GALATIA DIM

Paul n sob gbauŋ siꞌa n tis

GALATIA DIM

la nwa

¹Man Paul one a Kiristo Tumtum sobid gbauŋ kaŋa. Li kaꞌ nidibi daa gaŋi m ka m a Kiristo Tumtum laa, ka li me pu yi ninsaal soꞌ ni naa. Ka li ane Yesu Kiristo ne ti Baꞌ Winaꞌam one vuꞌug o kumin la n gaŋi m. ²Ti baꞌabiis bane wusa laꞌam be ne mam kpela la puꞌusid yanam Winaꞌam nidib bane be Galatia teensin la.

³Ti Baꞌ Winaꞌam ne ti Zugsob Yesu Kiristo na tisi ya yelsum ne sumalisim. ⁴Kiristo da pesigi o meŋ tis ye ba ku o tinam tuumbeꞌed zug, wuu ti Baꞌ Winaꞌam boodim a siꞌem la, ye o faaenn ti dunia beꞌug nwa ni. ⁵Winaꞌam na nye zunꞌor ka li kaꞌ naare. Ami.

Labasuŋ yinni gullim la yela

⁶Li paki m ye yanam taꞌam bas Winaꞌam one buoli ya Kiristo popielim zug la ka ya lee bas o ka diꞌe labaar siꞌa la, ⁷laꞌam ne lin kaꞌ labasuŋ la. Amaa ninsieba be ka daamidi ya ka mood ye ba tiak Kiristo labasuŋ la. ⁸Hale laꞌam ne tinam bee malek one yi arazana ni la yaꞌa mool labaar siꞌa line bee li konꞌ ne tinam mool siꞌel ya saꞌan la, Winaꞌam nopoor na be on sob zug. ⁹Ti daa pun yeli li, ka m lem yeti yaꞌas ye, soꞌ yaꞌa mool labaar siꞌa ka li bee li konꞌ ne yanam diꞌe siꞌel la, Winaꞌam nopoor na be on sob zug.

¹⁰Ya tenꞌes ye m mood ye m ke ka nidib pianꞌ m yela suꞌum bee? Ayei, m bood ye Winaꞌam pianꞌ m suꞌum. Ka ya tenꞌes ye m mood ye m maꞌae nidib sunya bee? Ayei, m yaꞌa moodin ye m maꞌen nidib sunya, m naan ku aan Kiristo tumtum na.

Paul n daa lieb Tumtum la yela

¹¹M baꞌabiise, m bood ye ya baŋ ye labasuŋ line ka m moon la pu yit ninsaalib potenda ni naa. ¹²Ka m me daa pu diꞌe li soꞌ nii, ka soꞌ daa pu yeli li paꞌali m mene. Ka li lee daa ane Yesu Kiristo meŋ daa nie li n paꞌali m.

¹³Ya daa wum man daa dol Jew dim malima la ka daa yiti niŋid siꞌem la n daa namisid Winaꞌam nidib bedego, ka mood ye m saꞌami ba suer la. ¹⁴Ka m miꞌilim ne m suꞌum niŋir ti Jew dim malima yela, daa gaad m Jew dim taaba bane zem ne man la. Ka m potenꞌer daa gbanꞌe hale ye m doli ti yaanam malima. ¹⁵Ka Winaꞌam lee daa gaŋi m ka ba nam pu duꞌa ma, ka buoli m o saꞌan o popielim zug. ¹⁶Ka saŋkan ka Winaꞌam daa gbanꞌe ye o nie o Biig la paꞌali m ye o ke ka m mool o Biig la labaar n tis bane kaꞌ Jew dim la, m daa pu keŋ soꞌ saꞌan ye o zamisi ma. ¹⁷Ka m me daa pu keŋ Jerusalem bane pun deŋ man a Tumtumnib la saꞌanee. Amaa m daa keŋ ne Arabia soꞌolimin, ka lin nyaꞌaŋ ka m leb Damaskus teŋin.

¹⁸Ka li daa gaad yuma atanꞌ nyaꞌaŋ ka m nyaan keŋ Jerusalem ye m kaae Piita, ka daa bee o saꞌan n paae dabisa piinanu, ¹⁹ka pu nye Tumtum soꞌ yaꞌasa, asee Jemes one a Zugsob pitu la maꞌaa. ²⁰Winaꞌam miꞌ ye lin ka m sobid o tuon nwa la ane sida, ka kaꞌ damaꞌare. ²¹Ka m nyaan yi Jerusalem n keŋ zinꞌis sieba bane be Siriya ne Silisia teensin. ²²Ka Winaꞌam nidib bane be Juuda teŋin la wum m yela ka lee nam pu nyee m ne ba ninii, ²³ka ba lee daa wum ne ka sieba yeti m yela ye, “One daa namisidi ti la, yuꞌun moon yadda niŋir paꞌalug line ka o daa mood ye o saꞌam la.” ²⁴Ka mam zug ka ba zunꞌe Winaꞌam.

Paul ne o Tumtum taab la yela

¹Ka yuma piinanaasi daa gaad la, ka man ne Barnabas nyaan leb Jerusalem, ka Titus me laꞌam doli ti. ²Winaꞌam n daa paꞌali m ye o bood ye m keŋ la zug ka m daa keŋ. Ka mam ne Winaꞌam nidib bane a kpeenmnam la laꞌase gbanꞌe gbanꞌar. Ka li ane man ne ban maꞌaa ka kaꞌ nidib sooginee. Ka m yeli ba labasuŋ kan ka m moon tisid bane kaꞌ Jew dim la saꞌan la a siꞌem; ka m pu bood ye tuumkan ka m daa tum ka nan tumi li la a zaalim. ³Hale laꞌam ne m dolim taab Titus a Greek nid la, ba daa pu mugus o ye o kpenꞌ baŋo, ⁴hale baa ninsieba bane daa maꞌa ye ba ane Winaꞌam nidib ka suaꞌ kpenꞌ ti soogin la, n bood ye ba ke ka o kpenꞌ baŋo la. Nimbama daa laꞌas ne ti ye ba baŋ tinam a yinni ne Yesu Kiristo la ke ka ti soꞌe ti meŋ Jew dim malima ni siꞌem la, ka bood ye ba ke ka ti dol malima la, ka aa li yamis. ⁵Ti daa pu siak ba boodim la baa fiinn mene, ye labasuŋ la ku tiake ka na kpelim a suꞌum ya saꞌan.

⁶Ka nimbane ka ya tenꞌes ye ba a nintitada la pu paas siꞌel m paꞌaluginee. Ban a siꞌem la pu paki ma. Bozugo Winaꞌam n nye ninsaal ka o a siꞌem la, ninsaal pu gosid o tiraan ka o a alaa. ⁷Ba yuꞌun nye ka Winaꞌam guꞌuli m labasuŋ la ye m mool li tis bane kaꞌ Jew dim la, ka li a wuu on me guꞌul Piita labasuŋ la ye o mool li tis Jew dim la. ⁸Ka Winaꞌam paŋ ke ka Piita a Kiristo Tumtum n tum Jew dim la saꞌan, ka me ke ka man me tum bane kaꞌ Jew dim la saꞌan. ⁹Ka Jemes ne Piita ne Joon, bane ka ya gos ka ba a kpeenmnam la baŋ ye Winaꞌam guꞌul m tuumsuŋ kaŋa, ka gbanꞌe man ne Barnabas nuꞌus n paꞌal ye ti mor noor yinni na tum Winaꞌam tuuma, ka ti siak taaba ye tinam na tum bane kaꞌ Jew dim la saꞌan, ka ban me na tum Jew dim la saꞌan. ¹⁰Yel yinni ka ba daa sosi ti ye ti tenr ye ti suŋi ba tadimnam la. Ka lina ka m daa pun tiaꞌ bedego ye m niŋ.

Paul n daa yel Piita o tuumbeꞌed la yela

¹¹Ka man daa be Antiok teŋin la ka Piita kenn anina la m daa yel o nidib soogin ye o pu niŋ suꞌum, lin daa nie nyain ye o tum taal la zug. ¹²Saŋkan ka nimbane ka Jemes tum la nam pu kena la, ka Piita yiti dit ne bane kaꞌ Jew dim la. Ka nimbama la daa ti paae na la, o daa weligi o meŋ ka pu lem dit ne baa, bozugo o daa zot dabiem ne nimbane yel ye li nar ka baꞌabiis bane kaꞌ Jew dim la kpenꞌ baŋo la zug. ¹³Ka baꞌabiis bane a Jew dim la daa paꞌas Piita zam la ni, ka ba zam la daa me veꞌeg Barnabas ka o yidigi dol ban niŋ siꞌel la.

¹⁴Ka man daa nye ka ban tum siꞌem la pu dolne labasuŋ la yela la, ka m yel Piita ba wusa tuon ye, “Fu ane Jew nid, bo ka fu tum wuu one kaꞌ Jew nida? Wala ka fun na nyaŋe mugus bane kaꞌ Jew dim la ye ba dol Jew dim malima?”

Yadda niŋir zug ka ti nye faangir la yela

¹⁵Tinam bane ka ba duꞌa ka ti a Jew dim, ti kaꞌa bane kaꞌ Jew dim, ka a tuumbeꞌed dim laa. ¹⁶Hale ti miꞌ ye soꞌ yadda niŋir Kiristo ni maꞌaa ka Winaꞌam na ke ka o a popielim daan o tuon, ka kaꞌ on na niŋ wada la yel siꞌem laa. Ka tinam me niŋ Yesu Kiristo yadda ye Winaꞌam ke ka ti a popielim dim o tuon, ka li yine ti yadda niŋir Kiristo ni na, ka kaꞌ tiname niŋ wada la yel siꞌem laa. Soꞌ wada siakir kudin ku ke ka o a popielim daan Winaꞌam tuone.

¹⁷Ti bood ye Winaꞌam ke ka ti a popielim dim o tuon, tiname a yinni ne Kiristo la zug. Ka lin yaꞌa ke ka ti baŋ ye ti a tuumbeꞌed dim wuu bane kaꞌ Jew dim la a siꞌem la, ya tenꞌes ye Kiristo duꞌosidne tuumbeꞌed dimaa? Ayei baa biꞌelaa. ¹⁸M yaꞌa daa dol Jew dim wada ka basi li, ka ti lem pinꞌili doli li, li paꞌal ye m saꞌamid wada la. ¹⁹Wada la paŋ zugoo, m ane kuꞌum ne wada la, ka m na tunꞌe voe ne Winaꞌam zug. ²⁰Ba da laꞌam kpaꞌa m dapuudir zug ne Kiristo, ka m kpi. Ka li ku lem aa ye m voe ne m meŋ vum, ka ane Kiristo vum be m saꞌan. Ka m yadda niŋir Winaꞌam Biig la ni one noŋi m ka kpii m yela la, ke ka m be vum kan ka m nam be nwa ni. ²¹M pu ket ka Winaꞌam popielim la a zaalim. Soꞌ yaꞌa aan popielim daan Winaꞌam tuon, ka li yiinne o wada siakir la ni, Kiristo kum la aane zaalim.

Wada siakir bee yadda niŋir la yela

¹Yanam Galatia dim ane zon! M paꞌali ya Kiristo kum dapuudir la zug yela suꞌuŋa, ka li nie nyain ya nini ni. Anoꞌone maꞌa ya? ²M bood ye m buꞌosi ya yel yinni maꞌaa, ya daa diꞌe Winaꞌam Siig Suŋ la ka li yi ne yaname dol wada la yel siꞌel la bee yanam wum labasuŋ la ka niŋ Kiristo yadda la? ³Ya ane zon bee? Ya daa pinꞌili a Winaꞌam nidib, ka li yine Winaꞌam Siig Suŋ paŋin la. Ka ya yuꞌun bood ye ya naa li ne ya meŋ paŋ bee? ⁴Ya namisug la wusa ane zaalim bee? Ayei, li kaꞌ zaalim. ⁵Winaꞌam tisidi ya o Siig Suŋ ka maan bunnyalima ya saꞌan, yanam wum labasuŋ la ka niŋ Kiristo yadda la, ka kaꞌ yanam niŋ wada la yel siꞌem laa. Bee m maꞌane?

⁶Li dolne lin da sob Winaꞌam gbauŋin Abraham yela siꞌem la ye, “On da niŋ Winaꞌam yadda, ka Winaꞌam gosi li ka siak ka o a popielim daan o tuon.” ⁷Baŋimi ye nimbane niŋ Winaꞌam yadda la sid ane Abraham yaas. ⁸Winaꞌam gbauŋ da pun nye ye Winaꞌam na ke ka bane kaꞌ Jew dim la a popielim dim o tuon ba yadda niŋir zug, hale ka li da nam pu niŋe, ka dinzug ka ba da pun yel Abraham labasuŋ la moolug yela hale ka li nan pu paae, on zug ka dunia buudi wusa na nye yelsum. ⁹Abraham da niŋ Winaꞌam yadda ka diꞌe yelsum. Ka ala men bane me niŋ Winaꞌam yadda la na diꞌe yelsum wuu on men.

¹⁰Nopoor be nimbane tiaꞌ wada la maꞌaa, bozugo li sobne ye, “Nopoor be ne bane wusa pu dol wada la yela zanꞌasa wenne lin sob Wada gbauŋin siꞌem la.” ¹¹Li ane nyain ye soꞌ kaeꞌ na di buod wada la dollim maꞌane, bozugo “Popielim daan na voe ne o yadda yela.” ¹²Ka li lem sob ye, “One niŋ wada la yel siꞌel wusa la, o niŋir la na ke ka o voe”. Ka dinzugo wada la siakir pu yine Winaꞌam yadda niŋir nii. ¹³Ka li me sob ye, “Nopoor be ne on mekama n kpi ka ba yaꞌal o tiig zug.” Ka dinzugo, Kiristo n da kpi dapuudir zug la, o da kpenꞌ nopoor la ni, ka faaenn ti nopoor line ka wada la mor na la nuꞌusin. ¹⁴O faaenn ti ye yelsum kan ka Winaꞌam ziꞌel noor ye o na tis Abraham la me na a bane kaꞌ Jew dim la din, ban a yinni ne Yesu Kiristo la zug, ka ye ti me na diꞌe Winaꞌam Siig Suŋ line ka o ziꞌel noor ye o na tisi ti la, ka ti diꞌer la yitne ti yadda niŋir ni na.

Wada la ne noor ziꞌelug la yela

¹⁵M baꞌabiise, m ye m zaŋ nidib beilim a siꞌem la n paꞌali ya siꞌel. Nidib ayi yaꞌa siak pianꞌ siꞌel yela ka sobi li, ka tik nuꞌug, soꞌ kaeꞌ na tiake lii, bee paꞌas siꞌela. ¹⁶Aa to, Winaꞌam da ziꞌel noor tis Abraham ne o yaaŋ. Li da pu sob ye o ziꞌel noor n tis o yaase, ka li ane nidib bedegoo. Ka li lee sob ye o yaaŋ, ka li ane yinni. Ka one a Kiristo la. ¹⁷Lin ka m yeli li la, ane ye, Winaꞌam da ziꞌel noor ka yel ye o ku saꞌami lii. Ka yuma kobus anaasi ne piistanꞌ da gaadeya, ka wada la nyaan kena, amaa li pu nyaŋe saꞌam noor ziꞌelug laa. ¹⁸Bozugo faar la yaꞌa ane wada la dollim yela, li ku lem dolne noor ziꞌelig laa. Amaa Winaꞌam tisi Abraham yelsum la, li yi ne o noor ziꞌelig la zug.

¹⁹Ka ya na buꞌosi m ye, bo zug ka Winaꞌam me da lem tis wada la? O da tisi li ye li paꞌali ti tuumbeꞌed a siꞌem, ka bood ye li be n ti paae saŋkan ka Abraham yaaŋ la na kena, on ka o da ziꞌel noor n tis la. Ka maleknam da diꞌe wada la Winaꞌam saꞌan n tis Moses, ka one tolisi li n tis nidib la, ka a nuꞌu nweꞌed daan. ²⁰Ka nuꞌu nweꞌed daan pu ziꞌe nid yinni maꞌaa yelle. Amaa Winaꞌam ane o konꞌ ka da tis noor ziꞌelug la ka nuꞌu nweꞌed daan la kaeꞌ.

Winaꞌam wada tisib la gbin yela

²¹Ya tenꞌes ye wada la ne Winaꞌam noorziꞌelug la kiꞌisidi taaba bee? Ayei baa biꞌelaa. Winaꞌam yaꞌa da tisin wad line nyaŋedin ketin ka nidib voen, nidib naan sid aan popielim dim o tuon ba wada siakir la zug. ²²Ka li lee da sob Winaꞌam gbauŋin ye dunia dim wusa bene tuumbeꞌed nuꞌusin. Ka linzug li ane bane niŋ Yesu Kiristo yadda na diꞌe Winaꞌam noorziꞌelug line ka o tisid soꞌ on niŋ Yesu Kiristo yadda la zug.

²³Ka saŋa kan ka nidib niŋid Yesu Kiristo yadda la da nam pu kena la, ka wada la da loo ti ziꞌel, wuu ti bene sarega ni ne, n ti paae saŋa kan ka li nie nyain ye nidib na nyaŋe niŋ Yesu Kiristo yadda. ²⁴Dinzugo, wada la da zamisi ti ka aa ti tuon sob n ti paae saŋa kan ka Kiristo kena ka ti a popielim dim Winaꞌam tuon tiname niŋ o yadda la zug. ²⁵Ka nannanna ka yadda niŋir saŋa la paa na, tuon sob la pu lem soꞌe ti yaꞌasa.

²⁶Ka yanam a yinni ne Yesu Kiristo la, ya wusa ane Winaꞌam biis, ka li yine ya yadda niŋir la ni na. ²⁷Bane wusa diꞌe kuꞌom suub la paꞌal ye ba ane Kiristo nidib, ka Kiristo bee ba saꞌan ka wenne on meŋ ne. ²⁸Ka yanam a yinni ne Kiristo la, ke ka ya wusa a yinni. Ka bakir kaeꞌ ne Jew dim ne bane kaꞌ Jew dima, ka me kaeꞌ ne yamis ne bane soꞌe ba meŋa, ka me kaeꞌ ne poꞌab ne dapaa. ²⁹Fu yaꞌa a Kiristo nid fu ane Abraham yaaŋ ka na diꞌe line ka Winaꞌam da ziꞌel noor ye o na tis la.

¹Man yet siꞌel la ane ye, ba gosid biig kane na ti di o saam faar la wuu o ane yamug ne, o biilim saŋa, hale laꞌam ne on sid soꞌe siꞌel wusa la. ²Ka on a biig la, nidib be n gosid o yela wusa hale n ti paae saŋkan ka o saam ziꞌel o la. ³Ala men tinam daa nan a biis Winaꞌam yela ni la ti daa ane yamis ninsaalib yiiga paꞌalug ni. ⁴Ka saŋa kan ka Winaꞌam daa ziꞌel la daa ti paa na la, Winaꞌam tum o meŋ Biig. Ka poꞌa soꞌ duꞌa o, ka o be Jew dim wada la nuꞌusin. ⁵O tum o ye o faaenn bane ka wada la soꞌe ba la, ka ke ka ti lieb Winaꞌam biis.

⁶Winaꞌam da ye o paꞌali ti ye ti aa o biis la, ka tum o Biig Siig Suŋ ye o bee ti sunfin ka ke ka ti buol Winaꞌam ye, “M Baꞌ.” ⁷Ka dinzug fu len kaꞌ yamugo, ka ane Winaꞌam biig. Ka fun sadigim aa o biig la, o na tis uf on ziꞌel siꞌel wusa ye o tis o biis la.

Galatia dim yela n pak Paul siꞌem la yela

⁸Saŋsiꞌen la ka ya da ziꞌ Winaꞌam la, ka dol siꞌelnam line kaꞌ Winaꞌam, ka aa li yamis. ⁹Amaa nannanna ya yuꞌun miꞌ Winaꞌam, (ka li kaꞌ ye yaname miꞌ oo, ka ane ye Winaꞌam lee miꞌi ya,) wala ka ya na lem dol line kaꞌa paŋa ka a zaalim? Bo ka ya bood ye ya lem aa li yamis yaꞌasa? ¹⁰Ya doli dabis sieba ne nwadis sieba ne saŋa sieba ne yuma sieba la malima. ¹¹M zot dabiem ye m tuuma kan ka m daa tumi ya zug la ane zaalim.

¹²M baꞌabiise, m belimi ya ye ya aa wuu mam ne; ka mam me aa wuu yanam ne. Ya pu tum mam beꞌede. ¹³Ya miꞌ ye man daa mool labasuŋ la ya saꞌan yiiga daan la, li daa ane man daa benꞌed la zug. ¹⁴Amaa ya pu neꞌesi ma ka laꞌam ne m niŋgbina la daa a siꞌem la hale li daa daami ya, ya daa lee diꞌe m wuu m ane Winaꞌam malek bee Yesu Kiristo ne. ¹⁵Ya daa mor sumalisim mam zug. Ka bo len niŋ ka ya tiake? Mam na nyaŋe yel ya yela ye, li yaꞌa nyaŋedin, ya daa naan fue ya nini n tisin mam. ¹⁶Ka m yuꞌun liebne ya dataa man yeti ya line a sida la bee?

¹⁷Nimbama la boodi ya yela. Amaa ba more potenꞌer beꞌed. Ba bood ye ba baki ya ne tinam ka ya lee boodi ba yela. ¹⁸Soꞌ yaꞌa tenꞌes suŋ o taaba yela, li a suꞌum ye o boodi ba yela. Lina yiti a sida, m yaꞌa bee ya saꞌan bee m yaꞌa kaꞌa ya saꞌanee. ¹⁹M binoŋa, m lem mor toog m saꞌan ya zug n ti paae saŋkan ka ya a wuu Kiristo a siꞌem la, ka toog la wenne wuu poꞌa yiti saꞌa bood duꞌam la. ²⁰M naan boodin ye m be ne ya saꞌan nannanna nwa, ka na nyaŋe tiake man pianꞌad siꞌem ne ya la. Ya yela ke ka m ziꞌ man na niŋ siꞌem.

Haga ne o nintaa la nwaasug la yela

²¹M ye m buꞌos yanam bane bood ye wada la soꞌe ya la ye, ya pu wum wada la yel siꞌel laa? ²²Li ye Abraham da duꞌa biis ayi. Ayinni a yamug biig, ka yinni a poꞌa kane kaꞌ yamug biiga. ²³Ka ba da duꞌa o bikane a poꞌa yamug biig la wuu ban yiti duꞌad siꞌem la. Ka li lee ane Winaꞌam noorziꞌelug la ke ka ba duꞌa biig kane a poꞌa kane kaꞌ yamug la biig la.

²⁴Neꞌe ane nwaasug ne. Ka poꞌab ayi la nwaasne wada la ne noorziꞌelug line ka Winaꞌam tis o nidib la. One duꞌa biig ka mor yaas ka ba a yamis la nwaasne wada line da yi Sinai zuerin la, zinꞌig kan ka Winaꞌam tisi li la, ka one a poꞌa kane yuꞌuri buon Haga la. ²⁵Ka Haga nwaasne Sinai zuer line be Arabia teŋin, ka me nwaasne Jerusalem ne Jew dim wada line be nannanna nwa la. Ka Jerusalem ne nidib bane doli li malima la ane yamis wuu Haga ne o yaas la a siꞌem la. ²⁶Amaa Jerusalem line be agol la kaꞌa yamuga ka lee aa ti ma. ²⁷Ka li sob Winaꞌam gbauŋin ye,

“Poꞌa kunduꞌare mor sumalisim.

Ka on one me pu nyet duꞌam toog la maalim vuud ne sumalisim.

Ka poꞌa one a kunduꞌar ka o sid bas o la na mor biis bedego n gaad poꞌa kan ka o sid mor o la.

Dinzug kunduꞌar la na mor sumalisim.”

²⁸M baꞌabiise, yanam ane Winaꞌam biis, ka li yine o noziꞌelugin, wuu poꞌa kane kaꞌ yamug la biig duꞌam la da yi Winaꞌam noziꞌelugin siꞌem la. ²⁹Abraham saŋa la, biig kane ka ba da duꞌa wuu ban yiti duꞌad siꞌem la, namisid biig kane ka ba duꞌa ka li yi Winaꞌam Siig Suŋ ni na la. Li me ane ala nannanna. ³⁰Tenꞌesimi Winaꞌam gbauŋ la yel siꞌem la ye, “Kadim poꞌa kane a yamug la ne o biig; ka o biig ne poꞌa kane kaꞌ yamug la biig la ku ti laꞌam pudug ba saam faar laa.” ³¹Ala, m baꞌabiise, tinam wenne poꞌa kane kaꞌ yamug la biis ne, ka pu wenne yamug la biis laa.

Yolisim gurim la yela

¹Kiristo da faaenn ti ye ti soꞌe ti meŋ wada la saꞌan. Dinzugo, ziꞌenimi kiŋ kiŋ ka da siaki lieb yamis yaꞌasa.

²Gosimi, mam Paul yeti ya ye, ya yaꞌa siak ka ba kpenꞌesi ya baŋo, Kiristo yela n be ya ni la pu mor nyoode. ³Ka len yet on mekama siak ka ba kpenꞌes o baŋo ye, on kpenꞌ baŋo la zug, li a tilas ye o dol wada la wusa. ⁴Yanam bane bood ye ya a popielim dim Winaꞌam tuon ya wada dolim zug la, baŋim ye ya baki ya meŋ ne Kiristo ka yiisi ya meŋ Winaꞌam popielim ni. ⁵Ka ti yadda niŋir Kiristo ni la ke ka ti mor tiꞌir ye Winaꞌam na ke ka ti a popielim dim o tuon. Ka Winaꞌam Siig Suŋ paŋ ke ka ti guri li. ⁶Ka tinam a yinni ne Yesu Kiristo la, li yela pu pak ye ti kpenꞌ baŋo bee ti pu kpenꞌee. Lini pak ane ti yaꞌa niŋ Yesu yadda ka li dolne ti noŋilim.

⁷Ya daa dol Winaꞌam yelsida suꞌuŋa. Anoꞌone ke ka ya pu lem doli li? ⁸Lin ka ba panꞌasi ya ka ya bas sida la pu yi Winaꞌam one buoli ya la saꞌan naa. ⁹Ala ka ba ye, “Li ane dabin biꞌela ket ka bodobodo gbil ukid.” ¹⁰Tinam a yinni ne Zugsob la ke ka m miꞌ suꞌuŋa ye ya tenꞌesa ku bee li konꞌ ne man paꞌali ya siꞌel laa. Winaꞌam na saans niŋkane wusa daamidi ya tenꞌesa la, on kun a soꞌ wusa.

¹¹M baꞌabiise, li yaꞌa a sida ye man meŋi moon ye li nar ka ba kpenꞌ baŋo, bo ka Jew dim namisidi ma? Lina yaꞌa aan sida, Jew dim naan ku tenꞌesidin ye m moolug Kiristo kum dapuudir zug la kaꞌ suꞌum. ¹²M naan bood ye nimbane daamidi ya tenꞌesa n yet ye li nar ka ya kpenꞌ baŋo la na maligim saꞌami ba meŋ niŋgbiŋ n paas.

¹³M baꞌabiise, Winaꞌam gaŋi ya ye ya mor yolisim. Dinzugo da ke ka ya yolisim la ke ka ya tum ya ninsaalib yaꞌamleog boodim, ka lee suŋ taaba ne noŋilim. ¹⁴Wada la wusa laꞌasne a yinni ye fu noŋim fu tiraan wenne fu meŋ. ¹⁵Ya yaꞌa zabid ne taaba wuu ya ane bunyuos, guꞌusimi ka da saꞌam taaba.

Winaꞌam Siig Suŋ boodim ne ninsaalib boodim la yela

¹⁶Neꞌ ka m yet ye, keli ka ya beilim dolne Winaꞌam Siig Suŋ la boodim, ka da niŋ lin ka ya ninsaalib boodim mor yaꞌamleog laa. ¹⁷Ka lin ka ninsaalib boodim mor yaꞌamleog la bee li konꞌ ne Winaꞌam Siig Suŋ la boodim. Bama ayi la ane dataas. Ka dinzug ya ku nyaŋe niŋ yaname bood siꞌem laa. ¹⁸Winaꞌam Siig Suŋ yaꞌa soꞌe ya, wada la pu lem soꞌe yaa.

¹⁹Ti ninsaalib boodim niŋid siꞌel la nie paalo, ka ket ka nidib mor poꞌasaꞌuŋ ne dianꞌad tuuma ne tuumyaalis ²⁰ne baꞌamaalug ne sontuuma ne datatuuma ne zabtaasim ne nyuur ne supeen ne dindiisim ne nogban nwaꞌar. ²¹Ka fufum dim ne bane nuud daam koon ne diꞌemyaalis ne tuum bane wenne bamanam, m yeti ya wuu man daa yeli ya siꞌem la ye, on mekama niŋid bama ku di Winaꞌam soꞌolim la faare.

²²Ka nyood line ka Winaꞌam Siig Suŋ la ket ka li nobugid nidib sunfin, ane noŋilim ne sumalisim ne sumodigir ne popielim ne yelsida ²³ne sumbugusum ne meŋ gbanꞌar. Wada la ku yel nid ye o da niŋ bamaa. ²⁴Ka nimbane a Yesu Kiristo nidib la, ba ninsaalib boodim ne li yaꞌamleog la kpi ne Kiristo ne, ka li pu lem soꞌe baa. ²⁵Winaꞌam Siig Suŋ sadigim tisi ti vum paal la, keli ka ti beilim dolne o boodim la. ²⁶Ka ti da mor nyeesim bee ket ka ti taaba sunf dued bee mor nyuur ne taabaa.

Taaba suŋir la yela

¹M baꞌabiise, tuumbeꞌed yaꞌa ke ka soꞌ lu, yanam bane ka Siig Suŋ la bee ya ni bedego la suŋim o ne sumbugusum, ka o due ka lem a suꞌum. Ka me guꞌusimini ya meŋ; ka ya paꞌati nye makir. ²Suŋimi taaba ya yeltood poogin, ka ala ka ya na dol Kiristo wada la. ³Soꞌ yaꞌa tenꞌes ye o a suꞌum, ka sid a one pu kpiꞌema, o maꞌad o meŋ. ⁴Soꞌ mekama kpansim o meŋ yela. O yaꞌa nye ka li a suꞌum, o tunꞌe nweꞌe nyoꞌog ne o meŋ yela. Ka li kaꞌ ye o mak o meŋ ne o tiraan yela. ⁵Soꞌ wusa moom o meŋ yela.

⁶One zamis Kiristo labaar la on pudugim bunsum line ka o mor la ne one zamis o la.

⁷Da maꞌa ya meŋa. Soꞌ ku nyaŋe maꞌ Winaꞌam wuu o ane zolugo. Nid na bun on but siꞌel la buudi. Ka li me ane ala nidib beilim ni. ⁸Soꞌ beilim yaꞌa dolne o ninsaalib boodim, li nyood ane kuꞌum. Ka soꞌ beilim yaꞌa dol Winaꞌam Siig Suŋ la boodim, lin nyood me ane nyovur lin kaꞌ naare. ⁹Dinzug, keli ka ti da genn ka bas tuumsumaa. Ka ti yaꞌa pu basi li saŋa na kena ka ti na nyee li nyood. ¹⁰Dinzugo ti yaꞌa nye suer, keli ka ti tum tuumsuma n tis soꞌ mekama, ka tumi tisi ti baꞌabiis bane niŋ Kiristo yadda la n gaad soꞌ mekam wusa.

Saꞌalug ne puꞌusug

¹¹Gosimi man sob ka li a sob beda siꞌem, li ane man Paul m meŋi yuꞌun sob bama.

¹²Nimbane paꞌane ba meŋ la bood ye ba mugusi ya ka ya kpenꞌ baŋo la. Ka ba kudun niŋidi li ye ba da nye namisug Kiristo kuꞌum dapuudir zug la yelaa. ¹³Hale nimbane malima a baŋo kpenꞌeb la, ba pu niŋid wada la yel siꞌel laa, ka bood ye yanam kpenꞌ baŋo ka ba na nyaŋe nweꞌe nyoꞌog ne yanam siaki diꞌe bun line a niŋgbina malima la. ¹⁴Ka li yaꞌa a mam, man kudun ku nweꞌe nyoꞌog ne siꞌel yelaa, asee ti Zugsob Yesu Kiristo kuꞌum dapuudir zug la maꞌaa. Li ane o kuꞌum dapuudir zug la ke ka dunia yela pu lem soꞌe ma, ka m wenne m kpine, ka m baꞌa lem kaeꞌ ne li yelaa. ¹⁵Li pu pak ye soꞌ kpenꞌ baŋo bee o pu kpenꞌee, line pak ane ye ti mor vumpaal. ¹⁶Winaꞌam na tis nimbane dol suer kaŋa la sumalisim ka zoo ba nimbaanlig, laꞌam ne Winaꞌam nidib sieba la wusa.

¹⁷Keli ka soꞌ soꞌ da lem daami ma; ka isa bane be m niŋgbina ni mam dol Yesu la zug la paꞌal ye m ane o nid.

¹⁸M baꞌabiise, ti Zugsob Yesu Kiristo yelsum na be ne ya siis. Ami.