TITUS

Paul n sob gbauŋ siꞌa n tis

TITUS

la nwa

¹Man Paul one a Winaꞌam yamug ne Yesu Kiristo Tumtum ye m ke ka bane ka Winaꞌam gaŋ la yadda niŋir keŋ tuon ka nobug, ka ba baŋ Winaꞌam yelsida, line ket ka ba dol Winaꞌam suer la. ²Ka ti mor tiꞌir ye ti na nye nyovur line kaꞌ naare, lin ka Winaꞌam one kaꞌa ziri sob la, da ziꞌel noor saŋkan ka dunia da nam pu maal la. ³Ka li saŋa paae la, o nie nyovur line kaꞌa naar la yela o pianꞌad puugin, line ka on one aa ti faangid la, tisi m ye m mool.

⁴M sobid gbauŋ kaŋa tisid Titus one ka tinam ne on laꞌam niŋ Yesu Kiristo yadda ka o liebi m biigi ameŋa la.

Ti Baꞌ Winaꞌam ne ti faangid Yesu Kiristo na tis uf yelsum ne sumalisim.

Titus tuuma Krete teŋin la yela

⁵Neꞌeŋa yela ka m ke ka fu be Krete, ye fu naae line pu naae la, n gaŋ kpeenmnam yadda niŋidibin la teŋ teŋ wuu mam yel uf siꞌem la, ⁶ka ba a popielim dim, ka a poꞌayiŋ dim, ka ba biis niŋ Yesu Kiristo yadda, ka kaꞌ ninyoodnam bee nimbeꞌednama. ⁷Ka kpeenm one soꞌe Winaꞌam nidib nar ka o a popielim sob, ka da mor nyeesim bee supeen bee a danuud, bee zaba soba bee one maan zam ye o nye nyoode. ⁸Asee ka o diꞌesid saam ne sumalisim, ka a one tum line a suꞌum, ka mor potenꞌer suŋ, ka dol Winaꞌam wada suer suꞌuŋa ka a suꞌum nyain, ka gbanꞌadi o meŋ suꞌuŋa. ⁹Ka o siake dol yelmeŋir paꞌalug line ka ba zamis o la, ka o na nyaŋe zaŋ yelsida paꞌalug la, kpemis sieba ka nyaŋ bane zanꞌas paꞌalug la.

¹⁰Ka nidib bedego be bane kiꞌisidi ti paꞌalug la ka ba pianꞌad kaꞌa gbin ne, ka a ziri dim. Li kas kas ane bane dol Jew dim malima line a baŋo kpenꞌeb la. ¹¹Li nar ka fu ke ka ba sin ka ba nwaꞌad ninsieba ya ne ban paꞌan line pu nar ye ba paꞌal la, ye ba diꞌe yood line pu nar ba la. ¹²Li da ane Krete nid, ba meŋ nodiꞌes yinni, yel ye, “Krete dim ane ziri dim saŋa wusa, ka wen wuu moogin bunyuanam, ne gbanyaꞌanam bane a dindiis.” ¹³Yel kaŋa a sida, dinzugo saꞌalimi ba ne kpiꞌeuŋ bedego, ye ba dol yelsida suer ne sukpiꞌem, ¹⁴ka bas Jew dim solima yela ne nidib noyelug line yit nimbane zanꞌas yelsida la ni. ¹⁵Bun wusa a nyain tisid one a nyain, amaa bane a dianꞌad dim, ka pu siakid Winaꞌam la, siꞌel siꞌel kaꞌa a nyain tisidi baa, bozugo ba yaꞌam ne ba potenda wusa ane dianꞌad. ¹⁶Ba yet nidib ye ba miꞌ Winaꞌam, amaa ba tuuma paꞌan ye li kaꞌ sidaa. Ba ane nimbeꞌednam, ka pu siakid Winaꞌam noore, ka ku nyaŋe tum tuumsuŋ siꞌa.

Paꞌalsuŋ la yela

¹Amaa yelimi ba line dol yelmeŋir paꞌalug. ²Kel ka dap kuda da nu daam bedego, ka mor nimmua, ka a potenꞌer dim, ka a bane siakid pianꞌad suꞌuŋa, ka me mor noŋilim ne modigir suꞌuŋa.

³Ka poꞌanyaꞌas me tum line dol naꞌasi suer, ka da bood yeesugo, ka da ke ka daam kuli baa. Ba paꞌalim line a suꞌum, ⁴ka saꞌal poꞌab bane pu kudige, ka ba noŋi ba sidib ne ba biis, ⁵ka mor yaꞌam, ka kaꞌ dianꞌad dima, ka zot nidib nimbaanlig, ka a yipoꞌa suma ka siakidi ba sidib noya, ye nidib da neꞌes Winaꞌam labasuŋ laa.

⁶Ala men, saꞌalim dasam, ye ba a potenꞌesuŋ dim. ⁷Ka paꞌali ba ne fu tuuma wusa line a tuumsuma ka ba me tuꞌas fu tuuma, ka paꞌali ba ne potenꞌesuŋ ne nimmua, ⁸ne pianꞌasuŋ line ka ba ku nyaŋe zerige fu, ka bane kiꞌisidi ti di nyan, ka ku nye taale ti saꞌanee.

⁹Kel ka bane a tumtumnib siakidi ba zugsobnam noya ka da zanꞌasi baa, ka tumi siꞌel wusa line na maꞌae ba sunya, ¹⁰ka da zuudi ba laꞌade ka lee paꞌal ye ba sid ane sida dim, ka ba siꞌel wusa ni, nidib na baŋ ye Winaꞌam ti faangid paꞌalug la a suꞌuŋa.

¹¹Ka Winaꞌam popielim nie ye nidib wusa nye faangir ¹²ka o paꞌani ti ye ti zanꞌas lin pu dol Winaꞌam suere, ne dunia boodim, ka ti dol Winaꞌam suer ne potenꞌer ne yelsida n be dunia nwa ni. ¹³Ka ti mor tiꞌir suŋ ne Yesu Kiristo, one a ti kpiꞌeuŋ sob Winaꞌam ti faangid la, naꞌam ken saŋa la. ¹⁴O noki o meŋ tisi ti ye ti nye yolisim ti tuumbeꞌed poogin, ka ke ka ti a nyain ka liebi o meŋ nidib bane bood hale ye ba tum tuumsuma.

¹⁵Paꞌalimi neꞌenam ka saꞌali ba, ka kpeꞌeŋi ba sunya ne fu paŋ wusa. Da ke ka soꞌo soꞌ poꞌogi fu.

Winaꞌam nidib tuuma la yela

¹Tienmi ba ye ba siak naꞌanam ne gomena kpiꞌemnam noya, ka niŋ ban yel siꞌel, ka siake niŋ line a tuumsuma wusa. ²Ka ba da pianꞌ beꞌed soꞌ yelaa, ka da bood zaba, ka a suguru dim bane naꞌasid nidib wusa.

³Ka saŋsiꞌen la tinam meŋ da ane zon, ka pu siakid yelugo, ka dol suebeꞌednam, ka ti yaꞌamleog ne niŋgbina boodim nyaŋe ti, ka ti beilim wusa ka ti mor potenꞌebeꞌednam ka nen nidib, ka nidib kisi ti ka ti me kisi taaba. ⁴Ka Winaꞌam one a ti faangid la suŋir ne noŋilim nie la, ⁵o faann ti ka li kaꞌ ti tuumsuma zugo, amaa li ane o meŋ nimbaanlzoor la yela, ka o faandi ti ne o Siig Suŋ, line piedi ti ka li aa duꞌampaal ne nyovurpaal la. ⁶O tisidi ti o Siig Suŋ la bedego Yesu Kiristo ti faangid la zug, ⁷ye ti a popielim dimi o tuon ka li yi o meŋ popielimin ka ti mor tiꞌir ye ti diꞌe nyovur line kaꞌ naare. ⁸Neꞌeŋa a yelsida. M bood ye fu paꞌali ba yelbama ne kpiꞌeuŋ, ka bane siak Winaꞌam la na guꞌusid ka tum tuumsuma saŋa wusa. Yelbama a suꞌum ka tisid nidib nyood.

⁹Amaa basimi buꞌosyeed ne yaanam yuda yela ne noŋgban nwaꞌar ne zaba line a Jew dim wada yela, bozugo lin wusa ane zaalim ka kaꞌ nyoode. ¹⁰Ka soꞌ yaꞌa bood ye o weligi ya yanam boom saŋa n saꞌal o noor ayinni bee ayi, ka o yaꞌa zanꞌas yanam kee o bas. ¹¹Fu miꞌ ye ninkaŋa buudi tiakne a nimbeꞌed ka pu dol suer suŋo. O kadi o meŋ saria beꞌed.

Paul toluŋ n tis Titus meŋ

¹²M yaꞌa tum Artemas bee Tikikus fu saꞌan na, fun on kpeꞌeŋi fu meŋi kenn m saꞌan Nikopolis teŋin na, ka m gbanꞌe ye m be anina sapal waad saŋa. ¹³Kpeꞌeŋimi fu meŋi n suŋ Zenas one tum wada tuuma la, ne Apollos, ba kena ni, ka siꞌel da poꞌogi baa. ¹⁴Kel ka ti nidib la zamis ka tum tuuma line nar ye ba tum ka li suŋi ba, ka ba be zaalim zaalim.

¹⁵Bane be ne mam wusa puꞌusid uf. Puꞌusimi ti yadda niŋidib taaba bane noŋi ti la.

Winaꞌam yelsum na be ne ya wusa.