တၢ်သးခုအကစီၣ်ဒ်စီၤလူၤကၣ်ကွဲးဝဲအသိးန့ၣ်.

တၢ်သးခုအကစီၣ်ဒ်စီၤလူၤကၣ်ကွဲးဝဲအသိးန့ၣ်.

၁

¹ တၢ်ဒိၣ်သီးဖံၤလူးဧၢ, တၢ်တဖၣ်လၢအဘၣ်တၢ်နာ် အီၤသပှၢ်တၢၢ်လၢပကျါ, ² ဒ်ပှၤလၢအထံၣ်တၢ်လၢအ မဲာ်ဒီးမၤအကလုၢ်အကထါအတၢ်မၤလၢ အခီၣ်ထံးလံၤ လံၤ, ဟ့ၣ်လီၤပှၤအသိး, အကူၢ်မ့ၢ်ပှၤအါဂၤပာ်တ့ၢ်အ သးလၢအကကတီၤကွဲးဝဲဒီး, ³ ယဲဒၣ်အံၤလၢအခီၣ်ထံး လံၤလံၤယဃုတိၢ်န့ၢ်တၢ်န့ၣ် ခဲလၢာ်လီၤတံၢ်လီၤဆဲးဒီး, ဘၣ်ယသးလၢယကကွဲးန့ၢ်နၤ, ⁴ တမံၤဘၣ်တမံၤ, ဒ်သိး နကသ့ၣ်ညါလၢတၢ်လၢနမၤလိတ့ၢ်တဖၣ်န့ၣ်, မ့ၢ်တၢ် အမ့ၢ်အတီလီၤ.

⁵ လၢကီၢ်ယူဒၤ အစီၤပၤဟ့ၤရိာ်အစိၤန့ၣ်, မတၤတဂၤ ပှၤလုၢ်တၢ်အဒိၣ်လၢ စီၤအဘံယၤတစိၣ်အကျါ, အမံၤ မ့ၢ်စီၤစဃၤရံ, အိၣ်ဝဲတဂၤ, ဒီးအမါမ့ၢ်လၢစီၤအၤဟရိၣ် အဖိမုၣ်အကျါ, ဒီးအမံၤမ့ၢ်နီၢ်အ့းလံၤစါဘ့းလီၤ. ⁶ ဒီး တီဝဲလိၤဝဲလၢယွၤအမဲာ်ညါခံဂၤလၢာ်, ဒီးလဲၤဝဲလၢယွၤ အတၢ်မၤလိာ်, ဒီးအတၢ်တီတၢ်လိၤခဲလၢာ်အပူၤ, ဒီး ပာ်တၢ်ကမၣ်လၢအလိၤအလီၢ်တအိၣ်ဘၣ်လီၤ. ⁷ ဒီးအ ဖိတအိၣ်ဘၣ်. အဂ့ၢ်ဒ်အံၤ, နီၢ်အ့းလံၤစါဘ့းန့ၣ်မ့ၢ်ပှၤ တူာ်ဖိ, ဒီးသးပှၢ်သဃဲးတ့ၢ်ဝဲခံဂၤလၢာ်လီၤ.

⁸ ဒီးတၢ်မၤအသးလၢ အမၤပှၤလုၢ်တၢ်အဒိၣ်အတၢ်မၤ လၢအတီၤအတစိၣ်ကျါလၢယွၤအမဲာ်ညါ, ဒ်ပှၤလုၢ်တၢ် အဒိၣ်တဖၣ်အလုၢ်အလၢ်အသိး, ဒီးဖးဝဲသတးဒီး, ⁹ တုၤ အလဲၤနုာ်ဆူ ယွၤအတၢ်လုၢ်ဟံၣ်ပူၤဒီး, ဘၣ်ဆိၣ်ကဲၤ တၢ်နၢမူလီၤ. ¹⁰ ဒီးနၣ်ရံၣ်လၢအဆိၣ်ကဲၤတၢ်နၢမူန့ၣ်, ပှၤ ဂီၢ်မုၢ်ခဲလၢာ်ဘါထုကဖၣ်တၢ်လၢခိလီၤ. ¹¹ ဒီးယွၤအက လူးတဂၤလီၣ်ဖျါထီၣ်အသးလၢအီၤ, ဒီးဆၢထၢၣ်ဝဲလၢ တၢ်ဆိၣ်ကဲၤနၢမူအလီၢ် စုထွဲတခီလီၤ. ¹² ဒီးစီၤစဃၤရံ ထံၣ်ဘၣ်ဝဲ, ဒီးအသူၣ်ကိၢ်အသးဂီၤ, ဒီးဘၣ်ပျံၤဘၣ်ဖုးဝဲ လီၤ. ¹³ ဒီးကလူးန့ၣ်စံးဘၣ်အီၤ, စီၤစဃၤရံဧၢ, ပျံၤတၢ်တ ဂ့ၤ, အဂ့ၢ်ဒ်အံၤ, တၢ်နၢ်ဟူတ့ၢ်လံနတၢ်ထုကဖၣ်, ဒီး နမါနီၢ်အ့းလံၤစါဘ့းကဆံးစၢ်န့ၢ်နဖိခွါ, ဒီးနဘၣ်ယုၢ်အ မံၤလၢစီၤယိၤဟၣ်လီၤ. ¹⁴ ဒီးကမ့ၢ်တၢ်သူၣ်ခုသးခု, သူၣ်ဖှံ သးညီလၢနဂီၢ်, ဒီးပှၤကသူၣ်ခုသးခုလၢအအိၣ်ဖျဲၣ်အဂ့ၢ် န့ၣ်အါဂၤလီၤ. ¹⁵ အဂ့ၢ်ဒ်အံၤ, ကမ့ၢ်ပှၤအဒိၣ်လၢယွၤအ မဲာ်ညါ, ဒီးစပံးထံဒီးတၢ်မူၤပှၤန့ၣ်, တဘၣ်အီဘၣ်ဝဲဘၣ်. ဒီးလၢအမိၢ်အဟၢဖၢပူၤလံၤလံၤန့ၣ်, ကလၢပှဲၤဝဲဒီးသးစီ ဆှံလီၤ. ¹⁶ ဒီးကဘိးဃၣ်က့ၤပှၤအံၣ်စရ့လးဖိအါဂၤဆူအ ကစၢ်ယွၤအအိၣ်လီၤ. ¹⁷ ဒီးကလဲၤဝဲလၢအမဲာ်ညါလၢစီၤ အ့ၤလံယၤအသူၣ်အသးဒီး အစိအကမီၤ, ဒ်သိးအက ဘိးဃၣ်က့ၤ ပၢ်တဖၣ်အသးဆူဖိအအိၣ်, ဒီးပှၤတစူၢ် ဘၣ်တၢ်န့ၣ်ဆူပှၤတီပှၤလိၤအတၢ်ကူၣ်သ့+ မၤ. ၄း၅, ၆|Mal.4.5-Mal.4.6*, ဒ်သိးအကကတဲာ်ကတီၤပှၤမၤက့ၤအသးတကလုာ် လၢကစၢ်အဂီၢ်လီၤ.

¹⁸ ဒီးစီၤစဃၤရံ စံးဘၣ်ကလူးန့ၣ်, တၢ်အံၤမ့ၢ် ယက သ့ၣ်ညါဒ်လဲၣ်. အဂ့ၢ်ဒ်အံၤ, ယဲဒၣ်အံၤ, ယမ့ၢ်ပှၤသးပှၢ်, ဒီးယမါန့ၣ်အသးပှၢ်သဃဲးတ့ၢ်လံန့ၣ်လီၤ. ¹⁹ ဒီးကလူး န့ၣ်ကတိၤဆၢတၢ်ဒီးစံးဘၣ်အီၤ, ယဲဒၣ်အံၤယမ့ၢ် ကၤ ဘြံၤအ့လး, လၢအဆၢထၢၣ်လၢယွၤအမဲာ်ညါ, ဒီးတၢ် မၢယဟဲကတိၤတၢ်ဒီးနၤ, ဒီးစံးဘၣ်တဲဘၣ်နၤလၢတၢ် သးခုအကစီၣ်အံၤလီၤ. ²⁰ ဒီးကွၢ်ကွၢ်, မ့ၢ်နတနာ်ဘၣ် ယကလုၢ်လၢအကလၢထီၣ်ပှဲၤထီၣ် ဖဲအကတီၢ်န့ၣ်ဒီး, လၢအတချုးမၤဒံးဘၣ်အသးဒီး, နကတိၤတၢ်တသ့လၢၤ ဘၣ်, ဒီးနကအိၣ်တအုၣ်လီၤ.

²¹ ဒီးပှၤဂီၢ်မုၢ် ကွၢ်လၢ် စီၤစဃၤရံအကျဲ, ဒီးမ့ၢ်အအိၣ် ဃဲးဃဲးလၢတၢ်လုၢ်ဟံၣ်ပူၤဒီး, ကမၢကမၣ်ဝဲတကူၢ်သ့ၣ် လီၤ. ²² ဒီးဟဲက့ၤထီၣ်ဝဲ, ဒီးကတိၤတၢ်ဒီးအီၤတသ့ဘၣ် ဒီးအဝဲသ့ၣ်သ့ၣ်ညါလၢ အထံၣ်တၢ်လၢညါခီ လၢတၢ် လုၢ်အဟံၣ်ပူၤ, ဒီးအဝဲဒၣ်ကျၢၢ်ကျာ်တၢ်ဆူအဝဲသ့ၣ်အ အိၣ်, ဒီးအိၣ်တအုၣ်ဝဲလီၤ.

²³ ဒီးတၢ်မၤအသးလၢ အနံၤအသီ လၢအမၤအတၢ်န့ၣ် လၢထီၣ်ပှဲၤထီၣ်ဒီး, က့ၤဝဲဆူအဟံၣ်လီၤ.

²⁴ ဒီးတၢ်လၢမုၢ်နံၤတဖၣ်န့ၣ် အလီၢ်ခံဒီး, အမါနီၢ်အ့း လံၤစါဘ့းဒၢထီၣ်, ဒီးပာ်ခူသူၣ်အသးယဲၢ်လါ, ဒီးစံးဝဲ ဒၣ်, ²⁵ ကစၢ်မၤယၤဒ်အံၤလၢမုၢ်နံၤတဖၣ်ဖဲအကွၢ်ယၤ, ဒ် သိးအကမၤပူၤမၤဖျဲးယၤလၢ တၢ်ဒုၣ်ဒွဲၣ်လၢပှၤကညီအ ကျါလီၤ.

²⁶ ဒီးလၢဃုလါတလါအပူၤန့ၣ်, ယွၤမၢကလူးကၤဘြံၤ အ့လးလဲၤဆူ ဝ့ၢ်တဖျၢၣ်လၢကၤလံၤလါအပူၤ, ကိးဝဲအ မံၤလၢနစၤရ့း, ²⁷ ဆူပှၤမုၣ်ကနီၤအအိၣ်လၢ အဘၣ်အဲၣ် တီဒီးပှၤလၢအမံၤမ့ၢ်စီၤယိၤသး, ဘၣ်ဃးဒီး စီၤဒၤဝံးအ ဟံၣ်လီၤ. ဒီးပှၤမုၣ်ကနီၤအမံၤမ့ၢ်နီၢ်မၤရံလီၤ. ²⁸ ဒီးက လူးလဲၤနုာ်ဆူအအိၣ်ဒီးစံးဝဲဒၣ်, ပှၤလၢအဘၣ်ဘျုးအါ တဂၤဧၢ, ယွၤအိၣ်ဒီးနၤလီၤ. လၢပိာ်မုၣ်အကျါန့ၣ် န ဘၣ်ဆိၣ်ဂ့ၤနဲလီၤ. ²⁹ ဒီးတုၤအထံၣ်ဝဲဒီး, အသူၣ်ကိၢ်အ သးဂီၤလၢအတၢ်ကတိၤအဃိ, ဒီးမ့ၢ်တၢ်ကတိၤ ဒိၣ်ဒ် လဲၣ်ဒ်လဲၣ်န့ၣ်, ဆိကမိၣ်ဝဲဒၣ်လီၤ. ³⁰ ဒီးကလူးန့ၣ်စံး ဘၣ်အီၤ, နီၢ်မၤရံဧၢ, ပျံၤတၢ်တဂ့ၤ, အဂ့ၢ်ဒ်အံၤ, နဘၣ် ဘျုးလၢယွၤလီၤ. ³¹ ဒီးကွၢ်ကွၢ်, နကဒၢထီၣ်ဒီးနကဆံးစၢ် န့ၢ်နဖိခွါ, ဒီးနဘၣ်ယုၢ်အမံၤလၢယ့ၣ်ရှူးလီၤ. ³² အဝဲဒၣ် န့ၣ်ကမ့ၢ်ပှၤအဒိၣ်, ဒီးကဘၣ်တၢ်ကိးအီၤလၢတၢ်ထီက တၢၢ်အဖိခွါလီၤ. ဒီးကစၢ်ယွၤကဟ့ၣ်အီၤလၢအပၢ်စီၤဒၤ ဝံးအလီၢ်ပစိာ်, ³³ ဒီးကပၢဘၣ်စီၤယၤကိၣ်အဟံၣ်အစိၤ စိၤအဃၣ်ဃၣ်လီၤ. ဒီးအဘီအမုၢ်န့ၣ်အကတၢၢ်တအိၣ် ဘၣ်လီၤ.

³⁴ ဒီးနီၢ်မၤရံစံးဘၣ်ကလူးန့ၣ်, မ့ၢ်ယတသ့ၣ်ညါဘၣ်ပှၤ ပိာ်ခွါဘၣ်ဒီး, တၢ်အံၤကမၤအသးဒ်လဲၣ်. ³⁵ ဒီးကလူးန့ၣ် ကတိၤဆၢတၢ်ဒီးစံးဘၣ်အီၤ, သးစီဆှံကဟဲလီၤလၢန လိၤ, ဒီးတၢ်ထီကတၢၢ်အစိအကမီၤကကဒုဘၣ်နၤလီၤ. မၤသးဒ်န့ၣ်ဒီးတၢ်စီဆှံလၢအကအိၣ်ဖျဲၣ်ဝဲန့ၣ်, ကဘၣ် တၢ်ကိးအီၤလၢယွၤအဖိခွါစ့ၢ်ကီးလီၤ. ³⁶ ဒီးကွၢ်ကွၢ်, ပှၤ ဒီဘူးဒီတံၢ်ဒီးနၤ, နီၢ်အ့းလံၤစါဘ့းတဂၤ, လၢအသးပှၢ် သဃဲးတ့ၢ်ဝဲ, ဒၢထီၣ်စ့ၢ်ကီးလံအဖိခွါ, ဒီးအအံၤမ့ၢ်လါ ဃုလါတလါဒီး ပှၤလၢတၢ်ကိးအီၤလၢပှၤတူာ်ဖိတဂၤ န့ၣ်လီၤ. ³⁷ အဂ့ၢ်ဒ်အံၤ, တၢ်လၢယွၤမၤတသ့ဘၣ်န့ၣ်, တအိၣ်ဘၣ်နီတမံၤဘၣ်. ³⁸ ဒီးနီၢ်မၤရံစံးဝဲဒၣ်, ကွၢ်ကွၢ်, ကစၢ်အကုၢ်ပိာ်မုၣ်လီၤ. မ်တၢ်ကမၤအသးဒီးယၤဒ်နက လုၢ်အသိးန့ၣ်တက့ၢ်. ဒီးကလူးန့ၣ်ဟးထီၣ်ကွံာ်ဝဲလၢ အအိၣ်လီၤ.

³⁹ ဒီးလၢမုၢ်နံၤတဖၣ်န့ၣ်, နီၢ်မၤရံဂဲၤဆၢထၢၣ်ဒီးလဲၤချ့ သဒံးဝဲဆူကစၢၢ်ကလိအလီၢ်, ဆူဝ့ၢ်အိၣ်လၢကီၢ်ယူဒၤ အဝ့ၢ်လီၤ. ⁴⁰ ဒီးလဲၤနုာ်ဆူစီၤစဃၤရံအဟံၣ်ပူၤဒီးကတိၤ ဒိၣ်နီၢ်အ့းလံၤစါဘ့းလီၤ. ⁴¹ ဒီးလၢနီၢ်အ့းလံၤစါဘ့းနၢ်ဟူ နီၢ်မၤရံအတၢ်ကတိၤဒိၣ်န့ၣ်ဒီး, တၢ်မၤအသးလၢ အဖိ ဂဲၤဝဲလၢအဟၢဖၢပူၤလီၤ. ⁴² ဒီးနီၢ်အ့းလံၤစါဘ့းလၢထီၣ် ပှဲၤထီၣ်ဝဲဒီးသးစီဆှံ, ဒီးကိးထီၣ်လၢအကလုၢ်ဖးဒိၣ်ဒီး စံးဝဲဒၣ်, လၢပိာ်မုၣ်အကျါန့ၣ်, နဘၣ်တၢ်ဆိၣ်ဂ့ၤနဲဒၣ် လီၤ. ဒီးနဟၢဖၢအတၤသၣ်န့ၣ်ဘၣ်ဆိၣ်ဂ့ၤဝဲလီၤ. ⁴³ တၢ် အံၤမၤအသးဒီးယၤလၢလဲၣ်, လၢယကစၢ်အမိၢ်ကဟဲဆူ ယအိၣ်အံၤလဲၣ်. ⁴⁴ အဂ့ၢ်ဒ်အံၤ, ကွၢ်ကွၢ်, လၢနတၢ်က တိၤဒိၣ်ဟူဘၣ်ယနၢ်ပူၤဒီး, ဖိသၣ်အသူၣ်ဖှံအသးညီဒီး ဂဲၤဝဲလၢယဟၢဖၢပူၤလီၤ. ⁴⁵ ဒီးပိာ်မုၣ်လၢအစူၢ်က့ၤနာ် က့ၤလၢတၢ်လၢယွၤစံးဘၣ်အီၤ, ကလၢထီၣ်ပှဲၤထီၣ်ဝဲ န့ၣ်, ဘၣ်တၢ်ဆိၣ်ဂ့ၤဝဲလီၤ. ဒီးနီၢ်မၤရံစံးဝဲဒၣ်, ယသးအံၤပာ်ယွၤလၢတၢ်အဒိၣ်,

⁴⁷ ဒီးယသူၣ်ကပိၢ်ယသးကဝးလၢ ပှၤအုၣ်က့ၤခီၣ်က့ၤယၤ, ယွၤအပူၤလီၤ. ⁴⁸ အဂ့ၢ်ဒ်အံၤ, ကွၢ်က့ၤလံအကုၢ်ပိာ်မုၣ် အတၢ်ဖှီၣ်လံ. အဂ့ၢ်ဒ်အံၤ, ကွၢ်ကွၢ်, တုၤအံၤဆူညါဒီး, ပှၤအစိၤစိၤအဃၣ်ဃၣ်ခဲလၢာ်ကကိးယၤလၢပှၤဘၣ်တၢ် ဆိၣ်ဂ့ၤလီၤ. ⁴⁹ အဂ့ၢ်ဒ်အံၤ, ပှၤသ့တၢ်လၢာ်န့ၣ်, မၤတၢ် အဒိၣ်လၢယဂီၢ်, ဒီးအမံၤမ့ၢ်တၢ်စီဆှံလီၤ. ⁵⁰ ဒီးအတၢ် သူၣ်ကညီၤသးကညီၤ အိၣ်ဝဲလၢပှၤလၢအပျံၤအီၤအလိၤ အစိၤစိၤအဃၣ်ဃၣ်လီၤ. ⁵¹ ဒီးမၤတၢ်စိတၢ်ကမီၤလၢအ စု, ဒီးမၤလီၤပြံလီၤပြါပှၤလၢအပာ်ကဖိအသးတဖၣ်, လၢ အတၢ်ကူၣ်ထီၣ်ဖးလီၤန့ၣ်လီၤ. ⁵² ဒီးတ့ၢ်လီၤကွံာ် ပှၤအ ဒိၣ်တဖၣ်လၢအလီၢ်ပစိာ်အဖီခိၣ်, ဒီးပာ်ထီၣ်ထီပှၤလၢ အဘၣ်ဖှီၣ်ဘၣ်ယာ်လီၤ. ⁵³ ပှၤလၢတၢ်သၣ်ဝံၤအသးန့ၣ်, ဒုးအီၣ်ဘျဲးအီၣ်ဝဲလၢတၢ်ဝံၣ်တၢ်ဆၢ, မ့မ့ၢ်ပှၤအထူးအ တီၤန့ၣ်, ဒုးက့ၤကလီကလီဝဲန့ၣ်လီၤ. ⁵⁴ မၤစၢၤအဖိအံၣ် စရ့လး, လၢတၢ်တိၢ်နီၣ်အတၢ်သးကညီၤဒီးစီၤအၤဘြၤ ဟၣ်ဒီးအချံအသၣ်လီၤစိၤလီၤဃၣ်, ⁵⁵ ဒ်အစံးပာ်လၢပပၢ် သ့ၣ်အသိးန့ၣ်လီၤ.

⁵⁶ ဒီးနီၢ်မၤရံအိၣ်ဒီး နီၢ်အ့းလံၤစါဘ့းသၢလါဃၣ်ဃၣ်, ဒီးက့ၤက့ၤဝဲဆူအဟံၣ်လီၤ. ⁵⁷ ဒီးနီၢ်အ့းလံၤစါဘ့းအမုၢ် အလါဘၣ်ဝဲ, ဒီးဆံးစၢ်န့ၢ်အဖိခွါလီၤ. ⁵⁸ ဒီးပှၤအိၣ်ဝးတ ရံးအီၤ, ဒီးအဘူးအတံၢ်တဖၣ်န့ၣ်, နၢ်ဟူလၢယွၤပာ်ဒိၣ် ထီၣ်အတၢ်သးကညီၤလၢအီၤ, ဒီးအသူၣ်ခုသးခုဃုာ်ဒီး အီၤလီၤ.

⁵⁹ ဒီးတၢ်မၤအသးလၢဃိးနံၤတနံၤဒီး, ပှၤဟဲဝဲဒ်သိးအ ကကူးတရံးဖိသၣ်န့ၣ်, ဒီးသါကယုၢ်ဝဲအမံၤလၢအပၢ်စီၤ စဃၤရံအမံၤလီၤ. ⁶⁰ ဒီးအမိၢ်ကတိၤဆၢတၢ်ဒီးစံးဝဲဒၣ်, တမ့ၢ်ဘၣ်, ဘၣ်ယုၢ်အမံၤလၢစီၤယိၤဟၣ်လီၤ. ⁶¹ ဒီးအဝဲ သ့ၣ်စံးဘၣ်အီၤ, လၢနဘူးနတံၢ်အကျါန့ၣ်, ပှၤလၢတၢ် ကိးအမံၤဒ်န့ၣ်တအိၣ်ဘၣ်နီတဂၤဘၣ်. ⁶² ဒီးအပၢ်အသး အိၣ်ယုၢ်အမံၤဒ်လဲၣ်ဒ်လဲၣ်န့ၣ်, အဝဲသ့ၣ်ကျၢၢ်ကျၣ်လၢ အီၤလီၤ. ⁶³ ဒီးအဝဲဒၣ်ဃ့တၢ်ကွဲးအလီၢ်, ဒီးကွဲးတၢ်, ဒီးစံး ဝဲဒၣ်, အမံၤမ့ၢ်စီၤယိၤဟၣ်လီၤ. ဒီးကမၢကမၣ်ဝဲခဲလၢာ် လီၤ. ⁶⁴ ဒီးအထးခိၣ်အိးထီၣ်က့ၤအသးတကီၢ်ခါ, ဒီးအ ပျ့ၤလီၤဆှၣ်ဝဲ, ဒီးကတိၤတၢ်ဒီးစံးထီၣ်ပတြၢၤယွၤလီၤ.―

⁶⁵ ဒီးပှၤအိၣ်ဝးတရံးအီၤတဖၣ် ဘၣ်ပျံၤဘၣ်ဖုး, ဒီးတၢ်မၤ အသးန့ၣ် ဟူထီၣ်သါလီၤလၢကစၢၢ်ကလိအလီၢ် လၢ ကီၢ်ယူဒၤအပူၤသကုၤဆးဒးလီၤ. ⁶⁶ ဒီးပှၤလၢအနၢ်ဟူတၢ် တဖၣ်န့ၣ်, ပာ်ဝဲလၢအသးဒီးစံးဝဲဒၣ်, မၤသးဒ်န့ၣ်ဒီး, တၢ်လၢဖိသၣ်အံၤကကဲထီၣ်ပှၤဒ်လဲၣ်. ဒီးယွၤအစုအိၣ် ဒီးအီၤလီၤ.

⁶⁷ ဒီးအပၢ်စီၤစဃၤရံလၢထီၣ်ပှဲၤထီၣ်ဒီးသးစီဆှံ, ဒီးက တိၤတၢ်လၢဝံအကျိာ်, ဒီးစံးဝဲဒၣ်, ⁶⁸ ကစၢ်, အံၣ်စရ့လး အယွၤန့ၣ်, မ်အဘၣ်တၢ်ဆိၣ်ဂ့ၤတက့ၢ်. အဂ့ၢ်ဒ်အံၤ,

⁶⁹ ဟဲအိၣ်သကိးဒီးမၤပူၤမၤဖျဲးအပှၤဂီၢ်မုၢ်, ဒီးဒုးအိၣ်ထီၣ် အတၢ်အုၣ်က့ၤခီၣ်က့ၤအနၢၤလၢပဂီၢ်လၢ အခ့အပှၤစီၤ ဒၤဝံးအဟံၣ်ပူၤလံ. ⁷⁰ ဒ်အစံးတ့ၢ်လၢအဝံစီဆှံလၢပျၢၤတ ဖၣ်အထးခိၣ်အသိးန့ၣ်, ⁷¹ တၢ်အုၣ်က့ၤခီၣ်က့ၤပှၤလၢပ ဒုၣ်ပဒါဒီးလၢကယဲၢ်ပှၤလၢအသးဟ့ပှၤအစုပူၤ, ⁷² ဒ်သိး အကဒုးနဲၣ် အတၢ်သးကညီၤလၢပပၢ်သ့ၣ်အလိၤ, ⁷³ ဒီး သ့ၣ်နီၣ်ထီၣ်က့ၤ အတၢ်အၢၣ်လီၤအီလီၤစီဆှံန့ၣ်, ⁷⁴ အ တၢ်ဆိၣ်လၢအဆိၣ်တၢ်ဒီးပပၢ်စီၤအၤဘြၤဟၣ်, လၢအ ကထုးထီၣ်န့ၢ်ပှၤလၢပဒုၣ်ပဒါအစုပူၤသတးဒီး, ⁷⁵ ကဒုး မၤပှၤလၢအတၢ်, လၢပသးခူတလ့ၢ်, လၢတၢ်စီဆှံဒီးတၢ် တီတၢ်လိၤအပူၤ, လၢအမဲာ်ညါတစိၤဒၣ်ပှၤလီၤ.

⁷⁶ ဒီးဖိသၣ်နၤဧၢ, နဲဒၣ်အံၤ, တၢ်ကကိးနၤလၢတၢ်ထီ ကတၢၢ်အဝံတဂၤန့ၣ်လီၤ. အဂ့ၢ်ဒ်အံၤ, နကလဲၤလၢက စၢ်အမဲာ်ညါ, ဒီးကတဲာ်ကတီၤအကျဲ, ⁷⁷ ဒ်သိးကဟ့ၣ် အပှၤဂီၢ်မုၢ်လၢတၢ်သ့ၣ်ညါတၢ်အုၣ်က့ၤခီၣ်က့ၤ လၢတၢ် ပျၢ်အတၢ်ဒဲးဘးအဂ့ၢ်, ⁷⁸ လၢပကစၢ်အတၢ်သးကညီၤဒိၣ် အဃိ, လၢမုၢ်ဆ့ၣ်ဝါလၢထးန့ၣ် ဟဲအိၣ်သကိးပှၤ, ⁷⁹ ဒ် သိး အကမၤကပီၤထီၣ်န့ၢ် ပှၤလၢအဆ့ၣ်နီၤလၢတၢ်ခံး ကျါဒီးလၢတၢ်သံအကဒုန့ၣ်, ဒီးဆှၢပခီၣ်ဆူတၢ်ဃူတၢ် ဖိးအကျဲလီၤ.

⁸⁰ ဒီးဖိသၣ်ဒိၣ်ထီၣ်ဒီး အသးဆူၣ်ထီၣ်ဝဲ, ဒီးအိၣ်ဝဲလၢ ပှၢ်မုၢ်ကနၢ တုၤမုၢ်တနံၤလၢအဒုးနဲၣ်ဖျါထီၣ်အသးလၢ ပှၤအံၣ်စရ့လးဖိလီၤ.

၂

¹ ဒီးတၢ်မၤအသးလၢ မုၢ်နံၤတဖၣ်န့ၣ်, ကဲစၢ်အီၤကူစ တူးအကလုၢ်လီၤလၢ ပှၤအိၣ်လၢဟီၣ်ခိၣ်ချၢခဲလၢာ်, အ မံၤကဘၣ်ဆဲးလီၤအသးလီၤ. ² တၢ်ဆဲးလီၤအမံၤအံၤ, ကဲ ထီၣ်ဆိဖဲစီၤကူၤရ့နံမ့ၢ်ကီၢ်စူၤရံအပဒိၣ်ဖးဒိၣ်လီၤ. ³ ဒီးပှၤ လဲၤဆဲးလီၤအမံၤတဂၤဆူအဝ့ၢ်ဒၣ်ဝဲ, တဂၤဆူအဝ့ၢ်ဒၣ် ဝဲ, ခဲလၢာ်လီၤ. ⁴ ဒီးစီၤယိၤသးန့ၣ်, မ့ၢ်လၢစီၤဒၤဝံးအဟံၣ် ဖိဒီးအစၢၤအသွဲၣ်ဒီး, ⁵ ဒ်သိးအကဆဲးလီၤအမံၤဒီး အ မါနီၢ်မၤရံလၢအဘၣ်တၢ်အဲၣ်တီဒီးအီၤ လၢအအိၣ်ဒီးအ ဟုးအသးန့ၣ်ဒီး, လဲၤထီၣ်လၢကၤလံၤလါလၢဝ့ၢ်နစၤရ့း အပူၤ, ဆူစီၤဒၤဝံးအဝ့ၢ်ကိးဝဲလၢဘ့ၤသလ့ဃ့ၣ်အိၣ်လၢ ကီၢ်ယူဒၤလီၤ. ⁶ ဒီးလၢအအိၣ်ဝဲဖဲန့ၣ်, တၢ်မၤအသးလၢ အမုၢ်အလါဘၣ်လၢအကဆံးစၢ်အဖိ, ⁷ ဒီးဆံးစၢ်န့ၢ်အ ဖိဝဲၢ်ကိပိာ်ခွါ, ဒီးဘိၣ်ဘံဃာ်အီၤလၢတၢ်ကံးညာ်, ဒီး ပုာ်မံလီၤအီၤလၢဂီၤဖံးအီၣ်တၢ်အလီၢ်လီၤ. အဂ့ၢ်ဒ်အံၤ, အလီၢ်တအိၣ်ဘၣ်လၢအဝဲသ့ၣ်အဂီၢ်လၢဘျီၣ်ပူၤဘၣ်.

⁸ ဒီးလၢကီၢ်အဝဲန့ၣ်အပူၤ, ပှၤကွၢ်သိတဖၣ်အိၣ်ဝဲလၢ ပှၢ်လၢ်ကျါ, ဒီးကွၢ်အသိလၢမုၢ်နၤလီၤ. ⁹ ဒီးကွၢ်ကွၢ်, ယွၤ အကလူးတဂၤဆၢထၢၣ်လၢအဃၢၤ, ဒီးယွၤအလၤအက ပီၤကပီၤထီၣ်ဝးတရံးအီၤ ကပြုၢ်ကပြီၤသတးဒီးအသူၣ် ပျံၤအသးဖုးဝဲဒိၣ်မးလီၤ. ¹⁰ ဒီးကလူးန့ၣ်စံးဘၣ်အီၤ, ပျံၤ တၢ်တဂ့ၤ. အဂ့ၢ်ဒ်အံၤ, ကွၢ်ကွၢ်, ယစံးဘၣ်သုလၢတၢ် သးခုဖးဒိၣ်အကစီၣ်, လၢအကကဲထီၣ်လၢ ပှၤဂီၢ်မုၢ်ခဲ လၢာ်အဂီၢ်လီၤ. ¹¹ အဂ့ၢ်ဒ်အံၤ, အအံၤတနံၤအံၤ, ပှၤလၢ အအုၣ်က့ၤခီၣ်က့ၤတၢ်တဂၤန့ၣ်, အိၣ်ဖျဲၣ်ဝဲလၢ သုဂီၢ် လၢစီၤဒၤဝံးအဝ့ၢ်ပူၤလံ. အဝဲဒၣ်မ့ၢ်ခရံာ်ကစၢ်န့ၣ်လီၤ.―

¹² ဒီးအပနီၣ်လၢသုဂီၢ်မ့ၢ်အအံၤ, သုကထံၣ်န့ၢ်ဖိသၣ်ဘၣ် ဘိၣ်ဘံဃာ်အသးလၢတၢ်ကံးညာ်, ဒီးအိၣ်မံလီၤလၢဂီၤ ဖံးအီၣ်တၢ်အလီၢ်လီၤ. ¹³ ဒီးမူခိၣ်သုးမုၢ်အဂီၢ်မုၢ်အိၣ်ထီၣ် သတူၢ်ကလာ်လၢကလူးတဂၤန့ၣ်အသိး, ဒီးသးဝံၣ်ထီၣ် ယွၤ, ဒီးစံးဝဲဒၣ်, တၢ်လၤကပီၤ, မ်အဘၣ်ယွၤလၢတၢ်ထီ ကတၢၢ်တက့ၢ်. ¹⁴ မ်တၢ်အမုာ်အိၣ်ထီၣ်လၢဟီၣ်ခိၣ်ချၢ, ဒီးတၢ်ဘၣ်အသးလၢပှၤကညီတက့ၢ်.

¹⁵ ဒီးတုၤကလူးတဖၣ်က့ၤထီၣ်ကွံာ် လၢအအိၣ်ဆူမူခိၣ် ဒီး, တၢ်မၤအသးလၢပှၤကွၢ်သိတဖၣ်စံးလိာ်အသး, မ်ပ လဲၤသကိး ပၢၢ်လၢဘ့ၤသလ့ဃ့ၣ်, ဒီးကွၢ်တၢ်မၤအသး အံၤ, လၢကစၢ်ဒုးသ့ၣ်ညါပှၤတက့ၢ်. ¹⁶ ဒီးလဲၤဝဲတကူၢ် သ့ၣ်ချ့သဒံး, ဒီးထံၣ်န့ၢ်နီၢ်မၤရံဒီးစီၤယိၤသး, ဒီးဖိသၣ် အိၣ်မံလီၤလၢဂီၤဖံးအီၣ်တၢ်အလီၢ်လီၤ. ¹⁷ ဒီးတုၤအထံၣ် တၢ်ဒီး, တၢ်လၢတၢ်စံးဘၣ်တဲဘၣ်အီၤလၢ ဖိသၣ်အဂ့ၢ် အကျိၤန့ၣ်, အဝဲသ့ၣ်ဘိးဘၣ်သ့ၣ်ညါ ပှၤအိၣ်ဝဲသကုၤ ဆးဒးလီၤ. ¹⁸ ဒီးကယဲၢ်ပှၤလၢအနၢ်ဟူဝဲတဖၣ်, ကမၢက မၣ်လၢ တၢ်လၢပှၤကွၢ်သိစံးဘၣ်တဲဘၣ်အီၤအဃိလီၤ.―

¹⁹ ဒီးတၢ်န့ၣ်တဖၣ်ခဲလၢာ်, နီၢ်မၤရံတိၢ်န့ၢ်ဝဲ, ဒီးဆိကမိၣ်ဝဲ လၢအသးလီၤ. ²⁰ ဒီးပှၤကွၢ်သိတဖၣ်န့ၣ်က့ၤက့ၤဝဲ, ဒီးစံး ထီၣ်ပတြၢၤဒီးသးဝံၣ်ထီၣ်ယွၤ, လၢတၢ်လၢအနၢ်ဟူဒီး ထံၣ်ဘၣ်ခဲလၢာ်အဃိ ဒ်တၢ်စံးဘၣ်အီၤအသိးန့ၣ်လီၤ.

²¹ ဒီးတုၤဃိးနံၤပှဲၤထီၣ်လၢ ဖိသၣ်ကဘၣ်တၢ်ကူးတရံး ဒီး, တၢ်ယုၢ်ဝဲအမံၤလၢယ့ၣ်ရှူး, ဒ်ကလူးန့ၣ်ယုၢ်ပာ်ဝဲလၢ အတချုးအိၣ်ထီၣ်ဒံးဘၣ်လၢဟၢဖၢပူၤ, အသိးန့ၣ်လီၤ. ²² ဒီးတုၤအဝဲသ့ၣ်မၤကဆှီအသး အနံၤတဖၣ်ပှဲၤထီၣ်, ဒ်စီၤမိၤရှ့အလုၢ်အလၢ်အသိးန့ၣ်ဒီး, အဝဲသ့ၣ်လဲၤစိာ်အီၤ, ဆူယရူၤၡလ့ၣ်, ဒ်သိးအကပာ်အီၤလၢယွၤအမဲာ်ညါ,―

²³ (ဒ်တၢ်ကွဲးအသးလၢ ယွၤအတၢ်သိၣ်တၢ်သီအပူၤ အ သိး, လၢကယဲၢ်ပိာ်ခွါလၢအအိးထီၣ် တၢ်အဒၢလီၢ်တ ဂၤလၢ်လၢ်, ကဘၣ်တၢ်ကိးအီၤလၢတၢ်စီဆှံလၢယွၤအ ဂီၢ်,)+ ၂မိၤ. ၁၃း၂|Exod.13.2*,²⁴ ဒီးလုၢ်ထီၣ်တၢ်, ဒ်တၢ်စံးပာ်ဝဲ လၢယွၤအတၢ်သိၣ်တၢ်သီအပူၤအသိးန့ၣ်, ထိၣ်လွံၢ်ဘုၣ် ခံဘ့ၣ်, မ့တမ့ၢ်ဘၣ်ဒီး, ကးက့ၣ်ဖိခံဘ့ၣ်လီၤ.+ ၃မိၤ. ၁၂း၈|Lev.12.8*.²⁵ ဒီးကွၢ်ကွၢ်, ပှၤကိးအမံၤလၢစီၤစူၤမ့းအိၣ်တဂၤ, အိၣ်ဝဲလၢယရူၤၡလ့ၣ်အပူၤလီၤ. ဒီးတၢ်လၢပှၤတဂၤန့ၣ်, မ့ၢ်ပှၤအတီအလိၤ, ဒီးယူးယီၣ်ယွၤ, ဒီးကွၢ်လၢ်အံၣ်စရ့လးအတၢ်မၤမုာ်အီၤအကျဲ, ဒီးသးစီဆှံအိၣ်လၢအလိၤလီၤ.―

²⁶ ဒီးသးစီဆှံဒုးနဲၣ်အီၤလၢ အတချုးထံၣ်ဒံးဘၣ်တၢ်သံဒီး, ကထံၣ်ဘၣ်ကစၢ်အခရံာ်န့ၣ်လီၤ. ²⁷ ဒီးလဲၤဝဲလၢသးန့ၣ် ဆူတၢ်လုၢ်အဟံၣ်ပူၤလီၤ. ဒီးဖဲအမိၢ်အပၢ်ဟဲနုာ် စိာ်ဖိ သၣ်ယ့ၣ်ရှူး, ဒ်သိးအကမၤတၢ်လၢအဃိဒ်တၢ်သိၣ်တၢ် သီအလုၢ်အလၢ်အသိးန့ၣ်ဒီး, ²⁸ အဝဲဒၣ်ဟံးထီၣ်အီၤလၢ အစုလိၤ, ဒီးစံးထီၣ်ပတြၢၤယွၤ, ဒီးစံးဝဲဒၣ်, ²⁹ ကစၢ်ဧၢ, ဒ်နကလုၢ်နကထါအသိးန့ၣ်, ခဲကနံၣ်အံၤ, ပျၢ်နခ့နပှၤ ယၤအံၤမုာ်မုာ်တက့ၢ်. ³⁰ အဂ့ၢ်ဒ်အံၤ, ယမဲာ်ထံၣ်ဘၣ်န တၢ်အုၣ်က့ၤခီၣ်က့ၤ, ³¹ လၢနကတဲာ်ကတီၤလၢပှၤဂီၢ်မုၢ် တဖၣ်ခဲလၢာ်အမဲာ်ညါ, ³² တၢ်ကပီၤလၢ တၢ်မၤကပီၤ ထီၣ်ပှၤကလုာ်တဖၣ်အဂီၢ်, ဒီးနပှၤဂီၢ်မုၢ်အံၣ်စရ့လးအ လၤအကပီၤလီၤ.

³³ ဒီးမ့ၢ်တၢ်လၢအကတိၤဝဲလၢအဂ့ၢ်ဒီး, အမိၢ်ဒီးစီၤယိၤ သးကမၢကမၣ်လီၤ. ³⁴ ဒီးစီၤစူၤမ့းအိၣ်ဆိၣ်ဂ့ၤအဝဲသ့ၣ်, ဒီးစံးဘၣ်အမိၢ်နီၢ်မၤရံ, ကွၢ်ကွၢ်, ဒ်သိးပှၤအါဂၤအတၢ် ကူၣ်တၢ်ဖးကအိၣ်ဖျါဒီး, အဝဲတဂၤအံၤဘၣ်တၢ်ပာ်အီၤ လၢပှၤအံၣ်စရ့လးဖိ အါဂၤလီၤဃံၤအလီၢ်, ဒီးဂဲၤဆၢ ထၢၣ်က့ၤအလီၢ်, ဒီးလၢတၢ်ပနီၣ်လၢပှၤစံးအၢအီၤလီၤ.―

³⁵ ဒီးနးတဘ့ၣ်ကဆဲးဖျိနသးဒၣ်နဲစ့ၢ်ကီးလီၤ.

³⁶ ဒီးပှၤလၢစီၤအၤရှူၢ်အဒူၣ်ကျါ, စီၤဖနူၤအ့လးအဖိမုၣ် ဝံနီၢ်အၣ်နၤအိၣ်ဝဲတဂၤလီၤ. ³⁷ ဒီးအဝဲဒၣ်အသးပှၢ်သဃဲး တ့ၢ်, ဒီးလၢအမုၣ်ကနီၤအလီၢ်ခံ, အိၣ်ဃုာ်ဒီးအဝၤနွံ နံၣ်, ဒီးအိၣ်ကမဲက့ၤဝဲတုၤအသးပှၢ်ဃိးဆံလွံၢ်နံၣ်ဃၣ် ဃၣ်, ဒီးဒုၣ်တၢ်အီၣ်တၢ်အီ, ဒီးဘါထုကဖၣ်တၢ်, ဒီး မၤယွၤအတၢ်လၢ မုၢ်နၤဆဲးလၢမုၢ်ဆါ, ဒီးတဟးဖးဒီး တၢ်လုၢ်ဟံၣ်ဘၣ်လီၤ. ³⁸ ဒီးဖဲအဆၢအကတီၢ်န့ၣ်, အိၣ် ဆၢထၢၣ်ဝဲလၢအဃၢၤ, ဒီးစံးထီၣ်ပတြၢၤစ့ၢ်ကီးကစၢ်, ဒီးစံးဘၣ်တဲဘၣ်အဂ့ၢ်အပီၢ်လၢ ပှၤလၢအကွၢ်လၢ်တၢ် အုၣ်က့ၤခီၣ်က့ၤအကျဲ, လၢယရူၤၡလ့ၣ်အပူၤခဲလၢာ်လီၤ.

³⁹ ဒီးမၤတၢ်ခဲလၢာ် ဒ်ယွၤအတၢ်သိၣ်တၢ်သီ အသိးဝံၤ ဒီး, က့ၤက့ၤဝဲဆူအဝ့ၢ်နစၤရ့း, လၢကီၢ်ကၤလံၤလါအပူၤ လီၤ. ⁴⁰ ဒီးဖိသၣ်ဒိၣ်ထီၣ်ဝဲ, ဒီးအသးဆူၣ်ထီၣ်, ဒီးလၢပှဲၤ ဝဲဒီးတၢ်ကူၣ်ဘၣ်ကူၣ်သ့, ဒီးယွၤအဘျုးအဖှိၣ်အိၣ်လၢ အလိၤလီၤ.

⁴¹ ဒီးအမိၢ်အပၢ်လဲၤထီၣ်ဆူယရူၤၡလ့ၣ်ကိးနံၣ်ဒဲး, လၢ ဘူၣ်လဲၤကပာ်လီၤ. ⁴² ဒီးတၢ်မၤအသးလၢအသးပှၢ်ထီၣ် တဆံခံနံၣ်ဒီး, အဝဲသ့ၣ်ဒ်ဘူၣ်အလုၢ်အလၢ်အသိးန့ၣ်, လဲၤထီၣ်ဆူယရူၤၡလ့ၣ်, ⁴³ ဒီးဖဲအမုၢ်နံၤတဖၣ်ပှဲၤထီၣ်ဝံၤ ဒီး, ပှၤတဖၣ်က့ၤက့ၤဝဲ, ဒီးဖိသၣ်ယ့ၣ်ရှူးအိၣ်လီၤတဲာ် လၢယရူၤၡလ့ၣ်အပူၤလီၤ. ဒီးစီၤယိၤသးဒီးအမိၢ်တသ့ၣ် ညါဘၣ်. ⁴⁴ ဒီးဆိကမိၣ်ဝဲလၢအအိၣ်လၢပှၤလဲၤဒီးအီၤအ ကျါ, ဒီးက့ၤက့ၤဝဲတနံၤလဲၤကျဲလီၤ. ဒီးဃုအီၤသပှၢ်ပှၢ် လၢအဘူးအတံၢ်ဒီးအတံၤအသကိးအကျါ, ⁴⁵ ဒီးတထံၣ် န့ၢ်ဘၣ်ဝဲဘၣ်, ဒီးက့ၤဃုက့ၤအီၤဆူယရူၤၡလ့ၣ်လီၤ.

⁴⁶ ဒီးတၢ်မၤအသးလၢ သၢနံၤပူၤကွံာ်ဒီး, ထံၣ်န့ၢ်အီၤ အိၣ်လၢတၢ်လုၢ်အဟံၣ်ပူၤ, ဆ့ၣ်နီၤဝဲလၢသရၣ်သ့ၣ်တ ဖၣ်အသးကံၢ်ပူၤ, ဒီးကနၣ်အကလုၢ်, ဒီးသံကွၢ်အတၢ် လီၤ. ⁴⁷ ဒီးမ့ၢ်အတၢ်ကူၣ်သ့, ဒီးအတၢ်စံးဆၢတၢ်သတး ဒီး, ပှၤနၢ်ဟူဝဲတဖၣ်န့ၣ်, ပာ်အသးကမၢကမၣ်ခဲလၢာ် လီၤ. ⁴⁸ ဒီးတုၤအထံၣ်အီၤဒီး, ကမၢကမၣ်ဒိၣ်မး, ဒီးအမိၢ် စံးဘၣ်အီၤ, ဖိဧၢ, ဘၣ်မနုၤလၢနမၤပှၤဒ်အံၤလဲၣ်. ကွၢ် ကွၢ်, နပၢ်ဒီးယၤအံၤ, ပသူၣ်အုးသးအုးဒီး ပဃုလံနၤ လီၤ. ⁴⁹ ဒီးစံးဘၣ်အီၤ, ဘၣ်မနုၤလၢသုဃုယၤလဲၣ်. သုတ သ့ၣ်ညါဘၣ်လၢ ယဘၣ်အိၣ်လၢယပၢ်အဟံၣ်ပူၤဘၣ် ဧါ. ⁵⁰ ဒီးတၢ်ကတိၤလၢအစံးဘၣ်အီၤန့ၣ်, အဝဲသ့ၣ်အ နၢ်တပၢၢ်ဘၣ်လီၤ.

⁵¹ ဒီးအဝဲဒၣ်က့ၤက့ၤဝဲဒီးအီၤ, ဒီးလဲၤဆူနစၤရ့း, ဒီးပာ် အသးလၢအဖီလာ်လီၤ. ဒီးတၢ်တဖၣ်န့ၣ် အမိၢ်တိၢ်န့ၢ် လၢအသးခဲလၢာ်လီၤ.

⁵² ဒီးယ့ၣ်ရှူးဒိၣ်ထီၣ်လၢတၢ်ကူၣ်သ့, ဒီးလၢအနီၢ်ခိ, ဒီး လၢတၢ်ဘၣ်ယွၤအသးဒီးပှၤကညီအသးလီၤ.

၃

¹ ဒီးလၢကဲစၢ်တံၤဘ့းရံအီၣ်နူၢ် တဆံယဲၢ်နံၣ်တနံၣ်အ တီၢ်ပူၤန့ၣ်, ဒီးစီၤပီၣ်တံၤပံၤလးမ့ၢ်ကီၢ်ယူဒၤ အပဒိၣ်ဖး ဒိၣ်, ဒီးစီၤဟ့ၤရိာ်မ့ၢ်ကၤလံၤလါအပဒိၣ်ဖးဒိၣ်, ဒီးအဒီ ပုၢ်ဝဲၢ်စီၤဖံလံးပူးမ့ၢ် ကီၢ်ယတူၢ်ဒီးကီၢ်တြဃိၤန့တံၤအပ ဒိၣ်ဖးဒိၣ်, ဒီးစီၤလူၤစၤနံမ့ၢ်အဘ့ၤလ့ၣ်အပဒိၣ်ဖးဒိၣ်,―

² ဒီးစီၤအၣ်နၣ်ဒီး စီၤကၤယါဖၤ မ့ၢ်ပှၤလုၢ်တၢ်အခိၣ်ဒီး, ယွၤအကလုၢ်ဘၣ်စီၤစဃၤရံအဖိခွါ, စီၤယိၤဟၣ်, လၢ ပှၢ်မုၢ်ကနၢလီၤ. ³ ဒီးလဲၤဆူထံယၢ်ဒ့ၣ်အခိၣ်အဃၢၤခဲ လၢာ်, ဒီးစံၣ်တဲၤတဲလီၤတၢ်ဒိးဘျၢ* ဘၣ်ဃးဒီးတၢ်ပီၢ် ယၢ်လီၤက့ၤပသးလၢတၢ်ပျၢ်တၢ်ဒဲးဘးအဂီၢ်လီၤ. ⁴ ဒ်တၢ် ကွဲးအသးလၢဝံယၡါယၤအလံာ်အတၢ်ကတိၤအသိး, တၢ်ကလုၢ်သီၣ်ထီၣ်လၢပှၢ်မုၢ်ကနၢဒီးစံးဝဲဒၣ်, ကတဲာ်ကတီၤက့ၤယွၤအကျဲန့ၣ်တက့ၢ်. မၤလိၤအကျဲမုၢ်တဖၣ်န့ၣ်တက့ၢ်.

⁵ ကယဲၢ်ကစၢၢ်ကဆူးကပှဲၤထီၣ်ဝဲ, ဒီးကယဲၢ်ကစၢၢ်ကလိဒီး တၢ်စိခိၣ်တဖျၢၣ်လၢ်လၢ် ကလီၤပၢၤဝဲ, ဒီးတၢ်အက့ၣ်တဖၣ်န့ၣ်ကဘျၢထီၣ်ဝဲ, ဒီးကျဲလၢအထီၣ်စိလီၤနုာ်တဖၣ်န့ၣ်ကဃူလိာ်ဝဲ, ⁶ ဒီးကယဲၢ်တၢ်ညၣ်ခဲလၢာ် န့ၣ်ကထံၣ်ဘၣ်ယွၤအတၢ် အုၣ်က့ၤခီၣ်က့ၤလီၤ.+ ၡါ. ၄၀း၃-၅|Isa.40.3-Isa.40.5*, ၅၂း၁၀|Isa.52.10*.

⁷ မၤသးဒ်န့ၣ်ဒီးစံးဘၣ်တဲဘၣ်ပှၤဂီၢ်မုၢ် လၢအဟဲဆူအ အိၣ်ဒ်သိးအကဒိးဘျၢ*အသးလၢအစုပူၤန့ၣ်, ဂုၢ်ပွ့ၤတဖု ဧၢ, မ့ၢ်မတၤသိၣ်လိသုဒ်သိးသုကဃ့ၢ်ကွံာ်လၢတၢ်သး ထီၣ်လၢအကဟဲန့ၣ်တဂၤလဲၣ်. ⁸ မၤသးဒ်န့ၣ်ဒီး တၤ သၣ်ကြၢးဒီးတၢ်ပီၢ်ယၢ်လီၤက့ၤအသးန့ၣ်, သၣ်ထီၣ်တ က့ၢ်. ဒီးသုတစံးလီၤသုသးလၢ စီၤအၤဘြၤဟၣ်မ့ၢ်ပပၢ် န့ၣ်တဂ့ၤ. အဂ့ၢ်ဒ်အံၤ, ယစံးဘၣ်တဲဘၣ်သုလၢယွၤမၤ လၢၢ်အံၤကဲထီၣ်လၢစီၤအၤဘြၤဟၣ်အဖိန့ၣ်သ့လီၤ. ⁹ ဒီး ခဲကနံၣ်အံၤဒၣ်လဲာ်, ကွါအိၣ်ပာ်လီၤအသးလၢသ့ၣ်အ ခီၣ်ထံးလံ. မၤသးဒ်န့ၣ်ဒီးကယဲၢ်သ့ၣ်လၢအတသၣ်ထီၣ် တၤသၣ်လၢအဂ့ၤတထံးလၢ်လၢ်န့ၣ်, ဘၣ်ကူာ်ကွံာ်, ဒီး ဘၣ်ဘျုးလီၤကွံာ်ဆူမ့ၣ်အူပူၤလီၤ.

¹⁰ ဒီးပှၤဂီၢ်မုၢ်သံကွၢ်အီၤဒီးစံးဝဲဒၣ်, မ့မ့ၢ်ဒ်န့ၣ်ဒီး, ပက မၤဒ်လဲၣ်. ¹¹ ဒီးအဝဲဒၣ်ကတိၤဆၢတၢ်ဒီးစံးဘၣ်အီၤ, ပှၤ လၢအဆ့အိၣ်ဝဲခံဘ့ၣ်န့ၣ်, မ်အနီၤဟ့ၣ်ပှၤလၢအတၢ်တ အိၣ်ဘၣ်တက့ၢ်. ဒီးပှၤလၢအတၢ်အီၣ်တၢ်အီအိၣ်ဝဲန့ၣ်, မ်အမၤဒ်န့ၣ်သိးတက့ၢ်. ¹² ဒီးပှၤဃ့သွဲတဖၣ်န့ၣ်, ဒ်သိး အကဒိးဘျၢ*အသးဒီး, ဟဲဆူအအိၣ်ဒီးစံးဘၣ်အီၤ, သရၣ်ဧၢ, ပကမၤဒ်လဲၣ်.―

¹³ ဒီးအဝဲဒၣ်စံးဘၣ်အီၤ, သုတဟံးန့ၢ် တၢ်အါန့ၢ်တၢ်မၤ လိာ်သုန့ၣ်တဂ့ၤ. ¹⁴ ဒီးပှၤသုးဖိတဖၣ်သံကွၢ်အီၤဒီးစံးဝဲ ဒၣ်, ပဝဲဒၣ်အံၤ, ပကမၤဒ်လဲၣ်. ဒီးအဝဲဒၣ်စံးဘၣ်အီၤ, သုတမၤဆူၣ်မၤစိးပှၤနီတဂၤတဂ့ၤ. ဒီးသုတအီၣ်ကဘျံး ကဘျၣ်တၢ်တဂ့ၤ. ဒီးဖဲသုန့ၢ်ဘၣ်သုဘူးသုလဲန့ၣ်, သူၣ် မံသးမံတက့ၢ်.

¹⁵ ဒီးပှၤဂီၢ်မုၢ်ကွၢ်လၢ်တၢ်အကျဲ, ဒီးလၢစီၤယိၤဟၣ် အ ဂ့ၢ်န့ၣ်, ဖဲပှၤခဲလၢာ်ဆိကမိၣ်လၢ အသးလၢအမ့ၢ်ခရံာ်, တမ့ၢ်ဘၣ်ခရံာ်လဲၣ်အဖၢမုၢ်န့ၣ်ဒီး, ¹⁶ စီၤယိၤဟၣ်ကတိၤ ဆၢပှၤခဲလၢာ်ဒီးစံးဝဲဒၣ်, တၢ်လၢယၤအံၤယဘျၢ*သုလၢ ထံကျါလီၤ. ဘၣ်ဆၣ်ဒီးပှၤဟဲဝဲတဂၤန့ၣ် သ့န့ၢ်ယၤတ က့ၢ်လီၤ. ဖဲယဃ့ၣ်လီၤအခီၣ်ဖံးပျံၤန့ၣ်, ယတဂ့ၤတဘၣ် ဘၣ်. အဝဲဒၣ် ကဘျၢ*သုလၢ သးစီဆှံဒီးမ့ၣ်အူအပူၤ လီၤ. ¹⁷ အကီၢ်လဲၢ်အိၣ်လၢအစုပူၤ, ဒီးကဝံၢ်ကဆှီထီၣ် ကွံာ်အဘု, ဒီးကဂၢ်ဖှိၣ်က့ၤဘုလၢအဖီပူၤ, မ့မ့ၢ်လီၤဧိၤဒံး ဧိၤန့ၣ်, ကဆူးထီၣ်ကွံာ်ဝဲလၢမ့ၣ်အူလီၤပံာ်တသ့ဘၣ်အ ပူၤလီၤ.

¹⁸ ဒီးသဆၣ်ထီၣ်အခံလၢအဂုၤအဂၤအါဘီ, ဒီးစံၣ်တဲၤ တဲလီၤတၢ်သးခုအကစီၣ်လၢပှၤဂီၢ်မုၢ်လီၤ.

¹⁹ ဒီးပဒိၣ်ဖးဒိၣ်စီၤဟ့ၤရိာ် ဘၣ်တၢ်သိၣ်ဃီၣ်လၢအီၤလၢ အဒီပုၢ်ဝဲၢ်အမါနီၢ်ဟ့ၤရိၤဒံအဃိ, ဒီးလၢကယဲၢ်တၢ်အၢ လၢစီၤဟ့ၤရိာ်မၤဝဲခဲလၢာ်အဃိ, ²⁰ ဒီးမၤအါထီၣ်တၢ်အံၤ လၢကယဲၢ်တၢ်အဖီခိၣ်ဒီး, ဒုးဃာ်စီၤယိၤဟၣ်လၢဃိာ်ပူၤ လီၤ.

²¹ ဒီးတၢ်မၤအသးလၢပှၤဂီၢ်မုၢ်ခဲလၢာ် ဒိးဘျၢ*အသးဒီး, ယ့ၣ်ရှူးဒိးဘျၢ*စ့ၢ်ကီးအသး, ဒီးဘါထုကဖၣ်တၢ်အဖၢ မုၢ်န့ၣ်ဒီး, မူခိၣ်အိးထီၣ်အသး, ²² ဒီးသးစီဆှံအိၣ်ဖျါနီၢ် ခိအက့ၢ်အဂီၤဒ်ထိၣ်လွံၢ်အသိး, ဒီးဟဲစီၢ်လီၤလၢအလိၤ လီၤ. ဒီးတၢ်အကလုၢ်သီၣ်လီၤလၢမူခိၣ်ဒီးစံးဝဲဒၣ်, နဲဒၣ် အံၤနမ့ၢ်ယဖိခွါလၢယအဲၣ်, ဒီးဘၣ်ယသးလၢနၤလီၤ.

²³ ဒီးယ့ၣ်ရှူးအကစၢ်ပှၢ်ဖဲ အမၤထီၣ်သီတၢ်န့ၣ်, အနံၣ် ပှဲၤထီၣ်သၢဆံဃၣ်ဃၣ်လီၤ. ဒီးပှၤဆိကမိၣ်ဝဲလၢအမ့ၢ် စီၤယိၤသးအဖိခွါလီၤ. ဒီးစီၤယိၤသးမ့ၢ် စီၤဟ့ၤလံအဖိ ခွါ, ²⁴ စီၤမးသးအဖိခွါ, စီၤလ့ၤဝံအဖိခွါ, စီၤမ့းလဃံအဖိ ခွါ, စီၤယၣ်နါအဖိခွါ, စီၤယိၤသးအဖိခွါ, ²⁵ စီၤမးတၤသံ အဖိခွါ, စီၤအမိၣ်အဖိခွါ, စီၤနအူၣ်အဖိခွါ, စီၤအ့းစလံအ ခွါ, စီၤနၤကဲအဖိခွါ, ²⁶ စီၤမအါသးအဖိခွါ, စီၤမးတၤသံ အဖိခွါ, စီၤစ့းမ့းအံအဖိခွါ, စီၤယိၤသးအဖိခွါ, စီၤယူဒၤ အဖိခွါ, ²⁷ စီၤယိၤအၣ်နၣ်အဖိခွါ, စီၤရ့ၤစါအဖိခွါ, စီၤစရူ ဘၤဘ့းလးအဖိခွါ, စီၤၡၤလတံၤအ့လးအဖိခွါ, စီၤန့ၤရံ အဖိခွါ, ²⁸ စီၤမ့းလဃံအဖိခွါ, စီၤအးဒံးအဖိခွါ, စီၤကိၣ် စၣ်အဖိခွါ, စီၤအ့းလမိၤဒၣ်အဖိခွါ, စီၤအ့ၢ်အဖိခွါ, ²⁹ စီၤ ယိၤစ့အဖိခွါ, စီၤအလံၤဧ့စ့ၢ်အဖိခွါ, စီၤယိၤရံၣ်အဖိခွါ, စီၤမးသးအဖိခွါ, စီၤလ့ၤဝံအဖိခွါ, ³⁰ စီၤစူၤမ့းအိၣ်အဖိခွါ, စီၤယူဒၤအဖိခွါ, စီၤယိၤသးအဖိခွါ, စီၤယိၤနာ်အဖိခွါ, စီၤအ့းလယါကံၣ်အဖိခွါ, စီၤမ့းလ့းအဖိခွါ, ³¹ စီၤမအံနၣ် အဖိခွါ, စီၤမးတၤသါအဖိခွါ, စီၤနၤသၣ်အဖိခွါ, စီၤဒၤဝံး အဖိခွါ, ³² စီၤယံးၡဲအဖိခွါ, စီၤဧိၤဘ့းအဖိခွါ, စီၤဘိၤဧးအ ဖိခွါ, စီၤစၤလမိၣ်အဖိခွါ, ³³ စီၤနးၡိၣ်အဖိခွါ, စီၤဧးမံၤနဒး အဖိခွါ, စီၤရၣ်အဖိခွါ, စီၤဃ့ၤစရိာ်အဖိခွါ, စီၤပ့းရ့းအဖိ ခွါ, စီၤယူဒၤအဖိခွါ, ³⁴ စီၤယၤကိာ်အဖိခွါ, စီၤအံၤစဲးအဖိ ခွါ, စီၤအၤဘြၤဟၣ်အဖိခွါ, စီၤတ့ရၤအဖိခွါ, စီၤနၤဃိၢ် အဖိခွါ, ³⁵ စီၤစၤရူာ်အဖိခွါ, စီၤရူၤအဖိခွါ, စီၤပ့ၤလ့းအဖိ ခွါ, စီၤဧၤဘ့ၢ်အဖိခွါ, စီၤစ့ၤလါအဖိခွါ, ³⁶ စီၤက့ၤနၣ်အဖိ ခွါ, စီၤအၢ်ဖးၡးအဖိခွါ, စီၤရှ့ၣ်အဖိခွါ, စီၤနိအၤအဖိခွါ, စီၤလ့ၤမ့းအဖိခွါ, ³⁷ စီၤမသူၤရှ့လၤအဖိခွါ, စီၤဃနိာ်အဖိ ခွါ, စီၤယၤရ့းအဖိခွါ, စီၤဟမၤလ့လးအဖိခွါ, စီၤက့ၤနၣ် အဖိခွါ, ³⁸ စီၤအနိၣ်အဖိခွါ, စီၤရှ့သးအဖိခွါ, စီၤအၤဒၣ် အဖိခွါ, ယွၤအဖိခွါလီၤ.

၄

¹ ဒီးယ့ၣ်ရှူးလၢပှဲၤဝဲဒီးသးစီဆှံ, ဒီးက့ၤက့ၤဝဲလၢထံယၢ် ဒ့ၣ်, ဒီးဘၣ်တၢ်ဆှၢအီၤလၢသးန့ၣ်ဆူပှၢ်မုၢ်ကနၢ, ဒီး ဘၣ်တၢ်လ့ပစီလၢမုၣ်ကီၤလံၢ်, အနံၤအသီလွံၢ်ဆံလီၤ.―

² ဒီးလၢအနံၤအသီန့ၣ်, တအီၣ်ဘၣ်တၢ်နီတမံၤဘၣ်. ဒီး အဝဲန့ၣ်လၢထီၣ်ပှဲၤထီၣ်ဝံၤဒီး, တၢ်သၣ်ဝံၤအသးလီၤ. ³ ဒီးမုၣ်ကီၤလံၢ်စံးဘၣ်အီၤ, နမ့မ့ၢ်ယွၤအဖိခွါဒီး, စံးဘၣ်လၢၢ်တဖျၢၣ်အံၤ ဒ်သိးအကကဲထီၣ်ကိၣ်တက့ၢ်.―

⁴ ဒီးယ့ၣ်ရှူးကတိၤဆၢအီၤဒီးစံးဝဲဒၣ်, တၢ်ကွဲးအသး, တ မ့ၢ်ဘၣ်ပှၤကညီမူဝဲထဲလၢကိၣ်န့ၣ်ဧိၤဘၣ်. (မ့ၢ်လၢက ယဲၢ်ယွၤအတၢ်ကတိၤတမံၤလၢ်လၢ်လီၤ.)+ ၅မိၤ. ၈း၃|Deut.8.3

⁵ ဒီးမုၣ်ကီၤလံၢ်ဆှၢထီၣ်အီၤဆူ ကစၢၢ်ဖးထီတဖျၢၣ်အ လိၤ, ဒီးတစိၢ်ဖိအတီၢ်ပူၤန့ၣ်ဒုးနဲၣ်အီၤလၢကယဲၢ်ဘီဧိၤ မုၢ်ဧိၤလၢဟီၣ်ခိၣ်ချၢခဲလၢာ်လီၤ. ⁶ ဒီးမုၣ်ကီၤလံၢ်စံးဘၣ် အီၤ, ကယဲၢ်တၢ်အစိအကမီၤအံၤ, ဒီးအလၤအကပီၤ န့ၣ်, ယကဟ့ၣ်နၤလီၤ. အဂ့ၢ်ဒ်အံၤ, တၢ်ဟ့ၣ်လီၤလံလၢ ယစုပူၤလံ, ဒီးဖဲဒၣ်ယသးပှၤလၢတၢ်မိၣ်ဟ့ၣ်ယသးလၢ အီၤဒီး, ယဟ့ၣ်ယဲဒၣ်လီၤ. ⁷ မၤသးဒ်န့ၣ်ဒီးနမ့ၢ်တီၤလီၤ ဘူၣ်ထီၣ်ဘါထီၣ်ယၤဒီး, ကကဲထီၣ်နတၢ်ခဲလၢာ်လီၤ.―

⁸ ဒီးယ့ၣ်ရှူးကတိၤဆၢအီၤဒီးစံးဝဲဒၣ်, တၢ်ကွဲးအသး, ယွၤ, နကစၢ်န့ၣ်, နဘၣ်ဘူၣ်ထီၣ်ဘါထီၣ်အီၤ, ဒီးနဘၣ်မၤ ထဲအဝဲဒၣ်အတၢ်ဧိၤလီၤ.+ ၅မိၤ. ၆း၁၃|Deut.6.13*.

⁹ ဒီးလဲၤဆှၢထီၣ်အီၤဆူယရူၤၡလ့ၣ်အပူၤ, ဒီးပာ်ထီၣ် အီၤလၢတၢ်လုၢ်ဟံၣ်အခိၣ်စိၣ်လီၤ. ဒီးစံးဘၣ်အီၤ, နမ့ မ့ၢ်ယွၤအဖိခွါဒီး, တ့ၢ်လီၤနသးဖဲအံၤတက့ၢ်. ¹⁰ အဂ့ၢ်ဒ် အံၤ, တၢ်ကွဲးအသးလၢအကမၤလိာ်အကလူးတဖၣ်လၢ နဂ့ၢ်နကျိၤ, ¹¹ ဒ်သိးအကအံးက့ၤကွၢ်က့ၤနၤ, ဒီးအဝဲသ့ၣ် ကစိာ်နၤလၢအစုလိၤ, ဒ်သိးနခီၣ်သုတဘၣ်ထံးဒီးလၢၢ် တဂ့ၤလီၤ.+ စံး. ၉၁း၁၁|Ps.91.11*.¹² ဒီးယ့ၣ်ရှူးကတိၤဆၢတၢ် ဒီးစံးဘၣ်အီၤ, တၢ်စံးဝဲဒၣ်, သုတလ့ပစီယွၤနကစၢ်န့ၣ် တဂ့ၤ.+ ၅မိၤ. ၆း၁၆|Deut.6.16*.

¹³ ဒီးမုၣ်ကီၤလံၢ်လ့ပစီတၢ်ခဲလၢာ်ဝံၤဒီး, ဟးဖးဒီးအီၤ တစိၢ်လီၤ.

¹⁴ ဒီးယ့ၣ်ရှူးက့ၤက့ၤဆူကၤလံၤလါ လၢသးန့ၣ်အစိအ ကမီၤ, ဒီးအကစီၣ်ဟူထီသါလီၤဝးတရံးဝဲဒီကီၢ်ညါန့ၣ် လီၤ. ¹⁵ ဒီးသိၣ်က့ၤသီက့ၤတၢ်လၢအဘူၣ်ဘျီၣ်ပူၤတဖၣ်, ဒီးပှၤစံးထီၣ်ပတြၢၤအီၤခဲလၢာ်လီၤ.

¹⁶ ဒီးက့ၤက့ၤဝဲဆူနစၤရ့း ဖဲအဒိၣ်ထီၣ်က့ၤဝဲအလီၢ်လီၤ. ဒီးဒ်အလုၢ်အလၢ်အသိးန့ၣ်, ဘၣ်အိၣ်ဘှံးအနံၤဒီး, လဲၤ နုာ်ဆူဘူၣ်ဘျီၣ်ပူၤ, ဒီးဂဲၤဆၢထၢၣ်ဝဲဒ်သိးအကဖးလံာ် လီၤ. ¹⁷ ဒီးတၢ်ဟ့ၣ်အီၤလၢဝံယၡါယၤအလံာ်လီၤ. ဒီး သလၣ်ထီၣ်လံာ်, ဒီးထံၣ်န့ၢ်အလီၢ်ဖဲတၢ်ကွဲးဝဲ,―

¹⁸ ယွၤအသးအိၣ်လၢယလိၤလီၤ. အဂ့ၢ်ဒ်အံၤ, ဖှူယၤဒ်သိးယကစံၣ်တဲၤတဲလီၤတၢ်သး ခုအကစီၣ်လၢပှၤဖှီၣ်ဖိယာ်ဖိလီၤ. မၢလီၤယၤ, (ဒ်သိးယကမၤဘျါက့ၤ ပှၤအသူၣ်ကၢ် အသးလီၤ), ဒ်သိးယကကိးထီၣ် တၢ်ထူၣ်ဖျဲးလၢပှၤဘၣ်တၢ်မၢ ကဲကုၢ်အဂီၢ်, ဒီးတၢ်ထံၣ်ထီၣ်က့ၤလၢပှၤမဲာ်ဘျီၣ်အဂီၢ်, ဒ်သိးယကပျၢ်ပှၤလၢ အဘၣ်တၢ်မၤအၢမၤနးအီၤ,

¹⁹ ဒ်သိးယကကိးထီၣ် နံၣ်တၢ်ဘၣ်ယွၤအသးန့ၣ်လီၤ.+ ၡါ. ၆၁း၁|Isa.61.1*.

²⁰ ဒီးထူထီၣ်လံာ်, ဒီးဟ့ၣ်လီၤက့ၤလၢတၢ်အခ့အပှၤတ ဂၤ, ဒီးဆ့ၣ်နီၤက့ၤဝဲလီၤ. ဒီးပှၤအိၣ်လၢဘူၣ်ဘျီၣ်ပူၤတ ဖၣ်န့ၣ်, ကွၢ်အီၤလၢအမဲာ်ထံထံဆးဆးခဲလၢာ်လီၤ. ²¹ ဒီး စံးဘၣ်အီၤ, တၢ်ကွဲးအသးအံၤလၢထီၣ်ပှဲၤထီၣ်လၢသုနၢ် ပူၤလၢမုၢ်မဆါတနံၤအံၤလီၤ. ²² ဒီးပှၤခဲလၢာ်အုၣ်အသး လၢအီၤ, ဒီးမ့ၢ်တၢ်ကတိၤအဂ့ၤအဘၣ်လၢအဟဲထီၣ်လၢ အထးခိၣ်အဃိဒီး, ကမၢကမၣ်ဝဲတကူၢ်သ့ၣ်လီၤ. ဒီးစံး ဝဲဒၣ်, အဝဲတဂၤအံၤမ့ၢ်စီၤယိၤသးအဖိခွါန့ၣ် တမ့ၢ်ဘၣ် ဧါ. ²³ ဒီးစံးဘၣ်အီၤ, မ့ၢ်မးသုကစံးဘၣ်ယၤလၢတၢ်က တိၤဒိအံၤ, ကသံၣ်သရၣ်ဧၢ, မၤဘျါက့ၤဒၣ်နသးတက့ၢ်. ဖဲဒၣ် ပနၢ်ဟူတၢ်မၤအသးလၢ ကပ့းရနီၣ်အပူၤတဖၣ် န့ၣ်, မၤစ့ၢ်ကီးဖဲအံၤလၢနထံနကီၢ်ဒၣ်နဲတက့ၢ်, ²⁴ ဒီးစံးဝဲ ဒၣ်, ယစံးဘၣ်သုတီတီ, တၢ်လၢဝံဧိၤမီၣ်ဧိၤန့ၣ်, တ ဘၣ်ဘၣ်တၢ်တူၢ်လိာ်အီၤလၢအထံအကီၢ်ဒၣ်ဝဲ, နီတဂၤ ဘၣ်. ²⁵ ဒီးယစံးဘၣ်သုလၢတၢ်အမ့ၢ်အတီ, လၢဝံအ့ၤ လံယၤအနံၤအသီ, ဖဲမူခိၣ်ကးတံာ်ဃာ်အသးသၢနံၣ်ဒီး ဃုလါ, ဖဲတၢ်သၣ်ဝံၤဖးဒိၣ်အိၣ်ဒီကီၢ်ညါန့ၣ်ဒီး, ²⁶ မုၣ်က မဲအိၣ်နာ်သက့အါဂၤ လၢအံၣ်စရ့လးအပူၤဘၣ်ဆၣ်ဒီး, တၢ်တမၢလီၤ စီၤအ့ၤလံယၤဆူအအိၣ်နီတဂၤဘၣ်, မၢ လီၤအီၤဆူစၤရဖၤသး, ဘၣ်ဃးဒီးစံဒိၣ်, ဆူပှၤမုၣ်ကမဲ တဂၤအအိၣ်လီၤ. ²⁷ ဒီးလၢဝံစီၤအလံၤၡါအစိၤန့ၣ်, ပှၤ ဘၣ်တၢ်ဆါအၢအိၣ်အါဂၤလၢ အံၣ်စရ့လးအပူၤဘၣ် ဆၣ်ဒီး, တမၤကဆှီဘၣ်နီတဂၤဘၣ်, မၤကဆှီဝဲထဲပှၤ စူၤရံဖိ, စီၤနဧၤမၣ်တဂၤဧိၤလီၤ. ²⁸ ဒီးပှၤအိၣ်လၢဘူၣ်ဘျီၣ် ပူၤခဲလၢာ်နၢ်ဟူတၢ်တဖၣ်န့ၣ်, ဒီးအသးဒိၣ်ထီၣ်ပှဲၤဆၢၣ် ကလာ်, ²⁹ ဒီးဂဲၤဆၢထၢၣ်ဟီထီၣ်ကွံာ်အီၤလၢဝ့ၢ်ပူၤဆူ ခိ, ဒီးဒ်သိးအကတ့ၢ်လီၤဆှိခိၣ်အီၤလၢ ကစၢၢ်လၢအဝ့ၢ် သူၣ်ထီၣ်အသးလၢအဖီခိၣ်အတလူၢ်ထိးဒီး, လဲၤဆှၢအီၤ လီၤ. ³⁰ ဒီးအဝဲဒၣ်လဲၤခီတူာ်ဝဲလၢအဝဲသ့ၣ်အကျါ, ဒီး ဟးထီၣ်ကွံာ်ဝဲလီၤ.

³¹ ဒီးလဲၤလီၤဝဲဆူကပ့းရနီၣ်, လၢကီၢ်ကၤလံၤလါ, ဒီး သိၣ်က့ၤသီက့ၤတၢ်လၢအိၣ်ဘှံးအနံၤလီၤ. ³² ဒီးပှၤတဖၣ် ပာ်ထီၣ်အသးကမၢကမၣ်, လၢအတၢ်သိၣ်တၢ်သီအဃိ လီၤ. အဂ့ၢ်ဒ်အံၤ, အကလုၢ်အိၣ်ဒီးအစိအကမီၤလီၤ.

³³ ဒီးလၢဘူၣ်ဘျီၣ်ပူၤန့ၣ်, ပှၤလၢတၢ်နါ တကဆှီဘၣ် အိၣ်လၢအလိၤအိၣ်ဝဲတဂၤ, ဒီးကိးပသူထီၣ်လၢအသီၣ် ဖးဒိၣ်, ဒီးစံးဝဲဒၣ်, ³⁴ အၣ်လါ, ပှၤနစၤရ့းဖိယ့ၣ်ရှူးဧၢ, တၢ်ဘၣ်ဃးဒီးပှၤဒီးနၤမ့ၢ်မနုၤလဲၣ်. မ့ၢ်နဟဲမၤဟးဂီၤပှၤ ဧါ. နဲဒၣ်အံၤနမ့ၢ်မတၤမတၤယသ့ၣ်ညါ, နမ့ၢ်ယွၤအပှၤ စီဆှံတဂၤန့ၣ်လီၤ. ³⁵ ဒီးယ့ၣ်ရှူးဒူအလိၤ, ဒီးစံးဝဲဒၣ်, အိၣ်ဘှီၣ်ကလာ်ဒီး ဟးထီၣ်ကွံာ်လၢအလိၤတက့ၢ်. ဒီး တၢ်နါဆီၣ်တပျုာ်ကွံာ်အီၤဆူတၢ်အသးကံၢ်ပူၤ, ဒီးတမၤ အၢဘၣ်အီၤဘၣ်ဒီး, ဟးထီၣ်ကွံာ်လၢအလိၤလီၤ. ³⁶ ဒီးပှၤ ခဲလၢာ်ကမၢကမၣ်ဝဲ, ဒီးကတိၤလိာ်အသးဒီးစံးဝဲဒၣ်, တၢ်ကလုၢ်အံၤမ့ၢ်တၢ်ကလုၢ်ဒ်လဲၣ်. အဂ့ၢ်ဒ်အံၤ, မၤလိာ် တၢ်နါလၢ အသူးအသ့ၣ်ဒီးအစိအကမီၤ, ဒီးဟးထီၣ် ကွံာ်ဝဲလီၤ. ³⁷ ဒီးအဂ့ၢ်အကျိၤဟူထီသါလီၤဒီကီၢ်ညါကိး ပူၤဒဲးလီၤ.

³⁸ ဒီးဟးထီၣ်ကွံာ်လၢဘူၣ်ဘျီၣ်ပူၤ, ဒီးလဲၤနုာ်ဝဲဆူစီၤၡံ မိၣ်အဟံၣ်, ဒီးစီၤၡံမိၣ်အမံၤပှၢ်ပိာ်မုၣ်န့ၣ်ဘၣ်တၢ်ညၣ် ဂိၢ်နးမး, ဒီးပှၤဃ့ကညးတၢ်လၢအဂီၢ်လီၤ. ³⁹ ဒီးဆၢထၢၣ် ဝဲလၢအဂီၤထံးဒီးဒူတၢ်ညၣ်ဂိၢ်, ဒီးတၢ်ညၣ်ဂိၢ်ဟးထီၣ် ကွံာ်လၢအလိၤလီၤ. ဒီးဂဲၤဆၢထၢၣ်ဝဲတကီၢ်ခါ, ဒီးမၤ အခ့အပှၤအတၢ်မၤလၢအဝဲသ့ၣ်အဂီၢ်လီၤ.

⁴⁰ ဒီးတုၤမုၢ်လီၤနုာ်ဒီး, ဖဲဒၣ်ပှၤအိၣ်ဒီး ပှၤဆူးပှၤဆါ, လၢတၢ်ဆူးတၢ်ဆါဒ်အံၤဒ်နုၤတဖၣ်န့ၣ်, ဟဲစိာ်အီၤဆူအ အိၣ်လီၤ. ဒီးပာ်အစုလၢအလိၤကိးဂၤဒဲး, ဒီးမၤဘျါက့ၤ အီၤလီၤ. ⁴¹ ဒီးတၢ်နါဟးထီၣ်ကွံာ်လၢပှၤအါဂၤအလိၤ, ဒီး ကိးပသူထီၣ်ဒီးစံးဝဲဒၣ်, နဲဒၣ်အံၤနမ့ၢ်ခရံာ်, ယွၤအဖိခွါ န့ၣ်လီၤ. ဒီးဒူဝဲအလိၤ, ဒီးတဒုးကတိၤဘၣ်အီၤဘၣ်. အဂ့ၢ်ဒ်အံၤ, အဝဲသ့ၣ်သ့ၣ်ညါလၢအမ့ၢ်ခရံာ်လီၤ.

⁴² ဒီးမုၢ်ဆ့ၣ်ထီၣ်ဒီးဟးထီၣ်ကွံာ်ဝဲဆူပှၢ်မုၢ်ကနၢ, ဒီးပှၤ ဂီၢ်မုၢ်ဃုအီၤ, ဒီးလဲၤဝဲတုၤလၢအအိၣ်, ဒီးတြီဃာ်အီၤ, ဒ်သိးအသုတဟးထီၣ်လၢအအိၣ်တဂ့ၤန့ၣ်လီၤ. ⁴³ ဒီးအ ဝဲဒၣ်စံးဘၣ်အီၤ, ယဘၣ်စံၣ်တဲၤတဲလီၤယွၤအဘီအမုၢ် အတၢ်သးခုကစီၣ်လၢဝ့ၢ်အဂုၤအဂၤအပူၤစ့ၢ်ကီးလီၤ. အ ဂ့ၢ်ဒ်အံၤ, မ့ၢ်လၢတၢ်အံၤအဂ့ၢ်ဒီး, တၢ်မၢလီၤယၤလီၤ.―

⁴⁴ ဒီးအိၣ်စံၣ်တဲၤတဲလီၤတၢ်လၢ ကၤလံၤလါအဘူၣ်ဘျီၣ် တဖၣ်အပူၤန့ၣ်လီၤ.

၅

¹ ဒီးတၢ်မၤအသးလၢ ပှၤဂီၢ်မုၢ်သနံးအီၤလၢ အကနၢ် ဟူယွၤအကလုၢ်အကထါအဂီၢ်ဒီး, အဝဲဒၣ် အိၣ်ဆၢ ထၢၣ်လၢကွံကံးန့ရ့ၤသးအနံၤဒီး, ² ထံၣ်ကဘီခံဘ့ၣ်ထိး ထီၣ်အသးလၢကွံအနံၤ, ဒီးပှၤမၤညၣ်တဖၣ်ဟးထီၣ်လၢ အပူၤ, ဒီးသ့ကွံာ်အစၤလီၤ. ³ ဒီးလဲၤနုာ်ဝဲလၢ ကဘီ တဘ့ၣ်လၢအမ့ၢ်စီၤၡံမိၣ်အတၢ်, ဒီးဃ့ပှၤသုးစီၤစုၤထီၣ် ဒီးခိန့ၣ်တစဲး, ဒီးဆ့ၣ်နီၤဝဲလၢကဘီပူၤ, ဒီးသိၣ်က့ၤသီ က့ၤပှၤဂီၢ်မုၢ်လီၤ.

⁴ ဒီးဆိတ့ၢ်လၢအစံၣ်တဲၤတဲလီၤတၢ်, ဒီးစံးဘၣ် စီၤၡံ မိၣ်, သုးဃီၤကဘီဆူထံယိာ်, ဒီးဒ်သိးသုကန့ၢ်အီၣ်ညၣ် ဒီး, ပျၢ်လီၤသုစၤတက့ၢ်. ⁵ ဒီးစီၤၡံမိၣ်ကတိၤဆၢတၢ်ဒီး စံးဘၣ်အီၤ, ကစၢ်ဧၢ, ပမၤတ့ၢ်သီတနၤကျၢၤ, ဒီးပတန့ၢ် ဘၣ်တၢ်နီတမံၤဘၣ်. ဘၣ်ဆၣ်ဒီးမ့ၢ်နကလုၢ်အဃိဒီး, ယကပျၢ်လီၤစၤန့ၣ်လီၤ. ⁶ ဒီးမၤဝဲဒ်န့ၣ်ဒီး, န့ၢ်ညၣ်ဂီၢ်မုၢ် ဖးဒိၣ်, ဒီးအစၤကယာ်တ့ၢ်ဒီး, ဒ်သိးအဂိၤမီၣ်အိၣ်လၢ ကဘီအဝဲတဘ့ၣ်အပူၤကဟဲမၤစၢၤအီၤဒီး, ဝၢ်ဃီၤအစု လီၤ. ⁷ ဒီးအဝဲသ့ၣ်ဟဲဃီၤ, ဒီးမၤပှဲၤကဘီခံဘ့ၣ်န့ၣ်တုၤ အကလီၤဘျၢတ့ၢ်လီၤ. ⁸ ဒီးစီၤၡံမိၣ်ပ့းတရူးထံၣ်တၢ်ဒီး, တီၤလီၤကဒွံကျိာ်လၢ ယ့ၣ်ရှူးအခီၣ်လ့ၢ်ခိၣ်ဒီးစံးဝဲဒၣ်, ကစၢ်ဧၢ, ဟးထီၣ်စာ်လၢယအိၣ်တက့ၢ်. အဂ့ၢ်ဒ်အံၤ, ယမ့ၢ်ပှၤတၢ်ဒဲးဘးဖိလီၤ. ⁹ အဂ့ၢ်ဒ်အံၤ, အဝဲဒၣ်ဒီးပှၤ အိၣ်ဒီးအီၤခဲလၢာ်န့ၣ်ကမၢကမၣ်လၢ အမၤန့ၢ်ညၣ်ဂီၢ်မုၢ် အဃိလီၤ. ¹⁰ ဒီးစီၤစ့းဘ့းဒဲအဖိခွါ, စီၤယၤကိာ်ဒီးစီၤယိၤ ဟၣ်, လၢအမ့ၢ်စီၤၡံမိၣ်အဂိၤမီၣ်န့ၣ်, မၤစ့ၢ်ကီးအသးဒ် န့ၣ်အသိးလီၤ. ဒီးယ့ၣ်ရှူးစံးဘၣ်စီၤၡံမိၣ်, ပျံၤတၢ်တဂ့ၤ. တုၤအံၤဆူညါန့ၣ်, နကဖီၣ်န့ၢ်ပှၤကညီလီၤ. ¹¹ ဒီးတုၤ အထိးထီၣ်အကဘီလၢခိဒီး, အဝဲသ့ၣ်ဟးသဒၣ်အတၢ် ခဲလၢာ်, ဒီးပိာ်ထီၣ်အခံလီၤ.

¹² ဒီးတၢ်မၤအသးဖဲ အအိၣ်လၢ ဝ့ၢ်တဖျၢၣ်အပူၤဒီး, ကွၢ်ကွၢ်, ပှၤဘၣ်တၢ်ဆါအၢ ပှဲၤအလိၤဒီဂၤညါတဂၤ ထံၣ်ယ့ၣ်ရှူး, ဒီးတီၤလီၤကဒွံကျိာ်, ဒီးဃ့ကညးအီၤ, ဒီး စံးဝဲဒၣ်, ကစၢ်ဧၢ, နသးမ့ၢ်အိၣ်လၢနကမၤကဆှီထီၣ် က့ၤယၤဒီး, နမၤသ့လီၤ. ¹³ ဒီးယူာ်ဃီၤအစုဒီးထိးဘၣ် အီၤ, ဒီးစံးဝဲဒၣ်, ယသးအိၣ်, မ်နကဆှီထီၣ်တက့ၢ်. ဒီးအတၢ်ဆါအၢန့ၣ် ဟးထီၣ်ကွံာ်လၢအလိၤတကီၢ်ခါ လီၤ. ¹⁴ ဒီးအဝဲဒၣ်မၤလိာ်အီၤ, လၢအသုတစံးဘၣ်ပှၤနီ တဂၤတဂ့ၤ. မ့မ့ၢ်လဲၤဒုးနဲၣ်နသးလၢပှၤလုၢ်တၢ်အဒိၣ်, ဒီးဒ်သိးတၢ်အုၣ်အသးလၢအဝဲသ့ၣ်အမဲာ်ညါကအိၣ်ဒီး, မၤဘူၣ်တၢ်ဒ်စီၤမိၤရှ့မၤလိာ်အသိး, လၢနကဆှီထီၣ်အ ဃိတက့ၢ်.

¹⁵ ဘၣ်ဆၣ်ဒီးအကစီၣ်ဟူထီသါလီၤအါထီၣ်တခီ, ဒီး ပှၤဂီၢ်မုၢ်ဖးဒိၣ်ဟဲအိၣ်ဖှိၣ်ရိဖှိၣ်ဒ်သိးအကနၢ်ဟူတၢ်, ဒီး ဒ်သိးအတၢ်ဆူးတၢ်ဆါကဘျါက့ၤလၢအစုပူၤလီၤ. ¹⁶ ဒီး အဝဲဒၣ်ဟးထီၣ်ဆူပှၢ်လၢ်ကျါဒီးဘါထုကဖၣ်တၢ်လီၤ.

¹⁷ ဒီးတၢ်မၤအသးလၢ မုၢ်နံၤတနံၤ အဝဲဒၣ်သိၣ်က့ၤသီ က့ၤတၢ်အဖၢမုၢ်ဒီး, ပှၤဖၤရံၤၡဲ, ဒီးပှၤနဲၣ်လိတၢ်သိၣ်တၢ် သီ, လၢအဟဲတ့ၢ်ဝဲလၢကယဲၢ်ကၤလံၤလါဒီးကီၢ်ယူဒၤ အသဝီတဖၣ်, ဒီးလၢယရူၤၡလ့ၣ်တဖၣ်န့ၣ်, ဆ့ၣ်နီၤ အိၣ်ဝဲ, ဒီးကစၢ်အစိအကမီၤအိၣ်ဝဲလၢအကမၤဘျါက့ၤ တၢ်လီၤ. ¹⁸ ဒီးကွၢ်ကွၢ်, ပှၤပိာ်ခွါတဖၣ်ဟဲစိာ်ပှၤလၢအသံ တခီပၤတဂၤလၢအလီၢ်မံပူၤ, ဒီးဃုဝဲဒ်သိးအကဟဲစိာ် ဒီးပာ်လီၤအီၤလၢအမဲာ်ညါလီၤ. ¹⁹ ဒီးမ့ၢ်ပှၤဂီၢ်မုၢ်အိၣ်ဒီး, ကဟဲစိာ်နုာ်အီၤဒ်လဲၣ်ဒ်လဲၣ်န့ၣ်, ဃုဝဲတထံၣ်ဘၣ်ဒီး, လဲၤထီၣ်ဆူဟံၣ်ခိၣ်, ဒီးစဲၤလီၤအီၤဒီးအလီၢ်မံလၢအူးခဲ ဘ့ၣ်ဘၣ်အလီၢ်ထူၣ်ဖျိ, ဆူတၢ်သးကံၢ်ပူၤလၢယ့ၣ်ရှူးအ မဲာ်ညါလီၤ. ²⁰ ဒီးထံၣ်အဝဲသ့ၣ်အတၢ်နာ်ဒီးစံးဝဲဒၣ်, စီဧၢ, နတၢ်ဒဲးဘးပျၢ်လံ. ²¹ ဒီးပှၤကွဲးလံာ်ဒီးပှၤဖၤရံၤၡဲသ့ၣ်တ ဖၣ်မုန့ၣ်, ကူၣ်တၢ်ဖးတၢ်ဒီးစံးဝဲဒၣ်, ပှၤလၢအကတိၤက မၣ်ယွၤတဂၤအံၤ, မ့ၢ်မတၤလဲၣ်. လၢယွၤအမဲာ်ညါန့ၣ်, မ့ၢ်မတၤပျၢ်တၢ်ဒဲးဘးသ့တဂၤလဲၣ်. ²² ဒီးယ့ၣ်ရှူးသ့ၣ်ညါ အတၢ်ကူၣ်ထီၣ်ဖးလီၤ, ဒီးကတိၤဆၢတၢ်ဒီးစံးဘၣ်အီၤ, ဘၣ်မနုၤလၢသုကူၣ်တၢ်လၢသုသးကံၢ်ပူၤလဲၣ်. ²³ မ့ၢ်တၢ် ကတိၤညီဖဲလဲၣ်တမံၤလဲၣ်. မ့ၢ်ပကစံးလၢနတၢ်ဒဲးဘး ပျၢ်လံ. မ့ၢ်ပကစံးလၢဂဲၤဆၢထၢၣ်ဟးတက့ၢ်န့ၣ်လဲၣ်.―

²⁴ ဘၣ်ဆၣ်ဒီး ဒ်သိးသုကသ့ၣ်ညါလၢ ပှၤကညီဖိခွါအံၤ, အိၣ်ဒီးအစိအကမီၤလၢ ဟီၣ်ခိၣ်ချၢလၢအကပျၢ်တၢ်ဒဲး ဘးဒီး, စံးဘၣ်ပှၤလၢအသံတခီပၤတဂၤန့ၣ်, ယစံးဘၣ် နၤ, ဂဲၤဆၢထၢၣ်, ဒီးဟံးထီၣ်နလီၢ်မံ, ဒီးက့ၤက့ၤဆူန ဟံၣ်တက့ၢ်. ²⁵ ဒီးဂဲၤဆၢထၢၣ်ဝဲတကီၢ်ခါ, လၢပှၤခဲလၢာ် အမဲာ်ညါ, ဒီးဟံးထီၣ်အလီၢ်မံ, ဒီးစံးထီၣ်ပတြၢၤယွၤ, ဒီးက့ၤက့ၤဝဲဆူအဟံၣ်လီၤ. ²⁶ ဒီးပှၤခဲလၢာ်ပာ်ထီၣ်အသး ကမၢကမၣ်ဒီးစံးထီၣ်ပတြၢၤယွၤ, ဒီးတၢ်ပျံၤတၢ်ဖုးအိၣ် ပှဲၤအသး, ဒီးစံးဝဲဒၣ်, အအံၤတနံၤအံၤ, ပထံၣ်ဘၣ်လံ တၢ်လီၤဆီလီၤလးမးလဲၣ်.

²⁷ ဒီးတၢ်မၤအသးတဖၣ်န့ၣ်အလီၢ်ခံဒီး, ဟးထီၣ်ကွံာ် ဝဲ, ဒီးထံၣ်ပှၤဃ့သွဲတဂၤအမံၤစီၤလ့ၤဝံ, ဆ့ၣ်နီၤဝဲလၢပှၤ ဃ့သွဲအလီၢ်, ဒီးစံးဘၣ်အီၤ, ပိာ်ယခံတက့ၢ်. ²⁸ ဒီးဂဲၤဆၢ ထၢၣ်ဝဲ, ဒီးဟးသဒၣ်အတၢ်ခဲလၢာ်, ဒီးပိာ်ထီၣ်အခံလီၤ.

²⁹ ဒီးစီၤလ့ၤဝံ မၤတၢ်အီၣ်ဖးဒိၣ်လၢအဂီၢ်လၢ အဟံၣ် ပူၤ, ဒီးပှၤဃ့သွဲဂီၢ်မုၢ်ဖးဒိၣ်, ဒီးပှၤအဂုၤအဂၤသ့ၣ်တဖၣ် န့ၣ်, ဆ့ၣ်နီၤသန့ၤဒီးအဝဲသ့ၣ်န့ၣ်လီၤ. ³⁰ ဒီးပှၤဖၤရံၤၡဲဒီး အပှၤကွဲးလံာ်တဖၣ်, ကဒူးကဒ့ၣ်တၢ်လၢအပျဲၢ်အဘီၣ် အလိၤ, ဒီးစံးဝဲဒၣ်, ဘၣ်မနုၤလၢသုအီၣ်ဃုာ်ဒီးအီဃုာ် တၢ်ဒီးပှၤဃ့သွဲ, ဒီးပှၤတၢ်ဒဲးဘးဖိတဖၣ်လဲၣ်. ³¹ ဒီးယ့ၣ် ရှူးကတိၤဆၢတၢ်ဒီးစံးဘၣ်အီၤ, ပှၤလၢအအိၣ်ဆူၣ်အိၣ် ချ့, မၤကသံၣ်သရၣ်အလီၢ်တအိၣ်ဘၣ်. မ့မ့ၢ်အလီၢ်အိၣ် ပှၤလၢအမၤတကဲဘၣ်တဖၣ်န့ၣ်လီၤ. ³² တမ့ၢ်ဘၣ်ယဟဲ ကိးက့ၤပှၤအတီအလိၤဘၣ်, မ့ၢ်ပှၤတၢ်ဒဲးဘးဖိ, လၢတၢ် ပီၢ်ယၢ်လီၤက့ၤအသးအဂ့ၢ်လီၤ.

³³ ဒီးပှၤတဖၣ်စံးဘၣ်အီၤ, ဘၣ်မနုၤလၢစီၤယိၤဟၣ်အ ပျဲၢ်အဘီၣ်ဒုၣ်တၢ်အီၣ်တၢ်အီဒီး မၤတၢ်ထုကဖၣ်အါစု, ဒီးဒ်န့ၣ်အသိးပှၤဖၤရံၤၡဲအပျဲၢ်အဘီၣ်စ့ၢ်ကီး, မ့မ့ၢ်နပျဲၢ် နဘီၣ်တဖၣ် အီၣ်တၢ်အီတၢ်လဲၣ်. ³⁴ ဒီးအဝဲဒၣ်စံးဘၣ် အီၤ, တၢ်လၢတလးမူးအပျဲၢ်န့ၣ်, ဖဲတလးမူးပိာ်ခွါအိၣ် ဒီးအီၤအဖၢမုၢ်ဒီး, သုမၢအဒုၣ်တၢ်အီၣ်တၢ်အီဘၣ်ကန့ၢ် ဧါ. ³⁵ ဘၣ်ဆၣ်ဒီးမုၢ်နံၤတဖၣ်ကဟဲဝဲ, ဖဲတၢ်ကထုးဖး တလးမူးပိာ်ခွါဒီးအီၤလီၤ. တုၤနုၤတစုကဒုၣ်တၢ်အီၣ် တၢ်အီလၢမုၢ်နံၤတဖၣ်န့ၣ်လီၤ. ³⁶ ဒီးစံးဘၣ်အီၤလၢတၢ် ကတိၤဒိ, တၢ်အကူအသိးလီၢ်လံၤန့ၣ်, ပှၤတဆးကျး ဘၣ်လၢတၢ်ကူတၢ်သိးအသီန့ၣ်နီတဂၤဘၣ်. မ့ၢ်မၤဝဲဒ် န့ၣ်ဒီးတၢ်အသီမၤယာ်ဝဲ, ဒီးတၢ်လၢအသီဒီးတၢ်အလီၢ် လံၤန့ၣ်, တဘၣ်လိာ်ဘၣ်အသးဘၣ်. ³⁷ ဒီးတၢ်လၢထံ ဒၢတၢ်ဖံးလီၢ်လံၤအပူၤန့ၣ်, ပှၤတဒၢနုာ်ဘၣ်စပံးထံအသီ နီတဂၤဘၣ်. ပှၤမ့ၢ်မၤဒ်န့ၣ်ဒီး, စပံးထံအသီကမၤသ့ၣ် ဖးထံဒၢတၢ်ဖံး, ဒီးစပံးထံကယွၤကွံာ်, ဒီးထံဒၢတၢ်ဖံး ကဟးဂီၤကွံာ်ဝဲလီၤ. ³⁸ မ့မ့ၢ်တၢ်လၢစပံးထံအသီန့ၣ်, ပှၤ ဘၣ်ဒၢနုာ်အီၤလၢထံဒၢတၢ်ဖံးအသီ, ဒီးအိၣ်ဒၣ်တၢ်ခံမံၤ လၢာ်လီၤ. ³⁹ ဒီးပှၤလၢအအီစပံးထံအလီၢ်လံၤန့ၣ်, တၢ် တမိၣ်အီဘၣ်အသးလၢအသီတကီၢ်ခါနီတဂၤဘၣ်. အ ဂ့ၢ်ဒ်အံၤ, စံးဝဲ, အလီၢ်လံၤန့ၣ်ဝံၣ်တက့ၢ်လီၤ.

၆

¹ ဒီးတၢ်မၤအသးလၢမုၢ်အိၣ်ဘှံးအနံၤ ဒူတ့းရီးပြီၤတူး အနံၤန့ၣ်, အဝဲဒၣ်လဲၤလၢစံာ်ပူၤ, ဒီးအပျဲၢ်အဘီၣ်ဒဲးဘု အစဲၤ, ဒီးလံာ်လူာ်လၢအစု, ဒီးအီၣ်ဝဲလီၤ. ² ဒီးပှၤဖၤရံၤ ၡဲတနီၤနီၤစံးဘၣ်အီၤ, တၢ်တဂ့ၤမၤဘၣ်လၢမုၢ်အိၣ်ဘှံး အနံၤန့ၣ်, ဘၣ်မနုၤလၢသုမၤလဲၣ်. ³ ဒီးယ့ၣ်ရှူးကတိၤ ဆၢအီၤဒီး, စံးဝဲဒၣ်, စီၤဒၤဝံးတုၤတၢ်သၣ်ဝံၤအသးဒီး ပှၤအိၣ်လၢအသိးတဖၣ်န့ၣ်, မၤဝဲဒ်လဲၣ်ဒ်လဲၣ်, ⁴ ဖဲအ လဲနုာ်ဆူယွၤအဟံၣ်ပူၤဒီးဟံးန့ၢ်အီၣ်တၢ်မဲာ်ညါအကိၣ်, လၢပှၤတဂ့ၤအီၣ်ဘၣ်နီတဂၤဘၣ်, ဂ့ၤအီၣ်ထဲပှၤလုၢ်တၢ် အဒိၣ်တဖၣ်ဧိၤ, ဒီးဟ့ၣ်အီၣ်စ့ၢ်ကီးပှၤအိၣ်ဒီးအီၤန့ၣ်, မ့ၢ် သုတဖးဒံးဘၣ်ဧါ. ⁵ ဒီးစံးဘၣ်အီၤ, တၢ်လၢပှၤကညီ ဖိခွါအံၤ, မ့ၢ်မုၢ်အိၣ်ဘှံးအနံၤအကစၢ်စ့ၢ်ကီးလီၤ.

⁶ ဒီးတၢ်မၤအသးလၢ မုၢ်အိၣ်ဘှံးအနံၤလၢအဂၤတနံၤ န့ၣ်, အဝဲဒၣ်လဲၤနုာ်ဆူဘူၣ်ဘျီၣ်ပူၤ, ဒီးသိၣ်က့ၤသီက့ၤ တၢ်, ဒီးပှၤလၢအစုထွဲသံအိၣ်ဖဲန့ၣ်တဂၤလီၤ. ⁷ ဒီးလၢ အိၣ်ဘှံးအနံၤ မ့ၢ်အကမၤဘျါက့ၤတၢ်, တမၤဘျါက့ၤ တၢ်လဲၣ်န့ၣ်, ဒ်သိးအကထံၣ်န့ၢ်အလီၢ်လၢအကဆှိးအီၤ ဒီး, ပှၤကွဲးလံာ်ဒီး ပှၤဖၤရံၤၡဲသ့ၣ်တဖၣ် ကွၢ်ဟုၣ်အီၤ လီၤ. ⁸ ဒီးအဝဲဒၣ်သ့ၣ်ညါအတၢ်ကူၣ်ထီၣ်ဖးလီၤ, ဒီးစံး ဘၣ်ပှၤလၢအစုသံတဂၤန့ၣ်, ဂဲၤထၢၣ်, ဒီးဆၢထၢၣ်လၢ တၢ်သးကံၢ်ပူၤတက့ၢ်. ဒီးအဝဲဒၣ်ဂဲၤထၢၣ်ဒီးဆၢထၢၣ်ဝဲ လီၤ. ⁹ အန့ၣ်ဒီး, ယ့ၣ်ရှူးစံးဘၣ်အီၤ, ယကသံကွၢ်သု လီၤ. လၢမုၢ်အိၣ်ဘှံးအနံၤန့ၣ်, ဂ့ၤမၤဒ်လဲၣ်. ဂ့ၤမၤဂ့ၤတၢ်, ဂ့ၤမၤအၢတၢ်လဲၣ်. ဂ့ၤအုၣ်က့ၤခီၣ်က့ၤပှၤကညီအသး, ဂ့ၤ မၤသံပှၤကညီအသးလဲၣ်. ¹⁰ ဒီးကွၢ်တရံးပှၤခဲလၢာ်, ဒီးစံး ဘၣ်ပှၤတဂၤန့ၣ်, ယူာ်ထီၣ်နစုတက့ၢ်. ဒီးမၤဝဲဒ်န့ၣ်, ဒီး အစုဘျါက့ၤဒ်အဝဲတခီအသိးန့ၣ်လီၤ. ¹¹ ဒီးပှၤတဖၣ်န့ၣ် အသးဒိၣ်ထီၣ်ပှဲၤဆၢၣ်ကလာ်, ဒီးကမၤယ့ၣ်ရှူးဒ်လဲၣ်ဒ် လဲၣ်န့ၣ်, ကူၣ်လိာ်အသးသကိးသကိးလီၤ.

¹² ဒီးတၢ်မၤအသးလၢမုၢ်နံၤတဖၣ်န့ၣ်, အဝဲဒၣ်လဲၤဘါ ထုကဖၣ်တၢ်လၢကစၢၢ်တဖျၢၣ်အလိၤ, ဒီးအိၣ်ဝဲဖဲန့ၣ်, ဒီးဘါထုကဖၣ်ယွၤသီတနၤကျၢၤလီၤ. ¹³ ဒီးတုၤမုၢ်ဆ့ၣ် ထီၣ်ဒီး, ကိးက့ၤအပျဲၢ်အဘီၣ်တဖၣ်ဆူအအိၣ်, ဒီးဃု ထၢထီၣ်ပှၤတဆံခံဂၤလၢအကျါ, ဒီးယုၢ်ဝဲအမံၤလၢပှၤ တၢ်မၢဖိလီၤ. ¹⁴ စီၤၡံမိၣ်ကိးဝဲအမံၤလၢစီၤပ့းတရူးဒီးအဒီ ပုၢ်ဝဲၢ်စီၤအၣ်ဒရ့း, စီၤယၤကိာ်ဒီးစီၤယိၤဟၣ်, ဒီးစီၤဖံလံး ပူးဒီးစီၤဘၢ်သလီးမဲ, ¹⁵ စီၤမးသဲဒီးစီၤသိၤမါ, စီၤအၤလဖဲ အဖိခွါစီၤယၤကိာ်ဒီး စီၤၡံမိၣ်ကိးက့ၤဝဲလၢစီၤစ့ၤလိၣ်, ¹⁶ ဒီးစီၤယၤကိာ်အဒီပုၢ်ဝဲၢ်စီၤယူဒၤ, ဒီးပှၤလၢအဟ့ၣ်လီၤ ကွံာ်အီၤ, စီၤယူဒၤအံၣ်စကၤရံၤအိာ်လီၤ. ¹⁷ ဒီးဟဲက့ၤလီၤ ဒီးအီၤလၢကစၢၢ်အလိၤ, ဒီးဆၢထၢၣ်လၢတၢ်အလီၢ်ပၢၤ, ဒီးအပျဲၢ်အဘီၣ်ဂီၢ်မုၢ်, ဒီးပှၤလၢကီၢ်ယူဒၤဒီကီၢ်ညါ, ဒီး လၢယရူၤၡလ့ၣ်, ဒီးလၢပီၣ်လဲၣ်နံၤဘူးဒီးစိၢ်ဒီးစံဒိၣ်သ့ၣ် တဖၣ်, ဂီၢ်မုၢ်ဖးဒိၣ်လၢအဟဲဒ်သိးအကနၢ်ဟူအကလုၢ်, ဒီးဒိးတၢ်မၤဘျါက့ၤအတၢ်ဆူးတၢ်ဆါ, ¹⁸ ဒီးပှၤလၢအ ဘၣ်တၢ်မၤတံာ်တာ်အီၤလၢတၢ်နါတဖၣ်, ဒီးအဝဲဒၣ်မၤ ဘျါက့ၤအီၤလီၤ. ¹⁹ ဒီးပှၤဂီၢ်မုၢ်ခဲလၢာ်ဂုာ်ထိးဘၣ်အီၤလီၤ. အဂ့ၢ်ဒ်အံၤ, အစိအကမီၤဟဲထီၣ်လၢအလိၤ, ဒီးမၤဘျါ က့ၤပှၤခဲလၢာ်လီၤ. ²⁰ ဒီးယ့ၣ်ရှူးကွၢ်ထီၣ်အပျဲၢ်အဘီၣ်ဒီး စံးဝဲဒၣ်, ပှၤဖှီၣ်ဖိယာ်ဖိတဖၣ်အံၤ, ဘၣ်ဆိၣ်ဂ့ၤဝဲလီၤ. အဂ့ၢ်ဒ်အံၤ, ယွၤအဘီအမုၢ်န့ၣ်မ့ၢ်သုတၢ်လီၤ.

²¹ ပှၤလၢတၢ်သၣ်ဝံၤအသး ခဲကနံၣ်အံၤ သုဝဲသ့ၣ်အံၤ, သုဘၣ်ဆိၣ်ဂ့ၤလီၤ. အဂ့ၢ်ဒ်အံၤ, သုကအီၣ်ကုးအီပှဲၤ လီၤ. ပှၤလၢအဟီၣ်ခဲကနံၣ်အံၤသုဝဲသ့ၣ်အံၤ, သုဘၣ် ဆိၣ်ဂ့ၤလီၤ. အဂ့ၢ်ဒ်အံၤ, သုကနံၤထီၣ်လီၤ. ²² တုၤပှၤ ကညီသးဟ့သု, ဒီးတုၤအဟီထီၣ်ကွံာ်သု, ဒီးဒုၣ်ဒွဲၣ် သု, ဒီးညိကွံာ်သုမံၤဒ်တၢ်အၢအသိးလၢပှၤကညီဖိခွါအံၤ အဃိဒီး, သုဘၣ်ဆိၣ်ဂ့ၤသုဝဲလီၤ. ²³ တၢ်လၢမုၢ်နံၤန့ၣ်, သးခုဒီးစံၣ်တက့ၢ်. အဂ့ၢ်ဒ်အံၤ, ကွၢ်ကွၢ်, သုဘျုးအိၣ်ဝဲ လၢမူခိၣ်ဒိၣ်မးလီၤ. အဂ့ၢ်ဒ်အံၤ, အဝဲသ့ၣ်အပၢ်တဖၣ် န့ၣ်, မၤဝံတဖၣ်ဒ်န့ၣ်အသိးလီၤ.

²⁴ မ့မ့ၢ်သုဝဲသ့ၣ်လၢအထူးအတီၤတဖၣ်အံၤ, သုဘၣ်အ ဖှီၣ်လီၤ. အဂ့ၢ်ဒ်အံၤ, သုတၢ်မုာ်တၢ်ခုၣ်န့ၣ်သုန့ၢ်ဘၣ် လံ. ²⁵ ပှၤလၢအအီၣ်ကုးအီပှဲၤသုဝဲသ့ၣ်အံၤ, သုဘၣ်အ ဖှီၣ်လီၤ. အဂ့ၢ်ဒ်အံၤ, သုကအိၣ်ဝံၤအိၣ်စ့ၤလီၤ. ပှၤလၢ အနံၤခဲကနံၣ်အံၤသုဝဲသ့ၣ်အံၤ, သုဘၣ်အဖှီၣ်လီၤ. အ ဂ့ၢ်ဒ်အံၤ, သုသူၣ်ကကၢ် သုသးကလီၤ, ဒီးသုကဟီၣ် လီၤ. ²⁶ တုၤပှၤကညီခဲလၢာ်စံးဂ့ၤသုဒီး, သုဘၣ်အဖှီၣ် လီၤ. အဂ့ၢ်ဒ်အံၤ, အဝဲသ့ၣ်အပၢ်တဖၣ်န့ၣ်မၤဝံလၢအ လီတၢ်တဖၣ်, ဒ်န့ၣ်အသိးလီၤ.

²⁷ မ့မ့ၢ်ယဲဒၣ်အံၤ, ယစံးဘၣ်ပှၤလၢ အနၢ်ဟူတၢ်သုဝဲ သ့ၣ်အံၤ, အဲၣ်သုဒုၣ်သုဒါတက့ၢ်. ပှၤလၢအသးဟ့သု တဖၣ်န့ၣ်, မၤဂ့ၤအီၤတက့ၢ်. ²⁸ ပှၤလၢအဆိၣ်အၢသုတ ဖၣ်န့ၣ်, ဆိၣ်ဂ့ၤအီၤတက့ၢ်. ပှၤလၢအကတိၤတရီတပါ သုတဖၣ်န့ၣ်, ဘါထုကဖၣ်န့ၢ်အဂီၢ်တက့ၢ်. ²⁹ ပှၤလၢအဒဲ နဘိးတခီန့ၣ်, ဟ့ၣ်အီၤလၢအဝဲတခီတက့ၢ်. ဒီးပှၤလၢအ ဟံးန့ၢ်နယၣ်န့ၣ်, သုတတြီအဟံးန့ၢ်စ့ၢ်ကီးနဆ့တဂ့ၤ.

³⁰ ကယဲၢ်ပှၤလၢအဃ့တၢ်လၢနၤတဂၤလၢ်လၢ်န့ၣ်, ဟ့ၣ် အီၤတက့ၢ်. ဒီးပှၤလၢအဟံးန့ၢ်နတၢ်န့ၣ်, သုတဃ့က ဒါက့ၤတဂ့ၤ. ³¹ ဒီးဒ်သုဆၢလၢပှၤကညီကမၤသုအသိး န့ၣ်, မၤအီၤဒ်န့ၣ်သိးတက့ၢ်.

³² ဒီးသုမ့ၢ်အဲၣ်ပှၤလၢအအဲၣ်သုဒီး, မ့ၢ်သုဘျုးအိၣ်မနုၤ လဲၣ်. အဂ့ၢ်ဒ်အံၤ, ပှၤတၢ်ဒဲးဘးဖိတဖၣ်အဲၣ်ပှၤလၢအ အဲၣ်အီၤစ့ၢ်ကီးလီၤ. ³³ ဒီးသုမ့ၢ်မၤဂ့ၤ ပှၤလၢအမၤဂ့ၤသု တဖၣ်ဒီး, သုဘျုးအိၣ်မနုၤလဲၣ်. အဂ့ၢ်ဒ်အံၤ, ပှၤတၢ်ဒဲး ဘးဖိတဖၣ်မၤဝဲဒ်န့ၣ်အသိးစ့ၢ်ကီးလီၤ. ³⁴ ဒီးသုမ့ၢ်ဒုးလိၢ် တၢ်လၢပှၤလၢသုမုၢ်လၢ်လၢ အကလိးက့ၤဝဲတဖၣ်န့ၣ် ဒီး, မ့ၢ်သုဘျုးအိၣ်မနုၤလဲၣ်. အဂ့ၢ်ဒ်အံၤ, ပှၤတၢ်ဒဲးဘးဖိ တဖၣ်ဒုးလိၢ်တၢ်လၢပှၤတၢ်ဒဲးဘးဖိ, ဒ်သိးအကန့ၢ်က့ၤ ဝဲပှဲၤသိးဒီးအလီၢ်စ့ၢ်ကီးလီၤ.

³⁵ လၢန့ၣ်အမဲာ်ညါအဲၣ်သုဒုၣ်သုဒါတဖၣ်, ဒီးမၤဂ့ၤတၢ် တက့ၢ်. ဒီးသုတမုၢ်လၢ်ဘၣ်လၢ သုကဒိးန့ၢ်က့ၤတၢ်နီ တမံၤဘၣ်ဒီး, ဒုးလိၢ်တၢ်တက့ၢ်. ဒီးသုကန့ၢ်ဘၣ်သုဘျုး ဖးဒိၣ်, ဒီးသုကကဲထီၣ်တၢ်ထီကတၢၢ်အဖိခွါတဖၣ်လီၤ. အဂ့ၢ်ဒ်အံၤ, အဝဲဒၣ်န့ၣ် မၤဘျုးပှၤလၢအတသ့ၣ်ညါ ဘၣ်တၢ်ဘျုးဘၣ်, ဒီးပှၤအအၢအသီတဖၣ်လီၤ. ³⁶ မၤသး ဒ်န့ၣ်ဒီး, ဒ်သုပၢ်သးကညီၤတၢ်အသိးန့ၣ်, သးကညီၤ တၢ်သုဝဲစ့ၢ်ကီးတက့ၢ်.

³⁷ ဒီးသုတစံၣ်ညီၣ်တၢ်တဂ့ၤ, ဒီးတၢ်တစံၣ်ညီၣ်ဘၣ်သု ဘၣ်. သုတစံၣ်ညီၣ်ဃၣ်တၢ်တဂ့ၤ, ဒီးတၢ်တစံၣ်ညီၣ် ဃၣ်ဘၣ်သုဘၣ်. ပျၢ်တၢ်တက့ၢ်. ဒီးတၢ်ကပျၢ်သုတၢ် လီၤ. ³⁸ ဟ့ၣ်တၢ်တက့ၢ်. ဒီးတၢ်ကဟ့ၣ်တၢ်လၢသုလီၤ. ပှၤ ကဃီၣ်ကစီဒီ, ကဆီၣ်လီၤဃာ်, ကဂံၤဂုၤ, ဒီးကမၤပှဲၤစိ တရိၤ, ဒီးကဟ့ၣ်လီၤလၢသုသးနါပှၢ်လီၤ. အဂ့ၢ်ဒ်အံၤ, ဒ် သုဃီၣ်ဟ့ၣ်တၢ်အသိးန့ၣ်, တၢ်ကဃီၣ်ဟ့ၣ်က့ၤသုလီၤ.

³⁹ ဒီးကတိၤဒိတၢ်ဒီးစံးဘၣ်အီၤ, ပှၤမဲာ်ဘျီၣ် ဒုးနဲၣ်ကျဲ လၢပှၤမဲာ်ဘျီၣ်ဘၣ်ကသ့ဧါ. ကလီၤတဲာ်ဆူတၢ်ပူၤခံဂၤ လၢာ်, တမ့ၢ်ဘၣ်ဧါ. ⁴⁰ အပျဲၢ်န့ၣ်တအိၣ်ဘၣ်လၢအသ ရၣ်အဖီခိၣ်ဘၣ်. မ့မ့ၢ်ကယဲၢ်ပှၤလၢအလၢထီၣ်ပှဲၤထီၣ် တဂၤလၢ်လၢ်န့ၣ်, ကဒ်သိးဒီးအသရၣ်လီၤ.

⁴¹ ကျိၤတဘိအိၣ်လၢနမဲာ်သၣ်ဒၣ်နဲအပူၤန့ၣ်, နတဆိ ကမိၣ်ဘၣ်ဒီး, ဘၣ်မနုၤလၢနကွၢ်ထံတၢ်အလ့ၣ်အဒ့လၢ နဒီပုၢ်ဝဲၢ်အမဲာ်သၣ်ပူၤန့ၣ်လဲၣ်. ⁴² နစံးဘၣ်နဒီပုၢ်ဝဲၢ်, ဒီ ပုၢ်ဝဲၢ်ဧၢ, ဟ့ၣ်ယခွဲးထီၣ်ကွံာ်တၢ်အလ့ၣ်အဒ့အိၣ်လၢန မဲာ်သၣ်ပူၤတက့ၢ်န့ၣ်, ကသ့ဒ်လဲၣ်. ပှၤလၢအလီတၢ်ဧၢ, ခွဲးထီၣ်ကွံာ်ဆိကျိၤတဘိ အိၣ်လၢနမဲာ်သၣ်ဒၣ်နဲအပူၤ တက့ၢ်. အန့ၣ်ဒီး, နကထံၣ်တၢ်ထံထံဆးဆးဒ်သိးနက ခွဲးထီၣ်ကွံာ်တၢ်အလ့ၣ်အဒ့ အိၣ်လၢနဒီပုၢ်ဝဲၢ်အမဲာ်သၣ် ပူၤန့ၣ်လီၤ.

⁴³ အဂ့ၢ်ဒ်အံၤ, သ့ၣ်လၢအဂ့ၤန့ၣ် တသၣ်ထီၣ်ဘၣ်လၢ အအၢဘၣ်, ဒီးသ့ၣ်လၢအအၢန့ၣ်တသၣ်ထီၣ်ဘၣ်လၢ အဂ့ၤဘၣ်. ⁴⁴ အဂ့ၢ်ဒ်အံၤ, သ့ၣ်တထံးလၢ်လၢ်န့ၣ်, ပှၤ သ့ၣ်ညါအီၤလၢအသၣ်ဒၣ်ဝဲလီၤ. အဂ့ၢ်ဒ်အံၤ, လၢတၤ ဆှုၣ်အလိၤန့ၣ်, ပှၤတဒဲးဘၣ်စပံးသၣ်ဘၣ်, ဒီးလၢတၤ ဆှုၣ်သပှီၤအလိၤန့ၣ်, ပှၤတဒဲးဘၣ်ချၢၣ်ဒၢသၣ်ဘၣ်. ⁴⁵ ပှၤ လၢအဂ့ၤန့ၣ်, ဟံးထီၣ်ဆံထီၣ်တၢ်ဂ့ၤလၢအပာ်ဖှိၣ်တၢ် အလီၢ်ဂ့ၤလၢအသးကံၢ်ပူၤလီၤ. ဒီးပှၤလၢအအၢန့ၣ်, ဟံး ထီၣ်ဆံထီၣ်တၢ်အၢ လၢအပာ်ဖှိၣ်တၢ်အလီၢ်အၢလၢအ သးကံၢ်ပူၤလီၤ. အဂ့ၢ်ဒ်အံၤ, ဒ်တၢ်ပှဲၤပသးလုၣ်ကွံာ်အ သိး, ပထးခိၣ်ကတိၤတၢ်လီၤ.

⁴⁶ ဒီးတၢ်လၢယမၤလိာ်သုန့ၣ်, သုတမၤဘၣ်ဒီး, ဘၣ်မ နုၤလၢသုကိးယၤ, ကစၢ်ဧၢ, ကစၢ်ဧၢလဲၣ်. ⁴⁷ ကယဲၢ်ပှၤ လၢအဟဲဆူယအိၣ်, ဒီးနၢ်ဟူယကလုၢ်ယကထါ, ဒီး မၤဝဲတဂၤလၢ်လၢ်န့ၣ်, မၤအသးဒ်တၢ်မနုၤမနုၤအသိး လဲၣ်န့ၣ်, ယကဒုးနဲၣ်သုလီၤ. ⁴⁸ မၤအသးဒ်ပှၤမၤဟံၣ်, ဒီးခူၣ်လီၤဝဲယိာ်, ဒီးပာ်လီၤအခီၣ်ထံးလၢလၢၢ်ခိၣ်အသိး န့ၣ်လီၤ. ဒီးထံထီၣ်, ဒီးထံဆူဘၣ်အဟံၣ်န့ၣ်, ဒီးမၤဟူး မၤဝးအီၤတသ့ဘၣ်. အဂ့ၢ်ဒ်အံၤ, အခီၣ်ထံးသူၣ်အသး လၢလၢၢ်ခိၣ်လီၤ. ⁴⁹ ဒီးပှၤလၢအနၢ်ဟူ, ဒီးတမၤဘၣ်ဝဲ န့ၣ်, မၤအသးဒ်ပှၤလၢအမၤဟံၣ်လၢဟီၣ်ခိၣ်, ဒီးအခီၣ် ထံးတအိၣ်ဘၣ်အသိးလီၤ. ဒီးထံဆူဘၣ်အီၤ, ဒီးလီၤပှီၢ် ကွံာ်ဝဲတကီၢ်ခါ, ဒီးဟံၣ်အလီၤပှီၢ်ကွံာ်န့ၣ်နးမးလီၤ.

၇

¹ ဒီးတုၤအမၤဝံၤအတၢ်ကတိၤန့ၣ် ခဲလၢာ်လၢပှၤဂီၢ်မုၢ် နၢ်ဟူတၢ်အဂီၢ်ဒီး, လဲၤနုာ်ဝဲဆူကပ့းရနီၣ်အပူၤလီၤ. ² ဒီး ပှၤသုးဖိတကယၤအခိၣ်, အကုၢ်အပှၤလၢအအဲၣ်ဝဲတ ဂၤန့ၣ်, မၤတကဲဘူးဒီးအကသံတ့ၢ်လီၤ. ³ ဒီးနၢ်ဟူဝဲလၢ ယ့ၣ်ရှူးအဂ့ၢ်, ဒီးမၢပှၤယူဒၤအသးပှၢ်တဖၣ် လဲၤဆူအ အိၣ်ဒီးဃ့ကညးအီၤ ဒ်သိးအကဟဲမၤဘျါက့ၤအကုၢ်အ ပှၤလီၤ. ⁴ ဒီးပှၤတဖၣ်န့ၣ်ဟဲဆူယ့ၣ်ရှူးအအိၣ်, ဒီးဃ့က ညးသပှၢ်ပှၢ်ဒီးစံးဝဲဒၣ်, ပှၤတဂၤန့ၣ်, ဂ့ၤဝဲလၢနကမၤတၢ် တမံၤအံၤလၢအဂီၢ်လီၤ. ⁵ အဂ့ၢ်ဒ်အံၤ, အဲၣ်ပှၤပကလုာ် အံၤ, ဒီးအကစၢ်ဒၣ်ဝဲသူၣ်န့ၢ်လံပဘူၣ်ဘျီၣ်တဖျၢၣ်လံ.

⁶ ဒီးယ့ၣ်ရှူးလဲၤတၢ်ဒီးအီၤလီၤ. ဒီးတုၤအအိၣ်တယံၤ လၢၤဘၣ်ဒီးအဟံၣ်န့ၣ်ဒီး, ပှၤသုးဖိတကယၤအခိၣ်တ ဂၤန့ၣ်, မၢအတံၤအသကိးတဖၣ် လဲၤဆူအအိၣ်ဒီးစံး ဘၣ်အီၤ, ကစၢ်ဧၢ, သုတမၤဘှံးနသးတဂ့ၤ. အဂ့ၢ်ဒ်အံၤ, နဟဲနုာ်ဆူယဟံၣ်ခိၣ်အဖီလာ်န့ၣ်, ယတဂ့ၤတဘၣ်ဘၣ် လီၤ. ⁷ ဒ်န့ၣ်အသိး, ယတဂ့ၤဟဲယဲဆူနအိၣ်ဘၣ်. ဘၣ် ဆၣ်ဒီး, စံးလၢနကလုၢ်တဘီဒီး, ယခ့ယပှၤကဘျါက့ၤ လီၤ. ⁸ အဂ့ၢ်ဒ်အံၤ, ယဲဒၣ်အံၤ, ယမ့ၢ်ပှၤကညီတဂၤလၢ တၢ်ပာ်အီၤလၢတၢ်စိတၢ်ကမီၤအဖီလာ်, ဒီးအိၣ်ဒီးသုး ဖိလၢယဖီလာ်လီၤ. ဒီးအအံၤတဂၤယစံးဘၣ်အီၤ, လဲၤ, ဒီးလဲၤဝဲ, ဒီးအန့ၣ်တဂၤ, ဟဲ, ဒီးဟဲဝဲ, ဒီးယကုၢ်န့ၣ်, မၤ တၢ်အံၤ, ဒီးမၤဝဲလီၤ. ⁹ တၢ်တဖၣ်န့ၣ်ယ့ၣ်ရှူးနၢ်ဟူဒီး, ကမၢကမၣ်ဝဲ, ဒီးကဒါဃီၤအသး, ဒီးစံးဘၣ်ပှၤဂီၢ်မုၢ် လၢအပိာ်အခံတဖၣ်န့ၣ်, ယစံးဘၣ်သု, လၢအံၣ်စရ့လး ဒၣ်လဲာ်အပူၤန့ၣ်, တၢ်နာ်ထဲအံၤယတထံၣ်န့ၢ်ဘၣ်.

¹⁰ ဒီးပှၤလၢတၢ်မၢလီၤအီၤတဖၣ်န့ၣ်, က့ၤဆူအဟံၣ်, ဒီး ထံၣ်န့ၢ်အကုၢ်အပှၤလၢအဆါတ့ၢ်တဂၤန့ၣ်, အိၣ်ဆူၣ် အိၣ်ချ့လီၤ.

¹¹ ဒီးလၢ မုၢ်ဆ့ၣ်ထီၣ်တနံၤန့ၣ်, တၢ်မၤအသးလၢအ လဲၤဆူဝ့ၢ်တဖျၢၣ်ကိးဝဲအမံၤလၢနၤအံၣ်, ဒီးအပျဲၢ်အဘီၣ် အါဂၤ, ဒီးပှၤဂီၢ်မုၢ်ဖးဒိၣ်, လဲၤဒီးအီၤလီၤ. ¹² ဒီးတုၤအဘူး ထီၣ်ဒီးဝ့ၢ်အကျဲစၢၤဒီး, ကွၢ်ကွၢ်, ပှၤယိးပှၤသံတဂၤ, လၢ အမ့ၢ်အမိၢ်အဖိခွါတဂၤဃီ, ဒီးအမိၢ်မ့ၢ်ပှၤမုၣ်ကမဲ, ဒီး ပှၤဝ့ၢ်ဖိဂီၢ်မုၢ်ဖးဒိၣ် အိၣ်ဒီးအီၤလီၤ. ¹³ ဒီးကစၢ်ထံၣ်ပိာ် မုၣ်, ဒီးသးကညီၤအီၤ, ဒီးစံးဘၣ်အီၤ, ဟီၣ်တဂ့ၤ. ¹⁴ ဒီး လဲၤထိးဘၣ်စူၢ်န့ၣ်, ဒီးပှၤယိးတၢ်တဖၣ်အိၣ်ကတီၢ်, ဒီး စံးဝဲဒၣ်, ဖိၣ်သၣ်ခွါဧၢ, ယစံးဘၣ်နၤ, ဂဲၤဆၢထၢၣ်တ က့ၢ်. ¹⁵ ဒီးပှၤသံတဂၤန့ၣ်ဂဲၤထၢၣ်ဆ့ၣ်နီၤဝဲ, ဒီးကတိၤထီၣ် တၢ်လီၤ. ဒီးဟ့ၣ်လီၤအီၤလၢအမိၢ်လီၤ. ¹⁶ ဒီးပှၤခဲလၢာ်ပျံၤ တၢ်, ဒီးစံးထီၣ်ပတြၢၤယွၤဒီးစံးဝဲဒၣ်, ဝံဖးဒိၣ်တဂၤအိၣ် ထီၣ်လံလၢပကျါလံ, ဒီးယွၤဟဲအိၣ်သကိး အပှၤဂီၢ်မုၢ် လံလီၤ. ¹⁷ ဒီးအဂ့ၢ်အကျိၤန့ၣ်, ဟူထီသါလီၤလၢကီၢ်ယူ ဒၤဒီကီၢ်ညါ, ဒီးအခိၣ်အဃၢၤသကုၤဆးဒးလီၤ.

¹⁸ ဒီးစီၤယိၤဟၣ် အပျဲၢ်အဘီၣ် စံးဘၣ်တဲဘၣ်အီၤလၢ တၢ်တဖၣ်န့ၣ်ခဲလၢာ်အဂ့ၢ်အကျိၤလီၤ. ¹⁹ ဒီးစီၤယိၤဟၣ် ကိးန့ၢ်အပျဲၢ်အဘီၣ်ခံဂၤဆူအအိၣ်, ဒီးမၢအလဲၤဆူယ့ၣ် ရှူးအအိၣ်, ဒီးစံးဝဲဒၣ်, နဲဒၣ်အံၤ, နမ့ၢ်ပှၤလၢအဟဲဝဲတ ဂၤန့ၣ်, မ့ၢ်ပဘၣ်ကွၢ်လၢ်ဒံးပှၤအဂၤတဂၤအကျဲလဲၣ်.―

²⁰ ဒီးပှၤတဖၣ်န့ၣ်ဟဲတုၤလၢအအိၣ်ဒီးစံးဝဲဒၣ်, ပှၤဘျၢ*တၢ် စီၤယိၤဟၣ်တဂၤ, မၢပဟဲဆူနအိၣ်ဒီးစံးဝဲဒၣ်, နဲဒၣ်အံၤ, နမ့ၢ်ပှၤလၢအဟဲတဂၤန့ၣ်, မ့ၢ်ပဘၣ်ကွၢ်လၢ်ဒံးပှၤအဂၤ တဂၤအကျဲလဲၣ်. ²¹ ဒီးတစုဃီဖဲန့ၣ်, မၤဘျါက့ၤပှၤဘၣ် တၢ်ဆူးတၢ်ဆါ, ဒီးပှၤဘၣ်တၢ်နးတၢ်ဖှီၣ်, ဒီးပှၤလၢတၢ် နါအိၣ်လၢအလိၤအါဂၤ, ဒီးမၤထံၣ်ထီၣ်က့ၤပှၤမဲာ်ဘျီၣ် အါဂၤလီၤ. ²² ဒီးယ့ၣ်ရှူးကတိၤဆၢတၢ်ဒီးစံးဘၣ်အီၤ, တၢ် လၢသုထံၣ်ဒီး သုနၢ်ဟူဘၣ်တဖၣ်န့ၣ်, က့ၤစံးဘၣ်တဲ ဘၣ် စီၤယိၤဟၣ်တက့ၢ်. ပှၤလၢအမဲာ်ဘျီၣ်တဖၣ်န့ၣ်, ထံၣ်ထီၣ်က့ၤတၢ်, ပှၤလၢအခီၣ်ဟးဂီၤတဖၣ်န့ၣ်, ဟး ထီၣ်က့ၤဝဲ, ပှၤဘၣ်တၢ်ဆါအၢတဖၣ်န့ၣ်ကဆှီထီၣ်က့ၤ ဝဲ, ပှၤလၢအနၢ်တအၢတဖၣ်န့ၣ်, နၢ်ဟူထီၣ်က့ၤတၢ်, ပှၤလၢအသံတဖၣ်န့ၣ်, ဂဲၤဆၢထၢၣ်က့ၤဝဲ, ပှၤလၢအ ဖှီၣ်အယာ်တဖၣ်န့ၣ်, တၢ်စံၣ်တဲၤတဲလီၤအီၤလၢတၢ်သး ခုအကစီၣ်, ²³ ဒီးဖဲဒၣ်ပှၤလၢအသးတဟးဂီၤဘၣ်လၢယ ပူၤတဂၤဂၤန့ၣ်, ဘၣ်ဆိၣ်ဂ့ၤဝဲလီၤ.

²⁴ ဒီးတုၤစီၤယိၤဟၣ်အကလူးတဖၣ်န့ၣ် ဟးထီၣ်ကွံာ် ဒီး, အဝဲဒၣ်စံးဘၣ်တဲဘၣ်ပှၤဂီၢ်မုၢ်လၢစီၤယိၤဟၣ်အဂ့ၢ်, သုဟးထီၣ်ဆူပှၢ်မုၢ်ကနၢ, ဒ်သိးသုကကွၢ်ကီတၢ်မနုၤတ မံၤလဲၣ်. မ့ၢ်တပိၢ်တဘိလၢအဟူးဝးဝဲလၢကလံၤန့ၣ်ဧါ.

²⁵ မ့တမ့ၢ်ဘၣ်ဒီး, သုဟးထီၣ်ဒ်သိး သုကကွၢ်ကီတၢ် မနုၤတမံၤလဲၣ်. ပှၤလၢအကူသိးတၢ်ကပုာ်လုးန့ၣ်ဧါ. ကွၢ်ကွၢ်, ပှၤလၢအကူတၢ်အဂ့ၤ, ဒီးအီၣ်တၢ်အီတၢ်လၢ အဝံၣ်အဆၢတဖၣ်န့ၣ်, အိၣ်လၢစီၤပၤအဟံၣ်ပူၤလီၤ.

²⁶ မ့တမ့ၢ်ဘၣ်ဒီး, မ့ၢ်သုဟးထီၣ်ဒ်သိးသုကကွၢ်ကီတၢ် မနုၤတမံၤလဲၣ်. မ့ၢ်ဝံတဂၤဧါ. မ့ၢ်လံ, ယစံးဘၣ်တဲဘၣ် သု, ဒီးတၢ်လၢအဒိၣ်န့ၢ်ဝံတက့ၢ်ဖးဒိၣ်လီၤ. ²⁷ အဝဲဒၣ် မ့ၢ်ပှၤလၢတၢ်ကွဲးအသးလၢအဂ့ၢ်, ကွၢ်ကွၢ်, ယမၢလီၤကလူးတဂၤလၢနမဲာ်ညါ, ဒီးကလဲၤကတဲာ်ကတီၤပာ်နကျဲလီၤ.+ မၤ. ၃း၁|Mal.3.1

²⁸ အဂ့ၢ်ဒ်အံၤ, ယစံးဘၣ်တဲဘၣ်သု, ပှၤလၢပိာ်မုၣ်ဆံး စၢ်န့ၢ်အီၤအကျါ, ဝံလၢအဒိၣ်န့ၢ်ပှၤဘျၢ*တၢ်, စီၤယိၤ ဟၣ်န့ၣ်တအိၣ်ဘၣ်နီတဂၤဘၣ်. ဘၣ်ဆၣ်ဒီးပှၤဆံးက တၢၢ်လၢယွၤအဘီအမုၢ်န့ၣ်ဒိၣ်န့ၢ်အီၤတက့ၢ်လီၤ.

²⁹ ဒီးပှၤဂီၢ်မုၢ်ခဲလၢာ် လၢအနၢ်ဟူတၢ်, ဒီးပှၤဃ့သွဲတ ဖၣ်န့ၣ်, ပာ်တီပာ်လိၤယွၤ, ဒီးဒိးဘျၢ*အသးလၢစီၤယိၤ ဟၣ်အတၢ်ဘျၢ*န့ၣ်လီၤ. ³⁰ မ့မ့ၢ်ဖၤရံၤၡဲဒီးပှၤသ့လံာ်တၢ် သိၣ်တၢ်သီတဖၣ်န့ၣ်, ညိကွံာ်ယွၤအတၢ်ကူၣ်လၢအဂီၢ် ဒၣ်ဝဲ, ဒီးတဒိးဘျၢ*ဘၣ်အသးဘၣ်.

³¹ မၤသးဒ်န့ၣ်ဒီး, ပှၤတစိၤအံၤ, မ့ၢ်ယကဒိလီၤအီၤလၢ မနုၤတမံၤလဲၣ်. ဒီးမ့ၢ်အလီၤဂာ်ဒီးမနုၤတမံၤလဲၣ်. ³² မ့ၢ် အလီၤဂာ်ဒီးဖိသၣ်တဖၣ်ဆ့ၣ်နီၤလၢဖၠါပူၤ, ဒီးကိးလိာ် အသးသကိးသကိးဒီးစံးဝဲဒၣ်, ပအူပံ, ဒီးသုတဂဲၤကလံၣ် ဘၣ်. ပဟီၣ်တၢ်, ဒီးသုမဲာ်ထံတလီၤဘၣ်. ³³ အဂ့ၢ်ဒ်အံၤ, ပှၤဘျၢ*တၢ်စီၤယိၤဟၣ်တဂၤဟဲဝဲ, ဒီးတအီၣ်ကိၣ်ဒီးတ အီဘၣ်စပံးထံဘၣ်, ဒီးသုစံးသုဝဲ, မ့ၢ်တၢ်နါအိၣ်လၢအ လိၤလီၤ. ³⁴ ပှၤကညီဖိခွါအံၤဟဲဝဲ, ဒီးအီၣ်တၢ်ဒီးအီတၢ်, ဒီးသုစံးသုဝဲ, ကွၢ်ကွၢ်, ပှၤအီၣ်လုၣ်ကိတၢ်, ပှၤအီစပံး ထံ, ပှၤဒီတံၤဒီသကိးဒီးပှၤဃ့သွဲ ဒီးပှၤတၢ်ဒဲးဘးဖိန့ၣ် လီၤ. ³⁵ ဘၣ်ဆၣ်ဒီးတၢ်ကူၣ်ဘၣ်ကူၣ်သ့န့ၣ်, ဘၣ်တၢ် ပာ်တီပာ်လိၤအီၤလၢအဖိခဲလၢာ်အစုပူၤလီၤ.

³⁶ ဒီးမတၤတဂၤ, ပှၤဖၤရံၤၡဲတဂၤ, ဃ့ကိးယ့ၣ်ရှူးဒ်သိး အကအီၣ်တၢ်ဒီးအီၤလီၤ. ဒီးလဲၤနုာ်ဝဲလၢဖၤရံၤၡဲအဟံၣ် ပူၤ, ဒီးဆ့ၣ်နီၤသန့ၤဝဲလၢမ့ၤလၣ်ထံးန့ၣ်လီၤ. ³⁷ ဒီးကွၢ် ကွၢ်, ပှၤတၢ်ဒဲးဘးဖိ, ပိာ်မုၣ်အိၣ်လၢဝ့ၢ်ပူၤတဂၤန့ၣ်, သ့ၣ်ညါဝဲလၢအဆ့ၣ်နီၤသန့ၤ လၢပှၤဖၤရံၤၡဲအဟံၣ်ပူၤ, ဒီးဟဲစိာ်ပလီလၢၢ်ဝါတဖျၢၣ် အိၣ်ဒီးတၢ်နၢမူ, ဒီးဆၢ ထၢၣ်လၢအချၢဘူးဒီးအခီၣ်, ဒီးဟီၣ်ဝဲ, ³⁸ ဒီးသ့ကွံာ်အ ခီၣ်လၢအမဲာ်ထံ, ဒီးတြူာ်ကွံာ်ဝဲလၢအခိၣ်သူ, ဒီးနၢမူ အခီၣ်, ဒီးဖှူဝဲလၢတၢ်နၢမူလီၤ.

³⁹ ဒီးပှၤဖၤရံၤၡဲလၢအကိးအီၤတဂၤန့ၣ်, ထံၣ်ဘၣ်ဒီးစံး ဝဲလၢအသးကံၢ်ပူၤ, အဝဲတဂၤအံၤမ့မ့ၢ်ဝံဒီး, ပိာ်မုၣ်လၢ အထိးဘၣ်အီၤတဂၤအံၤ, မ့ၢ်ပှၤဒ်လဲၣ်ဒ်လဲၣ်န့ၣ်, ကသ့ၣ် ညါတ့ၢ်ဝဲလီၤ. အဂ့ၢ်ဒ်အံၤ, မ့ၢ်ပှၤတၢ်ဒဲးဘးဖိလီၤ. ⁴⁰ ဒီး ယ့ၣ်ရှူးကတိၤဆၢတၢ်ဒီးစံးဘၣ်အီၤ, စီၤၡံမိၣ်ဧၢ, ယက တိၤတၢ်ဒီးနၤအလီၢ်အိၣ်တဘီလီၤ. ဒီးစံးဝဲဒၣ်, ကတိၤ တၢ်တက့ၢ်, သရၣ်ဧၢ, ⁴¹ စ့ကစၢ်တဂၤအစ့အိၣ်လၢပှၤခံ ဂၤအလိၤ, အဝဲတဂၤ, ဒန့ၤရံယဲၢ်ကယၤ, ဒီးအဝဲတဂၤ, ယဲၢ်ဆံလီၤ. ⁴² ပှၤတဖၣ်န့ၣ်, စ့လၢအကလိးက့ၤအီၤတ အိၣ်ဘၣ်ဒီး, ပျၢ်ကွံာ်ဝဲခံဂၤလၢာ်လီၤ. မ့မ့ၢ်ဒ်န့ၣ်ဒီး, အဝဲ ခံဂၤန့ၣ်, ကအဲၣ်အီၤဒိၣ်တက့ၢ်ဖဲလဲၣ်တဂၤလဲၣ်. စံးဘၣ် ယၤတက့ၢ်. ⁴³ ဒီးစီၤၡံမိၣ်ကတိၤဆၢတၢ်ဒီးစံးဝဲဒၣ်, ယဆိ ကမိၣ်ပှၤလၢအပျၢ်ကွံာ် အတၢ်လၢအအါတက့ၢ်တဂၤ လီၤ. ဒီးစံးဘၣ်အီၤ, နစံၣ်ညီၣ်တၢ်ဘၣ်လံ. ⁴⁴ ဒီးဃၣ်ဃီၤ အသးဆူပိာ်မုၣ်အအိၣ်, ဒီးစံးဘၣ်စီၤၡံမိၣ်, ပိာ်မုၣ်တဂၤ အံၤနထံၣ်စ့ၢ်ကီးဧါ. ယဟဲနုာ်လၢနဟံၣ်ပူၤဒီးထံလၢယ ခီၣ်အဂီၢ်န့ၣ်, နတဟ့ၣ်ဘၣ်ယၤဘၣ်. မ့မ့ၢ်ပိာ်မုၣ်အံၤသ့ ကွံာ်ယခီၣ်လၢအမဲာ်ထံ ဒီးတြူာ်ကွံာ်ဝဲလၢ အခိၣ်သူ လီၤ. ⁴⁵ နဲဒၣ်အံၤနတနၢမူဘၣ်ယၤဘၣ်. မ့မ့ၢ်ပိာ်မုၣ်အံၤ, လၢယဟဲနုာ်တ့ၢ်လံၤလံၤန့ၣ်, နၢမူယခီၣ် ဒီးတဆိတ့ၢ် ဘၣ်ဝဲဘၣ်. ⁴⁶ နဲဒၣ်အံၤ, နတဖှူဘၣ်ယခိၣ်လၢသိဘၣ်. မ့မ့ၢ်ပိာ်မုၣ်အံၤ, ဖှူယခီၣ်လၢသိနၢမူလီၤ. ⁴⁷ မၤသးဒ်န့ၣ် ဒီး, ယစံးဘၣ်နၤအံၤ, အတၢ်ဒဲးဘးလၢအအါန့ၣ်ပျၢ်လံ ဝဲလံ. အဂ့ၢ်ဒ်အံၤ, မ့ၢ်အအဲၣ်ဝဲဒိၣ်မးလီၤ. မ့မ့ၢ်ပှၤလၢ တၢ်ပျၢ်အီၤလၢအစှၤ, ကအဲၣ်တၢ်စှၤစ့ၢ်ကီးလီၤ. ⁴⁸ ဒီးစံး ဘၣ်ပိာ်မုၣ်န့ၣ်, နတၢ်ဒဲးဘးပျၢ်လံ. ⁴⁹ ဒီးပှၤလၢအဆ့ၣ် နီၤသန့ၤဃုာ်လၢမ့ၤလၣ်ထံးတဖၣ်န့ၣ်, စံးဝဲလၢအသး ကံၢ်ပူၤ, ပှၤလၢအပျၢ်စ့ၢ်ကီးတၢ်ဒဲးဘးတဂၤအံၤ, မ့ၢ်မ တၤတဂၤလဲၣ်. ⁵⁰ ဒီးယ့ၣ်ရှူးစံးဘၣ်ပိာ်မုၣ်, နတၢ်နာ်န့ၣ် အုၣ်က့ၤခီၣ်က့ၤလံနၤလံ. က့ၤမုာ်မုာ်တက့ၢ်.

၈

¹ လၢခံက့ၤဒီးတၢ်မၤအသးလၢ အလဲၤစံၣ်တဲၤတဲလီၤ ယွၤအဘီအမုၢ်အတၢ်သးခုအကစီၣ်လၢဝ့ၢ်ပူၤဒီး လၢသ ဝီပူၤ, တပူၤဘၣ်တပူၤကွ့ၢ်ကွ့ၢ်, ဒီးပှၤတဆံခံဂၤန့ၣ်လဲၤဒီး အီၤလီၤ. ² ဒီးပှၤလၢတၢ်နါအိၣ်လၢအလိၤ, ဒီးတၢ်ဆါ အီၤပိာ်မုၣ်တနီၤနီၤ, လၢအဘၣ် တၢ်မၤဘျါက့ၤအီၤတ ဖၣ်, ပှၤလၢတၢ်နါနွံဒုဟးထီၣ်လၢအလိၤ, နီၢ်မၤရံကိးဝဲ လၢပှၤမၤကဒၤလ့ၣ်ဖိတဂၤ, ³ ဒီးစီၤဟ့ၤရိာ်အပှၤကွၢ်တၢ် ဖိ, စီၤဃူၤစါအမါနီၢ်ယိၤအၣ်နၣ်တဂၤ, ဒီးနီၢ်စူၤစၣ်နၤ တဂၤ, ဒီးပိာ်မုၣ်အဂၤအါဂၤ လၢအလုၢ်အီၣ်လုၢ်အီအီၤ လၢအစုလီၢ်ခီၣ်ခိၣ်စ့ၢ်ကီးလီၤ.

⁴ ဒီးပှၤဂီၢ်မုၢ်ဖးဒိၣ်အိၣ်ဖှိၣ်ရိဖှိၣ်, ဒီးပှၤလၢခူလၢဝ့ၢ်တ ဖၣ်ဟဲဆူအအိၣ်, ဒီးကတိၤဒိတၢ်ဒီးစံးဝဲဒၣ်, ⁵ ပှၤလၢ အဖှံတၢ်တဂၤန့ၣ်, လဲၤဖှံလီၤအတၢ်ချံလီၤ. ဒီးဖှံတၢ်န့ၣ် တနီၤနီၤလီၤဘၣ်ဝဲလၢကျဲအသရ့ၤ, ဒီးဘၣ်ယီၢ်ဘၣ်ခါ, ဒီးထိၣ်ဖိလံၣ်ဖိလၢမူကပိာ်လိၤ ထၢအီၣ်ကွံာ်အီၤလီၤ.― ⁶ ဒီးအဂၤတနီၤလီၤဘၣ်ဝဲလၢလၢၢ်ခိၣ်, ဒီးမ့ၢ်တၢ်တစီၣ်ဘၣ်သတးဒီး, တုၤအမဲထီၣ်န့ၣ်, ညွံးကွံာ်ဝဲဒၣ်လီၤ.―

⁷ ဒီးအဂၤတနီၤလီၤဘၣ်ဝဲလၢ တၤဆှုၣ်တၤမဲအကျါ, ဒီး တၤဆှုၣ်တၤမဲန့ၣ် မဲထီၣ်ဃုာ်ဒီးအီၤ, ဒီးခဲဘၢကွံာ်အီၤ လီၤ. ⁸ ဒီးအဂၤတနီၤလီၤဘၣ်ဝဲလၢဟီၣ်ခိၣ်ဂ့ၤ, ဒီးမဲထီၣ် ဝဲ, ဒီးအသူၣ်အသၣ်အါန့ၢ်က့ၤအလီၢ်တကယၤလီၤ. စံး တၢ်ဒ်န့ၣ်ဒီး, ကိးပသူထီၣ်ဝဲ, ပှၤအိၣ်ဒီးအနၢ်လၢအနၢ် ဟူတၢ်န့ၣ်, မ်အနၢ်ဟူတၢ်တက့ၢ်.

⁹ ဒီးအပျဲၢ်အဘီၣ်သံကွၢ်အီၤဒီးစံးဝဲ, တၢ်လၢတၢ်ကတိၤ ဒိန့ၣ်, မ့ၢ်အမ့ၢ်မနုၤလဲၣ်. ¹⁰ ဒီးစံးဝဲဒၣ်, တၢ်ခူသူၣ်ဘၣ် ဃးဒီးယွၤအဘီအမုၢ်န့ၣ်, တၢ်ဟ့ၣ်သ့ၣ်ညါသုလီၤ. မ့ မ့ၢ်ပှၤဂၤတဖၣ်န့ၣ်တၢ်ဟ့ၣ်အီၤလၢတၢ်ကတိၤဒိ, ဒ်သိး အကကွၢ်တၢ်ဒီးတထံၣ်ဘၣ်တၢ်, ဒ်သိးအကနၢ်ဟူတၢ် ဒီးအနၢ်တပၢၢ်ဘၣ်တၢ်လီၤ.+ ၡါ. ၆း၉|Isa.6.9*.

¹¹ တၢ်ကတိၤဒိန့ၣ်မ့ၢ်အအံၤ, တၢ်ချံန့ၣ်မ့ၢ်ယွၤအကလုၢ် အကထါလီၤ. ¹² ဒီးတၢ်လၢကျဲအသရ့ၤန့ၣ်, မ့ၢ်ပှၤနၢ်ဟူ ဝဲ, တုၤနုၤတစုဒ်သိးအသုတနာ်, ဒီးသုတတုၤလၢတၢ် အုၣ်က့ၤခီၣ်က့ၤအီၤတဂ့ၤဒီး, မုၣ်ကီၤလံၢ် ဟဲထၢကွံာ် တၢ်အကလုၢ်န့ၣ်လၢအသးကံၢ်ပူၤလီၤ. ¹³ ဒီးတၢ်လၢလၢၢ် ခိၣ်တဖၣ်မုန့ၣ်, မ့ၢ်ပှၤနၢ်ဟူဝဲ, ဒီးဒိးန့ၢ်တၢ်အကလုၢ် လၢအသူၣ်ခုအသးခု, ဒီးမ့ၢ်အဂံၢ်တအိၣ်ဘၣ်ဒီး, စူၢ်က့ၤ နာ်က့ၤတၢ်တစိၢ်, ဒီးလၢတၢ်လ့ပစီအခါ, အသးဟးဂီၤ ဝဲတကူၢ်သ့ၣ်လီၤ. ¹⁴ ဒီးတၢ်လီၤဘၣ်လၢတၤဆှုၣ်တၤမဲအ ကျါ, မ့ၢ်ပှၤနၢ်ဟူဝဲ, ဒီးလဲၤတၢ်, ဒီးမ့ၢ်တၢ်ဘၣ်ယိၣ်ဘၣ် ဘီ, ဒီးတၢ်ထူးတၢ်တီၤ, ဒီးတၢ်မုာ်လၤလၢခိအံၤမၤဘၢ ကွံာ်အီၤသတးဒီး, အသၣ်တကဲထီၣ်ဘၣ် တကူၢ်သ့ၣ် လီၤ. ¹⁵ ဒီးတၢ်လၢဟီၣ်ခိၣ်ဂ့ၤတဖၣ်န့ၣ်, မ့ၢ်ပှၤလၢအနၢ် ဟူတၢ်အကလုၢ်န့ၣ်, ဒီးဒိးန့ၢ်ဝဲလၢအသးဂ့ၤ, ဒီးအသူၣ် ဂ့ၤအသးဝါ, ဒီးသၣ်ထီၣ်ဝဲလၢအသူၣ်စူၤအသးစူၤလီၤ.

¹⁶ ပှၤဒွဲၣ်ထီၣ်မ့ၣ်အူဒၢ, ဒီးမၤဘၢဝဲလၢသပၢၤအဖီလာ် မ့ၢ်ဂ့ၤ, ပာ်လီၤဝဲလၢလီၢ်မံခးအဖီလာ်မ့ၢ်ဂ့ၤ, တအိၣ်ဘၣ် နီတဂၤဘၣ်. မ့ၢ်အပာ်ဝဲလၢမ့ၣ်အူဒၢအလီၢ်, ဒ်သိးပှၤ လဲၤနုာ်တဖၣ်န့ၣ်, ကထံၣ်ဘၣ်အတၢ်ကပီၤလီၤ. ¹⁷ အဂ့ၢ် ဒ်အံၤ, တၢ်အိၣ်လၢတၢ်တဒၢလၢအတအိၣ်ဖျါထီၣ်ဘၣ် န့ၣ်, တအိၣ်ဘၣ်နီတမံၤဘၣ်. တၢ်အိၣ်ခူသူၣ်လၢတၢ် တသ့ၣ်ညါထီၣ်ဘၣ်, ဒီးတဟဲဖျါထီၣ်ဘၣ်န့ၣ်, တအိၣ် ဘၣ်နီတမံၤဘၣ်လီၤ. ¹⁸ မၤသးဒ်န့ၣ်ဒီး, သုနၢ်ဟူတၢ်ဒ် လဲၣ်ဒ်လဲၣ်န့ၣ်, ပလီၢ်သုသးတက့ၢ်. အဂ့ၢ်ဒ်အံၤ, ဖဲဒၣ် ပှၤလၢအတၢ်အိၣ်ဝဲန့ၣ်, တၢ်ကဟ့ၣ်တၢ်လၢအီၤလီၤ. ဒီး ဖဲဒၣ်ပှၤလၢအတၢ်တအိၣ်ဘၣ်ဒီး, တၢ်လၢအဆိကမိၣ် လၢအအိၣ်န့ၣ်, တၢ်ကဟံးထီၣ်ကွံာ်လၢအီၤလီၤ.

¹⁹ ဒီးအမိၢ်ဒီးအဒီပုၢ်ဝဲၢ်တဖၣ်ဟဲဆူအအိၣ်, ဒီးမ့ၢ်ပှၤဂီၢ် မုၢ်အိၣ်ဝဲဒီး, ဟဲတုၤလၢအအိၣ်တသ့ဘၣ်လီၤ. ²⁰ ဒီးပှၤ စံးဘၣ်အီၤ, ဒီးစံးဝဲဒၣ်, နမိၢ်ဒီးနဒီပုၢ်ဝဲၢ်တဖၣ်တၢ်မိၣ် ထံၣ်ဘၣ်အသးလၢနၤ, ဒီးအိၣ်ဆၢထၢၣ်ဝဲလၢခိလီၤ.―

²¹ ဒီးအဝဲဒၣ်ကတိၤဆၢတၢ်ဒီးစံးဘၣ်အီၤ, ယမိၢ်ဒီးယဒီပုၢ် ဝဲၢ်တဖၣ်န့ၣ်, မ့ၢ်ပှၤလၢအနၢ်ဟူယွၤအကလုၢ်အကထါ ဒီးမၤဝဲတဖၣ်န့ၣ်လီၤ.

²² ဒီးလၢမုၢ်နံၤတနံၤန့ၣ်, တၢ်မၤအသးလၢအလဲၤထီၣ် ဒီးအပျဲၢ်အဘီၣ်ဆူကဘီတဘ့ၣ်အပူၤဒီးစံးဘၣ်အီၤ, ခီ ဂာ်သကိးဆူကွံအဝၢ်ဘးခီတက့ၢ်. ဒီးလဲၤဝဲလီၤ. ²³ ဒီးခီ ဂာ်ဝဲအဖၢမုၢ်ဒီး, မံသပ့ၤဝဲလီၤ. ဒီးကလံၤမုၢ်ဟဲလီၤဆူၣ် ဆူၣ်ကလဲာ်လၢကွံပူၤ, ဒီးကဘီန့ၣ်ကပှဲၤတ့ၢ်, ဒီးအဝဲ သ့ၣ်ကဟးဂီၤတ့ၢ်ဝဲလီၤ. ²⁴ ဒီးအပျဲၢ်အဘီၣ်ဟဲထိၣ်ဂဲၤအီၤ ဒီးစံးဝဲဒၣ်, ကစၢ်ဧၢ, ကစၢ်ဧၢ, ပကဟးဂီၤတ့ၢ်မးလဲၣ်. ဒီးအဝဲဒၣ်ဂဲၤဆၢထၢၣ်ဒီးဒူကလံၤဒီးထံ အတပျုာ်တပျီၤ အလိၤ, ဒီးတုာ်ဝဲဒီးအိၣ်က့ၤဂၢၢ်တပၢၢ်လီၤ. ²⁵ ဒီးစံးဘၣ် အီၤ, သုတၢ်နာ်အိၣ်ဖဲလဲၣ်. ဒီးပျံၤတၢ်ဒီးကမၢကမၣ်ဝဲ တကူၢ်သ့ၣ်ဒီးစံးလိာ်အသး, ပှၤအံၤမ့ၢ်ပှၤဒ်လဲၣ်. မၤလိာ် ကလံၤဒီးထံ, ဒီးတၢ်စူၢ်မးအီၤလဲၣ်.

²⁶ ဒီးခီဂာ်ဝဲဆူ ပှၤကဒါရၤအကီၢ် လၢအအိၣ်လၢကၤ လံၤလါအဝၢ်ဘးခီလီၤ. ²⁷ ဒီးယုၢ်လီၤလၢခိ, ဒီးပှၤလၢ တၢ်နါအိၣ်လၢအလိၤဃဲးဃဲးတ့ၢ်တဂၤ, ဟဲသဂၢၢ်အီၤ လၢဝ့ၢ်ပူၤဒီးတကူတသိးဘၣ်တၢ်ဘၣ်. ဒီးတအိၣ်တဆိး ဘၣ်လၢဟံၣ်ပူၤဘၣ်. မ့မ့ၢ်အအိၣ်ဝဲလၢလိပူၤလီၤ. ²⁸ ဒီး ထံၣ်ဘၣ်ယ့ၣ်ရှူး, ဒီးကဲးပသူထီၣ်, ဒီးတီၤလီၤကဒွံကျိာ် လၢအမဲာ်ညါ, ဒီးစံးဝဲဒၣ်လၢအကလုၢ်ဖးဒိၣ်, ယွၤတၢ် ထီကတၢၢ်အဖိခွါယ့ၣ်ရှူးဧၢ, တၢ်ဘၣ်ဃးဒီးပှၤဒီးနၤမ့ၢ်မ နုၤတမံၤလဲၣ်ဒ်သိးနသုတမၤနးမၤဖှီၣ်ယၤတဂ့ၤဒီး, ယဃ့ ကညးနၤလီၤ. ²⁹ အဂ့ၢ်ဒ်အံၤ, မၤလိာ်တ့ၢ်တၢ်နါဒ်သိးအ ကဟးထီၣ်ကွံာ်လၢပှၤန့ၣ်အလိၤလီၤ. အဂ့ၢ်ဒ်အံၤ, တၢ် နါဟံးဃာ်အီၤအါဘျီလံ, ဒီးဘၣ်တၢ်စၢဃာ်ဝဲလၢထး သွဲ, ဒီးဘၣ်တၢ်သိးဃာ်ဝဲ, ဒီးထုးထီၣ်တဲာ်ကွံာ်အတၢ် စၢဃာ်, ဒီးဘၣ်တၢ်ဟီထီၣ်ကွံာ်လၢတၢ်နါန့ၣ်, ဆူပှၢ် လၢ်ကျါလီၤ.

³⁰ ဒီးယ့ၣ်ရှူးသံကွၢ်အီၤဒီးစံးဝဲဒၣ်, နမံၤမ့ၢ်ဒ်လဲၣ်. ဒီးစံး ဝဲဒၣ်, လ့းကူၣ်, အဂ့ၢ်ဒ်အံၤ, တၢ်နါအါဒုအိၣ်လၢအလိၤ လီၤ. ³¹ ဒီးဃ့ကညးအီၤ, ဒ်သိးအသုတမၤလိာ်အီၤလၢ အကလဲၤလီၤဆူတၢ်ယိာ်ပူၤတဂ့ၤလီၤ. ³² ဒီးဖဲအလီၢ်န့ၣ်, ထိးတဖုဖးဒိၣ်အီၣ်တၢ်လၢကစၢၢ်အလိၤ, ဒီးအဝဲသ့ၣ်ဃ့ ညးဝဲဒ်သိးအကဒုးလဲၤနုာ်အီၤဆူအပူၤလီၤ. ဒီးဒုးလဲၤဝဲ လီၤ. ³³ ဒီးတၢ်နါတဖၣ်ဟးထီၣ်ကွံာ် လၢပှၤတဂၤန့ၣ်အ လိၤ, ဒီးလဲၤနုာ်ဆူထိးတဖၣ်အပူၤ, ဒီးထိးတဖုဃ့ၢ်စံၣ် လီၤလၢကၢၢ်ဖးထီအလိၤဆူကွံပူၤ, ဒီးလီၤအုးသံကွံာ်ဝဲ လီၤ. ³⁴ ဒီးတုၤပှၤကွၢ်တၢ်တဖၣ်န့ၣ်, ထံၣ်တၢ်မၤအသး ဒီး, က့ၤဃ့ၢ်ဝဲဒီးစံၣ်တဲၤတဲလီၤတၢ်န့ၣ်လၢဝ့ၢ်ပူၤ, ဒီးလၢ ပှၢ်လၢ်ကျါလီၤ. ³⁵ ဒီးပှၤဟးထီၣ်ဝဲဒ်သိးအကကွၢ်တၢ်မၤ အသးတမံၤန့ၣ်, ဒီးဟဲဆူယ့ၣ်ရှူးအအိၣ်, ဒီးထံၣ်ပှၤလၢ တၢ်နါဟးထီၣ်လၢအလိၤတဂၤ, ကူသိးတၢ်, ဒီးအသး သပှၢ်ထီၣ်က့ၤ, ဒီးဆ့ၣ်နီၤလၢယ့ၣ်ရှူးအခီၣ်ထံး, ဒီးပျံၤဝဲ တကူၢ်သ့ၣ်လီၤ. ³⁶ ဒီးပှၤလၢတၢ်နါအိၣ်လၢအလိၤတဂၤ, ဘျါက့ၤဝဲ ဒ်လဲၣ်ဒ်လဲၣ်န့ၣ်, ပှၤထံၣ်ဝဲတဖၣ်စံးဘၣ်တဲ ဘၣ်အဝဲသ့ၣ်လီၤ. ³⁷ ဒီးပှၤဂီၢ်မုၢ်လၢအအိၣ်ဝးတရံးပှၤက ဒါရၤဖိအထံအကီၢ်ခဲလၢာ်န့ၣ်, ဃ့ကညးအီၤဒ်သိးအက ဟးထီၣ်လၢအအိၣ်လီၤ. အဂ့ၢ်ဒ်အံၤ, ပျံၤတၢ်ဒိၣ်မးလီၤ. ဒီးလဲၤနုာ်လၢကဘီပူၤဒီးက့ၤက့ၤဝဲလီၤ. ³⁸ ဒီးပှၤလၢတၢ် နါဟးထီၣ်လၢအလိၤတဂၤန့ၣ်, ဒ်သိးအကအိၣ်ဒီးအီၤ ဒီး, ဃ့ကညးဝဲလီၤ. ဘၣ်ဆၣ်ဒီးယ့ၣ်ရှူးပျၢ်ကွံာ်အီၤ, ဒီး စံးဝဲဒၣ်, ³⁹ က့ၤဆူနဟံၣ်ဒီး ဖဲဒၣ်ယွၤမၤတၢ်လၢနဂီၢ်တ ဖၣ်န့ၣ် တဲဖျါထီၣ်တက့ၢ်. ဒီးလဲၤစံၣ်တဲၤတဲလီၤဝဲဒီဝ့ၢ် ညါ, လၢကယဲၢ်တၢ်လၢယ့ၣ်ရှူးမၤဝဲလၢအဂီၢ်န့ၣ်လီၤ.

⁴⁰ ဒီးတၢ်မၤအသးလၢယ့ၣ်ရှူးက့ၤတုၤဝဲဒီး, ပှၤဂီၢ်မုၢ်တ ဖၣ်တူၢ်လိာ်အီၤလီၤ. အဂ့ၢ်ဒ်အံၤ, မ့ၢ်အအိၣ်ကွၢ်လၢ်အ ကျဲခဲလၢာ်လီၤ. ⁴¹ ဒီးကွၢ်ကွၢ်, ပှၤဘူၣ်ဘျီၣ်အခိၣ်, အမံၤ စီၤယၤအ့ၤရူးတဂၤ, ဟဲတီၤလီၤလၢယ့ၣ်ရှူးအခီၣ်ထံး, ဒီး ဃ့ကညးအီၤဒ်သိးအကဟဲဆူအဟံၣ်လီၤ. ⁴² အဂ့ၢ်ဒ်အံၤ, အဖိမုၣ်အိၣ်တဂၤဃီ, လၢအသးပှၢ်တဆံခံနံၣ်ဃၣ်ဃၣ် န့ၣ်, ကသံတ့ၢ်လီၤ. ဒီးလဲၤဝဲအဖၢမုၢ်ဒီးပှၤဂီၢ်မုၢ်တနံး ထီၣ်အီၤလီၤ.

⁴³ ဒီးပိာ်မုၣ်တဂၤလၢအဆါသွံၣ်လီၤဝဲတဆံခံနံၣ်, လၢ အဟ့ၣ်လီၤကွံာ်အတၢ်ခဲလၢာ်လၢကသံၣ်သရၣ်, ဒီးအ ဝဲသ့ၣ် မၤဘျါက့ၤအီၤတသ့ဘၣ်နီတဂၤဘၣ်, ⁴⁴ ဟဲလၢ ယ့ၣ်ရှူးအချၢဃံ, ဒီးထိးဘၣ်ဝဲအကူအသိးအသရ့ၤ, ဒီး အသွံၣ်လီၤန့ၣ်တုာ်က့ၤတကီၢ်ခါလီၤ. ⁴⁵ ဒီးယ့ၣ်ရှူးစံးဝဲ ဒၣ်, မ့ၢ်မတၤထိးဘၣ်ယၤတဂၤလဲၣ်. ဒီးပှၤခဲလၢာ်သမၢ ဝဲ, ဒီးစီၤပ့းတရူးဒီးပှၤအိၣ်လၢအသိးတဖၣ်စံးဝဲဒၣ်, က စၢ်ဧၢ, ပှၤဂီၢ်မုၢ်တနံးဃာ်နၤဒီးနစံး, မ့ၢ်မတၤထိးဘၣ်ယၤ တဂၤလဲၣ်န့ၣ်ဧါ. ⁴⁶ ဒီးယ့ၣ်ရှူးစံးဝဲဒၣ်, ပှၤတဂၤဂၤထိး ဘၣ်လံယၤလံ. အဂ့ၢ်ဒ်အံၤ, ယသ့ၣ်ညါလၢတၢ်အစိအ ကမီၤဟးထီၣ်လၢယလိၤလီၤ.

⁴⁷ ဒီးတုၤပိာ်မုၣ်သ့ၣ်ညါလၢ အအိၣ်တဒၢ တသ့လၢၤ ဘၣ်ဒီး, ကနိးဝဲ, ဒီးဟဲတီၤလီၤလၢအခီၣ်ထံး, ဒီးမ့ၢ်အ ထိးဘၣ်အီၤလၢမနုၤအဂ့ၢ်လဲၣ်, ဒီးဘျါက့ၤဝဲတကီၢ်ခါဒ် လဲၣ်ဒ်လဲၣ်န့ၣ် စံးဘၣ်တဲဘၣ်အီၤလၢ ပှၤခဲလၢာ်အမဲာ် ညါလီၤ. ⁴⁸ ဒီးအဝဲဒၣ်စံးဘၣ်အီၤ, ဖိမုၣ်ဧၢ, ပာ်နသးခူ တလ့ၢ်တက့ၢ်. နတၢ်နာ်မၤဘျါက့ၤလံနၤလံ. က့ၤမုာ် မုာ်တက့ၢ်.

⁴⁹ ကတိၤတၢ်န့ၣ်အဖၢမုၢ်ဒီး, ပှၤတဂၤဟဲလၢဘူၣ်ဘျီၣ် အခိၣ်အဟံၣ်, ဒီးစံးဘၣ်အီၤ, နဖိမုၣ်သံလံဝဲလံ. မၤ တံာ်တာ်သရၣ်န့ၣ်တဂ့ၤ. ⁵⁰ ဒီးယ့ၣ်ရှူးနၢ်ဟူ, ဒီးကတိၤ ဆၢအီၤ, ဒီးစံးဝဲဒၣ်, ပျံၤတၢ်တဂ့ၤ, ထဲနာ်တၢ်တက့ၢ်, ဒီး ကဘၣ်တၢ်အုၣ်က့ၤခီၣ်က့ၤအီၤလီၤ.

⁵¹ ဒီးလဲၤဝဲတုၤလၢဟံၣ်, ဒီးတဒုးလဲၤနုာ်ဘၣ်ပှၤနီတဂၤ ဘၣ်, ဒုးလဲၤနုာ်ထဲစီၤပ့းတရူး, စီၤယိၤဟၣ်, ဒီးစီၤယၤ ကိာ်, ဒီးပိာ်မုၣ်ဖိသၣ်အမိၢ်အပၢ်သ့ၣ်တဖၣ်ဧိၤလီၤ. ⁵² ဒီး ပှၤခဲလၢာ်ဟီၣ်တၢ်ယၢၤတၢ်, ဒီးအဝဲဒၣ်စံးဝဲ, ဟီၣ်တ ဂ့ၤ, အဂ့ၢ်ဒ်အံၤ, တသံဘၣ်. မ့ၢ်အမံသပ့ၤဝဲလီၤ. ⁵³ ဒီးပှၤ တဖၣ်န့ၣ် သ့ၣ်ညါဝဲလၢအသံဒီး, နံၤဘၣ်ဖၣ်လဲအီၤ လီၤ. ⁵⁴ ဒီးအဝဲဒၣ်ဟီထီၣ်ကွံာ်ပှၤခဲလၢာ်ဆူခိ, ဒီးဟံးဃာ် ပိာ်မုၣ်ဖိသၣ်အစု, ဒီးကိးပသူထီၣ်ဒီးစံးဝဲဒၣ်, ပိာ်မုၣ်ဖိ သၣ်ဧၢ, ဂဲၤဆၢထၢၣ်တက့ၢ်. ⁵⁵ ဒီးအသးဟဲက့ၤဝဲ, ဒီး ဂဲၤဆၢထၢၣ်တကီၢ်ခါလီၤ. ဒီးမၤလိာ်ဝဲဒ်သိးပှၤကဟ့ၣ် ဒုးအီၣ်အတၢ်လီၤ. ⁵⁶ ဒီးအမိၢ်အပၢ်ပာ်မးအသးကမၢက မၣ်လီၤ. ဒီးတၢ်မၤအသးန့ၣ်, ဒ်သိးအသုတစံးဘၣ်တဲ ဘၣ်ပှၤနီတဂၤတဂ့ၤဒီး, မၤလိာ်အီၤလီၤ.

၉

¹ ဒီးယ့ၣ်ရှူးကိးဖှိၣ် အပျဲၢ်အဘီၣ်တဆံခံဂၤန့ၣ်ဒီး, ဒီး ဟ့ၣ်လီၤအစိအကမီၤလၢတၢ်နါခဲလၢာ်အဖီခိၣ်, ဒီးဒ်သိး အကမၤဘျါက့ၤ တၢ်ဆူးတၢ်ဆါလီၤ. ² ဒီးမၢလီၤအီၤဒ် သိး အကစံၣ်တဲၤတဲလီၤယွၤအဘီအမုၢ်, ဒီးမၤဘျါက့ၤ တၢ်ဆူးတၢ်ဆါလီၤ. ³ ဒီးစံးဘၣ်အီၤ, သုလဲၤတၢ်အဂီၢ် န့ၣ်, သုတစိာ်တၢ်နီတမံၤတဂ့ၤ, နီၣ်ထိးဘိမ့ၢ်ဂ့ၤ, တၢ် အီၣ်အထၢၣ်မ့ၢ်ဂ့ၤ, ကိၣ်မ့ၢ်ဂ့ၤ, ကျိၣ်ဧိၤစ့ဧိၤမ့ၢ်ဂ့ၤ, ဆ့ခံ ဘ့ၣ်မ့ၢ်ဂ့ၤ, မ်အသုတအိၣ်တဂ့ၤ. ⁴ သုမ့ၢ်လဲၤနုာ်လၢဟံၣ် တဖျၢၣ်ဒီး, အိၣ်ဖဲန့ၣ်တက့ၢ်, ဒီးဟးထီၣ်ကွံာ်ဖဲန့ၣ်တ က့ၢ်. ⁵ ဒီးဖဲဒၣ်ပှၤလၢအတတူၢ်လိာ်ဘၣ်သုတဖၣ်, တုၤ သုဟးထီၣ်လၢဝ့ၢ်ပူၤန့ၣ်ဒီး, တြုၤလီၤကွံာ်ဟီၣ်ခိၣ်အက မူၣ်လၢသုခီၣ်လၣ်, လၢတၢ်အုၣ်အသးထီဒါအီၤတက့ၢ်.

⁶ ဒီးအဝဲသ့ၣ်ဟးထီၣ်, ဒီးလဲၤစံၣ်တဲၤတဲလီၤတၢ်သးခု အကစီၣ်, ဒီးမၤဘျါက့ၤတၢ်ဆူးတၢ်ဆါ, လၢသဝီတ ဖၣ်အပူၤသကုၤဆးဒးလီၤ.

⁷ ဒီးပဒိၣ်ဖးဒိၣ် စီၤဟ့ၤရိာ်နၢ်ဟူ ကယဲၢ်တၢ်မၤအသး လၢအီၤခဲလၢာ်, ဒီးတ့ၢ်အသးကဝ့ၤကဝီၤလီၤ. အဂ့ၢ်ဒ် အံၤ, ပှၤတနီၤနီၤစံးဝဲလၢစီၤယိၤဟၣ်ဂဲၤဆၢထၢၣ်က့ၤလၢ တၢ်သံလံ. ⁸ ဒီးတနီၤနီၤလၢစီၤအ့ၤလံယၤအိၣ်ဖျါထီၣ် လံ. ဒီးအဂၤတနီၤနီၤ, လၢဝံလၢပျၢၤတဂၤဂၤဂဲၤဆၢထၢၣ် က့ၤလံ. ⁹ ဘၣ်ဆၣ်ဒီးစီၤဟ့ၤရိာ်စံးဝဲဒၣ်, စီၤယိၤဟၣ်န့ၣ် ယကျီကွံာ်လံအကိာ်လံ, ဒီးပှၤလၢယနၢ်ဟူအဂ့ၢ်ဒ်အံၤ အသိးန့ၣ်, မ့ၢ်မတၤတဂၤလဲၣ်. ဒီးတၢ်မိၣ်ထံၣ်ဘၣ်အ သးလၢအီၤလီၤ.

¹⁰ ဒီးပှၤတၢ်မၢဖိတဖၣ်န့ၣ် ဟဲက့ၤစံးဘၣ်တဲဘၣ်အီၤလၢ ဖဲဒၣ်အမၤတၢ်တဖၣ်ခဲလၢာ်လီၤ. ဒီးဟံးန့ၢ်အီၤဒီးလဲၤဝဲ ဆူတၢ်တဒၢလၢပှၢ်မုၢ်ကနၢဘၣ်ဃးဒီးဝ့ၢ်တဖျၢၣ်, ကိးဝဲ လၢဘ့ၤသစဲဒၤလီၤ. ¹¹ ဒီးပှၤဂီၢ်မုၢ်သ့ၣ်ညါဝဲ, ဒီးပိာ်ထီၣ် အခံ, ဒီးအဝဲဒၣ်တူၢ်လိာ်အီၤ, ဒီးစံးဘၣ်တဲဘၣ်အီၤလၢ ယွၤအဘီအမုၢ်အဂ့ၢ်အကျိၤ, ဒီးမၤဘျါက့ၤ ပှၤလၢအ လီၢ်အိၣ်တဖၣ်န့ၣ်လီၤ.

¹² ဒီးမုၢ်ဃ့ၢ်လီၤဝဲ, ဒီးပှၤတဆံခံဂၤဟဲစံးဘၣ်အီၤ, ဒ်သိး ပှၤဂီၢ်မုၢ်န့ၣ်ကလဲၤဃုတၢ်အီၣ်တၢ်အီ, ဒီးထံၣ်န့ၢ်အလီၢ် မံလၢသဝီဒီးလၢပှၢ်လၢ်ကျါအိၣ်ဝးတရံးဝဲဒီး, ပျၢ်အီၤတ က့ၢ်. အဂ့ၢ်ဒ်အံၤ, ပအိၣ်ဖဲအံၤလၢပှၢ်မုၢ်ကနၢလီၤ. ¹³ ဒီး စံးဘၣ်အီၤ, ဟ့ၣ်အီၣ်အတၢ်သုဝဲတက့ၢ်. ဒီးအဝဲသ့ၣ် စံးဝဲဒၣ်, ပမ့ၢ်တလဲၤပှ့ၤဘၣ် တၢ်အီၣ်တၢ်အီလၢပှၤခဲ လၢာ်အံၤအဂီၢ်ဒီး, တၢ်အီၣ်တၢ်အီတအိၣ်ဘၣ်, အိၣ်ထဲ ကိၣ်ယဲၢ်ဖျၢၣ်, ဒီးညၣ်ခံဘ့ၣ်ဧိၤလီၤ. ¹⁴ အဂ့ၢ်ဒ်အံၤ, ပှၤပိာ် ခွါအိၣ်ယဲၢ်ကထိဃၣ်ဃၣ်လီၤ. ဒီးစံးဘၣ်အပျဲၢ်အဘီၣ်, မၢပှၤဂီၢ်မုၢ်ဆ့ၣ်နီၤယဲၢ်ဆံတဖု, ယဲၢ်ဆံတဖုတက့ၢ်. ¹⁵ ဒီး အဝဲသ့ၣ်မၤဝဲဒ်န့ၣ်, ဒီးမၢပှၤခဲလၢာ်ဆ့ၣ်နီၤဝဲလီၤ. ¹⁶ ဒီး အဝဲဒၣ်ဟံးန့ၢ်ကိၣ်ယဲၢ်ဖျၢၣ်, ဒီးညၣ်ခံဘ့ၣ်န့ၣ်, ဒီးကွၢ် ထီၣ်တၢ်ဆူမူခိၣ်ဒီးဆိၣ်ဂ့ၤဝဲ, ဒီးစိၢ်ဘျဲးဝဲ, ဒီးဟ့ၣ်လီၤဝဲ လၢအပျဲၢ်အဘီၣ်ဒ်သိးအဝဲသ့ၣ်ကပာ်လီၤလၢ ပှၤဂီၢ်မုၢ် အမဲာ်ညါလီၤ. ¹⁷ ဒီးပှၤဂီၢ်မုၢ်ခဲလၢာ်အီၣ်ဘျဲးအီၣ်ဝဲလီၤ. ဒီးထၢဖှိၣ်ဝဲအဘျဲၣ်အစဲၢ်ပှဲၤကုတဆံခံဒုလီၤ.

¹⁸ ဒီးတၢ်မၤအသးလၢအဘါထုကဖၣ်တၢ်လၢ တၢ်တ ဒၢ, ဒီးအပျဲၢ်အဘီၣ်အိၣ်ဒီးအီၤဒီး, အဝဲသံကွၢ်အီၤဒီးစံး ဝဲဒၣ်, ပှၤဂီၢ်မုၢ်စံးဝဲလၢယမ့ၢ်မတၤတဂၤလဲၣ်. ¹⁹ ဒီးအ ဝဲသ့ၣ်ကတိၤဆၢတၢ်ဒီးစံးဝဲဒၣ်, ပှၤဘျၢ*တၢ်စီၤယိၤဟၣ်, ဒီးအဂၤတနီၤနီၤ, စီၤအ့ၤလံယၤ, ဒီးအဂၤတနီၤစံးဝဲ, လၢ ဝံလၢပျၢၤတဂၤဂၤဂဲၤဆၢထၢၣ်က့ၤလံလီၤ. ²⁰ ဒီးအဝဲဒၣ် စံးဘၣ်အီၤ, မ့မ့ၢ်သုဝဲသ့ၣ်အံၤသုစံးလၢယမ့ၢ်မတၤတဂၤ လဲၣ်. ဒီးစီၤပ့းတရူးကတိၤဆၢတၢ်ဒီးစံးဝဲဒၣ်, နဲဒၣ်အံၤ, နမ့ၢ်ယွၤအခရံာ်လီၤ. ²¹ ဒီးမၤလိာ်အီၤ ဒ်သိးအသုတစံး ဘၣ်တဲဘၣ်တၢ်န့ၣ်လၢပှၤနီတဂၤတဂ့ၤ. ²² ဒီးစံးဝဲဒၣ်, ပှၤ ကညီဖိခွါအံၤ, ကဘၣ်တၢ်အါမံၤ, ဒီးကဘၣ်တၢ်ညိကွံာ် အီၤလၢပှၤသူၣ်က့သးပှၢ်, ဒီးပှၤလုၢ်တၢ်အခိၣ်, ဒီးပှၤကွဲး လံာ်သ့ၣ်တဖၣ်အစုပူၤ, ဒီးကဘၣ်တၢ်မၤသံအီၤ, ဒီးလၢ သၢနံၤတနံၤန့ၣ်, ကဂဲၤဆၢထၢၣ်က့ၤဝဲလီၤ.

²³ ဒီးစံးဘၣ်ပှၤခဲလၢာ်, ပှၤမ့ၢ်မိၣ်ပိာ်အသးလၢ ယခံတ ဂၤဂၤန့ၣ်, မ်အညိကွံာ်အသးဒၣ်ဝဲ, ဒီးယိးထီၣ်အထူၣ် စုညါကိးမုၢ်နံၤမုၢ်နၤ, ဒီးပိာ်ယခံတက့ၢ်. ²⁴ အဂ့ၢ်ဒ်အံၤ, ဖဲဒၣ်ပှၤလၢအမိၣ်အုၣ်က့ၤခီၣ်က့ၤအသးတဂၤဂၤန့ၣ်, အ သးကဟါမၢ်ကွံာ်လီၤ. ဒီးဖဲဒၣ်ပှၤလၢအသးဟါမၢ်ကွံာ် ဝဲလၢယဃိတဂၤဂၤန့ၣ်, ကအုၣ်က့ၤခီၣ်က့ၤအသးန့ၣ် လီၤ. ²⁵ အဂ့ၢ်ဒ်အံၤ, ပှၤမ့ၢ်န့ၢ်ဘၣ်ဟီၣ်ခိၣ်ဒီဘ့ၣ်ညါ, ဒီး အကစၢ်ဒၣ်ဝဲမ့ၢ်ဟါမၢ်, မ့တမ့ၢ်ဘၣ်, မ့ၢ်ဟးဂီၤန့ၣ်ဒီး, မ့ၢ်အန့ၢ်ဘျုးမနုၤလဲၣ်. ²⁶ အဂ့ၢ်ဒ်အံၤ, ဖဲဒၣ်ပှၤလၢအမဲာ် ဆှးယၤ, ဒီးယကလုၢ်ယကထါတဂၤဂၤဒီး, တုၤပှၤက ညီဖိခွါဟဲလီၤဝဲဒီးအလၤအကပီၤ, ဒီးအပၢ်အလၤအက ပီၤ, ဒီးကလူးစီဆှံတဖၣ်အလၤအကပီၤန့ၣ်ဒီး, ကမဲာ် ဆှးအဝဲသ့ၣ်တဖၣ်န့ၣ်လီၤ. ²⁷ ဒီးယစံးဘၣ်တဲဘၣ်သုတီ တီအံၤ, ပှၤဆၢထၢၣ်ဝဲဖဲအံၤတနီၤနီၤ တချုးအထံၣ်ဒံး ဘၣ်ယွၤအဘီအမုၢ်ဒီး, တလ့ၣ်ကွၢ်ဘၣ်တၢ်သံဘၣ်.

²⁸ ဒီးတၢ်မၤအသးလၢ အကတိၤတၢ်တဖၣ်န့ၣ်အလီၢ်ခံ ဃိးနံၤဃၣ်ဃၣ်ဒီး, ဟံးန့ၢ်စီၤပ့းတရူး, စီၤယိၤဟၣ်, ဒီးစီၤ ယၤကိာ်, ဒီးလဲၤထီၣ်ဘါထုကဖၣ်တၢ်ဆူကစၢၢ်တဖျၢၣ် အလိၤလီၤ. ²⁹ ဒီးတၢ်မၤအသးလၢအဘါထုကဖၣ်တၢ်အ ဖၢမုၢ်ဒီး, အမဲာ်လီၤလးထီၣ်, ဒီးအကူအသိးဝါထီၣ်က တြ့ၣ်ကတြိၣ်လီၤ. ³⁰ ဒီးကွၢ်ကွၢ်, ပှၤပိာ်ခွါခံဂၤလၢအမ့ၢ် စီၤမိၤရှ့ဒီးစီၤအ့ၤလံယၤ, ကတိၤလိာ်အသးဒီးအီၤ, လၢ အအိၣ်ဖျါထီၣ်လၢတၢ်လၤတၢ်ကပီၤအပူၤ, ³¹ ဒီးကတိၤ ဝဲလၢအတၢ်က့ၤထီၣ်, လၢအကလၢထီၣ်ပှဲၤထီၣ်လၢယ ရူၤၡလ့ၣ်အပူၤအဂ့ၢ်န့ၣ်လီၤ.

³² ဒီးစီၤပ့းတရူး ဒီးပှၤအိၣ်ဒီးအီၤန့ၣ်, အမဲာ်ဖံးဃၢဒီးမံ ခ့ဝဲလီၤ. ဒီးတုၤအဖုသံနီၣ်ထီၣ်ဒီး, ထံၣ်ဝဲအလၤအက ပီၤ, ဒီးပှၤခံဂၤဆၢထၢၣ်ဒီးအီၤလီၤ. ³³ ဒီးတၢ်မၤအသးဖဲ အဝဲသ့ၣ်ကဟးထီၣ်တ့ၢ်လၢအအိၣ်ဒီး, စီၤပ့းတရူးစံးတၢ် မနုၤမနုၤန့ၣ်တသ့ၣ်ညါဘၣ်ဝဲဒီး, စံးဘၣ်ယ့ၣ်ရှူး, ကစၢ် ဧၢ, ပအိၣ်ဖဲအံၤဂ့ၤမးလီၤ. ဒီးမ်ပမၤဒဲသၢဖျၢၣ်, လၢန ဂီၢ်တဖျၢၣ်, ဒီးလၢစီၤမိၤရှ့အဂီၢ်တဖျၢၣ်, ဒီးလၢစီၤအ့ၤ လံယၤ အဂီၢ်တဖျၢၣ်တက့ၢ်. ³⁴ ကတိၤတၢ်အဖၢမုၢ်ဒီး, တၢ်အၢၣ်လီၤကဒုအီၤလီၤ. ဒီးတုၤအဝဲသ့ၣ်လဲၤနုာ်လၢ တၢ်အၢၣ်အပူၤဒီး, ပျံၤတၢ်တကူၢ်သ့ၣ်လီၤ. ³⁵ ဒီးတၢ်အက လုၢ်သီၣ်ထီၣ်လၢတၢ်အၢၣ်အပူၤဒီးစံးဝဲဒၣ်, တၢ်လၢပှၤ တဂၤအံၤ, မ့ၢ်ယဖိခွါလၢယအဲၣ်အီၤလီၤ. ဒိကနၣ်အ ကလုၢ်တက့ၢ်.

³⁶ ဒီးဖဲတၢ်ကလုၢ်သီၣ်ထီၣ်န့ၣ်ဒီး, တၢ်ထံၣ်န့ၢ်ယ့ၣ်ရှူး အိၣ်တဂၤဃီလီၤ. ဒီးအဝဲသ့ၣ် အိၣ်ဘှီၣ်ကလာ်, ဒီး လၢမုၢ်နံၤတဖၣ်န့ၣ်, တစံးဘၣ်တဲဘၣ်တၢ်လၢအထံၣ်ဝဲ န့ၣ်, လၢပှၤနီတဂၤဘၣ်.

³⁷ ဒီးတၢ်မၤအသးလၢ မုၢ်ဆ့ၣ်ထီၣ်တနံၤ အဝဲသ့ၣ်ဟဲ က့ၤလီၤလၢကစၢၢ်အလိၤ, ဒီးပှၤဂီၢ်မုၢ်ဖးဒိၣ် ဟဲသဂၢၢ် အီၤလီၤ. ³⁸ ဒီးကွၢ်ကွၢ်, ပှၤလၢပှၤဂီၢ်မုၢ်န့ၣ်အကျါတဂၤ, ကိးပသူထီၣ်ဒီးစံးဝဲဒၣ်, သရၣ်ဧၢ, ယဃ့ကညးနၤလၢန ကကွၢ်စာ်ယဖိခွါန့ၣ်လီၤ. ³⁹ အဂ့ၢ်ဒ်အံၤ, မ့ၢ်ယဖိတဂၤ ဃီလီၤ. ဒီးကွၢ်ကွၢ်, တၢ်နါဟံးန့ၢ်အီၤ, ဒီးအဝဲဒၣ်ကိးပ သူထီၣ်တကီၢ်ခါ ဒီးပျုၢ်ထိးထီၣ်ဝဲ, ဒီးအထးခိၣ်သဘှဲ ထီၣ်, ဒီးမၤသဘှံးအီၤ, ဒီးဟးထီၣ်ကီမးလီၤ. ⁴⁰ ဒီးဒ်သိး နပျဲၢ်နဘီၣ်ကဟီထီၣ်ကွံာ်အီၤဒီး, ယဃ့ကညးအီၤလီၤ. ဒီးမၤဝဲတသ့ဘၣ်.

⁴¹ ဒီးယ့ၣ်ရှူးကတိၤဆၢတၢ်ဒီးစံးဝဲဒၣ်, ပှၤလၢအတနာ် ဘၣ်တၢ်ဒီးအနၢ်က့ၣ်တစိၤဧၢ, ယကအိၣ်ဒီးသုဆံးယံာ် လဲၣ်. ယကဝံသးစူၤသုဆံးယံာ်လဲၣ်. ဟဲစိာ်နဖိခွါဖဲအံၤ တက့ၢ်. ⁴² ဒီးဟဲစိာ်အီၤအဖၢမုၢ်ဒီး, တၢ်နါဆီၣ်လီၤဃံၤ အီၤ, ဒီးမၤပျုၢ်ထိးထီၣ်အီၤလီၤ. ဒီးယ့ၣ်ရှူးဒူတၢ်နါအ လိၤ, ဒီးမၤဘျါက့ၤဖိသၣ်, ဒီးဟ့ၣ်လီၤက့ၤအီၤလၢအပၢ် လီၤ. ဒီးမ့ၢ်ယွၤအစိအကမီၤသတးဒီး, ပှၤခဲလၢာ်ကမၢ ကမၣ်ဝဲတကူၢ်သ့ၣ်လီၤ.

⁴³ ဒီးပှၤခဲလၢာ် ကမၢကမၣ်လၢကယဲၢ်တၢ်လၢယ့ၣ်ရှူး မၤဝဲအဃိအဖၢမုၢ်ဒီး, အဝဲဒၣ်စံးဘၣ်အပျဲၢ်အဘီၣ်, ⁴⁴ ဒိး သုနၢ်လၢတၢ်ကတိၤတဖၣ်အံၤတက့ၢ်. အဂ့ၢ်ဒ်အံၤ, ပှၤ ကညီဖိခွါအံၤ, တၢ်ကဟ့ၣ်လီၤကွံာ်အီၤဆူပှၤကညီအစု ပူၤလီၤ. ⁴⁵ ဘၣ်ဆၣ်ဒီးတၢ်ကတိၤန့ၣ်, တသ့ၣ်ညါဘၣ်ဝဲ ဘၣ်, ဒီးအိၣ်တဒၢဒီးအီၤဒ်သိးအနၢ်သုတပၢၢ်တဂ့ၤ, ဒီး သံကွၢ်ဝဲလၢအဂ့ၢ်အကျိၤတဘူၣ်ဘၣ်လီၤ.

⁴⁶ ဒီးမ့ၢ်မတၤကကဲထီၣ်အဒိၣ်ကတၢၢ်တဂၤ လၢအကျါ န့ၣ်ဒီး, တဲးလိာ်ဃိလိာ်အသးလီၤ. ⁴⁷ ဒီးယ့ၣ်ရှူးသ့ၣ်ညါ တၢ်ကူၣ်လၢအဝဲသ့ၣ်အသးကံၢ်ပူၤ, ဒီးဟံးန့ၢ်ဖိသၣ်တ ဂၤ, ဒီးပာ်ဝဲလၢအကစၢ်ဒၣ်ဝဲအဃၢၤ, ⁴⁸ ဒီးစံးဘၣ်အဝဲ သ့ၣ်, ဖဲဒၣ်ပှၤလၢအတူၢ်လိာ်ဖိသၣ်အံၤလၢယမံၤအဃိ တဂၤဂၤန့ၣ်, မ့ၢ်အတူၢ်လိာ်ယၤ, ဒီးဖဲဒၣ်ပှၤလၢအတူၢ် လိာ်ယၤတဂၤဂၤန့ၣ်, မ့ၢ်အတူၢ်လိာ်ပှၤလၢအမၢလီၤယၤ တဂၤလီၤ. အဂ့ၢ်ဒ်အံၤ, ပှၤလၢအဆံးကတၢၢ်လၢသုဝဲ ခဲလၢာ်အကျါတဂၤန့ၣ်, ကကဲထီၣ်ဝဲလၢအဒိၣ်လီၤ.

⁴⁹ ဒီးစီၤယိၤဟၣ်ကတိၤဆၢတၢ်ဒီးစံးဝဲဒၣ်, ကစၢ်ဧၢ, ပ ထံၣ်မတၤတဂၤလၢအသန့ၤအသးလၢနမံၤသတးဒီး, ဟီ ထီၣ်ကွံာ်တၢ်နါ, ဒီးပတြီအီၤလီၤ. အဂ့ၢ်ဒ်အံၤ, တပိာ် ဘၣ်နခံဒီးပှၤဘၣ်, ⁵⁰ ဒီးယ့ၣ်ရှူးစံးဘၣ်အီၤ, သုတတြီ အီၤတဂ့ၤ. အဂ့ၢ်ဒ်အံၤ, ဖဲဒၣ်ပှၤလၢအတထီဒါဘၣ်ပှၤ တဂၤဂၤန့ၣ်, မ့ၢ်အအိၣ်လၢပပူၤလီၤ.

⁵¹ ဒီးတၢ်မၤအသးလၢတၢ်ဟံးထီၣ်အီၤအမုၢ်နံၤ ကဘၣ် တ့ၢ်ဒီး, ပာ်အမဲာ်လၢအကလဲၤဆူယရူၤၡလ့ၣ်သပှၢ်ပှၢ် လီၤ. ⁵² ဒီးမၢလီၤကလူးတဖၣ်လဲၤပာ်လၢအမဲာ်ညါလီၤ. ဒီးအဝဲသ့ၣ် ဒ်သိးအကကတဲာ်ကတီၤတၢ်လၢအဂီၢ်ဒီး, လဲၤနုာ်လၢပှၤၡၤမရံဖိအသဝီတဖျၢၣ်အပူၤလီၤ. ⁵³ ဒီးတ တူၢ်လိာ်ဘၣ်အီၤဘၣ်. အဂ့ၢ်ဒ်အံၤ, ပာ်အမဲာ်လၢအက လဲၤဆူယရူၤၡလ့ၣ်လီၤ. ⁵⁴ ဒီးအပျဲၢ်အဘီၣ်စီၤယၤကိာ် ဒီးစီၤယိၤဟၣ်ထံၣ်ဝဲဒီးစံးဝဲဒၣ်, ကစၢ်ဧၢ, ဒ်စီၤအ့ၤလံယၤ မၤဝဲအသိးန့ၣ်, ပမၤလိာ်မ့ၣ်အူဟဲလီၤလၢမူခိၣ်, ဒီးအီၣ် ကွံာ်ပှၤတဖၣ်န့ၣ်, နသးအိၣ်စ့ၢ်ကီးဧါ. ⁵⁵ ဒီးကဒါဃီၤ အသးဒီးဒူအလိၤ, ဒီးစံးဝဲဒၣ်, သုသးအံၤမ့ၢ်ဒ်လဲၣ်ဒ်လဲၣ် န့ၣ်, သုတသ့ၣ်ညါဘၣ်လီၤ. ⁵⁶ အဂ့ၢ်ဒ်အံၤ, ပှၤကညီ ဖိခွါအံၤ, တမ့ၢ်ဘၣ်အဟဲမၤဟးဂီၤပှၤကညီအသးဘၣ်, မ့ၢ်အဟဲအုၣ်က့ၤခီၣ်က့ၤအီၤလီၤ. ဒီးလဲၤဝဲဆူသဝီအဂၤ တဖျၢၣ်လီၤ.

⁵⁷ ဒီးတၢ်မၤအသးလၢ အလဲၤဝဲလၢကျဲဒီး, ပှၤတဂၤစံး ဘၣ်အီၤ, ကစၢ်ဧၢ, ဖဲနလဲၤတၢ်တပူၤပူၤန့ၣ်, ယကပိာ်န ခံလီၤ. ⁵⁸ ဒီးယ့ၣ်ရှူးစံးဘၣ်အီၤ, ထွံၣ်မံၤအိၣ်ဝဲဒီးအပူၤ, ဒီး ထိၣ်လၢတၢ်ဖးဖီအိၣ်ဝဲဒီးအလီၢ်, မ့မ့ၢ်ပှၤကညီဖိခွါအံၤ, ဖဲအကပာ်မံလီၤအခိၣ်န့ၣ်, အလီၢ်တအိၣ်ဘၣ်ဝဲဘၣ်.

⁵⁹ ဒီးစံးဘၣ်ပှၤလၢအဂၤတဂၤ, ပိာ်ယခံတက့ၢ်. ဒီးအ ဝဲဒၣ်စံးဝဲ, ကစၢ်ဧၢ, ဒ်သိးယကခူၣ်လီၤကွံာ်ယပၢ်ဒီး, ဒုး က့ၤဆိဒၣ်ကလိာ်ယၤတက့ၢ်. ⁶⁰ ဒီးယ့ၣ်ရှူးစံးဘၣ်အီၤ, ပှၤ အသံန့ၣ်, မ်အခူၣ်လီၤကွံာ်အပှၤသံဒၣ်ဝဲတက့ၢ်. မ့မ့ၢ်နဲ ဒၣ်အံၤလဲၤစံၣ်တဲၤတဲလီၤယွၤအဘီအမုၢ်အဂ့ၢ်တက့ၢ်.

⁶¹ ဒီးပှၤလၢအဂၤတဂၤစံးဝဲဒၣ်, ကစၢ်ဧၢ, ယကပိာ်နခံ လီၤ. ဘၣ်ဆၣ်ဒီးဒုးက့ၤကတိၤဒိၣ်ဆိဒၣ်ကလိာ်ယၤလၢ ပှၤအိၣ်လၢယဟံၣ်ပူၤတက့ၢ်. ⁶² ဒီးယ့ၣ်ရှူးစံးဘၣ်အီၤ, ပှၤ လၢအဟံးထီၣ်ထဲၣ်အဘိ, ဒီးကွၢ်က့ၤတၢ်ဆူအလီၢ်ခံန့ၣ်, တကြၢးဘၣ်ဒီးယွၤအဘီအမုၢ်နီတဂၤဘၣ်.

၁၀

¹ တၢ်န့ၣ်တဖၣ်အလီၢ်ခံဒီး, ကစၢ်ပာ်လီၤစ့ၢ်ကီးပှၤလၢ အဂၤနွံဆံဂၤ, ဒီးမၢအလဲၤခံဂၤတပူၤခံဂၤတပူၤ, လၢအ မဲာ်ညါဆူကယဲၢ်ခူကယဲၢ်ဝ့ၢ်, ဒီးကယဲၢ်အလီၢ်လၢ အ ကစၢ်ဒၣ်ဝဲကလဲၤန့ၣ်လီၤ. ² မ်ဒ်န့ၣ်ဒီး, စံးဘၣ်အီၤ, ကူး တၢ်အလီၢ်အိၣ်အါမး, မ့မ့ၢ်ပှၤမၤတၢ်ဖိန့ၣ် အိၣ်စှၤဂၤ လီၤ. မၤသးဒ်န့ၣ်ဒီး, ဘါထုကဖၣ်ကူးတၢ်အလီၢ်အက စၢ်ဒ်သိးအကမၢလီၤန့ၢ်ပှၤမၤတၢ်ဖိဆူ အကူးတၢ်အလီၢ် န့ၣ်တက့ၢ်. ³ လဲၤတက့ၢ်, ကွၢ်ကွၢ်, ယမၢလီၤသုလဲၤ တၢ်ဒ်သိဖိလၢထွံၣ်မံၤအကျါအသိးန့ၣ်လီၤ. ⁴ စ့အထၢၣ် မ့ၢ်ဂ့ၤ, တၢ်အီၣ်အထၢၣ်မ့ၢ်ဂ့ၤ, ခီၣ်ဖံးတဖၣ်မ့ၢ်ဂ့ၤ, သု တစိာ်တဂ့ၤ, ဒီးကတိၤဒိၣ်ပှၤလၢကျဲနီတဂၤတဂ့ၤ. ⁵ ဒီး ဖဲဒၣ်သုလဲၤနုာ်ဟံၣ်တဖျၢၣ်ဖျၢၣ်ဒီး, စံးဆိသုဝဲ, မ်တၢ် ဃူတၢ်ဖိးဘၣ်ဟံၣ်တဖျၢၣ်အံၤတက့ၢ်.

⁶ ဒီးတၢ်ဃူတၢ်ဖိးအဖိခွါမ့ၢ်အိၣ်ဖဲန့ၣ်ဒီး, သုတၢ်ဃူတၢ် ဖိးကအိၣ်ဝဲလၢအလိၤလီၤ. မ့တမ့ၢ်ဘၣ်ဒီး, ကဟဲဘၣ် ကဒါက့ၤသုလီၤ. ⁷ ဒီးအိၣ်လၢဟံၣ်တဖျၢၣ်ဃီအဝဲန့ၣ်, ဒီးအီၣ်တၢ်ဒီးအီတၢ်ဖဲဒၣ်တၢ်လၢပှၤပာ်လီၤဝဲတက့ၢ်. အ ဂ့ၢ်ဒ်အံၤ, ပှၤမၤတၢ်ဖိန့ၣ်ဂ့ၤန့ၢ်ဘၣ်အဘူးအလဲလီၤ. တ ဟံၣ်ဘၣ်တဟံၣ်, တဟံၣ်ဘၣ်တဟံၣ်, သုတလဲၤတ ဂ့ၤ. ⁸ ဒီးဖဲဒၣ်ဝ့ၢ်တဖျၢၣ်ဖျၢၣ်လၢသုလဲၤနုာ်န့ၣ်, ပှၤမ့ၢ် တူၢ်လိာ်သုဒီး, တၢ်လၢအပာ်လီၤန့ၢ်သုန့ၣ်အီၣ်တက့ၢ်.―

⁹ ဒီးမၤဘျါက့ၤ ပှၤဘၣ်ဆူးဘၣ်ဆါအိၣ်လၢအပူၤ, ဒီးစံး ဘၣ်တဲဘၣ်ပှၤတဖၣ်လၢယွၤအဘီအမုၢ်န့ၣ်ဟဲဘူးလံဒီး သုလံ. ¹⁰ ဒီးဖဲဒၣ်ဝ့ၢ်တဖျၢၣ်ဖျၢၣ်လၢသုလဲၤနုာ်န့ၣ်, ပှၤ မ့ၢ်တတူၢ်လိာ်ဘၣ်သုဒီး, လဲၤဆူအကျဲပူၤဒီးစံးသုဝဲ,―

¹¹ သုဝ့ၢ်အဟီၣ်ကမူၣ်စဲဘူးလၢပလိၤအံၤ, ပတြူာ်ကွံာ်ထီ ဒါသုလီၤ. ဘၣ်ဆၣ်ဒီးသ့ၣ်ညါတၢ်အံၤတက့ၢ်. ယွၤအ ဘီအမုၢ်န့ၣ်ဟဲဘူးလံ. ¹² ဒီးယစံးဘၣ်သု, လၢမုၢ်နံၤတ နံၤန့ၣ်, စဒိၣ်ကဘၣ်တၢ်ဘီၣ်န့ၢ်ဝ့ၢ်န့ၣ်တက့ၢ်လီၤ.

¹³ ဃရၤစံၣ်ဧၢ, နဲဒၣ်အံၤ, နဘၣ်အဖှီၣ်လီၤ. ဘ့ၤသစဲ ဒၤဧၢ, နဲဒၣ်အံၤနဘၣ်အဖှီၣ်လီၤ. အဂ့ၢ်ဒ်အံၤ, တၢ်လီၤ လးမၤအသးလၢသုပူၤတဖၣ်န့ၣ်, မ့ၢ်အမၤအသးလၢစိၢ် ဒီးစံဒိၣ်အပူၤဒီး, အဝဲသ့ၣ်ကကူသိးထီၣ်ထၢၣ်တၢ်ကံး ညာ်, ဒီးဆ့ၣ်နီၤလၢဖၣ်ဆါအကျါ, ဒီးပီၢ်ယၢ်လီၤက့ၤအ သးဃဲးဃဲးတ့ၢ်လံလီၤ. ¹⁴ ဘၣ်ဆၣ်ဒီးလၢတၢ်စံၣ်ညီၣ်အ ပူၤန့ၣ်, စိၢ်ဒီးစံဒိၣ်ကဘၣ်တၢ်ဘီၣ်န့ၢ်သုတက့ၢ်လီၤ. ¹⁵ ဒီး နဲဒၣ်ကပ့းရနီၣ် လၢအထီၣ်ဘးလၢမူခိၣ်ဧၢ, နကဘၣ် တၢ်ဆီၣ်လီၤပၢၢ်လၢလရာ်ပူၤလီၤ.

¹⁶ ပှၤလၢအနၢ်ဟူသုကလုၢ်န့ၣ်, မ့ၢ်အနၢ်ဟူယကလုၢ်, ဒီးပှၤလၢအညိကွံာ်သုန့ၣ်မ့ၢ်အညိကွံာ်ယၤ, ဒီးပှၤလၢအ ညိကွံာ်ယၤအံၤ, မ့ၢ်အညိကွံာ်ပှၤလၢအမၢလီၤယၤတဂၤ လီၤ.

¹⁷ ဒီးပှၤနွံဆံဂၤန့ၣ်ဟဲက့ၤကဒါက့ၤ အိၣ်ဒီးအသူၣ်ခုအ သးခုဒီးစံးဝဲဒၣ်, ကစၢ်ဧၢ, မ့ၢ်နမံၤသတးဒီး, တၢ်နါတ ဖၣ်ဒၣ်လဲာ်အိၣ်လၢပဖီလာ်လီၤ. ¹⁸ ဒီးစံးဘၣ်အီၤ, ဒ်လီ ဝၢ်ဒံးအသိးန့ၣ်, ယထံၣ်မုၣ်ကီၤလံၢ် လီၤတဲာ်လၢမူခိၣ် လီၤ. ¹⁹ ဒီးကွၢ်ကွၢ်, ယဟ့ၣ်သုစိသုကမီၤ, ဒ်သိးသုကယီၢ် ဂုၢ်ဧိၤဒးဧိၤ, ပတ့ၤတၢၢ်ပတ့ၤချဲး, ဒီးလၢဒုၣ်ဒါအစိကမီၤ ခဲလၢာ်အဖီခိၣ်လီၤ. ဒီးတၢ်တမၤအၢမၤနးဘၣ်သုနီတ မံၤဘၣ်. ²⁰ ဘၣ်ဆၣ်ဒီးမ့ၢ်သးတဖၣ်အိၣ်လၢသုဖီလာ်အ ဃိဒီး, သုတသးခုတဂ့ၤ. မ့ၢ်သုမံၤဆဲးလီၤအသးလၢမူ ခိၣ်အဃိဒီး, သးခုတက့ၢ်.

²¹ ဒီးယ့ၣ်ရှူးအသူၣ်ဖှံအသးညီတစုဃီဖဲန့ၣ်, ဒီးစံးဝဲဒၣ်, မူခိၣ်ဒီးဟီၣ်ခိၣ်အကစၢ်, ပၢ်ဧၢ, ယစံးထီၣ်ပတြၢၤနၤလီၤ. အဂ့ၢ်ဒ်အံၤ, တၢ်တဖၣ်အံၤ, နပာ်ခူသူၣ်လၢပှၤကူၣ်တၢ် သ့, ဒီးပှၤအသူၣ်ဆးသးဆးတဖၣ်အမဲာ်ညါ, ဒီးနမၤ ဖျါထီၣ်အီၤလၢဖိသၣ်အမဲာ်ညါလီၤ. မ့ၢ်လံ, ပၢ်ဧၢ, မ့ၢ်အ ဘၣ်နသးဒ်န့ၣ်လီၤ. ²² ဒီးဃၣ်ဃီၤအသးဆူအပျဲၢ်အဘီၣ် အအိၣ်ဒီးစံးဝဲဒၣ်, ယပၢ်န့ၣ် ဟ့ၣ်လီၤလံယၤလၢတၢ်ခဲ လၢာ်လံ. ဒီးမ့တမ့ၢ်ဘၣ်ပၢ်န့ၣ်ဒီး, ပှၤတသ့ၣ်ညါဘၣ် ဖိခွါနီတဂၤဘၣ်. ဒီးမ့တမ့ၢ်ဘၣ်ဖိခွါ, ဒီးပှၤလၢဖိခွါဘၣ် အသးလၢအကလီၣ်ဖျါ ပၢ်လၢအီၤတဖၣ်န့ၣ်ဒီး, ပှၤတ သ့ၣ်ညါဘၣ်ပၢ်နီတဂၤဘၣ်.

²³ ဒီးဃၣ်ဃီၤအသးဆူအပျဲၢ်အဘီၣ်အအိၣ်, ဒီးစံးဘၣ် အီၤကစုဒု, မဲာ်လၢအထံၣ်တၢ်လၢသုထံၣ်ဘၣ်န့ၣ်, ဘၣ် ဆိၣ်ဂ့ၤဝဲလီၤ. ²⁴ အဂ့ၢ်ဒ်အံၤ, ယစံးဘၣ်သု, ဝံဒီးစီၤပၤ အါဂၤ, တၢ်မိၣ်ထံၣ်ဘၣ်အသးလၢ တၢ်လၢသုထံၣ်န့ၣ် ဒီး, တထံၣ်ဘၣ်ဝဲဘၣ်. ဒီးတၢ်မိၣ်နၢ်ဟူဘၣ်အသးလၢ တၢ်လၢသုနၢ်ဟူန့ၣ်, ဒီးတနၢ်ဟူဘၣ်ဝဲဘၣ်.

²⁵ ဒီးကွၢ်ကွၢ်, မတၤတဂၤပှၤသ့လံာ်တၢ်သိၣ်တၢ်သီတ ဂၤ, ဂဲၤဆၢထၢၣ်ဒီးလ့ပစီအီၤဒီးစံးဝဲဒၣ်, သရၣ်ဧၢ, ဒ်သိး ယကန့ၢ်ဘၣ်သါတၢ်မူအထူအယိာ်ဒီး, ယဘၣ်မၤမနုၤ တမံၤလဲၣ်. ²⁶ ဒီးအဝဲဒၣ်စံးဘၣ်အီၤ, လၢလံာ်တၢ်သိၣ် တၢ်သီအပူၤန့ၣ်, တၢ်ကွဲးဒ်လဲၣ်, နဖးဒ်လဲၣ်. ²⁷ ဒီးကတိၤ ဆၢတၢ်ဒီးစံးဝဲဒၣ်, အဲၣ်ယွၤနကစၢ်လၢနသူၣ်ကံၢ်နသး လဲ, ဒီးနသးဒီဖျၢၣ်ညါ, ဒီးနတၢ်ကူၣ်တၢ်ဆးတုၤအလၢာ်, ဒီးနဂံၢ်နဘါခဲလၢာ်တက့ၢ်. ဒီးအဲၣ်ပှၤလၢနဃၢၤဒ်နအဲၣ် လီၤနသးဒၣ်နဲအသိးန့ၣ်တက့ၢ်.+ ၅မိၤ. ၆း၅|Deut.6.5*.²⁸ ဒီးစံးဘၣ်အီၤ, နကတိၤတၢ်ကစီဒီလီၤ. မၤ တၢ်ဒ်န့ၣ်, ဒီးနကမူလီၤ. ²⁹ ဘၣ်ဆၣ်ဒီး, တၢ်မိၣ်ပာ်တီ ပာ်လိၤဒၣ်အသးဒီး, စံးဘၣ်ယ့ၣ်ရှူး, ဒီးပှၤလၢယဃၢၤ န့ၣ်မ့ၢ်မတၤတဂၤလဲၣ်.

³⁰ ဒီးယ့ၣ်ရှူးကတိၤဆၢအီၤဒီးစံးဝဲဒၣ်, မတၤတဂၤလဲၤ လီၤလၢယရူၤၡလ့ၣ်ဆူယရံၤဃိ, ဒီးလီၤဘၣ်လၢတမျိး တမျာ်အကျါ, ဒီးအဝဲသ့ၣ်ဘ့ၣ်လီၤကွံာ်အကူအသိး, ဒီး တီၢ်အီၤတုၤအကသံတ့ၢ်ဒီး လဲၤသဒၣ်အီၤလီၤ. ³¹ ဒီးပှၤ လုၢ်တၢ်အဒိၣ်တဂၤ လဲၤတၢ်လၢကျဲန့ၣ်, ဒီးတုၤအထံၣ် အီၤဒီးလဲၤဝဲလၢကျဲအဝၢ်ဘးခီလီၤ. ³² ဒ်န့ၣ်အသိး, ပှၤ လ့ၤဝံဖိတဂၤတုၤဖဲန့ၣ်, ဒီးလဲၤထံၣ်ဝဲဝံၤဒီး, လဲၤပူၤကွံာ် ဝဲလၢကျဲအဝၢ်ဘးခီစ့ၢ်ကီးလီၤ.

³³ မ့မ့ၢ်ပှၤၡၤမရံဖိတဂၤလဲၤတၢ်ဒီး, တုၤဝဲလၢအအိၣ်, ဒီး ထံၣ်အီၤ, ဒီးသးကညီၤအီၤလီၤ. ³⁴ ဒီးလူလီၤသိဒီးစပံးထံ လၢအပူၤလီၢ်, ဒီးဘိၣ်ဘံဝဲ, ဒီးဒုးဒိးအီၤလၢအဆၣ်ဖိကီၢ် ဖိဒၣ်ဝဲတဒု, ဒီးဆှၢအီၤဆူပှၤတမှံၤအဘျီၣ်တဖျၢၣ်, ဒီး အံးက့ၤကွၢ်က့ၤအီၤလီၤ. ³⁵ ဒီးမုၢ်ဆ့ၣ်ထီၣ်တနံၤ, ဖဲအဟး ထီၣ်န့ၣ်, ဟံးန့ၢ်စ့ဒန့ၤရံၤခံဘ့ၣ်ဒီး ဟ့ၣ်လီၤပှၤဘျီၣ်ခိၣ် ဒီးစံးဘၣ်အီၤ, အံးက့ၤကွၢ်က့ၤအီၤတက့ၢ်. ဒီးဖဲဒၣ်န လၢာ်အါန့ၢ်အအံၤတက့ၢ်န့ၣ်, တုၤယဟဲက့ၤဒီး, ယက ဟ့ၣ်က့ၤနၤလီၤ.

³⁶ မၤသးဒ်န့ၣ်ဒီးနဆိကမိၣ်ဒ်လဲၣ်. လၢပှၤသၢဂၤအကျါ န့ၣ်, မ့ၢ်အကဲလၢပှၤလီၤဘၣ်လၢတမျာ်အကျါတဂၤအ ပှၤလၢအဃၢၤဖဲလဲၣ်တဂၤလဲၣ်. ³⁷ ဒီးစံးဝဲဒၣ်, မ့ၢ်ပှၤလၢ အသးကညီၤအီၤတဂၤလီၤ. ဒီးယ့ၣ်ရှူးစံးဘၣ်အီၤ, လဲၤ မၤနဲဒ်န့ၣ်သိးတက့ၢ်.

³⁸ ဒီးတၢ်မၤအသးဖဲအလဲၤတၢ်အဖၢမုၢ်ဒီး, အဝဲဒၣ်လဲၤ နုာ်ဆူသဝီတဖျၢၣ်အပူၤ, ဒီးပိာ်မုၣ်အမံၤနီၢ်မၢ်သၤတဂၤ တူၢ်လိာ်အီၤလၢအဟံၣ်ပူၤလီၤ. ³⁹ ဒီးပိာ်မုၣ်န့ၣ်အဒီပုၢ်ဝဲၢ် မုၣ်, ကိးဝဲလၢနီၢ်မၤရံအိၣ်ဝဲတဂၤလီၤ. အဝဲဒၣ်န့ၣ်ဆ့ၣ် နီၤလၢကစၢ်အခီၣ်ထံး, ဒီးကနၣ်အကလုၢ်လီၤ. ⁴⁰ မ့မ့ၢ် နီၢ်မၢ်သၤန့ၣ်လၢအတၢ်မၤအါအဃိဒီး, အသးကိၢ်ထီၣ် ဒီးလဲၤဆူအအိၣ်ဒီးစံးဝဲဒၣ်, ကစၢ်ဧၢ, ယမၤတၢ်တဂၤဃီ ဒီးယဒီပုၢ်ဝဲၢ်မုၣ်အိၣ်ဒၣ်အတၢ်န့ၣ်, နတပာ်ဘၣ်လၢတၢ် နီတမံၤဘၣ်ဧါ. မၤသးဒ်န့ၣ်ဒီးဒ်သိးအကမၤစၢၤယၤဒီး, စံးဘၣ်အီၤတက့ၢ်. ⁴¹ ဒီးယ့ၣ်ရှူးကတိၤဆၢတၢ်ဒီးစံးဘၣ် အီၤ, နီၢ်မၢ်သၤဧၢ, နီၢ်မၢ်သၤဧၢ, နဲဒၣ်အံၤ, နဘၣ်ယိၣ် တၢ်ဒီးနသးကိၢ်တၢ်လၢတၢ်အါမံၤအဃိလီၤ. ⁴² ဘၣ်ဆၣ် ဒီးတၢ်လၢပှၤကြၢးန့ၢ်ဘၣ်ဝဲန့ၣ်, အိၣ်တမံၤလီၤ. ဒီးနီၢ် မၤရံဃုထၢလံ တၢ်အဂ့ၤတမံၤန့ၣ်, လၢပှၤတဟံးထီၣ် ကွံာ်ဘၣ်လၢအီၤနီတဂၤဘၣ်.

၁၁

¹ ဒီးတၢ်မၤအသးဖဲ အအိၣ်ဘါထုကဖၣ်တၢ်လၢအလီၢ် တပူၤန့ၣ်တုၤအဆိတ့ၢ်ဒီး, အပျဲၢ်အဘီၣ်တဂၤ စံးဘၣ် အီၤ, ကစၢ်ဧၢ, သိၣ်လိပှၤလၢပဘါထုကဖၣ်တၢ်အဂ့ၢ်, ဒ်စီၤယိၤဟၣ်သိၣ်လိစ့ၢ်ကီး အပျဲၢ်အဘီၣ်အသိးန့ၣ်တ က့ၢ်. ² ဒီးစံးဘၣ်အီၤ, တုၤသုဘါထုကဖၣ်တၢ်ဒီး, စံး, အိၣ် လၢမူခိၣ်ပပၢ်ဧၢ, မ်နမံၤဘၣ်တၢ်ပာ်စီဆှံအီၤတက့ၢ်. နဘီ နမုၢ်န့ၣ်, မ်အဟဲတက့ၢ်. ³ ဒ်လၢမူခိၣ်အသိးန့ၣ်မ်တၢ်မၤ အသးလၢဟီၣ်ခိၣ်ချၢဖဲဒၣ်နသးတက့ၢ်. ကိၣ်လၢတနံၤ အဂီၢ်တနံၤအဂီၢ်န့ၣ်, ဟ့ၣ်လီၤပှၤလၢတနံၤဘၣ်တနံၤတ နံၤဘၣ်တနံၤတက့ၢ်. ⁴ ဒီးပျၢ်ကွံာ်ပတၢ်ဒဲးဘးတက့ၢ်.― အဂ့ၢ်ဒ်အံၤ, ပပျၢ်စ့ၢ်ကီးကယဲၢ်ပှၤလၢအကမၢ်အိၣ်ဒီးပှၤခဲ လၢာ်လီၤ. ဒီးသုတဒုးဟဲနုာ်ပှၤဆူတၢ်လ့ပစီအပူၤတဂ့ၤ, ဒီးထုးထီၣ်ကွံာ်လၢ်ပှၤလၢတၢ်အၢတၢ်သီအပူၤတက့ၢ်.

⁵ ဒီးစံးဘၣ်အီၤ, မတၤတဂၤလၢသုကျါ, အိၣ်ဒီးအတံၤ သကိး, ဒီးလၢဖးဖီမုၢ်လဲၤဆူအအိၣ်ဒီးစံးဘၣ်အီၤ, ခွါဧၢ, ယန့ၢ်ဘၣ်ကိၣ်သၢဖျၢၣ်အလီၢ်အိၣ်လီၤ. ⁶ အဂ့ၢ်ဒ်အံၤ, ယ တံၤသကိးတဂၤလဲၤတၢ်ဒီး ဟဲတုၤလံလၢယအိၣ်ဒီးတၢ် လၢယကပာ်လီၤလၢအမဲာ်ညါ တအိၣ်ဘၣ် နီတမံၤ ဘၣ်. ⁷ ဒီးပှၤအိၣ်လၢဟံၣ်ပူၤကတိၤဆၢတၢ်ဒီးစံးဝဲဒၣ်, မၤတံာ်တာ်ယၤတဂ့ၤ, တြဲၤကးတံာ်ဃာ်အသးလံ, ဒီး ယဖိယလံၤအိၣ်လံဒီးယၤလၢယလီၢ်မံပူၤလံ, ယဂဲၤဆၢ ထၢၣ်ဟ့ၣ်တၢ်လၢနၤတသ့ဘၣ်. ⁸ ယစံးဘၣ်သု, အဝဲတ ဂၤလၢအမ့ၢ်အတံၤသကိးအဃိ တဂဲၤဆၢထၢၣ်ဟ့ၣ်ဘၣ် အတၢ်နာ်သက့ဒီး, မ့ၢ်အဃ့ဝဲသပှၢ်ပှၢ်အဃိဒီးကဂဲၤဆၢ ထၢၣ်ဟ့ၣ်လီၤအီၤ, ဖဲအန့ၢ်တၢ် အလီၢ်အိၣ်တဖၣ်န့ၣ် လီၤ. ⁹ ဒီးယစံးဘၣ်သု, ဃ့တက့ၢ်, ဒီးတၢ်ကဟ့ၣ်သု လီၤ. ဃုတက့ၢ်, ဒီးသုကထံၣ်န့ၢ်တၢ်လီၤ. ဒိတကျိာ်တ က့ၢ်. ဒီးတၢ်ကအိးထီၣ်န့ၢ်သုလီၤ. ¹⁰ အဂ့ၢ်ဒ်အံၤ, ကယဲၢ် ပှၤလၢအဃ့တၢ်တဂၤလၢ်လၢ်န့ၣ်, န့ၢ်ဘၣ်တၢ်လီၤ. ဒီး ပှၤလၢအဃုတၢ်န့ၣ်, ထံၣ်န့ၢ်တၢ်လီၤ. ဒီးပှၤလၢအဒိတ ကျိာ်တၢ်န့ၣ်တၢ်ကအိးထီၣ်န့ၢ်အဂီၢ်လီၤ.

¹¹ ပၢ်တဂၤလၢသုကျါ, အဖိခွါမ့ၢ်ဃ့ကိၣ်ဒီး, ကဟ့ၣ် အီၤလၢလၢၢ်န့ၣ်, မ့ၢ်မတၤတဂၤလဲၣ်. ဒီးမ့ၢ်ဃ့ညၣ်တ ဘ့ၣ်ဒီး, လၢညၣ်အလီၢ်န့ၣ်, ကဟ့ၣ်အီၤလၢဂုၢ်တဘိ ဧါ. ¹² မ့ၢ်ဃ့တၢ်အဒံၣ်တဖျၢၣ်ဒီး, ကဟ့ၣ်အီၤလၢပတ့ၤချဲး န့ၣ်ဧါ. ¹³ မၤသးဒ်န့ၣ်ဒီးသုဝဲဒၣ်လၢအမ့ၢ်ပှၤအအၢအသီ န့ၣ်, သုမ့ၢ်သ့ၣ်ညါဟ့ၣ်သုဖိသုလံၤလၢတၢ်ဟ့ၣ်အဂ့ၤဒီး, သုပၢ်အိၣ်လၢမူခိၣ်န့ၣ်, ကဟ့ၣ်ပှၤလၢအဃ့တၢ်လၢအီၤ တဖၣ်လၢသးစီဆှံန့ၣ်အါန့ၢ်အန့ၣ်တက့ၢ်ဆံးဒိၣ်လဲၣ်.

¹⁴ ဒီးဟီထီၣ်ကွံာ်တၢ်နါတဒု, ဒီးမ့ၢ်ပှၤတအုၣ်လီၤ. ဒီး တၢ်မၤအသးလၢတၢ်နါဟးထီၣ်ကွံာ်, ဒီးပှၤတအုၣ်န့ၣ် ကတိၤထီၣ်တၢ်, ဒီးပှၤဂီၢ်မုၢ် ကမၢကမၣ်တကူၢ်သ့ၣ် လီၤ. ¹⁵ ဒီးပှၤအိၣ်လၢအကျါတနီၤနီၤစံးဝဲဒၣ်, မ့ၢ်အဟီ ထီၣ်ကွံာ်တၢ်နါလၢတၢ်နါအခိၣ်, ဘၤဧၤလစဘူာ်လီၤ.―

¹⁶ ဒီးအဂၤတနီၤလ့ပစီတၢ်ဒီး ဃ့တၢ်ပနီၣ်လၢမူခိၣ်, လၢ အီၤလီၤ. ¹⁷ ဒီးအဝဲဒၣ်သ့ၣ်ညါ အတၢ်ကူၣ်တၢ်ဖးဒီးစံး ဘၣ်အီၤ, ကယဲၢ်ဘီမုၢ်လၢအမၤလီၤဖးထီဒါလီၤအသး ဒၣ်ဝဲန့ၣ်, ကအိၣ်သယုၢ်လီၤ. ဒီးဟံၣ်မ့ၢ်မၤလီၤဖးထီဒါ လီၤအသးဒၣ်ဝဲဒီး, ကလီၤပှီၢ်လီၤ. ¹⁸ ဒီးမုၣ်ကီၤလံၢ်စ့ၢ်ကီး မ့ၢ်မၤလီၤဖးထီဒါလီၤ အကစၢ်ဒၣ်ဝဲဒီး, အဘီအမုၢ်က ကျၢၤဝဲဒ်လဲၣ်. အဂ့ၢ်ဒ်အံၤ, သုစံးလၢယဟီထီၣ်ကွံာ်တၢ် နါလၢဘၤဧၤလစဘူာ်လီၤ. ¹⁹ ဒီးယမ့ၢ်ဟီထီၣ်ကွံာ်တၢ်နါ လၢဘၤဧၤလစဘူာ်ဒီး, သုဖိခွါတဖၣ်ဟီထီၣ်ကွံာ်တၢ်နါ လၢမတၤတဂၤလဲၣ်. မၤသးဒ်န့ၣ်ဒီးအဝဲသ့ၣ်ကမ့ၢ်ပှၤစံၣ် ညီၣ်သုလီၤ. ²⁰ မ့မ့ၢ်ယမ့ၢ်ဟီထီၣ်ကွံာ်တၢ်နါလၢယွၤအ စုမုၢ်စုနၢဒီး, မ့ၢ်မးယွၤအဘီအမုၢ်ဟဲချုးန့ၢ်သုလီၤ.

²¹ ပှၤအဆူၣ်အိၣ်ဒီးအစုကဝဲၤ ပၢၤအဟံၣ်ဒၣ်ဝဲအဖၢမုၢ် ဒီး, အတၢ်ဖိတၢ်လံၤအိၣ်ကျၢၤဝဲလီၤ. ²² ဘၣ်ဆၣ်ဒီးတုၤ ပှၤအဂံၢ်အဘါဆူၣ်န့ၢ်အီၤတဂၤ ဟဲဒီးမၤနၢၤအီၤဒီး, က ဟံးန့ၢ်ကွံာ်ကယဲၢ်အစုကဝဲၤ လၢအသန့ၤအသးလၢအီၤ, ဒီးနီၤဖးအတၢ်ဖိတၢ်လံၤလီၤ.

²³ ပှၤလၢအတအိၣ်ဘၣ်ဒီးယၤအံၤ, မ့ၢ်အထီဒါယၤလီၤ. ဒီးပှၤလၢအတထၢဖှိၣ်ဘၣ်တၢ်ဒီးယၤအံၤ, မ့ၢ်အမၤလီၤ ပြံလီၤပြါတၢ်လီၤ.

²⁴ တုၤတၢ်နါတဒုဟးထီၣ်ကွံာ်လၢပှၤကညီအလိၤ, ဒီး ဟးဝဲလၢဃဲာ်ခိၣ်ဃဲာ်လာ် ဃုတၢ်အိၣ်ဘှံးအလီၢ်, ဒီး တထံၣ်န့ၢ်ဘၣ်ဝဲဒီး, စံးဝဲဒၣ်, ယကက့ၤက့ၤဆူယဟံၣ် လၢယဟးထီၣ်ကွံာ်လၢအပူၤလီၤ. ²⁵ ဒီးက့ၤက့ၤဝဲ, ဒီးထံၣ် န့ၢ်ဝဲလၢအအိၣ်ခွဲအသး, ဒီးကတဲာ်ကတီၤအသးလီၤ.―

²⁶ တုၤနုၤတစုလဲၤဟံးန့ၢ်တၢ်နါ လၢအအၢန့ၢ်အကစၢ်ဒၣ်ဝဲ နွံဒု, ဒီးလဲၤနုာ်က့ၤဝဲ, ဒီးအိၣ်ဝဲဆိးဝဲလၢအပူၤလီၤ. ဒီး တၢ်လၢပှၤတဂၤန့ၣ် အကတၢၢ်မ့ၢ်အနးန့ၢ်အခီၣ်ထံးတ က့ၢ်လီၤ.

²⁷ ဒီးဖဲအကတိၤတၢ်အဖၢမုၢ်ဒီး, တၢ်မၤအသးလၢပှၤဂီၢ် မုၢ်အကျါ, ပိာ်မုၣ်တဂၤကိးပသူထီၣ်ဒီးစံးဘၣ်အီၤ, ဒၢ လီၢ်လၢအဒၢနၤ, ဒီးနုၢ်လၢနအီၣ်န့ၣ်, ဘၣ်ဆိၣ်ဂ့ၤဝဲ လီၤ. ²⁸ ဒီးအဝဲဒၣ်စံး, မ့ၢ်မးပှၤလၢအနၢ်ဟူယွၤအကလုၢ် အကထါ, ဒီးတိၢ်န့ၢ်ဝဲတဖၣ်န့ၣ်, ဘၣ်ဆိၣ်ဂ့ၤဝဲလီၤ.

²⁹ ဒီးပှၤဂီၢ်မုၢ်အိၣ်ဖှိၣ်ရိဖှိၣ်ကတံာ်ကတူာ်, ဒီးစံးဝဲဒၣ်, ပှၤတစိၤအံၤမ့ၢ်အအၢအသီလီၤ. ဃုဝဲလၢတၢ်ပနီၣ်လီၤ လး, ဒီးမ့တမ့ၢ်ဘၣ်စီၤယိၤနါအတၢ်ပနီၣ်လီၤလးန့ၣ်ဒီး, တၢ်တဟ့ၣ်ဘၣ်တၢ်ပနီၣ်လီၤလးလၢအီၤဘၣ်. ³⁰ အဂ့ၢ်ဒ် အံၤ, ဒ်စီၤယိၤနါကဲတၢ်ပနီၣ်လီၤလးလၢပှၤနံၤနဝ့ဖိအမဲာ် ညါအသိးန့ၣ်, ပှၤကညီဖိခွါအံၤကကဲထီၣ်တၢ်ပနီၣ်လၢ ပှၤတစိၤအံၤအမဲာ်ညါ, ဒ်န့ၣ်အသိးလီၤ.

³¹ လၢတၢ်စံၣ်ညီၣ်အပူၤန့ၣ်, ကလံၤထံးအနီၢ်ပၤမုၣ်က ဂဲၤဆၢထၢၣ်ဒီးပှၤတစိၤအံၤ, ဒီးကစံၣ်ညီၣ်ဃၣ်အီၤလီၤ. အဂ့ၢ်ဒ်အံၤ, ဒ်သိးအကနၢ်ဟူဘၣ် စီၤၡလိၤမိၤအတၢ် ကူၣ်ဘၣ်ကူၣ်သ့ဒီး, ဟဲမးဝဲလၢဟီၣ်ခိၣ်အသနၢၣ်လီၤ. ဒီးကွၢ်ကွၢ်, ပှၤလၢအဒိၣ်န့ၢ်စီၤၡလိၤမိၤ အိၣ်ဝဲဖဲအံၤတ ဂၤလီၤ. ³² လၢတၢ်စံၣ်ညီၣ်အပူၤန့ၣ်, ပှၤနံၤနဝ့ဖိကဂဲၤဆၢ ထၢၣ်ဒီးပှၤတစိၤအံၤ, ဒီးကစံၣ်ညီၣ်ဃၣ်အီၤလီၤ. အဂ့ၢ်ဒ် အံၤ, မ့ၢ်စီၤယိၤနါစံၣ်တဲၤတဲလီၤတၢ်ဒီး, အဝဲသ့ၣ်ပီၢ်ယၢ် လီၤက့ၤအသးလီၤ. ဒီးကွၢ်ကွၢ်, ပှၤလၢအဒိၣ်န့ၢ်စီၤယိၤ နါအိၣ်ဝဲဖဲအံၤတဂၤလီၤ.

³³ ပှၤတဒွဲၣ်ထီၣ်ဘၣ်မ့ၣ်အူဒၢ, ဒီးပာ်လၢတၢ်တဒၢမ့ၢ် ဂ့ၤ, လၢနာ်ဖိအဖီလာ်မ့ၢ်ဂ့ၤ, နီတဂၤဘၣ်. မ့မ့ၢ်ဒ်သိးပှၤ ဟဲနုာ်တဖၣ်ကထံၣ်အတၢ်ကပီၤဒီး, ပာ်ထီၣ်ဝဲလၢမ့ၣ်အူ ဒၢအလီၢ်အဖီခိၣ်လီၤ. ³⁴ ပနီၢ်ခိအမ့ၣ်အူဒၢအံၤ, မ့ၢ်ပမဲာ် လီၤ. မၤသးဒ်န့ၣ်ဒီးနမဲာ်မ့ၢ်ဆးဒီး, နနီၢ်ခိကအိၣ်ဒီးတၢ် ကပီၤဒီဂၤညါလီၤ, မ့မ့ၢ်နမဲာ်မ့ၢ်ယုာ်ဒီး, နနီၢ်ခိကခံးဝဲ လီၤ. ³⁵ မၤသးဒ်န့ၣ်ဒီးတၢ်ကပီၤအိၣ်လၢနပူၤန့ၣ်, ဒ်အသု တမ့ၢ်တၢ်ခံးတဂ့ၤဒီး, ပလီၢ်နသးတက့ၢ်. ³⁶ မၤသးဒ်န့ၣ် ဒီးတၢ်ကပီၤမ့ၢ်အိၣ်လၢနနီၢ်ခိဒီဂၤညါဒီး, တၢ်ခံးမ့ၢ်တ အိၣ်ဘၣ်နီတပူၤဘၣ်ဒီး, တၢ်ခဲလၢာ်ကန့ၢ်တၢ်ကပီၤထီၣ် ဒ်မ့ၣ်အူဒၢအဧူၢ်ကပီၤထီၣ်ဘၣ်နၤအသိးန့ၣ်လီၤ.

³⁷ ကတိၤတၢ်အဖၢမုၢ်ဒီး, ပှၤဖၤရံၤၡဲတဂၤ ဃ့အီၤဒ်သိး အကဟဲအီၣ်တၢ်အီၣ်လၢ ဂီၤအီၣ်လၢအသိးလီၤ. ဒီး လဲၤနုာ်ဆ့ၣ်နီၤဝဲလၢမ့ၤလၣ်ထံးလီၤ. ³⁸ ဒီးတဘျၢ*ဘၣ်ဝဲ လၢအတချုးအီၣ်တၢ်န့ၣ်ပှၤဖၤရံၤၡဲထံၣ်ဝဲဒီး ကမၢကမၣ် လီၤ. ³⁹ ဒီးကစၢ်စံးဘၣ်အီၤ, ခဲကနံၣ်အံၤပှၤဖၤရံၤၡဲသုဝဲ သ့ၣ်အံၤ, သုမၤကဆှီထီၣ်လီခီအချၢ, ဒီးသီတ့ၤအချၢ လီၤ. မ့မ့ၢ်သုပူၤလၢညါန့ၣ်, လၢပှဲၤဝဲဒီးတၢ်အီၣ်ကဘျံး အီၣ်ကဘျၣ်, ဒီးတၢ်အၢတၢ်သီလီၤ. ⁴⁰ ပှၤဟးဂီၤဖိသ့ၣ် ဧၢ, ပှၤလၢအတ့တၢ်အချၢန့ၣ်, တမ့ၢ်ဘၣ်အတ့စ့ၢ်ကီး အပူၤဘၣ်ဧါ. ⁴¹ မ့မ့ၢ်တၢ်အိၣ်လၢအပူၤတဖၣ်န့ၣ်, ဟ့ၣ် သးကညီၤတၢ်တက့ၢ်. ဒီးကွၢ်ကွၢ်, တၢ်ခဲလၢာ်မ့ၢ်တၢ် ကဆှီလၢသုဂီၢ်လီၤ. ⁴² မ့မ့ၢ်ပှၤဖၤရံၤၡဲသ့ၣ်ဧၢ, သုဘၣ် အဖှီၣ်လီၤ. အဂ့ၢ်ဒ်အံၤ, သုမၤဘူၣ်ကဖီကဘီ, ဒီးပံက နၣ်အဒိး, ဒီးတၢ်ဒိးတၢ်လၣ်တမံၤလၢ်လၢ်, အဘျၢၣ်တ ဆံန့ၣ်တဘျၢၣ်လီၤ. ဒီးသုလဲၤကပာ်တၢ်စံၣ်ညီၣ်, ဒီး ယွၤအတၢ်အဲၣ်တၢ်ကွံလီၤ. အအံၤတဖၣ်သုဂ့ၤမၤ, ဒီးအ န့ၣ်တဖၣ်သုတဂ့ၤလဲၤကပာ်ဘၣ်သုဝဲဘၣ်.

⁴³ ပှၤဖၤရံၤၡဲသ့ၣ်ဧၢ, သုဘၣ်အဖှီၣ်လီၤ. အဂ့ၢ်ဒ်အံၤ, သု အဲၣ်ဒိးလီၢ်ဆ့ၣ်နီၤအဂ့ၤကတၢၢ်လၢဘူၣ်ဘျီၣ်ပူၤ, ဒီးတၢ် ကတိၤဒိၣ်သုလၢဖၠါပူၤလီၤ.

⁴⁴ (ပှၤကွဲးလံာ်, ဒီးပှၤဖၤရံၤၡဲ, ပှၤလီတၢ်ဖိသ့ၣ်ဧၢ,) သု ဘၣ်အဖှီၣ်လီၤ. အဂ့ၢ်ဒ်အံၤ, သုလီၤဂာ်လၢပှၤသွၣ်ခိၣ် အပူၤလၢအတအိၣ်ဖျါဘၣ်ဒီး, ပှၤကညီလဲၤတၢ်က့ၤတၢ် လၢအဖီခိၣ်န့ၣ်, ဒီးတသ့ၣ်ညါဘၣ်ဝဲဘၣ်.

⁴⁵ ဒီးပှၤသ့လံာ်တၢ်သိၣ်တၢ်သီတဂၤ, ကတိၤဆၢတၢ်ဒီး စံးဘၣ်အီၤ, သရၣ်ဧၢ, နစံးတၢ်ဒ်အံၤဒီး, မ့ၢ်နဒုၣ်ဒွဲၣ်ပှၤ စ့ၢ်ကီးလီၤ. ⁴⁶ ဒီးစံးဝဲဒၣ်, ပှၤသ့လံာ်တၢ်သိၣ်တၢ်သီသု ဝဲသ့ၣ်ဧၢ, သုဘၣ်အဖှီၣ်လီၤ. အဂ့ၢ်ဒ်အံၤ, တၢ်ဝံတၢ် ယိးလၢအကီမးန့ၣ် သုပာ်ထီၣ်လၢပှၤကညီအလိၤ, ဒီး သုကစၢ်ဒၣ်သုဝဲန့ၣ်, သုတထိးဘၣ် တၢ်ဝံတၢ်ယိးန့ၣ် လၢသုစုမုၢ်စုနၢနီတဘိဘၣ်. ⁴⁷ သုဝဲသ့ၣ်ဧၢ, သုဘၣ်အဖှီၣ်လီၤ. အဂ့ၢ်ဒ်အံၤ, သုမၤထီၣ်ဝံအသွၣ်ခိၣ်အပနီၣ်, ဒီးသုပၢ်သ့ၣ်မၤသံအီၤလီၤ.―

⁴⁸ မ့ၢ်မးသုအုၣ်သုသး, ဒီးအၢၣ်လီၤအီလီၤသုပၢ်အတၢ်မၤ လီၤ. အဂ့ၢ်ဒ်အံၤ, အဝဲသ့ၣ်မၤသံအီၤ, ဒီးသုဝဲသ့ၣ်, သု မၤထီၣ်အသွၣ်ခိၣ်အပနီၣ်လီၤ. ⁴⁹ မၤသးဒ်န့ၣ်ဒီး, ယွၤ အတၢ်ကူၣ်သ့ကူၣ်ဘၣ်စံးဝဲဒၣ်, ယကမၢလီၤဝံဒီးပှၤတၢ် မၢဖိသ့ၣ်တဖၣ်ဆူအအိၣ်, ဒီးအဝဲသ့ၣ်ကမၤသံအီၤတ နီၤ, ဒီးကမၤအၢမၤနးအီၤတနီၤ, ⁵⁰ ဒ်သိးလၢစီၤဟ့းဘ့းလး အသွံၣ်တုၤလီၤလၢစီၤစကၤရယၤ လၢတၢ်မၤသံအီၤလၢ တၢ်လုၢ်အလီၢ်ဒီးတၢ်လုၢ်အဟံၣ်အဘၢၣ်စၢၤန့ၣ်, ကယဲၢ် ဝံတဖၣ်အသွံၣ်ဂၢ်လီၤအသးလၢ ဟီၣ်ခိၣ်အခီၣ်ထံးလံၤ လံၤန့ၣ်, ⁵¹ တၢ်ကဃုအီၤလၢပှၤတစိၤအံၤအစုပူၤလီၤ. မ့ၢ် မးယစံးဘၣ်သု, တၢ်ကဃုဝဲလၢပှၤတစိၤအံၤအလိၤလီၤ.

⁵² ပှၤသ့လံာ်တၢ်သိၣ်တၢ်သီသ့ၣ်ဧၢ, သုဘၣ်အဖှီၣ်လီၤ. အဂ့ၢ်ဒ်အံၤ, တၢ်သ့ၣ်ညါအနီၣ်ဝံာ်န့ၣ်, သုစိာ်ကွံာ်လံ. သုတလဲၤနုာ်ဘၣ်သုကစၢ်ဒၣ်သုဝဲဘၣ်, ဒီးပှၤလဲၤနုာ်ဝဲ တဖၣ်န့ၣ်, သုတြီအီၤလီၤ.

⁵³ ဒီးစံးဘၣ်အီၤ လၢတၢ်န့ၣ်တဖၣ်အဖၢမုၢ်ဒီး, ပှၤကွဲး လံာ်ဒီးပှၤဖၤရံၤၡဲသ့ၣ်တဖၣ်, မၤတံာ်တာ်အီၤသပှၢ်ပှၢ်, ဒီးသံကွၢ်အီၤလၢတၢ်အါမံၤ, ⁵⁴ ဒီးကွၢ်ဟုၣ်အီၤ, ဒီးဃု တုၢ်န့ၢ်အတၢ်ကတိၤ, ဒ်သိးအကဆှိးအီၤလီၤ.

၁၂

¹ လၢအဆၢအကတီၢ်န့ၣ် ပှၤဂီၢ်မုၢ်အိၣ်ဖှိၣ်ရိဖှိၣ်အက လးတဖၣ်တုၤအယီၢ်လိာ်အသးသကိးသကိး, ဒီးအဝဲ ဒၣ်စံးဘၣ်တဲဘၣ်ဆိအပျဲၢ်အဘီၣ်, ပှၤဖၤရံၤၡဲ အကိၣ် မံၣ်လၢအမ့ၢ်တၢ်လီတၢ်ဝ့ၤန့ၣ်, ဟးဆှဲးသုဝဲတက့ၢ်. ² ဒီး တၢ်လၢအကျၢၢ်ဘၢအသး, လၢအတအိၣ်ဖျါထီၣ်ဘၣ်ဝဲ န့ၣ်, တအိၣ်ဘၣ်နီတမံၤဘၣ်. ဒီးတၢ်လၢအအိၣ်တဒၢ လၢတၢ်တသ့ၣ်ညါထီၣ်ဘၣ်ဝဲန့ၣ် တအိၣ်ဘၣ်နီတမံၤ ဘၣ်. ³ မၤသးဒ်န့ၣ်ဒီး ဖဲဒၣ်သုစံၣ်တဲၤတဲလီၤတၢ်လၢ တၢ်ခံးကျါတဖၣ်န့ၣ်, ကဟူထီသါလီၤလၢတၢ်ကပီၤအ ကျါလီၤ. ဒီးတၢ်လၢသုကတိၤလၢနၢ်ပူၤလၢဒၢးပူၤန့ၣ်, တၢ်ကစံၣ်တဲၤတဲလီၤပသူထီၣ်လၢဟံၣ်ခိၣ်အဖီခိၣ်လီၤ.

⁴ ယတံၤယသကိးသ့ၣ်ဧၢ, ယစံးဘၣ်သု, ပှၤလၢအမၤ သံပနီၢ်ခိ, ဒီးလၢခံက့ၤမၤဝဲတသ့လၢၤဘၣ်နီတမံၤဘၣ် တဖၣ်န့ၣ်, ပျံၤအီၤတဂ့ၤ. ⁵ သုဂ့ၤပျံၤမတၤမတၤန့ၣ်, ယကဒုးနဲၣ်သုလီၤ. ပှၤမၤသံတၢ်အလီၢ်ခံဒီး, တ့ၢ်လီၤဝဲ ဆူလရာ်ပူၤသ့တဂၤန့ၣ်, ပျံၤအီၤတက့ၢ်. မ့ၢ်မးယစံးဘၣ် သု, ပျံၤအီၤတက့ၢ်. ⁶ ပှၤဆါထိၣ်ဖှံးယဲၢ်ဘ့ၣ်လၢတိၢ်ခံ ဘ့ၣ်တမ့ၢ်ဘၣ်ဧါ, ဒီးတၢ်တသးပ့ၤနီၣ်ဘၣ်အီၤလၢယွၤ အမဲာ်ညါနီတဘ့ၣ်ဘၣ်. ⁷ ဒီးသုခိၣ်သူအဘိဒၣ်လဲာ်န့ၣ်, ဘၣ်တၢ်ဂံၢ်အီၤခဲလၢာ်လီၤ. မၤသးဒ်န့ၣ်ဒီး, သုတပျံၤတၢ် တဂ့ၤ, သုဂ့ၤန့ၢ်ထိၣ်ဖှံးအဂီၢ်မုၢ်တက့ၢ်လီၤ.

⁸ ဒီးယစံးဘၣ်သု, ကယဲၢ်ပှၤလၢ အအၢၣ်လီၤအီလီၤ ယၤလၢ ပှၤကညီအမဲာ်ညါတဂၤဂၤန့ၣ်, ပှၤကညီဖိခွါ အံၤ, ကအၢၣ်လီၤအီလီၤအီၤလၢ ယွၤအကလူးတဖၣ်အ မဲာ်ညါလီၤ. ⁹ ဒီးပှၤလၢအသမၢယၤလၢပှၤကညီအမဲာ် ညါန့ၣ်, တၢ်ကသမၢအီၤလၢယွၤအကလူးတဖၣ်အမဲာ် ညါလီၤ. ¹⁰ ဒီးကယဲၢ်ပှၤလၢအကတိၤကမၣ်ပှၤကညီဖိခွါ အံၤတဂၤဂၤဒီး, တၢ်ကမၤပူၤဖျဲးအီၤလီၤ. မ့မ့ၢ်ပှၤလၢအ ဒုၣ်ဒွဲၣ်သးစီဆှံန့ၣ်, တၢ်တမၤပူၤဖျဲးဘၣ်အီၤဘၣ်.

¹¹ ဒီးတုၤပှၤလဲၤမိၤသုဆူဘူၣ်ဘျီၣ်ပူၤ, ဒီးပှၤသူၣ်က့သး ပှၢ်, ဒီးပဒိၣ်ပပှၢ်အအိၣ်ဒီး, မ့ၢ်သုကကတိၤပူၤဖျဲးတၢ်ဒ် လဲၣ်ဒ်လဲၣ်န့ၣ်မ့ၢ်ဂ့ၤ, မ့ၢ်သုကကတိၤတၢ်ဒ်လဲၣ်ဒ်လဲၣ်မ့ၢ် ဂ့ၤ, သုတဘၣ်ယိၣ်တဂ့ၤ. ¹² အဂ့ၢ်ဒ်အံၤ, သုဂ့ၤကတိၤတၢ် ဒ်လဲၣ်ဒ်လဲၣ်န့ၣ်, သးစီဆှံကဒုးနဲၣ်သုတဘျီဃီဖဲန့ၣ်လီၤ.

¹³ ဒီးပှၤလၢပှၤဂီၢ်မုၢ်အကျါတဂၤစံးဘၣ်အီၤ, သရၣ်ဧၢ, မၤလိာ်လၢ်ယဒီပုၢ်ဝဲၢ်ဒ်သိးအကနီၤဖးန့ၢ်ယၤ လၢတၢ်န့ၢ် သါအဆၢတက့ၢ်. ¹⁴ ဒီးအဝဲဒၣ်စံးဘၣ်အီၤ, စီၤဧၢ, မ့ၢ် မတၤပာ်ယၤလၢ ပှၤစံၣ်ညီၣ်တၢ်မ့ၢ်ဂ့ၤ, ပှၤနီၤဖးတၢ်အ ဆၢမ့ၢ်ဂ့ၤ, လၢသုဖီခိၣ်တဂၤလဲၣ်. ¹⁵ ဒီးစံးဘၣ်ပှၤတဖၣ်, တၢ်ပံာ်တၢ်ကီခဲလၢာ်န့ၣ်, တိၢ်သုသးဒီးဟးဆှဲးတက့ၢ်. အဂ့ၢ်ဒ်အံၤ, ပှၤကညီအတၢ်မူတမ့ၢ်ဘၣ်အစုလီၢ်အခီၣ် ခိၣ်အိၣ်အါအါကလဲာ်န့ၣ်ဘၣ်.

¹⁶ ဒီးစံးဘၣ်အီၤလၢတၢ်ကတိၤဒိ, ဒီးစံးဝဲဒၣ်, ပှၤအထူး အတီၤတဂၤ, အဟီၣ်ခိၣ်သၣ်ထီၣ်အါမးလီၤ. ¹⁷ ဒီးဆိက မိၣ်ဝဲလၢအသး, ဒီးစံးဝဲဒၣ်, ယကမၤဒ်လဲၣ်. အဂ့ၢ်ဒ် အံၤ, ယတၤသူၣ်တၤသၣ်န့ၣ်, ယဂၢ်ဖှိၣ်အလီၢ်တအိၣ် ဘၣ်. ¹⁸ ဒီးစံးဝဲဒၣ်, ယကမၤဒ်အံၤ, ယကဃီၢ်လီၤကွံာ်ယ ဖီ, ဒီးယကမၤဒိၣ်ထီၣ်က့ၤအီၤ, ဒီးယကဂၢ်ဖှိၣ်ယတၤ

¹⁹ သူၣ်တၤသၣ်ဒီးယတၢ်ဖိတၢ်လံၤခဲလၢာ်ဖဲန့ၣ်လီၤ. ဒီးယ ကစံးဘၣ်ယသး, သးဧၢ, နတၢ်ဖိတၢ်လံၤအါအါကလဲာ် အိၣ်ပာ်လံလၢအါနံၣ်အါလါအဂီၢ်လံ. အိၣ်ဘှံးဒီးအီၣ် တၢ်အီတၢ်, ဒီးမုာ်လၤတၢ်တက့ၢ်. ²⁰ ဘၣ်ဆၣ်ဒီးယွၤစံး ဘၣ်အီၤ, ပှၤဟးဂီၤဖိဧၢ, ခဲမုၢ်နၤအံၤတၢ်ကဃ့က့ၤနသး လၢနၤလီၤ. တုၤနုၤတစု, တၢ်ဖိတၢ်လံၤလၢနကတီၤပာ် န့ၣ်, ကကဲလၢမတၤတဂၤအတၢ်လဲၣ်. ²¹ ပှၤလၢအပာ် ဖှိၣ်တၢ်လၢအဂီၢ်ဒၣ်ဝဲ, ဒီးအစုလီၢ်အခီၣ်ခိၣ်တအိၣ်ဘၣ် ဒီးယွၤဘၣ်န့ၣ်, မ့ၢ်အမၤအသးဒ်န့ၣ်သိးလီၤ.

²² ဒီးစံးဘၣ် အပျဲၢ်အဘီၣ်, လၢတၢ်အံၤအဃိ, ယစံး ဘၣ်သု, ဘၣ်ယိၣ်တၢ်လၢ သုသးအဂီၢ်လၢ သုကအီၣ် တၢ်ဒ်လဲၣ်ဒ်လဲၣ်အဂ့ၢ်တဂ့ၤ. ဒီးလၢသုနီၢ်ခိအဂီၢ်လၢသု ကကူတၢ်သိးတၢ်ဒ်လဲၣ်ဒ်လဲၣ်အဂ့ၢ်တဂ့ၤ, သးန့ၣ်ဂ့ၤန့ၢ် တၢ်အီၣ်တၢ်အီတက့ၢ်လီၤ. ²³ ဒီးနီၢ်ခိန့ၣ်, ဂ့ၤန့ၢ်တၢ်ကူ တၢ်သိးတက့ၢ်လီၤ. ²⁴ ကွၢ်ဆိကမိၣ်စိးဝၣ်ဃးတက့ၢ်. တ ဖှံဘၣ်တၢ်ဘၣ်, တကူးဘၣ်တၢ်ဘၣ်, အသိၣ်အဖီတ အိၣ်ဘၣ်, ဒီးယွၤဘုၣ်အီၣ်ဘုၣ်အီအီၤလီၤ. သုဂ့ၤန့ၢ်ထိၣ် ဖိလံၣ်ဖိဆံးဒိၣ်လဲၣ်. ²⁵ မ့ၢ်မတၤဘၣ်ယိၣ်တၢ်သတးဒီး, ထုးထီထီၣ်အယူာ်တပျၢ်ဧိၤသ့တဂၤလဲၣ်. ²⁶ မၤသးဒ်န့ၣ် ဒီးတၢ်လၢအဆံးကတၢၢ်န့ၣ်, သုမၤမ့ၢ်တသ့ဘၣ်ဒီး, သု ဘၣ်ယိၣ်လၢတၢ်ဂၤတဖၣ်အဃိဘၣ်မနုၤလဲၣ်.

²⁷ တၢ်လၢဖီဒ့ၣ်ညါန့ၣ်, မ့ၢ်အဒိၣ်ထီၣ်ဝဲ ဒ်လဲၣ်ဒ်လဲၣ် န့ၣ်, ကွၢ်ဆိကမိၣ်တက့ၢ်. တမၤဘၣ်တၢ်ဘၣ်, တလ့ၢ် ဘၣ်တၢ်ဘၣ်. ဘၣ်ဆၣ်ဒီးယစံးဘၣ်သု, စီၤၡလိၤမိၤအိၣ် ဒီးအကဟုအကညီၢ်ခဲလၢာ်န့ၣ်, ကူတၢ်သိးတၢ်တဂ့ၤထဲ သိးဒီး ဖီဒ့ၣ်ညါတဖိးန့ၣ်ဘၣ်. ²⁸ သုနာ်တၢ်စှၤသ့ၣ်ဧၢ, ယွၤမ့ၢ်ဒုးကူဒုးသိးနီၣ်ဧိၤမံၤဧိၤလၢ အအံၤတနံၤအိၣ်လၢ တၢ်ပျီပူၤဒီးခဲဂီၤတနံၤ ဘၣ်တၢ်ဘျုးလီၤကွံာ်လၢဖၣ်က ပူၤဒီး, ကဒုးကူဒုးသိးသု အါန့ၢ်အန့ၣ်တက့ၢ်ဆံးဒိၣ် လဲၣ်. ²⁹ သုကအီၣ်တၢ်သုကအီတၢ်မနုၤမနုၤန့ၣ်, သုတ ဃုတဂ့ၤ. ဒီးသုတဘၣ်ယိၣ်ဘၣ်ဘီတဂ့ၤ. ³⁰ အဂ့ၢ်ဒ်အံၤ, တၢ်တဖၣ်န့ၣ်, ပှၤကလုာ်တဖၣ်လၢဟီၣ်ခိၣ်ချၢအံၤ, ဃု ဝဲခဲလၢာ်လီၤ. ဒီးသုပၢ်သ့ၣ်ညါလၢသုန့ၢ်ဘၣ်တၢ်တဖၣ် န့ၣ်အလီၢ်အိၣ်လီၤ. ³¹ မ့မ့ၢ်ဃုယွၤအဘီအမုၢ်တက့ၢ်. ဒီး တၢ်ကပာ်ဖှိၣ်တၢ်တဖၣ်န့ၣ်ခဲလၢာ်ဒီးသုလီၤ. ³² သိလၢအစှၤတဖုဧၢ, ပျံၤတၢ်တဂ့ၤ, အဂ့ၢ်ဒ်အံၤ, ဘၣ်သုပၢ်အသးလၢ အကဟ့ၣ်သုလၢဘီဧိၤမုၢ်ဧိၤန့ၣ်လီၤ.―

³³ သုစုလီၢ်သုခီၣ်ခိၣ်န့ၣ်, ဆါလီၤကွံာ်ဒီး ဟ့ၣ်သးကညီၤ တၢ်တက့ၢ်. ဒီးမၤန့ၢ်သုဂီၢ်လၢထၢၣ်လၢအလီၢ်လံၤဝဲတ သ့ဘၣ်, တၢ်လုၢ်ဒိၣ်ပှ့ၤဒိၣ်လၢအလၢာ်တသ့ဘၣ်လၢမူ ခိၣ်, ဖဲတၢ်ဘျၣ်တသုးဘူးဘၣ်အသးဘၣ်, ဒီးတၢ်အဃၢ် တအီၣ်ဂီၤဘၣ်တၢ်န့ၣ်တက့ၢ်. ³⁴ အဂ့ၢ်ဒ်အံၤ, ဖဲသုတၢ် လုၢ်ဒိၣ်ပှ့ၤဒိၣ်အိၣ်ဝဲအလီၢ်န့ၣ်သုသးကအိၣ်ဝဲဖဲန့ၣ်လီၤ.

³⁵ ကံၢ်တူာ်သုယီၢ်ဒ့, ဒီးအိၣ်ဒီးသုမ့ၣ်အူဒၢ ကဲၤကပီၤ ထီၣ်တက့ၢ်. ³⁶ အိၣ်သုဝဲဒ်ပှၤလၢအကွၢ်လၢ်အကစၢ်အ ကျဲတုၤအဟဲက့ၤလၢမူးပူၤ, ဒ်သိးအကအိးထီၣ်တၢ်လၢ အဂီၢ်တကီၢ်ခါ, ဖဲအဟဲက့ၤဒီးဒိတကျိာ်တၢ်န့ၣ်တက့ၢ်.―

³⁷ အခ့အပှၤလၢအကစၢ်ဟဲက့ၤထံၣ်န့ၢ်လၢ အဆိးသီဝဲတ ဖၣ်န့ၣ်, ဘၣ်ဆိၣ်ဂ့ၤဝဲလီၤ. ယစံးဘၣ်သုတီတီလၢအ ကစၢ်ကကံၢ်တူာ်အယီၢ်ဒ့, ဒီးမၢအဆ့ၣ်နီၤ, ဒီးကဟဲမၤ အီၤလၢအခ့အပှၤအတၢ်မၤလီၤ. ³⁸ ဒီးပှၤခိးတၢ်ခံတီၤတ တီၤမ့ၢ်ဂ့ၤ, သၢတီၤတတီၤမ့ၢ်ဂ့ၤ, အကစၢ်မ့ၢ်ဟဲက့ၤထံၣ် န့ၢ်တၢ်မၤအသးဒ်န့ၣ်ဒီး, အခ့အပှၤတဖၣ်န့ၣ်, ဘၣ်ဆိၣ် ဂ့ၤဝဲလီၤ. ³⁹ ဒီးတၢ်အံၤသ့ၣ်ညါတက့ၢ်. ဟံၣ်ကစၢ်မ့ၢ်သ့ၣ် ညါတၢ်အဆၢအကတီၢ်လၢတၢ်ဟုၣ်တၢ်ဘျၣ် ကဟဲဝဲ ဒီး, ဒ်သိးအသုတဘၢၣ်ဖျိအဟံၣ်တဂ့ၤဒီး, ကဆိးသီ တ့ၢ်လီၤ. ⁴⁰ မၤသးဒ်န့ၣ်ဒီးအိၣ်ကတဲာ်ကတီၤသုသးတ က့ၢ်. အဂ့ၢ်ဒ်အံၤ, ဖဲနၣ်ရံၣ်လၢသုတဆိကမိၣ်ဘၣ်န့ၣ်, ပှၤကညီဖိခွါအံၤဟဲဝဲလီၤ.

⁴¹ ဒီးစီၤပ့းတရူးစံးဘၣ်အီၤ, ကစၢ်ဧၢ, တၢ်ကတိၤဒိအံၤ, မ့ၢ်နစံးဘၣ်တဲဘၣ် ပှၤပဝဲအံၤ, မ့ၢ်နစံးဘၣ်တဲဘၣ်စ့ၢ် ကီးပှၤခဲလၢာ်လဲၣ်. ⁴² ဒီးကစၢ်စံးဝဲဒၣ်, အခ့အပှၤလၢအ ကလုၢ်တီ, ဒီးအကူၣ်တၢ်သ့, လၢအကစၢ်ကပာ်ဝဲလၢ အပှၤမၤတၢ်ဖိအဖီခိၣ်, ဒ်သိးအကဒုးအီၣ်အတၢ်ဖဲအဆၢ အကတီၢ်ဘၣ်န့ၣ်, မ့ၢ်မတၤတဂၤလဲၣ်. ⁴³ အခ့အပှၤလၢ အကစၢ်ဟဲက့ၤထံၣ်န့ၢ်လၢအမၤဝဲဒ်န့ၣ်, ဘၣ်ဆိၣ်ဂ့ၤဝဲ လီၤ. ⁴⁴ ယစံးဘၣ်တဲဘၣ်သုနီၢ်နီၢ်လၢအကပာ်ထီၣ်အီၤ လၢအတၢ်ဖိတၢ်လံၤခဲလၢာ်အခိၣ်လီၤ. ⁴⁵ ဘၣ်ဆၣ်ဒီးအ ခ့အပှၤမ့ၢ်စံးဝဲလၢအသး, ယကစၢ်မၤယံာ်မၤနီၢ်အသး လီၤ, ဒီးမ့ၢ်တီၢ်အခ့အပှၤပိာ်မုၣ်ဒီးပိာ်ခွါတဖၣ်, ဒီးအီၣ် တၢ်အီတၢ်, ဒီးအီမူၤအသးဒီး, ဖဲမုၢ်နံၤမုၢ်နၤလၢအတ ကွၢ်လၢ်ဘၣ်အကျဲ, ဒီးနၣ်ရံၣ်လၢအတသ့ၣ်ညါဘၣ်ဝဲ န့ၣ်, ⁴⁶ ကုၢ်တဂၤန့ၣ်အကစၢ်ကဟဲက့ၤ, ဒီးကဒီၣ်တဲာ် ကွံာ်အီၤခံကူာ်, ဒီးကပာ်န့ၢ်အဂီၢ်ဒီးပှၤတစူၢ်တနာ်ဘၣ် တၢ်န့ၣ်အသိးလီၤ.

⁴⁷ ဒီးအခ့အပှၤ လၢအသ့ၣ်ညါအကစၢ်အသး, ဒီးတ ကတီၤပာ်ဘၣ်အသး, ဒီးတမၤဘၣ်ဝဲဖဲအကစၢ်အသး န့ၣ်, ကဘၣ်တီၢ်အါဘီလီၤ. ⁴⁸ မ့မ့ၢ်ပှၤလၢအတသ့ၣ်ညါ ဘၣ်, ဒီးမၤဝဲဖဲအဂ့ၤဘၣ်တီၢ်န့ၣ်ဒီး, ကဘၣ်တီၢ်စှၤဘီ လီၤ. ဒီးကယဲၢ်ပှၤလၢတၢ်ဟ့ၣ်လီၤအီၤလၢအအါတဂၤ လၢ်လၢ်န့ၣ်, တၢ်ကဃုက့ၤတၢ်အါလၢအီၤလီၤ. ဒီးပှၤ လၢတၢ်ပာ်န့ၢ်အီၤလၢအအါန့ၣ်, တၢ်ကဃ့က့ၤတၢ်အါ တက့ၢ်လၢအီၤလီၤ.

⁴⁹ ယဟဲတ့ၢ်လီၤ မ့ၣ်အူလၢဟီၣ်ခိၣ်ချၢလီၤ. ဒီးမ့ၢ်ကဲၤ ထီၣ်လံဒီး, ယဆၢဒံးလၢမနုၤလဲၣ်. ⁵⁰ ယတၢ်ဒိးဘျၢ*, လၢယဘၣ်ဒိးဘျၢ*ယသးန့ၣ်အိၣ်ဝဲ, ဒီးယတချုးဒိးဒံး ဘၣ်ဒီး, တၢ်သနံးယၤဆံးဒိၣ်လဲၣ်. ⁵¹ မ့ၢ်သုဆိကမိၣ်လၢ ယဟဲဟ့ၣ်တၢ်ဃူတၢ်ဖိး လၢဟီၣ်ခိၣ်ချၢန့ၣ်ဧါ. ယစံး ဘၣ်သု, တမ့ၢ်ဘၣ်. မ့ၢ်တၢ်လီၤမုၢ်လီၤဖးလီၤ. ⁵² အဂ့ၢ်ဒ် အံၤ, တုၤအံၤဆူညါပှၤအိၣ်လၢဟံၣ်တဖျၢၣ်ယဲၢ်ဂၤန့ၣ်, ကလီၤဖးသၢဂၤထီဒါခံဂၤ, ဒီးခံဂၤထီဒါသၢဂၤလီၤ. ⁵³ ပၢ် ဒီးအဖိခွါ, ဒီးဖိခွါဒီးအပၢ်, မိၢ်ဒီးအဖိမုၣ်, ဒီးဖိမုၣ်ဒီး အမိၢ်, မံၤပှၢ်ပိာ်မုၣ်ဒီးအဒဲၣ်, ဒီးဒဲၣ်ဒီးအမံၤပှၢ်ပိာ်မုၣ်တ ဖၣ်န့ၣ်, ကလီၤဖးထီဒါလိာ်အသးလီၤ.

⁵⁴ ဒီးစံးဘၣ်ပှၤဂီၢ်မုၢ်, တုၤသုထံၣ်တၢ်အၢၣ်ထီၣ်လၢမုၢ် နုာ်ဒီး, သုစံးတကီၢ်ခါလၢတၢ်ကဟဲစူၤဒီးတၢ်မၤအသး ဒ်န့ၣ်လီၤ. ⁵⁵ ဒီးတုၤကလံၤဟဲလၢကလံၤထံးဒီး, သုစံး လၢတၢ်ကကိၢ်ဒီးတၢ်မၤအသးလီၤ. ⁵⁶ ပှၤလီတၢ်ဖိသ့ၣ် ဧၢ, ဟီၣ်ခိၣ်ဒီးမူခိၣ်အမဲာ်န့ၣ်, သုကွၢ်နီၣ်သ့လီၤ. မ့မ့ၢ် အဆၢအကတီၢ်အံၤ, ဘၣ်မနုၤလၢ သုတကွၢ်နီၣ်ဘၣ် လဲၣ်. ⁵⁷ ဒီးဖဲသုသးဒၣ်သုဝဲစ့ၢ်ကီး, ဘၣ်မနုၤလၢသုတစံၣ် ညီၣ်လၢတၢ်အတီန့ၣ်လဲၣ်. ⁵⁸ အဂ့ၢ်ဒ်အံၤ, ဖဲနလဲၤတၢ်လၢ ကျဲဒီးနဒုၣ်နဒါဆူ ပဒိၣ်အအိၣ်ဒီး, ဒ်သိးနကပူၤဖျဲးလၢ အီၤဒီး, ဂုာ်ကျဲးစၢးတၢ်တက့ၢ်. မ့တမ့ၢ်ဘၣ်ဒီးကဟ့ၣ် လီၤနၤလၢပှၤစံၣ်ညီၣ်ကွီၢ်, ဒီးပှၤစံၣ်ညီၣ်ကွီၢ်ကဟ့ၣ်လီၤ နၤလၢတၢ်အခိၣ်, ဒီးတၢ်အခိၣ်ကတ့ၢ်လီၤနၤဆူဃိာ်ပူၤ လီၤ. ⁵⁹ ယစံးဘၣ်သု, ပှာ်လၢအကတၢၢ်တဘ့ၣ်န့ၣ်, နတ ချုးလိးတူာ်ဒံးဘၣ်ဒီး, နတထူၣ်ဖျဲးထီၣ်ဘၣ်ဖဲန့ၣ်ဘၣ်.

၁၃

¹ ဒီးအကတီၢ်ဖဲန့ၣ်, ပှၤအိၣ်ဝဲတနီၤနီၤလၢအစံးဘၣ်တဲ ဘၣ်အီၤလၢ ပှၤကၤလံၤလါဖိတဖၣ် လၢစီၤပံၤလးမၤ ကျီၣ်ကျဲအသွံၣ်ဒီးအတၢ်လုၢ်အဂ့ၢ်အကျိၤလီၤ. ² ဒီးယ့ၣ် ရှူးကတိၤဆၢတၢ်ဒီးစံးဘၣ်အီၤ, ပှၤကၤလံၤလါဖိတဖၣ် အံၤဘၣ်တၢ်ဒ်န့ၣ်ဒီး, မ့ၢ်သုဆိကမိၣ်လၢအမ့ၢ်ပှၤတၢ်ဒဲး ဘးဖိအၢန့ၢ် ကယဲၢ်ပှၤကၤလံၤလါဖိခဲလၢာ်တက့ၢ်ဧါ.―

³ ယစံးဘၣ်သု, တမ့ၢ်ဘၣ်. မ့မ့ၢ်သုမ့ၢ်တပီၢ်ယၢ်လီၤက့ၤ သုသးဘၣ်ဒီး, သုဝဲဒ်န့ၣ်အသိးကတုၤလၢတၢ်ဟးဂီၤခဲ လၢာ်လီၤ. ⁴ ဒီးပှၤတဆံဃိးဂၤလၢတၢးထီၡံလိၣ်လီၤပှီၢ် လၢအဖီခိၣ်, ဒီးမၤသံအီၤန့ၣ်, မ့ၢ်သုဆိကမိၣ်အမ့ၢ်ပှၤ တၢ်ဒဲးဘးဖိအၢန့ၢ်ပှၤအိၣ်လၢယရူၤၡလ့ၣ် ခဲလၢာ်တက့ၢ် ဧါ. ⁵ ယစံးဘၣ်သု, တမ့ၢ်ဘၣ်. မ့မ့ၢ်သုမ့ၢ်တပီၢ်ယၢ် လီၤက့ၤသုသးဘၣ်ဒီး, သုဝဲဒ်န့ၣ်အသိးကတုၤလၢတၢ် ဟးဂီၤခဲလၢာ်လီၤ.

⁶ ဒီးကတိၤဒိတၢ်အံၤ, မတၤတဂၤအချၢၣ်ဒၢသူၣ်အသး လၢအတၤသၣ်အလီၢ်ပူၤ အိၣ်ဝဲတထံး, ဒီးလဲၤဃုတၤ သၣ်လၢအလိၤ, ဒီးတထံၣ်န့ၢ်ဘၣ်ဝဲဘၣ်. ⁷ ဒီးစံးဘၣ် ပှၤလၢအပၢၤတၤသၣ်အလီၢ်တဂၤန့ၣ်, ကွၢ်ကွၢ်, ယဟဲ ဃုလံမးတၤသၣ်လၢချၢၣ်ဒၢတထံးအံၤသၢနံၣ်လံ, ဒီးယ တထံၣ်န့ၢ်ဘၣ်. ကူာ်ကွံာ်အီၤတက့ၢ်. ဘၣ်မနုၤလၢအ အိၣ်နိးစ့ၢ်ကီးဟီၣ်ခိၣ်လဲၣ်. ⁸ ဒီးအဝဲဒၣ်ကတိၤဆၢတၢ် ဒီးစံးဘၣ်အီၤ, ကစၢ်ဧၢ, အအံၤတနံၣ်အံၤစ့ၢ်ကီးကအိၣ် ဒၣ်ကလိာ်ဝဲ, တုၤယခူၣ်ဘှဲၣ်တရံးအီၤ, ဒီးပာ်တၢ်အ့ၣ် လၢအခီၣ်ထံးတက့ၢ်. ဒီးကသၣ်ထီၣ်ဝဲသ့ၣ်သ့ၣ်လီၤ.―

⁹ မ့တမ့ၢ်ဘၣ်ဒီးနကကူာ်ကွံာ်အီၤလၢခံလီၤ.

¹⁰ ဒီးလၢ မုၢ်အိၣ်ဘှံးနံၤတနံၤန့ၣ်, သိၣ်က့ၤသီက့ၤတၢ် လၢဘူၣ်ဘျီၣ်တဖျၢၣ်အပူၤ, ¹¹ ဒီးကွၢ်ကွၢ်, ပှၤလၢတၢ်နါ အိၣ်လၢအလိၤ, ဒီးဘၣ်တၢ်နးတၢ်ဖှီၣ်တဆံဃိးနံၣ်, ပိာ် မုၣ်အိၣ်ဝဲတဂၤလီၤ. ဒီးသကူးဝဲဒီးစူၣ်ဘျၢထီၣ်အသးတ ကဲဘၣ်လ့ၤတက့ၤဘၣ်. ¹² ဒီးယ့ၣ်ရှူးထံၣ်အီၤ, ဒီးကိးဃီၤ အီၤ, ဒီးစံးဘၣ်အီၤ, နီၢ်ဧၢ, နတၢ်ဆါဘျါက့ၤလံ. ¹³ ဒီးပာ် အစုလၢအလိၤ, ဒီးစူၣ်ဘျၢထီၣ်က့ၤအသးတကီၢ်ခါဒီး စံးထီၣ်ပတြၢၤထီၣ်ယွၤလီၤ. ¹⁴ ဒီးယ့ၣ်ရှူးမၤဘျါက့ၤတၢ် လၢအိၣ်ဘှံးအနံၤသတးဒီး, ပှၤဘူၣ်ဘျီၣ်အခိၣ်တဂၤအ သးဒိၣ်ထီၣ်ဝဲ, ဒီးကတိၤဆၢတၢ်ဒီးစံးဘၣ်ပှၤဂီၢ်မုၢ်, ပှၤ မၤတၢ်အနံၤအိၣ်ဃုနံၤလီၤ. မၤသးဒ်န့ၣ်ဒီးလၢနံၤအန့ၣ် တဖၣ်ဟဲဒိးမၤဘျါက့ၤသုသးတက့ၢ်, ဒီးတမ့ၢ်ဘၣ်လၢ မုၢ်အိၣ်ဘှံးအနံၤဘၣ်. ¹⁵ မၤသးဒ်န့ၣ်ဒီးကစၢ်ကတိၤဆၢ တၢ်ဒီးစံးဘၣ်အီၤ, ပှၤလီတၢ်ဖိသ့ၣ်ဧၢ, သုဝဲကိးဂၤဒဲးန့ၣ်, သုဂီၤဖံးမ့ၢ်ဂ့ၤ, သုကသ့ၣ်ယီၤမ့ၢ်ဂ့ၤ, သုပျၢ်အီၤလၢအ လီၢ်, ဒီးလဲၤမိၤဒုးအီအထံ လၢအိၣ်ဘှံးအနံၤတမ့ၢ်ဘၣ် ဧါ. ¹⁶ ဒီးပှၤလၢမုၣ်ကီၤလံၢ်စၢဃာ်အီၤ, ကွၢ်ကွၢ်, တဆံ ဃိးနံၣ်ညါ, စီၤအၤဘြၤဟၣ်အဖိမုၣ်တဂၤအံၤ, ဘၣ်တၢ် ပျၢ်ကွံာ်အီၤလၢအတၢ်စၢဃာ် လၢမုၢ်အိၣ်ဘှံးအနံၤန့ၣ်, တဘၣ်ဘၣ်ဧါ. ¹⁷ ဒီးကတိၤတၢ်န့ၣ်တဖၣ်ဒီး, အဒုၣ်အ ဒါခဲလၢာ်အမဲာ်ဆှး, ဒီးမ့ၢ်ကယဲၢ်တၢ်လီၤဆီလီၤလးလၢ အမၤအသးလၢအစုပူၤဒီး, ပှၤဂီၢ်မုၢ်အသူၣ်ခုသးခုခဲလၢာ် လီၤ.

¹⁸ ဒီးစံးဝဲဒၣ်, ယွၤအဘီအမုၢ်န့ၣ်လီၤဂာ်မနုၤလဲၣ်, ဒီး မ့ၢ်ယကဒိလီၤအီၤလၢမနုၤတမံၤလဲၣ်. ¹⁹ မ့ၢ်အလီၤဂာ်သ ဘၣ်အချံလၢ ပှၤတဂၤသူၣ်လီၤဝဲလၢအတၤသၣ်အလီၢ် အသိးန့ၣ်လီၤ. ဒီးမဲထီၣ်ဝဲ, ဒီးကဲထီၣ်လၢအထံဖးဒိၣ်, ဒီးထိၣ်ဖိလံၣ်ဖိယူၤလၢတၢ်ဖးဖီန့ၣ်, ဟဲစီၢ်လီၤအိၣ်ဘှံး လၢအဒ့ခံဒ့လိၤလီၤ.

²⁰ ဒီးစံးကဒီးဝဲ, ယွၤအဘီအမုၢ်န့ၣ်, ယကဒိလီၤအီၤလၢ မနုၤတမံၤလဲၣ်. ²¹ လီၤဂာ်ကိၣ်မံၣ်လၢပိာ်မုၣ်တဂၤဟံးန့ၢ် ဒီးဒၢနုာ်လၢကိၣ်ကမူၣ် သၢစ့အၤအပူၤတုၤအဖးထီၣ်ဝဲခဲ လၢာ်န့ၣ်လီၤ.

²² ဒီးလဲၤဝဲလၢ ခူဧိၤဝ့ၢ်ဧိၤဒီး ဒူဧိၤသဝီဧိၤကွ့ၢ်ကွ့ၢ်, ဒီး သိၣ်က့ၤသီက့ၤတၢ်, ဒီးလဲၤကျဲဆူယရူၤၡလ့ၣ်လီၤ.

²³ ဒီးမတၤတဂၤစံးဘၣ်အီၤ, ကစၢ်ဧၢ, ပှၤလၢအတုၤဝဲ လၢတၢ်အုၣ်က့ၤခီၣ်က့ၤအီၤန့ၣ်, မ့ၢ်အစှၤဂၤဧါ. ²⁴ ဒီးအဝဲ ဒၣ်စံးဘၣ်ပှၤတဖၣ်န့ၣ်, ဂုာ်လဲၤနုာ်ဖျိကျဲစၢၤအအံၣ်တ က့ၢ်. အဂ့ၢ်ဒ်အံၤ, ယစံးဘၣ်သု, ပှၤအါဂၤကဃုလဲၤနုာ် ဝဲ, ဒီးလဲၤနုာ်တသ့ဘၣ်. ²⁵ တုၤဟံၣ်ကစၢ်ဂဲၤဆၢထၢၣ်, ဒီးကးတံာ်ဃာ်တြဲၤ, ဒီးသုဆၢထၢၣ်လၢခိ, ဒီးဒိတကျိာ် တြဲၤဒီးစံး, ကစၢ်ဧၢ, ကစၢ်ဧၢ, အိးထီၣ်န့ၢ်ပဂီၢ်တက့ၢ်, ဒီးကစံးဆၢတၢ်, ဒီးကစံးဘၣ်သု, သုဟဲလၢလဲၣ်လၢ လဲၣ်န့ၣ်, ယတသ့ၣ်ညါဘၣ်သုဘၣ်. ²⁶ တုၤနုၤတစုသု ကစံး, ပဝဲဒၣ်အံၤ, ပအီၣ်တၢ်ဒီးပအီတၢ်လၢနမဲာ်ညါ, ဒီးနသိၣ်က့ၤသီက့ၤတၢ်လၢပကျဲအပူၤလီၤ. ²⁷ ဒီးအဝဲဒၣ် ကစံး, ယစံးဘၣ်သု, သုဟဲလၢလဲၣ်လၢလဲၣ်န့ၣ်, ယတ သ့ၣ်ညါဘၣ်သုဘၣ်. သုမၤတၢ်အၢတၢ်သီခဲလၢာ်သ့ၣ် ဧၢ, ဟးဖးဒီးယၤတက့ၢ်. ²⁸ တုၤသုထံၣ်ဘၣ်စီၤအၤဘြၤ ဟၣ်ဒီးစီၤအံၤစဲး, ဒီးစီၤယၤကိာ်, ဒီးဝံခဲလၢာ်အိၣ်လၢ ယွၤအဘီအမုၢ်အပူၤ, ဒီးသုဘၣ်ဟီထီၣ်ကွံာ်လၢခိဒီး, တၢ်ဘၣ်ဟီၣ်တၢ်ဘၣ်ယၢၤဒီး တၢ်မဲအ့ၣ်တဃံးကအိၣ်ဝဲ ဖဲန့ၣ်လီၤ. ²⁹ ဒီးပှၤကဟဲလၢမုၢ်နုာ်, ဒီးမုၢ်ထီၣ်, ဒီးကလံၤ စိး, ဒီးကလံၤထံး, ဒီးကဆ့ၣ်နီၤလၢယွၤအဘီအမုၢ်အပူၤ လီၤ. ³⁰ ဒီးကွၢ်ကွၢ်, ပှၤအိၣ်လၢခံတဖၣ်န့ၣ်ကအိၣ်က့ၤလၢ ညါဒီးပှၤအိၣ်လၢညါတဖၣ်န့ၣ်, ကအိၣ်က့ၤလၢခံလီၤ.

³¹ တၢ်လၢမုၢ်တနံၤန့ၣ်, ပှၤဖၤရံၤၡဲတနီၤနီၤဟဲဆူအအိၣ် ဒီးစံးဘၣ်အီၤ, ဟးထီၣ်ကွံာ်ဖဲအံၤတက့ၢ်. အဂ့ၢ်ဒ်အံၤ, စီၤဟ့ၤရိာ်အသးအိၣ်လၢအကမၤသံနၤလီၤ. ³² ဒီးစံးဘၣ် အဝဲသ့ၣ်, လဲၤစံးဘၣ်တဲဘၣ်ထွံၣ်ဟီၣ်ခိၣ်အဝဲန့ၣ်, ကွၢ် ကွၢ်, မုၢ်မဆါတနံၤအံၤ, ဒီးခဲဂီၤန့ၣ်, ယဟီထီၣ်ကွံာ် တၢ်နါဒီးမၤဘျါက့ၤတၢ်ဆူးတၢ်ဆါ, ဒီးလၢသၢနံၤတနံၤ န့ၣ်ယကလၢထီၣ်ပှဲၤထီၣ်လီၤ. ³³ မ့မ့ၢ်မုၢ်မဆါတနံၤအံၤ, ဒီးခဲဂီၤ, ဒီးခဲတဂီၤအံၤ, ယဘၣ်လဲၤတၢ်လီၤ. အဂ့ၢ်ဒ်အံၤ, မ့တမ့ၢ်ဘၣ်လၢယရူၤၡလ့ၣ်အပူၤဘၣ်ဒီး, ဝံတုၤတၢ်ဟး ဂီၤတသ့ဘၣ်လီၤ.

³⁴ ယရူၤၡလ့ၣ်ဧၢ, ယရူၤၡလ့ၣ်ဧၢ, နဲဒၣ်အံၤ, နမၤသံဝံတ ဖၣ်, ဒီးပှၤလၢတၢ်မၢလီၤအီၤဆူနအိၣ်တဖၣ် နကွံာ်အီၤ လၢလၢၢ်လီၤ. ဒ်ဆီမိၢ်ပှၢ်ဒုးအိၣ်ဖှိၣ်အဖိလၢအဒံးဆ့လာ် အသိးန့ၣ်, ယသးအိၣ်လၢယကဒုးအိၣ်ဖှိၣ်နဖိအဘျီဆံး အါလဲၣ် မ့မ့ၢ်သုဝဲသ့ၣ်အံၤ, သုသးတအိၣ်ဘၣ်. ³⁵ ကွၢ် ကွၢ်, တၢ်လဲၤသဒၣ်သုဟံၣ် (အိၣ်သယုၢ်) လီၤ ဒီးယစံး ဘၣ်တဲဘၣ်သုတီတီ, လၢသုတထံၣ်လၢၤဘၣ်ယၤတုၤ လီၤလၢအမုၢ်အလါဘၣ်လၢသုကစံး, ပှၤလၢအဟဲလၢ ယွၤအမံၤန့ၣ်, မ်အဘၣ်တၢ်ဆိၣ်ဂ့ၤတက့ၢ်န့ၣ်လီၤ.

၁၄

¹ ဒီးတၢ်မၤအသးလၢအိၣ်ဘှံးအနံၤ, ဖဲအလဲၤအီၣ်တၢ် လၢ ပှၤဖၤရံၤၡဲအဒိၣ်တဂၤအဟံၣ်ပူၤဒီး, ပှၤတဖၣ်ကွၢ် ဟုၣ်အီၤလီၤ. ² ဒီးကွၢ်ကွၢ်, ပှၤဆါညိးထံတဂၤအိၣ်လၢ အမဲာ်ညါလီၤ. ³ ဒီးယ့ၣ်ရှူးကတိၤဆၢတၢ်ဒီး စံးဘၣ်ပှၤသ့လံာ်တၢ်သိၣ်တၢ်သီဒီး ပှၤဖၤရံၤၡဲသ့ၣ်တဖၣ်ဒီးစံးဝဲဒၣ်, လၢအိၣ်ဘှံးအနံၤန့ၣ်, မၤဘျါက့ၤတၢ်ဆူးတၢ်ဆါဘၣ်ကကြၢးဧါ.―ဒီးအဝဲသ့ၣ်အိၣ်ဘှီၣ်ဝဲလီၤ၄, ၅ ဒီးအဝဲသ့ၣ်အိၣ်ဘှီၣ်ဝဲလီၤ.― ဒီးဟံးန့ၢ်အီၤ, ဒီးမၤဘျါ က့ၤဝဲ, ဒီးပျၢ်ကွံာ်အီၤလီၤ. ဒီးကတိၤဆၢအဝဲသ့ၣ်ဒီးစံးဝဲ ဒၣ်, ပှၤလၢသုကျါအကသ့ၣ်ယီၤမ့ၢ်ဂ့ၤ, အဂီၤဖံးမ့ၢ်ဂ့ၤ, မ့ၢ်လီၤတဲာ်လၢတၢ်ပူၤ, ဒီးလၢမုၢ်အိၣ်ဘှံးအနံၤ တထုး ထီၣ်က့ၤဘၣ်ဝဲတကီၢ်ခါန့ၣ်မ့ၢ်ဖဲလဲၣ်တဂၤလဲၣ်. ⁶ ဒီးအ ဝဲသ့ၣ်ကတိၤဆၢအီၤလၢ တၢ်န့ၣ်အဂ့ၢ်အကျိၤ တသ့ ဘၣ်. ⁷ ဒီးတုၤအထံၣ်ပှၤလၢ အဘၣ်တၢ်ကိးအီၤတဖၣ် န့ၣ်, ဃုထၢလီၢ်ဆ့ၣ်နီၤအဂ့ၤကတၢၢ်ဒီး, ကတိၤဒိတၢ်ဒီး စံးဘၣ်အီၤ, ⁸ တုၤပှၤကိးနၤဆူတလးမူးအမူးပူၤဒီး, ဆ့ၣ် နီၤလၢလီၢ်ဆ့ၣ်နီၤအဂ့ၤကတၢၢ်တဂ့ၤ. အဂ့ၢ်ဒ်အံၤ, ပှၤ လၢအဂ့ၤန့ၢ်နၤကဘၣ်တၢ်ကိးဘၣ်ဖုးလၢအီၤလီၤ. ⁹ ဒီး ပှၤလၢအကိးနၤဒီးအဝဲဒၣ်န့ၣ်, ကဟဲဆူနအိၣ်ဒီးကစံး ဘၣ်နၤ, ဟ့ၣ်ပှၤတဂၤအံၤအလီၢ်တက့ၢ်. တုၤနုၤတစုန မဲာ်ဆှးဒီး, နကလဲၤဆူအလီၢ်လၢအလာ်ကတၢၢ်လီၤ.―

¹⁰ မ့မ့ၢ်တုၤပှၤကိးနၤဒီး, လဲၤဆ့ၣ်နီၤသန့ၤလၢ အလီၢ်လာ် ကတၢၢ်တက့ၢ်. ဒ်သိးပှၤလၢအကိးနၤတုၤအဟဲတုၤဒီး, ကစံးဘၣ်နၤ, ခွါဧၢ, လဲၤထီၣ်ဆူအလီၢ်လၢအထီန့ၣ်တ က့ၢ်. တုၤနုၤတစုနလၤကပီၤကအိၣ်ဖျါထီၣ်လၢပှၤဆ့ၣ် နီၤသန့ၤဃုာ်ဒီးနၤခဲလၢာ်အမဲာ်ညါလီၤ. ¹¹ အဂ့ၢ်ဒ်အံၤ, ပှၤလၢအပာ်ထီၣ်ထီအသးဒၣ်ဝဲကိးဂၤဒဲးန့ၣ်, ကဘၣ် တၢ်ဆီၣ်လီၤအီၤလီၤ. ဒီးပှၤလၢအဆီၣ်လီၤအသးဒၣ်ဝဲ န့ၣ်, ကဘၣ်တၢ်ပာ်ထီၣ်ထီအီၤလီၤ.

¹² ဒီးစံးဘၣ်ပှၤလၢအကိးအီၤန့ၣ်, တုၤနမၤတၢ်အီၣ်တၢ် အီလၢဂီၤအီၣ်မ့ၢ်ဂ့ၤ, လၢဟါအီၣ်မ့ၢ်ဂ့ၤ, နတံၤသကိးတ ဖၣ်မ့ၢ်ဂ့ၤ, နပုၢ်နဝဲၢ်မ့ၢ်ဂ့ၤ, နဘူးနတံၢ်မ့ၢ်ဂ့ၤ, ပှၤအထူးအ တီၤအိၣ်လၢနဃၢၤမ့ၢ်ဂ့ၤ, သုတကိးတဂ့ၤ, အဝဲသ့ၣ်က ကိးဆၢဘၣ်ဖုးနၤဒီးကဟ့ၣ်ကၣ်နၤလီၤ. ¹³ မ့မ့ၢ်နဲဒၣ်အံၤ, တုၤနမၤတၢ်အီၣ်တၢ်အီဒီး, ကိးပှၤအဖှီၣ်အယာ်, ပှၤအစု ဟးဂီၤ, ပှၤအခီၣ်ဟးဂီၤ, ပှၤအမဲာ်ဘျီၣ်သ့ၣ်တဖၣ်န့ၣ်တ က့ၢ်. ¹⁴ ဒီးနကဘၣ်တၢ်ဆိၣ်ဂ့ၤလီၤ. အဂ့ၢ်ဒ်အံၤ, အဝဲသ့ၣ် တဖၣ်န့ၣ်ဟ့ၣ်ကၣ်နၤတသ့ဘၣ်. အဂ့ၢ်ဒ်အံၤ, တုၤပှၤအ တီအလိၤဂဲၤဆၢထၢၣ်က့ၤဒီး, တၢ်ကဟ့ၣ်ကၣ်နၤလီၤ.

¹⁵ ဒီးပှၤအိၣ်လၢ ပှၤဆ့ၣ်နီၤသန့ၤဃုာ်တၢ်အကျါတဂၤ န့ၣ်, နၢ်ဟူတၢ်န့ၣ်ဒီးစံးဘၣ်အီၤ, ပှၤလၢအကအီၣ်တၢ် လၢယွၤအဘီအမုၢ်န့ၣ်, ဘၣ်ဆိၣ်ဂ့ၤဝဲလီၤ. ¹⁶ ဒီးစံးဘၣ် အီၤ, မတၤတဂၤမၤတၢ်အီၣ်လၢဟါအီၣ်ဖးဒိၣ်, ဒီးကိး ပှၤအါဂၤလီၤ. ¹⁷ ဒီးတုၤတၢ်အီၣ်အခါဘၣ်ဒီး, မၢအခ့အ ပှၤလဲၤစံးဘၣ် ပှၤလၢအဘၣ်တၢ်ကိးပာ်အီၤတဖၣ်န့ၣ်, ဟဲတက့ၢ်. အဂ့ၢ်ဒ်အံၤ, တၢ်ခဲလၢာ်အိၣ်ကတဲာ်ကတီၤ လံအသးလံ. ¹⁸ ဒီးပှၤတဖၣ်န့ၣ်, ဒ်သိးတၢ်ကပျၢ်အီၤဒီး, ဃ့တၢ်လၢအသးတဖျၢၣ်ဃီခဲလၢာ်လီၤ. အဂံၢ်ခိၣ်တဂၤ စံးဘၣ်အီၤ, ယဲဒၣ်အံၤ ယပှ့ၤလံဟီၣ်ခိၣ်တကဝီၤဒီးယ ဘၣ်လဲၤကွၢ်အီၤလီၤ. ယဃ့ကညးနၤ, ပျၢ်ယၤတက့ၢ်.―

¹⁹ ဒီးအဝဲတဂၤစံးဝဲဒၣ်, ယဲဒၣ်အံၤ, ယပှ့ၤလံဂီၤဖံးယဲၢ်ဆိ, ဒီးယလဲၤမၤကွၢ်အီၤလီၤ. ယဃ့ကညးနၤ ပျၢ်ယၤတ က့ၢ်. ²⁰ ဒီးအဝဲတဂၤစံးဝဲဒၣ်, ယဲဒၣ်အံၤယန့ၢ်ယမါလံ. မၤသးဒ်န့ၣ်ဒီးယလဲၤတသ့ဘၣ်.

²¹ ဒီးအခ့အပှၤတဂၤန့ၣ် ဟဲက့ၤဆူအကစၢ်အအိၣ်, ဒီး စံးဘၣ်တဲဘၣ်တၢ်န့ၣ်တဖၣ်လီၤ. တုၤနုၤတစု, ဟံၣ်က စၢ်အသးဒိၣ်ထီၣ်, ဒီးစံးဘၣ်အခ့အပှၤတဂၤန့ၣ်, လဲၤချ့ ချ့ဆူကျဲဖးဒိၣ်, ဒီးကျဲဖိလၢဝ့ၢ်ပူၤ, ဒီးပှၤအဖှီၣ်အယာ်, ဒီးပှၤအဂီၤဟးဂီၤ, ဒီးပှၤအခီၣ်ဟးဂီၤ, ဒီးပှၤအမဲာ်ဘျီၣ် သ့ၣ်တဖၣ်န့ၣ်, ဒုးဟဲနုာ်အီၤဖဲအံၤတက့ၢ်. ²² ဒီးအခ့အ ပှၤစံးဝဲဒၣ်, ကစၢ်ဧၢ, ဒ်နမၤလိာ်တၢ်အသိးန့ၣ်, တၢ်မၤ လံအသးလံ, ဒီးတၢ်အလီၢ်အိၣ်ဒံးလီၤ. ²³ ဒီးကစၢ်စံးဘၣ် အခ့အပှၤ, လဲၤထီၣ်ဆူကျဲမုၢ်ဒီးကျဲဖိ, ဒီးဒုးဟဲနုာ်ဆူၣ် အီၤ, ဒ်သိးယဟံၣ်ကပှဲၤထီၣ်တက့ၢ်. ²⁴ အဂ့ၢ်ဒ်အံၤ, ယစံး ဘၣ်သု, ပှၤလၢအဘၣ်တၢ်ကိးပာ်အီၤတဖၣ်န့ၣ်, တလ့ၣ် ကွၢ်ဘၣ်ယတၢ်အီၣ်နီတဂၤဘၣ်.

²⁵ ဒီးပှၤဂီၢ်မုၢ်ဖးဒိၣ် ပိာ်ထီၣ်အခံ, ဒီးဃၣ်ဃီၤအသးဒီး စံးဘၣ်အီၤ, ²⁶ ပှၤတဂၤဂၤမ့ၢ်ဟဲဆူယအိၣ်ဒီး တသးဟ့ ဘၣ်အမိၢ်ဒီးအပၢ်, ဒီးအဖိအမါ, ဒီးအဖိအလံၤ, ဒီးအဒီ ပုၢ်ဝဲၢ်မုၣ်, ဒီးအဒီပုၢ်ဝဲၢ်ခွါ, ဒီးအသးသမူဒၣ်ဝဲစ့ၢ်ကီးဘၣ် ဒီး, ကဲထီၣ်ယပျဲၢ်ယဘီၣ်တသ့ဘၣ်. ²⁷ ဒီးပှၤလၢအတ ယိးဘၣ်အထူၣ်စုညါ, ဒီးတပိာ်ဘၣ်ယခံဘၣ်န့ၣ်, ကဲ ထီၣ်ယပျဲၢ်ယဘီၣ်တသ့ဘၣ်. ²⁸ အဂ့ၢ်ဒ်အံၤ, ပှၤလၢသု ကျါမိၣ်မၤအသးလၢတၢးထီတဖျၢၣ်, ဒီးတဆ့ၣ်နီၤဆိဒီး ဂံၢ်ကွၢ်ဝဲ, မ့ၢ်အတၢ်အိၣ်လၢဧါ, တလၢလဲၣ်န့ၣ်မ့ၢ်မတၤ တဂၤလဲၣ်. ²⁹ မ့တမ့ၢ်ဘၣ်ဒ်န့ၣ်ဒီး, ပာ်လီၤအခီၣ်ထံး, ဒီးမၤဝံၤထီၣ်တသ့ဘၣ်ဒီး, ပှၤလၢအထံၣ်ဝဲတဖၣ်ခဲလၢာ် ကဒုၣ်ဒွဲၣ်အီၤ, ³⁰ ဒီးကစံးဝဲ, ပှၤတဂၤအံၤမၤထီၣ်သီ, ဒီး မၤတုၤအဝံၤတသ့ဘၣ်. ³¹ ဒီးစီၤပၤကလဲၤဒုးစီၤပၤလၢအ ဂၤတဂၤ, ဒီးတဆ့ၣ်နီၤဆိဒီးဆိကမိၣ်ဝဲ, လၢပှၤတက လးန့ၣ်, မ့ၢ်အမၤနၢၤပှၤဟဲဒီးပှၤခံကလးဆူအအိၣ်, သ့ တသ့လဲၣ်န့ၣ်, မ့ၢ်မတၤတဂၤလဲၣ်. ³² မ့ၢ်တသ့ဘၣ်ဒီး, အဝဲတဂၤအိၣ်ယံၤဒံးအဖၢမုၢ်ဒီး, ကမၢလီၤပှၤသးပှၢ်ဒီး ဃ့တၢ်ဃူတၢ်ဖိးလီၤ.

³³ ဒ်န့ၣ်အသိး, ပှၤလၢသုကျါအံၤမ့ၢ်တညိကွံာ်ဘၣ်အ တၢ်ခဲလၢာ်ဒီး, ကဲထီၣ်ယပျဲၢ်ယဘီၣ်တသ့ဘၣ်နီတဂၤ ဘၣ်. ³⁴ အံသၣ်မ့ၢ်တၢ်ဂ့ၤလီၤ. ဘၣ်ဆၣ်ဒီး, အဟီမ့ၢ် ဘျါဒီး, မ့ၢ်အကဟီက့ၤဝဲလၢမနုၤတမံၤလဲၣ်. ³⁵ လၢဟီၣ် ခိၣ်အဂီၢ်မ့ၢ်ဂ့ၤ, လၢတၢ်ကမှံၤအုၣ်အဂီၢ်မ့ၢ်ဂ့ၤ, တဂ့ၤဘၣ်, ဒီးပှၤကွံာ်တ့ၢ်ကွံာ်အီၤလၢခိလီၤ. ပှၤအိၣ်ဒီးအနၢ်လၢအ နၢ်ဟူတၢ်န့ၣ်, မ်အနၢ်ဟူတၢ်တက့ၢ်.

၁၅

¹ ဒီးပှၤဃ့သွဲဒီးပှၤတၢ်ဒဲးဘးဖိခဲလၢာ်န့ၣ်, ဒ်သိးအက နၢ်ဟူဘၣ်တၢ်ဒီး, သုးဘူးအသးဆူအအိၣ်လီၤ. ² ဒီးပှၤဖၤ ရံၤၡဲ, ဒီးပှၤကွဲးလံာ်သ့ၣ်တဖၣ်, ကဒူးကဒ့ၣ်တၢ်ဒီးစံးလၢ အတူၢ်လိာ်ပှၤတၢ်ဒဲးဘးဖိဒီး အီၣ်ဃုာ်တၢ်ဒီးအီၤလီၤ. ဒီးကတိၤဒိတၢ်အံၤ ဒီးစံးဘၣ်အီၤ, ³ ပှၤလၢသုကျါ လၢအအိၣ်ဒီးအသိတကယၤ, ဒီးမ့ၢ်ဟါမၢ်တဒုဒီး, တ ပာ်လီၤတဲာ်ဝဲခွံဆံခွံဒု လၢပှၢ်လၢ်ကျါဒီးတလဲၤဃုဘၣ် လၢအဟါမၢ်တဒုတုၤ, အထံၣ်န့ၢ်က့ၤဝဲန့ၣ်, မ့ၢ်မတၤ တဂၤလဲၣ်. ⁵ ဒီးထံၣ်န့ၢ်က့ၤဝဲဒီး, အသူၣ်ခုသးခု, ဒီးပာ် ထီၣ်အီၤလၢအဖံဘၣ်ခိၣ်, ⁶ ဒီးဟဲက့ၤဆူအဟံၣ်, ဒီးကိး ဖှိၣ်အတံၤအသကိးဒီး ပှၤအိၣ်လၢအဃၢၤတဖၣ်, ဒီးစံး ဘၣ်အီၤ, သးခုဒီးယၤတက့ၢ်. အဂ့ၢ်ဒ်အံၤယသိလၢအ ဟါမၢ်တဒုန့ၣ်, ယထံၣ်န့ၢ်က့ၤလံအီၤလံ. ⁷ ယစံးဘၣ် သု, ဒ်န့ၣ်အသိးတၢ်သးခုကအိၣ်လၢမူခိၣ်, လၢပှၤတၢ် ဒဲးဘးဖိတဂၤလၢအပီၢ်ယၢ်လီၤက့ၤအသးအဃိ, အါန့ၢ် ပှၤအတီအလိၤခွံဆံခွံဂၤ လၢအပီၢ်ယၢ်လီၤက့ၤအသးအ လီၢ်တအိၣ်ဘၣ်အဃိတက့ၢ်လီၤ.

⁸ ဒီးပိာ်မုၣ်အိၣ်ဒီးစ့ဒြးမူးဆံဆဲၣ်ဘ့ၣ်တဂၤ, ဒီးမ့ၢ်ဟါ မၢ်ကွံာ်တဘ့ၣ်ဒီး, တဒွဲၣ်ထီၣ်ဘၣ်အမ့ၣ်အူဒၢ, ဒီးတခွဲ ဘၣ်အဟံၣ်သပှၢ်ပှၢ်တုၤအထံၣ်န့ၢ်က့ၤဝဲန့ၣ်, မ့ၢ်မတၤ တဂၤလဲၣ်. ⁹ ဒီးထံၣ်န့ၢ်က့ၤဝဲဒီး, ကိးဖှိၣ်အတံၤအသ ကိး, ဒီးပှၤအိၣ်လၢအဃၢၤတဖၣ်, ဒီးစံးဘၣ်အီၤ, သး ခုဒီးယၤတက့ၢ်. အဂ့ၢ်ဒ်အံၤ, ယစ့ဒြးမူးလၢအဟါမၢ်တ ဘ့ၣ်ယထံၣ်န့ၢ်က့ၤလံအီၤလံ. ¹⁰ ဒ်န့ၣ်အသိး, ယစံးဘၣ် သု, တၢ်သးခုကအိၣ်လၢယွၤအကလူးတဖၣ်အမဲာ်ညါ, လၢပှၤတၢ်ဒဲးဘးဖိတဂၤ လၢအပီၢ်ယၢ်လီၤက့ၤအသးအ ဃိလီၤ. ဒီးစံးဝဲဒၣ်, မတၤတဂၤအဖိခွါအိၣ်ခံဂၤလီၤ. ¹¹ ဒီး အဖိသဒါတဂၤစံးဘၣ်အပၢ်, ပၢ်ဧၢ, တၢ်ဖိတၢ်လံၤလၢန ကဟ့ၣ်သါယၤန့ၣ်, နီၤဖးဒီးဟ့ၣ်လီၤယၤတက့ၢ်. ဒီးအဝဲ ဒၣ်နီၤဖးတၢ်ဖိတၢ်လံၤ, ဒီးဟ့ၣ်လၢအဝဲသ့ၣ်လီၤ. ¹³ ဒီး တအါနံၤအါသီဘၣ်ဒီး, အဖိသဒါတဂၤန့ၣ်ပာ်ဖှိၣ်အစု လီၢ်အခီၣ်ခိၣ်ခဲလၢာ်, ဒီးလဲၤဝဲဆူကီၢ်အယံၤလီၤ. ဒီးအီၣ် ဂီၤကွံာ်အစုလီၢ်အခီၣ်ခိၣ်ဖဲန့ၣ် လၢတၢ်လုၣ်ကိလုၣ်က ပာ်အပူၤလီၤ. ¹⁴ ဒီးအီၣ်ဂီၤကယဲၢ်အတၢ်တုၤအလၢာ်ဒီး, တၢ်သၣ်ဝံၤလီၤဒိအိၣ်ထီၣ်လၢကီၢ်တဘ့ၣ်န့ၣ်အပူၤ, ဒီး ဘၣ်ဖှီၣ်ဘၣ်ယာ်ဝဲဒၣ်လီၤ. ¹⁵ ဒီးလဲၤအိၣ်ဝဲဒီးပှၤကီၢ်ဖိတ ဂၤဒီးအဝဲဒၣ်မၢအလဲၤကွၢ် အထိးတဖၣ်လၢပှၢ်လၢ်ကျါ လီၤ. ¹⁶ ဒီးတၢ်မိၣ်အီၣ်အသးလၢ ပထိးကၤရိာ်လၢထိး အီၣ်ဝဲ, ဒီးပှၤတဟ့ၣ်အီၣ်ဘၣ်နီတဂၤဘၣ်. ¹⁷ ဒီးသ့ၣ်နီၣ် လီၤက့ၤအသးဒီးစံးဝဲဒၣ်, ယပၢ်အပှၤဒိးလဲအသးလၢအ အီၣ်ကုးအီပှဲၤတဖၣ်န့ၣ်, အိၣ်ပှံၤဂၤပှံၤဂၤ, ဒီးယဲဒၣ်အံၤ, ယအိၣ်ဝံၤအိၣ်စ့ၤ, ဒီးယကသံတ့ၢ်ဖဲအံၤလီၤ. ¹⁸ ယကဂဲၤ ဆၢထၢၣ်, ဒီးယကက့ၤဆူယပၢ်အအိၣ်, ဒီးယကစံးဘၣ် အီၤ, ပၢ်ဧၢ, ယမၤကမၣ်ဘၣ်လံမူခိၣ်, ဒီးလၢနမဲာ်ညါ လံ. ¹⁹ ပှၤကိးယၤလၢနဖိခွါ ယတဂ့ၤတဘၣ်လၢၤဘၣ်. ပာ်ယၤဒ်နပှၤဒိးလဲအသးတဂၤအသိးန့ၣ်တက့ၢ်.

²⁰ ဒီးဂဲၤဆၢထၢၣ်, ဒီးက့ၤက့ၤဝဲဆူအပၢ်အအိၣ်, ဒီးအိၣ် ဒံးစီၤစုၤယံၤ ဒီးအပၢ်ထံၣ်အီၤဒီးအသးအိၣ်အီၤ, ဒီးလဲၤ ဃ့ၢ်ဖိးဝဲအကိာ်ဒီးနၢမူအီၤလီၤ. ²¹ ဒီးအဖိခွါစံးဘၣ်အီၤ, ပၢ်ဧၢ, ယမၤကမၣ်ဘၣ်လံမူခိၣ်ဒီးလၢနမဲာ်ညါလံ. ပှၤ ကိးယၤလၢနဖိခွါယတဂ့ၤတဘၣ်လၢၤဘၣ်. ²² ဒီးအပၢ် စံးဘၣ်အခ့အပှၤ, ဟဲစိာ်ဃီၤတၢ်ကူတၢ်သိးလၢအဂ့ၤက တၢၢ်ဒီးဒုးကူဒုးသိးအီၤတက့ၢ်. ဒီးဟ့ၣ်လီၤပသံးလၢအ စုအဂီၢ်, ဒီးခီၣ်ဖံးလၢအခီၣ်အဂီၢ်တက့ၢ်. ²³ ဒီးဟဲစိာ်မၤ သံဂီၤဖံးဖိလၢအဘီၣ်တဒုန့ၣ်တက့ၢ်. ဒီးမ်ပအီၣ်ဒီးမုာ် လၤသကိးတက့ၢ်. ²⁴ အဂ့ၢ်ဒ်အံၤ, ယဖိခွါလၢအသံတ့ၢ် တဂၤအံၤ, မူထီၣ်က့ၤလံ, ဒီးဟါမၢ်တ့ၢ်, ဒီးဘၣ်တၢ် ထံၣ်န့ၢ်က့ၤအီၤလံ. ဒီးအဝဲသ့ၣ်မုာ်လၤဝဲလီၤ.

²⁵ ဒီးအဖိဝဲၢ်ကိတဂၤ အိၣ်လၢပှၢ်လၢ်ကျါဒီးဟဲက့ၤဘူး ဒီးဟံၣ်, ဒီးနၢ်ဟူတၢ်ပှီၢ်ဒၢ, အူပံ, ဒီးတၢ်ဂဲၤကလံၣ်, ²⁶ ဒီး ကိးက့ၤအခ့အပှၤတဂၤဒီးသံကွၢ်ဝဲ, တၢ်အံၤမ့ၢ်မနုၤတ မံၤလဲၣ်. ²⁷ ဒီးအဝဲဒၣ်စံးဘၣ်အီၤ, နပုၢ်ဟဲက့ၤတုၤဝဲ, ဒီးန ပၢ်မၤသံဂီၤဖံးဖိလၢအဘီၣ်တဒုန့ၣ်လံ. အဂ့ၢ်ဒ်အံၤ, ဒိး န့ၢ်က့ၤအီၤလၢ အအိၣ်ဆူၣ်အိၣ်ချ့လီၤ. ²⁸ ဒီးအသးဒိၣ် ထီၣ်, ဒီးသါတလဲၤနုာ်ဘၣ်ဝဲဘၣ်. ဒီးအပၢ်ဟဲထီၣ်ဃ့ ကညးအီၤလီၤ. ²⁹ ဒီးအဝဲဒၣ်ကတိၤဆၢတၢ်ဒီးစံးဘၣ်အ ပၢ်, ကွၢ်ကွၢ်, ယမၤနတၢ်အနံၣ်အါထဲအံၤ, ဒီးနတၢ်မၤ လိာ်န့ၣ်ယတလုၣ်သ့ၣ်ခါပတာ်နီတဘျီဘၣ်. ဒီးဒ်သိး ယကမုာ်လၤဒီးယတံၤယသကိးဒီး, မဲာ်တဲးလဲးဖိတဒု ဧိၤ, နတဟ့ၣ်ဘၣ်ယၤနီတခီၣ်ဘၣ်. ³⁰ ဘၣ်ဆၣ်ဒီးတုၤ နဖိခွါလၢအအီၣ်ဂီၤကွံာ်နစုလီၢ်နခီၣ်ခိၣ်ဒီး ပှၤဃဲသဲမုၣ် တဂၤအံၤဟဲက့ၤဒီး, နမၤသံဂီၤဖံးဖိလၢအဘီၣ်လၢအဂီၢ် လီၤ. ³¹ ဒီးအဝဲဒၣ်စံးဘၣ်အီၤ, ဖိဧၢ, နအိၣ်ဒီးယၤတဘိ ယူၢ်ဃီ, ဒီးယစုလီၢ်ယခီၣ်ခိၣ်မ့ၢ်နတၢ်ခဲလၢာ်လီၤ. ³² ဘၣ် ဆၣ်ဒီးဂ့ၤသးခုဒီးမုာ်လၤတၢ်လီၤ. အဂ့ၢ်ဒ်အံၤ, နပုၢ်လၢ အသံတ့ၢ်တဂၤန့ၣ်, မူထီၣ်က့ၤလံ, ဒီးဟါမၢ်တ့ၢ်ဒီး, ဘၣ်တၢ်ထံၣ်န့ၢ်က့ၤအီၤလံ.

၁၆

¹ ဒီးစံးဘၣ်စ့ၢ်ကီးအပျဲၢ်အဘီၣ်, မတၤတဂၤအထူးအ တီၤအိၣ်ဒီးပှၤကွၢ်အတၢ်ဖိတၢ်လံၤတဂၤ, ဒီးပှၤဆှိးအီၤ လၢအမၤဂီၤအစုလီၢ်အခီၣ်ခိၣ်အဂ့ၢ်လီၤ. ² ဒီးကိးက့ၤဒီး စံးဘၣ်အီၤ, ယနၢ်ဟူလၢနဂ့ၢ်နပီၢ်အံၤ, မ့ၢ်မနုၤတမံၤ လဲၣ်. ဟ့ၣ်လီၤနတၢ်ကွၢ်တၢ်ဖိတၢ်လံၤအလံာ်တက့ၢ်. အ ဂ့ၢ်ဒ်အံၤ, နကဲပှၤကွၢ်တၢ်ဖိတၢ်လံၤတသ့လၢၤဘၣ်. ³ ဒီး ပှၤကွၢ်တၢ်ဖိတၢ်လံၤန့ၣ်စံးလီၤအသး, မ့ၢ်ယကမၤဒ်လဲၣ်. အဂ့ၢ်ဒ်အံၤ, ယကစၢ်န့ၣ်သါကမၤလီၤတဲာ်ကွံာ် ယမံၤ လၢပှၤကွၢ်တၢ်ဖိတၢ်လံၤလီၤ. ယခူၣ်တၢ်တကဲဘၣ်. ယ ဃ့တၢ်ဧီၢ်, ယမဲာ်ဆှးလီၤ. ⁴ တုၤတၢ်ဟီထီၣ်ကွံာ်ယၤလၢ ပှၤကွၢ်တၢ်ဖိတၢ်လံၤအလီၢ်န့ၣ်, ဒ်သိးပှၤကတူၢ်လိာ်ယၤ လၢအဟံၣ်ပူၤဒီး, ယကမၤဒ်လဲၣ်ဒ်လဲၣ်န့ၣ်, ယသ့ၣ်ညါ လီၤ. ⁵ ဒီးကိးပှၤလၢအကမၢ်အိၣ်ဒီးအကစၢ်တဂၤဘၣ် တဂၤ, တဂၤဘၣ်တဂၤ, ဒီးစံးဘၣ်အခီၣ်ထံးတဂၤ, နက မၢ်လၢနဘၣ်လိးက့ၤယကစၢ်န့ၣ်မ့ၢ်အဆံးဒိၣ်လဲၣ်. ⁶ ဒီး စံးဝဲဒၣ်, သိအဘၤသၤတကယၤလီၤ. ဒီးစံးဝဲဒၣ်, ဟံး န့ၢ်နလံာ်ဒီးဆ့ၣ်နီၤကွဲးယဲၢ်ဆံချ့ချ့တက့ၢ်. ⁷ တုၤနုၤတစု, စံးဘၣ်ကဒီးလၢအဂၤတဂၤ, နကမၢ်ဆံးဒိၣ်လဲၣ်. ဒီးစံး ဝဲဒၣ်, ဘုအကိၢ်တကယၤလီၤ. ဒီးစံးဘၣ်အီၤ, ဟံးန့ၢ်န လံာ်ဒီးကွဲးဃိးဆံတက့ၢ်. ⁸ ဒီးအကစၢ်စံးထီၣ်ပတြၢၤပှၤ ကွၢ်တၢ်ဖိတၢ်လံၤလၢအတတီတလိၤဘၣ်တဂၤလီၤ. အ ဂ့ၢ်ဒ်အံၤ, မ့ၢ်အမၤတၢ်လၢအတၢ်ကူၣ်တၢ်ဆးလီၤ. အ ဂ့ၢ်ဒ်အံၤ, အအံၤတဃၣ်အဖိခွါလၢအစိၤဒၣ်ဝဲန့ၣ်, ကူၣ် ဘၣ်ကူၣ်သ့ဒိၣ်န့ၢ်တၢ်ကပီၤအဖိခွါတက့ၢ်လီၤ. ⁹ ဒီးယ စံးဘၣ်သု, စုလီၢ်တတီခီၣ်ခိၣ်တလိၤဘၣ်န့ၣ်, ဒုးကဲထီၣ် အီၤလၢသုတံၤသုသကိး, ဒ်သိးတုၤအလၢာ်ကွံာ်ဒီး, အဝဲ သ့ၣ်ကတူၢ်လိာ်သုဆူ ဟံၣ်လီၤထူလီၤယိာ်တဖၣ်အပူၤ တက့ၢ်. ¹⁰ ပှၤလၢအမၤတီလၢတၢ်အစှၤကတၢၢ်န့ၣ်, က မၤတီစ့ၢ်ကီးဝဲလၢတၢ်အအါလီၤ. ဒီးပှၤလၢအမၤတတီ ဘၣ်လၢတၢ်အစှၤကတၢၢ်န့ၣ်, ကမၤဝဲတတီဘၣ်စ့ၢ်ကီး လၢတၢ်အအါလီၤ. ¹¹ မၤသးဒ်န့ၣ်ဒီး, လၢတၢ်စုလီၢ်တတီ ဘၣ်န့ၣ်, သုမၤမ့ၢ်တတီဘၣ်ဒီး, မ့ၢ်မတၤကအးလီၤသု လၢတၢ်စုလီၢ်လၢအနီၢ်နီၢ်တဂၤလဲၣ်. ¹² ပှၤဂၤအတၢ်န့ၣ် သုမၤမ့ၢ်တတီဘၣ်ဒီး, မ့ၢ်မတၤကဟ့ၣ်လီၤသုလၢသုတၢ် ဒၣ်သုဝဲတဂၤလဲၣ်. ¹³ တၢ်လၢအခ့အပှၤအံၤ, ကစၢ်ခံဂၤ အတၢ်မၤန့ၣ်မၤတပှဲၤဘၣ်နီတဂၤဘၣ်. ကသးဟ့ဝဲတ ဂၤ, ဒီးကအဲၣ်ဝဲတဂၤလီၤ. မ့တမ့ၢ်ဘၣ်ဒီးကသန့ၤအ သးတဂၤ, ဒီးတယူးတယီၣ်ဘၣ်တဂၤလီၤ. ယွၤအတၢ် မၤဒီးမၤမိၣ်အတၢ်မၤန့ၣ်သုမၤတသ့ဘၣ်.

¹⁴ ဒီးပှၤဖၤရံၤၡဲလၢအအဲၣ်စ့တဖၣ်န့ၣ်, နၢ်ဟူစ့ၢ်ကီးတၢ် န့ၣ်တဖၣ်ခဲလၢာ်ဒီး, ဒုၣ်ဒွဲၣ်အီၤလီၤ. ¹⁵ ဒီးအဝဲဒၣ်စံးဘၣ် အီၤ, သုဝဲသ့ၣ်အံၤ, သုမ့ၢ်ပှၤလၢအပာ်တီပာ်လိၤအသး လၢပှၤကညီအမဲာ်ညါလီၤ. ဘၣ်ဆၣ်ဒီးယွၤသ့ၣ်ညါသု သးလီၤ. အဂ့ၢ်ဒ်အံၤ, တၢ်လၢပှၤကညီပာ်လၢတၢ်သး ကွံန့ၣ်, မ့ၢ်တၢ်သးဘၣ်အၢလၢယွၤအမဲာ်ညါလီၤ.

¹⁶ တၢ်သိၣ်တၢ်သီဒီး ဝံသ့ၣ်တဖၣ်အိၣ်ဝဲတုၤလီၤလၢစီၤ ယိၤဟၣ်လီၤ. လၢန့ၣ်အလီၢ်ခံဒီး, တၢ်စံၣ်တဲၤတဲလီၤယွၤ အဘီအမုၢ်အတၢ်သးခုအကစီၣ်, ဒီးပှၤနုာ်ဆူၣ်ဝဲလၢအ ပူၤကိးဂၤဒဲးလီၤ. ¹⁷ ဒီးဟီၣ်ခိၣ်ဒီးမူခိၣ်ဒံမုၢ်ဒံဖျိးကွံာ်ညီန့ၢ် လံာ်တၢ်သိၣ်တၢ်သီအဖျၢၣ်တနၢၣ်ဖိ ဟးဂီၤဝဲန့ၣ်တက့ၢ် လီၤ.

¹⁸ ဖဲဒၣ်ပှၤလၢအပာ်မၢ်ကွံာ်အမါ, ဒီးအိၣ်ဃုာ်ဒီးအဂၤ တဂၤလၢ်လၢ်န့ၣ်, မ့ၢ်အအဲၣ်ဘၢမါလီၤ. ဒီးဖဲဒၣ်ပှၤလၢ အအိၣ်ဃုာ်ဒီး ပှၤလၢအဝၤပာ်မၢ်အီၤတဂၤလၢ်လၢ်န့ၣ်, မ့ၢ်အမၤကမၣ်ပှၤအမါလီၤ.

¹⁹ ဒီးမတၤတဂၤအထူးအတီၤ, ကူသိးဝဲလၢတၢ်လုးတ ကုာ်ဒီးဖှီဝါကဆှၣ်, ဒီးမုာ်လၤတၢ်ကိးမုၢ်နံၤမုၢ်နၤဒဲးဒိၣ် မးလီၤ. ²⁰ ဒီးပှၤဖှီၣ်ဖိယာ်ဖိအိၣ်ဒီးအပူၤလီၢ်ဒီဂၤညါ, အ မံၤစီၤလါစရူးတဂၤန့ၣ်, ပှၤပာ်လီၤဝဲလၢအကျဲစၢၤအခီၣ် ထံးလီၤ. ²¹ ဒီးတၢ်မိၣ်အီၣ်အသးလၢ တၢ်လီၣ်သြုလီၤပ လ့ၤလၢပှၤအထူးအတီၤအစီၢ်နီၤခိၣ်န့ၣ်လီၤ. ဒီးမ့မ့ၢ်ထွံၣ် တဖၣ်ဟဲလ့ၣ်အတၢ်ဆါပူၤလီၢ်လီၤ. ²² ဒီးတၢ်မၤအသး လၢ ပှၤဖှီၣ်ဖိယာ်ဖိတဂၤန့ၣ်သံဝဲ, ဒီးကလူးတဖၣ်စိာ် ထီၣ်အီၤဆူစီၤအၤဘြၤဟၣ်အသးနါပှၢ်အပူၤလီၤ. ဒီးပှၤ အထူးအတီၤန့ၣ်သံစ့ၢ်ကီးဝဲ, ဒီးတၢ်ခူၣ်လီၤအီၤလီၤ. ²³ ဒီး ဘၣ်တၢ်ဆိးကဲးဆိးလီ, ဒီးကျ့ထီၣ်အမဲာ်လၢပျုၤပူၤ, ဒီး ထံၣ်ထီၣ်သကွ့ၤစီၤအၤဘြၤဟၣ်, ဒီးစီၤလါစရူးအိၣ်လၢ အသးနါပှၢ်အပူၤလီၤ. ²⁴ ဒီးကိးထီၣ်ဒီးစံးဝဲဒၣ်, ပၢ်အၤ ဘြၤဟၣ်ဧၢ, သူၣ်ကညီၤသးကညီၤစာ်ယၤတက့ၢ်. ဒီးမၢ စီၤလါစရူးဘျၢလီၤအစုမုၢ်စိးနါလၢထံကျါ, ဒီးဟဲမၤခုၣ် လီၤယပျ့ၤတက့ၢ်. အဂ့ၢ်ဒ်အံၤ, ယဘၣ်တၢ်နးတၢ်ဖှီၣ်လၢ မ့ၣ်လၣ်မ့ၣ်ကဲၤအပူၤအံၤလီၤ. ²⁵ ဒီးစီၤအၤဘြၤဟၣ်စံးဝဲ ဒၣ်, ဖိဧၢ, လၢနမူဒံးဒီး, နဒိးနတၢ်ဂ့ၤတဖၣ်, ဒီးဒ်န့ၣ်အ သိးစီၤလါစရူးဒိးအတၢ်အၢတဖၣ်န့ၣ်, သ့ၣ်နီၣ်ထီၣ်တ က့ၢ်. မ့မ့ၢ်ခဲကနံၣ်အံၤ, အဝဲဒၣ်အိၣ်မုာ်ဖဲအံၤ, ဒီးနဲဒၣ်, နဘၣ်တၢ်နးတၢ်ဖှီၣ်လီၤ. ²⁶ ဒီးလၢတၢ်အံၤခဲလၢာ်အမဲာ် ညါဒီး, လၢပဘၢၣ်စၢၤဒီးသုဘၢၣ်စၢၤန့ၣ်, တၢ်အဆၢ လီၤတဲာ်တူာ်ဖးလဲၢ်အိၣ်ဝဲလီၤ. မၤသးဒ်န့ၣ်ဒီးပှၤဖဲအံၤမ့ၢ် မိၣ်လဲၤဃီၤအသးဆူသုအိၣ်ဒီး လဲၤဃီၤဝဲတသ့ဘၣ်. ဒီး ပှၤလၢသုအိၣ်ဘးခီန့ၣ် မ့ၢ်မိၣ်ဟဲဃီၤအသးဆူပအိၣ်အံၤ ဒီး, ဟဲဃီၤဝဲတသ့ဘၣ်. ²⁷ ဒီးစံးဝဲဒၣ်, ပၢ်ဧၢ, မ့မ့ၢ်ဒ်န့ၣ် ဒီး, ယဃ့ကညးနၤလၢ နကမၢအလဲၤဆူယပၢ်အဟံၣ် လီၤ. ²⁸ အဂ့ၢ်ဒ်အံၤ, ယဒီပုၢ်ဝဲၢ်အိၣ်ယဲၢ်ဂၤ, ဒ်သိးအက အုၣ်အသးသပှၢ်ပှၢ်လၢအီၤ, ဒ်သိးအသုတဟဲဆူတၢ်ဆိး ကဲးအလီၢ် ဖဲအံၤစ့ၢ်ကီးတဂ့ၤလီၤ. ²⁹ စီၤအၤဘြၤဟၣ်စံး ဘၣ်အီၤ, ပှၤတဖၣ်န့ၣ်အိၣ်ဒီးစီၤမိၤရှ့ဒီးဝံသ့ၣ်တဖၣ်လီၤ. မ်အဒိကနၣ်တၢ်လၢအီၤတက့ၢ်. ³⁰ ဒီးစံးဝဲဒၣ်, တမ့ၢ်ဘၣ်, ပၢ်အၤဘြၤဟၣ်ဧၢ, မ့မ့ၢ်ပှၤလၢအသံတဂၤ မ့ၢ်ဂဲၤဆၢ ထၢၣ်, ဒီးလဲၤဆူအအိၣ်ဒီး, ကပီၢ်ယၢ်လီၤက့ၤအသး လီၤ. ³¹ ဒီးစံးဘၣ်အီၤ, မ့ၢ်တဒိကနၣ်ဘၣ်တၢ်လၢစီၤမိၤ ရှ့ဒီးဝံသ့ၣ်တဖၣ်ဘၣ်ဒီး, ပှၤလၢအသံတဂၤ မ့ၢ်ဂဲၤဆၢ ထၢၣ်နာ်သက့ဒီး, တနာ်ဘၣ်ဝဲဘၣ်.

၁၇

¹ ဒီးစံးဘၣ်အပျဲၢ်အဘီၣ် တၢ်လီၤဃံၤအလီၢ်တဖၣ်တ အိၣ်ဘၣ်ဒီး, အိၣ်တသ့ဘၣ်. ဘၣ်ဆၣ်ဒီး, ပှၤလၢအဒုး အိၣ်ထီၣ်ဝဲတဂၤန့ၣ်, ဘၣ်အဖှီၣ်လီၤ. ² ပှၤမ့ၢ်မၤလီၤဃံၤ ပှၤတဂၤလၢပှၤဆံးတဖၣ်အံၤအကျါဒီး, ဆၢၣ်ဂူာ်လၢၢ် မ့ၢ်ဘၣ်စၢထီၣ်လၢအကိာ်, ဒီးအဝဲဒၣ် ဘၣ်တၢ်တ့ၢ်လီၤ ကွံာ်အီၤဆူပီၣ်လဲၣ်ပူၤဒီး, ဂ့ၤဒၣ်တၢ်လၢအဂီၢ်တက့ၢ် လီၤ.

³ သုဝဲသ့ၣ်အံၤပလီၢ်သုသးတက့ၢ်. နဒီပုၢ်ဝဲၢ်မ့ၢ်မၤက မၣ်ဘၣ်နၤဒီး, သိၣ်ဃီၤအီၤတက့ၢ်. ဒီးမ့ၢ်ပီၢ်ယၢ်လီၤ က့ၤအသးဒီး, ပျၢ်ကွံာ်အတၢ်ကမၣ်တက့ၢ်. ⁴ ဒီးလၢတ နံၤအတီၢ်ပူၤ, မ့ၢ်မၤကမၣ်ဘၣ်နၤတုၤအပှဲၤထီၣ်နွံစု, ဒီး မ့ၢ်ဟဲက့ၤကဒါက့ၤဆူနအိၣ်တုၤအပှဲၤထီၣ်နွံစုဒီးစံး, ယ ပီၢ်ယၢ်လီၤက့ၤယသးလီၤန့ၣ်ဒီး, ပျၢ်ကွံာ်အတၢ်ကမၣ် တက့ၢ်.

⁵ ဒီးပှၤတၢ်မၢဖိတဖၣ်စံးဘၣ်ကစၢ်, မၤအါထီၣ်ပတၢ် နာ်တက့ၢ်. ⁶ ဒီးကစၢ်စံးဝဲဒၣ်, သုတၢ်နာ်မ့ၢ်အိၣ်ထဲသ ဘၣ်ချံတဖျၢၣ်ဒီး, သုကစံးဘၣ်ဝံာ်တထံးအံၤ, ဟးထီၣ် ကွံာ်, ဒီးအိၣ်သူၣ်လီၤနသးလၢပီၣ်လဲၣ်ပူၤတက့ၢ်န့ၣ်ဒီး, ကစူၢ်သုကလုၢ်လီၤ.

⁷ ဒီးပှၤလၢသုကျါတဂၤဂၤ မ့ၢ်အိၣ်ဒီးအခ့အပှၤတဂၤ မၤစံာ်မ့ၢ်ဂ့ၤ, ကွၢ်ဆၣ်ဖိကီၢ်ဖိမ့ၢ်ဂ့ၤဒီး, တုၤအဟဲက့ၤလၢ စံာ်ပူၤဒီး, ကစံးဘၣ်အီၤတကီၢ်ခါ, ဟဲက့ၤဆ့ၣ်နီၤသန့ၤ လၢမ့ၤလၣ်ထံးတက့ၢ်န့ၣ်, မ့ၢ်မတၤတဂၤလဲၣ်. ⁸ မ့မ့ၢ် ကစံးဘၣ်အီၤ, ကတဲာ်ကတီၤတၢ်လၢယကအီၣ်, ဒီးယ အီၣ်တၢ်အီတၢ်အဖၢမုၢ်န့ၣ်, ကံၢ်တူာ်နယီၢ်တကိးဒီးမၤ ယခ့ယပှၤအတၢ်မၤတက့ၢ်. အန့ၣ်ဝံၤဒီး, နကအီၣ်ဒီး နကအီနဲဒၣ်လီၤန့ၣ်, တမ့ၢ်ဘၣ်ဧါ. ⁹ မ့ၢ်အခ့အပှၤမၤဝဲဒ် အမၤလိာ်ဝဲအသိးန့ၣ်ဒီး, မ့ၢ်အစံးထီၣ်ပတြၢၤအီၤဧါ. ယ ဆိကမိၣ်လၢအတပတြၢၤဘၣ်. ¹⁰ ဒ်န့ၣ်အသိးသုဝဲဒၣ် အံၤ, ဒ်တၢ်မၤလိာ်သုအသိးန့ၣ်, သုမၤခဲလၢာ်ဝံၤဒီး, စံး သုဝဲလၢပမ့ၢ်တၢ်အခ့အပှၤလၢအတဂိာ်တသီၣ်ဘၣ်တၢ် လီၤ. အဂ့ၢ်ဒ်အံၤ, တၢ်လၢပမၤလံန့ၣ်မ့ၢ်တၢ်လၢပကြၢး မၤန့ၣ်လီၤ.

¹¹ ဒီးတၢ်မၤအသးလၢ အလဲၤဆူယရူၤၡလ့ၣ်, ဒီးလဲၤခီ ဂာ်ၡၤမရံဒီးကၤလံၤလါအခၢၣ်သးလီၤ. ¹² ဒီးကလဲၤနုာ် တ့ၢ်ဝဲလၢသဝီတဖျၢၣ်အပူၤဒီး, ပှၤဘၣ်တၢ်ဆါအၢဆံ ဆဲၣ်ဂၤဟဲသဂၢၢ်အီၤ, ဒီးဆၢထၢၣ်အိၣ်သကွ့ၤဝဲ, ¹³ ဒီးကိး ပသူထီၣ်ဒီးစံးဝဲဒၣ်, ယ့ၣ်ရှူးကစၢ်ဧၢ, သူၣ်ကညီၤသး ကညီၤလၢ်ပှၤတက့ၢ်. ¹⁴ ဒီးထံၣ်ဝဲဒီးစံးဘၣ်အီၤ, လဲၤဒုး နဲၣ်သုသးလၢပှၤလုၢ်တၢ်အဒိၣ်တက့ၢ်. ဒီးတၢ်မၤအသး လၢအလဲၤတၢ်အဖၢမုၢ်ဒီး, ကဆှီထီၣ်က့ၤလီၤ. ¹⁵ ဒီးလၢ ပှၤတဖၣ်အကျါတဂၤ, တုၤအသ့ၣ်ညါလၢအဘျါက့ၤဝဲ ဒီး, ဟဲက့ၤကဒါက့ၤဒီးစံးထီၣ်ပတြၢၤယွၤလၢအကလုၢ် ဖးဒိၣ်လီၤ. ¹⁶ ဒီးထိၣ်လီၤပှီၤအသးလၢအခီၣ်ထံး, ဒီးစံး ထီၣ်ပတြၢၤအဘျုးအဖှိၣ်လီၤ. ဒီးပှၤတဂၤန့ၣ်မ့ၢ်ပှၤၡၤမရံ ဖိလီၤ. ¹⁷ ဒီးယ့ၣ်ရှူးကတိၤဆၢတၢ်ဒီးစံးဝဲဒၣ်, မ့ၢ်ပှၤဆံ ဆဲၣ်ဂၤန့ၣ်ကဆှီထီၣ်ဝဲတမ့ၢ်ဘၣ်ဧါ. ဒီးပှၤခွံဂၤန့ၣ်အိၣ် ဖဲလဲၣ်. ¹⁸ ပှၤဟဲက့ၤကဒါက့ၤ, ဒီးစံးထီၣ်ပတြၢၤယွၤအ ဘျုးအဖှိၣ်ပထံၣ်န့ၢ်ထဲ ပှၤတခီဘီမုၢ်ဖိတဂၤအံၤဧိၤဧါ.―

¹⁹ ဒီးစံးဘၣ်အီၤ, ဂဲၤဆၢထၢၣ်ဒီးက့ၤကၢ်နဲာ်, နတၢ်နာ်န့ၣ် အုၣ်က့ၤခီၣ်က့ၤလံနၤလံ.

²⁰ ဒီးပှၤဖၤရံၤၡဲသံကွၢ်အီၤလၢ ယွၤအဘီအမုၢ်ကဟဲခဲ လဲၣ်ခဲလဲၣ်, ဒီးအဝဲဒၣ်ကတိၤဆၢတၢ်ဒီးစံးဝဲဒၣ်, တမ့ၢ် ဘၣ်ယွၤအဘီအမုၢ်ဟဲဝဲအိၣ်ဒီး, တၢ်ကွၢ်ထံကွၢ်ဖျါန့ၣ် ဘၣ်. ²¹ ဒီးပှၤတစံးဘၣ်, ကွၢ်ကွၢ်, ဖဲအံၤ, ကွၢ်ကွၢ်, ဖဲန့ၣ် ဘၣ်. အဂ့ၢ်ဒ်အံၤ, ကွၢ်ကွၢ်, ယွၤအဘီအမုၢ်အိၣ်လၢသု သးကံၢ်ပူၤလီၤ.

²² ဒီးစံးဘၣ်အပျဲၢ်အဘီၣ်, အနံၤအသီ ကဘၣ်လၢသု ကဆၢထံၣ်ဘၣ် ပှၤကညီဖိခွါအမုၢ်နံၤအကျါတနံၤ, ဒီး သုတထံၣ်ဘၣ်ဘၣ်. ²³ ဒီးအဝဲသ့ၣ်ကစံးဘၣ်သု, ကွၢ် ကွၢ်, ဖဲအံၤ, ကွၢ်ကွၢ်, ဖဲန့ၣ်. လဲၤတဂ့ၤ, ပိာ်အခံတဂ့ၤ,―

²⁴ အဂ့ၢ်ဒ်အံၤ, ဒ်လီဝၢ်ဒံးလၢမူထံးတခီ, ကပီၤထီၣ်ပၢၢ်လၢ မူထံးအဝဲတခီအသိးဒီး, ပှၤကညီဖိခွါလၢအမုၢ်နံၤအပူၤ န့ၣ်, ကမၤအသးဒ်န့ၣ်အသိးလီၤ. ²⁵ ဘၣ်ဆၣ်ဒီးကဘၣ် ဆိတၢ်အါမံၤ, ဒီးကဘၣ်တၢ်ညိကွံာ်အီၤလၢ ပှၤတစိၤ အံၤအစုပူၤလီၤ.

²⁶ ဒီးဒ်တၢ်မၤအသးလၢ စီၤနိအၤအမုၢ်နံၤတဖၣ်အသိး န့ၣ်, တၢ်ကမၤအသးလၢပှၤကညီဖိခွါအမုၢ်နံၤဒ်န့ၣ်အ သိးလီၤ. ²⁷ ပှၤအီၣ်တၢ်အီတၢ်, ဒီးန့ၢ်မါန့ၢ်ဝၤတုၤမုၢ်တ နံၤလၢစီၤနိအၤလဲၤနုာ်လၢကဘီပူၤ, ဒီးထံလုၣ်ဘၢတၢ် ဟဲဒီးမၤဟးဂီၤကွံာ်အီၤခဲလၢာ်လီၤ. ²⁸ ဒ်န့ၣ်အသိးတၢ်မၤ အသးလၢစီၤလိာ်အမုၢ်နံၤတဖၣ်န့ၣ်လီၤ. ပှၤအီၣ်တၢ်အီ တၢ်, ပှ့ၤတၢ်ဆါတၢ်, သူၣ်တၢ်ဘျၢတၢ်, မၤဟံၣ်မၤဃီ လီၤ. ²⁹ ဘၣ်ဆၣ်ဒီးမုၢ်တနံၤလၢစီၤလိာ်ဟးထီၣ်ကွံာ်လၢ ဝ့ၢ်စဒိၣ်အပူၤန့ၣ်, တၢ်ဟဲစူၤလီၤလၢမ့ၣ်အူဒီးကးလၢမူ ခိၣ်, ဒီးမၤဟးဂီၤကွံာ်ပှၤခဲလၢာ်လီၤ. ³⁰ မုၢ်နံၤလၢပှၤကညီ ဖိခွါအံၤကအိၣ်ဖျါထီၣ်ဒီး, တၢ်ကမၤအသးဒ်န့ၣ်အသိး လီၤ.

³¹ ဒီးတၢ်လၢမုၢ်တနံၤန့ၣ်, ပှၤမ့ၢ်အိၣ်လၢအဟံၣ်ခိၣ်ဒီး အတၢ်ဖိတၢ်လံၤမ့ၢ်အိၣ်လၢအဟံၣ်ပူၤဒီး, မ်အသုတယုၢ် လီၤဟံးန့ၢ်က့ၤအီၤတဂ့ၤ. ဒ်န့ၣ်အသိးပှၤအိၣ်လၢစံာ်ပူၤ န့ၣ်, သုတက့ၤကဒါက့ၤဆူအလီၢ်ခံတဂ့ၤ. ³² သ့ၣ်နီၣ် ထီၣ်က့ၤ စီၤလိာ်အမါတက့ၢ်. ³³ ဖဲဒၣ်ပှၤလၢအဃုအုၣ် က့ၤခီၣ်က့ၤအသးတဂၤဂၤန့ၣ်, ကမၤဟါမၢ်ကွံာ်အသး လီၤ. ဒီးဖဲဒၣ်ပှၤလၢအဒုးဟါမၢ်ကွံာ်အသးတဂၤဂၤန့ၣ်, ကဒုးမူထီၣ်က့ၤအီၤလီၤ.

³⁴ ယစံးဘၣ်သု, တၢ်လၢမုၢ်တနၤန့ၣ် ပှၤပိာ်ခွါခံဂၤက အိၣ်လၢအလီၢ်မံတပူၤဃီဒီး, တၢ်ကဟံးထီၣ်ကွံာ်တဂၤ, ဒီးအဝဲတဂၤကအိၣ်လီၤတဲာ်လီၤ. ³⁵ ပှၤပိာ်မုၣ်ခံဂၤကဂူာ် ဆၢၣ်ဂူာ်တပူၤဃီ, ဒီးတၢ်ကဟံးထီၣ်ကွံာ်တဂၤ, ဒီးအဝဲ တဂၤကအိၣ်လီၤတဲာ်လီၤ. ³⁶ ဒီးအဝဲသ့ၣ်ကတိၤဆၢတၢ် ဒီးစံးဘၣ်အီၤ, ကစၢ်ဧၢ, ဖဲလဲၣ်ပူၤလဲၣ်. ဒီးအဝဲဒၣ်စံး ဘၣ်အီၤ, ဖဲဒၣ်တၢ်အစိၣ်အိၣ်ဝဲတပူၤပူၤန့ၣ်, လီတာ်တ ဖၣ်ကအိၣ်ဖှိၣ်ရိဖှိၣ်ဖဲန့ၣ်လီၤ.

၁၈

¹ ဒီးဒ်သိးပှၤကညီကဘါထုကဖၣ်တၢ်တဘိယူၢ်ဃီ, ဒီး သုတလီၤဘှါတဂ့ၤဒီး, စံးဘၣ်စ့ၢ်ကီးအီၤလၢတၢ်ကတိၤ ဒိအံၤ, ² ပှၤစံၣ်ညီၣ်ကွီၢ်လၢအတပျံၤဘၣ်ယွၤဒီးတယူးတ ယီၣ်ဘၣ်ပှၤကညီ, အိၣ်လၢဝ့ၢ်တဝ့ၢ်အပူၤတဂၤလီၤ.―

³ ဒီးမုၣ်ကမဲအိၣ်လၢဝ့ၢ်ပူၤန့ၣ်တဂၤ, ဒီးလဲၤဝဲဆူအအိၣ်ဒီး စံးဝဲဒၣ်, စံၣ်ညီၣ်တီန့ၢ်ယၤလၢယဒုၣ်ယဒါတက့ၢ်. ⁴ ဒီး တစံၣ်ညီၣ်ဘၣ်ဒီးအိၣ်ဝဲတစိၢ်လီၤ. လၢခံက့ၤဒီး, စံးလီၤ အသး, ယဲဒၣ်အံၤ, ယတပျံၤဘၣ်ယွၤဒီးယတယူးတယီၣ် ဘၣ်ပှၤကညီနာ်သက့ဒီး, ⁵ မ့ၢ်မုၣ်ကမဲတဂၤအံၤမၤတံာ် တာ်ယၤအဃိဒီး, ယကစံၣ်ညီၣ်တီန့ၢ်အီၤ, ဒ်သိးအသု တမၤဘှံးယသးလၢအဟဲထီဘိန့ၣ်တဂ့ၤလီၤ.

⁶ ဒီးကစၢ်စံးဝဲဒၣ်, ပှၤစံၣ်ညီၣ်ကွီၢ်လၢအတတီဘၣ်တ ဂၤစံးတၢ်န့ၣ်ကနၣ်တက့ၢ်. ⁷ ဒီးယွၤကစံၣ်ညီၣ်တီန့ၢ်အ ပှၤဃုထၢဖိလၢအကိးထီၣ်အီၤလၢ မုၢ်ဆါဆဲးလၢမုၢ်နၤ, ဒီးအဝဲဒၣ်ဝံသးစူၤတၢ်လၢအဂ့ၢ်ယံာ်ယံာ်, တမ့ၢ်ဘၣ်ဧါ. ယစံးဘၣ်သုလၢအကစံၣ်ညီၣ်တီန့ၢ်အီၤချ့ချ့လီၤ. ⁸ ဘၣ် ဆၣ်ဒီး, တုၤပှၤကညီဖိခွါအံၤဟဲလီၤဒီး, ကထံၣ်န့ၢ်တၢ် နာ်လၢဟီၣ်ခိၣ်ချၢအံၤဧါ.

⁹ ဒီးပှၤစံးလီၤအသးလၢပှၤတီပှၤလိၤ, ဒီးတယူးတယီၣ် ဘၣ်ပှၤဂၤတနီၤနီၤန့ၣ်, အဝဲဒၣ်စံးဘၣ်အီၤလၢတၢ်ကတိၤ ဒိအံၤလီၤ. ¹⁰ ပှၤခံဂၤလဲၤထီၣ်ဘါထုကဖၣ်တၢ်လၢတၢ် လုၢ်ဟံၣ်ပူၤလီၤ. အဝဲတဂၤမ့ၢ်ပှၤဖၤရံၤၡဲ, ဒီးအဝဲတဂၤ မ့ၢ်ပှၤဃ့သွဲလီၤ. ¹¹ ပှၤဖၤရံၤၡဲတဂၤဆၢထၢၣ်, ဒီးဘါထု ကဖၣ်ဝဲလၢအသးဒ်အံၤ, ယွၤဧၢ, ယစံးထီၣ်ပတြၢၤနၤ လီၤ. အဂ့ၢ်ဒ်အံၤ, ယတဒ်သိးဘၣ်ဒီးပှၤဂၤဘၣ်, ပှၤဂုာ် ဆူၣ်ပျိဆူၣ်တၢ်, ပှၤတတီတလိၤဘၣ်, ပှၤအဲၣ်ဘၢတၢ်, ဒီးပှၤဃ့သွဲတဂၤအံၤဒၣ်လဲာ်ဘၣ်လီၤ. ¹² နွံနံၤအတီၢ်ပူၤ ယဒုၣ်တၢ်အီၣ်တၢ်အီခံနံၤလီၤ. ဖဲဒၣ်ယန့ၢ်တၢ်ခဲလၢာ်ဒီး, အဘျၢၣ်တဆံ, ယမၤဘူၣ်တဘျၢၣ်လီၤ. ¹³ ဒီးပှၤဃ့သွဲ တဂၤအိၣ်ဆၢထၢၣ်သကွ့ၤဝဲ, ဒီးတကျ့ထီၣ်ဒၣ်လဲာ်အ မဲာ်ဆူမူခိၣ်ဘၣ်, မ့မ့ၢ်ဒဲလီၤအသးနါပှၢ်ဒီးစံးဝဲဒၣ်, ယွၤ ဧၢ, သူၣ်ကညီၤသးကညီၤ ပှၤတၢ်ဒဲးဘးဖိယၤအံၤတ က့ၢ်. ¹⁴ ယစံးဘၣ်သု, အအံၤတဂၤဘၣ်တၢ်ပာ်တီပာ်လိၤ အီၤဒီး, က့ၤလီၤက့ၤဝဲဆူအဟံၣ်လီၤ. မ့မ့ၢ်အဝဲတဂၤန့ၣ် တမ့ၢ်ဘၣ်. အဂ့ၢ်ဒ်အံၤ, ကယဲၢ်ပှၤလၢအပာ်ထီၣ်ထီအ သးန့ၣ် ကဘၣ်တၢ်ဆီၣ်လီၤအီၤလီၤ. ဒီးပှၤလၢအဆီၣ် လီၤအသးန့ၣ်, ကဘၣ်တၢ်ပာ်ထီၣ်ထီအီၤလီၤ. ¹⁵ ဒီးပှၤဟဲစိာ် ဖိဒံဖိသၣ်စ့ၢ်ကီးဆူအအိၣ်, ဒ်သိးအကထိးဘၣ်အီၤလီၤ. ဒီးအပျဲၢ်အဘီၣ်ထံၣ်ဝဲဒီးတြီအီၤလီၤ.―

¹⁶ ဘၣ်ဆၣ်ဒီး ယ့ၣ်ရှူးကိးအီၤဒီးစံးဝဲဒၣ်, ဒုးဟဲဖိသၣ်တ ဖၣ်န့ၣ်ဆူယအိၣ်ဒီးတြီအီၤတဂ့ၤ. အဂ့ၢ်ဒ်အံၤ, ယွၤအဘီ အမုၢ်န့ၣ်မ့ၢ်ပှၤဒ်န့ၣ်အသိးလီၤ. ¹⁷ ယစံးဘၣ်သုတီတီအံၤ, ဖဲဒၣ်ပှၤလၢအတဒိးန့ၢ်ဘၣ်ယွၤအဘီအမုၢ် ဒ်ဖိသၣ်အ သိးန့ၣ်, တလဲၤနုာ်ဘၣ်ဝဲလၢအပူၤလ့ၤတက့ၤဘၣ်.

¹⁸ ဒီးမတၤတဂၤ ပဒိၣ်တဂၤသံကွၢ်အီၤဒီးစံးဝဲဒၣ်, သ ရၣ်လၢအဂ့ၤတဂၤဧၢ, ယဲဒၣ်အံၤ, ဒ်သိးယကန့ၢ်ဘၣ်သါ တၢ်မူအထူအယိာ်ဒီး, ယဘၣ်မၤမနုၤလဲၣ်. ¹⁹ ဒီးယ့ၣ်ရှူး စံးဘၣ်အီၤ, ဘၣ်မနုၤနကိးယၤလၢအဂ့ၤလဲၣ်. ပှၤဂ့ၤတ အိၣ်ဘၣ်, အိၣ်ထဲယွၤတဂၤဧိၤလီၤ. ²⁰ တၢ်မၤလိာ်တဖၣ် န့ၣ်နသ့ၣ်ညါလီၤ. အဲၣ်ဘၢမါအဲၣ်ဘၢဝၤတဂ့ၤ. မၤသံ ပှၤကညီတဂ့ၤ. ဟုၣ်တၢ်တဂ့ၤ. အုၣ်နသးလၢတၢ်ကဘျံး ကဘျၣ်တဂ့ၤ. ယူးယီၣ်နမိၢ်ဒီးနပၢ်တက့ၢ်. ²¹+ ၂မိၤ. ၂၀း၁၂|Exod.20.12*-. ဒီးစံးဝဲဒၣ်, တၢ်န့ၣ်တဖၣ်ခဲလၢာ်ယတိၢ်န့ၢ်လံ လၢယဖိၣ်သၣ်ခွါထီၣ်လံၤလံၤလီၤ. ²² ဒီးယ့ၣ်ရှူးနၢ်ဟူတၢ် န့ၣ်ဒီးစံးဘၣ်အီၤ, နတလၢတပှဲၤဘၣ်အိၣ်ဒံးတမံၤလီၤ. ကယဲၢ်နစုလီၢ်နခီၣ်ခိၣ်ခဲလၢာ်န့ၣ်, ဆါလီၤကွံာ်ဒီးဟ့ၣ် ပှၤဖှီၣ်ဖိယာ်ဖိ, ဒီးနကအိၣ်ဒီး တၢ်လုၢ်ဒိၣ်ပှ့ၤဒိၣ်လၢမူ ခိၣ်, ဒီးဟဲပိာ်ယခံတက့ၢ်. ²³ ဒီးတုၤအနၢ်ဟူတၢ်န့ၣ်တ ဖၣ်ဒီး, အသူၣ်အုးအသးအုးထီၣ်လီၤ. အဂ့ၢ်ဒ်အံၤ, မ့ၢ်ပှၤ အထူးအတီၤဒိၣ်မးလီၤ. ²⁴ အသးအုးထီၣ်န့ၣ်, ယ့ၣ်ရှူး ထံၣ်ဒီးစံးဝဲဒၣ်, ပှၤအထူးအတီၤလဲၤနုာ်ဆူယွၤအဘီအ မုၢ်အပူၤကီဆံးဒိၣ်လဲၣ်. ²⁵ အဂ့ၢ်ဒ်အံၤ, ကီၤလၤအူးတဒု ဝၣ်ဖျိထးအမဲၢ်ခံညီန့ၢ် ပှၤအထူးအတီၤတဂၤလဲၤနုာ်ဆူ မူခိၣ်အဘီအမုၢ်အပူၤတက့ၢ်လီၤ. ²⁶ ဒီးပှၤနၢ်ဟူတဖၣ်န့ၣ် စံးဝဲဒၣ်, မ့မ့ၢ်ဒ်န့ၣ်ဒီး မ့ၢ်မတၤကတုၤလၢတၢ်အုၣ်က့ၤ ခီၣ်က့ၤသ့တဂၤလဲၣ်.

²⁷ ဒီးအဝဲဒၣ်စံး, တၢ်လၢပှၤကညီမၤတသ့ဘၣ်န့ၣ်, ယွၤ မၤဝဲသ့လီၤ.

²⁸ ဒီးစီၤပ့းတရူးစံးဝဲဒၣ်, ကွၢ်ကွၢ်, ပဝဲဒၣ်အံၤ, ပဟးသ ဒၣ်ပတၢ်ခဲလၢာ်ဒီးပိာ်နခံလံ. ²⁹ ဒီးအဝဲဒၣ်စံးဘၣ်အီၤ, ယစံးဘၣ်သုတီတီ, ပှၤလၢအဟးသဒၣ်အဟံၣ်အဃီမ့ၢ် ဂ့ၤ, အမိၢ်အပၢ်မ့ၢ်ဂ့ၤ, အပုၢ်အဝဲၢ်မ့ၢ်ဂ့ၤ, အဖိအမါမ့ၢ်ဂ့ၤ, အဖိအလံၤမ့ၢ်ဂ့ၤ, လၢယွၤအဘီအမုၢ်အဃိတဂၤလၢ်လၢ် န့ၣ်, ³⁰ ကန့ၢ်က့ၤဝဲအါန့ၢ်အလီၢ်အါစုလၢအံၤတဃၣ်, ဒီး ခဲကိာ်တဃၣ်ကန့ၢ်ဘၣ်တၢ်မူအထူအယိာ်လီၤ.

³¹ ဒီးဟံးန့ၢ်ပှၤတဆံခံဂၤန့ၣ်, ဒီးစံးဘၣ်အီၤ, ကွၢ်ကွၢ်, ပလဲၤထီၣ်ဆူယရူၤၡလ့ၣ်, ဒီးကယဲၢ်တၢ်ကွဲးအသးလၢဝံ အစုပူၤလၢပှၤကညီအဖိခွါအံၤအဂ့ၢ်န့ၣ်, ကလၢထီၣ်ပှဲၤ ထီၣ်ဝဲခဲလၢာ်လီၤ. ³² အဂ့ၢ်ဒ်အံၤ, ပှၤကဟ့ၣ်လီၤကွံာ်အီၤ ဆူပှၤကလုာ်တဖၣ်အစုပူၤ, ဒီးကဒုၣ်ဒွဲၣ်အီၤ, ဒီးကမၤ အၢမၤနးအီၤ, ဒီးကထူးပှဲာ်အလိၤ, ³³ ဒီးကဝ့ၤအီၤတီၢ် အီၤ, ဒီးကမၤသံအီၤလီၤ. ဒီးလၢသၢနံၤတနံၤန့ၣ်ကဂဲၤ ဆၢထၢၣ်က့ၤဝဲလီၤ. ³⁴ ဒီးတၢ်န့ၣ်တဖၣ်အဝဲသ့ၣ်အနၢ်တ ပၢၢ်ဘၣ်နီတမံၤဘၣ် ဒီးတၢ်ကတိၤန့ၣ်အဂ့ၢ်အိၣ်ခူသူၣ် လၢအီၤ, ဒီးအဝဲဒၣ်စံးတၢ်န့ၣ်အနၢ်တပၢၢ်ဘၣ်ဝဲတကူၢ် သ့ၣ်လီၤ.

³⁵ ဒီးတုၤအလဲၤဘူးဒီး ယရံၤဃိဒီး, ပှၤမဲာ်ဘျီၣ်ဆ့ၣ်နီၤ ဃ့တၢ်လၢကျဲအဃၢၤတဂၤ, ³⁶ နၢ်ဟူပှၤဂီၢ်မုၢ်ဟဲ, ဒီးသံ ကွၢ်ဝဲ, မ့ၢ်မနုၤလဲၣ်. ³⁷ ဒီးပှၤစံးဘၣ်အီၤလၢပှၤနစၤရ့းဖိ ယ့ၣ်ရှူးဟဲဝဲလီၤ. ³⁸ ဒီးအဝဲဒၣ်ကိးပသူထီၣ်ဒီးစံးဝဲဒၣ်, စီၤ ဒၤဝံးအဖိခွါယ့ၣ်ရှူးဧၢ, သူၣ်ကညီၤသးကညီၤစာ်ယၤတ က့ၢ်. ³⁹ ဒီးပှၤလဲၤလၢညါတဖၣ်န့ၣ်, ဒ်သိးအကအိၣ်ဘှီၣ် ကလာ်ဒီး, ဒူအလိၤဘၣ်ဆၣ်ဒီး, အဝဲဒၣ်ကိးပသူထီၣ် အါထီၣ်ဒီးစံးဝဲဒၣ်, စီၤဒၤဝံးအဖိခွါဧၢ, သူၣ်ကညီၤသး ကညီၤစာ်ယၤတက့ၢ်. ⁴⁰ ဒီးယ့ၣ်ရှူးအိၣ်ကတီၢ်, ဒီးမၢပှၤ ဟဲဆှၢအီၤဆူအအိၣ်လီၤ. ဒီးတုၤအဟဲဘူးဒီး, သံကွၢ် အီၤဒီးစံးဝဲဒၣ်, နသးအိၣ်လၢယကမၤနၤလၢမနုၤတမံၤ လဲၣ်. ⁴¹ ဒီးစံးဝဲဒၣ်, ကစၢ်ဧၢ, မ့ၢ်ဒ်သိးယကထံၣ်ထီၣ်က့ၤ တၢ်လီၤ. ⁴² ဒီးယ့ၣ်ရှူးစံးဘၣ်အီၤ, ထံၣ်ထီၣ်က့ၤတၢ်တ က့ၢ်. နတၢ်နာ်အုၣ်က့ၤခီၣ်က့ၤလံနၤလံ. ⁴³ ဒီးထံၣ်ထီၣ် က့ၤတၢ်တကီၢ်ခါ, ဒီးစံးထီၣ်ပတြၢၤယွၤ, ဒီးပိာ်ထီၣ်အခံ လီၤ. ဒီးပှၤခဲလၢာ်ထံၣ်ဝဲ, ဒီးစံးထီၣ်ပတြၢၤယွၤလီၤ.

၁၉

¹ ဒီးလဲၤခီဂာ်ယရံၤဃိ,― ဒီးကွၢ်ကွၢ်, ပှၤကိးဝဲအမံၤ လၢစီၤစးဃဲအိၣ်တဂၤလီၤ. ဒီးအဝဲဒၣ်မ့ၢ် ပှၤဃ့သွဲအ ခိၣ်, ဒီးမ့ၢ်ပှၤအထူးအတီၤလီၤ. ³ ဒီးယ့ၣ်ရှူးမ့ၢ်မတၤမ တၤန့ၣ်ဃုထံၣ်ဝဲ, ဒီးထံၣ်ဝဲတသ့ဘၣ်လၢပှၤဂီၢ်မုၢ်အဃိ လီၤ. အဂ့ၢ်ဒ်အံၤ, အနီၢ်ဖုၣ်လီၤ. ⁴ ဒီးလဲၤဃ့ၢ်ဝဲလၢညါဒီး လဲၤထီၣ်လၢသိးဝံာ်ဒၢတထံးအခံ ဒ်သိးအကထံၣ်ဘၣ် အီၤလီၤ. အဂ့ၢ်ဒ်အံၤ, ကဟဲတ့ၢ်ဝဲလၢကျဲန့ၣ်လီၤ. ⁵ ဒီး တုၤယ့ၣ်ရှူးလဲၤတုၤအလီၢ်ဖဲန့ၣ်ဒီး, ကွၢ်ထီၣ်ဒီးထံၣ်အီၤ ဒီးစံးဘၣ်အီၤ, စီၤစးဃဲဧၢ, ယုၢ်လီၤချ့ချ့တက့ၢ်. အဂ့ၢ်ဒ် အံၤ, ခဲမုၢ်ဆါအံၤယဘၣ်အိၣ်ကတီၢ်လၢနဟံၣ်ပူၤလီၤ.― ဒီးယုၢ်လီၤချ့ချ့ဒီး တူၢ်လိာ်အီၤလၢအသူၣ်ခုသးခုလီၤ.

⁷ ဒီးပှၤထံၣ်ဝဲဒီး, ကဒူးကဒ့ၣ်တၢ်ခဲလၢာ်ဒီးစံးဝဲဒၣ်, လၢ အလဲၤနုာ်ဆူပှၤတၢ်ဒဲးဘးဖိအအိၣ် ဒ်သိးအကမံဝဲလၢ အဟံၣ်ပူၤလီၤ.

⁸ ဒီးစီၤစးဃဲဆၢထၢၣ်ဒီးစံးဘၣ်ကစၢ်န့ၣ်, ကွၢ်ကွၢ်, က စၢ်ဧၢ, ယစုလီၢ်ယခီၣ်ခိၣ်, ခံပူန့ၣ်, ယဟ့ၣ်လီၤပှၤဖှီၣ်ဖိ ယာ်ဖိတပူလီၤ. ဒီးယမ့ၢ်အီၣ်ကဘျံးအီၣ်ကဘျၣ်ပှၤတ ဂၤအတၢ်တမံၤမံၤဒီး ယဟ့ၣ်လီၤက့ၤအီၤ အါန့ၢ်အလီၢ် လွံၢ်စးလီၤ. ⁹ ဒီးယ့ၣ်ရှူးစံးဘၣ်အီၤ, တၢ်အုၣ်က့ၤခီၣ် က့ၤတုၤလၢဟံၣ်ပူၤအံၤ, လၢမုၢ်မဆါတနံၤအံၤလံ. အဂ့ၢ် ဒ်အံၤ, မ့ၢ်စ့ၢ်ကီးစီၤအၤဘြၤဟၣ်အဖိခွါလီၤ. ¹⁰ အဂ့ၢ်ဒ် အံၤ, ပှၤကညီဖိခွါအံၤဟဲလီၤဝဲဒ်သိးအကဃုန့ၢ်, ဒီးအုၣ် က့ၤခီၣ်က့ၤပှၤလၢအဟါမၢ်တဖၣ်လီၤ.

¹¹ ဒီးတုၤပှၤနၢ်ဟူတၢ်န့ၣ်တဖၣ်ဒီး, မ့ၢ်အအိၣ်ဘူးဒီးယ ရူၤၡလ့ၣ်ဒီး ပှၤဆိကမိၣ်လၢယွၤအဘီအမုၢ်ကအိၣ်ထီၣ် တကီၢ်ခါ, ¹² သတးဒီး, ပာ်အါထီၣ်တၢ်ကတိၤအဒိဒီး စံးဝဲဒၣ်, မတၤတဂၤပဒိၣ်တဂၤလဲၤဆူထံယံၤကီၢ်ယံၤဒ် သိးအကမၤန့ၢ်အဘီအမုၢ်, ဒီးဟဲက့ၤကဒါက့ၤလီၤ. ¹³ ဒီး ကိးန့ၢ်အခ့အပှၤအကျါဆံဆဲၣ်ဂၤ, ဒီးဟ့ၣ်လီၤအီၤလၢစ့ ဆံဆဲၣ်မနါ, ဒီးစံးဘၣ်အီၤ, ကၤတၢ်တုၤလီၤလၢယဟဲ က့ၤတက့ၢ်.

¹⁴ ဘၣ်ဆၣ်ဒီးအထံဖိကီၢ်ဖိတဖၣ်သးဟ့အီၤ, ဒီးမၢက လူးတဖၣ်လဲၤပိာ်အခံ, ဒီးစံးဝဲဒၣ်, အဝဲတဂၤအံၤကဲစီၤ ပၤလၢပဖီခိၣ်, ပသးတအိၣ်ဘၣ်လီၤ. ¹⁵ ဒီးတၢ်မၤအသးလၢ အမၤန့ၢ်အဘီအမုၢ်ဝံၤဒီး, ဟဲက့ၤကဒါက့ၤဝဲ, ဒီးမၢပှၤကိးန့ၢ်အခ့အပှၤလၢအဟ့ၣ်လီၤတ့ၢ်အီၤလၢစ့တဖၣ်, ဒ်သိးအကသ့ၣ်ညါလၢပှၤတဂၤဒီးတဂၤမၤအါထီၣ်အတၢ် ဆံးအါဆံးအါအဂ့ၢ်န့ၣ်လီၤ.―

¹⁶ ဒီးအခီၣ်ထံးတဂၤဟဲဃီၤဒီးစံးဝဲဒၣ်, ကစၢ်ဧၢ, နစ့တမ နါန့ၣ်, န့ၢ်အါထီၣ်စ့ဆံဆဲၣ်မနါလံလီၤ. ¹⁷ ဒီးစံးဘၣ်အီၤ, ဘၣ်လံ, ကုၢ်လၢအဂ့ၤတဂၤဧၢ, မ့ၢ်နမၤနကလုၢ်တီလၢ တၢ်စှၤကိာ်အပူၤဒီး, အိၣ်လၢဝ့ၢ်ဆံဆဲၣ်အဖီခိၣ်တက့ၢ်.

¹⁸ ဒီးပှၤခံဂၤတဂၤဟဲဃီၤဒီးစံးဝဲဒၣ်, ကစၢ်ဧၢ, နစ့တမ နါန့ၣ်, န့ၢ်အါထီၣ်စ့ယဲၢ်မနါလံ. ¹⁹ ဒီးစံးစ့ၢ်ကီးလၢအီၤ, နဲဒၣ်အံၤ, အိၣ်လၢဝ့ၢ်ယဲၢ်ဝ့ၢ်အဖီခိၣ်တက့ၢ်. ²⁰ ဒီးအဂၤ တဂၤဟဲဃီၤဒီးစံးဝဲဒၣ်, ကစၢ်ဧၢ, ကွၢ်, နစ့တမနါလၢ ယပာ်လၢ တၢ်ဘိၣ်တၢ်စှၢၤအပူၤန့ၣ်တက့ၢ်. ²¹ အဂ့ၢ်ဒ် အံၤ, ယပျံၤနၤလီၤ. အဂ့ၢ်ဒ်အံၤ, နမ့ၢ်ပှၤအကီ, ဒီးတၢ်လၢ နတပာ်ဘၣ်န့ၣ်နဟံးန့ၢ်နဲ, ဒီးတၢ်လၢနတဖှံဘၣ်န့ၣ်န ကူးနဲလီၤ. ²² ဒီးစံးဘၣ်အီၤ, ကုၢ်လၢအအၢတဂၤဧၢ, ယ ကစံၣ်ညီၣ်ဃၣ်နၤလၢနထးခိၣ်ဒၣ်နဲလီၤ. နသ့ၣ်ညါလၢ ယမ့ၢ်ပှၤအကီ, ဒီးတၢ်လၢယတပာ်ဘၣ်န့ၣ်ယဟံးန့ၢ်ယဲ, ဒီးတၢ်လၢယတဖှံဘၣ်န့ၣ်ယကူးယဲလီၤ. ²³ မၤသးဒ်န့ၣ် ဒီးတုၤယဟဲက့ၤဒီး ဒ်သိးယကန့ၢ်ဘၣ် ယစ့ဒီးအအ့ၣ် ထီၣ်န့ၣ်, ဘၣ်မနုၤလၢနတဒုးလိၢ်ဘၣ်ယတၢ်န့ၣ်လဲၣ်.―

²⁴ ဒီးစံးဘၣ်ပှၤဆၢထၢၣ်လၢအဃၢၤတဖၣ်န့ၣ်, ဟံးန့ၢ်အ စ့တမနါဒီးဟ့ၣ်လီၤ ပှၤလၢအအိၣ်ဒီးစ့ဆံဆဲၣ်မနါတဂၤ န့ၣ်တက့ၢ်. ²⁵ (ဒီးအဝဲသ့ၣ်စံးဘၣ်အီၤ, ကစၢ်ဧၢ, အဝဲ ဒၣ်န့ၣ်အစ့အိၣ်ဆံဆဲၣ်မနါလံ.) ²⁶ အဂ့ၢ်ဒ်အံၤ, ယစံး ဘၣ်သုလၢကယဲၢ်ပှၤလၢအတၢ်အိၣ်ဝဲန့ၣ်, တၢ်ကဟ့ၣ် အတၢ်လီၤ. ဒီးပှၤလၢအတၢ်တအိၣ်ဘၣ်န့ၣ်, ဖဲအတၢ် အိၣ်ဝဲဒီး, တၢ်ကဟံးထီၣ်ကွံာ်လၢအီၤလီၤ.

²⁷ မ့မ့ၢ်ယဒုၣ်ယဒါ လၢအသးတအိၣ်ဘၣ်လၢယကကဲ အစီၤပၤတဖၣ်န့ၣ်, ဟဲစိာ်အီၤဖဲအံၤ, ဒီးမၤသံအီၤလၢယ မဲာ်ညါတက့ၢ်.

²⁸ ဒီးစံးတၢ်တဖၣ်န့ၣ်ဝံၤဒီး, လဲၤလၢညါ လၢအကလဲၤ ထီၣ်ဆူယရူၤၡလ့ၣ်လီၤ. ²⁹ ဒီးတၢ်မၤအသးဖဲအလဲၤပၢၢ် လၢသဝီဘ့ၤသဖးက့ဒီးဘ့ၤသနံ ဖဲကစၢၢ်ကိးဝဲအမံၤလၢ သ့ၣ်စၤယံးအအိၣ်ဒီး, မၢလီၤအပျဲၢ်အဘီၣ်ခံဂၤ, ³⁰ ဒီးစံးဝဲ ဒၣ်, လဲၤဆူသဝီအိၣ်လၢသုမဲာ်ညါတက့ၢ်. တုၤသုလဲၤ နုာ်ဒီးသုကထံၣ်န့ၢ် ကသ့ၣ်ယီၤဖိလၢပှၤတဒိးဘၣ်နီတ ခီၣ်ဘၣ်တဒု, ဘၣ်စၢဃာ်အသးလီၤ. ဃ့ၣ်လီၤအီၤဒီး ဟဲက့ၤမိၤအီၤတက့ၢ်. ³¹ ဒီးပှၤတဂၤဂၤမ့ၢ်သံကွၢ်ဝဲ, သု ဃ့ၣ်လီၤဘၣ်မနုၤလဲၣ်န့ၣ်ဒီး စံးဘၣ်အီၤဒ်အံၤ, မ့ၢ်ကစၢ် မၤအီၤအလီၢ်အိၣ်လီၤ. ³² ဒီးပှၤလၢအဒိးမၢလီၤအသးတ ဖၣ်န့ၣ်, လဲၤဝဲဒီးထံၣ်န့ၢ်တၢ် ဒ်အစံးဘၣ်အီၤအသိးန့ၣ် လီၤ. ³³ ဒီးဃ့ၣ်လီၤကသ့ၣ်ယီၤဖိအဖၢမုၢ်ဒီး အကစၢ်တ ဖၣ်စံးဘၣ်အီၤ, သုဃ့ၣ်လီၤကသ့ၣ်ယီၤဖိန့ၣ် ဘၣ်မနုၤ လဲၣ်. ³⁴ ဒီးအဝဲသ့ၣ်စံးဝဲဒၣ်, ကစၢ်မၤအီၤအလီၢ်အိၣ် လီၤ. ³⁵ ဒီးဟဲက့ၤမိၤအီၤဆူယ့ၣ်ရှူးအအိၣ်လီၤ. ဒီးဒါလီၤ အကူအသိးလၢကသ့ၣ်ယီၤဖိအလိၤ, ဒီးပာ်ထီၣ်ယ့ၣ်ရှူး လၢအဖီခိၣ်လီၤ. ³⁶ ဒီးလဲၤတၢ်အဖၢမုၢ်ဒီးပှၤဒါလီၤအကူ အသိးလၢကျဲပူၤလီၤ.

³⁷ တုၤအဘူးထီၣ်ဝဲ, ဒီးတုၤအလီၢ်ဖဲ ကစၢၢ်သ့ၣ်စၤယံး အကျဲလဲၤလီၤဝဲဒီး, အပျဲၢ်အဘီၣ်ဂီၢ်မုၢ် အသူၣ်ခုအသး ခု, ဒီးသးဝံၣ်ထီၣ်ယွၤ, လၢအကလုၢ်ဖးဒိၣ်လၢကယဲၢ် တၢ်လီၤလးတဖၣ်လၢအထံၣ်တ့ၢ်ဝဲအဃိ, ³⁸ ဒီးစံးဝဲဒၣ်, စီၤပၤလၢအဟဲလၢယွၤအမံၤတဂၤန့ၣ်, မ်အဘၣ်ဆိၣ်ဂ့ၤ တက့ၢ်. တၢ်ဃူတၢ်ဖိးအိၣ်လၢမူခိၣ်, ဒီးတၢ်လၤကပီၤ အိၣ်လၢတၢ်ထီၣ်ထီကတၢၢ်လီၤ.

³⁹ ဒီးပှၤဖၤရံၤၡဲအိၣ်လၢပှၤဂီၢ်မုၢ်အကျါတနီၤနီၤ စံးဘၣ် အီၤ, သရၣ်ဧၢ, ဒူနပျဲၢ်နဘီၣ်အလိၤတက့ၢ်. ⁴⁰ ဒီးကတိၤ ဆၢတၢ်ဒီးစံးဘၣ်အီၤ, ယစံးဘၣ်သုလၢပှၤတဖၣ်န့ၣ်မ့ၢ် အိၣ်ဘှီၣ်ဝဲဒီး လၢၢ်တဖၣ်န့ၣ်ကကိးပသူထီၣ်လီၤ.

⁴¹ ဒီးလဲၤဘူးထီၣ်ဒီးကွၢ်ဝ့ၢ်န့ၣ်, ဒီးအမဲာ်ထံလီၤလၢအ ဃိ, ⁴² ဒီးစံးဝဲဒၣ်, နမ့ၢ်သ့ၣ်ညါနဲဒၣ်လဲာ်တၢ်လၢအဘၣ် ဃးဒီးနတၢ်ဃူတၢ်ဖိးလၢနနံၤနသီအံၤအပူၤဒီး, ဂ့ၤလၢန ဂီၢ်လီၤ. မ့မ့ၢ်ခဲကနံၣ်အံၤအိၣ်တဒၢလၢနမဲာ်လီၤ. ⁴³ အဂ့ၢ် ဒ်အံၤ, မုၢ်နံၤတဖၣ်ကဘၣ်နၤဒီး, နဒုၣ်နဒါကမၤတၢ်အ ခိၣ်ဒူဝးတရံးနၤ, ဒီးကကဝီၤဃာ်နၤ, ဒီးကတြီနၤတပူၤ လၢ်လၢ်, ⁴⁴ ဒီးကမၤနၤဒီးနဖိအိၣ်လၢနပူၤန့ၣ် လီၤဒါဒီး ဟီၣ်ခိၣ်, ဒီးလၢၢ်တဖျၢၣ်လၢလၢၢ်အဖီခိၣ်န့ၣ်, တဒုးအိၣ် လီၤတဲာ်ဘၣ်နီတဖျၢၣ်ဘၣ်. အဂ့ၢ်ဒ်အံၤ, တၢ်ဟဲအံးက့ၤ ကွၢ်က့ၤနၤအမုၢ်အလါန့ၣ်, နတသ့ၣ်ညါဘၣ်.

⁴⁵ ဒီးလဲၤနုာ်ဆူတၢ်လုၢ်အဟံၣ်ပူၤ, ဒီးဟီထီၣ်ကွံာ်ပှၤပှ့ၤ တၢ်ဒီးဆါတၢ်လၢအပူၤ, ⁴⁶ ဒီးစံးဘၣ်အီၤ, တၢ်ကွဲးအသး, ယဟံၣ်မ့ၢ်တၢ်ဘါထုကဖၣ်အဟံၣ်လီၤ. မ့မ့ၢ်သုဝဲသ့ၣ် အံၤ, သုမၤလံမးအီၤလၢ တၢ်ဟုၣ်တၢ်ဘျၣ်အပူၤလီၤ.+ ၡါ. ၅၆း၇|Isa.56.7*, ယံး. ၇း၁၁|Jer.7.11*.

⁴⁷ ဒီးသိၣ်က့ၤသီက့ၤတၢ်လၢ တၢ်လုၢ်အဟံၣ်ပူၤသ့သ့ တနံၤလီၤ. ဒီးပှၤလုၢ်တၢ်အခိၣ်ဒီးပှၤကွဲးလံာ်, ဒီးပှၤအ ဒိၣ်အပှၢ်သ့ၣ်တဖၣ်န့ၣ်, ဃုမၤသံအီၤလီၤ. ⁴⁸ ဒီးကမၤ အီၤဒ်လဲၣ်ဒ်လဲၣ်န့ၣ်, ဃုဝဲတဘၣ်ဘၣ်. အဂ့ၢ်ဒ်အံၤ, ပှၤ ဂီၢ်မုၢ်ဒိကနၣ်အကလုၢ်ဒီးအသးစဲဘူးဒီးအီၤခဲလၢာ်လီၤ.

၂၀

¹ ဒီးတၢ်မၤအသးလၢအန့ၣ်တနံၤအပူၤဒီး, သိၣ်က့ၤသီ က့ၤပှၤဂီၢ်မုၢ်, ဒီးစံၣ်တဲၤတဲလီၤ တၢ်သးခုအကစီၣ်လၢ တၢ်လုၢ်အဟံၣ်ပူၤအဖၢမုၢ်ဒီး, ပှၤလုၢ်တၢ်အခိၣ်တဖၣ်, ဒီးပှၤကွဲးလံာ် ဂဲၤဆၢထၢၣ်ဃုာ်ဒီး ပှၤသူၣ်က့သးပှၢ်တ ဖၣ်, ဒီးကတိၤတၢ်ဒီးအီၤ, ဒီးစံးဝဲဒၣ်, ² နမၤတၢ်တဖၣ် အံၤလၢမတၤအစိအကမီၤလဲၣ်. မ့ၢ်မတၤဟ့ၣ်နၤလၢတၢ် အစိအကမီၤအံၤတဂၤလဲၣ်. ³ ဒီးအဝဲဒၣ်ကတိၤဆၢတၢ် ဒီးစံးဘၣ်အီၤ, ယကသံကွၢ်စ့ၢ်ကီးသုတၢ်တမံၤလီၤ. ဒီး စံးဘၣ်တဲဘၣ်ယၤတက့ၢ်. ⁴ စီၤယိၤဟၣ်အတၢ်ဘျၢ*န့ၣ်, မ့ၢ်အကဲထီၣ်လၢမူခိၣ်, မ့ၢ်အကဲထီၣ်လၢပှၤကညီလဲၣ်.―

⁵ ဒီးအဝဲသ့ၣ်ကတိၤလိာ်အသးဒီးစံးဝဲဒၣ်, ပမ့ၢ်စံးလၢမူ ခိၣ်ဒီး, ကစံးဘၣ်ပှၤ, မ့မ့ၢ်ဒ်န့ၣ်ဒီး, ဘၣ်မနုၤလၢသုတ နာ်ဘၣ်အီၤလဲၣ်. ⁶ ဒီးပမ့ၢ်စံးလၢပှၤကညီဒီး, ပှၤဂီၢ်မုၢ် ခဲလၢာ်ကကွံာ်ပှၤလၢလၢၢ်လီၤ. အဂ့ၢ်ဒ်အံၤ, အဝဲသ့ၣ် တဖၣ်န့ၣ်ပာ်စီၤယိၤဟၣ်လၢဝံတဂၤလီၤ. ⁷ ဒီးစံးဆၢဝဲ ဒၣ်, မ့ၢ်အကဲထီၣ်လၢလဲၣ်လၢလဲၣ်န့ၣ်, ပတသ့ၣ်ညါ ဘၣ်. ⁸ ဒီးယ့ၣ်ရှူးစံးဘၣ်အီၤ, ဒ်န့ၣ်အသိး, ယဲဒၣ်အံၤ, ယမၤတၢ်တဖၣ်အံၤ လၢမတၤမတၤအစိအကမီၤလဲၣ် န့ၣ်, ယတစံးဘၣ်တဲဘၣ်စ့ၢ်ကီးသုဘၣ်.

⁹ ဒီးစံးဘၣ်ပှၤဂီၢ်မုၢ်လၢတၢ်ကတိၤဒိအံၤ, မတၤတဂၤ သူၣ်လီၤစပံးလီၢ်တလီၢ်, ဒီးငါလီၤဝဲလၢပှၤမၤဟီၣ်ခိၣ်ဖိ တဖၣ်, ဒီးဟးဆူတခီထံတခီကီၢ်, ဒီးအိၣ်ဝဲဃဲးဃဲး လီၤ. ¹⁰ ဒီးတုၤအမုၢ်အလါဘၣ်ဒီး, မၤအခ့အပှၤတဂၤ လဲၤဆူပှၤမၤဟီၣ်ခိၣ်ဖိတဖၣ်အအိၣ် ဒ်သိးအကဟ့ၣ်လီၤ အီၤလၢစပံးလီၢ်အသၣ်လီၤ. ဒီးပှၤမၤဟီၣ်ခိၣ်တဖၣ်န့ၣ် တီၢ်အီၤ, ဒီးမၢအက့ၤကဒါက့ၤအိၣ်ကလီလီၤ. ¹¹ မၤက ဒီးတစု, မၢအခ့အပှၤလၢအဂၤတဂၤလဲၤဝဲ, ဒီးအဝဲသ့ၣ် တီၢ်အီၤ, ဒီးမၤအီၤတရီတပါ, ဒီးမၢအက့ၤကဒါက့ၤစ့ၢ် ကီးအိၣ်ကလီလီၤ. ¹² မၤကဒီးတစု, မၢအခ့အပှၤပှဲၤထီၣ် သၢဂၤတဂၤဒီး, အဝဲသ့ၣ်မၤအီၤ တုၤအပူၤလီၢ်အိၣ်ဒီး, ဟီထီၣ်ကွံာ်အီၤလီၤ.

¹³ ဒီးစပံးလီၢ်အကစၢ်စံးဝဲဒၣ်, ယကမၤဒ်လဲၣ်. ယကမၢ ယဖိခွါလၢယအဲၣ်အီၤတဂၤလဲၤဆူအအိၣ်လီၤ. တုၤအဝဲ သ့ၣ်ထံၣ်အီၤဒီး ကယူးယီၣ်အီၤသ့ၣ်သ့ၣ်လီၤ. ¹⁴ ဒီးတုၤပှၤ မၤဟီၣ်ခိၣ်တဖၣ်ထံၣ်အီၤဒီး, ကတိၤလိာ်အသးဒီးစံးဝဲ ဒၣ်, အဝဲအံၤမ့ၢ်ပှၤလၢအန့ၢ်ဘၣ်သါတၢ်တဂၤလီၤ. ဒ် သိးအတၢ်န့ၢ်သါကကဲထီၣ်ပတၢ်ဒီး, ဟဲဃီၤမၤသံသကိး အီၤတက့ၢ်. ¹⁵ ဒီးဟီထီၣ်ကွံာ်အီၤဆူစပံးလီၢ်အချၢ, ဒီး မၤသံကွံာ်အီၤလီၤ. မၤသးဒ်န့ၣ်ဒီး, စပံးလီၢ်အကစၢ်န့ၣ် ကမၤအီၤဒ်လဲၣ်. ¹⁶ ကဟဲမၤသံကွံာ်ပှၤမၤဟီၣ်ခိၣ်တဖၣ်, ဒီးကဟ့ၣ်လီၤကွံာ်စပံးလီၢ်လၢပှၤဂၤလီၤ. ဒီးပှၤလၢအနၢ် ဟူတၢ်တဖၣ်စံးဝဲဒၣ်, မ်အသုတမၤအသးဒ်န့ၣ်တဂ့ၤ.―

¹⁷ ဒီးကွၢ်ထံအီၤဒီးစံးဝဲဒၣ်, မ့မ့ၢ်ဒ်န့ၣ်ဒီး, လၢၢ်လၢပှၤသူၣ်ဟံၣ်ဖိတဖၣ်ညိကွံာ်အီၤတဖျၢၣ်န့ၣ်, ကဲထီၣ်လံလၢတၢ်အနၢၣ်အခိၣ်စိၣ်လံ. တၢ်ကွဲးအသးတထံၣ်န့ၣ်မ့ၢ်တၢ်ဒ်လဲၣ်.

¹⁸ ကယဲၢ်ပှၤလၢအလီၤဃံၤဝဲလၢ လၢၢ်အံၤအလိၤတဂၤ လၢ်လၢ်န့ၣ်, ကကၢ်ဝဲ, မ့မ့ၢ်ဖဲဒၣ်ပှၤလၢလၢၢ်အံၤကလီၤ တဲာ်လၢအလိၤန့ၣ်, ကမၤလီၤကလဲအီၤလီၤ.

¹⁹ ဒီးတစုဃီဖဲန့ၣ် ပှၤလုၢ်တၢ်အခိၣ်တဖၣ်ဒီးပှၤကွဲးလံာ် တဖၣ်န့ၣ်, ဃုပာ်အစုလၢအလိၤ, ဒီးပျံၤပှၤဂီၢ်မုၢ်လီၤ. အဂ့ၢ်ဒ်အံၤ, သ့ၣ်ညါလၢအစံးဘၣ်တၢ်ကတိၤဒိန့ၣ်ထီဒါ အဝဲသ့ၣ်လီၤ.

²⁰ ဒီးပှၤတဖၣ်န့ၣ်ကွၢ်ဟုၣ်တၢ်, ဒီးမၢလီၤ ပှၤကွၢ်ဟုၣ် တၢ်ဖိလၢအကပျိာ်အသးလၢပှၤအတီတဖၣ်, ဒ်သိးအက တုၢ်န့ၢ်အတၢ်ကတိၤ, လၢအကဟ့ၣ်လီၤအီၤဆူပဒိၣ်အ တၢ်စံၣ်ညီၣ်ဒီး အစိအကမီၤအပူၤအဂ့ၢ်လီၤ. ²¹ ဒီးအဝဲ သ့ၣ်သံကွၢ်အီၤဒီးစံးဝဲဒၣ်, သရၣ်ဧၢ, ပသ့ၣ်ညါလၢနက တိၤတၢ်, ဒီးသိၣ်က့ၤသီက့ၤတၢ်တီတီ, ဒီးနတကွၢ်ဒိၣ် ဆံးအါစှၤဘၣ်လၢပှၤနီတဂၤဘၣ်. မ့ၢ်နသိၣ်လိတၢ်လၢ ယွၤအကျဲတီတီလီၤ. ²² ပဟ့ၣ်သွဲလၢစီၤပၤကဲစၢ်န့ၣ်, မ့ၢ် အတီအဘၣ်, မ့ၢ်အတတီတဘၣ်ဘၣ်လဲၣ်. ²³ ဒီးသ့ၣ်ညါ ဝဲလၢအတၢ်လီတၢ်ဝ့ၤဒီးစံးဘၣ်အီၤ, သုလ့ပစီယၤမ့ၢ်အ ဘၣ်မနုၤလဲၣ်. ²⁴ ဒုးနဲၣ်ယၤလၢစ့ဒန့ၤရံတဘ့ၣ်တက့ၢ်. မ့ၢ်မတၤအက့ၢ်အဂီၤ ဒီးအတၢ်ကွဲးန့ၣ်, အိၣ်လၢအလိၤ လဲၣ်. ဒီးအဝဲသ့ၣ်ကတိၤဆၢတၢ်, ဒီးစံးဝဲဒၣ်, မ့ၢ်ကဲစၢ်အ တၢ်လီၤ. ²⁵ ဒီးအဝဲဒၣ်စံးဘၣ်အီၤ, မၤသးဒ်န့ၣ်ဒီးဟ့ၣ်ကဲ စၢ်န့ၣ်လၢကဲစၢ်အတၢ်, ဒီးယွၤလၢယွၤအတၢ်တက့ၢ်.―

²⁶ ဒီးတုၢ်န့ၢ်အတၢ်ကတိၤလၢပှၤဂီၢ်မုၢ်အမဲာ်ညါတသ့ဘၣ်, ဒီးကမၢကမၣ်ဝဲလၢအတၢ်စံးဆၢန့ၣ်, ဒီးအိၣ်ဝဲဘှီၣ်က လာ်လီၤ.

²⁷ ဒီးပှၤစးဒူၤကဲလၢအစံးဝဲလၢ တၢ်ဂဲၤဆၢထၢၣ်က့ၤတ အိၣ်ဘၣ်တနီၤနီၤလဲၤဆူအအိၣ်, ဒီးသံကွၢ်အီၤ, ²⁸ ဒီးစံးဝဲ ဒၣ်, သရၣ်ဧၢ, စီၤမိၤရှ့ကွဲးန့ၢ်ပှၤဒီးစံးဝဲဒၣ်, ပှၤတဂၤ အဒီပုၢ်ဝဲၢ်မ့ၢ်သံလၢအအိၣ်ဒီးအမါ, ဒီးဖဲအသံန့ၣ်အဖိ မ့ၢ်တအိၣ်ဘၣ်ဒီး, အဒီပုၢ်ဝဲၢ်ဘၣ်အိၣ်ဃုာ်ဒီးအမါဒီးမၤ အိၣ်ထီၣ်န့ၢ်အဒီပုၢ်ဝဲၢ်အချံသၣ်လီၤ.+ ၅မိၤ. ၂၅း၂၅|Deut.25.25*.²⁹ မၤ သးဒ်န့ၣ်ဒီး, ပှၤဒီပုၢ်ဝဲၢ်ခွါအိၣ်နွံဂၤလီၤ. ဒီးအခီၣ်ထံးတ ဂၤန့ၢ်အမါ, ဒီးအဖိတအိၣ်ဘၣ်ဒီးသံဝဲလီၤ. ³⁰ ဒီးခံဂၤ တဂၤန့ၣ်ဟံးန့ၢ်အမါဒီးအဖိတအိၣ်ဘၣ်ဒီးသံဝဲလီၤ. ³¹ ဒီး သၢဂၤတဂၤန့ၣ်ဟံးန့ၢ်အီၤ, ဒီးတၢ်မၤအသးဒ်န့ၣ်စ့ၢ်ကီး နွံဂၤလၢာ်, ဒီးအဖိတအိၣ်လီၤတဲာ်ဘၣ် ဒီးသံဝဲတကူၢ် သ့ၣ်လီၤ. ³² ဒီးလၢပှၤခဲလၢာ်န့ၣ်အလီၢ်ခံကတၢၢ်, ပိာ် မုၣ်န့ၣ်သံစ့ၢ်ကီးဝဲလီၤ. ³³ မၤသးဒ်န့ၣ်ဒီး လၢတၢ်ဂဲၤဆၢ ထၢၣ်အပူၤန့ၣ်, မ့ၢ်အကကဲလၢပှၤဖဲလဲၣ်တဂၤ အမါ လဲၣ်. အဂ့ၢ်ဒ်အံၤ, ပှၤနွံဂၤန့ၢ်မါလၢအီၤလီၤ.

³⁴ ဒီးယ့ၣ်ရှူးကတိၤဆၢတၢ် ဒီးစံးဘၣ်အီၤ, ပှၤအံၤတ ဃၣ်ဖိန့ၢ်မါန့ၢ်ဝၤလီၤ. ³⁵ မ့မ့ၢ်ပှၤလၢတၢ်ပာ်အီၤလၢပှၤဂ့ၤ န့ၢ်ဘၣ်ခဲကိာ်တဃၣ်, ဒီးတၢ်ဂဲၤဆၢထၢၣ်က့ၤလၢတၢ်သံ အပူၤတဖၣ်န့ၣ်, တန့ၢ်မါန့ၢ်ဝၤဘၣ်လီၤ. ³⁶ အဂ့ၢ်ဒ်အံၤ, သံတသ့လၢၤဘၣ်. အဂ့ၢ်ဒ်အံၤ, မ့ၢ်အဒ်သိးသိးဒီးကလူး တဖၣ်, ဒီးမ့ၢ်လၢတၢ်ဂဲၤဆၢထၢၣ်က့ၤအဖိသတးဒီး, မ့ၢ် ယွၤအဖိလီၤ.

³⁷ ဘၣ်ဆၣ်ဒီးလၢပှၤသံကဂဲၤဆၢထၢၣ်က့ၤန့ၣ်, စီၤမိၤရှ့ ဒုးနဲၣ်လၢသ့ၣ်တၤဆှုၣ်တခိၣ်အပူၤ, ဖဲတၢ်ကိးယွၤလၢစီၤ အၤဘြၤဟၣ်အကစၢ်, စီၤအံၤစဲးအကစၢ်, ဒီးစီၤယၤကိာ် အကစၢ်လီၤ. ³⁸ ဘၣ်ဆၣ်ဒီးယွၤတမ့ၢ်ဘၣ်ပှၤသံအကစၢ် ဘၣ်, မ့ၢ်ပှၤမူတဖၣ်အကစၢ်လီၤ. အဂ့ၢ်ဒ်အံၤ, ပှၤခဲလၢာ် မူဝဲလၢအီၤလီၤ.

³⁹ ဒီးပှၤကွဲးလံာ်တနီၤနီၤစံးဝဲဒၣ်, သရၣ်ဧၢ, နစံးတၢ်ဂ့ၤ မးလီၤ. ⁴⁰ ဒီးပှၤသံကွၢ်အတၢ်တဘူၣ်လၢၤဘၣ် နီတဂၤ ဘၣ်.

⁴¹ ဒီးစံးဘၣ်အဝဲသ့ၣ်, ပှၤစံးလၢခရံာ်မ့ၢ်စီၤဒၤဝံးအဖိခွါ ဒ်လဲၣ်. ⁴² စီၤဒၤဝံးအကစၢ်ဒၣ်လဲာ်, လၢလံာ်စံးထီၣ်ပ တြၢၤတၢ်အပူၤန့ၣ်စံးဝဲဒၣ်, ယွၤစံးဘၣ်ယကစၢ်, ဆ့ၣ်နီၤလၢယစုထွဲ,

⁴³ တုၤယပာ်လီၤနဒုၣ်နဒါလၢ နခီၣ်ယီၢ်လီၤအလီၢ်တ က့ၢ်.+ စံး. ၁၁၀း၁|Ps.110.1*.

⁴⁴ မၤသးဒ်န့ၣ်ဒီး စီၤဒၤဝံးကိးအီၤလၢအကစၢ်လီၤ. ဒီး ကမ့ၢ်အဖိခွါဒ်လဲၣ်. ⁴⁵ ဒီးဖဲပှၤဂီၢ်မုၢ်ခဲလၢာ်နၢ်ဟူဝဲဒီး, စံးဘၣ်အပျဲၢ်အဘီၣ်, ⁴⁶ ပှၤကွဲးလံာ်, လၢအအဲၣ်ဒိးဝဲလၢအလဲၤဟးသိးဆ့ထီထီ ကလဲာ်, ဒီးအဲၣ်ဒိးတၢ်ကတိၤဒိၣ်အီၤလၢဖၠါပူၤ, ဒီးလီၢ် ဆ့ၣ်နီၤလၢအလၤကပီၤဒိၣ်ကတၢၢ်လၢဘူၣ်ဘျီၣ်ပူၤ, ဒီး တၢ်အလီၢ်ဂ့ၤကတၢၢ်လၢ တၢ်အီၣ်တၢ်အီအပူၤတဖၣ်န့ၣ်, ပလီၢ်သုသးလၢအီၤတက့ၢ်.― ⁴⁷ အဝဲသ့ၣ်တဖၣ်န့ၣ်, အီၣ်ကွံာ် ပှၤမုၣ်ကမဲအဟံၣ်, ဒီးလၢတၢ်အိၣ်ဖျါအဂီၢ်, ဘါထုကဖၣ်တၢ် ထီထီကလဲာ်လီၤ. အဝဲသ့ၣ်ကဘၣ် တၢ်စံၣ်ညီၣ်ဒိၣ်ဒၣ်တၢ်တက့ၢ်လီၤ.

၂၁

¹ ဒီးကွၢ်ထီၣ်ဝဲ, ဒီးထံၣ်ပှၤအထူးအတီၤတဖၣ်တ့ၢ်လီၤ အတၢ်ဟ့ၣ်လၢစ့ပာ်ဖှိၣ်အလီၢ်ပူၤလီၤ. ² ဒီးထံၣ်စ့ၢ်ကီး ပှၤအဖှီၣ်အယာ်မုၣ်ကမဲတဂၤ, ဟဲတ့ၢ်လီၤတိၢ်အကးခံ ဘ့ၣ်လီၤ. ³ ဒီးစံးဝဲဒၣ်, ယစံးဘၣ်သုနီၢ်နီၢ်လၢပှၤအဖှီၣ် အယာ်မုၣ်ကမဲတဂၤအံၤ, တ့ၢ်လီၤတၢ်အါန့ၢ်ပှၤတဖၣ် န့ၣ်ခဲလၢာ်တက့ၢ်လီၤ. ⁴ အဂ့ၢ်ဒ်အံၤ, ပှၤတဖၣ်န့ၣ်ခဲလၢာ် ဟံးန့ၢ်ဝဲလၢအတၢ်ပှဲၤလုၣ်ကွံာ်အဘျဲၣ်, ဒီးတ့ၢ်လီၤလၢ တၢ်ဟ့ၣ်လၢယွၤန့ၣ်လီၤ. မ့မ့ၢ်ပိာ်မုၣ်တဂၤအံၤဟံးန့ၢ်ဝဲ လၢအတၢ်တလၢတပှဲၤဘၣ်အပူၤ, ဒီးတ့ၢ်လီၤတၢ်လၢအ ဘုၣ်အီၣ်ဘုၣ်အီအသးခဲလၢာ်လီၤ.

⁵ ပှၤတနီၤနီၤကတိၤတၢ်လၢတၢ်လုၢ်အဟံၣ်အဂ့ၢ်, လၢ တၢ်ကယၢကယဲလၢၢ်အဂ့ၤ, ဒီးတၢ်မၤဘူၣ်တဖၣ်, ဒီးအ ဝဲဒၣ်စံးဝဲ, ⁶ တၢ်လၢသုထံၣ်တဖၣ်အံၤ, အနံၤအသီက ဘၣ်လၢလၢၢ်ဖဲလၢၢ်အဖီခိၣ်, လၢတၢ်တမၤလီၤပှီၢ်ကွံာ် ဘၣ်န့ၣ်, တအိၣ်လီၤတဲာ်ဘၣ်နီတဖျၢၣ်ဘၣ်. ⁷ ဒီးအဝဲ သ့ၣ်သံကွၢ်အီၤဒီးစံးဝဲဒၣ်, သရၣ်ဧၢ, တၢ်န့ၣ်တဖၣ်က မၤအသးအခါဖဲလဲၣ်, ဒီးတုၤအကမၤအသးဘူးထီၣ်ဒီး, တၢ်ပနီၣ်လီၤလးကမၤအသးလၢမနုၤတမံၤလဲၣ်.

⁸ ဒီးအဝဲဒၣ်စံးဝဲ, ဒ်သိးပှၤသုတလီန့ၢ်သုတဂ့ၤဒီး, ပ လီၢ်သုသးတက့ၢ်. အဂ့ၢ်ဒ်အံၤ, ပှၤကဟဲဝဲလၢယမံၤအါ ဂၤ, ဒီးကစံးဝဲ, ယၤအံၤလီၤ. ဒီးအဆၢအကတီၢ်ဘူးထီၣ် လံ. မၤသးဒ်န့ၣ်ဒီး, သုတပိာ်အခံတဂ့ၤ. ⁹ ဒီးတုၤသုနၢ် ဟူတၢ်ဒုးသုးဒုးသံၣ်, ဒီးတၢ်တၢထီၣ်တၢလီၤအဂ့ၢ်ဒီး, ပျံၤတၢ်တဂ့ၤ. အဂ့ၢ်ဒ်အံၤ, တၢ်န့ၣ်တဖၣ်ဘၣ်မၤဆိအ သးလီၤ. မ့မ့ၢ်အကတၢၢ်တအိၣ်ဒံးဘၣ်တကီၢ်ခါဘၣ်.

¹⁰ တုၤနုၤတစုစံးဘၣ်အီၤ, ပှၤကညီတကလုာ်ဒီးတက လုာ်, တဘီမုၢ်ဒီးတဘီမုၢ်ကထီဒါလိာ်အသးလီၤ. ¹¹ ဒီး ဟီၣ်ခိၣ်ကဟူးဝးဆှဲးဆှိးနးနးကလဲာ်လၢအံၤတပူၤ လၢ နုၤတပူၤ, ဒီးတၢ်အိၣ်ဝံၤအိၣ်စ့ၤ, ဒီးတၢ်ဆါသံသတြိာ် ကအိၣ်ထီၣ်ဝဲလီၤ. ဒီးတၢ်ပနီၣ်ဖးဒိၣ်လၢအလီၤပျံၤလီၤ ဖုးန့ၣ်ကအိၣ်ထီၣ်ဝဲလၢမူကပိာ်လိၤလီၤ. ¹² ဘၣ်ဆၣ်ဒီး, တၢ်န့ၣ်တဖၣ်တချုးမၤဒံးဘၣ်အသးခဲလၢာ်ဒီး, ပှၤကပာ် အစုလၢသုလိၤ, ဒီးကမၤအၢမၤနးသု, ဒီးကဟ့ၣ်လီၤ ကွံာ်သုဆူဘူၣ်ဘျီၣ်ပူၤ, ဒီးဆူဃိာ်ပူၤ, ဒီးကလဲၤမိၤသု ဆူစီၤပၤဒီးပဒိၣ်ပပှၢ်အအိၣ်, လၢယမံၤအဃိလီၤ. ¹³ ဒီး ကကဲလၢတၢ်အုၣ်အသးလၢသုဂီၢ်လီၤ.

¹⁴ မၤသးဒ်န့ၣ်ဒီးဒ်သိးသုကကတိၤပူၤဖျဲးတၢ် ဒ်အံၤဒ်နုၤ ဒီး, တိၢ်သုသးလၢသုသုတဆိကမိၣ်ပာ်တဂ့ၤန့ၣ် တ က့ၢ်. ¹⁵ အဂ့ၢ်ဒ်အံၤ, ယကဟ့ၣ်သုထးခိၣ်, ဒီးတၢ်ကူၣ် သ့လၢသုဒုၣ်သုဒါတဖၣ်န့ၣ် ဂ့ၢ်လိာ်ဘှီလိာ်တသ့ဘၣ် နီတဂၤဘၣ်လီၤ. ¹⁶ ဒီးသုမိၢ်သုပၢ်, ဒီးသုပုၢ်သုဝဲၢ်, ဒီးသု ဘူးသုတံၢ်, ဒီးသုတံၤသုသကိးတဖၣ်န့ၣ်, ကဟ့ၣ်လီၤ ကွံာ်သု, ဒီးကမၤသံကွံာ်သုတနီၤနီၤလီၤ. ¹⁷ ဒီးပှၤကသး ဟ့သုလၢယမံၤအဃိခဲလၢာ်လီၤ. ¹⁸ မ့မ့ၢ်သုခိၣ်သူတဘိ ဧိၤတဟါမၢ်ဘၣ်ဝဲဘၣ်. ¹⁹ မၤန့ၢ်သုသးလၢသုတၢ်ဝံသး စူၤန့ၣ်တက့ၢ်. ²⁰ ဒီးတုၤသုထံၣ်သုးမုၢ်သံၣ်ဘိ ဝီၤဃာ်ယရူၤၡလ့ၣ်ဒီး, သ့ၣ်ညါလၢအတၢ်အိၣ်သယုၢ် ဘူးထီၣ်လံန့ၣ်တက့ၢ်.―

²¹ တုၤနုၤတစုပှၤအိၣ်လၢကီၢ်ယူဒၤတဖၣ်န့ၣ်, မ်အဃ့ၢ်စံၣ် ဆူကစၢၢ်ကလိတက့ၢ်. ဒီးပှၤအိၣ်လၢအသးကံၢ်ပူၤတ ဖၣ်န့ၣ်, မ်အဟးဆူခိတက့ၢ်. ဒီးပှၤအိၣ်လၢခိတဖၣ်န့ၣ်, မ်အသုတက့ၤနုာ်လၢအပူၤတဂ့ၤ. ²² အဂ့ၢ်ဒ်အံၤ, တၢ်လၢ မုၢ်နံၤတဖၣ်န့ၣ်, မ့ၢ်ဟ့ၣ်ကၣ်တၢ်အမုၢ်နံၤ, ဒ်သိးကယဲၢ် တၢ်ကွဲးအသးခဲလၢာ်ကလၢထီၣ်ပှဲၤထီၣ်ဝဲလီၤ.

²³ ဒီးလၢမုၢ်နံၤတဖၣ်န့ၣ်, ပှၤလၢအဒၢထီၣ်, ဒီးပှၤလၢ အဒုးအီၣ်နုၢ်တၢ်တဖၣ်န့ၣ်ဘၣ်အဖှီၣ်လီၤ. အဂ့ၢ်ဒ်အံၤ, တၢ်ဖှီၣ်ဖးဒိၣ်ကဘၣ်ကီၢ်တဘ့ၣ်အံၤ, ဒီးတၢ်သးထီၣ်က ဘၣ်ပှၤတကလုာ်အံၤလီၤ. ²⁴ အဝဲသ့ၣ်တဖၣ်န့ၣ်ကဘၣ် သံလၢနးအကနၣ်, ဒီးတၢ်ကစိာ်မၢကဲကုၢ်အီၤဆူပှၤကိး ကလုာ်ဒဲးအကျါ, ဒီးတၢ်ကယီၢ်တံၢ်ဝ့ၢ်ယရူၤၡလ့ၣ်တုၤ လီၤလၢပှၤကလုာ်အဂၤအမုၢ်အလါ ကလၢထီၣ်ပှဲၤထီၣ် လီၤ.

²⁵ ဒီးတၢ်ပနီၣ်လီၤလးကအိၣ်ထီၣ်လၢမုၢ်အလိၤ, ဒီးလါ အလိၤ, ဒီးဆၣ်ဧိၤဖီဧိၤအလိၤ, ဒီးတၢ်ကီတၢ်ခဲ, တၢ်ကိၢ် တၢ်ဂီၤ, ကဘၣ်ပှၤကညီအကလုာ်ကလုာ်လၢဟီၣ်ခိၣ် ချၢလီၤ. ဒီးပီၣ်လဲၣ်ဒီးလပီတဖၣ်ကသီၣ်ဝဲလီၤ. ²⁶ မ့ၢ်ပှၤ ကညီပျံၤတၢ်, ဒီးဘၣ်ယိၣ်တၢ်လၢတၢ်ကမၤအသးလၢ ဟီၣ်ခိၣ်အဂ့ၢ်သတးဒီး, ကသံတ့ၢ်လီၤ. အဂ့ၢ်ဒ်အံၤ, မူ ခိၣ်အစိအကမီၤတဖၣ်န့ၣ်ကဟူးကဝးလီၤ. ²⁷ တုၤနုၤတ စု, ပှၤကထံၣ်ဘၣ်ပှၤကညီဖိခွါအံၤ ဟဲလၢတၢ်အၢၣ်အ ပူၤအိၣ်ဒီးအစိအကမီၤ, ဒီးအလၤဒိၣ်အကပီၤဒိၣ်လီၤ.―

²⁸ ဒီးတုၤတၢ်န့ၣ်တဖၣ်မၤအသးဒီး, မ့ၢ်တၢ်အုၣ်က့ၤခီၣ်က့ၤ သုအမုၢ်အလါဘူးထီၣ်သတးဒီး, ကွၢ်ထီၣ်ဒီးမိာ်ထီၣ် သုခိၣ်တက့ၢ်.

²⁹ ဒီးစံးဘၣ်အီၤလၢတၢ်ကတိၤဒိ, ချၢၣ်ဒၢဒီးသ့ၣ်ခဲလၢာ် န့ၣ်, ကွၢ်အီၤတက့ၢ်. ³⁰ တုၤအလၣ်ဒိးထီၣ်ဒီး, သုထံၣ်, ဒီး သုသ့ၣ်ညါသုဝဲလၢတၢ်ကိၢ်အခါဘၣ်ဘူးတ့ၢ်လံ. ³¹ ဒ်န့ၣ် အသိး တုၤသုထံၣ်တၢ်တဖၣ်န့ၣ်မၤအသးဒီး, သ့ၣ်ညါ လၢယွၤအဘီအမုၢ်အိၣ်ဘူးထီၣ်လံန့ၣ်တက့ၢ်. ³² ယစံး ဘၣ်သုတီတီလၢ ပှၤတစိၤအံၤတချုးပူၤကွံာ်ဒံးဘၣ်ဒီး, တၢ်တဖၣ်န့ၣ်ကမၤအသးခဲလၢာ်လီၤ. ³³ မူခိၣ်ဒီးဟီၣ်ခိၣ် ကပူၤကွံာ်လီၤ. မ့မ့ၢ်ယတၢ်ကတိၤအံၤတပူၤကွံာ်ဘၣ်.

³⁴ ပလီၢ်သုသးတက့ၢ်. မ့တမ့ၢ်ဘၣ်ဒ်န့ၣ်ဒီး, သုသးက ဃၢဒီးတၢ်အီၣ်လုၣ်ကိအီလုၣ်ကိတၢ်, ဒီးလၢအအံၤတ ဃၣ်အတၢ်ဘၣ်ယိၣ်ဘၣ်ဘီသတးဒီး, မုၢ်တနံၤန့ၣ်က ဘၣ်သုလၢသုတဆိကမိၣ်ဘၣ်အကတီၢ်လီၤ. ³⁵ အဂ့ၢ်ဒ် အံၤ, ကဟဲဘၣ်ကယဲၢ်ပှၤအိၣ်လၢဟီၣ်ခိၣ်ချၢဒီဘ့ၣ်ညါ, ဒ်တစိးအသိးန့ၣ်လီၤ. ³⁶ မၤသးဒ်န့ၣ်ဒီး, ဒ်သိးတၢ်ကပာ် သုလၢသုဂ့ၤပူၤဖျဲးဒီး တၢ်လၢအကမၤအသးတဖၣ် ခဲ လၢာ်, ဒီးလၢသုဂ့ၤဆၢထၢၣ်လၢပှၤကညီဖိခွါအမဲာ်ညါ ဒီး, ဆိးသီဒီးဘါထုကဖၣ်တၢ်ကိးအကတီၢ်ဒဲးတက့ၢ်.

³⁷ ဒီးသိၣ်တၢ်သီတၢ်လၢမဆါခီလၢ တၢ်လုၢ်အဟံၣ်ပူၤ, ဒီးလဲၤအိၣ်လၢမုၢ်နၤလၢကစၢၢ်ကိးဝဲအမံၤလၢ သ့ၣ်စၤ ယံးအလိၤလီၤ. ³⁸ ဒီးပှၤဂီၢ်မုၢ်ခဲလၢာ်ဟဲဆူအအိၣ်ဂီၤဂီၤ လၢတၢ်လုၢ်အဟံၣ်ပူၤဒ်သိးကဒိကနၣ်တၢ်လီၤ.

၂၂

¹ ဒီးဘူၣ်ကိၣ်တဘၣ်ဒီးကိၣ်မံၣ် ကိးဝဲလၢဘူၣ်လဲၤက ပာ်ကဘၣ်ဘူးတ့ၢ်ဒီး, ² ပှၤလုၢ်တၢ်အခိၣ်ဒီးပှၤကွဲးလံာ် သ့ၣ်တဖၣ်, ဃုဝဲလၢအကမၤသံအီၤ ဒ်လဲၣ်ဒ်လဲၣ်န့ၣ် လီၤ. အဂ့ၢ်ဒ်အံၤ, ပျံၤပှၤဂီၢ်မုၢ်လီၤ.

³ ဒီးပှၤအိၣ်လၢပှၤတဆံခံဂၤအကျါ, စီၤယူဒၤကိးဝဲလၢ အံၣ်စကၤရံၤအိာ်တဂၤန့ၣ်, မုၣ်ကီၤလံၢ်လဲၤနုာ်ဝဲဆူအ ပူၤ, ⁴ ဒီးကဟ့ၣ်လီၤကွံာ်အီၤဒ်လဲၣ်ဒ်လဲၣ်န့ၣ်ဒီး, လဲၤက တိၤလိာ်အသးဒီး ပှၤလုၢ်တၢ်အခိၣ်ဒီးပှၤသုးဖိအခိၣ်တ ဖၣ်လီၤ. ⁵ ဒီးအဝဲသ့ၣ်တဖၣ်န့ၣ်အသးခုဝဲ, ဒီးအၢၣ်လီၤ အီလီၤဝဲလၢအကဟ့ၣ်လီၤအစ့လီၤ. ⁶ ဒီးအဝဲဒၣ်အၢၣ် လီၤအီလီၤဝဲ, ဒီးဒ်သိးအကဟ့ၣ်လီၤကွံာ်အီၤလၢပှၤဂီၢ် မုၢ်တအိၣ်ဘၣ်အခါဒီး, ဃုဝဲအဆၢအကတီၢ်လၢ အ ဘၣ်လီၤ.

⁷ ဒီးဘူၣ်ကိၣ်တဘၣ်ဒီးကိၣ်မံၣ်အမုၢ်တနံၤ လၢအဘၣ် မၤသံတၢ်လဲၤကပာ်ဘၣ်ဝဲ, ⁸ ဒီးမၢလီၤစီၤပ့းတရူးဒီးစီၤ ယိၤဟၣ်ဒီးစံးဝဲဒၣ်, လဲၤကတဲာ်ကတီၤတၢ်လဲၤကပာ်, ဒ်သိးပကအီၣ်တၢ်န့ၣ်တက့ၢ်. ⁹ ဒီးအဝဲသ့ၣ်စံးဘၣ်အီၤ, ဘၣ်နသးလၢပကကတဲာ်ကတီၤတၢ်ဖဲလဲၣ်ပူၤလဲၣ်. ¹⁰ ဒီး အဝဲဒၣ်စံးဘၣ်အီၤ, ကွၢ်ကွၢ်, တုၤသုလဲၤနုာ်လၢဝ့ၢ်ပူၤဒီး, ပှၤလဲၤစိာ်သပၢၤထံတဂၤကသဂၢၢ်သုလီၤ. ပိာ်အခံဆူ ဟံၣ်ပူၤဖဲအလဲၤနုာ်ဝဲတက့ၢ်. ¹¹ ဒီးစံးဘၣ်ဟံၣ်ကစၢ်, သ ရၣ်စံးဘၣ်နၤ, ဒၢးတဒၢးဖဲယကအီၣ်တၢ်လဲၤကပာ်ဒီးယ ပျဲၢ်ယဘီၣ်, အိၣ်ဖဲလဲၣ်ပူၤလဲၣ်. ¹² ဒီးကဒုးနဲၣ်သုလၢဒၢး ဖးဒိၣ်, လၢတၢ်ထီၣ်ထီတတီၤ, အိၣ်ကတီၤအသးလီၤ. ကတဲာ်ကတီၤတၢ်ဖဲန့ၣ်တက့ၢ်. ¹³ ဒီးအပျဲၢ်အဘီၣ်လဲၤဝဲ, ဒီးထံၣ်န့ၢ်တၢ်ဒ်အစံးဘၣ်အီၤအသိးန့ၣ်, ဒီးကတဲာ်က တီၤတၢ်လဲၤကပာ်လီၤ.

¹⁴ ဒီးတုၤအနၣ်ရံၣ်ဘၣ်ဒီး, ဆ့ၣ်နီၤသန့ၤဃုာ်ဒီးပှၤတၢ် မၢဖိတဆံခံဂၤန့ၣ်, ¹⁵ ဒီးစံးဘၣ်အီၤ, ယဲဒၣ်အံၤ, ယတ ချုးဒိးဒံးဘၣ်တၢ်ဒီး, တၢ်မိၣ်အီၣ်ဃုာ်ယသးလၢတၢ်လဲၤ ကပာ်အံၤဒီးသုဒိၣ်မးလီၤ. ¹⁶ အဂ့ၢ်ဒ်အံၤ, ယစံးဘၣ်တဲ ဘၣ်သုလၢ အတချုးလၢထီၣ်ပှဲၤထီၣ်ဒံးဘၣ်လၢယွၤအ ဘီအမုၢ်ဒီး, ယတအီၣ်လၢၤဘၣ်အီၤဘၣ်. ¹⁷ ဒီးဟံးန့ၢ်လီ ခီဒီးစံးထီၣ်ပတြၢၤတၢ်အဘျုးအဖှိၣ်, ဒီးစံးဝဲဒၣ်, ဟံးန့ၢ် တၢ်အံၤ, ဒီးနီၤဖးလိာ်သုသးလၢအီၤတက့ၢ်. ¹⁸ အဂ့ၢ်ဒ် အံၤ, ယစံးဘၣ်သုလၢယွၤအဘီအမုၢ် တချုးဟဲဒံးဘၣ် ဒီး, ယတအီလၢၤဘၣ်လၢစပံးမုၢ်အသၣ်အထံဘၣ်.

¹⁹ ဒီးဟံးန့ၢ်ကိၣ်ဒီးစံးထီၣ်ပတြၢၤတၢ်အဘျုးအဖှိၣ်, ဒီး စိၢ်ဘျဲးဝဲ, ဒီးဟ့ၣ်လီၤအပျဲၢ်အဘီၣ်, ဒီးစံးဝဲဒၣ်, တၢ် အံၤမ့ၢ်ယနီၢ်ခိ လၢအဘၣ်တၢ်ဟ့ၣ်လီၤကွံာ်အီၤလၢသု ဂီၢ်လီၤ. မၤတၢ်အံၤလၢသုသ့ၣ်နီၣ်ထီၣ်က့ၤယၤအဂ့ၢ်န့ၣ် တက့ၢ်. ²⁰ လၢအအီၣ်တၢ်အီၣ် လၢဟါအီၣ်အလီၢ်ခံဒီး, လီခီဒ်န့ၣ်အသိးစ့ၢ်ကီး, ဒီးစံးဝဲဒၣ်, လီခီအံၤမ့ၢ်တၢ်အၢၣ် လီၤအီလီၤအသီလၢ ယသွံၣ်လၢအဘၣ်တၢ်ဂၢ်လီၤအီၤ လၢသုဂီၢ်လီၤ.

²¹ ဘၣ်ဆၣ်ဒီးကွၢ်ကွၢ်, ပှၤလၢအကဟ့ၣ်လီၤကွံာ်ယၤ တဂၤ, အစုအိၣ်ဒီးယၤလၢစီၢ်နီၤခိၣ်အဖီခိၣ်လီၤ. ²² မ့ၢ် မးပှၤကညီဖိခွါအံၤလဲၤတၢ် ဒ်တၢ်စံၣ်ညီၣ်ပာ်ဝဲအသိး န့ၣ်လီၤ. ဘၣ်ဆၣ်ဒီး ပှၤလၢအဟ့ၣ်လီၤကွံာ်အီၤတဂၤ န့ၣ်, ဘၣ်အဖှီၣ်လီၤ. ²³ ဒီးမ့ၢ်မတၤမတၤလၢအကျါကမၤ တၢ်န့ၣ်တမံၤဒီး, အဝဲသ့ၣ်သံကွၢ်လိာ်အသးလီၤ.

²⁴ ဒီးမ့ၢ်မတၤမတၤလၢအကျါ ကဘၣ်တၢ်ပာ်အီၤလၢ အဒိၣ်ကတၢၢ်တဂၤဒီး, အဝဲသ့ၣ်ဂ့ၢ်လိာ်ဘှီလိာ်အသး စ့ၢ်ကီးလီၤ. ²⁵ ဒီးအဝဲဒၣ်စံးဘၣ်အီၤ, ပှၤကလုာ်တဖၣ် အစီၤပၤန့ၣ်ကဲကစၢ်လၢအဖီခိၣ်လီၤ. ဒီးပှၤအိၣ်ဒီးအစိ အကမီၤန့ၣ်, ပှၤကိးလၢပှၤမၤဂ့ၤတၢ်န့ၣ်လီၤ. ²⁶ မ့မ့ၢ်သုဝဲ သ့ၣ်အံၤတဒ်န့ၣ်အသိးဘၣ်. ပှၤလၢအဒိၣ်တက့ၢ်ဝဲလၢ သုကျါန့ၣ်, မ်အကဲထီၣ်ဒ်အဆံးတဂၤအသိးတက့ၢ်. ဒီး ပှၤအခိၣ်တဂၤ, မ်အကဲထီၣ် ဒ်တၢ်အခ့အပှၤအသိးတ က့ၢ်. ²⁷ အဂ့ၢ်ဒ်အံၤ, ပှၤလၢအဒိၣ်တက့ၢ်မ့ၢ်ဖဲလဲၣ်တဂၤ လဲၣ်. မ့ၢ်ပှၤလၢအဆ့ၣ်နီၤသန့ၤအီၣ်တၢ်လၢမ့ၤလၣ်ထံး မ့ၢ်တၢ်အခ့အပှၤလဲၣ်. မ့ၢ်ပှၤလၢအဆ့ၣ်နီၤလၢမ့ၤလၣ် ထံးန့ၣ်တမ့ၢ်ဘၣ်ဧါ. မ့မ့ၢ်ယဲဒၣ်အံၤ, ယအိၣ်လၢသုကျါ ဒ်တၢ်အခ့အပှၤအသိးလီၤ. ²⁸ ဒီးလၢယဘၣ်တၢ်လ့ပစီတ ဖၣ်အပူၤန့ၣ်, သုမ့ၢ်ပှၤလၢအအိၣ်ဝဲဆိးဝဲဒီးယၤလီၤ. ²⁹ ဒီး ယပာ်လီၤန့ၢ်သုလၢဘီမုၢ် ဒ်ယပၢ်ပာ်လီၤန့ၢ်ယၤအသိး,―

³⁰ ဒ်သိးသုကဆ့ၣ်နီၤအီၣ်တၢ်ဒီးအီတၢ်လၢ ယမ့ၤလၣ်ထံး လၢယဘီယမုၢ်အပူၤ, ဒီးသုကဆ့ၣ်နီၤလၢလီၢ်ပစိာ်အဖီ ခိၣ်, ဒီးစံၣ်ညီၣ်အံၣ်စရ့လးတဆံခံဒူၣ်န့ၣ်လီၤ.

³¹ ဒီးကစၢ်န့ၣ်စံးဝဲဒၣ်, စီၤၡံမိၣ်ဧၢ, စီၤၡံမိၣ်ဧၢ, ကွၢ်ကွၢ်, မုၣ်ကီၤလံၢ်ဃ့ဂုၤသုဒ်ဘုအသိးန့ၣ်လီၤ. ³² မ့မ့ၢ်ယဲဒၣ်အံၤ, ဒ်သိးနတၢ်နာ်သုတဟးဂီၤကွံာ်တဂ့ၤဒီး, ယဘါထုက ဖၣ်န့ၢ်လံလၢနဂီၢ်လံ. ဒီးတုၤနဃၣ်လိၤက့ၤနသးဒီး, ဒုး ဆူၣ်ထီၣ်နဒီပုၢ်ဝဲၢ်အဂံၢ်အဘါတက့ၢ်.

³³ ဒီးအဝဲဒၣ်စံးဘၣ်အီၤ, ကစၢ်ဧၢ, ဆူဃိာ်ပူၤမ့ၢ်ဂ့ၤ, ဆူ တၢ်သံအပူၤမ့ၢ်ဂ့ၤ, ယအိၣ်ကတီၤလံယသးလၢ ယက လဲၤဃုာ်ဒီးနၤလီၤ. ³⁴ ဒီးစံးဝဲဒၣ်, စီၤပ့းတရူးဧၢ, ယစံး ဘၣ်နၤ, ခဲမုၢ်နၤအံၤ ဆီဖါတချုးအိၣ်အိထီၣ်ဒံးဘၣ်ဒီး, နကသမၢယၤ, လၢနတသ့ၣ်ညါဘၣ်ယၤဘၣ်, သၢစုလီၤ.

³⁵ ဒီးစံးဘၣ်အဝဲသ့ၣ်, ဖဲယမၢသုလဲၤတၢ်တအိၣ်ဘၣ်ဒီး စ့အထၢၣ်, တၢ်အီၣ်အထၢၣ်, ဒီးခီၣ်ဖံးတဖၣ်ဒီး, သုတၢ် တလၢတပှဲၤဘၣ်န့ၣ် အိၣ်တမံၤမံၤဧါ. ဒီးအဝဲသ့ၣ်စံးဝဲ ဒၣ်, တအိၣ်ဘၣ်နီတမံၤဘၣ်. ³⁶ ဒီးစံးဘၣ်အီၤ, မ့မ့ၢ်ခဲက နံၣ်အံၤ, ပှၤအိၣ်ဒီးစ့အထၢၣ်န့ၣ်, မ်အဟံးန့ၢ်အီၤတက့ၢ်. ဒ်န့ၣ်အသိး, တၢ်အီၣ်အထၢၣ်လီၤ. ဒီးပှၤလၢအနးတ အိၣ်ဘၣ်န့ၣ်, မ်အဆါကွံာ်အယၣ်ဒီး ပှ့ၤန့ၢ်တဘ့ၣ်တ က့ၢ်. ³⁷ အဂ့ၢ်ဒ်အံၤ, ယစံးဘၣ်သုလၢတၢ်ကွဲးအသးအံၤ, တၢ်ဂံၢ်အီၤလၢ ပှၤမၤကမၣ်တၢ်ဖိအကျါ,+ ၡါ. ၅၃း၁၂|Isa.53.12ဘၣ်လၢထီၣ်ပှဲၤထီၣ်ဒံးလၢယပူၤလီၤ. အဂ့ၢ်ဒ်အံၤ, တၢ် လၢအဘၣ်ဃးဒီးယၤအံၤ, အိၣ်ဝဲဒီးအကတၢၢ်လီၤ.

³⁸ ဒီးအဝဲသ့ၣ်စံးဝဲဒၣ်, ကစၢ်ဧၢ, ကွၢ်ကွၢ်, နးခံဘ့ၣ် အိၣ်ဖဲအံၤလီၤ. ဒီးအဝဲဒၣ်စံးဘၣ်အီၤ, အါလံလီၤ.

³⁹ ဒီးဒ်အလုၢ်အလၢ်အသိးန့ၣ်, လဲၤဝဲဆူ ကစၢၢ်သ့ၣ် စၤယံးအလိၤ, ဒီးအပျဲၢ်အဘီၣ်ပိာ်ထီၣ်အခံလီၤ. ⁴⁰ ဒီး လဲၤတုၤဖဲအလီၢ်န့ၣ်ဒီးစံးဘၣ်အီၤ, ဒ်သိးသုသုတလဲၤနုာ် ဆူတၢ်လ့ပစီအပူၤတဂ့ၤဒီး, ဘါထုကဖၣ်တၢ်တက့ၢ်.―

⁴¹ ဒီးပာ်စီၤစုၤအသးဒီးအီၤ ယံၤတကွံာ်လၢၢ်ဃၣ်ဃၣ်, ဒီး ချံးလီၤအခီၣ်ဒီးဘါထုကဖၣ်တၢ်, ⁴² ဒီးစံးဝဲဒၣ်, ပၢ်ဧၢ, မ့ၢ်ဘၣ်နသးဒီး, တၢ်လၢလီခီအံၤ, မ်အလဲၤပူၤကွံာ်လၢ ယၤတက့ၢ်. ဘၣ်ဆၣ်ဒီးဖဲယသးဒၣ်ယဲတမ့ၢ်ဘၣ်, မ့ၢ် ဖဲဒၣ်နသးဒၣ်နဲတက့ၢ်.

⁴³ ဒီးကလူးလၢမူခိၣ်တဂၤ လီၣ်ဖျါထီၣ်အသးလၢအီၤ, ဒီးဒုးဆူၣ်ထီၣ်အဂံၢ်အဘါလီၤ. ⁴⁴ ဒီးဘၣ်တၢ်ဖှီၣ်အိၣ်ဝဲ တကဲဘၣ်ဒီး, ဘါထုကဖၣ်တၢ်သပှၢ်န့ၢ်အလီၢ်လီၤ. ဒီး တၢ်မၤအသးလၢအကပၢၤလီၤဝဲ လၢဟီၣ်ခိၣ်အဖီခိၣ်, ဒ်တၢ်သွံၣ်လီၤစီၤအဖျၢၣ်ဖးဒိၣ်အသိးန့ၣ်လီၤ. ⁴⁵ ဒီးဂဲၤဆၢ ထၢၣ်လၢတၢ်ဘါထုကဖၣ်, ဒီးက့ၤဝဲဆူအပျဲၢ်အဘီၣ်အ အိၣ်, ဒီးထံၣ်န့ၢ်လၢအမံသပ့ၤလၢတၢ်သးအုးအဃိ, ⁴⁶ ဒီး စံးဘၣ်အီၤ, သုမံသပ့ၤဘၣ်မနုၤလဲၣ်. ဂဲၤဆၢထၢၣ်ဒီး ဘါထုကဖၣ်တၢ်, ဒ်သိးသုသုတလဲၤနုာ်ဆူတၢ်လ့ပစီ အပူၤတဂ့ၤန့ၣ်တက့ၢ်.

⁴⁷ ဒီးကတိၤတၢ်အဖၢမုၢ်ဒီး, ကွၢ်ကွၢ်, ပှၤဂီၢ်မုၢ်, ဒီးပှၤ အိၣ်လၢပှၤတဆံခံဂၤအကျါကိးဝဲလၢ စီၤယူဒၤတဂၤဟဲ လၢအမဲာ်ညါ, ဒီးလဲၤဆူယ့ၣ်ရှူးအအိၣ်ဒ်သိးအကနၢမူ အီၤလီၤ. ⁴⁸ ဒီးယ့ၣ်ရှူးစံးဘၣ်အီၤ, စီၤယူဒၤဧၢ, နဟ့ၣ် လီၤကွံာ်ပှၤကညီဖိခွါလၢတၢ်နၢမူန့ၣ်ဧါ. ⁴⁹ ဒီးပှၤအိၣ်ဒီး အီၤထံၣ်တၢ်လၢအကမၤအသးဒီးစံးဘၣ်အီၤ, ကစၢ်ဧၢ, မ့ၢ်ပကကျီဒီးနးန့ၣ်ဧါ. ⁵⁰ ဒီးပှၤတဂၤကျီပှၤလုၢ်တၢ်အခိၣ် အခ့အပှၤတဂၤ, ဒီးအနၢ်ထွဲတခီတူာ်ကွံာ်ဝဲလီၤ. ⁵¹ ဒီး ယ့ၣ်ရှူးကတိၤဆၢတၢ်ဒီးစံးဝဲဒၣ်, ပှဲၤန့ၣ်လီၤ. ဒီးထိးဘၣ် အနၢ်, ဒီးမၤဘျါက့ၤအီၤလီၤ.

⁵² ဒီးယ့ၣ်ရှူးစံးဘၣ် ပှၤလုၢ်တၢ်အခိၣ် ဒီးပှၤသုးဖိအ ခိၣ်ဘၣ်ဃးဒီးတၢ်လုၢ်အဟံၣ်, ဒီးပှၤသးပှၢ်သ့ၣ်တဖၣ် လၢအဟဲဆူအအိၣ်န့ၣ်, ဒ်ပှၤဖီၣ်န့ၢ်တၢ်ဘျၣ်အသိးဒီး, သုဟဲဒီးနး, ဒီးနီၣ်တီၢ်န့ၣ်ဧါ. ⁵³ လၢယအိၣ်ဒီးသုလၢ တၢ်လုၢ်အဟံၣ်ပူၤသ့သ့တနံၤန့ၣ်, သုတယူာ်ထီၣ်သုစု လၢယလိၤဘၣ်. မ့မ့ၢ်ခဲကနံၣ်အံၤမ့ၢ်သုနၣ်ရံၣ်, ဒီးတၢ် ခံးအစိအကမီၤလီၤ.

⁵⁴ ဒီးအဝဲသ့ၣ်တဖၣ် ဟံးန့ၢ်အီၤဒီးဆှၢအီၤဆူ ပှၤလုၢ် တၢ်အခိၣ်အဟံၣ်ပူၤလီၤ. ဒီးစီၤပ့းတရူးပိာ်ထီၣ်အခံစီၤ စုၤသကွ့ၤလီၤ.

⁵⁵ ဒီးပှၤဆိၣ်ကဲၤမ့ၣ်အူလၢဂၢၤပူၤ, ဒီးဆ့ၣ်နီၤအိၣ်ဝးတ ရံးဝဲ, ဒီးစီၤပ့းတရူးဆ့ၣ်နီၤလၢအကျါလီၤ. ⁵⁶ ဒီးတၢ်အ ခ့အပှၤပိာ်မုၣ်တဂၤ ထံၣ်လၢအဆ့ၣ်နီၤလၢမ့ၣ်အူကပီၤ, ဒီးကွၢ်ဝဲဒၣ်ထံထံဆးဆး, ဒီးစံးဝဲဒၣ်, ပှၤတဂၤအံၤမ့ၢ် အအိၣ်တ့ၢ်ဒီးအဝဲဒၣ်န့ၣ်လီၤ. ⁵⁷ ဒီးအဝဲဒၣ်သမၢဝဲဒီးစံး ဝဲဒၣ်, နီၢ်ဧၢ, ယတသ့ၣ်ညါဘၣ်အီၤဘၣ်.

⁵⁸ ဒီးတစိၢ်ဖိပူၤကွံာ်, ပှၤတဂၤဒၣ်ထံၣ်အီၤဒီးစံးဝဲဒၣ်, နဲ ဒၣ်အံၤ, နဘၣ်ဃးစ့ၢ်ကီးဒီးပှၤတဖၣ်န့ၣ်လီၤ. ဒီးစီၤပ့း တရူးစံးဝဲဒၣ်, တမ့ၢ်ဘၣ်ယၤဘၣ်, စီဧၢ.

⁵⁹ ဒီးတနၣ်ရံၣ်ဃၣ်ဃၣ်ပူၤကွံာ်ဒီး, ပှၤတဂၤဒၣ်ကတိၤ သပှၢ်တၢၢ်ဒီးစံးဝဲဒၣ်, အဝဲတဂၤအံၤ မ့ၢ်အအိၣ်တ့ၢ်ဒီး အီၤနီၢ်နီၢ်လီၤ. အဂ့ၢ်ဒ်အံၤ, မ့ၢ်ပှၤကၤလံၤလါဖိလီၤ. ⁶⁰ ဒီး စီၤပ့းတရူးစံးဝဲဒၣ်, စီဧၢ, နစံးတၢ်န့ၣ်ယနၢ်တပၢၢ်ဘၣ်. ဒီးကတိၤတၢ်ဒ်န့ၣ်အဖၢမုၢ်ဒီး, ဆီဖါအိၣ်အိထီၣ်ဝဲ တ ကီၢ်ခါလီၤ.

⁶¹ ဒီးကစၢ်န့ၣ်ဃၣ်ဃီၤအသးဒီး ကွၢ်စီၤပ့းတရူးလီၤ. ဒီး စီၤပ့းတရူးသ့ၣ်နီၣ်ထီၣ်က့ၤ ကစၢ်အကလုၢ်ဒ်အစံးဘၣ် အီၤအသိးန့ၣ်, လၢဆီဖါတချုးအိၣ်အိထီၣ်ဒံးဘၣ်ဒီး, န ကသမၢယၤသၢစုလီၤ. ⁶² ဒီးစီၤပ့းတရူးဟးထီၣ်ဆူခိ, ဒီး ဟီၣ်ဟ့သးနးမးလီၤ.

⁶³ ဒီးပှၤကညီလၢအဟံးန့ၢ် ယ့ၣ်ရှူးတဖၣ်န့ၣ် ဒုၣ်ဒွဲၣ် အီၤ, ဒီးဝ့ၤအီၤတီၢ်အီၤလီၤ. ⁶⁴ ဒီးမၤဘၢဃာ်ဝဲအမဲာ်, ဒီး သံကွၢ်အီၤဒီးစံးဝဲဒၣ်, မ့ၢ်မတၤတီၢ်နၤတဂၤလဲၣ်. စံး ဘၣ်တဲဘၣ်ပှၤလၢဝံအကျိာ်တက့ၢ်. ⁶⁵ ဒီးကတိၤဒုၣ်ဒွဲၣ် အီၤလၢတၢ်ကတိၤအဂုၤအဂၤအါမံၤလီၤ.

⁶⁶ ဒီးတုၤမုၢ်ဆ့ၣ်ထီၣ်ဒီး, ပှၤသူၣ်က့သးပှၢ်, ဒီးပှၤလုၢ် တၢ်အခိၣ်, ဒီးပှၤကွဲးလံာ်သ့ၣ်တဖၣ်အိၣ်ဖှိၣ်ရိဖှိၣ်, ဒီး လဲၤဆှၢအီၤဆူအစံၣ်ညီၣ်တၢ်အလီၢ်, ⁶⁷ ဒီးစံးဝဲဒၣ်, နမ့မ့ၢ် ခရံာ်ဒီး, စံးဘၣ်တဲဘၣ်ပှၤတက့ၢ်. ဒီးစံးဘၣ်အီၤ, ယ မ့ၢ်စံးဘၣ်တဲဘၣ်နာ်သက့ သုဒီး, သုတနာ်ဘၣ်တၢ် ဘၣ်. ⁶⁸ ဒီးယမ့ၢ်သံကွၢ်နာ်သက့သုဒီး, သုတကတိၤဆၢ ဘၣ်ယၤဘၣ်, ဒီးသုတပျၢ်ဘၣ်ယၤဘၣ်. ⁶⁹ တုၤအံၤဆူ ညါပှၤကညီဖိခွါအံၤ ကဆ့ၣ်နီၤလၢယွၤအစိအကမီၤစုထွဲ လီၤ. ⁷⁰ ဒီးပှၤခဲလၢာ်စံးဝဲဒၣ်, မ့မ့ၢ်ဒ်န့ၣ်ဒီး, နမ့ၢ်ယွၤအဖိ ခွါဧါ. ဒီးအဝဲဒၣ်စံးဘၣ်အီၤ, သုစံးလၢယမ့ၢ်တၢ်န့ၣ် လီၤ. ⁷¹ ဒီးပှၤတဖၣ်စံးဝဲဒၣ်, ပမၤဒံးတၢ်အုၣ်အသးအလီၢ် အိၣ်ဒ်လဲၣ်. အဂ့ၢ်ဒ်အံၤ, ပနၢ်ဟူလၢအထးခိၣ်ဒၣ်ဝဲလီၤ.

၂၃

¹ ဒီးပှၤဂီၢ်မုၢ်ခဲလၢာ်န့ၣ်ဂဲၤဆၢထၢၣ်, ဒီးဆှၢအီၤဆူစီၤ ပံၤလးအအိၣ်လီၤ. ² ဒီးပာ်တၢ်ကမၣ်လၢအလိၤဒီးစံးဝဲ ဒၣ်, အဝဲတဂၤအံၤ, ပထံၣ်န့ၢ်အီၤလၢအဒုးလီၤကမၣ်ပှၤ တကလုာ်အံၤ, ဒီးတြီပှၤဟ့ၣ်သွဲလၢကဲစၢ်, ဒီးစံးလီၤအ သးလၢခရံာ်, စီၤပၤတဂၤလီၤ. ³ ဒီးစီၤပံၤလးသံကွၢ်အီၤ ဒီးစံးဝဲဒၣ်, နဲဒၣ်အံၤနမ့ၢ်ပှၤယူဒၤဖိအစီၤပၤန့ၣ်ဧါ. ဒီးအ ဝဲဒၣ်ကတိၤဆၢအီၤဒီးစံးဝဲဒၣ်, နစံးလံတၢ်လံ. ⁴ ဒီးစံး ဘၣ်ပှၤလုၢ်တၢ်အခိၣ်ဒီး ပှၤဂီၢ်မုၢ်တဖၣ်န့ၣ်, အဝဲတဂၤ အံၤ, ယတထံၣ်န့ၢ်ဘၣ် တၢ်ကမၣ်လၢအလိၤနီတမံၤ ဘၣ်. ⁵ ဒီးအဝဲသ့ၣ်ပာ်အသးဆူၣ်န့ၢ်အလီၢ်တက့ၢ်. ဒီး စံးဝဲဒၣ်, အဝဲတဂၤအံၤ, သိၣ်က့ၤသီက့ၤတၢ်လၢကီၢ်ယူ ဒၤဒီကီၢ်ညါ, လၢကၤလံၤလါတုၤဖဲအံၤ, ဒီးသဆၣ်ထီၣ် ပှၤဂီၢ်မုၢ်အခံလီၤ.

⁶ ဒီးစီၤပံၤလးနၢ်ဟူလၢကၤလံၤလါတဘီဒီး, သံကွၢ်ဝဲ, ပှၤအံၤ မ့ၢ်ပှၤကၤလံၤလါဖိဧါ. ⁷ ဒီးတုၤအသ့ၣ်ညါလၢ အဘၣ်ဃးဒီး စီၤဟ့ၤရိာ်အစိအကမီၤ, ဒီးမ့ၢ်လၢစီၤဟ့ၤ ရိာ် အိၣ်လၢယရူၤၡလ့ၣ် လၢမုၢ်နံၤတဖၣ်န့ၣ်သတးဒီး, မၢအလဲၤဆူအအိၣ်လီၤ.

⁸ ဒီးတုၤစီၤဟ့ၤရိာ်ထံၣ်ဘၣ်ယ့ၣ်ရှူးဒီး, အသးခုဒိၣ်မး လီၤ. အဂ့ၢ်ဒ်အံၤ, နၢ်ဟူတ့ၢ်အဂ့ၢ်အကျိၤအါမံၤ, ဒီးတၢ် မိၣ်ထံၣ်ဘၣ်အသးလၢအီၤဃဲးဃဲး, ဒီးမုၢ်လၢ်ဝဲလၢအက ထံၣ်တၢ်လီၤလးမၤအသးလၢအီၤတမံၤမံၤလီၤ. ⁹ ဒီးသံ ကွၢ်အီၤလၢတၢ်ကတိၤအါဘီ, ဒီးအဝဲဒၣ်တစံးဆၢဘၣ် အီၤနီတဘီဘၣ်. ¹⁰ ဒီးပှၤလုၢ်တၢ်အခိၣ်ဒီးပှၤကွဲးလံာ်သ့ၣ် တဖၣ်, ဆၢထၢၣ်ဒီးပာ်ထီၣ်တၢ်ကမၣ် လၢအလိၤနးမး လီၤ. ¹¹ ဒီးစီၤဟ့ၤရိာ်ဒီးအပှၤသုးဖိတဖၣ်, မၤအီၤတရီတ ပါ, ဒီးဒုၣ်ဒွဲၣ်အီၤ, ဒီးဒုးသိးထီၣ်အဆ့ကပြုၢ်ကပြီၤ, ဒီးဒုး က့ၤက့ၤအီၤဆူ စီၤပံၤလးအအိၣ်လီၤ. ¹² ဒီးလၢမုၢ်တနံၤ န့ၣ်, စီၤပံၤလးဒီးစီၤဟ့ၤရိာ်ဘၣ်လိာ်က့ၤအသးလီၤ. အ ဂ့ၢ်ဒ်အံၤ, လၢထံးလၢမကိာ်န့ၣ်, ထီဒါလိာ်အသးလီၤ.

¹³ ဒီးစီၤပံၤလးကိးဖှိၣ် ပှၤလုၢ်တၢ်အခိၣ်ဒီးပဒိၣ်ပပှၢ်ဒီး ပှၤဂီၢ်မုၢ်တဖၣ်, ¹⁴ ဒီးစံးဘၣ်အီၤ, သုဟဲဆှၢပှၤတဂၤအံၤ ဆူယအိၣ်ဒ်ပှၤလၢအဒုးလီၤကမၣ် ပှၤဂီၢ်မုၢ်အသိးလီၤ. ဒီးကွၢ်ကွၢ်, ယသံကွၢ်သံဒိးအီၤလၢသုမဲာ်ညါဘၣ်ဆၣ် ဒီး, တၢ်ကမၣ်လၢသုပာ်လၢအလိၤန့ၣ်, ယတထံၣ်န့ၢ် ဘၣ်နီတမံၤဘၣ်. ¹⁵ လၢန့ၣ်အမဲာ်ညါ, စီၤဟ့ၤရိာ်တထံၣ် ဘၣ်. အဂ့ၢ်ဒ်အံၤ, ယမၢသုလဲၤဆူအအိၣ်, ဒီးကွၢ်ကွၢ်, တၢ်ဂ့ၤဘၣ်သံန့ၣ်, တမၤဘၣ်ဝဲနီတမံၤဘၣ်. ¹⁶ မၤသးဒ်န့ၣ်ဒီးယကသိၣ်ဃီၣ်အီၤဒီး, ယကပျၢ်အီၤလီၤ. ¹⁷ (အဂ့ၢ် ဒ်အံၤ, လၢဘူၣ်ပူၤန့ၣ်, ဘၣ်ပျၢ်ပှၤတဂၤဂၤ လၢအဂီၢ်လီၤ.) ¹⁸ ဒီးအဝဲသ့ၣ်ကိးပသူထီၣ်တဘျီဃီ ဒီးစံးဝဲဒၣ်, အအံၤတဂၤမၤကွံာ်, ဒီးပျၢ်န့ၢ်ပှၤလၢ စီၤဘၤရးဘါတက့ၢ်. ¹⁹ စီၤဘၤရးဘါန့ၣ်မ့ၢ်ပှၤလၢအမၤတၢထီၣ်တၢလီၤ တၢ်လၢဝ့ၢ်ပူၤဒီး မၤသံပှၤကညီအဃိဒီး, လီၤဘၣ်လၢ ဃိာ်ပူၤလီၤ.

²⁰ မၤသးဒ်န့ၣ်ဒီး စီၤပံၤလးမိၣ်ပျၢ်အသးလၢယ့ၣ်ရှူးဒီး, ကတိၤထီၣ်ကဒီးလၢအဝဲသ့ၣ်လီၤ. ²¹ ဘၣ်ဆၣ်ဒီးအဝဲ သ့ၣ်ကိးပသူထီၣ် ဒီးစံးဝဲဒၣ်, ပျၤထီကွံာ်အီၤလၢထူၣ်စု ညါအလိၤတက့ၢ်. ပျၤထီကွံာ်အီၤလၢထူၣ်စုညါအလိၤ တက့ၢ်. ²² ဒီးအဝဲဒၣ်စံးဘၣ်အီၤသၢစုတစု, ဘၣ်မနုၤ လဲၣ်. မ့ၢ်အမၤကမၣ်တၢ်မနုၤတမံၤလဲၣ်. တၢ်ကမၣ်လၢ ဘၣ်သံအဂ့ၢ်န့ၣ်, ယတထံၣ်န့ၢ်ဘၣ်လၢအလိၤဘၣ်. မၤ သးဒ်န့ၣ်ဒီး ယကသိၣ်ဃီၣ်အီၤ, ဒီးယကပျၢ်ကွံာ်အီၤ လီၤ. ²³ ဘၣ်ဆၣ်ဒီးအဝဲသ့ၣ်ဂုာ်မၤဝဲလၢအကလုၢ်ဖးဒိၣ်, ဒီးဃ့လၢအကဘၣ်တၢ်ပျၤထီအီၤလၢ ထူၣ်စုညါအလိၤ လီၤ. ဒီးပှၤတဖၣ်အကလုၢ်, ဒီးပှၤလုၢ်တၢ်အခိၣ်တဖၣ် အကလုၢ်, မၤနၢၤတၢ်လီၤ. ²⁴ ဒီးဒ်အဝဲသ့ၣ်ဃ့တၢ်အသိး, စီၤပံၤလးစံၣ်ညီၣ်ဝဲ, ²⁵ ဒီးပျၢ်ကွံာ် ပှၤလၢအမၤတၢ်တၢ ထီၣ်တၢလီၤတၢ်, ဒီးမၤသံပှၤကညီဒီးလီၤဘၣ်လၢဃိာ် ပူၤ, လၢအဝဲသ့ၣ်ဃ့အီၤတဂၤန့ၣ်, မ့မ့ၢ်ဟ့ၣ်လီၤကွံာ် ယ့ၣ်ရှူး, ဒ်အဝဲသ့ၣ်အသးအသိးန့ၣ်လီၤ.

²⁶ ဒီးဆှၢအီၤအဖၢမုၢ်ဒီး, ဟံးဃာ်ပှၤကူၤရ့ၤန့ဖိ, စီၤၡံမိၣ်, ဟဲလၢပှၢ်လၢ်ကျါတဂၤ, ဒီးပာ်ထူၣ်စုညါလၢအလိၤ, ဒ် သိးအကယိးဝဲ, ဒီးပိာ်ယ့ၣ်ရှူးအခံလီၤ. ²⁷ ဒီးပှၤဂီၢ်မုၢ်ဖး ဒိၣ်, ဒီးပိာ်မုၣ်တဖၣ်ပိာ်ထီၣ်အခံ, ဒီးဒဲလီၤအသးနါပှၢ်, ဒီးဟီၣ်တၢ်ယၢၤတၢ်လၢအဃိလီၤ. ²⁸ ဒီးယ့ၣ်ရှူးဃၣ်ဃီၤ အသးဆူအအိၣ်ဒီးစံးဝဲဒၣ်, ပှၤယရူၤၡလ့ၣ်ဖိမုၣ်သ့ၣ်ဧၢ, ဟီၣ်လၢယဃိတဂ့ၤ, ဟီၣ်လၢသုဃိဒၣ်သုဝဲ, ဒီးလၢသု ဖိအဃိတက့ၢ်. ²⁹ အဂ့ၢ်ဒ်အံၤ, ကွၢ်ကွၢ်, မုၢ်နံၤတဖၣ်က ဘၣ်လၢပှၤကစံးဝဲ, ပှၤတူာ်ဖိပိာ်မုၣ်, ဒီးပှၤဒၢလီၢ်လၢ အတဒၢထီၣ်နီတဘျီဘၣ်, ဒီးပှၤနုၢ်ခိၣ်မီၣ်လၢအတဒုး အီၣ်နုၢ်ဘၣ်နီတဘျီဘၣ်တဖၣ်န့ၣ်, ဘၣ်ဆိၣ်ဂ့ၤဝဲလီၤ.―

³⁰ တုၤနုၤတစု, အဝဲသ့ၣ်ကစံးဘၣ်ကစၢၢ်ကလိ, လီၤတဲာ် လၢပလိၤတက့ၢ်. ဒီးကစံးဘၣ်တၢ်စိခိၣ်, မၤဘၢပှၤတ က့ၢ်. ³¹ အဂ့ၢ်ဒ်အံၤ, ပှၤမ့ၢ်မၤသ့ၣ်သံကစဲာ်ဒ်အံၤဒီး, က မၤတၢ်ဃ့ဒ်လဲၣ်.

³² ဒီးတၢ်မိၤထီၣ်ဃုာ်ဒီးအီၤစ့ၢ်ကီးပှၤမၤအၢတၢ်ခံဂၤ, ဒ် သိး အကဘၣ်တၢ်မၤသံအီၤလီၤ. ³³ ဒီးလဲၤဝဲတုၤလၢအ လီၢ်ကိးဝဲလၢကရၤနံ, ဒီးပှၤပျၤထီအီၤဖဲန့ၣ်, ဒီးပှၤမၤအၢ တၢ်ခံဂၤ, တဂၤလၢစုထွဲ, ဒီးတဂၤလၢစုစ့ၣ်လၢထူၣ်စုညါ အလိၤလီၤ. ³⁴ ဒီးယ့ၣ်ရှူးစံးဝဲဒၣ်, ပၢ်ဧၢ, ပျၢ်အတၢ်ဒဲးဘး တက့ၢ်. အဂ့ၢ်ဒ်အံၤ, မ့ၢ်အမၤဝဲဒ်လဲၣ်ဒ်လဲၣ်န့ၣ်တသ့ၣ် ညါဘၣ်. ဒီးပှၤဖးဝဲသတးဒီး, နီၤဖးအကူအသိးအဆၢ လီၤ.

³⁵ ဒီးပှၤဂီၢ်မုၢ်အိၣ်ဆၢထၢၣ်ကွၢ်တၢ်တကူၢ်သ့ၣ်လီၤ. ဒီး ပှၤတဖၣ်န့ၣ်, ဒီးပဒိၣ်ပပှၢ်န့ၣ်, ဒုၣ်ဒွဲၣ်တၢ်ဒီးစံးဝဲဒၣ်, အုၣ်က့ၤခီၣ်က့ၤပှၤဂၤလီၤ. အဝဲဒၣ်မ့မ့ၢ်ခရံာ်, ပှၤလၢယွၤ ဃုထၢအီၤတဂၤဒီး, မ်အအုၣ်က့ၤခီၣ်က့ၤဒၣ်အသး တ က့ၢ်. ³⁶ ဒီးပှၤသုးဖိလဲၤဆူအအိၣ်, ဒီးဟ့ၣ်ဒုးအီအီၤလၢတၤ ဆံၣ်အထံ, ဒီးဒုၣ်ဒွဲၣ်စ့ၢ်ကီးအီၤ, ³⁷ ဒီးစံးဝဲဒၣ်, နမ့မ့ၢ်ပှၤ ယူဒၤဖိအစီၤပၤဒီး, အုၣ်က့ၤခီၣ်က့ၤဒၣ်နသးတက့ၢ်. ³⁸ ဒီး လံာ်ဒုးနဲၣ်တၢ်, အိၣ်ကွဲးအသးလၢဟ့းလ့ၣ်အကျိာ်, ဒီးရိ မ့ၤအကျိာ်, ဒီးဧ့ၤဘြံၤအကျိာ်, ဘၣ်စဲထီၣ်ဝဲလၢအဖီခိၣ်, အအံၤတဂၤမ့ၢ်ပှၤယူဒၤဖိအစီၤပၤလီၤ.

³⁹ ဒီးပှၤမၤအၢတၢ်လၢအဘၣ်ပျၤထီဝဲ, ဒုၣ်ဒွဲၣ်အီၤတဂၤ ဒီးစံးဝဲဒၣ်, နမ့မ့ၢ်ခရံာ်န့ၣ်ဒီး, အုၣ်က့ၤခီၣ်က့ၤနသးဒီး ပှၤတက့ၢ်. ⁴⁰ မ့မ့ၢ်အဝဲတဂၤကတိၤဆၢတၢ်, ဒီးဒူအလိၤ, ဒီးစံးဝဲဒၣ်, နဘၣ်တၢ်စံၣ်ညီၣ်တမံၤဃီန့ၣ်ဒီး, နတပျံၤ ဘၣ်ယွၤဘၣ်ဧါ. ⁴¹ ဒီးပဝဲဒၣ်အံၤပဘၣ်တၢ်စံၣ်ညီၣ်တီတီ လီၤ. အဂ့ၢ်ဒ်အံၤ, ပဘၣ်တၢ်ဖဲပဂ့ၤဘၣ်လၢပမၤတၢ်အ ဃိလီၤ. မ့မ့ၢ်အဝဲတဂၤအံၤတမၤကမၣ်ဘၣ်တၢ်နီတမံၤ ဘၣ်. ⁴² ဒီးစံးဘၣ်ယ့ၣ်ရှူး, ကစၢ်ဧၢ, တုၤနဟဲလၢနဘီန မုၢ်အပူၤဒီး, သ့ၣ်နီၣ်ထီၣ်က့ၤယၤတက့ၢ်. ⁴³ ဒီးယ့ၣ်ရှူးစံး ဘၣ်အီၤ, ယစံးဘၣ်နၤတီတီအံၤ, ခဲမုၢ်ဆါအံၤနကအိၣ် ဒီးယၤလၢပၤရဒံစူးအပူၤလီၤ.

⁴⁴ ဒီးဘၣ်ဃုနၣ်ရံၣ်ဃၣ်ဃၣ်, ဒီးတၢ်ခံးမးလၢကီၢ်ဒီဘ့ၣ် ညါတုၤလီၤလၢခွံနၣ်ရံၣ်လီၤ. ⁴⁵ ဒီးမုၢ်ခံးလီၤဝဲ, ဒီးတၢ်လုၢ် ဟံၣ်အယၣ်ဘျးလီၤအသးန့ၣ်, သ့ၣ်ဖးထီၣ်လၢအသး ကံၢ်ပူၤလီၤ. ⁴⁶ ဒီးယ့ၣ်ရှူးကိးပသူထီၣ်လၢအကလုၢ်ဖးဒိၣ် ဒီးစံးဝဲဒၣ်, ပၢ်ဧၢ, ယဟ့ၣ်လီၤယသးလၢနစုပူၤလီၤ.+ စံး. ၃၁း၅|Ps.31.5*. ဒီးစံးတၢ်န့ၣ်ဝံၤဒီး, အသးဟးထီၣ်ကွံာ်လီၤ.

⁴⁷ ဒီးပှၤသုးဖိတကယၤအခိၣ်, ထံၣ်တၢ်မၤအသးသတး ဒီး, စံးထီၣ်ပတြၢၤယွၤဒီးစံးဝဲဒၣ်, တၢ်လၢပှၤတဂၤအံၤ, မ့ၢ်မးပှၤအတီလီၤ. ⁴⁸ ဒီးကယဲၢ်ပှၤခဲလၢာ်လၢအဟဲအိၣ် ဖှိၣ်ကွၢ်ကီတၢ်န့ၣ်, တုၤအထံၣ်တၢ်မၤအသးဒီး, ဒဲလီၤ အသးနါပှၢ်, ဒီးက့ၤက့ၤဝဲလီၤ. ⁴⁹ ဒီးပှၤလၢအသ့ၣ်ညါအီၤ ခဲလၢာ်, ဒီးပိာ်မုၣ်လၢအဟဲပိာ်အခံ လၢကၤလံၤလါတ ဖၣ်န့ၣ်, ဆၢထၢၣ်စၢၢ်တလၢၢ်ဒီးကွၢ်တၢ်တဖၣ်န့ၣ်လီၤ.

⁵⁰ ဒီးကွၢ်ကွၢ်, ပှၤလၢကီၢ်ယူဒၤဝ့ၢ်အရံၤမၤသဲဖိကိးဝဲအ မံၤလၢစီၤယိၤသး, ပှၤသးပှၢ်တဂၤန့ၣ်, မ့ၢ်ပှၤအဂ့ၤအဝါ, ဒီးအတီအလိၤ, ဒီးတအၢၣ်လီၤအီလီၤဘၣ်ပှၤသးပှၢ်အ ဂၤတဖၣ်အတၢ်မၤန့ၣ်ဘၣ်. ဒီးမ့ၢ်ပှၤလၢအကွၢ်လၢ်ယွၤ အဘီအမုၢ်အကျဲတဂၤ, ⁵¹ အဝဲဒၣ်န့ၣ်လဲၤဆူစီၤပံၤလးအ အိၣ်, ဒီးဃ့က့ၤယ့ၣ်ရှူးအစိၣ်လီၤ. ⁵² ဒီးဟံးလီၤအစိၣ်, ဒီးဘိၣ်ဘံဃာ်လၢဖှီဝါကဆှၣ်, ဒီးပာ်နုာ်အီၤလၢသွၣ်ခိၣ် စိးကျိးအသးလၢလၢၢ်ပူၤ, လၢတၢ်တပာ်နုာ်ဒံးဘၣ်ပှၤနီ တဂၤဘၣ်အပူၤလီၤ. ⁵³ ဒီးမုၢ်တနံၤန့ၣ်, မ့ၢ်လၢကတဲာ်က တီၤတၢ်အနံၤ, ဒီးမုၢ်အိၣ်ဘှံးအနံၤကဘၣ်ဘူးတ့ၢ်လီၤ.―

⁵⁴ ဒီးပှၤဟဲဒီးအီၤလၢကၤလံၤလါ, ပိာ်မုၣ်တဖၣ်ပိာ်ထီၣ်စ့ၢ် ကီးအခံ, ဒီးကွၢ်နီၣ်တၢ်သွၣ်ခိၣ်, ဒီးတၢ်ပာ်လီၤအစိၣ်ဒ် လဲၣ်ဒ်လဲၣ်န့ၣ်လီၤ. ⁵⁵ ဒီးက့ၤက့ၤဝဲ, ဒီးကတဲာ်ကတီၤ တၢ်နၢမူဒီးမူရၣ်လီၤ. ဒီးဒ်တၢ်မၤလိာ်အသိးန့ၣ်, အိၣ်ဘှံး ဝဲလၢအိၣ်ဘှံးအနံၤလီၤ.

၂၄

¹ ဒီးနွံနံၤအကျါ, လၢမုၢ်ခီၣ်ထံးအနံၤဂီၤဂီၤန့ၣ်အဝဲသ့ၣ် တဖၣ်, ဒီးပှၤအဂၤတနီၤနီၤ, လဲၤစိာ်တၢ်နၢမူလၢအက တဲာ်ကတီၤပာ်ဝဲ, ဆူတၢ်သွၣ်ခိၣ်အအိၣ်လီၤ. ² ဒီးထံၣ် န့ၢ်လၢလၢၢ်တဖျၢၣ်န့ၣ် တလ့ၣ်ကွံာ်လံအသးလၢ တၢ် သွၣ်ခိၣ်အပူၤလံ. ³ ဒီးလဲၤနုာ်ဝဲဒီး, တထံၣ်န့ၢ်ဘၣ်ကစၢ် ယ့ၣ်ရှူးအစိၣ်ဘၣ်. ⁴ ဒီးတၢ်မၤအသးလၢအသးဒ့ဒီလၢ တၢ်န့ၣ်အဃိအဖၢမုၢ်ဒီး, ကွၢ်ကွၢ်, ပှၤခံဂၤအကူအသိး ကပြုၢ်ကပြီၤ, ဆၢထၢၣ်လၢအဃၢၤလီၤ. ⁵ ဒီးအဝဲသ့ၣ် ပျံၤတၢ်, ဒီးကျးလီၤအမဲာ်လၢဟီၣ်ခိၣ်အဖီခိၣ်အဖၢမုၢ်ဒီး, ကလူးစံးဘၣ်အီၤ, သုဃုပှၤအမူလၢပှၤအသံအကျါန့ၣ် မ့ၢ်အဘၣ်မနုၤလဲၣ်. ⁶ တအိၣ်ဘၣ်ဖဲအံၤဘၣ်. မ့ၢ်အဂဲၤ ဆၢထၢၣ်က့ၤလံ. ဖဲအအိၣ်ဒံးလၢကၤလံၤလါန့ၣ်ဒီး, စံး ဘၣ်သုဒ်အံၤဒ်နုၤန့ၣ်, သ့ၣ်နီၣ်ထီၣ်တက့ၢ်. ⁷ စံးဝဲဒၣ်, ပှၤကညီဖိခွါအံၤ ကဘၣ်တၢ်ဟ့ၣ်လီၤကွံာ်အီၤလၢပှၤတၢ် ဒဲးဘးဖိအစုပူၤ, ဒီးကဘၣ်တၢ်ပျၤထီအီၤလၢထူၣ်စုညါ အလိၤ, ဒီးသၢနံၤတနံၤန့ၣ် ကဂဲၤဆၢထၢၣ်က့ၤဝဲလီၤ.―

⁸ ဒီးသ့ၣ်နီၣ်ထီၣ်အတၢ်ကတိၤတကူၢ်သ့ၣ်လီၤ.

⁹ ဒီးက့ၤက့ၤဝဲလၢတၢ်သွၣ်ခိၣ်, ဒီးစံးဘၣ်တဲဘၣ်ပှၤတ ဆံတဂၤန့ၣ်, ဒီးပှၤအဂၤတဖၣ်ခဲလၢာ်, လၢတၢ်မၤအသး န့ၣ်ခဲလၢာ်လီၤ. ¹⁰ ဒီးပှၤမၤကဒၤလ့ၣ်ဖိ, နီၢ်မၤရံ, ဒီးနီၢ် ယိၤအၣ်နၣ်, ဒီးစီၤယၤကိာ်အမိၢ်နီၢ်မၤရံ, ဒီးပှၤဂၤအိၣ် ဒီးအီၤတဖၣ်န့ၣ်, မ့ၢ်ပှၤလၢအစံးဘၣ်တဲဘၣ်ပှၤတၢ်မၢဖိ တဖၣ်လၢတၢ်မၤအသးန့ၣ်လီၤ. ¹¹ ဒီးတၢ်ကတိၤတဖၣ် န့ၣ်မၤအသးလၢအမဲာ်ညါ ဒ်ပှၤကတိၤနါစိၤတၢ်အသိး, ဒီးတစူၢ်တနာ်ဘၣ်အီၤဘၣ်.

¹² ဘၣ်ဆၣ်ဒီး စီၤပ့းတရူးဂဲၤဆၢထၢၣ်, ဒီးလဲၤဃ့ၢ်ဆူ တၢ်သွၣ်ခိၣ်, ဒီးဆုးလီၤအခိၣ်, ဒီးကွၢ်နုာ်ဝဲ, ဒီးထံၣ်ထဲဖှီ ဝါကဆှၣ်အိၣ်လီၤတဲာ်, ဒီးကမၢကမၣ် လၢတၢ်မၤအ သးအဃိ, ဒီးက့ၤက့ၤဝဲဆူအလီၢ်လီၤ.

¹³ ဒီးကွၢ်ကွၢ်, လၢအဝဲသ့ၣ်တဖၣ်အကျါ, ပှၤခံဂၤလဲၤ တၢ်လၢမုၢ်တနံၤန့ၣ်ဆူသဝီတဖျၢၣ်, အမံၤမ့ၢ်အ့းမၤအူ, ယံၤဝဲဒီးယရူၤၡလ့ၣ်ဃုဆံစတၤဒံအူၢ်လီၤ. ¹⁴ ဒီးကတိၤ လိာ်အသးလၢ တၢ်မၤအသးန့ၣ် အဂ့ၢ်အကျိၤခဲလၢာ် လီၤ. ¹⁵ ဒီးတၢ်မၤအသးဖဲအကတိၤလိာ်အသး, ဒီးသံကွၢ် လိာ်အသးအဖၢမုၢ်ဒီး, ယ့ၣ်ရှူးသုးဘူးဃီၤအသးဒီးလဲၤ ဃုာ်ဒီးအီၤလီၤ. ¹⁶ ဒီးတၢ်တြီဃာ်အမဲာ် ဒ်သိးအသုတ သ့ၣ်ညါအီၤတဂ့ၤလီၤ. ¹⁷ ဒီးစံးဘၣ်အီၤ, သုလဲၤတၢ်အဖၢမုၢ်, ဒီးသုကတိၤလိာ်သုသး, ဒီးသုသးအုၣ်သပှီၤအံၤမ့ၢ်တၢ်ကတိၤမနုၤလဲၣ်.―

¹⁸ ဒီးပှၤအမံၤ စီၤကျ့အီးပၤတဂၤန့ၣ်, ကတိၤဆၢတၢ်ဒီးစံး ဘၣ်အီၤ, နဲဒၣ်အံၤ, နမ့ၢ်ထဲပှၤတမှံၤလၢယရူၤၡလ့ၣ်အ ပူၤ, ဒီးနတသ့ၣ်ညါဘၣ်တၢ်မၤအသးလၢ မုၢ်နံၤတဖၣ် အံၤဘၣ်ဧါ. ¹⁹ ဒီးစံးဘၣ်အီၤ, မနုၤတဖၣ်လဲၣ်. ဒီးအဝဲ သ့ၣ်စံးဘၣ်အီၤ, တၢ်လၢပှၤနစၤရ့းဖိယ့ၣ်ရှူးအဂ့ၢ်အကျိၤ လီၤ. အဝဲဒၣ်န့ၣ်မ့ၢ်ဝံအိၣ်ဒီးအစိအကမီၤလၢအကလုၢ်ဒီး လၢအတၢ်မၤ, လၢယွၤအမဲာ်ညါဒီး ပှၤကညီခဲလၢာ်အ မဲာ်ညါလီၤ. ²⁰ ဒီးဒ်သိးအကဒိးဘၣ်တၢ်စံၣ်ညီၣ်ဘၢသံဒီး, ပှၤလုၢ်တၢ်အခိၣ်ဒီး ပဒိၣ်ပပှၢ်တဖၣ်န့ၣ်, ဟ့ၣ်လီၤကွံာ် အီၤ, ဒီးပျၤထီအီၤလၢထူၣ်စုညါအလိၤလီၤ. ²¹ ဒီးပမုၢ်လၢ် တ့ၢ်လၢအဝဲဒၣ်မ့ၢ် ပှၤလၢအအုၣ်က့ၤခီၣ်က့ၤအံၣ်စရ့လး လီၤ. လၢန့ၣ်အမဲာ်ညါ, လၢတၢ်မၤအသးအလီၢ်ခံန့ၣ် အအံၤတနံၤမ့ၢ်မုၢ်သၢနံၤတနံၤလီၤ. ²² ဒီးမ့မ့ၢ်ပိာ်မုၣ်လၢ ပကျါတနီၤနီၤ, လဲၤဂီၤဂီၤဆူတၢ်သွၣ်ခိၣ်လီၤ. ²³ ဒီးတထံၣ် န့ၢ်ဘၣ်အစိၣ်ဘၣ်ဒီး, ဟဲက့ၤစံးဝဲလၢအထံၣ်တၢ်လၢညါ ခီ, ဒီးထံၣ်ဘၣ်ကလူးတဖၣ်, လၢအစံးဘၣ်အီၤလၢအမူ ထီၣ်က့ၤဝဲသတးဒီးဒုးကမၢကမၣ်ပှၤလီၤ. ²⁴ ဒီးပှၤတနီၤ နီၤလၢပကျါလဲၤဆူတၢ်သွၣ်ခိၣ်, ဒီးထံၣ်န့ၢ်တၢ်ဒ်ပိာ်မုၣ် စံးဝဲအသိးဘၣ်ဆၣ်ဒီး, တထံၣ်ဘၣ်အီၤဘၣ်.

²⁵ ဒီးအဝဲဒၣ်စံးဘၣ်အီၤ, ပှၤအတၢ်ကူၣ်တအိၣ်, ဒီးအ သးဃၢလၢအတစူၢ်တနာ်ဘၣ် ဝံအကလုၢ်ခဲလၢာ်သ့ၣ် ဧၢ, ²⁶ ခရံာ်န့ၣ်ဘၣ်ဒိးတၢ်ဒ်န့ၣ်, ဒီးလဲၤနုာ်ဆူအတၢ်လၤ ကပီၤအပူၤတမ့ၢ်ဘၣ်ဧါ. ²⁷ ဒီးမၤဆိဝဲလၢစီၤမိၤရှ့, ဒီးလၢ ဝံခဲလၢာ်, ဒီးဒုးနဲၣ်ဖျါထီၣ်တၢ်ကွဲးအသးခဲလၢာ်ဘၣ်ဃး ဒီးအကစၢ်ဒၣ်ဝဲလီၤ.

²⁸ ဒီးအဝဲသ့ၣ်လဲၤဘူးထီၣ်ဒီး သဝီဖဲအကလဲၤတၢ်, ဒီး အဝဲဒၣ်ပာ်အသးလီၤဂာ်လၢ အကလဲၤပူၤကွံာ်တၢ်ဖဲန့ၣ် အသိးလီၤ. ²⁹ ဒီးအဝဲသ့ၣ်ဃ့ကညးအီၤသပှၢ်ပှၢ်, ဒီးစံး ဘၣ်အီၤ, အိၣ်ဒီးပှၤတက့ၢ်. အဂ့ၢ်ဒ်အံၤ, မုၢ်ကဟါတ့ၢ်, ဒီးမုၢ်ဘၣ်လံ. ဒီးလဲၤနုာ်အိၣ်ဒီးအီၤလီၤ.

³⁰ ဒီးတၢ်မၤအသးလၢ အဆ့ၣ်နီၤသန့ၤ ဃုာ်ဒီးအီၤဒီး, ဟံးန့ၢ်ကိၣ်ဒီးဆိၣ်ဂ့ၤဝဲ, ဒီးစိၢ်ဘျဲးဝဲ, ဒီးဟ့ၣ်လီၤအဝဲ သ့ၣ်လီၤ. ³¹ ဒီးအဝဲသ့ၣ်အမဲာ်အိးထီၣ်အသး, ဒီးသ့ၣ်ညါ အီၤလီၤ. ဒီးအဝဲဒၣ် သုးတဒၢကွံာ်အသးလၢအီၤလီၤ.―

³² ဒီးအဝဲသ့ၣ်စံးလိာ်အသးသကိးသကိးလၢ, အဝဲဒၣ်က တိၤတၢ်ဒီးပှၤလၢကျဲ, ဒီးဒုးနဲၣ်တၢ်ကွဲးအသးအဂ့ၢ်အပီၢ် ဒီး, ပသးဂဲၤဆူၣ်ထီၣ်လၢပပူၤတမ့ၢ်ဘၣ်ဧါ.

³³ ဒီးအဝဲသ့ၣ်ဂဲၤဆၢထၢၣ်တစုဃီဖဲန့ၣ်, ဒီးက့ၤက့ၤဝဲဆူ ယရူၤၡလ့ၣ်, ဒီးထံၣ်န့ၢ်ပှၤတဆံတဂၤန့ၣ်, ဒီးပှၤအိၣ်ဒီး အီၤ, ³⁴ အိၣ်ဖှိၣ်ရိဖှိၣ်, ဒီးစံးတကူၢ်သ့ၣ်လၢကစၢ်ဂဲၤဆၢ ထၢၣ်က့ၤလံနီၢ်နီၢ်, ဒီးဒုးနဲၣ်လံအသးလၢစီၤၡံမိၣ်လံ.―

³⁵ ဒီးအဝဲသ့ၣ်စံၣ်တဲၤတဲလီၤ တၢ်မၤအသးလၢကျဲန့ၣ်, ဒီး လၢအဒုးသ့ၣ်ညါအသးလၢအီၤ လၢတၢ်စိၢ်ဘျဲးကိၣ်အ ဂ့ၢ်န့ၣ်လီၤ.

³⁶ ဒီးကတိၤလိာ်အသးလၢ တၢ်န့ၣ်တဖၣ် အဖၢမုၢ်ဒီး, ယ့ၣ်ရှူးအိၣ်ဆၢထၢၣ်လၢအကျါ, ဒီးစံးဘၣ်အီၤ, မ်တၢ် ဃူတၢ်ဖိးအိၣ်ဒီးသုတက့ၢ်. ³⁷ ဒီးအဝဲသ့ၣ်ဆိကမိၣ်ဝဲလၢ အထံၣ်ပှၤအကလၤ, ဒီးအသူၣ်ပျံၤအသးဖုး, ဒီးအသူၣ် ကနိးအသးကနိးဝဲလီၤ. ³⁸ ဒီးစံးဘၣ်အီၤ, သုသူၣ်ကနိး သးကနိးဘၣ်မနုၤလဲၣ်. ဒီးတၢ်သးဒ့ဒီတဖၣ် အိၣ်ထီၣ် လၢသုသးဘၣ်မနုၤလဲၣ်. ³⁹ ကွၢ်ယစုလၣ်, ဒီးယခီၣ်လၣ် တက့ၢ်. အဂ့ၢ်ဒ်အံၤ, မ့ၢ်ယၤနီၢ်နီၢ်လီၤ. ဟံးကွၢ်ယၤဒီး သ့ၣ်ညါယၤတက့ၢ်. အဂ့ၢ်ဒ်အံၤ, ပှၤအကလၤန့ၣ်တ အိၣ်ဘၣ်ဒီးအဃံဒီးအညၣ်, ဒ်သုထံၣ်ယၤအသိးဘၣ်.―

⁴⁰ ဒီးစံးဝဲဒ်န့ၣ်ဝံၤဒီး, ဒုးနဲၣ်အစုလၣ်ဒီးအခီၣ်လၣ်လၢအီၤ လီၤ. ⁴¹ ဒီးမ့ၢ်အသူၣ်ခုအသးခုဒီး ကမၢကမၣ်အဃိဒီး, တစူၢ်တနာ်တဝၢ်ဒံးဘၣ်. ဒီးစံးဘၣ်အီၤ, တၢ်အီၣ်ဖဲအံၤ အိၣ်တမံၤမံၤဧါ. ⁴² ဒီးအဝဲသ့ၣ်ဟ့ၣ်အီၤလၢညၣ်အကၣ် တစဲးဒီးကနဲစီ, ⁴³ ဒီးဟံးန့ၢ်အီၣ်ဝဲလၢအဝဲသ့ၣ်အမဲာ်ညါ လီၤ. ⁴⁴ ဒီးစံးဘၣ်အီၤ, တၢ်ကတိၤတဖၣ်လၢယစံးဘၣ်သုဖဲယအိၣ်ဒံးဒီးသု, လၢကယဲၢ်တၢ်ကွဲးအသးလၢစီၤမိၤ ရှ့အတၢ်သိၣ်တၢ်သီအပူၤ, ဒီးဝံသ့ၣ်တဖၣ်အပူၤ, ဒီးလံာ် စံးထီၣ်ပတြၢၤတၢ်အပူၤ, လၢယဂ့ၢ်ယကျိၤန့ၣ်, ဘၣ်လၢ ထီၣ်ပှဲၤထီၣ်ခဲလၢာ်လီၤ. ⁴⁵ တုၤနုၤတစု, ဒ်သိးအဝဲသ့ၣ် အနၢ်ကပၢၢ် တၢ်ကွဲးအသးန့ၣ်ဒီး, အိးထီၣ်အသူၣ်အ သး, ⁴⁶ ဒီးစံးဘၣ်အီၤလၢတၢ်ကွဲးအသးဒ်န့ၣ်, ဒီးလၢခရံာ် ဘၣ်ဒိးတၢ်, ဒီးလၢသၢနံၤတနံၤန့ၣ်, ဘၣ်ဂဲၤဆၢထၢၣ်က့ၤ ဝဲလီၤ. ⁴⁷ ဒီးလၢပှၤဘၣ်စံၣ်တဲၤတဲလီၤတၢ်လၢအမံၤလၢ တၢ်ပီၢ်ယၢ်လီၤက့ၤသးဒီးတၢ်ပျၢ်တၢ်ဒဲးဘးအဂ့ၢ်, အဆိ လၢယရူၤၡလ့ၣ်ဒီး ပၢၢ်လၢပှၤကလုာ်ခဲလၢာ်န့ၣ်လီၤ.―

⁴⁸ ဒီးသုမ့ၢ်ပှၤအုၣ်အသးလၢတၢ်န့ၣ်တဖၣ်အဂ့ၢ်လီၤ.

⁴⁹ ဒီးကွၢ်ကွၢ်, ယမၢလီၤယပၢ်အတၢ်စံးပာ်န့ၣ် ဆူသု အိၣ်လီၤ. ဘၣ်ဆၣ်ဒီးတၢ်တချုးဒုးသိးထီၣ်သုလၢတၢ်စိ တၢ်ကမီၤလၢထးန့ၣ်ဘၣ်ဒီး, အိၣ်ဒၣ်သုဝဲလၢဝ့ၢ်ယရူၤ ၡလ့ၣ်အပူၤတက့ၢ်.

⁵⁰ ဒီးဆှၢထီၣ်အီၤဆူဘ့ၤသနံ, ဒီးယူာ်ထီၣ်အစု, ဒီးဆိၣ် ဂ့ၤအီၤလီၤ. ⁵¹ ဒီးတၢ်မၤအသးလၢအဆိၣ်ဂ့ၤအီၤအဖၢမုၢ် ဒီး, လီၤဖးဝဲဒီးအီၤ, ဒီးဘၣ်တၢ်စိာ်ထီၣ်အီၤဆူမူခိၣ် လီၤ. ⁵² ဒီးအဝဲသ့ၣ်တဖၣ်ဘူၣ်ထီၣ်ဘါထီၣ်အီၤ, ဒီးအ သူၣ်ခုသးခုဒိၣ်မး, ဒီးက့ၤက့ၤဝဲဆူယရူၤၡလ့ၣ်လီၤ. ⁵³ ဒီး အိၣ်သးဝံၣ်တၢ်ဒီး စံးထီၣ်ပတြၢၤယွၤလၢတၢ်လုၢ်အဟံၣ် ပူၤတဘိယူၢ်ဃီလီၤ. အၤမ့ၣ်.