လံာ်ဟိၤရှ့.
1၁
1 ယွၤအကလုၢ်လၢအဘၣ် စီၤဘ့ၤရံအဖိခွါစီၤဟိၤရှ့လၢ ယူဒၤအစီၤပၤတဖၣ်, စီၤဧူးစံယၤ, စီၤယိၤသၣ်, စီၤအၤ ဃာ်, စီၤဃံးစကံယၤအမုၢ်နံၤတဖၣ်, ဒီးလၢအံၣ်စရ့လး အစီၤပၤစီၤယိၤအၣ်အဖိခွါစီၤယၤရဘၣ် အမုၢ်နံၤတဖၣ် အပူၤန့ၣ်လီၤ.
2 ယွၤအကလုၢ်လၢစီၤဟိၤရှ့အခီၣ်ထံး. ယွၤစံးဘၣ်စီၤဟိၤရှ့န့ၣ်, လဲၤန့ၢ်မါဘၣ်ဃးဒီးတၢ်မၤက မၣ်မုၣ်ကမၣ်ခွါ, ဒီးပှၤမၤကမၣ်မုၣ်ကမၣ်ခွါအဖိတဖၣ် တက့ၢ်. အဂ့ၢ်ဒ်အံၤ, ပှၤကီၢ်ဖိလဲၤသဒၣ်ယွၤသတးဒီး, မၤကမၣ်မုၣ်ကမၣ်ခွါဒိၣ်မးလီၤ.
3 ဒီးလဲၤဝဲဒီးဟံးန့ၢ်ဒံးဘလဲၣ်အဖိမုၣ်နီၢ်ကိမၢၤ, ဒီးအဝဲ ဒၣ်ဒၢထီၣ်, ဒီးဆံးစၢ်န့ၢ်အီၤလၢအဖိခွါလီၤ.
4 ဒီးယွၤစံးဘၣ်အီၤ, ယုၢ်အမံၤလၢ ယံးစရ့လးတက့ၢ်. အဂ့ၢ်ဒ်အံၤ, အိၣ်ဒံးတစိၢ်ဖိဒီးယကမၤဆၢတၢ်လၢယံးစ ရ့လးအသွံၣ်အဂီၢ်, လၢစီၤယ့ၤဟူအဟံၣ်အဖီခိၣ်, ဒီးယ ကဒုးဆိတ့ၢ်အံၣ်စရ့လးအပှၤဟံၣ်ဖိအဘီမုၢ်လီၤ.
5 ဒီးတၢ်ကမၤအသးလၢမုၢ်တနံၤန့ၣ် လၢယကဘိးကၢ် ကွံာ်အံၣ်စရ့လးအချံၣ်လၢ ကစၢၢ်ကဆူးယံးစရ့လးအ ပူၤလီၤ.
6 ဒီးပိာ်မုၣ်န့ၣ် ဒၢထီၣ်ကဒီး ဒီးဆံးစၢ်ဖိမုၣ်တဂၤလီၤ. ဒီးယွၤစံးဝဲဒၣ်, ယုၢ်အမံၤလၢလိၤရူဃမၤတက့ၢ်. အဂ့ၢ် ဒ်အံၤ, ယတသးကညီၤလၢၤဘၣ် အံၣ်စရ့လးအပှၤဟံၣ် ဖိဘၣ်. မ့မ့ၢ်ယကစိာ်ထီၣ်ကွံာ်အီၤစီဖ့ကလ့ၤလီၤ.
7 မ့မ့ၢ်ယူဒၤအပှၤဟံၣ်ဖိန့ၣ်ယကသးကညီၤအီၤ, ဒီးယ ကအုၣ်က့ၤခီၣ်က့ၤအီၤလၢ ယွၤအကစၢ်, ဒီးယတအုၣ် က့ၤခီၣ်က့ၤဘၣ်အီၤလၢချံၣ်, လၢနး, လၢဒုးသုး, လၢက သ့ၣ်, လၢပှၤကသ့ၣ်သုးဖိဘၣ်.
8 ဒီးပိာ်မုၣ်န့ၣ် ထုးဖှၣ်နုၢ်နီၢ်လိၤရူဃမၤ, ဒီးဒၢထီၣ်ဝဲ, ဒီးဆံးစၢ်ဖိခွါတဂၤလီၤ. 9 ဒီးယွၤစံးဝဲဒၣ်, ယုၢ်အမံၤလၢ လိၤဧၣ်မံၤတက့ၢ်. အဂ့ၢ်ဒ်အံၤ, သုတမ့ၢ်လၢၤဘၣ်ယပှၤ ဂီၢ်မုၢ်ဘၣ်. ဒီးယတမ့ၢ်လၢၤဘၣ်သုကစၢ်ဘၣ်.
10 ဘၣ်ဆၣ်ဒီးပှၤအံၣ်စရ့လးဖိ ကမၤသးဒ် ပီၣ်လဲၣ်အ မဲးဧိၤဟီၣ်ဧိၤလၢပှၤဃီၣ်အီၤတသ့, ဒီးဂံၢ်အီၤတသ့ဘၣ် အသိးန့ၣ်, ဒီးတၢ်ကမၤအသးလၢ ဖဲအလီၢ်လၢတၢ်စံး ဘၣ်အီၤ, သုတမ့ၢ်လၢၤဘၣ်ယပှၤဂီၢ်မုၢ်န့ၣ် တၢ်ကစံး ဘၣ်အီၤ, သုမ့ၢ်ပှၤလၢအမူဝဲအဖိခွါလီၤ.
11 တုၤနုၤတစုပှၤယူဒၤဖိဒီး ပှၤအံၣ်စရ့လးဖိကအိၣ်ဖှိၣ်ရိ ဖှိၣ်တပူၤဃီ, ဒီးကပာ်တၢ်အခိၣ်တဂၤလၢအဂီၢ်ဒၣ်ဝဲ, ဒီး ကဟဲထီၣ်လၢကီၢ်တဘ့ၣ်အပူၤန့ၣ်လီၤ. အဂ့ၢ်ဒ်အံၤ, ယံး စရ့လးအမုၢ်တနံၤန့ၣ်မ့ၢ်အဒိၣ်လီၤ.
2၂
1 စံးဘၣ်သုဒီပုၢ်ဝဲၢ်ခွါဧၣ်မံၤ, ဒီးသုဒီပုၢ်ဝဲၢ်မုၣ် ရူဃမၤ န့ၣ်, 2 ဂ့ၢ်လိာ်ဘှီလိာ်ဒီးသုမိၢ်, ဂ့ၢ်လိာ်ဘှီလိာ်တက့ၢ်. အဂ့ၢ်ဒ်အံၤ, တမ့ၢ်လၢၤဘၣ်ယမါဘၣ်, ဒီးယတမ့ၢ်လၢၤ ဘၣ်အဝၤဘၣ်, ဒ်သိးအကပာ်ကွံာ်အတၢ်မၤကမၣ်မုၣ် ကမၣ်ခွါလၢအမဲာ်ညါ, ဒီးအတၢ်အဲၣ်ဘၢဝၤ လၢအနုၢ် အကဆူးပူၤန့ၣ်လီၤ. 3 ယကဒုးအိၣ်ဘ့ၣ်ဆ့ဘၣ်ဖုးအီၤ, ဒီးပာ်အီၤ ဒ်လၢမုၢ်တနံၤလၢအအိၣ်ဖျဲၣ်, ဒီးမၤအီၤဒ်ပှၢ် မုၢ်ကနၢအသိး, ဒီးပာ်အီၤဒ်ဟီၣ်ခိၣ်ဃ့အသိး, ဒီးမၤသံ အီၤလၢတၢ်သူအသးလၢထံလီၤ.
4 ဒီးယတသးကညီၤဘၣ်အဖိအလံၤဘၣ်. အဂ့ၢ်ဒ်အံၤ, မ့ၢ်တၢ်မၤကမၣ်မုၣ်ကမၣ်ခွါအဖိလီၤ.
5 အဂ့ၢ်ဒ်အံၤ, အမိၢ်မၤဃဲသဲမုၣ်အသး, ပှၤလၢအဒၢ ထီၣ်အီၤန့ၣ်မၤတၢ်မဲာ်ဆှးလီၤ. အဂ့ၢ်ဒ်အံၤ, စံးဝဲဒၣ်, ယ ကလူၤပိာ် ပှၤလၢအအဲၣ်ယၤ, လၢအဟ့ၣ်ယကိၣ်ဒီးယ ထံ, ယသိအဆူၣ်, ဒီးယဘဲ, ယသိဧိၤချါဧိၤ, ဒီးယ စပံးထံလီၤ.
6 မၤသးဒ်န့ၣ်ဒီးကွၢ်ကွၢ်, ယကကရၢထီၣ်နကျဲလၢတၤ ဆှုၣ်, ဒီးယကမၤထီၣ်တၢ်အဒူၣ်ဒ်သိးအသုတထံၣ်န့ၢ်အ ကျဲဧိၤကပူၤဧိၤတဂ့ၤ. 7 ဒီးကလူၤပှၤလၢအအဲၣ်အီၤ, ဒီး တချုးန့ၢ်ဘၣ်အီၤဘၣ်. ကဃုအီၤ, ဒီးတထံၣ်န့ၢ်ဘၣ်အီၤ ဘၣ်. တုၤနုၤတဘျီကစံးဝဲ, ယကလဲၤတၢ်, ဒီးက့ၤက ဒါက့ၤဆူယဝၤအခီၣ်ထံးတဂၤအအိၣ်လီၤ. အဂ့ၢ်ဒ်အံၤ, အကတီၢ်ဖဲန့ၣ်ဂ့ၤန့ၢ်ခဲကနံၣ်အံၤလၢယဂီၢ်တက့ၢ်လီၤ.
8 အဂ့ၢ်ဒ်အံၤ, တသ့ၣ်ညါဘၣ်လၢ ပှၤလၢအဟ့ၣ်လီၤ အီၤလၢဘုဧိၤဟုဧိၤ, ဒီးစပံးထံ, ဒီးသိဧိၤချါဧိၤ, ဒီးမၤ အါထီၣ်အကျိၣ်ဧိၤစ့ဧိၤ, ဒီးအထူဧိၤလွဲဧိၤလၢအဝဲသ့ၣ်မၤ ဝဲလၢဘဧၤလးအဂီၢ်တဂၤန့ၣ်မ့ၢ်ယၤလီၤန့ၣ်ဘၣ်. 9 မၤ သးဒ်န့ၣ်ဒီးယကဟံးန့ၢ်ကဒါက့ၤ ယဘုဧိၤဟုဧိၤလၢအ ဆၢကတီၢ်ဒၣ်ဝဲ, ဒီးယစပံးထံအသီလၢအကတီၢ်ဒၣ်ဝဲ, ဒီးယကမၤန့ၢ်က့ၤယသိအဆူၣ်, ဒီးယဘဲလၢအအိၣ်လၢ အကကျၢၢ်ဘၢအတၢ်အိၣ်ဘ့ၣ်ဆ့အဂီၢ်လီၤ.
10 ဒီးခဲကနံၣ်အံၤ ယကဒုးနဲၣ်အမၤ တၢ်ကလုာ်ကလိၤ လၢပှၤလၢအအဲၣ်အီၤ အမဲာ်ညါ, ဒီးပှၤတမၤပူၤမၤဖျဲး ဘၣ်အီၤလၢယစုပူၤနီတဂၤဘၣ်.
11 ဒီးယကဒုးဆိတ့ၢ်အတၢ်သူၣ်ဖှံသးညီ, အမၤဘူၣ်အ နံၤတဖၣ်, အလါထီၣ်သီအနံၤတဖၣ်, ဒီးအအိၣ်ဘှံးနံၤ တဖၣ်, ဒီးအတၢ်အိၣ်ဖှိၣ်လၢသ့ၣ်နံၤဖးသီအပူၤခဲလၢာ် လီၤ 12 ဒီးယကမၤဟးဂီၤအစပံးမုၢ်, ဒီးအချၢၣ်ဒၢလၢအ စံးလၢအဂ့ၢ်, အဝဲအံၤမ့ၢ်ယဘူးယလဲလၢပှၤလၢယအဲၣ် အီၤတဖၣ်ဟ့ၣ်ယၤလီၤ. ဒီးယကပာ်အီၤလၢသ့ၢ်ပှၢ်, ဒီး ဆၣ်ဖိကီၢ်ဖိလၢပှၢ်လၢ်ကျါန့ၣ်ကအီၣ်ကွံာ်အီၤလီၤ.
13 ယကဒုးအိၣ်သကိးအီၤလၢ ဘဧၤလးတဖၣ်အမုၢ်နံၤ တဖၣ်ဖဲအဆိၣ်ကဲၤထီၣ်တၢ်နၢမူလၢအဂီၢ်, ဒီးကယၢက ယဲအသးလၢနါဒ့အပသံး, ဒီးအတၢ်ကယၢကယဲ, ဒီး လူၤပိာ်ပှၤလၢအအဲၣ်အီၤအခံ, ဒီးသးပ့ၤနီၣ်ယၤလီၤ, ယွၤ စံးဝဲဒၣ်.
14 မၤသးဒ်န့ၣ်ဒီးကွၢ်ကွၢ်, ယကကလံာ်အီၤ, ဒီးဆှၢအီၤ ဆူပှၢ်မုၢ်ကနၢ, ဒီးယကကတိၤတၢ်မုာ်မုာ်ဒီးအီၤလီၤ.
15 ဒီးယကဟ့ၣ်လီၤအီၤလၢတၤသၣ်အလီၢ်ဖဲန့ၣ်, ဒီးက စၢၢ်ကဆူးဧၤကိၢ် လၢတၢ်မုၢ်လၢ်အကျဲစၢၤအဂီၢ်, ဒီးက သးဝံၣ်တၢ်ဖဲန့ၣ် ဒ်လၢအမုၣ်ကနီၤထီၣ်အမုၢ်နံၤတဖၣ်အ သိး, ဒီးဒ်မုၢ်တနံၤလၢအဟဲထီၣ်လၢကီၢ်အဲၤကူပတူးအ သိးန့ၣ်လီၤ.
16 ဒီးယွၤစံးဝဲဒၣ်, တၢ်ကမၤအသးလၢမုၢ်တနံၤန့ၣ်လၢန ကကိးယၤလၢအံၡံာ်, ဒီးနတကိးလၢၤဘၣ်ယၤလၢဘဧၤ လးဘၣ်. 17 အဂ့ၢ်ဒ်အံၤ, ယကဟံးထီၣ်ကွံာ်ဘဧၤလးအ မံၤတဖၣ်လၢအထးခိၣ်, ဒီးပှၤတသ့ၣ်နီၣ်ထီၣ်က့ၤလၢၤ ဘၣ်အီၤလၢအမံၤဘၣ်.
18 ဒီးတၢ်လၢမုၢ်တနံၤန့ၣ် ယကအၢၣ်လီၤအီလီၤတၢ်ဒီး ဆၣ်ဖိကီၢ်ဖိလၢပှၢ်လၢ်ကျါ, ဒီးထိၣ်ဖိလံာ်ဖိလၢမူကပိာ် လိၤ, ဒီးတၢ်စွါတဖၣ်လၢဟီၣ်ခိၣ်ချၢ, လၢအဂီၢ်လီၤ. ဒီး ယကမၤဟးဂီၤကွံာ်ချံၣ်ဧိၤပျၢ်ဧိၤ, ဒီးနးဧိၤဘီဧိၤ, ဒီးတၢ် ဒုးသုး, ဒီးပာ်ကွံာ်အီၤလၢထံဧိၤကီၢ်ဧိၤအပူၤ, ဒီးယက ဒုးမံလီၤအီၤလၢတၢ်တပျံၤဘၣ်အလီၢ်လီၤ.
19 ဒီးယကအဲၣ်တီနၤလၢယဂီၢ်လီၤထူလီၤယိာ်, ဒီးယက အဲၣ်တီနၤလၢတၢ်တီတၢ်လိၤ, ဒီးလၢတၢ်စံၣ်ညီၣ်တီ, ဒီး လၢတၢ်ဘျုးတၢ်ဖှိၣ်, ဒီးလၢတၢ်သးကညီၤ, 20 မ့ၢ်မး, ယ ကအဲၣ်တီနၤလၢတၢ်မ့ၢ်တၢ်တီ, ဒီးနကသ့ၣ်ညါယွၤလီၤ.
21 ဒီးယွၤစံးဝဲဒၣ်, လၢမုၢ်တနံၤန့ၣ် တၢ်ကမၤအသးလၢ ယကစံးဆၢတၢ်လီၤ. ယကစံးဆၢမူခိၣ်, ဒီးအဝဲဒၣ်က စံးဆၢဟီၣ်ခိၣ်, 22 ဒီးဟီၣ်ခိၣ်ကစံးဆၢဘုဧိၤဟုဧိၤ, ဒီး စပံးထံအသီ, ဒီးသိဧိၤချါဧိၤ, ဒီးအဝဲသ့ၣ်ကစံးဆၢယံးစ ရ့လးလီၤ.
23 ဒီးယကဖှံအီၤလၢယဂီၢ်လၢထံဧိၤကီၢ်ဧိၤအပူၤ, ဒီးယ ကသးကညီၤပှၤလၢယတသးကညီၤတ့ၢ်ဘၣ်အီၤ, ဒီးယ ကစံးဘၣ်ပှၤလၢအတမ့ၢ်တ့ၢ် ယပှၤဂီၢ်မုၢ်န့ၣ် နမ့ၢ်ယပှၤ ဂီၢ်မုၢ်လီၤ. ဒီးအဝဲသ့ၣ်ကစံးဝဲ, ယကစၢ်ဧၢန့ၣ်လီၤ.
3၃
1 ဒီးယွၤစံးဘၣ်ယၤ, လဲၤကဒီး, အဲၣ်ပိာ်မုၣ်လၢအတံၤ အသကိးအဲၣ်အီၤ, ဒီးပှၤအဲၣ်ဘၢဝၤဒ်ယွၤအဲၣ်ပှၤအံၣ်စ ရ့လးဖိအသိး, ပှၤလၢအဃၣ်အသးဆူကစၢ်အဂၤတဖၣ် အအိၣ်, ဒီးအဲၣ်ဒိးစပံးသၣ်အကိၣ်ဘ့ၣ်ဘၣ်န့ၣ်တက့ၢ်.
2 ဒီးယပှ့ၤန့ၢ်အီၤလၢစ့တဆံယဲၢ်ဘ့ၣ်, ဒီးဘုမုယီၤတဃိ မ့ၢ်ဒီးဖးဖီဃိမ့ၢ်လၢယဂီၢ်လီၤ.
3 ဒီးယစံးဘၣ်အီၤ, နဘၣ်အိၣ်လၢယဂီၢ် အါနံၤအါသီ လီၤ. နတဘၣ်မၤဃဲသဲမုၣ်နသးဘၣ်, ဒီးနတဘၣ်ကဲ ပိာ်ခွါအဂၤအတၢ်နီတဂၤဘၣ်, ဒီးယဲဒၣ်အံၤယကအိၣ် စ့ၢ်ကီးလၢနဂီၢ်လီၤ.
4 အဂ့ၢ်ဒ်အံၤ, ပှၤအံၣ်စရ့လးဖိကအိၣ်အါနံၤအါသီတ အိၣ်ဘၣ်ဒီးစီၤပၤ, ဒီးတအိၣ်ဘၣ်ဒီးပဒိၣ်ဖးဒိၣ်, ဒီးတ အိၣ်ဘၣ်ဒီးတၢ်လုၢ်တၢ်, ဒီးတအိၣ်ဘၣ်ဒီးတၢ်ဂီၤ, ဒီးတ အိၣ်ဘၣ်ဒီးအ့ဖိး, ဒီးတအိၣ်ဘၣ်ဒီးတၢ်ဂီၤတရၤဖးဘၣ်.
5 လၢခံက့ၤဒီး, ပှၤအံၣ်စရ့လးဖိကက့ၤကဒါက့ၤ, ဒီး ကဃုယွၤအကစၢ်, ဒီးစီၤဒၤဝံးအစီၤပၤ, ဒီးကပျံၤယွၤဒီး အတၢ်ဂ့ၤတၢ်ဝါလၢမုၢ်နံၤအလီၢ်ခံတဖၣ်န့ၣ်လီၤ.
4၄
1 ကနၣ်ယွၤအကလုၢ်အကထါတက့ၢ်, ပှၤအံၣ်စရ့လး ဖိသ့ၣ်ဧၢ. အဂ့ၢ်ဒ်အံၤ, ယွၤအိၣ်ဒီးတၢ်လိာ်ကွီၢ်ဒီးပှၤကီၢ် ဖိလီၤ. အဂ့ၢ်ဒ်အံၤ, တၢ်မ့ၢ်တၢ်တီမ့ၢ်ဂ့ၤ, တၢ်ဘျုးတၢ် ဖှိၣ်မ့ၢ်ဂ့ၤ, တၢ်သ့ၣ်ညါယွၤမ့ၢ်ဂ့ၤ, တအိၣ်ဘၣ်လၢကီၢ် ပူၤန့ၣ်ဘၣ်.
2 အိၣ်ထဲဆိၣ်တၢ်, ဒီးကတိၤတၢ်ကဘျံးကဘျၣ်, ဒီး မၤသံပှၤကညီ, ဒီးဟုၣ်တၢ်, ဒီးတၢ်အဲၣ်ဘၢမါအဲၣ်ဘၢ ဝၤလီၤ. မၤဘၢၣ်ဖျိတၢ်, ဒီးတၢ်သွံၣ်ဘၣ်လၢတၢ်သွံၣ်လီၤ.
3 မၤသးဒ်န့ၣ်ဒီး ကီၢ်န့ၣ်ကသူၣ်အုးသးအုး, ဒီးကယဲၢ် ပှၤလၢအအိၣ်ဝဲဆိးဝဲ, လၢအပူၤအသးကလီၤဘှါ, ဒီး ဆၣ်ဖိကီၢ်ဖိလၢပှၢ်လၢ်ကျါ, ဒီးထိၣ်ဖိလံၣ်ဖိလၢမူကပိာ် လိၤ, ဒီးတၢ်ကဟံးထီၣ်ကွံာ်စ့ၢ်ကီးဒ့ၣ်ဧိၤညၣ်ဧိၤလၢပီၣ် လဲၣ်ပူၤလီၤ.
4 ဘၣ်ဆၣ်ဒီး မ်ပှၤကညီအသုတဂ့ၢ်လိာ်ဘှီလိာ်တဂ့ၤ, မ်အသုတသိၣ်ဃီၣ်ပှၤဂၤတဂ့ၤ. အဂ့ၢ်ဒ်အံၤ, နပှၤဂီၢ်မုၢ် မၤသးဒ်ပှၤလၢအဂ့ၢ်လိာ်ဘှီလိာ်ဒီး ပှၤလုၢ်တၢ်အဒိၣ်အ သိးန့ၣ်လီၤ.
5 ဒီးနကလီၤဃံၤလၢမုၢ်ဆါခီ, ဒီးဝံကလီၤဃံၤစ့ၢ်ကီးဒီး နၤလၢမုၢ်နၤ, ဒီးယကမၤဟးဂီၤနမိၢ်လီၤ.
6 မ့ၢ်တၢ်သ့ၣ်ညါတအိၣ်ဘၣ်ဒီး, ယပှၤဂီၢ်မုၢ်ဟးဂီၤဝဲ လီၤ. မ့ၢ်နညိကွံာ်တၢ်သ့ၣ်ညါဒီး, ယကညိကွံာ်နၤလီၤ. ဒီးနကဲလၢၤဘၣ်ပှၤလုၢ်တၢ်အဒိၣ်လၢယဂီၢ်ဘၣ်. မ့ၢ်န သးပ့ၤနီၣ်ယွၤအတၢ်သိၣ်တၢ်သီဒီး, ယကသးပ့ၤနီၣ်နဖိ နလံၤလီၤ.
7 ထဲသိးဒီးအတၢ်အါထီၣ်အသိးန့ၣ် မၤကမၣ်ယၤလီၤ. ယကဒုးကဲက့ၤအလၤကပီၤလၢတၢ်မဲာ်ဆှးလီၤ.
8 အဝဲသ့ၣ်အီၣ်ယပှၤဂီၢ်မုၢ်အတၢ်ဒဲးဘး, ဒီးဘၣ်အသး လၢပှၤမၤတၢ်အၢလီၤ. 9 မၤသးဒ်န့ၣ်ဒီး, တၢ်ကမၤအသး လၢ, ဒ်ပှၤဂီၢ်မုၢ်အသိး, ပှၤလုၢ်တၢ်အဒိၣ်ဒ်န့ၣ်သိးလီၤ. ဒီးယကဒုးအိၣ်သကိးအီၤလၢအကျဲတဖၣ်, ဒီးယကဟ့ၣ် အတၢ်မၤအဘူးအလဲလီၤ.
10 အဂ့ၢ်ဒ်အံၤ, ကအီၣ်တၢ်, ဒီးတဘျဲးအီၣ်ဘၣ်. ကမၤ ကမၣ်မုၣ်ကမၣ်ခွါ, ဒီးတအါထီၣ်ဘၣ်. အဂ့ၢ်ဒ်အံၤ, လဲၤသဒၣ်အတၢ်ယူးယီၣ်ယွၤလီၤ.
11 တၢ်မၤကမၣ်မုၣ်ကမၣ်ခွါ, ဒီးစပံးထံ, ဒီးစပံးထံအ သီန့ၣ်မၤဟးဂီၤကွံာ်ပှၤအသးလီၤ.
12 ယပှၤဂီၢ်မုၢ်ဃ့တၢ်လၢအသ့ၣ်တဘိ, ဒီးအနီၣ်ထိးတ ဘိဒုးနဲၣ်တၢ်လၢအီၤလီၤ. အဂ့ၢ်ဒ်အံၤ, တၢ်မၤကမၣ်မုၣ် ကမၣ်ခွါအသးန့ၣ်ဒုးကမၣ်ဘၣ်အီၤ, ဒီးလၢအကမၣ်မုၣ် ကမၣ်ခွါဒီး, ဟးထီၣ်ကွံာ်လၢအကစၢ်အဖီလာ်လီၤ.
13 လုၢ်တၢ်လၢကစၢၢ်ဒီခိၣ်, ဒီးဆိၣ်ကဲၤတၢ်နၢမူလၢတၢ် စိခိၣ်အဒီခိၣ်လၢသ့ထိးဖၣ်, ဒီးသ့ၣ်လ့းဘန့ၤ, ဒီးဃီမုၢ် ပျဲၤအဖီလာ်လီၤ. အဂ့ၢ်ဒ်အံၤ, အကဒုန့ၣ်မုာ်ဝဲလီၤ. မၤ သးဒ်န့ၣ်ဒီး, သုဖိမုၣ်တဖၣ်မၤကမၣ်မုၣ်ကမၣ်ခွါ, ဒီး သုမါသုဒဲၣ်တဖၣ်အဲၣ်ဘၢဝၤလီၤ.
14 တုၤသုဖိမုၣ်တဖၣ်န့ၣ် မၤကမၣ်မုၣ်ကမၣ်ခွါ, ဒီးသု ဒဲၣ်တဖၣ်အဲၣ်ဘၢဝၤဒီး, ယတအိၣ်သကိးဘၣ်အီၤဘၣ်. အဂ့ၢ်ဒ်အံၤ, အကစၢ်ဒၣ်ဝဲန့ၣ်လဲၤအိၣ်တဒၢဒီးပှၤဃဲသဲ မုၣ်, ဒီးလုၢ်တၢ်ဒီးပှၤဃဲသဲမုၣ်လီၤ. ဒီးပှၤလၢအနၢ်တ ပၢၢ်ဘၣ်တၢ်ဘၣ်န့ၣ်ကလီၤဃံၤဝဲလီၤ.
15 နဲဒၣ်အံၣ်စရ့လးဧၢ, နမ့ၢ်မၤကမၣ်မုၣ်ကမၣ်ခွါဘၣ် ဆၣ်ဒီး, မ်ယူဒၤအတၢ်ဒဲးဘးအသုတအိၣ်တဂ့ၤ, ဒီးဟဲ ဆူကံးလကၤလးတဂ့ၤ, ဒီးလဲၤထီၣ်ဆူဘ့ၤသအၤဝ့ၣ် တဂ့ၤ, ဒီးဆိၣ်တၢ်, ဒီးစံး, ယွၤမူဝဲန့ၣ်တဂ့ၤ.
16 မ့ၢ်အံၣ်စရ့လးပာ်ကီအသး ဒ်ဂီၤဖံးမိၢ်လၢ အပာ်ကီ အသးသိးန့ၣ်ဒီး, ခဲကနံၣ်အံၤယွၤကဒုးအီၣ်အဆၣ်ဒ်သိ ဖိအသိးလၢအလီၢ်ဖးလဲၢ်အပူၤလီၤ.
17 အ့ဖရဲၣ်န့ၣ် စဲဘူးလံအသးဒီး အတၢ်ဂီၤတၢ်ဖီၣ်လံ. ကအိၣ်ဒၣ်ဝဲတက့ၢ်.
18 တုၤအဟးထီၣ်လၢအတၢ်အီၣ်တၢ်အီဒီး, မၤကမၣ်မုၣ် ကမၣ်ခွါလီၤ. အပှၤခိၣ်တဖၣ်န့ၣ်အဲၣ်ဒိးတၢ်မဲာ်ဆှးလီၤ.
19 ကလံၤဘိၣ်ထီၣ်အီၤလၢအဒံးဆ့အပူၤ, ဒီးကမဲာ်ဆှး လၢအလုၢ်တၢ်အဃိလီၤ.
5၅
1 ပှၤလုၢ်တၢ်အဒိၣ်သ့ၣ်ဧၢ, ကနၣ်တၢ်အံၤတက့ၢ်, ဒီး အံၣ်စရ့လးအပှၤဟံၣ်ဖိသ့ၣ်ဧၢ, ဒိကနၣ်တက့ၢ်, ဒီးစီၤ ပၤအပှၤဟံၣ်ဖိသ့ၣ်ဧၢ, ဒိးနူၤဒိးနၢ်တက့ၢ်. အဂ့ၢ်ဒ်အံၤ, တၢ်စံၣ်ညီၣ်ဘၣ်သုလီၤ. အဂ့ၢ်ဒ်အံၤ, သုမ့ၢ်တၢ်ပျံၤသ ကွီၤလၢမံးစပၤအလိၤ, ဒီးပှာ်ဧိၤစၤဧိၤဒါလီၤအသးလၢ တၤဘိၢ်အလိၤလီၤ.
2 ဒီးပှၤလၢအသးဟးဂီၤတဖၣ်န့ၣ် မၤသံတၢ်နးကဲၣ်ဆိး လီၤ. ဒီးယကသိၣ်ဃီၣ်အီၤခဲလၢာ်လီၤ.
3 ယသ့ၣ်ညါအ့ဖရဲၣ်, ဒီးအံၣ်စရ့လးတအိၣ်တဒၢဘၣ် ဒီးယၤဘၣ်. အဂ့ၢ်ဒ်အံၤ, ခဲကနံၣ်အံၤအ့ဖရဲၣ်ဧၢ, နမၤ ကမၣ်မုၣ်ကမၣ်ခွါလီၤ. အံၣ်စရ့လးတကဆှီဘၣ်ဝဲဘၣ်.
4 အတၢ်မၤတဒုးက့ၤဘၣ်အီၤဆူ အကစၢ်အအိၣ်ဘၣ်. အဂ့ၢ်ဒ်အံၤ, တၢ်မၤကမၣ်မုၣ်ကမၣ်ခွါအသးအိၣ်ဝဲလၢ အပူၤ, ဒီးတသ့ၣ်ညါဘၣ်ယွၤဘၣ်.
5 ဒီးအံၣ်စရ့လးအသးထီၣ်ထီန့ၣ် အုၣ်အသးလၢ အ မဲာ်ညါလီၤ. မၤသးဒ်န့ၣ်ဒီး အံၣ်စရ့လးဒီးအ့ဖရဲၣ်န့ၣ် ကလီၤဃံၤလၢအတၢ်ဒဲးဘးအဃိ, ဒီးယူဒၤစ့ၢ်ကီးကလီၤ ဃံၤဃုာ်ဒီးအီၤလီၤ.
6 ကလဲၤဘၣ်ဝဲဒီးအသိဒီးအမဲာ်တဲးလဲး, ဒီးအဂီၤဘုၣ် ဂီၤဖံး ဒ်သိးအကဃုယွၤဘၣ်ဆၣ်ဒီး, တထံၣ်န့ၢ်ဘၣ်ဝဲ ဘၣ်. သုးကွံာ်အသးလၢအီၤလီၤ.
7 မၤလီယွၤအတၢ်လီၤ. အဂ့ၢ်ဒ်အံၤ, ထီၣ်ဖိပှၤတခီဘီ မုၢ်ဖိလီၤ. ခဲကနံၣ်အံၤလါတလါကအီၣ်ကွံာ်အီၤ, ဒီး အဂီၤတဖၣ်လီၤ.
8 အူကွဲၤလၢကံဘဧၤအပူၤ, ဒီးတနွဲလၢရၤမါအပူၤတ က့ၢ်. ကိးပသူထီၣ်ဖဲဘ့ၤသအၤဝ့ၣ်အပူၤတက့ၢ်. တၢ် အိၣ်ဝဲလၢနလီၢ်ခံလီၤ, ဘံၣ်ယၤမံၣ်ဧၢ.
9 လၢတၢ်သိၣ်ဃီၣ်အမုၢ်တနံၤန့ၣ် အ့ဖရဲၣ်ကအိၣ်သ ယုၢ်လီၤ. ယဘိးဘၣ်သ့ၣ်ညါ ပှၤအံၣ်စရ့လးအဒူၣ် တဖၣ်လၢတၢ်မ့ၢ်တၢ်တီလီၤ.
10 ယူဒၤအပဒိၣ်ဖးဒိၣ်တဖၣ် မၤသးဒ်ပှၤလၢအသုးကွံာ် ကီၢ်အဃၢၤအပနီၣ်အသိးလီၤ. ယကလူလီၤယသးကဲၤ ထီၣ်လၢအလိၤဒ်ထံအသိးန့ၣ်လီၤ.
11 အ့ဖရဲၣ်န့ၣ် ဘၣ်တၢ်မၤအၢအီၤ, သဘှံးဝဲလၢတၢ်စံၣ် ညီၣ်အဃိလီၤ. အဂ့ၢ်ဒ်အံၤ, လဲၤပိာ်တီနံဒၣ်ဝဲလၢတၢ် မၤလိာ်အခံလီၤ.
12 ဒီးယမၤသးဒ်တၢ်အဃၢ်လၢအ့ဖရဲၣ်အဂီၢ်, ဒီးဒ်တၢ် အုၣ်တၢ်ကျၣ်အသိးလၢယူဒၤအပှၤဟံၣ်ဖိအဂီၢ်လီၤ.
13 တုၤအ့ဖရဲၣ်န့ၣ် ထံၣ်ဘၣ်အတၢ်ဆါ, ဒီးယူဒၤန့ၣ်အ ပူၤလီၢ်ဒီး, အ့ဖရဲၣ်လဲၤဝဲဆူအၤရှူၢ်, ဒီးမၢလီၤတၢ်ဆူစီၤ ပၤလၢအဒုးတၢ်လီၤ. ဘၣ်ဆၣ်ဒီးမၤဘျါက့ၤ သုတသ့ ဘၣ်, မၤဘျါက့ၤသုပူၤလီၢ်တသ့ဘၣ်လီၤ.
14 အဂ့ၢ်ဒ်အံၤ, ယကမၤသးဒ်ခ့ယုၢ်တဒုအသိးလၢအ့ဖ ရဲၣ်အဂီၢ်, ဒီးဒ်ခ့ယုၢ်ဖိအသိးလၢယူဒၤအပှၤဟံၣ်ဖိအဂီၢ် လီၤ. ယဲဒၣ်, ယၤဒၣ်လဲာ်ယကအ့ၣ်ဖှီလီၤကွံာ်တၢ်, ဒီး ဟးထီၣ်ကွံာ်လီၤ. ယကစိာ်ထီၣ်တၢ်, ဒီးတၢ်မၤပူၤဖျဲး တၢ်တအိၣ်ဘၣ်.
15 ယကဟးထီၣ်, ဒီးလဲၤဆူ ယလီၢ်ဒၣ်ယဲတုၤအထံၣ် တၢ်ဒဲးဘးဒီးဃုယမဲာ်လီၤ. ဒီးတုၤအဘၣ်တၢ်ကိၢ်တၢ် ဂီၤဒီး, ကဃုယၤဂီၤဂီၤလီၤ.
6၆
1 ဟဲ, က့ၤက့ၤသကိးဆူယွၤအအိၣ်တက့ၢ်. အဂ့ၢ်ဒ် အံၤ, အ့ၣ်ဖှီပှၤဘၣ်ဆၣ်ဒီး, ကမၤဘျါက့ၤပှၤလီၤ. တီၢ် ပှၤဘၣ်ဆၣ်ဒီး, ကဘိၣ်ဘံထီၣ်ပှၤလီၤ. 2 ခံနံၤအလီၢ်ခံ န့ၣ်ကမၤမူထီၣ်က့ၤပှၤလီၤ. သၢနံၤတနံၤန့ၣ် ကဒုးဂဲၤ ဆၢထၢၣ်ပှၤ, ဒီးပကမူလၢအမဲာ်ညါလီၤ.
3 မ်ပသ့ၣ်ညါယွၤ, ဒီးလူၤတၢ်ဒ်သိး ပကသ့ၣ်ညါအီၤ တက့ၢ်. အလဲၤတၢ်န့ၣ်အိၣ်ခၢၣ်သနၢၣ်ဒ်မုၢ်ဆ့ၣ်ထီၣ်အ သိး, ဒီးကဟဲဘၣ်ပှၤဒ်တၢ်ဟဲစူၤအသိး, ဒ်တၢ်ဟဲစူၤအ လီၢ်ခံတဘျီ, လၢအမၤဘၣ်စီၣ်ဟီၣ်ခိၣ်လီၤ.
4 အ့ဖရဲၣ်ဧၢ, ယကမၤနၤဒ်လဲၣ်. ယူဒၤဧၢ, ယကမၤ နၤဒ်လဲၣ်. အဂ့ၢ်ဒ်အံၤ, သုတၢ်ဂ့ၤမၤသးဒ်မုၢ်ဂီၤအတၢ် အၢၣ်အသိး, ဒီးဒ်ပစီၤထံလၢအဒံကွံာ်ဝဲလၢဂီၤဂီၤအသိး န့ၣ်လီၤ.
5 မၤသးဒ်န့ၣ်ဒီးယကူာ်လီၤအီၤလၢဝံတဖၣ်, ဒီးမၤသံ အီၤလၢယထးခိၣ်အတၢ်ကတိၤလီၤ. ဒီးတၢ်စံၣ်ညီၣ်နၤ န့ၣ်လဲၤတၢ်ဒ်တၢ်ကပီၤအသိးန့ၣ်လီၤ.
6 အဂ့ၢ်ဒ်အံၤ, ဘၣ်ယသးလၢ တၢ်သူၣ်ကညီၤသးက ညီၤ, ဒီးတမ့ၢ်ဘၣ်လၢတၢ်လုၢ်တၢ်န့ၣ်ဘၣ်. ဒီးဘၣ်ယ သးလၢတၢ်သ့ၣ်ညါယွၤဒိၣ်န့ၢ်တၢ်လုၢ်မ့ၣ်အူတက့ၢ်လီၤ.
7 ဘၣ်ဆၣ်ဒီး အဝဲသ့ၣ်ဒ်စီၤအၤဒၣ်အသိး, မၤဟးဂီၤ တၢ်အၢၣ်လီၤအီလီၤလီၤ. ဖဲန့ၣ်မၤထီဒါယၤလၢတၢ်လီ တၢ်ဝ့ၤလီၤ.
8 ကံးလဧးန့ၣ် မ့ၢ်ပှၤလၢအမၤတၢ်အၢအဝ့ၢ်လီၤ. ဘၣ် အၢဒီးတၢ်သွံၣ်လီၤ.
9 ဒ်တမျာ်တဖုခိးခူသူၣ်လၢ ပှၤကညီတဂၤအဂီၢ်အသိး န့ၣ်ပှၤလုၢ်တၢ်အဒိၣ်တဖု မ့ၢ်ဒ်န့ၣ်သိးလီၤ. မၤသံပှၤက ညီလၢကျဲလဲၤဆူၡက့ၣ်အပူၤလီၤ. မ့ၢ်မးတိာ်မၤတၢ်အၢ လီၤ.
10 ယထံၣ်တၢ်လၢအံၣ်စရ့လးအပှၤဟံၣ်ပူၤတမံၤ လၢအ လီၤပျံၤလီၤဖုးဝဲလီၤ. အ့ဖရဲၣ်မၤကမၣ်မုၣ်ကမၣ်ခွါ, အံၣ် စရ့လးဘၣ်အၢလီၤ.
11 ယူဒၤဧၢ, တၢ်ပာ်စ့ၢ်ကီးတၢ်ကူးတၢ် လၢနဂီၢ်တုၤယ ဒုးဟဲက့ၤကဒါက့ၤယပှၤဂီၢ်မုၢ်လၢအလဲၤကဲကုၢ်လီၤ.
7၇
1 တုၤယသါကမၤဘျါက့ၤ အံၣ်စရ့လးဒီး, အ့ဖရဲၣ်အ တၢ်ဒဲးဘးဒီးၡၤမရံအမၤတၢ်အၢန့ၣ်အိၣ်ဖျါထီၣ်လီၤ. အ ဂ့ၢ်ဒ်အံၤ, ကတိၤတၢ်ကဘျံးကဘျၣ်, ဒီးပှၤဟုၣ်တၢ်ဟဲ နုာ်, ဒီးတမျာ်တဖုဂုာ်ဆူၣ်ပျီဆူၣ်တၢ်လၢခိလီၤ.
2 ဒီးအဝဲသ့ၣ် တစံးဘၣ်လၢအသးကံၢ်ပူၤ လၢယသ့ၣ် နီၣ်ထီၣ်က့ၤအတၢ်အၢခဲလၢာ်န့ၣ်ဘၣ်. ခဲကနံၣ်အံၤအ တၢ်မၤတဖၣ်အိၣ်ဝးတရံးအီၤ, အိၣ်ဝဲလၢယမဲာ်ညါလီၤ.
3 ဒုးသးခုအစီၤပၤလၢအတၢ်အၢ, ဒီးပဒိၣ်ဖးဒိၣ်တဖၣ် လၢတၢ်ကတိၤကဘျံးကဘျၣ်လီၤ. 4 မ့ၢ်ဝဲလၢပှၤမၤက မၣ်ပမါပဝၤခဲလၢာ်, မၤသးဒ်ဖၣ်ကပူၤလၢပှၤကုၢ်ကိၣ်မၤ ကိၢ်ထီၣ်အီၤအသိးန့ၣ်, လၢအဆိတ့ၢ်မၤကိၢ်ထီၣ်အီၤလၢ အစံၢ်ကိၣ်သံကစဲာ်လံၤလံၤတုၤကိၣ်မံၣ်မၤဖးထီၣ်ဝဲလီၤ.
5 လၢစီၤပၤအမုၢ်တနံၤန့ၣ် ပဒိၣ်ဖးဒိၣ်မၤမူၤအသးလၢ စပံးထံအတၢ်ကိၢ်လီၤ. စီၤပၤယူာ်ထီၣ်ဃုာ်အစုဒီးပှၤဒုၣ်ဒွဲၣ်တၢ်လီၤ.
6 အဂ့ၢ်ဒ်အံၤ, သုးဘူးအသးအိၣ်ဒီးအသး ဒ်ဖၣ်ကပူၤ အသိးလၢအအိၣ်ခိးခူသူၣ်အဖၢမုၢ်န့ၣ်လီၤ. ပှၤကုၢ်ကိၣ် တဂၤမံဝဲသီတနၢၤကျၢၤလီၤ. မုၢ်ဆ့ၣ်ထီၣ်န့ၣ်အီၣ်တၢ် ဒ်မ့ၣ်လၣ်အသိးန့ၣ်လီၤ.
7 အဝဲသ့ၣ်ခဲလၢာ်န့ၣ် ကိၢ်ဝဲဒ်ဖၣ်ကပူၤအသိး, ဒီးအီၣ် ကွံာ်အပှၤစံၣ်ညီၣ်ကွီၢ်, အစီၤပၤခဲလၢာ်လီၤဃံၤလံ. ပှၤ ကိးထီၣ်ယၤအံၤတအိၣ်ဘၣ်လၢအကျါနီတဂၤဘၣ်.
8 အ့ဖရဲၣ်မၤဃါဃုာ်အသးဒီး ပှၤကလုာ်တဖၣ်, အ့ဖ ရဲၣ်မ့ၢ်ကိၣ်ဘ့ၣ်ဘၣ်တဘ့ၣ်လၢ တၢ်တမၤကဒါဘၣ်အီၤ ဘၣ်.
9 ပှၤတခီဘီမုၢ်ဖိအီၣ်ကွံာ်အဂံၢ်အဘါဘၣ်ဆၣ်ဒီး, အ ဝဲဒၣ်တသ့ၣ်ညါဘၣ်ဝဲဘၣ်, ဒီးခိၣ်သူဝါအိၣ်ဝဲဖဲအံၤဖဲနုၤ လၢအခိၣ်လိၤဘၣ်ဆၣ်ဒီး, တသ့ၣ်ညါဘၣ်ဝဲဘၣ်.
10 ဒီးအံၣ်စရ့လး အသးထီၣ်ထီန့ၣ် အုၣ်အသးလၢအ မဲာ်ညါဘၣ်ဆၣ်ဒီး, တဃၣ်အသးဆူ ယွၤအကစၢ်အ အိၣ်ဘၣ်. ဒီးလၢတၢ်ခဲလၢာ်န့ၣ်အဃိတဃုဘၣ်အီၤဘၣ်.
11 ဒီးအ့ဖရဲၣ်မၤသးဒ်ထိၣ်လွံၢ်တဘ့ၣ်အသိး လၢအသး တဖးဘၣ်. လၢအနၢ်ပၢၢ်တၢ်တအိၣ်ဘၣ်အသိးလီၤ. ကိး ဝဲဆူအဲၤကူပတူး, လဲၤဝဲဆူအၤရှူၢ်လီၤ.
12 တုၤအလဲၤဒီး, ယကဟုးယပှာ်လၢအဖီခိၣ်, ယက ထုးလီၤအီၤ ဒ်မူကပိာ်လိၤအထိၣ်ဧိၤလံၣ်ဧိၤအသိး န့ၣ် လီၤ. ယကသိၣ်ဃီၣ်အီၤ, ဒ်အတၢ်အိၣ်ဖှိၣ်နၢ်ဟူဝဲအ သိးန့ၣ်လီၤ.
13 အဝဲသ့ၣ်တဖၣ်န့ၣ်ဘၣ်အဖှီၣ်လီၤ. အဂ့ၢ်ဒ်အံၤ, ဟး ကွံာ်ဝဲလၢယအိၣ်လီၤ. မ်အဘၣ်တၢ်မၤဟးဂီၤအီၤ တ က့ၢ်. အဂ့ၢ်ဒ်အံၤ, မၤကမၣ်ဘၣ်ယၤလီၤ. ယသါကပှ့ၤ က့ၤအီၤဘၣ်ဆၣ်ဒီး, ကတိၤတၢ်ကဘျံးကဘျၣ်လၢယ ဂ့ၢ်လီၤ.
14 ဒီးတကိးထီၣ်ယၤလၢအသးဘၣ်. မ့မ့ၢ်အဟီၣ်ပသူ ထီၣ်လၢအလီၢ်မံပူၤလီၤ. အိၣ်ဖှိၣ်ရိဖှိၣ်လၢဘုဧိၤဟုဧိၤ, ဒီးစပံးထံအသီအဂီၢ်, ဒီးပူထီၣ်ယၤလီၤ.
15 ယသိၣ်ဃီၣ်အီၤ, ဒီးမၤဆူၣ်ထီၣ်အစုဒုၣ်ဘၣ်ဆၣ်ဒီး, ကူၣ်ထီၣ်တၢ်အၢထီဒါယၤလီၤ.
16 ဃၣ်အသးဘၣ်ဆၣ်ဒီး တမ့ၢ်ဘၣ်ဆူတၢ်ထီကတၢၢ် အအိၣ်ဘၣ်. မၤသးဒ်ချံၣ်လၢအလီတၢ်တဘ့ၣ် အသိး န့ၣ်လီၤ. အပဒိၣ်ဖးဒိၣ်တဖၣ်ကလီၤဃံၤလၢနးဧိၤဘီဧိၤ လၢအကတိၤတၢ်လၢအသးထီၣ်အဃိလီၤ. အန့ၣ်ကကဲ ထီၣ်အတၢ်ဒုၣ်ဒွဲၣ်အလီၢ်လၢကီၢ်အဲၤကူပတူးအပူၤလီၤ.
8၈
1 ပာ်ကွဲၤလၢနထးခိၣ်တက့ၢ်. ဒ်လံာ်ကြီကြာ်အသိး, ဟဲဝဲထီဒါယွၤအပှၤဟံၣ်ဖိလီၤ. အဂ့ၢ်ဒ်အံၤ, မၤဟးဂီၤ ယတၢ်အၢၣ်လီၤအီလီၤ, ဒီးလုၣ်သ့ၣ်ခါပတာ် ယတၢ် သိၣ်တၢ်သီလီၤ.
2 အံၣ်စရ့လးကကိးဘၣ်ယၤ, ယကစၢ်ဧၢ, ပသ့ၣ်ညါ နၤလီၤ.
3 အံၣ်စရ့လးညိကွံာ်လံတၢ်အဂ့ၤလီၤ. တၢ်အဒုၣ်အဒါ ကလူၤအီၤလီၤ.
4 ပာ်ထီၣ်လံစီၤပၤဘၣ်ဆၣ်ဒီး, တမ့ၢ်ဘၣ်လၢယၤဘၣ်. ပာ်ထီၣ်လံပဒိၣ်ဖးဒိၣ်ဘၣ်ဆၣ်ဒီး, ယတသ့ၣ်ညါဘၣ် အီၤဘၣ်. တ့တၢ်ဂီၤတဖၣ်လၢအစ့, ဒီးအထူဒ်သိးအ ကဘၣ်တၢ်ဒီၣ်တူာ်ကွံာ်အီၤလီၤ.
5 ၡၤမရံဧၢ, အဝဲဒၣ်ညိကွံာ်ဂီၤဖံးဖိတဒုန့ၣ်လံ. ယသး ကဲၤထီၣ်ဘၣ်အီၤလီၤ. အဝဲသ့ၣ်စီဆှံတသ့ဘၣ်ဆံးယံာ် လဲၣ်. 6 အဂ့ၢ်ဒ်အံၤ, ဟဲလၢအံၣ်စရ့လးလီၤ. ပှၤမၤတၢ် သ့ဖိမၤဝဲ, ဒီးတမ့ၢ်ဘၣ်ကစၢ်ဘၣ်. မ့ၢ်မးၡၤမရံအဂီၤဖံး ဖိကဘၣ်တၢ်မၤကၢ်လီၤကလဲအီၤလီၤ.
7 မ့ၢ်အဖှံကလံၤဒီး, ကကူးကလံၤသဝံးလီၤ. ဘုအဘိ တန့ၢ်ဘၣ်, တၢ်မဲထီၣ်န့ၣ်တသၣ်ထီၣ်ဘၣ်အချံအသၣ် ဘၣ်. မ့ၢ်သၣ်ထီၣ်ဘၣ်ဆၣ်ဒီး, ပှၤတခီဘီမုၢ်ဖိကယူၢ် လီၤကွံာ်အီၤလီၤ.
8 တၢ်ယူၢ်လီၤကွံာ်အံၣ်စရ့လးလီၤ. ခဲကနံၣ်အံၤအိၣ်ဝဲ လၢပှၤကလုာ်တဖၣ်အကျါ ဒ်သပၢၤလၢအတဘၣ်တၢ် အသးဘၣ်အသိးန့ၣ်လီၤ. 9 အဂ့ၢ်ဒ်အံၤ, လဲၤထီၣ်ဝဲဆူ အၤရှူၢ်အပူၤ ဒ်ကသ့ၣ်ယီၤအိၣ်တဒုဃီအသိးန့ၣ်လီၤ. အ့ ဖရဲၣ်န့ၣ်ဟ့ၣ်တၢ်အဲၣ်အဘူးအလဲလီၤ.
10 ဒီးမ့ၢ်ငါတၢ်လၢ ပှၤကလုာ်တဖၣ်အကျါဘၣ်ဆၣ်ဒီး, ခဲကနံၣ်အံၤယကထၢဖှိၣ်အီၤလီၤ. ဒီးတစိၢ်ဖိန့ၣ်ကဘၣ် တၢ်ကိၢ်တၢ်ဂီၤလၢပဒိၣ်ဖးဒိၣ်အစီၤပၤဃ့သွဲအဃိလီၤ.
11 မ့ၢ်အ့ဖရဲၣ်မၤအါထီၣ် တၢ်လုၢ်လီၢ်လၢတၢ်ဒဲးဘးအ ဂီၢ်ဒီး, တၢ်လုၢ်လီၢ်န့ၣ်ကဲထီၣ်တၢ်ဒဲးဘးလၢအဂီၢ်လီၤ.
12 ယကွဲးန့ၢ်အီၤလၢ ယတၢ်သိၣ်တၢ်သီ အကလးဘၣ် ဆၣ်ဒီး, ပာ်ဝဲဒ်ပှၤတခီဘီမုၢ်ဖိအတၢ်အသိးလီၤ.
13 တၢ်လၢတၢ်လုၢ်လၢ ပှၤမၤဘူၣ်ယၤန့ၣ် ပှၤလုၢ်တၢ် ညၣ်, ဒီးအီၣ်ဝဲလီၤ. ယွၤတတူၢ်လိာ်ဘၣ်ဝဲဘၣ်. ခဲကနံၣ် အံၤကသ့ၣ်နီၣ်ထီၣ်က့ၤအတၢ်အၢ, ဒီးအိၣ်သကိးအတၢ် ဒဲးဘးလီၤ. ကက့ၤကဒါက့ၤဆူအဲၤကူပတူးအပူၤလီၤ.
14 အဂ့ၢ်ဒ်အံၤ, အံၣ်စရ့လးသးပ့ၤနီၣ် ပှၤလၢအတ့လီၤ အီၤတဂၤ, ဒီးမၤထီၣ်တၢ်ဂီၤအဟံၣ်တဖၣ်, ဒီးယူဒၤမၤ အါထီၣ်ဝ့ၢ်အိၣ်ဒီးအခိၣ်ဒူလီၤ. မၤသးဒ်န့ၣ်ဒီးယကမၢ လီၤမ့ၣ်အူလၢအဝ့ၢ်တဖၣ်အပူၤ, ဒီးကအီၣ်ကွံာ်အနူၢ်အ စီၤတဖၣ်လီၤ.
9၉
1 အံၣ်စရ့လးဧၢ, သးခုတုၤလၢသူၣ်ပိၢ်သးပိၢ် ဒ်ပှၤက လုာ်တဖၣ်အသိးန့ၣ်တဂ့ၤ. အဂ့ၢ်ဒ်အံၤ, နဟးကွံာ်လၢ နကစၢ်အအိၣ်, ဒီးမၤကမၣ်မုၣ်ကမၣ်ခွါလီၤ. နအဲၣ်ဒိး တၢ်အဘူးအလဲလၢကယဲၢ်ယီၢ်ဘုအလီၢ်ပူၤခဲလၢာ်လီၤ.
2 ယီၢ်ဘုအလီၢ်မ့ၢ်ဂ့ၤ, နီၣ်စံၢ်စပံးသၣ်မ့ၢ်ဂ့ၤ, တဒုးအီၣ် အတၢ်ဘၣ်, ဒီးစပံးထံသီကလၢာ်ကွံာ်လၢအဂီၢ်လီၤ.
3 တအိၣ်တဆိးဘၣ်လၢယွၤအကီၢ်ပူၤဘၣ်, မ့မ့ၢ်အ့ဖ ရဲၣ်ကက့ၤက့ၤဆူအဲၤကူပတူးအပူၤ, ဒီးကအီၣ်တၢ်တ ကဆှီဘၣ်လၢအၤရှူၢ်အပူၤလီၤ.
4 အဝဲသ့ၣ်တလူလီၤဘၣ်စပံးထံလၢယွၤအဂီၢ်ဘၣ်, ဒီး အတၢ်လုၢ်တဖၣ်န့ၣ်တဘၣ်ဘၣ်အသးဘၣ်. ကကဲထီၣ် လၢအဂီၢ်ဒ်ပှၤသူၣ်အုးသးအုးအကိၣ်အသိးန့ၣ်လီၤ. က ယဲၢ်ပှၤလၢအအီၣ်ဝဲန့ၣ်ကကဲထီၣ်တၢ်တကဆှီဘၣ်. အ ဂ့ၢ်ဒ်အံၤ, အကိၣ်ကအိၣ်ဝဲလၢအဂီၢ်ဒၣ်ဝဲ, တဟဲနုာ်ဘၣ် လၢယွၤအဟံၣ်ဘၣ်.
5 တၢ်သ့ၣ်နံၤဖးသီအမုၢ်တနံၤ, ယွၤအမၤဘူၣ်မုၢ်တနံၤ အတီၢ်ပူၤန့ၣ်သုကမၤဒ်လဲၣ်. 6 အဂ့ၢ်ဒ်အံၤ, ကွၢ်ကွၢ်, ဟးထီၣ်ဝဲလၢတၢ်မၤဟးဂီၤအမဲာ်ညါလီၤ. အဲၤကူပတူး ကထၢဖှိၣ်အီၤ, မိၤအးကခူၣ်လီၤကွံာ်အီၤလီၤ. လးဆါ ကန့ၢ်အစုလီၢ်ခီၣ်ခိၣ်လၢအသးကွံဝဲ, တၤဆှုၣ်တၤမဲက အိၣ်ဝဲလၢအဒဲပူၤလီၤ.
7 တၢ်အိၣ်သကိးအမုၢ်နံၤတဖၣ်ဘၣ်လံ. တၢ်ဟ့ၣ်ကၣ် တၢ်အမုၢ်နံၤတဖၣ် ဘၣ်လံ. အံၣ်စရ့လးကသ့ၣ်ညါဝဲ လီၤ. ဝံဧိၤမီၣ်ဧိၤမ့ၢ်ပှၤဟးဂီၤဖိ, ပှၤအိၣ်ဒီးသးန့ၣ်မ့ၢ်ပှၤ ပျုၢ်, လၢနတၢ်အၢအါမံၤအဃိ, ဒီးလၢတၢ်ထိၣ်ဂဲၤသး ထီၣ်ဒိၣ်အဃိလီၤ.
8 အ့ဖရဲၣ် မ့ၢ်ပှၤခိးတၢ်ဖိလၢယကစၢ်လီၤ. ဝံဧိၤမီၣ်ဧိၤ န့ၣ်ပှၤမၤန့ၢ် ထိၣ်အပျံၤသကွီၤအိၣ်လၢ အကျဲခဲလၢာ်အ ပူၤ, တၢ်သးထီၣ်အိၣ်လၢအကစၢ်အဟံၣ်ပူၤလီၤ. 9 မၤ ဘၣ်အၢလီၤအသးလၢအဒိၣ်အယိာ် ဒ်လၢကံဘဧၤအ မုၢ်နံၤတဖၣ်အသိးန့ၣ်လီၤ. အဝဲဒၣ်ကသ့ၣ်နီၣ်ထီၣ်က့ၤ အတၢ်အၢ, ကအိၣ်သကိးအတၢ်ဒဲးဘးလီၤ.
10 ယထံၣ်န့ၢ်အံၣ်စရ့လး ဒ်စပံးသၣ်လၢ ပှၢ်မုၢ်ကနၢအ သိးန့ၣ်, ယပာ်သုပၢ်ဒ်ချၢၣ်ဒၢသၣ်မံဆိလၢသ့ၣ်ချၢၣ်ဒၢ သၣ်ထီၣ်ဆိအသိးန့ၣ်လီၤ. အဝဲသ့ၣ်လဲၤဝဲဆူဘဧၤလး ပဧိၢ်, ဒီးမၤလီၤဖးအသးလၢတၢ်မဲာ်ဆှးအလီၢ်အဂီၢ်, ဒီး ကဲထီၣ်တၢ်သးဘၢအၢအလီၢ်န့ၣ် ဒ်တၢ်လၢအအဲၣ်ဝဲအ သိးန့ၣ်လီၤ.
11 တၢ်လၢအ့ဖရဲၣ်န့ၣ် အလၤကပီၤ ကယူၤထီၣ်ကွံာ်ဒ် ထိၣ်တဘ့ၣ်အသိးန့ၣ်လီၤ. တၢ်တအိၣ်ဖျဲၣ်ဘၣ်, တၢ်ဒၢ အလီၢ်တအိၣ်ဘၣ်, တဒၢထီၣ်ဘၣ်ဝဲဘၣ်.
12 မ့ၢ်လုၢ်ထီၣ်အဖိအလံၤဘၣ်ဆၣ်ဒီး, ယကမၤစှီၢ်ကွံာ် အီၤလၢပှၤကညီအကျါလီၤ. တုၤယဟးထီၣ်လၢအအိၣ် ဒီး, မ့ၢ်မးကဘၣ်အဖှီၣ်လီၤ. 13 ယထံၣ်အ့ဖရဲၣ်ဒ်ဝ့ၢ်စိၢ် အသိးန့ၣ်သူၣ်အသးလၢအလီၢ်မုာ်လီၤ. ဘၣ်ဆၣ်ဒီးအ့ ဖရဲၣ်ကဟဲစိာ်ထီၣ် အဖိအလံၤဆူ ပှၤမၤသံပှၤကညီအ အအိၣ်လီၤ.
14 ယွၤဧၢ, ဟ့ၣ်တၢ်လၢအီၤတက့ၢ်. နကဟ့ၣ်လီၤအီၤ လၢမနုၤတမံၤလဲၣ်. ကဟ့ၣ်လီၤအီၤလၢ အဒၢအလီၢ် လၢအသၣ်လီၤပလ့ၤ, ဒီးနုၢ်လၢအကၤနုၢ်ထံလီၤ.
15 အတၢ်အၢခဲလၢာ်န့ၣ်အိၣ်ဝဲလၢကံးလကၤလးလီၤ. မ့ၢ် မးယသးဟ့အီၤဖဲန့ၣ်လီၤ. ယကဟီထီၣ်ကွံာ်အီၤလၢယ ဟံၣ်ပူၤလၢအမၤတၢ်အၢအဃိလီၤ. ယတအဲၣ်လၢၤဘၣ် အီၤဘၣ်. အပဒိၣ်ဖးဒိၣ်တဖၣ်မ့ၢ်ပှၤပူထီၣ်ဖိခဲလၢာ်လီၤ.
16 အ့ဖရဲၣ်ဘၣ်တၢ်ကျီကွံာ်အီၤ, အဂံၢ်ဃ့ထီကွံာ်, တ သၣ်ထီၣ်ဘၣ်တၤသၣ်ဘၣ်. မ့ၢ်ထီၣ်ဖိဘၣ်ဆၣ်ဒီး, ယ ကမၤသံတၢ်ဘၣ်ဃးဒီးအဒၢလီၢ်လၢအအဲၣ်ဝဲလီၤ.
17 ယွၤကညိကွံာ်အီၤလီၤ. အဂ့ၢ်ဒ်အံၤ, တဒိကနၣ်ဘၣ် အကလုၢ်ဘၣ်, ဒီးကကဲထီၣ်ပှၤဟးဝ့ၤဝီၤတၢ်လၢပှၤက လုာ်တဖၣ်အကျါလီၤ.
10၁၀
1 အံၣ်စရ့လး မ့ၢ်စပံးမုၢ်လၢ အဒ့ထီၣ်အါအါကလဲာ် လီၤ. သၣ်ထီၣ်တၤသၣ်လီၤ. ဒ်အတၤသၣ်ဂီၢ်မုၢ်အါထီၣ် အသိးန့ၣ်မၤအါထီၣ်အတၢ်လုၢ်လီၢ်လီၤ. ဒ်အကီၢ်ဂ့ၤဝဲ အသိးန့ၣ်တ့ဂ့ၤထီၣ်အတၢ်ဂီၤထူၣ်ကလာ်တဖၣ်လီၤ.
2 အသးဒ့ဒီဝဲလီၤ. ခဲကနံၣ်အံၤ, တၢ်ကထံၣ်န့ၢ်အတၢ် ကမၣ်လီၤ. တၢ်ကမၤလီၤပှီၢ်အတၢ်လုၢ်လီၢ်တဖၣ်, က မၤဟးဂီၤအတၢ်ဂီၤထူၣ်ကလာ်တဖၣ်လီၤ.
3 မ့ၢ်မးခဲကနံၣ်အံၤကစံးဝဲ, ပစီၤပၤတအိၣ်ဘၣ်. အဂ့ၢ် ဒ်အံၤ, ပတပျံၤဘၣ်ယွၤဘၣ်. မၤသးဒ်န့ၣ်ဒီးစီၤပၤကမၤ တၢ်လၢပဂီၢ်ဒ်လဲၣ်.
4 ကတိၤတၢ်ကတိၤ, အၢၣ်လီၤအီလီၤတၢ်ဒီး ဆိၣ်တၢ် တတီဘၣ်. တၢ်စံၣ်ညီၣ်မဲထီၣ်ဒ်သ့ၣ်ဖိစုၣ်လၢဟီၣ်ခိၣ် ကျိၤလၢအကဝီၤပူၤအသိးန့ၣ်လီၤ.
5 ပှၤၡၤမရံဖိကပျံၤတၢ်လၢ ဘ့ၤသအၤဝ့ၣ်အဂီၤဖံးဖိတ ဖၣ်အဃိလီၤ. အဂ့ၢ်ဒ်အံၤ, အပှၤဂီၢ်မုၢ်ကသးအုးလၢ အဃိ, ဒီးအပှၤလုၢ်တၢ်အဒိၣ်တဖၣ်ကစံၣ်ဝ့ၤဝီၤတၢ်လၢ အဃိ, လၢအလၤကပီၤအဃိလီၤ. အဂ့ၢ်ဒ်အံၤ, ဟးထီၣ် ကွံာ်ဝဲလီၤ. 6 တၢ်ကစိာ်ထီၣ်ကွံာ်အီၤဆူအၤရှူၢ်, လၢခိၣ် ဖးလၢစီၤပၤလၢအဒုးတၢ်အဂီၢ်လီၤ. အ့ဖရဲၣ်ကဒိးန့ၢ်တၢ် မဲာ်ဆှး, ဒီးအံၣ်စရ့လးကမဲာ်ဆှးလၢ အကူၣ်တၢ်ဒၣ်ဝဲ အဃိလီၤ.
7 တၢ်လၢၡၤမရံန့ၣ်အစီၤပၤ ဘၣ်တၢ်ဒီၣ်တဲာ်ကွံာ်အီၤ ဒ်တၢ်သဘှဲလၢထံဖံးခိၣ်အသိးန့ၣ်လီၤ.
8 အၤဝ့ၣ် အလီၢ်ထီၣ်ထီတဖၣ်, အံၣ်စရ့လးအတၢ်ဒဲး ဘးန့ၣ်ဟးဂီၤဝဲလီၤ. တၤဆှုၣ်ဒီးဘီထၢသၢဃိၣ်န့ၣ်က မဲထီၣ်လၢအတၢ်လုၢ်လီၢ်အဖီခိၣ်, ဒီးကစံးကစၢၢ်ကလိ, ကျၢၢ်ဘၢပှၤတက့ၢ်. ဒီးကစံးတၢ်စိခိၣ်, လီၤတဲာ်လၢပ လိၤတက့ၢ်.
9 အံၣ်စရ့လးဧၢ, လၢကံဘဧၤအမုၢ်နံၤတဖၣ် လံၤလံၤ န့ၣ်နမၤကမၣ်တၢ်လီၤ. အိၣ်ဝဲဖဲန့ၣ်လီၤ. တၢ်ဒုးသုးဒီး ပှၤတတီဘၣ်န့ၣ် ကချုးန့ၢ်အီၤလၢကံးလဧးအပူၤ တမ့ၢ် ဘၣ်ဧါ.
10 ယသးအိၣ်လၢယကသိၣ်ဃီၣ်အီၤဒီး, တုၤအစၢဃာ် အသးလၢအတၢ်ကမၣ်ခံမံၤအဃိန့ၣ်ဒီး, ပှၤကလုာ်တ ဖၣ်ကအိၣ်ဖှိၣ်ရိဖှိၣ်ထီဒါအီၤလီၤ.
11 ဒီးအ့ဖရဲၣ်မၤသးဒ်ဂီၤဖံးမိၢ် လၢအမၤလိတ့ၢ်တၢ်အ သိးန့ၣ်, အဲၣ်ဒိးယီၢ်လီၤဘု, ဘၣ်ဆၣ်ဒီးယကလဲၤတြူာ် လၢအကိာ်ဂ့ၤအလိၤလီၤ. ယကဒုးဒိးပှၤတဂၤလၢ အ့ဖ ရဲၣ်အလိၤ, ယူဒၤကထဲၣ်တၢ်, ဒီးယၤကိာ်ကမၤလီၤက လဲဟီၣ်ခိၣ်အလိၣ်ခဲလၢာ်လီၤ.
12 ဖှံတၢ်လၢသုဂီၢ်လၢတၢ်တီတၢ်လိၤ, ကူးတၢ်လၢတၢ် ဘျုးတၢ်ဖှိၣ်, မၤလီၤကလဲဟီၣ်ခိၣ်လၢ ပှၤထဲၣ်တ့ၢ်အီၤ တက့ၢ်. အဂ့ၢ်ဒ်အံၤသုဃုယွၤတုၤအဟဲဒုးစူၤဘၣ်သုလၢ တၢ်တီတၢ်လိၤန့ၣ်အမုၢ်အလါဘၣ်လံဝဲလံ.
13 သုထံၣ်လံတၢ်အၢ, သုကူးလံတၢ်ဒဲးဘး, သုအီၣ်လံ တၢ်ကတိၤကဘျံးကဘျၣ် အတၤသၣ်လံ. မ့ၢ်နသန့ၤန သးလၢနကျဲ, လၢနပှၤအဆူၣ်အါဂၤလီၤ. 14 တၢ်တၢ ထီၣ်တၢလီၤကအိၣ်ထီၣ်လၢနပှၤဂီၢ်မုၢ်အကျါ, ဒီးနတိာ် ဧိၤတာ်ဧိၤခဲလၢာ် ကဘၣ်တၢ်မၤဟးဂီၤအီၤ, ဒ်ၡၤလမၣ် မၤဟးဂီၤဘ့ၤသအၢ်ဘလးလၢ ဒုးသုးအမုၢ်တနံၤအပူၤ အသိးန့ၣ်လီၤ. ပှၤစုးလီၤပှၤအမိၢ်ဒီးအဖိအလံၤတပူၤဃီ လီၤ.
15 ဒီးကမၤသုလၢ ဘ့ၤသ့လးအပူၤ ဒ်န့ၣ်သိးလၢသုတၢ် ဒဲးဘးဒိၣ်အဃိလီၤ. မုၢ်ဆ့ၣ်ထီၣ်န့ၣ်အံၣ်စရ့လး အစီၤ ပၤန့ၣ်ကဘၣ်တၢ်ဒီၣ်တဲာ်ကွံာ်အီၤ လၢာ်လ့ၤတက့ၤလီၤ.
11၁၁
1 လၢအံၣ်စရ့လးမ့ၢ်ဖိသၣ်န့ၣ်ယအဲၣ်အီၤ, ဒီးယကိးန့ၢ် ယဖိခွါလၢအဲၤကူပတူးအပူၤလီၤ. 2 တၢ်ဒံးကိးအီၤဒံးဟး ထီၣ်လၢအအိၣ်လီၤ. လုၢ်တၢ်လၢဘဧၤလးတဖၣ်, ဒီး ဆိၣ်ကဲၤထီၣ်တၢ်နၢမူလၢတၢ်ဂီၤစိးပျၤအသးအဂီၢ်လီၤ.
3 ယဟံးန့ၢ်အ့ဖရဲၣ်အစုသတးဒီး, ယဒုးဟးလိသိၣ်လိ အီၤလီၤ. ဘၣ်ဆၣ်ဒီးတသ့ၣ်ညါဘၣ်ဝဲလၢ ယမၤဘျါ က့ၤအီၤဘၣ်.
4 ယမိၤအီၤလၢပှၤကညီအပျံၤ, လၢတၢ်အဲၣ်အပျံၤလီၤ. ဒီးယမၤသးဒ်ပှၤလၢ အစိာ်ထီၣ်ကွံာ်နီၣ်ယိးဘိလၢ အ ကိာ်လိၤအသိးန့ၣ်, ဒီးယပာ်လီၤတၢ်အီၣ်လၢအဂီၢ်, ယ ဒုးအီၣ်အီၤလီၤ.
5 တက့ၤက့ၤဘၣ်ဆူကီၢ်အဲၤကူပတူးအပူၤဘၣ်. အၤရှူၢ် ကကဲထီၣ်အစီၤပၤလီၤ. အဂ့ၢ်ဒ်အံၤ, တဃၣ်လိၤဘၣ် အသးဘၣ်, 6 ဒီးနးဧိၤဘီဧိၤကအိၣ်လၢအဝ့ၢ်တဖၣ်, ဒီး ကမၤလၢာ်ကွံာ်အတိာ်ဧိၤတာ်ဧိၤ, ဒီးအီၣ်ကွံာ်အီၤလၢအ ကူၣ်တၢ်အဃိလီၤ. 7 အဂ့ၢ်ဒ်အံၤ, ယပှၤဂီၢ်မုၢ်တိာ်ဝဲလၢ အကက့ၤကဒါက့ၤလၢအအိၣ်လီၤ. တၢ်ကိးအီၤဆူတၢ် ထီကတၢၢ်အအိၣ်ဘၣ်ဆၣ်ဒီး, တပာ်ထီၣ်ထီဘၣ်အီၤနီ တဂၤဘၣ်.
8 အ့ဖရဲၣ်ဧၢ, ယကဟ့ၣ်လီၤကွံာ်နၤဒ်လဲၣ်, အံၣ်စရ့ လးဧၢ, ယကဟ့ၣ်လီၤကွံာ်နၤဒ်လဲၣ်, ယကပာ်နၤဒ်အၤ ဒမၤအသိးဒ်လဲၣ်, ယကပာ်လီၤနၤဒ် စဘိအံၣ်အသိးဒ် လဲၣ်. ယသးလဲလိာ်အသးလၢယပူၤ, ယသးကညီၤတၢ် န့ၣ်ကဲၤထီၣ်တပူၤဃီလီၤ.
9 ယတမၤဘၣ် ယသးထီၣ်အတၢ်သးကဲၤထီၣ်, ယတ မၤဟးဂီၤဘၣ်အ့ဖရဲၣ်ဘၣ်. အဂ့ၢ်ဒ်အံၤ, ယမ့ၢ်ကစၢ်, ဒီးတမ့ၢ်ဘၣ်ပှၤကညီဘၣ်, မ့ၢ်တၢ်စီဆှံတဂၤလၢနကျါ လီၤ. ဒီးယတဟဲဘၣ်လၢယသးထီၣ်ဘၣ်. 10 တုၤအကိး ထီၣ်ရုၢ်ရုၢ်ဒ်ခ့ယုၢ်အသိးဒီး, ကလဲၤပိာ်ယွၤအခံလီၤ. က ကိးပသူထီၣ်ဒီး, ဖိသၣ်တဖၣ်န့ၣ်ကဟဲကနိးကစုာ်တၢ် လၢမုၢ်နုာ်တခီလီၤ.
11 ကဟဲဝဲကနိးကစုာ် ဒ်ထိၣ်ဖိလၢအဲၤကူပတူးအပူၤအ သိး, ဒီးဒ်ထိၣ်လွံၢ်လၢကီၢ်အၤရှူၢ်အပူၤသိးန့ၣ်, ဒီးယ ကဒုးအိၣ်ဒုးဆိးအီၤလၢအဟံၣ်တဖၣ်အပူၤလီၤ, ယွၤစံး ဝဲဒၣ်.
12 အ့ဖရဲၣ်ဝီၤဃာ်ယၤလၢတၢ်ကတိၤကဘျံးကဘျၣ်, ဒီး အံၣ်စရ့လးအပှၤဟံၣ်ဖိလၢလီတၢ်လီၤ. မ့မ့ၢ်ယူဒၤန့ၣ် ပၢဒံးတၢ်ဒီးယွၤ, ဒီးအကလုၢ်တီဝဲဒီးပှၤစီဆှံတဂၤလီၤ.
12၁၂
1 အ့ဖရဲၣ်အီၣ်ကလံၤ, ဒီးလူၤပိာ်ကလံၤမုၢ်ထီၣ်အခံလီၤ. မၤအါထီၣ်တၢ်ကတိၤကဘျံးကဘျၣ်, ဒီးတၢ်ဂုာ်ဆူၣ်ပျီ ဆူၣ်ကိးမုၢ်နံၤမုၢ်နၤဒဲး, ဒီးအၢၣ်လီၤအီလီၤတၢ်ဒီးအၤရှူၢ် လီၤ. ဒီးပှၤစိာ်သိဧိၤချါဧိၤဆူ အဲၤကူပတူးအပူၤလီၤ.―
2 ယွၤအိၣ်ဝဲဒီးတၢ်လိာ်ကွီၢ်ဒီးယူဒၤ, ဒီးကအိၣ်သကိးယၤ ကိာ်ဒ်အကျဲတဖၣ်အသိး, ဒ်အမၤတၢ်အသိးန့ၣ်ကဟ့ၣ် ကၣ်အီၤလီၤ.
3 ဟံးဃာ်အဝဲၢ်အခီၣ်နၢၣ်ခံလၢဒၢလီၢ်အပူၤ, ဒီးမၤပဒိၣ် အသးဒီးယွၤလၢအဂံၢ်အဘါလီၤ. 4 မၤပဒိၣ်အသးဒီးက လူးတဂၤန့ၣ်ဒီးမၤဃၣ်ဝဲလီၤ. အမဲာ်ထံလီၤဒီး, ဃ့က ညးဝဲလီၤ. ထံၣ်န့ၢ်အီၤလၢဘ့ၤသ့လးအပူၤ, ဒီးဖဲန့ၣ်, ကတိၤတၢ်ဒီးပှၤ, 5 ယွၤတၢ်သုးမုၢ်ဂီၢ်မုၢ်အကစၢ်ဒၣ်လဲာ်, ယွၤမ့ၢ်အနီၣ်သ့ၣ်နီၣ်ထီၣ်က့ၤတၢ်လီၤ.
6 ဒီးခဲကနံၣ်အံၤ က့ၤကဒါက့ၤဆူနကစၢ်အအိၣ်, တိၢ် န့ၢ်တၢ်ဘျုးတၢ်ဖှိၣ်ဒီးတၢ်စံၣ်ညီၣ်, ဒီးအိၣ်ခိးနကစၢ်တ ထံၣ်ဃီတက့ၢ်.
7 တၢ်လၢပှၤကနၤဧၣ်ဖိန့ၣ် စီၤပီၢ်လီတၢ်အိၣ်ဝဲလၢအစု ပူၤလီၤ. အဲၣ်ဒိးတၢ်မၤအၢတၢ်လီၤ.
8 ဒီးအ့ဖရဲၣ်စံးဝဲဒၣ်, မ့ၢ်မးယထူးထီၣ်တီၤထီၣ်လီၤ. ယ ထံၣ်န့ၢ်တၢ်အစုလီၢ်ခီၣ်ခိၣ်လီၤ. ယမၤတၢ်ခဲလၢာ်အကျါ န့ၣ်တၢ်ပာ်တၢ်ဒဲးဘးလၢယလိၤအလီၢ်တအိၣ်ဘၣ်.
9 ဘၣ်ဆၣ်ဒီး ယၤယွၤအံၤယမ့ၢ်နကစၢ်လၢ အဲၤကူပ တူးအပူၤလံၤလံၤန့ၣ်လီၤ. ယကဒုးအိၣ်ဒုးဆိးနၤလၢ ဒဲ တဖၣ်အပူၤ, ဒ်လၢမၤဘူၣ်အနံၤတဖၣ် အတီၢ်ပူၤအသိး န့ၣ်လီၤ.
10 ဒီးယကတိၤလံတၢ်ဒီးဝံတဖၣ်, ဒီးယမၤထီၣ်လံတၢ် ထံၣ်တၢ်လၢညါခီ, ဒီးကတိၤလံတၢ်ကတိၤဒိလၢဝံအစု ပူၤလံလီၤ.
11 မ့ၢ်မးကံးလဧးအၢဝဲလီၤ. မ့ၢ်မးမၤလီတၢ်လီၤ. ပှၤလုၢ် ဂီၤဖံးလၢကံးလကၤလးအပူၤ, ဒီးအတၢ်လုၢ်လီၢ်တဖၣ် န့ၣ်အိၣ်ဝဲဒ်တၢ်အပူလၢဟီၣ်ခိၣ်အကျိၤ ခူၣ်ကျိာ်လၢဟီၣ် ခိၣ်အကဝီၤပူၤအဖီခိၣ်အသိးန့ၣ်လီၤ.
12 ဒီးစီၤယၤကိာ်ဃ့ၢ်ဝဲဆူကီၢ်စူၤရံအပူၤ, ဒီးစီၤအံၣ်စရ့ လးမၤပှၤဂၤအတၢ်လၢအမါဂီၢ်, ဒီးကွၢ်သိဒီးမဲာ်တဲးလဲး လၢအမါအဂီၢ်လီၤ.
13 ဒီးယွၤဒုးဟးထီၣ်အံၣ်စရ့လးလၢ အဲၤကူပတူးအပူၤ, လၢဝံအစုပူၤ, ဒီးတၢ်ကွၢ်အီၤလၢဝံတဂၤလီၤ.
14 အ့ဖရဲၣ်ထိၣ်ဂဲၤတၢ်သးထီၣ်နးနးကလဲာ်လီၤ. မၤသး ဒ်န့ၣ်ဒီးအကစၢ်ကပာ်လီၤတဲာ် အတၢ်သွံၣ်လၢအလိၤ, ဒီးဒုးဘၣ်ကဒါက့ၤအီၤလၢအတၢ်ဒုၣ်ဒွဲၣ်လီၤ.
13၁၃
1 တုၤအ့ဖရဲၣ်ကတိၤတၢ်ဒီး, တၢ်ကနိးဝဲလီၤ. ပာ်ထီၣ် ထီအသးလၢအံၣ်စရ့လးအပူၤလီၤ. မ့မ့ၢ်တုၤအမၤကမၣ် တၢ်လၢဘဧၤလးအဃိဒီး, သံဝဲလီၤ.
2 ဒီးခဲကနံၣ်အံၤ မၤကမၣ်တၢ်အါထီၣ်အါထီၣ်, ဒီးတ့ တၢ်ဂီၤသိအသး, တၢ်ဂီၤစ့, ဒ်အတၢ်မၤသ့အသိးန့ၣ်လီၤ. တၢ်ခဲလၢာ်န့ၣ်မ့ၢ်ပှၤမၤတၢ်သ့ဖိအမၤတၢ်လီၤ. ပှၤလၢအ လုၢ်တၢ်စံးဝဲလၢအဂ့ၢ်န့ၣ်, မ်ပှၤနၢမူဂီၤဖံးဖိတဖၣ်တက့ၢ်.
3 မၤသးဒ်န့ၣ်ဒီး ကမၤသးဒ် မုၢ်ဂီၤအတၢ်အၢၣ်အသိး န့ၣ်, ဒီးဒ်မုၢ်ဆ့ၣ်အပစီၤထံ လၢအဒံကွံာ်အသိးန့ၣ်ဒ်ဖ့ လၢကလံၤအူဒံကွံာ်အီၤလၢယီၢ်ဘုအလီၢ်အသိးန့ၣ်, ဒီး ဒ်မ့ၣ်အူခုၣ်လၢတၢ်ထူၣ်ဖျိအပူၤအသိးန့ၣ်လီၤ.
4 ဘၣ်ဆၣ်ဒီးယဲဒၣ်အံၤ, ယမ့ၢ်နကစၢ်လၢအဲၤကူပတူး အပူၤလံၤလံၤ, ဒီးလၢယၤအံၤအမဲာ်ညါ, နတသ့ၣ်ညါ ဘၣ်ကစၢ်နီတဂၤဘၣ်. လၢယၤအံၤအမဲာ်ညါန့ၣ် တၢ် အုၣ်က့ၤခီၣ်က့ၤတအိၣ်ဘၣ်.
5 ယသ့ၣ်ညါနၤလၢပှၢ်မုၢ်ကနၢ, လၢကီၢ်ဘၣ်ဃးဒီးတၢ် သူအသးလၢထံနးနးကလဲာ်န့ၣ်လီၤ.
6 ဒ်တၢ်ဒုးအီၣ်အဆၣ်အသိးန့ၣ် ဘျဲးအီၣ်ဝဲလီၤ. အီၣ် ဘျဲးအီၣ်ဝဲ, ဒီးအသးထီၣ်ထီဝဲလီၤ. မၤသးဒ်န့ၣ်ဒီးသး ပ့ၤနီၣ်ယၤလီၤ.
7 ဒီးယကဲထီၣ်တၢ်ဒ်ခ့ယုၢ်တဒုလၢအဂီၢ်, ဒ်ခ့စံၣ်ပိၣ်အ သိးန့ၣ်ယအိၣ်ခိးအီၤလၢကျဲလီၤ. 8 ယသဂၢၢ်အီၤဒ်တၤ သူလၢအဖိဟါမၢ်အသိး, ဒီးယအ့ၣ်ဖှီအသးအသလီ, ဒီးယအီၣ်ကွံာ်အီၤဒ်ခ့ယုၢ်မိၢ်အသိးန့ၣ်, ဆၣ်ဖိကီၢ်ဖိအ မံၤတဖၣ်အ့ၣ်ဖှီကွံာ်အီၤလီၤ.
9 အံၣ်စရ့လးဧၢ, နမၤဟးဂီၤလီၤနသးလီၤ. ဘၣ်ဆၣ် ဒီးတၢ်မၤစၢၤနၤအိၣ်ဝဲလၢယပူၤလီၤ.
10 နစီၤပၤလၢအကအုၣ်က့ၤခီၣ်က့ၤနၤလၢ ဝ့ၢ်ခဲလၢာ်အ ပူၤန့ၣ်မ့ၢ်အအိၣ်ဖဲလဲၣ်. ဒီးနပှၤစံၣ်ညီၣ်ကွီၢ်လၢနစံးလၢ အဂ့ၢ်န့ၣ်ဟ့ၣ်လီၤယၤလၢစီၤပၤတဂၤ, ဒီးပဒိၣ်ဖးဒိၣ်တ ဖၣ်န့ၣ်မ့ၢ်အအိၣ်ဖဲလဲၣ်. 11 ယဟ့ၣ်လီၤနၤလၢစီၤပၤတဂၤ လၢယသးထီၣ်, ဒီးယဟံးထီၣ်ကွံာ်အီၤလၢယသးကဲၤ ထီၣ်လီၤ.
12 အ့ဖရဲၣ်အတၢ်အၢဘိၣ်ထီၣ်အသး, အတၢ်ဒဲးဘးပာ် ကီၤအသးလီၤ. 13 ပိာ်မုၣ်လၢအဘၣ်ဟုးဆါအတၢ်ဆိး ကဲးန့ၣ်ကဘၣ်အီၤလီၤ. မ့ၢ်ဖိခွါတဂၤလၢအကူၣ်တၢ်တ သ့ဘၣ်. မ့တမ့ၢ်ဘၣ်ဒ်န့ၣ်ဒီးတအိၣ်ယံာ်ဘၣ်လၢဖိသၣ် ဘၢၣ်ဖျိအလီၢ်ပူၤဘၣ်.
14 ယကမၤပူၤမၤဖျဲးအီၤလၢပျုၤအစုပူၤ, ဒီးယကပှ့ၤက့ၤ အီၤလၢတၢ်သံလီၤ. ဟဲး, တၢ်သံဧၢ, နတၢ်မၤသံအိၣ် ဖဲလဲၣ်. ပျုၤပူၤဧၢ, နတၢ်မၤဟးဂီၤအိၣ်ဖဲလဲၣ်. တၢ်ပီၢ် ယၢ်လီၤက့ၤယသးန့ၣ်အိၣ်တဒၢဒီးယမဲာ်လီၤ.
15 မ့ၢ်သၣ်ထီၣ်လၢအဒီပုၢ်ဝဲၢ်အကျါဘၣ်ဆၣ်ဒီး, ကလံၤ မုၢ်ထီၣ်ကဟဲ, ယွၤအကလံၤကဟဲထီၣ်လၢပှၢ်မုၢ်ကနၢ, ဒီးဒုးလီၤသံးအထံထီၣ်ပၢၢ်, ဒီးအထံမူန့ၣ်ကလီၤသံးကွံာ် လီၤ. ယကမၤဟးဂီၤလီခီလၢအဘၣ်ပှၤအသးလၢအတၢ် လုၢ်ဒိၣ်ပှ့ၤဒိၣ်ခဲလၢာ်လီၤ.
16 ၡၤမရံကအိၣ်သယုၢ်လီၤ. အဂ့ၢ်ဒ်အံၤ, ပူထီၣ်အက စၢ်လီၤ. ပှၤကလီၤဃံၤဝဲလၢနးဧိၤဘီဧိၤ, ပှၤကစုးလီၤအ ဖိဆံး, ဒီးကဖှဲးထီၣ်ပိာ်မုၣ်လၢအဒၢထီၣ်အဟၢဖၢလီၤ.
14၁၄
1 အံၣ်စရ့လးဧၢ, က့ၤကဒါက့ၤဆူ နကစၢ်ယွၤအအိၣ် တက့ၢ်. အဂ့ၢ်ဒ်အံၤ, နလီၤဃံၤလံလၢနတၢ်ဒဲးဘးအဃိ လံ.
2 ဟံးန့ၢ်တၢ်ကတိၤတဖၣ်, ဒီးက့ၤကဒါက့ၤဆူယွၤအ အိၣ်တက့ၢ်. စံးအီၤ, ပျၢ်ပတၢ်ဒဲးဘးခဲလၢာ်, ဒီးတူၢ် လိာ်ပှၤဧ့ၢ်ဂ့ၤတက့ၢ်. ဒီးပကဟ့ၣ်နၤလၢပပျုၤအတၢ်လုၢ် ဂီၤဖံးလီၤ.
3 အၤရှူၢ်တအုၣ်က့ၤခီၣ်က့ၤဘၣ်ပှၤဘၣ်, ပတဒိးဘၣ် ကသ့ၣ်ဘၣ်. ဒီးပတစံးလၢၤဘၣ်ပစုအမၤတၢ်လၢသုမ့ၢ် ပကစၢ်န့ၣ်ဘၣ်. အဂ့ၢ်ဒ်အံၤ, နသူၣ်အိၣ်သးအိၣ်ပှၤဖိၣ် ဃဲသ့ၣ်တဖၣ်လီၤ.
4 ယကမၤဘျါက့ၤအသးဟးဂီၤန့ၣ်လီၤ. ယကအဲၣ်က့ၤ ကွံက့ၤဒၣ်အီၤလီၤ. အဂ့ၢ်ဒ်အံၤ, ယသးထီၣ်ဃၣ်ကွံာ် လံအသးလၢအီၤလံ.
5 ယကမၤသးဒ် ပစီၤထံအသိး လၢအံၣ်စရ့လးအဂီၢ် လီၤ. ကမဲထီၣ်ဒ်ဖီဒ့ၣ်ညါအသိး, ဒီးကစဲၤလီၤအဂံၢ်ဒ် လဘၤနိၣ်အသိးန့ၣ်လီၤ.
6 အဒ့တဖၣ် ကယူာ်ထီၣ်အသး, ဒီးအတၢ်ဃံတၢ်လၤ ကမၤသးဒ်သ့ၣ်စၤယံးအသိး, ဒီးအနၢမူန့ၣ်ဒ်လဘၤနိၣ် အသိးန့ၣ်လီၤ.
7 ပှၤလၢအအိၣ်ဝဲဆိးဝဲလၢအဒဲပူၤန့ၣ် ကမူထီၣ်ဒ်ဘုဧိၤ ဟုဧိၤအသိး, ဒီးဒိၣ်ထီၣ်ဒ်စပံးမုၢ်အသိး, အမံၤကဟူ ထီၣ်သါလီၤဒ်လဘၤနိၣ်အစပံးထံအသိးန့ၣ်လီၤ.
8 အ့ဖရဲၣ်ကစံး, ယကမၤဒံးဒီး တၢ်ဂီၤတဖၣ်လၢမနုၤ လဲၣ်. ယစံးဆၢလံအီၤ, ဒီးယကအံးက့ၤကွၢ်က့ၤအီၤလီၤ. ယမၤသးဒ် သ့ၣ်ဆှိသံကစဲာ်တထံးအသိးန့ၣ်လီၤ. တၢ် ထံၣ်န့ၢ်နတၤသၣ်လၢယၤလီၤ.
9 မ့ၢ်မတၤကူၣ်တၢ်သ့ဒီး နၢ်ပၢၢ်တၢ်တဖၣ်အံၤ တဂၤ လဲၣ်. မ့ၢ်မတၤအိၣ်ဒီးတၢ်ကူၣ်တၢ်ဆးဒီးသ့ၣ်ညါအီၤန့ၣ် တဂၤလဲၣ်. အဂ့ၢ်ဒ်အံၤ, ယွၤအကျဲဧိၤကပူၤဧိၤန့ၣ်တီဝဲ လိၤဝဲ, ဒီးပှၤတီပှၤလိၤကလဲၤဝဲလၢအပူၤလီၤ. မ့မ့ၢ်ပှၤ မၤကမၣ်တၢ်ဖိန့ၣ် အခီၣ်ကဘၣ်တိၢ်ဘၣ်ထံးလၢအပူၤ လီၤ.