2 PIITA

PIITA

n sob gbauŋ ayi daan la nwa

¹Man Simon Piita one a Yesu Kiristo yamug ne o Tumtum la sobid gbauŋ kaŋa tisid bane ka ti Faangid Yesu Kiristo ne ti Baꞌ Winaꞌam popielim ke ka ya niŋ o yadda, ka li a suꞌum ka wenne tiname niŋ o yadda siꞌem la.

²Winaꞌam na peꞌesi ya yelsum ne sumalisim bedego, yaname baŋi one a ti Zugsob Yesu la.

Winaꞌam n gaŋi ti la beilim n a siꞌem la yela

³Winaꞌam paŋ la tisi ti siꞌel mekama line na ke ka ti be nyovur beilim line doli o suer, ka li yi ne tiname baŋ one buoli ti ye ti diꞌe o nyalima beilim ne o popielim la. ⁴Ka li yine neꞌenamin ka o tisi ti o noziꞌelug line a suꞌum hale ye ya luak saꞌuŋ line be dunia ni ka yi saalib yaꞌambeꞌed boodimin, ka lee lieb bane a wuu Winaꞌam a siꞌem la.

⁵Dinzugo kpeꞌeŋimini ya meŋ ka popielim paꞌasi ya yadda niŋir ni, ka baŋir paꞌasi ya popielimin, ⁶ka meŋ gbanꞌar paꞌasi ya baŋirin, ka modigir paꞌasi ya meŋ gbanꞌarin, ka Winaꞌam dollim ameŋa paꞌasi ya modigirin, ⁷ka ya Winaꞌam dollim ameŋa paꞌasi ya yelsum maalug ne ya baꞌabitaaba, ka ya yelsum maalug ne ya baꞌabitaaba paꞌas noŋilim. ⁸Bozugo ya yaꞌa mor neꞌenam wusa, li na ke ka ya kpiꞌem ne ya Winaꞌam tuuma ka li nobug ka ti baŋ Zugsob Yesu Kiristo yela. ⁹Ka one kaꞌa neꞌenama wenne zunzoŋ one ziꞌ yela ka tam ye Winaꞌam pun pie o tuumbeꞌed la yiis nyain.

¹⁰Dinzugo m baꞌabiise, kpeꞌeŋimi ne nimmua ka ke ka Winaꞌam buol ka gaŋi ya la niŋ ameŋa, ka ya yaꞌa niŋ neꞌeŋa ya ku guꞌuŋ baa biꞌelaa. ¹¹Ka ya na nye suer suŋ hale n na kpenꞌ Yesu Kiristo one a ti Zugsob ne ti Faangid la soꞌolimin, lin ka li saŋa kaꞌ ben la.

¹²Linzug ka m bood ye m tienn ya saŋa mekama ne yelbama, hale baa yaname pun deŋim baŋi li ka gbanꞌe kiŋ kiŋ ne yelsida kan ka ya diꞌe la. ¹³Ka mam nam voe la, m tenꞌes ye li nar ka m tienn ya n laki ya yaꞌam, ¹⁴mam sadigim baŋ ye li kpelim biꞌela ka m niŋgbiŋ la bodig wuu ti Zugsob Yesu Kiristo paꞌali m siꞌem la. ¹⁵M na ke ka m yaꞌa ti kaeꞌ ka ya na nyaŋe tienn yelbama saŋa mekama.

Piita n nye Kiristo naꞌam la yela

¹⁶Ti pu dol solima line yi ninsaalib yaꞌaminee, saŋa kan ka ti yeli ya ti Zugsob Yesu Kiristo paŋ ne o ken la naa, amaa ti sid nye o naꞌam zuꞌe siꞌem la. ¹⁷Ka o diꞌe naꞌasi ne zunꞌor line yi ti Baꞌ Winaꞌam ni la, ka kukor yi Winaꞌam paŋ nyaluŋun na yel ye, “Oŋa a m binoŋir, one ka m sunf maꞌed ne o yela hale.” ¹⁸Ka ti laꞌam da be ne o zuer zug, ka wum kukor kaŋa line yi arazana ni la.

¹⁹Ka li maligim ke ka ti baŋ ye Winaꞌam nodiꞌesidib pianꞌad la a sida. Li a suꞌum ka ya guꞌusi ne yelbama; ka li wenne fitla line nie lik zinꞌigin n ti paae beog yiligir ka Kiristo one a nwaddar la yuꞌun nie ya sunya ni. ²⁰Yelkane a yiiga ane ye ya baŋ neꞌeŋa ye Winaꞌam nodiꞌesidib pianꞌad line sob Winaꞌam gbauŋin la baa yinni pu yi ninsaal potenꞌerin naa. ²¹Li me da pu yi ninsaalib saꞌan naa, amaa Winaꞌam Siig Suŋ ke ka ba pianꞌ pianꞌad line yi Winaꞌam saꞌan na.

Ziri paꞌanib la yela

(Juud 4-13)

¹Ka ziri nodiꞌesidib me da be nidibin la wenne ziri paꞌanibi na be ya saꞌan la. Ba na suaꞌ mor ziri paꞌala line ken ne saꞌuŋ, hale n ti kiꞌisid Zugsob one daꞌa ba la ka li ke ka ba nye saꞌuŋ toꞌoto. ²Ka yadda niŋidib bedego na doli ba tuumyaalis la ka line na ke ka nidib pianꞌad beꞌedne yelsida la. ³Ba kpianꞌasug na ke ka ba tisi ya ziri paꞌala ye ba nye nyood. Kudumin la sa ka ba koosug pun da deŋim guri ba ka ba saꞌuŋ me nie guri ba.

⁴Ka Winaꞌam da pu tis maleknam bane tum tuumbeꞌed la suguru, ka lobi ba bas bugum teŋin niŋi ba bumbok zuluŋ line a zibisug guri saria kadib daar. ⁵Ka me pu niŋ suguru ne kudumin dima ka lee tilig Noa one da moon yelsida la ne o yidim babayopoi, saŋkan ka Winaꞌam da ke ka kuꞌom uak dunia wusa ne nidib bane pu dol Winaꞌam. ⁶Ka me koos Sodom ne Gomorra teens beꞌed ka ke ka bugum dii ba, ka ba lieb tampeligim ka li a saꞌalug n tis bane pu dol Winaꞌam suer la. ⁷O tilig Lot one a yelsida sob, amaa o sunf da saꞌam hale ne tuumbeꞌed dim ne ba tuumyaalis la. ⁸Lot one a yelsida sob la n da be ne ba daar wusa ka nyet ka wum ba tuumbeꞌed la, ke ne ka li saꞌam o popielim sunf la. ⁹Li yaꞌa a wala Zugsob la miꞌ on na niŋ siꞌem faaenn bane dol o ameŋa, ba makir puugin, ka niŋ tuumbeꞌed dim la namisugin n gur saria kadib daar. ¹⁰Ka li kas kas ane bane dol dianꞌad yaꞌamleog boodim ka neꞌes Winaꞌam kpiꞌeuŋ laa.

Ba mor nyeesim ne titaꞌalim ka pu zot dabiem ne ban na tuꞌu bane mor paŋ n bei agol la, ¹¹hale ka maleknam bane mor paŋ n kpiꞌemi gati ba la pu tuꞌudi bane be agol la Zugsob la tuon. ¹²Ka nimbama nwa lee wenne bunkonbid ne. Ba miꞌilim bee ba niŋgbiŋin ka ba pu tenꞌesida, ka be ne ye saalib gbanꞌe ba ku. Ba pianꞌad beꞌed ne lin ka ba ziꞌ, ka na saꞌam wuu bunkonbid la ne.

¹³Ba na nye yelbeꞌed ba tuumbeꞌed la yela. Ba sunya malis ne lin ka ba niŋid ka li a ba niŋgbina boodim, paalo ni. Ba ane gbada ne dianꞌad dim ban diꞌemid ka me laꞌam dit ne ya la. ¹⁴Ba yaꞌam gbanꞌene poꞌasaꞌuŋ ka pu tigid ne tuumbeꞌede. Ba panꞌasid bane sunya pu kpiꞌema, ka miꞌ hale ban na niŋ siꞌem n diꞌe ba fufum beꞌed boodim. Winaꞌam po noor ne ba. ¹⁵Ba bas suesuŋ la ne ka bodig, ka dol Balaam one a Beor biig la suer, one bood tuumbeꞌed yood la. ¹⁶Amaa Balaam da nye saꞌalug o tuumbeꞌed la yela. O buŋ pianꞌ o ne ninsaal kukor ka ke ka o bas zolim tuuma la.

¹⁷Nimbama wenne bulnoya bane pu bun kuꞌom, ka wenne kpaandug line ka sisiꞌem daꞌad. Ka Winaꞌam tiꞌeb zinꞌig kane a lik titaꞌari n guri ba. ¹⁸Ba mor ne pianꞌa yood nweꞌedi nyoꞌod ka mor tuumyood yaꞌamleogo panꞌasid nimbane pinꞌil ye ba yi nimbane ka ba beilim a tuumyood zinꞌigin la. ¹⁹Ba yeli ba ye ba na nye yolisim amaa ban bane yel la tum line ke ka saꞌuŋ kuli ba ka ke ka ba a yamis, bozugo line mekama kul soꞌ ket ka o liebidi li yamug. ²⁰Ba yaꞌa baŋ Yesu Kiristo one a ti Zugsob ne ti Faangid la ka baŋir la yiisi ba line ket ka saalib a dianꞌad dim la ka ba lem kpenꞌe li ni, ba beilim na maligim saꞌam hale n gaad yiigin la. ²¹Li naani aan suꞌum n tisi ba ka ba pu baŋin popielim suere, n gat ban baŋi li ka lem bas Winaꞌam noyelug kan ka o tisi ba la. ²²Li niŋi ba wuu siilis la yel siꞌem la ye, “Baa yaꞌa tinn, o lebidne dit,” ka lem ye, “Kukur kane ka ba suu o nyain la leb bianꞌar nweꞌebin.”

Zugsob ken la na yela

¹M zuanoŋa, neꞌeŋa a m gbauŋ kane peꞌesi ayi ka m sobi tisi ya. Gbana ayi la ni ka m bood ye m tienn ya line ka ya deŋim baŋ la ka nie ya potenꞌer soma. ²M bood ye ya tenr pianꞌaban ka Winaꞌam nodiꞌes soma da deŋim pianꞌa yumpokuda la, ne ti Zugsob one aa ti Faangid la noyelug kan ka o Tumtum bane ka o tum ya saꞌan la da pianꞌa la.

³Ka yiiga line nar ka ya baŋ ane ye dunia naar saŋa la, zamdim na ti kena ka paꞌan dine dol ba meŋ yaꞌamleog boodim. ⁴Ba na yel ye, “Yesu n daa yel noore ziꞌel ye o na leb na la be yaani? Hale ka ti yaanam ti kpi n ti paae saŋa nwa, siꞌel mekama kpelim nan ane ala wuu dunia pinꞌilugin da a siꞌem la.” ⁵Ba maali ponꞌosim n tam ye li yi ne Winaꞌam pianꞌadin la ka o da maal saazug kudumin sa ka ke ka teŋ yi kuꞌomin ka lem ke ka kuꞌom maale li. ⁶Ne kuꞌokan la ka dunia line da pun be sa la, ka li uak n saꞌami li. ⁷Ka Winaꞌam kan ziꞌel noor ye dunia ne saazug line kpelim be la, gur ye bugum ti saꞌami li laꞌam ne tuumbeꞌed dim la.

⁸M zuanoŋa, da tami yel sida kaŋaa, ye Winaꞌam potenꞌerin daar yinni wenne yuma tusir ne, ka yuma tusir me wen wuu daar yinni ne. ⁹Winaꞌam pu bugis ne line ka o yeli ziꞌel wuu sieba tenꞌesid siꞌem laa, amaa o niŋidi ya ne suguru, ka pu bood ye soꞌ saꞌam, ka lee bood ye soꞌ mekama tiake o tuumbeꞌedin.

¹⁰Ka Zugsob la ken daar la na wen wuu naꞌayiigi ken siꞌem la ne. Ka saazug na gaad naae ne vuud hale, ka bugum na kanb siꞌel wusa. Dunia ne bun line be li ni wusa me na dig zaalim.

¹¹Ka neꞌenam wusa sadigim na saꞌam la, li nar ka ya beilim na a wala? Asee ka ya pesigi ya meŋ n tis Winaꞌam ka doli o suer, ¹²ka guri Winaꞌam ken daar la ka kpeꞌeŋi ya meŋ n tum ye li niŋ toꞌoto. Daakan la ka bugum na kanbi saꞌam saazug ne dine be dunia ni wusa. ¹³Ka ti guri Winaꞌam n ziꞌel noor siꞌa la ye, “Saazug paal ne dunia paal na be, ka ani a popielim teŋ.”

¹⁴M zuanoŋa, yaname sadigim guri neꞌenam yela la, kpeꞌeŋimi ya meŋ ka ya a nyain ka gbaꞌa siꞌa da be ya ni, ka bei ne Winaꞌam ne sumalisim, ¹⁵ka geligid ye Zugsob la suguru diib ket ka ya nyet faangir. Ala men ka ti baꞌabinoŋir Paul daa sobi tisi ya line yi yaꞌam line ka Winaꞌam tis o la. ¹⁶O sobidne ala o gbana la wusa ni. O sobir la ni ka o yel yelsieba, ka li toe ye ti baŋi li gbin, ka bane ziꞌ siꞌel la ne bane pu kpiꞌem ne ba yadda niŋirin la nweligi li ka li a ba saꞌuŋ, wenne ban niŋid siꞌem ne Winaꞌam gbana wusa la.

¹⁷M zuanoŋa, yaname pun deŋim miꞌi li la, guꞌusimi ka tuumbeꞌed dim da ke ka ya yidig bee basi ya yadda niŋir laa. ¹⁸Amaa ke ka Winaꞌam yelsum ne baŋir nobug ti Zugsob Yesu Kiristo one aa ti faangid la ni.

O yuꞌur na nye naꞌasi nannanna ne saŋa kane kaꞌ naare. Ami.