လံာ်စီၤပီလူးကွဲးန့ၢ်ပှၤကလီးစဲဖိ.

လံာ်စီၤပီလူးကွဲးန့ၢ်ပှၤကလီးစဲဖိ.

၁

¹ ယ့ၣ်ရှူးခရံာ်အပှၤတၢ်မၢဖိဖဲယွၤအသး, စီၤပီလူးဒီးပ ဒီပုၢ်ဝဲၢ်စီၤတံၤမသ့း, ² ပစံးဘၣ်ပှၤစီဆှံ, ဒီးဒီပုၢ်ဝဲၢ်လၢအ ကလုၢ်တီလၢ ခရံာ်အပူၤအိၣ်လၢကလီးစဲန့ၣ်, မ်တၢ် ဘျုးတၢ်ဖှိၣ်ဒီးတၢ်ဃူတၢ်ဖိးလၢပပၢ်ယွၤဒီးကစၢ်ယ့ၣ်ရှူးခရံာ်န့ၣ်ဘၣ်သုတက့ၢ်.

³ ပဘါထုကဖၣ်တၢ်လၢသုဂီၢ် တဘိယူၢ်ဃီဒီး, ပစံးထီၣ်ပတြၢၤယွၤပကစၢ်ယ့ၣ်ရှူးခရံာ်အပၢ်အဘျုးအဖှိၣ် လီၤ. ⁴ အဂ့ၢ်ဒ်အံၤ, ပနၢ်ဟူသုတၢ်နာ်လၢယ့ၣ်ရှူးခရံာ်အ ပူၤ, ဒီးသုတၢ်အဲၣ်လၢပှၤစီဆှံခဲလၢာ်, ⁵ လၢတၢ်မုၢ်လၢ်အိၣ်ပာ်ဖှိၣ်လၢသုဂီၢ်လၢမူခိၣ်အဃိလီၤ. လၢတၢ်မုၢ်လၢ်န့ၣ်, သုနၢ်ဟူလၢတၢ်မ့ၢ်တၢ်တီအကလုၢ်အကထါဘၣ် ဃးဒီးတၢ်သးခုအကစီၣ်, ⁶ လၢအဟဲဆူသုအိၣ်ဒ်လၢဟီၣ်ခိၣ်ချၢခဲလၢာ်စ့ၢ်ကီးအသိး, ဒီးသၣ်ထီၣ်ဝဲဒီးအါထီၣ်ဒ်လၢသုကျါစ့ၢ်ကီးအသိး, လၢမုၢ်နံၤလၢသုနၢ်ဟူအီၤ, ဒီးသ့ၣ်ညါထီၣ်ယွၤအဘျုးအဖှိၣ်လၢတၢ်မ့ၢ်တၢ်တီ လံၤလံၤန့ၣ်လီၤ. ⁷ ဒ်သုမၤလိတၢ်လၢစီၤအ့းပၤဖြါလၢ တၢ်အဲၣ်အီၤ, ကုၢ်ဖိသကိးဒီးပှၤ, လၢအမ့ၢ်ခရံာ်အခ့အပှၤ အကလုၢ်တီလၢသုဂီၢ်အသိးန့ၣ်, ⁸ အဝဲဒၣ်ဒုးသ့ၣ်ညါပှၤ, လၢသုတၢ်အဲၣ်တၢ်ကွံလၢသးန့ၣ်အပူၤအဂ့ၢ်အကျိၤလီၤ.

⁹ မၤသးဒ်န့ၣ်ဒီးမုၢ်နံၤလၢပနၢ်ဟူတၢ်န့ၣ်လံၤလံၤ, ပတဆိတ့ၢ်ဘါထုကဖၣ်လၢသုဂီၢ်ဘၣ်. ဒီးပဃ့ကညးဒ်သိး သုကလၢထီၣ်ပှဲၤထီၣ်ဒီးတၢ်သ့ၣ်ညါ တၢ်ဘၣ်ယွၤအသးလၢကယဲၢ်တၢ်ကူၣ်သ့, ဒီးတၢ်နၢ်ပၢၢ်ဘၣ်ဃးဒီးသး န့ၣ်, ¹⁰ ဒ်သိးသုကလဲၤတၢ်ဒ်အကြၢးဒီးကစၢ်, လၢတၢ်ဘၣ်အသးခဲလၢာ်သတးဒီး, သုကသၣ်ထီၣ်လၢကယဲၢ် တၢ်မၤဂ့ၤ, ဒီးအါထီၣ်လၢတၢ်သ့ၣ်ညါယွၤ. ¹¹ ဒီးဆူၣ်ထီၣ်လၢကယဲၢ်တၢ်စိတၢ်ကမီၤ, ဒ်အလၤကပီၤအစိအကမီၤအသိး, လၢကယဲၢ်တၢ်ဝံသးစူၤ, ဒီးတၢ်သူၣ်စူၤသး စူၤအိၣ်ဒီးတၢ်သးခုန့ၣ်အဂ့ၢ်, ¹² ဒီးစံးထီၣ်ပတြၢၤပၢ်န့ၣ် အဘျုးအဖှိၣ်လၢအဒုးကဲပှၤလၢ ပှၤဂ့ၤန့ၢ်ဃုာ်တၢ်န့ၢ် သါဘၣ်ဃးဒီးပှၤစီဆှံလၢတၢ်ကပီၤအပူၤ, ¹³ ဒီးဟံးထီၣ်က့ၤပှၤလၢတၢ်ခံးအစိအကမီၤအပူၤ, ဒီးလဲက့ၤပလီၢ်ဆူ အဖိခွါလၢအအဲၣ်အီၤတဂၤအဘီအမုၢ်အပူၤလီၤ. ¹⁴ လၢအဝဲဒၣ်အပူၤပဘၣ်တၢ်ပှ့ၤက့ၤပှၤ, တၢ်ပျၢ်ပတၢ်ဒဲးဘး လီၤ. ¹⁵ အဝဲဒၣ်န့ၣ်မ့ၢ်ယွၤ, လၢပှၤထံၣ်အီၤတသ့ဘၣ်တ ဂၤအက့ၢ်အဂီၤ, တၢ်ဘၣ်တ့ခဲလၢာ်အပှၤဝဲၢ်ကိလီၤ. ¹⁶ အဂ့ၢ်ဒ်အံၤ, တၢ်ခဲလၢာ်ဘၣ်တ့အသးလၢအစုပူၤ, တၢ်အိၣ်လၢမူခိၣ်, ဒီးတၢ်အိၣ်လၢဟီၣ်ခိၣ်, တၢ်လၢပထံၣ်သ့, ဒီးတၢ်လၢပထံၣ်တသ့ဘၣ်, တၢ်လီၢ်ပစိာ်မ့ၢ်ဂ့ၤ, တၢ်စံၣ်ညီၣ်မ့ၢ်ဂ့ၤ, တၢ်အခိၣ်မ့ၢ်ဂ့ၤ, တၢ်အစိအကမီၤမ့ၢ်ဂ့ၤ, က ယဲၢ်တၢ်တမံၤလၢ်လၢ်ဘၣ်တၢ်တ့အီၤလၢအစုပူၤ, ဒီးလၢ အဂီၢ်လီၤ. ¹⁷ ဒီးအဝဲဒၣ် အိၣ်ပာ်လၢတၢ်ခဲလၢာ်တချုးအိၣ်ထီၣ်ဒံးဘၣ်, ဒီးတၢ်ခဲလၢာ် အိၣ်ဝဲဆိးဝဲလၢအီၤ လီၤ. ¹⁸ ဒီးအဝဲဒၣ်န့ၣ်မ့ၢ်နီၢ်ခိ, ဒ်ပစံးတၢ်အသိး, တၢ်အိၣ်ဖှိၣ်အခိၣ်, ဒီးမ့ၢ်ပှၤခီၣ်ထံး, ပှၤလၢအဂဲၤဆၢထၢၣ်က့ၤလၢတၢ်သံအဝဲၢ်ကိ, ဒ်သိးအကမ့ၢ်တၢ်အခိၣ်လၢတၢ်ခဲ လၢာ်အပူၤလီၤ. ¹⁹ အဂ့ၢ်ဒ်အံၤ, ဘၣ်ပၢ်အသးလၢတၢ်လၢ တၢ်ပှဲၤခဲလၢာ်ကအိၣ်ဝဲဆိးဝဲလၢအပူၤ, ²⁰ ဒီးလၢအဝဲဒၣ်အဃိကမၤဖိးလိာ်တၢ်ခဲလၢာ်ဒီးအကစၢ်ဒၣ်ဝဲ, ဒီးမၤဃူမၤဖိးဝဲလၢအထူၣ်စုညါအသွံၣ်အဃိ, တၢ်အိၣ်လၢဟီၣ်ခိၣ်မ့ၢ်ဂ့ၤ, တၢ်အိၣ်လၢမူခိၣ်မ့ၢ်ဂ့ၤန့ၣ်လီၤ.

²¹ ဒီးသုဝဲသ့ၣ်လၢအခီၣ်ထံးန့ၣ်, သုမၤတၢ်အၢတၢ်သီ သတးဒီး, သုမ့ၢ်ပှၤတခီဘီမုၢ်ဖိ, ဒီးတၢ်အဒုၣ်အဒါလၢ သုသး, ဘၣ်ဆၣ်ဒီးခဲကနံၣ်အံၤမၤဖိးလိာ်က့ၤသု, ²² လၢအဖံးအညၣ်အနီၢ်ခိအပူၤလၢအသံဝဲအဃိ, ဒ်သိးအကပာ်သုစီဆှံ, ဒီးတသံၣ်သူတမီၢ်ကျာ်, ဒီးတၢ်ပာ်တၢ်ကမၣ်လၢသုလိၤအလီၢ်တအိၣ်ဘၣ်, လၢအမဲာ်ညါန့ၣ် လီၤ. ²³ ဒီးသုမ့ၢ်အိၣ်သူၣ်လီၤသုသး, ဒီးအိၣ်ဂၢၢ်ဆိးကျၢၤလၢတၢ်နာ်အပူၤ, ဒီးသုမ့ၢ်တသုးကွံာ်သုလီၢ်လၢတၢ်မုၢ်လၢ်ဘၣ်ဃးဒီးတၢ်သးခုအကစီၣ်, လၢသုနၢ်ဟူလၢတၢ်စံၣ်တဲၤတဲလီၤလၢကယဲၢ်ပှၤဘၣ်တ့အသးလၢမူခိၣ်အဖီလာ်န့ၣ်ဒီး, တၢ်ကမၤအသးဒ်န့ၣ်လီၤ. ယၤစီၤပီလူးအံၤ, ယမ့ၢ်အဝဲန့ၣ်အခ့အပှၤလီၤ.

²⁴ ခဲကနံၣ်အံၤ, ယသူၣ်ခုသးခုလၢတၢ်နးတၢ်ဖှီၣ်အပူၤ လၢသုဂီၢ်, ဒီးယမၤလၢထီၣ်ပှဲၤထီၣ် တၢ်အိၣ်လီၤတဲာ်လၢခရံာ်အတၢ်နးတၢ်ဖှီၣ်, လၢယဖံးယညၣ်အပူၤလၢ အနီၢ်ခိ, ဒ်ပစံးတၢ်အသိး, တၢ်အိၣ်ဖှိၣ်အဂီၢ်လီၤ. ²⁵ ယမ့ၢ်အဝဲန့ၣ်အခ့အပှၤ, ဒ်ယွၤအတၢ်ကွၢ်တၢ်အလီၢ်လၢအဟ့ၣ်လီၤယၤလၢသုဂီၢ်, ဒ်သိးယကမၤလၢထီၣ်ပှဲၤထီၣ် ယွၤအကလုၢ်အကထါ, ²⁶ ဒ်ပစံးတၢ်အသိး, တၢ်ခူသူၣ်လၢအအိၣ်ခူသူၣ်တ့ၢ်အစိၤစိၤအဃၣ်ဃၣ်. ဘၣ်ဆၣ်ဒီးခဲကနံၣ်အံၤလီၣ်ဖျါထီၣ်အသးလၢအပှၤစီဆှံတဖၣ်အ မဲာ်ညါန့ၣ်လီၤ. ²⁷ လၢအဝဲသ့ၣ်အစုပူၤ, ယွၤပာ်အသးလၢအကဒုးသ့ၣ်ညါလၢပှၤကလုာ်တဖၣ်အကျါတၢ်လၢအမ့ၢ်အလၤထူးအကပီၤတီၤဘၣ်ဃးဒီးတၢ်ခူသူၣ် အံၤ, လၢအမ့ၢ်ခရံာ်အိၣ်လၢသုပူၤ, တၢ်မုၢ်လၢ်တၢ်လၤက ပီၤန့ၣ်လီၤ. ²⁸ အဝဲဒၣ်န့ၣ် ပစံၣ်တဲၤတဲလီၤ, ဒီးပသဆၣ်ထီၣ်ပှၤခဲလၢာ်အခံ, ပသိၣ်က့ၤသီက့ၤပှၤခဲလၢာ်, လၢကယဲၢ်တၢ်ကူၣ်သ့, ဒ်သိးပကပာ်လီၤပှၤခဲလၢာ်လၢထီၣ်ပှဲၤ ထီၣ်လၢခရံာ်အပူၤလီၤ. ²⁹ ယဂုာ်မၤတၢ်လၢတၢ်န့ၣ်အဂီၢ်သပှၢ်ပှၢ်, ဒ်အဝဲဒၣ်အစိအကမီၤမၤတၢ်လၢယပူၤဆူၣ်ဆူၣ်ကလဲာ်အသိးန့ၣ်လီၤ.

၂

¹ အဂ့ၢ်ဒ်အံၤ, ယသးဂဲၤလိာ်လၢသုဂီၢ်, ဒီးပှၤအိၣ်လၢ လီၤဒံၤကံအဂီၢ်, ဒီးဖဲဒၣ်ပှၤလၢအတထံၣ်ဘၣ်ယမဲာ်လၢဖံးလၢညၣ်အဂီၢ်, ဆံးဒိၣ်ဆံးဒိၣ်, ယသးအိၣ်လၢသုက သ့ၣ်ညါ, ² ဒ်သိးအသးကမုာ်ထီၣ်ဝဲ, ဒီးကအိၣ်ဒီးအသးစဲဘူးတဖျၢၣ်ဃီလၢတၢ်အဲၣ်တၢ်ကွံအပူၤ, ဒီးအိၣ်ဒီးတၢ်နၢ်ပၢၢ်လၢလၢပှဲၤပှဲၤအတၢ်ထူးတၢ်တီၤခဲလၢာ်, ဒ်သိးအကသ့ၣ်ညါယွၤအတၢ်ခူသူၣ်, ဒ်ပစံးတၢ်အသိး, ခရံာ်,―

³ လၢကယဲၢ်တၢ်ကူၣ်သ့ဒီးတၢ်သ့ၣ်ညါအတၢ်လုၢ်ဒိၣ်ပှ့ၤဒိၣ်ခဲလၢာ်အိၣ်ပာ်ခူသူၣ်အသးလၢအပူၤန့ၣ်လီၤ.

⁴ ယစံးဘၣ်တဲဘၣ်တၢ်န့ၣ်, ဒ်သိးပှၤသုတလွဲန့ၢ်သုလၢ တၢ်ကတိၤလီတၢ်နီတဂၤတဂ့ၤလီၤ. ⁵ အဂ့ၢ်ဒ်အံၤ, ယလီၤဖးဒီးသုလၢတၢ်ဖံးတၢ်ညၣ်, ဘၣ်ဆၣ်ဒီးယအိၣ်ဒီးသုလၢသူၣ်လၢသး, ဒီးယသူၣ်ခုယသးခုလၢယကွၢ်သုအိၣ်ကစီဒီ, ဒီးသုတၢ်စူၢ်ဂၢၢ်နာ်ကျၢၤလၢခရံာ်အပူၤအဃိလီၤ.

⁶ မၤသးဒ်န့ၣ်ဒီးသုဂံၢ်စဲၤလီၤ, ဒီးသုဘၣ်တၢ်မၤထီၣ်မၤ ထီသုလၢအပူၤ, ဒီးသုအိၣ်ဂၢၢ်ဆိးကျၢၤလၢတၢ်နာ်အပူၤ, ဒ်တၢ်သိၣ်လိသုအသိးသတးဒီး, အါထီၣ်လၢတၢ်စံး ထီၣ်ပတြၢၤအဘျုးအဖှိၣ်, ⁷ ဒီးလဲၤတၢ်လၢကစၢ်ယ့ၣ်ရှူး ခရံာ်အပူၤ, ဒ်သုဒိးန့ၢ်အီၤအသိးန့ၣ်တက့ၢ်. ⁸ ဒ်သိးပှၤသုတအိၣ်ဝဲတဂၤဂၤလၢအကစိာ်ကွံာ်သုသးလၢ တၢ်အဲၣ်ဒိးတၢ်သ့ၣ်ညါ, ဒီးတၢ်လီတၢ်ကလီကလီ, ဒ်ပှၤကညီစံးစိၤတဲစိၤတၢ်, ဒ်ဟီၣ်ခိၣ်အမိၢ်ပှၢ်အသိး, ဒီးတမ့ၢ် ဘၣ်ဒ်ခရံာ်အသိးန့ၣ်တဂ့ၤဒီး, ပလီၢ်သုသးတက့ၢ်. ⁹ အဂ့ၢ်ဒ်အံၤ, ယွၤအတၢ်လၢတၢ်ပှဲၤခဲလၢာ်အိၣ်ဝဲဆိးဝဲနီၢ်ခိ နီၢ်ခီလၢအဝဲဒၣ်အပူၤလီၤ. ¹⁰ ဒီးသုလၢထီၣ်ပှဲၤထီၣ်လၢအပူၤ, လၢအမ့ၢ်တၢ်အဒိၣ်အခိၣ်ဒီးတၢ်အစိအကမီၤခဲ လၢာ်အခိၣ်လီၤ. ¹¹ ဒီးလၢအဝဲဒၣ်အပူၤသုဒိးတၢ်ကူးတရံးလၢတၢ်ကူးတရံးတမၤဘၣ်အသးလၢပစုဘၣ်, မ့ၢ်လၢတၢ်ဘ့ၣ်လီၤကွံာ်တၢ်ဖံးတၢ်ညၣ်အကစၢ်မိၢ်ပှၢ်လၢ တၢ်ကူးတရံးဘၣ်ဃးဒီးခရံာ်လီၤ. ¹² ဒီးသုဘၣ်ခူၣ်လီၤကွံာ်ဃုာ်ဒီးအီၤလၢတၢ်ဒိးဘျၢ*န့ၣ်လီၤ. လၢအဝဲန့ၣ်အပူၤသုဘၣ်တၢ်ဂဲၤဆၢထၢၣ်ဃုာ်စ့ၢ်ကီးဒီးအီၤလၢတၢ်နာ်ဘၣ်ဃးဒီးယွၤအတၢ်မၤတၢ်လၢအမၤဂဲၤဆၢထၢၣ်က့ၤ အီၤလၢတၢ်သံန့ၣ်လီၤ. ¹³ ဒီးသုဝဲသ့ၣ်လၢအဘၣ်တၢ်သံလၢတၢ်လီၤကမၣ်အပူၤ, ဒီးလၢသုဖံးသုညၣ်တဘၣ်ဘၣ်တၢ်ကူးတရံးဘၣ်အပူၤအံၤ, အဝဲဒၣ်မၤမူထီၣ်ဃုာ် ဒီးအီၤ, ဒီးပျၢ်ကွံာ်သုတၢ်ကမၣ်ခဲလၢာ်လီၤ. ¹⁴ ဒီးတြူာ်ကွံာ်တၢ်ထီဒါပှၤ, ဒ်ပစံးတၢ်အသိး, တၢ်မၤလိာ်ကွဲးအသးလၢပှၤအစု, လၢအကဲထီၣ်ပဒုၣ်ပဒါ, ဒီးစိာ်ထီၣ်ကွံာ် ဝဲ, ဒီးပျၤထီကွံာ်အီၤလၢထူၣ်စုညါအလိၤလီၤ. ¹⁵ ဒီးဂုာ်န့ၢ်ဆူၣ်တၢ်အဒိၣ်အခိၣ်, ဒီးတၢ်အစိအကမီၤအတၢ်, ဒီးဒုးနဲၣ်အိၣ်ဖျါအီၤ, ဒီးမၤနၢၤအီၤလၢထူၣ်စုညါအလိၤလီၤ.

¹⁶ မၤသးဒ်န့ၣ်ဒီးလၢတၢ်အီၣ်မ့ၢ်ဂ့ၤ, တၢ်အီမ့ၢ်ဂ့ၤ, တၢ်မၤဘူၣ်အနံၤမ့ၢ်ဂ့ၤ, လါထီၣ်သီအနံၤမ့ၢ်ဂ့ၤ, အိၣ်ဘှံးအနံၤမ့ၢ်ဂ့ၤအဃိ, မ်ပှၤသုတစံၣ်ညီၣ်သုလၢအဂ့ၢ်အကျိၤနီတ ဂၤတဂ့ၤ. ¹⁷ တၢ်န့ၣ်တဖၣ်မ့ၢ်တၢ်ဆူညါတဖၣ်အကဒု လီၤ. မ့မ့ၢ်အမိၢ်ပှၢ်န့ၣ်မ့ၢ်ခရံာ်လီၤ. ¹⁸ ပှၤလၢအဆီၣ်လီၤဒၣ်အသး, ဒီးဘါကလူးတဖၣ်, ဒီးပာ်ထီၣ်ထီအသးကလီကလီလၢတၢ်ဖံးတၢ်ညၣ်အသးသတးဒီး, ဂဲၤလိာ်ဝဲလၢတၢ်လၢအထံၣ်တဖၣ်န့ၣ်, မ်သုသုတဒုးဟါမၢ်အီၤ လၢသုဘျုးနီတဂၤတဂ့ၤ. ¹⁹ ဒီးအဝဲဒၣ်တဟံးဃာ်ဘၣ်တၢ်အခိၣ်, လၢနီၢ်ခဲလၢာ်ဒိးန့ၢ်တၢ်မၤစၢၤဒီးတၢ်စၢဃာ်လၢအဆၢဒီးအထူၣ်လၢအီၤသတးဒီး, ဒိၣ်ထီၣ်လၢတၢ်ဒိၣ်ဘၣ်ဃးဒီးယွၤန့ၣ်အပူၤလီၤ.

²⁰ မၤသးဒ်န့ၣ်ဒီးသုမ့ၢ်သံသဒၣ်ဃုာ်ဒီးခရံာ် လၢဟီၣ် ခိၣ်အမိၢ်ပှၢ်ဒီး, ²¹ ဘၣ်မနုၤလၢ, ဒ်ပှၤလၢအမူဝဲလၢဟီၣ်ခိၣ်အသိးန့ၣ်, သုအၢၣ်လီၤအီလီၤတၢ်မၤလိာ်သုလၢ,―

²² ဟံးဃာ်တဂ့ၤ, လ့ၣ်ကွၢ်တဂ့ၤ, ထိးတဂ့ၤ,(တၢ်န့ၣ်တဖၣ်ခဲလၢာ်မ့ၢ်လၢအကဟးဂီၤဝဲလၢပမၤအီၤအဃိ), ဒ်ပှၤကညီအတၢ်မၤလိာ်, ဒီးအတၢ်သိၣ် တၢ်သီအသိးန့ၣ် လဲၣ်. ²³ အဝဲန့ၣ်မ့ၢ်တၢ်အိၣ်ဒီး တၢ်လီၤဂာ်တၢ်ကူၣ်သ့, လၢအဘါတၢ်ဖဲအသးအလိၤ, ဒီးတၢ်ဆီၣ်လီၤအသး, ဒီးတၢ်မၤအၢမၤနးအနီၢ်ခိ, တမ့ၢ်ဘၣ်လၢ တၢ်လၤကပီၤဘၣ်, မ့ၢ်တၢ်မၤလၢထီၣ်ပှဲၤထီၣ် တၢ်ဖံးတၢ်ညၣ်အဂီၢ်လီၤ.

၃

¹ မၤသးဒ်န့ၣ်ဒီးသုမ့ၢ်ဂဲၤဆၢထၢၣ်ဃုာ်ဒီးခရံာ်ဒီး, ဃုန့ၢ်တၢ်အိၣ်လၢထးန့ၣ်ဖဲခရံာ်ဆ့ၣ်နီၤလၢ ယွၤအစုထွဲ န့ၣ်တက့ၢ်. ² သးအိၣ်တၢ်လၢထးန့ၣ်တက့ၢ်. သးအိၣ် တၢ်လၢဟီၣ်ခိၣ်ချၢတဂ့ၤ. ³ အဂ့ၢ်ဒ်အံၤ, သုသံတ့ၢ်, ဒီးသု သးသမူအိၣ်ခူသူၣ်ဒီးခရံာ်လၢယွၤအပူၤလီၤ. ⁴ တုၤခရံာ် လၢအမ့ၢ်ပသးသမူကအိၣ်ဖျါဝဲဒီး, သုကအိၣ်ဖျါဃုာ်စ့ၢ်ကီးဒီးအီၤလၢတၢ်လၤကပီၤအပူၤလီၤ.

⁵ မၤသးဒ်န့ၣ်ဒီး, မၤသံသုဂီၤတဖၣ်လၢဟီၣ်ခိၣ်ချၢ, ဒ်ပ စံးတၢ်အသိး, တၢ်မၤကမၣ်မုၣ်ကမၣ်ခွါ, တၢ်အဲၣ်တလ့ၤအဲၣ်တဘီ, တၢ်သးကတၢ, တၢ်သးကွံတၢ်လၢအအၢ, ဒီးတၢ်သးကွံစုလီၢ်ခီၣ်ခိၣ်လၢအမ့ၢ်တၢ်ဘါတၢ်ဂီၤန့ၣ်တ က့ၢ်. ⁶ လၢတၢ်န့ၣ်တဖၣ်အဃိ, ယွၤအတၢ်သးဒိၣ်ဟဲ ဘၣ်ပှၤတစူၢ်ဘၣ်တၢ်ဘၣ်အလိၤလီၤ. ⁷ လၢအဝဲန့ၣ်အ ပူၤသုလဲၤတ့ၢ်ဖဲသုမူဒံးလၢအပူၤလီၤ. ⁸ မ့မ့ၢ်ခဲကနံၣ်အံၤညိကွံာ်တၢ်အံၤတဖၣ်ခဲလၢာ်, တၢ်သူၣ်ဒိၣ်သးဒိၣ်, တၢ်သူၣ်ထီၣ်သးထီၣ်, တၢ်ဆၢအၢ, တၢ်ဒုၣ်ဒွဲၣ်, တၢ်ကတိၤ မဲာ်ဆှးလၢအဟဲထီၣ်လၢသုထးခိၣ်န့ၣ်တက့ၢ်. ⁹ ကတိၤလိာ်သုသးလၢတၢ်ကတိၤကဘျံးကဘျၣ်တဂ့ၤ. အဂ့ၢ်ဒ်အံၤ, ပှၤလီၢ်လံၤဒီးအတၢ်မၤတဖၣ်န့ၣ်, သုဘ့ၣ်လီၤ ကွံာ်လံ, ¹⁰ ဒီးသုကူထီၣ်သိးထီၣ်က့ၤလံပှၤသီလၢတၢ်မၤက့ၤအီၤအသီဆူတၢ်သ့ၣ်ညါ, ဒ်ပှၤတ့အီၤတဂၤအက့ၢ် အဂီၤအသိးန့ၣ်လံ. ¹¹ ဖဲန့ၣ်ပှၤဟ့းလ့ၣ်ဖိဒီးပှၤယူဒၤဖိတအိၣ်, ပှၤဒိးတၢ်ကူးတရံးဒီးပှၤတဒိးဘၣ်တၢ်ကူးတရံး တအိၣ်, ပှၤပှၢ်လၢ်ကျါဖိ, ပှၤစကူသ့ၤဖိ, ပှၤကုၢ်ဖိ, ပှၤသဘျ့ဖိတအိၣ်ဘၣ်, မ့မ့ၢ်ခရံာ်မ့ၢ်တၢ်ခဲလၢာ်, ဒီးအိၣ်ဝဲလၢတၢ်ခဲလၢာ်အပူၤလီၤ.

¹² မၤသးဒ်န့ၣ်ဒီး, ဒ်ပှၤလၢယွၤဃုထၢအီၤ, ပှၤစီဆှံ, ဒီးပှၤလၢတၢ်အဲၣ်အီၤသ့ၣ်တဖၣ်အသိးန့ၣ်, ကူထီၣ်သိးထီၣ်တၢ်သးကညီၤ, တၢ်မၤဂ့ၤတၢ်, တၢ်ဆီၣ်လီၤသး, တၢ်သး စူၤ, တၢ်ဝံသးစူၤသ့ၣ်တဖၣ်တက့ၢ်. ¹³ ဝံသးစူၤလိာ်သုသး, ဒီးပှၤအတၢ်ကမၣ်မ့ၢ်အိၣ်ဒီး, ပျၢ်လိာ်သုသးတက့ၢ်. ဒ်ခရံာ်ပျၢ်သုတၢ်အသိးန့ၣ်, မၤသုဝဲဒ်န့ၣ်အသိးစ့ၢ်ကီး တက့ၢ်. ¹⁴ တၢ်န့ၣ်တဖၣ်ခဲလၢာ်အဖီခိၣ်, ကူထီၣ်သိးထီၣ်တၢ်အဲၣ်တၢ်ကွံလၢအမ့ၢ်တၢ်လၢတၢ်ပှဲၤအပျံၤစၢဃာ် တၢ်န့ၣ်တက့ၢ်. ¹⁵ မ်ခရံာ်အတၢ်ဃူတၢ်ဖိးပၢတၢ်လၢသုသးကံၢ်ပူၤတက့ၢ်. ဆူအဝဲန့ၣ်အပူၤတၢ်ကိးက့ၤသုလၢနီၢ်တဂၤဃီအပူၤလီၤ. ဒီးကဲထီၣ်ပှၤစံးထီၣ်ပတြၢၤတၢ်အဘျုးအဖှိၣ်တက့ၢ်.

¹⁶ မ်ခရံာ်အကလုၢ်အကထါအိၣ်ဝဲဆိးဝဲလၢသုပူၤထူးထူးတီၤတီၤ, လၢတၢ်ကူၣ်သ့ကူၣ်ဘၣ်ခဲလၢာ်အပူၤ, ဒီးသိၣ်လိလိာ်သုသးဒီးသဆၣ်ထီၣ်လိာ်သုခံလၢထါစံးထီၣ်ပတြၢၤ, ဒီးတၢ်သးဝံၣ်, ဒီးအုၣ်တၢ်ဘၣ်ဃးဒီးသးန့ၣ်, ဒီးသးဝံၣ်ထီၣ်ယွၤ, အိၣ်ဒီးတၢ်ဘျုးတၢ်ဖှိၣ်လၢသု သးကံၢ်ပူၤတက့ၢ်. ¹⁷ ကယဲၢ်သုမၤတၢ်န့ၣ်, လၢတၢ်ကတိၤမ့ၢ်ဂ့ၤ, လၢတၢ်မၤမ့ၢ်ဂ့ၤ, မၤတၢ်ခဲလၢာ်လၢကစၢ်ယ့ၣ်ရှူးအမံၤ, ဒီးစံးထီၣ်ပတြၢၤပၢ်ယွၤလၢအဝဲဒၣ်အဃိတက့ၢ်.

¹⁸ ပိာ်မုၣ်သ့ၣ်ဧၢ, ပာ်သုသးလၢသုဝၤအဖီလာ်, ဒ်အဂ့ၤအဘၣ်လၢကစၢ်အပူၤတက့ၢ်.

¹⁹ ပိာ်ခွါသ့ၣ်ဧၢ, အဲၣ်သုမါတက့ၢ်. ဒီးသုတပာ်ဒူသုသးလၢအလိၤတဂ့ၤ.

²⁰ ဖိသၣ်သ့ၣ်ဧၢ, စူၢ်သုမိၢ်သုပၢ်လၢတၢ်ကိးမံၤဒဲးအပူၤတက့ၢ်. အဂ့ၢ်ဒ်အံၤ, တၢ်န့ၣ်ဘၣ်ကစၢ်အသးလီၤ.

²¹ ပၢ်သ့ၣ်ဧၢ, ဒ်သိးသုဖိသုလံၤအသးသုတဟးဂီၤတဂ့ၤဒီး, သုတမၤဒိၣ်ထီၣ်အသးတဂ့ၤ.

²² ကုၢ်သ့ၣ်ဧၢ, စူၢ်သုကစၢ်ဘၣ်ဃးဒီးပဖံးပညၣ်လၢတၢ်ကိးမံၤဒဲးအပူၤတက့ၢ်. ထဲပှၤကညီအမဲာ်ညါလၢတၢ်မၤဘၣ်ပှၤကညီအသးတမ့ၢ်ဘၣ်, မ့မ့ၢ်ပျံၤယွၤ, ဒီးစူၢ်လၢ သူၣ်ကံၢ်သးလဲတက့ၢ်. ²³ ဒီးကယဲၢ်သုမၤတၢ်တမံၤလၢ်လၢ်, မၤလၢသူၣ်ကံၢ်သးလဲ, ဒ်လၢကစၢ်အသိး, ဒီးတမ့ၢ် ဘၣ်ဒ်လၢပှၤကညီအသိးဘၣ်တက့ၢ်. ²⁴ အဂ့ၢ်ဒ်အံၤ, သုသ့ၣ်ညါလၢသုကဒိးန့ၢ်ဘၣ်လၢကစၢ်အစုပူၤ, တၢ်ဟ့ၣ်ဘၣ်ဃးဒီးတၢ်န့ၢ်သါလီၤ. အဂ့ၢ်ဒ်အံၤ, သုမၤကစၢ်ခရံာ်အတၢ်လီၤ.―အဂ့ၢ်ဒ်အံၤ, ပှၤလၢအမၤတၢ်တတီတလိၤဘၣ်န့ၣ်, ကဘၣ်တၢ်လၢအမၤတတီတလိၤဘၣ်အဃိ, ဒီးတၢ်ကွၢ်မဲာ်တအိၣ်ဘၣ်ဝဲဘၣ်.

၄

¹ ကစၢ်သ့ၣ်ဧၢ, ဟ့ၣ်တၢ်လၢသုကုၢ်န့ၣ်တီတီလိၤလိၤ, ဒီးဂ့ၤဂ့ၤဘၣ်ဘၣ်တက့ၢ်. အဂ့ၢ်ဒ်အံၤ, သုသ့ၣ်ညါလၢသုကစၢ်အိၣ်စ့ၢ်ကီးလၢမူခိၣ်လီၤ.

² မၤတၢ်ဘါထုကဖၣ်သပှၢ်ပှၢ်, ဒီးဆိးသီလၢအပူၤအိၣ် ဒီးတၢ်စံးထီၣ်ပတြၢၤတၢ်အဘျုးအဖှိၣ်တက့ၢ်. ³ ဘါထုကဖၣ်စ့ၢ်ကီးတဘျီဃီလၢပဂီၢ်, ဒ်သိးယွၤကအိးထီၣ်အကလုၢ်အကထါအတြဲၤလၢပဂီၢ်ဒ်သိးပကစံၣ်တဲၤတဲ လီၤခရံာ်အတၢ်ခူသူၣ်လၢပဘၣ်တၢ်စၢဃာ်လၢအဃိ,―

⁴ ဒ်သိးယကမၤဖျါထီၣ်အဝဲန့ၣ်ဒ်ယဂ့ၤကတိၤတၢ်အသိးန့ၣ်တက့ၢ်.

⁵ လဲၤတၢ်လၢတၢ်ကူၣ်သ့လၢပှၤအိၣ်လၢခိအမဲာ်ညါ, ဒီးပှ့ၤက့ၤတၢ်အဆၢအကတီၢ်တက့ၢ်. ⁶ သုဂ့ၤစံးဆၢပှၤတဂၤလၢ်လၢ်ဒ်လဲၣ်ဒ်လဲၣ်, ဒ်သိးသုကသ့ၣ်ညါဒီး, မ်သုကလုၢ်ကထါအိၣ်ဒီးတၢ်ဘျုးတၢ်ဖှိၣ်ဒီး ဟီဒီးအံသၣ်, တဘိယူၢ်ဃီတက့ၢ်.

⁷ ပဒီပုၢ်ဝဲၢ်လၢအဘၣ်တၢ်အဲၣ်အီၤ, ဒီးမ့ၢ်တၢ်အခ့အပှၤလၢအကလုၢ်တီ, ဒီးကုၢ်သကိးကုၢ်ဒီးပှၤလၢကစၢ်အပူၤ, စီၤတူဃံၤကူးန့ၣ်, ကဘိးဘၣ်သ့ၣ်ညါသုလၢတၢ် ဘၣ်ဃးဒီးယၤခဲလၢာ်လီၤ. ⁸ အဝဲတဂၤန့ၣ်, ဒီးပှၤဘၣ်ဃးဒီးသု, ပဒီပုၢ်ဝဲၢ်လၢအကလုၢ်တီလၢတၢ်အဲၣ်အီၤ,―

⁹ စီၤအီးန့ၤစံမူးန့ၣ်, ယမၢအလဲၤဆူသုအိၣ်, လၢတၢ်အံၤတမံၤအဂီၢ်ဒ်သိးသုကသ့ၣ်ညါတၢ်ဘၣ်ဃးဒီးပှၤ, ဒီးအဝဲဒၣ်မၤမုာ်ထီၣ်သုသးလီၤ. ဒီးအဝဲသ့ၣ်ကဘိးဘၣ်သ့ၣ်ညါသုလၢတၢ်ဖဲအံၤခဲလၢာ်လီၤ.

¹⁰ ပှၤလၢအဘၣ်စၢဃာ်ဒီးယၤ, စီၤအရံးစတၢ်ဃူးကတိၤဒိၣ်သု, ဒီးစီၤဘၢ်နါဘၤအတခွါစီၤမၢ်ကူးလၢသုဒိးတၢ်မၤလိာ်လၢအဂ့ၢ်, မ့ၢ်လဲၤတုၤလၢသုအိၣ်ဒီး, တူၢ် လိာ်အီၤတက့ၢ်. ¹¹ ဒီးစီၤယ့ၣ်ရှူးကိးက့ၤဝဲလၢစီၤယူစတူးအဝဲသ့ၣ်တဖၣ်န့ၣ်မ့ၢ်ပှၤဒိးတၢ်ကူးတရံးဖိလီၤ. ဒီးထဲအဝဲသ့ၣ်ဧိၤမ့ၢ်ပှၤလၢအမၤဃုာ်တၢ်ဒီးယၤလၢယွၤအဘီအမုၢ်အဂီၢ်, ဒီးမ့ၢ်ပှၤလၢအမၤမုာ်ယသးလီၤ.

¹² ပှၤဘၣ်ဃးဒီးသုယ့ၣ်ရှူးခရံာ်အကုၢ်အပှၤ, စီၤအ့းပၤဖြါကတိၤဒိၣ်သု, ဒီးဂုာ်ဘါထုကဖၣ်သပှၢ်ပှၢ်လၢသုဂီၢ် တဘိယူၢ်ဃီ, ဒ်သိးသုကဆၢထၢၣ်အိၣ်လၢထီၣ်ပှဲၤထီၣ်ဒီးအိၣ်ဒီးသုစူၢ်ဂၢၢ်နာ်ကျၢၤလၢယွၤအတၢ်ဘၣ်အသးခဲ လၢာ်အပူၤလီၤ. ¹³ အဂ့ၢ်ဒ်အံၤ, ယအုၣ်ယသးလၢအဂီၢ်လၢအသးဂဲၤလိာ်ဝဲဒိၣ်မးလၢသုဂီၢ်, ဒီးလၢပှၤအိၣ်လၢလီၤဒံၤကံအဂီၢ်, ဒီးလၢပှၤအိၣ်လၢ ဟံၣ်ရိးပလံအဂီၢ်လီၤ.

¹⁴ ကသံၣ်သရၣ်လၢတၢ်အဲၣ်အီၤစီၤလူၤကၣ်, ဒီးစီၤဒ့မၤကတိၤဒိၣ်သုလီၤ.

¹⁵ ကတိၤဒိၣ်ပဒီပုၢ်ဝဲၢ်အိၣ်လၢလီၤဒံၤကံ, ဒီးစီၤနူၣ်ဖၤ, ဒီး တၢ်အိၣ်ဖှိၣ်လၢအဟံၣ်န့ၣ်တက့ၢ်. ¹⁶ ဒီးတုၤသုဖးလံာ်အံၤဝံၤဒီး, မၤဒ်သိးပှၤလီၤဒံၤကံအတၢ်အိၣ်ဖှိၣ်ကဖးဝဲစ့ၢ်ကီးတက့ၢ်. ဒီးလံာ်ဟဲလၢလီၤဒံၤကံန့ၣ်, ဖးစ့ၢ်ကီးသုဝဲ တက့ၢ်. ¹⁷ ဒီးစံးဘၣ်စီၤအၢ်ဃံးပူး, တၢ်မၤလၢနဒိးန့ၢ်လၢကစၢ်အပူၤန့ၣ်ပလီၢ်နသးလၢ နကမၤတုၤအလၢာ်တက့ၢ်.

¹⁸ ယၤ, စီၤပီလူးအတၢ်ကတိၤဒိၣ်လၢယစုဒၣ်ယဲလီၤ. သ့ၣ်နီၣ်ထီၣ်က့ၤယတၢ်စၢဃာ်တက့ၢ်. တၢ်အဘျုးအဖှိၣ်မ်အအိၣ်ဒီးသုတက့ၢ်.