လံာ်ယၡါယၤ

လံာ်ယၡါယၤ

၁

¹ စီၤအၤမိာ်အဖိခွါစီၤယၡါယၤအတၢ်ထံၣ် တၢ်လၢအ ထံၣ်ဘၣ်လၢယူဒၤဒီးယရူၤၡလ့ၣ် အဂ့ၢ်အကျိၤ, လၢယူ ဒၤအစီၤပၤစီၤဧူးစံယါ, ဒီးစီၤယိၤသၣ်, စီၤအၤဃး, စီၤ ဃံးစကံယၤအမုၢ်နံၤတဖၣ်အတီၢ်ပူၤလီၤ.

² ကနၣ်တက့ၢ်, မူခိၣ်ဧၢ, ဒိကနၣ်တက့ၢ်, ဟီၣ်ခိၣ်ဧၢ, အ ဂ့ၢ်ဒ်အံၤ, ယွၤကတိၤတၢ်လီၤ. ယလုၢ်ဒီးဒုးဒိၣ်ထီၣ်ဖိတ ဖၣ်, ဒီးအဝဲသ့ၣ်ပူထီၣ်ယၤလီၤ.

³ ဂီၤဘုၣ်ဂီၤဖံးသ့ၣ်ညါအကစၢ်, ဒီးကသ့ၣ်ယီၤအက စၢ်ဒုးအီၣ်ဆၣ်အကျိးလီၤ. အံၣ်စရ့လးတသ့ၣ်ညါဘၣ်, ယပှၤဂီၢ်မုၢ်တဆိကမိၣ်ဘၣ်ဝဲဘၣ်.

⁴ အၣ်လါ, ပှၤတၢ်ဒဲးဘးဖိတကလုာ်သ့ၣ်ဧၢ, ပှၤဝံဃၢ ဝဲဒီးတၢ်အၢအၢ်သီ, ပှၤမၤတၢ်အၢဖိအချံအသၣ်, ဖိတဖၣ် လၢအမၤဘၣ်အၢလီၤအသးလီၤ. လဲၤသဒၣ်လံယွၤလံ. မၤတရီတပါလံအံၣ်စရ့လးအတၢ်စီဆှံတဂၤလံ. ပာ်လံ အသးလၢပှၤတခီဘီမုၢ်ဖိလံ.

⁵ သုကပူထီၣ်ဒံး, ဒီးဘၣ်တၢ်တီၢ်ဒံးသုဘၣ်မနုၤလဲၣ်. အခိၣ်န့ၣ်ဆါဝဲဒီဖျၢၣ်ညါ, ဒီးအသးန့ၣ်လီၤဘှါဝဲဒီဖျၢၣ် ညါလီၤ. ⁶ လၢအခီၣ်ညါသးပၢၢ်လၢအခိၣ်န့ၣ် တၢ်အ လီၢ်ဆးတအိၣ်ဘၣ်လၢအပူၤဘၣ်. မ့ၢ်တၢ်ဘၣ်ဆဲးအ လီၢ်, တၢ်ပူၤလီၢ်, ဒီးတၢ်တီၢ်အလီၢ်လီၤ. တဘၣ်တၢ်စံၢ် အီၤဘၣ်, ဒီးတဘၣ်တၢ်ဘိၣ်ထီၣ်အီၤဘၣ်, ဒီးတဘၣ် တၢ်မၤစၢ်ဘၣ်အီၤဒီးသိဒီးချါဘၣ်.

⁷ သုကီၢ်အိၣ်သယုၢ်, သုဝ့ၢ်ဘၣ်တၢ်အီၣ်ကွံာ်အီၤလၢ မ့ၣ်အူ, သုဟီၣ်ခိၣ်န့ၣ်ပှၤတခီဘီမုၢ်ဖိအီၣ်ကွံာ်ဝဲလၢသု မဲာ်ညါ, ဒီးအိၣ်သယုၢ်ဒ်ပှၤတခီဘီမုၢ်ဖိမၤလူၤတၢ်အသိး န့ၣ်, ⁸ ဒီးစံယိၣ်အဖိမုၣ်အိၣ်လီၤတဲာ် ဒ်တကူးတဖျၢၣ် လၢစပံးအလီၢ်ပူၤအသိး, ဒ်ဒဲတဖျၢၣ်လၢဒံအလီၢ်ပူၤအ သိး, ဒ်ဝ့ၢ်လၢအဘၣ်တၢ်ကဝီၤဃာ်အီၤအသိးန့ၣ်လီၤ.

⁹ ယွၤမ့ၢ်တပာ်လီၤတဲာ်န့ၢ်ပှၤလၢ တၢ်အိၣ်လီၤတဲာ်တ စဲးဘၣ်ဒီး, ပကမၤပသးဒ်စဒိၣ်, ပကလီၤဂာ်လၢဂမိရၤ လီၤ.

¹⁰ ကနၣ်ယွၤအကလုၢ်ကထါတက့ၢ်, စဒိၣ်အပဒိၣ်သ့ၣ် ဧၢ, ဒိကနၣ်သုကစၢ်အတၢ်သိၣ်တၢ်သီတက့ၢ်, ဂမိရၤအ ပှၤဂီၢ်မုၢ်သ့ၣ်ဧၢ.

¹¹ သုလုၢ်ယၤလၢတၢ်အါအါကလဲာ်န့ၣ် မ့ၢ်အဘၣ်မနုၤ လဲၣ်, ယွၤစံးဝဲဒၣ်. ယဘျဲးအီၣ်ဒီးသိဖါအတၢ်လုၢ်မ့ၣ်အူ, ဒီးဆၣ်ဖိကီၢ်ဖိအဘီၣ်အသိလီၤ. ဒီးတဘၣ်ယသးလၢ ဂီၤဖံး, ဒီးသိဖိ, ဒီးမဲာ်တဲးလဲးဖါအသွံၣ်ဘၣ်. ¹² တုၤသုဟဲ အိၣ်ဖျါလၢယမဲာ်ညါဒီး, မ့ၢ်မတၤဃ့တၢ်န့ၣ်တမံၤလၢ သုစုပူၤဒ်သိးသုကယီၢ်ယဂၢၤပူၤတဖၣ်န့ၣ်လဲၣ်.

¹³ ဟဲစိာ်လၢၤ တၢ်မၤဘူၣ်ကလီကလီတဂ့ၤ. တၢ်ဆိၣ် ကဲၤတၢ်နၢမူန့ၣ်မ့ၢ်တၢ်သးဘၣ်အၢဒီးယၤလီၤ. လါထီၣ် သီအနံၤ, ဒီးအိၣ်ဘှံးအနံၤ, ဒီးကိးဖှိၣ်တၢ်န့ၣ်ဒ်န့ၣ်သိး လီၤ. သုတၢ်အိၣ်ဖှိၣ်ဘူၣ်တၢ်ဘါတၢ်ဒၣ်လဲာ်မ့ၢ်တၢ်အၢ တၢ်သီလီၤ.

¹⁴ သုလါထီၣ်သီအနံၤ, ဒီးသုတၢ်သ့ၣ်ပာ်အဘူၣ်န့ၣ်ယ သးဟ့အီၤလီၤ. ကဲထီၣ်တၢ်တံာ်တာ်လၢယလိၤလံ, ယ ဝံယယိးအီၤန့ၣ်, တၢ်ဘှံးယသးလံ.

¹⁵ ဒီးတုၤသုယူာ်ထီၣ်သုစုဒီး, ယကပာ်တဒၢယမဲာ်ဒီး သု, ဒီးတုၤသုမၤအါထီၣ်သုတၢ်ထုကဖၣ်ဒီး, ယတဒိက နၣ်ဘၣ်တၢ်ဘၣ်. သုစုပှဲၤဝဲဒီးတၢ်သွံၣ်လီၤ.

¹⁶ သ့စီကွံာ်သုသး, မၤကဆှီထီၣ်သုသး, သုးကွံာ်တၢ် အၢလၢသုမၤတၢ်န့ၣ်လၢယမဲာ်ညါတက့ၢ်. မၤလၢၤတၢ် အၢတဂ့ၤ. ¹⁷ မၤလိမၤတၢ်ဂ့ၤတက့ၢ်. ဃုတၢ်စံၣ်ညီၣ်တီ, မၤတၢ်လိၤလၢပှၤလၢအဘၣ်တၢ်မၤအၢအီၤ, စံၣ်ညီၣ်ပှၤ ဖှိၣ်ဃဲ, မၤစၢၤပှၤမုၣ်ကမဲတက့ၢ်.

¹⁸ ဟဲမီၣ်, ယွၤစံးဝဲဒၣ်, စံးကတိၤလိာ်သကိးပသးတ က့ၢ်. သုတၢ်ဒဲးဘးမ့ၢ်ဒ်တၢ်ဂီၤကယဲၢ်အသိးဘၣ်ဆၣ်ဒီး, ကဝါထီၣ်ဝဲဒ်မူခိၣ်ဖီအသိးလီၤ. မ့ၢ်ဂီၤဒ်တၢ်ဂီၤဆှုၣ်က လာ်အသိးဘၣ်ဆၣ်ဒီး, ကမၤသးဒ်သိအဆူၣ်အသိးလီၤ.

¹⁹ သုသးမ့ၢ်အၢၣ်လီၤအီလီၤ, ဒီးသုမ့ၢ်ဒိကနၣ်တၢ်ဒီး, သုကအီၣ်ထံဧိၤကီၢ်ဧိၤန့ၣ်အတၢ်ဂ့ၤလီၤ. ²⁰ မ့မ့ၢ်သုမ့ၢ်ဂ့ၢ် လိာ်, ဒီးပူထီၣ်ဒီး, နးဧိၤဘီဧိၤကအီၣ်ကွံာ်သုလီၤ. အဂ့ၢ်ဒ် အံၤ, ယွၤအထးခိၣ်န့ၣ်ကတိၤတၢ်န့ၣ်လီၤ.

²¹ ဝ့ၢ်လၢအကလုၢ်တီန့ၣ် ကဲထီၣ်လံ ပှၤဃဲသဲမုၣ်မး လဲၣ်. ပှဲၤက့ၢ်ဝဲဒီးတၢ်စံၣ်ညီၣ်တီ, တၢ်တီတၢ်လိၤအိၣ်ဝဲ ဆိးဝဲလၢအပူၤလီၤ. မ့မ့ၢ်ခဲကနံၣ်အံၤပှၤမၤသံပှၤကညီ တဖၣ်လီၤ.

²² နကျိၣ်ဧိၤစ့ဧိၤ ကဲထီၣ်အအ့ၣ်, နစပံးထံန့ၣ်ဃါဃုာ် ဒီးထံလီၤ. ²³ နပဒိၣ်ဖးဒိၣ်တဖၣ်မ့ၢ်ပှၤလၢအပူထီၣ်တၢ်, ဒီးဒီတံၤဒီသကိးဒီးပှၤဟုၣ်တၢ်ဘျၣ်တၢ်လီၤ. အဲၣ်ဒိးခိၣ် ဖးကိးအဂၤဒဲး, ဒီးဃုတၢ်ဟ့ၣ်လီၤ. တစံၣ်ညီၣ်န့ၢ်ပှၤဖိၣ် ဃဲအကွီၢ်ဘၣ်. ဒီးပှၤမုၣ်ကမဲအတၢ်လိာ်ကွီၢ်န့ၣ် တဟဲ ဘၣ်ဆူအအိၣ်ဘၣ်.

²⁴ မၤသးဒ်န့ၣ်ဒီးကစၢ်, တၢ်သုးမုၢ်ဂီၢ်မုၢ်အယွၤ, အံၣ်စရ့ လးအတၢ်ဒိၣ်တၢ်ဆူၣ်တဂၤစံးဝဲဒၣ်, အၣ်လါ, ယကမၤ မုာ်ထီၣ်က့ၤယသးဒီးပှၤထီဒါယၤ, ဒီးယကမၤဆၢတၢ် အၢလၢယဒုၣ်ယဒါတဖၣ်န့ၣ်လီၤ.

²⁵ ယကဃၣ်ယစုဆူနအိၣ်, ဒီးယကပှံၢ်ထီၣ်ကွံာ်နစ့အ အ့ၣ်, ဒီးဟံးထီၣ်ကွံာ်နပှာ်ဧိၤတြၤဧိၤခဲလၢာ်, ²⁶ ဒီးယက ဒုးအိၣ်ထီၣ်က့ၤ နပှၤစံၣ်ညီၣ်ကွီၢ်ဒ်လၢအဂံၢ်ခိၣ်အသိး န့ၣ်, ဒီးနပှၤကူၣ်လိာ်အသးဒ်လၢအခီၣ်ထံးအသိးန့ၣ် လီၤ. လၢတၢ်န့ၣ်အလီၢ်ခံတၢ်ကကိးနၤလၢတၢ်တီတၢ် လိၤအခူအဝ့ၢ်, ဝ့ၢ်လၢအကလုၢ်တီလီၤ.

²⁷ တၢ်ကပှ့ၤက့ၤစံယိၣ်လၢတၢ်စံၣ်ညီၣ်, အပှၤလၢအဟဲ က့ၤတဖၣ်လၢတၢ်တီတၢ်လိၤလီၤ.

²⁸ ပှၤမၤကမၣ်တၢ်ဖိ, ဒီးပှၤတၢ်ဒဲးဘးဖိန့ၣ် ကတုၤလၢ တၢ်ဟးဂီၤတပူၤဃီ, ဒီးပှၤလၢအလဲၤသဒၣ်ယွၤန့ၣ် က လၢာ်ဝဲလီၤ.

²⁹ အဂ့ၢ်ဒ်အံၤ, အမဲာ်ကဆှးလၢသ့ထိးဖၣ် လၢအဘၣ် သုသးတဖၣ်အဃိ, ဒီးသုကပာ်ဆှးသုမဲာ် လၢတၤသၣ် အလီၢ်လၢသုဃုထၢအီၤအဃိန့ၣ်လီၤ.

³⁰ အဂ့ၢ်ဒ်အံၤ, သုကမၤသးဒ်သ့ထိးဖၣ်တထံး လၢအ လၣ်လီၤညွံးအသိး, ဒီးဒ်တၤသၣ်အလီၢ်လၢထံတအိၣ် လၢအပူၤဘၣ်အသိးန့ၣ်လီၤ.

³¹ ဒီးပှၤအဂံၢ်ဆူၣ်န့ၣ် ကကဲထီၣ်ဒ်လုၣ်ခီမၤအအ့ၣ်အ သိး, ဒီးအမၤတၢ်ဒ်မ့ၣ်ဖီအသိး, ဒီးမ့ၣ်အူကအီၣ်ကွံာ်အီၤ တပူၤဃီ, ဒီးတၢ်တမၤလီၤပံာ်ဘၣ်ဝဲဘၣ်လီၤ.

၂

¹ တၢ်လၢစီၤအၤမိာ်အဖိခွါစီၤယၡါယၤန့ၣ် ထံၣ်ဘၣ်ဝဲ လၢယူဒၤ, ဒီးယရူၤၡလ့ၣ်အဂ့ၢ်.

² ဒီးလၢမုၢ်နံၤလၢခံတဖၣ်န့ၣ် တၢ်ကမၤအသးလၢ ယွၤအဟံၣ်အကစၢၢ်န့ၣ် ကအိၣ်ဂၢၢ်ဆိးကျၢၤလၢ က စၢၢ်ဒီခိၣ်, ဒီးကဘၣ်တၢ်ပာ်အီၤထီၣ်ထီန့ၢ် တၢ်စိခိၣ် တဖၣ်, ဒီးပှၤကိးကလုာ်ဒဲးကယွၤလီၤဝဲဆူအအိၣ်လီၤ.

³ ဒီးပှၤဂီၢ်မုၢ်အါကလုာ် ကလဲၤဒီးစံး, ဟဲ, လဲၤထီၣ်သ ကိးဆူယွၤအကစၢၢ်, ဆူစီၤယၤကိာ်အကစၢ်အဟံၣ်န့ၣ် တက့ၢ်. ဒီးကနဲၣ်လိပှၤလၢအကျဲတဖၣ်, ဒီးပကပိာ်အ ကျဲဧိၤကပူၤဧိၤလီၤ. အဂ့ၢ်ဒ်အံၤ, လၢစံယိၣ်အပူၤန့ၣ်တၢ် သိၣ်တၢ်သီကလဲၤထီၣ်, ဒီးယွၤအကလုၢ်ကထါလၢယ ရူၤၡလ့ၣ်အပူၤလီၤ.

⁴ ဒီးကစံၣ်ညီၣ်လၢပှၤကလုာ်တဖၣ်အကျါ, ဒီးကသိၣ် ဃီၣ်ပှၤဂီၢ်မုၢ်အါကလုာ်, ဒီးအဝဲသ့ၣ်ကပိာ်က့ၤအနး လၢထဲၣ်အကနၣ်, ဒီးအဘီလၢဒီပဲာ်ဃိတၢ်လီၤ. ဒီးပှၤ တကလုာ်တယၤထီၣ်နးလၢပှၤတကလုာ်အဖီခိၣ်ဘၣ်, ဒီးတမၤလိတၢ်ဒုးသုးလၢၤဘၣ်လီၤ.

⁵ ယၤကိာ်အဟံၣ်ဖိသ့ၣ်ဧၢ, ဟဲ, လဲၤသကိးတၢ်လၢယွၤ အတၢ်ကပီၤအပူၤန့ၣ်တက့ၢ်. ⁶ အဂ့ၢ်ဒ်အံၤ, နလဲၤသဒၣ် လံနပှၤဂီၢ်မုၢ်, စီၤယၤကိာ်အဟံၣ်ဖိလံ. အဂ့ၢ်ဒ်အံၤ, ပှဲၤဝဲ ဒီးတၢ်ဟဲလၢမုၢ်ထီၣ်တခီ, ဒီးပှၤမၤကဒါပမဲာ်ဒ်ပှၤဖလ့ ၡသးဖိအသိးန့ၣ်, ဒီးဒဲအစုဒီးပှၤတခီဘီမုၢ်ဖိလီၤ.

⁷ ဒီးအထံအကီၢ်ပှဲၤဝဲဒီး ကျိၣ်ဧိၤစ့ဧိၤ, ဒီးထူဧိၤလွဲဧိၤ, ဒီးအတၢ်ပာ်ဖှိၣ်တၢ်န့ၣ်အကတၢၢ်တအိၣ်ဘၣ်. ဒီးအထံ အကီၢ်ပှဲၤဝဲဒီးကသ့ၣ်တြၤ, ဒီးအလ့ၣ်ကဟၣ်တဖၣ်န့ၣ် အကတၢၢ်တအိၣ်ဘၣ်. ⁸ ဒီးအထံအကီၢ်ပှဲၤဝဲဒီးတၢ်ဂီၤ တၢ်ဖှီၣ်လီၤ. တၢ်လၢအစုမၤဝဲ, တၢ်လၢအစုမုၢ်တ့ဝဲန့ၣ် ဘူၣ်ဝဲဘါဝဲလီၤ.

⁹ ဒီးပှၤအဖှီၣ်ဆုးလီၤအခိၣ်, ဒီးပှၤအဒိၣ်ဆီၣ်လီၤအ သးလီၤ. မၤသးဒ်န့ၣ်ဒီးသုတပျၢ်အတၢ်တဂ့ၤ.

¹⁰ လဲၤနုာ်လၢလၢၢ်ပူၤ, ဒီးမၤဘံၣ်မၤဘၢနသးလၢဟီၣ် ခိၣ်အကမူၣ်ကျါန့ၣ်လၢယွၤအမၤပျံၤတၢ်, ဒီးလၢအက ဟုအကညီၢ်အလၤအကပီၤအမဲာ်ညါတက့ၢ်.

¹¹ တၢ်လၢမုၢ်တနံၤန့ၣ် ပှၤကညီအမဲာ်ထီၣ်ထီန့ၣ်ကဘၣ် တၢ်ဆီၣ်လီၤအီၤ, ဒီးပှၤသပျၢၤပှၤကညီအတၢ်ထီၣ်ထီ ကဘၣ်တၢ်ဆီၣ်လီၤအီၤ, ဒီးယွၤကအိၣ်ထီၣ်ထီဝဲတဂၤ ဃီလီၤ.

¹² အဂ့ၢ်ဒ်အံၤ, တၢ်သုးမုၢ်ဂီၢ်မုၢ် အယွၤအမုၢ်တနံၤက ဘၣ်လၢ ကယဲၢ်တၢ်ပာ်ကဖိအသး, ဒီးပာ်ထီၣ်ထီအ သး, ဒီးလၢကယဲၢ်တၢ်အိၣ်ထီၣ်ထီအဖီခိၣ်ခဲလၢာ်, ဒီး ကလီၤဝဲလီၤ. ¹³ ကဘၣ်လၢကယဲၢ်လဘၤနိၣ်အသ့ၣ်ဆှိ အ့းရ့းလၢအထီ, ဒီးကဘၣ်ဘၤၡၣ်အသ့ထိးဖၣ်ခဲလၢာ်,

¹⁴ ဒီးကဘၣ်လၢကယဲၢ်ကစၢၢ်ထီ, ဒီးကယဲၢ်တၢ်စိခိၣ်ဖး ထီ, ¹⁵ ဒီးကဘၣ်လၢကယဲၢ်တၢ်းထီ, ဒီးကယဲၢ်တၢ်အခိၣ် ဒူလၢပှၤထီၣ်တသ့, ¹⁶ ဒီးကယဲၢ်တၢ်ၡံၣ်အကဘီ, ဒီးက ယဲၢ်တၢ်ဖျါဂ့ၤခဲလၢာ်အဖီခိၣ်လီၤ.

¹⁷ ဒီးပှၤကညီ အတၢ်ထီၣ်ထီန့ၣ် ကဘၣ်တၢ်တ့ၢ်လီၤ ကွံာ်အီၤ, ဒီးပှၤသပျၢၤပှၤကညီအသးထီၣ်ထီန့ၣ်ကဘၣ် တၢ်ဆီၣ်လီၤအီၤ, ဒီးလၢမုၢ်တနံၤန့ၣ်ယွၤကအိၣ်ထီၣ်ထီ ဝဲတဂၤဃီလီၤ. ဒီးတၢ်ဂီၤတၢ်ဖီၣ်န့ၣ် ကဟါမၢ်ကွံာ်ဝဲ ခဲလၢာ်လီၤ.

¹⁹ ဒီးပှၤကလဲၤဆူလၢၢ်အိပူၤ, ဒီးဟီၣ်ခိၣ်အအိပူၤ, လၢယွၤ အတၢ်ပျံၤအလီၢ်အမဲာ်ညါ, ဒီးလၢအကဟုကညီၢ်အ လၤအကပီၤအအိၣ်ဖဲ အဂဲၤဆၢထၢၣ်မၤဆှဲးဆှိးဟီၣ်ခိၣ် အကတီၢ်န့ၣ်လီၤ.

²⁰ တၢ်လၢမုၢ်တနံၤန့ၣ် ပှၤကကွံာ်တ့ၢ်ကွံာ်အတၢ်ဂီၤစ့, ဒီးအတၢ်ဂီၤထူလၢ အတ့ဝဲလၢအကဘါဝဲအဂီၢ်ဆူခီဃ ဖၢ်အအိၣ်, ဒီးဘျါအအိၣ်, ²¹ ဒ်သိးအကလဲၤနုာ်လၢလၢၢ် သ့ၣ်ဖးအပူၤ, ဒီးလၢလၢၢ်ဧိၤလ့ဧိၤအဖီခိၣ်, လၢယွၤမၤ ပျံၤတၢ်အမဲာ်ညါ, ဒီးအကဟုအကညီၢ်အလၤအကပီၤ, ဖဲအဂဲၤဆၢထၢၣ်မၤဆှဲးဆှိးဟီၣ်ခိၣ်အကတီၢ်န့ၣ်လီၤ.

²² သန့ၤလၢၤနသးလၢ ပှၤကညီလၢအသါအိၣ်ဝဲလၢအ နါဒ့ပူၤန့ၣ်တဂ့ၤ. အဂ့ၢ်ဒ်အံၤ, ပကပာ်အီၤလၢမနုၤတမံၤ လဲၣ်.

၃

¹ အဂ့ၢ်ဒ်အံၤ, ကွၢ်ကွၢ်, ကစၢ်, တၢ်သုးမုၢ်ဂီၢ်မုၢ်အယွၤ န့ၣ်ဒုးဟးထီၣ်ကွံာ်, လၢယရူၤၡလ့ၣ်, ဒီးယူဒၤအပူၤ, တၢ် သန့ၤအသးအလီၢ်, ဒီးတၢ်လၢပှၤသန့ၤအသးလၢအီၤ လီၤ. ကိၣ်သန့ၤအသးအလီၢ်ခဲလၢာ်, ဒီးထံသန့ၤအသး အလီၢ်ခဲလၢာ်, ² ပှၤအဆူၣ်ဒီးပှၤဒုးသုးဖိ, ဒီးပှၤစံၣ်ညီၣ် ကွီၢ်ဒီးဝံဧိၤမီၣ်ဧိၤ, ပှၤဖးတၢ်ဖိဒီးပှၤသူၣ်က့သးပှၢ်, ³ ပှၤ ယဲၢ်ဆံအခိၣ်ဒီးပှၤဘၣ်တၢ်အမဲာ်, ပှၤကူၣ်လိာ်အသးဒီး ပှၤမၤတၢ်သ့, ဒီးပှၤမၤကဒါပမဲာ်လီၤ. ⁴ ဒီးယကပာ်ဖိဒံဖိ သၣ်လၢအပဒိၣ်ဖးဒိၣ်, ဒီးဖိသၣ်အီၣ်နုၢ်ကပၢအီၤလီၤ.

⁵ ဒီးပှၤဂီၢ်မုၢ်ကမၤအၢလိာ်အသး သကိးသကိးဒီးတ ဂၤဒီးတဂၤလီၤ. ပှၤဖိၣ်သၣ်ခွါကမၤတရီတပါပှၤသူၣ် က့သးပှၢ်, ဒီးပှၤလၢအလၤကပီၤတအိၣ်ဘၣ်န့ၣ်ကမၤ တရီတပါပှၤလၢအလၤအကပီၤအိၣ်လီၤ.

⁶ တုၤနုၤတစုပှၤတဂၤ ကဟံးဃာ်အဒီပုၢ်ဝဲၢ်လၢအပၢ် အပှၤဟံၣ်ဖိအကျါ, ဒီးစံး, နအိၣ်ဒီးတၢ်ကူတၢ်သိး, မ်န ကဲထီၣ်ပဒိၣ်, ဒီးတၢ်လီၤပှီၢ်အံၤကအိၣ်လၢနစုအဖီလာ် တက့ၢ်.

⁷ တၢ်လၢမုၢ်တနံၤန့ၣ်ကထုထီၣ်အကလုၢ်ဒီးစံး, ယတ ကဲဘၣ်ပှၤမၤဘျါက့ၤတၢ်ဘၣ်, အဂ့ၢ်ဒ်အံၤ, ကိၣ်မ့ၢ်ဂ့ၤ တၢ်အကူအသိးမ့ၢ်ဂ့ၤ, တအိၣ်ဘၣ်လၢယဟံၣ်ပူၤဘၣ်. ပာ်ယၤလၢပှၤပၢပှၤဂီၢ်မုၢ်တဂ့ၤ.

⁸ အဂ့ၢ်ဒ်အံၤ, ယရူၤၡလ့ၣ်ဟူးဝးဝဲ, ဒီးယူဒၤလီၤဃံၤဝဲ လီၤ. အဂ့ၢ်ဒ်အံၤ, အပျ့ၤဒီးအမၤတၢ်န့ၣ်ထီဒါယွၤဒ်သိး အကမၤဆါအတၢ်လၤကပီၤအမဲာ်လီၤ.

⁹ အမဲာ်ဖျါထီၣ်န့ၣ်အုၣ်အသးထီဒါအီၤလီၤ. ဒီးဒုးနဲၣ် အတၢ်ဒဲးဘးဒ်စဒိၣ်အသိးန့ၣ်, တပာ်ခူသူၣ်ဘၣ်အသး န့ၣ်ဘၣ်အဖှီၣ်လီၤ. အဂ့ၢ်ဒ်အံၤ, မၤအၢလီၤအသးလီၤ.

¹⁰ စံးလၢပှၤတီပှၤလိၤအဂ့ၢ်န့ၣ် လၢတၢ်ကဂ့ၤလၢအဂီၢ် န့ၣ်တက့ၢ်. အဂ့ၢ်ဒ်အံၤ, ကအီၣ်အမၤတၢ်အတၤသၣ် လီၤ.

¹¹ ပှၤအၢဖိန့ၣ်ဘၣ်အဖှီၣ်လီၤ. အဂ့ၢ်ဒ်အံၤ, တၢ်ကမၤ ဘၣ်အီၤဒ်အစုမၤဝဲအသိးန့ၣ်လီၤ.

¹² ယပှၤဂီၢ်မုၢ်အံၤ, အပှၤမၤအၢအီၤန့ၣ် မ့ၢ်ဖိဒံဖိသၣ်ဒီး ပိာ်မုၣ်ပိာ်မၢၤပၢအီၤလီၤ. ယပှၤဂီၢ်မုၢ်ဧၢ, ပှၤလၢအဆှၢ နၤတဖၣ်န့ၣ်ဒုးဟးဖျိးနၤ, ဒီးယူၢ်လီၤကွံာ်နလဲၤတၢ်အ ကျဲလီၤ.

¹³ ယွၤဆၢထၢၣ်ဝဲဒ်သိးအကကတိၤလိာ်ကွီၢ်, ဒီးဂဲၤဆၢ ထၢၣ်ဝဲဒ်သိးအကစံၣ်ညီၣ်ပှၤကလုာ်တဖၣ်လီၤ.

¹⁴ ယွၤကလဲၤနုာ်လၢတၢ်စံၣ်ညီၣ်အပူၤ ဒီးအပှၤဂီၢ်မုၢ်အ သူၣ်က့သးပှၢ်, ဒီးအပဒိၣ်ဖးဒိၣ်တဖၣ်လီၤ. မ့ၢ်သုဝဲသ့ၣ် လၢအအီၣ်ကွံာ်လံစပံးမုၢ်အလီၢ်လံ. တၢ်ဂုာ်န့ၢ်လၢပှၤ ဖှီၣ်ဖိယာ်ဖိန့ၣ်အိၣ်ဝဲလၢသုဟံၣ်ပူၤလီၤ.

¹⁵ သုတီၢ်လီၤကလဲ ယပှၤဂီၢ်မုၢ်, ဒီးသုဂုာ်ကျ့ပှၤဖှီၣ်ဖိ ယာ်ဖိအမဲာ်ဘၣ်မနုၤလဲၣ်, ကစၢ်, တၢ်သုးမုၢ်ဂီၢ်မုၢ်အ ယွၤစံးဝဲဒၣ်.

¹⁶ ဒီးယွၤစံးဝဲဒၣ်, မ့ၢ်လၢစံယိၣ်အဖိမုၣ်အသးထီၣ်ထီ, ဒီးလဲၤဒီးအကိာ်ယူာ်ထီၣ်အသး, ဒီးလွဲတၢ်လၢအမဲာ်, ဒီးထွဲတၢ်ဒုးလၢအလဲၤတၢ်, ဒီးမၤသီၣ်ပှ့ၤသၣ်လၢအခီၣ် ဒီး, ¹⁷ ယွၤကမၤကျၤစံယိၣ်အဖိမုၣ်အခိၣ်ဒီ, ဒီးယွၤက လီၣ်ဖျါထီၣ်အတၢ်ဘ့ၣ်ဆ့လီၤ. ¹⁸ တၢ်လၢမုၢ်တနံၤန့ၣ်ယွၤကဟံးထီၣ်ကွံာ်အကယၢကယဲပှ့ၤဘၣ်, ဒီးအခိၣ်ဖျီၣ်, ဒီးတၢ်ကဝီၤဒ်လါအသိးန့ၣ်,―

¹⁹ တၢ်လီၤစဲၤ. ဒီးထံဖှံၣ်တိၢ်ပီၤ. ဒီးတၢ်မၤဘၢမဲာ်ခိၣ်ကျီၤ, ²⁰ ဒီးခီၣ်အသွဲ, ဒီးနီၣ်ဘိၣ်, ဒီးတၢ်နၢမူအကိဧိၤ ဂီၢ်ဧိၤ, ဒီးအပစၢ်ပစီၢ် ²¹ ပသံး, ဒီးနါဒ့အကွီၢ်, ²² -တၢ်အကူအသိး လၢအလုၢ်ဒိၣ်ပှ့ၤဒိၣ် ဒီးဆ့ဖးထီ, ဒီးယၣ်ဖးလဲၢ်, ဒီးစ့ အထၢၣ်, ²³ ဒီးမဲာ်ထံကလၤ ဒီးဆ့ဖှီခီမၤ ဒီးခိၣ်ဖၢၣ်, ဒီးတၢ်မၤဘၢမဲာ်လီၤ.

²⁴ ဒီးတၢ်ကမၤအသးလၢနၢမူအလီၢ်န့ၣ်နၢအုၣ်ကအိၣ်, ဒီးလၢယီၢ်တကိးအလီၢ်န့ၣ်ပျံၤတဘိ, ဒီးလၢခိၣ်သူသံၣ် အလီၢ်န့ၣ်ကျၤခိၣ်, ဒီးလၢတၢ်အကူအသိးဖးလဲၢ်အလီၢ် န့ၣ်ယီၢ်တကိးထၢၣ်တၢ်ကံးညာ်လီၤ. ကိၢ်ဃိာ်အလီၢ် ကအိၣ်လၢတၢ်အဃံအလၤအလီၢ်လီၤ.

²⁵ နဖိခွါကလီၤဃံၤလၢနး, နပှၤအဆူၣ်န့ၣ်လၢဒုးသုးအ ပူၤလီၤ. ²⁶ အပဲတရီကဟီၣ်ဒီးယၢၤလီၤ. ဒီးအိၣ်ကလီဝဲ, ဒီးကဆ့ၣ်နီၤလၢဟီၣ်ခိၣ်လိၤလီၤ.

၄

¹ ဒီးတၢ်လၢမုၢ်တနံၤန့ၣ် ပိာ်မုၣ်နွံဂၤကဟံးဃာ်ပိာ်ခွါ တဂၤဒီးစံးဝဲ, ပကအီၣ်ပကိၣ်ဒၣ်ပဝဲ, ဒီးပကကူသိးပ တၢ်ကူတၢ်သိးဒၣ်ပဝဲလီၤ. ထဲဒုးယုၢ်ပှၤလၢနမံၤတက့ၢ်. မၤပူၤမၤဖျဲးတၢ်ဒုၣ်ဒွဲၣ်ပှၤတက့ၢ်.

² တၢ်လၢမုၢ်တနံၤန့ၣ် ယွၤအဒ့အဖီကအိၣ်လၢတၢ်အ ဃံအလၤ ဒီးတၢ်လၤကပီၤ. ဒီးဟီၣ်ခိၣ်အတၤသၣ်လၢ တၢ်ဂ့ၤတၢ်ဝါ, ဒီးတၢ်ကယၢကယဲလၢပှၤအံၣ်စရ့လးဖိ လၢအပူၤဖျဲးတ့ၢ်လံအဂီၢ်လီၤ.

³ ဒီးတၢ်ကမၤအသးလၢပှၤလၢ အအိၣ်လီၤတဲာ်လၢစံ ယိၣ်အပူၤ, ဒီးပှၤလၢအအိၣ်ဒံးလၢယရူၤၡလ့ၣ်အပူၤန့ၣ် ကဘၣ်တၢ်ကိးအီၤလၢပှၤစီဆှံ, ကယဲၢ်ပှၤလၢအမံၤကွဲး အသးလၢပှၤမူလၢယရူၤၡလ့ၣ်အပူၤ, ⁴ ဖဲယွၤသ့စီကွံာ်စံ ယိၣ်အဖိမုၣ်တဖၣ်အဃံၣ်အဃူး, ဒီးမၤစီကွံာ်ယရူၤၡ လ့ၣ်အသွံၣ်လၢအသးကံၢ်ပူၤလၢတၢ်စံၣ်ညီၣ်အသး, ဒီး လၢမ့ၣ်အူအီၣ်တၢ်အသးန့ၣ်လီၤ. ⁵ ဒီးလၢကစၢၢ်စံယိၣ် အတၢ်အိၣ်တၢ်ဆိးအလီၢ်ခဲလၢာ်အဖီခိၣ်, ဒီးလၢအတၢ် အိၣ်ဖှိၣ်တဖၣ်အဖီခိၣ်န့ၣ် ယွၤကတ့တၢ်အၢၣ်ဒီးမ့ၣ်အူ ခုၣ်လၢမုၢ်ဆါ, ဒီးမ့ၣ်လၣ်ကကဲၤကပီၤ လၢမုၢ်နၤလီၤ. အဂ့ၢ်ဒ်အံၤ, လၢတၢ်လၤကပီၤခဲလၢာ်အဖီခိၣ်န့ၣ် တၢ် ကျၢၢ်ဘၢကအိၣ်ဝဲလီၤ.

⁶ ဒီးဒဲလၢတၢ်ကဒုအလီၢ်လၢတၢ်ကိၢ်လၢမုၢ်ဆါအဃိ, ဒီးလၢတၢ်ဃ့ၢ်ဆူအအိၣ်အလီၢ်, ဒီးလၢတၢ်အိၣ်တဒၢ အလီၢ်ဒီးတၢ်တဒၢလၢကလံၤမုၢ်အဃိ, ဒီးလၢတၢ်ဟဲစူၤ အဃိန့ၣ်ကအိၣ်ဝဲတဖျၢၣ်လီၤ.

၅

¹ ပျဲသးဝံၣ်ယၤလၢပှၤလၢယအဲၣ်အီၤတဂၤအဂီၢ်, လၢ ပှၤလၢယအဲၣ်အီၤအတၢ်သးဝံၣ် လၢအစပံးအလီၢ်အဂ့ၢ် အကျိၤတက့ၢ်. ပှၤလၢယအဲၣ်အီၤတဂၤ အိၣ်ဒီးအစပံး အလီၢ်လၢကစၢၢ်ဖိအလိၤဖဲဟီၣ်ခိၣ်ဂ့ၤဒိၣ်မးလီၤ.

² ဒီးခူၣ်ကဖီထီၣ်ဝဲ, ဒီးထၢထီၣ်လၢၢ်ဧိၤမဲးဧိၤ, ဒီးသူၣ်စ ပံးမုၢ်စိရ့း, ဒီးမၤဒဲခိးတၢ်လၢအသးကံၢ်ပူၤတဖျၢၣ်, ဒီးခူၣ် လီၤစပံးထံအပူၤလီၤ. ဒီးကွၢ်လၢ်ဝဲလၢအကသၣ်ထီၣ်စ ပံးသၣ်, ဒီးသၣ်ထီၣ်ဝဲလၢစပံးသၣ်မံၤလီၤ.

³ ဒီးခဲကနံၣ်အံၤ, ပှၤအိၣ်ဝဲဆိးဝဲလၢယရူၤၡလ့ၣ်အပူၤ, ဒီးပှၤလၢယူဒၤအကျါတဖၣ်ဧၢ, စံၣ်ညီၣ်လၢ်ယၤဒီးယ စပံးအလီၢ်န့ၣ်တက့ၢ်. ⁴ တၢ်မၤလၢယစပံးလီၢ်အဂီၢ်လၢ ယတမၤဘၣ်န့ၣ်မ့ၢ်အအိၣ်ဒံးမနုၤလဲၣ်. ယကွၢ်လၢ်လၢ အကသၣ်ထီၣ်စပံးသၣ်, ဒီးသၣ်ထီၣ်စပံးသၣ်မံၤန့ၣ်မ့ၢ် အဘၣ်မနုၤလဲၣ်. ⁵ ဒီးခဲကနံၣ်အံၤ, ဟဲမီၣ်, ယကဘိးဘၣ်သ့ၣ်ညါသုလၢတၢ်လၢယကမၤယစပံးအလီၢ်လီၤ. ယကထုးထီၣ်ကွံာ်အကရၢ, ဒီးကကဲထီၣ်တၢ်အီၣ်ဆၣ်အလီၢ်, ယကမၤလီၤပှီၢ်အခိၣ်ဒူ, ဒီးကကဲထီၣ်တၢ်ယီၢ်တံၢ်အလီၢ်လီၤ.―

⁶ ဒီးယကပာ်အီၤလၢ တၢ်အိၣ်သယုၢ်, ဒီးတၢ်တပဲာ် ဃိအီၤဘၣ်, တၢ်တကတဲာ်ကတီၤဘၣ်အီၤဘၣ်. ဒီးတၤ ဆှုၣ်တၤမဲကမဲထီၣ်, ဒီးယမၤလိာ်တၢ်အၢၣ်လၢအသု တဟဲစူၤဟဲစီၣ်လၢအဖီခိၣ်တဂ့ၤ.

⁷ အဂ့ၢ်ဒ်အံၤ, တၢ်သုးမုၢ်ဂီၢ်မုၢ်အယွၤအစပံးအလီၢ်န့ၣ် မ့ၢ်အံၣ်စရ့လးအဟံၣ်, ဒီးယူဒၤအပှၤကညီန့ၣ် မ့ၢ်အ တၢ်သူၣ်အသးတမံၤလၢအဘၣ်အသးလီၤ. ဒီးကွၢ်လၢ် တၢ်စံၣ်ညီၣ်အကျဲ, ဒီးကွၢ်ကွၢ်, တၢ်လူလီၤသွံၣ်, ကွၢ် လၢ်တၢ်တီတၢ်လိၤအကျဲ, ဒီးကွၢ်ကွၢ်, တၢ်ကိးပသူထီၣ် လီၤ.

⁸ ပှၤလၢအမၤစဲဘူးတဟံၣ်ဒီးတဟံၣ်, လၢအပာ်စံာ်တ ပူၤဒီးစံာ်တပူၤ တုၤအလီၢ်တအိၣ်လၢၤဘၣ်, ဒီးတၢ်ဒုး အိၣ်ဒုးဆိးသုတပူၤဃီလၢ ကီၢ်အသးကံၢ်ပူၤန့ၣ်ဘၣ်အ ဖှီၣ်လီၤ.

⁹ အိၣ်လၢယနၢ်ပူၤ, တၢ်သုးမုၢ်ဂီၢ်မုၢ်အယွၤစံးဝဲ, မ့ၢ်မး ဟံၣ်အါဖျၢၣ်ကအိၣ်သယုၢ်, အဒိၣ်ဒီးအဂ့ၤ, လၢပှၤတ အိၣ်လၢအပူၤနီတဂၤဘၣ်လီၤ.

¹⁰ အဂ့ၢ်ဒ်အံၤ, စပံးလီၢ်အဆိတဆံ ကဟ့ၣ်ထီၣ်တဘၤ သး, ဒီးတၢ်ချံအဃိမ့ၢ်ကဟ့ၣ်လီၤတအ့ဖးလီၤ.

¹¹ ပှၤလၢအဂဲၤဆၢထၢၣ်လၢမုၢ်ဆ့ၣ်ဂီၤဂီၤ ဒ်သိးအက လူၤအီသံး, အိၣ်ဝဲတုၤမုၢ်ဟါတုၤစပံးထံမၤကိၢ်ထီၣ်အီၤ န့ၣ်ဘၣ်အဖှီၣ်လီၤ. ¹² ဒီးတနၢ်တဖီ, ဒီးသီဘုၣ်သီတူၢ်, ဒီး ဒၢဧိၤမိၤဧိၤ, ဒီးပံဧိၤတြၤဧိၤ, ဒီးစပံးထံစပံးနိန့ၣ်အိၣ်ဝဲလၢ အတၢ်ဒုးအီၣ်ဒုးအီအပူၤလီၤ. ဒီးယွၤအမၤတၢ်န့ၣ်တကွၢ် ဆိကမိၣ်ဘၣ်, ဒီးတၢ်လၢအမၤလၢအစုန့ၣ်တထံၣ်ဘၣ် ဝဲဘၣ်.

¹³ မၤသးဒ်န့ၣ်ဒီး ယပှၤဂီၢ်မုၢ်လဲၤကဲကုၢ်လၢတၢ်သ့ၣ်ညါ တအိၣ်ဘၣ်အဃိ, ဒီးအပှၤလၢအလၤကပီၤအိၣ်တဖၣ် န့ၣ်ကဲထီၣ်တၢ်သၣ်ဝံၤလီၤဒိအပှၤ, ဒီးအပှၤဂီၢ်မုၢ်ဃ့ထီၣ် ကွံာ်လၢတၢ်သူအသးလၢထံအဃိန့ၣ်လီၤ.

¹⁴ မၤသးဒ်န့ၣ်ဒီး ပျုၤပူၤမၤလဲၢ်ထီၣ်အသး, ဒီးအဲးထီၣ် အထးခိၣ်ဆံးလဲၢ်ဆံးလဲၢ်အနီၣ်ထိၣ်တအိၣ်ဘၣ်, ဒီးအ တၢ်လၤကပီၤ, ဒီးအသီၣ်အသဲ, ဒီးအပှၤဂီၢ်မုၢ်, ဒီးပှၤလၢ အသူၣ်ဖှံသးညီလၢအပူၤန့ၣ်လဲၤလီၤဝဲဖဲန့ၣ်လီၤ.

¹⁵ ဒီးပှၤအဖှီၣ် ဘၣ်တၢ်ဆီၣ်လီၤအီၤ ဒီးပှၤအဒိၣ်ဘၣ် တၢ်တ့ၢ်လီၤကွံာ်အီၤ, ဒီးပှၤပာ်ကဖိအသး အမဲာ်ဘၣ် တၢ်ဆီၣ်လီၤအီၤလီၤ.

¹⁶ ဒီးတၢ်သုးမုၢ်ဂီၢ်မုၢ်အယွၤ ထီၣ်ထီဝဲလၢတၢ်စံၣ်ညီၣ် အပူၤ, ဒီးယွၤတၢ်စီဆှံတဂၤ ကဘၣ်တၢ်ပာ်စီဆှံအီၤ လၢတၢ်တီတၢ်လိၤအပူၤလီၤ. ¹⁷ ဒီးသိဖိတဖၣ် ကအီၣ် တၢ်လၢအတၢ်အီၣ်ဆၣ်အလီၢ်, ဒီးတၢ်အဘီၣ်အလီၢ် အိၣ်သယုၢ်န့ၣ် ပှၤတခီဘီမုၢ်ဖိကအီၣ်ဝဲလီၤ.

¹⁸ ပှၤလၢအမိၤတၢ်အၢတၢ်သီလၢတၢ်ကလီကလီအပျံၤ, ဒီးမၤတၢ်ဒဲးဘးဒ်လၢ လ့ၣ်အပျံၤအသိးန့ၣ်, ဘၣ်အဖှီၣ် လီၤ. ¹⁹ လၢအစံး, မ်အမၤချ့ချ့, ဒုးအိၣ်ထီၣ်အမၤတၢ် လၢအဆိအချ့ဒ်သိးပကထံၣ်ဘၣ်အီၤတက့ၢ်, ဒီးအံၣ်စ ရ့လးအတၢ်စီဆှံတဂၤ အတၢ်ကူၣ်ထီၣ်ဖးလီၤန့ၣ်မ်အ သုးဘူးအသးဒီးဟဲဒ်သိး ပကသ့ၣ်ညါအီၤတက့ၢ်န့ၣ် လီၤ.

²⁰ ပှၤလၢအကိးတၢ်အၢ လၢတၢ်ဂ့ၤ, ဒီးတၢ်ဂ့ၤလၢတၢ် အၢ, လၢအပာ်တၢ်ခံးလၢတၢ်ကပီၤ, ဒီးတၢ်ကပီၤလၢ တၢ်ခံး, လၢအပာ်တၢ်ခၣ်လၢတၢ်ဆၢ, ဒီးတၢ်ဆၢလၢ တၢ်ခၣ်န့ၣ်ဘၣ်အဖှီၣ်လီၤ.

²¹ ပှၤလၢအမ့ၢ် ပှၤကူၣ်သ့လၢအမဲာ်ဒၣ်ဝဲ, ဒီးပှၤလၢအ သူၣ်ဆးအသးဆး လၢအမဲာ်ညါဒၣ်ဝဲန့ၣ် ဘၣ်အဖှီၣ် လီၤ. ²² ပှၤလၢအဆူၣ်ဝဲဒ်သိးအကအီစပံးထံ, ဒီးပှၤလၢအဂံၢ်ဆူၣ်အဘါဆူၣ် ဒ်သိးအကမၤဃါဃုာ်သံးဧိၤဂာ်ဧိၤ,―

²³ လၢအပာ်ပှၤအၢဖိလၢ ပှၤအတၢ်ကမၣ်တအိၣ်ဘၣ်လၢ ခိၣ်ဖးအဃိ, ဒီးထုးထီၣ်ကွံာ်ပှၤတီအတၢ်တီန့ၣ် ဘၣ် အဖှီၣ်လီၤ.

²⁴ မၤသးဒ်န့ၣ်ဒီးဒ်မ့ၣ်လၣ်မ့ၣ်ပျ့ၤ အီၣ်ကွံာ်လီၢ်ဧိၤဒံးဧိၤ အသိး, ဒီးဒ်နီၣ်ဧိၤမံၤဧိၤလၢမ့ၣ်အူအီၣ်ဝဲဒီး လီၤပၢၤဝဲအ သိးန့ၣ် အဂံၢ်ကဲထီၣ်တၢ်အုၣ်သံကျၣ်သံ, ဒီးအဖီကဒံ ထီၣ်ဒ်ဟီၣ်ခိၣ်အကမူၣ်အသိးန့ၣ်လီၤ. အဂ့ၢ်ဒ်အံၤ, ညိ ကွံာ်လံတၢ်သုးမုၢ်ဂီၢ်မုၢ်အယွၤအတၢ်သိၣ်တၢ်သီ, ဒီးတ ပးကဲဘၣ်အံၣ်စရ့လး အတၢ်စီဆှံတဂၤ အကလုၢ်က ထါဘၣ်လီၤ.

²⁵ မၤသးဒ်န့ၣ်ဒီး ယွၤအသးထီၣ်ကဲၤထီၣ်ဘၣ် အပှၤ ဂီၢ်မုၢ်, ဒီးယၤထီၣ်အစုထီဒါအီၤ, ဒီးတီၢ်အီၤ, ဒီးကစၢၢ် ကလိဟူးဝးဝဲ, ဒီးအစိၣ်အိၣ်ဝဲ လၢကျဲအသးကံၢ်ပူၤဒ် တၢ်အ့ၣ်သိးန့ၣ်လီၤ. လၢတၢ်ခဲလၢာ်အဃိန့ၣ် အသး ထီၣ်တစၢ်လီၤဘၣ်, ဒီးအစုယၤထီၣ်ဒံးအသးလီၤ.

²⁶ ကယူာ်ထီၣ်သုးဖိအလၣ်လၢပှၤကလုာ်တဖၣ်လၢအ အိၣ်လၢတၢ်ယံၤအဂီၢ်, ဒီးညိၣ်န့ၢ်အီၤလၢဟီၣ်ခိၣ်အက တၢၢ်တဖၣ်, ဒီးကွၢ်ကွၢ်, ကဟဲဝဲချ့ချ့လီၤ.

²⁷ တၢ်တဘှံးဘၣ်အသးနီတဂၤဘၣ်, ဒီးအခီၣ်တဘၣ် တိၢ်ဘၣ်ထံးနီတဂၤဘၣ်. ပှၤတမံသပ့ၤ, တမံခ့ဘၣ်နီတ ဂၤဘၣ်ဒီးအယီၢ်တကိးတလီၤဃ့ၣ်ဘၣ်, ဒီးအခီၣ်ဖံးပျံၤ တထီၣ်တဲာ်ဘၣ်. ²⁸ အပျၢ်အကနၣ်အ့ၣ်ဝဲ, ဒီးသူထီၣ်ချံၣ် ခဲလၢာ်, အကသ့ၣ်အခီၣ်မၤသးဒ်လၢၢ်မ့ၣ်အသိး, ဒီးအ လ့ၣ်ကဟၣ်ဒ်ကလံၤသဝံးအသိးန့ၣ်, ²⁹ ကိးရုၢ်ရုၢ်ဒ်ခံယုၢ် အမိၢ်အသိးဒီး ကိးရုၢ်ရုၢ်ဒ်ခ့ယုၢ်အဖိအသိး, ဒီးအူကြူၢ် ဖီၣ်န့ၢ်တၢ်, ဒီးလဲၤစိာ်ပူၤကွံာ်တၢ်, ဒီးတၢ်မၤထူၣ်ဖျဲး တအိၣ်ဘၣ်.

³⁰ တၢ်လၢမုၢ်တနံၤန့ၣ် ကအူကြူၢ်ထီဒါအီၤဒ်ပီၣ်လဲၣ်အ သီၣ်သွးသွးအသိးန့ၣ်လီၤ. ဒီးပှၤကကွၢ်ဆူဟီၣ်ခိၣ်, ဒီး ကွၢ်ကွၢ်, တၢ်ခံးတၢ်နၤ, တၢ်ကိၢ်တၢ်ဂီၤ, ဒီးတၢ်ကပီၤခံး လီၤဝဲလၢအတၢ်အၢၣ်န့ၣ်လီၤ.

၆

¹ လၢစီၤပၤဧူးစံယါသံဝဲတနံၣ်န့ၣ် ယထံၣ်ကစၢ်ဆ့ၣ်နီၤ ဝဲလၢလီၢ်ပစိာ်ထီဒီး ပာ်ထီၣ်ထီအဖီခိၣ်, ဒီးအဆ့ဖးထီ အခီၣ်ထံးန့ၣ်ပှဲၤနူၢ်ဧိၤစီၤဧိၤလီၤ.

² စ့ရၤဖးတဖၣ်ဆၢထၢၣ်လၢအဖီခိၣ်လီၤ. တဂၤအိၣ်ဒီး အဒံးဆ့ဃုဘ့ၣ်, တဂၤအိၣ်ဒီးအဒံးဆ့ဃုဘ့ၣ်လီၤ. မၤ ဘၢအမဲာ်လၢခံဘ့ၣ်, မၤဘၢအခီၣ်လၢခံဘ့ၣ်, ဒီးယူၤဝဲ လၢခံဘ့ၣ်လီၤ.

³ ဒီးအဝဲတဂၤအံၤ ကိးဝဲဆူအဝဲတဂၤန့ၣ် ဒီးစံးဝဲဒၣ်, စီဆှံ, စီဆှံ, စီဆှံမ့ၢ်တၢ်သုးမုၢ်ဂီၢ်မုၢ်အယွၤ, ဟီၣ်ခိၣ်ဒီ ဘ့ၣ်ညါပှဲၤဝဲဒီးအလၤကပီၤလီၤ.

⁴ ဒီးကျဲစၢၤအကျိၤထံး ဟူးဝးဝဲလၢပှၤလၢအကိးထီၣ် အသီၣ်အဃိ, ဒီးဟံၣ်ပှဲၤဝဲဒီးမ့ၣ်အူခုၣ်လီၤ.

⁵ ဒီးယစံး, ယဘၣ်အဖှီၣ်လီၤ. အဂ့ၢ်ဒ်အံၤ, ယဘၣ်တၢ် မၤဟးဂီၤယၤလီၤ. အဂ့ၢ်ဒ်အံၤ ယမ့ၢ်ပှၤလၢအပျုၤတ ကဆှီဘၣ်တဂၤ, ဒီးယအိၣ်ယဆိးလၢပှၤလၢအပျုၤတ ကဆှီဘၣ်တကလုာ်အကျါန့ၣ်လီၤ. အဂ့ၢ်ဒ်အံၤ, ယမဲာ် ထံၣ်ဘၣ်လံစီၤပၤတဂၤ, တၢ်သုးမုၢ်ဂီၢ်မုၢ်အယွၤလံ.

⁶ ဒီးစ့ရၤဖးတဂၤယူၤဝဲဆူယအိၣ်, ဒီးမ့ၣ်အူကဖးအိၣ် ဝဲလၢအစုပူၤလၢအဟံးန့ၢ် လၢတၢ်လုၢ်လီၢ်အဖီခိၣ်ဒီး နီၣ်တံာ်, ⁷ ဒီးဒုးထိးအီၤလၢယထးခိၣ်, ဒီးစံးဝဲဒၣ်, ကွၢ် ကွၢ်, တၢ်အံၤထိးလံနပျုၤလံ. ဒီးတၢ်ပျၢ်လံနတၢ်ကမၣ် လံ. ဒီးနတၢ်ဒဲးဘးကပူၤဖျဲးလီၤ.

⁸ ဒီးယနၢ်ဟူယွၤအကလုၢ်စံးဝဲဒၣ်, ယကမၢလီၤမတၤ တဂၤလဲၣ်. ဒီးမ့ၢ်မတၤကလဲၤလၢပဂီၢ်လဲၣ်. ဒီးယစံး, ကွၢ်ကွၢ်, ယၤလီၤ. မၢလီၤယၤတက့ၢ်.

⁹ ဒီးစံးဝဲဒၣ်, လဲၤ, ဒီးစံးဘၣ်ပှၤဂီၢ်မုၢ်အံၤ, နၢ်ဟူတၢ်ဒီး နၢ်ဟူတၢ်, ဘၣ်ဆၣ်ဒီးနၢ်သုတပၢၢ်တဂ့ၤ. ဒီးထံၣ်တၢ်ဒီး ထံၣ်တၢ်, ဘၣ်ဆၣ်ဒီးသုတသ့ၣ်ညါတဂ့ၤ. ¹⁰ မၤပှၤဂီၢ်မုၢ် အံၤအသးဘီၣ်သိ, မၤဃၢအနၢ်, ဒီးမၤဘံၣ်အမဲာ်တက့ၢ်. ကထံၣ်ဘၣ်ဖုး လၢအမဲာ်, ဒီးနၢ်ဟူဘၣ်ဖုးလၢအနၢ်, ဒီးနၢ်ပၢၢ်ဘၣ်ဖုးလၢအသး, ဒီးဃၣ်လိၤဘၣ်ဖုးအသး, ဒီးဘျိၣ်က့ၤဘျါက့ၤဝဲလီၤ.

¹¹ ဒီးယစံး, ဆံးယံာ်လဲၣ်, ကစၢ်ဧၢ, ဒီးစံးဝဲဒၣ်, တုၤလီၤ ခူဧိၤဝ့ၢ်ဧိၤကအိၣ်သယုၢ် လၢပှၤအိၣ်ဝဲဆိးဝဲတအိၣ်ဘၣ် အဃိ, ဒီးဟံၣ်ဧိၤဃီဧိၤကအိၣ်သယုၢ် လၢပှၤကညီတ အိၣ်ဘၣ်အဃိ, ဒီးထံဧိၤကီၢ်ဧိၤ ကအိၣ်သယုၢ်အိၣ်သ ညိ, ¹² ဒီးတုၤယွၤကပာ်ကွံာ်ပှၤကညီလၢအယံၤ, ဒီးတၢ် လဲၤသဒၣ်ဖးဒိၣ်ကအိၣ်လၢကီၢ်အသးကံၢ်ပူၤန့ၣ်လီၤ.

¹³ ဘၣ်ဆၣ်ဒီးဆံဆဲၣ်ပူတပူ ကအိၣ်လီၤတဲာ်လၢအပူၤ လီၤ. ဒီးအဝဲန့ၣ်ကဟဲက့ၤဒီး တၢ်ကမၤလၢာ်အီၤလီၤ. ဘၣ်ဆၣ်ဒီးဒ်ဃီမုၢ်ပျဲၢ်, ဒီးဒ်သ့ထိးဖၣ်လၢအကၢ်လီၤဝဲ, ဒီးအခိၣ်ဆၢၣ်အိၣ်လီၤတဲာ်အသိးန့ၣ် တၢ်အချံစီဆှံက အိၣ်ဒံးဝဲဒ်န့ၣ်သိးလီၤ.

၇

¹ ဒီးလၢယူဒၤအစီၤပၤစီၤဧူးစံယါအဖိခွါ, စီၤယိၤသၣ် အဖိခွါ, စီၤအၤဃးအမုၢ်နံၤတဖၣ်န့ၣ်တၢ်မၤအသးလၢ ပှၤစူၤရံအစီၤပၤရစံၣ်, ဒီးအံၣ်စရ့လးအစီၤပၤစီၤရမါလ ယၤအဖိခွါစီၤပ့ကးန့ၣ် ဟဲထီၣ်ဝဲဆူယရူၤၡလ့ၣ်ဒ်သိး အကဒုးတၢ်ဒီးအီၤ, ဒီးဒုးန့ၢ်ဝဲတသ့ဘၣ်လီၤ.

² ဒီးပှၤစံးဘၣ်စီၤဒၤဝံး အပှၤဟံၣ်ဖိ, ဒီးစံးဝဲဒၣ်, စူၤရံ သန့ၤအသးလၢအ့ဖရဲၣ်န့ၣ်လီၤ. ဒီးစီၤပၤအသး, ဒီးပှၤ ဂီၢ်မုၢ်အသးန့ၣ် ဝးဝဲဒ်သ့ၣ်လၢပှၢ်လၢ်ကျါလၢကလံၤအ မဲာ်ညါအသိးန့ၣ်လီၤ.

³ ဒီးယွၤစံးဘၣ် စီၤအၤမိာ်အဖိခွါစီၤယၡါယၤ, လဲၤသ ဂၢၢ်စီၤအၤဃး, နဲဒၣ်ဒီးနဖိခွါစီၤၡယၤရှူာ်ဖဲနိၣ်လၢထးခီ တပူၤအထံကျိၤအကတၢၢ်, ဖဲပှၤစုၣ်တၢ်ကံးညာ်အဟီၣ် ခိၣ်အကဝီၤအကျဲမုၢ်တက့ၢ်.

⁴ ဒီးစံးဘၣ်အီၤ, ပလီၢ်နသး, ဒီးအိၣ်ဃိကလာ်တက့ၢ်. ပျံၤတၢ်တဂ့ၤ. ဒီးသုတပာ်စၢ်လီၤနသးလၢမ့ၣ်အူခံလၢ အခုၣ်ထီၣ်အမဲၢ်ခံဘိန့ၣ်လၢစီၤရစံၣ်, ဒီးပှၤစူၤရံဖိ, စီၤရ မါလယၤအဖိခွါအသးကဲၤထီၣ်အဃိန့ၣ်တဂ့ၤ. ⁵ မ့ၢ်ပှၤ စူၤရံဖိကူၣ်ထီၣ်တၢ်အၢထီဒါနၤ, အ့ဖရဲၣ်, ဒီးစီၤရမါလ ယၤအဖိခွါစ့ၢ်ကီး, ဒီးစံးဝဲဒၣ်, ⁶ လဲၤထီဒါသကိးယူဒၤ, ဒီးမၤအၢအီၤ, ဒီးမၤနီၤဖးန့ၢ်အီၤလၢပဂီၢ်ဒၣ်ပဝဲ, ဒီးပာ် စီၤပၤတဂၤလၢအသးကံၢ်ပူၤ, စီၤတၤဘအ့လးအဖိခွါ န့ၣ်တက့ၢ်န့ၣ်ဒီး, ⁷ ကစၢ်ယွၤစံးဒ်အံၤ, တအိၣ်ဂၢၢ်ဆိး ကျၢၤဘၣ်, တမၤဘၣ်အသးဘၣ်. ⁸ အဂ့ၢ်ဒ်အံၤ, စူၤရံအခိၣ်မ့ၢ်ဒၤမ့ၤစ့း, ဒီးဒၤမ့ၤစ့းအခိၣ်မ့ၢ်စီၤရစံၣ်, ဒီးလၢဃုဆံယဲၢ်နံၣ်အတီၢ်ပူၤန့ၣ်အ့ဖရဲၣ်ကလီၤကၢ်ဝဲ, ဒီးတကဲလၢၤဘၣ်ပှၤတကလုာ်ဘၣ်.―

⁹ အဂ့ၢ်ဒ်အံၤ, အ့ဖရဲၣ်အခိၣ်မ့ၢ်ၡၤမရံ, ဒီးၡၤမရံအခိၣ်မ့ၢ် စီၤရမါလယၤအဖိခွါလီၤ. သုမ့ၢ်တနာ်ဘၣ်ဒီး, သုတ အိၣ်ဂၢၢ်ဆိးကျၢၤဘၣ်. ¹⁰ ဒီးယွၤကတိၤတၢ်ဒီးစီၤအၤဃး, ဒီးစံးဝဲဒၣ်, ¹¹ ဃ့ တၢ်ပနီၣ်တမံၤလၢယွၤနကစၢ်လၢနဂီၢ်ဒၣ်နဲတက့ၢ်. လၢ တၢ်ယိာ်ပူၤမ့ၢ်ဂ့ၤ, လၢတၢ်ထီၣ်ထီလၢထးခီမ့ၢ်ဂ့ၤ, ဃ့အီၤ တက့ၢ်.

¹² ဒီးစီၤအၤဃး စံးဝဲဒၣ်ယတဃ့ဘၣ်, ဒီးယတလ့ပစီ ယွၤဘၣ်.

¹³ ဒီးစံးဝဲဒၣ်, ခဲကနံၣ်အံၤကနၣ်တက့ၢ် စီၤဒၤဝံးအပှၤ ဟံၣ်ဖိသ့ၣ်ဧၢ, မၤတံာ်တာ်ပှၤကညီန့ၣ်မ့ၢ်တၢ်အဆံးတ မံၤသတးဒီး, သုကမၤတံာ်တာ်ယကစၢ်စ့ၢ်ကီးဧါ. ¹⁴ မၤ သးဒ်န့ၣ်ဒီး, ယွၤအကစၢ်ဒၣ်ဝဲကဟ့ၣ်လီၤသုလၢ တၢ် အပနီၣ်တမံၤ, ကွၢ်ကွၢ်, ပမုၣ်ကနီၤတဂၤကဒၢထီၣ်ဝဲ, ဒီး ဆံးစၢ်န့ၢ်အဖိခွါ, ဒီးယုၢ်ဝဲအမံၤလၢဧ့းမၤနူၤအ့လးလီၤ.

¹⁵ တၢ်နုၢ်ထံလီၤသကၤ, ဒီးကနဲစီန့ၣ်ကအီၣ်ဝဲတုၤအ သ့ၣ်ညါညိကွံာ်တၢ်အၢ, ဒီးဃုထၢတၢ်ဂ့ၤလီၤ. ¹⁶ အဂ့ၢ်ဒ် အံၤ, တချုးအသ့ၣ်ညါညိကွံာ်တၢ်အၢ, ဒီးဃုထၢတၢ်ဂ့ၤ န့ၣ်ဒီး, ကီၢ်တဘ့ၣ်လၢနပျံၤအစီၤပၤခံဂၤန့ၣ်ကအိၣ်သ ယုၢ်ဝဲလီၤ.

¹⁷ ဘၣ်ဆၣ်ဒီးယွၤကဒုးဘၣ်နၤ, ဒီးနပှၤဂီၢ်မုၢ်, ဒီးနပၢ် အပှၤဟံၣ်ဖိန့ၣ်လၢမုၢ်နံၤတဖၣ်လၢအတဟဲဘၣ်လၢအ့ ဖရဲၣ်ဟးဖးဒီးယူဒၤလံၤလံၤ, ဒ်ပစံးတၢ်အသိး, အၤရှူၢ်အ စီၤပၤလီၤ.

¹⁸ ဒီးလၢမုၢ်တနံၤန့ၣ် တၢ်ကမၤအသးလၢယွၤကညိၣ် န့ၢ်သၣ်ဘုလါလၢအအိၣ်လၢအဲၤကူပတူးအထံမိၢ်ပှၤအ နံၤတဖၣ်, ဒီးကွဲဧိၤကနဲဧိၤလၢအအိၣ်ဝဲလၢအၤရှူၢ်အကီၢ် ပူၤလီၤ. ¹⁹ ဒီးကဟဲဝဲ, ဒီးစီၢ်လီၤဝဲခဲလၢာ်လၢအကစၢၢ်က ဆူးအိၣ်သယုၢ်အပူၤ, ဒီးလၢလၢၢ်ကဆူးပူၤ, ဒီးလၢအက ရၢတၤဆှုၣ်ခဲလၢာ်အကျါ, ဒီးလၢကယဲၢ်တၢ်အီၣ်ဆၣ် အလီၢ်ခဲလၢာ်အပူၤလီၤ.

²⁰ တၢ်လၢမုၢ်တနံၤန့ၣ်ယွၤကလူၤတၢ်ခိၣ်သူ, ဒီးခီၣ်အ ဆူၣ်လၢဒီလူၤတၢ်လၢအဒိးလဲအသးတဘ့ၣ်, လၢတၢ် အိၣ်လၢထံမိၢ်ပှၢ်ဝၢ်ဘးခီ, လၢအၤရှူၢ်အစီၤပၤ, ဒီးကမၤ လၢာ်ကွံာ်ဝဲအခၣ်ဆူၣ်စ့ၢ်ကီးလီၤ.

²¹ ဒီးလၢမုၢ်တနံၤန့ၣ် တၢ်ကမၤအသးလၢပှၤတဂၤက ဘုၣ်ဂီၤဖံးမိၢ်တဒု, ဒီးသိခံဒုလီၤ. ²² ဒီးတၢ်ကမၤအသး လၢအကအီၣ်နုၢ်ထံလီၤသကၤလၢ တၢ်နုၢ်ထံအါလၢအ ကဟ့ၣ်ဝဲအဃိလီၤ. အဂ့ၢ်ဒ်အံၤ, ပှၤလၢအအိၣ်လီၤတဲာ် လၢကီၢ်ပူၤန့ၣ်ကအီၣ်တၢ်နုၢ်ထံလီၤသကၤ, ဒီးကနဲစီ ကိးဂၤဒဲးလီၤ.

²³ ဒီးလၢမုၢ်တနံၤန့ၣ်တၢ်ကမၤအသးလၢဖဲအလီၢ်လၢစ ပံးမုၢ်တကထိကြၢးဒီးစ့တကထိတပူၤလၢ်လၢ်န့ၣ်, က ကဲထီၣ်တၤဆှုၣ်တၤမဲအလီၢ်လီၤ.

²⁴ ပှၤကဟဲဖဲန့ၣ်ဒီးပျၢ်ဒီးချံၣ်လီၤ. အဂ့ၢ်ဒ်အံၤ, ကီၢ်ဒီ ဘ့ၣ်ညါန့ၣ်ကအိၣ်ဒီးတၤဆှုၣ်တၤမဲလီၤ.

²⁵ ဒီးကယဲၢ်ကစၢၢ်ကလိလၢပှၤခူၣ်အီၤဒီးတပူာ်န့ၣ်နတ လဲၤဘၣ်လၢအလိၤလၢတၢ်ပျံၤတၢ်ဆှုၣ်တၤမဲအဃိလီၤ. ဒီးကကဲထီၣ်ဂီၤဖံးလဲၤတၢ်အလီၢ်, ဒီးသိယီၢ်တၢ်အလီၢ် လီၤ.

၈

¹ ဒီးယွၤစံးဘၣ်ယၤ, ဟံးန့ၢ်တၢ်ဘ့ၣ်ဘၣ်ဖးဒိၣ်တဘ့ၣ် လၢနဂီၢ်, ဒီးကွဲးမဟၢ်ၡလးဃၤၡဘးလၢအလိၤလၢပှၤ ကညီအထိၣ်ဒံးတက့ၢ်. ² ဒီးယကဟံးန့ၢ်လၢ ယဂီၢ်ပှၤ အုၣ်အသးအမ့ၢ်အတီ, ပှၤလုၢ်တၢ်အဒိၣ်စီၤအူၤရံၤယၤ, ဒီးစီၤယဘ့းရ့ကယၤ အဖိခွါစီၤစကၤရယါဒ်သိးအက အုၣ်အသးလီၤ.

³ ဒီးယသုးဘူးယသးဆူဝံပိာ်မုၣ်အအိၣ်, ဒီးဒၢထီၣ်ဝဲ, ဒီးဆံးစၢ်န့ၢ်အဖိခွါတဂၤလီၤ. ဒီးယွၤစံးဘၣ်ယၤ, ယုၢ်အ မံၤလၢမဟၢ်ၡလးဃၤၡဘးန့ၣ်တက့ၢ်. ⁴ အဂ့ၢ်ဒ်အံၤ, ဖိ သၣ်တချုးသ့ၣ်ညါကိးယပၢ်ဒီးယမိၢ်န့ၣ်ဒီး, ပှၤကစိာ် ထီၣ်ကွံာ်ဒၤမ့ၤစ့းအစုလီၢ်အခီၣ်ခိၣ်, ဒီးၡၤမရံအတၢ်ဂုာ် န့ၢ်လၢအၤရှူၢ်အစီၤပၤအမဲာ်ညါလီၤ. ဒီးယွၤကတိၤ ကဒီးတၢ်ဒီးယၤဒီးစံးဝဲဒၣ်, ⁵ မ့ၢ်လၢ ပှၤဂီၢ်မုၢ်အံၤညိကွံာ်ၡံလိၤအထံတဖၣ် လၢအယွၤကယီ ကယီ, ဒီးသးခုဝဲလၢစီၤရစံၣ်, ဒီးစီၤရမါလယၤအဖိခွါအ ဂ့ၢ်ဒီး, ⁷ ကွၢ်ကွၢ်, ယွၤကဒုးဟဲလၢအဖီခိၣ်လၢထံမိၢ်ပှၢ် အထံဆူၣ်ဒီးအါ, ဒ်ပစံးတၢ်အသိး, အၤရှူၢ်အစီၤပၤ, ဒီးအ ကဟုကညီၢ်ခဲလၢာ်, ဒီးကထီၣ်လၢအကျိၤခဲလၢာ်အဖီ ခိၣ်, ဒီးလုၣ်ဘၢအနံၤခဲလၢာ်လီၤ. ⁸ ဒီးကခီဂာ်တၢ်ဆူယူ ဒၤ, ကလုၣ်ဘၢတၢ်, ဒီးလဲၤတၢ်လၢအဖီခိၣ်လီၤ. ကထီၣ် ဘးပှၤပၢၢ်လၢအကိာ်, ဒီးအယၤထီၣ်အဒံးဆ့န့ၣ်ကပှဲၤန ကီၢ်, ဧံးမၤနူၤအ့လးဧၢ.

⁹ ကအၢဒၣ်သုဝဲတက့ၢ်, ပှၤဂီၢ်မုၢ်သ့ၣ်ဧၢ, ဒီးလီၤကၢ်တ က့ၢ်, ပှၤအိၣ်လၢကီၢ်ယံၤသ့ၣ်ဧၢ, ကနၣ်တက့ၢ်. ကံၢ်တူာ် သုယီၢ်ဒ့, ဒီးလီၤကၢ်တက့ၢ်. ကံၢ်တူာ်သုယီၢ်ဒ့, ဒီးလီၤ ကၢ်တက့ၢ်. ¹⁰ ကူၣ်လိာ်တၢ်တက့ၢ်. ဒီးကကဲထီၣ်တၢ် ကလီကလီလီၤ. ကတိၤတၢ်ကတိၤတက့ၢ်. ဒီးတအိၣ် ဂၢၢ်ဆိးကျၢၤဘၣ်. အဂ့ၢ်ဒ်အံၤ, ယွၤအိၣ်ဒီးပှၤလီၤ.

¹¹ အဂ့ၢ်ဒ်အံၤ, ယွၤစံးဘၣ်ယၤဒ်အံၤလၢအစုဆူၣ်န့ၣ်ဒီး သိၣ်က့ၤယၤ ဒ်သိးယသုတပိာ် ပှၤဂီၢ်မုၢ်အံၤအကျဲတ ဂ့ၤ, ¹² ဒီးစံးဝဲဒၣ်, စံးလၢတၢ်ကရၢထီၣ်အၢလၢကယဲၢ် တၢ်လၢပှၤဂီၢ်မုၢ်စံးလၢ တၢ်ကရၢထီၣ်အၢအဂ့ၢ်န့ၣ်တ ဂ့ၤ. ဒီးပျံၤအတၢ်ပျံၤအလီၢ်န့ၣ်တဂ့ၤ. ဒီးဘၣ်ယိၣ်တၢ်တ ဂ့ၤ.

¹³ တၢ်သုးမုၢ်ဂီၢ်မုၢ်အယွၤန့ၣ် ပာ်စီဆှံအီၤတက့ၢ်. ဒီးမ် အဝဲဒၣ်ကဲထီၣ်သုပျံၤတၢ်အလီၢ်, ဒီးသုဘၣ်ယိၣ်တၢ်အ လီၢ်တက့ၢ်. ¹⁴ ဒီးအဝဲဒၣ်ကကဲထီၣ်တၢ်စီဆှံအလီၢ်, ဒီး လၢၢ်ဘၣ်တိၢ်ဘၣ်ထံးအလီၢ်ဒီးလၢလၢၢ်လီၤဃံၤအလီၢ် လၢအံၣ်စရ့လးခံဟံၣ်အဂီၢ်, လၢပှာ်ဧိၤစၤဧိၤ, ဒီးပျံၤသ ကွီၤအလီၢ်လၢပှၤယရူၤၡလ့ၣ်ဖိအဂီၢ်လီၤ.

¹⁵ ဒီးပှၤအါဂၤလၢအကျါန့ၣ် ကဘၣ်တိၢ်ဘၣ်ထံး, ဒီး ကလီၤဃံၤ, ဒီးကလီၤကၢ်ကွံာ်, ဒီးကဘၣ်ပျံၤသကွီၤ, ဒီး တၢ်ကဖီၣ်န့ၢ်အီၤလီၤ.

¹⁶ ထူထီၣ်တၢ်အုၣ်အသး, စဲဃာ်ပနီၣ်တၢ်သိၣ်တၢ်သီ လၢယပျဲၢ်ယဘီၣ်အကျါတက့ၢ်. ¹⁷ ဒီးယကအိၣ်ခီးယွၤ လၢအပာ်တဒၢအမဲာ်ဒီး စီၤယၤကိာ်အပှၤဟံၣ်ဖိ, ဒီးယ ကကွၢ်လၢ်အကျဲလီၤ.

¹⁸ ကွၢ်ကွၢ်, ယဲဒၣ်ဒီးယဖိတဖၣ်, လၢယွၤဟ့ၣ်လီၤယၤ အံၤ, မ့ၢ်လၢတၢ်ပနီၣ်လီၤလး, ဒီးတၢ်လီၤလိၢ်လီၤလးအ ဂီၢ်လၢအံၣ်စရ့လးအကျါ, လၢတၢ်သုးမုၢ်ဂီၢ်မုၢ်အယွၤ အအိၣ်, လၢအအိၣ်ဝဲလၢကစၢၢ်စံယိၣ်အလိၤလီၤ.

¹⁹ ဒီးတုၤပှၤစံးဘၣ်သု, ဃုတၢ်လၢပှၤအိၣ်ဒီးပှၤသံအက လၤ, ဒီးပှၤလၢအမဲာ်ထံၣ်ဝံ, ပှၤလၢအပံးပံး, ဒီးပှၤကတိၤ တၢ်ကသွံဒံဒီး, စံးသုဝဲ, ပှၤဂီၢ်မုၢ်ကဃုဘၣ်တၢ်လၢအက စၢ်အအိၣ်န့ၣ်တမ့ၢ်ဘၣ်ဧါ. တၢ်ဘၣ်ဃးဒီးပှၤမူန့ၣ်က ဃုဘၣ်တၢ်လၢပှၤသံအအိၣ်ဧါ.

²⁰ ဃုတၢ်လၢတၢ်သိၣ်တၢ်သီအအိၣ်န့ၣ်တက့ၢ်. မ့ၢ်တ ကတိၤဘၣ်ဒ်တၢ်ကတိၤန့ၣ်အသိးဘၣ်ဒီး, မ့ၢ်လၢမုၢ် ဆ့ၣ်အတၢ်ကပီၤတအိၣ်ဘၣ်လၢအပူၤဘၣ်လီၤ.

²¹ ဒီးကခီဂာ်ဝဲဘၣ်တၢ်ကီတၢ်ခဲဒီးတၢ်သၣ်ဝံၤလီၤဒိ, ဒီး တၢ်ကမၤအသးလၢတုၤတၢ်သၣ်ဝံၤအသးဒီး, ကမၤကိၢ် ထီၣ်အသး, ကဆိၣ်အၢအစီၤပၤဒီးအကစၢ်, ဒီးကကွၢ် တၢ်ဆူတၢ်ထီၣ်ထီ, ²² ဒီးဆူဟီၣ်ခိၣ်န့ၣ်ကကွၢ်တၢ်, ဒီး ကွၢ်ကွၢ်, တၢ်ကိၢ်တၢ်ဂီၤဒီးတၢ်ခံးတၢ်နၤ, တၢ်သူၣ်ကိၢ် သးဂီၤအတၢ်ခံး, ဒီးကဘၣ်တၢ်ဟီထီၣ်ကွံာ်အီၤဆူတၢ် ခံးသူလီၤ.

၉

¹ ဘၣ်ဆၣ်ဒီး, တၢ်ခံးန့ၣ်တအိၣ်ဘၣ်ဒီးပှၤလၢအဘၣ် တၢ်မၤအၢအီၤဘၣ်. ဒ်အဆၢအကတီၢ်အခီၣ်ထံးမၤတရီ တပါကီၢ်စဘူလိၣ်ဒီးကီၢ်နးသၤလံအသိးန့ၣ်, အဆၢအ ကတီၢ်လၢအလီၢ်ခံန့ၣ် ကမၤလၤကပီၤပီၣ်လဲၣ်အကျဲ, ယၢ်ဒ့ၣ်အနံၤ, ကၤလံၤလါဘၣ်ဃးဒီးပှၤကလုာ်တဖၣ်ဒ် န့ၣ်သိးလီၤ. ² ပှၤလၢအဆ့ၣ်နီၤလၢ တၢ်ခံးကျါန့ၣ်ထံၣ် ဘၣ်လံတၢ်ကပီၤဖးဒိၣ်လံ. ဒီးပှၤလၢအအိၣ်ဝဲဆိးဝဲလၢ တၢ်သံအကဒုအကီၢ်ပူၤန့ၣ် တၢ်ကပီၤထီၣ်ဘၣ်လံအီၤ လံ.

³ နမၤအါထီၣ်ပှၤတကလုာ်အံၤ, နမၤဒိၣ်ထီၣ်အတၢ် သးခုလီၤ. သးခုဝဲလၢနမဲာ်ညါဒ်တၢ်ကူးဘုအကတီၢ် အတၢ်သးခုအသိး, ဒီးဒ်ပှၤသးခုလၢအနီၤဖးတၢ်ဂုာ်န့ၢ် အဖၢမုၢ်အသိးန့ၣ်လီၤ.

⁴ အဂ့ၢ်ဒ်အံၤ, အတၢ်ယိးအနီၣ်ယိးဘိ, အဖံဘၣ်ခိၣ်အ နီၣ်ယိးဘိ, အပှၤဟီထီၣ်အီၤတဂၤအနီၣ်တီၢ်န့ၣ်, နမၤ ကၢ်အီၤဒ်လၢမံးဒယၣ်အမုၢ်တနံၤအသိးန့ၣ်လီၤ.

⁵ အဂ့ၢ်ဒ်အံၤ, ပှၤအိၣ်ဒီးအစုကဝဲၤလၢဒုးသုးအသီၣ်ပူၤ န့ၣ်အစုကဝဲၤခဲလၢာ်, ဒီးဆ့ဧိၤစီၤဧိၤထူထီၣ်အသးလၢ တၢ်သွံၣ်န့ၣ်ကကဲထီၣ်ဝဲလၢတၢ်ဆိၣ်ကဲၤမ့ၣ်အူ, လၢမ့ၣ် အူအီၣ်တၢ်အဂီၢ်လီၤ.

⁶ အဂ့ၢ်ဒ်အံၤ, ဖိသၣ်တဂၤအိၣ်ဖျဲၣ်လၢပဂီၢ်, တၢ်ဟ့ၣ် လီၤပှၤလၢဖိခွါတဂၤလီၤ. ဒီးတၢ်စံၣ်ညီၣ်ကအိၣ်လၢအ ဖံဘၣ်ခိၣ်, ဒီးတၢ်ကကိးအမံၤလၢတၢ်လီၤလး, ပှၤကူၣ် လိာ်တဂၤ, တၢ်ဆူၣ်ကစၢ်, အစိၤစိၤအဃၣ်ဃၣ်အပၢ်, တၢ်ဃူတၢ်ဖိးအပဒိၣ်ဖးဒိၣ်တဂၤလီၤ. ⁷ ဒီးအဘီအမုၢ် ဒိၣ်ထီၣ်လဲၢ်ထီၣ်န့ၣ်, ဒီးအတၢ်ဃူတၢ်ဖိးန့ၣ်အကတၢၢ် တအိၣ်ဘၣ်. လၢစီၤဒၤဝံးအလီၢ်ပစိာ်အဖီခိၣ်, ဒီးလၢအ ဘီအမုၢ်အဖီခိၣ် ဒ်သိးအကမၤအီၤလၢအဂၢၢ်အကျၢၤ, ဒီးမၤအီၤခၢၣ်သနၢၢ်လၢတၢ်စံၣ်ညီၣ်, ဒီးတၢ်တီတၢ်လိၤ, တုၤအံၤဆူညါလီၤစိၤလီၤထီလီၤ. တၢ်သုးမုၢ်ဂီၢ်မုၢ်အ ယွၤအသးဆူၣ်ကမၤတၢ်န့ၣ်လီၤ.

⁸ ယွၤမၢလီၤတၢ်ကတိၤတထံၣ်ဆူယၤကိာ်, ဒီးလီၤဘၣ် ဝဲလၢအံၣ်စရ့လး, ⁹ ဒီးကယဲၢ်ပှၤဂီၢ်မုၢ်ကသ့ၣ်ညါအ့ဖ ရဲၣ်, ဒီးပှၤၡၤမရံဖိလၢအသးထီၣ်ထီ, ဒီးပာ်ကဖိအသး န့ၣ်စံးဝဲ, ¹⁰ အူးခဲတဖၣ်လီၤပှီၢ်လံ, ဒီးပကမၤက့ၤလၢလၢၢ် စိးပျၤအသးလီၤ. သ့ၣ်သိဝံာ်ဒၢန့ၣ် ဘၣ်တၢ်ကူာ်ကွံာ် အီၤလံ, ဒီးပကပာ်သ့ၣ်ဆှိအ့ရ့းလၢအလီၢ်န့ၣ်လီၤ.

¹¹ မၤသးဒ်န့ၣ်ဒီး ယွၤကပာ်ထီၣ် ထီစီၤရစံၣ်အဒုၣ်အဒါ ထီဒါအီၤ, ဒီးကထိၣ်ဂဲၤအဒုၣ်အဒါတဖၣ်လီၤ. ¹² ပှၤစူၤ ရံဖိလၢမုၢ်ထီၣ်, ဒီးပှၤဖလ့ၡသးဖိလၢမုၢ်နုာ်, ဒီးကအီၣ် ကွံာ်အံၣ်စရ့လးဒီး အထးခိၣ်အိးထီၣ်အသးလီၤ. လၢ တၢ်အံၤခဲလၢာ်အဃိန့ၣ် အသးထီၣ်တစၢ်လီၤဘၣ်, ဒီး အစုယၤထီၣ်ဒံးအသးလီၤ.

¹³ ဘၣ်ဆၣ်ဒီး ပှၤဂီၢ်မုၢ်တဃၣ်ဘၣ်အသးဆူပှၤလၢအ တီၢ်အီၤအအိၣ်ဘၣ်, ဒီးတဃုဘၣ်တၢ်သုးမုၢ်ဂီၢ်မုၢ်အ ယွၤဘၣ်.

¹⁴ မၤသးဒ်န့ၣ်ဒီးယွၤကဒီၣ်တဲာ်ကွံာ်လၢအံၣ်စရ့လး, အ ခိၣ်ဒီးအမဲၢ်, အဒ့ဒီးအဆှဲလၢမုၢ်တနံၤဃီလီၤ.

¹⁵ ပှၤသးပှၢ်ဒီးပှၤ အိၣ်ဒီးအလၤကပီၤ, အဝဲဒၣ်မ့ၢ်အ ခိၣ်, ဒီးဝံလၢအသိၣ်က့ၤတၢ်ကဘျံးကဘျၣ်, အဝဲဒၣ်မ့ၢ် အမဲၢ်လီၤ. ¹⁶ အဂ့ၢ်ဒ်အံၤ, ပှၤလၢအဆှၢပှၤဂီၢ်မုၢ်အံၤဒုး ဟးဖျိးအီၤလၢကျဲ, ဒီးပှၤလၢအဘၣ်တၢ်ဆှၢဝဲလၢအီၤ န့ၣ်ဘၣ်တၢ်ယူၢ်လီၤကွံာ်အီၤလီၤ.

¹⁷ မၤသးဒ်န့ၣ်ဒီးယွၤတသးခုဘၣ်လၢ အပှၤဖိၣ်သၣ်ခွါ အဖီခိၣ်ဘၣ်. ဒီးအသးတအိၣ်ဘၣ်အပှၤဖိၣ်ဃဲဒီးအပှၤ မုၣ်ကမဲဘၣ်. အဂ့ၢ်ဒ်အံၤ, မ့ၢ်ပှၤအၢ, ဒီးပှၤမၤတၢ်အၢကိး ဂၤဒဲး, ဒီးကယဲၢ်ပှၤအထးခိၣ်ကတိၤတၢ် ကလီကလီ လီၤ. လၢတၢ်ခဲလၢာ်အဃိန့ၣ်အသးထီၣ်တစၢ်လီၤဘၣ် ဒီးအစုယၤထီၣ်ဒံးအသးလီၤ.

¹⁸ အဂ့ၢ်ဒ်အံၤ, တၢ်အၢအီၣ်ကွံာ်တၢ်ဒ်မ့ၣ်အူအသိး, ဒီး အီၣ်ကွံာ်တၤဆှုၣ်တၤမဲန့ၣ်, ဒီးဆိၣ်ကဲၤတၢ်လၢသ့ၣ် တီၣ်အကျါ, ဒီးထီၣ်ထီဒ်မ့ၣ်အူခုၣ်အထီၣ်ထီအသိးန့ၣ် လီၤ. ¹⁹ လၢတၢ်သုးမုၢ်ဂီၢ်မုၢ်အယွၤ အသးကဲၤထီၣ်အဃိန့ၣ်တၢ်ခံးန့ၢ်ထံဧိၤကီၢ်ဧိၤ, ဒီးပှၤဂီၢ်မုၢ်န့ၣ်မၤသးဒ်သ့ၣ်မုၣ်လၢမ့ၣ်အူအဂီၢ်လီၤ. ပှၤတသးလီဘၣ်အဒီပုၢ်ဝဲၢ်ဘၣ်.―

²⁰ ဒီးကအ့ၣ်တဲာ်တၢ်လၢအစုထွဲ, ဒီးတၢ်ကသၣ်ဝံၤအသး, ဒီးအီၣ်ကွံာ်တၢ်လၢအစုစ့ၣ်, ဒီးတဘျဲးအီၣ်ဘၣ်, ဒီးအီၣ် အစုဒုၣ်ဒၣ်ဝဲအညၣ်ကိးဂၤဒဲးလီၤ. ²¹ မနၤရှ့ၤန့ၣ်အ့ဖရဲၣ်, ဒီးအ့ဖရဲၣ်န့ၣ်မနၤရှ့ၤ, ဒီးအဝဲသ့ၣ်တဖၣ်တပူၤဃီန့ၣ်ထီ ဒါယူဒၤလီၤ. လၢတၢ်ခဲလၢာ်အဃိန့ၣ်အသးထီၣ်တစၢ် လီၤဘၣ်, ဒီးအစုယၤထီၣ်ဒံးအသးလီၤ.

၁၀

¹ ပှၤလၢအမၤလိာ်တၢ်မၤလိာ်အအၢ, ဒီးပှၤကွဲးလံာ်လၢ အကွဲးတၢ်မၤအၢလၢအစံၣ်ညီၣ်ဝဲန့ၣ်, ² ဒ်သိးအကဘိး ဃၣ်ကပၤပှၤဖှီၣ်ဖိလၢတၢ်စံၣ်ညီၣ်, ဒီးဒ်သိးအကမၤန့ၢ် ဆူၣ်ယပှၤဂီၢ်မုၢ်အပှၤ ဘၣ်ဖှီၣ်ဘၣ်ယာ်အကွီၢ်ဒ်သိးပှၤ မုၣ်ကမဲကကဲထီၣ်လၢအတၢ်ဂုာ်န့ၢ်, ဒီးဒ်သိးအကမၤ န့ၢ်ဆူၣ်ပှၤဖိၣ်ဃဲအတၢ်န့ၣ်ဘၣ်အဖှီၣ်လီၤ.

³ ဒီးလၢတၢ်အိၣ်သကိးအမုၢ်တနံၤန့ၣ်, ဒီးလၢတၢ်မၤ သယုၢ်တၢ်လၢအကဟဲလၢအယံၤန့ၣ် သုကမၤဒ်လဲၣ်. သုကဃ့ၢ်လၢ တၢ်မၤစၢၤအဂီၢ်ဆူ မတၤတဂၤအအိၣ် လဲၣ်. သုကပာ်လီၤတဲာ်သုလၤကပီၤန့ၣ်ဖဲလဲၣ်ပူၤလဲၣ်.

⁴ ယၤတအိၣ်ဘၣ်ဒီး, ကကိာ်လီၤဝဲလၢပှၤဘၣ်စၢဃာ် အဖီလာ်, ဒီးကလီၤဃံၤလၢပှၤဘၣ်တၢ်မၤသံအီၤအဖီ လာ်လီၤ. လၢတၢ်ခဲလၢာ်အဃိန့ၣ် အသးထီၣ်တစၢ် လီၤဘၣ်, ဒီးအစုယၤထီၣ်ဒံးအသးလီၤ.

⁵ အၣ်ဟါ, ပှၤအၤရှူၢ်ဖိ, ယသးထီၣ်အနီၣ်တီၢ်, ဒီးနီၣ် ထိးလၢအစုန့ၣ်မ့ၢ်ယသးကဲၤထီၣ်, ⁶ ယကမၢလီၤအီၤဆူ ပှၤလီတၢ်တကလုာ်, ဒီးယကမၤလိာ်အီၤလၢယတၢ်သး ထီၣ်အပှၤတကလုာ်အဂ့ၢ်အကျိၤန့ၣ်, ဒ်သိးအကဂုာ်န့ၢ် တၢ်ဂုာ်ဆူၣ်, ဒီးဂုာ်န့ၢ်အတၢ်, ဒီးဒ်သိးအကယီၢ်တံၢ်အီၤ ဒ်ကပံာ်လၢကျဲပူၤအသိးန့ၣ်လီၤ.

⁷ ဘၣ်ဆၣ်ဒီးအဝဲဒၣ်န့ၣ်တတိာ်ဘၣ်ဒ်န့ၣ်ဘၣ်. ဒီးတ ဆိကမိၣ်လၢအသးဒ်န့ၣ်ဘၣ်. မ့မ့ၢ်တၢ်အိၣ်ဝဲလၢအသး လၢအကမၤဟးဂီၤတၢ်, ဒီးလၢအကဒီၣ်တဲာ်ကွံာ်ပှၤက လုာ်တစှၤဘၣ်လီၤ.

⁸ အဂ့ၢ်ဒ်အံၤ, စံးဝဲ, ယပဒိၣ်ဖးဒိၣ်တဖၣ်န့ၣ်မ့ၢ်စီၤပၤသ ပှၢ်တၢၢ်, တမ့ၢ်ဘၣ်ဧါ. ⁹ ကးလနိၤန့ၣ်မၤသးဒ်ကၢ်ကမံၣ် အသိး, တမ့ၢ်ဘၣ်ဧါ. ဃမါသးန့ၣ်မၤသးဒ်အၢ်ပးအ သိး, တမ့ၢ်ဘၣ်ဧါ. ၡၤမရံန့ၣ်မၤသးဒ်ဒၤမ့ၤစ့းအသိး, တမ့ၢ်ဘၣ်ဧါ.

¹⁰ ဒ်ယစုမၤန့ၢ်တၢ်ဂီၤတၢ်ဖီၣ် အဘီမုၢ်ဒီးအတၢ်ဂီၢ်တၢ် ဖီၣ်လၢအအါန့ၢ်ယရူၤၡလ့ၣ် ဒီးၡၤမရံအတၢ်တက့ၢ်အ သိးန့ၣ်, ¹¹ ဒ်ယမၤၡၤမရံဒီးအတၢ်ဂီၤအသိးန့ၣ်, ယကမၤ ယရူၤၡလ့ၣ်ဒီးအတၢ်ဂီၤဒ်န့ၣ်အသိး, တမ့ၢ်ဘၣ်ဧါ.

¹² မၤသးဒ်န့ၣ်ဒီးတၢ်ကမၤအသးလၢ တုၤယွၤမၤဝံၤအ တၢ်မၤခဲလၢာ်လၢကစၢၢ်စံယိၣ်အလိၤ, ဒီးလၢယရူၤၡ လ့ၣ်အပူၤဒီး, ယကဒုးအိၣ်သကိးတၢ်လၢအၤရှူၢ်အစီၤပၤ အပာ်ကဖိအသးဒီး အမဲာ်ထီၣ်ထီအတၤသၣ်အလိၤန့ၣ် လီၤ.

¹³ အဂ့ၢ်ဒ်အံၤ, စံးဝဲဒၣ်, ယမၤတၢ်အံၤလၢယစုဆူၣ်, ဒီးလၢယတၢ်ကူၣ်သ့လီၤ. အဂ့ၢ်ဒ်အံၤ, ယကူၣ်သ့ကူၣ် ဘၣ်လီၤ. ယသုးပှၤကလုာ်တဖၣ်အပနီၣ်လၢအဃၢၤ, ယမၤန့ၢ်ဆူၣ်အတၢ်ပာ်ဖှိၣ်, ယဆီၣ်လီၤပှၤကီၢ်ဖိတဖၣ် ဒ်ပှၤအဂံၢ်ဆူၣ်တဂၤအသိးန့ၣ်, ¹⁴ ဒီးယစုထံၣ်န့ၢ်လံပှၤ ဂီၢ်မုၢ်အစုလီၢ်အခီၣ်ခိၣ်, ဒ်ထိၣ်အသွံအသိး, ဒီးဒ်ပှၤ ထၢဖှိၣ်ထိၣ်ဒံၣ်လၢအအိၣ်လီၤတဲာ်အသိးန့ၣ်, ယထၢ ဖှိၣ်လံဟီၣ်ခိၣ်အတၢ်ခဲလၢာ်, ဒီးတၢ်ဝၢ်အဒံးဆ့မ့ၢ်ဂ့ၤ, အဲးထီၣ်အထးခိၣ်မ့ၢ်ဂ့ၤ, ပံးပံးမ့ၢ်ဂ့ၤ, တအိၣ်ဘၣ်.

¹⁵ ကွါကပာ်ကဖိအသးလၢ ပှၤလၢအကူာ်တၢ်ဒီးအီၤအ ဖီခိၣ်န့ၣ်စ့ၢ်ကီးဧါ. လွးကပာ်ဒိၣ်အသးလၢ ပှၤလၢအ ဘူးအီၤအဖီခိၣ်န့ၣ်စ့ၢ်ကီးဧါ. မၤသးဒ်နီၣ်တီၢ်ယၤထီၣ် ပှၤလၢအယၤထီၣ်အီၤအသိးန့ၣ်, မၤသးဒ်နီၣ်ထိးယူာ် ထီၣ်ပှၤလၢတၢ်တမ့ၢ်ဘၣ်သ့ၣ်အသိးန့ၣ်လီၤ.

¹⁶ မၤသးဒ်န့ၣ်ဒီး, ကစၢ်, တၢ်သုးမုၢ်ဂီၢ်မုၢ်အယွၤ, ကမၢ လီၤတၢ်ဃဲၤသူဃဲၤလါလၢ အပှၤအဘီၣ်တဖၣ်အလိၤ, ဒီးလၢအလၤကပီၤအဖီလာ်တၢ်ကဆိၣ်ကဲၤတၢ်ဒ်မ့ၣ်အူ အီၣ်တၢ်အသိးန့ၣ်လီၤ.

¹⁷ ဒီးအံၣ်စရ့လးအတၢ်ကပီၤကအိၣ်လၢ မ့ၣ်အူအဂီၢ်, ဒီးအတၢ်စီဆှံလၢမ့ၣ်လၣ်အဂီၢ်, ဒီးကဆူးထီၣ်ဒီးအီၣ် ကွံာ်အတၤဆှုၣ်တၤမဲလၢမုၢ်တနံၤဃီလီၤ.

¹⁸ ဒီးအသ့ၣ်ဧိၤဝၣ်ဧိၤတဖု, ဒီးအဟီၣ်ခိၣ်အကဝီၤလၢ အသၣ်ထီၣ်တဖၣ် အလၤအကပီၤလၢအသးပၢၢ်လၢအ ညၣ်န့ၣ်ကလၢာ်ကွံာ်ဝဲ, ဒီးကမၤသးဒ်ပှၤစိာ်သုးအလၣ် လီၤဘှါအသိးန့ၣ်လီၤ. ¹⁹ တၢ်အိၣ်လီၤတဲာ်လၢအသ့ၣ်ဧိၤ ဝၣ်ဧိၤတဖုကအိၣ်စှၤထံး, ဒီးဖိသၣ်တဂၤကကွဲးအီၤလီၤ.

²⁰ ဒီးတၢ်လၢမုၢ်တနံၤန့ၣ် တၢ်ကမၤအသးလၢပှၤအိၣ် လီၤတဲာ်လၢအံၣ်စရ့လး ဒီးယၤကိာ်အပှၤဟံၣ်ဖိလၢအ ပူၤဖျဲးတၢ်တဖၣ်န့ၣ် တသန့ၤလၢၤဘၣ်အသးလၢပှၤလၢ အတီၢ်အီၤဘၣ်. မ့မၢ်အကသန့ၤအသးလၢယွၤအံၣ်စရ့ လးအတၢ်စီဆှံတဂၤန့ၣ်နီၢ်နီၢ်လီၤ.

²¹ တၢ်အိၣ်လီၤတဲာ်ကဟဲက့ၤ. ယၤကိာ်အတၢ်အိၣ်လီၤ တဲာ်ဆူတၢ်ဆူၣ်ကစၢ်တဂၤအအိၣ်လီၤ.

²² အဂ့ၢ်ဒ်အံၤ, အံၣ်စရ့လးဧၢ, နပှၤဂီၢ်မုၢ်မ့ၢ်မၤသးဒ်ပီၣ် လဲၣ်အမဲးအဟီၣ်အသိးန့ၣ်ဘၣ်ဆၣ်ဒီး, ထဲတၢ်အိၣ်လီၤ တဲာ်ကဟဲက့ၤလီၤ. တၢ်မၤလၢာ်ဝဲန့ၣ်စံၣ်ညီၣ်လံအသး လံ. လုၣ်ဘၢဝဲလၢတၢ်တီတၢ်လိၤလီၤ.

²³ အဂ့ၢ်ဒ်အံၤ, တၢ်မၤလၢာ်ဝဲလၢ အစံၣ်ညီၣ်လံအသး လံန့ၣ်ကစၢ်, တၢ်သုးမုၢ်ဂီၢ်မုၢ်အယွၤ, ကမၤဝဲလၢကီၢ်ဒီ ဘ့ၣ်ညါအသးကံၢ်ပူၤလီၤ.

²⁴ မၤသးဒ်န့ၣ်ဒီးကစၢ်, တၢ်သုးမုၢ်ဂီၢ်မုၢ်အယွၤစံးဝဲဒၣ်, ယပှၤဂီၢ်မုၢ်အိၣ်ဝဲလၢစံယိၣ်အလိၤသ့ၣ်ဧၢ, ပျံၤပှၤအၤရှူၢ်ဖိတဂ့ၤ, ကတီၢ်နၤလၢနီၣ်တီၢ်, ဒီးကယၤထီၣ်နီၣ်ထိးထီ ဒါနၤဒ်အဲၤကူပတူးအသိးန့ၣ်လီၤ.

²⁵ အဂ့ၢ်ဒ်အံၤ, အိၣ်ဒံးတစိၢ်ဖိ, ဒီးတၢ်သူၣ်ဒိၣ်သးဟ့က လၢာ်, ဒီးယသးထီၣ်လၢအဝဲသ့ၣ်ကလၢာ်ဝဲအဂ့ၢ်န့ၣ် လီၤ.

²⁶ ဒီးတၢ်သုးမုၢ်ဂီၢ်မုၢ်အယွၤ ကဒုးအိၣ်ထီၣ်နီၣ်တီၢ်တ ဘိလၢအဂီၢ်, ဒ်တၢ်တီၢ်မံးဒယၣ်ဖဲလၢၢ်ဧိရ့ာ်အသိးန့ၣ် ဒီးဒ်အနီၣ်တီၢ်အိၣ်ဝဲလၢပီၣ်လဲၣ်အဖီခိၣ်အသိးန့ၣ်, က ယၤထီၣ်အီၤဒ်လၢအဲၤကူပတူးအလိၤအသိးန့ၣ်လီၤ.

²⁷ ဒီးလၢမုၢ်တနံၤန့ၣ် တၢ်ကမၤအသးလၢတၢ်ကစိာ် ကွံာ်အတၢ်ဝံတၢ်ယိးလၢနဖံဘၣ်ခိၣ်အဖီခိၣ်, ဒီးအနီၣ် ယိးဘိလၢနကိာ်လိၤ ကကၢ်လီၤကွံာ်လၢတၢ်ဖှူလၢသိ အဃိလီၤ.

²⁸ ဟဲတုၤလံလၢဧၤယံး, လဲၤပူၤကွံာ်လံဆူမံးကြိၣ်, လၢမံး ကမၣ်န့ၣ်ပာ်ဖှိၣ်လံအတၢ်ဖိတၢ်လံၤ, ²⁹ ပူၤကွံာ်လံတၢ် ကဆူးလံ, အိၣ်ဝဲလၢမုၢ်နၤလၢက့ဘၤအပူၤလီၤ. ရၤမါက နိးကစုာ်ဝဲ, ကံးဘဧၤစီလူးဃ့ၢ်ဝဲလီၤ. ³⁰ ကးလံၣ်အဖိမုၣ် ဧၢ, ထုထီၣ်နကလုၢ်, လ့ရှ့ၣ်ဧၢ, ကနၣ်တက့ၢ်. ဧၤနသိး လၢအဘၣ်နးဘၣ်ဖှီၣ်ဧၢ. ³¹ မၤဒမ့ၤနၤဟးဝဲ, ပှၤက့ဘံၣ်ဖိ ဃ့ၢ်ဝဲဒီးအတၢ်ဖိအတၢ်လံၤလီၤ. ³² ဘၣ်ဆၣ်ဒီးတၢ်လၢ မုၢ်တနံၤအံၤအိၣ်ဝဲလၢနိၤဘးအပူၤလီၤ. ကဝၢ်အစုဆူစံ ယိၣ်အဖိမုၣ်အကစၢၢ်, ယရူၤၡလ့ၣ်အတၢ်စိခိၣ်န့ၣ်လီၤ.

³³ ကွၢ်ကွၢ်, ကစၢ်, တၢ်သုးမုၢ်ဂီၢ်မုၢ်အယွၤ, ပဲာ်တဲာ်တၢ် အဒ့န့ၣ်လၢတၢ်ပျံၤတၢ်ဖုး, ဒီးသ့ၣ်အထီန့ၣ်ကဘၣ်တၢ် ကူာ်လီၤကွံာ်အီၤ, ဒီးတၢ်အထီတဖၣ်န့ၣ် ကဘၣ်တၢ် ဆီၣ်လီၤအီၤလီၤ.

³⁴ ဒီးကကူာ်လီၤကွံာ် သ့ၣ်ဧိၤဝၣ်ဧိၤအဖုတီၣ်တဖၣ်လၢ ထး, ဒီးလဘၤနိၣ်အံၤကလီၤဒါဝဲလၢပှၤအဆူၣ်န့ၣ်လီၤ.

၁၁

¹ ဒီးသ့ၣ်ပဒၢတဘိကမဲထီၣ်လၢယံးၡဲအခိၣ်ဆၢၣ်, ဒီးဒ့ တဒ့ကမဲထီၣ်လၢအဂံၢ်လီၤ.

² ဒီးယွၤအသးကအိၣ်ဘှံးလၢအလိၤ, တၢ်ကူၣ်သ့ဒီး သူၣ်ဆးသးဆးအသး, တၢ်ကူၣ်လိာ်ဒီးတၢ်အစိအက မီၤအသး, တၢ်သ့ၣ်ညါအသး, ဒီးတၢ်ပျံၤယွၤအသးလီၤ.

³ ဒီးကမုာ်လၤတၢ်လၢတၢ်ပျံၤယွၤအပူၤ, ဒီးတစံၣ်ညီၣ် ဘၣ်တၢ်ဒ်တၢ်လၢအထံၣ်လၢအမဲာ်အသိးဘၣ်န့ၣ်, ဒီး တစံၣ်ညီၣ်တဲာ်ဘၣ်တၢ်ဒ်တၢ်လၢ အနၢ်ဟူလၢအနၢ်အ သိးဘၣ်. ⁴ ဒီးကစံၣ်ညီၣ်ပှၤဖှီၣ်ဖိယာ်ဖိလၢတၢ်တီ, ဒီး ကစံၣ်ညီၣ်တဲာ်ပှၤဟီၣ်ခိၣ်ဖိလၢ အဘၣ်နးဘၣ်ဖှီၣ်လၢ တၢ်လိၤလီၤ. ဒီးကတီၢ်ဟီၣ်ခိၣ် လၢအထးခိၣ်အနီၣ် တီၢ်, ဒီးလၢအပျုၤအသါန့ၣ်ကမၤသံပှၤအၢဖိလီၤ. ⁵ ဒီး တၢ်တီတၢ်လိၤကကဲထီၣ်အယီၢ်ဒ့အယီၢ်တကိး, ဒီးတၢ် မ့ၢ်တၢ်တီအယီၢ်တကိးလီၤ.

⁶ ဒီးထွံၣ်မံၤကအိၣ်ကဆိးဒီးသိဖိ, ဒီးခ့စံၣ်ပိၣ်ကကိာ် လီၤဒီးမဲာ်တဲးလဲးဖိ, ဒီးဂီၤဖံးဖိ, ဒီးခ့ယုၢ်ဖိ, ဒီးတၢ်ဘီၣ် ဖိကအိၣ်ဆိးတပူၤဃီ, ဒီးဖိဒံဖိသၣ်ကဆှၢအီၤလီၤ.

⁷ ဒီးဂီၤဖံးမိၢ်ဒီးတၤသူကအီၣ်အဆၣ်တပူၤဃီ, အဖိတ ဖၣ်ကကိာ်လီၤတပူၤဃီ, ဒီးခ့ယုၢ်ကအီၣ်လီၢ်ဧိၤဒံးဧိၤဒ် ဂီၤဖံးဖါအသိးန့ၣ်လီၤ. ⁸ ဒီးဖိသၣ်အီၣ်နုၢ်ကလိာ်ကွဲလၢ ဂုၢ်သီအပူၤအဖီခိၣ်, ဒီးဖိသၣ်ဖှါနုၢ်ကပာ်အစုလၢဂုၢ်မိာ် အိးအတၢ်အိပူၤအဖီခိၣ်လီၤ. ⁹ တမၤအၢဘၣ်, ဒီးတမၤ ဟးဂီၤဘၣ်ဘၣ်လၢ ယကစၢၢ်စီဆှံဒီဖျၢၣ်ညါအလိၤ ဘၣ်. အဂ့ၢ်ဒ်အံၤ, ဟီၣ်ခိၣ်ကပှဲၤဝဲဒီးတၢ်သ့ၣ်ညါယွၤဒ် ထံကျၢၢ်ဘၢပီၣ်လဲၣ်အသိးန့ၣ်လီၤ.

¹⁰ ဒီးတၢ်လၢမုၢ်တနံၤန့ၣ် တၢ်ကမၤအသးလၢယံးၡဲအ ဂံၢ်ပာ်ဆၢထၢၣ်အသးကကဲထီၣ်သုးဖိအလၣ်လၢပှၤက လုာ်တဖၣ်အဂီၢ်လီၤ. ပှၤကလုာ်တဖၣ် ကဃ့ၢ်ဆူအ အအိၣ်, ဒီးအအိၣ်ဘှံးအလီၢ်န့ၣ်ကအိၣ်ဒီးအလၤအက ပီၤလီၤ.

¹¹ ဒီးလၢမုၢ်တနံၤန့ၣ် တၢ်ကမၤအသးလၢယွၤကယူာ် ထီၣ်အစုပှဲၤထီၣ်ခံဘျီတဘျီ, ဒ်သိးအကမၤန့ၢ်က့ၤအ တၢ်အိၣ်လီၤတဲာ်လၢအအိၣ်လီၤတဲာ်လၢအၤရှူၢ်, ဒီးလၢ အဲၤကူပတူး, ဒီးလၢပၤသြိၣ်, ဒီးလၢကူၤၡး, ဒီးလၢဧ့ၤ လၣ်, ဒီးလၢၡံနၢ်, ဒီးလၢဃမါသး, ဒီးလၢပီၣ်လဲၣ်အကီး တဖၣ်န့ၣ်လီၤ.

¹² ဒီးကသူၣ်ထီၣ်သုးဖိအလၣ်လၢ ပှၤကလုာ်တဖၣ်အ ဂီၢ်, ဒီးကဒုးအိၣ်ဖှိၣ်အံၣ်စရ့လးအပှၤဟးဝ့ၤဝီၤဖိ, ဒီးက ပာ်ဖှိၣ်ယူဒၤအပှၤလီၤမုၢ်လီၤဖး လၢဟီၣ်ခိၣ်လွံၢ်နၢၣ်န့ၣ် လီၤ.

¹³ အ့ဖရဲၣ်အသးက့ၣ်န့ၣ်ကဟးထီၣ်ကွံာ်, ဒီးယူဒၤအ ဒုၣ်အဒါန့ၣ်ကဘၣ်တၢ်ဒီၣ်တဲာ်ကွံာ်အီၤလီၤ. အ့ဖရဲၣ် တသးက့ၣ်ဘၣ်ယူဒၤ, ဒီးယူဒၤတမၤအၢဘၣ်အ့ဖရဲၣ် ဘၣ်.

¹⁴ ဒီးအဝဲသ့ၣ်တဖၣ်န့ၣ် ကယူၤဘၣ်ပှၤဖလ့ၡသးဖိအဖံ ဘၣ်ခိၣ်ဆူမုၢ်နုာ်တခီ, ကဂုာ်န့ၢ်ပှၤမုၢ်ထီၣ်ဖိအတၢ်တ ပူၤဃီ, ကယူာ်ထီၣ်အစုဆူအဒိၣ်ဒီးမိၤအးအဖီခိၣ်, ဒီး ပှၤဧၣ်မိၣ်ဖိကစူၢ်အီၤလီၤ.

¹⁵ ဒီးယွၤကမၤဟးဂီၤအဲၤကူပတူးအပီၣ်လဲၣ်အပျ့ၤ, ဒီး ကဝၢ်အစုလၢထံမိၢ်ပှၢ်အဖီခိၣ်လၢကလံၤဆူၣ်, ဒီးကျီဖး ဒ့အီၤလၢနွံကျိၤ, ဒီးဒုးလဲၤပှၤလၢခီၣ်ဖံးန့ၣ်လီၤ.

¹⁶ ဒီးကျဲမုၢ် ကအိၣ်တဘိလၢ အပှၤဂီၢ်မုၢ်အအိၣ်လီၤ တဲာ်အဂီၢ်လၢအကအိၣ်လီၤတဲာ်လၢအၤရှူၢ်, ဒ်အအိၣ် လၢအံၣ်စရ့လးအဂီၢ်ဖဲမုၢ်နံၤလၢအဟးထီၣ်လၢကီၢ်အဲၤ ကူပတူးအပူၤအသိးန့ၣ်လီၤ.

၁၂

¹ ဒီးတၢ်လၢမုၢ်တနံၤန့ၣ်နကစံး, ယွၤဧၢ, ယကစံးထီၣ် ပတြၢၤနၤလီၤ. အဂ့ၢ်ဒ်အံၤ, နသးထီၣ်ယၤဘၣ်ဆၣ်ဒီး, နသးထီၣ်န့ၣ်ဟးထီၣ်ကွံာ်, ဒီးနမၤမုာ်ထီၣ်က့ၤယၤလီၤ.

² ကွၢ်ကွၢ်, ယွၤမ့ၢ်တၢ်အုၣ်က့ၤခီၣ်က့ၤယၤလီၤ. ယက သန့ၤယသး, ဒီးတပျံၤဘၣ်တၢ်ဘၣ်. အဂ့ၢ်ဒ်အံၤ, ယွၤမ့ၢ် ယဂံၢ်ယဘါ, ဒီးယတၢ်သးဝံၣ်, ဒီးကဲထီၣ်တၢ်အုၣ်က့ၤ ခီၣ်က့ၤယၤလီၤ.

³ မၤသးဒ်န့ၣ်ဒီး, သုကဒၢၣ်ထီၣ်ထံ လၢတၢ်အုၣ်က့ၤ ခီၣ်က့ၤအထံပူၤတဖၣ်ဒီးတၢ်သူၣ်ခုသးခုလီၤ.

⁴ ဒီးလၢမုၢ်တနံၤန့ၣ်သုကစံး, စံးထီၣ်ပတြၢၤယွၤ, ကိး ထီၣ်အမံၤ, ဒုးသ့ၣ်ညါအမၤတၢ်လၢပှၤကလုာ်တဖၣ် အကျါ, ဒုးသ့ၣ်နီၣ်ထီၣ်က့ၤအီၤလၢအမံၤအိၣ်လၢတၢ် ထီၣ်ထီတက့ၢ်.

⁵ သးဝံၣ်ထီၣ်ယွၤတက့ၢ်. အဂ့ၢ်ဒ်အံၤ, မၤဝဲလၢတၢ် ထီၣ်ထီလီၤ. သ့ၣ်ညါတၢ်အံၤလၢဟီၣ်ခိၣ်ဒီဘ့ၣ်ညါတ က့ၢ်. ⁶ ကိးပသူတၢ်, ဒီးသးဝံၣ်တၢ်, ပှၤစံယိၣ်ဖိဧၢ, အဂ့ၢ် ဒ်အံၤ, အံၣ်စရ့လးအတၢ်စီဆှံတဂၤန့ၣ်ဒိၣ်ဝဲလၢနသး ကံၢ်ပူၤလီၤ.

၁၃

¹ တၢ်အကလုၢ်လီၤလၢ ဘၤဘူၤလိၣ် အဂ့ၢ်လၢစီၤအၤ မိာ်အဖိခွါစီၤယၡါယၤထံၣ်ဘၣ်ဝဲလီၤ.

² လၢကစၢၢ်အဒီခိၣ်ပျီန့ၣ် သူၣ်ထီၣ်သုးဖိအလၣ်, ထု ထီၣ်အကလုၢ်ဆူအအိၣ်, ဝၢ်လၢသုစု, မ်အလဲၤနုာ်လၢ ပဒိၣ်ဖးဒိၣ်အပဲတရီပူၤန့ၣ်တက့ၢ်.

³ ယဲဒၣ်အံၤ ယမၤလိာ်လံပှၤလၢယပာ်စီဆှံအီၤတဖၣ် လံ. ယကိးထီၣ်လံစ့ၢ်ကီး ယပှၤအဆူၣ်တဖၣ်လၢယသး ကဲၤထီၣ်အဂီၢ်, ပှၤလၢအသးခုလၢယတၢ်ထီၣ်ထီအပူၤ လီၤ.

⁴ ပှၤဂီၢ်မုၢ်အသီၣ်အိၣ်ဝဲ လၢကစၢၢ်ကလိ, မၤသးဒ်ပှၤ ဂီၢ်မုၢ်အါဂၤအသိး, ပှၤကလုာ်တဖၣ်အဘီမုၢ်အိၣ်ဖှိၣ်ရိ ဖှိၣ်အသီၣ်တၢထီၣ်တၢလီၤန့ၣ်လီၤ. တၢ်သုးမုၢ်ဂီၢ်မုၢ် အယွၤပာ်ဖှိၣ်တၢ်သုးမုၢ်ဖိလၢဒုးသုးအဂီၢ်လီၤ.

⁵ ဟဲဝဲလၢထံယံၤကီၢ်ယံၤလၢမူခိၣ်အကတၢၢ်, ယွၤဒီး အတၢ်သးကဲၤထီၣ်အစုကဝဲၤ, ဒ်သိးအကမၤဟးဂီၤကီၢ် ဒီဘ့ၣ်ညါလီၤ.

⁶ ဟီၣ်တက့ၢ်. အဂ့ၢ်ဒ်အံၤ, ယွၤအမုၢ်တနံၤအိၣ်ဘူး ထီၣ်လံ, ကဟဲဒ်တၢ်ဟးဂီၤလၢတၢ်သ့တၢ်လၢာ်အအိၣ် အသိးန့ၣ်လီၤ. ⁷ မၤသးဒ်န့ၣ်ဒီးကယဲၢ်ပှၤအစုကလီၤစၢ်, ဒီးကယဲၢ်ပှၤအသးကပှံၢ်လီၤ. ⁸ ဒီးအသးကတုၤဝဲ, ဒီး တၢ်ဆိးကဲးဒီးတၢ်ဃဲကဖီၣ်န့ၢ်အီၤ, ဒ်ပိာ်မုၣ်လၢအဟုး ဆါအသိးန့ၣ်ကဘၣ်တၢ်ဆိးကဲးလီၤ. ကမၢကမၣ်လိာ် အသးတဂၤဒီးတဂၤလီၤ. အမဲာ်ကကဲထီၣ်မ့ၣ်လာ်အ မဲာ်လီၤ.

⁹ ကွၢ်ကွၢ်, ယွၤအမုၢ်တနံၤဟဲဝဲ, တၢ်ပျံၤအလီၢ်, အိၣ်ဒီး တၢ်သးထီၣ်, ဒီးတၢ်သးကဲၤထီၣ်, ဒ်သိးအကပာ်ကီၢ် အိၣ်သယုၢ်, ဒီးကမၤဟးဂီၤကွံာ်အပှၤဒဲးဘးဖိလၢအပူၤ လီၤ. ¹⁰ အဂ့ၢ်ဒ်အံၤ, မူခိၣ်အဆၣ်ဧိၤဖီဧိၤ, ဒီးအဆၣ်ယိးမါတ ဖၣ်န့ၣ်တကပီၤဘၣ်. တုၤမုၢ်လဲၤထီၣ်ဒီး, ခံးလီၤဝဲ, ဒီး လါန့ၣ်တဒုးကပီၤထီၣ်ဘၣ်လီၤ.

¹¹ ဒီးယကဒုးအိၣ်သကိးပှၤဟီၣ်ခိၣ်ဖိလၢအတၢ်အၢ, ဒီး ပှၤအၢဖိလၢအတၢ်မၤအၢ, ဒီးပှၤလၢအပာ်ထီၣ်ထီအသး န့ၣ်ယကဒုးတုာ်အပာ်ကဖိအသး, ဒီးပှၤမၤပျံၤတၢ်အ တၢ်ထီၣ်ထီန့ၣ်ယကဆီၣ်လီၤလီၤ. ¹² ယကမၤပှၤကညီ စှၤန့ၢ်ထူစီတက့ၢ်, ဒီးပှၤသပျၢၤပှၤကညီစှၤန့ၢ် အိဖ့ၢ်အ ထူတက့ၢ်လီၤ.

¹³ မၤသးဒ်န့ၣ်ဒီး ယကမၤဟူးဝးမူခိၣ်, ဒီးဟီၣ်ခိၣ်က ဘၣ်တၢ်ဝးသုးအလီၢ် လၢတၢ်သုးမုၢ်ဂီၢ်မုၢ်အယွၤအသး ထီၣ်အဃိ, လၢအသးကဲၤထီၣ်အမုၢ်တနံၤန့ၣ်လီၤ.

¹⁴ ဒီးတၢ်ကမၤအသး ဒ်တၤဟိစဘံလၢတၢ်လူၤအီၤအ သိးန့ၣ်, ဒီးမၤအသးဒ်သိလၢ ပှၤဒုးအိၣ်ဖှိၣ်အီၤတအိၣ် ဘၣ်, ဒီးပှၤကဃၣ်အသးဆူအပှၤတကလုာ်ဒၣ်ဝဲ, ဒီး ကဃ့ၢ်ဆူအကီၢ်ဒၣ်ဝဲစုာ်စုာ်လီၤ.

¹⁵ ကယဲၢ်ပှၤလၢ တၢ်ထံၣ်န့ၢ်အီၤ ကဘၣ်တၢ်ဆဲးအီၤဒီး ကယဲၢ်ပှၤလၢ အစဲဘူးဒီးပှၤတဖၣ်န့ၣ် ကလီၤဃံၤလၢ နးလီၤ. ¹⁶ ဒီးအဖိတဖၣ်န့ၣ်ကဘၣ်တၢ်တ့ၢ်လီၤကလဲဝဲ လၢအမဲာ်ညါ, အဟံၣ်တဖၣ်ကဘၣ်တၢ်ဂုာ်န့ၢ်, ဒီးအမါ တဖၣ်ကဘၣ်တၢ်ဖိးန့ၢ်ဆူၣ်ဝဲလီၤ.

¹⁷ ကွၢ်ကွၢ်, ယကထိၣ်ဂဲၤပှၤမၤဒဲဖိထီဒါအီၤလၢအတပး ကဲဘၣ်ကျိၣ်ဧိၤစ့ဧိၤဘၣ်, ဒီးတဘၣ်အသးလၢထူဧိၤလွဲ ဧိၤဘၣ်. ¹⁸ ဒီးချံၣ်ဧိၤပျၢ်ဧိၤကတီၢ်လီၤကလဲဖိၣ်သၣ်ပိာ်ခွါ ဒီးတသးအိၣ်ဘၣ်တၢ်ဒၢလီၢ်အသၣ်, ဒီးဖိဒံဖိသၣ်န့ၣ် တသးလီဘၣ်ဝဲဘၣ်.

¹⁹ ဒီးဘၤဘူၤလိၣ်, ဘီဧိၤမုၢ်ဧိၤအလၤအကပီၤ, ပှၤက့ၤ စ့းဖိအပာ်အသးထီၣ်ထီအလီၢ် အကယၢကယဲန့ၣ်က မၤသးဒ်ယွၤမၤဟးဂီၤစဒိၣ်ဒီးဂမိရၤအသိးန့ၣ်လီၤ. ²⁰ ပှၤ တအိၣ်တဆိးဘၣ်လၢအပူၤလီၤထူလီၤယိာ်, ဒီးပှၤအ လီၢ်တလီၤစံာ်ဘၣ်လၢအပူၤ အစိၤစိၤအဃၣ်ဃၣ်လီၤ. ဒီးပှၤဧ့ရ့းဖိတသူၣ်အဒဲဖဲန့ၣ်ဘၣ်, ဒီးပှၤကွၢ်သိတဒုး ကိာ်လီၤတၢ်ဖဲန့ၣ်ဘၣ်. ²¹ တၢ်ဒူတၢ်ဃိၤကကိာ်လီၤဖဲ န့ၣ်ဒီးအဟံၣ်ကပှဲၤဒီးတၢ်ကိးကဒံပျီၢ်ကဒီ, ဒီးထိၣ်ကီၤ လၤအူးကအိၣ်ကဆိးဖဲန့ၣ်, ဒီးတၢ်အဖံးဆူၣ်ထီဖိကဂဲၤ ကလံၣ်ဖဲန့ၣ်, ²² ဒီးထွံၣ်မံၤကမီၤဆၢလိာ်အသးလၢအနူၢ် အစီၤပူၤ, ဒီးထွံၣ်ဟီၣ်ခိၣ်လၢအဟံၣ်မုာ်တဖၣ်အပူၤလီၤ. ဒီးအဆၢအကတီၢ်ဘူးထီၣ်လံ. ဒီးတၢ်တသုးဘၣ်အနံၤ အသီဘၣ်.

၁၄

¹ အဂ့ၢ်ဒ်အံၤ, ယွၤကသးကညီၤယၤကိာ်, ဒီးဃုထၢဒံး အံၣ်စရ့လး, ဒီးကဒုးအိၣ်ဘှံးအီၤလၢအကီၢ်ဒၣ်ဝဲအပူၤ, ဒီးတခီဘီမုၢ်ဖိကရ့လိာ်အသးဒီးအီၤ, ဒီးကစဲဘူးဒီးယၤ ကိာ်အဟံၣ်လီၤ.

² ဒီးပှၤကလုာ်တဖၣ်န့ၣ်ကဟံးန့ၢ်အီၤ, ဒီးဟဲစိာ်အီၤဆူ အလီၢ်ဒၣ်ဝဲ, ဒီးအံၣ်စရ့လးအဟံၣ်ဖိကမၤန့ၢ်အီၤလၢ ယွၤအကီၢ်ပူၤလၢအကုၢ်အပှၤပိာ်ခွါအဂီၢ်, ဒီးလၢအကုၢ် အပှၤပိာ်မုၣ်အဂီၢ်, ဒီးကပၢပှၤလၢအမၤဆူၣ်မၤစိးအီၤ လီၤ.

³ ဒီးတၢ်ကမၤအသးလၢမုၢ်တနံၤလၢယွၤဒုးအိၣ်ဘှံးနၤ လၢနတၢ်သူၣ်အုးသးအုး, ဒီးနတၢ်ကိၢ်တၢ်ဂီၤ, ဒီးနမၤ တၢ်ကီလၢတၢ်ဒုးမၤနၤဒီး, ⁴ နကစံၣ်ဃဲၤတၢ်ကတိၤဒိအံၤ လၢဘၤဘူၤလိၣ်အစီၤပၤအဂ့ၢ်အကျိၤ, ဒီးနကစံး, ပှၤမၤ အၢတၢ်န့ၣ်လၢာ်ကွံာ်ဒ်လဲၣ်, ဝ့ၢ်ထူန့ၣ်လၢာ်ကွံာ်ဒ်လဲၣ်.

⁵ ယွၤမၤကၢ်လံပှၤအၢဖိအနီၣ်တီၢ်, ပှၤပၢတၢ်အနီၣ် ထိး, ⁶ ပှၤလၢအတီၢ်ပှၤကလုာ်တဖၣ်လၢအသးထီၣ်, ဒီး တအိၣ်ကတီၢ်ဘၣ်. ဒီးပၢဝဲပှၤကလုာ်တဖၣ်လၢအသး ကဲၤထီၣ်, ဒီးတၢ်တြီအီၤတအိၣ်ဘၣ်.

⁷ ပှၤဟီၣ်ခိၣ်ဖိအိၣ်ဘှံး, ဒီးအိၣ်ဃိကလံာ်ခဲလၢာ်လီၤ. သးဝံၣ်သံကျံထီၣ်တၢ်လီၤ. ⁸ သ့ၣ်ဆှိသးခုစ့ၢ်ကီးလၢနဖီ ခိၣ်, လဘၤနိၣ်အသ့ၣ်ဆှိအ့ရ့းစံးဝဲ, လၢနတကူၢ်အလီၢ် ခံန့ၣ်ပှၤကူာ်လီၤတၢ်တဟဲထီၣ်ထီဒါပှၤဘၣ်.

⁹ ပျုၤပူၤလၢလာ်ခီဟူးဝးဝဲလၢနဂ့ၢ်နကျိၤ ဒ်သိးတုၤန ဟဲဒီး, အကသဂၢၢ်နၤလီၤ. ထိၣ်ဂဲၤဝဲပှၤနီၢ်ဒိၣ်ဖိလၢနဂီၢ်, ကယဲၢ်ဟီၣ်ခိၣ်အဒိၣ်ခဲလၢာ်, ဒုးဂဲၤဆၢထၢၣ်ပှၤကလုာ် အစီၤပၤခဲလၢာ်လၢအလီၢ်ပစိာ်န့ၣ်လီၤ.

¹⁰ အဝဲသ့ၣ်ခဲလၢာ်ကကတိၤတၢ်ဒီးစံးဘၣ်နၤ, နဲဒၣ်, န လီၤစၢ်စ့ၢ်ကီးဒ်ပဝဲအသိးန့ၣ်ဧါ, နကဲထီၣ်တၢ်ဒ်ပဝဲအ သိးန့ၣ်စ့ၢ်ကီးဧါ. ¹¹ နတၢ်ထီၣ်ထီန့ၣ်ဘၣ်တၢ်ဒုးလဲၤလီၤ အီၤဆူပျုၤပူၤ, ဒီးနတနၢ်အသီၣ်လီၤ. လၢၣ်ဧိၤဆှးဧိၤဒါ လီၤအသးလၢနဖီလာ်, ဒီးတၢ်ကျၢၢ်ဘၢနၤန့ၣ်မ့ၢ်လၢၣ် ဧိၤဆှးဧိၤလီၤ.

¹² နလီၤတဲာ်လၢမူခိၣ်ဒ်လဲၣ်, ဆၣ်တူၢ်ဂီၤ, မုၢ်ဆ့ၣ်အဖိ ဧၢ, နဘၣ်တၢ်ကူာ်လီၤတ့ၢ်လၢဟီၣ်ခိၣ်အဖီခိၣ်ဒ်လဲၣ်, ပှၤလၢအမၤဃၣ်ပှၤကလုာ်တဖၣ်န့ၣ်နဲဧၢ.

¹³ အဂ့ၢ်ဒ်အံၤ, နစံးလၢနသးကံၢ်ပူၤ, ယကထီၣ်ဘးဆူ မူခိၣ်, ယကပာ်ယလီၢ်ပစိာ်လၢကစၢ်အဆၣ်ဧိၤဖီဧိၤအ ဖီခိၣ်, ယကဆ့ၣ်နီၤလၢတၢ်အိၣ်ဖှိၣ်အကစၢၢ်ကလိလၢ ကလံၤစိးကတၢၢ်လီၤ. ¹⁴ ယကထီၣ်ဘးတၢ်အၢၣ်အတၢ် ထီအဖီခိၣ်, ယကပာ်ယသးဒ်တၢ်ထီကတၢၢ်တဂၤအ သိးန့ၣ်လီၤ.

¹⁵ ဘၣ်ဆၣ်ဒီး တၢ်ကဒုးလဲၤလီၤနၤဆူပျုၤပူၤ, ဆူတၢ် ယိာ်ပူၤအခံဒးလီၤ.

¹⁶ ပှၤလၢအထံၣ်ဘၣ်နၤကကွၢ်ထံနၤ, ဒီးကွၢ်ဆိကမိၣ် နၤ, ဒီးစံး, ပှၤလၢအမၤဟီၣ်ခိၣ်ဆှဲးဆှိး, လၢအမၤဟူးဝး ဘီမုၢ်တဖၣ်မ့ၢ်ပှၤတဂၤအံၤဧါ. ¹⁷ ဒုးကဲထီၣ်ဟီၣ်ခိၣ်ဒ်ပှၢ် မုၢ်ကနၢအသိး, မၤဟးဂီၤအခူအဝ့ၢ်, ဒီးတပျၢ်ဘၣ်ပှၤလၢ အဖီၣ်န့ၢ်ဝဲ, ဆူအဟံၣ်ဘၣ်.

¹⁸ ပှၤကလုာ်တဖၣ်အစီၤပၤခဲလၢာ်, အဝဲသ့ၣ်ခဲလၢာ်န့ၣ် မံလီၤလၢတၢ်လၤကပီၤအပူၤ, တဂၤလၢအဟံၣ်ဒၣ်ဝဲအ ပူၤ, တဂၤလၢအဟံၣ်ဒၣ်ဝဲအပူၤလီၤ.

¹⁹ မ့မ့ၢ်နဲဒၣ်နဘၣ်တၢ်ကွံာ်ထီၣ်ကွံာ်လၢနသွၣ်ခိၣ်အပူၤ ဒ်တၢ်အဒ့အဖီလၢ တၢ်တပးကဲဘၣ်အီၤအသိး, ဒ်ပှၤ ဘၣ်တၢ်မၤသံအီၤအကူအသိးဆဲးဖျိလၢနး, လဲၤလီၤဆူ တၢ်ပူၤအလၢၢ်အမဲးအကျါအသိး, ဒ်တၢ်အစိၣ်လၢပှၤ ယီၢ်တံၢ်အီၤလၢအခီၣ်ဖီလာ်အသိးန့ၣ်လီၤ.

²⁰ နတဘၣ်ပာ်ဖှိၣ်ဃုာ်ဒီးအီၤလၢတၢ်ခူၣ်လီၤကွံာ်ဘၣ်. အဂ့ၢ်ဒ်အံၤ, နမၤဟးဂီၤနထံနကီၢ်, နပှၤဂီၢ်မုၢ်န့ၣ်နမၤသံ ကွံာ်အီၤလီၤ. ပှၤမၤတၢ်အၢအချံအသၣ်န့ၣ်တဘၣ်တၢ် ပှ့ၤဘၣ်အမံၤလီၤထူလီၤယိာ်ဘၣ်.

²¹ ကတဲာ်ကတီၤတၢ်မၤသံလၢ အဖိတဖၣ်အဂီၢ်လၢအ ပၢ်တဖၣ်အတၢ်အၢအဃိန့ၣ်တက့ၢ်. မ်အသုတဂဲၤဆၢ ထၢၣ်ဒီးန့ၢ်သါကီၢ်န့ၣ်, ဒီးမၤပှဲၤဟီၣ်ခိၣ်လၢခူဧိၤဝ့ၢ်ဧိၤ တဂ့ၤ.

²² ဒီးယဲဒၣ်ယကဂဲၤဆၢထၢၣ်ထီဒါအီၤ, တၢ်သုးမုၢ်ဂီၢ် မုၢ်အယွၤစံးဝဲဒၣ်, ဒီးယကဒီၣ်တဲာ်ဘၤဘူၤလိၣ်အမံၤ, ဒီးတၢ်အိၣ်လီၤတဲာ်, ဒီးအဖိအလံၤ, ဒီးအစၢၤအသွဲၣ်, ယွၤစံးဝဲဒၣ်လီၤ. ²³ ဒီးယကပာ်အီၤလၢသူၣ်ဧိၤဘါဧိၤအ လီၢ်, ဒီးနိၣ်ဧိၤအီဧိၤ, ဒီးယကခွဲသိၣ်အီၤဒီးနီၣ်ခွဲသိၣ်မၤ ဟးဂီၤတၢ်လီၤ. တၢ်သုးမုၢ်ဂီၢ်မုၢ်အယွၤစံးဝဲဒၣ်လီၤ.

²⁴ တၢ်သုးမုၢ်ဂီၢ်မုၢ်အယွၤဆိၣ်တၢ်ဒီးစံးဝဲဒၣ်, မ့ၢ်မးဒ် ယဆိကမိၣ်တၢ်အသိးန့ၣ် တၢ်ကမၤအသးဒ်န့ၣ်, ဒီးဒ် ယကူၣ်တၢ်အသိးန့ၣ်ကအိၣ်ဂၢၢ်ဆိးကျၢၤလီၤ. ²⁵ ယက မၤကၢ်လီၤပှၤအၤရှူၢ်ဖိလၢယကီၢ်ပူၤ, ဒီးလၢယကစၢၢ် လိၤယကယီၢ်တံၢ်အီၤ, ဒီးအနီၣ်ယိးဘိကဟးထီၣ်ကွံာ် လၢအဖီခိၣ်, ဒီးအတၢ်ဝံတၢ်ယိးကဟးထီၣ်ကွံာ်လၢအ ဖံဘၣ်ခိၣ်လီၤ.

²⁶ အအံၤမ့ၢ်တၢ်တိာ်လၢ တၢ်တိာ်ဝဲလၢဟီၣ်ခိၣ်ဒီဘ့ၣ် ညါအဂ့ၢ်, ဒီးအအံၤမ့ၢ်တၢ်အစုလၢအယူာ်ထီၣ်အသး လၢပှၤကိးကလုာ်ဒဲးအဖီခိၣ်လီၤ.

²⁷ အဂ့ၢ်ဒ်အံၤ, တၢ်သုးမုၢ်ဂီၢ်မုၢ်အယွၤတိာ်ဝဲလံ, ဒီးမ့ၢ်မ တၤကမၤအီၤ ကလီကလီတဂၤလဲၣ်. ဒီးအစုယူာ်ထီၣ် အသးလံ, ဒီးမ့ၢ်မတၤကဒုးထုးလီၤက့ၤအီၤတဂၤလဲၣ်.

²⁸ တၢ်လၢမုၢ်တနံၤလၢ စီၤအၤဃးသံဝဲဒၣ်, တၢ်အက လုၢ်လီၤဒ်အံၤ,

²⁹ မ့ၢ်ပှၤလၢအတီၢ်နၤအနီၣ်တီၢ်ကၢ်သတးဒီး, သးခုတ ဂ့ၤ, ဖလ့ၡသးခဲလၢာ်နၤဧၢ. အဂ့ၢ်ဒ်အံၤ, လၢဂုၢ်ဧိၤဒးဧိၤ အဂံၢ်န့ၣ်ဂုာ်မိာ်အိးတဘိကဟဲလီၤ, ဒီးအတၤသၣ်ကမ့ၢ် ဂုၢ်မ့ၣ်လၢအယူၤဝဲတဘိလီၤ.

³⁰ ဒီးပှၤဖှီၣ်ဖိအဖိဝဲၢ်ကိကအီၣ်တၢ်, ဒီးပှၤဘၣ်ဖှီၣ်ဘၣ် ယာ်ကမံလီၤအိၣ်ခၢၣ်သနၢၢ်လီၤ. ဒီးယကမၤသံနဂံၢ် လၢတၢ်သၣ်ဝံၤလီၤဒိ, ဒီးတၢ်အိၣ်လီၤတဲာ်လၢနၤန့ၣ်က ဘၣ်တၢ်မၤသံအီၤလီၤ.

³¹ ဟီၣ်ပသူထီၣ်, ပဲတရီဧၢ, ကိးပသူထီၣ်ဝ့ၢ်ဧၢ, နပှံၢ်ကွံာ် လံတုၤအလၢာ်, ဖလ့ၡသးဧၢ. အဂ့ၢ်ဒ်အံၤ, မ့ၣ်အူခုၣ်ဟဲ ထီၣ်လၢကလံၤစိး, ဒီးပှၤလီၤမုၢ်လီၤဖးလၢအပှၤသုးမုၢ် အကျါတအိၣ်ဘၣ်နီတဂၤဘၣ်.

³² ဒီးပှၤကစံးဆၢပှၤတကလုာ်အကလူးဒ်လဲၣ်. လၢယွၤ ပာ်လီၤလံစံယိၣ်အခီၣ်ထံး, ဒီးပှၤဘၣ်နးဘၣ်ဖှီၣ်လၢအ ပှၤဂီၢ်မုၢ်အကျါန့ၣ်ကဃ့ၢ်ဆူအအိၣ်လီၤ.

၁၅

¹ တၢ်အကလုၢ်လီၤလၢမိၤအးအဂ့ၢ်. အဂ့ၢ်ဒ်အံၤ, ဧၢ်ဘၣ်ဃးဒီးမိၤအးဘၣ်တၢ်မၤသယုၢ်အီၤ လၢမုၢ်တနၤ, တၢ်မၤဟးဂီၤဝဲ, အဂ့ၢ်ဒ်အံၤ, ကံၢ်ဘၣ်ဃး ဒီးမိၤအးဘၣ်တၢ်မၤသယုၢ်အီၤလၢမုၢ်တနၤ, တၢ်မၤဟး ဂီၤဝဲလီၤ.

² ပှၤလဲၤထီၣ်ဝဲဆူဘၤယံး, ဒီးဒံၤဘိၣ်ဆူအလီၢ်ထီၣ်ထီ တဖၣ်လၢအကဟီၣ်ဝဲအဂီၢ်လီၤ. လၢနဘိအလိၤ, ဒီးလၢ မ့ဒဘၤအလိၤန့ၣ်မိၤအးဟီၣ်ဝဲ, ပှၤအခိၣ်ကိးဖျၢၣ်ဒဲးမ့ၢ် ကျၤခိၣ်, ဒီးကယဲၢ်ပှၤခၣ်ဆူၣ်ဘၣ်တၢ်တံာ်တဲာ်ဝဲလီၤ.

³ လၢအကျဲတဖၣ်အပူၤန့ၣ် ပှၤကံၢ်တူာ်အယီၢ်ဒ့လၢ ထၢၣ်အတၢ်ကံးညာ်, လၢအဟံၣ်ခိၣ်အဖီခိၣ်, ဒီးလၢအ လီၢ်ဖးလဲၢ်အပူၤန့ၣ်ဟီၣ်ဝဲခဲလၢာ်, ဟဲလီၤဒီးဟီၣ်အါအါ ကလဲာ်, ⁴ ဒီးဃ့ၡဘိၣ်ကိးပသူထီၣ်, ဒီးအ့လဧၤလ့ၤလီၤ. အကလုၢ်ဟူထီၣ်ဝဲပၢၢ်လၢယါဟးလီၤ. မၤသးဒ်န့ၣ်ဒီး မိၤအးအပှၤသုးဖိကိးပသူထီၣ်, အသးလၢအပူၤဘၣ်တၢ် ကိၢ်တၢ်ဂီၤလီၤ.

⁵ ယသးကိးပသူထီၣ်လၢ မိၤအးအဂီၢ်လီၤ. ပှၤလၢအ ဃ့ၢ်တၢ်လၢအကျါန့ၣ်ပၢၢ်လၢစိၤဧၢ်, ဒ်ဂီၤဖံးမိၢ်အသးပှၢ် သၢနံၣ်အသိးလီၤ. အဂ့ၢ်ဒ်အံၤ, ပှၤလၢအထီၣ်ဘးလူဃံး န့ၣ်လဲၤထီၣ်ဘးအီၤဒီးဟီၣ်ဝဲလီၤ. အဂ့ၢ်ဒ်အံၤ, လၢဃိရ နဲၣ်အကျဲပူၤန့ၣ်ထုထီၣ်တၢ်မၤဟးဂီၤအကလုၢ်လီၤ.

⁶ အဂ့ၢ်ဒ်အံၤ, နံးမရံအထံတဖၣ်ကကဲထီၣ်တၢ်အိၣ်သ ယုၢ်လီၤ. အဂ့ၢ်ဒ်အံၤ, တီၢ်မုၢ်ဃ့ထီၣ်ကွံာ်လံ, နီၣ်ဧိၤမံၤ ဧိၤအသံကစဲာ်န့ၣ်တအိၣ်လၢၤဘၣ်.

⁷ မၤသးဒ်န့ၣ်ဒီး, တၢ်အါလၢတၢ်လၢပှၤမၤန့ၢ်အီၤ, ဒီး တၢ်လၢအပာ်ဖှိၣ်တၢ်န့ၣ် ကစိာ်ခီဂာ်ကွံာ်ထံပံၢ်သလီ အကျိန့ၣ်လီၤ.

⁸ အဂ့ၢ်ဒ်အံၤ, တၢ်ကိးပသူထီၣ်န့ၣ် အိၣ်ဝးတရံးမိၤအး အဃၢၤလီၤ. အဟီၣ်တၢ်ယၢၤတၢ်ဟူဝဲပၢၢ်လၢ အ့က လံၣ်, ဒီးဟူဝဲပၢၢ်လၢဘ့ၣ်အ့လံၣ်လီၤ.

⁹ အဂ့ၢ်ဒ်အံၤ, ဒံမိၣ်အထံတဖၣ်န့ၣ်ပှဲၤဝဲဒီးတၢ်သွံၣ်လီၤ. အဂ့ၢ်ဒ်အံၤ, ယကပာ်တၢ်အါထီၣ်ဒံးလၢဒံမိၣ်အလိၤ, ခ့ ယုၢ်လၢပှၤလၢအဃ့ၢ်ပူၤဖျဲးလၢမိၤအးအလိၤ, ဒီးပှၤလၢ အအိၣ်လီၤတဲာ်လၢကီၢ်ပူၤအလိၤန့ၣ်လီၤ.

၁၆

¹ ဟ့ၣ်ယုၢ်သိဖိလၢပှၤပၢထံဧိၤကီၢ်ဧိၤန့ၣ် လၢစ့လၤဆူ ပှၢ်မုၢ်ကနၢ, ဆူစံယိၣ်အဖိမုၣ်အကစၢၢ်တဖျၢၣ်န့ၣ်တ က့ၢ်.

² ဒီးကမၤအသးဒ်ထိၣ်လဲၤဝ့ၤဝီၤတၢ်တဘ့ၣ်, ဒ်ထိၣ်သွံ ကွံာ်တ့ၢ်ကွံာ်အသး အသိးန့ၣ်, မိၤအးအဖိမုၣ်တဖၣ်, လၢအၤနိၣ်အတၢ်ခီဂာ်အလီၢ်ကဒ်န့ၣ်သိးလီၤ.

³ ကူၣ်ထီၣ်တၢ်, မၤတၢ်တီတၢ်လိၤ, ပာ်နကဒုဒ်မုၢ်နၤ အကဒုအသိးလၢမုၢ်ထူၣ်အခါ, ပာ်ခူသူၣ်ပှၤဘၣ်တၢ်ဟီ ထီၣ်ကွံာ်န့ၣ်တက့ၢ်. ပှၤလၢအလဲၤဝ့ၢ်ဝီၤတၢ်န့ၣ်ဒုးနဲၣ် အီၤတဂ့ၤ.

⁴ ယပှၤဘၣ်တၢ်ဟီထီၣ်ကွံာ်တဖၣ်န့ၣ် ဒုးအိၣ်ဒုးဆိး အီၤဒီးနၤ, မိၤအးဧၢ, ကဲထီၣ်တၢ်အိၣ်တဒၢအလီၢ်လၢ အဂီၢ်လၢပှၤမၤအၢတၢ်အမဲာ်ညါတက့ၢ်. အဂ့ၢ်ဒ်အံၤ, ပှၤ အီၣ်ကဘျံးအီၣ်ကဘျၣ်န့ၣ်လၢာ်ကွံာ်လံ. မၤအၢတၢ်န့ၣ် အိၣ်ဆိတ့ၢ်လံ. ပှၤယီၢ်တံၢ်ထံဧိၤကီၢ်ဧိၤန့ၣ် လၢာ်ကွံာ် လံဝဲလံ.

⁵ ဒီးလီၢ်ပစိာ်တဖျၢၣ် ကအိၣ်ဂၢၢ်ဆိးကျၢၤလၢတၢ်အ ဘျုးအဖှိၣ်အပူၤ, ဒီးပှၤကဆ့ၣ်အနီၤဝဲလၢအဖီခိၣ်တ ဂၤလၢတၢ်မ့ၢ်တၢ်တီအပူၤလၢစီၤဒၤဝံးအဒဲပူၤလီၤ. က စံၣ်ညီၣ်တၢ်, ဒီးဃုတၢ်စံၣ်ညီၣ်, ဒီးမၤတၢ်တီတၢ်လိၤချ့ ချ့လီၤ.

⁶ ပနၢ်ဟူလံလၢမိၤအးအသးထီၣ်ထီ အဂ့ၢ်အကျိၤန့ၣ်, လၢအပာ်အသးထီၣ်ထီနးမး, လၢအပာ်ကဖိအသး, ဒီး လၢအပာ်အသးကဖိလိ, ဒီးလၢအသးကဲၤထီၣ်, အပာ် ကဖိအသးန့ၣ်တမ့ၢ်ဘၣ်တၢ်ဘၣ်န့ၣ်လီၤ.

⁷ မၤသးဒ်န့ၣ်ဒီး မိၤအးကဟီၣ်ပသူထီၣ်လၢမိၤအးအ ဃိ, ပှၤကဟီၣ်ဝဲလၢအကျါကိးဂၤဒဲးလီၤ. သုကအုကစွါ လၢကံၢ်ဃရ့ရှ့းအစပံးသၣ်ဘၣ်ကျီကွံာ်စီဖ့ကလ့ၤအဃိ လီၤ.

⁸ အဂ့ၢ်ဒ်အံၤ, ဃ့ၡဘိၣ်အဟီၣ်ခိၣ် အကဝီၤတဖၣ်ဃ့ ထီၣ်ကွံာ်လံ, စပံးမုၢ်စံးဘမၤလီၤ. ပှၤကလုာ်တဖၣ်အက စၢ်န့ၣ်မၤကၢ်လီၤကွံာ် အစပံးမုၢ်စိရ့းလၢအလဲၤပၢၢ်လၢ ယၤစ့ၢ်, လဲၤဝ့ၤဝီၤတၢ်လၢပှၢ်မုၢ်ကနၢ, အဒ့ထီၣ်ထီဝဲ, တုၤ ဝဲလၢပီၣ်လဲၣ်ဝၢ်ဘးခီလီၤ.

⁹ မၤသးဒ်န့ၣ်ဒီးယကဟီၣ်လၢယၤစ့ၢ်အတၢ် ဟီၣ်လၢ စပံးမုၢ်စံးဘမၤအဃိ, ယကမၤဘၣ်စီၣ်နၤလၢယမဲာ်ထံ, ဃ့ၡဘိၣ်, ဒီးအ့လဧၤလ့ၤဧၢ အဂ့ၢ်ဒ်အံၤ, တၢ်ကိးပသူ ထီၣ်လီၤဘၣ်နတၤသၣ်အလိၤ, ဒီးလၢနကူးဘုအလိၤ န့ၣ်လီၤ.

¹⁰ ဒီးတၢ်ဟံးထီၣ်ကွံာ် တၢ်သူၣ်ခုသးခု, ဒီးတၢ်သူၣ်ဖှံ သးညီ လၢတၤသၣ်အလီၢ်, ဒီးလၢစပံးအလီၢ်န့ၣ် ပှၤ တမၤလၢၤဘၣ်ထါဘၣ်, တကိးပသူထီၣ်လၢၤဘၣ်. စ ပံး ထံလၢနီၣ်စံၢ်စပံးသၣ်အပူၤန့ၣ် ပှၤယီၢ်တၢ်ဖိတယီၢ် လၢၤဘၣ်. ယဒုးအိၣ်ဘှီၣ်တၢ်ကိးပသူန့ၣ်လီၤ.

¹¹ မၤသးဒ်န့ၣ်ဒီးယသး သီၣ်ထီၣ်ဒ်တနၢ်အသိးလၢမိၤ အးအဃိ, ဒီးတၢ်အိၣ်လၢယသအိပူၤလၢကံၢ်ဃ့ရ့းအ ဃိလီၤ.

¹² ဒီးတုၤမိၤအးလီၣ်ဖျါထီၣ်အသး, တုၤအမၤဘှံးလီၤ အသးလၢအလီၢ်ထီအလိၤဒီး, တၢ်ကမၤအသးလၢအ ကလဲၤနုာ်လၢ အလီၢ်စီဆှံအပူၤဒ်သိးအကဘါထုကဖၣ် တၢ်, ဒီးတန့ၢ်ဘၣ်လီၤ.

¹³ တၢ်န့ၣ်မ့ၢ်တၢ်ကတိၤလၢ ယွၤကတိၤဝဲလၢမိၤအးအ ဂ့ၢ်အကျိၤလၢပျၢၤန့ၣ်လီၤ.

¹⁴ ဘၣ်ဆၣ်ဒီးခဲကနံၣ်အံၤ, ယွၤကတိၤတၢ်ဒီးစံးဝဲဒၣ်, လၢသၢနံၣ်အတီၢ်ပူၤ, ဒ်ပှၤဒိးလဲဖိအနံၣ်တဖၣ်အသိး န့ၣ်, မိၤအးအလၤကပီၤကဘၣ်တၢ်မၤတရီတပါအီၤ, ဒီး ပှၤဂီၢ်မုၢ်အါခဲလၢာ်, ဒီးတၢ်အိၣ်လီၤတဲာ်န့ၣ်ကဆံးဝဲ, ဒီး စှၤဝဲ, ဒီးတအါဘၣ်န့ၣ်လီၤ.

၁၇

¹ တၢ်အကလုၢ်လီၤလၢဒၤမ့ၤစ့းအဂ့ၢ်. ကွၢ်ကွၢ်, ဒၤမ့ၤစ့းတမ့ၢ်လၢၤဘၣ်ဝ့ၢ်တဖျၢၣ်ဘၣ်, ဒီးက ကဲထီၣ်ဝဲလၢတၢ်လီၤပှီၢ်အပူလီၤ.

² တၢ်လဲၤသဒၣ်ဧရိဧ့ၢ်အဝ့ၢ်တဖၣ်လီၤ. ကကဲထီၣ်တၢ် လၢသိဒီးမဲာ်တဲးလဲးအဖုတဖၣ်အဂီၢ်, ဒီးကကိာ်လီၤဝဲ, ဒီးတၢ်မၤပျံၤအီၤတအိၣ်ဘၣ်.

³ ဒီးတိာ်ဧိၤတာ်ဧိၤန့ၣ်တအိၣ်လၢၤဘၣ်ဒီး အ့ဖရဲၣ်ဘၣ်, ဒီးဘီဧိၤမုၢ်ဧိၤတအိၣ်လၢၤဘၣ်ဒီးဒၤမ့ၤစ့း, ဒီးတၢ်အိၣ် လီၤတဲာ်လၢစူၤရံန့ၣ်ဘၣ်. ကမၤသးဒ်အံၣ်စရ့လးအလၤ ကပီၤအသိးန့ၣ်, တၢ်သုးမုၢ်ဂီၢ်မုၢ်အယွၤစံးဝဲဒၣ်လီၤ.

⁴ ဒီးမုၢ်တနံၤန့ၣ်တၢ်ကမၤအသးလၢ ယၤကိာ်အလၤက ပီၤကလီၤစၢ်, ဒီးအညၣ်အတၢ်ဘီၣ်န့ၣ် ကဃဲၤလီၤဝဲ လီၤ. ⁵ ဒီးကမၤအသးဒ် ပှၤပာ်ဖှိၣ်တၢ်ကူးဘု, ဘုဆၢ ထၢၣ်အသး, ဒီးအစုဒုၣ်ကူးဘုအစဲၤအသိးန့ၣ်, ဒီးကမၤ သးဒ်ပှၤကူးဘုလၢကစၢၢ်ကဆူးရၤဖၤအသိးန့ၣ်လီၤ.

⁶ ဒီးတၢ်ကအိၣ်လီၤတဲာ်လၢအပူၤ ဒ်တၢ်တီၢ်သ့ၣ်စၤယံး အသိး, အသၣ်ခံဖျၢၣ်သၢဖျၢၣ်လၢဒ့အထီကတၢၢ်အခံ, လွံၢ်ဖျၢၣ်ယဲၢ်ဖျၢၣ် လၢသ့ၣ်လၢ အသၣ်ထီၣ်အလိၤန့ၣ် လီၤ, ယွၤ, အံၣ်စရ့လးအကစၢ်, စံးဝဲဒၣ်. ⁷ တၢ်လၢမုၢ်တနံၤန့ၣ် ပှၤကကွၢ်ဆူပှၤတ့အီၤအအိၣ်, ဒီးအမဲာ်ကကွၢ်ဆူအံၣ်စရ့လးအတၢ်စီဆှံတဂၤလီၤ.―

⁸ တကွၢ်ဘၣ်ဆူတၢ်လုၢ်အလီၢ်တဖၣ်, တၢ်လၢအမၤလၢ အစု, ဒီးတကွၢ်မဲာ်ဘၣ်တၢ်လၢအစုမုၢ်စုနၢမၤအီၤ, ဒီးဆူ အရှ့ရၤ, ဒီးဆူမုၢ်အတၢ်ဂီၤဘၣ်.

⁹ တၢ်လၢမုၢ်တနံၤန့ၣ်အဝ့ၢ်အိၣ်ဒီးအခိၣ်ဒူတဖၣ်န့ၣ်က မၤသးဒ်တၢ်အိၣ်လီၤတဲာ်လၢသဃာ်ကျါ, ဒီးလၢကစၢၢ် အဒီခိၣ်လၢပှၤလဲၤသဒၣ်လၢ ပှၤအံၣ်စရ့လးဖိအမဲာ်ညါ အသိးန့ၣ်, ဒီးတၢ်ကအိၣ်သယုၢ်လီၤ.

¹⁰ မ့ၢ်လၢနသးပ့ၤနီၣ် တၢ်အုၣ်က့ၤခီၣ်က့ၤနၤအကစၢ်, ဒီးနဂံၢ်နဘါအလၢၢ်န့ၣ် နတသ့ၣ်နီၣ်ထီၣ်က့ၤဘၣ်အီၤ ဘၣ်ဒီး, နကသူၣ်သ့ၣ်ဖိအဂ့ၤ, ဒီးနကသူၣ်တခီဘီမုၢ်အ ဒ့အဖီလီၤ.

¹¹ တၢ်လၢမုၢ်တနံၤလၢနသူၣ်တၢ်န့ၣ်နကကရၢအီၤ, ဒီး လၢမုၢ်ဂီၤန့ၣ် နကဒုးဆှိးထီၣ်နချံလီၤ. တၢ်ကူးတၢ်န့ၣ် ကယူၤထီၣ်ကွံာ်လၢ တၢ်ကိၢ်တၢ်ဂီၤဒီးတၢ်သးအုးနးမး အမုၢ်တနံၤလီၤ.

¹² အၣ်လါပှၤအါကလုာ်အသီၣ်လီၤ. ဒ်ပီၣ်လဲၣ်အသီၣ် အသိးန့ၣ်သီၣ်ထီၣ်ဝဲလီၤ. ဒီးပှၤဂီၢ်မုၢ်အဃ့ၢ်အသီၣ်လီၤ. ဒ်ထံအါသဖှိထီၣ်အသီၣ်အသိးန့ၣ်သီၣ်ထီၣ်ဝဲလီၤ.

¹³ ဒ်ထံအါသဖှိထီၣ်အသီၣ်အသိးန့ၣ် ပှၤကလုာ်တဖၣ် သီၣ်ထီၣ်ဝဲလီၤ. ဒီးယွၤကသိၣ်ဃီၣ်ဝဲ, ဒီးအဝဲသ့ၣ်က ဃ့ၢ်လၢအယံၤဒီးတၢ်ကလူၤဟီထီၣ်ကွံာ်အီၤ, ဒ်ကစၢၢ် ကလိအဖ့ဧိၤဃာ်ဧိၤ ဘၣ်တၢ်လူၤဟီထီၣ်ကွံာ်အီၤလၢ ကလံၤအမဲာ်ညါအသိး, ဒီးဒ်တၢ်လၢအတလ့ၣ်အသး လၢကလံၤသဝံးအမဲာ်ညါအသိးန့ၣ်လီၤ.

¹⁴ လၢမုၢ်ဟါအကတီၢ်န့ၣ်ကွၢ်ကွၢ်, တၢ်မၤပျံၤမၤဖုးန့ၣ် လီၤ. မုၢ်တချုးဆ့ၣ်ထီၣ်ဒံးဘၣ်ဒီး, တအိၣ်လၢၤဘၣ်. ပှၤ လၢအဂုာ်န့ၢ်ပတၢ်တဖၣ်အဂီၢ်မ့ၢ်အန့ၣ်, ဒီးပှၤလၢအဂုာ် ဆူၣ်ပျီဆူၣ်ပတၢ်တဖၣ်အဂီၢ်မ့ၢ်အန့ၣ်လီၤ.

၁၈

¹ အၣ်လါ, ကီၢ်အိၣ်ဒီးအဒံးဆ့လၢအသီၣ်ထီၣ်ဧၢ, ကီၢ် လၢအအိၣ်လၢကူၤၡးအထံမိၢ်ပှၢ်တဖၣ်ဝၢ်ဘးခီ, ² လၢ အမၢလီၤအကလူးတဖၣ်လၢပီၣ်လဲၣ်, ဒီးလၢထံဖံးခိၣ် လၢချံဆှဲကိမ့ၤအပူၤလီၤ. ကလူးလဲၤတၢ်ချ့သ့ၣ်ဧၢ, လဲၤ ဆူပှၤတကလုာ်ထီဒီးဘျ့အအိၣ်, ဆူပှၤဂီၢ်မုၢ်လၢအမၤ ပျံၤတၢ်လၢအခီၣ်ထံးတုၤခဲကနံၣ်အံၤ, ပှၤတကလုာ်လၢ အဂံၢ်ဆူၣ်အဘါဆူၣ်, ဒီးယီၢ်လီၤတၢ်, ဒီးထံကျိတဖၣ်နီၤ ဖးအကီၢ်ဆၢန့ၣ်တက့ၢ်.

³ ပှၤဟီၣ်ခိၣ်ဖိခဲလၢာ်သုဝဲသ့ၣ်ဧၢ, ပှၤအိၣ်လၢဟီၣ်ခိၣ် ချၢခဲလၢာ်သ့ၣ်ဧၢ, ဖဲပှၤယူာ်ထီၣ်သုးဖိအလၣ်လၢကစၢၢ် လိၤဒီး, ကွၢ်တက့ၢ်. ဖဲပှၤအူကွဲၤဒီး, ကနၣ်တက့ၢ်.

⁴ အဂ့ၢ်ဒ်အံၤ, ယွၤစံးဘၣ်ယၤဒ်အံၤ, ယကအိၣ်ဃိက လာ်, ဒီးယကကွၢ်တၢ်လၢယအိၣ်ယဆိးအလီၢ်ပူၤ, ဒ် တၢ်ကိၢ်ဆှံလၢနီၣ်ဧိၤမံၤဧိၤအလိၤအသိး, ဒ်ပစီၤထံအ တၢ်အၢၣ်လၢကူးဘုအကတီၢ် အတၢ်ကိၢ်ခါအသိးန့ၣ် လီၤ.

⁵ အဂ့ၢ်ဒ်အံၤ, ကူးဘုအကတီၢ်တချုးဘၣ်ဒံးဘၣ်ဒီး, ဖဲ အဆှိးဖျိထီၣ်, ဒီးအဖီကဲထီၣ်စပံးသၣ်အမံဒီး, ကပဲာ် တဲာ်ဝဲအဒ့လၢဒီပဲာ်ဃိတၢ်, ဒီးအဒ့သလၣ်ထီၣ်အသး ကညိကွံာ်ဝဲ, ဒီးပဲာ်တဲာ်ဝဲလီၤ.

⁶ ဒီးကအိၣ်လီၤတဲာ်တပူၤဃီလၢ ထိၣ်ဧိၤလံၣ်ဧိၤလၢက စၢၢ်လိၤအဂီၢ်, ဒီးဆၣ်ဖိကီၢ်ဖိလၢဟီၣ်ခိၣ်အဂီၢ်လီၤ. ဒီး ထိၣ်ဧိၤလံၣ်ဧိၤကအိၣ်လၢတၢ်ကိၢ်အကတီၢ်လၢအလိၤ, ဒီးဟီၣ်ခိၣ်အဆၣ်ဖိကီၢ်ဖိခဲလၢာ် ကအိၣ်လၢတၢ်ဂိၢ်အ ကတီၢ်လၢအလိၤလီၤ.

⁷ တၢ်လၢမုၢ်တနံၤန့ၣ်, ပှၤကဟဲစိာ်ခိၣ်ဖးဆူတၢ်သုးမုၢ် ဂီၢ်မုၢ်အယွၤ, လၢပှၤတကလုာ်ထီဒီးဘျ့, ဒီးပှၤတက လုာ်လၢအမၤပျံၤတၢ်လၢအခီၣ်ထံးတုၤခဲကနံၣ်အံၤ, ပှၤ တကလုာ်လၢအဃီၣ်တၢ်ဒီးယီၢ်လီၤတၢ်, ဒီးထံကျိတ ဖၣ်နီၤဖးအကီၢ်အဆၢဆူ တၢ်သုးမုၢ်ဂီၢ်မုၢ်အယွၤအမံၤ အလီၢ်, ကစၢၢ်စံယိၣ်လီၤ.

၁၉

¹ တၢ်အကလုၢ်လီၤလၢအဲၤကူပတူးအဂ့ၢ်. ကွၢ်ကွၢ်, ယွၤဒိးတၢ်အၢၣ်ယူၤချ့, ဒီးလဲၤဝဲဆူအဲၤကူပ တူးအပူၤ, ဒီးအဲၤကူပတူးအတၢ်ဂီၤတၢ်ဖီၣ် ဟူးဝးလၢ အမဲာ်ညါ, ဒီးအဲၤကူပတူးအသးန့ၣ်ပှံၢ်ဝဲလၢအပူၤလီၤ.

² ဒီးယကထိၣ်ဂဲၤ ပှၤအဲၤကူပတူးဖိထီဒါ ပှၤအဲၤကူပ တူးဖိ, ဒီးကဒုးလိာ်အသး, ပှၤတဂၤဒီးအဒီပုၢ်ဝဲၢ်, ပှၤတ ဂၤဒီးအတံၤအသကိး, ဝ့ၢ်တဖျၢၣ်ဒီးဝ့ၢ်တဖျၢၣ်, ဘီမုၢ်ဒီး ဘီမုၢ်လီၤ. ³ ဒီးအဲၤကူပတူးအသးကလီၤဘှါလၢအပူၤ ဒီးအတၢ်ကူၣ်ထီၣ်ဖးလီၤန့ၣ်ယကယူၢ်လီၤကွံာ်, ဒီးက ဃုဝဲလၢတၢ်ဂီၤတၢ်ဖီၣ်အအိၣ်, ဒီးလၢပှၤသ့တၢ်အူတၢ် သမူအအိၣ်, ဒီးလၢပှၤအိၣ်ဒီးပှၤသံအကလၤအအိၣ်ဒီး လၢပှၤမဲာ်ထံၣ်ဝံသ့အအိၣ်လီၤ.

⁴ ဒီးယကဟ့ၣ်လီၤအဲၤကူပတူးဆူအကစၢ်ကီတဂၤ, ဒီး စီၤပၤဆူၣ်တဂၤကပၢအီၤလီၤ, တၢ်သုးမုၢ်ဂီၢ်မုၢ်အယွၤစံး ဝဲဒၣ်.

⁵ ဒီးထံကလီၤသံးကွံာ်လၢပီၣ်လဲၣ်ပူၤ, ဒီးထံမိၢ်ပှၢ်အထံ ကလၢာ်ကွံာ်ဝဲ, ဒီးလီၤသံးကွံာ်လီၤ. ⁶ ထံမိၢ်ပှၢ်ကနၢ အုၣ်သံ, အဲၤကူပတူးအထံကျိၤကအိၣ်ကလီဒီးလီၤသံး ကွံာ်, ဒီးတပိၢ်ဒီးဆှဲကဃ့ထီၣ်ကွံာ်ဝဲလီၤ. ⁷ ဒီးစံာ်ဧိၤပှဲၤ ဧိၤလၢထံမိၢ်ပှၢ်အနံၤ, လၢထံထၣ်, ဒီးဟီၣ်ခိၣ်လၢတၢ်ချံ ဖှံအသးလၢအပူၤ, လၢထံနံၤခဲလၢာ်န့ၣ်ကဃ့ထီၣ်ကွံာ်, ဘၣ်တၢ်ဟီထီၣ်ကွံာ်, ဒီးတအိၣ်လၢၤဘၣ်.

⁸ ဒီးပှၤမၤညၣ်ဖိကသးအုး, ဒီးကယဲၢ်ပှၤလၢအတခွဲ တၢ်လၢထံမိၢ်ပှၢ်အပူၤကဟီၣ်ဝဲ, ဒီးပှၤလၢအဟုးပှာ်လၢ ထံဖံးခိၣ်န့ၣ်အဂံၢ်အဘါကလီၤစၢ်ဝဲလီၤ. ⁹ ဒီးပှၤလၢအ မၤတၢ်လၢလုၣ်ခီမၤ, ဒီးပှၤလၢအထါထၣ်ဖှီဝါန့ၣ်ကပာ် ဆှးအမဲာ်လီၤ. ¹⁰ ဒီးအတၢ်ခီၣ်ထံးတဖၣ်ဟးဂီၤကွံာ်, က ယဲၢ်ပှၤဒိးလဲဖိအသူၣ်ကိၢ်အသးဂီၤခဲလၢာ်လီၤ.

¹¹ စိၤဧၣ် အပဒိၣ်ဖးဒိၣ်မ့ၢ်ထဲပှၤဟးဂီၤဖိလီၤ. ဖၤရိၤအ ပှၤကူၣ်လိာ်အသးဖိ အတၢ်ကူၣ်လိာ်န့ၣ်မ့ၢ်ဆၣ်ဖိကီၢ်ဖိ အတၢ်လီၤ. သုစံးဘၣ်ဖၤရိၤ, ယမ့ၢ်ပှၤကူၣ်တၢ်သ့အ ဖိ, စီၤပၤလၢပျၢၤအဖိခွါန့ၣ်ကသ့ဒ်လဲၣ်.

¹² အဝဲသ့ၣ်တဖၣ်န့ၣ်အိၣ်ဖဲလဲၣ်. နပှၤကူၣ်တၢ်သ့န့ၣ် အိၣ်ဖဲလဲၣ်. မ်အစံးဘၣ်နၤ, ဒီးမ်အသ့ၣ်ညါတၢ်လၢတၢ် သုးမုၢ်ဂီၢ်မုၢ်အယွၤကူၣ်ထီၣ်ဖးလီၤလၢ အဲၤကူပတူးအ ဂ့ၢ်အကျိၤန့ၣ်တက့ၢ်.

¹³ စိၤဧၣ်အပဒိၣ်ဖးဒိၣ်န့ၣ်ကဲထီၣ်လံပှၤဟးဂီၤဖိ, တၢ် လီန့ၢ်နိဖးအခိၣ်တဖၣ်လီၤ. ဒုးလီၤကမၣ်အဲၤကူပတူး, လၢအမ့ၢ်အဒူၣ်တဖၣ်အလၢၢ်သနၢၣ်လီၤ.

¹⁴ ယွၤလူလီၤသးကဒံကပျီၤတမံၤလၢအကျါ, ဒီးပှၤဒုး လီၤကမၣ်အဲၤကူပတူးလၢအမၤတၢ်ခဲလၢာ်အပူၤ, ဒ်ပှၤ အီၤမူၤအသး လဲၤကနူၤကပၤတၢ်လၢအဘှိးတၢ်အပူၤအ သိးန့ၣ်လီၤ.

¹⁵ ဒီးတၢ်မၤတအိၣ်ဘၣ်ဒီး အဲၤကူပတူးလၢခိၣ်ဂ့ၤ, မဲၢ် ဂ့ၤ, တၢ်အဒ့ဂ့ၤ, ဆှဲဂ့ၤ, ကမၤဘၣ်ဝဲလီၤ.

¹⁶ တၢ်လၢမုၢ်တနံၤန့ၣ် အဲၤကူပတူးကမၤအသးဒ်ပိာ်မုၣ် အသိးန့ၣ်လီၤ. ဒီးကကနိးဒီးပျံၤတၢ်ဖုးတၢ်လၢတၢ်သုး မုၢ်ဂီၢ်မုၢ်အယွၤဝၢ်အစုအမဲာ်ညါ လၢအဝၢ်ဝဲလၢအဖီခိၣ် လီၤ.

¹⁷ ဒီးယူဒၤအကီၢ် ကကဲထီၣ်တၢ်ပျံၤအလီၢ်လၢအဲၤကူပ တူးအဂီၢ်လီၤ. ကယဲၢ်ပှၤလၢအသ့ၣ်နီၣ်ထီၣ်က့ၤအီၤန့ၣ် ကကနိးဝဲလၢ တၢ်သုးမုၢ်ဂီၢ်မုၢ်အယွၤအကူၣ်တၢ်လၢ အကူၣ်ထီၣ်ထီဒါအီၤအဃိန့ၣ်လီၤ.

¹⁸ တၢ်လၢမုၢ်တနံၤန့ၣ်ဝ့ၢ်ယဲၢ်ဖျၢၣ်လၢ အကတိၤကနၤ ဧၣ်အကျိာ်ကအိၣ်လၢကီၢ်အဲၤကူပတူးအပူၤ, ဒီးကဆိၣ် တၢ်လၢတၢ်သုးမုၢ်ဂီၢ်မုၢ်အယွၤအမဲာ်ညါလီၤ. ဒီးဝ့ၢ်တ ဝ့ၢ်န့ၣ်တၢ်ကိးအီၤလၢတၢ်ဟးဂီၤအဝ့ၢ်လီၤ.

¹⁹ တၢ်လၢမုၢ်တနံၤန့ၣ် တၢ်လုၢ်လီၢ်လၢယွၤအဂီၢ်ကအိၣ် လၢကီၢ်အဲၤကူပတူးအသးကံၢ်ပူၤတဖျၢၣ်, ဒီးအထူၣ် လၢယွၤအဂီၢ်လၢအဃၢၤတထူၣ်လီၤ. ²⁰ ဒီးကကဲထီၣ် တၢ်အပနီၣ်, ဒီးတၢ်အုၣ်အသးလၢတၢ်သုးမုၢ်ဂီၢ်မုၢ်အ ယွၤအဂီၢ်, လၢအဲၤကူပတူးအကီၢ်ပူၤ, ဒီးပှၤကကိးဆူ ယွၤလၢပှၤမၤအၢတၢ်အဃိ, ဒီးကမၢလီၤပှၤမၤပူၤဖျဲးတၢ် ပှၤအဒိၣ်တဂၤ, ဒီးအဝဲဒၣ်ကအုၣ်က့ၤခီၣ်က့ၤအီၤလီၤ.

²¹ ဒီးပှၤကသ့ၣ်ညါယွၤလၢအဲၤကူပတူးအပူၤ, ဒီးလၢမုၢ် တနံၤန့ၣ်ပှၤအဲၤကူပတူးဖိကသ့ၣ်ညါယွၤ, ဒီးကမၤအ တၢ်ဒီးတၢ်လုၢ်, ဒီးတၢ်မၤဘူၣ်, ဒီးကဆိၣ်တၢ်လၢယွၤအ ဂီၢ်ဒီးမၤတီအကလုၢ်လီၤ.

²² ဒီးယွၤကတီၢ်ပှၤအဲၤကူပတူးဖိ, ကတီၢ်ဝဲဒီးကမၤဘျါ က့ၤဝဲ, ဒီးအတၢ်ကဟဲက့ၤဆူယွၤအအိၣ်, ဒီးကဒိးတၢ် ဃ့ကညးတၢ်လၢအဂီၢ်, ဒီးကမၤဘျါက့ၤဝဲလီၤ.

²³ တၢ်လၢမုၢ်တနံၤန့ၣ် ကျဲမုၢ်ကအိၣ်လၢ အဲၤကူပတူး ပၢၢ်လၢအၤရှူၢ်, ဒီးပှၤအၤရှူဖိကလဲၤနုာ်လၢအဲၤကူပတူး, ဒီး ပှၤအဲၤကူပတူးဖိကလဲၤနုာ်လၢအၤရှူၢ်, ဒီးပှၤအဲၤကူပ တူးဖိကမၤဃုာ်တၢ်ဒီးပှၤအၤရှူၢ်ဖိလီၤ.

²⁴ တၢ်လၢမုၢ်တနံၤန့ၣ် အံၣ်စရ့လးကကဲလၢတၢ်သၢမံၤ တမံၤဒီးအဲၤကူပတူးဒီးအၤရှူၢ်, တၢ်ဆိၣ်ဂ့ၤလၢဟီၣ်ခိၣ် ချၢအသးကံၢ်ပူၤ, ²⁵ လၢတၢ်သုးမုၢ်ဂီၢ်မုၢ်အယွၤဆိၣ်ဂ့ၤဝဲ ဒီးစံးဝဲဒၣ်, ယပှၤဂီၢ်မုၢ်အဲၤကူပတူးဒီးအၤရှူၢ်တၢ်မၤလၢ ယစု, ဒီးအံၣ်စရ့လးယတၢ်န့ၢ်သါန့ၣ်မ်အဘၣ်တၢ်ဆိၣ် ဂ့ၤအီၤတက့ၢ်.

၂၀

¹ တၢ်လၢနံၣ်လၢ စီၤတၢ်တၣ်ဟဲဆူအၤစဒိာ် (တုၤအၤ ရှူၢ်အစီၤပၤစၤရကိၣ်မၢလီၤအီၤ) ဒီးဒုးတၢ်ဒီးအၤစဒိာ် ဒီးမၤန့ၢ်အီၤန့ၣ်လီၤ. ² တၢ်လၢအကတီၢ်န့ၣ်ယွၤကတိၤ တၢ်လၢစီၤအၤမိာ်အဖိခွါ စီၤယၡါယၤအစုပူၤ, ဒီးစံးဝဲ ဒၣ်, လဲၤဘ့ၣ်ကွံာ်ထၢၣ် အတၢ်ကံးညာ်လၢနယီၢ်ဒ့လိၤ, ဒီးဘ့ၣ်ကွံာ်နခီၣ်ဖံးလၢနခီၣ်တက့ၢ်. ဒီးမၤဝဲဒ်န့ၣ်, ဒီးဟး အိၣ်ဘ့ၣ်ဆ့, ဒီးအိၣ်ဘ့ၣ်ခီၣ်လီၤ. ³ ဒီးယွၤစံးဝဲဒၣ်, ဒ်ယခ့ယပှၤစီၤယၡါယၤဟးအိၣ်ဘ့ၣ်ဆ့ဒီးအိၣ်ဘ့ၣ်ခီၣ်သၢနံၣ်, လၢတၢ်ပနီၣ်ဒီးတၢ်အဒိအတဲာ်လၢအဲၤကူပတူးအဂ့ၢ်, ဒီးကူၤၡးအဂ့ၢ်အသိးန့ၣ်,―

⁴ အၤရှူၢ်အစီၤပၤကမိၤပှၤလၢ တၢ်ဖီၣ်န့ၢ်အီၤလၢအဲၤကူပ တူး, ဒီးပှၤလၢတၢ်မၢကဲကုၢ်အီၤလၢကူၤၡးပှၤအသးစၢ်, ဒီးပှၤအသးပှၢ်, အိၣ်ဘ့ၣ်ဆ့, အိၣ်ဘ့ၣ်ခီၣ်, အခံကီၢ်ဘ့ၣ် ဆ့, အဲၤကူပတူးအတၢ်မဲာ်ဆှးန့ၣ်လီၤ.

⁵ ဒီးပှၤကပျံၤဝဲ, အသးကတုၤဝဲလၢကူၤၡးလၢအသန့ၤ အသးလၢအီၤအဃိ, ဒီးလၢအဲၤကူပတူးလၢအပာ်ကဖိ အသးလၢအီၤအဃိလီၤ.

⁶ ဒီးတၢ်လၢမုၢ်တနံၤန့ၣ်ပှၤပီၣ်လဲၣ်နံၤဖိကစံး, ကွၢ်ကွၢ် တၢ်လၢပကွၢ်လၢ်အကျဲန့ၣ်, တၢ်လၢပဃ့ၢ်ဆူအအိၣ် လၢတၢ်မၤစၢၤအဂီၢ်လၢ ပတပူၤဖျဲးဒီးအၤရှူၢ်အစီၤပၤအ မဲာ်ညါန့ၣ်မ့ၢ်ဒ်န့ၣ်, ဒီးပကထူၣ်ဖျဲးပကစၢ်ဒၣ်ပဝဲ ဒ် လဲၣ်.

၂၁

¹ တၢ်အကလုၢ်လီၤလၢ ပှၢ်မုၢ်ကနၢပီၣ်လဲၣ် အဂ့ၢ်အ ကျိၤ, ဒ်ကလံၤသဝံးအူဆူၣ်ထီၣ်လၢကလံၤထံးတခီအ သိးန့ၣ်ဟဲထီၣ်ဝဲလၢ ပှၢ်မုၢ်ကနၢလၢကီၢ်မၤပျံၤတၢ်တ ဘ့ၣ်လီၤ.

² တၢ်ထံၣ်တၢ်ကီတမံၤန့ၣ် တၢ်ဒုးနဲၣ်အီၤလၢယၤလီၤ. ပှၤလီန့ၢ်တၢ်န့ၣ် လီန့ၢ်ဝဲ, ဒီးပှၤဂုာ်ဆူၣ်ပျိဆူၣ်န့ၣ် ဂုာ် ဆူၣ်ပျိဆူၣ်ဝဲလီၤ. လဲၤထီၣ်, ဧ့ၤလၣ်ဧၢ, ကဝီၤဃာ်တၢ်, မၤဒဲဧၢ, ယဒုးအိၣ်ဘှီၣ်ကလာ် တၢ်ကအုကစွါခဲလၢာ် လီၤ.

³ မၤသးဒ်န့ၣ်ဒီးယယီၢ်ဒ့ပှဲၤဒီးတၢ်ဆါ, တၢ်ဆိးကဲးမၤ န့ၢ်ယၤဒ်တၢ်ဆိးကဲးလၢအဘၣ်ပိာ်မုၣ်လၢအဟုးဆါအ သိး, ယအိၣ်တကဲဘၣ်လၢနၢ်ဟူတၢ်အဃိ, ယကနိးလၢ ထံၣ်တၢ်အဃိလီၤ. ⁴ ယသးကတုၤ, တၢ်ပျံၤတၢ်ဖုးမၤပျံၤ မၤဖုးယၤ, တၢ်ပာ်ယတၢ်မုာ်တၢ်လၤအမုၢ်ဟါန့ၣ်လၢ တၢ်ကနိးလၢယဂီၢ်လီၤ.

⁵ ကတဲာ်ကတီၤစီၢ်နီၤခိၣ်, ဒါလီၤတၢ်, အီၣ်တၢ်, အီတၢ်, ဂဲၤဆၢထၢၣ်, ပဒိၣ်သ့ၣ်ဧၢ, ဖှူကတီၤန့ၣ်တက့ၢ်.

⁶ အဂ့ၢ်ဒ်အံၤ, ယွၤစံးဘၣ်ယၤဒ်အံၤ, လဲၤပာ်ပှၤခိးတၢ်, တၢ်လၢအထံၣ်ဘၣ်ဝဲန့ၣ်မ်အစံးတက့ၢ်.

⁷ ဒီးမ့ၢ်ထံၣ်ဘၣ် ပှၤဒိးကသ့ၣ်တဆိတဆိ, ပှၤဒိးက သ့ၣ်ယီၤတဖၣ်, ပှၤဒိးကီၤလၤအူးတဖၣ်ဒီး, ဘၣ်ကနၣ် ဝဲလၢတၢ်ဒိကနၣ်လီၤတံၢ်လီၤဆဲးလီၤ.

⁸ ဒီးကိးထီၣ်ဝဲခ့ယုၢ်တဒုလီၤ. ကစၢ်ဧၢ, ယဆၢထၢၣ် တထံၣ်ဃီသ့တနံၤကျၢၤ လၢခိးတၢ်အလီၢ်အဖီခိၣ်, ဒီး ယအိၣ်လၢ ယကွၢ်တၢ်အလီၢ်သီတနၤကျၢၤလီၤ. ⁹ ဒီး ကွၢ်ကွၢ်, တၢ်အံၤဟဲ, ပှၤဒိးကသ့ၣ်, ပှၤဒိးကသ့ၣ်တဆိ တဆိလီၤ. ဒီးကတိၤဒံးဝဲ, လီၤပှီၢ်လံ, ဘၤဘူၤလိၣ်လီၤ ပှီၢ်လံ. ဒီးအကစၢ်အတၢ်ဂီၤခဲလၢာ်န့ၣ်တၢ်တ့ၢ်လီၤကၢ် ကွံာ်လၢဟီၣ်ခိၣ်လီၤ.

¹⁰ ယဘုယဟုလၢအဘၣ်ယီၢ်အီၤဒီး ယယီၢ်ဘုအလီၢ်ဖိ ဧၢ, တၢ်လၢယနၢ်ဟူလၢတၢ်သုးမုၢ်ဂီၢ်မုၢ်အယွၤ, အံၣ်စ ရ့လးအကစၢ်န့ၣ်ယစံးဘၣ်လံသုလံ.

¹¹ တၢ်အကလုၢ်လီၤလၢဒူမၤအဂ့ၢ်. တၢ်ကိးထီၣ်ယၤလၢစ့ဧၢ်, ပှၤခိးတၢ်ဖိဧၢ, တၢ်လၢမုၢ် နၤန့ၣ်မ့ၢ်အဂ့ၢ်မနုၤလဲၣ်. ပှၤခိးတၢ်ဖိဧၢ, တၢ်လၢမုၢ်နၤ န့ၣ်မ့ၢ်အဂ့ၢ်မနုၤလဲၣ်.

¹² ဒီးပှၤခိးတၢ်ဖိစံးဝဲဒၣ်, မုၢ်ဂီၤဟဲဝဲ, ဒီးမုၢ်နၤစ့ၢ်ကီး လီၤ. သုမ့ၢ်သံကွၢ်ဒီး, သံကွၢ်တက့ၢ်. က့ၤက့ၤ, ဟဲက့ၤ တက့ၢ်.

¹³ တၢ်အကလုၢ်လီၤလၢဧရ့းအဂ့ၢ်. လၢသ့ၣ်ပှၢ်အကျါလၢဧ့ရ့းအပူၤန့ၣ် သုကအိၣ်လၢမုၢ် နၤ, ပှၤလၢအပိာ်ကျဲအဖုတဖၣ်လၢဒဒၣ်သ့ၣ်ဧၢ, ¹⁴ ပှၤကီၢ် တ့မၤဖိဟဲစိာ်ထံဒီးသဂၢၢ်ပှၤသူအသးလၢထံ, လဲၤဘျီ ပှၤဃ့ၢ်တၢ်အမဲာ်ညါဒီးတၢ်အီၣ်လီၤ.

¹⁵ အဂ့ၢ်ဒ်အံၤ, ဃ့ၢ်ဝဲလၢနးအမဲာ်ညါ, လၢနးဘ့ၣ်ထီၣ် ကွံာ်အသးအမဲာ်ညါ, လၢချံၣ်သူထီၣ်အသးအမဲာ်ညါ, ဒီးလၢတၢ်ဒုးသုးအတၢ်ဃၢအမဲာ်ညါလီၤ.

¹⁶ အဂ့ၢ်ဒ်အံၤ, ယွၤစံးဘၣ်ယၤဒ်အံၤ, အိၣ်ဒံးတနံၣ်အ တီၢ်ပူၤ, ဒ်ပှၤဒိးလဲဖိအနံၣ်အသိးန့ၣ်ဒီး, က့ဒၢ်အလၤက ပီၤကလၢာ်ခဲလၢာ်လီၤ. ¹⁷ ဒီးပှၤချံၣ်ဖိ လၢအအိၣ်လီၤ တဲာ်တဖၣ်, ပှၤက့ဒၢ်ဖိအပှၤဆူၣ် န့ၣ်ကစှၤလီၤလီၤ. အဂ့ၢ် ဒ်အံၤ, ယွၤအံၣ်စရ့လးအကစၢ်စံးတၢ်န့ၣ်လီၤ.

၂၂

¹ တၢ်အကလုၢ်လီၤလၢ တၢ်ထံၣ်တၢ်အကစၢၢ်ကဆူး အဂ့ၢ်အကျိၤ. တၢ်ဘၣ်နၤလၢနလဲၤထီၣ်ဆူဟံၣ်ခိၣ်ခဲလၢာ်ခဲဆ့န့ၣ် လၢမနုၤတမံၤလဲၣ်.

² ပှဲၤဒီးတၢ်တၢထီၣ်တၢလီၤ, ဝ့ၢ်လၢအသီၣ်တၢ်တဖျၢၣ်, ဝ့ၢ်လၢအသးခုတၢ်တဖျၢၣ်ဧၢ, နပှၤလၢအဘၣ်တၢ်မၤသံ အီၤတဖၣ်တဘၣ်တၢ်မၤသံအီၤလၢနးဘၣ်. တမ့ၢ်ဘၣ် အသံဝဲလၢဒုးတၢ်အပူၤဘၣ်.

³ နပဒိၣ်ဃ့ၢ်ဝဲတပူၤဃီလၢချံၣ်ဧိၤပျၢ်ဧိၤအမဲာ်ညါ, ဘၣ် တၢ်စၢဃာ်ဝဲ, ကယဲၢ်ပှၤလၢတၢ်ထံၣ်န့ၢ်အီၤလၢနပူၤန့ၣ် ဘၣ်တၢ်စၢဃာ်အီၤတပူၤဃီ, ဃ့ၢ်တၢ်လၢအယံၤလီၤ.

⁴ မၤသးဒ်န့ၣ်ဒီးယစံး, ကွၢ်ကပာ်ယၤတက့ၢ်. ဒုးဟီၣ် ယၤနးနးကလဲာ်တက့ၢ်. ဂုာ်မၤမုာ်ထီၣ်က့ၤယၤလၢယ ပှၤဂီၢ်မုၢ်အဖိမုၣ်အတၢ်အိၣ်သယုၢ်အဃိန့ၣ်တဂ့ၤ.

⁵ အဂ့ၢ်ဒ်အံၤ, တၢ်ကိၢ်တၢ်ဂီၤ, ဒီးတၢ်ယီၢ်တံၢ်လီၤ, ဒီး တၢ်သးဒ့ဒီအမုၢ်တနံၤ အိၣ်ဒီးတၢ်သုးမုၢ်ဂီၢ်မုၢ်အယွၤ, လၢတၢ်ထံၣ်တၢ်အကစၢၢ်ကဆူးအပူၤန့ၣ်လီၤ. မၤလီၤ ပှီၢ်ကွံာ်တၢ်အခိၣ်ဒူ, ဒီးတၢ်ကိးထီၣ်ဆူကစၢၢ်ကလိန့ၣ် လီၤ.

⁶ ဧ့ၤလၣ်စိာ်လၢပီၤ, အိၣ်ဒီးလ့ၣ်ကဟၣ်, ပှၤခီၣ်သုးဖိ, ဒီးပှၤဒိးကသ့ၣ်လီၤ. ဒီးကံၢ်န့ၣ်ဘ့ၣ်ထီၣ်ကွံာ်ကတီၤ လီၤ.

⁷ ဒီးတၢ်မၤအသးလၢနကစၢၢ်ကဆူးလၢအဘၣ်တၢ်ဃု ထၢအီၤန့ၣ်ပှဲၤဝဲဒီးလ့ၣ်ကဟၣ်, ဒီးပှၤဒိးကသ့ၣ်န့ၣ်ပာ် လီၤအသးဖဲပဲတရီန့ၣ်လီၤ. ⁸ ဒီးတၢ်ထုးထီၣ်ကွံာ်တၢ်ကျၢၢ်ဘၢယူဒၤ, ဒီးတၢ်လၢမုၢ်တနံၤန့ၣ်, နကွၢ်ဆူပှၢ်လၢ်ကျါအဟံၣ်အစုကဝဲၤလီၤ.―

⁹ ဒီးတၢ်လီၤပှီၢ်အလီၢ် လၢစီၤဒၤဝံးအဝ့ၢ်ပူၤန့ၣ် သုထံၣ် ဘၣ်ဝဲလၢအအိၣ်အါပူၤလီၤ. ဒီးသုဒုးအိၣ်ဖှိၣ် နိၣ်လၢ လာ်ခီတပူၤအထံလီၤ. ¹⁰ ဒီးဟံၣ်အိၣ်ဝဲလၢယရူၤၡလ့ၣ် အပူၤသုဂံၢ်ဝဲ, ဒီးသုရူၢ်လီၤကွံာ်ဟံၣ်တဖၣ် ဒ်သိးသုက မၤက့ၤအခိၣ်ဒူလီၤ.

¹¹ ဒီးသုမၤကမါတပူၤလၢခိၣ်ဒူခံတီၤ အဘၢၣ်စၢၤလၢ နိၣ်လီၢ်လံၤအထံအဂီၢ်လီၤ. ဒီးပှၤလၢအတ့ဝဲတဂၤန့ၣ် သုတကွၢ်ဆူအအိၣ်ဘၣ်, ဒီးပှၤလၢအမၤအီၤတဂၤန့ၣ် သုတထံၣ်ဘၣ်အီၤဘၣ်.

¹² ဒီးတၢ်လၢမုၢ်တနံၤန့ၣ် တၢ်သုးမုၢ်ဂီၢ်မုၢ်အကစၢ်ယွၤ မၤလိာ်တၢ်ဟီၣ်တၢ်ယၢၤ, ဒီးတၢ်သူၣ်အုးသးအုး, ဒီးခိၣ်ကျၤနၢ်ကျၤ, ဒီးတၢ်ကံၢ်တူာ်တၢ်ယီၢ်ဒ့ဒီးထၢၣ်အတၢ် ကံးညာ်လီၤ.

¹³ ဒီးကွၢ်ကွၢ်, တၢ်သူၣ်ဖှံသးညီ, ဒီးတၢ်သူၣ်ခုသးခု, တၢ် မၤသံဂီၤဖံး, ဒီးတၢ်ကျီသံသိ, တၢ်အီၣ်တၢ်ညၣ်, ဒီးတၢ်အီ စပံးထံလီၤ. အီၣ်သကိး, ဒီးအီသကိးတက့ၢ်. အဂ့ၢ်ဒ်အံၤ, ခဲဂီၤကိာ်ပကသံလီၤ.

¹⁴ ဒီးတၢ်သုးမုၢ်ဂီၢ်မုၢ်အယွၤ လီၣ်ဖျါထီၣ်အသးလၢယ နၢ်ပူၤ, တၢ်အၢအံၤတၢ်တမၤပူၤမၤဖျဲးဘၣ်တုၤသုသံန့ၣ် လ့ၤတက့ၤဘၣ်, ကစၢ်, တၢ်သုးမုၢ်ဂီၢ်မုၢ်အယွၤစံးဝဲဒၣ် လီၤ.

¹⁵ ကစၢ်, တၢ်သုးမုၢ်ဂီၢ်မုၢ် အယွၤစံးဝဲဒ်အံၤ, လဲၤတၢ်, လဲၤနုာ်ဆူပှၤပၢၤတၢ်ပာ်ဖှိၣ်, စီၤၡၤဘနၤ, လၢအအိၣ်လၢ ဟံၣ်အဖီခိၣ်တဂၤအအိၣ်န့ၣ်တက့ၢ်. ¹⁶ နတၢ်အိၣ်ဖဲအံၤ မ့ၢ်မနုၤတမံၤလဲၣ်. ပှၤအိၣ်ဒီးနၤဖဲအံၤလၢနစိးတၢ်သွၣ် ခိၣ်တပူၤလၢနဂီၢ်မ့ၢ်မတၤတဂၤလဲၣ်. စိးအသွၣ်ခိၣ်ပူၤ လၢအလီၢ်ထီၣ်ထီ, ဘၢၣ်အအိၣ်အလီၢ်လၢလၢၢ်ပူၤလီၤ.

¹⁷ ကွၢ်ကွၢ်, ယွၤကွံာ်တ့ၢ်ကွံာ်နၤလၢတၢ်ကွံာ်တ့ၢ်, ပှၤက ညီဧၢ, ဒီးလုၣ်ဘၢနၤလၢတၢ်လုၣ်ဘၢလီၤ. ¹⁸ တလ့ၣ်ဒီး ကတလ့ၣ်နၤ, ဒ်တၢ်ဖျၢၣ်သလၢၣ်တဖျၢၣ်ဆူကီၢ်ဖးလဲၢ် အပူၤအသိးန့ၣ်လီၤ. ဖဲန့ၣ်နကသံ, ဒီးဖဲန့ၣ်နလ့ၣ်ကဟၣ် အိၣ်ဒီးအလၤကပီၤလီၤ. နကစၢ်အဟံၣ်ကမဲာ်ဆှးလီၤ.

¹⁹ ဒီးယကဟီထီၣ်ကွံာ်နၤလၢနအိၣ်အလီၢ်န့ၣ်, ဒီးလၢ နမၤတၢ်အလီၢ်န့ၣ်ကထုးလီၤကွံာ်နၤလီၤ. ²⁰ ဒီးလၢမုၢ်တ နံၤန့ၣ်တၢ်ကမၤအသးလၢ ယကကိးန့ၢ်ယခ့ယပှၤ စီၤ ဃံးလကံယၤအဖိခွါစီၤအ့ၤလယါကံၣ်, ²¹ ဒီးယကဒုးသိး အီၤလၢနဆ့, ဒီးယကဒုးဆူၣ်ထီၣ်အီၤလၢနယီၢ်တကိး န့ၣ်, ဒီးနစိနကမီၤယကဟ့ၣ်လီၤလၢအစုပူၤ, ဒီးကကဲ ထီၣ်ပှၤအိၣ်ဝဲဆိးဝဲလၢယရူၤၡလ့ၣ်အပူၤ, ဒီးယူဒၤအပှၤ ဟံၣ်ဖိအပၢ်လီၤ.

²² ဒီးယကပာ်စီၤဒၤဝံး အဟံၣ်အသိးလၢအဖံဘၣ်ခိၣ် လီၤ. ကအိးထီၣ်တၢ်, ဒီးတၢ်ကးတံာ်ဃာ်န့ၣ် တအိၣ် ဘၣ်, ဒီးကကးတံာ်ဃာ်တၢ်, ဒီးတၢ်အိးထီၣ်တၢ်န့ၣ်တ အိၣ်ဘၣ်. ²³ ဒီးယကမၤကျၢၤအီၤဒ်ပနဲာ်လၢအလီၢ်ခၢၣ် သနၢၢ်အသိး, ဒီးကကဲထီၣ်လီၢ်ပစိာ်အိၣ်ဒီးအလၤက ပီၤလၢအပၢ်အဟံၣ်အဂီၢ်လီၤ.

²⁴ ဒီးပှၤကဘျးထီၣ်အပၢ် အဟံၣ်အလၤကပီၤခဲလၢာ် လၢအလိၤ, တၢ်ဟဲထီၣ်ဒီးတၢ်လီၤစၢၤ, ကယဲၢ်သလၢ ဖိ, လၢသလၢအဖျၢၣ်ပၢၢ်လၢပလီကိးကလုာ်ဒဲးလီၤ.

²⁵ တၢ်သုးမုၢ်ဂီၢ်မုၢ်အယွၤစံးဝဲဒၣ်, တၢ်လၢမုၢ်တနံၤန့ၣ် ပနဲာ်အိၣ်ကျၢၤလၢအလီၢ်ခၢၣ်သနၢၢ် တဘိကဘၣ်တၢ် ထုးကွံာ်အီၤ, ဒီးတၢ်ကပဲာ်ကွံာ်အီၤ, ဒီးအတၢ်ကလီၤ တဲာ်, ဒီးတၢ်အဃၢလၢအအိၣ်ဝဲလၢအလိၤန့ၣ်ကဘၣ် တၢ်ဒီၣ်တဲာ်ကွံာ်အီၤလီၤ. အဂ့ၢ်ဒ်အံၤ, ယွၤကတိၤတၢ် လီၤ.

၂၃

¹ တၢ်အကလုၢ်လီၤလၢစိၢ်အဂ့ၢ်. တၢ်ၡံၣ်အကဘီသ့ၣ်ဧၢ, ဟီၣ်ပသူထီၣ်တက့ၢ်. အဂ့ၢ် ဒ်အံၤ, တၢ်မၤအိၣ်သယုၢ်အီၤလီၤ. ဟံၣ်တအိၣ်, တၢ်လဲၤ နုာ်တအိၣ်ဘၣ်. လၢကီၢ်ကံးတံၣ်န့ၣ်တၢ်လီၣ်ဖျါထီၣ် လၢအီၤလီၤ.

² ပှၤကီးဖိသ့ၣ်ဧၢ, အိၣ်ဘှီၣ်ကလာ်တက့ၢ်. စံဒိၣ်အပှၤ ကၤတၢ်ဖိခီဂာ်ပီၣ်လဲၣ်, ဒီးမၤပှဲၤနၤ, ³ ဒီးလၢထံဖးဒိၣ်အ ပူၤန့ၣ်ၡံဃိၢ်အတၢ်ချံအိၣ်, ဒီးထံမိၢ်ပှၢ်အကူးတၢ်န့ၣ်ဟဲ ဆူအအိၣ်, ဒီးမ့ၢ်ဝဲလၢ ပှၤကလုာ်တဖၣ်အဖၠါဧိၤဖီဧိၤ လီၤ.

⁴ မဲာ်ဆှးတက့ၢ်, စံဒိၣ်ဧၢ, အဂ့ၢ်ဒ်အံၤပီၣ်လဲၣ်ကတိၤ တၢ်, ပီၣ်လဲၣ်အတိာ်အတာ်, ဒီးစံးဝဲ, ယတဘၣ်တၢ်ဟုး ဆါဘၣ်, ဒီးယတဆံးစၢ်ဘၣ်တၢ်ဘၣ်, ဒီးယတဒုးဒိၣ် ထီၣ်ဘၣ်ဖိၣ်သၣ်ခွါဘၣ်, ယတလုၢ်ဘၣ်ပှၤမုၣ်လိၣ်ဘိ ဘၣ်.

⁵ တုၤတၢ်အကစီၣ်တုၤလၢအဲၤကူပတူးဒီး, ဘၣ်ဝဲလၢ တၢ်ဆိးကဲးလၢစိၢ်အကစီၣ်အဃိလီၤ.

⁶ ခီဂာ်တၢ်ဆူတၢ်ၡံၣ်, ဟီၣ်ပသူထီၣ်, ပှၤကီးဖိသ့ၣ်ဧၢ.

⁷ ဝ့ၢ်လၢအသးခုတၢ်လၢအခီၣ်ထံးန့ၣ် အိၣ်ဝဲလၢမုၢ်နံၤ လၢပျၢၤလံၤလံၤ, လၢအခီၣ်စိာ်ကွံာ်အီၤဆူအယံၤဒ်သိး အကအိၣ်ကဆိး, မ့ၢ်အဝဲအံၤဧါ.

⁸ မ့ၢ်မတၤကူၣ်ထီၣ်တၢ်န့ၣ်ထီဒါစိၢ်, တၢ်ခိၣ်သလုး, လၢအပှၤကၤတၢ်ဖိ မ့ၢ်ပဒိၣ်ဖးဒိၣ်တဖၣ်, ဒီးအပှၤဆါ တၢ်ပှ့ၤတၢ်မ့ၢ်ပှၤလၢအလၤကပီၤအိၣ်န့ၣ်တဂၤလဲၣ်.

⁹ တၢ်သုးမုၢ်ဂီၢ်မုၢ်အယွၤ ကူၣ်ထီၣ်ဝဲဒ်သိးအကမၤဘၣ် အၢတၢ်အဃံအလၤခဲလၢာ်အသးထီၣ်ထီ, ဒ်သိးအက မၤတရီတပါကယဲၢ်ပှၤလၢအလၤကပီၤအိၣ်လၢဟီၣ်ခိၣ် ချၢခဲလၢာ်လီၤ.

¹⁰ ခီဂာ်နကီၢ်ဒ်ထံမိၢ်ပှၢ်န့ၣ်အသိး, တၢ်ၡံၣ်အဖိမုၣ်ဧၢ. တၢ်ယီၢ်တကိးတအိၣ်လၢၤဘၣ်. ¹¹ အစုယူာ်ထီၣ်အသး လၢပီၣ်လဲၣ်အဖီခိၣ်လီၤ. အဝဲဒၣ်မၤဟူးဝးဘီမုၢ်တဖၣ် လီၤ. ယွၤမၤလိာ်တၢ်လၢ ကနၤဧၣ်အဂ့ၢ်အကျိၤဒ်သိး ပှၤကမၤဟးဂီၤအတိာ်အတာ်လီၤ.

¹² ဒီးစံးဝဲဒၣ်, နတမၤအါထီၣ်လၢၤဘၣ်တၢ်သူၣ်ဖှံသး ညီဘၣ်, စံဒိၣ်အဖိမုၣ်လိၣ်ဘိလၢအဘၣ်တၢ်မၤအၢအီၤ, နၤဧၢ. ဂဲၤဆၢထၢၣ်, ခီဂာ်တၢ်ဆူကံးတံၣ်တက့ၢ်. ဖဲန့ၣ် တၢ်အိၣ်ဘှံးတအိၣ်စ့ၢ်ကီးလၢနဂီၢ်ဘၣ်.

¹³ ကွၢ်ကွၢ်, က့ၤစ့းဖိအကီၢ်လီၤ. ပှၤတကလုာ်န့ၣ်တ အိၣ်တ့ၢ်ဘၣ်. အၤရှူၢ်ပာ်လီၤအီၤလၢ အခီၣ်ထံးလၢပှၤ အိၣ်ဝဲဆိးဝဲလၢပှၢ်မုၢ်ကနၢအဂီၢ်လီၤ. သူၣ်ထီၣ်ဝဲအတၢး ခိးတၢ်, ထိၣ်ဂဲၤဝဲအနူၢ်အစီၤ, ပာ်အီၤလၢတၢ်လီၤပှီၢ်လီၤ.

¹⁴ ဟီၣ်ပသူထီၣ်, တၢ်ရှံၣ်အကဘီသုဝဲသ့ၣ်ဧၢ, အဂ့ၢ်ဒ် အံၤ, သုတိာ်သုတာ်ဟးဂီၤလံ.

¹⁵ ဒီးတၢ်လၢမုၢ်တနံၤန့ၣ် တၢ်ကမၤအသးလၢတၢ်က သးပ့ၤနီၣ်စိၢ်အနံၣ်နွံဆံ, ဒ်စီၤပၤတဂၤအမုၢ်နံၤတဖၣ် အသိးန့ၣ်လီၤ. လၢအနံၣ်နွံဆံအကတၢၢ်န့ၣ်တၢ်ကမၤ အသးလၢစိၢ်အဂီၢ် ဒ်ပှၤဃဲသဲမုၣ်အတၢ်သးဝံၣ်အသိး န့ၣ်လီၤ.

¹⁶ ဟံးန့ၢ်တနၢ်တဆိ, လဲၤဝးတရံးဝ့ၢ်, ပှၤဃဲသဲမုၣ်လၢ တၢ်သးပ့ၤနီၣ်အီၤတဂၤဧၢ, ဒ့တၢ်ဧ့ၢ်ဂ့ၤ, အုၣ်တၢ်သးဝံၣ် အါယုၢ်, ဒ်သိးတၢ်ကသ့ၣ်နီၣ်ထီၣ်က့ၤနၤတက့ၢ်.

¹⁷ ဒီးလၢအနံၣ်နွံဆံအကတၢၢ်န့ၣ် တၢ်ကမၤအသးလၢ ယွၤကအိၣ်သကိးစိၢ်, ဒီးကက့ၤက့ၤဆူအဘူးအလဲ, ဒီး ကပာ်အသးလၢပှၤဃဲသဲမုၣ် ဒီးဘီဧိၤမုၢ်ဧိၤလၢဟီၣ်ခိၣ် ချၢခဲလၢာ်လီၤ.

¹⁸ ဒီးအန့ၢ်ဘၣ်တၢ်ဒီးအဘူးအလဲန့ၣ် ကကဲထီၣ်တၢ်စီ ဆှံလၢယွၤအဂီၢ်လီၤ. ပှၤတပာ်ဖှိၣ်ဘၣ်အီၤဘၣ်, တဒုး အိၣ်ဖှိၣ်ဘၣ်အီၤဘၣ်. အဂ့ၢ်ဒ်အံၤ, အန့ၢ်ဘၣ်တၢ်န့ၣ်က အိၣ်လၢပှၤလၢအအိၣ်ဝဲလၢယွၤအမဲာ်ညါအဂီၢ်, ဒ်သိး အကဘျဲးအီၣ်, ဒီးအိၣ်ဒီးတၢ်ကူတၢ်သိးအဂ့ၤန့ၣ်လီၤ.

၂၄

¹ ကွၢ်ကွၢ်, ယွၤဂၢ်လီၤတၢ်အိၣ်လၢဟီၣ်ခိၣ်န့ၣ်, ဒီးဒုး အိၣ်ကလီဝဲ, ဒီးကပာ်အီထီလာ်ဝဲ, ဒီးကမၤလီၤပြံလီၤ ပြါပှၤကီၢ်ဖိန့ၣ်လီၤ.

² ဒီးတၢ်ကမၤအသးလၢဒ်ပှၤဂီၢ်မုၢ်အသိး, ပှၤလုၢ်တၢ် အဒိၣ်ဒ်န့ၣ်သိး, ဒ်ပှၤအခ့အပှၤအသိး, အကစၢ်ဒ်န့ၣ် သိး, ဒ်ပှၤအခ့အပှၤပိာ်မုၣ်အသိး, အကစၢ်မုၣ်ဒ်န့ၣ်သိး, ဒ်ပှၤပှ့ၤတၢ်အသိး, ပှၤဆါတၢ်ဒ်န့ၣ်သိး, ဒ်ပှၤလိၢ်တၢ်အ သိးပှၤဒုးလိၢ်တၢ် ဒ်န့ၣ်အသိး, ဒ်ပှၤလၢအကမၢ်အိၣ် အသိး, အကမၢ်အကစၢ်ဒ်န့ၣ်သိးလီၤ.

³ ထံဧိၤကီၢ်ဧိၤန့ၣ်ကအိၣ်ကလီသိကဘဲး, ဒီးတၢ်ကဂုာ် န့ၢ်အတၢ်စီကညူးလီၤ. အဂ့ၢ်ဒ်အံၤ, ယွၤကတိၤတၢ်က တိၤတထံၣ်န့ၣ်လီၤ.

⁴ ဟီၣ်ခိၣ်သူၣ်အုးသးအုး, လီၤဘိၣ်လီၤဘဲ, လၢာ်ခိၣ် လီၤဘှါလီၤဘှဲ, လီၤဘိၣ်လီၤဘဲ, ပှၤဟီၣ်ခိၣ်ဖိအထီ ကတၢၢ်လီၤဘှါလီၤဘှဲဝဲလီၤ.

⁵ ဒီးထံဧိၤကီၢ်ဧိၤန့ၣ် ဘၣ်အၢလၢပှၤအိၣ်ဝဲဆိးဝဲလၢအ ပူၤတဖၣ်အဖီလာ်လီၤ. အဂ့ၢ်ဒ်အံၤ, ပှၤလုၣ်သ့ၣ်ခါပတာ် တၢ်သိၣ်တၢ်သီ, လဲလိာ်တၢ်မၤလိာ်, မၤဟးဂီၤတၢ်အၢၣ် လီၤအီလီၤအထူအယိာ်လီၤ.

⁶ မၤသးဒ်န့ၣ်ဒီး တၢ်ဆိၣ်အၢအီၣ်ကွံာ်ဟီၣ်ခိၣ်, ဒီးပှၤ လၢအအိၣ်လၢအပူၤတဖၣ်န့ၣ် တူၢ်တၢ်ဒဲးဘးလီၤ. မၤ သးဒ်န့ၣ်ဒီးပှၤဟီၣ်ခိၣ်ဖိလၢာ်ကွံာ်ဝဲ, ဒီးပှၤကညီလၢအ အိၣ်လီၤတဲာ်တဖၣ်န့ၣ်မ့ၢ်စှၤဂၤလီၤ.

⁷ စပံးထံအသီန့ၣ်သူၣ်အုးသးအုး, စပံးမုၢ်လီၤဘှါလီၤ ဘှဲလီၤ. ကယဲၢ်ပှၤလၢအသးခုလၢအသးန့ၣ် ကအုက စွါခဲလၢာ်လီၤ.

⁸ ဒၢအတၢ်သးခုန့ၣ် အိၣ်ဃိကလာ်, ပှၤလၢအသူၣ်ဖှံ သးညီအသီၣ်အိၣ်ဘှီၣ်ဝဲ, တနၢ်အတၢ်သးခုအိၣ်ဃိက လာ်လီၤ. ⁹ တအီၤလၢၤဘၣ်စပံးထံအိၣ်ဒီး တၢ်သးဝံၣ် ဘၣ်. သံးကခၣ်ဝဲလၢပှၤလၢအအီအီၤအဂီၢ်လီၤ. ¹⁰ တၢ် အိၣ်ကလီအဝ့ၢ်န့ၣ်လီၤပှီၢ်ဝဲလီၤ. ကယဲၢ်ဟံၣ်ကးတံာ် ဃာ်အသးဒ်သိးပှၤသုတနုာ်တဂ့ၤန့ၣ်လီၤ.

¹¹ တၢ်ကိးပသူလၢစပံးထံအဃိန့ၣ်အိၣ်ဝဲလၢကျဲပူၤ, က ယဲၢ်တၢ်သးခုန့ၣ်လဲၤပူၤကွံာ်ဝဲ, ဟီၣ်ခိၣ်အတၢ်သူၣ်ဖှံ သးညီန့ၣ်ဟးထီၣ်ကွံာ်လီၤ. ¹² တၢ်အိၣ်လီၤတဲာ်လၢဝ့ၢ် ပူၤန့ၣ်မ့ၢ်တၢ်အိၣ်သယုၢ်, ဒီးပဲတရီန့ၣ်တၢ်တီၢ်လီၤပှီၢ် အီၤလီၤ.

¹³ အဂ့ၢ်ဒ်အံၤ, တၢ်ကမၤအသးလၢဟီၣ်ခိၣ်အသးကံၢ် ပူၤ, လၢပှၤကလုာ်တဖၣ်အကျါ, ဒ်တၢ်တီၢ်သ့ၣ်စၤယံး အသိး ဒ်လၢတၢ်ထၢဖှိၣ်တၢ်ဝံၤဒီး, တၢ်ထၢဖှိၣ်တၢ်အိၣ် လီၤတဲာ်ဒံးအသိးန့ၣ်လီၤ.

¹⁴ အဝဲသ့ၣ်ကထုထီၣ်အကလုၢ်, ကအုၣ်ထီၣ်တၢ်လၢ ယွၤအကဟုကညီၢ်အဃိ, ကကိးပသူထီၣ်လၢပီၣ်လဲၣ် ပူၤလီၤ.

¹⁵ မၤသးဒ်န့ၣ်ဒီးမၤလၤကပီၤယွၤလၢမုၢ်ထီၣ်တခီ, ယွၤ, အံၣ်စရ့လးအကစၢ်အမံၤ, လၢပီၣ်လဲၣ်အကီးတဖၣ်န့ၣ် တက့ၢ်.

¹⁶ လၢဟီၣ်ခိၣ်အဃၢၤန့ၣ်ပနၢ်ဟူတၢ်သးဝံၣ်, စံးထီၣ်ပ တြၢၤပှၤတီပှၤလိၤတက့ၢ်. ဒီးယစံး, ယဃဲၤလီၤ. ယဃဲၤ လီၤ, ယဘၣ်အဖှီၣ်လီၤ. ပှၤလီန့ၢ်တၢ်တဖၣ်န့ၣ်လီန့ၢ် တၢ်, ပှၤလီန့ၢ်တၢ်တဖၣ်န့ၣ် လီန့ၢ်တၢ်လၢတၢ်လီန့ၢ် လီၤ.

¹⁷ မ်တၢ်ဃါဃ့ၢ်ကွံာ်, ဒီးမၢဧိၤပျၢ်ဧိၤ, ဒီးတၢ်ပျံၤသကွီၤ န့ၣ်ဘၣ်နၤတက့ၢ်, ပှၤကီၢ်ဖိဧၢ.

¹⁸ ဒီးတၢ်ကမၤအသးလၢ ပှၤလၢအဃ့ၢ်ဝဲလၢတၢ်ဃါ ဃ့ၢ်ကွံာ်အမဲာ်ညါန့ၣ် ကလီၤတဲာ်လၢမၢဧိၤပျၢ်ဧိၤအပူၤ, ဒီးပှၤလၢအဟဲထီၣ်လၢ မၢဧိၤပျၢ်ဧိၤအပူၤန့ၣ်ကဘၣ်ပျံၤ သကွီၤလီၤ. အဂ့ၢ်ဒ်အံၤ, တၢ်ထူၣ်ဖျိအိးထီၣ်အသးလၢ ထးခီ, ဒီးဟီၣ်ခိၣ်အခီၣ်ထံးတဖၣ်ကဆှဲးကဆှိးဝဲလီၤ.

¹⁹ ကၢ်လီၤလံ, ဟီၣ်ခိၣ်ကၢ်လီၤလၢာ်လံ. ပှံၢ်လီၤလံ, ဟီၣ် ခိၣ်ပှံၢ်လီၤစီဖ့ကလ့ၤလံ. ဟူးဝးလံ, ဟီၣ်ခိၣ်ဟူးဝးလီၤနး မးလံ.

²⁰ ဟီၣ်ခိၣ်ကလဲၤတၢ်ကနူၤကပၤ ဒ်ပှၤအီမူၤအသးအ သိး, ဒီးကဝးဝဲဒ်စုာ်အသိးန့ၣ်လီၤ. ဒီးအတၢ်ဒဲးဘးန့ၣ် ကဃၢဝဲလၢအဖီခိၣ်, ဒီးကလီၤဃံၤဝဲ, ဒီးတဂဲၤဆၢထၢၣ် လၢၤဘၣ်.

²¹ ဒီးလၢမုၢ်တနံၤန့ၣ်တၢ်ကမၤအသးလၢယွၤကအိၣ်သ ကိးတၢ်သုးမုၢ်ထီၣ်ထီအိၣ်လၢတၢ်ထီၣ်ထီ, ဒီးဟီၣ်ခိၣ် အစီၤပၤတဖၣ်လၢဟီၣ်ခိၣ်ချၢလီၤ. ²² ဒီးတၢ်ကဒုးအိၣ်ဖှိၣ် အီၤလၢတၢ်အိၣ်ဖှိၣ်တပူၤ ဒ်ပှၤဃိာ်ဖိလၢဃိာ်ပူၤအသိး, ဒီးကဘၣ်တၢ်ကးတံာ်ဃာ်အီၤလၢဃိာ်ပူၤ, ဒီးအါနံၤ အါသီအလီၢ်ခံန့ၣ်တၢ်ကအိၣ်သကိးအီၤလီၤ.

²³ ဒီးလါကပာ်ဆှးအမဲာ်, ဒီးမုၢ်ကမဲာ်ဆှးလီၤ. အဂ့ၢ် ဒ်အံၤ, တၢ်သုးမုၢ်ဂီၢ်မုၢ်အယွၤန့ၣ်ကမ့ၢ်စီၤပၤလၢကစၢၢ် စံယိၣ်အလိၤ, ဒီးလၢယရူၤၡလ့ၣ်အပူၤ, ဒီးတၢ်လၤက ပီၤကအိၣ်ဝဲလၢအသူၣ်က့သးပှၢ်အမဲာ်ညါလီၤ.

၂၅

¹ ယွၤဧၢ, နမ့ၢ်ယကစၢ်လီၤ. ယကပာ်ထီၣ်ထီနၤ, ယက စံးထီၣ်ပတြၢၤနမံၤလီၤ. အဂ့ၢ်ဒ်အံၤ, နမၤတၢ်လီၤလး, တၢ်ကူၣ်ထီၣ်ဖးလီၤလၢအယံာ်, တၢ်မ့ၢ်တၢ်တီ, တၢ်မ့ၢ် တၢ်ဘၣ်လီၤ.

² အဂ့ၢ်ဒ်အံၤ, နပာ်ဝ့ၢ်တဖျၢၣ်လၢတၢ်ပူ, ဝ့ၢ်အိၣ်ဒီးအ ခိၣ်ဒူတဝ့ၢ်လၢတၢ်လီၤပှီၢ်, ပှၤတခီဘီမုၢ်ဖိအနူၢ်လၢတၢ် တမ့ၢ်လၢၤဘၣ်ဝ့ၢ်တဖျၢၣ်ဘၣ်. တၢ်တမၤထီၣ်က့ၤအီၤ လီၤထူလီၤယိာ်ဘၣ်.

³ မၤသးဒ်န့ၣ်ဒီး ပှၤအဆူၣ်တကလုာ်ကစံးထီၣ်ပတြၢၤ နၤ, ပှၤအကလုာ်လၢအမ့ၢ်တၢ်ပျံၤအလီၢ်အဝ့ၢ်ဖိန့ၣ် က ပျံၤနၤလီၤ.

⁴ အဂ့ၢ်ဒ်အံၤ, နမ့ၢ်တ့ၢ်တိာ်ဧိၤတာ်ဧိၤလၢပှၤဖှီၣ်ဖိယာ် ဖိအဂီၢ်, တိာ်ဧိၤတာ်ဧိၤလၢပှၤဘၣ်နးဘၣ်ဖှီၣ်အဂီၢ်လၢ အဘၣ်တၢ်ကီအဖၢမုၢ်, တၢ်အိၣ်တဒၢအလီၢ်လၢကလံၤ မုၢ်အမဲာ်ညါ, တၢ်ကဒုလၢတၢ်ကိၢ်အမဲာ်ညါလၢပှၤမၤ ပျံၤတၢ်ဖုးတၢ်အအူသဖှိ မၤသးဒ်ကလံၤမုၢ်ဘၣ်တၢ်အ ဒူၣ်အသိးန့ၣ်အဖၢမုၢ်လီၤ.

⁵ ဒ်တၢ်ကိၢ်လၢအလီၢ်ဃ့အသိး, ပှၤတခီဘီမုၢ်ဖိအသီၣ် န့ၣ်နကမၤစၢ်လီၤလီၤ. ဒ်တၢ်ကိၢ်လၢတၢ်အၢၣ်အကဒု အသိး, ပှၤမၤပျံၤတၢ်အတၢ်သးဝံၣ်န့ၣ်ဘှီၣ်လီၤဝဲဒ်န့ၣ် သိးလီၤ.

⁶ ဒီးတၢ်သုးမုၢ်ဂီၢ်မုၢ်အယွၤကမၤတၢ်အီၣ်ဘီၣ်သိ, တၢ် အီလၢစပံးထံအိၣ်ဒီးအသံးအဃါလၢအပူၤ, တၢ်ဘီၣ် သိလၢအဝံၣ်, စပံးထံအိၣ်ဒီးအသံးအဃါလၢအပူၤလၢ အဆှံဝဲလၢပှၤကိးကလုာ်ဒဲးအဂီၢ် လၢကစၢၢ်အံၤအလိၤ လီၤ.

⁷ ဒီးလၢကစၢၢ်အလိၤအံၤ ကမၤဟးဂီၤတၢ်မၤဘၢမဲာ်, တၢ်မၤဘၢမဲာ်လၢအအိၣ် လၢပှၤကိးကလုာ်ဒဲးအဖီခိၣ်, ဒီးထၣ်တဘ့ၣ် လၢအထါထၣ်အသးလၢပှၤကိးကလုာ် ဒဲးအဖီခိၣ်လီၤ.

⁸ တၢ်သံလီၤဘျၢလံလီၤထူလီၤယိာ်လံ, ဒီးကစၢ်ယွၤ ထွါကွံာ်မဲာ်ထံလၢကယဲၢ်ပှၤအမဲာ်, ဒီးကဟံးထီၣ်ကွံာ် အပှၤဂီၢ်မုၢ်အတၢ်ဒုၣ်ဒွဲၣ်လၢဟီၣ်ခိၣ်ဒီဘ့ၣ်ညါလီၤ. အ ဂ့ၢ်ဒ်အံၤ, ယွၤကတိၤတၢ်လီၤ.

⁹ ဒီးပှၤကစံး, လၢမုၢ်တနံၤန့ၣ်ကွၢ်ကွၢ်, အဝဲဒၣ်အံၤမ့ၢ် ပကစၢ်လီၤ. ပကွၢ်လၢ်တ့ၢ်အကျဲ, ဒီးကအုၣ်က့ၤခီၣ်က့ၤ ပှၤလီၤ. အဝဲဒၣ်အံၤမ့ၢ်ယွၤလီၤ. ပကွၢ်လၢ်တ့ၢ်အကျဲလီၤ. ပကသူၣ်ဖှံသးညီ, ဒီးပကသးခုလၢအတၢ်အုၣ်က့ၤခီၣ် က့ၤအပူၤလီၤ.

¹⁰ အဂ့ၢ်ဒ်အံၤ, ယွၤအစု ကအိၣ်ဘှံးလၢကစၢၢ်အံၤအ လိၤ, ဒီးမိၤအးကဘၣ်တၢ်ယီၢ်တံၢ်အီၤလၢအလီၢ်ပူၤ, ဒ် လီၢ်ဧိၤဒံးဧိၤ ဘၣ်တၢ်ယီၢ်တံၢ်အီၤလၢတၢ်အအ့ၣ်ပူအ ထံကျါအသိးန့ၣ်လီၤ.

¹¹ ဒီးကယူာ်ထီၣ်အစုလၢအကျါ, ဒ်ပှၤပီၢ်ထံယူာ်ထီၣ် အစုဒ်သိးအကပီၢ်ထံအသိးန့ၣ်လီၤ. ဒီးတၢ်ကဆီၣ်လီၤ ဃာ်အတၢ်ထီၣ်ထီအိၣ်ဒီးအစုအမၤတၢ်န့ၣ်လီၤ.

¹² ဒီးနဝ့ၢ်ခိၣ်ဒူအတိာ်ထီၣ်ထီ, အတိာ်တဖျၢၣ်န့ၣ်အဝဲ ဒၣ်ရူၢ်လီၤကွံာ်, ဆီၣ်လီၤဝဲ, မၤလီၤပှီၢ်လၢဟီၣ်ခိၣ်လိၤ, မၤလီၤဒါလၢဟီၣ်ခိၣ်အကမူၣ်ကျါလီၤ.

၂၆

¹ လၢမုၢ်တနံၤန့ၣ် ပှၤကသးဝံၣ်တၢ်သးဝံၣ်အံၤလၢကီၢ် ယူဒၤအပူၤ, ပအိၣ်ဒီးဝ့ၢ်ခၢၣ်သနၢၢ်တဖျၢၣ်လီၤ. အဝဲဒၣ် ကပာ်တၢ်အုၣ်က့ၤခီၣ်က့ၤလၢအခိၣ်ဒူ, ဒီးအခိၣ်ဒူလၢခိ န့ၣ်လီၤ.

² အိးထီၣ်ပဲတရီ, ဒီးဒုးလဲၤနုာ်ပှၤအတီအလိၤ တက လုာ်လၢအတိၢ်န့ၢ်တၢ်မ့ၢ်တၢ်တီန့ၣ်တက့ၢ်.

³ ပှၤအသးလၢ အသန့ၤအသးလၢနၤန့ၣ် နကပၢၤအီၤ လၢတၢ်ဃူတၢ်ဖိးအလၢအပှဲၤန့ၣ်လီၤ. အဂ့ၢ်ဒ်အံၤ, သ န့ၤအသးလၢနၤလီၤ.

⁴ သန့ၤသုသးလၢယွၤလီၤစိၤလီၤထီတက့ၢ်. အဂ့ၢ်ဒ် အံၤ, လၢကစၢ်ယွၤအပူၤန့ၣ်လၢၢ်အထူအယိာ်အိၣ်ဝဲတ ဖျၢၣ်လီၤ.

⁵ အဂ့ၢ်ဒ်အံၤ, ဆီၣ်လီၤပှၤအိၣ်ဝဲဆိးဝဲ လၢအလီၢ်ထီၣ် ထီ, ဝ့ၢ်အိၣ်ထီၣ်ထီတဖျၢၣ်မၤလီၤပှီၢ်, မၤလီၤဃူဝဲဒီးဟီၣ် ခိၣ်, ဆီၣ်လီၤအီၤပၢၢ်လၢဟီၣ်ခိၣ်အကမူၣ်လီၤ. ⁶ ပှၤအ ခီၣ်ကယီၢ်လီၤအီၤ, ပှၤဘၣ်ဖှီၣ်ဘၣ်နးအခီၣ်, ပှၤဂံၢ်စၢ် ဘါစၢ်အခီၣ်လီၤ.

⁷ ပှၤတီအကျဲန့ၣ်လိၤဝဲလီၤ. တၢ်တီတၢ်လိၤတဂၤန့ၣ်က မၤဃူပှၤတီအကျဲလီၤ.

⁸ လၢနစံၣ်ညီၣ်တၢ်အကျဲန့ၣ်ပကွၢ်လၢ်တ့ၢ်စ့ၢ်ကီးနကျဲ လီၤ, ယွၤဧၢ. ပသးဆၢန့ၢ်နမံၤ, ဒီးတၢ်သ့ၣ်နီၣ်ထီၣ်က့ၤနၤ လီၤ.

⁹ ယဆၢန့ၢ်တ့ၢ်နၤလၢယသးလၢမုၢ်နၤ, မ့ၢ်မးယကဃု နၤလၢယသးလၢယပူၤဂီၤဂီၤလီၤ. အဂ့ၢ်ဒ်အံၤ, တုၤနတၢ် စံၣ်ညီၣ်အိၣ်လၢဟီၣ်ခိၣ်ချၢဒီး, ပှၤဟီၣ်ခိၣ်ဖိကမၤလိ တၢ်တီတၢ်လိၤလီၤ.

¹⁰ ပှၤတတီတလိၤဘၣ်ဘျုးဘၣ်ဖှိၣ်ဘၣ်ဆၣ်ဒီး, တမၤ လိဘၣ်တၢ်တီတၢ်လိၤဘၣ်. လၢတၢ်လိၤအကီၢ်ပူၤန့ၣ် ကမၤတၢ်ဒၢက့ၣ်ဒၢကူ, ဒီးတထံၣ်ဘၣ်ယွၤအကဟုက ညီၢ်ဘၣ်.

¹¹ ယွၤဧၢ, နစုအိၣ်ထီၣ်ထီအဝဲသ့ၣ်ထံၣ်ဝဲန့ၣ်အသးတ အိၣ်ဘၣ်. ကထံၣ်ဘၣ်ဝဲ, ဒီးအမဲာ်ကဆှး, နသးဆူၣ်လၢ နပှၤဂီၢ်မုၢ်အဂီၢ်, မ့ၢ်မးနဒုၣ်နဒါအမ့ၣ်အူကအီၣ်ကွံာ်အီၤ လီၤ.

¹² ယွၤဧၢ, နကဟ့ၣ်ပှၤလၢတၢ်ဃူတၢ်ဖိးလီၤ. အဂ့ၢ်ဒ်အံၤ ကယဲၢ်ပမၤတၢ်န့ၣ်ဒၣ်လဲာ်နမၤလၢပဂီၢ်လီၤ.

¹³ ယွၤပကစၢ်ဧၢ, ကစၢ်အဂၤတဖၣ်ပၢတ့ၢ်ပှၤလီၤ. နဲဒၣ်, နမံၤဒၣ်လဲာ်ပကဒုးသ့ၣ်နီၣ်ထီၣ်က့ၤအီၤလီၤ.

¹⁴ အဝဲသ့ၣ်န့ၣ်သံလံ, ဒီးတမူဘၣ်ဝဲဘၣ်. မ့ၢ်ပှၤလီၤတဲာ် ဖိ, ဒီးတဂဲၤဆၢထၢၣ်ဘၣ်. မၤသးဒ်န့ၣ်ဒီးနအိၣ်သကိး တ့ၢ်ဒီးမၤဟးဂီၤလံအီၤ, ဒီးနမၤဟးဂီၤလံကယဲၢ်တၢ်ဒုး သ့ၣ်နီၣ်ထီၣ်အီၤလံ.

¹⁵ နမၤအါထီၣ်လံပှၤတကလုာ်လံ, ယွၤဧၢ, နမၤအါထီၣ် လံပှၤတကလုာ်လံ, နမၤလၤကပီၤနသးလံ, နပာ်ယံၤ ထီၣ်လံထံသနၢၣ်ကီၢ်သနၢၣ်ခဲလၢာ်လံ.

¹⁶ ယွၤဧၢ, လၢအဘၣ်တၢ်ကိၢ်တၢ်ဂီၤန့ၣ်အိၣ်သကိးနၤ လီၤ, ကတိၤဝဲကသွံဒံဖဲနတၢ်သိၣ်ဃီၣ်အိၣ်ဝဲလၢအလိၤ လီၤ.

¹⁷ ဒ်ပှၤဒၢတၢ်အမုၢ်အလါ ဘၣ်ဘူးတ့ၢ်လၢအကဆံးစၢ် တၢ်, ဒီးအဟုးဆါ, ဒီးလၢအဘၣ်တၢ်ဆိးကဲးန့ၣ်ကိးပ သူထီၣ်အသိးန့ၣ် ပအိၣ်တ့ၢ်ပဝဲလၢနမဲာ်ညါဒ်န့ၣ်သိး ယွၤဧၢ.

¹⁸ ပဒၢထီၣ်လံ, ပဘၣ်တၢ်ဟုးဆါလံ, တၢ်မၤအသးဒ်ပ ဆံးစၢ်ကလံၤအသိးန့ၣ်လီၤ. ပအုၣ်က့ၤခီၣ်က့ၤထံဧိၤကီၢ် ဧိၤတသ့ဘၣ်, ဒီးပမၤလီၤဃံၤပှၤဟီၣ်ခိၣ်ဖိတသ့ဘၣ် လီၤ.

¹⁹ နပှၤသံန့ၣ်ကမူထီၣ်, ယပှၤအစိၣ်တဖၣ် ကဂဲၤဆၢ ထၢၣ်လီၤ. ဖုသံနီၣ်ထီၣ်ဒီးသးဝံၣ်တၢ်, ပှၤလၢအအိၣ်အ ဆိးလၢဟီၣ်ခိၣ်အကမူၣ်ကျါသ့ၣ်ဧၢ. အဂ့ၢ်ဒ်အံၤ, ဒ်နီၣ် ဧိၤမံၤဧိၤအပစီၤထံအသိးန့ၣ်မ့ၢ်နပစီၤထံ, ဒီးဟီၣ်ခိၣ်က ဟ့ၣ်ထီၣ်က့ၤပှၤသံတဖၣ်လီၤ.

²⁰ ဟဲ, ယပှၤဂီၢ်မုၢ်သ့ၣ်ဧၢ, လဲၤနုာ်လၢနဒၢးပူၤ, ဒီးကး တံာ်ဃာ်တြဲၤလၢနလီၢ်ခံတက့ၢ်. ပာ်ခူသူၣ်နသးတစိၢ်ဖိ တုၤတၢ်သးကဲၤထီၣ်လဲၤပူၤကွံာ်န့ၣ်တက့ၢ်.

²¹ အဂ့ၢ်ဒ်အံၤ, ကွၢ်ကွၢ်, ယွၤဟဲဝဲလၢအလီၢ်ပူၤဒ်သိးအ ကဒုးအိၣ်သကိး ပှၤဟီၣ်ခိၣ်ဖိအတၢ်ဒဲးဘးလၢအလိၤ, ဒီးဟီၣ်ခိၣ်ကလီၣ်ဖျါထီၣ်အသွံၣ်, ဒီးတကျၢၢ်ဘၢလၢၤ ဘၣ်အပှၤဘၣ်တၢ်မၤသံအီၤဘၣ်.

၂၇

¹ တၢ်လၢမုၢ်တနံၤန့ၣ် ယွၤအိၣ်ဒီးအနးအကိၤအဒိၣ်အ ဆူၣ်တဘ့ၣ်ကအိၣ်သကိး သမၣ်ဂုၢ်လဲၤချ့တၢ်တဘိန့ၣ် သမၣ်ဂုၢ်ဝံကျီၤတဘိ, ဒီးကမၤသံပယိၤတဘိလၢအ အိၣ်လၢပီၣ်လဲၣ်ပူၤန့ၣ်လီၤ.

² တၢ်လၢမုၢ်တနံၤန့ၣ် သးဝံၣ်ထီၣ်စပံးထံအစပံးလီၢ် န့ၣ်တက့ၢ်.

³ တၢ်လၢယၤယွၤအံၤယကွၢ်အီၤ, ယကမၤဘၣ်စီၣ်အီၤ ကိးပနာ်ဒဲးလီၤ. ဒ်သိးပှၤသုတမၤအၢအီၤဒီး, ယကကွၢ် လီၤအီၤလၢမုၢ်ဆါဆဲးလၢမုၢ်နၤလီၤ.

⁴ ယသးတထီၣ်လၢၤအီၤဘၣ်. မ်တၤဆှုၣ်တၤမဲန့ၣ်ပာ်အသးလၢအကဒုးတၢ်တက့ၢ်. ယကဃ့ၢ်ခီတူာ်အီၤ, ဒီး ဒုးအီၣ်အီၤလၢမ့ၣ်အူတပူၤဃီလီၤ.

⁵ မ့တမ့ၢ်ဘၣ်ဒ်န့ၣ်ဒီး, မ်အဟံးန့ၢ်ယဂံၢ်ယဘါ ဒီးမၤ တၢ်ဃူတၢ်ဖိးဒီးယၤတက့ၢ်. တၢ်ဃူတၢ်ဖိး မ်အမၤဒီး ယၤတက့ၢ်.

⁶ မုၢ်နံၤလၢအကဟဲန့ၣ်ယၤကိာ်အဂံၢ်ကစဲၤလီၤ. အံၣ်စ ရ့လးကဘိၣ်ထီၣ်, ဒီးဆှိးထီၣ်, ဒီးကမၤပှဲၤဟီၣ်ခိၣ်ဒီး တၤသၣ်လီၤ.

⁷ ဒ်ပှၤကျီအီၤအသိးန့ၣ်ကျီဝဲစ့ၢ်ကီးဧါ. ဒ်အပှၤဘၣ်တၢ် မၤသံအီၤအတၢ်မၤသံအသိးန့ၣ် ဘၣ်တၢ်မၤသံဝဲစ့ၢ်ကီး ဧါ.

⁸ နဂ့ၢ်လိာ်အီၤလၢနပျၢ်ကွံာ်အီၤအဃိန့ၣ် နမၤတၢ်လၢ အဘၣ်လီၤ. လၢကလံၤမုၢ်ထီၣ်အနံၤန့ၣ်ဒုးဟးထီၣ်ကွံာ် ဝဲလၢအကလံၤဆူၣ်န့ၣ်လီၤ.

⁹ မၤသးဒ်န့ၣ်ဒီးတုၤအပာ် တၢ်လုၢ်လီၢ်အလီၢ်ခဲလၢာ်ဒ် လၢၢ်ထူၣ်တဖၣ်လၢအလီၤကလဲအသိးဒီး, ယၤကိာ်အ တၢ်ဒဲးဘးကပူၤဖျဲးလၢတၢ်န့ၣ်အဃိ, ဒီးတၢ်န့ၣ်မ့ၢ်တၤ သၣ်ခဲလၢာ် လၢအကပျၢ်အတၢ်ကမၣ်လီၤ. ဒီးအရှ့ရၤ, ဒီး တၢ်ဂီၤဃမၣ်န့ၣ်တဂဲၤဆၢထၢၣ်လၢၤဘၣ်.

¹⁰ အဂ့ၢ်ဒ်အံၤ, ဝ့ၢ်အိၣ်ဒီးအခိၣ်ဒူတဖျၢၣ်ကအိၣ်သယုၢ်, တၢ်အိၣ်အလီၢ်လီၤပှီၢ်, ဒီးဘၣ်တၢ်လဲၤသဒၣ်အီၤဒ်ပှၢ်မုၢ် ကနၢအသိးန့ၣ်လီၤ. ဖဲန့ၣ်ဂီၤဖံးဖိကအီၣ်တၢ်, ဒီးကကိာ် လီၤဖဲန့ၣ်, ဒီးအီၣ်ကွံာ်အဒ့အဖီလီၤ.

¹¹ တုၤအဒ့အဖီဃ့ထီကွံာ်ဒီး, တၢ်ကမၤကၢ်ကွံာ်အီၤ, ပိာ်မုၣ်တဖၣ်ကဟဲဒီးဆိၣ်ကဲၤအီၤလၢမ့ၣ်အူလီၤ. မ့ၢ်ပှၤ တကလုာ်လၢအနၢ်တပၢၢ်ဘၣ်တၢ်ဘၣ်, မၤသးဒ်န့ၣ်ဒီး ပှၤတ့အီၤတဂၤတသးအိၣ်ဘၣ်အီၤ, ဒီးပှၤလၢအမၤအီၤ တဂၤန့ၣ်တသးကညီၤဘၣ်အီၤဘၣ်.

¹² ဒီးလၢမုၢ်တနံၤန့ၣ် တၢ်ကမၤအသးလၢယွၤကတီၢ် လီၤကွံာ်တၢ်လၢ ထံမိၢ်ပှၢ်အထံကျိပၢၢ်လၢအဲၤကူပတူး အထံမိၢ်ပှၢ်, ဒီးသုကဘၣ်တၢ်ထၢဖှိၣ်သုတဂၤဒီးတဂၤ လီၤ. ပှၤအံၣ်စရ့လးဖိသ့ၣ်ဧၢ.

¹³ ဒီးလၢမုၢ်တနံၤန့ၣ်တၢ်ကမၤအသးလၢတၢ်ကအူကွဲၤ ဖးဒိၣ်တဖျၢၣ်, ဒီးပှၤလၢအဟါမၢ်လၢကီၢ်အၤရှူၢ်န့ၣ်က ဟဲ, ဒီးပှၤလၢအဟးဝ့ၤဝီၤတၢ်လၢကီၢ်အဲၤကူပတူးအပူၤ န့ၣ်, ဒီးကဘူၣ်ထီၣ်ဘါထီၣ်ယွၤလၢကစၢၢ်စီဆှံအလိၤ လၢယရူၤၡလ့ၣ်အပူၤန့ၣ်လီၤ.

၂၈

¹ အ့ဖရဲၣ်အပှၤအီမူၤသံးတဖၣ် အသးထီၣ်ထီအခိၣ်သ လုးဒီးအဃံအလၤ, အလၤကပီၤအသံၣ်အဖီလီၤညွံးလၢ အအိၣ်ဝဲလၢပှၤဘၣ်တၢ်ကျီအီၤ လၢစပံးထံအကစၢၢ်က ဆူးဘီၣ်သိအခိၣ်န့ၣ်ဘၣ်အဖှီၣ်လီၤ.

² ကွၢ်ကွၢ်, တၢ်အဒိၣ်အဆူၣ်တဂၤအိၣ်ဒီးယွၤ, မၤသးဒ် ကလံၤမုၢ်အိၣ်ဒီးသူၣ်အသိး, မၤသးဒ်ကလံၤမုၢ်လၢအ မၤဟးဂီၤတၢ်အသိး, မၤသးဒ်ထံဟဲဆူၣ်လုၣ်ဘၢတၢ်အ သိးန့ၣ်မၤလီၤဃံၤဝဲလၢဟီၣ်ခိၣ်လိၤလၢအစုလီၤ.

³ အ့ဖရဲၣ်အပှၤအီမူၤသံးတဖၣ် အသးထီၣ်ထီအခိၣ်သ လုးန့ၣ် ကဘၣ်တၢ်ယီၢ်လီၤတံၢ်အီၤလၢပှၤအခီၣ်အဖီ လာ်လီၤ.

⁴ ဒီးအဃံအလၤ အလၤကပီၤ အသံၣ်အဖီလီၤညွံးလၢ အအိၣ်လၢအကစၢၢ်ကဆူးဘီၣ်သိအခိၣ်န့ၣ် ကမၤသး ဒ်ချၢၣ်ဒၢသၣ်လၢအမံဆိ တချုးတၢ်ကိၢ်ခါဘၣ်ဒံးဘၣ် တဖျၢၣ်လၢပှၤလၢအကွၢ်အီၤထံၣ်ဝဲဒီး, အိၣ်ဝဲလၢအစု ပူၤအဖၢမုၢ်န့ၣ်အီၣ်ယူၢ်လီၤကွံာ်ဝဲအသိးန့ၣ်လီၤ.

⁵ တၢ်လၢမုၢ်တနံၤန့ၣ် တၢ်သုးမုၢ်ဂီၢ်မုၢ်အယွၤကကဲ ထီၣ်တၢ်ခိၣ်သလုးအဃံအလၤ, ဒီးခိၣ်ကျီၤအလၤကပီၤ လၢအပှၤဂီၢ်မုၢ်လၢအအိၣ်လီၤတဲာ်တဖၣ်အဂီၢ်, ⁶ ဒီးတၢ် စံၣ်ညီၣ်အသးလၢ ပှၤလၢအဆ့ၣ်နီၤစံၣ်ညီၣ်တၢ်အဂီၢ်, ဒီးတၢ်အဂံၢ်အဘါလၢ ပှၤလၢအဘိးဃၣ်ကဒါတၢ်ဒုး သုးဆူပဲတရီအအိၣ်တဖၣ်အဂီၢ်န့ၣ်လီၤ.

⁷ ဒီးအဝဲသ့ၣ်တဖၣ်န့ၣ် လီၤကမၣ်စ့ၢ်ကီးလၢစပံးထံအ ဃိ, ဒီးဟးဖျိးကျဲလၢသံးအဃိလီၤ. ပှၤလုၢ်တၢ်အဒိၣ်, ဒီး ဝံလီၤကမၣ်တၢ်လၢသံးအဃိ, ဘၣ်တၢ်ယူၢ်လီၤကွံာ်အီၤ လၢစပံးထံ, ဟးဖျိးကျဲလၢသံးအဃိ, ကမၣ်တၢ်လၢအ ထံၣ်တၢ်အပူၤ, သးဒ့ဒီလၢအစံၣ်ညီၣ်တၢ်အပူၤလီၤ.

⁸ အဂ့ၢ်ဒ်အံၤ, စီၢ်နီၤခိၣ်ခဲလၢာ်ပှဲၤဒီးတၢ်ဘှိးဒီးတၢ်ဘၣ် အၢ, တၢ်ကဆှီအလီၢ်န့ၣ်တအိၣ်ဘၣ်ဝဲဘၣ်.

⁹ ကသိၣ်လိတၢ်သ့ၣ်ညါလၢမတၤလဲၣ်, ဒီးကဒုးပၢၢ်မ တၤအနၢ်လၢတၢ်နၢ်ဟူတၢ်န့ၣ်လဲၣ်. ပှၤလၢအလီၤဖှၣ်ဒီး တၢ်နုၢ်ထံ, ဒီးလီၤဖးဒီးအမိၢ်အနုၢ်ဧါ.

¹⁰ အဂ့ၢ်ဒ်အံၤ, မ့ၢ်တၢ်သိၣ်လၢတၢ်သိၣ်, တၢ်သိၣ်လၢ တၢ်သိၣ်, တဘိလၢတဘိ, တဘိလၢတဘိ, တဆံးတ က့ၢ်ဖဲအံၤ, တဆံးတက့ၢ်ဖဲန့ၣ်လီၤ.

¹¹ အဂ့ၢ်ဒ်အံၤ, ကကတိၤတၢ်ဒီးပှၤတကလုာ်အံၤလၢပျုၤ လၢအအုးအး, ဒီးတၢ်ကတိၤတကျိာ်ဒၣ်လီၤ.

¹² အဝဲဒၣ်စံးဘၣ်အီၤ, အဝဲအံၤ, မ့ၢ်တၢ်အိၣ်ဘှံးလီၤ. ဒုး အိၣ်ဘှံးပှၤတၢ်ဘှံးအသးတက့ၢ်. ဒီးအဝဲအံၤမ့ၢ်တၢ်မၤ မုာ်ထီၣ်တၢ်လီၤ. ဒီးဒိကနၣ်ဝဲန့ၣ်အသးတအိၣ်ဘၣ်.

¹³ မၤသးဒ်န့ၣ်ဒီးယွၤအကလုၢ်န့ၣ် ကဲထီၣ်လၢအဂီၢ်လၢ တၢ်သိၣ်လၢတၢ်သိၣ်, တၢ်သိၣ်လၢတၢ်သိၣ်, တဘိလၢ တဘိ, တဘိလၢတဘိ, တဆံးတက့ၢ်ဖဲအံၤ, တဆံးတ က့ၢ်ဖဲန့ၣ်, ဒ်သိးအကလဲၤတၢ်ဒီးလီၤဃံၤအီထီခိၣ်, ဒီး လီၤကၢ်ကွံာ်, ဒီးဘၣ်ပျံၤသကွီၤ, ဒီးဘၣ်တၢ်ဖီၣ်န့ၢ်အီၤ လီၤ.

¹⁴ မၤသးဒ်န့ၣ်ဒီးကနၣ်ယွၤအကလုၢ်တက့ၢ်, ပှၤလၢအ မၤတရီတပါပှၤလၢအပၢ ပှၤတကလုာ်အံၤလၢယရူၤၡ လ့ၣ်အပူၤသ့ၣ်ဧၢ.

¹⁵ မ့ၢ်သုစံး, ပမၤတ့ၢ်တၢ်အၢၣ်လီၤအီလီၤဒီးတၢ်သံ, ဒီး ပမၤတၢ်ဃူလိာ်ဒီးပျုၤပူၤဒီး, တုၤတၢ်အၢလုၣ်ဘၢခီဂာ် ကွံာ်တၢ်ဒီး, တဟဲဘၣ်ပှၤဘၣ်. အဂ့ၢ်ဒ်အံၤ, ပပာ်တၢ်က ဘျံးကဘျၣ်လၢပအိၣ်တဒၢအလီၢ်, ဒီးပပာ်ခူသူၣ်ပသး လၢလီတၢ်အပူၤလီၤ.

¹⁶ မၤသးဒ်န့ၣ်ဒီးကစၢ်ယွၤစံးဝဲဒ်အံၤ, ကွၢ်ကွၢ်, ယပာ် လီၤလၢၢ်တဖျၢၣ်, လၢၢ်လၢအဘၣ်တၢ်မၤကွၢ်အီၤတ ဖျၢၣ်, တၢ်သနၢၣ်အလၢၢ်, လၢအပှ့ၤဒိၣ်တဖျၢၣ်, တၢ်အ ခီၣ်ထံးအိၣ်ဂၢၢ်ဆိးကျၢၤလၢစံယိၣ်အပူၤလီၤ. ပှၤလၢအ နာ်တၢ်န့ၣ်တမၤဘၣ်တၢ်ချ့ချ့ဘၣ်.

¹⁷ ဒီးယကပာ်တၢ်စံၣ်ညီၣ်လၢပျံၤတဘိအလီၢ်, ဒီးတၢ် တီတၢ်လိၤ လၢတၢ်အဖျၢၣ်လီၤစဲၤအလီၢ်, ဒီးသူၣ်က တြူာ်ကွံာ်တၢ်ကဘျံးကဘျၣ်အအိၣ်တဒၢအလီၢ်, ထံ ကလုၣ်ဘၢတၢ်အိၣ်ခူသူၣ်အလီၢ်န့ၣ်လီၤ.

¹⁸ သုတၢ်အၢၣ်လီၤအီလီၤ ဒီးတၢ်သံန့ၣ်ကတုၤလၢတၢ် ဟးဂီၤ, ဒီးသုတၢ်မၤဃူလိာ်ဒီးပျုၤပူၤန့ၣ်တအိၣ်ဂၢၢ်ဆိး ကျၢၤဘၣ်. တုၤတၢ်အၢလုၣ်ဘၢကွံာ် တၢ်ခီဂာ်တၢ်ဒီး, သုကဘၣ်တၢ်ယီၢ်တံၢ်လၢအီၤလီၤ.

¹⁹ ဒီးတုၤအခီဂာ်တၢ်ဒီး, ကထုးထီၣ်ကွံာ်သုလီၤ. တဂီၤ ဘၣ်တဂီၤန့ၣ်ကခီဂာ်တၢ်, လၢမုၢ်ဆါဒီးလၢမုၢ်နၤ, ဒီး တၢ်နၢ်ပၢၢ်တၢ်အကစီၣ်န့ၣ်မ့ၢ်ထဲတၢ်ကိၢ်တၢ်ဂီၤလီၤ.

²⁰ အဂ့ၢ်ဒ်အံၤ, တၢ်အလီၢ်မံလၢပကစူၣ်လီၤပသးလၢအ ဖီခိၣ်န့ၣ်ဖုၣ်ကဲၣ်ဆိး, ဒီးယၣ်လၢပကလုးအီၤလၢပလိၤ န့ၣ်အံၣ်ကဲၣ်ဆိးလီၤ.

²¹ အဂ့ၢ်ဒ်အံၤ, ဒ်လၢကစၢၢ်ပရၤစံၣ်အသိးန့ၣ်ယွၤကဂဲၤ ဆၢထၢၣ်ဒ်လၢကံးဘိၣ် အကစၢၢ်ကဆူးအသိးန့ၣ်အ သးကထီၣ်, ဒ်သိးအကမၤအတၢ်မၤ, အတၢ်မၤလီၤဆီ, ဒီးဒ်သိးအကမၤအတၢ်မၤလီၤဆီလီၤကျဲလီၤ.

²² ဒီးခဲကနံၣ်အံၤဒုၣ်ဒွဲၣ်တၢ်တဂ့ၤ. သုပျံၤစၢဃာ်တၢ်န့ၣ် ကဆူၣ်ထီၣ်ဘၣ်ဖုးလီၤ. အဂ့ၢ်ဒ်အံၤ, တၢ်မၤလိာ်တၢ်မၤ လၢာ်ဟီၣ်ခိၣ်ဒီဘ့ၣ်ညါန့ၣ် ယနၢ်ဟူလၢကစၢ်တၢ်သုး မုၢ်အယွၤလီၤ.

²³ ဒိးသုနၢ်, ဒီးကနၣ်ယကလုၢ်, ဒိကနၣ်ဒီးကနၣ်ယတၢ် ကတိၤတက့ၢ်. ²⁴ ပှၤထဲၣ်တၢ်ဖိန့ၣ်မ့ၢ်အထဲၣ်တၢ်ကိးမုၢ် နံၤဒဲးဒ်သိးအကဖှံတၢ်ဧါ. အိးထီၣ်ဒီးမၤဘျဲးအဟီၣ်ခိၣ် အကိၢ်လိၣ်တဖၣ်စ့ၢ်ကီးဧါ.

²⁵ တုၤအမၤဃူအလိၤဝံၤဒီး, ဖှံစမုၣ်သူ, မၤပြံပြါစံယၤ, ဒီးပာ်ဘုကၠူၣ်လၢတကျိၤတကျိၤအပူၤ, ဒီးဘုမုယီၤလၢ အတၢ်ပနီၣ်, ဒီးဘုကူးစမ့းလၢအဃၢၤန့ၣ် တမ့ၢ်ဘၣ် ဧါ. ²⁶ အဂ့ၢ်ဒ်အံၤ, သိၣ်လိအီၤလၢတၢ်စံၣ်ညီၣ်, အကစၢ် သိၣ်လိအီၤလီၤ.

²⁷ အဂ့ၢ်ဒ်အံၤ, ပှၤဘၣ်ယီၢ်စမုၣ်သူလၢကရၢ်, ဒီးထုးလ့ၣ် ကဟၣ်အပၣ်လၢစံယၤအဖီခိၣ်န့ၣ်တမ့ၢ်ဘၣ်. အဂ့ၢ်ဒ် အံၤ, ပှၤဘၣ်တီၢ်စမုၣ်သူလၢနီၣ်တီၢ်, ဒီးစံယၤလၢနီၣ်ထိး ဘိန့ၣ်လီၤ.

²⁸ ဘုဧိၤဟုဧိၤန့ၣ် ပှၤဘၣ်မၤသဘှံးအီၤ လၢကိၣ်အဂီၢ် လီၤ. အဂ့ၢ်ဒ်အံၤ, တတီၢ်ဘၣ်ဝဲတထံၣ်ဃီဘၣ်. ဒီးထုးအ လ့ၣ်ကဟၣ်အပၣ်လၢအဖီခိၣ်လီၤ. မ့မ့ၢ်လၢအကသ့ၣ် တမံၤန့ၣ်တမၤသဘှံးဘၣ်အီၤဘၣ်.

²⁹ တၢ်န့ၣ်ဟဲထီၣ်စ့ၢ်ကီးလၢ တၢ်သုးမုၢ်ဂီၢ်မုၢ် အယွၤ လီၤ. အဝဲဒၣ်လီၤလးလၢအကူၣ်တၢ်, ဒီးဂ့ၤဝဲလၢအမၤ တၢ်လီၤ.

၂၉

¹ အၣ်လါ, အရံၤအ့လး, အရံၤအ့လး, ဝ့ၢ်ဖဲစီၤဒၤဝံး သူၣ်အဒဲလီၤ. ပာ်ဖှိၣ်တနံၣ်ဒီးတနံၣ်, မ်တၢ်မၤဘူၣ်နံၤ တဖၣ်လဲၤတရံးတၢ်တက့ၢ်.

² ဒီးယကမၤနးမၤဖှီၣ်အရံၤအ့လး, ဒီးတၢ်သူၣ်အုးသး, အုး, ဒီးတၢ်သူၣ်ကိၢ်သးဂီၤကအိၣ်, ဒီးအဝဲဒၣ်ကအိၣ် လၢယဂီၢ်ဒ်အရံၤအ့လးအသိးန့ၣ်လီၤ.

³ ဒီးယကသူၣ်ဒဲကဝီၤဃာ်နၤ, ဒီးဒုးနၤလၢ တိာ်တ ဖျၢၣ်, ဒီးကမၤထီၣ်တၢ်ခိၣ်ဒူဟီၣ်ခိၣ်တဖၣ် လၢနမဲာ် ညါလီၤ.

⁴ ဒီးနကဘၣ်တၢ်ဆီၣ်လီၤနၤ, ဒီးနကကတိၤတၢ်လၢ ဟီၣ်ခိၣ်အပူၤ, ဒီးနကလုၢ်ကအိၣ်လၢ တၢ်ဖီလာ်လၢ ဟီၣ်ခိၣ်အကမူၣ်အကျါ, ဒီးနကလုၢ်ကမၤသးဒ်ပှၤအိၣ် ဒီးပှၤသံအကလၤအကလုၢ်အသိးန့ၣ်, နကကတိၤတၢ် ကသွံဒံလၢဟီၣ်ခိၣ်အပူၤ, ဒီးလၢဟီၣ်ခိၣ်အကမူၣ်အပူၤ လီၤ.

⁵ ဒီးနပှၤတခီဘီမုၢ်ဖိဂီၢ်မုၢ်န့ၣ် ကမၤသးဒ်ဟီၣ်ခိၣ်အက မူၣ်ပြံကဒံအသိးန့ၣ်, ဒီးနပှၤမၤပျံၤမၤဖုးတၢ်န့ၣ်ကမၤ သးဒ်ဖ့ဧိၤဃာ်ဧိၤလၢအလဲၤပူၤကွံာ်အသိးန့ၣ်လီၤ. ဒီးက မၤသးလၢ တၢ်တစိၢ်ဖိအတီၢ်ပူၤန့ၣ် သတူၢ်ကလာ် လီၤ. ⁶ လၢတၢ်သုးမုၢ်ဂီၢ်မုၢ်အယွၤအမဲာ်ညါန့ၣ် တၢ်က အိၣ်သကိးဝဲလၢလီသီၣ်, ဒီးဟီၣ်ခိၣ်ဟူးဝး, ဒီးတၢ်အ သီၣ်ဖးဒိၣ်, ဒီးကလံၤမုၢ်, ဒီးကလံၤမုၢ်တွၤ, ဒီးမ့ၣ်လၣ် လၢအအီၣ်တၢ်လီၤ.

⁷ ဒီးပှၤကလုာ်ခဲလၢာ် အဂီၢ်မုၢ်လၢအဒုးသုးဒီးအရံၤအ့ လး, ကယဲၢ်ပှၤဒၣ်လဲာ်လၢအဒုးသုးဒီးအီၤ, ဒီးအဝ့ၢ်ခိၣ်ဒူ ဒီးမၤကိၢ်မၤဂီၤအီၤ, ကမၤအသးဒ်တၢ်မံမီၢ်, တၢ်ထံၣ်တၢ် လၢညါခီလၢမုၢ်နၤအသိးန့ၣ်လီၤ.

⁸ ဒီးကမၤအသးဒ် ပှၤတၢ်သၣ်ဝံၤအသးန့ၣ်မံမီၢ်တၢ်အ သိးန့ၣ်, ဒီးကွၢ်ကွၢ်, အီၣ်ဝဲ, ဒီးဖုသံနီၣ်ဝဲ, ဒီးအသးအိၣ်က လီဒၣ်တၢ်လီၤ. ဒီးမၤသးဒ်ပှၤတၢ်သူအသးလၢထံန့ၣ်မံ မီၢ်တၢ်အသိးန့ၣ်, ဒီးကွၢ်ကွၢ်, အီဝဲ, ဒီးဖုသံနီၣ်ဝဲ, ဒီးကွၢ် ကွၢ်, အသးလီၤဘှါဝဲ, ဒီးအသးဆၢန့ၢ်တၢ်လီၤ. ပှၤက လုာ်ခဲလၢာ်အဂီၢ်မုၢ်လၢ အဒုးသုးဒီးကစၢၢ်စံယိၣ်ကဒ် န့ၣ်သိးလီၤ.

⁹ စံး, ဒ်လဲၣ်ဒ်လဲၣ်, ဒီးသးကတုၤတက့ၢ်. သူၣ်ဖှံသးညီ, ဒီးအိၣ်မဲာ်ဘျီၣ်တက့ၢ်. အဝဲသ့ၣ်အီမူၤအသး, ဘၣ်ဆၣ် ဒီးလၢစပံးထံတမ့ၢ်ဘၣ်. လဲၤတၢ်ကလိာ်ကလီၢ်, ဘၣ် ဆၣ်ဒီးလၢသံးအဃိတမ့ၢ်ဘၣ်. ¹⁰ အဂ့ၢ်ဒ်အံၤ, ယွၤလူလီၤ တၢ်မံသပ့ၤအသးလၢသုလိၤ, ဒီးမၤဘံၣ်သုမဲာ်, ဝံတဖၣ် ဒီးသုးခိၣ်တဖၣ်, ပှၤထံၣ်တၢ်တဖၣ်န့ၣ်လုၣ်ဘၢဝဲလီၤ.

¹¹ ဒီးတၢ်ထံၣ်တၢ်လၢညါခီခဲလၢာ်န့ၣ် အိၣ်ဒီးသုမၤသး ဒ်တၢ်ကွဲးအသးလၢ အဘၣ်တၢ်စဲဃာ်ပနီၣ်အသိးလၢ ပှၤဟ့ၣ်လီၤပှၤတဂၤလၢအဖးလံာ်သ့, ဒီးစံးဘၣ်အီၤ, ဖး လၢ်တၢ်အံၤတက့ၢ်. ဒီးစံးဆၢဝဲ, ယဖးတသ့ဘၣ်, အဂ့ၢ်ဒ် အံၤ, ဘၣ်တၢ်စဲပနီၣ်ဃာ်လီၤ.

¹² ဒီးပှၤဟ့ၣ်လီၤ တၢ်ကွဲးအသးလၢ ပှၤလၢအဖးလံာ် တသ့ဘၣ်ဒီးစံးဝဲ, ဖးလၢ်တၢ်အံၤတက့ၢ်, ဒီးစံးဝဲဒၣ်, ယ ဖးလံာ်တသ့ဘၣ်.

¹³ ဒီးယွၤစံးဝဲဒၣ်, မ့ၢ်ပှၤဂီၢ်မုၢ်အံၤ သုးဘူးအသးဆူယ အိၣ်လၢအထးခိၣ်, ဒီးမၤလၤကပီၤယၤလၢအပျုၤ, ဘၣ် ဆၣ်ဒီးပာ်အသးယံၤဒီးယၤ, ဒီးအတၢ်ပျံၤယၤန့ၣ်မ့ၢ်ပှၤ ကညီအတၢ်သိၣ်လၢပှၤမၤလိအီၤ, ¹⁴ မၤသးဒ်န့ၣ်ဒီးယက မၤဒံးပှၤဂီၢ်မုၢ်လီၤဆီဒၣ်တၢ်, လီၤဆီဒိၣ်မး, ဒီးပှၤကူၣ် တၢ်သ့အတၢ်ကူၣ်သ့ကဟးဂီၤ, ဒီးပှၤကူၣ်တၢ်ဘၣ်အ တၢ်ကူၣ်တၢ်ဘၣ်ကဟါမၢ်လီၤ.

¹⁵ ပှၤလၢအလဲၤတၢ်ယိာ်ဒ်သိး အကပာ်ခူသူၣ်တၢ်ကူၣ် တၢ်ဖးလၢယွၤ, ဒီးအမၤတၢ်အိၣ်ဝဲလၢတၢ်ခံးကျါ, ဒီးစံး ဝဲ, မ့ၢ်မတၤထံၣ်ဘၣ်ပှၤလဲၣ်, ဒီးမ့ၢ်မတၤသ့ၣ်ညါပှၤလဲၣ် န့ၣ်ဘၣ်အဖှီၣ်လီၤ.

¹⁶ သုပာ်ခိၣ်ခံတၢ်မးလဲၣ်, တၢ်ကပာ်ပှၤတ့သပၢၤဒ်အ ကပံာ်အသိးန့ၣ်, ဒ်သိးတၢ်ဘၣ်တ့အီၤန့ၣ်ကစံးလၢတၢ် လၢအတ့အီၤအဂ့ၢ်, တတ့ဘၣ်ယၤဘၣ်, ဒီးတၢ်လၢအဘၣ်တၢ်မၤအီၤန့ၣ် ကစံးလၢတၢ်လၢအမၤအီၤအဂ့ၢ်န့ၣ် အနၢ်ပၢၢ်တသ့ဘၣ်န့ၣ်ဧါ.

¹⁷ တစိၢ်ဖိပူၤကွံာ်ဒီးလဘၤနိၣ် ကကဲထီၣ်ဟီၣ်ခိၣ်အက ဝီၤလၢအသၣ်ထီၣ်တၢ်, ဒီးဟီၣ်ခိၣ်အကဝီၤလၢအသၣ် ထီၣ်တၢ်န့ၣ်ကကဲထီၣ်ပှၢ်ဒိၣ်လာ်န့ၣ်တမ့ၢ်ဘၣ်ဧါ.

¹⁸ ဒီးတၢ်လၢမုၢ်တနံၤန့ၣ် ပှၤနၢ်တအၢန့ၣ်ကနၢ်ဟူလံာ် အကလုၢ်, ဒီးပှၤအမဲာ်ဘျီၣ်ကထံၣ်တၢ်လၢတၢ်ခံးကျါ, ဒီးတၢ်ခံးသူအကျါလီၤ.

¹⁹ ဒီးပှၤအသးစူၤန့ၣ် ဒံးယံာ်ကဒံး သးခုလၢယွၤအပူၤ, ဒီးပှၤဖှီၣ်ဖိယာ်ဖိလၢ ပှၤကညီအကျါန့ၣ် ကသူၣ်ဖှံသး ညီလၢအံၣ်စရ့လးအတၢ်စီဆှံတဂၤအပူၤလီၤ.

²⁰ အဂ့ၢ်ဒ်အံၤ, ပှၤမၤန့ၢ်ဆူၣ်တၢ်န့ၣ်လၢာ်ကွံာ်, ဒီးပှၤဒုၣ် ဒွဲၣ်တၢ်တအိၣ်လၢၤဘၣ်, ဒီးပှၤကွၢ်ဟုၣ်တၢ်မၤတတီ ဘၣ်န့ၣ်ဘၣ်တၢ်ဒီၣ်တဲာ်ကွံာ်ခဲလၢာ်လီၤ. ²¹ ပာ်ပှၤလၢ ပှၤမၤကမၣ်တၢ်ဖိလၢတၢ်ကတိၤတဘီအဃိ, ဒီးပာ်ပျံၤ သကွီၤလၢပှၤလၢအလိာ်ကွီၢ်လၢပဲတရီအဂီၢ်, ဒီးဘိး ဃၣ်ကပၤပှၤတီပှၤလိၤလၢတၢ်လီတၢ်ဝ့ၤလီၤ.

²² မၤသးဒ်န့ၣ်ဒီးယွၤစံးဘၣ်ယၤကိာ်အပှၤဟံၣ်ဖိ, ပှၤ လၢအပှ့ၤက့ၤ စီၤအၤဘြၤဟၣ်စံးဒ်အံၤ, တမ့ၢ်ဘၣ်ယၤ ကိာ်ကမဲာ်ဆှးခဲကနံၣ်အံၤဘၣ်, ဒီးတမ့ၢ်ဘၣ်အမဲာ်က လီၤဝါထီၣ်ခဲကနံၣ်အံၤဘၣ်.

²³ မ့မ့ၢ်, တုၤအထံၣ်ဘၣ်အဖိ, တၢ်မၤလၢယစု, လၢအ ကျါဒီး, ကပာ်စီဆှံယမံၤ, ဒီးပာ်စီဆှံစီၤယၤကိာ်အတၢ်စီ ဆှံ, ဒီးကပျံၤအံၣ်စရ့လးအကစၢ်န့ၣ်လီၤ. ²⁴ ဒီးပှၤလၢအ သးဟးဖျိးတၢ်န့ၣ်ကသ့ၣ်ညါတၢ်ကူၣ်သ့, ဒီးပှၤလၢအ ကဒူးကဒ့ၣ်တၢ်, ကမၤလိတၢ်လီၤ.

၃၀

¹ ဖိတဖၣ်လၢအပူထီၣ်န့ၣ်ဘၣ်အဖှီၣ်လီၤ, ယွၤစံးဝဲဒၣ်, ပှၤလၢအကူၣ်ထီၣ်တၢ်, ဘၣ်ဆၣ်ဒီးတဟဲဘၣ်လၢယၤ ဘၣ်, ဒီးကျၢၢ်ဘၢဝဲလၢတၢ်ကျၢၢ်ဘၢ, ဘၣ်ဆၣ်ဒီး, တမ့ၢ် ဘၣ်လၢယသးဘၣ်, ဒ်သိးအကပာ်ဖှိၣ်တၢ်ဒဲးဘးလၢ တၢ်ဒဲးဘး, ² ပှၤလၢအလဲၤလီၤဆူအဲၤကူပတူး, ဒီးတဃ့ ဘၣ်တၢ်လၢယထးခိၣ်ဘၣ်, ဒ်သိးအကအိၣ်တဒၢလၢ ဖၤရိၤအဂံၢ်အဘါအပူၤ, ဒီးသန့ၤအသးလၢအဲၤကူပတူး အကဒုပူၤလီၤ.

³ ဒီးအဲၤကူပတူးအဂံၢ်အဘါန့ၣ် ကကဲထီၣ်တၢ်မဲာ်ဆှး လၢသုဂီၢ်, ဒီးတၢ်သန့ၤသုသးလၢအဲၤကူပတူးအကဒု န့ၣ်ကပာ်မဲာ်ဆှးသုလီၤ. ⁴ အဂ့ၢ်ဒ်အံၤ, အပဒိၣ်တဖၣ် အိၣ်ဝဲလၢစိၤဧၣ်အပူၤ, ဒီးအကလူးတဖၣ်ဟဲတုၤဝဲလၢ ဃါန့ၤလီၤ. ⁵ အဝဲသ့ၣ်ခဲလၢာ်အမဲာ်ကဆှးလၢပှၤတက လုာ်လၢအတဂိာ်တသီၣ်ဘၣ်လၢအဂီၢ်န့ၣ်, ပှၤတက လုာ်လၢအတမ့ၢ်ဘၣ်လၢတၢ်မၤစၢၤအဂီၢ်, တမ့ၢ်ဘၣ် လၢတၢ်အဘျုးအဂီၢ်ဘၣ်. မ့ၢ်ဝဲလၢတၢ်မဲာ်ဆှးအဂီၢ်, ဒီး လၢတၢ်ဒုၣ်ဒွဲၣ်အလီၢ်စ့ၢ်ကီးအဂီၢ်လီၤ.

⁶ ဆၣ်ဖိကီၢ်ဖိအိၣ်ဒီး အတၢ်ပဒၢးတဖၣ်လဲၤဆူကလံၤ ထံးလၢတၢ်ကိၢ်တၢ်ဂီၤဒီးတၢ်နးတၢ်ဖှီၣ်အကီၢ်ပူၤ, ဖဲခ့ ယုၢ်မိၢ်, ဒီးခ့ယုၢ်ပှၢ်, ဒီးဂုၢ်ပွ့, ဒီးဂုၢ်မ့ၣ်လၢအယူၤအိၣ်ဝဲ လီၤ. စိာ်ဝဲအစုလီၢ်အခီၣ်ခိၣ်လၢကသ့ၣ်ယီၤဖိအဖံဘၣ် ခိၣ်, အတၢ်လုၢ်ဒိၣ်ပှ့ၤဒိၣ်လၢကီၤလၤအူးအချၢသကူၣ် အဖီခိၣ်ဆူပှၤတကလုာ်လၢ အတဂိာ်တသီၣ်ဘၣ်လၢ အဂီၢ်လီၤ.

⁷ ဒီးပှၤအဲၤကူပတူးဖိကမၤစၢၤတၢ်ကလီကလီ, ဒီးတ ဂိာ်တသီၣ်ဘၣ်နီတမံၤဘၣ်လီၤ. မၤသးဒ်န့ၣ်ဒီးယကိး အီၤလၢရၤဃးလၢအဆ့ၣ်နီၤအိၣ်ဃိကလာ်န့ၣ်လီၤ.

⁸ ဒီးခဲကနံၣ်အံၤ, လဲၤ, ကွဲးတၢ်လၢအမဲာ်ညါလၢတၢ် ဘ့ၣ်ဘၣ်အလိၤ, ဒီးကွဲးအီၤလၢလံာ်ပူၤ, ဒီးမ်အအိၣ်လၢ အနံၤအသီဆူညါအဂီၢ်, လၢအစိၤ အဃၣ်လီၤထူလီၤ ယိာ်အဂီၢ်န့ၣ်တက့ၢ်.

⁹ အဂ့ၢ်ဒ်အံၤ, အဝဲအံၤမ့ၢ်ပှၤပူထီၣ်တၢ်ဖိတကလုာ်, ဖိ သၣ်လၢအကတိၤတၢ်ကဘျံးကဘျၣ်, ဖိသၣ်လၢအဒိ ကနၣ်ယွၤကလုၢ်အသးတအိၣ်ဘၣ်. ¹⁰ မ့ၢ်ပှၤလၢအစံး လၢပှၤလၢအထံၣ်တၢ်လၢညါခီ, ထံၣ်တၢ်တဂ့ၤ, ဒီးလၢ ပှၤလၢအကွၢ်တၢ်တဖၣ်, ကွၢ်တၢ်အလိၤလၢပဂီၢ်တဂ့ၤ.

¹¹ ကတိၤဒီးပှၤလၢတၢ်ကတိၤမုာ်, ကွၢ်လီတၢ်တက့ၢ်. ဟး ဖျိးကျဲမုၢ်, လဲၤကပၤကပၤလၢကျဲဖိ, မၤဒ်သိးအံၣ်စရ့လး အတၢ်စီဆှံအသုတအိၣ်လၢပမဲာ်ညါတဂ့ၤန့ၣ်တက့ၢ်.

¹² မၤသးဒ်န့ၣ်ဒီးအံၣ်စရ့လးအတၢ်စီဆှံစံးဒ်အံၤ, မ့ၢ်သု ညိကွံာ်တၢ်ကတိၤအံၤ, ဒီးသန့ၤသုသးလၢတၢ်မၤအၢဒီး တၢ်အနၢ်က့ၣ်, ဒီးသုပတဲၢ်သုသးလၢအီၤ, ¹³ မၤသးဒ်န့ၣ် ဒီးတၢ်မၤအၢအံၤကမၤသးဒ်တၢ်လၢ အကဘၢၣ်ဖျိတ့ၢ်, လီၤပှီၢ်တ့ၢ်, လၢအကဖိထီၣ်လၢတၢ်အဒူၣ်ထီအလိၤလၢ အကလီၤပှီၢ်သတူၢ်ကလာ် လၢတစိၢ်ဖိအတီၢ်ပူၤအသိး န့ၣ်လီၤ.

¹⁴ ဒီးကလီၤကလဲဝ ဲဒ်ပှၤတ့သပၢၤဖိအသပၢၤလီၤကလဲ ဝဲ, ဒီးတၢ်တသးလီဘၣ်အသိး, ဒီးပှၤတထံၣ်န့ၢ်ဘၣ်သ ပၢၤက့လၢ ပကထၢထီၣ်မ့ၣ်အူလၢဖၣ်ကပူၤ, ဒီးဒၢၣ် ထီၣ်ထံလၢနိၣ်ပူၤလၢအက့အခီအကျါဘၣ်.

¹⁵ အဂ့ၢ်ဒ်အံၤ, ကစၢ်ယွၤ, အံၣ်စရ့လးအတၢ်စီဆှံတဂၤ န့ၣ်စံးဒ်အံၤ, လၢသုဃၣ်လိၤသုသးဒီးအိၣ်ဘှံးန့ၣ်သုက တုၤလၢတၢ်အုၣ်က့ၤခီၣ်က့ၤ, လၢသုအိၣ်ဃိကလာ်, ဒီး သန့ၤသုသးန့ၣ် မ့ၢ်သုဂံၢ်သုဘါလီၤ. ဒီးသုသးတအိၣ် ဘၣ်. ¹⁶ ဒီးသုစံး, တမ့ၢ်ဘၣ်. အဂ့ၢ်ဒ်အံၤ, ပကဃ့ၢ်ဒိးက သ့ၣ်လီၤ. မၤသးဒ်န့ၣ်ဒီးမ့ၢ်မးသုကဃ့ၢ်လီၤ. ဒီးပကဒိး တၢ်လဲၤချ့လီၤ. မၤသးဒ်န့ၣ်ဒီးပှၤလၢအလူၤသုတဖၣ်က လဲၤတၢ်ချ့လီၤ.

¹⁷ ပှၤတကထိကဃ့ၢ်လၢ ပှၤတဂၤသိၣ်ဃီၣ်တၢ်အဃိ, ဒီးလၢပှၤအသိၣ်ဃီၣ်တၢ်ယဲၢ်ဂၤအမဲာ်ညါန့ၣ်သုကဃ့ၢ် တုၤသုအိၣ်လီၤတဲာ်ဒ် သ့ၣ်တထံးလၢကစၢၢ်ဒီခိၣ်န့ၣ်, ဒီးဒ်တၢ်အပနီၣ်လၢတၢ်စိခိၣ်အသိးန့ၣ်လီၤ.

¹⁸ ဒီးမၤသးဒ်န့ၣ် ဒီးယွၤကအိၣ်ခိးဒ်သိးအကသးကညီၤ သု, ဒီးမၤသးဒ်န့ၣ်ဒီးကဂဲၤဆၢထၢၣ်ဒ်သိးအကသးအိၣ် သုလီၤ. အဂ့ၢ်ဒ်အံၤ, ယွၤမ့ၢ်တၢ်စံၣ်ညီၣ်အကစၢ်လီၤ. ပှၤ လၢအကွၢ်လၢ်အကျဲန့ၣ်ဘၣ်ဆိၣ်ဂ့ၤခဲလၢာ်လီၤ.

¹⁹ အဂ့ၢ်ဒ်အံၤ, ပှၤဂီၢ်မုၢ်ကအိၣ်ဝဲဆိးဝဲလၢစံယိၣ်လၢယ ရူၤၡလ့ၣ်အပူၤလီၤ. နမဲာ်ထံတလီၤလၢၤဘၣ်. လၢနဃ့ၢ် တၢ်အသီၣ်အဃိ ကသူၣ်ကညီၤ ကသးကညီၤနၤလီၤ. တုၤအနၢ်ဟူတၢ်ဒီး, ကစံးဆၢတၢ်လီၤ.

²⁰ ဒီးယွၤဟ့ၣ်လီၤသုလၢတၢ်နးတၢ်ဖှီၣ်အကိၣ်, ဒီးတၢ် မၤအၢမၤသီအထံ, ဘၣ်ဆၣ်ဒီးနသရၣ်တဖၣ်တပာ်ခူ သူၣ်လၢၤဘၣ်အသးဘၣ်, မ့မ့ၢ်နမဲာ်ကထံၣ်ဘၣ်နသ ရၣ်တဖၣ်လီၤ.

²¹ ဒီးနနၢ်ကနၢ်ဟူတၢ်ကတိၤလၢနလီၢ်ခံန့ၣ်စံးဝဲ, အဝဲ အံၤမ့ၢ်ကျဲန့ၣ်လီၤ. လဲၤတၢ်လၢအပူၤတက့ၢ်, ဖဲသုက ဃၣ်ဆူစုထွဲ, ဒီးဖဲသုကဃၣ်ဆူစုစ့ၣ်န့ၣ်လီၤ.

²² ဒီးသုကမၤဘၣ်အၢနတၢ်ဂီၤစ့အတၢ်ကျၢၢ်ဘၢ, ဒီးန တၢ်ဂီၤထူအနီၣ်ကျၢၢ်ဃာ်, ဒီးနကမၤလီၤပြံလီၤပြါအီၤဒ် တၢ်သးဘၣ်အၢအသိးန့ၣ်လီၤ. ဟးတ့ၢ်, နကစံးဘၣ်အီၤ လီၤ.

²³ ဒီးကဟ့ၣ်လီၤတၢ်စူၤလၢ နတၢ်ချံလၢ နကဖှံအီၤလၢ ဟီၣ်ခိၣ်အဂီၢ်, ဒီးတၢ်အီၣ်လၢဟီၣ်ခိၣ်ဟ့ၣ်ဝဲန့ၣ်ကဘီၣ် သိ, ဒီးဝံၣ်ဝဲလီၤ. တၢ်လၢမုၢ်တနံၤန့ၣ် နဆၣ်ဖိကီၢ်ဖိက အီၣ်တၢ်လၢတၢ်အီၣ်ဆၣ်အလီၢ်ဖးလဲၢ်အပူၤလီၤ.

²⁴ ဒီးဂီၤဖံး, ဒီးကသ့ၣ်ယီၤလၢ အမၤဟီၣ်ခိၣ်တဖၣ်က အီၣ်တၢ်အီၣ်ဃါဃုာ်ဒီးအံသၣ်လၢ ပှၤဂုၤဝဲလၢ နီၣ်ဂုၤ ဃၤ, ဒီးကီၢ်လဲၢ်န့ၣ်လီၤ.

²⁵ ဒီးလၢတၢ်မၤသံဖးဒိၣ်အမုၢ်နံၤန့ၣ်, တုၤတိာ်ဧိၤတာ် ဧိၤလီၤပှီၢ်ဝဲဒီး, ထံမိၢ်ပှၢ်ဒီးထံဖိကျိတဖၣ်ကအိၣ်ဝဲလၢ ကယဲၢ်ကစၢၢ်ထီအလိၤ, ဒီးလၢကယဲၢ်တၢ်စိခိၣ်ထီအ လိၤကိးဖျၢၣ်ဒဲးလီၤ.

²⁶ ဒီးမုၢ်တနံၤ လၢယွၤဘိၣ်ထီၣ် အပှၤတကလုာ်အပူၤ လီၢ်, ဒီးမၤဘျါက့ၤအဘၣ်တီၢ်အလီၢ်န့ၣ်လါအတၢ်က ပီၤကမၤသးဒ်မုၢ်အတၢ်ကပီၤအသိး, ဒီးမုၢ်အတၢ်ကပီၤ ကအါထီၣ်နွံစး, ဒ်မုၢ်နွံနံၤအတၢ်ကပီၤအသိးန့ၣ်လီၤ.

²⁷ ကွၢ်ကွၢ်, ယွၤအမံၤဟဲလၢအယံၤ, အသးထီၣ်ကဲၤထီၣ် မ့ၣ်အူခုၣ်ထီၣ်ဝဲလီၤ. အပျုၤပှဲၤဒီးသးထီၣ်, အပျ့ၤမၤသးဒ် မ့ၣ်အူလၢအအီၣ်တၢ်အသိးန့ၣ်လီၤ.

²⁸ ဒီးအသါမၤသးဒ်ထံကျိဆူၣ်လၢ အလုၣ်ဘၢအနံၤအ သိးန့ၣ်, ကထီၣ်တုၤလၢပှၤအကိာ်, ဒ်သိးအကဂံၤဂုၤပှၤ ကလုာ်တဖၣ်လၢတၢ်ကဘျံးကဘျၣ်အနီၣ်ဂုၤ, ဒီးထး အ့ၣ်ပျံၤဆှၢကမၣ် တၢ်လၢပှၤဂီၢ်မုၢ်အခၣ်ဃံအလိၤန့ၣ် လီၤ.

²⁹ တၢ်သးဝံၣ်ကအိၣ်ဒီးသု ဒ်မုၢ်တနၤလၢ တၢ်ပာ်စီဆှံ တၢ်မၤဘူၣ်အသိးန့ၣ်, ဒီးတၢ်သူၣ်ခုသးခုမၤသးဒ်ပှၤလဲၤ တၢ်ဒီးပံဧိၤတြၤဧိၤအသီၣ်, ဒ်သိးအကလဲၤထီၣ်ဘးယွၤ အကစၢၢ်, ဆူအံၣ်စရ့လးအလၢၢ်အအိၣ်အသိးန့ၣ်လီၤ.

³⁰ ဒီးယွၤကဒုးနၢ်ဟူအကလုၢ်အကဟုအကညီၢ်, ဒီးက ဒုးထံၣ်ဘၣ်အစုဟဲလီၤအိၣ်ဒီးသးထီၣ်ကဲၤထီၣ်, ဒီးမ့ၣ် လၣ်လၢအအီၣ်တၢ်, ဒီးကလံၤမုၢ်တွၤအတၢ်စူၤဒီးသူၣ် အလၢၢ်လီၤ.

³¹ အဂ့ၢ်ဒ်အံၤ, ပှၤအၤရှူၢ်ဖိ ကကၢ်လီၤဝဲလၢယွၤအက လုၢ်အဃိ, ကတီၢ်ဝဲလၢနီၣ်တီၢ်လီၤ.

³² ဒီးနီၣ်တီၢ်လၢ အတိာ်အသး တဘိအတၢ်တီၢ်တဘီ လၢ်လၢ်လၢယွၤပာ်လၢအလိၤန့ၣ်ကအိၣ်ဒီးဒၢဧိၤမိၤဧိၤ, ဒီးတနၢ်တဖီ, ဒီးလၢတၢ်ဒုးသုးလိာ်အသးဆူၣ်ဆူၣ်က လဲာ်န့ၣ်ကဒုးလိာ်အသးဒီးအီၤလီၤ.

³³ အဂ့ၢ်ဒ်အံၤ, လၢမုၢ်ဟါတနံၤလံၤလံၤန့ၣ်တိဖ့းကတဲာ် ကတီၤတ့ၢ်အသး, ဒီးလၢစီၤပၤအဂီၢ်န့ၣ်ကတဲာ်ကတီၤ လီၤအသးလီၤ. တၢ်မၤယိာ်ဒံးအီၤ, မၤလဲၢ်ထီၣ်ဝဲ, အပူမ့ၢ် မ့ၣ်အူဒီးသ့ၣ်မုၣ်အိၣ်အါလံလၢအပူၤလံ. ယွၤအသါမၤ သးဒ်ကးအကျိၤသိးန့ၣ်ဆိၣ်ကဲၤထီၣ်အီၤလီၤ.

၃၁

¹ ပှၤလၢအလဲၤလီၤလၢတၢ်မၤစၢၤအဂီၢ်ဆူအဲၤကူပတူး အပူၤန့ၣ်ဘၣ်အဖှီၣ်လီၤ. သန့ၤအသးလၢကသ့ၣ်, ဒီးပ တဲၢ်အသးလၢလ့ၣ်ကဟၣ်လၢအအိၣ်အါအဃိ, ဒီးလၢ ပှၤဒိးကသ့ၣ်လၢအဂံၢ်ဆူၣ်အဘါဆူၣ်အဃိ, ဒီးတကွၢ် ထီၣ်ဘၣ်ဆူအံၣ်စရ့လးအတၢ်စီဆှံတဂၤဘၣ်, ဒီးတဃု ဘၣ်ယွၤဘၣ်.

² ဘၣ်ဆၣ်ဒီးအဝဲဒၣ်ကူၣ်တၢ်သ့စ့ၢ်ကီး, ဒီးအကဒုးဟဲ ထီၣ်တၢ်အၢ, ဒီးတသုးဘၣ်အကလုၢ်ဘၣ်, ဒီးကဂဲၤဆၢ ထၢၣ်ထီဒါပှၤမၤတၢ်အၢအဟံၣ်ဖိ, ဒီးထီဒါပှၤမၤတတီ ဘၣ်အတၢ်မၤစၢၤလီၤ.

³ ဒီးပှၤအဲၤကူပတူးဖိမ့ၢ်ပှၤကညီ, ဒီးတမ့ၢ်ဘၣ် ယွၤ ဘၣ်, ဒီးအကသ့ၣ်န့ၣ်မ့ၢ်တၢ်ညၣ်ဒီးတမ့ၢ်ဘၣ်သးဘၣ်, ဒီးတုၤယွၤကယူာ်ထီၣ်အစု, ဒီးပှၤမၤစၢၤတၢ်န့ၣ်ကဘၣ် တိၢ်, ဒီးပှၤလၢအဒိးတၢ်မၤစၢၤအီၤန့ၣ်ကလီၤဃံၤ, ဒီးက လၢာ်ဝဲခဲလၢာ်တပူၤဃီလီၤ.

⁴ အဂ့ၢ်ဒ်အံၤ, ယွၤစံးဘၣ်ယၤဒ်အံၤ, ဒ်ခ့ယုၢ်, ဒီးခ့ယုၢ် ဖိလၢအကညီၤလၢအဂုာ်န့ၢ်တၢ်အဖီခိၣ်, ဖဲပှၤကွၢ်သိဂီၢ် မုၢ်ဟဲထီၣ်ထီဒါအီၤ, ဒီးခ့ယုၢ်တပျံၤဘၣ်အကလုၢ်, တ ဆီၣ်လီၤဘၣ်အသးလၢ အဝဲသ့ၣ်အသီၣ်အဃိဘၣ်အ သိးန့ၣ်, တၢ်သုးမုၢ်ဂီၢ်မုၢ်အယွၤကဟဲလီၤဒုးတၢ်လၢက စၢၢ်စံယိၣ်အလိၤ, ဒီးလၢအစိခိၣ်အလိၤဒ်န့ၣ်အသိးလီၤ.

⁵ ဒ်ထိၣ်ယူၤဝဲအသိးန့ၣ်ယွၤ ကကဟုကယာ်ယရူၤၡ လ့ၣ်, ကကဟုကယာ်, ဒီးမၤပူၤမၤဖျဲးအီၤ, ကလဲၤကပာ်, ဒီးအုၣ်က့ၤခီၣ်က့ၤအီၤလီၤ.

⁶ ဟဲက့ၤကဒါက့ၤဆူပှၤလၢ ပှၤအံၣ်စရ့လးဖိ ပူထီၣ် အီၤအအိၣ်န့ၣ်တက့ၢ်. ⁷ အဂ့ၢ်ဒ်အံၤ, လၢမုၢ်တနံၤန့ၣ်ပှၤ ကညိကွံာ်အတၢ်ဂီၤစ့, ဒီးအတၢ်ဂီၤထူ, တၢ်ဒဲးဘးလၢသု စုမၤလၢသုဂီၢ်စုာ်စုာ်လီၤ.

⁸ ဒီးအၤရှူၢ်ကလီၤဃံၤလၢနးလၢအတမ့ၢ်ဘၣ် ပှၤကညီ အနးဘၣ်, ဒီးတၢ်တမ့ၢ်ဘၣ်ပှၤကညီအနးကအီၣ်ကွံာ် အီၤ, ဒီးကဃ့ၢ်လၢနးအမဲာ်ညါဒီးအပှၤဖိၣ်သၣ်ခွါတဖၣ် န့ၣ်ကဟ့ၣ်သွဲလီၤ.

⁹ ဒီးအလၢၢ်အလ့ကဒံကွံာ်လၢတၢ်ပျံၤတၢ်ဖုးအဃိ, ဒီး အပဒိၣ်ဖးဒိၣ်တဖၣ်ကပျံၤသုးဖိအလၣ်န့ၣ်, ယွၤလၢအ မ့ၣ်အူအိၣ်ဝဲလၢစံယိၣ်, ဒီးအဖၣ်ကပူၤလၢယရူၤၡလ့ၣ် အပူၤတဂၤစံးဝဲဒၣ်လီၤ.

၃၂

¹ ကွၢ်ကွၢ်, စီၤပၤတဂၤကပၢတၢ်လၢ တၢ်တီတၢ်လိၤအ ဂီၢ်, ဒီးပဒိၣ်တဂၤကစံၣ်ညီၣ်တၢ်လၢတၢ်တီအဂီၢ်လီၤ.

² ဒီးပှၤတဂၤကမၤသးဒ် တၢ်အိၣ်တဒၢအလီၢ်လၢ က လံၤအမဲာ်ညါ, ဒီးတၢ်တဒီအလီၢ် လၢတၢ်ဟဲစူၤအမဲာ် ညါအသိး, ဒ်ထံကျိလၢအလီၢ်ဃ့အသိး, ဒ်လၢၢ်ဒိၣ်အ ကဒုလၢတၢ်ဘှံးသးအကီၢ်ပူၤအသိးန့ၣ်လီၤ.

³ ဒီးပှၤလၢအထံၣ်တၢ်တဖၣ် အမဲာ်တခံးဘၣ်, ဒီးပှၤ လၢအနၢ်ဟူတၢ်တဖၣ်အနၢ်ကနၢ်ဟူတၢ်လီၤ. ⁴ ဒီးပှၤ လၢအတဒိးတိၢ်ဘၣ်အသးတဖၣ် အနၢ်ကပၢၢ်တၢ်သ့ၣ် ညါ, ဒီးပှၤလၢအကတိၤတၢ်အုးအးတဖၣ်အပျ့ၤကက တိၤတၢ်ကျါလီၤ.

⁵ ပှၤဟးဂီၤဖိန့ၣ် ပှၤတကိးလၢၤဘၣ်အီၤလၢပှၤအဒိၣ် ဘၣ်, ဒီးပှၤအပံာ်န့ၣ်ပှၤတစံးလၢၤလၢအဂ့ၢ်, ပှၤအချီဘၣ်.

⁶ အဂ့ၢ်ဒ်အံၤ, ပှၤဟးဂီၤဖိကကတိၤတၢ်ဟးဂီၤ, ဒီးအ သးကမၤအၢတၢ်, ဒ်သိးအကမၤတၢ်အၢ, ဒီးကတိၤက မၣ်ဘၣ်ယွၤ, ဒီးဒ်သိးကဒုးအိၣ်ကလီ ပှၤတၢ်သၣ်ဝံၤအ သးန့ၣ်အသး, ဒီးဒုးလၢာ်ကွံာ်ပှၤတၢ်သူအသးလၢထံ အတၢ်အီလီၤ.

⁷ ပှၤအပံာ်အစုကဝဲၤန့ၣ် မ့ၢ်တၢ်အအၢလီၤ. ကူၣ်ထီၣ် တၢ်ကူၣ်အၢဒ်သိးအကမၤဟးဂီၤပှၤလၢ အဖှီၣ်အယာ် လၢတၢ်ကတိၤကဘျံးကဘျၣ်, ဖဲပှၤဖှီၣ်ဖိယာ်ဖိကတိၤ တၢ်တီန့ၣ်လီၤ.

⁸ မ့မ့ၢ်ပှၤအချီန့ၣ်ကူၣ်ထီၣ်တၢ်အချီတဖၣ်, ဒီးဆၢထၢၣ် ဝဲလၢတၢ်အချီတဖၣ်အဃိလီၤ.

⁹ ပှၤလၢအတပလီၢ်ဘၣ်အသးဘၣ်ပိာ်မုၣ်သ့ၣ်ဧၢ, ဂဲၤ ဆၢထၢၣ်, ကနၣ်ယကလုၢ်တက့ၢ်. ဖိမုၣ်လၢအသူၣ်မံ သးမံလၢတၢ်သ့ၣ်ဧၢ, ဒိကနၣ်ယတၢ်ကတိၤတက့ၢ်.

¹⁰ နံၤတဖၣ်လၢ တနံၣ်အဖီခိၣ်သုကကနိး, ပိာ်မုၣ်လၢ တပလီၢ်အသးသ့ၣ်ဧၢ, အဂ့ၢ်ဒ်အံၤ, တၢ်ထၢဖှိၣ်စပံးသၣ် တအိၣ်ဘၣ်, တၢ်ဂၢ်ဖှိၣ်အကတီၢ်တဟဲဘၣ်.

¹¹ ကနိး, ပှၤတပလီၢ်ဘၣ်အသးပိာ်မုၣ်သ့ၣ်ဧၢ, ကနိးက စုာ်, ပှၤလၢအသူၣ်မံသးမံလၢတၢ်သ့ၣ်ဧၢ, ဘ့ၣ်ကွံာ်ဆ့ ဒီးအိၣ်ဘ့ၣ်ဆ့, ဒီးကံၢ်တူာ်တၢ်လၢသုယီၢ်ဒ့န့ၣ်တက့ၢ်.

¹² ပှၤကဒဲလီၤအသးနါပှၢ်လၢဟီၣ်ခိၣ်အကဝီၤမုာ်အဃိ, လၢစပံးမုၢ်လၢအသၣ်ထီၣ်တၢ်အဃိလီၤ.

¹³ လၢယပှၤဂီၢ်မုၢ်အကီၢ်ပူၤန့ၣ် တၤဆှုၣ်တၤမဲကမဲထီၣ် လီၤ. မ့ၢ်မးလၢကယဲၢ်တၢ်သူၣ်ဖှံသးညီအဟံၣ်အဖီခိၣ်, လၢတၢ်သးပိၢ်အဝ့ၢ်ပူၤန့ၣ်လီၤ.

¹⁴ အဂ့ၢ်ဒ်အံၤ, တၢ်လဲၤသဒၣ်လံနူၢ်, ဝ့ၢ်အပှၤဂီၢ်မုၢ်န့ၣ် ပှၤလဲၤသဒၣ်လံအီၤလံ. တၢ်စိခိၣ်, ဒီးတၢးခိးတၢ်ကဲထီၣ် တၢ်အိပူၤလီၤထူလီၤယိာ်, ကသ့ၣ်ယီၤမံၤအတဝၢမုာ်, ဒီး ဆၣ်ဖိကီၢ်ဖိအဖုတဖၣ် အအီၣ်ဆၣ်အလီၢ်, ¹⁵ တုၤလီၤ လၢတၢ်လူလီၤဂၢ်လီၤသးလၢထးန့ၣ်လၢပလိၤ, ဒီးပှၢ်မုၢ် ကနၢကဲထီၣ်ဟီၣ်ခိၣ်အကဝီၤလၢအသၣ်ထီၣ်တၢ်, ဒီး တၢ်ပာ်ဟီၣ်ခိၣ်အကဝီၤလၢ အသၣ်ထီၣ်တၢ်န့ၣ်လၢပှၢ် ဒိၣ်လာ်လီၤ.

¹⁶ ဒီးတၢ်စံၣ်ညီၣ်တီကအိၣ်လၢပှၢ်မုၢ်ကနၢ, ဒီးတၢ်တီ တၢ်လိၤကအိၣ်ကဆိးလၢ ဟီၣ်ခိၣ်အကဝီၤလၢအသၣ် ထီၣ်တၢ်အပူၤလီၤ. ¹⁷ ဒီးတၢ်တီတၢ်လိၤအမၤတၢ်န့ၣ်က မ့ၢ်တၢ်မုာ်တၢ်ဖိး, ဒီးတၢ်တီတၢ်လိၤအတၢ်ကဲထီၣ်န့ၣ် ကမ့ၢ်တၢ်အိၣ်ဘှံးဒီး တၢ်သူၣ်မံသးမံ လီၤထူလီၤယိာ် လီၤ.

¹⁸ ဒီးယပှၤတကလုာ်ကအိၣ်လၢတၢ်အလီၢ်လီၤစံာ်မုာ်, လၢတၢ်အိၣ်တၢ်ဆိးအလီၢ်ကျၢၤ, ဒီးလၢတၢ်အိၣ်ဘှံးအ လီၢ်မုာ်ယုာ်အပူၤလီၤ.

¹⁹ ဒီးတၢ်ကဟဲစူၤလၢသူၣ် တုၤသ့ၣ်ကလီၤကၢ်လၢ ပှၢ် ဒိၣ်လာ်, ဒီးဝ့ၢ်န့ၣ် ကဘၣ်တၢ်ဆီၣ်လီၤအီၤသပှၢ်တၢၢ် လီၤ.

²⁰ ပှၤလၢအဖှံတၢ်လၢထံခဲလၢာ်အနံၤ, လၢအမၢလီၤဂီၤ ဖံးဒီးကသ့ၣ်ယီၤအခီၣ်တဖၣ်န့ၣ်ဘၣ်ဆိၣ်ဂ့ၤဝဲလီၤ.

၃၃

¹ နဲဒၣ်လၢအဂုာ်န့ၢ်တၢ်, ဒီးပှၤတဂုာ်န့ၢ်ဘၣ်နတၢ်ဘၣ်, ဒီးလီန့ၢ်တၢ်, ဒီးပှၤတလီန့ၢ်ဘၣ်နၤဘၣ်န့ၣ်နဘၣ်အဖှီၣ် လီၤ. တုၤနတဂုာ်န့ၢ်လၢၤဘၣ်တၢ်ဘၣ်ဒီး, တၢ်ကဂုာ်န့ၢ် နတၢ်, ဒီးတုၤနလီန့ၢ်တၢ်ဝံၤလံဒီး, ပှၤကလီန့ၢ်နၤလီၤ.

² ယွၤဧၢ, သးကညီၤပှၤတက့ၢ်. ပကွၢ်လၢ်နကျဲလီၤ. ကဲ ထီၣ်အစုဒုၣ်လၢမုၢ်ဂီၤ, တၢ်အုၣ်က့ၤခီၣ်က့ၤပှၤလၢတၢ် ကိၢ်တၢ်ဂီၤအကတီၢ်န့ၣ်တက့ၢ်.

³ လၢတၢ်တၢထီၣ်တၢလီၤအသီၣ်န့ၣ် ပှၤဂီၢ်မုၢ်ဃ့ၢ်ဝဲ, တုၤနဂဲၤဆၢထၢၣ်န့ၣ် ပှၤကလုာ်တဖၣ်လီၤပြံလီၤပြါ လီၤ.

⁴ ဒီးသုဂုာ်န့ၢ်တၢ်န့ၣ် တၢ်ကပာ်ဖှိၣ်ဒ်ဒွဲၣ်ဃစံ ပာ်ဖှိၣ် တၢ်အသိး, ဒ်ဒွဲၣ်ကိာ်စံၣ်အသိးန့ၣ်အဝဲသ့ၣ်စံၣ်ဘၣ်အ လိၤလီၤ.

⁵ ယွၤမ့ၢ်တၢ်ထီၣ်ထီလီၤ. အဂ့ၢ်ဒ်အံၤ, အိၣ်ဝဲဆိးဝဲလၢ တၢ်အလီၢ်ထီၣ်ထီလီၤ. မၤပှဲၤလံစံယိၣ်လၢတၢ်စံၣ်ညီၣ် ဒီးတၢ်တီတၢ်လိၤလံ.

⁶ ဒီးကကဲထီၣ်နကတီၢ်တဖၣ် အတၢ်ဂၢၢ်တၢ်ကျၢၤအ လီၢ်လီၤ. တၢ်အုၣ်က့ၤခီၣ်က့ၤအဂံၢ်အဘါ, တၢ်ကူၣ်သ့, ဒီးတၢ်သ့ၣ်ညါ, တၢ်ပျံၤယွၤန့ၣ်မ့ၢ်အတၢ်လုၢ်ဒိၣ်ပှ့ၤဒိၣ် လီၤ.

⁷ ကွၢ်ကွၢ်, အပှၤအဆူၣ်တဖၣ်ကိးထီၣ်လၢခိ, တၢ်ဃူ တၢ်ဖိးအကလူးတဖၣ်အမဲာ်ထံလီၤနးနးကလဲာ်လီၤ.

⁸ ကျဲမုၢ်အိၣ်သယုၢ်, ပှၤပိာ်ကျဲတအိၣ်လၢၤဘၣ်. အဝဲ ဒၣ်မၤဟးဂီၤ တၢ်အၢၣ်လီၤအီလီၤ, မၤတရီတပါဝ့ၢ် တဖၣ်, တပးကဲဘၣ်ပှၤနီတဂၤဘၣ်.

⁹ ထံဧိၤကီၢ်ဧိၤန့ၣ်အသူၣ်အုးအသးအုး, အသးလီၤဘှါ, လဘၤနိၣ်အမဲာ်ဆှး, ဃဲၤလီၤကွံာ်, ၡၤရိၣ်မၤသးဒ်ပှၢ်မုၢ် ကနၢအသိးန့ၣ်, ဒီးဘၤၡၣ်ဒီးကၢ်မ့ၤလးအလၣ်လီၤဆှု လီၤ.

¹⁰ ခဲကနံၣ်အံၤယကဂဲၤဆၢထၢၣ်, ယွၤစံးဝဲဒၣ်, ခဲကနံၣ် အံၤယကဒိးတၢ်ပာ်ထီၣ်ထီ, ခဲကနံၣ်အံၤယကပာ်ထီၣ် ထီယသးလီၤ.

¹¹ သုကဒၢထီၣ်ဖ့, သုကဆံးစၢ်လီၢ်, သုသါ, ဒ်မ့ၣ်အူအ သိးန့ၣ်ကအီၣ်ကွံာ်သုလီၤ.

¹² ပှၤကလုာ်တဖၣ် ကကဲထီၣ်လၢၢ်ထူၣ်လၢမ့ၣ်အူအီၣ် ဝဲ, တၤဆှုၣ်ဒီၣ်တဲာ်အသး, မ့ၣ်အူကအီၣ်ကွံာ်အီၤလီၤ.

¹³ ပှၤလၢအအိၣ်လၢအယံၤသ့ၣ်ဧၢ, တၢ်လၢယမၤန့ၣ်က နၣ်တက့ၢ်. ဒီးပှၤလၢအအိၣ်ဘူးသ့ၣ်ဧၢ, သ့ၣ်ညါယစိယ ကမီၤတက့ၢ်.

¹⁴ ပှၤတၢ်ဒဲးဘးဖိပျံၤတၢ်လၢစံယိၣ်အပူၤ, တၢ်ကနိးက စုာ်ဟံးန့ၢ်ပှၤတယူးတယီၣ်ဘၣ်ယွၤန့ၣ်လီၤ. မ့ၢ်မတၤ လၢပကျါအိၣ်ဝဲဆိးဝဲဒီး မ့ၣ်အီၣ်တၢ်ကသ့တဂၤလဲၣ်. မ့ၢ်မတၤလၢပကျါအိၣ်ဝဲဆိးဝဲဒီးမ့ၣ်အီၣ်တၢ်တထံၣ်ဃီ ကသ့တဂၤလဲၣ်.

¹⁵ ပှၤလၢအလဲၤတၢ်လၢတၢ်တီတၢ်လိၤအပူၤ, ဒီးကတိၤ တၢ်စၢၢ်ဆၢလၢအညိကွံာ်တၢ်အီၣ်ကဘျံးအီၣ်ကဘျၣ်, လၢအတြုၤအစုဒ်သိးအသုတဟံးန့ၢ်ခိၣ်ဖးတဂ့ၤ, လၢ အဆွံတံာ်အနၢ်ပူၤ ဒ်သိးအသုတနၢ်ဟူတၢ်သွံၣ်အဂ့ၢ်, ဒီးလၢအဘံၣ်အမဲာ် ဒ်သိးအသုတကွၢ် တၢ်အၢတဂ့ၤ န့ၣ်, ¹⁶ အဝဲဒၣ်ကအိၣ်ကဆိးလၢ တၢ်အလီၢ်ထီၣ်ထီ, လၢၢ်ဧိၤလ့ဧိၤအတိာ်အတာ် ကကဲထီၣ်အသန့ၤအသး အလီၢ်လီၤ. တၢ်ကဟ့ၣ်အကိၣ်, ဒီးအထံကအိၣ်ခၢၣ် သနၢၢ်လီၤ. ¹⁷ နမဲာ်ကထံၣ်ဘၣ်စီၤပၤအိၣ်ဒီးအဃံအလၤ, ကထံၣ်ဘၣ်ဝဲလၢထံယံၤကီၢ်ယံၤလီၤ.

¹⁸ နသးကဆိကမိၣ်လၢ တၢ်မၤပျံၤမၤဖုးအဂ့ၢ်လီၤ. ပှၤ ကွဲးလံာ်န့ၣ်အိၣ်ဖဲလဲၣ်, ပှၤစီၤစီၤပီၢ်အိၣ်ဖဲလဲၣ်, ပှၤလၢအ ဂံၢ်တၢးထီန့ၣ်အိၣ်ဖဲလဲၣ်.

¹⁹ ပှၤအဒူတကလုာ်န့ၣ်နတထံၣ်ဘၣ်, ပှၤတကလုာ်လၢ အပျုၤယိာ်န့ၢ်လၢနနၢ်ဟူတၢ်သ့တက့ၢ်, ပှၤလၢအပျ့ၤက တိၤတၢ်လီၤဆီတုၤနနၢ်တပၢၢ်ဘၣ်လီၤ.

²⁰ ကွၢ်စံယိၣ်, ပမၤဘူၣ်အဝ့ၢ်တဖျၢၣ်တက့ၢ်. နမဲာ်က ထံၣ်ဘၣ်ယရူၤၡလ့ၣ်လၢတၢ်အိၣ်အလီၢ်လီၤစံာ်မုာ်, ဒဲ လၢပှၤတသုးဘၣ်အလီၢ်ဘၣ်. စိၤရီၤပှၤတထုးထီၣ်ဘၣ် အတၢၣ်ဖိဘၣ်, ဒီးအပျံၤတတဲာ်ကွံာ်ဘၣ်နီတဘိဘၣ်.

²¹ မ့မ့ၢ်ဖဲန့ၣ် ယွၤကကဲထီၣ်တၢ်ကဟုကညီၢ် လၢပဂီၢ်, ထံမိၢ်ပှၢ်ဒီးထံဖးလဲၢ်အလီၢ်, ဖဲကဘီအိၣ်ဒီးတဝၢတလဲၤ ဘၣ်, ဒီးကဘီသုးတခီဂာ်ဘၣ်.

²² အဂ့ၢ်ဒ်အံၤ, ယွၤမ့ၢ်ပပှၤစံၣ်ညီၣ်ကွီၢ်, ယွၤမ့ၢ်ပပှၤဟ့ၣ် လီၤတၢ်သိၣ်တၢ်သီ, ယွၤမ့ၢ်ပစီၤပၤ, အဝဲဒၣ်ကအုၣ်က့ၤ ခီၣ်က့ၤပှၤလီၤ.

²³ နပျံၤလီၤဆှၣ်, ဟံးဃာ်ယၢ်ထူၣ်အိၣ်ထူၣ်ကလာ်တ သ့ဘၣ်, သလၣ်ထီၣ်ယၢ်လၣ်တသ့ဘၣ်. တုၤနုၤတစုပှၤ နီၤဖးတၢ်ဂုာ်န့ၢ်အါအါကလဲာ် ပှၤအစုဟးဂီၤအခီၣ်ဟး ဂီၤတဖၣ်ဂုာ်န့ၢ်တၢ်ဂုာ်န့ၢ်လီၤ.

²⁴ ဒီးပှၤအိၣ်ဝဲဆိးဝဲတဖၣ်န့ၣ်တစံး, ယမၤတကဲဘၣ်န့ၣ် ဘၣ်. ပှၤအိၣ်ဝဲဆိးဝဲလၢအပူၤန့ၣ် အတၢ်ဒဲးဘးပျၢ်လံ လီၤ.

၃၄

¹ သုးဘူးသုသး, ပှၤကလုာ်တဖၣ်သ့ၣ်ဧၢ, ဒ်သိးသုက နၢ်ဟူတၢ်တက့ၢ်. ဒီးပှၤဂီၢ်မုၢ်သ့ၣ်ဧၢ, ကနၣ်တက့ၢ်. မ် ဟီၣ်ခိၣ်ဒီးတၢ်မၤပှဲၤအီၤ, လၢာ်ခိၣ်ဒီးတၢ်အိၣ်ထီၣ်လၢ အပူၤန့ၣ်ဒိကနၣ်တၢ်တက့ၢ်.

² အဂ့ၢ်ဒ်အံၤ, ယွၤသးထီၣ်ပှၤကိးကလုာ်ဒဲး, ဒီးသးကဲၤ ထီၣ်ဘၣ်အသုးမုၢ်ဂီၢ်မုၢ်ခဲလၢာ်, ဒီးမၤဟးဂီၤ, ဒီးဟ့ၣ် လီၤအီၤလၢတၢ်မၤသံအီၤအဂီၢ်လီၤ.

³ ဒီးအပှၤဘၣ်ကျီန့ၣ်တၢ်ကကွံာ်တ့ၢ်ကွံာ်ဝဲလီၤ. အစိၣ် ကနၢအုၣ်ထီၣ်, ဒီးကစၢၢ်ကလိကပှံၢ်ဝဲလၢအသွံၣ်လီၤ.

⁴ ဒီးမူခိၣ်အသုးမုၢ်ခဲလၢာ်ကလၢာ်ကွံာ်, ဒီးမူခိၣ်ကထူ ထီၣ်အသးဒ်လံာ်တထူအသိး, ဒီးအသုးမုၢ်ခဲလၢာ်က လီၤတဲာ်, ဒ်စပံးလၣ်လီၤဆှုလၢစပံးမုၢ်အလိၤအသိး, ဒီး ဒ်ချၢၣ်ဒၢသၣ်လီၤဘီလၢချၢၣ်ဒၢအလိၤအသိးန့ၣ်လီၤ.

⁵ အဂ့ၢ်ဒ်အံၤ, ယနးစုၣ်အသးလၢမူခိၣ်, ကွၢ်ကွၢ်, ကဟဲ လီၤဘၣ်အဒိၣ်, ဒီးပှၤလၢအဘၣ်ယတၢ်ဆိၣ်အၢ, လၢ တၢ်စံၣ်ညီၣ်အဂီၢ်လီၤ.

⁶ ယွၤအိၣ်ဒီးအနးတဘ့ၣ်, ပှဲၤဒီးတၢ်သွံၣ်, ဘျဲးအီၣ်ဒီး သိ, ဒီးသိဖိဒီးမဲာ်တဲးလဲးအသွံၣ်, ဒီးသိဖါအကလ့ၢ်အ သိန့ၣ်လီၤ. အဂ့ၢ်ဒ်အံၤ, ယွၤအိၣ်ဒီးတၢ်လုၢ်ဖးဒိၣ်လၢဘိး စရၤအပူၤ, ဒီးတၢ်မၤသံဖးဒိၣ်လၢ ကီၢ်အဒိၣ်အပူၤန့ၣ် လီၤ.

⁷ ဒီးတၤဖးရံၣ်ကလီၤဃံၤဒီးအီၤ, ဂီၤဖံးဖါဖိ, ဒီးဂီၤဖံးဖါ ပှၢ်, ဒီးအကီၢ်န့ၣ်ကဘျဲးအီဒီးတၢ်သွံၣ်, ဒီးအဟီၣ်ခိၣ်အ ကမူၣ်န့ၣ်ကဘီၣ်ထီၣ်လၢသိလီၤ.

⁸ အဂ့ၢ်ဒ်အံၤ, တၢ်မၤဆၢတၢ်အၢ အမုၢ်တနံၤအိၣ်ဒီး ယွၤ, တၢ်ဟ့ၣ်ကၣ်တၢ်အနံၣ်လၢစံယိၣ်အကွီၢ်အဂီၢ်လီၤ.

⁹ ဒီးအထံကျိတဖၣ်ကကဲထီၣ်ကျဲတံး, ဒီးအဟီၣ်ခိၣ်အ ကမူၣ်န့ၣ်ကး, ဒီးအဟီၣ်ခိၣ်ကကဲထီၣ်ကျဲတံး, လၢမ့ၣ် အူအီၣ်ဝဲလီၤ.

¹⁰ လၢမုၢ်ဆါမ့ၢ်ဂ့ၤ, လၢမုၢ်နၤမ့ၢ်ဂ့ၤ, တလီၤပံာ်ဘၣ်. အ မ့ၣ်ခုၣ်ကထီၣ်လီၤထူလီၤယိာ်လီၤ. တစိၤဘၣ်တစိၤတ ဃၣ်ဘၣ်တဃၣ်, ကအိၣ်သယုၢ်လီၤ. လီၤစိၤလီၤထီပှၤ တခီဂာ်ဘၣ်အီၤဘၣ်.

¹¹ ထိၣ်စီၢ်မီ, ဒီးသူၣ်ဧိၤဘါဧိၤကန့ၢ်အီၤ, ဒီးထိၣ်ဖးဒိၣ်, ဒီးစိးဝၣ်ဃးကအိၣ်ကဆိးလၢအပူၤလီၤ. ဒီးတၢ်ကစၢၢ် ထီၣ်တၢ်အိၣ်သယုၢ်အပျံၤတဘိလၢအဖီခိၣ်, ဒီးတၢ်အိၣ် ကလီအလၢၢ်န့ၣ်လီၤ.

¹² တၢ်ကကိးအပဒိၣ်တဖၣ်ဆူဘီမုၢ်အပူၤ, ဒီးတအိၣ် ဘၣ်ဝဲဘၣ်. ဒီးအပဒိၣ်ဖးဒိၣ်တဖၣ်တမ့ၢ်လၢၤဘၣ်တၢ် နီတမံၤဘၣ်.

¹³ ဒီးတၤဆှုၣ်ကမဲထီၣ်လၢအနူၢ်ပူၤ, လးဆါ, ဒီးတၤဆှုၣ် မုၢ်လၢအတိာ်ပူၤလီၤ. ဒီးကကဲထီၣ်ထွံၣ်ဟီၣ်ခိၣ်အပူၤ, ဒီးထိၣ်ကီၤလၤအူးအအိၣ်အလီၢ်လီၤ.

¹⁴ ဒီးတၢ်မံၤလာ်ဖိကဘၣ်သဃိာ်ဒီးထွံၣ်မံၤဖိ, ဒီးတၢ် အဖံးဆူၣ်ထီဖိကကိးဆူအဂိၤမီၣ်လီၤ. မ့ၢ်လံ, ဖဲန့ၣ်တၢ် မုၢ်နၤဖိကအိၣ်ဃိကလာ်, ဒီးထံၣ်န့ၢ်အအိၣ်ဘှံးအလီၢ် လၢအဂီၢ်လီၤ.

¹⁵ ဖဲန့ၣ်ဂုၢ်ကးဖိကမၤအသွံ, ဒီးဒံၣ်လီၤ, ဒီးဟုအဒံၣ်, ဒီး ဘုၣ်အဖိလၢအကဒုပူၤလီၤ. ဒီးဖဲန့ၣ်လီတာ်ကအိၣ်ဖှိၣ် ရိဖှိၣ်, တဘ့ၣ်ဒီးအဂိၤမီၣ်, တဘ့ၣ်ဒီးအဂိၤမီၣ်လီၤ.

¹⁶ ဃုတၢ်လၢယွၤအလံာ်ပူၤ, ဒီးဖးတၢ်တက့ၢ်. တဟါမၢ် ဘၣ်နီတမံၤဘၣ်. တၢ်လၢအဂိၤမီၣ်တအိၣ်ဘၣ်န့ၣ်တ အိၣ်ဘၣ်နီတဘ့ၣ်ဘၣ်. အဂ့ၢ်ဒ်အံၤ, ယထးခိၣ်မၤလိာ် တၢ်န့ၣ်, ဒီးအသးန့ၣ်ဒုးအိၣ်ဖှိၣ်အီၤလီၤ. ¹⁷ အဝဲဒၣ်ဖး တၢ်လၢအဂီၢ်စ့ၢ်ကီး, ဒီးအစုနီၤဖးအဆၢလၢပျံၤလၢအ ဂီၢ်လီၤ. ကန့ၢ်သါအီၤလီၤထူလီၤယိာ်လီၤ. အစိၤစိၤအ ဃၣ်ဃၣ်ကအိၣ်ဝဲဆိးဝဲဖဲန့ၣ်လီၤ.

၃၅

¹ ပှၢ်မုၢ်ကနၢဒီးဃဲၣ်ခိၣ်ဃဲၣ်လာ်န့ၣ်ကသးခု, ဒီးမံၤခိၣ် သိၣ်လာ်ကသူၣ်ဖှံသးညီ, ဒီးကဖီထီၣ်ဒ်ဖီဝံဒံၣ်အသိး န့ၣ်လီၤ. ² ဖီထီၣ်ဒီးကဖီထီၣ်, ဒီးသူၣ်ဖှံသးညီလီၤ. ဒီး တၢ်သူၣ်ခုသးခု, ဒီးတၢ်ကိးပသူထီၣ်ကအိၣ်ဝဲလီၤ. တၢ် ကဟ့ၣ်လီၤအီၤလၢလဘၤနိၣ်အလၤကပီၤ, ကၢ်မ့ၤလး, ဒီးၡၤရိၣ်အဃံအလၤလီၤ. ပှၤကထံၣ်ဘၣ်ယွၤအလၤက ပီၤ, ပကစၢ်အကဟုအကညီၢ်လီၤ.

³ ဒုးဆူၣ်ထီၣ်စုလၢအလီၤစၢ်, ဒီးဒုးကျၢၤထီၣ်ခီၣ်လ့ၢ် ခိၣ်လၢအကနိးဝဲန့ၣ်တက့ၢ်.

⁴ စံးဘၣ်ပှၤလၢအပျံၤတၢ်, အိၣ်ဆူၣ်တက့ၢ်. ပျံၤတၢ်တ ဂ့ၤ, ကွၢ်ကွၢ်, သုကစၢ်လီၤ. တၢ်မၤဆၢတၢ်ဟဲဝဲ, ယွၤက ဟ့ၣ်ကၣ်တၢ်လီၤ. အဝဲဒၣ်ဟဲဝဲဒီးကအုၣ်က့ၤခီၣ်က့ၤသု လီၤ.

⁵ တုၤနုၤတစုပှၤမဲာ်ဘျီၣ်အမဲာ်ကအိးထီၣ်, ဒီးပှၤနၢ်တ အၢအနၢ်ကကပီၤထီၣ်လီၤ. ⁶ တုၤနုၤတစုပှၤအခီၣ်ဟး ဂီၤကစံၣ်ထီၣ်ဒ်တၤဟိအသိး, ဒီးပှၤတအုၣ်အပျ့ၤကသး ဝံၣ်တၢ်လီၤ. အဂ့ၢ်ဒ်အံၤ, ထံဖျိးထီၣ်လၢပှၢ်မုၢ်ကနၢ, ဒီး ထံကျိတဖၣ်လၢမံၤခိၣ်သိၣ်လာ်န့ၣ်လီၤ.

⁷ ဒီးပံၢ်ကဒဲးကကဲထီၣ်ထံနိၣ်, ဒီးဟီၣ်ခိၣ်ဃ့န့ၣ်ထံထီၣ် ပၢၢ်, ထွံၣ်မံၤအတဝၢပူၤကကဲထီၣ်တပိၢ်ဒီးဆှဲအလီၢ်န့ၣ် လီၤ. ⁸ ဒီးဖဲန့ၣ်ကျဲမုၢ်ဒီးကျဲဖိကအိၣ်, ဒီးတၢ်ကကိးအီၤ လၢကျဲစီဆှံ, ဒီးတၢ်တကဆှီဘၣ်တပိာ်ဘၣ်အီၤဘၣ်, ဒီး ကအိၣ်ထဲလၢအဝဲသ့ၣ်အဂီၢ်, ဒီးပှၤပိာ်ကျဲ, ဒီးပှၤလၢအ တမၤလိဘၣ်တၢ်ဘၣ်န့ၣ်တဟးဖျိးကျဲန့ၣ်ဘၣ်.

⁹ ဒီးခ့ယုၢ်တအိၣ်ဘၣ်ဖဲန့ၣ်ဘၣ်, ဒီးတၢ်ဒူတၢ်ဃိၤတ ပိာ်ဘၣ်အီၤ, ဒီးတအိၣ်ဘၣ်ဖဲန့ၣ်ဘၣ်. မ့မ့ၢ်ပှၤဒိးပှ့ၤက့ၤ အသးကလဲၤတၢ်ဖဲန့ၣ်လီၤ.

¹⁰ ဒီးပှၤလၢ ယွၤပှ့ၤက့ၤအီၤန့ၣ်ကဟဲက့ၤဆူစံယိၣ်အိၣ် ဒီးတၢ်သးဝံၣ်, ဒီးတၢ်သူၣ်ခုသးခုအထူအယိာ်လၢအ ခိၣ်အဖီခိၣ်လီၤ. တၢ်သူၣ်ဖှံသးညီဒီး တၢ်သူၣ်ခုသးခု ကချုးန့ၢ်အီၤ, ဒီးတၢ်သူၣ်အုးသးအုးဒီးတၢ်ကအုကစွါ ကဃ့ၢ်ထီၣ်ကွံာ်ဝဲလီၤ.

၃၆

¹ ဒီးလၢစီၤပၤဃံးစကံယၤအနံၣ်ပှဲၤထီၣ် တဆံလွံၢ်နံၣ် တနံၣ်န့ၣ်တၢ်မၤအသးလၢအၤရှူၢ်အစီၤပၤစၤနဃ့ရံာ်ဟဲ ထီဒါယူဒၤအဝ့ၢ် အိၣ်ဒီးအခိၣ်ဒူခဲလၢာ်, ဒီးမၤန့ၢ်အီၤ လီၤ. ² ဒီးအၤရှူၢ်အစီၤပၤမၢလီၤစီၤရၤဘၡါက့ၤအိၣ်ဒီးပှၤ သုးမုၢ်တဖုဖးဒိၣ်လၢ လၤကံၣ်ဆူယရူၤၡလ့ၣ်, ဆူစီၤ ပၤဃံးစကံယၤအအိၣ်လီၤ. ဒီးအဝဲဒၣ်ဆၢထၢၣ်ဝဲဖဲနိၣ် လၢထးခီတပူၤအထံကျိၤ ဖဲပှၤစုၣ်တၢ်ကံးညာ်အဟီၣ် ခိၣ်အကဝီၤအကျဲမုၢ်လီၤ.

³ ဒီးစီၤဃံးလကံယၤအဖိခွါ စီၤအ့လယါကံၣ်လၢအ အိၣ်လၢဟံၣ်အဖီခိၣ်, ဒီးပှၤကွဲးလံာ်စီၤရှ့ၤဘနၤ, ဒီးပှၤ ကွဲးနီၣ်တၢ်စီၤအၤစာ် အဖိခွါစီၤယိၤအၤန့ၣ်ဟဲထီၣ်ဝဲဆူ အအိၣ်, ⁴ ဒီးစီၤရၤဘၡါက့ၤစံးဘၣ်အီၤ, စံးလၢ်စီၤဃံးစ ကံယၤ, တၢ်ဒိၣ်စီၤပၤ, အၤရှူၢ်အစီၤပၤစံးဒ်အံၤ, တၢ်သန့ၤ အသးအိၣ်ဒီးနၤလၢ နသန့ၤနသးလၢအီၤမ့ၢ်မနုၤတမံၤ လဲၣ်. ⁵ ယစံး, မ့ၢ်ထဲတၢ်ကတိၤကလီကလီလၢနစံး, ယ အိၣ်ဒီးတၢ်ကူၣ်တၢ်ဖး ဒီးတၢ်အဂံၢ်အဘါလၢဒုးသုးအ ဂီၢ်န့ၣ်လီၤ. ခဲကနံၣ်အံၤနသန့ၤနသးလၢမတၤတဂၤလၢ နပူထီၣ်ယၤန့ၣ်လဲၣ်.

⁶ ကွၢ်ကွၢ်, နသန့ၤနသးလၢနီၣ်ထိးဘိအံၤ, တပိၢ်လၢအ ကၢ်ပိၤအသးတဘိ, လၢအဲၤကူပတူးလၢပှၤမ့ၢ်သန့ၤအ သးလၢအီၤဒီး, ကနုာ်လၢအစုပူၤ, ဒီးဆဲးနုာ်အီၤလီၤ. အဲၤ ကူပတူးအစီၤပၤဖၤရိၤ မၤအသးဒ်န့ၣ်လၢကယဲၢ်ပှၤလၢ အသန့ၤအသးလၢအီၤလီၤ.

⁷ ဒီးနမ့ၢ်စံးဘၣ်ယၤ, ပသန့ၤပသးလၢ ယွၤပကစၢ်န့ၣ် ဒီး, အဝဲဒၣ်မ့ၢ်ပှၤလၢ စီၤဃံးစကံယၤဟံးထီၣ်ကွံာ်အ လီၢ်ထီၣ်ထီတဖၣ်, ဒီးအတၢ်လုၢ်လီၢ်တဖၣ်, ဒီးစံးလၢယူ ဒၤဒီးယရူၤၡလ့ၣ်, သုဘၣ်ဘူၣ်တၢ်ဘါတၢ်လၢတၢ်လုၢ် လီၢ်အံၤအမဲာ်ညါန့ၣ်တမ့ၢ်ဘၣ်ဧါ.

⁸ ဒီးခဲကနံၣ်အံၤ အၢၣ်လီၤအီလီၤလၢ်တၢ်ဒီး ယကစၢ် အၤရှူၢ် အစီၤပၤန့ၣ်တက့ၢ်, ဒီးနဲဒၣ်တခီနပာ်ပှၤဒိးက သ့ၣ်လၢအလိၤမ့ၢ်သ့ဒီး, ယကဟ့ၣ်နၤလၢကသ့ၣ်ခံက ထိလီၤ.

⁹ မၤသးဒ်န့ၣ်ဒီး နကဘိးဃၣ်ကဒါ ယကစၢ်အပဒိၣ် လၢအဆံးကတၢၢ်အကျါတဂၤ, ဒီးသန့ၤနသးလၢအဲၤ ကူပတူးလၢလ့ၣ်ကဟၣ်အဂ့ၢ်, ဒီးလၢကသ့ၣ်အဂ့ၢ်န့ၣ် ဒ်လဲၣ်.

¹⁰ ဒီးခဲကနံၣ်အံၤယွၤတအိၣ်ဘၣ်ဒီး, ယဟဲထီဒါကီၢ်တ ဘ့ၣ်အံၤဒ်သိးယကမၤဟးဂီၤအီၤဧါ. ယွၤစံးဘၣ်ယၤ, လဲၤထီၣ်ဆူကီၢ်တဘ့ၣ်အံၤဒီးမၤဟးဂီၤအီၤတက့ၢ်လီၤ.

¹¹ ဒီးစီၤအ့ၤလယါကံၣ်, ဒီးစီၤရှ့ၤဘနၤ, ဒီးစီၤယိၤအၤတ ဖၣ်စံးဘၣ်စီၤရၤဘၡါက့ၤ, ကတိၤလၢ်လၢအၤရၣ်အ ကျိာ်ဒီးနခ့နပှၤတက့ၢ်. အဂ့ၢ်ဒ်အံၤ, ပနၢ်ပၢၢ်လီၤ. ဒီးက တိၤတၢ်လၢယူဒၤအကျိာ် ဒီးပှၤလၢပှၤဂီၢ်မုၢ်လၢအအိၣ် လၢခိၣ်ဒူအဖီခိၣ်န့ၣ်အနၢ်ပူၤတဂ့ၤ.

¹² ဒီးစီၤရၤဘၡါက့ၤစံးဝဲဒၣ်, ယကစၢ်မၢလီၤယကတိၤ တၢ်ကတိၤအံၤ ဒီးနကစၢ်ဒီးနၤစ့ၢ်ကီးဧါ. မ့ၢ်လၢပှၤ ဆ့ၣ်နီၤလၢခိၣ်ဒူအဖီခိၣ်လၢအကအီၣ်အအ့ၣ်ဒၣ်ဝဲ, ဒီး အီအဆံၣ်ထံဒၣ်ဝဲအိၣ်ဒီးသုတမ့ၢ်ဘၣ်ဧါ.

¹³ ဒီးစီၤရၤဘၡါက့ၤဆၢထၢၣ် ဒီးကိးထီၣ်လၢအကလုၢ် ဖးဒိၣ်လၢယူဒၤအကျိာ်န့ၣ်, ဒီးစံးဝဲဒၣ်, ကနၣ်စီၤပၤဖး ဒိၣ်, အၤရှူၢ်အစီၤပၤအကလုၢ်တက့ၢ်. ¹⁴ စီၤပၤစံးဒ်အံၤ, မ် သုသုတဟ့ၣ်စီၤဃံးစကံယၤလီန့ၢ်သုတဂ့ၤ, အဂ့ၢ်ဒ်အံၤ မၤပူၤမၤဖျဲးသုတသ့ဘၣ်. ¹⁵ ဒီးစီၤဃံးစကံယၤစံးဘၣ်သု, ယွၤကအုၣ်က့ၤခီၣ်က့ၤပှၤသပှၢ်တၢၢ်, ဝ့ၢ်တဖျၢၣ်အံၤတၢ် တဟ့ၣ်လီၤကွံာ်ဘၣ်အီၤလၢ အၤရှူၢ်အစီၤပၤ အစုဘၣ် န့ၣ်သတးဒီး, မ်အသုတဒုးသန့ၤသုသးလၢယွၤတဂ့ၤ.

¹⁶ ဒိကနၣ်စီၤဃံးစကံယၤအကလုၢ်တဂ့ၤ, အဂ့ၢ်ဒ်အံၤ, အၤရှူၢ်အစီၤပၤစံးဒ်အံၤ, မၤဒီးယၤလၢတၢ်ဆိၣ်ဂ့ၤ, ဒီးဟဲ ထီၣ်ဆူယအိၣ်, ဒီးအီၣ်တဂၤလၢအစပံးမုၢ်ဒၣ်ဝဲ, တဂၤ လၢအချၢၣ်ဒၢဒၣ်ဝဲ, ဒီးအီတဂၤလၢအထံပူၤဒၣ်ဝဲကိးဂၤ ဒဲး, ¹⁷ တုၤယဟဲဒီးစိာ်ထီၣ်သုဆူကီၢ်တဘ့ၣ် မၤသးဒ်သု ကီၢ်ဒၣ်သုဝဲအသိး, ကီၢ်တဘ့ၣ်အိၣ်ဒီးဘုကၠူၣ်ဒီးစပံး ထံ, ကီၢ်တဘ့ၣ်အိၣ်ဒီးကိၣ်, ဒီးစပံးအလီၢ်တဖၣ်န့ၣ် လီၤ.

¹⁸ စီၤဃံးစကံယၤစံး, ယွၤကမၤပူၤမၤဖျဲးပှၤသတးဒီး, မ်အသုတလွဲန့ၢ်သုတဂ့ၤ, ပှၤကလုာ်တဖၣ်အကစၢ်တ ဂၤဂၤမၤပူၤမၤဖျဲးအထံအကီၢ်လၢ အၤရှူၢ်အစီၤပၤအစုပူၤ န့ၣ်စ့ၢ်ကီးဧါ.

¹⁹ ဃမါသး, ဒီးအၢ်ပးအကစၢ်တဖၣ်အိၣ်ဖဲလဲၣ်. စဖၤရ ဝံၣ်အကစၢ်တဖၣ်အိၣ်ဖဲလဲၣ်. ဒီးတၢ်မၤပူၤမၤဖျဲးၡၤမရံ လၢယစုပူၤစ့ၢ်ကီးဧါ.

²⁰ ဒ်သိးယွၤကမၤပူၤမၤဖျဲးယရူၤၡလ့ၣ်လၢယစုပူၤန့ၣ်ဒီး လၢကီၢ်တဖၣ်န့ၣ်အကစၢ်ခဲလၢာ်အကျါန့ၣ်မ့ၢ်မတၤမၤ ပူၤအထံအကီၢ်လၢယစုပူၤတဂၤလဲၣ်.

²¹ ဒီးအဝဲသ့ၣ်အိၣ်ဘှီၣ်ကလာ်ဒီး တစံးဆၢတၢ်နီတမံၤ ဘၣ်. အဂ့ၢ်ဒ်အံၤ, စီၤပၤမၤလိာ်တၢ်, ဒီးစံးဝဲဒၣ်, စံးဆၢ အီၤနီတမံၤတဂ့ၤန့ၣ်လီၤ. ²² ဒီးစီၤဃံးလကံယၤ အဖိခွါစီၤအ့ၤလယါကံၣ်လၢအ အအိၣ်လၢဟံၣ်အဖီခိၣ်, ဒီးပှၤကွဲးလံာ်စီၤရှ့ၤဘနၤ, ဒီးပှၤ ကွဲးနီၣ်တၢ်စီၤအၤစာ်အဖိခွါ စီၤယိၤအၤတဖၣ်န့ၣ်က့ၤ က့ၤဆူစီၤဃံးစကံယၤအအိၣ်, အိၣ်ဒီးအဆ့ယာ်, ဒီးစံး ဘၣ်အီၤလၢ စီၤရၤဘၡါက့ၤ အတၢ်ကတိၤတဖၣ်န့ၣ် လီၤ.

၃၇

¹ ဒီးတုၤစီၤဃံးစကံယၤနၢ်ဟူတၢ်န့ၣ်ဒီး, တၢ်မၤအသး လၢအဖှီအဆ့, ဒီးကၤဝဲလၢထၢၣ်အတၢ်ကံးညာ်, ဒီးလဲၤ နုာ်လၢယွၤအဟံၣ်ပူၤလီၤ.

² ဒီးမၢလီၤ စီၤအ့ၤလယါကံၣ်လၢအအိၣ်လၢဟံၣ်အဖီ ခိၣ်, ဒီးပှၤကွဲးလံာ်စီၤရှ့ၤဘနၤ, ဒီးပှၤလုၢ်တၢ်အဒိၣ်တဖၣ် အပှၤသူၣ်က့သးပှၢ်ကၤဝဲလၢထၢၣ်အတၢ်ကံးညာ်, ဆူ စီၤအၤမိာ်အဖိခွါဝံယၡါယၤအအိၣ်န့ၣ်လီၤ.

³ ဒီးအဝဲသ့ၣ်တဖၣ်န့ၣ်စံးဘၣ်အီၤ, စီၤဃံးစကံယၤစံး ဒ်အံၤ, တၢ်လၢမုၢ်မဆါတနံၤအံၤမ့ၢ်တၢ်ကိၢ်တၢ်ဂီၤ, ဒီး တၢ်သိၣ်ဃီၣ်, ဒီးတၢ်မၤတရီတပါအနံၤလီၤ. အဂ့ၢ်ဒ် အံၤ, ဖိသၣ်တုၤဖဲအကအိၣ်ဖျဲၣ်အဆၢကတီၢ်, ဒီးအဂံၢ် အဘါလၢ ပှၤကဆံးစၢ်န့ၣ်တအိၣ်ဘၣ်. ⁴ ဘၣ်တဘၣ် ယွၤနကစၢ်ကနၢ်ဟူစီၤရၤဘၡါက့ၤအတၢ်ကတိၤ, လၢ အကစၢ်အၤရှူၢ်အစီၤပၤ မၢလီၤဒ်သိးအကဒုၣ်ဒွဲၣ်ကစၢ် လၢအမူဝဲန့ၣ်, ဒီးကသိၣ်ဃီၣ်တၢ်ကတိၤန့ၣ် လၢယွၤ နကစၢ်နၢ်ဟူတ့ၢ်လီၤ. မၤသးဒ်န့ၣ်ဒီးဘါထုကဖၣ်တၢ် လၢပှၤအိၣ်လီၤတဲာ်ဒံးတဖၣ်အဂီၢ်တက့ၢ်.

⁵ ဒီးစီၤပၤဃံးစကံယၤ အခ့အပှၤန့ၣ် လဲၤဆူစီၤယၡါ ယၤအအိၣ်လီၤ.

⁶ ဒီးစီၤယၡါယၤစံးဘၣ်အီၤ, သုဘၣ်စံးဘၣ်သုကစၢ်ဒ် အံၤ, ယွၤစံးဒ်အံၤ, ပျံၤတၢ်ကတိၤလၢနနၢ်ဟူလၢအၤရှူၢ် အစီၤပၤအခ့အပှၤဒုၣ်ဒွဲၣ်ယၤန့ၣ်တဂ့ၤ, ⁷ ကွၢ်ကွၢ်, ယက ပာ်သးတမံၤလၢအပူၤ, ဒီးကနၢ်ဟူတၢ်အကစီၣ်ဒီးက့ၤ ကဒါက့ၤဆူအကီၢ်ဒၣ်ဝဲ, ဒီးယကဒုးလီၤဃံၤအီၤလၢနး လၢအကီၢ်ဒၣ်ဝဲအပူၤလီၤ.

⁸ ဒီးစီၤရၤဘၡါက့ၤန့ၣ်က့ၤက့ၤဝဲ, ဒီးထံၣ်န့ၢ်အၤရှူၢ်အ စီၤပၤဒုးတၢ်ဒီးလံးဘနၤလီၤ. အဂ့ၢ်ဒ်အံၤ, နၢ်ဟူဝဲလၢ အဟးထီၣ်လၢလၤကံၣ်န့ၣ်လီၤ.

⁹ ဒီးအဝဲဒၣ်နၢ်ဟူတၢ်စံးလၢကူၤၡးအစီၤပၤစီၤတံရတၤ ကၤအဂ့ၢ်, ဟဲထီၣ်ဝဲလၢအကဒုးတၢ်ဒီးနၤန့ၣ်လီၤ. ဒီး တုၤအနၢ်ဟူဝဲဒီး, မၢလီၤအကလူးတဖၣ်ဆူ စီၤဃံးစ ကံယၤအအိၣ်, ဒီးစံးဝဲဒၣ်, ¹⁰ သုဘၣ်စံးလၢယူဒၤအစီၤပၤ စီၤဃံးစကံယၤဒ်အံၤ, နကစၢ်လၢနသန့ၤနသးလၢအီၤ တဂၤစံးဘၣ်နၤ, တၢ်တဟ့ၣ်လီၤယရူၤၡလ့ၣ်ဆူအၤရှူၢ် အစီၤပၤအစုပူၤဘၣ်န့ၣ်, မ်အသုတလီန့ၢ်နၤတဂ့ၤ.

¹¹ ကွၢ်ကွၢ်, တၢ်လၢအၤရှူၢ်အစီၤပၤတဖၣ်မၤထံဧိၤကီၢ် ဧိၤခဲလၢာ်, လၢအမၤဟးဂီၤအီၤစီဖ့ကလ့ၤန့ၣ်နနၢ်ဟူလံ ဒီးနကပူၤဖျဲးနဲစ့ၢ်ကီးဧါ.

¹² ပှၤအကလုာ်လၢ ယပၢ်တဖၣ်မၤဟးဂီၤအီၤ, ကိစၣ်, ဒီးဃရၣ်, ဒီးရ့စ့း, ဒီးပှၤဧ့ဒ့ၣ်ဖိလၢအအိၣ်လၢသလးစၢ် အပူၤန့ၣ်အကစၢ်တဖၣ်မၤပူၤဖျဲးအီၤစ့ၢ်ကီးဧါ.

¹³ ဃမါသးအစီၤပၤ, ဒီးအၢ်ပးအစီၤပၤ, ဒီးဝ့ၢ်စဖၤရ ဝံၣ်, ဟ့နၤဒီးဧးဝါအစီၤပၤန့ၣ်မ့ၢ်အအိၣ်ဖဲလဲၣ်.

¹⁴ ဒီးစီၤဃံးစကံယၤန့ၣ် ဟံးန့ၢ်လံာ်လၢကလူးတဖၣ်အ စုပူၤ, ဒီးဖးဝဲ, ဒီးလဲၤထီၣ်ဝဲဆူယွၤအဟံၣ်ပူၤ, ဒီးစီၤဃံးစ ကံယၤသလၣ်ထီၣ်ဝဲလၢယွၤအမဲာ်ညါလီၤ. ဒီးစီၤဃံးစကံယၤ ဘါထုကဖၣ်ယွၤ, ဒီးစံးဝဲဒၣ်,

¹⁶ တၢ်သုးမုၢ်ဂီၢ်မုၢ်အယွၤ, အံၣ်စရ့လးအကစၢ်လၢအအိၣ် ဝဲလၢခ့ရူာ်အဘၢၣ်စၢၤတဂၤဧၢ, နဲဒၣ်နမ့ၢ်ကစၢ်တဂၤ ဃီလၢဟီၣ်ခိၣ်အဘီမုၢ်ခဲလၢာ်အဖီခိၣ်လီၤ. နတ့လီၤမူ ခိၣ်ဒီးဟီၣ်ခိၣ်လီၤ. ¹⁷ ပာ်ဒိးနနၢ်, ယွၤဧၢ, ဒီးကနၣ်တက့ၢ်. အိးထီၣ်နမဲာ်, ယွၤဧၢ, ဒီးထံၣ်တၢ်, ဒီးကနၣ်စီၤစၤနဃ့ ရံာ်အတၢ်ကတိၤခဲလၢာ်လၢအဟ့ၣ်ယုၢ်ဝဲ ဒ်သိးအက ဒုၣ်ဒွဲၣ်ကစၢ်လၢအမူဝဲန့ၣ်တက့ၢ်. ¹⁸ မ့ၢ်မး, ယွၤဧၢ, အၤရှူၢ် အစီၤပၤတဖၣ်မၤဟးဂီၤဘီမုၢ်ခဲလၢာ်, ဒီးအထံအကီၢ်,―

¹⁹ ဒီးကွံာ်တ့ၢ်အကစၢ်တဖၣ်လၢမ့ၣ်အူပူၤ,(အဂ့ၢ်ဒ်အံၤ, တ မ့ၢ်ဘၣ်ကစၢ်ဘၣ်, မ့ၢ်သ့ၣ်ဧိၤဝၣ်ဧိၤ, ဒီးလၢၢ်ဧိၤလ့ဧိၤ, ပှၤကညီအမၤတၢ်လၢအစုလီၤ), ဒီးမၤဟးဂီၤကွံာ်အီၤလီၤ.

²⁰ ဒီးခဲကနံၣ်အံၤ, ယွၤပကစၢ်ဧၢ, အုၣ်က့ၤခီၣ်က့ၤပှၤ လၢအစုပူၤတက့ၢ်. ဒီးဟီၣ်ခိၣ်အဘီအမုၢ်ခဲလၢာ်ကသ့ၣ် ညါလၢနမ့ၢ်ယွၤ, ထဲနၤတဂၤဧိၤလီၤ.

²¹ ဒီးစီၤအၤမိာ်အဖိခွါ စီၤယၡါယၤမၢလီၤတၢ်ဆူစီၤဃံး စကံယၤ, ဒီးစံးဝဲဒၣ်ယွၤအံၣ်စရ့လးအကစၢ်စံးဝဲဒ်အံၤ, တၢ်လၢနဘါထုကဖၣ်ယၤလၢ အၤရှူၢ်အစီၤပၤ စီၤစၤန ဃ့ရံာ်အဂ့ၢ်န့ၣ်, ²² အအံၤမ့ၢ်တၢ်ကတိၤလၢယွၤကတိၤလံ လၢအဂ့ၢ်, ပှၤမုၣ်လိၣ်ဘိ, စံယိၣ်အဖိမုၣ်န့ၣ်တပးကဲ ဘၣ်နၤဘၣ်, နံၤဘၣ်ဖၣ်လဲဘၣ်နၤ, ယရူၤၡလ့ၣ်အဖိမုၣ် ကျၢၢ်ကျာ်အခိၣ်လၢနၤလံ. ²³ နဒုၣ်ဒွဲၣ်ဒီးပယွဲမတၤတ ဂၤလဲၣ်. ဒီးနထုထီၣ်နကလုၢ်လၢမတၤတဂၤအဖီခိၣ် လဲၣ်. ဒီးနကျ့ထီၣ်နမဲာ်ထီၣ်ထီလၢမတၤတဂၤအဖီခိၣ် လဲၣ်. နထီဒါအံၣ်စရ့လးအတၢ်စီဆှံတဂၤန့ၣ်လီၤ.

²⁴ နဒုၣ်ဒွဲၣ်ယွၤလၢနခ့နပှၤအစုပူၤ, ဒီးနစံး, ယထီၣ်ဘး ကစၢၢ်အတၢ်ထီတဖၣ်, လဘၤနိၣ်အကပၤ, လၢယလ့ၣ် ကဟၣ်ဂီၢ်မုၢ်, ဒီးယကကူာ်လီၤကွံာ်အသ့ၣ်ဆှိအ့ရ့းအ ထီ, ဒီးအသ့ၣ်ဆှိအဂ့ၤကတၢၢ်, ဒီးယကထီၣ်ဘးအလီၢ် ထီကတၢၢ်, တၤသၣ်အလီၢ်အပှၢ်ဒိၣ်လာ်လီၤ. ²⁵ ယခူၣ်လီၤတၢ်, ဒီးအီထံ, ဒီးယကမၤလီၤသံးအဲၤကူပတူးအထံ ကျိခဲလၢာ်လၢယခီၣ်ညါသးလီၤ.

²⁶ လၢထံးလၢမကိာ်ယမၤယဲ, ဒီးလၢမုၢ်နံၤတဖၣ်လၢ ပျၢၤယမၤအီၤန့ၣ်, နတနၢ်ဟူဘၣ်ဧါ. ခဲကနံၣ်အံၤ, ယဒုး ဟဲတၢ်မၤအသးဒ်သိး အကမၤလူၤဝ့ၢ်အိၣ်ဒီးအခိၣ်ဒူတ တဖၣ်ဒီးပာ်အီၤဒ်တၢ်ပူအိၣ်သယုၢ်အသိးန့ၣ်လီၤ. ²⁷ မၤ သးဒ်န့ၣ်ဒီး ပှၤအိၣ်ဝဲဆိးဝဲတဖၣ်န့ၣ် အစုလီၤဖုၣ်အ သးလီၤ, ပျံၤတၢ်ဖုးတၢ်, ဒီးပာ်ဆှးအမဲာ်, မ့ၢ်တီၢ်မုၢ်လၢ ပှၢ်လၢ်ကျါ, ဒီးနိၣ်ဧိၤမံၤဧိၤသံကစဲာ်, ဒီးနီၣ်အိၣ်လၢဟံၣ် ခိၣ်, ဒီးစံာ်ဧိၤပှဲၤဧိၤလၢဘုအဘိတချုးအိၣ်ထီၣ်ဒံးဘၣ် လီၤ. ²⁸ ဒီးနဆ့ၣ်နီၤ, ဒီးနလဲၤထီၣ်, ဒီးနဟဲနုာ်န့ၣ်ယသ့ၣ် ညါ, ဒီးနသးထီၣ်ဘၣ်ယၤလီၤ.

²⁹ မ့ၢ်နသးထီၣ်ဘၣ်ယၤ, ဒီးနပာ်နသးထီၣ်ထီန့ၣ်ဟဲ ထီၣ်လၢယနၢ်ပူၤဒီး, ယကပာ်ယနီၣ်ကွးလၢနနါဒ့ပူၤ, ဒီးယထးအ့ၣ်ပျံၤလၢနခၣ်ပူၤ, ဒီးယကဘိးဃၣ်ကဒါ က့ၤနၤလၢကျဲလၢနဟဲလီၤ.

³⁰ ဒီးအအံၤကကဲထီၣ်တၢ်အပနီၣ်လၢနဂီၢ်, အအံၤတ နံၣ်အံၤအီၣ်တၢ်လၢအမဲထီၣ်ဒၣ်တၢ်, ဒီးပှဲၤထီၣ်ခံနံၣ်တ နံၣ်န့ၣ်တၢ်လၢအမဲထီၣ်ဒၣ်တၢ်လၢအဝဲန့ၣ်, ဒီးပှဲၤထီၣ် သၢနံၣ်တနံၣ်ဖှံတၢ်, ဒီးကူးတၢ်, ဒီးသူၣ်စပံးမုၢ်တဖၣ်, ဒီး အီၣ်အတၤသၣ်န့ၣ်တက့ၢ်.

³¹ ဒီးတၢ်ပူၤဖျဲးလၢယူဒၤအပှၤဟံၣ်ဖိအကျါ လၢအအိၣ် လီၤတဲာ်န့ၣ် ကစဲၤလီၤအဂံၢ်ဆူတၢ်အဖီလာ်, ဒီးသၣ် ထီၣ်တၢ်ဆူတၢ်အဖီခိၣ်လီၤ.

³² အဂ့ၢ်ဒ်အံၤ, လၢယရူၤၡလ့ၣ်အပူၤန့ၣ်တၢ်အိၣ်လီၤ တဲာ်ကလဲၤထီၣ်, ဒီးတၢ်ပူၤဖျဲးလၢကစၢၢ်စံယိၣ်န့ၣ်လီၤ. တၢ်သုးမုၢ်ဂီၢ်မုၢ်အယွၤအသးဆူၣ်ကမၤတၢ်န့ၣ်လီၤ.

³³ မၤသးဒ်န့ၣ်ဒီး ယွၤစံးလၢအၤရှူၢ်အစီၤပၤအဂ့ၢ်ဒ်အံၤ, တဘၣ်ဟဲနုာ်ဘၣ်လၢဝ့ၢ်တဖျၢၣ်အံၤအပူၤဘၣ်, တဘၣ် ခးဘၣ်ပျၢ်တဘိဖဲန့ၣ်ဘၣ်, ဒီးတဘၣ်ဟဲထီၣ်လၢအမဲာ် ညါဒီးကတီၤဘၣ်, ဒီးတဘၣ်မၤထီၣ်တၢ်ခိၣ်ဒူလၢအ မဲာ်ညါဘၣ်. ³⁴ ဒီးကျဲလၢအဟဲန့ၣ်ကက့ၤက့ၤလၢကျဲတ ဘိန့ၣ်, ဒီးတဘၣ်ဟဲနုာ်ဘၣ်ဆူဝ့ၢ်ပူၤအံၤဘၣ်, ယွၤစံး ဝဲ, ³⁵ ဒီးယကအိၣ်ပှိၤဝ့ၢ်တဖျၢၣ်အံၤဒ်သိးယကအုၣ်က့ၤ ခီၣ်က့ၤအီၤ, လၢယဂီၢ်ဒၣ်ယဲ, ဒီးလၢယခ့ယပှၤစီၤဒၤဝံး အဃိလီၤ.

³⁶ ဒီးယွၤအကလူးန့ၣ်ဟးထီၣ်, ဒီးကျီကွံာ်ပှၤကညီတ ကလီၤဃိးကလးယဲၢ်ကထိလၢ အၤရှူၢ်သူၣ်ဒဲအပူၤန့ၣ်, ဒီးမုၢ်ဆ့ၣ်ထီၣ်န့ၣ်ပှၤဂဲၤဆၢထၢၣ်ဂီၤဂီၤ, ဒီးကွၢ်ကွၢ်, ပှၤ တဖၣ်န့ၣ်ခဲလၢာ်မ့ၢ်ပှၤအစိၣ်လီၤ.

³⁷ တုၤနုၤတစုအၤရှူၢ်အစီၤပၤစၤနဃ့ရံာ်ဟးထီၣ်, ဒီးလဲၤ ဝဲ, ဒီးက့ၤဝဲ, ဒီးအိၣ်ဝဲလၢနံၤနဝ့လီၤ. ³⁸ ဒီးအဝဲဒၣ်ဘူၣ်တၢ် ဘါတၢ်လၢအကစၢ်နံးစရိးအဟံၣ်ပူၤအဖၢမုၢ်ဒီး, အဖိခွါ စီၤအဒြၤမ့ၤလ့း, ဒီးစီၤၡၢ်အ့စ့ၢ်န့ၣ်ကျီကွံာ်အီၤလၢနး, ဒီး အဝဲသ့ၣ်ထူၣ်ဖျဲးဆူကီၢ်အရၤရးအပူၤ, ဒီးအဖိခွါစီၤအ့ၤ စၢ်ဃးဒိၣ်ကဲထီၣ်စီၤပၤလၢအလီၢ်န့ၣ်လီၤ.

၃၈

¹ တၢ်လၢမုၢ်နံၤတဖၣ်န့ၣ် စီၤဃံးစကံယၤဆါဝဲတုၤအ ကသံတ့ၢ်လီၤ. ဒီးစီၤအၤမိာ်အဖိခွါဝံယၡါယၤန့ၣ်လဲၤ ဆူအအိၣ်ဒီးစံးဘၣ်အီၤ, ယွၤစံးဒ်အံၤ, မၤလိာ်နပှၤဟံၣ်ဖိ အတၢ်တက့ၢ်. အဂ့ၢ်ဒ်အံၤ, နကသံ, ဒီးတသမူဘၣ်လီၤ.

² ဒီးစီၤဃံးစကံယၤဃၣ်အမဲာ်ဆူတၢ်ဒူၣ်, ဒီးဘါထုက ဖၣ်ယွၤ, ³ ဒီးစံးဝဲဒၣ်, ယွၤဧၢ, ယလဲၤတၢ်လၢနမဲာ်ညါလၢ တၢ်မ့ၢ်တၢ်တီအပူၤ, အိၣ်ဒီးယသးဒီဖျၢၣ်, ဒီးယမၤတ့ၢ် တၢ်အဂ့ၤလၢနမဲာ်ညါန့ၣ် သ့ၣ်နီၣ်ထီၣ်က့ၤလၢ်ယၤတ က့ၢ်. ဒီးစီၤဃံးစကံယၤဟီၣ်ဝဲနးမးလီၤ. ⁴ ဒီးယွၤအကလုၢ်ဘၣ်စီၤယၡါယၤ, ဒီးစံးဝဲဒၣ်,― ⁵ လဲၤ ဒီးစံးဘၣ်စီၤဃံးစကံယၤ, ယွၤနပၢ်စီၤဒၤဝံးအကစၢ်စံး ဒ်အံၤ, ယနၢ်ဟူလံနဘါထုကဖၣ်တၢ်လံ, ယထံၣ်လံန မဲာ်ထံလံ, ကွၢ်ကွၢ်, ယကပာ်ဖှိၣ်ဒီးနနံၤတဖၣ်လၢတဆံ ယဲၢ်နံၣ်လီၤ. ⁶ ဒီးလၢအၤရှူၢ်အစီၤပၤ အစုပူၤန့ၣ်ယက အုၣ်က့ၤခီၣ်က့ၤနၤဒီးဝ့ၢ်တဖျၢၣ်အံၤ, ဒီးယကအိၣ်ပှိၤဝ့ၢ် တဖျၢၣ်အံၤလီၤ. ⁷ ဒီးအအံၤမ့ၢ်တၢ်အပနီၣ်ဟဲလၢယွၤ လၢအကမၤတၢ်တမံၤအံၤလၢ အကတိၤတ့ၢ်ဝဲ, ⁸ ကွၢ် ကွၢ်, ယကဒုးက့ၤကဒါက့ၤတၢ်ကဒုလၢအတီၤတဖၣ် လၢအလဲၤလီၤပူၤကွံာ်တ့ၢ်လၢစီၤအၤဃးအမုၢ်အနၣ်ရံၣ် အလိၤ, ကက့ၤကဒါက့ၤအတီၤဆံဆဲၣ်တီၤလီၤ. ဒီးမုၢ် က့ၤက့ၤကဒါက့ၤဆံဆဲၣ်တီၤလၢ အလဲၤလီၤပူၤကွံာ်တ့ၢ် ဝဲလီၤ.

⁹ လၢယူဒၤအစီၤပၤစီၤဃံးစကံယၤဆါဝဲ, ဒီးဘျါက့ၤဝဲ န့ၣ်အတၢ်ကွဲး,

¹⁰ ယစံး, လၢယမုၢ်နံၤတဖၣ်အမုၢ်ထူၣ်ယကလဲၤလီၤဆူပျုၤပူၤအပဲတရီန့ၣ်, တၢ်ထုးထီၣ်ကွံာ်ယနံၣ်လၢအအိၣ်လီၤတဲာ်တဖၣ်န့ၣ်လီၤ.

¹¹ ယစံး, ယတထံၣ်ဘၣ်ယွၤ, ယွၤအိၣ်လၢကီၢ်မူအပူၤဘၣ်, ယတကွၢ်လၢၤဘၣ်ပှၤကညီ, ဒီးပှၤဟီၣ်ခိၣ်ဖိဘၣ်.

¹² တၢ်ထဲးထီၣ်ကွံာ်ယအိၣ်အလီၢ်, ဒီးဘၣ်တၢ်သုးကွံာ်အီၤလၢယအိၣ်ဒ်ပှၤကွၢ်သိဖိအဒဲအ သိးန့ၣ်လီၤ. ယထူထီၣ်လံယသးသမူဒ်ပှၤထါထၣ်ဖိအသိးလံ, ကကူးတဲာ်ယထၣ်အထိးလီၤ. လၢမုၢ်ဂီၤတုၤလၢမုၢ်နၤန့ၣ်နကမၤလၢာ်ကွံာ်ယၤလီၤ.

¹³ ယအိၣ်စူၤသးတုၤမုၢ်ဆ့ၣ်ထီၣ်န့ၣ်, ဒ်ခ့ယုၢ်အသိးကမၤကၢ်ယဃံယကွဲ, လၢမုၢ်ဂီၤတုၤလၢမုၢ်နၤနကမၤလၢာ်ကွံာ်ယၤလီၤ.

¹⁴ ဒ်ထိၣ်ဘျ့ၣ်ဘျီၣ်, ထိၣ်ဘျ့ၣ်ဘျီၣ်လၢအပံးပံးအသိး, ယပံးပံးလီၤ. ယကအုဒ်ထိၣ်လွံၢ်အသိးန့ၣ်, ယမဲာ်ယုာ်လၢယကွၢ်ထီၣ်ဆူထးန့ၣ်အဃိလီၤ. ယွၤဧၢ, ယဘၣ်တၢ်မၤအၢယၤ, ကဲထီၣ်ပှၤအုၣ်ကီၤအသးလၢယဂီၢ်တက့ၢ်.

¹⁵ ယကစံးဒ်လဲၣ်. ကတိၤတၢ်ဒီးယၤ, ဒီးမၤဝဲအကစၢ်ဒၣ်ဝဲန့ၣ်လီၤ. ယကလဲၤတၢ်ကဘဲးကဘဲးတစိၤဒၣ်ယၤ, လၢယသးအတၢ်ကိၢ်တၢ်ဂီၤအဃိလီၤ.

¹⁶ ယွၤဧၢ, ပှၤမူဝဲလၢတၢ်န့ၣ်တဖၣ်အဃိ, ဒီးလၢတၢ်ခဲလၢာ်န့ၣ်ယသးအသးသမူအိၣ်ဝဲလၢအပူၤ, ဒီးနကမၤဘျါက့ၤယၤဒီးမၤမူထီၣ်က့ၤယၤလီၤ.

¹⁷ ကွၢ်ကွၢ်, ယတၢ်ကိၢ်တၢ်ဂီၤန့ၣ်ကဲထီၣ်တၢ်မုာ်တၢ်ပၢၤ ဒီးနအဲၣ်ယၤဒီးမၤပူၤဖျဲးယသးလၢတၢ်ဟးဂီၤအပူၤ, နကွံာ်တ့ၢ်ကွံာ်ယတၢ်ဒဲးဘးခဲလၢာ်လၢနချၢဃံလီၤ.

¹⁸ အဂ့ၢ်ဒ်အံၤ, ပျုၤပူၤတသးဝံၣ်ထီၣ်ဘၣ်နၤဘၣ်, တၢ်သံတစံးထီၣ်ပတြၢၤဘၣ်နၤဘၣ်, ပှၤလၢအလဲၤလီၤဆူတၢ်ပူၤန့ၣ်တကွၢ်လၢ်နတၢ်မ့ၢ်တၢ်တီအကျဲဘၣ်.

¹⁹ ပှၤမူ, ပှၤမူ, အဝဲဒၣ်ကသးဝံၣ်ထီၣ်နၤ, ဒ်ယၤလၢမုၢ်မဆါတနံၤအသိးလီၤ. ပၢ်ကဘိးဘၣ်သ့ၣ်ညါဖိခွါတဖၣ်လၢ နတၢ်မ့ၢ်တၢ်တီ လီၤ.

²⁰ ယွၤဧၢ အုၣ်က့ၤခီၣ်က့ၤယၤတက့ၢ်. ဒီးကအုၣ်တၢ်ဒီးသံကျံတၢ်တစိၤဒၣ်ပှၤလၢယွၤအဟံၣ်ပူၤလီၤ.

²¹ ဒီးစီၤယၡါယၤစံးတ့ၢ်ဝဲ, မ်ပှၤဟံးန့ၢ်ချၢၣ်ဒၢသၣ်ဃ့ တလိၣ်, ဒီးပာ်လီၤအီၤလၢတၢ်ဝ့အဖီခိၣ်န့ၣ်တက့ၢ်, ဒီး ကဘျါက့ၤဝဲလီၤ.

²² ဒီးစီၤဃံးစကံယၤစံးတ့ၢ်ဝဲ, တၢ်ပနီၣ်လၢယကလဲၤ ထီၣ်ဆူယွၤအဟံၣ်န့ၣ်မ့ၢ်မနုၤတမံၤလဲၣ်.

၃၉

¹ တၢ်လၢအကတီၢ်န့ၣ်ဘၤဘူၤလိၣ် အစီၤပၤဘၤလဒၣ် အဖိခွါစီၤမရိဒးဘၤလဒၣ်တဂၤ ဟ့ၣ်ယုၢ်လံာ်ဒီးခိၣ်ဖး လၢစီၤဃံးစကံယၤ, အဂ့ၢ်ဒ်အံၤ, နၢ်ဟူလၢအဆါတ့ၢ်ဝဲ, ဒီးဘျါက့ၤဝဲလီၤ.

² ဒီးစီၤဃံးစကံယၤန့ၣ် သးခုလၢအဃိ, ဒီးဒုးနဲၣ်အီၤ လၢအတၢ်လုၢ်ဒိၣ်ပှ့ၤဒိၣ်အဟံၣ်, ကျိၣ်ဧိၤစ့ဧိၤ, ဒီးထူဧိၤ လွဲဧိၤ, ဒီးတၢ်နၢမူ, ဒီးသိအဂ့ၤ, ဒီးအစုကဝဲၤအဟံၣ်ဒီ ဖျၢၣ်ညါ, ဒီးကယဲၢ်အတၢ်လၢအအိၣ်လၢအတၢ်လုၢ်ဒိၣ် ပှ့ၤဒိၣ်အကျါန့ၣ်လီၤ. တၢ်လၢစီၤဃံးစကံယၤတဒုးနဲၣ် ဘၣ်အီၤန့ၣ်တအိၣ်ဘၣ်လၢအဟံၣ်ပူၤ, ဒီးတအိၣ်ဘၣ် လၢအဘီမုၢ်ဒီဘ့ၣ်ညါအပူၤနီတမံၤဘၣ်.

³ တုၤနုၤတစု ဝံယၡါယၤတဂၤန့ၣ်လဲၤဆူစီၤပၤဃံးစ ကံယၤအအိၣ်, ဒီးစံးဘၣ်အီၤ, ပှၤတဖၣ်န့ၣ်စံးဝဲဒ်လဲၣ်, ဒီးဟဲဆူနအိၣ်လၢလဲၣ်. ဒီးစီၤဃံးစကံယၤစံးဝဲဒၣ်, ဟဲဝဲ ဆူယအိၣ်လၢထံယံၤကီၢ်ယံၤတဘ့ၣ်, လၢဘၤဘူၤလိၣ် န့ၣ်လီၤ.

⁴ ဒီးစံးဝဲဒၣ်, မ့ၢ်အထံၣ်ဘၣ်တၢ်လၢနဟံၣ်ပူၤမနုၤလဲၣ်. ဒီးစီၤဃံးစကံယၤစံးဝဲဒၣ်, ထံၣ်ဘၣ်ကယဲၢ်တၢ်လၢအ အိၣ်လၢယဟံၣ်ပူၤခဲလၢာ်လီၤ. တၢ်လၢယတဒုးနဲၣ် ဘၣ်အီၤန့ၣ်တအိၣ်ဘၣ်လၢယတၢ်လုၢ်ဒိၣ်ပှ့ၤဒိၣ်အကျါ နီတမံၤဘၣ်.

⁵ ဒီးစီၤယၡါယၤစံးဘၣ်စီၤဃံးစကံယၤ, ကနၣ်တၢ်သုး မုၢ်ဂီၢ်မုၢ်အယွၤအကလုၢ်တက့ၢ်.

⁶ ကွၢ်ကွၢ်, မုၢ်နံၤတဖၣ်ကဟဲလၢကယဲၢ်တၢ်အိၣ်လၢန ဟံၣ်ပူၤ, ဒီးတၢ်လၢနပၢ်တဖၣ်ပာ်ဖှိၣ်ဝဲတုၤမုၢ်မဆါတ နံၤအံၤ, တၢ်ကစိာ်ထီၣ်ကွံာ်အီၤဆူဘၤဘူၤလိၣ်လီၤ. တၢ် တအိၣ်လီၤတဲာ်ဘၣ်နီတမံၤဘၣ်, ယွၤစံးဝဲဒၣ်.

⁷ ဒီးကစိာ်ကွံာ်နဖိခွါလၢအလီၤစၢၤလၢနၤ, လၢနထီၣ် ဖိအီၤ, ဒီးကကဲထီၣ်ပှၤဒ့ဒံၣ်ဖိလၢဘၤဘူၤလိၣ်အစီၤပၤ အနူၢ်ပူၤလီၤ.

⁸ ဒီးစီၤဃံးစကံယၤစံးဘၣ်စီၤယၡါယၤ, ယွၤအတၢ်က တိၤလၢနကတိၤတၢ်န့ၣ်ဂ့ၤဝဲလီၤ. ဒီးစံးဝဲဒၣ်, အဂ့ၢ်ဒ်အံၤ တၢ်ဃူတၢ်ဖိးဒီး တၢ်မ့ၢ်တၢ်တီကအိၣ်ဝဲလၢယမုၢ်နံၤတ ဖၣ်အပူၤန့ၣ်လီၤ.

၄၀

¹ မၤမုာ်ထီၣ်က့ၤ, မၤမုာ် ထီၣ်က့ၤယပှၤဂီၢ်မုၢ်တက့ၢ်, သုကစၢ်စံးဝဲဒၣ်. ² ကတိၤတၢ်မုာ်တၢ်ပၢၤဒီးပှၤယရူၤၡ လ့ၣ်ဖိတက့ၢ်. ဒီးစံးဘၣ်အီၤလၢအဒုးတၢ်ယၤတၢ်ဝံၤလံ, လၢအတၢ်ဒဲးဘးပျၢ်လံ, လၢအဘၣ်လံတၢ်ခံစးလၢအ တၢ်ဒဲးဘးအဃိလၢယွၤအစုပူၤလံ.

³ တၢ်အကလုၢ်သီၣ်ထီၣ်လၢပှၢ်မုၢ်ကနၢန့ၣ်, ကတဲာ်က တီၤယွၤအကျဲ, လၢမံၤခိၣ်သိၣ်လာ်န့ၣ်မၤလိၤကျဲမုၢ်တ ဘိလၢပကစၢ်အဂီၢ်န့ၣ်တက့ၢ်. ⁴ ကယဲၢ်ကစၢၢ်ကဆူး တၢ်ကမၤထီၣ်ထီဝဲ, ဒီးကယဲၢ်ကစၢၢ်ကလိဒီးတၢ်စိခိၣ် န့ၣ်တၢ်ကမၤလီၤပၢၤ, ဒီးတၢ်အက့ၣ်ကမၤဘျၢထီၣ်က့ၤ, ဒီးအလီၢ်ထီၣ်စိလီၤနုာ်တဖၣ် ကဘၣ်ဃူလိာ်အသး,―

⁵ ဒီးယွၤအလၤကပီၤကအိၣ်ဖျါထီၣ်, ဒီးကယဲၢ်တၢ်ညၣ်ခဲ လၢာ်ကထံၣ်ဘၣ်ဝဲတပူၤဃီလီၤ. အဂ့ၢ်ဒ်အံၤ, ယွၤအ ထးခိၣ်ကတိၤတၢ်လီၤ.

⁶ တၢ်ကလုၢ်န့ၣ်စံး, ကိးထီၣ်တက့ၢ်. ဒီးပှၤစံး, ယဘၣ် ကိးထီၣ်လၢမနုၤတမံၤလဲၣ်. ကယဲၢ်တၢ်ဖံးတၢ်ညၣ်န့ၣ် မ့ၢ်နီၣ်ဧိၤမံၤဧိၤခဲလၢာ်, ဒီးကယဲၢ်အဘျုးအဖှိၣ်ဒ်ပျီပူၤအ သံၣ်ဧိၤဖီဧိၤအသိးန့ၣ်ခဲလၢာ်လီၤ. ⁷ နီၣ်ဧိၤမံၤဧိၤန့ၣ်ဃ့ ထီၣ်ကွံာ်, သံၣ်ဧိၤဖီဧိၤန့ၣ်လီၤညွံးလီၤဘဲဝဲလီၤ. အဂ့ၢ်ဒ် အံၤ, ယွၤအသါအူထီၣ်ဘၣ်အီၤလီၤ, မ့ၢ်မးပှၤဂီၢ်မုၢ်မ့ၢ်နီၣ် ဧိၤမံၤဧိၤလီၤ.

⁸ နီၣ်ဧိၤမံၤဧိၤန့ၣ်ဃ့ထီၣ်ကွံာ်, သံၣ်ဧိၤဖီဧိၤန့ၣ်လီၤညွံး လီၤဘဲဝဲလီၤ. မ့မ့ၢ်ပကစၢ်အကလုၢ်ကထါန့ၣ်ကအိၣ် ဝဲကဆိးဝဲလီၤစိၤလီၤထီလီၤ.

⁹ ပှၤလၢအဟဲစိာ်တၢ်သးခုအကစီၣ်ဆူစံယိၣ်တဂၤဧၢ. လဲၤထီၣ်ဆူကစၢၢ်ထီအဒီခိၣ်, ထုထီၣ်နကလုၢ်ဒီးတၢ် အဂံၢ်အဘါ, ပှၤလၢအဟဲစိာ်တၢ်သးခုအကစီၣ်ဆူယ ရူၤၡလ့ၣ်တဂၤဧၢ, ထုထီၣ်အီၤတက့ၢ်. ပျံၤတၢ်တဂ့ၤ. စံး လၢယူဒၤအဝ့ၢ်တဖၣ်, ကွၢ်ကွၢ်, သုကစၢ်န့ၣ်တက့ၢ်.

¹⁰ ကွၢ်ကွၢ်, ယွၤကဟဲဒီးအစိအကမီၤ, ဒီးအစုဒုၣ်ကပၢ တၢ်လၢအဂီၢ်ဒၣ်ဝဲလီၤ. ကွၢ်ကွၢ်, အဘူးအလဲအိၣ်ဒီး အီၤ, ဒီးအဘူးအလဲအိၣ်ဝဲလၢအမဲာ်ညါလီၤ.

¹¹ ကအံးကကွၢ်အသိတဖုဒ်ပှၤကွၢ်သိတဂၤအသိး, ဒီး ကထၢဖှိၣ်သိဖိတဖၣ်လၢအစု, ဒီးကစိာ်အီၤလၢအသး နါပှၢ်အပူၤ, ဒီးကဆှၢကယီကယီသိမိၢ်ပှၢ်လၢအဒုးအီၣ် နုၢ်တၢ်လီၤ.

¹² ပှၤလၢအဃီၣ်ထံလၢအစုညါသးအပူၤ, ဒီးထိၣ်မူခိၣ် လၢအစုထါတထါ, ဒီးပာ်ဖှိၣ်ဟီၣ်ခိၣ်အကမူၣ်လၢနီၣ် ဃီၣ်အပူၤ, ဒီးစီၤကစၢၢ်ကလိလၢစီၤပီၢ်ပူၤ, ဒီးတၢ်စိခိၣ် တဖၣ်န့ၣ်လၢစီၤပီၢ်စီၤရွဲၤပူၤန့ၣ်မ့ၢ်မတၤတဂၤလဲၣ်.

¹³ မ့ၢ်မတၤထိၣ်ယွၤအသးတဂၤလဲၣ်. ဒီးမ့ၢ်မတၤကဲပှၤ ကူၣ်လိာ်အသးဒီးအီၤသတးဒီးကသိၣ်လိအီၤတဂၤလဲၣ်.

¹⁴ ကူၣ်လိာ်အသးဒီးပှၤတဂၤ, ဒီးအတၢ်သိၣ်လိအီၤ, ဒီး နဲၣ်လိအီၤလၢတၢ်စံၣ်ညီၣ်အကျဲ, ဒီးဘိးဘၣ်သ့ၣ်ညါ အီၤလၢတၢ်သ့ၣ်ညါန့ၣ်မ့ၢ်မတၤတဂၤလဲၣ်. ဒီးမ့ၢ်မတၤ ကနဲၣ်လိအီၤလၢ တၢ်သူၣ်ဆးသးဆး အကျဲန့ၣ်တဂၤ လဲၣ်.

¹⁵ ကွၢ်ကွၢ်, ပှၤကလုာ်တဖၣ်မၤသးဒ်ထံလီၤစီၤတဖျၢၣ် လၢထံစဲၤ, ဒီးတၢ်ပာ်အီၤဒ်တၢ်ကမှံၤလၢစီၤပီၢ်အပူၤအ သိးန့ၣ်လီၤ. ကွၢ်ကွၢ်, ကီးတဖၣ်န့ၣ်ဒ်ဟီၣ်ခိၣ်အကမူၣ် တဖျၢၣ်အသိးန့ၣ်ထၢထီၣ်ဝဲလီၤ.

¹⁶ ဒီးလဘၤနိၣ်လၢ တၢ်ဆိၣ်ကဲၤမ့ၣ်အူအဂီၢ်န့ၣ်တအါ ဘၣ်, ဒီးအဆၣ်ဖိကီၢ်ဖိလၢတၢ်လုၢ်မ့ၣ်အူအဂီၢ်န့ၣ်တ အါဘၣ်လီၤ.

¹⁷ ကယဲၢ်ပှၤကလုာ်ခဲလၢာ်န့ၣ် မၤသးဒ်တၢ်နီတမံၤလၢ အမဲာ်ညါအသိးန့ၣ်လီၤ. ပာ်ဝဲဒ်တၢ်ဆံးန့ၢ်တၢ်နီတမံၤ, ဒီးဒ်တၢ်တမ့ၢ်ဘၣ်တၢ်ဘၣ်အသိးန့ၣ်လီၤ.

¹⁸ ဒီးသုကဒိလီၤယွၤဒီးမတၤတဂၤလဲၣ်, ဒီးသုကဒိလီၤ အီၤဒီးတၢ်အဒိအတဲာ်လၢမနုၤတမံၤလဲၣ်.

¹⁹ တၢ်ဂီၤတၢ်ဖီၣ်န့ၣ်ပှၤမၤတၢ်သ့န့ၣ်တ့ဝဲ, ဒီးပှၤပိာ်ထူ န့ၣ်ပီၤဝဲလၢထူ, ဒီးကသိန့ၢ်စ့သွဲလၢအဂီၢ်လီၤ.

²⁰ ပှၤလၢအဖှီၣ်ဝဲ တုၤအမၤဘူၣ်တၢ်အပှ့ၤဒိၣ်တသ့ဘၣ် န့ၣ်ဃုထၢသ့ၣ်လၢအတအုၣ်တကျၣ်ဘၣ်. ဃုပှၤမၤတၢ် သ့လၢအကူၣ်သ့တၢ်တဂၤလၢအဂီၢ်, ဒ်သိးအကက တဲာ်ကတီၤတၢ်ဂီၤ စိးပျၤအသးတဖျၢၣ်လၢအတဟူးတ ဝးဘၣ်န့ၣ်လီၤ.

²¹ သုတသ့ၣ်ညါဘၣ်ဧါ. သုတနၢ်ဟူဘၣ်ဧါ. လၢအခီၣ် ထံးလံၤလံၤန့ၣ်တၢ်တစံးဘၣ်သုဘၣ်ဧါ. လၢဟီၣ်ခိၣ်အ ခီၣ်ထံးတဖၣ်အိၣ်ထီၣ်လံၤလံၤန့ၣ်သုနၢ်တပၢၢ်ဘၣ်ဧါ.

²² မ့ၢ်ပှၤလၢအဆ့ၣ်နီၤလၢ ဟီၣ်ထံးမူထံးအကဝီၤအဖီ ခိၣ်, ဒီးပှၤအိၣ်ဝဲဆိးဝဲတဖၣ်န့ၣ် မၤသးဒ်ဒွဲၣ်ဧိၤတြၤဧိၤအ သိး, ပှၤလၢအသလၣ်ထီၣ်မူခိၣ်ဒ်ယၣ်သဒၢတၢ်အသိး, ဒီးစၢၢ်ထီၣ်အီၤ ဒ်ဒဲလၢပှၤကအိၣ်ကဆိးလၢအပူၤအသိး န့ၣ်, ²³ ပှၤလၢအပာ်ပဒိၣ်ဖးဒိၣ်တဖၣ်လၢတၢ်နီတမံၤ, ဟီၣ်ခိၣ်အပှၤစံၣ်ညီၣ်ကွီၢ်န့ၣ် လၢတၢ်ကလီကလီန့ၣ် လီၤ.

²⁴ မ့ၢ်မးတသူၣ်ဘၣ်အသးဘၣ်, မ့ၢ်မးတဖှံဘၣ်အသး ဘၣ်, မ့ၢ်မးအထူၣ်အဂံၢ် တစဲၤလီၤအသးလၢဟီၣ်ခိၣ် လာ်ဘၣ်. ဒီးထဲယွၤအူဘၣ်အီၤ, ဒီးလီၤညွံး, ဒီးကလံၤသ ဝံးကစိာ်ထီၣ်ကွံာ်အီၤဒ်ဖ့ဧိၤဃာ်ဧိၤအသိးန့ၣ်လီၤ.

²⁵ ဒီးသုကဒိလီၤယၤဒီးမတၤတဂၤလဲၣ်. ဒီးယကဒ်သိး ဒီးမတၤတဂၤလဲၣ်. တၢ်စီဆှံတဂၤစံးဝဲဒၣ်.

²⁶ ကျ့ထီၣ်သုမဲာ်ဆူတၢ်ထီၣ်ထီ, ဒီးမ့ၢ်မတၤမတၤတ့တၢ် တဖၣ်အံၤန့ၣ်ကွၢ်တက့ၢ်. ပှၤလၢအဆှၢထီၣ်အသုးမုၢ်ဂီၢ် မုၢ်, ဒ်အတၢ်ဂံၢ်အသိးန့ၣ်မ့ၢ်မတၤတဂၤလဲၣ်. ကိးအီၤ လၢအမံၤခဲလၢာ်လီၤ. မ့ၢ်လၢအဂံၢ်ဆူၣ်အဘါဆူၣ်, ဒီး အစိဒိၣ်အကမီၤထီသတးဒီး, တဟါမၢ်ဘၣ်နီတမံၤဘၣ်.

²⁷ နဲဒၣ်နစံး, ယၤကိာ်ဧၢ, ဒီးနကတိၤတၢ်, အံၣ်စရ့လး ဧၢ, ယကျဲအိၣ်တဒၢလၢယွၤ, ဒီးယတၢ်စံၣ်ညီၣ်လဲၤပူၤ ကွံာ်လၢယကစၢ်န့ၣ်မ့ၢ်အဘၣ်မနုၤလဲၣ်. ²⁸ နတသ့ၣ်ညါ ဘၣ်ဧါ, နတနၢ်ဟူဘၣ်ဧါ. ယွၤမ့ၢ်ကစၢ်အထူအယိာ်, တၢ်တ့လီၤဟီၣ်ခိၣ် အကတၢၢ်တဖၣ်န့ၣ်တလီၤဘှါဘၣ် ဒီးတၢ်တဘှံးဘၣ်အသးဘၣ်. အသူၣ်ဆးအသးဆးန့ၣ် ပှၤဃုတဘၣ်ဘၣ်.

²⁹ ပှၤလၢအလီၤဘှါန့ၣ် ယွၤဟ့ၣ်ဝဲလၢအဂံၢ်အဘါလီၤ. ဒီးပှၤလၢအဂံၢ်အဘါတအိၣ်ဘၣ်န့ၣ် ဒုးဆူၣ်ထီၣ်ဝဲအ ဂံၢ်အဘါလီၤ.

³⁰ ဒီးပှၤဖိၣ်သၣ်ခွါန့ၣ်ကလီၤဘှါ, ဒီးတၢ်ကဘှံးအသး, ဒီးပှၤဃုထၢဖိန့ၣ်အဂံၢ်အဘါကစၢ်လီၤ, ကစၢ်လီၤဝဲ လီၤ. ³¹ မ့မ့ၢ်ပှၤလၢအမုၢ်လၢ်တၢ်လၢယွၤန့ၣ်အဂံၢ်အဘါ ကဆူၣ်ထီၣ်လီၤ. ကယူာ်ထီၣ်အဒံးဆ့ဒ်လံာ်ဧိၤတြၤဧိၤ အသိး, ကဃ့ၢ်ဝဲဒီးတၢ်တဘှံးဘၣ်အသးဘၣ်, ဒီးကလဲၤ တၢ်ဒီးတလီၤဘှံးလီၤတီၤဘၣ်လီၤ.

၄၁

¹ ကီးသ့ၣ်ဧၢ, အိၣ်ဘှီၣ်ကလာ်လၢယမဲာ်ညါတက့ၢ်, ဒီး မ်ပှၤကလုာ်တဖၣ်န့ၣ် ဒုးဆူၣ်ထီၣ်အဂံၢ်အဘါတက့ၢ်. မ်အသုးဘူးအသး, တုၤနုၤတစုမ်အကတိၤတၢ်တက့ၢ်. မ်ပသုးဘူးသကိးပသးဆူတၢ်စံၣ်ညီၣ်ကွီၢ်န့ၣ်တက့ၢ်.

² မ့ၢ်မတၤထိၣ်ဂဲၤထၢၣ် ပှၤလၢမုၢ်ထီၣ်တခီတဂၤလဲၣ်. တၢ်တီကိးအီၤဆူအခီၣ်ထံး, ဟ့ၣ်လီၤကွံာ်ပှၤကလုာ်တ ဖၣ်လၢအမဲာ်ညါ, ဒီးဒုးယီၢ်လီၤအီၤလၢစီၤပၤတဖၣ်, ဟ့ၣ်လီၤအီၤဆူအနးအဘီဒ်ဟီၣ်ခိၣ်အကမူၣ်အသိး, ဒီး ဆူအချံၣ်ဧိၤပျၢ်ဧိၤ, ဒ်လီၢ်ဧိၤဒံးဧိၤလီၤလဲလၢကလံၤအူ ဘၣ်အီၤအသိးန့ၣ်လီၤ.

³ အဝဲဒၣ်လူၤအီၤ, ဒီးခီဂာ်တၢ်မုာ်မုာ်, လၢကျဲလၢအတ ပိာ်တ့ၢ်ဘၣ်လၢအခီၣ်ဘၣ်.

⁴ မ့ၢ်မတၤကိးန့ၢ်ပှၤတစိၤလၢ အခီၣ်ထံးန့ၣ်သတးဒီး, မၤတၢ်ဒီးဒုးကဲထီၣ်တၢ်န့ၣ်တဂၤလဲၣ်. ယဲဒၣ်, ယွၤ, တၢ် အခီၣ်ထံး, ဒီးအိၣ်ဒီးအခံကတၢၢ်န့ၣ်, ယၤလီၤ.

⁵ ကီးတဖၣ်ထံၣ်ဘၣ်ဝဲဒီးပျံၤတၢ်, ဟီၣ်ခိၣ်အကတၢၢ် တဖၣ်ကနိးကစုာ်လီၤ. သုးဘူးအသးဒီးဟဲဝဲန့ၣ်လီၤ.

⁶ ပှၤမၤစၢၤလိာ်အသးတဂၤဒီးတဂၤစုာ်စုာ်, ဒီးစံးအဒီ ပုၢ်ဝဲၢ်, ပာ်ဆူၣ်နသးတက့ၢ်.

⁷ ဒီးပှၤမၤတၢ်သ့န့ၣ်ဒုးဆူၣ်ထီၣ်ပှၤပိာ်ထူဖိ, ပှၤလၢအ မၤဃူတၢ်လၢခံၣ်ခူၣ်န့ၣ် ပှၤလၢအတီၢ်တၢ်လၢထးလာ် အဖီခိၣ်, ဒီးစံးဝဲ, တၢ်စဲဘူးမ့ၢ်အဂ့ၤလီၤ. ဒီးမၤဃာ်ဝဲလၢ ထးပနဲာ်ဒ်သိးအသုတဟူးဝးတဂ့ၤလီၤ.

⁸ ဒီးနဲဒၣ်ယခ့ယပှၤအံၣ်စရ့လး, ယၤကိာ်လၢယဃုထၢ အီၤ, ယတံၤယသကိးစီၤအၤဘြၤဟၣ်အချံအသၣ်, ⁹ နဲ ဒၣ်လၢယဟံးဃာ်လၢဟီၣ်ခိၣ်အကတၢၢ်, ဒီးကိးန့ၢ်နၤ လၢအကပၤတဖၣ်, ဒီးစံးဘၣ်နၤ, နဲဒၣ်နမ့ၢ်ယခ့ယပှၤ လီၤ. ယဃုထၢလံနၤလံ, ဒီးယတညိကွံာ်ဘၣ်နၤဘၣ်.

¹⁰ ပျံၤတၢ်တဂ့ၤ အဂ့ၢ်ဒ်အံၤ, ယအိၣ်ဒီးနၤလီၤ. ကွၢ်တ ရံးတၢ်တဂ့ၤ, အဂ့ၢ်ဒ်အံၤ, ယမ့ၢ်နကစၢ်လီၤ. ယဒုးဆူၣ် ထီၣ်လံနဂံၢ်နဘါလံ, မ့ၢ်မးယမၤစၢၤလံနၤလံ. မ့ၢ်မးယ ဒုးအိၣ်ကျၢၤလံနၤလၢယစုထွဲအတီအလိၤန့ၣ်လီၤ.

¹¹ ကွၢ်ကွၢ်, ကယဲၢ်ပှၤလၢအသးထီၣ်နၤန့ၣ်အမဲာ်ကဆှး ဒီးကပာ်ဆှးအမဲာ်လီၤ. ပှၤလၢအဂ့ၢ်လိာ်ဘှီလိာ်ဒီးနၤ တဖၣ်န့ၣ် တကဲထီၣ်တၢ်နီတမံၤဘၣ်, ဒီးကတုၤလၢ တၢ်ဟးဂူာ်ဟးဂီၤလီၤ. ¹² ဒီးနကဃုအီၤ ဒီးနတထံၣ်န့ၢ် ဘၣ်ပှၤလၢအဂ့ၢ်လိာ်ဘှီလိာ်ဒီးနၤဘၣ်. ပှၤလၢအဒုး တၢ်ဒီးနၤတဖၣ်ကကဲထီၣ်ဒ်တၢ်နီတမံၤဘၣ်အသိးန့ၣ်, ဒီးဒ်တၢ်တမ့ၢ်ဘၣ်တၢ်ဘၣ်အသိးလီၤ.

¹³ အဂ့ၢ်ဒ်အံၤ, ယဲဒၣ်ယွၤနကစၢ်အံၤယဟံးဃာ် နစုထွဲ, ဒီးစံးလၢနၤ, ပျံၤတၢ်တဂ့ၤ. ယမၤစၢၤလံနၤလံ.

¹⁴ ပျံၤတၢ်တဂ့ၤ, လၢၣ်ဧိၤဆှးဧိၤယၤကိာ်, ဒီးအံၣ်စရ့လး အပှၤကညီသ့ၣ်ဧၢ, ယမၤစၢၤလံနၤ, ယွၤဒီးပှၤလၢအပှ့ၤ က့ၤနၤ, အံၣ်စရ့လးအတၢ်စီဆှံတဂၤစံးဝဲဒၣ်လီၤ.

¹⁵ ကွၢ်ကွၢ်, ယပာ်လံနၤလၢနီၣ်တီၢ်ဘုအသီလၢ အက နၣ်အ့ၣ်ဝဲ, အိၣ်ဒီးအမဲအခီလီၤ. နကတီၢ်ကစၢၢ်တဖၣ်, ဒီးတီၢ်လီၤကလဲအီၤ, ဒီးနကပာ်တၢ်စိခိၣ်တဖၣ်ဒ်ဖ့ဧိၤ ဃာ်ဧိၤအသိးန့ၣ်လီၤ.

¹⁶ နကပညၢအီၤ, ဒီးကလံၤကစိာ်ကွံာ်အီၤ, ဒီးကလံၤမုၢ် ကမၤပြံမၤပြါအီၤလီၤ. ဒီးနကသးခုလၢယွၤအပူၤ, ဒီးလၢ အံၣ်စရ့လး အတၢ်စီဆှံတဂၤအပူၤန့ၣ် နကပာ်ကဖိန သးလီၤ.

¹⁷ ပှၤဘၣ်နးဘၣ်ဖှီၣ်ဒီးပှၤဖှီၣ်ဖိယာ်ဖိန့ၣ်ဃုထံ, ဒီးတ အိၣ်ဘၣ်. အပျ့ၤဃ့ဝဲဒီးတၢ်သူအသးလၢထံလီၤ. ယၤ, ယွၤအံၤယကကနၣ်အကလုၢ်, ယဲဒၣ်, အံၣ်စရ့လးအက စၢ်, ယတလဲၤသဒၣ်ဘၣ်အီၤဘၣ်.

¹⁸ ယကအိးထီၣ်ထံကျိလၢကစၢၢ်ပျီအလိၤ, ဒီးထံထီၣ် ပၢၢ်လၢကစၢၢ်ကဆူးအသးကံၢ်ပူၤ, ဒီးယကပာ်ပှၢ်မုၢ်က နၢလၢထံနိၣ်အပူၤ, ဒီးဟီၣ်ခိၣ်ဃ့န့ၣ်လၢထံထီၣ်ပၢၢ်တ ဖၣ်လီၤ.

¹⁹ ဒီးယကသူၣ်သ့ၣ်ဆှိအ့ရ့း, ဒီးသ့ၣ်ဖှ့ၡံးတၤ, ဒီးသမ့ၤ ဟဒး, ဒီးသ့ၣ်စၤယံးအမံၤတဖၣ်လၢပှၢ်မုၢ်ကနၢလီၤ. ဒီး လၢမံၤခိၣ်သိၣ်လာ်န့ၣ်ယကပာ်သ့ၣ်ဆှိ, သ့ထိးအီၣ်, ဒီး သ့ၣ်ဆှိတအၤရှူၢ်တပူၤဃီ, ²⁰ ဒ်သိးအကထံၣ်တၢ်, ဒီးသ့ၣ် ညါဝဲ, ဒီးဆိကမိၣ်လၢအသး, ဒီးနၢ်ပၢၢ်တပူၤဃီလၢယွၤ အစုမၤတၢ်န့ၣ်, ဒီးအံၣ်စရ့လးအတၢ်စီဆှံတဂၤတ့လီၤ ဝဲလီၤ.

²¹ လိာ်ကွီၢ်တက့ၢ်, ယွၤစံးဝဲဒၣ်, ဒီးပာ်လီၤသုဂ့ၢ်သုကျိၤ လၢအဆူၣ်တက့ၢ်, ယၤကိာ်အစီၤပၤစံးဝဲဒၣ်. ²² မ်အသုးဘူးအသး, ဒီးဒုးနဲၣ်ပှၤလၢတၢ်လၢအကအိၣ်ထီၣ်တက့ၢ်. တၢ်လၢအခီၣ်ထံးတဖၣ်န့ၣ်မ့ၢ်မနုၤမနုၤလဲၣ်န့ၣ်မ်အဒုးနဲၣ်တက့ၢ်. ဒီးပကတိၢ်န့ၢ်အီၤလၢပသး, ဒီးသ့ၣ်ညါအကတၢၢ်လီၤ. မ့တမ့ၢ်ဘၣ်ဒ်န့ၣ်ဒီးမ်အဒုးနၢ်ဟူပှၤလၢတၢ်လၢအကဟဲထီၣ်တဖၣ်န့ၣ်တက့ၢ်.―

²³ ဒုးနဲၣ်ပှၤလၢတၢ်လၢအကဟဲထီၣ်ဆူခံဆူညါတက့ၢ်. ဒီးပကသ့ၣ်ညါလၢသုမ့ၢ်ကစၢ်တဖၣ်န့ၣ်လီၤ. မ့ၢ်မးတၢ် ဂ့ၤမ့ၢ်ဂ့ၤ, တၢ်အၢမ့ၢ်ဂ့ၤ, မၤတက့ၢ်. ဒီးပကကွၢ်တရံးတၢ်, ဒီးထံၣ်ဘၣ်တပူၤဃီန့ၣ်လီၤ.

²⁴ ကွၢ်ကွၢ်, သုမ့ၢ်တၢ်ဆံးန့ၢ်တၢ်နီတမံၤ, ဒီးသုမၤတၢ် န့ၣ်တမ့ၢ်ဘၣ်တၢ်ဘၣ်. ပှၤလၢအဃုထၢသုန့ၣ်မ့ၢ်တၢ် သးဘၣ်အၢလီၤ.

²⁵ ယဒုးအိၣ်ထီၣ်လံပှၤတဂၤလၢကလံၤစိးတခီ, ဒီးဟဲ လံဝဲလံ. လၢမုၢ်ထီၣ်တခီန့ၣ်ကကိးထီၣ်ယမံၤလီၤ. ဒီးက ဟဲလီၤဘၣ်ပဒိၣ်ဖးဒိၣ်တဖၣ်ဒ်လၢအီကတ့ၣ်အဖီခိၣ်အ သိးန့ၣ်, ဒီးဒ်ပှၤတ့သပၢၤဖိယီၢ်ဟီၣ်ခိၣ်ကပံာ်အသိးန့ၣ် လီၤ.

²⁶ မ့ၢ်မတၤဒုးနဲၣ်ဝဲလၢအခီၣ်ထံး ဒ်သိးပကသ့ၣ်ညါန့ၣ် တဂၤလဲၣ်. ဒီးလၢပျၢၤလၢသီန့ၣ်ဒ်သိးပကစံးအဝဲတီဝဲ လီၤတဂၤလဲၣ်. မ့ၢ်မးပှၤဒုးနဲၣ်ဝဲတအိၣ်ဘၣ်, မ့ၢ်မးပှၤဒုး နၢ်ဟူသုတၢ်ကတိၤန့ၣ်တအိၣ်ဘၣ်.

²⁷ ယကစံးဆိလၢစံယိၣ်, ကွၢ်ကွၢ်, ကွၢ်အီၤတက့ၢ်. ဒီးယ ကဟ့ၣ်လီၤ ပှၤစံၣ်တဲၤတၢ်သးခုအကစီၣ်လၢယရူၤၡ လ့ၣ်လီၤ.

²⁸ ဒီးယကွၢ်တၢ်, ဒီးပှၤကညီတအိၣ်ဘၣ်, ဒီးလၢအကျါ န့ၣ်, ဒီးပှၤကူၣ်လိာ်အသးတအိၣ်ဘၣ်, ဒီးယသံကွၢ်အီၤ, ဒီးတစံးဆၢဘၣ်တၢ်နီတမံၤဘၣ်.

²⁹ ကွၢ်ကွၢ်, မ့ၢ်တၢ်ကလီကလီခဲလၢာ်လီၤ. ဒီးအတၢ်မၤ န့ၣ်တမ့ၢ်ဘၣ်တၢ်ဘၣ်, အတၢ်ဂီၤသိအသးန့ၣ် မ့ၢ်က လံၤ, ဒီးတၢ်ကလီကလီန့ၣ်လီၤ.

၄၂

¹ ကွၢ်ယခ့ယပှၤတက့ၢ်. ယကဟံးဃာ်အီၤ, ပှၤလၢယ ဃုထၢအီၤလၢအဘၣ်ယသးလၢအီၤတဂၤန့ၣ်. ယပာ်ယ သးလၢအလိၤလီၤ. ကစံၣ်တဲၤတဲလီၤတၢ်စံၣ်ညီၣ်လၢ ပှၤကလုာ်တဖၣ်လီၤ. ² တကိးပသူထီၣ်ဘၣ်, ဒီးတထု ထီၣ်အကလုၢ်ဘၣ်, ဒီးတဒုးနၢ်ဟူဘၣ်အကလုၢ်လၢကျဲ ပူၤဘၣ်. ³ တပိၢ်တဘိလၢအသဘှံးန့ၣ်တမၤတဲာ်ကွံာ် ဘၣ်ဝဲဘၣ်, ဒီးတမၤပံာ်ဘၣ်မ့ၣ်အူဒၢအပှံာ်လၢအကပီၤ ပံာ်လ့ပံာ်လ့ဘၣ်. ကဒုးဟဲထီၣ်တၢ်စံၣ်ညီၣ်လၢတၢ်မ့ၢ် တၢ်တီလီၤ. ⁴ တကပီၤဘၣ်ပံာ်လ့ပံာ်လ့, ဒီးတသဘှံး ဘၣ်တုၤအပာ်တၢ်စံၣ်ညီၣ်လၢဟီၣ်ခိၣ်ချၢလီၤ. ဒီးကီး တဖၣ်န့ၣ်ကကွၢ်လၢ်အတၢ်သိၣ်တၢ်သီအကျဲလီၤ.

⁵ ကစၢ်ယွၤလၢအတ့လီၤမူခိၣ်, ဒီးသလၣ်ထီၣ်အီၤ, လၢအဒါလီၤဟီၣ်ခိၣ်ဒီးတၢ်မဲထီၣ်လၢအပူၤ, လၢအ ဟ့ၣ်လီၤပှၤဂီၢ်မုၢ်လၢအအိၣ်ဝဲလၢအဖီခိၣ်လၢအသါ, ဒီး ဟ့ၣ်ပှၤလၢအဟးလၢအလိၤန့ၣ် လၢအသးတဂၤန့ၣ်စံး ဝဲဒ်အံၤ, ⁶ ယဲဒၣ်ယွၤအံၤ, ယကိးန့ၢ်နၤလၢတၢ်မ့ၢ်တၢ် တီ, ဒီးယကဟံးဃာ်နၤလၢနစု, ဒီးယကအံးလီၤကွၢ် လီၤနၤ, ဒီးဟ့ၣ်လီၤနၤလၢ တၢ်အၢၣ်လီၤအီလီၤလၢပှၤ ဂီၢ်မုၢ်အဂီၢ်, လၢတၢ်ကပီၤလၢပှၤကလုာ်တဖၣ်အဂီၢ်,―

⁷ ဒ်သိးနကအိးထီၣ် ပှၤမဲာ်ဘျီၣ်အမဲာ်, ဒ်သိးနကဒုးဟး ထီၣ်ပှၤဃိာ်ဖိလၢဃိာ်ပူၤ, ဒီးပှၤလၢအအိၣ်ဝဲဆိးဝဲလၢ တၢ်ခံးကျါန့ၣ်လၢဃိာ်အဟံၣ်ပူၤလီၤ.

⁸ ယဲဒၣ်အံၤယမ့ၢ်ယွၤလီၤ. အဝဲန့ၣ်မ့ၢ်ယမံၤလီၤ. ဒီးယ လၤကပီၤယတဟ့ၣ်လီၤဘၣ်လၢပှၤအဂၤဘၣ်, ဒီးယ တၢ်စံးထီၣ်ပတြၢၤ ယတဟ့ၣ်ဘၣ်လၢတၢ်ဂီၤတၢ်ဖီၣ် ဘၣ်.

⁹ ကွၢ်ကွၢ်, တၢ်အခီၣ်ထံးတဖၣ်န့ၣ်မၤလံအသးလံ, ဒီး တၢ်အသီတဖၣ်န့ၣ် ယဒုးနဲၣ်လီၤ. တချုးအိၣ်ထီၣ်ဒံး ဘၣ်ဒီး, ယဒုးနၢ်ဟူသုလၢအီၤလီၤ.

¹⁰ သးဝံၣ်ယွၤလၢတၢ်သးဝံၣ်အသီ, ဒီးအတၢ်စံးထီၣ်ပ တြၢၤလၢဟီၣ်ခိၣ်အကတၢၢ်တဖၣ်န့ၣ်, ပှၤလၢအလဲၤ လီၤလၢပီၣ်လဲၣ်ဒီးတၢ်လၢအမၤပှဲၤအီၤ, ကီးတဖၣ်, ဒီးပှၤ လၢအအိၣ်လၢအဖီခိၣ်သ့ၣ်ဧၢ.

¹¹ ပှၢ်မုၢ်ကနၢဒီးအဝ့ၢ်တဖၣ်ကထုထီၣ်အကလုၢ်, အတ ဝီတဖၣ်လၢက့ဒၢ်အိၣ်ဝဲဆိးဝဲလၢအပူၤန့ၣ်, ပှၤအိၣ်ဝဲ ဆိးဝဲလၢစ့လၤကကိးလၢအကလုၢ်ဖးဒိၣ်, ကကိးပသူ ထီၣ်လၢကစၢၢ်ခိၣ်လီၤ. ¹² ကပာ်လၤကပီၤယွၤ, ဒီးဒုးနဲၣ် အတၢ်စံးထီၣ်ပတြၢၤလၢကီးတဖၣ်လီၤ.

¹³ ယွၤကလဲၤထီၣ်ဒ်ပှၤအဆူၣ်အသိးန့ၣ်, ကထိၣ်ဂဲၤအ သးဆူၣ်ဒ်ပှၤသုးဖိအသိးန့ၣ်, ကကိးထီၣ်လၢအကလုၢ် ဖးဒိၣ်, ကကိးပသူထီၣ်, ကမၤဃၣ်အဒုၣ်အဒါလီၤ.

¹⁴ ယအိၣ်ဘှီၣ်ကလာ်ကယီၤကီလံ. ယအိၣ်ဃိကလာ်, ဒီးယကီၤယသးလံလီၤ. မ့မ့ၢ်ခဲကနံၣ်အံၤ, ယကကိးလ့ၢ် လ့ၢ်ဒ်ပိာ်မုၣ်လၢအဟုးဆါအသိး, ယကမၤဟးဂီၤတၢ်, ယကယူၢ်လီၤကွံာ်တၢ်တပူၤဃီလီၤ. ¹⁵ ဒီးယကမၤသ ယုၢ်ကစၢၢ်တဖၣ်, ဒီးတၢ်စိခိၣ်တဖၣ်, ဒီးဒုးဃ့ထီၣ်ကွံာ် အနီၣ်ဧိၤမံၤဧိၤခဲလၢာ်, ဒီးယကပာ်အထံမိၢ်ပှၢ်လၢခိ, ဒီး ယကဒုးလီၤသံးကွံာ်နိၣ်ဧိၤအီဧိၤလီၤ.

¹⁶ ဒီးယကဒုးလဲၤပှၤမဲာ်ဘျီၣ်လၢ ကျဲမုၢ်လၢ အတသ့ၣ် ညါဘၣ်ဝဲဘၣ်, ဒီးယကဒုးပိာ်အီၤလၢကျဲဖိလၢအတ သ့ၣ်ညါတ့ၢ်ဝဲဘၣ်, ဒီးယကပာ်တၢ်ခံးလၢတၢ်ကပီၤ လၢအမဲာ်ညါ, ဒီးတၢ်အက့ၣ်တဖၣ်လၢတၢ်အလိၤတ ဖၣ်န့ၣ်လီၤ. တၢ်တဖၣ်န့ၣ်ယကမၤ, ဒီးယတလဲၤသဒၣ် ဘၣ်အီၤဘၣ်.

¹⁷ ကဘၣ်တၢ်ဘိးကဒါက့ၤအီၤ, ဒီးတၢ်မဲာ်ဆှးနးမး, ပှၤ လၢအသန့ၤအသးလၢတၢ်ဂီၤစိးပျၤအသး, လၢအစံး တၢ်ဂီၤသိအသး, သုမ့ၢ်ပကစၢ်လီၤန့ၣ်လီၤ.

¹⁸ ပှၤလၢအနၢ်တအၢသ့ၣ်ဧၢ, ကနၣ်တက့ၢ်. ဒီးပှၤလၢအ မဲာ်ဘျီၣ်သ့ၣ်ဧၢ, ကွၢ်ထံဒ်သိးသုကထံၣ်တၢ်တက့ၢ်.

¹⁹ မ့တမ့ၢ်ဘၣ် ယခ့ယပှၤဒီး မ့ၢ်မတၤမဲာ်ဘျီၣ်တဂၤ လဲၣ်. ဒီးပှၤနၢ်တအၢဒ်ယကလူးလၢယကမၢလီၤအီၤန့ၣ် မတၤတဂၤလဲၣ်. မ့ၢ်မတၤမဲာ်ဘျီၣ်ဒ်ပှၤအလၢအပှဲၤ, ဒီး မဲာ်ဘျီၣ်ဒ်ယွၤအခ့အပှၤအသိးန့ၣ်တဂၤလဲၣ်. ²⁰ နထံၣ် တၢ်အါမံၤဘၣ်ဆၣ်ဒီးတတိၢ်န့ၢ်ဘၣ်. နအိးထီၣ်အသး ဘၣ်ဆၣ်ဒီး, တနၢ်ဟူဘၣ်တၢ်ဘၣ်.

²¹ ဘၣ်ယွၤအသးလၢအတၢ်တီတၢ်လိၤအဃိ, လၢအက ပာ်ဒိၣ်တၢ်သိၣ်တၢ်သီ, ဒီးပာ်အီၤအိၣ်ဒီးအလၤကပီၤ လီၤ.

²² ဘၣ်ဆၣ်ဒီးပှၤတကလုာ်အံၤ, မ့ၢ်ပှၤလၢတၢ်ဂုာ်ဆူၣ် အတၢ်, ဒီးဘၣ်ပျံၤသကွီၤလၢတၢ်အိပူၤခဲလၢာ်, ဒီးအိၣ်ခူ သူၣ်လၢဃိာ်တဖၣ်အပူၤလီၤ. ကဲထီၣ်တၢ်လၢပှၤဂုာ် ဆူၣ်အီၤဒီးတၢ်မၤပူၤမၤဖျဲးတအိၣ်ဘၣ်, ဒီးတၢ်လၢပှၤမၤ န့ၢ်ဆူၣ်အီၤ, ဒီးပှၤလၢအစံး, ဟ့ၣ်က့ၤတၢ်တက့ၢ်န့ၣ်တ အိၣ်ဘၣ်.

²³ မ့ၢ်မတၤလၢအကျါကကနၣ်တၢ်န့ၣ်တဂၤလဲၣ်. မ့ၢ်မ တၤကဒိကနၣ်ဒီးနၢ်ဟူတၢ်လၢဆူညါ အဆၢအကတီၢ် အဂီၢ်တဂၤလဲၣ်.

²⁴ မ့ၢ်မတၤဟ့ၣ်လီၤယၤကိာ်လၢတၢ်မၤန့ၢ်ဆူၣ်, ဒီးအံၣ် စရ့လးလၢပှၤဂုာ်ဆူၣ်တၢ်အစုပူၤန့ၣ်တဂၤလဲၣ်. ယွၤ လၢပမၤကမၣ်ဘၣ်အီၤ, တမ့ၢ်ဘၣ်ဧါ. လဲၤဝဲလၢအကျဲ ပူၤအသးတအိၣ်, ဒီးတကနၣ်ဘၣ်အတၢ်သိၣ်တၢ်သီ ဘၣ်လီၤ.

²⁵ မၤသးဒ်န့ၣ်ဒီးယွၤလူလီၤဘၣ်အီၤလၢအသးထီၣ်, အ သးကဲၤထီၣ်, ဒီးတၢ်ဒုးသုးအတၢ်မၤဆူၣ်န့ၣ်လၢအလိၤ လီၤ. ဒီးအဝဲန့ၣ်ဆိၣ်ကဲၤအီၤလၢမ့ၣ်အူဝးတရံးဝဲ, ဘၣ် ဆၣ်ဒီးတသ့ၣ်ညါဘၣ်. ဒီးမ့ၣ်အူအီၣ်အီၤဘၣ်ဆၣ်ဒီး, တပာ်ဆိကမိၣ်ဘၣ်အသးဘၣ်လီၤ.

၄၃

¹ ဒီးခဲကနံၣ်အံၤ, ယွၤလၢအတ့လီၤနၤ, ယၤကိာ်ဧၢ, ဒီး မၤနၤ, အံၣ်စရ့လးဧၢ, စံးဒ်အံၤ, ပျံၤတၢ်တဂ့ၤ. အဂ့ၢ်ဒ်အံၤ, ယပှ့ၤက့ၤလံနၤလီၤ. ယကိးလံနၤလၢနမံၤလီၤ, နမ့ၢ်ယ တၢ်လီၤ.

² တုၤနခီဂာ်ထံန့ၣ်ဒီး, ယကအိၣ်ဒီးနၤ, ဒီးတုၤနခီဂာ် ထံမိၢ်ပှၢ်ဒီး, တလုၣ်ဘၢဘၣ်နၤဘၣ်. တုၤနခီတူာ်မ့ၣ်အူ ဒီး, မ့ၣ်အူတအီၣ်ဘၣ်နၤဘၣ်, ဒီးမ့ၣ်လၣ်တကိၢ်ဃံၣ် ကိၢ်ဃိာ်ဘၣ်နၤဘၣ်.

³ အဂ့ၢ်ဒ်အံၤ, ယဲဒၣ်ယွၤ, နကစၢ်, အံၣ်စရ့လးအတၢ်စီ ဆှံ, တၢ်ပှ့ၤက့ၤနၤတဂၤအံၤ, ယဟ့ၣ်လီၤအဲၤကူပတူး, ကူၤၡး, ဒီးစဘၤလၢနပှ့ၤလီၤ.

⁴ မ့ၢ်နမ့ၢ်တၢ်လုၢ်ဒိၣ်ပှ့ၤဒိၣ်လၢယမဲာ်ညါ, ဒီးနဘၣ်တၢ် လၤကပီၤ, ဒီးယအဲၣ်နၤသတးဒီး, ယကဟ့ၣ်လီၤပှၤသ ပျၢၤပှၤကညီလၢနဂီၢ်, ဒီးပှၤကလုာ်တဖၣ်လၢနသးအ ဂီၢ်လီၤ.

⁵ ပျံၤတၢ်တဂ့ၤ, အဂ့ၢ်ဒ်အံၤ, ယအိၣ်ဒီးနၤလီၤ. ယကဒုး ဟဲနချံနသၣ်လၢမုၢ်ထီၣ်တခီ, ဒီးလၢမုၢ်နုာ်တခီန့ၣ်ယ ကထၢဖှိၣ်နၤလီၤ. ⁶ ယကစံးဘၣ်ကလံၤစိးတခီန့ၣ်, ဟ့ၣ် ထီၣ်အီၤတက့ၢ်. ကလံၤထံးတခီန့ၣ်, တြီအီၤတဂ့ၤ. ဒုးဟဲ ထီၣ်ယဖိခွါလၢအယံၤ, ဒီးယဖိမုၣ်လၢဟီၣ်ခိၣ်အက တၢၢ်န့ၣ်တက့ၢ်. ⁷ ကယဲၢ်ပှၤလၢတၢ်ကိးယမံၤလၢအ လိၤ, ဒီးလၢယတ့လီၤအီၤလၢယလၤကပီၤအဂီၢ်, မ့ၢ်မး ယတ့အီၤ, ဒီးယမၤအီၤလီၤ.

⁸ ဒုးဟဲထီၣ်ပှၤမဲာ်ဘျီၣ်, ဒီးအမဲာ်အိၣ်, ဒီးပှၤနၢ်တအၢ, ဒီးအနၢ်အိၣ်န့ၣ်တက့ၢ်.

⁹ မ်ပှၤကလုာ်ခဲလၢာ်န့ၣ်အိၣ်ဖှိၣ်ရိဖှိၣ်, ဒီးမ်တၢ်ဒုးအိၣ် ဖှိၣ်ပှၤဂီၢ်မုၢ်တက့ၢ်. မ့ၢ်မတၤလၢအကျါန့ၣ်ကဒုးနဲၣ်တၢ် အံၤတဂၤလဲၣ်. ဒုးနၢ်ဟူပှၤလၢတၢ်လၢအခီၣ်ထံးတဖၣ် န့ၣ်တက့ၢ်. မ်အပာ်လီၤအတၢ်အုၣ်အသး, ဒီးဒိးတၢ် ပာ်တီအီၤတက့ၢ်. မ့တမ့ၢ်ဘၣ်ဒီး, မ်အကနၣ်တၢ်ဒီးစံး, မ့ၢ်ဝဲတီဝဲလီၤန့ၣ်တက့ၢ်.

¹⁰ သုဝဲဒၣ်အံၤသုမ့ၢ်ယတၢ်အုၣ်အသး, ယွၤစံးဝဲဒၣ်, ဒီး ယခ့ယပှၤလၢယဃုထၢအီၤ, ဒ်သိးသုကသ့ၣ်ညါ, ဒီး နာ်က့ၤယွၤ, ဒီးနၢ်ပၢၢ်လၢယမ့ၢ်အဝဲဒၣ်လီၤ. လၢယဂံၢ် ခိၣ်န့ၣ်ကစၢ်တဒိးတ့ဘၣ်အသးနီတဂၤဘၣ်, ဒီးလၢယ လီၢ်ခံန့ၣ်တအိၣ်ဘၣ်လီၤ.

¹¹ ယဲဒၣ်အံၤ, ယမ့ၢ်ယွၤလီၤ. ဒီးလၢယၤအမဲာ်ညါန့ၣ် တၢ်အုၣ်က့ၤခီၣ်က့ၤတအိၣ်ဘၣ်.

¹² ယဒုးနဲၣ်တၢ်, ဒီးယအုၣ်က့ၤခီၣ်က့ၤတၢ်, ဒီးယဒုးနၢ် ဟူတၢ်, ဒီးပှၤတခီဘီမုၢ်ဖိတအိၣ်ဘၣ်လၢသုကျါဘၣ်, ဒီးသုမ့ၢ်ယတၢ်အုၣ်အသး, ယွၤစံးဝဲဒၣ်, ဒီးယဲဒၣ်အံၤ, ယမ့ၢ်ယွၤလီၤ.

¹³ ဒီးလၢမုၢ်နံၤတချုးအိၣ်ဒံးဘၣ်ဒီး, ယအိၣ်ယဲလီၤ. ဒီး တၢ်ထူၣ်ဖျဲးလၢယစုပူၤတအိၣ်ဘၣ်. ယကမၤယဲဒီးမ့ၢ်မ တၤကမၤကဒါက့ၤတဂၤလဲၣ်.

¹⁴ ယွၤတၢ်ပှ့ၤက့ၤသု, အံၣ်စရ့လးအတၢ်စီဆှံတဂၤစံးဒ် အံၤ, လၢသုဂီၢ်န့ၣ်ယမၢလီၤတၢ်ဆူဘၤဘူၤလိၣ်, ဒီးဒုး လဲၤလီၤပှၤဟးဝ့ၤဝီၤတၢ်ခဲလၢာ်, ဒီးပှၤက့ၤစ့းဖိအကိးပ သူထီၣ်လၢအကဘီပူၤလီၤ.

¹⁵ ယဲဒၣ်အံၤ ယမ့ၢ်ယွၤသုတၢ်စီဆှံတဂၤ, တၢ်တ့လီၤ အံၣ်စရ့လး, သုစီၤပၤလီၤ.

¹⁶ ယွၤစံးဒ်အံၤ, ပှၤလၢအမၤကျဲမုၢ်လၢပီၣ်လဲၣ်ပူၤ, ဒီး ကျဲဖိလၢထံဆူၣ်အပူၤ, ¹⁷ ပှၤလၢအဒုးဟဲထီၣ်လ့ၣ်က ဟၣ်ဒီးကသ့ၣ်, တၢ်သုးမုၢ်ဒီးတၢ်အစိအကမီၤ, စံးဒ်အံၤ ကမံလီၤဝဲတပူၤဃီ, တဂဲၤဆၢထၢၣ်လၢၤဘၣ်, လီၤမၢ် ကွံာ်လံ. လီၤပံာ်လံဒ်မ့ၣ်အူဒၢ အပှံာ်အသိးန့ၣ်လီၤ.― ¹⁸ တၢ်လၢအခီၣ်ထံးတဖၣ်, သ့ၣ်နီၣ်ထီၣ်က့ၤအီၤတဂ့ၤ, ဒီးတၢ်လၢပျၢၤလၢသီတဖၣ်, ဆိကမိၣ်လၢအဂ့ၢ်တဂ့ၤ.―

¹⁹ ကွၢ်ကွၢ်, ယမၤတၢ်အသီတမံၤလီၤ. ခဲကနံၣ်အံၤကမဲ ထီၣ်လီၤ. သုတသ့ၣ်ညါဘၣ်ဧါ, မ့ၢ်မးယကပာ်ကျဲလၢ ပှၢ်မုၢ်ကနၢ, ဒီးထံကျိတဖၣ်လၢမံၤခိၣ်သိၣ်လာ်လီၤ.

²⁰ ပှၢ်လၢ်ကျါအဆၣ်ဖိကီၢ်ဖိကမၤလၤကပီၤယၤ, ထွံၣ် ဟီၣ်ခိၣ်ဒီးထိၣ်ကီၤလၤအူးလီၤ. အဂ့ၢ်ဒ်အံၤ, ယပာ်လီၤ ထံလၢပှၢ်မုၢ်ကနၢ, ဒီးထံကျိလၢမံၤခိၣ်သိၣ်လာ် ဒ်သိး ယကဟ့ၣ်တၢ်အီလၢ ယပှၤဂီၢ်မုၢ်, ပှၤလၢယဃုထၢ အီၤန့ၣ်လီၤ.

²¹ ပှၤတကလုာ်အံၤ ယတ့လီၤလၢယဂီၢ်ဒၣ်ယဲ, ကစံၣ် တဲၤတဲလီၤယတၢ်စံးထီၣ်ပတြၢၤလီၤ.

²² ဘၣ်ဆၣ်ဒီးနတကိးထီၣ်ဘၣ်ယၤ, ယၤကိာ်ဧၢ. အဂ့ၢ် ဒ်အံၤ, တၢ်ဘှံးနသးလၢယဃိ, အံၣ်စရ့လးဧၢ. ²³ နတဟဲ စိာ်ဘၣ်တၢ်လုၢ်မ့ၣ်အူအသိဆူယအိၣ်ဘၣ်, ဒီးနတမၤ လၤကပီၤဘၣ်ယၤလၢနတၢ်လုၢ်ဘၣ်, ယတဒုးမၤနၤလၢ တၢ်မၤဘူၣ်, ဒီးယတဒုးဘှံးနသးလၢတၢ်ဆိၣ်ကဲၤနၢမူ ဘၣ်. ²⁴ နတပှ့ၤန့ၢ်ဘၣ်ယၤလၢလီၢ်ဟ့ၣ်လၢစ့ဘၣ်, ဒီးန တဒုးဘျဲးအီၣ်ဘၣ်ယၤလၢနတၢ်လုၢ်အသိအချါဘၣ်. မ့ မ့ၢ်နပာ်တၢ်မၤလၢယလိၤလၢနတၢ်ဒဲးဘး, ဒီးနမၤဘှံး ယသးလၢနတၢ်ကမၣ်လီၤ.

²⁵ ယဲဒၣ်အံၤယတြူာ်ကွံာ် နတၢ်သရူးတၢ်ကမၣ်လၢယ ဂီၢ်ဒၣ်ယဲလီၤ. ယတသ့ၣ်နီၣ်ထီၣ်က့ၤဘၣ်နတၢ်ဒဲးဘး ဘၣ်.

²⁶ ဒုးသ့ၣ်နီၣ်ထီၣ်က့ၤယၤတက့ၢ်. လိာ်ကွီၢ်လိာ်ပသးတ က့ၢ်. ကတိၤတၢ်, ဒ်သိးနကဘၣ်တၢ်ပာ်တီပာ်လိၤနၤတ က့ၢ်.

²⁷ နပၢ်အခီၣ်ထံးတဂၤန့ၣ်မၤတၢ်ဒဲးဘး, ဒီးနသရၣ်သ့ၣ် တဖၣ်န့ၣ်မၤကမၣ်ဘၣ်ယၤလီၤ.

²⁸ မၤသးဒ်န့ၣ်ဒီး, ယကမၤဘၣ်အၢတၢ်အလီၢ်စီဆှံအ ပဒိၣ်ဖးဒိၣ်တဖၣ်, ဒီးဟ့ၣ်လီၤကွံာ်စီၤယၤကိာ်ဆူတၢ် ဆိၣ်အၢ, ဒီးအံၣ်စရ့လးန့ၣ်ဆူတၢ်ဒုၣ်ဒွဲၣ်လီၤ.

၄၄

¹ ဒီးခဲကနံၣ်အံၤကနၣ်ယခ့ယပှၤယၤကိာ်ဧၢ, ဒီးအံၣ်စ ရ့လးလၢယဃုထၢအီၤတဂၤဧၢ, ² ယွၤလၢအတ့လီၤနၤ, ဒီးတ့နၤလၢတၢ်ဒၢလီၢ်ပူၤလံၤလံၤ, ဒီးကမၤစၢၤနၤတဂၤ စံးဒ်အံၤ, ပျံၤတၢ်တဂ့ၤ, ယခ့ယပှၤယၤကိာ်ဧၢ, ဒီးယရှူရိၣ် လၢယဃုထၢအီၤတဂၤဧၢ.

³ အဂ့ၢ်ဒ်အံၤ, ယကလူလီၤထံလၢပှၤလၢတၢ်သူအသး လၢထံအလိၤ, ဒီးဒုးယွၤလီၤထံလၢဟီၣ်ခိၣ်ဃ့အဖီခိၣ် လီၤ. ယကလူလီၤယသးလၢနချံနသၣ်အလိၤ, ဒီးယတၢ် ဆိၣ်ဂ့ၤလၢနစၢၤနသွဲၣ်အလိၤလီၤ.

⁴ ဒီးကမဲထီၣ်လၢနီၣ်ဧိၤမံၤဧိၤအကျါ, ဒ်ပံၢ်သလီလၢထံ ကျိနံၤအသိးန့ၣ်လီၤ.

⁵ ပှၤတဂၤကစံး, ယဲဒၣ်အံၤယမ့ၢ်ယွၤအတၢ်လီၤ. ဒီးပှၤ တဂၤဒၣ်ကကိးလီၤအသးလၢစီၤယၤကိာ်အမံၤလီၤ. ဒီး ပှၤတဂၤဒၣ်ကကွဲးလၢအစု, လၢယွၤအဂီၢ်, ဒီးကယုၢ်လီၤ အမံၤသီလၢအံၣ်စရ့လးလီၤ.

⁶ ယွၤ, အံၣ်စရ့လးအစီၤပၤ, ဒီးတၢ်ပှ့ၤက့ၤအီၤ, တၢ်သုး မုၢ်ဂီၢ်မုၢ်အယွၤ, စံးဒ်အံၤ, ယဲဒၣ်အံၤ, ယမ့ၢ်တၢ်အခီၣ်ထံး ဒီးယဲဒၣ်အံၤယမ့ၢ်တၢ်အကတၢၢ်, ဒီးယဲဒၣ်အံၤအမဲာ် ညါကစၢ်တအိၣ်ဘၣ်.

⁷ ဒီးလၢယပာ်လီၤပှၤဂီၢ်မုၢ်လၢပျၢၤ တကလုာ်လံၤလံၤ န့ၣ်မ့ၢ်မတၤဒ်ယၤအသိးကကိးထီၣ်တၢ်, ဒီးဒုးနဲၣ်တၢ်, ဒီးကတဲာ်ကတီၤတၢ်လၢယဂီၢ်, ဒီးစံၣ်တဲၤတၢ်လၢအမၤ အသး, ဒီးတၢ်လၢအကမၤအသးန့ၣ်တဂၤလဲၣ်.

⁸ ဘၣ်ယိၣ်တၢ်တဂ့ၤ. ဒီးပျံၤတၢ်တဂ့ၤ. ယဒုးနၢ်ဟူနၤ, ဒီးစံးဘၣ်တဲဘၣ်နၤလၢပျၢၤလံၤလံၤ, တမ့ၢ်ဘၣ်ဧါ. ဒီး သုမ့ၢ်ယတၢ်အုၣ်အသး, တမ့ၢ်ဘၣ်ဧါ. ကစၢ်လၢယမဲာ် ညါန့ၣ်မ့ၢ်အအိၣ်စ့ၢ်ကီးဧါ. ဒီးလၢၢ်တအိၣ်ဘၣ်, ယတ သ့ၣ်ညါဘၣ်နီတမံၤဘၣ်.

⁹ ပှၤလၢအတ့တၢ်ဂီၤတၢ်ဖီၣ်န့ၣ် မ့ၢ်တၢ်ကလီကလီခဲ လၢာ်, ဒီးအတၢ်အဂ့ၤအဘၣ်တဖၣ်န့ၣ်မ့ၢ်တၢ်တဂိာ်တ သီၣ်ဘၣ်တၢ်ဘၣ်. ဒီးမ့ၢ်အပှၤအုၣ်အသးဒၣ်ဝဲ, တထံၣ် ဘၣ်တၢ်ဘၣ်, ဒီးတသ့ၣ်ညါဘၣ်တၢ်ဘၣ်ဒ်သိးအမဲာ် ကဆှးလီၤ.

¹⁰ မ့ၢ်မတၤတ့လီၤကစၢ်, ဒီးသိတၢ်ဂီၤတၢ်ဖီၣ်လၢအတ ဂိာ်တသီၣ်ဘၣ်တၢ်တဂၤလဲၣ်.

¹¹ ကွၢ်ကွၢ်, အတံၤအသကိးခဲလၢာ်ကမဲာ်ဆှးလီၤ. ဒီးပှၤ တ့တၢ်တဖၣ်န့ၣ်မ့ၢ်ပှၤကညီလီၤ. ကအိၣ်ဖှိၣ်ခဲလၢာ်, က ဆၢထၢၣ်, ကပျံၤတၢ်ဖုးတၢ်, ကမဲာ်ဆှးတပူၤဃီလီၤ.

¹² ပှၤပိာ်ထးမၤနီၣ်တံာ်, ဒီးမၤဝဲလၢမ့ၣ်အူကဖးအကျါ ဒီးတ့ဝဲလၢခံၣ်ခူၣ်, ဒီးမၤဝဲလၢအစုဒုၣ်အဆူၣ်လီၤ. မ့ၢ်လံ တၢ်သၣ်ဝံၤအသး, ဒီးအဂံၢ်အဘါတအိၣ်ဘၣ်. တအီ ဘၣ်ထံဘၣ်, ဒီးလီၤဘှါဝဲလီၤ.

¹³ ပှၤစုသ့စၢၢ်ထီၣ်ပျံၤ, ကွဲးပနီၣ်လၢနီၣ်ကွဲးတၢ်, တ့အီၤ လၢနီၣ်ပျၤ, ဒီးကမၤပနီၣ်အီၤလၢနီၣ်ကါတြါလီၤ. အန့ၣ် ဒီးတ့ဝဲဒ်ပှၤကညီအဂီၤအသိး, ဒ်ပှၤကညီအဃံအလၤ အသိး, ဒ်သိးအကအိၣ်ကဆိးလၢဟံၣ်ပူၤလီၤ.

¹⁴ ကူာ်လီၤကွံာ်သ့ၣ်ဆှိအ့ရ့းလၢအဂီၢ်, ဒီးဟံးန့ၢ်သ့ၣ် အကိၤ, ဒီးသ့ထိးဖၣ်, ဒီးဒုးဆူၣ်ထီၣ်ဝဲလၢအဂီၢ်ဒၣ်ဝဲလၢ သ့ၣ်လၢပှၢ်လၢ်ကျါအကျါလီၤ. သူၣ်ဝဲလၢသ့ၣ်ဆှိတ ထူၣ်, ဒီးတၢ်စူၤကဒုးဒိၣ်ထီၣ်ဝဲလီၤ.

¹⁵ ဒီးကဲထီၣ်ဝဲလၢသ့ၣ်မုၣ်လၢပှၤကညီအဂီၢ်လီၤ. ဒီးဟံး န့ၢ်ဝဲတကူာ်, ဒီးဆူးဒၣ်ဝဲလၢမ့ၣ်အူလီၤ. မ့ၢ်မးဆိၣ်ကဲၤ မ့ၣ်အူ, ဒီးကုၢ်ကိၣ်လီၤ. မ့ၢ်မးတ့စ့ၢ်ကီးအကစၢ်, ဒီးတီၤ လီၤဘါအီၤလီၤ. တ့တၢ်ဂီၤ, ဒီးတီၤလီၤကဒွံကျိာ်လၢအ မဲာ်ညါလီၤ.

¹⁶ ဆူးထီၣ်ကွံာ်တကူာ်လၢမ့ၣ်အူ, ဒီးကအီၣ်တၢ်ညၣ် လၢတကူာ်, ကၣ်တၢ်ညၣ်, ဒီးဘျဲးအီၣ်, ဒီးဆူးမ့ၣ်အူ, ဒီး စံးဝဲ, အၣ်ဟါ, ယလၢၤလံ, ယထံၣ်ဘၣ်မ့ၣ်အူလံ.

¹⁷ ဒီးတၢ်အိၣ်လီၤတဲာ်န့ၣ်တ့အီၤလၢအကစၢ်, အတၢ်ဂီၤ စိးပျၤအသးလီၤ. တီၤလီၤကဒွံကျိာ်, ဒီးဘူၣ်ထီၣ်ဘါ ထီၣ်အီၤ, ဒီးဘါထုကဖၣ်အီၤဒီးစံး, မၤပူၤမၤဖျဲးယၤတ က့ၢ်. အဂ့ၢ်ဒ်အံၤ, နမ့ၢ်ယကစၢ်လီၤ.

¹⁸ တသ့ၣ်ညါဘၣ်တၢ်ဘၣ်, အနၢ်တပၢၢ်ဘၣ်တၢ်ဘၣ်, အဂ့ၢ်ဒ်အံၤ, တၢ်ကျးဃာ်အမဲာ်လၢအသုတထံၣ်တၢ်တ ဂ့ၤ, အသးန့ၣ်လၢအသုတမၤဒီးတၢ်ကူၣ်သ့တဂ့ၤလီၤ.

¹⁹ ဒီးတတိၢ်ဘၣ်လၢအသးဘၣ်, ဒီးတအိၣ်ဘၣ်ဒီးတၢ် သ့ၣ်ညါ, ဒီးအသူၣ်ဆးအသးဆးလၢအကစံး, ယဆူး ကွံာ်တကူာ်လၢမ့ၣ်အူလံ, ယကုၢ်ကိၣ်စ့ၢ်ကီးလံလၢအ မ့ၣ်ကဖးအဖီခိၣ်လံ, ယကၣ်တၢ်ညၣ်, ဒီးအီၣ်တၢ်, ဒီး လၢတၢ်အိၣ်လီၤတဲာ်န့ၣ်ယကမၤတၢ်သးဘၣ်အၢ, ယ ကတီၤလီၤကဒွံကျိာ်လၢသ့ၣ်အထူၣ်အမဲာ်ညါန့ၣ်ဧါ.

²⁰ အီၣ်ဝဲလၢဖၣ်ဆါ, အသးလၢအလီန့ၢ်အီၤတမံၤဒုးဟး ဖျိးအီၤ, ဒီးမၤပူၤမၤဖျဲးအသးဒၣ်ဝဲတသ့ဘၣ်, ဒီးတစံး, တၢ်ကဘျံးကဘျၣ် အိၣ်လၢယစုထွဲတမ့ၢ်ဘၣ်ဧါန့ၣ် ဘၣ်.

²¹ သ့ၣ်နီၣ်ထီၣ်က့ၤတၢ်န့ၣ်တဖၣ်, ယၤကိာ်, ဒီးအံၣ်စရ့ လးဧၢ, အဂ့ၢ်ဒ်အံၤ, နမ့ၢ်ယခ့ယပှၤလီၤ. ယတ့နၤ, နမ့ၢ် ယခ့ယပှၤလီၤ. အံၣ်စရ့လးဧၢ, ယတသးပ့ၤနီၣ်ဘၣ်နၤ ဘၣ်.

²² ယတြူာ်ကွံာ်လံနတၢ်ကမၣ်ဒ်တၢ်အၢၣ်သူအသိး, ဒီး နတၢ်ဒဲးဘးဒ်တၢ်အၢၣ်အသိးန့ၣ်လံ. ဟဲက့ၤကဒါက့ၤ ဆူယအိၣ်တက့ၢ်. အဂ့ၢ်ဒ်အံၤ, ယပှ့ၤက့ၤလံနၤလံ.

²³ သးဝံၣ်တၢ်, မူခိၣ်ဧၢ. အဂ့ၢ်ဒ်အံၤ, ယွၤမၤတၢ်လံ. ကိး ပသူထီၣ်, ဟီၣ်ခိၣ်လၢလာ်ခီဧၢ, ဒီးအုၣ်ထီၣ်တၢ်, ကစၢၢ် သ့ၣ်ဧၢ, ပှၢ်လၢ်ကျါဒီးကယဲၢ်သ့ၣ်လၢအပူၤကိးထူၣ်ဒဲး ဧၢ. အဂ့ၢ်ဒ်အံၤ, ယွၤပှ့ၤက့ၤလံယၤကိာ်, ဒီးကမၤလၤက ပီၤလီၤအသးလၢအံၣ်စရ့လးအပူၤလီၤ.

²⁴ ယွၤလၢအပှ့ၤက့ၤနၤ, ဒီးတ့နၤလၢပှၤဒၢလီၢ်ပူၤလံၤ လံၤန့ၣ်စံးဒ်အံၤ, ယဲဒၣ်အံၤ ယမ့ၢ်ယွၤလၢအတ့တၢ်ခဲ လၢာ်, လၢအသလၣ်ထီၣ်မူခိၣ်တဂၤဃီ, လၢအဒါလီၤ ဟီၣ်ခိၣ်တဂၤဃီလီၤ. ²⁵ ပှၤလၢအမၤဟးဂီၤ ပှၤကတိၤ ကဘျံးကဘျၣ်အပနီၣ်တဖၣ်, ဒီးဒုးပျုၢ်ထီၣ်ပှၤလၢအ ဖးတၢ်, ဒုးက့ၤကဒါက့ၤပှၤကူၣ်တၢ်သ့, ဒီးပာ်အတၢ် သ့ၣ်ညါလၢပှၤဟးဂီၤဖိအတၢ်လီၤ. ²⁶ ပှၤလၢအဒုးအိၣ် ဂၢၢ်ဆိးကျၢၤအခ့အပှၤအတၢ်ကတိၤ, ဒီးမၤလၢထီၣ်ပှဲၤ ထီၣ်အကလူးအတၢ်ကူၣ်လီၤ. မ့ၢ်ပှၤလၢအစံးလၢယရူၤ ၡလ့ၣ်အဂ့ၢ်, ပှၤကအိၣ်ကဆိးလၢအပူၤ, ဒီးလၢယူဒၤအ ဝ့ၢ်တဖၣ်အဂ့ၢ်န့ၣ်, ပှၤကတ့က့ၤအီၤ, ဒီးအလီၢ်လီၤပှီၢ်န့ၣ် ယကမၤက့ၤအီၤလီၤ. ²⁷ ပှၤလၢအစံးတၢ်ယိာ်ပူၤန့ၣ်လီၤ သံးကွံာ်တက့ၢ်, ဒီးယကမၤလီၤသံးကွံာ်သုထံမိၢ်ပှၢ်လီၤ န့ၣ်, ²⁸ လၢအစံးလၢစီၤကိရ့ၣ်အဂ့ၢ်, ယပှၤကွၢ်သိ, ဒီးက မၤဝဲလၢကယဲၢ်တၢ်ဘၣ်ယသးလီၤ. ဒီးစံးလၢယရူၤၡ လ့ၣ်အဂ့ၢ်န့ၣ်နကဘၣ်တၢ်တ့က့ၤနၤလီၤ. ဒီးလၢတၢ် လုၢ်အဟံၣ်အဂ့ၢ်န့ၣ်, နခီၣ်ထံးတဖၣ်ကဘၣ်တၢ်ပာ်လီၤ အီၤလီၤ.

၄၅

¹ ယွၤစံးလၢ အပှၤဒိးဖှူအသးစီၤကိရ့ၣ်ဒ်အံၤ, ယဟံး ဃာ်အီၤလၢယစုထွဲဒ်သိး အကယီၢ်လီၤတံၢ်ပှၤကလုာ် တဖၣ်လၢအမဲာ်ညါ, ဒီးယကဃ့ၣ်လီၤစီၤပၤတဖၣ်အ ယီၢ်တကိး, ဒီးအိးထီၣ်တြဲၤခံဘ့ၣ်လၢအမဲာ်ညါ, ဒီးတြဲၤ တဖၣ်တကးတံာ်ဃၣ်ဘၣ်အသးဘၣ်. ² ယကလဲၤလၢ နမဲာ်ညါ, ဒီးမၤဃူလိာ်တၢ်ထီၣ်စိလီၤနုာ်, ဒီးယကမၤ ကၢ်ကွံာ်တြဲၤတိၢ်ဘီတဖၣ်, ဒီးယကကူးတဲာ်အနီၣ်ဘိ ထးလီၤ. ³ ဒီးယကဟ့ၣ်လီၤနၤလၢတၢ်လုၢ်ဒိၣ်ပှ့ၤဒိၣ်လၢ တၢ်ခံးကျါ, ဒီးတၢ်အစုလီၢ်အခီၣ်ခိၣ်အိၣ်ဘံၣ်အသး လၢအလီၢ်အိၣ်ခူသူၣ်တဖၣ်, ဒ်သိးနကသ့ၣ်ညါလၢယၤ ပှၤလၢအကိးထီၣ်နၤလၢနမံၤ, မ့ၢ်ယွၤအံၣ်စရ့လးအက စၢ်လီၤ.

⁴ လၢယခ့ယပှၤယၤကိာ်အဂီၢ်, ဒီးလၢပှၤလၢယဃုထၢ အီၤအံၣ်စရ့လးအဂီၢ်, ယကိးနၤလၢနမံၤ, ယကိးက့ၤနၤ လၢနမံၤသီ, ဒီးနတသ့ၣ်ညါဘၣ်ယၤဘၣ်လီၤ.

⁵ ယဲဒၣ်အံၤယမ့ၢ်ယွၤလီၤ. ဒီးအဂၤတအိၣ်ဘၣ်. လၢ ယၤအမဲာ်ညါကစၢ်တအိၣ်ဘၣ်. ယကကံၢ်တူာ်နယီၢ်ဒ့, ဒီးနတသ့ၣ်ညါဘၣ်ယၤဘၣ်, ⁶ ဒ်သိးပှၤကသ့ၣ်ညါလၢ မုၢ်ထီၣ်ပၢၢ်လၢမုၢ်နုာ်န့ၣ် လၢယၤအမဲာ်ညါတၢ်တအိၣ် ဘၣ်, ယမ့ၢ်ယွၤ, ဒီးအဂၤတအိၣ်ဘၣ်, ⁷ ယတ့တၢ်ကပီၤ ဒီးယမၤတၢ်ခံး, ယဒုးအိၣ်ထီၣ်တၢ်ဃူတၢ်ဖိး, ဒီးယတ့ တၢ်အၢလီၤ. ယဲဒၣ်ယွၤအံၤယမၤတၢ်တဖၣ်န့ၣ်ခဲလၢာ် လီၤ.

⁸ မူခိၣ်ဧၢ, ဒုးလီၤစီၤတၢ်လၢထးန့ၣ်တက့ၢ်. မ်တၢ်အၢၣ် ဂၢ်လီၤတၢ်တီတၢ်လိၤတက့ၢ်. မ်ဟီၣ်ခိၣ်အိးထီၣ်, ဒီးမ်အ ဒုးအိၣ်ထီၣ်တၢ်အုၣ်က့ၤခီၣ်က့ၤတက့ၢ်. ဒီးတၢ်တီတၢ် လိၤန့ၣ်, မ်အဒုးမဲထီၣ်ဝဲတပူၤဃီတက့ၢ်. ယဲဒၣ်ယွၤအံၤ တ့လီၤလံအီၤလံ.

⁹ ပှၤလၢအဂ့ၢ်လိာ်ဘှီလိာ်ဒီး ပှၤလၢအတ့လီၤအီၤ, သ ပၢၤအက့လၢသပၢၤဟီၣ်ခိၣ် အက့အကျါန့ၣ်ဘၣ်အဖှီၣ် လီၤ. ကပံာ်ဟီၣ်ခိၣ်ကစံးဘၣ်ပှၤလၢအတ့အီၤ, နတ့မနုၤ လဲၣ်န့ၣ်စ့ၢ်ကီးဧါ. ဒီးနမၤတၢ်ဒ်န့ၣ်, အစုတအိၣ်ဘၣ်န့ၣ် ဧါ.

¹⁰ ပှၤလၢအစံးဘၣ်အပၢ် နထီၣ်ဖိမနုၤလဲၣ်, ဒီးအမိၢ်, န ဆံးစၢ်မနုၤလဲၣ်န့ၣ်ဘၣ်အဖှီၣ်လီၤ.

¹¹ ယွၤအံၣ်စရ့လးအပှၤစီဆှံ, ဒီးပှၤတ့လီၤအီၤန့ၣ်စံးဒ် အံၤ, တၢ်လၢအကမၤအသးလၢယဖိခွါတဖၣ်အဂ့ၢ်အ ကျိၤန့ၣ်သံကွၢ်ယၤ, ဒီးတၢ်မၤလၢယစုအဂ့ၢ်အကျိၤန့ၣ် မၤလိာ်ဘၣ်ယၤတက့ၢ်လီၤ.

¹² ယတ့လီၤဟီၣ်ခိၣ်, ဒီးပှၤကညီအိၣ်လၢအဖီခိၣ်န့ၣ်ယ တ့လီၤအီၤလီၤ. ယဲဒၣ်ယစုသလၣ်ထီၣ်မူခိၣ်, ဒီးအသုး မုၢ်ဂီၢ်မုၢ်ခဲလၢာ်န့ၣ်ယမၤလိာ်လီၤ.

¹³ ယဒုးအိၣ်ထီၣ်အီၤလၢတၢ်တီတၢ်လိၤ, ဒီးယကမၤ ဃူအကျဲခဲလၢာ်လီၤ. အဝဲဒၣ်ကမၤက့ၤယဝ့ၢ်တဖျၢၣ်, ဒီး မၤထူၣ်ဖျဲးယပှၤဘၣ်တၢ်မၢကဲကုၢ်အီၤလီၤ. လၢတၢ်အ ပှ့ၤအဂီၢ်, လၢတၢ်အဘူးအလဲအဂီၢ်တမ့ၢ်ဘၣ်, တၢ်သုး မုၢ်ဂီၢ်မုၢ်အယွၤစံးဝဲဒၣ်လီၤ.

¹⁴ ယွၤစံးဝဲဒ်အံၤ, အဲၤကူပတူးအမၤတၢ်ဖံးတၢ်, ဒီးကူၤၡး ဒီးပှၤစဘၤဖိလၢအနီၢ်ဒိၣ်တဖၣ် အန့ၢ်တၢ်န့ၣ်ကဟဲဆူ နအိၣ်, ဒီးကဲထီၣ်နတၢ်လီၤ. ကပိာ်နခံ, ကဟဲဘၣ်စၢ ဃာ်လၢထးသွဲ, ကဘူၣ်ထီၣ်ဘါထီၣ်နၤ, ကဘါထုက ဖၣ်နၤဒီးစံး, ကစၢ်အိၣ်ထဲလၢနပူၤ, ဒီးကစၢ်အဂၤတအိၣ် ဘၣ်.

¹⁵ မ့ၢ်မးနမ့ၢ်ကစၢ်လၢအပာ်တဒၢနသး, ပှၤအုၣ်က့ၤခီၣ် က့ၤတၢ်. အံၣ်စရ့လးအကစၢ်ဧၢ.

¹⁶ အဝဲသ့ၣ်တဖၣ်န့ၣ်အမဲာ်ကဆှး, ဒီးပာ်ဆှးအမဲာ်ခဲ လၢာ်တပူၤဃီ, ပှၤလၢအတ့တၢ်ဂီၤန့ၣ်ကလဲၤနုာ်ဆူတၢ် မဲာ်ဆှးတပူၤဃီလီၤ.

¹⁷ အံၣ်စရ့လးကတုၤလၢ တၢ်အုၣ်က့ၤခီၣ်က့ၤအီၤအထူ အယိာ်လၢယွၤအပူၤလီၤ. သုမဲာ်တဆှး, ဒီးသုတပာ်ဆှး ဘၣ်သုမဲာ်အစိၤစိၤအဃၣ်ဃၣ်ဘၣ်လီၤ.

¹⁸ အဂ့ၢ်ဒ်အံၤ, ယွၤလၢအတ့လီၤမူခိၣ်စံးဒ်အံၤ, အဝဲဒၣ် မ့ၢ်ယွၤလၢအတ့လီၤဟီၣ်ခိၣ်ဒီးမၤအီၤ, အဝဲဒၣ်ဒုးအိၣ် ကျၢၤအီၤလီၤ. တမ့ၢ်ဘၣ်ဒ်သိးအကအိၣ်ကလီဒီးတ့ လီၤဝဲဘၣ်. မ့ၢ်ဒ်သိးအကအိၣ်ဒီးပှၤအိၣ်ဝဲဆိးဝဲလၢအ ဖီခိၣ်လီၤ. ¹⁹ ယဲဒၣ်အံၤယမ့ၢ်ယွၤ, ဒီးအဂၤတအိၣ်ဘၣ်.―တမ့ၢ်ဘၣ်ယကတိၤတၢ်အိၣ်ခူသူၣ်လၢ ဟီၣ်ခိၣ်တၢ် ခံးအလီၢ်ပူၤန့ၣ်ဘၣ်. ဃုန့ၢ်ယၤတက့ၢ်န့ၣ်တမ့ၢ်ဘၣ် ယစံးလၢစီၤယၤကိာ်အစၢၤအသွဲၣ်ကလီကလီဘၣ်. ယဲ ဒၣ်အံၤ, ယမ့ၢ်ယွၤလၢအကတိၤတၢ်တီတီလီၤ. ယဒုး နဲၣ်တၢ်လၢ အတီအလိၤလီၤ.

²⁰ အိၣ်ဖှိၣ်ရိဖှိၣ်, ဒီးဟဲတက့ၢ်. သုးဘူးသုသး တပူၤ ဃီ, ပှၤလၢအပူၤဖျဲးလၢ ပှၤကလုာ်တဖၣ်အကျါသ့ၣ် ဧၢ. ပှၤလၢအစိာ်ထီၣ်သ့ၣ်ဧိၤဝၣ်ဧိၤ, အတၢ်ဂီၤစိးပျၤအ သးန့ၣ်, ဒီးဘါထုကဖၣ်ကစၢ်တဂၤလၢအအုၣ်က့ၤခီၣ် က့ၤတၢ်တသ့ဘၣ်တဖၣ်န့ၣ် တသ့ၣ်ညါဘၣ်တၢ်နီတ မံၤဘၣ်. ²¹ ဒုးနဲၣ်တၢ်, ဒီးဒုးဟဲဘူးအီၤ, ဒီးမ်အကူၣ်လိာ် အသးတက့ၢ်. မ့ၢ်မတၤဒုးနၢ်ဟူတၢ်အံၤလၢတၢ်န့ၣ်လၢ ပျၢၤတဂၤလဲၣ်. မ့ၢ်မတၤဒုးနဲၣ်ဝဲလၢသီတဂၤလဲၣ်. ယဲ ဒၣ်, တမ့ၢ်ဘၣ်ဧါ. ဒီးလၢယၤအမဲာ်ညါန့ၣ်ကစၢ်တ အိၣ်ဘၣ်. ကစၢ်အတီအလိၤ, ပှၤအုၣ်က့ၤခီၣ်က့ၤတၢ်, ယဲဒၣ်အမဲာ်ညါန့ၣ်တၢ်တအိၣ်ဘၣ်.

²² ကွၢ်ထီၣ်ဆူယအိၣ်, ဒီးတုၤလၢတၢ်အုၣ်က့ၤခီၣ်က့ၤ သုတက့ၢ်, ဟီၣ်ခိၣ် အကတၢၢ်ခဲလၢာ်သ့ၣ်ဧၢ. အဂ့ၢ်ဒ် အံၤ, ယမ့ၢ်ကစၢ်, ဒီးအဂၤတအိၣ်ဘၣ်.

²³ ယဆိၣ်လီၤယသးလၢယကစၢ်ဒၣ်ယဲအမဲာ်ညါ, တၢ် ကတိၤထီၣ်ဖျဲးလၢတၢ်တီအထးခိၣ်လံ. တက့ၤကဒါ က့ၤဘၣ်. ကယဲၢ်ပှၤကချံးလီၤအခီၣ်လ့ၢ်ခိၣ်လၢယမဲာ် ညါ, ကယဲၢ်ပှၤအပျ့ၤကဆိၣ်တၢ်လၢယမဲာ်ညါလီၤ.

²⁴ ပှၤကစံး, ထဲလၢယွၤအပူၤ ယအိၣ်ဒီးတၢ်တီတၢ်လိၤ ဒီးတၢ်အဂံၢ်အဘါလီၤ. ပှၤကဟဲဆူအအိၣ်, ဒီးကယဲၢ် ပှၤလၢအသးထီၣ်ဘၣ်အီၤန့ၣ်အမဲာ်ကဆှးခဲလၢာ်လီၤ.

²⁵ ကယဲၢ်ပှၤအံၣ်စရ့လးဖိ အချံအသၣ်ခဲလၢာ်န့ၣ်တၢ်က ပာ်တီပာ်လိၤအီၤလၢယွၤအပူၤ, ဒီးကပာ်ကဖိအသး လၢအပူၤလီၤ.

၄၆

¹ ဘ့လးကိာ်လီၤ, နဘိသကူးအသး, အတၢ်ဂီၤတၢ်ဖီၣ် န့ၣ်ဘၣ်တၢ်ပာ်အီၤလၢ ဆၣ်ဖိကီၢ်ဖိအလိၤ, ဒီးဆၣ်ဖိ ကီၢ်ဖိအဒၢအလိၤလီၤ. သုတၢ်ဝံတၢ်ယိးကတဲာ်ကတီၤ လံ, တၢ်ပဒၢးလၢဆၣ်ဖိကီၢ်ဖိလၢတၢ်ဘှံးအသးအဂီၢ် လီၤ.

² သကူးအသး, ကိာ်လီၤဝဲတပူၤဃီလီၤ. မၤပူၤဖျဲးတၢ် ပဒၢးတသ့ဘၣ်. လဲၤဝဲဆူတၢ်မၢကဲကုၢ်အပူၤ အကစၢ် ဒၣ်ဝဲလီၤ.

³ ကနၣ်ယကလုၢ်တက့ၢ်, ယၤကိာ်အပှၤဟံၣ်ဖိ, ဒီးက ယဲၢ်ပှၤလၢ အအိၣ်လီၤတဲာ်လၢအံၣ်စရ့လးအပှၤဟံၣ်ဖိ ခဲလၢာ်, ပှၤလၢယစိာ်အီၤလၢပှၤအဟၢဖၢပူၤလံၤလံၤ, လၢအဘၣ်တၢ်စိာ်အီၤလၢအမိၢ်ဒၢလီၢ်လံၤလံၤသ့ၣ်ဧၢ. ⁴ -ဒီးယမ့ၢ်အဝဲဒၣ်တုၤလီၤသုသးပှၢ်, ဒီးတုၤသုခိၣ်ဝါ, ယ ကစိာ်သုလီၤ. ယဲဒၣ်ယမၤတ့ၢ်, ဒီးယကစိာ်တၢ်, မ့ၢ်မး ယကဝံတၢ်ယိးတၢ်, ဒီးယကမၤပူၤဖျဲးတၢ်လီၤ.

⁵ သုကဒိလီၤယၤ, ဒီးပာ်ဒ်သိးသိးဒီးယၤ, ဒီးပာ်သတြီၤ ယၤဒီးမတၤတဂၤ, ဒ်သိးပကလီၤဂာ်လိာ်ပသးန့ၣ်လဲၣ်.

⁶ ပှၤလၢအတသးလီဘၣ်ထူလၢထၢၣ်ပူၤ, ဒီးစီၤစ့လၢ စီၤပီၢ်စီၤရွဲၤ, အဝဲသ့ၣ်ငါပှၤပိာ်ထူ, ဒီးအဝဲဒၣ်တ့ကစၢ် လၢအီၤလီၤ. တီၤလီၤဝဲ, မ့ၢ်မးဘူၣ်ထီၣ်ဘါထီၣ်အီၤ လီၤ. ⁷ ယိးဝဲလၢအဖံဘၣ်ခိၣ်, ဒီးစိာ်အီၤ, ပာ်အီၤလၢအ လီၢ်ဒၣ်ဝဲ, ဒီးအိၣ်ထူၣ်ကလာ်ဖဲန့ၣ်လီၤ. တသုးဘၣ် အသးလၢအလီၢ်ဘၣ်. ဒီးပှၤကိးထီၣ်ဆူအအိၣ်, ဘၣ် ဆၣ်ဒီးတစံးဆၢဘၣ်, ဒီးတအုၣ်က့ၤခီၣ်က့ၤအီၤလၢအ တၢ်ကိၢ်တၢ်ဂီၤအပူၤဘၣ်လီၤ.

⁸ သ့ၣ်နီၣ်ထီၣ်က့ၤတၢ်န့ၣ်, ဒီးဒုးနဲၣ်သုသးလၢသ့မ့ၢ် ပှၤကညီန့ၣ်တက့ၢ်. တိၢ်န့ၢ်လၢသုသး, ပှၤလၢအသးဟး ဂီၤသ့ၣ်ဧၢ.

⁹ သ့ၣ်နီၣ်ထီၣ်က့ၤ တၢ်လၢအခီၣ်ထံးလၢပျၢၤန့ၣ်တ က့ၢ်. အဂ့ၢ်ဒ်အံၤ, ယမ့ၢ်ကစၢ်, ဒီးအဂၤတအိၣ်ဘၣ်, ယွၤ, ဒီးတၢ်လီၤဂာ်လၢယၤတအိၣ်ဘၣ်. ¹⁰ လၢအခီၣ် ထံးယဒုးနဲၣ်တၢ်တုၤအကတၢၢ်, ဒီးလၢပျၢၤလံၤလံၤ န့ၣ်တၢ်လၢအတမၤဒံးဘၣ်အသးဘၣ်, ဒီးယစံး, တၢ် လၢယတိာ်န့ၣ်ကအိၣ်ကျၢၤဝဲ, ဒီးကယဲၢ်တၢ်ဘၣ်ယသး န့ၣ်ယကမၤခဲလၢာ်လီၤ. ¹¹ ယကိးလံာ်ဖးဒိၣ်တဘ့ၣ်လၢ မုၢ်ထီၣ်တခီ, ဒီးပှၤလၢအမၤယကူၣ်ထီၣ်တၢ်တဂၤန့ၣ် လၢထံယံၤကီၢ်ယံၤလီၤ. ယကတိၤတ့ၢ်, မ့ၢ်မးယက မၤအိၣ်ထီၣ်, ယတိာ်တၢ်, မ့ၢ်မး ယကဒုးမၤအသး လီၤ.

¹² ကနၣ်ယကလုၢ်တက့ၢ်, ပှၤလၢအသးကီလၢအအိၣ် ယံၤဒီးတၢ်တီတၢ်လိၤသ့ၣ်ဧၢ, ¹³ ယဒုးဟဲဘူးယတၢ်တီ တၢ်လိၤ, တအိၣ်ဘၣ်လၢအယံၤဘၣ်, ဒီးယတၢ်အုၣ်က့ၤ ခီၣ်က့ၤတၢ်န့ၣ်တသုးနံၤသုးသီဘၣ်. ဒီးယကပာ်လီၤ ယတၢ်အုၣ်က့ၤခီၣ်က့ၤလၢစံယိၣ်အပူၤ, ယလၤကပီၤ လၢအံၣ်စရ့လးအလိၤလီၤ.

၄၇

¹ ယုၢ်လီၤ, ဒီးဆ့ၣ်နီၤလၢဟီၣ်ခိၣ်အကမူၣ်, ဘၤဘူၤ လိၣ်အဖိမုၣ်လိၣ်ဘိဧၢ, ဆ့ၣ်နီၤလၢဟီၣ်ခိၣ်လိၤ. လီၢ်ပ စိာ်တအိၣ်ဘၣ်, က့ၤစ့းအဖိမုၣ်ဧၢ. အဂ့ၢ်ဒ်အံၤ, ပှၤတ ကိးလၢၤဘၣ်နၤလၢပှၤအစၢ်, ဒီးပှၤအမုာ်လၤတၢ်ဘၣ်.

² ဟံးန့ၢ်ဆၢၣ်ဂူာ်လၢၢ်, ဒီးဂူာ်ဟုအကမူၣ်, ပဲထီၣ်နတၢ် ကျၢၢ်ဘၢမဲာ်, ဆှၢထီၣ်နဆ့အခီၣ်ထံး, လီၣ်ဖျါထီၣ်နခီၣ် ဒုၣ်, ခီဂာ်ထံကျိလၢနခီၣ်တက့ၢ်.

³ နတၢ်အိၣ်ဘ့ၣ်ဆ့ကအိၣ်ဖျါ, မ့ၢ်မးပှၤကထံၣ်နတၢ် မဲာ်ဆှးလီၤ. ယကမၤဆၢတၢ်အအၢ, ဒီးယတသဂၢၢ် ဘၣ်ပှၤကညီဘၣ်.

⁴ တၢ်ပှ့ၤက့ၤပှၤ, တၢ်သုးမုၢ်ဂီၢ်မုၢ်အယွၤန့ၣ်မ့ၢ်အမံၤ, အံၣ်စရ့လးအတၢ်စီဆှံတဂၤလီၤ.

⁵ ဆ့ၣ်နီၤအိၣ်ဘှီၣ်ကလာ်, ဒီးလဲၤနုာ်လၢ တၢ်ခံးကျါ, က့ၤစ့းအဖိမုၣ်ဧၢ. အဂ့ၢ်ဒ်အံၤ, ပှၤတကိးလၢၤဘၣ်နၤ လၢပှၤကလုာ်တဖၣ်အကစၢ်မုၣ်ဘၣ်.

⁶ ယသးထီၣ်ဘၣ်ယပှၤဂီၢ်မုၢ်, ယမၤဘၣ်အၢယတၢ်န့ၢ် သါ, ဒီးယဟ့ၣ်လီၤအီၤလၢနစုပူၤလီၤ. ဒီးနတသးက ညီၤဘၣ်အီၤဘၣ်. လၢပှၤသးပှၢ်ဒၣ်လဲာ်နပာ်နနီၣ်ယိး ဘိဃၢဃၢကလဲာ်လီၤ. ⁷ ဒီးနစံး, ယကကဲကစၢ်မုၣ်လီၤ ထူလီၤယိာ်လီၤ. တၢ်တဖၣ်န့ၣ်နတတိၢ်န့ၢ်ဘၣ်လၢန သးဘၣ်, ဒီးနတသ့ၣ်နီၣ်ထီၣ်က့ၤဘၣ်တၢ်အခံကတၢၢ် န့ၣ်ဘၣ်.

⁸ ဒီးခဲကနံၣ်အံၤကနၣ်တၢ်အံၤတက့ၢ်, ပှၤကလုာ်က လိၤမုၣ်ဧၢ, ပှၤလၢအဆ့ၣ်နီၤသူၣ်မံသးမံ, လၢအစံးလၢ အသးကံၢ်ပူၤ, ယအိၣ်ယဲ, ဒီးအဂၤတအိၣ်ဘၣ်. ယတ အိၣ်ကမဲဘၣ်နီတစုဘၣ်, ယဖိဟါမၢ်န့ၣ်ယတသ့ၣ်ညါ ဘၣ်.

⁹ ဒီးတၢ်ခံမံၤအံၤကဘၣ်နၤ သတူၢ်ကလာ်လၢမုၢ်တနံၤ ဃီ, နဖိဟါမၢ်ဒီးတၢ်မုၣ်ကမဲန့ၣ်လီၤ. ကဟဲဘၣ်နလိၤ လၢပှဲၤဝဲလၢ နမၤကဒါပမဲာ်ဒီးမၤတၢ်အူတၢ်သမူအအါ အဆူၣ်အဃိလီၤ.

¹⁰ အဂ့ၢ်ဒ်အံၤ, ဒီးနသန့ၤနသးလၢတၢ်အၢ, နစံး, တၢ် အမဲာ်တထံၣ်ဘၣ်ယၤဘၣ်လီၤ. နတၢ်ကူၣ်သ့ဒီးနတၢ် သ့ၣ်ညါန့ၣ်လွဲနၤ, ဒီးနစံးလၢနသးကံၢ်ပူၤ, ယဲဒၣ်အံၤယ အိၣ်, ဒီးလၢယၤအမဲာ်ညါတၢ်တအိၣ်ဘၣ်.

¹¹ မၤသးဒ်န့ၣ်ဒီးတၢ်အၢ ကဟဲဘၣ်နၤလၢနတသ့ၣ်ညါ ဘၣ်တၢ်အူတၢ်သမူလၢအဂီၢ်ဘၣ်, ဒီးတၢ်မၤအၢကဘၣ် နၤ, လၢနပူၤဖျဲးတသ့ဘၣ်. ဒီးတၢ်မၤဟးဂီၤကဘၣ်နၤသ တူၢ်ကလာ်လၢနတသ့ၣ်ညါဘၣ်န့ၣ်လီၤ.

¹² ဆၢထၢၣ်လၢ်, အိၣ်ဒီးနတၢ်အူတၢ်သမူ, ဒီးနမၤကဒါ ပမဲာ်အအါလၢနမၤလၢနမုၣ် ကနီၤထီၣ်လံၤလံၤန့ၣ်တ က့ၢ်. နကဘၣ်ဘျုးလၢအဃိ, နကမၤပျံၤတၢ်သ့ၣ်သ့ၣ် ဧါလီၤ.

¹³ တၢ်ဘှံးနသးလၢ နပှၤကူၣ်လိာ်အသးအါဂၤအဃိ လီၤ. မ်အဆၢထၢၣ်လၢ်, ဒီးပှၤနီၤဖးမူခိၣ်အဆၢပှၤကွၢ်ထံဆၣ်ဧိၤဖီဧိၤ, ပှၤလၢအဒုးသ့ၣ်ညါလါအကတီၢ် မ်အအုၣ်က့ၤခီၣ်က့ၤနၤလၢ တၢ်လၢအကဟဲဘၣ်နၤတ ဖၣ်န့ၣ်တက့ၢ်.

¹⁴ ကွၢ်ကွၢ်, အဝဲသ့ၣ်တဖၣ်န့ၣ်ကမၤသးဒ်လီၢ်ဧိၤဒံးဧိၤ လီၤကလဲအသိးန့ၣ်, မ့ၣ်အူကအီၣ်ကွံာ်အီၤလီၤ. မၤပူၤ မၤဖျဲးအကစၢ်ဒၣ်ဝဲဒီး မ့ၣ်လၣ်အစိအကမီၤတသ့ဘၣ်. တမ့ၢ်ဘၣ်မ့ၣ်အူကဖးလၢပှၤကဆူးမ့ၣ်အူဘၣ်. တမ့ၢ် ဘၣ်မ့ၣ်အူလၢပှၤကဆ့ၣ်နီၤလၢအမဲာ်ညါဘၣ်.

¹⁵ ပှၤလၢနမၤတၢ်ဒီးအီၤ, နပှၤကၤတၢ်ဖိလၢနမုၣ်ကနီၤ ထီၣ်လံၤလံၤန့ၣ်ကမၤသးဒ်န့ၣ်ဒီးနၤလီၤ. ကဟးကွံာ် တၢ်တဂၤလၢအကျဲဒၣ်ဝဲ, တဂၤလၢအကျဲဒၣ်ဝဲ, ဒီးတၢ် အုၣ်က့ၤခီၣ်က့ၤနၤတအိၣ်ဘၣ်လီၤ.

၄၈

¹ ကနၣ်တၢ်အံၤတက့ၢ်, စီၤယၤကိာ်အပှၤဟံၣ်ဖိ, ပှၤလၢ တၢ်ကိးအီၤလၢအံၣ်စရ့လးအမံၤ, ဒီးဟဲထီၣ်ဝဲလၢယူဒၤ အထံထီၣ်ပၢၢ်, ပှၤလၢအဆိၣ်လီၤအသးလၢယွၤအမံၤ, လၢအဒုးသ့ၣ်နီၣ်ထီၣ်က့ၤ အံၣ်စရ့လးအကစၢ်, ဘၣ် ဆၣ်ဒီးတမ့ၢ်ဘၣ်ဒီးတၢ်မ့ၢ်တၢ်တီဘၣ်, တမ့ၢ်ဘၣ်ဒီး တၢ်တီတၢ်လိၤဘၣ်သ့ၣ်ဧၢ. ² အဂ့ၢ်ဒ်အံၤ, စံးလီၤအသး လၢအဘၣ်ဃးဒီးဝ့ၢ်စီဆှံ, ဒီးသန့ၤအသးလၢအံၣ်စရ့ လးအကစၢ်, တၢ်သုးမုၢ်ဂီၢ်မုၢ်အယွၤမ့ၢ်အမံၤလီၤ.

³ တၢ်အခီၣ်ထံးတဖၣ်န့ၣ်ယဒုးနဲၣ်လၢပျၢၤ, ထီၣ်ဖျဲးဝဲ လၢယထးခိၣ်, ဒီးယဒုးနၢ်ဟူအီၤ, ယမၤအီၤသတူၢ်က လာ်, ဒီးမၤအသးလီၤ.

⁴ အဂ့ၢ်ဒ်အံၤ, ယသ့ၣ်ညါလၢနမ့ၢ်ပှၤကီ, ဒီးနကိာ်မ့ၢ် ထးတဘိ, ဒီးနမဲာ်တူၢ်ခိၣ်န့ၣ်မ့ၢ်တိၢ်ဘီလီၤ.

⁵ ဒီးယဒုးနဲၣ်အီၤလၢနၤလၢအခီၣ်ထံးန့ၣ်, လၢအတ ချုးဟဲဒံးဘၣ်, ဒီးယဘိးဘၣ်သ့ၣ်ညါနၤ, ဒ်သိးနသုတ စံး, ယတၢ်ဂီၤမၤတၢ်အံၤ, ဒီးယတၢ်ဂီၤစိးပျၤအသး, ဒီးယ တၢ်ဂီၤသိအသးမၤလိာ်အီၤန့ၣ်တဂ့ၤလီၤ.

⁶ နနၢ်ဟူလံ, ကွၢ်တၢ်အံၤခဲလၢာ်တက့ၢ်. ဒီးသုတဒုးနဲၣ် ဘၣ်အီၤဧါ. ဒီးယဒုးနၢ်ဟူနၤလၢတၢ်အသီ, တၢ်လၢအ အိၣ်ခူသူၣ်လၢနတသ့ၣ်ညါဘၣ်.

⁷ တ့လီၤအသးခဲကနံၣ်အံၤလီၤ, ဒီးတမ့ၢ်ဘၣ်လၢပျၢၤ ဘၣ်. ဒီးမုၢ်တနံၤအံၤတချုးဘၣ်ဒံးဘၣ်ဒီး, နတနၢ်ဟူ ဘၣ်အီၤဘၣ်. ဒ်သိးနသုတစံး, ကွၢ်ကွၢ်, ယသ့ၣ်ညါအီၤ လီၤန့ၣ်တဂ့ၤလီၤ.

⁸ မ့ၢ်မးနတနၢ်ဟူဘၣ်, မ့ၢ်မးနတသ့ၣ်ညါဘၣ်, မ့ၢ်မး လၢအခီၣ်ထံးလံၤလံၤန့ၣ် နနၢ်တအိးထီၣ်ဘၣ်အသး ဘၣ်. အဂ့ၢ်ဒ်အံၤ, ယသ့ၣ်ညါလၢနမၤ ဒီးလီတၢ်နးနး ကလဲာ်, ဒီးလၢပှၤဒၢလီၢ်ပူၤလံၤလံၤန့ၣ်တၢ်ကိးနၤလၢ ပှၤမၤကမၣ်တၢ်ဖိလီၤ.

⁹ လၢယမံၤဒၣ်ယဲအဃိန့ၣ် ယကသုးယံၤယသးထီၣ်, ဒီးလၢယတၢ်စံးထီၣ်ပတြၢၤအဃိန့ၣ် ယကတြီအီၤလၢ နၤ, ဒ်သိးယသုတဒီၣ်တဲာ်ကွံာ်နၤတဂ့ၤလီၤ.

¹⁰ ကွၢ်ကွၢ်, ယမၤပှံၢ်လံနၤ, ဘၣ်ဆၣ်ဒီးတမ့ၢ်ဘၣ်လၢစ့ အဂီၢ်ဘၣ်. ယဃုထၢလံနၤလၢတၢ်နးတၢ်ဖှီၣ်အဖၣ်က ပူၤလံ.

¹¹ လၢယကစၢ်ဒၣ်ယဲအဃိ, လၢယကစၢ်ဒၣ်ယဲအဃိ ယကမၤအီၤလီၤ. အဂ့ၢ်ဒ်အံၤ, ယမံၤကဘၣ်တၢ်မၤ ဘၣ်အၢအီၤဒ်လဲၣ်. ဒီးယလၤကပီၤန့ၣ်ယတဟ့ၣ်လီၤ ပှၤဂၤဘၣ်.

¹² ကနၣ်ယကလုၢ်တက့ၢ်, ယၤကိာ်ဧၢ, ဒီးအံၣ်စရ့လး လၢယကိးန့ၢ်အီၤ, ယဲဒၣ်အံၤယမ့ၢ်အဝဲဒၣ်လီၤ. ယဲဒၣ် အံၤယမ့ၢ်တၢ်အခီၣ်ထံး, ဒီးယဲဒၣ်အံၤယမ့ၢ်စ့ၢ်ကီးတၢ် အကတၢၢ်လီၤ. ¹³ ယစုပာ်လီၤစ့ၢ်ကီးဟီၣ်ခိၣ်အခီၣ်ထံး, ဒီးယစုထွဲန့ၣ်သလၣ်ထီၣ်မူခိၣ်လီၤ. ယကိးန့ၢ်အီၤ, ဒီး ဆၢထၢၣ်ဝဲတပူၤဃီလီၤ.

¹⁴ အိၣ်ဖှိၣ်ရိဖှိၣ်သုဝဲခဲလၢာ်သ့ၣ်ဧၢ, ဒီးကနၣ်တၢ်တ က့ၢ်. မ့ၢ်မတၤဒုးနဲၣ်တၢ်တဖၣ်န့ၣ်လၢအကျါတဂၤလဲၣ်. ယွၤအဲၣ်အီၤ, ကမၤတၢ်ဘၣ်အသးလၢဘၤဘူၤလိၣ်အ ပူၤ, ဒီးအစုဒုၣ်ကအိၣ်လၢပှၤက့ၤစ့းဖိအလိၤလီၤ.

¹⁵ ယဲဒၣ်ယကတိၤလံတၢ်လံ. ယကိးန့ၢ်စ့ၢ်ကီးအီၤ, ယ ဟဲစိာ်အီၤ, ဒီးကမၤဘီၣ်ထီၣ်ညီထီၣ်အကျဲလီၤ.

¹⁶ သုးဘူးသုသးဆူယအိၣ်, ကနၣ်တၢ်အံၤတက့ၢ်. လၢ အခီၣ်ထံးလံၤလံၤယတကတိၤခူသူၣ်တၢ်ဘၣ်, လၢအ အိၣ်ထီၣ်သီလံၤလံၤန့ၣ်ယအိၣ်ဖဲန့ၣ်လီၤ. ဒီးခဲကနံၣ်အံၤ ကစၢ်ယွၤမၢလီၤယၤဒီးအသးလီၤ.

¹⁷ ပှၤပှ့ၤက့ၤနၤ, အံၣ်စရ့လးအတၢ်စီဆှံယွၤစံးဒ်အံၤ, ယဲဒၣ်အံၤ, ယမ့ၢ်ယွၤ, နကစၢ်လၢအသိၣ်လိနၤဒ်သိး နကဘၣ်ဘျုးဘၣ်ဖှိၣ်, ဒီးယဒုးလဲၤနၤလၢကျဲလၢနဂ့ၤ လဲၤန့ၣ်လီၤ.

¹⁸ အိ, မ်နကနၣ်တ့ၢ်ယတၢ်မၤလိာ်တက့ၢ်. မ့မ့ၢ်ဒ်န့ၣ်ဒီး နတၢ်ဃူတၢ်ဖိးကမၤသးဒ်ထံမိၢ်ပှၢ်အသိး, ဒီးနတၢ်တီ တၢ်လိၤဒ်ပီၣ်လဲၣ်အလပီအသိးန့ၣ်လီၤ. ¹⁹ ဒီးနချံနသၣ် ကမၤသးဒ်မဲးဧိၤဟီၣ်ဧိၤအသိး, ဒီးနစၢၤနသွဲၣ်, ဒ်အဖျၢၣ် တဖၣ်အသိးန့ၣ်လီၤ. တၢ်တဒီၣ်တဲာ်ဘၣ်, ဒီးတမၤဟး ဂီၤဘၣ်အမံၤလၢယမဲာ်ညါဘၣ်.

²⁰ ဟးထီၣ်ကွံာ်လၢ ဘၤဘူၤလိၣ်အပူၤ, ဃ့ၢ်ထီၣ်ကွံာ် လၢပှၤက့ၤစ့းဖိအအိၣ်, အိၣ်ဒီးတၢ်သးခုအသီၣ်တက့ၢ်. ဒုးနဲၣ်, ဒီးဒုးနၢ်ဟူတၢ်အံၤတက့ၢ်. စံးဘၣ်တဲဘၣ်တၢ်ပၢၢ် လၢဟီၣ်ခိၣ်အကတၢၢ်တက့ၢ်. စံး, ယွၤပှ့ၤက့ၤလံအခ့အ ပှၤယၤကိာ်လံန့ၣ်တက့ၢ်.

²¹ တၢ်တသူဘၣ်အသးလၢထံဖ ဲအဒုးလဲၤအီၤလၢပှၢ်မုၢ် ကနၢဘၣ်, ဒုးယွၤထီၣ်ထံလၢလၢၢ်ပူၤလၢအဂီၢ်, တီၢ် လၢၢ်, ဒီးထံဖျိးထီၣ်ဝဲလီၤ.

²² တၢ်ဃူတၢ်ဖိးတအိၣ်ဘၣ်ဒီးပှၤတတီတလိၤဘၣ်န့ၣ်, ယွၤစံးဝဲဒၣ်.

၄၉

¹ ကနၣ်ယကလုၢ်, ကီးသ့ၣ်ဧၢ, ဒီးဒိကနၣ်တၢ်, ပှၤက လုာ်တဖၣ်အိၣ်လၢအယံၤအယိာ်သ့ၣ်ဧၢ, ယွၤကိးန့ၢ် ယၤလၢတၢ်ဒၢလီၢ်အပူၤလံၤလံၤ, လၢယမိၢ်အဟၢဖၢ ပူၤလံၤန့ၣ်ပှ့ၤဘၣ်ယမံၤလီၤ.

² ဒီးပာ်ယထးခိၣ် ဒ်နးလၢအအ့ၣ်ဝဲအသိးန့ၣ်, ဒီးဒုး အိၣ်တဒၢယၤလၢအစုအကဒုလီၤ. ဒီးပာ်ယၤလၢပျၢ် ဘျ့ကဆှၣ်တဘ့ၣ်, ဒီးပာ်ခူသူၣ်ယၤလၢအလၢပီၤပူၤ လီၤ. ³ ဒီးစံးဘၣ်ယၤ, နမ့ၢ်ယခ့ယပှၤ, အံၣ်စရ့လးဧၢ, ပှၤ လၢယကဒိးတၢ်လၤကပီၤလၢအပူၤလီၤ.

⁴ ဒီးယစံး, ယမၤလံတၢ်ကလီကလီလံ. လၢတၢ်ကလီ ကလီအဂီၢ်, လၢတၢ်နီတမံၤဘၣ်အဂီၢ်န့ၣ်ယလၢာ်ဂံၢ် လၢာ်ဘါလီၤ. ဘၣ်ဆၣ်ဒီးယတၢ်စံၣ်ညီၣ်အိၣ်ဒီးယွၤ, ဒီးယမၤတၢ်အိၣ်ဒီးယကစၢ်လီၤ.

⁵ ဒီးခဲကနံၣ်အံၤ, ယွၤစံးဝဲဒၣ်, လၢအပာ်ယၤလၢပှၤဒၢ လီၢ်အပူၤလံၤလံၤလၢအခ့အပှၤဒၣ်ဝဲ ဒ်သိးယကဒုးဟဲ က့ၤယၤကိာ်ဆူအအိၣ်, ဒီးအံၣ်စရ့လးမ့ၢ်တအိၣ်ဖှိၣ်ရိ ဖှိၣ်ဘၣ်ဆၣ်ဒီး, ယကအိၣ်ဒီးတၢ်လၤကပီၤလၢယွၤအ မဲာ်ညါ, ဒီးယကစၢ်ကဲတ့ၢ်လံယဂံၢ်ယဘါလံ. ⁶ ဒီးစံးဝဲ ဒၣ်, လၢနကကဲထီၣ်ယခ့ယပှၤဒ်သိးနကဒုးဂဲၤဆၢ ထၢၣ်ယၤကိာ်အဒူၣ်တဖၣ်, ဒီးဒုးဟဲက့ၤပှၤလၢအအိၣ် ဒံးလၢ အံၣ်စရ့လးအကျါန့ၣ် မ့ၢ်တၢ်ဆံးကဲၣ်ဆိးလီၤ. ဒီးယကပာ်နၤလၢတၢ်ကပီၤလၢပှၤကလုာ်တဖၣ်အဂီၢ်, ဒ်သိးနကကဲထီၣ် ယတၢ်အုၣ်က့ၤခီၣ်က့ၤပၢၢ်လၢဟီၣ် ခိၣ်အကတၢၢ်န့ၣ်လီၤ.

⁷ ယွၤ, တၢ်ပှ့ၤက့ၤအံၣ်စရ့လး, အတၢ်စီဆှံတဂၤ, စံးဘၣ် ပှၤလၢတၢ်တပာ်မးအလီၢ်, ပှၤတကလုာ်လၢတၢ်သး ဘၣ်အၢအီၤ, ပဒိၣ်တဖၣ်အခ့အပှၤ, ဒ်အံၤ, စီၤပၤတ ဖၣ်ကထံၣ်ဘၣ်, ဒီးဂဲၤဆၢထၢၣ်, ဒီးပဒိၣ်ဖးဒိၣ်တဖၣ်က တီၤလီၤကဒွံကျိာ်လၢယွၤအကလုၢ်တီတဂၤအဃိ, အံၣ် စရ့လးအတၢ်စီဆှံတဂၤလၢအဃုထၢနၤလီၤ.

⁸ ယွၤစံးဒ်အံၤ, လၢအကတီၢ်လၢတၢ်ဘၣ်အသးန့ၣ်ယ ကနၣ်လံနကလုၢ်လံ. ဒီးလၢတၢ်အုၣ်က့ၤခီၣ်က့ၤအမုၢ် တနံၤန့ၣ်ယမၤစၢၤလံနၤလံ. ဒီးယကအံးက့ၤကွၢ်က့ၤနၤ, ဒီးပာ်နၤလၢတၢ်အၢၣ်လီၤအီလီၤလၢပှၤဂီၢ်မုၢ်အဂီၢ်, ဒ် သိးနကဒုးဂဲၤဆၢထၢၣ်ဟီၣ်ခိၣ်, ဒီးဒ်သိးနကဒုးန့ၢ်သါ အီၤလၢတၢ်န့ၢ်သါအိၣ်သယုၢ်န့ၣ်, ဒ်သိးနကစံးပှၤဃိာ် ဖိ, ဟဲထီၣ်တက့ၢ်. ⁹ ပှၤအိၣ်လၢတၢ်ခံးကျါန့ၣ်မၤအိၣ်ဖျါ ထီၣ်သုသးတက့ၢ်. ကအီၣ်တၢ်လၢကျဲဧိၤကပူၤဧိၤ, ဒီး တၢ်စိခိၣ်ပျီခဲလၢာ်ကကဲထီၣ်အအီၣ်ဆၣ်အလီၢ်လီၤ.

¹⁰ တၢ်တသၣ်ဝံၤလၢၤဘၣ်အသးဘၣ်, ဒီးတၢ်တသူ လၢၤဘၣ်အသးလၢထံ, ဒီးပံၢ်ကဒဲးမ့ၢ်ဂ့ၤ, မုၢ်ဧိၤလါဧိၤ မ့ၢ်ဂ့ၤ, တတီၢ်ဘၣ်အီၤဘၣ်. အဂ့ၢ်ဒ်အံၤ, ပှၤလၢအသး အိၣ်အီၤန့ၣ်ကဆှၢအီၤ, ဒီးကဆှၢအီၤဆူထံထီၣ်ပၢၢ်အ လီၢ်တဖၣ်န့ၣ်လီၤ. ¹¹ ဒီးယကပာ်ယကစၢၢ်ခဲလၢာ်လၢ အကျဲန့ၣ်, ဒီးတၢ်ကမၤထီၣ်ထီယကျဲမုၢ်လီၤ.

¹² ကွၢ်ကွၢ်, အဝဲသ့ၣ်တဖၣ်အံၤကဟဲလၢအယံၤ, ဒီး ကွၢ်ကွၢ်, အဝဲသ့ၣ်တဖၣ်အံၤလၢကလံၤစိး, ဒီးလၢမုၢ်နုာ်, ဒီးအဝဲသ့ၣ်တဖၣ်အံၤ, လၢကီၢ်စံၣ်န့ၣ်လီၤ.

¹³ ကိးပသူထီၣ်, မူခိၣ်ဧၢ, ဒီးသူၣ်ဖှံသးညီ, ဟီၣ်ခိၣ်ဧၢ, မ် ကစၢၢ်ကလိထီၣ်ဖျဲးလၢတၢ်သးဝံၣ်တက့ၢ်. အဂ့ၢ်ဒ်အံၤ ယွၤမၤမုာ်ထီၣ်က့ၤလံအခ့အပှၤလံ, ဒီးကသးအိၣ်အပှၤ လၢအဘၣ်တၢ်နးတၢ်ဖှီၣ်လီၤ.

¹⁴ ဘၣ်ဆၣ်ဒီးစံယိၣ်စံးဝဲဒၣ်, ယွၤလဲၤသဒၣ်လံယၤလံ, ဒီးကစၢ်န့ၣ်သးပ့ၤနီၣ်လံယၤလံ.

¹⁵ ပိာ်မုၣ်ကသးပ့ၤနီၣ်အဖိလၢ အအီၣ်နုၢ်တုၤအတသး ကညီၤဘၣ်အဒၢလီၢ်အဖိန့ၣ်ဧါ. အဝဲန့ၣ်ဒၣ်လဲၣ်ကသး ပ့ၤနီၣ်လီၤ. မ့မ့ၢ်ယဲဒၣ်အံၤယတသးပ့ၤနီၣ်ဘၣ်နၤဘၣ်.

¹⁶ ကွၢ်ကွၢ်, ယကွဲးလံနၤလၢယစုညါသးအလိၤ, ဒီးနခိၣ် ဒူအိၣ်ဝဲလၢယမဲာ်ညါတထံၣ်ဃီလီၤ.

¹⁷ နဖိဟဲချ့ချ့, ပှၤလၢအမၤဟးဂီၤနၤ, ဒီးမၤသယုၢ်နၤ တဖၣ်န့ၣ်ကဟးထီၣ်လၢနပူၤလီၤ. ¹⁸ ကျ့ထီၣ်နမဲာ်, ကွၢ် ဝးတရံး, ဒီးထံၣ်တၢ်တက့ၢ်. အဝဲသ့ၣ်တဖၣ်အိၣ်ဖှိၣ်ရိ ဖှိၣ်ခဲလၢာ်, ဒီးဟဲဆူနအိၣ်လီၤ. ယမူယဲ, ယွၤစံးဝဲဒၣ်, မ့ၢ် မးနကသိးနသးလၢအီၤဒ်လၢတၢ်ကယၢကယဲအဃံအ လၤအသိး, ဒီးနကစၢဃာ်အီၤလၢနလိၤ, ဒ်တလးမူး ပိာ်မုၣ်အသိးန့ၣ်လီၤ.

¹⁹ အဂ့ၢ်ဒ်အံၤ, နတၢ်လီၤပှီၢ်, ဒီးနလီၢ်လၢတၢ်မၤဟးဂီၤ, ဒီးနကီၢ်အိၣ်သယုၢ်န့ၣ် ခဲကနံၣ်အံၤဒၣ်လဲာ်, တတြီၢ် ဘၣ်လၢပှၤအိၣ်ဝဲဆိးဝဲအဂီၢ်ဘၣ်. ဒီးပှၤလၢအအီၣ်နၤ တဖၣ်န့ၣ်ကအိၣ်ယံၤဝဲလီၤ. ²⁰ ပှၤတူာ်ဖိဧၢ, နဖိခွါတဖၣ် ကစံးကဒီးလၢနနၢ်ပူၤ, တၢ်အလီၢ်အံၤ, တတြီၢ်ဘၣ်လၢ ယဂီၢ်ဘၣ်, ပျဲယၤဒ်သိးယကအိၣ်ကဆိးတက့ၢ်.

²¹ ဒီးနကစံးလၢနသးကံၢ်ပူၤ, မ့ၢ်မတၤမၤလိၣ်ထီၣ်န့ၢ် ယၤလၢအဝဲသ့ၣ်တဖၣ်န့ၣ်တဂၤလဲၣ်. ယဖိဟါမၢ်, ဒီး ယအိၣ်သယုၢ်, ယမ့ၢ်ပှၤတၢ်မၢကဲကုၢ်အီၤ, ဒီးပှၤဘၣ်တၢ် ဟီထီၣ်ကွံာ်အီၤလီၤ. ဒီးအဝဲသ့ၣ်တဖၣ်အံၤ, မ့ၢ်မတၤ လုၢ်ဒိၣ်ထီၣ်အီၤတဂၤလဲၣ်. ကွၢ်ကွၢ်, ယအိၣ်လီၤတဲာ် တဂၤဃီလီၤ. အဝဲသ့ၣ်တဖၣ်အံၤမ့ၢ်အအိၣ်တ့ၢ်ဖဲလဲၣ်.

²² ကစၢ်ယွၤစံးဒ်အံၤ, ယကယူာ်ထီၣ်ယစုဆူပှၤကလုာ် တဖၣ်, ဒီးယကသူၣ်ထီၣ်ယသုးဖိအလၣ်လၢပှၤဂီၢ်မုၢ် အဂီၢ်လီၤ. ဒီးပှၤကဟဲစိာ်နဖိခွါလၢအစုဒုၣ်လိၤ, ဒီးက စိာ်နဖိမုၣ်တဖၣ်လၢအဖံဘၣ်ခိၣ်လီၤ.

²³ ဒီးစီၤပၤတဖၣ်ကကဲထီၣ်နပၢ်လၢအလုၢ်ဒိၣ်ထီၣ်တၢ်, ဒီးနီၢ်ပၤမုၣ်တဖၣ် ကကဲထီၣ်နမိၢ်လၢအလုၢ်ဒိၣ်ထီၣ် တၢ်လီၤ. ကတီၤလီၤကဒွံကျိာ်ဒီးကျးလီၤအမဲာ်လၢဟီၣ် ခိၣ်လိၤ, ဒီးကလ့ၣ်နခီၣ်အဟီၣ်ခိၣ်အကမူၣ်လီၤ. ဒီးနက သ့ၣ်ညါလၢယမ့ၢ်ယွၤ, ဒီးပှၤလၢအသန့ၤအသးလၢယၤ တဖၣ်အမဲာ်တဆှးဘၣ်လီၤ.

²⁴ တၢ်ကမၤန့ၢ်တၢ်ဂုာ်န့ၢ်လၢပှၤအဆူၣ်, ဒီးပှၤတၢ်မၢကဲ ကုၢ်အီၤတီတီန့ၣ်ကပူၤဖျဲးစ့ၢ်ကီးဧါ.

²⁵ မ့မ့ၢ်, ယွၤစံးဒ်အံၤ, ပှၤအဆူၣ်အတၢ်မၢကဲကုၢ်န့ၣ်တၢ် ကမၤန့ၢ်အီၤ, ဒီးတၢ်မၤပျံၤမၤဖုးတၢ်အတၢ်ဂုာ်န့ၢ်န့ၣ်က ပူၤဖျဲး, အဂ့ၢ်ဒ်အံၤယကဒုးတၢ်ဒီးပှၤလၢအဒုးတၢ်ဒီးနၤ, ဒီးယကအုၣ်က့ၤခီၣ်က့ၤနဖိခွါတဖၣ်လီၤ.

²⁶ ဒီးယကဒုးအီၣ် ပှၤလၢအမၤအၢနၤလၢအဖံးအညၣ် ဒၣ်ဝဲ, ဒီးကအီမူၤအသးလၢအသွံၣ်ဒၣ်ဝဲဒ်လၢစပံးထံ အသီအသိး, ဒီးကယဲၢ်တၢ်ဖံးတၢ်ညၣ်ခဲလၢာ်ကသ့ၣ် ညါလၢယဲဒၣ်အံၤ, ယမ့ၢ်ယွၤ, ပှၤအုၣ်က့ၤခီၣ်က့ၤနၤ, ဒီး လၢပှၤပှ့ၤက့ၤနၤန့ၣ် မ့ၢ်စီၤယၤကိာ်အတၢ်ဒိၣ်တၢ်ဆူၣ် တဂၤလီၤ.

၅၀

¹ ယွၤစံးဒ်အံၤ, သုမိၢ်လၢယပာ်မၢ်အီၤတဂၤ အလံာ် လီၤဖှၣ်တဘ့ၣ်န့ၣ်အိၣ်ဖဲလဲၣ်. ဒီးယဆါကွံာ်သုလၢယ ကမၢ်အကစၢ်ဖဲလဲၣ်တဂၤလဲၣ်. ကွၢ်ကွၢ်, သုဘၣ်တၢ် ဆါကွံာ်သုလၢသုတၢ်အၢအဃိ, ဒီးသုမိၢ်ဘၣ်တၢ်ပာ်မၢ် အီၤလၢသုတၢ်ကမၣ်အဃိလီၤ.

² တုၤယဟဲဒီး, ပှၤကညီတအိၣ်ဘၣ်န့ၣ်မ့ၢ်အဘၣ်မနုၤ လဲၣ်. တုၤယကိးထီၣ်ဒီးပှၤစံးဆၢတၢ်တအိၣ်ဘၣ်မ့ၢ်အ ဘၣ်မနုၤလဲၣ်. ယစုဖုၣ်လီၤတုၤယပှ့ၤက့ၤတၢ်တသ့ဘၣ် ဧါ. ဒီးဒ်သိးအကမၤပူၤဖျဲးတၢ်ဒီး, ယစိယကမီၤတအိၣ် ဘၣ်ဧါ. ကွၢ်ကွၢ်, လၢယတၢ်သိၣ်ဃီၣ်န့ၣ်, ယကမၤ လီၤသံးပီၣ်လဲၣ်, ဒီးပာ်ထံမိၢ်ပှၢ်လၢပှၢ်မုၢ်ကနၢလီၤ. အ ဒ့ၣ်အညၣ်နၢအုၣ်လၢထံတအိၣ်ဘၣ်အဃိ, ဒီးသံဝဲလၢ တၢ်သူအသးလၢထံအဃိလီၤ. ³ ယဒုးသိးမူခိၣ်ဒီးတၢ် သူ, ဒီးယပာ်ထၢၣ်တၢ်ကံးညာ်လၢတၢ်လုးဘၢအီၤလီၤ.

⁴ ကစၢ်ယွၤဟ့ၣ်လီၤယၤလၢ ပှၤဘၣ်တၢ်သိၣ်လိအီၤအ ပျ့ၤဒ်သိးယဒုးဆူၣ်ထီၣ်ပှၤလၢတၢ်ဘှံးအသးလၢတၢ်က တိၤဒ်လဲၣ်ဒ်လဲၣ်န့ၣ်ယကသ့ၣ်ညါလီၤ. ထိၣ်ဂဲၤဝဲလၢတ ဂီၤဘၣ်တဂီၤ, ထိၣ်ဂဲၤယနၢ်ဒ်သိးယကနၢ်ဟူတၢ်ဒ်ပှၤမၤ လိတၢ်အသိးန့ၣ်လီၤ.

⁵ ကစၢ်ယွၤအိးထီၣ်ယနၢ်, ဒီးယတပူထီၣ်ဘၣ်တၢ်ဘၣ်. ဒီးယတဂုၤက့ၤယလီၢ်ခံဘၣ်. ⁶ ယဟ့ၣ်ယချၢလၢပှၤတီၢ် တၢ်, ဒီးယဘိးလၢပှၤလၢအထဲးထီၣ်ကွံာ်ခၣ်ဆူၣ်လီၤ. ယတပာ်တဒၢဘၣ်ယမဲာ်လၢတၢ်မၤမဲာ်ဆှး, ဒီးတၢ်ထူး ပှဲာ်ဘၣ်.

⁷ အဂ့ၢ်ဒ်အံၤ, ကစၢ်ယွၤမ့ၢ်ပှၤမၤစၢၤယၤလီၤ. မၤသး ဒ်န့ၣ်ဒီးယမဲာ်တဆှးဘၣ်. မၤသးဒ်န့ၣ်ဒီးယပာ်ယမဲာ်ဒ် လၢၢ်မ့ၣ်အသိးန့ၣ်, ဒီးယသ့ၣ်ညါလၢ ယမဲာ်တဆှး ဘၣ်န့ၣ်လီၤ.

⁸ ပှၤလၢအပာ်တီယၤတဂၤန့ၣ်အိၣ်ဘူးဝဲလီၤ. မ့ၢ်မတၤ ကလိာ်ကွီၢ်ဒီးယၤတဂၤလဲၣ်. ဆၢထၢၣ်သကိးတက့ၢ်. မ့ၢ်မတၤကလိာ်ကွီၢ်ဒီးယၤတဂၤလဲၣ်. မ်အသုးဘူးအ သးတက့ၢ်.

⁹ ကွၢ်ကွၢ်, ကစၢ်ယွၤကမၤစၢၤယၤလီၤ. မ့ၢ်မတၤကစံၣ် ညီၣ်ဃၣ်ယၤတဂၤလဲၣ်. ကွၢ်ကွၢ်, အဝဲသ့ၣ်ခဲလၢာ်န့ၣ် ကလီၢ်လံၤဝဲဒ်ဆ့တဘ့ၣ်အသိးန့ၣ်, တၢ်အဃၢ်ကအီၣ် ကွံာ်အီၤလီၤ.

¹⁰ ပှၤလၢသုကျါလၢအပျံၤယွၤ, ဒီးဒိကနၣ်အခ့အပှၤအ ကလုၢ်, လၢအလဲၤတၢ်လၢတၢ်ခံးကျါ, ဒီးအတၢ်ကပီၤ တအိၣ်ဘၣ်န့ၣ် မ့ၢ်မတၤတဂၤလဲၣ်. မ်အသန့ၤအသး လၢယွၤအမံၤ, ဒီးပတဲၢ်အသးလၢအကစၢ်န့ၣ်တက့ၢ်.

¹¹ ကွၢ်ကွၢ်, ကယဲၢ်ပှၤလၢအဆိၣ်ကဲၤမ့ၣ်အူ, လၢအဒုး အိၣ်ဝးတရံးသုသးလၢမ့ၣ်ဖီခဲလၢာ်သ့ၣ်ဧၢ. လဲၤတၢ်လၢ သုမ့ၣ်အူအတၢ်ကပီၤအကျါ, ဒီးလၢမ့ၣ်ဖီလၢသုဆိၣ် ကဲၤအီၤအကျါန့ၣ်တက့ၢ်. သုကဘၣ်တၢ်အံၤလၢယစု, သုကမံလီၤလၢတၢ်ဆိးကဲးအပူၤလီၤ.

၅၁

¹ ကနၣ်ယကလုၢ်, ပှၤလၢအလူၤတၢ်တီတၢ်လိၤသ့ၣ် ဧၢ, ကွၢ်ထီၣ်လၢလၢၢ်ဖဲတၢ်ဘၢၣ်ထီၣ်န့ၢ်သု, ဒီးတၢ်ပူၤ အအိပူၤဖဲတၢ်မူၣ်ထီၣ်သုန့ၣ်တက့ၢ်, ပှၤလၢအဃုယွၤ သ့ၣ်ဧၢ.

² ကွၢ်ထီၣ်လၢသုပၢ်စီၤအၤဘြၤဟၣ်, ဒီးနီၢ်စၤရါလၢအ ဆံးစၢ်န့ၢ်သုတက့ၢ်. အဂ့ၢ်ဒ်အံၤ, လၢအမ့ၢ်တဂၤဃီ န့ၣ်ယကိးန့ၢ်အီၤ, ဒီးယဆိၣ်ဂ့ၤအီၤ, ဒီးမၤအါထီၣ်အီၤ လီၤ.

³ အဂ့ၢ်ဒ်အံၤ, ယွၤမၤမုာ်ထီၣ်က့ၤလံစံယိၣ်, ဒီးမၤမုာ် ထီၣ်က့ၤအလီၢ်အိၣ်သယုၢ်တဖၣ်, ဒီးပာ်အပှၢ်မုၢ်ကနၢဒ် ဧ့ၤဒ့ၣ်အသိး, ဒီးအမံၤခိၣ်သိၣ်လာ်ဒ်ယွၤအတၤသၣ်အ လီၢ်အသိးန့ၣ်လံ. တၢ်သူၣ်ဖှံသးညီဒီးတၢ်သူၣ်ခုသးခု ကအိၣ်လၢအပူၤ, တၢ်စံးထီၣ်ပတြၢၤ, ဒီးတၢ်လီၤမိၢ်လီၤ မဲၤအသီၣ်လီၤ.

⁴ ကနၣ်ယကလုၢ်, ယပှၤဂီၢ်မုၢ်သ့ၣ်ဧၢ, ဒီးယပှၤတက လုာ်ဧၢ, ဒိကနၣ်ယကလုၢ်ကထါတက့ၢ်. အဂ့ၢ်ဒ်အံၤ, တၢ်သိၣ်တၢ်သီကလဲၤထီၣ်လၢယၤ, ဒီးယကဒုးလီၤစံာ် ယတၢ်စံၣ်ညီၣ်လၢတၢ်ကပီၤလၢပှၤဂီၢ်မုၢ်အဂီၢ်လီၤ.

⁵ ယတၢ်တီတၢ်လိၤဘူးထီၣ်လံ. ယတၢ်အုၣ်က့ၤခီၣ် က့ၤဟးထီၣ်လံ. ဒီးယစုဒုၣ်ကစံၣ်ညီၣ်ပှၤဂီၢ်မုၢ်လီၤ. ထံ ယံၤကီၢ်ယံၤကကွၢ်လၢ်ယကျဲ, ဒီးကသန့ၤအသးလၢယ စုဒုၣ်လီၤ.

⁶ ကျ့ထီၣ်သုမဲာ်ဆူမူခိၣ်, ဒီးကွၢ်လီၤဆူဟီၣ်ခိၣ်လၢလာ် ခီတက့ၢ်. အဂ့ၢ်ဒ်အံၤ, မူခိၣ်ဒံကွံာ်ဒ်မ့ၣ်အူခုၣ်အသိး, ဒီး ဟီၣ်ခိၣ်ကလီၢ်လံၤဝဲဒ်ဆ့တဘ့ၣ်အသိးန့ၣ်, ဒီးပှၤဟီၣ် ခိၣ်ဖိကသံဒ်န့ၣ်သိးလီၤ. မ့မ့ၢ်ယတၢ်အုၣ်က့ၤခီၣ်က့ၤ ကအိၣ်လီၤထူလီၤယိာ်, ဒီးယတၢ်တီတၢ်လိၤတဟးဂီၤ ဘၣ်ဝဲဘၣ်.

⁷ ကနၣ်ယကလုၢ်, ပှၤလၢအသ့ၣ်ညါတၢ်တီတၢ်လိၤ သ့ၣ်ဧၢ, ပှၤဂီၢ်မုၢ်လၢယတၢ်သိၣ်တၢ်သီအိၣ်လၢအသး ကံၢ်ပူၤသ့ၣ်ဧၢ, ပျံၤပှၤကညီအဒုၣ်ဒွဲၣ်တၢ်တဂ့ၤ, ဒီးဘၣ် ယိၣ်တၢ်လၢအစံးအၢတၢ်အဃိန့ၣ်တဂ့ၤ.

⁸ အဂ့ၢ်ဒ်အံၤ, ဒ်ဆ့တဘ့ၣ်အသိးန့ၣ်တၢ်ဖိဃၢ်ကအီၣ် ကွံာ်အီၤ, ဒီးဒ်သိအဆူၣ်အသိးန့ၣ်အဃိၤအဃၢ်ကအီၣ် ကွံာ်အီၤလီၤ. မ့မ့ၢ်ယတၢ်တီတၢ်လိၤ ကအိၣ်လီၤထူ လီၤယိာ်, ဒီးယတၢ်အုၣ်က့ၤခီၣ်က့ၤအစိၤစိၤအဃၣ်ဃၣ် လီၤ.

⁹ ဖုသံနီၣ်ထီၣ်, ဖုသံနီၣ်ထီၣ်, သိးနသးဒီးတၢ်ဂံၢ်တၢ် ဘါ, ယွၤအစုဒုၣ်ဧၢ, ဖုသံနီၣ်ထီၣ်ဒ်လၢအမုၢ်နံၤလၢပျၢၤ, အစိၤအဃၣ်လၢကစၢၤကစၢၤအသိးန့ၣ်တက့ၢ်. နမ့ၢ်ပှၤ လၢအကျီကွံာ်ရၤဃး, ဒီးဆဲးပယိၤန့ၣ်တမ့ၢ်ဘၣ်ဧါ.

¹⁰ နမ့ၢ်ပှၤလၢအမၤလီၤသံးပီၣ်လဲၣ်, တၢ်ယိာ်ဖးဒိၣ်အ ထံ, လၢအပာ်ပီၣ်လဲၣ်အတၢ်ယိာ်ပူၤ လၢကျဲတဘိဒ်သိး ပှၤလၢအဘၣ်တၢ်ပှ့ၤက့ၤအီၤန့ၣ်ကခီဂာ်တၢ်, တမ့ၢ်ဘၣ် ဧါ.

¹¹ ဒီးပှၤလၢယွၤပှ့ၤက့ၤအီၤတဖၣ်န့ၣ် ကဟဲက့ၤ ကဒါ က့ၤ, ဒီးကဟဲက့ၤသးဝံၣ် တၢ်ဆူစံယိၣ်အအိၣ်ဒီးတၢ် သူၣ်ခုသးခုအထူအယိာ် အိၣ်လၢအခိၣ်, ဒီးကန့ၢ်ဘၣ် တၢ်သူၣ်ဖှံသးညီ, ဒီးတၢ်သူၣ်ခုသးခုကချုးန့ၢ်အီၤ, ဒီး တၢ်သူၣ်အုးသးအုး, ဒီးတၢ်ကအုကစွါကဃ့ၢ်ထီၣ်ကွံာ် လီၤ.

¹² ယဲဒၣ်, ယၤအံၤယမ့ၢ်ပှၤလၢအမၤမုာ်ထီၣ်က့ၤသုလီၤ. နမ့ၢ်မတၤလၢနကပျံၤပှၤကညီလၢအကသံ, ဒီးပှၤကညီ အဖိလၢ အကကဲထီၣ် ဒ်နီၣ်ဧိၤမံၤဧိၤ အသိးန့ၣ်တဂၤ လဲၣ်.

¹³ ဒီးနသးပ့ၤနီၣ်ယွၤလၢအတ့လီၤနၤ, လၢအသလၣ် ထီၣ်မူခိၣ်, ဒီးပာ်လီၤဟီၣ်ခိၣ်အခီၣ်ထံးတဖၣ်, ဒီးနဘၣ် ယိၣ်တၢ်တထံၣ်ဃီကိးမုၢ်နံၤဒဲး, လၢပှၤမၤအၢတၢ်အသး ထီၣ်အဃိ, ဒ်အကတဲာ်ကတီၤတၢ်လၢအကမၤဟးဂီၤ တၢ်အသိးန့ၣ်စ့ၢ်ကီးဧါ. ဒီးပှၤမၤအၢတၢ်အသးထီၣ်န့ၣ် မ့ၢ်အအိၣ်ဖဲလဲၣ်.

¹⁴ ပှၤတၢ်မၢကဲကုၢ်အီၤကထူၣ်ဖျဲးချ့ချ့, ဒီးတသံဘၣ်လၢ တၢ်ပူၤဘၣ်, ဒီးအကိၣ်တလီၤစှၤဘၣ်.

¹⁵ ဒီးယဲဒၣ်အံၤယမ့ၢ်ယွၤနကစၢ်လၢအထိၣ်ဂဲၤပီၣ်လဲၣ်, ဒီးအလပီသီၣ်ထီၣ်လီၤ. တၢ်သုးမုၢ်ဂီၢ်မုၢ်အယွၤမ့ၢ်အမံၤ လီၤ. ¹⁶ ဒီးယပာ်ယတၢ်ကတိၤလၢနထးခိၣ်အပူၤ, ဒီးယ ကျၢၢ်ဘၢနၤလၢယစုအကဒု, ဒ်သိးယကသူၣ်မူခိၣ်, ဒီး ပာ်ဟီၣ်ခိၣ်အခီၣ်ထံးတဖၣ်, ဒီးစံးလၢစံယိၣ်, နဲဒၣ်အံၤ နမ့ၢ်ယပှၤဂီၢ်မုၢ်လီၤ.

¹⁷ ထိၣ်ဂဲၤနသး, ထိၣ်ဂဲၤနသး, ဂဲၤဆၢထၢၣ်, ယရူၤၡ လ့ၣ်လၢအအီလံယွၤအသးထီၣ်အလီခီလၢအစု, နၤဧၢ. နအီလံတၢ်ကနူၤကပၤအလီခီလံ, ဒီးစူၢ်ထီၣ်ကွံာ်အီၤလံ လီၤ.

¹⁸ လၢကယဲၢ်အဖိခွါလၢအဆံးစၢ်ဝဲအကျါန့ၣ် ပှၤဆှၢ အီၤတအိၣ်ဘၣ်နီတဂၤဘၣ်. ပှၤဟံးထီၣ်အစုတအိၣ် ဘၣ်လၢကယဲၢ်အဖိခွါလၢအလုၢ်ဒိၣ်ထီၣ်ဝဲအကျါနီတ ဂၤဘၣ်.

¹⁹ တၢ်ခံမံၤအံၤဟဲဘၣ်နၤ, မ့ၢ်မတၤကဟီၣ်ကယၢၤလၢ နဂီၢ်တဂၤလဲၣ်. တၢ်အိၣ်သယုၢ်, ဒီးတၢ်လီၤပှီၢ်, ဒီးတၢ် သၣ်ဝံၤလီၤဒိ, ဒီးနးဧိၤဘီဧိၤလီၤ. မ့တမ့ၢ်ဘၣ်ယၤဘၣ် ဒီး မ့ၢ်မတၤကမၤမုာ်ထီၣ်က့ၤနၤလဲၣ်.

²⁰ နဖိခွါလီၤဘှါဝဲ, မံလီၤဝဲလၢကျဲခီၣ်ထံးဒ်တၤဖးသ အိလၢပှာ်ပူၤအသိးန့ၣ်လီၤ. ပှဲၤဝဲဒီးယွၤအသးထီၣ်, န ကစၢ်အသိၣ်ဃီၣ်တၢ်လီၤ.

²¹ မၤသးဒ်န့ၣ်ဒီး, ဒိကနၣ်လၢ်တၢ်အံၤ, ပှၤလၢအဘၣ် နးဘၣ်ဖှီၣ်ဒီးအီမူၤအသးဘၣ်ဆၣ်ဒီးတမ့ၢ်ဘၣ်လၢစပံး ထံဘၣ်န့ၣ်ဧၢ. ²² နကစၢ်, ကစၢ်ယွၤဒီးနကစၢ်လၢအက တိၤလိာ်ကွီၢ်လၢအပှၤဂီၢ်မုၢ်အဂီၢ်န့ၣ်, စံးဝဲဒ်အံၤ, ကွၢ်ကွၢ်, ယဟံးန့ၢ်ကွံာ်တၢ်လဲၤကနူၤကပၤအလီခီလၢနစုပူၤ, ယ သးထီၣ်အလီခီလီၤ. နတအီလၢၤဘၣ်အီၤဘၣ်. ²³ ဒီးယ ကပာ်အီၤလၢပှၤလၢအမၤနးမၤဖှီၣ်နၤအစုပူၤ, လၢအစံး ဘၣ်နသးတီၤလီၤကဒွံကျိာ်တက့ၢ်, ဒီးပကခီဂာ်နၤလီၤ. ဒီးနပာ်နနီၢ်ခိဒ်ဟီၣ်ခိၣ်အသိး, ဒီးဒ်ကျဲအသိး, လၢပှၤ လၢအလဲၤခီဂာ်ဝဲအဂီၢ်န့ၣ်လီၤ.

၅၂

¹ ဖုသံနီၣ်ထီၣ်, ဖုသံနီၣ်ထီၣ်, သိးထီၣ်နဂံၢ်နဘါ, စံယိၣ် ဧၢ, သိးထီၣ်နကူနသိးအဃံအလၤ, ယရူၤၡလ့ၣ်ဝ့ၢ်စီဆှံ ဧၢ. အဂ့ၢ်ဒ်အံၤ, ပှၤတဒိးဘၣ်တၢ်ကူးတရံး, ဒီးပှၤတက ဆှီဘၣ်တလဲၤနုာ်လၢၤဘၣ်လၢနပူၤဘၣ်.

² တြူာ်နသးလၢဟီၣ်ခိၣ်အကမူၣ်, ဂဲၤဆၢထၢၣ်, ဆ့ၣ် နီၤ, ယရူၤၡလ့ၣ်ဧၢ. ဃ့ၣ်လီၤပျံၤစၢဃာ်လၢနကိာ်, စံယိၣ် အဖိမုၣ်လၢတၢ်မၢကဲကုၢ်အီၤတဂၤဧၢ.

³ အဂ့ၢ်ဒ်အံၤ, ယွၤစံးဒ်အံၤ, တၢ်ဆါကွံာ်သုလၢတၢ်နီ တမံၤ, ဒီးစ့တအိၣ်ဘၣ်ဒီး, တၢ်ကပှ့ၤက့ၤသုလၢတၢ် တမ့ၢ်ဘၣ်စ့ဘၣ်လီၤ.

⁴ အဂ့ၢ်ဒ်အံၤ, ကစၢ်ယွၤစံးဒ်အံၤ, ယပှၤဂီၢ်မုၢ်လဲၤလီၤ လၢပျၢၤဆူ အဲၤကူပတူးအပူၤ ဒ်သိးအကအိၣ်ကဆိးဖဲ န့ၣ်လီၤ. ဒီးအဂ့ၢ်တအိၣ်ဘၣ်ဒီး, ပှၤအၤရှူၢ်ဖိမၤအၢအီၤ လီၤ.

⁵ ဒီးခဲကနံၣ်အံၤ တၢ်အိၣ်ဖဲအံၤ လၢယဂီၢ်မနုၤတမံၤ လဲၣ်, ယွၤစံးဝဲဒၣ်, တၢ်စိာ်ထီၣ်ကွံာ်ယပှၤဂီၢ်မုၢ်ကလီက လီ, အပဒိၣ်ဖးဒိၣ်ဟီၣ်ပသူထီၣ်, ယွၤစံးဝဲဒၣ်. ဒီးပှၤဒုၣ် ဒွဲၣ်ယမံၤတထံၣ်ဃီသ့တနံၤကျၢၤလီၤ.

⁶ မၤသးဒ်န့ၣ်ဒီး, ယပှၤဂီၢ်မုၢ်ကသ့ၣ်ညါထီၣ်ယမံၤ, မၤ သးဒ်န့ၣ်ဒီး, လၢမုၢ်တနံၤန့ၣ် ကသ့ၣ်ညါလၢယမ့ၢ်ပှၤ လၢအကတိၤတၢ်လီၤ. ကွၢ်ကွၢ်. ယၤလီၤ.

⁷ ပှၤလၢအစံၣ်တဲၤတဲလီၤ တၢ်သးခုအကစီၣ်လၢအ စံၣ်တဲၤတဲလီၤတၢ်ဃူတၢ်ဖိး, လၢအစံၣ်တဲၤတဲလီၤတၢ် အဂ့ၤ, လၢအဘိးဘၣ်သ့ၣ်ညါပှၤလၢ တၢ်အုၣ်က့ၤခီၣ် က့ၤလၢအစံးဘၣ်စံယိၣ်, နကစၢ်ကဲစီၤပၤန့ၣ်အခီၣ်အိၣ် လၢကစၢၢ်လိၤန့ၣ်မ့ၢ်အဃံအလၤဆံးဒိၣ်လဲၣ်.

⁸ နပှၤခိးတၢ်ဖိတဖၣ် ကထုထီၣ်အကလုၢ်, ကကိးပသူ ထီၣ်တပူၤဃီလီၤ. အဂ့ၢ်ဒ်အံၤ, တုၤယွၤဟဲက့ၤဆူစံယိၣ် ဒီး, ကထံၣ်ဝဲလၢမဲာ်သကိးမဲာ်လီၤ.

⁹ ကိးထီၣ်, ကိးပသူထီၣ်တပူၤဃီ, ယရူၤၡလ့ၣ်အတၢ် လီၤပှီၢ်သ့ၣ်ဧၢ, အဂ့ၢ်ဒ်အံၤ, ယွၤမၤမုာ်ထီၣ်က့ၤလံအ ပှၤဂီၢ်မုၢ်. ပှ့ၤက့ၤလံယရူၤၡလ့ၣ်န့ၣ်လံ.

¹⁰ ယွၤမၤဘ့ၣ်ဆ့အစုဒုၣ်စီဆှံလၢ ပှၤကလုာ်ခဲလၢာ်အ မဲာ်ညါ, ဒ်သိးဟီၣ်ခိၣ်အကတၢၢ်ခဲလၢာ်န့ၣ်ကထံၣ်ဘၣ် ပကစၢ်အတၢ်အုၣ်က့ၤခီၣ်က့ၤတၢ်လီၤ.

¹¹ ဟးထီၣ်, ဟးထီၣ်, လဲၤထီၣ်ဖဲန့ၣ်တက့ၢ်. တၢ်တကဆှီ ဘၣ်န့ၣ်ထိးဘၣ်အီၤနီတမံၤတဂ့ၤ. ဟးထီၣ်လၢအသး ကံၢ်ပူၤန့ၣ်တက့ၢ်. ကဆှီထီၣ်တက့ၢ်, ပှၤလၢအစိာ်ယွၤ အဃၢၤအဃိၢ်သ့ၣ်ဧၢ.

¹² အဂ့ၢ်ဒ်အံၤ, သုတဟးထီၣ်ပစုၢ်ပတ့ၤဘၣ်, ဒီးသုတ လဲၤထီၣ်ဃ့ၢ်ဘၣ်. အဂ့ၢ်ဒ်အံၤ, ယွၤကလဲၤတၢ်လၢသု မဲာ်ညါ, ဒီးအံၣ်စရ့လးအကစၢ်ကအိၣ်လၢသုလီၢ်ခံလီၤ.

¹³ ကွၢ်ကွၢ်, ယခ့ယပှၤကမၤတၢ်ဒီးတၢ်ကူၣ်သ့, ကဘီၣ် ထီၣ်ညီထီၣ်, ဒီးကထီၣ်ကထီ, ဒီးကဒိၣ်ထီၣ်ထီထီၣ်ဒိၣ် မးလီၤ.

¹⁴ ဒ်ပှၤအါဂၤကမၢကမၣ်တၢ်လၢနဃိအသိး, (အမဲာ် အက့ၢ်အဂီၤ ဟးဂီၤတုၤအတမ့ၢ်လၢၤဘၣ် ပှၤကညီအ သိး, ဒီးအက့ၢ်အဂီၤတုၤအတမ့ၢ်လၢၤဘၣ်ပှၤကညီဖိအ သိး,) ¹⁵ ကဖှံတၢ်လၢပှၤအါကလုာ်အလိၤဒ်န့ၣ်သိးလီၤ. စီၤပၤတဖၣ် ကကျၢၢ်တံၢ်အထးခိၣ် လၢအမဲာ်ညါလီၤ. အဂ့ၢ်ဒ်အံၤ, ကထံၣ်ဘၣ်တၢ်လၢပှၤတစံးဘၣ်အီၤ, ဒီး တၢ်လၢအတနၢ်ဟူတ့ၢ်ဘၣ်န့ၣ်ကသ့ၣ်ညါဝဲလီၤ.

၅၃

¹ မ့ၢ်မတၤနာ်က့ၤလံပကစီၣ်တဂၤလဲၣ်. ဒီးယွၤအစုဒုၣ် အိၣ်ဖျါထီၣ်လံလၢမတၤတဂၤအမဲာ်ညါလဲၣ်.

² အဂ့ၢ်ဒ်အံၤ, မဲထီၣ်ဝဲလၢအမဲာ်ညါဒ်သ့ၣ်ပဒၢအသိး, ဒီးဒ်သ့ၣ်အဂံၢ်လၢဟီၣ်ခိၣ်ဃ့အသိးန့ၣ်လီၤ. တအိၣ် ဘၣ်ဒီးအက့ၢ်အဂီၤဘၣ်, ဒီးတအိၣ်ဘၣ်ဒီးအဃံအလၤ ဘၣ်, ဒီးတုၤပထံၣ်အီၤဒီး, အဃံအလၤလၢအဘၣ်ပမဲာ် န့ၣ်တအိၣ်ဘၣ်.

³ ပှၤကညီမၤတရီတပါ, ဒီးလဲၤသဒၣ်အီၤလီၤ. မ့ၣ်ဝဲ လၢပှၤတၢ်သူၣ်အုးသးအုး, ဒီးသ့ၣ်ညါတၢ်နးတၢ်ဖှီၣ်, ဒ် ပှၤတဂၤလၢပှၤမၤဘၢအမဲာ်လၢအီၤအသိး, ပှၤမၤအီၤတ ရီတပါ, ဒီးပတပာ်ဘၣ်အလီၢ်ဘၣ်. ⁴ မ့ၢ်မးစိာ်ဝဲပတၢ် ဆူးတၢ်ဆါ, ဒီးဝံပတၢ်သူၣ်အုးသးအုးလီၤ. ဒီးပဆိက မိၣ်လၢတၢ်ကျီအီၤ, လၢယွၤတီၢ်အီၤ, ဒီးလၢအဘၣ် တၢ်နးတၢ်ဖှီၣ်လီၤ.

⁵ ဒီးဘၣ်တၢ်ဆဲးဖျိအီၤလၢ ပတၢ်ကမၣ်အဃိ, ဒီးဘၣ် တၢ်မၤသဘှံးအီၤလၢ ပတၢ်ဒဲးဘးအဃိလီၤ. တၢ်သိၣ် ဃီၣ်ဘၣ်ဃးဒီးပတၢ်ဃူတၢ်ဖိးန့ၣ်အိၣ်ဝဲလၢအလိၤ, ဒီး ပဘျါက့ၤလၢအဘၣ်တီၢ်အဃိန့ၣ်လီၤ.

⁶ ပဝဲဒၣ်အံၤ, ဒ်သိအသိးန့ၣ် ပဟးဖျိးကျဲခဲလၢာ်လံ. ပလဲၤကပၤကပၤတဂၤလၢအကျဲဒၣ်ဝဲ, တဂၤလၢအကျဲ ဒၣ်ဝဲစုာ်စုာ်လီၤ. ဒီးယွၤပာ်ပတၢ်အၢတၢ်သီခဲလၢာ်လၢ အလိၤလီၤ. ⁷ ဘၣ်တၢ်မၤအၢမၤသီအီၤ, ဘၣ်ဆၣ်ဒီးဆီၣ် လီၤအသး, ဒီးတအဲးထီၣ်ဘၣ်အထးခိၣ်ဘၣ်, ဒ်သိဖိလၢ ပှၤမိၤမၤသံအီၤအသိး, ဒ်သိလၢအအိၣ်ဘှီၣ်ကလာ်လၢ ပှၤတံာ်အဆူၣ်အမဲာ်ညါအသိးန့ၣ်, တအဲးထီၣ်ဘၣ်အ ထးခိၣ်ဘၣ်. ⁸ တၢ်ထုးထီၣ်ကွံာ်အီၤလၢတၢ်နးတၢ်ဖှီၣ် အပူၤ, ဒီးလၢတၢ်စံၣ်ညီၣ်ကွီၢ်အပူၤလီၤ. ဒီးလၢအပှၤ တစိၤတဃၣ်အကျါန့ၣ် မ့ၢ်မတၤကဆိကမိၣ်လၢအဒိး တၢ်ဒီၣ်တဲာ်ကွံာ်အီၤလၢ ကီၢ်မူလၢယပှၤဂီၢ်မုၢ်အတၢ် ကမၣ်အဃိ, လၢအဘၣ်ဆိၣ်အၢလၢအဝဲသ့ၣ်အလီၢ် န့ၣ်တဂၤလဲၣ်.

⁹ ဒီးတၢ်ဟ့ၣ်လီၤအသွၣ်ခိၣ်အိၣ်ဒီးပှၤအၢပှၤသီ, လၢအ သံဝဲန့ၣ်အိၣ်ဒီးပှၤထူးပှၤတီၤလီၤ. ဘၣ်ဆၣ်ဒီးတမၤ ဘၣ်တၢ်အၢတၢ်သီဘၣ်နီတမံၤဘၣ်. ဒီးလီတၢ်တအိၣ် ဘၣ်လၢအထးခိၣ်ဘၣ်.

¹⁰ ဒီးဘၣ်ယွၤအသးလၢအကမၤသဘှံးအီၤ, မၤနးမၤ ဖှီၣ်အီၤလီၤ. တုၤအပာ်ထီၣ်အသးလၢတၢ်လုၢ်လၢတၢ် ဒဲးဘးအဃိဒီး, ကထံၣ်ဘၣ်အချံအသၣ်, ကထုးထီအနံၤ အသီ, ဒီးတၢ်ဘၣ်ယွၤအသးကဘီၣ်ထီၣ်ညီထီၣ်လၢအ စုပူၤလီၤ. ¹¹ ကထံၣ်ဘၣ်အသူၣ်အသးအတၢ်မၤ, ဒီးကမံ သူၣ်မံသးလီၤ. ယခ့တီယပှၤလိၤကပာ်တီပာ်လိၤပှၤအါ ဂၤလၢအတၢ်သ့ၣ်ညါ, ဒီးကစိာ်အတၢ်အၢတၢ်သီလီၤ.

¹² မၤသးဒ်န့ၣ်ဒီး ယကဟ့ၣ်နီၤဖးအဂီၢ်ဒီးပှၤအဒိၣ်, ဒီး ကနီၤဖးဃုာ်တၢ်ဂုာ်န့ၢ်ဒီး ပှၤအဂံၢ်ဆူၣ်အဘါဆူၣ်လီၤ. အဂ့ၢ်ဒ်အံၤ, လူလီၤအသးတုၤအသံ, ဒီးတၢ်ဂံၢ်အီၤလၢပှၤ မၤကမၣ်တၢ်ဖိအကျါ, ဒီးစိာ်ထီၣ်ကွံာ်ပှၤအါဂၤအတၢ် ဒဲးဘး, ဒီးကဃ့ညးတၢ်လၢပှၤမၤကမၣ်တၢ်အဂီၢ်လီၤ.

၅၄

¹ သးဝံၣ်ထီၣ်, ပှၤတူာ်ဖိလၢ အတဆံးစၢ်ဘၣ်တၢ်ဧၢ, ကိးပသူ, ဒီးထုထီၣ်နကလုၢ်, ပှၤလၢအတဘၣ်တၢ်ဟုး ဆါဘၣ်တဂၤဧၢ. အဂ့ၢ်ဒ်အံၤ, ပှၤလၢအအိၣ်သယုၢ်တ ဂၤန့ၣ်အဖိအါန့ၢ် ပိာ်မုၣ်အိၣ်ဒီး အဝၤအဖိတက့ၢ်လီၤ, ယွၤစံးဝဲဒၣ်.

² မၤလဲၢ်ထီၣ်နဒဲအလီၢ်, ဒီးနအိၣ်နဆိးအလီၢ်အယၣ် သဒၢတၢ်န့ၣ်မၤထီထီၣ်အီၤတက့ၢ်. သးလီတၢ်တဂ့ၤ, မၤထီနပျံၤ, ဒီးမၤခၢၣ်သနၢၢ်နတၢၣ်ဖိတက့ၢ်.

³ အဂ့ၢ်ဒ်အံၤ, နကဖျိးထီၣ်လၢနစုထွဲဒီးလၢနစုစ့ၣ်, ဒီးန ချံနသၣ်ကန့ၢ်သါပှၤကလုာ်တဖၣ်, ဒီးကအိၣ်ဝဲဆိးဝဲ လၢဝ့ၢ်အိၣ်သယုၢ်တ့ၢ်အပူၤလီၤ.

⁴ ပျံၤတၢ်တဂ့ၤ. အဂ့ၢ်ဒ်အံၤ, နမဲာ်တဆှးဘၣ်. ဒီးပာ်ဆှး နမဲာ်တဂ့ၤ. အဂ့ၢ်ဒ်အံၤ, တၢ်တဒုးမဲာ်ဆှးနၤဘၣ်. အ ဂ့ၢ်ဒ်အံၤ, နသးစၢ်အမဲာ်ဆှးန့ၣ်နကသးပ့ၤနီၣ်, ဒီးတၢ်ဒုၣ် ဒွဲၣ်နအိၣ်မုၣ်ကမဲန့ၣ် နကသးပ့ၤနီၣ် ဒီးနတသ့ၣ်နီၣ် ထီၣ်လၢၤဘၣ်လီၤ.

⁵ အဂ့ၢ်ဒ်အံၤ, ပှၤလၢအတ့လီၤနၤတဂၤန့ၣ်မ့ၢ်နဝၤလီၤ. အမံၤမ့ၢ်တၢ်သးမုၢ်ဂီၢ်မုၢ်အယွၤလီၤ. ဒီးပှၤလၢအပှ့ၤက့ၤ နၤတဂၤန့ၣ်မ့ၢ်အံၣ်စရ့လးအတၢ်စီဆှံတဂၤလီၤ. ဒီးတၢ် ကကိးအီၤလၢဟီၣ်ခိၣ်ဒီဘ့ၣ်ညါအကစၢ်လီၤ.

⁶ အဂ့ၢ်ဒ်အံၤ, ဒ်ပိာ်မုၣ်လၢတၢ်လဲၤသဒၣ်အီၤဒီးဘၣ် တၢ်နးတၢ်ဖှီၣ်လၢအသးကံၢ်ပူၤအသိးန့ၣ် ယွၤကိးက့ၤ လံနၤ, ဒီးဒ်မါတဂၤလၢအန့ၢ်ဝၤလၢအသးစၢ်အသိးန့ၣ် လီၤ. အဂ့ၢ်ဒ်အံၤ, ယွၤစံးတ့ၢ်ဝဲ, ကဘၣ်တၢ်ပာ်မၢ်အီၤလီၤ.

⁷ ယလဲၤသဒၣ်နၤတစိၢ်ဖိဘၣ်ဆၣ်ဒီး, ယကထၢဖှိၣ်နၤ ဒီးတၢ်သးကညီၤဖးဒိၣ်တဖၣ်န့ၣ်လီၤ.

⁸ မ့ၢ်ယသးထီၣ်ဖျိးထီၣ်တဘျီသတးဒီး, ယပာ်ခူသူၣ် ယသးလၢနမဲာ်ညါတစိၢ်ဖိလီၤ. ဘၣ်ဆၣ်ဒီးယကသး ကညီၤနၤအိၣ်ဒီးတၢ်ဘျုးတၢ်ဖှိၣ်အထူအယိာ်လီၤ, တၢ် ပှ့ၤက့ၤနၤအယွၤစံးဝဲဒၣ်.

⁹ အဂ့ၢ်ဒ်အံၤ, အဝဲအံၤမ့ၢ်စီၤနိအၤအထံလၢယဂီၢ်လီၤ. ဒ်ယဆိၣ်တၢ်လၢထံ ဘၣ်ဃးဒီးစီၤနိအၤတလုၣ်ဘၢ လၢၤဘၣ်ဟီၣ်ခိၣ်အသိးန့ၣ်, ယဆိၣ်လၢယတသးထီၣ် လၢၤဘၣ်နၤ, ဒီးယတသိၣ်ဃီၣ်လၢၤဘၣ်နၤဘၣ်လီၤ.

¹⁰ အဂ့ၢ်ဒ်အံၤ, ကစၢၢ်ကလိကသုးအလီၢ်, ဒီးတၢ်စိခိၣ် ကဟူးဝးလီၤ. မ့မ့ၢ်ယဘျုးယဖှိၣ်တဟးဘၣ်လၢနအိၣ် ဘၣ်. ဒီးယတၢ်အၢၣ်လီၤအီလီၤဘၣ်ဃးဒီးတၢ်ဃူတၢ် ဖိးတဟူးတဝးဘၣ်န့ၣ်, ယွၤလၢအသးကညီၤနၤတဂၤ စံးဝဲဒၣ်.

¹¹ ပှၤလၢအဘၣ်တၢ်နးတၢ်ဖှီၣ်, ဘၣ်ကလံၤမုၢ်, ဒီးတ ဘၣ်တၢ်မၤမုာ်ထီၣ်က့ၤနၤတဂၤဧၢ, ကွၢ်ကွၢ်, ယပာ်န လၢၢ်တဖၣ်လၢလၢၢ်တ့ၣ်လ့ၣ်အကမူၣ်အပူၤ, ဒီးနခီၣ် ထံးတဖၣ်လၢတၢ်မျၢ်နံၤလါလီၤ. ¹² ယကတ့တၢးထီလၢ နခိၣ်ဒူအဖီခိၣ်လၢတၢ်မျၢ်ဂီၤဆှုၣ်ကလာ်, ဒီးနတြဲၤလၢ တၢ်မျၢ်ကပြုၢ်ကပြီၤ, ဒီးတၢ်လၢနဃၢၤခဲလၢာ်န့ၣ်က မ့ၢ်လၢၢ်ဘၣ်အပှၤအမဲာ်လီၤ.

¹³ ဒီးနဖိနလံၤ ကကဲထီၣ်ယွၤအပျဲၢ်အဘီၣ်ခဲလၢာ်, ဒီးန ဖိအတၢ်ဃူအတၢ်ဖိးန့ၣ်ကဒိၣ်ဝဲအါဝဲလီၤ.

¹⁴ နကအိၣ်ဂၢၢ်ဆိးကျၢၤလၢ တၢ်တီတၢ်လိၤလီၤ. နက အိၣ်ယံၤဒီးတၢ်မၤအၢမၤသီလီၤ. အဂ့ၢ်ဒ်အံၤ, နတပျံၤ ဘၣ်တၢ်ဘၣ်. ဒီးအိၣ်ယံၤဒီးတၢ်ဟးဂီၤလီၤ. အဂ့ၢ်ဒ်အံၤ, တဟဲဘူးဒီးနၤဘၣ်လီၤ.

¹⁵ ကွၢ်ကွၢ်, ပှၤကအိၣ်ဖှိၣ်ရိဖှိၣ်လီၤ. တမ့ၢ်ဘၣ်လၢယၤ အဃိဘၣ်. ကယဲၢ်ပှၤလၢအအိၣ်ဖှိၣ်ထီဒါနၤန့ၣ်ကဟး ဂီၤလၢနဃိလီၤ.

¹⁶ ကွၢ်ကွၢ်, ယတ့လီၤလံပှၤပိာ်တၢ်ဖိလၢအအူသဖှိမ့ၣ် အူကဖးလၢမ့ၣ်အူကျါ, လၢအဒုးဟဲထီၣ်အစုကဝဲၤလၢ အမၤတၢ်အဃိလံ. ဒီးယတ့လီၤလံ တၢ်မၤသယုၢ်ဒ်သိး အကမၤဟးဂီၤတၢ်လီၤ.

¹⁷ တၢ်အစုကဝဲၤလၢ အတ့လီၤအသးထီဒါနၤန့ၣ်တ ဘီၣ်ထီၣ်ညီထီၣ်နီတမံၤဘၣ်. ဒီးကယဲၢ်ပှၤအပျ့ၤလၢ အဂဲၤဆၢထၢၣ်ထီဒါနၤလၢတၢ်စံၣ်ညီၣ်အပူၤန့ၣ်နကဒုး စံၣ်ညီၣ်ဃၣ်အီၤလီၤ. အဝဲန့ၣ်မ့ၢ်ယွၤအခ့အပှၤအတၢ် န့ၢ်သါ, ဒီးအတၢ်တီတၢ်လိၤန့ၣ်ဟဲလၢယၤလီၤ, ယွၤစံး ဝဲဒၣ်.

၅၅

¹ ဟဲ, ကယဲၢ်ပှၤလၢတၢ်သူအသးလၢထံတဂၤလၢ်လၢ် သ့ၣ်ဧၢ, ဟဲဆူထံအအိၣ်တက့ၢ်. ဒီးပှၤလၢအစ့တအိၣ် သ့ၣ်ဧၢ, ဟဲပှ့ၤတၢ်, ဒီးအီၣ်တၢ်တက့ၢ်. ဒီးစ့တအိၣ်, အ ပှ့ၤတအိၣ်ဘၣ်န့ၣ်ဟဲပှ့ၤစပံးထံဒီးတၢ်နုၢ်ထံတက့ၢ်.

² သုလၢာ်စ့လၢတၢ်လၢအတမ့ၢ်ဘၣ်ကိၣ်အဂီၢ်, ဒီးသု မၤတၢ်လၢ အတဒုးဘျဲးအီၣ်ဘၣ်န့ၣ်အဂီၢ်မ့ၢ်အဘၣ်မ နုၤလဲၣ်. ဒိကနၣ်ယကလုၢ်လီၤတံၢ်လီၤဆဲး, ဒီးအီၣ်တၢ် အဂ့ၤန့ၣ်တက့ၢ်. ဒီးသုသးကမုာ်ထီၣ်က့ၤလၢတၢ်ဝံၣ် တၢ်ဆၢအပူၤလီၤ.

³ ဒိးသုနၢ်ဒီးဟဲဆူယအိၣ်တက့ၢ်. ဒိကနၣ်ဒီးသုသးက မူ, ဒီးယကမၤတၢ်အၢၣ်လီၤအီလီၤအထူအယိာ်ဒီးသု, တၢ်ဘျုးတၢ်ဖှိၣ်အဂၢၢ်အကျၢၤဘၣ်ဃးဒီးစီၤဒၤဝံးလီၤ.

⁴ ကွၢ်ကွၢ်, ယပာ်အီၤလၢတၢ်အုၣ်အသးလၢပှၤကလုာ် တဖၣ်အဂီၢ်, တၢ်အခိၣ်ဒီးပှၤမၤလိာ်တၢ်လၢပှၤဂီၢ်မုၢ်တ ဖၣ်အဂီၢ်လီၤ.

⁵ ကွၢ်ကွၢ်, ပှၤတကလုာ်လၢနတသ့ၣ်ညါဘၣ်အီၤဘၣ် န့ၣ်နကကိးန့ၢ်အီၤ, ဒီးပှၤတကလုာ်လၢအတသ့ၣ်ညါ ဘၣ်နၤတဖၣ်န့ၣ်ကဃ့ၢ်ဆူနအိၣ်လၢ ယွၤနကစၢ်အ ဃိ, ဒီးအံၣ်စရ့လးအတၢ်စီဆှံတဂၤအဃိလီၤ. အဂ့ၢ်ဒ် အံၤ, မၤလၤမၤကပီၤလံနၤလံလီၤ.

⁶ ဃုယွၤလၢ ပထံၣ်န့ၢ်ဘၣ်အီၤသ့အဖၢမုၢ်န့ၣ်တက့ၢ်. ကိးထီၣ်အီၤလၢအအိၣ်ဘူးအဖၢမုၢ်န့ၣ်တက့ၢ်.

⁷ မ်ပှၤတတီတလိၤဘၣ်န့ၣ်လဲၤသဒၣ်အကျဲဒၣ်ဝဲ, ဒီး ပှၤအၢန့ၣ်အဆိကမိၣ်တၢ်, ဒီးဟဲက့ၤကဒါက့ၤဆူယွၤ အအိၣ်တက့ၢ်. ဒီးကသူၣ်ကညီၤကသးကညီၤအီၤလီၤ. မ်အဟဲဆူပကစၢ်အအိၣ်တက့ၢ်. အဂ့ၢ်ဒ်အံၤ, ကပျၢ်တၢ် အါအါကလဲာ်လီၤ.

⁸ အဂ့ၢ်ဒ်အံၤ, ယတၢ်ဆိကမိၣ်တမ့ၢ်ဘၣ်သုတၢ်ဆိက မိၣ်ဘၣ်, ဒီးသုကျဲတမ့ၢ်ဘၣ်ယကျဲဘၣ်, ယွၤစံးဝဲဒၣ်.

⁹ အဂ့ၢ်ဒ်အံၤ, ဒ်မူခိၣ်ထီန့ၢ်ဟီၣ်ခိၣ်အသိး, ယကျဲထီန့ၢ် သုကျဲ, ဒီးယတၢ်ဆိကမိၣ်ထီန့ၢ်သုတၢ်ဆိကမိၣ်ဒ်န့ၣ် သိးလီၤ. ¹⁰ အဂ့ၢ်ဒ်အံၤ, ဒ်တၢ်စူၤ, ဒီးမူခိၣ်ဖီဟဲလီၤလၢမူခိၣ်, ဒီးတက့ၤကဒါက့ၤဘၣ်ဆူန့ၣ်, မ့မ့ၢ်မၤဘၣ်စီၣ်ဟီၣ်ခိၣ်, ဒီးဒုးမဲထီၣ်ဒီးဖးထီၣ်တၢ်သတးဒီး, ဒုးဟ့ၣ်ပှၤဖှံတၢ်လၢ တၢ်ချံ, ဒီးပှၤအီၣ်တၢ်လၢတၢ်အီၣ်အသိးန့ၣ်, ¹¹ ယတၢ် ကတိၤလၢအဟဲထီၣ်လၢ ယထးခိၣ်ကမၤအသးဒ်န့ၣ်, ဒီးတဟဲက့ၤကဒါက့ၤဆူယအိၣ်ကလီကလီဘၣ်. မ့ၢ်အ ကမၤထီၣ်တၢ်လၢအဘၣ်ယသး ဒီးကဒုးကဲထီၣ်တၢ် လၢယမၢအမၤတၢ်န့ၣ်လီၤ.

¹² အဂ့ၢ်ဒ်အံၤ, သုကဟးထီၣ်ဒီး တၢ်သူၣ်ခုသးခု, ဒီး တၢ်ကဆှၢသုဒီးတၢ်ဃူတၢ်ဖိး, ကစၢၢ်တဖၣ်, ဒီးတၢ်စိ ခိၣ်တဖၣ်ကကိးထီၣ် ဒီးတၢ်ကိးပသူထီၣ်လၢသုမဲာ်ညါ ဒီးကယဲၢ်သ့ၣ်လၢပှၢ်လၢ်ကျါန့ၣ်ကဒဲအစုခဲလၢာ်လီၤ.

¹³ လၢတၢ်ဆှုၣ်အလီၢ်န့ၣ်သ့ၣ်ဆှိကမဲထီၣ်, ဒီးလၢတၤ ဆှုၣ်တၤမဲအလီၢ်န့ၣ်သမ့ၤဟဒးလီၤ. ဒီးကကဲထီၣ်တၢ် အမံၤလၢယွၤအဂီၢ်, ဒီးတၢ်အပနီၣ်အထူအယိာ်လၢတၢ် တဒီၣ်တဲာ်ဘၣ်န့ၣ်လီၤ.

၅၆

¹ ယွၤစံးဒ်အံၤ, တိၢ်န့ၢ်တၢ်စံၣ်ညီၣ်တီ, ဒီးမၤတၢ်တီတၢ် လိၤတက့ၢ်. အဂ့ၢ်ဒ်အံၤ, ယတၢ်အုၣ်က့ၤခီၣ်က့ၤအိၣ် ဘူးတ့ၢ်လံ, ဒီးယတၢ်တီတၢ်လိၤလၢအကအိၣ်ဖျါထီၣ် လီၤ.

² ပှၤလၢအမၤတၢ်အံၤ, ဒီးပှၤကညီဖိလၢ အဟံးဃာ် အီၤ, လၢအတိၢ်န့ၢ်မုၢ်အိၣ်ဘှံးနံၤ, ဒ်သိးအသုတမၤဘၣ် အၢအီၤတဂ့ၤ, ဒီးကွၢ်အစုဒ်သိးအသုတမၤတၢ်အၢတဂ့ၤ န့ၣ်ဘၣ်ဆိၣ်ဂ့ၤဝဲလီၤ.

³ ဒီးပှၤတခီဘီမုၢ်ဖိလၢ အစဲဘူးအသးဒီးယွၤန့ၣ်မ်အ သုတစံး, ယွၤကမၤလီၤဖးကွံာ်ယၤသပှၢ်တၢၢ်ဒီးအပှၤ ဂီၢ်မုၢ်န့ၣ်တဂ့ၤ. ⁴ ဒီးပှၤဒ့ဒံၣ်ဖိ မ်အသုတစံး, ယမ့ၢ်သ့ၣ် ဃ့တထူၣ်န့ၣ်တဂ့ၤ. အဂ့ၢ်ဒ်အံၤ, ယွၤစံး, ပှၤဒ့ဒံၣ်ဖိလၢ အတိၢ်န့ၢ်ယမုၢ်အိၣ်ဘှံးနံၤတဖၣ်, ဒီးဃုထၢတၢ်လၢအ ဘၣ်ယသး, ဒီးဟံးဃာ်ယတၢ်အၢၣ်လီၤအီလီၤန့ၣ်, ⁵ ယ ကဟ့ၣ်လီၤအီၤလၢ အလီၢ်ဒီးအမံၤဂ့ၤန့ၢ်ဖိခွါ, ဒီးဖိမုၣ် တက့ၢ်လၢယဟံၣ်ပူၤ, ဒီးလၢယခိၣ်ဒူအပူၤလီၤ. ယက ဟ့ၣ်လီၤအီၤလၢ အမံၤအထူအယိာ် လၢအတဘၣ်တၢ် ဒီၣ်တဲာ်ကွံာ်ဘၣ်လီၤ.

⁶ ဒီးပှၤတခီဘီမုၢ်ဖိလၢအစဲဘူးအသးဒီးယွၤ, ဒ်သိးအ ကမၤအတၢ်, ဒီးဒ်သိးအကအဲၣ်ယွၤအမံၤ, ဒ်သိးအက ကဲထီၣ်အခ့အပှၤ, ကယဲၢ်ပှၤလၢအတိၢ်န့ၢ်မုၢ်အိၣ်ဘှံး နံၤ, ဒီးတမၤဘၣ်အၢအီၤ, ဒီးဟံးဃာ်ယတၢ်အၢၣ်လီၤအီ လီၤခဲလၢာ်န့ၣ်, ⁷ ယကဒုးဟဲထီၣ်အဝဲသ့ၣ်ဒၣ်လဲာ်ဆူ ယကစၢၢ်စီဆှံ, ဒီးယကဒုးသးခုအီၤလၢယတၢ်ဘါထု ကဖၣ်အဟံၣ်ပူၤလီၤ. အတၢ်လုၢ်မ့ၣ်အူဒီးအတၢ်လုၢ် တဖၣ်န့ၣ်ကဘၣ်တၢ်အသး လၢယတၢ်လုၢ်လီၢ်အဖီခိၣ် လီၤ. အဂ့ၢ်ဒ်အံၤ, ယဟံၣ်ကဘၣ်တၢ်ကိးအီၤလၢတၢ် ဘါထုကဖၣ်အဟံၣ်လၢပှၤကိးကလုာ်ဒဲးအဂီၢ်လီၤ.

⁸ ကစၢ်ယွၤလၢအဒုးအိၣ်ဖှိၣ်အံၣ်စရ့လးအပှၤဘၣ်တၢ် ဟီထီၣ်ကွံာ်အီၤတဖၣ်န့ၣ်စံးဒ်အံၤ, ပှၤလၢအအိၣ်ဖှိၣ် တ့ၢ်ဆူအအိၣ်အမဲာ်ညါန့ၣ် ယကဒုးအိၣ်ဖှိၣ်ပှၤဂၤဆူအ အိၣ်လီၤ. ⁹ ကယဲၢ်ဆၣ်ဖိကီၢ်ဖိလၢတၢ်ပျီပူၤသ့ၣ်ဧၢ, ဟဲအီၣ်တၢ်တက့ၢ်, ဆၣ်ဖိကီၢ်ဖိလၢ ပှၢ်လၢ်ကျါခဲလၢာ်သ့ၣ်ဧၢ.―

¹⁰ အပှၤခိးတၢ်ဖိမ့ၢ် ပှၤမဲာ်ဘျီၣ်ခဲလၢာ်, တသ့ၣ်ညါဘၣ် တၢ်ဘၣ်, မ့ၢ်ထွံၣ်တအုၣ်ခဲလၢာ်လီၤ. မီၤတၢ်တသ့ဘၣ်, မ့ၢ်အမံမီၢ်တၢ်, မံခ့ဝဲ, အဲၣ်ဒိးမံသပ့ၤ, ¹¹ ဒီးထွံၣ်န့ၣ်သးကွံ တၢ်အီၣ်, ဒီးတသ့ၣ်ညါဘၣ်တၢ်ဘျဲးအီၣ်ဘၣ်, ဒီးပှၤကွၢ် သိအကစၢ်ဒၣ်ဝဲန့ၣ်အနၢ်တပၢၢ်ဘၣ်တၢ်ဘၣ်. ဃၣ်အ သးတဂၤဆူအကျဲဒၣ်ဝဲတဂၤဆူအကျဲဒၣ်ဝဲ, တဂၤဆူအ သးကွံတၢ်အပူၤတဂၤဆူအသးကွံတၢ်အပူၤစုာ်စုာ်လီၤ.

¹² ဟဲသကိး, စံးဝဲ, ယကမၤန့ၢ်စပံးထံ, ဒီးပကဘျဲးအီလၢ သံး, ဒီးခဲဂီၤတနံၤကမၤအသးဒ်မုၢ်မဆါတနံၤအံၤအသိး န့ၣ်, ဒိၣ်န့ၢ်, အါန့ၢ်, နးန့ၢ်တက့ၢ်လီၤ.

၅၇

¹ ပှၤအတီအလိၤဟါမၢ်, ဒီးပှၤတတိၢ်န့ၢ်ဘၣ်လၢအ သးနီတဂၤဘၣ်, ဒီးပှၤမၤဂ့ၤတၢ်န့ၣ်ဘၣ်တၢ်ထုးထီၣ် ကွံာ်ဝဲ, ဒီးပှၤတဆိကမိၣ်လၢပှၤတီပှၤလိၤဘၣ်တၢ်ထုး ထီၣ်ကွံာ်အီၤလၢတၢ်အၢအပူၤဘၣ်.

² ကလဲၤနုာ်လၢတၢ်ဃူတၢ်ဖိးအပူၤလီၤ. ပှၤလၢအလဲၤ တၢ်စၢၢ်ဆၢလၢအမဲာ်ညါန့ၣ် ကအိၣ်ဘှံးလၢအလီၢ်မံ ပူၤလီၤ.

³ ဒီးသုဝဲသ့ၣ်အံၤ သုးဘူးသုသးဖဲအံၤ, ပှၤမၤကဒါပ မဲာ်အဖိခွါတဖၣ်, ပှၤမၤကမၣ်ပဖိပမါ, ဒီးပှၤဃဲသဲမုၣ်အ ချံအသၣ်သ့ၣ်ဧၢ. ⁴ သုမၤတရီတပါမတၤတဂၤလဲၣ်, သု အဲးထီၣ်ဖးလဲၢ်သုထးခိၣ်, သုဆဲးထီၣ်သုပျ့ၤလၢမတၤ အလိၤလဲၣ်. သုမ့ၢ်ပှၤမၤကမၣ်တၢ်အဖိ, ပှၤလီတၢ်အ ချံအသၣ်န့ၣ်တမ့ၢ်ဘၣ်ဧါ. ⁵ သုသးဆူၣ်ထီၣ်လၢဃီမုၢ် ပျဲၢ်အကျါ, လၢသ့ၣ်သံကစဲာ်ကိးထူၣ်ဒဲးအဖီလာ်, သုမၤ သံဖိသၣ်တဖၣ်လၢကစၢၢ်ကဆူးအပူၤ, လၢလၢၢ်အိပူၤ န့ၣ်တမ့ၢ်ဘၣ်ဧါ.

⁶ လၢကစၢၢ်ကဆူးအလၢၢ်ဘျ့အကျါန့ၣ်နဂီၢ်အိၣ်လီၤ. အဝဲသ့ၣ်တဖၣ်, အဝဲသ့ၣ်န့ၣ် မ့ၢ်တၢ်နီၤဖးန့ၢ်လၢနဂီၢ် လီၤ. နလူလီၤနတၢ်လုၢ်အီလၢအဂီၢ်, နဟဲစိာ်တၢ်မၤ ဘူၣ်ကိၣ်လီၤ. ယသူၣ်ကမံ ယသးကမံလၢတၢ်န့ၣ်တ ဖၣ်အဃိစ့ၢ်ကီးဧါ.

⁷ နပာ်နလီၢ်မံလၢကစၢၢ်ဖးထီတဖျၢၣ်, ဒီးဖဲန့ၣ်ဒၣ်လဲာ် နလဲၤထီၣ်လုၢ်တၢ်လီၤ.

⁸ ဒီးလၢတြဲၤဒီးကျဲစၢၤအချၢဃံန့ၣ် နပာ်ထီၣ်နတၢ်ဒုး သ့ၣ်နီၣ်ထီၣ်က့ၤတၢ်လီၤ. အဂ့ၢ်ဒ်အံၤ, နလီၣ်ဖျါနသး အိၣ်တဒၢလၢအမဲာ်ညါလီၤ. ဒီးနလဲၤထီၣ်, ဒီးမၤလဲၢ် ထီၣ်နလီၢ်မံ, နအၢၣ်လီၤအီလီၤတၢ်ဒီးအီၤ, နအဲၣ်ဒိးအ လီၢ်မံ, နကတဲာ်ကတီၤအလီၢ်လၢအဂီၢ်လီၤ.

⁹ နလဲၤဆူစီၤပၤအအိၣ်, အီၣ်ဒီးသိဖှူတၢ်, ဒီးမၤအါ ထီၣ်နသိနၢမူ, ဒီးနမၢလီၤနကလူးတဖၣ်ဆူတၢ်အယံၤ, ဒီးနမၤလီၤရၢၢ်နသးဆူပျုၤပူၤလီၤ.

¹⁰ နကျဲယံၤ, ဒီးနကျဲစၢးမၤတၢ်ဘၣ်ဆၣ်ဒီး, နတစံးဘၣ်, မုၢ်လၢ်တၢ်တအိၣ်ဘၣ်န့ၣ်ဘၣ်. နထံၣ်န့ၢ်ဘၣ်နစုအသး သမူလီၤ. မၤသးဒ်န့ၣ်ဒီးနတသူၣ်အုးသးအုးဘၣ်.

¹¹ ဒီးလၢနကတိၤတၢ်ကဘျံးကဘျၣ်, ဒီးတသ့ၣ်နီၣ်ထီၣ် က့ၤဘၣ်ယၤ, ဒီးတတိၢ်န့ၢ်ဘၣ်လၢနသးဘၣ်န့ၣ်မ့ၢ်န ဘၣ်ယိၣ်တၢ်ဒီး နပျံၤမတၤတဂၤလဲၣ်. မ့ၢ်ယအိၣ်ဘှီၣ် ကလာ်လၢပျၢၤလံၤလံၤန့ၣ်ဒီး, နတပျံၤဘၣ်ယၤ, တမ့ၢ် ဘၣ်ဧါ.

¹² ယကဒုးနဲၣ်နတၢ်တီတၢ်လိၤ, ဒီးနမၤတၢ်န့ၣ်, ဒီးတ ဒုးအိၣ်ထီၣ်နဘျုးနဖှိၣ်ဘၣ်.

¹³ တုၤနကိးထီၣ်တၢ်ဒီး, မ်တၢ်လၢနပာ်ဖှိၣ်အီၤမၤပူၤ မၤဖျဲးနၤတက့ၢ်. ဘၣ်ဆၣ်ဒီးကလံၤကအူဒံကွံာ်အီၤခဲ လၢာ်, ဒီးတၢ်အသါတဘျီကစိာ်ထီၣ်ကွံာ်အီၤလီၤ. မ့မ့ၢ် ပှၤလၢအသန့ၤအသးလၢယၤန့ၣ် ကန့ၢ်သါထံဧိၤကီၢ် ဧိၤန့ၣ်, ဒီးမၤန့ၢ်ယကစၢၢ်စီဆှံလီၤ.

¹⁴ ဒီးတၢ်ကစံး, မၤထီၣ်, မၤထီၣ်, ကတဲာ်ကတီၤကျဲဧိၤ ကပူၤဧိၤ, ထၢထီၣ်ကွံာ်ကယဲၢ်ခီၣ်ဘၣ်တိၢ်အလီၢ်လၢယ ပှၤဂီၢ်မုၢ်အကျဲပူၤန့ၣ်တက့ၢ်.

¹⁵ အဂ့ၢ်ဒ်အံၤ, ပှၤလၢအထီၣ်ထီ, ဒီးအိၣ်ဝဲထီၣ်ထီ, လၢ အအိၣ်ဝဲဆိးဝဲလၢတၢ်အထူအယိာ်ပူၤ, ဒီးအမံၤမ့ၢ်တၢ် စီဆှံတဂၤစံးဝဲဒ်အံၤ, ယအိၣ်ယဆိးလၢတၢ်ထီၣ်ထီ, လၢ တၢ်စီဆှံအလီၢ်, ဒီးယအိၣ်စ့ၢ်ကီးလၢပှၤအသူၣ်ကၢ်အ သးလီၤဒီးပှၤဆီၣ်လီၤအသးအသိး, ဒ်သိးယကမၤမူထီၣ် ပှၤဆီၣ်လီၤအသးတဖၣ်အသးဒီး ဒ်သိးယကမၤမူထီၣ် ပှၤလၢအသူၣ်ကၢ်အသးလီၤတဖၣ်အသးလီၤ.

¹⁶ အဂ့ၢ်ဒ်အံၤ, ယတဂ့ၢ်လိာ်ဘှီလိာ်လီၤထူလီၤယိာ်ဘၣ်, ယသးတထီၣ်ဘၣ်လီၤစိၤလီၤထီဘၣ်. အဂ့ၢ်ဒ်အံၤ, မ့မ့ၢ် ဒ်န့ၣ်ဒီးပှၤအသးကလီၤဘှါလၢယမဲာ်ညါ, ပှၤလၢယတ့ လီၤအီၤလီၤ.

¹⁷ လၢအသးကွံတၢ်အတၢ်ဒဲးဘးအဃိ, ယသးထီၣ်, ဒီး ယတီၢ်အီၤ, ဒီးပာ်တဒၢယသး, ဒီးယသးကဲၤထီၣ်လီၤ. အဂ့ၢ်ဒ်အံၤ, လဲၤကပၤကပၤဖဲကျဲလၢအဘၣ်အသးလီၤ.

¹⁸ အကျဲဧိၤကပူၤဧိၤန့ၣ်ယထံၣ်လံ, ဒီးယကမၤဘျါက့ၤ အီၤ, ဒီးယကဆှၢထီၣ်အီၤ, ဒီးယကမၤမုာ်ထီၣ်က့ၤအီၤ, ဒီးအပှၤလၢအသူၣ်အုးအသးအုးဒီးအီၤတဖၣ်လီၤ.

¹⁹ ယတ့လီၤပှၤအပျုၤအတၤသၣ်လီၤ. တၢ်ဃူတၢ်ဖိး, တၢ်ဃူတၢ်ဖိး, မ်အအိၣ်ဒီးပှၤလၢအယံၤ, ဒီးအိၣ်ဒီးပှၤ လၢအဘူးန့ၣ်တက့ၢ်. ယွၤစံးဝဲဒၣ်, ဒီးယကမၤဘျါ က့ၤအီၤလီၤ.

²⁰ မ့မ့ၢ်ပှၤတၢ်ဒဲးဘးဖိတဖၣ်န့ၣ် မၤသးဒ်ပီၣ်လဲၣ်လၢအ ဟူးဝးအသိးန့ၣ်လီၤ. အဂ့ၢ်ဒ်အံၤ, အိၣ်ဘှံးဝဲတသ့ဘၣ်. အထံစံၣ်ပီပုဒုးဟဲထီၣ်ကပံာ်ကပာ်, ဒီးကပံာ်ဟီၣ်ချါ လီၤ. ²¹ တၢ်ဃူတၢ်ဖိးတအိၣ်ဘၣ်ဒီးပှၤတတီတလိၤဘၣ် န့ၣ်, ယကစၢ်စံးဝဲဒၣ်.

၅၈

¹ ကိးထီၣ်လၢနကလုၢ်ဒိၣ်တက့ၢ်. သးလီတၢ်တဂ့ၤ. ထု ထီၣ်နကလုၢ်ဒ်ကွဲၤအသိးန့ၣ်, ဒီးစံးဘၣ်တဲဘၣ်ယပှၤ ဂီၢ်မုၢ်လၢအတၢ်ကမၣ်, ဒီးယၤကိာ်အပှၤဟံၣ်ဖိလၢအ တၢ်ဒဲးဘးတက့ၢ်.

² ဘၣ်ဆၣ်ဒီးအဝဲသ့ၣ်ဃုယၤတနံၤဘၣ်တနံၤ, ဒီးဘၣ် အသးလၢတၢ်သ့ၣ်ညါယကျဲ, ဒ်ပှၤတကလုာ်လၢအမၤ တၢ်တီတၢ်လိၤ, ဒီးတလဲၤသဒၣ်ဘၣ်အကစၢ်အတၢ်စံၣ် ညီၣ်ဘၣ်အသိးန့ၣ်လီၤ. ဃ့ဝဲလၢတၢ်စံၣ်ညီၣ်တီလၢယၤ, ဒီးမုာ်လၤဝဲလၢတၢ်သုးဘူးအသးဆူယွၤအအိၣ်န့ၣ်လီၤ.

³ ပဒုၣ်တၢ်အီၣ်တၢ်အီ, ဒီးနတထံၣ်ဘၣ်န့ၣ်, ပမၤနး မၤဖှီၣ်ပသး, ဒီးနတသ့ၣ်ညါဘၣ်န့ၣ် မ့ၢ်အဘၣ်မနုၤ လဲၣ်. ကွၢ်ကွၢ်, လၢသုဒုၣ်တၢ်အီၣ်တၢ်အီအမုၢ်တနံၤ န့ၣ်သုထံၣ်န့ၢ်တၢ်ဘၣ်သုသး, ဒီးမၢဆူၣ်ပှၤမၤသုတၢ်မၤ ခဲလၢာ်လီၤ.

⁴ ကွၢ်ကွၢ်, လၢတၢ်ဂ့ၢ်လိာ်ဘှီလိာ်ဒီးတၢ်အ့ၣ်လိာ်ဆိး က့လိာ်အဂီၢ်န့ၣ် သုဒုၣ်တၢ်အီၣ်တၢ်အီ, ဒီးလၢထိတၢ် လၢတၢ်အၢအစုခိၣ်အဂီၢ်န့ၣ်လီၤ. သုတဒုၣ်တၢ်အီၣ်တၢ် အီလၢမုၢ်မဆါတနံၤအံၤလၢ သုကဒုးနၢ်ဟူသုကလုၢ် လၢတၢ်ထီၣ်ထီဘၣ်.

⁵ အဝဲန့ၣ်မ့ၢ်တၢ်ဒုၣ်တၢ်အီၣ်တၢ်အီလၢ ယဃုထၢအီၤ, မုၢ်တနံၤလၢပှၤကမၤနးမၤဖှီၣ်အသးစ့ၢ်ကီးဧါ. မ့ၢ်ဒ်သိး ပှၤကဆုးလီၤအခိၣ်ဒ်ဆှဲအကမိာ်အသိး, ဒီးဒ်သိးအက ဒါလီၤထၢၣ်အတၢ်ကံးညာ် ဒီးဖၣ်ဆါလၢအဖီလာ်န့ၣ် စ့ၢ်ကီးဧါ. နကကိးတၢ်န့ၣ်တမံၤလၢတၢ်ဒုၣ်တၢ်အီၣ် တၢ်အီ, ဒီးမုၢ်တနံၤလၢအဘၣ်ယွၤအသးစ့ၢ်ကီးဧါ.

⁶ တၢ်ဒုၣ်တၢ်အီၣ်တၢ်အီလၢ အဘၣ်ယသးမ့ၢ်အအံၤ, တၢ်ဃ့ၣ်လီၤကွံာ်တၢ်အၢအပျံၤ, တၢ်ဘ့ၣ်ကွံာ်တၢ်ဝံဃၢ, ဒီးတၢ်မၤထူၣ်ဖျဲးပှၤဘၣ်တၢ်မၤအၢအီၤ, ဒီးတၢ်မၤကၢ် ကွံာ်နီၣ်ယိးဘိကိဘိဒဲးန့ၣ် တမ့ၢ်ဘၣ်ဧါ. ⁷ မ့ၢ်တၢ်နီၤ ဟ့ၣ်နကိၣ်လၢပှၤတၢ်သၣ်ဝံၤအသးအဂီၢ်, ဒီးတၢ်ဟဲစိာ် ပှၤဖှီၣ်ဖိယာ်ဖိလၢ အပှၤဘၣ်တၢ်ဟီထီၣ်ကွံာ်အီၤန့ၣ်ဆူ နဟံၣ်ပူၤန့ၣ်တမ့ၢ်ဘၣ်ဧါ. တုၤနထံၣ်ပှၤအိၣ်ဘ့ၣ်ဆ့ဒီး, လၢနကဒုးကူဒုးသိးအီၤ, ဒီးလၢနတပာ်တဒၢဘၣ်နသး ဒီးနဘူးနတံၢ်ဒၣ်နဲ, တမ့ၢ်ဘၣ်ဧါ.

⁸ တုၤနုၤတစုနတၢ်ကပီၤကကပီၤထီၣ်ဒ်မုၢ်ဆ့ၣ်အသိး, ဒီးနတၢ်ဘျါက့ၤန့ၣ် ကအိၣ်ထီၣ်ချ့သဒံးလီၤ. တုၤနုၤတ စုနတၢ်တီတၢ်လိၤကလဲၤလၢနမဲာ်ညါ, ဒီးယွၤအလၤက ပီၤကဟဲလၢနလီၢ်ခံန့ၣ်လီၤ.

⁹ တုၤနုၤတစုနကကိးထီၣ်, ဒီးယွၤကစံးဆၢတၢ်, နက ဃ့တၢ်, ဒီးကစံးဝဲ, ကွၢ်ကွၢ်, ယၤလီၤ. နမ့ၢ်သုးကွံာ်နီၣ် ယိးဘိလၢနကျါ, တၢ်ယူာ်ထီၣ်စုမုၢ်ဒီးကတိၤအၢတၢ်ဒီး

¹⁰ နမ့ၢ်သးအိၣ်ပှၤလၢ တၢ်သၣ်ဝံၤအသး, ဒီးမၤမံသး ပှၤလၢအသးဘၣ်နးဘၣ်ဖှီၣ်ဒီး, နတၢ်ကပီၤကကပီၤ ထီၣ်လၢတၢ်ခံးကျါ, ဒီးနတၢ်ခံးကမၤသးဒ်မုၢ်ထူၣ်အ သိးန့ၣ်, ¹¹ ဒီးယွၤကဆှၢနၤတထံၣ်ဃီ, ဒီးကမၤမံနသး လၢတၢ်အလီၢ်ဃ့အပူၤ, ဒီးကမၤဆူၣ်ထီၣ်နဃံနကွဲ, ဒီး နကမၤသးဒ်တၤသၣ်အလီၢ်ဘၣ်စီၣ်အသိး, ဒီးဒ်ထံထီၣ် ပၢၢ်တပူၤလၢအထံတလီၤသံးဘၣ်အသိးန့ၣ်လီၤ.

¹² ဒီးပှၤလၢအဟဲထီၣ်လၢနၤတဖၣ်ကမၤက့ၤတၢ်အလီၢ် အိၣ်သယုၢ်တဖၣ်, နကမၤက့ၤတၢ်အခီၣ်ထံးတဖၣ်ဘၣ် ဃးဒီးပှၤအါစိၤဒီးတၢ်ကကိးနၤလၢ ပှၤမၤက့ၤတၢ်ဘၢၣ် ဖျိ, ပှၤမၤက့ၤကျဲဧိၤကပူၤဧိၤဒ်သိးပှၤကအိၣ်ကဆိးလီၤ.

¹³ လၢအိၣ်ဘှံးအနံၤန့ၣ် နမ့ၢ်ဃၣ်ကွံာ်နခီၣ်လၢတၢ်မၤ ဘၣ်နသးဒၣ်နဲလၢ ယမုၢ်နံၤစီဆှံအပူၤ, ဒီးနမ့ၢ်ကိး အိၣ်ဘှံးနံၤလၢတၢ်သူၣ်ဖှံသးညီ, ယွၤအတၢ်စီဆှံလၢ တၢ်ယူးယီၣ်အလီၢ်, ဒီးတပိာ်ဘၣ်နကျဲဒၣ်နဲ, ဒီးတထံၣ် န့ၢ်ဘၣ်နတၢ်မုာ်ဒၣ်နဲ, ဒီးတကတိၤဘၣ်နတၢ်ကတိၤ ဒၣ်နဲသတးဒီး, နမ့ၢ်မၤလၤကပီၤအီၤဒီး, ¹⁴ နကသူၣ်ဖှံသး ညီလၢယွၤအပူၤ, ဒီးယကဒုးဒိးနၤလၢတၢ်အလီၢ်ထီၣ် ထီလၢဟီၣ်ခိၣ်ချၢအဖီခိၣ်, ဒီးယကဒုးအီၣ်နၤလၢနပၢ် စီၤယၤကိာ်အတၢ်န့ၢ်သါန့ၣ်လီၤ. အဂ့ၢ်ဒ်အံၤ, ယွၤအ ထးခိၣ်ကတိၤတၢ်န့ၣ်လီၤ.

၅၉

¹ ကွၢ်ကွၢ်, တမ့ၢ်ဘၣ်ယွၤအစုဖုၣ်လီၤတုၤအအုၣ်က့ၤ ခီၣ်က့ၤတၢ်တသ့ဘၣ်, ဒီးတမ့ၢ်ဘၣ်အနၢ်ဃၢဝဲတုၤအ နၢ်ဟူတၢ်တသ့ဘၣ်.

² မ့မ့ၢ်သုတၢ်အၢတဖၣ်မၤလီၤဖးသုလၢသုကစၢ်, ဒီးသု တၢ်ဒဲးဘးဒုးအိၣ်တဒၢအမဲာ်လၢ သုလၢအတနၢ်ဟူ ဘၣ်တၢ်ဘၣ်လီၤ.

³ အဂ့ၢ်ဒ်အံၤ, သုစုဘၣ်အၢဒီးတၢ်သွံၣ်, ဒီးသုစုမုၢ်ဒီး တၢ်အၢတၢ်သီလီၤ. သုပျုၤကတိၤလံတၢ်ကဘျံးကဘျၣ်, ဒီးသုပျ့ၤကတိၤတၢ်အၢလီၤ.

⁴ ပှၤကိးထီၣ်လၢတၢ်တီတၢ်လိၤတအိၣ်ဘၣ်, ဒီးပှၤလိာ် ကွီၢ်လၢတၢ်မ့ၢ်တၢ်တီတအိၣ်ဘၣ်. သန့ၤအသးလၢတၢ် ကလီကလီ, ဒီးကတိၤတၢ်ကဘျံးကဘျၣ်, ဒၢထီၣ်တၢ် မၤအၢ, ဒီးဆံးစၢ်တၢ်အၢလီၤ.

⁵ ဟုဝဲလၢဂုၢ်မိာ်အိးအဒံၣ်, ဒီးထ့ကပီၤအဒၢလီၤ. ပှၤ လၢအအီၣ်အဒံၣ်န့ၣ်ကသံဝဲ, ဒီးဒံၣ်သဘှံးတဖျၢၣ်န့ၣ် ဂုၢ်အၢကဟဲထီၣ်လၢအပူၤတဘိလီၤ.

⁶ အထၣ်တဖၣ်န့ၣ် တကဲထီၣ်ဘၣ်လၢ အကူအသိး ဘၣ်, ဒီးတလုးဘၢအသးလၢအတၢ်မၤဘၣ်. အမၤတၢ် တဖၣ်န့ၣ်မ့ၢ်တၢ်အၢအမၤတၢ်, ဒီးတၢ်မၤဆူၣ်မၤစိးအၢ အိၣ်ဝဲလၢအစုပူၤလီၤ.

⁷ အခီၣ်ဃ့ၢ်ဆူတၢ်အၢအအိၣ်, ဒီးမၤချ့ချ့ဒ်သိးအကလူ လီၤတၢ်သွံၣ်လၢအတၢ်ဒဲးဘးတအိၣ်ဘၣ်. အဆိကမိၣ် တၢ်န့ၣ်မ့ၢ်တၢ်အၢအတၢ်ဆိကမိၣ်, တၢ်မၤသယုၢ်, ဒီး တၢ်မၤဟးဂီၤအိၣ်ဝဲလၢအကျဲလီၤ.

⁸ တၢ်ဃူတၢ်ဖိးအကျဲတသ့ၣ်ညါဘၣ်ဝဲဘၣ်, ဒီးတၢ်စံၣ် ညီၣ်တီတအိၣ်ဘၣ်လၢအကျဲဘၣ်. မၤက့ၣ်အကျဲ, ပှၤ လၢအပိာ်အီၤန့ၣ် တသ့ၣ်ညါဘၣ်တၢ်ဃူတၢ်ဖိးနီတဂၤ ဘၣ်.

⁹ မၤသးဒ်န့ၣ်ဒီး, တၢ်စံၣ်ညီၣ်အိၣ်ယံၤဒီးပှၤ, ဒီးတၢ်တီ တၢ်လိၤတချုးန့ၢ်ဘၣ်ပှၤဘၣ်. ပကွၢ်လၢ်တၢ်ကပီၤအ ကျဲ, ဒီးကွၢ်ကွၢ်, တၢ်ခံး, ပကွၢ်လၢ်မုၢ်ထူၣ်အဧူၢ်, ဒီးပလဲၤ တၢ်လၢတၢ်ခံးကျါလီၤ. ¹⁰ ပကလၢၢ်တၢ်ဒ်ပှၤမဲာ်ဘျီၣ်လၢ တၢ်ဒူၣ်အဂီၢ်, ဒီးဒ်ပှၤလၢအမဲာ်တအိၣ်ဘၣ်အသိးန့ၣ်ပ ကလၢၢ်တၢ်လီၤ. ပခီၣ်ဘၣ်တိၢ်လၢမုၢ်ထူၣ်ဒ်လၢမုၢ်နၤ အသိး, ပအိၣ်လၢတၢ်ခံးသူအကျါဒ်ပှၤသံအသိးန့ၣ်လီၤ.

¹¹ ပပသူကညီၤခဲလၢာ်ဒ်တၤသူအသိး, ပပှ့ၤတထံၣ်ဃီဒ် ထိၣ်လွံၢ်အသိးလီၤ. ပကွၢ်လၢ်တၢ်စံၣ်ညီၣ်အကျဲ, ဒီး တအိၣ်ဘၣ်. တၢ်အုၣ်က့ၤခီၣ်က့ၤအကျဲ, ဒီးအိၣ်ယံၤဒီးပှၤ လီၤ.

¹² အဂ့ၢ်ဒ်အံၤ, ပတၢ်ကမၣ်အါထီၣ်လၢနမဲာ်ညါ, ဒီးပ တၢ်ဒဲးဘးအုၣ်အသးထီဒါပှၤလီၤ. အဂ့ၢ်ဒ်အံၤ, ပတၢ်က မၣ်အိၣ်ဒီးပှၤ, ဒီးပတၢ်အၢတၢ်သီန့ၣ်ပသ့ၣ်ညါအီၤလီၤ.

¹³ ပမၤကမၣ်တၢ်ဒီးကတိၤကဘျံးကဘျၣ်ထီဒါယွၤ, ဒီး ဃၣ်ဒူၣ်ချၢပသးလၢပကစၢ်, ဒီးပကတိၤတၢ်မၤအၢ, ဒီး တၢ်လဲၤသဒၣ်တၢ်, ပဒၢထီၣ်ဒီးကတိၤ တၢ်ကတိၤက ဘျံးကဘျၣ်လၢပသးလီၤ.

¹⁴ ဒီးတၢ်စံၣ်ညီၣ်ဃၣ် ကဒါက့ၤအသး, ဒီးတၢ်တီတၢ် လိၤဆၢထၢၣ်လၢအယံၤလီၤ. အဂ့ၢ်ဒ်အံၤ, တၢ်မ့ၢ်တၢ်တီ လီၤဃံၤလၢကျဲမုၢ်, ဒီးတၢ်တီတၢ်လိၤလဲၤနုာ်တသ့ဘၣ်.

¹⁵ မ့ၢ်မးတၢ်မ့ၢ်တၢ်တီတအိၣ်ဘၣ်, ဒီးပှၤလၢအဟးဆှဲး တၢ်အၢန့ၣ်တၢ်ဂုာ်န့ၢ်အတၢ်လီၤ. ဒီးယွၤထံၣ်ဘၣ်ဝဲ, ဒီး မ့ၢ်တၢ်စံၣ်ညီၣ်တအိၣ်ဘၣ်ဒီး, မ့ၢ်တၢ်အၢလၢအမဲာ်ညါ လီၤ.

¹⁶ ဒီးထံၣ်ဝဲလၢပှၤကညီတအိၣ်ဘၣ်, ဒီးကမၢကမၣ်ဝဲ လၢပှၤဃ့တၢ်တအိၣ်ဘၣ်. မၤသးဒ်န့ၣ်ဒီးအစုဒုၣ်ဒၣ်ဝဲ မၤတၢ်အုၣ်က့ၤခီၣ်က့ၤတၢ်လၢအဂီၢ်, ဒီးအတၢ်တီတၢ် လိၤဒၣ်ဝဲန့ၣ်ဒုးအိၣ်ကျၢၤအီၤလီၤ.

¹⁷ ဒီးသိးတၢ်တီတၢ်လိၤဒ်သဃိးအသိးန့ၣ်, ဒီးတၢ်အုၣ် က့ၤခီၣ်က့ၤအခိၣ်ကုာ်သုးကုာ်ဝဲလၢအခိၣ်, ဒီးကူသိးဝဲ လၢတၢ်ဟ့ၣ်ကၣ်တၢ်အၢအကူအသိးလၢ အကူအသိး အဂီၢ်, ဒီးကၤတၢ်သးဆူၣ်ဒ်အယၣ်တဘ့ၣ်အသိးန့ၣ် လီၤ.

¹⁸ ဒ်အဝဲသ့ၣ်မၤတၢ်အသိးန့ၣ်အဝဲဒၣ်ကဟ့ၣ်ကၣ်တၢ်, တၢ်သးကဲၤထီၣ်လၢအဒုၣ်အဒါအလိၤ, တၢ်လၢအကြၢး န့ၢ်ဘၣ်လၢပှၤထီဒါအီၤအလိၤလီၤ. ကဟ့ၣ်ကၣ်ပှၤထံ ယံၤကီၢ်ယံၤလၢအကြၢးန့ၢ်ဘၣ်လီၤ.

¹⁹ ဒီးကပျံၤယွၤအမံၤလၢမုၢ်နုာ်တခီ, ဒီးအလၤကပီၤလၢ မုၢ်ထီၣ်တခီလီၤ. အဂ့ၢ်ဒ်အံၤ, ကဟဲဝဲဒ်ထံကျိဆူၣ်အသိး န့ၣ်, ဒီးယွၤအသးကယူာ်ထီၣ်ထီသုးဖိအလၣ်တဘ့ၣ် လီၤ.

²⁰ ဒီးပှၤပှ့ၤက့ၤတၢ်ကဟဲလၢစံယိၣ်အဂီၢ်, ဒီးလၢပှၤလၢ အဃၣ်လိၤအသးလၢ တၢ်မၤကမၣ်လၢယၤကိာ်အပူၤ တဖၣ်အဂီၢ်လီၤ, ယွၤစံးဝဲဒၣ်.

²¹ ဒီးယဲဒၣ်အံၤ ယတၢ်အၢၣ်လီၤအီလီၤဒီးအီၤမ့ၢ်အအံၤ, ယွၤစံးဝဲဒၣ်, ယသးလၢအအိၣ်လၢနလိၤ, ဒီးယတၢ်က တိၤလၢယပာ်လၢနထးခိၣ်, တဟးထီၣ်ကွံာ်ဘၣ်လၢ နထးခိၣ်, လၢနချံနသၣ်အထးခိၣ်, လၢနချံနသၣ်အချံ အသၣ်အထးခိၣ်, တုၤအံၤဆူညါအစိၤစိၤအဃၣ်ဃၣ် လီၤ, ယွၤစံးဝဲဒၣ်လီၤ.

၆၀

¹ ဂဲၤဆၢထၢၣ်, ကပီၤထီၣ်တက့ၢ်. အဂ့ၢ်ဒ်အံၤ, နတၢ်က ပီၤဟဲလံ, ဒီးယွၤအလၤကပီၤထီၣ်ဘၣ်နလိၤလီၤ.

² အဂ့ၢ်ဒ်အံၤ, တၢ်ခံးကလုၣ်ဘၢဟီၣ်ခိၣ်, ဒီးတၢ်ခံးသူ ပှၤကလုာ်တဖၣ်လီၤ. မ့မ့ၢ်ယွၤကထီၣ်ဘၣ်နၤ, ဒီးအလၤ ကပီၤကအိၣ်ဖျါလၢနလိၤလီၤ. ³ ဒီးပှၤကလုာ်တဖၣ်က လဲၤတၢ်လၢနတၢ်ကပီၤအကျါ, ဒီးစီၤပၤတဖၣ်လၢနဟဲ ထီၣ်အဧူၢ်တဖၣ်အကျါလီၤ.

⁴ ကျ့ထီၣ်နမဲာ်, ကွၢ်ဝးတရံးဒီးထံၣ်တၢ်, ပှၤတဖၣ်န့ၣ် အိၣ်ဖှိၣ်ရိဖှိၣ်ခဲလၢာ်, ဒီးဟဲဝဲဆူနအိၣ်လီၤ. နခိခွါတဖၣ် ကဟဲလၢအယံၤ, ဒီးနဖိမုၣ်တဖၣ်န့ၣ်ပှၤကစိာ်လၢအက ပၤလီၤ.

⁵ တုၤနုၤတစုနကထံၣ်တၢ်, ဒီးသူၣ်ဖှံသးညီ, နသူၣ်က နိးနသးကကနိး, ဒီးနသူၣ်ကပိၢ်နသးကဝးလီၤ. အဂ့ၢ် ဒ်အံၤ, ပီၣ်လဲၣ်အတၢ်ထူးတၢ်တီၤကဃၣ်ဃီၤဆူနအိၣ်, ပှၤကလုာ်တဖၣ်အစုလီၢ်အခီၣ်ခိၣ်ကဟဲဆူနအိၣ်လီၤ.

⁶ ကီၤလၤအူးဂီၢ်မုၢ်ကလုၣ်ဘၢနၤ, ကီၤလၤအူးဖိဟဲ လၢမံးဒယၣ်, ဒီးဧ့ၤဖၣ်လီၤ. ကယဲၢ်ပှၤလၢၡဘၤန့ၣ်က ဟဲဝဲလီၤ. ကဟဲစိာ်ထူဒီးလီၢ်ဘၣ်, ဒီးယွၤအတၢ်စံးထီၣ် ပတြၢၤန့ၣ်ကစံၣ်တဲၤတဲလီၤဝဲဒီးအသးခုလီၤ.

⁷ က့ဒၢ်အသိအဖုခဲလၢာ်န့ၣ် ကအိၣ်ဖှိၣ်ဆူနအိၣ်, န ဘါယိးအသိဖါတဖၣ်ကမၤနတၢ်လီၤ. ကဘၣ်တၢ်တူၢ် လိာ်လၢယတၢ်လုၢ်လီၢ်, ဒီးယလၤကပီၤအဟံၣ်န့ၣ်ယ ကမၤလၤကပီၤအီၤလီၤ.

⁸ တၢ်တဖၣ်အံၤလၢ အယူၤဝဲဒ်တၢ်အၢၣ်အသိး, ဒီးဒ် ထိၣ်လွံၢ်ဆူအတၢ်ထူၣ်ဖျိအသိးန့ၣ်မ့ၢ်မတၤလဲၣ်.

⁹ မ့ၢ်မးထံယံၤကီၢ်ယံၤန့ၣ်ကကွၢ်လၢ်ယကျဲ, ဒီးတၢ်ၡံၣ် အကဘီလၢအဆိန့ၣ်, ဒ်သိးအကဟဲစိာ်နဖိခွါတဖၣ် လၢအယံၤ, အိၣ်ဒီးအစ့ဒီးအထူလၢယွၤနကစၢ်အမံၤအ ဃိ, ဒီးလၢအံၣ်စရ့လးအတၢ်စီဆှံတဂၤအဃိန့ၣ်လီၤ. အဂ့ၢ်ဒ်အံၤ, အဝဲဒၣ်မၤလၤကပီၤနၤလီၤ.

¹⁰ ဒီးပှၤတခီဘီမုၢ်ဖိကမၤထီၣ်နခိၣ်ဒူ, ဒီးအစီၤပၤကမၤ နတၢ်လီၤ. အဂ့ၢ်ဒ်အံၤ, ယတီၢ်နၤလၢယသးထီၣ်လီၤ. မ့ မ့ၢ်ယသးကညီၤနၤလၢယဘျုးယဖှိၣ်အဃိလီၤ.

¹¹ ဒီးနတြဲၤကအိၣ်အိးထီၣ်အသးတထံၣ်ဃီလီၤ. လၢမုၢ် ဆါဂ့ၤလၢမုၢ်နၤဂ့ၤ, တကးတံာ်ဃာ်ဘၣ်အသးဘၣ်, ဒ် သိး ပှၤကစိာ်ပှၤကလုာ်တဖၣ် အစုလီၢ်အခီၣ်ခိၣ်ဆူန အိၣ်, ဒီးဆှၢအစီၤပၤတဖၣ်လီၤ.

¹² အဂ့ၢ်ဒ်အံၤ, ပှၤတကလုာ်ဒီးဘီမုၢ်လၢအတမၤဘၣ်န တၢ်န့ၣ်ကဟးဂီၤဝဲလီၤ. မ့ၢ်မးပှၤကလုာ်တဖၣ်န့ၣ်က အိၣ်သယုၢ်သပှၢ်တၢၢ်လီၤ.

¹³ လဘၤနိၣ် အလၤကပီၤကဟဲဆူနအိၣ်, သ့ၣ်ဆှိ, သ့ ထိးအီၣ်, ဒီးသ့ၣ်ဆှိတအၤရှူၢ်တပူၤဃီ, ဒ်သိးအကမၤဃံ မၤလၤယလီၢ်စီဆှံ, ဒီးယခီၣ်အလီၢ်န့ၣ်ယကမၤလၤက ပီၤအီၤလီၤ.

¹⁴ တုၤနုၤတစုပှၤလၢအမၤအၢနၤအဖိခွါတဖၣ် ကဟဲသ ကူးအသးဆူနအိၣ်, ဒီးကယဲၢ်ပှၤလၢအမၤတရီတပါနၤ န့ၣ်ကတီၤလီၤကဒွံကျိာ်လၢနခီၣ်ထံး, ဒီးကကိးနၤလၢ ယွၤအဝ့ၢ်, အံၣ်စရ့လးအတၢ်စီဆှံတဂၤအစံယိၣ်လီၤ.

¹⁵ လၢနဘၣ်တၢ်လဲၤသဒၣ်နၤ, ဒီးတၢ်သးဟ့နၤ, ဒီးပှၤတ ခီတူာ်ဘၣ်နၤအလီၢ်န့ၣ် ယကပာ်နၤလၢတၢ်အလၤက ပီၤအထူအယိာ်, တၢ်သူၣ်ဖှံသးညီလၢ ပှၤအစိၤစိၤအဃၣ် ဃၣ်အဂီၢ်လီၤ.

¹⁶ ဒီးနကစူၢ်ပှၤကလုာ်တဖၣ်အနုၢ်ထံ, ဒီးနကစူၢ်တၢ် လၢစီၤပၤအနုၢ်, ဒီးနကသ့ၣ်ညါလၢယၤယွၤအံၤမ့ၢ်နတၢ် အုၣ်က့ၤခီၣ်က့ၤ, ဒီးတၢ်ပှ့ၤက့ၤနၤမ့ၢ်ယၤကိာ်အတၢ်ဒိၣ် တၢ်ဆူၣ်တဂၤလီၤ.

¹⁷ လၢတိၢ်ဂီၤအလီၢ်န့ၣ်ယကဟဲစိာ်ထူ, ဒီးလၢထးအ လီၢ်န့ၣ်ယကဟဲစိာ်စ့, ဒီးလၢသ့ၣ်အလီၢ်န့ၣ်တိၢ်ဂီၤ, ဒီး လၢလၢၢ်အလီၢ်န့ၣ်ထးလီၤ. ဒီးယကပာ်ပှၤကွၢ်နၤတဖၣ် လၢတၢ်ဃူတၢ်ဖိး, ဒီးနပဒိၣ်တဖၣ်လၢတၢ်တီတၢ်လိၤ လီၤ.

¹⁸ တၢ်တနၢ်ဟူလၢၤဘၣ် တၢ်မၤဆူၣ်မၤစိးလၢနကီၢ်ပူၤ ဘၣ်, တၢ်မၤသယုၢ်ဒီးတၢ်မၤဟးဂီၤလၢနဃၢၤတဖၣ်အ ပူၤဘၣ်. ဒီးနကကိးနခိၣ်ဒူလၢတၢ်အုၣ်က့ၤခီၣ်က့ၤ, ဒီးန ပဲတရီလၢတၢ်စံးထီၣ်ပတြၢၤန့ၣ်လီၤ.

¹⁹ မုၢ်တမ့ၢ်လၢၤဘၣ်နတၢ်ကပီၤလၢမုၢ်ဆါခီ, ဒီးလါတ ကပီၤဘၣ်လၢၤနၤလၢအကယဲၢ်ကယူာ်ဘၣ်. မ့မ့ၢ်ယွၤ ကကဲထီၣ်နတၢ်ကပီၤအထူအယိာ်, ဒီးနကစၢ်ကကဲ ထီၣ်နလၤကပီၤလီၤ.

²⁰ နမုၢ်တလီၤနုာ်လၢၤဘၣ်, နလါတဘၢလၢၤဘၣ်. အ ဂ့ၢ်ဒ်အံၤ, ယွၤကကဲထီၣ်တၢ်ကပီၤအထူအယိာ်လၢနဂီၢ်, ဒီးနဟီၣ်တၢ်ယၢၤတၢ်အမုၢ်နံၤတဖၣ်န့ၣ်ကလၢာ်လီၤ.

²¹ နပှၤဂီၢ်မုၢ်န့ၣ်ကတီကလိၤခဲလၢာ်လီၤ. ကန့ၢ်သါထံ ဧိၤကီၢ်ဧိၤန့ၣ်လီၤထူလီၤယိာ်, တၢ်အဒ့လၢယသူၣ်ယဲ, ယစုအမၤတၢ်ဒ်သိးယကဒိးတၢ်လၤကပီၤလီၤ.

²² ပှၤဖိနဲကဲၣ်တဂၤကကဲထီၣ်ပှၤတကထိ, ဒီးပှၤဆံးတ ဂၤလၢပှၤဆူၣ်တကလုာ်လီၤ. ယဲဒၣ်ယွၤအံၤ, ယကဒုးမၤ အသးလၢအဆၢအကတီၢ်ဒၣ်ဝဲချ့ချ့လီၤ.

၆၁

¹ ကစၢ်ယွၤအသးအိၣ်လၢယလိၤလီၤ. အဂ့ၢ်ဒ်အံၤ, ယွၤ ဖှူလံယၤဒ်သိး ယကစံၣ်တဲၤတဲလီၤတၢ်သးခုအကစီၣ် လၢပှၤဖှီၣ်ဖိယာ်ဖိ, မၢလီၤယၤဒ်သိးယကမၤဘျါက့ၤပှၤ အသူၣ်ကၢ်အသးလီၤ, ဒ်သိးယကကိးထီၣ်တၢ်ထူၣ်ဖျဲး လၢပှၤဘၣ်တၢ်မၢကဲကုၢ်အီၤအဂီၢ်, ဒီးတၢ်အိးထီၣ်တၢ် လၢပှၤဘၣ်တၢ်စၢဃာ်အဂီၢ်န့ၣ်, ² ဒ်သိးယကကိးထီၣ် နံၣ်တၢ်ဘၣ်ယွၤအသး, ဒီးပကစၢ်မၤဆၢတၢ်အၢအမုၢ်တ နံၤ, ဒ်သိးယကမၤမုာ်ထီၣ်က့ၤကယဲၢ်ပှၤလၢအသူၣ်အုး အသးအုးခဲလၢာ်, ³ ဒ်သိးယကပာ်လီၤတၢ်လၢပှၤအ သူၣ်အုးအသးအုးလၢစံယိၣ်အပူၤအဂီၢ်, ဒ်သိးယက ဟ့ၣ်လီၤအခိၣ်သလုးလၢဖၣ်ဆါအလီၢ်, တၢ်သးခုအသိ လၢတၢ်သးအုးအလီၢ်, တၢ်စံးထီၣ်ပတြၢၤအဆ့လၢတၢ် သးဃၢအလီၢ်န့ၣ်လီၤ. ဒီးတၢ်ကကိးအီၤလၢတၢ်တီ တၢ်လိၤအသ့ထိးဖၣ်တဖၣ်, တၢ်လၢယွၤသူၣ်ဝဲဒ်သိးအ ကဒိးတၢ်လၤကပီၤလီၤ.

⁴ ဒီးအဝဲသ့ၣ်ကမၤက့ၤတၢ်အလီၢ်လီၤပှီၢ်လၢသီ, ဒီးက မၤထီၣ်က့ၤတၢ်အိၣ်သယုၢ်လၢပျၢၤ, ဒီးကတ့လီၤက့ၤဝ့ၢ် လီၤပှီၢ်တဖၣ်, တၢ်အိၣ်သယုၢ်လၢကစၢၤကစၢၤန့ၣ်လီၤ.

⁵ ဒီးပှၤတခီဘီမုၢ်ဖိကဆၢထၢၣ်, ဒီးကွၢ်သုသိအဖုတ ဖၣ်, ဒီးပှၤတခီဘီမုၢ်ဖိအဖိခွါတဖၣ် ကကဲထီၣ်သုပှၤ ထဲၣ်တၢ်ဖိ, ဒီးပှၤကကတဲာ်ကတီၤသုစပံးမုၢ်လီၤ. ⁶ မ့မ့ၢ် သုဝဲသ့ၣ်အံၤ, တၢ်ကကိးသုလၢယွၤအပှၤလုၢ်တၢ်အဒိၣ် ပှၤကကိးသုလၢပှၤမၤကစၢ်အတၢ်လီၤ. သုကအီၣ်ပှၤက လုာ်တဖၣ်အစုလီၢ်အခီၣ်ခိၣ်, ဒီးသုကပာ်ကဖိသုသး လၢအလၤကပီၤအပူၤလီၤ.

⁷ လၢသုမဲာ်ဆှးအလီၢ်န့ၣ်သုကန့ၢ်တၢ်ခံစး, ဒီးလၢတၢ် ပာ်မဲာ်ဆှးအလီၢ်န့ၣ်တၢ်ကသူၣ်ဖှံသးညီလၢအဂီၢ်အပူၤ လီၤ. မၤသးဒ်န့ၣ်ဒီးကန့ၢ်ဘၣ်ခံစးလၢအကီၢ်ပူၤ, တၢ် သူၣ်ခုသးခုအထူအယိာ်ကအိၣ်ဒီးအီၤလီၤ.

⁸ အဂ့ၢ်ဒ်အံၤ, ယဲဒၣ်အံၤယမ့ၢ်ယွၤလီၤ. ယအဲၣ်တၢ်စံၣ် ညီၣ်တီ, ယသးဟ့တၢ်မၤန့ၢ်ဆူၣ်လၢတၢ်လုၢ်တၢ်ပာ်အ ဂီၢ်လီၤ. ဒီးယကဟ့ၣ်လီၤအဘူးအလဲလၢတၢ်မ့ၢ်တၢ်တီ အပူၤ, ဒီးယကအၢၣ်လီၤအီလီၤတၢ်အၢၣ်လီၤအီလီၤအ ထူအယိာ်ဒီးအီၤလီၤ.

⁹ အချံအသၣ်န့ၣ် ပှၤကသ့ၣ်ညါအီၤလၢ ပှၤကလုာ်တ တဖၣ်အကျါ, ဒီးအစၢၤအသွဲၣ်န့ၣ် လၢပှၤဂီၢ်မုၢ်အသး ကံၢ်ပူၤန့ၣ်လီၤ. ကယဲၢ်ပှၤလၢအထံၣ်ဘၣ်အီၤကအၢၣ် လီၤအီလီၤလၢအမ့ၢ်ပှၤအချံအသၣ် လၢယွၤဆိၣ်ဂ့ၤလံ အီၤလီၤ.

¹⁰ ယကသူၣ်ဖှံသးညီဒိၣ်မးလၢယွၤအပူၤလီၤ. မ်ယသး ပိၢ်လၢယကစၢ်အပူၤတက့ၢ်. အဂ့ၢ်ဒ်အံၤ, ဒုးသိးလံယၤ လၢတၢ်အုၣ်က့ၤခီၣ်က့ၤအဆ့, ဒီးဒုးသိးလံယၤလၢတၢ် တီတၢ်လိၤအဆ့ဖးထီန့ၣ် ဒ်တလးမူးပိာ်ခွါကယၢအ သးဒီးအခိၣ်သလုးဒ်ပှၤလုၢ်တၢ်အဒိၣ်အသိးန့ၣ်, ဒီးဒ်တ လးမူးပိာ်မုၣ်ကယၢအသးလၢ အကယၢကယဲအသိး န့ၣ်လီၤ.

¹¹ အဂ့ၢ်ဒ်အံၤ, ဒ်ဟီၣ်ခိၣ်ဒုးမဲထီၣ်အတၢ်အသိး, ဒီးဒ်တၤ သၣ်အလီၢ် ဒုးမဲထီၣ်တၢ်ဖှံအသးလၢအပူၤအသိးန့ၣ်က စၢ်ယွၤကဒုးအိၣ်ထီၣ်တၢ်တီတၢ်လိၤ, ဒီးတၢ်စံးထီၣ်ပ တြၢၤလၢပှၤကိးကလုာ်ဒဲးအမဲာ်ညါဒ်န့ၣ်သိးလီၤ.

၆၂

¹ လၢစံယိၣ်အဃိန့ၣ်ယတအိၣ်ဘှီၣ်ကလာ်ဘၣ်, ဒီး လၢယရူၤၡလ့ၣ်အဃိန့ၣ်ယတအိၣ်ဘှံးဘၣ်, တုၤလီၤ လၢအတၢ်တီတၢ်လိၤလဲၤထီၣ်ဝဲဒ်တၢ်ကယဲၢ်ကယူာ်အ သိး, ဒီးအတၢ်အုၣ်က့ၤခီၣ်က့ၤဒ်မ့ၣ်အူဒၢလၢအကဲၤက ပီၤထီၣ်အသိးန့ၣ်လီၤ.

² ဒီးပှၤကလုာ်တဖၣ်ကထံၣ်ဘၣ်နတၢ်တီတၢ်လိၤ, ဒီး စီၤပၤခဲလၢာ်န့ၣ်နလၤကပီၤလီၤ. ဒီးတၢ်ကကိးနၤလၢန မံၤသီလၢယွၤအထးခိၣ်ကယုၢ်ဝဲလီၤ.

³ ဒီးနကကဲထီၣ်တၢ်ခိၣ်သလုး အိၣ်ဒီးအဃံအလၤလၢ ယွၤအစုပူၤ, ဒီးစီၤပၤအခိၣ်ဒၢလၢနကစၢ်အစုပူၤလီၤ.

⁴ တၢ်တကိးလၢၤဘၣ်နၤလၢတၢ်လဲၤသဒၣ်ဘၣ်, ဒီးန ကီၢ်န့ၣ်တၢ်အိၣ်သယုၢ်ဘၣ်. မ့မ့ၢ်တၢ်ကကိးနၤလၢဃ့ပ စံဘၤ, ဒီးနကီၢ်န့ၣ်လၢဘဧူလၤလီၤ. အဂ့ၢ်ဒ်အံၤ, ယွၤမုာ် လၤတၢ်လၢနပူၤ, ဒီးနထံနကီၢ်ကန့ၢ်ဝၤလီၤ.

⁵ အဂ့ၢ်ဒ်အံၤ, ဒ်ဖိၣ်သၣ်ခွါန့ၢ်မါလၢ ပှၤမုၣ်လိၣ်ဘိအ သိးန့ၣ်, နဖိခွါတဖၣ်ကန့ၢ်မါလၢနၤဒ်န့ၣ်သိး, ဒီးဒ်တ လးမူးပိာ်ခွါ သူၣ်ဖှံသးညီလၢအတလးမူးပိာ်မုၣ်အသိး န့ၣ်နကစၢ်ကသူၣ်ဖှံသးညီလၢနဃိဒ်န့ၣ်အသိးလီၤ. ⁶ ယပာ်ပှၤခိးတၢ်ဖိလၢနခိၣ်ဒူ, ယရူၤၡလ့ၣ်ဧၢ, သ့တနံၤကျၢၤ ဒီးသီတနၤကျၢၤတအိၣ်ဘှီၣ်ဘၣ်. ပှၤလၢအဒုးသ့ၣ်နီၣ်ထီၣ်က့ၤယွၤသ့ၣ်ဧၢ, အိၣ်ဘှီၣ်ကလာ်တဂ့ၤ.―

⁷ ဒီးဒုးအိၣ်ဘှီၣ်ကလာ်အီၤတဂ့ၤ, တုၤလီၤလၢအဒုးအိၣ် ဂၢၢ်ဆိးကျၢၤ, တုၤလီၤလၢအပာ်ယရူၤၡလ့ၣ်လၢတၢ်စံး ထီၣ်ပတြၢၤလၢဟီၣ်ခိၣ်ချၢန့ၣ်လီၤ.

⁸ ယွၤဆိၣ်လီၤအသးလၢအစုထွဲအမဲာ်ညါ, ဒီးလၢအစုဒုၣ်ဆူၣ်အမဲာ်ညါ, မ့ၢ်မးယတဟ့ၣ်လၢၤဘၣ်နဘုဧိၤဟု ဧိၤလၢတၢ်အီၣ်လၢနဒုၣ်နဒါအဂီၢ်ဘၣ်, ဒီးတခီဘီမုၢ်ဖိ တအီလၢၤဘၣ်နစပံးထံအသီလၢနမၤအီၤန့ၣ်ဘၣ်.

⁹ အဂ့ၢ်ဒ်အံၤ, ပှၤလၢအကူးဘုတဖၣ်ကအီၣ်အတၢ်, ဒီးစံးထီၣ်ပတြၢၤယွၤလီၤ. ဒီးပှၤလၢအထၢဖှိၣ်တၢ်တဖၣ် ကအီအတၢ်လၢယလီၢ်စီဆှံအဂၢၤပူၤလီၤ.

¹⁰ လဲၤထီၣ်, လဲၤထီၣ်လၢပဲတရီန့ၣ်, ကတဲာ်ကတီၤပှၤဂီၢ် မုၢ်အကျဲ, မၤထီၣ်ထီ, မၤထီၣ်ထီကျဲမုၢ်တဘိ, ထၢထီၣ် လၢၢ်ဧိၤမဲးဧိၤ, ယူာ်ထီၣ်ထီသုးဖိအလၣ်လၢပှၤဂီၢ်မုၢ်တ ဖၣ်အဂီၢ်တက့ၢ်.

¹¹ ကွၢ်ကွၢ်, ယွၤဒုးနၢ်ဟူတၢ်ပၢၢ်လၢဟီၣ်ခိၣ်အကတၢၢ်, စံးဘၣ်စံယိၣ်အဖိမုၣ်, ကွၢ်ကွၢ်, နတၢ်အုၣ်က့ၤခီၣ်က့ၤဟဲ ဝဲ, ကွၢ်ကွၢ်, အိၣ်ဝဲဒီးတၢ်အဘူးအလဲ, ဒီးတၢ်လၢအဟ့ၣ် ကၣ်န့ၣ်အိၣ်ဝဲလၢအမဲာ်ညါလီၤ.

¹² ဒီးတၢ်ကကိးအီၤလၢပှၤစီဆှံတကလုာ်, ပှၤဒိးပှ့ၤက့ၤ အသးလၢယွၤ, ဒီးတၢ်ကကိးနၤလၢပှၤလၢ တၢ်ဃုအီၤ, ဝ့ၢ်လၢတၢ်တလဲၤသဒၣ်ဘၣ်အီၤတဖျၢၣ်န့ၣ်လီၤ.

၆၃

¹ ပှၤလၢအဟဲလၢအဒိၣ်, အိၣ်ဒီးအကူအသိးစုၣ်ဂီၤအ သးလၢဘိးစရၤ, ပှၤလၢအကူအသိးအိၣ်ဒီးအဃံအလၤ, ဟဲလၢအဂံၢ်ဆူၣ်အဘါဆူၣ် အိၣ်ဒီးအကဟုအကညီၢ် န့ၣ်မ့ၢ်မတၤတဂၤလဲၣ်. ယၤ, ပှၤလၢအစံၣ်တဲၤတဲလီၤ တၢ်တီတၢ်လိၤ, အစိဒိၣ်အကမီၤထီလၢ အကအုၣ်က့ၤ ခီၣ်က့ၤတၢ်အဂီၢ်လီၤ.

² နကူနသိးန့ၣ်ဂီၤဝဲ, ဒီးနဆ့မၤသးဒ်ပှၤလၢအယီၢ်စပံး သၣ်အနီၣ်စံၢ်ပူၤအသိးန့ၣ်မ့ၢ်အဘၣ်မနုၤလဲၣ်.

³ ယယီၢ်စပံးသၣ်အနီၣ်စံၢ်ပူၤတဂၤဃီ, ဒီးလၢပှၤဂီၢ်မုၢ် အကျါန့ၣ်ပှၤတအိၣ်ဒီးယၤနီတဂၤဘၣ်. ဒီးယယီၢ်အီၤ လၢယသးထီၣ်, ဒီးယယီၢ်တံၢ်အီၤလၢယသးကဲၤထီၣ် လီၤ. ဒီးအသွံၣ်ဖှံအသးလၢယကူယသိးအလိၤ, ဒီးယက မၤဘၣ်အၢယကူယသိးခဲလၢာ်လီၤ.

⁴ အဂ့ၢ်ဒ်အံၤ, တၢ်မၤဆၢတၢ်အၢအမုၢ်တနံၤအိၣ်ဝဲလၢ ယသးကံၢ်ပူၤ, ဒီးယပှၤဒိးပှ့ၤက့ၤအသးတဖၣ်အနံၣ်န့ၣ် ဘၣ်လံဝဲလံ.

⁵ ဒီးယကွၢ်တၢ်ဒီး တၢ်မၤစၢၤတအိၣ်ဘၣ်, ဒီးယပာ်ယ သးကမၢကမၣ်လၢ ပှၤဒုးအိၣ်ကျၢၤတၢ်တအိၣ်ဘၣ်အ ဃိလီၤ. မၤသးဒ်န့ၣ်ဒီး ယစုဒုၣ်ဒၣ်ယဲအုၣ်က့ၤခီၣ်က့ၤ တၢ်လၢယဂီၢ်, ဒီးယသးကဲၤထီၣ်ဒုးအိၣ်ကျၢၤယၤလီၤ.

⁶ ဒီးယယီၢ်လီၤပှၤဂီၢ်မုၢ်လၢယသးထီၣ်, ဒီးယဒုးမူၤအ သးလၢယသးကဲၤထီၣ်, ဒီးယဂၢ်လီၤအသွံၣ်လၢဟီၣ်ခိၣ် အဖီခိၣ်လီၤ.

⁷ ယွၤအဘျုးအဖှိၣ်န့ၣ် ယကဒုးသ့ၣ်နီၣ်ထီၣ်က့ၤအီၤ, တၢ်စံးထီၣ်ပတြၢၤယွၤန့ၣ်ဒ်ကယဲၢ်တၢ်လၢယွၤမၤဝဲလၢ ပဂီၢ်, ဒီးအတၢ်ဂ့ၤဖးဒိၣ်လၢအမၤဝဲလၢအံၣ်စရ့လးအပှၤ ဟံၣ်ဖိအဂီၢ်ဒ်အသးအိၣ်တၢ်, ဒီးအဘျုးဒိၣ်အဖှိၣ်အါအ သိးန့ၣ်လီၤ.

⁸ အဂ့ၢ်ဒ်အံၤ, စံးဝဲဒၣ်, အဝဲသ့ၣ်တဖၣ်မ့ၢ်သပှၢ်တၢၢ်ယ ပှၤဂီၢ်မုၢ်, ယဖိလၢအတလီဘၣ်တၢ်ဘၣ်. ဒီးအဝဲဒၣ်ကဲ ထီၣ်ပှၤအုၣ်က့ၤခီၣ်က့ၤအီၤလီၤ. ⁹ လၢအဝဲသ့ၣ်အတၢ် ထီဒုၣ်ထီဒါအီၤခဲလၢာ်အပူၤန့ၣ် အဝဲဒၣ်တမ့ၢ်ဘၣ်အ ဒုၣ်အဒါဘၣ်. ဒီးအမဲာ်ညါအကလူးတဂၤအုၣ်က့ၤခီၣ် က့ၤအီၤလီၤ. မ့ၢ်အအဲၣ်ဝဲ, ဒီးသးအိၣ်ဝဲဒီး, ပှ့ၤက့ၤအီၤ, ဒီး ဟံးန့ၢ်အီၤ, ဒီးစိာ်အီၤမုၢ်နံၤလၢပျၢၤခဲလၢာ်လီၤ.

¹⁰ မ့မ့ၢ်အဝဲသ့ၣ်တဖၣ်န့ၣ်ပူထီၣ်တၢ်, ဒီးမၤကိၢ်အသးစီ ဆှံအသး, ဒီးအဝဲဒၣ်ကဲထီၣ်က့ၤအဒုၣ်အဒါ, ဒီးဒုးသုး လၢအကစၢ်ဒၣ်ဝဲထီဒါအီၤလီၤ.

¹¹ တုၤနုၤတစုသ့ၣ်နီၣ်ထီၣ်က့ၤမုၢ်နံၤလၢပျၢၤတဖၣ်, စီၤ မိၤရှ့ဒီးအပှၤဂီၢ်မုၢ်လီၤ. ပှၤလၢအဒုးဟဲထီၣ်အီၤလၢပီၣ် လဲၣ်ပူၤ, ပှၤကွၢ်အသိတဖုန့ၣ်မ့ၢ်အအိၣ်ဝဲဖဲလဲၣ်. ပှၤလၢ အပာ်အသးစီဆှံလၢအပူၤန့ၣ်, မ့ၢ်အအိၣ်ဝဲဖဲလဲၣ်. ¹² ပှၤ လၢအဆှၢအီၤလၢစီၤမိၤရှ့အစုထွဲ, ဒီးအစုကညီၢ်လၢအ မၤသ့ၣ်ဖးထံလၢအဝဲသ့ၣ်အမဲာ်ညါဒ်သိးအကမၤအမံၤ အထူအယိာ်လၢအဂီၢ်ဒၣ်ဝဲ, ¹³ ပှၤလၢအဒုးလဲၤထီၣ်အီၤ လၢတၢ်ယိာ်ပူၤဒ်ကသ့ၣ်တဒုလၢပှၢ်မုၢ်ကနၢလၢ အခီၣ် တဘၣ်တိၢ်ဘၣ်အသိးန့ၣ်မ့ၢ်အအိၣ်ဖဲလဲၣ်.

¹⁴ ဒ်ဂီၤဖံးတဖုလဲၤလီၤဆူကစၢၢ်ကဆူးပူၤအသိးန့ၣ်ယွၤ အသးကဒုးအိၣ်ဘှံးအီၤလီၤ. နဆှၢနပှၤဂီၢ်မုၢ်ဒ်သိးနက မၤနမံၤကဟုနသၣ်ကညီၢ်ဒ်န့ၣ်သိးလီၤ.

¹⁵ ကွၢ်လီၤလၢမူခိၣ်, ဒီးထံၣ်တၢ်လၢနတၢ်စီဆှံ, ဒီးနတၢ် လၤကပီၤအအိၣ်အလီၢ်န့ၣ်တက့ၢ်. နသးဆူၣ်ဒီးနစိဒိၣ် နကမီၤဒိၣ်မ့ၢ်အအိၣ်ဖဲလဲၣ်. နသးကညီၤယၤဒီးနသး အိၣ်ယၤန့ၣ်ဘၣ်တၢ်တြီအီၤလီၤ.

¹⁶ အဂ့ၢ်ဒ်အံၤ, စီၤအၤဘြၤဟၣ်တသ့ၣ်ညါဘၣ်ပှၤ. ဒီး အံၣ်စရ့လးတအၢၣ်လီၤအီလီၤဘၣ်ပှၤဘၣ်ဆၣ်ဒီး, နမ့ၢ် ပပၢ်လီၤ. နဲဒၣ်ယွၤဧၢ, နမ့ၢ်ပပၢ်, တၢ်ပှ့ၤက့ၤပှၤလၢကစၢၤ ကစၢၤန့ၣ်မ့ၢ်နမံၤလီၤ.

¹⁷ ယွၤဧၢ, နကဒုးဟးဖျိးပှၤလၢနကျဲဧိၤကပူၤဧိၤ, နကမၤ ကိၤပသးလၢ ပတပျံၤဘၣ်နၤန့ၣ် မ့ၢ်အဘၣ်မနုၤလဲၣ်. ဟဲက့ၤကဒါက့ၤလၢနခ့နပှၤအဂီၢ်, နတၢ်န့ၢ်သါအဒူၣ် တဖၣ်န့ၣ်တက့ၢ်.

¹⁸ နပှၤစီဆှံန့ၢ်သါတၢ်တစိၢ်ဖိလီၤ. ပဒုၣ်ပဒါယီၢ်လီၤ ကွံာ်နတၢ်အလီၢ်စီဆှံလီၤ.

¹⁹ ပဝဲဒၣ်အံၤပအိၣ်လၢကစၢၤကစၢၤလံၤလံၤလီၤ. နတ ပၢဘၣ်အီၤဘၣ်. နမံၤတဘၣ်တၢ်ကိးအီၤလၢအလိၤဘၣ်.

၆၄

¹ အိ, မ်နမၤသ့ၣ်ဖးမူခိၣ်, ဒီးဟဲလီၤဒ်သိးကစၢၢ်ကလိက ဟူးဝးလၢနမဲာ်ညါ, ² ဒ်မ့ၣ်အူဆိၣ်ကဲၤသ့ၣ်မုၣ်ဃ့အသိး ဒ်မ့ၣ်အူဒုးကလာ်ထီၣ်ထံအသိးန့ၣ်, ဒ်သိးနကဒုးသ့ၣ် ညါနဒုၣ်နဒါလၢနမံၤ, ဒ်သိးပှၤကလုာ်တဖၣ်ကကနိး လၢနမဲာ်ညါတက့ၢ်.

³ တုၤနမၤတၢ်မၤပျံၤအလီၢ် လၢပတကွၢ်လၢ်အကျဲဘၣ် န့ၣ်နဟဲလီၤ, ဒီးကစၢၢ်ကလိဟူးဝးဝဲလၢနမဲာ်ညါလီၤ.

⁴ ဒီးလၢကစၢၤကစၢၤလံၤလံၤန့ၣ် ပှၤကညီတနၢ်ဟူ ဘၣ်, တသ့ၣ်ညါဘၣ်လၢအနၢ်ဘၣ်, ဒီးအမဲာ်တထံၣ် ဘၣ်ကစၢ်လၢနဖီခိၣ်လၢ အမၤတၢ်ဒ်န့ၣ်လၢပှၤလၢအ ကွၢ်လၢ်အကျဲအဂီၢ်န့ၣ်ဘၣ်လီၤ.

⁵ နသဂၢၢ်ပှၤလၢအသူၣ်ဖှံသးညီ, ပှၤလၢအမၤတၢ်တီ တၢ်လိၤ, ပှၤလၢအသ့ၣ်နီၣ်ထီၣ်က့ၤနၤလၢနကျဲနကပူၤ လီၤ. ကွၢ်ကွၢ်, နသးကဲၤထီၣ်လံ. ဒီးပမၤလံတၢ်ဒဲးဘး လံ, အိၣ်ဝဲတထံၣ်ဃီလၢအပူၤ, ဒီးပကတုၤလၢတၢ်အုၣ် က့ၤခီၣ်က့ၤပှၤလီၤ.

⁶ ပဝဲဒၣ်ခဲလၢာ်အံၤပမၤပသးဒ်တၢ်တကဆှီဘၣ်အသိး န့ၣ်လီၤ. ဒီးပတၢ်တီတၢ်လိၤခဲလၢာ်န့ၣ်မၤအသးဒ်တၢ် အကူအသိးဘၣ်အၢအသိးန့ၣ်လီၤ. ဒီးပလီၤညွံးပဝဲဒၣ် ခဲလၢာ်ဒ်သ့ၣ်လၣ်အူအသိးန့ၣ်, ဒီးပတၢ်ဒဲးဘးကစိာ် ထီၣ်ကွံာ်ပှၤဒ်ကလံၤအူကွံာ်တၢ်အသိးန့ၣ်လီၤ.

⁷ ဒီးပှၤကိးထီၣ်နမံၤတအိၣ်ဘၣ်, ပှၤထိၣ်ဂဲၤအသးဒ် သိးအကဟံးဃာ်နၤတအိၣ်ဘၣ်. အဂ့ၢ်ဒ်အံၤ, နပာ်တ ဒၢနမဲာ်လၢပှၤ, ဒီးနမၤပှံၢ်လီၤကွံာ်ပှၤလၢပတၢ်ဒဲးဘးအ ဃိလီၤ.

⁸ ဘၣ်ဆၣ်ဒီးယွၤဧၢ, နမ့ၢ်ပပၢ်လီၤ. ပဝဲဒၣ်အံၤပမ့ၢ်က ပံာ်ဟီၣ်ခိၣ်, ဒီးနဲဒၣ်နမ့ၢ်ပှၤတ့သပၢၤလီၤ. ဒီးပမ့ၢ်တၢ် လၢနမၤလၢနစုန့ၣ်ခဲလၢာ်လီၤ.

⁹ သးထီၣ်ပှၤဆူၣ်ဆူၣ်ကလဲာ်တဂ့ၤ, ယွၤဧၢ. ဒီးသ့ၣ်နီၣ် ထီၣ်က့ၤပတၢ်ဒဲးဘးလီၤထူလီၤယိာ်တဂ့ၤ. ကွၢ်ကွၢ်, ကွၢ် စာ်တက့ၢ်. ပမ့ၢ်နပှၤဂီၢ်မုၢ်ခဲလၢာ်လီၤ.

¹⁰ နဝ့ၢ်စီဆှံတဖၣ်န့ၣ်ကဲထီၣ်ပှၢ်မုၢ်ကနၢ, စံယိၣ်မ့ၢ်မံၤ ခိၣ်သိၣ်လာ်, ယရူၤၡလ့ၣ်မ့ၢ်တၢ်အိၣ်သယုၢ်လီၤ.

¹¹ ပဟံၣ်စီဆှံအိၣ်ဒီးအဃံအလၤ ဖဲပပၢ်တဖၣ်စံးထီၣ်ပ တြၢၤနၤလၢအပူၤန့ၣ်မ့ၣ်အူအီၣ်ကွံာ်လံအီၤလံ. ဒီးက ယဲၢ်တၢ်အလီၢ်လၢအဘၣ်ပသးခဲလၢာ် ကဲထီၣ်တၢ်အိၣ် သယုၢ်လံလီၤ.

¹² လၢတၢ်တဖၣ်န့ၣ်အဃိနကအိၣ်ဒၣ်နတၢ်, ယွၤဧၢ, န ကအိၣ်ဃိကလာ်, ဒီးမၤနးမၤဖှီၣ်ပှၤနးနးကလဲာ်စ့ၢ်ကီး ဧါ.

၆၅

¹ ပှၤလၢအတဃ့ဘၣ် တၢ်လၢယၤတဖၣ်န့ၣ် သံကွၢ် ယၤ, ပှၤလၢအတဃုယၤတဖၣ်န့ၣ်ထံၣ်န့ၢ်ယၤလီၤ. ယ စံးလၢပှၤတကလုာ်လၢအတကိးထီၣ်ယမံၤ, ကွၢ်ကွၢ်, ယၤလီၤ. ကွၢ်ကွၢ်, ယၤလီၤ.

² ယယူာ်ထီၣ်ယစုသ့တနံၤကျၢၤဆူပှၤပူထီၣ်တၢ်တက လုာ်, ပှၤလၢအပိာ်ကျဲတဂ့ၤဘၣ်, ဖဲအတၢ်ဆိကမိၣ်တၢ် ဒၣ်ဝဲ, ³ ပှၤတကလုာ်လၢအမၤသးထီၣ်ယၤတထံၣ်ဃီ လၢယမဲာ်သၣ်ပူၤ, လၢအလုၢ်တၢ်လၢ တၤသၣ်အလီၢ် ပူၤ, လၢအဆိၣ်ကဲၤတၢ်နၢမူလၢအူးခဲအဖီခိၣ်, ⁴ လၢအ ဆ့ၣ်နီၤလၢတၢ်သွၣ်ခိၣ်အပူၤ, လၢအအိၣ်သီတနၤကျၢၤ လၢတၢ်အိပူၤ, လၢအအီၣ်ထိးအညၣ်, ဒီးတၢ်တကဆှီ ဘၣ်အကသူအိၣ်ဝဲလၢအသပၢၤပူၤ. ⁵ ပှၤလၢအစံး, ဆၢ ထၢၣ်တပူၤဒၣ်, သုးဘူးနသးဆူယအိၣ်တဂ့ၤ. အဂ့ၢ်ဒ် အံၤ, ယစီဆှံန့ၢ်နၤတက့ၢ်လီၤ. အဝဲသ့ၣ်တဖၣ်န့ၣ်မ့ၢ် မ့ၣ်အူခုၣ်လၢယနါဒ့ပူၤ, မ့ၣ်အူလၢအအီၣ်ကွံာ်တၢ်သ့ တနံၤကျၢၤလီၤ.

⁶ ကွၢ်ကွၢ်, တၢ်ကွဲးအသးလၢယမဲာ်ညါ, ယမ့ၢ်တဟ့ၣ် ကၣ်ဘၣ်ဒီး, ယတအိၣ်ဘှံးဘၣ်. ဒီးယကဟ့ၣ်ကၣ်သု တၢ်ဒဲးဘး, ⁷ ဒီးသုပၢ်တဖၣ်အတၢ်ဒဲးဘးတပူၤဃီလၢ သုသးနါပှၢ်အပူၤလီၤ, ယွၤစံးဝဲဒၣ်. အဝဲသ့ၣ်ဆိၣ်ကဲၤ တၢ်နၢမူလၢကစၢၢ်လိၤ, ဒီးဒုၣ်ဒွဲၣ်ယၤလၢတၢ်စိခိၣ်အ လိၤလီၤ. ဒီးယကဃီၣ်ဟ့ၣ်အတၢ်မၤလၢအခီၣ်ထံးန့ၣ် လၢအသးနါပှၢ်အပူၤလီၤ.

⁸ ဒီးယွၤစံးဒ်အံၤ, ဒ်စပံးထံအသီအိၣ်ဝဲလၢအကူၤပူၤ, ဒီးပှၤစံး, မၤဟးဂီၤတဂ့ၤ, အဂ့ၢ်ဒ်အံၤ, တၢ်ဆိၣ်ဂ့ၤအိၣ် လၢအပူၤန့ၣ်အသိး, ယကမၤဒ်န့ၣ်သိးလၢယခ့ယပှၤအ ဂီၢ်, ဒ်သိးယသုတမၤဟးဂီၤခဲလၢာ်တဂ့ၤလီၤ.

⁹ ဒီးယကဒုးဟဲထီၣ် တၢ်အချံအသၣ်လၢစီၤယၤကိာ်, ဒီးတၢ်န့ၢ်သါယကစၢၢ်တဖျၢၣ်လၢယူဒၤ, ဒီးယပှၤဃု ထၢဖိကန့ၢ်သါဝဲ, ဒီးယခ့ယပှၤကအိၣ်ကဆိးဖဲန့ၣ်လီၤ.

¹⁰ ဒီးၡၤရိၣ်ကကဲထီၣ်သိအကရၢ, ဒီးကစၢၢ်ကဆူးဧၤ ကိၢ်န့ၣ်ဂီၤဖံးကိာ်လီၤအလီၢ်, လၢယပှၤဂီၢ်မုၢ်လၢအဃု တ့ၢ်ယၤအဂီၢ်န့ၣ်လီၤ. ¹¹ မ့မ့ၢ်သုဝဲလၢအလဲၤသဒၣ်ယွၤ, လၢအသးပ့ၤနီၣ်ယကစၢၢ်စီဆှံ, လၢအကတဲာ်ကတီၤစီၢ်နီၤခိၣ်လၢကစၢ်ကးအဂီၢ်, ဒီးမၤပှဲၤတၢ်လုၢ်အီလၢကစၢ်မနံးအဂီၢ်န့ၣ်,―

¹² ယဂံၢ်လံသုလၢ ဘီဧိၤနးဧိၤအဂီၢ်, ဒီးသုကကိာ်လီၤခဲ လၢာ်လၢတၢ်မၤသံသုအဂီၢ်လီၤ. အဂ့ၢ်ဒ်အံၤ, ယကိး ထီၣ်, ဒီးသုတစံးဆၢဘၣ်, ယကတိၤတၢ်, ဒီးသုတကနၣ် ဘၣ်, ဒီးသုမၤတၢ်အၢလၢယမဲာ်ညါ, ဒီးတၢ်လၢအတ ဘၣ်ဘၣ်ယသးန့ၣ်သုဃုထၢအီၤလီၤ.

¹³ မၤသးဒ်န့ၣ်ဒီးကစၢ်ယွၤစံးဒ်အံၤ, ကွၢ်ကွၢ်, ယခ့ယပှၤ ကအီၣ်တၢ်လီၤ. မ့မ့ၢ်တၢ်ကသၣ်ဝံၤသုသးလီၤ. ကွၢ်ကွၢ်, ယခ့ယပှၤကအီတၢ်လီၤ. မ့မ့ၢ်တၢ်ကသူသုသးလၢထံ လီၤ. ကွၢ်ကွၢ်, ယခ့ယပှၤကသူၣ်ဖှံသးညီလီၤ. မ့မ့ၢ်သု ကမဲာ်ဆှးလီၤ. ¹⁴ ကွၢ်ကွၢ်, ယခ့ယပှၤကအုၣ်တၢ်လၢအ သးမုာ်အဃိလီၤ. မ့မ့ၢ်သုကဟီၣ်လၢတၢ်သးအုးအဃိ, ဒီးကဟီၣ်ပသူထီၣ်လၢသူၣ်ကၢ်သးလီၤအဃိလီၤ.

¹⁵ ဒီးသုကပာ်လီၤတဲာ် သုမံၤလၢတၢ်ဆိၣ်အၢအလီၢ် လၢယပှၤဃုထၢဖိအဂီၢ်လီၤ. ဒီးကစၢ်ယွၤကမၤသံသု, ဒီးကယုၢ်အခ့အပှၤအမံၤတမံၤဒၣ်လီၤ.

¹⁶ ပှၤလၢအဆိၣ်ဂ့ၤလီၤအသးလၢကီၢ်ပူၤန့ၣ် ကဆိၣ်ဂ့ၤ လီၤအသးလၢတၢ်မ့ၢ်တၢ်တီအကစၢ်အမဲာ်ညါလီၤ. ဒီး ပှၤလၢအဆိၣ်လီၤအသးလၢကီၢ်ပူၤန့ၣ် ကဆိၣ်လီၤအ သးလၢတၢ်မ့ၢ်တၢ်တီအကစၢ်အမဲာ်ညါလီၤ. အဂ့ၢ်ဒ် အံၤ, တၢ်ကိၢ်တၢ်ဂီၤလၢအခီၣ်ထံးတဖၣ်န့ၣ်ဘၣ်တၢ် သးပ့ၤနီၣ်လံအီၤလံ, ဒီးအဂ့ၢ်ဒ်အံၤ, အိၣ်တဒၢလံဒီးယ မဲာ်လံ.

¹⁷ အဂ့ၢ်ဒ်အံၤ, ကွၢ်ကွၢ်, ယတ့လီၤမူခိၣ်အသီ, ဒီးဟီၣ်ခိၣ် အသီ, ဒီးတၢ်အခီၣ်ထံးတဖၣ်န့ၣ်တၢ်တသ့ၣ်နီၣ်ထီၣ် က့ၤဘၣ်အီၤဘၣ်. ဒီးတအိၣ်ထီၣ်လၢၤဘၣ်လၢပှၤအသး ကံၢ်ပူၤဘၣ်.

¹⁸ မ့မ့ၢ်သုဝဲသ့ၣ်အံၤသူၣ်ခုသးခုဒီးသူၣ်ဖှံသးညီလၢတၢ် လၢယတ့လီၤအီၤအပူၤန့ၣ်လီၤစိၤလီၤထီတက့ၢ်. အဂ့ၢ်ဒ် အံၤ, ကွၢ်ကွၢ်, ယတ့လီၤယရူၤၡလ့ၣ်လၢတၢ်သူၣ်ဖှံသး ညီအလီၢ်, ဒီးအပှၤဂီၢ်မုၢ်လၢတၢ်သူၣ်ပိၢ်သးဝးအလီၢ် န့ၣ်လီၤ.

¹⁹ ဒီးယကသူၣ်ဖှံသးညီလၢယရူၤၡလ့ၣ်အပူၤ, ဒီးသူၣ် ခုသးခုလၢယပှၤဂီၢ်မုၢ်အပူၤလီၤ. ဒီးတၢ်တနၢ်ဟူလၢၤ ဘၣ်တၢ်ဟီၣ်အသီၣ်, ဒီးတၢ်ကဲးကိးပသူထီၣ်အသီၣ် လၢအပူၤဘၣ်.

²⁰ ဖဲန့ၣ် ဖိဆံးအနံၤအသီတပှဲၤထီၣ်ဘၣ်, တအိၣ်လၢၤ ဘၣ်, ဒီးပှၤသးပှၢ်လၢအတမၤပှဲၤဘၣ်အနံၤအသီန့ၣ်တ အိၣ်ဘၣ်. အဂ့ၢ်ဒ်အံၤ, ဖိသၣ်အသးပှၢ်အနံၣ်တကယၤ န့ၣ်ကသံ, ဒီးပှၤတၢ်ဒဲးဘးဖိလၢအသးပှၢ်တကယၤန့ၣ် ကဘၣ်တၢ်ဆိၣ်အၢအီၤလီၤ.

²¹ ဒီးကသူၣ်ဟံၣ်, ဒီးကအိၣ်ဝဲဆိးဝဲလၢအပူၤ, ဒီးက သူၣ်စပံးအလီၢ်, ဒီးကအီၣ်အတၤသၣ်လီၤ. ²² တမၤဘၣ် ဟံၣ်ဒီးပှၤဂၤအိၣ်ဝဲဆိးဝဲလၢအပူၤဘၣ်. တသူၣ်ဘၣ်တၢ် ဒီးပှၤဂၤအီၣ်အတၤသၣ်ဘၣ်. အဂ့ၢ်ဒ်အံၤ, ဒ်သ့ၣ်တထံး အမုၢ်နံၤအသိးန့ၣ် ယပှၤဂီၢ်မုၢ်အမုၢ်နံၤကအိၣ်လီၤ. ဒီး ယပှၤဃုထၢဖိ ကမုာ်လၤတၢ်လၢအမၤဝဲလၢ အစုဃဲး ဃဲးလီၤ.

²³ တမၤဘၣ်တၢ်ကလီကလီဘၣ်, ဒီးတဆံးစၢ်ဘၣ်တၢ် လၢဘၣ်ယိၣ်တၢ်အဂီၢ်ဘၣ်. အဂ့ၢ်ဒ်အံၤ, အဝဲသ့ၣ်တဖၣ် န့ၣ်မ့ၢ်တၢ်အချံအသၣ်ဘၣ်တၢ်ဆိၣ်ဂ့ၤလၢယွၤ, ဒီးအ စၢၤအသွဲၣ်အိၣ်ဒီးအီၤလီၤ.

²⁴ ဒီးတၢ်ကမၤ အသးလၢ အဝဲသ့ၣ်တချုးကိးထီၣ်ဒံး ဘၣ်ဒီး, ယကစံးဆၢတၢ်လီၤ. ဒီးကကိးထီၣ်ဝဲအဖၢမုၢ် န့ၣ်ဒီး, ယကဒိကနၣ်လီၤ.

²⁵ ထွံၣ်မံၤဒီးသိဖိကအီၣ်အဆၣ်တပူၤဃီ, ဒီးခ့ယုၢ်က အီၣ်လီၢ်ဧိၤဒံးဧိၤဒ်ဂီၤဖံးအသိးန့ၣ်, ဒီးဟီၣ်ခိၣ်အကမူၣ် ကကဲထီၣ်ဂုၢ်ဧိၤဒးဧိၤအတၢ်အီၣ်လီၤ. တမၤအၢဘၣ်တၢ် ဒီးတမၤဟးဂီၤဘၣ်တၢ်လၢ ယကစၢၢ်စီဆှံဒီဖျၢၣ်ညါအ လိၤနီတပူၤဘၣ်, ယွၤစံးဝဲဒၣ်လီၤ.

၆၆

¹ ယွၤစံးဒ်အံၤ, မူခိၣ်မ့ၢ်ယလီၢ်ပစိာ်, ဒီးဟီၣ်ခိၣ်မ့ၢ်ယ ခီၣ်ယီၢ်အလီၢ်လီၤ. ဟံၣ်လၢသုကသူၣ်လၢယဂီၢ်န့ၣ်မ့ၢ် အအိၣ်ဖဲလဲၣ်, ဒီးယအိၣ်ဘှံးအလီၢ်န့ၣ်မ့ၢ်အအိၣ်ဖဲလဲၣ်.

² အဂ့ၢ်ဒ်အံၤ, တၢ်တဖၣ်န့ၣ်ခဲလၢာ်ယစုဒၣ်ယဲမၤဝဲ, ဒီး တၢ်တဖၣ်န့ၣ်ခဲလၢာ်ကဲထီၣ်ဝဲလီၤ, ယွၤစံးဝဲဒၣ်. ဒီးယ ကကွၢ်ပှၤတဂၤအံၤ, ပှၤလၢအသူၣ်စူၤအသးစူၤ, ဒီးအ သူၣ်ကၢ်အသးလီၤ, ဒီးပျံၤယကလုၢ်ယကထါန့ၣ်လီၤ.

³ ပှၤလၢအမၤသံဂီၤဖံးလၢ တၢ်လုၢ်အဂီၢ်န့ၣ် မ့ၢ်ပှၤလၢ အမၤသံပှၤကညီ, ပှၤလၢအလုၢ်သိဖိန့ၣ်မ့ၢ်ပှၤလၢအမၤ ကၢ်ကွံာ်ထွံၣ်အကိာ်, ပှၤလၢအမၤဘူၣ်ကိၣ်န့ၣ်မ့ၢ်ပှၤ လၢအမၤဘူၣ်ထိးအသွံၣ်, ပှၤလၢအဆိၣ်ကဲၤတၢ်နၢမူ န့ၣ်မ့ၢ်ပှၤလၢအစံးထီၣ်ပတြၢၤတၢ်ဂီၤလီၤ. မ့ၢ်မးအဝဲ သ့ၣ်တဖၣ်န့ၣ်ဃုထၢလံအကျဲတဖၣ်ဒၣ်ဝဲ, ဒီးအသးမုာ် လၤလၢအတၢ်သးဘၣ်အၢအပူၤလံ.

⁴ ယဲဒၣ်အံၤယကဃုထၢစ့ၢ်ကီး အတၢ်နးတၢ်ဖှီၣ်, ဒီး တၢ်လၢအပျံၤအီၤတဖၣ်န့ၣ်ယကဒုးဟဲဘၣ်အီၤလီၤ. အ ဂ့ၢ်ဒ်အံၤ, ယကိးထီၣ်, ဒီးတစံးဆၢဘၣ်နီတဂၤဘၣ်. ယ ကတိၤတၢ်, ဒီးတကနၣ်ဘၣ်တၢ်ဘၣ်. ဒီးမၤတၢ်အၢလၢ ယမဲာ်ညါ, ဒီးဃုထၢတၢ်လၢအတဘၣ်ဘၣ်ယသးဘၣ် န့ၣ်လီၤ.

⁵ ကနၣ်ယွၤအကလုၢ်ကထါတက့ၢ်. ပှၤလၢအကနိး တၢ်လၢအကလုၢ်အဃိသ့ၣ်ဧၢ. သုဒီပုၢ်ဝဲၢ်လၢအသးဟ့ သု, ဒီးဟီထီၣ်ကွံာ်သုလၢယမံၤအဃိစံးဝဲဒၣ်, မ်ယွၤဘၣ် တၢ်လၤကပီၤတက့ၢ်. ဒီးပကထံၣ်ဘၣ်သုသူၣ်ခုသးခု လီၤ. မ့မ့ၢ်အဝဲသ့ၣ်တဖၣ်န့ၣ်အမဲာ်ကဆှးလီၤ.

⁶ တၢ်တၢထီၣ်တၢလီၤအသီၣ်လၢဝ့ၢ်ပူၤ, တၢ်သီၣ်လၢ တၢ်လုၢ်ဟံၣ်ပူၤမးလဲၣ်. မ့ၢ်ယွၤအကလုၢ်လၢအမၤဆၢ တၢ်အၢလၢအဒုၣ်အဒါန့ၣ်လီၤ.

⁷ တချုးအဟုးဆါဒံးဘၣ်န့ၣ်ဆံးစၢ်တၢ်, တချုးအဘၣ် တၢ်ဟုးဆါဒံးဘၣ်န့ၣ်ဖိသၣ်ပိာ်ခွါအိၣ်ဖျဲၣ်ဝဲလီၤ.

⁸ မ့ၢ်မတၤနၢ်ဟူတၢ်ဒ်န့ၣ်သိးတမံၤတဂၤလဲၣ်. မ့ၢ်မတၤ ထံၣ်ဘၣ်တၢ်ဒ်န့ၣ်သိးတဖၣ်လဲၣ်. တၢ်ကဆံးစၢ်ကီၢ်တ ဘ့ၣ်လၢတနံၤအတီၢ်ပူၤန့ၣ်ဧါ. ပှၤတကလုာ်ကအိၣ်ဖျဲၣ် တဘျီဃီဧါ. အဂ့ၢ်ဒ်အံၤ, တုၤစံယိၣ်ဘၣ်တၢ်ဟုးဆါဒီး, ဆံးစၢ်အဖိတဖၣ်လီၤ.

⁹ ယကဒုးဟဲဆူတၢ်အိၣ်ဖျဲၣ်အလီၢ်, ဒီးတဒုးအိၣ်ဖျဲၣ် ဘၣ်စ့ၢ်ကီးဧါ, ယွၤစံးဝဲဒၣ်. ယကမၤလိၣ်ထီၣ်, ဒီးတဒုး ဆံးစၢ်ဘၣ်တၢ်ဘၣ်ဧါ, နကစၢ်စံးဝဲဒၣ်.

¹⁰ သူၣ်ခုသးခုဒီးယရူၤၡလ့ၣ်, ဒီးသူၣ်ဖှံသးညီဒီးအီၤ, က ယဲၢ်ပှၤလၢအအဲၣ်အီၤသ့ၣ်ဧၢ, သူၣ်ပိၢ်သးဝးဒီးအီၤ, က ယဲၢ်ပှၤလၢအသူၣ်အုးသးအုးဒီးအီၤသ့ၣ်ဧၢ, ¹¹ ဒ်သိးသု ကစူၢ်တၢ်ဒီးဘျဲးအီၣ်လၢ အနုၢ်အနါဘၣ်ဃးဒီးတၢ်မၤ မုာ်ထီၣ်က့ၤ, ဒ်သိးသုကစူၢ်န့ၢ်တၢ်ဒီး သူၣ်ဖှံသးညီ, လၢအလၤကပီၤအလၢအပှဲၤလီၤ.

¹² အဂ့ၢ်ဒ်အံၤ, ယွၤစံးဝဲဒ်အံၤ, ကွၢ်ကွၢ်, ယကဒုးဘၣ်အီၤ လၢတၢ်ဃူတၢ်ဖိးဒ်ထံမိၢ်ပှၢ်အသိး, ဒီးပှၤကလုာ်တဖၣ် အလၤကပီၤဒ်ထံကျိလၢ အလုၣ်ဘၢတၢ်အသိးန့ၣ်လီၤ. ဒီးသုကစူၢ်တၢ်, ဒီးတၢ်ကစိာ်သုလၢအကပၤလိၤ, ဒီးတၢ် ကသယဲးသုလၢအကံၣ်လူၢ်ခိၣ်လီၤ.

¹³ ဒ်ပှၤလၢအမိၢ်မၤမုာ်ထီၣ်က့ၤအီၤအသိးန့ၣ်, ယဲဒၣ် အံၤယကမၤမုာ်ထီၣ်က့ၤသုဒ်န့ၣ်သိး, ဒီးသုကဘၣ်တၢ် မၤမုာ်ထီၣ်က့ၤသုလၢယရူၤၡလ့ၣ်အပူၤလီၤ.

¹⁴ ဒီးသုကထံၣ်ဘၣ်တၢ်, ဒီးသုသးကသူၣ်ဖှံသးညီ, ဒီး သုဃံကဂ့ၤထီၣ်ဒ်နီၣ်ဧိၤမံၤဧိၤအသိးန့ၣ်, ဒီးယွၤအစုက အိၣ်ဖျါထီၣ်လၢအခ့အပှၤအမဲာ်ညါ, ဒီးကသးထီၣ်ဘၣ် အဒုၣ်အဒါန့ၣ်လီၤ.

¹⁵ အဂ့ၢ်ဒ်အံၤ, ကွၢ်ကွၢ်, ယွၤကဟဲလၢမ့ၣ်အူပူၤ, ဒီးအ လ့ၣ်ကဟၣ် မၤသးဒ်ကလံၤသဝံးအသိး, ဒ်သိးအက လၢာ်အသးထီၣ်လၢ အသးကဲၤထီၣ်အပူၤ, ဒီးအတၢ် သိၣ်ဃီၣ်လၢမ့ၣ်လၣ်အကျါလီၤ.

¹⁶ အဂ့ၢ်ဒ်အံၤ, ယွၤကလိာ်ကွီၢ်ဒီးတၢ်ဖံးတၢ်ညၣ်ခဲလၢာ် လၢမ့ၣ်အူ, ဒီးလၢအနးတဘ့ၣ်န့ၣ်, ဒီးပှၤလၢအဘၣ်တၢ် မၤသံအီၤလၢယွၤန့ၣ်ကအိၣ်အါဂၤလီၤ.

¹⁷ ပှၤလၢအမၤစီဆှံအသး, ဒီးမၤကဆှီအသးလၢတၤ သၣ်အလီၢ်ပူၤန့ၣ်အိၣ်လၢပှၤတဂၤဘၣ်တဂၤလၢအသး ကံၢ်ပူၤ, ဒီးအီၣ်ထိးအညၣ်, ဒီးတၢ်သးဘၣ်အၢ, ဒီးယုၢ် သူၣ်တဖၣ်န့ၣ်ကဟးဂီၤတပူၤဃီလီၤ, ယွၤစံးဝဲဒၣ်.

¹⁸ အဂ့ၢ်ဒ်အံၤ, ယသ့ၣ်ညါအမၤတၢ်, ဒီးအဆိကမိၣ်တၢ် လီၤ. အဆၢအကတီၢ်ဘၣ်လၢယကဒုးအိၣ်ဖှိၣ်ကယဲၢ် ပှၤကလုာ်, ဒီးပှၤကတိၤတၢ်အကျိာ်ခဲလၢာ်, ဒီးကဟဲဝဲ, ဒီးကထံၣ်ဘၣ်ယလၤကပီၤလီၤ.

¹⁹ ဒီးယကပာ်တၢ်အပနီၣ်လၢအကျါ, ဒီးယကမၢလီၤပှၤ လၢအထူၣ်ဖျဲးတဖၣ်ဆူပှၤကလုာ်တဖၣ်အအိၣ်, ဆူတၢ် ၡံၣ်, ပူလး, ဒီးလူး, ပှၤလၢအခးချံၣ်, ဆူတူၤဘလး, ဒီးယၤ ဝၣ်, ဒီးဆူပီၣ်လဲၣ်နံၤအိၣ်လၢအယံၤအယိာ်လၢအတနၢ် ဟူဘၣ်ယဂ့ၢ်, ဒီးလၢအတထံၣ်ဘၣ်ယလၤကပီၤဘၣ် န့ၣ်လီၤ. ဒီးကစံၣ်တဲၤတဲလီၤဝဲယလၤကပီၤလၢပှၤက လုာ်တဖၣ်န့ၣ်အကျါလီၤ.

²⁰ ဒီးကဟဲစိာ်သုဒီပုၢ်ဝဲၢ်ခဲလၢာ်လၢ တၢ်မၤဘူၣ်ယွၤအ ဂီၢ်, လၢကယဲၢ်ပှၤကလုာ်တဖၣ်အကျါ, အိၣ်လၢကသ့ၣ် လိၤ, ဒီးလၢလ့ၣ်ကဟၣ်အပူၤ, ဒီးလၢစုာ်အပူၤ, ဒီးလၢက သ့ၣ်လၤအလိၤ, ဒီးလၢကီၤလၤအူးအလိၤန့ၣ်ဆူယက စၢၢ်စီဆှံ, ယရူၤၡလ့ၣ်န့ၣ်, ယွၤစံးဝဲဒၣ်, ဒ်ပှၤအံၣ်စရ့လး ဖိဟဲစိာ်တၢ်မၤဘူၣ်လၢ လီခီကဆှီအပူၤဆူယွၤအဟံၣ် ပူၤအသိးန့ၣ်လီၤ.

²¹ ဒီးယကဟံးန့ၢ်စ့ၢ်ကီး တနီၤနီၤလၢအကျါလၢအက ကဲထီၣ်ပှၤလုၢ်တၢ်အဒိၣ်, ဒီးပှၤလ့ၤဝံဖိန့ၣ်, ယွၤစံးဝဲဒၣ်.

²² အဂ့ၢ်ဒ်အံၤ, ဒ်မူခိၣ်အသီ, ဒီးဟီၣ်ခိၣ်အသီလၢယတ့ လီၤအီၤန့ၣ်အိၣ်ဝဲဆိးဝဲလၢယမဲာ်ညါအသိးန့ၣ်, သုချံ သုသၣ်, ဒီးသုမံၤသုသၣ်ကအိၣ်ကဆိးဒ်န့ၣ်သိး, ယွၤစံး ဝဲဒၣ်.

²³ ဒီးတၢ်ကမၤအသးလၢလါထီၣ်သီ တုၤလၢလါထီၣ် သီ, ဒီးလၢအိၣ်ဘှံးနံၤတုၤလၢအိၣ်ဘှံးနံၤန့ၣ်, ကယဲၢ်တၢ် ဖံးတၢ်ညၣ် ကဟဲဘူၣ်ထီၣ်ဘါထီၣ်လၢ ယမဲာ်ညါခဲ လၢာ်လီၤ, ယွၤစံးဝဲဒၣ်.

²⁴ ဒီးကလဲၤထီၣ်ဝဲဒီး ထံၣ်ဘၣ်ပှၤအစိၣ်လၢအမၤကမၣ် ဘၣ်ယၤတဖၣ်န့ၣ်လီၤ. အဂ့ၢ်ဒ်အံၤ, အလၢၣ်တသံဘၣ်, ဒီးအမ့ၣ်အူတလီၤပံာ်ဘၣ်, ဒီးကကဲထီၣ်တၢ်သးဘၣ် အၢလၢကယဲၢ်တၢ်ဖံးတၢ်ညၣ်အမဲာ်ညါခဲလၢာ်လီၤ.