FILIPI DIM

Paul n sob gbauŋ siꞌa n tis

FILIPI DIM

la nwa

¹Mam Paul ne Timoti bane a Yesu Kiristo tumtumnib n sob gbauŋ kaŋa nwa. Ti sobid tisid Winaꞌam nidib bane a yinni ne Yesu Kiristo ka be Filipi teŋin laꞌam ne Winaꞌam nidib bane a tuongatib ne suŋidib la.

²Ti Baꞌ Winaꞌam ne ti Zugsob Yesu Kiristo na tisi ya yelsum ne sumalisim.

Paul n sosid Winaꞌam la yela

³M yaꞌa tenꞌesi ya yela m yiti puꞌus Winaꞌam bareka saŋa wusa. ⁴Ka m yaꞌa yiti sosid Winaꞌam tisidi ya wusa m sosidne ne sumalisim, ⁵tiname a tumtumnib ne taaba hale pinꞌilugin sa ti paae saŋa nwa la. ⁶M miꞌ hale ye one pinꞌil tuumsuŋo ya sunya ni la, na tum li naae Yesu Kiristo ken dabisir la.

⁷Li a suꞌum ka m tenꞌesi ya wusa yela ala, mam more ya potenꞌer la zug. Dinzug m yaꞌa be ne sarega ni bee ti laꞌam paꞌan ne nidib ye labasuŋ la a sida ya na laꞌam diꞌed Winaꞌam popielim piini la ne man. ⁸Ka Winaꞌam baŋ ye m yaꞌam boodi ya wusa ne noŋilim line yi Yesu Kiristo ni na.

⁹Ka m sosid Winaꞌam ye ya noŋilim na peꞌes hale ne miꞌilim ne baŋir ameŋa, ¹⁰ye ya gaŋ line a suꞌum la ka a nyain ka dianꞌad kaeꞌ n gur Yesu Kiristo lebig na dabisire, ¹¹ka peꞌel ne popielim tuuma line yi Yesu Kiristo saꞌan na n tisid Winaꞌam yuꞌur zunꞌor ne naꞌasi.

Paul sarega ni beilim la yela

¹²M baꞌabiise, m bood ye ya baŋ ye line niŋi m la, sid suŋ ka labasuŋ la ken tuon. ¹³Li ke ka gomena yin sogianam wusa ne soꞌ mekama baŋ ye m sarega ni beilim la ane Kiristo yela, ¹⁴ka baꞌabiis la titaꞌam sa mor kpiꞌeuŋ ne ti Zugsob la, m sarega beilim la zug, ka ba mor kpiꞌuŋo peꞌes hale ye ba pianꞌad Winaꞌam labaar la ka dabiem kaeꞌ.

¹⁵Sieba moon Kiristo yela la ne fufum ne nennim ka sieba tum ne potenꞌesuŋ. ¹⁶Ka potenꞌesuŋ dim la mooni li noŋirin ka baŋ ye Winaꞌam ziꞌeli man ye m guꞌe bane zanꞌas labasuŋ la. ¹⁷Ka sieba pu moon Kiristo yela ne popielim, amaa ba mooni li ne nennim ka tenꞌesid ye m namisug la paꞌas, mam be sarega ni la. ¹⁸Li pu pake. Line gaad li wusa ane Kiristo labaar la moolug hale li yaꞌa dolne potenꞌesuŋin bee potenꞌebeꞌedin ne, li kpelim malis man.

¹⁹Ka m miꞌ ye li yit ne ya Winaꞌam puꞌusum ni na ne Yesu Kiristo Siig suŋir ni, ka line naam la na tisi m faangir. ²⁰Lin ka man bood hale ka mor tiꞌir li yela ane ye m ku di nyan ne ka lee mor sukpiꞌeuŋ ka Kiristo nye naꞌasi man ni nannanna, wuu on yiti nye siꞌem saŋa wusa la, m yaꞌa kpi bee m yaꞌa voe. ²¹Ne mane, m yaꞌa voe ne, m voe ne Kiristo zug, ka m yaꞌa lem kpi ne, li ane nyood tis im. ²²Ka m yaꞌa voe ka na tum tuumsuma li a suꞌum. Amaa man bood baꞌ ne ma la zug, m ku nyaŋe gbanꞌe line ka m na gaŋi. ²³M bood ye m yi beilim kaŋa nwa ka bei ne Kiristo; ka line a suꞌum hale. ²⁴Amaa yanam yela, li a suꞌum ka m kpelim voe. ²⁵M mor sukpiꞌeuŋ ne man yel siꞌel la ka linzug ka m miꞌ ye m na kpelim be ne ya wusa, ka yaname niŋ Yesu Kiristo yadda la na tugus ne sumalisim. ²⁶Ka m yaꞌa ti be ne ya yaꞌas, ya na tunꞌe nweꞌ nyoꞌog ne m hale Yesu Kiristo ni.

²⁷Lin a siꞌem wusa keli ka ya beilim tual ne Kiristo labasuŋ la, ka m yaꞌa keenn ya saꞌan na bee m yaꞌa pu kenaa, m na wum ye ya gbanꞌe potenꞌer yinni kiŋ kiŋ, ka mood ne yadda yinni ne noor yinni ye labasuŋ la siakir na keŋ tuon. ²⁸Da zoti ya dataas dabiem baa biꞌelaa, ka ya sukpiꞌeuŋ na paꞌali ba ye ba na baꞌas beꞌed. Amaa ka lee paꞌal ye yanam na nye faangir line yi Winaꞌam saꞌan na la. ²⁹Ka li ane Winaꞌam tisid ka li kaꞌ ya yadda niŋir la maꞌanee, asee ya laꞌam namis Kiristo zug. ³⁰Ka ya namisug wenne yaname da nye man namisid siꞌem la, ka wumid ka ya nan kpelim bee li puugin nannanna la.

Kiristo meŋsier la yela

¹Ya beilim Kiristo yela yaꞌa sadigim kpeꞌeŋi ya, ka o noŋilim belisi ya, ka ya a bane laꞌam diꞌe Winaꞌam Siig Suŋ la, ka ya mor noŋilim ne nyoog ne taaba, ²keli ka m sumalisim peꞌel, ne yaname mor potenꞌer yinni ne noŋilim yinni ne taaba ne yaꞌam yinni ne sunf yinni la. ³Da niŋ siꞌel line yi nennimin ne titaꞌalimine, amaa lee siemi ya meŋ ka tenꞌesi ye ya taaba a suꞌum gati ya. ⁴Keli ka ya wusa potenꞌer be ne taaba suŋir ni, ka kaꞌane ya meŋ din maꞌanee.

⁵Potenꞌer kane nar ye ya mor ane Yesu Kiristo potenꞌer.

⁶Winaꞌam a siꞌem la, ala men ka Kiristo ae,

amaa o pu tenꞌes ye on zemis ne Winaꞌam la, o na kpelim gbanꞌe kiŋ kiŋ nee,

⁷ka lee siene o meŋ ka lieb wuu yamugi a siꞌem la,

ka ba duꞌa o ka o lieb ninsaal.

⁸Ka on nie wuu ninsaali a siꞌem la,

o sie o meŋ ka siak kuꞌum wuu tuumbeꞌed sobne hale n kpi dapuudir zug.

⁹Linzug ka Winaꞌam duꞌos o hale,

ka tis o yuꞌur line gat yuda wusa.

¹⁰Ka Yesu yuꞌur zugo bun line wusa voe ka be zinꞌig wusa bee saazug bee teŋ zug bee teŋ teŋir,

na igini o tuon ka duꞌos o yuꞌur.

¹¹Ka soꞌ mekama na yel ye, Yesu Kiristo a Zugsob la,

ka li zunꞌe ti Baꞌ Winaꞌam la yuꞌur.

Tinam a suꞌum nyain dunia beꞌed nwa ni la yela

¹²Dinzugo m zuanoŋa, mam daa bene ya ka ya siakidi m yelug siꞌem la, niŋimi ka li gati ala m yaꞌa kaꞌa ya saꞌane, ka tumi tuuma line yi ya faangir ni na la suꞌuŋa ne dabiem zotim. ¹³Winaꞌam be ya ni n tum ye ya potenꞌer doli o boodim suŋ, ka ya sid na tumi li.

¹⁴Niŋimi siꞌel mekama ka nyunyolug ne noŋgban nwaꞌar kaeꞌ, ¹⁵ye ya a nyain ka taal kaꞌasige, ka a Winaꞌam biis bane kaꞌa gbadaa ka bei nimbeꞌednam ne ninyood soogin, ka nie nyain wuu neesim dunia nwa ni, ¹⁶ka gbanꞌe nyovur pianꞌad la kiŋ kiŋ. Ya yaꞌa niŋi ala, m na nweꞌ nyoꞌog ne ya Yesu Kiristo ken na daar la, ye m zigib ne m tuuma la wusa pu niŋ zaalim. ¹⁷Hale baa m yaꞌa zaŋi m nyovur tis ka li wenne maan ne, yanam yadda niŋir zug, li na malis man ka m na maal sumalisim ne ya wusa. ¹⁸Ala mene li suꞌum ka ya sunya maꞌae ka ya mor sumalisim ne m.

Timoti ne Epafroditus la yela

¹⁹M mor tiꞌir ti Zugsob Yesu Kiristo ni ye ti ku yuuge ka na tum Timoti ya saꞌan na ka o na tisi ya m labaar ka m sunf maꞌae. ²⁰On maꞌaa mor potenꞌer yinni ne mam ka on baꞌa sid be ne ya yela hale. ²¹Soꞌ mekama zigid ne o meŋ yela ka kaꞌane Yesu Kiristo yelaa. ²²Ka ya miꞌ Timoti suꞌum a siꞌem ka miꞌ ye mam ne one tum labasuŋ tuuma wen wuu dau ne o biigi niŋid siꞌem la. ²³Dinzugo m mor potenꞌer ye m na tum o ya saꞌan toꞌoto, m yaꞌa baŋ m yela la na niŋ siꞌem. ²⁴Ka m meŋ me mor tiꞌir Zugsobin la ye li ku yuuge ka m me na kena.

²⁵M gbanꞌe li ka li nar ye m tumi m baꞌabiig, Epafroditus one a m tumtum tiraan ka lem a m sogia tiraan ka a one ka ya tum o ye o suŋi m la. ²⁶Ka o bood hale ye o nyee ya wusa; ka o sunf saꞌam yaname wumi o banꞌas yela la. ²⁷Sida, o daa benꞌedne ka nwaas kum. Ka Winaꞌam zo o nimbaanlig, ka li kaꞌane on maꞌaa nimbaanliga, amaa laꞌam ne mam men, ka m susaꞌaŋ da lem peꞌese. ²⁸Dinzug ka m mood ne nimmua hale ye m tum o ya saꞌan na, ka ya yaꞌa nye o, ya sunya na malis, ka m yaꞌam na maꞌae men. ²⁹Diꞌemin o ne sumalisim hale Zugsob la zug. ³⁰O daa nwaasne kum Kiristo tuuma yela, ka keesi o nyovur ye o suŋi man ne line ka ya meŋ pu nyaŋe suŋi m la. Naꞌasimi niŋkan buudi.

Sida popielim la yela

¹Baꞌasugo, m baꞌabiise, more sumalisim ne Zugsob la ni. Li pu daam man ye m lem sob bun kan yela yaꞌase, bozugo li ane suŋir tisi ya.

²Guꞌusimi ya meŋ ne nimbeꞌednam la, bane tum tuumbeꞌed la, laꞌam ne bane kpenꞌesid nidib baŋo la, ka paꞌan ye ba ane Winaꞌam nidib la. ³Ka tiname baŋo kpenꞌeb la paꞌal ye ti sid puꞌusid Winaꞌam ne o Siig Suŋ paŋ, ka nweꞌed nyoꞌog Yesu Kiristo ni. Ti pu tie ninsaali niŋid siꞌel yela. ⁴Hale baa m meŋi naani moren suekane na keen ka m nweꞌ nyoꞌog ne saalib yela laa.

Soꞌ yaꞌa tenꞌes ye o mor suekane na ke ka o nweꞌ nyoꞌog ne saalib niŋire, mane lee gat. ⁵Ban n duꞌa man daba anii daar ka ba kpenꞌesi m baŋo. Mane a Israel nid, Benjamin doog buudi ka a Hibiru nid yelmeŋir, ka Jew dim wada la dolisug yela ka m a Farisee nid. ⁶Ka li yaꞌa ane nimmua yela m da namisid Winaꞌam nidib bane niŋ Yesu yadda. Ka popielim line a wada siakir la yela la, m daa kaꞌ gbaꞌaree.

⁷Ka yelbane wusa ka m naani nokin ka li da aa m nyood la, ka Kiristo yela, ka m noki li ka li a zaalim. ⁸Asida, m tenꞌes ye siꞌel mekama ane zaalim. Ka Yesu Kiristo baŋir yela a suꞌum gati li wusa. On yela ka m lu siꞌel mekama ni ka noki li ka li a saꞌad, ye Kiristo lee na a m nyood, ⁹ne mam be o saꞌan la. M pu lem mor popielim line a m meŋ din ne, line a wada suer dolim. M yuꞌun mor ne popielim line yi Yesu Kiristo yadda niŋirin ka a Winaꞌam din line ka ti diꞌed ne yadda niŋir. ¹⁰Ka bood ye m baŋ o ne o kuꞌum vuꞌugir la paŋ, ka laꞌam namis ne o ka wenne o ne o kumin, ¹¹ye daasiꞌere m na tunꞌe nye kuꞌum vuꞌugir.

Winaꞌam piini diꞌer nyidigir la yela

¹²Li kaꞌane ye m pun deŋim nye piini la bee lieb suꞌum naae, amaa m nyidigid ye m gbanꞌe piinkane yela ka Yesu Kiristo gaŋi m la. ¹³M baꞌabiise m pu tenꞌes ye m nyaŋe li nanne. Lin ka m nyidigid la ane ye m tam nyaꞌaŋ bun ka lee mood ye m paam line be tuon la. ¹⁴M zotne hale ye m paae naar la ben, ye m di piini la. Ka piini la ane ye Winaꞌam buoli man arazana ni ka li yi Yesu Kiristo ni na.

¹⁵Keli ka tinam bane yadda biꞌ la mor potenꞌer kan men, ka soꞌ yaꞌa mor potenꞌer siꞌa, Winaꞌam na nie li ka ya baŋ. ¹⁶Keli ka ti gbanꞌe line ka ti deŋim siak la kiŋ kiŋ.

¹⁷M baꞌabiise, laꞌamini taaba tuꞌasi mam tuuma, ka kpansimi bane beilim tuꞌasi ti beilim a siꞌem la. ¹⁸M deŋim yeli ya noor bedego, ka lem yeti ya ne nintoꞌom ye nidib bedego be ka a dataas ne Yesu Kiristo dapuudir la yela. ¹⁹Ba baꞌasug ane saꞌuŋ, ka ba niŋgbiŋ boodim aa ba Winaꞌam. Ba nokid line a nyan la, n nweꞌedi ba nyoꞌog, ka ba yaꞌam kpenꞌed ne line a dunia bun maꞌaa. ²⁰Ka tiname a arazana nidib la, zinꞌikan ka ti guri ti faangid Yesu Kiristo yiib na la. ²¹One na tiakedi ti taduŋ niŋgbiŋ ka li wen wuu o niŋgbiŋ line venl pilpil la. O na niŋ ala ne o paŋ kane ket ka o nyaŋ ka soꞌe siꞌel mekama la.

Saꞌalug

¹Ala zug m baꞌabiise, yanam ban ka m noŋ hale ka bood ye m nye ya la, li ket ka m mor sumalisim ka lem a m nyood la. M zuanoŋa, ziꞌenimi kiŋ kiŋ yanam a yinni ne Zugsob la.

²M belim ne poꞌabama, Yuodia ne Sintike ye ban a yinni ne Zugsob la, ba niŋim noor yinni ne taaba. ³M zoongo ameŋa, m me sosid uf ye fu suŋ poꞌab la. Ba daa laꞌas ne man n tum Kiristo labasuŋ tuuma la ne Kelement ne tumtum taab bane kpelim ka ba yuda sob nyovur paal dim gbauŋin la.

⁴More sumalisim saŋa wusa yanam a yinni ne Zugsob la. Ka m na lem yel yaꞌas ye, more sumalisim. ⁵Kel ka nidib wusa nye ya suguru. Zugsob la kenna la liꞌelne. ⁶Da ke ka siꞌel yela paki yaa, amaa puꞌusum Winaꞌam siꞌel wusa ni ne sosug laꞌam ne bareka puꞌusug, ka o baŋi ya sosug yela. ⁷Winaꞌam na tisi ya sumalisim line gat din ka ninsaalib na baŋi li gbin ka na guri ya sunya ne ya tenꞌesa Yesu Kiristo ni.

⁸M Baꞌabiise, li baꞌasug ane anwa. Keli ka ya yaꞌam kpenꞌe siꞌel mekama line a sida, ne line mor zunꞌor, ne line a yelsida, ne line a popielim ne line venl, ne tuumsuma ne siꞌel mekama ka li a suꞌum ka nar pianꞌasuŋ. Tenꞌesimi bama yela. ⁹Niŋimi line ka ya zamis, ka diꞌe, ka wum, ka nye m saꞌan la, ka Winaꞌam one tisidi ti sumalisim na be ne ya.

Piini bareka puꞌusug

¹⁰Li malisi m hale Zugsob saꞌan la ya baꞌa lem be ne man yaꞌas la. Ya baꞌa sid daa be ne mam, amaa ya daa kaꞌ suer siaꞌ na paꞌali lii. ¹¹Li kaꞌane m yel ye siꞌeli poꞌogi ma. M pun zamis ye m beilim yaꞌa a siꞌem wusa li ku paki ma. ¹²M miꞌilim taduŋo a siꞌem ka lem miꞌ morem a siꞌem. M zamis ye m tunꞌe bei ne yela mekama wusa ni, li yaꞌa a tigir bee koꞌom bee kpanꞌam bee noŋ. ¹³M tunꞌe tum siꞌel mekama wusa ne paŋ kan ka Kiristo tisidi m la.

¹⁴Ka laꞌam ne wala sa ya maal suꞌum yaname laꞌam suŋi m ne m namisugin la. ¹⁵Ka yanam Filipi dim miꞌ ye labasuŋ moolug pinꞌilugin ya teŋin la, mam daa yi Masedonia ka toom la, Winaꞌam nidibi be teŋ siꞌa pu tisi m bee diꞌe siꞌeli m saꞌane asee yanam maꞌaa. ¹⁶Bozugo mam daa be Tesalonika teŋin la, ya daa tum n suŋim noor bedego. ¹⁷Li kaꞌa piini ka mam booda, amaa m bood ye ya diꞌe li nyood. ¹⁸M diꞌe piinbane wusa ka ya tis Epafroditus ye o mor na la ka li siaki m boodim. Li wen wuu bun line ka li nyuug malis ka ba nyuꞌe tis Winaꞌam ka o diꞌed ne sumalisim. ¹⁹Ka m Winaꞌam on ka m siak na tisi ya line mekama nar ne ya, ka li dolne o kpaꞌam titaꞌar line be Yesu Kiristo ni la.

²⁰Ti Baꞌ Winaꞌam na nye zunꞌor saŋa kane kaꞌ benne. Ami.

Puꞌusug

²¹Puꞌusum Winaꞌam nidib mekama wusa bane a yinni ne Yesu Kiristo la. Ti baꞌabiis bane laꞌam be ne m la puꞌusidi ya. ²²Winaꞌam nidib wusa puꞌusidi ya hale line gat ane naꞌab Kaisa yidim la.

²³Ti Zugsob Yesu Kiristo yelsum na be ne ya.