlʋ -mʋʋ -bhlogbɔɔ -gʋ -nɩ, nɩɩ, -a nɔ -slɛɛn nyɩma kpasɩɩ -sloluwɛlɩ -zɔnʋ -gʋ. Wee sloluee gwedɩlɩda, mʋ -wa nɩɩ, -a ’bhʋ gbʋ -kpʋa ’bɩ, -a zʋ -Lagɔ dlɩ -gʋ. 2 Nɩɩ, batizee batizee+ 6:2 Nɩɩ, Zuifʋʋ budobudoe -yɔ batizee batizeee -gʋgbʋ we gba ’yaa. gbʋ klaa, nyɩmaa sɔ ’wlu lapalɩe klaa, tlɩtlɩnya glaa ’wʋsɔsʋe klaa, we -yɔ -Lagɔɔ nyɩmaa -yɔgbʋ ’wʋbhuzlɩ, -a ’na -tʋlʋ we -gʋ nɩ. 3 -A bɛ ’yu, nɩɩ, -Lagɔ -ka ŋwnu, ’mʋ -a yia lɛnʋa.
4 ’Lee, nyɩma -wa bhlia, wa mneni wa ’ka lʋyii? Nɩɩ, wa ka -Lagɔɔ san ’yɩ, wa yia -Lagɔɔ wlawlalu -we bhʋa yalɩ ŋwɛyɩ, ’ɩn wa yia Zuzu ’Pʋpa yibheli. 5 Wa ka -Lagɔwɛlɩ ŋwɛyɩ, ’ɩn wa yia we ’jiyibheli nɩɩ, we nanɩ ’yli. ’Ɩn da -Lagɔ -ka nyɩma ’wlulapɩlɩda -mɩ, ’tɩtɛ -we ’kaa yi, wa ka we yibheli. 6 -Mʋʋ ’bɩgʋ, wa -ka bhli nɩ, waa nyɩma mɩa, wa ’nɩ wa dlɩ bhitiee ’sɔnʋ mneni, -we ka gbʋ -wa, -zakpa ’sɔnʋ wamɩa kʋlʋa -Lagɔɔ ’Yu *su -gʋ la, ’ɩn wa yia nyɩma ’yoo ’nyɛ wa ’ka ɔ vɛlɩ.
7 Kpaa dʋdʋ mɩa nɩ, ’nyu -ka lʋa -zakpa duun, ’ɩn we maa we, ’ɩn -wa nʋa -bha lubho, ’ɩn we wlaa wa -yla kpaa -lu -zɔnʋ. We -ka ’sa -mɩ nɩ, -Lagɔ ŋwnaa we ’nyu la. 8 ’Ɩn wee dʋdʋ -ka ’wia -sunya -yɔ -petu ’nyuu wla nɩ, -zugba wee dʋdʋ ’nɩ -lu ’wʋkʋ, -Lagɔ yia we mɛ -yɔlatɩa slʋɩ, ’ɩn siea we yia.
9 Na bhelia -zɔnʋ, -a -ka ’sa gba, -a mɩ we -gʋ nɩɩ, ’yoo -zɔnʋ a bhlia. Wee ’yoo mɩa, gbʋwʋsa -yoo -wa. 10 -We ’nɩa tɩklɩɩ -mɩ, -Lagɔ’ɔ nʋ we lɛ: -we a nʋa lɛ, we -yɔ sa a -slolua nɩɩ, a -kalɩ ɔ zɛ -Lagɔnyɩmaa ’wʋsasɩe nya, ’ɩn a mɩa we lɛnʋda, ɔ ’na ’ka we ’wʋdlʋ. 11 -We -a yɩbhalɩa aɩn, mʋ -wa nɩɩ, a ’dɛ weee -gʋ -tʋ ladoluda, ’ɩn a ’ka we ’wlulapalɩda nyni, ’ɩn -we weee a dɩa dlɩ ’wʋ, we ’ka lɛnʋ. 12 We ’dɛɛ ’gbʋ a ’na ’yamanɩ -nɩ, nɩɩ, a ’tideli nyɩma -wa zʋa -Lagɔ dlɩ -gʋ, ’ɩn -wa kaa dlɩtie ɔ gbʋ ’wʋ. Waa ’sasʋkpa -nyɩma mɩa, ma yɩa -Lagɔɔ kwɛlu -we ka wɛlɩ ɔ wlaa.
-Lagɔ wlaa Ablaamʋ -yla ɔ wɛlɩ
13 Da -Lagɔ wlaa Ablaamʋ -yla ɔ wɛlɩ, ɔ ka ɔ ’dɛɛ ’ŋnɩ nya bi. Nɩɩ, -ɔ ’ylia ɔ -zia -Lagɔ, ɔ -kanyɔ ’nɩ -mɩ, we ’gbʋ, ɔ ’dɛɛ ’ŋnɩ nya ɔ bia. 14 Ɔ nɛɛ: «Cɩɩn, ’nyu na yia -mɩ laŋwnaa, ’ɩn ɩn ’ka -mɩ ’yuoyuaa -zlo ’nyɛ.» 15 Ablaamʋ nʋa dlɩ tiee, ’ɩn -we ka wɛlɩ -Lagɔ wlaa, ’ɩn ɔ yia we ’yɩ.
16 Nyɩma -ka bia yi nɩ, nyɩmɛ -ɔ ’ylia -ɔ -zia wa ’wʋ, -mɔɔ ’ŋnɩ nya wa bia. Wa -ka ’sa nʋ, -bha wa yɩa we gbʋzɔnʋ nya. Nɩɩ, mʋ saa -zlɛ la.
17 ’Sa we mɩa Ablaamʋʋ zʋayli -nyɩmaa -nʋ nya. Nɩɩ, -lu -zɔnʋ -we ka wɛlɩ -Lagɔ wlaa ma ’kaa we ’yɩ. -Lagɔ ’yɩbha ɔ ’ka -slolu nɩɩ, ɔ’ɔ ’bhʋlʋ ɔ wɛlɩ -gʋ la, we ’dɛɛ ’gbʋ, ɔ wlaa ɔ wɛlɩ, ’ɩn ɔ yia bi.
18 Nɩɩ, gbʋ ’sɔ -we’e ’bhitia, mʋ -wa ɔ wɛlɩ -wlawlɩe -yɔ bibie. -We mɩa dɛ -gʋ, -Lagɔ ’nɩ mneni ɔ ’ka yo ’tʋbhʋ. We ’dɛɛ ’gbʋ, -amɩa -wa ’yɩa zizeda -Lagɔ zɔ dlɩwʋdɩdɩe -we ɔ dɩa -aɩn ’yu la we ’kninie nya, we ka -aɩn ’kʋayli ’pa bhabha.
19 -We -a dɩa dlɩ ’wʋ, mʋ zʋa -aɩn ’yliyɔ. -A mɩ we -gʋ -kli, we ’tɛ la, ’ɩn we plaa -Lagɔɔ -mɔwlʋda ’tata, -we ka gbʋ -wa, we gege -buduu gwe ’bhisa.
20 Nɩɩ, we ’wʋ -Zezu plaa tɩa -aɩn ’yu ɔ ’ka -aɩn ’wʋsa. Ɔ ka Mɛlɩkisedɛkɩɩ -bho *-Lagɔbʋbɔnyaa -kanyɔ ’kadʋ -zɛ, ’ylɩ weee -nʋ nya.
7-Lagɔbʋbɔnyɔ Mɛlɩkisedɛkɩ
1 Nɩɩ, ɔɔ Mɛlɩkisedɛkɩ mɩa, mɔ -wa zlɩmɛ Salɛmʋgbee ’wlulapɩlɩnyɔ, ’ɩn -Lagɔ -ɔ mɩa -mɔ yalɩ ’pɩpɩ, -mɔɔ bʋbɔnyɔ ɔ -mɩa. Da Ablaamʋ mɩa tʋ -yɔ ’bhʋda, -zugba ɔ ka nyɩmaa ’wlulapɩlɩnya lu nɩ, ’ɩn ɔɔ Mɛlɩkisedɛkɩ yia ɔ yoo mnɩ. Wa gbelia ’wʋ, ’ɩn ɔ yia Ablaamʋ ’nyulaŋwna. 2 ’Ɩn -mɔɔ yia -we weee -mɔɔ ’yɩa waa nyɩmaa ’wlulapɩlɩnya kwɛɛ, we kugbuaa -gʋ -bhlonʋ ɔ ’nyɛ. Ɔɔ Mɛlɩkisedɛkɩɩ ’ŋnɩɩ ji -wa nyɩmaa ’wlulapɩlɩnyɔ tɩklɩɩ. ’Ɩn, ɔ mɩ ’yaa Salɛmʋgbee ’wlulapɩlɩnyɔ nya, mʋʋ ji -wa, -ɔ pɩlɩ nyɩma ’wlu la ’wʋtʋtʋe -dlɔɔ nya. 3 Ɔɔ Mɛlɩkisedɛkɩ mɩa, ɔ dide klaa, ɔ ’nyaa klaa, we -yɔ ɔ dʋkpasɩ, -a ’nɩ wa -yi. Ɔ gwalɩgbʋ -yɔ ɔ tlɩtlɩgbʋ ’sɔ, wa’a gba -mʋʋ -gʋgbʋ. Ɔ ’wlʋ -Lagɔɔ ’Yu, ɔ mɩ -Lagɔbʋbɔnyɔ nya ’ylɩ weee -nʋ nya.
4 Amɩaa ’dɛ yla sa ɔ ’ylia, ’ɩn -amɩaa dʋkpasa Ablaamʋ yia -lu ɔ ’yɩa tʋ -gʋda, we kugbuaa -gʋ -bhlonʋ ɔ ’nyɛ. 5 Nɩɩ, -Lagɔɔ tite nɛɛ nɩɩ, *Leviii ’yuoyua -wa mɩa -Lagɔbʋbɔnya nya, wa ’yɩbhalɩ -lu weee kugbuaa -gʋ -bhlonʋ Izlaɛlɩnyɩma. Wa ’yɩbhalɩ we wa, -maa ’dɛ yi, Ablaamʋʋ ’yuoyua nya -mɩ wamɩa ’bhisa. 6 Mɛlɩkisedɛkɩ ’nɩ Leviii zʋayli -nyɩmɛ, ’ɩn Ablaamʋ yia ɔ -luu kugbuaa -gʋ -bhlonʋ ’nyɛ, ’ɩn Ablaamʋ -ɔ -yla -Lagɔ wlaa wɛlɩ, ɔmɔ yia -mɔɔ ’nyulaŋwna. 7 -A -yi we ’ji nɩɩ, kpasa ŋwna ’bɩsʋayu ’nyu la. -Mʋʋ ’nɩ kpɛlɩe -gʋla -ka. 8 -Lagɔbʋbɔnya mɩa, ma yɩa nyɩma kwɛɛ -luu kugbuaa -gʋ -bhlonʋ. Nɩɩ, nyɩma -maa -mɩa, ’ɩn ’ylɩ yabhlo nya, tlɩa -maa yia. ’Ɩn Mɛlɩkisedɛkɩ mɩa, ɔmɔ ka ’ya wee -luu kugbuaa -gʋ -bhlonʋ ’yɩ, ’ɩn ɔ mɩ ’yliyɔgada ’ylɩ weee -nʋ nya, ’sa -Lagɔwɛlɩ gbaa. 9 Leviii zʋayli -nyɩma yɩa nyɩma kwɛɛ -lu kugbuaa -gʋ -bhlonʋ. ’Ɩn wa mneni wa ’ka gba nɩɩ, Ablaamʋʋ gbɛgbɛɩn Leviii ’dɛbhie ka wee -lu kugbuaa -gʋ -bhlonʋ ’pɛnɩ. 10 Nɩɩ, Ablaamʋ mɩ *Leviii dʋkpasa nya. ’Ɩn da ɔ -yɔ Mɛlɩkisedɛkɩ ’kaa ’wʋgbeli nɩ, -zugba Levii mɩ ɔ ’pɩɔn ’wʋ, wa ’nɩ -slɔ ɔ gwalɩ.
-Zezu -yɔ Mɛlɩkisedɛkɩ
11 Leviii sɔlʋʋ -Lagɔbʋbʋe -wa Moizɩɩ titee gwe. Nɩɩ, Leviii sɔlʋʋ -Lagɔbʋbʋe -ka yaa gba nɩ, wa ’na ’ka yaa -Lagɔbʋbɔ sɔ -putu ligbe: -we mɩa Mɛlɩkisedɛkɩɩ -bho -nʋ nya, ’ɩn -we ’nɩa -Awlɔɔn -bho -nʋ. We ’nɩ mʋʋ? 12 ’Ɩn wa -ka -Lagɔbʋbɔ sɔ ’bhiti nɩ, we mɩ nɩɩ, wa ’bhiti tite. 13 Nyɩmaa -Kanyɔ -ɔ ka -gʋgbʋ -Lagɔwɛlɩ gbaa, zʋa -putu ’yli -nyɩmɛ ɔ -mɩa. Nyɩma weee -yi we ’ji nɩɩ, Zudaa zʋayli -nyɩmɛ -wa. Nɩɩ, -Lagɔbʋbɔnyɔ yabhlogbɔɔ ’nɩ wee zʋa nɩ ’yli ’bhʋlʋ. ’Ɩn Moizɩ mɩa -Lagɔbʋbɔnyaa -gʋgbʋ gbada, ɔ ’nɩ wee zʋa nɩ ’yli -nyɩmaa -gʋgbʋ gba.
15 -A yɩ -slɛɛn we -yɔ ’nanʋʋ nɩɩ, -Lagɔbʋbɔnyɔ -putu -ka yi nɩ, -mɔɔ ’wlʋ Mɛlɩkisedɛkɩ. 16 We ’nɩ zʋayli -tite -gʋ ɔ -zɛlɩ -Lagɔbʋbɔnyɔ. ’Yliyɔgagɩe -we ’nɩa bhloluda -ka, we ’tɩtɛ -gʋ ɔ -zɛlɩa we. 17 Gbʋzɔnʋ -wa, -Lagɔwɛlɩ nɛɛ:
«-Mɩ -wa Mɛlɩkisedɛkɩɩ -bho -Lagɔbʋbɔnyɔ
’ylɩ weee -nʋ nya.»
18 -Slɛɛn mɩa, tite sʋa ka ’plɩ, -we ka gbʋ -wa, we ’nɩ ’tɩtɛ -ka, ’ɩn we bhe. 19 Nɩɩ, Moizɩɩ tite ’nɩ mneni we ’ka -lu yabhlogbɔɔ -mɔwlʋlʋ, ’ɩn -mʋʋ ’ka gba. Nɩɩ, dlɩwʋdɩdɩe -we -zia tɩanʋ ’wʋ, -Lagɔ ka we -aɩn -slolu. We gbɛgbɛɩn -a nynia ɔ -yɔla.
20 We bhlɩ -mʋʋ -gʋ, -Lagɔ yia bi. Nɩɩ, -wa -zɛa ɔ bʋbɔnya tɩada, ɔ ’nɩ -maa ’gbʋ bi. 21 Nɩɩ, -Zezu ɔ -zɛlɩa -Lagɔbʋbɔnyɔ bibie nya, ɔ nɛɛ ɔ -yla:
«Jejitapɛ ka bi,
’ɩn ɔ ’na ’ka ɔ wɛlɩ -gʋ lʋyi:
‹-Mɩ -wa na bʋbɔnyɔ
’ylɩ weee -nʋ nya.› »
22 We ’dɛɛ ’gbʋ, -slɛɛn, *’wʋsuslolue -we -Lagɔ -yɔ -aɩn nʋa lɛ -Zezuu gbɛgbɛɩn, we ’yli we -zi ’wʋsuslolue -we ɔ -yɔ nyɩma nʋa lɛ Moizɩɩ gbɛgbɛɩn.
23 -Mʋʋ ’bɩgʋ, gbʋ -putu mɩ -bha. Nɩɩ, -Lagɔbʋbɔnya duun ka ’plɩ, -we ka gbʋ -wa, -bhlo ka tlɩ, ’ɩn wa palɩa -bhlo ɔ ’bɩgʋ. Wa ’yabhlogbɔɔ ’nɩ -Lagɔ bʋbɔda -tʋ ’ylɩ weee -nʋ nya. 24 Nɩɩ, -Zezu mɩa, -mɔɔ mɩ -bha ’ylɩ weee -nʋ nya, ’ɩn -ɔ ’kaa ɔ ’bɩgʋ ’plɩlɩ -Lagɔbʋbɔnyɔ nya, -mɔɔ -kanyɔ ’nɩ -mɩ. 25 We ’dɛɛ ’gbʋ -wa nynia -Lagɔ -yɔla ɔ gbɛgbɛɩn, ɔ mneni ɔ ’ka wa gbʋ ’wʋsa, ’ylɩ weee -nʋ nya. -We ka gbʋ -wa, -Zezu -ga ’yliyɔ ’ylɩ weee nya, ’ɩn ɔ mɩ -Lagɔ bhubhoeda -maa ’gbʋ.
26 We mɩ tɩklɩɩ nɩɩ, -Zezu -mɩ -amɩaa *-Lagɔbʋbɔnyaa -kanyɔ ’kadʋ nya, -we ka gbʋ -wa, ɔ mɩ -mɔwlʋda, ’sla -yɔ gbʋnyuu yabhlogbɔɔ ’nɩ ɔ ’wʋ -mɩ. Ɔ -yɔ gbʋnyuu -lɛnʋnya mɩ -yɔbhʋbhlʋda, ’ɩn -Lagɔ yia ɔ ’wʋbhu yalɩ, ɔ pɩlɩ -lu weee ’wlu la. 27 Ɔ ’nɩ -Lagɔbʋbɔnyaa -cɩan ’kadɩ tɔlʋa ’bhisa -mɩ. We ’nɩ nɩɩ, sa zlɩ zlɩa -bhlo, ’sa ɔ ’ka ’slaka -sa -Lagɔ -yla ɔ ’dɛɛ gbʋnyuu -yɔ nyɩmaa gbʋnyuuu ’gbʋ, -maa ’bhisa. We ’nɩ -mʋʋ. Nɩɩ, -zakpa -bhlogbɔɔ ɔ -saa ’slaka ɔ ’dɛɛ wlawlɩe ’slaka nya. 28 Nyɩma ’nɩ ’wʋtɛ, ’ɩn ’ma Moizɩɩ tite saa -Lagɔbʋbɔnyaa -cɩan ’kadɩ nya. ’Ɩn titee ’bɩgʋ -Lagɔ bia. Wee bibie mɩa, mʋ -zɛlɩa -Lagɔɔ ’Yu -ɔ mɩa tɩklɩɩ we ’ka gba ’ylɩ weee -nʋ nya, ɔ bʋbɔnyaa -kanyɔ.
8-Zezu -wa ’wʋsuslolue loluu ’kɔlʋ
1 -We -a mɩa gbada, we ji nɩ: -a ka ’sasʋkpa -Lagɔbʋbɔnyaa -kanyɔ ’kadʋ -ɔ -dɩa ’tɩtɛ -ka -Lagɔɔ ’ŋnɩmnɩkpee lilisɔlʋ la -mɔ yalɩ. 2 -Lagɔɔ -mɔwlʋda ɔ nʋa lubho. -Mɔ -wa nɩmɛkupalʋʋ dɛbhie. ’Mʋ Jejitapɛ ’sʋbhaa, we ’nɩ nyɩmɛ ’sʋbha we.
3 -Lagɔbʋbɔnyaa -cɩan ’kadɩ weee wa -saa -bha wa ’ka -lu wla, ’ɩn wa ’ka ’slaka -sa -Lagɔ -yla. We -ka ’sa -mɩ nɩ, da -Zezu yia, -lu -we ɔ ’kaa wla, we mɩ ɔ kwɛɛ. 4 Klisɩ -ka yaa dʋdʋ -gʋ -mɩ, ɔ ’nɩa -Lagɔbʋbɔnyɔ -zɛa yi, -we ka gbʋ -wa, Moizɩɩ titee sɔlʋ, -Lagɔbʋbɔnya -wa wlaa -li -Lagɔ -yla wa mɩ dʋdʋ -gʋ. 5 Waa -Lagɔbʋbɔnya mɩa, *-Lagɔbudu zɔ wa nʋa lubho. Wee -Lagɔbudu -yɔ yalɩ -nʋ ’wʋwlʋ, ’ɩn yalɩli -zɔnʋʋ zuzu -wa. Da Moizɩ ’kaa ’wʋsusloluee nɩmɛkupalʋ ’sʋbha nɩ, -Lagɔ nɛɛ ɔ -ylaɛ: «-Ɩn -mna ’wʋ, -ɩn ’sʋbha we, we ’wʋwlʋ -nʋ -we ɩn -slolua -mɩ ’klʋ -gɔgɔ ’kadʋ ’wlu ’bhisa.» 6 Sa lubho -we -Lagɔ ’nyɛa -Zezu ’ylia we -zia waa -Lagɔbʋbɔnyaa -nʋ, ’sa -bhlokpadɛ wee ’wʋsuslolue -we ka ’kɔlʋ -Zezu -mɩaa ’ylilo -zia ’wʋsusloluee tɩanʋ. -We ka gbʋ -wa, wee ’wʋsuslolue mɩa, -Lagɔɔ wlawlawɛlɩnya -gʋ we bhʋa.
7 We -ka yaa nɩɩ, wee ’wʋsusloluee tɩanʋ mɩ gbada, wa ’na ’ka yaa we ’lulolu lɛnʋ.
8 Nɩɩ, -Lagɔ dɩlɩa ɔ nyɩma gbʋ:
«Jejitapɛ nɛɛ:
‹’Ylɩ -we nya ɩn ’kaa *’wʋsuslolue lolu lɛnʋ,
ɩn -yɔ Izlaɛlɩnyɩma -yɔ Zudaa nyɩma ’sɔ nyɩdɩ,
wee ’ylɩ mɩ yida.
9 ’Wʋsuslolue -we ɩn -yɔ wa dʋkpasɩ nʋa lɛ
-maa sɔ -yɔwʋbhulʋe -yɔ
-maa Ezipʋtʋ -nyɩmaa kwɛɛ -sasɩe nya,
wee ’wʋsuslolue -lolu -mʋnɩ -yɔ we ’na ’ka ’wʋwlʋ.
Wa ’nɩ wee ’wʋsuslolue ’nʋŋwɛ zʋʋ ’gbʋ,
’ɩn ɩn yia wa sɔ ’bɩsa,
’sa Jejitapɛ gbaa.
10 Wee ’ylɩnya -mɩnɩɩ ’bɩgʋ,
sa ɩn -yɔ Izlaɛlɩnyɩma ’sɔ ’kaa ’wʋsuslolu,
mʋ nɩ: na tite na yia wa ’wlukʋʋn zʋa,
’ɩn ɩn ’ka we cɛlɩ wa dlɩ zɔ,
’ɩn ɩn ’ka wa -Lagɔ -zɛ,
’ɩn wamɩa ’ka na nyɩma -zɛ.
11 Wa ’na ’ka ’maslɛɛn wa -lima gbʋ -slolu.
Nyɩmɛ yabhlogbɔɔ ’na ’ka ɔ bheli -yla gbaɛ:
«-Ɩn yibheli Jejitapɛ» -we ka gbʋ -wa,
we ’ka ’nyɛnyɛyua -gʋ ’bhʋ we ’ka nyɩma kpasɩ ylɩ,
yibhelia wa ’dɛ weee yia ’mɩ.
12 Wa gbʋnyii na yia ’wʋtɩa,
’ɩn ɩn ’na ’ka ’maslɛɛn wa lɛnʋgbʋ ’nyii dlɩ -gʋ ’pa.› »
13 Nɩɩ, -Lagɔ -ka ’wʋsuslolue loluu gbʋ gba nɩ, -zugba ɔ ka we tɩanʋ ’sʋa -zɛlɩ. ’Ɩn -we -ka sʋa, we ka gɔ, ’ɩn la we yia daylɩ ’bhʋa.
9’Wʋsusloluee tɩanʋʋ ’slaka
1 ’Wʋsusloluee tɩanʋ mɩa, we ka tite, sa nyɩmɛ ’kaa -Lagɔ bʋbɔ, ’mʋ we slolua. We ka -Lagɔbʋbɔda yabhlo dʋdʋ -gʋ. 2 We ’dɛɛ ’gbʋ nyɩma yia -bha nɩmɛkupalʋ ’sʋbha. We nʋkplɛɛ tɩanʋ mɩa, ’mʋ wa laa -Lagɔɔ -mɔwlʋda. We nʋkplɛ mɩa, ’napɛ -yɔ ’tabhle -yɔ ’floo wa ’nyɛa -Lagɔ, we mɩ -bha. 3 -Mɔ we lʋʋ, ’naa yabhlo -dɩa wee nɩmɛkupalʋ ’wʋ ’sɔ. Wee ’naa lʋʋ -wa we nʋkplɛɛ ’sɔnʋ -we wa laa -Lagɔɔ -mɔwlʋda ’tata. 4 -Bhɛdɛ mɩa, ’wlɩgʋsielilu -we mɩa -can nya, we mɩ -bha. ’Ɩn ’kesu -we nʋkplɛ ’wʋsusloluee wɛlɩ mɩa, we mɩ -bha. Wee ’kesuu ku -yɔ mɩ -can nya. We nʋkplɛ mɩa, -can -tʋkpʋ -we kaa *manɩ ’wʋ klaa, -Awlɔɔn kɔɔsu -we minia -yɔ klaa, we -yɔ tʋkpanya -we -gʋ -Lagɔ cɛlɩa ɔ ’wʋsusloluee wɛlɩ, we mɩ -mɔ. 5 -Mɔ we -gʋ *selubɛɛn ’sɔ -we wa tɛlɩa, we mɩ -bha. Mʋ slolua nɩɩ, -Lagɔ mɩ -bha. ’Kesuu ’wlu -we -gʋ wa mnia nɩmɛɛ ’pɩɔn gbʋnyuu lamumnie saa, -mɔ we -kapuenya nynia. Nɩɩ, we ’nɩ we ’ji -gba -bhla.
6 Nɩɩ, we nʋkpla -luu ladɩdɩe -ka sa bhɩa, ’ylɩ weee nya, -Lagɔbʋbɔnya plaa we nʋkplɛɛ tɩanʋ ’wʋ, ’ɩn wa nʋa wa -Lagɔbʋbɔ -lubho. 7 We nʋkplɛɛ ’sɔnʋ mɩa, -Lagɔbʋbɔnyaa -kanyɔ ’kadʋ -bhlogbɔɔ plaa -mɛmɛ. -Zʋ ’wʋ, ɔ pla -mɔ -zakpa -bhlogbɔɔ. Nɩmɛɛ ’pɩɔn ’nɩ ɔ kwɛɛ -mɩ, ɔ ’nɩ mneni ɔ ’ka -mɔ pla. Ɔ -ka -mɔ pla nɩ, ’ɩn ɔ wlaa we -Lagɔ -yla, ɔ ’dɛɛ ’gbʋ, we -yɔ nyɩmaa gbʋnyii -we ka ’ji wa ’nɩa -yii ’gbʋ. 8 Sanɛɛ ’sa Zuzu ’Pʋpa slolua -aɩn nɩɩ, yalɩɩ -mɔwlʋda ’tataa ’yoo ’nɩ -slɔ -kalɩ. ’Mʋ, wee nɩmɛkupalʋʋ tɩanʋ ’nɩ -slɔ labhʋ, we ’na ’ka -kalɩ. 9 -We mɩa dɛ, we ’yli yabhlo -wa. Mʋ slolua -zɛɛn -aɩn nɩɩ, -we weee wa wlaa -Lagɔ -yla, ’slaka weee wa -saa, we ’nɩ mneni we ’ka nyɩmɛ -ɔ bʋbɔa -Lagɔ, ɔ dlɩ dlɩ tɩklɩɩ -zɛlɩ we ’ka gba. 10 Wee wlawlali -yɔ ’slakanya mɩa dɛ nɩ, lilie klaa, ’mamɩe klaa, we -yɔ budobudoee gbʋʋ ’dɛkpʋa we gbaa. We’e nʋnʋ nyɩmaa dlɩ -lu yabhlogbɔɔ, ’ɩn bhla -we nya -Lagɔ nʋa -lu weee ’wʋsuslolue lolu lɛ, -bha wee ’sasʋkpa -tite ’bhʋa la.
Klisɩɩ ’pɩɔɔn ’ylilo
11 Nɩɩ, Klisɩ yia *-Lagɔbʋbɔnyaa -kanyɔ ’kadʋ nya. ’Ɩn -li -zɔnʋ -we mɩ bhaa la, mɔ yia we -aɩn ’nyɛa. Nɩmɛkupalʋ -we zɔ ɔ nʋa ɔ lubho nɩ, we ’yli, ’ɩn we mɩa ’nanʋʋ we ’ka dʋdʋ -gʋ -nʋ -zi. We ’nɩ nyɩma ’sʋbha we. -We -Lagɔ -laa la dʋdʋ -gʋ, we ’nɩ we glaa -mɩ. 12 Nɩɩ, Klisɩ pla -Lagɔɔ -mɔwlʋda ’tata -zakpa -bhlogbɔɔ ’ylɩ weee -nʋ nya. Ɔ ka -mɔ pla, ’ɩn we ’nɩ -vlɔɔ ’pɩɔn -yɔ ’bhliyuu ’pɩɔn ɔ wla ’slaka nya, nɩɩ, ɔ ’dɛɛ ’pɩɔn ɔ wlaa. ’Sa ɔ -saa -aɩn gbʋ ’wʋ ’ylɩ weee -nʋ nya. 13 Nɩɩ, -vlɔɔ ’pɩɔn klaa, ’bhligblɔɔ ’pɩɔn klaa, we -yɔ ’bhlii ’tʋtɔ, ’mʋ wa slua, -wa plaa pʋɩn, wa ’wluo. Tɔʋn, ’ɩn wa pʋɩn mumnia la, ’ɩn wa wlʋa -mɔ. 14 We -ka ’sa -mɩ, Klisɩɩ ’pɩɔn ’yli, we ka ’tɩtɛ ’wʋ we -zi nɩmaa -nʋ. Nɩɩ, -Lagɔɔ Zuzu -ɔ mɩa la ’ylɩ weee -nʋ nya, we ’tɩtɛ nya ɔ wlaa ɔ ’dɛ, ’slaka -we ’nɩa ’sla -yɔ -ka nya -Lagɔ -yla. We ’dɛɛ ’gbʋ, ɔ ’pɩɔn mneni we ’ka -amɩaa dlɩ zɔ lawɔlʋ, ’ɩn gbʋ -we kwaa -aɩn tlɩtlɩe ’wʋ, we ’ka we -aɩn ’wʋsa. ’Ɩn -a ’ka ’yliyɔga -Lagɔɔ lubho nʋ.
’Wʋsuslolue loluu ’kɔlʋ
15 We ’dɛɛ ’gbʋ, Klisɩ mɩa -Lagɔ -yɔ nyɩma ’sɔ nyɩdɩɩ ’wʋsuslolue loluu ’kɔlʋ nya. Nɩɩ, nyɩma -wa -Lagɔ laa, ’ɩn -wa -yla ɔ wlaa ɔ wɛlɩ zʋzɔnʋ -we mɩa ’ylɩ weee -nʋ nyaa daa, -maa ’ka we ’yɩ Klisɩɩ tlɩtlɩee ’gbʋ. ’Ɩn ɔ ’ka wa ’wʋzɩtɩ gbʋnyuu -we wa nʋa lɛ ’wʋsusloluee tɩanʋʋ bhla, we gbɛgbɛɩn.
16 Wɛlɩ nyɩmɛ tɩa, wa ’nɩ -slɔ we -slolu nɩɩ, ɔ ka tlɩ, wa’a nɔ we -gʋ. 17 Nɩɩ, nyɩmɛ -ka wɛlɩ tɩ ’bhie ɔ ’ka tlɩ, we ka ’nʋŋwɛ. -Mɔɔ -ka ’yliyɔga, we sa bhe. 18 We ’dɛɛ ’gbʋ ’pɩɔn ’nɩ laslue nɩ, ’wʋsusloluee tɩanʋ ’na ’ka lɛnʋ. 19 Nɩɩ, tɩada mɩa, Moizɩ zɛlɩa -Lagɔɔ titee nʋkpla -wɛlɩ weee nyɩma weee -yla. Tɔʋn, ɔ gbʋanɩa *isɔpʋsuu ’klɩya ’wluo ’kwleeni zalʋ la, ɔ faa we ’bhliyuaa ’pɩɔn klaa, -vlɔɔ ’pɩɔn klaa, we -yɔ ’nyu lʋ, ’ɩn ɔ yia we ’mni -Lagɔɔ titee ’sɛbhɛ -yɔ nyɩma weee -gʋ. 20 ’Ɩn ɔ nɛɛ: «-We mɩa da nɩ, mʋ -wa ’wʋsusloluee ’pɩɔn. ’Wʋsuslolue -we -Lagɔ gbaa a zʋ ’nʋŋwɛ, mʋ -wa.» 21 ’Ya ’sa -bhlokpadɛ ɔ ’mnia ’pɩɔn nɩmɛkupalʋ -gʋ, we -yɔ -li -we ’wʋ wa bʋbɔa -Lagɔ, -mʋʋ weee -gʋ. 22 -Mɔ tite ’wʋ, -lu -we ’pɩɔn ’nɩa -mɔwlʋlʋ, we ’nɩ ’wʋzu. ’Pɩɔn ’nɩ laslue nɩ, nyɩmaa -yɔgbʋ ’wʋtɩtɩe ’nɩ -mɩ.
Klisɩ plaa yalɩ nyɩmaa ’gbʋ
23 Wee nɩmɛkupalʋʋ nʋkplali mɩa, yalɩlii zuzu we -mɩa, ’ɩn nɩmaa ’pɩɔn nya wa ’kaa we -mɔwlʋlʋ. Nɩɩ, we mɩ nɩɩ, wee yalɩlii -yɔ -slaka ’yli we -zi dʋdʋ -gʋ -nʋ. 24 We ’nɩ nyɩmaa ’sʋbha ’sʋbha -mɔwlʋda -we -wa yalɩ -nʋʋ zuzu, we ’wʋ Klisɩ pla. Nɩɩ, -mɔ yalɩɩ ’dɛbhie -gbolu ɔ plaa, ’ɩn ɔ mɩa -slɛɛn -Lagɔ ’yu -amɩaa ’gbʋ. 25 -Zʋ ŋwɛɛ *-Lagɔbʋbɔnyaa -kanyɔ ’kadʋ plaa -mɔwlʋda ’tata nɩmaa ’pɩɔn nya. Nɩɩ, Klisɩ ’nɩ yalɩ pla ɔ ’ka ɔ ’dɛ wla -zakpa duun. 26 We -ka yaa ’sa -mɩ, we ’ka dʋdʋʋ lalabhla ’wʋbhʋ, ɔ ka yaa sɩa -zakpa duun. -Ɩnnya, we ’nɩ ’sa -mɩ. Nɩɩ, -slɛɛn mɩa, dʋdʋʋ bhɩa bhla Klisɩ ’wlʋa dʋdʋ -gʋ -zakpa -bhlogbɔɔ ɔ ’ka gbʋnyuu lasa, ɔ ’dɛɛ wlawlɩe ’slaka nya. 27 Sa nyɩma weee yia tlɩa -zakpa -bhlogbɔɔ, ’ɩn we ’bɩgʋ -Lagɔ ’ka wa -yɔgbʋ ’wʋbhu, 28 ’sa -bhlokpadɛ Klisɩ wlaa ɔ ’dɛ -zakpa -bhlogbɔɔ ɔ ’ka nyɩma duuun gbʋnyuu lamumni. Ɔ -zakpa ’sɔnʋ yia ’wlʋa. -Mʋʋ mɩa, we ’nɩ gbʋnyuu ɔ yi lamumnia, nɩɩ, -wa mɩa ɔ wʋda, ’ma ɔ yia gbʋ ’wʋsaa.
10Klisɩ yia -Lagɔɔ dʋmagbʋ lɛnʋa
1 Moizɩɩ tite mɩa, we ’nɩ yalɩlii ’ylii ’dɛbhie. Nɩɩ, zʋzɔnʋ -we ’kaa lɛnʋ, we zuzu -wa. We ’dɛɛ ’gbʋ, -zʋ ŋwɛɛ -slaka -bhlokpadɛ -we wa tʋa -sada, nyɩma -wa nynia -Lagɔ -yɔla, we ’nɩ mneni we ’ka wa nʋ tɩklɩɩ we ’ka gba. 2 We -ka yaa -mʋʋ nɩ, -zugba -mama bʋbɔa -Lagɔ, -maa dlɩ ’na ’ka -maa gbʋ dɩlɩ -maa gbʋnyiii ’gbʋ, ’ɩn wa ’na ’ka ’slaka -sada -tʋ, wa ka -mɔwlʋ ’ylɩ weee -nʋ nyaa ’gbʋ. 3 Nɩɩ, we ’nɩ ’sa -mɩ. Wee ’slaka wa saa da -zʋ ŋwɛɛ, mʋ nʋa lɛ, ’ɩn wa ligbea wa gbʋnyii. 4 -We ka gbʋ -wa, ’bhligblɔɔ ’pɩɔn -yɔ -vlɔɔ ’pɩɔn ’nɩ mneni we ’ka nyɩmɛɛ gbʋnyii lamumni.
5 We ’dɛɛ ’gbʋ Klisɩ ’kaa dʋdʋ -gʋ yi nɩ, ɔ nɛɛ -Lagɔ -ylaɛ:
«-Ɩn ’nɩ ’slaka -yɔ wlawlali ’yɩbha.
Nɩɩ, -ɩn ka ’mɩ ku ’nyɛ.
6 ’Slaka -nɩma -we wa siea we -yɔ gbʋnyuuu ’slaka
’nɩ -mɩ dʋdʋ nanɩ.
7 We nya, ɩn gbaɛ:
‹-Lagɔ, -amɩ nɩ.
Yi ɩn yia ɩn ’ka -na dʋmagbʋ lɛnʋ.
Mʋ mɩa na daa cɛlɩda,
-mɔ -Lagɔɔ glɩglɩ -sɛbhɛ ’wʋ.› »
8 Klisɩ nɛɛ tɩaɛ: «’Slaka klaa, wlawlali klaa, ’slaka -nɩmaa -siesie klaa, we -yɔ gbʋnyuuu ’slaka, -ɩn ’nɩ we ’yɩbha, ’ɩn we ’nɩ -mɩ dʋdʋ nanɩ.» Ɔmɔ ka ’sa gba, ’ɩn Moizɩɩ tite -nanʋ nɛɛ nɩɩ, wa nʋ we lɛ. 9 Ɔ nɛɛ ’yaɛ: «-Amɩ, yi ɩn yia, ɩn ’ka -na dʋmagbʋ lɛnʋ.» Bhlasabhla -slaka mɩa, ’mʋ Klisɩ -saa la ɔnʋʋ ’slaka nya. 10 -We -Lagɔ ’yɩbhaa, ’mʋ -Zezu Klisɩ nʋa lɛ, nɩɩ, ɔ ’dɛ ɔ wlaa -zakpa -bhlogbɔɔ ’slaka nya ’ylɩ weee -nʋ nya. We gbɛgbɛɩn -a wlʋlʋa -mɔ.
11 Zlɩo zlɩ, -Lagɔbʋbɔnyɔ -mɔmɔ -ka -mɩ, -mɔɔ yligbe bhʋ -gʋ -mɔɔ -Lagɔbʋbɔ -lubho nʋda. ’Slakaa ’yli -bhlo ɔ saa -zakpa duun, ’ɩn we ’nɩ mneni we ’ka nyɩmaa gbʋnyii -bhasa. 12 Nɩɩ, Klisɩ -sa ’slaka -zakpa -bhlogbɔɔ ’ylɩ weee -nʋ nya nyɩmaa gbʋnyiii ’gbʋ, ’ɩn ɔ yia -Lagɔɔ lilisɔlʋ ladɩ. 13 -Slɛɛn mɩa, ɔ mɩ -Lagɔ wʋda -mɔɔ ’ka ɔ tʋnyɩma ɔ bhʋ zɔ lapalɩ. 14 Nɩɩ, ’slaka -bhlogbɔɔ nya ɔ nʋa nyɩma weee -wa ɔ mɩa -mɔwlʋlʋda, tɩklɩɩ we ’ka gba ’ylɩ weee -nʋ nya.
15 Zuzu ’Pʋpa mɩ ’ya we gbʋdayɩnyɔ nya -aɩn ’yu. Ɔ nɛɛ:
16 «Jejitapɛ nɛɛ:
‹’Wʋsuslolue na -yɔ wa ’sɔ yia cɩ lɛnʋa, mʋ nɩ:
na tite na yia wa dlɩ zɔ zʋa.
’Ɩn, ɩn ’ka we cɛlɩ wa ’wlukʋʋn.› »
17 Ɔ nɛɛ ’yaɛ:
«Ɩn ’na ’ka wa gbʋnyii -yɔ wa mnɔmnɔe dlɩ -gʋ ’pa.»
18 Nɩɩ, -Lagɔ -ka wa gbʋnyii ’wʋtɩ nɩ, -zugba wa ’nɩ ’maslɛɛn gbʋnyuuu ’slakaa gbʋ -ka.
A -tʋ dlɩ zʋda
19 Na bhelia, -amɩaa dlɩ ’tɛ ’wʋ -mɔwlʋda ’tataa plada -Zezuu ’pɩɔɔn ’gbʋ. 20 Ɔ ka ’yoo -lolu -we kwaa nyɩma ’yliyɔgagɩe ’wʋ -aɩn -yla lapalɩ. We ka nɩmɛkupalʋʋ nyɩdɩ naa ’wʋplɩlɩ. -Mʋʋ ji -wa nɩɩ, ɔ ’dɛɛ ku ’wʋ we ’plɩlɩa. 21 -Mʋʋ ’bɩgʋ, -a ka *-Lagɔbʋbɔnyaa -kanyɔ yabhlo, mɔ -wa -Lagɔɔ -buduu -kanyɔ. 22 -Amɩaa dlɩ mɩ -mɔwlʋda gbʋnyuu -we dɩlɩa -aɩn gbʋʋ daa, -amɩaa ku mɩ -yɔwɔlʋda ’nyu -zɔnʋ nya, we ’gbʋ, -amɩaa -gʋ -bi, ’ɩn -a nyni -Lagɔ -yɔla dlɩ weee nya. 23 Nɩɩ, dlɩwʋdɩdɩe -we ka gbʋ -a mɩa nyɩma -yla gbada, -a kpa we la -kli, -we ka gbʋ -wa, -Lagɔ -ɔ wlaa ɔ wɛlɩ, ɔ’ɔ ’bhʋlʋ we -gʋ la. 24 -A ’yɩ ’klɩ sa -a ’kaa ’kʋayli ’pʋpalɩ, -a ’ka nyɩmaa zɛkalɩ, ’ɩn -a ’ka ’nanɩ nʋ, we daa. 25 Nɩɩ, ’wlu -a gbelia da zlɩ tɔlʋa zlɩ, -a ’na -salɩ -mʋʋ kwɛ ’bɩ -nɩ, sa tɔlʋa mɩa we nʋda ’bhisa. -A ’pʋpalɩ ’kʋayli, we mɩ nɩɩ, -a nʋ we lɛ bhabha, da a mɩa we -yɔyɩda nɩɩ, Nyɩmaa -Kanyɔɔ yiyibhla ka cɩpa.
26 -A ka gbʋzɔnʋ ’kpɩa, ’ɩn -slɛɛn, -a -ka gbʋnyuu lɛnʋda -tʋ -amɩaa ’dɛ ’yibadɩ nɩ, ’slaka -we ’kaa -amɩaa gbʋnyii lamumni, we ’nɩ -mɩ. 27 We -ka ’sa -mɩ, -we -bhlogbɔɔ -a ’kaa wʋ nyanɔ dlɩ nya, mʋ -wa nɩɩ, -Lagɔ yia -amɩaa -yɔgbʋ ’wʋbhua, ’ɩn ɔ ’ka ɔ tʋnyɩma -sie -kosu ’kadʋ ’wʋ. 28 Nyɩmɛ -ɔ ’nɩ Moizɩɩ tite ’nʋŋwɛ zʋ, nyɩma ’sɔ, nyɩma ta -ka we gbʋdayɩnya nya -mɩ, wa ’na ’ka ɔ nyazɩ ’yɩlɩ, ’ɩn wa bhaa ɔ. 29 We -ka ’sa -mɩ, nyɩmɛ -ka -Lagɔɔ ’Yu ’wʋnyɛ, -kaslʋ ’wʋ -Lagɔ yia ɔ ’paa ’nyumɛɛ. We ’nɩ mʋʋ? Nɩɩ, ɔɔ nyɩmɛ mɩa, ’wʋsusloluee ’pɩɔn -we ’wlʋlʋa -mɔ ɔ, ɔ -ka we ’yɩ gbʋ -kpʋa nya, ’ɩn -Lagɔɔ Zuzu -ɔ slolua -aɩn -Lagɔɔ ’nanɩ, ɔ -ka ɔ vɛlɩ nɩ, -a -yi we ’ji nɩɩ, -Lagɔ yia ɔ -kaslʋ ’wʋpaa ’nyumɛɛ. 30 «Kpasasɩe mɩa, na -nʋ -wa. -We ka ’klʋ nyɩmɛ kaa, -amɩ wlaa we.» -Ɔ gbaa we, -a -yi ɔ. ’Ɩn ɔ nɛɛ ’yaɛ: «Jejitapɛ yia ɔ nyɩmaa -yɔgbʋ ’wʋbhua.» 31 ’Yliyɔga -Lagɔɔ kwɛɛ bhlilie mɩa, we -kalɩ -yɔ.
32 A ligbe amɩaa -Lagɔgbʋʋ gwedɩda, da -Lagɔɔ san ’mnia aɩn ’wʋ. -Mʋʋ ’bɩgʋ, a yia sɩa bhabha, ’ɩn a yia we ’wʋ amɩaa ’dɛ lakpa -kli. 33 Zlɩ tɔlʋa zlɩ, ’ɩn wa vɛlɩa aɩn, ’ɩn wa palɩa aɩn ’klɩyɩe ’wʋ -zejila ’wʋ. -Wa wa mɩ ’saa nʋda, ’ɩn a yia -maa lʋʋ ’yligbe. 34 A -yɔ -wa mɩa -kaslʋ ’wʋ ka sɩa. Wa -saa aɩn amɩaa zʋzɔnʋ kwɛɛ, ’ɩn a yia we -yɔŋwnu ’mʋna nya. -We ka gbʋ -wa, a -yi we ’ji nɩɩ, a ka ’ŋnɩmnɩe yabhlo, we -zi -lu weee ’wʋ, ’ɩn we mɩa ’ylɩ weee -nʋ nya. 35 ’Kʋa ’na wlalɩ aɩn ’ylila -nɩ, nɩɩ, -lu -we ka ’klʋ a kaa, we mɩ we bhɩalɩda. 36 We mɩ nɩɩ, a -ka dlɩtie, ’ɩn a -ka -Lagɔɔ dʋmagbʋ lɛnʋ, ’bhie a yɩa -we ka wɛlɩ -Lagɔ wlaa aɩn -yla. 37 ’Ɩn -mɔ -Lagɔwɛlɩ ’wʋ, -Lagɔ nɛɛ:
«Bhla -sɛlɛ nya, sa -sɛlɛ,
’ɩn -ɔ ’kaa yi, -mɔɔ ’kaa yi.
Ɔ ’na ’ka ’maslɛɛn -mɔ -gwlɛ.
38 -Ɔ zʋa ’mɩ dlɩ -gʋ,
-mɔɔ mɩ nyɩmɛ tɩklɩɩ nya ’mɩ ’yu,
’ɩn ’yliyɔgagɩe -mɔɔ yia ’yɩa.
Nɩɩ, ɔ -ka lʋbhiti nɩ,
ɔ ’na ’ka ’maslɛɛn ’mɩ dʋdʋnamanɩ.»+ 10:38 We ji -wa ’yaɛ: nyɩmɛ -ɔ mɩa nyɩmɛ tɩklɩɩ nya ’mɩ ’yu, dlɩzʋzʋee ’yoo -gʋ ɔ yia nɔda -tʋa.
39 -Wa bhitia lʋ, ’ɩn wa mnɔa, -amɩa ’nɩ wa glaa -mɩ. Nɩɩ, -wa zʋa -Lagɔ dlɩ -gʋ, ’ɩn ɔ saa wa gbʋ ’wʋ, wa glaa -a mɩa.
11Nyɩma wa yibhelia wa dlɩzʋzʋee ’gbʋ
1 Nyɩmɛ -ka -Lagɔ dlɩ -gʋ zʋ nɩ, -lu -we -gʋ ɔ dlɩ mɩa, ɔ mneni ɔ ’ka gba nɩɩ, ɔ ’ka we ’yɩ. Ɔ -yi we ’ji nɩɩ, -lu -we ɔ’ɔ ’yɩa -yɔ, we mɩ la gbʋzɔnʋ nya. 2 Bhlasabhla -nyɩma ka -Lagɔ dlɩ -gʋ zʋʋ ’gbʋ, ɔ yia wa ’yɩ nyɩma tɩklɩɩ nya. 3 -A ka -Lagɔ dlɩ -gʋ zʋʋ ’gbʋ, -a nʋa we ’wʋla nɩɩ, ɔ ka dʋdʋ lala ɔ wɛlɩ nya. -Lu weee wa yɩa -yɔ, ɔ ka we lala, -lu wa ’nɩa mneni wa ’ka -yɔyɩ, we nya.
4 *Abɛlɩ ka -Lagɔ dlɩ -gʋ zʋ, we ’dɛɛ ’gbʋ ’slaka ɔ -saa -Lagɔ -yla, we yia ɔ bheli kpasa Kaɛɛn -nʋ ’wʋzi. Dlɩzʋzʋee ’gbʋ Abɛlɩ yia nyɩmɛ tɩklɩɩ -zɛ, ’ɩn -Lagɔ yia ɔ wlawlaluu gbʋ -yɔŋwnu. Abɛlɩ ka tlɩ, ’ɩn ɔ mɩ gbada ’ylɩ weee nya, -we ka gbʋ -wa, ɔ ka -Lagɔ dlɩ -gʋ zʋ.
5 Enɔkʋ ka -Lagɔ dlɩ -gʋ zʋ, ’ɩn -Lagɔ yia ɔ ’wʋbhu -mʋʋ yi ’wlʋ nɩɩ, ɔ tlɩ. -Lagɔ yia ɔ ’dɛ kwesi ɔ bɛlɩ. We ’dɛɛ ’gbʋ wa ’nɩ mneni wa ’ka ɔ ’yɩ. -Lagɔwɛlɩ nɛɛ nɩɩ, da -Lagɔ ’nɩa -slɔ Enɔkʋ ’wʋbhu, -mɔɔ nanɩ ɔ dʋdʋ. 6 Nyɩmɛ -ɔ ’nɩ -Lagɔ dlɩ -gʋ zʋ, -mɔɔ ’nɩ mneni -mɔɔ ’ka ɔ dʋdʋ namanɩ. Nyɩmɛ -ɔ -ka -Lagɔ -yɔlanyni, dlɩ ɔ zʋa nɩɩ, -Lagɔ mɩ, ’ɩn -wa talɩa ɔ da, ’ɩn ɔ nʋa wa ’nanɩ ’wʋ.
7 *Nowee ka -Lagɔ dlɩ -gʋ zʋ. Gbʋnya -we ’kaa cɩ lɛnʋ, ’ɩn -we wa’a ’yɩa -slɔ -yɔ, we -gʋgbʋ -Lagɔ gbaa ɔ -yla, ’ɩn ɔ yia we -yɔŋwnu. We ’dɛɛ ’gbʋ ɔ bhlaa batoo ’kadʋ nɩ, ’ɩn we yia ɔ -yɔ ɔ -buduŋwɛɛ -nyɩma gbʋwʋsa. ’Sa Nowee dɩlɩa dʋdʋgʋ -nyɩma gbʋ. Nɩɩ, -Lagɔ ’yɩa ɔ nyɩmɛ tɩklɩɩ nya, -we ka gbʋ -wa, ɔ ka -Lagɔ dlɩ -gʋ zʋ.
8 Ablaamʋ ka -Lagɔ dlɩ -gʋ zʋ. Da -Lagɔ laa ɔ, ’ɩn ɔ yia -mɔɔ wɛlɩ ’wʋŋwnu, -mɔɔ ’nʋŋwɛzʋzʋe nya. -Lagɔ nɛɛ nɩɩ, ɔ ’ka ɔ dʋdʋ ’nyɛ ɔ -nʋ nya. Ɔ yia wee dʋdʋʋ gbɛgbɛɩn mnɩ, -zugba ɔ ’nɩ -bha da -yi. 9 Dlɩzʋzʋee ’gbʋ, dʋdʋ -we -Lagɔ ’kaa ɔ ’nyɛ, ɔ yia -mɔ ladɩlɩ ’lakpayu ’bhisa. -Mɔ ɔ -dɩlɩa *’naabudu zɔ la. ’Sa *Izakɩ -yɔ *Zakɔbʋ ’sɔ nʋ ’yaa. -Lu -we ka wɛlɩ -Lagɔ wlaa Ablaamʋ -yla, wamɩa yi ’yaa we ’yɩa. 10 Nɩɩ, ’gbe yabhlo, -we ka -budunya mɩa ’gwlu sa ’nanʋʋ, ’mʋ Ablaamʋ mɩa wʋda. Wee gbe mɩa, -Lagɔɔ dɛ tlia we la, ’ɩn ɔ yia we ’sʋbha.
11 Ablaamʋʋ ’ŋwnɔ *Sala ka -Lagɔ dlɩ -gʋ zʋ. We nya -Lagɔ ’nyɛa ɔ ’yu -yɩyɩee ’tɩtɛ, -zugba ɔ ka gɔ. -We ka gbʋ -wa, ɔ mɩ we -gʋ nɩɩ, -Lagɔ’ɔ ’bhʋlʋ ɔ wɛlɩ -gʋ la. 12 We ’dɛɛ ’gbʋ, ɔɔ nyɩmɛ yabhlogbɔɔ yia zʋa ’kadʋ lala, -zugba ɔ gɔgʋe kapa kapaa ’gbʋ ɔ ’wlʋ nyɩmɛ -ɔ mɩ tlɩda yida. Waa zʋayli -nyɩmaa ’wʋzulo ’wlʋ sa -zɛlɩ we mɩ yalɩ. Wa ’wlʋ ’ya gumunyuu ŋwɛyɔ -bʋsɛ, nyɩmɛ ’nɩ mneni ɔ ’ka wa zɛlɩ.
13 Dlɩzʋzʋe nya waa nyɩma weee tlɩa. Zʋzɔnʋnya, -we ka wɛlɩ -Lagɔ wlaa wa -yla, wa ’nɩ we kwɛzɩ, nɩɩ, wa ka we -yɔyɩ ’pɩpɩ, ’ɩn we yia wa ’mʋna ’wʋla. Wa nɛɛ nɩɩ, ’lakpanya wa -mɩa, ’ɩn wa mɩa nɔnɔnya nya dʋdʋ -gʋ. 14 Wa -ka ’sa gba nɩ, mʋ slolua nɩɩ, dʋdʋ -we -gʋ wa ’kaa ladɩ, wa mɩ we datalɩda. 15 Da wa ’bhʋa nɩ, wa’a pʋpalɩ wa ’wlukʋʋn we -gʋla. We -ka yaa wa dlɩ mɩ we -gʋ, -zugba wa mneni wa ’ka lʋbhiti. 16 Nɩɩ, dʋdʋ -zɔnʋ -we -gʋ wa ’kaa ladɩ, -we ka da wa mɩa talɩda, -we mɩa yalɩ, mʋ -wa. We ’dɛɛ ’gbʋ wa -ka -Lagɔ la wa Dide, we’e ’bhalɩ ɔ zʋ. Nɩɩ, ɔ ka wa -yla ’gbe yabhlo ’sʋbha.
17 Ablaamʋ ka -Lagɔ dlɩ -gʋ zʋ. We nya ɔ wlaa Izakɩ ’slaka nya da -Lagɔ ylaa ɔ la. Nɩɩ, ɔ ka ŋwnu ɔ ’ka ɔ ’yu yabhlogbɔɔ wla ’slaka nya, -zugba -Lagɔ ka ɔ -yla wɛlɩ wla. 18 -Lagɔ nɛɛ ’cɩn ɔ -ylaɛ: «’Yuoyua -wa ɩn gbaa -mɩ -yla nɩɩ, ’yɩa -na yia wa, Izakɩɩ gbɛgbɛɩn -na yia wa ’yɩa.» 19 -Bha Ablaamʋ pʋpalɩa ’wlukʋʋn la nɩɩ, -Lagɔ ka ’tɩtɛ ɔ ’ka Izakɩ ’wʋsɔlʋ tlɩtlɩnya glaa. We ’dɛɛ ’gbʋ, -Lagɔ ’nyɛa ɔ ’yu ɔ yoo lʋ, we ’wlʋ sa tlɩtlɩnya glaa -mɔɔ bhʋ.
20 Izakɩ ka -Lagɔ dlɩ -gʋ zʋ. We nya ɔ ŋwnaa *Zakɔbʋ -yɔ *Ezau ’nyu la, -we ’kaa wa ’ylɩ cɩɩ ’gbʋ.
21 Zakɔbʋ ka -Lagɔ dlɩ -gʋ zʋ. We nya ɔ tlɩtlɩ bhla cɩpaa, ’ɩn ɔ yia *-Zɛzɛfʋʋ ’yua ’nyulaŋwna -bhlo -bhlo. Ɔ kwlia ’wʋ ɔ kɔɔsu -gʋ, ’ɩn ɔ yia -Lagɔ bʋbɔ.
22 -Zɛzɛfʋ ka -Lagɔ dlɩ -gʋ zʋ. We nya, ɔ tlɩtlɩ bhla cɩpaa, ’ɩn ɔ yia Izlaɛlɩnyɩmaa Ezipʋtʋ -tla gbʋ gba. ’Ɩn -we wa ’kaa ɔ ’kwie nʋnʋ, ɔ yia we gba.
23 Moizɩɩ dide -yɔ ɔ ’nyaa ka -Lagɔ dlɩ -gʋ zʋ. We nya wa gwalɩa ɔ, ’ɩn wa yia ɔ zize ’cʋ ta zɔ. Wa ’yɩa nɩɩ, ɔɔ ’yu nanɩ ’yli, wa ’nɩ tite ’nʋŋwɛ -sasɩee daa nyanɔ nʋ Ezipʋtʋ -nyɩmaa ’wlulapɩlɩnyɔ kwɛɛ.
24 Moizɩ ka -Lagɔ dlɩ -gʋ zʋ. We nya ɔ ’ylimanɩa, ɔ ’nɩ ’yɩbha wa gbaa nɩɩ, Moizɩ mɩa, Ezipʋtʋ -nyɩmaa ’wlulapɩlɩnyɔɔ ’ŋwnɔyuu yu -wa. 25 Ɔ ka we -yɔŋwnu ɔ ’ka sɩa -Lagɔɔ nyɩma glaa. We mɩ ’sa ’bhie, ɔ mneni yaa ɔ ’ka gbʋnyuuu lɛnʋe ’wʋ -mʋna li bhla -sɛlɛɛ -nʋ nya. 26 Ezipʋtʋʋ ’ŋnɩmnɩli -zu ’wʋ, nɩɩ, wa ’ka ɔ vɛlɩ -Lagɔɔ -Bhasanyɔ ’bhisa, -mʋʋ nanɩ ɔ dʋdʋ we -zi -lu weee. Nɩɩ, -we -Lagɔ ’kaa cɩ ɔ ’nyɛ we -gʋ ɔ ’yli mɩa.
27 Moizɩ ka -Lagɔ dlɩ -gʋ zʋ. We ’gbʋ ɔ yia Ezipʋtʋ ’bhʋ, ’ɩn ɔ ’nɩ wa ’wlulapɩlɩnyɔ kwɛɛ nyanɔ nʋ. Ɔ ka dlɩ ’tɛmanɩ nɛɛ nyɩmɛ -ɔ yɩ -Lagɔ -yɔ, -Lagɔ -ɔ wa’a ’yɩa -yɔ. 28 Ɔ dlɩzʋzʋee ’gbʋ ɔ yia *’Wʋzɩtɩylɩɩ ’fɛtɩɩ -sasɩe ladɩ. ’Ɩn ɔ nɛɛ Izlaɛlɩnyɩma -yla wa tli klolo ’pɩɔn -yɔ, -mʋʋ yi ’wlʋ nɩɩ, ’anzɩ -we -Lagɔ zʋa tlɩtlɩe kwɛɛ, we ’bha Izlaɛlɩnyɩmaa ’yuaa tɩanʋ.
29 Izlaɛlɩnyɩma ka -Lagɔ dlɩ -gʋ zʋ. We nya wa yia *gumunyu Zalʋ lʋplɩlɩ dʋdʋ klo -gʋ ’bhisa. ’Ɩn Ezipʋtʋ -nyɩma -wa mɩa wa ’bɩ ’kaa ’plɩa yi, ’ɩn ’nyu yia -maa -gʋ yeli.
30 Izlaɛlɩnyɩma ka -Lagɔ dlɩ -gʋ zʋ. We nya wa bibea Zelikogbe ’ylɩ gbesɔ, ’ɩn we suo yia bhli.
31 ’Naabɩzɩŋwnɔ *Wlaabʋ ka -Lagɔ dlɩ -gʋ zʋ. We nya -wa’a zʋa -Lagɔ ’nʋŋwɛ, ’ɩn ɔ -yɔ wa ’nɩa tlɩ dabʋdʋ. Nɩɩ, nyɩmaa didedidenya -wa mɩa Izlaɛlɩnyɩma nya, ɔ ka wa zize.
32 Sa ɩn ’ka ’ya gbaa? Nɩɩ, Zedeɔn klaa, -Balakɩ klaa, Samʋsɔn klaa, Zɛfʋte klaa, -Davidɩ klaa, Samuɛlɩ klaa, we -yɔ *-Lagɔgbʋʋ -falɩpanya, -maa -gʋgbʋʋ gbagbɩe -tlʋlʋ ’mɩ -yla la. 33 -Maa ka -Lagɔ dlɩ -gʋ zʋ. We nya -maa lua dʋdʋ duuun -gʋ -nyɩma, -maa pɩlɩa nyɩma ’wlu la tɩklɩmɩmɩe nya, -we ka wɛlɩ -Lagɔ wlaa -maa -yla, ’ɩn -maa yia we ’yɩ. Nɩɩ, -maa ka -jlaa ŋwɛ gbʋan, 34 ’ɩn -maa yia -kosu ’tɩtɛ nyumonu, ’ɩn -lu ’nɩa -maa ylɩ tʋgʋgblɛ ’yu. Nɩɩ, wa ’nɩ bha latɛ, ’ɩn wa yia latɛmanɩ. Tʋ ’wʋ, wa ka latɛmanɩ, ’ɩn wa yia wa tʋnyɩma -gʋgalɩ. 35 ’Ŋwnɩ tɔlʋa ka -Lagɔ dlɩ -gʋ zʋ. We nya wa ’yɩa wa tlɩtlɩnya ’wʋsɔda, ’ɩn wa -yɔ wa ’sɔ yia -mɩ.
Nɩɩ, tɔlʋa wa ’palɩa ’klɩyɩe ’wʋ bhabha. We mɩ ’sa ’bhie, -maa ’nɩ -maa ’dɛɛ ’yitide gbʋ -yɔŋwnu. Nɩɩ, ’klɩyɩe ’wʋ -maa tlɩlɩa, ’ɩn we ’bɩgʋ, -maa ’ka ’yliyɔgagɩe -zɔnʋ ’yɩ. 36 Tɔlʋa mɩa, -maa wa vɛlɩa, ’ɩn wa sɛlɩa -maa. Tɔlʋa wa gbʋan nɛtɛ -llukpe nya, ’ɩn wa yia wa -kaslʋ ’wʋpa. 37 Tɔlʋa wa ’bhaa gbɔkʋ ’wʋ, wa yia tɔlʋa ’wʋdɩ ’sɔ, ’ɩn wa yia tɔlʋa ’bha tʋgʋgblɛ nya. Tɔlʋa gwaa la, bhlabhlɛɛ ku -yɔ wlii ku -wa -maa -bana. Wa yia -maa boba ’wʋtɩ, wa yia -maa ’klɩyɩe ’wʋpalɩ, ’ɩn wa yia -maa gbʋnyuu ’wluo nʋ. 38 Dʋdʋgʋ -nyɩma ’nɩ waa nyɩma -manɩɩ ’klʋ -ka. -Maa -yɔ lagwagwɩe ka da weee ’plɩlɩ: wa ka da bɛblɛɛ ’plɩlɩ, wa ka -gɔgɔ ’wlu mnɩ, ’ɩn wa yia tʋkpanya -yɔ ’bhʋkanya ’wʋ ladɩlɩ.
39 -Lagɔ ka wa yibheli dlɩzʋnya nya, -we ka gbʋ -wa, wa ’dɛ weee ka ɔ dlɩ -gʋ zʋ. Nɩɩ, -we ka wɛlɩ -Lagɔ wlaa wa -yla, wa ’nɩ ’maslɛɛn we ’yɩ. 40 -Lagɔ ka ’ya -a ’dɛ weee -yla -lu -zɔnʋ ladɩ, we ’dɛɛ ’gbʋ, wa ’nɩ mneni wa ’ka -mɩ tɩklɩɩ we ’ka gba, -zugba -a ’nɩ wa glaa -mɩ.
12A ’tɛmanɩ dlɩ sɩasɩe ’wʋ
1 Waa gbʋdayɩnyaa -zlo bibea -aɩn, ’ɩn wa mɩa -aɩn ylada. We ’dɛɛ ’gbʋ, -we weee nyenia -aɩn -a ’bhʋ we ’bɩ. Gbʋnyuu, -we bhlɩa -aɩn la bhebhe, -a ’bhʋ we ’bɩ. Gwagwa -yoo wa palɩa -aɩn -yla la, -a ’tɛmanɩ dlɩ -a -yɔ gwagwɩe ’ka we bhloluda nyni. 2 -A yla -Zezu ’ylɩ weee nya. Mɔ -wa -amɩaa dlɩzʋzʋee gwedɩda, ’ɩn mɔ -wa we gbalɩnyɔ. Ɔ yɩ ’mʋna -we ɔ ’kaa li -yɔɔ ’gbʋ, ɔ ŋwnua wa ’ka ɔ *su -gʋ lakʋlʋ, ɔ ’nɩ -mʋʋ zʋ -lu la. -Slɛɛn mɩa, ɔ -dɩlɩ -Lagɔɔ ’ŋnɩmnɩkpee lilisɔlʋ la.
3 Cɩɩn, a ’pa -Zezu dlɩ -gʋ. Sa gbʋnyuu -lɛnʋnya -sɔlʋa ɔ -yɔwʋ, ’ɩn ɔ ’nɩa -maa kwɛɛ -gwa, a ligbe we, ’kʋa yi aɩn ’ylila wla, ’ɩn a yi -Lagɔ dlɩ -gʋ -sa. 4 A ka gbʋnyuu nya gʋ, ’ɩn a ’nɩ we nya tlɩtlɩe ’yu nyni. 5 -Lagɔ ka aɩn ’dɩzʋ, ’ɩn a yia dlʋ. Ɔ ’yua ’bhisa ɔ gbaa aɩn -ylaɛ:
«Na ’yu, Jejitapɛ -ka -mɩ ’wʋslamanɩ nɩ,
-ɩn zʋ -na ’dɛ ’yliyɔ.
Ɔ -ka -mɩ -yla -na gbʋ lapalɩ nɩ,
’kʋa ’na wlalɩ -mɩ ’ylila -nɩ.
6 Jejitapɛ mɩa,
-wa ka zɛ ɔ -kalɩa,
’ma ɔ slamanɩa ’wʋ.
-Wa weee ɔ yɩa ɔ ’yua ’bhisa,
’ma ɔ paa -kaslʋ ’wʋ.»
7 A -ka sɩada -mɩ, -Lagɔ ’ka aɩn ’wʋslamanɩɩ gbʋ -wa. Ɔ ’yua ’bhisa ɔ bhua aɩn ’wʋ. ’Yu, -ɔ ɔ dide’e ’slamanɩa ’wʋ, -mɔɔ ’nɩ -mɩ. 8 -Lagɔ mɩa, ɔ ’yua weee ɔ slamanɩa ’wʋ. Ɔ ’nɩ aɩn ’wʋslamanɩ nɩ, -zugba bhoyi -gʋ -yua a -mɩa, a ’nɩ ɔ ’yuaa ’dɛbhie -gbolu. 9 -Amɩaa dʋdʋ -gʋ -didea ka -aɩn ’wʋslamanɩ, ’ɩn -a yia wa ’nʋŋwɛ zʋ. Nɩɩ, we -ka ’sa -mɩ, -amɩaa Dide -Lagɔ -ɔ mɩa yalɩ, -a pɩlɩ ɔ zɔla, -a ’ka ’yliyɔgagɩe ’yɩ. 10 -Amɩaa dʋdʋ -gʋ -didea mɩa, ’wʋ wa slamanɩa -aɩn bhla -sɛlɛ yabhlo nya wa dlɩɩ da. ’Ɩn -Lagɔ mɩa, -amɩaa ’dɛɛ zʋzɔnʋʋ ’gbʋ ɔ slamanɩa -aɩn ’wʋ, -a ’ka -mɔwlʋda -mɩ ɔ ’dɛ ’bhisa. 11 Wa -ka -aɩn ’wʋslamanɩda -mɩ, we’e namanɩ -aɩn dʋdʋ, we’e -la -aɩn ’mʋna ’wʋ. ’Ɩn cɩcɩ, -wa wa ’slamanɩ ’saa ’wʋ, ’ɩn -maa tʋa ’wʋ tɩklɩɩ ’wʋtʋtʋe -dlɔɔ nya.
12 We ’dɛɛ ’gbʋ amɩaa sɔnya -we sɩa, ’ɩn -we a bɛlɩa zɔ, a ’bhu we ’wʋ. Amɩaa ’kukolu -we sɩa, a ’tɛmanɩ we la. 13 A palɩ ’yoo -zɔnʋ la amɩaa bhʋ -yla, -ɔ mɩa ’tɩgɩda ɔ yi bhli, nɩɩ, ɔ ’ka ’pʋ.
’Yɩbhalɩgbʋnya
14 Nɩɩ, a fa -mɔ ’kʋa la a ’ka ’wʋtʋ -dlɔɔ nyɩma weee nya, ’ɩn bhʋ -we nanɩa -Lagɔ dʋdʋ, a ’ka we nɔ. We ’nɩ -mʋʋ nɩ, nyɩmɛ yabhlogbɔɔ ’na ’ka Jejitapɛ ’yɩ. 15 A zʋ amɩaa ’dɛ ’yliyɔ, -mʋʋ yi ’wlʋ nɩɩ, a palɩ -Lagɔɔ ’nanɩdlɩ -blɩgʋ. ’Ɩn -petu ’nyuu yabhlogbɔɔ ’na mini aɩn glaa -nɩ, we ’ka gbʋ duun -nyumo, ’ɩn we ’ka we gu nyɩma ’wʋlamneni -nɩ. 16 A zʋ amɩaa ’dɛ ’yliyɔ -mʋʋ yi ’wlʋ nɩɩ, aɩn glaa nyɩmɛ yabhlogbɔɔ -ka mʋtnɩ kwɛ, ’ɩn a yi -we mɩa -Lagɔɔ -nʋ nya ’wʋnyɛ Ezau ’bhisa. Nɩɩ, mɔ ’paa ɔ ’dɛɛ kpasabɩ pɛlʋ ɔ ’bɩsʋayu kwɛɛ lililuu -kaklʋ -bhlogbɔɔɔ ’gbʋ. 17 A -yi we ’ji nɩɩ, -mɔ ’yu gbɛgbɛɩn, ɔ ’yɩbha ɔ dide ŋwna ɔ ’nyu la, ’ɩn -mɔɔ ’nɩ we -yɔŋwnu. Nɩɩ, wie nya ɔ bhubhoea ɔ dide -mɔɔ ’ka -mɔɔ wɛlɩ ’bhiti, ’ɩn -mɔɔ ’nɩ we mneni.
18 Amɩanʋʋ -Lagɔɔ -yɔlanynie -yɔ bhlasabhla -Izlaɛlɩnyɩmaa -nʋ ’nɩ -bhlo -mɩ. Nɩɩ, -gɔgɔ ’kadʋ -we wa mnenia wa ’ka kwɛzɩ, amɩa ’nɩ we -yɔlanyni. -Kosu ’kadʋ klaa, nikpise klaa, -sabɔ klaa, we -yɔ ’nyuu -pɩpɛ ’kadʋ, a ’nɩ we -yɔyɩ. 19 A ’nɩ lɛglɛ -yɔ wɛlɩ ’nʋ. Nɩɩ, Izlaɛlɩnyɩma ka ’sasʋkpa wɛlɩ ’nʋ, ’ɩn wa nɛɛ wa ’nɩa we -putu yukwli pʋlʋ. 20 -We ka gbʋ -wa, -Lagɔ nɛɛ wa -yla: «-Ɔ -ka -gɔgɔ ’kadʋ nɩ kwɛzɩ, we yi nɩmɛ -zɛ, a ’bha ɔ gbɔkʋ ’wʋ.» Wee wɛlɩ mɩa dɛ, we -kalɩ -yɔ wa -yla. 21 -We wa ’yɩa -yɔ, we ka wa nyanɔdlɩ ’wʋslu, ’ɩn Moizɩ nɛɛ: «Ɩn mɩ tɛlɩda, nyanɔ ka ’mɩ dlɩ ’wʋslo.»
22 ’Ɩn amɩa, a ka -gɔgɔ ’kadʋ wa laa *Siɔn -yɔ ’yliyɔga -Lagɔɔ ’gbe -yɔlanyni. Yalɩɩ *-Zeluzalɛmʋ, mɔ ’anzɩɩ ’wlu -nyacɩɩn mɩa ’mʋna lida, -mɔ -wa. 23 -Lagɔɔ tɩa -yua -wa ka ŋnɩ mɩa yalɩ cɛlɩda, da wa gbelia ’wlu, a ka -bha -yɔlanyni. -Lagɔ, -ɔ bhua nyɩma weee -yɔgbʋ ’wʋ, a ka ɔ -yɔlanyni. A ka nyɩma tɩklɩɩ -wa ka tɩklɩmɩmɩe gbaa -yɔlanyni. 24 -Zezu -ɔ -wa *’wʋsuslolue loluu ’kɔlʋ, a ’ka ɔ -yɔlanyni. ’Ɩn ɔ ’pɩɔn -we wa slua la, ’ɩn -we ’ylia we -zia Abɛlɩɩ ’pɩɔn, a ’ka we -yɔlanyni.
25 We -ka ’sa -mɩ, a zʋ amɩaa ’dɛ ’yliyɔ, a yi -ɔ mɩa aɩn -yla gbʋ gbada, -blɩgʋpalɩ. Da dʋdʋ -gʋ, Moizɩ ka Izlaɛlɩnyɩma ’dɩzʋ, -maa ’nɩ ɔ wɛlɩ ’wʋŋwnu, ’ɩn -Lagɔ yia wa -kaslʋ ’wʋpa. -We -ka -amɩa, yalɩ -Lagɔ mɩa -aɩn -yla gbʋ gbada. Nɩɩ, -a -ka ɔ -blɩgʋpalɩ, -a ’nɩ mneni -a ’ka ɔ kwɛɛ ’tla. 26 Bha mɩa, -Lagɔɔ wɛlɩ zuklua dʋdʋ. -Zɛɛn mɩa, ɔ ka we gba -aɩn -yla, ɔ nɛɛ: «Dʋdʋʋ -tapa na yia zuklua, ’ɩn -slɛɛn we ’nɩ dʋdʋ -bhlogbɔɔ, nɩɩ, dʋdʋ -yɔ yalɩ ’sɔ na yia zuklua.» 27 Ɔ -ka gba «-tapa» nɩ, gbʋ yabhlo we slolua -aɩn. Mʋ -wa nɩɩ, -lu -we -Lagɔ -laa la, -we ’kaa zuklu, la we yia ’bhʋa. Nɩɩ, -we ’nɩa mneni we ’ka zuklu, -bha we yia -tʋa.
28 -Amɩa mɩa, -Lagɔ ka -aɩn ’tɩtɛ ’nyɛ, -a -yɔ ɔ ’sɔ ’ka nyɩma ’wlulapɩlɩ. Wee ’wlulapalɩe ’nɩ mneni we ’ka zuklu, we -ka ’sa -mɩ, -a ’pa -Lagɔ fuo, -a bʋbɔ ɔ ɔ dʋmasa, ’nʋŋwɛzʋzʋe -yɔ sɔsʋe nya. 29 Cɩɩn, -amɩaa -Lagɔ mɩa, -kosu -we saa -lu la, ’mʋ ɔ -mɩa.
13Sa -a ’kaa -Lagɔ dʋdʋnamanɩ
1 Nɩɩ, a -tʋ zɛkɩkalɩda, sa -Lagɔbhelia ’kaa we nʋ, ’sa. 2 ’Lakpanya, -wa yia amɩaa -gbɛ, a kpa wa sɔ ’sɔ nya. Nyɩma tɔlʋa nʋ ’saa, ’ɩn wa yia ’anzɩnyaa ’lakpasu kpa, wa ’nɩ we ’jiyibheli. 3 -Wa mɩa -kaslʋ ’wʋ, a ’pa wa dlɩ -gʋ nɛɛ amɩa -yɔ wa sɔ mɩ -kaslʋ ’wʋ. -Wa, wa mɩa sɩalɩda, a ’pa ’ya -maa dlɩ -gʋ, -we ka gbʋ -wa, amɩa ka ku, ’ɩn wa mneni wa ’ka aɩn sɩalɩ.
4 Nɩɩ, nyɩma weee zʋ kʋkwalɩe ’nʋŋwɛ. ’Lowli -yɔ ɔ ’ŋwnɔ mɩmnɩ -yla tɩklɩɩ. Mʋtnɩ kwɛ -cɩan -yɔ -wa -yɔ nyɩma weee dɩa -budu ’wʋ, -Lagɔ yia wa -yɔgbʋ ’wʋbhua.
5 ’Gwɛzii ’ylibɩlanɔnʋe ’na -zɛlɩ amɩaa dlɩ zɔ gbʋ -bhlogbɔɔ -nɩ. -We a kaa, we namanɩ aɩn dʋdʋ. -Lagɔɔ ’dɛ nɛɛ:
«Ɩn ’na ’ka cɩ ’sa -mɩ tɩ,
ɩn ’na ’ka cɩ -mɩ ’bɩbhʋ.»
6 We -ka ’sa -mɩ, -a mneni -a ’ka gba, -amɩaa -gʋ nya -biɛ:
«Jejitapɛ yia ’mɩ ’wʋsaa.
Ɩn ’na ’ka nyanɔ nʋ.
Lɛɛ -lu nyɩma ’ka ’mɩ nʋnʋa?»
7 A ligbe amɩaa ’yugalɩnyaa tɩanʋ -wa gbaa aɩn -yla -Lagɔgbʋ. Da wa -gaa ’yliyɔ, bhʋ -we wa nɔa, amɩaa ’dɛ ka we -yɔyɩ. Sa wa nʋa -Lagɔɔ dlɩ -gʋ -zʋda, a nʋ ’sa. 8 -Zezu mɩ -Zezu -bhlokpadɛ nya. Zʋbha klaa, -zɛɛn klaa, we -yɔ ’ylɩ weee nya, ɔ’ɔ ’bhiti. 9 -Slolue loluu ’yli -bhlo -bhlo -we bhʋa da -putu, a ’na ’tideli nyɩma ’yi wa ’ka aɩn -dawli ’wʋnʋ we nya. -We ’kaa aɩn ’kʋayli ’pa, we nanɩ ’yli nɩɩ, we -mɩ -Lagɔɔ ’nanɩ nya, lililuu titee ’nʋŋwɛzʋzʋe -we’e -saa we ’nʋŋwɛ -zʋnya ’wʋ, we ’na -zɛlɩ -mʋʋ -nɩ.
10 -Amɩa ka ’slakagʋsalɩlu yabhlo. We -gʋ -slaka mɩa, -Lagɔbʋbɔnya, -wa saa *Zuifʋʋ nɩmɛkupalʋ zɔ ’slaka, wa ’nɩ we ’klʋ -ka wa ’ka we li. 11 Wanʋʋ -gbɛ, *-Lagɔbʋbɔnyaa -kanyɔ ’kadʋ mɩa, -mɔwlʋda ’tata ɔ -yɔ nɩmaa ’pɩɔn plaa. Nɩɩ, mʋ -wa nyɩmaa gbʋnyuuu ’slaka. Wee nɩmaa -kpabhie mɩa, wa ’gbe -glima wa siea we. 12 We ’dɛɛ ’gbʋ, -Zezu yia -Zeluzalɛmʋgbee -glima tlɩlɩ, ɔ ’ka nyɩma -mɔwlʋlʋ ɔ ’dɛɛ ’pɩɔn nya. 13 -We mɩa ’dɛɛ ’gbʋ, -a ’tla -mɔ, -a -yɔ ɔ ’sɔ ’ka ’wʋgbeli ’gbe -glima, ’ɩn wa ’ka -aɩn vɛlɩ ɔ ’bhisa. 14 Da dʋdʋgʋ -gbe -we ’wʋ -a mɩa, ’plɩa we yia. Nɩɩ, ’gbe -we ’kaa cɩ yi, we da -a mɩa -talɩda. 15 Nɩɩ, ’slaka -we -a ’kaa -sa -Lagɔ -yla -Zezuu gbɛgbɛɩn, mʋ -wa nɩɩ, -a bhlɩ -Lagɔɔ ’ŋnɩ ’ylɩ weee nya. -Mʋʋ ji -wa nɩɩ, ŋwɛɛ -a wlelia we nɩɩ, -Lagɔ ’yli. 16 A ’na dlʋlʋ gbʋzɔnʋʋ lɛnʋe -yɔ ’wʋsɩsalɩe ’wʋ -nɩ, nɩɩ, mʋ -wa ’slaka -we nanɩa -Lagɔ dʋdʋ.
17 A zʋ amɩaa ’yugalɩnya ’nʋŋwɛ, a pɩlɩ wa zɔla. Ma zʋa amɩaa zuzu ’yliyɔ. -We ka gbʋ -wa, ’ma -Lagɔ yia we -gʋgbʋ layɩbhaa. A -ka wa ’nʋŋwɛ zʋ, ’ɩn wa nʋa wa lubho ’mʋna nya. We ’nɩ -mʋʋʋ, ’klʋ -susue nya wa yia we nʋa, ’ɩn -mʋʋ ’na ’ka aɩn ’wʋsa.
18 A bhubhoe -Lagɔ -amɩaa -nʋ nya. A -yi we ’ji nɩɩ, -amɩaa ’wlukʋʋ’ʋn dɩlɩ -aɩn gbʋ, nɩɩ, gbʋzɔnʋʋ lɛnʋe ’klɩ -a mɩa ’yɩda ’ylɩ weee nya. 19 Amɩaa zukpa -wa, -we na yɩbhalɩa aɩɩn ’dɛbhie mʋ -wa nɩɩ, a bhubhoe -Lagɔ ɔ ’ka ’mɩ ’yoo ’nyɛ, ’ɩn ɩn ’ka aɩn glaa nyni slʋɩ.
20 -Lagɔ, -ɔ nyɛa -aɩn ’wʋtʋtʋe -dlɔɔ, mɔ ’bhua bhlabhlɛɛ ’yliyɔzʋnyɔ ’kadʋ, -amɩaa -Kanyɔ -Zezu ’wʋ tlɩtlɩnya glaa, ’wʋsuslolue -we ’nɩa bhloluda -kaa ’pɩɔn nya. 21 Ɔɔ -Lagɔ ’nyɛ aɩn ’tɩtɛ a ’ka gbʋzɔnʋ ɔ ’yɩbhaa lɛnʋ. -We nanɩa ɔ dʋdʋ, ɔ nʋ we lɛ -aɩn ’wʋ -Zezu Klisɩɩ gbɛgbɛɩn. ’Ŋnɩmnɩe -mɩ -Zezuu -nʋ nya ’ylɩ weee nya. *-Amɛnɩ.
Wɛlɩpapɩe
22 Bheliaɩn, amɩa na palɩa zukpa. Nɩɩ, a pʋlʋ ’kʋayli -pa -wɛlɩ nɩ yukwli dlɩtie nya. Nɩɩ, -we ɩn cɛlɩa da ’sɛbhɛ nɩ ’wʋ, we ’nɩ tlʋlʋ bhabha. 23 Ɩn ’yɩbha a yibheli we ’ji nɩɩ, wa ka -amɩaa bheli Timotee -kaslʋ ’wʋsa. Ɔ -ka na -gbɛ yi -pa nɩ, ɩn -yɔ ɔ ’sɔ, ’ɩn -a mnɩa amɩaa -gbɛ.
24 A -sa amɩaa ’yugalɩnya weee -yɔ -Lagɔnyɩma weee fʋ. Italii -dʋdʋ -gʋ -bhelia nɛɛ, wa -sa aɩn fʋ.
25 -Lagɔ ŋwna a ’dɛ weee ’nyu la.