2 TESALONIKA DIM

Paul n sob gbauŋ ayi daan la n tis

TESALONIKA DIM

la nwa

¹Man Paul ne Silvanus ne Timoti sobid gbauŋ kaŋa n tisid yanam Winaꞌam nidib bane be Tesalonika teŋin la n be ti Baꞌ Winaꞌam ne Zugsob Yesu Kiristo ni la.

²Ti Baꞌ Winaꞌam ne ti Zugsob Yesu Kiristo na tisi ya yelsum ne sumalisim.

Winaꞌam saria kadib Zugsob ken la na yela

³Ti baꞌabiise, yanam yadda niŋir ne ya yinni yinni noŋilim ne taaba n nobugid bedego la zug, ka li nar ka a suꞌum ye ti puꞌus Winaꞌam bareka saŋa wusa ya zug. ⁴Ka linzug ka tinam meŋ nweꞌed nyoꞌog ya yela Winaꞌam nidibi laꞌased zinꞌig siꞌa wusa. Ti nweꞌed nyoꞌog ya modigir ne ya yadda niŋir ne Winaꞌam, mugusug ne namisug line paadi ya la zug.

⁵Lina paꞌal ye Winaꞌam kad saria ne yelsida ye o maali ya ka ya nar ne ya nam be o soꞌolimin la, ka li ane yanam be o soꞌolimin la zug ka nidib namisidi ya. ⁶Winaꞌam ane sida daan ka na namis bane namisidi ya la, ⁷ka ke ka yanam bane namisid la vuꞌus ne tinam, saŋkan ka Zugsob Yesu na ti yi arazana ni leb na, ka kena ne o malek bane mor paŋ titaꞌar la, ne bugum pielim ⁸ka namis bane ziꞌ Winaꞌam ne bane pu siak ti Zugsob Yesu labasuŋ la. ⁹Ba na diꞌe namisug line a saꞌuŋ ka kaꞌ naare ka na yi Zugsob la saꞌan ne o naꞌam paŋ titaꞌar la ni daar kan ka o na kena la. ¹⁰Saŋkan la ka ti na nye o, ka o na be o meŋ nidib ne bane wusa niŋ o yadda la ni. Ka ti na tis o naꞌasi. Bozugo yanam meŋi siak ti labaar la ka ya na ti bee ba saꞌan.

¹¹Linzug ka ti sosid Winaꞌam tisidi ya saŋa wusa ye o na ke ka ya nar ne yanam be o soꞌolimin la. Ka me sos o ye o paŋ na tisi ya popielim wusa line ka ya mor yaꞌamleog la, ka ke ka ya yadda niŋir tuuma na tum paae li ben, ¹²ye ti Zugsob Yesu bee ya ni ka yanam me bee o ni. Ka ya zanꞌasa na nye zunꞌor. Li wusa yine Winaꞌam ne Zugsob Yesu Kiristo ni na.

Tuumbeꞌed daan la yela

¹M ye m saꞌali ya ti Zugsob Yesu Kiristo la na ti kena la, ne tiname na ti laꞌas taaba n tuꞌos o la yela. Ti baꞌabiise, ti belimi ya ²ye ya yaꞌa wum labaar line yel ye Zugsob la dabisir pun kena, ya da ke ka daamug ne kikirug kpelim kpenꞌ ya potenꞌerine. Li yaꞌa ane ye soꞌ yel ala ka ba tenꞌes ye li yi ne Winaꞌam Siig Suŋ la ni, bee soꞌ paꞌal ala, be soꞌ karem gbauŋ ka tenꞌes ye li yi ne ti saꞌan, ³yanam da ke ka ba soꞌ maꞌa ya lina wusa nii. Daar kan la ku kenaa, asee ka saŋkan ka nidib bedego laꞌase zanꞌas Winaꞌam la kena, ka soꞌ nie ya soogin ka a tuumbeꞌed daan, on sid na keŋ bugum teŋin. ⁴O na kisig dine wusa ka ba buon ye Winaꞌam la, laꞌam ne siꞌelnam wusa dine ka nidib zunꞌodi li la, ka duꞌos o meŋ n gaadi ba wusa. Hale ka o na kpenꞌ Winaꞌam puꞌusum yin n zinꞌi ka na yel ye o ane Winaꞌam.

⁵Man daa nan be ya saꞌan la, m daa yeli ya lin wusa. Ya pu tenra? ⁶Ka siꞌel be, ka ya miꞌ li, ka li nam viꞌi tuumbeꞌed daan la, ka li saŋa yaꞌa ti paa na, tuumbeꞌed daan la na nie na. ⁷Tuumbeꞌed suaꞌada pun tum sa. Ka one nam viꞌi tuumbeꞌed daan la, na kpelim niŋ ala, n ti paae saŋkan ka o keŋ ka bas paalo. ⁸Ka tuumbeꞌed daan la yuꞌun na nie na. Ka Zugsob Yesu noor pebisim na ku o. Ka o ken la neesim na saꞌam o. ⁹Sutaana na ke ka tuumbeꞌed daan la kena. Ka o na mor paŋtitaꞌar, ka maan ziri bunnyalima, ¹⁰ka maꞌ damaꞌam buudi wusa n maꞌ nidib bane na nye saꞌuŋ, ban pu diꞌe sida ka pu noŋi li n nye faangir la zug. ¹¹Linzug ka Winaꞌam na tisi ba ziri potenꞌer, ka ba siak ziri, ¹²ye nidib bane wusa pu siak sidaa, ka bood tuumbeꞌed la, na nye saria kadib line a saꞌuŋ.

Ti puꞌusid Winaꞌam bareka la yela

¹³Ti baꞌabiise, bane ka Zugsob noŋ la, li nar ka ti puꞌus Winaꞌam bareka saŋa wusa ya zug, on daa gaŋi ya pinꞌilugin ka o Siig Suŋ one ke ka ya aa o nidib bane a suꞌum nyain la ne ya sida siakir la ke ka ya nye faangir la zug. ¹⁴Winaꞌam daa buoli ya ye ya nye faangir, ne labasuŋ kane ka ti daa mooli ya saꞌan la poogin, ye ya nye ti Zugsob Yesu Kiristo naꞌasi laꞌam ne o. ¹⁵Dinzugo ti baꞌabiise, ziꞌenimi kiŋ kiŋ, ka doli yelsida line ka ti pianꞌad ti gbauŋ ban ka ti sob la ni.

¹⁶Ti puꞌusid ti Zugsob Yesu Kiristo o meŋ ne ti Baꞌ Winaꞌam on noŋi ti, ka tisi ti sukpiꞌem kane kaꞌ naare ne tiꞌir suŋ o popielim zug la, ¹⁷ka sos o ye o na kpeꞌeŋi ya sunya, ka tisi ya paŋ ye ya niŋ siꞌel wusa line a suꞌum ka me yel line a suꞌum.

Puꞌusum Winaꞌam tisi ti

¹Baꞌasugo, ti baꞌabiise, sosimi Winaꞌam tisi ti, ye ti Zugsob labaar la na kpelim yadigid toꞌoto ka nye naꞌasi wuu lin daa niŋ yanam ni siꞌem la. ²Ka sos o ye o na faann ti nimbeꞌednam saꞌan, ka li kaꞌ nidib wusa siak Winaꞌam labaar laa. ³Ka Zugsob la lee a yelsida daan, ka na tisi ya paŋ ka guri ya, ka Sutaana da nyaŋe yaa. ⁴Ka Zugsob la ke ka ti miꞌ ya poog, ka miꞌ ye ya niŋid tiname yeli ya siꞌel la, ka na kpelim niŋid ala. ⁵Ti sosid Zugsob la ye o na ke ka ya sunya noŋ Winaꞌam, ka ya modig wuu Kiristo modig siꞌem la.

Saꞌalug

⁶Ti baꞌabiise, ti yeli ya ne ti Zugsob Yesu Kiristo paŋ ye ya basi ya baꞌabiis sieba bane zinꞌi ka mor gbanyaꞌam, ka pu dol paꞌalug kane ka ti tisi ya laa. ⁷Yanam meŋ miꞌ suꞌuŋa ye li nar ka ya tuꞌas tinam daa tum siꞌem la. Tinam daa be ne ya la, ti daa kaꞌ gbanyaꞌanama, ⁸ka pu dit soꞌ diib zaalim ka pu yoo, ka lee tum bedego nintaŋ ne yuꞌuŋ, ka ti yela da daami yaa. ⁹Ti daa niŋid ala, ka li kaꞌ ye ti pu mor li suere, ka lee ane ye ya nye tinam tum siꞌem la ka tuꞌasi li. ¹⁰Tinam daa nam be ne ya la, ti daa yeli ya ye, “One pu tum, on da dii.”

¹¹Ti wum ye sieba be ya saꞌan n zinꞌi ka mor gbanyaꞌam ka kpenꞌed nidib yela ni, ka pu tum na. ¹²Linzug ka ti yel nimbama, ka saꞌali ba ne Zugsob Yesu Kiristo paŋ ye ba tum ba tuuma baanlim, ka diisi ba meŋ. ¹³Ti baꞌabiise, da genn ka bas tuumsuma maalugo.

¹⁴Soꞌ yaꞌa zanꞌas ka pu siak line ka ti yeli ya gbauŋ kaŋa ni laa, yanam baŋim o, ka luak ne o ka ke ka nyan di o. ¹⁵Da niŋ o wuu o ane ya dataa, ka lee saꞌal o wuu ya baꞌabiig.

¹⁶Ti Zugsob one a sumalisim daan la na tisi ya sumalisim saŋa wusa ne siꞌel wusa ni, ka na be ne ya wusa.

¹⁷M sobid ne m meŋ nuꞌug ye, man Paul puꞌusidi ya. Anwa ka m sobid ka zanbin m gbana ni wusa.

¹⁸Ti Zugsob Yesu Kiristo yelsum na be ne ya wusa.