လံာ်တၢ်သးဝံၣ်တဖၣ်အတၢ်သးဝံၣ်

လံာ်တၢ်သးဝံၣ်တဖၣ်အတၢ်သးဝံၣ်

၁

¹ တၢ်သးဝံၣ်တဖၣ်အတၢ်သးဝံၣ် လၢအမ့ၢ်စီၤၡလိၤမိၤ အတၢ်လီၤ.

² မ်အနၢမူယၤလၢအထးခိၣ်အတၢ်နၢမူတဖၣ်တက့ၢ်. အဂ့ၢ်ဒ်အံၤ, နတၢ်အဲၣ်န့ၣ်ဂ့ၤန့ၢ်စပံးထံတက့ၢ်လီၤ.

³ မ့ၢ်နသိဂ့ၤအနၢမူအဃိန့ၣ်ဒီး, နမံၤမၤသးဒ်သိနၢမူလူ လီၤအသးအသိးလီၤ. မၤသးဒ်န့ၣ်ဒီးပှၤမုၣ်ကနီၤအဲၣ်နၤ လီၤ. ⁴ မိၤယၤတက့ၢ်, ဒီးပကဃ့ၢ်ပိာ်နခံလီၤ. စီၤပၤဆှၢလံ ယၤဆူအဒၢးပူၤလံ, ပကသူၣ်ဖှံသးညီ, ဒီးသူၣ်ခုသးခု လၢနပူၤလီၤ. ပကစံးထီၣ်ပတြၢၤနတၢ်အဲၣ် အါန့ၢ်စပံး ထံတက့ၢ်လီၤ. ပှၤအတီအလိၤတဖၣ်အဲၣ်နၤလီၤ.

⁵ ယသူဘၣ်ဆၣ်ဒီး ယဃံယလၤ, ယရူၤၡလ့ၣ်အဖိ မုၣ်သ့ၣ်ဧၢ, ⁶ ဒ်က့ဒၢ်အဒဲအသိးန့ၣ်, ဒ်စီၤၡလိၤမိၤအယၣ် သဒၢတၢ်အသိးန့ၣ်လီၤ. မ့ၢ်ယသူ, မ့ၢ်မုၢ်ကွၢ်ဘၣ်ယၤဒီး, ကွၢ်ယၤတဂ့ၤ. ယမိၢ်အဖိခွါတဖၣ်သးထီၣ်ယၤ, ပာ်ယၤ လၢပှၤပၢၤစပံးအလီၢ်လီၤ. ယစပံးအလီၢ်ဒၣ်ယဲယတ ပၢၤဘၣ်. ⁷ ပှၤလၢယသးအဲၣ်အီၤတဂၤဧၢ, ဖဲနဒုးအီၣ်န သိတဖုအဆၣ်, ဖဲနဒုးအိၣ်ဘှံးအီၤ လၢမုၢ်ထူၣ်န့ၣ်စံး ဘၣ်ယၤတက့ၢ်. အဂ့ၢ်ဒ်အံၤ, ယကမၤသးဒ်ပှၤလၢအ အိၣ်ဒီးနီၣ်ကျၢၢ်ဘၢမဲာ်လၢ နတံၤနသကိးအသိအဖုတ ဖၣ်အဃၢၤမ့ၢ်အဘၣ်မနုၤလဲၣ်.

⁸ ပိာ်မုၣ်လၢအဃံကတၢၢ်အလၤကတၢၢ်တဂၤဧၢ, နမ့ၢ် တသ့ၣ်ညါဘၣ်ဒီး, လဲၤပိာ်ကျဲလၢသိမဲာ်တဲးလဲးအခီၣ် လီၢ်, ဒီးဒုးအီၣ်နမဲာ်တဲးလဲးဖိအဆၣ်လၢပှၤကွၢ်သိအဒဲ ဃၢၤန့ၣ်တက့ၢ်.

⁹ ယပှၤသးဘိဧၢ, ယဒိလီၤနၤဒီးကသ့ၣ်တဖၣ်လၢဖၤ ရိၤအလ့ၣ်ကဟၣ်အပူၤလီၤ. ¹⁰ နဘိးတဖၣ်ဃံဝဲလၤဝဲဒီး တၢ်ကယၢကယဲ, နကိာ်အိၣ်ဒီးဖဲတၢ်မျၢ်တဝီလီၤ. ¹¹ ― ပက တ့န့ၢ်နၤလၢသွဲထူအိၣ်ဒီးတၢ်အဖျၢၣ်စ့တဖၣ်လီၤ.

¹² စီၤပၤအိၣ်ဝဲလၢ စီၢ်နီၤခိၣ်အဖၢမုၢ်ဒီး, ယတၢ်နၢမူနၢ် ဒး, နၢမူဒၣ်တၢ်လီၤ. ¹³ ပှၤလၢယအဲၣ်အီၤတဂၤမ့ၢ်မူရၣ်တ ဘိၣ်လၢယဂီၢ်လီၤ. ကအိၣ်ကဆိးဝဲလၢယနုၢ်အကဆူး ပူၤလီၤ. ¹⁴ ပှၤလၢယအဲၣ်အီၤတဂၤန့ၣ်မ့ၢ်သ့ၣ်ဂီၤစုမ့ၣ်အ ဖီတဖိးလၢတၤသၣ်အလီၢ်ဧ့ၣ်က့ဒံၤလၢယဂီၢ်လီၤ.

¹⁵ ကွၢ်ကွၢ်, ယပှၤသးဘိဧၢ, နဃံနလၤ, ကွၢ်ကွၢ်, န ဃံနလၤ, နအိၣ်ဒီးထိၣ်လွံၢ်အမဲာ်လီၤ.

¹⁶ ကွၢ်ကွၢ်, ပှၤလၢယအဲၣ်အီၤတဂၤဧၢ, နဃံနလၤ, န က့ၢ်နဂီၤဂ့ၤစ့ၢ်ကီး, ပလီၢ်မံမ့ၢ်လါဟ့လီၤ. ¹⁷ ပဟံၣ်အကျိၤ မ့ၢ်သ့ၣ်ဆှိအ့ရ့း, ဒီးပဟံၣ်ခိၣ်မ့ၢ်သ့ၣ်ဆှိလီၤ.

၂

¹ ယမ့ၢ်ၡၤရိၣ်အဖီဝံဒံၣ်, တၢ်ကစၢၢ်ကဆူးအဖီဒ့ၣ်ညါ လီၤ.

² ဒ်ဖီဒ့ၣ်ညါလၢတၤဆှုၣ်ကျါအသိးန့ၣ် ယပှၤသးဘိ တဂၤမ့ၢ်တၢ်ဒ်န့ၣ်သိးလၢပှၤဖိမုၣ်အကျါလီၤ.

³ ဒ်သ့ၣ်ပြၢးတးပူာ်လၢသ့ၣ် တဖုအကျါအသိးန့ၣ်ပှၤ လၢယအဲၣ်အီၤ မ့ၢ်တၢ်ဒ်န့ၣ်သိးလၢပှၤဖိခွါအကျါလီၤ. ယဆ့ၣ်နီၤလၢအကဒုကျါန့ၣ်ဘၣ်ယသးလီၤ. ဒီးအတၤ သၣ်န့ၣ်ဆၢဝဲလၢယကိာ်ပူၤလီၤ. ⁴ ဆှၢယၤဆူအတၢ် အီၣ်တၢ်အီအဟံၣ်, ဒီးအသုးဖိအလၣ်အိၣ်လၢယဖီခိၣ် န့ၣ်မ့ၢ်တၢ်အဲၣ်လီၤ. ⁵ ဒုးဆူၣ်ထီၣ်ယၤလၢစပံးသၣ်ဃ့, မၤကျၢၤထီၣ်ယသးလၢပြၢးတးပူာ်အသၣ်တက့ၢ်. အဂ့ၢ် ဒ်အံၤ, ယဆါလၢတၢ်အဲၣ်အဃိလီၤ. ⁶ အစုစ့ၣ်အိၣ်ဝဲလၢ ယခိၣ်အဖီလာ်, ဒီးအစုထွဲဖိးယၤလီၤ.

⁷ ယရူၤၡလ့ၣ်အဖိမုၣ်သ့ၣ်ဧၢ, ယဒုးဆိၣ်သုလၢတၤဟိ စဘံ, ဒီးတၤဟိမိၢ်လၢပှၢ်လၢ်ကျါအမဲာ်ညါ, လၢသုသု တထိၣ်ဂဲၤ, ဒီးလၢအတချုးဘၣ်ဒံးဘၣ်အသးဘၣ်ဒီး, လၢသုသုတမၤဖုသံနီၣ်ထီၣ်ပှၤလၢယအဲၣ်အီၤတဂ့ၤ.

⁸ ပှၤလၢယအဲၣ်အီၤအကလုၢ်သီၣ်ထီၣ်လီၤ. ကွၢ်ကွၢ်, ဟဲစံၣ်ထီၣ်လၢကစၢၢ်လိၤ, စံၣ်တတီၤတတီၤလၢတၢ်စိ ခိၣ်အလိၤလီၤ. ⁹ ပှၤလၢယအဲၣ်အီၤတဂၤန့ၣ် မၤသးဒ် တၤဟိစဘံ, မၤသးဒ်တၤဟိဖိအဖါအသိးန့ၣ်လီၤ. ကွၢ် ကွၢ်, ဆၢထၢၣ်ဝဲလၢပဒူၣ်အချၢဃံ, ကွၢ်ထီၣ်ဝဲလၢတၢ် ထူၣ်ဖျိ, ကွၢ်ဝဲတဘျီတဘျီလၢတၢ်ထူၣ်ဖျိအကဘျံးလီၤ.

¹⁰ ပှၤလၢယအဲၣ်အီၤကတိၤတၢ်, ဒီးစံးဘၣ်ယၤ, ယပှၤသး ဘိဧၢ, ဂဲၤဆၢထၢၣ်, ယပှၤအဃံအလၤဧၢ, ဟဲက့ၤထီၣ် တက့ၢ် ¹¹ အဂ့ၢ်ဒ်အံၤ, တၢ်ဂိၢ်အကတီၢ်ပူၤကွံာ်လံ, တၢ်ဟဲ စူၤပူၤကွံာ်, ဒီးလၢာ်လံ, ¹² ဖီအိၣ်ဖျါထီၣ်လၢဟီၣ်ခိၣ်ချၢ, ထိၣ်ပှ့ၤထီၣ် အကတီၢ်ဘၣ်လံ, ဒီးပနၢ်ဟူထိၣ်လွံၢ်အ သီၣ်လၢပကီၢ်ပူၤလံ, ¹³ ချၢၣ်ဒၢသၣ်ထီၣ်အချၢၣ်ဒၢသၣ် သံကစဲာ်, ဒီးစပံးမုၢ်ဆှိးထီၣ်, ဒီးနၢမူထီၣ်လီၤ. ဂဲၤဆၢ ထၢၣ်ယပှၤသးဘိတဂၤ, ယပှၤအဃံအလၤတဂၤဧၢ, ဒီး ဟဲက့ၤထီၣ်တက့ၢ်. ¹⁴ ယထိၣ်လွံၢ်အိၣ်လၢလၢၢ်အအိပူၤ, လၢအလီၢ်အိၣ်တဒၢလၢလ့လိၤဧၢ, ဟ့ၣ်ကွၢ်ယၤလၢန မဲာ်, ဒုးနၢ်ဟူယၤလၢနကလုၢ်တက့ၢ်. အဂ့ၢ်ဒ်အံၤ, နက လုၢ်မုာ်ဝဲ, ဒီးနမဲာ်တက့ၢ်အဂီၤဂ့ၤဝဲလီၤ. ¹⁵ ဖီၣ်န့ၢ်ပှၤလၢ ထွံၣ်ဟီၣ်ခိၣ်, ထွံၣ်ဟီၣ်ခိၣ်အဖိလၢအမၤဟးဂီၤစပံးမုၢ် တက့ၢ်. အဂ့ၢ်ဒ်အံၤ, ပစပံးမုၢ်ဆှိးထီၣ်လီၤ. ¹⁶ ပှၤလၢယ အဲၣ်အီၤန့ၣ်မ့ၢ်ယတၢ်, ဒီးယဲဒၣ်ယမ့ၢ်အတၢ်လီၤ. ဒုးအီၣ် တၢ်အဆၣ်လၢဖီဒ့ၣ်ညါအကျါလီၤ. ¹⁷ တုၤမုၢ်ခုၣ်လီၤ, ဒီး တၢ်အကဒုဃ့ၢ်ကွံာ်ဒီး, ပှၤလၢယအဲၣ်အီၤဧၢ, ဟဲက့ၤက ဒီး, မၤနသးဒ်တၤဟိစဘံ, ဒ်တၤဟိဖိအဖါလၢကစၢၢ် လၢၢ်မုၢ်အလိၤတက့ၢ်.

၃

¹ လၢမုၢ်နၤလၢ ယလီၢ်မံအပူၤန့ၣ်ယဃုပှၤလၢယသး အဲၣ်အီၤလီၤ. ² ယဃုအီၤ, ဒီးယတထံၣ်န့ၢ်ဘၣ်အီၤဘၣ်. ယကဂဲၤဆၢထၢၣ်, ဒီးလဲၤဝ့ၤဝီၤတၢ်လၢဝ့ၢ်ပူၤ, လၢကျဲပူၤ လၢကျဲမုၢ်ဖးလဲၢ်အပူၤန့ၣ် ယကဃုပှၤလၢယသးအဲၣ် အီၤလီၤ. ³ ယဃုအီၤ, ဒီးယတထံၣ်န့ၢ်ဘၣ်အီၤဘၣ်. ပှၤ ပၢၤတၢ်ဖိလၢအလဲၤဝ့ၤဝီၤတၢ်လၢ ဝ့ၢ်ပူၤတဖၣ်န့ၣ်ထံၣ် န့ၢ်ယၤလီၤ. ဒီးယစံးဘၣ်အီၤ, ပှၤလၢယသးအဲၣ်အီၤတ ဂၤန့ၣ်သုထံၣ်ဘၣ်အီၤစ့ၢ်ကီးဧါ. ⁴ ယလဲၤပူၤကွံာ်အီၤတ စဲး, ဒီးယထံၣ်န့ၢ်ပှၤလၢယသးအဲၣ်အီၤ, ယဟံးဃာ်အီၤ, ယတပျၢ်ဘၣ်အီၤတုၤယဆှၢအီၤဆူယမိၢ်အဟံၣ်ပူၤ, ဆူ ပှၤလၢအဆံးစၢ်န့ၢ်ယၤတဂၤအဒၢးပူၤလီၤ.

⁵ ယဒုးဆိၣ်သု, ယရူၤၡလ့ၣ်အဖိမုၣ်သ့ၣ်ဧၢ, လၢတၤဟိ စဘံ, ဒီးတၤဟိမိၢ်လၢပှၢ်လၢ်ကျါအမဲာ်ညါ, လၢသုသုတ ထိၣ်ဂဲၤ, ဒီးလၢအတချုးဘၣ်ဒံးဘၣ်အသးန့ၣ်လၢသုသု တမၤဖုသံနီၣ်ထီၣ်ပှၤလၢယအဲၣ်အီၤတဂ့ၤ.

⁶ ပှၤလၢအဟဲထီၣ်လၢ ပှၢ်မုၢ်ကနၢဒ်မ့ၣ်အူခုၣ်အထူၣ် တဖၣ်အသိး, လၢအနၢမူဝဲဒီးမူရၣ်, ဒီးလီၢ်ဘၣ်, ဒီးပှၤ ကၤတၢ်ဖိအတၢ်နၢမူအကမူၣ်န့ၣ်မ့ၢ်မတၤတဂၤလဲၣ်.

⁷ ကွၢ်ကွၢ်, မ့ၢ်လၢစီၤၡလိၤမိၤ အခးဒုးခိၣ်န့ၣ်လီၤ. ပှၤ အဆူၣ်လၢ အံၣ်စရ့လးအပှၤအဆူၣ်အကျါဃုဆံအိၣ် ဝးတရံးအီၤလီၤ. ⁸ ဟံးဃာ်နးခဲလၢာ်, ကတဲာ်ကတီၤလၢ ဒုးသုးအဂီၢ်လီၤ. လၢတၢ်ပျံၤအလီၢ်လၢမုၢ်နၤအဃိန့ၣ် ပှၤအိၣ်ဝဲဒီးအနးလၢ အကံၣ်ဒုၣ်အလိၤကိးဂၤဒဲးလီၤ.―

⁹ စီၤၡလိၤမိၤမၤန့ၢ်အဂီၢ်ဒၣ်ဝဲလၢ ခးဒုးခိၣ်န့ၣ်လၢလဘၤ နိၣ်အသ့ၣ်လီၤ. ¹⁰ မၤအထူၣ်လၢစ့, အဃီလၢထူ, အလီၢ် ဆ့ၣ်နီၤလၢတၢ်လုးတကုာ်, ဒီးအပူၤန့ၣ်ဒါဝဲလၢတၢ် အဲၣ်လၢယရူၤၡလ့ၣ်အဖိမုၣ်တဖၣ်လီၤ. ¹¹ စံယိၣ်ဖိမုၣ် သ့ၣ်ဧၢ, လဲၤထီၣ်, ကွၢ်စီၤၡလိၤမိၤအိၣ်ဒီးအခိၣ်သလုး ခိၣ်သလုးလၢအမိၢ်ဒုးကုာ်အီၤမုၢ်တနံၤလၢအန့ၢ်မါ, မုၢ် တနံၤလၢအသးခုန့ၣ်တက့ၢ်.

၄

¹ ကွၢ်ကွၢ်, ယပှၤသးဘိဧၢ, နဃံနလၤ, ကွၢ်ကွၢ်, နဃံန လၤ, နအိၣ်ဒီးထိၣ်လွံၢ်အမဲာ်လၢနတၢ်ကျၢၢ်ဘၢမဲာ်အဖီ လာ်လီၤ. နခိၣ်သူမၤသးဒ်မဲာ်တဲးလဲးတဖုလၢအကိာ် လီၤလၢကစၢၢ်ကံးလဧးအလိၤအသိးန့ၣ်လီၤ. ² နမဲမၤ သးဒ်သိတဖုလၢအဆူၣ်တံာ်အသး, လၢအဟဲထီၣ်လၢ လုၣ်ထံအလီၢ်, လၢကိးဒုဒဲးဖှံလီၤသဃံာ်, ဒီးအတူာ်ဖိ တအိၣ်ဘၣ်လၢအကျါအသိးလီၤ. ³ နပျုၤမၤသးဒ်ပျံၤဂီၤ တဘိအသိးန့ၣ်လီၤ. နထးခိၣ်ဃံဝဲလၤဝဲ, နဘိးမၤသးဒ် သလဲသၣ်သ့ၣ်ဖးတခီလၢနနီၣ်ကျၢၢ်ဘၢမဲာ်အဖီလာ်,―

⁴ နကိာ်မၤသးဒ် စီၤဒၤဝံးအတၢးထီလၢအမၤဝဲလၢတၢ်စု ကဝဲၤအဂီၢ်, ဖဲအကတီၤအဘ့ၣ် တကထိဘျးထီၣ်အ သး, ပှၤအဆူၣ်အကတီၤခဲလၢာ်အသိးန့ၣ်လီၤ. ⁵ နနုၢ်ခံ တိၣ်မၤသးဒ် တၤဟိစဘံဖိသဃံာ်ခံဒု လၢအအီၣ်အ ဆၣ်လၢဖီဒ့ၣ်ညါအကျါအသိးလီၤ. ⁶ တုၤမုၢ်နံၤခုၣ်လီၤ ဝဲ, ဒီးတၢ်အကဒုတဖၣ်ဃ့ၢ်ကွံာ်ဒီး, ယကလဲၤဆူမူရၣ် အကစၢၢ်, ဒီးလီၢ်ဘၣ်အတၢ်စိခိၣ်အအိၣ်လီၤ.

⁷ နဃံနလၤဒီဂၤညါ, ယပှၤသးဘိဧၢ, တၢ်အမဲၣ်တအိၣ် ဘၣ်လၢနလိၤဘၣ်. ⁸ ယမါဧၢ, ဟဲဒီးယၤလၢလဘၤနိၣ် အလိၤ, ဟဲဒီးယၤလၢလဘၤနိၣ်အလိၤ, ကွၢ်တၢ်လၢ အမါနၤအဒီခိၣ်, လၢစနံၢ်, ဒီးဃ့ရမိၣ်အဒီခိၣ်, လၢခ့ယုၢ် အပူၤ, လၢခ့စံၣ်ပိၣ်အကစၢၢ်န့ၣ်တက့ၢ်. ⁹ နဖီၣ်န့ၢ်ယသး ယဒီပုၢ်ဝဲၢ်မုၣ်ဧၢ, ယမါဧၢ, လၢနမဲာ်တတိၣ်, လၢဖဲတဝီ လၢနကိာ်လိၤလီၤ. ¹⁰ ယဒီပုၢ်ဝဲၢ်မုၣ်ဧၢ, ယမါဧၢ, နတၢ် အဲၣ်မုာ်ဆံးဒိၣ်လဲၣ်. နတၢ်အဲၣ်ဂ့ၤန့ၢ်စပံးထံဆံးဒိၣ်လဲၣ် ဒီးနသိနၢမူဂ့ၤန့ၢ် ကယဲၢ်တၢ်နၢမူခဲလၢာ်ဆံးဒိၣ်လဲၣ်.― ¹¹ ယမါဧၢ, တၢ်လီၤစီၤလၢနပျုၤဒ်ကနဲစီအခိၣ်ထံအသိးကနဲစီဒီးတၢ်နုၢ်ထံအိၣ်ဝဲလၢနပျ့ၤအဖီလာ်, ဒီးနကူနသိးအနၢမူန့ၣ် မၤသးဒ်လဘၤနိၣ်အနၢမူအသိးလီၤ.―

¹² ယဒီပုၢ်ဝဲၢ်မုၣ်ဧၢ, ယမါဧၢ, နမ့ၢ်တၤသၣ်အလီၢ်ကရၢ အသး, ထံထီၣ်ပၢၢ်ထိးဝးတံာ်အသး, ထံမူအိၣ်ဒီးအစဲ ဃာ်ပနီၣ်လီၤ. ¹³ နတၢ်သူၣ်အသးန့ၣ်မ့ၢ်သ့ၣ်သလဲသၣ် တဖုအိၣ်ဒီးတၤသၣ်အဝံၣ်အဆၢအလီၢ်, ဒီးသ့ၣ်ဂီၤစု မ့ၢ်, ဒီးသ့ၣ်နၢ်ဒး, ¹⁴ သ့ၣ်နၢ်ဒး, ဒီးသ့ၣ်ကၢ်ကိၣ်, လီၢ်ဟ့ၣ်, ဒီးကဒါရါ, ဒီးသ့ၣ်လီၢ်ဘၣ်ကိးကလုာ်ဒဲး, မူရၣ်, ဒီးအ

¹⁵ ကၠီၣ်, ဒီးတၢ်နၢမူအခိၣ်ကျၢၢ်, တၤသၣ်အလီၢ်အထံထီၣ် ပၢၢ်, အထံမူတပူၤ, ထံကျိလၢအယွၤလီၤလၢလဘၤနိၣ် လီၤ.

¹⁶ ကလံၤလၢကလံၤစိးဧၢ, ဖုသံနီၣ်တက့ၢ်, ဒီးနဲဒၣ်လၢ ကလံၤထံး, ဟဲတက့ၢ်. အူဘၣ်ယတၤသၣ်အလီၢ်န့ၣ်ဒ် သိးအတၢ်နၢမူကနၢမူထီၣ်တက့ၢ်. မ်ပှၤလၢယအဲၣ်အီၤ တဂၤဟဲနုာ်လၢအတၤသၣ်အလီၢ်, ဒီးအီၣ်အတၤသၣ် န့ၣ်တက့ၢ်.

၅

¹ ယဒီပုၢ်ဝဲၢ်မုၣ်ဧၢ, ယမါဧၢ, ယဟဲနုာ်လံလၢယတၤ သၣ်အလီၢ်ပူၤလံ. ယထၢထီၣ်ယမူရၣ်, ဒီးယတၢ်နၢမူ, ယအီၣ်ယကနဲခိၣ်ထံဒီးယကနဲစီ, ယအီယစပံးထံ, ဒီး ယတၢ်နုၢ်ထံလီၤ. ယတံၤယသကိးသ့ၣ်ဧၢ, အီၣ်တၢ်, ဒီး အီတၢ်, အီလၢအအါတက့ၢ်, ယပှၤသးဘိသ့ၣ်ဧၢ.

² ယမံဘၣ်ဆၣ်ဒီး, ယသးအိၣ်သပှ့ၤမဲာ်လီၤ. မ့ၢ်ပှၤလၢ ယအဲၣ်အီၤတဂၤအကလုၢ်လၢအဒိတကျိာ်တြဲၤဒီးစံးဝဲ, အိးထီၣ်န့ၢ်ယၤ, ယဒီပုၢ်ဝဲၢ်မုၣ်ဧၢ, ယပှၤသးဘိဧၢ, ယ ထိၣ်လွံၢ်, ယပှၤအလၢအပှဲၤတဂၤဧၢ, အဂ့ၢ်ဒ်အံၤ, ယခိၣ် ဘၣ်စီၣ်ပှဲၤလၢပစီၤထံ, ယခိၣ်သူလၢမုၢ်နၤအတၢ်လီၤစီၤ အဖျၢၣ်တဖၣ်လီၤ.

³ ယဘ့ၣ်ကွံာ်ယဆ့, ယကသိးထီၣ်အီၤဒ်လဲၣ်. ယသ့ စီကွံာ်ယခီၣ်, ယကမၤဘၣ်အၢအီၤဒ်လဲၣ်. ⁴ ပှၤလၢယ အဲၣ်အီၤဒၢနုာ်အစုလၢတြဲၤအတၢ်အိပူၤ, ဒီးယသးကနိး လၢအဃိလီၤ. ⁵ ယဂဲၤဆၢထၢၣ်ဒ်သိးယကအိးထီၣ်န့ၢ် ပှၤလၢယအဲၣ်အီၤတဂၤ, ဒီးယစုလီၤစီၤလၢမူရၣ်ဒီးယစု မုၢ်လၢမူရၣ်လၢ အလီၤစီၤဒၣ်တၢ်လၢတြဲၤအနီၣ်ဘိအ

⁶ လိၤလီၤ. ယအိးထီၣ်န့ၢ်ပှၤလၢယအဲၣ်အီၤတဂၤ, ဒီးပှၤ လၢယအဲၣ်အီၤန့ၣ်သုးကွံာ်လံအသး, ဟးထီၣ်လံ. လၢ အကတိၤတၢ်ဒီးယၤန့ၣ် ယသးကတုၤလီၤ. ယဃုအီၤ, ဒီးယထံၣ်န့ၢ်အီၤတသ့ဘၣ်. ယကိးထီၣ်အီၤ, ဒီးတစံး ဆၢဘၣ်ယၤဘၣ်. ⁷ ပှၤပၢၤတၢ်ဖိလၢအလဲၤဝ့ၤဝီၤတၢ် လၢဝ့ၢ်ပူၤတဖၣ်န့ၣ်ထံၣ်န့ၢ်ယၤ, ဒီးတီၢ်ယၤ, ဒီးဆဲးယၤ လီၤ. ပှၤလၢအပၢၤဝ့ၢ်ခိၣ်ဒူန့ၣ်ထုးထီၣ်ကွံာ်ယနီၣ်ကျၢၢ် ဘၢမဲာ်လီၤ. ⁸ ယရူၤၡလ့ၣ်အဖိမုၣ်သ့ၣ်ဧၢ, ယဒုးဆိၣ်သု, သုမ့ၢ်ထံၣ်န့ၢ်ပှၤလၢယအဲၣ်အီၤဒီး, သုကစံးဘၣ်တဲဘၣ် အီၤလၢယဆါလၢတၢ်အဲၣ်အဃိလီၤ.

⁹ ပှၤအဃံကတၢၢ်အလၤကတၢၢ် လၢပိာ်မုၣ်အကျါတ ဂၤဧၢ, ပှၤလၢနအဲၣ်အီၤဂ့ၤန့ၢ်ပှၤတၢ်အဲၣ်အီၤအဂၤတဂၤ ဒ်လဲၣ်. လၢနဒုးဆိၣ်ပှၤအဃိန့ၣ် ပှၤလၢနအဲၣ်အီၤတ ဂၤန့ၣ်ဂ့ၤန့ၢ်ပှၤလၢတၢ်အဲၣ်အီၤအဂၤတဂၤဒ်လဲၣ်.

¹⁰ ပှၤလၢယအဲၣ်အီၤတဂၤန့ၣ်ဝါဝဲ, ဒီးဂီၤဝဲ, တၢ်အခိၣ် လၢပှၤတကလးအကျါလီၤ. ¹¹ အခိၣ်မၤသးဒ်ထူစီအသိး န့ၣ်, အခိၣ်သူမၤသးဒ်သ့ၣ်စူၣ်ပလိၣ်အဒ့လၢအဝးဝဲအ သိးန့ၣ်, သူဝဲဒ်စိးဝၣ်ဃးအသိးန့ၣ်လီၤ. ¹² အမဲာ်မ့ၢ်ထိၣ် လွံၢ်အဝဲလၢထံကျိအဃၢၤ, သ့စီအသးလၢတၢ်နုၢ်ထံ အိၣ်ဝဲလၢတၢ်ပှဲၤအပူၤလီၤ. ¹³ အဘိးမၤအသးဒ်ဟီၣ်ခိၣ် အကဝီၤအိၣ်ဒီးသ့ၣ်ဖိနၢမူတဖၣ်အသိးန့ၣ်လီၤ. အပျုၤ မ့ၢ်ဖီဒ့ၣ်ညါလၢအလီၤစီၤမူရၣ် လၢအလီၤစီၤဒၣ်တၢ်,―

¹⁴ အစုမ့ၢ်ပသံးထူအိၣ်ဝဲဒီးတၢ်မျၢ်ဘီဟ့, အဟၢဖၢမ့ၢ်က ဆီမဲတ့အသးအိၣ်ဒီးတၢ်မျၢ်နံၤလါ, ¹⁵ အခီၣ်ဒုၣ်မ့ၢ်လၢၢ် ဝါကံၣ်ဃ့အထူၣ်အိၣ်ဝဲလၢအခီၣ်ထူစီအဖီခိၣ်, အမဲာ် သၣ်မၤသးဒ်လဘၤနိၣ်, အိၣ်ဒီးအကဟုကညီၢ်ထဲသိး ဒီး သ့ၣ်ဆှိအ့ရ့း, ¹⁶ အထးခိၣ်ဆၢမးလီၤ. မ့ၢ်အဃံအ လၤဒီဂၤညါလီၤ. အဝဲန့ၣ်မ့ၢ်ပှၤလၢယအဲၣ်အီၤ, ဒီးအဝဲ န့ၣ်မ့ၢ်ယတံၤယသကိး, ယရူၤၡလ့ၣ်အဖိမုၣ်သ့ၣ်ဧၢ.

၆

¹ ပှၤလၢအဃံကတၢၢ်အလၤကတၢၢ် လၢပိာ်မုၣ်အကျါ တဂၤဧၢ, ပှၤလၢနအဲၣ်အီၤမ့ၢ်အလဲၤဆူလဲၣ်. ဒ်သိးပက ဃုအီၤဒီးနၤဒီး, ပှၤလၢအနဲၣ်အီၤန့ၣ် မ့ၢ်အဃၣ်အသး ဒီးလဲၤဝဲဆူလဲၣ်.

² ပှၤလၢယအဲၣ်အီၤတဂၤန့ၣ် လဲၤလီၤဆူအတၤသၣ်အ လီၢ်ပူၤ, ဆူဟီၣ်ခိၣ်အကဝီၤအိၣ်ဒီးသ့ၣ်နၢမူဘိစ့ၣ်, ဒ်သိး အကဒုးအီၣ်တၢ်အဆၣ်လၢတၤသၣ်အလီၢ်ပူၤ, ဒီးဒ်သိး အကဒဲးဖီဒ့ၣ်ညါလီၤ. ³ ယမ့ၢ်ပှၤလၢယအဲၣ်အီၤတဂၤ အတၢ်, ဒီးပှၤလၢယအဲၣ်အီၤမ့ၢ်ယတၢ်လီၤ. ⁴ ဒုးအီၣ်တၢ် အဆၣ်လၢဖီဒ့ၣ်ညါအကျါလီၤ. ယပှၤသးဘိဧၢ, နဃံနလၤဒ်တံးရစၣ်အသိး, နအိၣ်ဖျါမုာ်ဒ်ယရူၤၡလ့ၣ်အသိး, နမ့ၢ်ပျံၤတၢ်အလီၢ်ဒ် ပှၤသုးမုၢ်အိၣ်ဒီးသုးအလၣ်အသိး န့ၣ်လီၤ. ဃၣ်ကဒါက့ၤနမဲာ်လၢယလိၤတက့ၢ်. အဂ့ၢ်ဒ် အံၤ, မၤဃၣ်ယၤလီၤ.

⁵ နခိၣ်သူမၤသးဒ် မဲာ်တဲးလဲးတဖုလၢအကိာ်လီၤလၢ ကစၢၢ်ကံးလဧးအသိးန့ၣ်, ⁶ နမဲာ်မၤသးဒ်သိတဖုလၢ အဟဲထီၣ်လၢလုၣ်ထံအလီၢ်, လၢအဖှံလီၤသဃံာ်ကိးဒု ဒဲး, ဒီးအတူာ်ဖိတအိၣ်ဘၣ်, လၢအကျါအသိးန့ၣ်လီၤ.

⁷ နဘိးမၤသးဒ် သလဲသၣ်သ့ၣ်ဖးတခီလၢနနီၣ်ကျၢၢ် ဘၢမဲာ်အဖီလာ်အသိးန့ၣ်လီၤ. ⁸ နီၣ်ပၤမုၣ်အိၣ်ဝဲဃုဆံ, ဒီးပှၤသံၣ်မါအိၣ်ဝဲဃိးဆံ, ဒီးပှၤမုၣ်ကနီၤပဂံၢ်တသ့ဘၣ် လီၤ. ⁹ မ့မ့ၢ်ယထိၣ်လွံၢ်, ယပှၤအလၢအပှဲၤတဂၤန့ၣ်မ့ၢ် ပှၤတဂၤဃီ, မ့ၢ်အမိၢ်အပှၤတဂၤဃီ, မ့ၢ်ပှၤလၢအဆံးစၢ် အီၤအပှၤဃုထၢဖိလီၤ. ပှၤဖိမုၣ်ထံၣ်ဘၣ်အီၤ, ဒီးဆိၣ် ဂ့ၤအီၤလီၤ. နီၢ်ပၤမုၣ်ဒီးပှၤသံၣ်မါတဖၣ်ထံၣ်ဝဲ, ဒီးစံး ထီၣ်ပတြၢၤအီၤလီၤ.

¹⁰ ပှၤလၢအကွၢ်ထီၣ်ဒ်မုၢ်ဆ့ၣ်အသိး, အဃံအလၤဒ် လါအသိး, ကပြုၢ်ကပြီၤဝဲဒ်မုၢ်အသိး, ဒီးမ့ၢ်တၢ်ပျံၤ အလီၢ်ဒ်ပှၤသုးမုၢ် အိၣ်ဝဲဒီးသုးအလၣ်အသိးန့ၣ်မ့ၢ်မ တၤတဂၤလဲၣ်.

¹¹ ယလဲၤလီၤဆူ တၤသၣ်အိၣ်ဒီးအကုကိၤအလီၢ်, ဒ် သိးယကကွၢ်ကစၢၢ်ကဆူးအတၤသၣ်, စပံးမုၢ်ကဆှိး ထီၣ်ဧါ, သ့ၣ်သလဲသၣ်ဖျိထီၣ်ဧါန့ၣ်, ဒ်သိးယကထံၣ် ဘၣ်လီၤ. ¹² ယတချုးသ့ၣ်ညါဒံးဘၣ်ဒီး, ယသးပာ်ယၤဒ် ဧးမံၤနဒးအလ့ၣ်ကဟၣ်အသိးန့ၣ်လီၤ. ဟဲက့ၤ, ဟဲက့ၤ, ပှၤရှူလမးဖိဧၢ, ဟဲက့ၤ, ဟဲက့ၤ, ဒ်သိးပကကွၢ်နၤတက့ၢ်.

¹³ သုကကွၢ်ဘၣ် ပှၤရှူလမးဖိ ဒ်မၤဃန့ၤအဂဲၤကလံၣ် အသိးန့ၣ်မ့ၢ်အဘၣ်မနုၤလဲၣ်.

၇

¹ ပှၤအိၣ်ဖျဲၣ်ပဒိၣ်အဖိမုၣ်ဧၢ, နခီၣ်အိၣ်ဒီးအခီၣ်ဖံးန့ၣ် မ့ၢ်အဃံအလၤဆံးဒိၣ်လဲၣ်. နကံၣ်ဒုၣ်ဆၢမၤသးဒ်ဖဲအ ဖျၢၣ်လၢပှၤမၤတၢ်သ့တ့ဝဲလၢအစုအသိးန့ၣ်လီၤ. ² နဒ့ မၤသးဒ်လီခီတဖျၢၣ် အိၣ်ဒီးစပံးထံဃါဃုာ်အသိးန့ၣ်, နဟၢဖၢမၤသးဒ် ဘုကၠူၣ်တပူကဝီၤဃာ်ဝဲဒီးဖီဒ့ၣ်ညါ အသိးန့ၣ်, ³ နနုၢ်ခံတိၣ်မၤသးဒ်တၤဟိစဘံသဃံာ်ခံဒု အသိးန့ၣ်, ⁴ နကိာ်မၤသးဒ်တၢးထီကဆီမဲတဖျၢၣ်အ သိးန့ၣ်, နမဲာ်မၤသးဒ်နိၣ်တဖၣ်လၢဃ့ၡဘိၣ်လၢပဲတရီ ဘ့ၤသရးဘံၣ်အဃၢၤအသိးန့ၣ် နနါဒ့မၤသးဒ်လဘၤ နိၣ်အတၢးထီတဖျၢၣ်လၢ အကွၢ်ဝဲဆူဒၤမ့ၤစ့းအသိးန့ၣ်

⁵ နခိၣ်အိၣ်ဝဲလၢနဖီခိၣ် မၤသးဒ်ကစၢၢ်ကၢ်မ့ၤလးအသိး န့ၣ်, နခိၣ်အခိၣ်သူန့ၣ်, မၤသးဒ်တၢ်လုးတကုာ်အသိး န့ၣ်, နခိၣ်သူဖီၣ်န့ၢ်စီၤပၤလီၤ. ⁶ ပှၤလၢတၢ်အဲၣ်အီၤဧၢ, လၢတၢ်မၤမုာ်အဂီၢ်န့ၣ်နဃံနလၤ, ဒီးနက့ၢ်နဂီၤဂ့ၤဆံး ဒိၣ်လဲၣ်. ⁷ နနီၢ်အံၤမၤသးဒ်သ့ၣ်စူၣ်ပလိၣ်အသိးန့ၣ်, ဒီး နနုၢ်ဒ်တၤသၣ်အကူၤတဖၣ်အသိးန့ၣ်လီၤ. ⁸ ― ယစံး, ယ ကထီၣ်သ့ၣ်စူၣ်ပလိၣ်, ယကဟံးဃာ်အဒ့လီၤ. ဒီးနနုၢ် ကမၤသးဒ်တၤသၣ်အကူၤသိးန့ၣ်, နနါဒ့အနၢမူမၤသး ဒ်ပြၢးတးပူာ်သၣ်အနၢမူအသိး, ⁹ ဒီးနကိာ်ပူၤမၤသးဒ်စ ပံးထံဂ့ၤကတၢၢ်အသိး လၢအဂဲၤအသးဖဲအဘၣ်ပှၤလၢ ယအဲၣ်အီၤတဂၤအဂီၢ်, လၢအယွၤနုာ်လီၤလၢပှၤလၢအ မံအပျုၤပူၤလီၤ. ¹⁰ ယမ့ၢ်ပှၤလၢယအဲၣ်အီၤတဂၤအတၢ်, ဒီးအဆၢတၢ်န့ၣ်ကအိၣ်ဝဲလၢယလိၤလီၤ.

¹¹ ပှၤလၢယအဲၣ်အီၤတဂၤဧၢ, ဟဲက့ၤ, လဲၤသကိးဆူပှၢ် လၢ်ကျါတက့ၢ်. အိၣ်သကိးသီတနၤကျၢၤလၢတဝီပူၤ တက့ၢ်. ¹² တုၤနုၤတစုစပံးမုၢ်ဘိၣ်ထီၣ်ဧါ, စပံးမုၢ်အဆှိး ဖးထီၣ်ဧါ, ဒီးသ့ၣ်သလဲဖျိထီၣ်ဧါန့ၣ်ဒ်သိးပကကွၢ်ဒီး, ပကလဲၤဂီၤဂီၤဆူစပံးမုၢ်အလီၢ်ပူၤလီၤ. ယကဟ့ၣ်နၤ လၢယတၢ်အဲၣ်ဖဲန့ၣ်လီၤ. ¹³ ဒူးဒးသၣ်နၢမူတၢ်ဒီးတၤ သၣ်ဝံၣ်ကိးအကလုာ်ဒဲး, အသီဂ့ၤ, အလီၢ်လံၤဂ့ၤ, လၢ ယပာ်ဖှိၣ်လၢနဂီၢ်အိၣ်ဝဲလၢ ပကျဲစၢၤအဃၢၤပှၤလၢယ အဲၣ်အီၤတဂၤဧၢ.

၈

¹ မ်နမၤနသး ဒ်ယဒီပုၢ်ဝဲၢ်ခွါလၢအစူၢ်ယမိၢ်အနုၢ်ခိၣ် မီၣ်အသိးန့ၣ်တက့ၢ်. တုၤယထံၣ်ဘၣ်နၤလၢခိဒီး, ယက နၢမူနၤ, ဒီးပှၤတဒုၣ်ဒွဲၣ်ဘၣ်ယၤလၢအဃိနီတဂၤဘၣ်.―

² ယကဆှၢနၤ, ယကဒုးဟဲနၤဆူယမိၢ်အဟံၣ်ပူၤ, ဒ်သိးန ကသိၣ်လိယၤလီၤ. ယကဒုးအီနၤလၢစပံးထံဃါဃုာ်, ဒီးလၢသလဲသၣ်အထံလီၤ. ³ အစုစ့ၣ်အိၣ်ဝဲလၢယခိၣ်ဖီ လာ်, ဒီးအစုထွဲဖိးယၤလီၤ.

⁴ ယရူၤၡလ့ၣ်အဖိမုၣ်သ့ၣ်ဧၢ, ယဒုးဆိၣ်သုလၢသုသု တထိၣ်ဂဲၤ, ဒီးလၢအတချုးဘၣ်ဒံးဘၣ်အသးဘၣ်ဒီး, သုသုတမၤဖုသံနီၣ်ထီၣ်ပှၤလၢယအဲၣ်အီၤန့ၣ်တဂ့ၤ.

⁵ ပှၤဟဲလၢပှၢ်လၢ်ကျါသန့ၤအသးလၢ ပှၤလၢအအဲၣ်ဝဲ တဂၤန့ၣ်မ့ၢ်မတၤတဂၤလဲၣ်. ယထိၣ်ဂဲၤနၤလၢပြၢးတး ပူာ်အဖီလာ်လီၤ. ဖဲန့ၣ်နမိၢ်ဆံးစၢ်န့ၢ်နၤ, ဖဲန့ၣ်ပှၤလၢ အ ဆံးစၢ်နၤတဂၤဆံးစၢ်န့ၢ်နၤလီၤ. ⁶ ပာ်ယၤဒ်တၢ်စဲဃာ်ပ နီၣ်လၢနသးလိၤအသိး, ဒ်တၢ်စဲဃာ်ပနီၣ်လၢနစုဒုၣ်အ လိၤအသိးန့ၣ်တက့ၢ်. အဂ့ၢ်ဒ်အံၤ, တၢ်အဲၣ်န့ၣ်ဆူၣ်ဝဲထဲ သိးဒီးတၢ်သံ, တၢ်သးက့ၣ်န့ၣ်ကီဝဲထဲသိးဒီးပျုၤပူၤလီၤ. အမ့ၣ်လၣ်တဖၣ်န့ၣ်မ့ၢ်မ့ၣ်အူအီၣ်တၢ်အမ့ၣ်လၣ်, ယွၤ အမ့ၣ်လၣ်လီၤ. ⁷ ထံအါမၤလီၤပံာ်တၢ်အဲၣ်တသ့ဘၣ်, ဒီးထံကျိမၤလီၤအုးသံအီၤတသ့ဘၣ်. ပှၤမ့ၢ်ဟ့ၣ်အဟံၣ် အစုလီၢ်အခီၣ်ခိၣ်ခဲလၢာ်လၢတၢ်အဲၣ်အဂီၢ်ဒီး, ပှၤတပာ် အီၤလၢတၢ်နီတမံၤဘၣ်.

⁸ ပအိၣ်ဒီးပဒီပုၢ်ဝဲၢ်မုၣ်အဆံးတဂၤ, ဒီးအနုၢ်တအိၣ် ဘၣ်. လၢမုၢ်တနံၤလၢပှၤကကတိၤတၢ်လၢအဂ့ၢ်အကျိၤ န့ၣ်ပကမၤပဒီပုၢ်ဝဲၢ်မုၣ်အဂီၢ်လၢမနုၤတမံၤလဲၣ်. ⁹ မ့မ့ၢ် တၢ်အဒူၣ်ဒီး, ပကမၤထီၣ်တၢးထီစ့လၢအဖီခိၣ်လီၤ. မ့မ့ၢ် တြဲၤတဘ့ၣ်ဒီး, ပကကရၢအီၤလၢသ့ၣ်ဆှိအ့ရ့းအသ့ၣ် ဘၣ်လီၤ.

¹⁰ ယဲဒၣ်အံၤယမ့ၢ်တၢ်အဒူၣ်, ဒီးယနုၢ်မၤသးဒ်တၢးထီ တဖၣ်အသိးန့ၣ်လီၤ. မၤသးဒ်န့ၣ်ဒီးယအိၣ်လၢအမဲာ် ညါဒ်ပှၤလၢအထံၣ်န့ၢ်တၢ်အမုာ်အဖိးအသိးန့ၣ်လီၤ.

¹¹ စီၤၡလိၤမိၤအိၣ်ဝဲဒီးစပံးမုၢ်အလီၢ်လၢ ဘဧၤလဟမိၣ် လီၤ. ဟ့ၣ်လီၤအစပံးမုၢ်အလီၢ်လၢပှၤပၢၤတၢ်ဖိလီၤ. လၢ အတၤသၣ်အဂီၢ်န့ၣ်ဘၣ်ဟဲစိာ်တဂၤစ့တကထိ, တဂၤ စ့တကထိလီၤ. ¹² ယစပံးမုၢ်အလီၢ်လၢအမ့ၢ်ယတၢ်န့ၣ် အိၣ်ဝဲလၢယမဲာ်ညါလီၤ. စီၤၡလိၤမိၤဧၢ, မ်နဝဲအိၣ်တက ထိ, ဒီးပှၤလၢအပၢၤတၤသၣ်တဖၣ်အဝဲန့ၣ်ခံကယၤတ က့ၢ်.

¹³ ပှၤလၢအအိၣ်အဆိးလၢ တၤသၣ်အလီၢ်ပူၤနဲဒၣ်တ ဂၤဧၢ, ပှၤဒီတံၤဒီသကိးတဖၣ်န့ၣ်ကနၣ်နကလုၢ်လီၤ. ဒုးနၢ်ဟူယၤတက့ၢ်.

¹⁴ ပှၤလၢယအဲၣ်အီၤတဂၤဧၢ, ဃ့ၢ်တၢ်ချ့ချ့ဒ်တၤဟိစဘံ အသိးဒ်တၤဟိဖိအဖါလၢတၢ်နၢမူအကစၢၢ်လိၤအသိးန့ၣ်တက့ၢ်.