1 TESALONIKA DIM

Paul n sob gbauŋ yiiga daan la n tis

TESALONIKA DIM

la nwa

¹Man Paul ne Silvanus ne Timoti sobid gbauŋ kaŋa n tisid yanam Winaꞌam nidib bane be Tesalonika teŋin la n be ti Baꞌ Winaꞌam ne Zugsob Yesu Kiristo ni la.

Winaꞌam na tisi ya yelsum ne sumalisim.

Tesalonika dim beilim ne ba yadda niŋir la yela

²Ti puꞌusid Winaꞌam bareka saŋa wusa ya zug, ka tiendi ya yela ti winsosugin. ³Ka tenr ti Baꞌ Winaꞌam la tuon ya yadda niŋir ne ya noŋilim line ke ka ya tum bedego ka ya tiꞌir kpemisi ya, ka ya modig be ti Zugsob Yesu Kiristo ni.

^4-5Ti baꞌabiis ban ka Winaꞌam noŋ la. Ti daa mor labasuŋ la na tisi ya ka li kaꞌane pianꞌad maꞌanee, ka lee ane ne Winaꞌam Siig Suŋ paŋ. Ka ti daa miꞌ suꞌuŋa ye Winaꞌam tumi ya saꞌan, ka daa baŋ ye o gaŋi ya. Tinam daa be ne ya la, ya daa miꞌ ti belim daa a siꞌem. Ka li ane yanam suꞌum zug. ⁶Ya daa ane ti tuꞌasim taas ne Zugsob la, ka diꞌe labaar n nye namisug bedego li zug la, ka laꞌam diꞌe sumalisim line yi Winaꞌam Siig Suŋ la ni na. ⁷Linzug ka yadda niŋidib bane be Masedonia ne Akaia soꞌolimin me a ya tuꞌasim taas. ⁸Ka nidib bedego bane be ani wum Zugsob labaar la ya saꞌan. Ka li kaꞌ bama maꞌanee, ka ane bane be zinꞌis wusa me wum ya yadda niŋir Winaꞌam ni la yela. Ka siꞌel kaeꞌ ka ti na len yeli baa. ⁹Nimbama la wusa pianꞌad yanam daa diꞌe ti suꞌuŋa siꞌem, ka bas baga ka dol Winaꞌam one voe ka sid a Winaꞌam la, ¹⁰ka gur o Biig Yesu ken la one na ti yi arazana ni la na. Winaꞌam da vuꞌug o kumin la, ka o faann ti Winaꞌam supeen kane na ti kena la ni.

Paul n daa tum siꞌem Tesalonika ni la yela

¹Ti baꞌabiise, yanam miꞌ ye tinam daa kena kaae ya la, li daa kaꞌa zaalim, ²ka miꞌ ye hale ba daa namisi ti, ka diisi ti nyan Filipi teŋin, ka ti nyaan kenn yanam saꞌan Tesalonika teŋin na. Winaꞌam daa tisi ti sukpiꞌeuŋ ka ti tuꞌas labasuŋ dine yi o ni na la tisi ya, hale laꞌam ne sieba daa daami ti bedego la.

³Ti saꞌalug pu yi damaꞌarin bee potenꞌebeꞌedinee. Ka li kaꞌ ye ti bood ye ti zam nidiba. ⁴Winaꞌam gosi ti ka ti nar ye o guꞌul ti o labasuŋ la zug, ka ti yiti pianꞌad wuu on bood siꞌem la. Ti pu mood ye ti maꞌae ninsaalib sunfo, ka lee mood ye ti maꞌae Winaꞌam one kpansi ti potenꞌer la sunf. ⁵Ya miꞌ suꞌuŋa ye ti daa pu tuꞌas damaꞌar zunꞌor pianꞌad bee pianꞌad line suaꞌ maal ne fufum ne. Winaꞌam miꞌ ye li a sida.

⁶Ka ti daa pu bood ye ti diꞌe zunꞌor ya saꞌan bee sieba saꞌanee, hale tinam a Kiristo Tumtumnib la zug ka ti mor suer ye ti daa sosidin siꞌel wusa ya ni, amaa li lee daa pu niŋid alaa. ⁷Ti daa a baanlim ya saꞌan, wuu bima gosid o biis siꞌem la. ⁸Tinam noŋi ya la zug, ka ti daa siak ye ti tisi ya labasuŋ line yi Winaꞌam ni na la, ka laꞌam pesigi ti meŋ tisi ya. Ti daa noŋi ya bedego.

⁹M baꞌabiise, ya tenr tiname daa tum siꞌem la. Ti daa tum tuuma yuꞌuŋ ne nintaŋ ye ti yela da daami yaa, tinam daa moon labasuŋ dine yi Winaꞌam ni na tisi ya la.

¹⁰Yanam ne Winaꞌam nye tinam niŋid siꞌem yanam yadda niŋidib saꞌan, ka ti a suꞌum nyain ka a popielnam ne buod dim. ¹¹Ya miꞌ ye ti daa saꞌali ya yinni yinni wuu dau saꞌan o biis siꞌem la, ¹²ka kpeꞌeŋ ya sunf ka yeli ya ye ya dol suer kane na maꞌae Winaꞌam sunf, one buoli ya ye ya kpenꞌ o soꞌolimin ne o naꞌamin la.

¹³Tiname daa mor labaar line yi Winaꞌam ni na tisi ya la, ya daa wum ka diꞌe li ka baŋ ye li ane labaar line pu yi ninsaalib ni naa, ka baŋ ye li ane labaar line yi Winaꞌam ni na. Ka li sid aa ala, ka be yanam yadda niŋidib sunya ni n tum. Ka dinzug ka ti me puꞌusid Winaꞌam bareka saŋa wusa. ¹⁴Ti baꞌabiise, li daa niŋid yanam saꞌan, wuu lin daa niŋid Winaꞌam nidib bane a yinni ne Yesu Kiristo ka be Juuda teŋin la siꞌem la. Ya nye namisug ya meŋ buudi ni wuu ban nye Jew dim saꞌan siꞌem la. ¹⁵Ba da ku Zugsob Yesu ne Winaꞌam nodiꞌesidib men, ka kadi ti yiis, ka li due Winaꞌam sunf, ¹⁶ka viꞌi ti ye ti da pianꞌad ne bane kaꞌ Jew dim ye ba nye faangir. Linzug ka ba a ninsaalib dataas. Tuumbeꞌed kaŋa kena paas ba tuumbeꞌed wusa ka li yuꞌun galis. Ka Winaꞌam supeen yuꞌun lu ba zug.

Paul n daa bood siꞌem ye o kaae ba la yela

¹⁷Ti baꞌabiise, tinam daa yi ya saꞌan saŋa biꞌela la, ti daa bakne ne niŋgbina ka kaꞌane suunrin bakire. Dinzug ka ti daa bood ka mood hale ye ti kena kaae ya yaꞌas. ¹⁸Ti daa bood ye ti leb ya saꞌan na. Ka man Paul daa mood ye m leb ya ni na noorin siꞌem, ka Sutaana viꞌi ti. ¹⁹Saŋkan ka ti Zugsob Yesu na ti leb na, ka ti be o tuon, ya yela ka ti nweꞌed nyoꞌog ka mor tiꞌir ne sumalisim. Kaꞌa ala bee? ²⁰Yanam zug ka ti na nye naꞌasi ne sumalisim.

¹Dinzugo, tiname n ziꞌ yaname a siꞌem la, ke ka ti ku lem nyaŋe modig yaꞌasa, ka siak ye ti be Atens teŋin ti konꞌo konꞌ, ²ka tum ti pitu Timoti one a ti Winaꞌam tumtum tiraan n paꞌan Kiristo labasuŋ la, ye o kena suŋi ya, ya yadda niŋir poogin, ka kpeꞌeŋi ya sunya ³ka namisug bama da ke ka ya soꞌ bas Winaꞌam suer la dollim. Yanam miꞌ ye li ane Winaꞌam boodim ye ti namis. ⁴Tiname daa nam be ne ya la, ti daa deŋi yeli ya ye ti wusa na nye namisug. Ka yanam miꞌ ye line la sid niŋ la. ⁵Dinzugo, mam daa ku nyaŋe modig la, ka m tum Timoti ye m baŋ ya yadda niŋir a siꞌem, ka zot ye Sutaana paꞌati panꞌasi ya, ka ti tuuma ya saꞌan la lieb zaalim.

⁶Ka nannanna ka Timoti yi ya saꞌan n leb na, ka mor labasuŋ ya noŋilim ne ya yadda niŋir yela la na, ka yeli ti ye ya tenꞌesidi ti yela saŋa wusa suꞌuŋa, ka bood bedego ye ya nyee ti, wuu tiname bood ye ti nyee ya siꞌem la. ⁷Dinzugo m baꞌabiise, tiname wum ya yadda niŋire a siꞌem yela la ke ka ti sunya kpiꞌem ya yela ti daamug ne ti namisug poogin. ⁸Ya yaꞌa ziꞌe kiŋ kiŋ ka dol Zugsob la, ya sid na be beilim suŋ. ⁹Ka nannanna ti na nyaŋe puꞌus Winaꞌam bareka ya zug, ka me puꞌus o bareka tinam mor sumalisim o tuon ya yela la zug, ¹⁰ka sosid o ne ti sunya yuꞌuŋ ne nintaŋ, ye ti nyee ya ne nif, ka suŋi ya ne dine pasig ya yadda niŋirin.

¹¹Ti sosidi ti Baꞌ Winaꞌam, ne ti Zugsob Yesu Kiristo ye o maal suer tisi ti, ka ti keenn ya saꞌan na. ¹²Ka sosid Zugsob ye o ke ka ya taaba noŋilim ne nidib wusa noŋilim a siꞌem na nobug bedego wuu tinam noŋi ya siꞌem la, ¹³ye o kpeꞌeŋi ya sunya ka saŋkan ka ti Zugsob Yesu na kena ne o nidib wusa la, yanam na di buod ka a suꞌum nyain ti Baꞌ Winaꞌam la tuon.

Beilim suŋ line maꞌed Winaꞌam sunf la yela

¹To, ti baꞌabiise, ya daa zamisid ti saꞌan yaname na a siꞌem ka li maꞌae Winaꞌam sunf. Ya kpelim aa ala. Ka ti saꞌali ya ka belimi ya ne ti Zugsob Yesu yuꞌur ye ya niŋ ka li gaad ala.

²Ya miꞌ noyelug bane ka ti daa tisi ya ne Zugsob Yesu paŋ la, ³ye Winaꞌam bood ye ya a suꞌum nyain, ka luak dianꞌad tuuma, ⁴ka ya yinni yinni baŋ yanam na niŋ siꞌem di poꞌa ne naꞌasi, ka ya sunya a nyain. ⁵Ka li kaꞌane ne beꞌed yaꞌamleog wuu baꞌamaanib bane pu dol Winaꞌam niŋid siꞌem laa. ⁶Ka neꞌ poogin, mit ka dau tum tuumbeꞌed ka maal beꞌed tis o baꞌabiig. Ti daa deŋim yeli ya, ka saꞌali ya ne paŋ ye, Zugsob na namis bane tum tuumbeꞌed bama. ⁷Winaꞌam daa pu gaŋi ti ye ti sunya a dianꞌade, amaa ye li a nyain. ⁸Dinzugo one zanꞌas paꞌalug kaŋa, o pu zanꞌas ninsaala, o zanꞌasne Winaꞌam one tisi ti o Siig Suŋ la.

⁹Li lem kaeꞌ ye ti sob tisi ya ya baꞌabiis noŋilim yelaa. Winaꞌam pun zamisi yanam ye ya noŋ taaba. ¹⁰Ka li a sida ye ya noŋ ya baꞌabiis wusa bane be Masedonia soꞌolimin la. Ti baꞌabiise, ti belimi ya ye ya ke ka noŋilim la gaad lin a siꞌem la, ¹¹ka ya kpeꞌeŋ ya meŋ n a baanlim, ka gosi ya meŋ tuuma, ka tum ne ya meŋ nuꞌus n diisi ya meŋ, wuu tinam daa yeli ya siꞌem la, ¹²ye ya nye naꞌasi bane kaꞌ yadda niŋidib la ni. Ka da tiaꞌ soꞌ ka ye o tisi ya, yanam bood siꞌel la.

Zugsob ken la na yela

¹³Ti baꞌabiise, ti bood ye ya baŋ yelsida ne bane kpi la yela, ka ya sunya da saꞌam wuu bane pu mor tiꞌir laa. ¹⁴Ti siak ye Yesu kpiya ka lem vuꞌug kumin, ka me siak ye bane daa a Yesu nidib ka da kpi la, Winaꞌam na more ba ne Yesu na. ¹⁵Lina ane Zugsob paꞌalug ka ti yeli ya ye, saŋkan ka Zugsob la na ti kena la, tinam bane kpelim voe la, ku deŋ bane kpi la n laꞌas ne Zugsob la yiigaa. ¹⁶Zugsob la meŋ na ti yi arazana ni sig na ka tis noor tansug ka ti wum malek kpeenm kukor ne Winaꞌam naꞌatan piebug. Ka bane a Yesu nidib ka kpi la, na vuꞌug kumin yiiga. ¹⁷Ka Winaꞌam yuꞌun na nok tinam bane kpelim voe la n laꞌas ne ba n tuꞌos Zugsob la saŋgbana ni. Ka ti yuꞌun na be Zugsob la saꞌan saŋa wusa. ¹⁸Dinzugo, kpemisimi taaba sunya ne pianꞌabama.

¹Ti baꞌabiise, li lem kaeꞌ ye ti sob siꞌel tisi ya Zugsob ken la saŋa ne dabisa la yelaa. ²Ka yanam meŋ miꞌ suꞌuŋa, ye Zugsob dabisir la na kena wuu naꞌayiigi na kenn yuꞌuŋ na siꞌem la. ³Nidib yaꞌa ti yet ye, “Laafe ne niŋmaꞌasim be” saŋkan la ka toog na kpelim lu ba zugin, wuu poꞌa yiti saꞌae duꞌam siꞌem la. Ka ba ku nyaŋe yi li nii.

⁴Ti baꞌabiise, yanam kaꞌ lik dima, ka Zugsob la dabisir na kpelim diꞌigi ya wuu naꞌayiiga. ⁵Ya wusa ane neesim nidib, ka be line a nyain la ni, ka ti kaꞌ yuꞌuŋ ne lik nidiba. ⁶Dinzugo, ti da gbisid wuu bama laa, ka nei ka da aa wuu one nu daam koole. ⁷Bane gbisid la, gbisidne yuꞌuŋ. Ka bane nu daam kool la, kool ne yuꞌuŋ. ⁸Ka tiname a neesim nidib la zug, ti da kool ka yaꞌam kaeꞌ. Li nar ka ti a wuu sogia bane yeꞌ zaba laꞌad line a kunt la ye li guꞌu ba meŋ, zaba ni. Ti yeem yadda niŋir ne noŋilim n guꞌu ti nyoꞌod, ka pid kunt balaŋir line a tiꞌir ye ti nye faangir la n guꞌu ti zut. ⁹Winaꞌam pu gaŋi ti ye ti nye o supeene, ka lee ye ti diꞌe faangir line yi ti Zugsob Yesu Kiristo ni na la. ¹⁰On da kpi ti zug, ye saŋkan ka o ti ken la na, ti yaꞌa voe bee ti yaꞌa kpi ne, ti na laꞌam be ne o. ¹¹Dinzugo kpemisimi ya taaba sunya, ka suŋ taaba ya yadda niŋir ni, wuu yaname niŋid siꞌem la.

Saꞌalug ne puꞌusug

¹²Ti baꞌabiise, ti belimi ya ye ya naꞌas bane ka Zugsob la gaŋi ba ye ba guri ya ka tum o tuuma ya soogin ka paꞌani ya la, ¹³ka tisi ba naꞌasi bedego, ka noŋi ba ba tuuma la zug, ka ya mor sumalisim ne taaba.

¹⁴Ti baꞌabiise, ti kpemisidi ya sunya ye ya saꞌal bane mor gbanyaꞌam la, ka kpemis bane pu mor sukpiꞌem la sunya, ka suŋ bane kaꞌ paŋ ba yadda niŋir poogin la, ka mor sumbugusum ne ba wusa, ¹⁵ka guꞌus ka ya soꞌ da lebis o tiraan beꞌed one tum beꞌed la zugo, ka kpemis ya meŋ ye ya tum tuumsuma n tis taaba ne nidib wusa.

¹⁶More sumalisim daar wusa, ¹⁷ka puꞌus Winaꞌam saŋa wusa, ¹⁸ka puꞌus o bareka siꞌel mekama ni; ka li ane Winaꞌam boodim line yi Yesu Kiristo ni na, ye ya niŋid ala.

¹⁹Da zanꞌasi Winaꞌam Siig Suŋ laa, ²⁰ka me da neꞌes pianꞌad line ka soꞌ diꞌe Winaꞌam ni tisi ya. ²¹Kpansimi siꞌel wusa, ka more dine a suꞌum, ²²ka luak bunbeꞌed buudi wusa.

²³Ti sosid Winaꞌam one tisidi ti sumalisim la ye o ke ka ya aa suꞌum nyain. Ka lem sos o ye o na more ya suꞌuŋa, ka Zugsob Yesu Kiristo la yaꞌa ti kena, ka ya siis ne niŋgbina a suꞌum ka ya di buod. ²⁴Winaꞌam one gaŋi ya la a sida sob, ka na niŋ ala.

²⁵Ti baꞌabiise, sosimi Winaꞌam tisi ti, ²⁶ka puꞌus ya baꞌabiis wusa suꞌuŋa. ²⁷M yeti ya ne Zugsob paŋ ye ya karem gbauŋ kaŋa tisi ya baꞌabiis zanꞌasa.

²⁸Ti Zugsob Yesu Kiristo yelsum na bee ya saꞌan. Ami.