လံာ်စဖါနယၤ.

လံာ်စဖါနယၤ.

၁

¹ ယွၤအကလုၢ်လၢအဘၣ်စီၤစဖါနယၤ, စီၤကူၤၡံအဖိဖိခွါ, စီၤကဒါလယၤအဖိခွါ, စီၤအမၤရယၤအဖိခွါ, စီၤဃံးစကံယၤအဖိခွါ လၢယူဒၤအစီၤပၤစီၤအၤမိၣ်အဖိခွါ, စီၤယိၤၡံယၤအမုၢ်နံၤတဖၣ်အပူၤန့ၣ်,

² ယကမၤလၢာ်ကွံာ် ကယဲၢ်တၢ်အိၣ်လၢထံဧိၤကီၢ်ဧိၤအ ပူၤ, ယွၤစံးဝဲဒၣ်, ³ ယကမၤလၢာ်ပှၤကညီဒီးဆၣ်ဖိကီၢ်ဖိ, ယကမၤလၢာ်ထိၣ်ဧိၤလံၣ်ဧိၤလၢမူကပိာ်လိၤ, ဒီးဒ့ၣ်ဧိၤညၣ်ဧိၤလၢပီၣ်လဲၣ်ပူၤ, ဒီးခီၣ်ဘၣ်တိၢ်အလီၢ်အိၣ်ဒီးပှၤတတီတလိၤ, ဒီးယကမၤစီၢ်ကွံာ်ပှၤကညီလၢထံဧိၤကီၢ်ဧိၤအပူၤန့ၣ်လီၤ, ယွၤစံးဝဲဒၣ်.

⁴ ဒီးယကယူာ်ထီၣ်ယစုထီဒါယူဒၤ, ဒီးကယဲၢ်ပှၤယရူၤၡလ့ၣ်ဖိ, ဒီးယကဒီၣ်တဲာ်ကွံာ်တၢ်အိၣ်လီၤတဲာ်ဘၣ်ဃးဒီးဘဧၤလးလၢအလီၢ်ဖဲအံၤ, တၢ်ဂီၤအပှၤလုၢ်တၢ်အဒိၣ် အမံၤ, ဒီးပှၤလုၢ်တၢ်အဒိၣ်တဂၤ, ⁵ ဒီးပှၤလၢအဘါထီၣ်မူခိၣ်အတၢ်သုးမုၢ်ဂီၢ်မုၢ်လၢဟံၣ်ခိၣ်, ဒီးပှၤလၢအဘါတၢ်ဒီးဆိၣ်တၢ်လၢယွၤအမဲာ်ညါ, ဒီးပှၤလၢအဆိၣ်တၢ် လၢအတၢ်ဂီၤမလိာ်အမဲာ်ညါ, ⁶ ဒီးပှၤလၢအဃၣ်ကွံာ်အသးလၢယွၤ, ဒီးတဃုဘၣ်ယွၤ, ဒီးတသံကွၢ်ဘၣ်အီၤဘၣ်လီၤ.

⁷ အိၣ်ဘှီၣ်ကလာ်လၢကစၢ်ယွၤအမဲာ်ညါတက့ၢ်. အဂ့ၢ်ဒ်အံၤ, ယွၤအမုၢ်တနံၤအိၣ်ဘူးထီၣ်လံ. အဂ့ၢ်ဒ်အံၤ, ယွၤကတဲာ်ကတီၤလံတၢ်လုၢ်, ပာ်စီဆှံလံပှၤလၢအကိးဝဲတဖၣ်န့ၣ်လံ.

⁸ ဒီးမုၢ်တနံၤလၢယွၤကလုၢ်တၢ်န့ၣ် တၢ်ကမၤအသးလၢယကအိၣ်သကိးပှၤအခိၣ်, ဒီးစီၤပၤအဖိအလံၤ, ဒီးကယဲၢ်ပှၤလၢအကူအသိးဒီး ပှၤတခီဘီမုၢ်ဖိအကူအသိးလီၤ.

⁹ ဒီးတၢ်လၢမုၢ်တနံၤန့ၣ် ယကအိၣ်သကိးကယဲၢ်ပှၤလၢအစံၣ်ကပာ်ကျဲစၢၤအကျိၤထံး, ပှၤလၢအမၤပှဲၤအကစၢ်အဟံၣ်လၢတၢ်မၤန့ၢ်ဆူၣ်ဒီးလီတၢ်လီၤ.

¹⁰ ဒီးယွၤစံးဝဲဒၣ်, တၢ်လၢမုၢ်တနံၤန့ၣ်တၢ်ကမၤအသးလၢတၢ်ကိးပသူထီၣ်ကသီၣ်ထီၣ်လၢပဲတရီညၣ်, ဒီးတၢ်ကဟီၣ်ပသူထီၣ်လၢတၢ်ခံတီၤတတီၤန့ၣ် ဒီးတၢ်လီၤပှီၢ်ဖးဒိၣ်ကသီၣ်ထီၣ်လၢတၢ်စိခိၣ်တဖၣ်န့ၣ်လီၤ.

¹¹ ပှၤအိၣ်ဝဲဆိးဝဲလၢ မးကတ့ၣ်သ့ၣ်ဧၢ, ဟီၣ်ပသူထီၣ်တက့ၢ်. အဂ့ၢ်ဒ်အံၤ, ပှၤကနၤဧၣ်ဖိ ဘၣ်တၢ်မၤဟးဂီၤကွံာ်အီၤခဲလၢာ်, ကယဲၢ်ပှၤလၢအစိာ်စ့ဘၣ်တၢ်ဒီၣ်တဲာ်ကွံာ်ခဲလၢာ်လီၤ.

¹² အဆၢအကတီၢ်ဖဲန့ၣ် ယကဃုတၢ်လၢယရူၤၡလ့ၣ်အပူၤလၢမ့ၣ်အူဒၢ, ဒီးအိၣ်သကိးပှၤလၢအအိၣ်ဒၣ်အတၢ်, လၢအစံးလၢအသးကံၢ်ပူၤ, တၢ်အဂ့ၤမ့ၢ်ဂ့ၤ, တၢ်အအၢမ့ၢ်ဂ့ၤ, ယွၤတမၤဘၣ်ဝဲဘၣ်.

¹³ ဒီးအတၢ်ဖိတၢ်လံၤကကဲလၢတၢ်ဂုာ်ဆူၣ်ပျီဆူၣ်, ဒီးအဟံၣ်တဖၣ်န့ၣ်ကကဲလၢတၢ်အိၣ်သယုၢ်လီၤ. ကသူၣ်ဘၣ်ဟံၣ်ဘၣ်ဆၣ်ဒီး, တအိၣ်တဆိးဘၣ်လၢအပူၤ, ကသူၣ်စပံးမုၢ်ဘၣ်ဆၣ်ဒီး, တအီဘၣ်အစပံးထံဘၣ်.

¹⁴ ယွၤအမုၢ်နံၤဖးဒိၣ် တနံၤအိၣ်ဘူးထီၣ်လံ, အိၣ်ဘူးထီၣ်လံ. ဒီးဟဲဝဲချ့ချ့လီၤ. ယွၤအမုၢ်တနံၤအကလုၢ်သီၣ်လီၤ. ပှၤအဆူၣ်ကဲးကိးနးနးကလဲာ်ဖဲန့ၣ်လီၤ.

¹⁵ တၢ်လၢမုၢ်တနံၤန့ၣ် မ့ၢ်တၢ်သးကဲၤထီၣ်အမုၢ်တနံၤ, တၢ်ဘၣ်ကိၢ်ဘၣ်ဂီၤ, ဒီးတၢ်ဘၣ်နးဘၣ်ဖှီၣ်အမုၢ်တနံၤ, တၢ်အိၣ်သယုၢ်ဒီးတၢ်လီၤပှီၢ်အမုၢ်တနံၤ, တၢ်ခံးဒီးတၢ်အုးသကျူာ်အမုၢ်တနံၤ, တၢ်အၢၣ်ဒီးတၢ်ခံးသူအမုၢ်တ နံၤ, ¹⁶ ကွဲၤအသီၣ်ဒီးတၢ်ကိးပသူထီၣ်အမုၢ်တနံၤထီဒါဝ့ၢ်အိၣ်ဒီးအခိၣ်ဒူ, ဒီးတၢးထီတဖၣ်လီၤ.

¹⁷ ဒီးယကဒုးဟဲတၢ်ကိၢ်တၢ်ဂီၤလၢပှၤကညီအလိၤ, ဒီးကလဲၤတၢ်ဒ်ပှၤမဲာ်ဘျီၣ်အသိးန့ၣ်လီၤ. မ့ၢ်အမၤကမၣ်ဘၣ်ယွၤဒီး, တၢ်ကလူလီၤအသွံၣ်ဒ်ဟီၣ်ခိၣ်အကမူၣ်အသိး, ဒီးအညၣ်ကမၤသးဒ်တၢ်အ့ၣ်အသိးန့ၣ်လီၤ.

¹⁸ လၢယွၤအသးကဲၤထီၣ်အမုၢ်တနံၤန့ၣ်အစ့မ့ၢ်ဂ့ၤ, အထူမ့ၢ်ဂ့ၤမၤပူၤဖျဲးအီၤတသ့ဘၣ်. အသးက့ၣ်အမ့ၣ်အူန့ၣ်ကအီၣ်ကွံာ်ထံဧိၤကီၢ်ဧိၤဒီဘ့ၣ်ညါလီၤ. အဂ့ၢ်ဒ်အံၤ, ကမၤလၢာ်ကွံာ် ကယဲၢ်ပှၤလၢအအိၣ်အဆိးလၢကီၢ်ပူၤသတူၢ်ကလာ်လီၤ.

၂

¹ သကူးလီၤသုသးဒီးအိၣ်သကူးလီၤသုသးတက့ၢ်, ပှၤတကလုာ်လၢအတဘၣ်ဘၣ်တၢ်အသးဘၣ်သ့ၣ်ဧၢ.

² တၢ်သိၣ်တချုးအိၣ်ဖျဲၣ်ဒံးဘၣ်ဒီး, မုၢ်နံၤဒံကွံာ်ဒ်ဖ့အသိး, ယွၤအသးကဲၤထီၣ်တချုးဘၣ်ဒံးဘၣ်သုဘၣ်, ယွၤ အသးထီၣ်တချုးဘၣ်ဒံးဘၣ်သုဒီး, ³ ဃုယွၤတက့ၢ်, ကယဲၢ်ပှၤလၢအသးစူၤလၢထံဧိၤကီၢ်ဧိၤအပူၤ, လၢအမၤအတၢ်စံၣ်ညီၣ်ခဲလၢာ်သ့ၣ်ဧၢ, ဃုတၢ်တီတၢ်လိၤ, ဃုတၢ်သူၣ်စူၤသးစူၤန့ၣ်တက့ၢ်. ဘၣ်တဘၣ်သုကအိၣ်တဒၢလၢယွၤအသးထီၣ်အမုၢ်တနံၤအပူၤန့ၣ်လီၤ.

⁴ အဂ့ၢ်ဒ်အံၤ, ပှၤကလဲၤသဒၣ်ဂါစၤ, ဒီးအၤၡကလိၣ်ကကဲထီၣ်တၢ်အိၣ်သယုၢ်လီၤ. တၢ်ကဟီထီၣ်ကွံာ်အၤစဒိးလၢမုၢ်ထူၣ်, ဒီးတၢ်ကထဲးထီၣ်ကွံာ်ဧ့ကြိၣ်လီၤ.

⁵ ပှၤကရံသးဖိတကလုာ်, ပှၤအိၣ်ဝဲဆိးဝဲလၢပီၣ်လဲၣ်နံၤန့ၣ်ဘၣ်အဖှီၣ်လီၤ. ပှၤဖလ့ၡသးဖိအကီၢ်, ကနၤဧၣ်ဧၢ, ယွၤအကလုၢ်ထီဒါသုလီၤ. ယကမၤဟးဂီၤနၤတုၤပှၤအိၣ်ဝဲဆိးဝဲလၢနပူၤတအိၣ်ဘၣ်နီတဂၤဘၣ်.

⁶ ဒီးပီၣ်လဲၣ်နံၤကကဲထီၣ် တၢ်အီၣ်ဆၣ်အလီၢ်အိၣ်ဒီးကမါလၢပှၤကွၢ်သိအဂီၢ်, ဒီးတၢ်အကရၢလၢသိဒီးမဲာ်တဲးလဲးတဖၣ်အဂီၢ်လီၤ.

⁷ ဒီးတၢ်ဃၢၤန့ၣ်ကအိၣ်လၢ ယူဒၤအပှၤဟံၣ်ဖိလၢအအိၣ်လီၤတဲာ်အဂီၢ်လီၤ. ကဒုးအီၣ်ဆၣ်ဖဲန့ၣ်, ကမံလီၤလၢမုၢ်ဟါလၢအၤၡကလိၣ်အဟံၣ်ပူၤလီၤ. အဂ့ၢ်ဒ်အံၤ, ယွၤအကစၢ်ကအိၣ်သကိးအီၤ, ဒီးဒုးဟဲက့ၤအီၤလၢအလဲၤကဲကုၢ်လီၤ.

⁸ ယနၢ်ဟူ မိၤအးအတၢ်ဒုၣ်ဒွဲၣ်, ဒီးပှၤဧၣ်မိၣ်ဖိအစံးအၢတၢ်, လၢအဒုၣ်ဒွဲၣ်ယပှၤဂီၢ်မုၢ်, ဒီးပာ်ဒိၣ်အသးထီဒါအကီၢ်အဃၢၤလီၤ.

⁹ မၤသးဒ်န့ၣ်ဒီးတၢ်သုးမုၢ်ဂီၢ်မုၢ်အယွၤ, အံၣ်စရ့လးအကစၢ်စံးဝဲဒၣ်, ယမူယဲ, မိၤအးကကဲထီၣ်ဒ်စဒိၣ်အသိးန့ၣ်, ဒီးပှၤဧၣ်မိၣ်ဒ်ဂမိရၤအသိးန့ၣ်, တၢ်အလီၢ်အိၣ်ဒီးတၤဆှုၣ်တၤမဲ, ဒီးအံသၣ်အပူၤတဖၣ်, ဒီးတၢ်အိၣ်သယုၢ်လီၤထူလီၤယိာ်လီၤ. ပှၤဂီၢ်မုၢ်လၢအအိၣ်လီၤတဲာ်တဖၣ်န့ၣ်ကဂုာ်ဆူၣ်ပျီဆူၣ်အီၤဒီး ပှၤအိၣ်လီၤတဲာ်လၢယပှၤတကလုာ်အကျါန့ၣ်ကန့ၢ်ဘၣ်အီၤလီၤ.

¹⁰ ကဘၣ်ဝဲလၢတၢ်တမံၤန့ၣ် လၢအသးထီၣ်ထီအဃိလီၤ. အဂ့ၢ်ဒ်အံၤ, ဒုၣ်ဒွဲၣ်တၢ်ဒီးပာ်ဒိၣ်ထီၣ်အသးထီဒါတၢ်သုးမုၢ်ဂီၢ်မုၢ်အယွၤအပှၤဂီၢ်မုၢ်လီၤ.

¹¹ ယွၤကကဲထီၣ်တၢ်မၤပျံၤအလီၢ်လၢအဂီၢ်လီၤ. အဂ့ၢ်ဒ်အံၤ, ကမၤလၢာ်ကွံာ်ကယဲၢ်ကစၢ်လၢ ဟီၣ်ခိၣ်ချၢခဲလၢာ်, ဒီးကယဲၢ်ပှၤလၢအအိၣ်အဆိးလၢကီၢ်လၢပီၣ်လဲၣ်နံၤခဲလၢာ်န့ၣ်ကဘူၣ်ထီၣ်ဘါထီၣ်အီၤ, တဂၤလၢအလီၢ်ဒၣ်ဝဲတဂၤလၢအလီၢ်ဒၣ်ဝဲစုာ်စုာ်လီၤ.

¹² ပှၤကူၤၡးဖိသ့ၣ်ဧၢ, သုကဘၣ်တၢ်မၤသံသုစ့ၢ်ကီးလၢ ယနးလီၤ. ¹³ ဒီးကယူာ်ထီၣ်အစုလၢကလံၤစိးအဖီခိၣ်, ဒီးမၤဟးဂီၤအၤရှူၢ်, ဒီးကမၤသယုၢ်နံၤနဝ့လၢ တၢ်အိၣ်သ ယုၢ်တုၢ်အလီၢ်, ဒ်ပှၢ်မုၢ်ကနၢအသိးလီၤ. ¹⁴ ဒီးသိဒီးမဲာ်တဲးလဲးတဖၣ်ကကိာ်လီၤလၢအသးကံၢ်ပူၤ, ဒီးပှၤကလုာ်တဖၣ်အဆၣ်ဖိကီၢ်ဖိအမံၤခဲလၢာ်, ထိၣ်စီၢ်မီ, ဒီးသူၣ်ဧိၤဘါဧိၤကအိၣ်ကဆိးလၢအထူၣ်အခိၣ်အဖီခိၣ်, တၢ်အသီၣ်ကပှ့ၤလၢတၢ်ထူၣ်ဖျိအပူၤ, တၢ်အိၣ်သယုၢ်ကအိၣ်ဝဲလၢအကျဲစၢၤလီၤ. အဂ့ၢ်ဒ်အံၤ, တၢ်မၤလၢသ့ၣ်ဆှိအ့ရ့းန့ၣ်လီၤပှီၢ်ကွံာ်လံ.

¹⁵ အဝဲအံၤမ့ၢ်ဝ့ၢ်လၢအသူၣ်ဖှံသးညီ, ဒီးအိၣ်ဝဲဆိးဝဲဒီးအသူၣ်မံသးမံ, လၢအစံးလၢအသးကံၢ်ပူၤ, ယၤလီၤ. ဒီးတၢ်လၢယၤအဖီခိၣ်န့ၣ် တၢ်တအိၣ်ဘၣ်ဝဲဘၣ်. ကဲထီၣ်ဝဲလၢတၢ်အိၣ်သယုၢ်အလီၢ်, တၢ်အလီၢ်လၢဆၣ်ဖိကီၢ်ဖိကကိာ်လီၤလၢအပူၤမးလဲၣ်. ကယဲၢ်ပှၤလၢအလဲၤတြူာ်ကွံာ်တဂၤလၢ်လၢ်န့ၣ်ကဒုၣ်ဒွဲၣ်, ဒီးဂံၤဂုၤအခိၣ်လီၤ.

၃

¹ ဝ့ၢ်လၢအပူထီၣ်, ဒီးဘၣ်အၢ, ဒီးမၤအၢမၤသီတၢ်န့ၣ်ဘၣ်အဖှီၣ်လီၤ.

² တဒိကနၣ်ဘၣ်တၢ်အကလုၢ်ဘၣ်. တဒိးဘၣ်တၢ်သိၣ်လိဘၣ်. တသန့ၤဘၣ်အသးလၢယွၤဘၣ်, တသုးဘူးအသးဆူအကစၢ်အအိၣ်ဘၣ်.

³ အပဒိၣ်ဖးဒိၣ်လၢအပူၤန့ၣ် မ့ၢ်ခ့ယုၢ်လၢအကိးပသူတၢ်, အပှၤစံၣ်ညီၣ်ကွီၢ်န့ၣ်, မ့ၢ်ထွံၣ်မံၤလီၤ. လၢမုၢ်ဟါ, တပာ်လီၤတဲာ်ဘၣ်တၢ်လၢမုၢ်ဂီၤအဂီၢ်နီတမံၤဘၣ်.

⁴ အဝံတဖၣ်မ့ၢ် ပှၤပာ်ကဖိအသး, ပှၤလီန့ၢ်တၢ်လီၤ. အပှၤလုၢ်တၢ်အဒိၣ် မၤဘၣ်အၢတၢ်စီဆှံတဖၣ်, လုၣ်သ့ၣ်ခါပတာ်တၢ်သိၣ်တၢ်သီလီၤ.

⁵ ယွၤ, တၢ်တီတၢ်လိၤတဂၤအိၣ်ဝဲလၢအသးကံၢ်ပူၤတမၤဘၣ်တၢ်အၢဘၣ်. လီၣ်ဖျါထီၣ်တၢ်စံၣ်ညီၣ်လၢတၢ်ကပီၤအကျါကိးဂီၤဒဲး, ဒီးကဲထီၣ်သပှၢ်တၢၢ်လီၤ. ဘၣ်ဆၣ်ဒီးပှၤအၢတသ့ၣ်ညါဘၣ်တၢ်မဲာ်ဆှးဘၣ်.

⁶ ယဒီၣ်တဲာ်ကွံာ်လံပှၤကလုာ်တဖၣ်လံ. အသနၢၣ်တဖၣ်အိၣ်သယုၢ်လံ. ယမၤသယုၢ်လံအကျဲဧိၤကပူၤဧိၤလံ. ပှၤတလဲၤဘၣ်ဝဲဘၣ်. အဝ့ၢ်တဖၣ်တုၤလံလၢတၢ်ဟးဂီၤလံ. ပှၤကညီတအိၣ်ဘၣ်လၢအပူၤဘၣ်. ပှၤတအိၣ်တဆိးဘၣ်လၢအပူၤနီတဂၤဘၣ်.

⁷ ယစံး, နကပျံၤယၤသပှၢ်တၢၢ်, နကဒိးန့ၢ်ဘၣ်တၢ်သိၣ်လိနၤလီၤ. ဒ်န့ၣ်သိးအအိၣ်အဆိးအလီၢ်တဟးဂီၤဘၣ်, ဒ်ကယဲၢ်တၢ်ခဲလၢာ်လၢယပာ်လီၤလၢအဂီၢ်အသိးန့ၣ်လီၤ. ဘၣ်ဆၣ်ဒီးအဝဲသ့ၣ်ဂဲၤဆၢထၢၣ်လၢဂီၤဂီၤ, ဒီးမၤဘၣ်အၢအမၤတၢ်ခဲလၢာ်လီၤ.

⁸ မၤသးဒ်န့ၣ်ဒီးကွၢ်လၢ်ယကျဲ, ယွၤစံးဝဲဒၣ်, တုၤမုၢ်တနံၤဘၣ်လၢယကဂဲၤဆၢထၢၣ်လၢ တၢ်ဂုာ်န့ၢ်အဂီၢ်န့ၣ်တက့ၢ်. အဂ့ၢ်ဒ်အံၤ, ယတၢ်တိာ်လၢယကဒုးအိၣ်ဖှိၣ်ပှၤကလုာ်တဖၣ်ဒီးထၢဖှိၣ်ဘီမုၢ်တဖၣ်ဒ်သိး ယကလူလီၤယသးထီၣ်လၢအလိၤ, ယသးကဲၤထီၣ်ခဲလၢာ်လီၤ. အဂ့ၢ်ဒ်အံၤ, ယသးက့ၣ်အမ့ၣ်အူကအီၣ်ကွံာ်ဟီၣ်ခိၣ်ဒီဘ့ၣ်ညါလီၤ.

⁹ တုၤနုၤတဘျီ ယကဟ့ၣ်ပှၤကလုာ်တဖၣ် လၢအကတိၤတၢ်အကျိာ်စီဒ်သိးအကကိးထီၣ်ယွၤအမံၤ, ဒီးဒ်သိးအကမၤအတၢ်လၢအသးတဖျၢၣ်ဃီလီၤ.

¹⁰ လၢကူၤၡးအထံမိၢ်ပှၢ်ဝၢ်ဘးခီန့ၣ် ပှၤဃ့ကညးယၤတဖၣ်, ယတၢ်လီၤပြံလီၤပြါအဖိမုၣ်, ကဟဲစိာ်ယတၢ်မၤဘူၣ်လီၤ.

¹¹ တၢ်လၢမုၢ်တနံၤန့ၣ် နမဲာ်တဆှးဘၣ်လၢနမၤတၢ်ခဲလၢာ်လၢနမၤကမၣ်ဘၣ်ယၤအဃိဘၣ်. အဂ့ၢ်ဒ်အံၤ, တုၤနုၤတဘျီယကစိာ်ကွံာ်လၢနသးကံၢ်ပူၤ နပှၤလၢအပာ်အသးထီၣ်ထီ, လၢအသူၣ်ပိၢ်အသးဝးတဖၣ်လီၤ. ဒီးနတပာ်ကဖိလၢၤဘၣ်နသးလၢ ယကစၢၢ်စီဆှံအလိၤဘၣ်.

¹² ဒီးလၢနသးကံၢ်ပူၤန့ၣ် ယကပာ်လီၤတဲာ်ပှၤဂီၢ်မုၢ်လၢအသူၣ်စူၤအသးစူၤ, ဒီးပှၤဘၣ်ဖှီၣ်ဘၣ်ယာ်, ဒီးအဝဲသ့ၣ်ကသန့ၤအသးလၢယွၤအမံၤလီၤ.

¹³ အံၣ်စရ့လးလၢအအိၣ်လီၤတဲာ်န့ၣ် တမၤအၢဘၣ်တၢ်ဘၣ်, တကတိၤဘၣ်တၢ်ကဘျံးကဘျၣ်, ဒီးပျ့ၤလၢအလီတၢ်န့ၣ်တအိၣ်ဘၣ်လၢအကိာ်ပူၤဘၣ်. အဂ့ၢ်ဒ်အံၤ, ကအီၣ်တၢ်ဒီးမံလီၤ, ဒီးတၢ်တမၤပျံၤဘၣ်အီၤနီတမံၤဘၣ်.

¹⁴ စံယိၣ်အဖိမုၣ်ဧၢ, အုၣ်တၢ်တက့ၢ်. အံၣ်စရ့လးဧၢ, ကိးပသူထီၣ်တက့ၢ်. သူၣ်ခုသးခု, ဒီးသူၣ်ဖှံသးညီလၢနသးဒီဖျၢၣ်ညါတက့ၢ်, ယရူၤၡလ့ၣ်အဖိမုၣ်ဧၢ.

¹⁵ ယွၤပာ်ကွံာ်နတၢ်စံၣ်ညီၣ်လံ, ဟီထီၣ်ကွံာ်နဒုၣ်နဒါလံ, အံၣ်စရ့လးအစီၤပၤ, ယွၤအိၣ်ဝဲလၢနသးကံၢ်ပူၤ, နတထံၣ်လၢၤဘၣ်တၢ်အၢဘၣ်.

¹⁶ တၢ်လၢမုၢ်တနံၤန့ၣ်တၢ်ကစံးလၢယရူၤၡလ့ၣ်, ပျံၤတၢ်တဂ့ၤ, ဒီးကစံးလၢစံယိၣ်, မ်နစုအဂံၢ်အဘါန့ၣ်သုတ စၢ်လီၤတဂ့ၤ. ¹⁷ ယွၤနကစၢ်အိၣ်လၢနသးကံၢ်ပူၤန့ၣ်, တၢ်အဆူၣ်လၢအကအုၣ်က့ၤခီၣ်က့ၤတၢ်လီၤ. ကသူၣ်ဖှံသးညီလၢနဖီခိၣ်အိၣ်ဒီးအသူၣ်ခုသးခုလီၤ. ကအိၣ်ဘှံးလၢအတၢ်အဲၣ်အပူၤ, ဒီးကသူၣ်ပိၢ်သးပိၢ်လၢနဖီခိၣ်အိၣ်ဒီးတၢ်သးခုအသီၣ်လီၤ.

¹⁸ ယကထၢဖှိၣ် ပှၤလၢအသူၣ်အုးသးအုးလၢ တၢ်မၤဘူၣ်နံၤတဖၣ်အဃိလၢအမ့ၢ်လၢနၤလီၤ. ပှၤလၢအဘၣ်တၢ်ဒုၣ်ဒွဲၣ်လီၤ.

¹⁹ ကွၢ်ကွၢ်, အကတီၢ်ဖဲန့ၣ်ယကမၤကယဲၢ်ပှၤလၢအမၤနးမၤဖှီၣ်နၤလီၤ. ဒီးယကအုၣ်က့ၤခီၣ်က့ၤပှၤလၢအလဲၤတကျဲၢ်တကျဲၢ်, ဒီးဒုးအိၣ်ဖှိၣ်ပှၤလၢအဘၣ်တၢ်ဟီထီၣ်ကွံာ်အီၤ, ဒီးယကပာ်အီၤလၢတၢ်စံးထီၣ်ပတြၢၤအလီၢ်, ဒီးဒုးဟူထီၣ်သါလီၤအမံၤလၢ ကယဲၢ်ကီၢ်ပူၤ ဖဲအဘၣ်တၢ်မဲာ်ဆှးကိးဘ့ၣ်ဒဲးလီၤ.

²⁰ အကတီၢ်ဖဲန့ၣ်ယကဒုးဟဲနုာ်သု, အကတီၢ်ဖဲန့ၣ်ယကဒုးအိၣ်ဖှိၣ်သုလီၤ. အဂ့ၢ်ဒ်အံၤ, ယကမၤအိၣ်ထီၣ်သုမံၤ, ဒီးပာ်အီၤလၢတၢ်စံးထီၣ်ပတြၢၤအလီၢ်လၢပှၤဂီၢ်မုၢ်ခဲလၢာ်အကျါလၢဟီၣ်ခိၣ်ချၢ, ဖဲအကတီၢ်လၢယဒုးဟဲက့ၤသုလၢတၢ်မၢကဲကုၢ်လၢအမဲာ်ညါလီၤ, ယွၤစံးဝဲဒၣ်.