JOON

JOON

n sob gbauŋ siꞌa Yesu Kiristo labasuŋ

yela la nwa

Pianꞌad la yela

¹Pinꞌilugin sa ka Pianꞌad la da pun deŋim be, ka Pianꞌad la da bene ne Winaꞌam, ka a Winaꞌam. ²Hale pinꞌilugin sa Pianꞌad la da bene ne Winaꞌam.

³Ka li yi o saꞌan na ka Winaꞌam naam bun wusa, ka li yaꞌa kaꞌan one, bun line naam la wusa ku naaminee. ⁴O saꞌan ka nyovur be, ka nyovur la tis saalib neesim. ⁵Ka neesim la nie nyain likin ka lik la pu nyaŋe kpiisi lii.

⁶Winaꞌam da tum dau soꞌ ka o yuꞌur buon Joon. ⁷Ka o kena ye o tuꞌas nidib neesim la yela, ye on zug ka ba wusa na niŋ Pianꞌad la yadda. ⁸O da kaꞌ one a neesim laa, amaa o tuuma da ane ye o kena di neesim la kaset.

⁹Yelmeŋir neesim line nie nyain tisid saalib wusa la da kenn dunia nwa ni. ¹⁰O da be dunia ni, ka a one maal dunia, hale laꞌam ne wala dunia dim da pu diꞌe oo. ¹¹O kenn bane a o buudi dimin na, ka ba da pu diꞌe oo. ¹²Amaa bane wusa diꞌe o ka niŋ o yadda la, o tisi ba paŋ kane ka ba na lieb Winaꞌam biis. ¹³Ba da lieb Winaꞌam biis ka li pu wenne ninsaalibi duꞌad siꞌem laa, amaa Winaꞌam a ba Baꞌ.

¹⁴Ka Pianꞌad la lieb ninsaal ka be ne ti. Ka ti nye o naꞌam paŋ beilim line nie ti saꞌan ka nar on kane a ti Baꞌ Winaꞌam biyimir la. O ni ka yelsum ne sida be.

¹⁵Joon yeli o yela, ka mooli yel ye, “Soꞌ be mam nyaꞌaŋ ka mor kpiꞌeuŋ gat man. Bozugo o da be ka man nan kaeꞌ.” ¹⁶Ka li yine o yelsum titaꞌarin ka ti wusa diꞌe o popielim piini la yinni yinni. ¹⁷Winaꞌam da ke ka Moses tis nidib wada ka lee ke ka popielim piini ne sida yi Yesu saꞌan na tisi ti. ¹⁸Soꞌ kaeꞌ nan miꞌ nye Winaꞌam. Winaꞌam biyimir one be o Baꞌ saꞌan la ke ka ti baŋ o.

Joon one suud nidib kuꞌom la n yel siꞌel la yela

(Mateo 3.1-12; Maak 1.1-8; Luuk 3.1-18)

¹⁹Saŋkan la ka Jew dim bane be Jerusalem da tum maalmaanib ne Levi dim Joon saꞌan ye ba buꞌos o ye, “Fu aa anoꞌone?” ²⁰Ka Joon lebisi ba nyain ye, “Li kaꞌa mane a Kiristo laa.”

²¹Ka ba buꞌos o ye, “Ka fu aa anoꞌone? Fu ane Elija bee?”

Ka o lebis ye, “Ayei.”

Ka ba lem buꞌos o ye, “Ka fu ane Winaꞌam nodiꞌes la bee?”

Ka o lem lebis ye, “Ayei.”

²²Ka ba lem buꞌos o yaꞌas ye, “Ka fu aa anoꞌon be? Tisimi ti lebiskan ka ti na tis bane tumi ti la na. Fun meŋ aa anoꞌon kimm ne?”

²³Ka Joon lebisi ba wenne line ka Winaꞌam nodiꞌes Azaya da sob siꞌem la ye, “Man ane one be sianꞌarin n moon ye, ‘Maalimi Zugsob la suer suꞌuŋa.’ ”

²⁴Bane buꞌos o la yine Farisee dimin na, ²⁵ka buꞌos o ye, “Fu yaꞌa kaꞌ Kiristo la, ka kaꞌ Elija, ka kaꞌ Winaꞌam nodiꞌes la, bo ka fu suud nidib la kuꞌom?”

²⁶Ka Joon lebis ye, “Mam suud ya ne kuꞌom. Amaa soꞌ be ya soogin ka ya ziꞌ o. ²⁷O ane one doli m nyaꞌaŋ na ka lee gati m, hale ka li pu nar ye m pidigi o taꞌadaa.”

²⁸Lini sob nwa niŋne Betani teŋin moꞌar Joodan nyaꞌaŋ, zinꞌikan ka Joon da suud nidib kuꞌom la.

Winaꞌam Peꞌebil zol

²⁹Ka yimbeog ka Joon nye ka Yesu ken na, ka o yel ye, “Gosimi one a Winaꞌam peꞌebil one yiisid dunia tuumbeꞌedi basid la. ³⁰Oŋa ka m yel ye, ‘Soꞌ be m nyaꞌaŋi ken na, ka o mor kpiꞌeuŋ gati m, bozugo, o da be ka m kaeꞌ.’ ³¹M da pu baŋ on a soꞌo, amaa line yela ka m daa suud nidib la kuꞌom ane ye li nie paꞌal Israel dim ka ba baŋ o.”

³²Ka Joon yel ye, “M nye ka Winaꞌam Siig Suŋ naam arazana ni sigid na wen wuu dawan ne n zuen ne o zugin ka kpelimi o ni. ³³M daa ziꞌ o, amaa Winaꞌam one tumi m na ye m suu nidib ne kuꞌom la paꞌali m ye, ‘One ka fu nye ka Winaꞌam Siig Suŋ la sigi o ni ka kpelim la, a one suud nidib ne Winaꞌam Siig Suŋ la.’ ³⁴M nye li ka dii li kaset ye one a Winaꞌam Biig la.”

Yesu yiiga nyaꞌandolib la yela

³⁵Ka beog lem nie ka Joon da ziꞌe ne o nyaꞌandolib ayi yaꞌas. ³⁶Ka Yesu n ken la ka o gos o ka ye, “Gosimi oŋa a Winaꞌam peꞌebil la.”

³⁷Ka nyaꞌandoliba ayi la wum la, ka dol Yesu. ³⁸Ka Yesu giꞌe nye ban dol o la ka buꞌosi ba ye, “Ya bood bo?”

Ka ba lebis o ye, “Rabbi,” (li gbin ane ye, paꞌana,) “Fu gbeend yaa ni?”

³⁹Ka o ye, “Kemi na gosi.”

Ka ba keŋ nye on be siꞌel, ka gbenn o saꞌan daakan, bozugo li da ane winkoor.

⁴⁰Nidiba ayi bane wum Yesu pianꞌad ka dol o la yinni yuꞌur buon Andrew ka a Simon Piita baꞌabiig. ⁴¹Ka line ka Andrew da niŋ yiiga ane, o keŋne ia Piita ka yel o ye, “Ti nye Messia la” (Li gbin ane Kiristo, one ka Winaꞌam gaŋ la.)

⁴²Ka o dol o kenn Yesu saꞌan na, ka Yesu gos o ka ye, “Fu ane Joon biiga Simon. Ba na buon uf ye Kefas. (Li gbin ane ye Akugir bee Piita.)”

Yesu n buol Filip ne Nataniel ye ba dol o la yela

⁴³Ka beog kane nie la ka Yesu bood ye o keŋ Galilee teŋin ka nye Filip ka yel o ye, “Doli m.”

⁴⁴Filip da yine Besaida, teŋkan ka Andrew ne Piita me yi na la. ⁴⁵Ka Filip nye Nataniel ka yel o ye, “Ti nye one ka Moses da sob o yela, ka Winaꞌam nodiꞌesidib me da sob la, one a Josef biig Yesu one yi Nazaret la.”

⁴⁶Nataniel buꞌos o ye, “Ka bunsuŋ siꞌa na nyaŋe yi Nazaret teŋin naa?”

Ka Filip lebis o ye, “Kem na gos.”

⁴⁷Ka Yesu nye Nataniel ka o kenne n tuꞌa o na ka o pianꞌa o yela ye, “Gosimi, oŋa ane Israel nid ameŋa ka pu mor taala.”

⁴⁸Ka Nataniel yel ye, “Fu niŋ wala baŋi ma?”

Ka Yesu lebis o ye, “Saŋkan ka fu paꞌa be kekaŋ gbinin ka Filip buol uf la, ka mam pun nye uf.”

⁴⁹Ka Nataniel yel ye, “Paꞌana, fu ane Winaꞌam biig, ka a Israel dim naꞌab.”

⁵⁰Ka Yesu yel o ye, “Mam yel ye, m nye uf ka fu be kekaŋ gbinin la zug, ka fu niŋi m yaddaa? Fu na nye yel nyalima bane gat neꞌeŋa.” ⁵¹Ka lem yel o ye, “Asida ka m yet uf ye, fu na nye ka arazana yoꞌog ka Winaꞌam maleknam dol Ninsaal Biig la saꞌan n dut ka sigid na.”

Poꞌadiir diꞌema Kana teŋin

¹Ka daba atanꞌ daar la ka poꞌadiir diꞌema daa be Kana teŋin Galilee soꞌolim ni. Ka Yesu ma be anina. ²Ka ba buol Yesu ne o nyaꞌandolib ye ba kenn diꞌema la na. ³Ka ban nu daam poꞌog la, ka Yesu ma yel o ye, “Ba daam naaeya.”

⁴Ka Yesu lebis o ye, “M ma, bo ka fu yet man line ka m na maali? M saŋa nam pu paae.”

⁵Ka o ma yel tumtumnib la ye, “Niŋim one yeli ya siꞌel wusa.”

⁶Jew dim maluŋ line a nuꞌug pier la zug, ka ba mor kuga siins ayuobu n be anina.

⁷Ka Yesu yeli ba ye, “Peꞌelim siins la ne kuꞌom.” Ka ba peꞌeli ba hale ti paae noya ben.

⁸Ka o yeli ba ye, “Kabigumi li n tis one gosid diꞌema yela la.” Ka ba kabig n tis o.

⁹Ka one gosid diꞌema yela la, pu baŋ lin yi siꞌel naa, amaa tumtumnib bane wik kuꞌom la miꞌ. Ka on lem daam la, ka o buol poꞌapaal sid la, ¹⁰n yel o ye, “Soꞌ wusa tisidne damalisiŋ diꞌema pinꞌilugin, ka ba yaꞌa ti nu tig la, ka ba yuꞌun tisid danbeꞌed. Amaa fun kpiank ne damalisiŋ la, hale ti paae nannanna.”

¹¹Nwa a Yesu nyalima tuumkan ka o deŋim maal. Ka o maali li Kana teŋin, Galilee soꞌolim ni la. O nie paꞌal o paŋ, ka o nyaꞌandolib la niŋ o yadda.

¹²Ka neꞌeŋa nyaꞌaŋ la, ka o keŋ Kapeenum teŋin ne o ma ne o mabiis ne o nyaꞌandolib. Ka ba zinꞌin anina dabisa biꞌela.

Yesu n niŋ siꞌel Winaꞌam puꞌusum yin la yela

(Mateo 21.12-13; Maak 11.15-17; Luuk 19.45-46)

¹³Ka Jew dim maluŋ line a kuꞌum malek gaadug tienr la da liꞌelne ka Yesu keŋ Jerusalem ¹⁴ka kpenꞌ Winaꞌam puꞌusum yin la ka nye ban kuosid niigi ne peꞌes ne dawana ka nidib be anina tiaꞌasid ligidi. ¹⁵Ka o nok nwiisi maal wug kpaꞌasir n kadi ba wusa ne ba peꞌes ne niigi yiis puꞌusum yin la. Ka kpaꞌe nidib bane tiaꞌasid ligidi la laꞌabaanlug widig, ka lebigi ba teebulnam la n pibil. ¹⁶Ka yel bane kuosid dawana la ye, “Nokimi bama nwa n toomi sa. Da ke ka m Baꞌ yir la liebi ya kukpiuŋ yire.”

¹⁷O nyaꞌandolib la tienn ye li da sob ye, “M nini muꞌe ne Winaꞌam yir siꞌem la wenne bugum n dit man ne.”

¹⁸Ka Jew dim buꞌos o ye, “Tuum nyalima zanbin bo ka fu na maal ka li paꞌal ye fu mor suer n na niŋ anwa?”

¹⁹Ka Yesu lebisi ba ye, “Saꞌami Winaꞌam puꞌusum yir kaŋa nwa ka dabisa atanꞌ daar ka m na due li ziꞌel.”

²⁰Ka Jew dim yel ye, “Li nokne yuma piisnaasi ne ayuobu ka ba meꞌ yikaŋa ka fu na nyaŋe due li ziꞌel dabisa atanꞌ daaree?” ²¹Amaa Yesu pianꞌadne Winaꞌam puꞌusum yir kane aa o niŋgbiŋ la. ²²Dinzugo, on da kpi ka vuꞌug kumin la o nyaꞌandolib tienn ye o deŋim yel neꞌ. Ka ba niŋ Winaꞌam gbauŋ yadda ne pianꞌakan ka Yesu pianꞌa la.

Yesu n miꞌ line be saalib sunya ni la yela

²³Ka on da be Jerusalem maluŋ la tienrin la, nidib bedego nye tuum nyalima zanbina ban ka o niŋ la, ka niŋ o yadda. ²⁴Ka Yesu pu pesigi o meŋ n tisi baa, ²⁵bozugo o miꞌ saalib wusa. O miꞌ line be saalib wusa sunya ni ka pu bood ye soꞌ yel o saalib yelaa.

Yesu ne Nikodemus la yela

¹Farisee dim nid yinni da be, ka o yuꞌur buon Nikodemus. O da ane Jew dim kpeenm. ²Dau kaŋa da kenn Yesu saꞌan na yuꞌuŋ n yel ye, “Paꞌana, ti miꞌ ye fu ane paꞌan one yi Winaꞌam saꞌan na, bozugo soꞌ ku nyaŋe tum tuum ban ka fu tum nwaa, asee Winaꞌam be on sob ni.”

³Ka Yesu lebis n yel o ye, “Ameŋa meŋa ka m yet uf ye, li yaꞌa kaꞌ ka ba maligim duꞌa uf yaꞌase, fu ku kpenꞌ Winaꞌam soꞌolim la nii.”

⁴Ka Nikodemus buꞌos o ye, “Soꞌ na niŋ wala lem duꞌa nid kane kudug yaꞌase. O na lem tunꞌe kpenꞌ o ma poogin, n lem n duꞌa yaꞌase?”

⁵Ka Yesu lebis o ye, “Ameŋa meŋa ka m yet uf ye, nid kane n pu duꞌa ne kuꞌom ne Siiga, o ku nyaŋ kpenꞌ Winaꞌam soꞌolim nii. ⁶Bun kane duꞌa ne niŋgbiŋ ane niŋgbiŋ, ka bun kane n duꞌa ne Siig la ane siig. ⁷Da ke ka li lidig uf ne man yel ye, li suꞌum ka fu lem duꞌa la zugo. ⁸Pebisim daꞌad n kenne lin bood siꞌel, ka fu wum lin vuud la, ka ziꞌ lin yi zinꞌisiꞌa bee lin ken zinꞌisiꞌa. One duꞌa ne Siig me ane ala.”

⁹Nikodemus lebis n buꞌos o ye, “Bun kaŋa na niŋ wala maali?”

¹⁰Ka Yesu lebis n buꞌos o ye, “Fu ane Israel kpeenm one paꞌan nidib, ka ziꞌ nwaa? ¹¹Ameŋa meŋa ka m yet uf ye, ti pianꞌadne tinam miꞌ siꞌel, ka di kaseta n tis tinam n nye siꞌel. Amaa ya pu siaki ti pianꞌad laa. ¹²M yaꞌa yeli ya dunia nwa yela, ka ya pu siaki, wala ka m na yeli ya arazana yela, ka ya siaki? ¹³Soꞌ nam ziꞌ n du arazana n be anina, asee one yi arazana ni n sig na la, one a Ninsaal Biig la. ¹⁴Wenne Moses n da be moog soogin la, ka zaŋ waaf n zakn agol siꞌem la, ala men ka ba na zank Ninsaal Biig la. ¹⁵Ka one niŋ o yadda na nye nyovur dine ka naare.”

¹⁶Winaꞌam noŋ dunia hale ka o tum o biyimir la n tis na. Ka one niŋ o yadda la, ku bodige, amaa o na nye nyovur dine kaꞌ naare. ¹⁷Ala zug Winaꞌam pu tum o Biig dunia ni na ye o koos dunia dim beꞌede, amaa ye dunia nye faangir o maꞌasim zug. ¹⁸Ka one niŋ o yadda la, ba ku koos o beꞌede. Amaa one pu niŋ o yadda la, Winaꞌam pun koos o ne beꞌed, on pu niŋ Winaꞌam biyimir yadda la zug. ¹⁹Ka antuꞌa kaŋa nwa yet ye, one ke ka dunia a nyain la kena, ka nidib bood lik n gaad o, ba tuumbeꞌed la zug. ²⁰On mekama tum tuumbeꞌed kis ne neesim la belim ka pu kenne li nii, o tuuma la na ti nie yela. ²¹Amaa on mekama tum line a ameŋa la, kene neesim la ni na, ye o tuumsuma nie ka nidib baŋ ye li ane Winaꞌam tuuma.

Yesu ne Joon la yela

²²Neꞌeŋa nyaꞌaŋ ka Yesu ne o nyaꞌandolib la keŋ Juuda teŋin ka kpelimi anina ka su nidib kuꞌom. ²³Ka Joon me da be Aenon teŋin line kpiꞌe Salim teŋin n suud nidib kuꞌom, bozugo kuꞌom da be ani bedego. Ka nidib bedego kena ka o suu ba. ²⁴Saŋkan la ba da nam pu kpenꞌes o sarega nii. ²⁵Ka noŋgbanwaꞌar yi Joon nyaꞌandolibin ne Jew dim nid yinni kuꞌom suub yela. ²⁶Ka ba kenn Joon saꞌan n yel o ye, “Paꞌana, gosima, one ka fu daa pianꞌ o yela la, ka o daa kenn fu saꞌan Joodan moꞌar nyaꞌaŋ la suud nidib kuꞌom, ka nidib wusa kenne o saꞌan.”

²⁷Ka Joon lebis o ye, “Soꞌ ku nyaŋe diꞌe siꞌela asee line ka Winaꞌam tis o. ²⁸Ya meŋ na di kaset ye m yel ye, ‘Li kaꞌa mane a Kiristo laa. Amaa ba tumi m ka m gaadi o tuon na.’ ²⁹Poꞌadaan soꞌe o poꞌa paal la, ka poꞌadaan la zua n ziꞌe ka wum o pianꞌad la, ka mor sumalisim bedego, bozugo on wum poꞌadaan la kukor la zug. M mor sumalisim bedego. ³⁰Li nar ka on du ka man sie.”

One yi arazana ni na la yela

³¹One yi agol na la gat siꞌel wusa, ka one be dunia ni ane dunia nid ka pianꞌad dunia yela. One yi arazana ni na ka gat siꞌel wusa la, ³²pianꞌad on wum ka nye siꞌel, amaa soꞌ pu diꞌe o pianꞌad laa. ³³One diꞌe o pianꞌad la paꞌal ye Winaꞌam a yelsida daan. ³⁴On ka Winaꞌam tum na la pianꞌadne Winaꞌam labaar, Winaꞌam tis o Siig Suŋ line kaꞌa makir la zug. ³⁵Ti Baꞌ Winaꞌam noŋi o Biig la ka zaŋ siꞌel wusa niŋi o nuꞌusin. ³⁶One niŋ o Biig la yadda mor nyovur line kaꞌ benne. Ka one pu siak Biig la noore, ku nye nyovure, ka Winaꞌam supeen lee na bene on sob zugin.

Yesu ne Samaria dim poꞌa la yela

¹Yesu daa ti baŋ ye Farisee dim wum ya ka on, Yesu, daa suud nidib kuꞌom n gaad Joon. ²Amaa Yesu nyaꞌandolib la daa suudi ba kuꞌom, ka kaꞌ Yesu meŋa. ³On ti baŋ la, o yi Juuda soꞌolimin n keŋ Galilee soꞌolimin.

⁴Ka li suꞌum ye o doli yi Samaria soꞌolim. ⁵Ka o keŋ paae Samaria teŋ siꞌa ka ba buon ye Sikar, line kpiꞌe poog kane ka Jakob da tis o biig Josef la. ⁶Ka Jakob bulug be anina, ka Yesu paae ani ka geenlis mor o ka o zinꞌin bulug la zug, ka li ane nintaŋ soog.

⁷Ka Samaria dim poꞌa soꞌ kena ye o wik kuꞌom. Ka Yesu yel o ye, “Tisim kuꞌom ka m nu.” ( ⁸Bozugo o nyaꞌandolib la gaadne teŋ poogin ye ba daꞌ diib na.)

⁹Ka poꞌa la lebis n buꞌos o ye, “Bo ka fun one a Jew nid, sosid man one a Samaria dim poꞌa ye, m tis uf kuꞌom.” (Bozugo Jew dim ne Samaria dim neꞌesid taaba.)

¹⁰Ka Yesu yel o ye, “Fu yaꞌa miꞌ Winaꞌam piini n a siꞌel, ka lem miꞌ one yet uf ye, tisi m kuꞌom la, fu naan sosin o ka o naan tisin uf vum kuꞌom.”

¹¹Ka poꞌa la lebis n yel ye, “M Zugsoba, fu pu mor lobidiŋ ye fu wike, ka bulug la me zulum. Yaa ni ka fu na paam vum kuꞌokaŋa? ¹²Fu gat tinam yaab Jakobnee? one tis tinam bulug la, ka me nu bulug la kuꞌom ne o biis ne o bunkonbid laa?”

¹³Ka Yesu lebis n yel o ye, “On wusa n nu bulkaŋa kuꞌom la, kuꞌonuud na lem gbanꞌ o. ¹⁴Amaa one wusa na nu kuꞌokane ka m na tis o la, kuꞌonuud ku maligim gbanꞌe on soba. Amaa kuꞌokan ka m na tis o la, na ti kilim wenne bulug on sob ni, ka li na bul n tis o nyovur kane kaꞌ naare.”

¹⁵Ka poꞌa la lebis n yel o ye, “M Zugsoba, tisim kuꞌokan, ka m na nu, ka kuꞌonuud ku lem gbanꞌe ma, ka m ku lem kenn kpela na n wik kuꞌom.”

¹⁶Ka Yesu yel o ye, “Kem ti buol fu sid na.”

¹⁷Ka poꞌa la lebis n yel o ye, “M pu mor sida.” Ka Yesu yel o ye, “Fu pianꞌ yelsida, fun yel ye fu kaꞌ sid la. ¹⁸Fu kul ne sidib anu nwa. Ka one ka fu be ne o nannanna la kaꞌ fu sida. Li ane yelmeŋir ka fu yel.”

¹⁹Ka poꞌa la yel Yesu ye, “M Zugsoba, m baŋ ka fu ane Winaꞌam nodiꞌes. ²⁰Ti yaanam da puꞌusid Winaꞌam zuekaŋa zug. Ka yanam Jew dim yet ye, li suꞌum ka ti puꞌus Winaꞌam ne Jerusalem.”

²¹Ka Yesu yel o ye, “Poꞌaa, siakim m yelug ye, saŋa la kenna, ka ya ku puꞌus zuekaŋa zug bee Jerusalem poogin n tisidi ti Baꞌ Winaꞌam yaꞌase. ²²Yanam puꞌusidne tisid bun kane ka ya ziꞌ. Tinam puꞌusidne tisid bun kane ka ti miꞌ, bozugo faangir la yitne Jew dimin na. ²³Amaa saŋa la kenna, ka li paae ya, ka bane puꞌusid ameŋa n tisid ti Baꞌ Winaꞌam na puꞌus ne siig ne yelmeŋir. Ti Baꞌ Winaꞌam boodne bane puꞌusid puꞌuskan la buudi. ²⁴Winaꞌam ane siig. Ka li suꞌum ye bane puꞌusid n tisid o la, puꞌus o ne yelmeŋir ne ba siis la wusa.”

²⁵Ka poꞌa la lebis n yel o ye, “M miꞌ ye Messia, one ka Winaꞌam gaŋ la kenna, one ka ba buon ye Kiristo la. O yaꞌa ti kena, o na paꞌali ti siꞌelkam wusa.”

²⁶Ka Yesu yel o ye, “Man one pianꞌad n tisid uf la, a on sob.”

²⁷Ka ban sonsi naae la, ka o nyaꞌandolib la kena, ka li lidigi ba, on sonsid ne poꞌa la, ka soꞌ lee pu buꞌos ye, “Bo ka fun ne poꞌa la sonsida?”

²⁸Ka poꞌa la bas o yuur la, ka keŋ teŋ poogin la ni n yel nidib la ye, ²⁹“Kemi na gos dau kane yel man zugin yela wusa. One paꞌati a Kiristo la bee?” ³⁰Ka ba yi teŋ poogin la n ken o saꞌan na.

³¹Saŋkan la ka o nyaꞌandolib la sos o ye, “Paꞌana, dim diib.”

³²Ka o yeli ba ye, “M mor diib na di, amaa ya ziꞌ.”

³³Ka o nyaꞌandolib la yel taaba ye, “Soꞌ mor diib na tis o bee?”

³⁴Ka Yesu yeli ba ye, “M diib ane ye m tum one tumi m la na boodim n naae. ³⁵Ya pu yet ye, ‘Li kpelim nwadisa anaasi ka ki bunib saŋa na kena?’ Gosimi, m yeti ya ye, godigimi ya nindaas n gos pood la. Ba sid peligne n gur ki bunub. ³⁶One bun diꞌedne yood, ka vaad zuud la ka li wenne nimbane niŋ yadda n kpenꞌed nyovur line kaꞌ naarin. Bozugo one bud ne one bun na laꞌas nye sumalisim. ³⁷Ala ka pianꞌuk la niŋ ameŋa ye, ‘Ayinni but ne. Ka ayinni me bun.’ ³⁸M tumi ya ne ye ya keŋ bun dine ka ya pu kuaa. Sieba daa kua. Amaa yanam diꞌe tuuma la yood.”

³⁹Samaria dim bedego bane be teŋkan la poogin daa niŋ Yesu yadda, poꞌa la yel siꞌel la zug, ye, “O yel man zugin yela wusa.” ⁴⁰Ka Samaria dim la n kenn o saꞌan na la, ba sos o ye, o be ne ba. Ka o kpelim ne ba dabayi.

⁴¹Nidib bedego daa niŋ o yadda yaꞌas, o yelug la zug, ⁴²ka yel poꞌa la ye, “Li lem kaꞌ fun yel siꞌel la zug, ka ti niŋ o yaddaa. Tinam meŋ wum o yelug la, ka me miꞌ dau kaŋa a dunia faangir la ameŋa.”

Yesu n tiꞌeb niŋkpiꞌuŋ biig la yela

⁴³Ka o Samaria beilim daba ayi nyaꞌaŋ la ka o toomi anina n keŋ Galilee; ⁴⁴ka Yesu meŋ da yel ye, “Winaꞌam nodiꞌes ku nye naꞌasi o meŋ teŋin ne.” ⁴⁵Ka on paae Galilee la ba diꞌe o suꞌuŋa, ban nye on tum siꞌel Jerusalem teŋin kuꞌum malek gaadug tienr maluŋ la, bozugo ban me daa keŋ.

⁴⁶Ka o paae Kana line be Galilee soꞌolimin la, zinꞌikan ka o daa tiak kuꞌom ka li lieb daam la. Ka dau ayinni one a naꞌayir kpeenm n zinꞌi Kapeenum ka o biig benꞌed. ⁴⁷Ka on wum ye Yesu naam Juuda n kenn Galilee na la, o keŋ belim o ye o kena tiꞌebi o biig; ka o bood ne kuꞌum.

⁴⁸Ka Yesu yel o ye, “Ya yaꞌa pu nye zanbina ne bunnyalimaa, ya ku niŋ m yaddaa.”

⁴⁹Ka naꞌayir kpeenm la yel o ye, “M Zugsoba kem toꞌoto na ka biig la nam pu kpii.”

⁵⁰Ka Yesu yel o ye, “Kem, ka fu biig la na voe.”

Ka dau la niŋ pianꞌuk kan ka Yesu pianꞌ tis o la yadda ka keŋ. ⁵¹Ka on gbanꞌe suere kun la ka tumtumnib tuꞌus o ka yel o ye, “Fu biig la tiligeya.” ⁵²Ka o buꞌosi ba saŋkan ka o biig la banꞌas la pinꞌili sonꞌe ya. Ka ba lebis ye, “Suꞌos nintaŋ ka winigi gbiꞌe biꞌela, ka o niŋtuulum la bas o.”

⁵³Ka o baꞌ la baŋ ye li ane saŋkan ka Yesu sa yel o ye, “Fu biig la na voe la.” Ka on ne o yidim wusa niŋ Yesu yadda. ⁵⁴Neꞌeŋa da a Yesu tuumnyalima zanbin ayi daan line ka o da niŋ on da yi Juuda n keŋ Galilee la.

Yesu n tiꞌeb nid beuŋ saꞌan la yela

¹Neꞌeŋa gaad la, Yesu da keŋ Jerusalem ka Jew dim maluŋ yinni be. ²Zaŋgoom kane gilig Jerusalem la mor zaꞌanoya, ka yinni be ka ba buon ye Peꞌes Zaꞌanoor. Li baba ka beuŋbil be ka ba buon Betzata ne Jew dim pianꞌad ka maal suga yalima anu be anina. ³Ka banꞌadnam bedego digi ba ni, ka sieba a zunzoos, ka sieba wabis ka sieba a ponda ((ka ba gur kuꞌom la damug saŋa. ⁴Ka saŋa be ne ka Zugsob malek sig kolugin la dami dam kuꞌom la, ka one mekama sig yiiga on dam naae la o na nye laafe.)) ⁵Ka dau yinni daa be anina n benꞌ yuma piistanꞌ ne anii. ⁶Ka Yesu nye o ka baŋ ye o yiti digi anina ka li yuug la, ka yel o ye, “Fu bood ye fu nye laafe?”

⁷Ka banꞌad la lebis ye, “M Zugsoba, m kaꞌa soꞌ one na zaŋimi sigis kuꞌomin la, kuꞌom damug saŋa laa, ka man ti ye m sig la, ka soꞌ pun deŋim sig sa.”

⁸Ka Yesu yel o ye, “Duom, zaŋimi fu debir la ka keŋ.” ⁹Ka aniŋa niŋa ka dau la nye laafe ka noki o debir la ka keŋ.

Daakan da ane Jew dim vuꞌusum daar. ¹⁰Linzug ka Jew dim la yel dau la ye, “Zina ane vuꞌusum daar. Ti wada pu nar ye fu ze debire.”

¹¹Ka o lebisi ba ye, “Dau kane tiꞌebi m la yel m ye, zaŋimi fu debir la ka keŋ.”

¹²Ka ba buꞌos o ye, “Daukan aa anoꞌone n yel uf ye, zaŋimi fu debir ka keŋe?”

¹³Ka dau kane nye laafe la pu baŋ lin aan soꞌ bozugo Yesu daa toom n kpenꞌ nidib la soogin.

¹⁴Ka lin nyaꞌaŋ la ka Yesu nye ponꞌor kane ka o daa tiꞌeb la Winaꞌam puꞌusum yin ka saꞌal o ye, “Gosima, fu nye laafe. Da lem tum tuumbeꞌed yaꞌase ka siꞌel ti niŋ uf ka li a beꞌed n gaad yiigin laa.” ¹⁵Ka dau la keŋ yel Jew dim la ye Yesu a one tiꞌeb o la.

¹⁶Linzug ke ka Jew dim la da namis Yesu, on da tiꞌeb dau la vuꞌusum daar la. ¹⁷Ka Yesu lebis ba ye, “M Baꞌ nam kpelim tum, ka mam me tum.” ¹⁸Ka Jew dim la bood hale ye ba ku o, bozugo li kaꞌane vuꞌusum daar wada saꞌuŋ la yela maꞌanee amaa on buon Winaꞌam ye, o Baꞌ, ka zemisid o meŋ ne Winaꞌam.

Biig la mor paŋ siꞌem la yela

¹⁹Ka Yesu lebisi ba ye, “M yeti ya line a sida ye, Biig la ku nyaŋe niŋ siꞌel ne o meŋ paŋa. O niŋid ne line ka o nye ka o Baꞌ niŋid la maꞌaa. Ka o Baꞌ la niŋid siꞌem la ka o me niŋid. ²⁰Bozugo Baꞌ la noŋ Biig la ka paꞌal o line wusa ka o niŋid. On na paꞌal o tum kada ka li gat bama ka li na lidigi ya. ²¹Ka wenne Baꞌ la vuꞌugid kum ka tisid nyovur la, ala men ka Biig la tisid bane ka o bood la nyovur. ²²Ka Baꞌ la pu kad soꞌ saria amaa o bas saria kadib la tis ne Biig la, ²³ye nidib wusa naꞌas o wuu ban naꞌasidi o Baꞌ la siꞌem la. One pu naꞌasid Biig la, me pu naꞌasid o Baꞌ kane tum o la naa.

²⁴“Asida ka m yeti ya neꞌeŋa ye, one niŋi m pianꞌad la yadda ka me niŋ one tumi m la yadda, mor nyovur line kaꞌ naare. Ba ku kad o saria. Ka o yi ne kumin n kpenꞌ nyovurin. ²⁵Asida ka m yeti ya ye saŋa la liꞌelne, li sid miriya, ka bane kpi la na wum Winaꞌam Biig la kukor, ka bane wum la na voe. ²⁶Ka ti Baꞌ Winaꞌam n soꞌe nyovur siꞌem la, ala men ka o ke ka o Biig la me soꞌe nyovur, ²⁷ka tis o paŋ ye o kad saria, on a Ninsaal Biig la zug.

²⁸“Da ke ka li lidigi ya. Saŋa la liꞌeliya ka bane wusa be yaadin na wumi o kukor ²⁹ka yi na. Bane tum suꞌum na vuꞌug kumin ka nye nyovur, amaa bane tum beꞌed na vuꞌug ka Winaꞌam moŋi ba buod.

Yesu kaset la yela

³⁰“M ku nyaŋe niŋ siꞌel ne m meŋ paŋa. M kat saria ka li dolne mam wum siꞌel Winaꞌam saꞌan la. M bood ye m niŋ ne one tumi m la na boodim ka kaꞌane m meŋ boodim, dinzugo m saria kadib ane yelsida. ³¹M yaꞌa di m meŋ kaset, li kaꞌ sidaa. ³²Amaa soꞌ be n diti m kaset ka m miꞌ ye li ane sida.

³³“Ya daa tum soꞌ Joon saꞌan ka o tuꞌas sida la yela n tisi ya. ³⁴Li kaꞌane ye li nar ye saal di kaset tisi ma, amaa m yel neꞌeŋa ye ya nye faangir. ³⁵Joon daa ane wuu fitla line tisid neesim ka ya siak ye ya be neesim la ni ne sumalisim saŋa biꞌela.

³⁶“Kaset line paꞌali m yela la gat line ka Joon di la. Tuumban ka Winaꞌam ke ka m tum la, tuumban ka m sid niŋid la paꞌan ye m Baꞌ Winaꞌam la tumi m na. ³⁷Ka m Baꞌ on tum man na la, o meŋ di kaset n tis man. Ya nam pu wumi o kukore, ka me nam pu nye on a siꞌem, ³⁸ka pu mor o pianꞌad la ya nii, yaname pu niŋ on ka o tum ya ni la yadda la zug. ³⁹Ya tenꞌes ye nyovur kane kaꞌ ben la be Winaꞌam gbauŋin, ka linzug ka ya ied ye ya baŋi li gbin. Gbauŋ la diti m kaset, ⁴⁰ka laꞌam ne wala ya zanꞌas ka pu keenn m saꞌan na ye ya nye nyovure.

⁴¹“M pu bood naꞌasi saalib saꞌanee, ⁴²amaa m miꞌ ya poos ka ya pu mor Winaꞌam noŋir ya sunya nii. ⁴³Mam nokne m Baꞌ yuꞌur n kena, ka ya pu diꞌe ma. Amaa soꞌ yaꞌa nok o meŋ yuꞌur n kena ya na diꞌe o. ⁴⁴Ya na niŋ wala niŋ Winaꞌam yadda, yanam bane diꞌesid naꞌasi ya taaba ni ka pu bood naꞌasi kane yit Winaꞌam yinni maꞌaa la ni na?

⁴⁵“Da tenꞌes ye m na noki ya yelbeꞌed keŋ m Baꞌ la saꞌane. Li ane Moses n yeli ya ala, on zug ka ya mor tiꞌir la. ⁴⁶Ya yaꞌa siakin Moses ya naani siakin man men, on sobi m labaar la zug. ⁴⁷Ka ya yaꞌa pu siaki o sob la, ya na niŋ wala siaki m pianꞌad la?”

Yesu diis nidib bedego

(Mateo 14.13-21; Maak 6.30-44; Luuk 9.10-17)

¹Ka Yesu loꞌoŋ Galilee beuŋ line a Tiberias beuŋ la. ²Ka nidib bedego dol o, bozugo ba nye o tuumnyalima ban ka o maal n tis banꞌadnam la. ³Ka Yesu du zuer zug n zinꞌin anina ne o nyaꞌandolib. ⁴Kuꞌum malek gaadug tienr maluŋ dabisir saŋa daa liꞌelne.

⁵Ka Yesu gorigi o zug, ka nye nidib bedego bane kenne o saꞌan la na ka buꞌos Filip ye, “Yaa ni ka ti na nye diib n daꞌ n tis nidib nwa, ka ba di?” ⁶O yel nwa ne ye o mak o n gos, bozugo o meŋ miꞌ on na niŋ siꞌem.

⁷Ka Filip lebis o ye, “Ligidi yaꞌa kun zuꞌe siꞌem li ku nyaŋe daꞌ diib ka nidib nwa nye biꞌel biꞌel n nyiꞌige.”

⁸Ka Yesu nyaꞌandol yinni, on yuꞌur buon Andrew, Simon Piita baꞌabiig la, yel o ye, ⁹“Biribiŋ be kpela n mor bodobodo anu ne zimbibis ayi. Ka nwa na niŋ nidib bedego nwa bo?”

¹⁰Ka Yesu yel ye, “Keli ka nidib la zinꞌin.” Mood bedego daa be zinꞌikan la. Ka dap la zinꞌin. Ba kal daa ane wuu tusa nu. ¹¹Ka Yesu diꞌe bodobodo la n puꞌus Winaꞌam bareka, ka pudug n tis nidib bane zinꞌi la, ka niŋ ala ne zimi la men. Ka ba wusa dii tig.

¹²Ka ban di tig la, ka o yel o nyaꞌandolib la ye, “Laꞌasem bodobodo line kpelim la, ka da ke ka siꞌel saꞌam.” ¹³Ka ba vaae dizoris la wusa. Ka li peꞌel peed piinayi. Li ane bodobodo anu la dizoris ka ba vaae, nidib la di naae la nyaꞌaŋ.

¹⁴Dinzugo nidib bama nwa n nye Yesu tuumnyalima la, ka ba yel ye, “Ameŋa, o sid ane Winaꞌam nodiꞌes one ka ba da yel ye, o na kenn dunia ni na la.” ¹⁵Ka Yesu baŋ ye ba na gbanꞌ o, n diis o naꞌam la, o leb n keŋ zueya baba o konꞌo konꞌ.

Yesu n ken kuꞌom zug la yela

(Mateo 14.22-33; Maak 6.45-52)

¹⁶Ka zaamnoor ka o nyaꞌandolib la sig beuŋin na ¹⁷ka kpenꞌ aaruŋin loꞌoŋid beuŋ la n tuꞌae Kapeenum teŋin. Ka yuꞌuŋ sobid ka Yesu nam pu keŋi ba saꞌane. ¹⁸Ka sisiꞌetitaꞌar daꞌad kuꞌom la duꞌosid kuꞌopila. ¹⁹Ka ban gaad ne ba aaruŋ la n keŋ wuu mail atanꞌ bee anaasi la, ka nye ka Yesu ken kuꞌom la zug n liꞌel aaruŋ la ka li lidigi ba. ²⁰Yesu yeli ba ye, “Li ane man. Da zoti dabiem.” ²¹Ka ba mor sumalisim ka siak ye o kpenꞌ aaruŋ la. Ka toꞌoto yim ka ba kpelim paae zinꞌikan ka ba da waꞌae la.

Nidib n ied Yesu la yela

²²Ka beug nie ka nidib bane kpelim beuŋ la gbekaŋa la nye ka aaruŋ yinni maꞌaa be, ka ba me miꞌ ye Yesu sa pu kpenꞌ aaruŋ ne o nyaꞌandolib la, amaa ba bas o ne ka keŋ. ²³Ka aaruma sieba yi Tiberias keŋ ziꞌe kpiꞌe zinꞌikan ka Zugsob la sa tis Winaꞌam bareka puꞌusug ka ke ka nidib di diib la. ²⁴Ka nidib la pu nye Yesu ka o be anina bee o nyaꞌandolib la, dinzug ba kpenꞌ aaruma ni n keŋ Kapeenum n ied o.

Yesu n a diib line tisid nyovur la yela

²⁵Ka nidib la nye Yesu ka o be gbekaŋa la ka buꞌos o ye, “Paꞌana, saŋkane ka fu kenn kpela na?”

²⁶Ka o lebisi ba ye, “Asida ka m yeti ya ye, ya iedne man yanam onb bodobodo n tig la zug, ka li kaꞌane m tuumnyalima ban ka ya nye la zugo. ²⁷Da tum ye ya diꞌe dikane na saꞌam, amaa lee tumme n diꞌe dikane na yuug ka tisid nyovur kane kaꞌ naare. Mam, Ninsaal Biig la, na tisi ya dikaŋa, bozugo m Baꞌ Winaꞌam gaŋi m ka li paꞌal ye m paae o yaꞌam.”

²⁸Ka ba buꞌos ye, “Ti na niŋ wala ka tum Winaꞌam tuuma?”

²⁹Ka Yesu lebisi ba ye, “Tuumkane ka Winaꞌam bood ane ye ya siak one ka o tum la na.”

³⁰Ka ba buꞌos o ye, “Ka tuumnyaluŋ bo ka fu maal ka li zanbin ka ti na nye ka niŋ uf yadda? ³¹Ti yaanam da di dikan ka ba buon ye manna la moogin wuu lin sob siꞌem ye, ‘O tisi ba dikane yi arazana ni na ka ba di.’ ”

³²Ka Yesu lebisi ba ye, “Asida ka m yeti ya ye, li kaꞌane Moses n da tisi ya dikane yi arazana ni na laa, ka ane m Baꞌ Winaꞌam tisidi ya diib ameŋa line yi arazana ni na la. ³³Ka dikane ka Winaꞌam tisi ya la ane line yi arazana ni sig na, ka li tisid dunia dim nyovur.”

³⁴Ka ba yel o ye, “Zugsoba, tisimi ti dikaŋa saŋa wusa.”

³⁵Yesu lebisi ba ye, “Mane a nyovur diib la. One mekama keenn m saꞌan na, koꞌom ku gbanꞌe oo, ka one me lem niŋi m yadda, kuꞌonuud ku mor oo. ³⁶M deŋim yeli ya ye ya nye m, ka laꞌam ne wala ya pu niŋi m yaddaa. ³⁷Ban wusa ka Winaꞌam tisidi m keenn m saꞌan na. Ka one ken ne m saꞌan na m ku kad o basi; ³⁸ka m yi arazana ni sig na ye m tum ne one tum man la boodim ka kaꞌ m meŋ boodim. ³⁹Ka one tum man la boodim ane anwa, ye on tisi m ninsieba wusa la, ye m da ke ka baa yinni bodige. Amaa o lee bood ye m vuꞌugi ba wusa dunia naar daar la. ⁴⁰Ka m Baꞌ la boodim ane neꞌeŋa ye one mekama nye Biig la ka niŋid o yadda na nye nyovur kane kaꞌ benne, ka m na vuꞌug o dunia naar daar la.”

⁴¹Ka Jew dim nyon ne o, on yel ye, “Mane a dikane yi arazana sig na la zug.” ⁴²Ka ba buꞌos taaba ye, “Dau kaŋa nwa kaꞌane Josef biig Yesu, one ka ti miꞌ o baꞌ ne o ma laa? Ka li niŋ wala ka o yuꞌun yel ye o yine arazana ni na.”

⁴³Ka Yesu yeli ba ye, “Da nyonini ya lema nii. ⁴⁴Soꞌ kaeꞌ na nyaŋe keenn m saꞌan naa li yaꞌa kaꞌa ye m Baꞌ one tumi m na la niŋi li. Ka m na vuꞌug o dunia naar daar la. ⁴⁵Ka Winaꞌam nodiꞌesidib da sob ye, ‘Winaꞌam na zamis nidib wusa.’ On mekama wum ka zamis m Baꞌ yela kenne m saꞌan na. ⁴⁶Soꞌ kaeꞌ nye m Baꞌ laa, li yaꞌa kaꞌa one yi Winaꞌam saꞌan na, on gullim nye o. ⁴⁷Asida sida ka m yeti ya ye, one niŋi m yadda mor nyovur kane kaꞌ benne. ⁴⁸Mane a nyovur diib la. ⁴⁹Ya yaanam da di dikan ka ba buon ye manna la moogin ka laꞌam ne wala ba kpiya. ⁵⁰Dikane yi arazana ni sig la na ane anwa ye saal na dii li ka ku kpii. ⁵¹Mane a dikane voe ka yi arazana ni sig na la ka soꞌ yaꞌa di dikaŋa o na voe saŋa mekama. Ka dikane ka m na tis ka dunia dim mor nyovur ane m niŋgbiŋ.”

⁵²Ka Jew dim la nwaꞌas taaba yet ye, “Dau kaŋa na niŋ wala tisi ti o niŋgbiŋ ka ti di?”

⁵³Ka Yesu yeli ba ye, “Asida sida ka m yeti ya ye, asee ka ya di Ninsaal Biig la niŋgbiŋ ka nuu o ziim, ka yaꞌa ka alaa ya pu mor nyovure. ⁵⁴One di m niŋgbiŋ ka nuu m ziim mor nyovur line kaꞌ naare, ka m na vuꞌug o dunia naar daar la. ⁵⁵Ka m niŋgbiŋ ane diib ameŋa ka m ziim a bun nuudir ameŋa. ⁵⁶One di m niŋgbiŋ ka nuu m ziim kpelim a yinni ne mam ka mam me a yinni ne on. ⁵⁷M Baꞌ soꞌe nyovur ka tumi m na ka on zug ka m voe, ala men ka one di mam niŋgbiŋ, na voe mam zug. ⁵⁸Neꞌeŋa a dikane yi arazana ni sig na, ka li kaꞌane wuu dikane ka ya yaanam da di ka kpi laa. Amaa one di dikaŋa la, na voe saŋa wusa.” ⁵⁹O yel neꞌeŋa ne on daa paꞌan nidib Kapeenum laꞌasug doogin la.

Pianꞌad line tisid nyovur la yela

⁶⁰Ka o nyaꞌandolib la bedego n wumi li la, ba yel ye, “Paꞌalkaŋa toe. Anoꞌon na tunꞌe diꞌe li?”

⁶¹Ka Yesu baŋ o potenꞌerin ye o nyaꞌandolib la nyoni li yela la ka yeli ba ye, “Ya noki li ka li ane poꞌogire? ⁶²Ka ya yaꞌa nyeen ka Ninsaal Biig la dutin zinꞌikan ka o da been la ya na niŋin wala? ⁶³One tisid nyovur la ane Winaꞌam Siig Suŋ, ka niŋgbiŋ la ane zaalim. Pianꞌakan ka m pianꞌ tisi ya la tisid Siig ne nyovur. ⁶⁴Amaa ya sieba be ka pu siake.” Yesu yel nwa bozugo o deŋim baŋ pinꞌilugin sa bane pu niŋ o yadda ne one na ti zam o la. ⁶⁵Ka o lem yel ye, “Neꞌeŋa yela ka m daa yel ye, soꞌ ku nyaŋe keenn m saꞌan na asee m Baꞌ la na tis suer.”

⁶⁶Ka neꞌenam nyaꞌaŋ o nyaꞌandolib titaꞌam sa buaki keŋ ka pu lem dol o yaꞌase.

⁶⁷Yesu buꞌos o nyaꞌandolib piinayi la ye, “Yanam me na bood ye ya keŋe.”

⁶⁸Ka Simon Piita lebisi buꞌos o ye, “Zugsoba, ti ye ti keŋe anoꞌon saꞌane? Fune mor pianꞌakane tisid nyovur kane kaꞌ ben la. ⁶⁹Ka ti siaki li ka baŋ ye, fun maꞌaa a niŋkane a suꞌum nyain ka yi Winaꞌam saꞌan na la.”

⁷⁰Ka Yesu lebisi buꞌosi ba ye, “Kaꞌa mane gaŋi yanam piinayi la laꞌam ne wala ya yinni a Sutaana nidaa?” ⁷¹O da pianꞌ neꞌeŋa Judas one a Simon Iskariot biig la yela. O da ane nyaꞌandolib piinayi la nid yinni one da na ti zam o.

Yesu ne o pitib la yela

¹Ka neꞌeŋa nwa nyaꞌaŋ la ka Yesu giligid Galilee teŋin ka pu bood ye o giligid Juuda teŋinee, Jew dimi bood ye ba kuu o la zug. ²Ka Jew dim diꞌemkan ka ba maan suga n gbeend la, da liꞌelne. ³Ka Yesu pitib yel o ye, “Toomim kpela ka keŋ Juuda teŋin ka fu nyaꞌandolib la nye fu tuuma ban ka fu niŋid la. ⁴Ka soꞌ yaꞌa bood ye nidib baŋ o bedego o pu suaꞌadi tumi o tuumaa. Fu yaꞌa tum tuumbama kel ka nidib bedego baŋ.” ⁵O pitib la pu niŋ o yadda, linzug ka ba yel o ala.

⁶Ka Yesu yeli ba ye, “Mam saŋa nam pu paae, amaa saŋa mekama yanam mor yaꞌa. ⁷Dunia dim ku nyaŋe kisi yaa, ka lee kisi m, man paꞌan ye ba tuuma a beꞌed la zug. ⁸Yanam kem diꞌema la. M nan ku keŋ diꞌem kaŋaa; ka m saŋa nan pu paae.” ⁹On yel wala la ka kpelim Galilee teŋin.

Yesu n da be suga diꞌema ni la yela

¹⁰Ka o pitib n gaadi naae la ka o me yuolim keŋ, ka pu neeli o meŋa. ¹¹Ka Jew dim ied o diꞌema la ni ka buꞌosid ye, “O be yaani?”

¹²Ka nidib la bedego nyaꞌam, ka sieba ye, “O ane ninsuŋ.”

Ka sieba ye, “Ayei, o paꞌan nidib la line a suebeꞌed.” ¹³Ka ban zot Jew dim la zug ka soꞌ pu nyaŋe pianꞌa neele.

¹⁴Ka diꞌema la ti paae pusuk ka Yesu du kpenꞌ Winaꞌam puꞌusum yir n paꞌan nidib. ¹⁵Ka li lidig Jew dim la ka ba yet ye, “Dau kaŋa niŋ wala mor baŋir ka lee pu zamise?”

¹⁶Ka Yesu lebisi ba ye, “M paꞌalug la kaꞌ m meŋ dinne, amaa li ane one tumi m la na din. ¹⁷One bood ye o tum Winaꞌam boodim, o na baŋ ye m paꞌalug la yi ne Winaꞌam saꞌan na, bee m paꞌan ne, ne m meŋ paŋ. ¹⁸One pianꞌad ne o meŋ paŋ la boodne o meŋ yuꞌur. Amaa one bood ye one tum o la na diꞌe yuꞌur la, ane sida sob ka pu mor zirii. ¹⁹Ya pu diꞌe wada Moses saꞌanee? Ka laꞌam ne wala ya soꞌ pu doli li suere. Bo ka ya ied sueya ye ya kuu ma?”

²⁰Ka nidib la lebis o ye, “Kikirig n dol uf. Anoꞌonami bood ye ba kuu fo?”

²¹Ka Yesu lebisi ba ye, “M daa tum tuumnyaluŋ yinni ka li lidigi ya. ²²Moses da yel ye, ya kpenꞌem baŋo, (amaa li da kaꞌane Moses n da pinꞌili lii, ka lee da yi ne ya yaanamin na.) Amaa ya kpenꞌesid biribis baŋo vuꞌusum daar. ²³Ka ya yaꞌa kpenꞌesid biribiŋ baŋo vuꞌusum daar ka li pu saꞌam Moses wada la, bo ka ya sunya pelig ne m, mam daa tiꞌeb dau la vuꞌusum daar la? ²⁴Mit ka ya gelig ka zerig nid ne nini gosigo, amaa geligim ne line a yelsida.”

²⁵Dinzug ka Jerusalem ninsieba buꞌos ye, “Li kaꞌane dau kaŋa ka ba bood ye ba ku laa? ²⁶Ka gosimi ya, o pianꞌadne paalo ni ka ba pu niŋ o siꞌela. Kpeenmnam sid siak ye o ane Kiristo on ka Winaꞌam gaŋ la bee? ²⁷Amaa ti miꞌ dau kaŋa n yi siꞌel na, ka Kiristo la yaꞌa ti nie soꞌ ku baŋ on yi siꞌel naa.”

²⁸Linzug Yesu n daa be puꞌusum yir n paꞌan nidib la, o pianꞌ ne kukortitaꞌar ye, “Ya miꞌ maa? Ka ya miꞌ mam yi siꞌel naa? Li kaꞌane m tuꞌer ka m kenaa. Amaa one tum man na la a sida sob, ka ya ziꞌ oo. ²⁹Ka mam lee miꞌ o, bozugo one tum man, ka o saꞌan ka m yi na.”

³⁰Dinzug ka ba ied suer ye ba gbanꞌ o, ka soꞌ pu siꞌis oo, bozugo o saŋa daa nan pu paae. ³¹Ka laꞌam ne wala nidib la titaꞌam da niŋ o yadda, ka ye, “Kiristo la yaꞌa ti kena o na tum tuumnyalima gaad dau kaŋa tum siꞌel laa?”

Farisee dim n tum nidib ye ba gbanꞌe Yesu la yela

³²Ka Farisee dim wum nidib la nyaꞌam Yesu yela, ka ban ne Winaꞌam maalmaan kpeenmnam tum nidib ye ba gbanꞌe Yesu.

³³Ka Yesu yel ye, “M na be ne ya yuug biꞌela ka lem leb one tum man na la saꞌan. ³⁴Ya na ti iedi m ka ku nye ma, ka mam na be zinꞌisiꞌa la ya ku nyaŋe kenn aninaa.”

³⁵Ka Jew dim yel taaba ye, “Dau kaŋa gbanꞌe ye o keŋ yaa ni ka ti ku nye oo? O gbanꞌe ne ye o keŋ Greek dim teensin, zinꞌi kan ka Jew dim be la, ye o paꞌal Greek dima? ³⁶Ka on yel ye, ti na ti iedi o ka ku nyee o, ka ye, on be zinꞌisiꞌa la ti ku nyaŋe kena la, li gbin a bo?”

Winaꞌam Siig Suŋ la yela

³⁷Ka diꞌema la naar dabisir line a dabistitaꞌar la, ka Yesu due ziꞌe ka pianꞌad ne kukortitaꞌar ye, “Kuꞌonuud yaꞌa mor soꞌ, o kemi m saꞌan na nu. ³⁸Li dolne Winaꞌam gbauŋ n sobi siilim siꞌem la ye, ‘One niŋi m yadda wenne kuꞌobulum line tisid nyovur.’ ” ³⁹O yel neꞌeŋa ka li gbin paꞌalne Winaꞌam Siig Suŋ la yela, ka bane niŋ o yadda la na ti diꞌe li. Bozugo saŋkan la Winaꞌam da nam pu tisi ba o Siig Suŋ laa, ka Yesu da nan pu nye zunꞌore.

Bakir n be nidibin Yesu yela la

⁴⁰Ka ban wum pianꞌakan la, nidib la sieba yel ye, “Oŋa sid a Winaꞌam nodiꞌes la.”

⁴¹Ka sieba ye, “Oŋa a Kiristo la.”

Amaa ka sieba buꞌos ye, “Kiristo la yi ne Galilee na bee? ⁴²Winaꞌam gbauŋ yel ne ye Kiristo la yi ne David gbinin na ka yi ne Betilehem teŋkan ka David da be la. Li kaꞌ alaa?” ⁴³Ka bakir be nidibin la o yela. ⁴⁴Ka sieba bood ye ba gbanꞌ o amaa soꞌ pu siꞌis oo.

Jew dim kpeenmnam n pu niŋ Yesu yadda la yela

⁴⁵Ka nimbane keŋ ye ba gbanꞌ o la leb maalmaan kpeenmnam ne Farisee dim la saꞌan ka ba buꞌos ye, “Bo ka ya pu gbanꞌe o na?”

⁴⁶Ka ba lebis ye, “Soꞌ nan ziꞌ pianꞌ wenne dau kaŋaa.”

⁴⁷Ka Farisee dim la buꞌosi ba ye, “Ka yanam me yidigi n dol suebeꞌed la ne bee?” ⁴⁸Ka kpeenmnam la bee Farisee dim la sieba pu niŋ o yaddaa. ⁴⁹Nidib bedego bane ziꞌ wada la, yelbeꞌed doli ba.

⁵⁰Ka Nikodemus one daa deŋim keŋ Yesu saꞌan la ka aa ba nid yinni buꞌosi ba ye, ⁵¹“Ti yaꞌa pu wum soꞌ antuꞌa ka baŋ on tum siꞌela, ti kat o saria bee?”

⁵²Ka ba lebis o ye, “Fu yi ne Galilee na menee? Iem Winaꞌam gbana ni ka fu na baŋ ye nodiꞌes kulim ku yi Galilee naa.”

Ban kuk poꞌa ne dau la yela

¹Ka ba wusa widigi kul ka Yesu keŋ Olives zuerin. ²Ka bekeeung ka o leb Winaꞌam puꞌusum yin la yaꞌas ka nidib la wusa keŋi o saꞌan na ka o zinꞌi paꞌani ba. ³Ka gbauŋmiꞌidib ne Farisee dim mor poꞌa na on ka ba kuk ka o saꞌam dau, ka ziꞌel o nidib la soogin, ⁴ka yel Yesu ye, “Paꞌana, ti kuk poꞌa kaŋa ne dau. ⁵Ka Moses wada la da ziꞌel ye, ti lob nimbamanam taaba ne kuga n ku. Ka fun ye wala?” ⁶Ba yeli ala ye ba kpans o gos, ka nye yela bul o.

Ka Yesu sunne noki o nuꞌubili sobid teŋin. ⁷Ka ban kpelim buꞌosid o la, ka o gorigi yeli ba ye, “One nan pu tum tuumbeꞌed ya soogin nokim kugir lobug o yiiga.” ⁸Ka lem sun yaꞌase noki o nuꞌubili sobid teŋin.

⁹Ka ban wumi ala la ka ba yi yinni yinni lin pinꞌil ne bunkuda la ni ka nyaꞌal poꞌa la gullim ka o ziꞌe Yesu tuon. ¹⁰Ka Yesu gorigi buꞌos poꞌa la ye, “Bane mor uf la na be yaani? Soꞌ pu koosi fu yela la beꞌedee?”

¹¹Ka poꞌa la lebis o ye, “M Zugsoba, ayei.”

Ka Yesu yel o ye, “Mam me ku koosi fu yela beꞌede. Kem ka da lem tum tuumbeꞌed yaꞌase.”

¹²Ka Yesu lem yel nidib la ye, “Mane a dunia neesim la. One doli m ku ken likin ne, amaa o na bene nyovur line a neesim la ni.”

¹³Ka Farisee dim yel o ye, “Fu pianꞌadne fu meŋ yela. Fu pianꞌad la kaꞌ sidaa.”

¹⁴Ka Yesu lebisi ba ye, “Hale baa m yaꞌa pianꞌadi m meŋ yela m pianꞌad la a sida; ka m miꞌ mam yi siꞌel na ne mam ken siꞌel, amaa ya ziꞌ mam yi siꞌel na ne mam ken siꞌela. ¹⁵Ya geligid soꞌ tuuma ne ninsaal yaꞌam. Mam pu geligid soꞌ yelaa. ¹⁶Amaa m yaꞌa gelig soꞌ yela, m geligir la a sida; ka li kaꞌane mam maꞌanee amaa mam ne one tum m la na n geligid. ¹⁷Ya wada la ni li sob ye, nidib ayi kaset diib a ameŋa. ¹⁸Mam dit kaset n tisidi m meŋ, ka m Baꞌ one tum man na la me dit kaset n tisidi m.”

¹⁹Ka ba buꞌos o ye, “Fu Baꞌ be yaani?”

Ka Yesu lebisi ba ye, “Ya ziꞌ man ne m Baꞌ la wusaa. Ya yaꞌa baŋin man, ya naan baŋin m Baꞌ la men.” ²⁰O pianꞌ neꞌenam ne one daa paꞌan nidib la Winaꞌam puꞌusum yin ka li kpiꞌe ligid laꞌasug zinꞌigin la. Ka soꞌ pu gbanꞌe oo, o saŋa nan pu paae la zug.

Yesu n paꞌan ye ba ku nyaŋe keŋ on ken siꞌel la yela

²¹Ka o yeli ba yaꞌas ye, “M na yi ya saꞌan, ka ya na ie man, amaa ya ku nye ma. Ya na kpi ya tuumbeꞌed la ni. Man ken siꞌel la ya ku nyaŋe keenn aninaa.”

²²Ka Jew dim yel ye, “O ye o ku ne o meŋ bee? On sadigim yel ye, on ken siꞌel la, ti ku nyaŋe keŋ la.”

²³Ka Yesu yeli ba ye, “Yanam yi ne teŋin na, ka man yii agol na. Ya ane dunia nwa nidib, ka mam kaꞌa dunia nwa nida. ²⁴Linzug ka m yeli ya ye, ya na kpi ne ya tuumbeꞌed la, ka ya yaꞌa pu niŋ yadda ne mane yel ye m a soꞌ laa, ya sid na kpi ne ya tuumbeꞌed la.”

²⁵Ka ba buꞌos o ye, “Fu aa anoꞌone?”

Ka o lebisi ba ye, “M ane on ka m yeli ya pinꞌilugin sa la. ²⁶M mor yela bedego line ka m na pianꞌ ka kadi ya saria. One tum man la a sida sob ka line ka m wum o saꞌan la, lin ka m mooni n tisid dunia dim.”

²⁷Ka ba pu baŋ on pianꞌ siꞌel la ane o Baꞌ Winaꞌam yela. ²⁸Dinzug ka Yesu yel ye, “Ya yaꞌa uk mam one a Ninsaal Biig la agol ya na baŋ man yel ye m a soꞌ la. Ka lem baŋ ye m pu tum siꞌel ne m meŋ paŋa, amaa m pianꞌad neꞌeŋa wuu m Baꞌ Winaꞌam n paꞌali m siꞌem la. ²⁹Ka one tum man la be ne man ka pu basi ma, bozugo m maan line maꞌedi o suunr daar wusa.” ³⁰Ka on pianꞌ neꞌeŋa la, ka nidib bedego niŋ o yadda.

Yamis ne yolisim dim

³¹Ka Yesu yel Jew dim bane niŋ o yadda la ye, “Ya yaꞌa kpelim mor m pianꞌad la, ya na ane m nyaꞌandolib ameŋa. ³²Ka ya na baŋ yelmeŋir la. Ka yelmeŋir la na tisi ya yolisim.”

³³Ka ba lebis n yel o ye, “Tinam ane Abraham yaas, ti kaꞌ nid soꞌ yamise. Ka wala ka fu yel ye, ti na nye yolisim?”

³⁴Ka Yesu lebisi ba ye, “Ameŋa ka m yeti ya ye, niŋkan wusa tum tuumbeꞌed la ane tuumbeꞌed yamug. ³⁵Yamug ku zinꞌi yin saŋa wusa, amaa yisob biribiŋ la zinꞌine yin la saŋa wusa. ³⁶Dinzugo yisob biribiŋ la yaꞌa tisi ya yolisim, ya mor yolisim ameŋa. ³⁷M miꞌ ye ya ane Abraham yaas. Amaa ya boodne man ye ya ku, bozugo m pianꞌad la pu kpenꞌedi ya sunya nii. ³⁸Man nye siꞌel m Baꞌ saꞌan la, lin ka m tuꞌasid. Ka yanam me niŋidne bun lin ka ya wum ya baꞌ saꞌan la.”

³⁹Ka ba lebis n yel o ye, “Abraham ane ti yaab.”

Ka Yesu lebis n yeli ba ye, “Ya yaꞌa aan Abraham yaas, ya naan tumin Abraham tuuma la. ⁴⁰Amaa ya boodne man ye ya ku, man one tuꞌasi ya yelmeŋir kan ka m wum Winaꞌam saꞌan la. Abraham da pu niŋ alaa. ⁴¹Ya tumne ya baꞌ la tuuma.”

Ka ba yel o ye, “Ti kaꞌ poꞌagoonda biise. Ti mor Baꞌ yinni one a Winaꞌam.”

⁴²Ka Yesu lebis n yeli ba ye, “Winaꞌam yaꞌa aane ya Baꞌ, ya naan noŋin man, bozugo m yine Winaꞌam ni n kena. M pu kene m tuꞌer naa, amaa o tumi m ne na. ⁴³Bo niŋ ka ya pu baŋ man yet siꞌel la gbin ne? Li ane ye yanam ku tunꞌe n siak m pianꞌad la zug. ⁴⁴Ya baꞌ ane Sutaana. Ka ya tumne ya baꞌ boodim n a siꞌem la. O daa pun ane ninkuud hale pinꞌilugin sa. O ziꞌ yelmeŋire, bozugo yelmeŋir kaꞌ o saꞌane. O yaꞌa maꞌad ziri la, o pianꞌadne wenne o meŋ n a siꞌem la, bozugo o ane ziri sob ne ziri wusa baꞌ. ⁴⁵Amaa mane tuꞌasidi ya yelmeŋir la, ya pu siaki. ⁴⁶Anoꞌone na tunꞌe n paꞌal ye m tum tuumbeꞌede. Man yaꞌa tuꞌasid ameŋa, wala ka ya pu siake ma? ⁴⁷One a Winaꞌam nid la kelisidne Winaꞌam pianꞌad. Yanam kaꞌ Winaꞌam nidib la zug, ka ya pu wumma.”

⁴⁸Ka Jew dim la lebis n yel o ye, “Tinam n yel ye, fu ane Samaritan nid la, ka kikirig dol uf la, ti maꞌanee?”

⁴⁹Ka Yesu lebisi ba ye, “Kikirig pu doli ma, amaa m duꞌosidne m Baꞌ yuꞌur suꞌuŋa, ka yanam poꞌogid man. ⁵⁰Man meŋ pu ied m meŋ yuꞌur duꞌosugo. Soꞌ be one iedi o meŋ yuꞌur, one a saria kat la. ⁵¹Ameŋa ka m yeti ya ye, nid kane siakim noor la, ku nye kuꞌum baa biꞌelaa.”

⁵²Ka Jew dim yel o ye, “Nannanna ti baŋi ya ye kikirig dol uf. Abraham ne Winaꞌam nodiꞌesidib la kpiya. Ka fu yet ye, nid kane siaki fu noor la, ku kpii baa biꞌela. ⁵³Fu gaad ti yaab Abraham one kpi laa? Bee fu gaad Winaꞌam nodiꞌesidib bane kpi laa? Fu tenꞌesid ye fu ane anoꞌone?”

⁵⁴Ka Yesu lebis n yeli ba ye, “Man yaꞌa duꞌosidi m yuꞌur la, li ane zaalim. Man Baꞌ la a one duꞌos m yuꞌur, on ka ya yel ye, one a ya Winaꞌam la. ⁵⁵Amaa yanam ziꞌ on a soꞌo. Ka man miꞌ on a soꞌ. Man yaꞌa yelin ye, m ziꞌ on a soꞌ, m naani aan ziri sob wen wuu yanam ne. Amaa m miꞌ on a soꞌ, ka siak o noor la. ⁵⁶Ya baꞌ Abraham da mor tiꞌir ye o na ti nye man saŋa nwa. Ka o nye ka mor sumalisim.”

⁵⁷Dinzug ka Jew dim la yel Yesu ye, “Fu nan pu paae yuum piisnu, ka niŋ wala nye Abraham?”

⁵⁸Ka Yesu yeli ba ye, “Ameŋa ka m yeti ya ye, Abraham da nan kaeꞌ saŋsiꞌa la, ka man pun be.” ⁵⁹Alazug ka ba zaŋ kuga ye ba lob o. Ka Yesu suaꞌ o meŋ, ka yi Winaꞌam puꞌusum yin la.

Yesu n tiꞌeb zunzoŋ la yela

¹Ka on ken la, o nye dau ka o zuꞌomi o biilimin sa. ²Ka o nyaꞌandolib buꞌos o ye, “Paꞌana, dau kaŋa tum tuumbeꞌed bee o baꞌ ne o ma n tumi li, ka duꞌa o ka o a zunzoŋa?”

³Ka Yesu lebis ye, “O zuꞌoŋ la kaꞌane ye o tumne beꞌede bee o baꞌ ne o ma tum. Amaa li a ye, Winaꞌam paꞌali o paŋ tuuma zunzoŋ la ni. ⁴Lin nan a nintaŋ la, asee ti tum one tum man na la tuuma. Yuꞌuŋ na sob ka soꞌ ku nyaŋe tum yaꞌase. ⁵Mam nan be dunia ni la, mane a dunia neesim.”

⁶Ka Yesu n yel neꞌeŋa la o tubis nintoond n bu tan n bulig zuꞌom la nini, ⁷ka yel o ye, “Kem Siloam bulugin n pie fu nini.” (Siloam gbin ane ye, Atum soꞌ.) Ka o keŋ pie o nini ka leb na nyet.

⁸O kpiꞌes ne bane deŋim miꞌ o ka o a sos la yel ye, “Kaꞌa dau kaŋa daa yiti sosid laa?” ⁹Ka sieba yel ye, “Li ane on la.”

Ka sieba me yel ye, “Ayei, li wen o ne ka li kaꞌa one.”

Ka o meŋ yel ye, “Mane la.”

¹⁰Ka ba buꞌos o ye, “Li niŋ wala ka fu yuꞌun nyeta?”

¹¹Ka o lebisi ba ye, “Dau kane ka ba buon Yesu la bu tan n buligi m nini ka yeli m ye m kem Siloam bulugin pie. Ka m keŋ pie ka yuꞌun nyet.”

¹²Ka ba buꞌos ye, “O be yaani?”

Ka o lebis ye, “M ziꞌ.”

¹³Ka ba dol one daa a zuꞌom la keŋ Farisee dim saꞌan. ¹⁴Ka daakan ka Yesu bu tan ke ka zuꞌom la nyet la, daa ane Jew dim vuꞌusum daar. ¹⁵Ka Farisee dim la buꞌos o yaꞌas ye, “Li niŋ wala ka fu nyeta?” Ka o lebisi ba ye, “O bu ne tan n buligi m nini, ka m pie ka nyet.”

¹⁶Ka Farisee dim sieba yel ye, “Dau kaŋa nwa pu dol vuꞌusum daar la wadaa, linzug ka ti baŋ ye o pu yi Winaꞌam saꞌan naa.”

Ka sieba ye, “Dau kane a tuumbeꞌed sob na niŋ wala tum tuumnyalim bama?” Ka bakir kenn Farisee dim la ni.

¹⁷Ka ba lem buꞌos dau la ye, “Fu na yeli o yela ye bo, on ke ka fu nyet la?”

Ka o lebisi ba ye, “O ane Winaꞌam nodiꞌes.”

¹⁸Ka Jew dim la pu siak ye o daa zuꞌom ne ka yuꞌun nyeta, asee ba buol o baꞌ ne o ma n buꞌos. ¹⁹Ka ba buꞌosi ba ye, “Ya biig la nwa? On ka ya ye ya duꞌa o ka o a zuꞌom laa? Ka li niŋ wala ka o yuꞌun nyeta?”

²⁰Ka ba lebis ye, “Ti miꞌ ye o ane ti biig, ka lem miꞌ ye, ti duꞌa o ka o a zuꞌom, ²¹amaa lin niŋ siꞌem ka o nyet la, ti ku baŋi, ka ti me lem ziꞌ one ke ka o nyeta. Buꞌosimi ne o, ka o ane dau, o lem kaꞌa biiga. O meŋ na pianꞌ.” ²²Ban zot Jew dim kpeenmnam dabiem la zug, ke ka ba yel ala. Jew dim daa pun deŋim gbanꞌe ye soꞌ yaꞌa siak ye Yesu ane Kiristo la, ba na kad o ba laꞌasug doogin la. ²³Linzug, ka o baꞌ ne o ma la yeli ba ye, “Buꞌosimi ne o, ka o kaꞌa biiga.”

²⁴Ka ba buol dau one daa a zuꞌom la noora ayi daan n yel o ye, “Pianꞌam Winaꞌam yuꞌur fu laafe nyeeb la yela. Ti miꞌ ye dau kaŋa ane tuumbeꞌed sob.”

²⁵Ka o lebis ye, “O yaꞌa ane tuumbeꞌed sob bee o kaꞌa tuumbeꞌed soba m ziꞌ. Mam miꞌ siꞌel ane ye, m daa ane zuꞌom ka yuꞌun nyet.”

²⁶Ka ba buꞌos o ye, “O niŋ uf bo? O niŋ wala laki fu nini?”

²⁷Ka o lebisi ba ye, “M pun deŋim yeli ya ka ya pu bood ye ya kelise, ka bo ka ya bood ye ya wum yaꞌase? Ya me bood ye ya liebi o nyaꞌandoliba?”

²⁸Ka ba tuꞌud o ye, “Fune aa o nyaꞌandol, ka tinam ane Moses nyaꞌandolib. ²⁹Ti miꞌ ye Winaꞌam da pianꞌ tisne Moses, amaa dau kaŋa nwa, ti ziꞌ on yi zinꞌisiꞌa naa.”

³⁰Ka dau la yel ye, “Nwa ane lidigir. Ya ziꞌ on yi siꞌel naa, ka laꞌam ne wala o lakim nini ka m nyet. ³¹Ti miꞌ ye, Winaꞌam ku kelis one a tuumbeꞌed sob sosugo, amaa ka soꞌ yaꞌa puꞌusid Winaꞌam ka niŋidi o boodim, o na wumi o sosug. ³²Dunia pinꞌilugin sa soꞌ nan ziꞌ wum ye ba ke ka on ka ba duꞌa o ka o a zuꞌom nini nyeta. ³³Dinzugo dau kaŋa yaꞌa pu yiin Winaꞌam saꞌan naa, o ku nyaŋe niŋin siꞌe siꞌel la.”

³⁴Ka ba lebis o ye, “Ba duꞌa uf ne tuumbeꞌedin, ka fu lee bood ye fu paꞌali tii?” Ka ba kad o yiis.

³⁵Ka Yesu n wum ye ba kad dau la yiis la, ka nye o la, o buꞌos o ye, “Fu niŋ Ninsaal Biig la yaddaa?”

³⁶Ka o lebis ye, “M Zugsoba, Ninsaal Biig la a anoꞌon ka m na niŋ o yadda?”

³⁷Yesu yel o ye, “Fu nye o ka li ane one pianꞌad ne fu la.”

³⁸Ka dau la yel ye, “M Zugsob, m niŋ uf yadda.” Ka naꞌas Yesu.

³⁹Yesu yel ye, “Saria kadib yela ka m keenn dunia ni, ka zunzoos na nyet, ka bane nyet la na lieb zunzoos.”

⁴⁰Ka Farisee dim sieba bane kpiꞌe ne o la n wum neꞌeŋa la, ba buꞌos o ye, “Din la tinam me ane zunzoosee?”

⁴¹Ka Yesu lebisi ba ye, “Ya yaꞌa aan zunzoos ya ku moren taale. Ka yaname sadigim yel ye ya nyet la, ya taal kpelim be.”

Konbkem siiliŋ la

¹Ka Yesu ye, “Asida ka m yeti ya ye, one pu dol peꞌes zaꞌanoorin la n kpenꞌ buluugin laa ka du zaŋguomi kpenꞌ ane one faand bee naꞌayiig. ²Amaa one dol zaꞌanoorin la kpenꞌ ane peꞌes la konbkem. ³Ka one gur zaꞌanoor la na yoꞌogi tis o. Ka o peꞌes la miꞌ o kukor la zug, o buoni ba yuda ka gaad tuon ka ba dol o. ⁴Ka on more o peꞌes wusa yi na la, o gaadi ba tuon ka ba dol o, bozugo ba miꞌ o kukor. ⁵Ba ku dol saana, ba na zo ka bas o, bozugo ba ziꞌ o kukore.” ⁶Siiliŋ kaŋa ka Yesu zaŋi siilimi ba, amaa ba pu gbanꞌe o pianꞌad la gbin ne.

Yesu n a konbkem suŋ la yela

⁷Ka Yesu yeli ba yaꞌas ye, “Asida ka m yeti ya ye, mane aa peꞌes la zaꞌanoor. ⁸Ban wusa deŋi m tuon ane bane faand bee naꞌayiis, ka peꞌes la pu kelisidi baa. ⁹Mane a zaꞌanoor la. Ka one dol zaꞌanoor kan la kpenꞌ na nye faangir. O na kpenꞌ ka yi na n nye diib n di. ¹⁰Naꞌayiig la kenne ye o zu ka ku, ka saꞌam maꞌaa, ka mam kena ye ba nye nyovur line kaꞌa naare.”

¹¹“Mane a konbkem suŋ la. Konbkem suŋ la pesigi o nyovur peꞌes la yela. ¹²One kaꞌ konbkem meŋire, ka gur peꞌes bane kaꞌ o meŋ dine ka li ane ligidi yela ka o guri ba la, o yaꞌa nye ka kunduŋ ken na ka o bas peꞌes la, ka zo. Ka kunduŋ la gbanꞌe ba ka widigi ba. ¹³Ban kaꞌ o meŋ peꞌese ka ane ligidi yela maꞌaa la zug, ka o zo.

¹⁴“Mane lee a konbkem suŋ la, ka miꞌ m meŋ konbid ka ba me miꞌ man ¹⁵wenne m Baꞌ Winaꞌam miꞌi man ka man me miꞌ o siꞌem la. Mane pesigi m nyovure tisi m peꞌes la. ¹⁶M mor peꞌesieba bane kaꞌ buluug nwa nii. Li nar ka m me more ba na ka ba kelisi m kukor, ka laꞌase ba wusa gumm ka mor konbkem yinni. ¹⁷Ka man pesigi m nyovur la zug ka m Baꞌ la noŋi m. Ka m na lem diꞌe li yaꞌas. ¹⁸Soꞌ ku nyaŋe zaŋi m nyovure. M meŋ lee pesigi m nyovur. M mor paŋ ye m pesigi m nyovure kpi, ka lem mor paŋ ye m lem diꞌe li yaꞌas. M Baꞌ tisi m noziꞌel kaŋa.”

¹⁹Ka pianꞌ bama zug ke ka bakir yaꞌan daa be Jew dim la soogin. ²⁰Ka ba titaꞌam sa yel ye, “Bo ka ya kelisid o, o ane geeŋ ka kikirig dol o.”

²¹Ka sieba yel ye, “Li kaꞌa on ka kikirig dol o pianꞌade nwaa. Kikirig na nyaŋe ke ka one zuꞌom nyeta?”

Jew dim n zanꞌas Yesu la yela

²²Ka diꞌema saŋa line ka ba tiend Winaꞌam puꞌusum yir pier Jerusalem teŋin la paae, ka li da a sapal. ²³Ka Yesu ken Winaꞌam puꞌusum yir zinꞌikan ka ba buon Solomon zaꞌambeŋ la. ²⁴Ka Jew dim laꞌase gilig o ka yel o ye, “Bo ka fu ke ka ti biꞌesid hale ne anwa? Fu yaꞌa ane Kiristo la, one ka Winaꞌam gaŋ la, fun yelimi ti nyain nyain.”

²⁵Ka Yesu lebisi ba ye, “M daa yeli ya, ka ya pu niŋi m yaddaa. Tuumban ka m tum m Baꞌ yuꞌurin la paꞌal mam a siꞌem. ²⁶Amaa yaname kaꞌ m peꞌes la zug ka ya pu niŋi m yaddaa. ²⁷M peꞌes wumi m kukor, ka m miꞌ ba, ka ba doli m, ²⁸ka m tisidi ba nyovur line kaꞌ benne, ka ba kulum ku bodige, ka soꞌ kaeꞌ na nyaŋe faann ba m nuꞌugine. ²⁹M Baꞌ one noki ba tisi m la mor paŋ hale gaad siꞌel wusa, ka soꞌ kaeꞌ na nyaŋe faann ba m Baꞌ la nuꞌugine. ³⁰Mam ne m Baꞌ la ane yinni.”

³¹Ka Jew dim lem ye ba lob o ne kuga n ku. ³²Ka Yesu yeli ba ye, “M paꞌali ya tuumsuma bedego line yi m Baꞌ la ni, ka tuumsuŋban yela ka ya lobidi m ne kugaa?”

³³Ka Jew dim la lebis o ye, “Li kaꞌane tuumsuma yelaa amaa Winaꞌam yuꞌusaꞌuŋ la yela, bozugo fu ane ninsaal amaa fu ye fu ane Winaꞌam.”

³⁴Ka o lebisi ba ye, “Li sobi ya wada ni ye, ‘Mam, Winaꞌam yel ye, ya ane Winaa.’ ³⁵Ti miꞌ ye Winaꞌam gbauŋ la a sida saŋa wusa, ka bane ka o zaŋ o labaar la tis la, o buoni ba ye ba ane wina. ³⁶Ka laꞌam ne wala ka ya yet ye, mam kane ka Winaꞌam gaŋ la ka tumi m dunia nwa ni la saꞌamid Winaꞌam yuꞌur, mam yet ye, mam a Winaꞌam Biig la zug. ³⁷M yaꞌa pu tumi m Baꞌ tuuma, da niŋine m yadda. ³⁸Amaa m yaꞌa tumi li hale ka ya pu niŋi m yadda, siakimi m tuuma la, ka ya na nye ka baŋ ye, m Baꞌ la a yinni ne mam ka m me a yinni ne o.” ³⁹Ka ba lem zigid ye ba gbanꞌ o, ka o toomi ba ni.

⁴⁰Ka o toomi anina n keŋ loꞌoŋ Joodan moꞌar n paae zinꞌikan ka Joon da deŋim suud nidib kuꞌom la n kpelimi ani. ⁴¹Ka nidib bedego kenn o saꞌan na ka yel ye, “Joon pu tum tuumnyalima, ka lin wusa ka o da pianꞌ dau kaŋa yela la ane sida.” ⁴²Ka nidib bedego niŋ o yadda anina.

Lazarus n kpi, ka Yesu ke ka o lem vuꞌug la yela

¹Ka dau daa be Betani teŋin. Ka o yuꞌur buon Lazarus. Ka o kaꞌ laafe. Teŋ kan ni ka Meeri ne o bier Marta be la. ²Li ane Meeri one daa kpaꞌe kpasoondim n walig Yesu ka eens o noba ne o zuobid la, on taunn n a Lazarus one n kaꞌ laafe la. ³Dinzug o tanp la daa tum n yel Yesu ye, “Zugsoba, fu zuanoŋir la kaꞌ laafe.”

⁴Ka Yesu n wumi li la, ka o yel ye, “Banꞌakan ku kuu o. Amaa li ane ye Winaꞌam yuꞌur na du bedego. Ka lin zug ka Winaꞌam Biig la yuꞌur me na du.”

⁵Ka Yesu noŋ Marta ne o pitu la ne Lazarus suꞌuŋa. ⁶Ka on wum ye Lazarus kaꞌ laafe la, o kpelim on daa be zinꞌisiꞌa la daba yi.

⁷Ka lin nyaꞌaŋ la ka o yel o nyaꞌandolib la ye, “Keli ka ti keŋ Juuda yaꞌas.”

⁸Ka o nyaꞌandolib la yel o ye, “Paꞌana, Jew dim daa bood uf ye ba lob ne kuga n kuu uf. Ka wala ka fu yel ye, fun na lem n keŋ anina yaꞌase?”

⁹Ka Yesu lebis n buꞌosi ba ye, “Li kaꞌ daar yinni a nintaŋ tansib ne zaam maꞌare? Nid yaꞌa ken nintaŋ win o ku tuꞌuge, bozugo dunia neesim be. ¹⁰Amaa nid yaꞌa ken yuꞌuŋ o tuꞌugidne, bozugo neesim kaeꞌ.”

¹¹Ka on yeli ba nwa n naae la, o yeli ba ye, “Ti zua Lazarus gbisidne. Amaa m na keŋ n nie o gbeenmin la.”

¹²Ka o nyaꞌandolib la yel o ye, “Zugsoba, o yaꞌa gbisidne, o na nye laafe.” ¹³Amaa Yesu yeti ba ne Lazarus kuꞌum yela. Ka ba tenꞌesid ye o yeti ba ne o gbeenm yela.

¹⁴Ka Yesu yeli ba nyain ye, “Lazarus kpi ne. ¹⁵Man daa kaꞌ o saꞌan la yela, ke ka m mor sumalisim, yanam zug, bozugo ya na niŋ m yadda. Amaa keli ka ti keŋ o saꞌan.”

¹⁶Ka Tomas, one a liiba la yinni, yel o nyaꞌandoltaab ye, “Keli ka ti laꞌam keŋ ne o. Ka li yaꞌa a kuꞌum, tinam laꞌam n kpi ne o.”

¹⁷Ka Yesu n paae la, o nye ka Lazarus pun be yaugin ne daba anaasi sa. ¹⁸Ka Betani teŋ daa pu lal ne Jerusalem. Li ane wuu maila ayi ne. ¹⁹Ka Jew dim bedego kena ye ba belis Marta ne Meeri ba taunn kum la zug.

²⁰Ka Marta n wum ye Yesu kenna la, o due n yi ye o tuꞌos o. Ka Meeri kpelim n zinꞌi yin. ²¹Ka Marta yel Yesu ye, “Zugsoba, fu yaꞌa daa been kpela, man taunn nwa naan ku kpii nee. ²²Amaa m miꞌ ye lin mekama ka fu sos Winaꞌam la, hale baa nannanna o na maal ala n tis uf.”

²³Ka Yesu yel o ye, “Fu taunn la na vuꞌug yaꞌas.”

²⁴Ka Marta yel o ye, “M miꞌ ye o na ti vuꞌug kumin dunia kaŋa naar daar.”

²⁵Ka Yesu yel o ye, “Mane a kuꞌum vuꞌugir ne nyovur. One niŋ m yadda la, hale o yaꞌa ane kuꞌum, o na vuꞌug. ²⁶Ka one mekama voe ka niŋi m yadda la, o kudum ku kpii. Fu niŋ nwa yadda bee?”

²⁷Ka Marta yel o ye, “M Zugsoba, m niŋ uf yadda ye fu ane Kiristo, Winaꞌam Biig, on ka ba da ye o na kenn dunia ni na la.”

²⁸Ka on yel nwa naae la, o suaꞌ keŋ buol o pitu Meeri n yel o ye, “Ti Paꞌan la be kpela yamma yamma ka buon uf.” ²⁹Ka on wum la ka o due toꞌoto n keŋ o saꞌan. ³⁰Ka Yesu da nam pu paae teŋ la ni naa, amaa o kpelim bene zinꞌikan ka Marta tuꞌos o la. ³¹Ka Jew dim bane be yin n belisid Meeri la, n nye ka o due toꞌoto n yi la, ka ba dol o n tenꞌesid ye, o kenne yaugin la ye o kaas.

³²Ka Meeri paae Yesu n be zinꞌisiꞌa la, ka nye o, ka igin Yesu tuon n yel o ye, “M Zugsoba, fu yaꞌa daa been kpela man taunn nwa naan ku kpii nee.”

³³Ka Yesu n nye ka o kum ka Jew dim bane dol o la me kum la, ka o suunr saꞌam hale, ka o sinꞌim bedego, ³⁴ka buꞌosi ba ye, yaa ni ka ya suaꞌ kum la? Ka ba yel o ye, “Ti Zugsoba, kem na n gos.”

³⁵Ka Yesu nintoꞌom yi.

³⁶Ka Jew dim la yel ye, “Gosimi, on noŋ o siꞌem.”

³⁷Ka sieba buꞌos ye, “Dau kaŋa daa niŋ siꞌem n nie zunzoŋ nini la ku nyaŋen keen ka dau kaŋa tiliginee?”

³⁸Dinzugo Yesu lem sinꞌim yaꞌas on paae yaugin la. Yaug la ane tampiing voonr, ka kugir ligili li noor. ³⁹Ka Yesu yel ye, “Lakimi kugir la.”

Ka one kpi la taunn Marta yel o ye, “M Zugsoba, o be ne yaugin daba anaasi nwa. Anwa o punꞌe ya.”

⁴⁰Ka Yesu buꞌos o ye, “M pu yel ye, fu yaꞌa niŋi m yadda, fu na nye Winaꞌam paŋa?”

⁴¹Ka ba lak kugir la ka bas yaug la noor. Ka Yesu goꞌe gosidi agol, ka yel ye, “M Baꞌ, man puꞌusid uf bareka fun wumi m sosug la. ⁴²M miꞌ ye saŋa wusa fu wum ne m sosug. Amaa li ane nidib bane ziꞌe kpela nwa la zug, ka m yeli ala, ye ba niŋ yadda ye fun tum man na.”

⁴³Ka on n yel nwa wusa n naae la, ka o duꞌos o kukor n tans ye, “Lazarus, yim na.” ⁴⁴Ka one daa kpi la due. Ka o noba ne o nuꞌus vilig ne pien. Ka pien bil loo o nindaa.

Ka Yesu yeli ba ye, “Yidigim pien la ka bas o ka o keŋ.”

Jew dim kpeenmnam n gbanꞌe Yesu kuub la yela

(Mateo 26.1-5; Maak 14.1-2; Luuk 22.1-2)

⁴⁵Ka Jew dim bedego bane dol Meeri laꞌam kena ka nye Yesu n maal siꞌem la ba niŋ o yadda. ⁴⁶Ka sieba keŋ Farisee dim saꞌan n yeli ba, Yesu n tum siꞌem la.

⁴⁷Ka maalmaan kpeenmnam ne Farisee dim laꞌas ba kpeenmnam ka yel ye, “Ti na niŋ wala? Dau kaŋa tum tuumnyalima bedego. ⁴⁸Ti yaꞌa ke ka o kpelim niŋidi ala nidib wusa na niŋ o yadda, ka Room dim na kena saꞌami ti zinꞌisuŋ ne ti soꞌolim wusa.”

⁴⁹Ka ba nid yinni, on yuꞌur buon Kaifas one da a maalmaan kpeenm yuum kan la, yeli ba ye, “Ya ziꞌ siꞌel siꞌela. ⁵⁰Ya pu baŋ ye li a suꞌum ye dau yinni naani kpi nidib la yela n gaad ti buudi la wusa saꞌuŋo?”

⁵¹O pu yel neꞌeŋa ne o meŋ yaꞌam, amaa on da a maalmaan kpeenm yuum kaŋa la n ke ka o diꞌe Winaꞌam pianꞌad n tis nidib la, ye Yesu na kpi n tis Jew dim buudi la. ⁵²Ka kaꞌane buudi kaŋa la yela maꞌanee, amaa ye o laꞌas Winaꞌam biis bane widig la. ⁵³Dinzugo daar kan ka ba pinꞌili gbanꞌe ban na niŋ siꞌem ku o.

⁵⁴Lin yela ka Yesu pu lem neeli o meŋ Jew dim sooginee, ka toomi anina keŋ teŋ kane kpiꞌe moogin, ka kpenꞌ Efiram teŋin n gbeenn anina ne o nyaꞌandolib la.

⁵⁵Ka Jew dim diꞌema lin ka ba buon kum malek gaadug tienr la da liꞌelne, ka ba bedego naam teŋin la keŋ Jerusalem ye ba maal maluŋ kane na ke ka ba a nyain la, ka dabisir la nyaan paae. ⁵⁶Ka ba ied Yesu. Ka ban be Winaꞌam puꞌusum yin la ka buꞌos taaba ye, “Ya tenꞌesid wala? Ya tenꞌes ka o ku kenn laꞌasug la naa?” ⁵⁷Ka maalmaan kpeenmnam ne Farisee dim la daa deŋim tis noor ye soꞌ yaꞌa baŋ on be zinꞌi siꞌa, on yelimi ba ka ba gbanꞌ o.

Meeri n kpaꞌe tudaare siinꞌe Yesu la yela

(Mateo 26.6-13; Maak 14.3-9)

¹Ka li kpelim daba ayuobu ka kum malek gaadug dabisir la paae, ka Yesu keŋ Betani, teŋ kan ka Lazarus on ka o daa vuꞌug kumin la be. ²Ka ba maal diib tis o, ka Marta pudug diib la, ka Lazarus paas bane dit ne o la ni. ³Ka Meeri zaŋ tudaare kpaam line ka ba buon naad la, ka na peꞌel kolibir, ka li ligidi zuꞌe bedego la, n kpaꞌe siinꞌe Yesu noba la ka nok o zuobid n duus li, ka yir la wusa taae ne tudaare kpaam la nyuug.

⁴Ka Judas Iskariot one a Yesu nyaꞌandolib la yinni, one na ti zam o la, yel ye, ⁵“Bo ka o pu kuos tudaare kpaam la m mor ligidi la na ka ti tis noŋ dima? Ligid kan na paae nid yinni yuum yood.” ⁶Li kaꞌane on noŋ noŋdim la yela ka o yel neꞌeŋa, amaa li ane on da mor ba ligidi kolug ka a naꞌayiig la yela, ka yiti suaꞌ yiis line be anina la.

⁷Ka Yesu yel ye, “Basimi poꞌa la baanlim. Kel ka o tenr lin ka o maal la n guri m mum daar. ⁸Noŋ dim na be ne ya saŋa wusa, amaa mam lee ku be ne ya saŋa wusa.”

⁹Ka Jew dim nidib titaꞌam sa n wum ye o be ani la, ba kena ka li kaꞌane Yesu yela maꞌanee, amaa laꞌam ne Lazarus one ka Yesu vuꞌug o kumin la nyeeb men. ¹⁰Ka maalmaan kpeenmnam la gbanꞌe ye ba ku Lazarus men. ¹¹Bozugo on yela ka Jew dim la bedego tiak ka niŋid Yesu yadda.

Yesu n kpenꞌ Jerusalem la yela

(Mateo 21.1-11; Maak 11.1-11; Luuk 19.28-40)

¹²Ka yim beug ka nidib bedego bane keŋ maluŋ dabisir la ni wum ye Yesu ken Jerusalem la, ¹³ka zaŋ kpukpar vaand n tuꞌosid o ka pianꞌad ne kukortitaꞌar ye, “Hosaana, yelsum bene one ken na ne Zugsob la yuꞌur la, ka a Israel dim naꞌab la.” ¹⁴Yesu nye buŋsiaꞌasiŋ ka banꞌ o ka li dolne lin da sob siꞌem Winaꞌam gbauŋin ye,

¹⁵“Jerusalem nidiba, da zoti dabiem.

Gosimi ya, ya naꞌab kenna ka banꞌad buŋsiaꞌasiŋ.”

¹⁶O nyaꞌandolib da nam pu deŋim baŋi li gbin ne, amaa Yesu n ti nye zunꞌor la, ba tienn ye neꞌeŋa da sobne o yela ka li me a line ka ba niŋi tis o la.

¹⁷Ka nidib bedego bane da be o saꞌan saŋkan ka o vuꞌug Lazarus kumin ka o yi yaugin na la, n yel Yesu n daa niŋ siꞌem. ¹⁸Ka on tum tuumnyaluŋ kaŋa ka nidib bedego wum la zug ba keŋ tuꞌos o. ¹⁹Ka Farisee dim yuꞌun yet taaba ye, “Ti ku nyaŋe niŋ siꞌe siꞌela. Gosimi ya, nidib la wusa dol o ne.”

Greek dim sieba n bood ye ba nye Yesu la yela

²⁰Ka Greek dim sieba me daa be bane keŋ Jerusalem ye ba puꞌus Winaꞌam maluŋ dabisir daar la. ²¹Ka ba kenn Filip one yi Besaida, Galilee soꞌolimin la saꞌan na n yel o ye, “Ti bood ye ti nye Yesu.” ²²Ka Filip keŋ yel Andrew ka ba dol taaba me keŋ yel Yesu.

²³Ka Yesu lebisi ba ye, “Saŋa la paae ya ye Ninsaal Biig la nye zunꞌor. ²⁴Asida ka m yeti ya ye kief yaꞌa pinꞌ teŋin ka pu bule, li kpelim ane yinni, amaa li yaꞌa bul li na duꞌa ki bedego. ²⁵One noŋi o nyovur na koꞌoŋi li, amaa one basi o nyovur dunia nwa ni la na nye nyovur line kaꞌ naare. ²⁶One bood ye o tum tisi m, asee ka o doli m, ka mam be zinꞌisiꞌa la o me na be ani. Soꞌ yaꞌa tum tis man, m Baꞌ na zunꞌe o daana yuꞌur.

²⁷“Nannanna m sunf saꞌameya, ka m na yel ye bo? M Baꞌa faann m saŋkaŋa namisugin nwaa? Ayei, li ane neꞌeŋa nwa yela ka m kena paae saŋkaŋa nwa. ²⁸M Baꞌa, zunꞌomi fu yuꞌur.”

Ka kukor yi saazug n yel ye, “M zunꞌe m yuꞌur ka na lem zunꞌe li yaꞌas.” ²⁹Ka nimbane ziꞌe kpiꞌe la wumi li la ka yel ye, “Saa dam,” ka sieba ye, “Maleki pianꞌ tis o.”

³⁰Ka Yesu lebis ye, “Kukor kaŋa pianꞌane ya yela, ka kaꞌ mam yelaa. ³¹Dunia nwa saria kadib paae ya, ka ba na kad one soꞌe li la bas. ³²Ka ba yaꞌa duꞌos man agol, m na buol nidib wusa kenn m saꞌan na.” ³³Yesu yel neꞌeŋa ne ye o paꞌal kuꞌum kan buudi ka o na ti kpi.

³⁴Ka nidib la lebis o ye, “Ti wum wada gbauŋin ka li yel ye Kiristo la kpelim be ne saŋa wusa, ka bo ka fu yel ye, ba na duꞌos Ninsaal Biig la agole? Ka Ninsaal Bikaŋa a anoꞌone?”

³⁵Yesu siilimi ba ye, “Neesim la na be ne ya saŋa biꞌela. One a neesim n be la, kemi, ka neesim nan kpen be la da ke ka yuꞌuŋ sobi ya. One keŋ likin ziꞌ on ken siꞌela. ³⁶Yaname be neesim la saꞌan la, niŋimini o yadda ka lieb neesim la biis.”

Jew dimi pu niŋ Yesu yadda la yela

Ka on yel neꞌeŋa naae la ka toom n suaꞌ o meŋ ba saꞌan. ³⁷Hale baa on tum tuumnyalima bedego ka ba nye la, laꞌam ne wala ba pu niŋ o yaddaa. ³⁸Li da niŋi ala ye Winaꞌam nodiꞌes Azaya da pianꞌa siꞌel la niŋi ameŋa ye,

“Ti Zugsoba, anoꞌon siaki ti labaar la?

Ka anoꞌon saꞌan ka Zugsob la nie o paŋi paꞌale?”

³⁹Ba da pu niŋ o yaddaa, bozugo Azaya da lem yel yaꞌas ye,

⁴⁰“O zuꞌomi ba nini ka digilimi ba sunya,

ka ba da nyeta bee ba sunya baŋe

ka ba lebi mam Winaꞌam saꞌan na ka m tiꞌebi ba.”

⁴¹Azaya yeli ala bozugo o da nye Yesu naꞌam paŋ ka pianꞌ o yela.

⁴²Ka laꞌam ne wala hale Jew dim tuongatib bedego niŋ o yadda ba sunya ni, ka Farisee dim zotim la yela ka ba pu neeli li ye ba na ti yiisi ba laꞌasug doogin n basi, ⁴³ban noŋ saalib zunꞌor n gat Winaꞌam zunꞌor la zug.

Yesu pianꞌad n na kad nidib saria la yela

⁴⁴Ka Yesu pianꞌ ne kukortitaꞌar ye, “One niŋid man yadda la, pu niŋid mam yadda maꞌanee, amaa o laꞌam niŋid ne one tum man na la yadda men. ⁴⁵Ka one nyee man la me nye one tum man la na. ⁴⁶M ane neesim n kenn dunia ni na, ka one niŋi m yadda ku kpelim likin ne.

⁴⁷“Ka soꞌ yaꞌa wumi m pianꞌad la ka pu doli li sueya, m ku kadi o saria, bozugo m pu kena ye m kadne dunia dim saria amaa ye m faaenn ba. ⁴⁸One zanꞌas ka pu diꞌe m pianꞌad la mor saria kadib. Ka pianꞌaban ka m pianꞌa la na ti kadi o saria naar daar la. ⁴⁹Ka m pu pianꞌ ne m meŋ paŋa. Amaa m Baꞌ one tum m la na meŋ tis m noor mam na pianꞌ siꞌem wusa. ⁵⁰Ka m miꞌ ye o noor ziꞌelug la taꞌasid nyovur line kaꞌ naare. Dinzugo m Baꞌ yeli m siꞌel la, lin ka m pianꞌad.”

Yesu n pie o nyaꞌandolib noba la yela

¹Ka kuꞌum malek gaadug tienr dabisir la da liꞌel la, ka Yesu baŋ ye o saŋa paae ye o yi dunia kaŋa ni ka keŋ o Baꞌ saꞌan. O da noŋi o meŋ nidib bane be dunia ni, ka noŋi ba hale.

²Ka Yesu ne o nyaꞌandolib daa ditne ba yuꞌuŋ diib, ka Sutaana daa pun deŋim n kpenꞌ Judas, Simon Iskariot biig la sunfin, ye o zam Yesu. ³Yesu daa miꞌ ye o Baꞌ la zaŋ siꞌel mekama wusa niŋ o nuꞌugin la, ka miꞌ ye o yine Winaꞌam saꞌan na, ka lebidne Winaꞌam saꞌan. ⁴Ka o due diibin la n yeeg o fuug, ka zaŋ pien n lo o sia, ⁵ka bue kuꞌom niŋ siꞌuŋun ka pinꞌil n pie o nyaꞌandolib la noba, ka duusidi ba ne pien kan ka o lo o sia la.

⁶O daa pie paae Simon Piita. Ka Piita buꞌos o ye, “M Zugsoba, fu ye fu pie m nobaa?”

⁷Ka Yesu lebis o ye, “Fun nan ziꞌ man niŋid siꞌel la, amaa, nwa nyaꞌaŋ fu na baŋi li.”

⁸Ka Piita yel o ye, “Fu kudum ku pie m nobaa.”

Ka Yesu lebis o ye, “M yaꞌa pu pie fu nobaa, fu lem kaꞌ m nyaꞌandola.”

⁹Ka Simon Piita yel o ye, “M Zugsoba, alazugo piem m nuꞌus ne m zug, ka kaꞌ m noba gullimnee.”

¹⁰Yesu yel o ye, “One pun su sa, o noba pier gullim siaki ya, ka li maal o niŋgbiŋ wusa ka li a nyain. Ya ane nyain, amaa kaꞌa ya wusaa.” ¹¹Ka Yesu daa pun miꞌ one ye o zam o la zug, ka o yel ye kaꞌ ya wusa a nyain ne.

¹²Ka one pie ba noba naae la, ka o lem ye o fuug, ka leb n zinꞌi, ka buꞌosi ba ye, “Ya baŋ man niŋ siꞌel laa?” ¹³“Ya buon man ye, Paꞌan ne Zugsob. Li ane ameŋa. M ane ala. ¹⁴Lin sadigim ane ye man ane ya Zugsob ne ya Paꞌan la, ka pie ya noba la, li suꞌum ye yanam me pie ya taaba noba. ¹⁵M maal nwa ne ye m paꞌali ya, ye yanam me na maalne wuu man maali ya siꞌem la. ¹⁶Ameŋa ka m yeti ya ye, tumtum ku gaad o zugsoba. Ka ban tum soꞌ la ku gaad one tum o la. ¹⁷Ya yaꞌa baŋ nwa, ka niŋ ala, yelsum be ya zutin.

¹⁸“Li kaꞌ ya wusa yela ka m yeta. M miꞌ mane gaŋ sieba la. Amaa asee Winaꞌam gbauŋ la sob siꞌem la niŋ ameŋa ye, ‘One dit ne man la, tuligi kis man.’

¹⁹“M yeti ya ne nannanna ka li nan pu maali. Ka li yaꞌa ti maal, ya na niŋ m yadda ye mane la. ²⁰Ameŋa ka m yeti ya ye, one diꞌe on ka m tum la diꞌedne man. Ka one diꞌed man la diꞌedne one tum man la na.”

Yesu n yel ye soꞌ na zam o la yela

(Mateo 26.20-25; Maak 14.17-21; Luuk 22.21-23)

²¹Ka Yesu n pianꞌ neꞌeŋa la ka o sunf saꞌam ka o yel ye, “Asida ka m yeti ya ye, ya yinni na zam man.”

²²Ka o nyaꞌandolib la gosid taaba ka yaꞌamisid on yela ka Yesu pianꞌad la. ²³Ka Yesu nyaꞌandol yinni one ka o noŋ hale la zinꞌi kpiꞌe ne Yesu. ²⁴Ka Simon Piita enbig nyaꞌandol la ka yel o ye, “Buꞌosim o, one ka o pianꞌad la.”

²⁵Ka one nan kpelim zinꞌi kpiꞌe ne Yesu baba la, buꞌos o ye, “Zugsoba, li aa anoꞌone?”

²⁶Ka Yesu lebis ye, “Li ane one ka m na zaŋ bodobodo nwa n suk laan la n tis o la na zam man.” Ka on suk diib la laan la ka zaŋi li tis Judas Iskariot. ²⁷Ka Judas n di diib la naae la ka Sutaana kpenꞌ o ni.

Ka Yesu yel o ye, “Fun na niŋ siꞌel la, niŋimi li toꞌoto.” ²⁸Ka bane wusa laꞌam dit ne o la pu baŋ lin yela ka o yel o alaa. ²⁹Ka sieba tenꞌes ye Judas n da more ba ligidi kolug la yela ka Yesu yet o ye o daꞌam laꞌaban ka ba bood maluŋ diib dabisir la yela, bee o suŋim noŋdim la. ³⁰Li daa ane yuꞌuŋ, ka Judas n diꞌe diib la naae la, ka kpelim yi.

Nooryelug paal la yela

³¹Ka Judas n daa yi la, ka Yesu yel ye, “Ninsaal Biig la yuꞌur na nye zunꞌor nannanna, ka on ni ka Winaꞌam yuꞌur me na nye zunꞌor. ³²Winaꞌam yuꞌur yaꞌa nye zunꞌor, o Biig la zug, Winaꞌam meŋ na zunꞌe o Biig la yuꞌur, ka li ku yuuge.

³³“M biise, m na be ne ya, saŋa biꞌela nwa. Ka ya na ti ied man. Wenne man daa yel Jew dim siꞌem la, ye, man ken zinꞌisiꞌa la ya ku tunꞌe kenn aninaa. Ala men ka m deŋim yeti ya nannanna.

³⁴“Nooryelug paal nwa ka m tisidi ya ye, ya noŋim taaba. Wenne man noŋi ya siꞌem la, ala men ka ya na noŋ taaba. ³⁵Ya yaꞌa noŋ taaba, nidib wusa na baŋ ye ya ane m nyaꞌandolib.”

Yesu n daa tuꞌas Piita na ti kiꞌis o siꞌem la yela

(Mateo 26.31-35; Maak 14.27-31; Luuk 22.31-34)

³⁶Ka Simon Piita buꞌos o ye, “M Zugsoba, fu ken yaani?”

Ka Yesu lebis o ye, “Man na ken zinꞌisiꞌa la, fu ku nyaŋ dol man nannanna. Amaa fu na ti yuolim dol man n keŋ.”

³⁷Ka Piita buꞌos o ye, “M Zugsoba, bo niŋ ka m ku nyaŋ dol uf nannanna? M na tunꞌe kpi fu zug.”

³⁸Ka Yesu lebis o ye, “Fu na kpi man zugoo? Ameŋa ka m yet uf ye, fu na kiꞌis man noor atanꞌ ka noraug naan kaas.”

Yesu n a suer line ken Winaꞌam saꞌan la yela

¹Ka Yesu yeli ba ye, “Da ke ka siꞌel daam ya sunyaa. Niŋim Winaꞌam yadda, ka niŋ man yadda men. ²M Baꞌ yir mor dood bedego. Yaꞌa kaꞌane alaa, m naan ku yeline ya ye, m kene ye m maal zinꞌig ya zugo. ³Ka m yaꞌa keŋ n maal zinꞌig la naae, m na lem kena n diꞌe ya lebi m saꞌan, ka ya na be zinꞌikan ka m be la. ⁴Ka man ken zinꞌisiꞌa la ya miꞌ ani, ka lem miꞌ li suer men.”

⁵Ka Tomas yel o ye, “M Zugsoba, ti ziꞌ fun ken zinꞌisiꞌa la. Ti na niŋ wala n baŋi li suere?”

⁶Ka Yesu lebis o ye, “Mane a suer ne yelmeŋir ne nyovur. Soꞌ kaeꞌ na nyaŋ n keŋ m Baꞌ Winaꞌam saꞌane, asee o paae man. ⁷Ya yaꞌa baŋin man ya naani baŋin m Baꞌ Winaꞌam men. Ka lin pinꞌil nannanna n zaŋ ken sa, ya baŋ o ka nyet o.”

⁸Ka Filip yel o ye, “M Zugsoba, paꞌalimi ti fu Baꞌ, ka tinam bood siꞌeli la.”

⁹Ka Yesu lebis o ye, “Filip, man be ne ya ka li yuug, ka fun nan kpelim ziꞌ maa? Bozugo on wusa nyet man la, nyet m Baꞌ men. Ka bo zug ka fu lem yet ye, paꞌalimi ti fu Baꞌ la? ¹⁰Fu pu siak ye m a yinni ne m Baꞌ la, ka m Baꞌ la a yinni ne manne? Pianꞌaban ka m pianꞌad tisi ya la kaꞌ m meŋ pianꞌade, amaa m Baꞌ kane be m ni la, one tumi o tuuma. ¹¹Niŋimi m yadda ye m a yinni ne m Baꞌ la, ka m Baꞌ la me a yinni ne man. Ka li yaꞌa kaꞌ alaa, niŋim man yadda m tuuma la zug. ¹²Yelmeŋir ka m yeti ya ye, one niŋ man yadda la na tum tuumbane ka man tum la. Hale o na tum tuumtitada ka ba gaad ala, bozugo m kenne m Baꞌ saꞌan. ¹³Lin wusa ka ya sos man yuꞌurin la, m na maali li, ye m Baꞌ yuꞌur na nye zunꞌor o Biig la zug. ¹⁴Ya yaꞌa sos siꞌel ne man yuꞌur, m na maali li.”

Winaꞌam Siig Suŋ ken na la yela

¹⁵“Ya yaꞌa noŋ man, ya na siak m noyelug la. ¹⁶Ka m na sos m Baꞌ, ka o na tisi ya Suŋid soꞌ. Ka o na be ne ya saŋa wusa. ¹⁷One a yelmeŋir Siig la. Ka dunia dim ku nyaŋ diꞌe o, bozugo ba pu nyet o, ka me pu baŋ oo. Yanam miꞌ o, bozugo o kpelim ya saꞌan, ka na be ya ni.

¹⁸“M ku basi ya wuu kpiibise. M na leb ya saꞌan na. ¹⁹Li kpelim biꞌela ka dunia nidib ku lem nyee m yaꞌase, amaa yanam na nyeti m. Man voe la zug, yanam me na mor nyovur. ²⁰Daakan la ka ya na baŋ ye m a yinni ne m Baꞌ la, ka yanam me a yinni ne m, ka m a yinni ne ya.

²¹“One diꞌe man noor ziꞌelug la, ka siaki li, one a one noŋi m. Ka one noŋ man la, m Baꞌ Winaꞌam me na noŋ o. Ka man na noŋ o, ka nie m meŋ n paꞌal o.” ²²Ka Judas, kaꞌane Judas Iskariot la, buꞌos o ye, “M Zugsoba, wala ka fu na nie fu meŋ n paꞌal tinam, ka kaꞌane dunia nidiba?”

²³Ka Yesu lebis o ye, “Nid yaꞌa noŋ man, o na diꞌe m noor, ka m Baꞌ na noŋ o, ka tinam na kenn o saꞌan na n kpelim o ni. ²⁴One pu noŋi m, pu diꞌedi m noore. Ka pianꞌad kane ka ya wum la, kaꞌ m meŋ pianꞌade, amaa li ane m Baꞌ one tum man na la pianꞌad.

²⁵“Pianꞌabama nwa ka m pianꞌad tisidi ya, man nan be ne ya la. ²⁶Amaa Suŋid la, one a Winaꞌam Siig Suŋ ka m Baꞌ la na ti tum o ya saꞌan na, ne m yuꞌur la, o na paꞌali ya siꞌel wusa, ka tiens ya siꞌel wusa lin ka man daa pianꞌ tisi ya la.

²⁷“M basi m sumalisim tisi ya, ka li ane m meŋ sumalisim ka m tisi ya, ka pu wenne dunia tisidi ya siꞌem la. Da ke ka ya sunya saꞌam, bee ka dabiem kpenꞌe yaa. ²⁸Ya daa pun wum ka m yeli ya ye, m na yi ya saꞌan, ka na lebi ya saꞌan na. Ya yaꞌa noŋin m, ya naan maalin sumalisim, man kenne m Baꞌ saꞌan la, bozugo m Baꞌ la gati m. ²⁹Ka nannanna m deŋim yeti ya ne ka li nan pu paae. Ka li yaꞌa ti paae ya na niŋ man yadda. ³⁰Ka lin yi nannanna n ken la, m ku lem pianꞌ bedego ne yaa, bozugo Sutaana one a dunia naꞌab la, kenna. Amaa o paŋ ku nyaŋe ma. ³¹Li a tilas ka dunia dim baŋ ye n noŋi m Baꞌ la, ka m Baꞌ la noor ziꞌelug la ka man dol.

“Duomi ka ti yi kpela keŋ.”

Veen tiig ne wila la siiliŋ

¹Ka Yesu paꞌali o nyaꞌandolib la ne siiliŋ ye, “Mane a veen tiig la ameŋa. Ka m Baꞌ gur tiig la. ²Wilkan be m ni ka pu wan na, m Baꞌ nwaadi li n basid. Ka wilkan wusa n wan la, o pesidi li ne n maali li suꞌuŋa ka li maligim wan bedego. ³Pianꞌakan ka m pianꞌ tisi ya la zug, ya ane nyain. ⁴Kpelim be man ni ka man me na be ya ni. Tiig wil ku tunꞌe wale, asee o kpelim be tiigin la. Ala men ka ya ku tunꞌe niŋ siꞌela asee ya kpelim be man ni.

⁵“Mane a tiig la, ka yanam a wila la. One kpelim be man ni ka man me be o ni la, on sob na wal bedego, bozugo ya ku tunꞌe niŋ siꞌela asee ya kpelim be man ni. ⁶On kane pu kpelim be man ni wenne wilkan ka ba nwaꞌe n bas, ka li kudug la. Ba na laꞌas wilban n lob bugumin, ka bugum dii ba. ⁷Ya yaꞌa kpelim be man ni, ka m pianꞌad be ya ni, ya na sos yaname bood siꞌel wusa ka li na niŋ ala n tisi ya. ⁸Ya tuumsuma bedego duꞌosid m Baꞌ Winaꞌam yuꞌur. Ka ala men ka li na paꞌal ye ya ane m nyaꞌandolib.

⁹“M Baꞌ noŋi m siꞌem la, ala men ka man noŋi ya. Kpelimi be ne m noŋir la poogin. ¹⁰Ya yaꞌa siak m noor ziꞌelug la, yanan kpelimi m noŋirin la, wuu man siak m Baꞌ noor ziꞌelug la, ka kpelim o noŋirin siꞌem la.

¹¹“M yeli ya yelbama ye ya diꞌe m sumalisim. Ka ya sunya na peꞌel ne sumalisim. ¹²M noor ziꞌelug nwa ka m yeti ya ye, noŋimi taaba, wuu man noŋi ya siꞌem la. ¹³Noŋir lem kaeꞌ gaad nidi naan kpi o zuanam zugo. ¹⁴Ya yaꞌa siak m noor ziꞌelug la, ya ane m zuanam. ¹⁵M yiti buoni ya ne ye, m tumtumnib. Amaa m ku lem buoli ya ala yaꞌase, bozugo tumtum ziꞌ o zugsob n niŋid siꞌela. Amaa m buoni ya ne ye, m zuanam, bozugo m yeli ya, m Baꞌ yeli m siꞌem wusa la. ¹⁶Kaꞌ yaname gaŋi ma. Amaa mane gaŋi ya ye ya tum tuumsuma wuu tisuŋi n wan welsuma siꞌem la. Ka ya tuumsuma na kpelim. Ka ya yaꞌa sos m Baꞌ Winaꞌam siꞌel man yuꞌur zug o na tisi ya. ¹⁷M noor ziꞌelug ane ye, ya noŋimi taaba.

Dunia dim kisug la yela

¹⁸“Dunia dim yaꞌa kisi ya, yanam baŋimi ye ba deŋi n kisigne man yiiga. ¹⁹Ya yaꞌa been dunia dim soꞌolimin la, dunia dim naan noŋini ba meŋ nidib. Amaa ya kaꞌ dunia dim soꞌolim nii. M gaŋi ya ne n weligi ya dunia dim soꞌolim ni. Dinzug ka dunia dim kisi ya la. ²⁰Tienmi yelkan ka m yeli ya la ye, ‘Tumtum pu gaad o zugsoba.’ Ba yaꞌa namis man, ba na namisi ya men. Ka ba yaꞌa daa siak man paꞌalug, ba me na siak ya paꞌalug men. ²¹Ba na niŋi ya neꞌenam wusa man zug, bozugo ba ziꞌ one tumi m la naa ²²Man yaꞌa pu keen na tuꞌasini ba, ba naan ku moren taale. Amaa lin a siꞌem la line na ligil ba taal la kaeꞌ. ²³One kis man la, o kisi m Baꞌ la men. ²⁴M yaꞌa pu tumin tuum kan ka soꞌ nan ziꞌ tumi ba saꞌan la, ba naan ku moren taale ba tuumbeꞌed zugo. Amaa lin a siꞌem la, ba nyeya ka kis man ne m Baꞌ la wusa. ²⁵Lin na niŋ siꞌem la, ane ye ban da deŋi sob siꞌel Winaꞌam gbauŋin la lieb ameŋa ye, ‘Ba kis man ne zaalim.’

²⁶“Suŋid la na kena on ka m na tum o ya ni, one a yelmeŋir Siig la, one yi m Baꞌ Winaꞌam saꞌan na la. O na dii m kaset. ²⁷Ka yanam me na dii man kaset, bozugo pinꞌilugin sa ka ya be m saꞌan.”

¹“M yeli ya neꞌenam wusa ye ya da yi yadda la ni. ²Ba na kadi ya yiis laꞌasug doodin, ka saŋa la sid kenna ka soꞌ yaꞌa ku ya, o na tenꞌes ye o tum line ka Winaꞌam bood. ³Ban ziꞌ m Baꞌ ne m meŋ la zug, ka ba na niŋ neꞌenam. ⁴Ka m yeli ya neꞌenam ye li saŋa la yaꞌa paae ya na tenr ye m daa yeli ya li yela.

Winaꞌam Siig Suŋ Tuuma la Yela

“M pu yeli ya neꞌenam pinꞌiluginee, mam da be ya saꞌan la zug, ⁵amaa nannanna m ken one tum m la saꞌan, ka ya soꞌ pu buꞌosi m ye, fu waꞌae yaa nii? ⁶Ka mam yeli ya neꞌeŋa la zug ka ya sunya saꞌam bedego. ⁷Ka laꞌam ne wala li ane sida ka m yeti ya ye, li ane ya suꞌum zug ka m ye m yi kpela, ka m yaꞌa pu keŋe, Suŋid la ku kenn ya ni naa. ⁸Amaa o yaꞌa kena o na nie paꞌal dunia nidibi yidig tuumbeꞌed yela siꞌem ne ban yidig popielim yela siꞌem ne ban yidig saria kadib yela siꞌem la. ⁹Ba yidig tuumbeꞌed yela, bozugo ba pu niŋ man yadda. ¹⁰Ba yidig popielim yela, bozugo man kenne m Baꞌ Winaꞌam saꞌan ka ba ku nyee man la zug. ¹¹Ba yidig saria kadib yela, bozugo Winaꞌam moŋ dunia nwa naꞌab buod siꞌem la zug.

¹²“M mor yela bedego na pianꞌa tisi ya amaa ya ku nyaŋe baŋi li nannanna. ¹³Ka one a yelmeŋir Siig la yaꞌa kena, o na suŋi ya ka ya baŋ yelsida la wusa; ka o ku pianꞌ ne o meŋ yela, amaa o na pianꞌ lin ka o wum la, ka me na paꞌani ya yel bane na ti kena. ¹⁴O na zunꞌe man yuꞌur; ka zaŋ man yela n yeli ya. ¹⁵M Baꞌ la soꞌe siꞌel wusa la ane man din. Linzug ka m yel ye, o na zaŋ man yela n yeli ya la.”

Susaꞌaŋ ne sumalisim la yela

¹⁶Ka Yesu yel ye, “Li kpelim saŋa biꞌela ka ya ku lem nyee ma, ka li na niŋ biꞌela yaꞌas ka ya na nyee m.”

¹⁷Ka nyaꞌandolib sieba yet taaba ye, “On yet ye li kpelim saŋa biꞌela ka ti ku nyee o, ka li na niŋ biꞌela yaꞌas ka ti na nyee o la, ka lem ye, m kenne m Baꞌ saꞌan la, li gbin a bo?” ¹⁸Ka ba lem ye, “On yet ye, saŋa biꞌela la, li gbin a bo? Ti ziꞌ li gbin ne.”

¹⁹Ka Yesu baŋ ye ba bood ye ba buꞌos o li gbin la, ka yeli ba ye, “Ya buꞌosid ne taaba man yel ye, saŋa biꞌela ka ya ku nyee ma, ka saŋa biꞌela yaꞌas ka ya na nyee m la, gbin ne? ²⁰Asida ka m yeti ya ye, ya na kum ka fabin, ka dunia dim sunya lee na malis. Ya sunya na saꞌam, ka ya susaꞌaŋ la na lieb sumalisim. ²¹Poꞌa yaꞌa saꞌ duꞌam, li zabidne, o saŋa paae la zug, ka o yaꞌa duꞌa naae o sunf malis, on duꞌa biig la zug ka tam zabir la. ²²Ala men ya sunya saꞌam nannanna amaa m na lem nyee ya yaꞌas, ka ya na mor sumalisim, ka soꞌ ku ke ka ya sunya lem saꞌam. ²³Saŋkan la ka ya ku lem buꞌosi m buꞌosa yaꞌase. Asida ka m yeti ya ye, ya yaꞌa sos siꞌeli m Baꞌ la saꞌan ne man yuꞌur zug, o na tisi ya. ²⁴Ya nan pu sos siꞌel ne man yuꞌur zugo. Sosimi ka ya na diꞌe ka ya sunya na peꞌel ne sumalisim.

Yesu n nyaŋ dunia la yela

²⁵“M pianꞌ neꞌeŋa siilimi ya ne. Amaa saŋa la kenna ka m ku lem pianꞌade ya ne siilise, ka lee na pianꞌade ya m Baꞌ la yela nyain nyain. ²⁶Saŋkan la ka ya na sos Winaꞌam ne man yuꞌur zug, ka m pu yel ye, m na sos o ya yelaa, ²⁷bozugo o meŋi noŋi ya la zug. O noŋi ya, yanam noŋi m ka siak ye m yi ne m Baꞌ la saꞌan na zug. ²⁸M sid naam ne m Baꞌ la ni kenn dunia ni na, ka na lem naam dunia ni n lebi m Baꞌ la saꞌan.”

²⁹Ka o nyaꞌandolib la yel ye, “Eheenn, nannanna fu yuꞌun pianꞌad ne nyain nyain, ka kaꞌ siilima. ³⁰Ka ti yuꞌun baŋ ye fu miꞌ siꞌel wusa, ka li pu nar ye soꞌ buꞌos uf buꞌosa. Neꞌeŋa zug ka ti siak ye fu yine Winaꞌam saꞌan na.”

³¹Yesu lebisi ba ye, “Ya yuꞌun siaki ya? ³²Saŋa la kenna, ka li sid paae ya ka ya na widigi kul soꞌ ne o yir o yir ka basi mane m konꞌo konꞌ, amaa m kaꞌa m konꞌ, m Baꞌ be man saꞌan la zug.

³³“M yeli ya neꞌeŋa ye ya mor sumalisim man ni. Dunia kaŋa ni ya mor namisug, amaa more sukpiꞌeuŋ; ka m nyaŋ dunia.”

Yesu n puꞌus Winaꞌam n tis o nidib la yela

¹Ka Yesu n pianꞌ pianꞌabama naae la o godigi gos saazug ka yel ye,

“M Baꞌa, saŋa la paae ya. Zunꞌomi fu Biig la yuꞌur, ka o me na zunꞌe fu yuꞌur; ²ka fu tis o paŋ ka o soꞌe saalib wusa ye o na zaŋ nyovur line kaꞌ naare n tis ban wusa ka fu tis o la. ³Ka nyovur line kaꞌ naar la ane ye ba baŋ fun one sid a Winaꞌam yinni maꞌaa la, ne man Yesu Kiristo one ka fu tum na la. ⁴M tum tuum lin ka fu tisi m la naae ka zunꞌe fu yuꞌur dunia ni. ⁵Ka m Baꞌa, fu me zuꞌomi m yuꞌur fu meŋ tuon nannanna ne zunꞌor kan ka m more fu ni ka dunia nam kaeꞌ la.

⁶“M paꞌali fu yuꞌur n tis nimbane ka fu gaŋ dunia nwa ni n tisi m la. Ba da ane fu din ka fu zaŋi ba n tisi m ka ba siaki fu noor, ⁷ka baŋ ye fun tis man siꞌel wusa la, yi ne fu saꞌan na, ⁸bozugo pianꞌaban ka fu tisi m la, m me tisi ba ka ba diꞌe, ka sid baŋ ye m yine fu saꞌan na, ka lem siak ye fune tumi m na. ⁹M sosid uf ba yela. Amaa m pu sosid uf ne dunia dim yelaa, amaa ban ka fu tisi m la yela, ban aa fu din la zug. ¹⁰Man din wusa ane fu din, ka fu din me a m din, ka ba ni ka m yuꞌur nyet zunꞌor. ¹¹Ka nannanna m kenne fu saꞌan na ka pu lem be dunia nii, ka ban lee na kpelim be li ni. M Baꞌasuŋo, guri ba ne fu paŋ kan ka fu tisi m la ka ba a yinni wuu tiname a yinni siꞌem la. ¹²Man daa be ne ba la m guri ba ne paŋ kan ka fu tisi m la. M gosi ba ka ba soꞌ pu bodige asee one ka li yeli ziꞌel ye o saꞌam la, ye Winaꞌam gbauŋ sob siꞌem la niŋ ameŋa.

¹³“Ka m yuꞌun kenne fu saꞌan na ka pianꞌ pianꞌabama dunia ni ye sumalisim wusa na be ba sunya ni. ¹⁴M tisi ba fu pianꞌad ka dunia dim kisi ba, ban kaꞌ dunia din la zug, wuu mam me kaꞌ dunia din siꞌem la. ¹⁵M pu sos uf ye fu yiisi ba dunia nwa ni, amaa m sos ye fu da ke ba kpenꞌ yelbeꞌed nii. ¹⁶Ka man kaꞌa dunia din siꞌem la, ala ka ba me kaꞌa dunia din ne. ¹⁷Kel ka yelsida la maali ba ka ba liebi fu meŋ nidib n a nyain, bozugo fu pianꞌad la a sida. ¹⁸Fun tumi m dunia ni na siꞌem la, ala men ka m me tumi ba dunia ni. ¹⁹Ka ban yela ka m pesig m meŋi tis uf, ye fu yelsida la ke ka ba me pesigi ba meŋ n tis uf.

²⁰“Li kaꞌane bama yela maꞌaa, ka m sosidi fo, amaa laꞌam ne bane na ti niŋ man yadda, ba labasuŋ moolug la zug. ²¹M Baꞌ ye ba wusa a yinni wuu fu, m Baꞌ, a yinni ne mam siꞌem la, ka m me a ne uf la, ala men ka ba me a yinni ne ti. Ka dunia dim na siak ye fune tum m na. ²²Ka zunꞌor kan ka fu tisi m la, m zaŋi li tisi ba ye ba a yinni wuu tiname a yinni siꞌem la. ²³M na be ne ba sunya ni ka fu be m ni, ye ba sid a yinni, ka dunia na baŋ ye fune tum man na ka noŋi ba wuu fun noŋ man siꞌem la.

²⁴“M Baꞌa, m bood ye ban ka fu tisi m la be ne m ka nyee m zunꞌor line ka fu da tisi m fu noŋir zug, saŋkan ka dunia da nam kaeꞌ la.

²⁵“M Baꞌ one a popielim soba, dunia nan pu baŋi fo, ka man lee baŋ uf, ka nimbama baŋ ye fune tum man na.

²⁶“Man ke ka ba baŋi fu yuꞌur ka na kpelim niŋidi ala, ye noŋir kan ka fu more m yela la, na bee ba ni, ka mam me be ne ba.”

Ba n gbanꞌe Yesu la yela

(Mateo 26.47-56; Maak 14.43-50; Luuk 22.47-53)

¹Ka Yesu n pianꞌ pianꞌabama naae la, o yi ne o nyaꞌandolib la n keŋ loꞌoŋ Kidron bonꞌog n paae lombonꞌog siaꞌa ni n kpenꞌ.

²Ka Judas one zam o la miꞌ zinꞌig la, bozugo Yesu ne o nyaꞌandolib la yiti laꞌased anina. ³Ka maalmaan kpeenmnam ne Farisee dim tis Judas ba tumtumnib ka sos Room dim sogianam n paꞌas o zug, ka ba keŋ anina ne fitlanam ne mood bugum ne zaba laꞌad.

⁴Ka Yesu n miꞌ lin wusa na niŋ o la, o yi tuon na ka buꞌosi ba ye, “Anoꞌon ka ya ieda?”

⁵Ka ba lebis o ye, “Ti iedne Yesu one yi Nazaret na la.”

Ka Yesu ye, “Mane nwa.” Judas one zam o la, laꞌam ziꞌe ne ba. ⁶Ka Yesu n yel ye, “Mane nwa” la, ka ba leb nyaꞌaŋi n lu teŋin.

⁷Ka Yesu lem buꞌosi ba ye, “Anoꞌon ka ya ieda?”

Ka ba lebis ye, “Ti iedne Yesu one yi Nazaret teŋin la na.”

⁸Ka Yesu lebisi ba ye, “M yeli ya ye mane la. Dinzugo ya yaꞌa iedne mane, lee keli ka nimbama keŋ.” ⁹Neꞌeŋa ke ka pianꞌakan ka o pianꞌ la niŋi ameŋa ye, “Nimbane ka fun Winaꞌam tisi m la, m pu ke ka soꞌ bodige.”

¹⁰Ka Simon Piita fue suꞌug n kia maalmaan kpeenm tumtum ka o yuꞌur buon Malkus la tobiri fiꞌig.

¹¹Ka Yesu yel Piita ye, “Lebisimi fu suꞌug la li teongun. Nwam kane a namisug ka m Baꞌ tisi m la, m da diꞌe lii?”

(Mateo 26.57; Maak 14.53; Luuk 22.54)

¹²Ka sogianam ne ba kpeenm la ne Jew dim tumtumnib gbanꞌe Yesu n lo o, ¹³ka mor o keŋ Annas saꞌan yiiga, one a Kaifas diem dau la. Kaifas n da a maalmaan kpeenm yuum kan la. ¹⁴Li ane Kaifas one da saꞌal Jew dim ye, li ane ba suꞌum ye nid yinni n kpi nidib wusa zug.

Piita n kiꞌis Yesu la yela

(Mateo 26.69-70; Maak 14.66-68; Luuk 22.55-57)

¹⁵Simon Piita ne nyaꞌandol yinni daa be nyaꞌaŋ n dol Yesu. Ka maalmaan kpeenm la n miꞌ nyaꞌandol yinni la zug ka nyaꞌandol la laꞌam dol Yesu n kpenꞌ maalmaan kpeenm la zakin. ¹⁶Ka Piita on ziꞌe zaꞌanoor la yiiŋ, ka nyaꞌandol oŋa la, one ka maalmaan kpeenm la miꞌ la, yi yel poꞌa kane gur zaꞌanoor la ka dol Piita kpenꞌ.

¹⁷Ka poꞌa kane gur zaꞌanoor la buꞌos Piita ye, “Kaꞌa fune a dau kaŋa nyaꞌandolib la yinni laa?”

Ka o lebis ye, “Ayei, li kaꞌa mane.”

¹⁸Ka waad be ka tumtumnib la ne yamis nyuꞌe bugum ka ba ziꞌe giligi li uosid. Ka Piita me keŋ laꞌase ba me uosid.

Maalmaan kpeenm n buꞌos Yesu buꞌosa la yela

(Mateo 26.59-66; Maak 14.55-64; Luuk 22.66-71)

¹⁹Ka maalmaan kpeenm buꞌos Yesu o nyaꞌandolib la ne o paꞌalug la yela.

²⁰Ka Yesu lebis o ye, “M pianꞌ ne paalo n neeli tis nidib la. Saŋa mekama m paꞌan laꞌasug doodin ne Winaꞌam puꞌusum yin ka Jew dim wusa laꞌased la. M pu suaꞌ pianꞌ siꞌela. ²¹Bo ka fu buꞌosi ma? Buꞌosim ne bane wumi m pianꞌad la. Bane miꞌ mam yel siꞌel.”

²²Ka on pianꞌ neꞌe la ka tumtumnib la yinni ziꞌe kpiꞌe o ka nweꞌ Yesu ne tampiank ka yet ye, “Li ane ala ka fu lebisid maalmaan kpeenm?”

²³Ka Yesu lebis o ye, “Ka m yaꞌa pianꞌane beꞌed, fun dimi li kaset, ka m yaꞌa pianꞌane line dol suer, wala ka fu nweꞌedi ma?” ²⁴Ka Annas ke ka o loob la kpelim aa ala ka ba mor o keŋ maalmaan kpeenm Kaifas saꞌan.

Piita n lem kiꞌis Yesu la yela

(Mateo 26.71-75; Maak 14.69-72; Luuk 22.58-62)

²⁵Ka Simon Piita nam kpelim ziꞌe uosid bugum la, ka ba buꞌos o ye, “Fu me kaꞌane o nyaꞌandolib la yinnii?”

Ka o kiꞌis ka yel ye, “Li kaꞌ mane.”

²⁶Ka maalmaan tumtum yinni one a duꞌad ne one ka Piita paꞌa fiꞌigi o tobir la buꞌos Piita yaꞌas ye, “Li kaꞌane fun ka m nye uf ne o lombonꞌogin laa?” ²⁷Ka Piita lem kiꞌis yaꞌas. Ka noraug kpelim kaas.

Yesu n be Pilate tuon la yela

(Mateo 27.1-2, 11-14; Maak 15.1-5; Luuk 23.1-5)

²⁸Ka bekeeung ka ba mor Yesu n yi Kaifas yin n keŋ gomena one ziꞌe Room naꞌab noba zug la yin. Ka Jew dim bane mor o na la pu kpenꞌ gomena la yin ne, bozugo ba pu bood ye ba saꞌam ba maluŋ laa. Ban bood ye ba saa di kuꞌum malek gaadug tienr maluŋ diib la. ²⁹Ka Pilate yi ba saꞌan na yel ye, “Tuumbeꞌed bo ka dau nwa tum ka ya mor o na?”

³⁰Ka ba lebis o ye, “O yaꞌa kaꞌane tuumbeꞌed soba, ti naan ku gbanꞌin o naa.”

³¹Ka Pilate yeli ba ye, “Doli ne o keŋi n kadi o saria ne ya wada suere a siꞌem.”

Ka Jew dim la yel o ye, “Li pu dol suer ye ti ku soꞌo.” ³²Neꞌeŋa da niŋ ne ye pianꞌakan ka Yesu da pianꞌa n paꞌal kum kan buudi ka o na kpi la, niŋi ameŋa.

³³Ka Pilate kpenꞌ zakin la yaꞌas ka buꞌos Yesu ye, “Fune a Jew dim naꞌab laa?”

³⁴Ka Yesu lebis o ye, “Buꞌoskaŋa yi ne fu meŋ saꞌan na bee sieba yel uf m yela?”

³⁵Ka Pilate lebis buꞌos o ye, “M ane Jew nida? Fu meŋ buudi ne ba maalmaan kpeenmnam gbanꞌe uf tisi m. Bo ka fu maale?”

³⁶Ka Yesu lebis o ye, “M naꞌam kaꞌ dunia nwa dine. Li yaꞌa aane ala m tumtumnib naani zabin ne Jew dim la ka ba ku gbanꞌini ma.”

³⁷Ka Pilate buꞌos o ye, “Alaa fu ane naꞌaba?”

Yesu lebis ye, “Fune yel ye, m ane naꞌab. Neꞌeŋa zug ka m kenn dunia nwa ni ka ba duꞌa m ye m paꞌal yelsida la. On mekama a yelsida sob wumi m kukor.”

³⁸Ka Pilate buꞌos o ye, “Yelsida a bo?”

Pilate n koos Yesu ye o kpi la yela

(Mateo 27.15-31; Maak 15.6-20; Luuk 23.13-25)

Ka Pilate yel ala nyaꞌaŋ la, o lem yi keŋ Jew dim la saꞌan n yeli ba ye, “M pu nye dau nwa taale. ³⁹Ka ya mor maluŋ ka yuum yuum kuꞌum malek gaadug tienr la saŋa ka m yiisid sarega nid yinni tisidi ya. Ya bood ye m yiis Jew dim naꞌab laa?”

⁴⁰Ka ba tansid ne kukortitaꞌar ye, “Kaꞌa one. Ti boodne Barabbas.” Barabbas da ane naꞌayiig kane faand.

¹Ka Pilate ke ka ba fieb Yesu. ²Ka sogianam zaŋ gonꞌos wug naꞌam zugpibig n pid o ka yeel o fuzenꞌug, ³ka kenn o saꞌan na yel o ye, “Naa, Jew dim naꞌaba,” ka nweꞌ o ne tampiank.

⁴Ka Pilate lem yi nidibin la na yaꞌas n yeli ba ye, “Gosimi ya, m na mor o kenn ya saꞌan na ka ya baŋ ye m pu nye taali o saꞌane.” ⁵Ka Yesu pid gonꞌos zugpibig ka ye fuzenꞌug n yi na. Ka Pilate yeli ba ye, “Dau la nwa.”

⁶Ka maalmaan kpeenmnam ne ba tumtumnib la nye o la, ba tans ye, “Kpaꞌami ne o dapuudir zug n ku. Kpaꞌami ne o.”

Ka Pilate yeli ba ye, “Ya meŋ zaŋim o n kpaꞌ, bozugo man pu nye o taale.”

⁷Ka Jew dim la yel o ye, “Ti mor wada, ka li paꞌal ye, li nar ka o kpi, bozugo o maali o meŋ ye o ane Winaꞌam Biig.”

⁸Ka Pilate n wum pianꞌabama la, dabiem maligim kpenꞌ o. ⁹Ka o lem kpenꞌ zakin la yaꞌas ka buꞌos Yesu ye, “Fu yi yaa ni na?” Ka Yesu pu lebis oo. ¹⁰Ka Pilate buꞌos o ye, “Fu ku lebisi maa? Fu ziꞌ ye m mor paŋ kane na bas uf, bee n kpaꞌa uf dapuudir zugo?”

¹¹Ka Yesu lebis o ye, “Winaꞌam yaꞌa pu tisin uf paŋa fu naani ku nyeen paŋi nyaŋeni ma. Dinzug one mor man na niŋi fu nuꞌusin la, tum tuumbeꞌed n gaad uf.”

¹²Pianꞌakaŋa yela ka Pilate ied suer ye o bas o, amaa Jew dim daa tansid n yet ye, “Fu yaꞌa bas dau kaŋa, fu kaꞌ Room naꞌab Kaisa zuaa. Bozugo on mekama nok o meŋi maal naꞌab bood ye o zab ne Kaisa.”

¹³Ka Pilate n wum pianꞌabama la, o mor Yesu n yi na zinꞌin saria kadib gbauŋ zug line be zinꞌikan ka Jew dim buon ye Gabbata la, ka li gbin a kuglama la. ¹⁴Daakan nintaŋ soos, ka ba tiꞌebid kuꞌum malek gaadug tienr daar la.

Ka Pilate yel Jew dim la ye, “Ya naꞌab la nwa.”

¹⁵Ka ba tansid n yet ye, “Mor o keŋ n kpaꞌ o.”

Ka Pilate buꞌosi ba ye, “M kpaꞌami ne ya naꞌab laa?”

Ka maalmaan kpeenmnam lebis ye, “Ti pu mor naꞌaba, asee Kaisa.”

¹⁶Ka o yuꞌun kees o tisi ba ye ba kpaꞌ o dapuudir zug n ku.

Ban n kpaꞌ Yesu dapuudir zug la yela

(Mateo 27.32-44; Maak 15.21-32; Luuk 23.26-43)

¹⁷Ka ba mor Yesu yi teŋin la ka ke ka o zeedi o meŋ dapuudir n keŋ zinꞌikan ka Jew dim buon ye Golgota la, ka li gbin a ye zunwana zinꞌig. ¹⁸Ka ba kpaꞌ o n tabil dapuudir zug. Ka me kpaꞌ nidib ayi n tabil dapuuda zug, ka yinni be o dagobug ka yinni be o datiuŋ. Ka Yesu bee ba soogin.

¹⁹Ka Pilate sob o yela n tabil dapuudir la zug ka sobir la yel ye,

“YESU ONE YI NAZARET,

KA A JEW DIM NAꞌAB LA.”

²⁰Zinꞌikan ka ba da kpaꞌ Yesu la, da kpiꞌene teŋ poogin la, ka Jew dim bedego karem sob la. Ka sob la da sob ne Jew dim pianꞌad, ne Room dim pianꞌad ne Greek dim pianꞌad. ²¹Ka Jew dim maalmaan kpeenmnam yel Pilate ye o da sob ye, “Dau kaŋa ane Jew dim naꞌaba, amaa ye o som ye, dau kaŋa yel ye, o ane Jew dim naꞌab.”

²²Pilate lebis ye, “Mam sob siꞌem la line kpelim be.”

²³Ka sogianam kpaꞌ Yesu naae la, ba zaŋ o fuud pudugi li zinꞌis anaasi n tis taaba. Fuug la da pu senn, amaa ba wugu line mum.

²⁴Linzug ka ba yel taaba ye ba da aenn lii, amaa ba maal bugulum bugulum gos one na di.

Neꞌeŋa da niŋi ala ye Winaꞌam gbauŋ la sob siꞌem la niŋ ameŋa ye,

“Ba pudug m fuud n tis taaba

ka maal bugulum bugulum ne m fuug la yela.”

Ka sogianam la niŋi ala.

²⁵Ka Yesu ma ne o mapit, ne Kleopas poꞌa ne Meeri Magdalene, n ziꞌe kpiꞌe dapuudir la. ²⁶Ka Yesu n nye o ma ne o nyaꞌandolkan ka o noŋ la ka ba ziꞌe kpiꞌe la, o yel o ma la ye, “M ma fu biig nwa.” ²⁷Ka me yel o nyaꞌandol la ye, “Fu ma nwa.” Ka saŋkan ken sa ka o nyaꞌandol la dol Yesu ma la kuli o yin.

Yesu kuꞌum la yela

(Mateo 27.45-56; Maak 15.33-41; Luuk 23.44-49)

²⁸Ka Yesu yuꞌun baŋ ye siꞌel wusa naae ya la ka yel ye, “Kuꞌonuud more m.” O yeli ala ye Winaꞌam gbauŋ n sob siꞌem la niŋi ameŋa. ²⁹Ka nwam ziꞌe ne danmiꞌisug. Ka ba zaŋ sooso los danmiꞌisugin la lo kikanꞌarin niŋi o noorin. ³⁰Ka on nu danmiꞌisug la ka ye, “Li naae ya,” ka sun o zug ka kpi.

³¹Li da ane vuꞌusum daar tiꞌebug, hale ka li a dabistitaꞌar, linzug ka Jew dim la pu bood ye niŋgbina la kpelim be dapuuda zugi li daare, ka ba sos Pilate ye o ke ka ba koꞌ ba noba, ka sigisi ba dapuuda la ni. ³²Ka sogianam keŋ koꞌ yiiga daan la noba, ne o tiraan one ka ba daa laꞌam kpaꞌa kpiꞌe Yesu la noba. ³³Ka ban kenn Yesu saꞌan na n nye ka o kpi la, ba pu koꞌ o nobaa. ³⁴Ka sogia yinni zaŋ kpan n kunsi o lugir ka ziim ne kuꞌom kpelim yi na. ³⁵One nye line naam la, dii li kaset. O pianꞌ ne yelsida, o meŋ miꞌ ye o pianꞌ ne yelsida, ye ya me siaki li. ³⁶Ka neꞌeŋa niŋ ne ye Winaꞌam gbauŋ la n sob siꞌem la lieb ameŋa ye, “Baa o konbir yinni, ku koꞌoge.” ³⁷Ka Winaꞌam gbauŋ lem sob zinꞌi siꞌa yaꞌas ye, “Ba na gos on ka ba kuns la.”

Ban mum Yesu la yela

(Mateo 27.57-61; Maak 15.42-47; Luuk 23.50-56)

³⁸Neꞌeŋa nyaꞌaŋ ka Josef one yi Arimatea teŋin ka a Yesu nyaꞌandol n keŋ sos Pilate ye o zaŋim Yesu niŋgbiŋ la tis o. Josef daa ane Yesu nyaꞌandol amaa on daa zot Jew dim la zug ka o pu neeli o meŋa. Ka Pilate n siak la ka o kena zaŋ niŋgbiŋ la keŋ. ³⁹Ka Nikodemus, one daa keŋ Yesu saꞌan yuꞌuŋ la, me dol Josef ka mor bunnyubis line buon mir ne aloes ka ba gendig taaba, ka li zuꞌe bedego. ⁴⁰Ka ba zaŋ Yesu niŋgbiŋ n bobug ne fuud ne bunnyubisa la, wuu Jew dim kum maluŋo a siꞌem la. ⁴¹Ka lombonꞌog be zinꞌikan ka ba kpaꞌ o la baba, ka Jew dim yaug be li poogin, ka ba nam pu mum soꞌ li nii. ⁴²Ka dabisir la sadigim a vuꞌusum daar tiꞌebug la ka yaug la me pu lal la, ka ba mum Yesu anina.

Ban nye ka Yesu kaꞌ yaugin la yela

(Mateo 28.1-8; Maak 16.1-8; Luuk 24.1-12)

¹Ka Alasidaar ka Meeri Magdalene isigi keŋ yaugin la, ka li nam pu nie naae, ka o nye ka kugir line ligil yaug la bilig. ²Ka o zo keŋ Simon Piita ne o nyaꞌandol siꞌa saꞌan, on ka Yesu noŋ la, ka yeli ba ye, “Ba zaŋ Zugsob la yaugin la yi ka ti ziꞌ ban niŋ o siꞌela.”

³Ka ba zo keŋ yaugin, ⁴ka nyaꞌandol oŋa la zo gaad Piita n paae yaugin la yiiga, ⁵ka kuni gos ka nye fuud la, ka lee pu kpenꞌe. ⁶Ka Simon Piita paae n kpelim kpenꞌ, ka nye fuud la digi, ⁷ne pien line ka ba da viligi o zug la. Li pu be ne fuud la, amaa li meŋi daꞌe keŋ n dig zinꞌisiꞌa. ⁸Ka nyaꞌandol one paae yiiga la, me kpenꞌ yaugin la n nye li ka siak. ⁹Lini sob Winaꞌam gbauŋin ye, asee ka o vuꞌug kumin la, ba da nam ziꞌ li gbin ne.

¹⁰Ka nyaꞌandolib la lebi kul ba yaan.

Yesu n nie o meŋ Meeri Magdalene saꞌan la yela

(Mateo 28.9-10; Maak 16.9-11)

¹¹Ka Meeri ziꞌe yaug la yiiŋ n kum, ka sunne gos yaug la poogin, ¹²ka nye maleknam ayi ka ba ye fupiela n zinꞌi zinꞌikan ka Yesu daa be la. Ka yinni be zug baba ka yinni me be noba baba.

¹³Ka ba buꞌos o ye, “Poꞌaa, bo ka fu kaasida?”

Ka o lebisi ba ye, “Ba noki m Zugsob la ka m ziꞌ ban niŋ o siꞌel la.” ¹⁴On pianꞌ neꞌeŋa la ka giꞌe nye Yesu ka o ziꞌe ka o lee pu baŋ ye li ane one.

¹⁵Ka Yesu buꞌos o ye, “Poꞌaa, bo ka fu kaasida? Ka anoꞌon ka fu ieda?”

Ka o tenꞌes ye o ane one gur lombonꞌog la ka yel o ye, “M diema, li yaꞌa ane fune zaŋi o niŋgbiŋ la, fun yeli m fun niŋ li siꞌel, ka m keŋ noki li.”

¹⁶Ka Yesu buol o ye, “Meeri.”

Ka o giꞌe gos o ka pianꞌ o ne Jew dim pianꞌad ye, “Rabboni.” Li gbin ane ye, Paꞌana.

¹⁷Yesu yeli o ye, “Da siꞌisi ma; ka m nan pu du m Baꞌ la saꞌane. Amaa kemi m baꞌabiis la saꞌan n yeli ba ye, m dutne one a m Baꞌ ne ya Baꞌ ni ka a m Winaꞌam ne ya Winaꞌam la ni.”

¹⁸Linzug ka Meeri Magdalene keŋ yel Yesu nyaꞌandolib la ye, “M nye Zugsob la.” Ka o yel ba lin wusa ka Yesu yel o la.

Yesu n nie o meŋ n paꞌal o nyaꞌandolib la yela

(Mateo 28.16-20; Maak 16.14-18; Luuk 24.36-49)

¹⁹Ka daakan yuꞌuŋ sisobir, line a Alasidaar, ka Yesu nyaꞌandolib la laꞌas taaba doogin, ka kpar zaꞌanoya, bozugo ba da zotne Jew dim la dabiem. Ka Yesu kena ziꞌe ba sisoogin, ka yeli ba ye, “Sumalisim na be ne ya.” ²⁰Ka on daa yeli ba wala la, ka paꞌali ba o nuꞌus ne o lugir. Ka nyaꞌandolib la mor sumalisim ban nye Zugsob la zug.

²¹Ka Yesu yeli ba yaꞌas ye, “Sumalisim na be ne ya. Wenne m Baꞌ tum man na la, ala men ka man me tumi ya.” ²²Ka on yeli ala naae la, ka o vuꞌusi niŋi ba ni, ka yeli ba ye, “Diꞌem Winaꞌam Siig Suŋ. ²³Niŋkan wusa ka ya niŋ suguru ne o ka yiis o tuumbeꞌed n bas la, Winaꞌam me na yiisi li bas. Ka niŋkan wusa ka ya pu niŋ o suguru ka yiis o tuumbeꞌed base, Winaꞌam me ku yiis o tuumbeꞌed n basi.”

Yesu ne Tomas la yela

²⁴Ka Tomas one ka ba buon Liibir ka a Yesu nyaꞌandolib pii ne yi la nid yinni la daa kaꞌ ba saꞌane Yesu n daa kena laa. ²⁵Ka nyaꞌandolib la sieba yel o ye, “Ti nye Zugsob la.”

Ka o yeli ba ye, “M yaꞌa pu nye bane kpaꞌ o nuꞌug la isa, ka siꞌisi li ne m nuꞌubil, ka siꞌisi o lugire, mam ku siake.”

²⁶Ka daba anii lem paae, ka nyaꞌandolib la laꞌas doogin yaꞌas, ka Tomas be ne ba. Ka laꞌam ne ban kpar zaꞌanoya la Yesu kena ziꞌen ba soogin, ka yeli ba ye, “Sumalisim be ne ya.” ²⁷Ka o yel Tomas ye, “Zaŋimi fu nuꞌubil n siꞌis m nuꞌus, ka zaŋ fu nuꞌug n siꞌis m lugir. Da biꞌesida amaa niŋim yadda.”

²⁸Ka Tomas lebis n yel o ye, “Fu ane m Zugsob ne m Winaꞌam.”

²⁹Ka Yesu buꞌos o ye, “Fu niŋ yadda fun nye man la zugoo? Yelsum be ne bane pu nyee, amaa ka lee niŋ yadda.”

Lin yela ka ba sob gbauŋ kaŋa nwa

³⁰Yesu da tum tuumnyalima sieba bedego ka o nyaꞌandolib la be ani. Ka tuumnyalima ban pu sob gbauŋ kaŋa nii. ³¹Ka m sob neꞌenam ye ya siak ye Yesu a Kiristo la, one a Winaꞌam Biig la, ka ya yaꞌa niŋ o yadda, ya na nye nyovur o yuꞌur zug.

Yesu n nie o meŋ n paꞌal o nyaꞌandolib sieba la yela

¹Lin nyaꞌaŋ ka Yesu nie o meŋi yaꞌas n paꞌal o nyaꞌandolib la, Tiberias beuŋ baba, ka lin niŋ siꞌem ane anwa. ²Simon Piita ne Tomas one ka ba buon Liibir la, ne Nataniel, one yi Kana, Galilee soꞌolim la ne Zebedee biis ne Yesu nyaꞌandol sieba ayi da laꞌam bene taaba. ³Ka Simon Piita yeli ba ye, “M waꞌene ye m gbanꞌ zimi.” Ka ba lebis ye, “Ti me na keŋ.” Ka ba keŋ kpenꞌ aaruŋ, ka yuꞌuŋkan wusa ka ba pu gbanꞌe siꞌel siꞌela.

⁴Ka beug yiligid la, ka Yesu ziꞌe beuŋ gbeug, amaa o nyaꞌandolib la pu baŋ ye li ane one.

⁵Ka Yesu buꞌosi ba ye, “M biise, ya mor zimii?”

Ka ba lebis o ye, “Ayei.”

⁶Ka o yeli ba ye, “Lomini ya zimilaꞌad la aaruŋ la datiuŋ baba ka ya na gbanꞌe. Ka ba lobi li ka zimi peꞌeli galis ka ba mak ye ba teeg li niŋ aaruŋ la guꞌuŋ.”

⁷Ka nyaꞌandol yinni, on ka Yesu noŋ la yel Piita ye, “Li ane Zugsob la.” Ka Piita n wumi ala la, ka on pu yeꞌ fuug la zug, o yeꞌ fuug ka ianki li kuꞌomin la keŋ Yesu saꞌan. ⁸Aaruŋ la pu lal ne beuŋ gbeugo, ka wen wuu fun na yaꞌas noba kobus ayiꞌiŋa ne, ka nyaꞌandolib bama la be aaruŋin la n veꞌed laꞌakan ka zimi peꞌel la. ⁹Ka ban du gbeug la ba yi aaruŋin la na ka nye ka bugum saana dit, ka zimi paꞌe ka bodobodo me be.

¹⁰Ka Yesu yeli ba ye, “More zimbane ka ya gbanꞌe la sieba na.”

¹¹Ka Simon Piita kpenꞌ aaruŋ ka veꞌed zimilaꞌad la duꞌos gbeug. Ka zimbeda peꞌeli li, ka ba kal a kobuga ne piisnu ne atanꞌ. Laꞌam ne ban zuꞌe la zimilaꞌad la pu aenn. ¹²Ka Yesu yeli ba ye, “Kemi na di.” Ka nyaꞌandolib la soꞌo soꞌ pu mor sukpiꞌem na buꞌos o ye, “Fu aa anoꞌone?” Bozugo ba baŋ ye on a Zugsob la. ¹³Ka Yesu zaŋ bodobodo ne zimi la tisi ba, ka ba onb. ¹⁴Neꞌeŋa da a noor atanꞌ daan ka Yesu nie o meŋ paꞌal o nyaꞌandolib la on da vuꞌug kumin la.

Yesu n sonsid ne Piita la yela

¹⁵Ka ban di naae la, ka Yesu buꞌos Simon Piita ye, “Simon, Joon biiga, fu sid noŋ man n gat bamaa?”

Ka o lebis o ye, “Eenn, m Zugsoba, fu pun miꞌ ye m noŋ uf.”

Ka Yesu yel o ye, “Guri m peꞌebibis la.”

¹⁶Ka Yesu lem buꞌos o noor ayi daan ye, “Simon, Joon biiga, fu noŋi maa?”

Ka o lebis o ye, “Eenn, m Zugsoba fu miꞌ ye m noŋ uf.”

Ka o yel o ye, “Guri m peꞌes la.”

¹⁷Ka Yesu lem buꞌos o noor atanꞌ daan yaꞌas ye, “Simon, Joon biiga, fu noŋi maa?”

Ka Piita sunf saꞌam, on buꞌos o noor atanꞌ daan ye, “Fu noŋi maa la,” ka o lebis ye, “M Zugsoba, fu miꞌ siꞌel wusa, ka miꞌ ye m noŋ uf.”

Ka Yesu yel o ye, “Guri m peꞌes la.”

¹⁸Ka Yesu lem yel o ye, “Asida ka m yet uf ye, fun da a dasaŋ la, fu da lood vilig n ken fun boode siꞌel, ka fun a bunkudug la, fu na tienn fu nuꞌus ka soꞌ na lo uf vilig ka more fu keŋ zinꞌi kan ka fu pu booda.” ¹⁹Yesu yel neꞌeŋa ne ye o paꞌal kuꞌum kan buudi ka Piita na kpi, ka li a zunꞌor n tis Winaꞌam. Ka neꞌeŋa nwa nyaꞌaŋ ka Yesu yel o ye, “Dol man.”

Nyaꞌandol kan ka Yesu noŋ la yela

²⁰Ka Piita giꞌe ka nye ka nyaꞌandolkan ka Yesu noŋ la doli ba nyaꞌaŋ, ka a one zinꞌi kpiꞌe ne Yesu ban daa dit la. Ka o me buꞌos Yesu ye, “M Zugsoba, anoꞌon ye o zam uf la.” ²¹Ka Piita nye o la ka buꞌos Yesu ye, “Ka dau kaŋa mene?”

²²Yesu lebis o ye, “Li yaꞌa ane m boodim ye o kpelim be ka m ti leb na, fu baꞌa bo be li nii? Fun yaꞌa dol man.” ²³Ka pianꞌad la yadig paae yadda niŋidib la ye nyaꞌandol kan la ku kpii, amaa Yesu meŋ pu yel ye o ku kpii, ka lee ye, “Li yaꞌa ane m boodim ye o kpelim be ka m ti leb na, fu baꞌa bo be li nii?”

²⁴Nyaꞌandol kaŋa di kaset yelbama nwa yela, ka sobi li. Ti baŋ ye o kaset la a yelsida.

Li naar nwa

²⁵Siꞌelnam bedego be ka Yesu maal. Ka ba yaꞌa ye ba sob li wusa, m tenꞌes ka paalo ku be dunia ni ka ba sob gbana la digile.