KOLOSE DIM

Paul n sob gbauŋ siꞌa n tis

KOLOSE DIM

la nwa

¹Mam, Paul one ka Winaꞌam gaŋ ka m a Yesu Kiristo Tumtum, ne ti baꞌabiig Timoti ²n sobid gbauŋ kaŋa tisid yanam bane a Winaꞌam nidib, ka a yinni ne Kiristo ka be Kolose teŋin ka a ti baꞌabiis bane a yadda dim la.

Ti Baꞌ Winaꞌam na tisi ya yelsum ne sumalisim.

Paul n puꞌusid Winaꞌam bareka la yela

³Tinam yiti puꞌusid Winaꞌam one aa ti Zugsob Yesu Kiristo Baꞌ la tisidi ya saŋa mekama. ⁴Ti puꞌusid o bareka tiname wum ye ya niŋid Yesu Kiristo yadda ka noŋ Winaꞌam nidib wusa la, ⁵yaname mor tiꞌir ne line ka Winaꞌam digil arazana ni n guri ya la zug. Ya pun deŋim wum tiꞌir la yela sida pianꞌadin line a Winaꞌam labasuŋ la, ⁶ka ba mooli tisi ya la. Ka zinꞌis bedego ka nidib bedego siak Winaꞌam labasuŋ la, ka ba kal peꞌesid. Ala men ka li me niŋidi ya saꞌan saŋa kan ka ya wum Winaꞌam popielim yela ka sid baŋi li n ti paae nannanna la. ⁷Ya zamis neꞌeŋa Epafras saꞌan one aa ti tumtum tiraan Yesu Kiristo ni, ka lem a Kiristo tumtum yelmeŋir ka ziꞌe ti noba zug ya yela la. ⁸O yeli ti yanam mor noŋilim Winaꞌam Siig Suŋ ni siꞌem la.

⁹Dinzug ka ti pu basi ka kpelim sosid Winaꞌam tisidi ya, saŋa kan ka ti wum ya labaar la n ti paae nannanna, ka sosid Winaꞌam ye ya baŋ o potenꞌer bood siꞌem suꞌuŋa, ne yaꞌamsuŋ ne baŋir line ka Winaꞌam Siig la tisid. ¹⁰Ti sosid ye ya tuuma n nar Zugsob la, ka li maꞌae o suunr bedego, ka ya tum tuumsuŋ wusa, ka ya Winaꞌam yela baŋir peꞌes. ¹¹Ka Winaꞌam paŋ titaꞌar la zug ka ya na mor paŋ bedego men, ye ya tunꞌe modig suꞌuŋa ne sumalisim ¹²ka na puꞌusidi ti Baꞌ Winaꞌam bareka. On maali ya ka ya nar ye yanam laꞌam ne ya Winaꞌam nidib taaba n diꞌe line a ya din ka be Winaꞌam soꞌolim line a nyain la ni. ¹³Winaꞌam faann ti Sutaana soꞌolimin line a likine n taꞌasi ti o Binoŋir soꞌolimin. ¹⁴On zug ka ti nye yolisim ka Winaꞌam yiisi ti tuumbeꞌedi bas la.

Kiristo a siꞌem la yela

¹⁵Winaꞌam one ka ba pu nyet la a siꞌem la Yesu me sid ane ala. O ane bun kane maal wusa la kpeenm. ¹⁶Ka li yine o saꞌan na ka Winaꞌam maali li wusa, bun bane be dunia ni bee saazug, bee bun nyeta, bee bane pu nyetaa, bee bane mor naꞌam bee soꞌolim, bee paŋ, bee kpiꞌeuŋ la. Ka bun wusa maalug yine o saꞌan ka ane o meŋ yela. ¹⁷O pun deŋim be ka siꞌel siꞌel nam kaeꞌ, ka o paŋ ket ka li wusa a gumm. ¹⁸One a Winaꞌam nidib kpeenm wuu zugu a yiiga siꞌem niŋgbiŋin la, ka lem a yiiga sob bane vuꞌug kumin la, ye o a siꞌel wusa kpeenm. ¹⁹Ka li malis Winaꞌam ye on a siꞌem la wusa Yesu me ane ala. ²⁰Li yine o saꞌan ka Winaꞌam zaŋ o ziim kane yi kuꞌum dapuudir zug la naal noor ne bun line be saazug ne dunia ni wusa.

²¹Saŋsiꞌen la ya daa ane biꞌemnam ne Winaꞌam, ka mor potenꞌebeꞌed ne tuumbeꞌed. ²²Amaa Yesu Kiristo kuꞌum la yela o naal noor ne yanam, ka na ziꞌel ya nyain Winaꞌam tuon ka ya ku lem mor gbaꞌar bee taale. ²³Ala zug ya yaꞌa kpelim mor ya yadda la kiŋ kiŋ wuu eenb suŋ ne, ka pu bas tiꞌir line ka ya wum labasuŋin laa, li na niŋi ala. Nwa ane labasuŋ kane ka ba daa mool tis soꞌ wusa one be dunia ni. Labaar kan la ka mam Paul liebi li tumtum la.

Paul n tum siꞌem n tis Winaꞌam nidib la yela

²⁴Li malis man Paul ne mane namisidi ya yela la. Namisug kan ka m namisid la ye li niŋne paae li ben wenne Kiristo n daa yel ye m na namis la. Ka li ane o niŋgbiŋ line a o nidib la yela ka m namisid. ²⁵Ka ya yela ka Winaꞌam gaŋi m ye m liebi o nidib la suŋid ka mooni o labaar la suꞌuŋa. ²⁶Labaar la da ane yelsuaꞌadir saŋa kane gaad la wusa, amaa nannanna li yuꞌun nie tis o nidib. ²⁷Ka Winaꞌam gbanꞌe ye o ke ka o nidib baŋ ye yelsuaꞌadir la ane yelsum titaꞌar n me tis buudi wusa. Yelsuaꞌadir la ane ye Kiristo a yinni ne ya ka tisi ya tiꞌir ka ya na be ne Winaꞌam.

²⁸Ti moon Kiristo yela, ka saꞌan soꞌ mekama, ka paꞌani ya ne yaꞌamsuŋ ye ya biꞌ Kiristo ni ka ti zaŋi ya n paꞌal Winaꞌam. ²⁹Linzug ka m kpeꞌeŋi m meŋ n mo hale ne paŋ titaꞌar line ka Kiristo tisi m la.

¹Ka m bood ye ya baŋ mam kpeꞌeŋi m meŋ siꞌem wusa, ya yela ne bane be Laodisea ne bane pu nyee m ne nif nan la, ²ye ya laꞌam taaba ne noŋir n kpeꞌeŋi ya sunya, ka baŋ Winaꞌam yelsuaꞌadir line a Kiristo la nyain nyain ka pu biꞌesidi li yela baa biꞌelaa. ³Ka Kiristo saꞌan ka baŋir ne miꞌilim wusa wusa be. ⁴M yeli ya nwa ne ka soꞌ da maꞌa ya ne yaꞌam gonluŋo, ⁵ka m baꞌa be ne ya, hale baa man kaꞌa ya saꞌan la, ka m sunf malis ne ya suer la dolim ne yaname siak Kiristo kiŋ kiŋ la.

Tinam a yinni ne Kiristo ti beilimin la yela

⁶Dinzugo yaname sadigim siak ye Yesu Kiristo a Zugsob la, bei ne o ne noor yinni, ⁷ka gbanꞌe o wenne tiig nyaꞌa gbanꞌ teŋ kiŋ kiŋ siꞌem la, ka ya yadda niŋir nobug, ka ke ka ya beilim Yesu ni a wuu tiname paꞌali ya siꞌem la, ka tisidi Winaꞌam bareka puꞌusum bedego.

⁸Guꞌusimi, ka soꞌ da panꞌasi ya ne paꞌalug line wen wuu yaꞌam paꞌalugo, ka a damaꞌa zaal, ka a paꞌalkuda ne saalib yiiga paꞌala, ka pu yi Kiristo ni na laa.

⁹Ka Winaꞌam a siꞌem wusa la, Kiristo me da ane ala o niŋgbiŋin. ¹⁰Ka yaname a yinni ne o la zug ka ya nye nyovur bedego. Kiristo ane kpeenm ka soꞌe line wusa mor paŋ ne kpiꞌeuŋ. ¹¹Yanam a Winaꞌam nidib n a yinni ne Kiristo la, ka zanbin line paꞌal ye ya a o nidib la, kaꞌane baŋo kpenꞌesug niŋgbiŋinee, ka ane ye Kiristo yiisi ya potenꞌebeꞌed ya ni. ¹²Yaname daa diꞌe kuꞌom suub la, li nwaasne wuu ba laꞌam mumi ya ne Kiristo. Ka yaname niŋ Winaꞌam yadda on vuꞌug Kiristo kumin siꞌem la, li me nwaasne wuu ya laꞌam vuꞌugi ne o.

¹³Ya tuumbeꞌed ne ya saalib boodim line pu dol suer la da ke ka ya ziꞌ Winaꞌam ka wenne bane kpine. Ka Winaꞌam ke ka ya laꞌam vuꞌug ne o. O da yiisi ti tuumbeꞌed wusa bas. ¹⁴Yesu yiis wada kan daa sob, ka li kati ti saria la, ka li moŋidi ti buod la, n zaŋi li kpaꞌa tabil o dapuudir la zug. ¹⁵Kiristo kuꞌum dapuudir la yela ke ka o saꞌam siisbeꞌednam bane mor paŋ ne kpiꞌeuŋ wusa ka diisi ba nyan paalo ni, on nyaŋe ba la zug.

¹⁶Dinzug, da ke ka soꞌ yel ye ya niŋimi anwa ne anwaa, diib sieba yela bee nuub yela bee yuum yuum malima bee nwadipaalis malima bee daba ayopoi vuꞌusum daar yela. ¹⁷Bama nwa da nwaasne line na ti kena la, ka li ameŋa a Kiristo. ¹⁸Da ke ka one maꞌa ye o kpiꞌem gat uf panꞌas uf ka maꞌa ye Winaꞌam nie siꞌel paꞌal on ne, ka nyidigid n maꞌadi siedi o meŋ ka puꞌusid maleknama. Ninkaŋa duꞌosidi o meŋ ka li gbin kaeꞌ, bozugo li ane ninsaalib tenꞌesug ka o dol, ¹⁹ka pu dol Kiristo yela. Kiristo wenne zugne, ka ket ka yadda niŋidib wusa a gumm ka nobugid wuu Winaꞌam bood siꞌem, wuu niŋgbiŋ duta ne giinla ke ka niŋgbiŋ a gumm ka mor paŋ siꞌem la.

Tiname kpi ka vuꞌug ne Kiristo la yela

²⁰Yaname sadigim wen wuu ya laꞌam kpine ne Kiristo ka bas saalib yiiga paꞌala la, da niŋidi wuu ya beilim kudug la ka siak wada bama buudi bane ye, ²¹“Da di neꞌenam, bee da lemi li, bee da siꞌisi li laa.” ²²Ban yela ka lin ka ba dit la mor kpienr poogin la. Li ane saalib maꞌaa wada tisib ne paꞌalug. ²³Ka wadkaŋa tuꞌasne wuu yaꞌam paꞌalug ka ket ka namisug puꞌusug ne meŋsier ne niŋgbiŋ namisug nobugid, amaa ka kaꞌ paŋ ye li kad ninsaal boodim yaꞌamleogo.

¹Yaname laꞌam sadigim vuꞌug kumin ne Kiristo la, more boodim ne bun line be arazana ni, zinꞌikan ka o zinꞌi Winaꞌam datiuŋ la. ²Keli ka ya potenꞌer gbanꞌe ne bun line be arazana ni, ka kaꞌane bun line be dunia nii; ³ka ya kpiya ka mor nyovur paal, ka Kiristo guri li Winaꞌam saꞌan. ⁴Ka Kiristo one a ti nyovur la yaꞌa nie ya na laꞌam nie ne o, n be o naꞌamin.

Beilim kudir ne beilim paal la yela

⁵Basimi ya niŋgbiŋ boodim line a poꞌasaꞌuŋ bee dianꞌad tuuma bee yaꞌamleog galisug bee potenꞌebeꞌed bee fufum, ka fufum a beꞌed wenne baꞌamaanib ne. ⁶Tuum ban yela ka Winaꞌam supeen ken bane zanꞌasidi o noor la ni na. ⁷Ya da niŋidi ala men yaname da laꞌam be ne ba la. ⁸Amaa nannanna, basimi supeen, ne endug, ne potenꞌebeꞌed, ne yuꞌusaꞌuŋ, ne pianꞌayaalis wusa. ⁹Da maꞌadi tisidi taaba yaname basi ya beilim kudug tuuma la, ¹⁰ka tiak beilim paal line ka Winaꞌam kpelim maani li saŋa mekama, ka ti wenne o meŋ ka baŋi o yela n paasid suꞌuŋa. ¹¹Beilim paalin la, li baꞌa kaeꞌ ye oŋa a Greek nid, bee Jew nid, bee o kpenꞌ baŋo, bee o pu kpenꞌe, bee o a saan bee o yi moogin na, bee o a yamug bee o kaꞌ yamuga, amaa Kiristo maꞌaa gaad siꞌel wusa ka be o nidib wusa ni.

¹²Yaname a bane ka Winaꞌam gaŋ ye ya a o nidib bane ka o noŋ la, more nimbaanlzoor, ka suŋidi nidib, ka siedi ya meŋ, ka a potenꞌesuŋ dim, ka a suguru dim ¹³ne bane gbanꞌadi ba meŋ ka ket taaba tuumbeꞌedi basid wuu Zugsob la yiisi ya tuumbeꞌedi bas siꞌem la, niŋimini ala men. ¹⁴Ka line gaad li wusa ane ye ya mor noŋilim ka line laꞌased siꞌel wusa ka li a gumm.

¹⁵Keli ka Kiristo sumalisim la soꞌe ya sunya ka li ane sumaliskan yela ka Winaꞌam buoli ya, ka ya a niŋgbiŋ yinni. More Winaꞌam bareka puꞌusug. ¹⁶More Kiristo labaar la suꞌuŋa ya sunya ni, n zamisid ka saꞌan taaba ne yaꞌamsuŋ ka yuum yuuma line be Winaꞌam gbauŋin la, ne Winaꞌam nidib yuuma ne yuumbane ka Winaꞌam Siig Suŋ tisi ya la, ka kpelim mor Winaꞌam bareka puꞌusug ya sunya ni. ¹⁷Line mekama ka ya niŋid, li ane tuuma bee pianꞌade, niŋimi li Zugsob Yesu Kiristo yuꞌurin, ka puꞌusidi ti Baꞌ Winaꞌam bareka ne Yesu Kiristo yuꞌur zug.

Ti beilim ne taaba la yela

¹⁸Poꞌaba, siakimi ya sidib noya, ka li nar ka poꞌab bane dol Zugsob la niŋidi ala.

¹⁹Sidiba, noŋimi ya poꞌab, ka da toe ne baa.

²⁰Biise, siakimi ya saamnam ne ya manam noya wusa ka line malis Zugsob la.

²¹Duꞌadiba, da sanꞌasi ya biis galise, ka ba na sinꞌig.

²²Yamise, siakimi ya zugsobnam noya wusa ka da tummi ban na be ne ya maꞌanee, ka ba tenꞌes ye ya ane tuumsuma dima, amaa ka lee tumi li ne poog yinni, Zugsob la naꞌasi yela. ²³Lin wusa ka ya tumid, tumi li ne poog yinni wen wuu ya tumne tisid Zugsob la, ka kaꞌ nidiba. ²⁴Ya miꞌ ye Zugsob la na tisi ya nyood lin ka o da yeli ziꞌel ye o na tis o nidib la. Li ane Kiristo one a Zugsob la ka ya tumi tisid. ²⁵Tuumbeꞌed sob la na diꞌe o tuumbeꞌed la yood bozugo Winaꞌam pu mor baragaŋa.

¹Zugsobnama, niŋimini line a suꞌum ne line zemis tisi ya yamis. Ka baŋi ya potenda ni ye ya me mor Zugsob one be arazana ni.

Saꞌalug

²Kpen sosimi Winaꞌam saŋa wusa ka tis o bareka puꞌusum. ³Laꞌam sosi tisi ti ye Winaꞌam na tisi ti suer ka ti mool o labaar la, n nie o yelsuaꞌadir line a Kiristo la. Ka li yela, ka m be sarega ni. ⁴Sosimi Winaꞌam ye m nyaŋe pianꞌ n nie li nyain, bozugo li nar ka m niŋi ala.

⁵More yaꞌamsuŋ ne yaname niŋid siꞌem n tisid bane kaꞌ yadda niŋidib la, ka noki ya saŋa la n tum line a suꞌum. ⁶Keli ka ya noor pianꞌad more mimilim wuu yaarum ne, ka baŋ yaname na lebis line nar n tis soꞌ mekama.

Puꞌusug

⁷Tikikus one a ti baꞌabinoŋir ne ti sida suŋid ne ti tumtum tiraan n a yinni ne Zugsob la na yeli ya m yela. ⁸Lin yela ka m tum o ya saꞌan na, ye ya baŋ tiname a siꞌem, ka kpeꞌeŋi ya sunya. ⁹Ka m tum on ne Onesimus one a ti sida baꞌabinoŋir ka aa ya teŋ nid la. Ba na yeli ya line wusa naamid kpela.

¹⁰Aristarkus one ka ti laꞌam be sarega ni la puꞌusidi ya. Maak one a Barnabas ansiŋ me puꞌusidi ya. M pun deŋim paꞌali ya o yela, ka o yaꞌa kena yanam on diꞌem o ne nuꞌusa ayiꞌiŋa. ¹¹Ka Josua one ka ba buon Justus la me puꞌusidi ya. Nidib atanꞌ bama maꞌaa a Jew dim bane laꞌam tum ne man ye Winaꞌam soꞌolim la yela keŋ tuon. Ban niŋid siꞌem la bugun ne m suunr. ¹²Epafras one a ya teŋ nid ka a Yesu Kiristo tumtum la me puꞌusidi ya. O tenꞌesidi ya yela saŋa mekama ka sosid Winaꞌam ne nimmua, ye ya ziꞌe kiŋ kiŋ ka biꞌ ka baŋ suꞌuŋa line ka Winaꞌam bood. ¹³M nye on tum namisi ya yela ne Laodisea dim ne Hierapolis dim la. ¹⁴Luuk one a duꞌata kan ka ti noŋ la ne Demas puꞌusidi ya. ¹⁵Puꞌusimi ti baꞌabiis bane be Laodisea teŋin, ne Nimfa ne Winaꞌam nidib bane laꞌased o yin la.

¹⁶Ya yaꞌa karem gbauŋ kaŋa nidibin n naae, keli ka ba karemi li n tis Winaꞌam nidib bane be Laodisea men. Ka yanam me karem Laodisea dim gbauŋ la.

¹⁷Yelimi Arikipus ye on a yinni ne Zugsob la, o gosimi o tuuma line ka o diꞌe Zugsobin la ka tum li naae.

¹⁸Mam Pauli sob puꞌuskaŋa ne m meŋ nuꞌug. Tenꞌesimi man be sarega ni la yela.

Winaꞌam yelsum na be ne ya.