လံာ်စီၤပီလူးကွဲးန့ၢ်ပှၤအ့းဖ့းစူးဖိ.

လံာ်စီၤပီလူးကွဲးန့ၢ်ပှၤအ့းဖ့းစူးဖိ.

၁

¹ ယ့ၣ်ရှူးခရံာ်အပှၤတၢ်မၢဖိဖဲယွၤအသး, ယၤစီၤပီလူး, စံးဘၣ်ပှၤစီဆှံလၢအအိၣ်လၢအ့းဖ့းစူးအပူၤ, ဒီးပှၤလၢ အစူၢ်က့ၤနာ်က့ၤယ့ၣ်ရှူးခရံာ်န့ၣ်, ² မ်တၢ်ဘျုးတၢ်ဖှိၣ်ဒီး တၢ်ဃူတၢ်ဖိးလၢပပၢ်ယွၤဒီးကစၢ်ယ့ၣ်ရှူးခရံာ်န့ၣ်, ဘၣ် သုတက့ၢ်.

³ ယွၤ, ပကစၢ်ယ့ၣ်ရှူးခရံာ်အပၢ်, လၢအဆိၣ်ဂ့ၤပှၤလၢ ကယဲၢ်သးအတၢ်ဆိၣ်ဂ့ၤလၢမူခိၣ်အလီၢ်တဖၣ်, လၢခ ရံာ်အပူၤန့ၣ်, မ်အဘၣ်တၢ်ဆိၣ်ဂ့ၤတက့ၢ်. ⁴ ဒ်အဃုထၢ ပှၤလၢအဝဲဒၣ်အပူၤ လၢဟီၣ်ခိၣ်အခီၣ်ထံး တချုးကဲ ထီၣ်ဒံးဘၣ်, ဒ်သိးပကစီဆှံ, ဒီးတသံၣ်သူမီၢ်ကျာ်ဘၣ် လၢအမဲာ်ညါ, လၢတၢ်အဲၣ်တၢ်ကွံအပူၤအသိးလီၤ. ⁵ အ အဝဲဒၣ်ပာ်ပာ်ပှၤလၢဖိအလီၢ်လၢခရံာ်အဃိ, လၢအဂီၢ် ဒၣ်ဝဲ, ဖဲဒၣ်အသးဂ့ၤအသိး, ⁶ ဒ်သိးပကကဲထီၣ်တၢ်စံး ထီၣ်ပတြၢၤအဘျုးလၤအဖှိၣ်ကပီၤ လၢအဟ့ၣ်ပှၤလၢ ပှၤလၢတၢ်အဲၣ်အီၤတဂၤအပူၤန့ၣ်လီၤ. ⁷ လၢအဝဲဒၣ်အ ပူၤ, ပအိၣ်ဒီးတၢ်ပှ့ၤက့ၤပှၤလၢအသွံၣ်, တၢ်ပျၢ်ပတၢ်က မၣ်, ဒ်အဘျုးထူးအဖှိၣ်တီၤအသိး, ⁸ လၢအမၤအါထီၣ်ဝဲ လၢပဂီၢ်, လၢတၢ်ကူၣ်သ့ဒီးတၢ်သ့ၣ်ညါနၢ်ပၢၢ်တၢ်အ ပူၤလီၤ. ⁹ ဒီးဒုးသ့ၣ်ညါပှၤလၢအသးဒၣ်ဝဲအတၢ်ခူသူၣ် ဒ်တၢ်ဘၣ်အသးလၢ အတိာ်ပာ်လၢအပူၤဒၣ်ဝဲအသိး,―

¹⁰ ဒ်သိးဖဲအမုၢ်အလါပှဲၤထီၣ်ဒီး, အကဒုးအိၣ်ဖှိၣ်တၢ်ခဲ လၢာ်လၢအခိၣ်တဂၤဃီခရံာ်အပူၤ, တၢ်အိၣ်လၢမူခိၣ်ဒီး တၢ်အိၣ်လၢဟီၣ်ခိၣ်လီၤ. ¹¹ လၢအဝဲဒၣ်အပူၤန့ၣ်, ပဘၣ် တၢ်ပာ်ပာ်ပှၤ, ဒ်ပှၤလၢအမၤတၢ်ခဲလၢာ်ဖဲအသးဒၣ်ဝဲ တဂၤတိာ်ပာ်ဝဲအသိး, ဒီးပကဲထီၣ်တၢ်န့ၢ်သါ, ¹² ဒ်သိးပ ဝဲဒၣ်, လၢအမုၢ်လၢ်တၢ်ဆိလၢခရံာ်အပူၤ, ကကဲထီၣ် လၢတၢ်စံးထီၣ်ပတြၢၤအလၤကပီၤအဂီၢ်လီၤ. ¹³ လၢအဝဲ ဒၣ်အပူၤ, သုဝဲသ့ၣ်စ့ၢ်ကီးနၢ်ဟူတၢ်မ့ၢ်တၢ်တီအကလုၢ် အကထါ, တၢ်အုၣ်က့ၤခီၣ်က့ၤသုအတၢ်သးခုအကစီၣ် ဒီး, သုစူၢ်က့ၤနာ်က့ၤစ့ၢ်ကီးတၢ်ဝံၤဒီး, သုဘၣ်တၢ်ဃံၤ ဃာ်သုလၢသးစီဆှံဘၣ်ဃးဒီးအတၢ်စံးပာ်န့ၣ်လီၤ.―

¹⁴ အဝဲန့ၣ်မ့ၢ်တၢ်ဟ့ၣ်ကီၤလၢပတၢ်န့ၢ်သါအဂ့ၢ်, တုၤလီၤ လၢပန့ၢ်တၢ်လၢတၢ်ပှ့ၤပာ်လၢပဂီၢ်, လၢတၢ်စံးထီၣ်ပ တြၢၤအဝဲဒၣ်အလၤအကပီၤအဂ့ၢ်လီၤ.

¹⁵ မၤသးဒ်န့ၣ်ဒီး, သုစူၢ်က့ၤနာ်က့ၤကစၢ်ယ့ၣ်ရှူး, ဒီးအဲၣ် ပှၤစီဆှံခဲလၢာ်န့ၣ်ယနၢ်ဟူသတးဒီး, ¹⁶ ယစံးထီၣ်ပတြၢၤ အဘျုးအဖှိၣ်လၢသုဃိန့ၣ်ယတဆိတ့ၢ်ဘၣ်, ဒီးယသ့ၣ် နီၣ်ထီၣ်သုလၢယတၢ်ဘါထုကဖၣ်အပူၤလီၤ. ¹⁷ ဒ်သိးပ ကစၢ်ယ့ၣ်ရှူးခရံာ်အကစၢ်, တၢ်လၤကပီၤအပၢ်တဂၤက ဟ့ၣ်လီၤသုသးဘၣ်ဃးဒီးတၢ်ကူၣ်သ့ကူၣ်ဘၣ်, ဒီးတၢ် လီၣ်ဖျါလၢတၢ်သ့ၣ်ညါထံအီၤအပူၤ, ¹⁸ ဒ်သိးသုသးအ မဲာ်ကကပီၤထီၣ်, ဒီးသုကထံၣ်ဘၣ်တၢ်မုၢ်လၢ်ဘၣ်ဃး ဒီးအတၢ်ကိးန့ၢ်သုန့ၣ်မ့ၢ်ဒ်လဲၣ်ဒ်လဲၣ်, ဒီးအတၢ်န့ၢ်သါ လၢအပှၤစီဆှံအပူၤ, အလၤကပီၤအထူးအတီၤမ့ၢ်တၢ်ဒ် လဲၣ်ဒ်လဲၣ်, ¹⁹ ဒီးအစိဒိၣ်အကမီၤဒိၣ်လၢပှၤနာ်တၢ်ပဝဲ ဒၣ်အဂ့ၢ်မ့ၢ်တၢ်ဒ်လဲၣ်ဒ်လဲၣ်, ²⁰ လၢအမၤဝဲလၢအစိအ ကမီၤအဂံၢ်အဘါလၢခရံာ်အပူၤဖဲအဒုးဂဲၤဆၢထၢၣ်အီၤ လၢတၢ်သံအပူၤ, ဒီးပာ်အီၤလၢအစုထွဲလၢမူခိၣ်အလီၢ် တဖၣ်, ²¹ လၢတၢ်အခိၣ်ဒီးတၢ်အဒိၣ်အထီ, ဒီးတၢ်ကဲက စၢ်, ဒီးကယဲၢ်တၢ်အမံၤလၢတၢ်ကိးဝဲထဲအအံၤတဃၣ်ဧိၤ တမ့ၢ်ဘၣ်, မ့ၢ်ခဲကိာ်တဃၣ်စ့ၢ်ကီး, အဖီခိၣ်, ²² ဒီးပာ်တၢ် ခဲလၢာ်လၢအခီၣ်အဖီလာ်, ဒီးဒုးကဲအီၤလၢတၢ်ခဲလၢာ် အခိၣ်, လၢတၢ်အိၣ်ဖှိၣ်လၢအမ့ၢ်အနီၢ်ခိအဂီၢ်, ²³ ပှၤလၢ အမၤပှဲၤထီၣ်တၢ်ခဲလၢာ် လၢတၢ်ခဲလၢာ်တဂၤ အတၢ် လၢတၢ်ပှဲၤလီၤ.

၂

¹ ဒီးပှၤလၢအသံတ့ၢ်လၢ တၢ်သရူးတၢ်ကမၣ်ဒီးတၢ်ဒဲး တူာ်တၢ်ဒဲးဘးအပူၤသုဝဲသ့ၣ်အံၤ, ယွၤမၤမူထီၣ်က့ၤလံ သုလံ. ² တၢ်န့ၣ်တဖၣ်အပူၤ သုလဲၤတ့ၢ်ဒ်ပှၤအအံၤတ ဃၣ်ဖိအသိး, ဒ်တၢ်ဖးဖီအစိအကမီၤအခိၣ်, သးလၢအ မၤတၢ်ခဲကနံၣ်အံၤ လၢပှၤတစူၢ်ဘၣ်တၢ်အပူၤအသိးန့ၣ် လီၤ. ³ လၢအဝဲသ့ၣ်အကျါလၢထံးလၢမကိၣ်ပဝဲဒၣ်ခဲ လၢာ်အံၤ, ပအိၣ်ပဆိးလၢပဖံးပညၣ်အသးကွံတၢ်အ ပူၤ, ဒီးပမၤတၢ်ဖဲဒၣ်ပဖံးပညၣ်အသး, ဒီးဒ်ပသးကူၣ်တၢ် ဖးတၢ်အသိး, ဒီးပအိၣ်ဖျဲၣ်လၢ ပှၤဂ့ၤဘၣ်တၢ်သးဒိၣ် ထီၣ်ဒ်ပှၤဂၤအသိးန့ၣ်လီၤ. ⁴ မ့မ့ၢ်ယွၤလၢအသူၣ်ကညီၤ တၢ်ဒိၣ်သးကညီၤတၢ်အါန့ၣ်, မ့ၢ်အအဲၣ်ပှၤကွံပှၤအါ အါကလဲာ်အဃိဒီး, ⁵ ပှၤလၢအသံလၢတၢ်ကမၣ်အပူၤ ပဝဲဒၣ်အံၤ, မၤမူထီၣ်က့ၤဃုာ်ပှၤဒီးခရံာ်လီၤ. (သုတုၤ လၢတၢ်အုၣ်က့ၤခီၣ်က့ၤသုလၢတၢ်ဘျုးတၢ်ဖှိၣ်,) ⁶ ဒီးမၤ ဂဲၤဆၢထၢၣ်ဃုာ်ပှၤ, ဒီးဒုးဆ့ၣ်နီၤဃုာ်ပှၤ, လၢမူခိၣ်အ လီၢ်တဖၣ်အပူၤလၢယ့ၣ်ရှူးခရံာ်အပူၤ, ⁷ ဒ်သိးအကဒုး နဲၣ်အဘျုးထူးဒိၣ်အဖှိၣ်တီၤအါလၢ ခဲကိာ်အစိၤအဃၣ် တဖၣ်, လၢအမၤဂ့ၤပှၤလၢယ့ၣ်ရှူးခရံာ်အပူၤအဃိလီၤ.

⁸ အဂ့ၢ်ဒ်အံၤ, သုတုၤလၢတၢ်အုၣ်က့ၤခီၣ်က့ၤသုလၢ တၢ်ဘျုးတၢ်ဖှိၣ်လၢတၢ်နာ်အဃိလီၤ. ဒီးအဝဲန့ၣ်တမ့ၢ် ဘၣ်လၢသုဃိဒၣ်သုဝဲဘၣ်, မ့ၢ်ယွၤအတၢ်ဟ့ၣ်လီၤ. ⁹ ဒ် သိးပှၤသုတပာ်အသးကဖၢလၢနီတဂၤတဂ့ၤဒီး, တမ့ၢ် ဘၣ်လၢတၢ်မၤအဃိဘၣ်. ¹⁰ အဂ့ၢ်ဒ်အံၤ, ပမ့ၢ်အတၢ်မၤ လၢအတ့လီၤဝဲလၢယ့ၣ်ရှူးခရံာ်အပူၤ, ဒ်သိးပကမၤတၢ် ဂ့ၤတဖၣ်လၢ ယွၤကတဲာ်ကတီၤပာ်လၢ ပကလဲၤတၢ် လၢအပူၤန့ၣ်လီၤ.

¹¹ မၤသးဒ်န့ၣ်ဒီး, သုလၢအမ့ၢ်တ့ၢ်ပှၤကလုာ်တဖၣ်လၢ တၢ်ဖံးတၢ်ညၣ်အပူၤ, ပှၤလၢပှၤဒိးတၢ်ကူးတရံးလၢတၢ် ဖံးတၢ်ညၣ်လၢတၢ်မၤလၢပစု, ကိးဝဲလၢပှၤတဒိးဘၣ် တၢ်ကူးတရံးန့ၣ်, ¹² လၢဖဲအကတီၢ်န့ၣ်သုတအိၣ်ဘၣ် ဒီးခရံာ်ဘၣ်, ပှၤတခီဘီမုၢ်ဖိလၢအတဘၣ်ဃးဒီးအံၣ်စ ရ့လးဘၣ်, ဒီးပှၤတမှံၤတပျီၤလၢအတဘၣ်ဃးဘၣ်ဒီး တၢ်စံးပာ်အတၢ်အၢၣ်လီၤအီလီၤဘၣ်, ပှၤတအိၣ်ဘၣ်ဒီး တၢ်မုၢ်လၢ်ဘၣ်, ဒီးတအိၣ်ဘၣ်ဒီးယွၤလၢဟီၣ်ခိၣ်ချၢ န့ၣ်, သ့ၣ်နီၣ်ထီၣ်က့ၤသုဝဲတက့ၢ်. ¹³ မ့မ့ၢ်ခဲကနံၣ်အံၤလၢ ယ့ၣ်ရှူးခရံာ်အပူၤန့ၣ်, သုလၢအအိၣ်ယံၤတ့ၢ်ဝဲအံၤ, အိၣ် ဘူးထီၣ်က့ၤလၢခရံာ်အသွံၣ်အဃိလီၤ. ¹⁴ အဂ့ၢ်ဒ်အံၤ, အ ဝဲဒၣ်မ့ၢ်ပတၢ်ဃူတၢ်ဖိး, ပှၤလၢအမၤက့ၤပှၤခံဖုတဖုဃီ, ဒီးမၤလီၤပှီၢ်ကွံာ်တၢ်ခိၣ်ဒူအိၣ်လၢပဘၢၣ်စၢၤ, ¹⁵ ဒီးလၢ အဖံးအညၣ်အပူၤမၤဟးဂီၤတၢ်ထီဒုၣ်ထီဒါ, ဒ်ပစံးတၢ် အသိး, တၢ်သိၣ်တၢ်သီဘၣ်ဃးဒီး တၢ်မၤလိာ်လၢတၢ် အသနိတဖၣ်န့ၣ်သတးဒီး, ပှၤခံကလုာ်န့ၣ်တ့က့ၤဝဲလၢ ပှၤအသီတဂၤဃီလၢအကစၢ်ဒၣ်ဝဲအပူၤဒီး, မၤတၢ်ဃူ တၢ်ဖိးလီၤ. ¹⁶ ဒီးမၤသံကွံာ်တၢ်ထီဒုၣ်ထီဒါန့ၣ်သတးဒီး, မၤဖိးလိာ်တၢ်ခံခီဒီးယွၤ လၢအနီၢ်တဂၤဃီလၢထူၣ်စု ညါန့ၣ်လီၤ. ¹⁷ ဒီးဟဲစံၣ်တဲၤတဲလီၤတၢ်ဃူတၢ်ဖိးလၢသု လၢအအိၣ်ယံၤ, ဒီးတၢ်ဃူတၢ်ဖိးဒီးပှၤ လၢအအိၣ်ဘူး လီၤ. ¹⁸ အဂ့ၢ်ဒ်အံၤ, ပဝဲဒၣ်ပှၤခံဖုအံၤ, ပန့ၢ်ဘၣ်တၢ်ဆှၢပှၤ ဆူပၢ်အအိၣ်လၢသးတဖျၢၣ်ဃီလၢအဝဲဒၣ်အဃိလီၤ.

¹⁹ မၤသးဒ်န့ၣ်ဒီး သုတမ့ၢ်လၢၤဘၣ်ပှၤတခီဘီမုၢ်ဖိဒီးပှၤ တမှံၤဘၣ်. မ့မ့ၢ်သုမ့ၢ်ပှၤဝ့ၢ်ဖိသကိးပှၤဝ့ၢ်ဖိဒီးပှၤစီဆှံ, ဒီး ယွၤအပှၤဟံၣ်ဖိ, ²⁰ ဒီးတၢ်မၤထီၣ်သုလၢပှၤတၢ်မၢဖိ, ဒီး ဝံသ့ၣ်တဖၣ်အခီၣ်ထံးအဖီခိၣ်, ဒီးယ့ၣ်ရှူးခရံာ်အကစၢ် ဒၣ်ဝဲမ့ၢ်ဟံၣ်သနၢၣ်အခီၣ်ထံးလီၤ. ²¹ လၢအဝဲဒၣ်အပူၤ ဟံၣ်န့ၣ်ခဲလၢာ် ဘၣ်လိာ်ဖိးဒ့လိာ်အသးဒီဖျၢၣ်ညါသ တးဒီး, ဒိၣ်ထီၣ်ဒီးကဲထီၣ်လၢယွၤအဟံၣ်စီဆှံလီၤ. ²² ဒီး လၢအဝဲဒၣ်အပူၤ တၢ်သူၣ်ထီၣ်ဃုာ်သုလၢ ယွၤအိၣ်ဝဲ ဆိးဝဲအလီၢ်လၢသးအပူၤလီၤ.

၃

¹ လၢတၢ်န့ၣ်အဃိ, ယၤစီၤပီလူး, ယ့ၣ်ရှူးခရံာ်အပှၤဘၣ် ဃိာ်လၢပှၤကလုာ်တဖၣ်, သုဝဲသ့ၣ်အဂီၢ်, ² သုမ့ၢ်နၢ်ဟူ တ့ၢ်တၢ်မၤဘၣ်ဃးဒီး ယွၤအဘျုးအဖှိၣ်လၢ တၢ်ဟ့ၣ် လီၤယၤလၢသုဂီၢ်, ³ လၢတၢ်ဒုးသ့ၣ်ညါတၢ်ခူသူၣ်လၢ ယၤလၢတၢ်လီၣ်ဖျါအပူၤ, ဒ်ယကွဲးတ့ၢ်လၢတၢ်စှၤကိာ် အသိးလီၤ. ⁴ လၢအဝဲန့ၣ်သုမ့ၢ်ဖးဒီး, သုကထံၣ်ယတၢ် နၢ်ပၢၢ်လၢခရံာ်အတၢ်ခူသူၣ်န့ၣ်လီၤ. ⁵ တၢ်ခူသူၣ်န့ၣ် လၢတၢ်အစိၤအဃၣ်အဂၤအပူၤန့ၣ်, တဒုးသ့ၣ်ညါဘၣ် ပှၤကညီဖိခွါတဖၣ်ဒ် အလီၣ်ဖျါထီၣ်အီၤခဲကနံၣ်အံၤလၢ အပှၤတၢ်မၢဖိစီဆှံဒီး ဝံသ့ၣ်တဖၣ်လၢသးန့ၣ်, အသိး,―

⁶ လၢပှၤကလုာ်တဖၣ်ကန့ၢ်သါဃုာ်တၢ်, ဒီးဘၣ်ဃးဒီး နီၢ်တဂၤဃီ, ဒီးဒိးန့ၢ်ဃုာ်တၢ်စံးပာ်လၢ ခရံာ်အပူၤလၢ တၢ်သးခုအကစီၣ်အဃိလီၤ. ⁷ လၢတၢ်သးခုအကစီၣ် န့ၣ်, ယကဲလၢအပှၤတၢ်မၢဖိ ဖဲဒၣ်ယွၤအဘျုးအဖှိၣ်အ တၢ်ဟ့ၣ်လီၤယၤဒ် အစိအကမီၤမၤတၢ်အသိးန့ၣ်လီၤ.―

⁸ တၢ်ဟ့ၣ်လီၤတၢ်ဘျုးတၢ်ဖှိၣ်အံၤလၢယၤ, ပှၤအဆံးက တၢၢ်လၢပှၤစီဆှံခဲလၢာ်အဖီလာ်တဂၤ, ဒ်သိးယကစံၣ် တဲၤတဲလီၤခရံာ် အတၢ်ထူးတၢ်တီၤလၢပသ့ၣ်ညါထီၣ် တသ့ဘၣ်, ⁹ ဒီးဒ်သိးယကဒုးသ့ၣ်ညါပှၤခဲလၢာ်, လၢ တၢ်မၤဘၣ်ဃးဒီးတၢ်ခူသူၣ် လၢအအိၣ်ပာ်ခူသူၣ်အသး လၢတၢ်အစိၤတဖၣ်လၢယွၤ, လၢအတ့လီၤတၢ်ခဲလၢာ် တဂၤအပူၤန့ၣ်, မ့ၢ်တၢ်ဒ်လဲၣ်ဒ်လဲၣ်အဂ့ၢ်လီၤ. ¹⁰ ဒ်သိး တၢ်အဒိၣ်အခိၣ်ဒီး တၢ်အစိအကမီၤလၢမူခိၣ်အလီၢ်တ ဖၣ်န့ၣ်, ကသ့ၣ်ညါထီၣ်ခဲကနံၣ်အံၤယွၤအတၢ်ကူၣ်သ့ လၢအဒိၣ်ဝဲအါဝဲန့ၣ်, လၢတၢ်အိၣ်ဖှိၣ်အဃိ, ¹¹ ဒ်အတၢ် တိာ်ပာ်အစိၤစိၤအဃၣ်ဃၣ်လၢအတိာ်မၤဝဲလၢပကစၢ် ယ့ၣ်ရှူးခရံာ်အပူၤအသိးလီၤ. ¹² လၢအဝဲဒၣ်အပူၤ, ပအိၣ်ဒီးပသးခူတလ့ၢ်, ဒီးတၢ်ဒုးဟဲပှၤဆူအအိၣ်လၢပသူၣ် ဂၢၢ်သးကျၢၤလၢတၢ်နာ်အီၤအဃိလီၤ.

¹³ မၤသးဒ်န့ၣ်ဒီး, ယဃ့ကညးလၢသုသုတလီၤဘှါလၢ ယတၢ်နးတၢ်ဖှီၣ်လၢယဒိးလၢသုဃိန့ၣ်တဂ့ၤ. အဝဲန့ၣ် မ့ၢ်သုလၤသုကပီၤလီၤ. ¹⁴ လၢတၢ်န့ၣ်အဃိယချံးလီၤယ ခီၣ်လၢပကစၢ်ယ့ၣ်ရှူးခရံာ်အပၢ်အမဲာ်ညါ, ¹⁵ လၢပှၤအ ဒူၣ်ကိးဒူၣ်ဒဲးလၢမူခိၣ်ဒီးလၢဟီၣ်ခိၣ်ချၢ, ဘၣ်တၢ်ယုၢ် အမံၤလၢအီၤ, ¹⁶ ဒ်သိးအကဟ့ၣ်လီၤသုဒ်အလၤထူးအ ကပီၤတီၤအသိး, လၢသုနီၢ်လၢညါကန့ၢ်ဘၣ်အဂံၢ်ဆူၣ် အဘါဆူၣ်လၢသးအဃိ, ¹⁷ ဒ်သိးခရံာ်ကအိၣ်ဝဲဆိးဝဲ လၢသုသးအပူၤလၢတၢ်နာ်အဃိ, ¹⁸ ဒ်သိးသုဂံၢ်စဲၤလီၤ, ဒီးသုခီၣ်ထံးပာ်ကျၢၤအသးလၢ တၢ်အဲၣ်တၢ်ကွံအပူၤ သတးဒီး, သုနၢ်ကပၢၢ်ထီၣ်သကိးဒီးပှၤစီဆှံခဲလၢာ်, ဒီး သုကသ့ၣ်ညါထီၣ်တၢ်လၢအမ့ၢ် ခရံာ်အတၢ်အဲၣ်တၢ် ကွံအဒီၣ်တူာ်, ဒီးအထီ, ဒီးအလီၤဆၢၣ်, ဒီးအထီၣ်ထီ,―

¹⁹ ဒီးဒ်သိးသုကသ့ၣ်ညါ ခရံာ်အတၢ်အဲၣ်လၢ ပသ့ၣ်ညါ လၢာ်တသ့ဘၣ်, ဒ်သိးသုကလၢထီၣ်ပှဲၤထီၣ်ဒီးယွၤအ တၢ်လၢတၢ်ပှဲၤခဲလၢာ်လီၤ.

²⁰ ဒီးပှၤလၢအမၤအါန့ၢ်ဒိၣ်န့ၢ် ကယဲၢ်ပဃ့တၢ်ဒီးဆိက မိၣ်တၢ်သ့တဂၤ, ဒ်အစိအကမီၤလၢအမၤဝဲလၢပပူၤအ သိး, ²¹ မ်အဘၣ်တၢ်လၤကပီၤလၢတၢ်အိၣ်ဖှိၣ်အပူၤဒီး လၢယ့ၣ်ရှူးခရံာ်အပူၤလၢတၢ်အစိၤတဖၣ်ခဲလၢာ်, လီၤ ထူလီၤယိာ်တက့ၢ်. အၤမ့ၣ်.

၄

¹ မၤသးဒ်န့ၣ်ဒီး, ပှၤလၢအဘၣ်ဃိာ်လၢကစၢ်အဃိ, ယဲ ဒၣ်အံၤ, ယဃ့ကညးသုဒ်သိးသုကလဲၤဒ်အကြၢးဒီးတၢ် ကိးလၢတၢ်ကိးက့ၤသုအသိး, ² အိၣ်ဒီးကယဲၢ်တၢ်ဆီၣ် လီၤသုသး, ဒီးသူၣ်စူၤသးစူၤ, အိၣ်ဒီးတၢ်ဝံသးစူၤဃဲး ဃဲး, ဒီးကီၤသုသးသကိးသကိးလၢ တၢ်အဲၣ်တၢ်ကွံအ ပူၤသတးဒီး, ³ ဂုာ်ဟံးဃာ်သုသးတဖျၢၣ်ဃီလၢတၢ်ဃူ တၢ်ဖိးအတၢ်စၢဃာ်အပူၤတက့ၢ်. ⁴ နီၢ်တဂၤဃီ, ဒီးသး တဖျၢၣ်ဃီ, ဒ်တၢ်ကိးက့ၤသုလၢတၢ်မုၢ်လၢ်တမံၤဃီလၢ သုတၢ်ကိးအပူၤအသိးန့ၣ်လီၤ. ⁵ ကစၢ်တဂၤဃီ, တၢ်နာ် တမံၤဃီ, တၢ်ဒိးဘျၢ*တမံၤဃီ, ⁶ ယွၤတဂၤဃီဒီးတၢ်ခဲ လၢာ်အပၢ်, လၢအအိၣ်ဝဲလၢတၢ်ခဲလၢာ်အဖီခိၣ်, ဒီးအိၣ် ဝဲလၢတၢ်ကိးပူၤဒဲး, ဒီးအိၣ်ဝဲလၢတၢ်ခဲလၢာ်အပူၤတဂၤ လီၤ. ⁷ ဘၣ်ဆၣ်ဒီးဒ်ခရံာ်အတၢ်ဃီၣ်ဟ့ၣ်တၢ်အသိးန့ၣ် တၢ်ဟ့ၣ်ပဝဲဒၣ်ကိးဂၤဒဲး, လၢတၢ်ဘျုးတၢ်ဖှိၣ်လီၤ. ⁸ မၤ သးဒ်န့ၣ်ဒီး, တၢ်စံးဝဲဒၣ်, တုၤအက့ၤထီၣ်ဆူထးန့ၣ်ဒီး, မိၤထီၣ်မၢကဲကုၢ်တၢ်လၢအမၢကဲကုၢ်တၢ်, ဒီးဟ့ၣ်လီၤတၢ်ဘျုးတၢ်ဖှိၣ်လၢပှၤကညီလီၤ.+ စံး. ၆၈း၈|Ps.68.8

⁹ ဒီးတၢ်လၢအက့ၤထီၣ်န့ၣ်, မ့တမ့ၢ်ဘၣ်လၢအဟဲလီၤ ဆိဆူဟီၣ်ခိၣ်လာ်န့ၣ်ဒီး, မ့ၢ်အမ့ၢ်မနုၤလဲၣ်. ¹⁰ ပှၤလၢအ ဟဲလီၤတဂၤန့ၣ် မ့ၢ်ပှၤလၢအက့ၤထီၣ်ဝဲဆူကယဲၢ်မူခိၣ် တဖၣ်အဖီခိၣ်, ဒ်သိးအကမၤပှဲၤထီၣ်တၢ်ခဲလၢာ်လီၤ.

¹¹ ဒီးအဝဲဒၣ်ဟ့ၣ်ပှၤတၢ်မၢဖိတနီၤ, ဒီးဝံတနီၤ, ဒီးပှၤလဲၤ စံၣ်တဲၤတဲလီၤတၢ်သးခုအကစီၣ်တနီၤ, ဒီးပှၤကွၢ်တၢ် တနီၤ, ဒီးသရၣ်သိၣ်လိတၢ်တနီၤ, ¹² လၢပှၤစီဆှံတဖၣ် ကလၢထီၣ်ပှဲၤထီၣ်အဂီၢ်, လၢပှၤကမၤအခ့အပှၤအတၢ် အဂီၢ်, လၢခရံာ်အနီၢ်ကထီၣ်ဝဲထီဝဲအဂီၢ်, ¹³ တုၤပတုၤ လၢတၢ်တမံၤဃီဘၣ်ဃးဒီးတၢ်နာ်တမံၤဃီ, ဒီးတၢ်သ့ၣ် ညါယွၤအဖိခွါဒီး, ပဒိၣ်တုာ်ခိၣ်ပှဲၤလၢ တၢ်ထဲသိးဒီးခ ရံာ်အနီၢ်အတၢ်လၢတၢ်ပှဲၤအပူၤလီၤ. ¹⁴ ဒ်သိးပသုတမ့ၢ် လၢၤဖိသၣ်လၢအဟူးဝးဝဲ, ဒီးဒံဝ့ၤဒံဝီၤထွဲ ကယဲၢ်တၢ် သိၣ်တၢ်သီအကလံၤအခံ, လၢပှၤကညီအလီတၢ်ဝ့ၤ တၢ်, လၢတၢ်လွဲတၢ်လဲးဘၣ်ဃးဒီးအလီတၢ်အတၢ် ကူၣ်တၢ်ဆးန့ၣ်တဂ့ၤ. ¹⁵ အခိၣ်တလိာ်ပဟံးဃာ်တၢ်မ့ၢ် တၢ်တီလၢတၢ်အဲၣ်တၢ်ကွံအပူၤသတးဒီး, ပကဒိၣ်ထီၣ် အါထီၣ်လၢ တၢ်ခဲလၢာ်ဆူအဝဲဒၣ်လၢအမ့ၢ်တၢ်အခိၣ် အပူၤ, ဒ်ပစံးတၢ်အသိး, ခရံာ်အပူၤလီၤ. ¹⁶ လၢအဝဲဒၣ်အ ပူၤ, တၢ်ဒုးတံၢ်လိာ်ပနီၢ်ဒီဂၤညါအဆၢ, ဒီးဒုးစဲဘူးဝဲလၢ ကယဲၢ်အဆၢလၢအမၤစၢၤတၢ် ဒ်အဂီၤတမံၤဒီးတမံၤမၤ ဝဲအသိးသတးဒီး, မၤဒိၣ်ထီၣ်နီၢ်န့ၣ်, ဒ်သိးအကထီၣ်ဝဲ ထီဝဲလၢအကစၢ်ဒၣ်ဝဲလၢတၢ်အဲၣ်တၢ်ကွံအပူၤလီၤ.

¹⁷ မၤသးဒ်န့ၣ်ဒီး, ယစံးတၢ်အံၤ, ဒီးအုၣ်ယသးလၢကစၢ် အပူၤ, ဒ်သိးသုသုတလဲၤလၢၤ, ဒ်ပှၤကလုာ်တဖၣ်လၢအ လဲၤတၢ်ဖဲဒၣ်အကူၣ်တၢ်ကလီကလီအသိးန့ၣ်တဂ့ၤ လီၤ. ¹⁸ အဝဲသ့ၣ်တဖၣ်အသူၣ်ခံးအသးခံးသတးဒီး, လီၤ ဖးကွံာ်ဒီးယွၤအတၢ်မူ, လၢတၢ်တသ့ၣ်ညါဘၣ်အိၣ်လၢ အပူၤအဃိ, ဒီးလၢအသူၣ်ကိၤအသးကိၤအဃိလီၤ. ¹⁹ အ မဲာ်တဆှးလၢၤဘၣ်ဒီး, ဟ့ၣ်လီၤဒၣ်အသးလၢအသးက တၢအပူၤ, ဒ်သိးအကဂုာ်မၤကယဲၢ်တၢ်အဲၣ်တလ့ၤအဲၣ် တဘီခဲလၢာ်လီၤ. ²⁰ မ့မ့ၢ်သုတမၤလိဘၣ်ခရံာ်ဒ်န့ၣ်ဘၣ်.

²¹ ဒ်ပစံးတၢ်အသိး, သုမ့ၢ်နၢ်ဟူအီၤဒီးဘၣ်တၢ်သိၣ်လိသု လၢအပူၤ, ဒ်တၢ်မ့ၢ်တၢ်တီလၢယ့ၣ်ရှူးအပူၤအသိး, ²² ဒ် သိးသုကဘ့ၣ်လီၤကွံာ်သုနီၢ်လီၢ်လံၤ ဘၣ်ဃးဒီးသုတၢ် မၤလၢပျၢၤလၢအအုၣ်သံဝဲဒ်တၢ်လီတၢ်ဝ့ၤအတၢ်သးကွံ အသိးန့ၣ်, ²³ ဒီးဒ်သိးသုကကဲထီၣ်ပှၤအသီလၢသးအ တၢ်ဆိကမိၣ်, ²⁴ ဒီးကူထီၣ်သိးထီၣ်သုနီၢ်သီတ့အသး လၢတၢ်လီၤဂာ်ယွၤအသိး, လၢတၢ်တီတၢ်လိၤ, ဒီးတၢ်စီ ဆှံနီၢ်နီၢ်အပူၤလီၤ.

²⁵ မၤသးဒ်န့ၣ်ဒီး, ကွံာ်တ့ၢ်ကွံာ်တၢ်ကတိၤ ကဘျံးက ဘျၣ်, ဒီးကတိၤလိာ်သုသးလၢတၢ်မ့ၢ်တၢ်တီတဂၤဒီးတ ဂၤတက့ၢ်. အဂ့ၢ်ဒ်အံၤ, ပမ့ၢ်ပဂီၤသကိးပဂီၤတဂၤဒီးတ ဂၤလီၤ. ²⁶ သးဒိၣ်ထီၣ်ဒီး, မၤကမၣ်တၢ်တဂ့ၤ. လၢသုတၢ် သးဒိၣ်ထီၣ်န့ၣ်သုတဒုးလီၤနုာ်မုၢ်တဂ့ၤ. ²⁷ ဒီးဟ့ၣ်မုၣ် ကီၤလံၢ်အလီၢ်တဂ့ၤ. ²⁸ ပှၤလၢအဟုၣ်တၢ်, မ်အသုတ ဟုၣ်လၢၤတၢ်တဂ့ၤ, အခိၣ်တလိာ်, ဒ်သိးအကဟ့ၣ်နီၤ တၢ်လၢပှၤဖှီၣ်ဖိယာ်ဖိဒီး, မ်အကျဲးစၢးမၤတၢ်ဂ့ၤလၢအ စုသပှၢ်ပှၢ်တက့ၢ်. ²⁹ တၢ်ကတိၤအအၢအသီန့ၣ်, မ်သုသု တဒုးဟဲထီၣ်လၢသုကိာ်ပူၤနီတဘီတဂ့ၤ. ဒ်သိးပှၤနၢ်ဟူ တၢ်တဖၣ်ကန့ၢ်ဘၣ်အဘျုးအဖှိၣ်ဒီး, ကတိၤတၢ်ဂ့ၤလၢ တၢ်မၤထီၣ်မၤထီတၢ်ဖဲအလီၢ်အိၣ်တက့ၢ်. ³⁰ ဒီးသုတဒုး သးအုးယွၤအသးစီဆှံတဂ့ၤ. လၢအဝဲဒၣ်န့ၣ်သုဘၣ် တၢ်ဃံၤဃာ်သု, တုၤတၢ်ပှ့ၤက့ၤအမုၢ်တနံၤဘၣ်န့ၣ် လီၤ. ³¹ ကယဲၢ်တၢ်အခၣ်, ဒီးတၢ်သးဒိၣ်, ဒီးတၢ်သးဟ့, ဒီး တၢ်ကလာ်တၢ်, ဒီးဒုၣ်ဒွဲၣ်တၢ်, ဒီးကယဲၢ်တၢ်အအၢအ သီခဲလၢာ်န့ၣ်, ကွံာ်တ့ၢ်ကွံာ်တက့ၢ်. ³² ဒီးဝံသးစူၤလိာ် သုသး, သူၣ်ကညီၤသးကညီၤလိာ်သုသး, ပျၢ်လိာ်သု တၢ်, ဒ်ယွၤအိၣ်လၢခရံာ်အပူၤပျၢ်သုတၢ်အသိးန့ၣ်တ က့ၢ်.

၅

¹ မၤသးဒ်န့ၣ်ဒီး, ကဲထီၣ်ပှၤကွၢ်လိယွၤဒ်ဖိသးဘိအသိး န့ၣ်တက့ၢ်. ² လဲၤသုဝဲလၢတၢ်အဲၣ်တၢ်ကွံအပူၤ, ဒ်ခရံာ် အဲၣ်ပှၤကွံပှၤ, ဒီးဟ့ၣ်လီၤကွံာ်အသးလၢပဂီၢ်လၢတၢ်မၤ ဘူၣ်ဒီးတၢ်လုၢ်လၢယွၤလၢတၢ်နၢမူအဂီၢ်အသိးတက့ၢ်.

³ မ့မ့ၢ်တၢ်မၤကမၣ်မုၣ်ကမၣ်ခွါ, ဒီးတၢ်တကဆှီဘၣ် ထီရီၤတမံၤမ့ၢ်ဂ့ၤ, တၢ်သးကွံမ့ၢ်ဂ့ၤထဲအမံၤ, မ်ပှၤသုတ ပှ့ၤဘၣ်လၢသုကျါတဂ့ၤ, ဒ်ပှၤစီဆှံ ဂ့ၤမၤဝဲအသိးန့ၣ် လီၤ. ⁴ ဒီးတၢ်ကတိၤဆူဖျိးဆူပျၤ, ဒီးတၢ်ကတိၤဟးဂူာ် ဟးဂီၤ, ဒီးတၢ်ကတိၤလိာ်ဃိၢ်လိာ်ကွဲန့ၣ်, မ့ၢ်အတဂ့ၤတ ဘၣ်ဘၣ်ဒီး, သုတကတိၤအီၤတဂ့ၤ, အခိၣ်တလိာ်, က တိၤတၢ်လၢ တၢ်စံးထီၣ်ပတြၢၤ ယွၤအဘျုးအဖှိၣ်တ က့ၢ်. ⁵ အဂ့ၢ်ဒ်အံၤ, တၢ်အံၤသုသ့ၣ်ညါလၢကယဲၢ်ပှၤမၤ ကမၣ်မုၣ်ကမၣ်ခွါမ့ၢ်ဂ့ၤ, ပှၤအဲၣ်တလ့ၤအဲၣ်တဘီမ့ၢ်ဂ့ၤ, ပှၤသးကွံတၢ်မ့ၢ်ဂ့ၤ, (လၢအမ့ၢ်ပှၤဘါတၢ်ဂီၤ,) န့ၢ်ဘၣ် သါတၢ်လၢခရံာ်ဒီးယွၤအဘီအမုၢ်အပူၤတသ့ဘၣ်နီတ ဂၤဘၣ်. ⁶ သုတဒုးလီသုသးလၢပှၤအတၢ်ကတိၤကလီ ကလီနီတဂၤတဂ့ၤ. အဂ့ၢ်ဒ်အံၤ, မ့ၢ်တၢ်န့ၣ်တဖၣ်အဃိ ဒီး, ယွၤအတၢ်သးဒိၣ်ဟဲဘၣ်ပှၤတစူၢ်ဘၣ်တၢ်ဘၣ်တ ဖၣ်န့ၣ်လီၤ. မၤသးဒ်န့ၣ်ဒီး, သုတမၤဃုာ်ဒီးအီၤတဂ့ၤ. ⁷ အဂ့ၢ်ဒ် အံၤ, လၢသီန့ၣ်သုမ့ၢ်တၢ်ခံး, မ့မ့ၢ်ခဲကနံၣ်အံၤသုမ့ၢ်တၢ် ကပီၤလၢကစၢ်အပူၤလီၤ. လဲၤတၢ်ဒ်တၢ်ကပီၤဖိအသိး န့ၣ်တက့ၢ်. ⁹ အဂ့ၢ်ဒ်အံၤ, တၢ်ကပီၤအတၤသၣ်မ့ၢ်ကယဲၢ် တၢ်မၤဂ့ၤ, ဒီးတၢ်တီတၢ်လိၤ, ဒီးတၢ်မ့ၢ်တၢ်တီလီၤ. ¹⁰ ဂုာ် ဃုသ့ၣ်ညါတၢ်လၢအဘၣ်ကစၢ်အသးတက့ၢ်. ¹¹ ဒီးသု တမၤဃုာ်ဒီးတၢ်ခံး အတၢ်မၤလၢ အတၤသၣ်တအိၣ် ဘၣ်န့ၣ်တဂ့ၤ, အခိၣ်တလိာ်, သိၣ်ဃီၣ်အီၤတက့ၢ်. ¹² အ ဂ့ၢ်ဒ်အံၤ, တၢ်လၢအဝဲသ့ၣ်မၤလၢတၢ်ခူသူၣ်န့ၣ်, ထဲပစံၣ် ဃဲၤအီၤဒီး, မ့ၢ်တၢ်မဲာ်ဆှးလီၤ. ¹³ ဘၣ်ဆၣ်ဒီးကယဲၢ်တၢ် လၢအဘၣ်တၢ်သိၣ်ဃီၣ်န့ၣ်, မ့ၢ်အဘၣ်တၢ်လီၣ်ဖျါထီၣ် အီၤလၢတၢ်ကပီၤလီၤ. အဂ့ၢ်ဒ်အံၤ, ကယဲၢ်တၢ်လၢအမၤ ဖျါတၢ်န့ၣ်မ့ၢ်တၢ်ကပီၤလီၤ. ¹⁴ မၤသးဒ်န့ၣ်ဒီးတၢ်စံးဝဲဒၣ်ပှၤလၢအမံ, နၤဧၢ, ဖုသံနီၣ်တက့ၢ်. ဂဲၤဆၢထၢၣ်က့ၤလၢတၢ်သံတက့ၢ်, ဒီးခရံာ်ကဟ့ၣ်လီၤနၤလၢတၢ်ကပီၤလီၤ, ပှၤလၢအမံ, နၤဧၢ, ဖုသံနီၣ်တက့ၢ်. ဂဲၤဆၢထၢၣ်က့ၤလၢ တၢ်သံတက့ၢ်, ဒီးခရံာ်ကဟ့ၣ်လီၤနၤလၢတၢ်ကပီၤလီၤ. ¹⁵ မၤသးဒ်န့ၣ်ဒီးတိၢ်သုသးဒ်သိး သုကလဲၤကွၢ်ဟုၣ်ကွၢ် စုးတၢ်, တမ့ၢ်ဘၣ်ဒ်ပှၤဟးဂီၤဖိအသိးဘၣ်, မ့ၢ်ဒ်ပှၤကူၣ် တၢ်သ့အသိးန့ၣ်တက့ၢ်. ¹⁶ ပှ့ၤက့ၤအဆၢကတီၢ်တက့ၢ်. အဂ့ၢ်ဒ်အံၤ, မုၢ်နံၤတဖၣ်န့ၣ်မ့ၢ်အအၢအသီလီၤ. ¹⁷ မၤသး ဒ်န့ၣ်ဒီး, ကဲထီၣ်လၢပှၤဟးဂီၤဖိတဂ့ၤ, မ့မ့ၢ်တၢ်ဘၣ်က စၢ်အသးဒ်လဲၣ်ဒ်လဲၣ်န့ၣ်သ့ၣ်ညါနၢ်ပၢၢ်တက့ၢ်.

¹⁸ ဒီးအီမူၤသုသးလၢစပံးထံတဂ့ၤ. လၢအဝဲန့ၣ်အပူၤ, မ့ၢ်တၢ်လုၣ်ကိလုၣ်ကပာ်လီၤ. မ့မ့ၢ်အိၣ်လၢပှဲၤဒီးသးန့ၣ် တက့ၢ်. ¹⁹ ကတိၤလိာ်သုသးလၢထါစံးထီၣ်ပတြၢၤ, ဒီး တၢ်သးဝံၣ်, ဒီးထါဘၣ်ဃးဒီးသးန့ၣ်, ဒီးအုၣ်ထီၣ်, ဒီးစံး ထီၣ်ပတြၢၤကစၢ်လၢသုသူၣ်ကံၢ်သးလဲတက့ၢ်. ²⁰ စံး ထီၣ်ပတြၢၤပၢ်ယွၤ အဘျုးအဖှိၣ်တဘိယူၢ်ဃီလၢတၢ်ခဲ လၢာ်အဃိ, လၢပကစၢ်ယ့ၣ်ရှူးခရံာ်အမံၤန့ၣ်တက့ၢ်.―

²¹ ပာ်လီၤလိာ်သုသးသကိးသကိး လၢသုဖီလာ်လၢတၢ် ပျံၤခရံာ်အပူၤတက့ၢ်. ²² ပိာ်မုၣ်သ့ၣ်ဧၢ, ပာ်လီၤသုသးလၢ သုဝၤအဖီလာ်, ဒ်လၢကစၢ်န့ၣ်အသိးတက့ၢ်. ²³ အဂ့ၢ်ဒ် အံၤ, ဝၤမ့ၢ်မါအခိၣ်, ဒ်ခရံာ်မ့ၢ်တၢ်အိၣ်ဖှိၣ်အခိၣ်အသိး န့ၣ်, ဒီးအဝဲဒၣ်န့ၣ်မ့ၢ် ပှၤအုၣ်က့ၤခီၣ်က့ၤပနီၢ်ခိတဂၤ လီၤ. ²⁴ မၤသးဒ်န့ၣ်ဒီးဒ်တၢ်အိၣ်ဖှိၣ်အိၣ်လၢခရံာ်အဖီ လာ်အသိးန့ၣ်, မ်မါသ့ၣ်တဖၣ်ပာ်လီၤအသးလၢအဝၤ ဒၣ်ဝဲအဖီလာ်လၢတၢ်ခဲလၢာ်အပူၤဒ်န့ၣ်သိးတက့ၢ်.

²⁵ ပိာ်ခွါသ့ၣ်ဧၢ, အဲၣ်သုမါ, ဒ်ခရံာ်အဲၣ်တၢ်အိၣ်ဖှိၣ်, ဒီး ဟ့ၣ်လီၤကွံာ်အသးလၢအဂီၢ်, ²⁶ ဒ်သိးကမၤစီဆှံအီၤလၢ တၢ်သ့စီလၢထံ, လၢတၢ်အကလုၢ်အကထါအဃိ, ²⁷ ဒ် သိးအကပာ်အီၤလၢအမဲာ်ညါဒၣ်ဝဲ, တၢ်အိၣ်ဖှိၣ်အိၣ်ဒီး အလၤအကပီၤ, ဒီးအမဲၣ်သူမဲၣ်ဂီၤမ့ၢ်ဂ့ၤ, အဖံးသွံးမ့ၢ်ဂ့ၤ, တၢ်ဒ်န့ၣ်သိးတဖၣ်မ့ၢ်ဂ့ၤ, တအိၣ်ဘၣ်, မ့ၢ်ဒ်သိးအကစီ ကဆှံ, ဒီးတသံၣ်သူတမီၢ်ကျာ်ဘၣ်လီၤ. ²⁸ ဒ်န့ၣ်အသိး ပိာ်ခွါသ့ၣ်တဖၣ်ဂ့ၤအဲၣ်အမါဒၣ်ဝဲ, ဒ်အအဲၣ်အနီၢ်ခိဒၣ် ဝဲအသိးန့ၣ်လီၤ. ပှၤလၢအအဲၣ်အမါဒၣ်ဝဲန့ၣ်အဲၣ်အသး ဒၣ်ဝဲလီၤ. ²⁹ အဂ့ၢ်ဒ်အံၤ, ပှၤလၢအသးဟ့အညၣ်ဒၣ်ဝဲတ အိၣ်ဘၣ်နီတဂၤဘၣ်. မ့ၢ်အလုၢ်ဝဲ, ဒီးအံးက့ၤကွၢ်က့ၤဝဲ, ဒ်ခရံာ်အံးက့ၤကွၢ်က့ၤအတၢ်အိၣ်ဖှိၣ်အသိးန့ၣ်လီၤ.―

³⁰ အဂ့ၢ်ဒ်အံၤ, ပမ့ၢ်အနီၢ်ခိအဂီၤတဖၣ် (ဒီးလၢအညၣ်, ဒီး အဃံတဖၣ်)လီၤ. ³¹ မ့ၢ်တၢ်န့ၣ်အဃိဒီး, ပိာ်ခွါကဟးသ ဒၣ်အမိၢ်ဒီးအပၢ်, ဒီးကဘျုးအသးဒီးအမါ, ဒီးအဝဲခံဂၤ န့ၣ်ကကဲထီၣ်တညၣ်ဃီလီၤ.

³² တၢ်အံၤမ့ၢ်တၢ်ခူသူၣ်ဖးဒိၣ်လီၤ. ဘၣ်ဆၣ်ဒီး ယစံး တၢ်န့ၣ်မ့ၢ်လၢခရံာ်ဒီးအတၢ်အိၣ်ဖှိၣ်အဂ့ၢ်လီၤ. ³³ ဘၣ် ဆၣ်ဒီးသုဝဲဒၣ်အံၤ, ဒ်သုအဲၣ်လီၤသုသးအသိး, တဂၤ အဲၣ်အမါ, တဂၤအဲၣ်အမါဒၣ်ဝဲတက့ၢ်. ဒီးပိာ်မုၣ်န့ၣ်မ် အယူးယီၣ်အဝၤတက့ၢ်.

၆

¹ ဖိသၣ်သ့ၣ်ဧၢ, စူၢ်သုမိၢ်သုပၢ်လၢကစၢ်အပူၤတက့ၢ်. အဂ့ၢ်ဒ်အံၤ, တၢ်န့ၣ်မ့ၢ်အတီအလိၤလီၤ. ² ယူးယီၣ်နမိၢ် ဒီးနပၢ်တက့ၢ်. တၢ်န့ၣ် မ့ၢ်တၢ်မၤလိာ်အခီၣ်ထံးတဘီ လၢအအိၣ်ဒီးတၢ်စံးပာ်လီၤ. ³ ဒ်သိးနကဘီၣ်ထီၣ်ညီ ထီၣ်, ဒီးနသးကကၢကခိးလၢဟီၣ်ခိၣ်ချၢလီၤ.

⁴ ပၢ်သ့ၣ်ဧၢ, မၤဒိၣ်ထီၣ်သုဖိတဖၣ်အသးတဂ့ၤ. မ့မ့ၢ် လုၢ်အီၣ်အီၤလၢကစၢ်အတၢ်သိၣ်တၢ်သီ, ဒီးအတၢ်သိၣ် ဃီၣ်သီဃီၣ်အပူၤတက့ၢ်.

⁵ ကုၢ်သ့ၣ်ဧၢ, စူၢ်သုကစၢ်ဘၣ်ဃးဒီးဖံးဒီးညၣ်အံၤ, လၢ တၢ်ပျံၤ, ဒီးတၢ်ကနိး, လၢသုသးဒီဖျၢၣ်ညါ, ဒ်လၢခရံာ်အ သိးန့ၣ်တက့ၢ်. ⁶ တမ့ၢ်ဘၣ်ထဲလၢသုအိၣ်လၢအမဲာ်ညါ ဒ်ပှၤလၢအမၤတၢ်ဘၣ်ပှၤကညီအသးအသိးန့ၣ်ဘၣ်. မ့ၢ် ဒ်ခရံာ်အကုၢ်အသိးဒီး, မၤတၢ်ဘၣ်ယွၤအသးလၢသု သူၣ်ကံၢ်သးလဲ, ⁷ ဒီးမၤကုၢ်အတၢ်မၤလၢသးဂ့ၤ, တမ့ၢ် ဘၣ်ဒ်လၢပှၤကညီအဂီၢ်အသိးဘၣ်, မ့ၢ်ဒ်လၢကစၢ်အ ဂီၢ်အသိးန့ၣ်လီၤ. ⁸ အဂ့ၢ်ဒ်အံၤ, သုသ့ၣ်ညါလၢဖဲဒၣ်ပှၤ လၢအမၤတၢ်ဂ့ၤ, ပှၤကုၢ်ဖိမ့ၢ်ဂ့ၤ, ပှၤသဘျ့ဖိမ့ၢ်ဂ့ၤ, ကန့ၢ် ဘၣ်တၢ်လၢကစၢ်အစုပူၤ, ဒ်အမၤတၢ်အသိးလီၤ.

⁹ ဒီးကစၢ်သ့ၣ်ဧၢ, မၤအဝဲသ့ၣ်တဖၣ်ဒ်န့ၣ်အသိး, ဒီးက တိၤပျံၤတၢ်တဂ့ၤ. အဂ့ၢ်ဒ်အံၤ, သုသ့ၣ်ညါလၢသုကစၢ် ဒီးအဝဲသ့ၣ်အကစၢ်, အိၣ်စ့ၢ်ကီးလၢမူခိၣ်, ဒီးတကွၢ်မဲာ် ဘၣ်ပှၤကညီဘၣ်လီၤ.

¹⁰ တၢ်ကတိၤလၢခံကတၢၢ်, ယပုၢ်သ့ၣ်ဝဲၢ်သ့ၣ်ဧၢ, အိၣ် ဆူၣ်အိၣ်ချ့လၢကစၢ်အပူၤ, ဒီးလၢအဝဲဒၣ်အစိအကမီၤ အဂံၢ်အဘါအပူၤတက့ၢ်. ¹¹ သိးထီၣ်ယွၤအစုကဝဲၤခဲ လၢာ်, ဒ်သိးသုတြီမုၣ်ကီၤလံၢ်အတၢ်လီတၢ်ဝ့ၤကသ့န့ၣ် တက့ၢ်. ¹² အဂ့ၢ်ဒ်အံၤ, တမ့ၢ်ဘၣ်ပကနိဒီးတၢ်သွံၣ်ဒီးတၢ် ဖံးတၢ်ညၣ်ဘၣ်, မ့ၢ်လၢတၢ်အခိၣ်, ဒီးတၢ်အစိအကမီၤ, ဒီးအအံၤတဃၣ်အတၢ်ခံးအကစၢ်, တၢ်နါအိၣ်လၢမူခိၣ် အလီၢ်တဖၣ်လီၤ. ¹³ မၤသးဒ်န့ၣ်ဒီး, ဟံးန့ၢ်ယွၤအစုကဝဲၤ ခဲလၢာ်, ဒ်သိးသုဆၢထၢၣ်လၢမုၢ်နံၤအအၢန့ၣ်ကသ့, ဒီး ဒ်သိးသုမၤတၢ်ခဲလၢာ်ဝံၤဒီး, သုကဆၢထၢၣ်တက့ၢ်.―

¹⁴ မၤသးဒ်န့ၣ်ဒီး, ကံၢ်တူာ်သုယီၢ်ဒ့ဒီးတၢ်မ့ၢ်တၢ်တီ, ဒီး သိးထီၣ်တၢ်တီတၢ်လိၤအသဃိး, ¹⁵ ဒီးဖျီၣ်သုခီၣ်ဒီးတၢ် သးခုအကစီၣ် ဘၣ်ဃးဒီးတၢ်ဃူတၢ်ဖိးအတၢ်ကတဲာ် ကတီၤ, ဒီးဆၢထၢၣ်တက့ၢ်. ¹⁶ လၢတၢ်ခဲလၢာ်အဖီခိၣ် န့ၣ်, ဒ်သိးသုမၤလီၤပံာ်မုၣ်ကီၤလံၢ်အပျၢ်မ့ၣ်အူခဲလၢာ် လၢအီၤကသ့ဒီး, ဟံးထီၣ်တၢ်နာ်အကတီၤတက့ၢ်. ¹⁷ ဒီး ကုာ်ထီၣ်တၢ်အုၣ်က့ၤခီၣ်က့ၤအခိၣ်ကုာ်သုး, ဒီးဟံးထီၣ် သးအနးလၢအမ့ၢ်ယွၤအကလုၢ်အကထါတက့ၢ်. ¹⁸ ဘါ ထုကဖၣ်တၢ်လၢကယဲၢ်တၢ်ဘါထုကဖၣ်, ဒီးတၢ်ဃ့က ညးကိးအကတီၢ်ဒဲး, လၢသုသူၣ်ကံၢ်သးလဲ, ဒီးဆိးသီ သပှၢ်ပှၢ်လၢတၢ်န့ၣ်အဂ့ၢ်, ဒီးဘါထုကဖၣ်န့ၢ်ပှၤစီဆှံခဲ လၢာ်အဂီၢ်, ¹⁹ ဒီးယဂီၢ်, ဒ်သိးတၢ်ကဟ့ၣ်ယအဲးထီၣ်ယ ထးခိၣ်အိၣ်ဒီးယသးခူတလ့ၢ်, ဒ်သိးယကမၤဖျါထီၣ် တၢ်သးခုအကစီၣ်အတၢ်ခူသူၣ်, ²⁰ လၢယမ့ၢ်အကလူး တဂၤလၢအဘၣ်တၢ်စၢဃာ်, ဒ်သိးယကစံၣ်တဲၤတဲလီၤ အီၤခူတလ့ၢ်, ဒ်ယဂ့ၤ စံၣ်တဲၤတဲလီၤတၢ်အသိးန့ၣ်တ က့ၢ်.

²¹ ဘၣ်ဆၣ်ဒီးဒ်သိး သုကသ့ၣ်ညါစ့ၢ်ကီး တၢ်လၢအ ဘၣ်ဃးဒီးယၤ, တၢ်လၢယမၤန့ၣ်ဒီး, ဒီပုၢ်ဝဲၢ်လၢတၢ် အဲၣ်အီၤ, ဒီးတၢ်အခ့အပှၤလၢအကလုၢ်တီလၢကစၢ်အ ပူၤ, စီၤတူဃံၤကူးတဂၤန့ၣ်, ကဘိးဘၣ်သ့ၣ်ညါသုလၢ တၢ်ခဲလၢာ်လီၤ. ²² ဒ်သိးသုကသ့ၣ်ညါတၢ်ဘၣ်ဃးဒီး ယၤ, ဒ်သိးအကမၤမုာ်ထီၣ်က့ၤသုသးဒီး, ယမၢအလဲၤ ဆူသုအိၣ်လၢတၢ်န့ၣ်အဃိလီၤ.

²³ မ်တၢ်ဃူတၢ်ဖိးဒီးတၢ်အဲၣ်တၢ်ကွံ အိၣ်ဒီးတၢ်နာ်ဟဲ လၢပၢ်ယွၤ, ဒီးကစၢ်ယ့ၣ်ရှူးခရံာ်န့ၣ်, ဘၣ်ပဒီပုၢ်ဝဲၢ်န့ၣ် တက့ၢ်.

²⁴ ပှၤလၢအအဲၣ်ပကစၢ်ယ့ၣ်ရှူး ခရံာ်လၢအသူၣ်ကံၢ်သး လဲခဲလၢာ်န့ၣ်, မ်တၢ်ဘျုးတၢ်ဖှိၣ်ကအိၣ်ဒီးအီၤတက့ၢ်.