3 JOON

JOON

n sob gbauŋ atanꞌ daan la nwa

¹Man one a kpeenm n sobid neꞌeŋa n tisid fun Gaius, on ka m sid noŋ ameŋa la.

²M zua noŋire, m sos Winaꞌam ye fu siꞌel wusa na a suꞌum, ka fu na be laafe, ka miꞌ ye fu siig mor laafe Winaꞌam tuon. ³Li daa malisi m bedego ti zuanam sieba daa paae na ka yel fun dol yelsida la suꞌuŋa siꞌem la. Ti miꞌ ye fu beilim wusa fu a yelsida daan. ⁴Siꞌel pu niŋi m malisim gaad man wum ye m biis dol yelsida laa.

⁵M zua noŋire, fun a yelsida sob la, ne fun niŋ siꞌel n suŋ yadda niŋidib la hale laꞌam ne ban a saam la.

Gaius la yela

⁶Ba tuꞌasi fu noŋilim yela n tis Winaꞌam nidib bane be kpela. Suŋim ba ka ba keŋ tuon. Kel ka fun suŋi ba siꞌem la malis Winaꞌam. ⁷Bozugo Kiristo tuuma yela, ka ba yi ken, ka zanꞌas suŋir din ka nidib bane pu dol Kiristo la bood ye ba tisi ba la. ⁸Dinzugo li suꞌum ka ti suŋ ti tumtum taaba bama nwa ka ba mool sida pianꞌad la n tis nidib.

Diotrefes ne Demetrius la yela

⁹M daa sob siꞌel n tis Winaꞌam nidib bane bee fu teŋin la. Ka Diotrefes one bood ye o niŋi ba tuongat la pu siak man sob siꞌel la. ¹⁰M yaꞌa kena m na tuꞌasi ya on tum siꞌel ka maꞌad tisidi ti la. Ka lin pu siaꞌal oo. O me zanꞌas ti taaba diꞌer ka viꞌid bane bood ye ba diꞌe ba, ka kadi ba yiis Winaꞌam nidib saꞌan.

¹¹M zuasuŋ, da tuꞌas line a bun beꞌede. Tuꞌasim line a suꞌum. On mekama tum dine a suꞌum ane Winaꞌam nid. On mekama tum dine a bunbeꞌed pu miꞌ Winaꞌam.

¹²Soꞌ wusa pianꞌad Demetrius yela suꞌum, hale yelmeŋir dim la me pianꞌade o yela suꞌum. Ka tinam me di o yelsida kaset. Ka fun meŋ miꞌ ye ti kaset la a sida.

Puꞌusug

¹³M mor pianꞌad bedego na yel uf, ka pu bood ye m sobi niŋ gbauŋine, ¹⁴ka tenꞌes ka m na kena kaae uf dabisa ayi nwa ni, ka ti pianꞌa tis taaba.

¹⁵Sumalisim be ne uf.

Fu zuanam wusa puꞌusid uf. Puꞌusimi ti zuanam yinni yinni tisi ti.