လံာ်နီၢ်အ့ၤစတၢ်.

လံာ်နီၢ်အ့ၤစတၢ်.

၁

¹ လၢစီၤအဃၤၡဝ့ရိၣ် အမုၢ်နံၤတဖၣ်န့ၣ် (အဝဲဒၣ်မ့ၢ် စီၤအဃၤၡှဝ့ရိာ် လၢအကဲစီၤပၤလၢဟံၣ်ဒူၤပၢၢ်လၢကူၤ ၡး, လၢကီၢ်တကယၤခံဆံနွံဘ့ၣ်အဖီခိၣ်လီၤ.) ² တၢ်မၤ အသးလၢမုၢ်နံၤတဖၣ်န့ၣ် တုၤစီၤပၤအဃၤၡဝ့ရိၣ်ဆ့ၣ် နီၤလၢအဘီမုၢ်အလီၢ်ပစိာ်အဖီခိၣ်န့ၣ် လၢအအိၣ်ဝဲလၢ နူၢ်ရှူၡၣ်အပူၤ ³ ဒီးလၢအကဲစီၤပၤသၢနံၣ်တနံၣ်န့ၣ်မၤဝဲ တၢ်အီၣ်တၢ်အီလၢအပဒိၣ်ဖးဒိၣ်, ဒီးအခ့အပှၤခဲလၢာ် အဂီၢ်လီၤ. ဒီးပၤရာ်ဒီးမၤဒဲအစိအကမီၤ, ပှၤအခိၣ်တဖၣ်, ကီၢ်အပဒိၣ်ဖးဒိၣ်တဖၣ်န့ၣ် အိၣ်ဝဲလၢအမဲာ်ညါလီၤ.―

⁴ တုၤနုၤတစုဒုးနဲၣ်ဝဲအဘီအမုၢ်အလၤကပီၤ, အတၢ်ထူး တၢ်တီၤ, ဒီးအကဟုအကညီၢ်အလၤကပီၤအါနံၤအါသီ, အနံၤတကယၤဃိးဆံညါလီၤ.

⁵ ဒီးတုၤမုၢ်နံၤတဖၣ်န့ၣ်ပှဲၤထီၣ်ဝံၤဒီး, စီၤပၤမၤတၢ်အီၣ် တၢ်အီလၢ ကယဲၢ်ပှၤအဂီၢ်လၢအအိၣ်ဝဲလၢ နူၢ်ရှူၡၣ်အ ပူၤ, ဒီးဒိၣ်ဒီးဆံးလၢစီၤပၤအနူၢ်အတၤသၣ်အလီၢ်အဂၢၤ ပူၤနွံနံၤလီၤ. ⁶ တၢ်ဝါ, တၢ်ဝါကၢ်ပၣ်, ဒီးတၢ်လါစၢဃာ် အသးဒီးကွီၤစ့, ဒီးထူၣ်လၢၢ်ဝါလၢပျံၤဖှီဝါကဆှၣ်, ဒီး တၢ်လုးတကုာ်အိၣ်ဝဲလီၤ. လီၢ်မံအလီၢ်န့ၣ် မ့ၢ်ထူဒီးစ့ လၢအအိၣ်ဝဲလၢတၢ်ဒါကံၣ်ဃ့ဒီးလၢၢ်ဘဟး, ဒီးလၢၢ် ဝါ, ဒီးလၢၢ်ဒၢ်, ဒီးလၢၢ်သူအဖီခိၣ်လီၤ. ⁷ ဒီးဒုးအီဝဲလၢ လီခီထူ, (လီခီန့ၣ်မ့ၢ်အလီၤဆီလိာ်အသးလီၤ.) ဒီးဘီ မုၢ်အစပံးထံအိၣ်အါအါကလဲာ် ဒ်လၢစီၤပၤအစုပူၤအ သိးန့ၣ်လီၤ.

⁸ ဒီးပှၤအီတၢ်န့ၣ်မၤသးဒ်တၢ်မၤလိာ်အသိးန့ၣ်, ပှၤတ မၤဆူၣ်ဘၣ်ပှၤနီတဂၤဘၣ်. အဂ့ၢ်ဒ်အံၤ, စီၤပၤမၤလိာ် အပဒိၣ်တဖၣ်ဒ်န့ၣ်, ဒ်သိးအကမၤဖဲဒၣ်ပှၤတဂၤအသး, ဖဲဒၣ်ပှၤတဂၤအသးစုာ်စုာ်လီၤ.

⁹ ဒီးနီၢ်ပၤမုၣ်ဝးၡတံၤမၤတၢ်အီၣ်တၢ်အီ လၢပိာ်မုၣ်အ ဂီၢ်လၢဘီမုၢ်အဟံၣ်လၢအအိၣ်ဒီး စီၤပၤအဃၤၡဝ့ရိၣ် လီၤ.

¹⁰ နွံနံၤတနံၤန့ၣ် တုၤစီၤပၤအသးမုာ်ဝဲဒီးစပံးထံဒီး, မၤ လိာ်စီၤမဟူမၣ်, စီၤဘံးစသၤ, စီၤဃၤရဘိနၤ, စီၤဘံး ကယၤ, ဒီးစီၤအဘၤကသၤ, စီၤစ့သၢ်, ဒီးစီၤကၤရကၣ်, ပှၤဒ့ဒံၣ်နွံဂၤလၢအမၤတၢ်လၢ စီၤပၤအဃၤၡဝ့ရိၣ်အမဲာ် ညါ, ¹¹ ဒ်သိးအကဟဲစိာ်နီၢ်ပၤမုၣ်ဝးၡတံၤဆူ စီၤပၤအ မဲာ်ညါအိၣ်ဒီးဘီမုၢ်အခိၣ်သလုး ဒ်သိးအကဒုးနဲၣ်ပှၤဂီၢ် မုၢ်, ဒီးပဒိၣ်ဖးဒိၣ်တဖၣ်လၢအတၢ်ဃံတၢ်လီၤလီၤ. အ ဂ့ၢ်ဒ်အံၤ, အက့ၢ်အဂီၤဂ့ၤဝဲလီၤ.

¹² ဒီးနီၢ်ပၤမုၣ်ဝးၡံတံၤဂ့ၢ်လိာ်ဝဲ, ဒီးတဟဲဘၣ်လၢစီၤပၤ အကလုၢ်လၢအပှၤဒ့ဒံၣ်အစုပူၤဘၣ်အဃိဒီး, စီၤပၤအ သးထီၣ်ဒိၣ်မး, ဒီးအသးဒိၣ်ထီၣ်ကဲၤထီၣ်လၢအပူၤလီၤ.

¹³ ဒီးစီၤပၤစံးဘၣ်ပှၤကူၣ်တၢ်သ့ လၢအသ့ၣ်ညါတၢ်အ ဆၢအကတီၢ်တဖၣ်န့ၣ်, (အဂ့ၢ်ဒ်အံၤ, စီၤပၤအလုၢ်အ လၢ်လၢကယဲၢ်ပှၤလၢအသ့တၢ်သိၣ်တၢ်သီ, ဒီးတၢ်စံၣ် ညီၣ်ခဲလၢာ်အမဲာ်ညါမ့ၢ်ဒ်န့ၣ်လီၤ. ¹⁴ ဒီးဘူးဒီးအီၤန့ၣ်မ့ၢ် စီၤကၢ်ၡၤနၤ, စီၤရှ့သၢ်, စီၤအၤဒမါသၤ, စီၤတၢ်ၡံၣ်, စီၤမ့ ရ့း, စီၤမၢ်စနၤ, စီၤမမူကၣ်သ့ၣ်တဖၣ်, ပၤရၣ်ဒီးမၤဒဲ အခိၣ်နွံဂၤလၢအထံၣ်ဘၣ်စီၤပၤအမဲာ်, ဒီးဆ့ၣ်နီၤလၢပှၤ အမဲာ်ညါလၢ ဘီမုၢ်အပူၤလီၤ.) ¹⁵ ဒ်တၢ်သိၣ်တၢ်သီအ သိးန့ၣ် မ့ၢ်နီၢ်ပၤမုၣ်ဝးၡတံၤတတိၢ်န့ၢ်ဘၣ်စီၤပၤအဃၤၡ ဝ့ရိၣ်အတၢ်မၤလိာ်လၢပှၤဒ့ဒံၣ်အစုပူၤဘၣ်သတးဒီး, ပ ကမၤအီၤလၢမနုၤတမံၤလဲၣ်.

¹⁶ ဒီးစီၤမမူကၣ်စံးဝဲလၢစီၤပၤ, ဒီးပဒိၣ်ဖးဒိၣ်တဖၣ်အ မဲာ်ညါ, နီၢ်ပၤမုၣ်ဝးၡံတံၤမၤကမၣ်ဘၣ်ထဲစီၤပၤဧိၤတမ့ၢ် ဘၣ်. မ့ၢ်စ့ၢ်ကီးပဒိၣ်ဖးဒိၣ်ခဲလၢာ်, ဒီးပှၤဂီၢ်မုၢ်ခဲလၢာ် လၢအအိၣ်ဝဲဒီး စီၤပၤအဃၤၡဝ့ရိၣ်အထံအကီၢ်ကိးဘ့ၣ် ဒဲးအပူၤလီၤ. ¹⁷ အဂ့ၢ်ဒ်အံၤ, နီၢ်ပၤမုၣ်အတၢ်မၤအံၤ က လဲၤထီၣ်လၢပှၤပိာ်မုၣ်ခဲလၢာ်အကျါ, ဒီးတုၤအနၢ်ဟူဝဲ လၢစီၤပၤအဃၤၡဝ့ရိၣ် မၤလိာ်နီၢ်ပၤမုၣ်ဝးၡတံၤလၢအ ကဟဲဆူအအိၣ်, ဒီးတဟဲဘၣ်ဝဲဘၣ်ဒီး, တပးကဲဘၣ် အဝၤလၢအမဲာ်ညါဘၣ်. ¹⁸ တၢ်လၢမုၢ်မဆါတနံၤအံၤပၤ ရၣ်ဒီးမၤဒဲ ပဒိၣ်မုၣ်တဖၣ်လၢအနၢ်ဟူ နီၢ်ပၤမုၣ်အတၢ် မၤန့ၣ်ကကတိၤတၢ်ဒီး စီၤပၤအပဒိၣ်ဖးဒိၣ်ခဲလၢာ်ဒ်န့ၣ် လီၤ. ဒီးတၢ်မၤတရီတပါ, ဒီးတၢ်သးဒိၣ်ထီၣ်ကအါထီၣ် ဝဲလီၤ.

¹⁹ မ့ၢ်ဂ့ၤဒီးစီၤပၤဒီး, မ်ဘီမုၢ်အတၢ်မၤလိာ်လဲၤထီၣ်လၢ စီၤပၤအအိၣ်, ဒီးမ်အဘၣ်ကွဲးအသးလၢပှၤပၤရၣ်ဖိ, ဒီး ပှၤမၤဒဲဖိအတၢ်သိၣ်တၢ်သီအကျါ, ဒ်သိးအသုတကဒံ ကဒါတဂ့ၤ, လၢနီၢ်ဝးၡတံၤတဟဲလၢၤဘၣ်ဆူစီၤပၤအ ဃၤၡဝ့ရိၣ်အမဲာ်ညါဘၣ်. ဒီးမ်စီၤပၤဟ့ၣ်လီၤအဘီမုၢ် အလီၢ်လၢပှၤဂၤလၢအဂ့ၤန့ၢ်အီၤတက့ၢ်န့ၣ်တက့ၢ်. ²⁰ ဒီး တုၤပှၤနၢ်ဟူစီၤပၤအတၢ်မၤလိာ်လၢ အကမၤလိာ်ဝဲလၢ အဘီမုၢ် ဒီဘ့ၣ်ညါအပူၤဒီး, (အဂ့ၢ်ဒ်အံၤ, ဒိၣ်နီၢ်မး လီၤ.) ပှၤအဖိအမါခဲလၢာ် ကမၤလၤကပီၤအဝၤဒီးဒိၣ် ဒီးဆံးလီၤ.

²¹ ဒီးတၢ်ကတိၤန့ၣ် ဂ့ၤဝဲလၢစီၤပၤဒီး ပဒိၣ်ဖးဒိၣ်တဖၣ် အမဲာ်, ဒီးစီၤပၤမၤဝဲဒ်စီၤမမူကၣ် အတၢ်ကတိၤအသိး န့ၣ်လီၤ.

²² ဒီးဟ့ၣ်ယုၢ်လံာ်လၢ စီၤပၤအထံအကီၢ်ခဲလၢာ်အပူၤ ဆူကီၢ်တဘ့ၣ်ဘၣ်တဘ့ၣ်အပူၤ, ဒ်တၢ်ကွဲးအသးအသိး န့ၣ်, ဒီးလၢပှၤအကလုာ်ကလုာ်ဒ်အတၢ်ကတိၤအကျိာ် အသိး, ဒ်သိးပှၤပိာ်ခွါကကဲဒိၣ် လၢအဟံၣ်ဒၣ်ဝဲအပူၤ ကိးဂၤဒဲး, ဒီးဒ်သိးအကဒုးဟူထီၣ်သါလီၤဝဲ ဒ်အပှၤတ ကလုာ်ဒၣ်ဝဲအကျိာ်အသိးန့ၣ်လီၤ.

၂

¹ တၢ်န့ၣ်တဖၣ်အလီၢ်ခံ တုၤစီၤပၤအဃၤၡဝ့ရိၣ်အသး ထီၣ်စၢ်လီၤဝဲဒီး, သ့ၣ်နီၣ်ထီၣ်က့ၤဝဲလၢနီၢ်ဝးၡတံၤ, ဒီး တၢ်လၢအဝဲဒၣ်မၤဝဲ, ဒီးတၢ်လၢအစံၣ်ညီၣ် လၢအလိၤ လီၤ.

² ဒီးစီၤပၤအခ့အပှၤတဖၣ် လၢအမၤအတၢ်စံးဘၣ်အီၤ, မ်ပှၤဃုန့ၢ်စီၤပၤလၢဖိသၣ်ပိာ်မုၣ်, ပှၤမုၣ်လိၣ်ဘိလၢအ က့ၢ်အဂီၤဂ့ၤတဖၣ်န့ၣ်တက့ၢ်. ³ ဒီးမ်စီၤပၤပာ်ပဒိၣ်တဖၣ် လၢအဘီအမုၢ်အထံအကီၢ်ကိးဘ့ၣ်ဒဲးအပူၤ ဒ်သိးအက ဒုးအိၣ်ဖှိၣ်ဖိသၣ်ပိာ်မုၣ်, ပှၤမုၣ်လိၣ်ဘိလၢအက့ၢ်အဂီၤ ဂ့ၤခဲလၢာ်လၢနူၢ်ရှူၡၣ်, လၢပိာ်မုၣ်အဟံၣ်ပူၤဆူစီၤပၤအ ပှၤဒ့ဒံၣ်စီၤဟ့က့ၤအစုပူၤ, လၢအပၢၤပိာ်မုၣ်ပိာ်မၢၤ, ဒီးမ် ပှၤဟ့ၣ်ပိာ်မုၣ်လၢသိနၢမူတဖၣ်, ⁴ ဒီးမ်ဖိသၣ်ပိာ်မုၣ်လၢ အဂ့ၤလၢစီၤပၤအမဲာ်တဂၤကဲထီၣ် နီၢ်ပၤမုၣ်လၢနီၢ်ဝးၡ တံၤအလီၢ်တက့ၢ်. ဒီးတၢ်တမံၤန့ၣ်ဂ့ၤဝဲလၢစီၤပၤအမဲာ်, ဒီးမၤဝဲဒ်န့ၣ်လီၤ.

⁵ ပှၤယူဒၤဖိတဂၤအိၣ်ဝဲလၢနူၢ်ရှူၡၣ်အပူၤ, ဒီးအမံၤမ့ၢ် စီၤမၢ်ဒကဲၤ, စီၤယၤအံၢ်အဖိခွါ, စီၤၡံမံၤအဖိခွါ, စီၤကံၣ် အဖိခွါ, ⁶ ပှၤဘံၣ်ယၤမံၣ်ဖိလၢပှၤစိာ်ထီၣ်ကွံာ်ဝဲလၢယ ရူၤၡလ့ၣ်ဒီးပှၤလၢတၢ်မၢကဲကုၢ်အီၤ, ဒီးပှၤစိာ်ထီၣ်ကွံာ် ဝဲဒီးယူဒၤအစီၤပၤယံးကၤနံယၤ, လၢဘၤဘူၤလိၣ်အစီၤ ပၤနဘူၤကးန့စၢ်စိာ်မၢကဲကုၢ်အီၤလီၤ.

⁷ ဒီးအဝဲဒၣ်န့ၣ် လုၢ်အီၣ်လုၢ်အီနီၢ်ဟဒးစၤ (အဝဲဒၣ် မ့ၢ်နီၢ်အ့ၤစတၢ်), အဖါတံၢ်အဖိမုၣ်လီၤ. အဂ့ၢ်ဒ်အံၤ, အ မိၢ်ဒီးအပၢ်တအိၣ်လၢၤဘၣ်. ဒီးဖိသၣ်ပိာ်မုၣ်အက့ၢ်အ ဂီၤဂ့ၤ, အိၣ်ဒီးအဃံအလၤလီၤ. ဒီးတုၤအမိၢ်အပၢ်သံဝဲ ဒီး, စီၤမၢ်ဒကဲၤဟံးန့ၢ်အီၤ, ဒီးပာ်အီၤလၢအဖိမုၣ်ဒၣ်ဝဲ အလီၢ်န့ၣ်လီၤ. ⁸ ဒီးတုၤစီၤပၤအတၢ်မၤလိာ်, ဒီးအတၢ် စံၣ်ညီၣ်ဟူထီၣ်ဝဲ, ဒီးတုၤဖိသၣ်ပိာ်မုၣ်အိၣ်ဖှိၣ်ရိဖှိၣ်လၢ နူၢ်ရှူၡၣ်အပူၤ လၢစီၤဟ့က့ၤအစုပူၤဒီး, ပှၤဟဲစိာ်စ့ၢ်ကီး နီၢ်အ့ၤစတၢ် ဆူစီၤပၤအဟံၣ်ပူၤ, ဆူပှၤပၢၤပိာ်မုၣ်စီၤဟ့ က့ၤအစုပူၤလီၤ.

⁹ ဒီးဖိသၣ်ပိာ်မုၣ်တဂၤန့ၣ် ဂ့ၤဝဲလၢအမဲာ်, ဒီးဘၣ်ဘျုး ဘၣ်ဖှိၣ်လၢအမဲာ်ညါ, ဒီးဟ့ၣ်လီၤဝဲချ့ချ့လၢသိနၢမူတ ဖၣ်, ဒီးအဂီၢ်တဖၣ်, ဒီးအဖိသၣ်ပိာ်မုၣ်နွံဂၤလၢတၢ်ဃု ထၢအီၤလၢစီၤပၤအဟံၣ်ပူၤ, ဒီးပာ်အီၤဒီး အဖိသၣ်ပိာ် မုၣ်တဖၣ်လၢတၢ်အလီၢ်အဂ့ၤကတၢၢ်လၢ ပိာ်မုၣ်အဟံၣ် ပူၤလီၤ.

¹⁰ နီၢ်အ့ၤစတၢ် တဒုးနဲၣ်ဘၣ်အပှၤတကလုာ်ဒီး အဘူး အတံၢ်ဘၣ်. အဂ့ၢ်ဒ်အံၤ, စီၤမၢ်ဒကဲၤမၤလိာ်အီၤဒ်သိး အသုတဒုးနဲၣ်ဝဲတဂ့ၤလီၤ.

¹¹ ဒီးစီၤမၢ်ဒကဲၤဟးဝ့ၤဝီၤတၢ်လၢ ပိာ်မုၣ်အဟံၣ်အဂၢၤ အမဲာ်ညါကိးမုၢ်နံၤမုၢ်နၤဒဲး, နီၢ်အ့ၤစတၢ်အိၣ်မုာ်ဧါတ အိၣ်မုာ်ဧါန့ၣ်, တၢ်ကမၤအသးဒီးအီၤမနုၤမနုၤလဲၣ်န့ၣ် ဒ်သိးအကသ့ၣ်ညါလီၤ.

¹² ဒီးဒ်တၢ်မၤလိာ်ပိာ်မုၣ်အသိး, လၢအအိၣ်တ့ၢ်တဆံခံ လါအလီၢ်ခံန့ၣ်, တုၤဖိသၣ်ပိာ်မုၣ်တဂၤတသါတဂၤတ သါကလဲၤနုာ်လၢ စီၤပၤအဃၤၡဝ့ရိၣ်အအိၣ်န့ၣ် အမုၢ် အလါဘၣ်စုာ်စုာ်ဒီး, (အဂ့ၢ်ဒ်အံၤ, အတၢ်မၤကဆှီအ မုၢ်နံၤတဖၣ်လၢထီၣ်ပှဲၤထီၣ်ဒ်အံၤ, ဃုလါအိၣ်ဒီးမူရၣ် အသိး, ဒီးဃုလါအိၣ်ဒီးတၢ်နၢမူ, ဒီးပိာ်မုၣ်အသိနၢမူ တဖၣ်လီၤ), ¹³ ဖိသၣ်ပိာ်မုၣ်ဟဲနုာ်လၢစီၤပၤအအိၣ်ဒ်န့ၣ် အသိးလီၤ. တုၤအကဟးထီၣ်လၢပိာ်မုၣ်အဟံၣ်ဆူ စီၤ ပၤအဟံၣ်ပူၤဒီး, ကယဲၢ်တၢ်လၢအဘၣ်အသး ပှၤဟ့ၣ် ဝဲလီၤ.

¹⁴ လဲၤနုာ်ဝဲလၢမုၢ်ဟါ, ဒီးလၢမုၢ်ဆ့ၣ်ထီၣ်တနံၤန့ၣ်က့ၤ က့ၤဝဲဆူပိာ်မုၣ်အဟံၣ်ခံဟံၣ်တဟံၣ်, ဆူစီၤပၤအပှၤဒ့ ဒံၣ် စီၤၡၤၡကးအစုပူၤလၢအပၢၤ ပှၤသံၣ်မါတဖၣ်လီၤ. ဒီးစီၤပၤမ့ၢ်တဘၣ်အသးလၢအီၤ, ဒီးတၢ်မ့ၢ်တကိးဘၣ် အီၤလၢအမံၤဘၣ်ဒီး, တဟဲနုာ်လၢၤဘၣ်ဆူ စီၤပၤအ အိၣ်ဘၣ်.

¹⁵ ဒီးတုၤစီၤမၢ်ဒကဲၤ အဖါတံၢ်စီၤအဘံဃယ့းလး အဖိ မုၣ်လၢစီၤမၢ်ဒကဲၤပာ်ဝဲလၢ အဖိမုၣ်ဒၣ်ဝဲတဂၤ ကလဲၤ နုာ်ဆူစီၤပၤအအိၣ်န့ၣ်အမုၢ်အလါဘၣ်ဝဲဒီး, တၢ်လၢပှၤ ပၢၤပိာ်မုၣ်စီၤပၤအပှၤဒ့ဒံၣ်စီၤဟ့က့ၤတဂၤ ပာ်လီၤဝဲအ မဲာ်ညါန့ၣ်တဃ့ဘၣ်တၢ်ဘၣ်. ဒီးနီၢ်အ့ၤစတၢ်ဘၣ်ဘျုး ဘၣ်ဖှိၣ်လၢကယဲၢ်ပှၤလၢအကွၢ်အီၤခဲလၢာ်အမဲာ်လီၤ.

¹⁶ ဒီးပှၤစိာ်နီၢ်အ့ၤစတၢ်ဆူ စီၤပၤအဃၤၡဝ့ရိၣ်အအိၣ် လၢဘီမုၢ်အဟံၣ်, လၢလါဆံဆဲၣ်လါတလါ, လါတ့ ဘ့းအပူၤ, လၢအကဲစီၤပၤနွံနံၣ်တနံၣ်န့ၣ်လီၤ.

¹⁷ ဒီးစီၤပၤအဲၣ်နီၢ်အ့ၤစတၢ်ဒိၣ်န့ၢ် ပိာ်မုၣ်ခဲလၢာ်တက့ၢ်, ဒီးအဘၣ်ဘျုးဘၣ်ဖှိၣ်, ဘၣ်ကူၢ်ဘၣ်တနာ်ဝဲဒၣ်လၢအ မဲာ်ညါဒိၣ်န့ၢ် ပှၤမုၣ်လိၣ်ဘိခဲလၢာ်တက့ၢ်, ဒီးပာ်ဘီမုၢ် အခိၣ်သလုးလၢအခိၣ်, ဒီးပာ်အီၤလၢနီၢ်ပၤမုၣ်လၢနီၢ်ဝး ၡတံၤအလီၢ်န့ၣ်လီၤ.

¹⁸ အန့ၣ်ဒီးစီၤပၤမၤတၢ်အီၣ်တၢ်အီဖးဒိၣ်လၢ အပဒိၣ်ဖး ဒိၣ်, ဒီးအခ့အပှၤခဲလၢာ်အဂီၢ်လၢအမ့ၢ်နီၢ်အ့ၤစတၢ်အ တၢ်အီၣ်တၢ်အီ, ဒီးပျၢ်တၢ်လၢကီၢ်တဖၣ်အပူၤ, ဒီးဟ့ၣ် လီၤတၢ်ဟ့ၣ်တဖၣ်ဒ်တၢ်အိၣ်လၢ စီၤပၤအစုပူၤအသိးန့ၣ် လီၤ.

¹⁹ ဒီးတုၤပှၤမုၣ်လိၣ်ဘိ အိၣ်ဖှိၣ်ရိဖှိၣ်ခံဘျီတဘျီန့ၣ်ဒီး, စီၤမၢ်ဒကဲၤဆ့ၣ်နီၤလၢစီၤပၤအပဲတရီပူၤန့ၣ်လီၤ.

²⁰ နီၢ်အ့ၤစတၢ်တဒုးနဲၣ်ဒံးဘၣ်အဘူးအတံၢ်, ဒီးအပှၤတ ကလုာ်ဘၣ်, ဒ်စီၤမၢ်ဒကဲၤမၤလိာ်အီၤအသိးန့ၣ်လီၤ. အ ဂ့ၢ်ဒ်အံၤ, နီၢ်အ့ၤစတၢ်တိၢ်န့ၢ်စီၤမၢ်ဒကဲၤအတၢ်မၤလိာ်ဒ် လၢတၢ်လုၢ်အီၤလၢ အအိၣ်အဆၢအကတီၢ် အသိးန့ၣ် လီၤ.

²¹ တၢ်လၢမုၢ်နံၤတဖၣ်န့ၣ် ဖဲစီၤမၢ်ဒကဲၤဆ့ၣ်နီၤလၢစီၤပၤ အပဲတရီအဖၢမုၢ်န့ၣ်, စီၤပၤအပှၤဒ့ဒံၣ်ခံဂၤ လၢပှၤပၢၤ တြဲၤအကျါန့ၣ်, စီၤဘံးကသၣ်, ဒီးစီၤတ့ရ့ၣ်အသးထီၣ်, ဒီးဃုပာ်အစုလၢစီၤပၤအဃၤၡဝ့ရိၣ်အလိၤလီၤ.

²² ဒီးတၢ်န့ၣ်တမံၤ စီၤမၢ်ဒကဲၤသ့ၣ်ညါဝဲဒီး, စံးဘၣ်တဲ ဘၣ်နီၢ်ပၤမုၣ်အ့ၤစတၢ်, ဒီးနီၢ်အ့ၤစတၢ်န့ၣ် စံးဘၣ်တဲ ဘၣ်စီၤပၤလၢ စီၤမၢ်ဒကဲၤအမံၤလီၤ. ²³ ဒီးတုၤပှၤဃုတၢ် လၢတၢ်န့ၣ်တမံၤအဂ့ၢ်အကျိၤ, ဒီးထံၣ်န့ၢ်ဝဲဒီး, ပှၤဘျး ထီၣ်အီၤလၢသ့ၣ်အလိၤခံဂၤလၢာ်, ဒီးကွဲးတၢ်လၢအဂ့ၢ် အကျိၤလၢ လံာ်ကွဲးနီၣ်တၢ်အပူၤ လၢစီၤပၤအမဲာ်ညါ လီၤ.

၃

¹ တၢ်န့ၣ်တဖၣ်အလီၢ်ခံ စီၤပၤအဃၤၡဝ့ရိၣ်ပာ်ဒိၣ်ပာ် ထီပှၤအကၤကးဖိ စီၤဟးမဒၤသၤအဖိခွါစီၤဟၤမၣ်, ဒီး ပာ်ထီၣ်ထီအီၤ, ဒီးပာ်အလီၢ်ဆ့ၣ်နီၤလၢပဒိၣ်ဖးဒိၣ်လၢ အအိၣ်ဒီးအီၤခဲလၢာ်အဖီခိၣ်လီၤ.

² ဒီးကယဲၢ်စီၤပၤအခ့အပှၤ လၢအအိၣ်ဝဲလၢ စီၤပၤအ ပဲတရီအပူၤခဲလၢာ်န့ၣ် သကူးလီၤအသးဒီးတီၤလီၤကဒွံ ကျိာ်, လၢစီၤဟၤမၣ်အမဲာ်ညါလီၤ. အဂ့ၢ်ဒ်အံၤ, စီၤပၤ မၤလိာ်တၢ်ဒ်န့ၣ်လၢအဂ့ၢ်အကျိၤလီၤ. မ့မ့ၢ်စီၤမၢ်ဒကဲၤ န့ၣ်တသကူးလီၤအသးဘၣ်, ဒီးတတီၤလီၤကဒွံကျိာ်လၢ အမဲာ်ညါဘၣ်.

³ ဒီးစီၤပၤအခ့အပှၤ လၢအအိၣ်ဝဲလၢစီၤပၤအပဲတရီအ ပူၤတဖၣ်စံးဘၣ်စီၤမၢ်ဒကဲၤ, နလုၣ်သ့ၣ်ခါပတာ်စီၤပၤ အတၢ်မၤလိာ်န့ၣ်မ့ၢ်အဘၣ်မနုၤလဲၣ်. ⁴ ဒီးတုၤအစံးဘၣ် အီၤတနံၤဘၣ်တနံၤ, ဒီးအဝဲဒၣ်တကနၣ်အကလုၢ်ဘၣ် ဒီး, တၢ်မၤအသးလၢအစံးဘၣ်စီၤဟၤမၣ်ဒ်သိး စီၤမၢ်ဒ ကဲၤအတၢ်န့ၣ် တအိၣ်ကျၢၤဧါကအိၣ်ကျၢၤလဲၣ်န့ၣ် က ထံၣ်ဘၣ်ဝဲလီၤ. အဂ့ၢ်ဒ်အံၤ, အဝဲဒၣ်စံးဘၣ်တ့ၢ်အဝဲ သ့ၣ်လၢအမ့ၢ်ပှၤယူဒၤဖိလီၤ.

⁵ ဒီးတုၤစီၤဟၤမၣ်ထံၣ်ဘၣ်ဝဲလၢ စီၤမၢ်ဒကဲၤတသကူး လီၤအသးဘၣ်, ဒီးတတီၤလီၤကဒွံကျိာ်ဘၣ်လၢအမဲာ် ညါဘၣ်ဒီး, စီၤဟၤမၣ်အသးထီၣ်ပှဲၤဆၢၣ်ကလာ်လီၤ.

⁶ ဒီးပာ်အစုထဲလၢစီၤမၢ်ဒကဲၤတဂၤဧိၤအလိၤန့ၣ် တပး ကဲဘၣ်ဝဲဘၣ်. အဂ့ၢ်ဒ်အံၤ, ပှၤဒုးနဲၣ်အီၤလၢစီၤမၢ်ဒကဲၤ အပှၤတကလုာ်န့ၣ်လီၤ. ဒီးစီၤဟၤမၣ်ဃုမၤသံကယဲၢ်ပှၤ ယူဒၤဖိလၢအအိၣ်ဝဲလၢ စီၤအဃၤၡဝ့ရိၣ် အဘီအမုၢ်ဒီ ဘ့ၣ်ညါအပူၤခဲလၢာ်, စီၤမၢ်ဒကဲၤ အပှၤတကလုာ်န့ၣ် လီၤ.

⁷ လၢလါခီၣ်ထံးတလါ (အဝဲန့ၣ်မ့ၢ်လါနံစၣ်) လၢစီၤ ပၤအဃၤၡဝ့ရိၣ်အနံၣ်တဆံခံနံၣ်န့ၣ်ပှၤတ့ၢ်လီၤပူရး, ဒ် ပစံးတၢ်အသိး, ဖးတၢ်လၢစီၤဟၤမၣ်အမဲာ်ညါတနံၤဘၣ် တနံၤ, ဒီးတလါဘၣ်တလါတုၤလီၤလၢလါတဆံခံလါ တလါလၢအမ့ၢ်လါအးဒၢ်လီၤ.

⁸ ဒီးစီၤဟၤမၣ်စံးဘၣ် စီၤပၤအဃၤၡဝ့ရိၣ်, ပှၤတက လုာ်လီၤမုၢ်လီၤဖး, ဒီးအိၣ်ပြံပြါလၢပှၤဂီၢ်မုၢ်အကျါလၢန ဘီမုၢ်အကီၢ်ခဲလၢာ်အပူၤ, ဒီးအတၢ်သိၣ်တၢ်သီန့ၣ်လီၤ ဆီဒီးပှၤကလုာ်ခဲလၢာ်အတၢ်သိၣ်တၢ်သီ, ဒီးတတိၢ်န့ၢ် ဘၣ်စီၤပၤအတၢ်သိၣ်တၢ်သီဘၣ်, ဒီးစီၤပၤတကြၢးဒုးအိၣ် ဘှံးအီၤဘၣ်. ⁹ မ့ၢ်ဂ့ၤဒီးစီၤပၤဒီး, မ်တၢ်ကွဲးအသးလၢ အကဘၣ်တၢ်မၤဟးဂီၤအီၤတက့ၢ်. ဒီးယကဟ့ၣ်စ့အ ကံကၢ်တကလးလၢပှၤလၢ အမၤတၢ်အံၤတဖၣ်အစုပူၤဒ် သိးအကဟဲစိာ်ဝဲဆူစီၤပၤအတၢ်ပာ်ဖှိၣ်အလီၢ်န့ၣ်လီၤ.

¹⁰ ဒီးစီၤပၤဘ့ၣ်ထီၣ်အပသံးလၢအစု, ဒီးဟ့ၣ်လီၤဝဲလၢ ပှၤအကၤကးဖိ, စီၤဟးမဒၤသၤအဖိခွါစီၤဟၤမၣ်, ပှၤ ယူဒၤဖိအဒုၣ်အဒါလီၤ.

¹¹ ဒီးစီၤပၤစံးဝဲဒၣ်, စ့န့ၣ်တၢ်ဟ့ၣ်လီၤလံနၤ, ဒီးပှၤတ ကလုာ်စ့ၢ်ကီးဒ်သိးနကမၤအီၤဒ်အဂ့ၤလၢနမဲာ်လီၤ.

¹² ဒီးလၢလါခီၣ်ထံးတလါထီၣ် တဆံသၢနံၤတနံၤန့ၣ်, ပှၤကိးန့ၢ်စီၤပၤအပှၤကွဲးလံာ်, ဒီးတၢ်ကွဲးအသးဒ်ကယဲၢ် တၢ်လၢစီၤဟၤမၣ်မၤလိာ် စီၤပၤအပဒိၣ်ဖးဒိၣ်, ဒီးပဒိၣ် လၢအအိၣ်ဝဲလၢကီၢ်တဘ့ၣ်တဘ့ၣ်အဖီခိၣ်, ဒီးလၢကီၢ် တဘ့ၣ် အပှၤဂီၢ်မုၢ်အပဒိၣ်ဖးဒိၣ်စုာ်စုာ်, ဒ်တၢ်ကွဲးအ သးအသိးန့ၣ် လၢပှၤတကလုာ်အတၢ်ကတိၤအကျိာ်, လၢပှၤတကလုာ်အတၢ်ကတိၤအကျိာ်လီၤ. ကွဲးအသး လၢစီၤပၤအဃၤၡဝ့ရိၣ်အမံၤ, ဒီးပှၤစဲဃာ်ဝဲလၢစီၤပၤအ တၢ်စဲဃၣ်ပနီၣ်န့ၣ်လီၤ.

¹³ ဒီးပှၤဟ့ၣ်ယုၢ်လံာ်လၢ ပှၤဃ့ၢ်တၢ်ဖိတဖၣ်အစုပူၤဆူ စီၤပၤအကီၢ်ခဲလၢာ်အပူၤ, ဒ်သိးပှၤကမၤဟးဂီၤ, ဒီးမၤ သံ, ဒီးမၤလၢာ်ပှၤယူဒၤဖိခဲလၢာ်ဒီးဒိၣ်ဒီးဆံး, ဒီးဖိဒံဖိ သၣ်, ဒီးပိာ်မုၣ်ပိာ်မၢၤလၢမုၢ်တနံၤဃီ, (အဝဲန့ၣ်မ့ၢ်လါ အးဒၢ်,) ဒီးဒ်သိးအကဂုာ်န့ၢ်အတၢ်ဖိတၢ်လံၤလီၤ.

¹⁴ လံာ်ကွဲးဆဲတၢ်တဘ့ၣ်န့ၣ် ဘၣ်ဟ့ၣ်ဝဲလၢ ကီၢ်ကိး ဘ့ၣ်ဒဲးအပူၤလၢတၢ်မၤလိာ်အဂီၢ်, ဒီးဘၣ်ဒုးနဲၣ်ဝဲလၢပှၤ တကလုာ်လၢ်လၢ် ဒ်သိးအကအိၣ်ကတဲာ်ကတီၤအသး လၢမုၢ်တနံၤန့ၣ်လီၤ.

¹⁵ စီၤပၤအတၢ်မၤလိာ်ဒုးမၤတၢ်ချ့ချ့, ဒီးပှၤဃ့ၢ်တၢ်ဖိတ ဖၣ်ဟးထီၣ်ဝဲလီၤ. ဒီးတၢ်ဟ့ၣ်လီၤတၢ်မၤလိာ်န့ၣ်လၢနူၢ် ရှူၡၣ်အပူၤလီၤ. ဒီးစီၤပၤ, ဒီးစီၤဟၤမၣ်ဆ့ၣ်နီၤဝဲ, ဒ်သိးအ ကအီၣ်တၢ်လီၤ. မ့မ့ၢ်ဝ့ၢ်ရှူၡၣ်ဖိအသူၣ်ကိၢ်အသးဂီၤလီၤ.

၄

¹ ဒီးတုၤစီၤမၢ်ဒကဲၤသ့ၣ်ညါတၢ်မၤအသးခဲလၢာ်ဒီး, ဖှီ အဆ့, ဒီးသိးထၢၣ်အတၢ်ကံးညာ်အိၣ်ဒီးဖၣ်ဆါ, ဒီး လဲၤထီၣ်ဆူဝ့ၢ်အသးကံၢ်ပူၤ, ဒီးကိးပသူထီၣ်လၢအက လုၢ်ဖးဒိၣ်နးမးလီၤ.

² ဒီးဟဲဝဲဆူစီၤပၤအပဲတရီအမဲာ်ညါလီၤ. အဂ့ၢ်ဒ်အံၤ, ပှၤသိးထၢၣ်အတၢ်ကံးညာ် တဘၣ်လဲၤနုာ်ဘၣ်ဆူစီၤပၤ အပဲတရီအပူၤဘၣ်.

³ ဒီးကယဲၢ်ကီၢ်ဖဲစီၤပၤအကလုၢ်, ဒီးအတၢ်မၤလိာ်, ဟဲ ဝဲတဘ့ၣ်လၢ်လၢ်န့ၣ်တၢ်သူၣ်အုးသးအုးဖးဒိၣ်, ဒီးတၢ် ဒုၣ်တၢ်အီၣ်, ဒီးမဲာ်ထံမဲာ်နိလီၤ, ဒီးတၢ်ဟီၣ်တၢ်ယၢၤ အိၣ်ဝဲလၢပှၤယူဒၤဖိအကျါ, ဒီးပှၤအါဂၤမံဝဲလၢထၢၣ်အ တၢ်ကံးညာ်, ဒီးလၢဖၣ်ဆါအကျါလီၤ.

⁴ ဒီးနီၢ်အ့ၤစတၢ်အဖိသၣ်ပိာ်မုၣ်, ဒီးအပှၤဒ့ဒံၣ်တဖၣ် ဟဲဝဲ, ဒီးစံးဘၣ်အီၤလီၤ. ဒီးနီၢ်ပၤမုၣ်အသးအုးဒိၣ်နီၢ်မး လီၤ. ဒီးဟ့ၣ်ယုၢ်တၢ်အကူအသိး, ဒ်သိးစီၤမၢ်ဒကဲၤက ကူကသိးဝဲ, ဒီးဒ်သိးအကဘ့ၣ်ကွံာ်ထၢၣ်အတၢ်ကံးညာ် လၢအလိၤလီၤ. ဘၣ်ဆၣ်ဒီးတတူၢ်လိာ်ဘၣ်ဝဲဘၣ်.

⁵ ဒီးနီၢ်အ့ၤစတၢ်ကိးန့ၢ် စီၤဟၤတး, စီၤပၤအပှၤဒ့ဒံၣ် လၢအမၢအအိၣ်ခိးလၢအမဲာ်ညါတဂၤ, ဒီးမၢအလဲၤဆူ စီၤမၢ်ဒကဲၤအအိၣ် ဒ်သိးအကသ့ၣ်ညါလၢတၢ်အံၤမ့ၢ်မ နုၤတမံၤလဲၣ်, ဒီးမ့ၢ်အဘၣ်မနုၤလဲၣ်န့ၣ်လီၤ.

⁶ ဒီးစီၤဟၤတးန့ၣ် လဲၤထီၣ်ဆူစီၤမၢ်ဒကဲၤ အအိၣ်လၢ ဝ့ၢ်အကျဲပူၤ လၢအအိၣ်ဝဲလၢ စီၤပၤအပဲတရီအမဲာ်ညါ လီၤ.

⁷ ဒီးစီၤမၢ်ဒကဲၤစံးဘၣ်အီၤလၢ ကယဲၢ်တၢ်လၢအဘၣ် ဝဲ, ဒီးလၢစ့အတၢ်ဂံၢ်လၢစီၤဟၤမၣ် သါကဟ့ၣ်လၢစီၤ ပၤအတၢ်ပာ်ဖှိၣ်အလီၢ်, လၢပှၤယူဒၤဖိအဃိဒ်သိးပှၤက မၤဟးဂီၤအီၤလီၤ.

⁸ ဒီးလံာ်မၤလိာ်တၢ်လၢ တၢ်ဟ့ၣ်ဝဲလၢနူၢ်ရှူၡၣ်အပူၤဒ် သိးအကမၤဟးဂီၤဝဲန့ၣ်ဟ့ၣ်လီၤ အလံာ်ကွဲးဆဲတဘ့ၣ်, ဒ်သိးအကဒုးနဲၣ် နီၢ်အ့ၤစတၢ်, ဒီးစံးဘၣ်အီၤလၢအဂ့ၢ် အကျိၤ, ဒီးမၤလိာ်အီၤလၢအကလဲၤနုာ်ဆူစီၤပၤအအိၣ် ဒ်သိး အကဃ့ကညးတၢ်, ဒီးဃ့တၢ်လၢအမဲာ်ညါလၢ အပှၤဂီၢ်မုၢ်အဂီၢ်လီၤ.

⁹ ဒီးစီၤဟးတးလဲၤဝဲ, ဒီးစံးဘၣ်တဲဘၣ်နီၢ်အ့ၤစတၢ်လၢ စီၤမၢ်ဒကဲၤအတၢ်ကတိၤန့ၣ်လီၤ.

¹⁰ ဒီးနီၢ်အ့ၤစတၢ်စံးဘၣ် စီၤဟၤတး, ဒီးဟ့ၣ်လီၤအက လုၢ်ဆူစီၤမၢ်ဒကဲၤအအိၣ်, ¹¹ ဒီးစံးဝဲဒၣ်, စီၤပၤအခ့အပှၤ ခဲလၢာ်, ဒီးပှၤဂီၢ်မုၢ်လၢစီၤပၤအကီၢ်ကိးဘ့ၣ်ဒဲးအပူၤန့ၣ် သ့ၣ်ညါဝဲလၢဖဲဒၣ်ပှၤ, ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ, ပှၤ မ့ၢ်တကိးဘၣ်အီၤဒီး မ့ၢ်လဲၤနုာ်ဆူစီၤပၤအအိၣ်လၢတၢ် အဂၢၤလၢညါတဂၢၤဒီး, အတၢ်မၤလိာ်အိၣ်တထံၣ်လၢ အကဘၣ်သံလီၤ. တသံဘၣ်ထဲပှၤလၢစီၤပၤကယူာ်ထီၣ် အနီၣ်ထိးထူဆူအအိၣ်, ဒ်သိးအကမူဒံးလီၤ. ဒီးလၢအ နံၤသၢဆံအတီၢ်ပူၤအံၤ, ပှၤတကိးဘၣ်ယၤဆူ စီၤပၤအ အိၣ်ဘၣ်.

¹² ဒီးပှၤစံးဘၣ်တဲဘၣ် စီၤမၢ်ဒကဲၤလၢလနီၢ်အ့ၤစတၢ်အ တၢ်ကတိၤန့ၣ်လီၤ.

¹³ ဒီးစီၤမၢ်ဒကဲၤ မၢပှၤစံးဆၢနီၢ်အ့ၤစတၢ်, နကပူၤဖျဲး လၢစီၤပၤအဟံၣ်ပူၤ ညီန့ၢ်ပှၤယူဒၤဖိခဲလၢာ်တက့ၢ်န့ၣ် ဆိကမိၣ်လၢနသးကံၢ်ပူၤတဂ့ၤ. ¹⁴ အဂ့ၢ်ဒ်အံၤ, ဖဲအဆၢ အကတီၢ်အံၤနမ့ၢ်အိၣ်ဘှီၣ်ကလာ်သပှၢ်တၢၢ်ဒီး, တၢ်မၤ ပူၤဖျဲးတၢ်ဒီးတၢ်ပူၤဖျဲးကအိၣ်ထီၣ်လၢ ပှၤယူဒၤဖိအဂီၢ် လၢအလီၢ်တပူၤဒၣ်လီၤ. မ့မ့ၢ်နဲဒၣ်ဒီး နပၢ်အပှၤဟံၣ်ဖိ ကတုၤလၢတၢ်ဟးဂီၤလီၤ. ဒီးနဟဲထီၣ်လၢဘီမုၢ်အလီၢ် လၢအဆၢအကတီၢ်အံၤအဂီၢ်ဧါန့ၣ် မ့ၢ်မတၤသ့ၣ်ညါတ ဂၤလဲၣ်. ဒီးနီၢ်အ့ၤစတၢ်မၢပှၤစံးဆၢစီၤမၢ်ဒကဲၤ, ¹⁵ လဲၤဒုးအိၣ် ဖှိၣ်ရိဖှိၣ်ကယဲၢ်ပှၤယူဒၤဖိလၢပှၤထံၣ်န့ၢ်အီၤလၢ ရှူၡၣ်အ ပူၤခဲလၢာ်, ဒီးဒုၣ်တၢ်အီၣ်တၢ်အီလၢယဂီၢ်တက့ၢ်. မုၢ် သၢနံၤအတီၢ်ပူၤန့ၣ် လၢမုၢ်ဆါဂ့ၤဂ့ၤ လၢမုၢ်နၤဂ့ၤဂ့ၤ, အီၣ်တၢ်တဂ့ၤ, ဒီးအီတၢ်တဂ့ၤ ယဲဒၣ်စ့ၢ်ကီးဒီးယဖိသၣ် ပိာ်မုၣ်တဖၣ်ပကဒုၣ်တၢ်အီၣ်ဒ်န့ၣ်လီၤ. ဒီးဒ်န့ၣ်အသိး ယကလဲၤနုာ်ဆူစီၤပၤအအိၣ် လၢအတဒ်ဘၣ်တၢ်မၤလိာ် အသိးဘၣ်, ဒီးယမ့ၢ်ဟးဂီၤဒီး, ယကဟးဂီၤလီၤ.

¹⁷ ဒီးစီၤမၢ်ဒကဲၤလဲၤတၢ်, ဒီးမၤဝဲဒ်ကယဲၢ်တၢ်လၢ နီၢ် အ့ၤစတၢ်မၤလိာ်အီၤအသိးန့ၣ်လီၤ.

၅

¹ ဒီးမုၢ်သၢနံၤတနံၤန့ၣ် တၢ်မၤအသးလၢ နီၢ်အ့ၤစတၢ် သိးထီၣ်နီၢ်ပၤမုၣ်အကူအသိး, ဒီးဆၢထၢၣ်ဝဲလၢစီၤပၤ အဟံၣ်အဂၢၤလၢညါတဂၢၤ သဃီၤဒီးစီၤပၤအဟံၣ်, ဒီး စီၤပၤဆ့ၣ်နီၤလၢဘီမုၢ်အလီၢ်ပစိာ် လၢဘီမုၢ်အဟံၣ်ပူၤ သဃီၤဒီးဟံၣ်အကျဲစၢၤန့ၣ်လီၤ.

² ဒီးတုၤစီၤပၤထံၣ်ဘၣ် နီၢ်ပၤမုၣ်အ့ၤစတၢ် ဆၢထၢၣ် လၢဂၢၤပူၤန့ၣ်လီၤ. တၢ်မၤအသးလၢအဘၣ်ဘျုးဘၣ်ဖှိၣ် လၢအမဲာ်, ဒီးစီၤပၤယူာ်ထီၣ်နီၣ်ထိးထူလၢအအိၣ်ဝဲလၢ အစုပူၤဆူ နီၢ်အ့ၤစတၢ်အအိၣ်လီၤ. ဒီးနီၢ်အ့ၤစတၢ်သုး ဘူးအသး, ဒီးထိးနီၣ်ထိးအခိၣ်န့ၣ်လီၤ.

³ ဒီးစီၤပၤစံးဘၣ်အီၤ, ဘၣ်နသးလၢမနုၤတမံၤလဲၣ်, နီၢ် ပၤမုၣ်အ့ၤစတၢ်ဧၢ, ဒီးနဃ့တၢ်လၢမနုၤလဲၣ်. တၢ်က ဟ့ၣ်လီၤနၤတုၤအဖးဖီယဘီယမုၢ်လီၤ.

⁴ ဒီးနီၢ်အ့ၤစတၢ်စံးဝဲဒၣ်, မ့ၢ်ဂ့ၤဒီးစီၤပၤဒီးမ်စီၤပၤဒီးစီၤ ဟၤမၣ်ဟဲလၢမုၢ်မဆါတနံၤအံၤ ဆူတၢ်အီၣ်တၢ်အီအ ပူၤလၢယကတဲာ်ကတီၤလၢအဂီၢ်တက့ၢ်.

⁵ ဒီးစီၤပၤစံးဝဲဒၣ်, မၢစီၤဟၤမၣ်မၤတၢ်ချ့ချ့ဒ်သိးအက မၤတၢ် ဒ်နီၢ်အ့ၤစတၢ်စံးတ့ၢ်ဝဲအသိးန့ၣ်တက့ၢ်. ဒီးစီၤ ပၤ, ဒီးစီၤဟၤမၣ်ဟဲဝဲဆူတၢ်အီၣ်တၢ်အီအပူၤလၢနီၢ်အ့ၤ စတၢ်ကတဲာ်ကတီၤဝဲလီၤ.

⁶ ဒီးစီၤပၤစံးဘၣ်နီၢ်အ့ၤစတၢ် လၢတၢ်အီစပံးထံအပူၤ န့ၣ်နဃ့တၢ်လၢမနုၤတမံၤလဲၣ်. တၢ်ကဟ့ၣ်လီၤအီၤလၢ နၤလီၤ. ဒီးနဃ့ကညးတၢ်လၢမနုၤတမံၤလဲၣ်. တၢ်က မၤဝဲတုၤအဖးဖီယဘီယမုၢ်လီၤ.

⁷ ဒီးနီၢ်အ့ၤစတၢ်စံးဆၢတၢ်, ဒီးစံးဝဲဒၣ်, ယဃ့တၢ်, ဒီးဃ့ ကညးတၢ်န့ၣ်မ့ၢ်အအံၤ, ⁸ ယမ့ၢ်ဘၣ်ဘျုးဘၣ်ဖှိၣ်လၢစီၤ ပၤအမဲာ်ဒီး, ဟ့ၣ်တၢ်လၢယဃ့, ဒီးမၤတၢ်လၢယဃ့က ညးန့ၣ်မ့ၢ်ဂ့ၤဒီးစီၤပၤဒီး, မ်စီၤပၤ, ဒီးစီၤဟၤမၣ်ဟဲဆူတၢ် အီၣ်တၢ်အီအပူၤ လၢယကတဲာ်ကတီၤလၢအဂီၢ်တက့ၢ်. ဒီးခဲဂီၤတနံၤန့ၣ်ယကမၤဒ်စီၤပၤအကလုၢ်အသိးန့ၣ်လီၤ.

⁹ ဒီးလၢမုၢ်တနံၤန့ၣ်စီၤဟၤမၣ်ဟးထီၣ်ဒီး အသူၣ်ခုအ သးခု, ဒီးအသူၣ်မုာ်အသးမုာ်လီၤ. ဒီးတုၤစီၤဟၤမၣ်ထံၣ် ဘၣ်စီၤမၢ်ဒကဲၤလၢ စီၤပၤအပဲတရီအပူၤ လၢအတဂဲၤ ဆၢထၢၣ်ဘၣ်, ဒီးတသုးဘၣ်အသးလၢအဂီၢ်ဘၣ်ဒီး, အ သးထီၣ်ဘၣ်စီၤမၢ်ဒကဲၤပှဲၤဆၢၣ်ကလာ်လီၤ. ¹⁰ ဘၣ်ဆၣ် ဒီးစီၤဟၤမၣ်ကီၤအသး, ဒီးတုၤအဟဲဆူအဟံၣ်ဒီး, မၢ လီၤတၢ်, ဒီးကိးန့ၢ်ပှၤလၢအအဲၣ်အီၤတဖၣ်, ဒီးအမါနီၢ် စ့ရ့ၣ်လီၤ.

¹¹ ဒီးစီၤဟၤမၣ် စံးဘၣ်အီၤလၢအထူးအတီၤ, အလၤက ပီၤ, ဒီးလၢအဖိအလံၤအါဂၤ, ဒီးလၢကယဲၢ်တၢ်လၢစီၤ ပၤပာ်ဒိၣ်ပာ်ထီအီၤ, ဒီးလၢအပာ်အီၤဒိၣ်န့ၢ် စီၤပၤအပ ဒိၣ်ဖးဒိၣ်, ဒီးအခ့အပှၤတဖၣ်န့ၣ်အဂ့ၢ်အကျိၤလီၤ.

¹² ဒီးစီၤဟၤမၣ်စံးဝဲဒၣ်, မ့ၢ်မးနီၢ်ပၤမုၣ်အ့ၤစတၢ် တဒုး ဟဲနုာ်ဘၣ်ဒီးစီၤပၤဆူတၢ်အီၣ်တၢ်အီလၢ အကတဲာ်က တီၤဝဲအပူၤနီတဂၤဘၣ်. ဒုးဟဲနုာ်ထဲယၤတဂၤဧိၤလီၤ. ခဲ ဂီၤတနံၤတၢ်ကိးန့ၢ်စ့ၢ်ကီးယၤဆူအအိၣ်ဒီးစီၤပၤလီၤ.

¹³ ဘၣ်ဆၣ်ဒီး ကယဲၢ်တၢ်အဆၢအကတီၢ်လၢယထံၣ် ဘၣ်ပှၤယူဒၤဖိစီၤမၢ်ဒကဲၤ ဆ့ၣ်နီၤလၢစီၤပၤအပဲတရီအ ပူၤန့ၣ်အဖၢမုၢ်ဒီး, တၢ်ခဲလၢာ်န့ၣ်တမ့ၢ်ဘၣ်တၢ်ဘၣ်ဒီး ယၤဘၣ်.

¹⁴ ဒီးအမါနီၢ်စ့ရ့ၣ် ဒီးပှၤလၢအအဲၣ်အီၤခဲလၢာ် စံးဘၣ် အီၤ, မ်ပှၤသူၣ်ထီၣ်သ့ၣ်တကျီာ်အထီအပျၢ်ယဲၢ်ဆံ, ဒီး ခဲဂီၤတနံၤန့ၣ်စံးဘၣ်စီၤပၤ ဒ်သိးပှၤကဘျးထီၣ် စီၤမၢ်ဒ ကဲၤလၢအလိၤ, ဒီးလဲၤဒီးစီၤပၤဆူတၢ်အီၣ်တၢ်အီအပူၤဒီး နသူၣ်ခုနသးခုတက့ၢ်. ဒီးတၢ်တမံၤန့ၣ်ဂ့ၤဝဲလၢစီၤဟၤ မၣ်အမဲာ်, ဒီးမၢပှၤသူၣ်ထီၣ်သ့ၣ်တကျီၣ်န့ၣ်လီၤ.

၆

¹ တၢ်လၢမုၢ်တနၤန့ၣ်စီၤပၤမံတန့ၢ်ဘၣ်, ဒီးမၤလိာ်ပှၤ ဟဲစိာ်လံာ်ကွဲးနီၣ်တၢ်တနံၤဘၣ်တနံၤ, ဒီးပှၤဖးအီၤလၢ စီၤပၤအမဲာ်ညါလီၤ.

² ဒီးပှၤထံၣ်န့ၢ် တၢ်ကွဲးအသးလၢ စီၤမၢ်ဒကဲၤစံးဘၣ် တ့ၢ်လၢစီၤပၤအပှၤဒ့ဒံၣ် စီၤဘံးကသၤနၤ, ဒီးစီၤတ့ရ့ၣ် လၢအပၢၤကျဲစၢၤခံဂၤန့ၣ် ဃုပာ်အစုလၢစီၤပၤအဃၤၡ ဝ့ရိၣ်အလိၤလီၤ.

³ ဒီးစီၤပၤစံးဝဲဒၣ်, ပှၤမၤစီၤမၢ်ဒကဲၤလၢ တၢ်အလၤက ပီၤဒီး တၢ်အဒိၣ်အထီလၢတၢ်တမံၤအံၤအဃိ, လၢမနုၤ တမံၤလဲၣ်. ဒီးစီၤပၤအခ့အပှၤလၢအမၤတၢ်တဖၣ် စံး ဘၣ်အီၤ, ပှၤတမၤဘၣ်အီၤလၢတၢ်နီတမံၤဘၣ်.

⁴ ဒီးစီၤပၤစံးဝဲဒၣ်, မ့ၢ်မတၤအိၣ်ဝဲလၢဂၢၤပူၤတဂၤလဲၣ်. ဒီးစီၤဟၤမၣ်ဟဲနုာ်လၢ စီၤပၤအဟံၣ်အဂၢၤပူၤလၢခိတ ဂၢၤ, ဒ်သိးအကစံးဘၣ်စီၤပၤလၢအကဘျးထီၣ်စီၤမၢ်ဒ ကဲၤလၢသ့ၣ်တကျီၣ်အလိၤ လၢအကတဲာ်ကတီၤပာ်လၢ အဂီၢ်လီၤ.

⁵ ဒီးစီၤပၤအခ့အပှၤစံးဘၣ်အီၤ, ကွၢ်ကွၢ်, စီၤဟၤမၣ် ဆၢထၢၣ်လၢဂၢၤပူၤလီၤ. ဒီးစီၤပၤစံးဝဲဒၣ်, မ်အဟဲနုာ် တက့ၢ်.

⁶ ဒီးစီၤဟၤမၣ်ဟဲနုာ်, ဒီးစီၤပၤစံးဘၣ်အီၤ, ပှၤလၢအ ဘၣ်စီၤပၤအသး လၢအကမၤလၤကပီၤအီၤတဂၤန့ၣ် ပှၤ ကမၤအီၤလၢမနုၤတမံၤလဲၣ်. (ဒီးစီၤဟၤမၣ် ဆိကမိၣ် လၢအသးကံၢ်ပူၤ, ပှၤဘၣ်စီၤပၤအသးလၢအကမၤလၤ ကပီၤအီၤဒိၣ်န့ၢ်ယၤတက့ၢ်, မ့ၢ်မတၤတဂၤလဲၣ်.)

⁷ ဒီးစီၤဟၤမၣ်စံးဆၢစီၤပၤ, လၢပှၤလၢအဘၣ်စီၤပၤအ သးလၢအကမၤလၤကပီၤအီၤတဂၤဂၤအဂီၢ်န့ၣ်, ⁸ မ်ပှၤ ဟဲစိာ်စီၤပၤအယၣ်လၢစီၤပၤကၤဝဲ, ဒီးကသ့ၣ်လၢစီၤပၤ ဒိးဝဲ, ဒီးစီၤပၤအခိၣ်သလုးလၢအပာ်လၢအခိၣ်, ⁹ ဒီးယၣ် တဘ့ၣ်န့ၣ်, ဒီးကသ့ၣ်တဒုန့ၣ်မ်ပှၤဟ့ၣ်ဝဲလၢစီၤပၤအပ ဒိၣ်ဖးဒိၣ်တဖၣ် အခိၣ်တဂၤအစုပူၤ, ဒ်သိးအကဒုးကၤ ပှၤလၢအဘၣ်စီၤပၤအသးလၢ အကမၤလၤမၤကပီၤအီၤ တဂၤ, ဒီးဒုးဒိးအီၤလၢကသ့ၣ်လၢဝ့ၢ်အကျဲဧိၤကပူၤဧိၤ, ဒီးကိးထီၣ်လၢအမဲာ်ညါ, ပှၤလၢအဘၣ်စီၤပၤအသးလၢ အကမၤလၤကပီၤအီၤတဂၤန့ၣ်ပှၤကမၤအီၤဒ်အံၤလီၤ.

¹⁰ ဒီးစီၤပၤစံးဘၣ် စီၤဟၤမၣ်, မၤချ့ချ့, ဟံးန့ၢ်ယၣ်တ ဘ့ၣ်န့ၣ်, ဒီးကသ့ၣ်တဒုန့ၣ်ဒ်နစံးအသိး, ဒီးမၤပှၤယူဒၤ ဖိစီၤမၢ်ဒကဲၤလၢအဆ့ၣ်နီၤလၢ စီၤပၤအပဲတရီအပူၤဒ်န့ၣ် အသိးတက့ၢ်. လၢကယဲၢ်တၢ်လၢနကတိၤတၢ်အကျါ န့ၣ်မၤကပာ်ကွံာ်နီတမံၤတဂ့ၤ.

¹¹ ဒီးစီၤဟၤမၣ်ဟံးန့ၢ်ယၣ်တဘ့ၣ်ဒီးကသ့ၣ်တဒု, ဒီးဒုး ကၤစီၤမၢ်ဒကဲၤ, ဒီးဒုးဒိးအီၤလၢကသ့ၣ်လၢဝ့ၢ်အကျဲဧိၤ ကပူၤဧိၤ, ဒီးကိးထီၣ်ဝဲလၢအမဲာ်ညါ, ပှၤလၢအဘၣ်စီၤ ပၤအသးလၢအကမၤလၤမၤကပီၤအီၤတဂၤန့ၣ် ပှၤကမၤ အီၤဒ်အံၤလီၤ.

¹² ဒီးစီၤမၢ်ဒကဲၤဟဲက့ၤဆူ စီၤပၤအပဲတရီ, ဒီးစီၤဟၤမၣ် က့ၤက့ၤချ့ချ့ဆူအဟံၣ်, ဒီးအသူၣ်အုးသးအုး, ဒီးအခိၣ် ကျၢၢ်ဘၢအသးလီၤ.

¹³ ဒီးစီၤဟၤမၣ်စံးဘၣ်အမါနီၢ်စ့ရၣ်, ဒီးပှၤလၢအအဲၣ် အီၤခဲလၢာ်လၢကယဲၢ်တၢ်လၢအဘၣ်အီၤလီၤ. ဒီးအပှၤ ကူၣ်တၢ်သ့တဖၣ်, ဒီးအမါနီၢ်စ့ရ့ၣ်စံးဘၣ်အီၤ, စီၤမၢ်ဒ ကဲၤလၢနလီၤဃံၤသီလၢအမဲာ်ညါတဂၤန့ၣ် မ့မ့ၢ်လၢပှၤ ယူဒၤဖိအချံအသၣ်ဒီး, နတမၤနၢၤဘၣ်အီၤဘၣ်. မ့မ့ၢ် နကလီၤဃံၤသပှၢ်တၢၢ်လၢအမဲာ်ညါလီၤ.

¹⁴ ဒီးကတိၤတၢ်ဒီးအီၤအဖၢမုၢ်ဒီး, စီၤပၤအပှၤဒ့ဒံၣ်ဟဲ ချ့ချ့ဒ်သိးအကဒုးဟဲ စီၤဟၤမၣ်ဆူ တၢ်အီလၢနီၢ်အ့ၤစ တၢ်ကတဲာ်ကတီၤဝဲလီၤ.

၇

¹ ဒီးစီၤပၤ, ဒီးစီၤဟၤမၣ်ဟဲဝဲဒ်သိးအကအီတၢ်ဒီးနီၢ်ပၤ မုၣ်အ့ၤစတၢ်လီၤ.

² ဒီးခံနံၤတနံၤလၢတၢ်အီစပံးထံန့ၣ် စီၤပၤစံးကဒီး နီၢ် အ့ၤစတၢ်, နဃ့တၢ်လၢမနုၤတမံၤလဲၣ်, နီၢ်ပၤမုၣ်အ့ၤစ တၢ်ဧၢ, တၢ်ကဟ့ၣ်လီၤနၤလီၤ. ဒီးနဃ့ကညးတၢ်လၢမ နုၤတမံၤလဲၣ်. တၢ်ကမၤအီၤတုၤအဖးဖီယဘီယမုၢ်လီၤ.

³ ဒီးနီၢ်ပၤမုၣ်အ့ၤစတၢ်စံးဆၢတၢ်, ဒီးစံးဝဲဒၣ်, စီၤပၤဧၢ, ယမ့ၢ်ဘၣ်ဘျုးဘၣ်ဖှိၣ်လၢနမဲာ်, ဒီးမ့ၢ်ဂ့ၤဒီးစီၤပၤဒီး, မ် တၢ်ဟ့ၣ်ယသးသမူလၢယဃ့တၢ်အဃိ, ဒီးယပှၤတက လုာ်လၢယဃ့ကညးတၢ်အဃိန့ၣ်တက့ၢ်. ⁴ အဂ့ၢ်ဒ်အံၤ, ပဘၣ်တၢ်ဆါကွံာ်ပှၤ, ယဲဒၣ်ဒီးယပှၤတကလုာ်, ဒ်သိး တၢ်ကမၤဟးဂီၤပှၤ, ဒ်သိးတၢ်ကမၤသံပှၤ, ဒ်သိးတၢ်က မၤဟါမၢ်ပှၤလီၤ. ပမ့ၢ်ဘၣ်တၢ်ဆါကွံာ်ပှၤလၢကုၢ်ပိာ်မုၣ် ဒီးကုၢ်ပိာ်ခွါအဂီၢ်ဒီး, ယကအိၣ်ဘှီၣ်ကလာ်လီၤ. ဘၣ် ဆၣ်ဒီးစီၤပၤအတၢ်လၢအကဟါမၢ်န့ၣ် တၢ်အဒုၣ်အဒါ မၤတၢ်ထဲသိးသိးန့ၣ်တသ့ဘၣ်.

⁵ ဒီးစီၤပၤအဃၤၡဝ့ရိၣ် စံးဆၢနီၢ်ပၤမုၣ်အ့ၤစတၢ်, ဒီး စံးဝဲဒၣ်, အဝဲဒၣ်န့ၣ်မ့ၢ်မတၤတဂၤလဲၣ်. ဒီးပှၤလၢအမၤ ပှဲၤအသးဒ်သိးအကမၤတၢ်ဒ်န့ၣ်ဘူၣ်ဝဲတဂၤန့ၣ်, မ့ၢ်အ အိၣ်ဖဲလဲၣ်.

⁶ ဒီးနီၢ်အ့ၤစတၢ်စံးဝဲဒၣ်, ပှၤထီဒါတၢ်, ဒီးပှၤအဒုၣ်အ ဒါန့ၣ်မ့ၢ် ပှၤအၢစီၤဟၤမၣ်တဂၤအံၤလီၤ. တုၤနုၤတဘျီ စီၤဟၤမၣ်ပျံၤတၢ်လၢစီၤပၤ, ဒီးနီၢ်ပၤမုၣ်အမဲာ်ညါလီၤ.

⁷ ဒီးစီၤပၤဂဲၤဆၢထၢၣ်လၢ တၢ်အီစပံးထံအပူၤ လၢအ သးဒိၣ်ထီၣ်, ဒီးလဲၤဝဲဆူဟံၣ်အတၤသၣ်အလီၢ်ပူၤ, ဒီးစီၤ ဟၤမၣ်ဆၢထၢၣ်ဝဲဒ်သိးအကဃ့ကညး နီၢ်ပၤမုၣ်အ့ၤစ တၢ်လၢအသးသမူအဂီၢ်လီၤ. အဂ့ၢ်ဒ်အံၤထံၣ်ဝဲလၢစီၤ ပၤတိာ်တၢ်အၢလၢအဂီၢ်လီၤ.

⁸ ဒီးစီၤပၤဟဲက့ၤလၢ ဟံၣ်အတၤသၣ်အလီၢ်ပူၤဆူတၢ် အီစပံးထံအလီၢ်, ဒီးစီၤဟၤမၣ်ထိၣ်လီၤပှီၤအသးလၢလီၢ် မံအဖီခိၣ်ဖဲနီၢ်အ့ၤစတၢ်အိၣ်ဝဲလီၤ. ဒီးစီၤပၤစံးဝဲဒၣ်, က ဖိးဆူၣ်နီၢ်ပၤမုၣ်လၢဟံၣ်ပူၤ အိၣ်ဒီးယၤစ့ၢ်ကီးဧါ. တုၤ တၢ်ကတိၤတထံၣ်ထီၣ်ဖျဲးထီၣ်လၢ စီၤပၤအထးခိၣ်ဒီး, ပှၤကျၢၢ်ဘၢစီၤဟၤမၣ်အမဲာ်လီၤ.

⁹ ဒီးပှၤဒ့ဒံၣ်စီၤဃၤရဘိနၤစံးဝဲလၢစီၤပၤအမဲာ်ညါ, ကွၢ် ကွၢ်, သ့ၣ်တကျီၣ်အထီအပျၢ်ယဲၢ်ဆံလၢစီၤဟၤမၣ်မၤဝဲ လၢစီၤမၢ်ဒကဲၤအဂီၢ် လၢအကတိၤတ့ၢ်တၢ်ဂ့ၤလၢစီၤပၤ အဂီၢ်တဂၤန့ၣ် အိၣ်ဝဲထူၣ်ကလာ်စ့ၢ်ကီးလၢစီၤဟၤမၣ် အဟံၣ်ပူၤလီၤ. ဒီးစီၤပၤစံးဘၣ်အီၤ, ဘျးထီၣ်အီၤလၢအ လိၤတက့ၢ်.

¹⁰ ဒီးပှၤဘျးထီၣ် စီၤဟၤမၣ်လၢသ့ၣ်တကျီၣ်အလိၤလၢ အကတဲာ်ကတီၤပာ်ဝဲလၢစီၤမၢ်ဒကဲၤအဂီၢ်လီၤ. ဒီးစီၤပၤ အသးဒိၣ်ထီၣ်စၢ်လီၤဝဲလီၤ.

၈

¹ တၢ်လၢမုၢ်တနံၤန့ၣ် စီၤပၤအဃၤၡဝ့ရိၣ် ဟ့ၣ်လီၤပှၤ ယူဒၤဖိအဒုၣ်အဒါစီၤဟၤမၣ်အဟံၣ်လၢ နီၢ်ပၤမုၣ်အ့ၤစ တၢ်, ဒီးစီၤမၢ်ဒကဲၤဟဲဝဲဆူ စီၤပၤအအိၣ်လီၤ. အဂ့ၢ်ဒ် အံၤ, အဝဲဒၣ်န့ၣ်ဘၣ်ဃးဒီးအီၤ ဒ်လဲၣ်ဒ်လဲၣ်န့ၣ်နီၢ်အ့ၤ စတၢ်စံးဘၣ်တဲဘၣ်ဝဲလီၤ.

² ဒီးစီၤပၤဘ့ၣ်လီၤအပသံးလၢအဟံးန့ၢ်က့ၤ လၢစီၤဟၤ မၣ်, ဒီးဟ့ၣ်လီၤဝဲလၢစီၤမၢ်ဒကဲၤန့ၣ်လီၤ. ဒီးနီၢ်အ့ၤစ တၢ်ပာ်စီၤမၢ်ဒကဲၤလၢစီၤဟၤမၣ်အဟံၣ်အဖီခိၣ်လီၤ.

³ ဒီးနီၢ်အ့ၤစတၢ်ကတိၤကဒီးတၢ်လၢ စီၤပၤအမဲာ်ညါ, ဒီးထိၣ်လီၤပှီၤအသးလၢအခီၣ်ထံး, ဒီးဃ့ကညးဝဲလၢအ မဲာ်ထံလီၤဒ်သိးအကဒုးပူၤကွံာ် ပှၤအကၤကးဖိစီၤဟၤ မၣ်အတၢ်အၢ, ဒီးအတၢ်ကူၣ်လၢအကူၣ်တၢ်ထီဒါပှၤယူ ဒၤဖိန့ၣ်လီၤ. ⁴ ဒီးစီၤပၤယူာ်ထီၣ်နီၣ်ထိးထူဆူ နီၢ်အ့ၤစတၢ်, ဒီးနီၢ်အ့ၤစတၢ်ဂဲၤဆၢထၢၣ်, ဒီးဆၢထၢၣ်လၢစီၤပၤအမဲာ်ညါ,―

⁵ ဒီးစံးဝဲဒၣ်, မ့ၢ်ဂ့ၤဒီးစီၤပၤ, ဒီးယမ့ၢ်ဘၣ်ဘျုးဘၣ်ဖှိၣ်လၢ စီၤပၤအမဲာ်ညါ, ဒီးတၢ်တမံၤအံၤမ့ၢ်လိၤလၢစီၤပၤအမဲာ် ညါ, ဒီးယဲဒၣ်ယမ့ၢ်ဂ့ၤလၢစီၤပၤအမဲာ်ဒီး, မ်တၢ်ကွဲးဘိး ကဒါက့ၤလံာ်လၢပှၤအကၤကးဖိ, စီၤဟးမဒၤသၤအဖိခွါ စီၤဟၤမၣ်ကူၣ်ထီၣ်ဝဲလၢအကွဲးဝဲဒ်သိး အကမၤဟးဂီၤ ပှၤယူဒၤဖိလၢအအိၣ်ဝဲလၢ စီၤပၤအထံအကီၢ်ခဲလၢာ်အ ပူၤန့ၣ်တက့ၢ်. ⁶ အဂ့ၢ်ဒ်အံၤ, တၢ်အၢလၢအကဘၣ်ယ ပှၤတကလုာ်န့ၣ်ယထံၣ်ကကဲဒ်လဲၣ်. ဒီးတၢ်မၤဟးဂီၤ ယဘူးယတံၢ်န့ၣ်ယထံၣ်ကကဲဒ်လဲၣ်.

⁷ ဒီးစီၤပၤအဃၤၡဝ့ရိၣ်စံးဘၣ် နီၢ်ပၤမုၣ်အ့ၤစတၢ်, ဒီး ပှၤယူဒၤဖိစီၤမၢ်ဒကဲၤ, ကွၢ်ကွၢ်, ယဟ့ၣ်လီၤလံနီၢ်အ့ၤစ တၢ်လၢစီၤဟၤမၣ်အဟံၣ်, ဒီးပှၤဘျးထီၣ်အီၤလၢသ့ၣ်တ ကျီၣ်န့ၣ်အလိၤလၢအပာ်အစုလၢ ပှၤယူဒၤဖိအလိၤအဃိ လီၤ. ⁸ ကွဲးစ့ၢ်ကီးသုဝဲလၢပှၤယူဒၤဖိအဂီၢ်, ဖဲအဂ့ၤလၢ သုမဲာ်, လၢစီၤပၤအမံၤ, ဒီးစဲဃာ်ပနီၣ်လၢစီၤပၤအပသံး တက့ၢ်. အဂ့ၢ်ဒ်အံၤ, လံာ်လၢအကွဲးအသးလၢစီၤပၤအ မံၤ, ဒီးစဲဃာ်ပနီၣ်လၢစီၤပၤအပသံးန့ၣ် ပှၤတမၤကဒံ ကဒါဘၣ်နီတဂၤဘၣ်.

⁹ ဒီးအကတီၢ်ဖဲန့ၣ် လၢလါသၢလါတလါလၢအမ့ၢ်လါ စံဝၣ်, လါထီၣ်ခံဆံသၢနံၤတနံၤန့ၣ်ပှၤကိးန့ၢ်စီၤပၤအပှၤ ကွဲးလံာ်, ဒီးပှၤကွဲးဝဲဒ်ကယဲၢ်တၢ်လၢစီၤမၢ်ဒကဲၤမၤလိာ် ပှၤယူဒၤဖိ, ဒီးပဒိၣ်ဖးဒိၣ်တဖၣ်, ဒီးပဒိၣ်တဖၣ်, ဒီးထံ ဧိၤကီၢ်ဧိၤအပဒိၣ်ဖးဒိၣ်တဖၣ် လၢအအိၣ်ဝဲလၢဟံၣ်ဒူၤ ပၢၢ်လၢကူၤၡး, ကီၢ်တကယၤခံဆံနွံဘ့ၣ်, ဒီးတဘ့ၣ် ဘၣ်တဘ့ၣ်ဒ်ကီၢ်အလံာ်ကွဲးအသးအသိး, ဒီးလၢပှၤအ ကလုာ်ကလုာ်ဒ်အတၢ်ကတိၤအကျိာ်အသိး, ဒီးလၢပှၤ ယူဒၤဖိဒ်အလံာ်ကွဲးအသးအသိး, ဒီးဒ်အတၢ်ကတိၤအ ကျိာ်အသိးန့ၣ်လီၤ.

¹⁰ ဒီးကွဲးဝဲလၢ စီၤပၤအဃၤၡဝ့ရိၣ်အမံၤ, ဒီးစဲဃာ်ပနီၣ် ဝဲလၢစီၤပၤအပသံး, ဒီးဟ့ၣ်ယုၢ်လံာ်လၢပှၤဃ့ၢ်တၢ်ဖိအ စုပူၤလၢအဒိးကသ့ၣ်, ပှၤဒိးကသ့ၣ်ချ့, ကသ့ၣ်လၤ, ဒီး ကီၤလၤအူးဖိလီၤ. ¹¹ လၢလံာ်ပူၤန့ၣ်စီၤပၤဟ့ၣ်ပှၤယူဒၤဖိ လၢအအိၣ်လၢဝ့ၢ်ကိးဖျၢၣ်ဒဲးအပူၤ လၢအကအိၣ်ဖှိၣ်ရိ ဖှိၣ်, ဒီးဆၢထၢၣ်လၢအသးသမူအဂီၢ် ဒ်သိးအကမၤ ဟးဂီၤဒီးမၤသံ, ဒီးမၤဟါမၢ်ကယဲၢ်ပှၤဂီၢ်မုၢ်, ဒီးကီၢ်တ ဘ့ၣ်လၢအကမၤအၢအီၤအစိအကမီၤခဲလၢာ်, ဖိဒံဖိသၣ်, ဒီးပိာ်မုၣ်ပိာ်မၢၤ, ဒီးဂုာ်န့ၢ်အတၢ်ဖိတၢ်လံၤလၢအတၢ်ဒၣ် ဝဲအဂီၢ်, ¹² လၢမုၢ်တနံၤဃီလၢစီၤပၤအဃၤၡဝ့ရိၣ်အကီၢ် ကိးဘ့ၣ်ဒဲးအပူၤလၢလါတဆံခံလါတလါ, လၢအမ့ၢ် လါအးဒၢ်, လါထီၣ်တဆံသၢနံၤတနံၤန့ၣ်လီၤ.

¹³ လံာ်ကွဲးဆဲတၢ်တဘ့ၣ်လၢ တၢ်မၤလိာ်အဂီၢ်န့ၣ် ပှၤ ဘၣ်ဟ့ၣ်ဝဲလၢကီၢ်ကိးဘ့ၣ်ဒဲးအပူၤ, ဒီးဘၣ်စံးဘၣ်တဲ ဘၣ်ပှၤကိးကလုာ်ဒဲး, ဒီးပှၤယူဒၤဖိကဘၣ်ကတဲာ်က တီၤတၢ်လၢမုၢ်တနံၤန့ၣ် ဒ်သိးအကမၤအၢဆၢအဒုၣ်အ ဒါလီၤ.

¹⁴ ဒီးပှၤဃ့ၢ်တၢ်ဖိလၢအဒိးကသ့ၣ်ချ့, ဒီးကသ့ၣ်လၤတ ဖၣ်န့ၣ်ဟးထီၣ်ဝဲ, ဒီးစီၤပၤအကလုၢ်မၢအလဲၤတၢ်ချ့ချ့ လီၤ. ဒီးတၢ်ဟ့ၣ်တၢ်မၤလိာ်န့ၣ်လၢနူၢ်ရှူၡၣ်အပူၤလီၤ.

¹⁵ စီၤမၢ်ဒကဲၤဟးထီၣ်ဝဲလၢစီၤပၤအအိၣ်, ကူဝဲသိးဝဲလၢ တၢ်ကူတၢ်သိးစီၤပၤ, လၢတၢ်လါ, ဒီးတၢ်ဝါ, အိၣ်ဒီးအ ခိၣ်သလုးထူဖးဒိၣ်, ဒီးယၣ်ဖှီဝါကဆှၣ်, ဒီးလုးတကုာ်, ဒီးပှၤဝ့ၢ်ဖိကိးပသူထီၣ်လၢအသူၣ်ခုအသးခုလီၤ.

¹⁶ ပှၤယူဒၤဖိအိၣ်ဝဲဒီးတၢ်ကပီၤ, ဒီးတၢ်သူၣ်ခုသးခု, ဒီး တၢ်သူၣ်ဖှံသးညီ, ဒီးတၢ်လၤကပီၤလီၤ.

¹⁷ ဒီးဖဲဒၣ်စီၤပၤအကလုၢ်, ဒီးအတၢ်မၤလိာ် ဟဲဝဲလၢ ကီၢ်တဘ့ၣ်လၢ်လၢ်အပူၤ, ဒီးလၢဝ့ၢ်တဝ့ၢ်လၢ်လၢ်အပူၤ န့ၣ်ပှၤယူဒၤဖိအိၣ်ဝဲဒီးတၢ်သူၣ်ခုသးခု, တၢ်သူၣ်ဖှံသး ညီ, တၢ်အီၣ်တၢ်အီ, ဒီးမုၢ်နံၤအဂ့ၤတနံၤလီၤ. ဒီးပှၤ ကီၢ်ဖိအါဂၤကဲထီၣ်ပှၤယူဒၤဖိလီၤ. အဂ့ၢ်ဒ်အံၤ, တၢ်ပျံၤ ပှၤယူဒၤဖိလီၤဘၣ်အလိၤလီၤ.

၉

¹ ဒီးလၢ လါတဆံခံလါတလါ လၢအမ့ၢ်လါအးဒၢ်, လါထီၣ်တဆံသၢနံၤတနံၤန့ၣ် တုၤစီၤပၤအကလုၢ်ဒီးအ တၢ်မၤလိာ်သုးဘူးအသးလၢအကမၤအသးဒီး, မုၢ်တ နံၤလၢပှၤယူဒၤဖိအဒုၣ်အဒါ မုၢ်လၢ်ဝဲလၢအကပၢအီၤ န့ၣ်, (ဘၣ်ဆၣ်ဒီးတၢ်ဘိးကဒါတၢ်တုၤပှၤယူဒၤဖိပၢပှၤ လၢအသးဟ့အီၤတခီလီၤ), ² ပှၤယူဒၤဖိ အိၣ်ဖှိၣ်ရိဖှိၣ် လၢဝ့ၢ်တဖၣ်အပူၤ, လၢစီၤပၤအဃၤၡဝ့ရိၣ်အထံအကီၢ် ကိးဘ့ၣ်ဒဲးအပူၤ, ဒ်သိးအကပာ်အစုလၢပှၤလၢအဃုမၤ အၢအီၤအလိၤ, ဒီးပှၤတဆၢထၢၣ်ဘၣ်လၢအမဲာ်ညါနီ တဂၤဘၣ်. အဂ့ၢ်ဒ်အံၤ, တၢ်ပျံၤအီၤန့ၣ်လီၤဘၣ်လၢပှၤ ဂီၢ်မုၢ်ခဲလၢာ်အလိၤလီၤ.

³ ဒီးကီၢ်အပဒိၣ်ဖးဒိၣ်, ဒီးပဒိၣ်ဖးဒိၣ်, ဒီးပဒိၣ်ဒီးပှၤ လၢအမၤစီၤပၤအတၢ်မၤခဲလၢာ်န့ၣ်မၤစၢၤပှၤယူဒၤဖိလီၤ. အဂ့ၢ်ဒ်အံၤ, တၢ်ပျံၤစီၤမၢ်ဒကဲၤန့ၣ် လီၤဘၣ်လၢအလိၤ လီၤ.

⁴ အဂ့ၢ်ဒ်အံၤ, စီၤမၢ်ဒကဲၤမ့ၢ်ပှၤအဒိၣ်လၢစီၤပၤအဟံၣ် ပူၤ, ဒီးအမံၤဟူထီသါလီၤလၢထံဧိၤကီၢ်ဧိၤ ကိးဘ့ၣ်ဒဲး အပူၤလီၤ. အဂ့ၢ်ဒ်အံၤ, စီၤမၢ်ဒကဲၤတဂၤအံၤဒံးယံာ်ဒံး ဒိၣ်ထီၣ်လီၤ.

⁵ ဒီးပှၤယူဒၤဖိကျီကွံာ်အဒုၣ်အဒါခဲလၢာ် လၢနးအကျီ တၢ်, ဒီးလၢတၢ်မၤသံ, ဒီးလၢတၢ်မၤဟးဂီၤ, ဒီးမၤပှၤ လၢအသးဟ့အီၤတဖၣ်န့ၣ်ဖဲအဘၣ်အသးလီၤ.

⁶ ဒီးလၢနူၢ်ရှူၡၣ်အပူၤန့ၣ်ပှၤယူဒၤဖိမၤသံ, ဒီးမၤဟးဂီၤ ပှၤယဲၢ်ကယၤ, ⁷ ဒီးစီၤပၡၤနဒၤသၤ, ဒီးစီၤဒၤလဖိၣ်, ဒီးစီၤ အၤစပၤသၤ, ⁸ ဒီးစီၤပိၤရသး, ဒီးစီၤအဒၤလယၤ, ဒီးစီၤအ ရံၤဒသၤ, ⁹ ဒီးစီၤပၢ်မၤၡတၤ, ဒီးစီၤအရံစဲၤ, ဒီးစီၤအရံဒဲၤ, ဒီးစီၤဝၤယစၤသၤ, ¹⁰ ပှၤယူဒၤဖိအဒုၣ်အဒါ စီၤဟးမဒၤ သၤအဖိခွါစီၤဟၤမၣ်အဖိခွါဆံဆဲၣ်ဂၤလီၤ. မ့မ့ၢ်အတၢ် ဖိတၢ်လံၤန့ၣ်တပာ်ဘၣ်အစုလၢအလိၤဘၣ်.

¹¹ တၢ်လၢမုၢ်တနံၤန့ၣ် ပှၤဟဲစိာ်လၢ ပှၤဘၣ်တၢ်မၤသံ အီၤလၢ နူၢ်ရှူၡၣ်အပူၤတဖၣ်အတၢ်ဂံၢ် ဆူစီၤပၤအအိၣ် လီၤ.

¹² ဒီးစီၤပၤစံးဘၣ် နီၢ်ပၤမုၣ်အ့ၤစတၢ်, ပှၤယူဒၤဖိမၤသံ, ဒီးမၤဟးဂီၤ ပှၤယဲၢ်ကယၤလၢဝ့ၢ်ရှူၡၣ်အပူၤ, ဒီးစီၤဟၤ မၣ်အဖိခွါဆံဆဲၣ်ဂၤလံ. လၢစီၤပၤအထံအကီၢ်လၢအ အိၣ်လီၤတဲာ်တဖၣ်အပူၤန့ၣ်မ့ၢ်အမၤလံမနုၤလဲၣ်. ခဲက နံၣ်အံၤနဃ့တၢ်မနုၤတမံၤလဲၣ်, ဒီးတၢ်ကဟ့ၣ်နၤလီၤ. ဒီးနဃ့ကညးဒံးမနုၤတမံၤလဲၣ်, ဒီးတၢ်ကမၤအီၤလီၤ.

¹³ ဒီးနီၢ်အ့ၤစတၢ်စံးဝဲဒၣ်, မ့ၢ်ဂ့ၤဒီးစီၤပၤဒီး, ပှၤယူဒၤဖိ လၢအအိၣ်ဝဲလၢရှူၡၣ်အပူၤန့ၣ်, မ်တၢ်ဟ့ၣ်အမၤဝဲခဲဂီၤ ကိာ်တနံၤဒ်လၢမုၢ်တနံၤအံၤအတၢ်မၤလိာ်အသိး, ဒီးမ် ပှၤဘျးထီၣ်စီၤဟၤမၣ်အဖိခွါဆံဆဲၣ်ဂၤလၢ သ့ၣ်အလိၤ တက့ၢ်.

¹⁴ ဒီးစီၤပၤစံးဝဲလၢပှၤဘၣ်မၤတၢ်ဒ်န့ၣ်, ဒီးတၢ်ဟ့ၣ်လီၤ တၢ်မၤလိာ်လၢရှူၡၣ်အပူၤ, ဒီးပှၤဘျးထီၣ်စီၤဟၤမၣ်အဖိ ခွါဆံဆဲၣ်ဂၤလီၤ.

¹⁵ ဒီးပှၤယူဒၤဖိ လၢအအိၣ်ဝဲလၢ ရှူၡၣ်အပူၤတဖၣ်န့ၣ် အိၣ်ဖှိၣ်ရိဖှိၣ်လၢလါအးဒၢ်, လါထီၣ်တဆံလွံၢ်နံၤတနံၤ စ့ၢ်ကီး, ဒီးမၤသံပှၤသၢကယၤလၢရှူၡၣ်အပူၤ, ဒီးတပာ် ဘၣ်အစုလၢတၢ်ဖိတၢ်လံၤအလိၤဘၣ်.

¹⁶ ဒီးပှၤယူဒၤဖိ လၢအအိၣ်လီၤတဲာ်လၢ စီၤပၤအထံအ ကီၢ်တဖၣ်အပူၤန့ၣ်အိၣ်ဖှိၣ်ရိဖှိၣ်, ဒီးဆၢထၢၣ်လၢအသး သမူအဂီၢ်, ဒီးအိၣ်ဘှံးဝဲ, တဘၣ်လၢၤတၢ်ကိၢ်တၢ်ဂီၤ လၢအဒုၣ်အဒါဘၣ်. ဒီးမၤသံအဒုၣ်အဒါနွံကလးယဲၢ် ကထိ, (ဒီးတပာ်ဘၣ်အစုလၢ တၢ်ဖိတၢ်လံၤ အလိၤ ဘၣ်), ¹⁷ လၢလါအးဒၢ်ပှဲၤထီၣ်တဆံသၢနံၤတနံၤလီၤ. ဒီး တဆံလွံၢ်နံၤတနံၤန့ၣ် အိၣ်ဘှံးဝဲ, ဒီးပာ်ဝဲလၢတၢ်အီၣ် တၢ်အီ, ဒီးတၢ်သူၣ်ခုသးခုအမုၢ်တနံၤလီၤ.

¹⁸ ဒီးပှၤယူဒၤဖိအိၣ်လၢရှူၡၣ်အပူၤတဖၣ်န့ၣ် အိၣ်ဖှိၣ်ရိ ဖှိၣ်လၢတဆံသၢနံၤတနံၤ, ဒီးလၢတဆံလွံၢ်နံၤတနံၤလီၤ. ဒီးလၢတဆံယဲၢ်နံၤတနံၤန့ၣ်အိၣ်ဘှံးဝဲ, ဒီးပာ်ဝဲလၢတၢ် အီၣ်တၢ်အီ, ဒီးတၢ်သူၣ်ခုသးခုအမုၢ်တနံၤလီၤ.

¹⁹ မၤသးဒ်န့ၣ်ဒီး ပှၤယူဒၤဖိလၢအအိၣ်လၢသဝီတဖၣ် အပူၤ လၢအအိၣ်ဝဲဆိးဝဲလၢ ဝ့ၢ်တအိၣ်ဘၣ်ဒီးအခိၣ်ဒူ တဖၣ်န့ၣ်ပာ်လါအးဒၢ်တဆံလွံၢ်နံၤတနံၤလၢတၢ်သူၣ်ခု သးခုဒီးတၢ်အီၣ်တၢ်အီ, ဒီးမုၢ်တနံၤအဂ့ၤ, ဒီးတၢ်ဟ့ၣ် ယုၢ်လိာ်အသးသကိးသကိး လၢတၢ်အဂီၢ်တဖၣ်အမုၢ် တနံၤလီၤ.

²⁰ ဒီးစီၤမၢ်ဒကဲၤကွဲးတၢ်န့ၣ်တဖၣ်, ဒီးဟ့ၣ်ယုၢ်လံာ်လၢ ပှၤယူဒၤဖိခဲလၢာ်လၢအအိၣ်ဝဲလၢ စီၤပၤအဃၤၡဝ့ရိၣ် အထံအကီၢ်ခဲလၢာ်အပူၤ လၢအဘူးဒီးလၢအယံၤ, ²¹ ဒ် သိးအကဒုးအိၣ်ဂၢၢ်ဆိးကျၢၤတၢ်လၢအကျါ, လၢအက တိၢ်န့ၢ်လါအးဒၢ်တဆံလွံၢ်နံၤတနံၤ, ဒီးတဆံယဲၢ်နံၤတ နံၤကိးနံၣ်ဒဲးတနံၣ်ဘၣ်တနံၣ်, ²² မုၢ်နံၤတဖၣ်လၢပှၤယူ ဒၤဖိအိၣ်ဘှံးဝဲ, တဘၣ်လၢၤတၢ်ကိၢ်တၢ်ဂီၤလၢအဒုၣ်အ ဒါဘၣ်, ဒီးလါတလါလၢအလဲလိာ်တၢ်သူၣ်အုးသးအုး လၢတၢ်သူၣ်ခုသးခု, ဒီးလၢအလဲလိာ်ဟီၣ်တၢ်ယၢၤတၢ် လၢမုၢ်တနံၤအဂ့ၤန့ၣ်, ဒ်သိးအကပာ်အီၤလၢ တၢ်အီၣ် တၢ်အီ, ဒီးတၢ်သူၣ်ခုသးခု, ဒီးတၢ်ဟ့ၣ်ယုၢ်လိာ်အသး သကိးသကိးလၢတၢ်အဂီၢ်တဖၣ်, ဒီးတၢ်ဟ့ၣ်ပှၤဖှီၣ်ဖိ ယာ်ဖိအတၢ်အမုၢ်နံၤတဖၣ်လီၤ.

²³ ဒီးပှၤယူဒၤဖိအၢၣ်လီၤအီလီၤ လၢအကမၤဝဲ ဒ်အမၤ သီအသိးန့ၣ်, ဒီးဒ်စီၤမၢ်ဒကဲၤကွဲးန့ၢ်အီၤအသိးန့ၣ်လီၤ. ²⁴ အဂ့ၢ်ဒ်အံၤ, ပှၤယူဒၤဖိခဲလၢာ်အဒုၣ်အဒါ ပှၤအကၤကးဖိ စီၤဟးမဒၤသၤအဖိခွါစီၤဟၤမၣ် ကူၣ်ဝဲလၢအကမၤဟးဂီၤပှၤယူဒၤဖိ, ဒီးတ့ၢ်လီၤပူရး (ဒ်ပစံးတၢ်အသိးဖးတၢ်) ဒ်သိးအကမၤလၢာ်ကွံာ်အီၤ, ဒီးမၤဟးဂီၤအီၤ,―

²⁵ ဘၣ်ဆၣ်ဒီး တုၤနီၢ်အ့ၤစတၢ်ဟဲဝဲဆူစီၤပၤအမဲာ်ညါဒီး, အဝဲဒၣ်မၤလိာ်ဝဲလၢလံာ်ပူၤ လၢအတၢ်ကူၣ်တၢ်အၢလၢ အကူၣ်ထီဒါပှၤယူဒၤဖိ, ကဟဲဘၣ်ကဒါက့ၤလၢအခိၣ် ဒၣ်ဝဲ, ဒီးအဝဲဒၣ်ဒီးအဖိခွါတဖၣ် ကဘၣ်တၢ်ဘျးထီၣ် အီၤလၢသ့ၣ်အလိၤလီၤ.

²⁶ မၤသးဒ်န့ၣ်ဒီးပှၤကိးန့ၢ်မုၢ်နံၤတဖၣ် လၢပူရံၣ်ထွဲပူရး အမံၤအခံလီၤ. မၤသးဒ်န့ၣ်ဒီးလၢလံာ်အံၤအတၢ်ကတိၤ ခဲလၢာ်အဃိ, ဒီးလၢကယဲၢ်တၢ်လၢ အထံၣ်ဘၣ်ဝဲလၢ တၢ်တမံၤန့ၣ်အဂ့ၢ်အကျိၤ, ဒီးတၢ်လၢအဘၣ်အီၤအဃိ ဒီး, ²⁷ ဒ်သိးအသုတမၤကပာ်တဂ့ၤ, ပှၤယူဒၤဖိစံၣ်ညီၣ်ဝဲ, ဒီးအၢၣ်လီၤအီလီၤလၢအဂီၢ်, ဒီးလၢအချံအသၣ်အဂီၢ်, ဒီးကယဲၢ်ပှၤလၢ အစဲဘူးအသးဒီးအီၤအဂီၢ်, လၢအက တိၢ်န့ၢ်မုၢ်ခံနံၤန့ၣ် ဒ်အကွဲးတၢ်အသိး, ဒီးဒ်အဆၢအက တီၢ်အသိးကိးနံၣ်ဒဲး, ²⁸ ဒီးလၢတၢ်ကဒုးသ့ၣ်နီၣ်ထီၣ်က့ၤ မုၢ်နံၤတဖၣ်လၢ ပှၤအစိၤစိၤအဃၣ်ဃၣ်, လၢပှၤတဒူၣ် လၢ်လၢ်, ဒီးလၢကီၢ်တဘ့ၣ်လၢ်လၢ်, ဒီးလၢဝ့ၢ်တဖျၢၣ် လၢ်လၢ်အပူၤ, ဒီးလၢပူရံၣ်အမုၢ်နံၤတဖၣ်န့ၣ်တၢ်တမၤ ကပာ်ဘၣ်လၢ ပှၤယူဒၤဖိအကျါဘၣ်, ဒီးတၢ်ဒုးသ့ၣ် နီၣ်ထီၣ်က့ၤအီၤ တဆိတ့ၢ်ဘၣ်လၢအချံအသၣ်အကျါ ဘၣ်.

²⁹ ဒီးစီၤအဘံဃယ့းလးအဖိမုၣ် နီၢ်ပၤမုၣ်အ့ၤစတၢ်, ဒီး ပှၤယူဒၤဖိစီၤမၢ်ဒကဲၤကွဲးဝဲလၢ တၢ်အစိအကမီၤခဲလၢာ် ဒ်သိးအကမၤဂၢၢ်မၤကျၢၤ လံာ်ပူရံၣ်ပှဲၤထီၣ် ခံဘ့ၣ်တ ဘ့ၣ်န့ၣ်လီၤ.

³⁰ ဒီးဟ့ၣ်ယုၢ်လံာ် အိၣ်ဒီးတၢ်ကတိၤအမုာ် အဖိးအမ့ၢ် အတီဆူကယဲၢ်ပှၤယူဒၤဖိအိၣ်ဝဲလၢ ကီၢ်တကယၤနွံဆံ ဘ့ၣ်လၢစီၤအဃၤၡဝ့ရိၣ်အဘီမုၢ်အပူၤ, ³¹ ဒ်သိးအကမၤ ဂၢၢ်မၤကျၢၤပူရံၣ်အမုၢ်နံၤတဖၣ်လၢအဆၢအကတီၢ်, ဒ် ပှၤယူဒၤဖိစီၤမၢ်ဒကဲၤ, ဒီးနီၢ်ပၤမုၣ်အ့ၤစတၢ် စံၣ်ညီၣ်ဝဲ အသိး, ဒီးဒ်အစံၣ်ညီၣ်လၢအဂီၢ်ဒၣ်ဝဲဒီးလၢအချံအသၣ် အဂီၢ်အသိးန့ၣ်, တၢ်ဘၣ်ဃးဒီးအတၢ်ဒုၣ်တၢ်အီၣ်, ဒီး အတၢ်ကိးပသူထီၣ်န့ၣ်လီၤ.

³² ဒီးနီၢ်အ့ၤစတၢ်အတၢ်မၤလိာ် ဒုးအိၣ်ဂၢၢ်ဆိးကျၢၤတၢ် ဘၣ်ဃးဒီးပူရံၣ်, ဒီးကွဲးအသးလၢလံာ်ပူၤလီၤ.

၁၀

¹ ဒီးစီၤပၤအဃၤၡဝ့ရိၣ် ဃ့သွဲလၢပှၤကီၢ်ဖိ, ဒီးလၢပှၤ ကီးဖိလၢပီၣ်လဲၣ်ပူၤလီၤ.

² ဒီးကယဲၢ်အမၤတၢ်ဘၣ်ဃးဒီး အစိအကမီၤ, ဒီးအ ဒိၣ်အထီ, ဒီးတၢ်ဒုးနဲၣ်စီၤမၢ်ဒကဲၤအဒိၣ်အထီလၢစီၤပၤ ပာ်ဒိၣ်ပာ်ထီအီၤခဲလၢာ်န့ၣ် ကွဲးအသးလၢမၤဒဲဒီးပၤရၣ် အစီၤပၤအလံာ်ကွဲးနီၣ်တၢ်အပူၤ, တမ့ၢ်ဘၣ်ဧါ.

³ အဂ့ၢ်ဒ်အံၤ, ပှၤယူဒၤဖိစီၤမၢ်ဒကဲၤမ့ၢ်ပှၤခီၣ်ထံးတဂၤ လၢစီၤပၤအဃၤၡဝ့ရိၣ်အဖီလာ်, ဒီးဒိၣ်ဝဲလၢပှၤယူဒၤဖိ အကျါ, ဒီးဘၣ်အဒီပုၢ်ဝဲၢ်ဂီၢ်မုၢ်အသး, ဒီးဃုဒုးထူးထီၣ် တီၤထီၣ်အပှၤဂီၢ်မုၢ်, ဒီးကတိၤတၢ်မုာ်တၢ်ဖိးဒီးအချံအ သၣ်ခဲလၢာ်လီၤ.