လံာ်ယိၤအ့လး.

လံာ်ယိၤအ့လး.

၁

¹ ယွၤအကလုၢ်လၢအဘၣ် စီၤပသူၤအ့လးအဖိခွါ စီၤ ယိၤအ့လး.

² ကနၣ်တၢ်အံၤ, ပှၤသူၣ်က့သးပှၢ်သ့ၣ်ဧၢ, ဒီးဒိကနၣ် ကယဲၢ်ပှၤကီၢ်ဖိခဲလၢာ်သ့ၣ်ဧၢ, လၢသုမုၢ်နံၤတဖၣ်မ့ၢ်ဂ့ၤ, လၢသုပၢ်တဖၣ်အမုၢ်နံၤတဖၣ်မ့ၢ်ဂ့ၤ, တၢ်ဒ်အံၤမၤအသး စ့ၢ်ကီးဧါ. ³ စံၣ်တဲၤတဲလီၤလၢသုဖိသုလံၤ, ဒီးသုဖိသု လံၤန့ၣ်မ်အစံၣ်တဲၤတဲလီၤလၢအဖိအလံၤ, ဒီးအဝဲသ့ၣ် အဖိအလံၤန့ၣ်မ်အစံးပှၤတစိၤဒၣ်တက့ၢ်လီၤ.

⁴ တၢ်လၢဒွဲၣ်ကၤစၣ်ပာ်လီၤတဲာ်န့ၣ် ဒွဲၣ်အၢ်ဘၤအီၣ်ဝဲ, ဒီးတၢ်လၢဒွဲၣ်အၢ်ဘၤပာ်လီၤတဲာ်န့ၣ် ဒွဲၣ်ယ့ၤလ့းအီၣ်ဝဲ, ဒီးတၢ်လၢဒွဲၣ်ယ့ၤလ့းပာ်လီၤတဲာ်န့ၣ် ဒွဲၣ်ဃစံၣ်အီၣ်ဝဲ လီၤ.

⁵ ပှၤအီမူၤအသးသ့ၣ်ဧၢ, ဖုသံနီၣ်ထီၣ်ဒီးဟီၣ်တက့ၢ်. ဒီးပှၤလၢအအီစပံးထံခဲလၢာ်သ့ၣ်ဧၢ, ဟီၣ်ပသူထီၣ်လၢ စပံးထံအသီအဃိန့ၣ်တက့ၢ်. အဂ့ၢ်ဒ်အံၤ, ဒီၣ်တဲာ်ကွံာ် လံအသးလၢသုထးခိၣ်လီၤ.

⁶ အဂ့ၢ်ဒ်အံၤ, တၢ်တကလုာ်ဟဲထီၣ်လၢယကီၢ်ပူၤလၢ အဆူၣ်ဝဲ, ဒီးတၢ်ဂံၢ်အီၤတသ့ဘၣ်. အမဲမ့ၢ်ခ့ယုၢ်အမဲ, ဒီးအိၣ်ဝဲဒီးခ့ယုၢ်မိၢ်အမဲထွံၣ်လီၤ.

⁷ မၤသယုၢ်လံစပံးမုၢ်, မၤဟးဂီၤကွံာ်ယချၢၣ်ဒၢ, ကုၣ် လီၤကွံာ်အဖံး, ဒီးညိကွံာ်ဝဲ, မၤဝါထီၣ်အဒ့တဖၣ်လီၤ.

⁸ ဟီၣ်ဒ်ပမုၣ်ကနီၤ ကံၢ်တူာ်အယီၢ်ဒ့လၢ ထၢၣ်အတၢ် ကံးညာ်လၢ အမုၣ်ကနီၤထီၣ်အဝၤတအိၣ်ဘၣ်အဃိသိး န့ၣ်တက့ၢ်.

⁹ တၢ်မၤဘူၣ်တၢ်အီၣ်, ဒီးတၢ်လုၢ်တၢ်အီၣ်န့ၣ်ဘၣ်ဒီၣ် တဲာ်ကွံာ်အသးလၢ ယွၤအဟံၣ်ပူၤလီၤ. ပှၤလုၢ်တၢ်အ ဒိၣ်, ယွၤအခ့အပှၤဟီၣ်ပသူထီၣ်လီၤ.

¹⁰ ပှၢ်လၢ်ကျါအိၣ်သယုၢ်, ဟီၣ်ခိၣ်သူၣ်အုးသးအုးလီၤ. အဂ့ၢ်ဒ်အံၤ, ဘုဟးဂီၤလံ. စပံးထံအသီဃ့ထီကွံာ်လံ. သိဧိၤချါဧိၤလီၤသံးလံ.

¹¹ ပာ်ဆှးသုမဲာ်, ပှၤမၤဟီၣ်ခိၣ်ဖိသ့ၣ်သုဧၢ, ဟီၣ်ပသူ ထီၣ်, ပှၤမၤစပံးမုၢ်သ့ၣ်ဧၢ, လၢဘုကၠူၣ်အဃိ, ဒီးလၢ ဘုမုယီၤအဃိတက့ၢ်. အဂ့ၢ်ဒ်အံၤ, စံာ်ဧိၤပှဲၤဧိၤအတၢ် ကူးဘုန့ၣ်ဟးဂီၤလံ.

¹² စပံးမုၢ်ဃ့ထီၣ်ကွံာ်လံ, ဒီးချၢၣ်ဒၢအလၣ်လီၤညွံးလံ. သ့ၣ်သလဲ, ဒီးသ့ၣ်စူၣ်ပလိၣ်, ဒီးပြၢးတးပူာ်အလၣ်လီၤ ဘဲလံ. ကယဲၢ်သ့ၣ်လၢဟီၣ်ခိၣ်အတဝီပူၤန့ၣ်ဃ့ထီၣ်ကွံာ် လံခဲလၢာ်လံ. မ့ၢ်မးတၢ်သူၣ်ခုသးခုဟါမၢ်လံဒီးပှၤကညီ ဖိလံလီၤ.

¹³ ကံၢ်တူာ်သုယီၢ်ဒ့, ဒီးဟီၣ်တက့ၢ်, ပှၤလုၢ်တၢ်အဒိၣ် သ့ၣ်ဧၢ, ဟီၣ်ပသူထီၣ်တက့ၢ်, တၢ်လုၢ်လီၢ်အခ့အပှၤ သ့ၣ်ဧၢ, ဟဲနုာ်မံသီတနၤကျၢၤလၢ ထၢၣ်အတၢ်ကံးညာ် အပူၤတက့ၢ်. ယကစၢ်အခ့အပှၤသ့ၣ်ဧၢ, အဂ့ၢ်ဒ်အံၤ, တၢ်တမၤဘူၣ်ဘၣ်တၢ်မၤဘူၣ်တၢ်အီၣ်, ဒီးတၢ်လုၢ်တၢ် အီလၢသုကစၢ်အဟံၣ်ပူၤဘၣ်လီၤ.

¹⁴ ပာ်စီဆှံတၢ်ဒုၣ်တၢ်အီၣ်တနံၤ, ကိးဖှိၣ်ပှၤသူၣ်က့သး ပှၢ်, ပှၤကီၢ်ဖိခဲလၢာ်, ဆူယွၤသုကစၢ်အဟံၣ်ပူၤ, ဒီးကိး ထီၣ်ဆူယွၤတက့ၢ်.

¹⁵ အၣ်လါ, လၢမုၢ်တနံၤန့ၣ်အဃိ, အဂ့ၢ်ဒ်အံၤ, ယွၤ အမုၢ်တနံၤအိၣ်ဘူးထီၣ်လံ, ဒီးဟဲဝဲဒ်တၢ်မၤဟးဂီၤဖးဒိၣ် လၢတၢ်သ့တၢ်လၢာ်အအိၣ်အသိးန့ၣ်လီၤ.

¹⁶ တၢ်အီၣ်ဒီၣ်တဲာ်ကွံာ်အသးလၢပမဲာ်ညါ တမ့ၢ်ဘၣ် ဧါ. တၢ်သူၣ်ခုသးခု, ဒီးတၢ်သူၣ်ဖှံသးညီန့ၣ်လၢယွၤအ ဟံၣ်ပူၤတမ့ၢ်ဘၣ်ဧါ. ¹⁷ တၢ်အချံအုၣ်လံလၢဟီၣ်ခိၣ်အ ကိၢ်လိၣ်အဖီလာ်လံ. ဘုပာ်ဖှိၣ်အလီၢ်အိၣ်သယုၢ်လံ, ဖီတဖၣ်လီၤပှီၢ်လံ. အဂ့ၢ်ဒ်အံၤ, ဘုဃ့ထီၣ်ကွံာ်လံ.

¹⁸ ဆၣ်ဖိကီၢ်ဖိကအုကစွါဒ်လဲၣ်. ဂီၤဘုၣ်ဂီၤဖံးအသူၣ် ကိၢ်အသးဂီၤလၢအတၢ်အီၣ်ဆၣ်တအိၣ်ဘၣ်အဃိ, ဒီး သိဒီးမဲာ်တဲးလဲးဟးဂီၤလံဝဲလံ.

¹⁹ ယွၤဧၢ, ယကကိးထီၣ်နၤလီၤ. အဂ့ၢ်ဒ်အံၤ, မ့ၣ်အူ အီၣ်ကွံာ်ပှၢ်မုၢ်ကနၢအအီၣ်ဆၣ်အလီၢ်, ဒီးမ့ၣ်လၣ်အီၣ် ကွံာ်ပှၢ်လၢ်ကျါအသ့ၣ်ခဲလၢာ်လီၤ.

²⁰ ပှၢ်လၢ်ကျါအဆၣ်ဖိကီၢ်ဖိဒၣ်လဲာ် မိာ်ထီၣ်အခိၣ်ဆူ နအိၣ်လီၤ. အဂ့ၢ်ဒ်အံၤ, ထံကျိအထံလီၤသံးကွံာ်လံ. ဒီး မ့ၣ်အူအီၣ်ကွံာ်လံပှၢ်မုၢ်ကနၢအတၢ်အီၣ်ဆၣ်အလီၢ်လံ.

၂

¹ အူကွဲၤလၢစံယိၣ်အလိၤ, ဒီးဒုးသီၣ်ထီၣ်တၢ်မၤပျံၤတၢ် လၢယကစၢၢ်စီဆှံအလိၤတက့ၢ်. မ်ပှၤကီၢ်ဖိခဲလၢာ်ကနိး တက့ၢ်. အဂ့ၢ်ဒ်အံၤ, ယွၤအမုၢ်တနံၤဟဲဝဲ, အဂ့ၢ်ဒ်အံၤ, အိၣ်ဘူးထီၣ်လံ. ² မ့ၢ်တၢ်ခံးဒီးတၢ်အုးတကျုာ်အမုၢ်တ နံၤ, တၢ်အၢၣ်ဒီးတၢ်ခံးသူအမုၢ်တနံၤလီၤ. ပှၤဂီၢ်မုၢ်ဒိၣ် ဝဲ, ဒီးဆူၣ်ဝဲ, သလၣ်ထီၣ်အသးလၢကစၢၢ်လိၤဒ်မုၢ်ဆ့ၣ် ထီၣ်အသိးန့ၣ်လီၤ. တၢ်ဒ်န့ၣ်သိးတအိၣ်တ့ၢ်ဘၣ်, ဒီး တၢ်ဒ်န့ၣ်သိးတအိၣ်ဘၣ်လၢၤဘၣ် လၢအစိၤအဃၣ်အါ နံၣ်တဖၣ်ဘၣ်.

³ မ့ၣ်အူအီၣ်ကွံာ်တၢ် လၢအမဲာ်ညါ, ဒီးမ့ၣ်လၣ်ဆူး ကွံာ်တၢ်လၢအလီၢ်ခံလီၤ. ထံဧိၤကီၢ်ဧိၤန့ၣ်မၤသးဒ်ဧ့ၤဒ့ၣ် အတၤသၣ်အလီၢ်လၢအမဲာ်ညါ, ဒီးလၢအလီၢ်ခံန့ၣ်ပှၢ် မုၢ်ကနၢအိၣ်သယုၢ်ဝဲလီၤ. ဒီးတၢ်တပူၤဖျဲးဘၣ်ဒီးအီၤနီ တမံၤဘၣ်.

⁴ အက့ၢ်အဂီၤမၤသးဒ်ကသ့ၣ်အက့ၢ်အဂီၤသိး, ဒီးဃ့ၢ် သဖှိတၢ် ဒ်ပှၤဒိးကသ့ၣ်အသိးန့ၣ်, ⁵ ဒ်လ့ၣ်ကဟၣ်အ သီၣ်အသိးန့ၣ်, စံၣ်ဝဲလၢကစၢၢ်ဒီခိၣ်, ဒ်မ့ၣ်လၣ်အသီၣ် လၢအအီၣ်ကွံာ်လီၢ်အသိးန့ၣ်, ဒ်ပှၤအဆူၣ်အဂီၢ်မုၢ်က တဲာ်ကတီၤအသးလၢဒုးသုးအဂီၢ်အသီၣ်သိးန့ၣ်လီၤ.

⁶ ပှၤဂီၢ်မုၢ်ကကနိးကစုာ်ဝဲလၢအမဲာ်ညါလီၤ. ပှၤအမဲာ် လီၤသပှၢ်ဝဲခဲလၢာ်လီၤ.

⁷ ဃ့ၢ်ဝဲဒ်ပှၤအဆူၣ်အသိး, ထီၣ်တၢ်ခိၣ်ဒူဒ်ပှၤသုးဖိအ သိး, ဒီးလဲၤတၢ်ဖိးဖိးတဂ့ၢ်တဂ့ၢ်ခဲလၢာ်, ဒီးတမၤဟး ဂီၤဘၣ်အဂ့ၢ်တဖၣ်ဘၣ်, ⁸ ဒီးတသနံးလိာ်ဘၣ်အသး ဘၣ်. လဲၤတၢ်ဖိးဖိးတဂၤလၢအကျဲဒၣ်ဝဲ, တဂၤလၢအ ကျဲဒၣ်ဝဲ, ဒီးမ့ၢ်လီၤဘၣ်လၢစုကဝဲၤအကျါဘၣ်ဆၣ်ဒီး, တဟးဂီၤဘၣ်.

⁹ ဃ့ၢ်ဝဲလၢဝ့ၢ်ပူၤ, ဃ့ၢ်ဝဲလၢဝ့ၢ်ခိၣ်ဒူအလိၤ, လဲၤထီၣ် လၢဟံၣ်ပူၤ, လဲၤနုာ်လၢတၢ်ထူၣ်ဖျိ ဒ်ပှၤဟုၣ်တၢ်အသိး န့ၣ်လီၤ.

¹⁰ ဟီၣ်ခိၣ်ကဆှဲးကဆှိးဝဲလၢအမဲာ်ညါ, မူခိၣ်ဟူးဝးဝဲ လီၤ. မုၢ်ဒီးလါခံးလီၤဝဲ, ဒီးဆၣ်ဧိၤဖီဧိၤ တကပီၤလၢၤ ဘၣ်.

¹¹ ဒီးယွၤဟ့ၣ် အကလုၢ်လၢအသုးမုၢ်ဂီၢ်မုၢ် အမဲာ်ညါ လီၤ. မ့ၢ်မးအသူၣ်ဒဲအလီၢ်န့ၣ်ဒိၣ်နီၢ်မးလီၤ. မ့ၢ်မးအစိ ထီအကမီၤဒိၣ်မၤအကလုၢ်န့ၣ်လီၤ. မ့ၢ်မးယွၤအမုၢ်တနံၤ မ့ၢ်အဒိၣ်, ဒီးတၢ်မၤပျံၤအလီၢ်နးမးလီၤ. ဒီးမ့ၢ်မတၤအိၣ် ဝဲသ့တဂၤလဲၣ်.

¹² မ့မ့ၢ်ခဲကနံၣ်အံၤဒၣ်လဲာ်ယွၤစံးဝဲဒၣ်, ဃၣ်သုသးဆူ ယအိၣ်လၢသုသးဒီဖျၢၣ်ညါ, ဒီးဒုၣ်တၢ်အီၣ်, ဒီးဟီၣ်, ဒီးသူၣ်အုးသးအုးန့ၣ်တက့ၢ်.

¹³ ဒီးမၤဖှီသုဆ့တဂ့ၤ, မၤဖှီသုသးဒီး ဃၣ်လိၤသုသးဆူ ယွၤသုကစၢ်အအိၣ်တက့ၢ်. အဂ့ၢ်ဒ်အံၤ, သူၣ်ကညီၤသး ကညီၤတၢ်, ဒီးသးအိၣ်တၢ်, ဒီးသးထီၣ်ကီ, ဒီးအဘျုး အဖှိၣ်ဒိၣ်မးလီၤ. ဒီးပီၢ်ယၢ်လီၤက့ၤအသးလၢတၢ်အၢအ ဃိလီၤ.

¹⁴ မ့ၢ်မတၤသ့ၣ်ညါတဂၤလဲၣ်. ဘၣ်တဘၣ် ကဃၣ်အ သး, ဒီးပီၢ်ယၢ်လီၤက့ၤအသး, ဒီးပာ်လီၤတဲာ်တၢ်ဆိၣ် ဂ့ၤလၢအလီၢ်ခံန့ၣ်, တၢ်မၤဘူၣ်တၢ်အီၣ်, ဒီးတၢ်လုၢ်တၢ် အီ, လၢယွၤသုကစၢ်အဂီၢ်န့ၣ်လီၤ.

¹⁵ အူကွဲၤလၢစံယိၣ်အလိၤ, ပာ်စီဆှံ တၢ်ဒုၣ်တၢ်အီၣ်, ကိးထီၣ်တၢ်အိၣ်ဖှိၣ်အမုၢ်တနံၤ, ¹⁶ ဒုးအိၣ်ဖှိၣ်ရိဖှိၣ်ပှၤဂီၢ် မုၢ်, ကိးဖှိၣ်တၢ်အိၣ်ဖှိၣ်စီဆှံ, ဒုးအိၣ်ဖှိၣ်ပှၤသူၣ်က့သး ပှၢ်, ဒုးအိၣ်ဖှိၣ်ဖိဒံဖိသၣ်, ဒီးပှၤလၢအအီၣ်နုၢ်ထံ, မ်တ လးမူးပိာ်ခွါဟဲထီၣ်လၢအဒၢးပူၤ, ဒီးတလးမူးပိာ်မုၣ်လၢ တၢ်ဘျးတဒၢပူၤတက့ၢ်.

¹⁷ မ်ပှၤလုၢ်တၢ်အဒိၣ်, ယွၤအခ့အပှၤဟီၣ်ဝဲလၢတၢ်ခိၣ် ဒုးထီၣ်အသး, ဒီးတၢ်လုၢ်လီၢ်အဘၢၣ်စၢၤတက့ၢ်. ဒီးမ် အစံး, သူၣ်ကညီၤသးကညီၤနပှၤဂီၢ်မုၢ်တက့ၢ်. ဒီးဟ့ၣ် လီၤနတၢ်န့ၢ်သါန့ၣ်လၢတၢ်ဒုၣ်ဒွဲၣ်အဂီၢ် ဒ်သိးပှၤကလုာ် တဖၣ်ကပၢအီၤတဂ့ၤ. ပှၤကစံးဝဲလၢပှၤဂီၢ်မုၢ်အကျါ, အ ကစၢ်အိၣ်ဖဲလဲၣ်န့ၣ်, မ့ၢ်အဘၣ်မနုၤလဲၣ်.

¹⁸ တုၤနုၤတဘျီယွၤအသးကဆူၣ်ဝဲလၢ အထံအကီၢ်အ ဂီၢ်, ဒီးကသးလီအပှၤဂီၢ်မုၢ်လီၤ. ¹⁹ ဒီးယွၤကစံးဆၢတၢ်, ဒီးစံးလၢအပှၤဂီၢ်မုၢ်, ကွၢ်ကွၢ်, ယကဟ့ၣ်လီၤသုလၢဘု ဧိၤဟုဧိၤ, ဒီးစပံးထံ, ဒီးသိဧိၤချါဧိၤ, ဒီးကအါဝဲလၢသုဂီၢ် လီၤ. ယတပာ်လၢၤဘၣ်သုလၢ တၢ်ဒုၣ်ဒွဲၣ်အလီၢ်လၢ ပှၤကလုာ်တဖၣ်အကျါဘၣ်.

²⁰ ဒီးယကဒုးအိၣ်ယံၤဒီးသုလၢ တၢ်လၢကလံၤစိးတခီ, ဒီးယကဟီထီၣ်ကွံာ်အီၤဆူကီၢ်အဃ့အိၣ်သယုၢ်တဘ့ၣ် အပူၤ, အိၣ်ဒီးအမဲာ်ဆူပီၣ်လဲၣ်လၢမုၢ်ထီၣ်, ဒီးအချၢဃံ ဆူပီၣ်လဲၣ်လၢမုၢ်နုာ်တခီ, ဒီးအနၢန့ၣ်ကနၢထီၣ်, ဒီး အနၢအုၣ်ကထီၣ်ဝဲလီၤ. အဂ့ၢ်ဒ်အံၤ, မၤတၢ်ဖးဒိၣ်တ ဖၣ်လံလီၤ.

²¹ ထံဧိၤကီၢ်ဧိၤဧၢ, ပျံၤတၢ်တဂ့ၤ. သူၣ်ခုသးခု, ဒီးသူၣ်ဖှံ သးညီတက့ၢ်. အဂ့ၢ်ဒ်အံၤ, ယွၤမၤတၢ်အဒိၣ်တဖၣ်လီၤ.

²² ဆၣ်ဖိကီၢ်ဖိလၢပှၢ်လၢ်ကျါသ့ၣ်ဧၢ, ပျံၤတၢ်တဂ့ၤ. အ ဂ့ၢ်ဒ်အံၤ, ပှၢ်မုၢ်ကနၢအတၢ်အီၣ်ဆၣ်အလီၢ်န့ၣ် မဲထီၣ်, အဂ့ၢ်ဒ်အံၤ, သ့ၣ်န့ၣ်သၣ်ထီၣ်, ချၢၣ်ဒၢ, ဒီးစပံးမုၢ်သၣ် ထီၣ်ဝဲလီၤ.

²³ စံယိၣ်အဖိသ့ၣ်ဧၢ, သူၣ်ခုသးခုတက့ၢ်, ဒီးသူၣ်ဖှံသး ညီလၢယွၤသုကစၢ်အပူၤတက့ၢ်. အဂ့ၢ်ဒ်အံၤ, ဟ့ၣ်လီၤ သုလၢတၢ်စူၤအခီၣ်ထံးတတီၤဖဲအကြၢး, ဒီးဒုးဟဲတၢ် စူၤဖးဒိၣ်လၢသုဂီၢ်, တၢ်စူၤလၢအခီၣ်ထံးတတီၤ, ဒီးတၢ် စူၤလၢအလီၢ်ခံတတီၤဒ်လၢထံးလၢသီအသိးန့ၣ်လီၤ.

²⁴ ဒီးယီၢ်ဘုအလီၢ်န့ၣ်ကပှဲၤဒီးဘုဧိၤဟုဧိၤ, ဒီးနီၣ်စံၢ်တၢ် တဖၣ်ကပှဲၤလုာ်ကွံာ်ဒီးစပံးထံဒီးသိဧိၤချါဧိၤလီၤ.

²⁵ ဒီးယကဟ့ၣ်ပှဲၤထီၣ်သု လၢနံၣ်တဖၣ်အဂီၢ် လၢဒွဲၣ် အၢ်ဘၤ, ဒွဲၣ်ယ့ၤလ့း, ဒီးဒွဲၣ်ဃစံၣ်, ဒီးဒွဲၣ်ကၤစၣ်, ယတၢ် သုးမုၢ်ဂီၢ်မုၢ်လၢယမၢလီၤဆူသုကျါန့ၣ်အီၣ်တၢ်န့ၣ်လီၤ.

²⁶ ဒီးသုကအီၣ်ကုးအီပှဲၤ, ဒီးဘျဲးအီၣ်, ဒီးစံးထီၣ်ပတြၢၤ ယွၤသုကစၢ်အမံၤလၢအမၤတၢ်လီၤလးဒီးသု, ဒီးယပှၤ ဂီၢ်မုၢ်အမဲာ်တဆှးဘၣ်လီၤစိၤလီၤထီလီၤ.

²⁷ တုၤနုၤတဘျီ သုကသ့ၣ်ညါလၢယအိၣ်လၢပှၤအံၣ်စ ရ့လးဖိအကျါ, ဒီးလၢယၤ, ယွၤအံၤ, ယမ့ၢ်သုကစၢ်, ဒီးတမ့ၢ်တၢ်ဂၤဘၣ်. ဒီးယပှၤဂီၢ်မုၢ်အမဲာ်တဆှးဘၣ်လီၤ ထူလီၤယိာ်ဘၣ်.

²⁸ ဒီးတၢ်ကမၤအသးလၢအလီၢ်ခံန့ၣ်, ယွၤစံးဝဲဒၣ်, ယ ကလူလီၤဂၢ်လီၤယသးလၢ ကယဲၢ်တၢ်ညၣ်ခဲလၢာ်အ လိၤ, ဒီးသုဖိမုၣ်ဒီးသုဖိခွါသ့ၣ်တဖၣ်ကကတိၤတၢ်လၢ ဝံကျိာ်, ဒီးသုသးပှၢ်တဖၣ်ကမံမီၢ်တၢ်မံမီၢ်လီၤ. ဒီးသု ဖိခွါတဖၣ်ကထံၣ်တၢ်လၢညါခီ, ²⁹ ဒီးလၢမုၢ်နံၤတဖၣ်န့ၣ် ယကလူလီၤဂာ်လီၤယသးလၢ သုကုၢ်ပိာ်မုၣ်ဒီးသုကုၢ် ပိာ်ခွါအလိၤလီၤ. ³⁰ ဒီးယကဟ့ၣ် တၢ်လီၤလိၢ်လီၤလး, လၢမူခိၣ်ထး, ဒီးလၢဟီၣ်ခိၣ်လာ်, တၢ်သွံၣ်, ဒီးမ့ၣ်အူ, မ့ၣ်အူခုၣ်အသဝံလီၤ. ³¹ တချုးကစၢ်အမုၢ်နံၤဖးဒိၣ်မၤပျံၤ တၢ်တနံၤဟဲဒီး, မုၢ်ကကဲထီၣ်တၢ်ခံး, ဒီးလါကကဲထီၣ် တၢ်သွံၣ်လီၤ. ³² ဒီးတၢ်ကမၤအသးလၢဖဲဒၣ်ပှၤလၢအကိး ထီၣ်ကစၢ်အမံၤတဂၤလၢ်လၢ်န့ၣ်ကပူၤဖျဲးဝဲလီၤ. အဂ့ၢ် ဒ်အံၤ, ပှၤပူၤဖျဲးတၢ်တဖၣ်ကအိၣ်ဝဲလၢကစၢၢ်စံယိၣ်, ဒီး လၢယရူၤၡလ့ၣ်အပူၤ, ဒ်ယွၤစံးဝဲအသိး, လၢပှၤလၢအ အိၣ်လီၤတဲာ်အကျါ, လၢယွၤကကိးအီၤလီၤ.

၃

¹ အဂ့ၢ်ဒ်အံၤ, ကွၢ်ကွၢ်, တၢ်လၢမုၢ်နံၤတဖၣ်, ဒီးတၢ် လၢအကတီၢ်န့ၣ် တုၤယဒုးဟဲက့ၤယူဒၤဒီးယရူၤၡလ့ၣ် လၢအလဲၤကဲကုၢ်ဒီး, ² ယကဒုးအိၣ်ဖှိၣ်ရိဖှိၣ်ပှၤကိးက လုာ်ဒဲး, ဒီးယကဒုးဟဲလီၤအီၤဆူကစၢၢ်ကဆူးယဟိၡၤ ဖး, ဒီးယကစံၣ်ညီၣ်အီၤဖဲန့ၣ်လၢယပှၤဂီၢ်မုၢ်ဒီး ယတၢ် န့ၢ်သါအံၣ်စရ့လး, လၢအဝဲသ့ၣ်မၤလီၤပြံလီၤပြါအီၤလၢ ပှၤကလုာ်တဖၣ်အကျါအဃိ, ဒီးနီၤဖးယထံယကီၢ်လီၤ.

³ ဒီးအဝဲသ့ၣ်ဖးဝဲလၢ ယပှၤဂီၢ်မုၢ်အဂီၢ်, ဒီးဟ့ၣ်လီၤဖိ သၣ်ပိာ်ခွါတဂၤလၢပှၤဃဲသဲမုၣ်တဂၤအဂီၢ်, ဒီးဆါကွံာ် ဖိသၣ်ပိာ်မုၣ်တဂၤလၢစပံးထံအဂီၢ်, ဒ်သိးအကအီတၢ် လီၤ. ⁴ သုဒီးယၤမ့ၢ်ဒ်လဲၣ်, စိၢ်, ဒီးစံဒိၣ်, ဒီးဖလ့ၡသးအ ကီၢ်ဃၢၤခဲလၢာ်သ့ၣ်ဧၢ, သုကမၤဆၢတၢ်လၢယၤဧါ. ဒီး သုမ့ၢ်မၤဆၢတၢ်လၢယၤဒီး, ယကဟ့ၣ်လီၤသုမၤဆၢတၢ် လၢသုခိၣ်ဒၣ်သုဝဲ ချ့မးဒီးချ့သဒံးလီၤ. ⁵ မ့ၢ်သုစိာ်ထီၣ် ကွံာ်ယစ့ဒီးယထူ, ဒီးစိာ်ယတၢ်ဂ့ၤဒီးတၢ်ဘၣ်တၢ်အသး တဖၣ်ဆူသုတၢ်ဂီၤအနူၢ်ပူၤ, ⁶ ဒီးသုဆါကွံာ်ပှၤယူဒၤဖိ, ပှၤယရူၤၡလ့ၣ်ဖိဆူပှၤယၤဝၣ်ဖိအစုပူၤ, ဒ်သိးအကအိၣ် ယံၤဒီးအကီၢ်ဃၢၤဒၣ်ဝဲဒီး, ⁷ ကွၢ်ကွၢ်, ယကထိၣ်ဂဲၤဆၢ ထၢၣ်အီၤလၢအလီၢ်ဖဲသုဆါကွံာ်အီၤ, ဒီးယကဟ့ၣ်က ဒါက့ၤသုမၤဆၢတၢ်လၢသုခိၣ်ဒၣ်သုဝဲအဖီခိၣ်, ⁸ ဒီးအဝဲ သ့ၣ်ကဆါကွံာ်အီၤဆူ ပှၤစဘၤဖိ, ပှၤတကလုာ်အိၣ်ဝဲ လၢအယံၤအစုပူၤလီၤ. အဂ့ၢ်ဒ်အံၤ, ယွၤကတိၤလံတၢ်လံ.

⁹ ကိးထီၣ်တၢ်အံၤလၢပှၤကလုာ်တဖၣ်အကျါ, ကတဲာ် ကတီၤတၢ်ဒုးသုး, ထိၣ်ဂဲၤပှၤအဆူၣ်, ဒုးဟဲဘူးပှၤသုးဖိ ခဲလၢာ်, ဒုးဟဲထီၣ်အီၤတက့ၢ်. ¹⁰ ပိာ်က့ၤသုထဲၣ်အက နၣ်လၢနး, ဒီးသုဒီပဲာ်သ့ၣ်လၢဘီတက့ၢ်. မ်ပှၤအဂံၢ်စၢ် အဘါစၢ်စံး, ယမ့ၢ်ပှၤအဆူၣ်တက့ၢ်.

¹¹ ပှၤကလုာ်အိၣ်ဝးတရံးခဲလၢာ်သ့ၣ်ဧၢ, မၤချ့ချ့, ဒီးဟဲ, ဒီးအိၣ်ဖှိၣ်ရိဖှိၣ်တက့ၢ်. ယွၤဧၢ, ဒုးဟဲလီၤနပှၤအဆူၣ် တဖၣ်ဖဲန့ၣ်တက့ၢ်.

¹² မ်ပှၤကလုာ်တဖၣ်ဖုသံနီၣ်, ဒီးဟဲထီၣ်ဆူ ကစၢၢ်က ဆူးယဟိၡၤဖးအပူၤတက့ၢ်. အဂ့ၢ်ဒ်အံၤ, ယကဆ့ၣ်နီၤ စံၣ်ညီၣ်ပှၤကလုာ်အိၣ်ဝးတရံးခဲလၢာ်ဖဲန့ၣ်လီၤ.

¹³ ဒၢနုာ်ထါဂဲာ်တက့ၢ်. အဂ့ၢ်ဒ်အံၤ, ဘုဂီၤလံ. ဟဲ, ယီၢ် တၢ်တက့ၢ်. အဂ့ၢ်ဒ်အံၤ, နီၣ်စံၢ်စပံးသၣ်ပှဲၤလံ, အစပံးထံ ပှဲၤလုၣ်ကွံာ်အတၢ်ပူၤလီၤ. အဂ့ၢ်ဒ်အံၤ, အတၢ်ဒဲးဘးဒိၣ် မးလီၤ. ¹⁴ ပှၤဂီၢ်မုၢ်, ပှၤဂီၢ်မုၢ်လၢတၢ်စံၣ်ညီၣ်တဲာ်အက စၢၢ်ကဆူးအပူၤလီၤ. အဂ့ၢ်ဒ်အံၤ, ယွၤအမုၢ်တနံၤအိၣ် ဘူးထီၣ်လံလၢတၢ်စံၣ်ညီၣ်တဲာ်အကစၢၢ်ကဆူးပူၤလံ. မုၢ်ဒီးလါကခံးလီၤဝဲ, ဒီးဆၣ်ဧိၤဖီဧိၤတကပီၤဘၣ်,

¹⁶ ယွၤကကိးပသူထီၣ်လၢစံယိၣ်, ဒီးထုထီၣ်အကလုၢ်လၢ ယရူၤၡလ့ၣ်အပူၤ, ဒီးမူခိၣ်, ဒီးဟီၣ်ခိၣ်ကဟူးဝးဝဲလီၤ. ဘၣ်ဆၣ်ဒီးယွၤမ့ၢ်တၢ်အိၣ်တဒၢအလီၢ်လၢ အပှၤဂီၢ်မုၢ် အဂီၢ်, ဒီးတိာ်ဧိၤတာ်ဧိၤလၢပှၤအံၣ်စရ့လးဖိအဂီၢ်လီၤ.

¹⁷ ဒီးသုကသ့ၣ်ညါလၢယၤယွၤအံၤ, ယမ့ၢ်သုကစၢ်လၢ အအိၣ်အဆိးလၢယကစၢၢ်စီဆှံစံယိၣ်အလိၤလီၤ. ဒီးယ ရူၤၡလ့ၣ်ကစီဆှံဝဲ, ဒီးပှၤတခီဘီမုၢ်ဖိတခီဂာ်လၢၤဘၣ် အီၤဘၣ်.

¹⁸ လၢမုၢ်တနံၤန့ၣ် တၢ်ကမၤအသးလၢကစၢၢ်ကလိက လီၤစီၤလၢစပံးထံအသီ, ဒီးတၢ်နုၢ်ထံကယွၤလီၤလၢတၢ် စိခိၣ်, ဒီးထံကယွၤလီၤလၢယူဒၤအထံကျိခဲလၢာ်, ဒီး ထံထီၣ်ပၢၢ်ကပၢၢ်ထီၣ်လၢယွၤအဟံၣ်ပူၤ, ဒီးကယွၤလီၤ လၢကစၢၢ်ကဆူးၡံးတံၣ်လီၤ.

¹⁹ အဲၤကူပတူးကအိၣ်သယုၢ်, ဒီးအဒိၣ်ကကဲထီၣ်ပှၢ်မုၢ် ကနၢအိၣ်သယုၢ်လၢတၢ်မၤန့ၢ်ဆူၣ်ပှၤယူဒၤဖိအဃိ, လၢ အလူလီၤတၢ်သွံၣ် လၢတၢ်ဒဲးဘးတအိၣ်ဘၣ်လၢအကီၢ် ပူၤအဃိလီၤ. ²⁰ မ့မ့ၢ်ယူဒၤန့ၣ် ပှၤကအိၣ်ကဆိးလၢအပူၤလီၤထူလီၤယိာ်, ဒီးလၢယရူၤၡလ့ၣ်န့ၣ်အစိၤစိၤအဃၣ်ဃၣ်လီၤ.―

²¹ ဒီးအသွံၣ်လၢယတပာ်တ့ၢ်ဘၣ်လၢအတၢ်ဒဲးဘးတအိၣ် ဘၣ်န့ၣ်ယကပာ်လၢအတၢ်ဒဲးဘးတအိၣ်ဘၣ်, ဒီးယွၤ ကအိၣ်ဝဲဆိးဝဲလၢစံယိၣ်အပူၤလီၤ.