လံာ်စီၤမိၤရှ့အခီၣ်ထံးတဘ့ၣ်.

လံာ်စီၤမိၤရှ့အခီၣ်ထံးတဘ့ၣ်.

၁

¹ လၢထံးလၢသီန့ၣ် ယွၤတ့လီၤမူခိၣ်ဒီးဟီၣ်ခိၣ်လီၤ. ဒီးဟီၣ်ခိၣ်န့ၣ်အိၣ်သယုၢ်, ဒီးအိၣ်ကလီလီၤ. ² ဒီးတၢ် ခံးအိၣ်ဝဲလၢတၢ်ယိာ်အထံဖံးခိၣ်, ဒီးယွၤအသးဟုဝဲ လၢထံဖံးခိၣ်, ³ ဒီးယွၤစံးဝဲဒၣ်, တၢ်ကပီၤမ်အကဲထီၣ် တက့ၢ်, ဒီးတၢ်ကပီၤကဲထီၣ်ဝဲလီၤ. ⁴ ဒီးယွၤထံၣ်ဝဲလၢ တၢ်ကပီၤန့ၣ်မ့ၢ်အဂ့ၤလီၤ. ဒီးနီၤဖးတၢ်ကပီၤဒီးတၢ်ခံး အဆၢန့ၣ်လီၤ. ⁵ ဒီးတၢ်ကပီၤန့ၣ်ယွၤယုၢ်ဝဲအမံၤလၢမုၢ် နံၤ, ဒီးတၢ်ခံးန့ၣ်ယွၤယုၢ်ဝဲအမံၤလၢမုၢ်နၤလီၤ. ဒီးမုၢ် ဟါအိၣ်, ဒီးမုၢ်ဂီၤအိၣ်, မုၢ်တနံၤလီၤ.

⁶ ဒီးယွၤစံးဝဲဒၣ်, လၢထံအသးကံၢ်ပူၤန့ၣ် မ်မူကပိာ် လိၤကဲထီၣ်, ဒီးနီၤဖးထံဒီးထံအဆၢန့ၣ်တက့ၢ်. ⁷ ဒီး ယွၤတ့လီၤမူကပိာ်လိၤ, ဒီးနီၤဖးထံလၢမူကပိာ်လိၤအ ဖီလာ်, ဒီးထံလၢမူကပိာ်လိၤအဖီခိၣ်အဆၢန့ၣ်လီၤ. ဒီးတၢ်မၤအသးဒ်န့ၣ်လီၤ. ⁸ ဒီးမူကပိာ်လိၤန့ၣ်ယွၤယုၢ် ဝဲအမံၤလၢမူခိၣ်လီၤ. ဒီးမုၢ်ဟါအိၣ်, ဒီးမုၢ်ဂီၤအိၣ်, မုၢ် ခံနံၤတနံၤလီၤ.

⁹ ဒီးယွၤစံးဝဲဒၣ်, ထံလၢမူခိၣ်အဖီလာ်အံၤ မ်အအိၣ် ဖှိၣ်လၢအလီၢ်တပူၤဃီ, ဒီးမ်ခိအိၣ်ဖျါထီၣ်တက့ၢ်. ဒီး တၢ်မၤအသးဒ်န့ၣ်လီၤ. ¹⁰ ဒီးခိန့ၣ်ယွၤယုၢ်ဝဲအမံၤလၢ ဟီၣ်ခိၣ်, ဒီးထံအိၣ်ဖှိၣ်န့ၣ်ယုၢ်ဝဲအမံၤလၢပီၣ်လဲၣ်, ဒီး ယွၤထံၣ်ဝဲလၢအဂ့ၤလီၤ. ¹¹ ဒီးယွၤစံးဝဲဒၣ်, မ်ဟီၣ်ခိၣ် ဒုးမဲထီၣ်နီၣ်ဧိၤမံၤဧိၤ, ဘုဧိၤဟုဧိၤလၢအသၣ်ဝဲလၢဘု သၣ်, သ့ၣ်ဧိၤဝၣ်ဧိၤလၢအသၣ်ဝဲလၢတၤသၣ်ဒ်အက လုာ်အသိး, လၢအချံအိၣ်လၢအပူၤလၢဟီၣ်ခိၣ်ချၢတ က့ၢ်. ဒီးတၢ်မၤအသးဒ်န့ၣ်လီၤ. ¹² ဒီးဟီၣ်ခိၣ်ဒုးမဲထီၣ် နီၣ်ဧိၤမံၤဧိၤ, ဘုဧိၤဟုဧိၤလၢအသၣ်ဝဲလၢဘုသၣ်, ဒီး သ့ၣ်ဧိၤဝၣ်ဧိၤလၢအသၣ်ဝဲလၢတၤသၣ် ဒ်အကလုာ်အ သိး, လၢအချံအိၣ်လၢအပူၤလီၤ. ¹³ ဒီးယွၤထံၣ်ဝဲလၢ အဂ့ၤလီၤ. ဒီးမုၢ်ဟါအိၣ်, ဒီးမုၢ်ဂီၤအိၣ်, မုၢ်သၢနံၤတ နံၤလီၤ.

¹⁴ ဒီးယွၤစံးဝဲဒၣ်, ဒ်သိးအကနီၤဖးနံၤဒီးနၤန့ၣ်ဒီး, မ် တၢ်ကပီၤအဖျၢၣ်တဖၣ် ကဲထီၣ်လၢမူကပိာ်လိၤန့ၣ်တ က့ၢ်, ဒီးမ်အအိၣ်လၢတၢ်ပနီၣ်အဂီၢ်, ဒီးလၢတၢ်အမုၢ် အလါအဂီၢ်, ဒီးလၢမုၢ်နံၤအဂီၢ်, ဒီးလၢနံၣ်ဧိၤလါဧိၤ အဂီၢ်တက့ၢ်. ¹⁵ ဒီးမ်အအိၣ်လၢမူကပိာ်လိၤလၢတၢ်က ပီၤအဂီၢ်, ဒ်သိးအကကပီၤထီၣ်လၢဟီၣ်ခိၣ်ချၢတက့ၢ်. ဒီးတၢ်မၤအသးဒ်န့ၣ်လီၤ. ¹⁶ ဒီးယွၤတ့လီၤတၢ်ကပီၤအ ဒိၣ်ခံဖျၢၣ်လီၤ. အဒိၣ်တဖျၢၣ်ဒ်သိးအကပၢနံၤ, ဒီးအ ဆံးတဖျၢၣ် ဒ်သိးအကပၢနၤ, ဒီးတ့လီၤဆၣ်ဧိၤဖီဧိၤ စ့ၢ်ကီးလီၤ. ¹⁷ ဒီးဒ်သိးအကကပီၤထီၣ်လၢဟီၣ်ခိၣ်ချၢ,

¹⁸ ဒီးကပၢနံၤဒီးနၤ, ဒီးကနီၤဖးတၢ်ကပီၤဒီးတၢ်ခံးအဆၢ ဒီး, ယွၤပာ်အီၤလၢမူကပိာ်လိၤန့ၣ်လီၤ. ဒီးယွၤထံၣ်ဝဲ လၢအဂ့ၤလီၤ. ¹⁹ ဒီးမုၢ်ဟါအိၣ်, ဒီးမုၢ်ဂီၤအိၣ်, မုၢ်လွံၢ် နံၤတနံၤလီၤ.

²⁰ ဒီးယွၤစံးဝဲဒၣ်, မ်ထံဖှံထီၣ်န့ၢ်အါအါကလဲာ်တၢ်အိၣ် ဝဲဒီးတၢ်မူတၢ်ဂဲၤ, ဒီးထိၣ်ဧိၤလံၣ်ဧိၤလၢအကယူၤထီၣ် လၢဟီၣ်ခိၣ်အဖီခိၣ်, လၢမူကပိာ်လိၤအပူၤတက့ၢ်. ²¹ ဒီး ယွၤတ့လီၤတၢ်သးဖးဒိၣ်, ဒီးကယဲၢ်တၢ်အသးလၢအ ဟူးသ့ဂဲၤသ့လၢထံဖှံထီၣ်န့ၢ်အီၤအါအါကလဲာ်, ဒ်အ ကလုာ်အသိး, ဒီးတၢ်အယူၤကိးအကလုာ်ဒဲးဒ်အက လုာ်အသိးန့ၣ်လီၤ. ဒီးယွၤထံၣ်ဝဲလၢအဂ့ၤလီၤ. ²² ဒီး ယွၤဆိၣ်ဂ့ၤအီၤ, ဒီးစံးဝဲဒၣ်, မ်အသၣ်ထီၣ်, ဒီးအါ ထီၣ်, ဒီးမၤပှဲၤထီၣ်ပီၣ်လဲၣ်ပူၤတက့ၢ်. ဒီးတၢ်အယူၤ တဖၣ်မ်အအါထီၣ်လၢဟီၣ်ခိၣ်ချၢတက့ၢ်. ²³ ဒီးမုၢ်ဟါ အိၣ်, ဒီးမုၢ်ဂီၤအိၣ်, မုၢ်ယဲၢ်နံၤတနံၤလီၤ.

²⁴ ဒီးယွၤစံးဝဲဒၣ်, မ်ဟီၣ်ခိၣ်ဖှံထီၣ်န့ၢ်တၢ်အသးဒ်အက လုာ်အသိး, ဆၣ်ဧိၤကီၢ်ဧိၤအဒၢ, ဒီးတၢ်အစွါအစွဲ, ဒီး ဆၣ်ဧိၤကီၢ်ဧိၤအမံၤဒ်အကလုာ်အသိးန့ၣ်တက့ၢ်. ဒီး တၢ်မၤအသးဒ်န့ၣ်လီၤ.

²⁵ ဒီးယွၤတ့လီၤဟီၣ်ခိၣ်အဆၣ်ဧိၤကီၢ်ဧိၤအမံၤ ဒ်အက လုာ်အသိး, ဒီးဆၣ်ဧိၤကီၢ်ဧိၤအဒၢဒ်အကလုာ်အသိး, ဒီးကယဲၢ်တၢ်လၢအစွါလၢဟီၣ်ခိၣ်ချၢ ဒ်အကလုာ်အ သိးန့ၣ်လီၤ. ဒီးယွၤထံၣ်ဝဲလၢအဂ့ၤလီၤ.

²⁶ ဒီးယွၤစံးဝဲဒၣ်, မ်ပတ့လီၤ ပှၤကညီဒ်ပဂီၤဒၣ်ပဝဲ အသိး, ဒ်ပကစၢ်ဒၣ်ပဝဲအသိးတက့ၢ်. ဒီမ်အပၢဒ့ၣ်ဧိၤ ညၣ်ဧိၤလၢပီၣ်လဲၣ်ပူၤ, ဒီးထိၣ်ဧိၤလံၣ်ဧိၤလၢတၢ်ဖးဖီ, ဒီးဆၣ်ဧိၤကီၢ်ဧိၤ, ဒီးဟီၣ်ခိၣ်ဒီဘ့ၣ်ညါ, ဒီးကယဲၢ်တၢ် အစွါအစွဲလၢအစွါလၢဟီၣ်ခိၣ်ချၢတက့ၢ်. ²⁷ ဒီးယွၤတ့ လီၤပှၤကညီဒ်အဂီၢ်ဒၣ်ဝဲအသိးလီၤ. တ့လီၤဝဲလၢယွၤအ ဂီၤလီၤ, ပိာ်မုၣ်ဒီးပိာ်ခွါန့ၣ်တ့လီၤဝဲလီၤ. ²⁸ ဒီးယွၤဆိၣ် ဂ့ၤအီၤ, ဒီးစံးဘၣ်အီၤ, မ်သုသၣ်ထီၣ်, ဒီးအါထီၣ်, ဒီး မၤပှဲၤထီၣ်ဟီၣ်ခိၣ်ဒီးမၤနၢၤအီၤ, ဒီးပၢဒ့ၣ်ဧိၤညၣ်ဧိၤလၢ ပီၣ်လဲၣ်ပူၤ, ဒီးထိၣ်ဧိၤလံၣ်ဧိၤလၢတၢ်ဖးဖီ, ဒီးကယဲၢ် တၢ်အသးလၢအဟူးအဂဲၤလၢဟီၣ်ခိၣ်ချၢန့ၣ်တက့ၢ်.

²⁹ ဒီးယွၤစံးဝဲဒၣ်, ကွၢ်ကွၢ်, ယဟ့ၣ်တ့ၢ်သုလၢဘုဧိၤ ဟုဧိၤလၢအသၣ်ထီၣ် ဘုသၣ်အိၣ်လၢဟီၣ်ခိၣ်ချၢဒီဘ့ၣ် ညါကိးမံၤဒဲး, ဒီးသ့ၣ်ဧိၤဝၣ်ဧိၤလၢအသၣ်ထီၣ်ဒၣ်အ သၣ်တဖၣ်န့ၣ်ကိးကလုာ်ဒဲးလီၤ. တၢ်တဖၣ်န့ၣ်ကကဲ ထီၣ်သုတၢ်အီၣ်လီၤ.

³⁰ ဒီးကယဲၢ်ဆၣ်ဧိၤကီၢ်ဧိၤ လၢဟီၣ်ခိၣ်ချၢ, ဒီးကယဲၢ် ထိၣ်ဧိၤလံၣ်ဧိၤလၢတၢ်ဖးဖီ, ဒီးကယဲၢ်တၢ်လၢအစွါလၢ ဟီၣ်ခိၣ်ချၢလၢအအိၣ်ဒီး အသးသမူတဖၣ်မုန့ၣ်ယဟ့ၣ် တ့ၢ်အီၤလၢနီၣ်ဧိၤမံၤဧိၤကိးကလုာ်ဒဲးလၢ အတၢ်အီၣ် အဂီၢ်လီၤ. ဒီးတၢ်မၤအသးဒ်န့ၣ်လီၤ.

³¹ ဒီးယွၤကွၢ်အတ့လီၤတၢ်တမံၤလၢ်လၢ်န့ၣ်, ဒီးထံၣ်ဝဲ လၢအဂ့ၤမးလီၤ. ဒီးမုၢ်ဟါအိၣ်, ဒီးမုၢ်ဂီၤအိၣ်, မုၢ်ဃု နံၤတနံၤလီၤ.

၂

¹ ဒီးမူခိၣ်, ဒီးဟီၣ်ခိၣ်, ဒီးကယဲၢ်အသုးမုၢ်ဂီၢ်မုၢ်န့ၣ် ဝံၤဝဲခဲလၢာ်လီၤ. ² ဒီးလၢမုၢ်နွံနံၤတနံၤန့ၣ်ယွၤမၤဝံၤတၢ် မၤလၢအမၤဝဲ, ဒီးအိၣ်ဘှံးလၢမုၢ်နွံနံၤတနံၤလၢကယဲၢ် အတၢ်မၤလၢအမၤဝဲခဲလၢာ်လီၤ.

³ ဒီးယွၤဆိၣ်ဂ့ၤမုၢ်နွံနံၤတနံၤန့ၣ်, ဒီးပာ်စီဆှံအီၤလီၤ. အဂ့ၢ်ဒ်အံၤ, အိၣ်ဘှံးဝဲလၢမုၢ်တနံၤန့ၣ်လၢကယဲၢ်အ တၢ်မၤလၢအတ့ဒီးမၤဝဲခဲလၢာ်လီၤ.

⁴ ဖဲအဘၣ်တၢ်တ့လီၤအီၤ, လၢမုၢ်တနံၤလၢကစၢ်ယွၤ တ့လီၤဟီၣ်ခိၣ်ဒီးမူခိၣ်န့ၣ်, မူခိၣ်ဒီးဟီၣ်ခိၣ်အတၢ်အိၣ် ဖျဲၣ်တဖၣ်မ့ၢ်အအံၤ, ⁵ ဒီးကယဲၢ်တၢ်မဲတၢ်မါလၢပှၢ်လၢ် ကျါလၢအတချုးအိၣ်ဒံးဘၣ်လၢဟီၣ်ခိၣ်ပူၤ, ဒီးကယဲၢ် ဘုဧိၤဟုဧိၤလၢပျီပူၤလၢအတချုးမဲထီၣ်ဒံးဘၣ်. အဂ့ၢ် ဒ်အံၤ, ကစၢ်ယွၤတဒုးဟဲစူၤဒံးဘၣ်တၢ်လၢဟီၣ်ခိၣ်ချၢ ဘၣ်, ဒီးပှၤကညီလၢအကမၤဟီၣ်ခိၣ်တအိၣ်ဘၣ်နီတ ဂၤဘၣ်. ⁶ ဘၣ်ဆၣ်ဒီးဘှ့ၣ်ထီၣ်ဝဲလၢဟီၣ်ခိၣ်, ဒီးမၤ ဘၣ်စီၣ်ဟီၣ်ခိၣ်ဒီဘ့ၣ်ညါလီၤ.

⁷ ဒီးကစၢ်ယွၤတ့လီၤပှၤကညီလၢ ဟီၣ်ခိၣ်အကမူၣ်, ဒီးအူသဖှိတၢ်မူအသါဆူအနါဒ့ပူၤ, ဒီးပှၤကညီကဲထီၣ် ပှၤအသးသမူတဂၤလီၤ.

⁸ ဒီးကစၢ်ယွၤ သူၣ်လီၤဖျးလီၤတၤသၣ်အလီၢ် ဆူမုၢ် ထီၣ်တခီလၢဧ့ၤဒ့ၣ်အပူၤ, ဒီးပှၤကညီလၢအတ့လီၤဝဲ န့ၣ်ပာ်ဝဲဖဲန့ၣ်လီၤ.

⁹ ဒီးကစၢ်ယွၤဒုးမဲထီၣ် ကယဲၢ်သ့ၣ်လၢပကွၢ်ဂ့ၤ, ဒီး ပအီၣ်ဂ့ၤလၢဟီၣ်ခိၣ်ပူၤတထံးလၢ်လၢ်, ဒီးတၢ်မူအသ့ၣ် တထံးလၢအအိၣ်ဝဲလၢ တၤသၣ်အလီၢ်အသးကံၢ်ပူၤ, ဒီးတၢ်သ့ၣ်ညါတၢ်ဂ့ၤဒီးတၢ်အၢအသ့ၣ်တထံးလီၤ.

¹⁰ ဒီးထံမိၢ်ပှၢ်တကျိဟးထီၣ်လၢ ဧ့ၤဒ့ၣ်အပူၤဒ်သိးအ ကမၤဘၣ်စီၣ် တၤသၣ်အလီၢ်လီၤ. ဒီးဖးဒ့ထီၣ်ဖဲန့ၣ်, ဒီးကဲထီၣ် ထံလွံၢ်ကျိလီၤ. ¹¹ အခီၣ်ထံးတကျိအမံၤန့ၣ် မ့ၢ်ပံၤၡိၣ်လီၤ. ဒီးအဝဲန့ၣ်လဲၤတရံးကီၢ်ဃဝံၤလၤဒီဘ့ၣ် ညါ, ဒီးဖဲန့ၣ်ထူအိၣ်ဝဲလီၤ. ¹² ဒီးကီၢ်အထူန့ၣ်မ့ၢ်အဂ့ၤ လီၤ. တၢ်မျၢ်ပလဲ, ဒီးတၢ်မျၢ်မဟူယၤအိၣ်ဝဲဖဲန့ၣ်လီၤ.―

¹³ ဒီးထံကျိလၢအပှဲၤထီၣ်ခံကျိတကျိ အမံၤန့ၣ်မ့ၢ်ကံဃိၣ် လီၤ. အဝဲန့ၣ်လဲၤတရံးကီၢ်ကူၤၡးဒီဘ့ၣ်ညါလီၤ. ¹⁴ ဒီး ထံကျိလၢအပှဲၤထီၣ်သၢကျိတကျိအမံၤန့ၣ် မ့ၢ်ဃံးဒ က့လးလီၤ. အဝဲန့ၣ်လဲၤဆူမုၢ်ထီၣ် ဆူကီၢ်အၤရှူၢ်အ ဃၢၤန့ၣ်လီၤ. ဒီးထံကျိလၢအပှဲၤထီၣ်လွံၢ်ကျိတကျိန့ၣ် မ့ၢ်ဖရၤသးလီၤ.

¹⁵ ဒီးကစၢ်ယွၤဟံးန့ၢ်ပှၤကညီ, ဒီးပာ်ဝဲလၢဧ့ၤဒ့ၣ်အ တၤသၣ်အလီၢ်ပူၤဒ်သိးအကမၤအီၤ, ဒီးပၢၤအီၤလီၤ. ¹⁶ ဒီးကစၢ်ယွၤမၤလိာ်ပှၤကညီဒီးစံးဝဲဒၣ်, ကယဲၢ်သ့ၣ်လၢ တၤသၣ်အလီၢ်ပူၤအံၤ, နအီၣ်ဒီးနအီၣ်ဘၣ်သၢၣ်. ¹⁷ မ့ မ့ၢ်တၢ်သ့ၣ်ညါတၢ်ဂ့ၤဒီးတၢ်အၢအသ့ၣ်တထံးန့ၣ်အီၣ် အသၣ်တဂ့ၤ. အဂ့ၢ်ဒ်အံၤ, မုၢ်တနံၤလၢနအီၣ်အီၤန့ၣ် သံဒီးနကသံလီၤ.

¹⁸ ဒီးယွၤစံးဝဲဒၣ်, ပှၤကညီအိၣ်တဂၤဃီ တဂ့ၤဘၣ် ယကတ့န့ၢ်အီၤလၢတၢ်မၤစၢၤလၢအကြၢးဒီးအီၤလီၤ.

¹⁹ ဒီးကစၢ်ယွၤတ့လီၤ ကယဲၢ်ဆၣ်ဧိၤကီၢ်ဧိၤလၢပှၢ်လၢ် ကျါ, ဒီးကယဲၢ်ထိၣ်ဧိၤလံၣ်ဧိၤလၢတၢ်ဖးဖီလၢဟီၣ်ခိၣ် ကိးမံၤဒဲး, ဒီးဒုးဟဲဝဲဆူပှၤကညီအအိၣ်ဒ်သိးအကထံၣ် ဝဲလၢအဝဲဒၣ်ကယုၢ်အမံၤဒ်လဲၣ်ဒ်လဲၣ်န့ၣ်လီၤ. ဒီးဖဲဒၣ် ပှၤကညီယုၢ်တၢ်အသးအမံၤန့ၣ်မ့ၢ်အမံၤလီၤ. ²⁰ ဒီးပှၤ ကညီယုၢ်ကယဲၢ်ဆၣ်ဧိၤကီၢ်ဧိၤအဒၢ, ဒီးထိၣ်ဧိၤလံၣ် ဧိၤလၢတၢ်ဖးဖီ, ဒီးကယဲၢ်ဆၣ်ဧိၤကီၢ်ဧိၤလၢပှၢ်လၢ်ကျါ ကိးကလုာ်ဒဲးအမံၤလီၤ. မ့မ့ၢ်လၢပှၤကညီအဂီၢ်န့ၣ်တၢ် မၤစၢၤကြၢးဒီးအီၤန့ၣ်တၢ်တထံၣ်န့ၢ်ဘၣ်ဝဲဘၣ်.

²¹ ဒီးကစၢ်ယွၤဒုးလီၤဘၣ်တၢ်မံသပ့ၤလၢ ပှၤကညီအ လိၤ, ဒီးအဝဲဒၣ်မံသပ့ၤ, ဒီးထဲးထီၣ်န့ၢ်ဝဲအဂုာ်ဃံတ ဘ့ၣ်, ဒီးမၤမံထီက့ၤဝဲအလီၢ်လၢအညၣ်လီၤ. ²² ဒီးတၢ် ဂုာ်ဃံလၢအထဲးထီၣ်န့ၢ်ဝဲလၢပိာ်ခွါအလိၤန့ၣ်, ကစၢ် ယွၤတ့လီၤအီၤလၢပိာ်မုၣ်, ဒီးဆှၢအီၤဆူပိာ်ခွါအအိၣ်လီၤ.

²³ ဒီးပိာ်ခွါစံးဝဲဒၣ်, ခဲကနံၣ်အံၤအဝဲဒၣ်အံၤမ့ၢ်ဃံလၢ ယဃံ, ဒီးညၣ်လၢယညၣ်လီၤ. တၢ်ကကိးအီၤလၢပိာ် မုၣ်, အဂ့ၢ်ဒ်အံၤ, ဘၣ်တၢ်ထဲးထီၣ်ကွံာ်အီၤလၢပိာ်ခွါ အလိၤလီၤ. ²⁴ မၤသးဒ်န့ၣ်ဒီး တၢ်လၢပိာ်ခွါအံၤကဟး သဒၣ်အမိၢ်အပၢ်, ဒီးကဘျုးအသးဆူ ပိာ်မုၣ်အအိၣ်, ဒီးတၢ်လၢပှၤခံဂၤန့ၣ် ကကဲထီၣ်တၢ်တသွံၣ်ဃီတညၣ် ဃီလီၤ. ²⁵ ဒီးပှၤခံဂၤ, ပိာ်ခွါဒီးအမါန့ၣ်အိၣ်ဘ့ၣ်ဆ့, ဒီးအမဲာ်တဆှးဘၣ်လီၤ.

၃

¹ ဒီးတၢ်လၢဂုၢ်န့ၣ် ကူၣ်တၢ်သ့န့ၢ်ကယဲၢ်ဆၣ်ဖိကီၢ်ဖိ လၢပှၢ်လၢ်ကျါလၢကစၢ်ယွၤတ့လီၤအီၤန့ၣ်တက့ၢ်လီၤ. ဒီးစံးဘၣ်ပိာ်မုၣ်န့ၣ်, ကယဲၢ်သ့ၣ်အိၣ်လၢတၤသၣ်အ လီၢ်ပူၤတထံးလၢ်လၢ်န့ၣ်ယွၤမၤလိာ်သု, အီၣ်အီၤတဂ့ၤ န့ၣ်, သပှၢ်တၢၢ်ဧါ. ² ဒီးပိာ်မုၣ်စံးဘၣ်အီၤ, သ့ၣ်အ သၣ်လၢတၤသၣ်အလီၢ်ပူၤန့ၣ်, ပအီၣ်ဘၣ်သၢၣ်. ³ မ့ မ့ၢ်သ့ၣ်အိၣ်လၢတၤသၣ်အလီၢ်အသးကံၢ်ပူၤတထံးန့ၣ်, ယွၤစံးဝဲဒၣ်, အီၣ်အီၤတဂ့ၤ, ထိးအီၤတဂ့ၤ, သုကသံ ဘၣ်ဖုးလီၤ.

⁴ ဒီးဂုၢ်န့ၣ်စံးဘၣ်ပိာ်မုၣ်, သုတသံဒီးသုတသံဘၣ်ဘၣ် လီၤ. ⁵ မ့ၢ်ယွၤသ့ၣ်ညါလၢမုၢ်တနံၤလၢသုအီၣ်အီၤန့ၣ် သုမဲာ်ကအိးထီၣ်အသး, ဒီးသုကလီၤဂာ်ဒီးယွၤ, ဒီး ကသ့ၣ်ညါတၢ်ဂ့ၤဒီးတၢ်အၢန့ၣ်လီၤ.

⁶ ဒီးပိာ်မုၣ်န့ၣ်ထံၣ်ဘၣ်ဝဲလၢ သ့ၣ်တထံးန့ၣ်ဂ့ၤဝဲလၢ တၢ်အီၣ်အဂီၢ်, ဒီးဃံလၤဝဲလၢပမဲာ်အဂီၢ်, ဒီးတၢ်မုာ် လၤအသ့ၣ်တထံးလၢတၢ်ဒုးကူၣ်သ့တၢ်အဂီၢ်ဒီး, ဟံး န့ၢ်အသၣ်, ဒီးအီၣ်ဝဲ, ဒီးဟ့ၣ်စ့ၢ်ကီးအဝၤအိၣ်ဒီးအီၤ, ဒီးအဝဲဒၣ်အီၣ်ဝဲလီၤ. ⁷ ဒီးပှၤခံဂၤန့ၣ်အမဲာ်အိးထီၣ်အ သး, ဒီးသ့ၣ်ညါလၢအအိၣ်ဘ့ၣ်ဆ့, ဒီးဆးပကိာ်ထီၣ် ချၢၣ်ဒၢအလၣ်, ဒီးမၤယီၢ်တကိးလၢအဂီၢ်လီၤ.

⁸ ဒီးနၢ်ဟူကစၢ်ယွၤ အကလုၢ်ဟဲလၢတၤသၣ်အလီၢ်, လၢမုၢ်ခုၣ်လီၤအကတီၢ်, ဒီးပိာ်ခွါဒီးအမါပာ်တဒၢအ သးဒီးကစၢ်ယွၤအမဲာ်, လၢသ့ၣ်ကျါလၢတၤသၣ်အ လီၢ်အသးကံၢ်ပူၤန့ၣ်လီၤ.

⁹ ဒီးကစၢ်ယွၤကိးထီၣ်ပိာ်ခွါ, ဒီးစံးဘၣ်အီၤ, နအိၣ်ဖဲ လဲၣ်ခီလဲၣ်. ¹⁰ ဒီးအဝဲဒၣ်စံး, ယနၢ်ဟူနကလုၢ်လၢတၤ သၣ်အလီၢ်ပူၤန့ၣ်, ဒီးမ့ၢ်ယအိၣ်ဘ့ၣ်ဆ့ဒီး, ယပျံၤတၢ်, ဒီးယပာ်တဒၢယသးလီၤ.

¹¹ ဒီးအဝဲဒၣ်စံး, မ့ၢ်မတၤဒုးနဲၣ်နၤလၢနအိၣ်ဘ့ၣ်ဆ့တ ဂၤလဲၣ်. သ့ၣ်တထံးလၢယမၤလိာ်နၤ, အီၣ်အသၣ်တ ဂ့ၤန့ၣ်, နအီၣ်လံဧါ.

¹² ဒီးပိာ်ခွါန့ၣ်စံးဝဲဒၣ်, ပိာ်မုၣ်လၢနဟ့ၣ်အိၣ်ဒီးယၤတ ဂၤန့ၣ်ဟ့ၣ်ယၤလၢသ့ၣ်အသၣ်န့ၣ်, ဒီးယအီၣ်ဘၣ်လီၤ.

¹³ ဒီးကစၢ်ယွၤစံးဘၣ်ပိာ်မုၣ်, တၢ်အံၤလၢနမၤန့ၣ်မ့ၢ်မ နုၤတမံၤလဲၣ်. ဒီးပိာ်မုၣ်စံးဝဲဒၣ်, မ့ၢ်ဂုၢ်လီန့ၢ်ယၤဒီး, ယအီၣ်ဘၣ်လီၤ.

¹⁴ ဒီးကစၢ်ယွၤစံးဘၣ်ဂုၢ်န့ၣ်, မ့ၢ်နမၤတၢ်အံၤဒီး, နဘၣ် ဆိၣ်အၢနးန့ၢ်ဆၣ်ဧိၤကီၢ်ဧိၤအဒၢ, ဒီးဆၣ်ဧိၤကီၢ်ဧိၤအ မံၤလၢပှၢ်လၢ်ကျါခဲလၢာ်တက့ၢ်လီၤ. နဘၣ်ဟးလၢန ဟၢဖၢ, ဒီးနဘၣ်အီၣ်ဟီၣ်ခိၣ်အကမူၣ်မုၢ်နံၤလၢနမူခဲ လၢာ်လီၤ. ¹⁵ ဒီးယကဒုးထီဒုၣ်ထီဒါလိာ်နသးဒီးပိာ်မုၣ်, ဒီးနချံနသၣ်ဒီးပိာ်မုၣ်အချံအသၣ်န့ၣ်လီၤ. အဝဲဒၣ်က မၤသဘှံးနခိၣ်, ဒီးနကမၤသဘှံးအခီၣ်နၢၣ်ခံလီၤ.

¹⁶ ဒီးစံးဘၣ်ပိာ်မုၣ်န့ၣ်, နဒၢထီၣ်ဒီးတၢ်ဆိးကဲးန့ၣ်ယ ကမၤအါထီၣ်အါအါကလဲာ်, ဒီးနကဆံးစၢ်န့ၢ်နဖိဒီး နသူၣ်အုးသးအုးလီၤ. ဒီးနကသန့ၤနသးလၢနဝၤ, ဒီး အဝဲဒၣ်ကပၢနၤလီၤ.

¹⁷ ဒီးစံးဘၣ်ပိာ်ခွါန့ၣ်, မ့ၢ်နဒိကနၣ်နမါအကလုၢ်ဒီး အီၣ်သ့ၣ်သၣ်လၢယမၤလိာ်နၤ အီၣ်အီၤတဂ့ၤန့ၣ်ဒီး, ဟီၣ်ခိၣ်ဘၣ်ဆိၣ်အၢလၢနဃိလီၤ. နကအီၣ်တၢ်ဘၣ် ဃးဒီးအီၤအိၣ်ဒီးတၢ်ဘၣ်ကိၢ်ဘၣ်ဂီၤ, မုၢ်နံၤလၢနမူခဲ လၢာ်လီၤ. ¹⁸ တၤဆှုၣ်တၤမဲဒီးနီၣ်ဧိၤမံၤဧိၤန့ၣ်ကမဲထီၣ် န့ၢ်လၢနဂီၢ်, ဒီးနကအီၣ်ဘုဧိၤဟုဧိၤလၢတၢ်ပျီပူၤလီၤ. ¹⁹ နကအီၣ်တၢ်ဒီးနမဲာ်ကပၢၤန့ၣ် တုၤနက့ၤက့ၤဆူဟီၣ် ခိၣ်လာ်လီၤ. အဂ့ၢ်ဒ်အံၤတၢ်ဟံးန့ၢ်နၤလၢအီၤလီၤ. အ ဂ့ၢ်ဒ်အံၤ, နမ့ၢ်ဟီၣ်ခိၣ်ကမူၣ်, ဒီးနကက့ၤဆူဟီၣ်ခိၣ် ကမူၣ်လီၤ.

²⁰ ဒီးစီၤအၤဒၣ်ယုၢ်အမါ အမံၤလၢနီၢ်အံၣ်အုလီၤ. အ ဂ့ၢ်ဒ်အံၤ, မ့ၢ်ကယဲၢ်ပှၤမူခဲလၢာ်အမိၢ်လီၤ. ²¹ ဒီးကစၢ် ယွၤမၤဆ့တၢ်ဖံးလၢစီၤအၤဒၣ်အဂီၢ်, ဒီးလၢအမါအဂီၢ်, ဒီးဒုးကူဒုးသိးအီၤလီၤ.

²² ဒီးကစၢ်ယွၤစံးဝဲဒၣ်, ကွၢ်ကွၢ်, ပှၤကညီကဲထီၣ်လံ ဒ်ပှၤတဂၤလၢပကျါအသိး, လၢအသ့ၣ်ညါတၢ်ဂ့ၤဒီး တၢ်အၢလီၤ. ဒီးခဲကနံၣ်အံၤကယူာ်ထီၣ်ဘၣ်ဖုးအစု, ဒီး ဟံးန့ၢ်စ့ၢ်ကီး သ့ၣ်မူအသၣ်, ဒီးမူဝဲလီၤထူလီၤယိာ် လီၤ. ²³ ဒီးကစၢ်ယွၤဒုးဟးထီၣ်ကွံာ်အီၤလၢဧ့ၤဒ့ၣ်တၤ သၣ်အလီၢ် ဒ်သိးအကမၤဟီၣ်ခိၣ်လၢတၢ်ဟံးထီၣ်အီၤ လၢအပူၤလီၤ.

²⁴ ဒီးဟီထီၣ်ကွံာ်ပှၤကညီ, ဒီးပာ်ခ့ရူာ်တဖၣ်လၢဧ့ၤဒ့ၣ် တၤသၣ်အလီၢ်မုၢ်ထီၣ်တခီ, ဒီးနးမ့ၣ်အူလၢအတရံး အသးကိးခီဒဲးဒ်သိးအကပၢၤသ့ၣ်တၢ်မူအကျဲလီၤ.

၄

¹ ဒီးစီၤအၤဒၣ်သ့ၣ်ညါအမါနီၢ်အံၣ်အု, ဒီးအဝဲဒၣ်ဒၢ ထီၣ်, ဒီးဆံးစၢ်န့ၢ်စီၤကၤယံၣ်, ဒီးစံးဝဲဒၣ်, ယန့ၢ်ဘၣ် လံပှၤကညီတဂၤလၢယွၤလံ. ² ဒီးဆံးစၢ်န့ၢ်ကဒီးအပုၢ် စီၤဟ့းဘ့းလးလီၤ. ဒီးစီၤဟ့းဘ့းလးန့ၣ်မ့ၢ်ပှၤကွၢ်သိ လီၤ. မ့မ့ၢ်စီၤကၤယံၣ်တဂၤန့ၣ်မ့ၢ်ပှၤမၤဟီၣ်ခိၣ်လီၤ.

³ ဒီးတၢ်မၤအသးလၢမုၢ်နံၤတဖၣ်အကတၢၢ်န့ၣ်, လၢ စီၤကၤယံၣ်ဟဲစိာ်တၢ်မၤဘူၣ်ကစၢ်ယွၤလၢ ဟီၣ်ခိၣ်အ တၤသၣ်လီၤ. ⁴ ဒီးစီၤဟ့းဘ့းလးဟဲစိာ်စ့ၢ်ကီးသိအဝဲၢ် ကိတဖၣ်ဒီးအသိန့ၣ်လီၤ. ဒီးဘၣ်ယွၤအသးလၢစီၤဟ့း ဘ့းလးဒီးအတၢ်မၤဘူၣ်လီၤ.― မ့မ့ၢ်စီၤကၤယံၣ်ဒီးအ တၢ်မၤဘူၣ်န့ၣ်တဘၣ်ဘၣ်အသးဘၣ်, ဒီးစီၤကၤယံၣ် အသးထီၣ်ဒိၣ်ဒိၣ်ကလဲာ်, ဒီးအမဲာ်လီၤသပှၢ်လီၤ.

⁶ ဒီးယွၤစံးဘၣ်စီၤကၤယံၣ်, ဘၣ်မနုၤနသးထီၣ်လဲၣ်, ဒီးဘၣ်မနုၤနမဲာ်လီၤသပှၢ်လဲၣ်. ⁷ နမၤမ့ၢ်ဂ့ၤဒီး, တၢ် ပာ်ထီၣ်ထီနၤတအိၣ်ဘၣ်ဧါ. ဒီးနမၤမ့ၢ်တဂ့ၤဘၣ်ဒီး တၢ်ဒဲးဘးကိာ်လီၤလၢတြဲၤအဃၢၤလီၤ. ဒီးအဝဲဒၣ်က သန့ၤ, အသးလၢနၤ, ဒီးနကပၢအီၤလီၤ.

⁸ ဒီးစီၤကၤယံၣ်ကတိၤတၢ်ဒီးအပုၢ် စီၤဟ့းဘ့းလး, ဒီး တၢ်မၤအသးလၢအအိၣ်လၢတၢ်ပျီပူၤအဖၢမုၢ်ဒီး, စီၤကၤ ယံၣ်ဂဲၤထၢၣ်ထီဒါအပုၢ်စီၤဟ့းဘ့းလး, ဒီးမၤသံ အီၤလီၤ.

⁹ ဒီးယွၤစံးဘၣ်စီၤကၤယံၣ်, နပုၢ်စီၤဟ့းဘ့းလးန့ၣ်အိၣ် ဖဲလဲၣ်. ဒီးအဝဲဒၣ်စံး, ယတသ့ၣ်ညါဘၣ်. ယမ့ၢ်ပှၤ ကွၢ်ယပုၢ်ယဲဧါ.

¹⁰ ဒီးအဝဲဒၣ်စံး, နမၤတၢ်မနုၤလဲၣ်. နပုၢ်အသွံၣ်အ သီၣ်ကိးထီၣ်ယၤလၢဟီၣ်ခိၣ်လာ်လီၤ. ¹¹ ဒီးခဲကနံၣ်အံၤ နဘၣ်တၢ်ဆိၣ်အၢကွံာ်လၢဟီၣ်ခိၣ်, လၢအအဲးထီၣ်အ ထးခိၣ်, ဒ်သိးအကဒိးန့ၢ်နပုၢ်အသွံၣ်လၢနစုပူၤလီၤ.―

¹² တုၤနမၤဟီၣ်ခိၣ်ဒီး, တဟ့ၣ်လၢၤဘၣ်နၤလၢအဂံၢ်အ ဘါဘၣ်, နကကဲထီၣ်ပှၤလဲၤဝ့ၤဝီၤတၢ်, ဒီးပှၤဃ့ၢ်တၢ် လၢဟီၣ်ခိၣ်ချၢလီၤ.

¹³ ဒီးစီၤကၤယံၣ်စံးဘၣ်ယွၤ, ယတၢ်ဒဲးဘးဒိၣ်န့ၢ် ယ တူၢ်ကဲတက့ၢ်လီၤ. ¹⁴ ကွၢ်ကွၢ်, မုၢ်မဆါတနံၤအံၤနဟီ ထီၣ်ကွံာ်ယၤလၢဟီၣ်ခိၣ်အမဲာ်ညါ, ဒီးယကအိၣ်တဒၢ ဒီးနမဲာ်, ဒီးယကကဲထီၣ်ပှၤလဲၤဝ့ၤဝီၤတၢ်, ဒီးပှၤဃ့ၢ် တၢ်လၢဟီၣ်ခိၣ်ချၢ, ဒီးတၢ်ကမၤအသးလၢဖဲဒၣ်ပှၤလၢ အထံၣ်န့ၢ်ယၤတဂၤလၢ်လၢ်န့ၣ်ကမၤသံယၤလီၤ.

¹⁵ ဒီးယွၤစံးဘၣ်အီၤ, မၤသးဒ်န့ၣ်ဒီးဖဲဒၣ်ပှၤလၢအမၤ သံစီၤကၤယံၣ်တဂၤဂၤန့ၣ်, ကဘၣ်တၢ်ဒဲးဘးနွံစးလီၤ. ဒီးယွၤပာ်တၢ်ပနီၣ်လၢစီၤကၤယံၣ်အလိၤ, ဒ်သိးပှၤလၢ အထံၣ်န့ၢ်အီၤအသုတမၤသံအီၤနီတဂၤတဂ့ၤလီၤ.

¹⁶ ဒီးစီၤကၤယံၣ်ဟးထီၣ်ကွံာ်လၢယွၤအမဲာ်ညါ, ဒီးလဲၤ အိၣ်ဝဲဆိးဝဲလၢ ကီၢ်နိာ်အိၣ်လၢ ဧ့ၤဒ့ၣ်မုၢ်ထီၣ်တခီ လီၤ. ¹⁷ ဒီးစီၤကၤယံၣ်သ့ၣ်ညါအမါ, ဒီးအဝဲဒၣ်ဒၢထီၣ်, ဒီးဆံးစၢ်န့ၢ်စီၤဃနိာ်လီၤ. ဒီးတ့ဝ့ၢ်တဖျၢၣ်, ဒီးယုၢ်ဝဲ အမံၤဒ်သိးဒီးအဖိခွါဃနိာ်အမံၤလီၤ.

¹⁸ ဒီးစီၤဧၤရး အိၣ်ဖျဲၣ်လၢစီၤဃနိာ်အဂီၢ်, ဒီးစီၤဧၤရး ထီၣ်ဖိစီၤမဃူယအ့လး, ဒီးစီၤမဃူယအ့လးထီၣ်ဖိစီၤ မသူရှ့ၤအ့လး, ဒီးစီၤမသူရှ့ၤအ့လးထီၣ်ဖိစီၤလ့ၤမ့းလီၤ.

¹⁹ ဒီးစီၤလ့ၤမ့းဟံးန့ၢ်အမါခံဂၤလီၤ. အဝဲတဂၤအမံၤမ့ၢ် နီၢ်ဧဒၤ, ဒီးအဝဲတဂၤအမံၤမ့ၢ်နီၢ်စံလၤလီၤ. ²⁰ ဒီးနီၢ်ဧ ဒၤဆံးစၢ်န့ၢ်စီၤယၤဘလးလီၤ.― ဒီးအဝဲဒၣ်မ့ၢ်ပှၤလၢအ အိၣ်ဝဲဆိးဝဲလၢဒဲပူၤ, ဒီးအိၣ်ဒီးဆၣ်ဖိကီၢ်ဖိအဒၢတဖၣ် အပၢ်လီၤ. ²¹ ဒီးအဒီပုၢ်ဝဲၢ်တဂၤအမံၤမ့ၢ်စီၤယူၤဘလး လီၤ. အဝဲဒၣ်မ့ၢ်ပှၤလၢအဒ့တနၢ်ဒီးအူပံတဖၣ်အပၢ်လီၤ.

²² ဒီးနီၢ်စံလၤဆံးစၢ်စ့ၢ်ကီး စီၤတူၤဘလးက့ၤယံၣ်, ပှၤ လၢအသိၣ်လိကယဲၢ်ပှၤလၢအမၤတၢ်လၢ တိၢ်ဒီးထးခဲ လၢာ်လီၤ. ဒီးစီၤတူၤဘလးက့ၤယံၣ်အဒီပုၢ်ဝဲၢ်မုၣ် မ့ၢ် နီၢ်နၤဧမၤလီၤ.

²³ ဒီးစီၤလ့ၤမ့းစံးဘၣ်အမါတဖၣ်, နီၢ်ဧဒၤဒီးနီၢ်စံလၤ သ့ၣ်ဧၢ, ကနၣ်ယကလုၢ်, စီၤလ့ၤမ့းအမါသ့ၣ်သုဧၢ, ဒိကနၣ်ယတၢ်ကတိၤတက့ၢ်. အဂ့ၢ်ဒ်အံၤ, ယမၤသံ ပှၤတဂၤလၢယဘၣ်တူာ်အဂ့ၢ်, ဒီးပှၤဖိၣ်သၣ်ခွါတဂၤ လၢယဘၣ်တီၢ်အလီၢ်အဂ့ၢ်လီၤ. ²⁴ ပှၤလၢအမၤသံစီၤ ကၤယံၣ်န့ၣ်မ့ၢ်ဘၣ်တၢ်ဒဲးဘးနွံစးဒီး, မ့ၢ်မးပှၤလၢအ မၤသံစီၤလ့ၤမ့းန့ၣ်ကဘၣ်တၢ်ဒဲးဘးနွံဆံနွံစးလီၤ.

²⁵ ဒီးစီၤအၤဒၣ်သ့ၣ်ညါကဒီးအမါ, ဒီးအဝဲဒၣ်ဆံးစၢ် န့ၢ်အဖိပိာ်ခွါ, ဒီးယုၢ်အမံၤလၢစီၤရှ့သးလီၤ. အဂ့ၢ်ဒ် အံၤ, ယွၤပာ်န့ၢ်ယၤလၢတၢ်အချံအသၣ်အဂၤလၢ စီၤ ဟ့းဘ့းလးအလီၢ်, ပှၤလၢစီၤကၤယံၣ်မၤသံအီၤတဂၤ န့ၣ်လီၤ, စံးဝဲဒၣ်.

²⁶ ဒီးဖိခွါတဂၤအိၣ်ဖျဲၣ်စ့ၢ်ကီး လၢစီၤရှ့သးအဂီၢ်, ဒီး ယုၢ်ဝဲအမံၤလၢစီၤအနိၣ်လီၤ. တုၤနုၤတစုပှၤကိးထီၣ်သီ ယွၤအမံၤလီၤ.

၅

¹ အအံၤမ့ၢ်စီၤအၤဒၣ်အစၢၤအသွဲၣ်.

² မုၢ်တနံၤလၢယွၤတ့လီၤပှၤကညီန့ၣ် တ့လီၤအီၤလၢ ယွၤအဂီၤလီၤ. ပိာ်မုၣ်ဒီးပိာ်ခွါန့ၣ်တ့လီၤအီၤ, ဒီးဆိၣ် ဂ့ၤအီၤလီၤ. ဒီးမုၢ်တနံၤလၢအတ့လီၤဝဲန့ၣ်ယုၢ်အမံၤလၢ အၤဒၣ်လီၤ.

³ ဒီးစီၤအၤဒၣ်အိၣ်ဝဲအနံၣ်တကယၤသၢဆံ, ဒီးထီၣ်ဖိ လီၤဂာ်လၢအကစၢ်ဒၣ်ဝဲ, ဒ်အဂီၤဒၣ်ဝဲအသိးန့ၣ်ဒီးယုၢ် ဝဲအမံၤလၢစီၤရှ့သးလီၤ. ⁴ ဒီးစီၤအၤဒၣ်အမုၢ်နံၤမုၢ်သီ လၢအထီၣ်ဖိစီၤရှ့သးအလီၢ်ခံန့ၣ် မ့ၢ်အနံၣ်ဃိးကယၤ လီၤ. ဒီးထီၣ်ဖိအဖိမုၣ်ဒီးအဖိခွါလီၤ. ⁵ ဒီးစီၤအၤဒၣ်အ မုၢ်နံၤခဲလၢာ်န့ၣ်မ့ၢ်အနံၣ်ခွံကယၤသၢဆံ, ဒီးသံ ဝဲလီၤ.

⁶ ဒီးစီၤရှ့သးအိၣ်ဝဲအနံၣ်တကယၤယဲၢ်နံၣ်, ဒီးထီၣ်ဖိ စီၤအနိၣ်လီၤ. ⁷ ဒီးစီၤရှ့သးအိၣ်ဝဲလၢအထီၣ်ဖိစီၤအနိၣ် အလီၢ်ခံဃိးကယၤနွံနံၣ်, ဒီးထီၣ်ဖိအဖိမုၣ်ဒီးအဖိခွါ လီၤ. ⁸ ဒီးစီၤရှ့သးအမုၢ်နံၤခဲလၢာ်န့ၣ် မ့ၢ်ခွံကယၤတ ဆံခံနံၣ်, ဒီးသံဝဲလီၤ.

⁹ ဒီးစီၤအနိၣ်အိၣ်ဝဲအနံၣ်ခွံဆံ, ဒီးထီၣ်ဖိစီၤက့ၤနၣ် လီၤ. ¹⁰ ဒီးစီၤအနိၣ်အိၣ်ဝဲလၢအထီၣ်ဖိ စီၤက့ၤနၣ်အ လီၢ်ခံန့ၣ်အနံၣ်ဃိးကယၤတဆံယဲၢ်နံၣ်, ဒီးထီၣ်ဖိအ ဖိမုၣ်ဒီးအဖိခွါလီၤ. ¹¹ ဒီးစီၤအနိၣ် အမုၢ်နံၤခဲလၢာ်မ့ၢ် အနံၣ်ခွံကယၤယဲၢ်နံၣ်, ဒီးသံဝဲလီၤ.

¹² ဒီးစီၤက့ၤနၣ်အိၣ်ဝဲအနံၣ်နွံဆံ, ဒီးထီၣ်ဖိစီၤမၤဟလၤ လ့လးလီၤ. ¹³ ဒီးစီၤက့ၤနၣ်အိၣ်လၢအထီၣ်ဖိ စီၤမၤဟ လၤလ့လးအလီၢ်ခံအနံၣ်ဃိးကယၤလွံၢ်ဆံ, ဒီးထီၣ်ဖိ အဖိမုၣ်ဒီးအဖိခွါလီၤ. ¹⁴ ဒီးစီၤက့ၤနၣ် အမုၢ်နံၤခဲလၢာ် မ့ၢ်အနံၣ်ခွံကယၤတဆံ, ဒီးသံဝဲလီၤ.

¹⁵ ဒီးစီၤမၤဟလၤလ့လးအိၣ်ဝဲဃုဆံယဲၢ်နံၣ်ဒီး ထီၣ်ဖိ စီၤယၤရ့းလီၤ. ¹⁶ ဒီးစီၤမၤဟလၤလ့လးအိၣ်ဝဲလၢအထီၣ် ဖိစီၤယၤရ့းအလီၢ်ခံအနံၣ်ဃိးကယၤသၢဆံ, ဒီးထီၣ်ဖိ အဖိမုၣ်ဒီးအဖိခွါလီၤ. ¹⁷ ဒီးစီၤမၤဟလၤလ့လးအမုၢ်နံၤ ခဲလၢာ်မ့ၢ်အနံၣ်ဃိးကယၤခွံဆံယဲၢ်နံၣ်, ဒီးသံဝဲလီၤ.

¹⁸ ဒီးစီၤယၤရ့းအိၣ်ဝဲတကယၤဃုဆံခံနံၣ်, ဒီးထီၣ်ဖိစီၤ ဃနိာ်လီၤ. ¹⁹ ဒီးစီၤယၤရ့းအိၣ်ဝဲလၢအထီၣ်ဖိစီၤဃနိာ် အလီၢ်ခံအနံၣ်ဃိးကယၤ, ဒီးထီၣ်ဖိအဖိမုၣ်ဒီးအဖိခွါ လီၤ. ²⁰ ဒီးစီၤယၤရ့းအမုၢ်နံၤခဲလၢာ်မ့ၢ် အနံၣ်ခွံကယၤ ဃုဆံခံနံၣ်, ဒီးသံဝဲလီၤ.

²¹ ဒီးစီၤဃနိာ်အိၣ်ဝဲဃုဆံယဲၢ်နံၣ်, ဒီးထီၣ်ဖိစီၤမသူၤၡ လၤလီၤ. ²² ဒီးစီၤဃနိာ်လဲၤတၢ်ဒီးယွၤလၢအထီၣ်ဖိစီၤ မသူၤၡလၤအလီၢ်ခံအနံၣ်သၢကယၤ, ဒီးထီၣ်ဖိအဖိမုၣ် ဒီးအဖိခွါလီၤ. ²³ ဒီးစီၤဃနိာ်အမုၢ်နံၤခဲလၢာ်မ့ၢ်အနံၣ် သၢကယၤဃုဆံယဲၢ်နံၣ်လီၤ. ²⁴ ဒီးစီၤဃနိာ်လဲၤတၢ်ဒီး ယွၤလီၤ. ဒီးတအိၣ်ဘၣ်ဝဲဘၣ်ဝဲ. အဂ့ၢ်ဒ်အံၤ, ယွၤ ဟံးန့ၢ်အီၤလီၤ.

²⁵ ဒီးစီၤမသူၤၡှလၤအိၣ်ဝဲတကယၤဃိးဆံနွံနံၣ်, ဒီးထီၣ် ဖိစီၤလ့ၤမ့းလီၤ. ²⁶ ဒီးစီၤမသူၤၡလၤအိၣ်ဝဲလၢအထီၣ်ဖိ စီၤလ့ၤမ့းအလီၢ်ခံအနံၣ်နွံကယၤဃိးဆံခံနံၣ်, ဒီးထီၣ်ဖိ အဖိမုၣ်ဒီးအဖိခွါလီၤ. ²⁷ ဒီးစီၤမသူၤၡလၤ အမုၢ်နံၤခဲ လၢာ်န့ၣ်မ့ၢ်အနံၣ်ခွံကယၤဃုဆံခွံနံၣ်, ဒီးသံဝဲလီၤ.

²⁸ ဒီးစီၤလ့ၤမ့းအိၣ်ဝဲတကယၤဃိးဆံခံနံၣ်, ဒီးထီၣ်ဖိ အဖိခွါတဂၤလီၤ. ²⁹ ဒီးယုၢ်ဝဲအမံၤလၢစီၤနိအၤဒီးစံးဝဲ ဒၣ်, အအံၤတဂၤကမၤမုာ်ထီၣ်က့ၤ ပှၤလၢပတၢ်မၤဒီး ပမၤတၢ်လၢပစုတုၤတၢ်ဘှံးပသးအဂ့ၢ် လၢဟီၣ်ခိၣ်လၢ ယွၤဆိၣ်အၢအီၤအဃိလီၤ. ³⁰ ဒီးစီၤလ့ၤမ့းအိၣ်ဝဲလၢအ ထီၣ်ဖိစီၤနိအၤအလီၢ်ခံ အနံၣ်ယဲၢ်ကယၤခွံဆံယဲၢ်နံၣ်, ဒီးထီၣ်ဖိအဖိမုၣ်ဒီးအဖိခွါလီၤ. ³¹ ဒီးစီၤလ့ၤမ့းအမုၢ်နံၤ ခဲလၢာ်မ့ၢ်နွံကယၤနွံဆံနွံနံၣ်, ဒီးသံဝဲလီၤ.

³² ဒီးစီၤနိအၤအိၣ်ဝဲအနံၣ်ယဲၢ်ကယၤ, ဒီးထီၣ်ဖိစီၤရှ့ၣ်, ဒီးစီၤဃၣ်, ဒီးစီၤယ့ဖ့းသးလီၤ.

၆

¹ ဒီးတၢ်မၤအသးတုၤ ပှၤကညီအါထီၣ်သီလၢဟီၣ်ခိၣ် ချၢ, ဒီးဖိမုၣ်တဖၣ်အိၣ်ဖျဲၣ်လၢပဂီၢ်ဒီး, ² ယွၤအဖိခွါ တဖၣ်ထံၣ်ဘၣ်ဝဲလၢပှၤကညီအဖိမုၣ်မ့ၢ်အဂ့ၤလီၤ. ဒီး ဟံးန့ၢ်အမါဖဲဒၣ်အသးကွံအီၤတဖၣ်န့ၣ်လီၤ.

³ ဒီးယွၤစံးဝဲဒၣ်, ယသးတဂ့ၢ်လိာ်ဘှီလိာ်ဒီးပှၤကညီ လီၤထူလီၤယိာ်ဘၣ်, အဂ့ၢ်ဒ်အံၤအဝဲဒၣ်မ့ၢ်တၢ်ညၣ်စ့ၢ် ကီးလီၤ. ဘၣ်ဆၣ်ဒီးအမုၢ်နံၤကအိၣ်အနံၣ်တကယၤ ခံဆံလီၤ. ⁴ ဒီးတၢ်လၢမုၢ်နံၤတဖၣ်န့ၣ် ပှၤနီၢ်ဒိၣ်ဖိတ ဖၣ်အိၣ်ဝဲလၢဟီၣ်ခိၣ်ချၢလီၤ. ဒီးအိၣ်စ့ၢ်ကီးဝဲလၢအလီၢ် ခံန့ၣ်ဖဲယွၤအဖိခွါ လဲၤနုာ်လၢပှၤကညီအဖိမုၣ်အအိၣ်, ဒီးအဝဲသ့ၣ်ဆံးစၢ်န့ၢ်တၢ်လၢအဂီၢ်လီၤ. ဒီးအဝဲသ့ၣ်တ ဖၣ်န့ၣ်ကဲထီၣ်စ့ၢ်ကီးပှၤအဒိၣ်အထီ, ပှၤလၢအမံၤဟူ သၣ်ဖျါလၢပျၢၤလီၤ.

⁵ ဒီးယွၤထံၣ်ဝဲလၢပှၤကညီအတၢ်ဒဲးဘးန့ၣ် မ့ၢ်အဒိၣ် လၢဟီၣ်ခိၣ်ချၢ, ဒီးကယဲၢ်အတၢ်ကူၣ်ဆိကမိၣ်လၢအ သးတမံၤလၢ်လၢ်န့ၣ် မ့ၢ်ထဲအအၢအသီကိးမုၢ်နံၤမုၢ်နၤ ဒဲးလီၤ. ⁶ ဒီးမ့ၢ်အတ့လီၤ ပှၤကညီလၢဟီၣ်ခိၣ်ချၢဒီး, ယွၤပီၢ်ယၢ်လီၤက့ၤအသး, ဒီးအသးအုးလၢအသးကံၢ် ပူၤလီၤ.

⁷ ဒီးယွၤစံးဝဲဒၣ်, ပှၤကညီလၢယတ့လီၤအီၤန့ၣ်ယက မၤဟးဂီၤကွံာ်အီၤလၢဟီၣ်ခိၣ်ချၢ, လၢပှၤကညီပၢၢ်လၢ ဆၣ်ဖိကီၢ်ဖိ, ဒီးတၢ်အစွါအစွဲဒီးထိၣ်ဧိၤလံၣ်ဧိၤလၢတၢ် ဖးဖီလီၤ. အဂ့ၢ်ဒ်အံၤ, မ့ၢ်ယတ့လီၤအီၤဒီး, ယပီၢ်ယၢ် လီၤက့ၤယသးလီၤ. ⁸ မ့မ့ၢ်စီၤနိအၤဘၣ်ဘျုးလၢယွၤအ မဲာ်ညါလီၤ.

⁹ အအံၤမ့ၢ်စီၤနိအၤအစၢၤအသွဲၣ်. ဒီးစီၤနိအၤမ့ၢ်ပှၤအတီ, ဒီးပှၤအလၢအပှဲၤလၢပှၤတ စိၤဒၣ်အီၤအကျါလီၤ. စီၤနိအၤလဲၤတၢ်ဒီးယွၤလီၤ.

¹⁰ ဒီးစီၤနိအၤထီၣ်ဖိအဖိခွါသၢဂၤ, စီၤရှ့ၣ်, ဒီးစီၤဃၣ်, ဒီးစီၤယ့ဖ့းသးလီၤ.

¹¹ ဒီးဟီၣ်ခိၣ်အၢဝဲလၢယွၤအမဲာ်ညါ, ဒီးဟီၣ်ခိၣ်လၢဝဲ ပှဲၤဝဲဒီးတၢ်မၤဆူၣ်မၤစိးလီၤ. ¹² ဒီးယွၤကွၢ်လီၤလၢဟီၣ် ခိၣ်ချၢ, ဒီးကွၢ်ကွၢ်, မ့ၢ်အအၢအသီလီၤ. အဂ့ၢ်ဒ်အံၤ, ကယဲၢ်တၢ်ဖံးတၢ်ညၣ်မၤအၢလီၤအကျဲလၢ ဟီၣ်ခိၣ်ချၢ ခဲလၢာ်လီၤ.

¹³ ဒီးယွၤစံးဘၣ်စီၤနိအၤ, တၢ်ညၣ်ခဲလၢာ်အကတၢၢ်ဟဲ ထီၣ်လံလၢယမဲာ်ညါလံ. အဂ့ၢ်ဒ်အံၤ, ဟီၣ်ခိၣ်လၢပှဲၤ ဝဲဒီးတၢ်မၤဆူၣ်မၤစိးလၢအဝဲသ့ၣ်အဃိဒီး, ကွၢ်ကွၢ်, ယကမၤဟးဂီၤကွံာ်အီၤဒီးဟီၣ်ခိၣ်လီၤ. ¹⁴ မၤကဘီလၢ သ့ၣ်ကီးဖၢ်လၢနဂီၢ်တက့ၢ်. နဘၣ်မၤဒၢးသ့ၣ်တဖၣ်လၢ ကဘီအပူၤ, ဒီးလၢညါမ့ၢ်ဂ့ၤ, လၢခိမ့ၢ်ဂ့ၤ, နဘၣ်ဖှူ အီၤဒီးတၢ်ဖှူလီၤ. ¹⁵ ဒီးနဘၣ်မၤအီၤဒ်အံၤ, ကဘီအထီ န့ၣ်အပျၢ်သၢကယၤ, အဒီၣ်ဃီၤန့ၣ်အပျဲၢ်ယဲၢ်ဆံ, ဒီး အကစီၤထီၣ်န့ၣ်အပျၢ်သၢဆံလီၤ. ဒီးနဘၣ်မၤတၢ်ထူၣ် ဖျိလၢကဘီအပူၤလီၤ. ¹⁶ ဒီးအဖီခိၣ်န့ၣ်နဘၣ်မၤဝံၤလၢ တပျၢ်, ဒီးကဘီအတြဲၤန့ၣ်နဘၣ်ပာ်လၢအကပၤလီၤ. နဘၣ်မၤအဒၢးလၢအခီၣ်ထံးတတီၤ, ခံတတီၤ, ဒီးသၢ တတီၤလီၤ. ¹⁷ ဒီးကွၢ်ကွၢ်, ယဲဒၣ်အံၤယဒုးဟဲထီၣ်ယဲ ထံလုၣ်ဘၢတၢ်လၢဟီၣ်ခိၣ်ချၢ, လၢအကမၤဟးဂီၤကွံာ် ကယဲၢ်တၢ်ညၣ်လၢအအိၣ်ဒီးတၢ်မူအသါလၢမူခိၣ်အဖီ လာ်လီၤ. ကယဲၢ်တၢ်အိၣ်လၢဟီၣ်ခိၣ်ချၢကသံကွံာ်ကိး မံၤဒဲးလီၤ. ¹⁸ မ့မ့ၢ်နဲဒၣ်အံၤယကမၤဂၢၢ်မၤကျၢၤယတၢ် အၢၣ်လီၤအီလီၤဒီးနၤ, ဒီးနဘၣ်လဲၤနုာ်လၢကဘီအပူၤ ဒီးနဖိခွါသ့ၣ်, ဒီးနမါ, ဒီးနဖိခွါအမါသ့ၣ်တဖၣ်အိၣ် ဒီးနၤလီၤ.

¹⁹ ဒီးနဘၣ်ဒုးလဲၤနုာ်တၢ်ခံဒုခံဒုလၢ ကယဲၢ်တၢ်သးအ ကျါလၢတၢ်ကိးကလုာ်ဒဲးအကျါဆူကဘီအပူၤ, ဒ်သိး အကမူဒံးဒီးနၤ, အမိၢ်ဒီးအဖါဘၣ်အိၣ်လီၤ.

²⁰ ထိၣ်ဖိလံၣ်ဖိဒ်အကလုာ်အသိး, ဒီးဆၣ်ဖိကီၢ်ဖိဒ်အ ကလုာ်အသိး, ကယဲၢ်တၢ်အစွါအစွဲလၢဟီၣ်ခိၣ်ချၢဒ် အကလုာ်အသိးန့ၣ် ခံဒုခံဒုလၢကိးကလုာ်ဒဲးအကျါ, ကဟဲဆူနအိၣ်, ဒ်သိးအကမူဒံးလီၤ.

²¹ ဒီးဟံးန့ၢ်ဆူနအိၣ် တၢ်အီၣ်ကိးမံၤဒဲးလၢတၢ်အီၣ်အီၤ အကျါန့ၣ်တက့ၢ်, ဒီးနဘၣ်ပာ်ဖှိၣ်လၢနဂီၢ်, ဒီးကကဲ ထီၣ်တၢ်အီၣ်လၢနဂီၢ်, ဒီးလၢအဝဲသ့ၣ်အဂီၢ်လီၤ.

²² ဒ်န့ၣ်အသိး စီၤနိအၤမၤဝဲ, ဒ်ကယဲၢ်တၢ်လၢယွၤမၤ လိာ်အီၤအသိးန့ၣ်မၤဝဲဒ်န့ၣ်အသိးလီၤ.

၇

¹ ဒီးယွၤစံးဘၣ်စီၤနိအၤ, ဟဲနုာ်နဲ, ဒီးနပှၤဟံၣ်ဖိခဲ လၢာ်ဆူကဘီအပူၤန့ၣ်တက့ၢ်. အဂ့ၢ်ဒ်အံၤ, နဲဒၣ်အံၤ ယထံၣ်န့ၢ်နၤလၢပှၤအတီအလိၤလၢ ယမဲာ်ညါလၢပှၤ တစိၤအံၤအကျါလီၤ. ² လၢကယဲၢ်ဆၣ်ဖိကီၢ်ဖိလၢအ ကဆှီတဖၣ်အကျါနဘၣ်ဟံးန့ၢ် နွံဒုနွံဒုအမိၢ်ဒီးအဖါ, ဒီးလၢဆၣ်ဖိကီၢ်ဖိလၢအတကဆှီဘၣ်အကျါ, ခံဒုခံဒု အမိၢ်ဒီးအဖါလီၤ. ³ လၢထိၣ်ဖိလံၣ်ဖိလၢတၢ်ဖးဖီအ ကျါ, နဘၣ်ဟံးန့ၢ်စ့ၢ်ကီးနွံဘ့ၣ်နွံဘ့ၣ်အမိၢ်ဒီးအဖါ, ဒ် သိးအချံအသၣ်ကမူဒံးလၢဟီၣ်ခိၣ်ချၢဒီဘ့ၣ်ညါလီၤ.―

⁴ အဂ့ၢ်ဒ်အံၤ, နွံသီပူၤကွံာ်ဒီး, ယကမၢတၢ်ဟဲစူၤအနံၤ လွံၢ်ဆံဒီးအနၤလွံၢ်ဆံ လၢဟီၣ်ခိၣ်ချၢ, ဒီးကယဲၢ်တၢ် သးလၢ ယတ့လီၤအီၤတမံၤလၢ်လၢ်န့ၣ်, ယကမၤဟး ဂီၤကွံာ်အီၤလၢဟီၣ်ခိၣ်ချၢလီၤ.

⁵ ဒီးစီၤနိအၤမၤဝဲ ဒ်ကယဲၢ်တၢ်လၢယွၤမၤလိာ်အီၤအ သိးန့ၣ်လီၤ. ⁶ ဒီးလၢထံလုၣ်ဘၢတၢ်အိၣ်ဝဲလၢဟီၣ်ခိၣ် ချၢန့ၣ်စီၤနိအၤအသးပှၢ်အနံၣ်ဃုကယၤလီၤ.

⁷ ဒီးစီၤနိအၤ, ဒီးအဖိခွါသ့ၣ်, ဒီးအမါ, ဒီးအဖိခွါအ မါသ့ၣ်တဖၣ်အိၣ်ဒီးအီၤန့ၣ်, လဲၤနုာ်ဆူကဘီပူၤလၢ ထံလုၣ်ဘၢတၢ်အမဲာ်ညါလီၤ. ⁸ ဒီးလၢဆၣ်ဖိကီၢ်ဖိအ ကဆှီ, ဒီးလၢဆၣ်ဖိကီၢ်ဖိတကဆှီဘၣ်, ဒီးလၢထိၣ် ဖိလံၣ်ဖိ, ဒီးလၢကယဲၢ်တၢ်လၢအစွါလၢဟီၣ်ခိၣ်ချၢတ မံၤလၢ်လၢ်အကျါ, ⁹ ခံဒုခံဒုန့ၣ်လဲၤနုာ်လၢကဘီပူၤဆူ စီၤနိအၤအအိၣ်, အမိၢ်ဒီးအဖါ, ဒ်ယွၤမၤလိာ်စီၤနိအၤ အသိးန့ၣ်လီၤ. ¹⁰ ဒီးတၢ်မၤအသးလၢနွံသီပူၤကွံာ်ဒီး, ထံလုၣ်ဘၢတၢ်အိၣ်ထီၣ်ဝဲလၢဟီၣ်ခိၣ်ချၢလီၤ.

¹¹ လၢစီၤနိအၤအသးပှၢ်အနံၣ်ဃုကယၤ, လါခံလါတ လါ, ဒီးလါထီၣ်တဆံနွံနံၤမုၢ်တနံၤဃီန့ၣ်, တၢ်ယိာ် ပူၤဖးဒိၣ်အထံထီၣ်ပၢၢ်ဘၢၣ်ဖျိထီၣ်အသး, ဒီးမူခိၣ်အ တၢ်ထူၣ်ဖျိအိးထီၣ်အသးလီၤ. ¹² ဒီးတၢ်ဟဲစူၤလၢဟီၣ် ခိၣ်ချၢအနံၤလွံၢ်ဆံ, ဒီးအနၤလွံၢ်ဆံလီၤ.

¹³ တၢ်လၢမုၢ်နံၤတနံၤဃီန့ၣ်စီၤနိအၤ, ဒီးစီၤနိအၤအဖိ ခွါတဖၣ်, စီၤရှ့ၣ်, ဒီးစီၤဃၣ်, ဒီးစီၤယ့ဖ့းသး, ဒီးစီၤ နိအၤအမါ, ဒီးအဖိခွါအမါသၢဂၤအိၣ်ဒီးအီၤန့ၣ် လဲၤ နုာ်လၢကဘီပူၤလီၤ. ¹⁴ အဝဲသ့ၣ်တဖၣ်, ဒီးကယဲၢ်ဆၣ် ဖိကီၢ်ဖိအမံၤဒ်အကလုာ်အသိး, ဒီးကယဲၢ်ဆၣ်ဖိကီၢ်ဖိ အဒၢဒ်အကလုာ်အသိး, ဒီးကယဲၢ်တၢ်အစွါလၢအစွါ လၢဟီၣ်ခိၣ်ချၢဒ်အကလုာ်အသိး, ဒီးကယဲၢ်ထိၣ်ဧိၤ လံၣ်ဧိၤဒ်အကလုာ်အသိး, ကယဲၢ်တၢ်အိၣ်ဒီးအဒံးဆ့ တမံၤလၢ်လၢ်န့ၣ်, ¹⁵ လဲၤနုာ်လၢကဘီပူၤဆူစီၤနိအၤအ အိၣ်ခံဒုခံဒုလၢကယဲၢ်တၢ်ညၣ်အကျါ, ဖဲတၢ်မူအသါ အိၣ်ဝဲလၢအပူၤ, ¹⁶ ဒီးတၢ်လၢအလဲၤနုာ်တဖၣ်န့ၣ်လဲၤ နုာ်လၢအမိၢ်ဒီးအဖါလၢကယဲၢ်တၢ်ညၣ်အကျါ, ဒ်ယွၤ မၤလိာ်တၢ်အသိးန့ၣ်လီၤ. ဒီးယွၤကးတံာ်ဃာ်အခံလီၤ.

¹⁷ ဒီးထံလုၣ်ဘၢတၢ်န့ၣ်အိၣ်ဝဲ အသီလွံၢ်ဆံလၢဟီၣ်ခိၣ် ချၢ, ဒီးထံန့ၣ်ဒိၣ်ထီၣ်, ဒီးကဘီကဖီထီၣ်, ဒီးအိၣ်ဝဲ ထီၣ်ထီလၢဟီၣ်ခိၣ်အဖီခိၣ်လီၤ. ¹⁸ ဒီးထံဆူၣ်ထီၣ်, ဒီး ဒိၣ်ထီၣ်အါအါကလဲာ်လၢဟီၣ်ခိၣ်ချၢ, ဒီးကဘီလဲၤတၢ် လၢထံဖံးခိၣ်န့ၣ်လီၤ. ¹⁹ ဒီးထံဆူၣ်ထီၣ်ဆူၣ်ဆူၣ်ကလဲာ် လၢဟီၣ်ခိၣ်ချၢ, ဒီးကယဲၢ်ကစၢၢ်ထီ လၢမူခိၣ်ဒီဘ့ၣ် ညါအဖီလာ်န့ၣ်လီၤဘျၢဝဲလီၤ. ²⁰ ဒီးထံဒိၣ်ထီၣ်ကစီၤ ထီၣ်တဆံယဲၢ်ပျၢ်, ဒီးကစၢၢ်ကလိလီၤဘျၢဝဲလီၤ.

²¹ ဒီးကယဲၢ်တၢ်ညၣ်လၢ အဂဲၤလၢဟီၣ်ခိၣ်ချၢ, ထိၣ်ဧိၤ လံၣ်ဧိၤမ့ၢ်ဂ့ၤ, ဆၣ်ဖိကီၢ်ဖိအဒၢမ့ၢ်ဂ့ၤ, ဆၣ်ဖိကီၢ်ဖိအ မံၤမ့ၢ်ဂ့ၤ, ကယဲၢ်တၢ်စွါလၢအစွါလၢဟီၣ်ခိၣ်ချၢမ့ၢ်ဂ့ၤ, ကယဲၢ်ပှၤကညီမ့ၢ်ဂ့ၤ, သံဝဲခဲလၢာ်လီၤ. ²² ဒီးတၢ်ခဲ လၢာ်လၢတၢ်မူအသါအိၣ်လၢအနါဒ့ပူၤလၢ အအိၣ်လၢ ခိသံဝဲကိးမံၤဒဲးလီၤ.

²³ ဒီးကယဲၢ်တၢ်သးလၢ ဟီၣ်ခိၣ်ချၢလၢ ပှၤကညီပၢၢ် လၢဆၣ်ဖိကီၢ်ဖိ, ဒီးတၢ်အစွါအစွဲ, ဒီးထိၣ်ဖိလံၣ်ဖိလၢ တၢ်ဖးဖီန့ၣ်, ဟးဂီၤကွံာ်ခဲလၢာ်လီၤ. ဒီးဟးဂီၤကွံာ်ဝဲ လၢဟီၣ်ခိၣ်ချၢ, ဒီးအိၣ်လီၤတဲာ်ထဲစီၤနိအၤ, ဒီးပှၤလၢ အအိၣ်ဒီးအီၤလၢကဘီအပူၤလီၤ. ²⁴ ဒီးထံဆူၣ်ထီၣ်လၢ ဟီၣ်ခိၣ်ချၢအနံၤတကယၤယဲၢ်ဆံလီၤ.

၈

¹ ဒီးယွၤသ့ၣ်နီၣ်ထီၣ်က့ၤစီၤနိအၤ, ဒီးကယဲၢ်တၢ်သး ဒီးကယဲၢ်ဆၣ်ဖိကီၢ်ဖိလၢအအိၣ်ဒီးအီၤလၢကဘီအပူၤ, ဒီးယွၤဒုးအူထီၣ်ကလံၤလၢဟီၣ်ခိၣ်ချၢဒီး ထံလီၤသံးဝဲ လီၤ. ² ဒီးတၢ်ယိာ်ပူၤအထံထီၣ်ပၢၢ်, ဒီးမူခိၣ်အတၢ် ထူၣ်ဖျိတဖၣ်ဘၣ်ဆွံတံာ်ဃာ်အသး, ဒီးတၢ်ဟဲစူၤလၢ မူခိၣ်တုာ်ဝဲလီၤ. ³ ဒီးထံက့ၤကဒါက့ၤလၢဟီၣ်ခိၣ်ချၢ တထံၣ်ဃီ, ဒီးအသီတကယၤယဲၢ်ဆံပူၤကွံာ်ဒီး, ထံ လီၤစှၤဝဲလီၤ.

⁴ ဒီးလၢလါနွံလါတလါ, လါထီၣ်တဆံနွံနံၤတနံၤန့ၣ် ကဘီတုာ်ထီၣ်လၢကစၢၢ်အရၤရးအလိၤလီၤ.

⁵ ဒီးထံစှၤလီၤတထံၣ်ဃီ တုၤလီၤလၢလါဆံဆဲၣ်လါ တလါ, ဒီးလၢလါဆံဆဲၣ်လါတလါ, ဒီးလါထီၣ်တ နံၤန့ၣ် ကစၢၢ်တဖၣ်အဒီခိၣ်အိၣ်ဖျါထီၣ်ဝဲလီၤ.

⁶ ဒီးတၢ်မၤအသးလၢ အသီလွံၢ်ဆံပူၤကွံာ်ဒီးစီၤနိအၤ အိးထီၣ် ကဘီအတၢ်ထူၣ်ဖျိလၢအမၤဝဲလီၤ. ⁷ ဒီးပျၢ် ထီၣ်စိးဝၣ်ဃးတဘ့ၣ်, ဒီးအဝဲန့ၣ်လဲၤဒီးဟဲက့ၤလဲၤဒီး ဟဲက့ၤ, တုၤထံသူထီၣ်ကွံာ်လၢဟီၣ်ခိၣ်ချၢလီၤ. ⁸ ထံလီၤသံးဧါတလီၤသံးဘၣ်ဧါလၢဟီၣ်ခိၣ်ချၢ, ဒ်သိးအကသ့ၣ်ညါဒီး, ပျၢ်ထိၣ်လွံၢ်တဘ့ၣ်လၢအအိၣ်လီၤ.―

⁹ ဒီးထိၣ်လွံၢ်တဘ့ၣ်န့ၣ်တထံၣ်န့ၢ်ဘၣ် တၢ်အိၣ်ဘှံးအ လီၢ်လၢအခီၣ်အဂီၢ်နီတပူၤဘၣ်ဒီး, ဟဲက့ၤကဒါက့ၤ ဆူအအိၣ်လၢကဘီပူၤလီၤ. အဂ့ၢ်ဒ်အံၤ, ထံအိၣ်လၢ ဟီၣ်ခိၣ်ချၢဒီဘ့ၣ်ညါလီၤ. ဒီးယူာ်ထီၣ်အစု, ဒီးဟံးန့ၢ် အီၤ, ဒီးဒုးနုာ်အီၤဆူကဘီပူၤဆူအအိၣ်လီၤ.

¹⁰ ဒီးအိၣ်ခိးဒံးနွံသီကဒီး, ဒီးပျၢ်ကဒီးထိၣ်လွံၢ်တဘ့ၣ် န့ၣ်လၢကဘီပူၤလီၤ. ¹¹ ဒီးထိၣ်လွံၢ် ဟဲက့ၤဆူအအိၣ် လၢမုၢ်ဟါ, ဒီးကွၢ်ကွၢ်, သ့ၣ်စၤယံးအလၣ်သံကစဲာ် တဘ့ၣ်အိၣ်လၢအနိးပူၤလီၤ. ဒီးစီၤနိအၤသ့ၣ်ညါဝဲလၢ ထံလီၤသံးကွံာ်လၢဟီၣ်ခိၣ်ချၢလီၤ.

¹² ဒီးအိၣ်ခိးဒံးနွံသီကဒီး, ဒီးပျၢ်ထိၣ်လွံၢ်န့ၣ်, ဒီးတဟဲ က့ၤလၢၤဘၣ်ဆူအအိၣ်ဘၣ်.

¹³ ဒီးတၢ်မၤအသးလၢ အနံၣ်ဃုကယၤတနံၣ်, လါခီၣ် ထံးတလါ, လါထီၣ်တနံၤန့ၣ်ထံသူထီၣ်ကွံာ်လၢဟီၣ် ခိၣ်ချၢ, ဒီးစီၤနိအၤမၤကွံာ်ကဘီအတၢ်ကျၢၢ်ဘၢ, ဒီး ကွၢ်ဝဲ, ဒီးကွၢ်ကွၢ်, ဟီၣ်ခိၣ်ဘ့ၣ်ခိၣ်ဃ့ထီၣ်လံအသး လံ. ¹⁴ ဒီးလၢလါခံလါတလါ, လါထီၣ်အနံၤခံဆံနွံနံၤ တနံၤဒီးကွၢ်ကွၢ်, ဟီၣ်ခိၣ်ဃ့ထီၣ်ဝဲလီၤ. ဒီးယွၤစံးဘၣ်စီၤနိအၤဒီးစံးဝဲဒၣ်, ¹⁵ ယုၢ်လီၤလၢ ကဘီပူၤ, နဲဒၣ်, ဒီးနမါ, ဒီးနဖိခွါသ့ၣ်, ဒီးနဖိခွါအမါ သ့ၣ်တဖၣ်အိၣ်ဒီးနၤတက့ၢ်. ¹⁷ ဒုးယုၢ်လီၤဒီးနၤကယဲၢ် တၢ်သးလၢအအိၣ်ဒီးနၤ လၢတၢ်ညၣ်ခဲလၢာ်အကျါ, ထိၣ်ဖိလံၣ်ဖိ, ဆၣ်ဖိကီၢ်ဖိဒီးကယဲၢ်တၢ်စွါလၢအစွါလၢ ဟီၣ်ခိၣ်ချၢ, ဒ်သိးအကဖှံထီၣ်လၢဟီၣ်ခိၣ်ချၢ, ဒီးသၣ် ထီၣ်, ဒီးအါထီၣ်လၢဟီၣ်ခိၣ်ချၢန့ၣ်တက့ၢ်.

¹⁸ ဒီးစီၤနိအၤယုၢ်လီၤဝဲ, ဒီးအဖိခွါသ့ၣ်, ဒီးအမါ, ဒီး အဖိခွါအမါသ့ၣ်တဖၣ်အိၣ်ဒီးအီၤလီၤ. ¹⁹ ကယဲၢ်ဆၣ်ဖိ ကီၢ်ဖိ, ကယဲၢ်တၢ်စွါတၢ်စွဲ, ဒီးကယဲၢ်ထိၣ်ဖိလံၣ်ဖိ, ဒီးဖဲဒၣ်တၢ်လၢအစွါလၢဟီၣ်ခိၣ်ချၢတမံၤလၢ်လၢ်, ဒ် အဒူၣ်တဖၣ်အသိးန့ၣ်ယုၢ်လီၤဝဲလၢကဘီပူၤလီၤ.

²⁰ ဒီးစီၤနိအၤမၤတၢ်လုၢ်လီၢ် လၢယွၤအဂီၢ်, ဒီးဟံးန့ၢ် တၢ်လၢကယဲၢ်ဆၣ်ဖိကီၢ်ဖိအကဆှီ, ဒီးကယဲၢ်ထိၣ်ဖိ လံၣ်ဖိအကဆှီတမံၤလၢ်လၢ်အကျါန့ၣ်, ဒီးလုၢ်တၢ်လုၢ် မ့ၣ်အူလၢတၢ်လုၢ်လီၢ်န့ၣ်အဖီခိၣ်လီၤ. ²¹ ဒီးယွၤနၢထီၣ်တၢ်နၢမူ, ဒီးယွၤစံးလၢအသးကံၢ်ပူၤ, ပှၤကညီအသးကူၣ်ထီၣ်တၢ်မၤအအၢအသီ လၢအဖိၣ်သၣ်ခွါထီၣ်လံၤလံၤဘၣ်ဆၣ်ဒီး, ယတဆိၣ်အၢလၢၤဘၣ်ဟီၣ်ခိၣ်လၢပှၤကညီအဃိဘၣ်, ဒီးယတကျီလၢၤဘၣ်ကယဲၢ်တၢ်သး ဒ်ယမၤတ့ၢ်အသိးန့ၣ်ဘၣ်လီၤ.―

²² ဟီၣ်ခိၣ်အမုၢ်နံၤလၢအအိၣ်ဒံးခဲလၢာ်န့ၣ် ဖှံတၢ်အက တီၢ်, ဒီးကူးဘုအကတီၢ်, ဒီးတၢ်ဂိၢ်အကတီၢ်, ဒီး တၢ်ကိၢ်အကတီၢ်, ဒီးတၢ်စူၤအကတီၢ်, ဒီးတၢ်ယီၤအ ကတီၢ်, ဒီးနံၤ, ဒီးနၤ, တတုာ်ဘၣ်ဘၣ်လီၤ.

၉

¹ ဒီးယွၤဆိၣ်ဂ့ၤစီၤနိအၤ, ဒီးအဖိခွါသ့ၣ်တဖၣ်, ဒီးစံး ဘၣ်အီၤ, မ်သုသၣ်ထီၣ်, ဒီးအါထီၣ်, ဒီးမၤပှဲၤထီၣ် ဟီၣ်ခိၣ်တက့ၢ်. ² ဒီးတၢ်ပျံၤသုဒီးတၢ်ဖုးသုကအိၣ်လၢ ကယဲၢ်ဆၣ်ဖိကီၢ်ဖိအလိၤလၢဟီၣ်ခိၣ်ချၢ, ဒီးလၢက ယဲၢ်ထိၣ်ဖိလံၣ်ဖိအလိၤလၢတၢ်ဖးဖီ, ဒီးလၢကယဲၢ်တၢ် လၢအစွါလၢဟီၣ်ခိၣ်ချၢအလိၤ, ဒီးလၢကယဲၢ်ဒ့ၣ်ဧိၤ ညၣ်ဧိၤအလိၤလၢပီၣ်လဲၣ်ပူၤလီၤ. တၢ်ဟ့ၣ်လီၤအီၤလၢ သုစုပူၤလီၤ. ³ ကယဲၢ်တၢ်ဂဲၤလၢအမူဝဲ တမံၤလၢ်လၢ် န့ၣ်ကကဲထီၣ်တၢ်အီၣ်လၢသုဂီၢ်, ဒ်တၢ်မဲတၢ်မါအသံ ကစဲာ်အသိးန့ၣ် ယဟ့ၣ်လီၤသုလၢ တၢ်ခဲလၢာ်လီၤ.―

⁴ မ့မ့ၢ်တၢ်ညၣ်အိၣ်ဒီးအတၢ်မူ ဒ်ပစံးတၢ်အသိးအသွံၣ် န့ၣ်, အီၣ်အီၤတဂ့ၤ.

⁵ ဒီးယကဃုသုသးသမူအသွံၣ်သပှၢ်တၢၢ်လီၤ. ယက ဃုအီၤလၢကယဲၢ်ဆၣ်ဖိကီၢ်ဖိအစုပူၤ, ဒီးလၢကယဲၢ်ပှၤ ကညီအစုပူၤလီၤ. လၢကယဲၢ်ပှၤကညီ အဒီပုၢ်ဝဲၢ်အစု ပူၤတဂၤလၢ်လၢ်န့ၣ် ယကဃုပှၤကညီအသးသမူလီၤ.

⁶ ပှၤလၢအလူလီၤပှၤကညီအသွံၣ်န့ၣ်, အသွံၣ်ကဘၣ် တၢ်လူလီၤအီၤလၢ ပှၤကညီအစုပူၤလီၤ. အဂ့ၢ်ဒ်အံၤ တၢ်တ့လီၤပှၤကညီလၢယွၤအဂီၢ်လီၤ. ⁷ ဒီးသုဝဲသ့ၣ်တ ဖၣ်အံၤသၣ်ထီၣ်, ဒီးအါထီၣ်တက့ၢ်. ထီၣ်ဖိအါဂၤလၢ ဟီၣ်ခိၣ်ချၢ, ဒီးအါထီၣ်လၢအဖီခိၣ်တက့ၢ်.

⁸ ဒီးယွၤစံးဘၣ်စီၤနိအၤဒီးအဖိခွါအိၣ်ဒီးအီၤ, ဒီးစံးဝဲ ဒၣ်, ⁹ ဒီးယဲဒၣ်အံၤ, ကွၢ်ကွၢ်, ယပာ်ယတၢ်အၢၣ်လီၤ အီလီၤဒီးသု, ဒီးသုချံသုသၣ်လၢသုလီၢ်ခံ, ¹⁰ ဒီးကယဲၢ် တၢ်သးအိၣ်ဒီးသုလၢထိၣ်ဖိလံၣ်ဖိ, လၢဆၣ်ဖိကီၢ်ဖိအ ဒၢ, ဒီးလၢကယဲၢ်ဆၣ်ဖိကီၢ်ဖိလၢ ဟီၣ်ခိၣ်ချၢသ့ၣ်တ ဖၣ်အကျါအိၣ်ဒီးသု, လၢကယဲၢ်တၢ်လၢအယုၢ်လီၤလၢ ကဘီပူၤပၢၢ်လၢ ကယဲၢ်ဆၣ်ဖိကီၢ်ဖိလၢဟီၣ်ခိၣ်ချၢတ မံၤလၢ်လၢ်လီၤ. ¹¹ ဒီးယကပာ်ယတၢ်အၢၣ်လီၤအီလီၤ ဒီးသုလီၤ. ဒီးကယဲၢ်တၢ်ညၣ်တဘၣ်လၢၤဘၣ်တၢ်ဒီၣ် တဲာ်ကွံာ်အီၤလၢ ထံလုၣ်ဘၢတၢ်ဘၣ်ဒီး ထံလုၣ်ဘၢ တၢ်လၢအကမၤဟးဂီၤကွံာ်ဟီၣ်ခိၣ်အံၤ, တအိၣ်ထီၣ် လၢၤဘၣ်လီၤ.

¹² ဒီးယွၤစံးဝဲဒၣ်, ယတၢ်အၢၣ်လီၤအီလီၤအပနီၣ်လၢ ယအၢၣ်လီၤအီလီၤဒီးသုဒီး ကယဲၢ်တၢ်သးလၢအအိၣ် ဒီးသုအစိၤစိၤအဃၣ်ဃၣ်န့ၣ်မ့ၢ်အအံၤ, ¹³ ယပာ်ယချံၣ် လၢတၢ်အၢၣ်အလိၤ, ဒီးကကဲထီၣ်တၢ်အၢၣ်လီၤအီလီၤ အပနီၣ်လၢယအၢၣ်လီၤအီလီၤဒီးဟီၣ်ခိၣ်န့ၣ်လီၤ. ¹⁴ ဒီး တၢ်ကမၤအသးတုၤယဒုးထီၣ် တၢ်အၢၣ်လၢဟီၣ်ခိၣ်အ ဖီခိၣ်ဒီး, ချံၣ်န့ၣ်ကအိၣ်ဖျါလၢတၢ်အၢၣ်အလိၤလီၤ.―

¹⁵ ဒီးယကသ့ၣ်နီၣ်ထီၣ်က့ၤယတၢ်အၢၣ်လီၤအီလီၤလၢယ အၢၣ်လီၤအီလီၤဒီးသု, ဒီးကယဲၢ်တၢ်သးအိၣ်လၢ က ယဲၢ်တၢ်ညၣ်အကျါန့ၣ်လီၤ. ဒီးထံတကဲထီၣ်လၢၤဘၣ် ထံလုၣ်ဘၢတၢ် ဒ်သိးအကမၤဟးဂီၤကွံာ် ကယဲၢ်တၢ် ညၣ်န့ၣ်ဘၣ်. ¹⁶ ဒီးတၢ်လၢချံၣ်န့ၣ်ကအိၣ်လၢတၢ်အၢၣ် အလိၤ, ဒီးယကကွၢ်အီၤဒ်သိးယကသ့ၣ်နီၣ်ထီၣ်က့ၤ တၢ်အၢၣ်လီၤအီလီၤအထူအယိာ်လၢ ယွၤအၢၣ်လီၤအီ လီၤဒီးကယဲၢ်တၢ်သးလၢ ကယဲၢ်တၢ်ညၣ်အကျါလၢ အအိၣ်လၢဟီၣ်ခိၣ်ချၢလီၤ. ¹⁷ ဒီးယွၤစံးဘၣ် စီၤနိအၤ, အဝဲအံၤမ့ၢ်တၢ်အၢၣ်လီၤအီလီၤလၢ ယအၢၣ်လီၤအီလီၤ ဒီးကယဲၢ်တၢ်ညၣ်လၢဟီၣ်ခိၣ်ချၢအပနီၣ်လီၤ.

¹⁸ ဒီးစီၤနိအၤအဖိခွါ လၢအယုၢ်လီၤလၢကဘီပူၤန့ၣ်မ့ၢ် စီၤရှ့ၣ်, ဒီးစီၤဃၣ်, ဒီးစီၤယ့ဖ့းသးလီၤ. ဒီးစီၤဃၣ်မ့ၢ် စီၤကနၤဧၣ်အပၢ်လီၤ. ¹⁹ အဝဲသ့ၣ်တဖၣ်န့ၣ် မ့ၢ်စီၤနိ အၤအဖိခွါသၢဂၤ, ဒီးဟီၣ်ခိၣ်ပှဲၤဒီးပှၤကညီသကုၤဆး ဒးလၢအီၤလီၤ.

²⁰ ဒီးစီၤနိအၤကဲထီၣ် ပှၤမၤဟီၣ်ခိၣ်ဒီးသူၣ်စပံးအလီၢ် လီၤ. ²¹ ဒီးအီစပံးထံ, ဒီးအီမူၤဝဲ, ဒီးအိၣ်ဘ့ၣ်ဆ့လၢ အဒဲပူၤလီၤ. ²² ဒီးစီၤကနၤဧၣ်အပၢ်စီၤဃၣ်တဂၤ ထံၣ် ဘၣ်အပၢ်အိၣ်ဘ့ၣ်ဆ့, ဒီးစံးဘၣ်အဒီပုၢ်ဝဲၢ်ခံဂၤအိၣ်ဝဲ လၢခိလီၤ. ²³ ဒီးစီၤရှ့ၣ်, ဒီးစီၤယ့ဖ့းသးဟံးန့ၢ်ယၣ်တ ဘ့ၣ်, ဒီးပာ်ဝဲလၢအဖံဘၣ်ခိၣ်ခံဂာ်လၢာ်, ဒီးလဲၤဂုၤခံ, ဒီး မၤဘံၣ်အပၢ်အိၣ်ဘ့ၣ်ဆ့, ဒီးဃၣ်ဒူၣ်ချၢအသးသတး ဒီး, တထံၣ်ဘၣ်အပၢ်အိၣ်ဘ့ၣ်ဆ့ဘၣ်လီၤ.

²⁴ ဒီးစီၤနိအၤဖုသံနီၣ်ထီၣ်က့ၤလၢ အစပံးထံဒီးတၢ်လၢ အဖိသဒါမၤအီၤန့ၣ်သ့ၣ်ညါဝဲလီၤ. ²⁵ ဒီးစံးဝဲဒၣ်, မ်စီၤ ကနၤဧၣ်ဘၣ်တၢ်ဆိၣ်အၢတက့ၢ်. ကကဲထီၣ်ကုၢ်တ ဖၣ်အကုၢ်လၢအဒီပုၢ်ဝဲၢ်အဂီၢ်လီၤ. ²⁶ ဒီးစံးဝဲဒၣ်, ယွၤ စီၤရှ့ၣ်အကစၢ်န့ၣ်, မ်အဘၣ်တၢ်ဆိၣ်ဂ့ၤအီၤတက့ၢ်. ဒီး စီၤကနၤဧၣ်ကကဲထီၣ်အကုၢ်လီၤ. ²⁷ ယွၤကမၤလဲၢ်ထီၣ် စီၤယ့ဖ့းသးအလီၢ်, ဒီးကအိၣ်ဝဲဆိးဝဲလၢစီၤရှ့ၣ်အဒဲတ ဖၣ်အပူၤ, ဒီးစီၤကနၤဧၣ်ကကဲထီၣ်အကုၢ်လီၤ.

²⁸ ဒီးစီၤနိအၤအိၣ်ဝဲလၢ ထံလုၣ်ဘၢတၢ်အလီၢ်ခံ, အနံၣ် သၢကယၤယဲၢ်ဆံလီၤ. ²⁹ ဒီးစီၤနိအၤအမုၢ်နံၤခဲလၢာ်မ့ၢ် အနံၣ်ခွံကယၤယဲၢ်ဆံ, ဒီးသံဝဲလီၤ.

၁၀

¹ ဒီးအအံၤမ့ၢ်စီၤနိအၤအဖိခွါ, စီၤရှ့ၣ်ဒီးစီၤဃၣ်ဒီးစီၤယ့ ဖ့းသးသ့ၣ်တဖၣ်အစၢၤအသွဲၣ်လီၤ. ဒီးလၢထံလုၣ်ဘၢ တၢ်အလီၢ်ခံန့ၣ်ဖိခွါတဖၣ်အိၣ်ဖျဲၣ်လၢအဂီၢ်လီၤ.

² ဒီးစီၤယ့ဖ့းသးအဖိခွါ မ့ၢ်စီၤကိမၢၤ, ဒီးစီၤမါကူး, ဒီးစီၤစၤဒဲ, ဒီးစီၤယၤဝၣ်, ဒီးစီၤတူၤဘလး, ဒီးစီၤမ့ၤ ရှ့း, ဒီးစီၤတံရ့းလီၤ.

³ ဒီးစီၤကိမၢၤအဖိခွါမ့ၢ် စီၤအၤၡကံနး, ဒီးစီၤရံဖသး, ဒီးစီၤတိကးရမၤလီၤ.

⁴ ဒီးစီၤယၤဝၣ်အဖိခွါမ့ၢ်စီၤအလံၡၤ, ဒီးစီၤတၢ်ၡံၣ်, ဒီး စီၤကံးတံၣ်, ဒီးစီၤဒိဒၤနံၣ်လီၤ. ⁵ ဒီးပှၤတဖၣ်အံၤနီၤဖး ပှၤကလုာ်တဖၣ်အအိၣ်အလီၢ် လၢအထံအကီၢ် ဒ်အ တၢ်ကတိၤအကျိာ်, ဒ်အဒူၣ်လၢအပှၤကလုာ်အသိးစုာ် စုာ်ခဲလၢာ်လီၤ.

⁶ ဒီးစီၤဃၣ်အဖိခွါမ့ၢ်စီၤကူၤၡး, ဒီးစီၤမံးစရၤယံၣ်, ဒီး စီၤဖူး, ဒီးစီၤကနၤဧၣ်လီၤ.

⁷ ဒီးစီၤကူၤၡးအဖိခွါမ့ၢ်စီၤစဘၤ, ဒီးစီၤဃဝံၤလၤ, ဒီး စီၤစၤဘတၤ, ဒီးစီၤရၤဧမၤ, ဒီးစီၤစၤဘတံကၤလီၤ. ဒီးစီၤရၤဧမၤအဖိခွါမ့ၢ်စီၤၡဘၤ, ဒီးစီၤဒဒၣ်လီၤ.

⁸ ဒီးစီၤကူၤၡးထီၣ်ဖိစီၤနံးမရိးလီၤ. အဝဲဒၣ်ကဲထီၣ်သီ ပှၤအဒိၣ်လၢဟီၣ်ခိၣ်ချၢလီၤ. ⁹ မ့ၢ်ပှၤခိးခးတၢ်ဖိဖးဒိၣ် လၢယွၤအမဲာ်ညါလီၤ. မၤသးဒ်န့ၣ်ဒီးပှၤစံးဝဲ, ဒ်စီၤနံး မရိးပှၤခးတၢ်ဖိဖးဒိၣ်လၢယွၤအမဲာ်ညါအသိးန့ၣ်လီၤ.

¹⁰ ဒီးအဘီမုၢ်အခီၣ်ထံးမ့ၢ်ဘၤဘ့းလး, ဒီးအ့ရ့း, ဒီးအး ကး, ဒီးကၤလန့ၤအိၣ်ဝဲလၢကီၢ်ၡံနၢ်အပူၤလီၤ.

¹¹ ဒီးဟးထီၣ်လၢအကီၢ်န့ၣ်ဆူအၤရှူၢ်, ဒီးတ့လီၤနံၤနဝ့, ဒီးဝ့ၢ်ရဃိဘိး, ဒီးကါလး, ¹² ဒီးရ့စ့ၣ်အိၣ်ဝဲလၢနံၤနဝ့ ဒီးကါလးအဘၢၣ်စၢၤန့ၣ်လီၤ. အဝဲန့ၣ်မ့ၢ်ဝ့ၢ်ဖးဒိၣ်တ ဖျၢၣ်လီၤ.

¹³ ဒီးစီၤမံးစရၤယံၣ်ထီၣ်ဖိလူဒံၣ်, ဒီးဧနၤမံၣ်, ဒီးလဟါ ဘံၣ်, ဒီးနၤဖတူဃံၣ်, ¹⁴ ဒီးပသြူစံၣ်, ဒီးကၤစလူဃံၣ်, (ပှၤဖလ့ၡသးဖိလီၤစၢၤလၢအီၤ,) ဒီးကၤပတိရံၣ်လီၤ. ¹⁵ ဒီးစီၤကနၤဧၣ်ထီၣ်ဖိအဝဲၢ်ကိ စီၤစံဒိၣ်, ဒီးစီၤဃ့ၤသး ¹⁶ ဒီးယဘူၣ်ဖိ, ဒီးအမိၢ်ဖိ, ဒီးကံၢ်ကၣ်ဖိ,― ဒီးဃံၤဝံဖိ, ဒီးဧၤရကၤဖိ, ဒီးစံၣ်ဖိ, ¹⁸ ဒီးအၢ်ဝးဖိ, ဒီး စမၢ်ဖိ, ဒီးဃမါသးဖိလီၤ. လၢခံက့ၤဒီး ပှၤကနၤဧၣ် အဒူၣ်ဖိလီၤပြံလီၤပြါလီၤ.

¹⁹ ဒီးပှၤကနၤဧၣ်အကီၢ်ဃၢၤန့ၣ် မ့ၢ်လၢစံဒိၣ်ဖဲနဟဲနုာ် လၢကရၢ်ပၢၢ်လၢဂါစၤ, ဖဲနလဲၤနုာ်ဆူစဒိၣ်, ဒီးဂမိရၤ, ဒီးအၤဒမၤ. ဒီးစဘိအံၣ်ပၢၢ်လၢလါၡၤလီၤ. ²⁰ ဒီးအန့ၣ် မ့ၢ်စီၤဃၣ်အဖိခွါတဖၣ် ဒ်အဒူၣ်အသိး, ဒ်အတၢ်က တိၤအကျိာ်အသိး, လၢအကီၢ်ပူၤ, ဒီးလၢအကလုာ် အကျါန့ၣ်လီၤ.

²¹ စီၤဧ့ၤဘ့ၢ်အဖိခဲလၢာ်အပၢ်စီၤရှ့ၣ်, ဒီပုၢ်ဝဲၢ်ဒီးစီၤယ့ဖ့း သးအဒိၣ်တဂၤန့ၣ် ဖိတဖၣ်အိၣ်ဖျဲၣ် လၢအဂီၢ်စ့ၢ်ကီး လီၤ. ²² ဒီးစီၤရှ့ၣ်အဖိခွါတဖၣ်မ့ၢ်စီၤဧ့ၤလၣ်, ဒီးစီၤအၤ ရှူၢ်, ဒီးစီၤအၢ်ဖးၡး, ဒီးစီၤလူး, ဒီးစီၤအရၣ်လီၤ.

²³ ဒီးစီၤအရၣ်အဖိခွါမ့ၢ်စီၤဧူးစး, ဒီးစီၤဃူလးဒီးစီၤက့ သ့ၢ်, ဒီးစီၤမၤစးလီၤ.

²⁴ ဒီးစီၤအၢ်ဖးၡးန့ၣ်ထီၣ်ဖိ စီၤစ့ၤလါ, ဒီးစီၤစ့ၤလါန့ၣ် ထီၣ်ဖိစီၤဧ့ၤဘ့ၢ်.

²⁵ ဒီးစီၤဧ့ၤဘ့ၢ်န့ၣ် အဖိပိာ်ခွါအိၣ်ဖျဲၣ်လၢအဂီၢ် ခံဂၤ လီၤ. အဝဲတဂၤအမံၤမ့ၢ်စီၤပ့ၤလ့းလီၤ. အဂ့ၢ်ဒ်အံၤ, လၢအဝဲတဂၤအစိၤန့ၣ်ဟီၣ်ခိၣ်ဖိလီၤမုၢ်လီၤဖးလီၤ. ဒီး အဒီပုၢ်ဝဲၢ်အမံၤမ့ၢ်စီၤယးကတၣ်လီၤ.

²⁶ ဒီးစီၤယးကတၣ်ထီၣ်ဖိစီၤအၤလမိဒး, ဒီးစီၤရှ့လဖး, ဒီးစီၤဃၤစရမၤဝ့း, ဒီးစီၤယၤရၢ်, ²⁷ ဒီးစီၤဟဒိၣ်ရၣ်, ဒီး စီၤအူစလး, ဒီးစီၤဒံးကလး, ²⁸ ဒီးစီၤဧူဘလး, ဒီးစီၤ အဘံမအ့လး, ဒီးစီၤၡဘၤ, ²⁹ ဒီးစီၤအိဖ့ၢ်, ဒီးစီၤဃဝံၤ လၤ, ဒီးစီၤယိတာ်လီၤ. အဝဲသ့ၣ်ခဲလၢာ်န့ၣ်မ့ၢ်စီၤယး ကတၣ်အဖိခွါလီၤ. ³⁰ ဒီးအိၣ်ဝဲဆိးဝဲအလီၢ်န့ၣ်မ့ၢ်လၢ မ့ၤၡး, ဖဲနလဲၤတၢ်ဆူစဖၢ်, ကစၢၢ်တဖျၢၣ်အိၣ်လၢမုၢ် ထီၣ်တခီလီၤ.

³¹ အဝဲသ့ၣ်တဖၣ်န့ၣ်မ့ၢ် စီၤရှ့ၣ်အဖိခွါဒ်အဒူၣ်အသိး, ဒ်အတၢ်ကတိၤအကျိာ်အသိး, လၢအကီၢ်ပူၤ ဒ်အက လုာ်အသိးန့ၣ်လီၤ.

³² အဝဲသ့ၣ်တဖၣ်န့ၣ် မ့ၢ်စီၤနိအၤအဖိခွါအဒူၣ်သ့ၣ်တ ဖၣ်ဒ်အစၢၤအသွဲၣ်အသိး, လၢအကလုာ်သ့ၣ်တဖၣ်အ ကျါန့ၣ်လီၤ. ဒီးလၢထံလုၣ်ဘၢတၢ်အလီၢ်ခံန့ၣ်ပှၤအ ကလုာ်တဖၣ် လီၤပြံလီၤပြါလၢဟီၣ်ခိၣ်ချၢ လၢအဝဲ သ့ၣ်တဖၣ်န့ၣ်လီၤ.

၁၁

¹ ဒီးပှၤဟီၣ်ခိၣ်ဖိအိၣ်ဒီးအကလုၢ်တမံၤဃီ, ဒီးတၢ်က တိၤတမံၤဃီခဲလၢာ်လီၤ.

² ဒီးတၢ်မၤအသးလၢ ပှၤဟးထီၣ်လၢမုၢ်ထီၣ်တခီအဖၢ မုၢ်ဒီး, ထံၣ်န့ၢ်ပျီအိၣ်လၢကီၢ်ၡံနၢ်အပူၤ, ဒီးအိၣ်ဝဲဆိး ဝဲဖဲန့ၣ်လီၤ.

³ ဒီးစံးလိာ်အသး, ဟဲမီၣ်, မၤသကိးအူးခဲဒီးကုၢ်အီၤ သပှၢ်တၢၢ်တက့ၢ်. ဒီးအဝဲသ့ၣ်အိၣ်ဒီးအူးခဲ, လၢလၢၢ် အလီၢ်ဒီးကျဲတံးကိၢ်လိၣ်လၢအီကတ့ၣ်အလီၢ်လီၤ. ⁴ ဒီး စံးဝဲဒၣ်, ဟဲမီၣ်, မၤသကိးဝ့ၢ်တဝ့ၢ်လၢပဂီၢ်, ဒီးတၢး ထီတဖျၢၣ်အိၣ်ဒီးအခိၣ်လၢမူခိၣ်, ဒီးမၤထီၣ်သကိးပ မံၤ, ဒ်သိးပသုတလီၤပြံလီၤပြါလၢ ဟီၣ်ခိၣ်ချၢဒီဘ့ၣ် ညါတဂ့ၤန့ၣ်တက့ၢ်.

⁵ ဒီးယွၤဟဲလီၤကွၢ်ဝ့ၢ်န့ၣ်, ဒီးတၢးထီလၢပှၤကညီဖိမၤ ဝဲလီၤ. ⁶ ဒီးယွၤစံးဝဲဒၣ်, ကွၢ်ကွၢ်, ပှၤကညီမ့ၢ်ပှၤတ ကလုာ်ဃီ, ဒီးအကလုၢ်မ့ၢ်တမံၤဃီခဲလၢာ်အဃိဒီး, မၤထီၣ်တၢ်အံၤလီၤ. ဒီးခဲကနံၣ်အံၤကယဲၢ်တၢ်လၢအ ကူၣ်မၤန့ၣ် တၢ်တတြီဘၣ်အီၤနီတမံၤဘၣ်. ⁷ ဟဲမီၣ်, လဲၤလီၤသကိး, ဒီးမၤသဘံၣ်ဘုၣ်အကလုၢ်, ဒ်သိးအ နၢ်သုတပၢၢ်လိာ်အကလုၢ်န့ၣ်တက့ၢ်.

⁸ ဒီးယွၤမၤလီၤပြံလီၤပြါအီၤ လၢဟီၣ်ခိၣ်ချၢဒီဘ့ၣ်ညါ လီၤ. ဒီးအဝဲသ့ၣ်မၤထီၣ်ဝ့ၢ်န့ၣ်ဆိတ့ၢ်ဝဲလီၤ.

⁹ မၤသးဒ်န့ၣ်ဒီးအမံၤမ့ၢ် ဘၤဘ့းလးလီၤ. အဂ့ၢ်ဒ်အံၤ, ဖဲန့ၣ်ယွၤမၤသဘံၣ်ဘုၣ် ပှၤဟီၣ်ခိၣ်ဖိခဲလၢာ်အကလုၢ်, ဒီးဖဲန့ၣ်မၤလီၤပြံလီၤပြါအီၤ လၢဟီၣ်ခိၣ်ချၢဒီဘ့ၣ်ညါ လီၤ.

¹⁰ ဒီးအအံၤမ့ၢ် စီၤရှ့ၣ်အစၢၤအသွဲၣ်. ထံလုၣ်ဘၢတၢ် အလီၢ်ခံခံနံၣ်န့ၣ်, စီၤရှ့ၣ်အိၣ်ဝဲအနံၣ်တကယၤ, ဒီး ထီၣ်ဖိစီၤအၢ်ဖးၡးလီၤ. ¹¹ ဒီးစီၤရှ့ၣ်အိၣ်ဝဲလၢအထီၣ်ဖိ စီၤအၢ်ဖးၡးအလီၢ်ခံ အနံၣ်ယဲၢ်ကယၤ, ဒီးထီၣ်ဖိအဖိ မုၣ်ဒီးအဖိခွါလီၤ.

¹² ဒီးစီၤအၢ်ဖးၡးအိၣ်ဝဲသၢဆံယဲၢ်နံၣ်, ဒီးထီၣ်ဖိစီၤစ့ၤ လါလီၤ. ¹³ ဒီးစီၤအၢ်ဖးၡးအိၣ်ဝဲလၢအထီၣ်ဖိစီၤစ့ၤလါ အလီၢ်ခံလွံၢ်ကယၤသၢနံၣ်, ဒီးထီၣ်ဖိအဖိမုၣ်ဒီးအဖိခွါ လီၤ.

¹⁴ ဒီးစီၤစ့ၤလါအိၣ်ဝဲအနံၣ်သၢဆံ, ဒီးထီၣ်ဖိစီၤဧ့ၤဘ့ၢ် လီၤ. ¹⁵ ဒီးစီၤစ့ၤလါအိၣ်ဝဲလၢအထီၣ်ဖိစီၤဧ့ၤဘ့ၢ်အလီၢ် ခံလွံၢ်ကယၤသၢနံၣ်, ဒီးထီၣ်ဖိအဖိမုၣ်ဒီးအဖိခွါလီၤ.

¹⁶ ဒီးစီၤဧ့ၤဘ့ၢ်အိၣ်ဝဲသၢဆံလွံၢ်နံၣ်, ဒီးထီၣ်ဖိစီၤပ့ၤလ့း လီၤ. ¹⁷ ဒီးစီၤဧ့ၤဘ့ၢ်အိၣ်ဝဲလၢအထီၣ်ဖိ စီၤပ့ၤလ့းအ လီၢ်ခံအနံၣ်လွံၢ်ကယၤသၢဆံ, ဒီးထီၣ်ဖိအဖိမုၣ်ဒီးအ ဖိခွါလီၤ.

¹⁸ ဒီးစီၤပ့ၤလ့း အိၣ်ဝဲအနံၣ်သၢဆံ, ဒီးထီၣ်ဖိစီၤရူၤ လီၤ. ¹⁹ ဒီးစီၤပ့ၤလ့းအိၣ်ဝဲလၢအထီၣ်ဖိ စီၤရူၤအလီၢ်ခံ ခံကယၤခွံနံၣ်, ဒီးထီၣ်ဖိအဖိမုၣ်ဒီးအဖိခွါလီၤ. ဒီးစီၤရူၤအိၣ်ဝဲသၢဆံခံနံၣ်ဒီးထီၣ်ဖိ စီၤစရူာ်လီၤ.

²¹ ဒီးစီၤရူၤအိၣ်ဝဲလၢ အထီၣ်ဖိစီၤစရူာ်အလီၢ်ခံ ခံကယၤ နွံနံၣ်, ဒီးထီၣ်ဖိအဖိမုၣ်ဒီးအဖိခွါလီၤ.

²² ဒီးစီၤစရူာ်အိၣ်ဝဲအနံၣ်သၢဆံ, ဒီးထီၣ်ဖိစီၤနၤဃိၢ် လီၤ. ²³ ဒီးစီၤစရူာ်အိၣ်ဝဲလၢအထီၣ်ဖိ စီၤနၤဃိၢ်အလီၢ် ခံအနံၣ်ခံကယၤ, ဒီးထီၣ်ဖိအဖိမုၣ်ဒီးအဖိခွါလီၤ. ဒီးစီၤနၤဃိၢ်အိၣ်ဝဲခံဆံခွံနံၣ်, ဒီးထီၣ်ဖိစီၤတ့ရၤလီၤ.

²⁵ ဒီးစီၤနၤဃိၢ်အိၣ်ဝဲလၢအထီၣ်ဖိစီၤတ့ရၤအလီၢ်ခံ တက ယၤတဆံခွံနံၣ်, ဒီးထီၣ်ဖိအဖိမုၣ်ဒီးအဖိခွါလီၤ.

²⁶ ဒီးစီၤတ့ရၤအိၣ်ဝဲအနံၣ်နွံဆံ, ဒီးထီၣ်ဖိစီၤအၤဘြၣ်, စီၤနၤဃိၢ်, ဒီးစီၤဟၤရၣ်လီၤ.

²⁷ ဒီးအအံၤမ့ၢ် စီၤတ့ရၤအစၢၤအသွဲၣ်, စီၤတ့ရၤထီၣ်ဖိ စီၤအၤဘြၣ်, စီၤနၤဃိၢ်, ဒီးစီၤဟၤရၣ်လီၤ. ဒီးစီၤဟၤ ရၣ်န့ၣ်ထီၣ်ဖိစီၤလိာ်လီၤ. ²⁸ ဒီးအပၢ်စီၤတ့ရၤတချုးသံ ဒံးဘၣ်ဒီး, စီၤဟၤရၣ်သံဝဲလၢကီၢ်လၢအအိၣ်ဖျဲၣ်လၢ အပူၤ, လၢပှၤက့ၤစ့းဖိအဝ့ၢ်အူၢ်အပူၤလီၤ.

²⁹ ဒီးစီၤအၤဘြၣ်, ဒီးစီၤနၤဃိၢ်န့ၢ်မါလီၤ. ဒီးစီၤအၤဘြၣ် အမါအမံၤမ့ၢ်နီၢ်စၤရဲ, ဒီးစီၤနၤဃိၢ်အမါအမံၤမ့ၢ်နီၢ်မံး လကၤ, စီၤဟၤရၣ်အဖိမုၣ်လီၤ. အဝဲဒၣ်န့ၣ်မ့ၢ်နီၢ်မံး လကၤအပၢ်, ဒီးနီၢ်ယံၤစကၤအပၢ်လီၤ. ³⁰ ဒီးနီၢ်စၤရဲ တဂၤန့ၣ်မ့ၢ်ပှၤတူာ်ဖိလီၤ. အဖိတအိၣ်ဘၣ်.

³¹ ဒီးစီၤတ့ရၤဟံးန့ၢ်အဖိခွါစီၤအၤဘြၣ်, ဒီးအလံၤစီၤ ဟၤရၣ်အဖိခွါစီၤလိာ်, ဒီးအဒဲၣ်နီၢ်စၤရဲ, အဖိခွါစီၤအၤ ဘြၣ်အမါ, ဒီးဟးထီၣ်ဝဲဒီးအီၤလၢ ပှၤက့ၤစ့းဖိအဝ့ၢ် အူၢ်, ဒ်သိးအကလဲၤဆူကီၢ်ကနၤဧၣ်အပူၤလီၤ. ဒီးလဲၤ ဝဲပၢၢ်လၢဟၤရၣ်ဒီးအိၣ်ဝဲဆိးဝဲဖဲန့ၣ်လီၤ. ³² ဒီးစီၤတ့ရၤ အမုၢ်နံၤခဲလၢာ်န့ၣ် မ့ၢ်အနံၣ်ခံကယၤယဲၢ်နံၣ်, ဒီးစီၤ တ့ရၤသံဝဲလၢဟၤရၣ်အပူၤလီၤ.

၁၂

¹ ဒီးယွၤစံးဘၣ်စီၤအၤဘြၣ်, ဟးထီၣ်နဲလၢနထံနကီၢ် ဒီးလၢနဘူးနတံၢ်အအိၣ်, ဒီးလၢနပၢ်အဟံၣ်ဆူကီၢ်တ ဘ့ၣ်လၢယကဒုးနဲၣ်နၤတက့ၢ်. ² ဒီးယကဒုးကဲထီၣ်နၤ လၢပှၤတကလုာ်ဖးဒိၣ်, ဒီးယကဆိၣ်ဂ့ၤနၤ, ဒီးယက ပာ်ဒိၣ်နမံၤ, ဒီးနကကဲထီၣ်တၢ်ဆိၣ်ဂ့ၤလီၤ. ³ ဒီးပှၤ လၢအဆိၣ်ဂ့ၤနၤန့ၣ်ယကဆိၣ်ဂ့ၤအီၤ, ဒီးပှၤလၢအဆိၣ် အၢနၤန့ၣ်ယကဆိၣ်အၢအီၤလီၤ. ဒီးပှၤဟီၣ်ခိၣ်ဖိအဒူၣ် ခဲလၢာ်ကဘၣ်တၢ်ဆိၣ်ဂ့ၤလၢနပူၤလီၤ.

⁴ ဒီးစီၤအၤဘြၣ်ဟးထီၣ်ဝဲ ဒ်ယွၤမၤလိာ်အီၤအသိးန့ၣ် ဒီးစီၤလိာ်လဲၤဝဲဒီးအီၤလီၤ. ဒီးလၢစီၤအၤဘြၣ်ဟးထီၣ်ဝဲ လၢဟၤရၣ်အပူၤန့ၣ်, အသးပှၢ်တ့ၢ်နွံဆံယဲၢ်နံၣ်လီၤ. ⁵ ဒီးစီၤအၤဘြၣ်ဟံးန့ၢ်အမါနီၢ်စၤရဲ, ဒီးအဖိဒိၣ်စီၤလိာ်, ဒီးကယဲၢ်တၢ်ဖိတၢ်လံၤလၢအမၤန့ၢ်ဝဲ, ဒီးပှၤအသးလၢ အန့ၢ်ဘၣ်ဝဲလၢဟၤရၣ်အပူၤ, ဒီးဟးထီၣ်ဝဲဒ်သိးအက လဲၤဆူကီၢ်ကနၤဧၣ်, ဒီးဟဲနုာ်လၢကီၢ်ကနၤဧၣ်အပူၤ လီၤ.

⁶ ဒီးစီၤအၤဘြၣ် ခီဂာ်တၢ်လၢကီၢ်န့ၣ်အပူၤပၢၢ်လၢ ၡ က့ၣ်အလီၢ်, ဖဲမိၤရံယၤအသ့ထိးဖၣ်န့ၣ်လီၤ. အက တီၢ်ဖဲန့ၣ်ပှၤကနၤဧၣ်ဖိအိၣ်ဝဲလၢကီၢ်ပူၤန့ၣ်လီၤ.

⁷ ဒီးယွၤလီၣ်ဖျါထီၣ်အသးလၢစီၤအၤဘြၣ်, ဒီးစံးဝဲဒၣ်, ယကဟ့ၣ်လီၤကီၢ်တဘ့ၣ်အံၤ လၢနချံနသၣ်လီၤ. ဒီး မၤထီၣ်တၢ်လုၢ်အလီၢ်လၢ ယွၤလၢအလီၣ်ဖျါထီၣ်အ သးလၢအီၤအဂီၢ်ဖဲန့ၣ်လီၤ.

⁸ ဒီးဟးဝဲဖဲန့ၣ် ဆူကစၢၢ်ကလိတဖျၢၣ် အိၣ်လၢဝ့ၢ် ဘ့ၤသ့လးအမုၢ်ထီၣ်တခီ, ဒီးသူၣ်အဒဲအိၣ်ဒီး ဝ့ၢ်ဘ့ၤ သ့လးလၢမုၢ်နုာ်တခီ, ဒီးဝ့ၢ်ဂဲလၢမုၢ်ထီၣ်တခီလီၤ. ဒီး မၤတၢ်လုၢ်အလီၢ်ဖဲန့ၣ်လၢယွၤအဂီၢ်, ဒီးကိးထီၣ်ယွၤ အမံၤလီၤ. ⁹ ဒီးစီၤအၤဘြၣ်ဟးထီၣ်ဝဲ, ဒီးလဲၤတၢ်, ဒီး ဟးဝဲဆူကလံၤထံးတခီလီၤ.

¹⁰ ဒီးတၢ်သၣ်ဝံၤလီၤဒိအိၣ်ထီၣ်ဝဲလၢကီၢ်ပူၤန့ၣ်, ဒီးစီၤ အၤဘြၣ်လဲၤလီၤဆူအဲၤကူပတူး, ဒ်သိးအကအိၣ်တမှံၤ ဖဲန့ၣ်လီၤ. အဂ့ၢ်ဒ်အံၤ, တၢ်သၣ်ဝံၤလီၤဒိန့ၣ် အိၣ်နး မးလၢကီၢ်ပူၤန့ၣ်လီၤ.

¹¹ ဒီးတၢ်မၤအသးဘူးထီၣ်လၢအကလဲၤနုာ် လၢအဲၤကူ ပတူးဒီး, စံးဘၣ်အမါနီၢ်စၤရဲ, ကွၢ်ကွၢ်, ယသ့ၣ်ညါ လၢပှၤကွၢ်နၤတမံၤ နမ့ၢ်ပိာ်မုၣ်အဃံအလၤလီၤ. ¹² ဒီး တၢ်ကမၤအသးဖဲ ပှၤအဲၤကူပတူးဖိထံၣ်ဘၣ်နၤဒီး, က စံးဝဲ, အဝဲတဂၤအံၤမ့ၢ်အမါလီၤ. ဒီးကမၤသံယၤလီၤ. မ့မ့ၢ်ကဒုးမူဒံးနၤလီၤ. ¹³ စံးလၢ်လၢနမ့ၢ်ယဒီပုၢ်ဝဲၢ်မုၣ်, ဒ်သိးတၢ်ကမၤဂ့ၤယၤလၢနဃိတက့ၢ်. ဒီးယသးကမူ ဒံးလၢနဃိလီၤ.

¹⁴ ဒီးတၢ်မၤအသးဖဲ စီၤအၤဘြၣ်ဟဲနုာ်လၢအဲၤကူပတူး အပူၤဒီး, ပှၤအဲၤကူပတူးဖိထံၣ်ဘၣ်ပိာ်မုၣ်န့ၣ်လၢအ ဃံအလၤဒိၣ်မးလီၤ. ¹⁵ ဒီးဖၤရိၤ အပဒိၣ်ဖးဒိၣ်တဖၣ် ထံၣ်ဘၣ်အီၤ, ဒီးစံးထီၣ်ပတြၢၤအီၤလၢဖၤရိၤအမဲာ်ညါ, ဒီးတၢ်ဆှၢန့ၢ်ပိာ်မုၣ်ဆူဖၤရိၤအဟံၣ်ပူၤလီၤ.

¹⁶ ဒီးမၤဂ့ၤစီၤအၤဘြၣ်လၢအဃိ, ဒီးအိၣ်ဒီးသိ, ဒီးဂီၤ ဖံး, ဒီးကသ့ၣ်ယီၤအဖါ, ဒီးကုၢ်ပိာ်ခွါ, ဒီးကုၢ်ပိာ်မုၣ်, ဒီးကသ့ၣ်ယီၤမိၢ်, ဒီးကီၤလၤအူးသ့ၣ်တဖၣ်လီၤ.

¹⁷ ဒီးယွၤတီၢ်ဖၤရိၤဒီးအပှၤဟံၣ်ဖိ လၢတီၢ်တၢ်ဖးဒိၣ်တ ဖၣ် လၢစီၤအၤဘြၣ်အမါ နီၢ်စၤရဲအဃိလီၤ. ¹⁸ ဒီးဖၤရိၤ ကိးန့ၢ်စီၤအၤဘြၣ်, ဒီးစံးဝဲဒၣ်, နမၤယၤလၢမနုၤတ မံၤလဲၣ်. အဝဲတဂၤမ့ၢ်နမါန့ၣ်နတဒုးနဲၣ်ဘၣ်ယၤ မ့ၢ် အဘၣ်မနုၤလဲၣ်. ¹⁹ အဝဲအံၤမ့ၢ်ယဒီပုၢ်ဝဲၢ်မုၣ်န့ၣ် နစံး ဘၣ်မနုၤလဲၣ်. ဒီးယကဟံးန့ၢ်ဘၣ်ဖုးအီၤ လၢယမါ လီၤ. ဒီးခဲကနံၣ်အံၤ, ကွၢ်ကွၢ်, ဟံးန့ၢ်နမါ, ဒီးဟး ထီၣ်တက့ၢ်.

²⁰ ဒီးဖၤရိၤမၤလိာ် အခ့အပှၤလၢအဂ့ၢ်အကျိၤ, ဒီးမၢ အဟးထီၣ်ဒီးအမါ, ဒီးကယဲၢ်တၢ်လၢအအိၣ်ဒီးအီၤခဲ လၢာ်လီၤ.

၁၃

¹ ဒီးစီၤအၤဘြၣ်ဟးထီၣ်လၢအဲၤကူပတူး, အဝဲဒၣ်ဒီး အမါ, ဒီးကယဲၢ်အတၢ်ခဲလၢာ်, ဒီးစီၤလိာ်လၢအသိး ဆူကီၢ်ကလံၤထံးလီၤ. ² ဒီးစီၤအၤဘြၣ်ထူးဝဲတီၤဝဲဒီး ဆၣ်ဖိကီၢ်ဖိ, ကျိၣ်ဧိၤစ့ဧိၤ, ဒီးထူဧိၤလွဲဧိၤအါမးလီၤ.

³ ဒီးလဲၤဝဲဒ်အတၢ်လဲၤအသိး လၢကီၢ်ကလံၤထံးဆူဝ့ၢ် ဘ့ၤသ့လး, ဖဲအလီၢ်လၢအဒဲအိၣ်လၢအခီၣ်ထံး, လၢ ဝ့ၢ်ဘ့ၤသ့လးဒီး ဝ့ၢ်ဂဲအဘၢၣ်စၢၤ, ⁴ ဖဲအလီၢ်လၢတၢ် လုၢ်လီၢ်အိၣ် လၢအမၤဝဲလၢအခီၣ်ထံးန့ၣ်လီၤ. ဒီးစီၤ အၤဘြၣ်ကိးထီၣ်ယွၤအမံၤဖဲန့ၣ်လီၤ.

⁵ ဒီးစီၤလိာ်လၢအလဲၤတၢ်ဒီး စီၤအၤဘြၣ်အိၣ်စ့ၢ်ကီးဒီး သိအဖုတဖၣ်, ဒီးဂီၤဖံးအဖုတဖၣ်, ဒီးဒဲတဖၣ်န့ၣ်လီၤ.

⁶ ဒီးဒ်သိးအကအိၣ်တပူၤဃီဒီး, ကီၢ်တလၢဘၣ်လၢ အဂီၢ်ဘၣ်. အဂ့ၢ်ဒ်အံၤအတၢ်ဖိတၢ်လံၤအါဝဲတုၤ အ အိၣ်တပူၤဃီတသ့ဘၣ်လီၤ.

⁷ ဒီးပှၤလၢအကွၢ် စီၤအၤဘြၣ်အဆၣ်ဖိကီၢ်ဖိအဒၢ, ဒီး ပှၤလၢအကွၢ်စီၤလိာ်အဆၣ်ဖိကီၢ်ဖိအဒၢန့ၣ် အ့ၣ်လိာ် ဆိးက့လိာ်အသးလီၤ. ဒီးအကတီၢ်ဖဲန့ၣ်ပှၤကနၤဧၣ်ဖိ, ဒီးပှၤပရးစၤဖိအိၣ်ဝဲဆိးဝဲလၢကီၢ်ပူၤန့ၣ်လီၤ.

⁸ ဒီးစီၤအၤဘြၣ်စံးဘၣ်စီၤလိာ်, ယဃ့ကညးနၤ, မ် တၢ်အ့ၣ်လိာ်ဆိးက့လိာ်သုတအိၣ်ဒီးယၤဒီးနၤ, ဒီးယ ပှၤကွၢ်ဆၣ်ဖိကီၢ်ဖိ, ဒီးနပှၤကွၢ် ဆၣ်ဖိကီၢ်ဖိတဂ့ၤ. အဂ့ၢ်ဒ်အံၤ, ပမ့ၢ်ဒီပုၢ်ဝဲၢ်လီၤ. ⁹ ကီၢ်တဘ့ၣ်အံၤအိၣ် လၢနမဲာ်ညါဒီဘ့ၣ်ညါတမ့ၢ်ဘၣ်ဧါ. မၤလီၤဖးလၢ်န သးဒီးယၤတက့ၢ်. မ့မ့ၢ်လၢစုစ့ၣ်တခီဒီး, ယကလဲၤ ဆူစုထွဲတခီလီၤ. မ့မ့ၢ်လၢစုထွဲတခီဒီး, ယကလဲၤဆူ စုစ့ၣ်တခီလီၤ.

¹⁰ ဒီးစီၤလိာ်ကျ့ထီၣ်အမဲာ်, ဒီးထံၣ်ဘၣ်ယၢ်ဒ့ၣ်အပျီဒီ ဘ့ၣ်ညါလၢအဘၣ်စီၣ်သကုၤဆးဒး လၢယွၤတချုးမၤ ဟးဂီၤဒံးဘၣ်စဒိၣ်, ဒီးဂမိရၤ, ဒ်ယွၤအတၤသၣ်အလီၢ် အသိး, ဒ်ကီၢ်အဲၤကူပတူး, ဖဲနဟဲနုာ်လၢဝ့ၢ်စိၤဧၢ်အ သိးန့ၣ်လီၤ. ¹¹ ဒီးစီၤလိာ်ဃုထၢယၢ်ဒ့ၣ်အပျီဒီဘ့ၣ်ညါ လီၤ. ဒီးစီၤလိာ်ဟးဝဲဆူမုၢ်ထီၣ်တခီ, ဒီးလီၤဖးလိာ် အသးသကိးသကိးလီၤ.

¹² ဒီးစီၤအၤဘြၣ်အိၣ်ဝဲဆိးဝဲလၢ ကီၢ်ကနၤဧၣ်အပူၤဒီး စီၤလိာ်အိၣ်ဝဲဆိးဝဲလၢပျီအဝ့ၢ်တဖၣ်အပူၤ, ဒီးသူၣ်အ ဒဲဆူစဒိၣ်တခီလီၤ. ¹³ ဒီးစဒိၣ်အပှၤကညီမ့ၢ်ပှၤအၢ, ဒီး ပှၤတၢ်ဒဲးဘးဖိလၢယွၤအမဲာ်ညါဒိၣ်မးလီၤ.

¹⁴ ဒီးယွၤစံးဘၣ်စီၤအၤဘြၣ်လၢ စီၤလိာ်လီၤမုၢ်လီၤဖး ဒီးအီၤအလီၢ်ခံန့ၣ်, ကျ့ထီၣ်နမဲာ်, ဒီးဖဲနအိၣ်အလီၢ် န့ၣ်ကွၢ်ထီၣ်လၢကလံၤစိး, ဒီးလၢကလံၤထံး, ဒီးလၢ မုၢ်ထီၣ်, ဒီးလၢမုၢ်နုာ်န့ၣ်တက့ၢ်. ¹⁵ အဂ့ၢ်ဒ်အံၤ, ကီၢ် လၢနထံၣ်ဘၣ်အီၤန့ၣ်, ယကဟ့ၣ်လီၤအီၤဒီဘ့ၣ်ညါ လၢနၤ, ဒီးလၢနချံနသၣ်လီၤစိၤလီၤထီလီၤ. ¹⁶ ဒီးယ ကမၤနချံနသၣ်ဒ်ဟီၣ်ခိၣ်ကမူၣ်အသိးသတးဒီး, ပှၤဂံၢ် ဟီၣ်ခိၣ်ကမူၣ်မ့ၢ်သ့ဒီး ဂံၢ်နချံနသၣ်ကသ့စ့ၢ်ကီးလီၤ.―

¹⁷ ဂဲၤဆၢထၢၣ်လဲၤတၢ်လၢကီၢ်ပူၤ, လၢအထီဒီးလၢအဒီၣ် တူာ်န့ၣ်တက့ၢ်, အဂ့ၢ်ဒ်အံၤ, ယကဟ့ၣ်လီၤအီၤလၢ နၤလီၤ.

¹⁸ ဒီးစီၤအၤဘြၣ်သုးအဒဲ, ဒီးလဲၤအိၣ်ဝဲဖဲ မးမရ့အသ့ ထိးဖၣ်လၢအအိၣ်လၢဝ့ၢ်ဃ့ဘြိၣ်, ဒီးမၤထီၣ်တၢ်လုၢ် အလီၢ်လၢယွၤအဂီၢ်ဖဲန့ၣ်လီၤ.

၁၄

¹ ဒီးတၢ်မၤအသးလၢၡံနၢ်အစီၤပၤအးမရၤဖ့လး, အ့း လးစၢ်အစီၤပၤအၤရယိာ်, ဧ့ၤလၣ်အစီၤပၤကဒၢ်လဧိ မ့ၢ်, ဒီးပှၤကလုာ်တဖၣ်အစီၤပၤတံးဒၤလးသ့ၣ်တဖၣ် အမုၢ်နံၤတဖၣ်န့ၣ်, ² လၢအဝဲသ့ၣ်ဒုးလိာ်အသးဒီးစဒိၣ် အစီၤပၤဘ့ရၤဒီးဂမိရၤအစီၤပၤဘံးရၡၤ, အၤဒမၤအစီၤ ပၤၡံးနာ်, ဒီးစဘိအံၣ်အစီၤပၤရှ့မ့ဘ့ၢ်, ဒီးဘ့လၤ (အဝဲ န့ၣ်မ့ၢ်စိၤဧၢ်) အစီၤပၤလီၤ. ³ ပှၤတဖၣ်အံၤဒီတံၤဒီသ ကိးလိာ်အသးခဲလၢာ်လၢတၢ်ပၢၤခိၣ်စံးဒံၣ် (အဝဲန့ၣ် မ့ၢ်ပီၣ်လဲၣ်အံသၣ်) လီၤ.

⁴ အဝဲသ့ၣ်မၤကဒၢ်လဧိမ့ၢ်အတၢ်တဆံခံနံၣ်, ဒီးတဆံ သၢနံၣ်တနံၣ်န့ၣ်ဂဲၤထၢၣ်ထီဒါထီၣ်အီၤလီၤ. ⁵ ဒီးတဆံ လွံၢ်နံၣ်တနံၣ်န့ၣ် ကဒၢ်လဧိမ့ၢ်ဟဲဝဲဒီး စီၤပၤသ့ၣ်တ ဖၣ်လၢအအိၣ်ဒီးအီၤ, ဒီးကျီကွံာ်ပှၤရၤဖၤဖိအိၣ်လၢဧၤ ၡတါရိၤကၢ်နါယံၣ်, ဒီးပှၤစူစၤဖိအိၣ်လၢဟၣ်အပူၤ, ဒီးပှၤအ့ၣ်ဖိ အိၣ်လၢၡၤဝ့ကးရယးသံၣ်, ⁶ ဒီးပှၤဃိၢ်ဖိ အိၣ်လၢအကစၢၢ်စ့ဧၢ် ပၢၢ်လၢအ့လးဖရၣ် လၢအအိၣ် လၢပှၢ်မုၢ်ကနၢအဃၢၤန့ၣ်လီၤ.

⁷ ဒီးဟဲက့ၤကဒါက့ၤဝဲ, ဒီးလဲၤဝဲဆူဧ့ၣ်မံးၡပး (အဝဲ န့ၣ်မ့ၢ်ကၤဒ့ၣ်)လီၤ. ဒီးကျီကွံာ် ပှၤဧမၤလ့းဖိအကီၢ်ဒီ ဘ့ၣ်ညါ, ဒီးပှၤအမိၢ်ဖိစ့ၢ်ကီးလၢအအိၣ်အဆိးလၢဃၤ စစိၣ်တါမၢ်အပူၤလီၤ.

⁸ ဒီးစဒိၣ်အစီၤပၤ, ဒီးဂမိရၤအစီၤပၤ, ဒီးအၤဒမၤအ စီၤပၤ, ဒီးစဘိအံၣ်အစီၤပၤ, ဒီးဘ့လၤ (အဝဲန့ၣ်မ့ၢ် စိၤဧၢ်) အစီၤပၤသ့ၣ်တဖၣ်လဲၤထီၣ်ဒီး ဒုးတၢ်ဒီးအီၤ လၢတၢ်ပၢၤခိၣ်စံးဒံၣ်လီၤ.

⁹ ဒုးတၢ်ဒီးဧ့ၤလၣ်အစီၤပၤ ကဒၢ်လဧိမ့ၢ်, ဒီးပှၤက လုာ်တဖၣ်အစီၤပၤတံးဒၤလး, ဒီးၡံနၢ်အစီၤပၤအးမရၤ ဖ့လးဒီးအ့းလးစၢ်အစီၤပၤအၤရယိာ်လီၤ. စီၤပၤလွံၢ်ဂၤ ဒုးတၢ်ဒီးယဲၢ်ဂၤလီၤ.

¹⁰ ဒီးတၢ်ပၢၤခိၣ်စံးဒံၣ် ပှဲၤဒီးကျဲတံးအပူၤ, ဒီးစဒိၣ်ဒီး ဂမိရၤအစီၤပၤတဖၣ်ဃ့ၢ်ဝဲ, ဒီးလီၤတဲာ်ဖဲန့ၣ်, ဒီးပှၤ လၢအအိၣ်လီၤတဲာ်တဖၣ်န့ၣ် ဃ့ၢ်ဝဲဆူ ကစၢၢ်ကလိ လီၤ. ¹¹ ဒီးပှၤဟံးန့ၢ်စဒိၣ်ဒီး ဂမိရၤအတၢ်ဖိတၢ်လံၤခဲ လၢာ်, ဒီးအတၢ်အီၣ်တၢ်အီခဲလၢာ်, ဒီးလဲၤတၢ်လီၤ.―

¹² ဒီးဟံးန့ၢ်စီၤအၤဘြၣ်အဖိဒိၣ်စီၤလိာ် လၢအအိၣ်လၢစ ဒိၣ်အပူၤ, ဒီးအတၢ်ဖိတၢ်လံၤ, ဒီးလဲၤတၢ်လီၤ.

¹³ ဒီးပှၤလၢအထူၣ်ဖျဲးတဂၤ ဟဲစံးဘၣ်တဲဘၣ် ပှၤဧ့ၤ ဘြံၤဖိစီၤအၤဘြၣ်လီၤ. ဒီးအဝဲဒၣ်န့ၣ်အိၣ်ဝဲဖဲ မၤမရ့ အသ့ထိးဖၣ်လီၤ. ဒီးမးမရ့မ့ၢ်ပှၤအမိၢ်ဖိ, ဒီပုၢ်ဝဲၢ်ဒီးစီၤ အ့ၡကိၤလး, ဒီးဒီပုၢ်ဝဲၢ်ဒီးစီၤဧၤန့ၢ်လီၤ. အဝဲသ့ၣ်တ ဖၣ်န့ၣ်ဒီသိၣ်ဒီးစီၤအၤဘြၣ်လီၤ.

¹⁴ ဒီးတုၤစီၤအၤဘြၣ်နၢ်ဟူလၢ တၢ်ဖီၣ်န့ၢ်အဒီပုၢ်ဝဲၢ်ဒီး, ကတဲာ်ကတီၤပှၤလၢ အသိၣ်လိအီၤလၢအအိၣ်ဖျဲၣ်လၢ အဟံၣ်ပူၤ, ပှၤသၢကယၤတဆံဃိးဂၤ, ဒီးလူၤပိာ်အခံ ဆူဒၣ်လီၤ.

¹⁵ ဒီးအဝဲဒၣ်ဒီးအကုၢ်အပှၤနီၤဖးလိာ်အသး ထီဒါအီၤ လၢမုၢ်နၤဒီးကျီကွံာ်အီၤ. ဒီးလူၤအီၤဆူဃိဘၤ, လၢအ အိၣ်လၢဝ့ၢ်ဒၤမ့ၤစ့းအစုစ့ၣ်တခီလီၤ. ¹⁶ ဒီးဟဲက့ၤစိာ်က ဒါက့ၤတၢ်ဖိတၢ်လံၤခဲလၢာ်, ဒီးဟဲက့ၤစိာ်စ့ၢ်ကီးအဒီ ပုၢ်ဝဲၢ်စီၤလိာ်, ဒီးအတၢ်ဖိတၢ်လံၤ, ဒီးပိာ်မုၣ်ပိာ်မၢၤ စ့ၢ်ကီး, ဒီးပှၤဂီၢ်မုၢ်ဂီၢ်ပၤလီၤ.

¹⁷ ဒီးလၢစီၤအၤဘြၣ်ဟဲက့ၤကဒါက့ၤ လၢအကျီကွံာ် ကဒၢ်လဧိမ့ၢ်, ဒီးစီၤပၤသ့ၣ်တဖၣ်လၢအအိၣ်ဒီးအီၤအ လီၢ်ခံန့ၣ်, စဒိၣ်အစီၤပၤလဲၤသဂၢၢ်ထီၣ်အီၤ လၢတၢ် ပၢၤခိၣ်ၡၤဝ့အပူၤလီၤ. အဝဲန့ၣ်မ့ၢ်စီၤပၤအတၢ်ပၢၤခိၣ် လီၤ.

¹⁸ ဒီးၡၤလ့ၣ်အစီၤပၤ မးလကံစဒ့းဟဲက့ၤစိာ်ထီၣ်ကိၣ် ဒီးစပံးထံလီၤ. အဝဲန့ၣ်မ့ၢ် တၢ်ထီကတၢၢ်ကစၢ်အပှၤ လုၢ်တၢ်အဒိၣ်လီၤ. ¹⁹ ဒီးဆိၣ်ဂ့ၤအီၤ, ဒီးစံးဝဲဒၣ်, စီၤ အၤဘြၣ်ဘၣ်ဃးဒီး တၢ်ထီကတၢၢ်ကစၢ်လၢအအိၣ်ဒီး ဟီၣ်ခိၣ်ဒီးမူခိၣ်န့ၣ်, မ်အဘၣ်တၢ်ဆိၣ်ဂ့ၤအီၤတက့ၢ်.―

²⁰ ဒီးတၢ်ထီကတၢၢ်ကစၢ်လၢအဟ့ၣ်လီၤ နဒုၣ်နဒါလၢန စုပူၤန့ၣ်, မ်အဘၣ်တၢ်ဆိၣ်ဂ့ၤအီၤတက့ၢ်. ဒီးအဝဲဒၣ် ဟ့ၣ်အီၤလၢတၢ်ခဲလၢာ်ဆံဆဲၣ်ပူတပူလီၤ.

²¹ ဒီးစဒိၣ်အစီၤပၤစံးဘၣ် စီၤအၤဘြၣ်, ဟ့ၣ်ယၤလၢ ပှၤကညီ, ဒီးဟံးန့ၢ်တၢ်ဖိတၢ်လံၤလၢနဂီၢ်ဒၣ်နဲတက့ၢ်.

²² ဒီးစီၤအၤဘြၣ်စံးဘၣ်စဒိၣ်အစီၤပၤ, ယယူာ်ထီၣ်ယ စုဆူယွၤတၢ်ထီကတၢၢ်ကစၢ်လၢအအိၣ်ဒီး ဟီၣ်ခိၣ်ဒီး မူခိၣ်န့ၣ်, ²³ လၢယတဟံးန့ၢ်ဘၣ်တၢ်အိၣ်ဒီးနၤနီတမံၤ, ထဲလုၣ်တဘိ, ထဲခီၣ်ဖံးပျံၤတဘိယတဟံးဘၣ်. နက စံးဘၣ်ဖုး, ယဒုးထူးထီၣ်တီၤထီၣ်စီၤအၤဘြၣ်လီၤ.

²⁴ ယကဟံးန့ၢ်ထဲတၢ်လၢ ပှၤဖိၣ်သၣ်ခွါတဖၣ်အီၣ်တၢ်, ဒီးပှၤလၢအလဲၤတၢ်ဒီးယၤ, စီၤဧၤန့ၢ်, စီၤအ့ၡကိၤလး, ဒီးစီၤမးမရ့အဂီၢ်လီၤ. အဝဲသ့ၣ်တဖၣ်န့ၣ် ကဟံးန့ၢ် ဒၣ်ဝဲလၢအဂီၢ်တက့ၢ်.

၁၅

¹ တၢ်န့ၣ်တဖၣ်အလီၢ်ခံ ယွၤအကလုၢ်ဘၣ်စီၤအၤဘြၣ် လၢတၢ်ထံၣ်တၢ်လၢညါခီအပူၤ, ဒီးစံးဝဲဒၣ်, စီၤအၤဘြၣ် ဧၢ, ပျံၤတၢ်တဂ့ၤ. ယမ့ၢ်ကတီၤတဘ့ၣ်လၢနဂီၢ်ဒီးနဘူး နလဲဒိၣ်ဒိၣ်ကလဲာ်လီၤ.

² စီၤအၤဘြၣ်စံးဝဲဒၣ်, ကစၢ်ယွၤဧၢ, နကဟ့ၣ်လီၤယၤ မနုၤတမံၤလဲၣ်. အဂ့ၢ်ဒ်အံၤ, ယမ့ၢ်ပှၤတူာ်ဖိ, ဒီးယပှၤ ဟံၣ်ဖိအခိၣ်မ့ၢ်ပှၤဒၤမ့ၤစ့းဖိ, စီၤအလံၤဧ့စ့ၢ်တဂၤအံၤ လီၤ. ³ ဒီးစီၤအၤဘြၣ်စံးဝဲဒၣ်, ကွၢ်ကွၢ်, နတဟ့ၣ် လီၤဘၣ်ယၤလၢတၢ်အချံအသၣ်ဘၣ်, ဒီးကွၢ်ကွၢ်, ယ ပှၤဟံၣ်ဖိတဂၤမ့ၢ်ပှၤန့ၢ်သါယတၢ်လီၤ.

⁴ ဒီးကွၢ်ကွၢ်, ယွၤအကလုၢ်ဘၣ်အီၤ, ဒီးစံးဝဲဒၣ်, အ ဝဲတဂၤန့ၣ်တကဲဘၣ်လၢပှၤန့ၢ်သါနတၢ်ဘၣ်. မ့မ့ၢ်ပှၤ လၢအဟဲထီၣ်လၢနဟၢဖၢပူၤတဂၤ ကကဲထီၣ်ပှၤန့ၢ် သါနတၢ်လီၤ. ⁵ ဒီးဒုးဟးထီၣ်အီၤဆူခိ, ဒီးစံးဝဲဒၣ်, ကွၢ်ထီၣ်ဆူမူခိၣ်, ဒီးနဂံၢ်မ့ၢ်သ့ဒီး, ဂံၢ်ဆၣ်ဧိၤဖီဧိၤန့ၣ် တက့ၢ်. ဒီးစံးဘၣ်အီၤ, နချံနသၣ်ကမၤအသးဒ်န့ၣ် လီၤ.

⁶ ဒီးအဝဲဒၣ်နာ်ယွၤ, ဒီးတၢ်ပးကဲအတၢ်နာ်လၢတၢ်တီ တၢ်လိၤလၢအဂီၢ်လီၤ. ⁷ ဒီးစံးဘၣ်အီၤ, တၢ်လၢယၤ အံၤ, ယမ့ၢ်ယွၤလၢအဒုးဟဲထီၣ်နၤ လၢပှၤက့ၤစ့းဖိအ ဝ့ၢ်အူၢ်အပူၤ, ဒ်သိးယကဟ့ၣ်လီၤနၤလၢ ကီၢ်တဘ့ၣ် အံၤလၢနကန့ၢ်သါအီၤလီၤ.

⁸ ဒီးစံးဝဲဒၣ်, ကစၢ်ယွၤဧၢ, ယကသ့ၣ်ညါလၢယက န့ၢ်သါအီၤဒ်လဲၣ်. ⁹ ဒီးစံးဘၣ်အီၤ, ဟံးန့ၢ်ယၤလၢဂီၤ ဖံးမိၢ်သၢနံၣ်ဖိတဒု, ဒီးမဲာ်တဲးလဲးမိၢ် သၢနံၣ်ဖိတဒု, ဒီးသိဖါသၢနံၣ်ဖိတဒု, ဒီးထိၣ်လွံၢ်ဘုၣ်တဘ့ၣ်, ဒီး ကးက့ၣ်ဖိတဘ့ၣ်တက့ၢ်.

¹⁰ ဒီးဟံးန့ၢ်တၢ်တဖၣ်န့ၣ်လၢအဂီၢ်, ဒီးနီၤဖးဝဲလၢအ သးကံၢ်ပူၤ, ဒီးပာ်ဝဲတခီတခီသဃီၤဒီးအသကိးလီၤ. မ့မ့ၢ်ထိၣ်တဖၣ်န့ၣ်တနီၤဖးဘၣ်ဝဲဘၣ်. ¹¹ ဒီးထိၣ်ဧိၤလံၣ် ဧိၤဟဲလီၤလၢတၢ်စိၣ်တဖၣ်အလိၤ, ဒီးစီၤအၤဘြၣ်ဃါ ထီၣ်ကွံာ်အီၤလီၤ.

¹² ဒီးတုၤမုၢ်လီၤနုာ်ဒီး, တၢ်မံသပ့ၤလီၤဘၣ်လၢစီၤအၤ ဘြၣ်အလိၤ, ဒီးကွၢ်ကွၢ်, တၢ်ပျံၤတၢ်ဖုး, တၢ်ခံးဖး ဒိၣ်လီၤဘၣ်လၢအလိၤလီၤ.

¹³ ဒီးစံးဘၣ်စီၤအၤဘြၣ်, သ့ၣ်ညါသပှၢ်တၢၢ်လၢနချံန သၣ်ကကဲထီၣ်ပှၤတမှံၤလၢ ကီၢ်တဘ့ၣ်အပူၤ လၢအ တမ့ၢ်ဘၣ်အတၢ်ဘၣ်, ဒီးကမၤပှၤကီၢ်ဖိန့ၣ်အတၢ်, ဒီး အဝဲသ့ၣ် ကမၤနးမၤဖှီၣ်အီၤ အနံၣ်လွံၢ်ကယၤန့ၣ်တ က့ၢ်. ¹⁴ လၢန့ၣ်အမဲာ်ညါ ပှၤတကလုာ်လၢအဝဲသ့ၣ် ကမၤအတၢ်န့ၣ် ယကစံၣ်ညီၣ်အီၤလီၤ. လၢခံက့ၤဒီး ကဟးထီၣ်အိၣ်ဒီးအတၢ်ဖိတၢ်လံၤအါအါကလဲာ်လီၤ.

¹⁵ ဒီးနကလဲၤဆူနပၢ်သ့ၣ်တဖၣ်အအိၣ်မုာ်မုာ်လီၤ. န ခိၣ်ဝါဂ့ၤဒီးနကဘၣ်တၢ်ခူၣ်လီၤကွံာ်နၤလီၤ.

¹⁶ ဒီးပှၤလွံၢ်စိၤတစိၤန့ၣ် ကဟဲက့ၤကဒါက့ၤဖဲအံၤလီၤ. အဂ့ၢ်ဒ်အံၤ, ပှၤအမိၢ်ဖိအတၢ်အၢတၢ်သီ တပှဲၤထီၣ်ဒံး ဘၣ်လီၤ.

¹⁷ ဒီးတုၤမုၢ်လီၤနုာ်ဒီး, တၢ်ခံးလီၤ, ဒီးကွၢ်ကွၢ်, ဖၣ် ကပူၤအိၣ်ဒီးမ့ၣ်အူခုၣ်တဖျၢၣ်, ဒီးမ့ၣ်အူဒၢကဲၤထီၣ်တ ဖျၢၣ်လၢအလဲၤလၢတၢ်တဖၣ်န့ၣ်တခီတခီအဘၢၣ်စၢၤ လီၤ.

¹⁸ တၢ်လၢမုၢ်နံၤတနံၤန့ၣ် ယွၤအၢၣ်လီၤအီလီၤတၢ်ဒီး စီၤအၤဘြၣ်, ဒီးစံးဝဲဒၣ်, ယဟ့ၣ်လီၤနချံနသၣ်လၢ ကီၢ်တဘ့ၣ်အံၤ, လၢအဲၤကူပတူးအထံကျိ ပၢၢ်လၢထံ ထံမိၢ်ပှၢ်ဖးဒိၣ်, ထံဖရၤသး, ¹⁹ ပှၤက့ၣ်ဖိဒီးပှၤကနးဖိ, ဒီးပှၤကးမိၣ်ဖိ, ²⁰ ဒီးပှၤဃ့ၤသးဖိ, ဒီးပှၤပရးဖိဒီးပှၤရၤ ဖၤဖိ, ဒီးပှၤအမိၢ်ဖိ, ဒီးပှၤကနၤဧၣ်ဖိ, ဒီးပှၤကံၢ်ကၣ် ဖိ, ဒီးပှၤယဘူၣ်ဖိလီၤ.

၁၆

¹ ဒီးစီၤအၤဘြၣ်အမါနီၢ်စၤရဲ တဆံးစၢ်ဘၣ်အဖိလၢ အဂီၢ်ဘၣ်. ဒီးအဝဲဒၣ်အိၣ်ဒီးအကုၢ်ပိာ်မုၣ်တဂၤပှၤအဲၤ ကူပတူးဖိ, ဒီးအမံၤမ့ၢ်နီၢ်ဟၤကၢ်လီၤ. ² ဒီးနီၢ်စၤရဲစံး ဘၣ်စီၤအၤဘြၤ, ကွၢ်ကွၢ်, ယွၤတြီယၤဒ်သိးယသုတ ဆံးစၢ်တၢ်တဂ့ၤလီၤ. လဲၤနုာ်စာ်ဆူယကုၢ်ပိာ်မုၣ်အ အိၣ်တက့ၢ်. ဘၣ်တဘၣ် ယကသူၣ်ထီၣ်ယသးလၢ အီၤလီၤ. ဒီးစီၤအၤဘြၣ်ကနၣ်အမါအကလုၢ်လီၤ.

³ ဒီးလၢစီၤအၤဘြၣ်အိၣ်ဝဲလၢ ကီၢ်ကနၤဧၣ်အနံၣ်တ ဆံအလီၢ်ခံန့ၣ်, စီၤအၤဘြၣ်အမါနီၢ်စၤရဲဟံးန့ၢ်အကုၢ် ပိာ်မုၣ်, ပှၤအဲၤကူပတူးဖိနီၢ်ဟၤကၢ်, ဒီးဟ့ၣ်အီၤလၢ အဝၤစီၤအၤဘြၣ်ဒ်သိးအကကဲထီၣ်အမါလီၤ.

⁴ ဒီးလဲၤနုာ်ဝဲဆူနီၢ်ဟၤကၢ်အအိၣ် ဒီးအဝဲဒၣ်ဒၢထီၣ် လီၤ. ဒီးတုၤအထံၣ်ဘၣ်ဝဲလၢအဒၢထီၣ်ဒီး, အကစၢ် မုၣ်တမ့ၢ်လၢၤဘၣ်တၢ်လၢအမဲာ်ညါဘၣ်.

⁵ ဒီးနီၢ်စၤရဲစံးဘၣ်စီၤအၤဘြၣ်, တၢ်မၤကမၣ်ယၤအံၤ, မ်အအိၣ်လၢနလိၤတက့ၢ်. ယဟ့ၣ်ယကုၢ်ပိာ်မုၣ်လၢန သးနါပှၢ်, ဒီးတုၤအထံၣ်ဘၣ်ဝဲလၢအဒၢထီၣ်ဒီး, ယ တမ့ၢ်လၢၤဘၣ်တၢ်လၢအမဲာ်ညါဘၣ်. မ်ယွၤစံၣ်ညီၣ် တၢ်ဘၣ်ဃးဒီးယၤဒီးနၤတက့ၢ်.

⁶ ဒီးစီၤအၤဘြၣ်စံးဘၣ်နီၢ်စၤရဲ, ကွၢ်ကွၢ်, နကုၢ်ပိာ် မုၣ်အိၣ်လၢနစုပူၤလီၤ. မၤအီၤဖဲဒၣ်အဂ့ၤလၢနမဲာ်တ က့ၢ်. ဒီးနီၢ်စၤရဲမၤနးမၤဖှီၣ်အီၤ, ဒီးအဝဲဒၣ်ဃ့ၢ်ထီၣ်ကွံာ် လၢအမဲာ်ညါလီၤ.

⁷ ဒီးယွၤအကလူးတဂၤ ထံၣ်န့ၢ်အီၤလၢထံထီၣ်ပၢၢ်တ ပူၤအဃၢၤလၢပှၢ်လၢ်ကျါ, လၢထံထီၣ်ပၢၢ်အဃၢၤအိၣ် ဝဲလၢဝ့ၢ်ရှူၢ်အကျဲလီၤ. ⁸ ဒီးစံးဝဲဒၣ်, နီၢ်စၤရဲအကုၢ်ပိာ် မုၣ်နီၢ်ဟၤကၢ်ဧၢ, နဟဲလၢလဲၣ်, ဒီးနကလဲၤဆူလဲၣ်, ဒီးစံးဝဲဒၣ်, ယဃ့ၢ်လၢယကစၢ်မုၣ် နီၢ်စၤရဲအမဲာ်ညါ လီၤ.

⁹ ဒီးယွၤအကလူးတဂၤစံးဘၣ်အီၤ, က့ၤကဒါက့ၤဆူန ကစၢ်မုၣ်အအိၣ်, ဒီးဆီၣ်လီၤနသးလၢအစုပူၤတက့ၢ်.

¹⁰ ဒီးယွၤအကလူးစံးဘၣ်အီၤ, ယကမၤအါထီၣ်နချံန သၣ်အါအါကလဲာ်, ဒီးမ့ၢ်အအါအဃိဒီး, ပှၤတဂံၢ် ဘၣ်အီၤဘၣ်. ¹¹ ဒီးယွၤအကလူးစံးဘၣ်အီၤ, ကွၢ်ကွၢ်, နဒၢထီၣ်လံ, ဒီးနကဆံးစၢ်န့ၢ်နဖိခွါ, ဒီးနဘၣ်ယုၢ်အ မံၤလၢစီၤယံးၡမၤဧ့လးလီၤ. အဂ့ၢ်ဒ်အံၤ, ယွၤနၢ်ဟူလံ နတၢ်နးတၢ်ဖှီၣ်လံ. ¹² ဒီးကကဲထီၣ်ပှၤမံၤတဂၤလီၤ. အ စုကထီဒါကယဲၢ်ပှၤကညီတဂၤလၢ်လၢ်, ဒီးကယဲၢ်ပှၤ ကညီအစုကထီဒါအီၤလီၤ. ဒီးကအိၣ်ဝဲဆိးဝဲလၢအဒီ ပုၢ်ဝဲၢ်ခဲလၢာ်အမဲာ်ညါလီၤ.

¹³ ဒီးယွၤလၢအကတိၤတၢ်ဒီးအီၤန့ၣ်, ပိာ်မုၣ်ကိးဝဲအ မံၤလၢထံၣ်တၢ်ကစၢ်လီၤ. အဂ့ၢ်ဒ်အံၤ, စံးဝဲဒၣ်, ပှၤ လၢအထံၣ်ယၤတဂၤန့ၣ် မ့ၢ်ယဃုထံၣ်န့ၢ်အီၤဧါ. ¹⁴ မၤ သးဒ်န့ၣ်ဒီး, ထံပူၤတပူၤန့ၣ်ပှၤကိးဝဲလၢပှၤမူဝဲဒီးထံၣ် ယၤတဂၤအထံပူၤလီၤ. ကွၢ်ကွၢ်, အိၣ်ဝဲလၢကၤဒ့ၣ်ဒီး ဘ့ရ့းအဘၢၣ်စၢၤလီၤ.

¹⁵ ဒီးနီၢ်ဟၤကၢ်ဆံးစၢ်န့ၢ်အဖိခွါ လၢစီၤအၤဘြၣ်အဂီၢ်, ဒီးစီၤအၤဘြၣ်ယုၢ်အဖိခွါ လၢနီၢ်ဟၤကၢ် ဆံးစၢ်န့ၢ်အီၤ အမံၤလၢစီၤယံးၡမၤဧ့လးလီၤ. ¹⁶ ဒီးလၢနီၢ်ဟၤကၢ်ဆံး စၢ်န့ၢ်စီၤယံးၡမၤဧ့လးလၢ စီၤအၤဘြၣ်အဂီၢ်န့ၣ် စီၤအၤ ဘြၣ်အသးပှၢ်ဃိးဆံဃုနံၣ်လီၤ.

၁၇

¹ ဒီးလၢစီၤအၤဘြၣ်အသးပှၢ် ခွံဆံခွံနံၣ်န့ၣ် ယွၤလီၣ် ဖျါထီၣ်အသးလၢ စီၤအၤဘြၣ်အမဲာ်ညါ, ဒီးစံးဘၣ် အီၤ, တၢ်လၢယၤအံၤယမ့ၢ်ကစၢ်သ့တၢ်လၢာ်လီၤ. လဲၤ တၢ်လၢယမဲာ်ညါ, ဒီးလၢထီၣ်ပှဲၤထီၣ်တက့ၢ်.

² ဒီးယကအၢၣ်လီၤအီလီၤတၢ်ဒီးနၤ, ဒီးယကမၤအါ ထီၣ်နၤအါအါကလဲာ်လီၤ.

³ ဒီးစီၤအၤဘြၣ်တီၤလီၤကဒွံကျိာ်, ဒီးယွၤကတိၤတၢ် ဒီးအီၤ, ဒီးစံးဝဲဒၣ်, ⁴ ယဲဒၣ်အံၤကွၢ်ကွၢ်, ယတၢ်အၢၣ် လီၤအီလီၤအိၣ်ဒီးနၤ, ဒီးနကကဲထီၣ်ပှၤအါကလုာ်အ ပၢ်လီၤ. ⁵ ဒီးတၢ်တကိးလၢၤဘၣ်နမံၤလၢအၤဘြၣ်ဘၣ်. မ့မ့ၢ်နမံၤကမ့ၢ်အၤဘြၤဟၣ်လီၤ. အဂ့ၢ်ဒ်အံၤ, ယပာ် နၤလၢပှၤအါကလုာ်အပၢ်လီၤ. ⁶ ဒီးယကဒုးသၣ်ထီၣ် နၤအါအါကလဲာ်, ဒီးယဒုးကဲထီၣ်နၤလၢပှၤအါကလုာ်, ဒီးစီၤပၤတဖၣ်ကလီၤစၢၤလၢနၤလီၤ. ⁷ ဒီးယကဒုးအိၣ် ဂၢၢ်ဆိးကျၢၤ ယတၢ်အၢၣ်လီၤအီလီၤဒီးနၤ, ဒီးနချံန သၣ်လၢနလီၢ်ခံလၢအစိၤအဃၣ်အကျါ, ဒ်သိးအက ကဲထီၣ် တၢ်အၢၣ်လီၤအီလီၤအထူအယိာ်, လၢယက ကဲထီၣ်နကစၢ်, ဒီးနချံနသၣ်လၢနလီၢ်ခံအကစၢ်အဂ့ၢ် လီၤ. ⁸ ဒီးယကဟ့ၣ်လီၤနၤ, ဒီးနချံနသၣ်လၢနလီၢ်ခံ န့ၣ်လၢကီၢ်တဘ့ၣ်အံၤလၢနအိၣ်တမှံၤလၢအပူၤ, ကီၢ် ကနၤဧၣ်ဒီဘ့ၣ်ညါလၢတၢ်ဟံးဃာ်အထူအယိာ်အဂီၢ်, ဒီးယကကဲထီၣ်အကစၢ်လီၤ.

⁹ ဒီးယွၤစံးဘၣ်စီၤအၤဘြၤဟၣ်, နဘၣ်တိၢ်န့ၢ်ယတၢ် အၢၣ်လီၤအီလီၤ, နဲဒၣ်, ဒီးနချံနသၣ်လၢနလီၢ်ခံလၢ အစိၤအဃၣ်တဖၣ်လီၤ. ¹⁰ ဒီးယတၢ်အၢၣ်လီၤအီလီၤဒီး သု, ဒီးနချံနသၣ်လၢနလီၢ်ခံလၢသုဘၣ်တိၢ်န့ၢ်န့ၣ်မ့ၢ် အအံၤ, ကယဲၢ်ပိာ်ခွါလၢသုကျါတဂၤလၢ်လၢ်န့ၣ်ဘၣ် ဒိးတၢ်ကူးတရံးလီၤ. ¹¹ ဒီးသုဘၣ်ကူးတရံးကွံာ်သုတၢ် အခိၣ်ဖံးလီၤ. ဒီးကကဲထီၣ်ယတၢ်အၢၣ်လီၤအီလီၤဒီး သုအတၢ်ပနီၣ်လီၤ. ¹² ဒီးပှၤဃိးနံၤဖိလၢသုကျါ, ကယဲၢ်ပိာ်ခွါလၢသုစိၤသုဃၣ်တဖၣ်, ပှၤလၢအအိၣ်ဖျဲၣ်လၢဟံၣ်ပူၤမ့ၢ်ဂ့ၤ, ပှၤလၢသုပှ့ၤအီၤဒီးစ့လၢ တခီဘီတခီမုၢ်ဖိ လၢအတမ့ၢ်ဘၣ်သုချံသုသၣ်မ့ၢ်ဂ့ၤ, ကဘၣ်ဒိးတၢ်ကူးတရံးလီၤ.―

¹³ ပှၤလၢအအိၣ်ဖျဲၣ်လၢနဟံၣ်ပူၤ, ဒီးပှၤလၢနပှ့ၤအီၤလၢ နစ့, ဘၣ်ဒိးတၢ်ကူးတရံးသပှၢ်တၢၢ်လီၤ. ဒီးယတၢ် အၢၣ်လီၤအီလီၤကအိၣ်လၢ သုညၣ်လၢတၢ်အၢၣ်လီၤ အီလီၤအထူအယိာ်အဂီၢ်လီၤ. ¹⁴ ဒီးပှၤပိာ်ခွါလၢအတ ဒိးဘၣ်တၢ်ကူးတရံး, လၢအတၢ်အခိၣ်ဖံးတဘၣ်တၢ် ကူးတရံးဘၣ်န့ၣ်, အဝဲတဂၤကဘၣ်တၢ်ဒီၣ်တဲာ်ကွံာ် အီၤလၢ အပှၤတကလုာ်န့ၣ်လီၤ. မ့ၢ်အလုၣ်သ့ၣ်ခါပ တာ်ယတၢ်အၢၣ်လီၤအီလီၤလီၤ.

¹⁵ ဒီးယွၤစံးဘၣ်စီၤအၤဘြၣ်ဟၣ်, နမါနီၢ်စၤရဲအံၤနတ ဘၣ်ကိးဘၣ်အမံၤလၢစၤရဲဘၣ်. မ့မ့ၢ်စၤရါကမ့ၢ်အမံၤ လီၤ. ¹⁶ ဒီးယကဆိၣ်ဂ့ၤအီၤ, ဒီးယကဟ့ၣ်လီၤနဖိခွါ လၢအီၤစ့ၢ်ကီးလီၤ. ဒီးယကဆိၣ်ဂ့ၤအီၤ, ဒီးကကဲထီၣ် ပှၤကလုာ်တဖၣ်, ဒီးပှၤဂီၢ်မုၢ်အစီၤပၤတဖၣ် ကလီၤ စၢၤလၢအီၤလီၤ.

¹⁷ ဒီးစီၤအၤဘြၤဟၣ်တီၤလီၤကဒွံကျိာ်, ဒီးနံၤထီၣ်, ဒီး စံးလၢအသးကံၢ်ပူၤ, ပှၤလၢအသးပှၢ်အနံၣ်တကယၤ တဂၤအံၤဘၣ်ကထီၣ်ဖိဧါ. ဒီးပှၤလၢအသးပှၢ်အနံၣ်ခွံ ဆံနီၢ်စၤရါတဂၤန့ၣ်, ဘၣ်ကဆံးစၢ်န့ၢ်တၢ်ဧါ. ¹⁸ ဒီး စီၤအၤဘြၤဟၣ်စံးဘၣ်ယွၤ, မ်စီၤယံးၡမၤဧ့လးမူလၢန မဲာ်ညါတက့ၢ်.

¹⁹ ဒီးယွၤစံးဝဲဒၣ်, နမါနီၢ်စၤရါကဆံးစၢ်န့ၢ်နဖိခွါ သ ပှၢ်တၢၢ်, ဒီးနဘၣ်ယုၢ်အမံၤလၢစီၤအံၤစဲး, ဒီးယကဒုး အိၣ်ဂၢၢ်ဆိးကျၢၤယတၢ်အၢၣ်လီၤအီလီၤဒီးအီၤ, ဒီးအ ချံအသၣ်လၢအလီၢ်ခံန့ၣ် လၢတၢ်အၢၣ်လီၤအီလီၤအ ထူအယိာ်အဂီၢ်လီၤ.

²⁰ ဒီးတၢ်လၢစီၤယံးၡမၤဧ့လးန့ၣ် ယနၢ်ဟူလံနကလုၢ် လံ. ကွၢ်ကွၢ်, ယဆိၣ်ဂ့ၤလံအီၤလံ. ဒီးယကဒုးသၣ် ထီၣ်အီၤ, ဒီးယကမၤအါထီၣ်အီၤအါအါကလဲာ်လီၤ. ကထီၣ်ဖိပဒိၣ်တဆံခံဂၤ, ဒီးယကဒုးကဲထီၣ်အီၤလၢ ပှၤတကလုာ်ဖးဒိၣ်လီၤ. ²¹ မ့မ့ၢ် ယကဒုးအိၣ်ဂၢၢ်ဆိး ကျၢၤ ယတၢ်အၢၣ်လီၤအီလီၤဒီးစီၤအံၤစဲးလၢ နီၢ်စၤရါ ကဆံးစၢ်န့ၢ်နၤ ခဲကိာ်တနံၣ်ဖဲအကတီၢ်အံၤဆၢအလီၢ် လီၤ. ²² ဒီးကတိၤတၢ်ဒီးအီၤန့ၣ်ဆိတ့ၢ်ဝံၤဒီး, ယွၤဟး ထီၣ်ဆူထးလၢစီၤအၤဘြၤဟၣ်အအိၣ်လီၤ.

²³ ဒီးမုၢ်တနံၤဃီန့ၣ်ဒ်ယွၤမၤလိာ်အီၤအသိးန့ၣ်, စီၤအၤ ဘြၤဟၣ်ဟံးန့ၢ်အဖိခွါ စီၤယံးၡမၤဧ့လး, ဒီးကယဲၢ်ပှၤ အိၣ်ဖျဲၣ်လၢအဟံၣ်ပူၤ, ဒီးကယဲၢ်ပှၤလၢအပှ့ၤလၢအစ့, ကယဲၢ်ပိာ်ခွါလၢစီၤအၤဘြၤဟၣ်အပှၤဟံၣ်ဖိအကျါကိး ဂၤဒဲး, ဒီးကူးတရံးအတၢ်အခိၣ်ဖံးအညၣ်လီၤ.

²⁴ ဒီးလၢစီၤအၤဘြၤဟၣ် ဒိးတၢ်ကူးတရံးအတၢ်အခိၣ် ဖံးန့ၣ်, အသးပှၢ်တ့ၢ်ခွံဆံခွံနံၣ်လီၤ. ²⁵ ဒီးအဖိခွါစီၤယံး ၡမၤဧ့လးလၢအဒိးတၢ်ကူးတရံး အတၢ်အခိၣ်ဖံးန့ၣ်, အသးပှၢ်တ့ၢ်တဆံသၢနံၣ်လီၤ. ²⁶ ဒီးစီၤအၤဘြၤဟၣ်, ဒီးအဖိခွါစီၤယံးၡမၤဧ့လးန့ၣ် ဒိးတၢ်ကူးတရံးမုၢ်တနံၤ ဃီလီၤ. ²⁷ ဒီးကယဲၢ်အပှၤဟံၣ်ဖိ, ပှၤအိၣ်ဖျဲၣ်လၢအ ဟံၣ်ပူၤ, ဒီးပှၤလၢအပှ့ၤဝဲလၢစ့ လၢပှၤတခီဘီမုၢ်ဖိန့ၣ် ဒိးတၢ်ကူးတရံးဒီးအီၤခဲလၢာ်လီၤ.

၁၈

¹ ဒီးယွၤလီၣ်ဖျါထီၣ်အသးလၢအမဲာ်ညါဖဲ မးမရ့အ သ့ထိးဖၣ်လီၤ. ဒီးလၢမုၢ်ကိၢ်ထီၣ်န့ၣ် ဆ့ၣ်နီၣ်ဝဲလၢဒဲ အကျဲစၢၤ, ² ဒီးကျ့ထီၣ်အမဲာ်, ဒီးကွၢ်ဝဲ, ဒီးကွၢ်ကွၢ်, ပှၤကညီသၢဂၤ ဆၢထၢၣ်လၢအဃၢၤလီၤ. ဒီးတုၤအ ထံၣ်ဘၣ်ဝဲဒီး, ဃ့ၢ်ထီၣ်ဝဲလၢဒဲအကျဲစၢၤဒ်သိးအကသ ဂၢၢ်ထီၣ်အီၤ, ဒီးတီၤလီၤကဒွံကျိာ်လၢဟီၣ်ခိၣ်, ³ ဒီးစံး ဝဲဒၣ်, ယကစၢ်ဧၢ, ယမ့ၢ်ဘၣ်ဘျုးလၢနမဲာ်ညါဒီး, လဲၤပူၤကွံာ်လၢ်လၢနကုၢ်နပှၤအအိၣ်တဂ့ၤ. ⁴ ပျဲပှၤဟဲ စိာ်ထံတစဲး, ဒီးသ့ကွံာ်သုခီၣ်ဒီးအိၣ်ဘှံးလၢ်လၢသ့ၣ် အဖီလာ်န့ၣ်တက့ၢ်. ⁵ ဒီးယကဟဲစိာ်ကိၣ်တကူာ်, ဒီး မၤမုာ်ထီၣ်က့ၤသုသးတက့ၢ်. လၢခံက့ၤဒီးသုကလဲၤ ဘၣ်ဒံးတၢ်လီၤ. အဂ့ၢ်ဒ်အံၤ, မ့ၢ်သုဟဲလံဆူသုကုၢ်သု ပှၤအအိၣ်လံလီၤ. ဒီးစံးဝဲဒၣ်, ဒ်န့ၣ်အသိးမၤဒ်နစံးတၢ် အသိးန့ၣ်တက့ၢ်.

⁶ ဒီးစီၤအၤဘြၤဟၣ်က့ၤချ့သဒံးဆူဒဲပူၤ, ဆူနီၢ်စၤရါအ အိၣ်, ဒီးစံးဝဲဒၣ်, ကတဲာ်ကတီၤန့ၢ်ကိၣ်ကမူၣ်သၢစ့ၤ အၤချ့ချ့, စံၢ်အီၤ, ဒီးမၤကိၣ်ဒီဘ့ၣ်တဖၣ်လၢဖၣ်ကပူၤ အဖီခိၣ်န့ၣ်တက့ၢ်.

⁷ ဒီးစီၤအၤဘြၤဟၣ်ဃ့ၢ်ဆူဂီၤဖံးတဖုအအိၣ်, ဒီးမၤန့ၢ် ဂီၤဖံးဖိလၢအညၣ်စၢ်, ဒီးဂ့ၤဝဲတဒု, ဒီးဟ့ၣ်လီၤလၢဖိၣ် သၣ်ခွါတဂၤ, ဒီးအဝဲဒၣ်ကတဲာ်ကတီၤအီၤချ့သဒံးလီၤ.

⁸ ဒီးဟံးန့ၢ်တၢ်နုၢ်ထံလီၤသကၤ, ဒီးတၢ်နုၢ်ထံ, ဒီးဂီၤ ဖံးဖိလၢအကတဲာ်ကတီၤတ့ၢ်န့ၣ်, ဒီးပာ်လီၤဝဲလၢအဝဲ သ့ၣ်အမဲာ်ညါ, ဒီးဆၢထၢၣ်အကစၢ်ဒၣ်ဝဲလၢအဃၢၤ လၢသ့ၣ်အဖီလာ်, ဒီးအဝဲသ့ၣ်အီၣ်တၢ်လီၤ.

⁹ ဒီးစံးဘၣ်အီၤ, နမါနီၢ်စၤရါန့ၣ်မ့ၢ်အအိၣ်ဖဲလဲၣ်, ဒီး စံးဝဲဒၣ်, ကွၢ်ကွၢ်, အိၣ်ဝဲလၢဒဲပူၤလီၤ. ¹⁰ ဒီးစံးဝဲဒၣ်, တၢ်ဆၢက့ၤအကတီၢ်န့ၣ် ယကဟဲက့ၤဆူနအိၣ်သပှၢ် တၢၢ်, ဒီးကွၢ်ကွၢ်, နမါနီၢ်စၤရါကအိၣ်ဒီးအဖိခွါလီၤ. ဒီးနီၢ်စၤရါနၢ်ဟူဝဲ လၢဒဲအကျဲစၢၤအိၣ်ဝဲလၢ အချၢဃံ န့ၣ်လီၤ.

¹¹ ဒီးစီၤအၤဘြၤဟၣ်ဒီးနီၢ်စၤရါအသးပှၢ်တ့ၢ်, လဲၤတ့ၢ် လၢနံၣ်တဖၣ်အကျါလီၤ. ဒီးတကဲထီၣ်လၢၤဘၣ်ဒီးနီၢ် စၤရါဒ်ပိာ်မုၣ်အလုၢ်အလၢ်အသိးန့ၣ်ဘၣ်. ¹² ဒီးနီၢ်စၤ ရါနံၤဘၣ်ဝဲလၢအသးကံၢ်ပူၤ, ဒီးစံးဝဲဒၣ်, ယသးပှၢ် တ့ၢ်အလီၢ်ခံန့ၣ်ယကအိၣ်ဒီးတၢ်မုာ်လၤစ့ၢ်ကီးဧါ. ဒီး ယကစၢ်န့ၣ်သးပှၢ်တ့ၢ်လီၤ.

¹³ ဒီးယွၤစံးဘၣ်စီၤအၤဘြၤဟၣ်, နီၢ်စၤရါနံၤဝဲ, ဒီးစံး, ယသးပှၢ်တ့ၢ်, ဒီးယကဆံးစၢ်န့ၢ်ယဖိသပှၢ်တၢၢ်ဧါန့ၣ် ဘၣ်မနုၤလဲၣ်. ¹⁴ တၢ်ကီကဲၣ်ဆိးအိၣ်ဝဲဒီးယွၤတမံၤမံၤ ဧါ. တုၤအဆၢကတီၢ်ဘၣ်ဒီး, ယကဟဲက့ၤဆူနအိၣ် ဖဲတၢ်ဆၢက့ၤအကတီၢ်, ဒီးနီၢ်စၤရါကအိၣ်ဒီး အဖိခွါ လီၤ. ¹⁵ ဒီးနီၢ်စၤရါသမၢဝဲ, ဒီးစံးဝဲဒၣ်, ယတနံၤဘၣ်. မ့ၢ်အပျံၤတၢ်အဃိလီၤ. ဒီးစံးဝဲဒၣ်, တမ့ၢ်ဘၣ်, မ့ၢ်န နံၤလီၤ.

¹⁶ ဒီးပှၤကညီတဖၣ်န့ၣ်ဟးထီၣ်ဖဲန့ၣ်, ဒီးကွၢ်ဝဲဆူဝ့ၢ်စ ဒိၣ်, ဒီးစီၤအၤဘြၤဟၣ်လဲၤဒီးအီၤဒ်သိးကဆှၢအီၤလီၤ.

¹⁷ ဒီးယွၤစံးဝဲဒၣ်, တၢ်လၢယကမၤတၢ်အံၤ, ယကပာ် ခူသူၣ်လၢစီၤအၤဘြၤဟၣ်ဧါ. ¹⁸ ဒီးစီၤအၤဘြၤဟၣ်ကကဲ ထီၣ် ပှၤတကလုာ်ဖးဒိၣ်ဒီးဆူၣ်ဝဲ, ဒီးကယဲၢ်ပှၤကညီ လၢဟီၣ်ခိၣ်ချၢန့ၣ်ကဘၣ်တၢ်ဆိၣ်ဂ့ၤလၢအပူၤ ကိးက လုာ်ဒဲးလီၤ. ¹⁹ အဂ့ၢ်ဒ်အံၤ, ယသ့ၣ်ညါအီၤလၢအက မၤလိာ်အဖိအလံၤ, ဒီးအပှၤဟံၣ်ဖိလၢအလီၢ်ခံန့ၣ်လီၤ. ဒီးအဝဲသ့ၣ်ကပိာ်ယွၤအကျဲ ဒ်သိးအကမၤတၢ်တီတၢ် လိၤ, ဒီးတၢ်စံၣ်ညီၣ်, ဒ်သိးယွၤကဒုးလီၤဘၣ်တၢ်လၢ စီၤအၤဘြၤဟၣ်အလိၤလၢအစံးပာ်လၢအဂ့ၢ်လီၤ.

²⁰ ဒီးယွၤစံးဝဲဒၣ်, မ့ၢ်စဒိၣ်ဒီးဂမိရၤအကိးတၢ်ဒိၣ်ဝဲအါ ဝဲဒီး, အတၢ်ဒဲးဘးယိာ်မး, ²¹ သတးဒီးယကလဲၤလီၤ, ဒီးမ့ၢ်အမၤဝဲတုၤအလၢာ် ဖဲဒၣ်တၢ်ကိးလၢအဟဲဆူယ အိၣ်အသိးဧါန့ၣ်ယကကွၢ်, ဒီးမ့တမ့ၢ်ဘၣ်ဒီး, ယက သ့ၣ်ညါလီၤ.

²² ဒီးပှၤကညီတဖၣ်န့ၣ် ဃၣ်ဒူၣ်ချၢအသးဖဲန့ၣ်, ဒီးလဲၤ ဝဲဆူစဒိၣ်လီၤ. မ့မ့ၢ်စီၤအၤဘြၤဟၣ်န့ၣ် ဆၢထၢၣ်ဒံး လၢယွၤအမဲာ်ညါလီၤ. ²³ ဒီးစီၤအၤဘြၤဟၣ်သုးဘူးအသး ဒီးစံးဝဲဒၣ်, နကမၤဟးဂီၤပှၤတီပှၤလိၤစ့ၢ်ကီးဒီး ပှၤတတီတလိၤန့ၣ်ဧါ.―

²⁴ ဘၣ်တဘၣ်ပှၤတီပှၤလိၤယဲၢ်ဆံကအိၣ်ဝဲလၢဝ့ၢ်ပူၤလီၤ. နကမၤဟးဂီၤစ့ၢ်ကီး ဒီးတပျၢ်ဘၣ်အလီၢ်န့ၣ်လၢပှၤတီ ပှၤလိၤယဲၢ်ဆံလၢအအိၣ်လၢအပူၤအဃိဘၣ်ဧါ. ²⁵ မ်န သုတမၤဒ်န့ၣ်တဂ့ၤ. မၤသံပှၤအတီအလိၤ ဒီးပှၤတတီ တလိၤ, ဒီးပာ်ပှၤအတီအလိၤဒ်ပှၤတတီတလိၤအသိး န့ၣ်, မ်တၢ်သုတမၤအသးဒ်န့ၣ်ဒီးနၤတဂ့ၤ. ပှၤလၢအ စံၣ်ညီၣ်ဟီၣ်ခိၣ်ဒီဘ့ၣ်ညါတဂၤန့ၣ် ကမၤတၢ်တီတၢ် လိၤတမ့ၢ်ဘၣ်ဧါ.

²⁶ ဒီးယွၤစံးဝဲဒၣ်, ယမ့ၢ်ထံၣ်န့ၢ်ပှၤအတီအလိၤယဲၢ်ဆံ လၢဝ့ၢ်စဒိၣ်အပူၤဒီး, ယကပျၢ်အလီၢ်ဒီဘ့ၣ်ညါလၢအ ဃိလီၤ.

²⁷ ဒီးစီၤအၤဘြၤဟၣ်စံးဆၢတၢ်, ဒီးစံးဝဲဒၣ်, ကွၢ်ကွၢ်, ယပာ်ယသးလၢ ယကကတိၤတၢ်ဒီးကစၢ်, ဒီးယမ့ၢ် ဟီၣ်ခိၣ်အကမူၣ်ဒီးဖၣ်ဆါယဲလီၤ. ²⁸ ဘၣ်တဘၣ်ပှၤအ တီအလိၤယဲၢ်ဆံန့ၣ်ကစှၤလီၤယဲၢ်ဂၤလီၤ. နကမၤဟး ဂီၤဝ့ၢ်ဒီဖျၢၣ်ညါလၢယဲၢ်ဂၤအဃိဧါ. ဒီးစံးဝဲဒၣ်, ယမ့ၢ် ထံၣ်န့ၢ်လွံၢ်ဆံယဲၢ်ဂၤဖဲန့ၣ်ဒီး, ယတမၤဟးဂီၤဘၣ်လီၤ.

²⁹ ဒီးကတိၤတၢ်ဒီးအီၤကဒီးတစု ဒီးစံးဝဲဒၣ်, ဘၣ်တ ဘၣ်တၢ်ကထံၣ်န့ၢ်ပှၤလွံၢ်ဆံဖဲန့ၣ်လီၤ. ဒီးစံးဝဲဒၣ်, ယ တမၤဘၣ်လၢပှၤလွံၢ်ဆံအဃိဘၣ်လီၤ.

³⁰ ဒီးစံးဝဲဒၣ်, မ်ကစၢ်အသးသုတထီၣ်တဂ့ၤ. ဒီးယ ကကတိၤတၢ်လီၤ. ဘၣ်တဘၣ် တၢ်ကထံၣ်န့ၢ်ပှၤသၢ ဆံဖဲန့ၣ်လီၤ. ဒီးစံးဝဲဒၣ်, ယမ့ၢ်ထံၣ်န့ၢ်ပှၤသၢဆံဖဲန့ၣ် ဒီး, ယတမၤဘၣ်လီၤ.

³¹ ဒီးစံးဝဲဒၣ်, ကွၢ်ကွၢ်, ယပာ်ယသးလၢယကကတိၤ တၢ်ဒီးကစၢ်လီၤ. ဘၣ်တဘၣ်တၢ်ကထံၣ်န့ၢ်ပှၤခံဆံဖဲ န့ၣ်လီၤ. ဒီးစံးဝဲဒၣ်, ယတမၤဟးဂီၤဘၣ်လၢပှၤခံဆံ အဃိဘၣ်လီၤ.

³² ဒီးစံးဝဲဒၣ်, မ်ကစၢ်သုတသးထီၣ်တဂ့ၤ. ဒီးယက ကတိၤတၢ်ထဲအအံၤတဘျီဧိၤလီၤ. ဘၣ်တဘၣ်တၢ်က ထံၣ်န့ၢ်ပှၤဆံဆဲၣ်ဂၤဖဲန့ၣ်လီၤ. ဒီးစံးဝဲဒၣ်, ယတမၤ ဟးဂီၤဘၣ်လၢပှၤဆံဆဲၣ်ဂၤအဃိဘၣ်လီၤ.

³³ ဒီးတုၤယွၤကတိၤလိာ်အသး ဒီးစီၤအၤဘြၤဟၣ်ဝံၤ ဒီး, လဲၤတၢ်တကီၢ်ခါလီၤ. ဒီးစီၤအၤဘြၤဟၣ်က့ၤက့ၤ ဝဲဆူအလီၢ်လီၤ.

၁၉

¹ ဒီးမုၢ်ဟါလီၤန့ၣ်ကလူးခံဂၤဟဲဝဲဆူဝ့ၢ်စဒိၣ်လီၤ. ဒီး စီၤလိာ်ဆ့ၣ်နီၤလၢဝ့ၢ်စဒိၣ်အပဲတရီပူၤ, ဒီးစီၤလိာ်ထံၣ် ဘၣ်ဝဲ, ဒီးဂဲၤဆၢထၢၣ်ဒ်သိးကသဂၢၢ်အီၤ, ဒီးတီၤလီၤ ကဒွံကျိာ်ဒီးအမဲာ်ဆူဟီၣ်ခိၣ်န့ၣ်, ² ဒီးစံးဝဲဒၣ်, ကွၢ် ကွၢ်, ယကစၢ်သ့ၣ်ဧၢ, ဟဲက့ၤနုာ်ဆူသုကုၢ်သုပှၤအ ဟံၣ်ပူၤ, ဒီးအိၣ်သီတနၤကျၢၤ, ဒီးသ့ကွံာ်သုခီၣ်တ က့ၢ်. ဒီးသုကဂဲၤဆၢထၢၣ်ဂီၤဂီၤ, ဒီးလဲၤဒံးသုကျဲန့ၣ် လီၤ. ဒီးစံးဝဲဒၣ်, တမ့ၢ်ဘၣ်. မ့မ့ၢ်ပကအိၣ်လၢကျဲ ပူၤသီတနၤကျၢၤလီၤ.

³ ဒီးကညးဝဲဆူၣ်မးဒီးအဝဲသ့ၣ်ဟဲက့ၤဆူအအိၣ်, ဒီး လဲၤနုာ်ဆူအဟံၣ်ပူၤလီၤ. ဒီးမၤတၢ်အီၣ်တၢ်အီလၢအ ဂီၢ်, ဒီးသၣ်မံကိၣ်လၢအတအိၣ်ဘၣ်ဒီးကိၣ်မံၣ်, ဒီးအ ဝဲသ့ၣ်အီၣ်တၢ်လီၤ.

⁴ ဘၣ်ဆၣ်ဒီးတချုးမံလီၤဒံးဘၣ်ဝဲဒီး, ပှၤဝ့ၢ်ဖိ, ပှၤစ ဒိၣ်ဖိလၢ ပှၤအသးစၢ်ပၢၢ်လၢပှၤအသးပှၢ်, ကယဲၢ်ပှၤ လၢတခီလၢ်လၢ်န့ၣ် ဟဲအိၣ်ဝးတရံးဟံၣ်တဖျၢၣ်န့ၣ် လီၤ. ⁵ ဒီးကိးထီၣ်စီၤလိာ်ဒီးစံးဘၣ်အီၤ, ပှၤလၢအဟဲ ဆူနအိၣ်မုၢ်ဟါအံၤ, မ့ၢ်အအိၣ်ဖဲလဲၣ်. ဟဲစိာ်အီၤဆူ ပဒိၣ်, ဒ်သိးပကသ့ၣ်ညါအီၤတက့ၢ်.

⁶ ဒီးစီၤလိာ်ဟးထီၣ်လၢကျဲစၢၤဆူအအိၣ်, ဒီးကးတံာ် ဃာ်တြဲၤလၢအလီၢ်ခံ, ⁷ ဒီးစံးဝဲဒၣ်, ယဒီပုၢ်ဝဲၢ်သ့ၣ် ဧၢ, မ်သုသုတမၤတၢ်အၢတၢ်သီထဲထဲအံၤတဂ့ၤ. ⁸ ကွၢ် ကွၢ်, ယအိၣ်ဒီးယဖိမုၣ်ခံဂၤလၢအတသ့ၣ်ညါဘၣ်ပိာ် ခွါဘၣ်, ဒီးပျဲလၢယဟဲစိာ်အီၤဆူသုအိၣ်, ဒီးမၤအီၤဖဲ ဒၣ်အဂ့ၤလၢသုမဲာ်တက့ၢ်. မ့မ့ၢ်ပှၤကညီတဖၣ်အံၤသု သုတမၤအီၤလၢတၢ်နီတမံၤတဂ့ၤ. အဂ့ၢ်ဒ်အံၤ, မ့ၢ်အ ဟဲလံလၢယဟံၣ်ခိၣ်အကဒုပူၤလံလီၤ.

⁹ ဒီးအဝဲသ့ၣ်စံး, သုးကွံာ်နသး, ဒီးစံးကဒီးဝဲ, အဝဲ တဂၤအံၤဟဲအိၣ်တမှံၤ, ဒီးပာ်မးအသးလၢပှၤစံၣ်ညီၣ် တၢ်လီၤ. ခဲကနံၣ်အံၤပကမၤနၤနးန့ၢ်အဝဲသ့ၣ်တဖၣ်န့ၣ် တက့ၢ်လီၤ. ဒီးသနံးမးပှၤတဂၤ, စီၤလိာ်တဂၤန့ၣ်, ဒီး ဘူးဒီးအကမၤသ့ၣ်ဖးတြဲၤလီၤ. ¹⁰ ဒီးပှၤကညီတဖၣ်န့ၣ် ယူာ်ထီၣ်အစု, ဒီးဒုးဟဲက့ၤစီၤလိာ်ဆူအအိၣ်လၢဟံၣ် ပူၤ, ဒီးကးတံာ်ဃာ်တြဲၤလီၤ. ¹¹ ဒီးမၤဘျီၣ်ပှၤလၢအအိၣ် လၢဟံၣ်ကျဲစၢၤထံးအမဲာ်, လၢအဆံးပၢၢ်လၢအဒိၣ်လီၤ. ဒီးအဝဲသ့ၣ်မၤဘှံးအသးလၢတၢ်ဃုကျဲစၢၤအဃိလီၤ.

¹² ဒီးပှၤကညီတဖၣ်န့ၣ်စံးဘၣ်စီၤလိာ်, ပှၤဘၣ်ဃးဒီး နၤအိၣ်ဒံးဖဲအံၤတဂၤဂၤဧါ. နမာ်ဒီးနဖိခွါသ့ၣ်ဒီးနဖိမုၣ် သ့ၣ်ဒီးကယဲၢ်နတၢ်အိၣ်ဝဲလၢဝ့ၢ်ပူၤ တမံၤလၢ်လၢ်န့ၣ် ဒုးဟးထီၣ်ကွံာ်လၢတၢ်အလီၢ်အံၤတက့ၢ်. ¹³ အဂ့ၢ်ဒ်အံၤ, ပကမၤဟးဂီၤတၢ်အလီၢ်အံၤလီၤ. အဂ့ၢ်ဒ်အံၤ, အတၢ် ကိးဒိၣ်ထီၣ်လၢယွၤအမဲာ်ညါ, ဒီးယွၤမၢပဟဲမၤဟးဂီၤ အီၤလီၤ.

¹⁴ ဒီးစီၤလိာ်ဟးထီၣ်ဝဲ, ဒီးကတိၤတၢ်ဒီးအမာ်လၢအ န့ၢ်မါလၢအဖိမုၣ်သ့ၣ်တဖၣ်, ဒီးစံးဝဲဒၣ်, ဂဲၤထၢၣ်, ဟးထီၣ်ကွံာ်လၢအလီၢ်အံၤတက့ၢ်. အဂ့ၢ်ဒ်အံၤ, ယွၤ ကမၤဟးဂီၤဝ့ၢ်တဖျၢၣ်အံၤလီၤ. ဘၣ်ဆၣ်ဒီးလၢအမာ် သ့ၣ်အမဲာ်ညါန့ၣ်မၤအသးဒ် ပှၤကတိၤလိာ်ကွဲတၢ်အ သိးန့ၣ်လီၤ.

¹⁵ ဒီးတုၤမုၢ်ဆ့ၣ်ထီၣ်ဒီး, ကလူးတဖၣ်မၢစီၤလိာ်လဲၤ တၢ်ချ့ချ့, ဒီးစံးဝဲဒၣ်, ဂဲၤထၢၣ်, ဟံးန့ၢ်နမါဒီးနဖိမုၣ်ခံ ဂၤလၢအအိၣ်ဖဲအံၤတက့ၢ်. နကတုၤဘၣ်ဖုးလၢတၢ်ဟး ဂီၤလၢဝ့ၢ်အံၤအတၢ်ဒဲးဘးအပူၤလီၤ. ¹⁶ ဒီးဖဲအမၤယံာ် မၤနီၢ်အသးအဖၢမုၢ်ဒီး, မ့ၢ်ယွၤသးအိၣ်အီၤဒီး, ပှၤတ ဖၣ်န့ၣ်ဟံးဃာ်အစု, ဒီးအမါအစု, ဒီးအဖိမုၣ်ခံဂၤအ စု, ဒီးဆှၢထီၣ်အီၤဒီးပာ်အီၤလၢဝ့ၢ်အခိတခီန့ၣ်လီၤ.

¹⁷ ဒီးတၢ်မၤအသးတုၤအဒုးဟးထီၣ်အီၤဆူခိဝံၤဒီး, စံး ဝဲဒၣ်, ဟးပူၤဖျဲးကွံာ်လၢနသးသမူအဂီၢ်တက့ၢ်. ကွၢ် က့ၤလၢနချၢဃံတဂ့ၤ. အိၣ်လၢပျီအံၤ နီတပူၤတဂ့ၤ. ဟးပူၤဖျဲးကွံာ်ဆူကစၢၢ်ကလိတက့ၢ်. နကတုၤဘၣ်ဖုး လၢတၢ်ဟးဂီၤလီၤ.

¹⁸ ဒီးစီၤလိာ်စံးဝဲဒၣ်, ယကစၢ်ဧၢ, မ်အသုတမၤအသး ဒ်န့ၣ်တဂ့ၤ, ¹⁹ ကွၢ်ကွၢ်, နကုၢ်နပှၤဘၣ်ဘျုးဘၣ်ဖှိၣ်လၢ နမဲာ်ညါ, ဒီးမ့ၢ်နဒုးမူဒံးယၤဒီး, နမၤဒိၣ်ထီၣ်နဘျုးန ဖှိၣ်လၢနမၤယၤလီၤ. ဒီးယဟးပူၤဖျဲးကွံာ်ဆူကစၢၢ်န့ၣ် တသ့ဘၣ်. တၢ်အၢတၢ်နးတမံၤမံၤကဘၣ်ယၤဘၣ်ဖုး, ဒီးယကသံလီၤ. ²⁰ ကွၢ်ကွၢ်, ဝ့ၢ်တဖျၢၣ်အံၤအိၣ်ဘူးလၢ ပကဃ့ၢ်ဆူအအိၣ်, ဒီးမ့ၢ်အဆံးတဖျၢၣ်လီၤ. ပျဲယဟး ပူၤဖျဲးကွံာ်လၢ်ဆူန့ၣ်တက့ၢ်. မ့ၢ်ဝ့ၢ်အဆံးတဖျၢၣ်တမ့ၢ် ဘၣ်ဧါ. ဒီးယသးကမူဒံးလီၤ.

²¹ ဒီးအဝဲဒၣ်စံးဘၣ်အီၤ, ကွၢ်ကွၢ်, ယဝံၣ်ထီၣ်လံနမဲာ် လၢတၢ်တမံၤအံၤအဂ့ၢ်စ့ၢ်ကီးလီၤ. ယတမၤဟးဂီၤဘၣ် ဝ့ၢ်တဖျၢၣ်လၢနကတိၤတၢ်လၢအဂ့ၢ်ဘၣ်လီၤ. ²² ဟးပူၤ ဖျဲးကွံာ်ချ့ချ့ဆူန့ၣ်တက့ၢ်. အဂ့ၢ်ဒ်အံၤ, နတချုးလဲၤတုၤ ဒံးဘၣ်ဖဲန့ၣ်ဒီး, ယမၤတသ့ဘၣ်နီတမံၤဘၣ်. မၤသးဒ် န့ၣ်ဒီး ဝ့ၢ်ဘၣ်တၢ်ကိးအမံၤလၢစိၤဧၢ်လီၤ. ²³ မုၢ်ထီၣ် လၢဟီၣ်ခိၣ်ချၢ ဖဲစီၤလိာ်လဲၤနုာ်လၢဝ့ၢ်စိၤဧၢ်အပူၤလီၤ.

²⁴ ဒီးယွၤမၢတၢ်ဟဲစူၤကးဒီးမ့ၣ်အူလၢ စဒိၣ်ဒီးဂမိရၤအ ဖီခိၣ်, လၢယွၤအအိၣ်လၢမူခိၣ်လီၤ. ²⁵ ဒီးမၤဟးဂီၤကွံာ် ဝ့ၢ်တဖၣ်န့ၣ်, ဒီးပျီဒီဘ့ၣ်ညါ, ဒီးကယဲၢ်ပှၤဝ့ၢ်ဖိ, ဒီး တၢ်မဲတၢ်မါလၢဟီၣ်ခိၣ်န့ၣ်လီၤ.

²⁶ မ့မ့ၢ်အမါတဂၤကွၢ်ကဒါက့ၤဆူအလီၢ်ခံ, ဒီးကဲထီၣ် လၢအံသၣ်ထူၣ်လီၤ.

²⁷ ဒီးစီၤအၤဘြၤဟၣ် ဂဲၤဆၢထၢၣ်ဂီၤဂီၤ, ဒီးလဲၤဆူအ လီၢ်လၢအအိၣ်ဆၢထၢၣ်လၢ ယွၤအမဲာ်ညါ, ²⁸ ဒီးကွၢ် လီၤဝဲဆူ စဒိၣ်ဒီးဂမိရၤအအိၣ်, ဒီးဆူပျီအဟီၣ်ခိၣ်ဒီ ဘ့ၣ်ညါအအိၣ်, ဒီးကွၢ်ထီၣ်ဝဲ, ဒီးကွၢ်ကွၢ်, ဟီၣ်ခိၣ် အမ့ၣ်အူခုၣ်ထီၣ်ဒ်ဖၣ်ကပူၤအမ့ၣ်အူခုၣ်အသိးန့ၣ်လီၤ.

²⁹ ဒီးတၢ်မၤအသးတုၤယွၤမၤဟးဂီၤ ပျီအဝ့ၢ်တဖၣ်ဒီး, ယွၤသ့ၣ်နီၣ်ထီၣ်စီၤအၤဘြၤဟၣ်, ဒီးတုၤအမၤဟးဂီၤ ဝ့ၢ်လၢစီၤလိာ်အိၣ်လၢအပူၤဒီး, မၢစီၤလိာ်ဟးထီၣ်ကွံာ် လၢတၢ်ဟးဂီၤအပူၤလီၤ.

³⁰ ဒီးစီၤလိာ်ဟးထီၣ်လၢဝ့ၢ်စိၤဧၢ်, ဒီးအိၣ်ဝဲဆိးဝဲလၢက စၢၢ်ကလိ, ဒီးအဖိမုၣ်ခံဂၤအိၣ်ဒီးအီၤလီၤ. အဂ့ၢ်ဒ်အံၤ, အိၣ်ဝဲလၢဝ့ၢ်စိၤဧၢ်န့ၣ်ပျံၤတၢ်လီၤ. ဒီးအိၣ်ဝဲဆိးဝဲလၢ တၢ်အိပူၤအဝဲဒၣ်ဒီးအဖိမုၣ်ခံဂၤအိၣ်ဒီးအီၤလီၤ.

³¹ ဒီးအဝဲၢ်ကိတဂၤ စံးဘၣ်အပုၢ်, ပပၢ်အသးပှၢ်တ့ၢ် လံ. ဒီးပှၤလၢအကဟဲဆူပအိၣ် ဒ်ပှၤဟီၣ်ခိၣ်ဖိအလုၢ် အလၢ်အသိးန့ၣ်, တအိၣ်ဘၣ်လၢဟီၣ်ခိၣ်ချၢနီတဂၤ ဘၣ်. ³² ဟဲမီၣ်, မၢသကိးပပၢ်အီစပံးထံ, ဒီးမံဃုာ်ဒီး အီၤ, ဒ်သိးပကဒုးမူထီၣ်တၢ်အချံလၢပပၢ်န့ၣ်တက့ၢ်.

³³ ဒီးလၢမုၢ်တနၤန့ၣ် ဒုးအီအပၢ်လၢစပံးထံ, ဒီးအဝဲၢ် ကိတဂၤလဲၤနုာ်မံဃုာ်ဒီးအပၢ်လီၤ. ဒီးမံလီၤမ့ၢ်ဂ့ၤ, ဂဲၤ ဆၢထၢၣ်မ့ၢ်ဂ့ၤ, တသ့ၣ်ညါဘၣ်ဝဲဘၣ်. ³⁴ ဒီးတၢ်မၤအ သးလၢမုၢ်ဆ့ၣ်ထီၣ်တနံၤန့ၣ်, အဝဲၢ်ကိစံးဘၣ်အပုၢ်, ကွၢ်ကွၢ်, မုၢ်ဟါတနံၤန့ၣ်ယမံဃုာ်ဒီးယပၢ်လီၤ. မၢ သကိးအအီစပံးထံခဲမုၢ်နၤစ့ၢ်ကီး, ဒီးလဲၤနုာ်မံဃုာ်နဲဒီး အီၤ, ဒ်သိးပကဒုးမူထီၣ်တၢ်အချံလၢပပၢ်န့ၣ်တက့ၢ်.

³⁵ ဒီးဒုးအီအပၢ်လၢစပံးထံ လၢမုၢ်တနၤန့ၣ်စ့ၢ်ကီး, ဒီး ပုၢ်တဂၤဂဲၤဆၢထၢၣ်, ဒီးမံဃုာ်ဒီးအီၤ, ဒီးမံလီၤမ့ၢ်ဂ့ၤ, ဂဲၤဆၢထၢၣ်မ့ၢ်ဂ့ၤ, တသ့ၣ်ညါဘၣ်ဝဲဘၣ်. ³⁶ ဒီးစီၤလိာ် အဖိမုၣ်ခံဂၤန့ၣ်ဒၢထီၣ်ဝဲလၢအပၢ်လီၤ.

³⁷ ဒီးအဝဲၢ်ကိတဂၤဆံးစၢ်အဖိခွါ, ဒီးယုၢ်ဝဲအမံၤလၢစီၤ မိၤအးလီၤ. အဝဲဒၣ်မ့ၢ်ပှၤမိၤအးဖိအပၢ်တုၤမုၢ်မဆါတ နံၤအံၤလီၤ. ³⁸ ဒီးအပုၢ်တဂၤဆံးစၢ်စ့ၢ်ကီးအဖိခွါ, ဒီး ယုၢ်ဝဲအမံၤစီၤဘ့ၣ်ဧၣ်မံလီၤ. အဝဲဒၣ်မ့ၢ်ပှၤဧၣ်မိၣ်ဖိအ ပၢ်တုၤမုၢ်မဆါတနံၤအံၤလီၤ.

၂၀

¹ ဒီးစီၤအၤဘြၤဟၣ်ဟးထီၣ်ဖဲန့ၣ် ဆူကီၢ်အိၣ်လၢက လံၤထံးတခီ, ဒီးအိၣ်ဝဲဆိးဝဲလၢကၤဒ့ၣ်ဒီးရှူၢ်အဘၢၣ် စၢၤ, ဒီးအိၣ်တမှံၤလၢကရၢ်အပူၤလီၤ. ² ဒီးစီၤအၤဘြၤ ဟၣ်စံးလၢအမါနီၢ်စၤရါအဂ့ၢ်, အဝဲဒၣ်န့ၣ်မ့ၢ်ယဒီပုၢ် ဝဲၢ်မုၣ်လီၤ. ဒီးကရၢ်အစီၤပၤအဘံၤမ့လ့းမၢလီၤဝဲ, ဒီး ဟံးန့ၢ်နီၢ်စၤရါလီၤ.

³ ဒီးယွၤဟဲဆူစီၤအဘံၤမ့လ့းအအိၣ် လၢတၢ်မံမီၢ်အ ပူၤလၢမုၢ်နၤ, ဒီးစံးဘၣ်အီၤ, ကွၢ်ကွၢ်, နမ့ၢ်ပှၤသံလၢ ပိာ်မုၣ်လၢနဟံးန့ၢ်အီၤအဃိလီၤ. အဂ့ၢ်ဒ်အံၤ, အဝဲ ဒၣ်န့ၣ်မ့ၢ်ပှၤတဂၤအမါလီၤ. ⁴ ဒီးစီၤအဘံၤမ့လ့းတလဲၤဘူးဒံးဘၣ်ဒီးအီၤဘၣ်, ဒီးစံး ဝဲဒၣ်, ကစၢ်ဧၢ, နကမၤသံစ့ၢ်ကီးပှၤတီတကလုာ်ဧါ.

⁵ အဝဲတဂၤစံးဘၣ်ယၤ, အဝဲဒၣ်န့ၣ် မ့ၢ်ယဒီပုၢ်ဝဲၢ်မုၣ်, တမ့ၢ်ဘၣ်ဧါ. ဒီးအဝဲဒၣ်အကစၢ်ဒၣ်ဝဲစံး, အဝဲဒၣ်မ့ၢ် ယဒီပုၢ်ဝဲၢ်ခွါလီၤ. ယမၤတၢ်အံၤလၢယသးဒီဖျၢၣ်ဒီးယ စုအတၢ်ဒဲးဘးတအိၣ်ဘၣ်လီၤ.

⁶ ဒီးယွၤစံးဘၣ်အီၤလၢတၢ်မံမီၢ်အပူၤန့ၣ်, ယဲဒၣ်အံၤ ယသ့ၣ်ညါစ့ၢ်ကီးလၢနမၤတၢ်အံၤ လၢနသးဒီဖျၢၣ်လီၤ. အဂ့ၢ်ဒ်အံၤ, ဒ်သိးနသုတမၤကမၣ်ဘၣ်ယၤတဂ့ၤဒီး, ယတြီနၤစ့ၢ်ကီးယဲလီၤ. မၤသးဒ်န့ၣ်ဒီးယတဟ့ၣ်ဘၣ် နထိးအီၤဘၣ်လီၤ. ⁷ ဒီးခဲကနံၣ်အံၤဟ့ၣ်က့ၤပှၤတဂၤန့ၣ် အမါတက့ၢ်. အဂ့ၢ်ဒ်အံၤ, မ့ၢ်ဝဲလၢဝံတဂၤလီၤ. ဒီး ကဘါထုကဖၣ်န့ၢ်လၢနဂီၢ်, ဒီးနကမူလီၤ. မ့မ့ၢ်နမ့ၢ် တဟ့ၣ်က့ၤဘၣ်ဒီး, သ့ၣ်ညါလၢသံဒီးနကသံ, ဒီးက ယဲၢ်တၢ်ဘၣ်ဃးဒီးနၤခဲလၢာ်တက့ၢ်.

⁸ ဒီးစီၤအဘံၤမ့လ့းန့ၣ်ဂဲၤဆၢထၢၣ်လၢမုၢ်ဂီၤ, ဒီးကိးန့ၢ် အခ့အပှၤခဲလၢာ်, ဒီးစံၣ်တဲၤတဲလီၤတၢ်တဖၣ်န့ၣ်လၢ အနၢ်ပူၤခဲလၢာ်, ဒီးပှၤတဖၣ်န့ၣ်ပျံၤတၢ်ဒိၣ်မးလီၤ. ⁹ ဒီး စီၤအဘံၤမ့လ့းကိးန့ၢ်စီၤအၤဘြၤဟၣ်, ဒီးစံးဘၣ်အီၤ, နမၤပှၤဒ်လဲၣ်. ဒ်သိးနကမၢတၢ်ဒဲးဘးအဒိၣ်တမံၤဘၣ် ယၤ, ဒီးယဘီယမုၢ်ဒီး, ယမၤကမၣ်ဘၣ်နၤလၢမနုၤ တမံၤလဲၣ်. နမၤယၤလၢ တၢ်မၤလၢပှၤတဂ့ၤမၤဘၣ် လီၤ. ¹⁰ ဒီးစီၤအဘံၤမ့လ့းစံးဘၣ်စီၤအၤဘြၤဟၣ်, ဒ်သိး နကမၤတၢ်အံၤဒီး, နထံၣ်ဘၣ်မနုၤတမံၤလဲၣ်.

¹¹ ဒီးစီၤအၤဘြၤဟၣ်စံးဝဲဒၣ်, အဂ့ၢ်ဒ်အံၤ, ယစံး, မ့ၢ် မးတၢ်ပျံၤယွၤတအိၣ်ဘၣ်ဖဲအံၤဘၣ်, ဒီးပှၤကမၤသံယၤ လၢယမါအဃိလီၤ. ¹² ဘၣ်ဆၣ်ဒီးမ့ၢ်စ့ၢ်ကီးဝဲလၢယဒီ ပုၢ်ဝဲၢ်မုၣ်လီၤ, မ့ၢ်လၢယပၢ်အဖိမုၣ်လီၤ. ဘၣ်ဆၣ်ဒီး တမ့ၢ်ဘၣ်ယမိၢ်အဖိမုၣ်ဘၣ်. ဒီးကဲထီၣ်လၢယမါလီၤ.―

¹³ ဒီးတၢ်မၤအသးဖဲ ယွၤမၢယဟးသဒၣ်ယပၢ်အဟံၣ်ဒီး, ယစံးဘၣ်အီၤ, နဘျုးနဖှိၣ်လၢနဘၣ်မၤယၤမ့ၢ်အအံၤ, ကယဲၢ်အလီၢ်လၢပကလဲၤတုၤတပူၤလၢ်လၢ်န့ၣ်, စံးလၢ ယမ့ၢ်နဒီပုၢ်ဝဲၢ်ခွါတက့ၢ်.

¹⁴ ဒီးစီၤအဘံၤမ့လ့းဟံးန့ၢ်သိ, ဒီးဂီၤဖံး, ဒီးကုၢ်ပိာ်မုၣ်, ဒီးကုၢ်ပိာ်ခွါတဖၣ်, ဒီးဟ့ၣ်စီၤအၤဘြၤဟၣ်, ဒီးဟ့ၣ် က့ၤအမါလၢအီၤလီၤ.

¹⁵ ဒီးစီၤအဘံၤမ့လ့းစံးဝဲဒၣ်, ကွၢ်ကွၢ်, ယကီၢ်အိၣ်လၢ နမဲာ်ညါလီၤ. ဖဲအဘၣ်နသးအိၣ်တက့ၢ်.

¹⁶ ဒီးစံးဘၣ်နီၢ်စၤရါ, ကွၢ်ကွၢ်, ယဟ့ၣ်လံစ့တကထိ လၢနဒီပုၢ်ဝဲၢ်ခွါလံ. ကွၢ်ကွၢ်, အဝဲဒၣ်မ့ၢ်တၢ်မၤဘၢ မဲာ်လၢနဂီၢ်, လၢကယဲၢ်ပှၤလၢအအိၣ်ဒီးနၤအဂီၢ်, ဒီး လၢပှၤခဲလၢာ်, ဒီးအဝဲဒၣ်ဘၣ်တၢ်သိၣ်ဃီၣ်လီၤ.

¹⁷ ဒီးစီၤအၤဘြၤဟၣ်ဘါထုကဖၣ်ယွၤ, ဒီးယွၤမၤဘျါ က့ၤစီၤအဘံၤမ့လ့း, ဒီးအမါ, ဒီးအကုၢ်ပိာ်မုၣ်တဖၣ်, ဒီးအဝဲသ့ၣ်ဆံးစၢ်န့ၢ်အဖိလီၤ. ¹⁸ အဂ့ၢ်ဒ်အံၤ, ယွၤမၤ တံာ်ဃာ် စီၤအဘံၤမ့လ့းအပှၤဟံၣ်ဖိအဒၢလီၢ်ခဲလၢာ်, လၢစီၤအၤဘြၤဟၣ်အမါ, နီၢ်စၤရါအဃိလီၤ.

၂၁

¹ ဒီးယွၤအိၣ်သကိးနီၢ်စၤရါ ဒ်အစံးပာ်အသိး, ဒီးယွၤ မၤနီၢ်စၤရါဒ်အကတိၤတၢ်အသိးန့ၣ်လီၤ. ² အဂ့ၢ်ဒ်အံၤ, နီၢ်စၤရါဒၢထီၣ်, ဒီးဆံးစၢ်န့ၢ်စီၤအၤဘြၤဟၣ်အဖိခွါလၢ လၢအသးပှၢ်တ့ၢ်, ဖဲအဆၢကတီၢ် လၢယွၤစံးပာ်အီၤ လီၤ.

³ ဒီးအဖိခွါလၢအအိၣ်ဖျဲၣ်လၢအဂီၢ်, လၢနီၢ်စၤရါဆံး စၢ်န့ၢ်အီၤတဂၤန့ၣ် စီၤအၤဘြၤဟၣ်ယုၢ်အမံၤလၢစီၤအံၤ စဲးလီၤ. ⁴ ဒီးအဖိခွါစီၤအံၤစဲးအိၣ်ဃိးနံၤဒီး, အပၢ်စီၤ အၤဘြၤဟၣ်ကူးတရံးအီၤ, ဒ်ယွၤမၤလိာ်အီၤအသိးန့ၣ် လီၤ. ⁵ ဒီးဖဲအဖိခွါစီၤအံၤစဲးအိၣ်ဖျဲၣ်လၢအဂီၢ်န့ၣ်, စီၤ အၤဘြၤဟၣ်အသးပှၢ်အနံၣ်တကယၤလီၤ.

⁶ ဒီးနီၢ်စၤရါစံးဝဲဒၣ်, ယွၤဒုးနံၤယၤလီၤ. ကယဲၢ်ပှၤလၢ အနၢ်ဟူခဲလၢာ်န့ၣ်ကနံၤဃုာ်ဒီးယၤလီၤ. ⁷ ဒီးစံးဝဲဒၣ်, မ့ၢ်မတၤကစံးတ့ၢ် စီၤအၤဘြၤဟၣ်လၢ နီၢ်စၤရါကဒုး အီၣ်နုၢ်ဖိန့ၣ်လဲၣ်. အဂ့ၢ်ဒ်အံၤ, လၢအသးပှၢ်တ့ၢ်န့ၣ် ယဆံးစၢ်န့ၢ်အဖိခွါလီၤ.

⁸ ဒီးဖိသၣ်န့ၣ်ဒိၣ်ထီၣ်, ဒီးဖှၣ်အမိၢ်အနုၢ်န့ၣ်လီၤ. ဒီး မုၢ်နံၤလၢစီၤအံၤစဲးဖှၣ်ဒီးအမိၢ်အနုၢ်န့ၣ် စီၤအၤဘြၤဟၣ် မၤတၢ်အီၣ်တၢ်အီဖးဒိၣ်လီၤ.

⁹ ဒီးနီၢ်စၤရါထံၣ်ပှၤအဲၤကူပတူးဖိ, နီၢ်ဟၤကၢ်အဖိခွါ လၢအဆံးစၢ်န့ၢ်စီၤအၤဘြၤဟၣ်တဂၤန့ၣ်, နံၤဘၣ်ဖၣ်လဲ တၢ်လီၤ. ¹⁰ ဒီးစံးဘၣ်စီၤအၤဘြၤဟၣ်, ဟီထီၣ်ကွံာ်ကုၢ် ပိာ်မုၣ်န့ၣ်ဒီးအဖိခွါတက့ၢ်. အဂ့ၢ်ဒ်အံၤ, ကုၢ်ပိာ်မုၣ်အ ဖိခွါတန့ၢ်ဘၣ်သါတၢ်ဒီးယဖိခွါ, စီၤအံၤစဲးန့ၣ်ဘၣ်.―

¹¹ ဒီးတၢ်တမံၤန့ၣ် ကီမးလၢစီၤအၤဘြၤဟၣ်အမဲာ်ညါလၢ အဖိခွါအဃိလီၤ.

¹² ဒီးယွၤစံးဘၣ်စီၤအၤဘြၤဟၣ်, မ်အသုတမ့ၢ်တၢ်ကီ လၢနမဲာ်ညါလၢနဖိသၣ်အဃိ, ဒီးလၢနကုၢ်ပိာ်မုၣ်အ ဃိန့ၣ်တဂ့ၤ. ကယဲၢ်တၢ်လၢနီၢ်စၤရါစံးဘၣ်တဲဘၣ်နၤ ခဲလၢာ်န့ၣ်ကနၣ်အကလုၢ်တက့ၢ်. အဂ့ၢ်ဒ်အံၤ, တၢ် ကကိးန့ၢ်နချံနသၣ်လၢစီၤအံၤစဲးအပူၤလီၤ. ¹³ ဒီးယက ဒုးကဲထီၣ်စ့ၢ်ကီးကုၢ်ပိာ်မုၣ်အဖိခွါ လၢပှၤတကလုာ်, လၢအမ့ၢ်နချံနသၣ်အဃိလီၤ.

¹⁴ ဒီးစီၤအၤဘြၤဟၣ် ဂဲၤဆၢထၢၣ်လၢဂီၤဂီၤ, ဒီးဟံးန့ၢ် ကိၣ်, ဒီးထံတထၢၣ်, ဒီးဟ့ၣ်အီၤလၢနီၢ်ဟၤကၢ်ဒီးပာ်ဝဲ လၢအဖံဘၣ်ခိၣ်ဒီးမၢအလဲၤတၢ်လီၤ. ဒီးအဝဲဒၣ်ဟးထီၣ်, ဒီးလဲၤဝ့ၤဝီၤတၢ်လၢပှၢ်မုၢ်ကနၢ ဘ့ၢ်ၡဘၤအပူၤလီၤ.

¹⁵ ဒီးထံလၢာ်ဝဲလၢထၢၣ်ပူၤ, ဒီးပာ်ဖိသၣ်န့ၣ်လၢသ့ၣ် ဖိတခိၣ်အဖီလာ်လီၤ. ¹⁶ ဒီးလဲၤဆ့ၣ်နီၤသဃီၤဒီးအီၤ, အိၣ်လၢအယံၤ, ယံၤတခးချံၣ်ဃၣ်ဃၣ်လီၤ. အဂ့ၢ်ဒ် အံၤ, စံးဝဲဒၣ်, မ်ယသုတထံၣ်ဘၣ်ဖိသၣ်သံန့ၣ်တဂ့ၤ. ဒီးဆ့ၣ်နီၤဝဲသဃီၤဒီးအီၤ, ဒီးထုထီၣ်အကလုၢ်, ဒီးအ မဲာ်ထံလီၤဝဲလီၤ.

¹⁷ ဒီးယွၤကနၣ်ဖိသၣ်အကလုၢ်, ဒီးယွၤအကလူးကိး လီၤလၢမူခိၣ်ဆူနီၢ်ဟၤကၢ်, ဒီးစံးဘၣ်အီၤ, နီၢ်ဟၤကၢ် ဧၢ, မ့ၢ်နဘၣ်မနုၤတမံၤလဲၣ်. ဘၣ်ယိၣ်တဂ့ၤ. အဂ့ၢ် ဒ်အံၤ, ယွၤကနၣ်လံဖိသၣ်အကလုၢ်ဖဲအအိၣ်အလီၢ်န့ၣ် လံ. ¹⁸ ဂဲၤဆၢထၢၣ်, ဝံၣ်ဆၢထၢၣ်ဖိသၣ်, ဒီးဟံးထီၣ် အီၤလၢနစုတက့ၢ်. အဂ့ၢ်ဒ်အံၤ, ယကပာ်အီၤလၢပှၤ တကလုာ်ဖးဒိၣ်လီၤ.

¹⁹ ဒီးယွၤအိးထီၣ်ပိာ်မုၣ်အမဲာ်, ဒီးထံၣ်ဘၣ်ထံပူၤတပူၤ, ဒီးလဲၤမၤပှဲၤထံထၢၣ်, ဒီးဒုးအီဖိသၣ်န့ၣ်လီၤ.

²⁰ ဒီးယွၤအိၣ်ဒီးဖိသၣ်, ဒီးဒိၣ်ထီၣ်ဝဲ, ဒီးအိၣ်ဝဲဆိးဝဲ လၢပှၢ်လၢ်ကျါ, ဒီးကဲထီၣ်ပှၤခးတၢ်ဖိလီၤ. ²¹ ဒီးအိၣ်ဝဲ ဆိးဝဲလၢ ပှၢ်လၢ်ကျါပၤရၣ်, ဒီးအမိၢ်ဟံးန့ၢ်အီၤအမါ လၢကီၢ်အဲၤကူပတူးအပူၤလီၤ.

²² ဒီးတၢ်မၤအသးလၢအဆၢအကတီၢ်ဖဲန့ၣ်, စီၤအဘံၤ မ့လ့း, ဒီးအပှၤသုးမုၢ်အခိၣ်, စီၤဖံကိးလး, စံးဘၣ်စီၤ အၤဘြၤဟၣ်ဒီးစံးဝဲဒၣ်, ကယဲၢ်နမၤတၢ်တမံၤလၢ်လၢ် န့ၣ်ယွၤအိၣ်ဒီးနၤလီၤ. ²³ ဒီးခဲကနံၣ်အံၤဆိၣ်လီၤနသး လၢယွၤအမဲာ်ညါလၢနတလီန့ၢ်ဘၣ်ယၤ, ဒီးယဖိခွါ, ဒီးယစၢၤယသွဲၣ်ဘၣ်န့ၣ်တက့ၢ်. ဒ်တၢ်ဘျုးတၢ်ဖှိၣ်လၢ ယမၤနၤအသိးန့ၣ်နဘၣ်မၤယၤ, ဒီးကီၢ်လၢနအိၣ်တမှံၤ လၢအပူၤလီၤ.

²⁴ ဒီးစီၤအၤဘြၤဟၣ် စံးဝဲဒၣ်, ယကဆိၣ်လီၤယသး လီၤ. ²⁵ ဒီးစီၤအၤဘြၤဟၣ်သိၣ်ဃီၣ်စီၤအဘံၤမ့လ့းလၢ ထံပူၤတပူၤလၢစီၤအဘံၤမ့လ့း အကုၢ်အပှၤဟံးန့ၢ်ဆူၣ် အဃိလီၤ.

²⁶ ဒီးစီၤအဘံၤမ့လ့းစံးဝဲဒၣ်, တၢ်တမံၤအံၤမ့ၢ်မတၤမ တၤမၤန့ၣ်, ယတသ့ၣ်ညါဘၣ်, ဒီးနတစံးဘၣ်တဲ ဘၣ်ယၤဘၣ်, ဒီးယတနၢ်ဟူဘၣ် တုၤမုၢ်မဆါတနံၤ အံၤဘၣ်လီၤ.

²⁷ ဒီးစီၤအၤဘြၤဟၣ် ဟံးန့ၢ်သိဒီးမဲာ်တဲးလဲး, ဒီးဂီၤဖံး တဖၣ်, ဒီးဟ့ၣ်ဝဲလၢစီၤအဘံၤမ့လ့း, ဒီးအဝဲခံဂၤန့ၣ် မၤသကိးတၢ်အၢၣ်လီၤအီလီၤလီၤ. ²⁸ ဒီးစီၤအၤဘြၤဟၣ် ပာ်သိဖိမိၢ်နွံဒုတပူၤဒၣ်လီၤ. ²⁹ စီၤအဘံၤမ့လ့းစံးဘၣ် စီၤအၤဘြၤဟၣ်, တၢ်လၢသိဖိမိၢ်နွံဒုလၢနပာ်တပူၤဒၣ် န့ၣ်, မ့ၢ်အဘၣ်မနုၤလဲၣ်. ³⁰ ဒီးစံးဝဲဒၣ်, အဂ့ၢ်ဒ်အံၤ, သိဖိမိၢ်နွံဒု, နဘၣ်ဟံးန့ၢ်လၢယစုပူၤ, ဒ်သိးအကကဲ ထီၣ်တၢ်အုၣ်အသးလၢပဂီၢ်လၢ ယခူၣ်လီၤလံထံပူၤ အံၤလီၤ. ³¹ မၤသးဒ်န့ၣ်ဒီးတၢ်လၢအလီၢ်န့ၣ်ပှၤကိးဝဲအ မံၤလၢဘ့ၢ်ၡဘၤလီၤ. အဂ့ၢ်ဒ်အံၤ, ဆိၣ်လီၤအသးဖဲ န့ၣ်ခံဂၤလိာ်လီၤ.

³² ဒီးမၤတၢ်အၢၣ်လီၤအီလီၤဖဲဘ့ၢ်ၡဘၤန့ၣ်လီၤ. ဒီးစီၤ အဘံၤမ့လ့း, ဒီးအပှၤသုးမုၢ်အခိၣ်, စီၤဖံကိးလးန့ၣ် ဂဲၤဆၢထၢၣ်, ဒီးက့ၤက့ၤဆူပှၤဖလ့ၡသးဖိအကီၢ်လီၤ.

³³ ဒီးစီၤအၤဘြၤဟၣ်သူၣ်သ့ၣ်တဖု လၢဘ့ၤၡဘၤအ ပူၤ, ဒီးကိးထီၣ်ဖဲန့ၣ်လၢယွၤအမံၤ, ကစၢ်အထူအယိာ် လီၤ. ³⁴ ဒီးစီၤအၤဘြၤဟၣ်အိၣ်တမှံၤလၢ ပှၤဖလ့ၡသး ဖိအကီၢ်ပူၤအါနံၤအါသီလီၤ.

၂၂

¹ ဒီးတၢ်မၤအသးလၢတၢ်တဖၣ်န့ၣ်အလီၢ်ခံဒီး, ယွၤ မၤကွၢ်စီၤအၤဘြၤဟၣ်, ဒီးစံးဘၣ်အီၤ, စီၤအၤဘြၤဟၣ် ဧၢ, ဒီးစံးဝဲဒၣ်, ကွၢ်ကွၢ်, ယၤလီၤ. ² ဒီးစံးဝဲဒၣ်, ဟံး န့ၢ်နဖိခွါ, နဖိခွါတဂၤဃီ, စီၤအံၤစဲးလၢနအဲၣ်အီၤ, ဒီး လဲၤဆူကီၢ်မိၤရံယၤ, ဒီးလုၢ်ထီၣ်အီၤဖဲန့ၣ်လၢတၢ်လုၢ် မ့ၣ်အူလၢကစၢၢ်တဖျၢၣ်အလိၤ လၢကစၢၢ်အကျါ, လၢ ယကစံးဘၣ်နၤန့ၣ်တက့ၢ်. ³ ဒီးစီၤအၤဘြၤဟၣ်ဂဲၤဆၢထၢၣ်ဂီၤဂီၤ, ဒီးဂီၤကၢ်အကသ့ၣ်ယီၤ, ဒီးဟံးန့ၢ်အဖိၣ်သၣ်ခွါခံဂၤ, ဒီးအဖိခွါစီၤအံၤစဲး, ဒီးဖးသ့ၣ်မုၣ်လၢတၢ်လုၢ်မ့ၣ်အူအဂီၢ်, ဒီးဂဲၤ ဆၢထၢၣ်ဒီးလဲၤဝဲဆူအလီၢ်လၢယွၤစံးဘၣ်အီၤန့ၣ်လီၤ.

⁴ ဒီးသၢနံၤတနံၤန့ၣ် စီၤအၤဘြၤဟၣ်ကျ့ထီၣ်အမဲာ်, ဒီး ထံၣ်ဘၣ်အလီၢ်န့ၣ်အိၣ်လၢအယံၤလီၤ.

⁵ ဒီးစီၤအၤဘြၤဟၣ်စံးဘၣ်ဖိၣ်သၣ်ခွါတဖၣ်, အိၣ်သု ဝဲဒီးကသ့ၣ်ယီၤဖဲအံၤတက့ၢ်. ဒီးယဲဒၣ်ဒီးဖိသၣ်အံၤပ ကလဲၤဆူဘးန့ၣ်, ဒီးဘူၣ်တၢ်ဘါတၢ်, ဒီးဟဲက့ၤက ဒါက့ၤဆူသုအိၣ်လီၤ.

⁶ ဒီးစီၤအၤဘြၤဟၣ် ဟံးန့ၢ်တၢ်လုၢ်မ့ၣ်အူအသ့ၣ်မုၣ်, ဒီးပာ်ဝဲလၢအဖိခွါစီၤအံၤစဲးအလိၤ, ဒီးဟံးန့ၢ်မ့ၣ်အူ, ဒီး ဒီတဘ့ၣ်လၢအစုပူၤ, ဒီးလဲၤဝဲခံဂၤလၢာ်တပူၤဃီလီၤ.

⁷ ဒီးစီၤအံၤစဲးကတိၤတၢ်ဒီးအပၢ် စီၤအၤဘြၤဟၣ်, ဒီး စံးဝဲဒၣ်, ယပၢ်ဧၢ, ဒီးစံးဝဲဒၣ်, ယဖိဧၢ, ကွၢ်ကွၢ်, ယၤလီၤ. ဒီးစံးဝဲဒၣ်, ကွၢ်ကွၢ်, မ့ၣ်အူဒီးသ့ၣ်မုၣ်အိၣ် ဝဲလီၤ. မ့မ့ၢ်သိဖိလၢတၢ်လုၢ်မ့ၣ်အူအဂီၢ်န့ၣ်, မ့ၢ်အ အိၣ်ဖဲလဲၣ်.

⁸ ဒီးစီၤအၤဘြၤဟၣ်စံးဝဲဒၣ်, ယဖိဧၢ, ယွၤကထံၣ်န့ၢ် ဒၣ်သိဖိလၢတၢ်လုၢ်မ့ၣ်အူလၢအဂီၢ်ဒၣ်ဝဲလီၤ. ဒီးလဲၤခံ ဂၤလၢာ်တပူၤဃီလီၤ. ⁹ ဒီးလဲၤတုၤလၢအလီၢ်လၢယွၤ စံးတ့ၢ်အီၤ, ဒီးစီၤအၤဘြၤဟၣ်မၤထီၣ်တၢ်လုၢ်လီၢ်ဖဲန့ၣ်, ဒီးကတဲာ်ကတီၤသ့ၣ်မုၣ်, ဒီးစၢဃာ်အဖိခွါစီၤအံၤစဲး, ဒီးပာ်အီၤလၢတၢ်လုၢ်လီၢ်လၢသ့ၣ်မုၣ်အဖီခိၣ်လီၤ.

¹⁰ ဒီးစီၤအၤဘြၤဟၣ်ယူာ်ထီၣ်အစု, ဒီးဟံးန့ၢ်ဒီတဘ့ၣ် န့ၣ်ဒ်သိးအကမၤသံအဖိခွါလီၤ. ¹¹ ဒီးယွၤအကလူးကိး ထီၣ်အီၤလၢမူခိၣ်, ဒီးစံးဝဲဒၣ်, စီၤအၤဘြၤဟၣ်ဧၢ, စီၤ အၤဘြၤဟၣ်ဧၢ, ဒီးစံးဝဲဒၣ်, ကွၢ်ကွၢ်, ယၤလီၤ. ¹² ဒီး စံးဝဲဒၣ်, ယူာ်ထီၣ်နစုလၢဖိသၣ်အလိၤတဂ့ၤ, ဒီးမၤ အီၤလၢတၢ်နီတမံၤတဂ့ၤ. အဂ့ၢ်ဒ်အံၤ, ခဲကနံၣ်အံၤ ယသ့ၣ်ညါလၢနပျံၤယွၤလီၤ. ယမၤန့ၢ်နဖိခွါ, နဖိခွါ တဂၤဃီန့ၣ် နတညးဘၣ်လီၤ.

¹³ ဒီးစီၤအၤဘြၤဟၣ်ကျ့ထီၣ်အမဲာ်ဒီးကွၢ်တၢ်, ဒီးကွၢ် ကွၢ်, သိဖါတဒုအိၣ်လၢအလီၢ်ခံ လၢအဘၣ်ကွးလၢ အနၢၤလၢသဃာ်ကျါလီၤ. ဒီးစီၤအၤဘြၤဟၣ်လဲၤဟံး န့ၢ်သိဖါတဒုန့ၣ်, ဒီးလုၢ်ထီၣ်အီၤလၢတၢ်လုၢ်မ့ၣ်အူလၢ အဖိခွါအလီၢ်လီၤ. ¹⁴ ဒီးအလီၢ်န့ၣ်စီၤအၤဘြၤဟၣ်ယုၢ် အမံၤလၢယဟိဝၤယံၤရၤ, ဒ်ပှၤစံးတုၤမဆါတနံၤအံၤ အသိးန့ၣ်, လၢယွၤအကစၢၢ်တဖျၢၣ်အလိၤန့ၣ်တၢ်က ထံၣ်န့ၢ်တၢ်လီၤ.

¹⁵ ဒီးယွၤအကလူးကိးလီၤဝဲလၢမူခိၣ်ဆူ စီၤအၤဘြၣ် ဟၣ်ခံဘျီတဘျီ, ¹⁶ ဒီးစံးဝဲဒၣ်, ယဆိၣ်လီၤယသးလၢ ယကစၢ်ဒၣ်ယဲ, ယွၤစံးဝဲဒၣ်, မ့ၢ်နမၤတၢ်အံၤတမံၤဒီး တဟံးဃာ်ဘၣ်နဖိခွါ, နဖိခွါတဂၤဃီဘၣ်အဃိဒီး,―

¹⁷ ဆိၣ်ဂ့ၤဒီးယကဆိၣ်ဂ့ၤနၤ, ဒီးမၤအါထီၣ်ဒီးယကမၤအါ ထီၣ်နချံနသၣ်ဒ်ဆၣ်ဧိၤဖီဧိၤ လၢမူခိၣ်အသိး, ဒီးဒ်မဲး ဧိၤဟီၣ်ဧိၤလၢပီၣ်လဲၣ်နံၤအသိးန့ၣ်လီၤ. ဒီးနချံနသၣ် ကန့ၢ်ဘၣ်အဒုၣ်အဒါအပဲတရီလီၤ. ¹⁸ မ့ၢ်နဒိကနၣ်ယ ကလုၢ်အဃိဒီး, ကယဲၢ်ပှၤကညီလၢဟီၣ်ခိၣ်ချၢကဘၣ် တၢ်ဆိၣ်ဂ့ၤလၢနချံနသၣ်အပူၤလီၤ.

¹⁹ ဒီးစီၤအၤဘြၤဟၣ်က့ၤကဒါက့ၤဆူ အဖိၣ်သၣ်ခွါအ အိၣ်, ဒီးဂဲၤဆၢထၢၣ်, ဒီးလဲၤဝဲတပူၤဃီဆူဘ့ၢ်ၡဘၤ လီၤ. ဒီးစီၤအၤဘြၤဟၣ်အိၣ်ဝဲဆိးဝဲလၢဘ့ၢ်ၡဘၤလီၤ.

²⁰ ဒီးတၢ်မၤအသးလၢ တၢ်တဖၣ်န့ၣ်အလီၢ်ခံ, ပှၤစံး ဘၣ်စီၤအၤဘြၤဟၣ်, ဒီးစံးဝဲဒၣ်, ကွၢ်ကွၢ်, နီၢ်မံးလ ကၤဆံးစၢ်န့ၢ်စ့ၢ်ကီးအဖိလၢ နဒီပုၢ်ဝဲၢ်စီၤနၤဃိၢ်အဂီၢ် လီၤ. ²¹ အဝဲၢ်ကိစီၤဧူစးဒီးအပုၢ်စီၤဘူစး, ဒီးစီၤအရၣ် အပၢ်, စီၤကမူၤအ့လး, ²² ဒီးစီၤက့ၤစ့းဒီးစီၤဃစိၤ, ဒီး စီၤပံးလဒၣ်, ဒီးစီၤယံးဒလာ်, ဒီးစီၤဘသူၤအ့လး,―

²³ ဒီးစီၤဘသူၤအ့လးန့ၣ်ထီၣ်ဖိ နီၢ်ရံးဘကၤန့ၣ်လီၤ. တၢ် လၢပှၤဃိးဂၤန့ၣ် နီၢ်မံးလကၤဆံးစၢ်န့ၢ် စီၤအၤဘြၤ ဟၣ်အဒီပုၢ်ဝဲၢ်, စီၤနၤဃိၢ်အဂီၢ်လီၤ.

²⁴ ဒီးအသံၣ်မါ, အမံၤမ့ၢ်နီၢ်ရူမၤဆံးစၢ်န့ၢ်စ့ၢ်ကီး စီၤ တ့ဘာ်, ဒီးစီၤကဃၣ်, ဒီးစီၤတဃာ်, ဒီးစီၤမၤကၤလီၤ.

၂၃

¹ ဒီးနီၢ်စၤရါအသးပှၢ်တကယၤခံဆံနွံနံၣ်လီၤ. အန့ၣ် မ့ၢ်နီၢ်စၤရါအသးသမူအနံၣ်တဖၣ်လီၤ. ² ဒီးနီၢ်စၤရါသံ ဝဲလၢကံးရယးအၢ်ဘၤ, အဝဲန့ၣ်မ့ၢ်ဃ့ဘြိၣ်, အိၣ်လၢ ကီၢ်ကနၤဧၣ်အပူၤလီၤ. ဒီးစီၤအၤဘြၤဟၣ်ဟဲဝဲဒ်သိး အကဟီၣ်, ဒီးအမဲာ်ထံကလီၤလၢအဃိလီၤ.

³ ဒီးစီၤအၤဘြၤဟၣ်ဂဲၤဆၢထၢၣ် လၢအတၢ်သံအမဲာ် ညါ, ဒီးကတိၤတၢ်ဒီးစီၤဃ့ၤသးအဖိခွါတဖၣ်, ဒီးစံးဝဲ ဒၣ်, ⁴ ယဲဒၣ်အံၤယမ့ၢ်ပှၤတမှံၤ, ဒီးယအိၣ်တမှံၤလၢ သုကျါလီၤ. ဟ့ၣ်ယၤလၢတၢ်သွၣ်ခိၣ်လၢတၢ်ဟံးဃာ် အဂီၢ်လၢသုကျါတက့ၢ်. ဒီးယကခူၣ်လီၤကွံာ်ယတၢ် သံလၢယမဲာ်ညါလီၤ.

⁵ ဒီးစီၤဃ့ၤသးအဖိခွါတဖၣ်စံးဆၢစီၤအၤဘြၤဟၣ်, ဒီး စံးဘၣ်အီၤ, ⁶ ကစၢ်ဧၢ, ကနၣ်ပကလုၢ်တက့ၢ်. နမ့ၢ် ယွၤအပဒိၣ်တဂၤလၢပကျါလီၤ. ဖဲဒၣ်နဃုထၢတၢ်လၢ ပသွၣ်ခိၣ်အကျါန့ၣ်ခူၣ်လီၤကွံာ်နတၢ်သံတက့ၢ်. ပှၤ လၢအတြီနခူၣ်လီၤကွံာ် နတၢ်သံလၢအသွၣ်ခိၣ်ပူၤန့ၣ် တအိၣ်ဘၣ်လၢပကျါနီတဂၤဘၣ်. ⁷ ဒီးစီၤအၤဘြၤဟၣ်ဂဲၤဆၢထၢၣ်, ဒီးသကူးလီၤအသးလၢပှၤကီၢ်ဖိ, စီၤဃ့ၤသးအဖိခွါတဖၣ်အမဲာ်ညါလီၤ.―

⁸ ဒီးကတိၤတၢ်ဒီးအီၤ, ဒီးစံးဝဲဒၣ်, မ့ၢ်ဘၣ်သုသးလၢယ ကခူၣ်လီၤကွံာ်ယတၢ်သံလၢယမဲာ်ညါဒီး, ကနၣ်ယက လုၢ်, ဒီးဃ့ကညးန့ၢ်ယဂီၢ်လၢစီၤစိၤဃၢ်အဖိခွါ စီၤဧ့ၤ ဖရိၣ်, ⁹ ဒ်သိးအကဟ့ၣ်ယၤလၢတၢ်အိပူၤ မးကပ့လၤ လၢအအိၣ်ဒီးအီၤ, လၢအအိၣ်လၢအဟီၣ်ခိၣ်တကဝီၤ ပူၤအကတၢၢ်န့ၣ်တက့ၢ်. ကဟ့ၣ်ဘၣ်ယၤလၢစ့ဖဲအပှ့ၤ ကြၢးအဃိ, ဒ်သိးအကကဲထီၣ်တၢ်သွၣ်ခိၣ်အတၢ်ဟံး ဃာ်လၢသုကျါလီၤ.

¹⁰ ဒီးစီၤဧ့ၤဖရိၣ်ဆ့ၣ်နီၤဝဲလၢ စီၤဃ့ၤသးအဖိခွါတဖၣ် အကျါလီၤ. ဒီးပှၤဃ့ၤသးဖိ, စီၤဧ့ၤဖရိၣ်စံးဆၢစီၤအၤ ဘြၤဟၣ်လၢစီၤဃ့ၤသးအဖိခွါတဖၣ်အနၢ်ပူၤ, ကယဲၢ် ပှၤလဲၤနုာ်ဝဲလၢအဝ့ၢ်အပဲတရီန့ၣ်, ဒီးစံးဝဲဒၣ်, ¹¹ တမ့ၢ် ဘၣ်, ကစၢ်ဧၢ, ကနၣ်ယကလုၢ်တက့ၢ်. ဟီၣ်ခိၣ်တ ကဝီၤန့ၣ်ယကဟ့ၣ်နၤ, ဒီးတၢ်အိပူၤအိၣ်ဝဲလၢအပူၤန့ၣ် ယကဟ့ၣ်နၤ, လၢပှၤတကလုာ်ဒၣ်ယဲအမဲာ်ညါအံၤ ယဟ့ၣ်နၤလီၤ. ခူၣ်လီၤကွံာ်နတၢ်သံတက့ၢ်.

¹² ဒီးစီၤအၤဘြၤဟၣ် သကူးလီၤအသးလၢပှၤကီၢ်ဖိအ မဲာ်ညါ, ¹³ ဒီးကတိၤတၢ်ဒီးစီၤဧ့ၤဖရိၣ်လၢပှၤကီၢ်ဖိအနၢ် ပူၤ, ဒီးစံးဝဲဒၣ်, ဘၣ်ဆၣ်ဒီးကနၣ်လၢ်ယကလုၢ်တ က့ၢ်. ယကဟ့ၣ်နၤလၢစ့လၢဟီၣ်ခိၣ်တကဝီၤန့ၣ် အ ဂီၢ်လီၤ. ဟံးန့ၢ်လၢယစုပူၤတက့ၢ်, ဒီးယကခူၣ်လီၤ ကွံာ်ယတၢ်သံဖဲန့ၣ်လီၤ. ဒီးစီၤဧ့ၤဖရိၣ်စံးဆၢစီၤအၤဘြၤဟၣ်, ဒီးစံးဘၣ်အီၤ,

¹⁵ ကစၢ်ဧၢ, ကနၣ်ယကလုၢ်တက့ၢ်. ဟီၣ်ခိၣ်တကဝီၤ အပှ့ၤန့ၣ်မ့ၢ်စ့ၡက့လးလွံၢ်ကယၤလီၤ. တၢ်န့ၣ်လၢယၤ ဒီးနၤအဘၢၣ်စၢၤန့ၣ်မ့ၢ်မနုၤလဲၣ်. ဒီးခူၣ်လီၤကွံာ်နတၢ် သံတက့ၢ်.

¹⁶ ဒီးစီၤအၤဘြၤဟၣ်ကနၣ်စီၤဧ့ၤဖရိၣ်အကလုၢ်, ဒီးစီၤ အၤဘြၤဟၣ်စီၤထီၣ်န့ၢ် စီၤဧ့ၤဖရိၣ်အစ့လၢအစံးတ့ၢ် လၢစီၤဃ့ၤသးအဖိခွါတဖၣ်အနၢ်ပူၤ, စ့ၡက့လးလွံၢ် ကယၤလၢပှၤကၤတၢ်ဖိတူၢ်လိာ်ဝဲန့ၣ်လီၤ.

¹⁷ ဒီးစီၤဧ့ၤဖရိၣ်အဟီၣ်ခိၣ်တကဝီၤလၢ အအိၣ်ဝဲလၢမး ကပ့လၤအပူၤ, လၢမးမရ့အမဲာ်ညါ, ဟီၣ်ခိၣ်တကဝီၤ ဒီးတၢ်အိပူၤအိၣ်လၢအပူၤ, ဒီးကယဲၢ်သ့ၣ်လၢအအိၣ် လၢဟီၣ်ခိၣ်တကဝီၤပူၤ, ဒီးအိၣ်ဝဲလၢအဃၢၤဝးဝးခဲ လၢာ်န့ၣ်, တၢ်မၤကျၢၤဝဲ, ¹⁸ လၢစီၤအၤဘြၤဟၣ်အတၢ် ပှ့ၤဃာ်အဂီၢ်လၢစီၤဃ့ၤသးအဖိခွါတဖၣ်အမဲာ်ညါ, လၢ ကယဲၢ်ပှၤလၢ အလဲၤနုာ်လၢအဝ့ၢ်အပဲတရီခဲလၢာ် အ မဲာ်ညါလီၤ.

¹⁹ တၢ်တဖၣ်အလီၢ်ခံန့ၣ်, စီၤအၤဘြၤဟၣ်ခူၣ်လီၤကွံာ် အမါနီၢ်စၤရါလၢတၢ်အိပူၤအိၣ်ဝဲလၢ မးကပ့လၤအ ဟီၣ်ခိၣ်တကဝီၤပူၤ, လၢမးမရ့အမဲာ်ညါလီၤ. အဝဲန့ၣ် မ့ၢ်ဃ့ဘြိၣ်အိၣ်ဝဲလၢကီၢ်ကနၤဧၣ်အပူၤလီၤ. ²⁰ ဒီးဟီၣ် ခိၣ်တကဝီၤ, ဒီးတၢ်အိပူၤအိၣ်ဝဲလၢအပူၤန့ၣ် ပှၤဃ့ၤ သးအဖိခွါတဖၣ် မၤကျၢၤဝဲလၢစီၤအၤဘြၤဟၣ်အဂီၢ်, လၢတၢ်သွၣ်ခိၣ်အတၢ်ဟံးဃာ်အဂီၢ်လီၤ.

၂၄

¹ ဒီးစီၤအၤဘြၤဟၣ်အသးပှၢ်တ့ၢ်, ဒီးလဲၤနုာ်တ့ၢ်ဝဲလၢ အနံၤအသီကျါ, ဒီးယွၤဆိၣ်ဂ့ၤတ့ၢ်စီၤအၤဘြၤဟၣ်လၢ တၢ်ခဲလၢာ်အပူၤလီၤ.

² ဒီးစီၤအၤဘြၤဟၣ်စံးဘၣ်အကုၢ်သးပှၢ်လၢအဟံၣ်ပူၤ, လၢအပၢကယဲၢ်အတၢ်အိၣ်ဒီးအီၤခဲလၢာ်တဂၤန့ၣ်, ပာ် လၢ်နစုလၢယကံၣ်ဒုၣ်အဖီလာ်တက့ၢ်. ³ ဒီးယကဒုး ဆိၣ်နၤလၢယွၤ, မူခိၣ်ကစၢ်ဒီးဟီၣ်ခိၣ်ကစၢ်အမဲာ်ညါ, လၢနတဟံးန့ၢ်ဘၣ်ယဖိခွါအမါလၢ ပှၤကနၤဧၣ်ဖိလၢ ယအိၣ်ယဆိးလၢအကျါတဖၣ်အဖိမုၣ်ဘၣ်လီၤ. ⁴ မ့မ့ၢ် နဘၣ်လဲၤဆူ ယကီၢ်ဒၣ်ယဲ, ဒီးဆူယဘူးယတံၢ်အ အိၣ်, ဒီးဟံးန့ၢ်ယဖိခွါစီၤအံၤစဲးအမါလီၤ.

⁵ ဒီးအကုၢ်စံးဘၣ်အီၤ, ဘၣ်တဘၣ်, တဘၣ်ဘၣ်ပိာ် မုၣ်အသးလၢအကပိာ်ယခံဆူကီၢ်တဘ့ၣ်အံၤဘၣ်. မ့ၢ် ယဘၣ်မၢနဖိခွါက့ၤက့ၤဆူ ကီၢ်လၢနဟဲထီၣ်လၢအ ပူၤန့ၣ်ဧါ.

⁶ ဒီးစီၤအၤဘြၤဟၣ်စံးဘၣ်အီၤ, ပလီၢ်နသးဒ်သိးနသု တဒုးက့ၤက့ၤယဖိခွါဖဲန့ၣ်တဂ့ၤ. ⁷ ယွၤ, မူခိၣ်ကစၢ်လၢ အဟံးန့ၢ်ယၤလၢယပၢ်အဟံၣ်ပူၤ, ဒီးလၢယဘူးယတံၢ် အကီၢ်, ဒီးကတိၤတၢ်ဒီးယၤ, ဒီးဆိၣ်တၢ်ဒီးယၤ, ဒီး စံးဝဲဒၣ်, တၢ်လၢကီၢ်တဘ့ၣ်အံၤ ယကဟ့ၣ်လီၤနချံ နသၣ်တဂၤန့ၣ် ကမၢလီၤအကလူးတဂၤလဲၤလၢနမဲာ် ညါ, ဒီးနကဟံးန့ၢ်ယဖိခွါအမါဖဲန့ၣ်လီၤ. ⁸ ဒီးမ့ၢ်တ ဘၣ်ဘၣ် ပိာ်မုၣ်အသးလၢအကပိာ်နခံဒီး, နကပူၤဖျဲး လၢယတၢ်ဆိၣ်အံၤလီၤ. မ့မ့ၢ် ဒုးက့ၤက့ၤယဖိခွါဖဲန့ၣ် လ့ၤတက့ၤတဂ့ၤ.

⁹ ဒီးအကုၢ်အပှၤပာ်အစုလၢ အကစၢ်စီၤအၤဘြၤဟၣ် အကံၣ်ဒုၣ်အဖီလာ်, ဒီးဆိၣ်တၢ်ဒီးအီၤလၢ တၢ်တမံၤ န့ၣ်အဂ့ၢ်အကျိၤလီၤ.

¹⁰ ဒီးအကုၢ်အပှၤဟံးန့ၢ်ကီၤလၤအူး ဆံဆဲၣ်ဒုလၢအ ကစၢ်အကီၤလၤအူးကျါ, ဒီးလဲၤတၢ်လီၤ. (ဒီးအက စၢ်အတၢ်ဖိတၢ်လံၤ အိၣ်ဝဲလၢအစုပူၤခဲလၢာ်လီၤ.) ဒီး ဂဲၤဆၢထၢၣ်, ဒီးလဲၤဆူကီၢ်မ့းစပတၤမံ, ဝ့ၢ်နၤဃိၢ်လီၤ.

¹¹ ဒီးမုၢ်ဟါအကတီၢ်, အဆၢအကတီၢ်လၢပိာ်မုၣ်လဲၤ ဒၢၣ်ထံန့ၣ်, အဝဲဒၣ်ဒုးချံးလီၤအကီၤလၤအူးအခီၣ်လၢ ထံပူၤအဃၢၤလၢဝ့ၢ်တဖျၢၣ်န့ၣ်လၢခိတခီလီၤ. ¹² ဒီးစံးဝဲ ဒၣ်, ယွၤ, ယကစၢ်စီၤအၤဘြၤဟၣ်အကစၢ်ဧၢ, မၢတၢ် ဂ့ၤဘၣ်ယၤလၢမုၢ်မဆါတနံၤအံၤတက့ၢ်, ဒီးဒုးဘၣ်ယ ကစၢ်စီၤအၤဘြၤဟၣ်လၢနဘျုးနဖှိၣ်တက့ၢ်. ¹³ ကွၢ်ကွၢ်, ယဆၢထၢၣ်လၢထံထီၣ်ပၢၢ်အဃၢၤအံၤ, ဒီးပှၤဝ့ၢ်ဖိအဖိ မုၣ်တဖၣ်ဟးထီၣ်ဒၢၣ်ထံလီၤ. ¹⁴ ဒီးမ်တၢ်မၤအသးလၢ ဖိသၣ်ပိာ်မုၣ်လၢယစံးဘၣ်အီၤ, ပာ်လီၤစာ်နထံစဲၤဒ်သိး ယကအီထံတက့ၢ်န့ၣ်, ဒီးကစံး, အီတက့ၢ်, ဒီးယကဒုး အီစ့ၢ်ကီးနကီၤလၤအူးန့ၣ်, မ်အဝဲဒၣ်ကမ့ၢ်ပှၤလၢနပာ် အီၤလၢနခ့နပှၤစီၤအံၤစဲးအဂီၢ်န့ၣ်တက့ၢ်. အန့ၣ်ဒီးယ ကသ့ၣ်ညါလၢယကစၢ်ဘၣ်ဘျုးဘၣ်ဖှိၣ်လၢနၤလီၤ.

¹⁵ ဒီးတၢ်မၤအသးလၢအကတိၤတၢ် တချုးဝံၤဒံးဘၣ် ဒီး, ကွၢ်ကွၢ်, နီၢ်ရံးဘကၤလၢအအိၣ်ဖျဲၣ်ဝဲလၢစီၤအၤ ဘြၤဟၣ်အဒီပုၢ်ဝဲၢ်စီၤနၤဃိၢ်အမါ နီၢ်မံးလကၤအဖိခွါ စီၤဘသူၤအ့လးအဂီၢ်တဂၤ, ဟးထီၣ်စိာ်ဒီးအထံစဲၤအိၣ် လၢအဖံဘၣ်ခိၣ်လီၤ. ¹⁶ ဒီးဖိသၣ်ပိာ်မုၣ်န့ၣ်အက့ၢ်အ ဂီၤဂ့ၤမးလီၤ, မ့ၢ်ပိာ်မုၣ်လိၣ်ဘိလီၤ. ဒီးပှၤပိာ်ခွါတ သ့ၣ်ညါဘၣ်အီၤနီတဂၤဘၣ်. ဒီးလဲၤလီၤဆူထံထီၣ်ပၢၢ်, ဒီးမၤပှဲၤအထံစဲၤ, ဒီးဟဲက့ၤထီၣ်လီၤ.

¹⁷ ဒီးတၢ်အကုၢ်အပှၤဃ့ၢ်သဂၢၢ်အီၤ, ဒီးစံးဝဲဒၣ်, ဟ့ၣ် အီစာ်ယၤလၢနထံတစဲးအိၣ်လၢနထံစဲၤပူၤန့ၣ်တက့ၢ်.

¹⁸ ဒီးစံးဝဲဒၣ်, ကစၢ်ဧၢ, အီတက့ၢ်, ဒီးပာ်လီၤအထံစဲၤ လၢအစုလိၤချ့ချ့, ဒီးဒုးအီဝဲလီၤ. ¹⁹ ဒီးဒုးအီဝဲဝံၤဒီး, စံးဝဲ ဒၣ်, ယကဒၢၣ်ထံလၢနကီၤလၤအူးအဂီၢ်တုၤအအီဘျဲး အီစ့ၢ်ကီးလီၤ. ²⁰ ဒီးမၤဝဲချ့ချ့, ဒီးလူလီၤထံလၢအထံ စဲၤပူၤဆူကျိးပူၤ, ဒီးဃ့ၢ်ဒၢၣ်ထံကဒီးလၢထံထီၣ်ပၢၢ်အ ပူၤ, ဒီးဒၢၣ်ထံလၢအကီၤလၤအူးခဲလၢာ်အဂီၢ်လီၤ.

²¹ ဒီးပှၤတဂၤန့ၣ်ကမၢကမၣ်လၢအဃိ, ဒီးယွၤမၤဘီၣ် ထီၣ်ညီထီၣ်အကျဲဧါန့ၣ်, ဒ်သိးအကသ့ၣ်ညါဒီး, အိၣ် ဘှီၣ်ကလာ်လီၤ. ²² ဒီးတုၤကီၤလၤအူးအီတၢ်ဝံၤဒီး, တၢ် မၤအသးလၢပှၤတဂၤန့ၣ် ဟံးန့ၢ်ကွီၤထူလီၤတယၢၢ်တ ခီၡက့လး, ဒီးထံဖှံၣ်ခံဘိလီၤတယၢၢ်တဆံလၢအစုအ ဂီၢ်လီၤ.

²³ ဒီးစံးဝဲဒၣ်, နမ့ၢ်မတၤတဂၤအဖိမုၣ်လဲၣ်, ဒုးနဲၣ်လၢ် ယၤတက့ၢ်. ဒ်သိးပကအိၣ်လၢနပၢ်အဟံၣ်ခဲမုၢ်နၤအံၤ အလီၢ်အိၣ်စ့ၢ်ကီးဧါ. ²⁴ ဒီးစံးဘၣ်အီၤ, ယမ့ၢ်နီၢ်မံးလကၤအဖိခွါလၢအဆံးစၢ်န့ၢ်လၢစီၤနၤဃိၢ်အဂီၢ်စီၤဘသူၤအ့လးအဖိမုၣ်လီၤ.―

²⁵ ဒီးစံးဘၣ်စ့ၢ်ကီးအီၤ, လီၢ်ဧိၤဒံးဧိၤ, ဒီးနီၣ်ဧိၤမံၤဧိၤအိၣ် ဝဲဒီးပှၤအါလံ. ဒီးတၢ်အိၣ်အလီၢ် လၢမုၢ်နၤအဂီၢ်န့ၣ် အိၣ်ဝဲလီၤ. ဒီးပှၤတဂၤန့ၣ်ဆုးလီၤအခိၣ်, ဒီးဘါယွၤ, ²⁶ ဒီးစံး ဝဲဒၣ်, ယွၤ, ယကစၢ်စီၤအၤဘြၤဟၣ်အကစၢ်လၢအတ ဒုးလဲၤသဒၣ်ဘၣ်အဘျုးအဖှိၣ်, ဒီးအတၢ်မ့ၢ်တၢ်တီလၢ ယကစၢ်ဘၣ်တဂၤန့ၣ်, မ်အဘၣ်တၢ်ဆိၣ်ဂ့ၤတက့ၢ်. ယဲဒၣ်အံၤယအိၣ်လၢကျဲန့ၣ် ယွၤဆှၢယၤဆူယကစၢ် အဒီပုၢ်ဝဲၢ်အဟံၣ်လီၤ.

²⁸ ဒီးဖိသၣ်ပိာ်မုၣ်န့ၣ် ဃ့ၢ်ဒုးနဲၣ်အမိၢ်အပှၤဟံၣ်ဖိလၢ တၢ်တဖၣ်န့ၣ်လီၤ. ²⁹ ဒီးနီၢ်ရံးဘကၤ အိၣ်ဒီးအဒီပုၢ်ဝဲၢ် ခွါ, ဒီးအမံၤမ့ၢ်စီၤလၤဘၣ်လီၤ. ဒီးစီၤလၤဘၣ်ဃ့ၢ်ထီၣ် ဆူပှၤတဂၤန့ၣ်အအိၣ်, ဆူထံထီၣ်ပၢၢ်အဃၢၤလီၤ. ³⁰ ဒီး တုၤအထံၣ်ဘၣ်ကွီၤ, ဒီးထံဖှံၣ်လၢ အဒီပုၢ်ဝဲၢ်မုၣ်အစု လိၤ, ဒီးတုၤအနၢ်ဟူအဒီပုၢ်ဝဲၢ်မုၣ်နီၢ်ရံးဘကၤအတၢ် ကတိၤလၢအစံးပှၤတဂၤန့ၣ်စံးဘၣ်ယၤဒ်န့ၣ်ဒီး, တၢ် မၤအသးလၢ အလဲၤဝဲဆူပှၤတဂၤန့ၣ်အအိၣ်, ဒီးကွၢ် ကွၢ်, အိၣ်ဆၢထၢၣ်လၢကီၤလၤအူးအဃၢၤ, ဖဲထံထီၣ် ပၢၢ်န့ၣ်လီၤ. ³¹ ဒီးစံးဝဲဒၣ်, ပှၤလၢအဘၣ်တၢ်ဆိၣ်ဂ့ၤ လၢယွၤတဂၤဧၢ, ဟဲနုာ်တက့ၢ်, နအိၣ်ဆၢထၢၣ်လၢခိ အံၤမ့ၢ်အဘၣ်မနုၤလဲၣ်. အဂ့ၢ်ဒ်အံၤ, ယကတဲာ်က တီၤလံဟံၣ်, ဒီးအလီၢ်တပူၤလၢကီၤလၤအူးအဂီၢ်လံ.

³² ဒီးပှၤတဂၤန့ၣ် လဲၤနုာ်လၢဟံၣ်ပူၤလီၤ. ဒီးအဝဲဒၣ် ဃ့ၣ်လီၤကွံာ်ကီၤလၤအူးဒီး ဟ့ၣ်လီၢ်ဧိၤဒံးဧိၤ, ဒီးနီၣ် ဧိၤမံၤဧိၤလၢကီၤလၤအူးအဂီၢ်, ဒီးထံလၢအသ့စီကွံာ်အ ခီၣ်အဂီၢ်, ဒီးလၢအပှၤအိၣ်ဒီးအီၤတဖၣ်အခီၣ်အဂီၢ်လီၤ.

³³ ဒီးပှၤပာ်တၢ်အီၣ်လၢအမဲာ်ညါ ဒ်သိးအကအီၣ်တၢ် လီၤ. ဘၣ်ဆၣ်ဒီးစံးဝဲဒၣ်, ယတချုးကတိၤဒံးဘၣ်ယ တၢ်ကတိၤဘၣ်ဒီး, ယတအီၣ်ဘၣ်ဘၣ်. ဒီးစံးဝဲဒၣ်, ကတိၤတၢ်တက့ၢ်. ဒီးစံးဝဲဒၣ်, ယမ့ၢ်စီၤအၤဘြၤဟၣ်အကုၢ်အပှၤလီၤ.

³⁵ ဒီးယွၤဆိၣ်ဂ့ၤလံယကစၢ်ဒိၣ်မးလံ. ဒီးကဲထီၣ်လၢပှၤ အဒိၣ်လံ. ဒီးဟ့ၣ်လီၤဝဲလၢသိ, ဒီးမဲာ်တဲးလဲး, ဒီးဂီၤ ဘုၣ်ဂီၤဖံး, ဒီးကျိၣ်ဧိၤစ့ဧိၤ, ဒီးထူဧိၤလွဲဧိၤဒီးကုၢ်ပိာ်ခွါ, ဒီးကုၢ်ပိာ်မုၣ်, ဒီးကီၤလၤအူး, ဒီးကသ့ၣ်ယီၤသ့ၣ်တ ဖၣ်လီၤ. ³⁶ ဒီးယကစၢ်အမါနီၢ်စၤရါဆံးစၢ်န့ၢ်အဖိခွါလၢ ယကစၢ်အဂီၢ်, ဖဲအသးပှၢ်တ့ၢ်လီၤ. ဒီးကယဲၢ်အတၢ် တမံၤလၢ်လၢ်န့ၣ်ဟ့ၣ်လံဝဲလၢအီၤလီၤ.

³⁷ ဒီးယကစၢ် ဒုးဆိၣ်လီၤယသးဒီးစံးဝဲ, နတဟံးန့ၢ် ဘၣ်ယဖိခွါအမါလၢပှၤကနၤဧၣ်ဖိ လၢယအိၣ်ယဆိး လၢအကီၢ်ပူၤတဖၣ်အဖိမုၣ်အကျါဘၣ်. ³⁸ မ့မ့ၢ်နဘၣ် လဲၤဆူယပၢ်အဟံၣ်ပူၤ, ဒီးဆူယပှၤတဒူၣ်ဒၣ်ယဲအအိၣ် ဒီးဟံးန့ၢ်ယဖိခွါအမါလီၤ. ³⁹ ဒီးယစံးယကစၢ်န့ၣ်, ဘၣ် တဘၣ်ပိာ်မုၣ်တပိာ်ဘၣ်ယခံဘၣ်. ⁴⁰ ဒီးစံးဘၣ်ယၤ, ယွၤလၢယလဲၤတၢ်လၢအမဲာ်ညါ ကမၢအကလူးတဂၤ လဲၤဒီးနၤ, ဒီးကမၤဘီၣ်ထီၣ်ညီထီၣ်နကျဲ, ဒီးနကဟံး န့ၢ်ယဖိခွါအမါလၢယပှၤတဒူၣ်ဒၣ်ယဲအကျါ, ဒီးလၢ ယပၢ်အဟံၣ်ပူၤလီၤ. ⁴¹ တုၤနုၤတစုနကပူၤဖျဲးလၢယ ဆိၣ်တၢ်အံၤ ဖဲနဟဲဆူယပှၤတဒူၣ်ဒၣ်ယဲအအိၣ်လီၤ. ဒီးအဝဲသ့ၣ် မ့ၢ်တဟ့ၣ်ဘၣ်လၢနၤဘၣ်ဒီး, နကပူၤဖျဲး လၢယတၢ်ဆိၣ်အံၤလီၤ.

⁴² ဒီးလၢမုၢ်မဆါတနံၤအံၤ ယဟဲတုၤလၢထံထီၣ်ပၢၢ်, ဒီးယစံး, ယွၤ, ယကစၢ်စီၤအၤဘြၤဟၣ်အကစၢ်ဧၢ, န မ့ၢ်မၤဘီၣ်မၤညီယကျဲလၢယပိာ်ဒီး, ⁴³ ကွၢ်ကွၢ်, ယဆၢ ထၢၣ်လၢထံထီၣ်ပၢၢ်အဃၢၤ, ဒီးတၢ်ကမၤအသးဖဲပှၤ မုၣ်ကနီၤဟးထီၣ်ဒၢၣ်ထံ, ဒီးယစံးဘၣ်အီၤ, ဒုးအီလၢ် ယထံတစဲးလၢနထံစဲၤပူၤန့ၣ်တက့ၢ်, ⁴⁴ ဒီးအဝဲဒၣ်စံး ဘၣ်ယၤ, အီနဲ, ဒီးယကဒၢၣ်ထံလၢနကီၤလၤအူးအ ဂီၢ်စ့ၢ်ကီးလီၤန့ၣ်ဒီး,― မ်အဝဲဒၣ်ကမ့ၢ်ပိာ်မုၣ်လၢယွၤ ပာ်လၢယကစၢ်အဖိခွါအဂီၢ်န့ၣ်တက့ၢ်. ⁴⁵ ဒီးယကတိၤ တၢ်တချုးဝံၤဒံးဘၣ်လၢယသးကံၢ်ပူၤဘၣ်ဒီး, ကွၢ်ကွၢ်, နီၢ်ရံးဘကၤဟးထီၣ် အိၣ်ဒီးအထံစဲၤလၢအဖံဘၣ်ခိၣ်, ဒီးလဲၤလီၤဆူထံထီၣ်ပၢၢ်, ဒီးဒၢၣ်ထီၣ်ထံဝံၤဒီး, ယစံး ဘၣ်အီၤ, ဒုးအီလၢ်ယၤတက့ၢ်. ⁴⁶ ဒီးမၤဝဲချ့ချ့, ဒီးပာ် လီၤအထံစဲၤ, ဒီးစံးဝဲဒၣ်အီတက့ၢ်. ဒီးယကဒုးအီန ကီၤလၤအူးစ့ၢ်ကီးလီၤ. ဒီးယအီတၢ်, ဒီးအဝဲဒၣ်ဒုးအီ

⁴⁷ ကီၤလၤအူးစ့ၢ်ကီးလီၤ. ဒီးယသံကွၢ်အီၤဒီးယစံး, နမ့ၢ် မတၤတဂၤအဖိမုၣ်လဲၣ်. ဒီးစံးဝဲဒၣ်, ယမ့ၢ်စီၤနၤဃိၢ် အဖိခွါလၢနီၢ်မံးလကၤဆံးစၢ်န့ၢ်အဂီၢ် စီၤဘသူၤအ့လး အဖိမုၣ်လီၤ. ဒီးယဒုးတုၢ်ထီၣ်အီၤလၢနါဒ့ကွီၤ, ဒီးယဒုး သိးအစုလၢထံဖှံၣ်တဖၣ်လီၤ. ⁴⁸ ဒီးယဆုးလီၤယခိၣ်, ဒီး ယဘါယွၤ, ဒီးယဆိၣ်ဂ့ၤယွၤ, ယကစၢ်စီၤအၤဘြၤဟၣ် အကစၢ်လၢအဆှၢယၤလၢကျဲအဘၣ်, ဒ်သိးယကဟံး န့ၢ် ယကစၢ်အဒီပုၢ်ဝဲၢ်တဂၤအဖိမုၣ် လၢအဖိခွါအဂီၢ် လီၤ. ⁴⁹ ဒီးခဲကနံၣ်အံၤသုမ့ၢ်မၤဘျုးမၤဖှိၣ်, မၤမ့ၢ်မၤတီ ဒီးယကစၢ်ဒီး, ဒုးနဲၣ်ယၤ, ဒီးမ့တမ့ၢ်ဘၣ်ဒီးဒုးနဲၣ်ယၤ, ဒ်သိးဆူစုထွဲမ့ၢ်ဂ့ၤ, ဆူစုစ့ၣ်မ့ၢ်ဂ့ၤ, ယဃၣ်ယသးကသ့ န့ၣ်တက့ၢ်.

⁵⁰ ဒီးစီၤလၤဘၣ်ဒီးစီၤဘသူၤအ့လးစံးဆၢတၢ်, ဒီးစံးဝဲ ဒၣ်, တၢ်အံၤတမံၤဟဲလၢယွၤလီၤ. အၢမ့ၢ်ဂ့ၤ, ဂ့ၤမ့ၢ်ဂ့ၤ, ပစံးဒၣ်ပဝဲတသ့ဘၣ်. ⁵¹ ကွၢ်ကွၢ်, နီၢ်ရံးဘကၤအိၣ်လၢ နမဲာ်ညါလီၤ. ဟံးန့ၢ်အီၤဒီးက့ၤက့ၤတက့ၢ်. ဒီးမ်အကဲ ထီၣ်နကစၢ်အဖိခွါအမါ ဒ်ယွၤစံးတၢ်အသိးန့ၣ်တက့ၢ်.

⁵² ဒီးတုၤစီၤအၤဘြၤဟၣ်အကုၢ်အပှၤ နၢ်ဟူတၢ်ကတိၤ ဒီး, တၢ်မၤအသးလၢ အတီၤလီၤကဒွံကျိာ်ဒီးဘါယွၤ လီၤ. ⁵³ ဒီးအကုၢ်အပှၤန့ၣ်ထုးထီၣ်ကယၢစ့, ဒီးကယၢ ထူ, ဒီးတၢ်အကူအသိးသ့ၣ်တဖၣ်, ဒီးဟ့ၣ်လၢနီၢ်ရံး ဘကၤလီၤ. ဒီးဟ့ၣ်တၢ်လုၢ်ဒိၣ်ပှ့ၤဒိၣ်တဖၣ်လၢ အဒီ ပုၢ်ဝဲၢ်ခွါ, ဒီးအမိၢ်စ့ၢ်ကီးလီၤ.

⁵⁴ ဒီးအီၣ်တၢ်ဒီးအီတၢ်, အဝဲဒၣ်ဒီး, ပှၤကညီအိၣ်ဒီးအီၤ, ဒီးအိၣ်ဝဲသီတနၤကျၢၤလီၤ. ဒီးမုၢ်ဆ့ၣ်ထီၣ်န့ၣ်ဂဲၤဆၢ ထၢၣ်, ဒီးစံးဝဲဒၣ်, မၢယက့ၤက့ၤဆူယကစၢ်အိၣ်တက့ၢ်.

⁵⁵ ဒီးအဒီပုၢ်ဝဲၢ်ခွါဒီးအမိၢ်စံးဝဲဒၣ်, မ်ဖိသၣ်ပိာ်မုၣ်န့ၣ် အိၣ်ဒီးပှၤအနံၤအသီတဖၣ်, ဆံဆဲၣ်သီတက့ၢ်. တၢ် တဖၣ်န့ၣ်အလီၢ်ခံကလဲၤဘၣ်ဝဲလီၤ.

⁵⁶ ဒီးစံးဘၣ်အီၤ, တြီယၤတဂ့ၤ. အဂ့ၢ်ဒ်အံၤ, ယွၤမၤ ဘီၣ်မၤညီလံယကျဲလံ. မၢယက့ၤက့ၤတၢ်တက့ၢ်. ဒီး ယကက့ၤဆူယကစၢ်အအိၣ်လီၤ.

⁵⁷ ဒီးအဝဲသ့ၣ်စံးဝဲဒၣ်, ပကကိးန့ၢ်ဖိသၣ်ပိာ်မုၣ်န့ၣ်, ဒီးသံကွၢ်တၢ်လၢအထးခိၣ်လီၤ. ⁵⁸ ဒီးကိးန့ၢ်နီၢ်ရံးဘ ကၤ, ဒီးစံးဘၣ်အီၤ, နကလဲၤဒီးပှၤတဂၤအံၤစ့ၢ်ကီးဧါ. ဒီးစံးဝဲဒၣ်, ယကလဲၤလီၤ.

⁵⁹ ဒီးမၢအဒီပုၢ်ဝဲၢ်မုၣ်နီၢ်ရံးဘကၤလဲၤတၢ်, ဒီးပှၤလၢအ ဒုးအီၣ်နုၢ်အီၤတဂၤ, ဒီးစီၤအၤဘြၤဟၣ်အကုၢ်အပှၤ, ဒီး အဝဲဒၣ်အပှၤကညီတဖၣ်လီၤ. ⁶⁰ ဒိးဆိၣ်ဂ့ၤနီၢ်ရံးဘကၤ ဒီးစံးဘၣ်အီၤ, နဲဒၣ်ပဒီပုၢ်ဝဲၢ်မုၣ်တဂၤဧၢ, မ်နကကဲ ထီၣ်ပှၤအကလးတဖၣ်အဘျီအကထိကထိတက့ၢ်. ဒီး မ်နချံနသၣ်န့ၢ်ဘၣ် ပှၤလၢအသးဟ့အီၤ အပဲတရီန့ၣ် တက့ၢ်.

⁶¹ ဒီးနီၢ်ရံးဘကၤ, ဒီးအဖိသၣ်ပိာ်မုၣ်တဖၣ် ဂဲၤဆၢ ထၢၣ်, ဒီးဒိးထီၣ်ကီၤလၤအူးဒီး ပိာ်ပှၤတဂၤန့ၣ်အခံ လီၤ. ဒီးတၢ်အကုၢ်အပှၤတဂၤန့ၣ်ဟံးန့ၢ် နီၢ်ရံးဘကၤ, ဒီးက့ၤက့ၤဝဲလီၤ.

⁶² ဒီးစီၤအံၤစဲးဟဲက့ၤလၢပှၤမူဝဲဒီး ထံၣ်ယၤတဂၤအထံ ပူၤန့ၣ်အကျဲလီၤ. အဂ့ၢ်ဒ်အံၤ, အိၣ်ဝဲဆိးဝဲလၢကီၢ်က လံၤထံးတခီလီၤ. ⁶³ ဒီးစီၤအံၤစဲးဟးထီၣ်ဝဲဆူဟီၣ်ခိၣ်တ ကဝီၤပူၤ, ဒ်သိးအကဆိကမိၣ်ဆိကမးတၢ်လၢမုၢ်ဟါ န့ၣ်လီၤ. ဒီးကျ့ထီၣ်အမဲာ်, ဒီးကွၢ်တၢ်, ဒီးကွၢ်ကွၢ်, ကီၤလၤအူးတဖၣ်န့ၣ်ဟဲက့ၤဝဲလီၤ.

⁶⁴ ဒီးနီၢ်ရံးဘကၤကျ့ထီၣ်အမဲာ်, ဒီးတုၤအထံၣ်ဘၣ်စီၤ အံၤစဲးဒီး, ယုၢ်လီၤဝဲလၢကီၤလၤအူးအလိၤလီၤ. ⁶⁵ အဂ့ၢ် ဒ်အံၤ, စံးတ့ၢ်တၢ်အကုၢ်အပှၤ, ပှၤလၢအဟဲသဂၢၢ်ပှၤ လၢဟီၣ်ခိၣ်တကဝီၤပူၤတဂၤန့ၣ် မ့ၢ်မတၤတဂၤလဲၣ် န့ၣ်, ဒီးတၢ်အကုၢ်အပှၤစံးတ့ၢ်ဝဲဒၣ်, မ့ၢ်ယကစၢ်လီၤ. ဒီးဟံးန့ၢ်နီၣ်ကျၢၢ်ဘၢ, ဒီးကျၢၢ်ဘၢအမဲာ်လီၤ.

⁶⁶ ဒီးတၢ်အကုၢ်အပှၤစံၣ်တဲၤတဲလီၤ စီၤအံၤစဲးလၢက ယဲၢ်တၢ်လၢ အမၤဝဲခဲလၢာ်လီၤ. ⁶⁷ ဒီးစီၤအံၤစဲးဆှၢအီၤ ဆူအမိၢ်, နီၢ်စၤရါအဒဲပူၤ, ဒီးဟံးန့ၢ်နီၢ်ရံးဘကၤ, ဒီး အဝဲဒၣ်ကဲလၢအမါ, ဒီးစီၤအံၤစဲးအဲၣ်အီၤဒီးဘၣ်တၢ်မၤ မုာ်မၤခုၣ်အီၤလၢအမိၢ်သံအလီၢ်ခံန့ၣ်လီၤ.

၂၅

¹ မၤကဒီးတစု, စီၤအၤဘြၤဟၣ်န့ၢ်အမါ, ဒီးအမံၤမ့ၢ် နီၢ်ကတူရၤလီၤ. ² ဒီးဆံးစၢ်န့ၢ်ဝဲလၢအဂီၢ်လၢစီၤစံးမ ရၣ်, ဒီးစီၤယးကၡၣ်, ဒီးစီၤမဒၣ်, ဒီးစီၤမံးဒယၣ်, ဒီး စီၤယံးၡဘး, ဒီးစီၤရှူဧၤလီၤ.

³ ဒီးစီၤယးကၡၣ်ထီၣ်ဖိစီၤၡဘၤ, ဒီးစီၤဒဒၣ်လီၤ. ဒီး စီၤဒဒၣ်အဖိခွါမ့ၢ်ပှၤအၤရှူရးဖိ, ဒီးပှၤလတူၡးဖိ, ဒီး ပှၤလူမးဖိလီၤ.

⁴ ဒီးစီၤမံးဒယၣ်အဖိခွါမ့ၢ် စီၤဧ့ၤဖၣ်, ဒီးစီၤဧ့ၤဖ့ၢ်, ဒီး စီၤဃနိာ်, ဒီးစီၤအဘံဒၤ, ဒီးစီၤအ့ၤလဒါဧၤလီၤ. ပှၤ တဖၣ်ခဲလၢာ်န့ၣ်မ့ၢ်နီၢ်ကတူရၤအဖိခွါလီၤ.

⁵ ဒီးစီၤအၤဘြၤဟၣ် ဟ့ၣ်ကယဲၢ်တၢ်လၢအအိၣ်ဒီးအီၤ လၢစီၤအံၤစဲးလီၤ. ⁶ မ့မ့ၢ်အသံၣ်မါတဖၣ်အဖိခွါသ့ၣ် တဖၣ်လၢအအိၣ်ဒီးစီၤအၤဘြၤဟၣ်န့ၣ် ဖဲစီၤအၤဘြၤ ဟၣ်မူဒံးအဖၢမုၢ်ဒီး, ဟ့ၣ်အီၤလၢတၢ်ဟ့ၣ်တဖၣ်, ဒီး မၢအဟးထီၣ်လၢအဖိခွါစီၤအံၤစဲးအအိၣ် ဆူမုၢ်ထီၣ်တ ခီ, ဆူကီၢ်မုၢ်ထီၣ်န့ၣ်လီၤ.

⁷ ဒီးအအံၤမ့ၢ်စီၤအၤဘြၤဟၣ်အမုၢ်နံၤတဖၣ်အနံၤအသီ လၢအမူဝဲန့ၣ်အနံၣ်တကယၤနွံဆံယဲၢ်နံၣ်လီၤ. ⁸ ဒီးစီၤ အၤဘြၤဟၣ်အသးလၢာ်, ဒီးသံဝဲအခိၣ်ဝါဂ့ၤ, ဒီးအိၣ် ဘျဲးအိၣ်, ဒီးတၢ်ပာ်ဖှိၣ်အီၤဒီးအပှၤတကလုာ်ဒၣ်ဝဲန့ၣ် လီၤ.

⁹ ဒီးအဖိခွါစီၤအံၤစဲး, ဒီးစီၤယံးၡမၤဧ့လးခူၣ်လီၤကွံာ် အီၤလၢတၢ်အိပူၤမးကပ့လၤ အိၣ်ဝဲလၢပှၤဃ့ၤသးဖိစီၤ စိၤဃၢ်, အဖိခွါစီၤဧ့ၤဖရိၣ်အဟီၣ်ခိၣ်တကဝီၤပူၤလၢအ အိၣ်ဝဲလၢမးမရ့အမဲာ်ညါလီၤ. ¹⁰ အဝဲန့ၣ်မ့ၢ်ဟီၣ်ခိၣ်တ ကဝီၤလၢစီၤအၤဘြၤဟၣ်ပှ့ၤဝဲလၢ စီၤဃ့ၤသးအဖိခွါတ ဖၣ်လီၤ. စီၤအၤဘြၤဟၣ်ဘၣ်တၢ်ခူၣ်လီၤကွံာ်အီၤဖဲန့ၣ်, ဒီးအမါနီၢ်စၤရါလီၤ.

¹¹ ဒီးလၢစီၤအၤဘြၤဟၣ်သံအလီၢ်ခံန့ၣ်, တၢ်မၤအသး လၢယွၤဆိၣ်ဂ့ၤအဖိခွါ, စီၤအံၤစဲး, ဒီးစီၤအံၤစဲးအိၣ်ဝဲ ဆိးဝဲလၢပှၤမူဒီး ထံၣ်ယၤတဂၤန့ၣ်အထံပူၤအဃၢၤန့ၣ် လီၤ.

¹² ဒီးအအံၤမ့ၢ်စီၤအၤဘြၤဟၣ် အဖိခွါလၢပှၤအဲၤကူပ တူးဖိ, နီၢ်စၤရါအကုၢ်ပိာ်မုၣ်, နီၢ်ဟၤကၢ်ဆံးစၢ်န့ၢ်လၢ အဂီၢ်, စီၤယံးၡမၤဧ့လးအစၢၤအသွဲၣ်, ¹³ ဒီးအအံၤမ့ၢ်စီၤ ယံးၡမၤဧ့လးအဖိခွါတဖၣ်အမံၤလၢအမံၤတဖၣ်, ဒီးဒ် အအိၣ်ဖျဲၣ်ဝဲအသိးန့ၣ် စီၤယံးၡမၤဧ့လးအဖိခွါဝဲၢ်ကိ စီၤနဘါယိး, ဒီးစီၤက့ဒၢ်, ဒီးစီၤအးဒဘအ့လး, ဒီး စီၤမံးကစၢ်, ¹⁴ -ဒီးစီၤမံးၡမၤ, ဒီးစီၤဒူမၤ, ဒီးစီၤမၤစၤ, စီၤဃဒၢ်, ဒီးစီၤတ့မၤ, ဒီးစီၤယတူၢ်, ဒီးစီၤနါဖံၣ်, ဒီး စီၤက့ဒမၤလီၤ. ¹⁶ အဝဲသ့ၣ်တဖၣ်န့ၣ် မ့ၢ်စီၤယံးၡမၤဧ့ လးအဖိခွါဒီးအဝဲသ့ၣ်တဖၣ်န့ၣ် မ့ၢ်အမံၤလၢအသဝီ ပူၤ, လၢအဝ့ၢ်ကရၢအသးအပူၤ, ပဒိၣ်တဆံခံဂၤဒ်အ ကလုာ်အသိးန့ၣ်လီၤ.

¹⁷ ဒီးအအံၤမ့ၢ် စီၤယံးၡမၤဧ့လး မူဝဲအနံၣ်တဖၣ်လီၤ. အိၣ်ဝဲတနံၣ်တကယၤသၢဆံနွံနံၣ်, ဒီးအသးလၢာ်, ဒီး သံဝဲ, ဒီးတၢ်ပာ်ဖှိၣ်အီၤဒီးအပှၤတကလုာ်ဒၣ်ဝဲလီၤ.

¹⁸ ဒီးအိၣ်ဝဲလၢဃဝံလၤပၢၢ်လၢရှူၢ်အိၣ်လၢကီၢ်အဲၤကူပ တူးအမဲာ်ညါ, ဖဲနလဲၤတၢ်ဆူကီၢ်အရှူၢ်လီၤ. အိၣ်ဝဲ လၢအဒီပုၢ်ဝဲၢ်ခဲလၢာ်အမဲာ်ညါန့ၣ်လီၤ.

¹⁹ ဒီးအအံၤမ့ၢ်စီၤအၤဘြၤဟၣ်အဖိခွါ, စီၤအံၤစဲးအစၢၤ အသွဲၣ်,

²⁰ စီၤအၤဘြၤဟၣ်ထီၣ်ဖိစီၤအံၤစဲး, ဒီးစီၤအံၤစဲးဖဲအသး ပှၢ်အနံၣ်လွံၢ်ဆံန့ၣ် န့ၢ်မါလၢနီၢ်ရံးဘကၤ, ပှၤစူၤရံဖိ စီၤဘသူၤအ့လး အိၣ်လၢပၤဒနါရၣ်အပူၤအဖိမုၣ်, ပှၤ စူၤရံဖိ, စီၤလၤဘၣ်အဒီပုၢ်ဝဲၢ်မုၣ်လီၤ.

²¹ ဒီးစီၤအံၤစဲး ဃ့ကညးယွၤလၢအမါအဂီၢ်လၢအတူာ် ဖိအဃိလီၤ. ဒီးယွၤဒိးတၢ်ဃ့ကညးလၢအီၤ, ဒီးအမါ နီၢ်ရံးဘကၤဒၢထီၣ်လီၤ.

²² ဒီးအဖိတဖၣ်ဘၣ်ထံးလိာ်အသးလၢအပူၤ, ဒီးစံးဝဲ ဒၣ်, မ့မ့ၢ်ဒ်န့ၣ်ဒီးယအိၣ်ဒ်အံၤဘၣ်မနုၤလဲၣ်. ဒီးလဲၤ သံကွၢ်တၢ်လၢယွၤလီၤ.

²³ ဒီးယွၤစံးဘၣ်အီၤ, ပှၤခံကလုာ်အိၣ်လၢနဒၢလီၢ်အ ပူၤ, ဒီးပှၤဂီၢ်မုၢ်ခံကလုာ်ကလီၤဖးလၢနဟၢဖၢပူၤလီၤ. ဒီးအဝဲတကလုာ်ကဆူၣ်န့ၢ်အဝဲတကလုာ်တက့ၢ်လီၤ. ဒီးအဒိၣ်ကမၤအဆံးအတၢ်လီၤ.

²⁴ ဒီးတုၤအနံၤအသီလၢ အကဆံးစၢ်န့ၣ်တၢ်ပှဲၤထီၣ်ဒီး, ကွၢ်ကွၢ်, ပှၤသဃံာ်အိၣ်ဝဲလၢအဒၢလီၢ်လီၤ. ²⁵ ဒီးပှၤ လၢအဟဲဆိတဂၤဂီၤဝဲ, မၤသးဒ်ဆ့အိၣ်ဒီးအဆူၣ်အသိး ဒီဂၤညါလီၤ. ဒီးကိးဝဲအမံၤလၢစီၤဧ့ၡီၤလီၤ.

²⁶ ဒီးတၢ်န့ၣ်အလီၢ်ခံအပုၢ်ဟဲထီၣ်ဒီး အစုဟံးဃာ်စီၤဧ့ ၡီၤအခီၣ်နၢၣ်ခံလီၤ. ဒီးကိးဝဲအမံၤလၢစီၤယၤကိာ်လီၤ. ဒီးလၢအဆံးစၢ်န့ၢ်ဝဲန့ၣ် စီၤအံၤစဲးအသးပှၢ်အနံၣ်ဃုဆံ လီၤ.

²⁷ ဒီးဖိသၣ်ပိာ်ခွါတဖၣ်န့ၣ်ဒိၣ်ထီၣ်, ဒီးစီၤဧ့ၡီၤမ့ၢ်ပှၤခး တၢ်သ့, ပှၤပှၢ်လၢ်ကျါဖိလီၤ. ဒီးစီၤယၤကိာ်န့ၣ်မ့ၢ်ပှၤ ကစုဒု, ဒီးအိၣ်ဝဲဆိးဝဲလၢဒဲပူၤလီၤ.

²⁸ ဒီးစီၤအံၤစဲးအဲၣ်စီၤဧ့ၡီၤလီၤ. အဂ့ၢ်ဒ်အံၤ, အဆၣ်ဖိ ကီၢ်ဖိအမံၤအညၣ်န့ၣ်အိၣ်ဝဲလၢအကိာ်ပူၤလီၤ. မ့မ့ၢ်နီၢ် ရံးဘကၤတဂၤအဲၣ်စီၤယၤကိာ်လီၤ.

²⁹ ဒီးစီၤယၤကိာ်ချီတၢ်ချီ, ဒီးစီၤဧ့ၡီၤဟဲက့ၤလၢပှၢ်လၢ် ကျါ, ဒီးအသးလီၤဘှါဝဲလီၤ.

³⁰ ဒီးစီၤဧ့ၡီၤစံးဘၣ်စီၤယၤကိာ်, ဒုးအီၣ်စာ်ယၤလၢတၢ် အဂီၤအံၤတက့ၢ်. အဂ့ၢ်ဒ်အံၤ, ယသးလီၤဘှါလီၤ. မၤ သးဒ်န့ၣ်ဒီးပှၤကိးဝဲအမံၤလၢအဒိၣ်လီၤ.

³¹ ဒီးစီၤယၤကိာ်စံးဝဲဒၣ်, ဆါကွံာ်န့ၢ်ယၤလၢနဝဲၢ်ကိအ လီၢ်လၢမုၢ်မဆါတနံၤအံၤတက့ၢ်.

³² ဒီးစီၤဧ့ၡီၤစံးဝဲဒၣ်, ကွၢ်ကွၢ်, ယကသံတ့ၢ်လီၤဒီးတၢ် လၢဝဲၢ်ကိအလီၢ်အံၤ ကဂိာ်တၢ်လၢယဂီၢ် မနုၤတမံၤ လဲၣ်.

³³ ဒီးစီၤယၤကိာ်စံးဝဲဒၣ်, ဆိၣ်တၢ်ဒီးယၤလၢမုၢ်မဆါ တနံၤအံၤတက့ၢ်. ဒီးဆိၣ်တၢ်ဒီးအီၤ, ဒီးဆါကွံာ်အဝဲၢ် ကိအလီၢ်လၢစီၤယၤကိာ်လီၤ. ³⁴ ဒီးစီၤယၤကိာ်ဟ့ၣ်စီၤ ဧ့ၡီၤလၢကိၣ်, ဒီးကသူအိၣ်ဒီးပထိးသၣ်လီၤ. ဒီးအီၣ် တၢ်ဒီးအီတၢ်, ဒီးဂဲၤဆၢထၢၣ်, ဒီးလဲၤတၢ်လီၤ. ဒီး စီၤဧ့ၡီၤတပးကဲဘၣ်ဝဲၢ်ကိအလီၢ်ဘၣ်လီၤ.

၂၆

¹ ဒီးတၢ်သၣ်ဝံၤလီၤဒိအခီၣ်ထံး လၢအအိၣ်လၢစီၤအၤ ဘြၤဟၣ်အမုၢ်နံၤတဖၣ်အမဲာ်ညါန့ၣ် တၢ်သၣ်ဝံၤလီၤဒိ အိၣ်ဝဲလၢကီၢ်ပူၤလီၤ. ဒီးစီၤအံၤစဲးလဲၤဝဲဆူ ပှၤဖလ့ၡ သးဖိအစီၤပၤစီၤအဘံၤမ့လ့းအအိၣ်လၢကရၢ်ပူၤလီၤ.

² ဒီးယွၤလီၣ်ဖျါထီၣ်အသးလၢအမဲာ်ညါ, ဒီးစံးဝဲဒၣ်, လဲၤလီၤဆူကီၢ်အဲၤကူပတူးတဂ့ၤ. အိၣ်လၢကီၢ်လၢယ ကစံးဘၣ်နၤအပူၤတက့ၢ်. ³ အိၣ်လၢကီၢ်တဘ့ၣ်အံၤတ က့ၢ်. ဒီးယကအိၣ်ဒီးနၤ, ဒီးယကဆိၣ်ဂ့ၤနၤလီၤ. အ ဂ့ၢ်ဒ်အံၤ, တၢ်လၢကီၢ်တဖၣ်အံၤခဲလၢာ်ယကဟ့ၣ်လီၤ နၤဒီးနချံနသၣ်, ဒီးယကမၤဂၢၢ်မၤကျၢၤတၢ်လၢယ ဆိၣ်တၢ်ဒီးနပၢ်စီၤအၤဘြၤဟၣ်, ⁴ ဒီးယကမၤအါထီၣ် နချံနသၣ်ဒ်ဆၣ်ဧိၤဖီဧိၤလၢမူခိၣ်အသိး, ဒီးယကဟ့ၣ် လီၤကီၢ်တဖၣ်အံၤခဲလၢာ်လၢနချံနသၣ်လီၤ. ဒီးကယဲၢ် ပှၤကညီလၢဟီၣ်ခိၣ်ချၢတကလုာ်လၢ်လၢ်န့ၣ်, ကဘၣ် ဆိၣ်ဂ့ၤလၢနချံနသၣ်အပူၤလီၤ. ⁵ မ့ၢ်လၢ စီၤအၤဘြၤ ဟၣ်ဒိကနၣ်ယကလုၢ်, ဒီးတိၢ်န့ၢ်ယလုၢ်ယလၢ်, ယ တၢ်မၤလိာ်, ယတၢ်စံၣ်ညီၣ်, ဒီးယတၢ်သိၣ်တၢ်သီ အဃိန့ၣ်လီၤ. ဒီးစီၤအံၤစဲးအိၣ်ဝဲဆိးဝဲလၢကရၢ်န့ၣ်လီၤ. ⁶ ဒီးပှၤက ညီဖဲန့ၣ်သံကွၢ်ဝဲလၢအမါအဂ့ၢ်အကျိၤ, ဒီးစံးဝဲဒၣ်, မ့ၢ် ယဒီပုၢ်ဝဲၢ်မုၣ်လီၤ. အဂ့ၢ်ဒ်အံၤ, ဒ်သိးအကစံးမ့ၢ်ယ မါဒီး, ပျံၤတၢ်, ဒီးစံးဝဲဒၣ်, ပှၤဖဲအလီၢ်အံၤကမၤသံ ဘၣ်ဖုးယၤလၢနီၢ်ရံးဘကၤအဃိလီၤ. အဂ့ၢ်ဒ်အံၤ, အ က့ၢ်အဂီၤဂ့ၤဝဲလီၤ.

⁸ ဒီးတုၤအအိၣ်တ့ၢ်ဖဲန့ၣ်ယံာ်ယံာ်ဒီး, တၢ်မၤအသး လၢပှၤဖလ့ၡသးဖိအစီၤပၤ, စီၤအဘံၤမ့လ့းကွၢ်တၢ်လၢ တၢ်ထူၣ်ဖျိပူၤ, ဒီးထံၣ်ဘၣ်တၢ်, ဒီးကွၢ်ကွၢ်, စီၤအံၤ စဲးလိာ်ကွဲဝဲဒီးအမါ, နီၢ်ရံးဘကၤလီၤ.

⁹ ဒီးစီၤအဘံၤမ့လ့းကိးန့ၢ်စီၤအံၤစဲး, ဒီးစံးဝဲဒၣ်, ကွၢ် ကွၢ်, အဝဲဒၣ်န့ၣ်မ့ၢ်မးနမါလီၤ. ဒီးနစံးလၢအမ့ၢ်ယဒီ ပုၢ်ဝဲၢ်မုၣ်ဒ်လဲၣ်. ဒီးစီၤအံၤစဲးစံးဘၣ်အီၤ, အဂ့ၢ်ဒ်အံၤ, ယစံးယကသံဘၣ်ဖုးလၢအဃိလီၤ.

¹⁰ ဒီးစီၤအဘံၤမ့လ့းစံးဝဲဒၣ်, နမၤပှၤဒ်လဲၣ်. ပှၤတဂၤ ဘူးဒီးအကမံဃုာ်ဒီးနမါလီၤ. ဒီးနကဒုးဘၣ်ပှၤလၢ တၢ်ဒဲးဘးလီၤ.

¹¹ ဒီးစီၤအဘံၤမ့လ့းမၤလိာ်ပှၤဂီၢ်မုၢ်ခဲလၢာ်, ဒီးစံးဝဲဒၣ်, ပှၤကညီတဂၤအံၤမ့ၢ်ဂ့ၤ, အမါမ့ၢ်ဂ့ၤ, ပှၤလၢအထိး အီၤန့ၣ်သံဒီးကသံလီၤ.

¹² ဒီးစီၤအံၤစဲးဖှံတၢ်လၢကီၢ်တဘ့ၣ်အပူၤန့ၣ်, ဒီးတၢ် လၢနံၣ်တနံၣ်န့ၣ်ဒိးန့ၢ်တၢ်အါန့ၢ်အလီၢ်အစးတကယၤ, ဒီးယွၤဆိၣ်ဂ့ၤအီၤလီၤ. ¹³ ဒီးပှၤတဂၤအံၤဒိၣ်ထီၣ်, ဒီးဒံး ယံာ်ဒံးဒိၣ်ထီၣ်တုၤအဒိၣ်ထီၣ်ဒိၣ်မးလီၤ. ¹⁴ အဂ့ၢ်ဒ်အံၤ, အိၣ်ဒီးသိအဖုတဖၣ်, ဒီးဂီၤဘုၣ်ဂီၤဖံးအဖုတဖၣ်, ဒီး အကုၢ်အပှၤအါဒံအါဂၤလီၤ. ဒီးပှၤဖလ့ၡသးဖိသးက့ၣ် အီၤလီၤ. ¹⁵ အဂ့ၢ်ဒ်အံၤ, ကယဲၢ်ထံပူၤလၢအပၢ်အကုၢ် အပှၤခူၣ်လီၤဝဲလၢ အပၢ်စီၤအၤဘြၤဟၣ်အမုၢ်နံၤတဖၣ် ခဲလၢာ်န့ၣ်, ပှၤဖလ့ၡသးဖိမၤတံာ်ဘၢအီၤ, ဒီးမၤပှဲၤ အီၤဒီးဟီၣ်ခိၣ်လီၤ.

¹⁶ ဒီးစီၤအဘံၤမ့လ့းစံးဘၣ် စီၤအံၤစဲး, ဟးထီၣ်ကွံာ် လၢပအိၣ်တက့ၢ်. အဂ့ၢ်ဒ်အံၤ, နဆူၣ်န့ၢ်ပှၤတက့ၢ်ဒိၣ် မးလီၤ.

¹⁷ ဒီးစီၤအံၤစဲးဟးထီၣ်ဖဲန့ၣ်, ဒီးသူၣ်အဒဲလၢကရၢ်အ တၢ်တြိအပူၤ, ဒီးအိၣ်ဝဲဆိးဝဲဖဲန့ၣ်လီၤ. ¹⁸ ဒီးစီၤအံၤစဲး ခူၣ်လီၤကဒီးထံပူၤလၢပှၤခူၣ်လီၤလၢ အပၢ်စီၤအၤဘြၤ ဟၣ်အမုၢ်နံၤတဖၣ်န့ၣ်လီၤ. အဂ့ၢ်ဒ်အံၤ, လၢစီၤအၤ ဘြၤဟၣ်သံအလီၢ်ခံန့ၣ် ပှၤဖလ့ၡသးဖိမၤတံာ်ဘၢအီၤ လီၤ. ဒီးယုၢ်ဝဲအမံၤ ဒ်အမံၤလၢအပၢ်ယုၢ်ဝဲအသိးန့ၣ် လီၤ.

¹⁹ ဒီးစီၤအံၤစဲးအကုၢ်အပှၤခူၣ်လီၤလၢတြိပူၤ, ဒီးထံၣ်န့ၢ် ထံမူတပူၤလီၤ. ²⁰ ဒီးကရၢ်အပှၤကွၢ်တၢ်ဖိအ့ၣ်လိာ်ဆိး က့လိာ်အသးဒီးစီၤအံၤစဲးအပှၤကွၢ်တၢ်ဖိ, ဒီးစံးဝဲဒၣ်, ထံအံၤမ့ၢ်ပတၢ်လီၤ. ဒီးမ့ၢ်အအ့ၣ်လိာ်ဆိးက့လိာ်အသး ဒီးအီၤဒီး, ကိးထံပူၤအမံၤလၢဧ့စ့းလီၤ. ²¹ ဒီးခူၣ်လီၤထံ ပူၤတဂၤတပူၤ, ဒီးအ့ၣ်လိာ်ဆိးက့လိာ်အသးလၢအဝဲ န့ၣ်အဂ့ၢ်စ့ၢ်ကီးလီၤ. ဒီးယုၢ်ဝဲအမံၤလၢစံးတနၤလီၤ.

²² ဒီးဟးထီၣ်ကွံာ်ဖဲန့ၣ်, ဒီးခူၣ်လီၤထံပူၤအဂၤတပူၤ, ဒီးတအ့ၣ်လိာ်ဘၣ်အသး လၢအဝဲန့ၣ်အဂ့ၢ်ဘၣ်. ဒီး ကိးဝဲအမံၤလၢရဃိဘိး, ဒီးစံးဝဲဒၣ်, အဂ့ၢ်ဒ်အံၤ, ခဲ ကနံၣ်အံၤယွၤမၤလံအလီၢ်လၢပဂီၢ်လံ ဒီးပကသၣ်ထီၣ် လၢကီၢ်ပူၤလီၤ. ဒီးလဲၤထီၣ်ဖဲန့ၣ်ဆူဘ့ၢ်ၡဘၤလီၤ. ²³ ဒီးလၢမုၢ်နၤ တနၤန့ၣ်ယွၤလီၣ်ဖျါထီၣ်အသးလၢအီၤ, ဒီးစံးဝဲဒၣ်, ယဲဒၣ်အံၤယမ့ၢ်နပၢ်စီၤအၤဘြၤဟၣ်အကစၢ်လီၤ. ပျံၤ တၢ်တဂ့ၤ. အဂ့ၢ်ဒ်အံၤ, ယအိၣ်ဒီးနၤ, ဒီးယကဆိၣ် ဂ့ၤနၤ, ဒီးမၤအါထီၣ်နချံနသၣ်လၢ ယခ့ယပှၤစီၤအၤ ဘြၤဟၣ်အခိၣ်အဃိလီၤ.

²⁵ ဒီးမၤထီၣ်တၢ်လုၢ်အလီၢ်ဖဲန့ၣ်, ဒီးကိးထီၣ်ယွၤအမံၤ, ဒီးသူၣ်အဒဲဖဲန့ၣ်, ဒီးစီၤအံၤစဲးအကုၢ်အပှၤခူၣ်လီၤထံ ပူၤတပူၤဖဲန့ၣ်လီၤ.

²⁶ ဒီးစီၤအဘံၤမ့လ့းဟဲဆူအအိၣ်လၢကရၢ်, ဒီးအတံၤ အသကိးစီၤအဃူးစး, ဒီးအပှၤသုးမုၢ်အခိၣ်စီၤဖံကိးလး လီၤ. ²⁷ ဒီးစီၤအံၤစဲးစံးဘၣ်အီၤ, ဘၣ်မနုၤလၢသုဟဲဆူ ယအိၣ်လဲၣ်. ဒီးသုသးဟ့ယၤ, ဒီးသုမၢယဟးထီၣ် ကွံာ်လၢသုအိၣ်မးလဲၣ်.

²⁸ ဒီးစံးဝဲဒၣ်, ပထံၣ်လၢယွၤအိၣ်ဒီးနၤသပှၢ်တၢၢ်, ဒီး ပှၤစံး, မ်တၢ်ဆိၣ်လီၤပသးအိၣ်လၢပဘၢၣ်စၢၤ, လၢပှၤ ဒီးနၤအဘၢၣ်စၢၤတက့ၢ်. ဒီးမၤသကိးတၢ်အၢၣ်လီၤအီ လီၤဒီးနၤ, ²⁹ လၢနတမၤအၢဘၣ်ပှၤဘၣ်, ဒ်ပတထိး ဘၣ်နၤဘၣ်အသိး, ဒ်ပမၤနၤထဲတၢ်ဂ့ၤ, ဒီးမၢနလဲၤ တၢ်မုာ်မုာ်အသိးန့ၣ်တက့ၢ်. ခဲကနံၣ်အံၤနမ့ၢ်ပှၤဘၣ် တၢ်ဆိၣ်ဂ့ၤလၢယွၤလီၤ.

³⁰ ဒီးမၤတၢ်အီၣ်တၢ်အီလၢအဂီၢ်, ဒီးအဝဲသ့ၣ်အီၣ်တၢ်, ဒီးအီတၢ်လီၤ. ³¹ ဒီးမုၢ်ဆ့ၣ်ထီၣ်န့ၣ်ဂဲၤဆၢထၢၣ်ဂီၤဂီၤ, ဒီးဆိၣ်လီၤလိာ်အသး သကိးသကိး, ဒီးစီၤအံၤစဲးပျၢ် အီၤ, ဒီးက့ၤထီၣ်ဝဲလၢအအိၣ်မုာ်မုာ်လီၤ.

³² ဒီးတၢ်မၤအသးလၢမုၢ်တနံၤန့ၣ် စီၤအံၤစဲးအကုၢ်အ ပှၤဟဲစံးဘၣ်အီၤလၢ ထံပူၤတပူၤလၢအခူၣ်လီၤတ့ၢ်အ ဂ့ၢ်အကျိၤ, ဒီးစံးဘၣ်အီၤ, ပထံၣ်န့ၢ်လံထံလံ. ³³ ဒီး ယုၢ်ဝဲအမံၤလၢၡဘၤလီၤ. မၤသးဒ်န့ၣ်ဒီး, ဝ့ၢ်အမံၤမ့ၢ် ဘ့ၢ်ၡဘၤတုၤမုၢ်မဆါတနံၤအံၤလီၤ.

³⁴ ဒီးစီၤဧ့ၡီၤအသးပှၢ်တ့ၢ်အနံၣ်လွံၢ်ဆံ, ဒီးန့ၢ်မါလၢပှၤ ဃ့ၤသးဖိစီၤဘအ့ရံၤအဖိမုၣ်နီၢ်ယဟူဒံး, ဒီးပှၤဃ့ၤသး ဖိစီၤအ့လိၣ်အဖိမုၣ် နီၢ်ဘၤစမးလီၤ. ³⁵ ဒီးအဝဲသ့ၣ်မၤ ဆါစီၤအံၤစဲးဒီးနီၢ်ရံးဘကၤအသးလီၤ.

၂၇

¹ ဒီးတုၤစီၤအံၤစဲးအသးပှၢ်တ့ၢ်, ဒီးအမဲာ်ခံးတုၤအတ ထံၣ်ဘၣ်တၢ်ဘၣ်ဒီး, တၢ်မၤအသးလၢအကိးန့ၢ်အဖိ ခွါဝဲၢ်ကိ, စီၤဧ့ၡီၤ, ဒီးစံးဘၣ်အီၤ, ယဖိခွါဧၢ, ဒီးစံး ဘၣ်အီၤ, ကွၢ်ကွၢ်, ယၤလီၤ.

² ဒီးစံးဝဲဒၣ်, ကွၢ်ကွၢ်, ခဲကနံၣ်အံၤယသးပှၢ်တ့ၢ်လံ. ဒီးမုၢ်တနံၤလၢယကသံန့ၣ်ယတသ့ၣ်ညါဘၣ်. ³ ဒီးခဲ ကနံၣ်အံၤဟံးန့ၢ်လၢ်နစုကဝဲၤ, နလၢပီၤ, ဒီးနချံၣ်, ဒီး လဲၤဆူပှၢ်လၢ်ကျါ, ဒီးခးန့ၢ်ယၤလၢဆၣ်ဖိကီၢ်ဖိအမံၤ,

⁴ ဒီးမၤန့ၢ်ယတၢ်အီၣ်လၢအဝံၣ်, တၢ်လၢယအဲၣ်ဒိး, ဒီး ဟဲစိာ်ဆူယအိၣ်တက့ၢ်. ဒီးယကအီၣ်တၢ်ဒ်သိးယသး ကဆိၣ်ဂ့ၤနၤလၢယတချုးသံဒံးဘၣ်လီၤ. ⁵ ဒီးတုၤစီၤအံၤစဲးကတိၤတၢ်ဒီးအဖိခွါစီၤဧ့ၡီၤဒီး, နီၢ်ရံးဘကၤနၢ်ဟူဝဲလီၤ. ဒီးစီၤဧ့ၡီၤလဲၤဝဲဆူပှၢ်လၢ်ကျါဒ်သိး, အကခးန့ၢ်ဆၣ်ဖိကီၢ်ဖိအမံၤဒီးဟဲက့ၤစိာ်ဝဲလီၤ.― ⁶ ဒီးနီၢ်ရံးဘကၤကတိၤတၢ်ဒီးအဖိခွါစီၤယၤကိာ်, ဒီးစံးဝဲဒၣ်, ကွၢ်ကွၢ်, ယနၢ်ဟူနပၢ်ကတိၤတၢ်ဒီးနဝဲၢ်စီၤဧ့ၡီၤ ဒီးစံးဝဲဒၣ်, ဟဲက့ၤစိာ်န့ၢ်ယၤလၢဆၣ်ဖိကီၢ်ဖိအမံၤ,

⁷ ဒီးမၤန့ၢ်ယၤလၢတၢ်အီၣ်အဝံၣ်တက့ၢ်. ဒီးယကအီၣ် တၢ်ဒီးဆိၣ်ဂ့ၤနၤလၢယွၤအမဲာ်ညါလၢ ယတချုးသံဒံး ဘၣ်လီၤ. ⁸ ဒီးခဲကနံၣ်အံၤ, ယဖိခွါဧၢ, ကနၣ်ယက လုၢ်ဒ်ယမၤလိာ်နၤအသိးန့ၣ်တက့ၢ်. ⁹ လဲၤလၢ်ဆူမဲာ် တဲးလဲးတဖုအအိၣ်, ဒီးဟဲက့ၤစိာ်န့ၢ်ယၤလၢမဲာ်တဲးလဲး ဖိအဂ့ၤခံဒုတက့ၢ်. ဒီးယကမၤအီၤလၢတၢ်အီၣ်အဝံၣ်, လၢနပၢ်အဂီၢ်ဒ်အအဲၣ်ဒိးဝဲအသိးန့ၣ်လီၤ. ¹⁰ ဒီးနဘၣ် ဟဲစိာ်ဆူနပၢ်အအိၣ်, ဒီးကအီၣ်တၢ်ဒ်သိးအကဆိၣ်ဂ့ၤ နၤလၢအတချုးသံဒံးဘၣ်လီၤ.

¹¹ ဒီးစီၤယၤကိာ်စံးဘၣ်အမိၢ်နီၢ်ရံးဘကၤ, ကွၢ်ကွၢ်, ယ ဝဲၢ်စီၤဧ့ၡီၤမ့ၢ်ပှၤတဂၤအိၣ်ဒီးအဆူၣ်လီၤ. မ့မ့ၢ်ယၤတဂၤ အံၤယမ့ၢ်ပှၤအဘျ့လီၤ. ¹² ဘၣ်တဘၣ်ယပၢ်ကကလၢၢ် ယၤ, ဒီးယကကဲထီၣ်လၢအမဲာ်ညါဒ်ပှၤလီတၢ်အသိး န့ၣ်, ဒီးယကဒုးဟဲဘၣ်ယလိၤလၢတၢ်ဆိၣ်အၢ, ဒီးတ မ့ၢ်ဘၣ်တၢ်ဆိၣ်ဂ့ၤဘၣ်.

¹³ ဒီးအမိၢ်စံးဘၣ်အီၤ, ယဖိခွါဧၢ, မ်တၢ်ဆိၣ်အၢနၤ န့ၣ်ဘၣ်ယၤတက့ၢ်. ထဲကနၣ်ယကလုၢ်, ဒီးလဲၤဟဲ က့ၤစိာ်န့ၢ်ယၤလၢတၢ်န့ၣ်တက့ၢ်.

¹⁴ ဒီးလဲၤဝဲ, ဒီးမၤန့ၢ်, ဒီးဟဲက့ၤစိာ်ဆူအမိၢ်အအိၣ်, ဒီးအမိၢ်မၤတၢ်အီၣ်လၢအပၢ်အဲၣ်ဒိးလီၤ. ¹⁵ ဒီးနီၢ်ရံးဘ ကၤဟံးန့ၢ်အဖိခွါဝဲၢ်ကိစီၤဧ့ၡီၤအကူအသိး အဂ့ၤလၢအ အိၣ်ဒီးအီၤလၢဟံၣ်ပူၤ, ဒီးဒုးသိးအဖိခွါသဒါ စီၤယၤ ကိာ်လၢအီၤလီၤ. ¹⁶ ဒီးဒုးသိးအစု, ဒီးအကိာ်ဘျ့, ဒီး မဲာ်တဲးလဲးဖိအဖံး, ¹⁷ ဒီးဟ့ၣ်တၢ်အီၣ်အဝံၣ်, ဒီးကိၣ်လၢ အမၤဝဲတဖၣ်န့ၣ်, လၢအဖိခွါစီၤယၤကိာ်အစုပူၤလီၤ.

¹⁸ ဒီးအဝဲဒၣ်ဟဲဆူအပၢ်အအိၣ်, ဒီးစံးဝဲဒၣ်, ယပၢ်ဧၢ, ဒီးစံးဝဲဒၣ်, ကွၢ်ကွၢ်, ယၤလီၤ. ယဖိခွါဧၢ, နမ့ၢ်မ တၤတဂၤလဲၣ်. ¹⁹ ဒီးစီၤယၤကိာ်စံးဘၣ်အပၢ်, ယမ့ၢ်န ဖိဝဲၢ်ကိ, စီၤဧ့ၡီၤလီၤ. ယမၤလံတၢ်ဒ်နမၤလိာ်ယၤအ သိးန့ၣ်လံ. ဂဲၤဆၢထၢၣ်ဆ့ၣ်နီၤအီၣ်လၢ်လၢယဆၣ်ဖိ ကီၢ်ဖိအမံၤ, ဒ်သိးနသးကဆိၣ်ဂ့ၤယၤတက့ၢ်.

²⁰ ဒီးစီၤအံၤစဲးစံးဘၣ်အဖိခွါ, ယဖိခွါဧၢ, နမၤန့ၢ်ချ့ချ့ ထဲအံၤဒ်လဲၣ်. ဒီးစံးဝဲဒၣ်, အဂ့ၢ်ဒ်အံၤ, ယွၤနကစၢ် ဒုးဟဲအီၤဆူယအိၣ်လီၤ.

²¹ ဒီးစီၤအံၤစဲးစံးဘၣ်စီၤယၤကိာ်, သုးဘူးနသးတက့ၢ်. နမ့ၢ်ယဖိခွါစီၤဧ့ၡီၤသပှၢ်တၢၢ်ဧါ နတမ့ၢ်ဘၣ်လဲၣ်န့ၣ်, ယကကလၢၢ်နၤလီၤ.

²² ဒီးစီၤယၤကိာ် သုးဘူးအသးဆူအပၢ် စီၤအံၤစဲးအ အိၣ်, ဒီးကလၢၢ်အီၤ. ဒီးစံးဝဲဒၣ်, တၢ်အကလုၢ်န့ၣ်မ့ၢ် စီၤယၤကိာ်အကလုၢ်လီၤ. မ့မ့ၢ်အစုန့ၣ်မ့ၢ်စီၤဧ့ၡီၤအစု လီၤ. ²³ ဒီးမ့ၢ်အစုအိၣ်ဒီးအဆူၣ် ဒ်အဝဲၢ်စီၤဧ့ၡီၤအစုအ သိးဒီး, တသ့ၣ်ညါနီၣ်ဘၣ်အီၤဘၣ်. ဒီးဆိၣ်ဂ့ၤအီၤလီၤ.

²⁴ ဒီးစံးဝဲဒၣ်, နမ့ၢ်ယဖိခွါစီၤဧ့ၡီၤသပှၢ်တၢၢ်စ့ၢ်ကီးဧါ. ဒီးစံးဝဲဒၣ်, ယၤလီၤ. ²⁵ ဒီးစံးဝဲဒၣ်, ဟဲက့ၤစိာ်ဘူးဒီး ယၤ, ဒီးယကအီၣ်လၢယဖိခွါအဆၣ်ဖိကီၢ်ဖိအမံၤန့ၣ် ဒ်သိးယသးကဆိၣ်ဂ့ၤနၤလီၤ. ဒီးစိာ်ဘူးဝဲဒီးအီၤ, ဒီး အီၣ်ဝဲလီၤ. ဒီးဟဲစိာ်စပံးထံ, ဒီးအီဝဲလီၤ.

²⁶ ဒီးအပၢ်စီၤအံၤစဲးစံးဘၣ်အီၤ, သုးဘူးလၢ်နသးဆူယ အိၣ်, ဒီးနၢမူယၤတက့ၢ်, ယဖိခွါဧၢ. ²⁷ ဒီးအဝဲဒၣ်သုး ဘူးအသးဆူအအိၣ်ဒီးနၢမူအီၤလီၤ. ဒီးနၢဝဲလၢအကူ အသိးအစိ, ဒီးဆိၣ်ဂ့ၤဝဲ, ဒီးစံးဝဲဒၣ်, ကွၢ်, ယဖိခွါ အစိအံၤမ့ၢ်ဒ်ဟီၣ်ခိၣ်တကဝီၤလၢ ယွၤဆိၣ်ဂ့ၤအီၤအစိ အသိးန့ၣ်လီၤ. ²⁸ ဒီးမ်ယွၤဟ့ၣ်လီၤနၤလၢမူခိၣ်အပစီၤ ထံ, ဒီးဟီၣ်ခိၣ်အသိ, ဒီးဘုဧိၤဟုဧိၤ, ဒီးစပံးထံစပံး နိအါအါကလဲာ်တက့ၢ်. ²⁹ မ်ပှၤဂီၢ်မုၢ်တဖၣ်မၤနတၢ်, ဒီးပှၤကလုာ်တဖၣ် သကူးလီၤအသး လၢနမဲာ်ညါတ က့ၢ်. မ်နကဲထီၣ်နဒီပုၢ်ဝဲၢ်တဖၣ်အကစၢ်ဒီး နမိၢ်အဖိ ခွါတဖၣ် သကူးလီၤအသးလၢနမဲာ်သၣ်အပူၤတက့ၢ်. ပှၤလၢအဆိၣ်အၢနၤန့ၣ်, မ်အဘၣ်တၢ်ဆိၣ်အၢအီၤတ က့ၢ်. ဒီးပှၤလၢအဆိၣ်ဂ့ၤနၤန့ၣ်, မ်အဘၣ်တၢ်ဆိၣ်ဂ့ၤ အီၤတက့ၢ်.

³⁰ ဒီးတုၤစီၤအံၤစဲးဆိၣ်ဂ့ၤ စီၤယၤကိာ်ဝံၤဒီးစီၤယၤကိာ် ဟးထီၣ်လၢအပၢ်စီၤအံၤစဲးအအိၣ်အဖၢမုၢ်န့ၣ်ဒီး, တၢ် မၤအသးလၢအဝဲၢ် စီၤဧ့ၡီၤဟဲက့ၤလၢ အလဲၤခးတၢ် လီၤ. ³¹ ဒီးအဝဲတဂၤန့ၣ်မၤစ့ၢ်ကီးလံတၢ်အီၣ်လၢအဝံၣ်, ဒီးဟဲက့ၤစိာ်ဆူအပၢ်အအိၣ်, ဒီးစံးဘၣ်အပၢ်, မ်ယ ပၢ်ဂဲၤဆၢထၢၣ်, ဒီးအီၣ်တၢ်လၢအဖိခွါအဆၣ်ဖိကီၢ်ဖိ အမံၤ, ဒ်သိးနသးကဆိၣ်ဂ့ၤယၤတက့ၢ်.

³² ဒီးအပၢ်စီၤအံၤစဲးစံးဘၣ်အီၤ, နမ့ၢ်မတၤတဂၤလဲၣ်. ဒီးစံးဘၣ်အီၤ, ယမ့ၢ်နဖိခွါ, နဖိခွါဝဲၢ်ကိစီၤဧ့ၡီၤလီၤ.

³³ ဒီးစီၤအံၤစဲးကနိးဝဲနးနးကလဲာ်ဒီးစံးဝဲဒၣ်, မ့ၢ်မတၤတ ဂၤလဲၣ်. ပှၤလၢအခးန့ၢ်ဆၣ်ဖိကီၢ်ဖိအမံၤ, ဒီးဟဲစိာ် ဆူယအိၣ်လၢနတချုးဟဲဒံးဘၣ်, ဒီးယအီၣ်တၢ်လၢ အီၤခဲလၢာ်, ဒီးယဆိၣ်ဂ့ၤလံအီၤတဂၤန့ၣ်မ့ၢ်အအိၣ်ဖဲ လဲၣ်. မ့ၢ်မးကဘၣ်တၢ်ဆိၣ်ဂ့ၤလီၤ.

³⁴ ဒီးတုၤစီၤဧ့ၡီၤနၢ်ဟူအပၢ်အတၢ်ကတိၤန့ၣ်ဒီး, ကဲး ကိးပသူထီၣ်ဖးဒိၣ်နးနးကလဲာ်, ဒီးစံးဘၣ်အပၢ်, ဆိၣ် ဂ့ၤယၤ, ယၤစ့ၢ်ကီးတက့ၢ်, ပၢ်ဧၢ.

³⁵ ဒီးစံးဝဲဒၣ်, နပုၢ်ဟဲဝဲဒီးလီတၢ်, ဒီးဟံးန့ၢ်ကွံာ်လံန တၢ်ဆိၣ်ဂ့ၤန့ၣ်လံ. ³⁶ ဒီးစံးဝဲဒၣ်, အမံၤယၤကိာ်ကြၢး ဒီးအီၤတမ့ၢ်ဘၣ်ဧါ. အဂ့ၢ်ဒ်အံၤ, ခွီၣ်ဘျီယၤခံစုလံ. ဟံးန့ၢ်ကွံာ်ယဝဲၢ်ကိအလီၢ်, ဒီးကွၢ်ကွၢ်, ခဲကနံၣ်အံၤ ဟံးန့ၢ်ကွံာ်လံယတၢ်ဆိၣ်ဂ့ၤလံ. ဒီးစံးဝဲဒၣ်, နတပာ် လီၤတဲာ်တၢ်ဆိၣ်ဂ့ၤတမံၤလၢယဂီၢ်ဘၣ်ဧါ.

³⁷ ဒီးစီၤအံၤစဲးစံးဆၢတၢ်, ဒီးစံးဘၣ်စီၤဧ့ၡီၤ, ကွၢ်ကွၢ်, ယပာ်အီၤလၢနကစၢ်, ဒီးအဒီပုၢ်ဝဲၢ်ခဲလၢာ်န့ၣ်, ယ ဟ့ၣ်အီၤလၢအကုၢ်အပှၤ, ဒီးယဒုးအိၣ်ကျၢၤအီၤဒီးဘု ဧိၤဟုဧိၤ, ဒီးစပံးထံစပံးနိလီၤ. ဒီးခဲကနံၣ်အံၤယက မၤလၢနဂီၢ်မနုၤတမံၤလဲၣ်, ယဖိခွါဧၢ.

³⁸ ဒီးစီၤဧ့ၡီၤစံးဘၣ်အပၢ်, နအိၣ်ဒီးတၢ်ဆိၣ်ဂ့ၤထဲတမံၤ ဧိၤဧါ, ယပၢ်ဧၢ, ဆိၣ်ဂ့ၤယၤ, ယၤစ့ၢ်ကီးတက့ၢ်, ယပၢ် ဧၢ, ဒီးစီၤဧ့ၡီၤထုထီၣ်အကလုၢ်, ဒီးအမဲာ်ထံလီၤဝဲလီၤ.

³⁹ ဒီးအပၢ်စီၤအံၤစဲးစံးဆၢတၢ်, ဒီးစံးဘၣ်အီၤ, ကွၢ် ကွၢ်, နအိၣ်နဆိးအလီၢ် ကမ့ၢ်လၢဟီၣ်ခိၣ်အသိ, ဒီး မူခိၣ်လၢထးခီအပစီၤထံန့ၣ်လီၤ. ⁴⁰ ဒီးနကမူလၢနနး ဒီးနကမၤနပုၢ်အတၢ်လီၤ. ဒီးတုၤနဟးထီၣ်ကွံာ်ဒီး, တၢ် ကမၤအသးလၢ နကမၤကၢ်ကွံာ် အနီၣ်ယိးဘိလၢန ကိာ်ချၢဃံလီၤ.

⁴¹ ဒီးစီၤဧ့ၡီၤသးဟ့စီၤယၤကိာ်လၢ တၢ်ဆိၣ်ဂ့ၤလၢအ ပၢ်ဆိၣ်ဂ့ၤအီၤအဃိလီၤ. ဒီးစီၤဧ့ၡီၤစံးလၢအသးကံၢ်ပူၤ, မုၢ်နံၤတဖၣ်လၢပဟီၣ်လၢပပၢ်အဃိန့ၣ် အိၣ်ဘူးတ့ၢ် လံ, ဒီးယကမၤသံယပုၢ်စီၤယၤကိာ်လီၤ.

⁴² ဒီးအဖိခွါဝဲၢ်ကိအတၢ်ကတိၤန့ၣ်, ပှၤစံးဘၣ်တဲဘၣ် နီၢ်ရံးဘကၤလီၤ. ဒီးမၢပှၤလဲၤကိးန့ၢ်အဖိခွါသဒါစီၤ ယၤကိာ်, ဒီးစံးဘၣ်အီၤ, ကွၢ်ကွၢ်, နဝဲၢ်စီၤဧ့ၡီၤမၤမုာ် အသးလၢနဂ့ၢ်လၢအကမၤသံနၤလီၤ. ⁴³ ဒီးခဲကနံၣ်အံၤ ယဖိခွါဧၢ, ကနၣ်ယကလုၢ်တက့ၢ်. ဒီးဂဲၤဆၢထၢၣ်, ဒီးဃ့ၢ်ဆူယဒီပုၢ်ဝဲၢ်ခွါစီၤလၤဘၣ်အအိၣ်လၢဟၤရၣ်အ ပူၤ, ⁴⁴ ― ဒီးအိၣ်ဒီးအီၤမုၢ်နံၤတနီၤနီၤတုၤနဝဲၢ်အသးဒိၣ်န့ၣ် ဃၣ်ကွံာ်လၢနအိၣ်, ⁴⁵ ― ဒီးတုၤအသးပ့ၤနီၣ်တၢ်လၢနမၤ တ့ၢ်အီၤန့ၣ်တက့ၢ်. တုၤနုၤတစုယကမၢပှၤလဲၤဟဲက့ၤ စိာ်နၤဖဲန့ၣ်လီၤ. သုကဟါမၢ်သဒၣ်ကွံာ်ယၤခံဂၤလိာ် တနံၤဃီန့ၣ်, မ့ၢ်အဘၣ်မနုၤလဲၣ်.

⁴⁶ ဒီးနီၢ်ရံးဘကၤစံးဘၣ်စီၤအံၤစဲး, တၢ်ဘှံးယသးလၢ ယသးသမူအဃိ, လၢပှၤဃ့ၤသးဖိအဖိမုၣ်အဂ့ၢ်အကျိၤ လီၤ. စီၤယၤကိာ်မ့ၢ်န့ၢ်မါလၢပှၤဃ့ၤသးဖိအဖိမုၣ်, ပှၤ ဒ်အံၤအသိး, ပှၤကီၢ်ဖိအံၤဒီး, ယသးသမူအံၤမ့ၢ်အဂိာ် မနုၤလဲၣ်.

၂၈

¹ ဒီးစီၤအံၤစဲးကိးန့ၢ်စီၤယၤကိာ်ဒီးဆိၣ်ဂ့ၤအီၤ, ဒီးမၤ လိာ်အီၤ, ဒီးစံးဘၣ်အီၤ, န့ၢ်မါလၢပှၤကနၤဧၣ်ဖိအဖိ မုၣ်တဂ့ၤ. ² ဂဲၤဆၢထၢၣ်လဲၤဆူကီၢ်ပၤဒနါရၣ်, ဆူန မိၢ်အပၢ်စီၤဘသူၤအ့လးအဟံၣ်ပူၤ, ဒီးန့ၢ်နမါလၢနမိၢ် အဒီပုၢ်ဝဲၢ်ခွါ စီၤလၤဘၣ်အဖိမုၣ်အကျါဖဲန့ၣ်တက့ၢ်.―

³ ဒီးယွၤလၢအသ့တၢ်လၢာ်န့ၣ်မ်အဆိၣ်ဂ့ၤနၤ, ဒီးဒုးသၣ် ထီၣ်နၤ, ဒီးမၤအါထီၣ်နၤ, ဒီးဒုးကဲထီၣ်နၤလၢပှၤဂီၢ် မုၢ်တဖၣ်အတၢ်အိၣ်ဖှိၣ်တဖု, ⁴ ဒီးဟ့ၣ်လီၤတၢ်ဆိၣ်ဂ့ၤ ဘၣ်ဃးဒီး စီၤအၤဘြၤဟၣ်လၢနၤ, ဒီးလၢနချံနသၣ် အိၣ်ဒီးနၤ, ဒ်သိးနကန့ၢ်သါကီၢ်လၢနအိၣ်တမှံၤလၢအ ပူၤ, လၢယွၤဟ့ၣ်လီၤစီၤအၤဘြၤဟၣ်န့ၣ်တက့ၢ်.

⁵ ဒီးစီၤအံၤစဲးမၢစီၤယၤကိာ်လဲၤတၢ်, ဒီးလဲၤဝဲဆူပၤဒ နါရၣ်, ဆူပှၤစူၤရံဖိစီၤယၤကိာ်ဒီးစီၤဧ့ၡီၤအမိၢ်နီၢ်ရံးဘ ကၤအဒီပုၢ်ဝဲၢ် စီၤဘသူၤအ့လးအဖိခွါ စီၤလၤဘၣ်အ အအိၣ်လီၤ.

⁶ ဒီးစီၤဧ့ၡီၤထံၣ်ဝဲလၢစီၤအံၤစဲးဆိၣ်ဂ့ၤစီၤယၤကိာ်, ဒီး မၢအလဲၤဝဲဆူပၤဒနါရၣ်လၢအကန့ၢ်မါဖဲန့ၣ်, ဒီးဖဲအ ဆိၣ်ဂ့ၤအီၤန့ၣ်မၤလိာ်ဝဲ, ဒီးစံးဝဲဒၣ်, န့ၢ်နမါလၢပှၤက နၤဧၣ်ဖိအဖိမုၣ်တဂ့ၤန့ၣ်, ⁷ ဒီးစီၤယၤကိာ်ကနၣ်အမိၢ် အပၢ်အကလုၢ်, ဒီးလဲၤဝဲဆူပၤဒနါရၣ်လီၤ. ⁸ ဒီစီၤဧ့ ၡီၤထံၣ်ဝဲလၢပှၤကနၤဧၣ်ဖိအဖိမုၣ် တဘၣ်ဘၣ်အပၢ် စီၤအံၤစဲးအသးဘၣ်, ⁹ ဒီးစီၤဧ့ၡီၤလဲၤဆူစီၤယံးၡမၤဧ့ လးအအိၣ်, ဒီးပာ်ဖှိၣ်ဒီးအမါလၢအအိၣ်တ့ၢ်တဖၣ်လၢ စီၤအၤဘြၤဟၣ်အဖိခွါစီၤယံးၡမၤဧ့လးအဖိမုၣ်, စီၤန ဘါယိးအဒီပုၢ်ဝဲၢ်မုၣ်, နီၢ်မၤဃလးလီၤ.

¹⁰ ဒီးစီၤယၤကိာ်ဟးထီၣ်လၢဘ့ၢ်ၡဘၤ, ဒီးလဲၤဝဲဆူဟၤ ရၣ်လီၤ. ¹¹ ဒီးဘၣ်လၢတၢ်အလီၢ်တပူၤ, ဒီးအိၣ်ဝဲဖဲန့ၣ် သီတနၤကျၢၤလီၤ. အဂ့ၢ်ဒ်အံၤ, မုၢ်လီၤနုာ်တ့ၢ်လံ. ဒီး ဟံးန့ၢ်လၢၢ်တဖျၢၣ်လၢတၢ်အလီၢ်တပူၤန့ၣ်, ဒီးပာ်ဝဲ လၢအခိၣ်တခၢၣ်, ဒီးမံနီၤလၢတၢ်အလီၢ်တပူၤန့ၣ်လီၤ.

¹² ဒီးမံမီၢ်တၢ်ဒီးကွၢ်ကွၢ်, ဃီတဆိအိၣ်ဆၢထၢၣ်လၢ ဟီၣ်ခိၣ်ချၢ, ဒီးအခိၣ်ထီၣ်ဘးလၢမူခိၣ်လီၤ. ဒီးကွၢ် ကွၢ်, ယွၤအကလူးတဖၣ်လဲၤထီၣ်, ဒီးဟဲလီၤလၢအ လိၤလီၤ. ¹³ ဒီးကွၢ်ကွၢ်, ယွၤအိၣ်ဆၢထၢၣ်လၢအခိၣ်, ဒီးစံးဝဲဒၣ်, ယဲဒၣ်အံၤယမ့ၢ်ယွၤ, စီၤအၤဘြၤဟၣ်နပၢ် အကစၢ်, ဒီးစီၤအံၤစဲးအကစၢ်လီၤ. ကီၢ်လၢနမံလၢအ လၢအဖီခိၣ်တဘ့ၣ်အံၤယကဟ့ၣ်လီၤနၤ, ဒီးနချံနသၣ် လီၤ. ¹⁴ ဒီးနချံနသၣ်န့ၣ်ကမၤသးဒ်ဟီၣ်ခိၣ်အကမူၣ်အ သိးန့ၣ်, ဒီးနကပြံထီၣ်ပြါထီၣ်ဆူမုၢ်နုာ်, ဒီးဆူမုၢ်ထီၣ်, ဒီးဆူကလံၤစိး, ဒီးဆူကလံၤထံး, ဒီးကယဲၢ်ပှၤဟီၣ် ခိၣ်အဒူၣ်တဖၣ်ကဘၣ်တၢ်ဆိၣ်ဂ့ၤလၢနၤ, ဒီးလၢနချံ နသၣ်အပူၤခဲလၢာ်လီၤ. ¹⁵ ဒီးကွၢ်ကွၢ်, ယအိၣ်ဒီးနၤ, ဒီးဖဲဒၣ်နလဲၤတၢ်တပူၤလၢ်လၢ်န့ၣ် ယကအံးက့ၤကွၢ် က့ၤနၤ, ဒီးယကဒုးဟဲက့ၤကဒါက့ၤနၤဆူကီၢ်တဘ့ၣ် အံၤလီၤ. အဂ့ၢ်ဒ်အံၤ, ယတလဲၤသဒၣ်ဘၣ်နၤတုၤယ မၤတၢ်လၢယစံးဘၣ်နၤလီၤ.

¹⁶ ဒီးစီၤယၤကိာ်ဖုသံနီၣ်ထီၣ်ဒီးစံးဝဲဒၣ်, မ့ၢ်မးယွၤအိၣ် ဝဲလၢတၢ်အလီၢ်တပူၤအံၤ, ဒီးယတသ့ၣ်ညါဘၣ်ယဲ ဘၣ်. ¹⁷ ဒီးပျံၤဝဲ, ဒီးစံးဝဲဒၣ်, တၢ်အလီၢ်တပူၤအံၤမ့ၢ် တၢ်ပျံၤအလီၢ်ဆံးဒိၣ်လဲၣ်. အဝဲအံၤတမ့ၢ်ဘၣ်တၢ်ဂၤ ဘၣ်, မ့ၢ်ယွၤအဟံၣ်ဒီးအဝဲအံၤမ့ၢ်မူခိၣ်အပဲတရီလီၤ.

¹⁸ ဒီးမုၢ်ဆ့ၣ်ထီၣ်န့ၣ်စီၤယၤကိာ်ဂဲၤဆၢထၢၣ်ဂီၤဂီၤ, ဒီးဟံး န့ၢ်လၢၢ်တဖျၢၣ်လၢအပာ်လၢအခိၣ်တခၢၣ်န့ၣ်, ဒီးပာ် ဆၢထၢၣ်အီၤလၢထူၣ်တထူၣ်, ဒီးလူလီၤသိလၢအဖီခိၣ် လီၤ. ¹⁹ ဒီးယုၢ်အလီၢ်တပူၤန့ၣ်အမံၤလၢဘ့ၤသ့လးလီၤ. ဘၣ်ဆၣ်ဒီး ဝ့ၢ်တဖျၢၣ်အမံၤလၢအခီၣ်ထံးန့ၣ်မ့ၢ်လူးစး လီၤ.

²⁰ ဒီးစီၤယၤကိာ်ဆိၣ်လီၤအသး, ဒီးစံးဝဲဒၣ်, ယွၤမ့ၢ် အိၣ်ဒီးယၤ, ဒီးမ့ၢ်အံးက့ၤကွၢ်က့ၤယၤလၢကျဲပူၤလၢယ ပိာ်အံၤ, ဒီးမ့ၢ်ဟ့ၣ်လီၤယၤလၢကိၣ်လၢယအီၣ်, ဒီး တၢ်ကူတၢ်သိးလၢယကကူကသိး, ²¹ ဒီးယဟဲက့ၤကဒါ က့ၤမုာ်မုာ်တုၤလၢယပၢ်အဟံၣ်ပူၤဒီး, ယွၤကကဲထီၣ် ယကစၢ်လီၤ. ²² ဒီးလၢၢ်တဖျၢၣ်လၢယပာ်ဆၢထၢၣ်လၢ ထူၣ်တထူၣ်အံၤကကဲထီၣ်ယွၤအဟံၣ်, ဒီးကယဲၢ်တၢ် လၢနဟ့ၣ်လီၤယၤတမံၤလၢ်လၢ်န့ၣ် ယကဟ့ၣ်နၤလၢ ဆံဆဲၣ်ပူတပူသပှၢ်တၢၢ်လီၤ.

၂၉

¹ ဒီးစီၤယၤကိာ်ထွဲထီၣ်အခီၣ်, ဒီးလဲၤတုၤလၢ ပှၤမုၢ် ထီၣ်ဖိအကီၢ်ပူၤလီၤ. ² ဒီးကွၢ်ဝဲ, ဒီးကွၢ်ကွၢ်, ထံပူၤ အိၣ်ဝဲတပူၤလၢပျီပူၤ, ဒီးကွၢ်ကွၢ်, ဖဲန့ၣ်သိဒီးမဲာ်တဲး လဲးသၢဖုကိာ်လီၤလၢအဃၢၤန့ၣ်လီၤ. အဂ့ၢ်ဒ်အံၤ, ပှၤ ဒုးအီသိဒီးမဲာ်တဲးလဲးအထံ, လၢထံပူၤန့ၣ်လီၤ. ဒီး လၢၢ်ဖးဒိၣ်တဖျၢၣ်အိၣ်ဝဲလၢထံပူၤအခိၣ်ထိးလီၤ. ³ ဒီး သိဒီးမဲာ်တဲးလဲးအိၣ်ဖှိၣ်ရိဖှိၣ်ဖဲန့ၣ်ခဲလၢာ်ဒီး ပှၤတလ့ၣ် ကွံာ်လၢၢ်န့ၣ်လၢထံပူၤအခိၣ်ထိး, ဒီးဒုးအီသိဒီးမဲာ်တဲး လဲးအထံ, ဒီးတလ့ၣ်ကဒါက့ၤလၢၢ်ဆူအလီၢ်ဒၣ်ဝဲလၢ ထံပူၤအခိၣ်ထိးလီၤ.

⁴ ဒီးစီၤယၤကိာ်စံးဘၣ်အီၤ, ယဒီပုၢ်ဝဲၢ်ဧၢ, သုဟဲလၢ လဲၣ်. ဒီးစံးဝဲဒၣ်, လၢဟၤရၣ်ပဝဲလီၤ.

⁵ ဒီးစံးဘၣ်အီၤ, စီၤနၤဃိၢ်အဖိခွါစီၤလၤဘၣ်န့ၣ်သု သ့ၣ်ညါအီၤစ့ၢ်ကီးဧါ. ဒီးစံးဝဲဒၣ်, ပသ့ၣ်ညါသၢၣ်.

⁶ ဒီးစံးဘၣ်အီၤ, မ့ၢ်အအိၣ်မုာ်စ့ၢ်ကီးဧါ. ဒီးစံးဝဲဒၣ်, အိၣ်မုာ်, ဒီးကွၢ်ကွၢ်, အဖိမုၣ်နီၢ်ရၤဃ့လးဟဲဝဲဒီးသိ ဒီးမဲာ်တဲးလဲးန့ၣ်လီၤ.

⁷ ဒီးစံးဝဲဒၣ်, ကွၢ်ကွၢ်, မုၢ်အိၣ်ဒံးဖးထီ, ဒီးအဆၢအ ကတီၢ်လၢ ပှၤဒုးအိၣ်ဖှိၣ်ဆၣ်ဖိကီၢ်ဖိအဒၢ တဘၣ်ဒံး ဘၣ်. ဒုးအီသိဒီးမဲာ်တဲးလဲးအထံ, ဒီးလဲၤဒုးအီၣ်အ ဆၣ်တက့ၢ်.

⁸ ဒီးစံးဝဲဒၣ်, ကယဲၢ်သိဒီးမဲာ်တဲးလဲးခဲလၢာ် တချုး အိၣ်ဖှိၣ်ဒံးဘၣ်, ဒီးတချုးပှၤတလ့ၣ်ကွံာ်ဒံးဘၣ်လၢၢ် လၢထံပူၤအခိၣ်ထိးဘၣ်ဒီး, ပမၤတသ့ဘၣ်. တုၤအ န့ၣ်တစု ပဒုးအီသိတဖၣ်အထံလီၤ.

⁹ ဒီးကတိၤဝဲဒီးအီၤအဖၢမုၢ်ဒီး, နီၢ်ရၤဃ့လးဟဲဒီးအပၢ် အသိဒီးမဲာ်တဲးလဲးလီၤ. အဂ့ၢ်ဒ်အံၤ, အဝဲဒၣ်ကွၢ်အီၤ လီၤ.

¹⁰ ဒီးတုၤစီၤယၤကိာ်ထံၣ်ဘၣ် အမိၢ်အဒီပုၢ်ဝဲၢ်ခွါစီၤလၤ ဘၣ်အဖိမုၣ်နီၢ်ရၤဃ့လး, ဒီးအမိၢ်အဒီပုၢ်ဝဲၢ်ခွါစီၤလၤ ဘၣ်အသိဒီးမဲာ်တဲးလဲးဒီး, တၢ်မၤအသးလၢစီၤယၤ ကိာ်သုးဘူးအသး, ဒီးတလ့ၣ်ကွံာ်လၢၢ်လၢထံပူၤအ ခိၣ်ထိး, ဒီးဒုးအီအမိၢ်အဒီပုၢ်ဝဲၢ်ခွါ, စီၤလၤဘၣ်အသိ ဒီးမဲာ်တဲးလဲးအထံန့ၣ်လီၤ.

¹¹ ဒီးစီၤယၤကိာ်နၢမူနီၢ်ရၤဃ့လး, ဒီးထုထီၣ်အကလုၢ်, ဒီးအမဲာ်ထံလီၤဝဲလီၤ. ¹² ဒီးစီၤယၤကိာ်စံးဘၣ်တဲဘၣ် နီၢ်ရၤဃ့လးလၢသါဒီပုၢ်ဒီဝဲၢ်ဒီးအပၢ်, ဒီးလၢသါမ့ၢ်နီၢ် နီၢ်ရံးဘကၤအဖိခွါလီၤ. ဒီးအဝဲဒၣ်ဃ့ၢ်စံးဘၣ်က့ၤအ ပၢ်လီၤ.

¹³ ဒီးတုၤစီၤလၤဘၣ်နၢ်ဟူအဒီပုၢ်ဝဲၢ်မုၣ်အဖိခွါ စီၤယၤ ကိာ်အကစီၣ်ဒီး, တၢ်မၤအသးလၢအဃ့ၢ်သဂၢၢ်အီၤ, ဒီးဖိးအီၤ, ဒီးနၢမူအီၤဒီးဆှၢအီၤဆူအဟံၣ်လီၤ. ဒီးအ ဝဲဒၣ်စံၣ်တဲၤတဲလီၤ စီၤလၤဘၣ်လၢ တၢ်တဖၣ်န့ၣ်ခဲ လၢာ်လီၤ.

¹⁴ ဒီးစီၤလၤဘၣ်စံးဘၣ်အီၤ, မ့ၢ်မးနမ့ၢ်ယဃံဒီးယညၣ် လီၤ. ဒီးအိၣ်ဝဲဒီးအီၤတလါအမုၢ်နံၤတဖၣ်လီၤ.

¹⁵ ဒီးစီၤလၤဘၣ်စံးဘၣ်စီၤယၤကိာ်, မ့ၢ်နမ့ၢ်ယဒီပုၢ်ဝဲၢ် ဒီး, နဂ့ၤမၤယတၢ်ကလီကလီစ့ၢ်ကီးဧါ. နဘူးနလဲ မ့ၢ်မနုၤမနုၤလဲၣ်န့ၣ်စံးဘၣ်ယၤတက့ၢ်.

¹⁶ ဒီးစီၤလၤဘၣ်အိၣ်ဒီးအဖိမုၣ်ခံဂၤလီၤ. အဒိၣ်တဂၤ အမံၤမ့ၢ်နီၢ်လ့ၤအၤ, ဒီးအဆံးတဂၤအမံၤမ့ၢ် နီၢ်ရၤဃ့ လးလီၤ. ¹⁷ ဒီးနီၢ်လ့အၤန့ၣ်အမဲာ်ဖ့လီၤ. မ့မ့ၢ်နီၢ်ရၤဃ့ လးတဂၤန့ၣ်အိၣ်ဒီးအဃံအလၤ, ဒီးအက့ၢ်အဂီၤဂ့ၤလီၤ.

¹⁸ ဒီးစီၤယၤကိာ်အဲၣ်နီၢ်ရၤဃ့လး, ဒီးစံးဝဲဒၣ်, ယကမၤ နတၢ်နွံနံၣ်လၢနီၢ်ရၤဃ့လး, နဖိမုၣ်အဆံးတဂၤအဂီၢ် လီၤ. ¹⁹ ဒီးစီၤလၤဘၣ်စံးဝဲဒၣ်, ယဟ့ၣ်အီၤလၢနၤန့ၣ်ဂ့ၤ န့ၢ်ယဟ့ၣ်အီၤလၢပှၤဂၤတက့ၢ်လီၤ. အိၣ်ဒီးယၤတက့ၢ်.

²⁰ ဒီးစီၤယၤကိာ်မၤတၢ်နွံနံၣ်လၢနီၢ်ရၤဃ့လးအဂီၢ်, ဒီး အိၣ်ဝဲလၢအမဲာ်ညါ ဒ်စှၤနံၤစှၤသီအသိး, လၢအအဲၣ် အီၤအဃိလီၤ.

²¹ ဒီးစီၤယၤကိာ်စံးဘၣ်စီၤလၤဘၣ်, ဟ့ၣ်ယမါတက့ၢ်. အဂ့ၢ်ဒ်အံၤ, ယမုၢ်နံၤတဖၣ်လၢထီၣ်ပှဲၤထီၣ်လံ. ဒီးယ ကလဲၤနုာ်ဆူအအိၣ်လီၤ.

²² ဒီးစီၤလၤဘၣ်ဒုးအိၣ်ဖှိၣ်ရိဖှိၣ် ပှၤကညီအိၣ်ဝဲလၢအ လီၢ်တပူၤန့ၣ်ခဲလၢာ်, ဒီးမၤတၢ်အီၣ်တၢ်အီလီၤ. ²³ ဒီး တၢ်မၤအသးလၢမုၢ်နၤန့ၣ်, လၢအဟံးန့ၢ်အဖိမုၣ်နီၢ်လ့ၤ အၤ, ဒီးဆှၢဝဲဆူအအိၣ်, ဒီးအဝဲဒၣ်လဲၤနုာ်ဆူအအိၣ် လီၤ. ²⁴ ဒီးစီၤလၤဘၣ်ဟ့ၣ်အကုၢ်ပိာ်မုၣ်နီၢ်စံၤလပၤ, လၢ အဖိမုၣ်နီၢ်လ့ၤအၤလၢအကုၢ်ပိာ်မုၣ်အဂီၢ်လီၤ.

²⁵ ဒီးတၢ်မၤအသးလၢမုၢ်ဆ့ၣ်ထီၣ်န့ၣ်, ကွၢ်ကွၢ်, မ့ၢ် နီၢ်လ့ၤအၤလီၤ. ဒီးအဝဲဒၣ်စံးဘၣ်စီၤလၤဘၣ်, တၢ်လၢ နမၤယၤမ့ၢ်မနုၤလဲၣ်. ယမၤနတၢ်လၢနီၢ်ရၤဃ့လးအဂီၢ် တမ့ၢ်ဘၣ်ဧါ. ဒီးနလီန့ၢ်ယၤမ့ၢ်အဘၣ်မနုၤလဲၣ်. ²⁶ ဒီးစီၤလၤဘၣ်စံးဝဲဒၣ်, ဟ့ၣ်ဆိပှၤအဆံးလၢအဝဲၢ်ကိအမဲာ်ညါန့ၣ်, တမၤဘၣ်ဘၣ်လၢပလီၢ်တပူၤအံၤဘၣ်.―

²⁷ မၤပှဲၤထီၣ် အဝဲတဂၤန့ၣ်အတနွံတက့ၢ်. ဒီးပကဟ့ၣ် အီၤစ့ၢ်ကီးလၢနၤလၢ နမၤတၢ်လၢနကမၤဒီးယၤနွံနံၣ် အဂၤတဖၣ်အဃိလီၤ.

²⁸ ဒီးစီၤယၤကိာ်မၤဝဲဒ်န့ၣ်, ဒီးမၤပှဲၤထီၣ်အဝဲတဂၤန့ၣ် အတနွံ, ဒီးအဝဲဒၣ်ဟ့ၣ်အီၤလၢအဖိမုၣ်နီၢ်ရၤဃ့လးလၢ အမါစ့ၢ်ကီးလီၤ. ²⁹ ဒီးစီၤလၤဘၣ်ဟ့ၣ်အကုၢ်ပိာ်မုၣ်နီၢ် ဘံၤလဟၤလၢအဖိမုၣ် နီၢ်ရၤဃ့လးအကုၢ်ပိာ်မုၣ်အဂီၢ် လီၤ.

³⁰ ဒီးလဲၤနုာ်ဝဲစ့ၢ်ကီးဆူနီၢ်ရၤဃ့လးအအိၣ်, ဒီးအဲၣ်စ့ၢ် ကီးနီၢ်ရၤဃ့လးဒိၣ်န့ၢ်နီၢ်လ့အၤတက့ၢ်, ဒီးမၤကဒီးအ တၢ်နွံနံၣ်တဂၤတဖၣ်ဒီးအီၤလီၤ.

³¹ ဒီးယွၤထံၣ်ဝဲလၢနီၢ်လ့ၤအၤ ဘၣ်တၢ်သးဟ့အီၤ, ဒီး အိးထီၣ်အဒၢလီၢ်လီၤ. မ့မ့ၢ်နီၢ်ရၤဃ့လး မ့ၢ်ပှၤတူာ်ဖိ လီၤ.

³² ဒီးနီၢ်လ့ၤအၤဒၢထီၣ်, ဒီးဆံးစၢ်န့ၢ်အဖိခွါလီၤ. ဒီး ယုၢ်အမံၤလၢစီၤရူၤဘ့ၣ်လီၤ. အဂ့ၢ်ဒ်အံၤ, စံးဝဲဒၣ်, ယွၤ ကွၢ်က့ၤယတၢ်နးတၢ်ဖှီၣ်လီၤ. အဂ့ၢ်ဒ်အံၤ, ခဲကနံၣ် အံၤယဝၤကအဲၣ်ယၤလီၤ.

³³ ဒီးဒၢထီၣ်ကဒီးတစု, ဒီးဆံးစၢ်န့ၢ်အဖိခွါ, ဒီးစံးဝဲ ဒၣ်, မ့ၢ်ယွၤနၢ်ဟူလၢယဘၣ်တၢ်သးဟ့ယၤဒီး, ဟ့ၣ် လီၤယၤလၢအဝဲအံၤစ့ၢ်ကီးလီၤ. ဒီးယုၢ်အမံၤလၢစီၤစူၤ မ့းအိၣ်လီၤ.

³⁴ ဒီးဒၢထီၣ်ကဒီးတစု, ဒီးဆံးစၢ်န့ၢ်အဖိခွါ, ဒီးစံးဝဲ ဒၣ်, အအံၤတဘျီယဝၤကဘျုးအသးဒီးယၤလၢယဆံး စၢ်န့ၢ်အဖိခွါသၢဂၤအဃိလီၤ. မၤသးဒ်န့ၣ်ဒီးယုၢ်ဝဲအ မံၤလၢစီၤလ့ၤဝံလီၤ.

³⁵ ဒီးဒၢထီၣ်ကဒီးတစု, ဒီးဆံးစၢ်န့ၢ်အဖိခွါ, ဒီးစံးဝဲ ဒၣ်, ခဲကနံၣ်အံၤယကစံးထီၣ်ပတြၢၤယွၤလီၤ. မၤသး ဒ်န့ၣ်ဒီး ယုၢ်ဝဲအမံၤလၢစီၤယူဒၤလီၤ. ဒီးဆံးစၢ်န့ၢ်တၢ် တၢ်န့ၣ်ဆိတ့ၢ်ဝဲလီၤ.

၃၀

¹ ဒီးနီၢ်ရၤဃ့လးထံၣ်ဘၣ်ဝဲလၢ အတဆံးစၢ်န့ၢ်ဘၣ် အဖိလၢစီၤယၤကိာ်အဂီၢ်ဘၣ်. ဒီးနီၢ်ရၤဃ့လးန့ၣ်သး က့ၣ်အဒီပုၢ်ဝဲၢ်မုၣ်, ဒီးစံးဘၣ်စီၤယၤကိာ်, ဟ့ၣ်ယၤ လၢဖိတဖၣ်တက့ၢ်. မ့တမ့ၢ်ဘၣ်ဒီးယမ့ၢ်တၢ်သံလီၤ.

² ဒီးစီၤယၤကိာ်သးထီၣ်နီၢ်ရၤဃ့လး, ဒီးစံးဝဲဒၣ်, ယဲ ဒၣ်အံၤ, ယအိၣ်လၢယွၤအလီၢ်, လၢအတြီဃာ်ဒၢလီၢ် အတၤသၣ်ဒီးနၤဧါ.

³ ဒီးစံးဝဲဒၣ်, ကွၢ်ကွၢ်, ယကုၢ်ပိာ်မုၣ်နီၢ်ဘံၤလဟၤ တဂၤအံၤ, လဲၤနုာ်ဆူအအိၣ်တက့ၢ်. ဒီးကဆံးစၢ်န့ၢ် ဝဲလၢယခီၣ်လ့ၢ်ခိၣ်အဖီခိၣ်, ဒီးယကန့ၢ်ဘၣ်ယဖိစ့ၢ် ကီးလၢအီၤလီၤ.

⁴ ဒီးဟ့ၣ်အီၤလၢအကုၢ်ပိာ်မုၣ် နီၢ်ဘံၤလဟၤလၢအမါ, ဒီးစီၤယၤကိာ်လဲၤနုာ်ဆူအအိၣ်လီၤ. ⁵ ဒီးနီၢ်ဘံၤလဟၤ န့ၢ်ဒၢထီၣ်, ဒီးဆံးစၢ်န့ၢ်အဖိခွါလၢစီၤယၤကိာ်အဂီၢ် လီၤ.

⁶ ဒီးနီၢ်ရၤဃ့လးစံးဝဲဒၣ်, ယွၤစံၣ်ညီၣ်ယကွီၢ်, ဒီးက နၣ်စ့ၢ်ကီးယကလုၢ်, ဒီးဟ့ၣ်လီၤယၤလၢယဖိခွါလီၤ. မၤသးဒ်န့ၣ်ဒီး ယုၢ်ဝဲအမံၤလၢစီၤဒၣ်လီၤ.

⁷ ဒီးနီၢ်ရၤဃ့လးအကုၢ်ပိာ်မုၣ်နီၢ်ဘံၤလဟၤန့ၣ်ဒၢထီၣ် ကဒီးတစု, ဒီးဆံးစၢ်န့ၢ်အဖိခွါခံဂၤတဂၤ လၢစီၤယၤ ကိာ်အဂီၢ်လီၤ.

⁸ ဒီးနီၢ်ရၤဃ့လးစံးဝဲဒၣ်, ယကနိဒီးယဒီပုၢ်ဝဲၢ်မုၣ်လၢ ယွၤအတၢ်ကနိတဖၣ်, ဒီးယမၤနၢၤတၢ်လီၤ. ဒီးယုၢ်ဝဲ အမံၤလၢစီၤနးသၤလံလီၤ.

⁹ ဒီးနီၢ်လ့ၤအၤထံၣ်ဝဲလၢအဆံးစၢ်န့ၢ်တၢ်န့ၣ်ဆိတ့ၢ်ဝဲ, ဒီးဟံးန့ၢ်အကုၢ်ပိာ်မုၣ်နီၢ်စံၤလပၤ ဒီးဟ့ၣ်အီၤလၢစီၤ ယၤကိာ်လၢအမါလီၤ.

¹⁰ ဒီးနီၢ်လ့ၤအၤအကုၢ်ပိာ်မုၣ် နီၢ်စံၤလပၤန့ၣ်ဆံးစၢ်န့ၢ် အဖိခွါလၢစီၤယၤကိာ်အဂီၢ်လီၤ. ¹¹ ဒီးနီၢ်လ့ၤအၤစံးဝဲ ဒၣ်, ပှၤတဖု, ဒီးယုၢ်အမံၤလၢစီၤကးလီၤ.

¹² ဒီးနီၢ်လ့ၤအၤအကုၢ်ပိာ်မုၣ် နီၢ်စံၤလပၤဆံးစၢ်န့ၢ်အဖိ ခွါလၢစီၤယၤကိာ်အဂီၢ်ခံဂၤတဂၤလီၤ. ¹³ ဒီးနီၢ်လ့ၤအၤ စံးဝဲဒၣ်, ယဘၣ်တၢ်အမုာ်လီၤ. အဂ့ၢ်ဒ်အံၤ, ပှၤပိာ် မုၣ်တဖၣ်ကကိးယၤလၢ ပှၤဘၣ်တၢ်အမုာ်လီၤ. ဒီး ယုၢ်ဝဲအမံၤလၢစီၤအၤရှ့ၢ်လီၤ.

¹⁴ ဒီးကူးဘုကၠူၣ်အမုၢ်နံၤတဖၣ်န့ၣ် စီၤရူၤဘ့ၣ်လဲၤတၢ်, ဒီးထံၣ်န့ၢ်ဒူးဒးသၣ်လၢပျီပူၤ, ဒီးဟဲက့ၤစိာ်ဝဲဆူအမိၢ် နီၢ်လ့ၤအၤအအိၣ်လီၤ. ဒီးနီၢ်ရၤဃ့လးစံးဘၣ် နီၢ်လ့ၤ အၤ, ဟ့ၣ်စာ်ယၤလၢနဖိခွါအဒူးဒးသၣ်တနီၤတက့ၢ်.

¹⁵ ဒီးစံးဘၣ်အီၤ, နဟံးထီၣ်ကွံာ်ယဝၤန့ၣ်မ့ၢ်တၢ်အဆံး ဧါ, ဒီးနကဟံးထီၣ်ကွံာ်စ့ၢ်ကီးယဖိခွါအဒူးဒးသၣ်ဧါ. ဒီးနီၢ်ရၤဃ့လးစံးဝဲဒၣ်, အဂ့ၢ်မ့ၢ်ဒ်န့ၣ်ဒီးကမံဃုာ်ဒီးနၤ ခဲမုၢ်နၤအံၤလၢနဖိခွါအဒူးဒးသၣ်အဃိလီၤ.

¹⁶ ဒီးလၢမုၢ်ဟါန့ၣ်စီၤယၤကိာ် ဟဲက့ၤထီၣ်လၢပျီပူၤ, ဒီးနီၢ်လ့ၤအၤလဲၤသဂၢၢ်အီၤ, ဒီးစံးဝဲဒၣ်, နဘၣ်ဟဲဆူ ယအိၣ်လီၤ. အဂ့ၢ်ဒ်အံၤ, ယမၢလဲနၤလၢယဖိခွါအဒူး ဒးသၣ်လီၤ. ဒီးမံဃုာ်ဝဲဒီးအီၤလၢမုၢ်နၤန့ၣ်လီၤ.

¹⁷ ဒီးယွၤကနၣ်နီၢ်လ့ၤအၤအကလုၢ်, ဒီးအဝဲဒၣ်ဒၢထီၣ် ဝဲ, ဒီးဆံးစၢ်န့ၢ်အဖိခွါလၢစီၤယၤကိာ်အဂီၢ် ယဲၢ်ဂၤတ ဂၤလီၤ. ¹⁸ ဒီးနီၢ်လ့ၤအၤစံးဝဲဒၣ်, ယွၤဟ့ၣ်လီၤယၤလၢ ယဘူးယလဲလၢ ယဟ့ၣ်ယကုၢ်ပိာ်မုၣ်လၢယဝၤအဃိ လီၤ. ဒီးယုၢ်ဝဲအမံၤလၢစီၤယံးစၣ်ကၢ်လီၤ.

¹⁹ ဒီးနီၢ်လ့ၤအၤဒၢထီၣ်ကဒီးတစု, ဒီးဆံးစၢ်န့ၢ်အဖိခွါ လၢစီၤယၤကိာ်အဂီၢ်ဃုဂၤတဂၤလီၤ. ²⁰ ဒီးနီၢ်လ့ၤအၤစံး ဝဲဒၣ်, ယွၤနီၤဟ့ၣ်ယၤလၢတၢ်နီၤဟ့ၣ်အဂ့ၤလီၤ. ခဲက နံၣ်အံၤယဝၤကအိၣ်ဃုာ်ဒီးယၤ လၢယဆံးစၢ်န့ၢ်အဖိ ခွါဃုဂၤအဃိလီၤ. ဒီးယုၢ်ဝဲအမံၤလၢစီၤစဘူလိၣ်လီၤ.

²¹ လၢခံက့ၤဒီးဆံးစၢ်န့ၢ်အဖိမုၣ်တဂၤ, ဒီးယုၢ်ဝဲအမံၤ လၢနီၢ်ဒံနၤလီၤ.

²² ဒီးယွၤသ့ၣ်နီၣ်ထီၣ်က့ၤနီၢ်ရၤဃ့လး, ဒီးယွၤကနၣ်အ ကလုၢ်, ဒီးအိးထီၣ်အဒၢလီၢ်န့ၣ်လီၤ. ²³ ဒီးအဝဲဒၣ်ဒၢထီၣ် ဒီးဆံးစၢ်န့ၢ်အဖိခွါ, ဒီးစံးဝဲဒၣ်, ယွၤမၤပူၤမၤဖျဲးယၤဒီးတၢ် ဒုၣ်ဒွဲၣ်ယၤလီၤ. ²⁴ ဒီးယုၢ်ဝဲအမံၤလၢ စီၤယိၤသးလီၤ. ဒီးစံးဝဲဒၣ်, ယွၤကဟ့ၣ်ဒံးယၤလၢဖိခွါအဂၤတဂၤလီၤ.

²⁵ ဒီးနီၢ်ရၤဃ့လးဆံးစၢ်န့ၢ်စီၤယိၤသးဝံၤဒီး, တၢ်မၤအ သးလၢစီၤယၤကိာ်စံးဘၣ်စီၤလၤဘၣ်, ပျၢ်ယၤဒ်သိးယ ကက့ၤက့ၤဆူယလီၢ်ဒၣ်ယဲ, ဒီးဆူယကီၢ်ဒၣ်ယဲန့ၣ်တ က့ၢ်. ²⁶ ဟ့ၣ်ယၤလၢယမါသ့ၣ်, ဒီးယဖိသ့ၣ်တဖၣ်လၢ ယမၤနတၢ်လၢအဃိ, ဒီးဒုးဟးထီၣ်ယၤတက့ၢ်. အဂ့ၢ် ဒ်အံၤ, နသ့ၣ်ညါယမၤတၢ်လၢယမၤလၢနဂီၢ်လီၤ.

²⁷ ဒီးစီၤလၤဘၣ်စံးဘၣ်အီၤ, ယဘၣ်ဘျုးဘၣ်ဖှိၣ်လၢန မဲာ်ညါစ့ၢ်ကီးဧါ. ယဖးတၢ်ဒီးယသ့ၣ်ညါလၢယွၤဆိၣ် ဂ့ၤယၤလၢနဃိလီၤ. ²⁸ ဒီးစံးဝဲဒၣ်, ပာ်နဘူးနလဲဒီးယ ကဟ့ၣ်ယဲလီၤ.

²⁹ ဒီးစံးဘၣ်အီၤ, ယမၤနတၢ်, ဒီးနဆၣ်ဖိကီၢ်ဖိအဒၢ အိၣ်ဒီးယၤ ဒ်လဲၣ်ဒ်လဲၣ်န့ၣ်နသ့ၣ်ညါလီၤ. ³⁰ အဂ့ၢ်ဒ် အံၤ, လၢယတချုးဟဲဒံးဘၣ်န့ၣ်နတၢ်အိၣ်ဝဲစှၤမးလီၤ. ဒီးဖျိးထီၣ်လံအါအါကလဲာ်လံ. ဒီးယွၤဆိၣ်ဂ့ၤနၤလၢ ယခီၣ်အဃိလီၤ. ဒီးခဲကနံၣ်အံၤယကမၤစ့ၢ်ကီးလၢယ ဟံၣ်ဒၣ်ယဲအဂီၢ်အကတီၢ်ဖဲလဲၣ်.

³¹ ဒီးစံးဘၣ်အီၤ, ယဘၣ်ဟ့ၣ်နၤလၢမနုၤတမံၤလဲၣ်. ဒီး စီၤယၤကိာ်စံးဘၣ်အီၤ, နတဘၣ်ဟ့ၣ်ယၤလၢတၢ်နီတ မံၤဘၣ်. နမ့ၢ်မၤတၢ်အံၤတမံၤလၢယဂီၢ်ဒီး, ယကကွၢ်, ဒီးပၢၤကဒီးနသိဒီးမဲာ်တဲးလဲးလီၤ.

³² တၢ်လၢမုၢ်မဆါတနံၤအံၤ ယကလဲၤခီတူာ်နသိဒီး မဲာ်တဲးလဲးခဲလၢာ်, ဒီးဟီထီၣ်ကွံာ်ဖဲန့ၣ်ကယဲၢ်ဆၣ်ဖိ ကီၢ်ဖိလၢအကံၣ်စံၣ်ဘှဲ, ဒီးကံၣ်ဖျၢၣ်သလၢၣ်တဒုလၢ် လၢ်, ဒီးကယဲၢ်ဆၣ်ဖိကီၢ်ဖိလၢအဃး လၢသိတဖၣ် အကျါ, တဒုလၢ်လၢ်, ဒီးတၢ်လၢအကံၣ်ဖျၢၣ်သလၢၣ်, ဒီးကံၣ်စံၣ်ဘှဲလၢမဲာ်တဲးလဲးအကျါန့ၣ်လီၤ. ဒီးတၢ်န့ၣ် ကမ့ၢ်ယဘူးယလဲလီၤ. ³³ ဒီးတုၤနဟဲလီၤလၢယဘူးယ လဲအဂ့ၢ်ဒီး, ယတၢ်တီတၢ်လိၤကအုၣ်အသးလၢယဂီၢ် လၢမုၢ်တနံၤခဲကိာ်န့ၣ်လီၤ. ကယဲၢ်တၢ်လၢအတကံၣ် စံၣ်ဘှဲဘၣ်, ဒီးတကံၣ်ဖျၢၣ်သလၢၣ်ဘၣ်လၢမဲာ်တဲးလဲး အကျါ, ဒီးတဃးဘၣ်လၢသိအကျါဘၣ်န့ၣ်, ကကဲ ထီၣ်တၢ်ဟုၣ်တၢ်ဒီးယၤလီၤ.

³⁴ ဒီးစီၤလၤဘၣ်စံးဝဲဒၣ်, ကွၢ်ကွၢ်, မ်တၢ်မၤအသးဒ် နကလုၢ်အသိးန့ၣ်တက့ၢ်.

³⁵ ဒီးတၢ်လၢမုၢ်နံၤန့ၣ်ဟီထီၣ်ကွံာ် မဲာ်တဲးလဲးအဖါလၢ အကံၣ်တပလူာ်တပလူာ်, ဒီးကံၣ်ဖျၢၣ်သလၢၣ်, ဒီး ကယဲၢ်မဲာ်တဲးလဲးအမိၢ်လၢအကံၣ်စံၣ်ဘှဲ, ဒီးကံၣ်ဖျၢၣ် သလၢၣ်, ဒီးကယဲၢ်တၢ်လၢအအိၣ်ဒီးတၢ်အဝါလၢအ လိၤ, ကယဲၢ်တၢ်လၢအဃးလၢသိအကျါခဲလၢာ်, ဒီး ဟ့ၣ်ဝဲလၢအဖိခွါတဖၣ်အစုပူၤလီၤ. ³⁶ ဒိးပာ်သၢသီကျဲ လၢအကစၢ်ဒၣ်ဝဲဒီးစီၤယၤကိာ်အဘၢၣ်စၢၤလီၤ. ဒီးစီၤ ယၤကိာ်ကွၢ်စီၤလၤဘၣ်အသိဒီးမဲာ်တဲးလဲး လၢအအိၣ် လီၤတဲာ်တဖၣ်န့ၣ်လီၤ.

³⁷ ဒီးစီၤယၤကိာ်ဟံးန့ၢ်နီၣ်ဘိလၢ သ့ၣ်လံးဘန့ၤအသံ ကစဲာ်, ဒီးလၢသ့ၣ်လူးစး, ဒီးလၢသ့ၣ်ဧၢ်မိၣ်, ဒီးကုၣ် လီၤအဘိဝါလၢအလိၤ, ဒီးဒုးအိၣ်ဖျါထီၣ်တၢ်အဝါလၢ အလိၤလီၤ. ³⁸ ဒီးတုၤသိဒီးမဲာ်တဲးလဲးတဖၣ်ဟဲအီထံဒီး, ပာ်နီၣ်ဘိလၢအကုၣ်လီၤတဖၣ်လၢနီၣ်အီထံအပူၤ, လၢ ကျိးဧိၤကျးဧိၤအပူၤ လၢသိဒီးမဲာ်တဲးလဲးတဖၣ် အမဲာ် ညါ, ဒီးတုၤအဟဲအီထံဒီး, ဒၢထီၣ်လီၤ.

³⁹ ဒီးသိဒီးမဲာ်တဲးလဲးတဖၣ် ဒၢထီၣ်လၢနီၣ်ဘိတဖၣ်အ မဲာ်ညါ, ဒီးဖှံလီၤသိဒီးမဲာ်တဲးလဲးတဖၣ်လၢအကံၣ်တပ လူာ်တပလူာ်, ကံၣ်စံၣ်ဘှဲ, ဒီးကံၣ်ဖျၢၣ်သလၢၣ်လီၤ.

⁴⁰ ဒီးစီၤယၤကိာ်နီၤဖးသိဖိတဖၣ်, ဒီးပာ်သိဒီးမဲာ်တဲး လဲးသ့ၣ်တဖၣ်အမဲာ်ဆူ တၢ်လၢအကံၣ်တပလူာ်တပ လူာ်, ဒီးကယဲၢ်အဃးလၢစီၤလၤဘၣ်အသိဒီးမဲာ်တဲး လဲးအကျါလီၤ. ဒီးပာ်အဆၣ်ဖိကီၢ်ဖိအဖုဒၣ်ဝဲတဖၣ် လၢတၢ်တပူၤဒၣ်, ဒီးတပာ်ဘၣ်တပူၤဃီဒီးစီၤလၤဘၣ် အသိဒီးမဲာ်တဲးလဲးတဖၣ်ဘၣ်. ⁴¹ ဒီးဖဲဒၣ်တၢ်အဂံၢ်ဆူၣ်အဘါဆူၣ်တဖၣ် ဒၢထီၣ်ဝဲတဘျီလၢ်လၢ်န့ၣ်တၢ်မၤအသးလၢ စီၤယၤကိာ်ပာ်နီၣ်ဘိတဖၣ်လၢကျိးဧိၤကျးဧိၤအပူၤ လၢသိဒီးမဲာ်တဲးလဲးအမဲာ်ညါဒ်သိးအကဒၢထီၣ်လၢနီၣ်ဘိတဖၣ်အကျါလီၤ.―

⁴² မ့မ့ၢ်ဘၣ်လၢတၢ်အဂံၢ်စၢ်ဘါစၢ်ဒီး, တပာ်ဘၣ်ဝဲလၢ အပူၤဘၣ်. မၤသးဒ်န့ၣ်ဒီး တၢ်လၢအဂံၢ်စၢ်ဘါစၢ်တ ဖၣ်န့ၣ် မ့ၢ်စီၤလၤဘၣ်အတၢ်, ဒီးတၢ်လၢအဂံၢ်ဆူၣ်အ ဘါဆူၣ်န့ၣ်မ့ၢ်စီၤယၤကိာ်အတၢ်လီၤ.

⁴³ ဒီးတၢ်လၢပှၤတဂၤန့ၣ် ဖျိးထီၣ်အါအါကလဲာ်, ဒီး အိၣ်ဒီးသိဒီးမဲာ်တဲးလဲးအါဖု, ဒီးကုၢ်ပိာ်မုၣ်, ဒီးကုၢ် ပိာ်ခွါ, ဒီးကီၤလၤအူး, ဒီးကသ့ၣ်ယီၤသ့ၣ်တဖၣ်လီၤ.

၃၁

¹ ဒီးနၢ်ဟူဝဲလၢစီၤလၤဘၣ်အဖိခွါတဖၣ် အတၢ်ကတိၤ လၢအစံးဝဲ, စီၤယၤကိာ်ဟံးန့ၢ်ကွံာ်ကယဲၢ်တၢ်လၢအ အိၣ်ဒီးပပၢ်, ဒီးမ့ၢ်တၢ်လၢအအိၣ်တ့ၢ်ဒီးပပၢ်သတးဒီး, န့ၢ်ဘၣ်တၢ်လၤကပီၤအံၤခဲလၢာ်လီၤ. ² ဒီးစီၤယၤကိာ် ကွၢ်စီၤလၤဘၣ်အမဲာ်, ဒီးထံၣ်ဝဲလၢအတဘၣ်အမဲာ်ဒ် လၢမဟါမဟိအသိးန့ၣ်ဘၣ်လီၤ.

³ ဒီးယွၤစံးဘၣ်စီၤယၤကိာ်, က့ၤကဒါက့ၤဆူနပၢ်တ တဖၣ်အကီၢ်, ဒီးဆူနဘူးနတံၢ်အအိၣ်န့ၣ်တက့ၢ်. ဒီး ယကအိၣ်ဒီးနၤလီၤ.

⁴ ဒီးစီၤယၤကိာ်မၢပှၤလဲၤကိးန့ၢ် နီၢ်ရၤဃ့လး, ဒီးနီၢ် လ့ၤအၤဆူပျီပူၤ, ဆူအသိဒီးမဲာ်တဲးလဲးအအိၣ်, ⁵ ဒီး စံးဘၣ်အီၤ, ယကွၢ်သုပၢ်အမဲာ်လၢအတဘၣ်ယၤဒ်လၢ မဟါမဟိအသိးန့ၣ်ဘၣ်. ဘၣ်ဆၣ်ဒီးယပၢ်အကစၢ် န့ၣ်အိၣ်တ့ၢ်ဒီးယၤလီၤ. ⁶ ဒီးသုသ့ၣ်ညါလၢယမၤသုပၢ် အတၢ်လၢယဂံၢ်ယဘါခဲလၢာ်လီၤ. ⁷ ဒီးသုပၢ်န့ၢ်လီန့ၢ် ယၤ, ဒီးလဲက့ၤလံယဘူးယလဲဆံဆဲၣ်ဘျီလံ. ဘၣ် ဆၣ်ဒီးယွၤတဟ့ၣ်အမၤအၢဘၣ်ယၤနီတမံၤဘၣ်. ⁸ အ ဝဲဒၣ်မ့ၢ်စံးဒ်အံၤ, တၢ်ကံၣ်စံၣ်ဘှဲကကဲထီၣ်နဘူးနလဲ န့ၣ်ဒီး, သိဒီးမဲာ်တဲးလဲးတဖၣ်ဆံးစၢ်တၢ်ကံၣ်စံၣ်ဘှဲဒီ ဖုညါလီၤ. မ့ၢ်စံးဒ်အံၤ, တၢ်ကံၣ်တပလူာ်တပလူာ်က ကဲထီၣ်နဘူးနလဲန့ၣ်ဒီး, သိဒီးမဲာ်တဲးလဲးတဖၣ်ဆံးစၢ် တၢ်ကံၣ်တပလူာ်တပလူာ်ဒီဖုညါလီၤ.

⁹ ဒီးယွၤထုးထီၣ်ကွံာ်သုပၢ်အဆၣ်ဖိကီၢ်ဖိအဒၢ, ဒီး ဟ့ၣ်လၢယၤလီၤ. ¹⁰ ဒီးတၢ်ဆၢကတီၢ်လၢသိဒီးမဲာ်တဲး လဲးတဖၣ်ဒၢထီၣ်ဒီး, တၢ်မၤအသးလၢယကျ့ထီၣ်ယ မဲာ်, ဒီးယထံၣ်တၢ်လၢယတၢ်မံမီၢ်အပူၤ, ဒီးကွၢ်ကွၢ်, မဲာ်တဲးလဲးဖါတဖၣ်လၢအစံၣ်ထီၣ်လၢ မဲာ်တဲးလဲးတ ဖၣ်အလိၤန့ၣ်, မ့ၢ်အကံၣ်တပလူာ်တပလူာ်, ကံၣ်စံၣ် ဘှဲ, ဒီးကံၣ်စံၣ်ပိၣ်လီၤ.

¹¹ ဒီးယွၤအကလူးစံးဘၣ်ယၤလၢတၢ်မံမီၢ်အပူၤ, ဒီးစံး ဝဲဒၣ်, စီၤယၤကိာ်ဧၢ, ဒီးယစံး, ကွၢ်ကွၢ်, ယၤလီၤ. ¹² ဒီးအဝဲဒၣ်စံး, ကျ့ထီၣ်နမဲာ်, ဒီးကွၢ်, ကယဲၢ်မဲာ်တဲး လဲးဖါလၢအစံၣ်ထီၣ်လၢ မဲာ်တဲးလဲးတဖၣ်အလိၤန့ၣ် မ့ၢ်အကံၣ်တပလူာ်တပလူာ်, ကံၣ်စံၣ်ဘှဲ, ကံၣ်စံၣ် ပိၣ်ခဲလၢာ်လီၤ. အဂ့ၢ်ဒ်အံၤ, တၢ်လၢစီၤလၤဘၣ်မၤနၤ န့ၣ်ယထံၣ်ခဲလၢာ်လံ. ¹³ ယမ့ၢ်ဘ့ၤသ့လးအကစၢ်, ဖဲ နဖှူတၢ်အထူၣ်တထူၣ်, ဖဲနဆိၣ်တၢ်ဆိၣ်ဒီးယၤလီၤ. ခဲကနံၣ်အံၤ, ဂဲၤဆၢထၢၣ်, ဟးထီၣ်ကွံာ်လၢကီၢ်ပူၤ အံၤ, ဒီးက့ၤကဒါက့ၤဆူနဘူးနတံၢ်အကီၢ်တက့ၢ်.

¹⁴ ဒီးနီၢ်ရၤဃ့လး, ဒီးနီၢ်လ့ၤအၤစံးဆၢတၢ်, ဒီးစံးက့ၤ အီၤ, တၢ်လၢပဂီၢ်, ဒီးတၢ်လၢပကန့ၢ်သါန့ၣ်အိၣ်ဒံးလၢ ပပၢ်အဟံၣ်ပူၤစ့ၢ်ကီးဧါ. ¹⁵ အဝဲဒၣ်ပာ်ပှၤဒ်ပှၤတခီဘီမုၢ် ဖိအသိးန့ၣ်တမ့ၢ်ဘၣ်ဧါ. အဂ့ၢ်ဒ်အံၤ, ဆါကွံာ်ပှၤ, ဒီး အီၣ်ကွံာ်စ့ၢ်ကီးပစ့လၢာ်စီဖ့ကလ့ၤလီၤ. ¹⁶ အဂ့ၢ်ဒ်အံၤ, ကယဲၢ်တၢ်အစုလီၢ်အခီၣ်ခိၣ်လၢ ယွၤထုးထီၣ်ကွံာ်လၢ ပပၢ်န့ၣ်မ့ၢ်ပတၢ်, ဒီးပဖိပလံၤအတၢ်လီၤ. ဒီးခဲကနံၣ် အံၤ, ကယဲၢ်တၢ်လၢယွၤစံးဘၣ်နၤခဲလၢာ်န့ၣ် မၤတက့ၢ်.

¹⁷ ဒီးစီၤယၤကိာ်ဂဲၤဆၢထၢၣ်, ဒီးပာ်အဖိခွါ, ဒီးအမါ သ့ၣ်တဖၣ်လၢကီၤလၤအူးအခိၣ်, ¹⁸ ဒီးဆှၢထီၣ်ကွံာ်အ ဆၣ်ဖိကီၢ်ဖိအဒၢခဲလၢာ်, ဒီးကယဲၢ်အတၢ်ဖိတၢ်လံၤ လၢအန့ၢ်ဘၣ်, ဆၣ်ဖိကီၢ်ဖိအဒၢလၢအန့ၢ်တ့ၢ်, လၢ အန့ၢ်ဘၣ်ဝဲလၢ ပၤဒနါရၣ်အပူၤ, ဒ်သိးအကလဲၤဆူ အပၢ်စီၤအံၤစဲးအအိၣ်လၢကီၢ်ကနၤဧၣ်အပူၤလီၤ.

¹⁹ ဒီးစီၤလၤဘၣ် လဲၤတံာ်သိအဆူၣ်, ဒီးနီၢ်ရၤဃ့လး ဟုၣ်န့ၢ်တ့ၢ်အပၢ်အတၢ်ဂီၤတရၤဖးလီၤ.

²⁰ ဒီးစီၤယၤကိာ်ဟုၣ်န့ၢ် ပှၤစူၤရံဖိ စီၤလၤဘၣ်အသး လီၤ. အဂ့ၢ်ဒ်အံၤ, တစံးဘၣ်အီၤလၢအဃ့ၢ်န့ၣ်ဘၣ်. ²¹ ဒီးဃ့ၢ်အဝဲဒၣ်ဒီး ကယဲၢ်တၢ်လၢအအိၣ်ဒီးအီၤ, ဒီးဂဲၤ ဆၢထၢၣ်, ဒီးခီဂာ်ထံမိၢ်ပှၢ်, ဒီးဒိးအမဲာ်ဆူကစၢၢ်ကံး လဧးလီၤ.

²² ဒီးသၢနံၤတနံၤန့ၣ်, ပှၤစံးဘၣ်စီၤလၤဘၣ်လၢစီၤယၤ ကိာ်ဃ့ၢ်လံန့ၣ်လီၤ. ²³ ဒီးဟံးန့ၢ်အဒီပုၢ်ဝဲၢ်တဖၣ်ဒီးအီၤ, ဒီးလူၤပိာ်အခံနွံသီကျဲ, ဒီးချုးန့ၢ်အီၤလၢကစၢၢ်ကံးလ ဧးအလိၤလီၤ.

²⁴ ဒီးယွၤဟဲဆူပှၤစူၤရံဖိ စီၤလၤဘၣ်အအိၣ်လၢတၢ်မံမီၢ် အပူၤလၢမုၢ်နၤ, ဒီးစံးဘၣ်အီၤ, ပလီၢ်နသးဒ်သိးနသု တစံးတၢ်လၢစီၤယၤကိာ်လၢတၢ်ဂ့ၤ ပၢၢ်လၢတၢ်အၢန့ၣ် နီတမံၤတဂ့ၤ.

²⁵ ဒီးစီၤလၤဘၣ်ချုးန့ၢ် စီၤယၤကိာ်လီၤ. ဒီးစီၤယၤကိာ် သူၣ်လီၤလံအဒဲလၢကစၢၢ်အလိၤန့ၣ်, ဒီးစီၤလၤဘၣ်ဒီး အဒီပုၢ်ဝဲၢ်သူၣ်လီၤဝဲလၢကစၢၢ်ကံးလဧးအလိၤလီၤ.

²⁶ ဒီးစီၤလၤဘၣ်စံးဘၣ်စီၤယၤကိာ်, နမၤဒ်လဲၣ်. နဟုၣ် န့ၢ်ယသး, ဒီးမိၤထီၣ်ကွံာ်ယဖိမုၣ်တဖၣ် ဒ်ပှၤလၢပှၤ ဖီၣ်န့ၢ်အီၤလၢနးအသိးမးလဲၣ်. ²⁷ နဃ့ၢ်ခူသူၣ်, ဒီးန ဟးထီၣ်ကစုဒု, ဒီးနတစံးဘၣ်ယၤဒ်သိးယကပျၢ်နၤဒီး တၢ်သးခု, ဒီးတၢ်သးဝံၣ်, ဒီးဒၢဧိၤတြၤဧိၤ, ဒီးတနၢ် တဖီန့ၣ်မ့ၢ်အဘၣ်မနုၤလဲၣ်. ²⁸ ဒီးနတဒုးနၢမူဘၣ်ယၤ လၢယဖိခွါ, ဒီးယဖိမုၣ်သ့ၣ်တဖၣ်န့ၣ်မးလဲၣ်. ခဲက နံၣ်အံၤနမၤပှၤဟးဂီၤဖိအတၢ်မၤလီၤ. ²⁹ တၢ်အစိအက မီၤအိၣ်လၢယစုပူၤလၢယမၤအၢမၤနးသုသ့လီၤ. ဘၣ် ဆၣ်ဒီး သုပၢ်အကစၢ်ကတိၤတၢ်ဒီးယၤလၢမုၢ်နၤတနၤ န့ၣ်ဒီးစံးဝဲဒၣ်, ပလီၢ်နသးဒ်သိး နသုတကတိၤတၢ်ဒီး စံးဘၣ်စီၤယၤကိာ်လၢတၢ်ဂ့ၤပၢၢ်လၢတၢ်အၢန့ၣ်တဂ့ၤ.

³⁰ ဒီးခဲကနံၣ်အံၤမ့ၢ်နသးသယုၢ်ဘၣ် နပၢ်အဟံၣ်ဒိၣ်မး ဒီး, က့ၤဒီးနကက့ၤက့ၤလီၤ. နဟုၣ်န့ၢ်ယကစၢ်တဖၣ် န့ၣ်မ့ၢ်အဘၣ်မနုၤလဲၣ်.

³¹ ဒီးစီၤယၤကိာ်စံးဆၢတၢ်, ဒီးစံးဘၣ်စီၤလၤဘၣ်, မ့ၢ် ယပျံၤတၢ်အဂ့ၢ်လီၤ. အဂ့ၢ်ဒ်အံၤ, ယစံး, နကဂုာ်ဆူၣ် န့ၢ်ဘၣ်ဖုးနဖိမုၣ်တဖၣ်လၢယၤလီၤ. ³² ပှၤလၢနထံၣ်န့ၢ် နကစၢ်တဖၣ်အိၣ်ဒီးအီၤတဂၤန့ၣ်, မ်အသုတမူတဂ့ၤ. လၢပဒီပုၢ်ဝဲၢ်အမဲာ်ညါအံၤ ကွၢ်နီၣ်တၢ်လၢအမ့ၢ်နတၢ် အိၣ်ဒီးယၤ, ဒီးဟံးန့ၢ်လၢနဂီၢ်တက့ၢ်. ဒီးစီၤယၤကိာ် တသ့ၣ်ညါဘၣ်ဝဲလၢနီၢ်ရၤဃ့လးဟုၣ်န့ၢ်အီၤဘၣ်.

³³ ဒီးစီၤလၤဘၣ်လဲၤနုာ်ဝဲလၢစီၤယၤကိာ်အဒဲပူၤ, ဒီးလၢ နီၢ်လ့ၤအၤအဒဲပူၤ, ဒီးလၢအကုၢ်ပိာ်မုၣ်ခံဂၤအဒဲပူၤ, ဒီး တထံၣ်န့ၢ်ဘၣ်ဝဲဘၣ်. ဒီးဟးထီၣ်လၢနီၢ်လ့ၤအၤအဒဲ ပူၤ, ဒီးလဲၤနုာ်ဝဲလၢနီၢ်ရၤဃ့လးအဒဲပူၤလီၤ.

³⁴ ဒီးနီၢ်ရၤဃ့လးဟံးန့ၢ်တ့ၢ် တၢ်ဂီၤတရၤဖးတဖၣ်န့ၣ်, ဒီးပာ်ဝဲလၢကီၤလၤအူးအဂီၤကၢ်အဖီလာ်, ဒီးဆ့ၣ်နီၤ ဝဲလၢအဖီခိၣ်လီၤ. ဒီးစီၤလၤဘၣ်ကလၢၢ်တၢ်လၢဒဲပူၤ ဒီဖျၢၣ်ညါ, ဒီးတထံၣ်န့ၢ်ဘၣ်ဝဲဘၣ်.

³⁵ ဒီးစံးဘၣ်အပၢ်, လၢယဂဲၤဆၢထၢၣ်လၢနမဲာ်ညါတ ကဲဘၣ်အံၤ မ်ယကစၢ်အသုတသးထီၣ်တဂ့ၤ. အဂ့ၢ် ဒ်အံၤ, ပိာ်မုၣ်အလုၢ်အလၢ်အိၣ်လၢယလိၤလီၤ. ဒီးဃု ဝဲ, ဒီးတထံၣ်န့ၢ်ဘၣ်တၢ်ဂီၤတရၤဖးန့ၣ်ဘၣ်.

³⁶ ဒီးစီၤယၤကိာ်အသးထီၣ်, ဒီးအ့ၣ်လိာ်အသးဒီးစီၤ လၤဘၣ်, ဒီးစီၤယၤကိာ်စံးဆၢတၢ်ဒီးစံးဘၣ်စီၤလၤဘၣ်, လၢနလူၤသဖှိပိာ်ယခံန့ၣ် ယတၢ်ကမၣ်မ့ၢ်မနုၤလဲၣ်. ယတၢ်ဒဲးဘးမ့ၢ်မနုၤလဲၣ်. ³⁷ အဂ့ၢ်ဒ်အံၤ, နကလၢၢ် တ့ၢ်ယတၢ်ဖိတၢ်လံၤခဲလၢာ်, ဒီးနထံၣ်န့ၢ်တၢ်ဘၣ်ဃး ဒီးနဟံၣ်အတၢ်ဖိတၢ်လံၤခဲလၢာ်န့ၣ် မနုၤတမံၤလဲၣ်. ပာ်လီၤအီၤဖဲအံၤလၢယဒီပုၢ်ဝဲၢ်, ဒီးနဒီပုၢ်ဝဲၢ်အမဲာ်သၣ် ပူၤဒ်သိးအကလိာ်ပကွီၢ်တက့ၢ်. ³⁸ ယအိၣ်ဒီးနၤအနံၣ် ခံဆံအံၤနသိမိၢ်, နမဲာ်တဲးလဲးမိၢ်အဟုးတဟးဂီၤဘၣ်. ဒီးနသိဒီးနမဲာ်တဲးလဲးအဖါယတအီၣ်ဘၣ်. ³⁹ တၢ်ဘၣ် ဖှီသံန့ၣ်ယတဟဲစိာ်ဘၣ်ဆူနအိၣ်ဘၣ်, ယလိးက့ၤယဲ လီၤ. လၢမုၢ်ဆါခီမ့ၢ်ဂ့ၤ, လၢမုၢ်နၤခီမ့ၢ်ဂ့ၤ, တၢ်လၢ အဘၣ်တၢ်ဟုၣ်အီၤန့ၣ်, နဃုလၢယစုပူၤလီၤ. ⁴⁰ ယ အိၣ်လၢမုၢ်ဆါခီန့ၣ် တၢ်ကိၢ်အီၣ်ယၤ, ဒီးလၢမုၢ်နၤ န့ၣ်တၢ်ဂိၢ်အီၣ်ယၤ, ဒီးယတၢ်မံဟးသဒၣ်ကွံာ်ယမဲာ် လီၤ. ⁴¹ ဒ်န့ၣ်အသိးယအိၣ်လၢနဟံၣ်ပူၤအနံၣ်ခံဆံလီၤ. ယမၤနတၢ်တဆံလွံၢ်နံၣ်လၢနဖိမုၣ်ခံဂၤအဂီၢ်, ဒီးဃုနံၣ် လၢနသိဒီးမဲာ်တဲးလဲးအဂီၢ်, ဒီးနလဲက့ၤယဘူးယလဲ ဆံဆဲၣ်ဘျီလီၤ. ⁴² ယပၢ်အကစၢ်, စီၤအၤဘြၤဟၣ်အ ကစၢ်, ဒီးစီၤအံၤစဲးအတၢ်ပျံၤန့ၣ်မ့ၢ်တအိၣ်ဘၣ်ဒီးယၤ ဘၣ်ဒီး, မ့ၢ်မးခဲကနံၣ်အံၤ နကဒုးက့ၤကလီယၤလီၤ. ယွၤကွၢ်ယတၢ်နးတၢ်ဖှီၣ်, ဒီးယမၤတၢ်လၢယစု, ဒီး သိၣ်ဃီၣ်နၤလၢမကိာ်တနၤအံၤလီၤ.

⁴³ ဒီးစီၤလၤဘၣ်စံးဆၢတၢ်, ဒီးစံးဘၣ်စီၤယၤကိာ်, တၢ် လၢဖိမုၣ်တဖၣ်အံၤမ့ၢ်ယဖိမုၣ်, ဒီးတၢ်လၢဖိသၣ်တဖၣ် အံၤမ့ၢ်ယဖိသၣ်, ဒီးတၢ်လၢသိဒီးမဲာ်တဲးလဲးတဖၣ်အံၤ မ့ၢ်ယသိဒီးမဲာ်တဲးလဲးတဖၣ်, ဒီးကယဲၢ်တၢ်လၢနထံၣ် ဘၣ်တဖၣ်န့ၣ်မ့ၢ်ယတၢ်ခဲလၢာ်လီၤ. ဒီးတၢ်လၢမုၢ်မ ဆါတနံၤအံၤယမၤယဖိမုၣ်ဒီး အဖိလၢအဆံးစၢ်တဖၣ် န့ၣ်ကသ့မနုၤတမံၤလဲၣ်.

⁴⁴ ဒီးခဲကနံၣ်အံၤဟဲမီၣ်, မ်ပမၤတၢ်အၢၣ်လီၤအီလီၤ, ယၤဒီးနၤ, ဒီးမ်အကဲထီၣ်တၢ်အုၣ်အသးလၢယၤဒီးနၤ အဘၢၣ်စၢၤန့ၣ်တက့ၢ်.

⁴⁵ ဒီးစီၤယၤကိာ်ဟံးန့ၢ်လၢၢ်တဖျၢၣ်, ဒီးပာ်ထီၣ်အီၤလၢ ထူၣ်တထူၣ်လီၤ. ⁴⁶ ဒီးစီၤယၤကိာ်စံးဘၣ်အဒီပုၢ်ဝဲၢ်တ ဖၣ်, ထၢထီၣ်န့ၢ်လၢၢ်တဖၣ်န့ၣ်တက့ၢ်. ဒီးအဝဲသ့ၣ် ဟံးန့ၢ်လၢၢ်တဖၣ်, ဒီးပူဖှိၣ်ထီၣ်တပူ, ဒီးအီၣ်တၢ်ဖဲ န့ၣ်လၢတၢ်တပူအဖီခိၣ်လီၤ.

⁴⁷ ဒီးစီၤလၤဘၣ်ယုၢ်အမံၤလၢယကၢ်စၤဒူသၤလီၤ. မ့မ့ၢ် စီၤယၤကိာ်ယုၢ်အမံၤလၢကံးလဧးလီၤ.

⁴⁸ ဒီးစီၤလၤဘၣ်စံးဝဲဒၣ်, တၢ်လၢတၢ်ပူအံၤမ့ၢ်တၢ်အုၣ် အသးလၢယၤဒီးနၤအဘၢၣ်စၢၤ လၢမုၢ်မဆါတနံၤအံၤ လီၤ. မၤသးဒ်န့ၣ်ဒီးပှၤကိးအမံၤ လၢကံးလဧးဒီးမံးစ ပၤလီၤ. ⁴⁹ အဂ့ၢ်ဒ်အံၤ, စံးဝဲဒၣ်, တုၤပအိၣ်သဒၢလိာ် ပသးဒီး မ်ယွၤကွၢ်တၢ်လၢယၤဒီးနၤအဘၢၣ်စၢၤန့ၣ်တ က့ၢ်. ⁵⁰ နမ့ၢ်မၤနးမၤဖှီၣ်ယဖိမုၣ်တဖၣ်, ဒီးနမ့ၢ်ဟံးန့ၢ် နမါလၢယဖိမုၣ်အဖီခိၣ်ဒီး, ပှၤကညီတအိၣ်ဘၣ်ဒီးပှၤ နီတဂၤဘၣ်. ကွၢ်, ယွၤမ့ၢ်တၢ်အုၣ်အသးအိၣ်လၢယၤ ဒီးနၤအဘၢၣ်စၢၤန့ၣ်လီၤ.

⁵¹ ဒီးစီၤလၤဘၣ်စံးဘၣ်စီၤယၤကိာ်, ကွၢ်ကွၢ်, တၢ်ပူ တဖျၢၣ်အံၤ, ဒီးကွၢ်ကွၢ်, တၢ်ထူၣ်တထူၣ်အံၤလၢယ ပာ်ထီၣ်လၢယၤဒီးနၤအဘၢၣ်စၢၤန့ၣ်, ⁵² မ်တၢ်ပူတဖျၢၣ် အံၤကဲထီၣ်တၢ်အုၣ်အသး, ဒီးမ်တၢ်ထူၣ်တထူၣ်အံၤ ကဲထီၣ်တၢ်အုၣ်အသးလၢယတခီဂာ်တၢ်ပူတဖျၢၣ်အံၤ ဆူနအိၣ်, ဒီးနတခီဂာ်တၢ်ပူတဖျၢၣ်အံၤဒီးတၢ်ထူၣ်တ ထူၣ်အံၤဆူယအိၣ်လၢ တၢ်အၢတၢ်နးအဂီၢ်ဘၣ်န့ၣ်တ က့ၢ်. ⁵³ ဒီးမ်စီၤအၤဘြၤဟၣ်အကစၢ်, ဒီးစီၤနၤဃိၢ်အ ကစၢ်, အဝဲသ့ၣ်အပၢ်အကစၢ်န့ၣ် စံၣ်ညီၣ်တၢ်လၢပ ဘၢၣ်စၢၤတက့ၢ်. ဒီးစီၤယၤကိာ်ဆိၣ်လီၤအသးလၢအ ပၢ်စီၤအံၤစဲးအတၢ်ပျံၤအမဲာ်ညါန့ၣ်လီၤ.

⁵⁴ ဒီးစီၤယၤကိာ်လုၢ်ထီၣ်တၢ်လုၢ်လၢကစၢၢ်လိၤ, ဒီးကိး န့ၢ်အဒီပုၢ်ဝဲၢ်ဒ်သိးအကအီၣ်ကိၣ်လီၤ ဒီးအီၣ်ကိၣ်, ဒီး အိၣ်ဝဲသ့တနၤကျၢၤလၢကစၢၢ်လိၤလီၤ.

⁵⁵ ဒီးမုၢ်ဆ့ၣ်ထီၣ်န့ၣ် စီၤလၤဘၣ်ဂဲၤဆၢထၢၣ်ဂီၤဂီၤ, ဒီး နၢမူအဖိခွါဒီးအဖိမုၣ်သ့ၣ်တဖၣ်, ဒီးဆိၣ်ဂ့ၤအီၤလီၤ. ဒီးစီၤလၤဘၣ်ဟးထီၣ်, ဒီးက့ၤကဒါက့ၤဆူအလီၢ်လီၤ.

၃၂

¹ ဒီးစီၤယၤကိာ်လဲၤပိာ်အကျဲ, ဒီးယွၤအကလူးတဖၣ် ဟဲသဂၢၢ်အီၤလီၤ. ² ဒီးတုၤစီၤယၤကိာ်ထံၣ်ဘၣ်အီၤဒီး, စံးဝဲဒၣ်, အဝဲအံၤမ့ၢ်ယွၤအပှၤသုးမုၢ်ဂီၢ်မုၢ်လီၤ. ဒီးတၢ် လၢအလီၢ်တပူၤန့ၣ်ယုၢ်ဝဲအမံၤလၢမၤဃန့ၤလီၤ. ³ ဒီးစီၤယၤကိာ် မၢအကလူးတဖၣ်လဲၤလၢအမဲာ်ညါဆူအဝဲၢ်စီၤဧ့ၡီၤအအိၣ်, ဆူကီၢ်စံဧ့ၢ်, အဒိၣ်အပျီပူၤမၤလိာ်အီၤ, ဒီးစံးဝဲဒၣ်, သုဘၣ်စံးယကစၢ်စီၤဧ့ၡီၤဒ် အံၤ, နကုၢ်နပှၤစီၤယၤကိာ်စံးဒ်အံၤ, ယအိၣ်တမှံၤဒီးစီၤ လၤဘၣ်, ဒီးအိၣ်ဖဲန့ၣ်တုၤခဲကနံၣ်အံၤလီၤ. ⁴ ဒီးမၤလိာ်အီၤ, ဒီးစံးဝဲဒၣ်, သုဘၣ်စံးယကစၢ်စီၤဧ့ၡီၤဒ်အံၤ, နကုၢ်နပှၤစီၤယၤကိာ်စံးဒ်အံၤ, ယအိၣ်တမှံၤဒီးစီၤလၤဘၣ်, ဒီးအိၣ်ဖဲန့ၣ်တုၤခဲကနံၣ်အံၤလီၤ.―

⁵ ယအိၣ်ဒီးဂီၤဖံး, ဒီးကသ့ၣ်ယီၤ, ဒီးသိ, ဒီးမဲာ်တဲးလဲး, ဒီးကုၢ်ပိာ် ခွါ, ဒီးကုၢ်ပိာ်မုၣ်သ့ၣ်တဖၣ်, ဒီးယမၢပှၤလဲၤစံးဘၣ်ယ ကစၢ် ဒ်သိးယကဘၣ်ဘျုးဘၣ်ဖှိၣ်လၢနမဲာ်ညါလီၤ.

⁶ ဒီးအကလူးတဖၣ်န့ၣ် ဟဲက့ၤကဒါက့ၤဆူ စီၤယၤ ကိာ်အအိၣ်, ဒီးစံးဝဲဒၣ်, ပလဲၤဆူနဝဲၢ်စီၤဧ့ၡီၤအအိၣ်, ဒီးအဝဲဒၣ်န့ၣ်ဟဲသဂၢၢ်စ့ၢ်ကီးနၤ, ဒီးပှၤကညီလွံၢ်က ယၤအိၣ်ဒီးအီၤလီၤ.

⁷ ဒီးစီၤယၤကိာ်ပျံၤတၢ်ဒိၣ်မး, ဒီးအသူၣ်ကိၢ်အသးဂီၤ လီၤ. ဒီးနီၤဖးပှၤကညီလၢအအိၣ်ဒီးအီၤ, ဒီးသိ, ဒီး မဲာ်တဲးလဲး, ဒီးဂီၤဖံး, ဒီးကီၤလၤအူးသ့ၣ်တဖၣ်လၢ တၢ်ခံဖုလီၤ. ⁸ ဒီးစံးဝဲဒၣ်, စီၤဧ့ၡီၤမ့ၢ်ဟဲပၢၢ်လၢအဝဲ တဖု, ဒီးကျီကွံာ်အီၤဒီး, အဝဲတဖုလၢအအိၣ်လီၤတဲာ် န့ၣ်ကပူၤကဖျဲးလီၤ.

⁹ ဒီးစီၤယၤကိာ်စံးဝဲဒၣ်, ယပၢ်စီၤအၤဘြၤဟၣ်အက စၢ်, ဒီးယပၢ်စီၤအံၤစဲးအကစၢ်, ယွၤလၢအစံးဘၣ်ယၤ, က့ၤကဒါက့ၤဆူနကီၢ်, ဒီးဆူနဘူးနတံၢ်အအိၣ်, ဒီး ယကမၤဂ့ၤနၤန့ၣ်တဂၤဧၢ, ¹⁰ ယဆံးန့ၢ်ကယဲၢ်နဘျုးန ဖှိၣ်, ဒီးနတၢ်မ့ၢ်တၢ်တီလၢနမၤနခ့နပှၤတမံၤလၢ်လၢ် န့ၣ်တက့ၢ်လီၤ. အဂ့ၢ်ဒ်အံၤ, ယခီဂာ်ထံယၢ်ဒ့ၣ်အံၤ အိၣ်ဒီးယနီၣ်ထိးဘိ, ဒီးခဲကနံၣ်အံၤယမ့ၢ်တၢ်ခံဖုလီၤ.―

¹¹ မၤပူၤမၤဖျဲးလၢ်ယၤဒီး ယဝဲၢ်အစုလၢစီၤဧ့ၡီၤအစုန့ၣ်တ က့ၢ်. အဂ့ၢ်ဒ်အံၤ, ယပျံၤအီၤလီၤ. ကဟဲကျီသံကွံာ် ဘၣ်ဖုးယၤ, ဒီးဖိဒီးမါလီၤ. ¹² ဒီးနစံး, ယကမၤဂ့ၤနၤ သပှၢ်တၢၢ်, ဒီးယကမၤနချံနသၣ်ဒ်မဲးလၢပီၣ်လဲၣ်နံၤ အသိး, လၢပဂံၢ်တသ့ဘၣ်လၢအအါအဃိလီၤ.

¹³ ဒီးတၢ်လၢမုၢ်တနၤန့ၣ်အိၣ်ဝဲဖဲန့ၣ်, ဒီးဟံးန့ၢ်တၢ်လၢ အအိၣ်လၢအစုပူၤတနီၤနီၤ, တၢ်ခိၣ်ဖးလၢအဝဲၢ်စီၤဧ့ၡီၤ အဂီၢ်, ¹⁴ မဲာ်တဲးလဲးအမိၢ်ခံကယၤ, ဒီးမဲာ်တဲးလဲးအဖါ ခံဆံ, သိအမိၢ်ခံကယၤ, ဒီးသိအဖါခံဆံ, ¹⁵ ကီၤလၤ အူးအမိၢ်အိၣ်ဒီးအနုၢ်ထံဒီးအဖိသၢဆံ, ဂီၤဖံးအမိၢ်လွံၢ် ဆံ, ဒီးဂီၤဖံးအဖါတဆံ, ကသ့ၣ်ယီၤအမိၢ်ခံဆံ, ဒီး အဖါတဆံလီၤ.

¹⁶ ဒီးဟ့ၣ်ဝဲလၢအကုၢ်အပှၤတဖၣ်အစုပူၤ, တဖုလၢတ ပူၤဒၣ်, တဖုလၢတပူၤဒၣ်, ဒီးစံးဘၣ်အကုၢ်အပှၤ, လဲၤခီဂာ်တၢ်လၢယမဲာ်ညါ, ဒီးပာ်တၢ်အလီၢ်လၢတဖု တဖုအဘၢၣ်စၢၤန့ၣ်တက့ၢ်.

¹⁷ ဒီးမၤလိာ်ပှၤလၢအခီၣ်ထံးတဂၤဒီးစံးဝဲဒၣ်, တုၤယ ဝဲၢ်စီၤဧ့ၡီၤဟဲသဂၢၢ်နၤ, ဒီးစံးဝဲ, နမ့ၢ်မတၤအဝဲလဲၣ်, ဒီး နကလဲၤဖဲလဲၣ်, ဒီးတၢ်အိၣ်လၢနမဲာ်ညါတဖၣ်မ့ၢ်မတၤ အဝဲလဲၣ်န့ၣ်ဒီး, ¹⁸ နဘၣ်စံး, မ့ၢ်နကုၢ်နပှၤစီၤယၤကိာ်အ ဝဲ, မ့ၢ်တၢ်ခိၣ်ဖးဟ့ၣ်ယုၢ်လၢယကစၢ်စီၤဧ့ၡီၤအဂီၢ်လီၤ. ဒီးကွၢ်ကွၢ်, အကစၢ်ဒၣ်ဝဲအိၣ်ဝဲစ့ၢ်ကီးလၢပလီၢ်ခံန့ၣ် လီၤ.

¹⁹ ဒီးမၤလိာ်စ့ၢ်ကီးပှၤခံဂၤတဂၤ, ဒီးပှၤသၢဂၤတဂၤ, ဒီး ကယဲၢ်ပှၤလၢအပိာ် တၢ်အဖုသ့ၣ်တဖၣ်အခံကိးဂၤဒဲး, ဒီးစံးဝဲဒၣ်, တုၤသုထံၣ်န့ၢ်ဘၣ်စီၤဧ့ၡီၤဒီး, သုဘၣ်က ကတိၤတၢ်ဒီးအီၤလၢတၢ်ကတိၤတဖၣ်အံၤလီၤ. ²⁰ ဒီးစံး စ့ၢ်ကီး, ကွၢ်ကွၢ်, နကုၢ်နပှၤစီၤယၤကိာ်အိၣ်ဝဲလၢပလီၢ် ခံန့ၣ်တက့ၢ်. အဂ့ၢ်ဒ်အံၤ, စံးဝဲဒၣ်, ယကမၤဘၢအ မဲာ်လၢတၢ်ခိၣ်ဖးလၢအလဲၤလၢညါ, ဒီးယကထံၣ်ဘၣ် အမဲာ်လၢအလီၢ်ခံလီၤ. ဘၣ်တဘၣ်ကကွၢ်ယမဲာ်လီၤ.

²¹ ဒီးတၢ်ခိၣ်ဖးလဲၤခီဂာ်တၢ်လၢအမဲာ်ညါလီၤ. မ့မ့ၢ် အကစၢ်ဒၣ်ဝဲ, အိၣ်သီတနၤကျၢၤလၢမုၢ်တနၤန့ၣ်လၢ အပှၤတဖုအကျါလီၤ. ²² ဒီးဂဲၤဆၢထၢၣ်လၢမုၢ်တနၤန့ၣ်, ဒီးဟံးန့ၢ်အမါခံဂၤ, ဒီးအကုၢ်ပိာ်မုၣ်ခံဂၤ, ဒီးအဖိခွါ တဆံတဂၤ, ဒီးလဲၤခီဂာ်ယးဘိးအတၢ်ကျိးထံအလီၢ် လီၤ. ²³ ဒီးဟံးန့ၢ်အဝဲသ့ၣ်တဖၣ်, ဒီးမၢအလဲၤခီထံကျိ ဒီးမၢတၢ်လၢအအိၣ်ဒီးအီၤလဲၤခီဂာ်တၢ်လီၤ.

²⁴ ဒီးစီၤယၤကိာ်အိၣ်လီၤတဲာ်တဂၤဃီ, ဒီးပှၤကညီတ ဂၤကနိဒီးအီၤတုၤမုၢ်ဆ့ၣ်ဝါထီၣ်လီၤ. ²⁵ ဒီးတုၤအထံၣ် လၢအတမၤဃၣ်အီၤဘၣ်ဒီး, ထိးဘၣ်စီၤယၤကိာ်အ ကံၣ်ဒုၣ်ဆၢ, ဒီးကနိဝဲအဖၢမုၢ်ဒီး, စီၤယၤကိာ်အကံၣ် ဒုၣ်ဆၢတလံာ်လီၤ. ²⁶ ဒီးစံးဝဲဒၣ်, ပျၢ်ယၤတက့ၢ်. အ ဂ့ၢ်ဒ်အံၤမုၢ်ဆ့ၣ်ဝါထီၣ်လံ. ဒီးစံးဝဲဒၣ်, နမ့ၢ်တဆိၣ်ဂ့ၤ ဘၣ်ယၤဘၣ်ဒီး, ယတပျၢ်ဘၣ်နၤဘၣ်.

²⁷ ဒီးအဝဲဒၣ်စံးဘၣ်အီၤ, နမံၤမ့ၢ်ဒ်လဲၣ်, ဒီးစံးဝဲဒၣ်, စီၤ ယၤကိာ်လီၤ. ²⁸ ဒီးစံးဝဲဒၣ်, တၢ်တကိးလၢၤဘၣ်နမံၤလၢ စီၤယၤကိာ်ဘၣ်. မ့ၢ်စီၤအံၣ်စရ့လးတခီလီၤ. အဂ့ၢ်ဒ်အံၤ, နမၤပဒိၣ်နသးဒီးယွၤဒီးပှၤကညီ, ဒီးနမၤဃၣ်တၢ်လီၤ.

²⁹ ဒီးစီၤယၤကိာ်သံကွၢ်ဝဲ, ဒီးစံးဝဲဒၣ်, စံးဘၣ်တဲဘၣ် လၢ်ယၤလၢနမံၤတက့ၢ်. ဒီးစံးဝဲဒၣ်, ဘၣ်မနုၤလၢန သံကွၢ်ယမံၤလဲၣ်, ဒီးဆိၣ်ဂ့ၤအီၤဖဲန့ၣ်လီၤ.

³⁰ ဒီးစီၤယၤကိာ်ယုၢ်တၢ်အလီၢ်န့ၣ်အမံၤလၢ ပနံၤအ့ လးလီၤ. အဂ့ၢ်ဒ်အံၤ, ယကွၢ်ဆၢညါယွၤအမဲာ်, ဒီး ယသးသမူပူၤဖျဲးလီၤ.

³¹ ဒီးလဲၤခီဂာ်ပနံၤအ့လးအဖၢမုၢ်ဒီး, မုၢ်ထီၣ်န့ၢ်အီၤ, ဒီး လဲၤတၢ်တကျဲၢ်တကျဲၢ်လၢအကံၣ်ဒုၣ်လီၤ.

³² မၤသးဒ်န့ၣ်ဒီး ပှၤအံၣ်စရ့လးဖိတအီၣ်ဘၣ်ထူၣ်လၢ အအိၣ်လၢကံၣ်ဒုၣ်လာ်တဘိန့ၣ် တုၤမုၢ်မဆါတနံၤ အံၤလီၤ. အဂ့ၢ်ဒ်အံၤ, တၢ်ထိးစီၤယၤကိာ်အကံၣ်ဒုၣ် လာ်လၢအထူၣ်လိၤလီၤ.

၃၃

¹ ဒီးစီၤယၤကိာ်ကျ့ထီၣ်အမဲာ်ဒီးကွၢ်တၢ်, ဒီးကွၢ်ကွၢ်, စီၤဧ့ၡီၤဟဲ, ဒီးပှၤကညီလွံၢ်ကယၤအိၣ်ဒီးအီၤလီၤ, ဒီး နီၤဖးဟ့ၣ်ဖိသၣ်တဖၣ်လၢနီၢ်လ့ၤအၤ, ဒီးနီၢ်ရၤဃ့လး, ဒီးအကုၢ်ပိာ်မုၣ်ခံဂၤလီၤ.

² ဒီးပာ်အကုၢ်ပိာ်မုၣ်ဒီးအဖိတဖၣ်လၢညါ, ဒီးနီၢ်လ့ၤ အၤ, ဒီးအဖိတဖၣ်လၢခံ, ဒီးနီၢ်ရၤဃ့လးဒီးစီၤယိၤသး လၢအခံကတၢၢ်လီၤ. ³ ဒီးအဝဲဒၣ်လဲၤခီလၢအမဲာ်ညါ, ဒီးတီၤလီၤကဒွံကျိာ်နွံစုတုၤအဘူးထီၣ်ဒီးအဝဲၢ်လီၤ.

⁴ ဒီးစီၤဧ့ၡီၤဃ့ၢ်သဂၢၢ်အီၤ, ဒီးဖိးအီၤ, ဒီးထိၣ်လီၤတီၢ် အသးလၢအကိာ်လိၤ, ဒီးနၢမူအီၤ, ဒီးအမဲာ်ထံလီၤတ ကူၢ်သ့ၣ်လီၤ. ⁵ ဒီးကျ့ထီၣ်အမဲာ်, ဒီးထံၣ်ပိာ်မုၣ်ဒီးအ ဖိတဖၣ်, ဒီးစံးဝဲဒၣ်, ပှၤအိၣ်ဒီးနၤန့ၣ်မ့ၢ်မတၤတဖၣ် လဲၣ်. ဒီးစံးဝဲဒၣ်, ဖိသၣ်တဖၣ်လၢယွၤဟ့ၣ်သးကညီၤ နကုၢ်နပှၤလီၤ.

⁶ ဒီးအကုၢ်အပှၤပိာ်မုၣ်, အဝဲသ့ၣ်ဒီးအဖိတဖၣ်, ဟဲ ဘူး, ဒီးသကူးလီၤအသးလီၤ. ⁷ ဒီးနီၢ်လ့ၤအၤဒီးအဖိ တဖၣ်ဟဲဘူးစ့ၢ်ကီး, ဒီးသကူးလီၤအသးလီၤ. ဒီးလၢ အလီၢ်ခံန့ၣ်စီၤယိၤသးဟဲဘူးဒီးနီၢ်ရၤဃ့လး, ဒီးသကူး လီၤအသးလီၤ.

⁸ ဒီးစံးဝဲဒၣ်, တၢ်တဖုဒီဖုညါလၢယဘၣ်သဃိာ်အံၤ မ့ၢ်အဂ့ၢ်ဒ်လဲၣ်. ဒီးစံးဝဲဒၣ်, မ့ၢ်ဒ်သိးယကဘၣ်ဘျုး ဘၣ်ဖှိၣ်လၢယကစၢ်အမဲာ်ညါလီၤ.

⁹ ဒီးစီၤဧ့ၡီၤစံးဝဲဒၣ်, ယတၢ်အါလံ, ယပုၢ်ဧၢ, တၢ် လၢအအိၣ်ဒီးနၤအံၤမ်အအိၣ်ဒီးနၤတက့ၢ်.

¹⁰ ဒီးစီၤယၤကိာ်စံးဝဲဒၣ်, တမ့ၢ်ဘၣ်, ယမ့ၢ်ဘၣ်ဘျုး ဘၣ်ဖှိၣ်လၢနမဲာ်ညါဒီး, ဒိးန့ၢ်လၢ်ယခိၣ်ဖးလၢယစုပူၤ အံၤတက့ၢ်. အဂ့ၢ်ဒ်အံၤ, မ့ၢ်ယထံၣ်ဘၣ်လံနမဲာ်, မၤ သး ဒ်ယထံၣ်ယွၤအမဲာ်အသိး, ဒီးဘၣ်နသးလၢယၤ လီၤ. ¹¹ ဒိးန့ၢ်လၢ်ယတၢ်ဆိၣ်ဂ့ၤလၢပှၤဟဲစိာ်ဆူနအိၣ် တက့ၢ်. မ့ၢ်လၢယွၤဟ့ၣ်သးကညီၤယၤအဂ့ၢ်, ဒီးမ့ၢ် လၢတၢ်ခဲလၢာ်အိၣ်ဒီးယၤအဂ့ၢ်လီၤ. ဒီးကညးဝဲဒီး, ဒိး န့ၢ်ဝဲလီၤ.

¹² ဒီးစံးဝဲဒၣ်, ဟးထီၣ်သကိးဒီးလဲၤထီၣ်သကိးတက့ၢ်, ဒီးယကလဲၤတၢ်လၢနမဲာ်ညါလီၤ.

¹³ ဒီးစံးဘၣ်အီၤ, ယကစၢ်သ့ၣ်ညါဝဲလၢဖိသၣ်တဖၣ် အဂံၢ်စၢ်ဘါစၢ်, ဒီးသိဒီးမဲာ်တဲးလဲးအဖုတဖၣ်, ဒီးဂီၤ ဖံးအဖုတဖၣ်လၢအဒၢထီၣ်အိၣ်ဒီးယၤ, ဒီးပှၤမ့ၢ်ဟီလဲၤ အီၤဆူၣ်တနံၤဒီး, ကသံဒီဖုညါလီၤ. ¹⁴ မ်ယကစၢ်လဲၤ ဆိလၢနကုၢ်နပှၤအမဲာ်ညါတက့ၢ်. ဒီးယကဆှၢတၢ် ကဘဲးကဘဲး ဒ်ဆၣ်ဖိကီၢ်ဖိလၢယမဲာ်ညါ ထွဲတၢ်အ သိး, ဒီးဒ်ဖိသၣ်ထွဲတၢ်အသိး, တုၤယဟဲဆူယကစၢ် အအိၣ်, ဆူစံဧ့ၢ်လီၤ.

¹⁵ ဒီးစီၤဧ့ၡီၤစံးဝဲဒၣ်, ဒုးပာ်လီၤတဲာ်ယၤလၢပှၤတနီၤ, ဒီးနၤတက့ၢ်. ဒီးစံးဝဲဒၣ်, အလီၢ်အိၣ်ဒ်လဲၣ်, မ်ယ ဘၣ်ဘျုးဘၣ်ဖှိၣ်လၢယကစၢ်အမဲာ်ညါတက့ၢ်. ¹⁶ ဒီး တၢ်လၢမုၢ်တနံၤန့ၣ် စီၤဧ့ၡီၤက့ၤကဒါက့ၤဝဲလၢအကျဲ ဆူစံဧ့ၢ်လီၤ.

¹⁷ ဒီးစီၤယၤကိာ်လဲၤတၢ်ဆူစူးကိၤသး, ဒီးသူၣ်ဟံၣ်တ ဖျၢၣ်လၢအဂီၢ်, ဒီးမၤတကူးတဖၣ်လၢအဆၣ်ဖိကီၢ်ဖိ အဒၢအဂီၢ်လီၤ. မၤသးဒ်န့ၣ်ဒီးတၢ်အလီၢ်န့ၣ်ပှၤကိးအ မံၤလၢစူးကိၤသးလီၤ. ¹⁸ ဒီးစီၤယၤကိာ်ဟဲဝဲမုာ်မုာ်ဆူ ဝ့ၢ်ၡက့ၣ်အိၣ်လၢကီၢ်ကနၤဧၣ်အပူၤ, ဖဲအဟဲလၢပၤဒ နါရၣ်လီၤ. ဒီးသူၣ်အဒဲလၢဝ့ၢ်အမဲာ်ညါန့ၣ်လီၤ.

၃၄

¹ ဒီးနီၢ်လ့ၤအၤအဖိမုၣ်နီၢ်ဒံနၤ, လၢအဆံးစၢ်န့ၢ်လၢစီၤ ယၤကိာ်တဂၤန့ၣ်လဲၤအိၣ်သကိးပှၤကီၢ်ဖိအဖိမုၣ်လီၤ.

² ဒီးပှၤဃံၤဝံၤဖိကီၢ်အပဒိၣ်စီၤဃမိၢ်အဖိခွါ စီၤၡက့ၣ် ထံၣ်အီၤ, ဒီးဟံးန့ၢ်အီၤ, ဒီးမံဃုာ်ဒီးအီၤ, ဒီးမၤဟးဂီၤ အီၤလီၤ. ³ ဒီးအသးစဲဘူးဒီးစီၤယၤကိာ်အဖိမုၣ်နီၢ်ဒံနၤ, ဒီးအဲၣ်ဖိသၣ်ပိာ်မုၣ်န့ၣ်, ဒီးကတိၤတၢ်ဒီးဖိသၣ်ပိာ်မုၣ် န့ၣ်ဘၣ်သူၣ်ဘၣ်သးလီၤ. ⁴ ဒီးစီၤၡက့ၣ်ကတိၤတၢ်ဒီး အပၢ်စီၤဃမိၢ်, ဒီးစံးဝဲဒၣ်, မၤန့ၢ်ယၤလၢပိာ်မုၣ်ဖိသၣ် တဂၤအံၤလၢယမါတက့ၢ်.

⁵ ဒီးစီၤယၤကိာ်နၢ်ဟူဝဲလၢ အမၤဘၣ်အၢအဖိမုၣ်နီၢ်ဒံ နၤလီၤ. ဒီးအဖိခွါတဖၣ်အိၣ်ဝဲဒီးဆၣ်ဖိကီၢ်ဖိအဒၢလၢ ပှၢ်လၢ်ကျါ, ဒီးစီၤယၤကိာ် အိၣ်ဘှီၣ်ဝဲတုၤအဟဲက့ၤ လီၤ. ⁶ ဒီးစီၤၡက့ၣ်အပၢ်စီၤဃမိၢ်ဟးထီၣ်ဝဲဆူစီၤယၤ ကိာ်အအိၣ်ဒ်သိးအကကတိၤတၢ်ဒီးအီၤလီၤ.

⁷ ဒီးတုၤစီၤယၤကိာ်အဖိခွါတဖၣ်နၢ်ဟူဝဲဒီး, ဟဲက့ၤ ထီၣ်ဝဲလၢပှၢ်လၢ်ကျါ, ဒီးအသးဆါဒီးအသးထီၣ်နးမး လီၤ. အဂ့ၢ်ဒ်အံၤ, မ့ၢ်အမံဃုာ်ဒီးစီၤယၤကိာ်အဖိမုၣ် ဒီးမၤပှၤဟးဂီၤဖိအတၢ်မၤလၢ အံၣ်စရ့လးအကျါလီၤ. ဒီးတဂ့ၤမၤဘၣ်ဒ်န့ၣ်ဘၣ်.

⁸ ဒီးစီၤဃမိၢ်ကတိၤတၢ်ဒီးအီၤ, ဒီးစံးဝဲဒၣ်, ယဖိခွါ စီၤၡက့ၣ်အသးစဲဘူးဒီးသုဖိမုၣ်လီၤ. ဟ့ၣ်လၢ်အီၤလၢ အမါတက့ၢ်. ⁹ ဒီးန့ၢ်မါန့ၢ်ဝၤဒီးပှၤတက့ၢ်. ဟ့ၣ်သုဖိ မုၣ်တဖၣ်လၢပှၤ, ဒီးဟံးန့ၢ်ပဖိမုၣ်လၢသုဂီၢ်တက့ၢ်.

¹⁰ ဒီးသုကအိၣ်ကဆိးဒီးပှၤ, ဒီးကီၢ်အံၤကအိၣ်လၢသုမဲာ် ညါလီၤ. အိၣ်သုဝဲဒီးကၤတၢ်လၢအပူၤ, ဒီးမၤန့ၢ်တၢ် ဟံးဃာ်လၢအပူၤတက့ၢ်.

¹¹ ဒီးစီၤၡက့ၣ်စံးဘၣ်ပိာ်မုၣ်အပၢ် ဒီးအဒီပုၢ်ဝဲၢ်တဖၣ်, မ်ယဘၣ်ဘျုးဘၣ်ဖှိၣ်လၢသုမဲာ်ညါတက့ၢ်. ဒီးတၢ်လၢ သုစံးဘၣ်ယၤယကဟ့ၣ်လီၤ. ¹² တၢ်ကလိးဒီးတၢ်ဟ့ၣ် န့ၣ်သုမ့ၢ်ဃ့လၢယၤအါအါကလဲာ်နာ်သက့ဒီး, ယက ဟ့ၣ်ဖဲဒၣ်သုစံးတၢ်လီၤ. ဒီးဟ့ၣ်ဖိသၣ်ပိာ်မုၣ်န့ၣ်လၢ ယမါတက့ၢ်.

¹³ ဒီးစီၤယၤကိာ်အဖိခွါတဖၣ်စံးဆၢစီၤၡက့ၣ်, ဒီးအ ပၢ်စီၤဃမိၢ်အိၣ်ဒီးလီတၢ်လီၤ. ဒီးစံးဝဲဒၣ်, မ့ၢ်အမၤ ဘၣ်အၢပဒီပုၢ်ဝဲၢ်မုၣ်အဂ့ၢ်လီၤ.

¹⁴ ဒီးစံးဘၣ်အီၤ, တၢ်တမံၤအံၤဟ့ၣ်ပဒီပုၢ်ဝဲၢ်မုၣ်လၢပှၤ လၢအတဒိးဘၣ်တၢ်ကူးတရံးန့ၣ်ပမၤတသ့ဘၣ်. အဂ့ၢ် ဒ်အံၤ, မ့ၢ်တၢ်ဒုၣ်ဒွဲၣ်ပှၤအလီၢ်လီၤ. ¹⁵ ဘၣ်ဆၣ်ဒီးပက အၢၣ်လီၤသုဒ်အံၤ, သုမ့ၢ်ကဲထီၣ်ဒ်ပှၤအသိး, ကယဲၢ် ပိာ်ခွါဒိးတၢ်ကူးတရံးကိးဂၤဒဲးန့ၣ်ဒီး, ¹⁶ ပကဟ့ၣ်ပဖိ မုၣ်လၢသု, ဒီးပကဟံးန့ၢ်သုဖိမုၣ်လၢပဂီၢ်, ဒီးပက အိၣ်ကဆိးဒီးသု, ဒီးပကကဲထီၣ်ပှၤတကလုာ်ဃီလီၤ.―

¹⁷ မ့မ့ၢ်သုမ့ၢ်တကနၣ်ဘၣ်ပကလုၢ်လၢ သုကဒိးတၢ်ကူး တရံးန့ၣ်ဘၣ်ဒီး, ပကဟံးန့ၢ်ကွံာ်ပဖိမုၣ်, ဒီးလဲၤတၢ် လီၤ.

¹⁸ ဒီးအတၢ်ကတိၤန့ၣ်ဂ့ၤဝဲလၢစီၤဃမိၢ်, ဒီးစီၤဃမိၢ်အ ဖိခွါစီၤၡက့ၣ်အမဲာ်ညါလီၤ. ¹⁹ ဒီးဖိၣ်သၣ်ခွါန့ၣ်ဒ်သိး အကမၤတၢ်တမံၤန့ၣ်ဒီး, တသုးနံၤသုးသီဘၣ်, မ့ၢ်အ ဘၣ်အသးလၢ စီၤယၤကိာ်အဖိမုၣ်အဂ့ၢ်လီၤ. ဒီးအဝဲ ဒၣ်န့ၣ်အလၤအကပီၤဒိၣ်န့ၢ် အပၢ်အပှၤဟံၣ်ဖိခဲလၢာ် တက့ၢ်လီၤ.

²⁰ ဒီးစီၤဃမိၢ်, ဒီးအဖိခွါစီၤၡက့ၣ်လဲၤဝဲဆူအဝ့ၢ်အပဲတ ရီ, ဒီးကတိၤတၢ်ဒီးပှၤဝ့ၢ်ဖိဒီးစံးဝဲဒၣ်, ²¹ ပှၤတဖၣ်န့ၣ် အိၣ်ဃူအိၣ်ဖိးဒီးပှၤ, ဒီးမ်အအိၣ်အဆိးလၢကီၢ်ပူၤ, ဒီး ကၤတၢ်လၢအပူၤတက့ၢ်. ကွၢ်ကွၢ်, ကီၢ်အံၤလဲၢ်ဝဲလၢ အမဲာ်ညါလီၤ. မ်ပန့ၢ်မါလၢအဖိမုၣ်, ဒီးဟ့ၣ်အီၤလၢ ပဖိမုၣ်တက့ၢ်. ²² ဘၣ်ဆၣ်ဒီးပှၤတဖၣ်န့ၣ်ကအၢၣ်လီၤ ဒီးပှၤလၢအကအိၣ်ဒီးပှၤ ဒီးကဲထီၣ်ပှၤတကလုာ်ဃီဒီး ပှၤမ့ၢ်ထဲလၢကယဲၢ်ပှၤပိာ်ခွါလၢပကျါ ဘၣ်ဒိးတၢ်ကူး တရံး ဒ်အဝဲသ့ၣ်တဖၣ် ဒိးတၢ်ကူးတရံးအသိးဧိၤန့ၣ် လီၤ. ²³ ဒီးအတၢ်ဖိတၢ်လံၤ, ဒီးအစုလီၢ်အခီၣ်ခိၣ်, ဒီး ကယဲၢ်အဆၣ်ဖိကီၢ်ဖိအဒၢခဲလၢာ်န့ၣ် ကကဲလၢပတၢ် တမ့ၢ်ဘၣ်ဧါ. ထဲပအၢၣ်လီၤဒီးအီၤန့ၣ်ဒီး, ကအိၣ်ဝဲ ဆိးဝဲဒီးပှၤလီၤ.

²⁴ ဒီးကယဲၢ်ပှၤလၢအဟးထီၣ်လၢ အဝ့ၢ်ပဲတရီန့ၣ် က နၣ်စီၤဃမိၢ်, ဒီးစီၤၡက့ၣ်အကလုၢ်, ဒီးကယဲၢ်ပှၤပိာ် ခွါဒိးတၢ်ကူးတရံး, ပှၤလၢအဟးထီၣ်လၢအဝ့ၢ်ပဲတရီ ကိးဂၤဒဲးလီၤ.

²⁵ ဒီးတုၤပှၤဆါထီၣ်ဖဲမုၢ်သၢနံၤတနံၤန့ၣ် တၢ်မၤအသး လၢစီၤယၤကိာ်အဖိခွါဒီပုၢ်ဝဲၢ်ဒီးနီၢ်ဒံနၤ, စီၤစူးမ့းအိၣ် ဒီးစီၤလ့ၤဝံခံဂၤန့ၣ်, ဟံးန့ၢ်နးတဂၤတဘ့ၣ် တဂၤတ ဘ့ၣ်, ဒီးလဲၤနုာ်ဝဲလၢဝ့ၢ်ပူၤအိၣ်ဒီးအသးခူတလ့ၢ်, ဒီး မၤသံပှၤပိာ်ခွါခဲလၢာ်လီၤ. ²⁶ ဒီးမၤသံစီၤဃမိၢ်, ဒီးအ ဖိခွါစီၤၡက့ၣ်လၢနးအကနၣ်, ဒီးဟံးထီၣ်ကွံာ်နီၢ်ဒံနၤ လၢစီၤၡက့ၣ်အဟံၣ်ပူၤ, ဒီးဟးထီၣ်ကွံာ်ဝဲလီၤ. ²⁷ ဒီးစီၤ ယၤကိာ်အဖိခွါတဖၣ်ဟဲလီၤဘၣ်လၢ ပှၤဘၣ်တၢ်မၤသံ အီၤအလိၤ, ဒီးဂုာ်န့ၢ်ဝ့ၢ်အတၢ်, လၢပှၤမၤဘၣ်အၢအ ဒီပုၢ်ဝဲၢ်မုၣ်အဃိလီၤ. ²⁸ ဒီးဟံးန့ၢ်အသိ, ဒီးမဲာ်တဲးလဲး, ဒီးအဂီၤဖံး, ဒီးအကသ့ၣ်ယီၤ, ဒီးတၢ်အိၣ်လၢဝ့ၢ်ပူၤ, ဒီးတၢ်အိၣ်လၢပျီပူၤ, ²⁹ ဒီးအတၢ်ဖိတၢ်လံၤခဲလၢာ်, ဒီး ကယဲၢ်အဖိဒံဖိသၣ်ဒီးဖီၣ်န့ၢ်အမါ, ဒီးဂုာ်န့ၢ်တၢ်အိၣ် လၢဟံၣ်ပူၤခဲလၢာ်လီၤ.

³⁰ ဒီးစီၤယၤကိာ်စံးဘၣ်စီၤစူးမ့းအိၣ်, ဒီးစီၤလ့ၤဝံ, သုမၤ ကိၢ်မၤဂီၤယၤတုၤယကနၢအုၣ်လၢပှၤကီၢ်ဖိအကျါ, လၢ ပှၤကနၤဧၣ်ဖိ, ဒီးပှၤပရံးစၤဖိအကျါလီၤ. ဒီးယၤယမ့ၢ်ပှၤ စှၤဂၤ, ဒီးကအိၣ်ဖှိၣ်ရိဖှိၣ်ထီဒါယၤဒီးကျီသံယၤ, ဒီးယ ကတုၤလၢတၢ်ဟးဂူာ်ဟးဂီၤ, ယၤဒီးယပှၤဟံၣ်ဖိလီၤ.

³¹ ဒီးအဝဲသ့ၣ်စံးဝဲဒၣ်, ကမၤဘၣ်ပဒီပုၢ်ဝဲၢ်မုၣ်ဒ်ပှၤဃဲ သဲမုၣ်အသိးန့ၣ်ဧါ.

၃၅

¹ ဒီးယွၤစံးဘၣ်စီၤယၤကိာ်, ဂဲၤဆၢထၢၣ်လဲၤထီၣ်ဆူ ဘ့ၤသ့လး, ဒီးအိၣ်ဖဲန့ၣ်ဒီးမၤထီၣ်တၢ်လုၢ်လီၢ်လၢယွၤ လၢအလီၣ်ဖျါထီၣ်အသးလၢနၤ ဖဲနဃ့ၢ်ထီၣ်လၢနဝဲၢ် စီၤဧ့ၡီၤအမဲာ်ညါ, အဂီၢ်န့ၣ်တက့ၢ်.

² ဒီးစီၤယၤကိာ်စံးဘၣ်အပှၤဟံၣ်ဖိ, ဒီးပှၤလၢအအိၣ် ဒီးအီၤခဲလၢာ်, ပှၤတခီဘီမုၢ်ဖိအကစၢ်တဖၣ် လၢအ အိၣ်လၢသုကျါန့ၣ်, ကွံာ်တ့ၢ်ကွံာ်အီၤတက့ၢ်. ဒီးမၤ ကဆှီသုသး, ဒီးကလံၤသုသး, ³ ဒီးဂဲၤဆၢထၢၣ်, ဒီး လဲၤထီၣ်သကိးဆူဘ့ၤသ့လးတက့ၢ်. ဒီးယကမၤထီၣ် တၢ်လုၢ်လီၢ်ဖဲန့ၣ်လၢယွၤအဂီၢ် လၢအစံးဆၢယၤဖဲမုၢ် တနံၤလၢယဘၣ်တၢ်ကိၢ်တၢ်ဂီၤ, ဒီးအိၣ်ဒီးယၤလၢကျဲ လၢယပိာ်အီၤန့ၣ်လီၤ.

⁴ ဒီးအဝဲသ့ၣ်ဟ့ၣ်စီၤယၤကိာ်လၢ ကယဲၢ်တခီဘီမုၢ်ဖိ အကစၢ်လၢအအိၣ်လၢအစုပူၤခဲလၢာ်, ဒီးအကွီၤလၢ အအိၣ်လၢအနၢ်ပူၤလီၤ. ဒီးစီၤယၤကိာ်ပာ်ခူသူၣ်အီၤ လၢသ့ထိးဖၣ်လၢအအိၣ်လၢ ၡက့ၣ်အဃၢၤတထံးအ ဖီလာ်လီၤ. ⁵ ဒီးဟးထီၣ်ဝဲ, ဒီးတၢ်ပျံၤယွၤအိၣ်ဝဲလၢ ပှၤဝ့ၢ်ဖိလၢအအိၣ်ဝးတရံးအီၤသတးဒီး တလူၤပိာ်ဘၣ် စီၤယၤကိာ်အဖိခွါတဖၣ်အခံဘၣ်.

⁶ ဒီးစီၤယၤကိာ်ဟဲဝဲဆူဝ့ၢ်လူၤစး, လၢကီၢ်ကနၤဧၣ်အ ပူၤ (အဝဲန့ၣ်မ့ၢ်ဘ့ၤသ့လး), အဝဲဒၣ်ဒီးပှၤအိၣ်ဒီးအီၤ

⁷ ခဲလၢာ်လီၤ. ဒီးမၤထီၣ်တၢ်လုၢ်အလီၢ်ဖဲန့ၣ်, ဒီးကိးတၢ် အလီၢ်န့ၣ်လၢအ့လးဘ့ၤသ့လးလီၤ. အဂ့ၢ်ဒ်အံၤ, လၢ အဃ့ၢ်ထီၣ်ကွံာ်လၢအဝဲၢ်အမဲာ်ညါန့ၣ် ယွၤဒုးနဲၣ်အသး လၢအီၤဖဲန့ၣ်လီၤ.

⁸ ဒီးနီၢ်ဒဘိရၣ်, ပှၤလၢအဒုးအီၣ်နုၢ်နီၢ်ရံးဘကၤန့ၣ် သံဝဲ, ဒီးဘၣ်တၢ်ခူၣ်လီၤအီၤလၢဘ့ၤသ့လးအလာ်ခီ လၢသ့ထိးဖၣ်တထံးအဖီလာ်, ဒီးပှၤယုၢ်အမံၤလၢအး လိၣ်ဘၤကူာ်လီၤ. ⁹ ဒီးတုၤစီၤယၤကိာ်ဟဲက့ၤလၢပၤဒနါရၣ်န့ၣ် ယွၤလီၣ်ဖျါထီၣ်အသးကဒီးတစုလၢအီၤ, ဒီးဆိၣ်ဂ့ၤအီၤလီၤ.―

¹⁰ ဒီးယွၤစံးဘၣ်အီၤ, နမံၤမ့ၢ်ယၤကိာ်လီၤ. တၢ်တကိး လၢၤဘၣ်နမံၤလၢယၤကိာ်ဘၣ်, မ့မ့ၢ်အံၣ်စရ့လးကမ့ၢ် နမံၤလီၤ. ဒီးယုၢ်ဝဲအမံၤလၢစီၤအံၣ်စရ့လးလီၤ.

¹¹ ဒီးယွၤစံးဘၣ်အီၤ, တၢ်လၢယၤအံၤယမ့ၢ်ယွၤလၢအ သ့တၢ်လၢာ်လီၤ. သၣ်ထီၣ်, ဒီးအါထီၣ်တက့ၢ်. ပှၤ တကလုာ်, ဒီးပှၤအကလုာ်တဖၣ်အတၢ်အိၣ်ဖှိၣ်တဖု ကကဲထီၣ်လၢနၤ, ဒီးစီၤပၤတဖၣ်ကဟဲထီၣ်လၢနယီၢ် ဒ့ပူၤလီၤ. ¹² ဒီးကီၢ်လၢယဟ့ၣ်လီၤစီၤအၤဘြၤဟၣ်, ဒီး စီၤအံၤစဲးတဘ့ၣ်န့ၣ် ယကဟ့ၣ်လီၤလၢနၤ, ဒီးယက ဟ့ၣ်လီၤကီၢ်န့ၣ်လၢနချံနသၣ်လၢနလီၢ်ခံလီၤ.

¹³ ဒီးယွၤဟးထီၣ်ဆူထးလၢတၢ်အလီၢ်ဖဲ အကတိၤတၢ် ဒီးအီၤလီၤ. ¹⁴ ဒီးစီၤယၤကိာ်သူၣ်လီၤထူၣ်တထူၣ်ဖဲအ လီၢ်လၢအကတိၤတၢ်ဒီးအီၤ, လၢၢ်အထူၣ်တထူၣ်လီၤ. ဒီးလူလီၤတၢ်လုၢ်အီလၢအဖီခိၣ်, ဒီးဂၢ်လီၤသိလၢအဖီ ခိၣ်လီၤ. ¹⁵ ဒီးတၢ်အလီၢ်လၢယွၤကတိၤတၢ်ဒီးအီၤန့ၣ်, စီၤယၤကိာ်ယုၢ်ဝဲအမံၤလၢဘ့ၤသ့လးလီၤ.

¹⁶ ဒီးဟးထီၣ်ဝဲလၢဘ့ၤသ့လး, ဒီးယံၤဒီးဝ့ၢ်အ့ဖရးသး ဖးဖီတီၤလဲၤန့ၣ်, နီၢ်ရၤဃ့လးအဟုးဆါထီၣ်, ဒီးအ ဟုးဆါအဖၢမုၢ်န့ၣ်ဘၣ်တၢ်ကီတၢ်ခဲလီၤ. ¹⁷ ဒီးတၢ်မၤ အသးလၢအဟုးဆါ, ဒီးဘၣ်တၢ်ကီတၢ်ခဲအဖၢမုၢ်န့ၣ်, ပှၤကွၢ်ဟုးတဂၤစံးဘၣ်အီၤ, ဘၣ်ယိၣ်တဂ့ၤ. အဂ့ၢ်ဒ် အံၤ, နကအိၣ်ဒီးနဖိခွါတဂၤအံၤစ့ၢ်ကီးလီၤ.

¹⁸ ဒီးတၢ်မၤအသးလၢအသးဟးထီၣ်အဖၢမုၢ်န့ၣ်(အဂ့ၢ် ဒ်အံၤ, သံဝဲ) ယုၢ်ဝဲအမံၤလၢဘံၣ်အိနံလီၤ. မ့မ့ၢ်အ ပၢ်တဂၤန့ၣ်ယုၢ်ဝဲအမံၤလၢဘံၣ်ယၤမံၣ်လီၤ.

¹⁹ ဒီးနီၢ်ရၤဃ့လးသံဝဲ, ဒီးဘၣ်တၢ်ခူၣ်လီၤကွံာ်အီၤလၢ အ့ဖရးသးအကျဲန့ၣ်လီၤ. အဝဲန့ၣ်မ့ၢ် ဘ့ၤသလ့ဃ့ၣ် လီၤ. ²⁰ ဒီးစီၤယၤကိာ်သူၣ်လီၤထူၣ်တထူၣ်လၢအသွၣ် ခိၣ်န့ၣ်လီၤ. အဝဲန့ၣ်မ့ၢ်နီၢ်ရၤဃ့လးအသွၣ်ခိၣ်ထူၣ်တုၤ မုၢ်မဆါတနံၤအံၤလီၤ.

²¹ ဒီးစီၤအံၣ်စရ့လးဟးထီၣ်, ဒီးသလၣ်ထီၣ်အဒဲလၢ တၢးထီဧ့ၤဒ့ၢ်ဝၢ်ဘးခီလီၤ. ²² ဒီးတၢ်မၤအသးလၢစီၤ အံၣ်စရ့လးအိၣ်ဝဲဆိးဝဲလၢကီၢ်န့ၣ်အဖၢမုၢ်ဒီး, စီၤရူၤ ဘ့ၣ်လဲၤမံဃုာ်ဒီးအပၢ်သံၣ်မါ, နီၢ်ဘံၤလဟၤ, ဒီးစီၤ အံၣ်စရ့လးနၢ်ဟူဝဲလီၤ.

²³ ဒီးစီၤယၤကိာ်အဖိခွါအိၣ်တဆံခံဂၤလီၤ. နီၢ်လ့ၤအၤ အဖိခွါတဖၣ်မ့ၢ်စီၤယၤကိာ်အဖိဝဲၢ်ကိ, စီၤရူၤဘ့ၣ်, ဒီး စီၤစူၤမ့းအိၣ်, ဒီးစီၤလ့ၤဝံ, ဒီးစီၤယူဒၤ, ဒီးစီၤယံးစၣ် ကၢ်, ဒီးစီၤစဘူလိၣ်လီၤ.

²⁴ နီၢ်ရၤဃ့လးအဖိခွါတဖၣ် မ့ၢ်စီၤယိၤသး, ဒီးစီၤဘံၣ် ယၤမံၣ်လီၤ.

²⁵ ဒီးနီၢ်ရၤဃ့လးအကုၢ်ပိာ်မုၣ်, နီၢ်ဘံၤလဟၤအဖိခွါ တဖၣ်မ့ၢ်စီၤဒၣ်, ဒီးစီၤနးသၤလံလီၤ.

²⁶ နီၢ်လ့ၤအၤအကုၢ်ပိာ်မုၣ်, နီၢ်စံၤလပၤအဖိခွါတဖၣ်မ့ၢ် စီၤကး, ဒီးစီၤအၤရှ့ၢ်လီၤ. အဝဲသ့ၣ်တဖၣ်န့ၣ်မ့ၢ်စီၤယၤ ကိာ်အဖိခွါလၢ ပှၤဆံးစၢ်န့ၢ်အီၤ, လၢပၤဒနါရာ်အပူၤ လီၤ.

²⁷ ဒီးစီၤယၤကိာ်ဟဲဝဲဆူအပၢ်စီၤအံၤစဲးအအိၣ်, ဆူမးမ ရ့, ဆူဝ့ၢ်အၤရဘၤ, (အဝဲန့ၣ်မ့ၢ်ဃ့ဘြိၣ်) ဖဲစီၤအၤဘြၤ ဟၣ်ဒီးစီၤအံၤစဲးအိၣ်တမှံၤန့ၣ်လီၤ.

²⁸ ဒီးစီၤအံၤစဲးအမုၢ်နံၤတဖၣ်န့ၣ် မ့ၢ်အနံၣ်တကယၤဃိး ဆံလီၤ. ²⁹ ဒီးစီၤအံၤစဲးအသးလၢာ်, ဒီးသံဝဲ, ဒီးတၢ် ပာ်ဖှိၣ်အီၤဒီးအပှၤတကလုာ်ဒၣ်ဝဲလီၤ. အသးပှၢ်ဒီးပှဲၤ ဒီးအနံၤအသီလီၤ. ဒီးအဖိခွါစီၤဧ့ၡီၤ, ဒီးစီၤယၤကိာ် ခူၣ်လီၤကွံာ်အီၤလီၤ.

၃၆

¹ ဒီးအဝဲအံၤမ့ၢ် စီၤဧ့ၡီၤအစၢၤအသွဲၣ် (အဝဲန့ၣ်မ့ၢ်အ ဒိၣ်.)

² စီၤဧ့ၡီၤန့ၢ်မါလၢကနၤဧၣ်အဖိမုၣ်အကျါန့ၣ်, ပှၤဃ့ၤ သးဖိစီၤအ့လိၣ်အဖိမုၣ်နီၢ်ဧဒၤတဂၤ, ဒီးနီၢ်အဟိးလံး ဘါမၤ, စီၤဧနၤအဖိမုၣ်, ပှၤဃံၤဝံၤဖိစီၤစံးဘဧိၣ်အဖိ ခွါန့ၣ်လီၤ. ³ ဒီးစီၤယံးၡမၤဧ့လးအဖိမုၣ်, စီၤနဘါယိး အဒီပုၢ်ဝဲၢ်မုၣ်, နီၢ်ဘၤစမးတဂၤလီၤ.

⁴ ဒီးနီၢ်ဧဒၤန့ၣ်ဆံးစၢ်န့ၢ် စီၤအလံဖးစးန့ၣ်လၢစီၤဧ့ၡီၤ အဂီၢ်, ဒီးနီၢ်ဘၤစမးန့ၣ်ဆံးစၢ်န့ၢ်စီၤရဧူၤအ့လး, ⁵ ဒီးနီၢ် အဟိးလံဘါမၤန့ၣ် ဆံးစၢ်န့ၢ်စီၤယဧူၤၡး, ဒီးစီၤယၤဧ လၣ်, ဒီးစီၤကိးရးလီၤ. အဝဲသ့ၣ်တဖၣ်န့ၣ်မ့ၢ်စီၤဧ့ၡီၤအဖိ ခွါလၢအအိၣ်ဖျဲၣ်လၢအဂီၢ်လၢကီၢ်ကနၤဧၣ်အပူၤလီၤ.

⁶ ဒီးစီၤဧ့ၡီၤဟံးန့ၢ်အမါ, ဒီးအဖိခွါ, ဒီးအဖိမုၣ်, ဒီးက ယဲၢ်ပှၤအသးလၢအဟံၣ်ပူၤခဲလၢာ်, ဒီးအသိဒီးမဲာ်တဲး လဲး, ဒီးအဆၣ်ဖိကီၢ်ဖိအဒၢခဲလၢာ်, ဒီးကယဲၢ်အစု လီၢ်ခီၣ်ခိၣ်လၢအန့ၢ်ဘၣ်လၢကီၢ်ကနၤဧၣ်အပူၤ, ဒီးဟး ဆူကီၢ်ယံၤဒီးအဒီပုၢ်ဝဲၢ်စီၤယၤကိာ်တဘ့ၣ်အပူၤလီၤ. ⁷ အဂ့ၢ်ဒ်အံၤ, အတၢ်ဖိတၢ်လံၤအါတုၤအအိၣ်တပူၤဃီတသ့ဘၣ်လီၤ. ဒီးကီၢ်လၢအအိၣ်တမှံၤလၢအပူၤအိၣ်ဒီးအီၤတသ့ဘၣ် လၢအဆၣ်ဖိကီၢ်ဖိအဒၢအဃိလီၤ.―

⁸ ဒီးစီၤဧ့ၡီၤအိၣ်ဝဲဆိးဝဲလၢကစၢၢ်စ့ဧ့ၢ်အလိၤလီၤ. စီၤဧ့ ၡီၤန့ၣ်မ့ၢ်အဒိၣ်လီၤ.

⁹ ဒီးအအံၤမ့ၢ်ပှၤအဒိၣ်ဖိလၢ ကစၢၢ်စ့ဧ့ၢ်အလိၤတဖၣ် အပၢ်စီၤဧ့ၡီၤအစၢၤအသွဲၣ်လီၤ.

¹⁰ အအံၤမ့ၢ်စီၤဧ့ၡီၤအဖိခွါအမံၤ, စီၤဧ့ၡီၤအမါနီၢ်ဧဒၤ အဖိခွါစီၤအလံဖးစးတဂၤ, ဒီးစီၤဧ့ၡီၤအမါနီၢ်ဘၤစမး အဖိခွါစီၤရဧူၤအ့လးတဂၤလီၤ.

¹¹ ဒီးစီၤအလံဖးစးအဖိခွါမ့ၢ်စီၤတ့ၤမၣ်, ဒီးစီၤအိမၢ်, စီၤ စဖိၤ, ဒီးစီၤကၤတၣ်, ဒီးစီၤကနးစးလီၤ.

¹² ဒီးနီၢ်တံးမနၤမ့ၢ်စီၤဧ့ၡီၤအဖိခွါ စီၤအလံဖးစးအသံၣ် မါလီၤ. ဒီးဆံးစၢ်န့ၢ်စီၤဧမၤလ့းလၢစီၤအလံဖးစးအဂီၢ် လီၤ. အဝဲသ့ၣ်တဖၣ်န့ၣ်မ့ၢ်စီၤဧ့ၡီၤအမါနီၢ်ဧဒၤအဖိခွါ လီၤ.

¹³ ဒီးအအံၤမ့ၢ်စီၤရဧူၤအ့လးအဖိခွါ, စီၤနၤဃး, ဒီးစီၤ စ့ရၤ, စီၤၡးမၤ, ဒီးစီၤမံစၤလီၤ. အဝဲသ့ၣ်တဖၣ်န့ၣ်မ့ၢ် စီၤဧ့ၡီၤအမါနီၢ်ဘၤစမးအဖိခွါလီၤ.

¹⁴ ဒီးအအံၤမ့ၢ်စီၤစံးဘဧိၣ်အဖိခွါစီၤဧနၤအဖိမုၣ်, စီၤဧ့ ၡီၤအမါနီၢ်အဟိးလံးဘါမၤအဖိခွါ, ဒီးဆံးစၢ်န့ၢ်စီၤယ ဧူၡၢ်, ဒီးစီၤယၤဧလၣ်, ဒီးစီၤကိးရးလၢစီၤဧ့ၡီၤအဂီၢ်လီၤ.

¹⁵ ဒီးအအံၤမ့ၢ်စီၤဧ့ၡီၤအဖိခွါအစကီၤတဖၣ်, လၢစီၤဧ့ ၡီၤအဖိဝဲၢ်ကိစီၤအလံဖးစးအဖိခွါအကျါ, စကီၤတ့ၤမၣ်, စကီၤအိမၢ်, စကီၤစဖိၤ, စကီၤကနးစး, ¹⁶ စကီၤကိး ရး, စကီၤကၤတၣ်, စကီၤဧမၤလ့းလီၤ. အဝဲသ့ၣ်တ ဖၣ်န့ၣ်မ့ၢ်စီၤအလံဖးစးအစကီၤ အိၣ်လၢကီၢ်အဒိၣ်အ ပူၤလီၤ. အဝဲသ့ၣ်န့ၣ်မ့ၢ်နီၢ်ဧဒၤအဖိခွါလီၤ. ¹⁷ ဒီးအအံၤမ့ၢ်စီၤ ဧ့ၡီၤအဖိခွါစီၤရဧူၤအ့လးအဖိခွါ, စကီၤနၤဃး, စကီၤ စ့ရၤ, စကီၤၡးမၤ, စကီၤမံစၤလီၤ. အဝဲသ့ၣ်တဖၣ်န့ၣ် မ့ၢ် စီၤရဧူၤအ့လးအစကီၤတဖၣ် လၢကီၢ်အဒိၣ်အပူၤ လီၤ. အဝဲသ့ၣ်န့ၣ်မ့ၢ်စီၤဧ့ၡီၤအမါနီၢ်ဘၤစမးအဖိခွါလီၤ.

¹⁸ ဒီးအအံၤမ့ၢ် စီၤဧ့ၡီၤအမါနီၢ်အဟိးလံးဘါမၤအဖိခွါ, စကီၤယဧူၢ်ၡး, စကီၤယၤဧလၣ်, စကီၤကိးရးလီၤ. အဝဲသ့ၣ်တဖၣ်န့ၣ်မ့ၢ် စီၤဧနၤအဖိမုၣ်စီၤဧ့ၡီၤအမါနီၢ် အဟိးလံးဘါမၤအစကီၤတဖၣ်န့ၣ်လီၤ. ¹⁹ အဝဲသ့ၣ်တ ဖၣ်န့ၣ်မ့ၢ်စီၤဧ့ၡီၤအဖိခွါ (အဝဲဒၣ်မ့ၢ်အဒိၣ်) ဒီးအဝဲ သ့ၣ်တဖၣ်န့ၣ်မ့ၢ်စကီၤတဖၣ်လီၤ.

²⁰ ဒီးအအံၤမ့ၢ်ပှၤဃိၢ်ဖိစီၤစ့ဧ့ၢ်အဖိခွါတဖၣ် လၢအအိၣ် ဝဲဆိးဝဲလၢကီၢ်ပူၤ, စီၤလိတၣ်, ဒီးစီၤၡိဘလး, ဒီးစီၤ စံးဘဧိၣ်, ဒီးစီၤဧနၤ, ²¹ ဒီးစီၤဒံၡိၣ်, ဒီးစီၤအ့စၢ်, ဒီး စီၤဒံၡၣ်လီၤ. အဝဲသ့ၣ်တဖၣ်န့ၣ် မ့ၢ်စကီၤတဖၣ်လၢ ပှၤဃိၢ်ဖိအကျါ, စီၤစ့ဧ့ၢ်အဖိခွါလၢကီၢ်အဒိၣ်အပူၤလီၤ.

²² ဒီးစီၤလိတၣ်အဖိခွါမ့ၢ်စီၤဃိၢ်ရၤ, ဒီးစီၤဟ့ၣ်မၣ်လီၤ. ဒီးစီၤလိတၣ်အဒီပုၢ်ဝဲၢ်မုၣ်မ့ၢ်နီၢ်တံးမနၤလီၤ.

²³ ဒီးအအံၤမ့ၢ်စီၤၡိဘလးအဖိခွါ, စီၤဧးလဝၣ်, ဒီးစီၤ မနၤဃး, ဒီးစီၤဧ့ၤဘါလး, ဒီးစီၤၡဖိၤ, ဒီးစီၤအိၣ်နၣ်လီၤ.

²⁴ ဒီးအအံၤမ့ၢ်စီၤစံးဘဧိၣ်အဖိခွါ, စီၤအၤယၤ, ဒီးစီၤ ဧနၤလီၤ. တၢ်လၢစီၤဧနၤန့ၣ်မ့ၢ်ပှၤလၢအကွၢ်အပၢ်စီၤ စံးဘဧိၣ်အကသ့ၣ်ယီၤအဖၢမုၢ်န့ၣ် ထံၣ်န့ၢ်ထံထီၣ်ကိၢ် အလီၢ်လၢပှၢ်လၢ်ကျါလီၤ.

²⁵ ဒီးအအံၤမ့ၢ်စီၤဧနၤအဖိ, စီၤဒံၡိၣ်, ဒီးစီၤဧနၤအဖိမုၣ် နီၢ်အဟိးလံးဘါမၤလီၤ.

²⁶ ဒီးအအံၤမ့ၢ်စီၤဒံၡိၣ်အဖိခွါ, စီၤဃ့းမဒၣ်, ဒီးစီၤအ့း ၡဘၣ်, ဒီးစီၤယံးသရၣ်, ဒီးစီၤကရၣ်လီၤ.

²⁷ ဒီးအအံၤမ့ၢ်စီၤအ့စၢ်အဖိခွါ, စီၤဘံးလဟၣ်, ဒီးစီၤ စၤဧဝၣ်, ဒီးစီၤယၤဧကၣ်လီၤ.

²⁸ ဒီးအအံၤမ့ၢ်စီၤဒံၡၣ်အဖိခွါ, စီၤဧူးစး, ဒီးစီၤအၤရၣ် လီၤ. ²⁹ အအံၤမ့ၢ်စကီၤတဖၣ်လၢပှၤဃိၢ်ဖိအကျါ, စကီၤလိတၣ်, စကီၤၡိဘလး, စကီၤစံးဘဧိၣ်, စကီၤဧနၤ,―

³⁰ စကီၤဒံၡိၣ်, စကီၤအ့စၢ်, စကီၤဒံၡၣ်လီၤ. အဝဲသ့ၣ် တဖၣ်န့ၣ်မ့ၢ်ပှၤဃိၢ်ဖိအစကီၤလၢအစကီၤတဖၣ်အကျါ လၢကီၢ်စ့ဧ့ၢ်အပူၤလီၤ.

³¹ ဒီးအအံၤမ့ၢ် စီၤပၤလၢအကဲစီၤပၤလၢကီၢ်အဒိၣ်အပူၤ လၢစီၤပၤတချုးအိၣ်ဒံးဘၣ်စီၤပၤလၢ ပှၤအံၣ်စရ့လးဖိ အဖီခိၣ်, ³² ဒီးစီၤဘဧိၣ်အဖိခွါ စီၤဘ့လၤကဲစီၤပၤလၢ ကီၢ်အဒိၣ်အပူၤ, ဒီးအဝ့ၢ်အမံၤမ့ၢ်ဒံးနဟးဘၤလီၤ.

³³ ဒီးစီၤဘ့လၤန့ၣ်သံဝဲ, ဒီးစီၤစ့ရၤအဖိခွါဘၣ်ဃးဒီး ဝ့ၢ်ဘိးစရၤ, စီၤယိၤဘးကဲစီၤပၤလၢအလီၢ်လီၤ.

³⁴ ဒီးစီၤယိၤဘးန့ၣ်သံဝဲ, ဒီးစီၤဃူၡၣ် ဘၣ်ဃးဒီးကီၢ် တ့ၤမၣ်ကဲစီၤပၤလၢအလီၢ်လီၤ.

³⁵ ဒီးစီၤဃူၡၣ်န့ၣ်သံဝဲ, ဒီးစီၤဘဒးအဖိခွါ (ပှၤလၢအ ကျီသံကွံာ်မံးဒယၣ်လၢပျီမိၤအးအပူၤ) စီၤဟဒးကဲစီၤ ပၤလၢအလီၢ်လီၤ. ဒီးအဝ့ၢ်အမံၤမ့ၢ်ဧဝံးလီၤ.

³⁶ ဒီးစီၤဟဒးန့ၣ်သံဝဲ, ဒီးစီၤစးမလၤဘၣ်ဃးဒီး မးစ ရ့ကၤကဲစီၤပၤလၢအလီၢ်လီၤ.

³⁷ ဒီးစီၤစးမလၤန့ၣ်သံဝဲ, ဒီးစီၤစီလူးဘၣ်ဃးဒီးဝ့ၢ်ရဃိ ဘိးလၢထံမိၢ်ပှၢ်အနံၤန့ၣ်ကဲစီၤပၤလၢအလီၢ်လီၤ.

³⁸ ဒီးစီၤစီလူးန့ၣ်သံဝဲ, ဒီးစီၤဧးကဘိၢ်အဖိခွါစီၤဘဧၤ လဃါနၣ်ကဲစီၤပၤလၢအလီၢ်လီၤ.

³⁹ ဒီးစီၤဧးကဘိၢ်အဖိခွါစီၤဘဧၤလဃါနၣ်သံဝဲ, ဒီးစီၤ ဃဒၢ်ကဲစီၤပၤလၢအလီၢ်လီၤ. ဒီးအဝ့ၢ်အမံၤမ့ၢ်ဖၤဧူၤ, ဒီးအမါအမံၤမ့ၢ် နီၢ်မဟ့တးဘးအ့လး, နီၢ်မးတရ့း အဖိမုၣ်, စီၤမ့စဟးအဖိမုၣ်လီၤ.

⁴⁰ ဒီးအအံၤမ့ၢ်စီၤဧ့ၡီၤအစကီၤတဖၣ်အမံၤ, ဒ်အဒူၣ်တ ဖၣ်အသိး, ဒ်အလီၢ်တဖၣ်အသိးလၢအမံၤတဖၣ်န့ၣ်, စကီၤတံးမနၤ, စကီၤဧးလဝၣ်, စကီၤယသ့း, ⁴¹ စကီၤ အဟိးလံးဘါမၤ, စကီၤအ့လး, စကီၤပံနိၣ်, ⁴² စကီၤ ကနးစး, စကီၤတ့ၤမၤ, စကီၤမံးဘစၢ်, ⁴³ စကီၤမးက ဒံအ့လး, စကီၤဧံရၣ်လီၤ. အဝဲသ့ၣ်တဖၣ်န့ၣ်မ့ၢ်အဒိၣ် အစကီၤတဖၣ်, ဒ်အအိၣ်ဝဲဆိးဝဲအလီၢ်အသိးလၢ အ တၢ်ဟံးဃာ်အကီၢ်ပူၤလီၤ. အဝဲဒၣ်န့ၣ်မ့ၢ်ပှၤအဒိၣ်ဖိအ ပၢ်, စီၤဧ့ၡီၤလီၤ.

၃၇

¹ ဒီးစီၤယၤကိာ်အိၣ်ဝဲဆိးဝဲလၢကီၢ်ပူၤ ဖဲအပၢ်အိၣ်တ မှံၤ, လၢကီၢ်ကနၤဧၣ်အပူၤလီၤ.

² အအံၤမ့ၢ်စီၤယၤကိာ်အစၢၤအသွဲၣ်, စီၤယိၤသးအသး အိၣ်တဆံနွံနံၣ်ဒီးကွၢ်သိဒီးမဲာ်တဲးလဲးတဖၣ်ဒီး အဒီပုၢ် ဝဲၢ်လီၤ. ဒီးဖိၣ်သၣ်ခွါန့ၣ်အိၣ်ဒီး နီၢ်ဘံၤလဟၤအဖိခွါ သ့ၣ်ဒီးနီၢ်စံၤလပၤအဖိခွါသ့ၣ်, အပၢ်အမါတဖၣ်လီၤ. ဒီးစီၤယိၤသး ဟဲစိာ်အဝဲသ့ၣ်အကစီၣ်အအၢဆူ အပၢ် အအိၣ်လီၤ.

³ ဒီးစီၤအံၣ်စရ့လးအဲၣ်စီၤယိၤသးအါန့ၢ်အဖိခွါခဲလၢာ် တက့ၢ်လီၤ. အဂ့ၢ်ဒ်အံၤ, မ့ၢ်အသးပှၢ်အဖိခွါလီၤ. ဒီး မၤဆ့ဖးထီတဘ့ၣ်အိၣ်ဒီးအစုလၢအဂီၢ်လီၤ.

⁴ ဒီးအဒီပုၢ်ဝဲၢ်တဖၣ်န့ၣ် ထံၣ်ဘၣ်ဝဲလၢအပၢ်အဲၣ်အီၤ အါန့ၢ်အအဲၣ်အဒီပုၢ်ဝဲၢ်ခဲလၢာ်တက့ၢ်, ဒီးသးဟ့အီၤ လီၤ. ဒီးကတိၤမုာ်မုာ်ဒီးအီၤတကဲဘၣ်. ⁵ ဒီးစီၤယိၤသးမံမီၢ်တၢ်မံမီၢ်, ဒီးစံးဘၣ်တဲဘၣ်အဒီပုၢ်ဝဲၢ်, ဒီးအဝဲသ့ၣ်သးဟ့အီၤ အါန့ၢ်အန့ၣ်တက့ၢ်လီၤ.―

⁶ ဒီးစံးဘၣ်အီၤ, ကနၣ်လၢတၢ်မံမီၢ်အံၤ လၢယမံမီၢ်တ က့ၢ်. ⁷ ဒီးကွၢ်ကွၢ်, ပဃ့ဘုကဒိၣ်လၢစံာ်ပူၤ, ဒီးကွၢ် ကွၢ်, ယဘုကဒိၣ်ဂဲၤဆၢထၢၣ်, ဒီးအိၣ်ဝဲထူၣ်ကလာ် လီၤ. ဒီးကွၢ်ကွၢ်, သုဘုကဒိၣ်အိၣ်ဝးတရံးဝဲ, ဒီးသ ကူးလီၤအသးလၢယဘုကဒိၣ်အမဲာ်ညါလီၤ.

⁸ ဒီးအဒီပုၢ်ဝဲၢ်စံးဘၣ်အီၤ, နကကဲစီၤပၤလၢပဖီခိၣ်သ ပှၢ်တၢၢ်ဧါ, နကပၢပှၤသပှၢ်တၢၢ်ဧါ. ဒီးသးဟ့ဒံးအီၤ နးန့ၢ်အန့ၣ်တက့ၢ်လၢအတၢ်မံမီၢ်အဃိ, ဒီးလၢအတၢ် ကတိၤအဃိလီၤ.

⁹ ဒီးမံမီၢ်ဒံးတၢ်မံမီၢ်လၢအဂၤတမံၤ, ဒီးစံးဘၣ်တဲဘၣ် အဒီပုၢ်ဝဲၢ်, ဒီးစံးဝဲဒၣ်, ကွၢ်ကွၢ်, ယမံမီၢ်ဒံးတၢ်မံမီၢ် တမံၤ, ဒီးကွၢ်ကွၢ်, မုၢ်ဒီးလါ, ဒီးဆၣ်တဆံတဖျၢၣ် သကူးလီၤအသးလၢယမဲာ်ညါလီၤ.

¹⁰ ဒီးစံးဘၣ်အပၢ်ဒီးအဒီပုၢ်ဝဲၢ်, ဒီးအပၢ်သိၣ်ဃီၣ်အီၤ, ဒီးစံးဘၣ်အီၤ, တၢ်မံမီၢ်လၢနမံမီၢ်အံၤမ့ၢ်ဒ်လဲၣ်. ယၤ, ဒီးနမိၢ်, ဒီးနဒီပုၢ်ဝဲၢ်သ့ၣ်တဖၣ်ကဟဲတီၤလီၤကဒွံကျိာ် လၢနမဲာ်ညါသပှၢ်တၢၢ်ဧါ.

¹¹ ဒီးအဒီပုၢ်ဝဲၢ်တဖၣ်န့ၣ်သးက့ၣ်အီၤလီၤ. မ့မ့ၢ်အပၢ် တဂၤန့ၣ်တိၢ်န့ၢ်တၢ်ကတိၤတထံၣ်န့ၣ်လီၤ.

¹² ဒီးအဒီပုၢ်ဝဲၢ်တဖၣ်န့ၣ် လဲၤကွၢ်အပၢ်အသိဒီးမဲာ်တဲး လဲးတဖၣ်လၢၡက့ၣ်လီၤ. ¹³ ဒီးစီၤအံၣ်စရ့လးစံးဘၣ်စီၤ ယိၤသး, နဒီပုၢ်ဝဲၢ်တဖၣ်ကွၢ်တၢ်လၢၡက့ၣ်အပူၤတမ့ၢ် ဘၣ်ဧါ, ဟဲမီၣ်, ယကမၢနလဲၤတၢ်ဆူအအိၣ်လီၤ. ဒီး စံးဘၣ်အီၤ, ကွၢ်ကွၢ်, ယၤလီၤ.

¹⁴ ဒီးစံးဘၣ်အီၤ, လဲၤလၢ်တက့ၢ်. နဒီပုၢ်ဝဲၢ်အိၣ်မုာ်ဧါ န့ၣ်, ဒီးသိဒီးမဲာ်တဲးလဲးတဖၣ်အိၣ်မုာ်ဧါန့ၣ်, လဲၤကွၢ်, ဒီးဟဲက့ၤစံးဘၣ်ယၤတက့ၢ်. ဒီးမၢအဟးထီၣ်လၢဃ့ ဘြိၣ်အပျီ, ဒီးအဝဲဒၣ်ဟဲက့ၤဆူၡက့ၣ်လီၤ.

¹⁵ ဒီးပှၤတဂၤထံၣ်န့ၢ်အီၤ, ဒီးကွၢ်ကွၢ်, လဲၤဝ့ၤဝီၤတၢ် လၢပှၢ်လၢ်ကျါလီၤ. ဒီးပှၤတဂၤန့ၣ်သံကွၢ်အီၤ, ဒီးစံး ဝဲဒၣ်, နဃုမနုၤတမံၤလဲၣ်, ¹⁶ ဒီးစံးဝဲဒၣ်, ယဃုယဒီ ပုၢ်ဝဲၢ်လီၤ. ဒုးနဲၣ်လၢ်ယၤဖဲအကွၢ်တၢ်တက့ၢ်.

¹⁷ ဒီးပှၤတဂၤန့ၣ်စံးဝဲဒၣ်, ဟးထီၣ်လံလၢအံၤလံ. အဂ့ၢ် ဒ်အံၤ, ယနၢ်ဟူအစံး, လဲၤသကိးဆူဒိၤသၣ်တက့ၢ်. ဒီးစီၤယိၤသးလူၤပိာ်အခံ, ဒီးထံၣ်န့ၢ်အီၤလၢဒိၤသၣ်လီၤ.

¹⁸ ဒီးအဝဲသ့ၣ်တဖၣ်န့ၣ်ထံၣ်ဘၣ်အီၤလၢအယံၤ, ဒီးတ ချုးအဟဲဘူးဒံးဘၣ်ဒီး, ကူၣ်ထီဒါအီၤလၢအကမၤသံ အီၤလီၤ. ¹⁹ ဒီးကတိၤလိာ်အသးဒီးစံးဝဲဒၣ်, ကွၢ်ကွၢ်, တၢ်မံမီၢ်အကစၢ်တဂၤဟဲဝဲလီၤ. ²⁰ ဒီးခဲကနံၣ်အံၤဟဲမီၣ်, မၤသံသကိးအီၤ, ဒီးတ့ၢ်လီၤကွံာ်အီၤလၢတၢ်ပူၤတပူၤ ပူၤတက့ၢ်. ဒီးပကစံးလၢဆၣ်ဖိကီၢ်ဖိအအၢတဒုအီၣ် ကွံာ်အီၤ, ဒီးအတၢ်မံမီၢ်တဖၣ်ကကဲထီၣ်ဒ်လဲၣ်ဒ်လဲၣ် န့ၣ်ပကထံၣ်ဘၣ်လီၤ.

²¹ ဒီးစီၤရူၤဘ့ၣ်နၢ်ဟူဝဲ, ဒီးမၤပူၤမၤဖျဲးအီၤလၢအစုပူၤ, ဒီးစံးဝဲဒၣ်, မ်ပသုတကျီသံအသးတဂ့ၤ. ²² ဒီးစီၤရူၤဘ့ၣ် စံးဘၣ်အီၤ, လူလီၤတၢ်သွံၣ်တဂ့ၤ, တ့ၢ်လီၤကွံာ်အီၤ လၢတၢ်ပူၤအံၤလၢပှၢ်လၢ်ကျါတက့ၢ်. သုသုတပာ်သုစု လၢအလိၤတဂ့ၤ, ဒ်သိးအကမၤပူၤမၤဖျဲးအီၤဒီးအစုပူၤ လၢအကဟ့ၣ်က့ၤအီၤလၢအပၢ်အဂ့ၢ်လီၤ.

²³ ဒီးတုၤစီၤယိၤသးဟဲဆူအဒီပုၢ်ဝဲၢ်အအိၣ်ဒီး, အဝဲသ့ၣ် ဘ့ၣ်ကွံာ်အဆ့ဖးထီအိၣ်ဒီးအစုတဘ့ၣ်န့ၣ် လၢအလိၤ လီၤ. ²⁴ ဒီးဟံးန့ၢ်အီၤ, ဒီးတ့ၢ်လီၤကွံာ်အီၤလၢတၢ်ပူၤ လီၤ. ဒီးတၢ်ပူၤန့ၣ်အိၣ်ကလီလီၤ. ထံတအိၣ်ဘၣ်လၢ အပူၤဘၣ်.

²⁵ ဒီးအဝဲသ့ၣ်တဖၣ်န့ၣ်ဆ့ၣ်နီၤအီၣ်တၢ်, ဒီးကျ့ထီၣ်အ မဲာ်, ဒီးထံၣ်တၢ်, ဒီးကွၢ်ကွၢ်, ပှၤယံးၡမၤဧ့လးဖိတဖု ဟဲလၢကီၢ်ကံးလဧးအိၣ်ဒီးအကီၤလၤအူး, ဒီးစိာ်ဝဲဒီး နီၣ်တြူးနကိးအဃ့, ဒီးသ့ၣ်စရံအထုးဒီးသ့ၣ်လိးအ ထုး, ဒီးလဲၤစိာ်လီၤဝဲဆူအဲၤကူပတူးလီၤ.

²⁶ ဒီးစီၤယူဒၤစံးဘၣ်အဒီပုၢ်ဝဲၢ်, ပမ့ၢ်မၤသံပဒီပုၢ်ဝဲၢ်တ ဂၤန့ၣ်ဒီးပာ်ခူသူၣ်အသွံၣ်ဒီး, မ့ၢ်အဂိာ်မနုၤလဲၣ်.

²⁷ ဟဲမီၣ်, ဆါကွံာ်သကိးအီၤလၢပှၤယံးၡမၤဧ့လးဖိန့ၣ် တက့ၢ်. ဒီးမ်ပစုသုတအိၣ်လၢအလိၤတဂ့ၤ. အဂ့ၢ်ဒ် အံၤ, မ့ၢ်ဝဲလၢပဒီပုၢ်ဝဲၢ်ပဖံးပညၣ်လီၤ. ဒီးအဒီပုၢ်ဝဲၢ် သ့ၣ်တဖၣ်န့ၣ်ကနၣ်ဝဲလီၤ.

²⁸ ဒီးပှၤမံးဒယၣ်ဖိ, ပှၤကၤတၢ်ဖိ, လဲၤပူၤလၢအအိၣ်, ဒီးအဝဲသ့ၣ်စဲၤထီၣ်, ဒီးစိာ်ထီၣ်စီၤယိၤသးလၢတၢ်ပူၤ, ဒီးဆါကွံာ်စီၤယိၤသးလၢ ပှၤယံးၡမၤဧ့လးဖိလၢစ့ခံဆံ အဂီၢ်လီၤ. ဒီးအဝဲသ့ၣ်ဟဲစိာ်စီၤယိၤသးဆူ အဲၤကူပ တူးအပူၤလီၤ. ²⁹ ဒီးစီၤရူၤဘ့ၣ်က့ၤက့ၤဝဲဆူတၢ်ပူၤ, ဒီးကွၢ်ကွၢ်, စီၤယိၤသးတအိၣ်ဘၣ် လၢတၢ်ပူၤဘၣ်, ဒီးဖှီဝဲအယၣ်,―

³⁰ ဒီးက့ၤကဒါက့ၤဆူအဒီပုၢ်ဝဲၢ်အအိၣ်, ဒီးစံးဝဲဒၣ်, ဖိ သၣ်ပိာ်ခွါတဂၤန့ၣ်တအိၣ်လၢၤဘၣ်. ဒီးယဲဒၣ်အံၤယ ကလဲၤယဲဖဲလဲၣ်.

³¹ ဒီးအဝဲသ့ၣ်ဟံးန့ၢ်စီၤယိၤသးအဆ့တဘ့ၣ်, ဒီးမၤသံ မဲာ်တဲးလဲးဖိတဒု, ဒီးဘျၢလီၤဆ့တဘ့ၣ်န့ၣ်လၢအသွံၣ် ပူၤ, ³² ဒီးမၢပှၤက့ၤစိာ်ဆ့ဖးထီအိၣ်ဒီးအစုန့ၣ်, ဒီးလဲၤ စိာ်ဝဲဆူအပၢ်အအိၣ်, ဒီးစံးဝဲဒၣ်, တၢ်အံၤတဘ့ၣ်ပထံၣ် န့ၢ်အီၤလီၤ. မ့ၢ်နဖိခွါအဆ့ဧါ, တမ့ၢ်ဘၣ်ဧါန့ၣ်ကွၢ်တ က့ၢ်. ³³ ဒီးအဝဲဒၣ်ကွၢ်နီၣ်အီၤ, ဒီးစံးဝဲဒၣ်, မ့ၢ်ယဖိခွါ အဆ့မးလဲၣ်. ဆၣ်ဖိကီၢ်ဖိအအၢတဒု အီၣ်ကွံာ်လံအီၤ လံ. စီၤယိၤသးဘၣ်ယာ်သံကွံာ်လံသပှၢ်တၢၢ်လံ.

³⁴ ဒီးစီၤယၤကိာ်ဖှီအယၣ်, ဒီးကူထၢၣ်တၢ်ကံးညာ်လၢ အယီၢ်ဒ့, ဒီးသူၣ်အုးသးအုးလၢအဃိ အါနံၤအါသီ လီၤ. ³⁵ ဒီးအဖိခွါခဲလၢာ်, ဒီးအဖိမုၣ်ခဲလၢာ်ဂဲၤဆၢ ထၢၣ်မၤမုာ်ထီၣ်အီၤ, ဒီးဒိးဘၣ်တၢ်မၤမုာ်ထီၣ်က့ၤအီၤ န့ၣ်တအဲၣ်ဝဲဘၣ်, ဒီးစံးဝဲဒၣ်, အဂ့ၢ်ဒ်အံၤ, ယကလဲၤ လီၤဒီး တၢ်ဟီၣ်တၢ်ယၢၤဆူယဖိခွါအအိၣ် လၢပျုၤပူၤ လီၤ. ဒီးအပၢ်အမဲာ်ထံလီၤလၢအဃိလီၤ.

³⁶ ဒီးပှၤမံးဒယၣ်ဖိန့ၣ်ဆါကွံာ်အီၤလၢ ဖၤရိၤအပှၤဒ့ဒံၣ် ဖိ, ဒီးပှၤမၤသံတၢ်တဖၣ်အဒိၣ်, စီၤပိၤတံၤဖၢ်, လၢ အဲၤကူပတူးအပူၤလီၤ.

၃၈

¹ ဒီးအကတီၢ်ဖဲန့ၣ်တၢ်မၤအသးလၢ စီၤယူဒၤဟးထီၣ် လၢအဒီပုၢ်ဝဲၢ်အကျါ, ဒီးဃၣ်ကပၤအသးဆူပှၤတဂၤ, ပှၤဧဒူးလၣ်ဖိအအိၣ်, လၢအမံၤမ့ၢ်စီၤဃံရၤလီၤ. ² ဒီး စီၤယူဒၤန့ၣ်ထံၣ်ဘၣ်မတၤတဂၤ, ပှၤကနၤဧၣ်ဖိစီၤရှူာ် အဖိမုၣ်ဖဲန့ၣ်, ဒီးဟံးန့ၢ်အီၤ, ဒီးလဲၤနုာ်ဆူအအိၣ်လီၤ.―

³ ဒီးဒၢထီၣ်ဝဲဒီးဆံးစၢ်န့ၢ်အဖိခွါ, ဒီးယုၢ်ဝဲအမံၤလၢစီၤ အ့ၢ်လီၤ.

⁴ ဒီးဒၢထီၣ်ကဒီးဝဲ, ဒီးဆံးစၢ်န့ၢ်အဖိခွါ, ဒီးယုၢ်ဝဲအ မံၤလၢစီၤအိၤနၣ်လီၤ.

⁵ ဒီးဒၢထီၣ်ကဒီးဝဲ, ဒီးဆံးစၢ်န့ၢ်အဖိခွါ, ဒီးယုၢ်ဝဲအ မံၤလၢစီၤရှ့လၤလီၤ. ဒီးလၢအဆံးစၢ်အဝဲတဂၤန့ၣ်စီၤ ယူဒၤအိၣ်ဝဲလၢဝ့ၢ်ကစံာ်လီၤ.

⁶ ဒီးစီၤယူဒၤဟံးန့ၢ်မါလၢ အဖိဝဲၢ်ကိစီၤအ့ၢ်အဂီၢ်ဒီးအ မံၤမ့ၢ်နီၢ်တၤမၢ်လီၤ. ⁷ ဒီးစီၤယူဒၤအဖိဝဲၢ်ကိစီၤအ့ၢ်တ ဂၤန့ၣ်, အၢဝဲလၢယွၤအမဲာ်ညါ, ဒီးယွၤမၤသံအီၤလီၤ.―

⁸ ဒီးစီၤယူဒၤစံးဘၣ်စီၤအိၤနၣ်, လဲၤနုာ်ဆူနဝဲၢ်အမါအ အိၣ်, ဒီးန့ၢ်မါလၢအီၤ, ဒီးဒုးအိၣ်ထီၣ်တၢ်အချံအသၣ် လၢနဝဲၢ်အဂီၢ်တက့ၢ်.

⁹ ဒီးစီၤအိၤနၣ်န့ၣ်သ့ၣ်ညါဝဲလၢ တၢ်အချံအသၣ်တကဲ ထီၣ်အတၢ်ဒၣ်ဝဲဘၣ်, ဒီးတၢ်မၤအသးတုၤအလဲၤနုာ် လၢအဝဲၢ်အမါအအိၣ်ဒီး, မၤဟးဂီၤကွံာ်တၢ်ဆူဟီၣ်ခိၣ်, ဒ်သိးအသုတဟ့ၣ် တၢ်အချံအသၣ်လၢအဝဲၢ်တဂ့ၤန့ၣ် လီၤ. ¹⁰ ဒီးတၢ်လၢအမၤဝဲန့ၣ် မ့ၢ်တၢ်အၢလၢယွၤအ မဲာ်ညါ, ဒီးမၤသံအီၤစ့ၢ်ကီးလီၤ.

¹¹ ဒီးစီၤယူဒၤစံးဘၣ်အဒဲၣ်နီၢ်တၤမၢ်န့ၢ်, အိၣ်ကမဲလၢ နပၢ်အဟံၣ်ပူၤတုၤယဖိခွါစီၤရှ့လၤဒိၣ်ထီၣ်တက့ၢ်. အ ဂ့ၢ်ဒ်အံၤ, စံးဝဲဒၣ်, ကသံဘၣ်ဖုးဒ်အဝဲၢ်တဖၣ်အသိး လီၤ. ဒီးနီၢ်တၤမၢ်န့ၣ်လဲၤအိၣ်ဝဲဆိးဝဲလၢအပၢ်အဟံၣ် ပူၤလီၤ.

¹² ဒီးအနံၤအသီအါထီၣ်ဝဲဝံၤဒီး, စီၤရှူာ်အဖိမုၣ်, စီၤ ယူဒၤအမါသံဝဲလီၤ. ဒီးစီၤယူဒၤဘၣ်တၢ်မၤမုာ်အီၤဝံၤ ဒီး, လဲၤဝဲဆူပှၤတံာ်သိအဆူၣ်အအိၣ်, ဆူတံးမနၤ, အဝဲဒၣ်ဒီးအတံၤအသကိးပှၤဧဒူးလၣ်ဖိစီၤဃံရၤလီၤ. ¹³ ဒီးပှၤစံးဘၣ်နီၢ်တၤမၢ်ဒီးစံးဝဲဒၣ်, နမံၤပှၢ်ပိာ်ခွါလဲၤထီၣ်ဆူတံးမနၤ, ဒ်သိးအကတံာ် အသိအဆူၣ်လိၤ.―

¹⁴ ဒီးအဝဲဒၣ်ဘ့ၣ်ကွံာ်အမုၣ်ကမဲအကူအသိး, ကျၢၢ်ဘၢ ထီၣ်အသးဒီးနီၢ်ကျၢၢ်ဘၢ, ဒီးကၤအတၢ်, ဒီးဆ့ၣ်နီၤ လၢထံထီၣ်ပၢၢ်ခံပူၤအကျဲစၢၤ, လၢအအိၣ်ဝဲလၢတံးမ နၤအကျဲဃၢၤန့ၣ်လီၤ. အဂ့ၢ်ဒ်အံၤ, ထံၣ်ဘၣ်ဝဲလၢစီၤ ရှ့လၤဒိၣ်ထီၣ်ဝဲ, ဒီးတၢ်တဟ့ၣ်ဘၣ်အီၤလၢအမါဘၣ်.

¹⁵ ဒီးစီၤယူဒၤထံၣ်ဘၣ်အီၤ, ဒီးမ့ၢ်အကျၢၢ်ဘၢအမဲာ်ဒီး, ဆိကမိၣ်ဝဲလၢအမ့ၢ်ပှၤဃဲသဲမုၣ်တဂၤလီၤ. ¹⁶ ဒီးဃၣ်က ပၤအသးဆူအအိၣ်လၢကျဲဃၢၤ, ဒီးစံးဝဲဒၣ်, ဟဲမီၣ်, ဒုး ဟဲနုာ်လၢ်ယၤလၢနအိၣ်တက့ၢ်, (အဂ့ၢ်ဒ်အံၤ, တသ့ၣ် ညါဘၣ်လၢအမ့ၢ်အဒဲၣ်ဘၣ်.) ဒီးစံးဝဲဒၣ်, ဒ်သိးနက ဟဲနုာ်လၢယအိၣ်ဒီး, နကဟ့ၣ်ယၤလၢမနုၤတမံၤလဲၣ်.

¹⁷ ဒီးစံးဝဲဒၣ်, ယကမၢပှၤဟဲစိာ်န့ၢ်နၤလၢ မဲာ်တဲးလဲး ဖိတဒုလၢမဲာ်တဲးလဲးအကျါလီၤ. ဒီးစံးဝဲဒၣ်, နတချုး မၢလီၤဒံးဘၣ်ဒီး, နကဟ့ၣ်ကီၤတၢ်တမံၤမံၤဧါ.

¹⁸ ဒီးစံးဝဲဒၣ်, ယဘၣ်ဟ့ၣ်နၤလၢတၢ်ဟ့ၣ်ကီၤမနုၤတ မံၤလဲၣ်. ဒီးစံးဝဲဒၣ်, နတၢ်စဲဃာ်ပနီၣ်, ဒီးအပျံၤ, ဒီး နီၣ်ထိးဘိလၢအအိၣ်လၢနစုပူၤလီၤ. ဒီးဟ့ၣ်တၢ်တဖၣ် န့ၣ်လၢအီၤ, ဒီးလဲၤနုာ်ဆူအအိၣ်, ဒီးအဝဲဒၣ်ဒၢထီၣ် လၢအဃိလီၤ.

¹⁹ ဒီးဂဲၤဆၢထၢၣ်ဝဲ, ဒီးက့ၤက့ၤတၢ်, ဒီးဘ့ၣ်ကွံာ်အ နီၣ်ကျၢၢ်ဘၢလၢအလိၤ, ဒီးကူသိးထီၣ်က့ၤပှၤမုၣ်ကမဲ အကူအသိးလီၤ.

²⁰ ဒီးစီၤယူဒၤမၢအတံၤအသကိး, ပှၤဧဒူးလၣ်ဖိတဂၤ လဲၤစိာ်မဲာ်တဲးလဲးဖိတဒု ဒ်သိးအကဒိးန့ၢ်က့ၤတၢ်ဟ့ၣ် ကီၤန့ၣ်လၢပိာ်မုၣ်အစုပူၤလီၤ. ဒီးတထံၣ်န့ၢ်ဘၣ်အီၤ ဘၣ်. ²¹ ဒီးသံကွၢ်ပှၤလၢအဝဲဒၣ်အလီၢ်န့ၣ်, ဒီးစံးဝဲဒၣ်, ပှၤဃဲသဲမုၣ် လၢအအိၣ်တ့ၢ်လၢ ထံထီၣ်ပၢၢ်ခံပူၤဖဲကျဲ ဃၢၤတဂၤန့ၣ်မ့ၢ်အအိၣ်ဖဲလဲၣ်, ဒီးစံးဝဲဒၣ်, ပှၤဃဲသဲ မုၣ်တအိၣ်တ့ၢ်ဘၣ်ဖဲအံၤနီတဂၤဘၣ်.

²² ဒီးက့ၤကဒါက့ၤဆူစီၤယူဒၤအအိၣ် ဒီးစံးဘၣ်အီၤ, ယတထံၣ်န့ၢ်ဘၣ်ပိာ်မုၣ်ဘၣ်. ဒီးပှၤအိၣ်လၢတၢ်အလီၢ် န့ၣ်စံးဝဲလၢ ပှၤဃဲသဲမုၣ်တအိၣ်တ့ၢ်ဘၣ်ဖဲန့ၣ်နီတဂၤ ဘၣ်.

²³ ဒီးစီၤယူဒၤစံးဝဲဒၣ်, ကဟံးန့ၢ်ဒၣ်ဝဲတက့ၢ်. ပမဲာ် ကဆှးဘၣ်ဖုးလီၤ, ကွၢ်ကွၢ်, ယမၢလီၤမဲာ်တဲးလဲးဖိ တဒုအံၤ, ဒီးနတထံၣ်န့ၢ်ဘၣ်အီၤဘၣ်.

²⁴ ဒီးတၢ်မၤအသးလၢအလီၢ်ခံသၢလါဃၣ်ဃၣ်န့ၣ် ပှၤ စံးဘၣ်စီၤယူဒၤ, ဒီးစံးဝဲဒၣ်, နဒဲၣ်နီၢ်တၤမၢ်တဂၤမၤ ကမၣ်တၢ်, ဒီးကွၢ်ကွၢ်, ဒၢသမူထီၣ်စ့ၢ်ကီးလီၤ. ဒီး စီၤယူဒၤစံးဝဲဒၣ်, ဟဲက့ၤစိာ်ထီၣ်အီၤ, ဒီးမ်အဘၣ်တၢ် ကုၢ်သံဃိသံအီၤတက့ၢ်.

²⁵ ဒီးတုၤပှၤဟဲက့ၤစိာ်ထီၣ်အီၤဒီး, အဝဲဒၣ်မၢလီၤတၢ် ဆူအမံၤပှၢ်ပိာ်ခွါအအိၣ်, ဒီးစံးဝဲဒၣ်, ယဒၢထီၣ်လၢ တၢ်တဖၣ်န့ၣ်အကစၢ်အဃိလီၤ. ဒီးစံးဝဲဒၣ်, ကွၢ်နီၣ် လၢ်တက့ၢ်. တၢ်စဲဃာ်ပနီၣ်, ဒီးအပျံၤ, ဒီးနီၣ်ထိးဘိ တဖၣ်အံၤမ့ၢ်မတၤအဝဲလဲၣ်.

²⁶ ဒီးစီၤယူဒၤကွၢ်နီၣ်ဝဲဒီးစံးဝဲဒၣ်, အဝဲဒၣ်န့ၣ်တီန့ၢ်လိၤ န့ၢ်ယၤတက့ၢ်လီၤ. အဂ့ၢ်ဒ်အံၤ, ယတဟ့ၣ်ဘၣ်အီၤလၢ ယဖိခွါစီၤရှ့လၤဘၣ်, ဒီးတသ့ၣ်ညါလၢၤဘၣ်အီၤဘၣ်.

²⁷ ဒီးတၢ်မၤအသးလၢအဟုးဆါအဖၢမုၢ်ဒီး, ကွၢ်ကွၢ်, ပှၤသဃံာ်အိၣ်ဝဲလၢအဒၢလီၢ်ပူၤလီၤ. ²⁸ ဒီးတၢ်မၤအသး လၢအဟုးဆါအဖၢမုၢ်န့ၣ်ဒီး, ပှၤတဂၤအစုအိၣ်ဖျါထီၣ် ဒီးပှၤကွၢ်ပဟုးဟံးဝဲ, ဒီးကံၢ်အစုလၢပျံၤဂီၤ, ဒီးစံးဝဲ ဒၣ်, အဝဲတဂၤအံၤဟဲဆိဝဲလီၤ.

²⁹ ဒီးတၢ်မၤအသးလၢအထုးထီၣ်ကဒါက့ၤအစု, ဒီးကွၢ် ကွၢ်, အဒီပုၢ်ဝဲၢ်တဂၤဟဲထီၣ်ကွံာ်ဝဲလီၤ. ဒီးစံးဝဲဒၣ်, နဘၢၣ်ဖျိတၢ်ဒ်လဲၣ်, မ်တၢ်ဘၢၣ်ဖျိတၢ်အံၤအိၣ်လၢန လိၤတက့ၢ်. ဒီးယုၢ်ဝဲအမံၤလၢစီၤဖ့ၤရ့းလီၤ. ³⁰ လၢခံ က့ၤဒီးအဒီပုၢ်ဝဲၢ်လၢ အအိၣ်ဒီးအပျံၤဂီၤလၢအစုလိၤတ ဂၤန့ၣ်ဟဲထီၣ်ကွံာ်ဝဲလီၤ. ဒီးယုၢ်ဝဲအမံၤလၢစီၤစ့ၤရးလီၤ.

၃၉

¹ ဒီးပှၤလဲၤစိာ်လီၤ စီၤယိၤသးဆူ ကီၢ်အဲၤကူပတူးအ ပူၤ, ဒီးပှၤအဲၤကူပတူးဖိ, ဖၤရိၤအပှၤဒ့ဒံၣ်, ပှၤမၤသံ တၢ်တဖၣ်အဒိၣ်, စီၤပိၤတံၤဖၢ်န့ၣ်ပှ့ၤအီၤလၢပှၤယံးၡ မၤဧ့လးဖိလၢအဟဲစိာ်အီၤဖဲန့ၣ်တဖၣ်အစုပူၤလီၤ.

² ဒီးယွၤအိၣ်ဒီးစီၤယိၤသး, ဒီးမ့ၢ်ပှၤလၢအတၢ်မၤကဲ ထီၣ်တၢ်လီၤ. ဒီးအိၣ်ဝဲလၢအကစၢ် ပှၤအဲၤကူပတူးဖိ အဟံၣ်ပူၤလီၤ.

³ ဒီးအကစၢ်ထံၣ်ဘၣ်ဝဲလၢယွၤအိၣ်ဒီးအီၤ, ဒီးလၢယွၤ ဒုးကဲထီၣ်အတၢ်မၤလၢအစုပူၤခဲလၢာ်လီၤ.

⁴ ဒီးစီၤယိၤသးဘၣ်ဘျုးဘၣ်ဖှိၣ်လၢအမဲာ်, ဒီးမၤအီၤ လၢအခ့အပှၤအတၢ်လီၤ. ဒီးအဝဲဒၣ်ပာ်အီၤလၢအပှၤ ဟံၣ်ဖိအခိၣ်, ဒီးကယဲၢ်အတၢ်အိၣ်ဒီးအီၤန့ၣ်, ပာ်ဝဲ လၢအစုပူၤခဲလၢာ်လီၤ.

⁵ ဒီးတၢ်မၤအသး ဖဲအပာ်အီၤလၢအပှၤဟံၣ်ဖိအခိၣ်, ဒီးလၢ တၢ်အိၣ်ဒီးအီၤခဲလၢာ်အခိၣ်လံၤလံၤန့ၣ်, ယွၤ ဆိၣ်ဂ့ၤပှၤအဲၤကူပတူးဖိအဟံၣ် လၢစီၤယိၤသးအဃိ လီၤ. ဒီးယွၤအတၢ်ဆိၣ်ဂ့ၤဘၣ်ကယဲၢ်တၢ်လၢအအိၣ်ဒီး အီၤလၢဟံၣ်ပူၤ, ဒီးလၢအအိၣ်လၢခိခဲလၢာ်လီၤ.

⁶ ဒီးပာ်လီၤတဲာ် ကယဲၢ်တၢ်လၢအအိၣ်ဒီးအီၤခဲလၢာ် လၢစီၤယိၤသးအစုပူၤ, ဒီးတသ့ၣ်ညါဘၣ်တၢ်အိၣ်ဒီး အီၤနီတမံၤဘၣ်, သ့ၣ်ညါထဲတၢ်အီၣ်လၢအအီၣ်ဝဲလီၤ. ဒီးစီၤယိၤသးအက့ၢ်အဂီၤဂ့ၤ, ဒီးပကွၢ်အီၤဂ့ၤလီၤ.

⁷ ဒီးတၢ်မၤအသးလၢတၢ်တဖၣ်န့ၣ်အလီၢ်ခံ, အကစၢ် အမါတဂၤဒိးထီၣ်အမဲာ်လၢစီၤယိၤသးအအိၣ်, ဒီးစံးဝဲ ဒၣ်, မံဃုာ်ဒီးယၤတက့ၢ်.

⁸ ဒီးဂ့ၢ်လိာ်ဝဲ, ဒီးစံးဘၣ်အကစၢ်အမါ, ကွၢ်ကွၢ်, ယ ကစၢ်တသ့ၣ်ညါဘၣ်တၢ်အိၣ်ဒီးယၤလၢဟံၣ်ပူၤ, ဒီးပာ် လီၤတဲာ် ကယဲၢ်တၢ်လၢအအိၣ်ဒီးအီၤ လၢယစုပူၤခဲ လၢာ်လံ. ⁹ တၢ်ဒိၣ်န့ၢ်ယၤလၢဟံၣ်ပူၤအံၤတအိၣ်ဘၣ်. ဒီးတတြီဃာ်ဘၣ်တၢ်လၢယၤနီတမံၤဘၣ်, တြီဃာ်ထဲ နၤတဂၤဧိၤ, လၢနမ့ၢ်အမါအဃိလီၤ. ဒီးယကမၤတၢ် အၢတၢ်သီအဒိၣ်အယိာ်တမံၤအံၤ, ဒီးမၤကမၣ်ဘၣ်ယွၤ ဒ်လဲၣ်.

¹⁰ ဒီးတၢ်မၤအသးဖဲအကတိၤတၢ်ဒီး စီၤယိၤသးတနံၤ ဘၣ်တနံၤတနံၤဘၣ်တနံၤဒီး, မံလၢအဃၢၤမ့ၢ်ဂ့ၤ, အိၣ် ဒီးအီၤမ့ၢ်ဂ့ၤတကနၣ်ဘၣ်အကလုၢ်ဘၣ်. ¹¹ ဒီးတၢ်မၤအ သးလၢဖဲအကတီၢ်န့ၣ်ဃၣ်ဃၣ်, စီၤယိၤသးလဲၤနုာ်လၢ ဟံၣ်ပူၤဒ်သိးအကမၤအတၢ်မၤ, ဒီးပှၤဟံၣ်ဖိပိာ်ခွါတ အိၣ်ဘၣ်လၢဟံၣ်ပူၤနီတဂၤဘၣ်. ¹² ဒီးအဝဲဒၣ်ဖီၣ်န့ၢ် အီၤလၢအယၣ်ဒီးစံးဝဲဒၣ်, မံဃုာ်ဒီးယၤတက့ၢ်. ဒီး လဲၤသဒၣ်အယၣ်လၢအစုပူၤဒီးဃ့ၢ်ဝဲ, ဒီးဟးထီၣ်ဆူ ခိလီၤ.

¹³ ဒီးတၢ်မၤအသးတုၤပိာ်မုၣ်ထံၣ်ဝဲ လၢအလဲၤသဒၣ် အယၣ်လၢအစုပူၤ, ဒီးဃ့ၢ်ထီၣ်ကွံာ်ဆူခိဒီး, ¹⁴ အဝဲဒၣ် ကိးန့ၢ်ပှၤဟံၣ်ဖိတဖၣ်, ဒီးကတိၤတၢ်ဒီးအီၤ, ဒီးစံးဝဲ ဒၣ်, ကွၢ်, အဝဲဒၣ်န့ၣ်ဟဲစိာ်ပှၤဧ့ၤဘြံၤဖိဆူပအိၣ်ဒ်သိး အကမၤတရီတပါပှၤလီၤ. ဟဲနုာ်ဝဲလၢယအိၣ်ဒ်သိးအ ကမံဃုာ်ဒီးယၤ, ဒီးယကိးပသူထီၣ်လၢယကလုၢ်ဖးဒိၣ် လီၤ. ¹⁵ ဒီးတၢ်မၤအသးတုၤအနၢ်ဟူလၢယထုထီၣ်ယ ကလုၢ်ဒီးကိးထီၣ်ဒီး, လဲၤသဒၣ်ဝဲအယၣ်လၢယဃၢၤ, ဒီးဃ့ၢ်ထီၣ်, ဒီးဟးထီၣ်ဆူခိလီၤ.

¹⁶ ဒီးပာ်ဝဲယၣ်တဘ့ၣ်န့ၣ်လၢအဃၢၤ တုၤအကစၢ်ဟဲ ဆူအဟံၣ်လီၤ. ¹⁷ ဒီးကတိၤဒီးအီၤ, ဒ်တၢ်ကတိၤအံၤ အသိး, ဒီးစံးဝဲဒၣ်, ပှၤကုၢ်ဖိပှၤဧ့ၤဘြံၤဖိလၢနဟဲစိာ် လၢပအိၣ်တဂၤန့ၣ်ဟဲနုာ်လၢယအိၣ်ဒ်သိး အကမၤတ ရီတပါယၤလီၤ. ¹⁸ ဒီးတၢ်မၤအသးတုၤယထုထီၣ်ယက လုၢ်ဒီးကိးထီၣ်ဒီး, လဲၤသဒၣ်ဝဲအယၣ်လၢယဃၢၤ, ဒီး ဃ့ၢ်ထီၣ်ကွံာ်ဆူခိလီၤ.

¹⁹ ဒီးတၢ်မၤအသးတုၤအကစၢ် နၢ်ဟူအမါ အတၢ်က တိၤလၢအကတိၤဒီးအီၤ, ဒီးစံးဝဲလၢနကုၢ်ဖိတဂၤမၤ ယၤ ဒ်တၢ်ကတိၤတဖၣ်အံၤအသိးန့ၣ်ဒီး, အသးထီၣ် ကဲၤထီၣ်ဝဲလီၤ.

²⁰ ဒီးစီၤယိၤသးအကစၢ်န့ၣ်ဟံးန့ၢ်အီၤ, ဒီးဒၢနုာ်အီၤ လၢဃိာ်ပူၤ, အလီၢ်ဖဲစီၤပၤအပှၤဃိာ်ဖိတဖၣ်အိၣ်စၢ ဃာ်အသးလီၤ. ဒီးအိၣ်ဝဲလၢဃိာ်ပူၤဖဲန့ၣ်လီၤ.

²¹ ဒီးယွၤအိၣ်ဒီးစီၤယိၤသး, ဒီးမၤအီၤလၢ အဘျုးအ ဖှိၣ်, ဒီးဒုးဘၣ်အီၤလၢတၢ်အဘျုးအဖှိၣ် လၢပှၤဃိာ် ဒိၣ်တဂၤအမဲာ်ညါလီၤ.

²² ဒီးပှၤဃိာ်ဒိၣ်တဂၤန့ၣ် ပာ်ပှၤဃိာ်ဖိအိၣ်လၢဃိာ်ပူၤ ခဲလၢာ်လၢစီၤယိၤသးအစုပူၤ, ဒီးဖဲဒၣ်ပှၤမၤတၢ်တမံၤ လၢ်လၢ်ဖဲန့ၣ်မ့ၢ်အဝဲဒၣ်မၤဝဲလီၤ. ²³ ဒီးပှၤဃိာ်ဒိၣ်တဂၤ န့ၣ်တကွၢ်ဘၣ်တၢ်အိၣ်လၢအစုပူၤနီတမံၤဘၣ်. အဂ့ၢ် ဒ်အံၤ, ယွၤအိၣ်ဒီးစီၤယိၤသး, ဒီးအတၢ်မၤန့ၣ် ယွၤဒုး ကဲထီၣ်ဝဲလီၤ.

၄၀

¹ ဒီးတၢ်မၤအသးလၢတၢ်တဖၣ်န့ၣ်အလီၢ်ခံ, လၢအဲၤ ကူပတူးအစီၤပၤ အပှၤကွၢ်အတၢ်အီတဂၤ, ဒီးအပှၤ ကုၢ်အကိၣ်တဂၤမၤကမၣ်ဘၣ်အကစၢ်, အဲၤကူပတူး အစီၤပၤလီၤ.

² ဒီးဖၤရိၤသးထီၣ်ဘၣ်အပှၤဒ့ဒံၣ်ခံဂၤန့ၣ်, ပှၤကွၢ်အ တၢ်အီတဖၣ်အဒိၣ်တဂၤ, ဒီးပှၤကုၢ်အကိၣ်တဖၣ်အ ဒိၣ်တဂၤလီၤ. ³ ဒီးဟ့ၣ်တၢ်ပၢၤအီၤလၢပှၤမၤသံတၢ်တ ဖၣ်အဒိၣ်အဟံၣ်ပူၤ, လၢဃိာ်ပူၤ, အလီၢ်ဖဲစီၤယိၤသး အိၣ်စၢဃာ်အသးလီၤ. ⁴ ဒီးပှၤမၤသံတၢ်တဖၣ်အဒိၣ် မၢစီၤယိၤသးကွၢ်အီၤ, ဒီးအဝဲဒၣ်မၤအီၤလၢအခ့အပှၤ အတၢ်, ဒီးအဝဲသ့ၣ်တဖၣ်န့ၣ် ဘၣ်တၢ်ပၢၤအီၤတစိၢ် တလီၢ်လီၤ.

⁵ ဒီးအဝဲသ့ၣ်မံမီၢ်တၢ်မံမီၢ်ခံဂၤလိာ်, တဂၤအတၢ်မံမီၢ်, တဂၤအတၢ်မံမီၢ်လၢမုၢ်တနၤဃီ, တဂၤဒ်အတၢ်မံမီၢ်ဖး ဝဲအသိး, တဂၤဒ်အတၢ်မံမီၢ်ဖးဝဲအသိး, အဲၤကူပတူး အစီၤပၤအပှၤကွၢ်အတၢ်အီတဂၤ, ဒီးအပှၤကုၢ်အကိၣ် တဂၤလၢအအိၣ်စၢဃာ်အသးလၢဃိာ်ပူၤလီၤ.

⁶ ဒီးလၢမုၢ်ဂီၤန့ၣ်စီၤယိၤသးဟဲဆူအအိၣ်, ဒီးကွၢ်အီၤ, ဒီးကွၢ်ကွၢ်, အသူၣ်ကိၢ်အသးဂီၤဝဲလီၤ. ⁷ ဒီးသံကွၢ်ဖၤ ရိၤအပှၤဒ့ဒံၣ်ဖိလၢအအိၣ်ဒီးအီၤတဖၣ်, လၢအဘၣ်တၢ် ပၢၤအီၤလၢအကစၢ်အဟံၣ်ပူၤ, ဒီးစံးဝဲဒၣ်, တၢ်လၢမုၢ် မဆါတနံၤအံၤသုမဲာ်လီၤသပှၢ်မ့ၢ်အဘၣ်မနုၤလဲၣ်.

⁸ ဒီးစံးဘၣ်အီၤ, ပမံမီၢ်တၢ်မံမီၢ်, ဒီးပှၤဖးအီၤတအိၣ် ဘၣ်. ဒီးစီၤယိၤသးစံးဘၣ်အီၤ, ဖးတၢ်တဖၣ်အိၣ်ဒီး ယွၤတမ့ၢ်ဘၣ်ဧါ. စံးဘၣ်တဲဘၣ်ယၤတက့ၢ်. ⁹ ဒီးပှၤကွၢ်တၢ်အီတဖၣ်အဒိၣ်တဂၤန့ၣ်, ဃဲၤလီၤအတၢ်မံမီၢ်လၢစီၤယိၤသးဒီးစံးဘၣ်အီၤ, ယမံမီၢ်တၢ်အဖၢမုၢ်ဒီး, ကွၢ်ကွၢ်, စပံးမုၢ်တမုၢ်အိၣ်လၢယမဲာ်ညါလီၤ.―

¹⁰ ဒီးစပံးမုၢ်အိၣ်ဒီး အစုဖံးသၢဘိလီၤ. ဒီးမၤသးဒ်အဒိး ထီၣ်အသိး, ဆှိးထီၣ်ဝဲ, ဒီးအကူၤတဖၣ်ဒုးမံထီၣ်စပံး သၣ်လီၤ. ¹¹ ဒီးဖၤရိၤအလီခီအိၣ်လၢယစုပူၤ, ဒီးယဟံး န့ၢ်စပံးသၣ်န့ၣ်, ဒီးယစံၢ်အထံဆူဖၤရိၤအလီခီပူၤ, ဒီး ယပာ်လီခီန့ၣ်လၢဖၤရိၤအစုညါသးအပူၤလီၤ.

¹² ဒီးစီၤယိၤသးစံးဘၣ်အီၤ, အအံၤမ့ၢ်တၢ်ဖးအီၤ, တၢ် လၢအစုဖံးသၢဘိန့ၣ်မ့ၢ်မုၢ်သၢနံၤလီၤ. ¹³ သၢနံၤအတီၢ် ပူၤန့ၣ်, ဖၤရိၤကဝံၣ်ထၢၣ်နခိၣ်, ဒီးပာ်က့ၤနၤလၢန လီၢ်, ဒီးနကဟ့ၣ်က့ၤလီခီလၢဖၤရိၤအစုပူၤ ဒ်တၢ်အ လုၢ်အလၢ်အဂံၢ်ခိၣ်ဖဲ နမ့ၢ်အပှၤကွၢ်အတၢ်အီအသိးန့ၣ် လီၤ.

¹⁴ အန့ၣ်ဒီးတုၤနဘၣ်တၢ်ဂ့ၤဒီး, သ့ၣ်နီၣ်ထီၣ်က့ၤယၤ, ဒီးမၤယၤလၢတၢ်ဘျုးတၢ်ဖှိၣ်, ဒီးစံးဘၣ်ဖၤရိၤလၢယ ဂ့ၢ်ယကျိၤ, ဒီးဒုးဟးထီၣ်ယၤလၢဟံၣ်တဖျၢၣ်အံၤအပူၤ တက့ၢ်. ¹⁵ အဂ့ၢ်ဒ်အံၤ, တၢ်ဟုၣ်န့ၢ်ယၤလၢပှၤဧ့ၤဘြံၤဖိ အကီၢ်ပူၤသပှၢ်တၢၢ်, ဒီးဖဲအံၤစ့ၢ်ကီး, ဒ်သိးပှၤကဒၢ နုာ်ယၤလၢတၢ်ပူၤအံၤဒီး, ယတမၤဘၣ်တၢ်နီတမံၤဘၣ်.

¹⁶ ဒီးပှၤကုၢ်ကိၣ်တဖၣ်အဒိၣ်ထံၣ်ဘၣ်ဝဲ လၢတၢ်ဖးတၢ် မ့ၢ်အဂ့ၤ, ဒီးစံးဘၣ်စီၤယိၤသး, တၢ်လၢယၤအံၤယအိၣ် စ့ၢ်ကီးလၢယတၢ်မံမီၢ်အပူၤ, ဒီးကွၢ်ကွၢ်, ကိၣ်ဝါအနာ် သၢဖျၢၣ်အိၣ်လၢယခိၣ်အဖီခိၣ်လီၤ. ¹⁷ ဒီးနာ်အထီက တၢၢ်တဖျၢၣ်န့ၣ် အိၣ်ဒီးဖၤရိၤအတၢ်အီၣ်ကိးကလုာ်ဒဲး လၢပှၤကုၢ်တၢ်ဖိမၤဝဲလီၤ. ဒီးထိၣ်ဖိလံၣ်ဖိအီၣ်ထီၣ်ကွံာ် အီၤလၢနာ်ပူၤအိၣ်လၢယခိၣ်အဖီခိၣ်လီၤ.

¹⁸ ဒီးစီၤယိၤသးစံးဆၢတၢ်ဒီးစံးဝဲဒၣ်, အအံၤမ့ၢ်တၢ်ဖး အီၤ, တၢ်လၢနာ်သၢဖျၢၣ်န့ၣ်မ့ၢ်မုၢ်သၢနံၤလီၤ. ¹⁹ သၢနံၤ အတီၢ်ပူၤန့ၣ်, ဖၤရိၤကဝံၣ်ထီၣ်ကွံာ်နခိၣ်လၢနလိၤ, ဒီး ကဘျးထီၣ်နၤလၢသ့ၣ်တထူၣ်အလိၤ, ဒီးထိၣ်ဖိလံၣ်ဖိ ကအီၣ်ကွံာ်နဖံးနညၣ်လၢနလိၤလီၤ.

²⁰ ဒီးတၢ်မၤအသးလၢ မုၢ်သၢနံၤတနံၤဘၣ် လၢဖၤရိၤ အိၣ်ဖျဲၣ်အနံၤဆၢအလီၢ်, ဒီးမၤအတၢ်အီၣ်တၢ်အီလၢ အခ့အပှၤခဲလၢာ်အဂီၢ်, ဒီးဝံၣ်ထီၣ်ပှၤကွၢ်အတၢ်အီတ ဖၣ်အဒိၣ်တဂၤအခိၣ်, ဒီးပှၤကုၢ်အကိၣ်တဖၣ်အဒိၣ်တ ဂၤအခိၣ်, လၢအခ့အပှၤအကျါလီၤ. ²¹ ဒီးပာ်က့ၤပှၤ ကွၢ်အတၢ်အီတဖၣ်အဒိၣ်လၢ အကွၢ်အတၢ်အီအလီၢ်, ဒီးအဝဲဒၣ် ပာ်က့ၤလီခီ, လၢဖၤရိၤအစုညါသးအပူၤ လီၤ. ²² မ့မ့ၢ်ပှၤကုၢ်အကိၣ်တဖၣ်အဒိၣ်တဂၤန့ၣ် ဘျး ထီၣ်ဝဲ, ဒ်စီၤယိၤသးဖးဝဲလၢအဂီၢ်အသိးန့ၣ်လီၤ. ²³ ဘၣ် ဆၣ်, ဒီးပှၤကွၢ်တၢ်အီတဖၣ်အဒိၣ်န့ၣ်တသ့ၣ်နီၣ်ထီၣ် က့ၤဘၣ်စီၤယိၤသးဘၣ်. မ့ၢ်အသးပ့ၤနီၣ်အီၤလီၤ.

၄၁

¹ ဒီးတၢ်မၤအသးလၢခံနံၣ်အမုၢ်နံၤတဖၣ် အကတၢၢ် န့ၣ်, ဖၤရိၤမံမီၢ်တၢ်, ဒီးကွၢ်ကွၢ်, ဆၢထၢၣ်ဝဲလၢထံ မိၢ်ပှၢ်အနံၤလီၤ. ² ဒီးကွၢ်ကွၢ်, ဂီၤဖံးမိၢ်လၢပကွၢ်ဂ့ၤ, လၢအဖံးအညၣ်ဘီၣ်နွံဒုဟဲထီၣ်လၢထံမိၢ်ပှၢ်အပူၤ, ဒီး အီၣ်အဆၣ်လၢဆှဲကျါလီၤ. ³ ဒီးကွၢ်ကွၢ်, ဂီၤဖံးမိၢ်လၢ ပကွၢ်အၢ, ဒီးအဖံးအညၣ်ဃဲၤအဂၤနွံဒုဟဲထီၣ်လၢထံ မိၢ်ပှၢ်အပူၤ, ဒီးဆၢထၢၣ်လၢဂီၤဖံးမိၢ်အဝဲတဖၣ်န့ၣ်အ ဃၢၤလၢထံနံၤလီၤ. ⁴ ဒီးဂီၤဖံးမိၢ်လၢပကွၢ်အၢ, ဒီးအ ဖံးအညၣ်ဃဲၤတဖၣ်န့ၣ်အီၣ်ကွံာ် ဂီၤဖံးလၢပကွၢ်ဂ့ၤလၢ အဖံးအညၣ်ဘီၣ်တဖၣ်န့ၣ်လီၤ. ဒီးဖၤရိၤဖုသံနီၣ်ထီၣ် လီၤ.

⁵ ဒီးမံသပ့ၤဝဲ, ဒီးမံမီၢ်ကဒီးခံဘျီတဘျီ, ဒီးကွၢ်ကွၢ် ဘုအစဲၤနွံစဲၤမဲထီၣ်ဝဲလၢထံးတဘိဃီ, ဒီးအဖျၢၣ်ကၢ ဒီးဂ့ၤလီၤ. ⁶ ဒီးကွၢ်ကွၢ်, ဘုအစဲၤနွံစဲၤလၢအဖျၢၣ်သွံး ဒီးဃ့ထီၣ်ကွံာ်လၢကလံၤမုၢ်ထီၣ်န့ၣ်, မဲထီၣ်ဝဲလၢအ ဝဲသ့ၣ်တဖၣ်အလီၢ်ခံန့ၣ်လီၤ. ⁷ ဒီးဘုစဲၤလၢအဖျၢၣ် သွံးနွံစဲၤယူၢ်လီၤကွံာ်ဘုစဲၤလၢအဖျၢၣ်ကၢဒီးဂ့ၤနွံစဲၤန့ၣ် လီၤ. ဒီးဖၤရိၤဖုသံနီၣ်ထီၣ်, ဒီးကွၢ်ကွၢ်, မ့ၢ်တၢ်မံမီၢ်လီၤ.

⁸ ဒီးမုၢ်ဆ့ၣ်ထီၣ်န့ၣ်တၢ်မၤအသးလၢ အသူၣ်ကိၢ်အ သးဂီၤ, ဒီးမၢလီၤပှၤလဲၤကိးန့ၢ်ကယဲၢ်အဲၤကူပတူးအ ပှၤကွဲးလံာ်, ဒီးအပှၤကူၣ်တၢ်သ့ခဲလၢာ်, ဒီးဖၤရိၤဃဲၤ ဘၣ်အီၤလၢအတၢ်မံမီၢ်တဖၣ်လီၤ. ဒီးပှၤဖးန့ၢ်တၢ်လၢ ဖၤရိၤတအိၣ်ဘၣ်နီတဂၤဘၣ်.

⁹ ဒီးပှၤကွၢ်တၢ်အီတဖၣ်အဒိၣ်တဂၤန့ၣ် ကတိၤထီၣ် တၢ်ဒီးဖၤရိၤဒီးစံးဝဲဒၣ်, တၢ်လၢမုၢ်မဆါတနံၤအံၤယ သ့ၣ်နီၣ်ထီၣ်က့ၤယတၢ်ဒဲးဘးလီၤ. ¹⁰ ဖၤရိၤသးထီၣ်အ ကုၢ်အပှၤ, ဒီးဟ့ၣ်တၢ်ပၢၤယၤလၢပှၤမၤသံတၢ်တဖၣ် အဒိၣ်အဟံၣ်ပူၤ, ယၤဒီးပှၤကုၢ်ကိၣ်တဖၣ်အဒိၣ်လီၤ.―

¹¹ ဒီးပမံမီၢ်တၢ်မံမီၢ်လၢမုၢ်တနၤဃီ, ယၤဒီးအဝဲဒၣ်, တ ဂၤဒ်အတၢ်မံမီၢ်ဖးဝဲအသိး, တဂၤဒ်အတၢ်မံမီၢ်ဖးဝဲအ သိးန့ၣ်, ပမံမီၢ်တၢ်လီၤ. ¹² ဒီးပှၤမၤသံတၢ်တဖၣ်အဒိၣ် တဂၤအကုၢ်အပှၤဖိၣ်သၣ်ခွါ, ပှၤဧ့ၤဘြံၤဖိတဂၤအိၣ်ဝဲ ဒီးပှၤဖဲန့ၣ်, ဒီးပဃဲၤဘၣ်အီၤ, ဒီးအဝဲဒၣ်န့ၣ်ဖးန့ၢ်ပှၤ လၢပတၢ်မံမီၢ်, တဂၤဒ်အတၢ်မံမီၢ်အသိး, တဂၤဒ်အ တၢ်မံမီၢ်အသိးန့ၣ်ဖးဝဲလီၤ. ¹³ ဒီးဒ်အဖးန့ၢ်ပှၤအသိးန့ၣ် တၢ်မၤအသးလီၤ. တၢ်လၢယၤအံၤပာ်က့ၤဝဲလၢယလီၢ် လီၤ. မ့မ့ၢ်အဝဲတဂၤန့ၣ်ဘျးထီၣ်ဝဲလီၤ.

¹⁴ ဒီးဖၤရိၤမၢလီၤပှၤကိးန့ၢ်စီၤယိၤသး, ဒီးဒုးဟဲက့ၤထီၣ် အီၤလၢဃိာ်ပူၤချ့ချ့, ဒီးလူၤအခၣ်ဆူၣ်, ဒီးကလံၤအ သး, ဒီးဟဲဝဲဆူဖၤရိၤအအိၣ်လီၤ.

¹⁵ ဒီးဖၤရိၤစံးဘၣ်စီၤယိၤသးန့ၣ်, ယမံမီၢ်တၢ်မံမီၢ်, ဒီး ပှၤဖးဝဲတအိၣ်ဘၣ်နီတဂၤဘၣ်ဒီးယနၢ်ဟူပှၤစံး, တုၤ နနၢ်ဟူတၢ်မံမီၢ်ဒီး, နဖးအီၤသ့လီၤ.

¹⁶ ဒီးစီၤယိၤသးစံးဆၢဖၤရိၤဒီးစံးဝဲဒၣ်, တအိၣ်ဘၣ်ဒီး ယၤဘၣ်, ယွၤကစံးဆၢဖၤရိၤမုာ်မုာ်လီၤ.

¹⁷ ဒီးဖၤရိၤစံးဘၣ်စီၤယိၤသးန့ၣ်, လၢယမံမီၢ်တၢ်န့ၣ် ကွၢ်ကွၢ်, ယဆၢထၢၣ်လၢထံမိၢ်ပှၢ်အနံၤ, ¹⁸ ဒီးကွၢ်ကွၢ်, ဂီၤဖံးမိၢ်လၢအဖံးအညၣ်ဘီၣ်, ဒီးပကွၢ်ဂ့ၤနွံဒုဟဲထီၣ်, လၢထံမိၢ်ပှၢ်အပူၤ, ဒီးအီၣ်အဆၣ်လၢဆှဲကျါလီၤ. ¹⁹ ဒီး ကွၢ်ကွၢ်, ဂီၤဖံးမိၢ်အဂၤနွံဒုလၢအဘၣ်ဖှီၣ်ဘၣ်ယာ်လၢ ပကွၢ်အၢနးမး, ဒီးအဖံးအညၣ်ဃဲၤ, ဒ်အဝဲသ့ၣ်အၢဝဲ အသိးန့ၣ်ယတထံၣ်ဘၣ်လၢ အဲၤကူပတူးနီတပူၤနီတ ဘျီဘၣ်. ²⁰ ဒီးဂီၤဖံးအဃဲၤဒီးအအၢတဖၣ်န့ၣ်အီၣ်ထီၣ် ကွံာ်ဂီၤဖံးအဘီၣ်လၢအအိၣ်ထီၣ်ဆိနွံဒုန့ၣ်လီၤ. ²¹ ဒီးနုာ် ဝဲလၢအပူၤဝံၤဒီး, ပှၤတသ့ၣ်ညါဘၣ်လၢအနုာ်လၢအ ပူၤဘၣ်. ပကွၢ်အီၤအၢဒ်လၢအခီၣ်ထံးအသိးလီၤ. ဒီး ယဖုသံနီၣ်ထီၣ်လီၤ. ²² ဒီးယထံၣ်တၢ်လၢယမံမီၢ်တၢ်အပူၤ, ဒီးကွၢ်ကွၢ်, ဘုစဲၤနွံစဲၤမဲထီၣ်ဝဲလၢထံးတဘိဃီ, အဖျၢၣ်ပှဲၤဒီးဂ့ၤလီၤ.―

²³ ဒီးကွၢ်ကွၢ်, ဘုအဂၤနွံစဲၤလၢအဖျၢၣ်သွံးဒီးဃ့ထီၣ်လၢ ကလံၤမုၢ်ထီၣ်န့ၣ်မဲထီၣ်ဝဲလၢ အဝဲသ့ၣ်တဖၣ်အလီၢ်ခံ န့ၣ်လီၤ. ²⁴ ဒီးဘုစဲၤလၢအဖျၢၣ်သွံးန့ၣ်ယူၢ်လီၤကွံာ်ဘု စဲၤလၢအဖျၢၣ်ဂ့ၤနွံစဲၤလီၤ. ဒီးယဃဲၤဘၣ်ပှၤကွဲးလံာ်တ ဖၣ်, ဒီးပှၤဒုးနဲၣ်တၢ်လၢယၤတအိၣ်ဘၣ်နီတဂၤဘၣ်.

²⁵ ဒီးစီၤယိၤသးစံးဘၣ်ဖၤရိၤ, ဖၤရိၤအတၢ်မံမီၢ်န့ၣ် မ့ၢ် တၢ်တမံၤဃီလီၤ. တၢ်လၢယွၤကမၤတ့ၢ်န့ၣ် ဒုးနဲၣ်ဝဲ လၢဖၤရိၤလီၤ. ²⁶ ဂီၤဖံးမိၢ်ဂ့ၤနွံဒုန့ၣ်မ့ၢ်နွံနံၣ်လီၤ. ဒီးဘု စဲၤဂ့ၤနွံစဲၤန့ၣ်မ့ၢ်နွံနံၣ်လီၤ. တၢ်မံမီၢ်န့ၣ်မ့ၢ်တၢ်တမံၤဃီ လီၤ. ²⁷ ဂီၤဖံးမိၢ်အဃဲၤဒီးပကွၢ်အအၢလၢအဟဲထီၣ်လၢ အလီၢ်ခံနွံဒုန့ၣ်မ့ၢ်နွံနံၣ်လီၤ. ဒီးဘုစဲၤလၢအဖျၢၣ်သွံးဒီး ဃ့ထီၣ်လၢကလံၤမုၢ်ထီၣ်နွံစဲၤန့ၣ်, မ့ၢ်နွံနံၣ်အိၣ်ဒီးတၢ် သၣ်ဝံၤလီၤဒိလီၤ.

²⁸ အအံၤမ့ၢ်တၢ်ကတိၤလၢ ယစံးဘၣ်တဲဘၣ်တ့ၢ်ဖၤရိၤ လီၤ. တၢ်လၢယွၤကမၤတ့ၢ်န့ၣ်ဒုးထံၣ်ဘၣ်ဝဲလၢဖၤရိၤ လီၤ.

²⁹ ကွၢ်ကွၢ်, နွံနံၣ်ကဟဲအိၣ်ဒီးတၢ်လၢတၢ်ပှဲၤဖးဒိၣ်လၢ ကီၢ်အဲၤကူပတူးဒီဘ့ၣ်ညါအပူၤလီၤ. ³⁰ ဒီးနွံနံၣ်အိၣ်ဒီး တၢ်သၣ်ဝံၤလီၤဒိကအိၣ်ထီၣ်လၢအလီၢ်ခံန့ၣ်, ဒီးပှၤက သးပ့ၤနီၣ်တၢ်လၢတၢ်ပှဲၤလၢ ကီၢ်အဲၤကူပတူးအပူၤန့ၣ်, ဒီးတၢ်သၣ်ဝံၤလီၤဒိကမၤလၢာ်ကွံာ် ထံဧိၤကီၢ်ဧိၤန့ၣ် လီၤ. ³¹ ဒီးပှၤတသ့ၣ်ညါလၢၤဘၣ် တၢ်လၢတၢ်ပှဲၤလၢ ကီၢ်ပူၤလၢတၢ်သၣ်ဝံၤလီၤဒိအိၣ်လၢ အလီၢ်ခံအဃိန့ၣ် လီၤ. အဂ့ၢ်ဒ်အံၤ, အဝဲန့ၣ်ကအိၣ်နးမးလီၤ. ³² ― ဒီးတၢ် မံမီၢ်အိၣ်ဒီးဖၤရိၤခံမံၤခံဘျီ, အဂ့ၢ်ဒ်အံၤ, မ့ၢ်ယွၤကတဲာ် ကတီၤတၢ်တမံၤန့ၣ် ဂၢၢ်ဂၢၢ်ကျၢၤကျၢၤအဂ့ၢ်လီၤ. ဒီး ယွၤကဒုးကဲထီၣ်တၢ်န့ၣ်ချ့သဒံးလီၤ.

³³ ဒီးခဲကနံၣ်အံၤ မ်ဖၤရိၤကွၢ်ဃုပှၤအသူၣ်ဖးအသးဖး, ဒီးကူၣ်တၢ်သ့ကူၣ်တၢ်ဘၣ်တဂၤ, ဒီးပာ်အီၤလၢကီၢ် အဲၤကူပတူးအဖီခိၣ်န့ၣ်တက့ၢ်. ³⁴ မ်ဖၤရိၤမၤဝဲ, ဒီးပာ် ပှၤအံးက့ၤကွၢ်က့ၤတၢ်တဖၣ် လၢထံဧိၤကီၢ်ဧိၤအဖီခိၣ်, ဒီးတၢ်လၢတၢ်ပှဲၤအနွံနံၣ်န့ၣ် ဟံးန့ၢ်ကီၢ်အဲၤကူပတူး ယဲၢ်ပူတပူတက့ၢ်. ³⁵ ဒီးမ်ပှၤထၢဖှိၣ်တၢ်အီၣ်တၢ်အီလၢ အနံၣ်အဂ့ၤလၢအကဟဲဝဲခဲလၢာ်, ဒီးပာ်ဖှိၣ်ဘုဧိၤဟုဧိၤ လၢဖၤရိၤအစုဖီလာ်, ဒီးပၢၤတၢ်အီၣ်တၢ်အီလၢဝ့ၢ်တ ဖၣ်အပူၤန့ၣ်တက့ၢ်. ³⁶ ဒီးတၢ်အီၣ်တၢ်အီန့ၣ်ကအိၣ်ပာ် စၢၤလၢကီၢ်အဂီၢ်လၢ တၢ်သၣ်ဝံၤလီၤဒိအနွံနံၣ်လၢအ ကအိၣ်ထီၣ်လၢကီၢ်အဲၤကူပတူးအဃိန့ၣ်, ဒ်သိးထံဧိၤ ကီၢ်ဧိၤအသုတဟးဂီၤလၢတၢ်သၣ်ဝံၤလီၤဒိအဃိန့ၣ်တ ဂ့ၤလီၤ.

³⁷ ဒီးတၢ်တမံၤန့ၣ်ဂ့ၤဝဲလၢဖၤရိၤအမဲာ်, ဒီးလၢအခ့အ ပှၤအမဲာ်ခဲလၢာ်လီၤ. ³⁸ ဒီးဖၤရိၤစံးဘၣ်အခ့အပှၤန့ၣ်, ပထံၣ်န့ၢ်ပှၤဒ်အံၤသိး, ပှၤလၢပကစၢ်အသးအိၣ်လၢအ ပူၤကသ့စ့ၢ်ကီးဧါ.

³⁹ ဒီးဖၤရိၤစံးဘၣ်စီၤယိၤသး, မ့ၢ်ပကစၢ်ဘိးဘၣ်သ့ၣ် ညါနၤလၢတၢ်တဖၣ်န့ၣ်ခဲလၢာ်ဒီး, ပှၤအသူၣ်ဖးအသး ဖး, ဒီးကူၣ်တၢ်သ့ကူၣ်တၢ်ဘၣ်ထဲသိးဒီးနၤအံၤတအိၣ် ဘၣ်နီတဂၤဘၣ်. ⁴⁰ နကအိၣ်လၢယဟံၣ်အဖီခိၣ်, ဒီး ဖဲတၢ်ထီၣ်ဖျဲးလၢနထးခိၣ်န့ၣ် ယပှၤဂီၢ်မုၢ်ဘၣ်ဒိကနၣ် ခဲလၢာ်လီၤ. ထဲလၢယလီၢ်ပစိာ်အဖီခိၣ်န့ၣ် ယကဒိၣ် န့ၢ်နၤလီၤ. ⁴¹ ဒီးဖၤရိၤစံးဘၣ်စီၤယိၤသး, ကွၢ်, ယပာ် လံနၤလၢကီၢ်အဲၤကူပတူးဒီဘ့ၣ်ညါအဖီခိၣ်လံ.

⁴² ဒီးဖၤရိၤဘ့ၣ်ကွံာ်အပသံးတဘိလၢအစု, ဒီးဖျီၣ်ထီၣ် လၢစီၤယိၤသးအစု, ဒီးဒုးသိးဝဲဒီးအဆ့ဖှီဝါကဆှၣ်ဒၣ်, ဒီးဒုးလံာ်ဝဲဒီးသွဲထူတဝီလၢအကိာ်လိၤန့ၣ်လီၤ. ⁴³ ဒီးဒုး ဒိးလ့ၣ်ကဟၣ်ခံဖျၢၣ်တဖျၢၣ်လၢအအိၣ်ဒီးအီၤ, ဒီးပှၤ ကိးဝဲလၢအမဲာ်ညါ, ချံးခီၣ်တက့ၢ်. ဒီးပာ်အီၤလၢကီၢ် အဲၤကူပတူးဒီဘ့ၣ်ညါအဖီခိၣ်လီၤ.

⁴⁴ ဒီးဖၤရိၤစံးဘၣ်စီၤယိၤသး, ယမ့ၢ်ဖၤရိၤလီၤ. ဒီးနၤ တအိၣ်ဘၣ်ဒီး, ပှၤတယူာ်ထီၣ်ဘၣ်အစုအခီၣ်လၢကီၢ် အဲၤကူပတူးဒီဘ့ၣ်ညါနီတဂၤဘၣ်.

⁴⁵ ဒီးဖၤရိၤကိးက့ၤစီၤယိၤသးအမံၤလၢ စီၤစးဖနးသဖၤ န့ၤ, ဒီးဟ့ၣ်အမါလၢဝ့ၢ်အိၣ် အပှၤလုၢ်တၢ်အဒိၣ်စီၤပိၤ တံၤဖ့ရၤအဖိမုၣ်နီၢ်အၤစနးလီၤ. ဒီးစီၤယိၤသးလဲၤတၢ် သကုၤကီၢ်အဲၤကူပတူးလီၤ.

⁴⁶ ဒီးလၢစီၤယိၤသးဆၢထၢၣ်လၢ အဲၤကူပတူးအစီၤပၤ ဖၤရိၤအမဲာ်ညါန့ၣ်, အသးပှၢ်အနံၣ်သၢဆံ, ဒီးစီၤယိၤ သးဟးထီၣ်လၢဖၤရိၤအမဲာ်ညါ, ဒီးလဲၤတၢ်လၢကီၢ်အဲၤ ကူပတူးဒီဘ့ၣ်ညါအပူၤလီၤ.

⁴⁷ ဒီးတၢ်လၢတၢ်ပှဲၤအနွံနံၣ်န့ၣ် ဟီၣ်ခိၣ်ဒုးမဲထီၣ်တၢ် ဒီးဘုကဒိၣ်တဖၣ်လီၤ. ⁴⁸ ဒီးနွံနံၣ်န့ၣ်ထၢဖှိၣ်ဝဲလၢတၢ် အီၣ်တၢ်အီလၢအအိၣ်လၢကီၢ်အဲၤကူပတူးအပူၤခဲလၢာ်, ဒီးပာ်ဖှိၣ်ဝဲလၢဝ့ၢ်တဖၣ်အပူၤလီၤ. တၢ်အီၣ်တၢ်အီလၢ အအိၣ်လၢခိဝးတရံးဝ့ၢ်တဖျၢၣ်ဖျၢၣ်န့ၣ် ပာ်ဝဲလၢအပူၤ န့ၣ်လီၤ. ⁴⁹ ဒီးစီၤယိၤသးဂၢ်ဖှိၣ် ဘုဧိၤဟုဧိၤဒ်မဲးလၢပီၣ် လဲၣ်နံၤအသိးအါအါကလဲာ်, တုၤအဂံၢ်တၢ်န့ၣ်ဆိတ့ၢ် ဝဲလီၤ. အဂ့ၢ်ဒ်အံၤ, ဂံၢ်ဝဲတသ့ဘၣ်.

⁵⁰ ဒီးတၢ်သၣ်ဝံၤလီၤဒိအနံၣ်တဖၣ် တချုးဘၣ်ဒံးဘၣ် ဒီးအဖိခွါခံဂၤအိၣ်ဖျဲၣ်လၢစီၤယိၤသးအဂီၢ်, လၢဝ့ၢ်အိၣ် အပှၤလုၢ်တၢ်အဒိၣ် စီၤပိၤတံၤဖ့ရၤအဖိမုၣ် နီၢ်အၤစနး န့ၣ်ဆံးစၢ်န့ၢ်လၢအဂီၢ်လီၤ.

⁵¹ ဒီးစီၤယိၤသးယုၢ်ဝဲအဖိဝဲၢ်ကိအမံၤလၢ မနၤရှ့ၤလီၤ. အဂ့ၢ်ဒ်အံၤ, ယွၤဒုးသးပ့ၤနီၣ်ယၤလၢယတၢ်ကိၢ်တၢ်ဂီၤ ခဲလၢာ်ဒီးယပၢ်အပှၤဟံၣ်ဖိခဲလၢာ်လီၤ.

⁵² ဒီးအဖိခွါခံဂၤတဂၤန့ၣ်ယုၢ်ဝဲအမံၤလၢ အ့ဖရဲၣ်လီၤ. အဂ့ၢ်ဒ်အံၤ, ယွၤဒုးသၣ်ထီၣ်ယၤလၢယတၢ်နးတၢ်ဖှီၣ် အကီၢ်ပူၤလီၤ.

⁵³ ဒီးတၢ်လၢတၢ်ပှဲၤနွံနံၣ်လၢအအိၣ်ဝဲလၢ ကီၢ်အဲၤကူပ တူးအပူၤန့ၣ်ကတၢၢ်ဝဲလီၤ. ⁵⁴ ဒီးတၢ်သၣ်ဝံၤလီၤဒိနွံနံၣ် အိၣ်ထီၣ်သီဒ်စီၤယိၤသးစံးဝဲအသိးန့ၣ်, ဒီးတၢ်သၣ်ဝံၤ လီၤဒိအိၣ်ဝဲလၢကီၢ်ကိးဘ့ၣ်ဒဲးလီၤ. မ့မ့ၢ်လၢကီၢ်အဲၤကူ ပတူးဒီဘ့ၣ်ညါအပူၤန့ၣ်တၢ်အီၣ်အိၣ်ဝဲလီၤ.

⁵⁵ ဒီးတုၤပှၤအဲၤကူပတူးဖိခဲလၢာ်အိၣ်ဝံၤအိၣ်စ့ၤဒီး, ပှၤ ဂီၢ်မုၢ်ကိးထီၣ်ဖၤရိၤလၢတၢ်အီၣ်အဂီၢ်, ဒီးဖၤရိၤစံးဘၣ် ပှၤအဲၤကူပတူးဖိခဲလၢာ်န့ၣ်, လဲၤဆူစီၤယိၤသးအအိၣ်, ဒီးဖဲအစံးဘၣ်သုန့ၣ်မၤတက့ၢ်.

⁵⁶ ဒီးတၢ်သၣ်ဝံၤလီၤဒိအိၣ်ဝဲလၢ ဟီၣ်ခိၣ်ချၢဒီဘ့ၣ်ညါ, ဒီးစီၤယိၤသးအိးထီၣ်ကယဲၢ်ဖီတဖၣ်ခဲလၢာ်, ဒီးဆါဝဲ ဒီးပှၤအဲၤကူပတူးဖိလီၤ. ဒီးတၢ်သၣ်ဝံၤလီၤဒိစွၣ်မးဝဲ လၢကီၢ်အဲၤကူပတူးအပူၤလီၤ.

⁵⁷ ဒီးကယဲၢ်ပှၤကီၢ်တဖၣ်အဖိဟဲဝဲဆူ ကီၢ်အဲၤကူပတူး အပူၤဆူစီၤယိၤသးအအိၣ်, ဒ်သိးအကပှ့ၤတၢ်လီၤ. အ ဂ့ၢ်ဒ်အံၤ, တၢ်သၣ်ဝံၤလီၤဒိစွၣ်မးဝဲလၢကီၢ်ကိးဘ့ၣ်ဒဲး အပူၤလီၤ.

၄၂

¹ ဒီးစီၤယၤကိာ်ထံၣ်ဘၣ်ဝဲလၢ ဘုဧိၤဟုဧိၤအိၣ်လၢအဲၤ ကူပတူးအပူၤ, ဒီးစီၤယၤကိာ်စံးဘၣ်အဖိခွါတဖၣ်, သု ကွၢ်လိာ်သုသးမ့ၢ်အဘၣ်မနုၤလဲၣ်. ² ကွၢ်ကွၢ်, ယနၢ် ဟူလၢဘုဧိၤဟုဧိၤအိၣ်လၢအဲၤကူပတူးအပူၤလီၤ. လဲၤ လီၤဖဲန့ၣ်, ဒီးပှ့ၤတၢ်လၢပဂီၢ်ဖဲန့ၣ်, ဒ်သိးပကမူဒံး, ဒီး ပသုတသံတဂ့ၤန့ၣ်တက့ၢ်.

³ ဒီးစီၤယိၤသးအဒီပုၢ်ဝဲၢ်ဆံဆဲၣ်ဂၤ လဲၤလီၤဝဲဒ်သိးအ ကပှ့ၤဘုဧိၤဟုဧိၤလၢအဲၤကူပတူးအပူၤလီၤ. ⁴ မ့မ့ၢ်စီၤ ယိၤသးအပုၢ်စီၤဘံၣ်ယၤမံၣ်တဂၤ, စီၤယၤကိာ်တမၢ ဘၣ်အလဲၤတၢ်ဒီးအဒီပုၢ်ဝဲၢ်ဘၣ်. အဂ့ၢ်ဒ်အံၤ, စံးဝဲဒၣ်, ကဘၣ်တၢ်အၢတၢ်နးဘၣ်ဖုးလီၤ.

⁵ ဒီးစီၤအံၣ်စရ့လးအဖိခွါတဖၣ် ဟဲပှ့ၤတၢ်လၢပှၤလၢ အဟဲတဖၣ်အကျါလီၤ. အဂ့ၢ်ဒ်အံၤ, တၢ်သၣ်ဝံၤလီၤဒိ န့ၣ်အိၣ်လၢကီၢ်ကနၤဧၣ်အပူၤလီၤ.

⁶ ဒီးစီၤယိၤသးမ့ၢ်တၢ်အခိၣ်လၢကီၢ်အဖီခိၣ်လီၤ. အ ဝဲဒၣ်ဆါတၢ်ဒီးပှၤကီၢ်ဖိခဲလၢာ်, ဒီးစီၤယိၤသးအဒီပုၢ် ဝဲၢ်ဟဲဝဲ, ဒီးတီၤလီၤကျးလီၤအမဲာ်ဆူအအိၣ်လၢ ဟီၣ် ခိၣ်လီၤ.

⁷ ဒီးစီၤယိၤသးထံၣ်ဘၣ်အဒီပုၢ်ဝဲၢ်, ဒီးသ့ၣ်ညါနီၣ်အီၤ လီၤ. ဘၣ်ဆၣ်ဒီးပာ်အသးလၢ ပှၤတခီဘီမုၢ်ဖိလၢအ မဲာ်ညါ, ဒီးကတိၤတၢ်ဆူၣ်ဆူၣ်ဒီးအီၤ, ဒီးစံးဘၣ်အီၤ, သုဟဲလၢလဲၣ်. ဒီးစံးဝဲဒၣ်, လၢကီၢ်ကနၤဧၣ်ဒ်သိးပ ကပှ့ၤတၢ်အီၣ်တၢ်အီလီၤ.

⁸ ဒီးစီၤယိၤသးသ့ၣ်ညါနီၣ်အဒီပုၢ်ဝဲၢ်လီၤ. မ့မ့ၢ်အဝဲ သ့ၣ်တဖၣ်န့ၣ်တသ့ၣ်ညါနီၣ်ဘၣ်အီၤဘၣ်. ⁹ ဒီးစီၤယိၤ သးသ့ၣ်နီၣ်ထီၣ်က့ၤ တၢ်မံမီၢ်တဖၣ်လၢအမံမီၢ်လၢအ ဂ့ၢ်အကျိၤ, ဒီးစံးဘၣ်အီၤ, သုမ့ၢ်ပှၤဟးကွၢ်ဟုၣ်တၢ် လီၤ. ဒ်သိးသုကထံၣ်ဘၣ်ကီၢ်အအိၣ်ဘ့ၣ်ဆ့ဒီး, သု ဟဲလီၤ.

¹⁰ ဒီးအဝဲသ့ၣ်စံးဘၣ်အီၤ, တမ့ၢ်ဘၣ်ကစၢ်ဧၢ, မ့ၢ်ဒ် သိးပကပှ့ၤတၢ်အီၣ်တၢ်အီဒီး, နကုၢ်နပှၤဟဲလီၤ. ¹¹ ပဝဲ ဒၣ်ခဲလၢာ်အံၤပမ့ၢ်ပှၤတဂၤဃီအဖိခွါလီၤ. ပမ့ၢ်ပှၤအ တီလီၤ. နကုၢ်နပှၤတမ့ၢ်ဘၣ်ပှၤဟးကွၢ်ဟုၣ်တၢ်ဘၣ်.

¹² ဒီးစံးဘၣ်အီၤ, တမ့ၢ်ဘၣ်, မ့ၢ်ဒ်သိးသုကထံၣ်ဘၣ် ကီၢ်အအိၣ်ဘ့ၣ်ဆ့ဒီး, သုဟဲလီၤ.

¹³ ဒီးစံးဝဲဒၣ်, နကုၢ်နပှၤမ့ၢ်ဒီပုၢ်ဝဲၢ်တဆံခံဂၤ, ပှၤတဂၤ ဃီအိၣ်လၢကီၢ်ကနၤဧၣ်တဂၤအဖိခွါတဖၣ်လီၤ. ဒီးကွၢ် ကွၢ်, အဆံးတဂၤအိၣ်ဒီးပပၢ်လၢမုၢ်မဆါတနံၤအံၤလီၤ. ဒီးအဝဲတဂၤတအိၣ်လၢၤဘၣ်.

¹⁴ ဒီးစီၤယိၤသး စံးဘၣ်အီၤ, တၢ်န့ၣ်မ့ၢ်တၢ်လၢယစံး ဘၣ်သုလီၤ. ယစံး, သုမ့ၢ်ပှၤဟးကွၢ်ဟုၣ်တၢ်လီၤ. ¹⁵ တၢ် ကမၤကွၢ်သုလၢတၢ်အံၤ, လၢဖၤရိၤအသးသမူအမဲာ်ညါ န့ၣ် သုပုၢ်သဒါမ့ၢ်တဟဲဘၣ်ဖဲအံၤဘၣ်ဒီး, သုတဟး ထီၣ်ဘၣ်ဖဲအံၤဘၣ်. ¹⁶ မၢပှၤလၢသုကျါတဂၤလဲၤဒီးဟဲ က့ၤစိာ်သုပုၢ်တဂၤန့ၣ်တက့ၢ်. ဒီးသုကအိၣ်စၢဃာ်သု သး, ဒ်သိးတၢ်တီအိၣ်လၢသုပူၤဧါန့ၣ်, သုတၢ်ကတိၤက ဘၣ်တၢ်မၤကွၢ်အီၤလီၤ. မ့တမ့ၢ်ဘၣ်ဒ်န့ၣ်ဒီးလၢဖၤရိၤ အသးသမူအမဲာ်ညါန့ၣ်သုမ့ၢ်ပှၤဟးကွၢ်ဟုၣ်တၢ်လီၤ.

¹⁷ ဒီးစီၤယိၤသးပာ်ဃုာ်အီၤခဲလၢာ် လၢပၢၤတၢ်အလီၢ် သၢနံၤလီၤ. ¹⁸ ဒီးသၢနံၤတနံၤန့ၣ်စီၤယိၤသးစံးဘၣ်အီၤ, မၤတၢ်အံၤ, ဒီးမူတက့ၢ်. ယပျံၤယွၤလီၤ. ¹⁹ သုမ့ၢ်တီဒီး, မ်ပှၤလၢသုဒီပုၢ်ဝဲၢ်အကျါတဂၤဘၣ်တၢ်စၢဃာ်အီၤလၢ တၢ်ပၢၤသုအဟံၣ်ပူၤ, ဒီးလဲၤစိာ်သုဘုဧိၤဟုဧိၤလၢတၢ် သၣ်ဝံၤလီၤဒိအိၣ်လၢသုဟံၣ်တဖၣ်အဂီၢ်န့ၣ်, ²⁰ ဒီးဟဲ က့ၤစိာ်သုပုၢ်သဒါဆူယအိၣ်တက့ၢ်. ဒီးသုကမၤတီသု ကလုၢ်, ဒီးသုတသံဘၣ်လီၤ. ဒီးအဝဲသ့ၣ်မၤဝဲဒ်န့ၣ်လီၤ.

²¹ ဒီးကတိၤလိာ်အသးသကိးသကိးဒီးစံးဝဲဒၣ်, ပတၢ် ဒဲးဘးအိၣ်မးလၢပဒီပုၢ်ဝဲၢ်တဂၤအဃိ, လၢပထံၣ်ဘၣ် အသူၣ်ကိၢ်အသးဂီၤ, လၢအဃ့ကညးပှၤ, ဒီးပတက နၣ်ဘၣ်. မၤသးဒ်န့ၣ်ဒီးတၢ်ကိၢ်တၢ်ဂီၤအံၤဘၣ်ပှၤလီၤ.

²² ဒီးစီၤရူၤဘ့ၣ်စံးဆၢအီၤဒီးစံးဝဲဒၣ်, ယစံးဘၣ်သု, မၤ ကမၣ်ဘၣ်ဖိသၣ်တဂ့ၤ, ဒီးသုတကနၣ်ဘၣ်တမ့ၢ်ဘၣ် ဧါ. မၤသးဒ်န့ၣ်ဒီး, ကွၢ်ကွၢ်, တၢ်ဃုန့ၢ်အသွံၣ်စ့ၢ် ကီးလီၤ.

²³ ဒီးစီၤယိၤသးနၢ်ပၢၢ်တၢ်န့ၣ်, အဝဲသ့ၣ် တသ့ၣ်ညါ ဘၣ်. အဂ့ၢ်ဒ်အံၤ, ပှၤကတိၤကျိးတၢ်တဂၤအိၣ်ဝဲလၢ အဘၢၣ်စၢၤလီၤ. ²⁴ ဒီးဃၣ်ကဒါကွံာ်အသးလၢအီၤဒီး အမဲာ်ထံလီၤ, ဒီးဟဲက့ၤကဒီးဆူအအိၣ်, ဒီးကတိၤတၢ် ဒီးအီၤ, ဒီးဟံးန့ၢ်ကွံာ်စီၤစူၤမ့းအိၣ်လၢအကျါ, ဒီးစၢ ဃာ်အီၤလၢအမဲာ်ညါလီၤ.

²⁵ ဒီးစီၤယိၤသးမၤလိာ်ဝဲလၢ ပှၤကမၤပှဲၤအထၢၣ်တဖၣ် ဒီးဘု, ဒီးဒၢနုာ်က့ၤအစ့လၢအထၢၣ်ပူၤ, တဂၤလၢအ ထၢၣ်ဒၣ်ဝဲ, တဂၤလၢအထၢၣ်ဒၣ်ဝဲ, ဒီးဟ့ၣ်အီၤလၢ တၢ်အီၣ်တၢ်အီလၢကျဲဧိၤကပူၤဧိၤအဂီၢ်လီၤ. ဒီးမၤအီၤ ဒ်န့ၣ်လီၤ.

²⁶ ဒီးပဒၢးထီၣ်ဘုဧိၤဟုဧိၤလၢကသ့ၣ်ယီၤ, ဒီးဟးထီၣ် ဖဲန့ၣ်လီၤ. ²⁷ ဒီးဖဲအမံဝဲအလီၢ်န့ၣ်, ပှၤတဂၤအိးထီၣ်အ ထၢၣ် ဒ်သိးအကဟ့ၣ်အကသ့ၣ်ယီၤအဆၣ်, ဒီးထံၣ် ဘၣ်ဝဲအစ့လီၤ. ဒီးကွၢ်ကွၢ်, အိၣ်ဝဲလၢထၢၣ်အခိၣ်လီၤ.―

²⁸ ဒီးစံးဘၣ်အဒီပုၢ်ဝဲၢ်, တၢ်ဟ့ၣ်က့ၤလံယစ့လံ. ဒီးကွၢ် ကွၢ်, အိၣ်လၢယထၢၣ်ပူၤမးလဲၣ်. ဒီးအသးလီၤဘှါဝဲ, ဒီးပျံၤတၢ်, ဒီးစံးလိာ်အသးသကိးသကိး, တၢ်အံၤလၢ ယွၤမၤပှၤန့ၣ်, မ့ၢ်မနုၤတမံၤလဲၣ်.

²⁹ ဒီးဟဲဝဲဆူအပၢ်စီၤယၤကိာ်အအိၣ်လၢ ကီၢ်ကနၤဧၣ် အပူၤ, ဒီးစံးဘၣ်တဲဘၣ်အီၤလၢကယဲၢ်တၢ်လၢအဘၣ် အီၤ, ဒီးစံးဝဲဒၣ်, ³⁰ ကီၢ်အကစၢ်တဂၤကတိၤတၢ်ဒီးပှၤ ဆူၣ်ဆူၣ်, ဒီးပာ်ပှၤလၢပှၤဟးကွၢ်ဟုၣ်တၢ်လၢကီၢ်ပူၤ လီၤ. ³¹ ဒီးပစံးဘၣ်အီၤ, ပမ့ၢ်ပှၤအတီလီၤ. ပတမ့ၢ်ဘၣ် ပှၤကွၢ်ဟုၣ်ကွၢ်စုာ်ဘၣ်. ³² ပမ့ၢ်ဒီပုၢ်ဝဲၢ်တဆံခံဂၤ, ပပၢ် အဖိခွါတဖၣ်လီၤ. တဂၤတအိၣ်လၢၤဘၣ်, ဒီးအဆံး တဂၤအိၣ်ဒီး ပပၢ်လၢကီၢ်ကနၤဧၣ်အပူၤလၢ မုၢ်မဆါ တနံၤအံၤလီၤ.

³³ ဒီးပှၤတဂၤန့ၣ်, ကီၢ်အကစၢ်တဂၤစံးဘၣ်ပှၤ, ယက သ့ၣ်ညါလၢသုမ့ၢ်ပှၤတီလၢတၢ်အံၤ, ပာ်လီၤတဲာ်သုဒီ ပုၢ်ဝဲၢ်တဂၤဒီးယၤ, ဒီးဟံးန့ၢ်တၢ်လၢသုဟံၣ်တဖၣ်အ တၢ်သၣ်ဝံၤလီၤဒိအဂီၢ်, ဒီးဟးထီၣ်တက့ၢ်. ³⁴ ဒီးသုပုၢ် သဒါန့ၣ်ဟဲစိာ်ဆူယအိၣ်တက့ၢ်. ဒီးယကသ့ၣ်ညါလၢ သုတမ့ၢ်ဘၣ်ပှၤကွၢ်ဟုၣ်ကွၢ်စုာ်ဘၣ်, လၢသုမ့ၢ်ပှၤအ တီလီၤ. ယကဟ့ၣ်က့ၤသုဒီပုၢ်ဝဲၢ်, ဒီးသုကကၤတၢ် လၢကီၢ်ပူၤလီၤ.

³⁵ ဒီးတုၤအမၤခီအထၢၣ်တဖၣ်ဒီး, ကွၢ်ကွၢ်, တၢ်မၤအ သးလၢပှၤအစ့ဘိၣ်န့ၣ်အိၣ်ဝဲလၢ အထၢၣ်ပူၤကိးဘိၣ်ဒဲး လီၤ. ဒီးတုၤအဝဲသ့ၣ်ဒီးအပၢ်ထံၣ်ဘၣ်အစ့ဘိၣ်တဖၣ် ဒီးဘၣ်ယိၣ်ဘၣ်ဘီတၢ်လီၤ. ³⁶ ဒီးအပၢ်စီၤယၤကိာ်စံး ဘၣ်အီၤ, သုဒုးဟါမၢ်သဒၣ်ကွံာ်ယဖိဒီးယၤလီၤ. စီၤ ယိၤသးတအိၣ်ဘၣ်, စီၤစူၤမ့းအိၣ်တအိၣ်ဘၣ်, ဒီးသု သါကဟံးန့ၢ်ကွံာ်စီၤဘံၣ်ယၤမံၣ်လီၤ. တၢ်တဖၣ်န့ၣ် ထီဒုၣ်ထီဒါယၤခဲလၢာ်လီၤ.

³⁷ ဒီးစီၤရူၤဘ့ၣ်ကတိၤတၢ်ဒီးအပၢ်, ဒီးစံးဘၣ်အီၤ, ယ မ့ၢ်တဟဲက့ၤစိာ်ဘၣ်အီၤဆူနအိၣ်ဘၣ်ဒီး, မၤသံကွံာ်ယ ဖိခွါခံဂၤတက့ၢ်. ပာ်အီၤလၢယစုပူၤတက့ၢ်, ဒီးယက ဟဲက့ၤစိာ်အီၤဆူနအိၣ်လီၤ.

³⁸ ဒီးစံးဝဲဒၣ်, ယဖိခွါတလဲၤလီၤဘၣ်ဒီးသုဘၣ်. အဂ့ၢ် ဒ်အံၤ, အဝဲၢ်တဂၤသံလံ, ဒီးအဝဲဒၣ်န့ၣ်အိၣ်ဝဲတဂၤဃီ လီၤ. မ့ၢ်ဘၣ်တၢ်အၢတၢ်နးလၢ ကျဲလၢသုလဲၤန့ၣ်ဒီး, သုကဒုးလဲၤလီၤယခိၣ်ဝါဆူပျုၤပူၤအိၣ်ဒီး ယသူၣ်အုး သးအုးလီၤ.

၄၃

¹ ဒီးတၢ်သၣ်ဝံလီၤဒိန့ၣ် အိၣ်ဝဲလၢကီၢ်ပူၤနးမးလီၤ.―

² ဒီးတုၤအအီၣ်လၢာ်ကွံာ် ဘုဧိၤဟုဧိၤလၢအဟဲက့ၤစိာ် လၢကီၢ်အဲၤကူပတူးအပူၤန့ၣ်ဒီး, တၢ်မၤအသးလၢအ ပၢ်စံးဘၣ်အီၤ, က့ၤပှ့ၤပတၢ်အီၣ်တၢ်အီတစဲးတက့ၢ်.

³ ဒီးစီၤယူဒၤကတိၤတၢ်ဒီးအီၤ, ဒီးစံးဝဲဒၣ်, ပှၤတဂၤ န့ၣ်အုၣ်အသးသပှၢ်သပှၢ်, ဒီးစံးဝဲဒၣ်, သုပုၢ်တဂၤန့ၣ် မ့ၢ်တအိၣ်ဘၣ်ဒီးသုဘၣ်ဒီး, သုတထံၣ်ဘၣ်ယမဲာ်ဘၣ် န့ၣ်လီၤ. ⁴ နမ့ၢ်မၢပပုၢ်လဲၤလီၤဒီးပှၤဒီး, ပကလဲၤလီၤပှ့ၤ နတၢ်အီၣ်လီၤ. ⁵ ဒီးနမ့ၢ်တမၢလီၤဘၣ်အီၤဒီး, ပတလဲၤ လီၤဘၣ်. အဂ့ၢ်ဒ်အံၤ, ပှၤတဂၤန့ၣ်စံးဘၣ်ပှၤ, သုပုၢ် မ့ၢ်တအိၣ်ဘၣ်ဒီးသုဘၣ်ဒီး, သုတထံၣ်ဘၣ်ယမဲာ်ဘၣ်.

⁶ ဒီးစီၤအံၣ်စရ့လးစံးဝဲဒၣ်, သုစံးဘၣ်ပှၤတဂၤလၢသု အိၣ်ဒံးဒီးသုပုၢ်တဂၤန့ၣ်, ဒီးမၤအၤမၤနးယၤန့ၣ်, မ့ၢ် အဘၣ်မနုၤလဲၣ်. ⁷ ဒီးစံးဝဲဒၣ်, ပှၤတဂၤန့ၣ်သံကွၢ်ပှၤ လီၤတံၢ်လီၤဆဲးလၢပဂ့ၢ်ပကျိၤ, ဒီးလၢပဘူးပတံၢ်အဂ့ၢ် အကျိၤ, ဒီးစံးဝဲဒၣ်, သုပၢ်အိၣ်ဒံးစ့ၢ်ကီးဧါ, သုဒီပုၢ် ဝဲၢ်အိၣ်တဂၤဧါ. ဒီးဖဲဒၣ်တၢ်ကတိၤအသိးန့ၣ်ပစံးဆၢ အီၤလီၤ. ကစံးဝဲ, မၢသုဒီပုၢ်ဝဲၢ်ဟဲက့ၤလီၤတက့ၢ်န့ၣ်, ပသ့ၣ်ညါသပှၢ်တၢၢ်ကသ့ဧါ.

⁸ ဒီးစီၤယူဒၤ စံးဘၣ်အပၢ်စီၤအံၣ်စရ့လးန့ၣ်, မၢဖိၣ် သၣ်ခွါတဂၤန့ၣ်လဲၤလီၤဒီးယၤတက့ၢ်. ဒီးပကဂဲၤဆၢ ထၢၣ်, ဒီးလဲၤတၢ်, ဒီးမူဒံး, ဒီးတသံဘၣ်, ပှၤဒီးနၤ ဒီးပဖိဒံဖိသၣ်စ့ၢ်ကီးလီၤ. ⁹ ဒီးယကအုၣ်ခီၣ်ယသးလၢ အဂီၢ်, နကဘၣ်ဃုက့ၤအီၤလၢယစုပူၤလီၤ. ယမ့ၢ်တ ဟဲက့ၤစိာ်ဘၣ်ဆူနအိၣ်, ဒီးပာ်အီၤလၢနမဲာ်ညါဘၣ်ဒီး, မ်တၢ်ဒဲးဘးအိၣ်လၢယလိၤလၢနမဲာ်ညါကိးမုၢ်နံၤမုၢ်နၤ ဒဲးတက့ၢ်. ¹⁰ အဂ့ၢ်ဒ်အံၤ, ပမ့ၢ်တမၤယံာ်မၤနီၢ်တ့ၢ်ပ သးဘၣ်ဒီး, ခဲကနံၣ်အံၤပကဟဲက့ၤကဒါက့ၤခံဘျီတ ဘျီလံလီၤ.

¹¹ ဒီးအပၢ်စီၤအံၣ်စရ့လးစံးဘၣ်အီၤ, မ့မ့ၢ်ဒ်န့ၣ်ဒီး, မၤ တၢ်အံၤ, ဟံးန့ၢ်ကီၢ်အတၤသၣ်ဝံၣ်လၢသုထၢၣ်ပူၤ, ဒီး လဲၤစိာ်န့ၢ်ပှၤတဂၤန့ၣ်လၢခိၣ်ဖး, သ့ၣ်စရံၤအထုးတစဲး, ဒီးကနဲစီတစဲး, နီၣ်တြူးနကိးအဃ့, ဒီးသ့ၣ်လိးအထုး, သ့အီၣ်ဘိတၣ်အသၣ်, ဒီးသ့ၣ်ၡီၤက့းအသၣ်, ¹² ဒီးဟံး န့ၢ်စ့ခံစးလၢသုစုပူၤတက့ၢ်. ဒီးစ့လၢသုဟဲက့ၤစိာ်လၢ သုထၢၣ်ပူၤန့ၣ်, က့ၤစိာ်လၢသုစုပူၤတက့ၢ်. ဘၣ်တဘၣ် ပှၤကွၢ်ကပာ်တၢ်လီၤ. ¹³ ဒီးဟံးန့ၢ်သုပုၢ်, ဒီးဂဲၤဆၢထၢၣ် လဲၤကဒီးဆူပှၤတဂၤန့ၣ်အအိၣ်တက့ၢ်. ¹⁴ ဒီးယွၤလၢအ သ့တၢ်လၢာ်န့ၣ်မ်အဟ့ၣ်သုလၢ တၢ်သးကညီၤလၢပှၤ တဂၤန့ၣ်အမဲာ်ညါ, ဒ်သိးအကပျၢ်သုဒီပုၢ်ဝဲၢ်အဂၤတ ဂၤဒီးစီၤဘံၣ်ယၤမံၣ်န့ၣ်တက့ၢ်. ဒီးယဖိမ့ၢ်ဟါမၢ်ကွံာ် လၢယၤဒီး, ကဟါမၢ်ကွံာ်လၢယၤလီၤ.

¹⁵ ဒီးပှၤတဖၣ်န့ၣ်ဟံးန့ၢ်ခိၣ်ဖးတမံၤန့ၣ်ဒီးစ့ခံစး, ဒီးစီၤ ဘံၣ်ယၤမံၣ်, ဒီးဂဲၤဆၢထၢၣ်, ဒီးလဲၤလီၤဆူကီၢ်အဲၤကူ ပတူး, ဒီးဆၢထၢၣ်လၢစီၤယိၤသးအမဲာ်ညါလီၤ.

¹⁶ ဒီးစီၤယိၤသးထံၣ်ဘၣ် စီၤဘံၣ်ယၤမံၣ်အိၣ်ဒီးအီၤ, ဒီးစံးဘၣ်ပှၤလၢအဟံၣ်ဖိအဖီခိၣ်တဂၤ, မၢပှၤတဖၣ်ဟဲ ဆူယဟံၣ်, ဒီးမၤသံတၢ်, ဒီးကတဲာ်ကတီၤတၢ်တက့ၢ်. အဂ့ၢ်ဒ်အံၤ, ပှၤတဖၣ်န့ၣ် ကအီၣ်တၢ်ဒီးယၤဖဲမုၢ်ထူၣ် န့ၣ်လီၤ. ¹⁷ ဒီးပှၤတဂၤန့ၣ်မၤဝဲဒ်စီၤယိၤသးမၤလိာ်ဝဲအ သိး, ဒီးဆှၢထီၣ်ပှၤတဖၣ်ဆူစီၤယိၤသးအဟံၣ်ပူၤလီၤ.

¹⁸ ဒီးမ့ၢ်ပှၤဆှၢထီၣ်အီၤဆူစီၤယိၤသးအဟံၣ်ပူၤဒီး, အဝဲ သ့ၣ်တဖၣ်ပျံၤတၢ်, ဒီးစံးဝဲဒၣ်, တၢ်ဆှၢနုာ်ပှၤလၢစ့ လၢအအိၣ်က့ၤလၢပထၢၣ်ပူၤလၢအခီၣ်ထံးတဘျီအဃိ, ဒ်သိးအကဃုအလီၢ်လၢပဖီခိၣ်, ဒီးထိၣ်လီၤတီၢ်အသး လၢပလိၤ, ဒီးဟံးန့ၢ်ပှၤလၢကုၢ်လၢပှၤ, ဒီးပကသ့ၣ် ယီၤတဖၣ်လီၤ. ¹⁹ ဒီးသုးဘူးအသးဆူပှၤလၢစီၤယိၤသး အပှၤဟံၣ်ဖိအဖီခိၣ်, ဒီးကတိၤတၢ်ဒီးအီၤလၢဟံၣ်အကျဲ စၢၤ, ²⁰ ဒီးစံးဝဲဒၣ်, ကစၢ်ဧၢ, ပဟဲလီၤလၢအခီၣ်ထံး တစု, ဒ်သိးပကပှ့ၤတၢ်အီၣ်တၢ်အီတီတီလီၤ. ²¹ ဒီးတုၤ ပဟဲလၢပမံအလီၢ်န့ၣ်ဒီး, တၢ်မၤအသးလၢပအိးထီၣ် ပထၢၣ်, ဒီးကွၢ်ကွၢ်, ပှၤအစ့အိၣ်ဝဲလၢအထၢၣ်ခိၣ်, တဂၤအစ့လၢအထၢၣ်ခိၣ် တဂၤအစ့လၢအထၢၣ်ခိၣ်, ပစ့ဒ်အလီၤတယၢၢ်အသိး ဒီးပဟဲက့ၤစိာ် လၢပစုပူၤ လီၤ. ²² ဒီးပဟဲစိာ်လီၤစ့အဂၤလၢပစုပူၤ, ဒ်သိးပကပှ့ၤ တၢ်အီၣ်တၢ်အီလီၤ. မ့ၢ်မတၤဒၢနုာ်ပစ့လၢပထၢၣ်ပူၤ တဂၤလဲၣ်န့ၣ်ပတသ့ၣ်ညါဘၣ်.

²³ ဒီးစံးဝဲဒၣ်, မ်သုဘၣ်တၢ်အမုာ်တက့ၢ်. ပျံၤတၢ်တ ဂ့ၤ. သုကစၢ်, ဒီးသုပၢ်အကစၢ်ဟ့ၣ်သုလၢတၢ်ထူးတၢ် တီၤလၢသုထၢၣ်ပူၤလီၤ. သုစ့အိၣ်တ့ၢ်ဒီးယၤလီၤ. ဒီး ဆှၢထီၣ် စီၤစူးမ့းအိၣ်ဆူအအိၣ်လီၤ. ²⁴ ဒီးပှၤတဂၤန့ၣ် ဆှၢပှၤတဖၣ်ဆူ စီၤယိၤသးအဟံၣ်ပူၤ, ဒီးဟ့ၣ်အီၤလၢ ထံ, ဒီးအဝဲသ့ၣ်သ့ကွံာ်အခီၣ်, ဒီးပှၤတဂၤန့ၣ်ဟ့ၣ်အ ကသ့ၣ်ယီၤတဖၣ်လၢအဆၣ်လီၤ.

²⁵ ဒီးအဝဲသ့ၣ် ကတဲာ်ကတီၤအခိၣ်ဖးန့ၣ် တုၤစီၤယိၤ သးကဟဲလၢမုၢ်ထူၣ်လီၤ. အဂ့ၢ်ဒ်အံၤ, နၢ်ဟူဝဲလၢအ ကအီၣ်တၢ်ဖဲန့ၣ်လီၤ. ²⁶ ဒီးစီၤယိၤသးဟဲဆူအဟံၣ်, ဒီး အဝဲသ့ၣ်တဖၣ်ဟဲက့ၤစိာ်တၢ်ခိၣ်ဖးန့ၣ် လၢအအိၣ်လၢ အစုပူၤဆူအအိၣ်လၢအဟံၣ်ပူၤ, ဒီးတီၤလီၤကဒွံကျိာ် လၢအမဲာ်ညါလီၤ. ²⁷ ဒီးအဝဲဒၣ်သံကွၢ်အီၤလၢအအိၣ် မုာ်အဂ့ၢ်အကျိၤ, ဒီးစံးဝဲဒၣ်, သုပၢ်ပှၤသးပှၢ်တဂၤလၢ သုကတိၤတၢ်လၢအဂ့ၢ်န့ၣ်, အိၣ်မုာ်စ့ၢ်ကီးဧါ, မ့ၢ်အ မူဒံးစ့ၢ်ကီးဧါ.

²⁸ ဒီးစံးဆၢဝဲဒၣ်, နကုၢ်နပှၤပပၢ်တဂၤအိၣ်မုာ်ဝဲ, ဒီး မူဒံးလီၤ. ဒီးဆုးလီၤအခိၣ်, ဒီးသကူးလီၤအသးလၢ အမဲာ်ညါလီၤ.

²⁹ ဒီးအဝဲဒၣ်ကျ့ထီၣ်အမဲာ်, ဒီးထံၣ်ဘၣ်အပုၢ်, အမိၢ် အဖိခွါစီၤဘံၣ်ယၤမံၣ်တဂၤ, ဒီးစံးဝဲဒၣ်, အဝဲတဂၤအံၤ မ့ၢ်သုပုၢ်လၢသုစံးဘၣ်ယၤလၢ အဂ့ၢ်အကျိၤစ့ၢ်ကီးဧါ. ဒီးစံးဝဲဒၣ်, မ်ယွၤသးကညီၤနၤတက့ၢ်, ယဖိခွါဧၢ.

³⁰ ဒီးစီၤယိၤသးမၤဝဲချ့ချ့လီၤ. အဂ့ၢ်ဒ်အံၤ, သးအိၣ်အ ပုၢ်, ဒီးဃုအလီၢ်ဖဲအကပျဲအမဲာ်ထံလီၤ. ဒီးလဲၤနုာ်လၢ

³¹ အဒၢးပူၤ, ဒီးအမဲာ်ထံလီၤဖဲန့ၣ်လီၤ. ဒီးပျၢ်အမဲာ်, ဒီး ဟးထီၣ်, ဒီးကီၤအသး, ဒီးစံးဝဲဒၣ်, ပာ်လီၤတၢ်အီၣ် တက့ၢ်.

³² ဒီးပှၤပာ်လီၤလၢအဂီၢ်တပူၤ, ဒီးလၢအဝဲသ့ၣ်တဖၣ် န့ၣ်အဂီၢ်တပူၤဒၣ်, ဒီးလၢပှၤအဲၤကူပတူးဖိလၢအအီၣ် တၢ်ဒီးအီၤအဂီၢ်တပူၤဒၣ်လီၤ. အဂ့ၢ်ဒ်အံၤ, ပှၤအဲၤကူ ပတူးဖိတအီၣ်ဘၣ်တၢ်ဒီးပှၤဧ့ၤဘြံၤဖိဘၣ်. အဂ့ၢ်ဒ်အံၤ, အဝဲန့ၣ်မ့ၢ်တၢ်သးဘၣ်အၢလၢပှၤအဲၤကူပတူးဖိန့ၣ်လီၤ.

³³ ဒီးဒုးဆ့ၣ်နီၤအဝဲၢ်ကိတဂၤ, ဒ်အဝဲၢ်ကိအလီၢ်အသိး, ဒီးအဆံးတဂၤဒ်အဆံးအလီၢ်အသိး, လၢအမဲာ်ညါ, ဒီး ပှၤတဖၣ်န့ၣ်ကွၢ်လိာ်အသးဒီး ကမၢကမၣ်သကိးသ ကိးလီၤ.

³⁴ ဒီးဟံးန့ၢ်တၢ်ဟ့ၣ်နီၤလၢအမဲာ်ညါလၢ အဝဲသ့ၣ်အ ဂီၢ်ဒီးစီၤဘံၣ်ယၤမံၣ်အတၢ်ဟ့ၣ်နီၤန့ၣ် အါန့ၢ်ပှၤဂၤအ တၢ်ယဲၢ်စးလီၤ. ဒီးအီတၢ်, ဒီးအီဘျဲးအီတၢ်ဒီးအီၤလီၤ.

၄၄

¹ ဒီးအဝဲဒၣ်မၤလိာ်ပှၤလၢအဟံၣ်ဖိအဖီခိၣ်, ဒီးစံးဝဲ ဒၣ်, မၤပှဲၤထီၣ်ပှၤတဖၣ်န့ၣ်အထၢၣ်ပူၤဒီးတၢ်အီၣ်တၢ် အီဖဲအစိာ်ထီၣ်သ့, ဒီးဒၢနုာ်ပှၤအစ့, တဂၤအစ့လၢအ ထၢၣ်ခိၣ်, တဂၤအစ့လၢအထၢၣ်ခိၣ်, ² ဒီးဒၢနုာ်ယ သလူ, သလူစ့တဖျၢၣ်လၢပှၤအဆံးအထၢၣ်ခိၣ်, ဒီး အဘုအဟုအစ့န့ၣ်တက့ၢ်. ဒီးမၤဝဲဒ်စီၤယိၤသးကတိၤ တၢ်အသိးန့ၣ်လီၤ. ³ တုၤမုၢ်ဆ့ၣ်ကပီၤထီၣ်ဒီး, တၢ်မၢ ပှၤတဖၣ်လဲၤတၢ်, အဝဲသ့ၣ်ဒီးအကသ့ၣ်ယီၤလီၤ.

⁴ ဟးထီၣ်ဝဲလၢဝ့ၢ်ပူၤတယံၤဘၣ်ဒီး, စီၤယိၤသးစံးဘၣ် ပှၤလၢအဟံၣ်ဖိအဖီခိၣ်တဂၤ, ဂဲၤဆၢထၢၣ်လူၤပိာ်ပှၤ တဖၣ်န့ၣ်အခံ, ဒီးတုၤနချုးန့ၢ်အီၤဒီး, စံးဘၣ်အီၤ, သု ဟ့ၣ်ဆၢက့ၤတၢ်အၢလၢတၢ်ဂ့ၤအလီၢ် မ့ၢ်အဘၣ်မနုၤ လဲၣ်. ⁵ အဝဲအံၤမ့ၢ်တၢ်လၢယကစၢ်အီလၢအပူၤ, ဒီး လၢအဖးတၢ်ဘၣ်လၢအီၤတမ့ၢ်ဘၣ်ဧါ. သုမၤတၢ်အၢ လၢသုမၤတၢ်န့ၣ်လီၤ.

⁶ ဒီးအဝဲဒၣ်လဲၤချုးန့ၢ်အီၤ, ဒီးကတိၤတၢ်ဒီးအီၤလၢ တၢ်ကတိၤန့ၣ်လီၤ.

⁷ ဒီးအဝဲသ့ၣ်တဖၣ်န့ၣ်စံးဘၣ်အီၤ, ယကစၢ်ကတိၤ တၢ်ကတိၤတဖၣ်န့ၣ်မ့ၢ်အဘၣ်မနုၤလဲၣ်. ဒ်တၢ်ကတိၤ တဖၣ်အသိးန့ၣ်, မ်နကုၢ်နပှၤအသုတမၤတဂ့ၤ. ⁸ ကွၢ် ကွၢ်, စ့လၢပထံၣ်န့ၢ်ဘၣ်လၢပထၢၣ်ခိၣ်န့ၣ် ပဟဲက့ၤ စိာ်ဆူနအိၣ်လၢကီၢ်ကနၤဧၣ်အပူၤလီၤ. ဒီးပဟုၣ်ကျိၣ် ဧိၤစ့ဧိၤ, ထူဧိၤလွဲဧိၤလၢနကစၢ်အဟံၣ်ပူၤဒ်လဲၣ်. ⁹ ဖဲ ဒၣ်ပှၤလၢတၢ်ထံၣ်န့ၢ်အီၤအိၣ်ဒီးနကုၢ်နပှၤတဂၤဂၤအံၤ, မ်အသံတက့ၢ်, ဒီးပဝဲဒၣ်အံၤပကကဲထီၣ်ယကစၢ်အ ကုၢ်အပှၤလီၤ.

¹⁰ ဒီးစံးဝဲဒၣ်, ခဲကနံၣ်အံၤကမၤအသးဒၣ်ဝဲဒ်သုတၢ်က တိၤအသိးန့ၣ်တက့ၢ်. ဖဲဒၣ်ပှၤလၢတၢ်ကထံၣ်န့ၢ်အ အိၣ်ဒီးအီၤတဂၤတဂၤန့ၣ်, ကကဲထီၣ်ယကုၢ်, ဒီးသုဝဲ သ့ၣ်အံၤတၢ်ဒဲးဘးတအိၣ်ဘၣ်ဘၣ်လၢသုလိၤဘၣ်.

¹¹ ဒီးစိာ်လီၤကွံာ်အထၢၣ်ချ့ချ့လၢဟီၣ်ခိၣ်, ဒီးအိးထီၣ် အထၢၣ်တဂၤအထၢၣ်ဒၣ်ဝဲ, တဂၤအထၢၣ်ဒၣ်ဝဲ, ¹² ဒီး ဃုဆိဝဲဖဲအဝဲၢ်ကိတဂၤ, ဒီးလၢာ်ဝဲဖဲအဆံးတဂၤ, ဒီး ထံၣ်န့ၢ်သလူတဖျၢၣ်န့ၣ်လၢ စီၤဘံၣ်ယၤမံၣ်အထၢၣ်ပူၤ လီၤ.

¹³ ဒီးဖှီဝဲအယၣ်, ဒီးပဒၢးထီၣ်တၢ်လၢအကသ့ၣ်ယီၤ, တဂၤလၢအကသ့ၣ်ယီၤ, တဂၤလၢအကသ့ၣ်ယီၤ, ဒီး က့ၤကဒါက့ၤဆူဝ့ၢ်ပူၤလီၤ. ¹⁴ ဒီးစီၤယူဒၤဒီးအဒီပုၢ်ဝဲၢ် ဟဲဝဲဆူစီၤယိၤသးအဟံၣ် (ဒီးအိၣ်ဒံးဖဲန့ၣ်,) ဒီးအဝဲ သ့ၣ်တဖၣ်န့ၣ်ထိၣ်လီၤပှီၢ်အသးလၢ ဟီၣ်ခိၣ်လၢအမဲာ် ညါလီၤ.

¹⁵ ဒီးစီၤယိၤသးစံးဘၣ်အီၤ, တၢ်လၢသုမၤတၢ်အံၤမ့ၢ်မ နုၤတမံၤလဲၣ်. ပှၤဒ်ယၤအသိး, ဖးတၢ်ဘၣ်န့ၣ်သုတ သ့ၣ်ညါဘၣ်ဧါ.

¹⁶ ဒီးစီၤယူဒၤစံးဝဲဒၣ်, ပကစံးဘၣ်ယကစၢ်ဒ်လဲၣ်, ပ ကကတိၤတၢ်ဒ်လဲၣ်, ပကပာ်တီပသးဒ်လဲၣ်. ယွၤထံၣ် န့ၢ်နကုၢ်နပှၤအတၢ်အၢတၢ်သီလီၤ. ကွၢ်ကွၢ်, ပမ့ၢ်ပ ကစၢ်အကုၢ်အပှၤ, ပဝဲဒၣ်ဒီးပှၤတဂၤလၢ တၢ်ထံၣ်န့ၢ် သလူတဖျၢၣ်န့ၣ်အိၣ်ဒီးအီၤစ့ၢ်ကီးလီၤ.

¹⁷ ဒီးစံးဝဲဒၣ်, ယမၤတၢ်န့ၣ် မ်အသုတမၤအသးတဂ့ၤ. ပှၤလၢတၢ်ထံၣ်န့ၢ်သလူတဖျၢၣ် လၢအစုပူၤတဂၤန့ၣ် ကကဲထီၣ်ယကုၢ်လီၤ. မ့မ့ၢ်သုဝဲသ့ၣ်အံၤ ဂဲၤဆၢထၢၣ် က့ၤထီၣ်က့ၤမုာ်မုာ်ဆူ သုပၢ်အအိၣ်တက့ၢ်.

¹⁸ ဒီးစီၤယူဒၤသုးဘူးအသးဆူအအိၣ်, ဒီးစံးဝဲဒၣ်, ယ ကစၢ်ဧၢ, ဒုးကတိၤလၢ်နကုၢ်နပှၤလၢ တၢ်ကတိၤတ ဘီလၢယကစၢ်အနၢ်ပူၤတက့ၢ်. ဒီးမ်နသးထီၣ်သုတ ကဲၤထီၣ်ဘၣ်နကုၢ်နပှၤတဂ့ၤ. အဂ့ၢ်ဒ်အံၤ, နထဲသိးဒီး ဖၤရိၤလီၤ. ¹⁹ ယကစၢ်သံကွၢ်အကုၢ်အပှၤ, ဒီးစံးဝဲဒၣ်, သုပၢ်မ့ၢ်ဂ့ၤ, သုဒီပုၢ်ဝဲၢ်မ့ၢ်ဂ့ၤ, အိၣ်စ့ၢ်ကီးဧါ. ²⁰ ဒီးပ စံးဘၣ်ယကစၢ်ပအိၣ်ဒီးပပၢ်, ပှၤသးပှၢ်တဂၤ, ဒီးအဖိ အိၣ်ဖျဲၣ်ဖဲအသးပှၢ်, အဆံးတဂၤ, ဒီးအဝဲၢ်တဂၤသံ လံ, ဒီးအိၣ်လီၤတဲာ်လၢအမိၢ်န့ၣ်ထဲအဝဲတဂၤဧိၤ, ဒီး ယပၢ်အဲၣ်အီၤလီၤ. ²¹ ဒီးနစံးဘၣ်နကုၢ်နပှၤ, ဟဲစိာ်လီၤ အီၤဆူယအိၣ်, ဒ်သိးယကဒိးယမဲာ်လၢအလိၤန့ၣ်တ က့ၢ်. ²² ဒီးပစံးဘၣ်ယကစၢ်, ဖိၣ်သၣ်ခွါန့ၣ်လဲၤသဒၣ် အပၢ်တသ့ဘၣ်. မ့ၢ်လဲၤသဒၣ်အပၢ်ဒီး, အဝဲဒၣ်ကသံ လီၤ. ²³ ဒီးနစံးဘၣ်နကုၢ်နပှၤ, သုပုၢ်သဒါမ့ၢ်တဟဲလီၤ ဘၣ်ဒီးသုဘၣ်ဒီး, သုတထံၣ်လၢၤဘၣ်ယမဲာ်ဘၣ်လီၤ.

²⁴ ဒီးတၢ်မၤအသးတုၤပက့ၤထီၣ်ဆူနကုၢ်နပှၤ, ပပၢ်တ ဂၤအအိၣ်ဒီး, ပစံးဘၣ်တဲဘၣ်အီၤလၢယကစၢ်အတၢ် ကတိၤန့ၣ်လီၤ. ²⁵ ဒီးပပၢ်စံး, က့ၤပှ့ၤပတၢ်အီၣ်တၢ်အီတ စဲးတက့ၢ်. ²⁶ ဒီးပစံး, ပလဲၤလီၤတသ့ဘၣ်. ပပုၢ်အဆံး တဂၤမ့ၢ်အိၣ်ဒီးပှၤဒီး, ပကလဲၤလီၤလီၤ. အဂ့ၢ်ဒ်အံၤ, ပ ပုၢ်အဆံးတဂၤမ့ၢ်တအိၣ်ဘၣ်ဒီးပှၤဒီး, ပထံၣ်ဘၣ်ပှၤတ ဂၤန့ၣ်အမဲာ်တသ့ဘၣ်. ²⁷ ဒီးနကုၢ်နပှၤယပၢ်တဂၤန့ၣ် စံးဘၣ်ပှၤ, သုသ့ၣ်ညါလၢယမါဆံးစၢ်န့ၢ်ယၤလၢပှၤခံ ဂၤလီၤ. ²⁸ ဒီးအဝဲတဂၤဟးထီၣ်လၢယအိၣ်, ဒီးယစံး, ယာ်သံကွံာ်လံဝဲသပှၢ်တၢၢ်လံ. ဒီးလၢန့ၣ်လံၤလံၤယ တထံၣ်လၢၤဘၣ်အီၤဘၣ်. ²⁹ ဒီးသုမ့ၢ်ဟံးန့ၢ်စ့ၢ်ကီးအဝဲ တဂၤအံၤလၢယအိၣ်, ဒီးမ့ၢ်ဘၣ်တၢ်အၢတၢ်နးဒီး, သု ကဒုးလဲၤလီၤယခိၣ်ဝါဆူပျုၤပူၤဒီး တၢ်နးတၢ်ဖှီၣ်လီၤ. ³⁰ ဒီးခဲကနံၣ်အံၤတုၤယက့ၤဆူ နကုၢ်နပှၤယပၢ်အအိၣ်ဒီးဖိၣ်သၣ်ခွါတဂၤအံၤတအိၣ်ဘၣ်ဒီးပှၤဘၣ်ဒီး, အသးသမူဘၣ်တၢ်စၢဃာ်အသးလၢ အဖိအသးသမူအပူၤ,―

³¹ ဒီးတုၤအထံၣ်လၢဖိၣ်သၣ်ခွါအံၤတအိၣ်ဘၣ်ဒီး, တၢ်က မၤအသးလၢအကသံဝဲလီၤ. ဒီးနကုၢ်နပှၤကဒုးလဲၤလီၤ နကုၢ်နပှၤပပၢ်အခိၣ်ဝါဆူပျုၤပူၤ, ဒီးတၢ်သူၣ်အုးသး အုးလီၤ. ³² အဂ့ၢ်ဒ်အံၤ, နကုၢ်နပှၤကဲထီၣ်ပှၤအၢၣ်လီၤ အီလီၤလၢအဂီၢ်လၢယပၢ်အမဲာ်ညါဒီးယစံး, ယမ့ၢ်တ ဟဲက့ၤစိာ်ဘၣ်အီၤဆူနအိၣ်ဘၣ်ဒီး, ယကဘၣ်တၢ်ဒဲး ဘးလၢယပၢ်အမဲာ်ညါကိးမုၢ်နံၤမုၢ်နၤဒဲးလီၤ.

³³ ဒီးခဲကနံၣ်အံၤ, ဒုးအိၣ်ဒုးဆိးလၢ်ယၤ, လၢယကစၢ် အကုၢ်လၢဖိၣ်သၣ်ခွါန့ၣ်အလီၢ်, ဒီးဒုးက့ၤထီၣ်ဖိၣ်သၣ် ခွါဒီးအဒီပုၢ်ဝဲၢ်တက့ၢ်. ³⁴ အဂ့ၢ်ဒ်အံၤ, ဖိၣ်သၣ်ခွါန့ၣ် တအိၣ်ဒီးယၤဘၣ်ဒီး, ယကက့ၤထီၣ်ဆူယပၢ်အအိၣ်ဒ် လဲၣ်. ယကထံၣ်ဘၣ်ဖုးတၢ်နးတၢ်ဖှီၣ် လၢအကလီၤ ဘၣ်ယပၢ်လီၤ.

၄၅

¹ ဒီးစီၤယိၤသးကီၤအသးလၢ ပှၤလၢအဆၢထၢၣ်လၢ အဃၢၤခဲလၢာ်အမဲာ်ညါတကဲဘၣ်, ဒီးကိးထီၣ်ဝဲ, ဒုး ဟးထီၣ်ကယဲၢ်ပှၤလၢယအိၣ်တက့ၢ်. ဒီးစီၤယိၤသးလီၣ် ဖျါထီၣ်အသးလၢအဒီပုၢ်ဝဲၢ်အမဲာ်ညါအဖၢမုၢ်ဒီး, ပှၤ တဆၢထၢၣ်ဘၣ်ဒီးအီၤနီတဂၤဘၣ်. ² ဒီးအကလုၢ်ထီၣ် ဖျဲးလၢမဲာ်ထံမဲာ်နိအပူၤ, ဒီးပှၤအဲၤကူပတူးဖိ, ဒီးဖၤရိၤ အပှၤဟံၣ်ဖိနၢ်ဟူဝဲလီၤ.

³ ဒီးစီၤယိၤသးစံးဘၣ်အဒီပုၢ်ဝဲၢ်, ယမ့ၢ်စီၤယိၤသးလီၤ. ယပၢ်မူဒံးစ့ၢ်ကီးဧါ. ဒီးအဒီပုၢ်ဝဲၢ်စံးဆၢဝဲတကဲဘၣ်. အဂ့ၢ်ဒ်အံၤ, အသူၣ်ကိၢ်အသးဂီၤလၢအအိၣ်လၢအမဲာ် ညါအဃိလီၤ.

⁴ ဒီးစီၤယိၤသးစံးဘၣ်အဒီပုၢ်ဝဲၢ်, သုးဘူးလၢ်သုသးဆူ ယအိၣ်တက့ၢ်. ဒီးသုးဘူးအသးလီၤ. ဒီးစံးဘၣ်အီၤ, ယမ့ၢ်သုဒီပုၢ်ဝဲၢ်စီၤယိၤသး, လၢသုဆါကွံာ်ဆူအဲၤကူပ တူးလီၤ. ⁵ ဒီးခဲကနံၣ်အံၤသုသုတသးအုးတဂ့ၤ. ဒီးသု သုတသးထီၣ်လီၤသုသးလၢ သုဆါကွံာ်ယၤဖဲအံၤအ ဃိတဂ့ၤ. အဂ့ၢ်ဒ်အံၤ, ယွၤမၢယဟဲလီၤလၢသုမဲာ်ညါ ဒ်သိးယကဒုးပူၤဖျဲးပှၤအသးသမူန့ၣ်လီၤ.

⁶ တၢ်သၣ်ဝံၤလီၤဒိအံၤအိၣ်လံလၢ ကီၢ်ပူၤခံနံၣ်အံၤလံ. ဒီးအိၣ်ဒံးယဲၢ်နံၣ်လၢအတအိၣ်ဘၣ်ဒီး ထဲၣ်တၢ်ဒီးကူး တၢ်န့ၣ်ဘၣ်လီၤ. ⁷ ဒီးယွၤမၢယလဲၤလၢသုမဲာ်ညါဒ်သိး အကပာ်တၢ်အိၣ်လီၤတဲာ်လၢသုဂီၢ်လၢဟီၣ်ခိၣ်ချၢ, ဒီး ဒုးမူဒံးသုလၢတၢ်မၤထူၣ်ဖျဲးတၢ်ဖးဒိၣ်လီၤ. ⁸ ဒီးခဲကနံၣ် အံၤသုမၢယဟဲဖဲအံၤတမ့ၢ်ဘၣ်. မ့ၢ်ယွၤလီၤ. ဒီးပာ်ယၤ လၢဖၤရိၤအပၢ်, ဒီးအပှၤဟံၣ်ဖိခဲလၢာ်အကစၢ်, ဒီးပှၤ ပၢတၢ်လၢကီၢ်အဲၤကူပတူးဒီကီၢ်ညါလီၤ.

⁹ က့ၤထီၣ်ချ့ချ့ဆူယပၢ်အအိၣ်, ဒီးစံးဘၣ်အီၤ, နဖိခွါ စီၤယိၤသးစံးဒ်အံၤ, ယွၤပာ်ယၤလၢကီၢ်အဲၤကူပတူးဒီ ကီၢ်ညါအကစၢ်လီၤ. ဟဲလီၤဆူယအိၣ်တက့ၢ်. မၤယံာ် မၤနီၢ်နသးတဂ့ၤ. ¹⁰ ဒီးနကအိၣ်ကဆိးလၢကီၢ်ကိရှ့ၣ်ဒီး နကအိၣ်ဘူးဒီးယၤ, နဲဒၣ်, ဒီးနဖိ, ဒီးနဖိအဖိတဖၣ်, ဒီးနသိဒီးနမဲာ်တဲးလဲးတဖၣ်, ဒီးနဂီၤဘုၣ်ဂီၤဖံးတဖၣ်, ဒီးကယဲၢ်တၢ်လၢအအိၣ်ဒီးနၤလီၤ. ¹¹ ဒီးယကလုၢ်အီၣ် လုၢ်အီနၤဖဲန့ၣ်, (အဂ့ၢ်ဒ်အံၤ, တၢ်သၣ်ဝံၤလီၤဒိအိၣ်ဒံး ယဲၢ်နံၣ်လီၤ) နဲဒၣ်, ဒီးနပှၤဟံၣ်ဖိ, ဒီးကယဲၢ်ပှၤအိၣ် ဒီးနၤန့ၣ်ကဘၣ်တၢ်ဖှီၣ်တၢ်ယာ်ခဲလၢာ်ဘၣ်ဖုးလီၤ.

¹² ဒီးကွၢ်ကွၢ်, သုမဲာ်ဒီးယပုၢ်စီၤဘံၣ်ယၤမံၣ်အမဲာ်ထံၣ် ဝဲလၢအမ့ၢ်ယထးခိၣ်လၢအကတိၤတၢ်ဒီးသုလီၤ. ¹³ ဒီး သုကစံးဘၣ်တဲဘၣ်ယပၢ်လၢ ယလၤကပီၤလၢကီၢ်အဲၤ ကူပတူးအပူၤခဲလၢာ်အဂ့ၢ်အကျိၤ, ဒီးကယဲၢ်တၢ်လၢ သုထံၣ်ဘၣ်ခဲလၢာ်ခဲဆ့လီၤ. ဒီးသုဘၣ်မၤချ့ချ့, ဒီးဟဲ စိာ်လီၤယပၢ်ဖဲအံၤလီၤ.

¹⁴ ဒီးထိၣ်လီၤအသးလၢအပုၢ် စီၤဘံၣ်ယၤမံၣ်အကိာ် လိၤ, ဒီးအမဲာ်ထံလီၤ, ဒီးစီၤဘံၣ်ယၤမံၣ်အမဲာ်ထံလီၤ လၢအကိာ်န့ၣ်လီၤ. ¹⁵ ဒီးနၢမူအဒီပုၢ်ဝဲၢ်ခဲလၢာ်, ဒီးအ မဲာ်ထံလီၤလၢအလိၤ, ဒီးလၢန့ၣ်အလီၢ်ခံန့ၣ်အဒီပုၢ်ဝဲၢ် ကတိၤတၢ်ဒီးအီၤလီၤ.

¹⁶ ဒီးတၢ်အကစီၣ်န့ၣ်ဟူထီၣ်လၢစီၤပၤဖၤရိၤအဟံၣ်ပူၤ, ဒီးစံးဝဲဒၣ်, စီၤယိၤသးအဒီပုၢ်ဝဲၢ်ဟဲလံ. ဒီးဂ့ၤဝဲလၢဖၤ ရိၤအမဲာ်, ဒီးလၢအခ့အပှၤအမဲာ်လီၤ.

¹⁷ ဒီးဖၤရိၤစံးဘၣ်စီၤယိၤသး, စံးဘၣ်တဲဘၣ်နဒီပုၢ်ဝဲၢ်, မၤတၢ်အံၤ, ပဒၢးထီၣ်တၢ်လၢသုဆၣ်ဖိကီၢ်ဖိအဖီခိၣ်, ဒီးလဲၤတၢ်, က့ၤက့ၤဆူကီၢ်ကနၤဧၣ်အပူၤ, ¹⁸ ဒီးဟံးန့ၢ် သုပၢ်, ဒီးသုပှၤဟံၣ်ဖိ, ဒီးဟဲဆူယအိၣ်တက့ၢ်. ဒီးယ ကဟ့ၣ်သုလၢကီၢ်အဲၤကူပတူးအတၢ်ဂ့ၤ, ဒီးသုကအီၣ် ထံဧိၤကီၢ်ဧိၤအသိလီၤ. ¹⁹ ဒီးခဲကနံၣ်အံၤတၢ်မၤလိာ်နၤ, မၤတၢ်အံၤ, ဟံးန့ၢ်လ့ၣ်ကဟၣ်လၢ ကီၢ်အဲၤကူပတူး အပူၤလၢသုဖိဒံဖိသၣ်အဂီၢ်ဒီး လၢသုဖိသုမါအဂီၢ်, ဒီး ဟဲစိာ်သုပၢ်, ဒီးဟဲက့ၤတက့ၢ်. ²⁰ ဒီးမ်သုမဲာ်အသုတ လိးကီသုတၢ်ဖိတၢ်လံၤတဂ့ၤ. အဂ့ၢ်ဒ်အံၤ, ကီၢ်အဲၤကူ ပတူးဒီကီၢ်ညါအတၢ်ဂ့ၤန့ၣ် မ့ၢ်သုတၢ်လီၤ.

²¹ ဒီးအံၣ်စရ့လးအဖိတဖၣ်မၤဝဲဒ်န့ၣ်လီၤ. ဒီးစီၤယိၤသး ဟ့ၣ်အီၤလၢလ့ၣ်ကဟၣ်တဖၣ်, ဒ်ဖၤရိၤမၤလိာ်အသိး, ဒီးဟ့ၣ်အတၢ်အီၣ်တၢ်အီလၢကျဲအဂီၢ်လီၤ.

²² ဒီးဟ့ၣ်ပှၤတဖၣ်န့ၣ်ခဲလၢာ်လၢ အကူအသိးတဂၤ လၢအကကလံၤအသးအဂီၢ်, တဂၤလၢအကကလံၤ အသးအဂီၢ်လီၤ. မ့မ့ၢ်စီၤဘံၣ်ယၤမံၣ်တဂၤန့ၣ်ဟ့ၣ်အီၤ လၢစ့သၢကယၤ, ဒီးအကူအသိးလၢအကကလံၤအ သးယဲၢ်ဘျီအဂီၢ်လီၤ. ²³ ဒီးဟ့ၣ်ယုၢ်အပၢ်ဒ်အံၤ, ကသ့ၣ် ယီၤအဖါပဒၢးအသးဆံဆဲၣ်ဒုလၢ ကီၢ်အဲၤကူပတူးအ တၢ်ဂ့ၤတဖၣ်, ဒီးကသ့ၣ်ယီၤအမိၢ်ဆံဆဲၣ်ဒုပဒၢးအ သးလၢဘုဧိၤဟုဧိၤ, ဒီးကိၣ်, ဒီးတၢ်အီၣ်လၢအပၢ်အ ဂီၢ်လၢကျဲပူၤလီၤ. ²⁴ ဒီးပျၢ်အဒီပုၢ်ဝဲၢ်, ဒီးအဝဲသ့ၣ်တ ဖၣ်လဲၤဝဲလီၤ. ဒီးစံးဘၣ်အီၤ, မ်တၢ်သူၣ်တမုာ်သးတ မုာ် သုတအိၣ်ထီၣ်လၢသုကျါလၢကျဲပူၤတဂ့ၤ. ²⁵ ဒီးအဝဲသ့ၣ်တဖၣ်န့ၣ်လဲၤထီၣ်ဝဲလၢအဲၤကူပတူး, ဒီးဟဲဝဲဆူကီၢ်ကနၤဧၣ်ဆူ အပၢ်စီၤယၤကိာ်အအိၣ်လီၤ.―

²⁶ ဒီးစံးဘၣ်တဲဘၣ်အီၤ, ဒီးစံးဝဲဒၣ်, စီၤယိၤသးမူဒံးဒီး ပၢကီၢ်အဲၤကူပတူးဒီကီၢ်ညါလီၤ. ဒီးစီၤယၤကိာ်အသး ကတုၤလီၤ. အဂ့ၢ်ဒ်အံၤ, တနာ်ဘၣ်အီၤဘၣ်.

²⁷ ဒီးအဝဲသ့ၣ်စံးဘၣ်တဲဘၣ်အီၤလၢ စီၤယိၤသးအတၢ် ကတိၤလၢအစံးတ့ၢ်အီၤခဲလၢာ်လီၤ. ဒီးတုၤအထံၣ်ဘၣ် လ့ၣ်ကဟၣ်တဖၣ်လၢစီၤယိၤသးဟ့ၣ်ယုၢ်အီၤဒီး, အပၢ် စီၤယၤကိာ်အသးမူထီၣ်က့ၤဝဲလီၤ.

²⁸ ဒီးစီၤအံၣ်စရ့လးစံးဝဲဒၣ်, အါလံ, ယဖိခွါစီၤယိၤသး မူဒံးလီၤ. ယကလဲၤတၢ်, ဒီးထံၣ်ဘၣ်အီၤလၢယတချုး သံဒံးဘၣ်လီၤ.

၄၆

¹ ဒီးစီၤအံၣ်စရ့လးဟးထီၣ်ဒီး ကယဲၢ်တၢ်အိၣ်ဒီးအီၤ, ဒီးဟဲဆူဘ့ၢ်ၡဘၤ, ဒီးလုၢ်တၢ်လုၢ်တဖၣ်လၢအပၢ်စီၤ အံၤစဲးအကစၢ်လီၤ.

² ဒီးယွၤစံးဘၣ် စီၤအံၣ်စရ့လးလၢအထံၣ်တၢ်လၢမုၢ် နၤအကျါ, ဒီးစံးဝဲဒၣ်, စီၤယၤကိာ်ဧၢ, စီၤယၤကိာ်ဧၢ, ဒီးစံးဝဲဒၣ်, ကွၢ်ကွၢ်, ယၤလီၤ.

³ ဒီးစံးဝဲဒၣ်, ယဲဒၣ်အံၤယမ့ၢ်ယွၤ, နပၢ်အကစၢ်လီၤ. နလဲၤလီၤဆူအဲၤကူပတူးအပူၤန့ၣ်ပျံၤတၢ်တဂ့ၤ. အဂ့ၢ် ဒ်အံၤ, ယကဒုးကဲထီၣ်နၤလၢပှၤတကလုာ်ဖးဒိၣ်ဖဲန့ၣ် လီၤ. ⁴ ယကလဲၤလီၤဒီးနၤဆူအဲၤကူပတူးအပူၤ, ဒီး ယကဟဲက့ၤစိာ်ထီၣ်စ့ၢ်ကီးနၤသပှၢ်တၢၢ်, ဒီးစီၤယိၤသး ကပာ်အစုလၢနမဲာ်လိၤလီၤ.

⁵ ဒီးစီၤယၤကိာ်ဂဲၤဆၢထၢၣ်ဝဲလၢဘ့ၢ်ၡဘၤ, ဒီးအံၣ်စ ရ့လးအဖိခွါတဖၣ် ဒုးဒိးအပၢ်စီၤယၤကိာ်, ဒီးအဖိဒံဖိ သၣ်, ဒီးအဖိအမါလၢလ့ၣ်ကဟၣ်, လၢဖၤရိၤမၢအဟဲ ဒိးအီၤလီၤ. ⁶ ဒီးဟံးန့ၢ်အဆၣ်ဖိကီၢ်ဖိ, ဒီးအတၢ်ဖိတၢ် လံၤလၢအန့ၢ်ဘၣ်ဝဲလၢကီၢ်ကနၤဧၣ်အပူၤ, ဒီးလဲၤလီၤ ဆူအဲၤကူပတူးအပူၤ, စီၤယၤကိာ်, ဒီးအချံအသၣ်အိၣ် ဒီးအီၤခဲလၢာ်လီၤ. ⁷ အဖိခွါသ့ၣ်, ဒီးအဖိခွါအဖိခွါသ့ၣ် အိၣ်ဒီးအီၤ, ဒီးအဖိမုၣ်သ့ၣ်, ဒီးအဖိခွါအဖိမုၣ်သ့ၣ်, ဒီးအချံအသၣ်ခဲလၢာ်သ့ၣ်တဖၣ်န့ၣ်, စိာ်လီၤဝဲဆူအဲၤ ကူပတူးအပူၤလီၤ.

⁸ ဒီးအအံၤမ့ၢ် ပှၤအံၣ်စရ့လးဖိလၢအဟဲဆူ အဲၤကူပ တူးအပူၤ, စီၤယၤကိာ်ဒီးအဖိခွါတဖၣ်အမံၤ.

⁹ စီၤယၤကိာ်အဖိဝဲၢ်ကိစီၤရူၤဘ့ၣ်, ဒီးစီၤရူၤဘ့ၣ်အဖိ ခွါစီၤဃနိာ်, ဒီးစီၤပးလူ, ဒီးစီၤဃ့းစရိၣ်, ဒီးစီၤကၢ်မံၤ လီၤ.

¹⁰ ဒီးစီၤစူၤမ့းအိၣ်အဖိခွါမ့ၢ်စီၤယၤမူအ့လး, ဒီးစီၤယၤ မံၣ်, ဒီးစီၤအိၤဟးဒီးစီၤယၤကံၣ်, ဒီးစီၤစိဃၢ်, ဒီးက နၤဧၣ်မုၣ်အဖိခွါစီၤၡီအူးလီၤ.

¹¹ ဒီးစီၤလ့ၤဝံအဖိခွါမ့ၢ်စီၤက့ရၡိၣ်, စီၤကဃး, ဒီးစီၤမ ရၤရံၤလီၤ.

¹² ဒီးစီၤယူဒၤအဖိခွါမ့ၢ်စီၤအ့ၢ်, ဒီးစီၤအိၤနၣ်, ဒီးစီၤရှ့ လၤ, ဒီးစီၤဖ့ၤရ့း, ဒီးစီၤစ့ရၤလီၤ. မ့မ့ၢ်စီၤအ့ၢ်, ဒီးစီၤ အိၤနၣ်သံဝဲလၢကီၢ်ကနၤဧၣ်အပူၤလီၤ. ဒီးစီၤဖ့ၤရ့းအဖိ ခွါမ့ၢ်စီၤဃ့းစရိၣ်, ဒီးစီၤဃမူလီၤ.

¹³ ဒီးစီၤယံးစၣ်ကၢ်အဖိခွါမ့ၢ်စီၤတိၤလၤ, ဒီးစီၤဖူဝၤ, ဒီး စီၤယိၤဘး, ဒီးစီၤၡံးမရိၣ်လီၤ.

¹⁴ ဒီးစီၤစဘူလိၣ်အဖိခွါမ့ၢ်စီၤစ့ရ့း, ဒီးစီၤအ့လိၣ်, ဒီး စီၤယၤလအ့လးလီၤ. ¹⁵ အန့ၣ်တဖၣ်မ့ၢ်နီၢ်လ့ၤအၤအဖိ ခွါလၢအဆံးစၢ်န့ၢ်ဒီးအဖိမုၣ်နီၢ်ဒံနၤလၢ စီၤယၤကိာ် အဂီၢ်, လၢပၤဒနါရၣ်အပူၤလီၤ. အဖိခွါဒီးအဖိမုၣ်, ပှၤ အသးခဲလၢာ်န့ၣ်အိၣ်ဝဲသၢဆံသၢဂၤလီၤ.

¹⁶ ဒီးစီၤကးအဖိခွါ မ့ၢ်စီၤစံးဖယိၣ်, ဒီးစီၤဃးကံ, စီၤ ရှူနံၤ, ဒီးစီၤအ့စဘိၣ်, ဒီးစီၤဧ့ရံၤ, ဒီးစီၤအရိဒံၤ, ဒီး စီၤအၤရအ့လံလီၤ. ¹⁷ ဒီးစီၤအၤရှ့ၢ်အဖိခွါမ့ၢ်စီၤယံးမနၤ, ဒီးစီၤယံးၡဝၤ, ဒီးစီၤယံးၡဝံၤ, ဒီးစီၤဘရံဧၤ, ဒီးအဒီပုၢ်ဝဲၢ်မုၣ်နီၢ်စ့ရၤဒီးစီၤဘရံဧၤအဖိခွါစီၤဃ့ဘ့ၢ်, ဒီးစီၤမးလကံအ့လၤလီၤ.―

¹⁸ အန့ၣ်တဖၣ်မ့ၢ်နီၢ်စံၤလပၤလၢ စီၤလၤဘၣ်ဟ့ၣ်အဖိမုၣ် နီၢ်လ့ၤအၤတဂၤအဖိခွါလီၤ. ဒီးအန့ၣ်တဖၣ်ဆံးစၢ်န့ၢ် ဝဲလၢစီၤယၤကိာ်အဂီၢ်, ပှၤအသးအိၣ်တဆံဃုဂၤလီၤ.

¹⁹ ဒီးစီၤယၤကိာ်အမါနီၢ်ရၤဃ့လးအဖိခွါ စီၤယိၤသး, ဒီးစီၤဘံၣ်ယၤမံၣ်လီၤ.

²⁰ ဒီးစီၤမနၤရှ့ၤ, ဒီးစီၤအ့ဖရဲၣ်အိၣ်ဖျဲၣ်ဝဲလၢကီၢ်အဲၤကူ ပတူးအပူၤလၢစီၤယိၤသးအဂီၢ်လီၤ. ဝ့ၢ်အိၣ်အပှၤလုၢ် တၢ်အဒိၣ်, စီၤပိၤတံၤဖ့ရၤအဖိမုၣ် နီၢ်အၤစနးဆံးစၢ် န့ၢ်အီၤလၢအဂီၢ်လီၤ.

²¹ ဒီးစီၤဘံၣ်ယၤမံၣ်အဖိခွါမ့ၢ်စီၤဘ့လၤ, ဒီးစီၤဘ့က့ၢ်, ဒီးစီၤအၤၡဘ့လး, ဒီးစီၤက့ရၤ, ဒီးစီၤနဧၤမၣ်, စီၤအ့ ဃံၤ, ဒီးစီၤရိဃး, စီၤမူးဖံၣ်, ဒီးစီၤဃူဖံၣ်, ဒီးစီၤအၤ ရးလီၤ. ²² အန့ၣ်တဖၣ်မ့ၢ်နီၢ်ရၤဃ့လးအဖိခွါလၢအအိၣ် ဖျဲၣ်လၢစီၤယၤကိာ်အဂီၢ်, ပှၤအသးခဲလၢာ်န့ၣ်မ့ၢ်တဆံ လွံၢ်ဂၤလီၤ.

²³ ဒီးစီၤဒၣ်အဖိခွါမ့ၢ်စီၤဃူၡံၣ်လီၤ. ဒီးစီၤနးသၤလံအ ဖိခွါမ့ၢ်စီၤယၤစအ့လး, ဒီးစီၤကူနံၤ, ဒီးစီၤယ့စ့ၢ်, ဒီး စီၤၡံးလ့ၣ်လီၤ. ²⁴ အန့ၣ်တဖၣ်မ့ၢ်နီၢ်ဘံၤလဟၤ, လၢစီၤ လၤဘၣ်ဟ့ၣ်အဖိမုၣ်နီၢ်ရၤဃ့လးတဂၤအဖိခွါလီၤ. ²⁵ ဒီး အန့ၣ်ဆံးစၢ်န့ၢ်ဝဲလၢစီၤယၤကိာ်အဂီၢ်, ပှၤအသးခဲလၢာ် န့ၣ်မ့ၢ်နွံဂၤလီၤ.

²⁶ ဒီးလၢစီၤယၤကိာ်အဖိခွါအမါသ့ၣ်အဖီခိၣ် ကယဲၢ် ပှၤအသးလၢအဟဲဒီးစီၤယၤကိာ်ဆူ အဲၤကူပတူးအပူၤ, လၢအဟဲထီၣ်လၢအယီၢ်ဒ့, ပှၤအသးခဲလၢာ်န့ၣ်မ့ၢ်ဃု ဆံဃုဂၤလီၤ.

²⁷ ဒီးစီၤယိၤသးအဖိခွါ လၢအအိၣ်ဖျဲၣ်န့ၢ်အီၤလၢအဲၤကူ ပတူးအပူၤန့ၣ်မ့ၢ်ပှၤအသးခံဂၤလီၤ. ကယဲၢ်ပှၤအသး လၢစီၤယၤကိာ်အပှၤဟံၣ်ဖိ, လၢအဟဲဆူအဲၤကူပတူး အပူၤန့ၣ်မ့ၢ်ပှၤနွံဆံလီၤ.

²⁸ ဒီးမၢလီၤစီၤယူဒၤလဲၤလၢ အမဲာ်ညါဆူစီၤယိၤသးအ အိၣ်, ဒ်သိးအကဒုးနဲၣ်ကျဲလၢအမဲာ်ညါဆူကီၢ်ကိရှ့ၣ်, ဒီးဟဲဝဲဆူကီၢ်ကိရှ့ၣ်အပူၤတကူၢ်သ့ၣ်လီၤ.

²⁹ ဒီးစီၤယိၤသးကတဲာ်ကတီၤအလ့ၣ်ကဟၣ်, ဒီးလဲၤ သဂၢၢ်ထီၣ်အပၢ် စီၤအံၣ်စရ့လးဆူကိရှ့ၣ်, ဒီးအိၣ်ဖျါ ထီၣ်လၢအမဲာ်ညါ, ဒီးထိၣ်လီၤအသးလၢအကိာ်ဒီးအ မဲာ်ထံလီၤလၢအကိာ်တထံၣ်ဃီလီၤ.

³⁰ ဒီးစီၤအံၣ်စရ့လးစံးဘၣ်စီၤယိၤသး, မ့ၢ်ယထံၣ်ဘၣ်န မဲာ်အဃိဒီး, မ်ယသံခဲအံၤတက့ၢ်. မ့ၢ်နမူဒံးအဂ့ၢ်လီၤ.

³¹ ဒီးစီၤယိၤသးစံးဘၣ်အဒီပုၢ်ဝဲၢ်, ဒီးအပၢ်အပှၤဟံၣ်ဖိ တဖၣ်, ယကလဲၤထီၣ်ဒုးနဲၣ်တၢ်လၢဖၤရိၤ, ဒီးစံးဘၣ် အီၤ, ယဒီပုၢ်ဝဲၢ်, ဒီးယပၢ်အပှၤဟံၣ်ဖိလၢအအိၣ်တ့ၢ် လၢကီၢ်ကနၤဧၣ်အပူၤန့ၣ်, ဟဲလံဆူယအိၣ်လံ. ³² ဒီး ပှၤတဖၣ်န့ၣ်မ့ၢ်ပှၤကွၢ်သိဒီးမဲာ်တဲးလဲးလီၤ. အဂ့ၢ်ဒ်အံၤ, မ့ၢ်ပှၤဘၣ်ဃးဒီးဆၣ်ဖိကီၢ်ဖိအဒၢ, ဒီးဟဲက့ၤစိာ်ဝဲအသိ ဒီးအမဲာ်တဲးလဲးတဖၣ်, ဒီးအဂီၤဘုၣ်ဂီၤဖံးတဖၣ်, ဒီး ကယဲၢ်တၢ်လၢအအိၣ်ဒီးအီၤခဲလၢာ်လီၤ.

³³ ဒီးတၢ်ကမၤအသးတုၤ ဖၤရိးကိးန့ၢ်သု, ဒီးစံးသုမၤ တၢ်မနုၤလဲၣ်န့ၣ်ဒီး, ³⁴ သုဘၣ်စံး, နကုၢ်နပှၤ, ပဝဲဒၣ် ဒီးပပၢ်တဖၣ်, လၢအဖိၣ်သၣ်ခွါထီၣ်လံၤလံၤတုၤခဲက နံၣ်အံၤ, မ့ၢ်ပှၤဘၣ်ဃးဒီးဆၣ်ဖိကီၢ်ဖိအဒၢန့ၣ်, ဒ်သိး သုကအိၣ်ကဆိးလၢကီၢ်ကိရှ့ၣ်အပူၤလီၤ. အဂ့ၢ်ဒ်အံၤ, ကယဲၢ်ပှၤလၢအကွၢ်သိဒီးမဲာ်တဲးလဲးခဲလၢာ်န့ၣ်, မ့ၢ်တၢ် သးဘၣ်အၢလၢပှၤအဲၤကူပတူးဖိအမဲာ်ညါလီၤ.

၄၇

¹ ဒီးစီၤယိၤသးဟဲစံးဘၣ်တဲဘၣ်ဖၤရိၤ, ဒီးစံးဝဲဒၣ်, ယ ပၢ်ဒီးယဒီပုၢ်ဝဲၢ်, ဒီးအသိဒီးအမဲာ်တဲးလဲးတဖၣ်, ဒီး အဂီၤဘုၣ်ဂီၤဖံးတဖၣ်, ဒီးကယဲၢ်တၢ်လၢအအိၣ်ဒီးအီၤ ခဲလၢာ်န့ၣ်, ဟဲထီၣ်လၢကီၢ်ကနၤဧၣ်အပူၤ, ဒီးကွၢ် ကွၢ်, အိၣ်ဝဲလၢကီၢ်ကိရှ့ၣ်အပူၤလီၤ.

² ဒီးဟံးန့ၢ်အဒီပုၢ်ဝဲၢ်တနီၤ, ပှၤယဲၢ်ဂၤ, ဒီးပာ်အီၤလၢ ဖၤရိၤအမဲာ်ညါလီၤ. ³ ဒီးဖၤရိၤစံးဘၣ်အဒီပုၢ်ဝဲၢ်, သု မၤတၢ်မနုၤလဲၣ်. ဒီးအဝဲသ့ၣ်စံးဘၣ်ဖၤရိၤ, နကုၢ်နပှၤ မ့ၢ်ပှၤကွၢ်သိဒီးမဲာ်တဲးလဲး, ပဝဲဒၣ်ဒီးပပၢ်တဖၣ်စ့ၢ်ကီး လီၤ. ⁴ ဒီးစံးဘၣ်ဖၤရိၤ, ဒ်သိးပကအိၣ်တမှံၤလၢကီၢ် ပူၤအံၤဒီး, ပဟဲလီၤ. အဂ့ၢ်ဒ်အံၤ, နကုၢ်နပှၤအသိဒီး မဲာ်တဲးလဲးတဖၣ်အဆၣ်တအိၣ်ဘၣ်, မ့ၢ်တၢ်သၣ်ဝံၤ လီၤဒိအိၣ်ဝဲလၢကီၢ်ကနၤဧၣ်အပူၤနးမးအဂ့ၢ်လီၤ. ဒီးခဲ ကနံၣ်အံၤ ဒုးအိၣ်ဒုးဆိးလၢ်နကုၢ်နပှၤလၢ ကီၢ်ကိရှ့ၣ် အပူၤန့ၣ်တက့ၢ်.

⁵ ဒီးဖၤရိၤစံးဘၣ်စီၤယိၤသး, ဒီးစံးဝဲဒၣ်, နပၢ်ဒီးနဒီ ပုၢ်ဝဲၢ်ဟဲဆူနအိၣ်လီၤ. ⁶ ကီၢ်အဲၤကူပတူးအိၣ်ဝဲလၢန မဲာ်ညါလီၤ. ဒုးအိၣ်ဒုးဆိးနပၢ်, ဒီးနဒီပုၢ်ဝဲၢ်လၢအလီၢ် ဂ့ၤကတၢၢ်လၢကီၢ်ပူၤ, ဒုးအိၣ်အီၤလၢကီၢ်ကိရှ့ၣ်တက့ၢ်. ဒီးနမ့ၢ်သ့ၣ်ညါပှၤလၢ အမၤတၢ်သ့တဖၣ်လၢအကျါန့ၣ် ဒီး, ပာ်အီၤလၢယဆၣ်ဖိကီၢ်ဖိအဒၢအဒိၣ်တဖၣ်တက့ၢ်. ⁷ ဒီးစီၤယိၤသးဆှၢထီၣ် အပၢ်စီၤယၤကိာ်, ဒီးပာ်အီၤလၢဖၤရိၤအမဲာ်ညါ, ဒီးစီၤယၤကိာ်ဆိၣ်ဂ့ၤဖၤရိၤလီၤ.―

⁸ ဒီးဖၤရိၤစံးဘၣ်စီၤယၤကိာ်, နသးသမူအနံၣ်အမုၢ်နံၤတ ဖၣ်န့ၣ်, မ့ၢ်အဆံးအါလဲၣ်, ⁹ ဒီးစီၤယၤကိာ်စံးဘၣ်ဖၤ ရိၤ, ယအိၣ်တမှံၤအနံၣ်အလါတဖၣ်အမုၢ်နံၤတဖၣ်န့ၣ်, မ့ၢ်အနံၣ်တကယၤသၢဆံလီၤ. ယသးသမူအနံၣ်ဧိၤလါ ဧိၤအမုၢ်နံၤတဖၣ်န့ၣ်မ့ၢ်စှၤနံၤစှၤသီ, ဒီးအၢဝဲနးဝဲလီၤ. ဒီးယပၢ်တဖၣ် အသးသမူအနံၣ်ဧိၤလါဧိၤ အမုၢ်နံၤတ ဖၣ်လၢအအိၣ်တမှံၤအမုၢ်နံၤန့ၣ်, ယတချုးန့ၢ်ဒံးဘၣ်,―

¹⁰ ဒီးစီၤယၤကိာ်ဆိၣ်ဂ့ၤဖၤရိၤ, ဒီးဟးထီၣ်လၢဖၤရိၤအမဲာ် ညါလီၤ.

¹¹ ဒီးစီၤယိၤသးဒုးအိၣ်ဒုးဆိးအပၢ်, ဒီးအဒီပုၢ်ဝဲၢ်, ဒီး ဟ့ၣ်အီၤလၢအတၢ်ဟံးဃာ်လၢ ကီၢ်အဲၤကူပတူးအပူၤ, လၢအလီၢ်အဂ့ၤကတၢၢ်လၢကီၢ်ပူၤ, လၢရၤမစ့အကီၢ် ပူၤ, ဒ်ဖၤရိၤမၤလိာ်ဝဲအသိးန့ၣ်လီၤ. ¹² ဒီးစီၤယိၤသးလုၢ် အီၣ်လုၢ်အီအပၢ်, ဒီးအဒီပုၢ်ဝဲၢ်, ဒီးအပၢ်အပှၤဟံၣ်ဖိ ခဲလၢာ်လၢတၢ်အီၣ်, ဒ်ဖိဒံဖိသၣ်အါစှၤဝဲအသိးန့ၣ်လီၤ.

¹³ ဒီးတၢ်အီၣ်တအိၣ်ဘၣ်လၢ ထံဧိၤကီၢ်ဧိၤဒီဘ့ၣ်ညါ နီတပူၤဘၣ်. အဂ့ၢ်ဒ်အံၤ, တၢ်သၣ်ဝံၤလီၤဒိန့ၣ်အိၣ်နး မးလီၤ. ဒီးပှၤအဲၤကူပတူးဖိ, ဒီးပှၤကီၢ်ကနၤဧၣ်ဖိအ သးလီၤဘှါလၢတၢ်သၣ်ဝံၤလီၤဒိအဃိလီၤ.

¹⁴ ဒီးစီၤယိၤသးထၢထီၣ် ကယဲၢ်စ့လၢတၢ်ထံၣ်န့ၢ်လၢ ကီၢ်အဲၤကူပတူးအပူၤ, ဒီးလၢကီၢ်ကနၤဧၣ်အပူၤ, လၢ ဘုဧိၤဟုဧိၤလၢပှၤပှ့ၤဝဲအဂီၢ်, ဒီးစီၤယိၤသးဟဲစိာ်စ့န့ၢ် ဆူဖၤရိၤအဟံၣ်ပူၤလီၤ. ¹⁵ ဒီးစ့လၢာ်ဝဲလၢကီၢ်အဲၤကူပ တူးအပူၤ, ဒီးလၢကီၢ်ကနၤဧၣ်အပူၤ, ဒီးကယဲၢ်ပှၤအဲၤ ကူပတူးဖိဟဲဝဲဆူစီၤယိၤသးအအိၣ်, ဒီးစံးဝဲဒၣ်, ဟ့ၣ် ပှၤလၢတၢ်အီၣ်တက့ၢ်. ဘၣ်မနုၤ ပကသံလၢနဂီၤထံး လဲၣ်. အဂ့ၢ်ဒ်အံၤ, စ့လၢာ်လံအဂ့ၢ်လီၤ.

¹⁶ ဒီးစီၤယိၤသးစံးဝဲဒၣ်, စ့မ့ၢ်လၢာ်ဝဲဒီး, ဟ့ၣ်ယၤလၢ ဆၣ်ဖိကီၢ်ဖိအဒၢတက့ၢ်. ဒီးယကဟ့ၣ်သုတၢ်လၢသု ဆၣ်ဖိကီၢ်ဖိအဒၢအဃိလီၤ.

¹⁷ ဒီးအဝဲသ့ၣ်ဟဲစိာ်အဆၣ်ဖိကီၢ်ဖိအဒၢဆူ စီၤယိၤသး အအိၣ်, ဒီးစီၤယိၤသးဟ့ၣ်အီၤလၢတၢ်အီၣ်လၢကသ့ၣ် အဃိ, ဒီးလၢသိဒီးမဲာ်တဲးလဲးအဃိ, ဒီးလၢဂီၤဘုၣ်ဂီၤ ဖံးအဃိ, ဒီးလၢကသ့ၣ်ယီၤအဃိလီၤ. ဒီးတၢ်လၢနံၣ် တနံၣ်န့ၣ် ဆှၢအီၤလၢတၢ်အီၣ်လၢအဆၣ်ဖိကီၢ်ဖိအဒၢ ခဲလၢာ်အဃိလီၤ.

¹⁸ ဒီးတၢ်လၢနံၣ်တနံၣ်န့ၣ်ပူၤကွံာ်ဝဲ, ဒီးခံနံၣ်တနံၣ်န့ၣ် အဝဲသ့ၣ်တဖၣ်န့ၣ် ဟဲဆူအအိၣ်ဒီးစံးဘၣ်အီၤ, ပတ ပာ်ခူသူၣ်ဘၣ်ဒီးယကစၢ်လၢ ပစ့လၢာ်လံ. ဒီးယက စၢ်အိၣ်ဒီး ပဆၣ်ဖိကီၢ်ဖိအဒၢအဖုတဖၣ်လံလီၤ. တၢ် အိၣ်လီၤတဲာ်လၢယကစၢ်အမဲာ်ညါထဲပနီၢ်, ဒီးပဟီၣ် ခိၣ်ဧိၤလီၤ. ¹⁹ ပကသံလၢနဂီၤထံးပဝဲဒၣ်ဒီးပဟီၣ်ခိၣ်န့ၣ် မ့ၢ်အဘၣ်မနုၤလဲၣ်. ပှ့ၤပှၤဒီးပဟီၣ်ခိၣ်လၢတၢ်အီၣ်အ ဂီၢ်တက့ၢ်. ဒီးပဝဲဒၣ်ဒီးပဟီၣ်ခိၣ်န့ၣ်, ကကဲထီၣ်ဖၤရိၤ အကုၢ်လီၤ. ဒီးဟ့ၣ်တၢ်ချံတၢ်သၣ်ဒ်သိးပကမူဒံး, ဒီး ပသုတသံ, ဒီးဟီၣ်ခိၣ်သုတအိၣ်သယုၢ်တဂ့ၤန့ၣ်တက့ၢ်.

²⁰ ဒီးစီၤယိၤသးပှ့ၤဟီၣ်ခိၣ်လၢ ကီၢ်အဲၤကူပတူးဒီဘ့ၣ် ညါလၢဖၤရိၤအဂီၢ်လီၤ. အဂ့ၢ်ဒ်အံၤ, ပှၤအဲၤကူပတူးဖိ ဆါကွံာ်အစံာ်အပှဲၤ, တဂၤအစံာ် တဂၤအစံာ်စုာ်စုာ် လီၤ. မ့ၢ်တၢ်သၣ်ဝံၤလီၤဒိဘၣ်အီၤစွၣ်မးအဃိလီၤ. ဒီး ဟီၣ်ခိၣ်ကဲထီၣ်ဖၤရိၤအတၢ်လီၤ. ²¹ ဒီးလၢကီၢ်အဲၤကူပတူးအဃၢၤကတၢၢ် တုၤလၢအကတၢၢ်ဒၣ်န့ၣ်, ဒုးခီဂာ်ပှၤဂီၢ်မုၢ်ဆူဝ့ၢ်တဖၣ်အပူၤလီၤ.―

²² ထဲပှၤလုၢ်တၢ်အဒိၣ်တဖၣ်အဟီၣ်ခိၣ်တပှ့ၤဘၣ်. အဂ့ၢ် ဒ်အံၤ, ပှၤလုၢ်တၢ်အဒိၣ်အိၣ်ဝဲဒီးအဂီၢ်လၢဖၤရိၤဟ့ၣ်အီၤ လီၤ. ဒီးအီၣ်တၢ်အဂီၢ်န့ၣ်လၢဖၤရိၤဟ့ၣ်အီၤလီၤ. အ ကူၢ်မ့ၢ်ဒ်န့ၣ်ဒီးတဆါကွံာ်ဘၣ်အဟီၣ်ခိၣ်ဘၣ်.

²³ ဒီးစီၤယိၤသးစံးဘၣ်ပှၤဂီၢ်မုၢ်, ကွၢ်ကွၢ်, တၢ်လၢမုၢ် မဆါတနံၤအံၤယပှ့ၤလံသုဒီးသုဟီၣ်ခိၣ်လၢ ဖၤရိၤအ ဂီၢ်လံ. ကွၢ်ကွၢ်တၢ်ချံတၢ်သၣ်အိၣ်လၢသုဂီၢ်, ဒီးသုက ဖှံတၢ်လၢဟီၣ်ခိၣ်လီၤ. ²⁴ ဒီးကမၤအသးလၢတၢ်အါထီၣ် န့ၣ်သုဘၣ်ဟ့ၣ်ဖၤရိၤလၢယဲၢ်ပူတပူ, ဒီးလွံၢ်ပူကကဲထီၣ် သုတၢ်ဒၣ်သုဝဲ, လၢစံာ်ဧိၤပှဲၤဧိၤအချံအသၣ်အဂီၢ်, ဒီး လၢသုတၢ်အီၣ်တၢ်အီအဂီၢ်, ဒီးပှၤလၢသုဟံၣ်ဖိအ ဂီၢ်, ဒီးလၢသုဖိဒံဖိသၣ်အတၢ်အီၣ်တၢ်အီအဂီၢ်လီၤ.

²⁵ ဒီးစံးဝဲဒၣ်, နဒုးပူၤဖျဲးပသးသမူလံ, မ်ပဘၣ်ဘျုး ဘၣ်ဖှိၣ်လၢယကစၢ်အမဲာ်တက့ၢ်. ဒီးပကကဲထီၣ်ဖၤ ရိၤအကုၢ်အပှၤလီၤ.

²⁶ ဒီးစီၤယိၤသးဒုးအိၣ်ထီၣ် တၢ်အလုၢ်အလၢ်လၢကီၢ် အဲၤကူပတူးဒီဘ့ၣ်ညါအပူၤ, တုၤမုၢ်မဆါတနံၤအံၤ, လၢ ယဲၢ်ပူတပူကကဲထီၣ်ဖၤရိၤအတၢ်လီၤ. ထဲပှၤလုၢ်တၢ်အ ဒိၣ်တဖၣ်အဟီၣ်ခိၣ်န့ၣ်, တကဲထီၣ်ဘၣ်ဖၤရိၤအတၢ်ဘၣ်.

²⁷ ဒီးအံၣ်စရ့လးအိၣ်ဝဲဆိးဝဲလၢ ကီၢ်အဲၤကူပတူးလၢ ကီၢ်ကိရှ့ၣ်အပူၤ, ဒီးအိၣ်ဝဲဒီးတၢ်ဟံးဃာ်တဖၣ်လၢအ ပူၤ, ဒီးသၣ်ထီၣ်, ဒီးအါထီၣ်အါအါကလဲာ်လီၤ.

²⁸ ဒီးစီၤယၤကိာ်အိၣ်ဝဲလၢ ကီၢ်အဲၤကူပတူးတဆံနွံနံၣ် ဒီးစီၤယၤကိာ်အမုၢ်နံၤတဖၣ်န့ၣ် မ့ၢ်တကယၤလွံၢ်ဆံနွံ နံၣ်လီၤ.

²⁹ ဒီးမုၢ်နံၤလၢစီၤအံၣ်စရ့လးကသံန့ၣ် သုးဘူးတ့ၢ်အ သး, ဒီးကိးန့ၢ်အဖိခွါစီၤယိၤသး, ဒီးစံးဘၣ်အီၤ, ယ မ့ၢ်ဘၣ်ဘျုးဘၣ်ဖှိၣ်လၢနမဲာ်ဒီး, ပာ်လၢ်နစုလၢယကံၣ် ဒုၣ်အဖီလာ်, ဒီးမၤယၤလၢတၢ်ဘျုးတၢ်ဖှိၣ်ဒီးလၢတၢ် မ့ၢ်တၢ်တီတက့ၢ်. ခူၣ်လီၤကွံာ်လၢ်ယၤလၢအဲၤကူပတူး အပူၤတဂ့ၤ. ³⁰ မ့မ့ၢ်ယကမံဒီးယပၢ်တဖၣ်, ဒီးနဘၣ်စိာ် ထီၣ်ကွံာ်ယၤလၢအဲၤကူပတူးအပူၤ, ဒီးခူၣ်လီၤကွံာ်ယၤ လၢအဝဲသ့ၣ်တဖၣ်အသွၣ်ခိၣ်ပူၤလီၤ. ဒီးစံးဝဲဒၣ်, ယ ကမၤဒ်နတၢ်ကတိၤအသိးန့ၣ်လီၤ.

³¹ ဒီးစံးဝဲဒၣ်, ဆိၣ်တၢ်ဒီးယၤတက့ၢ်. ဒီးအဝဲဒၣ်ဆိၣ် တၢ်ဒီးအီၤလီၤ. ဒီးစီၤအံၣ်စရ့လးဆုးလီၤအခိၣ်လၢအ လီၢ်မံခိၣ်လီၤ.

၄၈

¹ ဒီးတၢ်တဖၣ်အလီၢ်ခံန့ၣ်တၢ်မၤအသးလၢ ပှၤစံးဘၣ် စီၤယိၤသး, ကွၢ်ကွၢ်, နပၢ်ဘၣ်ဆူးဘၣ်ဆါလီၤ. ဒီး ဟံးန့ၢ်အဖိခွါခံဂၤ, စီၤမနၤရှ့ၤဒီးစီၤအ့ဖရဲၣ်လီၤ.

² ဒီးပှၤစံးဘၣ်တဲဘၣ်စီၤယၤကိာ်, ဒီးစံးဝဲဒၣ်, ကွၢ်ကွၢ်, နဖိခွါစီၤယိၤသးဟဲဆူနအိၣ်လီၤ. ဒီးစီၤအံၣ်စရ့လးပာ် ဆူၣ်ထီၣ်အသး, ဒီးဆ့ၣ်နီၤဝဲလၢအလီၢ်မံဖီခိၣ်လီၤ.

³ ဒီးစီၤယၤကိာ်စံးဘၣ်စီၤယိၤသး, ယွၤလၢအသ့တၢ် လၢာ်လီၣ်ဖျါထီၣ်အသးလၢယၤဖဲလူးစး, အိၣ်လၢကီၢ် ကနၤဧၣ်အပူၤ. ဒီးဆိၣ်ဂ့ၤယၤ, ⁴ ဒီးစံးဘၣ်ယၤ, ကွၢ် ကွၢ်, ယကဒုးသၣ်ထီၣ်နၤ, ဒီးမၤအါထီၣ်နၤ, ဒီးယက ဒုးကဲထီၣ်နၤလၢပှၤကလုာ်တဖၣ်အဖုအဖု, ဒီးယက ဟ့ၣ်လီၤကီၢ်တဘ့ၣ်အံၤလၢနချံနသၣ်လၢနလီၢ်ခံ, လၢ တၢ်ဟံးဃာ်အထူအယိာ်လီၤ.

⁵ ဒီးခဲကနံၣ်အံၤနဖိခွါခံဂၤ, စီၤအ့ဖရဲၣ်ဒီးစီၤမနၤရှ့ၤ, လၢအအိၣ်ဖျဲၣ်န့ၢ်နၤလၢကီၢ်အဲၤကူပတူးအပူၤ, လၢယ တချုးဟဲဒံးဘၣ်ဆူနအိၣ်လၢကီၢ်အဲၤကူပတူးန့ၣ်, မ့ၢ် ယတၢ်လီၤ. ဒ်စီၤရူၤဘ့ၣ်, ဒီးစီၤစူၤမ့းအိၣ်အသိးန့ၣ် ကကဲထီၣ်ယတၢ်လီၤ.

⁶ ဒီးနဖိနလံၤလၢနထီၣ်ဖိလၢအလီၢ်ခံန့ၣ်, ကကဲထီၣ်န တၢ်, ဒီးလၢအန့ၢ်သါတၢ်န့ၣ်တၢ်ကကိးအီၤလၢအဒီပုၢ် ဝဲၢ်အမံၤလီၤ. ⁷ ဒီးတၢ်လၢယၤအံၤဖဲယဟဲက့ၤလၢပၤဒၣ် န့ၣ်နီၢ်ရၤဃ့လးသံဝဲလၢယဃၢၤလၢ ကီၢ်ကနၤဧၣ်ဖဲကျဲ ဘူးထီၣ်ဒီးအ့ဖရးသး, ဒီးယခူၣ်လီၤကွံာ်အီၤဖဲန့ၣ်, လၢ အ့ဖရးသးအကျဲန့ၣ်လီၤ. အဝဲန့ၣ်မ့ၢ်ဘ့ၤသလ့ဃ့ၣ်လီၤ.

⁸ ဒီးစီၤအံၣ်စရ့လးထံၣ်ဘၣ်စီၤယိၤသးအဖိခွါ, ဒီးစံးဝဲ ဒၣ်, ပှၤတဖၣ်အံၤမ့ၢ်မတၤတဖၣ်လဲၣ်.

⁹ ဒီးစီၤယိၤသးစံးဘၣ်အပၢ်, မ့ၢ်ယဖိခွါလၢယွၤဟ့ၣ် လီၤယၤဖဲအံၤလီၤ. ဒီးစံးဝဲဒၣ်, ဟဲစိာ်လၢ်အီၤဆူယ အိၣ်တက့ၢ်. ဒီးယကဆိၣ်ဂ့ၤအီၤလီၤ.

¹⁰ ဒီးစီၤအံၣ်စရ့လး အမဲာ်ခံးလၢ အသးပှၢ်တ့ၢ်အဃိ လီၤ. ထံၣ်တၢ်တသ့ဘၣ်, ဒီးဒုးသုးဘူးအီၤဆူအအိၣ်, ဒီးနၢမူအီၤ, ဒီးဖိးအီၤလီၤ.

¹¹ ဒီးစီၤအံၣ်စရ့လးစံးဘၣ်စီၤယိၤသး, ယတဆိကမိၣ် ဘၣ်လၢယကထံၣ်ဘၣ်နမဲာ်ဘၣ်, ဒီးကွၢ်ကွၢ်, ယွၤဒုး ထံၣ်ဘၣ်ယၤလၢနချံနသၣ်စ့ၢ်ကီးလီၤ.

¹² ဒီးစီၤယိၤသးဟံးထီၣ်ကွံာ်အီၤ, လၢအကံၣ်ဆူးအပူၤ ဒီးတီၤလီၤကဒွံကျိာ်ဝဲလီၤ. ¹³ ဒီးစီၤယိၤသးဟံးန့ၢ်အီၤခံ ဂၤလိာ်, စီၤအ့ဖရဲၣ်လၢအစုထွဲသဃီၤဒီးစီၤအံၣ်စရ့လး အစုစ့ၣ်, ဒီးစီၤမနၤရှ့ၤလၢအစုစ့ၣ်သဃီၤဒီးစီၤအံၣ်စရ့ လးအစုထွဲ, ဒီးဒုးသုးဘူးအီၤဆူအအိၣ်လီၤ.

¹⁴ ဒီးစီၤအံၣ်စရ့လးယူာ်ထီၣ်အစုထွဲ, ဒီးပာ်ဝဲလၢစီၤအ့ ဖရဲၣ်အခိၣ်လၢအမ့ၢ်ပှၤအဆံး, ဒီးအစုစ့ၣ်လၢစီၤမနၤ ရှ့ၤအခိၣ်လီၤ. မ့ၢ်အဆှၢအစုလၢတၢ်သ့ၣ်ညါလီၤ. အဂ့ၢ် ဒ်အံၤ, စီၤမနၤရှ့ၤမ့ၢ်အဝဲၢ်ကိလီၤ.

¹⁵ ဒီးဆိၣ်ဂ့ၤစီၤယိၤသး, ဒီးစံးဝဲဒၣ်, ယွၤ, လၢယပၢ်တ ဖၣ်စီၤအၤဘြၤဟၣ်ဒီးစီၤအံၤစဲးလဲၤတၢ်လၢအမဲာ်ညါ, ယွၤ လၢအအံးထီၣ်ကွၢ်လီၤယၤ လၢယကဲထီၣ်လံၤလံၤတုၤ မုၢ်မဆါတနံၤအံၤ, ¹⁶ ကလူးလၢအပှ့ၤက့ၤယၤလၢကယဲၢ် တၢ်အၢတၢ်နးအပူၤန့ၣ်, မ်အဆိၣ်ဂ့ၤဖိသၣ်တဖၣ်အံၤ တက့ၢ်, ဒီးမ်တၢ်ကိးက့ၤယမံၤလၢအီၤ, ဒီးယပၢ်တဖၣ် စီၤအၤဘြၤဟၣ်ဒီးစီၤအံၤစဲးအမံၤန့ၣ်တက့ၢ်. ဒီးမ်အကဲ ထီၣ်ပှၤဂီၢ်မုၢ်ဂီၢ်ပၤလၢဟီၣ်ခိၣ်ချၢအသးကံၢ်ပူၤ န့ၣ်တက့ၢ်.

¹⁷ ဒီးစီၤယိၤသးထံၣ်ဘၣ်ဝဲလၢ အပၢ်ပာ်အစုထွဲလၢစီၤ အ့ဖရဲၣ်အခိၣ်, ဒီးတဘၣ်အမဲာ်ဘၣ်. ဒီးဟံးထီၣ်အ ပၢ်အစုဒ်သိးအကသုးကွံာ်အီၤလၢ စီၤအ့ဖရဲၣ်အခိၣ်ဆူ စီၤမနၤရှ့ၤအခိၣ်လီၤ. ¹⁸ ဒီးစီၤယိၤသးစံးဘၣ်အပၢ်, ဒ် န့ၣ်တမ့ၢ်ဘၣ်, ယပၢ်ဧၢ, အဂ့ၢ်ဒ်အံၤ, အဝဲတဂၤအံၤ မ့ၢ်အဝဲၢ်ကိလီၤ. ပာ်လီၤနစုထွဲလၢအခိၣ်တက့ၢ်.

¹⁹ ဒီးအပၢ်ဂ့ၢ်လိာ်ဝဲ, ဒီးစံးဝဲဒၣ်, ယသ့ၣ်ညါ, ယဖိခွါ ဧၢ, ယသ့ၣ်ညါလီၤ. အဝဲဒၣ်ကကဲထီၣ်စ့ၢ်ကီးပှၤတ ကလုာ်, ဒီးအဝဲဒၣ်ကဒိၣ်ထီၣ်စ့ၢ်ကီးလီၤ. ဘၣ်ဆၣ်ဒီး အပုၢ်ကဒိၣ်ထီၣ်ဒိၣ်န့ၢ်အီၤတက့ၢ်, ဒီးအချံအသၣ်ကကဲ ထီၣ်ပှၤကလုာ်တဖၣ်အလၢအပှဲၤလီၤ.

²⁰ ဒီးတၢ်လၢမုၢ်တနံၤန့ၣ်ဆိၣ်ဂ့ၤအီၤ, ဒီးစံးဝဲဒၣ်, ပှၤ အံၣ်စရ့လးဖိကဆိၣ်ဂ့ၤတၢ်လၢနၤ, ဒီးကစံး, မ်ယွၤ ပာ်နၤဒ်စီၤအ့ဖရဲၣ်, ဒီးစီၤမနၤရှ့ၤအသိးတက့ၢ်. ဒီးပာ် စီၤအ့ဖရဲၣ်လၢစီၤမနၤရှ့ၤအမဲာ်ညါလီၤ.

²¹ ဒီးစီၤအံၣ်စရ့လးစံးဘၣ်စီၤယိၤသး, ကွၢ်ကွၢ်, ယသံ ယဲလီၤ. ဘၣ်ဆၣ်ဒီးယွၤကအိၣ်ဒီးသု, ဒီးဒုးက့ၤက့ၤ သုဆူသုပၢ်တဖၣ်အကီၢ်ပူၤလီၤ.

²² ဒီးယဲဒၣ်အံၤယဟ့ၣ်တ့ၢ်နၤလၢ တၢ်အဂီၢ်တမံၤလၢ နဒီပုၢ်ဝဲၢ်အဖီခိၣ်, လၢယဟံးန့ၢ်လၢပှၤအမိၢ်ဖိအစုပူၤ လၢယနးဒီးယချံၣ်န့ၣ်လီၤ.

၄၉

¹ ဒီးစီၤယၤကိာ်ကိးန့ၢ်အဖိခွါတဖၣ်ဒီးစံးဝဲဒၣ်, အိၣ် ဖှိၣ်ရိဖှိၣ်တက့ၢ်. ဒီးတၢ်လၢအကဘၣ်သုလၢမုၢ်နံၤလၢ ခံတဖၣ်န့ၣ်, ယကဒုးနဲၣ်သုလီၤ.

² စူးရိအိၣ်ဖှိၣ်, ဒီးကနၣ်တၢ်, ယၤကိာ်အဖိခွါသ့ၣ်ဧၢ, ကနၣ်သုပၢ်အံၣ်စရ့လးအကလုၢ်တက့ၢ်.

³ ရူၤဘ့ၣ်ဧၢ, နမ့ၢ်နဲယဖိဝဲၢ်ကိ, ယဂံၢ်ယဘါ, ဒီးယဆူၣ်ထီၣ်တၢ်အခီၣ်ထံး, တၢ်ထီၣ်ထီအထီတုာ်, တၢ်အစိအကမီၤအဒိၣ်တုာ်,

⁴ ပိလိၣ်ဒ်ထံအသိး, နတဂ့ၤန့ၢ်ထီၣ်တၢ်တက့ၢ်ဘၣ်, မ့ၢ်နထီၣ်ဘးနပၢ်အလီၢ်မံအဃိ, ဒီးနမၤဘၣ်အၢတၢ်, မ့ၢ်အထီၣ်ဘးယလီၢ်မံဒါလီၤ.

⁵ စူၤမ့းအိၣ်, ဒီးလ့ၤဝံမ့ၢ်ဒီပုၢ်ဝဲၢ်, အတၢ်အၢၣ်လီၤမ့ၢ်တၢ်မၤအၢအစုကဝဲၤ,

⁶ လၢအပှၤတကရၢသဒၢအပူၤ, ယသးဧၢ, နုာ်တဂ့ၤ, လၢအတၢ်အိၣ်ဖှိၣ်အပူၤ, ယလၤယကပီၤဧၢ, အိၣ်ဖှိၣ် တဂ့ၤ, မ့ၢ်လၢအသးထီၣ်န့ၣ်မၤသံပှၤကညီ, ဒီးလၢအလူၤအသးဒၣ်ဝဲန့ၣ်, ပဲာ်တဲာ်ဂီၤဖံးအခီၣ်ထူၣ် န့ၣ်အဂ့ၢ်လီၤ.

⁷ အသးထီၣ်န့ၣ် မ်အဘၣ်တၢ်ဆိၣ်အၢလၢအဆူၣ်ဝဲအ ဃိ, ဒီးအသးဒိၣ်ထီၣ်ဆူၣ်, လၢအဒူဝဲအဃိ, ယကမၤလီၤမုၢ်လီၤဖးအီၤလၢယၤကိာ်အပူၤ, ဒီးယကမၤလီၤပြံလီၤပြါအီၤလၢအံၣ်စရ့လးအပူၤလီၤ.

⁸ ယူဒၤဧၢ, နဲဒၣ်အံၤနဒီပုၢ်ဝဲၢ်ကစံးထီၣ်ပတြၢၤနၤ, နစု ကအိၣ်လၢနဒုၣ်နဒါအကိာ်လိၤ, နပၢ်အဖိခွါတဖၣ်ကသကူးလီၤအသးလၢနမဲာ်ညါလီၤ.

⁹ ယူဒၤမ့ၢ်ခ့ယုၢ်ဆံးတဒု, လၢတၢ်ယာ်သံကွံာ်အအိၣ်နလဲၤထီၣ်လံ, ယဖိခွါဧၢ, သကူးလီၤအသး, ကိာ်လီၤဝဲဒ်ခ့ယုၢ်အသိး, ဒီးဒ်ခ့ယုၢ်မိၢ်အသိးလီၤ. မ့ၢ်မတၤကထိၣ်ဂဲၤအီၤလဲၣ်.

¹⁰ စီၤပၤအနီၣ်ထိးတဟးထီၣ်လၢယူဒၤအအိၣ်, ပှၤဟ့ၣ်တၢ်သိၣ်တၢ်သီ တဟးထီၣ်ကွံာ်လၢအခီၣ်က ဆူး, တုၤတၢ်မၤဃူမၤဖိးတၢ်ဟဲ, ဒီးပှၤဂီၢ်မုၢ်ကဒိကနၣ်အကလုၢ်လီၤ.

¹¹ စၢဃာ်ကသ့ၣ်ယီၤဖိလၢစပံးအမုၢ်, ဒီးကသ့ၣ်ယီၤဆံးလၢစပံးမုၢ်စီၤရ့း, ဆှုၣ်ဝဲအဆ့လၢစပံးထံအပူၤ, ဒီးအယၣ်လၢစပံးကူၤအသွံၣ်ပူၤ,

¹² အမဲာ်ဂီၤဝဲလၢစပံးထံ, ဒီးအမဲဝါဝဲလၢတၢ်နုၢ်ထံလီၤ.

¹³ စဘူလိၣ်ကအိၣ်လၢပီၣ်လဲၣ်နံၤ, ဒီးကကဲထီၣ်ကဘီသန့, ဒီးအသရ့ၤကအိၣ်သဃီၤဒီးစံဒိၣ်လီၤ.

¹⁴ ယံးစၣ်ကၢ်မ့ၢ်ကသ့ၣ်ယီၤလၢ အဂံၢ်ဆူၣ်အဘါဆူၣ် တဒု, ကိာ်လီၤဝဲလၢသိကရၢတဖၣ်အဘၢၣ်စၢၤ,

¹⁵ ဒီးထံၣ်ဘၣ်ဝဲလၢတၢ်အိၣ်ဘှံးမ့ၢ်အဂ့ၤ, ဒီးဟီၣ်ခိၣ်မ့ၢ်အမုာ်, ဒီးသကူးအဖံဘၣ်ခိၣ်ဒ်သိးအကယိးတၢ်, ဒီးကဲကုၢ်ကဲပှၤလၢအဟ့ၣ်သွဲလီၤ.

¹⁶ ဒၣ်ကစံၣ်ညီၣ်အပှၤဂီၢ်မုၢ်အကွီၢ်, ဒ်အံၣ်စရ့လးအပှၤတဒူၣ်အသိးလီၤ.

¹⁷ ဒၣ်မ့ၢ်ဂုၢ်သီလၢကျဲမုၢ်အဃၢၤတဘိ, ဂုၢ်ပွ့ၤလၢကျဲအဃၢၤတဘိ, ဖျးဝဲလၢကသ့ၣ်အခီၣ်နၢၣ်ခံဒီးပှၤဒိးဝဲလီၤတဲာ်လၢအချၢဃံလီၤ.

¹⁸ ယကွၢ်လၢ်နအုၣ်က့ၤခီၣ်က့ၤတၢ်အကျဲ, ယွၤဧၢ.

¹⁹ ကး, ပှၤတဖုကဆီၣ်တနံးအီၤ, မ့မ့ၢ်အဝဲဒၣ်ကဆီၣ်တနံးတၢ်အခီၣ်နၢၣ်ခံလီၤ.

²⁰ လၢအၤရှ့ၢ်အပူၤအကိၣ်ကဝံၣ်ဝဲ, ဒီးကဟ့ၣ်စီၤပၤအတၢ်ဝံၣ်သိဝံၣ်ဘဲးလီၤ.

²¹ နးသၤလံမ့ၢ်တၤဟိထူၣ်ဖျဲးအသးတဒု, ဟ့ၣ်လီၤတၢ်ကတိၤအမုာ်အဘၣ်လီၤ.

²² ယိၤသးမ့ၢ်တၢ်သၣ်ထီၣ်အဖိ, တၢ်သၣ်ထီၣ်အဖိလၢထံထီၣ်ပၢၢ်အဃၢၤ, အဒ့ကထီၣ်လၢတၢ်အခိၣ်ဒူလိၤလီၤ.

²³ ပှၤခးပျၢ်ဧိၤစၤဧိၤမၤဆါအီၤ, ဒီးခးတၢ်, ဒီးခိးခူသူၣ်အီၤ,

²⁴ ဘၣ်ဆၣ်အချံၣ်အိၣ်ဆူၣ်ဒၣ်တၢ်, ဒီးအစုဒုၣ်အိၣ်ဒီးအဂံၢ်အဘါ, လၢယၤကိာ်တၢ်ဆူၣ်တၢ်ချ့တဂၤအစု, လၢပှၤအံးထီၣ်ကွၢ်လီၤတၢ်, အံၣ်စရ့လးအလၢၢ်,

²⁵ လၢနပၢ်အကစၢ်လၢအကမၤစၢၤနၤ, ဒီးလၢတၢ်သ့တၢ်လၢာ်လၢအကဆိၣ်ဂ့ၤနၤဒီးမူခိၣ်လၢ ထးခီအတၢ်ဆိၣ်ဂ့ၤ, တၢ်အယိာ်ပူၤလၢအကိာ်လီၤလၢလာ်ခီအတၢ်ဆိၣ်ဂ့ၤ, နုၢ်ခိၣ်ဒီးဒၢလီၢ်အတၢ်ဆိၣ်ဂ့ၤလီၤ.

²⁶ နပၢ်အတၢ်ဆိၣ်ဂ့ၤဒိၣ်န့ၢ် ကစၢၢ်အထူအယိာ်အတၢ် ဆိၣ်ဂ့ၤ, တၢ်စိခိၣ်လီၤစိၤလီၤဃၣ်အတၢ်ဂ့ၤတၢ်ဝါ, ဒီးကအိၣ်လၢယိၤသးအခိၣ်, ပှၤလၢအလီၤဖးဒီးဒီပုၢ်ဝဲၢ်အခိၣ်ဒီခိၣ်လီၤ.

²⁷ ဘံၣ်ယၤမံၣ်, ထွံၣ်မံၤတဒု, ကဖှီသံတၢ်, လၢမုၢ်ဂီၤန့ၣ်ကအီၣ်တၢ်ဂုာ်ပျီန့ၢ်, ဒီးလၢမုၢ်ဟါန့ၣ်ကနီၤဖးတၢ်ဂုာ်ဆူၣ်န့ၢ်လီၤ.

²⁸ အဝဲသ့ၣ်ခဲလၢာ်န့ၣ်မ့ၢ်အံၣ်စရ့လးအဒူၣ်တဆံခံဒူၣ်, ဒီးအန့ၣ်မ့ၢ်တၢ်လၢအပၢ်ကတိၤတၢ်ဒီးအီၤ, ဒီးဆိၣ်ဂ့ၤအီၤတဂၤ ဒ်အတၢ်ဆိၣ်ဂ့ၤအသိး, တဂၤဒ် အတၢ်ဆိၣ်ဂ့ၤအသိးန့ၣ်, ဆိၣ်ဂ့ၤအီၤလီၤ.

²⁹ ဒီးမၤလိာ်အီၤ, ဒီးစံးဘၣ်အီၤ, တၢ်ပာ်ဖှိၣ်ယၤဒီးယ ပှၤဂီၢ်မုၢ်လီၤ. ခူၣ်လီၤကွံာ်ယၤဒီးယပၢ်တဖၣ်, လၢတၢ် အိပူၤအိၣ်ဝဲလၢ ပှၤဃ့ၤသးဖိစီၤဧ့ၤဖရိၣ်အဟီၣ်ခိၣ်တက ဝီၤပူၤ, ³⁰ လၢတၢ်အိပူၤလၢအအိၣ်ဝဲလၢဟီၣ်ခိၣ်တက ဝီၤမးကပ့လၤအပူၤ, လၢအအိၣ်ဝဲလၢမးမရ့အမဲာ်ညါ လၢကီၢ်ကနၤဧၣ်အပူၤ, လၢစီၤအၤဘြၤဟၣ်ပှ့ၤဝဲအိၣ်ဒီး ဟီၣ်ခိၣ်တကဝီၤန့ၣ်လၢပှၤဃ့ၤသးဖိ စီၤဧ့ၤဖရိၣ်လၢတၢ် သွၣ်ခိၣ်အတၢ်ဟံးဃာ်တက့ၢ်. ³¹ ပှၤခူၣ်လီၤကွံာ်စီၤအၤ ဘြၤဟၣ်ဖဲန့ၣ်, ဒီးအမါနီၢ်စၤရါလီၤ. ပှၤခူၣ်လီၤကွံာ် စီၤအံၤစဲးဖဲန့ၣ်ဒီးအမါနီၢ်ရံးဘကၤ, ဒီးဖဲန့ၣ်ယခူၣ်လီၤ ကွံာ်နီၢ်လ့ၤအၤလီၤ. ³² ဟီၣ်ခိၣ်တကဝီၤဒီးတၢ်အိပူၤအိၣ် လၢအပူၤလၢတၢ်ပှ့ၤအီၤလၢ စီၤဃ့ၤသးအဖိခွါတဖၣ်အ

³³ စုပူၤလီၤ. ဒီးစီၤယၤကိာ်မၤလိာ် အဖိခွါခဲလၢာ်ဝံၤဒီး, ထုးထီၣ်အခီၣ်လၢအလီၢ်မံပူၤ, ဒီးသံဝဲ, ဒီးတၢ်ပာ်ဖှိၣ် အီၤဒီးအပၢ်တဖၣ်လီၤ.

၅၀

¹ ဒီးစီၤယိၤသးထိၣ်လီၤအသးလၢအပၢ်အမဲာ်, ဒီးအ မဲာ်ထံလီၤလၢအလိၤ, ဒီးနၢမူအီၤလီၤ. ² ဒီးစီၤယိၤသးမၤလိာ် အခ့အပှၤကသံၣ်သရၣ်တဖၣ်ဒ်သိးအကပာ်အပၢ်အစိၣ်ဒီးကသံၣ်လီၤ. ဒီးကသံၣ်သရၣ်တဖၣ်န့ၣ် ပာ်စီၤအံၣ်စရ့လးအစိၣ်ဒီးကသံၣ်လီၤ.―

³ ဒီးအနံၤလွံၢ်ဆံလၢထီၣ်ပှဲၤထီၣ်လၢအဂီၢ်လီၤ. အဂ့ၢ်ဒ် အံၤ, ပှၤလၢတၢ်ပာ်အစိၣ်ဒီးကသံၣ်တဖၣ်န့ၣ်, အနံၤ အသီ လၢထီၣ်ပှဲၤထီၣ်ဒ်န့ၣ်လီၤ. ဒီးပှၤအဲၤကူပတူးဖိ ဟီၣ်ဝဲယၢၤဝဲလၢအဂီၢ်အနံၤနွံဆံလီၤ.

⁴ ဒီးတၢ်ဟီၣ်တၢ်ယၢၤအမုၢ်နံၤန့ၣ်ပူၤကွံာ်ဝံၤဒီး, စီၤယိၤ သးစံးဘၣ်ဖၤရိၤအပှၤဟံၣ်ဖိ, ဒီးစံးဝဲဒၣ်, ယမ့ၢ်ဘၣ်ဘျုး ဘၣ်ဖှိၣ်လၢသုမဲာ်ဒီး, ကတိၤလၢ်တၢ်လၢဖၤရိၤအနၢ်ပူၤ, ဒီးစံး, ⁵ ယပၢ်ဒုးဆိၣ်ယၤ, ဒီးစံးဝဲဒၣ်, ကွၢ်ကွၢ်, ယ သံယဲလီၤ. တၢ်ပူၤလၢယခူၣ်လီၤလၢယဂီၢ်လၢကီၢ်က နၤဧၣ်အပူၤန့ၣ်, နဘၣ်ခူၣ်လီၤကွံာ်ယၤဖဲန့ၣ်လီၤ. ဒီး ခဲကနံၣ်အံၤ ဒုးလဲၤထီၣ်လၢ်ယၤ, ဒ်သိးယကခူၣ်လီၤ ကွံာ်ယပၢ်တက့ၢ်. ဒီးယကဟဲက့ၤကဒါက့ၤလီၤ.

⁶ ဒီးဖၤရိၤစံးဝဲဒၣ်, လဲၤထီၣ်, ဒီးခူၣ်လီၤကွံာ်နပၢ်ဒ်အ ဒုးဆိၣ်နၤအသိးန့ၣ်တက့ၢ်.

⁷ ဒီးစီၤယိၤသးလဲၤထီၣ်ခူၣ်လီၤကွံာ်အပၢ် အိၣ်ဒီးဖၤရိၤ အခ့အပှၤခဲလၢာ်, ဒီးအပှၤဟံၣ်ဖိသးပှၢ်တဖၣ်, ဒီးက ယဲၢ်ကီၢ်အဲၤကူပတူးအသးပှၢ်သ့ၣ်တဖၣ်န့ၣ် လဲၤထီၣ် ဒီးအီၤ, ⁸ ဒီးစီၤယိၤသးအပှၤဟံၣ်ဖိခဲလၢာ်, ဒီးအဒီပုၢ် ဝဲၢ်, ဒီးအပၢ်အပှၤဟံၣ်ဖိလီၤ. မ့မ့ၢ်အဖိဒံဖိသၣ်တဖၣ်, ဒီးအသိဒီးမဲာ်တဲးလဲးတဖၣ်, ဒီးဂီၤဘုၣ်ဂီၤဖံးတဖၣ်န့ၣ်, ပာ်လီၤတဲာ်ဝဲလၢကီၢ်ကိရှ့ၣ်အပူၤလီၤ. ⁹ ဒီးလ့ၣ်ကဟၣ် တဖၣ်, ဒီးပှၤဒိးကသ့ၣ်တဖၣ်လဲၤထီၣ်ဒီးအီၤ မ့ၢ်တၢ် အဖုဖးဒိၣ်တဖုန့ၣ်လီၤ.

¹⁰ ဒီးလဲၤပၢၢ်လၢအၤတၤအကြဲၢ်ပူၤ, လၢအအိၣ်ဝဲလၢ ထံယၢ်ဒ့ၣ်ဝၢ်ဘးခီ, ဒီးဖဲန့ၣ်ဟီၣ်ဝဲယၢၤဝဲဒီး တၢ်ဟီၣ် တၢ်ယၢၤဖးဒိၣ်နးမးလီၤ.

¹¹ ဒီးပှၤအိၣ်ဝဲဆိးဝဲလၢကီၢ်ကနၤဧၣ်တဖၣ် ထံၣ်ဘၣ်ဝဲ လၢတၢ်ဟီၣ်ပသူဟီၣ်ပသီလၢ အၤတၤအကြဲၢ်ပူၤ, ဒီး စံးဝဲဒၣ်, တၢ်ဟီၣ်ပသူဟီၣ်ပသီအံၤအိၣ်ဒီးပှၤအဲၤကူပ တူးဖိနးမးလီၤ. မၤသးဒ်န့ၣ်ဒီးပှၤယုၢ်ဝဲအမံၤလၢဟ့းဘ့ၤ လးမံးစရၤယံၣ်, လၢအအိၣ်လၢထံယၢ်ဒ့ၣ်ဝၢ်ဘးခီလီၤ.

¹² ဒီးအဖိခွါတဖၣ်န့ၣ် မၤအီၤဒ် အမၤလိာ်အီၤအသိး န့ၣ်လီၤ. ¹³ ဒီးအဖိခွါတဖၣ်လဲၤစိာ်ထီၣ်က့ၤအီၤဆူကီၢ် ကနၤဧၣ်, ဒီးခူၣ်လီၤကွံာ်အီၤလၢဟီၣ်ခိၣ်အကဝီၤမးက ပ့လၤအအိပူၤ, လၢစီၤအၤဘြၤဟၣ်ပှ့ၤဝဲအိၣ်ဒီးဟီၣ်ခိၣ် တကဝီၤလၢပှၤဃ့ၤသးဖိ စီၤဧ့ၤဖရိၣ်လၢတၢ်သွၣ်ခိၣ်အ တၢ်ဟံးဃာ်အဂီၢ်, အိၣ်ဝဲလၢမးမရ့အမဲာ်ညါလီၤ.

¹⁴ ဒီးလၢအခူၣ်လီၤကွံာ်အပၢ်အလီၢ်ခံန့ၣ်, စီၤယိၤသး က့ၤကဒါက့ၤဆူအဲၤကူပတူး, အဝဲဒၣ်ဒီးအဒီပုၢ်ဝဲၢ်တ ဖၣ်, ဒီးကယဲၢ်ပှၤလၢအလဲၤထီၣ်ဒီးအီၤ ဒ်သိးအက ခူၣ်လီၤကွံာ်အပၢ်န့ၣ်ခဲလၢာ်လီၤ.

¹⁵ ဒီးစီၤယိၤသးအဒီပုၢ်ဝဲၢ်တဖၣ် ထံၣ်ဘၣ်ဝဲလၢအပၢ် သံလံ, ဒီးစံးဝဲဒၣ်, ဘၣ်တဘၣ်စီၤယိၤသးကမၤအၢမၤ နးပှၤ, ဒီးကမၤအၢဆၢပှၤလၢ ကယဲၢ်တၢ်အၢလၢပမၤ အီၤသပှၢ်တၢၢ်လီၤ. ¹⁶ ဒီးမၢလီၤအကလုၢ်ဆူစီၤယိၤသး, ဒီးစံးဝဲဒၣ်, နပၢ်တချုးသံဒံးဘၣ်ဒီး, မၤလိာ်ဝဲ, ဒီးစံး ဝဲဒၣ်, ¹⁷ သုဘၣ်စံးဘၣ်စီၤယိၤသးဒ်အံၤ, ပျၢ်သးကညီၤ နဒီပုၢ်ဝဲၢ်အတၢ်ကမၣ်, ဒီးအတၢ်ဒဲးဘးန့ၣ်တက့ၢ်. အ ဂ့ၢ်ဒ်အံၤ, မၤအၢတ့ၢ်နၤလီၤ. ဒီးခဲကနံၣ်အံၤပျၢ်နပၢ်အ ယွၤအခ့အပှၤအတၢ်ကမၣ်တက့ၢ်. ဒီးတုၤအကတိၤတၢ် ဒီးအီၤဒီး, ¹⁸ စီၤယိၤသးအမဲာ်ထံလီၤဝဲလီၤ. ဒီးအဒီပုၢ် ဝဲၢ်လဲၤစ့ၢ်ကီးဝဲ, ဒီးထိၣ်လီၤပှီၤအသးလၢအမဲာ်ညါဒီး စံးဝဲဒၣ်, ကွၢ်ကွၢ်, ပမ့ၢ်နကုၢ်နပှၤလီၤ.

¹⁹ ဒီးစီၤယိၤသးစံးဘၣ်အီၤ, ပျံၤတၢ်တဂ့ၤ. အဂ့ၢ်ဒ်အံၤ, ယအိၣ်လၢယွၤအလီၢ်စ့ၢ်ကီးဧါ. ²⁰ သုဝဲဒၣ်အံၤသုကူၣ် ထီၣ်တၢ်အၢလၢယဂီၢ်လီၤ. မ့မ့ၢ်ယွၤကူၣ်ကဲထီၣ်အီၤ လၢတၢ်ဂ့ၤ, ဒ်သိးအကမၤတၢ်ဒ်လၢမုၢ်မဆါတနံၤအံၤ အသိး, လၢအကဒုးမူဒံးပှၤဂီၢ်မုၢ်အါအါကလဲာ်အဂ့ၢ် လီၤ. ²¹ ဒီးခဲကနံၣ်အံၤပျံၤတၢ်တဂ့ၤ. ယကလုၢ်အီၣ်လုၢ် အီသုဒီးသုဖိဒံဖိသၣ်သ့ၣ်တဖၣ်န့ၣ်လီၤ. ဒီးမၤမုာ်ထီၣ် က့ၤအီၤ, ဒီးကတိၤဘၣ်သူၣ်ဘၣ်သးအီၤလီၤ.

²² ဒီးစီၤယိၤသးအိၣ်ဝဲဆိးဝဲလၢအဲၤကူပတူးအပူၤ, အဝဲ ဒၣ်ဒီးအပၢ်အပှၤဟံၣ်ဖိလီၤ. ဒီးစီၤယိၤသးမူဝဲအနံၣ်တ ကယၤတဆံလီၤ. ²³ ဒီးစီၤယိၤသးထံၣ်ဘၣ်စီၤအ့ဖရဲၣ် အဖိအလံၤသၢစိၤတစိၤလီၤ. ဒီးစီၤမနၤရှ့ၤအဖိခွါစီၤမၤ ကံၢ်အဖိအလံၤအိၣ်ဖျဲၣ်ဝဲလၢ စီၤယိၤသးအခီၣ်လ့ၢ်ခိၣ် လီၤ.

²⁴ ဒီးစီၤယိၤသးစံးဘၣ်အဒီပုၢ်ဝဲၢ်, ယသံယဲလီၤ, ဒီးယွၤ ကဟဲအိၣ်သကိးသုသပှၢ်တၢၢ်, ဒီးကဒုးဟဲထီၣ်သုလၢ ကီၢ်အံၤဆူကီၢ်တဘ့ၣ်န့ၣ်လၢ အဆိၣ်တၢ်လၢအဂ့ၢ်အ ကျိၤဒီးစီၤအၤဘြၤဟၣ်, ဒီးစီၤအံၤစဲး, ဒီးစီၤယၤကိာ် လီၤ.

²⁵ ဒီးစီၤယိၤသးဒုးဆိၣ် ပှၤအံၣ်စရ့လးဖိလၢတၢ်ဆိၣ်, ဒီးစံးဝဲဒၣ်, ယွၤကဟဲအိၣ်သကိးသုသပှၢ်တၢၢ်, ဒီးသု ဘၣ်စိာ်ထီၣ်ကွံာ်ယဃံယကွဲလၢအံၤလီၤ.

²⁶ ဒီးစီၤယိၤသးအသးပှၢ် အနံၣ်တကယၤတဆံန့ၣ်ဒီး သံဝဲလီၤ. ဒီးပှၤပာ်အစိၣ်ဒီးကသံၣ်, ဒီးပာ်နုာ်အီၤလၢ စူၢ်တဖျၢၣ်အပူၤလၢအဲၤကူပတူးအပူၤလီၤ.