Салоникдегилеге язылгъан экинчи кагъыз

2 Салоникдегилеге

Салоник шагьарда Исагъа иман салгъанлагъа биринчи кагъызын язып, Павел, Коринф шагьарда тура да туруп, шондагъы жыйынгъа арадан бир нече ай гетип бирдагъы керен язгъан болмагъа герек. Павелни биринчи кагъызында бу дюньяны ахыр замандагъы гьалы булан байлавлу айтылгъан ойларын Салоникдеги жыйындагъыланы ортакъчылары тюз англап битмеген. Шо хабар да элчиге етише. Гючлю гьызарлавлагъа да тюшюп, Исагъа иман салгъанланы бирлери Месигь экинчи керен къайтып ювукъ заманны ичинде гележек деп гьисаплайлар. Шо гёнгюлю де булан олар ишлемей, оьзлени гьар гюнлюк борчларын кютмей туралар.

Жыйынны бир бир ортакъчыларыны терс къаравларыны алдын алмагъа ва Сыйлы Язывларда Месигьни экинчи керен къайтып гелмеклиги гьакъындагъы уьйретивню мекенли кюйде англатмагъа умут эте туруп, Павел шо агьвалатны алдында болмагъа тюшеген ишлени тындырыкълы кюйде суратлай: Исагъа иман салгъанлар азап чегивлерден къутулуп болмажакълар; оланы гьызарлажакълар, алдатажакълар; иманын яманлажакълар; олагъа хыянатлыкъ этилежек. Амма бары да оьзлени уьстюне тюшген сынавлагъа ва къыйынлыкълагъа да къарамайлы, Павел Салоникдегилеге иманында къатты кююнде токътап турмагъа чакъырыв эте: «Раббибиз Иса Месигь Оьзю ва бизин сюеген, Оьзюню зор яхшылыгъындан таба бизге герти умут береген, даим гёнгюбюзню алагъан Атабыз Аллагь сизин ругьландырсын, яхшы болагъан затланы гьар заман этмеге ва айтмагъа сизге гюч берсин» (2:16 17).

Башлапгъы саламлар

¹Павелден, Силадан ва Тимофейден Атабыз Аллагьны ва Раббибиз Иса Месигьни Салоник шагьардагъы иманлыларыны жыйынына салам! ²Атабыз Аллагьдан ва Раббибиз Иса Месигьден сизге парахатлыкъ ва рагьму болсун!

Аллагьны къыяматгюнгю дуваны

³Къардашлар, сизин учун биз гьар заман Аллагьгъа шюкюр этмеге герекбиз. Шо тийишли де дюр, неге тюгюл сизин иманыгъыз даим арта ва бир биригизге бакъгъан сюювюгюз токътавсуз гючлене. ⁴Башыгъызгъа тюшген гьызарлавларда, азапларда сиз гёрсетип турагъан чыдамлыкъны ва иманны гьакъында Исагъа иман салгъанланы бары да жыйынларында биз оьктемлик булан хабарлайбыз.

⁵Сиз гьали Аллагьны гьакимлиги саялы азап чегип турасыз. Сиз Оьзюню гьакимлигини тюбюне тюшмеге деп лайыкълы гьисапланагъаныгъыз Аллагьны дуваны адилли экенин исбатлай. ⁶Аллагь адиллидир. Сизге азап берегенлеге тийишли азабын О бережек. ^7-8Шолай къыйынлыкъланы башдан гечирген сизин булан бизге буса рагьатлыкъ бережек. Раббибиз Иса кёклерден от ялынны ичинде къудратлы малайиклер булан бирче гелген заманда, шолай болажакъ. Аллагьны танымагъанланы ва Раббибиз Исаны Сююнч Хабарын къабул этмегенлени шо заман О барысын да жазалажакъ. ⁹Олар Раббибизден, Ону зор къудратындан даимге айрылып, даим жазаланып туражакъ. ¹⁰Булар Раббибиз Оьзюню халкъыны арасында макътавлу болмакъ учун ва Оьзюне иман салгъан бары да халкъны арасында оьр болмакъ учун гележек шо гюн болажакъ. Сиз де оланы арасында болажакъсыз, неге тюгюл де Ону гьакъындагъы бизин шагьатлыгъыбызгъа инандыгъыз.

¹¹Шо саялы да Аллагь Оьзю чакъыргъан яшавгъа сиз лайыкълы болсун деп, гьар заман дуа этебиз. О сизин гьар рагьмулу хыялыгъызны ва иманыгъыздан чыгъагъан гьар ишигизни Оьзюню къудраты булан тамамласын деп тилейбиз. ¹²Шоллукъда, сиз Раббибиз Исаны атын макътавлу этежексиз ва сизин ишлеригизден таба О да Аллагьыбызны ва Оьзюню рагьмусу булан макътавлу болажакъ.

Иса къайтып гележек гюнден алда болажакъ агьвалатлар

^1-2Гьали буса Раббибиз Иса Месигьни къайтып гелмеклигини ва биз Ону къаршылама нечик жыйылажагъыбызны гьакъында айтайыкъ. Биз тилейбиз сизге, къардашлар, адашып, адап къалмагъыз! Эгер де ким буса да бирев биз Аллагьны атындан таба сёйлей эди, Раббибиз къайтып гелеген гюн етишди деп неде уьйрете эди, неде кагъыз яза эди деп билдире буса, огъар инанмагъыз. ³Вёрегиз, сизин бирев де къайдагъы затлар булан алдатып къоймасын. Аллагьгъа къаршы уллу башгётеривню заманы гелмей туруп ва жагьаннемге дуван этилген яманлыкъ этежек адам белгили болмай туруп, шо гюн гелмежек. ⁴О адам аллагь деп айтылагъан ва оьзюне сужда этеген бары да затлагъа къаршы чыгъажакъ ва олардан оьзюн оьр салажакъ. О Аллагьны ибадатханасында да ерлешип, оьзюн Аллагьман деп де билдирежек. ⁵Унутгъанмысыз, сизин яныгъызда болгъанда, мен сизге шону гьакъында айтгъан эдим чи? ⁶О адамны белгили болмакълыгъын не зат токътатып турагъанын гьали сиз билесиз: ону заманы гьали де гелмеген.

⁷Амма сырлы яманлыкъ гьаракат этип тура ва шону токътатып турагъан адам бир якъгъа тайгъанча, о шолай этип туражакъ. ⁸Шо заман яманлыкъ этежек адам оьзю ачыкъ болажакъ. Амма Раббибиз Иса авзундан чыкъгъан бир тынышы булан ону оьлтюрежек. Оьзюню макътавлукъда гелмеклиги булан ону ёкъ этежек. ⁹Яманлыкъ этежек адам иблисге хас болгъан ишлер булан гележек. О гьар тюрлю гюч булан ялгъан аламатлар ва муъжизатлар гёрсетежек. ¹⁰Дагъытылывну ёлуна тюшген инсанланы о къайдагъы яман ялгъанлар булан алдатажакъ. Оьзюнден таба къутгъарылма болагъан гьакъ гертиликни сюймегени саялы, олар ёкъ этилежеклер. ¹¹Шо себепден ялгъангъа инансын деп, Аллагь оланы адашдырмагъа къояжакъ. ¹²Натижада, гьакъ гертиликге инанмай, яманлыкъдан къанып къалгъанлагъа айыплап дуван этилежек.

Раббибиз сизин къутгъармакъ учун танглагъан

¹³Амма, Раббибиз сюеген къардашлар, сизин учун Аллагьгъа шюкюр этип турмагъа герекбиз. Неге тюгюл де, сиз Ругьундан таба Оьзюнюки болагъан кюйню этсин деп, гьакъ гертиликге инанып къутгъарылсын деп, Аллагь инг башлап танглагъанларыны арасындансыз. ¹⁴Раббибиз Иса Месигьни макътавлугъуна сиз де ортакъчы болсун деп, биз сизге Сююнч Хабарны етишдиргенде, Аллагь сизин шогъар чакъырды. ¹⁵Шогъар гёре, къардашларым, сёз булан болуп да, кагъыз булан болуп да, биз сизге уьйретген ёлдан тайышмагъыз.

¹⁶Раббибиз Иса Месигь Оьзю ва бизин сюеген, Оьзюню зор яхшылыгъындан таба бизге герти умут береген, даим гёнгюбюзню алагъан Атабыз Аллагь, ¹⁷сизин ругьландырсын, яхшы болагъан затланы гьар заман этмеге ва айтмагъа сизге гюч берсин.

«Бизин учун дуа этигиз»

¹Ахырда, къардашлар, Раббибизни гьакъындагъы хабар сизин арагъызда йимик яйылсын учун, огъар гьюрмет этилсин учун, бизин учун дуа этигиз. ²Раббибиз бизин яман ва къылыкъсыз адамлардан къоруп сакъласын деп дуа этигиз, неге тюгюл Ону гьакъындагъы хабаргъа бары да инсанлар инанмайлар. ³Амма Раббибиз аминдир. О сизге ругь якъдан гюч берер ва иблисден къоруп сакълар. ⁴Сизин айтсакъ, биз буюргъан затланы этип тургъаныгъыз йимик, энни де этип туражагъыгъызгъа Раббибизни алдында инанабыз. ⁵Раббибиз сизин юреклеригизге Аллагьны сюювюн ва Раббибизни сабурлугъун салсын.

«Ишлемеген тишнемес»

⁶Къардашлар, Раббибиз Исаны аты булан сизге буюрабыз: бошуна заманын йибереген ва биз сизге гёрсетген ёлда юрюмейген иман къардашлар булан къатнашмагъыз. ⁷Бизин уьлгюбюз булан нечик юрюмеге герекни сиз оьзюгюз де билесиз. Сизин яныгъызда турагъанда, биз заманыбызны бош оьтгермедик. ⁸Гьеч биревню де гьавайын ашын ашамадыкъ ва биревге де намус салмайыкъ деп, гечесин гюнюн бир этип ишледик, загьмат тёкдюк. ⁹Биз шолай этдик, неге тюгюл биз сизге уьлгю гёрсетмеге сюе эдик. Амма сизден толу кюйде кёмек къаравулламагъа гьакъыбыз бар эди. ¹⁰Сизин яныгъыздагъы заман биз сизге: «Ишлемеген тишнемес», – деп буйрукъ этдик чи.

¹¹Биз муну язагъаныбыз: арагъызда бош туруп, ишлемей, гишилени ишлерине баш сугъуп айланагъанларыгъыз барын биз эшитебиз. ¹²Раббибиз Иса Месигьни аты булан биз шолай тайпалагъа тийишли кюйде яшамагъа, оьзлеге аш сувгъа сама зат къазанмагъа башласын деп буюрабыз. ¹³Сиз буса, иман къардашлар, тийишли затны токътавсуз этип туругъуз.

¹⁴Бу кагъызыбызда биз береген насигьатлагъа гёре юрюмейгенге айрыча тергев берип къарагъыз. Шолай адам булан къатнашмагъыз, о оьзюню юрюшюнден оьзю илыгъагъан болсун. ¹⁵Шону булан бирге де ону душман гьисап этмегиз, огъар иман къардашыгъызгъа йимик буварыв этигиз.

Ахырынчы ёравлар

¹⁶Парахатлыкъ береген Раббибиз оьзю сизге гьар заман, гьар затда парахатлыкъ берсин! Раббибиз сизин барыгъыз да булан бирликде болсун!

¹⁷Мен, Павел, оьз къолум булан саламлар язаман. Шу кагъыз менден экенни белгиси гьисапда гьар кагъызымда мен шолай этемен. ¹⁸Раббибиз Иса Месигьни рагьмусу сизин барыгъыз да булан болсун.