2 KORINT DIM

Paul n sob gbauŋ ayi daan la n tis

KORINT DIM

la nwa

¹Man Paul, on ka Winaꞌam gaŋ m ne o boodim ye m a Yesu Kiristo Tumtum la, ne ti baꞌabiig Timoti, sobid gbauŋ kaŋa n tisid Winaꞌam nidib bane wusa be Korint ne Akaia teensin wusa la.

²Ti Baꞌ Winaꞌam ne ti Zugsob Yesu Kiristo na tisi ya yelsum ne sumalisim.

Yeltoog poogin suŋir yela

³Keli ka ti puꞌus Winaꞌam one aa ti Zugsob Yesu Kiristo Baꞌ la bareka, on one aa ti Baꞌ ka zoti ti nimbaanlig, ka a Winaꞌam ka suŋir wusa yit o saꞌan na la. ⁴O suŋidi ti ti yeltood wusa poogin, ye ti nyaŋedi nokid suŋir kane ka ti diꞌed Winaꞌam saꞌan la n suŋid bane mor yeltood sieba wusa la. ⁵Ti sadigim nyet namisug bedego Kiristo zug, ala men ti na diꞌe suŋir bedego ka li yine Kiristo saꞌan na. ⁶Ti yaꞌa nye yeltoog, li ane ye yanam me yaꞌa ti nye yeltoog, ya na nye suŋir ne faangir, ka li yine tinam saꞌan na. Ka tinam yaꞌa nye suŋir Winaꞌam saꞌan, yanam me na nye suŋir, ka li yine ti saꞌan na, ka na diꞌe paŋ ye ya modig ya namisug poogin line wenne namisug kane ka tinam nye la. ⁷Ti tiꞌir ya yela kaꞌa biꞌesugo. Ti miꞌ ye yaname sadigim namisid wuu tiname namisid siꞌem la, ya na diꞌe suŋir wuu tiname diꞌed siꞌem la.

⁸M baꞌabiise, ti bood ye ya baŋ yeltoog kan ka ti daa nye Asia teŋin la yela. Yeltoog la daa daami ti bedego ka gaadi ti paŋ ben, ka ti daa pu len tenꞌesid vum yelaa, ⁹ka tenꞌes ye li ane wuu koto ni ka ba kadi ti saria koos ka li a kuꞌum. Ka lina niŋ ye ti da tiaꞌ ti meŋ paŋa, ka lee tiaꞌane Winaꞌam one vuꞌugid kum la. ¹⁰O faaenn ti yeltoog titaꞌar line a kuꞌum la ni, ka ti miꞌ ye o na lem faaenn ti, ka mor tiꞌir o saꞌan ye o na lem faaenn ti yaꞌas. ¹¹Ka yanam me suŋi ti n sos Winaꞌam tisi ti la. Winaꞌam na diꞌe ya sosug la bedego ka tisi ti yelsum. Dinzugo nidib bedego na puꞌus Winaꞌam bareka on niŋ siꞌel tisi ti la zug.

Bun line ke ka Paul tiak o suer la yela

¹²Tinam nweꞌed nyoꞌog neꞌeŋa yela bozugo ti potenda dit kaset ye ti nyaŋe gbanꞌe ti meŋ dunia nwa ni. Line gaad li wusa ane tinam ne yanam soogin. Li yi ne Winaꞌam a suꞌum nyain ne yelsida daan la yela. Li ane Winaꞌam popielim zug ka kaꞌane ninsaalib yaꞌam ka ti be ala laa. ¹³Ti yiti sobidi lin maꞌaa ka ya na nyaŋe karem ka gbanꞌe li gbin. ¹⁴Ya daa gbanꞌe lin ka ti daa niŋ la gbin ka pu gbanꞌe li wusa suꞌuŋaa. Ka m mor tiꞌir ye ya na gbanꞌe lin ka ti sob la suꞌuŋa ye Yesu Kiristo ken daar la ka yanam na nweꞌe nyoꞌog tinam yela wuu tinam na nweꞌe nyoꞌog yanam yela siꞌem la.

¹⁵M daa miꞌ neꞌe suꞌuŋa ka linzug ka m daa gbanꞌe ye m na kena kaae ya yiiga ye ya di nyood noor ayi. ¹⁶M daa gbanꞌe ye m na keenn ya saꞌan na ka nyaan gaad keŋ Masedonia teŋin, ka m yaꞌa ti lebid na ka na len kaae ya ka ya na suŋi m ka m gaadi keŋ Juuda teŋin. ¹⁷Ya tenꞌes ye m gbanꞌar la kaꞌa suꞌuŋa bee? Ya tenꞌes ye m dolne ninsaalib boodim n gbanꞌe ye m niŋ siꞌel ka bood ye m kpanbi siak ye eenn ne ayei nee?

¹⁸Winaꞌam ane yelsida sob, ala men ka li a sida ye tiname yeti ya siꞌel la kaꞌane ye ti kpanbidi siakid ye eenn ne ayei nee. ¹⁹Yesu Kiristo one a Winaꞌam Biig ka mam, Paul ne Timoti ne Silvanus daa mool o yela ya saꞌan la, pu mor biꞌesugo. Li ane eenn o saꞌan saŋa wusa. ²⁰Li yine Yesu Kiristo ni na ka Winaꞌam siak ye eenn, ye o na niŋ lin ka o ziꞌel noor li yela la wusa. Ka linzug ka ti puꞌusug poogin ka li yine Yesu Kiristo ni ka ti yel ye ami, ka tisid Winaꞌam naꞌasi. ²¹Li ane Winaꞌam ket ka ti ziꞌe kiŋ kiŋ Kiristo saꞌan tinam laꞌam ne yanam, ka gaŋi ti ye ti tum o tuuma, ²²ka nok o zanbin zanbili ti ka li paꞌal ye one soꞌe ti ka tisi ti o Siig Suŋ n ke ka ti miꞌ suꞌuŋa ye o na ti tisi ti o piini wusa.

²³Winaꞌam aa m kaset sob ye man pu leb Korint la, m faann ya yak. ²⁴Ti pu mood ye ti yeli ya ne mugusug line nar ye ya siak laa; ka ya yadda niŋir dol suer suꞌuŋa. Ti tum ne taaba ye ya nye sumalisim.

¹M daa gbanꞌe ye m ku lem kena kaae yaa n ke ka ya sunf saꞌam. ²Ka m yaꞌa ket ka ya sunf saꞌamid, anoꞌone be na tisi m sumalisim? Soꞌo kaeꞌ, asee yanam bane ka m ke ka ya sunf saꞌam la. ³M daa pu bood ye nimbane naan tisini m sumalisim la keen ka m moren susaꞌaŋa, ka linzug ka m daa sob gbauŋ kan la wala. M miꞌ ya suꞌuŋa ka miꞌ ye mam yaꞌa mor sumalisim, yanam me na mor, ⁴ka daa sob tisidi ya ka mor susaꞌaŋ ne daamug m sunfin bedego, ka li ke ka m kaas, ka li kaꞌa ye m bood ye m ke ka ya sunf saꞌam, ka ane ye m ke ka ya baŋ man noŋi ya siꞌem bedego.

Lin nar ka ba di soꞌ suguru siꞌem la yela

⁵Nid yinni ya soogin yaꞌa daa ke ka soꞌ sunf saꞌam, li kaꞌane ye o saꞌame man sunfo, amaa o saꞌam ne yanam sunf biꞌela. M pu bood ye m yel ye o saꞌam ne ya sunf bedegoo. ⁶Saansug kan ka ya bedego tis on daana la, zemiseya. ⁷Nannanna li nar ka ya di o suguru ka kpeꞌeŋ o sunf, ka li da ke ka o sunf saꞌam bedego ka o saꞌam. ⁸M belimi ya ye ya ke ka o lem baŋ ye ya sid noŋ o. ⁹M daa sob gbauŋ kaŋa neꞌ zug ye m kpansi ya gos ye ya yiti siak man yeti ya siꞌel la. ¹⁰Ya yaꞌa di soꞌ suguru, mam me na di o daana suguru men. Tuumbeꞌed siꞌa yaꞌa daa be ka zabi mam ka li ane man na dii li suguru, m niŋi li Kiristo tuon yanam zug ¹¹ye Sutaana da nyaŋe tii. Ti miꞌ on bood ye o niŋ siꞌel la.

Paul susaꞌaŋ Troas teŋin la yela

¹²Man daa paae Troas teŋin ye m mool Kiristo labasuŋ la, ka nye ka Zugsob la pun tiꞌeb suesuŋi digil. ¹³Ka m sunf pu malisa man pu nye m baꞌabiig Titus anina la zug. Ka dinzug ka m kees nidib la ka gaadi keŋ Masedonia teŋin.

Tinam ket ka nidib baŋ Kiristo yaꞌan la yela

¹⁴M puꞌus Winaꞌam bareka. Tiname a yinni ne Kiristo la, ka Winaꞌam yiti dolisidi ti ka li wenne ti laꞌasne n tuunl taaba ka doli Kiristo ken, n paꞌal ye o di yaꞌan n nyaŋ siꞌel wusa. Winaꞌam noki ti n ke ka nidib wusa baŋ Kiristo yela. Ka ti wenne nyuug line malis ka yadig zinꞌis wusa, ¹⁵ka wenne tudaare ka Kiristo nyuꞌe li tis Winaꞌam, ka nimbane nye faangir la ne bane bodig la na wumi li nyuug. ¹⁶Bane bodig la saꞌan li wenne nyuug beꞌed line a kuꞌum n tisi ba. Amaa li wenne nyuug suꞌum line a nyovur n tis bane nye faangir la. Anoꞌon nar ne yel kaŋa? ¹⁷Nidib bedego mool Winaꞌam labaar wuu bane kuosid laꞌad dine kaꞌa suꞌum ka bood ligidi bedego la. Tinam kaꞌ ala. Amaa Winaꞌam tumi ti la zug ka ti pianꞌad Winaꞌam tuon n a yinni ne Kiristo.

Ti tuuma line dol Winaꞌam Siig Suŋ la yela

¹Ya tenꞌes ye ti lem pinꞌili pianꞌad tinam a suꞌum la yela bee? Ka tenꞌes ye ti wenne ninsieba ka bood gbana line na paꞌali tinam a suꞌum siꞌem la yela ye ti tisi ya bee? Ka bood ye ya sob gbauŋ kan la buudi ye ti tis ninsiebaa? ²Yanam meŋ wenne gbauŋ kaŋa ne. Ka nidib wusa nyaŋe nyee li ka karemi li. Ka ti noŋi ya bedego. ³Li nie paalo ye Kiristo meŋ sob gbauŋ kaŋa la ye ti tolisi li. Ka o pu nok siꞌel sob kuglamir zugo, ka lee nok Winaꞌam one voe la Siig Suŋ n sob ninsaalib sunfin.

⁴Ti miꞌ ye Winaꞌam niŋid ala, ka ti miꞌilim yit Yesu Kiristo ni na. ⁵Ka siꞌel kaeꞌ ti ni n ke ka ti tunꞌe yel ye ti nar ye ti tum tuumkaŋaa. Li ane Winaꞌam ke ka li nar ye ti tumi li, ⁶ka me nar ye ti tum nonaar paal tuuma la. Nonaar paal la kaꞌane wada kan ka ba sobe, ka lee yine Winaꞌam Siig Suŋ ni na. Ka wada dine sob la dolne kuꞌum, ka Siig Suŋ la tisid nyovur.

⁷Winaꞌam da tis wada line taꞌasid kuꞌum ka o da kpiꞌa li sobir kuglamir zug la, ka o naꞌam pipilim nie nyain li tisibin la. Ka Moses nindaa pelig ka nyeen pil pil, ka Israel dim pu nyaŋe gosi lii, laꞌam ne pipilim la da sied la. Wada line taꞌasid kuꞌum la sadigim da mor pipilim anwa la, ⁸labasuŋ line tisidi Winaꞌam Siig Suŋ la ku mor pipilim n gaad ala bee? ⁹Ka wada line ke ka nidib li kumin la yaꞌa da mor pipilim, labasuŋ line ke ka ti a popielim dim Winaꞌam tuon la ku peligi gaad ala bee? ¹⁰Sida, pipilim line be nannanna nwa gaad pipilim line da be la bedego, ka dinzug ka pipilim line da be la lieb zaalim. ¹¹Line ku yaꞌas naar la yaꞌa da mor pipilim, line be nannanna nwa ka ku naae laa, ku mor pipilim bedego n gaad ala bee?

¹²Tiname mor tiꞌir kaŋa la zug, ka ti sunf kpiꞌem, ¹³ka ti pu wenne Moses one da nok pien lus o nindaa ye Israel dim da nyee o nindaa pipilim line sied la naare. ¹⁴Ka Israel dim la me mor yaꞌam lik. Ka saŋkan la n ti paae zina, ka ba yaꞌa karem nonaakudug gbauŋ la, li wenne pien la nan kpelim be, ka ba pu gbanꞌed ban karem siꞌel la gbin ne. Kiristo ni maꞌaa, ka pien la na bodig. ¹⁵Sida, saŋkan la n ti paae zina, ba yaꞌa karem Moses gbauŋ la, pien la nan kpelim ligil ne ba yaꞌam. ¹⁶Ka soꞌ yaꞌa bas ka dol Zugsob la, pien la na bodig o ni. ¹⁷Ka Zugsob on ka ba dol la ane Winaꞌam Siig Suŋ. Ka Zugsob Siig Suŋ la be siꞌel la, yolisim me be anina. ¹⁸Pien pu ligil tinam bane wusa dol Zugsob la nindaase. Ka Zugsob la naꞌam pipilim nie ti ni, ka tiakedi ti ye ti wenne on a siꞌem la. Ka o naꞌam pipilim bee ti ni n nobugid bedego bedego. Ka li wusa yi ne Zugsob one a Siig Suŋ la ni na.

¹Winaꞌam zoti ti nimbaanlig ka tisidi ti tuumkaŋa, ka dinzug ka ti pu sinꞌigida. ²Ti zanꞌasne ye ti dol nyan ne yelsuaꞌada tuuma wusa, ka me pu maꞌad nidibaa, bee tiaked Winaꞌam pianꞌad ye li dol ziri sueyaa, ka lee pianꞌad yelsida paalo ni, ka niŋidi li Winaꞌam tuon, ka ke ka nidib yaꞌam line miꞌ suꞌum ne beꞌed la baŋ ye ti niŋid line a suꞌum. ³Labasuŋ line ka ti moon la yaꞌa suaꞌane, ka li a wuu pien ligili li, li suaꞌane bane bodig la saꞌan maꞌaa. ⁴Sutaana one soꞌe dunia nwa la ke ka bane pu niŋ Winaꞌam yadda la yaꞌam a lik, ka ba ku nyaŋe baŋ labasuŋ Kiristo naꞌam yela laa, one a wuu Winaꞌam a siꞌem wusa la. ⁵Ti pu mooni ti meŋ yelaa, ka lee moon ye Yesu Kiristo a Zugsob, ka ye tinam tumi tisidi ya Yesu zug. ⁶Winaꞌam da yel ye, kel ka li nie nyain likin. Ka li ane one ke ka li a nyain ti sunfin n ke ka ti baŋ Winaꞌam naꞌam pipilim line ka ti nye Kiristo saꞌan la suꞌuŋa.

Tinam kaꞌ paŋ la paꞌal Winaꞌam paŋ a siꞌem la yela

⁷Ka baŋir kaŋa la wenne siꞌel line ligidi zuꞌe bedego, ka ba suaꞌa li dukin. Ka tinam wenne duk la, ye li paꞌal ye paŋtitaꞌar line ka li mor la kaꞌa tinam dine, ka lee ane Winaꞌam bun. ⁸Ti nyet daamug siꞌel wusa ni ka ti sunf pu saꞌamida, ne yelpakir ka pu basi ka kpelim mor potenꞌer ye ti na yii li ni, ⁹ka nyet namisug ka Zugsob la pu basidi tii, ne demis ka ti pu kpii, ¹⁰ka yiti nyet namisug ti niŋgbina ni wuu Yesu da kpi siꞌem la ye nidib na nye o nyovur ti niŋgbina ni. ¹¹Ti vum saŋa wusa ka ti yiti nyet namisug line zemis ne kum Yesu zug, ye nidib na nye o nyovur ti niŋgbina line na kpi la ni. ¹²Aa to, kuꞌum tumi ti saꞌan, amaa vum tumi yanam saꞌan.

¹³Li sob Winaꞌam gbauŋin ye soꞌ yel ye, “Man niŋ Winaꞌam yadda la zug ka m pianꞌad.” Tinam meŋ niŋ Winaꞌam yadda wuu on niŋ siꞌem la ka ti yadda niŋir zug ka ti me pianꞌad. ¹⁴Ka miꞌ ye Winaꞌam one vuꞌugi ti Zugsob Yesu kumin la, me na vuꞌug tinam meŋ ne o, ka laꞌase ti ne yanam n more ti keŋ o tuon. ¹⁵Li wusa ane yanam suꞌum nyeeb zug. Ka Winaꞌam popielim yadigid ka nidib nyee li ka paasid, ka ala ka ba bareka puꞌusug la me paasid n tisid Winaꞌam naꞌasi.

¹⁶Dinzugo, ti pu sinꞌigida. Hale laꞌam ne ti ninsaal niŋgbina saꞌamid la, Winaꞌam ket ka ti meŋ nyet vumpaal ti sunfin beog beog. ¹⁷Namisug line ka ti nyet la ane biꞌela ka na gaad, ka lee ke ka ti na nye naꞌasi titaꞌar line kaꞌa naare, ka gati ti namisug la bedego, ka ti ku nyaŋe maki li ne ti namisug laa. ¹⁸Ti noki ti sunf n lo ne bun lin ka ti pu nyetaa, ka kaꞌ ne bun lin ka ti nyeta. Bun lin ka ti nyet la ku yaꞌas naare, ka lin ka ti pu nyet la na be yuma ka li kaꞌ naare.

Ti arazana ni niŋgbina la yela

¹Ti niŋgbina wenne fudoog ne. Ka ti miꞌ ye li yaꞌa ti saꞌam ti na mor niŋgbin siꞌa arazana ni ka li wenne doog. Ka li ane Winaꞌam mee li, ka kaꞌ ninsaaliba. Ka li na be yuma ka li kaꞌ naare. ²Ti mor susaꞌaŋ dunia nwa ni ka bood ne ti sunf wusa ye Winaꞌam na noki ti arazana niŋgbiŋ la n yeeli ti wuu fuug ne. ³Bozugo ti yaꞌa yeꞌ arazana fuug la ti ku ken biꞌel la. ⁴Tiname be ti dunia niŋgbinin la, ka ti mor daamug ti sunfin ka siꞌimi li zug. Li kaꞌane ye ti pu bood ye ti mor ti dunia niŋgbiŋ laa, ka ane ye ti bood ye Winaꞌam noki ti arazana niŋgbiŋ la n yeeli ti bozugo vum na nyaŋ niŋgbiŋ line na kpi la. ⁵Li ane Winaꞌam tiꞌebi ti ye ti nye tiaker kaŋa, ka tisi ti o Siig Suŋ ye li paꞌal ye ti na diꞌe on ye o tisi ti siꞌel la wusa.

⁶Dinzugo ti yiti mor sukpiꞌeuŋ bedego, ka miꞌ ye ti yaꞌa be ti dunia niŋgbinin, ti kaꞌ Zugsob saꞌan arazana nii. ⁷Ka li kaꞌane tiname nyet o la ke ka ti dol oo, ka ane ti yadda niŋir yela. ⁸Ti mor sukpiꞌeuŋ bedego ka na boodin ye ti basin ti dunia niŋgbiŋ la ka moren ti arazana niŋgbiŋ la n be Zugsob saꞌan. ⁹Aa to, ti yaꞌa be arazana ni bee ti dunia niŋgbinin ti bood bedego ye ti maꞌae Zugsob la sunf. ¹⁰Li nar ka ti wusa na ziꞌe Kiristo tuon ka on na kadi ti saria, ka na tis on mekama on nar ne o diꞌe siꞌem la. Ka li yaꞌa a suꞌum bee beꞌed, li dolne on tum siꞌem dunia nwa ni.

Tiname voe ye ti naꞌas Winaꞌam la yela

¹¹Dinzugo tiname zot Zugsob la dabiem ne ti sunf wusa la zug ka ti mood ye ti ke ka nidib siak Winaꞌam. O miꞌ tinam a siꞌem suꞌuŋa. Ka m mor potenꞌer ye yanam me miꞌ ya sunfin tinam a siꞌem la. ¹²Ti pu lem mood ye ti yeli ya tinam suꞌum yela yaꞌasa. Ti lee mood ye ti ke ka ya mor siꞌel na nweꞌe nyoꞌog ti yela. Ka ya mor siꞌel na yel nimbane nweꞌed nyoꞌog ban a siꞌem ka nidib nyeti li paalo la, ka kaꞌa ban a siꞌem ba sunfinee. ¹³Ti niŋir yaꞌa a wuu geenmis tuuma, li ane Winaꞌam yela. Ka ti yaꞌa pu geenm li ane yanam meŋ zug. ¹⁴Kiristo noŋir soꞌe ti ka ti baŋ suꞌuŋa ye dau yinni da kpi tis nidib wusa, ka dinzug ka nidib wusa da laꞌam kpi ne o. ¹⁵Ka me baŋ ye o da kpi tisi ba ye bane mor vumpaal o zug la ku lem voe ye ba niŋ ba meŋ boodim, ka lee voe ye ba niŋ on, one kpi ka vuꞌug kumin n tisi ba la boodim.

Winaꞌam ke ka ti tiake a nimpaala la yela

¹⁶Tiname tenꞌes nidib a siꞌem la, pu len dolne ti ninsaalib potendaa. Hale laꞌam ne tinam daa tenꞌes Kiristo a siꞌem la da dolne ti ninsaalib potenda la, ti pu len niŋid alaa. ¹⁷Soꞌ yaꞌa a yinni ne Kiristo, Winaꞌam maal o ka o a nimpaal. Ka o boodim kudug la gaadeya, ka o yuꞌun mor boodim paal. ¹⁸Winaꞌam niŋi li wusa ka naali ti ne o meŋ, ka li yine Kiristo ni na, ka tisi ti tuuma ye ti ke ka nidib me naal ne o. ¹⁹Ti labaar ane ye Winaꞌam da be Kiristo ni ka da naal dunia dim ne o meŋ ka yiisi ti tuumbeꞌedi bas, ka guꞌuli ti o naaluŋ labaar la.

Tinam diꞌe Kiristo zinꞌig n tum siꞌem la yela

²⁰Dinzug ka ti ziꞌe Kiristo ziꞌa n pianꞌad. Ka Winaꞌam belim nidib, ka li yine tinam saꞌan. Ti ziꞌe Kiristo ziꞌa ka belimi ya ye ya naal noor ne Winaꞌam. ²¹Kiristo pu mor tuumbeꞌede. Ka Winaꞌam da ke ka o diꞌe ti tuumbeꞌed zanꞌasa ye tinam lieb yinni ne o la, ka ti na diꞌe Winaꞌam popielim.

¹Tiname tum ne taaba Winaꞌam ni la, ti belimi ya ye yanam bane diꞌe Winaꞌam popielim piini la da ke ka li a zaalim ya saꞌane. ²Bozugo Winaꞌam da yel o gbauŋin ye,

“Saŋkan ka m siak ye m tisi ya m yelsum la,

ka m wumi ya sosug.

Ka faangir daar la ka m suŋi ya.”

M na yeli ya ye saŋa kan ka Winaꞌam siak ye o tisi ya o yelsum la ane nannanna nwa, ka faangir daar la a zina.

³Ti pu niŋid siꞌel line na viꞌi soꞌ suer ka ba luu, ka soꞌ da nye taali ti tuuma nii. ⁴Ka lin wusa ka ti nyet la paꞌal ye ti ane nimbane tum Winaꞌam tuuma suꞌuŋa. Ti daa nyet daamug ne fara ne yeltood. ⁵Ka ba daa buꞌudi ti ka loodi ti sarega ni. Ka nidib bedego giligi ti n kisi ti. Ka ti daa tum tuumkpiꞌema bedego, ka daa pu gbisida. Ka koꞌom daa more ti. Ti daa modig bama ni wusa. ⁶Ti niŋir wusa a nyain. Ka lin ne ti miꞌilim ne ti modigir ne ti yelsum ne Winaꞌam Siig Suŋ ne ti sida noŋilim ⁷ne ti sida pianꞌad ne Winaꞌam paŋ la wusa paꞌal ye ti ane nimbane tum o tuuma suꞌuŋa. Ti mor popielim wuu zaba laꞌad line be datiuŋ ne dagobug, ⁸ka nyet naꞌasi ne nyan ne tuꞌud ne zunꞌor. Ba niŋidi ti wuu damaꞌanam ka ti lee a sida dim, ⁹ka niŋidi ti wuu ba ziꞌi tii amaa nidib bedego miꞌi ti, ka niŋidi ti wuu ti kpine ka ti lee mor nyovur, ka namisidi ti ka ti lee pu kpii. ¹⁰Ka ti mor susaꞌaŋ ka me yiti mor sumalisim, ka a noŋdim ka lee ke ka nidib bedego diꞌed yelsum bedego, ka pu mor siꞌel dunia nwa nii, ka lee mor siꞌel wusa Winaꞌam tuon.

¹¹M zuasuma bane be Korint teŋine, ti pie ti poog n pianꞌad, ka noŋi ya ne ti sunf bedego. ¹²Tiname noŋi ya siꞌem la kaꞌ biꞌelaa. Ka li ane yanam noŋilim pu zuꞌe tinam saꞌanee. ¹³M pianꞌadi ya wuu ya ane m biis, ye ya me noŋi ti ne ya sunf wusa wuu tiname noŋi ya siꞌem la.

Noor yinni ne bada dim saꞌalug la yela

¹⁴Da mor noor yinni ne bane kaꞌ yadda niŋidib la ye ya niŋ siꞌela. Popielim ne beꞌed ku nyaŋe laꞌas taabaa. Ka li ku nyaŋ a lik ka a neesim saŋa yinnii. ¹⁵Ka Kiristo ne Sutaana ku nyaŋe siak taaba noore. Ka one a yadda niŋid ku nyaŋe mor noor yinni ne one kaꞌ yadda niŋida. ¹⁶Ka Winaꞌam puꞌusug yir ku nyaŋe a yinni ne badaa. Tinam meŋ ane Winaꞌam one voe la yir. Li dolne Winaꞌam da yel o gbauŋin siꞌem la ye,

“M na bee ba soogin ka laꞌam ken ne ba.

M na aa ba Winaꞌam.

Ka ban na aa m nidib.”

¹⁷Ka dinzug ka Zugsob Winaꞌam one mor paŋ n gaad siꞌel wusa la da yel o nidib ye,

“Yimi bane kaꞌ m nidib la soogin,

ka baki ya meŋ ne ba.

Da siꞌis bun line a dianꞌade,

ka m na diꞌe ya.”

¹⁸“M na aa ya Baꞌ

ka yanam me aa m biribis ne m bipumis.”

¹M zuanoŋa, noorziꞌela bama ane ti din. Dinzugo keli ka ti bas siꞌel wusa line ket ka ti niŋgbina ne ti siis a dianꞌad la, ka lieb nyain. Keli ka ti naꞌas Winaꞌam ka ke ka ti aa o nidib ka a suꞌum nyain.

Paul n mor sumalisim ne Korint dim la yela

²Keli ka ya noŋilim ti saꞌan nobug bedego. Ti pu tum soꞌ beꞌede, ka pu saꞌam soꞌ yadda niŋire, ka pu noki ti tuuma zug n diꞌe siꞌel soꞌ saꞌane. ³M pu bood ye m yeli ya ye ya tum beꞌede; ka m deŋin yel ye tiname noŋi ya siꞌem la ane bedego. Ka li yaꞌa a ye ti kpine bee ti voe ti ku bas ti noor yinni laa. ⁴M miꞌ ya poog suꞌuŋa ka mor nyeesim ya yela. Ti yeltood wusa poogin m mor sukpiꞌeuŋ ne sumalisim bedego.

⁵Hale ne tinam daa paae Masedonia teŋin la, ti daa pu nye vuꞌusum. Yeltood daa be zinꞌis wusa ka zaba me be. Ka ti meŋ mor dabiem ti sunfin. ⁶Ka Winaꞌam one ket ka bane mor susaꞌaŋ la nye kpeꞌeŋir la daa ke ka Titus kena, ka ti sunf kpeꞌeŋ, ⁷ka li kaꞌane o ken la na maꞌanee, amaa on daa yeli ti yaname daa kpeꞌeŋ o sunf siꞌem la. O yeli ti ye ya bood hale ye ya nyee m ka mor susaꞌaŋ ne line daa niŋ la ye ka soꞌ yaꞌa pianꞌa beꞌed man yela, yanam yiti kpeꞌeŋi ya meŋ n lebis suꞌum man yela. Ka dinzug ka m sumalisim maligim paas bedego.

⁸Hale laꞌam ne gbauŋ kan ka m daa sob la daa saꞌam ya sunya la, m sunf pu saꞌam man sobi li laa. M nye ka m gbauŋ la daa saꞌam ya sunya, amaa li ane saŋa biꞌela. ⁹Ka m mor sumalisim nannanna, ka li kaꞌane man daa ke ka ya sunf saꞌam la yelaa, ka ane ye ya susaꞌaŋ la daa ke ka ya tiake ya sueya la zug. Susaꞌaŋ kaŋa ane susaꞌaŋ lin ka Winaꞌam tisi ya, ka dinzug ka gbauŋ kane ka ti daa sob la pu ke ka ya nye beꞌede. ¹⁰Susaꞌaŋ lin ka Winaꞌam tisid la ket ka nidib tiakedi ba sunya ka lin na ke ka ba nye faangir. Ka susaꞌaŋ ku be neꞌeŋa nii. Ka dunia susaꞌaŋ dolne kuꞌum. ¹¹Ya nye Winaꞌam n ke ka ya susaꞌaŋ dol suer siꞌa. Li daa ke ka ya tenꞌes line daa niŋi ya saꞌan la yela ne nimmua, ka ke ka ya bood bedego ye ya paꞌal ye ya kaꞌ taal yelkaŋa nii, ka ke ka ya sunf due, ka ya zot dabiem, ka bood ne ya sunya wusa ye ya nyee m ka bood ye ya niŋ line a suꞌum, ka kpeꞌeŋi ya meŋ ye ya saans one tum tuumbeꞌed kaŋa la. Ya paꞌaleya ye ya kaꞌ taal yelkaŋa wusa nii.

¹²Hale ne man daa sobi ya siꞌem la, man daa pu sobi li one tum tuumbeꞌed kaŋa bee on ka o maal beꞌed tis o la zugo, ka lee sobi li ye li ke ka ya baŋ suꞌuŋa Winaꞌam tuon yaname noŋi ti siꞌem bedego la. ¹³Dinzugo ti nye sukpiꞌeuŋ ka me nye sumalisim bedego. Titus mor sumalisim yaname ke ka o susaꞌaŋ naae la zug. Ka lin ke ka ti sumalisim paas bedego. ¹⁴M daa nweꞌe nyoꞌog ya yela Titus saꞌan ka ya me pu diis m nyane. Ti yiti pianꞌad sida tisidi ya. Ka ala men tiname pianꞌad siꞌel n nweꞌed nyoꞌog ne Titus la daa sid a sida. ¹⁵Ka Titus tenr yaname wusa kpeꞌeŋi ya meŋ n siak m noor ka diꞌe o ne zotim siꞌem la. Ka dinzug ka o noŋilim ya saꞌan nobugid bedego. ¹⁶M miꞌ ye ya na niŋ siꞌel wusa lin ka m yeti ya la. Ka dinzug ka m mor sumalisim.

Winaꞌam nidib n suŋid taaba siꞌem la yela

¹Ti baꞌabiise, ti bood ye ya baŋ Winaꞌam popielim tum siꞌel Winaꞌam nidib bane be Masedonia teŋin la saꞌan. ²Ba daa nye makir bedego ba yeltood poogin ka o popielim la lee ke ka ba mor sumalisim bedego, ka sumalisim la ke ka ba nok ligidi bedego n tis ne ba sunf wusa ye ba suŋ Winaꞌam nidib laꞌam ne ban daa a noŋ dim la. ³M nyaŋe yeli ya ye ba daa tis ka li zemis ba paŋ tunꞌe siꞌem, hale ka li gaad ala. ⁴Ka ba daa sosi ti bedego ne ba meŋ boodim ye ti tisi ba suer ne yelsum ye ba laꞌam suŋ Winaꞌam nidib sieba la. ⁵Ka daa niŋ ka li gaad tiname tenꞌes siꞌem la. Ka yiiga ba daa zaŋi ba meŋ tis Zugsob la laꞌam ne tinam men, ka li dolne Winaꞌam boodim. ⁶Dinzugo ti kpeꞌeŋ Titus one pinꞌil ligidi laꞌasug tuuma ya saꞌan la ye o suŋi ya ka ya naae popiel tuumkaŋa la. ⁷Ya mor yelsum bedego ya zut, ka niŋ Kiristo yadda bedego ka tunꞌe pianꞌ Winaꞌam yela suꞌuŋa ka mor Winaꞌam miꞌilim bedego ka tiaꞌ ye ya suŋ nidib ka noŋi ti bedego. Kpeꞌeŋimi ya meŋ n me tum popiel tuumkaŋa bedego men.

⁸M pu yet nwa ne m paŋa. Amaa m zaŋ ne ninsieba n tum siꞌel la ye m maki baŋ ya sida noŋilim zem siꞌem. ⁹Ya miꞌ ti Zugsob Yesu Kiristo popielim a siꞌem. Hale laꞌam ne on daa a yelsum wusa daan la, o da lieb noŋ daan yanam suꞌum nyeeb zug. Ka li ane on lieb noŋ daan la ke ka yanam lieb yelsum dim.

¹⁰M ye m yeli ya man tenꞌes yelkaŋa siꞌem. Ye, li a suꞌum ka ya yuꞌun naae tuumkan ka ya daa pinꞌili tum yuum sa la. Ya daa bood bedego ye ya pinꞌili li. ¹¹Ka li a suꞌum ka ya me bood nannanna ye ya naae li, ka li zemisi ya pinꞌilugin boodim la. Keli ka ya tisib la zemis yaname mor siꞌem. ¹²Soꞌ yaꞌa mor boodim ye o tis piini, Winaꞌam diꞌed o piini siꞌem la dolne one na tis ka li zemis on mor siꞌem, ka kaꞌane one pu mor siꞌem laa.

¹³Ti boodim kaꞌa ye ti yiis sieba ba namisugin ka li lebig pakir tisi yaa. Amaa li suꞌum ye li zem taaba. ¹⁴Ka yaname mor bedego nannanna la, suŋim bane a noŋ dim la. Ban me na ti mor bedego ka suŋi ya, ya boodim saŋa. Ka anwa ka ya wusa na zem taaba. ¹⁵Li dolne lin da sob Winaꞌam gbauŋin siꞌem la ye,

“Niŋkane vaae bedego la pu mor ka li zuꞌe galise.

Ka niŋkane vaae biꞌela la pu mor ka li pood galise.”

¹⁶Ti puꞌus Winaꞌam bareka one ke ka Titus mor potenꞌer ye o suŋi ya wuu tiname mor potenꞌer siꞌem la. ¹⁷O daa siaki ti kpeꞌeŋir la ka me daa mor potenꞌer ye o suŋi ya, ka gbanꞌe ne o meŋ boodim ye o keenn ya saꞌan na. ¹⁸Ka ti ye ti tum ti baꞌabiig soꞌ ye on ne Titus kena. O ane on ka Winaꞌam nidib wusa naꞌasid o on tum siꞌem ka moon labasuŋ la zug. ¹⁹Ka laꞌam ne neꞌ, ba me gaŋ o ye o giligid ne tinam ka suŋidi ti ne popielim tuumkaŋa. Ti tum popielim tuumkaŋa ye ti tis Winaꞌam naꞌasi, ka sid paꞌal ye ti bood ye ti suŋ. ²⁰Ti guꞌusidi ti meŋ ye soꞌ da pianꞌ beꞌed tinam niŋ siꞌel ne piintitaꞌar kaŋa la yelaa, ²¹ka bood ye ti niŋ line a suꞌum Winaꞌam tuon ne ninsaalib saꞌan men.

²²Ka ti ye ti tum ti baꞌabiig soꞌ yaꞌas ne ba. Ti daa nye on tum siꞌem saŋa bedego ka baŋ ye o tiaꞌ ye o suŋ. Ka nannanna o mor potenꞌer bedego ye o suŋi ya, on miꞌ suꞌuŋa ye ya na niŋ tiname yeli ya siꞌem la zug. ²³Ka li yaꞌa aa ti baꞌabiig Titus yela, o ane m tumtum tiraan one tum ne man ye ti suŋi ya. Ka li yaꞌa aa ti baꞌabiis bane ye ba dol o la yela, ba ane bane ka Winaꞌam nidib tum la, ka ke ka Kiristo nyet naꞌasi. ²⁴Paꞌalimini ba ya noŋilim, ka Winaꞌam nidib nye ka baŋi li, ka me baŋ ye tinam yiti nweꞌed nyoꞌog ya yela la a sida.

¹Li pu len nar ka m sobi yeli ya piini lin ka ba tisid Winaꞌam nidib yelaa. ²M miꞌ ye ya mor potenꞌer ye ya suŋ, ka nweꞌed nyoꞌog ne Masedonia nidib ya yela, n yeli ba ye Winaꞌam nidib bane be Akaia teŋin la tiꞌeb ye ba suŋ yuum sa. Ka yanam mor potenꞌer ye ya suŋ la kpeꞌeŋi ba bedego sa. ³Ka m ye m tum ti baꞌabiis bama ye lin ka m nweꞌed nyoꞌog ya yela yelkaŋa nwa ni la ku a pianꞌad maꞌanee, ka lee a sida, ka ya sid tiꞌeb ne ya piini la wuu man yel siꞌem la. ⁴Ka li yaꞌa kaꞌ alaa ka Masedonia dim sieba yaꞌa doli m ka nye ka ya pu tiꞌebe, nyan na dii ti bedego, ka m pu len yet yanam yelaa. Nyan na dii ti tiname daa tenꞌes ye ya na tiꞌeb ne ya piini la zug. ⁵Ka dinzug ka m gos ka li nar ka m kpeꞌeŋ ti baꞌabiis bama ye ba gaad tuon ka deŋim tiꞌeb piini kan ka ya ziꞌel noor ye ya tis la. Ka ala ka m yaꞌa ti paa na, ya na pun tiꞌeb ne ya piini la. Ka li na paꞌal ye ya tisidne ne ya boodim ka kaꞌane ne mugusugo.

⁶Tenꞌesimi neꞌ. Niŋkane but bielim biꞌela yaꞌa ti bun, o ku nye bedegoo. Amaa one but bedego me yaꞌa ti bun, o na nye bedego. ⁷Keli ka ya soꞌ mekama niŋ wuu on gbanꞌe siꞌem la, ka kaꞌane susaꞌaŋ bee soꞌ mugusidi yaa. Winaꞌam noŋ one tisid piini ne sumalisim, ⁸ka na nyaŋe tisi ya ka li gaad yaname bood siꞌem. Ka ya na yiti mor yanam meŋi bood siꞌem la wusa, ka na nyaŋe tis piini ye ya suŋ tuumsuma wusa. ⁹Li dolne lin da sob Winaꞌam gbauŋin popielnam yela siꞌem la ye,

“O nok piini bedego tis noŋdim,

ka o popielim la na be yuma ka li kaꞌ naare.”

¹⁰Winaꞌam one tisid bane but la bielim ka tisid diib ye ti di la, na tisi ya yelsum ka li zemisi ya boodim ka ke ka li nobug, ka me ke ka yanam mor siꞌel na tis la nobug. ¹¹Ka ya na yiti mor bedego bedego n na tis nidib. Ka ya piini lin ka ti tolisid la, na ke ka nidib bedego puꞌusid Winaꞌam bareka, ka li na yine tinam saꞌan na.

¹²Suŋir kan ka ya tisid Winaꞌam nidib la pu suŋidi ban maꞌane, amaa li me ket ka nidib bedego puꞌusid Winaꞌam bareka. ¹³Ka suŋir kaŋa paꞌan yanam a siꞌem ka ke ka nidib nyet ka ya siaki dol Kiristo labasuŋ la. Dinzug ka ba na zunꞌe Winaꞌam ka puꞌus o bareka yaname mor noor yinni ne ba n tisidi ba piintitaꞌar la, ka me mor noor yinni ne Winaꞌam nidib wusa la. ¹⁴Winaꞌam n tisi ya yelsumtitaꞌar la zug ka ba na noŋi ya bedego ka sos Winaꞌam tisi ya. ¹⁵Keli ka ti puꞌus Winaꞌam bareka o piintitaꞌar line gati ti pianꞌad ben la.

Paul lebisug bane pu bood o la yela

¹Man Paul, one ka ya yel ye m yaꞌa bee ya saꞌan m a dabieug, ka m yaꞌa kaꞌa ya saꞌane m mor sukpiꞌeuŋ n pianꞌadi ya yela la, belimidi ya ne Kiristo sumbugusum, ²ka sosidi ya ye m yaꞌa ti kena, li ku nar ka m pianꞌad ne sukpiꞌeuŋo. M miꞌ ye m na nyaŋe mor sukpiꞌeuŋ n saꞌal bane yel ye ti tum ne ka li dolne ti ninsaalib boodim la. ³Hale ne tinam be dunia ni la ti pu nweꞌed tanp wenne dunia nidibi niŋid siꞌem laa. ⁴Lin ka ti more zabid la kaꞌane dunia dine, ka lee more Winaꞌam paŋ ka saꞌamid line mor paŋ wusa. ⁵Ka saꞌamid ziri tenꞌes beꞌed dim ne bane duꞌosid ba meŋ ne Winaꞌam baŋir yela la. Ka ti nyaŋ potenꞌer beꞌed wusa ka ba siak a Kiristo din. ⁶Ka ti yaꞌa keenn ya saꞌan na, ka ya paꞌali ti ye ya sid siak Winaꞌam noor, tiname tiaꞌ ye ti saans one pu siak Winaꞌam noor la.

⁷Gosimi lin ka ya nyet la ka kpansi ba. Soꞌ yaꞌa be ka tenꞌes ye o a Kiristo nid, on tenꞌesim o meŋ yela ye on a Kiristo nid la tinam me ane ala. ⁸M nweꞌed nyoꞌog ne paŋ kan ka Winaꞌam tisi ti la yela, line a ye ti kpeꞌeŋi ya, ka kaꞌ ye ti saꞌami yaa. Hale ne man nweꞌe nyoꞌog ka li gaad lin nar siꞌem la, m ku di nyan ne li yelaa. ⁹M pu bood ye m niŋ ka li a wuu m bood ye m kpenꞌesi ya dabiem ne m gbana laa. ¹⁰Sieba yet ye, “O gbana la kpiꞌemne ka tebis hale. Amaa o yaꞌa bee ti saꞌan o mor dabiem ka o pianꞌad kaꞌa gbin ne.” ¹¹Niŋkan daana baŋim ye lin ka ti yet gbana ni la, ti yaꞌa keenn ya saꞌan na, ala ka ti me na niŋ.

¹²Ti ku yel ye ti a suꞌum wuu bane tenꞌes ye ba a suꞌum hale la, ka maki ti meŋ ne baa. Ba meŋ boodim gbanꞌe line a suꞌum ye ba niŋ, ka ba maki ba meŋ ne ban gbanꞌe siꞌem la, ka me maki ba meŋ ne ba taaba. Linzug ba kaꞌa yaꞌam. ¹³Ka ti ku nweꞌe nyoꞌog ka li gaad Winaꞌam tisi ti siꞌem la benne, ka lee na nweꞌe nyoꞌog n zemis tuumkan ka o tisi ti la ben. Ka ti tuuma ya saꞌan la zemis on tisi ti la ben. ¹⁴Ka lin sadigim a sida la, tiname daa a yiiga dim n keenn ya saꞌan na n mor Kiristo labasuŋ na la, ti daa pu gaadi one tisi ti siꞌel la ben ne. ¹⁵Dinzugo ti pu nweꞌed nyoꞌog ne tuumbane ka sieba tum laa, line gaad Winaꞌam tisi ti siꞌem ben laa, ka lee mor potenꞌer ye ya yadda niŋir Winaꞌam ni na nobug ka ti na nyaŋe tum ya saꞌan ka li gaad tinam daa yiti tum siꞌem ya saꞌan la, ka li kpelim zemis ne Winaꞌam tisi ti siꞌem la ben. ¹⁶Ka ti yuꞌun na mool labasuŋ la teens bane be ya tuon la ni, ka ku nweꞌe nyoꞌog ne tuumkan ka soꞌ deŋim tum o soꞌolim kan ka Winaꞌam tis o ye o tum la nii. ¹⁷Li dolne lin da sob Winaꞌam gbauŋin siꞌem ye, “One bood ye o nweꞌe nyoꞌog on nweꞌem nyoꞌog ne lin ka Zugsob la niŋ la.” ¹⁸Li kaꞌane niŋkane yel o meŋ suꞌum yela la a ninsuŋo, amaa li ane niŋkane ka Winaꞌam yel o suꞌum yela la a ninsuŋ.

Paul ne ziri Tumtumnib la yela

¹M mor tiꞌir ye ya na di suguru ne m yalimis la biꞌela, amaa ya pun di suguru ne li. ²M nyuune ya yela wuu Winaꞌami nyuune ya yela siꞌem la, li wenne dau one gur poꞌaꞌeliŋ one ziꞌ dau la, ka ti ke ka o kul sid. Ka yanam wenne poꞌaꞌeliŋ la, ka o sid la me wenne Kiristo ne. ³M zot dabiem ye ya potenda na tiak ka ya bas ka ku tiaꞌ ye ya dol Kiristo suꞌuŋa ne ya sunf yinnii, ka wenne Eve one ka waaf la da maꞌ o ne o yaꞌambeꞌed la. ⁴Ka soꞌ yaꞌa keenn ya saꞌan na ka moon Yesu soꞌ yela, ka li kaꞌ Yesu one ka ti mool la yelaa, bee ya diꞌe siig kane be li konꞌ ne line ka ya pun diꞌe la, bee ya diꞌe labasuŋ line be li konꞌ ne line ka ya siak la, ya na yiti modig ka di suguru ne ba. ⁵M pu tenꞌes ye m ane nyaꞌaŋ nid ne Tumtumnib bane ka ya tenꞌes ye ba a suꞌum galis laa. ⁶Hale ne man pu zamis nomiꞌilim pianꞌad la, m lee mor baŋir. Ti yele ya nyain siꞌel wusa poogin.

⁷M daa mool Winaꞌam labasuŋ la ya saꞌan, ka daa pu ke ka ya yo siꞌela, ka sie m meŋ ye yanam lee du. Ya tenꞌes ye man daa tum siꞌel la, a beꞌed n tisi ya bee? ⁸M daa diꞌe ligidi Winaꞌam nidib sieba saꞌan ye m suŋi m meŋ ka lee tum tisi ya. ⁹Ka man daa be ya saꞌan ka m boodim a siꞌem wusa, m daa pu daami yaa. Amaa li daa ane ti baꞌabiis bane yi Masedonia ni la daa tis man bood siꞌel wusa. Man daa pu daami ya siꞌel ni la, m na kpelim a ala ne dabisbane be tuon la. ¹⁰Li a sida ye m miꞌ Kiristo yelsida ka doli li. Ala li me a sida ye soꞌ ku ke ka m sin m noor Akaia teensin nyoꞌog nweꞌeb kaŋa yelaa. ¹¹Bo ka m yel anwaa? Man pu noŋi ya la zug bee? Ayei. Winaꞌam miꞌ ye m noŋi ya.

¹²M na kpelim niŋ man niŋid siꞌem la nannanna ye m ke ka ziri dim la ku nye suer n nweꞌe nyoꞌog n yel ye ba tum wuu tiname tum siꞌem laa.

¹³Nimbama nwa buudi ane nimbane maꞌad ye ba ane Tumtumnib, ka maꞌadi ba tuuma yela ka tiake ba meŋ n tuꞌas wuu Tumtumnib bane ka Kiristo sid tum la. ¹⁴Li kaꞌ yelsaaŋa. Hale Sutaana tunꞌe tiak o meŋ n tuꞌas wuu malek suŋ ne. ¹⁵Dinzugo, Sutaana tumtumnib yaꞌa tiake ba meŋ n tuꞌas wuu nimbane tum popielim tuuma la, li kaꞌ bunnyalimaa. Ba daar yaꞌa ti paae, ba na diꞌe line nare ba tuuma la a siꞌem.

Paul namisug la yela

¹⁶M ye m yel din ka m pun yeli ya ye, soꞌ da tenꞌes ye m ane zolugo. Amaa ya yaꞌa tenꞌes ye m sid ane zolug, yanam dimi m suguru wuu yaname yiti dit zolug suguru siꞌem la, ka m na nyaŋe nweꞌe nyoꞌog biꞌela. ¹⁷Man yel siꞌel nannanna la pu yit Zugsob saꞌan naa. Ka li yaꞌa aa m nyoꞌog nweꞌeb la ni, m pianꞌad wuu zolug ne. ¹⁸Ka nidib bedego sadigim nweꞌe nyoꞌog ba dunia bun yela la, mam me na nweꞌe nyoꞌog. ¹⁹Yaname sadigim a yaꞌam dim bedego la, ya yiti dit suguru ne zon! ²⁰Soꞌ yaꞌa tansi ya wuu ya ane ba yamis, bee diꞌe siꞌel ya saꞌan yanam naꞌasidi ba la yela, bee more ya ba nuꞌusin, bee ziemi ya, bee nweꞌe ya tampianꞌas, ya yiti modig ka di suguru ne ba. ²¹Line kpenꞌesi m nyan la ane ye ti daa tadigne, ka m me siake li.

Ka soꞌ yaꞌa mor sukpiꞌeuŋ na nweꞌe nyoꞌog ne siꞌel yela, mam me mor sukpiꞌeuŋ na nweꞌe nyoꞌog li yela. M pianꞌad ne wuu zolug ne. ²²Ba yaꞌa nweꞌe nyoꞌog n yel ye ba ane Hibiru dim bee Israel dim bee Abraham yaas, man me tunꞌe lebis ye man me ane ba yinni. ²³Ba yaꞌa yel ye ba ane Kiristo tumtumnib m tunꞌe lebis ye man a Kiristo tumtumsuŋ n gaadi ba. M pianꞌad ne wuu one kaꞌa yaꞌam ne. Mam tum bedego n gaadi ban tum siꞌem la. Ka ba kpenꞌesi m sarega noor bedego n gaad bam kpenꞌesi ban siꞌem la. Ka ba fiꞌebi m noor bedego n gaad bam fiꞌebi ban siꞌem la. Ka saŋa bedego ka m pu lal ne kuꞌum. ²⁴Noor anu ka Jew dim fiꞌeb man ne kpaꞌasa noor piistanꞌ ne awai. ²⁵Noor atanꞌ ka Room dim buꞌu m. Ka noor yinni ka nidib lob man ne kuga. Noor atanꞌ ka m be aaruŋin ka li tua tampiins ka saꞌam ateukun. Ka noor yinni ka m be kuꞌomin la dabis mum. ²⁶M daa nye yeltood m goondim ni. Kuꞌom daa ye li di man, ka faandib giŋi man ye ba faann m laꞌad. Ka m Jew dim taaba ne bane kaꞌa Jew dim moꞌ ye ba saꞌam man. Ka m nye yeltood ateuk poogin. Ka zam baꞌabiis moꞌ ye ba saꞌam man. ²⁷M daa tum tuum kpiꞌema. Ka noor bedego ka m pu gbisida. Ka koꞌom ne kuꞌonuud daa gbanꞌe m. Ka m pu nye diib bee gbeensir bee fuugi na pil waade. ²⁸Line paꞌas la, daa wusa m mor sunf zeeb ne Winaꞌam nidibi n be zinꞌig wusa yela. ²⁹Soꞌ yaꞌa pu kpiꞌem ne o Winaꞌam dolim la nii, li wenne mane pu kpiꞌema. Ka soꞌ yaꞌa ke ka o tiraan tum tuumbeꞌed, m sunf yiti saꞌam ne one ke ka o niŋ ala la.

³⁰Li yaꞌa nar ye m nweꞌe nyoꞌog, m na nweꞌe nyoꞌog ne line paꞌal m tadimis. ³¹Winaꞌam one aa ti Zugsob Yesu saam ka o yuꞌur nyet zunꞌor ka li kaꞌ naar la, miꞌ ye m pu maꞌada. ³²Man daa be Damaskus teŋin la, niŋ kane ka naꞌab Aretus ke ka o soꞌe Damaskus la daa guꞌul nidib teŋ la zaꞌanoorin ye ba gbanꞌe m. ³³Ka sieba daa nok nwiig n lo peog ka ke ka m kpenꞌ zinꞌi peogin la, ka ba noki li tud takoro ni sigisi m ka m zo.

Yelsuaꞌada line nie Paul saꞌan la yela

¹Li nar ka m nweꞌe nyoꞌog, hale laꞌam ne nyoꞌog nweꞌeb la kaꞌ nyood laa. Ka m ye m pianꞌ siꞌelnam line ka Zugsob la ke ka m nye ka li wenne zaansuŋ ne, ne yelsuaꞌada line ka o ke ka ba nie ka m baŋi ba. ²M miꞌ soꞌ Kiristo ni, ka yuma piinanaasi line da gaad sa la, ka Winaꞌam da nok o du arazana ni agol. M ziꞌ o sid da du ne, ne o niŋgbinaa, bee o zaansimne nyee lii, Winaꞌam maꞌaa miꞌ. ³Ka m miꞌ ye niŋkaŋa da du Winaꞌam sumalisim teŋin agol, ka lee ziꞌ ye o sid da du ne, ne o niŋgbina bee o zaansimne nyee lii, Winaꞌam maꞌaa miꞌ. ⁴Ka dau la wum siꞌelnam anina, line ka o ku nyaŋe yel, ne line ka ninsaal pu mor suer na yel laa. ⁵Ka man na nweꞌe nyoꞌog dau kaŋa yela ka lee ku nweꞌe nyoꞌog m meŋ yelaa. Asee bun line paꞌal ye m ane tadim la yela maꞌaa ka m na nweꞌe nyoꞌog. ⁶Ka m yaꞌa boodin ye m nweꞌe nyoꞌog m naan ku aan yalim, man pianꞌadin sida la zug. Ka m lee ku niŋi lii, ka soꞌ ti tenꞌes m suꞌum yela n gaad on nye ka m niŋ siꞌem ne on wum man yel siꞌem la.

⁷Siꞌel be m niŋgbinin ka m laafe poꞌog, lin ket ka m pu nyaŋed nweꞌed nyoꞌog ne yelsuaꞌada titada line ka Winaꞌam nie m laa. Ka line zabidi m niŋin la yi ne Sutaana saꞌan na n daamid m ye li ke ka m ku nyaŋe nweꞌ nyoꞌogo. ⁸Noor atanꞌ ka m sos Zugsob ye o yiisimi li m saꞌan. ⁹Ka o lebisi m ye, “Man yelsum la siak uf, ka fun kaꞌa paŋ saŋsiꞌa la ka m paꞌane m paŋi zem siꞌem.” Dinzug m mor sumalisim ka nweꞌed nyoꞌog ne man pu kpiꞌem la ye Kiristo paŋ na bee m saꞌan. ¹⁰M yaꞌa pu kpiꞌema, bee nidib yaꞌa tuꞌud m bee m yaꞌa nyet yeltood bee namisug bee daamug Kiristo zug, m mor sumalisim. Mam kaꞌa paŋ la, lin ket ka m mor Kiristo paŋ, ka linzug ka m mor sumalisim.

Paul n bood ye Korint dim nye yelsum la yela

¹¹M niŋid wuu yalim ne. Ka li ane yaname ke ka m aa ala. Yanam naan paꞌalin mam a suꞌum siꞌem. Hale baa m yaꞌa a zaalim, li kaꞌ ye m pu a suꞌum n paae nimbane ka ya tenꞌes ye ba a Tumtumnib ka a suꞌum galis laa. ¹²M daa modigi niŋ bunnyalima ne tuumtitada ya saꞌan line paꞌal ye m sid ane Kiristo Tumtum. ¹³Ka ya diꞌe yelsum ka li zemis ne Winaꞌam nidib sieba n diꞌe siꞌem la. Yelsum kan maꞌaa ka ya pu diꞌe ane ye, m pu ke ka m meŋ yela daami yaa. M belimi ya ye ya tisi m suguru m taal kaŋa yela.

¹⁴Noor atanꞌ daan nwa ka m tiꞌebid ye m kena kaae ya. M noŋi ya ka bood ye ya me noŋi m, ka pu bood ye m diꞌe ya ligidi, ka ku ke ka m yela daami yaa. Yanam wenne m biis ne. Ka li kaꞌ ye biise na diisi ba saamnama, ka ane ye saamnami na diisi ba biis. ¹⁵M na mor sumalisim ka nok m soꞌolim ne m meŋ wusa n tis, ye m suŋi ya. Man noŋi ya bedego la zugo, yanam na noŋi man biꞌela bee?

¹⁶Ya sieba yet ye, li a sida ye m yela pu daami yaa. Ka ye m lee more yaꞌam, ka nyaŋe ya ne damaꞌam. ¹⁷M daa pu ke ka nimbane ka m tumi ya saꞌan la soꞌ soꞌ zami ya n diꞌe siꞌel ya saꞌan n tisi ma. ¹⁸M daa belim Titus ye o keenn ya saꞌan na, ka ke ka ti baꞌabiig soꞌ laꞌam dol o. Titus daa pu zami ya n diꞌe siꞌela. Bee m maꞌanee? Ka mam ne Titus tum ne potenꞌer yinni, ka dol suer yinni.

¹⁹Ya tenꞌes ye tinam yet neꞌeŋa wusa la, ti mood ye ti pianꞌ yiisi ti meŋ ya saꞌan bee? Ayei, ti pu niŋid alaa. Ti pianꞌad gbauŋin nwa ne Winaꞌam tuon lin ka Kiristo bood ye ti pianꞌ la. Ka li wusa ane ye ti suŋ yanam bane aa ti baꞌabinoŋa la. ²⁰M zot dabiem ye m yaꞌa keenn ya saꞌan na, m paꞌati nye ka ya pu wenne wuu man boodin ye ya aan siꞌem laa, ka ya me na nye ka mam meŋ ku niŋ wuu yanam boodin ye m niŋin siꞌem la mene. Ka m paꞌati nye ka ya zabid ne taaba ka nyuun, ka ya sunf dued ne taaba, ka ya weligid ne taaba, ka saꞌam ya taaba zut, ka keend taaba, ka niŋid yood yoodi, ka mor nyeesim. ²¹M lem zot dabiem ye m yaꞌa lem kena Winaꞌam na diisi m nyan ya tuon, ka m sunf na saꞌam ne ya sieba bane daa tum tuumbeꞌed ka nam pu tiake ba sunya ne tuumbeꞌed ne dianꞌad tuuma ne nyaꞌamis line ka ba daa tum la yelaa.

Saꞌalug ne puꞌusug

¹Lina paasid noor atanꞌ daan ka m na kena kaae ya. “Soꞌ yaꞌa mor taal ne o tiraan ka li a antuꞌa, li nar ka on daana mor kasetib ayi bee atanꞌ.” ²M yet bane tum tuumbeꞌed la ne bane kpelim la wusa ye, m yaꞌa kena m ku zo ya soꞌ nimbaanliga. Man daa bee ya saꞌan noor ayi daan ni la, m daa pun yeli ya neꞌ. Ka mam kaꞌa ya saꞌan nannanna la, m na lem yeli ya neꞌ yaꞌas. ³Yanam bood ye ya baŋ ye Kiristo tisi m suer ka m pianꞌad neꞌ la, li kaꞌa ye o koꞌoŋ paŋ ye o maali ya siꞌela, amaa o mor paŋ hale ya ni. ⁴Li a sida ye on da be dapuudir zug la o da kaꞌa paŋa, ka kpi. Ka li lee ane Winaꞌam paŋ la ke ka o voe. Ka tinam a yinni ne Kiristo la ti me kaꞌa paŋa, ka Winaꞌam paŋ la ke ka ti laꞌam voe ne Kiristo ka tum ne o paŋi ya saꞌan.

⁵Peligimini ya poog gos ye ya sid niŋ Kiristo yadda. Kpansimini ya meŋ ka Kiristo be ya ni. Li yaꞌa kaꞌa alaa ya lu ne. ⁶M mor potenꞌer ye ya na baŋ ye tinam kaꞌ nimbane bas Winaꞌam dollim. ⁷Ti sosid Winaꞌam ya zug ka ya da tum line a beꞌede. Kaꞌa ye ti duꞌosidi ti meŋ tiname nyaŋ makir laa, amaa ye ya maal line a suꞌum, hale baa li yaꞌa wenne tinam lu ne. ⁸Ti ku nyaŋe niŋ siꞌel line pu dol Winaꞌam sida suer laa, asee yelsida la maꞌaa. ⁹Tinam yaꞌa tadig ka yanam lee mor paŋ, ti mor sumalisim. Ka sosid Winaꞌam ye ya beilim wusa na a suꞌum. ¹⁰Ka man kaꞌa ya saꞌan la ka m sobid neꞌeŋa tisidi ya ye m yaꞌa ti kena, li pu nar ye m zaŋ Zugsob la tisi m paŋ siꞌa la n tum ne sutoogo. O tisi m o paŋ la ye m suŋi ya ka kaꞌ ye m saꞌami yaa.

¹¹Baꞌasugo, m baꞌabiise, kelisimi man yet siꞌel la, ka tiake ya tuuma, ka more potenꞌer yinni, ka be ne sumalisim, ka Winaꞌam one tisid noŋilim ne sumalisim, na bee ya saꞌan.

¹²Puꞌusimi taaba ne noŋilim puꞌusug. ¹³Winaꞌam nidib wusa puꞌusidi ya.

¹⁴Ti Zugsob Yesu Kiristo yelsum ne Winaꞌam noŋilim na bee ya wusa saꞌan, ka ya me na a yinni ne Winaꞌam Siig Suŋ la. Kpelimi suꞌum.