EFESUS DIM

Paul n sob gbauŋ siꞌa n tis

EFESUS DIM

la nwa

¹Mam Paul one ka Winaꞌam gaŋ ka m a Yesu Kiristo Tumtum la sobid gbauŋ kaŋa tisid Winaꞌam nidib bane be Efesus teŋin ka a yadda niŋidib Yesu Kiristo ni la.

²Ti Baꞌ Winaꞌam ne ti Zugsob Yesu Kiristo yelsum ne sumalisim na be ne ya.

Winaꞌam bareka tisib la yela

³Winaꞌam one a ti Zugsob Yesu Kiristo Baꞌ diꞌem bareka puꞌusum, tiname a Kiristo nidib ka a yinni ne o la zug, ka Winaꞌam tisi ti yelsum line aa o piini wusa ka yii o saꞌan arazana ni la. ⁴Dunia da nam pu pinꞌil la, Winaꞌam da pun deŋim gaŋi ti ye ti aa o nidib n a yinni ne Kiristo ka a nyain o tuon ka gbada kaeꞌ. ⁵On noŋi ti la zug ka o gbanꞌe ye o zaŋi ti ka ti lieb o biis, ka li yine Yesu Kiristo meŋ ni na. O gbanꞌe line ne o meŋ yaꞌamboodim, ⁶ye o popielim piintitaꞌar line ka o tisi ti, tinam a yinni ne o Binoŋir la zug nye zunꞌor, ⁷one ka o ziim tisi ti yolisim ka yiisi ti tuumbeꞌedi bas. Ka li wusa doli o popielim titaꞌar ⁸kan ka o tisidi ti la, ⁹ka ke ka ti mor yaꞌamsuŋ ne baŋir wusa, ye ti baŋ o potenꞌer line da a yelsuaꞌadir ka yi o boodim suŋ kan ka o gbanꞌe ti yela ka li yine Kiristo ni la. ¹⁰Winaꞌami n gbanꞌe saŋsiꞌa la yaꞌa ti paae li ben o na laꞌas bunam bane wusa be arazana ne dunia ni ka Kiristo a Zugsob.

^11-12Winaꞌam one ke ka siꞌel wusa niŋid wuu o boodim a siꞌem la, gaŋi ti ye ti aa o nidib ka a yinni ne Kiristo. Ka li dol o potenꞌer kan ka o deŋim gbanꞌe ye tinam bane deŋim mor tiꞌir ne Kiristo la, na ke ka nidib duꞌos o yuꞌur titaꞌar la.

¹³Yaname wum sida labasuŋ line ke ka ya nye faangir la, ya siak Kiristo ka a yinni ne o, ka Winaꞌam tisi ya o Siig Suŋ wuu on ziꞌel siꞌem. Ka Siig Suŋ la a zanbin ¹⁴ka li paꞌal ye ti na nye line wusa ka o ziꞌeli tisi ti, n ti paae saŋkan ka ti na diꞌe li wusa.

Paul Winaꞌam sosug

¹⁵Neꞌenam zug, ne mam wum ye ya niŋ ti Zugsob Yesu Kiristo yadda ka mor noŋir ne Winaꞌam nidib wusa la, ¹⁶m pu guꞌe ka kpelim puꞌusid Winaꞌam bareka ya zug ka tenri sosid Winaꞌam ya yela. ¹⁷Ye ti Baꞌ Winaꞌam one mor yuꞌur titaꞌar ka ti Zugsob Yesu Kiristo be o saꞌan la na tisi ya yaꞌamsuŋ line paꞌani ya Winaꞌam a siꞌem ka ya baŋ o. ¹⁸Ka nie ya potenda ka ya baŋ yelsida ne tiꞌir lin yela ka o gaŋi ya la. Ka lem baŋ ziꞌelsuŋ kane ka o tis o nidib la malisim a siꞌem, ¹⁹ka me baŋ o paŋ line a buntitaꞌar ka kaꞌ makire ka be tinam bane siak o ni la. ²⁰Paŋ titaꞌakaŋa ane yinni ne paŋ titaꞌakan ka o zaŋi vuꞌug Kiristo kumin n zinꞌil o o datiuŋ arazana ni la. ²¹Ka Kiristo naꞌam gat naꞌanam wusa naꞌam ne paŋdim wusa, ka o a yuꞌur daan n gat soꞌ wusa, ka li kaꞌane dunia kaŋa maꞌanee, amaa laꞌam ne dunia kane na ti kena la. ²²Winaꞌam gaŋ Kiristo ka o a Winaꞌam nidib la Zugsob n soꞌe siꞌel wusa, ka ke ka bunam wusa na zinꞌini o tuon. ²³Winaꞌam nidib la ane Kiristo niŋgbin, ka o ni ka siꞌel wusa maali naae.

Winaꞌam more ti kumin keŋ vuꞌumin la yela

¹Saŋsiꞌen la ya da ane kuꞌum ya tuumbeꞌed ne ya taal yela line ka ya da niŋid, ²yaname da dol dunia nwa suer, ka me dol Sutaana one soꞌe bane mor paŋ agol, ka a one be bane zanꞌas Winaꞌam noor la ni n tum ne ba. ³Tiname daa laꞌam be ne ba la, ti da niŋidi ti ninsaal yaꞌamleog line a ti niŋgbina boodim ne ti yaꞌamboodim. Ka tiname da a siꞌem ke ka ti da nar ye Winaꞌam namisi ti, wuu dunia dim wusa ne.

⁴Ka Winaꞌam n noŋi ti bedego la zug ka o zoo ti nimbaanlig bedego. ⁵Hale baa ti tuumbeꞌedi da ke ka ti nwaas wuu ti kpi ne la, o laꞌam vuꞌugi ti ne Kiristo. Li ane o popielim zug ka o faann ya. ⁶Ka Kiristo maꞌasim zug ka Winaꞌam laꞌam vuꞌugi ti ne Kiristo n ke ka ti zinꞌin ne o arazana ni, ⁷ye saŋa line na ti kena la, o na nie paꞌali o popielim line kaꞌ ben la a siꞌem, ne on tisidi ti yelsum, tiname a yinni ne Kiristo la zug. ⁸Ka o popielim zug ka o tisi ya faangir ka li yine ya yadda niŋir Kiristo ni na, ka li kaꞌane ya meŋ tuuma zugo. Li wusa ane Winaꞌam piini niŋir, ⁹ka kaꞌane ninsaal tuuma yela, ka ya nweꞌedi nyoꞌogo. ¹⁰Li ane Winaꞌam maali ti ka ti a yinni ne Yesu Kiristo ye ti tum tuumsuma line ka o pun deŋim digil ye ti yuꞌun niŋid la.

Ti laꞌas a yinni Kiristo zug la yela

¹¹Ya da a bane kaꞌ Jew dim buudi ne ninsaalib duꞌam poogin, ka Jew dim bane kpenꞌed baŋo la buoni ya ye Apukpenꞌbaŋo dim, ka li ane ninsaalib din maꞌaa. ¹²Dinzugo tenri ye saŋsiꞌen la ya da kaꞌ yinni ne Kiristo, ka ya baꞌa da pu peꞌes ne Israel teŋgbauŋ ne nonaar kan ka Winaꞌam da ziꞌeli tisi ba la. Ya da be dunia nwa ni ka pu mor tiꞌire, ka ziꞌ Winaꞌam, ¹³ka da lal ne o. Amaa nannanna yanam a yinni ne Kiristo la zug, ka o ziim la ke ka ya yuꞌun liꞌel ne o.

¹⁴Ka Kiristo aa ti zabpansid ka noki ti buudi ayi la ka ti lieb yinni, ka nwaꞌe zaba zaŋguom la ¹⁵line a Jew dim maluŋ ne ba wada la. O kum la kpiis maluŋ la ye o kpanb buudi ayi la o saꞌan ka ba a buudi yinni ka mor sumalisim ne taaba. ¹⁶Ka o kuꞌum dapuudir zug la naal noor ne tinam buudi ayi nwa ne Winaꞌam ka ti a buudi yinni ka zabir naae. ¹⁷Ka Kiristo kena mool sumalisim labasuŋ la n tis yanam bane lal, ne bane be yaꞌamin la. ¹⁸Ka o zug ka ti buudi ayi la wusa mor suer ne Siig Suŋ yinni la ni, ye ti liꞌel ti Baꞌ Winaꞌam saꞌan.

¹⁹Linzug ka ya kudum lem kaꞌ saam bee zoomaa, ka ane Winaꞌam nidib ka be o soꞌolimin ka aa o yidim. ²⁰Ka ba eenb ne ya, eenbkan ka Winaꞌam Tumtumnib ne o nodiꞌesidib da eenb la zug. Ka Yesu Kiristo n a doog la eenbir kugir la, ²¹one ke ka yir la wusa maal ka li gbanꞌe kiŋkiŋ, ka yaligidi n liebid Winaꞌam puꞌusum yir line a nyain ka a yinni ne Zugsob la. ²²Ka yanam a yinni ne o la zug ka Winaꞌam Siig Suŋ mee ya n maali ya Winaꞌam yir ye o be anina la.

Paul n tum tis bane kaꞌ Jew dim la yela

¹Dinzug ka mam Paul n be sarega ni Yesu Kiristo zug yanam buudbane kaꞌ Jew dim la yela.

²M tenꞌesid ye ya wum ye Winaꞌam tisi m tuuma line yi o popielimin ya yela, ³ne on nie o yelsuaꞌadir tisi m ye m baŋi li gbin, wuu man deŋim sobi li giŋa siꞌem la. ⁴Ka ya yaꞌa karem lina ya na nye mam baŋ yelsuaꞌadir la gbini a siꞌem line a Kiristo la. ⁵Ka Winaꞌam da pu nie li n tis kudimin dima, ka o Siig la yuꞌun nie li paꞌal o Tumtumnib ne o nodiꞌesidib. ⁶Ka yelsuaꞌadir la yela ane ye labasuŋ moolug la ket ka buudi wusa laꞌamid ne taaba pudugid Winaꞌam piini ka laꞌam diꞌed line ka o ziꞌel noor tisi ti, tinam a yinni ne Yesu Kiristo la zug, ka laꞌam lem be niŋgbiŋ yinni ni.

⁷Li da ane Winaꞌam paŋ tuuma niŋir ka o gaŋi piinsuŋ n tisi m line ke ka m lieb labasuŋ la moon moon. ⁸Ka mam one a Winaꞌam nidib wusa kpaanr la diꞌe piinkaŋa, ye m mool labasuŋ la tis buudi bane kaꞌa Jew dim la, piintitaꞌar one a Yesu Kiristo la yela line kaꞌa ben ne, ⁹ka ke ka nidib wusa nye yelsuaꞌadir suer line ka Winaꞌam one maal bun wusa la da suaꞌ yuum pokudug ni. ¹⁰O nidib na ke ka naꞌanam ne paŋ dim bane be saazug baŋ Winaꞌam yaꞌam line kaꞌa ben la. ¹¹Winaꞌam niŋ neꞌenam ka li dolne on gbanꞌe siꞌem, saŋkan ka dunia nam pu pinꞌile, ka li yine ti Zugsob Yesu Kiristo saꞌan ka li niŋ sida. ¹²Ka tinam siak o la ke ka ti nyees ka mor suer ye ti keŋ Winaꞌam saꞌan. ¹³Dinzug ka m sosidi ya ye ya da ke ka ya sunya saꞌam mane namisidi ya yela la zugo, ka m namisug ane ya sumalisim.

Paul Winaꞌam sosug

¹⁴Dinzug ka m igin duma zug ti Baꞌ Winaꞌam tuon, ¹⁵on kane tisid buudi wusa bane be saazug ne dunia ni ba yuda la. ¹⁶M sosid Winaꞌam ye o Siig Suŋ na tisi ya paŋi ya sunya ni line doli o naꞌam paŋ titaꞌar, ¹⁷ye Kiristo bee ya sunya ni, ka ya yadda niŋir zug, ka ya noŋilim kpiꞌem ka pu tiakeda. ¹⁸Ye ka yanam laꞌam ne Winaꞌam nidib wusa na paam paŋ n na nyaŋe baŋ Yesu noŋilim waꞌam ka labis ka du ka zulum siꞌem, ¹⁹ka baŋ o noŋilim line gat nidibi na tunꞌe baŋi li siꞌem. Hale bun line wusa yit Winaꞌam saꞌan na la na peꞌel ya.

²⁰One tunꞌe maal siꞌelnam bedego, hale gat tiname na sos bee tenꞌes siꞌem la line zemisi o paŋ kane tumi ti ni la. ²¹Winaꞌam na nye naꞌasi Kiristo nidib saꞌan saŋa dine kaꞌ naare. Ami.

Kiristo niŋgbina a yinni siꞌem la yela

¹Mam one a sarega nid Zugsob la yela sosidi ya ye ya dol suer line nar ne Winaꞌam gaŋi ya la. ²Li a suꞌum ka ya sie ya meŋ ka a baanlim ka mor suguru ne sumbugusum line yi noŋirin, ³ka kpeꞌeŋi ya meŋ ka mor noor yinni line yi Winaꞌam Siig Suŋin na la, ka more li ne sumbugusum ka li laꞌasedi ya gumm. ⁴Niŋgbiŋ yinni be, ka Winaꞌam Siig Suŋ yinni maꞌaa be. Ka Winaꞌam buoli ya ye ya mor tiꞌir yinni. ⁵Ka Zugsob yinni be, ne yadda yinni ne kuꞌom suub yinni ⁶ne Winaꞌam yinni one a ti wusa Baꞌ, one gat siꞌel wusa, ka o paŋ be ti ni n tum, ka o lem be ti wusa ni la.

⁷Ka ti wusa yinni yinni diꞌe popielim piini line dol Kiristo boodim la. ⁸Dinzug ka li sob Winaꞌam gbauŋin ye,

“On daa du agol la,

o daa more bane ka o nyaŋe la keŋ,

ka tis nidib piini.”

⁹Line sob ye, “O du agol la” gbin a bo? Li ane ye o daa deŋim sig na hale n ti paae dunia teŋir. ¹⁰Ka on kane sig na la a one me du agola sa, gaad dunia ne saazug wusa ye o be bun wusa wusa ni la. ¹¹Ka o meŋ tisi ti piinsieba ye sieba liebi o Tumtumnib, ka sieba a o nodiꞌesidib, ka sieba a labasuŋ la moon moonib, ka sieba a bane gur Winaꞌam nidib, ka sieba a paꞌanib. ¹²Ka ba tiꞌeb Winaꞌam nidib ka ba na tum n suŋi taaba, ka Kiristo niŋgbiŋ line a o nidib la nobug ¹³n ti paae saŋkan ka ti wusa mor noor yinni line doli ti noor siakir ne tiname baŋ Winaꞌam Biig la yela. Ka ti biꞌ naae, n ti paae wuu Kiristo zemis siꞌem la.

¹⁴Ka ti lem kaꞌ biis bane kaꞌ yaꞌam, ka dol damaꞌanam paꞌala line yi bibiꞌelnam yaꞌamin, wuu siꞌel ka sisiꞌem daꞌadi li n tuulum siꞌem laa. ¹⁵Amaa lee more noŋir ka pianꞌami sida tis taaba ye ti nobug yela wusa ni n ti paae Kiristo ¹⁶one wenne zug line ke ka niŋgbiŋ la wusa laꞌase toꞌoŋ taaba ne li duta wusa la. Ka li yinni yinni yaꞌa niŋid line nar, niŋgbiŋ la wusa nobugidne suꞌuŋa, ka li yine noŋirin na ka li biꞌid.

Ti beilim paal la yela

¹⁷Dinzug ka m mudigidi saꞌani ya ye ya da lem niŋid wuu bane kaꞌ Winaꞌam nidibi niŋid siꞌem ne ba yaꞌam line pu dol suer la. ¹⁸Ba potenda pu nie, ka ba pu paꞌas nyovur kan ka Winaꞌam tisid laa, ba ziꞌilim ne ba kpaana la zug. ¹⁹Ka ba sunya digilim ka ba baꞌa kaeꞌ ne nyan ne, ka bood tuumyood hale ne li buudi wusa.

²⁰Li kaꞌ ala ka ya zamis Kiristo yelaa. ²¹Yaname sadigim wumi o yela ka zamis yelsida o saꞌan line be o ni la, ²²basimi yaname da a siꞌem ya beilim kudirin line ke ka damaꞌam yaꞌamleog ke ka ya saꞌam la, ²³ka tiake ya potenda boodim ka li lieb bunpaala. ²⁴Keli ka ya beilim ae bunpaala line ka Winaꞌam maal ka li wen o la, ka yaname niŋid siꞌel a sida ne popielim line dol Winaꞌam suer.

²⁵Dinzugo, basimi damaꞌam ka ya wusa pianꞌad a sida n tisid ya kpiꞌes; ka ti laꞌase a niŋgbiŋ yinni ne taaba. ²⁶Da ke ka ya supeen ke ka ya tum tuumbeꞌede, ka me da ke ka zaam maꞌae ka ya kpen mor supeen ne. ²⁷Da tisi sutaana suer ka o daami yaa. ²⁸One daa zuud on da lem zuud yaꞌase, amaa li suꞌum ye o tum ka nye o meŋ nuꞌug tuuma bun, ka na tunꞌe suŋ noŋ dim.

²⁹Da ke ka ya noya pianꞌad beꞌede, amaa keli ka li yitne pianꞌa suꞌuŋa, ka li suŋ bane kelisid la, ka ba biꞌ ba beilim puugin. ³⁰Da niŋi line na ke ka Winaꞌam Siig Suŋ la sunf saꞌam ne yaa, bozugo one deŋi zanbili ya n guri daar kan ka o na tisi ya yolisim wusa la. ³¹Basimi sutoog ne supeen ne endug ne noŋgban nwaꞌar, ne yuꞌusaꞌuŋ ne potenꞌebeꞌed wusa, ³²ka suŋidi taaba ne nimbaanlzoor ka tis taaba suguru wen wuu Winaꞌam niŋ siꞌem ne Kiristo ka yiis ti tuumbeꞌed n bas la.

Nyain beilim la yela

¹Winaꞌam a siꞌem la, ya me aa ala, wuu biis bane ka ba saam noŋ la. ²Ka more noŋir wuu Kiristo noŋi ti siꞌem la, ka pesig o meŋ n maal maan suŋ n tis Winaꞌam ti yela la.

³Da ke ka poꞌasaꞌuŋ ne dausaꞌuŋ ne dianꞌad wusa ne yaꞌamleog kudum pudug li yuꞌure, yaname sadigim a Winaꞌam nidib la. ⁴Ala mene da more pianꞌayood ne galim yood line pu dol suere, amaa lee puꞌusum Winaꞌam bareka. ⁵Baŋimi neꞌeŋa ye poꞌasaꞌuŋ sob bee dausaꞌuŋ sob bee dianꞌad sob bee fufum sob ku di faar Kiristo ne Winaꞌam soꞌolim la nii. Ka one mor fufum wenne baꞌamaan ne.

⁶Neꞌenam zug, ka Winaꞌam sunf pelig ne bane zanꞌas o noor la. Dinzugo, da ke ka soꞌ maꞌa ya ne pianꞌa zaalise. ⁷Da laꞌas ne baa.

⁸Saŋsiꞌen sa ya da bene likin, amaa ya yuꞌun be ne neesim ni ka a yinni ne Zugsob la. Linzug, niŋimi wuu bane be neesim ni n niŋid siꞌem la. ⁹Ka neesim beilim nyood ane popielim ne yelsida ne yelsum wusa. ¹⁰Ka kpeꞌeŋi baŋi line maꞌed Zugsob la suunr. ¹¹Ka da ke ka ya baꞌa be ne likin tuuma line kaꞌ nyood laa, amaa viigimini ba gbin, ¹²ka li mor nyan hale ne soꞌ na pianꞌ line ka ba suaꞌ niŋid la. ¹³Ka ba yaꞌa viig siꞌel gbin likin n yiisi li paalo ni, li paꞌal lin a siꞌem la nyain nyain. ¹⁴Ka line nied wusa liebidne nyain. Dinzug ka li sob ye,

“Gbeenm soba, duom ka vuꞌug kumin,

ka Kiristo na ke ka li nie ya saꞌan.”

¹⁵Guꞌusimi ne ya meŋ ne ya beilim a siꞌem. Maalimi ne wuu bane mor yaꞌam ka kaꞌa wuu bane kaꞌa yaꞌam, ¹⁶ka ya yaꞌa nye suer yanam niŋim line a suꞌum, ka saŋa la ane tuumbeꞌed saŋa. ¹⁷Dinzugo da ae zon ne, ka baŋimi Zugsob la boodim a siꞌem.

¹⁸Da nuud daam kooleyaa, ka li ane tuum yaalis. Amaa keli ka Winaꞌam Siig Suŋ peꞌeli ya. ¹⁹Pianꞌami tisimi taaba ne yuuma bane sob Winaꞌam gbauŋin, ne yuuma bane ka Winaꞌam nidib sob, ne yuuma bane ka Winaꞌam Siig Suŋ tis, ka yuꞌum yuuma wusa zunꞌod Winaꞌam yuꞌur ne ya sunf wusa. ²⁰Ka siꞌel mekama ni, puꞌusimi ti Baꞌ Winaꞌam bareka ne ti Zugsob Yesu Kiristo yuꞌurin saŋa mekama.

Poꞌab ne ba sidib la yela

²¹Siakimi taaba noya, yaname naꞌasid Kiristo la.

²²Poꞌaba, siakimini ya sidib noya wuu yaname siakid Zugsob la noor siꞌem la. ²³Ka sid la soꞌe poꞌa la wen wuu Kiristo soꞌe Winaꞌam nidib siꞌem la, bane aa o niŋgbiŋ line ka o faaenn la. ²⁴Ka Winaꞌam nidib sadigim siak Kiristo noor la, poꞌab me niŋimi ala mene n tisimi ba sidib yela mekama wusa ni.

²⁵Sidiba, noŋimini ya poꞌab wuu Kiristo noŋ Winaꞌam nidib ka pesigi o meŋi tisi ba yela la. ²⁶O niŋ ala ye o gaŋi ba ka ba a Winaꞌam din ka suu ba Winaꞌam kuꞌom ka ba a nyain labasuŋ la ni, ²⁷ye o zaŋi ba ka ba a yinni keŋi o meŋ tuon ka a nyain ka gbada kaeꞌ wen wuu poꞌa kun sid ne venlim pilpil ka siꞌel kaeꞌ saꞌami o venlim la. ²⁸Ala mene sidib noŋimi ba poꞌab wuu ba meŋ niŋgbiŋ ne. Ka one noŋi o poꞌa noŋi o meŋ. ²⁹Ka soꞌ kaeꞌ kisi o meŋ niŋgbinaa. O lee diisidi li ne ka gosidi li wuu Kiristo niŋid siꞌem n tisid Winaꞌam nidib la, ³⁰tiname a o niŋgbiŋ wila la zug. ³¹Linzug ka li sob ye, “Dau na basi o baꞌ ne o ma ka toꞌoŋ ne o poꞌa ka ba bayi la lieb niŋgbiŋ yinni.” ³²Neꞌeŋa ane yelsuaꞌadir titaꞌar ka m baŋ ka li gbin ane Kiristo ne Winaꞌam nidib la yela. ³³Keli ka ya wusa yinni yinni noŋi o poꞌa wuu o meŋ ne. Ka poꞌa la me naꞌasimi o sid.

Biis ne ba duꞌadib la yela

¹Biise, siakimini ya duꞌadib noya, Zugsob la ni, ka lina dol suer. ²Winaꞌam noyelug yiiga line mor noziꞌelug la ane ye, “Naꞌasimi fu baꞌ ne fu ma, ³ka fu na a suꞌum, ka fu nyovur waꞌam dunia ni.”

⁴Saamnama, da ke ya biis sunya pelig ne saꞌala galisugo, ka lee ugusini ba ne saꞌalug ne zamisug line dol Zugsob la suer.

Yamis ne ba zugsobnam la yela

⁵Yamise, siakimini ya dunia nwa ni zugsobnam noya ne naꞌasi zotim ne sunf yinni, wuu ba ane Kiristo ne. ⁶Li kaꞌane ban na be ne ya gullimnee ye ba tenꞌes ye ya a suꞌum, amaa niŋimi wuu ya ane Kiristo yamis ka tum Winaꞌam boodim ne ya sunya wusa. ⁷Tumi ya tuuma ne sumalisim wuu ya tumne tisid Zugsob la ka kaꞌ nidiba, ⁸ka more potenꞌer ye one tum tuumsuŋ mekama na di li nyood Zugsob Kiristo la saꞌan, o yaꞌa a yamug bee o kaꞌ yamuga.

⁹Yanam zugsobnama, niŋimini ala mene n tisidi ba, ka da mugusidi baa, ka more potenꞌer ye yanam ne ban wusa mor Zugsob yinni arazana ni, one pu mor baragaŋa.

Zaba laꞌad bane ka Winaꞌam tisid la yela

¹⁰Line kpelim ane ye, ya mor sukpiꞌem Zugsob la ni laꞌam ne o paŋ titaꞌar la. ¹¹Yeemi Winaꞌam zaba laꞌad la wusa ka ya na nyaŋe ziꞌe kiŋkiŋ, ka Sutaana bibiꞌelim yaꞌam da nyaŋe lubi yaa. ¹²Ka ti pu zabid ne saaliba, amaa ti zabid ne siisbeꞌednam kpiꞌemnam bane a paŋ dim naꞌanam bane soꞌe dunia line a lik tuumbeꞌed yela la, ne siisbeꞌednam wusa bane be saazug. ¹³Dinzugo, nokimi Winaꞌam zaba laꞌad la wusa bobig wuu Room dim sogianami niŋid siꞌem la, ka dabis beꞌug yaꞌa kena ya na nyaŋe ya dataas. Ka zaba la yaꞌa ti naae ya na kpelim ziꞌe ya ziꞌa ni kiŋkiŋ.

¹⁴Dinzugo, tiꞌebim ziꞌe ka nok sida n lo wuu sialoodiŋ ne, ka bobigi popielim wuu gbauŋ tiꞌedugu lusi nyoꞌog. ¹⁵Ka pid taꞌada n tiꞌebi keŋ mool sumalisim labasuŋ la. ¹⁶Ka line lem paꞌas ane ye, zanli lusub bun nuꞌusin line a yadda ka na tunꞌe kpiis pima line dit wenne bugum pielim, lin ka Sutaana toond la. ¹⁷Ka pidi kunt zugpibis line a faangir, ka noki Winaꞌam Siig Suŋ zaba suꞌug line a Winaꞌam pianꞌad la. ¹⁸Niŋimi neꞌenam ka dol Siig Suŋ la sosid Winaꞌam suŋir suꞌuŋa saŋa wusa. Kpelim sosid Winaꞌam n tis nidib wusa, ¹⁹ka me sos Winaꞌam tis man, ye Winaꞌam na ke ka m nyaŋe pianꞌ suꞌuŋa ne paŋ n ke ka labasuŋ line suaꞌa la nie. ²⁰Labaar la yela ka m liebi li tumtum ka ba loo m ne bana. Sosim Winaꞌam ye m na tunꞌe paꞌali li ne paŋ wuu lin suꞌum ye m pianꞌan siꞌem la.

Puꞌusug

²¹Tikikus one aa ti baꞌabinoŋir ne Zugsob sida suŋid la na yeli ya m yela wusa, ka ya na baŋ line maan ne m, laꞌam ne m tuuma wusa a siꞌem. ²²Lin yela ka m tum o ya saꞌan na ye ya baŋi ti yela la ka ya sunya kpeꞌeŋ.

²³Winaꞌam one a ti Baꞌ la ne ti Zugsob Yesu Kiristo na tisi ti baꞌabiis la wusa noŋir ne sumalisim ne yadda niŋir. ²⁴Yelsum na be ne bane noŋi ti Zugsob Yesu Kiristo ne noŋir line kaꞌ benne.