လံာ်ဃဘးကူာ်.

လံာ်ဃဘးကူာ်.

၁

¹ တၢ်အကလုၢ်လီၤလၢဝံဃဘးကူာ်ထံၣ်ဘၣ်ဝဲ.

² ယွၤဧၢ, ယဘၣ်ကိးထီၣ်တၢ်, ဒီးနတနၢ်ဟူဘၣ်ဆံး ယံာ်လဲၣ်. ယဘၣ်ကိးပသူထီၣ်လၢတၢ်မၤအၢဆူၣ်အဃိ, ဒီးနတအုၣ်က့ၤခီၣ်က့ၤဘၣ်န့ၣ်မ့ၢ်ဆံးယံာ်လဲၣ်. ³ နဒုး ထံၣ်ဘၣ်ယၤလၢတၢ်အၢတၢ်သီ, ဒီးနဒုးကွၢ်ယၤလၢတၢ် နးတၢ်ဖှီၣ်မ့ၢ်အဘၣ်မနုၤလဲၣ်. တၢ်မၤသယုၢ်, ဒီးတၢ်မၤ န့ၢ်ဆူၣ်အိၣ်ဝဲလၢယမဲာ်ညါ, ဒီးတၢ်အ့ၣ်လိာ်ဆိးက့လိာ် အိၣ်ထီၣ်ဝဲ, ဒီးတၢ်ဂ့ၢ်လိာ်ဘှီလိာ်ပာ်ထီၣ်ထီအသးလီၤ.

⁴ မၤသးဒ်န့ၣ်ဒီး တၢ်သိၣ်တၢ်သီစၢ်လီၤဝဲ, ဒီးတၢ်စံၣ် ညီၣ်တီတလဲၤထီၣ်လၢၤဘၣ်. အဂ့ၢ်ဒ်အံၤ, ပှၤတတီဘၣ် န့ၣ်မၤနၢၤပှၤတီလၢလီတၢ်လီၤ. မၤသးဒ်န့ၣ်ဒီး, တၢ်စံၣ် ညီၣ်ဒၢက့ၣ်လဲၤထီၣ်ဝဲဒၣ်လီၤ.

⁵ ကွၢ်တၢ်လၢပှၤကလုာ်တဖၣ်အကျါ, ဒီးကွၢ်ထံတၢ်, ဒီးကမၢကမၣ်, ဒီးပာ်ကမၢကမၣ်သုသးတက့ၢ်. အဂ့ၢ်ဒ် အံၤ, ယကမၤတၢ်မၤတမံၤ လၢသုမုၢ်နံၤတဖၣ်အပူၤလၢ ပှၤမ့ၢ်စံးဘၣ်တဲဘၣ်သုဘၣ်ဆၣ်ဒီး, သုတနာ်ဘၣ်. ⁶ အ ဂ့ၢ်ဒ်အံၤ, ကွၢ်ကွၢ်, ယကထိၣ်ဂဲၤဆၢထၢၣ်ပှၤက့ၤစ့းဖိ, ပှၤတကလုာ်လၢအမၤဆူၣ်တၢ်, ဒီးမၤချ့တၢ်, လၢအလဲၤ တၢ်လၢဟီၣ်ခိၣ်အလီၢ်ဖးလဲၢ် ဒ်သိးအကမၤန့ၢ်ဆူၣ်တၢ် အိၣ်ဝဲဆိးဝဲအလီၢ်လၢအတမ့ၢ်ဘၣ်အတၢ်ဒၣ်ဝဲဘၣ်.

⁷ မ့ၢ်တၢ်မၤပျံၤတၢ်အလီၢ်ဒီး တၢ်မၤဖုးတၢ်အလီၢ်လီၤ. အကွီၢ်, ဒီးအတၢ်ကဲဒိၣ်ဟဲထီၣ်ဝဲလၢအကစၢ်ဒၣ်ဝဲလီၤ.

⁸ အကသ့ၣ်န့ၣ် လဲၤတၢ်ချ့န့ၢ်ခ့စံၣ်ပိာ်တက့ၢ်, ဒီးဒူန့ၢ် ထွံၣ်မံၤလၢမုၢ်ဟါတက့ၢ်လီၤ. အကသ့ၣ်ပာ်ကဖိအသး ဒီးလဲၤသဖှိတၢ်, ကသ့ၣ်လၢအဟဲလၢအယံၤ, ဒီးယူၤဝဲဒ် လံာ်ကြီကြာ်လၢအယူၤချ့ဒ်သိး အကအီၣ်တၢ်အဂီၢ်အ သိးန့ၣ်လီၤ.

⁹ ဟဲဝဲခဲလၢာ်လၢတၢ်မၤန့ၢ်ဆူၣ်အဂီၢ်, အမဲာ်မၤသးဒ် ကလံၤမုၢ်ထီၣ်အသိးန့ၣ်, ထၢဖှိၣ်ပှၤကဲကုၢ်ဖိဒ်မဲးဧိၤဟီၣ် ဧိၤအသိးန့ၣ်လီၤ.

¹⁰ ဒီးမၤတရီတပါစီၤပၤတဖၣ်, ဒီးတပာ်ကဲဘၣ်ပဒိၣ်ဖး ဒိၣ်တဖၣ်, နံၤဘၣ်ဖၣ်လဲတိာ်ဧိၤတာ်ဧိၤကိးဖျၢၣ်ဒဲး, မၤ ပူဟီၣ်ခိၣ်, ဒီးမၤန့ၢ်ဝဲလီၤ.

¹¹ တုၤနုၤတစုအသးဆူၣ်ထီၣ်, ဒီးလဲၤပူၤတၢ်, ဒီးမၤတၢ် ဒဲးဘး, ပှၤလၢအစိအကမီၤမ့ၢ်အကစၢ်န့ၣ်လီၤ.

¹² ယွၤဧၢ, နအိၣ်တ့ၢ်လၢပျၢၤလၢကစၢၤကစၢၤ လီၤထူ လီၤယိာ်တမ့ၢ်ဘၣ်ဧါ, ယကစၢ်, ယတၢ်စီဆှံတဂၤဧၢ. ပတသံဘၣ်, ယွၤဧၢ. နပာ်အီၤလၢတၢ်စံၣ်ညီၣ်အဂီၢ်, ဒီး, လၢၢ်ဧၢ, နပာ်လီၤအီၤလၢတၢ်သိၣ်ဃီၣ်အဂီၢ်လီၤ.

¹³ နမဲာ်စီဆှံန့ၢ်နကွၢ်တၢ်ဒဲးဘးကဲတက့ၢ်လီၤ, ဒီးနကွၢ် ထံတၢ်တတီတလိၤဘၣ်န့ၣ်တကဲဘၣ်. နကွၢ်ပှၤမၤန့ၢ် ဆူၣ်တၢ်န့ၣ်မ့ၢ်အဘၣ်မနုၤလဲၣ်. တုၤပှၤတတီဘၣ်န့ၣ် မၤဟးဂီၤကွံာ် ပှၤလၢအတီန့ၢ်အကစၢ်ဒၣ်ဝဲန့ၣ်တက့ၢ် ဒီး, နအိၣ်ဃိကလာ်မ့ၢ်အဘၣ်မနုၤလဲၣ်. ¹⁴ နပာ်ပှၤကညီ ဒ်ပီၣ်လဲၣ်အညၣ်အသိးန့ၣ်, ဒ်တၢ်စွါလၢအခိၣ်တအိၣ်ဘၣ်အသိးန့ၣ် မ့ၢ်အဘၣ်မနုၤလဲၣ်.―

¹⁵ ထုးထီၣ်တၢ်ခဲလၢာ်လၢတခွဲ, မၤန့ၢ်ဝဲလၢအပှာ်ပူၤ, ဒီး ထုးထီၣ်န့ၢ်ဝဲလၢအသွ့ပူၤလီၤ. မၤသးဒ်န့ၣ်ဒီးသူၣ်ခုသး ခုဒီးသူၣ်ဖှံသးညီလီၤ.

¹⁶ မၤသးဒ်န့ၣ်ဒီး လုၢ်ထီၣ်တၢ်လၢအပှာ်, ဒီးဆိၣ်ကဲၤ ထီၣ်တၢ်နၢမူလၢ အသွ့အဂီၢ်လီၤ. အဂ့ၢ်ဒ်အံၤ, အဂီၢ် ဘီၣ်ထီၣ်လၢအီၤ, ¹⁷ ဒီးအတၢ်အီၣ်န့ၣ်မ့ၢ်တၢ်အဘီၣ်လီၤ. လၢအဝဲန့ၣ်အဃိကမၤအိၣ်ကလီအပှာ်, ဒီးမၤသံပှၤက လုာ်တဖၣ်တထံၣ်ဃီန့ၣ်တသးလီဝဲဘၣ်ဧါ.

၂

¹ ယကဆၢထၢၣ်လၢပၢၤတၢ်အလီၢ်, ဒီးယကပာ်ယသး လၢယတိာ်ယတာ်အဖီခိၣ်, ဒီးယကကွၢ်တၢ်လၢအက စံးဘၣ်ယၤဒ်လဲၣ်ဒ်လဲၣ်. ဒီးယကစံးဆၢတၢ်ဘၣ်ဃးဒီး ယကဒူးကဒ့ၣ်တၢ်ဒ်လဲၣ်ဒ်လဲၣ်န့ၣ်လီၤ.

² ဒီးယွၤစံးဆၢယၤဒီးစံးဝဲဒၣ်, ကွဲးတၢ်ထံၣ်လၢညါခီ, ဒီးကွဲးလၢတၢ်ဘ့ၣ်ဘၣ်အလိၤ, ဒ်သိးပှၤလၢအဖးတၢ်န့ၣ် ကဃ့ၢ်ဝဲတက့ၢ်.

³ အဂ့ၢ်ဒ်အံၤ, တၢ်ထံၣ်လၢညါခီန့ၣ်အိၣ်ဝဲလၢတၢ်အ ဆၢအကတီၢ်အဂီၢ်, ဒီးကကတိၤတၢ်လၢတၢ်အကတၢၢ်, ဒီးတကတိၤကဘျံးကဘျၣ်ဘၣ်. မ့ၢ်သုးနံၤသုးသီဘၣ် ဆၣ်ဒီး, အိၣ်ခိးအီၤတက့ၢ်. အဂ့ၢ်ဒ်အံၤ, ကဟဲသပှၢ် တၢၢ်ဒီးတသုးနံၤသုးသီဘၣ်.

⁴ ကွၢ်ကွၢ်, ပှၤလၢအပာ်ကဖိအသးန့ၣ် အသးတလိၤ လၢအပူၤဘၣ်. မ့မ့ၢ်ပှၤအတီအလိၤန့ၣ်ကမူဝဲလၢအတၢ် နာ်လီၤ.

⁵ ဒီးလၢန့ၣ်အမဲာ်ညါစပံးထံန့ၣ်လီန့ၢ်တၢ်လီၤ. ပှၤလၢ ပာ်ထီၣ်ထီအသးန့ၣ်တအိၣ်ဘှံးဘၣ်ဝဲဘၣ်. အဂ့ၢ်ဒ်အံၤ, မၤလဲၢ်ထီၣ်အဆၢန့ၢ်တၢ်န့ၣ်ဒ်ပျုၤပူၤအသိးလီၤ. မၤသး ဒ်တၢ်သံအသိးန့ၣ်ဒီးတဘျဲးအီၣ်ဘၣ်. မ့ၢ်အထၢဖှိၣ်ပှၤ ကလုာ်ခဲလၢာ်လၢအဂီၢ်, ဒီးပာ်ထီၣ်ပှၤဂီၢ်မုၢ်ခဲလၢာ်တ ပူၤဃီလၢအဂီၢ်လီၤ.

⁶ အဝဲသ့ၣ်ခဲလၢာ်ကကတိၤဒိတၢ်ထီဒါအီၤ, ဒီးကက တိၤခီတၢ်ထီဒါအီၤ, ဒီးကစံး, ပှၤလၢအမၤအါထီၣ်တၢ် လၢအတမ့ၢ်ဘၣ်အတၢ်ဒၣ်ဝဲဘၣ်, ဒီးဟံးန့ၢ် တၢ်ဟ့ၣ် ကီၤအါမံၤန့ၣ်ဘၣ်အဖှီၣ်လီၤ, ဆံးယံာ်လဲၣ်.

⁷ ကွၢ်ကွၢ်, ပှၤလၢအဟ့ၣ်နစ့အအ့ၣ်အဂီၢ်တဖၣ်န့ၣ်က ဂဲၤဆၢထၢၣ်သတူၢ်ကလာ်, ဒီးပှၤကဖုသံနီၣ်ထီၣ်လၢအ ကမၤဟူးဝးနၤနးနးကလဲာ်, တမ့ၢ်ဘၣ်ဧါ. ဒီးနကကဲ ထီၣ်အတၢ်ဂုာ်ဆူၣ်ပျီဆူၣ်လီၤ.

⁸ မ့ၢ်နဂုာ်န့ၢ်ပှၤအါကလုာ်ဒီး, ပှၤဂီၢ်မုၢ်လၢအအိၣ်လီၤ တဲာ်န့ၣ် ကဂုာ်န့ၢ်နၤလၢပှၤကညီအသွံၣ်အဃိ, ဒီးလၢ တၢ်မၤန့ၢ်ဆူၣ်ဟီၣ်ခိၣ်, ဒီးခူဧိၤဝ့ၢ်ဧိၤ, ဒီးကယဲၢ်ပှၤလၢ အအိၣ်အဆိးလၢအပူၤအဃိလီၤ.

⁹ ပှၤလၢအသးကွံအစုလီၢ်အခီၣ်ခိၣ် တတီဘၣ်လၢအ ဟံၣ်အဂီၢ်ဒ်သိးအကပာ်အသွံလၢတၢ်ထီၣ်ထီ ဒ်သိးအ ကပူၤဖျဲးဒီးတၢ်အၢအစုန့ၣ်ဘၣ်အဖှီၣ်လီၤ.

¹⁰ နဒီၣ်တဲာ်ကွံာ်ပှၤအါကလုာ်, ဒီးမၤကမၣ်လီၤနသးသ တးဒီး, နကူၣ်ထီၣ်တၢ်မဲာ်ဆှး လၢနပှၤဟံၣ်ဖိအမဲာ်လီၤ.

¹¹ အဂ့ၢ်ဒ်အံၤ, လၢၢ်လၢတၢ်အဒူၣ်ပူၤန့ၣ် ကိးထီၣ်ဝဲဒီး ကျိၤလၢသ့ၣ်ကျါန့ၣ်စံးဆၢအီၤလီၤ.

¹² ပှၤလၢအမၤထီၣ်အတဝီ လၢတၢ်သွံၣ်, ဒီးမၤကျၢၤ ထီၣ်အဝ့ၢ်လၢတၢ်မၤတတီဘၣ်န့ၣ်ဘၣ်အဖှီၣ်လီၤ.

¹³ ကွၢ်ကွၢ်, ကဲထီၣ်လၢတၢ်သုးမုၢ်ဂီၢ်မုၢ်အယွၤ လၢပှၤ ဂီၢ်မုၢ်မၤတၢ်လၢမ့ၣ်အူအဂီၢ်, ဒီးပှၤဂီၢ်မုၢ်မၤတၢ်လၢတၢ် မၤဘှံးအသးကလီကလီအဂီၢ်, တမ့ၢ်ဘၣ်ဧါ.

¹⁴ အဂ့ၢ်ဒ်အံၤ, ဟီၣ်ခိၣ်ကပှဲၤထီၣ်ဒီး တၢ်သ့ၣ်ညါယွၤ အလၤကပီၤ, ဒ်ထံလုၣ်ဘၢပီၣ်လဲၣ်အသိးန့ၣ်လီၤ.

¹⁵ ပှၤလၢအဟ့ၣ်သံးလၢပှၤလၢအဃၢၤ, ဒီးလူလီၤနသး ကဲၤထီၣ်, ဒီးဒုးအီမူၤအီၤဒ်သိးနကကွၢ်အတၢ်အိၣ်ဘ့ၣ် ဆ့န့ၣ်ဘၣ်အဖှီၣ်လီၤ.

¹⁶ နပှဲၤဒီးတၢ်မဲာ်ဆှး, တမ့ၢ်ဘၣ်ဒီးတၢ်လၤကပီၤဘၣ်. အီစ့ၢ်ကီးနဲ, ဒီးဒုးနဲၣ်လၢနတဒိးဘၣ်တၢ်ကူးတရံးဘၣ် န့ၣ်တက့ၢ်. လီခီလၢယွၤအစုထွဲအပူၤကဟဲတရံးဆူန အိၣ်, ဒီးတၢ်မဲာ်ဆှးကအိၣ်လၢနလၤကပီၤအဖီခိၣ်လီၤ.

¹⁷ အဂ့ၢ်ဒ်အံၤ, တၢ်မၤန့ၢ်ဆူၣ်လဘၤနိၣ်န့ၣ်ကကျၢၢ်ဘၢ နၤ, ဒီးတၢ်မၤဟးဂီၤဆၣ်ဖိကီၢ်ဖိလၢအမၤပျံၤမၤဖုးအီၤ, လၢပှၤကညီအသွံၣ်အဃိ, ဒီးလၢတၢ်မၤန့ၢ်ဆူၣ်ထံဧိၤ ကီၢ်ဧိၤ, ဒီးခူဧိၤဝ့ၢ်ဧိၤ, ဒီးကယဲၢ်ပှၤလၢအအိၣ်ဝဲလၢအ ပူၤခဲလၢာ်အဃိလီၤ.

¹⁸ တၢ်ဂီၤလၢပှၤတ့စိးပျၤဝဲ, တၢ်ဂီၤသိအသး, ဒီးပှၤသိၣ် လိတၢ်ကဘျံးကဘျၣ်, ပှၤတ့တၢ်ဂီၤတအုၣ်, ဒီးသန့ၤ အသးလၢတၢ်လၢအတ့ဝဲန့ၣ်မ့ၢ်အဘျုးမနုၤလဲၣ်.

¹⁹ ပှၤလၢအစံး သ့ၣ်ဧိၤဝၣ်ဧိၤ ဂဲၤဆၢထၢၣ်တက့ၢ်, ဒီး လၢၢ်ဧိၤလ့ဧိၤတအုၣ်န့ၣ် ဖုသံနီၣ်တက့ၢ်န့ၣ်ဘၣ်အဖှီၣ် လီၤ. အဝဲန့ၣ်ကသိၣ်လိတၢ်စ့ၢ်ကီးဧါ. ကွၢ်ကွၢ်, အဝဲ န့ၣ်ပီၤဝဲဒီးထူဒီးစ့ဘၣ်ဆၣ်ဒီး, အသါတအိၣ်ဘၣ်လၢအ ပူၤလ့ၤတက့ၤဘၣ်.

²⁰ မ့မ့ၢ်ယွၤအိၣ်ဝဲလၢအနူၢ်စီဆှံအပူၤလီၤ. အိၣ်ဘှီၣ်က လာ်လၢအမဲာ်ညါ, ပှၤဟီၣ်ခိၣ်ဖိခဲလၢာ်သ့ၣ်ဧၢ.

၃

¹ စီၤဃဘးကူာ်အတၢ်ထုကဖၣ်ဒ်ၡံကအိနိးအသိး.

² ယွၤဧၢ, ယနၢ်ဟူနကစီၣ်, ဒီးယပျံၤတၢ်. ယွၤဧၢ, လၢနံၣ်ဧိၤလါဧိၤအပူၤ မၤမူထီၣ်က့ၤနတၢ်မၤ, လၢနံၣ်ဧိၤလါဧိၤအပူၤန့ၣ်လီၣ်ဖျါထီၣ်အီၤတက့ၢ်. သ့ၣ်နီၣ်ထီၣ်က့ၤတၢ်သးကညီၤ လၢတၢ်သးထီၣ်အပူၤတ က့ၢ်.

³ ယွၤဟဲဝဲလၢတ့ၤမၣ်, ဒီးတၢ်စီဆှံတဂၤလၢကစၢၢ်ပၤရၣ်, စ့လၤ. အလၤကပီၤကျၢၢ်ဘၢမူခိၣ်, ဒီးဟီၣ်ခိၣ်ပှဲၤဝဲဒီးအတၢ်စံးထီၣ်ပတြၢၤလီၤ.

⁴ အတၢ်ကယဲၢ်ကယူာ် မၤအသးဒ်မုၢ်အတၢ်ကပီၤအ သိး, အစုလိၤဧူၢ်ထီၣ်, ဒီးအကဟုကညီၢ်အိၣ်ခူသူၣ်ဖဲန့ၣ်လီၤ.

⁵ တၢ်သံသတြိာ်လဲၤဝဲလၢအမဲာ်ညါ, ဒီးတၢ်သံသတြိာ်မ့ၣ်အူလဲၤတၢ်လၢအခီၣ်ထံးလီၤ.

⁶ အိၣ်ကတီၢ်ဝဲ, ဒီးဟီၣ်ခိၣ်ဟူးဝးဝဲ, ကွၢ်ဝဲ, ဒီးဒုးကနိးကစုာ်ပှၤကလုာ်တဖၣ်, ကစၢၢ်ကလိအထူအယိာ်သ့ၣ်ဖးလီၤအသး, တၢ်စိခိၣ်အထူအယိာ်သကူးလီၤအသးလီၤ. အကျဲဧိၤအကပူၤဧိၤအိၣ်လၢပျၢၤလၢကစၢၤလီၤ.

⁷ ယထံၣ်ဘၣ်ကူၤၡးအဒဲဘၣ်တၢ်ကိၢ်တၢ်ဂီၤ, မံးဒယၣ်အဒဲအယၣ်သဒၢဟူးဝးဝဲလီၤ.

⁸ ယွၤဧၢ, နသးကဲၤထီၣ်ဘၣ်ထံမိၢ်ပှၢ်တဖၣ်ဧါ. နသးထီၣ်ဘၣ်ထံမိၢ်ပှၢ်တဖၣ်ဧါ. နသးကဲၤထီၣ်ဘၣ်ပီၣ်လဲၣ်သတးဒီး, နဒိးနကသ့ၣ်လၢနတၢ်အုၣ်က့ၤခီၣ်က့ၤ အလ့ၣ်ကဟၣ်အပူၤစ့ၢ်ကီးဧါ.

⁹ နချံၣ်အိၣ်ဘ့ၣ်ဆ့, တၢ်တအိၣ်ဘၣ်လၢအလိၤ, ပျၢ်ဧိၤစၤဧိၤအါလံ, မ့ၢ်တၢ်အကလုၢ်. စ့လၤ. နမၤသ့ၣ်ဖးဟီၣ်ခိၣ်ဒီးကဲထီၣ်ထံမိၢ်ပှၢ်တဖၣ်လီၤ.

¹⁰ ကစၢၢ်ကလိထံၣ်ဘၣ်နၤဒီးဟူးဝးဝဲ, ထံလုၣ်ဘၢန့ၣ်လုၣ်ဘၢတၢ်, ထံယိာ်ပူၤထုထီၣ်အကလုၢ်, ယူာ်ထီၣ်အစုထီၣ်ထီလီၤ.

¹¹ မုၢ်ဒီးလါ အိၣ်ကတီၢ်ဝဲလၢ အအိၣ်အဆိးအလီၢ်ပူၤ, လၢနပျၢ်ဧိၤစၤဧိၤလၢအယူၤဝဲလၢအတၢ်ကပီၤအဃိ, လၢနဘီဧိၤနးဧိၤအကပြုၢ်ကပြီၤအဃိလီၤ.

¹² နလဲၤခီဂာ်ဟီၣ်ခိၣ်လၢနသးထီၣ်, နယီၢ်လီၤပှၤကလုာ်တဖၣ်လၢနသးကဲၤထီၣ်,

¹³ နလဲၤထီၣ်လၢနကအုၣ်က့ၤခီၣ်က့ၤပှၤဂီၢ်မုၢ်အဂီၢ်, လၢနပှၤဒိးဖှူအသးအတၢ်အုၣ်က့ၤခီၣ်က့ၤအဂီၢ်, နမၤလီၤပှီၢ်ကွံာ်ပှၤတတီဘၣ်အဟံၣ်အခိၣ်, နမၤအိၣ်ဖျါထီၣ်အခီၣ်ထံးတုၤလၢပှၤအကိာ်လီၤ. စ့လၤ.

¹⁴ နဆဲးအသုးဖိအခိၣ်အဒိၣ်တဂၤ လၢအဘီဒၣ်ဝဲ, ပှၤလၢအလဲၤသဖှိဝဲဒ်သိးအကမၤပြံပြါယၤ, အတၢ်သးခုမ့ၢ်လၢအကအီၣ်ကွံာ်ပှၤဖှီၣ်ဖိယာ်ဖိလၢတၢ် ခူသူၣ်လီၤ.

¹⁵ နလဲၤခီဂာ်ပီၣ်လဲၣ်လၢနကသ့ၣ်, ဖဲထံဖးဒိၣ်လၢအလပီစံၣ်စုးလီၤ.

¹⁶ ယနၢ်ဟူတၢ်, ဒီးယကနိးလၢယသးကံၢ်ပူၤ, ယထးခိၣ်ဝးလၢတၢ်သီၣ်အဃိ, တၢ်အုၣ်သံတၢ်ကျၣ်သံဟဲနုာ်လၢယဃံပူၤ, ဒီးယကနိးကစုာ်လၢယလီၢ်, ဒ်သိးယကအိၣ်ဘှံးလၢတၢ်ဘၣ်ကိၢ်ဘၣ်ဂီၤအမုၢ်နံၤ, ဖဲအကတီၢ်လၢပှၤဂီၢ်မုၢ်လၢ အကဒုးသုးဒီးပှၤအံၤဟဲဝဲ လီၤ.

¹⁷ ချၢၣ်ဒၢမ့ၢ်တဆှိးဘၣ်ဘၣ်ဆၣ်, တၤသၣ်မ့ၢ်တအိၣ်ဘၣ်လၢစပံးမုၢ်အလိၤဘၣ်ဆၣ်, သ့ၣ်စၤယံးအသၣ်မ့ၢ်လီၤဘီဘၣ်ဆၣ်, တၢ်အီၣ်တၢ်အီမ့ၢ်တအိၣ်လၢပှၢ်လၢ်ကျါဘၣ်ဆၣ်, သိဒီးမဲာ်တဲးလဲးမ့ၢ်လၢာ်ဝဲလၢကရၢပူၤဘၣ်ဆၣ်, ဒီးဂီၤဘုၣ်ဂီၤဖံးမ့ၢ်တအိၣ်လၢအလီၢ်ပူၤဘၣ်ဆၣ်ဒီး,

¹⁸ ယသူၣ်ကပိၢ်ယသးကဝးလၢယွၤအပူၤ, ယကသူၣ်ဖှံသးညီ လၢတၢ်အုၣ်က့ၤခီၣ်က့ၤအကစၢ်အ ပူၤလီၤ.

¹⁹ ယွၤယကစၢ်မ့ၢ်ယဂံၢ်ယဘါလီၤ. မၤယခီၣ်ဒ်တၤဟိမိၢ်အခီၣ်အသိး, ဒုးလဲၤယၤလၢယလီၢ်ထီၣ်ထီအဖီခိၣ်လီၤ. လၢတၢ်အခိၣ်အဂီၢ်, အိၣ်ဒီးယနီၣ်ဒ့တၢ်တဖၣ်.