2 TIMOTI

Paul n sob gbauŋ ayi daan n tis

TIMOTI

la nwa

¹Man Paul one ka Winaꞌam boodim ke ka m a Yesu Kiristo Tumtum ka li dol nyovur noziꞌelug line be Yesu Kiristo saꞌan. ²M sobid gbauŋ kaŋa tisid Timoti one liebi m binoŋir la.

Ti Baꞌ Winaꞌam ne ti Zugsob Yesu Kiristo na tis uf yelsum ne nimbaanlzoor ne sumalisim.

Puꞌusug ne kpeꞌeŋir la yela

³M puꞌusid Winaꞌam bareka one ka m dol ne popielim wenne m yaaname da dol siꞌem la. Saŋa wusa m tenꞌesidi ya yela m Winsosugin. ⁴M pu tami fu susaꞌaŋ la yela, ka bood hale yuꞌuŋ ne nintaŋ wusa ye m nye uf ka mor sumalisim. ⁵M tenri fu yadda niŋir ameŋa la line deŋi be fu yaapoꞌa Lois ni ka me be fu ma Yunis ni la. M miꞌ ye li me be fu ni. ⁶Lin la ka m tiend uf ye fu ke ka Winaꞌam piini line be fu sunfin la, ka o da tis uf saŋkan ka m da paꞌal m nuꞌusi fu zugin la maligim nie. ⁷Ka Winaꞌam tisi ti o Siig Suŋ ye ti mor paŋ ne noŋilim ne meŋ gbanꞌar ka kaꞌ ye ti zo dabiem.

⁸Dinzugo da zot nyan ye fu yel line ka fu miꞌ ti Zugsob yela, ka me da zot nyan ne mam one a sarega nidi o yela laa, amaa me diꞌem namisug line aa fu din labasuŋ la yela, ka tiaꞌ ne Winaꞌam paŋ, ⁹one faann ti ka buoli ti ye ti a o ninsuma la, ka li kaꞌane tiname tum siꞌel la zugo, amaa li ane o meŋ boodim ne o popielim piini line ka o tisi ti Yesu Kiristo ni, yuma bane gaad ka dunia nam pu pinꞌil la. ¹⁰Ka popielim piini la yuꞌun nie nyain Yesu Kiristo lebigin la, one faann ti ka saꞌam kuꞌum paŋ, ka ke ka ti nye nyovur line ka kum kaeꞌ, ka li yi Winaꞌam labasuŋin la na.

¹¹Labasuŋ la yela ka o gaŋi m ye m a Kiristo Tumtum la ne one paꞌan ka lem mooni li. ¹²Ka yelkaŋa zug ka m namisid amaa m pu zoti li nyan ne; ka m miꞌ one ka m niŋ o yadda, ka miꞌ ye o na nyaŋe guri line ka o guꞌuli m la suꞌuŋa, n ti paae Winaꞌam saria kadib daar la.

¹³Dolisim paꞌalsuŋ line ka m paꞌal uf la ne noŋilim ne yadda niŋir line be Yesu Kiristo ni la. ¹⁴Guri yelsida line ka Winaꞌam Siig Suŋ guꞌul uf la, one be ti ni la.

¹⁵Ya pun miꞌ ye, bane be Asia la wusa basi m ne, ka Pigelus ne Hermogenes a nimbane bee ba soogin.

¹⁶Ti Zugsob na zo Onesiferus yidim nimbaanlig ka o yiti kaadi m ka m sunf maꞌed, ka pu zot nyan ne ban loo m ne baans laa. ¹⁷Ka on paae Room na la, o ia man ne nimmua ka nye m. ¹⁸Saria kadib daar la ka Zugsob na zo o nimbaanlig. Ka fu pun miꞌ suŋir kan ka o suŋim Efesus teŋin la.

¹M biiga, kpeꞌeŋim fu meŋ ne popielim piini line be Yesu Kiristo ni la. ²Ka fun wum siꞌel mam saꞌan nidib bedego tuon la, tolisimi li tis yelsida dim bane na tunꞌe paꞌal sieba men. ³Diꞌem namisug line a fu din, fun a Yesu Kiristo sogia la zug. ⁴One tum sogia tuuma baꞌa kaeꞌ ne bane kaꞌa sogianam yela nii, amaa o bood ye o maꞌae o kpeenm la sunf. ⁵Ka soꞌ yaꞌa bood ye o di yaꞌan diꞌema zinꞌigin, o ku nyaŋe diꞌe piini asee ka o dolis diꞌema la wada suer. ⁶Li nar ka kpaad suŋ one tum tuuma hale deŋim diꞌe o zuud la nyood. ⁷Tenꞌesimi mam yel siꞌem la, ka Zugsob na ke ka fu baŋ siꞌel wusa gbin.

⁸Tenꞌesim Yesu Kiristo yela, one da vuꞌug kumin la, one da a naꞌab David yaaŋ wen wuu labasuŋ kan ka m moon la yet siꞌem la. ⁹Labasuŋ kaŋa zug ka m namisid ka ba gbaꞌ m ne bana wen wuu tuumbeꞌed sob ne. Amaa Winaꞌam pianꞌad la pu gbaꞌ ne bana. ¹⁰Neꞌeŋa zug ka m modigid siꞌel wusa ni ye bane ka Winaꞌam gaŋ la me nye faangir line be Yesu Kiristo ni la, laꞌam ne naꞌasi line kaꞌ naare. ¹¹Yelmeŋir nwa ye,

“Ti yaꞌa laꞌam kpi ne o,

ti me na voe ne o.

¹²Ka ti yaꞌa modig,

ti me na mor naꞌam ne o.

Ti yaꞌa zanꞌas o,

o me na zanꞌasi ti.

¹³Ti yaꞌa kaꞌ yelsida dima,

o na kpelim a yelsida sob,

bozugo o ku tiake o meŋ a siꞌem laa.”

Tumtum suŋ na a siꞌem la yela

¹⁴Tienmi fu nidib la neꞌeŋa, ka saꞌali ba Zugsob la tuon, ka ba da mor noŋgban nwaꞌar pianꞌad yelaa, line pu tum suꞌum ka kulim saꞌamidne bane wum la. ¹⁵Kpeꞌeŋim ka fun noki fu meŋ n tis Winaꞌam ka fu tuuma paa Winaꞌam yaꞌam, ka me a one pu zot nyan ne o tuuma, ka sid paꞌan pianꞌad line a yelsida la. ¹⁶Zanꞌasim pianꞌayood line pu dol Winaꞌam suere; ka li na kpenꞌes nidib suebeꞌedin ka ba suebeꞌed dolim la na ke ka ba zanꞌas Winaꞌam yela. ¹⁷Ka ba pianꞌad la, na wen wuu fenꞌekudugu onbid niŋgbiŋ yaligid siꞌem la. Ka paꞌaniba ayi bee ba soogin, ka ba ane Himeneus ne Piletus, ¹⁸bane bas yelsida la suer ka yet ye kuꞌum vuꞌugir la gaadeya sa, ka me saꞌamid ninsieba yadda niŋir. ¹⁹Amaa Winaꞌam eenbkpiꞌuŋ la ziꞌe kiŋ kiŋ, ka o zanbin la sobne anina ye, “Zugsob la miꞌ bane a o nidib,” Ka lem sob ye, “Bane wusa sid ye ba ane Winaꞌam nidib la, basimi ba tuumbeꞌed.”

²⁰Yir titaꞌar pu mor salima bee anzurifa laꞌad maꞌaa ne, amaa daad ne yaꞌad bunam me be, ka ba yiisid sieba dabis suma daar, ka sieba me a daar wusa tuuma laꞌad. ²¹Ka soꞌ yaꞌa pie o meŋ wuu ban pied laꞌad la siꞌem la, o na lieb tuumsuma lauk, line ka ba gaŋ ka li nar ye yidaan noki li tumi o tuumsuŋ siꞌa.

²²Zanꞌasim dasam boodim line a beꞌed ka kpeꞌeŋ ne nimmua ye fu a yelsida sob ka mor yadda niŋir ne noŋilim ne sumalisim, laꞌam ne bane puꞌusidi ti Zugsob ne popielim la. ²³Zanꞌasim yalim buꞌosyaalis ka fu miꞌ ye li more zaba. ²⁴Mit ka Zugsob tumtum a one noŋ zaba. Amaa o naꞌasim nidib wusa ka a paꞌansuŋ ka me mor suguru, ²⁵ka nok yaꞌam saꞌal ne o dataas, ka daasiꞌere Winaꞌam na ke ka ba tiak ka baŋ yelsida la, ²⁶ka luak Sutaana bendugun la line ka o deŋi bend ye ba tumi o boodim la.

Naar Saŋa la yela

¹Baŋim neꞌeŋa. Li na toe hale n tis Winaꞌam nidib, dunia naar saŋa la, ²nidib na a bane noŋi ba meŋ, ne bane noŋ ligidi hale, ne bane nweꞌedi ba nyoꞌog, ne bane mor nyeesim, ne bane tuꞌud nidib, ne bane pu siakid ba saamnam ne manam noya, ne bane pu mor bareka puꞌusum, ne bane pu dol Winaꞌam suere ³ne bane pu noŋ ban laꞌam kpin sieba, ne bane pu mor soꞌ nyoogo, ne bane saꞌami ba taaba yuda ne bane pu gbanꞌadi ba meŋa, ne bane ka ba taaba zoti ba dabiem, ne bane kis line a suꞌum, ⁴ne filim filim dim, ne haya dim, ne titaꞌalnam ne bane bood line na maꞌedi ba meŋ sunya n gaad Winaꞌam la. ⁵Ba niŋidne wuu ba dolne Winaꞌam suer, amaa ka pu paꞌani li paŋa. Zanꞌasim nimban nam buudi.

⁶Ka ba sieba suaꞌadi kpenꞌed yaani maꞌad poꞌab bane kaꞌ yaꞌam, ka tuumbeꞌed peꞌeli ba, ka ba yaꞌamleog nyaŋedi ba, ⁷ka ba kelisid soꞌ mekama ka ku nyaŋe baŋ line a sida laa, ⁸ka li wen wuu Jannes ne Jambres da zanꞌas Moses siꞌem la. Ala men ka nimbama me zanꞌasid sida la, bane ka ba tuumbeꞌed saꞌami ba yaꞌam, ka ba pu niŋ Yesu Kiristo yadda ne sidaa. ⁹Amaa nidib wusa na nye ka ba ane zon wuu Jannes ne Jambres ka ba tuuma ku keŋ tuone.

Paꞌalug

¹⁰Fu miꞌ m paꞌalug la wusa ne m tuuma niŋir ne m beilim potenꞌer, ne m yadda niŋir, ne suguru ne m noŋilim ne m modigir, ¹¹ne m namisug Yesu dollim yela, ne m fara. Fu miꞌ line niŋi m Antiok teŋin, ne Ikonium teŋin, ne Listra teŋin, ne ban namisi m siꞌem Yesu yela la. Ka Zugsob la faann m neꞌeŋa wusa ni. ¹²Asida ka m ye bane wusa n bood ye ba dol Winaꞌam n a yinni ne Yesu Kiristo, ba na namisi ba. ¹³Ka nimbeꞌednam ne zam dim tuumbeꞌed na kpelim peꞌesid hale, n maꞌad nidib ka ba kpenꞌesidi ba meŋ damaꞌamin. ¹⁴Amaa fu nee, kpelim tenr lin ka fu zamis ka siak la kiŋ kiŋ; ¹⁵ka fu miꞌ bane saꞌan ka fu zamisi li. Ka fu biilimin sa fu baŋ Winaꞌam gbauŋ suꞌuŋa line na nyaŋe tis uf yaꞌam ye fu niŋ Yesu Kiristo yadda ka nye faangir. ¹⁶Ka Winaꞌam gbauŋ wusa yine o saꞌan na ka suŋidi ti n tisidi ti popielim paꞌalug ne saꞌalug line bigisid beꞌed ne suꞌum ne zamisug wusa. ¹⁷Dau kane dol Winaꞌam na naae o zamisug, ka tiꞌeb ne tuumsuŋ wusa.

¹M tis uf noor Winaꞌam ne Yesu Kiristo tuon, one na ti kad bane voe ne bane kpi saria la ne, o lebig na ne o naꞌam soꞌolim yela, ²ye fu tiꞌeb suꞌuŋa mool Winaꞌam pianꞌad saŋa suŋ ne saŋa kane kaꞌ suꞌum wusa, ka saꞌani ba ne noŋgban malisiŋ n paꞌani ba ka kpeꞌeŋidi ba ka mor suguru saŋa wusa. ³Bozugo saŋa na kena ka nidib ku nyaŋe modig ne sida paꞌalug laa, amaa ba doli ba meŋ yaꞌamleog boodim n dol paꞌanib bedego bane na paꞌal line malisi ba toba ni maꞌaa. ⁴Ka ba na fendig ka ku kelis sida laa ka lee kelisid line a solima. ⁵Amaa fu nee, gbanꞌami fu meŋ ka modig di fara, ka a one moon Winaꞌam labasuŋ, ka tumi fu tuuma wusa.

⁶Ka saŋa paaeya ye m vum na naae, m kuꞌum la wenne maan ka ba maal tis Winaꞌam. ⁷M zab zabsuŋ la nyaŋe li, ka zo paae zua la ben, ka gur yelsida kan ka ti siak la yela la ka li pu saꞌam. ⁸Ka nyaŋer nyood digi guri m line a popielim ka Zugsob one a li yelsida saria kat la na tisi m dabis kan daar. Ka li kaꞌane mam maꞌanee, amaa ban wusa more o lebig na tiꞌir la.

Paul toluŋ n tis Timoti meŋ

⁹Kpeꞌeŋi fu meŋi keenn m saꞌan na nannanna. ¹⁰Bozugo Kresens keŋ Galatia, ka Titus keŋ Dalmatia, ka Demas noŋ dunia kaŋa ka basi m ka keŋ Tesalonika. ¹¹Ka Luuk gullim kpelim be m saꞌan. Dol Maak na ka o mor suŋir ne m tuuma la zinꞌigin. ¹²M tum Tikikus Efesus teŋin. ¹³Fu yaꞌa kenna, fun on more m waad fukan ka m daa bas Kaapus saꞌan Troas teŋin la, ne gbana ka li kas kas ane gbauŋ bane ka ba sob ne konbid gbauŋ la.

¹⁴Alekizanda one kunt siꞌelnam la niŋi m beꞌed hale, ka Winaꞌam na yo o li sam. ¹⁵Guꞌusimi fu meŋ ne o ka o zanꞌasi ti pianꞌad la ne kpiꞌeuŋ.

¹⁶M deŋir saria kadib la, soꞌ pu ziꞌeni m nyaꞌaŋ ka suŋi ma. Ba wusa bas man ne. Amaa ka m sosid Winaꞌam ye o tisi ba suguru. ¹⁷Ka Zugsob la daa ziꞌe m nyaꞌaŋ ka tisi m paŋ ye m mool pianꞌad la suꞌuŋa ye bane kaꞌ Jew dim la bedego wum. Ka m daa nye faangir gbigim noorin. ¹⁸Zugsob la na faann m line wusa a beꞌed zinꞌigin ka more man kpenꞌesi o naꞌamin. O na nye naꞌasi dine kaꞌ benne. Ami.

Puꞌusug

¹⁹Puꞌusum Prisila ne Akuila, ne Onesiferus yidim. ²⁰Erastus kpelim Korint teŋin. Ka Trofimus benꞌedne ka m ke ka o kpelim Miletus teŋin. ²¹Kpeꞌeŋimi fu meŋi kena, ka sapal nyaan paae. Yubulus ne Pudens ne Linus ne Klaudia ne ti baꞌabiis wusa puꞌusid uf.

²²Ti Zugsob na be ne fu siig.

Winaꞌam yelsum na be ne fu.