လံာ်ပှၤစံၣ်တဲၤတဲလီၤတၢ်.

လံာ်ပှၤစံၣ်တဲၤတဲလီၤတၢ်.

၁

¹ စီၤဒၤဝံးအဖိခွါ, စီၤပၤလၢယရူၤၡလ့ၣ်အပူၤ, ပှၤစံၣ် တဲၤတဲလီၤတၢ်အတၢ်ကတိၤလီၤ.

² တၢ်ကလီကလီ အတၢ်ကလီကလီန့ၣ်, ပှၤစံၣ်တဲၤ တဲလီၤတၢ်စံးဝဲဒၣ်, တၢ်ကလီကလီအတၢ်ကလီလီန့ၣ်, တၢ်ခဲလၢာ်မ့ၢ်တၢ်ကလီကလီလီၤ.

³ ပှၤဘၣ်ဘျုးဘၣ်ဖှိၣ်လၢ အမၤတၢ်ခဲလၢာ်လၢအမၤဝဲ လၢမုၢ်အဖီလာ်န့ၣ်, မ့ၢ်မနုၤတမံၤလဲၣ်. ⁴ ပှၤတစိၤလဲၤဝဲ ဒီးပှၤတစိၤဟဲဝဲလီၤ. မ့မ့ၢ်ဟီၣ်ခိၣ်အိၣ်ဝဲဆိးဝဲလီၤထူ လီၤယိာ်လီၤ. ⁵ မုၢ်ဟဲထီၣ်, ဒီးမုၢ်လီၤနုာ်, ဒီးလဲၤဝဲချ့ချ့ ဆူအလီၢ်ဖဲအဟဲထီၣ်ဝဲလီၤ. ⁶ ကလံၤလဲၤဆူကလံၤထံး, ဒီးဃၣ်ကဒါက့ၤအသးဆူကလံၤစိး, တရံးထီဘိလၢအ လဲၤတၢ်, ဒီးကလံၤဟဲက့ၤကဒါက့ၤဒ်အကဝီၤတဖၣ်အ သိးန့ၣ်လီၤ. ⁷ ထံကျိယွၤလီၤဆူပီၣ်လဲၣ်ပူၤခဲလၢာ်ဘၣ် ဆၣ်ဒီး, ပီၣ်လဲၣ်တပှဲၤဘၣ်. ဖဲအလီၢ်လၢထံကျိဟဲန့ၣ် လဲၤကဒီးဆူန့ၣ်လီၤ. ⁸ ကယဲၢ်တၢ်ခဲလၢာ်ပှဲၤဒီးတၢ်ဘှံး သူၣ်ဘှံးသးလီၤ. ပှၤကညီစံၣ်တဲၤတဲလီၤအီၤတသ့ဘၣ်. ပှၤမဲာ်ကွၢ်တၢ်ဘၣ်ဆၣ်ဒီး, တဘျဲးကွၢ်ဘၣ်, ဒီးပှၤအနၢ် တဘျဲးနၢ်ဟူဘၣ်တၢ်ဘၣ်.

⁹ တၢ်လၢအအိၣ်တ့ၢ်န့ၣ် မ့ၢ်တၢ်လၢအကကဲထီၣ်, ဒီး တၢ်လၢအမၤတ့ၢ်အသးန့ၣ် မ့ၢ်တၢ်လၢအကမၤအသး လီၤ. ဒီးတၢ်အသီတအိၣ်လၢမုၢ်အဖီလာ်ဘၣ်. ¹⁰ ကွၢ် ကွၢ်, အဝဲအံၤမ့ၢ်တၢ်အသီန့ၣ်, တၢ်လၢပစံးလၢအဂ့ၢ်ဒ် န့ၣ်သ့အိၣ်ဝဲတမံၤမံၤဧါ. အဝဲဒၣ်န့ၣ် အိၣ်တ့ၢ်ဝဲလၢ ပျၢၤ, လၢပတချုးအိၣ်ဒံးဘၣ်လီၤ. ¹¹ တၢ်သ့ၣ်နီၣ်ထီၣ် က့ၤတၢ်လၢပျၢၤတအိၣ်ဘၣ်, ဒီးတၢ်လၢအကဟဲန့ၣ်ပှၤ လၢအကဟဲလၢအလီၢ်ခံန့ၣ် တသ့ၣ်နီၣ်ထီၣ်က့ၤဘၣ် အီၤဘၣ်.

¹² တၢ်လၢယၤအံၤ ပှၤစံၣ်တဲၤတဲလီၤတၢ်, ယမ့ၢ်စီၤပၤ လၢယရူၤၡလ့ၣ်လီၤ. ¹³ ဒီးယပာ်ယသးလၢယကဃုန့ၢ် ဒီးချုန့ၢ်ကယဲၢ်တၢ်ခဲလၢာ်လၢအမၤအသးလၢ မူခိၣ်အ ဖီလာ်အဂ့ၢ်လၢတၢ်ကူၣ်သ့လီၤ. မ့ၢ်တၢ်မၤအအၢလၢ ယွၤဟ့ၣ်လီၤပှၤကညီဖိဒ်သိးအကမၤအီၤလီၤ. ¹⁴ ယထံၣ် ဘၣ်ကယဲၢ်တၢ်လၢအမၤအသးလၢမုၢ်အဖီလာ်, ဒီးကွၢ် ကွၢ်, ကယဲၢ်တၢ်ခဲလၢာ်မ့ၢ်တၢ်ကလီကလီ, ဒီးတၢ်မၤ လၢအတဂိာ်တသီၣ်ဘၣ်တၢ်ဘၣ်လီၤ.

¹⁵ တၢ်လၢအက့ၣ်န့ၣ် ပမၤဘျၢထီၣ်တသ့ဘၣ်, ဒီးတၢ် လၢအတအိၣ်ဘၣ်န့ၣ် ပဂံၢ်ထီၣ်တသ့ဘၣ်. ¹⁶ ယက တိၤတၢ်ဒီးယသးဒၣ်ယဲ, ဒီးယစံး, ကွၢ်ကွၢ်, ယန့ၢ်ဘၣ် တၢ်ကူၣ်သ့ဒီးမၤအါထီၣ်အီၤ အါန့ၢ်ကယဲၢ်ပှၤလၢအ အိၣ်တ့ၢ်ဝဲလၢယမဲာ်ညါ လၢယရူၤၡလ့ၣ်အပူၤန့ၣ်တ က့ၢ်လီၤ. ဒီးယသးကွၢ်ထံဘၣ်တ့ၢ်တၢ်ကူၣ်သ့, ဒီးတၢ် သ့ၣ်ညါအါမးလီၤ. ¹⁷ ဒီးယဟ့ၣ်သ့ၣ်ညါယသးလၢတၢ် ကူၣ်သ့, ဒီးတၢ်ဒုးပျုၢ်တၢ်, ဒီးပှၤဟးဂီၤဖိအတၢ်လီၤ. ယ သ့ၣ်ညါလၢအဝဲန့ၣ်မ့ၢ်စ့ၢ်ကီးတၢ်မၤ တဂိာ်တသီၣ်ဘၣ် တၢ်ဘၣ်လီၤ. ¹⁸ အဂ့ၢ်ဒ်အံၤ, တၢ်မၤကိၢ်မၤဂီၤအိၣ်အါမး လၢတၢ်ကူၣ်သ့အါအပူၤန့ၣ်, ဒီးပှၤလၢအမၤအါထီၣ်အ တၢ်သ့ၣ်ညါန့ၣ်မၤအါထီၣ်အတၢ်သူၣ်အုးသးအုးလီၤ.

၂

¹ ယစံးလၢယသးကံၢ်ပူၤ, ဟဲ, ယကမၤကွၢ်နၤလၢတၢ် နံၤတၢ်အ့လီၤ. မၤသးဒ်န့ၣ်ဒီး, မုာ်လၤတၢ်လၢတၢ်ဂ့ၤ တက့ၢ်. ဒီးကွၢ်ကွၢ်, အဝဲန့ၣ်မ့ၢ်စ့ၢ်ကီးတၢ်ကလီကလီ လီၤ. ² ယစံးလၢတၢ်နံၤတၢ်အ့အဂ့ၢ်န့ၣ် မ့ၢ်တၢ်ပျုၢ်, ဒီး လၢတၢ်သးခုအဂ့ၢ်န့ၣ်မ့ၢ်အဂိာ်မနုၤလဲၣ်. ³ ယဃုလၢ ယသးလၢယကမၤမုာ်ယညၣ်လၢ စပံးထံ, ဒီးယသး ဆှၢဒံးယၤလၢတၢ်ကူၣ်သ့, လၢယကဟံးဃာ်ပှၤဟးဂီၤ ဖိအတၢ်တုၤယကထံၣ်တၢ်လၢအဂ့ၤ ဒီးပှၤကညီဖိလၢ အကမၤလၢမူခိၣ်အဖီလာ်တစိၤဒၣ်အီၤလီၤ. ⁴ ယမၤ တၢ်အဒိၣ်တဖၣ်, ယမၤဟံၣ်, ယသူၣ်စပံးအလီၢ်, ⁵ ယ သူၣ်ဖီအလီၢ်, ဒီးတၤသၣ်အလီၢ်, ဒီးယသူၣ်သ့ၣ်လၢအ သၣ်တၢ်ကိးကလုာ်ဒဲးလီၤ. ⁶ ယမၤကမါတဖၣ်ဒ်သိး ကဖှိၣ်ထံလၢသ့ၣ်တဖုဖဲ တၢ်ဒုးမဲထီၣ်သ့ၣ်တဖၣ်န့ၣ် လီၤ.

⁷ ယမၤန့ၢ်ကုၢ်ပိာ်ခွါ, ဒီးကုၢ်ပိာ်မုၣ်, ဒီးယအိၣ်ဒီး ကုၢ်အိၣ်ဖျဲၣ်လၢယဟံၣ်ပူၤ, ဒီးယအိၣ်ဒီးဂီၤဖံးအဖုတ ဖၣ်, ဒီးသိဒီးမဲာ်တဲးလဲးအါအါကလဲာ်, အါန့ၢ်ကယဲၢ်ပှၤ လၢအအိၣ်ဝဲ, လၢယမဲာ်ညါလၢယရူၤၡလ့ၣ်အပူၤတ က့ၢ်လီၤ. ⁸ ဒီးယပာ်ဖှိၣ်ကျိၣ်ဧိၤစ့ဧိၤ, ဒီးထူဧိၤလွဲၤဧိၤ, ဒီးတၢ်လုၢ်ဒိၣ်ပှ့ၤဒိၣ်ဘၣ်ဃးဒီး စီၤပၤဒီးထံဧိၤကီၢ်ဧိၤ တဖၣ်လီၤ. ယမၤန့ၢ်ပှၤသးဝံၣ်တၢ်ပိာ်ခွါ, ဒီးပှၤသးဝံၣ် တၢ်ပိာ်မုၣ်, တၢ်လၢပှၤကညီဖိမုာ်လၤလၢအီၤ, ပမါဒီးပ သံၣ်မါတဖၣ်လီၤ. ⁹ ဒီးယဒိၣ်ထီၣ်ဒီးယတၢ်အါထီၣ်န့ၢ် ကယဲၢ်ပှၤလၢအအိၣ်ဝဲလၢ ယမဲာ်ညါယရူၤၡလ့ၣ်အပူၤ တက့ၢ်လီၤ. ဒီးယတၢ်ကူၣ်သ့အိၣ်ဒံးစ့ၢ်ကီးဒီးယၤလီၤ.―

¹⁰ ဒီးကယဲၢ်တၢ်လၢယမဲာ်ဆၢတၢ်န့ၣ် ယဒုးန့ၢ်ဘၣ်အီၤ, ယတတြီယသးလၢတၢ်ဒုးခုယသးနီတမံၤဘၣ်. အဂ့ၢ်ဒ် အံၤ, ယသးခုလၢယမၤတၢ်ခဲလၢာ်အပူၤ, ဒီးအဝဲန့ၣ်မ့ၢ် ယဂီၢ်လၢယမၤတၢ်အဃိလီၤ. ¹¹ ဒီးယကွၢ်ကယဲၢ်တၢ်မၤ လၢယစုမၤဝဲ, ဒီးတၢ်မၤလၢယမၤဒီးတၢ်ဘှံးယသး, ဒီး ကွၢ်ကွၢ်, ကယဲၢ်တၢ်ခဲလၢာ်မ့ၢ်တၢ်ကလီကလီ, ဒီးတၢ် မၤတဂိာ်တသီၣ်ဘၣ်တၢ်ဘၣ်, ဒီးတၢ်ဘျုးတၢ်ဖှိၣ်တ အိၣ်ဘၣ်လၢမုၢ်အဖီလာ်ဘၣ်.

¹² ဒီးယဃၣ်ယသးဒ်သိးယကကွၢ်တၢ်ကူၣ်သ့, ဒီးတၢ် ပျုၢ်ဒီးပှၤဟးဂီၤဖိအတၢ်လီၤ. အဂ့ၢ်ဒ်အံၤ, ပှၤကညီဟဲ လၢစီၤပၤအလီၢ်ခံန့ၣ် ကမၤမနုၤတမံၤလဲၣ်. တၢ်လၢ ပှၤမၤတ့ၢ်လံလီၤ. ¹³ ဒီးယထံၣ်လၢတၢ်ကူၣ်သ့ဂ့ၤန့ၢ်ပှၤ ဟးဂီၤဖိအတၢ်ထဲသိးဒီး တၢ်ကပီၤဂ့ၤန့ၢ်တၢ်ခံးတက့ၢ် လီၤ. ¹⁴ ပှၤကူၣ်တၢ်သ့အမဲာ်သၣ်န့ၣ် အိၣ်ဝဲလၢအခိၣ် လီၤ. မ့မ့ၢ်ပှၤဟးဂီၤဖိလဲၤတၢ်လၢတၢ်ခံးကျါလီၤ. ဘၣ် ဆၣ်ဒီးယထံၣ်လၢ တၢ်တမံၤဃီဘၣ်ပှၤခဲလၢာ်လီၤ.―

¹⁵ ဒီးယစံးလၢယသးကံၢ်ပူၤ, ဒ်တၢ်ဘၣ်ပှၤဟးဂီၤဖိအသိး န့ၣ်တၢ်ကဘၣ်ယၤဒၣ်လဲာ်, သတးဒီးယကူၣ်တၢ်သ့ ဒိၣ်န့ၢ်အန့ၣ်တက့ၢ်မ့ၢ်အဘၣ်မနုၤလဲၣ်. တုၤနုၤတစုယ စံးလၢယသးကံၢ်ပူၤ, အဝဲန့ၣ်စ့ၢ်ကီးမ့ၢ်တၢ်ကလီကလီ လီၤ. ¹⁶ အဂ့ၢ်ဒ်အံၤ, တၢ်သ့ၣ်နီၣ်ထီၣ်က့ၤပှၤကူၣ်တၢ်သ့ အါန့ၢ်ပှၤဟးဂီၤဖိ, တအိၣ်ဘၣ်လီၤထူလီၤယိာ်ဘၣ်. အ ဂ့ၢ်ဒ်အံၤ, တၢ်လၢအအိၣ်ခဲကနံၣ်အံၤ, ကဘၣ်တၢ်သး ပ့ၤနီၣ်အီၤလၢမုၢ်နံၤတဖၣ်လၢအကဟဲဝဲန့ၣ်လီၤ. ဒီးပှၤ ကူၣ်တၢ်သ့န့ၣ်သံဝဲ, ဒ်ပှၤဟးဂီၤဖိအသိးန့ၣ်မးလဲၣ်.―

¹⁷ မၤသးဒ်န့ၣ်ဒီးယသးဟ့တၢ်သးသမူလီၤ. အဂ့ၢ်ဒ်အံၤ, ကယဲၢ်တၢ်မၤလၢအမၤအသးလၢ မုၢ်အဖီလာ်မ့ၢ်တၢ် အၢလၢယမဲာ်ညါလီၤ. အဂ့ၢ်ဒ်အံၤ, ကယဲၢ်တၢ်ခဲလၢာ်မ့ၢ် တၢ်ကလီကလီ, ဒီးတၢ်မၤတဂိာ်တသီၣ်ဘၣ်တၢ်ဘၣ် လီၤ. ¹⁸ ဒီးယသးဟ့ကယဲၢ်ယတၢ်မၤလၢယမၤလၢမုၢ်အ ဖီလာ်လီၤ. အဂ့ၢ်ဒ်အံၤ, ယဘၣ်ပာ်လီၤတဲာ်အီၤလၢပှၤ ကညီလၢ အကအိၣ်ဝဲလၢယလီၢ်ခံန့ၣ်လီၤ. ¹⁹ ဒီးကမ့ၢ် ပှၤကူၣ်သ့ဧါ, ပှၤဟးဂီၤဖိဧါန့ၣ်မ့ၢ်မတၤသ့ၣ်ညါတဂၤ လဲၣ်. ဒီးကပၢကယဲၢ်ယတၢ်မၤလၢယမၤအီၤ, ဒီးလၢယ ဒုးနဲၣ်ယတၢ်ကူၣ်သ့လၢမုၢ်အဖီလာ်လီၤ. အဝဲန့ၣ်မ့ၢ်စ့ၢ် ကီးတၢ်ကလီကလီလီၤ.

²⁰ မၤသးဒ်န့ၣ်ဒီးယဃၣ် ယသးဒ်သိးယကဒုးဟးဂီၤ ယသးလၢကယဲၢ်တၢ်မၤလၢ ယမၤလၢမုၢ်အဖီလာ်အ ဃိန့ၣ်လီၤ.

²¹ အဂ့ၢ်ဒ်အံၤ, ပှၤလၢအမၤတၢ်လၢတၢ်ကူၣ်သ့, ဒီးတၢ် သ့ၣ်ညါ, ဒီးတၢ်တီတၢ်လိၤဘၣ်ဆၣ်ဒီး, ဘၣ်ဟ့ၣ်လီၤ အဂီၢ်လၢပှၤလၢအတမၤဘၣ်လၢအဂီၢ်ဘၣ်, အဝဲန့ၣ်မ့ၢ် တၢ်ကလီကလီ, ဒီးတၢ်အၢဖးဒိၣ်လီၤ. ²² အဂ့ၢ်ဒ်အံၤ, ပှၤ ကညီလၢအမၤတၢ်ခဲလၢာ်အဃိ, ဒီးလၢအသးကိၢ်လၢ တၢ်လၢအမၤဝဲလၢမုၢ်အဖီလာ်အဃိန့ၣ် မ့ၢ်အမ့ၢ်မနုၤ လဲၣ်. ²³ အဂ့ၢ်ဒ်အံၤ, အမုၢ်နံၤခဲလၢာ်တဖၣ်မ့ၢ်တၢ်သူၣ် အုးသးအုး, ဒီးအတၢ်မၤန့ၣ်မ့ၢ်တၢ်မၤကိၢ်မၤဂီၤ, ဒီးအ သးတအိၣ်ဘှံးဘၣ်လၢမုၢ်နၤဒၣ်လဲာ်ဘၣ်. အဝဲန့ၣ်မ့ၢ် စ့ၢ်ကီးတၢ်ကလီကလီလီၤ. ²⁴ ပှၤကညီအီၣ်တၢ်ဒီးအီတၢ် ဒီးမုာ်လၤတၢ်ဂ့ၤလၢအမၤတၢ်အပူၤန့ၣ်, မ့ၢ်တၢ်ဂ့ၤက တၢၢ်လၢအဂီၢ်လီၤ. အဝဲန့ၣ်စ့ၢ်ကီးယထံၣ်လၢအဟဲလၢ ယွၤအစုလီၤ. ²⁵ အဂ့ၢ်ဒ်အံၤ, မ့ၢ်မတၤအီၣ်တၢ်, ဒီးမ့ၢ်မတၤ မုာ်လၤတၢ်ဒိၣ်န့ၢ်ယၤတဂၤလဲၣ်. ²⁶ အဂ့ၢ်ဒ်အံၤ, ယွၤဟ့ၣ် လီၤပှၤကညီလၢအဂ့ၤလၢအမဲာ်ညါလၢတၢ်ကူၣ်သ့, ဒီး တၢ်သ့ၣ်ညါ, ဒီးတၢ်သးခုလီၤ. မ့မ့ၢ်အဟ့ၣ်လီၤပှၤတၢ်ဒဲး ဘးဖိလၢတၢ်မၤဘှံးအသးဒ်သိးအကထၢထီၣ်တၢ်, ဒီး ပာ်ဖှိၣ်တၢ်ဒ်သိးအကဟ့ၣ်ဝဲလၢ ပှၤဂ့ၤလၢယွၤအမဲာ် ညါလီၤ. အဝဲန့ၣ်မ့ၢ်စ့ၢ်ကီးတၢ်ကလီကလီ, ဒီးတဂိာ်တ သီၣ်ဘၣ်တၢ်ဘၣ်.

၃

¹ တၢ်အခ့အခါအိၣ်ဝဲလၢ ကယဲၢ်တၢ်တမံၤလၢ်လၢ် အဂီၢ်, ဒီးအဆၢအကတီၢ်လၢကယဲၢ်တၢ်ကူၣ်တၢ်ဖး လၢမူခိၣ်အဖီလာ်အဂီၢ်လီၤ. ² အကတီၢ်လၢပှၤကအိၣ် ဖျဲၣ်အဂီၢ်, အကတီၢ်လၢပှၤကသံအဂီၢ်, အကတီၢ်လၢ သူၣ်တၢ်အဂီၢ်, ဒီးအကတီၢ်လၢထဲးကွံာ်တၢ်လၢအသူၣ် အသးအဂီၢ်, ³ အကတီၢ်လၢတၢ်မၤသံတၢ်အဂီၢ်, ဒီးအ ကတီၢ်လၢတၢ်မၤဘျါက့ၤအဂီၢ်, အကတီၢ်လၢတၢ်မၤ လီၤပှီၢ်တၢ်အဂီၢ်, ဒီးအကတီၢ်လၢတၢ်မၤထီၣ်က့ၤတၢ် အဂီၢ်, ⁴ အကတီၢ်လၢတၢ်ဟီၣ်အဂီၢ်, ဒီးအကတီၢ်လၢ တၢ်နံၤအဂီၢ်, အကတီၢ်လၢတၢ်သးအုးအဂီၢ်, ဒီးအက တီၢ်လၢတၢ်ဂဲၤကလံၣ်အဂီၢ်, ⁵ အကတီၢ်လၢတၢ်ကွံာ် တ့ၢ်ကွံာ်လၢၢ်အဂီၢ်, ဒီးအကတီၢ်လၢတၢ်ပာ်ဖှိၣ်လၢၢ်အ ဂီၢ်, အကတီၢ်လၢပှၤကဖိးလိာ်သးအဂီၢ်, ဒီးအကတီၢ် လၢပှၤဖိးလိာ်သးကဆိတ့ၢ်အဂီၢ်, ⁶ အကတီၢ်လၢပှၤက ဃုန့ၢ်တၢ်အဂီၢ်, ဒီးအကတီၢ်လၢတၢ်ကဟါမၢ်အဂီၢ်, အ ကတီၢ်လၢပှၤဟံးဃာ်တၢ်အဂီၢ်, ဒီးအကတီၢ်လၢပှၤက ကွံာ်တ့ၢ်ကွံာ်တၢ်အဂီၢ်, ⁷ အကတီၢ်လၢပှၤကဖှီတၢ်အ ဂီၢ်, ဒီးအကတီၢ်လၢပှၤကဆးတၢ်အဂီၢ်, အကတီၢ်လၢ ပှၤကအိၣ်ဘှီၣ်ကလာ်အဂီၢ်, ဒီးအကတီၢ်လၢပှၤကက တိၤတၢ်အဂီၢ်, ⁸ အကတီၢ်လၢပှၤကအဲၣ်တၢ်အဂီၢ်, ဒီး တကတီၢ်လၢပှၤကသးဟ့တၢ်အဂီၢ်, အကတီၢ်လၢတၢ် ဒုးသုးအဂီၢ်, ဒီးအကတီၢ်လၢတၢ်အိၣ်ဃူအိၣ်ဖိးအဂီၢ် န့ၣ်လီၤ. ⁹ ပှၤလၢအမၤတၢ်န့ၣ်ဘၣ်ဘျုးလၢအမၤတၢ် တုၤအမၤဘှံးအသးအဃိန့ၣ်လၢမနုၤတမံၤလဲၣ်.

¹⁰ ယထံၣ်ဘၣ်လံတၢ်ဖံးတၢ်မၤလၢ ယွၤဟ့ၣ်လီၤပှၤက ညီဖိဒ်သိးအကမၤဝဲလီၤ. ¹¹ ယွၤမၤကယဲၢ်တၢ်ခဲလၢာ် အိၣ်ဒီးအဃံအလၤလၢအကတီၢ်ဒၣ်ဝဲ, ဒီးပာ်တၢ်အထူ အယိာ်လၢအသးကံၢ်ပူၤ, ဘၣ်ဆၣ်ဒီးတၢ်လၢယွၤမၤဝဲ လၢအခီၣ်ထံးပၢၢ်လၢအကတၢၢ်န့ၣ် ပှၤကညီအနၢ်တ ပၢၢ်ဘၣ်နီတဂၤဘၣ်. ¹² လၢပှၤကညီသးခု, ဒီးမၤတၢ်ဂ့ၤ တစိၤဒၣ်အီၤအမဲာ်ညါန့ၣ် ယသ့ၣ်ညါလၢတၢ်ဂ့ၤအဂၤ တအိၣ်ဘၣ်လၢအဂီၢ်နီတမံၤဘၣ်. ¹³ လၢပှၤကညီကိးဂၤ ဒဲးကအီၣ်တၢ်, ဒီးအီတၢ်, ဒီးမုာ်လၤတၢ်ဂ့ၤလၢအမၤတၢ် ခဲလၢာ်အပူၤန့ၣ်, မ့ၢ်ယွၤအတၢ်ဟ့ၣ်စ့ၢ်ကီးလီၤ. ¹⁴ ယ သ့ၣ်ညါလၢကယဲၢ်တၢ်လၢ ယွၤမၤဝဲန့ၣ်ကအိၣ်ဝဲလီၤ ထူလီၤယိာ်လီၤ. တၢ်ကပာ်ဖှိၣ်ဒီးအီၤတသ့ဘၣ်, ဒီးတၢ် ကထုးကွံာ်လၢအီၤတသ့ဘၣ်နီတမံၤဘၣ်. ဒီးယွၤမၤဝဲ န့ၣ်ဒ်သိးပှၤကပျံၤတၢ်လၢအမဲာ်ညါလီၤ. ¹⁵ တၢ်လၢအ အိၣ်ခဲကနံၣ်အံၤအိၣ်တ့ၢ်ဝဲလၢပျၢၤ, ဒီးတၢ်လၢအကကဲ ထီၣ်န့ၣ်အိၣ်တ့ၢ်လၢပျၢၤလီၤ. ဒီးယွၤဃုတၢ်လၢအလဲၤ ပူၤကွံာ်တ့ၢ်န့ၣ်လီၤ. ¹⁶ မၤကဒီးတစု, ယကွၢ်တၢ်လၢမုၢ်အဖီလာ်, လၢတၢ်စံၣ်ညီၣ်အလီၢ်, ဒီးတၢ်တတီတလိၤအိၣ်ဖဲန့ၣ်, ဒီးဖဲတၢ်တီတၢ်လိၤအလီၢ်န့ၣ်တၢ်အၢတၢ်သီအိၣ်ဝဲလီၤ.―

¹⁷ ယစံးလၢယသးကံၢ်ပူၤ, ယွၤကစံၣ်ညီၣ်ပှၤတီ, ဒီးပှၤတ တီဘၣ်လီၤ. အဂ့ၢ်ဒ်အံၤ, အဆၢအကတီၢ်အိၣ်ဝဲဖဲန့ၣ် လၢကယဲၢ်တၢ်ကူၣ်တၢ်ဖးဒီး တၢ်ဖံးတၢ်မၤတမံၤလၢ် လၢ်အဂီၢ်န့ၣ်လီၤ.

¹⁸ ယစံးလၢယသးကံၢ်ပူၤ, မ့ၢ်လၢပှၤကညီဖိအဃိ, ဒ် သိးယွၤကမၤကွၢ်အီၤ, ဒ်သိးပှၤကညီကထံၣ်လီၤက့ၤအ သးဒၣ်ဝဲလၢအမ့ၢ်ဆၣ်ဖိကီၢ်ဖိလီၤ.

¹⁹ အဂ့ၢ်ဒ်အံၤ, တၢ်လၢအဘၣ်ပှၤကညီဖိန့ၣ်ဘၣ်ဆၣ် ဖိကီၢ်ဖိလီၤ. တၢ်တမံၤဃီဘၣ်အီၤလီၤ. ဒ်တမံၤသံဝဲအ သိးန့ၣ်အဝဲတမံၤသံဒ်န့ၣ်အသိး, အိၣ်ဝဲဒီးတၢ်သါတမံၤ ဃီလီၤ. ဒီးတၢ်ဂ့ၤန့ၢ်ဆၣ်ဖိကီၢ်ဖိန့ၣ်တအိၣ်ဘၣ်ဒီးပှၤ ကညီဘၣ်. အဂ့ၢ်ဒ်အံၤ, ကယဲၢ်တၢ်ခဲလၢာ်မ့ၢ်တၢ်ကလီ ကလီလီၤ. ²⁰ လဲၤဝဲဆူအလီၢ်တပူၤဃီခဲလၢာ်, ကဲထီၣ် လၢဟီၣ်ခိၣ်အကမူၣ်, ဒီးကကဲထီၣ်က့ၤဟီၣ်ခိၣ်အက မူၣ်ခဲလၢာ်လီၤ. ²¹ ပှၤကညီအသးလဲၤထီၣ်ဆူထးခီ, ဒီး ဆၣ်ဖိကီၢ်ဖိအသး လဲၤလီၤဆူဟီၣ်ခိၣ်န့ၣ်မ့ၢ်မတၤသ့ၣ်ညါတဂၤလဲၣ်.

²² ဒီးယထံၣ်လၢတၢ်ဂ့ၤန့ၢ် ပှၤကညီသးခုလၢအမၤတၢ် အပူၤန့ၣ်တအိၣ်ဘၣ်. အဂ့ၢ်ဒ်အံၤ, အဝဲန့ၣ်မ့ၢ်အဂီၢ်လီၤ. အဂ့ၢ်ဒ်အံၤ, မ့ၢ်မတၤကဒုးဟဲက့ၤအီၤ ဒ်သိးအက ထံၣ်ဘၣ်တၢ်လၢအကကဲထီၣ်လၢအလီၢ်ခံတဂၤလဲၣ်.

၄

¹ ဒီးယဃၣ်ယသးဒီး ယကွၢ်ကယဲၢ်တၢ်မၤအၢလၢအ မၤအသးလၢမုၢ်အဖီလာ်, ဒီးကွၢ်ကွၢ်, ပှၤလၢအဘၣ်တၢ် မၤအၢအီၤအမဲာ်ထံလီၤ, ဒီးပှၤမၤမုာ်ထီၣ်က့ၤအီၤ တ အိၣ်ဘၣ်, ဒီးတၢ်အစိအကမီၤအိၣ်ဝဲလၢပှၤမၤအၢအီၤအ စုပူၤ, ဒီးပှၤမၤမုာ်ထီၣ်က့ၤအီၤတအိၣ်ဘၣ်. ² တုၤနုၤတစု ယစံးထီၣ်ပတြၢၤပှၤသံလၢအသံတ့ၢ် အါန့ၢ်ပှၤမူလၢအ မူဒံးတက့ၢ်လီၤ. ³ မ့ၢ်လံ, ပှၤလၢအတအိၣ်ဒံးဘၣ်, လၢ အတထံၣ်ဘၣ်တၢ်မၤအၢလၢ အမၤအသးလၢမုၢ်အဖီ လာ်န့ၣ်ဂ့ၤန့ၢ်အဝဲခံဂၤလၢာ်တက့ၢ်လီၤ.

⁴ ဒီးယကွၢ်ကယဲၢ်တၢ်ဖံးတၢ်မၤ, ဒီးပှၤမၤသ့အတၢ်မၤ လၢပှၤလၢအဃၢၤသးကါအီၤလၢအဃိလီၤ. အဝဲန့ၣ်မ့ၢ် စ့ၢ်ကီးတၢ်ကလီကလီ, ဒီးတၢ်မၤတဂိာ်တသီၣ်ဘၣ်တၢ် ဘၣ်လီၤ. ⁵ ပှၤဟးဂီၤဖိတဝံထီၣ်အစု, ဒီးအီၣ်အညၣ်ဒၣ် ဝဲလီၤ. ⁶ တၢ်အိၣ်ဘှံးပှဲၤပစုတတၢၤဒုၣ်ဂ့ၤန့ၢ်တၢ်ဖံးတၢ် မၤဒီးတၢ်ဂုာ်မၤန့ၢ်ကလံၤပှဲၤပစုခံတၢၤဒုၣ်တက့ၢ်လီၤ.

⁷ ဒီးယဃၣ်ယသး, ဒီးယကွၢ်ထံတၢ်ကလီကလီတ မံၤလၢမုၢ်အဖီလာ်လီၤ. ⁸ ပှၤအိၣ်ဝဲတဂၤဃီ, ဒီးခံဂၤတဂၤတအိၣ်ဘၣ်. ဒီးအဖိခွါမ့ၢ်ဂ့ၤ အဒီပုၢ်ဝဲၢ်မ့ၢ်ဂ့ၤ, တ အိၣ်ဘၣ်. ဘၣ်ဆၣ်ဒီးအမၤတၢ်တဆိတ့ၢ်ဘၣ်, ဒီးအမဲာ် တဘျဲးကွၢ်ဘၣ်တၢ်ထူးတၢ်တီၤဘၣ်, ဒီးစံးဝဲ, ယမၤတၢ်, ဒီးယမၤလီၤဖးယသးဒီး တၢ်ဂ့ၤလၢမတၤတဂၤ အဂီၢ် လဲၣ်. အဝဲန့ၣ်မ့ၢ်စ့ၢ်ကီး တၢ်ကလီကလီ, ဒီးမ့ၢ်တၢ်မၤ အအၢဒိၣ်မးလီၤ. ⁹ ပှၤခံဂၤဂ့ၤန့ၢ်ပှၤတဂၤတက့ၢ်လီၤ. အ ဂ့ၢ်ဒ်အံၤ, အဘူးအလဲဂ့ၤအိၣ်ဝဲလၢအမၤတၢ်အဂီၢ်လီၤ.

¹⁰ အဂ့ၢ်ဒ်အံၤ, တဂၤမ့ၢ်လီၤဃံၤဒီး, ပှၤတဂၤကဝံၣ်ဆၢ ထၢၣ်အသကိးလီၤ. မ့မ့ၢ်ပှၤအိၣ်တဂၤဃီ မ့ၢ်လီၤဃံၤ ဒီး, ပှၤခံဂၤတဂၤလၢအကဝံၣ်ဆၢထၢၣ်အီၤ တအိၣ် ဘၣ်ဒီး, ဘၣ်အဖှီၣ်လီၤ. ¹¹ ဒီးပှၤခံဂၤမ့ၢ်မံဃုာ်ဒီး, လၢၤဝဲ လီၤ. မ့မ့ၢ်ပှၤတဂၤဧိၤကလၢၤဝဲဒ်လဲၣ်. ¹² ဒီးတၢ်မ့ၢ်မၤ ဃၣ်ပှၤတဂၤဒီး, ခံဂၤကတြီအီၤလီၤ. ဒီးပျံၤပိၤအသး သၢပလွံတဘိန့ၣ် ပှၤတမၤတဲာ်ဘၣ်ချ့သဒံးဘၣ်.

¹³ ဖိသၣ်လၢအဖှီၣ်အယာ် ဒီးကူၣ်တၢ်သ့န့ၣ်ဂ့ၤန့ၢ်စီၤ ပၤလၢအသးပှၢ်, ဒီးမ့ၢ်ပှၤဟးဂီၤဖိ, ဒီးတတူၢ်လိာ်လၢၤ ဘၣ်တၢ်သိၣ်က့ၤအီၤဘၣ်တက့ၢ်လီၤ. ¹⁴ အဂ့ၢ်ဒ်အံၤ, ဟဲ ထီၣ်ဝဲလၢဃိာ်ပူၤ ဒ်သိးအကကဲစီၤပၤလီၤ. အဝဲတဂၤ အိၣ်ဖျဲၣ်လၢအဘီအမုၢ်အပူၤဘၣ်ဆၣ်ဒီးကဲလၢပှၤဖှီၣ်ဖိ ယာ်ဖိလီၤ. ¹⁵ ယထံၣ်ပှၤအမူ လၢအဟးဝဲလၢမုၢ်အဖီ လာ်ခဲလၢာ်န့ၣ် အိၣ်ဝဲဒီးဖိသၣ်, ပှၤခံဂၤတဂၤလၢအ ဆၢထၢၣ်လၢအလီၢ်န့ၣ်လီၤ.

¹⁶ ပှၤဂီၢ်မုၢ်လၢ အလဲၤတၢ်လၢအမဲာ်ညါန့ၣ်အကတၢၢ် တအိၣ်ဘၣ်ဘၣ်ဆၣ်ဒီး, ပှၤလၢအဟဲလၢအလီၢ်ခံန့ၣ် တသးခုလၢအပူၤဘၣ်. မ့ၢ်မးအဝဲအံၤမ့ၢ်စ့ၢ်ကီးတၢ်က လီကလီ, ဒီးတၢ်ဂုာ်မၤန့ၢ်ကလံၤလီၤ.

၅

¹ တုၤနလဲၤဆူယွၤအဟံၣ်ပူၤဒီး, ကွၢ်နခီၣ်တက့ၢ်. အဂ့ၢ် ဒ်အံၤ, ဒိကနၣ်တၢ်န့ၣ်ဂ့ၤန့ၢ်တၢ်လုၢ်လၢပှၤဟးဂီၤဖိလုၢ် တၢ်တက့ၢ်လီၤ. အဂ့ၢ်ဒ်အံၤ, တသ့ၣ်ညါဘၣ်လၢအမၤ တၢ်အၢဘၣ်. ² မၤတၢ်ချ့ချ့လၢနထးခိၣ်တဂ့ၤ, ဒီးမ်နသး အသုတကတိၤတၢ်လၢအဆိအချ့လၢယွၤအမဲာ်ညါတ ဂ့ၤ. အဂ့ၢ်ဒ်အံၤ, ယွၤအိၣ်ဝဲလၢမူခိၣ်, ဒီးနဲဒၣ်နအိၣ်လၢ ဟီၣ်ခိၣ်ချၢလီၤ. မၤသးဒ်န့ၣ်ဒီးမ်နတၢ်ကတိၤအိၣ်စှၤ ဝဲန့ၣ်တက့ၢ်. ³ အဂ့ၢ်ဒ်အံၤ, တၢ်မံမီၢ်ဟဲဃုာ်ဝဲဒီးတၢ်မၤ အါ, ဒီးပှၤဟးဂီၤဖိအကလုၢ် ဟဲဃုာ်ဝဲဒီးတၢ်ကတိၤအါ လီၤ. ⁴ တုၤနဆိၣ်တၢ်ဒီးယွၤဒီး, မၤတီနကလုၢ်တက့ၢ်. သုးနံၤသုးသီတဂ့ၤ. အဂ့ၢ်ဒ်အံၤ, တဘၣ်ဘၣ်အသးလၢ ပှၤဟးဂီၤဖိဘၣ်. မၤဘူၣ်တၢ်လၢနဆိၣ်တၢ်န့ၣ်တက့ၢ်.―

⁵ နတဆိၣ်ဘၣ်န့ၣ် ဂ့ၤန့ၢ်နဆိၣ်တၢ်ဒီး တမၤဘူၣ်တၢ် ဘၣ်တက့ၢ်လီၤ. ⁶ မ်နထးခိၣ်အသုတဒုးမၤတၢ်ဒဲးဘး လၢနညၣ်တဂ့ၤ. ဒီးစံးလၢကလူးအမဲာ်ညါလၢအမ့ၢ် တၢ်မၤတဘၣ်ဘၣ်န့ၣ်တဂ့ၤ. ယွၤကသးထီၣ်လၢနက လုၢ်အဃိ, ဒီးမၤဟးဂီၤတၢ်မၤလၢနစုန့ၣ် မ့ၢ်အဘၣ်မနုၤ လဲၣ်. ⁷ အဂ့ၢ်ဒ်အံၤ, လၢတၢ်မံမီၢ်အါမံၤအကျါန့ၣ်တၢ် ကလီကလီအိၣ်ဝဲ, ဒီးလၢတၢ်ကတိၤအါအကျါန့ၣ်အိၣ် ဝဲစ့ၢ်ကီးဒ်န့ၣ်သိးလီၤ. မ့မ့ၢ်ပျံၤယွၤတက့ၢ်. ⁸ နမ့ၢ်ထံၣ်တၢ်မၤအၢ ပှၤဖှီၣ်ဖိယာ်ဖိ, ဒီးတၢ်မၤကဒံကဒါတၢ်စံၣ်ညီၣ်ကွီၢ်ဒီးတၢ်တီတၢ်လိၤလၢကီၢ်တဘ့ၣ်ဘ့ၣ်အပူၤဒီး, ကမၢကမၣ်လၢတၢ်န့ၣ်အဃိတဂ့ၤ. အဂ့ၢ်ဒ်အံၤ, လၢတၢ်ထီန့ၣ်အဖီခိၣ်တၢ်ထီတက့ၢ်အိၣ်တဂၤလၢအကွၢ်ဝဲလီၤ. ဒီးတၢ်ထီန့ၢ်အဝဲသ့ၣ်အိၣ်ဝဲလီၤ.―

⁹ ဟီၣ်ခိၣ်အဘျုးအဖှိၣ် မ့ၢ်လၢပှၤခဲလၢာ်အဂီၢ်, စီၤပၤ ဒၣ်လဲာ်န့ၢ်ဘျုးလၢဟီၣ်ခိၣ်လၢပှၤမၤအီၤန့ၣ်လီၤ. ¹⁰ ပှၤ လၢအအဲၣ်စ့န့ၣ်အသးတမံဘၣ်လၢစ့အဃိဘၣ်, ဒီးပှၤ လၢအအဲၣ်တၢ်အစုလီၢ်အခီၣ်ခိၣ်န့ၣ် တသးတမံဘၣ် လၢတၢ်အါအဃိဘၣ်, အဝဲန့ၣ်မ့ၢ်စ့ၢ်ကီးတၢ်ကလီက လီလီၤ. ¹¹ တုၤတၢ်အစုလီၢ်ခီၣ်ခိၣ်အါထီၣ်ဒီး, ပှၤလၢ အအီၣ်အီၤန့ၣ်အါထီၣ်ဝဲ, ဒီးလၢအကစၢ်ကွၢ်အီၤလၢအ မဲာ်အဖီခိၣ်န့ၣ်မ့ၢ်အဘၣ်ဘျုးလၢမနုၤလဲၣ်. ¹² ပှၤမၤအီၣ် တၢ်ဖိအိၣ်ဒီးအတၢ်အါမ့ၢ်ဂ့ၤ, စှၤမ့ၢ်ဂ့ၤ, မံဝဲမုာ်မးလီၤ. မ့မ့ၢ် ပှၤထူးပှၤတီၤအတၢ်အါန့ၣ် တဟ့ၣ်မံဘၣ်အီၤ ဘၣ်. ¹³ တၢ်အၢနးမးလၢ ယထံၣ်ဘၣ်လၢမုၢ်အဖီလာ် န့ၣ်အိၣ်ဝဲတမံၤလီၤ. မ့ၢ်တၢ်ထူးတၢ်တီၤပာ်ဖှိၣ်အသး လၢအကစၢ်အတၢ်အၢအဂီၢ်လီၤ. ¹⁴ ဒီးတၢ်ထူးတၢ်တီၤ န့ၣ်ဟါမၢ်ဝဲလၢတၢ်ဖံးတၢ်မၤအအၢအဃိလီၤ. ဒီးထီၣ် ဖိအဖိခွါ, ဒီးတၢ်တအိၣ်ဘၣ်လၢအစုပူၤဘၣ်လီၤ. ¹⁵ ဒ်အ ဟဲထီၣ်လၢ အမိၢ်အဒၢလီၢ်ပူၤအသိးန့ၣ်, ကက့ၤအိၣ် ဘ့ၣ်ဆ့ဒ်အဟဲဝဲအသိးလီၤ. ဒီးတဟံးန့ၢ်ဘၣ်တၢ်လၢ အမၤတၢ်အဃိလၢအကစိာ်ဝဲလၢအစုပူၤနီတမံၤဘၣ်.

¹⁶ အဝဲအံၤမ့ၢ်စ့ၢ်ကီးတၢ်အၢနးမးလၢ, ဒ်အဟဲဝဲလၢတၢ် ကိးမံၤဒဲးအသိးန့ၣ်ကက့ၤက့ၤဝဲဒ်န့ၣ်သိးလီၤ. ဒီးပှၤလၢ အမၤဝဲလၢ ကလံၤအဂီၢ်န့ၣ် မ့ၢ်အဘၣ်ဘျုး လၢမနုၤ လဲၣ်. ¹⁷ ဒီးအမုၢ်နံၤခဲလၢာ်အီၣ်တၢ်လၢတၢ်ခံးကျါစ့ၢ်ကီး ဒီးဘၣ်တၢ်သူၣ်ကိၢ်သးဂီၤနးမး, ဒီးတၢ်ဆူးတၢ်ဆါဒီး တၢ်သူၣ်ဒိၣ်သးထီၣ်လီၤ. ¹⁸ ကွၢ်ကွၢ်, တၢ်လၢယထံၣ် ဘၣ်လံ, ပှၤအီၣ်တၢ်, ဒီးအီတၢ်, ဒီးမုာ်လၤတၢ်ဂ့ၤလၢအ မၤတၢ်ခဲလၢာ်အပူၤလၢ အမၤဝဲလၢမုၢ်အဖီလာ်ကိးမုၢ် နံၤဒဲးလၢယွၤဟ့ၣ်လီၤအီၤန့ၣ်မ့ၢ်အဂ့ၤအဘၣ်လီၤ. အဂ့ၢ် ဒ်အံၤ, မ့ၢ်အဂီၢ်လီၤ. ¹⁹ ကယဲၢ်ပှၤလၢယွၤဟ့ၣ်လီၤအီၤလၢ တၢ်ထူးတၢ်တီၤ, ဒီးအစုလီၢ်အခီၣ်ခိၣ်, ဒီးဟ့ၣ်ဝဲလၢအ ကအီၣ်အီၤ, ဒီးမၤန့ၢ်အဂီၢ်, ဒီးသးခုလၢအမၤတၢ်အပူၤ, အန့ၣ်မ့ၢ်ဝဲလၢယွၤအတၢ်ဟ့ၣ်လီၤ. ²⁰ အဂ့ၢ်ဒ်အံၤ, တတိၢ် နီၣ်ဘၣ်အသးသမူအမုၢ်နံၤ အဂ့ၢ်အကျိၤအါအါဘၣ်. အဂ့ၢ်ဒ်အံၤ, ယွၤကစံးဆၢအီၤလၢတၢ်သူၣ်ခုသးခုလီၤ.

၆

¹ ယထံၣ်ဘၣ်တၢ်အၢတမံၤ, လၢမုၢ်အဖီလာ်, ဒီးဃၢဝဲ လၢပှၤကညီအလိၤလီၤ. ² ပှၤကညီအိၣ်ဝဲလၢယွၤဟ့ၣ် လီၤအီၤလၢတၢ်ထူးတၢ်တီၤဒီးအစုလီၢ်အခီၣ်ခိၣ်, ဒီးတၢ် လၤကပီၤ, ဒီးတုၤအန့ၢ်ဘၣ်တၢ်အလီၢ်တအိၣ်ဘၣ်လၢ ကယဲၢ်တၢ်လၢအသးဆၢန့ၢ်အကျါ, မ့မ့ၢ်ယွၤတဟ့ၣ် အီၣ်အတၢ်ဘၣ်, မ့ၢ်ပှၤဂၤအီၣ်ဝဲလီၤ, အန့ၣ်မ့ၢ်တၢ်ကလီ ကလီလီၤ. ဒီးတၢ်အအၢနးမးလီၤ. ³ ပှၤမ့ၢ်ထီၣ်ဖိတက ယၤ, ဒီးမူဝဲအါနံၤ, ဒီးအနံၣ်အမုၢ်နံၤမ့ၢ်အါဘၣ်ဆၣ်ဒီး, အသးမ့ၢ်တဘျဲးအီၣ်ဘၣ်ဒီးတၢ်ဂ့ၤဘၣ်, ဒီးတၢ်ခူၣ်လီၤ ကွံာ်အီၤမ့ၢ်တအိၣ်ဘၣ်ဒီး, ယစံး, တၢ်လီၤလူးဂ့ၤန့ၢ်အီၤ တက့ၢ်လီၤ. ⁴ အဂ့ၢ်ဒ်အံၤ, ဟဲဝဲလၢတၢ်ကလီကလီလီၤ. ဒီးဟးထီၣ်ကွံာ်ဝဲလၢတၢ်ခံးကျါ, ဒီးတၢ်လုၣ်ဘၢအမံၤ လၢတၢ်ခံးကျါလီၤ. ⁵ ဒီးတထံၣ်ဘၣ်မုၢ်, ဒီးတသ့ၣ်ညါ ဘၣ်တၢ်ဘၣ်, အဝဲအံၤကအိၣ်ဒီးတၢ်အိၣ်ဘှံးအါန့ၢ်အဝဲ န့ၣ်တက့ၢ်လီၤ. ⁶ မ့ၢ်လံ, မ့ၢ်မူဝဲအနံၣ်တကထိခံစးဘၣ် ဆၣ်ဒီး, တထံၣ်ဘၣ်တၢ်ဂ့ၤဘၣ်. ပှၤခဲလၢာ်လဲၤဝဲဆူအ လီၢ်တပူၤဃီ, တမ့ၢ်ဘၣ်ဧါ.

⁷ ပှၤကညီအမၤတၢ်ခဲလၢာ်န့ၣ် မ့ၢ်လၢအထးခိၣ်အဂီၢ် ဘၣ်ဆၣ်ဒီး, တဘျဲးအီၣ်ဘၣ်. ⁸ အဂ့ၢ်ဒ်အံၤ, ပှၤကူၣ်တၢ် သ့ဘၣ်ဘျုးဘၣ်ဖှိၣ်အါန့ၢ် ပှၤဟးဂီၤဖိလၢမနုၤတမံၤ လဲၣ်. ဒီးပှၤဖှီၣ်ဖိယာ်ဖိလၢအသ့ၣ်ညါလဲၤတၢ်လၢပှၤမူ အမဲာ်ညါန့ၣ်ဘၣ်ဘျုးလၢမနုၤတမံၤလဲၣ်. ⁹ တၢ်လၢပ မဲာ်ထံၣ်တၢ်န့ၣ်ဂ့ၤန့ၢ် ပသးဟးဝ့ၤဝီၤဆၢန့ၢ်တၢ်တက့ၢ် လီၤ. အဝဲန့ၣ်မ့ၢ်စ့ၢ်ကီးတၢ်ကလီကလီ, ဒီးတၢ်ဂုာ်မၤန့ၢ် ကလံၤလီၤ. ¹⁰ တၢ်လၢအအိၣ်န့ၣ်တၢ်ကိးတ့ၢ်အမံၤလၢ ပျၢၤ, ဒီးတၢ်သ့ၣ်ညါလၢအမ့ၢ်ပှၤကညီလီၤ. ဒီးလိာ်ကွီၢ် ဒီးပှၤလၢ အဆူၣ်န့ၢ်အီၤတက့ၢ်တဂၤန့ၣ် တသ့ဘၣ်.―

¹¹ မ့ၢ်မးတၢ်မၤအါထီၣ်တၢ်ကလီကလီန့ၣ် အိၣ်ဝဲအါမံၤ လီၤ. ပှၤကညီဘၣ်ဘျုးဘၣ်ဖှိၣ်လၢမနုၤတမံၤလဲၣ်.

¹² အဂ့ၢ်ဒ်အံၤ, မ့ၢ်မတၤသ့ၣ်ညါတၢ်ဂ့ၤလၢပှၤကညီအ ဂီၢ်လၢအသးသမူအဖၢမုၢ်လၢအသးသမူအမုၢ်နံၤကလီ ကလီအပူၤန့ၣ်တဂၤလဲၣ်. အဂ့ၢ်ဒ်အံၤ, လၢာ်ဝဲဒ်တၢ်အ ကဒုအသိးန့ၣ်လီၤ. မ့ၢ်မတၤသ့ၣ်ညါပှၤလၢအကအိၣ် ထီၣ်လၢအလီၢ်ခံလၢမုၢ်အဖီလာ်တဂၤလဲၣ်.

၇

¹ တၢ်အမံၤအသၣ်ဂ့ၤန့ၣ် ဂ့ၤန့ၢ်သိနၢမူလၢအလုၢ်ဒိၣ် ပှ့ၤဒိၣ်တက့ၢ်လီၤ. ဒီးပှၤသံဝဲအမုၢ်တနံၤန့ၣ်ဂ့ၤန့ၢ်အအိၣ် ဖျဲၣ်အမုၢ်တနံၤန့ၣ်တက့ၢ်လီၤ. ² လဲၤတၢ်ဆူတၢ်သးအုး အဟံၣ်န့ၣ်ဂ့ၤန့ၢ်လဲၤတၢ်ဆူ တၢ်အီၣ်တၢ်အီအဟံၣ်တ က့ၢ်လီၤ. အဂ့ၢ်ဒ်အ့ၤ, အဝဲန့ၣ်မ့ၢ်ပှၤကညီခဲလၢာ်အက တၢၢ်, ဒီးပှၤမူဝဲန့ၣ်ကပာ်ဝဲလၢအသးလီၤ. ³ တၢ်သးအုး န့ၣ်ဂ့ၤန့ၢ်တၢ်နံၤတၢ်အ့န့ၣ်တက့ၢ်လီၤ. အဂ့ၢ်ဒ်အံၤ, ပ မဲာ်လီၤလီၤသပှၢ်န့ၣ်မၤဂ့ၤထီၣ်ပသးလီၤ. ⁴ ပှၤကူၣ်တၢ် သ့အသးအိၣ်ဝဲလၢတၢ်သးအုးအဟံၣ်ပူၤလီၤ.― မ့မ့ၢ်ပှၤ ဟးဂီၤဖိအသးအိၣ်ဝဲလၢတၢ်မုာ်လၤအဟံၣ်ပူၤလီၤ. ⁵ ပှၤ ကနၣ်ပှၤကူၣ်တၢ်သ့အသိၣ်ဃီၣ်တၢ်န့ၣ် ဂ့ၤန့ၢ်အကနၣ် ပှၤဟးဂီၤဖိအတၢ်သးဝံၣ်တက့ၢ်လီၤ. ⁶ အဂ့ၢ်ဒ်အံၤ, ဒ် တၤဆှုၣ်အသီၣ်လၢသပၢၤဖီလာ်အသိးန့ၣ် ပှၤဟးဂီၤဖိ နံၤဝဲန့ၣ်မ့ၢ်ဒ်န့ၣ်သိးလီၤ. အဝဲန့ၣ်မ့ၢ်စ့ၢ်ကီးတၢ်ကလီက လီလီၤ. ⁷ မ့ၢ်မးတၢ်မၤအၢမၤနးန့ၣ်မၤပျုၢ်ပှၤကူၣ်တၢ်သ့ လီၤ. ဒီးခိၣ်ဖးန့ၣ်ဒုးဟးဂီၤပှၤကညီအတၢ်သူၣ်ဖးသးဖး လီၤ. ⁸ တၢ်အကတၢၢ်န့ၣ် ဂ့ၤန့ၢ်တၢ်အခီၣ်ထံးတက့ၢ် လီၤ. တၢ်ဝံသးစူၤန့ၣ်ဂ့ၤန့ၢ်တၢ်ပာ်ထီၣ်ထီအသးတက့ၢ် လီၤ, ⁹ သးထီၣ်ချ့တဂ့ၤ, အဂ့ၢ်ဒ်အံၤ, တၢ်သးထီၣ်အိၣ်ဝဲ ဆိးဝဲလၢပှၤဟးဂီၤဖိအသးနါပှၢ်အပူၤလီၤ. ¹⁰ မုၢ်နံၤလၢ ပျၢၤဂ့ၤန့ၢ်မုၢ်နံၤခဲကနံၣ်အံၤမ့ၢ်အဘၣ်မနုၤလဲၣ်န့ၣ်စံးတ ဂ့ၤ. အဂ့ၢ်ဒ်အံၤ, နသံကွၢ်လၢတၢ်န့ၣ်အဂ့ၢ်တအိၣ်ဘၣ်ဒီး တၢ်ကူၣ်သ့ဘၣ်. ¹¹ တၢ်ကူၣ်သ့န့ၣ်ဂ့ၤထဲသိးဒီးတၢ်န့ၢ် သါ, ဒီးပှၤလၢအထံၣ်ဘၣ်မုၢ်ဧိၤလါဧိၤန့ၣ်န့ၢ်ဘျုးလၢ အီၤလီၤ. ¹² အဂ့ၢ်ဒ်အံၤ, တၢ်ကူၣ်သ့မ့ၢ်တၢ်တဒီတၢ်, ဒီးစ့မ့ၢ်တၢ်တဒီတၢ်လီၤ. မ့မ့ၢ်တၢ်သ့ၣ်ညါမ့ၢ်အဂ့ၤကတၢၢ်လီၤ. အဂ့ၢ်ဒ်အံၤ, တၢ်ကူၣ်သ့ဟ့ၣ်လီၤတၢ်သးသမူလၢပှၤလၢအ အိၣ်ဝဲဒီးအီၤလီၤ. ¹³ ကွၢ်ယွၤအမၤတၢ်တက့ၢ်, အဂ့ၢ်ဒ် အံၤ, တၢ်လၢအမၤက့ၣ်န့ၣ် မ့ၢ်မတၤမၤဘျၢသ့တဂၤ လဲၣ်,― ¹⁴ လၢတၢ်ဘီၣ်ထီၣ်ညီထီၣ်အမုၢ်တနံၤန့ၣ်သးခုတ က့ၢ်, ဒီးလၢတၢ်အၢအမုၢ်တနံၤန့ၣ်ကွၢ်ဆိကမိၣ်တၢ်တ က့ၢ်. ဒီးယွၤပာ်တမံၤဒီးတမံၤသဃီၤလိာ်အသးဒ်သိးပှၤ ကညီအသုတထံၣ်န့ၢ် တၢ်လၢအဟဲလၢအလီၢ်ခံနီတ မံၤတဂ့ၤလီၤ.― ¹⁵ ကယဲၢ်တၢ်အံၤယထံၣ်လၢယတၢ်ကလီ ကလီအမုၢ်နံၤတဖၣ်န့ၣ်, ပှၤတီလၢအဟးဂီၤဝဲလၢအတၢ်တီအဃိန့ၣ်အိၣ်ဝဲလီၤ. ဒီးပှၤတတီဘၣ်လၢအမၤအါ ထီၣ် အမုၢ်နံၤတဖၣ်လၢ အတၢ်တတီတလိၤဘၣ်န့ၣ် အိၣ်ဝဲလီၤ. ¹⁶ ပာ်နသးတီကဲၣ်ဆိးတဂ့ၤ, ပာ်နသးကူၣ် တၢ်သ့ကဲၣ်ဆိးတဂ့ၤ, နကမၤဟးဂီၤလီၤနသး မ့ၢ်အ ဘၣ်မနုၤလဲၣ်.

¹⁷ ပာ်နသးတတီဘၣ်နးကဲၣ်ဆိးတဂ့ၤ. ဒီးကဲထီၣ်ပှၤ ဟးဂီၤဖိတဂ့ၤ. နဆၢနကတီၢ်တချုးဘၣ်ဒံးဘၣ်ဒီး, န ကသံန့ၣ်မ့ၢ်အဘၣ်မနုၤလဲၣ်. ¹⁸ ဂ့ၤလၢနဟံးဃာ်တၢ် အံၤ, ဒီးထုးက့ၤနစုလၢတၢ်န့ၣ်တဂ့ၤ. အဂ့ၢ်ဒ်အံၤ, ပှၤလၢ အပျံၤယွၤကဟဲထီၣ်ကွံာ်လၢအီၤခဲလၢာ်လီၤ.

¹⁹ တၢ်ကူၣ်သ့မၤဆူၣ်ထီၣ် ပှၤကူၣ်သ့န့ၣ်အါန့ၢ်ပှၤဆူၣ် ဆံဆဲၣ်ဂၤလၢ အအိၣ်ဝဲလၢဝ့ၢ်ပူၤတက့ၢ်လီၤ. ²⁰ ပှၤအ တီလၢအမၤတၢ်ဂ့ၤ, ဒီးတမၤဘၣ်တၢ်ဒဲးဘးဘၣ်န့ၣ်တ အိၣ်ဘၣ်လၢဟီၣ်ခိၣ်ချၢနီတဂၤဘၣ်. ²¹ ဒီးပာ်နသးလၢ ကယဲၢ်တၢ်ကတိၤလၢပှၤကတိၤဝဲန့ၣ်တဂ့ၤ. နကနၢ်ဟူ ဘၣ်ဖုးနခ့နပှၤဆိၣ်အၢနၤလီၤ. ²² အဂ့ၢ်ဒ်အံၤ, နသးဒၣ်နဲ သ့ၣ်ညါဝဲအါဘျီလၢနဆိၣ်အၢတ့ၢ်ပှၤဂၤလီၤ. ²³ တၢ်ခဲလၢာ်အံၤယမၤကွၢ်လံလၢတၢ်ကူၣ်သ့လံ. ယစံးတ့ၢ်, ယကကူၣ်တၢ်သ့ဘၣ်ဆၣ်ဒီးအိၣ်ယံၤဒီးယၤလီၤ.―

²⁴ တၢ်လၢအအိၣ်ဝဲလၢအယံၤန့ၣ်, ဒီးယိာ်ယိာ်ကလဲၣ်န့ၣ် မ့ၢ်မတၤထံၣ်န့ၢ်သ့တဂၤလဲၣ်. ²⁵ ယပာ်ယသးလၢယက သ့ၣ်ညါ, ဒီးဃုန့ၢ်, ဒီးချုန့ၢ်တၢ်ကူၣ်သ့, ဒီးတၢ်ကူၣ်တၢ် ဆး, ဒီးလၢယကသ့ၣ်ညါလၢတၢ်အၢမ့ၢ်ပှၤဟးဂီၤဖိအ တၢ်, ဒီးပှၤဟးဂီၤဖိအတၢ်မ့ၢ်တၢ်ပျုၢ်လီၤ. ²⁶ ဒီးပိာ်မုၣ်လၢ အသးမ့ၢ်ပှၤဧိၤစၤဧိၤ, ဒီးတၢ်ပျံၤသကွီၤ, လၢအစုမ့ၢ်ပျံၤ န့ၣ်ယထံၣ်န့ၢ်လၢအအၢန့ၢ်တၢ်သံတက့ၢ်လီၤ. ပှၤလၢ အဘၣ်ယွၤအသးန့ၣ်ကပူၤကဖျဲးဒီးအီၤလီၤ. မ့မ့ၢ်အက ဖီၣ်န့ၢ်ပှၤတၢ်ဒဲးဘးဖိလီၤ. ²⁷ ကွၢ်ကွၢ်, ပှၤစံၣ်တဲၤတဲလီၤ တၢ်စံးဝဲဒၣ်, ယမၤကွၢ်တမံၤဘၣ်တမံၤဒ်သိးကသ့ၣ်ညါ တၢ်သတးဒီး, ယထံၣ်န့ၢ်တၢ်အံၤ, ²⁸ တၢ်လၢယသးဃုဒံး ဝဲဒီးတထံၣ်န့ၢ်ဘၣ်န့ၣ်မ့ၢ်အအံၤ, ယထံၣ်န့ၢ်ပိာ်ခွါတဂၤ လၢပှၤကထိအကျါလီၤ. မ့မ့ၢ်လၢပှၤခဲလၢာ်န့ၣ်အကျါ ယတထံၣ်န့ၢ်ဘၣ်ပိာ်မုၣ်တဂၤဘၣ်. ²⁹ ကွၢ်ကွၢ်, ယထံၣ် န့ၢ်ထဲတၢ်အံၤတမံၤ, ယွၤတ့လီၤပှၤကညီလိၤဝဲလီၤ. ဒီးအ ဝဲသ့ၣ်တဖၣ်န့ၣ်ဃုကူၣ်တၢ်အါမံၤလီၤ.

၈

¹ မ့ၢ်မတၤလီၤဂာ်ပှၤကူၣ်တၢ်သ့တဂၤလဲၣ်. ဒီးမ့ၢ်မတၤ သ့ၣ်ညါတၢ်ကတိၤအဒိၣ်အယိာ်လဲၣ်. ပှၤကညီအတၢ် ကူၣ်သ့န့ၣ်ဒုးကပီၤထီၣ်အမဲာ်, ဒီးအမဲာ်ဒူလဲလိာ်အသး လီၤ.

² မ့ၢ်လၢတၢ်ဆိၣ်ဘၣ်ဃးဒီးယွၤအဃိဒီး, ယဟ့ၣ်ကူၣ် နၤ, တိၢ်န့ၢ်စီၤပၤအတၢ်မၤလိာ်တက့ၢ်. ³ ဟးထီၣ်လၢအ မဲာ်ညါချ့ချ့တဂ့ၤ. ဆၢထၢၣ်လၢ တၢ်အၢအပူၤတဂ့ၤ. အဂ့ၢ်ဒ်အံၤ, မၤဖဲဒၣ်တၢ်လၢအဘၣ်အသးလီၤ.

⁴ ဖဲစီၤပၤအကလုၢ်အိၣ်န့ၣ် တၢ်စိတၢ်ကမီၣ်အိၣ်ဝဲလီၤ. ဒီးနမၤဒ်လဲၣ်န့ၣ်မ့ၢ်မတၤကစံးလၢအီၤတဂၤလဲၣ်.

⁵ ပှၤလၢအတိၢ်န့ၢ်တၢ်မၤလိာ်န့ၣ် တသ့ၣ်ညါဘၣ်တၢ် အၢဘၣ်. ဒီးပှၤကူၣ်တၢ်သ့တဂၤအသးန့ၣ်သ့ၣ်ညါတၢ် အဆၢအကတီၢ်ဒီးတၢ်စံၣ်ညီၣ်လီၤ.

⁶ အဂ့ၢ်ဒ်အံၤ, တၢ်ခဲလၢာ်အိၣ်ဝဲဒီးအဆၢအကတီၢ်, ဒီး အတၢ်စံၣ်ညီၣ်လီၤ. အဂ့ၢ်ဒ်အံၤ, ပှၤကညီအတၢ်အၢ

⁷ လၢအဘၣ်အီၤမ့ၢ်အအါမးလီၤ. အဂ့ၢ်ဒ်အံၤ, တၢ်ကမၤ သးန့ၣ်တသ့ၣ်ညါဘၣ်ဝဲဘၣ်. အဂ့ၢ်ဒ်အံၤ, ကမၤအသး ဒ်လဲၣ်ဒ်လဲၣ်န့ၣ်မ့ၢ်မတၤစံးဘၣ်တဲဘၣ်သ့တဂၤလဲၣ်.

⁸ ပှၤအိၣ်ဒီး အစိအကမီၤလၢအသးအဖီခိၣ် ဒ်သိးအ သးအသု တဟးထီၣ်ကွံာ်တဂ့ၤန့ၣ် တအိၣ်နီတဂၤ ဘၣ်. ဒီးလၢတၢ်သံအမုၢ်တနံၤအဖီခိၣ်န့ၣ် အစိအက မီၤတအိၣ်ဘၣ်. တၢ်ပျၢ်ပှၤတအိၣ်ဘၣ်လၢတၢ်ဒုးသုးအံၤ အပူၤဘၣ်. ဒီးတၢ်တတီတလိၤန့ၣ်မၤပူၤမၤဖျဲးပှၤလၢအ အိၣ်ဒီးအီၤတသ့ဘၣ်. ⁹ တၢ်ခဲလၢာ်အံၤယထံၣ်, ဒီးယပာ်ယသးလၢကယဲၢ်တၢ်လၢအမၤအသးလၢ မုၢ်အဖီလာ်လီၤ. တၢ်အဆၢအကတီၢ်အိၣ်ဝဲဖဲပှၤပၢပှၤဂၤလၢအတၢ်အၢအဂီၢ်လီၤ.―

¹⁰ ဒီးယထံၣ်ဘၣ် ပှၤတတီတလိၤဘၣ် တၢ်ခူၣ်လီၤကွံာ် အီၤဒီးလဲၤလီၤဆူပျုၤပူၤလီၤ. မ့မ့ၢ်ပှၤလၢအမၤတၢ်လိၤ လၢအဟဲဒီးဟးထီၣ်ကွံာ်လၢတၢ်စီဆှံအလီၢ်, ဒီးဘၣ် တၢ်သးပ့ၤနီၣ်အီၤလၢဝ့ၢ်ပူၤ ဖဲအမၤတ့ၢ်ဝဲဒ်န့ၣ်လီၤ. အ န့ၣ်မ့ၢ်စ့ၢ်ကီးတၢ်ကလီကလီလီၤ.

¹¹ မ့ၢ်တၢ်တမၤဘၣ်ချ့သဒံးလၢတၢ်စံၣ်ညီၣ်ဃၣ်တၢ်မၤ အၢဘၣ်ဒီး, ပှၤကညီဖိအသးအိၣ်ပှဲၤဆၢၣ်ကလာ်လၢ အကမၤတၢ်အၢလီၤ. ¹² ပှၤတၢ်ဒဲးဘးဖိမ့ၢ်မၤအၢတၢ်အ ဘျီတကယၤ, ဒီးအနံၤအါထီၣ်ဘၣ်ဆၣ်ဒီး, မ့ၢ်မးယ သ့ၣ်ညါလၢတၢ်ဂ့ၤကအိၣ်လၢပှၤပျံၤယွၤအဂီၢ်, ပှၤလၢ အပျံၤတၢ်လၢအမဲာ်ညါအဂီၢ်လီၤ.

¹³ မ့မ့ၢ်တၢ်ဂ့ၤတဘၣ်ဘၣ်ပှၤတတီတလိၤဘၣ်, ဒီးအမုၢ် နံၤလၢအမၤအသးဒ်တၢ်ကဒုအသိးတအါထီၣ်ဘၣ်. အ ဂ့ၢ်ဒ်အံၤ, မ့ၢ်အတပျံၤဘၣ်လၢယွၤအမဲာ်ညါဘၣ်.

¹⁴ တၢ်ကလီကလီတမံၤ မၤအသးလၢဟီၣ်ခိၣ်ချၢလီၤ. ပှၤတီပှၤလိၤလၢအဘၣ်တၢ် ဒ်ပှၤတတီတလိၤမၤတၢ်အ သိးန့ၣ်, ဒီးပှၤတတီတလိၤဘၣ်လၢအဘၣ်တၢ်ဒ်ပှၤတီ ပှၤလိၤအမၤတၢ်အသိးန့ၣ်အိၣ်ဝဲလီၤ. ယစံး, အဝဲန့ၣ်မ့ၢ် စ့ၢ်ကီးတၢ်ကလီကလီလီၤ. ¹⁵ တုၤနုၤတစုယစံးထီၣ်ပ တြၢၤတၢ်သူၣ်ဖှံသးညီလီၤ. အဂ့ၢ်ဒ်အံၤ, ပှၤအီၣ်တၢ်, ဒီး အီတၢ်, ဒီးပာ်မုာ်လၤအသးန့ၣ်တၢ်ဂ့ၤန့ၢ်အန့ၣ်တအိၣ် ဘၣ်. အဂ့ၢ်ဒ်အံၤ, အဝဲန့ၣ်အိၣ်ဒီးအီၤလၢအမၤတၢ်အဂီၢ် လၢအသးသမူအမုၢ်နံၤလၢယွၤဟ့ၣ်လီၤအီၤလၢမုၢ်အဖီ လာ်အဖၢမုၢ်န့ၣ်လီၤ.

¹⁶ တုၤယပာ်ယသးဒ်သိး ယကသ့ၣ်ညါတၢ်ကူၣ်သ့ဒီး ကွၢ်ဆိကမိၣ်တၢ်မၤအသးလၢဟီၣ်ခိၣ်ချၢ (အဂ့ၢ်ဒ်အံၤ, လၢမုၢ်နၤမ့ၢ်ဂ့ၤ, လၢမုၢ်ဆါမ့ၢ်ဂ့ၤ, ပှၤတမံဘၣ်လၢအမဲာ် ဘၣ်, ) ¹⁷ ဒီးယထံၣ်လၢယွၤအတၢ်မၤခဲလၢာ်, လၢပှၤက ညီဃုနၢ်ပၢၢ်တၢ်မၤအသး လၢမုၢ်အဖီလာ်န့ၣ် တသ့ ဘၣ်, ပှၤကညီမ့ၢ်မၤဒ်သိးအကထံၣ်န့ၢ်အီၤနာ်သက့, တထံၣ်န့ၢ်ဘၣ်ဝဲဘၣ်. လၢန့ၣ်အမဲာ်ညါပှၤလၢအကူၣ် တၢ်သ့န့ၣ်မ့ၢ်ဆိကမိၣ်လၢ အကသ့ၣ်ညါဘၣ်ဆၣ်ဒီး, တထံၣ်န့ၢ်ဘၣ်ဝဲဘၣ်လီၤ.

၉

¹ အဂ့ၢ်ဒ်အံၤ, ယဆိကမိၣ်တၢ်အံၤခဲလၢာ်လၢယက ဃုန့ၢ်တၢ်ခဲလၢာ်အံၤ, လၢပှၤတီပှၤလိၤ, ဒီးပှၤကူၣ်တၢ် သ့, ဒီးအတၢ်မၤတဖၣ်န့ၣ်အိၣ်ဝဲလၢယွၤအစုပူၤ, ဒီးတၢ် အဲၣ်မ့ၢ်ဂ့ၤ, တၢ်သးဟ့မ့ၢ်ဂ့ၤ, ပှၤတသ့ၣ်ညါဘၣ်နီတ ဂၤဘၣ်, တၢ်ခဲလၢာ်န့ၣ်အိၣ်ဆူညါလၢအီၤလီၤ.

² တၢ်ခဲလၢာ်ဟဲဘၣ် ပှၤခဲလၢာ်ဒ်သိးသိးလီၤ. ပှၤတီဒီး ပှၤတတီဘၣ်, ပှၤဂ့ၤဒီးပှၤကဆှီဒီးပှၤတကဆှီဘၣ်, ပှၤ လၢအလုၢ်တၢ်ဒီးပှၤလၢ အတလုၢ်ဘၣ်တၢ်န့ၣ်ဘၣ်ဝဲ တၢ်တမံၤဃီလီၤ. ဒ်ပှၤအဂ့ၤအသိးန့ၣ် ပှၤတၢ်ဒဲးဘး ဖိမ့ၢ်ဒ်န့ၣ်သိးလီၤ. ပှၤလၢအဆိၣ်တၢ်န့ၣ် မ့ၢ်ဒ်ပှၤလၢ အပျံၤတၢ်ဆိၣ်အသိးန့ၣ်လီၤ, ³ တၢ်အၢတမံၤအိၣ်ဝဲလၢ ကယဲၢ်တၢ်ခဲလၢၢာ်လၢ အမၤအသးလၢမုၢ်အဖီလာ် လၢပှၤခဲလၢာ်ဘၣ်တၢ်တမံၤဃီလီၤ. ဒီးပှၤကညီအသး ပှဲၤဒီးတၢ်အၢ, ဒီးတၢ်ပျုၢ်အိၣ်ဝဲလၢအသးကံၢ်ပူၤလၢအ မူဒံးအဖၢမုၢ်, ဒီးလၢအဝဲန့ၣ်အလီၢ်ခံန့ၣ်သံဝဲလီၤ. ⁴ အဂ့ၢ်ဒ်အံၤ, လၢပှၤလၢအဘၣ်တၢ်ဂံၢ်ဃုာ်အီၤဒီးပှၤမူခဲလၢၢာ်န့ၣ်ပမုၢ်လၢ်အဂီၢ်အလီၢ်အိၣ်လီၤ. အဂ့ၢ်ဒ်အံၤ, ထွံၣ်မူဒံးတဒုဂ့ၤန့ၢ်ခ့ယုၢ်လၢအသံတဒုတက့ၢ်လီၤ.―

⁵ အဂ့ၢ်ဒ်အံၤ, ပှၤလၢအမူဒံးန့ၣ် သ့ၣ်ညါဝဲလၢအကသံ လီၤ. မ့မ့ၢ်ပှၤသံန့ၣ် တသ့ၣ်ညါဘၣ်တၢ်နီတမံၤဘၣ်. ဒီးအဘူးအလဲတအိၣ်လၢၤဘၣ်. အဂ့ၢ်ဒ်အံၤ, ပှၤသးပ့ၤ နီၣ်တၢ်သ့ၣ်နီၣ်ထီၣ်က့ၤအီၤလီၤ. ⁶ အတၢ်အဲၣ်ဒီးအတၢ် သးဟ့, ဒီးအတၢ်သးကါန့ၣ်ဟါမၢ်လံ, ဒီးအဂီၢ်တအိၣ် လၢၤဘၣ်လၢတၢ်မၤအသးလၢ မုၢ်အဖီလာ်နီတမံၤလီၤ ထူလီၤယိာ်လီၤ.

⁷ လဲၤအီၣ်နကိၣ်ဒီးတၢ်သးခု, ဒီးအီနစပံးထ့လၢတၢ် သးဖှံတက့ၢ်. အဂ့ၢ်ဒ်အံၤ, ယွၤတူၢ်လိာ်လံနမၤတၢ် လံ. ⁸ မ်နကူနသိးန့ၣ် ဝါဝဲကိးအဆၢအကတီၢ်ဒဲးတ က့ၢ်. မ်နခိၣ်အသိအသုတအိၣ်ဆံးကဲၣ်ဆိးတဂ့ၤ. ⁹ မူသးခုဒီးနမါလၢနအဲၣ်အီၤလၢ နတၢ်ကလီကလီအသးသမူအမုၢ်နံၤခဲလၢာ်အတီၢ်ပူၤလၢ ယွၤဟ့ၣ်လီၤနၤလၢမုၢ်အဖီလာ်, နမုၢ်နံၤကလီကလီခဲလၢာ်အတီၢ်ပူၤတက့ၢ်. အဂ့ၢ်ဒ်အံၤ, အဝဲန့ၣ်မ့ၢ်နဂီၢ်လၢနမူဒံးအဖၢမုၢ်, ဒီးလၢနတၢ်မၤအပူၤလၢနမၤလၢမုၢ်အဖီလာ် လီၤ.

¹⁰ ကယဲၢ်တၢ်လၢနစုထံၣ်န့ၢ်လၢ နကမၤတမံၤလၢ်လၢ်န့ၣ် မၤအီၤလၢနဂံၢ်နဘါခဲလၢာ်တက့ၢ်. အဂ့ၢ်ဒ်အံၤ, တၢ် မၤမ့ၢ်ဂ့ၤ, တၢ်ကူၣ်မ့ၢ်ဂ့ၤ, တၢ်သ့ၣ်ညါမ့ၢ်ဂ့ၤ, တၢ်ကူၣ်သ့ မ့ၢ်ဂ့ၤ, တအိၣ်ဘၣ်လၢပျုၤပူၤဖဲနလဲၤတၢ်န့ၣ်ဘၣ်လီၤ.

¹¹ ယဟဲက့ၤ ဒီးယထံၣ်တၢ်လၢမုၢ်အဖီလာ်လၢပှၤဃ့ၢ် သတြီၤချ့န့ၣ် တတုၤဆိဘၣ်, ဒီးပှၤဒုးတၢ်ဆူၣ်န့ၣ်တ မၤနၢၤဘၣ်တၢ်ဘၣ်, ဒီးကိၣ်တအိၣ်ဘၣ်ဒီးပှၤကူၣ်တၢ် သ့ဘၣ်, ဒီးတၢ်ထူးတၢ်တီၤ တအိၣ်ဘၣ်ဒီးပှၤလၢအ ကူၣ်အဆးဘၣ်, ဒီးပှၤမၤတၢ်သ့တဘၣ်ဘျုးဘၣ်ဖှိၣ် ဘၣ်လီၤ. မ့မ့ၢ်တၢ်အဆၢအကတီၢ်ဒီးတၢ်ဘၣ်အတီၤ ဘၣ် ပှၤခဲလၢာ်လီၤ. ¹² အဂ့ၢ်ဒ်အံၤ, ပှၤကညီစ့ၢ်ကီးတ သ့ၣ်ညါဘၣ်အဆၢအကတီၢ်ဘၣ်. ဒ်ဒ့ၣ်ဧိၤညၣ်ဧိၤလၢ အဘၣ်ပှာ်အၢအသိးန့ၣ်, ဒီးဒ်ထိၣ်ဧိၤလံၣ်ဧိၤဘၣ်ပျံၤ သကွီၤအသိးန့ၣ် ပှၤကညီဖိဘၣ်ပျံၤသကွီၤလၢအက တီၢ်အၢဖဲအဘၣ်အီၤသတူၢ်ကလာ်လီၤ.

¹³ တၢ်ကူၣ်သ့အံၤ ယထံၣ်လၢမုၢ်အဖီလာ်, ဒီးဒိၣ်ဝဲ လၢယၤလီၤ. ¹⁴ ဝ့ၢ်ဆံးအိၣ်, ဒီးပှၤစှၤဂၤအိၣ်ဝဲလၢအပူၤ, ဒီးစီၤပၤဖးဒိၣ်ဟဲထီဒါအီၤ, ဒီးကဝီၤဃာ်အီၤ ဒီးမၤထီၣ် တိာ်ဖးဒိၣ်တဖၣ်ထီဒါအီၤလီၤ. ¹⁵ ဒီးပှၤဖှီၣ်ဖိလၢအကူၣ် တၢ်သ့တဂၤန့ၣ် အိၣ်ဝဲလၢအပူၤလီၤ. ဒီးမၤပူၤမၤဖျဲး ဝ့ၢ်န့ၣ်လၢအတၢ်ကူၣ်သ့လီၤ. ဘၣ်ဆၣ်ဒီး ပှၤတသ့ၣ် နီၣ်ထီၣ်က့ၤပှၤဖှီၣ်ဖိတဂၤန့ၣ်နီတဂၤဘၣ်. ¹⁶ ဒီးယစံး, တၢ်ကူၣ်သ့ဂ့ၤန့ၢ်တၢ်အဂံၢ်အဘါတက့ၢ်လီၤ. ဘၣ်ဆၣ် ဒီးပှၤတပးကဲဘၣ် ပှၤဖှီၣ်ဖိယာ်ဖိ အတၢ်ကူၣ်သ့န့ၣ်, ဒီးပှၤတနၢ်ဟူဘၣ်အတၢ်ကတိၤဘၣ်. ¹⁷ ပှၤကူၣ်တၢ်သ့ အတၢ်ကတိၤကပုာ်လုးန့ၣ် ဟူထီၣ်ဝဲဒိၣ်န့ၢ်ပှၤကိးပသူ ထီၣ်လၢအပၢတၢ်လၢ ပှၤဟးဂီၤဖိအကျါတက့ၢ်လီၤ.

¹⁸ တၢ်ကူၣ်သ့န့ၣ်ဂ့ၤန့ၢ် ဒုးသုးတၢ်အစုကဝဲၤတက့ၢ်လီၤ. မ့မ့ၢ်ပှၤတၢ်ဒဲးဘးဖိတဂၤဧိၤန့ၣ် မၤဟးဂီၤတၢ်ဂ့ၤအါမး လီၤ.

၁၀

¹ သၣ်ဘုလါသံန့ၣ်ဒုးနၢအုၣ်ပှၤမၤတၢ်နၢမူတဂၤအသိ အချါလီၤ. ဒီးပှၤဟးဂီၤဖိအတၢ်တစဲးဖိဃၢန့ၢ်တၢ်ကူၣ် သ့, ဒီးတၢ်လၤကပီၤတက့ၢ်ဒ်န့ၣ်အသိးလီၤ. ² ပှၤကူၣ် တၢ်သ့အသးန့ၣ် အိၣ်ဝဲလၢအစုထွဲတခီလီၤ. မ့မ့ၢ်ပှၤ ဟးဂီၤဖိအသးန့ၣ်အိၣ်ဝဲလၢအစုစ့ၣ်တခီလီၤ. ³ ဒီးတုၤ ပှၤဟးဂီၤဖိလဲၤတၢ်လၢကျဲစ့ၢ်ကီး, ဒီးအသးဆးတအိၣ် ဘၣ်ဒီး, စံးဘၣ်ပှၤကိးဂၤဒဲးလၢအမ့ၢ်ပှၤဟးဂီၤဖိလီၤ.

⁴ ပဒိၣ်ဖးဒိၣ်တဂၤအသးမ့ၢ်ထီၣ်ဘၣ်နၤဒီး, ဟးလၢန လီၢ်တဂ့ၤ, အဂ့ၢ်ဒ်အံၤ, တၢ်သူၣ်စူၤသးစူၤန့ၣ်မၤပူၤမၤဖျဲး တၢ်ဒဲးဘးအဒိၣ်အယိာ်လီၤ.

⁵ ယထံၣ်ဘၣ်တၢ်အၢတမံၤလၢမုၢ်အဖီလာ်, တၢ်ကမၣ် လၢအဟဲထီၣ်လၢပှၤပၢတၢ်လီၤ. ⁶ ပှၤဟးဂီၤဖိဘၣ်တၢ် ပာ်အီၤလၢအလီၢ်ထီၣ်ထီ, ဒီးပှၤထူးပှၤတီၤ ဆ့ၣ်နီၤ လၢအလီၢ်ဖုၣ်လီၤ. ⁷ ယထံၣ်တၢ်အခ့အပှၤလၢကသ့ၣ် လိၤ, ဒီးပဒိၣ်ဖးဒိၣ်လဲၤတၢ်လၢအခီၣ်ဒ်တၢ်အခ့အပှၤ အသိးန့ၣ်လီၤ. ⁸ ပှၤလၢအခူၣ်လီၤတၢ်ပူၤန့ၣ်ကလီၤတဲာ်လၢအပူၤလီၤ. ဒီးပှၤလၢအဘၢၣ်ဖျိတၢ်အဒူၣ်န့ၣ်ဂုၢ်ကအ့ၣ်အီၤလီၤ.―

⁹ ပှၤလၢအသုးကွံာ်လၢၢ်တဖၣ်န့ၣ် အတၢ်ကမၤဆါအီၤ လီၤ. ပှၤလၢအမၤသ့ၣ်ဖးသ့ၣ်န့ၣ်တၢ်ကဘၣ်ဘၣ်ဖုး အီၤလီၤ. ¹⁰ ထးအကနၣ်မ့ၢ်တအ့ၣ်ဘၣ်, ဒီးပှၤမ့ၢ်တကျ့ ဘၣ်အကနၣ်ဒီး, ပှၤဘၣ်ထုးထီၣ်အဂံၢ်အဘါဆူၣ်တ က့ၢ်လီၤ. မ့မ့ၢ်တၢ်ကူၣ်သ့ဂ့ၤလၢတၢ်ဆှၢပှၤအဂီၢ်လီၤ.

¹¹ ပှၤအူတၢ်သမူတၢ်တချုး မၤဒံးဘၣ်တၢ်ဒီး, ဂုၢ်မ့ၢ်ဖျး တၢ်ဒီး, ပှၤအူတၢ်တဂၤန့ၣ်အဘျုးအဖှိၣ်တအိၣ်ဘၣ်.

¹² ပှၤကူၣ်တၢ်သ့ အတၢ်ကတိၤန့ၣ် ဘၣ်တၢ်အသးလီၤ. မ့မ့ၢ်ပှၤဟးဂီၤဖိအပျုၤန့ၣ်မၤဟးဂီၤအီၤလီၤ. ¹³ အထးခိၣ် အတၢ်ကတိၤခီၣ်ထံးန့ၣ်မ့ၢ်ပှၤဟးဂီၤဖိအတၢ်, ဒီးအထး ခိၣ်အကတၢၢ်န့ၣ် မ့ၢ်တၢ်ပျုၢ်အၢလီၤ. ¹⁴ ဒီးပှၤဟးဂီၤဖိ မၤအါထီၣ်အတၢ်ကတိၤလီၤ. ဘၣ်ဆၣ်ဒီးတၢ်ကမၤအ သးန့ၣ်ပှၤတသ့ၣ်ညါနီတဂၤဘၣ်. ဒီးတၢ်ကမၤအသး ဆူညါန့ၣ်မ့ၢ်မတၤစံးသ့တဂၤလဲၣ်. ¹⁵ ပှၤဟးဂီၤဖိမၤတၢ် န့ၣ်မၤဘှံးအသးလီၤ. အဂ့ၢ်ဒ်အံၤ, တသ့ၣ်ညါလဲၤဆူ ဝ့ၢ်ပူၤဘၣ်.

¹⁶ ကီၢ်ဧၢ, နဘၣ်အဖှီၣ်လီၤ. အဂ့ၢ်ဒ်အံၤ, နစီၤပၤမ့ၢ် ဖိသၣ်, ဒီးနပဒိၣ်တဖၣ်အီၣ်တၢ်အီတၢ်လၢဂီၤဂီၤလီၤ.

¹⁷ ကီၢ်ဧၢ, တုၤနစီၤပၤ မ့ၢ်ပှၤအိၣ်ဖျဲၣ်ပဒိၣ်ဖိ, ဒီးနပ ဒိၣ်တဖၣ်အီၣ်တၢ်အီတၢ်လၢ အဆၢဘၣ်အကတီၢ်ဂ့ၤ လၢတၢ်အဂံၢ်အဘါအဂီၢ်, တမ့ၢ်ဘၣ်လၢအီမူၤအသး အဂီၢ်ဒီး, နဘၣ်တၢ်ဆိၣ်ဂ့ၤလီၤ. ¹⁸ ပှၤကၢၣ်မၤတၢ်သ တးဒီး, ဟံၣ်လီၤပှီၢ်ကွံာ်လီၤ. ဒီးစုအကၢၣ်န့ၣ်သတး ဒီး, ဟံၣ်လီၤစီၤလီၤ.

¹⁹ ပှၤမၤတၢ်အီၣ်တၢ်အီလၢပှၤကနံၤဝဲအဂီၢ်, ဒီးစပံးထံ မၤခုပှၤအသးလီၤ. မ့မ့ၢ်စ့စံးဆၢတၢ်ခဲလၢာ်လီၤ.

²⁰ လၢနဆိကမိၣ်တၢ်အပူၤဒၣ်လဲာ်န့ၣ် ဆိၣ်အၢစီၤပၤ တဂ့ၤ, ဒီးလၢနဒၢးပူၤဒၣ်လဲာ် ဆိၣ်အၢပှၤထူးပှၤတီၤ တဂ့ၤ. အဂ့ၢ်ဒ်အံၤ, ထိၣ်လၢမူကပိာ်လိၤကစိာ်တၢ်အ ကလုၢ်, ဒီးတၢ်လၢအအိၣ်ဒီးအဒံးဆ့န့ၣ် ကစံးဘၣ်တဲဘၣ်တၢ်လီၤ.

၁၁

¹ ကွံာ်နကိၣ်လၢထံဖံးခိၣ်တက့ၢ်. အဂ့ၢ်ဒ်အံၤ, အါနံၤ အါသီအလီၢ်ခံန့ၣ်နကထံၣ်န့ၢ်က့ၤအီၤလီၤ.

² ဟ့ၣ်နီၤဖးတၢ်လၢပှၤနွံဂၤ, ဒီးဃိးဂၤဒၣ်လဲာ်အဂီၢ် တက့ၢ်. အဂ့ၢ်ဒ်အံၤ, တၢ်အၢလၢအကမၤအသးလၢ ဟီၣ်ခိၣ်ချၢမနုၤမနုၤန့ၣ်နတသ့ၣ်ညါဘၣ်. ³ တုၤတၢ် အၢၣ်ပှဲၤဒီးတၢ်စူၤဒီး, လူလီၤအသးလၢဟီၣ်ခိၣ်ချၢလီၤ ဒီးတုၤသ့ၣ်တထံးလီၤဃံၤဝဲဆူကလံၤထံးမ့ၢ်ဂ့ၤ, ဆူက လံၤစိးမ့ၢ်ဂ့ၤ, ဖဲအလီၢ်လၢသ့ၣ်လီၤဃံၤဝဲန့ၣ်ကအိၣ်ဝဲဖဲ န့ၣ်လီၤ. ⁴ ပှၤလၢအခိးကလံၤန့ၣ်တဖှံဘၣ်တၢ်ဘၣ်, ဒီး ပှၤလၢအကွၢ်တၢ်အၢၣ်န့ၣ်တကူးဘၣ်ဘုဘၣ်. ⁵ သးအ ကျဲမ့ၢ်ဂ့ၤ, ဃံကဲထီၣ်လၢပှၤလၢအဒၢတၢ်တဒၢလီၢ်ပူၤဒ် လဲၣ်ဒ်လဲၣ်မ့ၢ်ဂ့ၤ, ဒ်နတသ့ၣ်ညါဘၣ်အသိးန့ၣ် နတ သ့ၣ်ညါဘၣ်ယွၤအမၤတၢ်လၢ အမၤတၢ်ခဲလၢာ်ဒ်န့ၣ် သိးလီၤ. ⁶ လၢမုၢ်ဂီၤန့ၣ်ဖှံနတၢ်ချံတက့ၢ်, ဒီးလၢမုၢ်ဟါ န့ၣ်ထုးက့ၤနစုတဂ့ၤ. အဂ့ၢ်ဒ်အံၤ, ကဘီၣ်ထီၣ်လၢလဲၣ် တမံၤမံၤလဲၣ်, အအံၤမ့ၢ်ဂ့ၤ, အန့ၣ်မ့ၢ်ဂ့ၤ, မ့တမ့ၢ်ဘၣ်, တၢ်ခံမံၤလၢာ်ကဂ့ၤဒ်သိးသိးမ့ၢ်ဂ့ၤ, နတသ့ၣ်ညါဘၣ်.

⁷ မ့ၢ်မးတၢ်ကပီၤမုာ်ဝဲ, ဒီးပမဲာ်ကွၢ်မုၢ်အတၢ်ကပီၤန့ၣ် မုာ်ဝဲလီၤ. ⁸ ဘၣ်ဆၣ်ဒီးပှၤမ့ၢ်မူဝဲအါနံၣ်အါလါ, ဒီးသး ခုဒၣ်ဝဲလၢ တၢ်ခဲလၢာ်အပူၤနာ်သက့ဒီး, မ်အသ့ၣ် နီၣ်ထီၣ်က့ၤမုၢ်နံၤအခံးတဖၣ်တက့ၢ်. အဂ့ၢ်ဒ်အံၤ, က အိၣ်အါနံၤအါသီလီၤ. ကယဲၢ်တၢ်လၢအဟဲဝဲန့ၣ်မ့ၢ်တၢ် ကလီကလီလီၤ. ⁹ ဖိၣ်သၣ်ခွါဧၢ, လၢနဖိၣ်သၣ်ခွါအဖၢ မုၢ်ဒီး, သးခုတက့ၢ်. ဒီးမၤမုာ်နသးလၢနဖိၣ်သၣ်ခွါအ မုၢ်နံၤအတီၢ်ပူၤ, ဒီးလဲၤတၢ်လၢနသးအကျဲပူၤ, ဒီးဖဲတၢ် ဘၣ်နမဲာ်တက့ၢ်. ဘၣ်ဆၣ်ဒီးသ့ၣ်ညါနဲ, လၢကယဲၢ် တၢ်ခဲလၢာ်န့ၣ်အဃိ, ယွၤကဒုးဟဲနၤဆူတၢ်စံၣ်ညီၣ် အပူၤန့ၣ်တက့ၢ်.

¹⁰ မၤသးဒ်န့ၣ်ဒီးသုးကွံာ်တၢ်မၤကိၢ်မၤဂီၤနသး, ဒီးသုး ကွံာ်တၢ်အၢလၢနဖံးနညၣ်တက့ၢ်. အဂ့ၢ်ဒ်အံၤ, ဖိသၣ်ဒီး ဖိၣ်သၣ်ခွါထီၣ်အလီၢ်န့ၣ်မ့ၢ်တၢ်ကလီကလီလီၤ.

၁၂

¹ လၢမုၢ်နံၤအအၢတချုးဟဲဒံးဘၣ်. ဒီးနံၣ်တချုးသုး ဘူးဒံးဘၣ်အသးဖဲနကစံး တၢ်အမုာ်တအိၣ်ဘၣ်လၢ အပူၤဘၣ်, လၢနသးစၢ်ဒံးအမုၢ်နံၤန့ၣ်သ့ၣ်နီၣ်ထီၣ်က့ၤ ပှၤလၢအတ့လီၤနၤတက့ၢ်. ² ဖဲမုၢ်, ဒီးတၢ်ကပီၤ, ဒီးလါ, ဒီးဆၣ်ဧိၤဖီဧိၤတချုးခံးလီၤဒံးဘၣ်, ဒီးတၢ်အၢၣ်တချုး ဟဲက့ၤဒံးဘၣ်လၢတၢ်ဟဲစူၤအလီၢ်ခံ, ³ လၢမုၢ်တနံၤဖဲ ပှၤပၢၤဟံၣ်ကကနိး, ဒီးပှၤအဆူၣ်ကသကူးလီၤအသး. ဒီးပှၤဂူာ်ဆၢၣ်ဂူာ်ကအိၣ်ဃိကလာ်လၢအအိၣ်စှၤအဃိ ဒီးပှၤလၢအကွၢ်ထီၣ်တၢ်လၢ တၢ်ထူၣ်ဖျိကခံးလီၤဝဲ,―

⁴ ဒီးတြဲၤကကးတံာ်ဃာ်အသးလၢကျဲပူၤ, တုၤဂူာ်ဆၢၣ် ဂူာ်အသီၣ်စၢ်လီၤဝဲ, ဒီးပှၤဂဲၤဆၢထၢၣ်လၢထိၣ်ဖိအပှ့ၤ အဃိ, ဒီးတၢ်သးဝံၣ်အဖိမုၣ်ဘၣ်တၢ်ဆီၣ်လီၤအီၤခဲ လၢာ်လီၤ. ⁵ ဒီးပျံၤစ့ၢ်ကီးတၢ်လၢအအိၣ်ထီၣ်ထီ, ဒီးတၢ် ပျံၤအလီၢ်ကအိၣ်ဝဲလၢကျဲပူၤ, ဒီးၡၤကးသၣ် အဖီဖး ထီၣ်, ဒီးဒွဲၣ်ဃၤကာ်ကဲထီၣ်တၢ်အဃၢ, တၢ်သးကွံက ဟါမူၤဟါမၢ်လီၤ. အဂ့ၢ်ဒ်အံၤ, ပှၤကညီလဲၤဝဲဆူအ ဟံၣ်အထူအယိာ်, ဒီးပှၤဟီၣ်တၢ်ဖိလဲၤတၢ်လၢကျဲပူၤ န့ၣ်လီၤ. ⁶ ဖဲပျံၤစ့တထီၣ်တဲာ်ဒံးဘၣ်, ဒီးသလၢထူတ သ့ၣ်ဖးဒံးဘၣ်, ဒီးဖဲအထံစဲၤတဟးဂီၤဒံးဘၣ်လၢထံ ထီၣ်ပၢၢ်, ဒီးစဲးတဟးဂီၤဒံးဘၣ်ဖဲထံပူၤအဃၢၤဘၣ်.―

⁷ တုၤနုၤတစုအကမူၣ် ကက့ၤဆူဟီၣ်ခိၣ်ဒ်အအိၣ်တ့ၢ်ဝဲ အသိးန့ၣ်, ဒီးအသးကက့ၤဆူယွၤလၢအဟ့ၣ်လီၤအီၤ လီၤ.

⁸ တၢ်ကလီကလီ အတၢ်ကလီကလီန့ၣ် ပှၤစံၣ်တဲၤ တဲလီၤတၢ်စံးဝဲဒၣ်, ကယဲၢ်တၢ်ခဲလၢာ်န့ၣ်မ့ၢ်တၢ်ကလီကလီလီၤ.

⁹ ဒီးလၢန့ၣ်အမဲာ်ညါ ပှၤစံၣ်တဲၤတဲလီၤတၢ်န့ၣ်မ့ၢ်ပှၤ ကူၣ်တၢ်သ့သတးဒီး, သိၣ်လိဒံးပှၤဂီၢ်မုၢ်လၢ တၢ်သ့ၣ် ညါ, ဒီးဆိကမိၣ်တၢ်, ဒီးဃုထီၣ်တၢ်, ဒီးကတဲာ်ကတီၤ တၢ်ကတိၤဒိအါထံၣ်လီၤ. ¹⁰ ပှၤစံၣ်တဲၤတဲလီၤတၢ်န့ၣ်ဃု န့ၢ်တၢ်သူၣ်မုာ်သးမုာ်အတၢ်ကတိၤ, ဒီးတၢ်ကွဲးအသး စၢၢ်ဆၢတၢ်မ့ၢ်တၢ်တီအတၢ်ကတိၤန့ၣ်လီၤ. ¹¹ ပှၤကူၣ် တၢ်သ့အတၢ်ကတိၤန့ၣ် မ့ၢ်နီၣ်ဆဲးတၢ်, ဒီးထးပနဲာ် လၢပှၤအိၣ်ဖှိၣ်အခိၣ်ပျၤနုာ်အီၤ, တၢ်လၢပှၤကွၢ်သိတဂၤ ဃီဟ့ၣ်လီၤဝဲလီၤ. ¹² လၢန့ၣ်အမဲာ်ညါယဖိခွါဧၢ, ဒိးတၢ် သိၣ်ဃီၣ်လၢ တၢ်န့ၣ်တက့ၢ်. ပမၤလံာ်အါကတြူၢ် န့ၣ်အကတၢၢ်တအိၣ်ဘၣ်, ဒီးဆိကမိၣ်တၢ်အါအါက လဲာ်န့ၣ်မၤဘှံးပဖံးပညၣ်လီၤ.

¹³ တၢ်ခဲလၢာ်အခိၣ်ကျၢၢ်န့ၣ်မ်ပနၢ်ဟူတက့ၢ်. ပျံၤယွၤ ဒီးတိၢ်န့ၢ်အတၢ်မၤလိာ်တက့ၢ်. အဂ့ၢ်ဒ်အံၤ, အဝဲန့ၣ်မ့ၢ် ပှၤကညီအတၢ်ခဲလၢာ်လီၤ.

¹⁴ အဂ့ၢ်ဒ်အံၤ, ယွၤကဒုးဟဲကယဲၢ်တၢ်မၤအိၣ်ဒီးတၢ်ခူ သူၣ်ခဲလၢာ်, ဂ့ၤမ့ၢ်ဂ့ၤ, အၢမ့ၢ်ဂ့ၤ, ဆူတၢ်စံၣ်ညီၣ်အပူၤ န့ၣ်လီၤ.