တၢ်ကတိၤဒိ

တၢ်ကတိၤဒိ

၁

¹ အံၣ်စရ့လး အစီၤပၤ, စီၤဒၤဝံးအဖိခွါ စီၤၡလိၤမိၤ အတၢ်ကတိၤဒိ, ² ဒ်သိးပှၤကသ့ၣ်ညါတၢ်ကူၣ်သ့ဒီး တၢ်သိၣ်လိ, ဒ်သိးအနၢ်ကပၢၢ်ပှၤသူၣ်ဆးသးဆးအတၢ် ကတိၤ, ³ ဒ်သိးအကဒိးန့ၢ်တၢ်ကူၣ်ဘၣ်ကူၣ်သ့, တၢ်တီ တၢ်လိၤ, ဒီးတၢ်စံၣ်ညီၣ်, ဒီးတၢ်အသးစၢၢ်ဆၢတဖၣ် အတၢ်သိၣ်လိ, ⁴ ဒ်သိးအကဒုးကူၣ်သ့ပှၤလၢ အတမၤ လိဘၣ်တၢ်ဘၣ်, ဒီးဟ့ၣ်တၢ်သ့ၣ်ညါ, ဒီးတၢ်ဒုးပလီၢ် အသးလၢပှၤဖိၣ်သၣ်ခွါတဖၣ်လီၤ.

⁵ မ်ပှၤကူၣ်သ့ ကနၣ်တက့ၢ်. ဒီးအမၤလိတၢ်ကအါ ထီၣ်, ဒီးပှၤလၢအသူၣ်ဆးသးဆးကန့ၢ်ဘၣ်တၢ်ဒုးကူၣ် တၢ်လီၤ. ⁶ အန့ၣ်ဒီးအနၢ်ကပၢၢ် တၢ်ကတိၤအဒီၣ်အ ယိာ်, ပှၤကူၣ်တၢ်သ့အကလုၢ်အကထါ, ဒီးအပှိၤ ပှီၢ်တၢ်လီၤ.

⁷ တၢ်ပျံၤယွၤန့ၣ် မ့ၢ်တၢ်သ့ၣ်ညါအခီၣ်ထံးလီၤ. တၢ် ကူၣ်သ့ဒီးတၢ်သိၣ်လိန့ၣ်ပှၤဟးဂီၤဖိတပးကဲဘၣ်လီၤ.

⁸ ယဖိခွါဧၢ, ကနၣ်နပၢ်အသိၣ်တၢ်တက့ၢ်, ဒီးလဲၤ သဒၣ်နမိၢ်အသိၣ်က့ၤသီက့ၤတၢ်တဂ့ၤ. ⁹ အဂ့ၢ်ဒ်အံၤ, ကကဲထီၣ် တၢ်အဃံအလၤအခိၣ်ကျီၤလၢနခိၣ်အလိၤ, ဒီးဖဲတဝီလၢနကိာ်လိၤလီၤ.

¹⁰ ယဖိခွါဧၢ, ပှၤတၢ်ဒဲးဘးဖိမ့ၢ်ကလံာ်နၤဒီး, အၢၣ်လီၤ အီလီၤတဂ့ၤ. ¹¹ မ့ၢ်စံးဟဲဒီးပှၤ, မ်ပကခိးခူသူၣ်လၢတၢ် သွံၣ်အဂီၢ်, မ်ပကခိးတဒၢတၢ်လၢပှၤအတၢ်ဒဲးဘးတ အိၣ်ဘၣ်ကလီကလီအကျဲအဂီၢ်တက့ၢ်. ¹² မ်ပကယူၢ် လီၤကွံာ်မူဒံးအီၤ ဒ်ပျုၤပူၤအသိးန့ၣ်, ဒီးလၢအနီၢ်ဒီဂၤ ညါဒ်ပှၤလၢအလဲၤလီၤဆူ တၢ်အပူၤအသိးန့ၣ်တက့ၢ်.―

¹³ ပကထံၣ်န့ၢ်တၢ်လုၢ်ဒိၣ်ပှ့ၤဒိၣ်အကလုာ်ကလုာ်, ပက မၤပှဲၤပဟံၣ်ဒီး တၢ်ဂုာ်န့ၢ်လီၤ. ¹⁴ နဂီၢ်ကလီၤဘၣ်လၢ ပကျါ, ပကအိၣ်ဒီးထၢၣ်တဖျၢၣ်ဃီလီၤ.

¹⁵ ယဖိခွါဧၢ, ပိာ်ကျဲဒီးအီၤတဂ့ၤ, တြီနခီၣ်လၢအကျဲ ပူၤတက့ၢ်. ¹⁶ အဂ့ၢ်ဒ်အံၤ, အခီၣ်ဃ့ၢ်ဝဲဆူတၢ်အၢ, ဒီးမၤ ချ့ချ့ဒ်သိးအကလူလီၤတၢ်သွံၣ်လီၤ. ¹⁷ အဂ့ၢ်ဒ်အံၤ, ပှၤ ဒါလီၤပှာ်ဧိၤစၤဧိၤလၢ ထိၣ်ကိးဘ့ၣ်ဒဲးအမဲာ်ညါကလီ ကလီလီၤ. ¹⁸ ဒီးအဝဲသ့ၣ်ခိးခူသူၣ်လၢအသွံၣ်ဒၣ်ဝဲအဂီၢ်, ခိးတဒၢတၢ်လၢအသးသမူဒၣ်ဝဲအဂီၢ်န့ၣ်လီၤ. ¹⁹ ပှၤလၢ အသးကွံလုၣ်ကိတၢ်အါထီၣ်တဂၤလၢ်လၢ် အကျဲမ့ၢ်ဒ် န့ၣ်သိးလီၤ. ဟံးထီၣ်ကွံာ်ဝဲ အကစၢ်တဖၣ်အသးသမူ လီၤ.

²⁰ တၢ်ကူၣ်သ့ကိးထီၣ်တၢ်လၢခိ, ထုထီၣ်အကလုၢ်လၢ ကျဲပူၤ, ²¹ ကိးထီၣ်ဝဲလၢတၢ်အိၣ်ဖှိၣ်အလီၢ်, လၢကျဲစၢၤ အခီၣ်ထံး, လၢခူဧိၤဝ့ၢ်ဧိၤအပူၤန့ၣ်ဒုးထီၣ်ဖျဲး အတၢ်က တိၤ, ²² ဒီးစံးဝဲဒၣ်, ပှၤတမၤလိဘၣ်တၢ်သ့ၣ်ဧၢ, သုက အဲၣ်ဒိးတၢ်တမၤလိဘၣ်, ဒီးပှၤမၤတရီတပါန့ၣ်ကမုာ် လၤလၢတၢ်တရီတပါအပူၤ, ဒီးပှၤဟးဂီၤဖိကသးဟ့ တၢ်သ့ၣ်ညါန့ၣ်ဆံးယံာ်လဲၣ်.

²³ ဃၣ်သုသးလၢ ယသိၣ်ဃီၣ်တၢ်အဃိတက့ၢ်. ကွၢ် ကွၢ်, ယကလူလီၤယသးလၢသုလိၤ, ယကဘိးဘၣ်သ့ၣ် ညါသုလၢယကလုၢ်ကထါလီၤ.

²⁴ မ့ၢ်ယကိး, ဒီသုဂ့ၢ်လိာ်ဝဲ, မ့ၢ်ယယူာ်ထီၣ်ယစု, ဒီး ပှၤတဒိကနၣ်ဘၣ်ဝဲ, ²⁵ မ့မ့ၢ်သုပာ်ယတၢ်ဟ့ၣ်ကူၣ်လၢ တၢ်ကလီကလီ, ဒီးတဘၣ်ဘၣ်သုသးလၢ ယတၢ်သိၣ် ဃီၣ်န့ၣ်သတးဒီး, ²⁶ ယဲဒၣ်ယကနံၤဘၣ်ဖၣ်လဲသုတၢ် နးတၢ်ဖှီၣ်, တုၤတၢ်မၤပျံၤသုဟဲ, ဒီးယကကတိၤဒိးတၢ် လီၤ. ²⁷ တုၤတၢ်မၤပျံၤသုဟဲ ဒ်ကလံၤမုၢ်တွၤအသိး, ဒီး တၢ်မၤဟးဂီၤချုးန့ၢ်သု ဒ်ကလံၤသဝံးအသိးန့ၣ်, တုၤ တၢ်မၤနးမၤဖှီၣ်, ဒီးတၢ်ကိၢ်တၢ်ဂီၤဟဲဘၣ်သုဒီး, ²⁸ တုၤ နုၤတစု ပှၤကကိးထီၣ်ယၤ, ဒီးယတစံးဆၢဘၣ်တၢ် ဘၣ်. ကဃုယၤသပှၢ်ပှၢ်, ဒီးတထံၣ်န့ၢ်ဘၣ်ယၤဘၣ်.

²⁹ အဂ့ၢ်ဒ်အံၤ, အဝဲသ့ၣ်သးဟ့တၢ်သ့ၣ်ညါ, ဒီးတဃု ထၢဘၣ်တၢ်ပျံၤယွၤဘၣ်. ³⁰ တဘၣ်ဘၣ်အသးလၢ ယ တၢ်ဟ့ၣ်ကူၣ်ဘၣ်, ဒီးမၤတရီတပါယတၢ်သိၣ်ဃီၣ်ခဲ လၢာ်လီၤ.

³¹ မၤသးဒ်န့ၣ်ဒီး ကအီၣ်အကျဲဒၣ်ဝဲအတၤသၣ်, ဒီးက ဘျဲးအီၣ်ဝဲလၢအတၢ်ကူၣ်တၢ်ဖးဒၣ်ဝဲန့ၣ်လီၤ. ³² မ့ၢ်မးပှၤ ပှၤတမၤလိဘၣ်တၢ်ဘၣ်အဃၣ်ကွံာ်အသးန့ၣ် ကမၤ သံအီၤ, ဒီးပှၤဟးဂီၤဖိအတၢ်တပလီၢ်ဘၣ်အသးန့ၣ် ကမၤဟးဂီၤအီၤလီၤ.

³³ မ့မ့ၢ်ပှၤလၢအဒိကနၣ် ယကလုၢ်န့ၣ် ကအိၣ်မံသူၣ် မံသး, ဒီးကပူၤဖျဲးဒီးတၢ်အၢတၢ်သီအတၢ်ပျံၤန့ၣ်လီၤ.

၂

¹ ယဖိခွါဧၢ, နမ့ၢ်ဒိးန့ၢ်ယတၢ်ကတိၤ, ဒီးပာ်ဖှိၣ်ယတၢ် မၤလိာ်ဒီးနၤ, ² ဒ်သိးနကဒိး နနၢ်လၢတၢ်ကူၣ်သ့, ဒီး ဃၣ်နသးဆူတၢ်သူၣ်ဆးသးဆး, ³ မ့ၢ်မးနမ့ၢ်ကိးတၢ် ဆူတၢ်ကူၣ်တၢ်ဆး, ဒီးထုထီၣ်နကလုၢ်ဆူတၢ်သူၣ်ဆး သးဆးဒီး, ⁴ နမ့ၢ်ဃုအီၤဒ်ကျိၣ်ဧိၤစ့ဧိၤအသိး, ဒီးချုအီၤ ဒ်တၢ်လုၢ်ဒိၣ်ပှ့ၤဒိၣ် အိၣ်ခူသူၣ်အသိးန့ၣ်ဒီး, ⁵ နနၢ်က ပၢၢ်တၢ်ပျံၤယွၤ, ဒီးနကထံၣ်န့ၢ်တၢ်သ့ၣ်ညါယွၤလီၤ.

⁶ အဂ့ၢ်ဒ်အံၤ, ယွၤဟ့ၣ်လီၤတၢ်ကူၣ်သ့လီၤ. တၢ်သ့ၣ် ညါ, ဒီးတၢ်သူၣ်ဆးသးဆးထီၣ်ဖျဲးလၢအထးခိၣ်လီၤ.

⁷ ပာ်ဖှိၣ်ဝဲလၢ တၢ်ကူၣ်သ့အမူာ်အနီၢ် လၢပှၤတီပှၤလိၤ အဂီၢ်, မ့ၢ်ဝဲကတီၤတဘ့ၣ်လၢ ပှၤလၢအလဲၤတၢ်လၢ လၢပှဲၤပှဲၤအဂီၢ်လီၤ.

⁸ ပၢၤဝဲလၢတၢ်စံၣ်ညီၣ်အကျဲဧိၤကပူၤဧိၤ, ဒီးကွၢ်အပှၤ စီဆှံအကျဲလီၤ.

⁹ တုၤနုၤတစု နနၢ်ကပၢၢ်တၢ်တီတၢ်လိၤ, ဒီးတၢ်စံၣ် ညီၣ်, ဒီးတၢ်အသးစၢၢ်ဆၢ, ကယဲၢ်ကျဲဧိၤကပူၤဧိၤလၢ အဂ့ၤအဘၣ်လီၤ.

¹⁰ အဂ့ၢ်ဒ်အံၤ, တၢ်ကူၣ်သ့ကဟဲနုာ်လၢနသးကံၢ်ပူၤ, ဒီးတၢ်သ့ၣ်ညါကဘၣ်နသး, ¹¹ ဒီးတၢ်ဒုးပလီၢ်နသးက အံးက့ၤကွၢ်က့ၤနၤ, ဒီးတၢ်သူၣ်ဆးသးဆးကပၢၤနၤ,―

¹² ဒ်သိးအကမၤပူၤဖျဲးနၤလၢ တၢ်အၢအကျဲ, ဒီးပှၤလၢ အကတိၤတၢ်အက့ၣ်အကူ, ¹³ ပှၤလၢအလဲၤသဒၣ်တၢ် လိၤအကျဲဒ်သိးအကပိာ်တၢ်ခံးအကျဲ, ¹⁴ ပှၤလၢအသူၣ်ခု သးခုလၢအမၤတၢ်အၢ, လၢအသူၣ်ဖှံသးညီလၢ တၢ် ဒၢက့ၣ်ဒၢကူအပူၤ, ¹⁵ ပှၤလၢအကျဲအကပူၤ, ဒၢက့ၣ်ဒၢ ကူ, ဒီးအကျဲမ့ၢ်အအၢအသီလီၤ.

¹⁶ ကမၤပူၤမၤဖျဲးနၤလၢပိာ်မုၣ်ဟးဂီၤ, ဒီးပှၤတမှံၤပိာ်မုၣ် လၢအလွဲတၢ်လၢအတၢ်ကတိၤ, ¹⁷ ပှၤလၢအလဲၤသဒၣ် အမုၣ်ကနီၤထီၣ်အတံၤအသကိး, ဒီးသးပ့ၤနီၣ်အက စၢ်အတၢ်အၢၣ်လီၤအီလီၤလီၤ. ¹⁸ အဂ့ၢ်ဒ်အံၤ, အဟံၣ် လီၤဒးဝဲဆူတၢ်သံ, ဒီးအကျဲဧိၤကပူၤဧိၤဆူပှၤသံအအိၣ် လီၤ. ¹⁹ ပှၤလၢအလဲၤဆူအအိၣ် တဟဲက့ၤကဒါက့ၤဘၣ် နီတဂၤဘၣ်. တထီၣ်ဘးဘၣ်တၢ်မူအကျဲဘၣ်.

²⁰ မၤသးဒ်န့ၣ်ဒီးလဲၤတၢ်လၢ ပှၤဂ့ၤအကျဲပူၤ, ဒီးဟံး ဃာ်ပှၤတီပှၤလိၤအကျဲန့ၣ်တက့ၢ်. ²¹ အဂ့ၢ်ဒ်အံၤ, ပှၤအ တီအလိၤကအိၣ်ကဆိးလၢ ထံဧိၤကီၢ်ဧိၤအပူၤ, ဒီးပှၤ လၢပှၤပှဲၤကအိၣ်ဒၣ်တၢ်လၢအပူၤလီၤ.

²² မ့မ့ၢ်ပှၤတတီတလိၤဘၣ်န့ၣ် ကဘၣ်တၢ်ဒီၣ်တဲာ်ကွံာ် လၢကီၢ်ပူၤ, ဒီးပှၤမၤကမၣ်တၢ်ဖိန့ၣ်ကဘၣ်တၢ်ထဲးကွံာ် အီၤလၢအပူၤလီၤ.

၃

¹ ယဖိခွါဧၢ, သးပ့ၤနီၣ် ယသိၣ်က့ၤသီက့ၤတၢ်တဂ့ၤ. မ်နသးတိၢ်န့ၢ်ယတၢ်မၤလိာ်တက့ၢ်. ² အဂ့ၢ်ဒ်အံၤ, က ပာ်ဖှိၣ်မုၢ်နံၤအါနံၤ, ဒီးသးသမူအနံၣ်, ဒီးတၢ်ဃူတၢ် ဖိးလၢနဂီၢ်လီၤ.

³ ဒုးလဲၤသဒၣ်တၢ်ဘျုးတၢ်ဖှိၣ်, ဒီးတၢ်မ့ၢ်တၢ်တီလၢ နၤတဂ့ၤ, စၢထီၣ်အီၤလၢနကိာ်လိၤ, ကွဲးအီၤလၢနသး အဘ့ၣ်ဘၣ်လိၤန့ၣ်တက့ၢ်. ⁴ မ့မ့ၢ်ဒ်န့ၣ်ဒီး နကဘၣ် တၢ်အသး, ဒီးဘီၣ်ထီၣ်ညီထီၣ်လၢ ယွၤဒီးပှၤကညီ အမဲာ်ညါလီၤ. ⁵ သန့ၤနသးလၢယွၤလၢနသးဒီဖျၢၣ်ညါတက့ၢ်. ဒီးသုတသန့ၤနသးလၢနတၢ်ကူၣ်တၢ်ဆးဒၣ်နဲတဂ့ၤ.―

⁶ သ့ၣ်ညါယွၤလၢနကျဲခဲလၢာ်အပူၤတက့ၢ်. ဒီးအဝဲဒၣ် ကမၤလိၤနကျဲလီၤ.

⁷ ကဲထီၣ်ပှၤလၢအကူၣ်တၢ်သ့ လၢနမဲာ်ညါဒၣ်နဲအပူၤ တဂ့ၤ. ပျံၤယွၤ, ဒီးဟးထီၣ်ကွံာ်လၢတၢ်အၢအအိၣ်န့ၣ် တက့ၢ်. ⁸ ကကဲထီၣ်တၢ်အဆးလၢနဒ့အဂီၢ်, ဒီးတၢ် နူာ်ကံၢ်လၢနဃံအဂီၢ်လီၤ.

⁹ မၤလၤကပီၤယွၤ လၢနစုလီၢ်နခီၣ်ခိၣ်, ဒီးလၢနတၢ် အါထီၣ်ခဲလၢာ် အတၤသၣ်ဆိတက့ၢ်. ¹⁰ တုၤနုၤတစုန သိၣ်ဧိၤဖီဧိၤ ကပှဲၤဒီးတၢ်အါအါကလဲာ်, ဒီးနနီၣ်စံၢ်စ ပံးသၣ်န့ၣ်ကပှဲၤလုၣ်ကွံာ်ဒီးစပံးထံအသီလီၤ.

¹¹ ယဖိခွါဧၢ, ယွၤသိၣ်ဃီၣ်တၢ်န့ၣ် သုတမၤတရီတပါ တဂ့ၤ. အသိၣ်က့ၤသီက့ၤတၢ်န့ၣ်သုတသးကိၢ်လၢအ ဃိတဂ့ၤ. ¹² အဂ့ၢ်ဒ်အံၤ, ပှၤလၢယွၤအဲၣ်အီၤန့ၣ်ယွၤသိၣ် ဃီၣ်အီၤဒ် ပၢ်သိၣ်ဃီၣ်အဖိလၢအအဲၣ်ဝဲအသိးန့ၣ်လီၤ.

¹³ ပှၤလၢအထံၣ်န့ၢ်တၢ်ကူၣ်သ့, ဒီးပှၤလၢအမၤန့ၢ်တၢ် သူၣ်ဆးသးဆးန့ၣ်ဘၣ်ဆိၣ်ဂ့ၤဝဲလီၤ. ¹⁴ အဂ့ၢ်ဒ်အံၤ, တၢ် န့ၢ်ဘၣ်အီၤန့ၣ်ဂ့ၤန့ၢ်တၢ်န့ၢ်ဘၣ်ကျိၣ်ဧိၤစ့ဧိၤ, ဒီးအတၢ် အါထီၣ်ဂ့ၤန့ၢ်ထူစီတက့ၢ်လီၤ. ¹⁵ အပှ့ၤဒိၣ်န့ၢ်တၢ်မျၢ်ပ လဲတက့ၢ်, ဒီးကယဲၢ်တၢ်လၢ အဘၣ်နသးခဲလၢာ်န့ၣ်န တထိၣ်သတြီၤဘၣ်ဒီးအီၤဘၣ်. ¹⁶ မုၢ်နံၤအါအိၣ်ဝဲလၢအ စုထွဲ, ဒီးတၢ်ထူးတၢ်တီၤ, ဒီးတၢ်လၤတၢ်ကပီၤလၢ အစုစ့ၣ်လီၤ. ¹⁷ အကျဲန့ၣ်မ့ၢ်ကျဲအမုာ်, ဒီးကယဲၢ်အကျဲ ဧိၤကပူၤဧိၤမ့ၢ်တၢ်ဃူတၢ်ဖိးလီၤ. ¹⁸ ကဲထီၣ်ဝဲလၢတၢ်မူ အသ့ၣ်တထံးလၢ ကယဲၢ်ပှၤလၢအဟံးန့ၢ်အီၤအဂီၢ်, ဒီးပှၤလၢအဟံးဃာ်အီၤန့ၣ်ဘၣ်ဆိၣ်ဂ့ၤဝဲလီၤ.

¹⁹ ယွၤပာ်လီၤဟီၣ်ခိၣ်အခီၣ်ထံးလၢတၢ်ကူၣ်သ့, တ့ လီၤမူခိၣ်လၢတၢ်ကူၣ်တၢ်ဆးလီၤ. ²⁰ ထံယိာ်ပူၤသ့ၣ်ဖး လီၤအသးလၢအတၢ်သ့ၣ်ညါ, ဒီးတၢ်အၢၣ်ဒုးလီၤစီၤ ပစီၤထံလီၤ.

²¹ ယဖိခွါဧၢ, ဒုးဟးထီၣ်တၢ်န့ၣ်တဖၣ်လၢနမဲာ်ညါတ ဂ့ၤ, ပၢၤတၢ်ကူၣ်သ့အမူာ်အနီၢ် ဒီးတၢ်ပလီၢ်နသးတ က့ၢ်. ²² ဒီးကကဲထီၣ်တၢ်မူလၢနသးအဂီၢ်, ဒီးတၢ်ဃံ တၢ်လၤလၢနကိာ်အဂီၢ်လီၤ. ²³ တုၤနုၤတစုနကပိာ်နကျဲ အိၣ်ဒီးတၢ်သန့ၤနသး, ဒီးနခီၣ်တဘၣ်တိၢ်ဘၣ်. ²⁴ တုၤ နမံလီၤဒီး, နတပျံၤဘၣ်တၢ်ဘၣ်. မ့ၢ်မးတုၤနမံလီၤ ဒီး, နကမံသပ့ၤမုာ်မုာ်လီၤ. ²⁵ တၢ်မၤပျံၤမၤဖုးတၢ်သ တူာ်ကလာ်မ့ၢ်ဂ့ၤ, ပှၤတတီတလိၤအတၢ်မၤသယုၢ်တၢ် တုၤအဟဲမ့ၢ်ဂ့ၤ, ပျံၤတဂ့ၤ. ²⁶ အဂ့ၢ်ဒ်အံၤ, ယွၤကကဲ ထီၣ်နတၢ်မုၢ်လၢ်, ဒီးကပၢၤနခီၣ်ဒ်သိးအသုတဘၣ် ပျံၤသကွီၤတဂ့ၤလီၤ.

²⁷ တုၤနစုမၤသ့ဒီး, တြီတၢ်ဂ့ၤလၢပှၤလၢအဂ့ၤန့ၢ်ဘၣ် ဝဲတဂ့ၤ, ²⁸ တုၤတၢ်အိၣ်ဒီးနၤဒီး, စံးလၢနသကိး, လဲၤ တၢ်ဒီးဟဲက့ၤကဒါက့ၤ, ယကဟ့ၣ်တၢ်ခဲဂီၤကိာ်န့ၣ် တဂ့ၤ. ²⁹ တုၤပှၤအိၣ်လၢနဃၢၤအိၣ်ဝဲဆိးဝဲဒီးနၤအိၣ်ဒီး တၢ်သန့ၤအသးဒီး, ကူၣ်တၢ်အၢထီဒါအီၤတဂ့ၤ.

³⁰ ပှၤမ့ၢ်တမၤအၢဘၣ်နၤဘၣ်ဒီး, ဂ့ၢ်လိာ်ဘှီလိာ်ဒီးအီၤ ကလီကလီတဂ့ၤ. ³¹ သးကွံပှၤမၤအၢမၤသီတၢ်အလီၢ်တ ဂ့ၤ. ဒီးဃုထၢအကျဲနီတဘိတဂ့ၤ. ³² အဂ့ၢ်ဒ်အံၤ, ပှၤအ အသးက့ၣ်န့ၣ် မ့ၢ်တၢ်သးဘၣ်အၢအလီၢ်လၢယွၤအမဲာ် ညါ, မ့မ့ၢ်အတၢ်ကူၣ်တၢ်ဖးန့ၣ် အိၣ်ဒီးပှၤအသးလိၤ လီၤ. ³³ ယွၤအတၢ်ဆိၣ်အၢအိၣ်ဝဲလၢပှၤတတီတလိၤအ ဟံၣ်ပူၤ, မ့မ့ၢ်ဆိၣ်ဂ့ၤပှၤတီပှၤလိၤအအိၣ်အဆိးအလီၢ် လီၤ. ³⁴ မၤတရီတပါပှၤမၤတရီတပါတၢ်, မ့မ့ၢ်ဟ့ၣ်ဘျုး ဟ့ၣ်ဖှိၣ်တၢ်လၢ ပှၤအသူၣ်စူၤအသးစူၤလီၤ.

³⁵ ပှၤလၢအကူၣ်တၢ်သ့နၣ် ကန့ၢ်သါတၢ်လၤကပီၤ, မ့ မ့ၢ်ပှၤဟးဂီၤဖိန့ၣ်တၢ်မဲာ်ဆှးကအူထီၣ်ကွံာ်အီၤလီၤ.

၄

¹ ဖိခွါသ့ၣ်ဧၢ, ဒိကနၣ်ပၢ်အတၢ်သိၣ်တၢ်သီ, ဒီးပာ် သုသးဒ်သိးသုကသ့ၣ်ညါတၢ်ကူၣ်တၢ်ဆးတက့ၢ်. ² အ ဂ့ၢ်ဒ်အံၤ, ယဟ့ၣ်လီၤသုလၢတၢ်သိၣ်လိအဂ့ၤလီၤ. လဲၤ သဒၣ်ယတၢ်သိၣ်တၢ်သီတဂ့ၤ. ³ အဂ့ၢ်ဒ်အံၤ, ယမ့ၢ်ယ ပၢ်အဖိခွါ, ပှၤအစၢ်ဒီးပှၤတဂၤဃီလၢ ယမိၢ်အဲၣ်အီၤတ ဂၤလီၤ. ⁴ ဒီးသိၣ်က့ၤယၤ, ဒီးစံးဘၣ်ယၤ, မ်နသးဟံး ဃာ်ယကလုၢ်တက့ၢ်. တိၢ်န့ၢ်ယတၢ်မၤလိာ်တက့ၢ်, ဒီး နကမူလီၤ.

⁵ မၤန့ၢ်တၢ်ကူၣ်သ့, မၤန့ၢ်တၢ်ကူၣ်တၢ်ဆးတက့ၢ်, သး ပ့ၤနီၣ်အီၤတဂ့ၤ, ဒီးဟးဖျိးလၢယထးခိၣ်အတၢ်ကတိၤ တဂ့ၤ. ⁶ လဲၤသဒၣ်အီၤတဂ့ၤ, ဒီးကအံးက့ၤကွၢ်က့ၤနၤ လီၤ, အဲၣ်အီၤတက့ၢ်, ဒီးကပၢၤနၤလီၤ.

⁷ တၢ်အခိၣ်ကျၢၢ်န့ၣ်မ့ၢ်တၢ်ကူၣ်သ့လီၤ. မၤန့ၢ်တၢ်ကူၣ် သ့တက့ၢ်, ဒီးမၤန့ၢ်တၢ်ကူၣ်တၢ်ဆး လၢနမၤတၢ်ခဲ လၢာ်န့ၣ်တက့ၢ်. ⁸ ပာ်ထီၣ်ထီအီၤတက့ၢ်, ဒီးကပာ်ထီၣ် ထီနၤလီၤ. တုၤနဖိးအီၤဒီး, ကမၤလၤကပီၤနၤလီၤ. ⁹ က ဟ့ၣ်နခိၣ်လၢခိၣ်ကျီၤအဃံအလၤ, ကဟ့ၣ်နၤလၢခိၣ် သလုးအဃံအလၤလီၤ.

¹⁰ ယဖိခွါဧၢ, ကနၣ်တက့ၢ်, ဒီးဒိးန့ၢ်ယကလုၢ်ကထါ တက့ၢ်, ဒီးနသးသမူအနံၣ်အလါကအါဝဲလီၤ.

¹¹ ယသိၣ်လိနၤလၢ တၢ်ကူၣ်သ့အကျဲ, ဒီးဒုးပိာ်နၤ လၢတၢ်လိၤအကျဲလီၤ. ¹² တုၤနလဲၤတၢ်ဒီး, နထွဲတၢ်တ အံၣ်ဘၣ်, ဒီးတုၤနဃ့ၢ်တၢ်ဒီး, နခီၣ်တဘၣ်တိၢ်ဘၣ်.

¹³ ဟံးဃာ်တၢ်သိၣ်လိတက့ၢ်. ပျၢ်အီၤတဂ့ၤ. ပၢၤအီၤ တက့ၢ်. အဂ့ၢ်ဒ်အံၤ, မ့ၢ်နတၢ်မူလီၤ.

¹⁴ လဲၤတၢ်လၢ ပှၤတတီတလိၤအကျဲတဂ့ၤ, ဒီးပိာ်ပှၤ အၢအကျဲဧိၤကပူၤဧိၤတဂ့ၤ. ¹⁵ ဟးဆှဲးအီၤတက့ၢ်. လဲၤ တြူာ်အီၤတဂ့ၤ. ဃၣ်ကွံာ်နသးလၢအီၤဒီး လဲၤတၢ်တ က့ၢ်. ¹⁶ အဂ့ၢ်ဒ်အံၤ အဝဲသ့ၣ်မ့ၢ်တမၤတၢ်အၢဘၣ်ဒီး, တ မံဘၣ်ဝဲဘၣ်. ¹⁷ အဂ့ၢ်ဒ်အံၤအီၣ်ဝဲလၢတၢ်တတီတလိၤ အကိၣ်, ဒီးအီတၢ်မၢဆူၣ်အစပံးထံလီၤ.

¹⁸ မ့မ့ၢ်ပှၤတီပှၤလိၤအကျဲန့ၣ် မၤသးဒ်မုၢ်ဆ့ၣ်ထီၣ်အ တၢ်ကပီၤ ဒံးယံာ်ဒံးကပီၤထီၣ်, ဒံးယံာ်ဒံးကပီၤထီၣ်, တုၤလၢမုၢ်ထူၣ်အသိးန့ၣ်လီၤ. ¹⁹ ပှၤတတီတလိၤအကျဲ န့ၣ်မၤသးဒ်တၢ်ခံးသူအသိးန့ၣ်, အခီၣ်ကဘၣ်တိၢ်လၢ မနုၤမနုၤန့ၣ်တသ့ၣ်ညါဘၣ်ဝဲဘၣ်.

²⁰ ယဖိခွါဧၢ, ကနၣ်ယတၢ်ကတိၤတက့ၢ်. ဒိးနနၢ်လၢ ယတၢ်ကလုၢ်ကတိၤတက့ၢ်. ²¹ ဒုးဟးတဒၢအီၤလၢနမဲာ် တဂ့ၤ. ပၢၤအီၤလၢနသးကံၢ်ပူၤတက့ၢ်. ²² အဂ့ၢ်ဒ်အံၤ, မ့ၢ် တၢ်မူလၢ ပှၤလၢအထံၣ်န့ၢ်အီၤအဂီၢ်, ဒီးတၢ်ဆးလၢ အဖံးအညၣ်ဒီဂၤညါအဂီၢ်လီၤ.

²³ လၢနပၢၤတၢ်ခဲလၢာ်အဖီခိၣ်န့ၣ်ပၢၤနသးတက့ၢ်. အ ဂ့ၢ်ဒ်အံၤတၢ်အမူထီၣ်ပၢၤလၢအပူၤလီၤ.

²⁴ သုးကွံာ်ထးခိၣ်လီတၢ်လၢနအိၣ်, ဒီးပာ်ယံၤထီၣ်ပျုၤ က့ၣ်ဒီးနၤတက့ၢ်. ²⁵ မ်နမဲာ်ကွၢ်တၢ်လိၤလိၤ, ဒီးမ်နမဲာ် ဖံးအိၣ်စၢၢ်ဆၢပံၢ်ကလာ်လၢနမဲာ်ညါတက့ၢ်.

²⁶ ကွၢ်ဆိကမိၣ် နခီၣ်အကျဲဒ်သိး နကျဲဧိၤကပူၤဧိၤခဲ လၢာ် ကအိၣ်ကျၢၤတက့ၢ်. ²⁷ ဆူစုထွဲဂ့ၤ, ဆူစုစ့ၣ်ဂ့ၤ, ဃၣ် နသးတဂ့ၤ, သုးကွံာ်နခီၣ်လၢတၢ်အၢအအိၣ်တက့ၢ်.

၅

¹ ယဖိခွါဧၢ, ကနၣ်ယတၢ်ကူၣ်သ့အကလုၢ်တက့ၢ်. ဒိးနနၢ်လၢယတၢ်ကူၣ်တၢ်ဆးအကလုၢ်တက့ၢ်. ² ဒ်သိး နကကွၢ်တၢ်ပလီၢ်နသး, ဒီးနပျုၤကပၢၤတၢ်သ့ၣ်ညါ အဂ့ၢ်လီၤ. ³ အဂ့ၢ်ဒ်အံၤ, ပိာ်မုၣ်ဟးဂီၤန့ၣ် အပျုၤဒုးလီၤ စီၤကနဲစီ, ဒီးအထးခိၣ်ဘျ့န့ၢ်သိတက့ၢ်လီၤ. ⁴ ဒီးအက တၢၢ်န့ၣ်ခၣ်ဝဲ ဒ်သဘူးအပၤစံၣ်တူးအသိး, အ့ၣ်ဝဲဒ်နး လၢအကနၣ်အ့ၣ်ခံခီလၢာ်အသိးန့ၣ်လီၤ. ⁵ အခီၣ်လဲၤ လီၤဆူတၢ်သံ, အထွဲတၢ်န့ၣ်ပၢၢ်လၢပျုၤပူၤလီၤ. ⁶ နက ကွၢ်ဆိကမိၣ်ဘၣ်ဖုးတၢ်မူအကျဲပၢၤလီၤ. အကျဲတဂၢၢ် တကျၢၤဘၣ်, ဒီးနသ့ၣ်ညါအီၤတသ့ဘၣ်. ⁷ ဒီးခဲကနံၣ် အံၤ, ဖိခွါသ့ၣ်ဧၢ, ကနၣ်ယကလုၢ်တက့ၢ်. ⁸ ဒီးဃၣ် ကွံာ်လၢယထးခိၣ်အတၢ်ကတိၤတဂ့ၤ, သုးနကျဲယံၤဒီး အီၤတက့ၢ်. ဒီးလဲၤဘူးဒီးအဟံၣ်အကျဲစၢၤတဂ့ၤ. ⁹ ဒ်သိး နသုတဟ့ၣ်လီၤနလၤကပီၤလၢပှၤဂၤ, ဒီးနနံၣ်နလါလၢ ပှၤမၤဆူၣ်တၢ်တဂ့ၤ, ¹⁰ ဒ်သိးပှၤတခီဘီမုၢ်ဖိ အသုတ အီၣ်နစုလီၢ်နခီၣ်ခိၣ်, ဒီးနမၤတၢ်အဘူးအလဲအသုတ အိၣ်လၢ ပှၤတခီဘီမုၢ်ဖိအဟံၣ်ပူၤတဂ့ၤလီၤ.

¹¹ ဒီးတုၤနနီၢ်ခိ, ဒီးနဖံးနညၣ်လၢာ်ဒီး, နသူၣ်ကအုး နသးကအုးလၢ နယူာ်ကတၢၢ်န့ၣ်, ¹² ဒီးနကစံး, ယ သးဟ့တၢ်သိၣ်က့ၤသီက့ၤ, ဒီးယသးတပးကဲဘၣ်တၢ် သိၣ်ဃီၣ်ဒ်လဲၣ်. ¹³ ဒီးယတကနၣ်ဘၣ်ယသရၣ်သ့ၣ်တ ဖၣ်အကလုၢ်ဘၣ်, ဒီးယတဒိးယနၢ်လၢ ပှၤသိၣ်လိ ယၤတဖၣ်အကလုၢ်ဘၣ်. ¹⁴ ဘူးဒီးယအိၣ်လၢ ကယဲၢ် တၢ်အၢခဲလၢာ်အပူၤလၢပှၤဂီၢ်မုၢ်, ဒီးတၢ်အိၣ်ဖှိၣ်အကျါ န့ၣ်လီၤ.

¹⁵ အီထံလၢနထံပူၤဒၣ်နဲ, ဒီးထံလၢအယွၤလီၤလၢန ထံထီၣ်ပၢၢ်အပူၤဒၣ်နဲန့ၣ်တက့ၢ်. ¹⁶ မ်နထံထီၣ်ပၢၢ်က ယွၤလီၤလၢခိ, ဒီးထံကျိတဖၣ်လၢကျဲဖးလဲၢ်အပူၤန့ၣ် လီၤ. ¹⁷ မ်အအိၣ်ထဲလၢနဂီၢ်ဒၣ်နဲ, ဒီးတမ့ၢ်ဘၣ်လၢပှၤ ဂၤလၢအအိၣ်ဒီးနၤအဂီၢ်ဘၣ်. ¹⁸ မ်နထံထီၣ်ပၢၢ်ဘၣ်တၢ် ဆိၣ်ဂ့ၤတက့ၢ်, ဒီးနကသးခုဒီးနဖိၣ်သၣ်ခွါထီၣ်အမါ လီၤ. ¹⁹ မ့ၢ်ဝဲလၢတၤဟိမိၢ်အတၢ်အဲၣ်, ဒီးတၤယုၢ်မိၢ်အ ဃံအလၤလီၤ. အဧိၤနါဧိၤကဒုးဘျဲးအီၣ်နၤကိးအကတီၢ် ဒဲး, ဒီးနကမၤမူၤနသးလၢအတၢ်အဲၣ်တထံၣ်ဃီလီၤ.

²⁰ ဒီးယဖိခွါဧၢ, နကမၤမူၤနသးလၢပိာ်မုၣ်ဟးဂီၤ, ဒီးဖိး ပှၤတမှံၤပိာ်မုၣ်အနုၢ်အနါန့ၣ်မ့ၢ်အဘၣ်မနုၤလဲၣ်. ²¹ အ ဂ့ၢ်ဒ်အံၤ, ပှၤကညီအကျဲအိၣ်ဝဲလၢ ယွၤအမဲာ်ညါ, ဒီး ကွၢ်ဆိကမိၣ်ဝဲအကျဲဧိၤကပူၤဧိၤခဲလၢာ် အဂ့ၢ်အကျိၤ လီၤ. ²² အတၢ်အၢဒၣ်ဝဲကဖီၣ်န့ၢ်ပှၤတတီတလိၤ. ဒီးအ တၢ်ဒဲးဘးဒၣ်ဝဲအပျံၤကစၢဃာ်အီၤလီၤ.

²³ တၢ်သိၣ်က့ၤသီက့ၤတအိၣ်ဘၣ်ဒီး, ကသံဝဲ, ဒီးလၢ အသးခံးဒိၣ်အပူၤန့ၣ်ကဟးဖျိးကျဲလီၤ.

၆

¹ ယဖိခွါဧၢ, နမ့ၢ်အုၣ်ကီၤနသးလၢနတံၤနသကိးအ ဂီၢ်, နမ့ၢ်ဟံးန့ၢ်ပှၤအစုလၢပှၤဂၤအဂီၢ်ဒီး, ² နမ့ၢ်ဘၣ်တ့ၢ် တၢ်လၢပျံၤသကွီၤလၢနထးခိၣ်အတၢ်ကတိၤ, နမ့ၢ်ဘၣ် တၢ်ဖီၣ်န့ၢ်နၤလၢနထးခိၣ်အကလုၢ်ဒီး, ³ ယဖိခွါဧၢ, မၤ တၢ်အံၤ, ဒီးမၤပူၤမၤဖျဲးနသးတက့ၢ်. အဂ့ၢ်ဒ်အံၤ, နလီၤ ဘၣ်လံလၢနတံၤနသကိးအစုပူၤလံ, ဒီးလဲၤဆီၣ်လီၤန သး, ဒီးသဆၣ်ထီၣ်နတံၤနသကိးအခံတက့ၢ်, ⁴ ဟ့ၣ်မံ နမဲာ်တဂ့ၤ, ဟ့ၣ်မံခ့နမဲာ်ဖံးတဂ့ၤ. ⁵ မၤပူၤမၤဖျဲးနသး ဒ်တၤဟိစဘံလၢပှၤအစုပူၤအသိးန့ၣ်, ဒီးဒ်ထိၣ်တဘ့ၣ် လၢပှၤဖီၣ်န့ၢ်ထိၣ်အစုပူၤအသိးန့ၣ်တက့ၢ်.

⁶ ပှၤကၢၣ်ဖိဧၢ, လဲၤဆူတၢၢ်ဧိၤတြၤဧိၤအအိၣ်, ကွၢ်ဆိ အကမိၣ်အကျဲဒီးကူၣ်တၢ်သ့တက့ၢ်. ⁷ အဝဲဒၣ်န့ၣ်အပ ဒိၣ်တအိၣ်, အပှၤကွၢ်အီၤတအိၣ်, အပှၤပၢၤအီၤတအိၣ် ဘၣ်လီၤ. ⁸ လၢတၢ်ကိၢ်အကတီၢ်န့ၣ် ကတဲာ်ကတီၤအ တၢ်အီၣ်, ဒီးလၢကူးဘုအကတီၢ်န့ၣ်ထၢဖှိၣ်အတၢ်အီၣ် တၢ်အီလီၤ. ⁹ ပှၤကၢၣ်ဖိဧၢ, နကမံဆံးယံာ်လဲၣ်, နက ဖုသံနီၣ်လၢနမံန့ၣ်အကတီၢ်ဖဲလဲၣ်. ¹⁰ မံတစဲးစဲး, မံခ့တ စဲးစဲး, ချံးလီၤစုတစဲးစဲး ဒ်သိးနကမံလီၤလီၤ. ¹¹ နတၢ် ဖှီၣ်တၢ်ယာ်ကဟဲဒ်တမျိၤတမျာ်လၢကျဲပူၤအသိး, ဒီးန တၢ်ဖှီၣ်တၢ်နးဒ်ပှၤအိၣ်ဒီးအစုကဝဲၤအသိးန့ၣ်လီၤ.

¹² ပှၤတဂိာ်တသီၣ်ဘၣ် ပှၤအၢပှၤသီန့ၣ် လဲၤဝဲဒီးထး ခိၣ်လီတၢ်လီၤ. ¹³ ဖျးအမဲာ်, ကတိၤတၢ်လၢအခီၣ်, ဒုးနဲၣ် တၢ်လၢအစုမုၢ်စုနၢလီၤ. ¹⁴ လီတၢ်ဝ့ၤတၢ်အိၣ်ဝဲလၢအ သးကံၢ်ပူၤ, ကူၣ်ဝဲလၢတၢ်မၤအၢတထံၣ်ဃီ, ထိၣ်အ့ၣ် လိာ်ဆိးက့လိာ်တၢ်လီၤ. ¹⁵ မၤသးဒ်န့ၣ်ဒီးအတၢ်နးတၢ် ဖှီၣ်ကဟဲဘၣ်အီၤသတူၢ်ကလာ်, ကဟးဂီၤသပြူၤက လာ်, ဒီးတၢ်မၤဘျါက့ၤအီၤတအိၣ်ဘၣ်.

¹⁶ တၢ်ဃုမံၤယွၤသးဟ့အီၤ, ဒီးနွံမံၤအသးဘၣ်အၢအီၤ လီၤ. ¹⁷ ပှၤအမဲာ်အိၣ်ထီၣ်ထီ, ပှၤအပျ့ၤလၢအကတိၤတၢ် ကဘျံးကဘျၣ်, ဒီးပှၤအစုလၢအလူလီၤတၢ်သွံၣ်လၢ အတၢ်ဒဲးဘးတအိၣ်ဘၣ်, ¹⁸ ပှၤအသးလၢအကူၣ်တၢ် တိာ်အၢ, ပှၤအခီၣ်လၢအဃ့ၢ်တၢ်ချ့ဆူတၢ်အၢအအိၣ်,―

¹⁹ ပှၤအုၣ်အသးတတီဘၣ်လၢ အကတိၤတၢ်ကဘျံးက ဘျၣ်, ဒီးပှၤလၢအထိၣ်အ့ၣ်လိာ်ဆိးက့လိာ်တၢ်လၢဒီပုၢ် ဝဲၢ်အကျါလီၤ.

²⁰ ယဖိခွါဧၢ, တိၢ်န့ၢ်နပၢ်အတၢ်မၤလိာ်တက့ၢ်, ဒီးဟး သဒၣ်နမိၢ်အတၢ်သိၣ်တဂ့ၤ. ²¹ စၢထီၣ်အီၤလၢနသးအ လိၤတထံၣ်ဃီ, စၢထီၣ်အီၤလၢနကိာ်လိၤတက့ၢ်. ²² တုၤ နလဲၤတၢ်ဒီး, ကဆှၢနၤ, တုၤနမံလီၤဒီး, ကပၢၤနၤ, ဒီးတုၤ နဖုသံနီၣ်ထီၣ်ဒီး, ကကတိၤတၢ်ဒီးနၤလီၤ. ²³ အဂ့ၢ်ဒ်အံၤ, တၢ်မၤလိာ်န့ၣ်မ့ၢ်မ့ၣ်အူဒၢ, ဒီးတၢ်သိၣ်န့ၣ်မ့ၢ်တၢ်က ပီၤ, ဒီးတၢ်သိၣ်ဃီၣ် အတၢ်သိၣ်က့ၤသီက့ၤန့ၣ်မ့ၢ်တၢ်မူ အကျဲလီၤ. ²⁴ အဝဲသ့ၣ်ကတြီနၤလၢပိာ်မုၣ်အအၢ, ပိာ်မုၣ် ဟးဂီၤလၢအလွဲတၢ်လၢအပျ့ၤလီၤ. ²⁵ သးကွံအက့ၢ်ဘၣ် အဂီၤဂ့ၤလၢနသးကံၢ်ပူၤတဂ့ၤ. ဒီးဒုးဖီၣ်န့ၢ်အမဲာ်ဖံးလၢ နၤတဂ့ၤ. ²⁶ အဂ့ၢ်ဒ်အံၤ, ပှၤဖှီၣ်လီၤလၢဃဲသဲမုၣ်အဃိ န့ၣ်အတၢ်အိၣ်တ့ၢ်ထဲကိၣ်တလိၣ်, ဒီးပှၤအဲၣ်ဘၢဝၤ ဃုပှၤအသးသမူလၢအပှ့ၤဒိၣ်န့ၣ်လီၤ. ²⁷ ပှၤမ့ၢ်ပာ်မ့ၣ်အူ လၢအသးနါပှၢ်ဒီး, အကူအသိးတကဲၤထီၣ်ဘၣ်ဧါ. ²⁸ ပှၤ မ့ၢ်လဲၤတၢ်လၢမ့ၣ်အူကဖးအဖီခိၣ်ဒီး, အခီၣ်တကိၢ်ဃိာ် ဘၣ်ဧါ. ²⁹ တၢ်မၤအသးဒ်န့ၣ်လၢ ကယဲၢ်ပှၤလၢအလဲၤ နုာ်ဆူပှၤဂၤအမါအအိၣ်တဂၤလၢ်လၢ်န့ၣ်လီၤ. ကယဲၢ် ပှၤလၢအထိးဘၣ်အီၤန့ၣ် ကတူၢ်ဘၣ်တၢ်ဒဲးဘးကိးဂၤ ဒဲးလီၤ. ³⁰ ပှၤဟုၣ်တၢ်ဘျၣ်တၢ်န့ၣ်တုၤတၢ်သၣ်ဝံၤအသး ဒီး, မ့ၢ်ဟုၣ်တၢ်ဒ်သိးအသးကဘျဲးအီၣ်ဒီး, ပှၤတကွၢ် ကပာ်ဘၣ်အီၤဘၣ်. ³¹ ဘၣ်ဆၣ်ဒီးပှၤမ့ၢ်ထံၣ်န့ၢ်အီၤဒီး, ဘၣ်ဟ့ၣ်ကၣ်တၢ်အလီၢ်နွံစး, ဘၣ်ဟ့ၣ်အဟံၣ်အတၢ်ဖိ တၢ်လံၤခဲလၢာ်လီၤ. ³² ပှၤလၢအမၤကမၣ် ပှၤမါန့ၣ်အ သးဆးတအိၣ်ဘၣ်. ပှၤလၢအမၤတၢ် တမံၤန့ၣ်မ့ၢ်အ မၤသံလီၤအသးဒၣ်ဝဲန့ၣ်လီၤ. ³³ ကထံၣ်န့ၢ်တၢ်တီၢ်အ လီၢ်တဖၣ်, ဒီးတၢ်မဲာ်ဆှး, ဒီးအတၢ်ဒုၣ်ဒွဲၣ်န့ၣ်တ ဘၣ်တၢ်တြူာ်ကွံာ်အီၤဘၣ်.

³⁴ အဂ့ၢ်ဒ်အံၤ, တၢ်သးက့ၣ်ဒုးကဲထီၣ် ပှၤကညီအသး ထီၣ်, ဒီးတသးလီဘၣ်လၢမၤဆၢတၢ်အမုၢ်နံၤဘၣ်. ³⁵ တ ကွၢ်ပးကဲဘၣ်တၢ်လိးလၢစ့ဘၣ်, ဒီးနမ့ၢ်ဟ့ၣ်ခိၣ်ဖးအါ ဘၣ်ဆၣ်ဒီး, တမံသူၣ်တမံသးဘၣ်ဝဲဘၣ်.

၇

¹ ယဖိခွါဧၢ, တိၢ်န့ၢ်ယကလုၢ်, ဒီးပာ်ဖှိၣ်ယတၢ်မၤ လိာ်လၢနအိၣ်တက့ၢ်. ² တိၢ်န့ၢ်ယတၢ်မၤလိာ်တက့ၢ်, ဒီးနကမူလီၤ. ဒီးပာ်ယတၢ်သိၣ်တၢ်သီ ဒ်နမဲာ်ပှၤဖိ အသိးန့ၣ်တက့ၢ်. ³ စၢထီၣ်အီၤလၢနစုမုၢ်အလိၤ, ကွဲး အီၤလၢနသးဘ့ၣ်ဘၣ်အလိၤတက့ၢ်. ⁴ ― စံးလၢတၢ်ကူၣ် သ့, နမ့ၢ်ယဒီပုၢ်ဝဲၢ်မုၣ်န့ၣ်တက့ၢ်. ဒီးကိးန့ၢ်တၢ်သူၣ်ဆး သးဆးလၢနဘူးနတံၢ်တက့ၢ်. ⁵ ဒ်သိးကတြီနၤလၢပိာ် မုၣ်ဟးဂီၤ, ပှၤတမှံၤပိာ်မုၣ်လၢ အလွဲတၢ်လၢအတၢ် ကတိၤလီၤ.

⁶ အဂ့ၢ်ဒ်အံၤ, ဖဲယဟံၣ်အတၢ်ထူၣ်ဖျိ, တၢ်ထူၣ်ဖျိအ ကဘျံးန့ၣ်, ⁷ ယကွၢ်တၢ်လၢပှၤလၢအတမၤလိဘၣ်တၢ် ဘၣ်အကျါ, ယကွၢ်ထံပှၤလၢအသးဆးတအိၣ်ဘၣ်လၢ ပှၤဖိၣ်သၣ်ခွါအကျါတဂၤလီၤ. ⁸ လဲၤပိာ်ကျဲဘူးဒီးအသ နၢၣ်, ဒီးလဲၤဝဲဆူအဟံၣ်ပူၤ, ⁹ လၢသံယီၢ်ယာ်ဖဲမုၢ်ဟါ လီၤ, လၢဖးဖီမုၢ်, ဒီးတၢ်ခံးသူလီၤ. ¹⁰ ဒီးကွၢ်ကွၢ်, ပိာ်မုၣ် တဂၤဟဲသဂၢၢ်အီၤ လၢအကူသိးဝဲဒီးပှၤဃဲသဲမုၣ်အကူ အသိး, ဒီးတၢ်လီတၢ်ဝ့ၤအိၣ်လၢအသး, ¹¹ ကလာ်တၢ်ဒီး တဒိကနၣ်ဘၣ်တၢ်ဘၣ်, အခီၣ်တအိၣ်တဆိးဘၣ်လၢ အဟံၣ်ဒၣ်ဝဲအပူၤဘၣ်. ¹² တစိၢ်အိၣ်ဝဲလၢခိ, တစိၢ်အိၣ်ဝဲ လၢကျဲဖးလဲၢ်အပူၤ, ဒီးခိးတၢ်ဖဲတၢ်အသနၢၣ်တပူၤလၢ် လၢ်လီၤ. ¹³ ဒီးဟံးဃာ်အီၤ, ဒီးနၢမူအီၤလီၤ. အမဲာ်ကဲၤ, ဒီးစံးဘၣ်အီၤ. ¹⁴ တၢ်လုၢ်မၤဃူမၤဖိးဘၣ်ယၤ လၢမုၢ်မ ဆါတနံၤအံၤ, ယမၤလၢပှဲၤယဆိၣ်တၢ်လီၤ. ¹⁵ မၤသးဒ် န့ၣ်ဒီးယဟဲထီၣ်သဂၢၢ်နၤ ဒ်သိးယကဃုနမဲာ်, ဒီးယ ထံၣ်န့ၢ်လံနၤလံ. ¹⁶ ယဒါလီၤယလီၢ်မံလၢယၣ်လုး, လၢ ယၣ်ကံၣ်ဃ့, တၢ်ဖှီဝါလၢအဲၤကူပတူးလီၤ. ¹⁷ ယဒုးနၢမူ

¹⁸ ယလီၢ်မံလၢမူရၣ်, ဒီးအကၠီၣ်, ဒီးကဒါရါလီၤ. ဟဲ, ဘျဲး အီၣ်သကိးဒီးတၢ်အဲၣ်တုၤလီၤလၢမုၢ်ဂီၤတက့ၢ်. မုာ်လၤ သကိးတၢ်လၢ တၢ်အဲၣ်တၢ်ကွံအပူၤတက့ၢ်. ¹⁹ အဂ့ၢ်ဒ် အံၤ, ဟံၣ်အကစၢ်တအိၣ်ဘၣ်လၢဟံၣ်ဘၣ်. လဲၤတၢ်ကျဲ အယံၤ, ²⁰ ဟံးန့ၢ်စ့အထၢၣ်ဒီးအီၤ, ကဟဲက့ၤဆူအဟံၣ် လၢလါပှဲၤအနံၤလီၤ. ²¹ လွဲကဒံလွဲကဒါအီၤလၢ အတၢ် ကတိၤအါထံၣ်, ကလံာ်အီၤလၢအပျုၤအလွဲတၢ်လီၤ.―

²² အဝဲဒၣ်လဲၤပိာ်အခံတကီၢ်ခါ, ဒ်ဂီၤဖံးလဲၤဆူတၢ်မၤသံ အီၤအသိးန့ၣ်, ဒီးဒ်ပှၤဟးဂီၤဖိတဂၤဆူနီၣ်စ့ၤထးအပူၤ လၢတၢ်သိၣ်ဃီၣ်အဂီၢ်အသိးန့ၣ်, ²³ တုၤပျၢ်တဘ့ၣ်ဆဲး ထူၣ်ဖျိအသူၣ်, ဒ်ထိၣ်ဧိၤလံၣ်ဧိၤလဲၤတၢ်ချ့ချ့ဆူ ပျံၤသ ကွီၤအပူၤ, ဒီးတသ့ၣ်ညါဘၣ်လၢအမ့ၢ်လၢအသးသမူ အဂီၢ်အသိးန့ၣ်ဘၣ်လီၤ.

²⁴ ဒီးခဲကနံၣ်အံၤဖိသၣ်သ့ၣ်ဧၢ, ကနၣ်ယကလုၢ်, ဒီးဒိ ကနၣ် ယထးခိၣ်အတၢ်ကတိၤတက့ၢ်. ²⁵ ဒုးလဲၤလီၤန သးဆူအကျဲပူၤတဂ့ၤ, ဟးဖျိးတၢ်ဆူအကျဲဧိၤကပူၤဧိၤ တဂ့ၤ. ²⁶ အဂ့ၢ်ဒ်အံၤ, ပှၤဘၣ်ဆဲးအသးလၢအဝဲဒၣ်မၤ လီၤဃံၤအီၤန့ၣ်အိၣ်အါဂၤ, ပှၤလၢအဝဲဒၣ်မၤသံအီၤခဲ လၢာ်န့ၣ် မ့ၢ်ပှၤဂီၢ်မုၢ်ဖးဒိၣ်လီၤ. ²⁷ အဟံၣ်မ့ၢ်ပျုၤပူၤအ ကျဲ, လဲၤလီၤဝဲဆူတၢ်သံအဒၢးပူၤလီၤ.

၈

¹ တၢ်ကူၣ်သ့ကိးထီၣ်တၢ်, တမ့ၢ်ဘၣ်ဧါ, ဒီးတၢ်ကူၣ် တၢ်ဆးထုထီၣ်အကလုၢ်, တမ့ၢ်ဘၣ်ဧါ. ² ဆၢထၢၣ် ဝဲလၢတၢ်အလီၢ်ထီၣ်ထီလၢကျဲအဃၢၤ, လၢကျဲဘျီၣ်ပူၤ လီၤ. ³ ကိးပသူထီၣ်ဝဲလၢပဲတရီအခီၣ်ထံး ဖဲပှၤလဲၤနုာ် လၢဝ့ၢ်ပူၤ, လၢကျဲစၢၤပူၤလီၤ. ⁴ ပှၤကညီသ့ၣ်ဧၢ, ယကိး ထီၣ်သု, ဒီးယကလုၢ်ဘၣ်ပှၤကညီဖိလီၤ. ⁵ ပှၤလၢအ တမၤလိဘၣ်တၢ်ဘၣ်သ့ၣ်ဧၢ, နၢ်ပၢၢ်တၢ်ဒုးကူၣ်တၢ် တက့ၢ်, ဒီးပှၤဟးဂီၤဖိသ့ၣ်ဧၢ, အိၣ်ဒီးသုသးလၢအနၢ် ပၢၢ်တၢ်တက့ၢ်. ⁶ ကနၣ်တၢ်တက့ၢ်, အဂ့ၢ်ဒ်အံၤ, ယက တိၤတၢ်အိၣ်ဖျါ, ဒီးတၢ်အလိၤကထီၣ်ဖျဲး လၢယပျုၤ လီၤ. ⁷ အဂ့ၢ်ဒ်အံၤ, ယထးခိၣ်ကကတိၤတၢ်မ့ၢ်တၢ်တီ, ဒီးယပျုၤသးဘၣ်အၢတၢ်ကတိၤကဘျံးကဘျၣ်လီၤ.―

⁸ ယထးခိၣ်အတၢ်ကတိၤခဲလၢာ် အိၣ်လၢတၢ်တီတၢ် လိၤအပူၤ, တၢ်လီတၢ်ဝ့ၤ, တၢ်ဒၢကူဒၢက့ၣ်တအိၣ် လၢအပူၤဘၣ်. ⁹ ဖျါဝဲလၢကယဲၢ်ပှၤလၢအနၢ်ပၢၢ်တၢ်အ မဲာ်ညါ, ဒီးလိၤဝဲလၢကယဲၢ်ပှၤလၢအထံၣ်န့ၢ်တၢ်သ့ၣ် ညါအဂီၢ်လီၤ. ¹⁰ ဒိးန့ၢ်ယသိၣ်လိတၢ်လၢစ့အမဲာ်ညါ, ဒီး တၢ်သ့ၣ်ညါလၢထူစီအမဲာ်ညါတက့ၢ်. ¹¹ အဂ့ၢ်ဒ်အံၤ, တၢ်သ့ၣ်ညါဂ့ၤန့ၢ် တၢ်မျၢ်ပလဲ, ဒီးကယဲၢ်တၢ်လုၢ်ဒိၣ် ပှ့ၤဒိၣ်ခဲလၢာ်န့ၣ်တၢ်တထိၣ်သတြီၤဘၣ်ဒီးအီၤဘၣ်.

¹² ယဲဒၣ်တၢ်ကူၣ်သ့အံၤ ယအိၣ်ယဆိးဒီးတၢ်ကူၣ်တၢ် ဆး, ဒီးယထံၣ်န့ၢ်တၢ်သ့ၣ်ညါကူၣ်ထီၣ်တၢ်သ့ဖးလီၤ တၢ်ဘၣ်တဖၣ်လီၤ. ¹³ တၢ်ပျံၤယွၤမ့ၢ်တၢ်သးဟ့တၢ်အၢ လီၤ. တၢ်ပာ်အသးထီၣ်ထီ, ဒီးတၢ်ပာ်ကဖိအသး, ဒီး ကျဲအၢ, ဒီးထးခိၣ်လီတၢ်, ယသးဟ့လီၤ. ¹⁴ တၢ်ဒုးကူၣ် တၢ်မ့ၢ်ယတၢ်, ဒီးတၢ်သူၣ်ဖးသးဖးလီၤ. ယမ့ၢ်တၢ်ကူၣ် တၢ်ဆး, ယအိၣ်ဒီးတၢ်ဂံၢ်တၢ်ဘါလီၤ. ¹⁵ စီၤပၤကဲစီၤပၤ လၢယၤ, ပှၤစံၣ်ညီၣ်ကွီၢ်စံၣ်ညီၣ်တီတၢ်လၢယၤလီၤ.

¹⁶ ပဒိၣ်ဖးဒိၣ်ပၢတၢ်လၢယၤ, ဒီးပှၤအိၣ်ဖျဲၣ်ပဒိၣ်, ဟီၣ် ခိၣ် အပှၤစံၣ်ညီၣ်ကွီၢ်ခဲလၢာ်လီၤ. ¹⁷ ယအဲၣ်ပှၤလၢအ အဲၣ်ယၤ, ဒီးပှၤလၢအဃုယၤဂီၤဂီၤန့ၣ် ကထံၣ်န့ၢ်ယၤ လီၤ. ¹⁸ တၢ်ထူးတၢ်တီၤဒီး တၢ်လၤကပီၤအိၣ်ဝဲဒီးယၤ တၢ်စုလီၢ်ဂၢၢ်တၢ်ခီၣ်ခိၣ်ကျၢၤ, ဒီးတၢ်တီတၢ်လိၤလီၤ.―

¹⁹ ယတၤသၣ်ဂ့ၤန့ၢ်ထူ, ဂ့ၤန့ၢ်ထူစီ, ဒီးယတၢ်အါထီၣ် ဂ့ၤန့ၢ်စ့လၢအဘၣ်တၢ်ဃုထၢအီၤတက့ၢ်လီၤ. ²⁰ ယလဲၤ တၢ်လၢတၢ်တီတၢ်လိၤအကျဲလၢတၢ်စံၣ်ညီၣ်အကျဲတဖၣ်, ²¹ ― ဒ်သိးယကဒုးန့ၢ်ဘၣ်ပှၤလၢ အအဲၣ်ယၤလၢတၢ် န့ၢ်သါ, ဒီးယကမၤပှဲၤအတၢ်ပာ်ဖှိၣ်အလီၢ်လီၤ.

²² ယွၤတ့န့ၢ်ယၤလၢအကျဲခီၣ်ထံးလၢ အတၢ်မၤလၢ ပျၢၤတဖၣ်အမဲာ်ညါလီၤ. ²³ တၢ်ဖှူယၤလၢကစၢၤကစၢၤ, လၢအခီၣ်ထံး, လၢဟီၣ်ခိၣ်တချုးကဲထီၣ်ဒံးဘၣ်, ²⁴ ဖဲထံ ယိာ်ပူၤတအိၣ်ဘၣ်န့ၣ်ယအိၣ်ဖျဲၣ်, ဖဲထံထီၣ်ပၢၢ်ပှဲၤဒီး ထံတအိၣ်ဘၣ်န့ၣ်လီၤ. ²⁵ လၢကစၢၢ်ကလိ တချုးအိၣ် ဂၢၢ်ဒံးဘၣ်, လၢတၢ်စိခိၣ်တချုးအိၣ်ဒံးဘၣ်ဒီး, ယအိၣ် ဖျဲၣ် ²⁶ ဖဲအတတ့ဒံးဘၣ်ဟီၣ်ခိၣ်, ဒီးပှၢ်မုၢ်ကနၢဒီးဟီၣ် ခိၣ်အကမူၣ်အဂံၢ်ခိၣ်ထံးလီၤ. ²⁷ ဖဲအကတဲာ်ကတီၤမူ ခိၣ်န့ၣ်ယအိၣ်ဖဲန့ၣ်, လၢအတိၤကဝီၤလၢထံယိာ်အဖံး ခိၣ်, ²⁸ ဖဲအပာ်ထီၣ်တၢ်အၢၣ်လၢထးခီ, ဖဲအမၤကျၢၤထီၣ် ထံယိာ်ပူၤအထံထီၣ်ပၢၢ်, ²⁹ ဖဲအတနီၢ်ပီၣ်လဲၣ်နံၤဒ်သိး ထံဧိၤနိဧိၤအသုတလဲၤပူၤကွံာ်အနံၤတဂ့ၤ, ဖဲအပာ်လီၤ ဟီၣ်ခိၣ်အခီၣ်ထံးန့ၣ်, ³⁰ ယအိၣ်ဒီးအီၤ, ဒ်ပှၤမၤတၢ်သ့ တဂၤအသိး, ယကဲထီၣ်အတၢ်သူၣ်ဖှံသးညီတနံၤဘၣ် တနံၤ, ယသူၣ်ပိၢ်သးဝးလၢအမဲာ်ညါတထံၣ်ဃီ, ³¹ ယ သူၣ်ပိၢ်သးဝးလၢလၢာ်ခိၣ်ဟီၣ်ခိၣ်အဖီခိၣ်, ယတၢ်သူၣ် ဖှံသးညီအိၣ်ဝဲဒီးပှၤကညီဖိလီၤ.

³² ဒီးခဲကနံၣ်အံၤဖိသ့ၣ်လံၤသ့ၣ်ဧၢ, ကနၣ်ယကလုၢ် တက့ၢ်. အဂ့ၢ်ဒ်အံၤ, ပှၤလၢအတိၢ်န့ၢ်ယကျဲတဖၣ်န့ၣ် ဘၣ်ဆိၣ်ဂ့ၤဝဲလီၤ.

³³ ကနၣ်တၢ်သိၣ်လိ, ဒီးကူၣ်ထီၣ်တၢ်သ့တက့ၢ်, ဒီးညိ ကွံာ်အီၤတဂ့ၤ. ³⁴ ပှၤလၢအဒိကနၣ်ယကလုၢ်, လၢအခိး တၢ်လၢယတြဲၤအဂီၤထံးတနံၤဘၣ်တနံၤ, လၢအပၢၤ တၢ်လၢယကျဲစၢၤအထူၣ်န့ၣ်ဘၣ်ဆိၣ်ဂ့ၤဝဲလီၤ. ³⁵ အဂ့ၢ် ဒ်အံၤ, ပှၤလၢအထံၣ်န့ၢ်ယၤန့ၣ်ထံၣ်န့ၢ်တၢ်အမူ, ဒီးက ဘၣ်ယွၤအသးလီၤ. ³⁶ မ့မ့ၢ်ပှၤလၢအတချုးန့ၢ်ဘၣ်ယၤ ဘၣ်န့ၣ်မၤအၢလီၤအသးလီၤ. ကယဲၢ်ပှၤလၢအသးဟ့ ယၤန့ၣ်အဲၣ်တၢ်သံခဲလၢာ်လီၤ.

၉

¹ တၢ်ကူၣ်သ့မၤအဟံၣ်လံ, စိးအထူၣ်နွံထူၣ်လံ, မၤသံ အဆၣ်ဖိကီၢ်ဖိလံ, ² မၤဃါဃုာ်အစပံးထံလံ, ကတဲာ် ကတီၤအစီၢ်နီၤခိၣ်လံ, ³ မၢလီၤအဖိသၣ်ပိာ်မုၣ်တဖၣ် န့ၣ်လံ, ကိးထီၣ်ဝဲလၢဝ့ၢ်အလီၢ်ထီၣ်ထီအဖီခိၣ်, ⁴ ပှၤ လၢအတမၤလိဘၣ်တၢ်ဘၣ်န့ၣ် မ်အဃၣ်ဃီၤအသး ဆူအံၤတက့ၢ်. ပှၤလၢအသးဆးတအိၣ်ဘၣ်န့ၣ်အဝဲဒၣ် စံးဘၣ်အီၤ, ⁵ ဟဲဃီၤအီၣ်ယကိၣ်, ဒီးအီယစပံးထံလၢ ယဃါဃုာ်တက့ၢ်. ⁶ လဲၤသဒၣ်ပှၤဟးဂီၤဖိအတၢ်, ဒီးမူ နဲ, ဒီးလဲၤပိာ်စၢၢ်ဆၢတၢ်ကူၣ်တၢ်ဆးအကျဲန့ၣ်တက့ၢ်.

⁷ ပှၤလၢအသိၣ်က့ၤသီက့ၤ ပှၤဒုၣ်ဒွဲၣ်တၢ်န့ၣ်, န့ၢ်ဘၣ် တၢ်မဲာ်ဆှးလၢအဂီၢ်ဒၣ်ဝဲ, ဒီးပှၤလၢအသိၣ်ဃီၣ်ပှၤတ တီတလိၤဘၣ်န့ၣ်, ကဒိးအုးဒိးဃးလၢအလိၤဒၣ်ဝဲလီၤ.

⁸ သိၣ်ဃီၣ်ပှၤဒုၣ်ဒွဲၣ်တၢ်တဂ့ၤ. ကသးဟ့ဘၣ်ဖုးနၤ လီၤ. သိၣ်ဃီၣ်ပှၤကူၣ်တၢ်သ့တက့ၢ်, ဒီးကအဲၣ်နၤလီၤ.

⁹ ဟ့ၣ်တၢ်ကူၣ်သ့လၢပှၤကူၣ်တၢ်သ့တက့ၢ်, ဒီးကကူၣ် တၢ်သ့ဒိၣ်ထီၣ်လီၤ. ဘိးဘၣ်သ့ၣ်ညါပှၤတီပှၤလိၤလၢ တၢ်တက့ၢ်, ဒီးကန့ၢ်တၢ်အါထီၣ်လီၤ. ¹⁰ တၢ်ပျံၤယွၤမ့ၢ် တၢ်ကူၣ်သ့အခီၣ်ထံး, ဒီးတၢ်သ့ၣ်ညါတၢ်စီဆှံတဂၤ န့ၣ်မ့ၢ်တၢ်ကူၣ်တၢ်ဆးလီၤ. ¹¹ မ့ၢ်မးနမုၢ်နံၤကအါထီၣ် လၢယၤ, ဒီးနသးသမူအနံၣ်န့ၣ်ကအါထီၣ်လီၤ.

¹² နမ့ၢ်ကူၣ်တၢ်သ့ဒီး, နကကူၣ်တၢ်သ့လၢနဂီၢ်ဒၣ်နဲ, ဒီးနမ့ၢ်ဒုၣ်ဒွဲၣ်တၢ်ဒီး, နကဘၣ်တၢ်တဂၤဃီလီၤ.

¹³ ပိာ်မုၣ်ဟးဂီၤန့ၣ် ကလာ်ထီၣ်, အသးတဖးဘၣ်, ဒီး တသ့ၣ်ညါဘၣ်တၢ်နီတမံၤဘၣ်. ¹⁴ ဒီးဆ့ၣ်နီၤဝဲဖဲအဟံၣ် အကျဲစၢၤ, လၢလီၢ်ဆ့ၣ်နီၤအဖီခိၣ်လၢဝ့ၢ်အလီၢ်ထီၣ် ထီန့ၣ်, ¹⁵ ဒ်သိးအကကိးန့ၢ်ပှၤလဲၤပူၤဝဲလၢကျဲ, လၢအ ပိာ်ကျဲစၢၢ်ဆၢပံၢ်ကလာ်လီၤ. ¹⁶ ပှၤလၢအတမၤလိဘၣ် တၢ်ဘၣ်န့ၣ်မ်အဃၣ်ဃီၤအသးဖဲအံၤတက့ၢ်. ဒီးပှၤလၢ အသးဆးတအိၣ်ဘၣ်န့ၣ်အဝဲဒၣ်စံးဘၣ်အီၤ, ¹⁷ ထံလၢ ပဟုၣ်အီၤန့ၣ်မ့ၢ်အဆၢလီၤ. ဒီးကိၣ်လၢပအီၣ်ခူသူၣ် န့ၣ် မ့ၢ်အဝံၣ်လီၤ. ¹⁸ ― ဒီးအဝဲဒၣ်တသ့ၣ်ညါဘၣ်လၢပှၤ သံအိၣ်ဖဲန့ၣ်, ဒီးပှၤလၢအကိးန့ၢ်အီၤန့ၣ်အိၣ်ဝဲလၢပျုၤ အတၢ်ယိာ်ပူၤန့ၣ်ဘၣ်လီၤ.

၁၀

¹ စီၤၡလိၤမိၤအတၢ်ကတိၤဒိဖိခွါလၢအကူၣ်တၢ်သ့န့ၣ်ဒုးသးခုအပၢ်လီၤ. မ့မ့ၢ်ဖိ ခွါလၢအဟးဂီၤန့ၣ်မ့ၢ်တၢ်သးအုးအလီၢ်လၢအမိၢ်လီၤ.

² တၢ်အၢတၢ်သီအတၢ်လုၢ်ဒိၣ်ပှ့ၤဒိၣ်န့ၣ်တဂိာ်တသီၣ် ဘၣ်တၢ်နီတမံၤဘၣ်. မ့မ့ၢ်တၢ်တီတၢ်လိၤန့ၣ်မၤပူၤမၤ ဖျဲးဒီးတၢ်သံလီၤ.

³ ယွၤတဒုးသၣ်ဝံၤပှၤတီပှၤလိၤအသးဘၣ်. မ့မ့ၢ်အက ညိကွံာ်ပှၤတတီတလိၤအသးကွံတၢ်လီၤ.

⁴ ပှၤလၢအမၤတၢ်လၢ အစုလီၤဘှါန့ၣ်ဖှီၣ်လီၤယာ်လီၤ ဝဲလီၤ. မ့မ့ၢ်ပှၤအခုအစုန့ၣ်ဒုးထူးထီၣ်တီၤထီၣ်ဝဲလီၤ.

⁵ ပှၤလၢအထၢဖှိၣ်တၢ်လၢ တၢ်ကိၢ်အကတီၢ်န့ၣ်မ့ၢ်ဖိ ခွါလၢအကူၣ်တၢ်သ့လီၤ. မ့မ့ၢ်ပှၤလၢအမံဝဲလၢကူးဘု အကတီၢ်န့ၣ်မ့ၢ်ဖိခွါလၢအဒုးမဲာ်ဆှးတၢ်လီၤ.

⁶ တၢ်ဆိၣ်ဂ့ၤတဖၣ်အိၣ်ဝဲလၢ ပှၤတီပှၤလိၤအခိၣ်လီၤ. မ့မ့ၢ်တၢ်မၤအၢန့ၣ် ကကျၢၢ်ဘၢပှၤတတီတလိၤအထး ခိၣ်လီၤ.

⁷ တၢ်သ့ၣ်နီၣ်ထီၣ်က့ၤပှၤတီပှၤလိၤန့ၣ် ဘၣ်ဆိၣ်ဂ့ၤဝဲ လီၤ. မ့မ့ၢ်ပှၤတတီတလိၤအမံၤကအုၣ်ကကျၣ်လီၤ.

⁸ ပှၤလၢအသးကူၣ်တၢ်သ့န့ၣ်ဒိးန့ၢ်တၢ်မၤလိာ်လီၤ. မ့ မ့ၢ်ပှၤလၢအဟးဂီၤလၢအပျုၤန့ၣ်ကလီၤဃံၤဝဲလီၤ.

⁹ ပှၤလၢအလဲၤတၢ် လၢလၢပှဲၤပှဲၤန့ၣ် လဲၤဝဲဂၢၢ်ဂၢၢ် ကျၢၤကျၢၤလီၤ. မ့မ့ၢ်ပှၤလၢအလဲၤတၢ်ဒၢက့ၣ်ဒၢကူန့ၣ် တၢ်ကမၤဖျါထီၣ်အီၤလီၤ.

¹⁰ ပှၤလၢအဖျးအမဲာ်န့ၣ် ကဒုးသးအုးတၢ်လီၤ. ပှၤလၢ အဟးဂီၤလၢအပျၢၤန့ၣ်ကလီၤဃံၤဝဲလီၤ.

¹¹ ပှၤတီပှၤလိၤအထးခိၣ်မ့ၢ်ထံမူအပူၤလီၤ. မ့မ့ၢ်တၢ်မၤ အၢန့ၣ်ကကျၢၢ်ဘၢပှၤတတီတလိၤအထးခိၣ်န့ၣ်လီၤ.

¹² တၢ်သးဟ့န့ၣ် ထိၣ်ဂဲၤထီၣ်တၢ်အ့ၣ်လိာ်ဆိးက့လိာ် လီၤ. မ့မ့ၢ်တၢ်အဲၣ်တၢ်ကွံန့ၣ်ကျၢၢ်ဘၢကယဲၢ်တၢ်မၤက မၣ်ခဲလၢာ်လီၤ.

¹³ ပှၤအကူၣ်အဆးန့ၣ် တၢ်ကူၣ်သ့အိၣ်ဝဲလၢအပျုၤလိၤ လီၤ. မ့မ့ၢ်ပှၤလၢအသးဆးတအိၣ်ဘၣ်န့ၣ်နီၣ်တီၢ်အိၣ် ဝဲလၢအချၢဃံအဂီၢ်လီၤ.

¹⁴ ပှၤလၢအကူၣ်တၢ်သ့န့ၣ်ပာ်ဖှိၣ်တၢ်သ့ၣ်ညါ, မ့မ့ၢ်ပှၤ ဟးဂီၤဖိအထးခိၣ်န့ၣ်အိၣ်ဘူးဝဲဒီးတၢ်ဟးဂီၤလီၤ.

¹⁵ ပှၤထူးပှၤတီၤအတၢ်ထူးတၢ်တီၤန့ၣ် မ့ၢ်အဝ့ၢ်ဆူၣ်န့ၣ် လီၤ. ပှၤဖှီၣ်ဖိယာ်ဖိအတၢ်ဖှီၣ်တၢ်ယာ်န့ၣ်မ့ၢ်တၢ်မၤဟး ဂီၤအီၤလီၤ.

¹⁶ ပှၤတီပှၤလိၤအမၤတၢ်န့ၣ်ဘၣ်ဃးဒီးတၢ်မူ, ပှၤတတီ တလိၤအတၢ်အါထီၣ်န့ၣ်ဘၣ်ဃးဒီးတၢ်ဒဲးဘးလီၤ.

¹⁷ ပှၤလၢအတိၢ်န့ၢ် တၢ်သိၣ်လိန့ၣ်မ့ၢ်တၢ်မူအကျဲတ ဘိလီၤ. မ့မ့ၢ်ပှၤလၢအလဲၤသဒၣ်တၢ်သိၣ်ဃီၣ်န့ၣ်ဒုးဟး ဖျိးကျဲလီၤ.

¹⁸ ပှၤလၢအပာ်ခူသူၣ်တၢ်သးဟ့န့ၣ် အိၣ်ဒီး အပျုၤက ဘျံးကဘျၣ်, ဒီးပှၤလၢအကတိၤခဲၣ်တၢ်န့ၣ်မ့ၢ်ပှၤဟးဂီၤ ဖိလီၤ.

¹⁹ လၢတၢ်ကတိၤအါထံၣ်အကျါန့ၣ် တၢ်ကမၣ်တစှၤ ဘၣ်. မ့မ့ၢ်ပှၤလၢအဝံဂုၢ်အထးခိၣ်န့ၣ်မ့ၢ်ပှၤကူၣ်တၢ်သ့ လီၤ.

²⁰ ပှၤတီပှၤလိၤအပျ့ၤန့ၣ် မ့ၢ်စ့လၢတၢ်ဃုထၢအီၤ, မ့မ့ၢ် ပှၤတတီတလိၤအသးန့ၣ်တဂိာ်တသီၣ်ဘၣ်တၢ်ဘၣ်.

²¹ ပှၤတီပှၤလိၤအပျုၤဒုးအီၣ်တၢ်လၢပှၤအါဂၤလီၤ. မ့မ့ၢ် ပှၤဟးဂီၤဖိသံဝဲလၢ အသူၣ်ဆးအသးဆးတအိၣ်ဘၣ် အဃိန့ၣ်လီၤ.

²² ယွၤအတၢ်ဆိၣ်ဂ့ၤန့ၣ် ဒုးထူးဒုးတီၤပှၤ, ဒီးတပာ် ဖှိၣ်ထီၣ်တၢ်သူၣ်အုးသးအုးဒီးအီၤဘၣ်.

²³ ဒ်လိာ်ကွဲတၢ်အသိးန့ၣ် ပှၤဟးဂီၤဖိမၤအၢတၢ်လီၤ. မ့ မ့ၢ်တၢ်ကဟ့ၣ်တၢ်လၢပှၤတီပှၤလိၤဆၢန့ၢ်ဘၣ်လီၤ.

²⁴ တၢ်လၢပှၤတတီတလိၤပျံၤဝဲန့ၣ်ကဘၣ်အီၤလီၤ. မ့မ့ၢ် တၢ်ကဟ့ၣ်တၢ်လၢပှၤတီပှၤလိၤဆၢန့ၢ်ဘၣ်လီၤ.

²⁵ ဒ်ကလံၤသဝံးလဲၤပူၤကွံာ်တၢ်အသိး, ပှၤတတီတ လိၤဘၣ်န့ၣ်တအိၣ်လၢၤဘၣ်. မ့မ့ၢ်ပှၤတီပှၤလိၤအိၣ်ဝဲ ဒီး အခီၣ်ထံးအထူအယိာ်လီၤ.

²⁶ ဒ်တၤဆံၣ်ထံလၢပမဲအသိး, ဒီးဒ်မ့ၣ်အူခုၣ်လၢပမဲာ် အသိးန့ၣ်ပှၤကၢၣ်ဖိမ့ၢ်ဒ်န့ၣ်သိးလၢ ပှၤလၢအမၢလီၤ အီၤလီၤ.

²⁷ တၢ်ပျံၤယွၤန့ၣ်မၤအါထီၣ်မုၢ်နံၤမုၢ်နၤလီၤ. မ့မ့ၢ်ပှၤတ တီတလိၤအနံၣ်အလါန့ၣ်ကစှၤလီၤဝဲလီၤ.

²⁸ ပှၤတီပှၤလိၤ အတၢ်မုၢ်လၢ်န့ၣ် မ့ၢ်တၢ်သူၣ်ခုသးခု လီၤ. မ့မ့ၢ်ပှၤတတီတလိၤဘၣ် အတၢ်ကွၢ်လၢ်အကျဲ န့ၣ်ကဟါမၢ်လီၤ.

²⁹ ယွၤအကျဲမ့ၢ်တိာ်ဧိၤတာ်ဧိၤလၢ ပှၤအလၢအပှဲၤအဂီၢ်, မ့မ့ၢ်တၢ်ဟးဂီၤအိၣ်ဝဲလၢပှၤမၤတၢ်အၢအဂီၢ်လီၤ.

³⁰ ပှၤတီပှၤလိၤ တဘၣ်တၢ်သုးအလီၢ် လီၤစိၤလီၤထီ ဘၣ်. မ့မ့ၢ်ပှၤတတီတလိၤဘၣ်န့ၣ် တအိၣ်တဆိးဘၣ် လၢထံဧိၤကီၢ်ဧိၤအပူၤဘၣ်.

³¹ တၢ်ကူၣ်သ့ထီၣ်ဖျဲးလၢ ပှၤတီပှၤလိၤအထးခိၣ်လီၤ. မ့မ့ၢ်လီတၢ်အပျ့ၤန့ၣ်တၢ်ကကူးတဲာ်အီၤလီၤ.

³² ပှၤတီပှၤလိၤ အပျုၤန့ၣ်သ့ၣ်ညါတၢ်ဘၣ်တၢ်အသး လီၤ. မ့မ့ၢ်ပှၤတတီတလိၤဘၣ်အထးခိၣ်န့ၣ်ကတိၤလီ တၢ်လီၤ.

၁၁

¹ စီၤပီၢ်လီတၢ်န့ၣ် မ့ၢ်တၢ်သးဘၣ်အၢလၢယွၤအမဲာ်ညါ လီၤ. မ့မ့ၢ်စီၤပီၢ်သၣ်အတီန့ၣ်မ့ၢ်တၢ်ဘၣ်အသးလီၤ.

² တုၤသးထီၣ်ထီဟဲဝဲဒီး, တၢ်မဲာ်ဆှးဟဲဝဲလီၤ. မ့မ့ၢ် တၢ်ကူၣ်သ့အိၣ်ဝဲဒီးပှၤအသူၣ်စူၤအသးစူၤလီၤ.

³ ပှၤတီပှၤလိၤ အတၢ်လၢတၢ်ပှဲၤန့ၣ်ကဆှၢအီၤလီၤ. မ့ မ့ၢ်ပှၤဝ့ၤတၢ်လီတၢ်အလွဲတၢ်န့ၣ်ကမၤဟးဂီၤအီၤလီၤ.

⁴ လၢတၢ်သးထီၣ်အနံၤန့ၣ် တၢ်ထူးတၢ်တီၤတဂိာ်တ သီၣ်ဘၣ်တၢ်ဘၣ်. မ့မ့ၢ်တၢ်တီတၢ်လိၤ မၤပူၤမၤဖျဲး တၢ်လၢတၢ်သံလီၤ.

⁵ ပှၤအလၢအပှဲၤအတၢ်တီတၢ်လိၤန့ၣ် မၤလိၤအကျဲ လီၤ. မ့မ့ၢ်ပှၤတတီတလိၤန့ၣ်လီၤဃံၤဝဲလၢအတၢ်တ တီတလိၤဒၣ်ဝဲအဃိလီၤ.

⁶ ပှၤအသးစၢၢ်ဆၢအတၢ်တီတၢ်လိၤ ကမၤပူၤမၤဖျဲးအီၤ လီၤ. မ့မ့ၢ်ပှၤလီတၢ်ဖိအတၢ်သးကွံန့ၣ် ဖီၣ်န့ၢ်အီၤလီၤ.

⁷ တုၤပှၤတတီတလိၤဘၣ်သံဒီး, အတၢ်မုၢ်လၢ်န့ၣ်ဟါ မၢ်ဝဲ, ဒီးပှၤအၢအကွၢ်လၢ်တၢ်န့ၣ်တုၤလၢတၢ်ဟးဂူာ် ဟးဂီၤလီၤ.

⁸ တၢ်မၤပူၤမၤဖျဲး ပှၤတီပှၤလိၤလၢ တၢ်မၤကိၢ်မၤဂီၤ လီၤ. ဒီးပှၤတတီတလိၤန့ၣ်ဟဲနုာ်လၢအလီၢ်လီၤ.

⁹ ပှၤလီတၢ်ဖိ မၤဟးဂီၤပှၤအိၣ်လၢအဃၢၤလၢအထး ခိၣ်လီၤ. မ့မ့ၢ်ပှၤပူၤဖျဲးဝဲလၢ ပှၤတီပှၤလိၤအတၢ်သ့ၣ် ညါအဃိလီၤ.

¹⁰ တုၤပှၤတီပှၤလိၤဘၣ်တၢ်ဂ့ၤတၢ်ဝါဒီး, ပှၤဝ့ၢ်ဖိသးခု ဝဲ, ဒီးတုၤပှၤတတီတလိၤဘၣ်တုၤလၢတၢ်ဟးဂီၤဒီး, ပှၤ ကိးပသူထီၣ်လီၤ.

¹¹ ခူဧိၤဝ့ၢ်ဧိၤန့ၣ် ထီၣ်ထီဝဲလၢ ပှၤတီပှၤလိၤအတၢ်ဆိၣ် ဂ့ၤလီၤ. မ့မ့ၢ်ကလီၤပှီၢ်ဝဲလၢပှၤတတီတလိၤဘၣ်အထး ခိၣ်လီၤ.

¹² ပှၤလၢအမၤတရီတပါပှၤလၢ အဃၢၤန့ၣ်မ့ၢ်ပှၤလၢ အသးဆးတအိၣ်ဘၣ်လီၤ. မ့မ့ၢ်ပှၤအကူၣ်အဆးန့ၣ်က အိၣ်ဘှီၣ်ကလာ်လီၤ.

¹³ ပှၤလၢအလဲၤကတိၤခဲၣ်တၢ်န့ၣ် လီၣ်ဖျါထီၣ်တၢ်ခူ သူၣ်လီၤ. မ့မ့ၢ်ပှၤလၢအသးတီန့ၣ်ပာ်တဒၢတၢ်လီၤ.

¹⁴ ဖဲပှၤဆှၢတၢ်တအိၣ်ဘၣ်န့ၣ် ပှၤဂီၢ်မုၢ်လီၤဃံၤဝဲလီၤ. မ့မ့ၢ်ဖဲပှၤဒုးကူၣ်တၢ်အိၣ်ဝဲအါဂၤန့ၣ် တၢ်အုၣ်က့ၤခီၣ် က့ၤအိၣ်ဝဲလီၤ.

¹⁵ ပှၤအုၣ်ကီၤအသးလၢပှၤလၢ အတသ့ၣ်ညါသ့ၣ်ခိး ဘၣ်ဝဲအဂီၢ်န့ၣ်, ကဘၣ်တၢ်ကီတၢ်ခဲလီၤ. မ့မ့ၢ်ပှၤသးဟ့ တၢ်အုၣ်ကီၤန့ၣ်, ဘၣ်ယိၣ်တၢ်အလီၢ်တအိၣ်ဘၣ်.

¹⁶ ပိာ်မုၣ်အိၣ်ဒီးအဃံအလၤဟံးဃာ်တၢ်လၤကပီၤ, ဒီး ပှၤအဆူၣ်ဟံးဃာ်တၢ်ထူးတၢ်တီၤန့ၣ်လီၤ.

¹⁷ ပှၤမၤဘျုးမၤဖှိၣ်တၢ်န့ၣ် မၤတၢ်ဂ့ၤလၢအသးဒၣ်ဝဲအ ဂီၢ်လီၤ. မ့မ့ၢ်ပှၤအသးကိၤန့ၣ်မၤကိၢ်မၤဂီၤအဖံးအညၣ် ဒၣ်ဝဲလီၤ.

¹⁸ ပှၤတတီတလိၤန့ၣ် မၤတၢ်လၢအဘူးအလဲလီတၢ်အ ဂီၢ်လီၤ. မ့မ့ၢ်ပှၤလၢအဖှံတၢ်တီတၢ်လိၤန့ၣ်ကန့ၢ်ဘၣ် အဘူးအလဲကျၢၤလီၤ.

¹⁹ ပှၤလၢအအိၣ်ကျၢၤလၢ တၢ်တီတၢ်လိၤအပူၤန့ၣ်က န့ၢ်ဘၣ်တၢ်မူလီၤ. မ့မ့ၢ်ပှၤလၢအလူၤတၢ်အၢန့ၣ်မၤန့ၢ် ဝဲလၢအတၢ်သံဒၣ်ဝဲအဂီၢ်လီၤ.

²⁰ ပှၤလၢအသးက့ၣ်န့ၣ်ယွၤသးဘၣ်အၢအီၤလီၤ. မ့မ့ၢ် ပှၤအကျဲလိၤန့ၣ်ဘၣ်အသးလီၤ.

²¹ စုဟံးဃာ်စုဘၣ်ဆၣ်ဒီး ပှၤအၢအတၢ်ဒဲးဘးတပျၢ် ဘၣ်. မ့မ့ၢ်ပှၤတီပှၤလိၤအချံအသၣ်ကပူၤဖျဲးတၢ်လီၤ.

²² ဒ်တၢ်အကွီၤထူလၢထိးအနါဒ့ပူၤအသိးန့ၣ် ပိာ်မုၣ် အဃံအလၤလၢအဟးဖးဒီး တၢ်ကူၣ်ဘၣ်ကူၣ်သ့အ အိၣ်န့ၣ်မ့ၢ်ဒ်န့ၣ်သိးလီၤ.

²³ ပှၤတီပှၤလိၤအဆၢတၢ်န့ၣ်မ့ၢ်ထဲတၢ်ဂ့ၤလီၤ. မ့မ့ၢ်ပှၤ တတီတလိၤဘၣ် အကွၢ်လၢ်တၢ်အကျဲန့ၣ်မ့ၢ်တၢ်သး ထီၣ်လီၤ.

²⁴ တၢ်လၢအဖှံတၢ်, ဒီးအတၢ်အါထီၣ်န့ၣ်အိၣ်ဝဲလီၤ. ဒီးတၢ်လၢအဟ့ၣ်တၢ်စှၤကဲၣ်ဆိး, ဒီးဘၣ်ထဲတၢ်ဖှီၣ် တၢ်ယာ်န့ၣ်အိၣ်ဝဲလီၤ.

²⁵ ပှၤလၢအဟ့ၣ်တၢ်ညီကဘီၣ်ထီၣ်ညီထီၣ်, ဒီးပှၤလၢ အဖှိၣ်ထံန့ၣ်ကဒိးဖှိၣ်ထံအကစၢ်ဒၣ်ဝဲလီၤ.

²⁶ ပှၤလၢအဟံးဃာ်ဘုဧိၤဟုဧိၤန့ၣ် ပှၤဂီၢ်မုၢ်ကဆိၣ်အၢ အီၤလီၤ. မ့မ့ၢ်တၢ်ဆိၣ်ဂ့ၤကဘၣ်ပှၤအခိၣ်လၢအဆါ ကွံာ်ဝဲလီၤ.

²⁷ ပှၤလၢအဃုတၢ်ဂ့ၤသပှၢ်တၢၢ်န့ၣ်ဃုတၢ်ဘျုးလီၤ. မ့ မ့ၢ်ပှၤလၢအဃုတၢ်အၢန့ၣ် တၢ်အအၢကချုးန့ၢ်အီၤလီၤ.

²⁸ ပှၤလၢအသန့ၤအသးလၢ တၢ်ထူးတၢ်တီၤန့ၣ်ကလီၤ ဃံၤဝဲလီၤ. မ့မ့ၢ်ပှၤတီပှၤလိၤန့ၣ် ကဆှိးထီၣ်ဒ်သ့ၣ်ဒ့ဆှိး ဝဲအသိးန့ၣ်လီၤ.

²⁹ ပှၤလၢအမၤကိၢ်မၤဂီၤအပှၤဟံၣ်ဖိဒၣ်ဝဲန့ၣ် ကန့ၢ်သါ ကလံၤ, ဒီးပှၤဟးဂီၤဖိန့ၣ်ကကဲထီၣ်ပှၤလၢအသးကူၣ် တၢ်သ့အကုၢ်အပှၤလီၤ.

³⁰ ပှၤတီပှၤလိၤအတၤသၣ်န့ၣ် မ့ၢ်တၢ်မူအသ့ၣ်, ဒီးပှၤ လၢအမၤန့ၢ်ပှၤအသးတဖၣ်န့ၣ်မ့ၢ်ပှၤကူၣ်တၢ်သ့လီၤ.

³¹ ကွၢ်ကွၢ်, ပှၤတီပှၤလိၤန့ၣ် တၢ်ဟ့ၣ်ကၣ်တၢ်လၢအီၤ လၢဟီၣ်ခိၣ်ချၢလီၤ. မ့မ့ၢ်ပှၤတတီတလိၤ, ဒီးပှၤတၢ် ဒဲးဘးဖိန့ၣ်အါန့ၢ်အန့ၣ်တက့ၢ်လီၤ.

၁၂

¹ ပှၤလၢအအဲၣ်ဒိးတၢ်သိၣ်လိန့ၣ် အဲၣ်ဒိးတၢ်သ့ၣ်ညါ လီၤ. မ့မ့ၢ်ပှၤလၢအသးဟ့တၢ်သိၣ်ဃီၣ်န့ၣ် မၤအသး ဒ်ဆၣ်ဖိကီၢ်ဖိအသိးန့ၣ်လီၤ.

² ပှၤလၢအဂ့ၤန့ၣ်ဘၣ်ယွၤအသးလီၤ. မ့မ့ၢ်ပှၤလၢအ ကူၣ်တၢ်အၢန့ၣ်ယွၤကဟ့ၣ်ဝဲအတၢ်ဒဲးဘးလီၤ.

³ ပှၤတအိၣ်ဂၢၢ်ဆိးကျၢၤလၢ တၢ်တတီတလိၤအဃိ ဘၣ်, မ့မ့ၢ်ပှၤတီပှၤလိၤအဂံၢ်တဟူးတဝးဘၣ်.

⁴ ပိာ်မုၣ်လၢအဂ့ၤအဘၣ်န့ၣ်, မ့ၢ်အဝၤအခိၣ်သလုး လီၤ. မ့မ့ၢ်ပိာ်မုၣ်လၢ အဒုးမဲာ်ဆှးတၢ်န့ၣ် မၤသးဒ်တၢ် အုၣ်တၢ်ကျၣ်လၢဃံပူၤအသိးန့ၣ်လီၤ.

⁵ ပှၤအတီအလိၤအတၢ်ကူၣ်ထီၣ်ဖးလီၤန့ၣ် မ့ၢ်တၢ်စံၣ် ညီၣ်တီလီၤ. မ့မ့ၢ်ပှၤအၢအကူၣ်တၢ်န့ၣ်မ့ၢ်လီတၢ်လီၤ.

⁶ ပှၤအၢအတၢ်ကတိၤန့ၣ် ခိးခူသူၣ်လၢတၢ်သွံၣ်လီၤ. မ့ မ့ၢ်ပှၤတီပှၤလိၤအထးခိၣ်န့ၣ်မၤပူၤမၤဖျဲးအီၤလီၤ.

⁷ တၢ်မၤကဒံကဒါ ပှၤတတီတလိၤဘၣ်, ဒီးတအိၣ် လၢၤဘၣ်. မ့မ့ၢ်ပှၤတီပှၤလိၤအဟံၣ်န့ၣ်ကအိၣ်ဂၢၢ်ဆိး ကျၢၤလီၤ.

⁸ ပှၤကဒိးတၢ်စံးထီၣ်ပတြၢၤအီၤ ဒ်အတၢ်ကူၣ်တၢ်ဆး အသိးန့ၣ်လီၤ. မ့မ့ၢ်ပှၤလၢအသးက့ၣ်န့ၣ်တၢ်တပးကဲ ဘၣ်အီၤဘၣ်.

⁹ ပှၤလၢတၢ်တပးကဲဘၣ်အီၤ, ဒီးအိၣ်ဝဲဒီးအကုၢ်အပှၤ တဂၤန့ၣ်ဂ့ၤန့ၢ်ပှၤလၢ အမၤလၤကပီၤလီၤအသး, ဒီးအ ကိၣ်တအိၣ်ဘၣ်န့ၣ်တက့ၢ်လီၤ.

¹⁰ ပှၤတီပှၤလိၤပးကဲအဆၣ်ဖိကီၢ်ဖိအသးသမူလီၤ. မ့ မ့ၢ်ပှၤတတီတလိၤဘၣ်အသးအိၣ်တၢ်န့ၣ် မ့ၢ်တၢ်သူၣ် ကိၤသးကိၤလီၤ.

¹¹ ပှၤလၢအမၤအီၣ် အဟီၣ်ခိၣ်ဒၣ်ဝဲန့ၣ် ကဘျဲးအီၣ်ဒီး ကိၣ်လီၤ. မ့မ့ၢ်ပှၤလၢအပိာ်ပှၤကလီကလီအခံန့ၣ်အ သးဆးတအိၣ်ဘၣ်.

¹² ပှၤတတီတလိၤဘၣ်န့ၣ် သးကွံပှၤအၢအပှာ်ဧိၤစၤဧိၤ လီၤ. မ့မ့ၢ်ပှၤတီပှၤလိၤအဂံၢ်န့ၣ်သၣ်ထီၣ်ဒၣ်တၢ်လီၤ.

¹³ ပှၤအပျူၤမၤကမၣ်တၢ်န့ၣ်မ့ၢ်ပျံၤသကွီၤအအၢလီၤ. မ့ မ့ၢ်ပှၤတီပှၤလိၤန့ၣ်ကပူၤဖျဲးဒီးတၢ်မၤကိၢ်မၤဂီၤလီၤ.

¹⁴ ပှၤကဘျဲးအီၣ်ဒီး တၢ်ဂ့ၤလၢအထးခိၣ်အတၤသၣ်, ဒီးတၢ်ကဟ့ၣ်ကၣ်ပှၤလၢအစုအမၤတၢ်န့ၣ်လီၤ.

¹⁵ ပှၤဟးဂီၤဖိအကျဲန့ၣ် လိၤဝဲလၢအမဲာ်ညါဒၣ်ဝဲ န့ၣ် လီၤ. မ့မ့ၢ်ပှၤလၢအဒိကနၣ်တၢ်ဟ့ၣ်ကူၣ်န့ၣ်မ့ၢ်ပှၤလၢ အကူၣ်တၢ်သ့လီၤ.

¹⁶ ပှၤဟးဂီၤဖိလီၣ်ဖျါထီၣ်အသးထီၣ်တနံၤဃီလီၤ. မ့မ့ၢ် ပှၤကူၣ်တၢ်ဘၣ်န့ၣ်ပာ်ခူသူၣ်တၢ်မဲာ်ဆှးလီၤ.

¹⁷ ပှၤလၢအကတိၤဒၣ် တၢ်မ့ၢ်တၢ်တီန့ၣ်ဒုးနဲၣ်တၢ်တီ တၢ်လိၤလီၤ. မ့မ့ၢ်ပှၤအုၣ်တၢ်ကဘျံးကဘျၣ်န့ၣ်ဒုးနဲၣ် တၢ်လီတၢ်ဝ့ၤလီၤ.

¹⁸ ပှၤလၢအကတိၤဖဲအခိၣ်စၢၢ်ဆၢဒ်နးဧိၤဘီဧိၤဆဲးတၢ် အသိးန့ၣ်အိၣ်ဝဲလီၤ. မ့မ့ၢ်ပှၤကူၣ်တၢ်သ့အပျ့ၤန့ၣ် မၤ ဘျါက့ၤတၢ်လီၤ.

¹⁹ တၢ်မ့ၢ်တၢ်တီအပျုၤန့ၣ် ကအိၣ်ဂၢၢ်ဆိးကျၢၤလီၤထူ လီၤယိာ်လီၤ. မ့မ့ၢ်တၢ်ကဘျံးကဘျၣ်အပျ့ၤန့ၣ်အိၣ်ထဲ တပနာ်ဧိၤလီၤ.

²⁰ တၢ်လီတၢ်ဝ့ၤအိၣ်ဝဲလၢ ပှၤလၢအကူၣ်တၢ်အၢအသး ကံၢ်ပူၤလီၤ. မ့မ့ၢ်တၢ်သးခုအိၣ်ဝဲဒီး ပှၤလၢအဒုးကူၣ် တၢ်ဃူတၢ်ဖိးလီၤ.

²¹ တၢ်အၢတဘၣ်ဘၣ်ပှၤတီပှၤလိၤနီတမံၤဘၣ်. မ့မ့ၢ် ပှၤတတီတလိၤဘၣ်န့ၣ်ကပှဲၤဒီးတၢ်နးတၢ်ဖှီၣ်လီၤ.

²² ပျုၤကတိၤတၢ်ကဘျံးကဘျၣ်န့ၣ် မ့ၢ်တၢ်သးဘၣ်အၢ လၢယွၤအမဲာ်ညါလီၤ. မ့မ့ၢ်ပှၤလၢအမၤတၢ်မ့ၢ်တၢ်တီ န့ၣ်ဘၣ်အသးလီၤ.

²³ ပှၤလၢအကူၣ်တၢ်ဘၣ်န့ၣ်, ကျၢၢ်ဘၢတၢ်သ့ၣ်ညါ လီၤ. မ့မ့ၢ်ပှၤဟးဂီၤဖိအသးန့ၣ်ကိးထီၣ် ပှၤဟးဂီၤဖိ အတၢ်လီၤ.

²⁴ ပှၤအခုအစုန့ၣ်ကပၢတၢ်လီၤ. မ့မ့ၢ်ပှၤအကၢၣ်န့ၣ်က ဘၣ်ဟ့ၣ်သွဲလီၤ.

²⁵ တၢ်မၤကိၢ်မၤဂီၤလၢပှၤကညီ အသးကံၢ်ပူၤန့ၣ်ဒုးသ ကူးအီၤလီၤ. မ့မ့ၢ်တၢ်ကတိၤမုာ် တထံၣ်န့ၣ်ဒုးသးခုအီၤ လီၤ.

²⁶ ပှၤတီပှၤလိၤဒုးနဲၣ်ကျဲလၢအသကိးလီၤ. မ့မ့ၢ်ပှၤတ တီတလိၤဘၣ်အကျဲန့ၣ်ဒုးဟးဖျိးအကျဲလီၤ.

²⁷ ပှၤအကၢၣ်န့ၣ် တကၣ်အီၣ်ဘၣ်တၢ်လၢအခးဝဲဘၣ်. မ့မ့ၢ်ပှၤအခုန့ၣ် မ့ၢ်ပှၤအစုလီၢ်အခီၣ်ခိၣ် လၢအလုၢ်ဒိၣ် ပှ့ၤဒိၣ်လီၤ.

²⁸ တၢ်အမူအိၣ်ဝဲလၢပှၤတီပှၤလိၤအကျဲ, ဒီးလၢတၢ် ပိာ်ကျဲန့ၣ်တၢ်သံတအိၣ်ဘၣ်.

၁၃

¹ ဖိခွါလၢအကူၣ်တၢ်သ့န့ၣ် ဒိးသိၣ်က့ၤတၢ်လၢအပၢ် လီၤ. မ့မ့ၢ်ပှၤလၢအမၤတရီတပါတၢ်န့ၣ် တကနၣ်ဘၣ် တၢ်သိၣ်ဃီၣ်ဘၣ်.

² ပှၤကအီၣ်တၢ်ဂ့ၤလၢအထးခိၣ် အတၤသၣ်န့ၣ်လီၤ. မ့မ့ၢ်ပှၤလီတၢ်ဖိအသးန့ၣ်ကအီၣ်တၢ်မၤဆူၣ်မၤစိးလီၤ.

³ ပှၤလၢအပၢၤအထးခိၣ်န့ၣ် ကွၢ်က့ၤအသးသမူလီၤ. မ့မ့ၢ်ပှၤလၢအအဲးလဲၢ်ထီၣ်အထးခိၣ်န့ၣ် ကတုၤလၢတၢ် ဟးဂီၤလီၤ.

⁴ ပှၤအကၢၣ်န့ၣ်အသးဆၢတၢ်, ဒီးအတၢ်တအိၣ်ဘၣ်. မ့မ့ၢ်ပှၤအခုန့ၣ်အသးကဘီၣ်ထီၣ်လီၤ.

⁵ ပှၤတီပှၤလိၤန့ၣ် သးဟ့တၢ်ကတိၤ ကဘျံးကဘျၣ် လီၤ. မ့မ့ၢ်ပှၤတတီတလိၤအမၤတၢ်န့ၣ် မ့ၢ်တၢ်သးဘၣ် အၢဒီးတၢ်မဲာ်ဆှးလီၤ.

⁶ တၢ်တီတၢ်လိၤပၢၤ ပှၤအလၢအပှဲၤအကျဲပူၤန့ၣ်လီၤ. မ့မ့ၢ်တၢ်တတီတလိၤဘၣ်န့ၣ် ဒုးလီၤဃံၤပှၤတၢ်ဒဲးဘး ဖိလီၤ.

⁷ ပှၤလၢအပာ်ထူးပာ်တီၤအသး, ဒီးအတၢ်တအိၣ်ဘၣ် န့ၣ်အိၣ်ဝဲလီၤ. ပှၤလၢအပာ်ဖှီၣ်ပာ်ယာ်အသး, ဒီးထူး ဒိၣ်တီၤအါန့ၣ်အိၣ်ဝဲလီၤ.

⁸ တၢ်ပှ့ၤက့ၤပှၤကညီအသးန့ၣ် မ့ၢ်အတၢ်ထူးတၢ်တီၤ လီၤ. မ့မ့ၢ်ပှၤဖှီၣ်ဖိယာ်ဖိန့ၣ် တနၢ်ဟူဘၣ်တၢ်ကတိၤ မၤပျံၤအီၤဘၣ်.

⁹ ပှၤတီပှၤလိၤအတၢ်ကပီၤန့ၣ်သးခုဝဲလီၤ. မ့မ့ၢ်ပှၤတ တီတလိၤဘၣ်အမ့ၣ်အူဒၢန့ၣ်ကလီၤပံာ်ကွံာ်လီၤ.

¹⁰ လၢတၢ်ပာ်ထီၣ်ထီအသးန့ၣ် ထဲတၢ်အ့ၣ်လိာ်ဆိးက့ လိာ်န့ၣ်ကဲထီၣ်ဝဲလီၤ. မ့မ့ၢ်တၢ်ကူၣ်သ့အိၣ်ဝဲဒီးပှၤလၢ အဒိးန့ၢ်တၢ်ဒုးကူၣ်တၢ်န့ၣ်လီၤ.

¹¹ တၢ်စုလီၢ်ခီၣ်ခိၣ်လၢ ပှၤမၤန့ၢ်ညီန့ၣ် စှၤလီၤကွံာ်ဝဲ လီၤ. မ့မ့ၢ်ပှၤလၢအပာ်ဖှိၣ်တၢ်လၢအစုမၤတၢ်န့ၣ် အ တၢ်ကအါထီၣ်ဝဲလီၤ.

¹² တၢ်မုၢ်လၢ်လၢ အသုးနံၤသုးသီန့ၣ် မၤဆါပှၤအသး လီၤ. မ့မ့ၢ်တၢ်လၢပှၤမိၣ်န့ၢ်ဘၣ်အသးန့ၣ် တုၤအန့ၢ် ဘၣ်ဒီး, မ့ၢ်တၢ်မူအသ့ၣ်တထံးလီၤ.

¹³ ပှၤလၢအတပးကဲဘၣ် တၢ်အကလုၢ်န့ၣ်ကတုၤလၢ တၢ်ဟးဂီၤလီၤ. မ့မ့ၢ်ပှၤလၢအပျံၤတၢ်မၤလိာ်န့ၣ်က အိၣ်ဃူအိၣ်ဖိးလီၤ.

¹⁴ ပှၤကူၣ်တၢ်သ့အတၢ်သိၣ်တၢ်သီန့ၣ် မ့ၢ်တၢ်မူအထံ ထီၣ်ပၢၢ်, ဒ်သိးပှၤကဟးထီၣ်ကွံာ်လၢ တၢ်သံအပျံၤသ ကွီၤန့ၣ်လီၤ.

¹⁵ တၢ်ကူၣ်တၢ်ဆးန့ၣ် န့ၢ်ဘၣ်တၢ်ဘျုးတၢ်ဖှိၣ်လီၤ. မ့ မ့ၢ်ပှၤလီတၢ်အကျဲန့ၣ်မ့ၢ်အကီလီၤ.

¹⁶ ကယဲၢ် ပှၤလၢအကူၣ်တၢ်ဘၣ်န့ၣ် မၤဝဲဒီးတၢ်သ့ၣ် ညါလီၤ. မ့မ့ၢ်ပှၤဟးဂီၤဖိန့ၣ်သလၣ်ထီၣ် ပှၤဟးဂီၤဖိ အတၢ်န့ၣ်လီၤ.

¹⁷ ကလူးလၢ အတတီတလိၤဘၣ်န့ၣ်လီၤဘၣ်လၢတၢ် အၢအပူၤလီၤ. မ့မ့ၢ်ပှၤတၢ်မၢဖိလၢအမ့ၢ်အတီန့ၣ် မ့ၢ် တၢ်မၤဘျါက့ၤတၢ်လီၤ.

¹⁸ ပှၤလၢအညိကွံာ်တၢ်သိၣ်လိန့ၣ် ကအိၣ်ဒီးတၢ်ဖှီၣ် တၢ်ယာ်, ဒီးတၢ်မဲာ်ဆှးလီၤ. မ့မ့ၢ်ပှၤလၢအတိၢ်န့ၢ်တၢ် သိၣ်က့ၤသီက့ၤန့ၣ်ကဒိးတၢ်လၤကပီၤလီၤ.

¹⁹ တၢ်လၢပှၤမိၣ်န့ၢ်ဘၣ်အသးန့ၣ်တုၤအန့ၢ်ဒီး, မၤမုာ် အသးလီၤ. မ့မ့ၢ်ပှၤဟးဂီၤဖိဟးသဒၣ်တၢ်အၢန့ၣ်မ့ၢ် တၢ်သးဘၣ်အၢလၢအမဲာ်ညါလီၤ.

²⁰ ပှၤလၢအလဲၤတၢ်ဒီးပှၤကူၣ်တၢ်သ့န့ၣ် ကကဲထီၣ်ပှၤ ကူၣ်တၢ်သ့လီၤ. မ့မ့ၢ်ပှၤဒီတံၤဒီသကိးဒီးပှၤဟးဂီၤဖိန့ၣ် ကတုၤလၢတၢ်ဟးဂီၤလီၤ.

²¹ တၢ်အၢကလူၤပိာ်ပှၤတၢ်ဒဲးဘးဖိအခံလီၤ. မ့မ့ၢ်တၢ် ကဟ့ၣ်ကၣ်တၢ်ဂ့ၤလၢပှၤတီပှၤလိၤလီၤ.

²² ပှၤအဂ့ၤဟ့ၣ်သါတၢ်လၢ အဖိတဖၣ်အဖိတဖၣ်လီၤ. မ့မ့ၢ်ပှၤတၢ်ဒဲးဖိအစုလီၢ်အခီၣ်ခိၣ် အိၣ်ပာ်စၢၤဝဲလၢပှၤ တီပှၤလိၤအဂီၢ်လီၤ.

²³ တၢ်အီၣ်အါမးဟဲလၢ ပှၤဖှီၣ်ဖိယာ်ဖိအဟီၣ်ခိၣ်ထဲၣ် အသးလီၤ. မ့မ့ၢ်ပှၤလၢအတုၤလၢတၢ်ဟးဂီၤလၢတၢ် တတီတလိၤအဃိန့ၣ်အိၣ်ဝဲလီၤ.

²⁴ ပှၤလၢအတမၤဘၣ်ဒီးနီၣ်တီၢ်န့ၣ် သးဟ့အဖိခွါလီၤ. မ့မ့ၢ်ပှၤလၢအအဲၣ်အီၤန့ၣ်သိၣ်ဃီၣ်အီၤသပှၢ်တၢၢ်လီၤ.

²⁵ ပှၤတီပှၤလိၤအီၣ်ဝဲတုၤအသးဘျဲးအီၣ်လီၤ. မ့မ့ၢ်ပှၤ တတီတလိၤဘၣ်အဟၢဖၢန့ၣ်ကလီၤကအိလီၤ.

၁၄

¹ ပိာ်မုၣ်လၢအကူၣ်တၢ်သ့န့ၣ်မၤထီၣ်အဟံၣ်လီၤ. မ့မ့ၢ် ပှၤဟးဂီၤဖိန့ၣ်မၤလီၤပှီၢ်အီၤလၢအစုလီၤ.

² ပှၤလၢအလဲၤတၢ်လၢ အတၢ်တီတၢ်လိၤန့ၣ် ပျံၤယွၤ လီၤ. မ့မ့ၢ်ပှၤလၢအလဲၤတၢ်လၢအကျဲဒၢက့ၣ်န့ၣ်တပး ကဲဘၣ်အီၤဘၣ်.

³ လၢပှၤဟးဂီၤဖိအထးခိၣ်န့ၣ် တၢ်ပာ်ထီၣ်ထီအသးအ နီၣ်တီၢ်အိၣ်ဝဲလီၤ. မ့မ့ၢ်ပှၤကူၣ်တၢ်သ့အပျုၤန့ၣ်အံး က့ၤကွၢ်က့ၤအီၤလီၤ.

⁴ ဖဲဂီၤဖံးတအိၣ်ဘၣ်န့ၣ် အီၣ်ဆၣ်အကျိးအိၣ်ဝဲကဆှဲ ကဆှီလီၤ. မ့မ့ၢ်တၢ်အါထီၣ်အါထီၣ် အိၣ်ဝဲလၢဂီၤဖံးအ ဂံၢ်အဘါလီၤ.

⁵ ပှၤအုၣ်အသး လၢအမ့ၢ်အတီန့ၣ် တကတိၤတၢ်က ဘျံးကဘျၣ်ဘၣ်. မ့မ့ၢ်ပှၤအုၣ်အသးကဘျံးကဘျၣ်န့ၣ် ကတိၤတၢ်ကဘျံးကဘျၣ်လီၤ.

⁶ ပှၤမၤတၢ်တရီတပါန့ၣ်ဃုတၢ်ကူၣ်သ့, ဒီးတထံၣ်န့ၢ် ဘၣ်ဝဲဘၣ်, မ့မ့ၢ်တၢ်သ့ၣ်ညါန့ၣ်ညီဝဲလၢပှၤအသူၣ်ဆး အသးဆးအဂီၢ်လီၤ.

⁷ ဟးထီၣ်ကွံာ်လၢ ပှၤဟးဂီၤဖိအအိၣ်တက့ၢ်. အဂ့ၢ်ဒ် အံၤ, နတထံၣ်န့ၢ်ဘၣ် တၢ်သ့ၣ်ညါအပျုၤလၢအလိၤ ဘၣ်.

⁸ ပှၤကူၣ်တၢ်ဘၣ်အတၢ်ကူၣ်သ့န့ၣ်မ့ၢ်လၢအနၢ်ပၢၢ်အ အကျဲလီၤ. မ့မ့ၢ်ပှၤဟးဂီၤဖိအတၢ်ဟးဂီၤန့ၣ်မ့ၢ်လီတၢ် လီၤ.

⁹ ပှၤဟးဂီၤဖိ မၤတရီတပါတၢ်ဒဲးဘးလီၤ. မ့မ့ၢ်ပှၤတီ ပှၤလိၤန့ၣ်ဘၣ်တၢ်အသးလီၤ.

¹⁰ ပှၤအသးသ့ၣ်ညါ အသူၣ်အုးအသးအုးဒၣ်ဝဲ, ဒီးပှၤ တမှံၤတမၤဃါဃုာ်အသးဒီးအတၢ်သးခုန့ၣ်ဘၣ်.

¹¹ ပှၤတတီတလိၤဘၣ်အဟံၣ်န့ၣ်ကလီၤပှီၢ်လီၤ. မ့မ့ၢ် ပှၤအသးစၢၢ်ဆၢအဒဲန့ၣ်ကဂ့ၤထီၣ်လီၤ.

¹² ကျဲလၢအလိၤဝဲလၢပှၤကညီအမဲာ်ညါန့ၣ်အိၣ်ဝဲ, မ့ မ့ၢ်အကတၢၢ်မ့ၢ်တၢ်သံအကျဲန့ၣ်လီၤ.

¹³ ဖဲပနံၤဒၣ်လဲာ်ပသးအုး, ဒီးတၢ်သးခုအကတၢၢ်န့ၣ် မ့ၢ်တၢ်သးအုးလီၤ.

¹⁴ ပှၤလၢအသးဟးဂီၤန့ၣ်ကဘျဲးအီၣ်တၢ်လၢအကျဲဒၣ် ဝဲ, ဒီးပှၤအဂ့ၤန့ၣ် ကမံသူၣ်မံသးလၢအကစၢ်ဒၣ်ဝဲလီၤ.

¹⁵ ပှၤလၢအတမၤလိဘၣ်တၢ်ဘၣ်န့ၣ် နာ်တၢ်ကတိၤ ကိးထံၣ်ဒဲးလီၤ. မ့မ့ၢ်ပှၤအကူၣ်တၢ်ဘၣ်န့ၣ် ကွၢ်ဆိက မိၣ်အထွဲတၢ်လီၤ.

¹⁶ ပှၤကူၣ်တၢ်သ့န့ၣ်ပျံၤတၢ်, ဒီးဟးဖးဒီးတၢ်အၢလီၤ. မ့မ့ၢ်ပှၤဟးဂီၤဖိပာ်ကဖိအသး, ဒီးအသးမံဝဲလီၤ.

¹⁷ ပှၤလၢအသးထီၣ်ချ့န့ၣ်ကမၤတၢ်တဂ့ၤတဘၣ်, ဒီးပှၤ လၢအကူၣ်တၢ်အၢန့ၣ်ပှၤသးဟ့အီၤလီၤ.

¹⁸ ပှၤလၢအတမၤလိဘၣ်တၢ်ဘၣ်န့ၣ် န့ၢ်သါပှၤဟးဂီၤ ဖိအတၢ်လီၤ. မ့မ့ၢ်ပှၤလၢအကူၣ်တၢ်ဘၣ်န့ၣ် ကုာ်ခိၣ် သလုးတၢ်သ့ၣ်ညါလီၤ.

¹⁹ ပှၤအၢတီၤလီၤကဒွံကျိာ်လၢပှၤဂ့ၤအမဲာ်ညါ, ဒီးပှၤတ တီတလိၤဘၣ်န့ၣ်ဖဲပှၤတီပှၤလိၤအပဲတရီန့ၣ်လီၤ.

²⁰ ပှၤလၢအဃၢၤဒၣ်လဲာ်သးဟ့ပှၤဖှီၣ်ဖိယာ်ဖိလီၤ. မ့ မ့ၢ်ပှၤအဲၣ်ပှၤထူးပှၤတီၤန့ၣ်အိၣ်ဝဲအါဂၤလီၤ.

²¹ ပှၤလၢအတပးကဲဘၣ်အသကိးန့ၣ် မ့ၢ်ပှၤတၢ်ဒဲးဘး ဖိလီၤ. မ့မ့ၢ်ပှၤလၢအသးကညီၤပှၤဖှီၣ်ဖိယာ်ဖိန့ၣ်ဘၣ် ဆိၣ်ဂ့ၤဝဲလီၤ.

²² ပှၤလၢအကူၣ်တၢ်အၢန့ၣ်ဟးဖျိးကျဲ, တမ့ၢ်ဘၣ်ဧါ. မ့မ့ၢ်တၢ်ဘျုးတၢ်ဖှိၣ်ဒီး တၢ်မ့ၢ်တၢ်တီအိၣ်ဝဲဒီး ပှၤလၢ အကူၣ်တၢ်ဂ့ၤလီၤ.

²³ မၤတၢ်ဖံးတၢ်ခဲလၢာ်န့ၣ်အိၣ်ဒီးအဘျုးလီၤ. မ့မ့ၢ်ပျုၤ အကတိၤတၢ်န့ၣ်ဘၣ်ဃးထဲလၢတၢ်ဖှီၣ်တၢ်ယာ်လီၤ.

²⁴ ပှၤကူၣ်တၢ်သ့အခိၣ်သလုးန့ၣ်မ့ၢ်အတၢ်ထူးတၢ်တီၤ လီၤ. မ့မ့ၢ်ပှၤဟးဂီၤဖိ အတၢ်န့ၣ်မ့ၢ်ပှၤဟးဂီၤဖိအတၢ် လီၤ.

²⁵ ပှၤအုၣ်အသးလၢအကလုၢ်တီန့ၣ် မၤပူၤဖျဲးပှၤအသး သမူလီၤ. မ့မ့ၢ်ပှၤလီတၢ်န့ၣ်ကတိၤတၢ်ကဘျံးကဘျၣ် လီၤ.

²⁶ တၢ်သန့ၤအသးအလီၢ်ကျၢၤအိၣ်ဝဲလၢ တၢ်ပျံၤယွၤအ ပူၤလီၤ. ဒီးအဖိအလံၤကအိၣ်ဒီးတၢ်အိၣ်တဒၢအလီၢ် လီၤ.

²⁷ တၢ်ပျံၤယွၤန့ၣ်မ့ၢ်တၢ်မူအထံပူၤ, ဒ်သိးပှၤကဟးဆှဲး တၢ်သံအပျံၤသကွီၤလီၤ.

²⁸ ပှၤဂီၢ်မုၢ်အါဂၤန့ၣ်မ့ၢ်စီၤပၤအလၤအကပီၤလီၤ. မ့မ့ၢ် ပှၤတအါဘၣ်အဃိန့ၣ်ပဒိၣ်တုၤလၢတၢ်ဟးဂီၤလီၤ.

²⁹ ပှၤလၢအသးထီၣ်ကီန့ၣ် အတၢ်ကူၣ်တၢ်ဆးဒိၣ်မး လီၤ. မ့မ့ၢ်ပှၤလၢအသးထီၣ်ချ့န့ၣ်ပာ်ထီၣ်ထီပှၤဟးဂီၤ ဖိအတၢ်လီၤ.

³⁰ ပှၤအသးမုာ်န့ၣ်မ့ၢ်ပှၤအဖံးအညၣ်အတၢ်မူလီၤ. မ့မ့ၢ် သးက့ၣ်န့ၣ်မ့ၢ်တၢ်ဃံတၢ်ကွဲအတၢ်အုၣ်တၢ်ကျၣ်လီၤ.

³¹ ပှၤလၢအမၤအၢပှၤဖှီၣ်ဖိယာ်ဖိန့ၣ် ဒုၣ်ဒွဲၣ်ပှၤလၢအ တ့လီၤအီၤလီၤ. မ့မ့ၢ်ပှၤလၢအသးကညီၤ ပှၤဘၣ်ဖှီၣ် ဘၣ်ယာ်န့ၣ်မၤလၤကပီၤအီၤလီၤ.

³² ပှၤအအၢန့ၣ်ဘၣ်တၢ်ဟီထီၣ်ကွံာ်အီၤလၢ အတၢ်အၢ အပူၤန့ၣ်လီၤ. မ့မ့ၢ်ပှၤတီပှၤလိၤန့ၣ်တုၤအသံဒီး, မုၢ်လၢ် တၢ်လီၤ.

³³ တၢ်ကူၣ်သ့အိၣ်ဝဲဆိးဝဲမုာ်မုာ်လၢ ပှၤလၢအကူၣ်တၢ် သ့အသးကံၢ်ပူၤလီၤ. မ့မ့ၢ်တၢ်အိၣ်ဝဲလၢပှၤဟးဂီၤဖိအ သးကံၢ်ပူၤန့ၣ်ကအိၣ်ဖျါထီၣ်ဝဲလီၤ.

³⁴ တၢ်တီတၢ်လိၤန့ၣ် ပာ်ပှၤတကလုာ်လၢတၢ်ထီၣ်ထီ လီၤ. မ့မ့ၢ်တၢ်ဒဲးဘးန့ၣ်ကဲထီၣ်ပှၤဂီၢ်မုၢ်အတၢ်ဒုၣ်ဒွဲၣ်အ လီၢ်လီၤ.

³⁵ အခ့အပှၤ လၢအကူၣ်တၢ်သ့န့ၣ် ဘၣ်စီၤပၤအသး လီၤ. မ့မ့ၢ်အသးထီၣ်ဘၣ်ပှၤလၢအဒုးမဲာ်ဆှးတၢ်လီၤ.

၁၅

¹ စံးဆၢတၢ်မုာ်မုာ်န့ၣ် ဘိးဃၣ်ကွံာ်တၢ်သးထီၣ်လီၤ. မ့မ့ၢ်တၢ်ကတိၤဆါန့ၣ်ထိၣ်ဂဲၤတၢ်သးထီၣ်လီၤ.

² ပှၤကူၣ်တၢ်သ့အပျ့ၤန့ၣ် ဒုးဖျါထီၣ်တၢ်သ့ၣ်ညါအဂ့ၤ အဘၣ်လီၤ. မ့မ့ၢ်ပှၤဟးဂီၤဖိအထးခိၣ်ဂၢ်လီၤပှၤဟးဂီၤ ဖိအတၢ်လီၤ.

³ ယွၤအမဲာ်အိၣ်ဝဲလၢတၢ်ကိးပူၤဒဲး, ဒီးကွၢ်တၢ်အၢဒီး တၢ်ဂ့ၤလီၤ.

⁴ ပှၤအပျ့ၤလၢ အမၤမုာ်ထီၣ်က့ၤတၢ်န့ၣ် မ့ၢ်တၢ်မူအ သ့ၣ်လီၤ. မ့မ့ၢ်လီတၢ်လၢအီၤန့ၣ်မၤကၢ်ပှၤအသးလီၤ.

⁵ ပှၤဟးဂီၤဖိတပးကဲဘၣ် အပၢ်အတၢ်သိၣ်က့ၤသီက့ၤ ဘၣ်. မ့မ့ၢ်ပှၤလၢအတိၢ်န့ၢ်တၢ်သိၣ်ဃီၣ်န့ၣ်ကူၣ်တၢ် ဘၣ်လီၤ.

⁶ တၢ်အစုလီၢ်အခီၣ်ခိၣ် အိၣ်ဝဲလၢပှၤတီပှၤလိၤအဟံၣ် အါမးလီၤ. မ့မ့ၢ်တၢ်မၤကိၢ်မၤဂီၤ အိၣ်ဝဲလၢပှၤတတီ တလိၤအတၢ်အါထီၣ်အပူၤလီၤ.

⁷ ပှၤကူၣ်တၢ်သ့အပျုၤန့ၣ်ဖှံလီၤတၢ်သ့ၣ်ညါလီၤ. မ့မ့ၢ် ပှၤဟးဂီၤဖိအသးန့ၣ်တဒ်န့ၣ်ဘၣ်.

⁸ ပှၤတတီတလိၤဘၣ်အတၢ်လုၢ်တၢ်ပာ်န့ၣ် ယွၤသး ဘၣ်အၢအီၤလီၤ. မ့မ့ၢ်ပှၤတီပှၤလိၤအတၢ်ထုကဖၣ်န့ၣ် ဘၣ်အသးလီၤ.

⁹ ယွၤသးဘၣ်အၢပှၤတတီတလိၤဘၣ်အကျဲလီၤ. မ့မ့ၢ် အဲၣ်ပှၤလၢအလူၤတၢ်တီတၢ်လိၤလီၤ.

¹⁰ ပှၤလၢအလဲၤသဒၣ် ကျဲဧိၤကပူၤဧိၤန့ၣ် ကဘၣ်တၢ် သိၣ်ဃီၣ်အီၤနးမးလီၤ. ပှၤလၢအသးဟ့တၢ်သိၣ်ဃီၣ် န့ၣ်ကသံဝဲလီၤ.

¹¹ တၢ်ပျုၤပူၤဒီးလရာ်န့ၣ် အိၣ်ဝဲလၢယွၤအမဲာ်ညါလီၤ. ပှၤကညီဖိအသးန့ၣ်အါန့ၢ်တက့ၢ်ဆံးဒိၣ်လဲၣ်.

¹² ပှၤမၤတၢ်တရီတပါန့ၣ် တအဲၣ်ဘၣ်ပှၤလၢအသိၣ် ဃီၣ်အီၤဘၣ်, ဒီးတလဲၤဘၣ်ဝဲဆူပှၤလၢအကူၣ်တၢ်သ့ အအိၣ်ဘၣ်.

¹³ တၢ်သးခုန့ၣ်မၤဂ့ၤထီၣ်ပှၤအမဲာ်လီၤ. မ့မ့ၢ်တၢ်သူၣ် ကိၢ်သးဂီၤန့ၣ်မၤသူၣ်ကၢ်သးလီၤတၢ်လီၤ.

¹⁴ ပှၤအကူၣ်အဆးအသးန့ၣ်ဃုတၢ်သ့ၣ်ညါလီၤ. မ့မ့ၢ် ပှၤဟးဂီၤဖိအထးခိၣ်န့ၣ် အီၣ်ဝဲလၢပှၤဟးဂီၤဖိအတၢ် လီၤ.

¹⁵ ပှၤလၢအဘၣ်နးဘၣ်ဖှီၣ်အမုၢ်နံၤန့ၣ် မ့ၢ်အအၢကိးနံၤ ဒဲးလီၤ. မ့မ့ၢ်ပှၤလၢအသးမုာ်န့ၣ်အိၣ်ဝဲဒီးအပွဲဧိၤလီဧိၤ တထံၣ်ဃီလီၤ.

¹⁶ တၢ်တစဲးဖိအိၣ်ဒီးတၢ်ပျံၤယွၤန့ၣ်ဂ့ၤန့ၢ် တၢ်လုၢ်ဒိၣ် ပှ့ၤဒိၣ်အိၣ်ဝဲဒီးတၢ်မၤကိၢ်မၤဂီၤလီၤ.

¹⁷ အီၣ်တၢ်ဒိးတၢ်လၣ် အိၣ်ဒီးတၢ်အဲၣ်န့ၣ်ဂ့ၤန့ၢ်ဂီၤဖံး ဘီၣ်တဒုအိၣ်ဒီးတၢ်သးဟ့တက့ၢ်လီၤ.

¹⁸ ပှၤလၢအသးထီၣ်န့ၣ် ထိၣ်ဂဲၤတၢ်အ့ၣ်လိာ်ဆိးက့ လိာ်န့ၣ်လီၤ. မ့မ့ၢ်ပှၤလၢအသးဒိၣ်ထီၣ်ကီန့ၣ် မၤမုာ် ထီၣ်က့ၤတၢ်အ့ၣ်လိာ်ဆိးက့လိာ်န့ၣ်လီၤ.

¹⁹ ပှၤကၢၣ်အကျဲန့ၣ်မၤသး ဒ်ကရၢတၤဆှုၣ်အသိးန့ၣ် လီၤ. မ့မ့ၢ်ပှၤတီပှၤလိၤအကျဲန့ၣ်မ့ၢ်ကျဲမုၢ်လီၤ.

²⁰ ဖိခွါလၢအကူၣ်တၢ်သ့န့ၣ် ဒုးသးခုအပၢ်အသးလီၤ. မ့မ့ၢ်ပှၤဟးဂီၤဖိန့ၣ်တပးကဲဘၣ်အမိၢ်ဘၣ်.

²¹ ပှၤဟးဂီၤဖိအတၢ်န့ၣ် မ့ၢ်တၢ်သးခုလၢပှၤလၢအသး ဆးတအိၣ်ဘၣ်အဂီၢ်လီၤ. မ့မ့ၢ်ပှၤအကူၣ်အဆးန့ၣ်က လဲၤတၢ်စၢၢ်ဆၢပံၢ်ကလာ်လီၤ.

²² တၢ်ကူၣ်လိာ်အသးတအိၣ်ဘၣ်ဒီး, တၢ်ကူၣ်ထီၣ်ဖး လီၤန့ၣ်တကဲထီၣ်ဘၣ်. မ့မ့ၢ်လၢပှၤဒုးကူၣ်တၢ်အိၣ်အါ ဂၤန့ၣ်ဂၢၢ်ဝဲကျၢၤဝဲလီၤ.

²³ ပှၤစံးဆၢတၢ်လၢအထးခိၣ်သတးဒီး, အိၣ်ဝဲဒီးတၢ် သးခု, ဒီးတၢ်ကတိၤတထံၣ်လၢပှၤ ကတိၤဝဲဖဲအဆၢ အကတီၢ်ဒၣ်ဝဲန့ၣ်ဂ့ၤဆံးဒိၣ်လဲၣ်.

²⁴ တၢ်မူအကျဲလဲၤထီၣ်ဆူထးခီလၢ ပှၤအကူၣ်တၢ်ဘၣ် အဂီၢ်, ဒ်သိးအကဟးဖးဒီးပျုၤပူၤလၢလာ်ခီလီၤ.

²⁵ ယွၤကမၤဟးဂီၤပှၤပာ်ထီၣ်ထီအသးအဟံၣ်လီၤ. မ့ မ့ၢ်ပှၤမုၣ်ကမဲအဟီၣ်ခိၣ်အဆၢန့ၣ် ကဒုးအိၣ်ဂၢၢ်ဆိး ကျၢၤဝဲလီၤ.

²⁶ ယွၤသးဘၣ်အၢပှၤအၢအကူၣ်တၢ်ဖးတၢ်လီၤ. မ့မ့ၢ် တၢ်ကတိၤမုာ်န့ၣ်မ့ၢ်တၢ်အကဆှီလီၤ.

²⁷ ပှၤလၢအသးကွံလုၣ်ကိ တၢ်စုလီၢ်ခီၣ်ခိၣ်န့ၣ်မၤကိၢ် မၤဂီၤအပှၤဟံၣ်ဖိဒၣ်ဝဲလီၤ. မ့မ့ၢ်ပှၤလၢအသးဟ့ခိၣ်ဖး တဖၣ်န့ၣ်ကမူဝဲလီၤ.

²⁸ ပှၤတီပှၤလိၤဆိကမိၣ်တၢ် ဒ်သိးအကစံးဆၢတၢ်လီၤ. မ့မ့ၢ်ပှၤအအၢတဖၣ်န့ၣ်အထးခိၣ်ဂၢ်လီၤတၢ်အၢလီၤ.

²⁹ ယွၤအိၣ်ယံၤဒီးပှၤတတီတလိၤဘၣ်န့ၣ်လီၤ. မ့မ့ၢ်ပှၤ တီပှၤလိၤအတၢ်ထုကဖၣ်န့ၣ်ကကနၣ်ဝဲလီၤ.

³⁰ ပမဲာ်အတၢ်ကပီၤဒုးသးခုပသးလီၤ. တၢ်အကစီၣ် လၢအဂ့ၤမၤဘီၣ်ထီၣ်ပဃံလီၤ.

³¹ ပှၤအနၢ်လၢအဒိကနၣ် တၢ်မူအတၢ်သိၣ်ဃီၣ်န့ၣ်က အိၣ်ဝဲဆိးဝဲလၢပှၤကူၣ်တၢ်သ့အကျါလီၤ.

³² ပှၤလၢအညိကွံာ်တၢ်သိၣ်က့ၤသီက့ၤန့ၣ် တပးကဲဘၣ် အသးဒၣ်ဝဲဘၣ်လီၤ. မ့မ့ၢ်ပှၤလၢအဒိကနၣ်တၢ်သိၣ် ဃီၣ်န့ၣ်န့ၢ်ဘၣ်အသးလီၤ.

³³ တၢ်ပျံၤယွၤန့ၣ် မ့ၢ်တၢ်ကူၣ်သ့အတၢ်သိၣ်က့ၤသီက့ၤဒီး တၢ်ဆီၣ်လီၤအသးန့ၣ်အိၣ်ဆိန့ၢ်တၢ်လၤကပီၤတက့ၢ်လီၤ.

၁၆

¹ သးအကူၣ်တၢ်န့ၣ်ဟဲလၢ ပှၤကညီလီၤ. မ့မ့ၢ်ပျ့ၤအ တၢ်စံးဆၢဟဲလၢယွၤလီၤ.

² ကယဲၢ်ပှၤကညီအကျဲန့ၣ် ကဆှီဝဲလၢအမဲာ်ညါဒၣ်ဝဲ လီၤ. မ့မ့ၢ်ယွၤစီၤဝဲအသးလီၤ.

³ တလ့ၣ်နမၤတၢ်တဖၣ်လၢယွၤအလိၤတက့ၢ်, ဒီးန ကူၣ်ထီၣ်ဖးလီၤတၢ်န့ၣ်ကကဲထီၣ်တၢ်လီၤ.

⁴ ယွၤမၤတၢ်ခဲလၢာ်လၢအလီၢ်ဒၣ်ဝဲအဂီၢ်လီၤ. ပှၤတ တီတလိၤဒၣ်လဲာ်လၢမုၢ်နံၤအၢတနံၤအဂီၢ်လီၤ.

⁵ ယွၤသးဘၣ်အၢ ကယဲၢ်ပှၤလၢ အပာ်ထီၣ်ထီအသး ကိးဂၤဒဲးလီၤ. စုဟံးဃာ်စုဘၣ်ဆၣ်ဒီးတပူၤဖျဲးဒီးတၢ်ဒဲး ဘးဘၣ်.

⁶ တၢ်မၤပူၤဖျဲးတၢ်ဒဲးဘးလၢ တၢ်ဘျုးတၢ်ဖှိၣ်, ဒီးတၢ် မ့ၢ်တၢ်တီလီၤ. ဒီးပှၤဟးဖးဒီး တၢ်အၢလၢ တၢ်ပျံၤ ယွၤလီၤ.

⁷ တုၤပှၤကညီအကျဲဘၣ်ယွၤအသးဒီး, ဒုးဃူဒုးဖိးအ ဒုၣ်အဒါဒၣ်လဲာ်ဒီးအီၤလီၤ.

⁸ တၢ်တစဲးဖိအိၣ်ဒီးတၢ်တီတၢ်လိၤန့ၣ်ဂ့ၤန့ၢ် တၢ်အါ အိၣ်ဒီးတၢ်စံၣ်ညီၣ်တတီဘၣ်န့ၣ်တက့ၢ်လီၤ.

⁹ ပှၤကညီအသးကူၣ်ဝဲအကျဲလီၤ. မ့မ့ၢ်ယွၤဆှၢအထွဲ တၢ်လီၤ.

¹⁰ တၢ်စံၣ်ညီၣ်အတီအိၣ်ဝဲလၢစီၤပၤအထးခိၣ်လီၤ. လၢ တၢ်စံၣ်ညီၣ်န့ၣ် အထးခိၣ် တလုၣ်သ့ၣ်ခါပတာ်ဘၣ် လီၤ.

¹¹ စီၤပီၢ်တြူး, ဒီးစီၤပီၢ်ဘၣ်ဃးဒီးတၢ်စံၣ်ညီၣ်တီန့ၣ်မ့ၢ် ယွၤအတၢ်လီၤ. ကယဲၢ်စီၤပီၢ်သၣ်လၢထၢၣ်ပူၤန့ၣ်မ့ၢ် အမၤတၢ်လီၤ.

¹² တၢ်မၤတတီတလိၤဘၣ်န့ၣ် စီၤပၤတဖၣ်သးဘၣ်အၢ လီၤ. အဂ့ၢ်ဒ်အံၤ, အလီၢ်ပစိာ်အိၣ်ဂၢၢ်ဆိးကျၢၤဝဲလၢ တၢ်တီတၢ်လိၤလီၤ.

¹³ တၢ်တီတၢ်လိၤအပျုၤန့ၣ်ဘၣ်စီၤပၤအသးလီၤ, ဒီးက အဲၣ်ပှၤလၢအကတိၤတၢ်လိၤလီၤ.

¹⁴ စီၤပၤအသးထီၣ်န့ၣ်မ့ၢ်တၢ်သံအကလူးလီၤ. မ့မ့ၢ်ပှၤ ကူၣ်တၢ်သ့န့ၣ်ကမၤပူၤဖျဲးဝဲလီၤ.

¹⁵ တၢ်မူအိၣ်ဝဲလၢ စီၤပၤအမဲာ်အတၢ်ကပီၤအပူၤ, ဒီး တၢ်ဘၣ်အသးန့ၣ် မၤသးဒ်တၢ်ဟဲစူၤလၢခံတတီၤအ တၢ်အၢၣ်အသိးန့ၣ်လီၤ.

¹⁶ တၢ်န့ၢ်ဘၣ်တၢ်ကူၣ်သ့န့ၣ် ဂ့ၤန့ၢ်ထူစီတက့ၢ်ဆံးဒိၣ် လဲၣ်. ဒီးတၢ်န့ၢ်ဘၣ်တၢ်ကူၣ်တၢ်ဆးန့ၣ်ဂ့ၤပှၤဃုထၢ အီၤအါန့ၢ်စ့တက့ၢ်လီၤ.

¹⁷ ပှၤအသးစၢၢ်ဆၢအကျဲမုၢ်န့ၣ် မ့ၢ်ဒ်သိးကဟးဖးဒီး တၢ်အၢလီၤ. ပှၤလၢအကွၢ်အကျဲန့ၣ် ကွၢ်အသးလီၤ.

¹⁸ တၢ်ပာ်ထီၣ်ထီအသးန့ၣ် ဟဲဝဲလၢတၢ်ဟးဂီၤအမဲာ် ညါ, ဒီးတၢ်ပာ်ကဖိအသးန့ၣ် ဟဲဝဲလၢတၢ်လီၤဃံၤအ မဲာ်ညါလီၤ.

¹⁹ ပှၤဆီၣ်လီၤအသးလၢ ပှၤသးစူၤအကျါန့ၣ်ဂ့ၤန့ၢ်အ နီၤဖးတၢ်ဂုာ်န့ၢ်အိၣ်ဒီးပှၤပာ်ထီၣ်ထီအသးတက့ၢ်လီၤ.

²⁰ ပှၤလၢအတိၢ်န့ၢ်တၢ် အကလုၢ်အကထါန့ၣ်ကထံၣ် န့ၢ်တၢ်ဂ့ၤလီၤ. ဒီးပှၤလၢအသန့ၤအသး လၢယွၤန့ၣ် ဘၣ်ဆိၣ်ဂ့ၤဝဲလီၤ.

²¹ ပှၤလၢအသးကူၣ်တၢ်သ့န့ၣ် ပှၤကကိးအီၤလၢပှၤ ကူၣ်ပှၤဆး, ဒီးတၢ်ကတိၤမုာ်န့ၣ်မၤအါထီၣ်တၢ်တူၢ် လိာ်တၢ်သိၣ်လိန့ၣ်လီၤ.

²² တၢ်ကူၣ်တၢ်ဆးန့ၣ်မ့ၢ် တၢ်မူအထံထီၣ်ပၢၢ်လၢပှၤ လၢအအိၣ်ဒီးအီၤအဂီၢ်လီၤ. မ့မ့ၢ်ပှၤဟးဂီၤဖိအတၢ်သိၣ် လိန့ၣ်မ့ၢ်ပှၤဟးဂီၤဖိအတၢ်လီၤ.

²³ ပှၤကူၣ်တၢ်သ့အသးန့ၣ်ကဒုးမၤသ့အထးခိၣ်, ဒီးပာ် ဖှိၣ်တၢ်သိၣ်လိလၢအပျုၤလိၤလီၤ.

²⁴ တၢ်ကတိၤမုာ်မ့ၢ်ကနဲအခိၣ်ထံလီၤ. ဆၢဝဲလၢပသး အဂီၢ်, ဒီးမၤဘျါက့ၤတၢ်လၢပဃံပကွဲအဂီၢ်လီၤ.

²⁵ ကျဲလၢအလိၤဝဲလၢပှၤကညီအမဲာ်ညါ, ဒီးအကတၢၢ် မ့ၢ်တၢ်သံအကျဲန့ၣ်အိၣ်ဝဲတဘိလီၤ.

²⁶ ပှၤလၢအမၤတၢ်န့ၣ် မၤဝဲလၢအကစၢ်ဒၣ်ဝဲအဂီၢ်လီၤ. အဂ့ၢ်ဒ်အံၤ, အထးခိၣ်သဆၣ်ထီၣ်အခံလီၤ.

²⁷ ပှၤအၢန့ၣ်ကူၣ်ထီၣ်တၢ်အၢ, ဒီးတၢ်အိၣ်လၢအပျုၤ လိၤန့ၣ်မ့ၢ်တၢ်ဒ်မ့ၣ်အူကဲၤထီၣ်အသိးန့ၣ်လီၤ.

²⁸ ပှၤလီတၢ်န့ၣ်ထိၣ်ဂဲၤတၢ်အ့ၣ်လိာ်ဆိးက့လိာ်, ဒီးပှၤ ကတိၤခဲၣ်တၢ်မၤလီၤဖးပှၤဒီတံၤဒီသကိးလီၤ.

²⁹ ပှၤမၤအၢတၢ်န့ၣ် ကလံာ်ပှၤလၢအဃၢၤ, ဒီးဒုးလဲၤ အီၤလၢကျဲလၢအတဂ့ၤဘၣ်လီၤ.

³⁰ ပှၤလၢအမၤဘံၣ်အမဲာ်ဒ်သိးအကကူၣ်လီတၢ်, ဒီးပှၤ လၢအပၢၢ်တံၢ်အပျုၤန့ၣ်ဒုးကဲထီၣ်တၢ်အၢလီၤ.

³¹ ခိၣ်ဝါန့ၣ်မ့ၢ်အိၣ်ဝဲလၢ တၢ်တီတၢ်လိၤအကျဲဒီး, မ့ၢ် တၢ်ခိၣ်သလုးအိၣ်ဒီးအလၤကပီၤလီၤ.

³² ပှၤလၢအသးထီၣ်ကီန့ၣ်ဂ့ၤန့ၢ်ပှၤဆူၣ်တက့ၢ်လီၤ. ဒီး ပှၤလၢအပၢအသးဒၣ်ဝဲန့ၣ် ဂ့ၤန့ၢ်ပှၤလၢ အမၤန့ၢ်ဝ့ၢ် တဖျၢၣ်တက့ၢ်လီၤ.

³³ တၢ်ကွံာ်ဃီၤတၢ်ဖးလၢ ပှၤကံၣ်ဖျၢၣ်ခိၣ်ဘၣ်ဆၣ်ဒီး, ယွၤစံၣ်ညီၣ်အီၤခဲလၢာ်လီၤ.

၁၇

¹ တၢ်အဃ့တမီအိၣ်ဒီး တၢ်ဃူတၢ်ဖိးန့ၣ် ဂ့ၤန့ၢ်ဟံၣ် ပှဲၤဒီးတၢ်လုၢ်အပွဲဧိၤလီဧိၤအိၣ်ဒီး တၢ်အ့ၣ်လိာ်ဆိးက့ လိာ်တက့ၢ်လီၤ.

² တုၢ်လၢအကူၣ်အဆးန့ၣ် ကပၢဖိခွါလၢအဒုးမဲာ်ဆှး တၢ်, ဒီးကန့ၢ်တၢ်န့ၢ်သါလၢဒီပုၢ်ဝဲၢ်အကျါလီၤ.

³ သပၢၤသိတၢ်န့ၣ်မ့ၢ်လၢစ့အဂီၢ်, ဒီးဖၣ်ကပူၤလၢထူအ ဂီၢ်လီၤ. မ့မ့ၢ်ယွၤမၤကွၢ်ပှၤအသးလီၤ.

⁴ ပှၤမၤတၢ်အၢတဂၤန့ၣ်ဒိကနၣ်ပျုၤလီတၢ်လီၤ. ပှၤက တိၤတၢ်ကဘျံးကဘျၣ်န့ၣ်ကနၣ်ပျ့ၤအအၢလီၤ.

⁵ ပှၤလၢအမၤတရီတပါ ပှၤဖှီၣ်ဖိယာ်ဖိန့ၣ် ဒုၣ်ဒွဲၣ်ပှၤ လၢအတ့အီၤလီၤ. ပှၤလၢအသးခုလၢတၢ်နးတၢ်ဖှီၣ်အ ဃိန့ၣ်ကဘၣ်အတၢ်ဒဲးဘးလီၤ.

⁶ ပှၤသးပှၢ်အခိၣ်သလုးန့ၣ် မ့ၢ်အဖိတဖၣ်အဖိတဖၣ်, ဒီးဖိတဖၣ်အလၤအကပီၤမ့ၢ်အပၢ်တဖၣ်လီၤ.

⁷ ပျုၤအဂ့ၤအဝါတဘၣ်လိာ်ဘၣ်ဒီး ပှၤဟးဂီၤဖိဘၣ်. ပျုၤကဘျံးကဘျၣ်တဘၣ်လိာ်ဘၣ်ဒီး ပှၤအိၣ်ဖျဲၣ်ပဒိၣ် နးန့ၢ်အန့ၣ်တက့ၢ်လီၤ.

⁸ ခိၣ်ဖးမ့ၢ်တၢ်မျၢ်လၢပှၤလၢ အန့ၢ်ဘၣ်အီၤအမဲာ်ညါ လီၤ. ဖဲအဃၣ်အသးတပူၤလၢ်လၢ်န့ၣ် ဘီၣ်ထီၣ်ညီထီၣ် လီၤ.

⁹ ပှၤလၢအကျၢၢ်ဘၢတၢ်ကမၣ်န့ၣ် ဃုတၢ်အဲၣ်တၢ်ကွံ လီၤ. မ့မ့ၢ်ပှၤလၢအစံးဘၣ်က့ၤတၢ်တမံၤန့ၣ်မၤလီၤဖး ပှၤဒီတံၤဒီသကိးလီၤ.

¹⁰ တၢ်သိၣ်ဃီၣ်အတၢ်ကတိၤန့ၣ် လဲၤနုာ်လၢပှၤအကူၣ် အဆးအပူၤယိာ်န့ၢ် တၢ်တီၢ်အဘျီတကယၤလၢပှၤဟး ဂီၤဖိအပူၤတက့ၢ်လီၤ.

¹¹ ပှၤအအၢန့ၣ် ဃုထဲတၢ်ပူထီၣ်လီၤ. မ်ဒ်န့ၣ်ဒီးတၢ် ကမၢလီၤကလူးလၢအသးကိၤတဂၤဆူအအိၣ်လီၤ.

¹² တၤသူလၢ ပှၤဟုၣ်န့ၢ်အဖိတဒုမ့ၢ်သဂၢၢ် ပှၤဒီးဂ့ၤ န့ၢ်ပှၤဟးဂီၤဖိလၢအတၢ်ဟးဂီၤအပူၤလီၤ.

¹³ ပှၤလၢအဟ့ၣ်ကၣ်တၢ်အၢလၢတၢ်ဂ့ၤ အဂီၢ်န့ၣ်တၢ် အၢတဟးဖးဘၣ်ဒီးအဟံၣ်ဘၣ်.

¹⁴ တၢ်အ့ၣ်လိာ်ဆိးက့လိာ်အခီၣ်ထံးန့ၣ် မ့ၢ်ထံဖျိးထီၣ် လီၤ. မၤသးဒ်န့ၣ်ဒီး တၢ်ဂ့ၢ်လိာ်ဘှီလိာ်တချုးဘၢၣ် ဖျိဒံးဘၣ်ဒီး, ဆိတ့ၢ်တက့ၢ်.

¹⁵ ပှၤလၢအပာ်တီပှၤတတီတလိၤ, ဒီးပှၤလၢအစံၣ်ညီၣ် ဃၣ်ပှၤအတီအလိၤန့ၣ် မ့ၢ်တၢ်သးဘၣ်အၢလၢယွၤအ မဲာ်ညါခံဂၤလၢာ်လီၤ.

¹⁶ တၢ်ပှ့ၤ အိၣ်ဝဲလၢပှၤဟးဂီၤဖိအစုပူၤ ဒ်သိးအကန့ၢ် ဘၣ်တၢ်ကူၣ်သ့, ဒီးအသးဆး တအိၣ်ဘၣ်န့ၣ်မ့ၢ်အ ဘၣ်မနုၤလဲၣ်.

¹⁷ ပှၤအတံၤအသကိးအဲၣ်တၢ်ကိး အဆၢအကတီၢ်ဒဲး, ဒီးပှၤဒီပုၢ်ဝဲၢ်အိၣ်ဖျဲၣ်ဝဲလၢတၢ်မၤကိၢ်မၤဂီၤအဂီၢ်လီၤ.

¹⁸ ပှၤလၢအသးဆးတအိၣ်ဘၣ်န့ၣ်ဟံးလိာ်ပှၤအစု, ဒီး ဟ့ၣ်ကီၤတၢ်လၢအတံၤအသကိးအမဲာ်ညါလီၤ.

¹⁹ ပှၤလၢအအဲၣ်တၢ်အ့ၣ်လိာ်ဆိးက့န့ၣ် အဲၣ်တၢ်ဒဲးဘး လီၤ. ပှၤလၢအမၤထီၣ်ထီအတြဲၤန့ၣ်ဃုတၢ်ဟးဂီၤလီၤ.

²⁰ ပှၤလၢအသးက့ၣ်န့ၣ် တထံၣ်န့ၢ်ဘၣ်တၢ်ဂ့ၤဘၣ်. ဒီး ပှၤလၢအပျ့ၤလီတၢ်န့ၣ် ကလီၤဘၣ်ဝဲလၢ တၢ်အၢအ ပူၤလီၤ.

²¹ ပှၤလၢအထီၣ်ဖိ ပှၤဟးဂီၤဖိန့ၣ်ဘၣ်တၢ်ကိၢ်တၢ်ဂီၤ လီၤ. ဒီးပှၤဟးဂီၤဖိအပၢ်န့ၣ်တသးခုဘၣ်.

²² သးလၢအခုန့ၣ်မၤဂ့ၤပနီၢ်ခိလီၤ. မ့မ့ၢ်သူၣ်ကၢ်သးလီၤ န့ၣ်ဒုးဃ့ထီၣ်ကွံာ်ပဃံပကွဲလီၤ. ²³ ပှၤတတီတလိၤန့ၣ် ဟံးထီၣ်ခိၣ်ဖးလၢအသးနါပှၢ်အ ပူၤ, ဒ်သိးအကဘိးက့ၣ်တၢ်စံၣ်ညီၣ်အကျဲလီၤ.

²⁴ တၢ်ကူၣ်သ့ အိၣ်ဝဲလၢပှၤအကူၣ် အဆးအမဲာ်အမဲာ် ညါလီၤ. မ့မ့ၢ်ပှၤဟးဂီၤဖိအမဲာ်အိၣ်ဝဲဆူဟီၣ်ခိၣ်အက တၢၢ်န့ၣ်လီၤ.

²⁵ ဖိခွါပှၤဟးဂီၤဖိန့ၣ်မ့ၢ်အပၢ်အတၢ်သးအုး, ဒီးတၢ်မၤ ကိၢ်မၤဂီၤပှၤလၢအဆံးစၢ်န့ၢ်အီၤအသးလီၤ.

²⁶ ဒုးလိးပှၤအတီအလိၤလၢစ့န့ၣ်တဂ့ၤစ့ၢ်ကီးဘၣ်, တီၢ် ပှၤအိၣ်ဖျဲၣ်ပဒိၣ်လၢ အတၢ်တီတၢ်လိၤအဃိန့ၣ် တဂ့ၤ ဘၣ်.

²⁷ ပှၤလၢအကတိၤတၢ်စှၤထံၣ်န့ၣ် အိၣ်ဒီးတၢ်သ့ၣ်ညါ လီၤ. ဒီးပှၤလၢအသးသ့န့ၣ်မ့ၢ်ပှၤအကူၣ်အဆးလီၤ.

²⁸ ပှၤဟးဂီၤဖိဒၣ်လဲာ်မ့ၢ်အိၣ်ဘှီၣ်ကလာ်ဒီး, ပှၤပာ်အီၤ လၢပှၤကူၣ်တၢ်သ့လီၤ. ပှၤလၢအကျၢၢ်တံာ်အထးခိၣ် န့ၣ်မ့ၢ်ပှၤအကူၣ်အဆးလီၤ.

၁၈

¹ ပှၤလၢအမၤလီၤဖးလီၤအသးန့ၣ် ဃုတၢ်ဘၣ်အသး ဒၣ်ဝဲလီၤ. ဃ့ၢ်သဖှိထီဒါတၢ်ကူၣ်သ့ခဲလၢာ်လီၤ.

² ပှၤဟးဂီၤဖိတမုာ်လၤဝဲလၢ တၢ်ကူၣ်တၢ်ဆးအပူၤ ဘၣ်. ဘၣ်အသးလၢအလီၣ်ဖျါအသးဒၣ်ဝဲဒိၣ်တက့ၢ် လီၤ.

³ တုၤပှၤတတီတလိၤဟဲဒီး, တၢ်မၤတရီတပါဟဲဝဲစ့ၢ် ကီး, ဒီးတၢ်မဲာ်ဆှးအိၣ်ဝဲဒီးတၢ်ဒုၣ်ဒွဲၣ်လီၤ.

⁴ ပှၤကညီအထးခိၣ်အတၢ်ကတိၤန့ၣ် မ့ၢ်ထံယိာ်လီၤ. တၢ်ကူၣ်သ့အထံထီၣ်ပၢၢ်မ့ၢ်ထံကျိလၢအယွၤလီၤလီၤ.

⁵ တၢ်ကွၢ်မဲာ်ပှၤတတီတလိၤဘၣ်န့ၣ်, ဒီးမၤဆူၣ်ပှၤတီ ပှၤလိၤလၢတၢ်စံၣ်ညီၣ်အပူၤန့ၣ်မ့ၢ်တၢ်တဂ့ၤဘၣ်.

⁶ ပှၤဟးဂီၤဖိအပျုၤလဲၤနုာ်ဆူတၢ်အ့ၣ်လိာ်ဆိးက့လိာ်, ဒီးအထးခိၣ်ကိးထီၣ်လၢတၢ်တီၢ်အဂီၢ်လီၤ.

⁷ ပှၤဟးဂီၤဖိအထးခိၣ်န့ၣ်မ့ၢ်တၢ်မၤဟးဂီၤအီၤလီၤ. ဒီး အပျုၤန့ၣ်မ့ၢ်ပျံၤသကွီၤလၢအသးသမူအဂီၢ်လီၤ.

⁸ ပှၤလၢအသီၣ်ဝံသဲကလၤ အတၢ်ကတိၤန့ၣ်မၤအသး ဒ်အတၢ်ကတိၤလိာ်ကွဲအသိး ဘၣ်ဆၣ်ဒီး, လဲၤလီၤဝဲ ဆူပှၤအသးကံၢ်ပူၤလီၤ.

⁹ ပှၤလၢအပာ်ကၢၣ်အသး လၢအတၢ်မၤအပူၤတဂၤစ့ၢ် ကီးန့ၣ်မ့ၢ်အဒီပုၢ်ဝဲၢ်ဒီးပှၤလၢအမၤဟးဂီၤတၢ်လီၤ.

¹⁰ ယွၤအမံၤမ့ၢ်တၢးထီခၢၣ်သနၢၢ်လီၤ. ပှၤတီပှၤလိၤန့ၣ် ဃ့ၢ်နုာ်ဆူအပူၤ, ဒီးအိၣ်ပူၤဖျဲးဝဲလီၤ.

¹¹ ပှၤထူးပှၤတီၤအတၢ်ထူးတၢ်တီၤန့ၣ်မ့ၢ်အဝ့ၢ်ဆူၣ်, ဒီး မၤသးဒ်တၢ်အခိၣ်ဒူထီအသိး လၢအတၢ်ဆိကမိၣ်ဒၣ်ဝဲ အပူၤလီၤ.

¹² လၢတၢ်ဟးဂီၤတချုးတုၤဒံးဘၣ်ဒီး, ပှၤကညီပာ်ထီၣ် ထီအသးလီၤ. ဒီးတၢ်ဆီၣ်လီၤအသးန့ၣ် အိၣ်ဆိန့ၢ်တၢ် လၤကပီၤတက့ၢ်လီၤ.

¹³ ပှၤလၢအစံးဆၢတၢ်တမံၤလၢ အတချုးနၢ်ဟူဒံးဘၣ် အဂ့ၢ်အကျိၤန့ၣ် မ့ၢ်ပှၤဟးဂီၤဖိအတၢ်ဒီးတၢ်မဲာ်ဆှးလၢ အဂီၢ်လီၤ.

¹⁴ ပှၤကညီအသးတူၢ်အတၢ်ဆါကဲလီၤ. မ့မ့ၢ်သူၣ်ကၢ် သးလီၤန့ၣ်မ့ၢ်မတၤတူၢ်ကကဲတဂၤလဲၣ်.

¹⁵ ပှၤအကူၣ်အဆးအသးန့ၣ် န့ၢ်ဘၣ်တၢ်သ့ၣ်ညါလီၤ. ဒီးပှၤကူၣ်တၢ်သ့အနၢ်န့ၣ်ဃုတၢ်သ့ၣ်ညါလီၤ.

¹⁶ ပှၤကညီအခိၣ်ဖးန့ၣ်အိးထီၣ်ကျဲ, ဒီးဆှၢအီၤဆူပှၤအ ဒိၣ်တဖၣ်အမဲာ်ညါလီၤ.

¹⁷ ပှၤလၢအလိာ်ကွီၢ်ဆိန့ၣ် ဖျါတီဖျါလိၤလီၤ. မ့မ့ၢ်ပှၤ လၢအဃၢၤဟဲဝဲ, ဒီးဃုကွၢ်အီၤလီၤ.

¹⁸ ဖးတၢ်န့ၣ် မၤလၢာ်တၢ်အ့ၣ်လိာ်ဆိးက့လိာ်, ဒီးမၤ လီၤဖးပှၤအဆူၣ်တဖၣ်လီၤ.

¹⁹ ဒီပုၢ်ဝဲၢ်လၢ အဘၣ်တၢ်မၤဆါအသးန့ၣ် ဆူၣ်န့ၢ်ဝ့ၢ် ခၢၣ်သနၢၢ်တက့ၢ်လီၤ. ဒီးအတၢ်အ့ၣ်လိာ်ဆိးက့လိာ် န့ၣ်မၤသးဒ်တိာ်ဧိၤတာ်ဧိၤအနီၣ်ဘိအသိးန့ၣ်လီၤ.

²⁰ ပှၤကညီကဘျဲးအီၣ်လၢအထးခိၣ်အတၤသၣ်, ကပှဲၤ ဝဲဒီးအပျုၤအတၢ်အါထီၣ်လီၤ.

²¹ တၢ်သံဒီးတၢ်မူအိၣ်ဝဲလၢပှၤပျ့ၤအစိကမီၤ, ဒီးပှၤလၢ အအဲၣ်အီၤန့ၣ်ကအီၣ်အတၤသၣ်လီၤ.

²² ပှၤလၢအန့ၢ်မါတဂၤန့ၣ် န့ၢ်ဘၣ်တၢ်အဂ့ၤတမံၤ, ဒီး ဘၣ်ဘျုးဘၣ်ဖှိၣ်လၢယွၤလီၤ.

²³ ပှၤဖှီၣ်ဖိယာ်ဖိန့ၣ် ဃ့ကညးတၢ်လီၤ. မ့မ့ၢ်ပှၤထူး ပှၤတီၤစံးဆၢတၢ်အဆူၣ်လီၤ.

²⁴ ပှၤဃုအတံၤအသကိးအါန့ၣ် ဃုအတၢ်ဟးဂီၤဒၣ်ဝဲ လီၤ. မ့မ့ၢ်ပှၤအဲၣ်တၢ်တဂၤလၢအစဲဘူးတၢ်ဒိၣ်န့ၢ်ဒီပုၢ် ဝဲၢ်တက့ၢ်န့ၣ်အိၣ်ဝဲလီၤ.

၁၉

¹ ပှၤဖှီၣ်ဖိယာ်ဖိလၢ အလဲၤတၢ်လၢလၢပှဲၤပှဲၤန့ၣ်ဂ့ၤန့ၢ် ပှၤလၢအပျုၤက့ၣ်, ဒီးမ့ၢ်ပှၤဟးဂီၤဖိတက့ၢ်လီၤ.

² ပှၤအသးတအိၣ်ဘၣ်ဒီးတၢ်သ့ၣ်ညါန့ၣ် တဂ့ၤစ့ၢ်ကီး ဘၣ်, ဒီးပှၤလၢအလဲၤတၢ်ချ့လၢအခီၣ်န့ၣ်ဟးဖျိးကျဲလီၤ.

³ ပှၤကညီအပှၤဟးဂီၤဖိအတၢ်န့ၣ်မၤဟးဂီၤအကျဲ, ဒီး အသးကဒူးကဒ့ၣ်တၢ်လၢယွၤအလိၤလီၤ.

⁴ တၢ်ထူးတၢ်တီၤဒုးကဲထီၣ် ပတံၤပသကိးအါဂၤလီၤ. မ့မ့ၢ်ပှၤဖှီၣ်ဖိယာ်ဖိလီၤဖးဒီးအတံၤအသကိးလီၤ.

⁵ ပှၤအုၣ်အသးကဘျံးကဘျၣ်န့ၣ် ကတူၢ်တၢ်ဒဲးဘး လီၤ. ဒီးပှၤလၢအကတိၤကဘျံးကဘျၣ်န့ၣ် တပူၤဖျဲး ဘၣ်ဝဲဘၣ်.

⁶ ပှၤအါဂၤလွဲပဒိၣ်အသး, ဒီးပှၤခဲလၢာ်ဒီတံၤဒီသကိး ဒီးပှၤလၢအဟ့ၣ်ခိၣ်ဖးလီၤ.

⁷ ပှၤဖှီၣ်ဖိယာ်ဖိ အဒီပုၢ်ဝဲၢ်ခဲလၢာ်န့ၣ် သးဟ့အီၤလီၤ. အတံၤအသကိးဟးယံၤဒီးအီၤအါန့ၢ်အန့ၣ်တက့ၢ်လီၤ. အဝဲဒၣ်လူၤအီၤလၢအတၢ်ကတိၤလီၤ. အဝဲသ့ၣ်တ အိၣ်ဘၣ်.

⁸ ပှၤလၢအန့ၢ်ဘၣ်တၢ်ကူၣ်သ့န့ၣ်အဲၣ်အသးဒၣ်ဝဲလီၤ. ပှၤလၢအတိၢ်န့ၢ် တၢ်ကူၣ်တၢ်ဆးန့ၣ်ကထံၣ်န့ၢ်တၢ်ဂ့ၤ လီၤ.

⁹ ပှၤအုၣ်အသးကဘျံးကဘျၣ်န့ၣ် ကတူၢ်တၢ်ဒဲးဘး လီၤ. ဒီးပှၤလၢအကတိၤတၢ်ကဘျံးကဘျၣ်န့ၣ်ကတုၤ ဝဲလၢတၢ်ဟးဂီၤလီၤ.

¹⁰ အိၣ်မုာ်ဆိးပၢၤန့ၣ်တကြၢးဘၣ်ဒီးပှၤဟးဂီၤဖိဘၣ်. ဒီး တၢ်အကုၢ်အပှၤပၢပဒိၣ်တဖၣ် နးန့ၢ်အန့ၣ်တက့ၢ်လီၤ.

¹¹ ပှၤကူၣ်တၢ်သ့န့ၣ်သးထီၣ်ကီ, ဒီးလဲၤကပာ်တၢ်က မၣ်န့ၣ်မ့ၢ်အလၤကပီၤလီၤ.

¹² စီၤပၤအသးထီၣ်န့ၣ် မၤသးဒ်ခ့ယုၢ်အသီၣ်ထီၣ်ရုၢ်ရုၢ် အသိးန့ၣ်လီၤ. မ့မ့ၢ်တၢ်ဘၣ်အသးန့ၣ် မၤသးဒ်ပစီၤ ထံအိၣ်ဝဲလၢနီၣ်ဧိၤမံၤဧိၤအဖီခိၣ်အသိးန့ၣ်လီၤ.

¹³ ဖိခွါပှၤဟးဂီၤဖိန့ၣ် မ့ၢ်အပၢ်အတၢ်နးတၢ်ဖှီၣ်လီၤ. ဒီး ပမါလၢအဂ့ၢ်လိာ်တၢ်န့ၣ်မ့ၢ်တၢ်လီၤစီၤတထံၣ်ဃီလီၤ.

¹⁴ ဒီးဟံၣ်ဒီးဃီ, ဒီးတၢ်ထူးတၢ်တီၤန့ၣ် မ့ၢ်တၢ်န့ၢ်သါ လၢပၢ်လီၤ. မ့မ့ၢ်မါလၢအကူၣ်တၢ်သ့န့ၣ်ဟဲလၢယွၤ တခီလီၤ.

¹⁵ တၢ်အကၢၣ်န့ၣ် ဒုးလီၤဘၣ် တၢ်မံသပ့ၤလၢပှၤအ လိၤ, ဒီးပှၤအကၢၣ်န့ၣ်ကဘၣ်တၢ်သၣ်ဝံၤလီၤဒိလီၤ.

¹⁶ ပှၤလၢအတိၢ်န့ၢ်တၢ်မၤလိာ်န့ၣ် ကွၢ်က့ၤအသးဒၣ်ဝဲ, မ့မ့ၢ်ပှၤလၢအတပးကဲဘၣ်အကျဲန့ၣ်ကသံလီၤ.

¹⁷ ပှၤလၢအသးကညီၤ ပှၤဖှီၣ်ဖိန့ၣ် ဒုးလိၢ်တၢ်လၢ ယွၤလီၤ. ဒီးတၢ်လၢအမၤဂ့ၤတၢ်န့ၣ် ယွၤကဟ့ၣ်ကၣ် အီၤလီၤ.

¹⁸ တၢ်မုၢ်လၢ်အိၣ်ဝဲအဖၢမုၢ်ဒီး, သိၣ်ဃီၣ်နဖိခွါတက့ၢ်. ဒီးဆၢသံအီၤတဂ့ၤ.

¹⁹ ပှၤလၢအသးထီၣ်ဆူၣ်န့ၣ်ကဘၣ်တၢ်နးတၢ်ဖှီၣ်လီၤ. အဂ့ၢ်ဒ်အံၤ, နမ့ၢ်မၤပူၤမၤဖျဲးအီၤဘၣ်ဆၣ်ဒီး, နဘၣ်မၤ ကဒီးတဘျီလီၤ.

²⁰ ကနၣ်တၢ်ဒုးကူၣ်တၢ်, ဒီးကနၣ် တၢ်သိၣ်လိတၢ်, ဒ် သိးနကူၣ်တၢ်ကသ့လၢ နနံၣ်ဧိၤလါဧိၤအခံကတၢၢ်န့ၣ် တက့ၢ်.

²¹ တၢ်ကူၣ်ထီၣ်ဖးလီၤအါမံၤအိၣ်ဝဲလၢ ပှၤကညီအသး ကံၢ်ပူၤလီၤ. မ့မ့ၢ်ယွၤအကူၣ်ထီၣ်တၢ်န့ၣ် ကအိၣ်ဂၢၢ် ဆိးကျၢၤလီၤ.

²² တၢ်ဂ့ၤလၢပှၤဆၢမၤန့ၣ် မ့ၢ်အဘျုးအဖှိၣ်လီၤ. ဒီးပှၤ ဖှီၣ်ဖိယာ်ဖိန့ၣ် ဂ့ၤန့ၢ်ပှၤကတိၤတၢ်, ကဘျံးကဘျၣ်တ က့ၢ်လီၤ.

²³ တၢ်ပျံၤယွၤဘၣ်ဃးဒီး တၢ်မူလီၤ. ဒီးပှၤကမံသူၣ်မံ သး, ဒီးတၢ်အၢတအိၣ်သကိးဘၣ်အီၤဘၣ်.

²⁴ ပှၤအကၢၣ်န့ၣ်ဘျၢလီၤအစုလၢလီခီအပူၤ, ဒီးတထုး က့ၤဘၣ်ဆူအထးခိၣ်ဒၣ်လဲာ်ဘၣ်.

²⁵ တီၢ်ပှၤလၢ အမၤတၢ်တရီတပါတက့ၢ်. ဒီးပှၤလၢအ တမၤလိဘၣ်တၢ်န့ၣ်ကပလီၢ်အသးလီၤ. ဒီးသိၣ်ဃီၣ် ပှၤအကူၣ်အဆးတက့ၢ်. ဒီးကနၢ်ပၢၢ်တၢ်သ့ၣ်ညါလီၤ.

²⁶ ပှၤလၢအမၤဆူၣ်အပၢ်, ဒီးဟီထီၣ်ကွံာ်အမိၢ်န့ၢ်မ့ၢ်ဖိ ခွါလၢအဒုးအိၣ်ထီၣ်တၢ်မဲာ်ဆှး, ဒီးတၢ်ဒုၣ်ဒွဲၣ်လီၤ.

²⁷ ယဖိခွါဧၢ, သုတဒိကနၣ်လၢၤ တၢ်သိၣ်လိလၢအ ဒုးဟးဖျိးနၤလၢတၢ်သ့ၣ်ညါအတၢ်ကတိၤန့ၣ်တဂ့ၤ.

²⁸ ပှၤအုၣ်အသးလၢအအၢအသီန့ၣ် တပးကဲဘၣ်တၢ် စံၣ်ညီၣ်တီဘၣ်. ဒီးပှၤတတီတလိၤဘၣ်န့ၣ်အကိာ်ပူၤ ယူၢ်လီၤတၢ်အၢလီၤ.

²⁹ တၢ်စံၣ်ညီၣ်ဃၣ် အိၣ်ကတဲာ်ကတီၤအသးလၢပှၤမၤ တရီတပါတၢ်အဂီၢ်, ဒီးတၢ်တီၢ်အလီၢ်လၢပှၤဟးဂီၤဖိ အချၢဃံအဂီၢ်လီၤ.

၂၀

¹ စပံးထံန့ၣ် မ့ၢ်တၢ်မၤတရီတပါတၢ်, ဒီးသံးဧိၤဂာ်ဧိၤ န့ၣ်မ့ၢ်တၢ်မၤတၢထီၣ်တၢလီၤတၢ်လီၤ. ဒီးကယဲၢ်ပှၤ လၢအလဲၤကနူၤကပၤလၢအဃိန့ၣ်ကူၣ်တၢ်တသ့ဘၣ်.

² စီၤပၤမၤပျံၤတၢ်န့ၣ် မၤသးဒ် ခ့ယုၢ်သီၣ်ရုၢ်ရုၢ်အသိး န့ၣ်, ဒီးပှၤလၢအထိၣ်ဂဲၤအသးထီၣ်အီၤန့ၣ်မၤကမၣ် ဘၣ်အသးဒၣ်ဝဲန့ၣ်လီၤ.

³ ပှၤအိၣ်လီၤဖးအသး ဒီးတၢ်အ့ၣ်လိာ်ဆိးက့လိာ်န့ၣ် မ့ၢ်အလၤကပီၤလီၤ. မ့မ့ၢ်ကယဲၢ်ပှၤဟးဂီၤဖိန့ၣ်ကအ့ၣ် လိာ်အသးလီၤ.

⁴ ပှၤအကၢၣ်န့ၣ်တထဲၣ်ဘၣ်တၢ်လၢ တၢ်ဂိၢ်အဃိလီၤ. မၤသးဒ်န့ၣ် ဒီးကဃ့တၢ်လၢကူးဘုအခါ, ဒီးအတၢ် တအိၣ်ဘၣ်.

⁵ တၢ်ကူၣ်ထီၣ်ဖးလီၤလၢ ပှၤကညီအသးကံၢ်ပူၤန့ၣ်မ့ၢ် ထံယိာ်လီၤ. ဘၣ်ဆၣ်ဒီးပှၤအသူၣ်ဆးအသးဆးန့ၣ် ထုးထီၣ်ဝဲလီၤ.

⁶ ပှၤအါဂၤကိးထီၣ် တဂၤအတၢ်ဘျုးဒၣ်ဝဲ, တဂၤအ တၢ်ဘျုးဒၣ်ဝဲလီၤ. မ့မ့ၢ်ပှၤလၢအကလုၢ်တီန့ၣ်မ့ၢ်မတၤ ထံၣ်န့ၢ်အီၤသ့တဂၤလဲၣ်.

⁷ ပှၤတီပှၤလိၤန့ၣ် လဲၤတၢ်လၢအတၢ်လၢတၢ်ပှဲၤအပူၤ လီၤ. အဖိအလံၤဘၣ်တၢ်ဆိၣ်ဂ့ၤလၢအလီၢ်ခံန့ၣ်လီၤ.

⁸ စီၤပၤဆ့ၣ်နီၤဝဲလၢ လီၢ်ပစိာ်စံၣ်ညီၣ်တၢ်န့ၣ် ဂုၤက ယဲၢ်တၢ်အၢလၢအမဲာ်လီၤ.

⁹ ယသ့စီလံယသးလံ, ယတၢ်ဒဲးဘးတအိၣ်ဘၣ်န့ၣ် မ့ၢ်မတၤစံးသ့တဂၤလဲၣ်.

¹⁰ စီၤပီၢ်သၣ်ခံမံၤ, ဒီးနီၣ်ဃီၣ်တၢ်ခံမံၤန့ၣ် မ့ၢ်တၢ်သး ဘၣ်အၢခံမံၤလၢာ်လၢယွၤအမဲာ်ညါလီၤ.

¹¹ ဖိသၣ်ဒၣ်လဲာ်န့ၣ် အမၤတၢ်ကဆှီဧါ. အမၤတၢ်လိၤ ဧါန့ၣ်ပှၤသ့ၣ်ညါအီၤလၢအမၤတၢ်လီၤ.

¹² နၢ်လၢအနၢ်ဟူတၢ်, မဲာ်လၢအထံၣ်တၢ်န့ၣ် ယွၤတ့ လီၤအီၤခံမံၤလၢာ်လီၤ.

¹³ အဲၣ်ဒိးမံန့ၣ်တဂ့ၤ. နကဖှီၣ်လီၤယာ်လီၤဘၣ်ဖုးလီၤ. အိးထီၣ်နမဲာ်တက့ၢ်. ဒီးနကဘျဲးအီၣ်ဒီးကိၣ်လီၤ.

¹⁴ တၢ်နီတမံၤ, တၢ်နီတမံၤန့ၣ်ပှၤပှ့ၤတၢ်စံးဝဲဒၣ်လီၤ. ဒီး ဟးထီၣ်ကွံာ်အလီၢ်ခံန့ၣ်, ပာ်ကဖိအသးလီၤ.

¹⁵ ထူဒီးတၢ်မျၢ်ပလဲဂီၢ်မုၢ်အိၣ်ဝဲလီၤ. မ့မ့ၢ်တၢ်သ့ၣ်ညါ အပျုၤန့ၣ်မ့ၢ်တၢ်လုၢ်ဒိၣ်ပှ့ၤဒိၣ်အလီခီလီၤ.

¹⁶ ပှၤလၢအအုၣ်ခီၣ်အသးလၢ ပှၤလၢအတသ့ၣ်ညါ ဘၣ်ဝဲအဂီၢ်န့ၣ် ဟံးန့ၢ်အယၣ်တက့ၢ်. ဒီးဟံးကီၤလၢ ပှၤလၢအအုၣ်ကီၤအသးလၢပှၤလၢအတသ့ၣ်ညါဘၣ်ဝဲ တဖၣ်အဂီၢ်တက့ၢ်.

¹⁷ ကိၣ်ကဘျံးကဘျၣ်န့ၣ် ဆၢဝဲလၢပှၤကညီအဂီၢ်လီၤ. ဘၣ်ဆၣ် ဒီးလၢအလီၢ်ခံန့ၣ်အထးခိၣ်ကပှဲၤဒီးလၢၢ်ပြံ ဧိၤလီၤ.

¹⁸ တၢ်ကူၣ်ထီၣ်ဖးလီၤန့ၣ် အိၣ်ဂၢၢ်ဆိးကျၢၤလၢတၢ် ကူၣ်လိာ်အသးလီၤ. မၤတၢ်ဒုးသုးအိၣ်ဒီး တၢ်ဒုးကူၣ် တၢ်အဂ့ၤအဘၣ်န့ၣ်တက့ၢ်.

¹⁹ ပှၤလၢအလဲၤခဲၣ်တၢ်န့ၣ် လီၣ်ဖျါထီၣ်တၢ်အိၣ်ခူသူၣ် လီၤ. မၤသးဒ်န့ၣ်ဒီး, ဒီတံၤဒီသကိးဒီး ပှၤအဲးထီၣ်ဖး လဲၢ်အပျုၤတဂ့ၤ.

²⁰ ပှၤလၢအဆိၣ်အၢအမိၢ်အပၢ်န့ၣ် အမ့ၣ်အူဒၢကလီၤ ပံာ်လၢတၢ်ခံးသူလီၤ.

²¹ ပှၤန့ၢ်ဘၣ် တၢ်အစုလီၢ်အခီၣ်ခိၣ်ချ့ချ့ လၢအခီၣ်ထံး ဘၣ်ဆၣ်ဒီး, အကတၢၢ်န့ၣ်တဘၣ်ဘၣ်တၢ်ဆိၣ်ဂ့ၤဘၣ်.

²² ယကဟ့ၣ်ကၣ် တၢ်အၢန့ၣ်စံးတဂ့ၤ. အိၣ်ခိးယွၤတ က့ၢ်. ဒီးအဝဲဒၣ်ကမၤစၢၤနၤလီၤ.

²³ စီၤပီၢ်သၣ်ခံမံၤန့ၣ် မ့ၢ်တၢ်သးဘၣ်အၢလၢ ယွၤအ မဲာ်ညါလီၤ. ဒီးစီၤပီၢ်သၣ်လၢအလီတၢ်န့ၣ်တဂ့ၤဘၣ်.

²⁴ ပှၤအထွဲတၢ်န့ၣ်ဘၣ်ဃးဒီးယွၤလီၤ. ဒီးပှၤကညီအ နၢ်ကပၢၢ်အကျဲဒ်လဲၣ်.

²⁵ ပှၤလၢအဆိၣ်လီၤအသးချ့ဒီးသံကွၢ်က့ၤ တၢ်လၢအ ဆိၣ်တၢ်အလီၢ်ခံန့ၣ် ကဲထီၣ်ဝဲလၢတၢ်ပျံၤသကွီၤလၢ အဂီၢ်လီၤ.

²⁶ စီၤပၤလၢအကူၣ်တၢ်သ့န့ၣ် ဂုၤပှၤတတီတလိၤ, ဒီးဒုး လဲၤထးကြၢ်လၢအဖီခိၣ်လီၤ.

²⁷ ပှၤကညီအသးန့ၣ်မ့ၢ်ယွၤအမ့ၣ်အူဒၢလီၤ. ဃုတၢ်တ ဒၢလၢပနီၢ်ခိအပူၤခဲလၢာ်လီၤ.

²⁸ တၢ်ဘျုးတၢ်ဖှိၣ်ဒီးတၢ်မ့ၢ်တၢ်တီပၢၤဃာ်စီၤပၤ, ဒီးက မၤကျၢၤအလီၢ်ပစိာ်လၢတၢ်သးကညီၤလီၤ.

²⁹ ပှၤဖိၣ်သၣ်ခွါအလၤကပီၤန့ၣ် မ့ၢ်အဂံၢ်အဘါ, ဒီးပှၤ သးပှၢ်အဃံအလၤန့ၣ်မ့ၢ်အခိၣ်ဝါလီၤ.

³⁰ တၢ်တီၢ်အပူၤလီၢ်န့ၣ်မၤကဆှီကွံာ်တၢ်အၢ, တၢ်တီၢ် အလီၢ်လၢအပၢၢ်လၢပဟၢဖၢအသးကံၢ်ပူၤလီၤ.

၂၁

¹ စီၤပၤအသးအိၣ်ဝဲလၢယွၤအစုပူၤ ဒ်ထံကျိအသိးန့ၣ် လီၤ. ဘိးဃၣ်အီၤဖဲအဘၣ်အသးလီၤ.

² ပှၤကညီအကျဲကိးဘိဒဲးလိၤဝဲလၢအမဲာ်ဒၣ်ဝဲလီၤ. မ့ မ့ၢ်ယွၤစီၤကွၢ်ပှၤကညီအသးလီၤ.

³ မၤတၢ်တီတၢ်လိၤဒီး တၢ်စံၣ်ညီၣ်တီန့ၣ်ဘၣ်ယွၤအ သးဒိၣ်န့ၢ်တၢ်လုၢ်တၢ်ပာ်တက့ၢ်လီၤ.

⁴ တၢ်ပာ်ထီၣ်ထီအမဲာ်, ဒီးတၢ်ပာ်ကဖိအသး, ပှၤတ တီတလိၤအမ့ၣ်အူဒၢန့ၣ်မ့ၢ်တၢ်ဒဲးဘးလီၤ.

⁵ ပှၤအခုအကူၣ်ထီၣ်တၢ်န့ၣ် ကဲထီၣ်ထဲတၢ်အါထီၣ် လီၤ. မ့မ့ၢ်ကယဲၢ်ပှၤလၢအမၤချ့ချ့န့ၣ် ဖှီၣ်လီၤယာ်လီၤ လီၤ.

⁶ စုလီၢ်ခီၣ်ခိၣ် လၢပှၤမၤန့ၢ်အီၤလၢပျ့ၤကဘျံးကဘျၣ် န့ၣ်မ့ၢ်ဘှ့ၣ်လၢတၢ်အူဒံကွံာ်အီၤ, မ့ၢ်အဃုတၢ်သံလီၤ.

⁷ ပှၤတတီတလိၤ အတၢ်မၤဆူၣ်မၤစိးကထုးထီၣ်ကွံာ် အီၤလီၤ. အဂ့ၢ်ဒ်အံၤ, မၤတၢ်စံၣ်ညီၣ်အသးတအိၣ်ဘၣ်.

⁸ ပှၤလၢအဃၢလၢတၢ်ဒဲးဘး, အကျဲက့ၣ်ဒိၣ်မးလီၤ. မ့ မ့ၢ်ပှၤကဆှီအမၤတၢ်လိၤဝဲလီၤ.

⁹ ပှၤအိၣ်ဝဲဆိးဝဲလၢဟံၣ်ခိၣ်အသနၢၣ်န့ၣ်ဂ့ၤန့ၢ်ပှၤအိၣ် ဒီးပိာ်မုၣ်လၢ အဂ့ၢ်လိာ်ဘှီလိာ်တဂၤလၢဟံၣ်ဖးလဲၢ်အ ပူၤတက့ၢ်လီၤ.

¹⁰ ပှၤတတီတလိၤအသးဆၢတၢ်အၢလီၤ. ပှၤလၢအ ဃၢၤတဘၣ်ဘျုးလၢအီၤဘၣ်.

¹¹ တုၤပှၤမၤတၢ်တရီတပါဘၣ် တၢ်တူၢ်တၢ်ဒဲးဘးဒီး, ပှၤလၢအတမၤလိဘၣ်တၢ်ဘၣ်န့ၣ် န့ၢ်တၢ်ကူၣ်သ့လီၤ. ဒီး တုၤပှၤကူၣ်တၢ်သ့ ဒိးတၢ်သိၣ်က့ၤဒီး, န့ၢ်ဘၣ်တၢ် သ့ၣ်ညါလီၤ.

¹² တၢ်တီတဂၤန့ၣ် ကွၢ်ထံပှၤတတီတလိၤအဟံၣ်လီၤ. တ့ၢ်လီၤပှၤတတီတလိၤဆူတၢ်ဟးဂီၤအပူၤလီၤ.

¹³ ပှၤလၢအဆွံတံာ်အနၢ်လၢ ပှၤဖှီၣ်ဖိယာ်ဖိအတၢ်ကိး တဂၤန့ၣ်ကကိးစ့ၢ်ကီးအဝဲဒၣ်, ဒီးတၢ်တစံးဆၢအီၤ ဘၣ်.

¹⁴ တၢ်ဟ့ၣ်ခိၣ်ဖးလၢ တၢ်ခူသူၣ်န့ၣ်မၤစၢ်လီၤတၢ်သး ထီၣ်, ဒီးတၢ်ဟ့ၣ်တၢ်လၢသးနါပှၢ်အပူၤန့ၣ်မၤစၢ်တၢ် သးထီၣ်ဆူၣ်လီၤ.

¹⁵ တၢ်စံၣ်ညီၣ်တီန့ၣ်မ့ၢ်တၢ်သးခုလၢပှၤတီပှၤလိၤအဂီၢ် လီၤ. မ့မ့ၢ်တၢ်မၤဟးဂီၤန့ၣ်အိၣ်ဝဲလၢပှၤမၤတၢ်အၢအဂီၢ် လီၤ.

¹⁶ ပှၤလၢအဟးဖျိးတၢ်ကူၣ်တၢ်ဆးအကျဲန့ၣ်ကအိၣ်က ဆိးဝဲလၢပှၤသံအတၢ်အိၣ်ဖှိၣ်အပူၤလီၤ.

¹⁷ ပှၤလၢအအဲၣ်ဒိး တၢ်မုာ်လၤန့ၣ် ကကဲထီၣ်ပှၤဖှီၣ် ဖိယာ်ဖိလီၤ. ပှၤလၢအအဲၣ်ဒိးစပံးထံ, ဒီးသိဧိၤချါဧိၤန့ၣ် တထူးတတီၤဘၣ်ဝဲဘၣ်.

¹⁸ ပှၤတတီတလိၤန့ၣ်ကကဲထီၣ်ပှၤတီပှၤလိၤအပှ့ၤလီၤ. ဒီးပှၤလီတၢ်ဖိကအိၣ်လၢပှၤအလိၤအလီၢ်လီၤ.

¹⁹ တၢ်အိၣ်ဝဲဆိးဝဲလၢပှၢ်မုၢ်ကနၢန့ၣ် ဂ့ၤန့ၢ်အိၣ်ဝဲဒီး ပိာ်မုၣ်လၢအဂ့ၢ်လိာ်ဘှီလိာ်ဒီး သးထီၣ်ဒၣ်တၢ်တက့ၢ် လီၤ.

²⁰ တၢ်လုၢ်ဒိၣ်ပှ့ၤဒိၣ်လၢအဘၣ်ပှၤအသးဒီး သိဧိၤချါဧိၤ န့ၣ်အိၣ်ဝဲလၢပှၤကူၣ်တၢ်သ့အဟံၣ်ပူၤလီၤ. မ့မ့ၢ်ပှၤဟး ဂီၤဖိမၤလၢာ်အီၤလီၤ.

²¹ ပှၤလၢအလူၤတၢ်တီတၢ်လိၤဒီး တၢ်သးကညီၤန့ၣ်က ထံၣ်န့ၢ်တၢ်မူ, ဒီးတၢ်တီတၢ်လိၤ, ဒီးတၢ်လၤကပီၤလီၤ.

²² ပှၤကူၣ်တၢ်သ့န့ၣ် ထီၣ်ဘၣ်ပှၤအဆူၣ်အဝ့ၢ်ခိၣ်ဒူဒီး မၤလီၤပှီၢ်တၢ်အဆူၣ်လၢအသန့ၤအသးလၢအီၤလီၤ.

²³ ပှၤလၢအပၢၤအထးခိၣ်, ဒီးအပျ့ၤန့ၣ်တြီကွံာ်တၢ်မၤ ကိၢ်မၤဂီၤလၢအသးလီၤ.

²⁴ ပှၤပာ်အသးထီၣ်ထီ, ဒီးပာ်ကဖိအသးန့ၣ် အမံၤမ့ၢ် တၢ်မၤတရီတပါလီၤ. မၤဝဲလၢအသးကဖိလိ နးကဲၣ် ဆိးလီၤ.

²⁵ ပှၤအကၢၣ်အဆၢတၢ်န့ၣ်မၤသံအီၤလီၤ. အဂ့ၢ်ဒ်အံၤ, အစုမၤတၢ်န့ၣ်အသးတအိၣ်ဘၣ်.

²⁶ ဆၢန့ၢ်တၢ်ဆူၣ်ဆူၣ်ကလဲာ်သ့တနံၤကျၢၤလီၤ. မ့မ့ၢ် ပှၤတီပှၤလိၤန့ၣ်ဟ့ၣ်ဒၣ်တၢ်, ဒီးတသးလီဘၣ်တၢ်ဘၣ်.

²⁷ ပှၤတတီတလိၤဘၣ်အလုၢ်တၢ်န့ၣ် မ့ၢ်တၢ်သးဘၣ် အၢလီၤ. ဒီးဖဲအဟဲစိာ်ဝဲဒီးအကူၣ်တၢ်အၢန့ၣ်နးန့ၢ်အ န့ၣ်တက့ၢ်ဆံးဒိၣ်လဲၣ်.

²⁸ ပှၤအုၣ်အသးကဘျံးကဘျၣ်န့ၣ် ကတုၤလၢတၢ်ဟး ဂီၤလီၤ. မ့မ့ၢ်ပှၤလၢအနၢ်ဟူတၢ်န့ၣ် ကကတိၤတၢ်တ ထံၣ်ဃီလီၤ.

²⁹ ပှၤတတီတလိၤဘၣ်န့ၣ်ပာ်ကဲၤအမဲာ်လီၤ. မ့မ့ၢ်ပှၤ လၢအသးစၢၢ်ဆၢန့ၣ်ကတဲာ်ကတီၤအကျဲလီၤ.

³⁰ တၢ်ကူၣ်သ့, ဒီးတၢ်ကူၣ်တၢ်ဆး, ဒီးတၢ်ကူၣ်ထီၣ် ဖးလီၤထီဒါယွၤန့ၣ်တအိၣ်ဘၣ်.

³¹ ကသ့ၣ်ကတဲာ်ကတီၤအသးလၢ ဒုးသုးမုၢ်တနံၤအ ဂီၢ်, မ့မ့ၢ်တၢ်မၤနၢၤတၢ်ဟဲလၢယွၤလီၤ.

၂၂

¹ ပှၤဃုထၢအမံၤဂ့ၤအသၣ်ဂ့ၤန့ၣ် အလီၢ်အိၣ်ဒိၣ်န့ၢ် တၢ်ထူးဒိၣ်တၢ်တီၤအါတက့ၢ်လီၤ. ဒီးတၢ်အဲၣ်ဂ့ၤန့ၢ် ကျိၣ်ဧိၤစ့ဧိၤဒီးထူဧိၤလွဲဧိၤတက့ၢ်လီၤ.

² ပှၤထူးပှၤတီၤဒီးပှၤဖှီၣ်ဖိယာ်ဖိသဂၢၢ်လိာ်အသးလီၤ. ယွၤတ့လီၤအီၤခဲလၢာ်လီၤ.

³ ပှၤကူၣ်တၢ်ဘၣ်န့ၣ်, ထံၣ်ဘၣ်တၢ်အၢ, ဒီးပာ်တဒၢအ သးလီၤ. မ့မ့ၢ်ပှၤအတမၤလိဘၣ်တၢ်ဘၣ်န့ၣ်လဲၤဒၣ် တၢ်, ဒီးဘၣ်တၢ်နးတၢ်ဖှီၣ်လီၤ.

⁴ တၢ်သူၣ်စူၤသးစူၤဒီးတၢ်ပျံၤယွၤန့ၣ်အကတၢၢ်မ့ၢ်တၢ် ထူးတၢ်တီၤ, တၢ်လၤကပီၤ, ဒီးတၢ်မူန့ၣ်လီၤ.

⁵ တၤဆှုၣ်တၤမဲ, ဒီးတၢ်ပျံၤသကွီၤအိၣ်ဝဲလၢပှၤလီတၢ် အကျဲလီၤ. ပှၤလၢအကွၢ်လီၤအသးန့ၣ်ကအိၣ်ယံၤဒီး အီၤလီၤ.

⁶ ဆှၢဖိဒံဖိသၣ်လၢအကျဲဧိၤကပူၤဧိၤန့ၣ်တက့ၢ်. ဒီးတုၤ အသးပှၢ်ဒီး, တဟးဖးဒီးအီၤဘၣ်.

⁷ ပှၤထူးပှၤတီၤကပၢပှၤဖှီၣ်ဖိယာ်ဖိ, ဒီးပှၤလၢအလိၢ်စ့ န့ၣ်ကကဲထီၣ်စ့ကစၢ်အကုၢ်လီၤ.

⁸ ပှၤလၢအဖှံတၢ်မၤအၢန့ၣ်ကကူးတၢ်နးတၢ်ဖှီၣ်, ဒီးအ သးထီၣ်အနီၣ်တီၢ်ကဟးဂီၤလီၤ.

⁹ ပှၤလၢအဟံးစုကွၢ်မဲာ်တၢ်န့ၣ် ကဘၣ်တၢ်ဆိၣ်ဂ့ၤ လီၤ. အဂ့ၢ်ဒ်အံၤ, ဟ့ၣ်လီၤအတၢ်အီၣ်လၢပှၤဖှီၣ်ဖိယာ်ဖိ လီၤ.

¹⁰ ဟီထီၣ်ကွံာ်ပှၤလၢ အမၤတၢ်တရီတပါန့ၣ်တက့ၢ်, ဒီးတၢ်ဂ့ၢ်လိာ်ဘှီလိာ်ကဟးထီၣ်, မ့ၢ်မးတၢ်အ့ၣ်လိာ် ဆိးက့လိာ်, ဒီးတၢ်ဒုၣ်ဒွဲၣ်န့ၣ်ကဆိတ့ၢ်လီၤ.

¹¹ ပှၤလၢအအဲၣ်တၢ်သးကဆှီန့ၣ်, တၢ်ဘျုးတၢ်ဖှိၣ်အိၣ် ဝဲလၢအထးခိၣ်လိၤန့ၣ်, ဒီးစီၤပၤကဒီတံၤဒီသကိးဒီးအီၤ လီၤ.

¹² ယွၤအမဲာ်ပၢၤတၢ်သ့ၣ်ညါလီၤ. မ့မ့ၢ်အကမၤဟးဂီၤ ပှၤလီတၢ်အတၢ်ကတိၤလီၤ.

¹³ ပှၤအကၢၣ်စံးဝဲဒၣ်, ခ့ယုၢ်တဒုအိၣ်ဝဲလၢခိလီၤ. တၢ် ကမၤသံယၤလၢကျဲပူၤလီၤ.

¹⁴ ပိာ်မုၣ်ဟးဂီၤအထးခိၣ်န့ၣ်မ့ၢ်တၢ်ပူၤယိာ်လီၤ. ပှၤလၢ ယွၤသးဘၣ်အၢအီၤန့ၣ်ကလီၤတဲာ်လၢအပူၤလီၤ.

¹⁵ ပှၤဟးဂီၤဖိအတၢ်ဘိၣ်အသးလၢ ဖိသၣ်အသးကံၢ်ပူၤ လီၤ. တၢ်သိၣ်ဃီၣ်အနီၣ်တီၢ်န့ၣ်ကဟီထီၣ်ကွံာ်ဝဲယံၤ ဒီးအီၤလီၤ.

¹⁶ ပှၤမၤဆူၣ်မၤစိး ပှၤဖှီၣ်ဖိယာ်ဖိ, ဒ်သိးအတၢ်ကအါ ထီၣ်, ဒီးပှၤလၢအဟ့ၣ်တၢ်လၢ ပှၤထူးပှၤတီၤန့ၣ်က ဘၣ်ထဲတၢ်ဖှီၣ်တၢ်ယာ်လီၤ.

¹⁷ ဒိးနနၢ်, ဒီးကနၣ်ပှၤကူၣ်တၢ်သ့အတၢ်ကတိၤ, ဒီးပာ် နသးလၢယတၢ်သ့ၣ်ညါတက့ၢ်. ¹⁸ အဂ့ၢ်ဒ်အံၤ, နမ့ၢ် ပၢၤအီၤလၢနသးကံၢ်ပူၤ, ဒီးမ့ၢ်အိၣ်ဝဲဆိးဝဲလၢနပျုၤ ဒီး, မ့ၢ်တၢ်အမုာ်လီၤ. ¹⁹ ဒ်သိးနကသန့ၤနသးလၢယွၤဒီး, ယဘိးဘၣ်သ့ၣ်ညါနၤ လၢမုၢ်မဆါတနံၤအံၤ, နၤဒၣ် လဲာ်လီၤ. ²⁰ ယကွဲးန့ၢ်လံနၤလၢတၢ်အဂ့ၤဘၣ်ဃးဒီးတၢ် ကူၣ်ထီၣ်ဖးလီၤ, ဒီးတၢ်သ့ၣ်ညါ, ²¹ ဒ်သိးယကဘိးဘၣ် သ့ၣ်ညါနၤလၢတၢ်မ့ၢ်တၢ်တီအတၢ်ကတိၤ, ဒ်သိးနက က့ၤစိာ်တၢ်မ့ၢ်တၢ်တီအတၢ်ကတိၤဆူ ပှၤလၢအမၢလီၤ နၤအအိၣ်န့ၣ်တမ့ၢ်ဘၣ်ဧါ.

²² ပှၤဖှီၣ်ဖိယာ်ဖိမ့ၢ်အဖှီၣ်အယာ်အဃိဒီး, ဂုာ်ဆူၣ်ပျိ ဆူၣ်အတၢ်တဂ့ၤ. ဒီးမၤအၢပှၤဘၣ်နးဘၣ်ဖှီၣ်လၢပဲတရီ အပူၤန့ၣ်တဂ့ၤ. ²³ အဂ့ၢ်ဒ်အံၤ, ယွၤကလိာ်အကွီၢ်, ဒီးဂုာ် ဆူၣ်ပှၤအသးသမူလၢအဂုာ်ဆူၣ်အတၢ်လီၤ.

²⁴ ဒီတံၤဒီသကိးဒီးပှၤလၢအသးထီၣ်တဂ့ၤ. ဒီးလဲၤတၢ် ဒီးပှၤလၢအသးထီၣ်ချ့န့ၣ်တဂ့ၤ. ²⁵ နကမၤလိဘၣ်ဖုးအ ကျဲ, ဒီးနသးကဘၣ်ဘၣ်ဖုးပျံၤသကွီၤလီၤ.

²⁶ ကဲထီၣ်ပှၤလၢအဟံးစု, လၢအအုၣ်ကီၤအသးလၢ ပှၤဂၤအကမၢ်အဂီၢ်အကျါတဂ့ၤ. ²⁷ နလိးက့ၤတၢ်မ့ၢ်တ အိၣ်ဘၣ်ဒီး, ပှၤကဟံးထီၣ်ကွံာ်နလီၢ်မံလၢနဖီလာ်, မ့ၢ်အဘၣ်မနုၤလဲၣ်.

²⁸ သုးကီၢ်အဃၢၤအပနီၣ်လၢပျၢၤ လၢနပၢ်တဖၣ်ပာ် လီၤဝဲန့ၣ်တဂ့ၤ.

²⁹ နထံၣ်ဘၣ်ပှၤလၢအခုတဂၤဧါ. ကဆၢထၢၣ်လၢစီၤ ပၤအမဲာ်ညါလီၤ. တဆၢထၢၣ်ဘၣ်လၢပှၤလၢအမံၤတ ဟူသၣ်တဖျါဘၣ်အမဲာ်ညါဘၣ်.

၂၃

¹ တုၤနဆ့ၣ်နီၤအီၣ်တၢ်ဒီးပဒိၣ်ဖးဒိၣ်ဒီး, ဆိကမိၣ်တၢ် အိၣ်လၢနမဲာ်ညါအဂ့ၢ်အကျိၤလီၤတံၢ်လီၤဆဲး, ² ဒီးနမ့ မ့ၢ်ပှၤလၢအအီၣ်တၢ်ဆူၣ်ဒီး, ပာ်ဒီလၢနကိာ်လိၤတ က့ၢ်. ³ ဆၢန့ၢ်ဘၣ်အတၢ်ဝံၣ်တဂ့ၤ. အဂ့ၢ်ဒ်အံၤ, မ့ၢ်တၢ် အီၣ်လီတၢ်လီၤ.

⁴ မၤတၢ်ဆူၣ်ဒ်သိးနကထူးထီၣ်တီၤထီၣ်တဂ့ၤ. သန့ၤန သးလၢနတၢ်ကူၣ်တၢ်ဆးဒၣ်နဲတဂ့ၤ. ⁵ နကဒုးယူၤနမဲာ် ဆူတၢ်လၢအတမ့ၢ်ဘၣ်တၢ်ဘၣ်အအိၣ်စ့ၢ်ကီးဧါ. အဂ့ၢ် ဒ်အံၤတၢ်ထူးတၢ်တီၤန့ၣ် မၤအဒံးဆ့လၢအဂီၢ်ဒၣ်ဝဲ, ဒီး ယူၤထီၣ်ကွံာ်ဝဲဆူမူခိၣ်, ဒ်လံာ်ဧိၤတြၤဧိၤအသိးန့ၣ်လီၤ.

⁶ အီၣ်ပှၤအတၢ်အီၣ်လၢအကူၣ်တၢ်အၢန့ၣ်တဂ့ၤ. ဒီး ဆၢန့ၢ်အတၢ်အီၣ်ဝံၣ်န့ၣ်တဂ့ၤ. ⁷ အဂ့ၢ်ဒ်အံၤ, ဒ်အဆိက မိၣ်တၢ်လၢအသးကံၢ်ပူၤအသိးန့ၣ် အကစၢ်ဒၣ်ဝဲ မ့ၢ် တၢ်ဒ်န့ၣ်သိးလီၤ. အီၣ်တၢ်အီတၢ်တက့ၢ်န့ၣ်, စံးနၤ ဘၣ်ဆၣ်ဒီး, အသးတအိၣ်ဘၣ်ဒီးနၤဘၣ်. ⁸ တၢ်လၢန အီၣ်န့ၣ်နကဘှိးထီၣ်, ဒီးနတၢ်ကတိၤမုာ်န့ၣ်ကဟါမၢ် လီၤ.

⁹ ကတိၤတၢ်လၢ ပှၤဟးဂီၤဖိအနၢ်ပူၤတဂ့ၤ. အဂ့ၢ်ဒ် အံၤ, တပးကဲဘၣ်နတၢ်ကတိၤအတၢ်ကူၣ်သ့ဘၣ်.

¹⁰ သုးကီၢ်အဃၢၤအပနီၣ်လၢ အအိၣ်လၢပျၢၤတဂ့ၤ. ဒီးလဲၤနုာ်လၢပှၤဖိၣ်ဃဲအဟီၣ်ခိၣ်အကဝီၤပူၤတဂ့ၤ.

¹¹ အဂ့ၢ်ဒ်အံၤ, ပှၤလၢအပှ့ၤက့ၤအီၤန့ၣ်မ့ၢ်ပှၤအဆူၣ်, ဒီးကလိာ်ကွီၢ်ဒီးနၤလီၤ.

¹² ပာ်နသးလၢတၢ်သိၣ်လိတၢ်, ဒီးဒိးနနၢ်လၢတၢ်သ့ၣ် ညါအတၢ်ကတိၤန့ၣ်တက့ၢ်.

¹³ တြီတၢ်သိၣ်ဃီၣ်လၢဖိသၣ်တဂ့ၤ. အဂ့ၢ်ဒ်အံၤ, နမ့ၢ် တီၢ်အီၤလၢ နီၣ်တီၢ်န့ၣ်ဘၣ်ဆၣ်ဒီး, တသံဘၣ်ဝဲဘၣ်.

¹⁴ တီၢ်အီၤလၢနီၣ်တီၢ်တက့ၢ်, ဒီးနကမၤပူၤမၤဖျဲးအသး လၢပျုၤပူၤလီၤ.

¹⁵ ယဖိခွါဧၢ, နသးမ့ၢ်ကူၣ်တၢ်သ့ဒီး, ယသးကခုယဲဒၣ် လီၤ. ¹⁶ တုၤနပျုၤကတိၤတၢ်ဘၣ်ဒီး, ယသူၣ်ကခုယသး ကခုလီၤ.

¹⁷ မ်နသးအသုတသးကါပှၤတၢ်ဒဲးဘးဖိတဂ့ၤ. မ့မ့ၢ် အိၣ်လၢတၢ်ပျံၤယွၤအပူၤသ့တနံၤကျၢၤတက့ၢ်. ¹⁸ အဂ့ၢ် ဒ်အံၤ, တၢ်အကတၢၢ်အိၣ်မးဝဲ, ဒီးနမုၢ်လၢ်တၢ်န့ၣ်တ ဘၣ်တၢ်ဒီၣ်တဲာ်ကွံာ်အီၤဘၣ်.

¹⁹ ယဖိခွါဧၢ, ကနၣ်တၢ်, ဒီးကူၣ်တၢ်သ့, ဒီးဒုးလဲၤလိၤ နသးလၢကျဲပူၤတက့ၢ်. ²⁰ အိၣ်လၢပှၤအီလုၣ်ကိစပံးထံ အကျါ, လၢပှၤအီၣ်ဆူၣ်တၢ်ညၣ်အကျါတဂ့ၤ. ²¹ အဂ့ၢ်ဒ် အံၤ, ပှၤအီမူၤအသး, ဒီးပှၤအီၣ်လုၣ်ကိတၢ်န့ၣ်ကဘၣ် တၢ်ဖှီၣ်တၢ်ယာ်လီၤ. ဒီးတၢ်ကၢၣ်အတၢ်မံခ့န့ၣ်ကဒုး ကူဒုးသိးလၢတၢ်ယာ်တၢ်ဖျ့လီၤ.

²² ကနၣ်နပၢ်လၢအထီၣ်ဖိနၤအကလုၢ်တက့ၢ်. ဒီးတုၤန မိၢ်သးပှၢ်ဒီး, မၤတရီတပါအီၤတဂ့ၤ.

²³ ပှ့ၤတၢ်မ့ၢ်တၢ်တီတက့ၢ်, ဒီးဆါကွံာ်အီၤတဂ့ၤ. ဒီးတၢ် ကူၣ်သ့, ဒီးတၢ်သိၣ်လိ, ဒီးတၢ်ကူၣ်တၢ်ဆးန့ၣ်တက့ၢ်.

²⁴ ပှၤအတီအလိၤတဂၤအပၢ်န့ၣ် ကသူၣ်ဖှံသးညီဒိၣ်နီၢ် မးလီၤ. ဒီးပှၤလၢအထီၣ်ဖိပှၤကူၣ်တၢ်သ့န့ၣ် ကသးခု လၢအဃိလီၤ. ²⁵ မ်နမိၢ်ဒီးနပၢ်သးခု, ဒီးပှၤလၢအဆံးစၢ် နၤန့ၣ်သူၣ်ဖှံသးညီတက့ၢ်.

²⁶ ယဖိခွါဧၢ, ဟ့ၣ်ယၤလၢနသးတက့ၢ်. ဒီးမ်ယကျဲဘၣ် နမဲာ်တက့ၢ်. ²⁷ အဂ့ၢ်ဒ်အံၤ, ပှၤဃဲသဲမုၣ်မ့ၢ်တၢ်ပူၤယိာ်, ဒီးပိာ်မုၣ်ဟးဂီၤန့ၣ်မ့ၢ်တၢ်ပူၤအံၣ်လီၤ. ²⁸ အဝဲဒၣ်ခိးတၢ် ခူသူၣ်ဒ်တမျိၤတမျာ်အသိးန့ၣ်, ဒီးမၤအါထီၣ်ပှၤလီ တၢ်ဖိလၢပှၤကညီအကျါလီၤ.

²⁹ မ့ၢ်မတၤအိၣ်ဝဲဒီးတၢ်နးတၢ်ဖှီၣ်တဂၤလဲၣ်. မ့ၢ်မတၤ အိၣ်ဝဲဒီးတၢ်သးအုးတဂၤလဲၣ်. မ့ၢ်မတၤအိၣ်ဝဲဒီးတၢ် အ့ၣ်လိာ်ဆိးက့လိာ်တဂၤလဲၣ်. မ့ၢ်မတၤအိၣ်ဝဲဒီးတၢ် သူၣ်ကိၢ်သးဂီၤတဂၤလဲၣ်. မ့ၢ်မတၤအဂ့ၢ်တအိၣ်ဘၣ်ဒီး အိၣ်ဝဲဒီးအပူၤလီၢ်န့ၣ်တဂၤလဲၣ်. မ့ၢ်မတၤအိၣ်ဝဲဒီးအ မဲာ်ဂီၤတဂၤလဲၣ်. ³⁰ ပှၤလၢအအိၣ်ယံာ်လၢစပံးထံအ ဃၢၤ, လၢအဃုစပံးထံလၢ အဃါဃုာ်အသးတဖၣ်န့ၣ် လီၤ. ³¹ တုၤစပံးထံဂီၤထီၣ်, တုၤအဟ့ၣ်အက့ၢ်အဂီၤလၢ လီခီပူၤ, တုၤအဂဲၤအသးဖဲအဘၣ်ဒီး, ကွၢ်အီၤတဂ့ၤ.―

³² လၢခံကတၢၢ်န့ၣ်ကအ့ၣ်တၢ်ဒ်ဂုၢ်အသိး, ဒီးဖျးတၢ်ဒ် ဂုၢ်ပွ့အသိးန့ၣ်လီၤ. ³³ နမဲာ်ကထံၣ်တၢ်လီၤဆီဒီးလီတၢ် ကထီၣ်ဖျဲးလၢနထးခိၣ်လီၤ. ³⁴ ဒီးနကမၤသးဒ်ပှၤလၢအ မံလီၤလၢပီၣ်လဲၣ်အသးကံၢ်ပူၤအသိးန့ၣ်, ဒီးဒ်ပှၤလၢအ မံလီၤလၢယၢ်ထူၣ်အစိးခံအသိးန့ၣ်လီၤ. ³⁵ စံးဝဲ, ပှၤကျီ ယၤ, ဒီးယတဆါဘၣ်. ပှၤတီၢ်ယၤ, ဒီးယတသ့ၣ်ညါ ဘၣ်. ယကဖုသံနီၣ်ထီၣ်အကတီၢ်ဖဲလဲၣ်. ယကဃုကဒီး အီၤလီၤ.

၂၄

¹ သးကါပှၤအၢတဂ့ၤ. ဒီးဆၢအိၣ်ဒီးအီၤတဂ့ၤ. ² ― အ ဂ့ၢ်ဒ်အံၤ, အသးကူၣ်တၢ်မၤဟးဂီၤ, ဒီးအပျုၤကတိၤ မၤအၢတၢ်လီၤ.

³ ပှၤမၤဟံၣ်လၢတၢ်ကူၣ်သ့, ဒီးဒုးအိၣ်ဂၢၢ်ဆိးကျၢၤဝဲ လၢတၢ်ကူၣ်တၢ်ဆးလီၤ. ⁴ ဒီးတၢ်သ့ၣ်ညါကမၤပှဲၤဝဲအ ဒၢးတဖၣ်ဒီးတၢ်ထူးတၢ်တီၤလၢအလုၢ်ဒိၣ်ပှ့ၤဒိၣ်, ဒီးအ ဂ့ၤအမုာ်ခဲလၢာ်လီၤ. ⁵ ပှၤကူၣ်တၢ်သ့န့ၣ်အဂံၢ်ဆူၣ်အ ဘါဆူၣ်, ဒီးပှၤအိၣ်ဒီးတၢ်သ့ၣ်ညါမၤအါထီၣ်အဂံၢ်အ ဘါလီၤ. ⁶ အဂ့ၢ်ဒ်အံၤ, နဘၣ်မၤနတၢ်ဒုးသုးလၢတၢ်ဒုး ကူၣ်တၢ်သ့လီၤ. ဒီးပှၤဒုးကူၣ်တၢ်အါဂၤသတးဒီး, တၢ် အုၣ်က့ၤခီၣ်က့ၤအိၣ်ဝဲဒၣ်လီၤ. ⁷ တၢ်ကူၣ်သ့န့ၣ်အိၣ်ဝဲ ထီကဲၣ်ဆိးလၢ ပှၤဟးဂီၤဖိအဂီၢ်လီၤ. တအဲးထီၣ် ဘၣ်အထးခိၣ်လၢပဲတရီအပူၤဘၣ်.

⁸ ပှၤလၢအကူၣ်မၤတၢ်အၢန့ၣ် ပှၤကကိးအီၤလၢတၢ်မၤ အၢအကစၢ်လီၤ. ⁹ ပှၤဟးဂီၤဖိအဆိကမိၣ်တၢ်န့ၣ် မ့ၢ် တၢ်ဒဲးဘးလီၤ. ဒီးပှၤမၤတၢ်တရီတပါန့ၣ်မ့ၢ်တၢ်သး ဘၣ်အၢလၢပှၤကညီအမဲာ်ညါလီၤ.

¹⁰ နသးမ့ၢ်လီၤဘှါလၢ တၢ်နးတၢ်ဖှီၣ်အမုၢ်တနံၤန့ၣ်ဒီး, နဂံၢ်နဘါမ့ၢ်အဆံးလီၤ.

¹¹ ပှၤလၢတၢ်ပာ်အီၤလၢတၢ်သံအဂီၢ်, ဒီးပှၤလၢအအိၣ် ဘူးဒီးတၢ်ကမၤသံအီၤန့ၣ်မၤပူၤဖျဲးအီၤတက့ၢ်.

¹² နမ့ၢ်စံး, ကွၢ်ကွၢ်, ပတသ့ၣ်ညါဘၣ်တၢ်န့ၣ်ဒီး, ပှၤ လၢအစီၤကွၢ်ပှၤအသးတဂၤန့ၣ်ကွၢ်ဆိကမိၣ်တၢ်, တ မ့ၢ်ဘၣ်ဧါ. ပှၤလၢအပၢၤနသးန့ၣ်တသ့ၣ်ညါဘၣ်ဧါ, ဒီး ကဟ့ၣ်ကၣ်တၢ်လၢပှၤကညီဒ် အမၤတၢ်အသိးန့ၣ်ကိး ဂၤဒဲးလီၤ. ¹³ ယဖိခွါဧၢ, အီၣ်ကနဲစီတက့ၢ်. အဂ့ၢ်ဒ်အံၤ, မ့ၢ်အဝံၣ်လီၤ. ဒီးကနဲအခိၣ်ထံလၢနကိာ်ပူၤန့ၣ်မ့ၢ်အဆၢလီၤ.―

¹⁴ ဒ်န့ၣ်သိးမၤလိတၢ်သ့ၣ်ညါ တၢ်ကူၣ်သ့လၢနသးအဂီၢ် တက့ၢ်. နမ့ၢ်ထံၣ်န့ၢ်အီၤဒီး, တၢ်အကတၢၢ်အိၣ်ဝဲ, နမုၢ် လၢ်တၢ်တဘၣ်ဘၣ်တၢ်ဒီၣ်တဲာ်ကွံာ်အီၤဘၣ်.

¹⁵ ပှၤအအၢအသီဧၢ, ခိးခူသူၣ်ထီဒါပှၤတီပှၤလိၤအ ဟံၣ်တဂ့ၤ. မၤဟးဂီၤအအိၣ်ဘှံးအလီၢ်တဂ့ၤ. ¹⁶ အဂ့ၢ်ဒ် အံၤ, ပှၤတီပှၤလိၤလီၤဃံၤနွံဘျီဘၣ်ဆၣ်ဒီး, ကဂဲၤဆၢ ထၢၣ်က့ၤလီၤ. မ့မ့ၢ်ပှၤ တတီတလိၤဘၣ်န့ၣ် အခီၣ် ဘၣ်တိၢ်ဒီးလီၤဃံၤလၢတၢ်ဟးဂီၤအပူၤလီၤ.

¹⁷ တုၤနဒုၣ်နဒါလီၤဃံၤဒီး, သးခုတၢ်တဂ့ၤ, ဒီးတုၤ အခီၣ်ဘၣ်တိၢ်ဒီး, သူၣ်ဖှံသးညီတဂ့ၤ. ¹⁸ ယွၤကထံၣ် ဘၣ်ဖုး, ဒီးတဘၣ်အသးဘၣ်, ဒီးကဃၣ်ကဒါက့ၤအ သးထီၣ်လၢအအိၣ်လီၤ.

¹⁹ မၤကိၢ်နသးလၢပှၤအၢအဃိတဂ့ၤ, ဒီးသးကါပှၤတ တီတလိၤန့ၣ်တဂ့ၤ. ²⁰ အဂ့ၢ်ဒ်အံၤ, တၢ်အကတၢၢ်တအိၣ်ဘၣ်လၢပှၤအအၢအဂီၢ်ဘၣ်. ပှၤတတီတလိၤဘၣ် အမ့ၣ်အူဒၢကဘၣ်တၢ်မၤလီၤပံာ်ကွံာ်အီၤလီၤ.

²¹ ယဖိခွါဧၢ, ပျံၤယွၤဒီးစီၤပၤတက့ၢ်. မၤဃါဃုာ်ဒီးပှၤ လၢအကဒံကဒါတဂ့ၤ. ²² အဂ့ၢ်ဒ်အံၤ, အတၢ်နးတၢ်ဖှီၣ် ကအိၣ်ထီၣ်သတူၢ်ကလာ်, ဒီးပှၤခံဂၤန့ၣ်အတၢ်ဟး ဂီၤန့ၣ်မ့ၢ်မတၤသ့ၣ်ညါတဂၤလဲၣ်.

²³ တၢ်အံၤတဖၣ်မ့ၢ်စ့ၢ်ကီးအဟဲလၢပှၤကူၣ်တၢ်သ့လီၤ. ကွၢ်မဲာ် ပှၤလၢတၢ်စံၣ်ညီၣ်ကွီၢ်အပူၤန့ၣ် မ့ၢ်အတဂ့ၤ ဘၣ်. ²⁴ ပှၤလၢအစံးဘၣ် ပှၤတတီတလိၤ, နမ့ၢ်ပှၤတီပှၤ လိၤလီၤန့ၣ်, ပှၤဂီၢ်မုၢ်ကဆိၣ်အၢအီၤ, ပှၤကလုာ်တဖၣ် ကသးဘၣ်အၢအီၤလီၤ. ²⁵ မ့မ့ၢ်ပှၤလၢ အသိၣ်ဃီၣ်တၢ် န့ၣ်ကအိၣ်မုာ်, ဒီးတၢ်ဆိၣ်ဂ့ၤလၢအဂ့ၤကဘၣ်အီၤလီၤ.

²⁶ ပှၤလၢအစံးဆၢ တၢ်လၢတၢ်ကတိၤလိၤန့ၣ်နၢမူပ ပျုၤလီၤ.

²⁷ ကတဲာ်ကတီၤနတၢ်မၤလၢခိ, ဒီးမၤတၢ်လၢစံာ်ဧိၤပှဲၤ ဧိၤအပူၤတက့ၢ်. လၢခံက့ၤဒီး သူၣ်ထီၣ်နဟံၣ်တက့ၢ်.

²⁸ အဂ့ၢ်တအိၣ်ဘၣ်ဒီး အုၣ်နသးထီဒါပှၤလၢနဃၢၤတ ဂ့ၤ. ဒီးလီတၢ်လၢနပျုၤတဂ့ၤ.

²⁹ ဒ်အမၤယၤအသိးန့ၣ် ယကမၤအီၤ, ယကဟ့ၣ်ကၣ် တၢ်လၢပှၤတဂၤန့ၣ်ဒ်အမၤတၢ်အသိးန့ၣ်, စံးတဂ့ၤ.

³⁰ ယလဲၤတၢ်လၢပှၤအကၢၣ်အစံာ်ပူၤအဃၢၤ, ဒီးလၢပှၤ လၢအသးဆးတအိၣ်ဘၣ်အစပံးလီၢ်အဃၢၤ. ³¹ ဒီးကွၢ် ကွၢ်, ခဲဘၢဝဲဒီးတၤဆှုၣ်တၤမဲလီၤ. ဒီးနီၣ်ဧိၤမံၤဧိၤအိၣ် ဝဲလၢအဖီခိၣ်ဒီဘ့ၣ်ညါ, ဒီးအကရၢလၢၢ်လီၤပှီၢ်လီၤ.

³² ဒီးယထံၣ်ဘၣ်ဒီးယဆိကမိၣ်လၢယသးကံၢ်ပူၤ, ယကွၢ် အီၤ, ဒီးယဒိးန့ၢ်တၢ်သိၣ်လိလီၤ. ³³ မံတစဲးစဲး, မံခ့တစဲး စဲး, ချံးစုလၢအကမံအဂီၢ်တစဲးစဲးလီၤ. ³⁴ ဒီးနတၢ်ဖှီၣ်တၢ် ယာ်ကဟဲဘၣ်နၤဒ်ပှၤတမျိၤတမျာ်အသိးန့ၣ်, ဒီးတၢ် သၣ်ဝံၤသၣ်စ့ၤနၤဒ်ပှၤအိၣ်ဒီးအစုကဝဲၤအသိးန့ၣ်လီၤ.

၂၅

¹ အအံၤမ့ၢ်စ့ၢ်ကီးစီၤၡလိၤမိၤအတၢ်ကတိၤဒိ လၢယူဒၤ အစီၤပၤစီၤဃံးစကံယၤအပှၤကညီကွဲးဆဲဝဲလီၤ.

² ယွၤပာ်ခူသူၣ်တၢ်တမံၤမ့ၢ်အလၤကပီၤလီၤ. မ့မ့ၢ်စီၤ ပၤဃုဖျါထီၣ်တၢ်တမံၤမ့ၢ်အလၤကပီၤလီၤ.

³ မူခိၣ်လၢတၢ်ထီအဂီၢ်, ဒီးဟီၣ်ခိၣ်လၢတၢ်ယိာ်အဂီၢ်, ဒီးဒ်န့ၣ်သိးစီၤပၤအသးန့ၣ်ပှၤဃုဖျါတဘၣ်ဘၣ်.

⁴ ဟံးထီၣ်စ့အအ့ၣ်လၢစ့ပူၤတက့ၢ်, ဒီးလီခီလၢပှၤသိ တၢ်ဖိအဂီၢ်ကဟဲထီၣ်လီၤ. ⁵ ဟံးထီၣ်ကွံာ်ပှၤအၢလၢစီၤ ပၤအမဲာ်ညါတက့ၢ်. ဒီးအလီၢ်ပစိာ်ကအိၣ်ဂၢၢ်ဆိးကျၢၤ လၢတၢ်တီတၢ်လိၤအပူၤလီၤ.

⁶ မၤလၤကပီၤနသးလၢစီၤပၤအမဲာ်ညါတဂ့ၤ, ဒီးဆၢ ထၢၣ်လၢပှၤအဒိၣ်အလီၢ်ပူၤတဂ့ၤ. ⁷ အဂ့ၢ်ဒ်အံၤ, ပှၤစံး လၢနၤ, ဟဲထီၣ်ဖဲအံၤတက့ၢ်န့ၣ်, ဂ့ၤန့ၢ်ပှၤဆီၣ်လီၤနၤလၢပဒိၣ်လၢနမဲာ်ထံၣ်ဘၣ်အီၤအမဲာ်ညါတက့ၢ်လီၤ.

⁸ လဲၤထီၣ်ချ့ချ့ဒ်သိးနကလိာ်ကွီၢ်တဂ့ၤ. တုၤပှၤအိၣ် လၢနဃၢၤဒုးမဲာ်ဆှးနၤဒီး, လၢခံကတၢၢ်နကမၤဒ်လဲၣ် ဒ်လဲၣ်န့ၣ်နတသ့ၣ်ညါဘၣ်ဖုးလီၤ.

⁹ နလိာ်ကွီၢ်ဒီးပှၤလၢနဃၢၤဘၣ်ဆၣ်ဒီး, လီၣ်ဖျါပှၤဂၤ အတၢ်အိၣ်ခူသူၣ်န့ၣ်တဂ့ၤ. ¹⁰ ပှၤလၢအနၢ်ဟူနကလုၢ် န့ၣ်ကဒုးမဲာ်ဆှးဘၣ်ဖုးနၤ, ဒီးနတၢ်ဒုၣ်ဒွဲၣ်အလီၢ်န့ၣ် တဟးသဒၣ်ဘၣ်နၤဘၣ်.

¹¹ တၢ်ကတိၤလၢ ပှၤကတိၤလၢအကတီၢ်ဒၣ်ဝဲန့ၣ်မၤ သးဒ်သၣ်သွံထူအိၣ်ဝဲလၢတၢ်ဂီၤစ့အပူၤအသိးန့ၣ်လီၤ.

¹² ပှၤသိၣ်ဃီၣ်တၢ်လၢ ပှၤကူၣ်တၢ်သ့တဂၤလၢအနၢ် လၢအဒိကနၣ်တၢ်အပူၤန့ၣ် မၤသးဒ်ကွီၤထူ, ဒီးတၢ်က ယၢကယဲထူစီအသိးန့ၣ်လီၤ.

¹³ ဒ်မူခိၣ်ဖီအတၢ်ခုၣ်လၢ ကူးဘုအကတီၢ်အသိးန့ၣ်မ့ၢ် ကလူးအကလုၢ်တီလၢပှၤလၢအမၢလီၤအီၤန့ၣ်လီၤ. အ ဂ့ၢ်ဒ်အံၤမၤကျၢၤထီၣ်အကစၢ်အသးလီၤ.

¹⁴ ပှၤလၢအပာ်ကဖိအသးလၢ ခိၣ်ဖးကဘျံးကဘျၣ်အ ဃိန့ၣ်မၤသးဒ်တၢ်အၢၣ်, ဒီးကလံၤ, ဒီးတၢ်တဟဲစူၤဘၣ် အသိးန့ၣ်လီၤ.

¹⁵ ပှၤသးထီၣ်ကီမၤန့ၢ်ပဒိၣ်အသး, ဒီးပှၤအပျ့ၤလၢအ စၢ်န့ၣ်မၤကၢ်တၢ်ဃံလီၤ.

¹⁶ နထံၣ်န့ၢ်ကနဲစီစ့ၢ်ကီးဧါ. အီၣ်ဖဲအကြၢးတက့ၢ်. န ကပှဲၤကဲၣ်ဆိးဘၣ်ဖုးလၢအီၤ, ဒီးဘှိးထီၣ်အီၤလီၤ.

¹⁷ သုးကွံာ်နခီၣ်လၢပှၤလၢနဃၢၤအဟံၣ်တက့ၢ်. အသး ကဘှံးဘၣ်ဖုးလၢနၤ, ဒီးသးဟ့နၤလီၤ.

¹⁸ ပှၤလၢအအုၣ်အသးကဘျံးကဘျၣ်ထီဒါပှၤလၢအဃၢၤ န့ၣ်, မ့ၢ်ခံၣ်ခူၣ်, ဒီးနးဧိၤဘီဧိၤ, ဒီးပျၢ်လၢအအ့ၣ်ဝဲလီၤ.

¹⁹ တၢ်သန့ၤအသးလၢ ပှၤလီတၢ်လၢတၢ်ကိၢ်တၢ်ဂီၤအ မုၢ်တနံၤန့ၣ်မၤသးဒ်မဲကၢ်အသးတဘ့ၣ်, ဒီးခီၣ်လၢအ ဆၢလီၤတလံာ်ကွံာ်အသိးန့ၣ်လီၤ.

²⁰ ဒ်ပှၤလၢအဟံးထီၣ်ကွံာ်ယၣ်လၢတၢ်ဂိၢ်အနံၤအသိး, ဒ်တၤဆံၣ်ထံလၢဘျါအ့ၣ်အဖီခိၣ်အသိးန့ၣ်, မ့ၢ်ပှၤလၢ အသးဝံၣ်တၢ်သးဝံၣ်လၢ ပှၤလၢအသူၣ်အုးသးအုးန့ၣ် လီၤ.

²¹ နဒုၣ်နဒါန့ၣ် တၢ်မ့ၢ်သၣ်ဝံၤအသးဒီး, ဟ့ၣ်အီၣ်အီၤ လၢကိၣ်တက့ၢ်. ဒီးတၢ်မ့ၢ်သူအသးလၢထံဒီးဟ့ၣ်အီ အီၤလၢထံတက့ၢ်. ²² နကပာ်ဖှိၣ်မ့ၣ်အူကဖးလၢအခိၣ်ဖီ ခိၣ်, ဒီးယွၤကဟ့ၣ်လီၤနၤလၢနဘူးနလဲလီၤ.

²³ ကလံၤလၢကလံၤစိးန့ၣ် ဒုးဟဲတၢ်စူၤ, ဒီးပျ့ၤလၢအ ဘၣ်ဃးဒီးသီၣ်ဝံသဲကလၤဒုးအိၣ်ထီၣ် ပှၤမဲာ်လီၤမှဲၤလီၤ.

²⁴ အိၣ်ဝဲဆိးဝဲလၢဟံၣ်ခိၣ်အသနၢၣ်န့ၣ် ဂ့ၤန့ၢ်အိၣ်ဝဲဒီး ပိာ်မုၣ်လၢအဂ့ၢ်လိာ်ဘှီလိာ်တၢ်လၢ ဟံၣ်ဖးလဲၢ်အပူၤ တက့ၢ်လီၤ.

²⁵ ဒ်ထံခုၣ်လၢပှၤလၢ တၢ်သူအသးလၢထံအဂီၢ်အသိး န့ၣ်အကစီၣ်ဂ့ၤဟဲလၢထံယံၤကီၢ်ယံၤမ့ၢ်ဒ်န့ၣ်သိးလီၤ.

²⁶ ပှၤတီပှၤလိၤလီၤဃံၤဝဲလၢပှၤတတီတလိၤဘၣ်အမဲာ် ညါန့ၣ် မၤသးဒ်ထံမူလၢအဒုဝဲ, ဒီးထံထီၣ်ပၢၢ်လၢအ အုၣ်ဝဲအသိးန့ၣ်လီၤ.

²⁷ အီၣ်ကနဲစီလၢအအါတဂ့ၤဘၣ်, ဒ်န့ၣ်အသိး, ပှၤဃု အလၤကပီၤဒၣ်ဝဲန့ၣ်မၤဘှံးအသးလီၤ.

²⁸ ပှၤလၢအတပၢဘၣ်အသးဒၣ်ဝဲန့ၣ် မၤသးဒ်ဝ့ၢ်လၢ အလီၤပှီၢ်ဝဲ, အခိၣ်ဒူတအိၣ်ဘၣ်အသိးန့ၣ်လီၤ.

၂၆

¹ ဒ်မူခိၣ်ဖီလၢတၢ်ကိၢ်ခါ, ဒီးတၢ်ဟဲစူၤလၢကူးဘုအခါ အသိးန့ၣ် တၢ်လၤကပီၤတကြၢးဘၣ်ဒီးပှၤဟးဂီၤဖိဘၣ်.

² ဒ်ထိၣ်ဖှံးယူၤဝ့ၤဝီၤအသိးန့ၣ်, ဒ်ထိၣ်ဘျ့ၣ်ဘျီၣ်ဧိၤယူၤ ထီၣ်ကွံာ်အသိးန့ၣ် တၢ်ဆိၣ်အၢလၢအဂ့ၢ်တအိၣ်ဘၣ် ဘၣ်န့ၣ်တဟဲဘၣ်ဝဲဘၣ်.

³ နီၣ်ဖျ့လၢကသ့ၣ်အဂီၢ်, ထးခိၣ်ပျံၤလၢကသ့ၣ်ယီၤ အဂီၢ်, ဒီးနီၣ်တီၢ်လၢပှၤဟးဂီၤဖိအချၢဃံအဂီၢ်လီၤ.

⁴ စံးဆၢပှၤဟးဂီၤဖိ ဒ်အပှၤဟးဂီၤဖိအတၢ်အသိးန့ၣ်တ ဂ့ၤ. နကလီၤဂာ်ဘၣ်ဖုးဒီးအီၤလီၤ.

⁵ စံးဆၢပှၤဟးဂီၤဖိ ဒ်အပှၤဟးဂီၤဖိအတၢ်အသိးန့ၣ်တ က့ၢ်. ကကူၣ်တၢ်သ့ဘၣ်ဖုးလၢအမဲာ်ဒၣ်ဝဲလီၤ.

⁶ ပှၤလၢအတလိတၢ်ကတိၤလၢ ပှၤဟးဂီၤဖိအစုပူၤ န့ၣ်ဒီၣ်တဲာ်အခီၣ်ဒၣ်ဝဲ, ဒီးအီတၢ်မၤအၢလီၤ.

⁷ ပှၤလၢအခီၣ်ဟးဂီၤန့ၣ် အခီၣ်လီၤစဲၤဝဲစၢ်ကဘံၣ်, ဒီး တၢ်ကတိၤဒိလၢ ပှၤဟးဂီၤဖိအထးခိၣ်န့ၣ်မ့ၢ်ဒ်န့ၣ်သိး လီၤ.

⁸ ဒ်ပှၤလၢအစၢဃာ်လၢၢ်တဖျၢၣ်လၢ နီၣ်ဘျုးအပူၤအ သိးန့ၣ်ပှၤလၢအမၤလၤကပီၤပှၤဟးဂီၤဖိန့ၣ် မ့ၢ်ဒ်န့ၣ်အ သိးလီၤ.

⁹ ဒ်တၤဆှုၣ်ယူာ်ထီၣ်အသးလၢ ပှၤအီမူၤသံးအစုပူၤအ သိးန့ၣ်, တၢ်ကတိၤဒိလၢ ပှၤဟးဂီၤဖိအထးခိၣ်မ့ၢ်ဒ်န့ၣ် သိးလီၤ.

¹⁰ ဒ်ပျၢ်လၢအဆဲးပှၤကိးဂၤဒဲးအသိးန့ၣ် ပှၤငါပှၤဟးဂီၤ ဖိ, ဒီးပှၤလဲၤပူၤကွံာ်တၢ်ဖိ, မ့ၢ်ဒ်န့ၣ်သိးလီၤ.

¹¹ ဒ်ထွံၣ်က့ၤကဒါက့ၤဆူအတၢ်ဘှိးအသိးန့ၣ် ပှၤဟး ဂီၤဖိကမၤက့ၤကဒီးအပှၤဟးဂီၤအတၢ်ဒ်န့ၣ်သိးလီၤ.

¹² နထံၣ်ဘၣ်ပှၤလၢအကူၣ်တၢ်သ့လၢ အမဲာ်ဒၣ်ဝဲန့ၣ် စ့ၢ်ကီးဧါ. ပမုၢ်လၢ်တၢ်လၢပှၤဟးဂီၤဖိဒိၣ်န့ၢ်အဝဲဒၣ်တ က့ၢ်လီၤ.

¹³ ပှၤအကၢၣ်န့ၣ်စံးဝဲဒၣ်, ခ့ယုၢ်အိၣ်ဝဲလၢကျဲ, ခ့ယုၢ် အိၣ်ဝဲလၢကျဲပူၤလီၤ. ¹⁴ ဒ်တြဲၤတရံးတၢ်လၢအသံၣ်ကျီၤ အသိးန့ၣ်ပှၤအကၢၣ် ဃၣ်အသးလၢအလီၢ်မံပူၤဒ်န့ၣ် သိးလီၤ. ¹⁵ ပှၤအကၢၣ်န့ၣ် ဘျၢလီၤအစုလၢလီခီပူၤလီၤ. ထုးက့ၤဆူအထးခိၣ်ပူၤန့ၣ် မၤဘှံးအသးလီၤ. ¹⁶ ပှၤအ ကၢၣ်န့ၣ်ကူၣ်တၢ်သ့လၢ အမဲာ်ဒၣ်ဝဲဒိၣ်န့ၢ်ပှၤနွံဂၤလၢ အစံးဆၢတၢ်သ့တက့ၢ်လီၤ.

¹⁷ ပှၤလၢအလဲၤပူၤတၢ်, ဒီးမၤကိၢ်ထီၣ်အသးလၢတၢ် အ့ၣ်လိာ်လၢအတဘၣ်ဃးဘၣ်ဒီးအီၤန့ၣ် မၤသးဒ်ပှၤ လၢအဟံးဃာ်ထွံၣ်အနၢ်အသိးန့ၣ်လီၤ.

¹⁸ ဒ်ပှၤပျုၢ်လၢအကွံာ်မ့ၣ်အူခံ, ဒီးပျၢ်ဧိၤစၤဧိၤ, ဒီးတၢ် သံအသိးန့ၣ်, ¹⁹ ပှၤလၢအလီန့ၢ်ပှၤလၢအဃၢၤ, ဒီးစံးဝဲ, ယမၤလိာ်ကွဲတၢ်တမ့ၢ်ဘၣ်ဧါန့ၣ်မ့ၢ်ဒ်န့ၣ်အသိးလီၤ.

²⁰ ဖဲသ့ၣ်မုၣ်တအိၣ်ဘၣ်ဒီး, မ့ၣ်အူလီၤပံာ်လီၤ. ဒီးဖဲပှၤ ကတိၤခဲၣ်တၢ်တအိၣ်ဘၣ်န့ၣ်တၢ်အ့ၣ်လိာ်ဆိးက့လိာ် ဆိတ့ၢ်ဝဲလီၤ.

²¹ ဒ်သွဲၣ်လးလၢမ့ၣ်ကဖးအဂီၢ်အသိး, ဒ်သ့ၣ်မုၣ်လၢမ့ၣ် အူအဂီၢ်အသိးန့ၣ်, ပှၤလၢအဂ့ၢ်လိာ်ဘှီလိာ်ဒၣ်တၢ်မ့ၢ် တၢ်ထိၣ်ဂဲၤထီၣ်တၢ်အ့ၣ်လိာ်ဆိးက့လိာ်အဂီၢ်လီၤ.

²² ပှၤခဲၣ်တၢ်အတၢ်ကတိၤန့ၣ် မၤသးဒ်တၢ်ကတိၤလိာ် ကွဲအသိး ဘၣ်ဆၣ်ဒီး, လဲၤလီၤဝဲဆူပှၤအသးကံၢ်ပူၤ လီၤ.

²³ ပျုၤအဲၣ်တၢ်ဆူၣ်အိၣ်ဒီးသးအၢန့ၣ် မၤသးဒ်သပၢၤ ဟီၣ်ခိၣ်ပီၤဒီးစ့အအ့ၣ်အသိးန့ၣ်လီၤ.

²⁴ ပှၤလၢအသးဟ့တၢ်န့ၣ်လီတၢ်လၢအပျုၤ, ဒီးပာ်ဖှိၣ် လီတၢ်လၢအသးကံၢ်ပူၤလီၤ. ²⁵ တုၤအကတိၤတၢ်မုာ်မုာ် ဒီး, နာ်အီၤတဂ့ၤ. အဂ့ၢ်ဒ်အံၤ, တၢ်သးဘၣ်အၢနွံမံၤအိၣ် ဝဲလၢ အသးကံၢ်ပူၤလီၤ. ²⁶ လီတၢ်န့ၣ်ကျၢၢ်ဘၢအတၢ် သးဟ့ဘၣ်ဆၣ်ဒီး အတၢ်အၢကအိၣ်ဖျါထီၣ်လၢတၢ် အိၣ်ဖှိၣ်ဖးဒိၣ်အမဲာ်ညါလီၤ.

²⁷ ပှၤလၢအခူၣ်လီၤတၢ်ပူၤန့ၣ်ကလီၤတဲာ်လၢအပူၤ, ဒီး ပှၤလၢအတလ့ၣ်လၢၢ်တဖျၢၣ်န့ၣ် အတၢ်ကတလ့ၣ်က့ၤ ကဒါက့ၤလၢအလိၤလီၤ.

²⁸ ပှၤအပျုၤကဘျံးကဘျၣ်န့ၣ် သးဟ့ပှၤလၢအဘၣ်တၢ် မၤအၢလၢအီၤ, ဒီးထးခိၣ်လၢအလွဲတၢ်န့ၣ်မၤဟးဂီၤ တၢ်လီၤ.

၂၇

¹ ပာ်ကဖိနသးလၢခဲဂီၤကိာ်အဂ့ၢ်တဂ့ၤ. အဂ့ၢ်ဒ်အံၤ, တၢ်ကမၤအသးလၢတနံၤအတီၢ်ပူၤန့ၣ် နတသ့ၣ်ညါ ဘၣ်.

² နထးခိၣ်ဒၣ်နဲတမ့ၢ်ဘၣ်, မ်ပှၤဂၤစံးထီၣ်ပတြၢၤနၤ တက့ၢ်. နပျုၤဒၣ်နဲတမ့ၢ်ဘၣ်. မ်ပှၤတမှံၤတဂၤတက့ၢ်.

³ လၢၢ်ဧိၤလ့ဧိၤမ့ၢ်အဃၢ, ဒီးမဲးဧိၤဟီၣ်ဧိၤမ့ၢ်တၢ်ဃၢ တၢ်စံာ်လီၤ. မ့မ့ၢ်ပှၤဟးဂီၤဖိအသးထီၣ်န့ၣ်ဃၢန့ၢ်တၢ် ခံမံၤလၢာ်တက့ၢ်လီၤ.

⁴ တၢ်သးကဲၤထီၣ် မၤအၢမၤနးတၢ်, ဒီးတၢ်သးထီၣ် မၤတပျုာ်တပျီၤတၢ်လီၤ. မ့မ့ၢ်လၢတၢ်သးကါအမဲာ် ညါမ့ၢ်မတၤဆၢထၢၣ်သ့တဂၤလဲၣ်.

⁵ သိၣ်ဃီၣ်တၢ်အိၣ်ဖျါန့ၣ် ဂ့ၤန့ၢ်တၢ်အဲၣ်အိၣ်ခူသူၣ်တ က့ၢ်လီၤ. ⁶ တံၤသကိးအဆဲးတၢ်န့ၣ် မ့ၢ်အမ့ၢ်အတီ လီၤ. မ့မ့ၢ်ဒုၣ်ဒါအနၢမူတၢ်န့ၣ်အါမးလီၤ.

⁷ ပှၤလၢအဘျဲးအီၣ်တၢ်န့ၣ် ယီၢ်လီၤတံၢ်ကနဲစီအခိၣ် ထံလီၤ. မ့မ့ၢ်ကယဲၢ်တၢ်အခၣ် တမံၤလၢ်လၢ်န့ၣ်ဆၢဝဲ လၢပှၤလၢတၢ်သၣ်ဝံၤအသးအဂီၢ်လီၤ.

⁸ ဒ်ထိၣ်လၢအဟးသဒၣ် အသွံအသိးန့ၣ်ပှၤလၢအဟး သဒၣ်အလီၢ်ဒၣ်ဝဲန့ၣ်မ့ၢ်ဒ်န့ၣ်သိးလီၤ.

⁹ သိဒီးတၢ်နၢမူမၤခုပှၤအသး, ဒီးတၢ်မုာ်ဘၣ်ဃးဒီး တံၤသကိးဟ့ၣ်ကူၣ်တၢ်န့ၣ်ဒ်န့ၣ်သိးလီၤ.

¹⁰ နတံၤနသကိး, ဒီးနပၢ်အတံၤအသကိးန့ၣ် လဲၤသ ဒၣ်အီၤတဂ့ၤ. ဒီးလဲၤနုာ်လၢနဒီပုၢ်ဝဲၢ်အဟံၣ်ပူၤလၢန တၢ်နးတၢ်ဖှီၣ်အမုၢ်နံၤန့ၣ်တဂ့ၤ. ပှၤလၢအဃၢၤလၢအ အိၣ်ဘူးန့ၣ်ဂ့ၤန့ၢ်ဒီပုၢ်ဝဲၢ်လၢအအိၣ်ဝဲလၢအယံၤတက့ၢ် လီၤ.

¹¹ ယဖိခွါဧၢ, ကူၣ်တၢ်သ့, ဒီးမၤခုယသး ဒ်သိးယက စံးဆၢပှၤလၢအဒုၣ်ဒွဲၣ်ယၤန့ၣ်တက့ၢ်.

¹² ပှၤကူၣ်တၢ်ဘၣ်န့ၣ်ထံၣ်ဘၣ်တၢ်အၢ, ဒီးပာ်တဒၢအ သးလီၤ. မ့မ့ၢ်ပှၤလၢအတမၤလိဘၣ်တၢ်ဘၣ်န့ၣ်လဲၤ ဒၣ်တၢ်, ဒီးဘၣ်တၢ်နးတၢ်ဖှီၣ်လီၤ.

¹³ ပှၤအုၣ်ကီၤအသးလၢ အတသ့ၣ်ညါဘၣ်ဝဲအဂီၢ်န့ၣ် ဟံးန့ၢ်အယၣ်တက့ၢ်. ဒီးဟံးကီၤလၢ ပှၤလၢအအုၣ် ကီၤအသးလၢပိာ်မုၣ်ဟးဂီၤအဂီၢ်တက့ၢ်.

¹⁴ ပှၤလၢအဆိၣ်ဂ့ၤအတံၤအသကိး လၢအကလုၢ်ဖးဒိၣ် လၢဂီၤသီၣ်ထၢန့ၣ် တၢ်ကပာ်အီၤလၢတၢ်ဆိၣ်အၢလၢ အဂီၢ်လီၤ.

¹⁵ တၢ်လီၤစီၤတထံၣ်ဃီလၢ တၢ်ဟဲစူၤအါအမုၢ်တနံၤ, ဒီးပိာ်မုၣ်လၢအဂ့ၢ်လိာ်ဘှီလိာ်ဒၣ်တၢ်န့ၣ် ဒ်သိးလိာ်အ သးလီၤ. ¹⁶ ပှၤလၢအတြီအီၤန့ၣ်တြီကလံၤ, ဒီးအစုထွဲ ဘၣ်ဝဲလၢသိဧိၤချါဧိၤလီၤ.

¹⁷ ထးကျ့ထး, ဒီးပှၤကညီကျ့အတံၤအသကိးအမဲာ်ဒ် န့ၣ်သိးလီၤ.

¹⁸ ပှၤလၢအပၢၤချၢၣ်ဒၢန့ၣ် ကအီၣ်ဘၣ်အတၤသၣ်လီၤ. ဒီးပှၤလၢအပးလ့ၢ်ပးကါအကစၢ်န့ၣ် ကဒိးတၢ်လၤက ပီၤလီၤ.

¹⁹ ဒ်ပှၤအမဲာ်ကွၢ်ဆၢညါလၢထံကျါအသိးန့ၣ်, ပှၤက ညီအသးဒီးပှၤကညီအသးမ့ၢ်ဒ်န့ၣ်သိးလီၤ.

²⁰ တၢ်ပျုၤပူၤဒီး တၢ်မၤဟးဂီၤ အလီၢ်န့ၣ်တပှဲၤဘၣ်ဝဲ ဘၣ်, ဒီးပှၤကညီအမဲာ်တဘျဲးကွၢ်ဘၣ်တၢ်ဘၣ်.

²¹ ဒ်သပၢၤသိတၢ်လၢစ့အဂီၢ်, ဒီးဖၣ်ကပူၤလၢထူအဂီၢ် အသိးန့ၣ်, ပှၤကညီဒီးအတၢ်စံးထီၣ်ပတြၢၤမၤသးဒ်န့ၣ် သိးလီၤ.

²² နမ့ၢ်ဆုပှၤဟးဂီၤဖိလၢကျံၣ်လၢဘုဧိၤဟုဧိၤလီၤကလဲ အကျါဘၣ်ဆၣ်ဒီး, အပှၤဟးဂီၤဖိ အတၢ်တဟးဖးဒီး အီၤဘၣ်.

²³ သ့ၣ်ညါနသိနမဲာ်တဲးလဲးအဂ့ၢ်တက့ၢ်, ကွၢ်နဂီၤဘုၣ် ဂီၤဖံးကစီဒီတက့ၢ်. ²⁴ အဂ့ၢ်ဒ်အံၤ, တၢ်စုလီၢ်ခီၣ်ခိၣ်တ အိၣ်ဘၣ်လီၤထူလီၤယိာ်ဘၣ်, ဒီးတၢ်ခိၣ်သလုးအိၣ်ဝဲ အစိၤစိၤအဃၣ်ဃၣ်စ့ၢ်ကီးဧါ. ²⁵ နီၣ်ဧိၤမံၤဧိၤလၢာ်ဝဲ, ဒီး တၢ်မဲထီၣ်သီအိၣ်ဖျါထီၣ်ဒီး, ပှၤထၢဖှိၣ်တၢ်လၢအမဲ ထီၣ်လၢကစၢၢ်ကလိလီၤ. ²⁶ သိဖိမ့ၢ်လၢနကူတၢ်သိး တၢ်အဂီၢ်, ဒီးမဲာ်တဲးလဲးမ့ၢ်ဟီၣ်ခိၣ်အကဝီၤအပှ့ၤလီၤ.

²⁷ ဒီးမဲာ်တဲးလဲးအနုၢ်ထံကအါဝဲလၢ နကအီၣ်တၢ်အ ဂီၢ်, ဒီးလၢနပှၤဟံၣ်ဖိကအီၣ်တၢ်အဂီၢ်, ဒီးလၢနဖိသၣ် ပိာ်မုၣ်အဂီၢ်လီၤ.

၂၈

¹ ဖဲပှၤတလူၤဘၣ်ဒီး, ပှၤတတီတလိၤဘၣ်ဃ့ၢ်ဝဲလီၤ. မ့မ့ၢ်ပှၤတီပှၤလိၤအသးခူတလ့ၢ်ဒ်ခ့ယုၢ်အသိးန့ၣ်လီၤ.

² မ့ၢ်ပှၤကီၢ်ဖိအမၤကမၣ်တၢ်အဃိန့ၣ်ဒီး, ပဒိၣ်ဖးဒိၣ် အိၣ်ဝဲအါဂၤလီၤ. မ့မ့ၢ်ပှၤအကူၣ်အဆးဒီးပှၤသ့ၣ်ညါ အဃိန့ၣ်, အနံၣ်အလါကအါထီၣ်လီၤ.

³ ပှၤဖှီၣ်ဖိလၢအမၤအၢ ပှၤဘၣ်ဖှီၣ်ဘၣ်ယာ်န့ၣ်မ့ၢ်တၢ် ဟဲစူၤဒိၣ်လၢအတြူာ်ကွံာ်တၢ်, ဒီးတပာ်လီၤတဲာ်ဘၣ် တၢ်အီၣ်ဘၣ်.

⁴ ပှၤလၢအလဲၤသဒၣ် တၢ်သိၣ်တၢ်သီန့ၣ် စံးထီၣ်ပ တြၢၤပှၤအအၢလီၤ. မ့မ့ၢ်ပှၤလၢအတိၢ်န့ၢ်တၢ်သိၣ်တၢ် သီန့ၣ်ဂ့ၢ်လိာ်ဒီးအီၤလီၤ.

⁵ ပှၤအအၢန့ၣ်အနၢ်တပၢၢ်ဘၣ်တၢ်စံၣ်ညီၣ်ဘၣ်. မ့မ့ၢ် ပှၤလၢအဃုယွၤန့ၣ်နၢ်ပၢၢ်တၢ်ခဲလၢာ်လီၤ.

⁶ ပှၤဖှီၣ်ဖိလၢအလဲၤတၢ် လၢလၢပှဲၤပှဲၤန့ၣ်ဂ့ၤန့ၢ်ပှၤလၢ အထူးအတီၤ, လၢအကျဲက့ၣ်န့ၣ်တက့ၢ်လီၤ.

⁷ ပှၤလၢအတိၢ်န့ၢ်တၢ်သိၣ်တၢ်သီန့ၣ် မ့ၢ်ဖိခွါလၢအ သူၣ်ဆးအသးဆးလီၤ. မ့မ့ၢ်ပှၤလၢအဒီတံၤဒီသကိးဒီး ပှၤလၢအအီၣ်လုၣ်ကိတၢ်န့ၣ်ဒုးမဲာ်ဆှးအပၢ်လီၤ.

⁸ ပှၤလၢအမၤအါထီၣ် အစုလီၢ်အခီၣ်ခိၣ်လၢစ့အအ့ၣ် ထီၣ်ဒီးလၢတၢ်အါထီၣ်န့ၣ် ပာ်ဖှိၣ်ဝဲလၢပှၤသးကညီၤ ပှၤဖှီၣ်ဖိအဂီၢ်န့ၣ်လီၤ.

⁹ ပှၤလၢအဃၣ်ကွံာ်အနၢ်ဒ်သိး အသုတနၢ်ဟူတၢ်သိၣ် တၢ်သီတဂ့ၤန့ၣ်, အတၢ်ထုကဖၣ်ကကဲလၢ တၢ်သး ဘၣ်အၢလီၤ.

¹⁰ ပှၤလၢအဒုးဟးဖျိးပှၤ တီပှၤလိၤဆူကျဲအအၢန့ၣ်က လီၤတဲာ်လၢအပူၤဒၣ်ဝဲန့ၣ်လီၤ. မ့မ့ၢ်ပှၤတီပှၤလိၤက န့ၢ်ဘၣ်သါတၢ်ဂ့ၤတၢ်ဘၣ်လီၤ.

¹¹ ပှၤထူးပှၤတီၤန့ၣ် ကူၣ်တၢ်သ့လၢအမဲာ်ဒၣ်ဝဲလီၤ. မ့ မ့ၢ်ပှၤဖှီၣ်ဖိယာ်ဖိအိၣ်ဒီး အတၢ်ကူၣ်တၢ်ဆးန့ၣ်ဃု ကွၢ်အီၤလီၤ.

¹² ပှၤတီပှၤလိၤသူၣ်ဖှံသးညီဒီး တၢ်လၤကပီၤဖးဒိၣ်အိၣ် ဝဲလီၤ. မ့မ့ၢ်တုၤပှၤတတီတလိၤဘၣ်န့ၣ်ထီၣ်ထီဒီး, ပှၤ ပာ်ခူသူၣ်အသးလီၤ.

¹³ ပှၤလၢအကျၢၢ်ဘၢ အတၢ်သရူးကမၣ်န့ၣ် တဘီၣ် ထီၣ်တညီထီၣ်ဘၣ်ဘၣ်. မ့မ့ၢ်ပှၤလၢအတဲလီၤကျဲၤလီၤ ဒီးညိကွံာ်ဝဲန့ၣ်ကဒိးတၢ်သးကညီၤလီၤ.

¹⁴ ပှၤလၢအပျံၤတၢ်တထံၣ်ဃီန့ၣ် ဘၣ်ဆိၣ်ဂ့ၤဝဲလီၤ. မ့မ့ၢ်ပှၤလၢအပာ်ကိၤအသးန့ၣ် ကလီၤဘၣ်လၢတၢ်အၢ အပူၤလီၤ.

¹⁵ ပှၤတတီတလိၤလၢ အပၢပှၤဘၣ်ဖှီၣ်ဘၣ်ယာ်န့ၣ်မၤ သးဒ်ခ့ယုၢ်လၢအသီၣ်ထီၣ်ရုၢ်ရုၢ်, ဒီးတၤသူလၢအလဲၤ ဝ့ၤဝီၤတၢ်အသိးန့ၣ်လီၤ.

¹⁶ ပဒိၣ်ဖးဒိၣ်လၢအကူၣ် အဆးတအိၣ်ဘၣ်န့ၣ်မၤအၢ တၢ်ဖးဒိၣ်လီၤ. မ့မ့ၢ်ပှၤလၢအသးဟ့တၢ်သးကွံန့ၣ်က မၤအါထီၣ်အနံၤအသီလီၤ.

¹⁷ ပှၤလၢပှၤကညီအသွံၣ်အိၣ်လၢအလိၤန့ၣ် ကဃ့ၢ်တၢ် ဆူတၢ်ပူၤလီၤ. မ်ပှၤအသုတတြီအီၤတဂ့ၤ.

¹⁸ ပှၤလၢအလဲၤတၢ်လၢလၢပှဲၤပှဲၤန့ၣ် ကတုၤလၢတၢ် အုၣ်က့ၤခီၣ်က့ၤလီၤ. မ့မ့ၢ်ပှၤလၢအကျဲက့ၣ်န့ၣ်ကလီၤ ဃံၤတကီၢ်ခါလီၤ.

¹⁹ ပှၤလၢအမၤအဟီၣ်ခိၣ်န့ၣ်ကဘျဲးအီၣ်ကိၣ်လီၤ. မ့မ့ၢ် ပှၤလၢအလူၤတၢ်ကလီကလီန့ၣ် ကပှဲၤဒီးတၢ်ဖှီၣ်တၢ် ယာ်လီၤ.

²⁰ ပှၤအမ့ၢ်အတီန့ၣ် ကဘၣ်တၢ်ဆိၣ်ဂ့ၤလၢအအါလီၤ. မ့မ့ၢ်ပှၤလၢအမၤချ့ချ့ ဒ်သိးအကထူးထီၣ်တီၤထီၣ်ဒီး, ကတူၢ်တၢ်ဒဲးဘးလီၤ.

²¹ တၢ်ကွၢ်မဲာ်ပှၤကညီန့ၣ်တဂ့ၤဘၣ်. အဂ့ၢ်ဒ်အံၤ, ပှၤက ကမၣ်တၢ်လၢကိၣ်တလိၣ်အဂီၢ်လီၤ.

²² ပှၤလၢအသးအၢန့ၣ် မၤချ့ချ့ဒ်သိးအကထူးထီၣ်တီၤ ထီၣ်, ဒီးတဆိကမိၣ်ဘၣ်လၢ အကဘၣ်တၢ်နးတၢ် ဖှီၣ်ဘၣ်.

²³ ပှၤလၢအသိၣ်ဃီၣ်ပှၤကညီတဂၤန့ၣ် ကဘၣ်ဘျုးဘၣ် ဖှိၣ်လၢခံအါန့ၢ် ပှၤလၢအလွဲတၢ်လၢအပျ့ၤတက့ၢ်လီၤ.

²⁴ ပှၤလၢအဟုၣ်အမိၢ်အပၢ်အတၢ်, ဒီးစံးတမ့ၢ်ဘၣ်တၢ် ကမၣ်န့ၣ်မ့ၢ်အဒီတံၤဒီသကိးဒီးပှၤမၤဟးဂီၤတၢ်လီၤ.

²⁵ ပှၤလၢအသးကွံတၢ်န့ၣ် ထိၣ်ဂဲၤတၢ်အ့ၣ်လိာ်ဆိးက့ လိာ်လီၤ. မ့မ့ၢ် ပှၤလၢအသန့ၤအသးလၢယွၤန့ၣ်က ဘီၣ်ထီၣ်ညီထီၣ်လီၤ.

²⁶ ပှၤလၢအသန့ၤလီၤအသးလၢအသးဒၣ်ဝဲန့ၣ် မ့ၢ်ပှၤ ဟးဂီၤဖိလီၤ. မ့မ့ၢ်ပှၤလၢအလဲၤတၢ်ဒီးတၢ်ကူၣ်သ့န့ၣ် ကပူၤကဖျဲးတၢ်လီၤ.

²⁷ ပှၤလၢအဟ့ၣ်တၢ်လၢ ပှၤဖှီၣ်ဖိယာ်ဖိန့ၣ်အတၢ်က အါလီၤ. မ့မ့ၢ်ပှၤလၢအပာ်တဒၢအမဲာ်န့ၣ်ကဘၣ်တၢ် ဆိၣ်အၢအါမးလီၤ.

²⁸ တုၤပှၤတတီတလိၤထီၣ်ထီဒီး, ပှၤကညီ ပာ်ခူသူၣ် အသးလီၤ. မ့မ့ၢ်တုၤအဟးဂီၤဒီး, ပှၤတီပှၤလိၤအါထီၣ် ဝဲလီၤ.

၂၉

¹ ပှၤလၢအဘၣ်တၢ်သိၣ်ဃီၣ်အီၤအါဘျီ ဒီးပာ်ဆူၣ်အ ကိာ်န့ၣ် တၢ်ကမၤဟးဂီၤအီၤသတူၢ်ကလာ်, ဒီးတၢ်မၤ ဘျါက့ၤအီၤတအိၣ်ဘၣ်.

² တုၤပှၤတီပှၤလိၤအါထီၣ်ဒီး, ပှၤဂီၢ်မုၢ်သူၣ်ခုသးခု လီၤ. မ့မ့ၢ်တုၤပှၤအၢတဂၤပၢတၢ်ဒီး, ပှၤဂီၢ်မုၢ်သူၣ်အုး သးအုးလီၤ.

³ ပှၤလၢအအဲၣ်တၢ်ကူၣ်သ့န့ၣ်မၤသးခုအပၢ်လီၤ. မ့မ့ၢ် ပှၤလၢအဒီတံၤဒီသကိးဒီး ပှၤဃဲသဲမုၣ်န့ၣ် လၢာ်ဝီၤ အစုလီၢ်အခီၣ်ခိၣ်လီၤ.

⁴ စီၤပၤဒုးအိၣ်ဂၢၢ်ဆိးကျၢၤထံဧိၤကီၢ်ဧိၤလၢ တၢ်စံၣ် ညီၣ်တီလီၤ. မ့မ့ၢ်ပှၤလၢအဒိးန့ၢ်ခိၣ်ဖးန့ၣ်ကမၤဟး ဂီၤအီၤလီၤ.

⁵ ပှၤလၢအကတိၤလွဲပှၤလၢအဃၢၤန့ၣ် ဒါလီၤပျံၤသ ကွီၤလၢအခီၣ်အဂီၢ်လီၤ.

⁶ ပှၤအၢအလီၤကမၣ်တၢ်န့ၣ် အိၣ်ဝဲဒီးပျံၤသကွီၤလီၤ. မ့မ့ၢ်ပှၤတီပှၤလိၤန့ၣ်သးဝံၣ်တၢ်ဒီးသူၣ်ခုသးခုလီၤ.

⁷ ပှၤတီပှၤလိၤန့ၣ်ပးကဲပှၤဖှီၣ်ဖိယာ်ဖိအကွီၢ်လီၤ. မ့မ့ၢ် ပှၤတတီတလိၤဘၣ်န့ၣ် အနၢ်တပၢၢ်ဘၣ်တၢ်သ့ၣ်ညါ ဘၣ်.

⁸ ပှၤမၤတရီတပါတၢ်န့ၣ် ဒုးကဲၤထီၣ်မ့ၣ်လၣ်လၢဝ့ၢ်ပူၤ လီၤ. မ့မ့ၢ်ပှၤကူၣ်တၢ်သ့န့ၣ်ဒုးဃၣ်ကွံာ်တၢ်သးထီၣ်လီၤ.

⁹ ပှၤကူၣ်တၢ်သ့ကလိာ်ကွီၢ်ဒီးပှၤဟးဂီၤဖိ, ဒီးသးထီၣ် မ့ၢ်ဂ့ၤ, နံၤမ့ၢ်ဂ့ၤ, တၢ်အိၣ်ဘှံးတအိၣ်ဘၣ်.

¹⁰ ပှၤဘၣ်ဃးဒီးတၢ်သွံၣ်န့ၣ် သးဟ့ပှၤအလၢအပှဲၤလီၤ. မ့မ့ၢ်ပှၤအတီအလိၤန့ၣ်ဃုဒုးမူအီၤလီၤ.

¹¹ ပှၤဟးဂီၤဖိလီၣ်ဖျါထီၣ်အသးထီၣ်ခဲလၢာ်လီၤ. မ့မ့ၢ် ပှၤကူၣ်တၢ်သ့န့ၣ်မၤစၢ်လီၤဝဲလၢအလီၢ်ခံန့ၣ်လီၤ.

¹² ပှၤပၢတၢ်မ့ၢ်ကနၣ်တၢ်ကတိၤကဘျံးကဘျၣ်ဒီး, အ ခ့အပှၤမ့ၢ်ပှၤတတီတလိၤခဲလၢာ်လီၤ.

¹³ ပှၤဖှီၣ်ဖိဒီးပှၤမၤအၢမၤနးတၢ် သဂၢၢ်လိာ်အသးလီၤ. ယွၤဒုးကပီၤထီၣ်အမဲာ်ခံဂၤလၢာ်လီၤ.

¹⁴ စီၤပၤလၢအစံၣ်ညီၣ်ပှၤဖှီၣ်ဖိတီတီလိၤလိၤန့ၣ်အလီၢ် ပစိာ်ကအိၣ်ဂၢၢ်ဆိးကျၢၤလီၤထူလီၤယိာ်လီၤ.

¹⁵ နီၣ်တီၢ်ဒီးတၢ်သိၣ်ဃီၣ်န့ၣ်ဟ့ၣ်လီၤတၢ်ကူၣ်သ့လီၤ. မ့မ့ၢ်ဖိသၣ်အိၣ်ဒၣ်တၢ်န့ၣ်ကဒုးမဲာ်ဆှးအမိၢ်လီၤ.

¹⁶ တုၤပှၤတတီတလိၤဘၣ်န့ၣ်အါထီၣ်ဒီး, တၢ်ကမၣ် အါထီၣ်လီၤ. မ့မ့ၢ်ပှၤတီပှၤလိၤ ကထံၣ်ဘၣ်အတၢ် လီၤဃံၤန့ၣ်လီၤ.

¹⁷ သိၣ်ဃီၣ်နဖိခွါတက့ၢ်, ဒီးကဒုးအိၣ်ဘှံးနၤ, မ့ၢ်မး ကမၤမုာ်ထီၣ်က့ၤနသးလီၤ.

¹⁸ ဖဲတၢ်ထံၣ်တၢ်တအိၣ်ဘၣ်န့ၣ် ပှၤဂီၢ်မုၢ်တဘၣ်တၢ် တြီအီၤဘၣ်. မ့မ့ၢ်ပှၤလၢအတိၢ်န့ၢ်တၢ်သိၣ်တၢ်သီန့ၣ် ဘၣ်တၢ်အမုာ်လီၤ.

¹⁹ တၢ်အခ့အပှၤ တဒိးန့ၢ်ဘၣ် တၢ်သိၣ်ဃီၣ်လၢတၢ် ကတိၤဘၣ်. အဂ့ၢ်ဒ်အံၤ, မ့ၢ်နၢ်ပၢၢ်ဘၣ်ဆၣ်ဒီး, တစံး ဆၢဘၣ်ဝဲဘၣ်.

²⁰ နထံၣ်ဘၣ်ပှၤလၢအကတိၤတၢ်ချ့ချ့စ့ၢ်ကီးဧါ. ပမုၢ် လၢ်တၢ်လၢပှၤဟးဂီၤဖိအဂီၢ်အါန့ၢ်အီၤတက့ၢ်လီၤ.

²¹ ပှၤလၢအလုၢ်အီၣ်အခ့အပှၤမုာ်မုာ် လၢအဖိသၣ်လံၤ လံၤန့ၣ်လၢခံက့ၤကကဲထီၣ်အဖိခွါလီၤ.

²² ပှၤသးထီၣ်န့ၣ်ထိၣ်ဂဲၤတၢ်အ့ၣ်လိာ်ဆိးက့လိာ်, ဒီး ပှၤလၢအသးကဲၤထီၣ်န့ၣ်အတၢ်ကမၣ်အိၣ်အါမးလီၤ.

²³ ပှၤကညီအပာ်ထီၣ်ထီအသးန့ၣ် ကဒုးဆီၣ်လီၤအီၤ လီၤ. မ့မ့ၢ်ပှၤလၢအဆီၣ်လီၤအသးန့ၣ်ကဘၣ်တၢ်လၤ ကပီၤလီၤ.

²⁴ ပှၤလၢအဒီတံၤဒီသကိးဒီး ပှၤဟုၣ်တၢ်ဖိန့ၣ်သးဟ့အ သးဒၣ်ဝဲလီၤ. နၢ်ဟူဝဲတၢ်ဆိၣ်အၢန့ၣ်, ဒီးတလီၣ်ဖျါ ဘၣ်တၢ်ဘၣ်.

²⁵ တၢ်ပျံၤပှၤကညီန့ၣ်ဟဲစိာ်ပျံၤသကွီၤလီၤ. မ့မ့ၢ်ပှၤလၢ အသန့ၤအသးလၢယွၤန့ၣ်ကအိၣ်ခၢၣ်သနၢၢ်လီၤ.

²⁶ ပှၤအါဂၤဃုဘၣ်ပှၤပၢတၢ်အမဲာ်ဘၣ်ဆၣ်ဒီး, ပှၤက ညီအတၢ်စံၣ်ညီၣ်န့ၣ်ဟဲဝဲလၢယွၤလီၤ.

²⁷ ပှၤအၢပှၤသီန့ၣ်မ့ၢ်တၢ်သးဘၣ်အၢလၢ ပှၤတီပှၤလိၤ အဂီၢ်လီၤ. ဒီးပှၤလၢအလိၤဝဲလၢကျဲန့ၣ် မ့ၢ်တၢ်သး ဘၣ်အၢလၢပှၤတတီတလိၤဘၣ်အဂီၢ်လီၤ.

၃၀

¹ စီၤယၤက့ၣ်အဖိခွါစီၤအၤကူၢ်အတၢ်ကတိၤ. ပှၤတဂၤန့ၣ်စံးဘၣ်စီၤအံၤသအ့လး, စံးဘၣ်စီၤအံၤသ အ့လးဒၣ်လဲာ်ဒီးစီၤအူးကါလး,―

² မ့ၢ်မးယလီၤဂာ် ဆၣ်ဖိကီၤဖိအါန့ၢ် ပှၤကညီကိးဂၤ ဒဲးတက့ၢ်လီၤ. ဒီးပှၤကညီအတၢ်ကူၣ်တၢ်ဆးန့ၣ်တ အိၣ်ဘၣ်ဒီးယၤဘၣ်. ³ ဒီးယတမၤလိတ့ၢ်ဘၣ်တၢ်ကူၣ် သ့ဘၣ်, ဒီးယတသ့ၣ်ညါတ့ၢ်ဘၣ်တၢ်စီဆှံဘၣ်. ⁴ မ့ၢ် မတၤထီၣ်ဘးမူခိၣ် ဒီးဟဲက့ၤလီၤတဂၤလဲၣ်. မ့ၢ်မ တၤပာ်ဖှိၣ်ကလံၤလၢ အစုခိၣ်ပူၤတဂၤလဲၣ်. မ့ၢ်မတၤ ဘိၣ်ထီၣ်ထံလၢယၣ်ပူၤတဂၤလဲၣ်. မ့ၢ်မတၤမၤခၢၣ်သ နၢၢ်ဟီၣ်ခိၣ်အကတၢၢ်တဖၣ်တဂၤလဲၣ်, အမံၤဒ်လဲၣ်, ဒီး အဖိခွါအမံၤဒ်လဲၣ်. နမ့ၢ်သ့ၣ်ညါဒီး, စံး.

⁵ ယွၤအကလုၢ်ကထါန့ၣ် ကဆှီဝဲကိးထံၣ်ဒဲးလီၤ. အ ဝဲဒၣ်မ့ၢ်ကတီၤတဘ့ၣ်လၢ ပှၤသန့ၤအသးလၢအီၤ အ ဂီၢ်လီၤ.

⁶ ပာ်ဖှိၣ်တၢ်ဒီး အတၢ်ကတိၤတဂ့ၤ, ကသိၣ်ဃီၣ်ဘၣ် ဖုးနၤ, ဒီးတၢ်ကထံၣ်န့ၢ်နၤလၢ ပှၤကတိၤတၢ်ကဘျံး ကဘျၣ်လီၤ.

⁷ ယဃ့တ့ၢ် တၢ်ခံမံၤလၢနၤလီၤ. ယတချုးသံဒံးဘၣ် ဒီး, ဟ့ၣ်လီၤအီၤလၢယၤတက့ၢ်. ⁸ ပာ်လီတၢ်, ဒီးတၢ်က တိၤ, ကဘျံးကဘျၣ်န့ၣ်ယံၤဒီးယၤတက့ၢ်. တၢ်ဖှီၣ်တၢ် ယာ်မ့ၢ်ဂ့ၤ, တၢ်ထူးတၢ်တီၤမ့ၢ်ဂ့ၤ, ဟ့ၣ်လီၤယၤတဂ့ၤ, ဒုးအီၣ်ယၤလၢ တၢ်အီၣ်ဖဲအကလၢလၢယဂီၢ်တက့ၢ်.―

⁹ ယကအီၣ်ကုးအီပှဲၤဘၣ်ဖုးဒီးသမၢနၤ, ဒီးစံး, ယွၤန့ၣ် မ့ၢ်မတၤတဂၤလဲၣ်. မ့တမ့ၢ်ဘၣ်ဒ်န့ၣ်ဒီး, ယကဘၣ်ဖှီၣ် ဘၣ်ယာ်, ဒီးဟုၣ်ဘၣ်ဖုးတၢ်, ဒီးကိးထီၣ်တရီတပါယွၤ အမံၤန့ၣ်လီၤ.

¹⁰ ခဲၣ်တၢ်အခ့အပှၤလၢ အကစၢ်အမဲာ်ညါတဂ့ၤ. က ဆိၣ်အၢဘၣ်ဖုးနၤ, ဒီးနကတူၢ်တၢ်ဒဲးဘးလီၤ.

¹¹ ပှၤလၢအဆိၣ်အၢ အပၢ်ဒီး တဆိၣ်ဂ့ၤဘၣ်အမိၢ်န့ၣ် အိၣ်ဝဲတစိၤလီၤ. ¹² ပှၤလၢအကဆှီဝဲလၢအမဲာ်ဒၣ်ဝဲဘၣ် ဆၣ်ဒီး, တသ့စီဒံးဘၣ်အသးလၢ အတၢ်ဘၣ်အၢန့ၣ် အိၣ်ဝဲတစိၤလီၤ. ¹³ ပှၤလၢအမဲာ်အိၣ်ထီၣ်ထီဆံးထီလဲၣ်, ဒီးအမဲာ်ဖံးပာ်ထီၣ်ထီအသးန့ၣ် အိၣ်ဝဲတစိၤလီၤ. ¹⁴ ပှၤ လၢအမဲမ့ၢ်နး, ဒီးအမဲထွံၣ်မ့ၢ်ဒီ, ဒ်သိးအကအီၣ်ကွံာ် ပှၤဖှီၣ်ဖိယာ်ဖိ လၢဟီၣ်ခိၣ်ချၢ, ဒီးပှၤဘၣ်ဖှီၣ်ဘၣ်နး လၢပှၤကညီအကျါန့ၣ်အိၣ်ဝဲတစိၤလီၤ.

¹⁵ သလံၤအိၣ်ဝဲဒီး အဖိမုၣ်ခံဘိ, စံးဝဲ, ဟ့ၣ်, ဟ့ၣ်န့ၣ် လီၤ. တၢ်သၢမံၤအိၣ်ဝဲလၢအတဘျဲးအီၣ်ဘၣ်, မ့ၢ်လံ, တၢ်လွံၢ်မံၤ, လၢအတစံးဘၣ်အါလံန့ၣ်ဘၣ်. ¹⁶ တၢ်ပျုၤ ပူၤ, ပှၤတူာ်ဖိအဒၢလီၢ်, ဟီၣ်ခိၣ်လၢအတပှဲၤဘၣ်ဒီး ထံ, ဒီးမ့ၣ်အူ, တစံး, အါလံန့ၣ်ဘၣ်.

¹⁷ ပှၤအမဲာ်လၢအတပးကဲဘၣ်အပၢ်, ဒီးမၤတရီတပါ တၢ်ဒိကနၣ်အမိၢ် အကလုၢ်န့ၣ်စိးဝၣ်ဃး လၢကစၢၢ် ကဆူးန့ၣ်ကစိးကွံာ်အီၤ, ဒီးလံာ်ဧိၤတြၤဧိၤအဖိကအီၣ် ကွံာ်အီၤလီၤ. ¹⁸ တၢ်လၢအလီၤလးကဲၣ်ဆိးလၢ ယမဲာ်ညါအိၣ်သၢမံၤလီၤ. မ့ၢ်မးတၢ်လၢ ယနၢ်တပၢၢ်ဘၣ်န့ၣ်အိၣ်လွံၢ်မံၤ―

¹⁹ လံာ်ဧိၤတြၤဧိၤအကျဲလၢမူကပိာ်လိၤ, ဂုၢ်ဧိၤဒးဧိၤအကျဲ လၢလၢၢ်လိၤ, ကဘီအကျဲလၢပီၣ်လဲၣ်ပူၤ, ဒီးပှၤကညီ အိၣ်ဒီးပှၤမုၣ်ကနီၤအကျဲလီၤ. ²⁰ ပိာ်မုၣ်လၢအအဲၣ်ဘၢ အဝၤအကျဲန့ၣ်မ့ၢ်ဒ်န့ၣ်သိးလီၤ. အီၣ်ဝဲ, ဒီးတြူာ်အထး ခိၣ်, ဒီးစံးဝဲဒၣ်, ယတမၤတၢ်အၢဘၣ်.

²¹ ဟီၣ်ခိၣ်အိၣ်တမုာ်ဘၣ်လၢသၢမံၤအဃိ, ဒီးလွံၢ်မံၤ န့ၣ်တူၢ်ဝဲတကဲဘၣ်. ²² တၢ်အခ့အပှၤ, တုၤအပၢတၢ်, ဒီး ပှၤဟးဂီၤဖိ, တုၤအဘျဲးအီၣ်တၢ်, ²³ ဒီးပိာ်မုၣ်လၢပှၤသး ဟ့အီၤ, တုၤအန့ၢ်ဘၣ်အဝၤ, ဒီးကုၢ်ပိာ်မုၣ်လၢအန့ၢ်သါ အကစၢ်အတၢ်လီၤ.

²⁴ တၢ်လၢအဆံးလၢ ဟီၣ်ခိၣ်ချၢအံၤ ဘၣ်ဆၣ်ဒီး, ကူၣ်ဘၣ်ကူၣ်သ့ဒိၣ်ဒိၣ်ကလဲာ်န့ၣ်အိၣ်ဝဲလွံၢ်မံၤလီၤ.

²⁵ တၢၢ်ဧိၤတြၤဧိၤတဆူၣ်ဘၣ်ဆၣ်ဒီး, ကတဲာ်ကတီၤ အတၢ်အီၣ်လၢတၢ်ကိၢ်ခါလီၤ. ²⁶ ယုၢ်ၡၤဖးတဖၣ်အဂံၢ် စၢ်အဘါစၢ်ဘၣ်ဆၣ်ဒီး, မၤအဟံၣ်လၢလၢၢ်အိပူၤလီၤ.―

²⁷ ဒွဲၣ်ဧိၤတြၤဧိၤအစီၤပၤ တအိၣ်ဘၣ်ဘၣ်ဆၣ်ဒီး, ဟးဝဲ တဖုတဖုခဲလၢာ်လီၤ. ²⁸ ဒီးလ့ၢ်ဟံးဃာ်တၢ်လၢအစု, ဒီး အိၣ်ဝဲလၢစီၤပၤအနူၢ်ပူၤလီၤ.

²⁹ တၢ်ထွဲတၢ်ဂ့ၤအိၣ်ဝဲသၢမံၤ, ဒီးလွံၢ်မံၤလၢအထွဲတၢ် ဘၣ်အိၣ်ဝဲလီၤ. ³⁰ ခ့ယုၢ်ဆူၣ်ဝဲလၢဆၣ်ဖိကီၢ်ဖိအကျါ, ဒီးတဃၣ်ကွံာ်အသးလၢတၢ်နီတမံၤဘၣ်. ³¹ ထွံၣ်တက လုာ်လၢအယီၢ်ဒ့စ့ၤ, ဒီးမဲာ်တဲးလဲးဖါ, ဒီးစီၤပၤလၢတၢ် ဂဲၤဆၢထၢၣ်ထီဒါအီၤတသ့ဘၣ်လီၤ.

³² ဒီးနမ့ၢ်မၤပှၤဟးဂီၤဖိအတၢ် လၢနပာ်ထီၣ်ထီနသးအ ဃိမ့ၢ်ဂ့ၤ, နမ့ၢ်ကူၣ်တၢ်အၢမ့ၢ်ဂ့ၤ, ပာ်နစုလၢနထးခိၣ်အ ဖီခိၣ်တက့ၢ်. ³³ အဂ့ၢ်ဒ်အံၤ, တၢ်စံၢ်တၢ်နုၢ်ထံဒီးကဲထီၣ် တၢ်နုၢ်ထံကိၢ်လိၣ်, ဒီးတၢ်ဝံာ်ပှၤအနါဒ့ဒီး, သွံၣ်ဟဲထီၣ် ဝဲ, ဒီးပှၤမၤဆူၣ်ထီၣ်တၢ်သးထီၣ်ဒီး, တၢ်အ့ၣ်လိာ်ဆိးက့ လိာ်အိၣ်ထီၣ်ဝဲလီၤ.

၃၁

¹ မၤစၤ အစီၤပၤ လမူၤအ့လး အတၢ်ကတိၤလၢအ မိၢ်သိၣ်လိအီၤလီၤ.

² ယဖိခွါဧၢ, မနုၤလဲၣ်, ယဒၢလီၢ်အဖိခွါဧၢ, မနုၤ လဲၣ်, ယဖိခွါဘၣ်ဃးဒီးယဆိၣ်တၢ်တဂၤဧၢ, မနုၤ လဲၣ်, ³ ဟ့ၣ်နဂံၢ်နဘါလၢပိာ်မုၣ်တဂ့ၤ, နကျဲလၢတၢ် လၢအမၤဟးဂီၤစီၤပၤတဖၣ်န့ၣ်တဂ့ၤ.

⁴ စီၤလမူၤအ့လးဧၢ, အီစပံးထံန့ၣ်တမ့ၢ်ဘၣ်လၢစီၤ ပၤအဂီၢ်, တမ့ၢ်ဘၣ်လၢစီၤပၤအဂီၢ်ဘၣ်. ဆၢအီသံးန့ၣ် တမ့ၢ်ဘၣ်လၢပဒိၣ်ဖးဒိၣ်အဂီၢ်ဘၣ်.

⁵ ကအီတၢ်, ဒီးသးပ့ၤနီၣ်ဘၣ်ဖုးတၢ်သိၣ်တၢ်သီ, ဒီး မၤကဒံကဒါပှၤဘၣ်ဖှီၣ်ဘၣ်နး တဂၤဂၤအတၢ်စံၣ်ညီၣ် ကွီၢ်လီၤ. ⁶ ဟ့ၣ်သံးဧိၤမ့ၤဧိၤလၢပှၤလၢအဘူးဒီးအက ဟးဂီၤ, ဒီးစပံးထံလၢပှၤလၢအသးဆါတက့ၢ်, မ်အအီ တၢ်ဒီးသးပ့ၤနီၣ် အတၢ်ဖှီၣ်တၢ်ယာ်တက့ၢ်. ⁷ မ်အသု တသ့ၣ်နီၣ်ထီၣ်က့ၤလၢၤအတၢ်နးတၢ်ဖှီၣ်တဂ့ၤ.

⁸ အဲးထီၣ်နထးခိၣ်လၢ ပှၤတအုၣ်တဖၣ်အဂီၢ်, ဒီးလၢ ပှၤဖိၣ်ဃဲခဲလၢာ်အကွီၢ်အဂီၢ်တက့ၢ်. ⁹ အဲးထီၣ်နထးခိၣ် စံၣ်ညီၣ်တၢ်တီတီလိၤလိၤ, ဒီးစံၣ်ညီၣ်တီပှၤဘၣ်နးဘၣ် ဖှီၣ်ဒီးပှၤဖှီၣ်ဖိယာ်ဖိန့ၣ်တက့ၢ်.

¹⁰ မ့ၢ်မတၤထံၣ်န့ၢ်အမါလၢအမၤတၢ်သ့တဂၤလဲၣ်. အ ဂ့ၢ်ဒ်အံၤ, အပှ့ၤဒိၣ်န့ၢ်တၢ်မျၢ်တက့ၢ်လီၤ. ¹¹ အဝၤအသး သန့ၤအသးလၢအီၤ, ဒီးအတၢ်အါထီၣ်တစှၤလီၤဘၣ်.―

¹² မၤအီၤလၢ တၢ်ဂ့ၤဒီးတမ့ၢ်ဘၣ်လၢ တၢ်အၢတစိၤဒၣ် အီၤလီၤ. ¹³ ဃုန့ၢ်သိအဆူၣ်ဒီးဘဲ, ဒီးမၤဒၣ်တၢ်လၢအ စုလီၤ. ¹⁴ မၤသးဒ်ပှၤကၤတၢ်ဖိအကဘီအသိးန့ၣ်, ဟဲစိာ် တၢ်အီၣ်လၢအယံၤလီၤ. ¹⁵ လၢတၢ်ခံးဒံးန့ၣ်ဂဲၤဆၢထၢၣ် ဒီးဒုးအီၣ်အပှၤဟံၣ်ဖိ, ဒီးဟ့ၣ်လီၤအခ့အပှၤ ပိာ်မုၣ်အ ဂီၢ်လီၤ. ¹⁶ ကွၢ်ဆိကမိၣ်ဝဲလၢဟီၣ်ခိၣ်တကဝီၤ, ဒီးပှ့ၤ န့ၢ်ဝဲလီၤ. သူၣ်စပံးလီၢ်လၢအစုအတၤသၣ်လီၤ. ¹⁷ ကံၢ်တူာ်အယီၢ်ဒ့လၢတၢ်ဂံၢ်တၢ်ဘါ, ဒီးပာ်ဆူၣ်ထီၣ်အစု ဒုၣ်လီၤ. ¹⁸ သ့ၣ်ညါဝဲလၢကၤတၢ်မ့ၢ်အဂ့ၤလီၤ. အမ့ၣ်အူ ဒၢတလီၤပံာ်လၢမုၢ်နၤဘၣ်. ¹⁹ ပာ်အစုလၢနီၣ်ဘ့ဘဲအ လိၤ, ဒီးအစုဟံးဃာ်ကဟၣ်စုဝံာ်ဘဲလီၤ. ²⁰ သလၣ်ထီၣ် အစုလၢပှၤဘၣ်နးဘၣ်ဖှီၣ်အဂီၢ်, ဒီးယူာ်ထီၣ်အစုဆူ ပှၤဖှီၣ်ဖိယာ်ဖိအအိၣ်လီၤ. ²¹ တပျံၤဘၣ်မူခိၣ်ဖီလၢအပှၤ ဟံၣ်ဖိအဂီၢ်ဘၣ်. အဂ့ၢ်ဒ်အံၤ, အပှၤဟံၣ်ဖိကူဝဲသိးဝဲဒီး တၢ်ဂီၤလီၤ. ²² မၤဝဲဒီးယၣ်လုးလၢအလီၢ်မံအဂီၢ်လီၤ. အ ကူအသိးမ့ၢ်ဖှီဝါကဆှၣ်, ဒီးလုးတကုာ်လီၤ. ²³ တုၤအဝၤ ဆ့ၣ်နီၤဝဲလၢပဲတရီအပူၤ, လၢထံဧိၤကီၢ်ဧိၤအပှၤသး ပှၢ်အကျါန့ၣ်ဒီး, ပှၤသ့ၣ်ညါအီၤလီၤ. ²⁴ မၤဝဲလၢတၢ်အ ကူအသိးဖှီဝါကဆှၣ်, ဒီးဆါကွံာ်ဝဲ, ဒီးဟ့ၣ်လီၤယီၢ်တ ကိးတဖၣ်လၢ ပှၤကၤတၢ်ဖိလီၤ. ²⁵ တၢ်ဂံၢ်တၢ်ဘါ, ဒီး တၢ်လၤကပီၤန့ၣ်မ့ၢ်အကူအသိးလီၤ. ဒီးနံၤဘၣ်မုၢ်နံၤ လၢအကဟဲတဖၣ်န့ၣ်လီၤ. ²⁶ အဲးထီၣ်အထးခိၣ်အိၣ်ဒီး တၢ်ကူၣ်သ့, ဒီးတၢ်ဘျုးတၢ်ဖှိၣ်အတၢ်သိၣ်တၢ်သီန့ၣ် အိၣ်ဝဲလၢအပျ့ၤလိၤလီၤ. ²⁷ ကွၢ်ဝဲလၢအပှၤဟံၣ်ဖိအကျဲ ကစီဒီ, တအီၣ်တၢ်အကၢၣ်အကိၣ်ဘၣ်. ²⁸ အဖိဂဲၤဆၢထၢၣ်, ဒီးဆိၣ်ဂ့ၤအီၤ, အဝၤန့ၣ်စံးထီၣ်ပတြၢၤအီၤလီၤ.―

²⁹ ပှၤဖိမုၣ်အါဂၤ မၤဂ့ၤဂ့ၤဘၣ်ဘၣ်လံဘၣ်ဆၣ်ဒီး, နတ လၢကွံာ်အီၤခဲလၢာ်လီၤ.

³⁰ တၢ်အဃံအလၤန့ၣ် လီန့ၢ်တၢ်, ဒီးတၢ်အက့ၢ်ဂ့ၤ အဂီၤဂ့ၤမ့ၢ်တၢ်ကလီကလီလီၤ. မ့မ့ၢ်ပိာ်မုၣ်လၢအပျံၤ ယွၤန့ၣ်တၢ်ကစံးထီၣ်ပတြၢၤအီၤလီၤ.

³¹ ဟ့ၣ်အီၤလၢအစုအတၤသၣ်, ဒီးမ်အတၢ်မၤဒၣ်ဝဲ စံးထီၣ်ပတြၢၤအီၤလၢပဲတရီအပူၤတက့ၢ်.