လံာ်စီၤပီလူးကွဲးန့ၢ်ပှၤကလၤတံဖိ.

လံာ်စီၤပီလူးကွဲးန့ၢ်ပှၤကလၤတံဖိ.

၁

¹ ပှၤတၢ်မၢဖိ, ပှၤကညီဒုးကဲထီၣ်ဝဲတမ့ၢ်ဘၣ်, ဒီးကဲ ထီၣ်လၢပှၤကညီအစုပူၤတမ့ၢ်ဘၣ်, မ့ၢ်လၢယ့ၣ်ရှူးခရံာ်, ဒီးပၢ်ယွၤလၢ အမၤဂဲၤဆၢထၢၣ်က့ၤအီၤလၢတၢ်သံအစု ပူၤ, ယၤစီၤပီလူး, ² ဒီးဒီပုၢ်ဝဲၢ်အိၣ်ဒီးယၤခဲလၢာ်, ပစံးဘၣ် တၢ်အိၣ်ဖှိၣ်တဖၣ်အိၣ်လၢကီၢ်ကလၤတံန့ၣ်, ³ မ်တၢ် ဘျုးတၢ်ဖှိၣ်ဒီးတၢ်ဃူတၢ်ဖိးလၢပပၢ်ယွၤ, ဒီးပကစၢ် ယ့ၣ်ရှူးခရံာ်, ⁴ လၢအဟ့ၣ်လီၤအသးဒၣ်ဝဲလၢပတၢ်ဒဲး ဘးအဃိ, ဒ်သိးအကထုးထီၣ်န့ၢ်ပှၤလၢအအံၤတဃၣ် လၢအအၢအပူၤ, ဖဲဒၣ်ပပၢ်ယွၤအသးန့ၣ်, ဘၣ်သုတ က့ၢ်. ⁵ အဝဲဒၣ်န့ၣ်, မ်တၢ်လၤတၢ်ကပီၤအိၣ်ဒီးအီၤအစိၤ စိၤအဃၣ်ဃၣ်တက့ၢ်.+ အၤမ့ၣ်.

⁶ ယကမၢကမၣ်လၢသုလီၤဖးဒီးပှၤလၢ အကိးက့ၤသု လၢခရံာ်အဘျုးအဖှိၣ်အပူၤ, ဒီးအိၣ်က့ၤလၢတၢ်သးခု အကစီၣ်အဂၤအပူၤချ့ထဲအံၤအဃိလီၤ. ⁷ ဒီးတမ့ၢ်ဘၣ် အဂၤဘၣ်. မ့မ့ၢ်ပှၤအိၣ်ဝဲတနီၤနီၤလၢအမၤတံာ်တာ်သု, ဒီးအသးအိၣ်လၢ အကမၤကဒံကဒါခရံာ်အတၢ်သးခု အကစီၣ်လီၤ. ⁸ ဘၣ်ဆၣ်ဒီးတၢ်သးခုအကစီၣ်လၢယ စံၣ်တဲၤတဲလီၤသုအမဲာ်ညါ, ပဝဲဒၣ်အံၤမ့ၢ်ဂ့ၤ, ကလူးလၢ မူခိၣ်မ့ၢ်ဂ့ၤ, မ့ၢ်စံၣ်တဲၤတဲလီၤသုလၢတၢ်သးခုအကစီၣ် အဂုၤအဂၤဒီး, မ်အဘၣ်တၢ်ဆိၣ်အၢတက့ၢ်. ⁹ ဒ်ပစံးလံ အသိးန့ၣ်, ခဲကနံၣ်အံၤယစံးကဒီးယဲ, တၢ်သးခုအက စီၣ်လၢသုဒိးန့ၢ်အီၤအမဲာ်ညါ, ပှၤမ့ၢ်စံၣ်တဲၤတဲလီၤသု လၢတၢ်သးခုအကစီၣ်အဂုၤအဂၤတဂၤဂၤဒီး, မ်အဘၣ် တၢ်ဆိၣ်အၢတက့ၢ်. ¹⁰ အဂ့ၢ်ဒ်အံၤ, ခဲကနံၣ်အံၤ, မ့ၢ်ယဃု ဘၣ်ဘျုးလၢပှၤကညီအမဲာ်ညါ, မ့ၢ်ယဃုဘၣ်ဘျုးလၢ ယွၤအမဲာ်ညါလဲၣ်. မ့ၢ်ယဃုမၤတၢ်ဘၣ်ပှၤကညီအသး ဧါ. အဂ့ၢ်ဒ်အံၤ, ယမ့ၢ်ဃုမၤတၢ်ဘၣ်ဒံးပှၤကညီအသး ဒီး, ယတမ့ၢ်ဘၣ်ခရံာ်အခ့အပှၤဘၣ်.

¹¹ ဒီးပုၢ်သ့ၣ်ဝဲၢ်သ့ၣ်ဧၢ, ယဘိးဘၣ်သ့ၣ်ညါသုလၢတၢ် သးခုအကစီၣ်လၢယစံၣ်တဲၤတဲလီၤန့ၣ်, တမ့ၢ်ဘၣ်ပှၤ ကညီအတၢ်ဘၣ်. ¹² အဂ့ၢ်ဒ်အံၤ, ယတဒိးန့ၢ်ဘၣ်အီၤလၢ ပှၤကညီဘၣ်. ဒီးပှၤတသိၣ်လိဘၣ်ယၤဘၣ်. မ့မ့ၢ်ယ့ၣ်ရှူး ခရံာ်လီၣ်ဖျါထီၣ်အီၤလၢယၤလီၤ. ¹³ အဂ့ၢ်ဒ်အံၤ, ယမၤ ညီနုၢ်တၢ်ဖဲယအိၣ်ဒံးလၢ ပှၤယူဒၤဖိအလုၢ်အလၢ်အပူၤ န့ၣ်, သုနၢ်ဟူလၢယမၤအၢမၤသီယွၤအတၢ်အိၣ်ဖှိၣ်နး မး, ဒီးယမၤဟးဂူာ်မၤဟးဂီၤအီၤလီၤ. ¹⁴ ဒီးယဂဲၤလိာ်လၢ ယပၢ်သ့ၣ်အတၢ်စံၣ်စိၤတဲစိၤဒိၣ်မး, ဒီးယသ့ထီၣ်လၢပှၤ ယူဒၤဖိအလုၢ်အလၢ်အါန့ၢ် ပှၤသကျဲဒီးယၤလၢ ပှၤက လုာ်ဒၣ်ယၤအကျါအါဂၤတက့ၢ်လီၤ. ¹⁵ ဘၣ်ဆၣ်ဒီးတုၤတၢ်ဘၣ်ယွၤအသး, လၢအဃုထၢယၤလၢယမိၢ်အဟၢဖၢပူၤဒီးကိးက့ၤယၤလၢအဘျုးအဖှိၣ်,―

¹⁶ ဒ်သိးအကလီၣ်ဖျါထီၣ် အဖိခွါလၢယပူၤ, ဒ်သိးယက စံၣ်တဲၤတဲလီၤအီၤလၢပှၤကလုာ်တဖၣ်အကျါဒီး, တ ကီၢ်ခါန့ၣ်ယတကူၣ်ထီၣ်ဖးလီၤဒီး တၢ်ဖံးတၢ်ညၣ်ဒီး သွံၣ်ဒီးထံန့ၣ်ဘၣ်. ¹⁷ ဒီးယတလဲၤထီၣ်ဘၣ်ဆူ ယရူၤၡ လ့ၣ်ဆူပှၤကဲဆိပှၤတၢ်မၢဖိလၢယမဲာ်ညါန့ၣ်ဘၣ်. မ့မ့ၢ် ယလဲၤဆူကီၢ်ဧ့ရ့း, ဒီးယဟဲက့ၤကဒီးဆူဒၤမ့ၤစ့းလီၤ.

¹⁸ တုၤနုၤတစုလၢသၢနံၣ်ပူၤကွံာ်ဒီး, ယက့ၤထီၣ်ဆူယ ရူၤၡလ့ၣ်, ဒ်သိးယကအိၣ်သကိးစီၤပ့းတရူး, ဒီးယအိၣ် ဒီးအီၤတဆံယဲၢ်သီလီၤ. ¹⁹ ဘၣ်ဆၣ်ဒီးတၢ်မၢဖိအဂုၤအ ဂၤတဖၣ်ယတထံၣ်ဘၣ်နီတဂၤဘၣ်. ယထံၣ်ထဲပကစၢ် အဒီပုၢ်ဝဲၢ်စီၤယၤကိာ်တဂၤဧိၤလီၤ. ²⁰ ဒီးတၢ်လၢယကွဲး န့ၢ်သု, ကွၢ်ကွၢ်, လၢယွၤအမဲာ်ညါ, ယတကတိၤကဘျံး ကဘျၣ်ဘၣ်. လၢခံက့ၤဒီး, ယလဲၤဆူကီၢ်စူၤရံ, ဒီးကီၢ်ကံၤလံၤကံ,

²² ဒီးတၢ်အိၣ်ဖှိၣ်တဖၣ်လၢခရံာ်အပူၤ, ဘၣ်ဃးဒီးကီၢ်ယူ ဒၤန့ၣ်တသ့ၣ်ညါဘၣ်ယမဲာ်ဘၣ်. ²³ ထဲအနၢ်ဟူလၢပှၤ လၢအမၤအၢမၤသီပှၤပဝဲဒၣ်အံၤလၢအခီၣ်ထံးတဂၤ, ခဲ ကနံၣ်အံၤစံၣ်တဲၤတဲလီၤတၢ်နာ် လၢအမၤဟးဂူာ်မၤဟး ဂီၤတ့ၢ်ဝဲ, ²⁴ ဒီးစံးထီၣ်ပတြၢၤယွၤလၢယဃိလီၤ.

၂

¹ အန့ၣ်အလီၢ်ခံတဆံလွံၢ်နံၣ်ပူၤကွံာ်ဒီး, ယလဲၤထီၣ် ကဒီးဆူယရူၤၡလ့ၣ်, အိၣ်ဒီးစီၤဘၢ်နါဘၤ, ဒီးယဟံးန့ၢ် စီၤတံတူးစ့ၢ်ကီးလီၤ. ² ဒီးယလဲၤထီၣ်လၢတၢ်လီၣ်ဖျါအ ဃိ, ဒီးတၢ်သးခုအကစီၣ်လၢ ယစံၣ်တဲၤတဲလီၤလၢပှၤ ကလုာ်တဖၣ်န့ၣ်, ယပာ်ဖျါထီၣ်လၢအမဲာ်ညါ, မ့မ့ၢ်လၢ ပှၤအိၣ်ဒီးအလၤကပီၤတဖၣ်အမဲာ်ညါကစုဒု, မ့တမ့ၢ် ဘၣ်ဒ်န့ၣ်ဒီး, ယဃ့ၢ်တ့ၢ်ဒီးယကဃ့ၢ်ဒံး, ကမ့ၢ်ဘၣ်ဖုး တၢ်ကလီကလီလီၤ. ³ ဘၣ်ဆၣ်ဒီးတၢ်တမၢဘၣ်ပှၤဟ့း လ့ၣ်ဖိစီၤတံတူးအိၣ်ဒီးယၤ, ဒိးတၢ်ကူးတရံးဘၣ်. ⁴ ဒီး အဝဲန့ၣ်မ့ၢ်လၢဒီပုၢ်ဝဲၢ်အဘျၣ်လၢအဟဲနုာ်ခူသူၣ်တဖၣ် အဃိ, အဝဲသ့ၣ်ဟဲနုာ်ကွၢ်ဟုၣ်ပတၢ်ထူၣ်ဖျဲးလၢအအိၣ် ဒီးပှၤလၢယ့ၣ်ရှူးခရံာ်အပူၤ ဒ်သိးအကမၢ ပကဲကုၢ် လီၤ. ⁵ ဘၣ်ဆၣ်ဒီးလၢပကစူၢ်အကလုၢ်န့ၣ်ပတအၢၣ် လီၤအီလီၤဘၣ်အီၤထဲတနၣ်ရံၣ်ဧိၤဘၣ်. ဒ်သိးတၢ်သးခု အကစီၣ်အတၢ်မ့ၢ်တၢ်တီကအိၣ်ကဆိးဒီးသုလီၤ. ⁶ မ့ မ့ၢ်လၢပှၤလၢအလီၤဂာ်လၢအမ့ၢ်တၢ်တဖၣ် (မ့ၢ်တၢ်ဒ် လဲၣ်ဒ်လဲၣ်, တလီၤဆီဘၣ်ဒီးယၤဘၣ်, ယွၤတကွၢ်ဒိၣ် ဆံးအါစှၤဘၣ်ပှၤနီတဂၤဘၣ်), ပှၤလၢအလီၤဂာ်လၢအ မ့ၢ်တၢ်တဖၣ်န့ၣ်, တမၤအါထီၣ်ယတၢ်နီတမံၤဘၣ်.―

⁷ အခိၣ်တလိာ် တုၤအထံၣ်လၢတၢ်ဟ့ၣ်လီၤယၤလၢတၢ် သးခုအကစီၣ်ဘၣ်ဃးဒီးတၢ်တကူးတရံးဘၣ်, ဒ်တၢ် ဘၣ်ဃးဒီးတၢ်ကူးတရံး, လၢစီၤပ့းတရူးအသိး, ⁸ (အဂ့ၢ် ဒ်အံၤ, ပှၤလၢအမၤတၢ်လၢစီၤပ့းတရူးအပူၤလၢတၢ်မၢဖိ အလီၢ်ဘၣ်ဃးဒီးတၢ်ကူးတရံးအဂီၢ်တဂၤ, မၤစ့ၢ်ကီး တၢ်လၢယပူၤလၢပှၤကလုာ်တဖၣ်အဂီၢ်လီၤ.) ⁹ ဒီးတုၤ အသ့ၣ်ညါတၢ်အဘျုးအဖှိၣ် လၢတၢ်ဟ့ၣ်လီၤယၤသ တးဒီး, စီၤယၤကိာ်ဒီးစီၤက့ၤဖးဒီးစီၤယိၤဟၣ်သ့ၣ်တဖၣ် လၢအလီၤဂာ်ထူၣ်တဖၣ်န့ၣ်, ဟ့ၣ်လီၤယၤဒီးစီၤဘၢ်နါ ဘၤလၢအစုထွဲဘၣ်ဃးဒီးတၢ်ရ့လိာ်, ဒ်သိးပကလဲၤပဝဲ ဆူပှၤကလုာ်တဖၣ်အအိၣ်, ဒီးအဝဲသ့ၣ်ဆူပှၤဒိးတၢ်ကူး တရံးအအိၣ်လီၤ. ¹⁰ ဘၣ်အသးထဲလၢပကသ့ၣ်နီၣ်ထီၣ် က့ၤပှၤဖှီၣ်ဖိယာ်ဖိတမံၤဧိၤလီၤ. ဒီးတၢ်န့ၣ်တမံၤဒၣ်လဲာ် မ့ၢ်တၢ်လၢယဂုာ်မၤတ့ၢ်သပှၢ်ပှၢ်လီၤ.

¹¹ ဘၣ်ဆၣ်ဒီးတုၤစီၤပ့းတရူးဟဲဆူအၣ်တံၤအီာ်ဒီး, ယ ဂ့ၢ်လိာ်ဘှီလိာ်အီၤလၢအမဲာ်သၣ်ပူၤလီၤ. အဂ့ၢ်ဒ်အံၤ, ပာ်တၢ်ကမၣ်လၢအလိၤအလီၢ်အိၣ်လီၤ. ¹² အဂ့ၢ်ဒ်အံၤ, တချုးပှၤတနီၤနီၤဟဲလၢစီၤယၤကိာ်အအိၣ်ဒီး, အဝဲဒၣ် အီၣ်ဃုာ်တၢ်ဒီးပှၤကလုာ်တဖၣ်လီၤ. မ့မ့ၢ်တုၤအဝဲသ့ၣ် ဟဲတုၤဒီး, ပျံၤပှၤဒိးတၢ်ကူးတရံးဒီးဂုၤက့ၤအသး, ဒီးမၤ လီၤဖးအသးလီၤ. ¹³ ဒီးပှၤယူဒၤဖိအဂၤတဖၣ်လီဃုာ်တၢ် စ့ၢ်ကီးဒီးအီၤတုၤစီၤဘၢ်နါဘၤဒၣ်လဲာ် လဲၤဃုာ်ဒီးအီၤ လၢအလီတၢ်အပူၤလီၤ. ¹⁴ မ့မ့ၢ်တုၤယထံၣ်လၢပှၤတဖၣ် တလဲၤစၢၢ်ဆၢဘၣ် ဒီးတၢ်သးခုအကစီၣ်အတၢ်မ့ၢ်တၢ် တီဘၣ်ဒီး, ယစံးဘၣ်စီၤပ့းတရူးလၢ ပှၤခဲလၢာ်အမဲာ် ညါ, ပှၤယူဒၤဖိတဂၤနဲဒၣ်အံၤ, နမ့ၢ်တိၢ်န့ၢ်ပှၤကလုာ်တ ဖၣ်အလုၢ်အလၢ်, ဒီးတတိၢ်န့ၢ်ဘၣ်ပှၤယူဒၤဖိအလုၢ်အ လၢ်ဘၣ်ဒီး, ဘၣ်မနုၤလၢနမၢဆူၣ်ပှၤကလုာ်တဖၣ်မၤဒ် ပှၤယူဒၤဖိအသိးလဲၣ်. ¹⁵ ပှၤလၢအတမ့ၢ်ဘၣ်ပှၤတၢ်ဒဲး ဘးဖိဘၣ်ဃးဒီးပှၤကလုာ်တဖၣ်, ပှၤယူဒၤဖိပဝဲဒၣ်အံၤ,

¹⁶ ပသ့ၣ်ညါလၢ ပှၤကညီတဘၣ်တၢ်ပာ်တီပာ်လိၤလၢတၢ် မၤဘၣ်ဃးဒီးတၢ်သိၣ်တၢ်သီဘၣ်. မ့ၢ်လၢတၢ်နာ်ဘၣ် ဃးဒီးယ့ၣ်ရှူးခရံာ်လီၤ. ဒီးပဝဲဒၣ်အံၤ, ပစူၢ်က့ၤနာ်က့ၤ ယ့ၣ်ရှူးခရံာ်ဒ်သိးပကဘၣ်တၢ်ပာ်တီပာ်လိၤပှၤလၢတၢ် နာ်ဘၣ်ဃးဒီးခရံာ်, ဒီးတမ့ၢ်ဘၣ်လၢတၢ်မၤဘၣ်ဃးဒီး တၢ်သိၣ်တၢ်သီဘၣ်လီၤ. အဂ့ၢ်ဒ်အံၤ, တၢ်ညၣ်တဘၣ် တၢ်ပာ်တီပာ်လိၤလၢ တၢ်မၤဘၣ်ဃးဒီးတၢ်သိၣ်တၢ်သီ နီတဂၤဘၣ်. ¹⁷ ဘၣ်ဆၣ်ဒီးပဃုတၢ်ပာ်တီပာ်လိၤပှၤလၢ ခရံာ်အပူၤအဖၢမုၢ်ဒီး, တၢ်မ့ၢ်ထံၣ်န့ၢ်ပှၤလၢပှၤတၢ်ဒဲး ဘးဖိဒီး, ခရံာ်မ့ၢ်တၢ်ဒဲးဘးအခ့အပှၤန့ၣ်ဧါ, မ်အသုတ မၤအသးဒ်န့ၣ်တဂ့ၤ. ¹⁸ အဂ့ၢ်ဒ်အံၤ, တၢ်လၢယမၤလီၤပှီၢ် အီၤတဖၣ်န့ၣ်, ယမ့ၢ်မၤထီၣ်က့ၤကဒီးအီၤဒီး, ယမၤဖျါ ထီၣ်ယသးလၢပှၤမၤကမၣ်တၢ်ဖိလီၤ. ¹⁹ အဂ့ၢ်ဒ်အံၤ, မ့ၢ် တၢ်သိၣ်တၢ်သီသတးဒီး, ယသံသဒၣ်ကွံာ်တၢ်သိၣ်တၢ် သီဒ်သိးယကမူထီၣ်လၢယွၤအဂီၢ်လီၤ. ²⁰ ယဒိးသံဃုာ် လံယသးလၢထူၣ်စုညါအလိၤဒီးခရံာ်န့ၣ်လံ, ဘၣ်ဆၣ် ဒီးယမူလီၤ. ဘၣ်ဆၣ်တမ့ၢ်လၢၤဘၣ်ယၤဘၣ်, မ့ၢ်ခရံာ်မူ လၢယပူၤလီၤ. ဒီးတၢ်လၢယမူလၢတၢ်ဖံးတၢ်ညၣ်အပူၤ ခဲကနံၣ်အံၤ, မ့ၢ်ယမူလၢတၢ်နာ်ဘၣ်ဃးဒီးယွၤအဖိခွါ တဂၤ, လၢအအဲၣ်ယၤဒီးဟ့ၣ်လီၤကွံာ်အသးလၢယဂီၢ် လီၤ. ²¹ ယတမၤဘၣ်ယွၤအဘျုးအဖှိၣ်လၢတၢ်ကလီက လီဘၣ်. အဂ့ၢ်ဒ်အံၤ, ပှၤမ့ၢ်ဘၣ်တၢ်ပာ်တီပာ်လိၤအီၤလၢ တၢ်သိၣ်တၢ်သီဒီး, ခရံာ်ဒိးသံအသးကလီကလီလီၤ.

၃

¹ ပှၤဟးဂီၤ, ပှၤကလၤတံဖိ, လၢတၢ်ပာ်ဖျါထီၣ်ယ့ၣ်ရှူး ခရံာ်ဒိးသံအသး လၢထူၣ်စုညါအလိၤ လၢသုမဲာ်ညါ သ့ၣ်ဧၢ, မ့ၢ်မတၤမၤကဒါသုမဲာ်တဂၤလဲၣ်. တၢ်မိၣ်သ့ၣ် ညါယသးလၢသုထဲအံၤတမံၤ, ² မ့ၢ်သုဒိးန့ၢ်သးလၢတၢ် မၤဘၣ်ဃးဒီးတၢ်သိၣ်တၢ်သီ, မ့ၢ်လၢတၢ်နာ်ဘၣ်ဃးဒီး တၢ်နၢ်ဟူလဲၣ်. ³ မ့ၢ်သုဟးဂီၤထဲထဲအံၤဧါ. သုမၤထီၣ်သီ လၢသး, ဒီးခဲကနံၣ်အံၤ, မ့ၢ်သုကမၤဝံၤက့ၤအီၤလၢတၢ် ဖံးတၢ်ညၣ်န့ၣ်ဧါ. ⁴ မ့မ့ၢ်ကလီကလီဒီး, မ့ၢ်သုဘၣ်တၢ် နးတၢ်ဖှီၣ်ပှဲၤအံၤကလီကလီဧါ. ⁵ မၤသးဒ်န့ၣ်ဒီးပှၤလၢ အဒုးဒိးန့ၢ်သုလၢသးန့ၣ်, ဒီးမၤတၢ်လီၤလးလၢသုကျါ တဂၤန့ၣ်, မ့ၢ်အမၤဝဲလၢတၢ်မၤဘၣ်ဃးဒီးတၢ်သိၣ်တၢ် သီ, မ့ၢ်လၢတၢ်နာ်ဘၣ်ဃးဒီးတၢ်နၢ်ဟူလဲၣ်. ⁶ ဒ်န့ၣ်အ သိးစီၤအၤဘြၤဟၣ်စူၢ်က့ၤနာ်က့ၤယွၤ, ဒီးတၢ်ပးကဲလၢ တၢ်တီတၢ်လိၤလၢအဂီၢ်လီၤ.+ ၁မိၤ. ၁၅း၆|Gen.15.6*.⁷ မၤသးဒ် န့ၣ်ဒီး သ့ၣ်ညါသုဝဲလၢပှၤလၢအဘၣ်ဃးဒီးတၢ်နာ်တ ဖၣ်န့ၣ်, မ့ၢ်စီၤအၤဘြၤဟၣ်အဖိခွါန့ၣ်တက့ၢ်. ⁸ ဒီးတၢ် ကွဲးအသးန့ၣ်, ထံၣ်ပာ်လၢယွၤကပာ်တီပာ်လိၤပှၤက လုာ်တဖၣ်လၢတၢ်နာ်ဒီး, စံၣ်တဲၤတဲလီၤပာ်တၢ်သးခု အကစီၣ်လၢစီၤအၤဘြၤဟၣ်, ဒီးစံးဝဲဒၣ်, ပှၤကိးကလုာ် ဒဲးကဘၣ်ဆိၣ်ဂ့ၤလၢနပူၤလီၤ.+ ၁မိၤ. ၁၂း၃|Gen.12.3*.⁹ မၤသး ဒ်န့ၣ်ဒီးပှၤလၢအဘၣ်ဃးဒီးတၢ်နာ်တဖၣ်န့ၣ် ဘၣ်ဆိၣ် ဂ့ၤဃုာ်ဒီးပှၤလၢအနာ်တၢ်, စီၤအၤဘြၤဟၣ်လီၤ.

¹⁰ အဂ့ၢ်ဒ်အံၤ, ဖဲဒၣ်ပှၤလၢအဘၣ်ဃးဒီးတၢ်သိၣ်တၢ် သီအတၢ်မၤတဖၣ်န့ၣ်, မ့ၢ်အအိၣ်လၢတၢ်ဆိၣ်အၢအဖီ လာ်လီၤ. အဂ့ၢ်ဒ်အံၤ, တၢ်ကွဲးအသး, ကယဲၢ်ပှၤလၢအ တအိၣ်တဆိးဘၣ်လၢ တၢ်ကွဲးအသးလၢလံာ်တၢ်သိၣ် တၢ်သီအပူၤခဲလၢာ် ဒ်သိးအကမၤအီၤဒီး, ဘၣ်တၢ်ဆိၣ် အၢကိးဂၤဒဲးလီၤ.+ ၅မိၤ. ၂၇း၂၆|Deut.27.26*.¹¹ ဒီးတၢ်လၢပှၤတဘၣ်တၢ်ပာ်တီပာ်လိၤလၢတၢ်သိၣ်တၢ်သီအပူၤလၢယွၤ အမဲာ်ညါနီတဂၤဘၣ်န့ၣ်, အိၣ်ဖျါဝဲလီၤ. အဂ့ၢ်ဒ်အံၤ, ပှၤ တီပှၤလိၤကမူဝဲလၢတၢ်နာ်လီၤ.+ ဃဘး. ၂း၄|Hab.2.4*.¹² ဒီးတၢ် သိၣ်တၢ်သီတဘၣ်ဃးဘၣ်ဒီးတၢ်နာ်ဘၣ်, မ့မ့ၢ်ပှၤလၢ အမၤတၢ်န့ၣ်, ကမူဝဲလၢအပူၤလီၤ.+ ၃မိၤ. ၁၈း၅|Lev.18.5*.¹³ ခရံာ်ဘၣ်ဆိၣ်အၢလၢပဂီၢ်သတးဒီး, ပှ့ၤက့ၤပှၤလၢတၢ် ဆိၣ်အၢဘၣ်ဃးဒီးတၢ်သိၣ်တၢ်သီအပူၤလီၤ. အဂ့ၢ်ဒ် အံၤ, တၢ်ကွဲးအသး, ပှၤလၢအဘၣ်စဲထီအသးလၢသ့ၣ် အလိၤ, မ့ၢ်အဘၣ်ဆိၣ်အၢကိးဂၤဒဲးလီၤ.+ ၅မိၤ. ၂၁း၂၃|Deut.21.23*.

¹⁴ ဒ်သိးစီၤအၤဘြၤဟၣ်အတၢ်ဆိၣ်ဂ့ၤ ကဘၣ်က့ၤပှၤက လုာ်တဖၣ်အလိၤလၢယ့ၣ်ရှူးခရံာ်အပူၤ, ဒ်သိးပကဒိးန့ၢ် သးလၢတၢ်စံးပာ်ဝဲန့ၣ်လၢတၢ်နာ်အဃိလီၤ.

¹⁵ ပုၢ်သ့ၣ်ဝဲၢ်သ့ၣ်ဧၢ, ယကတိၤတၢ်ဒ်ပှၤကညီအသိး, မ့ၢ် ပှၤကညီအတၢ်အၢၣ်လီၤအီလီၤဘၣ်ဆၣ်ဒီး, မ့ၢ်ဘၣ်တၢ် မၤကျၢၤအီၤဒီး, ပှၤတမၤဟးဂီၤဘၣ်မ့ၢ်ဂ့ၤ, တမၤအါထီၣ် မ့ၢ်ဂ့ၤ, နီတဂၤဘၣ်. ¹⁶ ဒီးတၢ်စံးပာ်တဖၣ်န့ၣ် မ့ၢ်တၢ်စံး ဘၣ်စီၤအၤဘြၤဟၣ်ဒီးအချံအသၣ်လီၤ. တၢ်တစံးဘၣ် အချံအသၣ်တဖၣ်, ဒ်အဘၣ်ဃးဒီးပှၤအါအသိးဘၣ်, မ့ၢ် ဒ်အဘၣ်ဃးဒီးပှၤတဂၤဃီအသိး, ဒီးစံး, နချံနသၣ်, ဒ်ပ စံးတၢ်အသိး, ခရံာ်လီၤ.+ ၁မိၤ. ၂၂း၁၈|Gen.22.18*.¹⁷ ဒီးယစံးတၢ်အံၤ, တၢ်အၢၣ်လီၤအီလီၤလၢ ယွၤမၤကျၢၤပာ်အီၤန့ၣ်, တၢ်သိၣ်တၢ်သီအိၣ်ထီၣ်လၢ အလီၢ်ခံအနံၣ်လွံၢ်ကယၤ သၢဆံန့ၣ်, မၤဟးဂီၤဝဲတုၤတၢ်စံးပာ်ကမ့ၢ်တၢ်ကလီက လီန့ၣ်တသ့ဘၣ်. ¹⁸ အဂ့ၢ်ဒ်အံၤ, တၢ်ဟ့ၣ်သါမ့ၢ်ဟဲလၢ တၢ်သိၣ်တၢ်သီဒီး, တဟဲလၢၤဘၣ်လၢတၢ်စံးပာ်ဘၣ်. ဘၣ်ဆၣ်ဒီးယွၤဟ့ၣ်ဝဲလၢ စီၤအၤဘြၤဟၣ်လၢတၢ်စံး ပာ်လီၤ.

¹⁹ မၤသးဒ်န့ၣ်ဒီး တၢ်သိၣ်တၢ်သီမ့ၢ်မနုၤလဲၣ်. မ့ၢ်တၢ်ပာ် အါထီၣ်အီၤလၢတၢ်ကမၣ်တဖၣ်အဃိ တုၤလၢအချံအ သၣ်လၢတၢ်စံးပာ်ဘၣ်ဃးဒီးအီၤကဟဲဝဲ, ဒီးဘၣ်တၢ် စံၣ်ညီၣ်ဝဲလၢကလူးတဖၣ်, လၢပှၤအိၣ်လၢခံခီဘၢၣ်စၢၤ တဂၤအစုပူၤလီၤ. ²⁰ ဒီးတၢ်လၢပှၤအိၣ်လၢခံခီဘၢၣ်စၢၤ န့ၣ်, ဘၣ်ဃးဒီးတၢ်တခီဧိၤတမ့ၢ်ဘၣ်, မ့မ့ၢ်ယွၤန့ၣ်မ့ၢ်တ ဂၤဃီလီၤ. ²¹ မၤသးဒ်န့ၣ်ဒီးမ့ၢ်တၢ်သိၣ်တၢ်သီထီဒါယွၤ အတၢ်စံးပာ်တဖၣ်ဧါ. မ်အသုတမၤအသးဒ်န့ၣ်တဂ့ၤ. အဂ့ၢ်ဒ်အံၤ, တၢ်မ့ၢ်ဟ့ၣ်တၢ်သိၣ်တၢ်သီလၢအမၤမူတၢ် သ့ဒီး, ကမ့ၢ်မးတၢ်တီတၢ်လိၤကဟဲလၢတၢ်သိၣ်တၢ်သီ န့ၣ်လီၤ. ²² ဘၣ်ဆၣ်ဒီးတၢ်ကွဲးအသးန့ၣ်ကးတံာ်ဃာ်ပှၤ ခဲလၢာ်အခံလၢတၢ်ဒဲးဘးအဖီလာ်, ဒ်သိးတၢ်စံးပာ်ဘၣ် ဃးဒီးတၢ်နာ်ယ့ၣ်ရှူးခရံာ်န့ၣ်, ကဘၣ်တၢ်ဟ့ၣ်လီၤအီၤ လၢပှၤစူၢ်က့ၤနာ်က့ၤတၢ်န့ၣ်လီၤ. ²³ တၢ်နာ်တချုးဟဲဒံး ဘၣ်ဒီး, ပဘၣ်တၢ်ပၢၤပှၤလၢတၢ်သိၣ်တၢ်သီအဖီလာ် ဒီးတၢ်ကးတံာ်ဃာ်ပခံလၢ တၢ်နာ်လၢ အကအိၣ်ဖျါ ထီၣ်ဝဲအဂ့ၢ်လီၤ. ²⁴ မၤသးဒ်န့ၣ်ဒီးတၢ်သိၣ်တၢ်သီမ့ၢ်ပှၤ သိၣ်လိနဲၣ်လိတၢ်တဂၤလၢအကဆှၢပှၤဆူခရံာ်န့ၣ်, ဒ် သိးပကဘၣ်တၢ်ပာ်တီပာ်လိၤပှၤလၢတၢ်နာ်လီၤ. ²⁵ မ့ မ့ၢ်တုၤတၢ်နာ်ဟဲတုၤဒီး, ပတအိၣ်လၢၤဘၣ်လၢပှၤသိၣ် လိတၢ်န့ၣ်အဖီလာ်ဘၣ်. ²⁶ အဂ့ၢ်ဒ်အံၤ, သုဝဲခဲလၢာ်, သု မ့ၢ်ယွၤအဖိလၢတၢ်နာ်ယ့ၣ်ရှူးခရံာ်အဃိလီၤ. ²⁷ အဂ့ၢ်ဒ် အံၤ, ဖဲဒၣ်ပှၤဒိးဘျၢအသးဆူခရံာ်အပူၤတဖၣ်န့ၣ်, မ့ၢ်အ ကူထီၣ်သိးထီၣ်ခရံာ်လီၤ. ²⁸ ပှၤယူဒၤဖိတအိၣ်, ပှၤဟ့း လ့ၣ်ဖိတအိၣ်, ပှၤကုၢ်ဖိတအိၣ်, ပှၤသဘျ့ဖိတအိၣ်, ပှၤ ပိာ်မုၣ်တအိၣ်, ပှၤပိာ်ခွါတအိၣ်ဘၣ်. အဂ့ၢ်ဒ်အံၤ, သုမ့ၢ် တၢ်တမံၤဃီခဲလၢာ်, လၢယ့ၣ်ရှူးခရံာ်အပူၤလီၤ. ²⁹ ဒီးသု မ့မ့ၢ်ခရံာ်အတၢ်ဒီး, သုမ့ၢ်စီၤအၤဘြၤဟၣ်အချံအသၣ်, ဒီးပှၤကန့ၢ်ဘၣ်သါတၢ် ဒ်တၢ်စံးပာ်ဟဲဝဲအသိးန့ၣ်လီၤ.

၄

¹ ဘၣ်ဆၣ်ဒီးယစံး, ပှၤန့ၢ်ဘၣ်သါတၢ်တဂၤ, ဖဲအမ့ၢ်ဖိ သၣ်အဖၢမုၢ်ဒီး, မ့ၢ်တၢ်ခဲလၢာ်အကစၢ်နာ်သက့ဒီး, တ လီၤဆီဘၣ်ဒီးကုၢ်တဂၤဘၣ်.― ² မ့မ့ၢ်အမုၢ်အလါလၢအ ပၢ်စံၣ်ညီၣ်ပာ်ဝဲတချုးဘၣ်ဒံးဘၣ်ဒီး, မ့ၢ်အအိၣ်လၢပှၤ ပၢၤတၢ်, ဒီးပှၤကွၢ်တၢ်အဖီလာ်လီၤ. ³ ဒ်န့ၣ်အသိးလၢပ မ့ၢ်ဖိသၣ်အခါန့ၣ်, ပကဲကုၢ်လၢတၢ်အမိၢ်ပှၢ်ဘၣ်ဃးဒီး ဟီၣ်ခိၣ်အဖီလာ်လီၤ. ⁴ မ့မ့ၢ်တုၤအမုၢ်အလါပှဲၤထီၣ်ဒီး, ယွၤမၢလီၤအဖိခွါအိၣ်ဖျဲၣ်လၢပိာ်မုၣ်, အိၣ်ဖျဲၣ်လၢတၢ် သိၣ်တၢ်သီအဖီလာ်, ⁵ ဒ်သိးအကပှ့ၤက့ၤ ပှၤအိၣ်လၢ တၢ်သိၣ်တၢ်သီအဖီလာ်, ဒ်သိးပကန့ၢ်ဘၣ်ဖိခွါအလီၢ် လီၤ. ⁶ ဒီးသုမ့ၢ်ဖိခွါအဃိဒီး, ယွၤမၢလီၤဖိခွါအသးဆူပ သးကံၢ်ပူၤလၢအကိးထီၣ်, အးဘၤ, ပၢ်ဧၢ, လီၤ. ⁷ မၤသးဒ် န့ၣ်ဒီးနတမ့ၢ်လၢၤဘၣ်ကုၢ်ဘၣ်. နမ့ၢ်ဖိခွါလီၤ. ဒီးနမ့မ့ၢ် ဖိခွါဒီး, နမ့ၢ်ပှၤန့ၢ်သါတၢ်လၢယွၤအဃိလီၤ. ⁸ ဘၣ်ဆၣ် ဒီးအခါဖဲသုတသ့ၣ်ညါဘၣ်ယွၤဘၣ်န့ၣ်, သုကဲကုၢ်လၢ ကစၢ်လၢအတမ့ၢ်ဘၣ်ကစၢ်တဖၣ်န့ၣ်လီၤ. ⁹ မ့မ့ၢ်ခဲက နံၣ်အံၤ, သုသ့ၣ်ညါယွၤ, ဒ်ပစံးတၢ်အသိး, ယွၤသ့ၣ်ညါ တ့ၢ်သုသတးဒီး, ဘၣ်မနုၤလၢသုဃၣ်ကဒါက့ၤသုသး ဆူတၢ်အမိၢ်ပှၢ်လၢအဂံၢ်အဘါစၢ်ဒီး ဖှီၣ်ဝဲယာ်ဝဲလၢသု သးအိၣ်ကဲက့ၤကဒီးကုၢ်လၢအဖီလာ်လဲၣ်. ¹⁰ သုတိၢ်န့ၢ် မုၢ်နံၤတဖၣ်, ဒီးလါ, ဒီးတၢ်အခ့အခါ, ဒီးနံၣ်တဖၣ်လီၤ.―

¹¹ ယပျံၤတၢ်လၢသုဂ့ၢ် လၢယကျဲးစၢးတၢ်လၢသုဂီၢ်ကမ့ၢ် ဘၣ်ဖုးတၢ်ကလီကလီလီၤ.

¹² ကဲထီၣ်ဒ်ယၤအသိး, အဂ့ၢ်ဒ်အံၤ, ယမ့ၢ်စ့ၢ်ကီးဒ်သု အသိး, ပုၢ်သ့ၣ်ဝဲၢ်သ့ၣ်ဧၢ, ယဃ့ကညးသုလီၤ. တမ့ၢ် ဘၣ်သုမၤအၢတ့ၢ်ယၤနီတမံၤဘၣ်. ¹³ ဒီးလၢထံးလၢသီ ယဖံးယညၣ်တအိၣ်ဆူၣ်ဘၣ်ဒီး, ယစံၣ်တဲၤတဲလီၤတၢ် သးခုအကစီၣ်လၢသုန့ၣ်, သုသ့ၣ်ညါလီၤ. ¹⁴ ဒီးတၢ်လ့ပ စီ အိၣ်လၢယဖံးယညၣ်အပူၤန့ၣ် သုတမၤတရီတပါ ဘၣ်, သုတညိကွံာ်ဘၣ်ယၤဘၣ်, သုတူၢ်လိာ်ယၤဒ်ယွၤ အကလူးအသိးဒ်ယ့ၣ်ရှူးခရံာ်အသိးန့ၣ်လီၤ. ¹⁵ မၤသးဒ် န့ၣ်ဒီး, သုတၢ်ခုၣ်တၢ်မုာ်န့ၣ်, မ့ၢ်အအိၣ်ဖဲလဲၣ်. အဂ့ၢ်ဒ် အံၤ, ယအုၣ်ယသးလၢသု, လၢသုအူခွဲးထီၣ်သုမဲာ်ဒီး ဟ့ၣ်လီၤယၤမ့ၢ်သ့ဒီး, အခါဖဲန့ၣ်သုကမၤလီၤ. ¹⁶ မ့ၢ်ယ ကဲထီၣ်သုဒုၣ်သုဒါ လၢယစံးဘၣ်သုလၢတၢ်မ့ၢ်တၢ်တီ အဃိဧါ. ¹⁷ အဝဲသ့ၣ်ဂဲၤလိာ်လၢသုဂီၢ်တမံၤန့ၣ်, တဂ့ၤ ဘၣ်ဝဲဘၣ်. မ့မ့ၢ်အသးအိၣ်ဟီထီၣ်ကွံာ်သုဒ်သိးသုက ဂဲၤလိာ်သုသးလၢအဂီၢ်လီၤ. ¹⁸ ဘၣ်ဆၣ်ဒီးဂ့ၤဂဲၤလိာ်သု သးလၢတၢ်ဂ့ၤအဂီၢ်တဘိယူၢ်ဃီ, ဒီးတမ့ၢ်ဘၣ်ထဲယ အိၣ်ဒီးသုအဖၢမုၢ်န့ၣ်ဧိၤဘၣ်. ¹⁹ ယဖိဆံးလၢယဟုးဆါ ကဒီးလၢသုဃိ တုၤခရံာ်အက့ၢ်အဂီၤလိၣ်ထီၣ်အသး လၢသုပူၤသ့ၣ်ဧၢ. ²⁰ တၢ်မိၣ်အိၣ်ဘၣ်ယသးဒီးသုခဲက နံၣ်အံၤ, ဒီးမၤလီၤဆီယကလုၢ်ဒီးသုလီၤ. အဂ့ၢ်ဒ်အံၤ, ယ သးဒ့ဒီလၢသုဂ့ၢ်လီၤ.

²¹ ပှၤလၢတၢ်မိၣ်အိၣ်ဘၣ်အသးလၢ တၢ်သိၣ်တၢ်သီအ ဖီလာ်သ့ၣ်ဧၢ, စံးဘၣ်ယၤတက့ၢ်. တၢ်သိၣ်တၢ်သီမ့ၢ်သု တနၢ်ဟူဘၣ်ဧါ. ²² အဂ့ၢ်ဒ်အံၤ, တၢ်ကွဲးအသး, လၢစီၤအၤ ဘြၤဟၣ်အိၣ်ဒီးအဖိခွါခံဂၤ, တဂၤလၢကုၢ်မုၣ်, ဒီးတဂၤ လၢသဘျ့မုၣ်လီၤ. ²³ မ့မ့ၢ်ပှၤလၢအဘၣ်ဃးဒီးကုၢ်မုၣ်တ တဂၤန့ၣ်, အိၣ်ဖျဲၣ်လၢတၢ်ဖံးတၢ်ညၣ်, ဒီးပှၤလၢအဘၣ် ဃးဒီးသဘျ့မုၣ်တဂၤအိၣ်ဖျဲၣ်လၢတၢ်စံးပာ်လီၤ. ²⁴ တၢ် န့ၣ်တဖၣ်မ့ၢ်အဒိအတဲာ်လီၤ. အဂ့ၢ်ဒ်အံၤ, ပိာ်မုၣ်တဖၣ် အံၤမ့ၢ်တၢ်အၢၣ်လီၤအီလီၤခံမံၤန့ၣ်လီၤ. အဝဲတမံၤလၢ အဟဲလၢကစၢၢ်စံၤနါလၢ အဆံးစၢ်အဖိလၢကုၢ်အလီၢ် န့ၣ်, မ့ၢ်နီၢ်ဟၤကၢ်လီၤ. ²⁵ အဂ့ၢ်ဒ်အံၤ, နီၢ်ဟၤကၢ်မ့ၢ်က စၢၢ်စံၤနါလၢကီၢ်ဧ့ရ့း, ဒီးဒ်သိးဒီးယရူၤၡလ့ၣ်လၢအအိၣ် ခဲကနံၣ်အံၤ, အဂ့ၢ်ဒ်အံၤ, ကဲကုၢ်ဒီးအဖိတဖၣ်လီၤ. ²⁶ မ့မ့ၢ် ယရူၤၡလ့ၣ်လၢထးန့ၣ်, အိၣ်သဘျ့ဒီးမ့ၢ်ပဝဲဒၣ်ခဲလၢာ် အမိၢ်လီၤ. ²⁷ အဂ့ၢ်ဒ်အံၤ, တၢ်ကွဲးအသး, ပှၤတူာ်ဖိလၢအတဆံးစၢ်ဘၣ်တဂၤဧၢ, သူၣ်ဖှံသး ညီတက့ၢ်. ပိာ်မုၣ်လၢအတဘၣ်တၢ်ဟုးဆါဘၣ်ဧၢ, ထုထီၣ်န ကလုၢ်ဒီးကိးပသူထီၣ်တက့ၢ်. အဂ့ၢ်ဒ်အံၤ, ပိာ်မုၣ် လၢအအိၣ်သယုၢ်တဂၤ, အဖိအါန့ၢ်ပိာ်မုၣ်လၢအ အိၣ်ဒီးအဝၤတက့ၢ်လီၤ.+ ၡါ. ၅၄း၁|Isa.54.1

²⁸ မ့မ့ၢ်ပဝဲဒၣ်အံၤ, ပုၢ်သ့ၣ်ဝဲၢ်သ့ၣ်ဧၢ, ဒ်စီၤအံၤစဲးအသိး န့ၣ်, ပမ့ၢ်တၢ်စံးပာ်အဖိလီၤ. ²⁹ ဘၣ်ဆၣ်ဒီးဒ်အကတီၢ်ဖဲ န့ၣ်အသိး, ပှၤလၢအအိၣ်ဖျဲၣ်လၢတၢ်ဖံးတၢ်ညၣ်တဂၤ န့ၣ်မၤအၢမၤသီပှၤလၢအအိၣ်ဖျဲၣ်လၢသးတဂၤလီၤ. ဒီး ခဲကနံၣ်အံၤ, တၢ်မၤအသးဒ်န့ၣ်အသိးစ့ၢ်ကီးလီၤ. ³⁰ ဘၣ် ဆၣ်ဒီးတၢ်ကွဲးအသးစံးဝဲဒ်လဲၣ်. ဟီထီၣ်ကွံာ်ကုၢ်မုၣ်ဒီး အဖိခွါတက့ၢ်. အဂ့ၢ်ဒ်အံၤ, ကုၢ်မုၣ်အဖိခွါတဒိးန့ၢ်ဃုာ် တၢ်ဟ့ၣ်သါဒီးပှၤသဘျ့မုၣ်အဖိခွါဘၣ်.+ ၁မိၤ. ၂၁း၉|Gen.21.9―

³¹ မၤသးဒ်န့ၣ်ဒီး, ပုၢ်သ့ၣ်ဝဲၢ်သ့ၣ်ဧၢ, ပတမ့ၢ်ဘၣ်ကုၢ်မုၣ်အ ဖိဘၣ်, မ့ၢ်ပှၤသဘျ့မုၣ်အဖိလီၤ.

၅

¹ မၤသးဒ်န့ၣ်ဒီး, အိၣ်ဂၢၢ်ဆိးကျၢၤလၢတၢ်ထူၣ်ဖျဲးအ ပူၤလၢခရံာ်မၤထူၣ်ဖျဲးပှၤန့ၣ်တက့ၢ်. ဒီးသုတဘၣ်တၢ် ဖီၣ်ဃာ်ကဒီးသုလၢ ကုၢ်အနီၣ်ယိးဘိအဖီလာ်တဂ့ၤ.― ² ကွၢ်ကွၢ်, ယၤစီၤပီလူးစံးဘၣ်သု, သုမ့ၢ်ဒိးတၢ်ကူးတရံးဒီး, ခရံာ်တဂိာ်တသီၣ်ဘၣ်တၢ်လၢသုဂီၢ်နီတမံၤဘၣ်.―

³ ဒီးယအုၣ်ကဒီးယသးလၢ ကယဲၢ်ပှၤဒိးတၢ်ကူးတရံးတ ဂၤလၢ်လၢ်, အကမၢ်အိၣ်ဝဲလၢအဘၣ်တိၢ်န့ၢ်တၢ်သိၣ် တၢ်သီခဲလၢာ်လီၤ. ⁴ ဖဲဒၣ်ပှၤလၢအဘၣ်တၢ်ပာ်တီပာ် လိၤလၢတၢ်သိၣ်တၢ်သီသုဝဲသ့ၣ်အံၤ, သုလီၤမုၢ်လီၤဖး ဒီးခရံာ်, ဒီးသုလီၤတဲာ်ကွံာ်လၢ တၢ်ဘျုးတၢ်ဖှိၣ်အပူၤ လံ. ⁵ အဂ့ၢ်ဒ်အံၤ, ပဝဲဒၣ်အံၤလၢသးန့ၣ်ပအိၣ်ခိးတၢ်မုၢ် လၢ်ဘၣ်ဃးဒီးတၢ်တီတၢ်လိၤလၢတၢ်နာ်လီၤ. ⁶ အဂ့ၢ်ဒ် အံၤ, လၢယ့ၣ်ရှူးခရံာ်အပူၤန့ၣ်, တၢ်ကူးတရံးမ့ၢ်ဂ့ၤ, တၢ် တကူးတရံးမ့ၢ်ဂ့ၤ, တဂိာ်တသီၣ်ဘၣ်တၢ်ဘၣ်. မ့ၢ်တၢ် စူၢ်တၢ်နာ်လၢအမၤတၢ်လၢတၢ်အဲၣ်တၢ်ကွံလီၤ.

⁷ သုဃ့ၢ်တ့ၢ်ကစီဒီလီၤ. မ့ၢ်မတၤတြီသုဒ်သိးသုသုတ စူၢ်ဘၣ်တၢ်မ့ၢ်တၢ်တီတဂ့ၤန့ၣ်တဂၤလဲၣ်. ⁸ တၢ်လွဲအံၤ တဟဲဘၣ်လၢပှၤလၢအကိးက့ၤသုဘၣ်. ⁹ ကိၣ်မံၤတစဲး ဖိ, မၤဖးထီၣ်တၢ်ဒီဖျၢၣ်ညါလီၤ. ¹⁰ ယနာ်တၢ်လၢကစၢ် အပူၤလၢသုဂ့ၢ်, လၢသုသးတလီၤဆီဘၣ်လီၤ. ဒီးပှၤမ တၤတဂၤမတၤတဂၤလၢ အမၤတံာ်တာ်သုန့ၣ်ကဘၣ် တၢ်စံၣ်ညီၣ်အီၤလီၤ. ¹¹ ပုၢ်သ့ၣ်ဝဲၢ်သ့ၣ်ဧၢယဲဒၣ်အံၤ, ယ မ့ၢ်စံၣ်တဲၤတဲလီၤဒံးတၢ်ဒိးတၢ်ကူးတရံးအဂ့ၢ်ဒီး, ဘၣ်မ နုၤလၢယဘၣ်ဒံးတၢ်မၤအၢမၤသီယၤလဲၣ်. မ့မ့ၢ်ဒ်န့ၣ်ဒီး တၢ်ဘၣ်တိၢ်ဘၣ်ဃးဒီးထူၣ်စုညါန့ၣ်, ဟါမၢ်ကွံာ်လံ လီၤ. ¹² ပှၤလၢအမၤတံာ်တာ်သုတဖၣ်န့ၣ်, ဂ့ၤဘၣ်တၢ် ဒီၣ်တဲာ်ကွံာ်အီၤလီၤ.

¹³ အဂ့ၢ်ဒ်အံၤ, ပုၢ်သ့ၣ်ဝဲၢ်သ့ၣ်ဧၢ, တၢ်ကိးက့ၤသုဆူတၢ် ထူၣ်ဖျဲးအပူၤလီၤ. ထဲတၢ်အံၤ, သုတမၤသုတၢ်ထူၣ်ဖျဲး န့ၣ်, လၢတၢ်ဒုးအိၣ်ထီၣ်ပဖံးပညၣ်အလီၢ်တဂ့ၤ. မ့မ့ၢ် လၢတၢ်အဲၣ်တၢ်ကွံန့ၣ်မၤစၢၤလိာ်သုသးတက့ၢ်. ¹⁴ အဂ့ၢ် ဒ်အံၤ, တၢ်သိၣ်တၢ်သီခဲလၢာ် လၢထီၣ်ပှဲၤထီၣ်လၢတၢ် ကတိၤတဘီအံၤ, ပှၤအိၣ်လၢနဃၢၤန့ၣ်, အဲၣ်အီၤဒ်နအဲၣ် လီၤနသးအသိးန့ၣ်တက့ၢ်. ¹⁵ ဒီးသုမ့ၢ်အ့ၣ်လိာ်သုသး, ဒီးအီၣ်လိာ်သုသးဒီး, ပလီၢ်သုသးလၢသုသုတမၤဟး ဂီၤလိာ်သုသးတဂ့ၤန့ၣ်တက့ၢ်.

¹⁶ ဘၣ်ဆၣ်ဒီးယစံးယဲ, လဲၤတၢ်လၢသးအပူၤတက့ၢ်. ဒီးသုညၣ်အသးကွံတၢ်န့ၣ်, သုတမၤလၢထီၣ်ပှဲၤထီၣ်တ ဂ့ၤ. ¹⁷ အဂ့ၢ်ဒ်အံၤ, တၢ်ညၣ်အသးကွံတၢ်န့ၣ်ထီဒါသး န့ၣ်, ဒီးသးအသးကွံတၢ်န့ၣ်ထီဒါတၢ်ညၣ်န့ၣ်လီၤ. ဒီး တၢ်တဖၣ်န့ၣ်ထီဒါလိာ်အသးအဃိဒီး, တၢ်လၢသုတ ဆၢမၤဘၣ်န့ၣ်သုမၤလီၤ. ¹⁸ ဘၣ်ဆၣ်ဒီးသးန့ၣ်မ့ၢ်ဆှၢ သုဒီး, သုတအိၣ်ဘၣ်လၢတၢ်သိၣ်တၢ်သီအဖီလာ်ဘၣ်.

¹⁹ ဒီးတၢ်မၤဘၣ်ဃးဒီးပဖံးပညၣ်တဖၣ်, အိၣ်ဖျါဝဲလီၤ. မ့ၢ်အအံၤ, တၢ်မၤကမၣ်မုၣ်ကမၣ်ခွါ, တၢ်အဲၣ်တလ့ၤ အဲၣ်တဘီ, ²⁰ တၢ်သးကတၢ, တၢ်ဘါတၢ်ဂီၤ, တၢ်ဟိၣ် တၢ်ယီ, တၢ်ထီဒုၣ်ထီဒါ, တၢ်အ့ၣ်လိာ်ဆိးက့လိာ်, တၢ် ခိးထဲသိးလိာ်အသး, တၢ်သူၣ်ဒိၣ်သးဟ့, တၢ်ဂ့ၢ်လိာ်ဘှီ လိာ်, တၢ်လီၤမုၢ်လီၤဖး, တၢ်အစုတလီၤဃုာ်ဘၣ်.―

²¹ တၢ်သးကါ, တၢ်မၤသံပှၤကညီ, တၢ်အီမူၤသံး, တၢ်မၤပွဲ ဧိၤဝီဧိၤ, ဒီးတၢ်ဒ်န့ၣ်အသိးတဖၣ်န့ၣ်လီၤ. တၢ်လၢယစံး ပာ်သု, ယစံးပာ်ကဒီးသုဒ်န့ၣ်အသိး, ပှၤလၢအမၤတၢ်ဒ် န့ၣ်တဖၣ်, တန့ၢ်ဘၣ်သါယွၤအဘီအမုၢ်ဘၣ်.

²² မ့မ့ၢ်သးအတၤသၣ်န့ၣ်, မ့ၢ်တၢ်အဲၣ်တၢ်ကွံ, တၢ်သူၣ် ခုသးခု, တၢ်ဃူတၢ်ဖိး, တၢ်ဝံသးစူၤ, တၢ်သူၣ်စူၤသးစူၤ, တၢ်မၤဂ့ၤတၢ်, တၢ်စူၢ်တၢ်နာ်, ²³ တၢ်ဆီၣ်လီၤပသး, တၢ် ကီၤသူၣ်ကီၤသးသ့ၣ်တဖၣ်န့ၣ်လီၤ. တၢ်ဒ်န့ၣ်အသိးတ ဖၣ်အံၤ, တၢ်သိၣ်တၢ်သီလၢအတြီအီၤန့ၣ်, တအိၣ်ဘၣ်နီ တမံၤဘၣ်. ²⁴ ဒီးပှၤလၢအဘၣ်ဃးဒီးခရံာ်တဖၣ်န့ၣ်, ပျၤ ထီအဖံးအညၣ်အိၣ်ဒီးအသးဆၢတၢ်, ဒီးအတၢ်သးကွံ တဖၣ်, လၢထူၣ်စုညါအလိၤလီၤ. ²⁵ ပမ့ၢ်မူလၢသးန့ၣ်အ ပူၤဒီး, မ်ပလဲၤတၢ်လၢသးန့ၣ်အပူၤတက့ၢ်. ²⁶ မ်ပသုတ ဆၢပမံၤဟူသၣ်ဖျါကလီကလီ, ဒီးမၤသးထီၣ်လိာ်ပ သး, ဒီးသးကါလိာ်ပသး, တဂ့ၤ.

၆

¹ ဒီပုၢ်ဝဲၢ်သ့ၣ်ဧၢ, ပှၤကညီတဂၤဂၤ မ့ၢ်ဘၣ်တၢ်ချုးန့ၢ် အီၤလၢတၢ်လီၤကမၣ်တမံၤမံၤဒီး, သုဝဲလၢအဘၣ်ဃး ဒီးသးန့ၣ်, ဝံၣ်ဆၢထၢၣ်က့ၤအီၤအိၣ်ဒီးသုသူၣ်စူၤသးစူၤ, ဒီးကွၢ်လီၤနသးဒၣ်နဲ ဒ်သိးနသုတဘၣ်တၢ်လ့ပစီတဂ့ၤ န့ၣ်စ့ၢ်ကီးတက့ၢ်. ² ဝံလိာ်သုတၢ်ဝံတၢ်ဃၢသကိးသ ကိး, ဒီးမၤလၢထီၣ်ပှဲၤထီၣ်ခရံာ်အတၢ်သိၣ်တၢ်သီဒ်န့ၣ် အသိးတက့ၢ်. ³ အဂ့ၢ်ဒ်အံၤ, ပှၤလၢအတမ့ၢ်ဘၣ်တၢ်နီ တမံၤဘၣ်, မ့ၢ်ဆိကမိၣ်လၢအမ့ၢ်တၢ်ထဲအံၤထဲနုၤဒီးမ့ၢ် အလီလီၤအသးလီၤ. ⁴ ဘၣ်ဆၣ်ဒီးမ်ပှၤပစီကွၢ်အတၢ် မၤဒၣ်ဝဲကိးဂၤဒဲးတက့ၢ်. တုၤနုၤတစုကအိၣ်ဒီးတၢ်သး ခုလၢအကစၢ်ဒၣ်ဝဲတဂၤဃီအဂ့ၢ်, ဒီးတမ့ၢ်ဘၣ်လၢပှၤ ဂၤအဂ့ၢ်ဘၣ်. ⁵ အဂ့ၢ်ဒ်အံၤ, ပှၤဘၣ်ဝံအတၢ်ဝံဒၣ်ဝဲ, ကိး ဂၤဒဲးလီၤ.

⁶ ဒီးပှၤလၢအဘၣ်တၢ်သိၣ်လိအီၤလၢ တၢ်အကလုၢ်အ ကထါန့ၣ်, မ်အနီၤဟ့ၣ်အတၢ်ဂ့ၤတဖၣ်ခဲလၢာ်ဒီးပှၤလၢ အသိၣ်လိအီၤတဂၤန့ၣ်တက့ၢ်. ⁷ သုတလီလီၤသုသးတ ဂ့ၤ. ယွၤတတူၢ်လိာ်ဘၣ်တၢ်တရီတပါဘၣ်. ကယဲၢ်တၢ် လၢပှၤကညီဖှံဝဲတမံၤမံၤန့ၣ်, ကကူးအဝဲန့ၣ်စ့ၢ်ကီးလီၤ.

⁸ အဂ့ၢ်ဒ်အံၤ, ပှၤလၢအဖှံတၢ်ဘၣ်ဃးဒီးအညၣ်ဒၣ်ဝဲန့ၣ်, ကကူးတၢ်အုၣ်သံဘၣ်ဃးဒီးတၢ်ညၣ်န့ၣ်, ဒီးပှၤလၢအဖှံ တၢ်ဘၣ်ဃးဒီးသးန့ၣ်, ကကူးတၢ်မူလီၤထူလီၤယိာ်, ဘၣ်ဃးဒီးသးန့ၣ်လီၤ. ⁹ ပမၤတၢ်ဂ့ၤန့ၣ်, မ်ပသုတလီၤ ဘှံးလီၤတီၤတဂ့ၤ. အဂ့ၢ်ဒ်အံၤ, ပမ့ၢ်တလီၤဘှံးဘၣ်ဒီး, တုၤအမုၢ်အလါဘၣ်ဒီး, ပကကူးတၢ်န့ၣ်လီၤ. ¹⁰ မၤသးဒ် န့ၣ် ဒီးဖဲပအိၣ်ဒီးအဆၢကတီၢ်န့ၣ်, မ်ပမၤဂ့ၤတၢ်လၢပှၤ ကညီကိးဂၤဒဲးတက့ၢ်. ဘၣ်ဆၣ်ဒီးအါတက့ၢ်လၢပှၤစူၢ် က့ၤနာ်က့ၤတၢ်အဟံၣ်လီၤ.

¹¹ ယကွဲးန့ၢ်သုလၢယစုဒၣ်ယဲ, လၢလံာ်အဖျၢၣ်ဆံးဒိၣ် ဆံးဒိၣ်န့ၣ်, ကွၢ်သုဝဲတက့ၢ်.

¹² ဖဲဒၣ်ပှၤလၢအဆၢန့ၢ် အလၤကပီၤလၢတၢ်ဖံးတၢ်ညၣ် အပူၤန့ၣ်, မ့ၢ်ထဲလၢအသုတဒိးဘၣ်တၢ်မၤအၢမၤသီလၢ ခရံာ်အထူၣ်စုညါအဃိတဂ့ၤဒီး, မၢဆူၣ်သုဒိးတၢ်ကူး တရံးလီၤ. ¹³ အဂ့ၢ်ဒ်အံၤ, ပှၤလၢအဒိးတၢ်ကူးတရံးတဖၣ် န့ၣ် တတိၢ်န့ၢ်ဘၣ်တၢ်သိၣ်တၢ်သီလၢ အကစၢ်ဒၣ်ဝဲ ဘၣ်. မ့ၢ်ဒ်သိးအကပာ်အသးကဖၢလၢလၢသုဖံးသုညၣ် အဃိဒီး, မၢသုဒိးတၢ်ကူးတရံးလီၤ. ¹⁴ မ့မ့ၢ်ယဲဒၣ်အံၤ, မ့ တမ့ၢ်ဘၣ်လၢ ပကစၢ်ယ့ၣ်ရှူးခရံာ် အထူၣ်စုညါအပူၤ ဘၣ်ဒီး, မ်ယသုတပာ်ယသးကဖၢလၢလၢတၢ်နီတမံၤ တဂ့ၤ. လၢအဝဲန့ၣ်အဃိ, ဟီၣ်ခိၣ်ဘၣ်တၢ်ပျၤထီဝဲလၢ ထူၣ်စုညါအလိၤလၢယဂီၢ်, ဒီးယဘၣ်တၢ်ပျၤထီယၤလၢ ထူၣ်စုညါအလိၤလၢဟီၣ်ခိၣ်အဂီၢ်လီၤ. ¹⁵ အဂ့ၢ်ဒ်အံၤ, တၢ်လၢယ့ၣ်ရှူးခရံာ်အပူၤန့ၣ်, ဒိးတၢ်ကူးတရံးမ့ၢ်ဂ့ၤ, တ ဒိးဘၣ်တၢ်ကူးတရံးမ့ၢ်ဂ့ၤ, တမ့ၢ်ဘၣ်တၢ်ဘၣ်. မ့မ့ၢ်တၢ် တ့သီန့ၣ်မ့ၢ်တၢ်လီၤ. ¹⁶ ဖဲဒၣ်ပှၤလၢအလဲၤဝဲဒ်တၢ်ဘျၢ အံၤအသိးတဖၣ်, မ်တၢ်ဃူတၢ်ဖိးဒီး တၢ်သးကညီၤက အိၣ်လၢအလိၤ, ဒီးလၢယွၤအအံၣ်စရ့လးအလိၤတက့ၢ်.

¹⁷ တုၤအံၤဆူညါ, သုတမၤတံာ်တာ်ယၤနီတဂၤတဂ့ၤ. အဂ့ၢ်ဒ်အံၤယစိာ်တၢ်အပူၤလီၢ်တဖၣ် ဘၣ်ဃးဒီးကစၢ် ယ့ၣ်ရှူး, လၢယနီၢ်ခိအလိၤလီၤ.

¹⁸ ပုၢ်သ့ၣ်ဝဲၢ်သ့ၣ်ဧၢ, ပကစၢ်ယ့ၣ်ရှူးခရံာ်အဘျုးအဖှိၣ် န့ၣ်, မ်အအိၣ်ဒီးသုသူၣ်သုသးတက့ၢ်. အၤမ့ၣ်.