လံာ်စီၤၡမူၤအ့လးခံဘ့ၣ်တဘ့ၣ်.
1၁
1 ဒီးလၢစီၤစီလူးသံအလီၢ်ခံန့ၣ် တၢ်မၤအသးလၢစီၤ ဒၤဝံးဟဲက့ၤကဒါက့ၤလၢ အမၤသံပှၤဧမၤလ့းဖိ, ဒီးစီၤ ဒၤဝံးအိၣ်တ့ၢ်ဝဲလၢစံကလးခံနံၤ, 2 ဒီးသၢနံၤတနံၤန့ၣ်, ကွၢ်ကွၢ်, တၢ်မၤအသးလၢ ပှၤတဂၤဟဲလၢစီၤစီလူးအ ပှၤသုးမုၢ်အကျါအိၣ်ဒီးအဆ့ယာ်ကွံာ်, ဒီးဟီၣ်ခိၣ်အ ကမူၣ်လၢအခိၣ်, ဒီးဟဲဝဲဆူစီၤဒၤဝံးအအိၣ်, ဒီးတၢ်မၤ အသးလၢအထိၣ်လီၤပှီၤအသးလၢဟီၣ်ခိၣ်, ဒီးတီၤလီၤ ဝဲလီၤ.
3 ဒီးစီၤဒၤဝံးစံးဘၣ်အီၤ, နဟဲလၢလဲၣ်, ဒီးစံးဘၣ်အီၤ, ယပူၤဖျဲးလၢအံၣ်စရ့လးအပှၤသုးမုၢ်အကျါလီၤ.
4 ဒီးစီၤဒၤဝံးစံးဘၣ်အီၤ, တၢ်မၤအသးဒ်လဲၣ်. စံးဘၣ် လၢ်ယၤတက့ၢ်. ဒီးစံးဆၢဝဲဒၣ်, ပှၤဂီၢ်မုၢ်ဃ့ၢ်လံလၢတၢ် ဒုးသုးအပူၤ, ဒီးပှၤဂီၢ်မုၢ်အါဂၤလီၤဃံၤလံစ့ၢ်ကီး, ဒီးသံ လံ, ဒီးစီၤစီလူးဒီးအဖိခွါစီၤယိနၤသၣ်သံစ့ၢ်ကီးလံ.
5 ဒီးစီၤဒၤဝံးစံးဘၣ်ပှၤဖိၣ်သၣ်ခွါလၢ အစံးဘၣ်အီၤန့ၣ်, စီၤစီလူးဒီးအဖိခွါစီၤယိနၤသၣ်သံတ့ၢ်လံန့ၣ်နသ့ၣ်ညါ ဒ်လဲၣ်.
6 ဒီးပှၤဖိၣ်သၣ်ခွါလၢအစံးဘၣ်အီၤ. စံးဝဲဒၣ်, ဘၣ်လၢ ယအိၣ်လၢကစၢၢ်ကံးလဘိ, ဒီးကွၢ်ကွၢ်, စီၤစီလူးတ န့ၤအသးလၢအဘီလီၤ. ဒီးကွၢ်ကွၢ်, လ့ၣ်ကဟၣ်, ဒီး ကသ့ၣ်သုးတဖၣ်လူၤသပှၢ်အီၤလီၤ. 7 ဒီးတုၤအကွၢ် တၢ်ဆူအလီၢ်ခံဒီး, ထံၣ်ဘၣ်ယၤ, ဒီးကိးန့ၢ်ယၤ, ဒီးယ စံးဆၢတၢ်, ကွၢ်ကွၢ်, ယၤလီၤ. 8 ဒီးစံးဘၣ်ယၤ, နမ့ၢ်မ တၤတဂၤလဲၣ်. ဒီးယစံးဆၢအီၤ, ယမ့ၢ်ပှၤဧမၤလ့းဖိတ ဂၤလီၤ. 9 ဒီးစံးဘၣ်ကဒီးယၤ, ဆၢထၢၣ်လၢ်လၢယ လိၤ, ဒီးမၤသံယၤတက့ၢ်. အဂ့ၢ်ဒ်အံၤ, တၢ်ကိၢ်တၢ်ဂီၤ ဘၣ်ယၤနးမးလီၤ. အဂ့ၢ်ဒ်အံၤ, ယသးဒီဖျၢၣ်အိၣ်ဒံး လၢယပူၤလီၤ.
10 ဒီးယဆၢထၢၣ်လၢအလိၤ, ဒီးယမၤသံအီၤလီၤ. အ ဂ့ၢ်ဒ်အံၤ, ယသ့ၣ်ညါသပှၢ်တၢၢ်လၢအမူဒံးလၢအလီၤ ဃံၤအလီၢ်ခံန့ၣ်တသ့ဘၣ်. ဒီးယဟံးန့ၢ်အခိၣ်သလုး လၢအအိၣ်ဝဲလၢအခိၣ်, ဒီးထံဖှံၣ်အိၣ်လၢအစုလိၤ, ဒီး ယဟဲစိာ်အီၤဆူယကစၢ်ဖဲအံၤလီၤ.
11 ဒီးစီၤဒၤဝံးစှီၤအကူအသိး, ဒီးဖှီဝဲ, ဒီးပှၤကညီအိၣ်ဒီး အီၤခဲလၢာ်မၤဝဲဒ်န့ၣ်အသိးလီၤ. 12 ဒီးဒဲလီၤအသးနါပှၢ်, ဒီးဟီၣ်ဝဲ, ဒီးဒုၣ်တၢ်အီၣ်တုၤလီၤလၢမုၢ်ဟါလၢ စီၤစီ လူးအဃိ, ဒီးလၢစီၤယိနၤသၣ်အဃိ, ဒီးလၢယွၤအပှၤ ဂီၢ်မုၢ်အဃိ, ဒီးလၢအံၣ်စရ့လးအပှၤဟံၣ်ဖိအဃိလီၤ. အဂ့ၢ်ဒ်အံၤ, လီၤဃံၤဝဲလၢနးလီၤ.
13 ဒီးစီၤဒၤဝံးစံးဘၣ်ပှၤဖိၣ်သၣ်ခွါလၢအစံးဘၣ်အီၤ, န အိၣ်လၢလဲၣ်. ဒီးစံးဆၢဝဲဒၣ်, ယမ့ၢ်ပှၤတခီဘီမုၢ်ဖိ အဖိခွါ, ပှၤဧမၤလ့းဖိလီၤ.
14 ဒီးစီၤဒၤဝံးစံးဘၣ်အီၤ, နယူာ်ထီၣ်နစုဒ်သိးနကမၤ ဟးဂီၤယွၤအပှၤဒိးဖှူအသးန့ၣ်နတပျံၤဘၣ်ဧါ.
15 ဒီးစီၤဒၤဝံးကိးန့ၢ်ပှၤလၢ ပှၤဖိၣ်သၣ်ခွါတဖၣ်အကျါ, ဒီးစံးဘၣ်အီၤ, သုးဘူးနသး, ကျီကွံာ်အီၤတက့ၢ်. ဒီး ကျီကွံာ်ဝဲတုၤအသံလီၤ.
16 ဒီးစီၤဒၤဝံးစံးဘၣ်အီၤ, နသွံၣ်အိၣ်လၢနခိၣ်ဒၣ်နဲလီၤ. အဂ့ၢ်ဒ်အံၤ, နထးခိၣ်အုၣ်အသးထီဒါနၤ, ဒီးစံးဝဲ, ယ မၤသံကွံာ်လံယွၤအပှၤဒိးဖှူအသးလံ.
17 ဒီးစီၤဒၤဝံးမၤထါ ဟီၣ်တၢ်လၢထါအံၤ, လၢစီၤစီလူး ဒီးစီၤယိၤနၤသၣ်အဃိလီၤ.
18 (ဒီးမၤလိာ်တၢ်သိၣ်လိပှၤအံၣ်စရ့လးဖိ လၢချံၣ်လီၤ. ကွၢ်ကွၢ်, တၢ်ကွဲးအသးလၢလံာ်ယၤၡၣ်အပူၤလီၤ.)
19 အံၣ်စရ့လးဧၢ, နလၤနကပီၤသံလၢနလီၢ်ထီၣ်ထီ တဖၣ်န့ၣ်, ပှၤအဆူၣ်လီၤဃံၤဝဲဒ်လဲၣ်.
20 ဒုးနဲၣ်တၢ်လၢကၤသးအပူၤတဂ့ၤ, စံၣ်တဲၤတဲလီၤတၢ်လၢအၤၡကလိၣ်အကျဲပူၤတဂ့ၤ. ပှၤဖလ့ၡသးဖိအဖိမုၣ်တဖၣ်အသးကခုဘၣ်ဖုး, ပှၤတဒိးဘၣ်တၢ်ကူးတရံးအဖိမုၣ်ကသူၣ်ဖှံသးညီ.
21 ကံးလဘိအကစၢၢ်သ့ၣ်ဧၢ, ပစီၤထံမ့ၢ်ဂ့ၤ တၢ်စူၤမ့ၢ်ဂ့ၤ, ဟီၣ်ခိၣ်အကဝီၤအိၣ်ဒီး တၢ်မၤဘူၣ်မ့ၢ်ဂ့ၤ, မ်အသုတအိၣ်လၢသုလိၤတဂ့ၤ, မ့ၢ်တၢ်ကွံာ်တ့ၢ်ဖဲန့ၣ် ပှၤအဆူၣ်အကတီၤတဘ့ၣ် အ ဂ့ၢ်, စီၤစီလူးအကတီၤ, ပှၤဒိးဖှူအသးလၢ သိအသဃိး လီၤ.
22 လၢပှၤဘၣ်တၢ်မၤသံအီၤအသွံၣ်, လၢပှၤအဆူၣ်အသိန့ၣ်, စီၤယိနၤသၣ်အချံၣ်တဃၣ်ကဒါအသးဘၣ်, ဒီးစီၤစီလူးအနးတဟဲက့ၤကလီဘၣ်.
23 စီၤစီလူးဒီးစီၤယိနၤသၣ်, မ့ၢ်ပှၤလၢတၢ်အဲၣ်အီၤ, ဒီးပှၤကွၢ်အီၤမုၣ်လၢအမူဒံး, ဒီးလၢအသံန့ၣ်တလီၤဖှၣ်ဘၣ်. ဃ့ၢ်တၢ်ချ့န့ၢ်လံာ်ဧိၤတြၤဧိၤတက့ၢ်, အဂံၢ်အဘါဆူၣ်န့ၢ်ခံယုၢ်တက့ၢ်လီၤ.
24 အံၣ်စရ့လးအဖိမုၣ်သ့ၣ်ဧၢ, ဟီၣ်လၢစီၤစီလူးအဃိ, ပှၤလၢအဒုးသိးသုဒီးတၢ်ဂီၤဒီးတၢ်ကယၢကယဲ, ပှၤလၢအဒုးကယၢကယဲသုကူသုသိးလၢ ထူဧိၤလွဲ ဧိၤ.
25 ပှၤအဆူၣ်လီၤဃံၤလၢ တၢ်ဒုးသုးအကျါန့ၣ်ဒ်လဲၣ်. စီၤယိနၤသၣ်ဧၢ, နဘၣ်တၢ်မၤသံနၤလၢနလီၢ်ထီၣ်ထီ,
26 တၢ်ဖှီၣ်ဘၣ်ယၤလၢနဃိ, ယဒီပုၢ်ဝဲၢ်စီၤယိနၤသၣ်ဧၢ, နမ့ၢ်တၢ်မုာ်လၢယဂီၢ်မုာ်မုာ်ကလဲာ်, နအဲၣ်ယၤအံၤလီၤလးမးလီၤ, ဒိၣ်န့ၢ်ပိာ်မုၣ်အတၢ်အဲၣ်တက့ၢ်လီၤ.
27 ပှၤအဆူၣ်လီၤဃံၤဒ်လဲၣ်. ဒီးတၢ်ဒုးသုးအစုကဝဲၤန့ၣ်ဟးဂီၤဒ်လဲၣ်.
2၂
1 ဒီးတၢ်တဖၣ်န့ၣ်အလီၢ်ခံ တၢ်မၤအသးလၢစီၤဒၤဝံး သံကွၢ်တၢ်လၢယွၤ, ဒီးစံးဝဲဒၣ်, ယဘၣ်လဲၤထီၣ်ဆူယူ ဒၤအဝ့ၢ်တဖျၢၣ်ဖျၢၣ်ဧါ. ဒီးယွၤစံးဘၣ်အီၤ, လဲၤထီၣ် တက့ၢ်. ဒီးစီၤဒၤဝံးစံးဝဲဒၣ်, ယဘၣ်လဲၤဆူလဲၣ်. ဒီးစံး ဝဲဒၣ်, ဆူဃ့ဘြိၣ်လီၤ.
2 ဒီးစီၤဒၤဝံးလဲၤထီၣ်ဖဲန့ၣ်, ဒီးအမါခံဂၤစ့ၢ်ကီး, ပှၤယံး စရ့လးဖိနီၢ်အဃံနိၣ်, ဒီးပှၤကၢ်မ့ၤလးဖိစီၤနၤဘလး အမါနီၢ်အဘံၤကါယံးလးလီၤ.
3 ဒီးစီၤဒၤဝံးစိာ်ထီၣ်ပှၤအိၣ်ဒီးအီၤ, တဂၤဒီးအပှၤဟံၣ် ဖိ, တဂၤဒီးအပှၤဟံၣ်ဖိစုာ်စုာ်, ဒီးအိၣ်ဝဲဆိးဝဲလၢဃ့ ဘြိၣ်အဝ့ၢ်တဖၣ်အပူၤလီၤ.
4 ဒီးယူဒၤအပှၤကညီဟဲဝဲ, ဒီးဖှူစီၤဒၤဝံးစီၤပၤလၢယူ ဒၤအပှၤဟံၣ်ဖိအဖီခိၣ်ဖဲန့ၣ်လီၤ. ဒီးပှၤစံးဘၣ်စီၤဒၤဝံး လၢပှၤယၤဘ့ၣ်ကံးလးဧးဖိခူၣ်လီၤကွံာ်စီၤစီလူးလီၤ.
5 ဒီးစီၤဒၤဝံးမၢကလူးတဖၣ် လဲၤဆူယၤဘ့ၣ်ကံးလဧး, ဒီးစံးဘၣ်အီၤ, မ်သုဘၣ်တၢ်ဆိၣ်ဂ့ၤလၢယွၤတက့ၢ်. အ ဂ့ၢ်ဒ်အံၤ, သုမၤဘျုးမၤဖှိၣ်သုကစၢ်စီၤစီလူး, ဒီးခူၣ်လီၤ ကွံာ်အီၤလီၤ. 6 ဒီးခဲကနံၣ်အံၤ မ်ယွၤမၤသုလၢတၢ် ဘျုးတၢ်ဖှိၣ်, ဒီးတၢ်မ့ၢ်တၢ်တီန့ၣ်တက့ၢ်. ဒီးယဲဒၣ် အံၤယကမၤစ့ၢ်ကီးသုလၢတၢ်ဂ့ၤ လၢတၢ်ဘျုးတၢ်ဖှိၣ် အံၤအဃိလီၤ. မ့ၢ်လၢသုမၤတၢ်န့ၣ်တမံၤအဂ့ၢ်လီၤ.―
7 ဒီးခဲကနံၣ်အံၤ မ်သုစုဆူၣ်ထီၣ်, ဒီးသုသးအိၣ်ခူတ လ့ၢ်တက့ၢ်. အဂ့ၢ်ဒ်အံၤ, သုကစၢ်စီၤစီလူးသံလံ. ဒီးယူ ဒၤအပှၤဟံၣ်ဖိဖှူယၤလၢစီၤပၤလၢအဖီခိၣ်လံလီၤ.
8 ဒီးစီၤစီလူးအပှၤသုးမုၢ်အခိၣ်စီၤန့ၢ် အဖိခွါစီၤအဘံ န့ၢ်ဟံးန့ၢ်စီၤစီလူးအဖိခွါစီၤအံၤၡဘိရှ့း, ဒီးဟဲစိာ်အီၤ ဆူမၤဃန့ၤန့ၣ်လီၤ. 9 ဒီးပာ်အီၤလၢစီၤပၤလၢကံးလ ဧးအဖီခိၣ်, ဒီးလၢပှၤအၤရှူၢ်ဖိအဖီခိၣ်, ဒီးလၢဘံၣ်ယၤ မံၣ်အဖီခိၣ်, ဒီးလၢအံၣ်စရ့လးခဲလၢာ်အဖီခိၣ်လီၤ.
10 ဒီးစီၤစီလူးအဖိခွါ စီၤအံၤၡဘိရှ့းလၢအကဲသီအံၣ်စ ရ့လးအစီၤပၤန့ၣ် အသးပှၢ်အနံၣ်လွံၢ်ဆံ, ဒီးကဲစီၤပၤ ခံနံၣ်လီၤ. မ့မ့ၢ်ယူဒၤအပှၤဟံၣ်ဖိပိာ်စီၤဒၤဝံးအခံလီၤ.
11 ဒီးမုၢ်နံၤအတၢ်ဂံၢ်လၢစီၤဒၤဝံးကဲစီၤပၤလၢဃ့ဘြိၣ်အ ပူၤလၢ ယူဒၤအပှၤဟံၣ်ဖိအဖီခိၣ်န့ၣ် မ့ၢ်နွံနံၣ်ဒီးဃု လါလီၤ.
12 ဒီးစီၤန့ၢ်အဖိခွါစီၤအဘံန့ၢ်, ဒီးစီၤစီလူးအဖိခွါစီၤအံၤ ၡဘိရှ့းအခ့အပှၤလဲၤထီၣ်လၢ မၤဃန့ၤန့ၣ်ဆူကံးဘိၣ် လီၤ.
13 ဒီးနီၢ်စရူယၤအဖိခွါစီၤယိၤအာ်, ဒီးစီၤဒၤဝံးအခ့အ ပှၤတဖၣ်လဲၤထီၣ်, ဒီးဘၣ်သဃိာ်လိာ်အသးလၢနိၣ် ကံးဘိၣ်အဃၢၤ, ဒီးဆ့ၣ်နီၤ, ပှၤတဖုလၢနိၣ်တခီဒီး ပှၤတဖုလၢနိၣ်တခီဒၣ်လီၤ.
14 ဒီးစီၤအဘံန့ၢ်စံးဘၣ်စီၤယိၤအာ်, မ်ပှၤဖိၣ်သၣ်ခွါဂဲၤ ဆၢထၢၣ်, ဒီးလိာ်ကွဲတၢ်လၢပမဲာ်ညါတက့ၢ်. ဒီးစီၤ ယိၤအာ်စံးဝဲဒၣ်, ကဂဲၤဆၢထၢၣ်ဒၣ်ဝဲတက့ၢ်.
15 ဒီးဂဲၤဆၢထၢၣ်ဒီးခီဂာ်ဝဲဒ်တၢ်ဂံၢ်အသိး, ပှၤဘံၣ်ယၤ မံၣ်ဖိလၢအဘၣ်ဃးဒီးစီၤစီလူးအဖိခွါ စီၤအံၤၡဘိရှ့း တဆံခံဂၤ, ဒီးစီၤဒၤဝံးအခ့အပှၤတဆံခံဂၤလီၤ.
16 ဒီးတဂၤဖီၣ်ဃာ် ပှၤလၢအဃၢၤတဂၤအခိၣ်စုာ်စုာ်, ဒီးဆဲးပှၤလၢအဃၢၤလၢအကပၤပူၤ, ဒီးလီၤဃံၤဝဲတ ပူၤဃီလီၤ. ဒီးတၢ်အလီၢ်န့ၣ်ပှၤကိးဝဲလၢ ဃ့လကး ဟစူရံၣ်လၢအအိၣ်ဝဲလၢကံးဘိၣ်အပူၤလီၤ.
17 ဒီးတၢ်ဒုးသုးဆူၣ်ဆူၣ်ကလဲာ်လၢမုၢ်တနံၤန့ၣ်, ဒီးစီၤ အဘံန့ၢ်, ဒီးအံၣ်စရ့လးအပှၤကညီဃၣ်ဝဲလၢစီၤဒၤဝံး အခ့အပှၤအမဲာ်ညါလီၤ.
18 ဒီးနီၢ်စရူယၤအဖိခွါစီၤယိၤအာ်, ဒီးစီၤအဘံၡဲၤ, ဒီးစီၤ ဧစၤအ့လးသၢဂၤအိၣ်ဝဲဖဲန့ၣ်လီၤ. ဒီးစီၤဧစၤအ့လးန့ၣ် မ့ၢ်ပှၤလၢအခီၣ်ချ့ ဒ်တၤဟိအခီၣ်အသိးန့ၣ်လီၤ.
19 ဒီးစီၤဧစၤအ့လးန့ၣ် လူၤစီၤအဘံန့ၢ်, ဒီးလဲၤတၢ်န့ၣ် ဆူစုထွဲဂ့ၤ, ဆူစုစ့ၣ်ဂ့ၤ, တဃၣ်ဘၣ်အသးဘၣ်, ဒီးလူၤ စီၤအဘံန့ၢ်လီၤ.
20 ဒီးစီၤအဘံန့ၢ် ကွၢ်တၢ်လၢအလီၢ်ခံဒီးစံးဝဲဒၣ်, နမ့ၢ် စီၤဧစၤအ့လးန့ၣ်ဧါ. ဒီးစံးဆၢဝဲဒၣ်, ယၤလီၤ.
21 ဒီးစီၤအဘံန့ၢ်စံးဘၣ်အီၤ, ဆူနစုထွဲမ့ၢ်ဂ့ၤ, ဆူနစုစ့ၣ် မ့ၢ်ဂ့ၤ, ဃၣ်နသး, ဒီးဖီၣ်န့ၢ်ပှၤဖိၣ်သၣ်ခွါတဂၤဂၤ, ဒီး ဂုာ်န့ၢ်အတၢ်တက့ၢ်. ဘၣ်ဆၣ်ဒီးစီၤဧစၤအ့လးတဃၣ် ဘၣ်အသးလၢအပိာ်အခံဘၣ်.
22 ဒီးစီၤအဘံန့ၢ်စံးကဒီးစီၤဧစၤအ့လးန့ၣ်, ဃၣ်ကွံာ်နသးလၢနပိာ်ယခံတက့ၢ်. ယဘၣ်ကျီလီၤဃံၤနၤဆူ ဟီၣ်ခိၣ်န့ၣ် မ့ၢ်အဘၣ်မနုၤလဲၣ်. မ့မ့ၢ်ဒ်န့ၣ်ဒီး ယက ကျ့ထီၣ်ယမဲာ်လၢ နဒီပုၢ်ဝဲၢ်စီၤယိၤအာ် အမဲာ်ညါ ဒ်လဲၣ်.
23 ဒီးဃၣ်အသးန့ၣ်ဂ့ၢ်လိာ်ဝဲ, ဒီးစီၤအဘံန့ၢ်ဆဲးအီၤ လၢဘီဃၣ်ကဒါအသး အကနၣ်လၢအဟၢဖၢပူၤ, ဒီး ဘီဖျိထီၣ်လၢအချၢဃံ, ဒီးလီၤဃံၤဝဲဖဲန့ၣ်, ဒီးသံဝဲတ ပူၤဃီလီၤ. ဒီးဖဲဒၣ်ပှၤလၢအဟဲဆူအလီၢ်ဖဲစီၤဧစၤအ့ လးလီၤဃံၤဒီးသံန့ၣ်, တၢ်မၤအသးလၢအအိၣ်ကတီၢ် ဝဲလီၤ.
24 ဒီးစီၤယိၤအာ်, ဒီးစီၤအဘံၡဲၤလူၤစီၤအဘံန့ၢ်, ဒီးတုၤ အတုၤလၢတၢ်စိခိၣ်အးမၤလၢ အအိၣ်ဝဲလၢကံၤဃး အမဲာ်ညါ လၢပှၢ်မုၢ်ကနၢကံးဘိၣ်အကျဲအပူၤ ဒီးမုၢ် လီၤနုာ်ဝဲလီၤ.
25 ဒီးပှၤဘံၣ်ယၤမံၣ်ဖိအိၣ်ဖှိၣ်ရိဖှိၣ် လၢစီၤအဘံန့ၢ်အ လီၢ်ခံ, ဒီးကဲထီၣ်ပှၤတဖု, ဒီးဆၢထၢၣ်လၢတၢ်စိခိၣ် အဒီခိၣ်လီၤ.
26 ဒီးစီၤအဘံန့ၢ်ကိးထီၣ်ဆူစီၤယိၤအာ်ဒီးစံးဝဲဒၣ်, နး ဧိၤဘီဧိၤကအီၣ်တၢ်တထံၣ်ဃီစ့ၢ်ကီးဧါ. ကကဲထီၣ် တၢ်ကိၢ်တၢ်ဂီၤလၢခံကတၢၢ်န့ၣ် နတသ့ၣ်ညါဘၣ်ဧါ. နကမၤလိာ်ပှၤဂီၢ်မုၢ်ဒ်သိး အကဟဲက့ၤကဒါက့ၤလၢ အလူၤအဒီပုၢ်ဝဲၢ်န့ၣ်ဆံးယံာ်လဲၣ်.
27 ဒီးစီၤယိၤအာ်စံးဝဲဒၣ်, ဒ်ယွၤမူဝဲအသိးန့ၣ်. နမ့ၢ်တ ကတိၤဘၣ်တၢ်ဘၣ်ဒီး, လၢမုၢ်ဂီၤလံၤလံၤန့ၣ်ပှၤဂီၢ်မုၢ် ကက့ၤတ့ၢ်လၢအလူၤအဒီပုၢ်ဝဲၢ်ကိးဂၤဒဲးလီၤ.
28 ဒီးစီၤယိၤအာ်အူကွဲၤ, ဒီးပှၤဂီၢ်မုၣ်အိၣ်ကတီၢ်, ဒီးတ လူၤလၢၤဘၣ်အံၣ်စရ့လးဘၣ်, ဒီးတဒုးသုးလၢၤဘၣ်.
29 ဒီးစီၤအဘံန့ၢ်, ဒီးအပှၤကညီလဲၤတၢ်သီတနၤကျၢၤန့ၣ်လၢတၢ်ပျီပူၤ, ဒီးခီဂာ်ယၢ်ဒ့ၢ်, ဒီးလဲၤခီဂာ်ဘံၤသြိၣ်, ဒီးလဲၤတုၤလၢမၤဃန့ၤန့ၣ်လီၤ.
30 ဒီးစီၤယိၤအာ်ဟဲက့ၤကဒါက့ၤလၢ အလူၤစီၤအဘံ န့ၢ်, ဒီးတုၤအဒုးအိၣ်ဖှိၣ်ပှၤဂီၢ်မုၢ်ခဲလၢာ်ဒီး, စီၤဒၤဝံးအ ခ့အပှၤစှၤလီၤတဆံခွံဂၤ, ဒီးစီၤဧစၤအ့လးလီၤ.
31 ဒီးစီၤဒၤဝံးအခ့အပှၤ ကျီကွံာ်တ့ၢ်ဘံၣ်ယၤမံၣ်, ဒီးစီၤ အဘံန့ၢ်အပှၤကညီ ဒီးပှၤသၢကယၤဃုဆံသံဝဲလီၤ.
32 ဒီးဟံးထီၣ်စီၤဧစၤအ့လး, ဒီးခူၣ်လီၤကွံာ်အီၤလၢအ ပၢ်အသွၣ်ခိၣ်အပူၤ လၢအအိၣ်ဝဲလၢဘ့ၤသလ့ဃ့ၣ်အ ပူၤလီၤ. ဒီးစီၤယိၤအာ်, ဒီးအပှၤကညီလဲၤတၢ်သီတ နၤကျၢၤ ဒီးတုၤဝဲလၢဃ့ဘြိၣ်လၢမုၢ်ဆ့ၣ်ထီၣ်န့ၣ်လီၤ.
3၃
1 ဒီးတၢ်ဒုးလိာ်အသးလၢ စီၤစီလူးအပှၤဟံၣ်ဖိ, ဒီးစီၤ ဒၤဝံးအပှၤဟံၣ်ဖိ, အိၣ်ဝဲယံာ်မးလီၤ. ဒီးစီၤဒၤဝံးဆူၣ် ထီၣ်ဆူၣ်ထီၣ်, မ့မ့ၢ်စီၤစီလူးအပှၤဟံၣ်ဖိစၢ်လီၤစၢ်လီၤ ဝဲလီၤ. 2 ဒီးစီၤဒၤဝံးထီၣ်ဖိလၢဃ့တြိၣ်အပူၤလီၤ. အဖိဝဲၢ်ကိမ့ၢ်စီၤအၤမနိၣ်, ပှၤယံးစရ့လးဖိနီၢ်အဃံနိၣ်အဖိလီၤ.―
3 ဒီးခံဂၤတဂၤမ့ၢ်စီၤကံးလအာ်, ပှၤကၢ်မ့ၤလးဖိစီၤနၤ ဘလးအမါနီၢ်အဘံၤကါယံးလးအဖိလီၤ. ဒီးသၢဂၤတ ဂၤမ့ၢ်စီၤအးဘၡါလိၣ်, ကရှူၢ်အစီၤပၤစီၤတးလမဲအဖိ မုၣ်နီၢ်မၤကၤအဖိခွါလီၤ. 4 ဒီးလွံၢ်ဂၤတဂၤမ့ၢ်စီၤအဒိ နံၤယၤ. နီၢ်ဃးကံၤအဖိခွါလီၤ. ဒီးယဲၢ်ဂၤတဂၤမ့ၢ်စီၤၡဖး တယၤ. နီၢ်အဘံတလးအဖိခွါလီၤ. 5 ဒီးဃုဂၤတဂၤမ့ၢ် စီၤယံးသြၣ်, စီၤဒၤဝံးအမါနီၢ်ဧ့ကလၤအဖိလီၤ. စီၤဒၤ ဝံးထိၣ်ဖိအဝဲသ့ၣ်တဖၣ်န့ၣ်လၢဃ့ဘြိၣ်အပူၤလီၤ.
6 ဒီးလၢစီၤစီလူးအပှၤဟံၣ်ဖိ ဒီးစီၤဒၤဝံးအပှၤဟံၣ်ဖိဒုး လိာ်အသးအဖၢမုၢ်ဒီး, တၢ်မၤအသးလၢစီၤအဘံန့ၢ် ပာ်ဆူၣ်အသးလၢစီၤစီလူးအဟံၣ်အဂီၢ်လီၤ.
7 ဒီးစီၤစီလူးအိၣ်ဒီးအသံၣ်မါတဂၤ စီၤအၤယၤအဖိမုၣ်, ဒီးအမံၤမ့ၢ်နီၢ်ရံးစဖၤလီၤ. ဒီးစီၤအံၤၡဘိရှ့းစံးလၢစီၤအ ဘံန့ၢ်, နလဲၤနုာ်လၢယပၢ်အသံၣ်မါတဂၤအအိၣ်န့ၣ် မ့ၢ်အဘၣ်မနုၤလဲၣ်.
8 ဒီးစီၤအဘံန့ၢ်အသးထီၣ်ဒိၣ်မး လၢစီၤအံၤၡဘိရှ့းအ တၢ်ကတိၤအဃိ, ဒီးစံးဝဲဒၣ်, ယဲဒၣ်အံၤပှၤလၢအထီ ဒါယူဒၤ, ဒီးမၤတၢ်ဘျုးတၢ်ဖှိၣ်လၢနပၢ် စီၤစီလူးအ ပှၤဟံၣ်ဖိ, ဒီးအဒီပုၢ်ဝဲၢ်, ဒီးအတံၤသကိးလၢမုၢ်မဆါ တနံၤအံၤ, ဒီးတဟ့ၣ်လီၤကွံာ်ဘၣ်နၤလၢ စီၤဒၤဝံးအ စုပူၤဘၣ်န့ၣ် ယမ့ၢ်ထွံၣ်အခိၣ်သတးဒီး, နပာ်တၢ်က မၣ်လၢယလိၤ, လၢပိာ်မုၣ်အံၤအဂ့ၢ်အကျိၤလၢမုၢ်မ ဆါတနံၤအံၤဧါ.
9 ယမ့ၢ်တမၤဘၣ်စီၤဒၤဝံး ဒ်ယွၤဆိၣ်တၢ်ဒီးအီၤအသိး ဘၣ်ဒီး, မ်ယွၤမၤစီၤအဘံန့ၢ်ဒ်န့ၣ်ဒီးအါန့ၢ်အန့ၣ်တ က့ၢ်. 10 လၢယကဒုးခီဂာ်ဘီဧိၤမုၢ်ဧိၤလၢ စီၤစီလူးအ ပှၤဟံၣ်ဖိ, ဒီးပာ်ထီၣ်စီၤဒၤဝံးအလီၢ်ပစိာ်လၢအံၣ်စရ့ လးအဖီခိၣ်ဒီးလၢယူဒၤအဖီခိၣ် လၢဒၣ်ဘ့ၢ်ၡဘၤန့ၣ် တက့ၢ်.
11 ဒီးမ့ၢ်အပျံၤစီၤအဘံန့ၢ်ဒီး, ဒီးစံးဆၢအီၤလၢတၢ်က ကတိၤအဂၤတသ့ဘၣ်နီတထံၣ်ဘၣ်.
12 ဒီးစီၤအဘံန့ၢ်မၢကလူးတဖၣ်လဲၤ ဆူစီၤဒၤဝံးအအိၣ် လၢအဂီၢ်, ဒီးစံးဝဲဒၣ်, ထံဧိၤကီၢ်ဧိၤန့ၣ်မ့ၢ်အမ့ၢ်မတၤ တဂၤအတၢ်လဲၣ်. ဒီးစံးအၢၣ်လီၤအီၤလီၤတၢ်ဒီးယၤ, ဒီးကွၢ်ကွၢ်, ယစုကအိၣ်ဒီးနၤဒ်သိးအံၣ်စရ့လးကဟဲ ဆူနအိၣ်ခဲလၢာ်လီၤ.
13 ဒီးစံးဝဲဒၣ်, ဂ့ၤလံ. ယကအၢၣ်လီၤအီလီၤတၢ်ဒီးနၤ လီၤ. ဘၣ်ဆၣ်ဒီးယကဃ့တၢ်တမံၤလၢနၤ, ဒ်ပစံးတၢ် အသိး, တုၤနဟဲထံၣ်ဘၣ်ယမဲာ်ဒီး, နမ့ၢ်တဟဲစိာ်စီၤ စီလူးအဖိမုၣ် နီၢ်မံၤကၤလးဒီး, နတထံၣ်ဘၣ်ယမဲာ် ဘၣ်.
14 ဒီးစီၤဒၤဝံးမၢကလူးတဖၣ် လဲၤဆူစီၤစီလူးအဖိခွါစီၤ အံၤၡဘိရှ့းအအိၣ်, ဒီးစံးဝဲဒၣ်, ဟ့ၣ်လီၤယမါနီၢ်မံကၤ လးလၢယန့ၢ်ဘၣ်အီၤလၢ ပှၤဖလ့ၡသးဖိအတၢ်အခိၣ် ဖံးတကယၤန့ၣ်တက့ၢ်.
15 ဒီးစီၤအံၤၡဘိရှ့းမၢလီၤတၢ်, ဒီးဟံးန့ၢ်အီၤလၢအဝၤ စီၤလ့ရှ့ၣ်အဖိခွါစီၤဖးလၤတံလးန့ၣ်လီၤ.
16 ဒီးအဝၤလဲၤဒီးအီၤ, ဒီးဟီၣ်ဝဲလၢအလီၢ်ခံပၢၢ်လၢဘၤ ဃူရံၣ်လီၤ. ဒီးစီၤအဘံန့ၢ်စံးဘၣ်အီၤ, ဟး, က့ၤက့ၤတ က့ၢ်. ဒီးက့ၤက့ၤဝဲလီၤ.
17 ဒီးစီၤအဘံန့ၢ်ကတိၤတၢ်ဒီး ပှၤအံၣ်စရ့လးအပှၤသူၣ် က့သးပှၢ်, ဒီးစံးဝဲဒၣ်, လၢထံးလၢမကိာ်သုဃုပာ်စီၤ ဒၤဝံးလၢစီၤပၤလၢသုဖီခိၣ်လီၤ. 18 ဒီးခဲကနံၣ်အံၤမၤတ က့ၢ်. အဂ့ၢ်ဒ်အံၤ, ယွၤကတိၤတၢ်လၢစီၤဒၤဝံးအဂ့ၢ်အ ကျိၤ, ဒီးစံးဝဲဒၣ်, ယကအုၣ်က့ၤခီၣ်က့ၤယပှၢ်ဂီၢ်မုၢ်အံၣ် စရ့လးလၢယခ့ယပှၤစီၤဒၤဝံး လၢပှၤဖလ့ၡသးဖိအစု ပူၤ, ဒီးလၢအဒုၣ်အဒါခဲလၢာ်အစုပူၤလီၤ.
19 ဒီးစီၤအဘံန့ၢ်ကတိၤစ့ၢ်ကီးတၢ်လၢ ဘံၣ်ယၤမံၣ်အ နၢ်ပူၤ, ဒီးစီၤအဘံန့ၢ်လဲၤကတိၤစ့ၢ်ကီးတၢ်လၢစီၤဒၤ ဝံးအနၢ်ပူၤလၢဃ့ဘြိၣ်အပူၤလၢ ကယဲၢ်တၢ်အဂ့ၤလၢ အံၣ်စရ့လးအမဲာ်ညါ, ဒီးလၢကယဲၢ်တၢ်အဂ့ၤလၢပှၤ ဘံၣ်ယၤမံၣ်အပှၤဟံၣ်ဖိခဲလၢာ်လီၤ.
20 ဒီးစီၤအဘံန့ၢ်ဟဲဒီးပှၤကညီခံဆံဆူ စီၤဒၤဝံးအအိၣ် လၢဃံဘြိၣ်အပူၤ, ဒီးစီၤဒၤဝံးမၤတၢ်အီၣ်တၢ်အီလၢစီၤ အဘံန့ၢ်, ဒီးပှၤကညီအိၣ်ဒီးအီၤအဂီၢ်လီၤ.
21 ဒီးစီၤအဘံန့ၢ်စံးဘၣ်စီၤဒၤဝံး, ယကဂဲၤဆၢထၢၣ်, ဒီး လဲၤတၢ်, ဒီးဒုးအိၣ်ဖှိၣ်ရိဖှိၣ်အံၣ်စရ့လးခဲလၢာ်ဆူစီၤ ပၤယကစၢ်အအိၣ် ဒ်သိးအကအၢၣ်လီၤအီလီၤ တၢ် ဒီးနၤ, ဒီးဒ်သိးနကပၢကယဲၢ်တၢ်လၢအဘၣ် နသးလၢ တၢ်ခဲလၢာ်လီၤ. ဒီးစီၤဒၤဝံးပျၢ်စီၤအဘံန့ၢ်, ဒီးအဝဲဒၣ် လဲၤတၢ်မုာ်မုာ်လီၤ.
22 ဒီးကွၢ်ကွၢ်, စီၤဒၤဝံးအခ့အပှၤ, ဒီးစီၤယိၤအာ်ဟဲက့ၤ လၢတၢ်တဖုအအိၣ်, ဒီးဟဲက့ၤစိာ်တၢ်ဂုာ်န့ၢ်ဝဲအါအါ ကလဲာ်လီၤ. ဘၣ်ဆၣ်ဒီးစီၤအဘံန့ၢ်တအိၣ်ဘၣ်ဒီးစီၤ ဒၤဝံးလၢဃ့ဘြိၣ်အပူၤဘၣ်. အဂ့ၢ်ဒ်အံၤ, အဝဲဒၣ်ပျၢ် တ့ၢ်လံအီၤ, ဒီးဟးထီၣ်လံမုာ်မုာ်လံ.
23 ဒီးစီၤယိၤအာ် ဒီးပှၤသုးမုၢ်ခဲလၢာ်လၢအအိၣ်ဒီးအီၤ န့ၣ်ဟဲဝဲ, ဒီးပှၤစံးဘၣ်စီၤယိၤအာ်ဒီးစံးဝဲဒၣ်, စီၤန့ၢ်အဖိ ခွါစီၤအဘံန့ၢ်ဟဲဆူစီၤပၤအအိၣ်, ဒီးအဝဲဒၣ်ပျၢ်အီၤ, ဒီးက့ၤက့ၤလံမုာ်မုာ်လံ.
24 ဒီးစီၤယိၤအာ်ဟဲဆူစီၤပၤအအိၣ်, ဒီးစံးဝဲဒၣ်, နမၤမနုၤ လဲၣ်. ကွၢ်ကွၢ်, စီၤအဘံန့ၢ်ဟဲဆူနအိၣ်ဒီးနပျၢ်အီၤ, ဒီး ဟးထီၣ်ကွံာ်လံန့ၣ်မ့ၢ်အဘၣ်မနုၤလဲၣ်. 25 နသ့ၣ်ညါ စီၤန့ၢ်အဖိခွါစီၤအဘံန့ၢ်လၢ အဟဲလီၤန့ၢ်နၤ, ဒီးဒ်သိး အကသ့ၣ်ညါနဟးထီၣ်ဒီးနဟဲနုာ်တၢ်, ဒီးဒ်သိးအက သ့ၣ်ညါကယဲၢ်တၢ်လၢနမၤခဲလၢာ်လီၤ.
26 ဒီးစီၤယိၤအာ်ဟးထီၣ်ကွံာ်လၢစီၤဒၤဝံးအအိၣ်, ဒီးမၢ လီၤကလူးတဖၣ် လဲၤပိာ်စီၤအဘံန့ၢ်အခံဒီးဟဲက့ၤစိာ် အီၤလၢထံပူၤစံရၤလီၤ. ဘၣ်ဆၣ်ဒီးစီၤဒၤဝံးတသ့ၣ်ညါ ဘၣ်ဝဲဘၣ်.
27 ဒီးစီၤအဘံန့ၢ်ဟဲက့ၤဆူဃ့ဘြိၣ်, ဒီးစီၤယိၤအာ်ဆှၢ အီၤဆူတၢ်ကပၤလၢပဲတြီအပူၤ, ဒ်သိးအကကတိၤ တၢ်ဒီးအီၤအိၣ်တဒၢ, ဒီးကျီအီၤလၢအဟၢဖၢ, ဒီးသံဝဲ, လၢစီၤယိၤအာ်အဒီပုၢ်ဝဲၢ် စီၤဧစၤအ့လးအသွံၣ်အဃိ လီၤ.
28 လၢခံက့ၤဒီးတုၤစီၤဒၤဝံးနၢ်ဟူဝဲဒီး, စံးဝဲဒၣ်, ယဲဒၣ် အံၤဒီးယဘီယမုၢ် ပူၤဖျဲးဒီးစီၤန့ၢ်အဖိခွါ စီၤအဘံန့ၢ် အသွံၣ်လၢယွၤအမဲာ်ညါလီၤစိၤလီၤထီလီၤ. 29 မ်အအိၣ် လၢစီၤယိၤအာ်အခိၣ်, ဒီးလၢအပၢ်အပှၤဟံၣ်ဖိခဲလၢာ် အဖီခိၣ်တက့ၢ်. ဒီးပှၤလၢအအိၣ်ဒီးအသွံၣ်ထီၣ်ဂ့ၤ, ပှၤ လၢအဘၣ်တၢ်ဆါအၢဂ့ၤ, ပှၤလၢအတန့ၤအသးလၢ နီၣ်ထိးဂ့ၤ, ပှၤလၢအလီၤဃံၤလၢနးဧိၤဘီဧိၤဂ့ၤ, ပှၤလၢ အမိၣ်န့ၢ်ဘၣ်အသးလၢကိၣ်ဂ့ၤ, မ်အသုတလၢာ်လၢ စီၤယိာ်အာ်အဟံၣ်ပူၤတဂ့ၤ.
30 ဒီးစီၤယိၤအာ်, ဒီးအဒီပုၢ်ဝဲၢ်စီၤအဘံၡဲမၤသံစီၤအဘံ န့ၢ်လၢအမၤသံအဒီပုၢ်ဝဲၢ် စီၤဧစၤအ့လးအဃိလၢကံး ဘိၣ်အပူၤလၢတၢ်ဒုးသုးအကျါန့ၣ်လီၤ.
31 ဒီးစီၤဒၤဝံးစံးဘၣ်စီၤယိၤအာ်, ဒီးပှၤဂီၢ်မုၢ်ခဲလၢာ်လၢ အအိၣ်ဒီးအီၤ, ဖှီသုဆ့, ဒီးကံၢ်တူာ်သုသးဒီးထၢၣ်အ တၢ်ကံးညာ်, ဒီးဟီၣ်လၢစီၤအဘံန့ၢ်အမဲာ်ညါတက့ၢ်. ဒီးစီၤဒၤဝံးပိာ်အလီၢ်မံအခံလီၤ.
32 ဒီးခူၣ်လီၤကွံာ်စီၤအဘံန့ၢ်လၢ ဃ့ဘြိၣ်အပူၤ, ဒီးစီၤ ပၤထုထီၣ်အကလုၢ်, ဒီးဟီၣ်ဝဲဖဲစီၤအဘံန့ၢ်အသွၣ်ခိၣ်, ဒီးပှၤဂီၢ်မုၢ်ခဲလၢာ်ဟီၣ်ဝဲလီၤ. 33 ဒီးစီၤပၤဟီၣ်တၢ်ယၢၤ တၢ်လၢစီၤအဘံန့ၢ်အဃိ, ဒီးစံးဝဲဒၣ်, စီၤအဘံန့ၢ်သံဝဲ ဒ်ပှၤဟးဂီၤဖိ သံဝဲအသိးန့ၣ်ဧါ. 34 နစုတဘၣ်စၢဃာ် ဘၣ်အသးဘၣ်, ဒီးနခီၣ်တအိၣ်ဘၣ်လၢသိးအပူၤဘၣ်, ဒ်ပှၤလီၤဃံၤလၢ ပှၤအၢအမဲာ်ညါအသိးန့ၣ်, နလီၤ ဃံၤနဲလီၤ. ဒီးပှၤဟီၣ်ဝဲလၢအဃိခဲလၢာ်လီၤ.
35 ဒီးမုၢ်ဆါခီအဖၢမုၢ်န့ၣ် ပှၤခဲလၢာ်ဟဲမၢစီၤဒၤဝံးအီၣ် တၢ်လီၤ. ဒီးစီၤဒၤဝံးဆိၣ်တၢ်, ဒီးစံးဝဲဒၣ်, မုၢ်တချုး လီၤနုာ်ဒံးဘၣ်ဒီး, ကိၣ်မ့ၢ်ဂ့ၤ, တၢ်အဂၤမ့ၢ်ဂ့ၤ, ယမ့ၢ် အီၣ်ကွၢ်ဒီး, မ်ယွၤမၤယၤဒ်န့ၣ်ဒီးအါန့ၢ်အန့ၣ်တက့ၢ်.
36 ဒီးပှၤဂီၢ်မုၢ်တိၢ်နီၣ်ခဲလၢာ်, ဒီးဂ့ၤဝဲလၢအမဲာ်, ဒ်က ယဲၢ်တၢ်လၢစီၤပၤမၤဝဲတမံၤလၢ်လၢ်န့ၣ် မ့ၢ်တၢ်ဂ့ၤလၢ ပှၤဂီၢ်မုၢ်ခဲလၢာ်အမဲာ်အသိးန့ၣ်လီၤ.
37 ဒီးပှၤဂီၢ်မုၢ်ခဲလၢာ်, ဒီးအံၣ်စရ့လးခဲလၢာ်သ့ၣ်ညါဝဲ လၢမုၢ်တနံၤန့ၣ်လၢ စီၤပၤမၤသံစီၤန့ၢ်အဖိခွါစီၤအဘံ န့ၢ်န့ၣ်အသးတအိၣ်ဘၣ်.
38 ဒီးစီၤပၤစံးဘၣ်အခ့အပှၤ, ပှၤတၢ်အခိၣ်, ဒီးပှၤတၢ် အဒိၣ်လီၤဃံၤဝဲလၢ အံၣ်စရ့လးအပူၤလၢမုၢ်မဆါတ နံၤအံၤသုတသ့ၣ်ညါဘၣ်ဧါ. 39 ဒီးယဒိးဖှူယသးလၢ စီၤပၤဘၣ်ဆၣ်ဒီး, ယဂံၢ်စၢ်ယဘါစၢ်လၢမုၢ်မဆါတနံၤ အံၤ, ဒီးပှၤတဖၣ်အံၤ, နီၢ်စရူၤယၤအဖိခွါတဖၣ်န့ၣ်ဆူၣ် ကဲၣ်ဆိးလၢယဂီၢ်လီၤ. ယွၤကဟ့ၣ်ကၣ်ပှၤမၤတၢ်အၢ ဒ်အတၢ်အၢတၢ်သီအသိးန့ၣ်လီၤ.
4၄
1 ဒီးတုၤစီၤစီလူးအဖိခွါနၢ်ဟူဝဲလၢ စီၤအဘံန့ၢ်သံဝဲ လၢဃ့ဘြိၣ်အပူၤဒီး, အစုလီၤစၢ်, ဒီးပှၤအံၣ်စရ့လး ဖိအသူၣ်ကိၢ်အသးဂီၤခဲလၢာ်လီၤ.
2 ဒီးစီၤစီလူးအဖိခွါအိၣ်ဒီးပှၤခံဂၤလၢအမ့ၢ် ပှၤအဖုတ ဖၣ်အခိၣ်, ဒီးအဝဲတဂၤအမံၤမ့ၢ်စီၤဘၤနါ, ဒီးအဝဲတ ဂၤအမံၤမ့ၢ်စီၤရ့ကး, စီၤရံးမိၣ်အဖိခွါ, ပှၤဘအ့ရိးဖိလၢ စီၤဘံၣ်ယၤမံၣ်အဖိခွါအကျါလီၤ. (အဂ့ၢ်ဒ်အံၤ, ပှၤဂံၢ် ဘအ့ရိးလၢဘံၣ်ယၤမံၣ်အဂီၢ်စ့ၢ်ကီးလီၤ. 3 ဒီးပှၤဘအ့ ရိးဖိဃ့ၢ်ဝဲဆူကံးတယၣ်, ဒီးကဲထီၣ်ပှၤတမှံၤဖဲန့ၣ်တုၤ မုၢ်မဆါတနံၤအံၤလီၤ.)
4 ဒီးစီၤစီလူးအဖိခွါ စီၤယိနၤသၣ်အိၣ်ဒီးအဖိခွါလၢအ ခီၣ်ဟးဂီၤတဂၤလီၤ. လၢစီၤစီလူးဒီးစီၤယိနၤသၣ်အက စီၣ်ဟဲလၢယံးစရ့လးန့ၣ်အသးပှၢ်ယဲၢ်နံၣ်, ဒီးပှၤကွၢ် ဖိသၣ်န့ၣ်ဟံးန့ၢ်အီၤ, ဒီးဃ့ၢ်ဝဲ, ဒီးဃ့ၢ်ဝဲချ့ချ့အဖၢမုၢ်ဒီး, တၢ်မၤအသးလၢအလီၤဃံၤဝဲ, ဒီးအခီၣ်ဟးဂီၤဝဲလီၤ. ဒီးအမံၤမ့ၢ်စီၤမဖံဘိၤရှ့းလီၤ.
5 ဒီးပှၤဘအ့ရိးဖိစီရံးမိၣ် အဖိခွါစီၤရ့ကးဒီးစီၤဘၤနါ လဲၤဝဲ, ဒီးမုၢ်ကိၢ်ထီၣ်န့ၣ် တုၤဝဲလၢစီၤအံၤၡဘိရှ့းအ ဟံၣ်လၢအမံလီၤလၢလီၢ်မံပူၤလၢမုၢ်ထူၣ်န့ၣ်လီၤ. 6 ဒီး လဲၤဝဲဖဲန့ၣ်ဆူ ဟံၣ်အသးကံၢ်ပူၤ, ဒ်အကဟဲစိာ်ဘု ကၠူၣ်အသိး, ဒီးကျီကွံာ်အီၤလၢအဟၢဖၢ, ဒီးစီၤရ့ကး, ဒီးအဒီပုၢ်ဝဲၢ်စီၤဘၤနါပူၤဖျဲးဝဲလီၤ. 7 ဒီးလဲၤနုာ်လၢအ ဟံၣ်ပူၤ, ဒီးဖဲအမံလီၤလၢအလီၢ်မံပူၤလၢအဒၢးပူၤန့ၣ် ဒီး, ကျီကွံာ်ဝဲ, ဒီးမၤသံအီၤ, ဒီးဒီၣ်တဲာ်ကွံာ်အကိာ်, ဒီးဟံးန့ၢ်အခိၣ်, ဒီးလဲၤထီၣ်ဝဲလၢတၢ်ပျီပူၤသီတနၤ ကျၢၤလီၤ.
8 ဒီးဟဲစိာ်စီၤအံၤၡဘိရှ့းအခိၣ် ဆူစီၤဒၤဝံးအအိၣ်လၢ ဃ့ဘြိၣ်အပူၤ, ဒီးစံးဘၣ်စီၤပၤ, ကွၢ်ကွၢ်, နဒုၣ်နဒါစီၤ စီလူးအဖိခွါ လၢအဃုနသးသမူစီၤအံၤၡဘိရှ့းအခိၣ်, ဒီးမုၢ်မဆါတနံၤအံၤ ယွၤမၤဆၢတၢ်အၢလၢစီၤစီလူး, ဒီးလၢအချံအသၣ်လၢစီၤပၤယကစၢ်အဂီၢ်လီၤ.
9 ဒီးစီၤဒၤဝံးစံးဆၢပှၤဘအ့ရိးဖိစီၤရံးမိၣ် အဖိခွါစီၤရ့ ကး, ဒီးအဒီပုၢ်ဝဲၢ်စီၤဘၤနါ, ဒီးစံးဘၣ်အီၤ, ယွၤမူဝဲလၢ အပှ့ၤက့ၤယသးလၢကယဲၢ်တၢ်အၢအပူၤန့ၣ်, 10 လၢပှၤ တဂၤဒုးနဲၣ်ယၤ, ဒီးစံးဝဲဒၣ်, ကွၢ်ကွၢ်, စီၤစီလူးသံလံ, (ဒီးမၤသးဒ်တၢ်အကစီၣ်ဂ့ၤလၢ အမဲာ်အသိးန့ၣ်လီၤ.) ယဟံးဃာ်အီၤ, ဒီးမၤသံအီၤလၢစံကလးအပူၤ, ပှၤလၢ အဆိကမိၣ်ယကဟ့ၣ်အီၤလၢ အဘူးအလဲလၢအက စီၣ်အဂီၢ်န့ၣ်လီၤ. 11 တုၤပှၤအၢမၤသံပှၤအတီလၢအ ဟံၣ်ဒၣ်ဝဲလၢအလီၢ်မံပူၤန့ၣ်ဒီး, ယကမၤနးန့ၢ်အန့ၣ် တက့ၢ်ဆံးအါလဲၣ်. ယကဃုအသွံၣ်န့ၣ်လၢသုစုပူၤ, ဒီးသုးကွံာ်သုလၢဟီၣ်ခိၣ်ချၢ, တမ့ၢ်ဘၣ်ဧါ.
12 ဒီးစီၤဒၤဝံးမၤလိာ်ပှၤဖိၣ်သၣ်ခွါတဖၣ်, ဒီးအဝဲသ့ၣ် မၤသံအီၤ, ဒီးဒီၣ်တဲာ်ကွံာ်အစုဒီးအခီၣ်, ဒီးဒုးလီၤစဲၤ အီၤလၢနိၣ်အဖီခိၣ်လၢဃ့ဘြိၣ်အပူၤလီၤ. ဒီးဟံးန့ၢ် စီၤအံၤၡဘိရှ့ၤအခိၣ်, ဒီးခူၣ်လီၤကွံာ်ဝဲလၢစီၤအဘံန့ၢ် အသွၣ်ခိၣ်ပူၤလၢဃ့ဘြိၣ်အပူၤလီၤ.
5၅
1 ဒီးအံၣ်စရ့လးအဒူၣ်ခဲလၢာ်ဟဲဆူ စီၤဒၤဝံးအအိၣ် ဆူဃ့ဘြိၣ်, ဒီးကတိၤတၢ်ဒီးစံးဝဲဒၣ်, ကွၢ်ကွၢ်, ပမ့ၢ်န ဃံဒီးနညၣ်လီၤ. 2 ဒီးလၢထံးလၢမကိာ်လၢစီၤစီလူး ကဲစီၤပၤလၢအဖီခိၣ်န့ၣ် နမ့ၢ်ပှၤလၢအလဲၤဆှၢထီၣ်, ဒီးဟဲဆှၢနုာ်အံၣ်စရ့လး, ဒီးယွၤစံးဘၣ်နၤ, နဘၣ်အံး က့ၤကွၢ်က့ၤ ယပှၤဂီၢ်မုၢ်အံၣ်စရ့လး, ဒီးနကကဲထီၣ် အံၣ်စရ့လးအခိၣ်လီၤ.
3 ဒီးအံၣ်စရ့လးအပှၤသူၣ်က့သးပှၢ် ဟဲဆူစီၤပၤအအိၣ် လၢဃ့ဘြိၣ်အပူၤ, ဒီးစီၤပၤဒၤဝံးအၢၣ်လီၤအီလီၤတၢ် ဒီးအီၤလၢဃ့ဘြိၣ်အပူၤလၢ ယွၤအမဲာ်ညါ, ဒီးအဝဲသ့ၣ် ဖှူစီၤဒၤဝံးလၢစီၤပၤလၢအံၣ်စရ့လးအဖီခိၣ်လီၤ.
4 ဒီးလၢစီၤဒၤဝံးကဲထီၣ်သီစီၤပၤန့ၣ် အသးပှၢ်အနံၣ် သၢဆံ, ဒီးကဲစီၤပၤအနံၣ်လွံၢ်ဆံလီၤ. 5 ကဲစီၤပၤလၢ ယူဒၤအဖီခိၣ်နွံနံၣ်ဒီးဃုလါလၢဃ့ဘြိၣ်အပူၤ, ဒီးကဲစီၤ ပၤလၢအံၣ်စရ့လးခဲလၢာ် ဒီးယူဒၤအဖီခိၣ်သၢဆံသၢ သၢနံၣ်လၢယရူၤၡလ့ၣ်အပူၤလီၤ.
6 ဒီးစီၤပၤ, ဒီးအပှၤကညီ လဲၤဝဲဆူယရူၡလ့ၣ်, ဆူပှၤ ယဘူၣ်ဖိ, ပှၤကီၢ်ဖိအအိၣ်လၢအကတိၤတၢ်ဒီးစီၤဒၤ ဝံး, ဒီးစံးဝဲဒၣ်, နမ့ၢ်တစိာ်ထီၣ်ကွံာ်ပှၤမဲာ်ဘျီၣ်, ဒီးပှၤ ခီၣ်ဟးဂီၤဘၣ်ဒီး, နတဟဲနုာ်ဘၣ်ဖဲအံၤဘၣ်. (စံးဝဲ စီၤဒၤဝံးဟဲနုာ်ဖဲအံၤတသ့ဘၣ်.)
7 ဒီးစီၤဒၤဝံးမၤန့ၢ်စံယိၣ်အတိာ်လီၤ. အဝဲန့ၣ်မ့ၢ်စီၤဒၤ ဝံးအဝ့ၢ်န့ၣ်လီၤ.
8 ဒီးစီၤဒၤဝံးစံးဝဲလၢ မုၢ်တနံၤန့ၣ်, ဖဲဒၣ်ပှၤလၢအထီၣ် ဘးထံကျိ, ဒီးကျီကွံာ်ပှၤယဘူၣ်ဖိ, ဒီးပှၤအခီၣ်ဟးဂီၤ, ဒီးပှၤမဲာ်ဘျီၣ်လၢ စီၤဒၤဝံးအသးဟ့အီၤတဂၤဂၤန့ၣ် ကကဲထီၣ်တၢ်အခိၣ်လီၤ. မၤသးဒ်န့ၣ်ဒီးပှၤစံးဝဲလၢ ပှၤမဲာ်ဘျီၣ်, ဒီးပှၤအခီၣ်ဟးဂီၤတဘၣ်ဟဲနုာ်လၢဟံၣ် ပူၤဘၣ်.
9 ဒီးစီၤဒၤဝံးအိၣ်ဝဲလၢတိာ်ပူၤ, ဒီးယုၢ်အမံၤလၢစီၤဒၤ ဝံးအဝ့ၢ်ဒီးစီၤဒၤဝံးသူၣ်တၢ်ဝးတရံး လၢမံးလိၤဒီးလၢ အပူၤလီၤ.
10 ဒီးစီၤဒၤဝံးလဲၤတၢ်, ဒီးဒိၣ်ထီၣ်, ဒီးယွၤ, တၢ်သုးမုၢ်အ ကစၢ်, အိၣ်ဒီးအီၤလီၤ.
11 ဒီးစိၢ်အစီၤပၤစီၤဃံရၣ် မၢလီၤအကလူးတဖၣ်ဆူစီၤ ဒၤဝံးအအိၣ်, ဒီးဟ့ၣ်ယုၢ်သ့ၣ်ဆှိးအ့ရ့းတဖၣ်, ဒီးပှၤမၤ တၢ်လၢသ့ၣ်သ့, ဒီးပှၤမၤတၢ်လၢလၢၢ်သ့, ဒီးအဝဲသ့ၣ် မၤစီၤဒၤဝံးအဟံၣ်တဖျၢၣ်လီၤ.
12 ဒီးစီၤဒၤဝံးသ့ၣ်ညါဝဲလၢ ယွၤပာ်ဂၢၢ်ပာ်ကျၢၤအီၤလၢ စီၤပၤလၢအံၣ်စရ့လးအဖီခိၣ်, ဒီးလၢအပာ်ထီၣ်ထီအ ဘီအမုၢ်လၢအံၣ်စရ့လးအပှၤဂီၢ်မုၢ်အဃိလီၤ.
13 ဒီးလၢအဟဲလၢဃ့ဘြိၣ်အလီၢ်ခံန့ၣ် စီၤဒၤဝံးထံၣ်န့ၢ် အသံၣ်အမါ, ဒီးအမါတဖၣ်လၢယရူၤၡလ့ၣ်အပူၤ, ဒီး တၢ်ဆံးစၢ်န့ၢ်ဒံးဖိမုၣ်ဒီးဖိခွါလၢစီၤဒၤဝံးအဂီၢ်လီၤ.
14 ဒီးပှၤလၢအအိၣ်ဖျဲၣ်လၢအဂီၢ်လၢ ယရူၤၡလ့ၣ်အပူၤ တဖၣ်အမံၤ, မ့ၢ်စီၤၡးမူၤ, ဒီးစီၤၡိၤဘာ်, ဒီးစီၤနၤသၣ်, ဒီးစီၤၡလိၤမိၤ, 15 ဒီးစီၤယံးဘဃၢ်, ဒီးစီၤအလံၤရှူၤ, ဒီးစီၤ န့းဖ့း, ဒီးစီၤယၤဖံ, 16 ဒီးစီၤအလံၡမၤ, ဒီးစီၤအလံဒၤ, ဒီးစီၤအလံဖလ့လီၤ.
17 ဒီးတုၤပှၤဖလ့ၡသးဖိနၢ်ဟူဝဲလၢ ပှၤဖှူစီၤဒၤဝံးလၢစီၤ ပၤလၢအံၣ်စရ့လးအဖီခိၣ်ဒီး, ပှၤဖလ့ၡသးဖိဟဲဃုစီၤ ဒၤဝံး, ဒီးစီၤဒၤဝံးနၢ်ဟူဝဲ, ဒီးလဲၤလီၤဝဲဆူတိာ်ပူၤလီၤ.
18 ဒီးပှၤဖလ့ၡသးဖိဟဲ, ဒီးသလၣ်ထီၣ်အသးလၢက စၢၢ်ကဆူးရၤဖၤအပူၤလီၤ.
19 ဒီးစီၤဒၤဝံးသံကွၢ်တၢ်လၢယွၤ, ဒီးစံးဝဲဒၣ်, ယဘၣ် လဲၤထီၣ်ဆူပှၤဖလ့ၡသးဖိအအိၣ်န့ၢ်ဧါ. နကဟ့ၣ်လီၤ ကွံာ်အီၤလၢယစုပူၤဧါ. ဒီးယွၤစံးဘၣ်စီၤဒၤဝံး, လဲၤထီၣ် တက့ၢ်. အဂ့ၢ်ဒ်အံၤ, ယကဟ့ၣ်လီၤကွံာ်ပှၤဖလ့ၡသး ဖိလၢနစုပူၤသပှၢ်တၢၢ်လီၤ.
20 ဒီးစီၤဒၤဝံးဟဲဝဲဆူဘဧၤလးပရၤစံၣ်, ဒီးစီၤဒၤဝံးကျီ ကွံာ်အီၤဖဲန့ၣ်, ဒီးစံးဝဲဒၣ်, ယွၤဘၢၣ်ဖျိတၢ်လၢယမဲာ် ညါလၢယဒုၣ်ယဒါအဖီခိၣ်, ဒ်ထံဘၢၣ်ဖျိတၢ်အသိး န့ၣ်လီၤ. မၤသးဒ်န့ၣ်ဒီး ယုၢ်ဝဲတၢ်အလီၢ်အမံၤလၢဘ ဧၤလးပရၤစံၣ်လီၤ.
21 ဒီးအဝဲသ့ၣ်တဖၣ်န့ၣ် လဲၤသဒၣ်အတၢ်ဂီၤတဖၣ်, ဒီး စီၤဒၤဝံးဒီးအပှၤကညီဆူးထီၣ်ကွံာ်အီၤလီၤ.
22 ဒီးပှၤဖလ့ၡသးဖိ ဟဲထီၣ်ကဒီးတစု ဒီးသလၣ်ထီၣ် အသးလၢကစၢၢ်ကဆူးရၤဖၤအပူၤလီၤ.
23 ဒီးတုၤစီၤဒၤဝံးသံကွၢ်တၢ်လၢယွၤဒီး, အဝဲဒၣ်စံး, န တဘၣ်လဲၤထီၣ်ဘၣ်. လဲၤတရံးလၢအချၢဃံ, ဒီးဟဲဆူ အအိၣ်သဃီၤဒီးပံၢ်သလိဘကၤတဖၣ်တက့ၢ်. 24 ဒီး တၢ်ကမၤအသးတုၤ နနၢ်ဟူတၢ်အသီၣ်လၢပံၢ်သလိ ဘကၤအခံန့ၣ်ဒီး, နဘၣ်ထိၣ်ဂဲၤနသးလီၤ. အဂ့ၢ်ဒ် အံၤ, တုၤနုၤတစုယွၤကလဲၤလၢနမဲာ်ညါ ဒ်သိးအကကျီကွံာ်ပှၤဖလ့ၡသးဖိအသုးမုၢ်န့ၣ်လီၤ.
25 ဒီးစီၤဒၤဝံး မၤဝဲဒ်ယွၤမၤလိာ်အီၤအသိးန့ၣ်, ဒီးကျီ ကွံာ်ပှၤဖလ့ၡသးဖိလၢ က့ဘၤပၢၢ်လၢနဟဲတုၤလၢက့ စ့ၢ်လီၤ.
6၆
1 ဒီးစီၤဒၤဝံးဒုးအိၣ်ဖှိၣ်ရိဖှိၣ် ပှၤဃုထၢဖိလၢအံၣ်စရ့ လးအကျါခဲလၢာ်, ပှၤသၢကလးလီၤ.
2 ဒီးစီၤဒၤဝံးဂဲၤဆၢထၢၣ်, ဒီးလဲၤဒီးပှၤဂီၢ်မုၢ်ခဲလၢာ်လၢ အအိၣ်ဒီးအီၤ, လၢဘၤလ့ၤလၢ ယူဒၤအပူၤ, ဒ်သိးအ ကဟဲစိာ်ယွၤအတလါဖဲန့ၣ် လၢတၢ်ယုၢ်အမံၤလၢတၢ် သုးမုၢ်ဂီၢ်မုၢ်အယွၤအမံၤလၢ အအိၣ်ဝဲလၢခရူာ်တဖၣ် အဘၢၣ်စၢၤန့ၣ်လီၤ. 3 ဒီးပာ်တလါလၢလ့ၣ်ကဟၣ် အသီတဆိအဖီခိၣ်, ဒီးဟဲစိာ်ဝဲလၢစီၤအဘံနဒာ်အ ဟံၣ်လၢအအိၣ်ဝဲလၢ ကံဘဧၤအပူၤ, ဒီးစီၤအဘံနဒာ် အဖိခွါစီၤဧူးစၤ, ဒီးစီၤအဃံယိၤဆှၢလ့ၣ်ကဟၣ်အသီ န့ၣ်လီၤ.
4 ဒီးဟဲစိာ်ဝဲလၢစီၤအဘံနဒာ်အဟံၣ် လၢအအိၣ်ဝဲလၢ ကံဘဧၤအပူၤ အိၣ်ဒီးယွၤအတလါဒီးစီၤအဃံယိၤလဲၤဝဲလၢတလါအမဲာ်ညါလီၤ.
5 ဒီးစီၤဒၤဝံးအိၣ်ဒီး ပှၤအံၣ်စရ့လးအပှၤဟံၣ်ဖိခဲလၢာ် န့ၣ်ဒ့တၢ်ပှီၢ်တၢ်အကလုၢ်ကလုာ် ဘၣ်ဃးဒီးသ့ၣ်ဆှိ, လၢတနၢ်, ဒီးလၢသီတူၢ်, ဒီးလၢဒၢ, ဒီးလၢနီၣ်ဝးတၢ် သီၣ်, ဒီးလၢစှၢၣ်စှံးလီၤ.
6 ဒီးဟဲဝဲတုၤလၢစီၤနၤကိၣ်အကြဲၢ်ပူၤ, ဒီးစီၤဧူးစၤယူာ် ထီၣ်အစုဆူယွၤအတလါ, ဒီးဟံးဃာ်အီၤလီၤ. အဂ့ၢ် ဒ်အံၤ, ဂီၤဖံးတဖၣ်မၤဟူးဝးအီၤလီၤ.
7 ဒီးယွၤအသးထီၣ် ကဲထီၣ်ဘၣ်စီၤဧူးစၤ, ဒီးယွၤကျီ ကွံာ်အီၤလၢအတၢ်ကမၣ်အဃိ, ဒီးသံဝဲလၢယွၤအတ လါအဃၢၤလီၤ. 8 ဒီးမ့ၢ်ယွၤဘၢၣ်ဖျိတၢ်လၢစီၤဧူးစၤ အလိၤဒီး, စီၤဒၤဝံးအသးတမုာ်ဘၣ်. ဒီးယုၢ်တၢ်အလီၢ် အမံၤလၢဖ့ရ့းဧူးစၤ တုၤမုၢ်မဆါတနံၤအံၤလီၤ.
9 ဒီးစီၤဒၤဝံးပျံၤယွၤလၢမုၢ်တနံၤန့ၣ်, ဒီးစံးဝဲဒၣ်, ယွၤ အတလါကဟဲဆူယအိၣ်ဒ်လဲၣ်. 10 ဒီးစီၤဒၤဝံးဒုးဟးထီၣ်ယွၤအတလါဆူ စီၤဒၤဝံးအဝ့ၢ်ပူၤန့ၣ်အသးတအိၣ်ဘၣ်. ဒီးစီၤဒၤဝံးစိာ်ဝဲဆူတၢ်ကပၤ, ဆူပှၤကံးတံးဖိ စီၤဧိၤဘ့းအ့ဒိၣ်အဟံၣ်ပူၤလီၤ.―
11 ဒီးယွၤအတလါအိၣ်ဝဲလၢ ပှၤကံးတံးဖိစီၤဧိၤဘ့းအ့ဒိၣ် အဟံၣ်ပူၤန့ၣ်သၢလါလီၤ. ဒီးယွၤဆိၣ်ဂ့ၤစီၤဧိၤဘ့းအ့ ဒိၣ်ဒီးအပှၤဟံၣ်ဖိခဲလၢာ်လီၤ.
12 ဒီးပှၤဒုးနဲၣ်စီၤပၤဒၤဝံး, ဒီးစံးဝဲဒၣ်, ယွၤဆိၣ်ဂ့ၤစီၤဧိၤ ဘ့းအ့ဒိၣ်အပှၤဟံၣ်ဖိ, ဒီးကယဲၢ်တၢ်ဘၣ်ဃးဒီးအီၤ လၢယွၤအတလါအဃိလီၤ. ဒီးစီၤဒၤဝံးလဲၤတၢ်, ဒီးဟဲ စိာ်ယွၤအတလါလၢစီၤဧိၤဘ့းအ့ဒိၣ်အဟံၣ်ပူၤ ဆူစီၤ ဒၤဝံးအဝ့ၢ်ပူၤအိၣ်ဒီးတၢ်သူၣ်ခုသးခုလီၤ.
13 ဒီးတုၤပှၤလၢအစိာ်ယွၤအတလါခါ တၢ်ဃုဘျီဒီးတၢ် မၤအသးလၢအဝဲဒၣ်လုၢ်ဂီၤဖံး, ဒီးတၢ်အဘီၣ်လီၤ.
14 ဒီးစီၤဒၤဝံးဂဲၤကလံၣ်လၢယွၤအမဲာ်ညါ ဒီးအဂံၢ်အ ဘါခဲလၢာ်, ဒီးစီၤဒၤဝံးကံၢ်တူာ်အသးလၢ အ့ဖိးဖှီဝါ ကဆှၣ်လီၤ. 15 ဒီးစီၤဒၤဝံး, ဒီးအံၣ်စရ့လးအပှၤဟံၣ်ဖိ ခဲလၢာ်ဟဲစိာ်ယွၤအတလါ အိၣ်ဒီးတၢ်ကိးပသူထီၣ်, ဒီးကွဲၤအသီၣ်လီၤ.
16 ဒီးယွၤအတလါဟဲနုာ်လၢစီၤဒၤဝံးအဝ့ၢ်ပူၤ, ဒီးစီၤစီ လူးအဖိမုၣ်နီၢ်မံၤကၤလးကွၢ်တၢ်လၢ တၢ်ထူၣ်ဖျိ, ဒီး ထံၣ်စီၤဒၤဝံးစံၣ်ထီၣ်, ဒီးဂဲၤကလံၣ်လၢယွၤအမဲာ်ညါ, ဒီးတပးကဲဘၣ်အီၤလၢအသးကံၢ်ပူၤဘၣ်.
17 ဒီးပှၤဟဲစိာ်ယွၤအတလါ, ဒီးပာ်လီၤဝဲလၢအလီၢ်ဒၣ် ဝဲလၢ ဒဲအသးကံၢ်ပူၤလၢ စီၤဒၤဝံးသူၣ်ဝဲလၢအဂီၢ် လီၤ. ဒီးစီၤဒၤဝံး လုၢ်တၢ်လုၢ်မ့ၣ်အူ, ဒီးတၢ်လုၢ်မၤဃူ မၤဖိးတၢ်လၢယွၤအမဲာ်ညါလီၤ.
18 ဒီးတုၤစီၤဒၤဝံးလုၢ်တၢ်လုၢ်မ့ၣ်အူ, ဒီတၢ်လုၢ်မၤဃူ မၤဖိးတၢ်ဝံၤဒီး, ဆိၣ်ဂ့ၤပှၤဂီၢ်မုၢ်လၢတၢ်သုးမုၢ်ဂီၢ်မုၢ်အ ယွၤအမံၤလီၤ.
19 ဒီၤနီၤဖးဟ့ၣ်ပှၤဂီၢ်မုၢ်ခဲလၢာ်, ပှၤအံၣ်စရ့လးအဂီၢ်မုၢ် ခဲလၢာ်လၢပိာ်ခွါပၢၢ်လၢပိာ်မုၣ်, တဂၤကိၣ်ဘ့ၣ်ဘၣ် တဘ့ၣ်, ဒီးတၢ်ညၣ်ဂ့ၤတလိၣ်, ဒီးတၢ်အီတကွံးကိးဂၤ ဒဲး, ဒီးပှၤက့ၤက့ၤဝဲဆူအဟံၣ်ဒၣ်ဝဲခဲလၢာ်လီၤ.
20 ဒီးစီၤဒၤဝံးဟဲက့ၤဆိၣ်ဂ့ၤအပှၤဟံၣ်ဖိလီၤ. ဒီးစီၤစီလူး အဖိမုၣ်နီၢ်မံၤကၤလးဟဲသဂၢၢ်စီၤဒၤဝံး, ဒီးစံးဝဲဒၣ်, အံၣ်စရ့လးအစီၤပၤလၢ အဘ့ၣ်လီၤကွံာ်အကူအသိး လၢအခ့အပှၤအကုၢ်ပိာ်မုၣ်အမဲာ်ညါ, ဒ်ပှၤဟးဂီၤဖိ ဘ့ၣ်လီၤကွံာ်အကူအသိးအိၣ်ဖျါအသိးန့ၣ် အလၤက ပီၤလၢမုၢ်မဆါတနံၤမ့ၢ်ဆံးဒိၣ်လဲၣ်.
21 ဒီးစီၤဒၤဝံးစံးဘၣ်နီၢ်မံၤကၤလး, အိၣ်လၢယွၤအမဲာ် ညါလၢအဃုထၢယၤလၢနပၢ်အမဲာ်ညါ, ဒီးလၢအပှၤ ဟံၣ်ဖိခဲလၢာ်အမဲာ်ညါ, ဒ်သိးအကပာ်ယၤလၢယွၤအ ပှၤဂီၢ်မုၢ်အဖီခိၣ်, လၢအံၣ်စရ့လးအဖီခိၣ်လီၤ. မၤသးဒ် န့ၣ်ဒီးယကလိာ်ကွဲတၢ်လၢယွၤအမဲာ်ညါလီၤ. 22 ဒီးယ ကမၤဟးဂီၤယသးနးန့ၢ်အန့ၢ်တက့ၢ်, ဒီးယကဆီၣ် လီၤယသးလၢယမဲာ်ညါဒၣ်ယဲ, ဒီးကုၢ်ပိာ်မုၣ်တဖၣ် လၢနကတိၤတၢ်လၢအဂ့ၢ်အကျိၤန့ၣ် ကမၤလၤကပီၤ ယၤလီၤ.
23 ဒီးစီၤစီလူးအဖိမုၣ်နီၢ်မံကၤလး တအိၣ်ဘၣ်ဒီးအဖိ တုၤမုၢ်နံၤလၢအသံလီၤ.
7၇
1 ဒီးစီၤပၤဆ့ၣ်နီၤလၢအဟံၣ်ပူၤ, ဒီးယွၤဒုးအိၣ်ဘှံးအီၤ လၢအဒုၣ်အဒါအိၣ်ဝးတရံးအီၤခဲလၢာ်လီၤ. 2 တၢ်မၤ အသးလၢစီၤပၤစံးဘၣ်ဝံနၤသၣ်, ကွၢ်စာ်တက့ၢ်. ယ အိၣ်ယဆိးလၢဟံၣ်သ့ၣ်ဆှိးအ့ရ့းအပူၤ, မ့မ့ၢ်ယွၤအ အတလါအိၣ်ဝဲလၢယၣ်သဒၢတၢ်အပူၤလီၤ.
3 ဒီးစီၤနၤသၣ်စံးဘၣ်စီၤပၤ, လဲၤမၤကယဲၢ်တၢ်လၢအ အိၣ်ဝဲလၢ နသးကံၢ်ပူၤတက့ၢ်. အဂ့ၢ်ဒ်အံၤ, ယွၤအိၣ်ဒီး နၤလီၤ.
4 ဒီးလၢမုၢ်နၤန့ၣ် တၢ်မၤအသးလၢယွၤအကလုၢ်ဘၣ် စီၤနၤသၣ်, ဒီးစံးဝဲဒၣ်, 5 လဲၤစံးဘၣ်ယခ့ယပှၤစီၤဒၤဝံး, ယွၤစံးဝဲဒ်အံၤ, နကသူၣ်ယဟံၣ်လၢယကအိၣ်ကဆိး လၢအပူၤစ့ၢ်ကီးဧါ, 6 ဒီးယတအိၣ်တဆိးလၢဟံၣ်ပူၤ လၢမုၢ်နံၤလၢယဒုးဟဲထီၣ် ပှၤအံၣ်စရ့လးဖိလၢအဲၤ ကူပတူး တုၤမုၢ်မဆါတနံၤအံၤဘၣ်, ဒီးယလဲၤတၢ်လၢ ဒဲပူၤဒီးလၢတၢ်အိၣ်အလီၢ်လီၤ. 7 လၢကယဲၢ်တၢ်လီၢ် ဖဲယလဲၤတၢ် ဒီးပှၤအံၣ်စရ့လးဖိအပူၤန့ၣ် ယကတိၤ တၢ်ဒီးပှၤအံၣ်စရ့လးဖိအဒူၣ်တဒူၣ်ဒူၣ်လၢ ယမၤလိာ် လၢအကအံးက့ၤကွၢ်က့ၤ ယပှၤဂီၢ်မုၢ်အံၣ်စရ့လး, ဒီး စံး, သုတသူၣ်ထီၣ်န့ၢ်ယၤလၢ ဟံၣ်သ့ၣ်ဆှိးအ့ရ့းန့ၣ် မ့ၢ်အဘၣ်မနုၤလဲၣ်န့ၣ်ဧါ.
8 ဒီးခဲကနံၣ်အံၤ, နဘၣ်စံးဘၣ်ယခ့ယပှၤစီၤဒၤဝံးဒ် အံၤ, တၢ်သုးမုၢ်ဂီၢ်မုၢ်အယွၤစံးဒ်အံၤ, ယဟံးထီၣ်ကွံာ် နၤလၢသိအကရၢဖဲနကပိာ်သိအခံ, ဒ်သိးနကကဲထီၣ် တၢ်အခိၣ်လၢယပှၤဂီၢ်မုၢ်အဖီခိၣ်, လၢအံၣ်စရ့လးအ ဖီခိၣ်လီၤ. 9 ဒီးဖဲနလဲၤတၢ်တပူၤလၢ်လၢ်န့ၣ်ယအိၣ်ဒီး နၤ, ဒီးယဒီၣ်တဲာ်ကွံာ်နဒုၣ်နဒါခဲလၢာ်လၢနမဲာ်ညါ, ဒီးယပာ်လံနမံၤလၢတၢ်အဒိၣ်, ဒ်ပှၤအဒိၣ်လၢဟီၣ်ခိၣ် ချၢအမံၤအသိးလံ.
10 (ဒီးယကပာ်တၢ်အလီၢ်လၢယပှၤဂီၢ်မုၢ် အံၣ်စရ့လး အဂီၢ်, ဒီးယကသူၣ်လီၤအီၤဒ်သိး အကအိၣ်ကဆိး လၢအလီၢ်ဒၣ်ဝဲ, ဒီးတဟးလၢၤဘၣ်, ဒီးပှၤအၢဖိတ မၤနးမၤဖှီၣ်လၢၤဘၣ်အီၤ, ဒ်လၢအခီၣ်ထံးအသိးန့ၣ် ဘၣ်. 11 ဒီးလၢမုၢ်တနံၤလၢယမၤလိာ်ပှၤစံၣ်ညီၣ်ကွီၢ် လၢယပှၤဂီၢ်မုၢ်အံၣ်စရ့လးအဖီခိၣ်, ဒီးဒုးအိၣ်ဘှံးနၤ လၢနဒုၣ်နဒါခဲလၢာ်န့ၣ်လံၤလံၤလီၤ) ဒီးယွၤစံးဘၣ် နၤလၢအကသူၣ်န့ၢ်နၤလၢဟံၣ်တဖျၢၣ်လီၤ. 12 ဒီးတုၤ နမုၢ်နံၤပှဲၤထီၣ်, ဒီးနမံဒီးနပၢ်တဖၣ်ဒီး, ယကပာ်ထီၣ် နချံနသၣ်လၢနလီၢ်ခံန့ၣ် လၢအကဟဲလၢနဟၢဖၢပူၤ, ဒီးယကဒုးအိၣ်ဂၢၢ်ဆိးကျၢၤအဘီအမုၢ်လီၤ. 13 အဝဲဒၣ် တဂၤန့ၣ် ကသူၣ်ဟံၣ်တဖျၢၣ်လၢယမံၤအဂီၢ်, ဒီးယ ကဒုးအိၣ်ဂၢၢ်ဆိးကျၢၤ အဘီအမုၢ်အလီၢ်ပစိာ်လီၤစိၤ လီၤထီလီၤ. 14 ဒီးယကကဲထီၣ်အပၢ်, ဒီးအဝဲဒၣ်က ကဲထီၣ်ယဖိခွါလီၤ. မ့ၢ်မၤတၢ်ဒဲးဘးဒီး, ယကသိၣ်ဃီၣ် အီၤလၢပှၤကညီအနီၣ်တီၢ်, ဒီးလၢပှၤကညီဖိအနီၣ်တီၢ် အလီၢ်တဖၣ်လီၤ. 15 ဘၣ်ဆၣ်ဒီးယတၢ်သးကညီၤတ ဟးသဒၣ်ဘၣ်အီၤ ဒ်ယဟံးထီၣ်က့ၤအီၤလၢ စီၤစီလူး လၢယညိကွံာ်လၢနမဲာ်ညါအသိးန့ၣ်ဘၣ်. 16 ဒီးနဟံၣ် ဒီးနဘီနမုၢ်ကအိၣ်ဂၢၢ်ဆိးကျၢၤ လီၤစိၤလီၤထီလၢန မဲာ်ညါ, ဒီးနလီၢ်ပစိာ်ကအိၣ်လီၤစိၤလီၤထီလီၤ.
17 ဒ်တၢ်ကတိၤခဲလၢာ်န့ၣ်အသိး, ဒီးဒ်ကယဲၢ်ထံၣ်တၢ် လၢညါခီအံၤအသိးန့ၣ်, စီၤနၤသၣ်ကတိၤတၢ်ဒီးစီၤဒၤ ဝံးဒ်န့ၣ်အသိးလီၤ. 18 ဒီးစီၤပၤဒၤဝံးလဲၤနုာ်, ဒီးဆ့ၣ်နီၤလၢယွၤအမဲာ်ညါ, ဒီးစံးဝဲဒၣ်, ယမ့ၢ်မတၤတဂၤလဲၣ်, ကစၢ်ယွၤဧၢ, ဒီးယဟံၣ်လၢနဆှၢယၤတုၤခဲကနံၣ်အံၤ, မ့ၢ်မနုၤတမံၤလဲၣ်.―
19 ဒီးနကတိၤတၢ်လၢ နခ့နပှၤအဟံၣ်အဂ့ၢ်အကျိၤယံာ် ယံာ်ကလဲာ်အံၤ မ့ၢ်တၢ်အဆံးလၢနမဲာ်ညါန့ၣ်ဧါ. ဒီး ကစၢ်ယွၤဧၢ, အဝဲန့ၣ်မ့ၢ်ပှၤကညီအလုၢ်အလၢ်စ့ၢ်ကီး ဧါ.
20 ဒီးစီၤဒၤဝံးစံးဒံးလၢနၤသ့မနုၤတမံၤလဲၣ်. နသ့ၣ်ညါန ခ့နပှၤ, ကစၢ်ယွၤဧၢ. 21 လၢနကလုၢ်ကထါအဃိ, ဒီးဒ် နသးဒၣ်နဲအသိးန့ၣ် နမၤတၢ်အဒိၣ်တဖၣ်အံၤ ဒ်သိး နခ့နပှၤကသ့ၣ်ညါတၢ်လီၤ. 22 မၤသးဒ်န့ၣ်ဒီးနမ့ၢ်တၢ် အဒိၣ်, ကစၢ်ယွၤဧၢ. အဂ့ၢ်ဒ်အံၤ, ဒ်နၤအသိးပှၤတအိၣ် ဘၣ်နီတဂၤဘၣ်. ဒီးကစၢ်လၢနမဲာ်ညါတအိၣ်ဘၣ်. ဒ်ကယဲၢ်တၢ်လၢပနၢ်ဟူလၢပနၢ်အသိးန့ၣ်လီၤ. 23 ဒီး ပှၤတကလုာ်လၢဟီၣ်ခိၣ်ချၢ လီၤဂာ်နပှၤဂီၢ်မုၢ်, အံၣ် စရ့လးလၢယွၤလဲၤပှ့ၤက့ၤလၢ ပှၤတကလုာ်လၢအဂီၢ် ဒၣ်ဝဲ, ဒ်သိးအကမၤအီၤလၢအမံၤ, ဒီးဒ်သိးအကမၤ တၢ်အဒိၣ်တဖၣ်လၢသုဂီၢ်, ဒီးတၢ်ပျံၤအလီၢ်တဖၣ်ဒီး လၢနကီၢ်အဂီၢ် လၢနပှၤဂီၢ်မုၢ်အမဲာ်ညါ လၢနပှ့ၤက့ၤ အီၤလၢနဂီၢ် လၢအဲၤကူပတူး, လၢပှၤကလုာ်တဖၣ် ဒီးအကစၢ်တဖၣ်န့ၣ်, မ့ၢ်မနုၤတကလုာ်လဲၣ်. 24 အ ဂ့ၢ်ဒ်အံၤ, နပာ်ဂၢၢ်ပာ်ကျၢၤလံလၢလၢနဂီၢ်နပှၤဂီၢ်မုၢ် အံၣ်စရ့လးလၢနပှၤတကလုာ်လၢ နဂီၢ်အစိၤစိၤအ ဃၣ်ဃၣ်, ဒီးနဲဒၣ်ယွၤဧၢ, နကဲထီၣ်လံအကစၢ်လံ.
25 ဒီးခဲကနံၣ်အံၤကစၢ်ယွၤဧၢ, တၢ်ကတိၤလၢနကတိၤ တၢ်လၢနခ့နပှၤအဂ့ၢ်အကျိၤ, ဒီးလၢအဟံၣ်အဂ့ၢ်အ ကျိၤန့ၣ်, မၤဂၢၢ်မၤကျၢၤအီၤလီၤစိၤလီၤထီ, ဒီးမၤတၢ် ဒ်နကတိၤတၢ်အသိးန့ၣ်တက့ၢ်. 26 ဒီးမ်တၢ်ပာ်ဒိၣ်နမံၤ လီၤစိၤလီၤထီ, ဒီးစံး, တၢ်သုးမုၢ်ဂီၢ်မုၢ်အယွၤ မ့ၢ်အံၣ်စ ရ့လးအကစၢ်, ဒီးမ်နခ့နပှၤစီၤဒၤဝံးအဟံၣ်အိၣ်ဂၢၢ်ဆိး ကျၢၤလၢနမဲာ်ညါတက့ၢ်. 27 အဂ့ၢ်ဒ်အံၤ, နဲဒၣ်တၢ်သုး မုၢ်ဂီၢ်မုၢ်အယွၤ, အံၣ်စရ့လးအကစၢ်ဧၢ, နလီၣ်ဖျါထီၣ် လၢနခ့နပှၤအနၢ်ပူၤ, ဒီးနစံး, ယကသူၣ်န့ၢ်နၤလၢ ဟံၣ်တဖျၢၣ်လီၤ. မၤသးဒ်န့ၣ်ဒီးနခ့နပှၤ ထံၣ်န့ၢ်တၢ် လၢအသးကံၢ်ပူၤ ဒ်သိးအကဘါထုကဖၣ်တၢ်ဘါထု ကဖၣ်အံၤလၢနၤလီၤ.
28 ဒီးခဲကနံၣ်အံၤ, ကစၢ်ယွၤဧၢ, နမ့ၢ်ကစၢ်တဂၤန့ၣ်, ဒီးနကလုၢ်မ့ၢ်တၢ်အမ့ၢ်အတီ, ဒီးနစံးပာ်တၢ်ဂ့ၤအံၤ လၢနခ့နပှၤလီၤ. 29 ဒီးခဲကနံၣ်အံၤ, မ်အဘၣ်နသးဒီး ဆိၣ်ဂ့ၤနခ့နပှၤအဟံၣ် ဒ်သိးအကအိၣ်ဝဲဆိးဝဲလၢန မဲာ်ညါလီၤစိၤလီၤထီတက့ၢ်. အဂ့ၢ်ဒ်အံၤ, နဲဒၣ်ကစၢ် ယွၤဧၢ, နကတိၤတၢ်လံ. ဒီးမ်နခ့နပှၤအဟံၣ်ဘၣ်ဆိၣ် ဂ့ၤလၢနတၢ်ဆိၣ်ဂ့ၤလီၤထူလီၤယိာ်န့ၣ်တက့ၢ်.
8၈
1 ဒီးတၢ်န့ၣ်အလီၢ်ခံ တၢ်မၤအသးလၢစီၤဒၤဝံးကျီကွံာ် ပှၤဖလ့ၡသးဖိ, ဒီးမၤနၢၤအီၤ, ဒီးစီၤဒၤဝံးမၤန့ၢ်မ့သ့း အးမၤလၢပှၤဖလ့ၡသးဖိအစုပူၤလီၤ.
2 ဒီးကျီကွံာ်မိၤအး, ဒီးထိၣ်ဝဲလၢပျံၤတဘိ, ဒီးဒုးမံလီၤ အီၤလၢဟီၣ်ခိၣ်အဖီခိၣ်, ဒီးထိၣ်ဝဲလၢပျံၤခံဘိဒ်သိးအ ကမၤသံအီၤ, ဒီးလၢပျံၤဒီဘိတဘိ ဒ်သိးအကဒုးမူဒံး အီၤလီၤ. ဒီးပှၤမိၤအးဖိကဲထီၣ်စီၤဒၤဝံးအခ့အပှၤ, ဒီး ဟ့ၣ်သွဲလီၤ.
3 ဒီးဖဲစိဘၤအစီၤပၤ စီၤရဃိာ်အဖိခွါစီၤဟးဒးဧ့စ့ၢ်လၢ အလဲၤမၤန့ၢ် အကီၢ်ဃၢၤလၢထံမိၢ်ပှၢ်ဖရၤသးန့ၣ်စီၤဒၤ ဝံးကျီကွံာ်အီၤလီၤ.
4 ဒီးစီၤဒၤဝံးဟံးန့ၢ်ကွံာ်လၢအီၤ ကသ့ၣ်သုးဖိတကထိ နွံကယၤ, ဒီးပှၤခီၣ်သုးဖိခံကလး, ဒီးစီၤဒၤဝံးပဲာ်တဲာ် ကွံာ်လ့ၣ်ကဟၣ်အကသ့ၣ် အခီၣ်ထူၣ်ခဲလၢာ်, ဘၣ် ဆၣ်ဒီးပာ်လီၤတဲာ်လၢအကျါဖဲ အကလၢလၢလ့ၣ်က ဟၣ်အကယၤအဂီၢ်န့ၣ်လီၤ.
5 ဒီးတုၤပှၤစူၤရံဖိလၢ ဒၤမ့ၤစ့းဟဲမၤစၢၤစိဘၤအစီၤပၤ စီၤဟးဒးဧ့စ့ၢ်, ဒီးစီၤဒၤဝံးကျီကွံာ် ပှၤစူၤရံဖိခံကလး ခံကထိလီၤ.
6 ဒီးစီၤဒၤဝံးပာ်ပှၤပၢၤတၢ်ဖိတဖၣ်လၢ စူၤရံဘၣ်ဃး ဒီးဒၤမ့ၤစ့းအပူၤ, ဒီးပှၤစူၤရံဖိကဲထီၣ်စီၤဒၤဝံးအခ့အ ပှၤ, ဒီးဟ့ၣ်သွဲလီၤ. ဒီးဖဲဒၣ်စီၤဒၤဝံးလဲၤတၢ်တပူၤလၢ် လၢ်န့ၢ် ယွၤအံးလီၤကွၢ်လီၤအီၤလီၤ.
7 ဒီးစီၤဒၤဝံးဟံးန့ၢ်အကတီၤထူလၢ အအိၣ်ဝဲလၢစီၤ ဟးဒးဧ့စ့ၢ်အခ့အပှၤအလိၤ, ဒီၤဟဲစိာ်အီၤဆူယရူၤၡ လ့ၣ်လီၤ. 8 ဒီးစီၤဒၤဝံးဟံးန့ၢ်တိၢ်ဧိၤပှာ်ဧိၤအါအါက လဲာ်လၢစီၤဟးဒးဧ့စ့ၢ်အဝ့ၢ်တဖၣ်အပူၤ, လၢဘ့ၤတၤ အပူၤ, ဒီးလၢဘ့ၤရိသဲၤအပူၤလီၤ.
9 ဒီးတုၤဃမါသးအစီၤပၤစီၤတိဧံၤ နၢ်ဟူဝဲလၢစီၤဒၤဝံး ကျီကွံာ်စီၤဟးဒးဧ့စ့ၢ်အပှၤသုးမုၢ်ဂီၢ်မုၢ်ခဲလၢာ်ဒီး, 10 စီၤ တိဧံၤမၢအဖိခွါစိၤယိၤရၣ်လဲၤကတိၤဒိၣ်အီၤ, ဒီးဆိၣ် ဂ့ၤအီၤလၢအဒုးသုးဒီးစီၤဟးဒးဧ့စ့ၢ် ဒီးကျီကွံာ်အီၤအ ဃိလီၤ. (အဂ့ၢ်ဒ်အံၤ, စီၤဟးဒးဧ့စ့ၢ်ဒုးတ့ၢ်တၢ်ဒီးစီၤတိ ဧံၤလီၤ. 11 ) ဒီးဟဲစိာ်ဝဲဒီလီခီစ့ဒီးလီခီထူ, ဒီးလီခီတိၢ် လီၤ. အဝဲသ့ၣ်တဖၣ်န့ၣ် စီၤပၤမၤဘူၣ်ယွၤလၢအီၤအိၣ် ဒီးကျိၣ်ဧိၤစ့ဧိၤ, ဒီးထူဧိၤလွဲဧိၤလၢအမၤဘူၣ်တ့ၢ်ဘၣ် ဃးဒီးကယဲၢ်ပှၤအကလုာ်တဖၣ်လၢ အမၤနၢၤဝဲတဖၣ် န့ၣ်လီၤ. 12 ဒီးဘၣ်ဃးဝဲဒီးစူၤရံ, ဒီးမိၤအး, ဒီးပှၤဧၣ်မိၣ် ဖိ, ဒီးပှၤဖလ့ၡသးဖိ, ဒီးဧမၤလ့းဒီးစိဘၤအစီၤပၤစီၤရ ဃိာ်အဖိခွါစီၤဟးဒးဧ့စ့ၢ်အတၢ်ဂုာ်န့ၢ်န့ၣ်လီၤ.
13 ဒီးတုၤစီၤဒၤဝံးဟဲက့ၤလၢ အကျီကွံာ်ပှၤစူၤရံဖိတက လးဃိးကထိလၢ ကစၢၢ်ကဆူးအံသၣ်အပူၤန့ၣ်ဒီး, မၤ န့ၢ်အမံၤအသၣ်လီၤ.
14 ဒီးပာ်ပှၤပၢၤတၢ်ဖိလၢအဒိၣ်အပူၤ, ပာ်ပှၤပၢၤတၢ်ဖိ လၢအဒိၣ်ဒီဘ့ၣ်ညါအပူၤ, ဒီးကယဲၢ်ပှၤအဒိၣ်ဖိကဲထီၣ် စီၤဒၤဝံးအခ့အပှၤလီၤ. ဖဲဒၣ်စီၤဒၤဝံးလဲၤဝဲတပူၤလၢ် လၢ်န့ၣ်ယွၤအံးထီၣ်ကွၢ်လီၤအီၤလီၤ.
15 ဒီးစီၤဒၤဝံးကဲစီၤပၤလၢ အံၣ်စရ့လးခဲလၢာ်အဖီခိၣ်, ဒီးမၤတၢ်စံၣ်ညီၣ်ဒီးတၢ်တီတၢ်လိၤလၢပှၤဂီၢ်မုၢ်ခဲလၢာ် အဂီၢ်လီၤ. 16 ဒီးနီၢ်စရူယၤအဖိခွါစီၤယိာ်အာ်အိၣ်ဝဲလၢ ပှၤသုးမုၢ်အဖီခိၣ်, ဒီးစီၤအဃံလူးအဖိခွါစီၤယဟိၡၤ ဖးမ့ၢ်ပှၤကွဲးနီၣ်တၢ်လီၤ.
17 ဒီးစီၤအဃ့တူၢ်အဖိခွါစီၤစၤဒိး, ဒီးစီၤအ့ဘယၤသၢ် အဖိခွါစီၤအဃ့ၤမ့လ့း မ့ၢ်ပှၤလုၢ်တၢ်အဒိၣ်တဖၣ်, ဒီး စီၤစရါယၤမ့ၢ်ပှၤကွဲးလံာ်, 18 ဒီးစီၤယဟိယဒါအဖိခွါ စီၤဘနါယၤအိၣ်ဝဲလၢ ပှၤကရံးသးဖိ, ဒီးပှၤဖလ့ၡသး ဖိအဖီခိၣ်, ဒီးစီၤဒၤဝံးအဖိခွါတဖၣ်မ့ၢ်ပဒိၣ်တဖၣ်လီၤ.
9၉
1 ဒီးစီၤဒၤဝံးစံးဝဲဒၣ်, ပှၤအိၣ်လီၤတဲာ်ဒံးလၢစီၤစီလူး အပှၤဟံၣ်ဖိအကျါ, ဒ်သိးယကမၤအီၤလၢတၢ်အဘျုး အဖှိၣ်လၢစီၤယိနၤသၣ်အဃိတဂၤဂၤန့ၣ်ဧါ.
2 ဒီးတၢ်အခ့အပှၤ လၢစီၤစီလူးအပှၤဟံၣ်ဖိအကျါအိၣ် ဝဲတဂၤ, ဒီးအမံၤမ့ၢ်စီၤစံဘၤ, ဒီးပှၤကိးအီၤဆူစီၤဒၤဝံး အအိၣ်, ဒီးစီၤပၤစံးဘၣ်အီၤ, နမ့ၢ်စီၤစံဘၤစ့ၢ်ကီးဧါ. ဒီးစံးဆၢဝဲဒၣ်, နကုၢ်နပှၤလီၤ.
3 ဒီးစီၤပၤစံးဝဲဒၣ်, ပှၤလၢစီၤစီလူးအပှၤဟံၣ်ဖိအကျါ လၢယကမၤအီၤလၢယွၤအဘျုးအဖှိၣ်န့ၣ် တအိၣ်လၢၤ ဘၣ်ဧါ. ဒီးစီၤစံဘၤစံးဘၣ်စီၤပၤ, စီၤယိနၤသၣ်အဖိ ခွါလၢအခီၣ်ဟးဂီၤန့ၣ်အိၣ်ဒံးတဂၤလီၤ.
4 ဒီးစီၤပၤစံးဘၣ်အီၤ, မ့ၢ်အအိၣ်ဖဲလဲၣ်. ဒီးစီၤစံဘၤစံး ဘၣ်စီၤပၤ, ကွၢ်ကွၢ်, အိၣ်ဝဲလၢစီၤဧးမံၤအ့လးအဖိခွါ စီၤမၤကံၢ်အဟံၣ်လၢလိဒဘၢ်အပူၤလီၤ.
5 ဒီးစီၤဒၤဝံးမၢပှၤလဲၤဟဲက့ၤစိာ်အီၤလၢ စီၤဧးမံၤအ့ အဖိခွါစီၤမၤကံၢ်အဟံၣ်လၢလိဒဘၢ်အပူၤလီၤ.
6 ဒီးစီၤစီလူးအဖိခွစီၤယိနၤသၣ်အဖိခွါ စီၤမဖံဘိၤရှ့း ဟဲဆူစီၤဒၤဝံးအအိၣ် ဒီးထိၣ်လီၤပှီၤအသး, ဒီးတီၤလီၤ ကဒွံကျိာ်, ဒီးစီၤဒၤဝံးစံးဝဲဒၣ်, စီၤမဖံဘိရှ့းဧၢ, ဒီးစံး ဆၢဝဲဒၣ်, ကွၢ်ကွၢ်နကုၢ်နပှၤလီၤ.
7 ဒီးစီၤဒၤဝံးစံးဝဲဒၣ်, ပျံၤတၢ်တဂ့ၤ. အဂ့ၢ်ဒ်အံၤ, ယက မၤနၤလၢတၢ်ဘျုးတၢ်ဖှိၣ်လၢ နပၢ်စီၤယိနၤသၣ်အဃိ သပှၢ်တၢၢ်, ဒီးယကဟ့ၣ်က့ၤနၤလၢနပၢ်စီၤစီလူးအ ဟီၣ်ခိၣ်ခဲလၢာ်, ဒီးနဘၣ်အီၣ်တၢ်အီတၢ်လၢယစီၢ်နီၤ ခိၣ်တထံၣ်ဃီလီၤ.
8 ဒီးအဝဲဒၣ်တီၤလီၤကဒွံကျိာ်ဒီးစံးဝဲဒၣ်, လၢနကကွၢ် လီၤထွံၣ်သံတဒုဒ်ယၤအသိးန့ၣ်, နကုၢ်နပှၤမ့ၢ်မနုၤတ မံၤလဲၣ်.
9 ဒီးစီၤပၤကိးန့ၢ်စီၤစီလူးအခ့အပှၤစီၤစံဘၤ, ဒီးစံးဘၣ် အီၤ, ယဟ့ၣ်လီၤလံနကစၢ်အဖိခွါလၢကယဲၢ်တၢ်လၢ အဘၣ်ဃးဒီးစီၤစီလူးဒီးအဟံၣ်ခဲလၢာ်လံ, 10 ဒီးနဲဒၣ် ဒီးနဖိခွါတဖၣ်, ဒီးနကုၢ်နပှၤတဖၣ် ဘၣ်မၤဟီၣ်ခိၣ် လၢအဂီၢ်, ဒီးနဘၣ်ဟဲစိာ်တၢ်ဒ်သိးနကစၢ်အဖိခွါက အိၣ်ဒီးတၢ်အီၣ်လၢ အီၣ်တၢ်အဂီၢ်, ဒီးနကစၢ်အဖိခွါ စီၤမဖံဘိရှ့းကအီၣ်ကိၣ် လၢယစီၢ်နီၤခိၣ်တထံၣ်ဃီ လီၤ. ဒီးစီၤစံဘၤအိၣ်ဒီးအဖိခွါတဆံယဲၢ်ဂၤ, ဒီးအကုၢ် အပှၤခံဆံလီၤ.
11 ဒီးစီၤစံဘၤစံးဘၣ်စီၤပၤ, ဒ်ကယဲၢ်တၢ်လၢယကစၢ် စီၤပၤမၤလိာ်အကုၢ်အပှၤအသိးန့ၣ် နကုၢ်နပှၤကမၤဒ် န့ၣ်သိးလီၤ. ဒီးစီၤပၤစံးဝဲဒၣ်, စီၤမဖံဘိရှ့းကအီၣ်တၢ် လၢယစီၢ်နီၤခိၣ်ဒ်စီၤပၤအဖိခွါတဂၤအသိးန့ၣ်လီၤ.
12 ဒီးစီၤမဖံဘိရှ့းအိၣ်ဒီးအဖိခွါအဆံးတဂၤ, အမံၤမ့ၢ် စီၤမံၤကါလီၤ. ဒီးကယဲၢ်ပှၤလၢအအိၣ်ဝဲဆိးဝဲလၢစီၤစံ ဘၤအဟံၣ်ပူၤခဲလၢာ်န့ၣ် မ့ၢ်စီၤမဖံဘိရှ့းအကုၢ်အပှၤ လီၤ.
13 ဒီးစီၤမဖံဘိရှ့းအိၣ်ဝဲဆိးဝဲလၢ ယရူၤၡလ့ၣ်အပူၤလီၤ. အဂ့ၢ်ဒ်အံၤ, အီၣ်တၢ်တထံၣ်ဃီလၢစီၤပၤအစီၢ်နီၤခိၣ်, ဒီးအခီၣ်ဟးဂီၤခံခီလိာ်လီၤ.
10၁၀
1 ဒီးတၢ်န့ၣ်အလီၢ်ခံတၢ်မၤအသးလၢ ပှၤဧၣ်မိၣ်ဖိအ စီၤပၤသံဝဲ, ဒီးအဖိခွါစီၤဃၤနူၣ်ကဲထီၣ်စီၤပၤလၢအလီၢ် လီၤ.
2 ဒီးစီၤဒၤဝံးစံးဝဲဒၣ်, ယကမၤဘျုးမၤဖှိၣ်စီၤနၤဃၣ်အ ဖိခွါစီၤဃၤနူၣ်, ဒ်အပၢ်မၤဘျုးမၤဖှိၣ်ယၤအသိးန့ၣ်လီၤ. ဒီးစီၤဒၤဝံးမၢပှၤလဲၤမၤမုာ်ထီၣ်က့ၤအီၤလၢ အပၢ်အဃိ လၢအခ့အပှၤအစုပူၤလီၤ. ဒီးစီၤဒၤဝံးအခ့အပှၤဟဲနုာ် လၢပှၤဧၣ်မိၣ်ဖိအကီၢ်ပူၤလီၤ.
3 ဒီးပှၤဧၣ်မိၣ်ဖိအခိၣ်တဖၣ် စံးဘၣ်အကစၢ်စီၤဃၤနူၣ်, စီၤဒၤဝံးမၤလၤမၤကပီၤနပၢ် လၢနမဲာ်လၢအမၢပှၤမၤ မုာ်ထီၣ်က့ၤတၢ်တဖၣ်ဆူနအိၣ်ဧါ. စီၤဒၤဝံးမၢအခ့အ ပှၤဟဲဃုတၢ်လၢဝ့ၢ်ပူၤ, ဒီးကွၢ်ဟုၣ်တၢ်လၢအပူၤ, ဒီး မၤဟးဂီၤအီၤန့ၣ်တမ့ၢ်ဘၣ်ဧါ.
4 ဒီးစီၤဃၤနူၣ်ဟံးန့ၢ်စီၤဒၤဝံးအခ့အပှၤ, ဒီးလူၤအခၣ် ဆူၣ်တခီ, ဒီးကူးတဲာ်အဆ့လၢအသးကံၢ်ပူၤ, ဖဲအခံ ကီၢ်, ဒီးပျၢ်အီၤလီၤ.
5 ဒီးပှၤစံးဘၣ်စီၤဒၤဝံး, ဒီးအဝဲဒၣ်မၢပှၤလဲၤသဂၢၢ်အီၤ လီၤ. အဂ့ၢ်ဒ်အံၤ, ပှၤကညီန့ၣ်အမဲာ်ဆှးဒိၣ်မးလီၤ. ဒီး စီၤပၤစံးဝဲဒၣ်, အိၣ်လၢယရံၤဃိတုၤသုခၣ်ဆူၣ်ထီၣ်, ဒီးဟဲက့ၤတက့ၢ်.
6 ဒီးတုၤပှၤဧၣ်မိၣ်ဖိထံၣ်လၢအနၢအုၣ်လၢ စီၤဒၤဝံးအ မဲာ်ညါဒီး, ပှၤဧၣ်မိၣ်ဖိမၢလီၤတၢ်ဒီးငါပှၤစူၤရံဖိလၢစ့, ပှၤခီၣ်သုးဖိခံကလးဘၣ်ဃးဒီးဘ့ၤသရဃိာ်, ဒီးပှၤစူၤ ရံဖိဘၣ်ဃးဒီးစိဘၤ, ဒီးပှၤတကထိဘၣ်ဃးဒီးစီၤပၤ မကၤ, ဒီးပှၤတကလးခံကထိဘၣ်ဃးဒီးစီၤအံၡတိာ် လီၤ.
7 ဒီးတုၤစီၤဒၤဝံးနၢ်ဟူဝဲဒီး, မၢလီၤစီၤယိၤအာ်ဒီးပှၤသုး ဖိပှၤအဆူၣ်ဂီၢ်မုၢ်ခဲလၢာ်လီၤ.
8 ဒီးပှၤဧၣ်မိၣ်ဖိဟဲထီၣ်ဒီး ကတဲာ်ကတီၤတၢ်ဒုးသုးဖဲ တၢ်လဲၤနုာ်လၢပဲတရီအလီၢ်, ဒီးပှၤစူၤရံဖိဘၣ်ဃးဒီး စိဘၤ, ဒီးရဃိာ်, ဒီးအံၡတိာ်ဒီးမၤကၤအိၣ်ဝဲတပူၤဒၣ် လၢတၢ်ပျီပူၤလီၤ.
9 ဒီးတုၤစီၤယိၤအာ်ထံၣ်လၢ တၢ်ဒုးသုးအလီၢ်အိၣ်ဝဲ လၢအမဲာ်ညါ, ဒီးလၢအချၢဃံဒီး, ဃုထၢပှၤဃုထၢ ဖိခဲလၢာ်လၢအံၣ်စရ့လးအကျါ, ဒီးကတဲာ်ကတီၤအီၤ ထီဒါပှၤစူၤရံဖိလီၤ. 10 ဒီးပှၤအိၣ်လီၤတဲာ်တဖၣ်န့ၣ်ပာ် ဝဲလၢအဒီပုၢ်ဝဲၢ်စီၤအဘံၡဲအစုပူၤ ဒ်သိးအကပာ်အီၤ ထီဒါပှၤဧၣ်မိၣ်ဖိလီၤ.
11 ဒီးစံးဝဲဒၣ်, ပှၤစူၤရံဖိမ့ၢ်ဆူၣ်န့ၢ်ယၤတက့ၢ်ဒီး, နဘၣ် မၤစၢၤယၤ, ဒီးပှၤဧၣ်မိၣ်ဖိမ့ၢ်ဆူၣ်န့ၢ်နၤတက့ၢ်ဒီး, ယက ဟဲမၤစၢၤနၤလီၤ. 12 တံးတဟီၣ်, ဒီးပာ်ဆူၣ်ထီၣ်သကိး ပသးလၢပပှၤဂီၢ်မုၢ်အဂီၢ်, ဒီးလၢပကစၢ်အဝ့ၢ်တဖၣ် အဂီၢ်တက့ၢ်. ဒီးမ်ယွၤမၤတၢ်အဂ့ၤလၢအမဲာ်တက့ၢ်.
13 ဒီးစီၤယိၤအာ်သုးဘူးအသးဒီးပှၤဂီၢ်မုၢ် အိၣ်ဒီးအီၤဒ် သိးအကဒုးတၢ်ဒီးပှၤစူၤရံဖိ, ဒီးအဝဲသ့ၣ်ဃ့ၢ်လၢအမဲာ် ညါလီၤ.
14 ဒီးပှၤဧၣ်မိၣ်ဖိထံၣ်ဝဲလၢ ပှၤစူၤရံဖိဃ့ၢ်သတးဒီး, ဃ့ၢ် စ့ၢ်ကီးဝဲလၢ စီၤအဘံၡဲၤအမဲာ်ညါ, ဒီးလဲၤနုာ်လၢဝ့ၢ်ပူၤ လီၤ. စီၤစီၤယိၤအာ်ဟဲက့ၤလၢပှၤဧၣ်မိၣ်ဖိအအိၣ်, ဒီး ဟဲဝဲဆူယရူၤၡလ့ၣ်လီၤ.
15 ဒီးပှၤစူၤရံဖိထံၣ်လၢ အဘၣ်တၢ်ကျီကွံာ်အီၤလၢအံၣ် စရ့လးအမဲာ်ညါ, ဒီးအိၣ်ဖှိၣ်ရိဖှိၣ်လီၤ.
16 ဒီးစီၤဟးဒးဧ့စ့ၢ်မၢလီၤတၢ်, ဒီးဟဲစိာ်ပှၤစူၤရံဖိလၢ အအိၣ်လၢထံမိၢ်ပှၢ်ဝၢ်ဘးခီ, ဒီးအဝဲသ့ၣ်ဟဲဆူဃ့လၣ် လီၤ. ဒီးစီၤဟးဒးဧ့စ့ၢ်အပှၤသုးမုၢ်အခိၣ်စီၤၡိဘး, လဲၤ လၢအမဲာ်ညါလီၤ. 17 ဒီးပှၤစံးဘၣ်စီၤဒၤဝံး, ဒီးအဝဲဒၣ် ဒုးအိၣ်ဖှိၣ်အံၣ်စရ့လးခဲလၢာ်, ဒီးခီဂာ်ယၢ်ဒ့ၣ်, ဒီးဟဲ ဆူဃ့လၣ်, ဒီးပှၤစူၤရံဖိကတဲာ်ကတီၤတၢ်ထီဒါစီၤဒၤ ဝံး, ဒီးဒုးသုးဒီးအီၤလီၤ.
18 ဒီးပှၤစူၤရံဖိဃ့ၢ်လၢအံၣ်စရ့လးအမဲာ်ညါ, ဒီးစီၤဒၤ ဝံးမၤသံပှၤစူၤရံဖိ အလ့ၣ်ကဟၣ်အပှၤကညီနွံကယၤ, ဒီးပှၤကသ့ၣ်သုးဖိလွံၢ်ကလး, ဒီးကျီကွံာ်ပှၤသုးမုၢ်အ ခိၣ်စီၤၡိဘးလၢအသံဝဲဖဲန့ၣ်လီၤ.
19 ဒီးစီၤပၤခဲလၢာ်လၢအမ့ၢ် စီၤဟးဒးဧ့စ့ၢ်အခ့အပှၤတ ဖၣ်န့ၣ်ထံၣ်ဝဲလၢအဘၣ်တၢ်ကျီကွံာ်အီၤလၢ အံၣ်စရ့ လးအမဲာ်ညါ, ဒီးမၤဃူမၤဖိးဒီးအံၣ်စရ့လး, ဒီးမၤအ တၢ်လီၤ. ဒီးပှၤစူၤရံဖိပျံၤလၢအကမၤစၢၤဒံးပှၤဧၣ်မိၣ်ဖိ လီၤ.
11၁၁
1 ဒီးတုၤနံၣ်ဆၢအလီၢ်, ဒီးအဆၢကတီၢ်ဘၣ်လၢစီၤပၤ တဖၣ်လဲၤထီၣ်ဒီး, တၢ်မၤအသးလၢစီၤဒၤဝံးမၢလီၤစီၤ ယိၤအာ်ဒီးအခ့အပှၤအိၣ်ဒီးအီၤ, ဒီးအံၣ်စရ့လးခဲလၢာ်, ဒီးအဝဲသ့ၣ်မၤဟးဂီၤပှၤဧၣ်မိၣ်ဖိ, ဒီးကဝီၤဃာ်ရးဘး, ဒီးစီၤဒၤဝံးအိၣ်ဝဲလၢယရူၤၡလ့ၣ်အပူၤလီၤ.
2 ဒီးတၢ်မၤအသးလၢ မုၢ်ဟါလီၤဒီး, စီၤဒၤဝံးဂဲၤဆၢ ထၢၣ်လၢအလီၢ်မံ, ဒီးဟးဝဲလၢစီၤပၤအဟံၣ်ခိၣ်လီၤ. ဒီးလၢဟံၣ်ခိၣ်န့ၣ် ထံၣ်ပိာ်မုၣ်တဂၤလုၢ်ထံ န့ၣ်လီၤ. ဒီးပိာ်မုၣ်န့ၣ်အက့ၢ်အဂီၤဂ့ၤမးလီၤ.
3 ဒီးစီၤဒၤဝံးမၢပှၤလဲၤသံကွၢ် လၢပိာ်မုၣ်အဂ့ၢ်အကျိၤ န့ၣ်, ဒီးတၢ်စံးဝဲဒၣ်, အဝဲအံၤမ့ၢ်စီၤအလံဧၣ်အဖိ မုၣ်နီၢ်ဘၤသရှ့ဘၤ, ပှၤဃ့ၤသးဖိစီၤအူၤရံယၤအမါန့ၣ် တမ့ၢ်ဘၣ်ဧါ.
4 ဒီးစီၤဒၤဝံးမၢလီၤကလူးတဖၣ်, ဒီးဟံးန့ၢ်အီၤ, ဒီးအဝဲ ဒၣ်ဟဲနုာ်ဆူအအိၣ်, ဒီးမံဃုာ်ဒီးအီၤလီၤ. (အဂ့ၢ်ဒ်အံၤ, ကဆှီလံလၢအတၢ်တကဆှီဘၣ်န့ၣ်လံ.) ဒီးပိာ်မုၣ် န့ၣ်က့ၤဝဲဆူအဟံၣ်လီၤ.
5 ဒီးပိာ်မုၣ်န့ၣ်ဒၢထီၣ်, ဒီးမၢလီၤတၢ်, ဒီးစံးဘၣ်စီၤဒၤ ဝံး, ဒီးစံးဝဲဒၣ်, ယဒၢထီၣ်လံ.
6 ဒီးစီၤဒၤဝံးမၢလီၤတၢ်ဆူစီၤယိၤအာ်အအိၣ် ဒီးစံးဝဲ ဒၣ်, မၢပှၤဃ့ၤသးဖိစီၤအူၤရံယၤဟဲဆူယအိၣ်တက့ၢ်. ဒီးစီၤယိၤအာ်မၢလီၤစီၤအူၤရံယၤဆူ စီၤဒၤဝံးအအိၣ် လီၤ.
7 ဒီၤတုၤစီၤအူၤရံယၤဟဲဝဲဒီး, စီၤဒၤဝံးသံကွၢ်အီၤလၢ စီၤယိၤအာ်အအိၣ်မုာ်အဂ့ၢ်အကျိၤ, ဒီးလၢပှၤဂီၢ်မုၢ်အ အိၣ်မုာ်အဂ့ၢ်အကျိၤ, ဒီးတၢ်ဒုးသုးအိၣ်ဘီၣ်အိၣ်ညီအ ဂ့ၢ်အကျိၤန့ၣ်လီၤ.
8 ဒီးစီၤဒၤဝံးစံးဘၣ်စီၤအူၤရံယၤ, လဲၤလီၤဆူနဟံၣ်, ဒီး သ့စီနခီၣ်တက့ၢ်. ဒီးစီၤအူၤရံယၤဟးထီၣ်လၢစီၤပၤအ ဟံၣ်, ဒီးတၢ်အီၣ်ပိာ်အခံလၢစီၤပၤအအိၣ်လီၤ.
9 ဒီးစီၤအူၤရံယၤမံဝဲဖဲစီၤပၤအဟံၣ်ကျဲစၢၤ ခီၣ်ထံးအိၣ် ဒီးအကစၢ်အခ့အပှၤခဲလၢာ်, ဒီးတလဲၤလီၤဘၣ်ဆူအ ဟံၣ်ဘၣ်.
10 ဒီးပှၤဒုးနဲၣ်စီၤဒၤဝံးဒီးစံးဝဲဒၣ်, စီၤအူၤရံယၤတလဲၤ လီၤဘၣ်ဆူအဟံၣ်ဘၣ်. ဒီးစီၤဒၤဝံးစံးဘၣ်စီၤအူၤရံ ယၤ, နဟဲက့ၤလၢနကျဲဧိၤကပူၤဧိၤတမ့ၢ်ဘၣ်ဧါ. နတ လဲၤလီၤဘၣ်ဆူနဟံၣ်န့ၣ်မ့ၢ်အဘၣ်မနုၤလဲၣ်.
11 ဒီးစီၤအူၤရံၤယၤစံးဘၣ်စီၤဒၤဝံး, တလါန့ၣ်, ဒီးအံၣ်စ ရ့လး, ဒီးယူဒၤ, အိၣ်ဝဲလၢဒဲပူၤ, ဒီးယကစၢ်စီၤယိၤအာ်, ဒီးယကစၢ်အခ့အပှၤတဖၣ် သူၣ်ဒဲလၢတၢ်ပျီပူၤ, ဒီးယဲ ဒၣ်အံၤယကလဲၤနုာ်လၢယဟံၣ်ပူၤ ဒ်သိးယကအီၣ် တၢ်, ဒီးအီတၢ်, ဒီးမံဃုာ်ဒီးယမါစ့ၢ်ကီးဧါ. ဒ်နမူနဲ, ဒီး နသးမူဝဲအသိးန့ၣ်, ယတမၤဘၣ်တၢ်န့ၣ်ဘၣ်.
12 ဒီးစီၤဒၤဝံးစံးဘၣ်စီၤအူၤရံယၤ, အိၣ်လၢမုၢ်တနံၤအံၤ စ့ၢ်ကီး, ဒီးခဲဂီၤတနံၤယကပျၢ်နၤလီၤ. ဒီးစီၤအူၤရံယၤ အိၣ်ဝဲလၢယရူၤၡလ့ၣ်လၢမုၢ်တနံၤန့ၣ်, ဒီးလၢမုၢ်ဆ့ၣ် ထီၣ်တနံၤန့ၣ်လီၤ.
13 ဒီးစီၤဒၤဝံးကိးန့ၢ်အီၤ, ဒီးအဝဲဒၣ်အီၣ်တၢ်, ဒီးအီတၢ် လၢအမဲာ်ညါ, ဒီးစီၤဒၤဝံးဒုးအီမူၤအီၤ, ဒီးလၢမုၢ်ဟါန့ၣ် ဟးထီၣ်မံလၢအလီၢ်မံပူၤ အိၣ်ဒီးအကစၢ်အခ့အပှၤ, ဒီးတလဲၤလီၤဘၣ်ဝဲဆူအဟံၣ်ဘၣ်.
14 ဒီးမုၢ်ဆ့ၣ်ထီၣ်န့ၣ် တၢ်မၤအသးလၢစီၤဒၤဝံးကွဲးန့ၢ် စီၤယိၤအာ်အလံာ်တဘ့ၣ်, ဒီးဟ့ၣ်ယုၢ်ဝဲလၢစီၤအူၤရံ ယၤအစုပူၤလီၤ.
15 ဒီးကွဲးဝဲလၢလံာ်ပူၤဒီးစံးဝဲဒၣ်, ပာ်စီၤအူၤရံယၤလၢ တၢ်ဒုးသုးဆူၣ်ဆူၣ်ကလဲာ်အမဲာ်ညါ, ဒီးဟဲက့ၤသဒၣ် အီၤဒ်သိးအကဘၣ်တၢ်ကျီကွံာ်အီၤ, ဒီးသံန့ၣ်တက့ၢ်.
16 ဒီးတုၤစီၤယိၤအာ်ကွၢ်ဝ့ၢ်န့ၣ်ဒီး, တၢ်မၤအသးလၢ အပာ်စီၤအူၤရံယၤလၢအလီၢ်ဖဲအသ့ၣ်ညါ ပှၤအဆူၣ် တဖၣ်အိၣ်ဝဲလီၤ. 17 ဒီးပှၤဝ့ၢ်ဖိတဖၣ်လဲၤထီၣ်ဒုးတၢ် ဒီးစီၤယိာ်အာ်, ဒီးပှၤလီၤဃံၤလၢစီၤဒၤဝံးအခ့အပှၤအ ကျါ, ဒီးပှၤဃ့ၤသးဖိစီၤအူၤရံယၤသံဝဲစ့ၢ်ကီးလီၤ.
18 ဒီးစီၤယိာ်အာ်မၢလီၤတၢ်, ဒီးစံးဘၣ်စီၤဒၤဝံးလၢက ယဲၢ်တၢ်ဘၣ်ဃးဒီး တၢ်ဒုးသုးခဲလၢာ်န့ၣ်လီၤ. 19 ဒီး မၤလိာ်ပှၤကလူးတဂၤ, ဒီးစံးဝဲဒၣ်, တုၤနစံၣ်တဲၤတဲ လီၤတၢ်ဘၣ်ဃးဒီးဒုးသုးန့ၣ်လၢစီၤပၤဝံၤဒီး, 20 စီၤပၤ အသးမ့ၢ်ဒိၣ်ထီၣ်ဒီးစံးဘၣ်နၤ, တုၤသုဒုးသုးဒီး, သုသုး ဘူးသုသးဒီးဝ့ၢ်န့ၣ် မ့ၢ်အဘၣ်မနုၤလဲၣ်. သုတသ့ၣ်ညါ ဘၣ်လၢပှၤကခးတၢ်လၢဝ့ၢ်ခိၣ်ဒူန့ၣ်ဘၣ်ဧါ. 21 မ့ၢ်မ တၤကျီကွံာ်စီၤယရူၤဘရှ့းအဖိခွါ စီၤအဘံၤမ့လ့းတဂၤ လဲၣ်. ပိာ်မုၣ်တဂၤကွံာ်လီၤဆၢၣ်ဂူာ်လၢၢ်တကူာ်လၢ ဝ့ၢ်ခိၣ်ဒူလၢအလိၤ, ဒီးသံဝဲလၢတ့ဘ့းန့ၣ်တမ့ၢ်ဘၣ်ဧါ. သုလဲၤဘူးဒီးဝ့ၢ်ခိၣ်ဒူန့ၣ် မ့ၢ်အဘၣ်မနုၤလဲၣ်န့ၣ်ဒီး, စံး စ့ၢ်ကီးနဲ, ပှၤဃ့ၤသးဖိစီၤအူရံယၤသံလံစ့ၢ်ကီးလံ.
22 ဒီးကလူးတဂၤန့ၣ်လဲၤတၢ်, ဒီးဟဲက့ၤ, ဒီးဒုးနဲၣ်စီၤဒၤ ဝံးလၢကယဲၢ်တၢ်လၢ စီၤယိၤအာ်မၢလီၤလၢ အဂီၢ် လီၤ. 23 ဒီးကလူးတဂၤန့ၣ် စံးဘၣ်စီၤဒၤဝံး, ပှၤကညီတဖၣ်န့ၣ်ဆူၣ်န့ၢ်ပှၤ, ဒီးဟဲဝဲဆူပအိၣ်လၢတၢ်ပျီပူၤ, ဒီးပအိၣ်လၢအဖီခိၣ်ပၢၢ်လၢတၢ်လဲၤနုာ်လၢ ပဲတရီအပူၤလီၤ.―
24 ဒီးပှၤခးတၢ်ဖိခးတၢ်လၢ နခ့နပှၤလၢဝ့ၢ်ခိၣ်ဒူအဖီခိၣ်, ဒီးစီၤပၤအခ့အပှၤတဖၣ်သံလံ. ဒီးနခ့နပှၤပှၤဃ့ၤသးဖိ စီၤအူၤရံယၤသံစ့ၢ်ကီးလီၤ.
25 ဒီးစီၤဒၤဝံးစံးဘၣ်ကလူးန့ၣ်, နဘၣ်စံးလၢစီၤယိၤ အာ်ဒ်အံၤ, မ်တၢ်အံၤအသုတကဲထီၣ်တၢ်အၢလၢနမဲာ် တဂ့ၤ. အဂ့ၢ်ဒ်အံၤ, ဘီဧိၤနးဧိၤအီၣ်အဝဲတဂၤ, ဒီးအဝဲ တဂၤလီၤ. ဒုးဆူၣ်ထီၣ်နဒုးတၢ်ထီဒါဝ့ၢ်န့ၣ်, ဒီးမၤဟး ဂီၤအီၤတက့ၢ်. ဒီးဒုးဆူၣ်ထီၣ်အဂံၢ်အဘါတက့ၢ်.
26 ဒီးတုၤစီၤအူၤရံယၤအမါနၢ်ဟူဝဲလၢ အဝၤစီၤအူၤရံ ယၤသံတ့ၢ်ဒီး, ဒဲလီၤအသးနါပှၢ်လၢအဝၤအဃိလီၤ.
27 ဒီးဟီၣ်တၢ်ယၢၤတၢ်ပူၤကွံာ်ဒီး, စီၤဒၤဝံးမၢလီၤတၢ်, ဒီးဟဲစိာ်အီၤဆူအဟံၣ်ပူၤ, ဒီးကဲထီၣ်အမါ, ဒီးဆံးစၢ် န့ၢ်အီၤလၢအဖိခွါလီၤ. ဒီးတၢ်လၢစီၤဒၤဝံးမၤဝဲန့ၣ်မ့ၢ် တၢ်အၢလၢယွၤအမဲာ်လီၤ.
12၁၂
1 ဒီးယွၤမၢလီၤစီၤနၤသၣ်ဆူစီၤဒၤဝံးအအိၣ်လီၤ. ဒီးဟဲ ဝဲဆူအအိၣ်, ဒီးစံးဘၣ်အီၤ, ပှၤခံဂၤအိၣ်ဝဲလၢဝ့ၢ်တ ဖျၢၣ်ဃီလီၤ. အဝဲတဂၤမ့ၢ်ပှၤထူးပှၤတီၤ, ဒီးအဝဲတဂၤ မ့ၢ်ပှၤဖှီၣ်ပှၤယာ်လီၤ.
2 ဒီးပှၤထူးပှၤတီၤတဂၤန့ၣ် အိၣ်ဒီးဂီၤဘုၣ်ဂီၤဖံး, ဒီးသိ ဒီးမဲာ်တဲးလဲးအါအါကလဲာ်လီၤ.
3 ဒီးပှၤဖှီၣ်ဖိယာ်ဖိတဂၤန့ၣ် အတၢ်တအိၣ်ဘၣ်နီတ မံၤဘၣ်. အိၣ်ဝဲထဲသိမိၢ်ဖိလၢအပှ့ၤဝဲ, ဒီးဘုၣ်အီၣ်ဝဲ တဒုလီၤ. ဒီးအတၢ်ဒိၣ်ထီၣ်ဒီးအီၤ, ဒီးအဖိအလံၤလီၤ. အီၣ်ဝဲလၢအတၢ်အီၣ်ဒၣ်ဝဲ, ဒီးအီဝဲလၢအလီခီတဖျၢၣ် ဒၣ်ဝဲအပူၤ, ဒီးမံလီၤလၢအသးနါပှၢ်, ဒီးကဲထီၣ်လၢအ ဂီၢ် ဒ်အဖိမုၣ်တဂၤအသိးန့ၣ်လီၤ.
4 ဒီးပှၤလဲၤတၢ်တဂၤဟဲဝဲဆူ ပှၤထူးပှၤတီၤအအိၣ်, ဒီး အဝဲဒၣ်သးလီအသိဒၣ်ဝဲ, အမဲာ်တဲးလဲးဒၣ်ဝဲ, ဒီးအ ဂီၤဘုၣ်ဂီၤဖံးဒၣ်ဝဲလၢ အကကတဲာ်ကတီၤတၢ်လၢပှၤ ဟဲပိာ်ကျဲလၢအဟဲဆူအအိၣ်တဂၤအဂီၢ်, ဒီးဟံးန့ၢ်ပှၤ ဖှီၣ်ပှၤယာ်အသိးဖိတဒု, ဒီးကတဲာ်ကတီၤအီၤလၢပှၤ လၢအဟဲဆူအအိၣ်တဂၤအဂီၢ်လီၤ.
5 ဒီးစီၤဒၤဝံးအသးထီၣ်ကဲၤထီၣ်ဘၣ် ပှၤတဂၤန့ၣ်ဒိၣ် ဒိၣ်ကလဲာ်, ဒီးစံးလၢစီၤနၤသၣ်, ယွၤမူဝဲ, ပှၤလၢအမၤ တၢ်တမံၤန့ၣ်မ့ၢ်ပှၤကြၢးသံလီၤ. 6 ဒီးကဘၣ်ဟ့ၣ်ကၣ် သိဖိလွံၢ်စးလၢအမၤတၢ်န့ၣ်အဃိ, ဒီးလၢအတသးက ညီၤဘၣ်တၢ်အဃိလီၤ.
7 ဒီးစီၤနၤသၣ်စံးဘၣ်စီၤဒၤဝံးန့ၣ်, နဲဒၣ်အံၤနမ့ၢ်ပှၤက ညီအဝဲန့ၣ်တဂၤလီၤ. ယွၤ, အံၣ်စရ့လးအကစၢ်စံးဝဲဒ် အံၤ, ယဖှူနၤစီၤပၤလၢအံၣ်စရ့လးအဖီခိၣ်, ဒီးယမၤပူၤ မၤဖျဲးနၤလၢစီၤစီလူးအစုပူၤ, 8 ဒီးယဟ့ၣ်လီၤနၤလၢန ကစၢ်အဟံၣ်, ဒီးနကစၢ်အမါတဖၣ် ဆူနသးနါပှၢ်, ဒီးယဟ့ၣ်လီၤနၤလၢ အံၣ်စရ့လးဒီးယူဒၤအဟံၣ်, ဒီး မ့ၢ်ဆံးကဲၣ်ဆိးဒီး, ယကဟ့ၣ်လီၤနၤဒ်အံၤဒ်နုၤလီၤ.
9 ဒီးနတပးကဲဘၣ်ယွၤအတၢ်မၤလိာ်ဘၣ်ဒီး, နမၤတၢ် အၢလၢအမဲာ်န့ၣ် မ့ၢ်အဘၣ်မနုၤလဲၣ်. နမၤသံပှၤဃ့ၤ သးဖိစီၤအူၤရံယၤလၢနး, ဒီးနဟံးန့ၢ်အမါလၢနမါ, ဒီး နမၤသံအီၤလၢပှၤဧၣ်မိၣ်ဖိအနးလီၤ. 10 ဒီးခဲကနံၣ်အံၤ နးန့ၣ်တဟးဖးဘၣ်လၢနဟံၣ်လီၤစိၤလီၤထီလီၤ. အ ဂ့ၢ်ဒ်အံၤ, နတပးကဲဘၣ်ယၤဘၣ်. ဒီးဟံးန့ၢ်ပှၤဃ့ၤသး ဖိစီၤအူၤရံယၤအမါလၢနမါန့ၣ်လီၤ. 11 ဒီးယွၤစံးဝဲဒ်အံၤ, ကွၢ်ကွၢ်, ယကဒုးဂဲၤဆၢထၢၣ်တၢ်အၢထီဒါနၤလၢနဟံၣ်ဒၣ်နဲအပူၤ, ဒီးယကဟံးန့ၢ်နမါတဖၣ်လၢနမဲာ်ညါ, ဒီးဟ့ၣ်လီၤအီၤလၢပှၤလၢနဃၢၤ, ဒီးကမံဃုာ်ဒီးနမါတဖၣ် လၢမုၢ်အံၤအမဲာ်ညါလီၤ.―
12 နဲဒၣ်နမၤတၢ်ခူသူၣ်, မ့မ့ၢ်ယဲဒၣ်အံၤ ယကမၤတၢ်တ မံၤအံၤလၢ အံၣ်စရ့လးခဲလၢာ်အမဲာ်ညါ, ဒီးလၢမုၢ်အ အမဲာ်ညါလီၤ.
13 ဒီးစီၤဒၤဝံးစံးဘၣ်စီၤနၤသၣ်, ယမၤကမၣ်ဘၣ်လံယွၤ လံ. ဒီးစီၤနၤသၣ်စံးဘၣ်စီၤဒၤဝံး, ယွၤမၤပူၤမၤဖျဲးလံန တၢ်ဒဲးဘးလံ. နတသံဘၣ်. 14 ဘၣ်ဆၣ်ဒီးလၢတၢ်မၤ တမံၤအံၤအဃိ, နဟ့ၣ်ယွၤအဒုၣ်အဒါလၢတၢ်ဒုၣ်ဒွဲၣ် အလီၢ်သတးဒီး, ဖိသၣ်လၢအအိၣ်ဖျဲၣ်လၢနဂီၢ်တဂၤ သံဒီးကသံစ့ၢ်ကီးလီၤ.
15 ဒီးစီၤနၤသၣ်က့ၤဝဲဆူအဟံၣ်လီၤ. ဒီးယွၤတီၢ်ဖိသၣ် လၢစီၤအူၤရံယၤအမါဆံးစၢ်န့ၢ်လၢ စီၤဒၤဝံးအဂီၢ်, ဒီး ဆါဝဲနးမးလီၤ. 16 ဒီးစီၤဒၤဝံးဃ့ကညးယွၤလၢဖိသၣ် အဂီၢ်, ဒီးစီၤဒၤဝံးဒုၣ်တၢ်အီၣ်တၢ်အီ, ဒီးလဲၤနုာ်ဝဲဒီး မံလီၤသီတနၤကျၢၤလၢဟီၣ်ခိၣ်အဖီခိၣ်လီၤ.
17 ဒီးအပှၤဟံၣ်ဖိအသူၣ်က့သးပှၢ်ဂဲၤဆၢထၢၣ်, ဒီးလဲၤ ဆူအအိၣ်ဒ်သိးအကဝံၣ်ဆၢထၢၣ်အီၤလၢဟီၣ်ခိၣ်, ဒီး အသးတအိၣ်ဘၣ်ဝဲဘၣ်, ဒီးတအီၣ်ဘၣ်တၢ်ဒီးအီၤ ဘၣ်.
18 ဒီးမုၢ်နွံနံၤတနံၤန့ၣ် တၢ်မၤအသးလၢဖိသၣ်သံဝဲလီၤ. ဒီးစီၤဒၤဝံးအခ့အပှၤပျံၤလၢ ကစံးဘၣ်အီၤလၢဖိသၣ် သံလံအဂ့ၢ်လီၤ. အဂ့ၢ်ဒ်အံၤ, အဝဲသ့ၣ်တဖၣ်စံးဝဲဒၣ်, ကွၢ်ကွၢ်, ဖိသၣ်မူဒံးအဖၢမုၢ်ဒီးပကတိၤတၢ်ဒီးအီၤ, ဒီး တကနၣ်ဘၣ်ပကလုၢ်ဘၣ်, ပမ့ၢ်စံးဘၣ်အီၤလၢဖိသၣ် သံလံန့ၣ်ဒီး, ကမၤကိၢ်အသးဒ်လဲၣ်.
19 ဒီးစီၤဒၤဝံးထံၣ်ဘၣ်ဝဲလၢ အခ့အပှၤကတိၤကသွံဒံ, ဒီးစီၤဒၤဝံးနၢ်ပၢၢ်လၢဖိသၣ်သံတ့ၢ်လံ, ဒီးစီၤဒၤဝံးစံး ဘၣ်အခ့အပှၤ, ဖိသၣ်သံလံဧါ, ဒီးစံးဝဲဒၣ်, သံလံဝဲလံ.
20 ဒီးစီၤဒၤဝံးဂဲၤဆၢထၢၣ်လၢဟီၣ်ခိၣ်, ဒီးသ့စီၤအသး လၢထံ, ဒီးဖှူအသး, ဒီးကလံၤအသး, ဒီးဟဲနုာ်လၢယွၤ အဟံၣ်ပူၤ, ဒီးဘူၣ်တၢ်ဘါတၢ်လီၤ. ဒီးဟဲနုာ်လၢအ ဟံၣ်ဒၣ်ဝဲ, ဒီးဃ့တၢ်, ဒီးပှၤပာ်ကိၣ်လၢအမဲာ်ညါ, ဒီး အီၣ်တၢ်လီၤ.
21 ဒီးအခ့အပှၤစံးဘၣ်အီၤ, နမၤတၢ်အံၤမ့ၢ်မနုၤတမံၤ လဲၣ်. နဒုၣ်တၢ်အီၣ်, ဒီးနဟီၣ်လၢနဖိသၣ်အဃိလၢအ မူဒံးအဖၢမုၢ်လီၤ. မ့မ့ၢ်တုၤဖိသၣ်လံဒီး, နဂဲၤဆၢထၢၣ် အီၣ်တၢ်မးလဲၣ်. 22 ဒီးစံးဝဲဒၣ်, ဖိသၣ်မူဒံးအဖၢမုၢ်ဒီး, ယဒုၣ်တၢ်အီၣ်, ဒီးယဟီၣ်လီၤ. အဂ့ၢ်ဒ်အံၤ, ယစံးယွၤသးကညီၤယၤ, ဒီးဒုးမူဒံးဖိသၣ်ဧါန့ၣ်, မ့ၢ်မတၤကသ့ၣ်ညါတဂၤလဲၣ်.―
23 ဒီးခဲကနံၣ်အံၤသံလံဒီး ယကဒုၣ်တၢ်အီၣ်တၢ်အီန့ၣ် မ့ၢ်အဘၣ်မနုၤလဲၣ်. ယဒုးဟဲက့ၤကဒါက့ၤအီၤဘၣ် ကသ့ဧါ. ယကလဲၤဆူအအိၣ်, မ့မ့ၢ်အဝဲဒၣ်န့ၣ်တ ဟဲက့ၤကဒါက့ၤဆူယအိၣ်ဘၣ်.
24 ဒီးစီၤဒၤဝံးမၤမုာ်ထီၣ်က့ၤအမါနီၢ်ဘၤသရှ့ၤဘၤ, ဒီး လဲၤနုာ်ဆူအအိၣ်, ဒီးမံဃုာ်ဒီးအီၤ, ဒီးအဝဲဒၣ်ဆံးစၢ် န့ၢ်အဖိခွါ, ဒီးယုၢ်ဝဲအမံၤလၢစီၤၡလိၤမိၤလီၤ. ဒီးယွၤ အဲၣ်အီၤလီၤ. 25 ဒီးမၢလီၤတၢ်လၢဝံနၤသၣ်အစုပူၤ, ဒီး ယုၢ်အမံၤလၢစီၤယဒံဒယၤလၢယွၤအဃိလီၤ.
26 ဒီးစီၤယိၤအာ်ဒုးတၢ်ထီဒါရးဘး ဘၣ်ဃးဒီးပှၤဧၣ်မိၣ် ဖိ, ဒီးမၤန့ၢ်စီၤပၤအဝ့ၢ်လီၤ. 27 ဒီးစီၤယိၤအာ်မၢလီၤက လူးတဖၣ်ဆူစီၤဒၤဝံးအအိၣ်, ဒီးစံးဝဲဒၣ်, ယဒုးတၢ်ဒီး ရးဘး, ဒီးမၤန့ၢ်လံဝ့ၢ်ဘၣ်ဃးဒီးထံဧိၤကီၢ်ဧိၤလံ. 28 ဒီး ခဲကနံၣ်ဒုးအိၣ်ဖှိၣ်ရိဖှိၣ် ပှၤဂီၢ်မုၢ်လၢအအိၣ်လီၤတဲာ် တဖၣ်န့ၣ်, ဒီးသူၣ်ဒဲလၢဝ့ၢ်အဃၢၤ, ဒီးမၤန့ၢ်အီၤတ က့ၢ်. ယကမၤန့ၢ်ဘၣ်ဖုးဝ့ၢ်, ဒီးပှၤကယုၢ်အမံၤဒ်သိးဒီး ယမံၤလီၤ.
29 ဒီးစီၤဒၤဝံးဒုးအိၣ်ဖှိၣ်ရိဖှိၣ်ပှၤဂီၢ်မုၢ်ခဲလၢာ်, ဒီးလဲၤဝဲ ဆူရးဘး, ဒီးဒုးတၢ်ဒီးအီၤ, ဒီးမၤန့ၢ်အီၤလီၤ. 30 ဒီးဟံးန့ၢ် အစီၤပၤအခိၣ်သလုးလၢအခိၣ်, (အိၣ်ဝဲဒီးအတၢ်မျၢ် တဖၣ်န့ၣ်လီၤသယၢၢ်ထူတကံကၢ်လီၤ.) ဒီးပှၤပာ်ဝဲ လၢစီၤဒၤဝံးအခိၣ်လီၤ. ဒီးဟဲစိာ်ဝဲလၢဝ့ၢ်အတၢ်ဖိတၢ် လံၤလၢအဂုာ်န့ၢ်အါအါကလဲာ်လီၤ.
31 ဒီးဟဲစိာ်ထီၣ်ပှၤလၢအအိၣ်လၢအပူၤတဖၣ်, ဒီးပာ် ဝဲလၢလွးအဖီလာ်, ဒီးလၢထးကြၢ်အဖီလာ်, ဒီးလၢ ကွါအဖီလာ်, ဒီးမၢအခီဂာ်ပှၤမၤအူးခဲအလီၢ်ပူၤလီၤ. မၤပှၤဧၣ်မိၣ်ဖိအဝ့ၢ်ခဲလၢာ် ဒ်န့ၣ်အသိးလီၤ. ဒီးစီၤဒၤ ဝံး, ဒီးပှၤခဲလၢာ်ဟဲက့ၤဝဲဆူယရူၤၡလ့ၣ်လီၤ.
13၁၃
1 ဒီးတၢ်န့ၣ်အလီၢ်ခံတၢ်မၤအသးလၢ စီၤဒၤဝံးအဖိခွါ စီၤအးဘၡါလိၣ်အိၣ်ဒီးအဒီပုၢ်ဝဲၢ်မုၣ်လၢ အက့ၢ်အဂီၤ ဂ့ၤ, ဒီးအမံၤမ့ၢ်နီၢ်တၤမၢ်, ဒီးစီၤဒၤဝံးအဖိခွါစီၤအၤမနိၣ် အဲၣ်အီၤလီၤ.
2 ဒီးစီၤအၤမနိၣ်အသူၣ်ကိၢ်သးဂီၤ တုၤအဆါထီၣ်ဝဲ လၢအဒီပုၢ်ဝဲၢ်မုၣ်နီၢ်တၤမၢ်အဃိလီၤ. အဂ့ၢ်ဒ်အံၤ, မ့ၢ် မုၣ်လိၣ်ဘိတဂၤ, ဒီးကီလၢစီၤအၤမနိၣ်အမဲာ်ညါလၢ အကမၤတၢ်လၢအီၤတမံၤမံၤန့ၣ်လီၤ.
3 ဒီးစီၤအၤမနိၣ်အိၣ်ဒီးအတံၤအသကိး, ဒီးအမံၤမ့ၢ်စီၤ ယိၤနဒာ်, စီၤဒၤဝံးအဒီပုၢ်ဝဲၢ်စီၤၡံမၤအဖိခွါလီၤ. ဒီးစီၤ ယိၤနဒာ်န့ၣ်မ့ၢ်ပှၤကူၣ်တၢ်သ့ဒိၣ်မးလီၤ.
4 ဒီးအဝဲဒၣ်စံးဘၣ်အီၤ, စီၤပၤအဖိခွါနဲဒၣ်အံၤ, နဃဲၤ လီၤတနံၤဘၣ်တနံၤန့ၣ် မ့ၢ်အဘၣ်မနုၤလဲၣ်. နတစံး ဘၣ်ယၤဘၣ်ဧါ. ဒီးစီၤအၤမနိၣ်စံးဘၣ်အီၤ, ယအဲၣ်ယ ဒီပုၢ်ဝဲၢ်စီၤအးဘၡါလိၣ်အဒီပုၢ်ဝဲၢ်မုၣ်နီၢ်တၤမၢ်လီၤ.
5 ဒီးစီၤယိၤနဒာ်စံးဘၣ်အီၤ, မံလီၤလၢနလီၢ်မံပူၤ, ဒီး ပာ်ဆါနသး, ဒီးတုၤနပၢ်ဟဲကွၢ်နၤဒီး, စံးဘၣ်အီၤ. ဒုး ဟဲလၢ်ယဒီပုၢ်ဝဲၢ်မုၣ်နီၢ်တၤမၢ်, လၢအကဟ့ၣ်ယၤလၢ တၢ်အီၣ်, ဒီးကတဲာ်ကတီၤတၢ်လၢယမဲာ်ညါ ဒ်သိးယ ကထံၣ်ဘၣ်, ဒီးအီၣ်တၢ်လၢအစုပူၤတက့ၢ်.
6 ဒီးစီၤအၤမနိၣ်မံလီၤ, ဒီးပာ်ဆါအသးဒီးစီၤပၤဟဲကွၢ် အီၤ, ဒီးစီၤအၤမနိၣ်စံးလၢစီၤပၤ, ဒုးဟဲလၢ်ယဒီပုၢ်ဝဲၢ် မုၣ်နီၢ်တၤမၢ်လၢအကမၤန့ၢ်ယၤလၢ ကိၣ်ဘ့ၣ်ဘၣ်ခံ ဘ့ၣ်လၢယမဲာ်ညါ, ဒ်သိးယကအီၣ်တၢ်လၢအစုပူၤ န့ၣ်တက့ၢ်.
7 ဒီးစီၤဒၤဝံးမၢလီၤတၢ်ဆူ နီၢ်တၤမၢ်အဟံၣ်, ဒီးစံးဝဲ ဒၣ်, လဲၤလၢ်ဆူနဒီပုၢ်ဝဲၢ်စီၤအၤမနိၣ်အဟံၣ်ပူၤ, ဒီးက တဲာ်ကတီၤန့ၢ်အီၤလၢတၢ်အီၣ်တက့ၢ်.
8 ဒီးနီၢ်တၤမၢ်လဲၤဝဲဆူအဒီပုၢ်ဝဲၢ် စီၤအၤမနိၣ်အဟံၣ်, ဒီးအဝဲဒၣ်မံလီၤဝဲလီၤ. ဒီးဟံးန့ၢ်ကိၣ်ကမူၣ်ဒီးစံၢ်ဝဲ, ဒီးမၤကိၣ်ဘ့ၣ်ဘၣ်လၢအမဲာ်ညါ, ဒီးကုၢ်ကိၣ်ဘ့ၣ်ဘၣ် န့ၣ်လီၤ.
9 ဒီးဟံးန့ၣ်သပၢၤဘ့ၣ်ဘၣ်, ဒီးလူလီၤဝဲလၢအမဲာ်ညါ, ဒီးစီၤအၤမနိၣ်အီၣ်ဝဲအသးတအိၣ်, ဒီးစံးဝဲဒၣ်, ပှၤပိာ် ခွါဟးထီၣ်လၢယအိၣ်ခဲလၢာ်တက့ၢ်, ဒီးပှၤပိာ်ခွါဟး ထီၣ်ကွံာ်လၢအအိၣ်ခဲလၢာ်လီၤ.
10 ဒီးစီၤအၤမနိၣ်စံးဘၣ်နီၢ်တၤမၢ်, ဟဲစိာ်တၢ်အီၣ်ဆူ ဒၢးပူၤ, ဒီးယကအီၣ်တၢ်လၢနစုပူၤလီၤ. ဒီးနီၢ်တၤမၢ် ဟံးန့ၢ်ကိၣ်ဘ့ၣ်ဘၣ်လၢအမၤတ့ၢ်, ဒီးဟဲစိာ်ဝဲဆူဒၢး ပူၤဆူအဒီပုၢ်ဝဲၢ်စီၤအၤမနိၣ်အအိၣ်လီၤ.
11 ဒီးဟဲစိာ်ဝဲဒ်သိး အကအီၣ်ဝဲ, ဒီးအဝဲဒၣ်ဟံးန့ၢ်အီၤ, ဒီးစံးဘၣ်အီၤ, ဟဲမံဃုာ်ဒီးယၤတက့ၢ်. ယဒီပုၢ်ဝဲၢ်မုၣ် ဧၢ, 12 ဒီးစံးဆၢဝဲဒၣ်, မၤတဂ့ၤ, ယဒီပုၢ်ဝဲၢ်ဧၢ, ဆီၣ်လီၤ ယၤတဂ့ၤ, အဂ့ၢ်ဒ်အံၤ, မၤတၢ်ဒ်န့ၣ်လၢအံၣ်စရ့လးအ ပူၤတဂ့ၤဘၣ်. မၤပှၤဟးဂီၤဖိအတၢ်မၤတမံၤအံၤတဂ့ၤ.―
13 ဒီးယဲဒၣ်ယကဒုးဟးထီၣ်ကွံာ် ယတၢ်မဲာ်ဆှးဒ်လဲၣ်, ဒီးနဲဒၣ်နကကဲထီၣ်ဒ်ပှၤဟးဂီၤဖိတဂၤအသိး လၢအံၣ် စရ့လးအပူၤလီၤ. ဒီးခဲကနံၣ်အံၤကတိၤလၢ်တၢ်ဒီးစီၤ ပၤတက့ၢ်. အဂ့ၢ်ဒ်အံၤ, တတြီယၤလၢနၤဘၣ်. 14 ဒီးကနၣ်အကလုၢ်အသးတအိၣ်ဘၣ်, ဒီးမ့ၢ်အဆူၣ်န့ၢ်အီၤတက့ၢ်ဒီး, ဆီၣ်လီၤအီၤဒီးမံဃုာ်ဒီးအီၤလီၤ.―
15 ဒီးစီၤအၤမနိၣ်သးဟ့အီၤဒိၣ်ဒိၣ်ကလဲာ် တုၤတၢ်သး ဟ့လၢအသးဟ့အီၤန့ၣ်ဒိၣ်န့ၢ်တၢ်အဲၣ်လၢ အအဲၣ်တ့ၢ် အီၤတက့ၢ်လီၤ. ဒီးစီၤအၤမနိၣ်စံးဘၣ်အီၤ, ဂဲၤဆၢထၢၣ် ဟးထီၣ်ကွံာ်တက့ၢ်. 16 ဒီးစံးဘၣ်အီၤ, အလီၢ်တအိၣ်ဘၣ်. တၢ်အၢလၢနဟီထီၣ်ကွံာ်ယၤအံၤ ဒိၣ်န့ၢ်တၢ်အဂၤတမံၤလၢနမၤယၤတက့ၢ်လီၤ. ဒီးကနၣ်အကလုၢ်န့ၣ် အသးတအိၣ် ဘၣ်,
17 ဒီးကိးန့ၢ်အခ့အပှၤတဂၤလၢ အမၤအခ့အပှၤအတၢ်, ဒီးစံးဝဲဒၣ်, ဟီထီၣ်ကွံာ်ပှၤတဂၤအံၤလၢယအိၣ်, ဒီး ကးတံာ်ဃာ်တြဲၤလၢနီၣ်ဘိလၢအလီၢ်ခံန့ၣ်တက့ၢ်.
18 ဒီးသိးဝဲအဆ့ကံၣ်ဃ့လီၤ. အဂ့ၢ်ဒ်အံၤ, စီၤပၤတဖၣ် အဖိမုၣ်လိၣ်ဘိတဖၣ်သိးဆ့ဒ်န့ၣ်လီၤ. ဒီးအခ့အပှၤ ဒုးဟးထီၣ်ကွံာ်အီၤဆူခိ, ဒီးကးတံာ်ဃာ်တြဲၤလၢနီၣ် ဘိလၢအလီၢ်ခံလီၤ.
19 ဒီးနီၢ်တၤမၢ်ပာ်ထီၣ်ဖၣ်ဆါလၢအခိၣ်, ဒီးဖှီအဆ့ကံၣ် ဃ့လၢအသိးဝဲ, ဒီးပာ်အစုလၢအခိၣ်, ဒီးလဲၤတၢ်, ဒီး ဟီၣ်ဝဲလီၤ.
20 ဒီးအဒီပုၢ်ဝဲၢ်စီၤအးဘၡါလိၣ်စံးဘၣ်အီၤ, မ့ၢ်နဒီပုၢ် ဝဲၢ်စီၤအၤမနိၣ်အိၣ်တ့ၢ်ဒီးနၤစ့ၢ်ကီးဧါ. ဒီးခဲကနံၣ်အံၤ အိၣ်ဘှီၣ်ကလာ်တက့ၢ်, ယဒီပုၢ်ဝဲၢ်မုၣ်ဧၢ. အဝဲဒၣ်ဒီ ပုၢ်ဒီဝဲၢ်ဒီးနၤလီၤ. ပးကဲတၢ်တမံၤန့ၣ်တဂ့ၤ. ဒီးနီၢ်တၤ မၢ်အိၣ်သယုၢ်လၢအဒီပုၢ်ဝဲၢ် စီၤအးဘၡါလိၣ်အဟံၣ် ပူၤလီၤ.
21 ဒီးစီၤပၤနၢ်ဟူတၢ်တဖၣ်န့ၣ်ခဲလၢာ်, ဒီးအသးထီၣ်ဒိၣ် မးလီၤ.
22 ဒီးဂ့ၤမ့ၢ်ဂ့ၤ, အၢမ့ၢ်ဂ့ၤ, စီၤအးဘၡါလိၣ်တကတိၤဘၣ် ဒီးအဒီပုၢ်ဝဲၢ်စီၤအၤမနိၣ်ဘၣ်. အဂ့ၢ်ဒ်အံၤ, စီၤအးဘၡါ လိၣ်သးဟ့စီၤအၤမနိၣ် လၢအဆီၣ်လီၤအဒီပုၢ်ဝဲၢ်မုၣ် နီၢ်တၤမၢ်အဃိလီၤ.
23 ဒီးမုၢ်နံၤတဖၣ်ခံနံၣ်ပူၤကွံာ်န့ၣ် တၢ်မၤအသးလၢစီၤ အးဘၡါလိၣ်အိၣ်ဒီးပှၤတံာ်သိအဆူၣ် လၢဘဧၤလး ဃါစိၢ်လၢအအိၣ်ဝဲလၢ အ့ဖရဲၣ်အဃၢၤ, ဒီးစီၤအးဘ ၡါလိၣ်ကိးန့ၢ်စီၤပၤအဖိခွါတဖၣ်ခဲလၢာ်လီၤ.
24 ဒီးစီၤအးဘၡါလိၣ်ဟဲဆူစီၤပၤအအိၣ်, ဒီးစံးဝဲဒၣ်, ကွၢ်ကွၢ်, နခ့နပှၤအိၣ်ဒီးပှၤတံာ်သိအဆူၣ်တဖၣ်လီၤ. မ်စီၤပၤဒီးအခ့အပှၤလဲၤလၢ်ဒီးနခ့နပှၤတက့ၢ်.
25 ဒီးစီၤပၤစံးဘၣ်စီၤအးဘၡါလိၣ်, တမ့ၢ်ဘၣ်, ယဖိခွါ ဧၢ, မ်ပသုတလဲၤသကိးခဲလၢာ်, ဒီးကဲထီၣ်တၢ်ဃၢလၢ နလိၤတဂ့ၤ. ဒီးအဝဲဒၣ်သဆၣ်ထီၣ်အခံလီၤ. ဘၣ်ဆၣ် ဒီးလဲၤဝဲအသးတအိၣ်ဘၣ်, ဒီးဆိၣ်ဂ့ၤအီၤလီၤ.
26 ဒီးစီၤအၤဘၡါလိၣ်စံးဝဲဒၣ်, မ့တမ့ၢ်ဘၣ်ဒီး, ဒုးလဲၤ လၢ်ယဒီပုၢ်ဝဲၢ်စီၤအၤမနိၣ်ဒီးပှၤတက့ၢ်. ဒီးစီၤပၤစံးဘၣ် အီၤ, ကလဲၤဝဲဒီးနၤမ့ၢ်အဘၣ်မနုၤလဲၣ်.
27 ဒီးစီၤအးဘၡါလိၣ်ဂုာ်သဆၣ်ထီၣ်အခံ တုၤအပျၢ်စီၤ အၤမနိၣ်ဒီးစီၤပၤအဖိခွါခဲလၢာ်ဒီးအီၤလီၤ.
28 ဒီးစီၤအးဘၡါလိၣ်မၤလိာ်အခ့အပှၤ, ဒီးစံးဝဲဒၣ်, တုၤ စီၤအၤမနိၣ်အသးမုာ်ဝဲလၢစပံးထံဒီး, ကွၢ်တက့ၢ်. ဒီး တုၤယစံးဘၣ်သု, ကျီစီၤအၤမနိၣ်တက့ၢ်န့ၣ်ဒီး, မၤသံ အီၤတက့ၢ်. ပျံၤတၢ်တဂ့ၤ. ယမၤလိာ်သုတမ့ၢ်ဘၣ်ဧါ. ပာ်ဆူၣ်သုသး, ဒီးကဲထီၣ်ပှၤအသးတသုၣ်ဘၣ်တ က့ၢ်.
29 ဒီးစီၤအးဘၡါလိၣ်အခ့အပှၤ မၤစိၤအၤမနိၣ်ဒ်စီၤအး ဘၡါလိၣ်မၤလိာ်အသိးန့ၣ်လီၤ. ဒီးကယဲၢ်စီၤပၤအဖိ ခွါဂဲၤဆၢထၢၣ်, ဒီးဒိးအကသ့ၣ်လၤတဂၤလၢ်လၢ်, ဒီး ဃ့ၢ်ဝဲလီၤ.
30 ဒီးအိၣ်ဝဲလၢကျဲအဖၢမုၢ်ဒီး, တၢ်မၤအသးလၢအက စီၣ်ဟဲဆူစီၤဒၤဝံးအအိၣ်, ဒီးစံးဝဲဒၣ်, စီၤအးဘၡါလိၣ် မၤသံလံစီၤပၤအဖိခွါခဲလၢာ်လံ, ဒီးတအိၣ်လီၤတဲာ် ဘၣ်နီတဂၤဘၣ်.
31 ဒီးစီၤပၤဂဲၤဆၢထၢၣ်, ဒီးဖှီအဆ့, ဒီးမံလီၤလၢဟီၣ် ခိၣ်, ဒီးအခ့အပှၤဆၢထၢၣ်လၢအဃၢၤခဲလၢာ်အိၣ်ဒီး အဆ့ယာ်ဝဲလီၤ.
32 ဒီးစီၤဒၤဝံးအဒီပုၢ်ဝဲၢ် စီၤၡံမၤအဖိခွါစီၤယိၤနဒာ် က တိၤတၢ်ဒီးစံးဝဲဒၣ်, မ်ယကစၢ်အသုတစံးလၢတၢ်မၤ သံပှၤဖိၣ်သၣ်ခွါ, စီၤပၤအဖိခွါခဲလၢာ်န့ၣ်တဂ့ၤ. အဂ့ၢ်ဒ် အံၤ, သံဝဲထဲစီၤအၤမနိၣ်တဂၤဧိၤလီၤ. အဂ့ၢ်ဒ်အံၤ, တၢ် န့ၣ်အိၣ်ဝဲလၢစီၤအးဘၡါလိၣ်အတၢ်တိာ်ဝဲလၢ မုၢ်တ နံၤလံၤလံၤလၢအမၤဆူၣ် အဒီပုၢ်ဝဲၢ်မုၣ်နီၢ်တၤမၢ်န့ၣ် န့ၣ်လီၤ.
33 ဒီးခဲကနံၣ်အံၤ မ်ယကစၢ်စီၤပၤအသုတပာ်တၢ်တမံၤ အံၤလၢအသးကံၢ်ပူၤ, ဒီးစံးလၢစီၤပၤအဖိခွါခဲလၢာ်သံ လံန့ၣ်တဂ့ၤ. အဂ့ၢ်ဒ်အံၤ, သံလံထဲစီၤအၤမနိၣ်တဂၤ ဧိၤလီၤ.
34 ဒီးစီၤအၤဘၡါလိၣ်န့ၣ် ဃ့ၢ်ထီၣ်ကွံာ်လီၤ. ဒီးပှၤဖိၣ် သၣ်ခွါတဂၤလၢအပၢၤတၢ်န့ၣ် ကျ့ထီၣ်အမဲာ်, ဒီးကွၢ် ဝဲ, ဒီးကွၢ်ကွၢ်, ပှၤဂီၢ်မုၢ်ဖးဒိၣ်ဟဲဝဲလၢအချၢဃံလၢက စၢၢ်အကပၤလီၤ.
35 ဒီးစီၤယိၤနဒာ်စံးဘၣ်စီၤပၤ, ကွၢ်ကွၢ်, စီၤပၤအဖိခွါတ ဖၣ်ဟဲဝဲ, ဒ်နခ့နပှၤစံးတၢ်အသိးန့ၣ်, တၢ်မၤအသးဒ် န့ၣ်အသိးလီၤ.
36 ဒီးတုၤအကတိၤတၢ်ဝံၤဒီး, ကွၢ်ကွၢ်, စီၤပၤအဖိခွါတ ဖၣ်ဟဲဝဲ, ဒီးထုထီၣ်အကလုၢ်, ဒီးဟီၣ်ဝဲ, ဒီးစီၤပၤစ့ၢ်ကီး ဒီးအခ့အပှၤခဲလၢာ်ဟီၣ်ဝဲနးနးကလဲာ်လီၤ.
37 ဒီးစီၤအးဘၡါလိၣ်ဃ့ၢ်ဝဲ, ဒီးလဲၤဝဲဆူကရှူၢ်အစီၤပၤ စီၤဧးမံၤဟူးအဖိခွါစီၤတးလမဲအအိၣ်လီၤ. ဒီးစီၤဒၤဝံး အသးတမုာ်ဘၣ်လၢအဖိခွါအဃိန့ၣ် ကိးမုၢ်နံၤမုၢ်နၤ ဒဲးလီၤ.
38 ဒီးစီၤအးဘၡါလိၣ်ဃ့ၢ်ဝဲ, ဒီးလဲၤဝဲဆူကရှူၢ်အပူၤ, ဒီး အိၣ်ဝဲဖဲန့ၣ်သၢနံၣ်လီၤ.
39 ဒီးစီၤဒၤဝံးဆၢ လဲၤတၢ်ဆူစီၤအးဘၡါလိၣ်အအိၣ် လီၤ. အဂ့ၢ်ဒ်အံၤ, အသးမုာ်ထီၣ်က့ၤလၢစီၤအၤမနိၣ်အ ဂ့ၢ်လီၤ. အဂ့ၢ်ဒ်အံၤ, သံလံဝဲလံ.
14၁၄
1 ဒီးနီၢ်စရူယၤအဖိခွါစီၤယိၤအာ်သ့ၣ်ညါဝဲလၢ စီၤပၤအသးအိၣ်စီၤအးဘၡါလိၣ်လီၤ.
2 ဒီးစီၤယိၤအာ်မၢလီၤတၢ်ဆူတကိၤ, ဒီးဟဲစိာ်ဖဲန့ၣ်ပှၤ ပိာ်မုၣ်လၢအကူၣ်တၢ်သ့တဂၤ, ဒီးစံးဘၣ်အီၤ, ပာ်န သးလၢပှၤဟီၣ်တၢ်ယၢၤတၢ်ဖိ, ဒီးသိးပှၤဟီၣ်တၢ်ယၢၤ တၢ်ဖိအကူအသိး, ဒီးဖှူနသးလၢသိတဂ့ၤ, ဒီးပာ်နသး ဒ်ပှၤလၢအဟီၣ်ဝဲ လၢပှၤသံအဃိယံာ်ယံာ်ကလဲာ်အ သိးန့ၣ်, 3 ဒီးလဲၤနုာ်ဆူစီၤပၤအအိၣ်, ဒီးကတိၤတၢ် ဒီးအီၤလၢတၢ်ကတိၤဒ်အံၤအသိးတက့ၢ်. ဒီးစီၤယိၤ အာ်ပာ်တၢ်ကတိၤလၢအထးခိၣ်လီၤ.
4 ဒီးပှၤတကိၤမုၣ်ကတိၤတၢ်ဒီးစီၤပၤ, ဒီးထိၣ်လီၤပှီၤ အသး, ဒီးတီၤလီၤကဒွံကျိာ်, ဒီးစံးဝဲဒၣ်, အုၣ်က့ၤခီၣ် က့ၤတၢ်တက့ၢ်, စီၤပၤဧၢ.
5 ဒီးစီၤပၤစံးဘၣ်အီၤ, နဘၣ်တၢ်မနုၤတမံၤလဲၣ်. ဒီးစံး ဆၢဝဲဒၣ်, ယမ့ၢ်ပှၤမုၣ်ကမဲသပှၢ်တၢၢ်, ဒီးယဝၤသံ လံ. 6 ဒီးနကုၢ်ပိာ်မုၣ်အိၣ်ဒီးအဖိခွါခံဂၤ, ဒီးအ့ၣ်လိာ် ဆိးက့ၤလိာ်အသးလၢတၢ်ပျီပူၤ, ဒီးတၢ်မၤလီၤဖှၣ်အီၤ တအိၣ်ဘၣ်. ဒီးအဝဲတဂၤကျီကွံာ်အဝဲတဂၤ, ဒီးသံဝဲ လီၤ. 7 ဒီးကွၢ်ကွၢ်, ပှၤဂဲၤဆၢထၢၣ်ထီဒါနကုၢ်ပိာ်မုၣ် ဒီဒူၣ်ညါ, ဒီးစံးဝဲဒၣ်, ဟ့ၣ်လီၤကွံာ်ပှၤတဂၤလၢအကျီ ကွံာ်အဒီပုၢ်ဝဲၢ်, ဒီးပကမၤသံအီၤလၢအဒီပုၢ်ဝဲၢ်လၢအ မၤသံအီၤအသးသမူအဃိ, ဒီးပကမၤဟးဂီၤစ့ၢ်ကီးပှၤ လၢအန့ၢ်သါတၢ်လီၤ. ဒီးဒ်န့ၣ်အသိး ကမၤလီၤပံာ် ယမ့ၣ်အူကဖးလၢအအိၣ်လီၤတဲာ်, ဒီးအမံၤမ့ၢ်ဂ့ၤ, တၢ် အိၣ်လီၤတဲာ်လၢဟီၣ်ခိၣ်ချၢမ့ၢ်ဂ့ၤ, တပာ်လီၤတဲာ်ဘၣ် လၢယဝၤအဂီၢ်ဘၣ်လီၤ.
8 ဒီးစီၤပၤစံးဘၣ်ပိၣ်မုၣ်န့ၣ်, က့ၤဆူနဟံၣ်, ဒီးယကမၤ လိာ်တၢ်လၢနဂ့ၢ်နကျိၤလီၤ.
9 ဒီးပှၤတကိၤမုၣ်စံးဘၣ်စီၤပၤ, ယကစၢ်စီၤပၤဧၢ, မ်တၢ် အၢန့ၣ်ဘၣ်ယၤ, ဒီးယပၢ်အပှၤဟံၣ်ဖိ, ဒီးမ်စီၤပၤ, ဒီးအ လီၢ်ပစိာ်ပူၤဖျဲးတက့ၢ်.
10 ဒီးစီၤပၤစံးဝဲဒၣ်, ဖဲဒၣ်ပှၤလၢအစံးတၢ်တမံၤမံၤလၢနၤ န့ၣ်ဟဲစိာ်အီၤဆူယအိၣ်တက့ၢ်. ဒီးတထိးလၢၤဘၣ်နၤ ဘၣ်.
11 ဒီးစံးဝဲဒၣ်, မ်စီၤပၤသ့ၣ်နီၣ်ထီၣ်က့ၤယွၤနကစၢ်, ဒ်သိး ကတြီပှၤမၤကၣ်တၢ်သွံၣ် ဒ်သိးအသုတမၤဟးဂီၤယဖိ ခွါတဂ့ၤ. ဒီးစံးဝဲဒၣ်, ယွၤမူဝဲ, နဖိခွါအခိၣ်သူတဘိ တလီၤတဲာ်ဘၣ်ဆူဟီၣ်ခိၣ်ဘၣ်.
12 ဒီးပိာ်မုၣ်စံးဝဲဒၣ်, ဒုးကတိၤနကုၢ်ပိာ်မုၣ်လၢတၢ်က တိၤတဘီဒီးယကစၢ်စီၤပၤန့ၣ်တက့ၢ်. ဒီးစံးဝဲဒၣ်, က တိၤတၢ်တက့ၢ်.
13 ဒီးပိာ်မုၣ်န့ၣ်စံးဝဲဒၣ်, နဆိကမိၣ်တၢ်န့ၣ်ထီဒါယွၤအ ပှၤဂီၢ်မုၢ်န့ၣ်မ့ၢ်အဘၣ်မနုၤလဲၣ်. အဂ့ၢ်ဒ်အံၤ, စီၤပၤက တိၤတၢ်တမံၤန့ၣ် ဒ်ပှၤလၢအမၤကမၣ်တၢ်အသိး, လၢ စီၤပၤတဟဲက့ၤစိာ်ဘၣ် အပှၤဟးဝ့ၤဝီၤဖိတဂၤအဃိ န့ၣ်လီၤ. 14 အဂ့ၢ်ဒ်အံၤ, သံဒီးပဘၣ်သံလီၤ. ဒီးပမၤပသး ဒ်ထံလၢတၢ်လူလီၤအီၤလၢဟီၣ်ခိၣ်, ဒီးပှၤဘျၢၣ်ထီၣ် တသ့လၢၤဘၣ်အသိးန့ၣ်လီၤ. ဒီးယွၤတမၤသံဘၣ်တၢ် ဘၣ်. မ့ၢ်အကူၣ်ထီၣ်ဝဲဒ်သိးအပှၤဟးဝ့ၤဝီၤဖိန့ၣ်အသု တဘၣ်တၢ်ဟီထီၣ်ကွံာ်အီၤလၢအမဲာ်ညါတဂ့ၤလီၤ.
15 ဒီးခဲကနံၣ်အံၤယဟဲကတိၤတၢ်ဒီး ယကစၢ်စီၤပၤလၢ တၢ်တမံၤအံၤအဂ့ၢ်အကျိၤလီၤ. အဂ့ၢ်ဒ်အံၤ, ပှၤဂီၢ်မုၢ်မၤ ပျံၤမၤဖုးယၤ, ဒီးနကုၢ်ပိာ်မုၣ်စံးဝဲဒၣ်, ယကကတိၤတၢ် ဒီးစီၤပၤလီၤ. ဘၣ်တဘၣ်စီၤပၤကမၤတၢ်လၢအကုၢ်ပိာ် မုၣ်ဃ့တၢ်လီၤ. 16 အဂ့ၢ်ဒ်အံၤ, စီၤပၤဒိကနၣ်ဒ်သိးအက မၤပူၤမၤဖျဲးအကုၢ်ပိာ်မုၣ် ဒီးပှၤကညီအစုပူၤလၢအသါ ကမၤဟးဂီၤကွံာ်ယၤ, ဒီးယဖိခွါတပူၤဃီလၢယွၤအ တၢ်ဟ့ၣ်န့ၢ်သါတၢ်အပူၤလီၤ. 17 ဒီးနကုၢ်ပိာ်မုၣ် စံးဝဲ ဒၣ်, ယကစၢ်စီၤပၤ အတၢ်ကတိၤကကဲထီၣ်တၢ်မၤ မုာ်ထီၣ်က့ၤတၢ်လီၤ. အဂ့ၢ်ဒ်အံၤ, ဒ်ယွၤအကလူးတဂၤ အသိးန့ၣ်ယကစၢ်စီၤပၤမၤအသးဒ်န့ၣ်အသိး လၢအ ကနီၤဖးတၢ်ဂ့ၤဒီးတၢ်အၢအဆၢန့ၣ်လီၤ. ဒီးယွၤနက စၢ်ကအိၣ်ဒီးနၤလီၤ.
18 ဒီးစီၤပၤစံးဆၢတၢ်, ဒီးစံးဘၣ်ပိာ်မုၣ်န့ၣ်, တၢ်လၢ ယကသံကွၢ်နၤန့ၣ်ပာ်ခူသူၣ်တဂ့ၤ. ဒီးပိာ်မုၣ်န့ၣ်စံးဝဲ ဒၣ်, မ်ယကစၢ်စီၤပၤကတိၤလၢ်တၢ်တက့ၢ်.
19 ဒီးစီၤပၤစံးဝဲဒၣ်, စီၤယိၤအာ်အစုအိၣ်ဒီးနၤလၢတၢ် တဖၣ်အံၤခဲလၢာ်အပူၤတမ့ၢ်ဘၣ်ဧါ. ဒီးပိာ်မုၣ်စံးဆၢ တၢ်ဒီးစံးဝဲဒၣ်, နသးမူဝဲ, ယကစၢ်စီၤပၤဧၢ, ဆူစုထွဲ မ့ၢ်ဂ့ၤ, ဆူစုစ့ၣ်မ့ၢ်ဂ့ၤ, ပှၤဃၣ်အသးလၢယကစၢ်စီၤပၤ အတၢ်ကတိၤတသ့ဘၣ်နီတဂၤဘၣ်. အဂ့ၢ်ဒ်အံၤ, နခ့ နပှၤစီၤယိၤအာ်မၤလိာ်ယၤ, ဒီးပာ်တၢ်ကတိၤခဲလၢာ် န့ၣ်လၢနကုၢ်ပိာ်မုၣ်အထးခိၣ်လီၤ. 20 နခ့နပှၤစီၤယိၤ အာ်မၤတၢ်အံၤ ဒ်သိးအကဒုးအိၣ်ထီၣ်တၢ်ကတိၤအ က့ၢ်အဂီၤတမံၤန့ၣ်လီၤ. ဒီးယကစၢ်ကူၣ်တၢ်သ့ဒ်ယွၤ အကလူးတဂၤအတၢ်ကူၣ်သ့အသိးန့ၣ်, ဒ်သိးအက သ့ၣ်ညါတၢ်လၢအအိၣ်လၢဟီၣ်ခိၣ်ချၢခဲလၢာ်လီၤ.
21 ဒီးစီၤပၤစံးဘၣ်စီၤယိၤအာ်, ကွၢ်ကွၢ်, ယမၤလံတၢ်န့ၣ် တမံၤလံ. ဒီးလဲၤ, ဟဲက့ၤစိာ်ပှၤဖိၣ်သၣ်ခွါစီၤအးဘၡါ လိၣ်တက့ၢ်.
22 ဒီးစီၤယိၤအာ်ထိၣ်လီၤပှီၤအသးဒီးတီၤလီၤကဒွံကျိာ်, ဒီးစံးထီၣ်ပတြၢၤစီၤပၤအဘျုးအဖှိၣ်, ဒီၤစီၤယိၤအာ်စံး ဝဲဒၣ်, တၢ်လၢမုၢ်မဆါတနံၤအံၤ, နခ့နပှၤသ့ၣ်ညါဝဲ လၢ အဘၣ်ဘျုးဘၣ်ဖှိၣ်လၢနမဲာ်လီၤ, ယကစၢ်စီၤပၤ ဧၢ, အဂ့ၢ်ဒ်အံၤ, စီၤပၤမၤလံအခ့အပှၤအတၢ်ကတိၤလံ လီၤ.
23 ဒီးစီၤယိၤအာ်ဂဲၤဆၢထၢၣ်, ဒီးလဲၤဝဲဆူကရှူၢ်, ဒီးဟဲ စိာ်စီၤအးဘၡါလိၣ်ဆူယရူၤၡလ့ၣ်အပူၤလီၤ.
24 ဒီးစီၤပၤစံးဝဲဒၣ်, ကက့ၤဒၣ်ဝဲဆူအဟံၣ်ဒၣ်ဝဲတက့ၢ်. ဒီးမ်အသုတထံၣ်ဘၣ်ယမဲာ်တဂ့ၤ. ဒီးစီၤအးဘၡါလိၣ် က့ၤဝဲဆူအဟံၣ်ဒၣ်ဝဲ, ဒီးတထံၣ်ဘၣ်စီၤပၤအမဲာ်ဘၣ်.
25 ဒီးလၢအံၣ်စရ့လးအကျါန့ၣ် ပှၤဒိးတၢ်စံးထီၣ်ပတြၢၤ လၢအဃံအလၤအဃိ ဒ်စီၤအးဘၡါလိၣ်အသိးန့ၣ်တ အိၣ်ဘၣ်နီတဂၤဘၣ်. လၢအခီၣ်ညါသးပၢၢ်လၢအခိၣ် ဒီ, အမဲာ်တအိၣ်ဘၣ်နီတမံၤဘၣ်. 26 တုၤအတံာ်အ ခိၣ်သူဒီး, (အဂ့ၢ်ဒ်အံၤ, တုၤနံၣ်ဆၢအလီၢ်ဒီး, တံာ်ဝဲ လီၤ. မ့ၢ်အခိၣ်သူဃၢဝဲလၢအလိၤဒီး, တံာ်ဝဲလီၤ.) အခိၣ်သူလီၤသယၢၢ်ၡက့လးခံကယၤ, ဒ်စီၤပၤအစီၤ ပီၢ်သၣ်အသိးန့ၣ်လီၤ.
27 ဒီးအဖိခွါသၢဂၤ, ဒီးအဖိမုၣ်တဂၤ အိၣ်ဖျဲၣ်န့ၢ်လၢစီၤ အးဘၡါလိၣ်အဂီၢ်လီၤ. ပိာ်မုၣ်တဂၤန့ၣ်အမံၤမ့ၢ်နီၢ် တၤမၢ်, ဒီးအက့ၢ်အဂီၤဂ့ၤလီၤ.
28 ဒီးစီၤအးဘၡါလိၣ်အိၣ်ဝဲလၢ ယရူၤၡလ့ၣ်ခံနံၣ်ညါ, ဒီးတထံၣ်ဘၣ်စီၤပၤအမဲာ်ဘၣ်.
29 ဒီးစီၤအးဘၡါလိၣ်မၢလီၤတၢ်ဆူစီၤယိၤအာ်အအိၣ်ဒ် သိးအကဒုးလဲၤအီၤဆူ စီၤပၤအအိၣ်လီၤ. ဒီးဟဲဆူအ အိၣ်အသးတအိၣ်ဘၣ်. ဒီးမၢလီၤကဒီးခံဘျီတဘျီ, ဒီး ဟဲဝဲဆူအအိၣ်အသးတအိၣ်ဘၣ်.
30 ဒီးစံးဘၣ်အခ့အပှၤ, ကွၢ်ကွၢ်, စီၤယိၤအာ်အစံာ်အိၣ် ဘူးဒီးယစံာ်, ဒီးအိၣ်ဝဲဒီးဘုမုယီၤဖဲန့ၣ်လီၤ. လဲၤဆူး ထီၣ်အီၤလၢမ့ၣ်အူတက့ၢ်. ဒီးစီၤအးဘၡါလိၣ်အခ့အ ပှၤတဖၣ်န့ၣ် လဲၤဆူးထီၣ်ကွံာ်စံာ်န့ၣ်လၢမ့ၣ်အူလီၤ.
31 ဒီးယိၤအာ်ဂဲၤဆၢထၢၣ်, ဒီးဟဲဝဲဆူစီၤအးဘၡါလိၣ် အဟံၣ်ပူၤ, ဒီးစံးဘၣ်အီၤ, နခ့နပှၤဆူးထီၣ်ကွံာ်ယ စံာ်လၢမ့ၣ်အူန့ၣ်မ့ၢ်အဘၣ်မနုၤလဲၣ်.
32 ဒီးစီၤအးဘၡါလိၣ်စံးဆၢစီၤယိၤအာ်, ကွၢ်ကွၢ်, ယမၢ လီၤတၢ်, ဒီးစံး, ဟဲဖဲအံၤ, ဒီးယကမၢလီၤနၤဆူစီၤပၤအ အိၣ်ဒ်သိးနကစံး, ယဟဲက့ၤလၢကရှူၢ်န့ၣ်မ့ၢ်အဘၣ် မနုၤလဲၣ်. ဂ့ၤလၢယဂီၢ်လၢယအိၣ်ဒံးဖဲန့ၣ်လီၤ. ဒီးခဲ ကနံၣ်အံၤ, ဒုးထံၣ်ဘၣ်ယၤလၢစီၤပၤအမဲာ်တက့ၢ်. ဒီး တၢ်အၢမ့ၢ်အိၣ်လၢယပူၤဒီး, မ်အမၤသံယၤတက့ၢ်.
33 ဒီးစီၤယိာ်အာ်ဟဲဆူစီၤပၤအအိၣ်, ဒီးစံးဘၣ်အီၤ, ဒီး အဝဲဒၣ်ကိးန့ၢ်စီၤအးဘၡါလိၣ်, ဒီးဟဲဝဲဆူစီၤပၤအ အိၣ်, ဒီးတီၤလီၤကဒွံကျိာ် ဒီးကျးလီၤအမဲာ်ဆူဟီၣ်ခိၣ် လၢစီၤပၤအမဲာ်ညါ, ဒီးစီၤပၤနၢမူစီၤအးဘၡါလိၣ်လီၤ.
15၁၅
1 ဒီးလၢတၢ်န့ၣ်အလီၢ်ခံ တၢ်မၤအသးလၢစီးအးဘၡါ လိၣ်ကတဲာ်ကတီၤလ့ၣ်ကဟၣ်တဖၣ်, ဒီးကသ့ၣ်တ ဖၣ်, ဒီးပှၤကညီယဲၢ်ဆံ ဒ်သိးအကဃ့ၢ်လၢအမဲာ်ညါ လီၤ.
2 ဒီးစီၤအးဘၡါလိၣ်ဂဲၤဆၢထၢၣ်ဂီၤဂီၤ, ဒီးဆၢထၢၣ် လၢပဲတရီအဃၢၤ, ဒီးတုၤပှၤအိၣ်ဒီးအကွီၢ်တဂၤဂၤဟဲ ဆူစီၤပၤအအိၣ်လၢတၢ်စံၣ်ညီၣ်အဂီၢ်ဒီး, တၢ်မၤအသး လၢစီၤအၤဘၡါလိၣ်ကိးန့ၢ်အီၤ, ဒီးစံးဝဲဒၣ်, နဘၣ်ဃး ဒီးဝ့ၢ်မနုၤတဝ့ၢ်လဲၣ်. ဒီးစံးဝဲဒၣ်, နခ့နပှၤဘၣ်ဃးဒီး အံၣ်စရ့လးအဒူၣ်တဖၣ်တဒူၣ်လီၤ.
3 ဒီးစီၤအးဘၡါလိၣ်စံးဝဲဒၣ်, ကွၢ်, နတၢ်ဂ့ၤ, ဒီးလိၤ, ဘၣ်ဆၣ်ဒီးစီၤပၤအပှၤလၢ အဒိကနၣ်နကလုၢ်န့ၣ်တ အိၣ်ဘၣ်. 4 ဒီးစီၤအးဘၡါလိၣ်စံးဝဲဒၣ်, အိ, မ့ၢ်မတၤက ပာ်ယၤလၢပှၤစံၣ်ညီၣ်ကွီၢ်လၢကီၢ်ပူၤတဂၤလဲၣ်. ဒီးက ယဲၢ်ပှၤအိၣ်ဒီးအကွီၢ်မ့ၢ်ဂ့ၤ, တၢ်စံၣ်ညီၣ်အလီၢ်မ့ၢ်ဂ့ၤ, ဟဲဝဲဆူယအိၣ်ဒီးယကမၤအီၤလၢတၢ်တီတၢ်လိၤလီၤ.
5 ဒီးတုၤပှၤတဂၤဂၤသုးဘူးအသး ဒ်သိးအကတီၤလီၤ ကဒွံကျိာ်ဒီး, တၢ်မၤအသးလၢအယူာ်ထီၣ်အစု, ဒီးဟံး န့ၢ်အီၤ, ဒီးနၢမူအီၤလီၤ.
6 ဒီးစီၤအးဘၡါလိၣ်မၤအံၣ်စရ့လးခဲလၢာ် လၢအဟဲ ဆူစီၤပၤအအိၣ်လၢစံၣ်ညီၣ်တၢ်အဂီၢ် ဒ်တၢ်န့ၣ်တမံၤ အသိးလီၤ. ဒီးစီၤအးဘၡါလိၣ်ဟုၣ်န့ၢ်အံၣ်စရ့လးအ ပှၤကညီအသးလီၤ.
7 ဒီးလွံၢ်နံၣ်အလီၢ်ခံန့ၣ် တၢ်မၤအသးလၢစီၤအးဘၡါ လိၣ်စံးဘၣ်စီၤပၤ, ဒုးလဲၤလၢ်ယၤဒ်သိးယကမၤဘူၣ် တၢ်ဘၣ်ဃးဒီးတၢ်ဆိၣ် လၢယဆိၣ်တၢ်ဒီးယွၤလၢဃ့ ဘြိၣ်အပူၤန့ၣ်တက့ၢ်. 8 အဂ့ၢ်ဒ်အံၤ, လၢယအိၣ်လၢက ရှူၢ်အပူၤန့ၣ်နခ့နပှၤဆိၣ်တၢ်ဆိၣ်တမံၤ, ဒီးစံးဝဲဒၣ်, ယွၤ မ့ၢ်ဒုးဟဲက့ၤကဒီးယၤဆူ ယရူၤၡလ့ၣ်အပူၤသပှၢ်တၢၢ် ဒီး, ယကမၤယွၤအတၢ်လီၤ.
9 ဒီးစီၤပၤစံးဘၣ်အီၤ, လဲၤတၢ်မုာ်မုာ်တက့ၢ်. ဒီးဂဲၤဆၢ ထၢၣ်, ဒီးလဲၤဝဲဆူဃ့ဘြိၣ်လီၤ.
10 ဒီးစီၤအးဘၡါလိၣ်မၢလီၤ ပှၤကွၢ်ဟုၣ်တၢ်လၢအံၣ်စ စရ့လးအဒူၣ်ခဲလၢာ်အကျါဒီးစံးဝဲဒၣ်, တုၤသုနၢ်ဟူ ကွဲၤအသီၣ်ဒီး, သုဘၣ်စံး, စီၤအးဘၡါလိၣ်ကဲစီၤပၤလၢ ဃ့ဘြိၣ်အပူၤလီၤ.
11 ဒီးပှၤခံကယၤဟးဝဲလၢ ယရူၤၡလ့ၣ်အပူၤအိၣ်ဒီးစီၤ အးဘၡါလိၣ်လီၤ. တၢ်ကိးန့ၢ်အီၤ, ဒီးလဲၤဝဲတီတီလိၤ လိၤ, ဒီးတသ့ၣ်ညါဘၣ်တၢ်နီတမံၤဘၣ်.
12 ဒီးစီၤအးဘၡါလိၣ် မၢလီၤတၢ်ဆူပှၤကံလိၤဖိစီၤအ ဃံသဖ့ၤလး, ပှၤကူၣ်လိာ်အသးဒီးစီၤဒၤဝံး, လၢအဝ့ၢ် ကံလိၤအပူၤဖဲအလုၢ်တၢ်အဖၢမုၢ်လီၤ. ဒီးတၢ်အၢၣ်လီၤ အၢန့ၣ်ဆူၣ်ထီၣ်ဝဲ, ဒီးပှၤလဲၤတၢ်, ဒီးအါထီၣ်ဒီးစီၤအး ဘၡါလိၣ်န့ၣ်လီၤ.
13 ဒီးကလူးတဂၤဟဲဆူစီၤဒၤဝံးအအိၣ်, ဒီးစံးဝဲဒၣ်, အံၣ် စရ့လးအပှၤကညီတဖၣ် အသးအိၣ်ထွဲစီၤအးဘၡါ လိၣ်အခံလီၤ.
14 ဒီးစီၤဒၤဝံးစံးဘၣ်အခ့အပှၤခဲလၢာ် လၢအအိၣ်ဒီးအီၤ လၢယရူၤၡလ့ၣ်အပူၤန့ၣ်, ဂဲၤဆၢထၢၣ်, ဒီးဃ့ၢ်သကိး တက့ၢ်. မ့တမ့ၢ်ဘၣ်ဒ်န့ၣ်ဒီး ပတပူၤဖျဲးဒီးစီၤအးဘ ၡါလိၣ်ဘၣ်. ဟးထီၣ်ချ့ချ့တက့ၢ်. ကချုးန့ၣ်ဘၣ်ဖုးပှၤ သတူာ်ကလာ်, ဒီးကဒုးဘၣ်ပှၤလၢတၢ်အၢ, ဒီးက ကျီကွံာ်ဝ့ၢ်လၢနးအကနၣ်လီၤ.
15 ဒီးစီၤပၤအခ့အပှၤစံးဘၣ်စီၤပၤ, ကွၢ်ကွၢ်, နခ့နပှၤတ ဖၣ်န့ၣ်, ကမၤဖဲဒၣ်တၢ်လၢယကစၢ်စီၤပၤ ကဃုထၢ ဝဲတမံၤလၢ်လၢ်လီၤ.
16 ဒီးစီၤပၤဟးထီၣ်ဒီးအပှၤဟံၣ်ဖိခဲလၢာ် အိၣ်ဒီးအီၤ, ဒီးစီၤပၤပာ်လီၤတဲာ်ပှၤသံၣ်မါဆံဆဲၣ်ဂၤ ဒ်သိးအက ပၢၤဟံၣ်န့ၣ်လီၤ. 17 ဒီးစီၤပၤဟးထီၣ်ဒီးပှၤဂီၢ်မုၢ်ခဲလၢာ် အိၣ်ဒီးအီၤ, ဒီးအိၣ်ကတီၢ်လၢ အလီၢ်အိၣ်ယံၤလီၤ.―
18 ဒီးအခ့အပှၤခဲလၢာ်န့ၣ် လဲၤပူၤကွံာ်လၢအဃၢၤ, ဒီး ပှၤကရံသးဖိခဲလၢာ်, ပှၤဖ့ၤလ့းဖိခဲလၢာ်, ဒီးပှၤကံးတံး ဖိခဲလၢာ်, ပှၤဃုကယၤလၢအဟဲဒီးအီၤလၢကၤသးအ ပူၤန့ၣ် လဲၤတၢ်လၢစီၤပၤအမဲာ်ညါလီၤ.
19 ဒီးစီၤပၤစံးဘၣ်ပှၤကံးတံးဖိစီၤအံတဲၤ, နလဲၤစ့ၢ်ကီးဒီး ပှၤမ့ၢ်အဘၣ်မနုၤလဲၣ်. က့ၤဆူနလီၢ်ဒီးအိၣ်ဒီးစီၤပၤတ က့ၢ်. အဂ့ၢ်ဒ်အံၤ, နမ့ၢ်ပှၤတခီဘီမုၢ်ဖိ, ဒီးပှၤဘၣ်တၢ်ဟီ ထီၣ်ကွံာ်လၢနလီၢ်လီၤ. 20 နဟဲမဟါန့ၣ်, ယကမၢနဟး ဝ့ၤဝီၤတၢ်ဒီးပှၤမဆါတနံၤအံၤဧါ. ယကလဲၤတၢ်ဖဲယ လဲၤတၢ်လီၤ. က့ၤက့ၤနဲ, ဒီးက့ၤစိာ်နဒီပုၢ်ဝဲၢ်န့ၣ်တက့ၢ်. မ်တၢ်ဘျုးတၢ်ဖှိၣ်, ဒီးတၢ်မ့ၢ်တၢ်တီအိၣ်ဒီးနၤတက့ၢ်.
21 ဒီးစီၤအံတဲၤစံးဆၢစီၤပၤဒီးစံးဝဲဒၣ်, ယွၤမူဝဲ, ဒီးယက စၢ်မူဝဲ, ဖဲဒၣ်အလီၢ်လၢယကစၢ်စီၤပၤအိၣ်ဝဲလၢတၢ် သံအပူၤမ့ၢ်ဂ့ၤ, တၢ်မူအပူၤမ့ၢ်ဂ့ၤ, နခ့နပှၤကအိၣ်ဖဲန့ၣ် စ့ၢ်ကီးလီၤ.
22 ဒီးစီၤဒၤဝံးစံးဘၣ်စီၤအံတဲၤလဲၤတၢ်, ဒီးခီဂာ်တၢ်တ က့ၢ်. ဒီးပှၤကံးတံးဖိစီၤအံတဲၤလဲၤခီဂာ်တၢ်, ဒီးအပှၤက ညီခဲလၢာ်, ဒီးဖိဒံဖိသၣ်လၢအအိၣ်ဒီးအီၤလီၤ.
23 ဒီးပှၤကီၢ်ဖိခဲလၢာ် ဟီၣ်ဝဲလၢအသီၣ်ဖးဒိၣ်, ဒီးပှၤ ဂီၢ်မုၢ်ခီဂာ်တၢ်ခဲလၢာ်, ဒီးစီၤပၤအကစၢ်ဒၣ်ဝဲန့ၣ်ခီဂာ် ထံကျိကံဒြိၣ် ဒီးပှၤခဲလၢာ်ခီဂာ်တၢ်ဆူပှၢ်လၢ်ကျါအ ကျဲန့ၣ်လီၤ.
24 ဒီးကွၢ်ကွၢ်, စီၤစၤဒိးစ့ၢ်ကီး, ဒီးပှၤလ့ၤဝံဖိခဲလၢာ်အိၣ် ဒီးအီၤ, ဒီးစိာ်ဝဲလၢယွၤအတၢ်အၢၣ်လီၤအီလီၤအတ လါဒီးပာ်လီၤယွၤအတလါလီၤ. ဒီးစီၤအ့ဘယၤသၢ် လဲၤထီၣ်ဝဲတုၤလီၤလၢပှၤဂီၢ်မုၢ်ခဲလၢာ် ဟးထီၣ်ကွံာ် လၢဝ့ၢ်ပူၤဝံၤဝဲလီၤ.
25 ဒီးစီၤဒၤဝံးစံးဘၣ်စီၤစၤဒိး, က့ၤစိာ်ယွၤအတလါန့ၣ် ဆူဝ့ၢ်ပူၤတက့ၢ်. ယမ့ၢ်ဘၣ်ဘျုးဘၣ်ဖှိၣ်လၢယွၤအမဲာ် ဒီး, ကဒုးဟဲက့ၤကဒါယၤ, ဒီးကဒုးနဲၣ်ယၤလၢအဝဲန့ၣ်, ဒီးအအိၣ်အလီၢ်လီၤ. 26 ဒီးမ့ၢ်စံးဒ်အံၤ, တဘၣ်ဘၣ်ယ သးလၢနၤဘၣ်ဒီး, ကွၢ်ကွၢ်, ယၤလီၤ. မ်အမၤယၤဖဲအ ဂ့ၤလၢအမဲာ်တက့ၢ်.
27 ဒီးစီၤပၤစံးဘၣ်ပှၤလုၢ်တၢ်အဒိၣ်စီၤစၤဒိး, နမ့ၢ်ပှၤထံၣ် တၢ်တမ့ၢ်ဘၣ်ဧါ. က့ၤက့ၤမုာ်မုာ်ဆူဝ့ၢ်ပူၤဒီးသုဖိခွါခံ ဂၤအိၣ်ဒီးသု, နဖိခွါစီၤအဃံမ့ၤဧး, ဒီးစီၤအ့ဘယၤ သၢ်အဖိခွါစီၤယိနၤသၣ်န့ၣ်တက့ၢ်. 28 ကွၢ်တက့ၢ်. ယ ကအိၣ်လၢပှၢ်မုၢ်ကနၢအတၢ်ပျီပူၤ တုၤတၢ်ကတိၤဟဲ လၢသုအိၣ်လၢ ပှၢ်မုၢ်ကနၢအတၢ်ပျီပူၤတုၤတၢ်ကတိၤ ဟဲလၢသုအိၣ်လၢအကဒုးနဲၣ်ယတၢ်လီၤ.
29 ဒီးစီၤစၤဒိးဒီးစီၤအ့ဘယၤသၢ်, စိာ်က့ၤယွၤအတလါ ဆူယရူၤၡလ့ၣ်အပူၤ, ဒီးအိၣ်ဝဲဖဲန့ၣ်လီၤ.
30 ဒီးစီၤဒၤဝံးလဲၤထီၣ်ကစၢၢ်သ့ၣ်စၤယံးအလိၤ, ဒီးလဲၤ ဝဲ, ဒီးဟီၣ်ဝဲ, ဒီးအခိၣ်ကျၢၢ်ဘၢအသး, ဒီးလဲၤတၢ်အ ခီၣ်ဘ့ၣ်ဆ့, ဒီးကယဲၢ်ပှၤလၢအအိၣ်ဒီးအီၤခဲလၢာ်န့ၣ် ကျၢၢ်ဘၢအခိၣ်, ဒီးလဲၤဝဲ, ဒီးဟီၣ်ဝဲလၢအလဲၤတၢ်အ ဖၢမုၢ်လီၤ.
31 ဒီးပှၤဒုးနဲၣ်စီၤဒၤဝံး, ဒီးစံးဝဲဒၣ်, စီၤအဃံသဖ့ၤလး အိၣ်ဝဲလၢပှၤအၢၣ်လီၤတၢ်အၢအကျါ ဒီးစီၤအးဘၡါ လိၣ်န့ၣ်လီၤ. ဒီးစီၤဒၤဝံးစံးဝဲဒၣ်, ယွၤဧၢ, ဒုးကဲထီၣ်လၢ် စီၤအဃံသဖ့ၤလး အတၢ်ကူၣ်လိာ်အသးန့ၣ်လၢတၢ် ကလီကလီတက့ၢ်.
32 ဒီးတၢ်မၤအသးတုၤ စီၤဒၤဝံးဟဲတုၤလၢတၢ်ဒီခိၣ်ဖဲ အဘူၣ်ထီၣ်ဘါထီၣ်ယွၤဒီး, ကွၢ်ကွၢ်, ပှၤအၢ်ကးဖိစီၤ ဃူၡဲၤဟဲသဂၢၢ်အီၤ, အိၣ်ဒီးအဆ့ယာ်ကွံာ်, ဒီးဟီၣ်ခိၣ် အကမူၣ်အိၣ်လၢအခိၣ်လီၤ.
33 ဒီးစီၤဒၤဝံးစံးဘၣ်အီၤ, နမ့ၢ်လဲၤခီဂာ်တၢ်ဒီးယၤဒီး, နကကဲထီၣ်တၢ်ဝံတၢ်ဃၢလၢယဂီၢ်လီၤ. 34 မ့မ့ၢ်နမ့ၢ် က့ၤဆူဝ့ၢ်ပူၤ, ဒီးစံးဘၣ်စီၤအးဘၡါလိၣ်, ယကကဲထီၣ် နခ့နပှၤ, စီၤပၤဧၢ, ယမ့ၢ်နပၢ်အခ့အပှၤလၢပျၢၤလံၤလံၤ, ဒီးခဲကနံၣ်အံၤ ယကကဲထီၣ်နခ့နပှၤစ့ၢ်ကီးလီၤန့ၣ်ဒီး, နကမၤဟးဂီၤဘၣ် စီၤအဃံသဖ့ၤလးအတၢ်ကူၣ်လိာ် အသးန့ၣ်လၢယဂီၢ်လီၤ. 35 ဒီးပှၤလုၢ်တၢ်အဒိၣ်စီၤစၤဒိး, ဒီးစီၤအ့ဘယၤသၢ်အိၣ်ဒီးနၤဖဲန့ၣ် တမ့ၢ်ဘၣ်ဧါ. ဒီးက ယဲၢ်တၢ်လၢနကနၢ်ဟူလၢစီၤပၤအဟံၣ်ပူၤ တမံၤလၢ် လၢ်န့ၣ် တၢ်ကမၤအသးလၢနဘၣ်စံးဘၣ်ပှၤလုၢ်တၢ် အဒိၣ်စီၤစၤဒိး, ဒီးစီၤအ့ဘယၤသၢ်လီၤ. 36 ကွၢ်ကွၢ်, အဖိခွါခံဂၤအိၣ်ဒီးအီၤဖဲန့ၣ်, စီၤစၤဒိးအဖိခွါစီၤအဃံ မ့ၤဧး, ဒီးစီၤအ့ဘယၤသၢ်အဖိခွါစီၤယိနၤသၣ်, ဒီးသု ဘၣ်ဟ့ၣ်ယုၢ်ယၤလၢ ကယဲၢ်တၢ်လၢသုနၢ်ဟူလၢအ ဝဲသ့ၣ်အစုပူၤလီၤ.
37 ဒီးစီၤဃူၡဲၤစီၤဒၤဝံးအသကိးဟဲနုာ်လၢဝ့ၢ်ပူၤ, ဒီးစီၤ အးဘၡါလိၣ်ဟဲနုာ်လၢယရူၤၡလ့ၣ်အပူၤလီၤ.
16၁၆
1 ဒီးတုၤစီၤဒၤဝံးလဲၤပူၤကွံာ်တၢ်ဒီခိၣ်တစဲးဒီး, ကွၢ်ကွၢ်, စီၤမဖံဘိၤရှ့းအခ့အပှၤ စီၤစံဘၤဟဲသဂၢၢ်အီၤ, အိၣ်ဒီး ကသ့ၣ်ယီၤလၢအဂီၤကၢ်အသးခံဒု, ဒီးကိၣ်အလိၣ်ခံ ကယၤ, ဒီးစပံးသၣ်ဃ့အကူၤတကယၤ, ဒီးတၢ်ကိၢ်အ ကတီၢ်အတၤသၣ်တကယၤ, ဒီးစပံးထံဒၢတၢ်ဖံးတ ဖျၢၣ်အိၣ်ဝဲလၢအလိၤလီၤ.
2 ဒီးစီၤပၤစံးဘၣ်စီၤစံဘၤ, တၢ်အံၤတဖၣ်အိၣ်ဒီးနၤမ့ၢ် ဒ်လဲၣ်. ဒီးစီၤစံဘၤစံးဝဲဒၣ်, ကသ့ၣ်ယီၤအိၣ်လၢစီၤပၤ အပှၤဟံၣ်ဖိအဂီၢ်ဒ်သိးအကဒိးအီၤ, ဒီးကိၣ်ဒီးတၢ်ကိၢ် အကတီၢ်အတၤသၣ်လၢ ပှၤဖိၣ်သၣ်ခွါအတၢ်အီၣ်အ ဂီၢ်, ဒီးစပံးထံန့ၣ်အိၣ်ဝဲ ဒ်သိးပှၤလၢအလီၤဘှါလၢ ပှၢ်မုၢ်ကနၢန့ၣ်ကအီဘၣ်ဝဲလီၤ.
3 ဒီးစီၤပၤစံးဝဲဒၣ်, ဒီးနကစၢ်အဖိခွါန့ၣ် မ့ၢ်အအိၣ်ဖဲ လဲၣ်. ဒီးစီၤစံဘၤစံးဘၣ်စီၤပၤ, ကွၢ်ကွၢ်, အိၣ်ဝဲလၢယ ရူၤၡလ့ၣ်အပူၤလီၤ. အဂ့ၢ်ဒ်အံၤ, စံးဝဲဒၣ်, တၢ်လၢမုၢ်မ ဆါတနံၤအံၤ အံၣ်စရ့လးအပှၤဟံၣ်ဖိကဟ့ၣ်က့ၤယၤ လၢယပၢ်အဘီအမုၢ်န့ၣ်လီၤ.
4 ဒီးစီၤပၤစံးဘၣ်စီၤစံဘၤ, ကွၢ်ကွၢ်, ကယဲၢ်စီၤမဖံဘိၤ ရှ့းအတၢ်မ့ၢ်နတၢ်ခဲလၢာ်လီၤ. ဒီးစီၤစံဘၤစံးဝဲဒၣ်, ယ တီၤလီၤကဒွံကျိာ်လၢနမဲာ်ညါလီၤ. မ်ယဘၣ်ဘျုးဘၣ် ဖှိၣ်လၢနမဲာ်တက့ၢ်. ယကစၢ်စီၤပၤဧၢ.
5 ဒီးတုၤစီၤပၤဒၤဝံးဟဲပၢၢ်လၢဘၤဃူရံၣ်ဒီး, ကွၢ်ကွၢ်, ပှၤလၢစီၤစီလူးအပှၤဟံၣ်ဖိအကျါတဂၤ ဟဲထီၣ်ဖဲန့ၣ်, အမံၤမ့ၢ်စီၤၡံမံၤ, စီၤကရၤအဖိခွါလီၤ. ဟဲထီၣ်ဝဲဒီးဟဲ ထီၣ်ဒီးဆိၣ်အၢတၢ်လီၤ. 6 ဒီးကွံာ်စီၤဒၤဝံး, ဒီးစီၤပၤဒၤ ဝံးအခ့အပှၤခဲလၢာ်လၢလၢၢ်, ဒီးပှၤဂီၢ်မုၢ်ဒီးပှၤအဆူၣ် ခဲလၢာ်အိၣ်ဝဲလၢအစုထွဲဒီးအစုစ့ၣ်လီၤ.
7 ဒီးလၢစီၤၡံမံၤဆိၣ်အၢတၢ်န့ၣ်စံးဝဲဒ်အံၤ, ဟးထီၣ်, ဟးထီၣ်, တၢ်သွံၣ်အပှၤကညီဧၢ, ပှၤဘလးယဧၤလး ဖိဧၢ. 8 ယွၤဟ့ၣ်ကၣ်လံနၤလၢကယဲၢ်စီၤစီလူးအပှၤ ဟံၣ်ဖိအသွံၣ်လံ, ပှၤလၢနကဲစီၤပၤလၢအလီၢ်, ဒီးယွၤ ဟ့ၣ်လီၤလံနဘီနမုၢ်လၢနဖိခွါစီၤအးဘၡါလိၣ်အစုပူၤ လံ. ဒီးကွၢ်ကွၢ်, နဘၣ်တၢ်ဖီၣ်န့ၢ်နၤလၢနတၢ်အၢဒၣ် နဲလီၤ. အဂ့ၢ်ဒ်အံၤ, နမ့ၢ်တၢ်သွံၣ်အပှၤကညီလီၤ.
9 ဒီးနီၢ်စရူၤယၤအဖိခွါ စီၤအဘံၡဲၤစံးဘၣ်စီၤပၤ, ထွံၣ်သံတဒုအံၤကဆိၣ်အၢယကစၢ်စီၤပၤန့ၣ် မ့ၢ်အဘၣ်မ နုၤလဲၣ်. ဒုးလဲၤခီဂာ်လၢ်ယၤတက့ၢ်, ဒီးယကဒီၣ်တဲာ် အကိာ်လီၤ.
10 ဒီးစီၤပၤစံးဝဲဒၣ်, တၢ်ဘၣ်ဃးဒီးယၤဒီးသုမ့ၢ်ဒ်လဲၣ်, နီၢ်စရူၤယၤအဖိခွါသ့ၣ်ဧၢ, ကဆိၣ်အၢဒၣ်ဝဲတက့ၢ်. ဒီး ယွၤမ့ၢ်စံးဘၣ်အီၤ, ဆိၣ်အၢစီၤဒၤဝံးန့ၣ်ဒီး, မ့ၢ်မတၤက စံး, နမၤဒ်န့ၣ်မ့ၢ်အဘၣ်မနုၤလဲၣ်န့ၣ်တဂၤလဲၣ်.
11 ဒီစီၤဒၤဝံးစံးဘၣ်စီၤအဘံၡဲၤ ဒီးအခ့အပှၤခဲလၢာ်, ကွၢ် ကွၢ်, ယဖိခွါလၢအဟဲထီၣ်လၢယပှံာ်ပူၤတဂၤဃုယ သးသမူလီၤ. ခဲကနံၣ်အံၤ, ပှၤဘံၣ်ယၤမံၣ်ဖိအံၤကမၤ ဒိၣ်တက့ၢ်မးဆံးဒိၣ်လဲၣ်. တြီအီၤတဂ့ၤ. ကဆိၣ်ဒၣ်ဝဲ တက့ၢ်. အဂ့ၢ်ဒ်အံၤယွၤမၤလိာ်အီၤလီၤ.
12 ဘၣ်တဘၣ်ယွၤကကွၢ်လီၤယတၢ်နးတၢ်ဖှီၣ်, ဒီးယွၤ ကဟ့ၣ်ကၣ်ယၤလၢတၢ်ဂ့ၤလၢ အတၢ်ဆိၣ်အၢလၢမုၢ် မဆါတနံၤအံၤအဃိလီၤ.
13 ဒီးစီၤဒၤဝံးဒီးအပှၤကညီလဲၤတၢ်လၢကျဲ, ဒီးစီၤၡံမံၤ လဲၤဝဲလၢကစၢၢ်အကပၤ သဃီၤဒီးအီၤ, ဒီးလဲၤဝဲ, ဒီး ဆိၣ်အၢဝဲ, ဒီးကွံာ်အီၤလၢလၢၢ်, ဒီးကွံာ်ဝဲလၢဟီၣ်ခိၣ် အကမူၣ်လီၤ.
14 ဒီးစီၤပၤဒီးပှၤဂီၢ်မုၢ်လၢအအိၣ်ဒီးအီၤခဲလၢာ်, ဟဲဝဲ, ဒီးတၢ်ဘှံးအသး, ဒီးအိၣ်ဘှံးဝဲဖဲန့ၣ်လီၤ.
15 ဒီးစီၤအးဘၡါလိၣ်, ဒီးပှၤဂီၢ်မုၢ်ခဲလၢာ်လၢအံၣ်စရ့ လးအပှၤကညီအကျါန့ၣ် ဟဲဝဲဆူယရူၤၡလ့ၣ်, ဒီးစီၤ ဃံသဖ့ၤလးအိၣ်ဝဲဒီးအီၤလီၤ.
16 ဒီးတၢ်မၤအသးတုၤစီၤဒၤဝံးအတံၤအသကိး ပှၤအၢ် ကးဖိစိၤဃူၡဲၤဟဲဝဲဆူ စီၤအၤဘၡါလိၣ်အအိၣ်န့ၣ်ဒီး, စီၤဃူၡဲၤစံးဘၣ်စီၤအးဘၡါလိၣ်, မ်စီၤပၤမူဝဲတက့ၢ်, မ်စီၤပၤမူဝဲတက့ၢ်.
17 ဒီးစီၤအးဘၡါလိၣ်စံးဘၣ်စီၤဃူၡဲၤ, အအံၤမ့ၢ်နဘျုး နဖှိၣ်လၢနမၤနသကိးစ့ၢ်ကီးဧါ. နတလဲၤဘၣ်ဒီးနတံၤ နသကိးမ့ၢ်အဘၣ်မနုၤလဲၣ်.
18 ဒီးစီၤဃူၡဲၤစံးဘၣ်စီၤအးဘၡါလိၣ်, တမ့ၢ်ဘၣ်. ပှၤ လၢယွၤဒီးပှၤဂီၢ်မုၢ်အံၤ, ဒီးအံၣ်စရ့လးအပှၤကညီခဲ လၢာ်ဃုထၢအီၤတဂၤန့ၣ်ယကကဲထီၣ်အတၢ်, ဒီးယ ကအိၣ်ဒီးအီၤလီၤ 19 မၤကဒီးတစုယကမၤဘၣ်မတၤ အတၢ်တဂၤလဲၣ်. လၢအဖိခွါအမဲာ်ညါတမ့ၢ်ဘၣ်ဧါ. ဒ်ယမၤတၢ်လၢနပၢ်အမဲာ်ညါအသိးန့ၣ် ယကမ့ၢ်တၢ် ဒ်န့ၣ်လၢနမဲာ်ညါလီၤ.
20 ဒီးစီၤအးဘၡါလိၣ်စံးဘၣ်စီၤအဃံသဖ့းလး, ပကမၤ ဒ်လဲၣ်ဒ်လဲၣ်န့ၣ် ကူၣ်လိာ်သုသးလၢသုကျါတက့ၢ်.
21 ဒီးစီၤအဃံသဖ့ၤလးစံးဘၣ်စီၤအးဘၡါလိၣ်, လဲၤနုာ် လၢနပၢ်အသံၣ်အမါ လၢအပာ်လီၤတဲာ်ဝဲလၢအက ပၢၤဟံၣ်တဖၣ်အအိၣ်တက့ၢ်. ဒီးအံၣ်စရ့လးခဲလၢာ် ကနၢ်ဟူလၢနပၢ်သးဘၣ်အၢနၤ, ဒီးကယဲၢ်ပှၤလၢအ အိၣ်ဒီးနၤခဲလၢာ်န့ၣ်, အစုကဆူၣ်ထီၣ်လီၤ.
22 ဒီးပှၤသူၣ်စီၤအးဘၡါလိၣ်အဒဲလၢ ဟံၣ်ခိၣ်, ဒီးစီၤ အးဘၡါလိၣ်လဲၤနုာ်လၢ အပၢ်အသံၣ်အမါတဖၣ်အ အိၣ်လၢအံၣ်စရ့လးခဲလၢာ်အမဲာ်ညါလီၤ.
23 ဒီးတၢ်လၢမုၢ်နံၤတဖၣ်န့ၣ် စီၤအဃံသဖ့ၤလးအကူၣ် တၢ်လၢအဒုးကူၣ်ပှၤဂၤန့ၣ် မၤသးဒ်ပှၤသံကွၢ်တၢ်လၢ ယွၤကလုၢ်အသိးန့ၣ်လီၤ. ကယဲၢ်စီၤအဃံသဖ့ၤလး အဒုးကူၣ်တၢ်မၤသးဒ်န့ၣ်ဒီး စီၤဒၤဝံးဒီးစီၤအးဘၡါ လိၣ်ခံဂၤလိာ်လီၤ.
17၁၇
1 ဒီးအဃံသဖ့ၤလးစံးဘၣ်စီၤအးဘၡါလိၣ်, ဒုးဃုထၢ ယၤလၢပှၤတကလးခံကထိတက့ၢ်. ဒီးယကဂဲၤဆၢ ထၢၣ်ဒီးယကလူၤစီၤဒၤဝံးခဲမုၢ်နၤအံၤလီၤ. 2 ဒီးယက မၤချုးန့ၢ်အီၤ, ဖဲတၢ်ဘှံးအသး, ဒီးအစုလီၤဘှါ, ဒီးယ ကမၤပျံၤအီၤ, ဒီးကယဲၢ်ပှၤလၢအအိၣ်ဒီးအီၤ ခဲလၢာ် န့ၣ်ကဃ့ၢ်ထီၣ်ကွံာ်, ဒီးယကကျီကွံာ်ထဲစီၤပၤတဂၤဧိၤ လီၤ. 3 ဒီးယကဒုးဟဲက့ၤပှၤဂီၢ်မုၢ်ခဲလၢာ်ဆူနအိၣ်လီၤ. ပှၤလၢနဃုန့ၢ်အီၤန့ၣ် မၤသးဒ်ပှၤခဲလၢာ်ဟဲက့ၤအသိး န့ၣ်လီၤ. ပှၤဂီၢ်မုၢ်ခဲလၢာ်ကအိၣ်မုာ်အိၣ်ခုၣ်လီၤ.
4 ဒီးတၢ်ကတိၤန့ၣ်လိၤဝဲလၢ စီၤအးဘၡါလိၣ်အမဲာ်, ဒီးအံၣ်စရ့လးအပှၤသူၣ်က့သးပှၢ်အမဲာ်လီၤ.
5 ဒီးစီၤအးဘၡါလိၣ်စံးဝဲဒၣ်, ကိးန့ၢ်ပှၤအၢ်ကးဖိစီၤဃူ ၡဲၤစ့ၢ်ကီးတက့ၢ်. မ့ၢ်မနုၤအိၣ်လၢအထးခိၣ်န့ၣ်ပကနၢ် ဟူသကိးစ့ၢ်ကီးတက့ၢ်.
6 ဒီးစီၤဃူၡဲၤဟဲဆူစီၤအးဘၡါလိၣ်အအိၣ်, ဒီးစီၤအး ဘၡါလိၣ်ကတိၤတၢ်ဒီးအီၤ, ဒီးစံးဝဲဒၣ်, စီၤအဃံသ ဖ့ၤလးကတိၤတၢ်ဒ်တၢ်ကတိၤအံၤအသိးန့ၣ်, ပဘၣ် မၤအတၢ်ကတိၤန့ၣ်ဧါ, မ့တမ့ၢ်ဘၣ်ဒီး, ကတိၤတၢ်နဲ တက့ၢ်.
7 ဒီးစီၤဃူၡဲၤစံးဘၣ်စီၤအးဘၡါလိၣ်, အအံၤတဘျီစီၤ အဃံသဖ့ၤလးအကူၣ်ထီၣ်တၢ်လၢ အဒုးကူၣ်ထီၣ်ပှၤ တဂ့ၤဘၣ်. 8 ဒီးစီၤဃူၡဲၤစံးဝဲဒၣ်, နသ့ၣ်ညါနပၢ်, ဒီး အပှၤကညီတဖၣ်လၢအမ့ၢ်ပှၤအဆူၣ်, ဒီးအသးဆါ, ဒ်တၤသူမိၢ်လၢ ပှၤဟုၣ်န့ၢ်အဖိလၢပှၢ်လၢ်ကျါအသိး န့ၣ်, ဒီးနပၢ်မ့ၢ်ပှၤသုးဖိဒီးတအိၣ်ဘၣ်သီတနၤကျၢၤဒီး ပှၤဂီၢ်မုၢ်ဘၣ်. 9 ကွၢ်ကွၢ်, အိၣ်ခူသူၣ်ဝဲခဲကနံၣ်အံၤ, လၢ တၢ်ပူၤတပူၤပူၤ, မ့တမ့ၢ်ဘၣ်ဒ်န့ၣ်ဒီး, အိၣ်ဝဲလၢအလီၢ် တပူၤပူၤ, ဒီးတုၤပှၤတနီၤနီၤလီၤဃံၤသီဒီး, တၢ်ကမၤ အသးလၢဖဲဒၣ်ပှၤလၢအနၢ်ဟူဝဲ တဂၤလၢ်လၢ်န့ၣ်က စံးဝဲဒၣ်, တၢ်မၤသံတမံၤအိၣ်ဝဲလၢပှၤလၢ အပိာ်စီၤ အးဘၡါလိၣ်အခံတဖၣ်အကျါန့ၣ်လီၤ.
10 ဒီးပှၤအဆူၣ်လၢအသးမၤသးဒ် ခ့ယုၢ်အသးအသိး န့ၣ်ကပှံၢ်ဝဲသပှၢ်တၢၢ်လီၤ. အဂ့ၢ်ဒ်အံၤ, အံၣ်စရ့လးခဲ လၢာ်သ့ၣ်ညါဝဲလၢနပၢ်မ့ၢ်ပှၤအဆူၣ်, ဒီးပှၤအိၣ်ဒီးအီၤ တဖၣ်မ့ၢ်ပှၤအဆူၣ်လီၤ. 11 မၤသးဒ်န့ၣ်ဒီးယဟ့ၣ်တၢ် ကူၣ်လၢတၢ်ကဒုးအိၣ်ဖှိၣ်ရိဖှိၣ် အံၣ်စရ့လးဆူနအိၣ် လၢဒၣ်ပၢၢ်လၢဘ့ၢ်ၡဘၤ, အါဝဲဒ်မဲးဧိၤဟီၣ်ဧိၤလၢပီၣ် လဲၣ်နံၤအသိးန့ၣ်, ဒီးလၢနကလဲၤဒုးတၢ်နကစၢ်ဒၣ်နဲ လီၤ. 12 ဒီးပကလီၤဘၣ်အလိၤလၢအလီၢ်ဖဲပှၤကထံၣ် န့ၢ်အီၤ, ဒီးပကဟဲလီၤလၢအလိၤဒ်ပစီၤထံလီၤဘၣ်လၢ ဟီၣ်ခိၣ်ချၢအသိးန့ၣ်, ဒီးလၢအဝဲဒၣ်, ဒီးလၢပှၤအိၣ်ဒီး အီၤခဲလၢာ်အကျါန့ၣ် တၢ်တပာ်လီၤတဲာ်ဘၣ်အီၤနီ တဂၤဘၣ်. 13 ဒီးမ့ၢ်လဲၤနုာ်အိၣ်လၢဝ့ၢ်တဝ့ၢ်ဝ့ၢ်အပူၤဒီး, အံၣ်စရ့လးခဲလၢာ်ကဟဲစိာ်ပျံၤတဖၣ်ဆူဝ့ၢ်တဝ့ၢ်န့ၣ်, ဒီးပကထုးန့ၢ်အီၤဆူထံလိာ်ပူၤ တုၤလၢၢ်တအိၣ်လီၤ တဲာ်ဘၣ်ဖဲန့ၣ်နီတဖျၢၣ်ဘၣ်.
14 ဒီးစီၤအးဘၡါလိၣ်, ဒီးအံၣ်စရ့လးအပှၤကညီခဲလၢာ် စံးဝဲဒၣ်, ပှၤအၢ်ကးဖိစီၤဃူၡဲၤအတၢ်ဟ့ၣ်ကူၣ်တၢ်တ မံၤ, ဂ့ၤန့ၢ်စီၤအဃံသဖ့ၤလးအကူၣ်တၢ်တက့ၢ်လီၤ. အ ဂ့ၢ်ဒ်အံၤ, ယွၤမၤလိာ်တၢ်ဒ်သိးစီၤအဃံသဖ့ၤလးအဒုး ကူၣ်တၢ်ဂ့ၤတမံၤန့ၣ် ကတုၤလၢတၢ်ဟးဂီၤ, ဒ်သိးယွၤ ကဒုးဘၣ်စီၤအးဘၡါလိၣ်လၢတၢ်အၢလီၤ.
15 ဒီးစီၤဃူၡဲစံးဘၣ် ပှၤလုၢ်တၢ်အဒိၣ်စီၤစၤဒိး, ဒီးစီၤအ့ ဘယၤသၢ်, စီၤအဃံသဖ့ၤလးဒုးကူၣ်ထီၣ်စီၤအးဘၡါ လိၣ်ဒီးအံၣ်စရ့လးအပှၤသူၣ်က့သးပှၢ်ဒ်အံၤဒ်နုၤ, ဒီးယ ဒုးကူၣ်ထီၣ်ယဲတၢ်ဒ်အံၤဒ်နုၤလီၤ. 16 ဒီးခဲကနံၣ်အံၤမၢ လီၤတၢ်ချ့ချ့, ဒီးဒုးနဲၣ်စီၤဒၤဝံး, ဒီးစံး, အိၣ်သီတနၤ ကျၢၤလၢပှၢ်မုၢ်ကနၢအတၢ်ပျီပူၤတဂ့ၤ, ဒီးခီဂာ်တၢ်သ ပှၢ်တၢၢ်တက့ၢ်. စီၤပၤဒီးပှၤအိၣ်ဒီးအီၤခဲလၢာ်ကဘၣ် တၢ်ယူၢ်လီၤကွံာ်ဘၣ်ဖုးအီၤလီၤ.
17 ဒီးစီၤယိနၤသၣ်, ဒီးစီၤအဃ့မ့ၤဧးဆၢထၢၣ်လၢဧ့ၣ်ရိၤက့လးအဃၢၤ, ဒီးကုၢ်ပိာ်မုၣ်တဂၤလဲၤတၢ်, ဒီးဒုးနဲၣ် အီၤ, ဒီးအဝဲသ့ၣ်လဲၤဒုးနဲၣ်စီၤပၤဒၤဝံးလီၤ. (အဂ့ၢ်ဒ် အံၤ, အဝဲသ့ၣ်တဖၣ်န့ၣ်လဲၤနုာ်အိၣ်ဖျါလၢဝ့ၢ်ပူၤတ သ့ဘၣ်.)
18 ဒီးပှၤဖိၣ်သၣ်ခွါတဂၤထံၣ်ဘၣ်အီၤ, ဒီးစံးဘၣ်စီၤအး ဘၡါလိၣ်လီၤ. ဒီးပှၤခံဂၤန့ၣ်လဲၤတၢ်ချ့ချ့, ဒီးဟဲတုၤ လၢပှၤတဂၤအဟံၣ်လၢဘဃူရံၣ်အပူၤ လၢအအိၣ်ဒီး ထံပူၤလၢအဂၢၤပူၤ, ဒီးယုၢ်လီၤဝဲဆူအပူၤလီၤ.
19 ဒီးပိာ်မုၣ်န့ၣ်ဟံးန့ၢ်တၢ်, ဒီးဒါလီၤကျၢၢ်ဘၢထံပူၤအ အခိၣ်ထိး, ဒီးလိလီၤဘုဂံာ်အသးလၢအဖီခိၣ်, ဒီးတၢ် တမံၤန့ၣ်ပှၤတသ့ၣ်ညါဘၣ်.
20 ဒီးစီၤအးဘၡါလိၣ်အခ့အပှၤ ဟဲဆူပိာ်မုၣ်အအိၣ်လၢ ဟံၣ်ပူၤ, ဒီးစံးဝဲဒၣ်, စီၤယိနၤသၣ်, ဒီးစီၤအဃံမ့ၤဧးမ့ၢ် အအိၣ်ဖဲလဲၣ်. ဒီးပိာ်မုၣ်န့ၣ်စံးဝဲဒၣ်, ခီဂာ်လံထံကျိ လံ. ဒီးဃုဝဲဒီးတထံၣ်ဘၣ်, ဒီးက့ၤက့ၤဝဲဆူယရူၤၡလ့ၣ် လီၤ.
21 ဒီးလၢအဟးထီၣ်ကွံာ်အလီၢ်ခံန့ၣ် တၢ်မၤအသးလၢ အဝဲသ့ၣ်ဟဲထီၣ်လၢထံပူၤ, ဒီးလဲၤဒုးနဲၣ်စီၤပၤဒၤဝံး, ဒီးစံးဘၣ်စီၤဒၤဝံး, ဂဲဆၢထၢၣ်, ဒီးခီဂာ်ထံကျိချ့ချ့တ က့ၢ်. အဂ့ၢ်ဒ်အံၤ, စီၤအဃံသဖ့ၤလးဒုးကူၣ်တၢ်ထီဒါ သုဒ်အံၤဒ်နုၤလီၤ.
22 ဒီးစီၤဒၤဝံးဂဲၤဆၢထၢၣ်, ဒီးကယဲၢ်ပှၤလၢအအိၣ်ဒီး အီၤ, ဒီးခီဂာ်ယၢ်ဒ့ၣ်လီၤ. တုၤမုၢ်ဆ့ၣ်ထီၣ်န့ၣ်ပှၤလၢအ တခီဂာ်ဒံးဘၣ်ယၢ်ဒ့ၣ်န့ၣ်တအိၣ်ဘၣ်နီတဂၤဘၣ်.
23 ဒီးတုၤစီၤအဃံသဖ့ၤလးထံၣ်ဘၣ်ဝဲလၢ အဟ့ၣ်ကူၣ် တၢ်န့ၣ် တဘၣ်တၢ်မၤထွဲအခံဘၣ်ဒီး, ပာ်ဂီၤကၢ်လၢ အကသ့ၣ်ယီၤအလိၤ, ဒီးဂဲၤဆၢထၢၣ်, ဒီးက့ၤက့ၤဝဲဆူ အဟံၣ်, လၢအဝ့ၢ်ဒၣ်ဝဲအပူၤ, ဒီးမၤလိာ်အပှၤဟံၣ်ဖိ အတၢ်, ဒီးစၢၣ်သံအသး, ဒီးသံဝဲ, ဒီးဘၣ်တၢ်ခူၣ်လီၤ ကွံာ်လၢအပၢ်အသွၣ်ခိၣ်ပူၤန့ၣ်လီၤ.
24 ဒီးစီၤဒၤဝံးဟဲဆူမၤဃန့ၤအပူၤ, ဒီးစီၤအးဘၡါလိၣ် ခီဂာ်ယၢ်ဒ့ၣ်, ဒီးအံၣ်စရ့လးအပှၤကညီလၢအအိၣ်ဒီး အီၤခဲလၢာ်လီၤ.
25 ဒီးစီၤအးဘၡါလိၣ်ပာ်စီၤဧမါစၤ လၢပှၤသုးမုၢ်အခိၣ်, လၢစီၤယိၤအာ်အလီၢ်န့ၣ်လီၤ. ဒီးစီၤဧမါစၤမ့ၢ်ပှၤတ ဂၤအဖိခွါလၢအမံၤမ့ၢ်စီၤယ့သ့ၢ်, ပှၤအံၣ်စရ့လးဖိ, လၢ အလဲၤနုာ်ဆူနီၢ်အဘံၤကါယံးလးအအိၣ် နၤဃၣ်အဖိ မုၣ်စီၤယိၤအာ်အမိၢ်နီၢ်စရူယၤအဒီပုၢ်ဝဲၢ်မုၣ်လီၤ.
26 ဒီးအံၣ်စရ့လး, ဒီးစီၤအၤဘၡါလိၣ်သူၣ်ဒဲလၢကီၢ်ကံး လဧးအပူၤလီၤ.
27 ဒီးတုၤစီၤဒၤဝံးဟဲတုၤလၢမၤဃန့ၤဒီး, တၢ်မၤအသး လၢပှၤဧၣ်မိၣ်ဖိ, နၤဃၣ်အဖိခွါစီၤၡှိတံၤဘၣ်ဃးဒီးရး ဘး, ဒီးစီၤဧမံၤအ့လးအဖိခွါစီၤမၤကံၢ်ဘၣ်ဃးဒီးလိဒ ဘၢ်, ဒီးပှၤကံးလဧးဖိစီၤဘၢ်စံးလဲဘၣ်ဃးဒီးရိကလံၣ် သ့ၣ်တဖၣ်န့ၣ်, 28 ဟဲစိာ်လီၢ်မံတဖၣ်, ဒီးသလၢတဖၣ်, ဒီးသပၢၤတဖၣ်, ဒီးဘုကၠူၣ်, ဒီးဘုမုယီၤ, ဒီးကိၣ်အက မူၣ်, ဒီးဘုဝဲာ်အသး, ဒီးပထိး, ဒီးသဘ့, ဒီးတၢ်ဝဲာ်အ သး, 29 ဒီးကနဲစီ, ဒီးတၢ်နုၢ်ထံလီၤသကၤ, ဒီးသိ, ဒီးဂီၤ ဖံးနုၢ်ထံကိၢ်လိၢ်သ့ၣ်တဖၣ်န့ၣ်လၢစီၤဒၤဝံးအဂီၢ်, ဒီး လၢပှၤလၢအအိၣ်ဒီးအီၤအဂီၢ်လီၤ. အဂ့ၢ်ဒ်အံၤ, စံးဝဲဒၣ် ပှၤဂီၢ်မုၢ်ဘၣ်တၢ်သၣ်ဝံၤအသး, ဒီးတၢ်ဘှံးအသး, ဒီး တၢ်သူအသးလၢထံလၢပှၢ်မုၢ်ကနၢန့ၣ်လီၤ.
18၁၈
1 ဒီးစီၤဒၤဝံးဂံၢ်ပှၤဂီၢ်မုၢ်လၢအအိၣ်ဒီးအီၤ, ဒီးပာ်ပှၤတ ကထိအခိၣ်တဖၣ်, ဒီးပှၤတကယၤအခိၣ်တဖၣ်လၢ အဖီခိၣ်လီၤ. 2 ဒီးစီၤဒၤဝံးမၢလီၤသၢဖုတဖုလၢစီၤယိၤ အာ်အစုပူၤ, ဒီးသၢဖုတဖုလၢနီၢ်စရူယၤအဖိခွါ, စီၤ ယိၤအာ်အဒီပုၢ်ဝဲၢ်စီၤအဘံၡဲၤအစုပူၤ, ဒီးသၢဖုတဖုလၢ ပှၤကံးတံးဖိစီၤအံတဲၤအစုပူၤလီၤ. ဒီးစီၤပၤစံးဘၣ်ပှၤ ဂီၢ်မုၢ်, ယကလဲၤထီၣ်စ့ၢ်ကီး ယကစၢ်ဒၣ်ယဲဒီးသုသ ပှၢ်တၢၢ်လီၤ.
3 ဒီးပှၤဂီၢ်မုၢ်စံးဆၢဝဲဒၣ်, နတဘၣ်လဲၤဘၣ်. အဂ့ၢ်ဒ် အံၤ, ပမ့ၢ်ဃ့ၢ်ထီၣ်ကွံာ်ဒီး, အဝဲသ့ၣ်တဖၣ်န့ၣ်တပာ်ပှၤ လၢအသးဘၣ်, ဒီးပမ့ၢ်သံတဝာ်ဒီး, အဝဲသ့ၣ်တဖၣ်န့ၣ် တပာ်ပှၤလၢအသးဘၣ်. အဂ့ၢ်ဒ်အံၤ, ခဲကနံၣ်အံၤနဂ့ၤ န့ၢ်ပဝဲဒၣ်တကလးန့ၣ်တက့ၢ်လီၤ. ဒီးခဲကနံၣ်အံၤဂ့ၤ လၢနကဲထီၣ်တၢ်မၤစၢၤပှၤလၢဝ့ၢ်ပူၤလီၤ.
4 ဒီးစီၤပၤစံးဝဲဒၣ်, ယကမၤတၢ်လၢအဂ့ၤလၢသုမဲာ် လီၤ. ဒီးစီၤပၤဆၢထၢၣ်လၢပဲတရီအဃၢၤ, ဒီးပှၤဂီၢ်မုၢ် ခဲလၢာ်ဟဲထီၣ်တကယၢအဖုတဖၣ်, ဒီးတကထိအဖု တဖၣ်လီၤ.
5 ဒီးစီၤပၤမၤလိာ်စီၤယိၤအာ်, ဒီးစီၤအဘံၡဲၤ, ဒီးစီၤအံ တဲၤ, ဒီးစံးဝဲဒၣ်, မၤပှၤဖိၣ်သၣ်ခွါစီၤအးဘၡါလိၣ်စၢ်စၢ် လၢယဃိတက့ၢ်. ဒီးလၢစီၤဒၤဝံးမၤလိာ်ပှၤသုးဖိအခိၣ် တဖၣ်လၢ စီၤအးဘၡါလိၣ်အဂ့ၢ်အကျိၤန့ၣ် ပှၤဂီၢ်မုၢ် နၢ်ဟူဝဲခဲလၢာ်လီၤ.
6 ဒီးပှၤဂီၢ်မုၢ်ဟးထီၣ်ဝဲဆူတၢ်ပျီပူၤ ထီဒါအံၣ်စရ့လး, ဒီးတၢ်ဒုးသုးန့ၣ်အိၣ်ဝဲလၢ သ့ၣ်တဖုဘၣ်ဃးဒီးအ့ဖ ရဲၣ်အကျါလီၤ. 7 ဒီးအံၣ်စရ့လးအပှၤဂီၢ်မုၢ်ဘၣ်တၢ်မၤ သံအီၤလၢစီၤဒၤဝံးအခ့အပှၤ, ဒီးတၢ်လၢမုၢ်တနံၤန့ၣ် တၢ်မၤသံဖးဒိၣ်အိၣ်ဝဲပှၤကညီခံကလးလီၤ. 8 ဒီးတၢ် ဒုးသုးန့ၣ်လီၤပြံလီၤပြါဖဲန့ၣ် လၢကီၢ်ဒီဘ့ၣ်ညါဒီးတၢ် လၢမုၢ်တနံၤန့ၣ် သ့ၣ်တဖုအီၣ်ကွံာ်ပှၤအါန့ၢ်နးအီၣ် ကွံာ်တၢ်တက့ၢ်လီၤ.
9 ဒီးစီၤအးဘၡါလိၣ်ဘၣ်သဃိာ်ဒီး စီၤဒၤဝံးအခ့အပှၤ ဒီးစီၤအးဘၡါလိၣ်ဒိးကသ့လၤ, ဒီးကသ့ၣ်လၤလဲၤဝဲ လၢသ့ထိးဖၣ်ဖးဒိၣ်တထံးအဒ့တီၣ်အဖီလာ် ဒီးစီၤအး ဘၡါလိၣ်အခိၣ်သူဘၣ်ကွးလၢသ့ထိးဖၣ်ဖးဒိၣ်တထံး န့ၣ်အဒ့, ဒီးအကစၢ်လီၤစဲလၢတၢ်ဖးဖီလီၤ. ဒီးကသ့ၣ် လၤလၢအအိၣ်ဝဲလၢအဖီလာ်န့ၣ်ဟးထီၣ်ကွံာ်ဝဲလီၤ.
10 ဒီးပှၤတဂၤထံၣ်ဘၣ်ဝဲ, ဒီးဒုးနဲၣ်စီၤယိၤအာ်, ဒီးစံးဝဲ ဒၣ်, ကွၢ်ကွၢ်, ယထံၣ်ဘၣ်စီၤအးဘၡါလိၣ်လီၤစဲၤလၢ သ့ထိးဖၣ်ဖးဒိၣ်တထံးအခံလီၤ.
11 ဒီးစီၤယိၤအာ်စံးဘၣ်ပှၤလၢအဒုးနဲၣ်အီၤ, ဒီးကွၢ်ကွၢ်, နထံၣ်ဘၣ်, ဒီးနတကျီကွံာ်ဘၣ်အီၤဆူဟီၣ်ခိၣ်န့ၣ်မ့ၢ် အဘၣ်မနုၤလဲၣ်, ယကဟ့ၣ်တ့ၢ်နၤလၢစ့ဆံဆဲၣ်ဘ့ၣ်, ဒီးယီၢ်တကိးလီၤ.
12 ဒီးပှၤတဂၤန့ၣ်စံးဘၣ်စီၤယိၤအာ်, ယမ့ၢ်ဒိးန့ၢ်စ့တက ထိလၢယစုပူၤဘၣ်ဆၣ်ဒီး, ယတယူာ်ထီၣ်ဘၣ်ယစု ထီဒါစီၤပၤအဖိခွါဘၣ်. အဂ့ၢ်ဒ်အံၤ, လၢပနၢ်ပူၤန့ၣ်စီၤ ပၤမၤလိာ်နၤ, ဒီးစီၤအဘံၡဲၤ, ဒီးစီၤအံတဲၤ, ဒီးစံးဝဲဒၣ်, သုမၤပှၤဖိၣ်သၣ်ခွါစီၤအးဘၡါလိၣ် ဒ်လဲၣ်ဒ်လဲၣ်န့ၣ်ပ လီၢ်သုသးတက့ၢ်. 13 မ့တမ့ၢ်ဘၣ်ဒ်န့ၣ်ဒီး, ယကမၤတၢ် ထီဒါလီၤယသးသမူဒၣ်ယဲလီၤ. အဂ့ၢ်ဒ်အံၤ, တၢ်ကျၢၤ ဘၢအသးလၢစီၤပၤအမဲာ်ညါတအိၣ်ဘၣ်, ဒီးနဲဒၣ်အံၤ နကပာ်ထီၣ်နသးထီဒါယၤလီၤ.
14 ဒီးစီၤယိၤအာ်စံးဝဲဒၣ်, ယတအိၣ်ယံာ်ဘၣ်ဒီးနၤဒ်အံၤ ဘၣ်. ဒီးဟံးန့ၢ်ဘီဖိသၢဘ့ၣ်လၢအစုပူၤဒီးဆဲးဖျိထီၣ် စီၤအးဘၡါလိၣ်အသးလၢအမူဒံးလၢ သ့ထိးဖၣ်အခံ န့ၣ်လီၤ.
15 ဒီးပှၤဖိၣ်သၣ်ခွါဆံဆဲၣ်ဂၤ လၢအစိာ်စီၤယိၤအာ်အစု ကဝဲၤန့ၣ်ကဝီၤဃာ်ဝဲ, ဒီးကျီကွံာ်စီၤအးဘၡါလိၣ်, ဒီး မၤသံအီၤလီၤ.
16 ဒီးစီၤယိၤအာ်အူကွဲၤ, ဒီးပှၤဂီၢ်မုၢ်ဟဲက့ၤလၢအလူၤ အံၣ်စရ့လးလီၤ. အဂ့ၢ်ဒ်အံၤ, စီၤယိၤအာ်တြီပှၤဂီၢ်မုၢ် လီၤ.
17 ဒီးဟံးန့ၢ်စီၤအးဘၡါလိၣ်, ဒီးတ့ၢ်လီၤကွံာ်အီၤဆူတၢ် ပူၤဖးဒိၣ်လၢအအိၣ်ဝဲလၢ သ့ၣ်တဖုန့ၣ်အကျါ, ဒီးပာ် ဖှိၣ်လၢၢ်တပူဖးဒိၣ်လၢအဖီခိၣ်, ဒီးအံၣ်စရ့လးဃ့ၢ်ဝဲ တဂၤဆူအဒဲဒၣ်ဝဲ, တဂၤဆူအဒဲဒၣ်ဝဲစုာ်စုာ်လီၤ.
18 ဒီးစီၤအၤဘၡါလိၣ် လၢအမူဒံးအဖၢမုၢ်ဒီး, ဟံးန့ၢ် ထူၣ်ဖးဒိၣ်တထူၣ်, ဒီးပာ်ထူၣ်ကလာ်လၢအဂီၢ်ဒၣ်ဝဲ, လၢအအိၣ်ဝဲလၢ စီၤပၤအကစၢၢ်ကဆူးလီၤ. အဂ့ၢ်ဒ် အံၤ, စံးဝဲဒၣ်, ယဖိခွါလၢအကဒုးသ့ၣ်နီၣ်ထီၣ်က့ၤယ မံၤတအိၣ်ဘၣ်. ဒီးယုၢ်ထူၣ်န့ၣ်အမံၤဒ်သိးဒီးအမံၤဒၣ် ဝဲ, ဒီးပှၤကိးအီၤလၢစီၤအးဘၡါလိၣ်အပနီၣ်တုၤမုၢ်မ ဆါတနံၤအံၤလီၤ.
19 ဒီးစီၤစၤဒိးအဖိခွါစီၤအဃံမ့ၤဧးစံးဝဲဒၣ်, ဒုးဃ့ၢ်ယၤ တက့ၢ်, ဒီးယကစိာ်န့ၢ်စီၤပၤလၢတၢ်ကစီၣ်လၢယွၤစံၣ် ညီၣ်အီၤလၢအပူၤဖျဲးဒီးအဒုၣ်အဒါအစုပူၤန့ၣ်လီၤ.
20 ဒီးစီၤယိၤအာ်စံးဝဲဒၣ်, လၢမုၢ်မဆါတနံၤအံၤနတ ဘၣ်စိာ်ဘၣ်တၢ်အကစီၣ်ဘၣ်. မုၢ်အဂၤတနံၤန့ၣ်နက စိာ်တၢ်ကစီၣ်လီၤ. မ့မ့ၢ်မုၢ်မဆါတနံၤအံၤနတဘၣ်စိာ် ဘၣ်တၢ်အကစီၣ်ဘၣ်. အဂ့ၢ်ဒ်အံၤ, စီၤပၤအဖိခွါသံ လံ.
21 ဒီးစီၤယိၤအာ်စံးဘၣ်စီၤကူၡံ, လဲၤစံးဘၣ်စီၤပၤလၢ တၢ်လၢနထံၣ်ဘၣ်န့ၣ်တက့ၢ်. ဒီးစီၤကူၤၡံဆုးလီၤအ ခိၣ်လၢစီၤယိၤအာ်အမဲာ်ညါ, ဒီးဃ့ၢ်ဝဲလီၤ.
22 ဒီးစီၤစၤဒိးအဖိခွါ စီၤအဃံမ့ၤဧးစံးကဒီးလၢစီၤယိၤ အာ်, ထီရီတမံၤကမၤဒၣ်ဝဲအသးတက့ၢ်. ဒီးစီၤယိၤအာ် စံးဝဲဒၣ်, နကဃ့ၢ်န့ၣ်မ့ၢ်အဘၣ်မနုၤလဲၣ်, ယဖိခွါဧၢန တၢ်အကစီၣ်တအိၣ်ဘၣ်.
23 ဒီးထီရီၤတၢ်ကမၤဒၣ်ဝဲအသးတက့ၢ်. ဒုးဃ့ၢ်လၢ်ယၤ တက့ၢ်. ဒီးစံးဘၣ်အီၤ, ဃ့ၢ်, ဒီးစီၤအဃံမ့ၤဧးဃ့ၢ်ဝဲလၢ တၢ်ပျီပူၤအကျဲ, ဒီးလဲၤပူၤကွံာ်စီၤကူၤၡံန့ၣ်လီၤ.
24 ဒီးစီၤဒၤဝံးဆ့ၣ်နီၤဝဲလၢ ပဲတရီခံဘ့ၣ်န့ၣ်အဘၢၣ်စၢၤ, ဒီးပှၤပၢၤတၢ်ဖိလဲၤထီၣ်ဆူပဲတရီအဟံၣ်ခိၣ် လၢခိၣ်ဒူ န့ၣ်, ဒီးကျ့ထီၣ်အမဲာ်, ဒီးကွၢ်ဝဲ, ဒီးကွၢ်ကွၢ်, ပှၤတဂၤ ဃ့ၢ်ဝဲတဂၤဃီလီၤ.
25 ဒီးပှၤပၢၤတၢ်ဖိကိးထီၣ်, ဒီးဒီးဒုးနဲၣ်စီၤပၤ, ဒီးစီၤပၤစံး ဝဲဒၣ်, မ့ၢ်အိၣ်တဂၤဃီဒီး, အိၣ်ဝဲဒီးတၢ်အကစီၣ်လၢအ ထးခိၣ်လီၤ. ဒီးဟဲဝဲ, ဒီးသုးဘူးအသးလီၤ.
26 ဒီးပှၤပၢၤတၢ်ဖိထံၣ်ပှၤတဂၤဒၣ်ဃ့ၢ်ဝဲ, ဒီးပှၤပၢၤတၢ်ဖိ ကိးဆူပှၤပၢၤပဲတရီတဂၤ, ဒီးစံးဝဲဒၣ်, ပှၤတဂၤဃ့ၢ်တ ဂၤဃီလီၤ. ဒီးစီၤပၤစံးဝဲဒၣ်, အဝဲဒၣ်စိာ်တၢ်အကစီၣ် စ့ၢ်ကီးလီၤ.
27 ဒီးပှၤပၢၤတၢ်ဖိစံးဝဲဒၣ်, ယကွၢ်ပှၤလၢအဃ့ၢ်ဆိတ ဂၤဒ်စီၤစၤဒိးအဖိခွါ စီၤအဃံမ့ၤဧးအဃ့ၢ်တၢ်အသိးန့ၣ် လီၤ. ဒီးစီၤပၤစံးဝဲဒၣ်, အဝဲတဂၤန့ၣ်မ့ၢ်ပှၤအဂ့ၤ, ဒီး ဟဲဝဲဒီးတၢ်အကစီၣ်အဂ့ၤလီၤ.
28 ဒီးစီၤအဃံမ့ၤဧးကိးထီၣ်, ဒီးစံးဝဲဒၣ်, တၢ်အမုာ်လီၤ. ဒီးတီၤလီၤကဒွံကျိာ်လၢစီၤပၤအမဲာ်ညါ, ဒီးစံးဝဲဒၣ်, ယွၤနကစၢ်လၢအဟ့ၣ်လီၤကွံာ်ပှၤကညီတဖၣ် လၢအ ယူာ်ထီၣ်အစုထီဒါယကစၢ်စီၤပၤန့ၣ် မ်အဘၣ်တၢ်စံး ထီၣ်ပတြၢၤအီၤတက့ၢ်.
29 ဒီးစီၤပၤစံးဝဲဒၣ်, ပှၤဖိၣ်သၣ်ခွါစီၤအးဘၡါလိၣ်န့ၣ် မ့ၢ်အအိၣ်မုာ်စ့ၢ်ကီးဧါ. ဒီးစီၤအဃံမ့ၤဧးစံးဝဲဒၣ်, လၢ စီၤယိၤအာ်မၢလီၤစီၤပၤအခ့အပှၤ ဒီးနခ့နပှၤယၤအံၤ ဒီး, ယထံၣ်လၢတၢ်တၢထီၣ်တၢလီၤဖးဒိၣ်, ဒီးအမ့ၢ်မ နုၤမနုၤလဲၣ်န့ၣ်ယတသ့ၣ်ညါဘၣ်.
30 ဒီးစီၤပၤစံးဘၣ်အီၤ, ဃၣ်ဃီၤနသး, ဒီးဆၢထၢၣ်ဖဲအံၤ တက့ၢ်. ဒီးဃၣ်ဃီၤအသးဒီးဆၢထၢၣ်ဝဲလီၤ.
31 ဒီးကွၢ်ကွၢ်, စီၤကူၤၡံဟဲဝဲ, ဒီးစီၤကူၤၡံစံးဝဲဒၣ်, တၢ်အ ကစီၣ်, ယကစၢ်စီၤပၤဧၢ, အဂ့ၢ်ဒ်အံၤ, လၢမုၢ်မဆါတ နံၤအံၤ, ယွၤစံၣ်ညီၣ်နပူၤဖျဲးဒီးကယဲၢ်ပှၤလၢအဂဲၤဆၢ ထၢၣ်ထီဒါနၤခဲလၢာ်အစုပူၤန့ၣ်လီၤ.
32 ဒီးစီၤပၤစံးလၢစီၤကူၤၡံ, ပှၤဖိသၣ်ခွါစီၤအးဘၡါလိၣ် န့ၣ်မ့ၢ်အအိၣ်မုာ်စ့ၢ်ကီးဧါ. ဒီးစီၤကူၤၡံစံးဝဲဒၣ်, ယက စၢ်စီၤပၤအဒုၣ်အဒါ, ဒီးကယဲၢ်ပှၤလၢအဂဲၤဆၢထၢၣ် ထီဒါနၤခဲလၢာ်န့ၣ် မ်အအိၣ်ဒ်ဖိၣ်သၣ်ခွါတဂၤန့ၣ်အ သိးတက့ၢ်.
33 ဒီးစီၤပၤကနိးကစုာ်, ဒီးလဲၤထီၣ်ဝဲဆူတၢ်ဒၢးပူၤလၢပဲ တရီအဖီခိၣ်, ဒီးဟီၣ်ဝဲလီၤ. ဒီးလဲၤတၢ်အဖၢမုၢ်န့ၣ်ဒီး စံးဝဲဒ်အံၤ, ယဖိခွါအးဘၡါလိၣ်ဧၢ, ယဖိခွါ, ယဖိခွါ အးဘၡါလိၣ်ဧၢ, မ်ယသံတ့ၢ်လၢနဂီၢ် ယဖိခွါအးဘ ၡါလိၣ်ဧၢ, ယဖိခွါအးဘၡါလိၣ်ဧၢ, ယဖိခွါဧၢ.
19၁၉
1 ဒီးပှၤစံးဘၣ်စီၤယိၤအာ်, ကွၢ်ကွၢ်, စီၤပၤဟီၣ်ဝဲ, ဒီးအ သးသယုၢ်စီၤအးဘၡါလိၣ်လီၤ.
2 ဒီးတၢ်လၢမုၢ်တနံၤန့ၣ် တၢ်အုၣ်က့ၤခီၣ်က့ၤန့ၣ်ကဲ ထီၣ်ဝဲလၢတၢ်မိၣ်တၢ်မးလၢပှၤခဲလၢာ်အဂီၢ်လီၤ. အဂ့ၢ် ဒ်အံၤ, ပှၤဂီၢ်မုၢ်နၢ်ဟူလၢမုၢ်တနံၤန့ၣ်လၢစီၤပၤအသူၣ် ကိၢ်အသးဂီၤလၢအဖိခွါအဃိန့ၣ်လီၤ.
3 ဒီးပှၤဂီၢ်မုၢ်န့ၣ်ဟဲခူသူၣ်ဝဲဆူဝ့ၢ်ပူၤ, ဒ်ပှၤလၢအမဲာ်ဆှး ပာ်ခူသူၣ်အသးဖဲအဃ့ၢ်ကွံာ်လၢ တၢ်ဒုးသုးအပူၤအ သိးန့ၣ်လီၤ.
4 ဒီးစီၤပၤကျၢၢ်ဘၢအမဲာ်, ဒီးစီၤပၤကိးပသူထီၣ်, ယဖိ ခွါအးဘၡါလိၣ်ဧၢ, အးဘၡါလိၣ်ဧၢ, ယဖိခွါဧၢ, ယဖိ ခွါဧၢ.
5 ဒီးစီၤယိၤအာ်ဟဲနုာ်လၢဟံၣ်ပူၤဆူစီၤပၤအအိၣ်, ဒီးစံး ဝဲဒၣ်, တၢ်လၢမုၢ်မဆါတနံၤအံၤ နဒုးမဲာ်ဆှးနခ့နပှၤ ခဲလၢာ်လၢ အအုၣ်က့ၤခီၣ်က့ၤနသးသမူလၢမုၢ်မဆါ တနံၤအံၤ, ဒီးနဖိခွါတဖၣ်ဒီးနဖိမုၣ်တဖၣ်အသးသမူ, ဒီးနမါတဖၣ်အသးသမူ, ဒီးနသံၣ်မါတဖၣ်အသးသ မူ, 6 လၢနအဲၣ်နဒုၣ်နဒါ, ဒီးသးဟ့နတံၤနသကိးအဃိ န့ၣ်လီၤ. အဂ့ၢ်ဒ်အံၤ, နဒုးနဲၣ်လၢမုၢ်မဆါတနံၤအံၤလၢ ပဒိၣ်မ့ၢ်ဂ့ၤ, တၢ်အခ့အပှၤမ့ၢ်ဂ့ၤ, တမ့ၢ်ဘၣ်တၢ်ဘၣ်လၢ နမဲာ်ညါဘၣ်. အဂ့ၢ်ဒ်အံၤ, ယသ့ၣ်ညါလၢမုၢ်မဆါတ နံၤအံၤလၢစီၤအးဘၡါလိၣ်မ့ၢ်မူဒံး, ဒီးပမ့ၢ်သံပဝဲဒၣ် ခဲလၢာ်လၢမုၢ်မဆါတနံၤအံၤဒီး, မ့ၢ်တၢ်အဂ့ၤလၢနမဲာ် လီၤ. 7 ဒီးခဲကနံၣ်အံၤဂဲၤဆၢထၢၣ်, လဲၤထီၣ်, ဒီးကတိၤ မုာ်က့ၤနခ့နပှၤတဖၣ်အသးတက့ၢ်. အဂ့ၢ်ဒ်အံၤ, ယဆိၣ် တၢ်လၢယွၤအမဲာ်ညါလၢနမ့ၢ်တလဲၤထီၣ်ဘၣ်ဒီး, ပှၤ တအိၣ်ဘၣ်ဒီးနၤလၢမုၢ်တနံၤအံၤနီတဂၤဘၣ်. ဒီးတၢ် အၢအံၤကနးန့ၢ် ကယဲၢ်တၢ်အၢလၢအဘၣ်နၤလၢနဖိၣ် သၣ်ခွါထီၣ်လံၤလံၤ တုၤခဲကနံၣ်အံၤတက့ၢ်လီၤ.
8 ဒီးစီၤပၤဂဲၤဆၢထၢၣ်, ဒီးဆ့ၣ်နီၤဝဲလၢပဲတရီအပူၤဒီး ပှၤစံးဘၣ်ပှၤခဲလၢာ်, ဒီးစံးဝဲဒၣ်, ကွၢ်ကွၢ်, စီၤပၤဆ့ၣ်နီၤ ဝဲလၢပဲတရီအပူၤလီၤ. ဒီးပှၤခဲလၢာ်ဟဲဆူစီၤပၤအမဲာ် ညါလီၤ.
9 မ့မ့ၢ်အံၣ်စရ့လးဃ့ၢ်ထီၣ်ကွံာ်တ့ၢ်လံ, တဂၤဆူအဒဲ ဒၣ်ဝဲ, တဂၤဆူအဒဲဒၣ်ဝဲလံ. ဒီးပှၤဂ့ၢ်လိာ်ဘှီလိာ်ခဲ လၢာ်လၢကယဲၢ်အံၣ်စရ့လးအဒူၣ်တဖၣ်အကျါ, ဒီးစံး ဝဲဒၣ်, စီၤပၤမၤပူၤမၤဖျဲးပှၤလၢပဒုၣ်ပဒါအစုပူၤ, ဒီးမၤ ထူၣ်ဖျဲးပှၤလၢ ပှၤဖလ့ၡသးဖိအစုပူၤလီၤ. ဒီးခဲကနံၣ် အံၤ, ဃ့ၢ်ထီၣ်ကွံာ်လၢကီၢ်ပူၤလၢစီၤအးဘၡါလိၣ်အ ဃိလီၤ. 10 ဒီးစီၤအးဘၡါလိၣ်လၢ ပဖှူအီၤလၢပဖီခိၣ် တဂၤသံလံလၢတၢ်ဒုးသုးအပူၤလံ. ဒီးခဲကနံၣ်အံၤသု တကတိၤဘၣ်တၢ်လၢတၢ်ဒုးဟဲက့ၤစီၤပၤအဂ့ၢ်အကျိၤ န့ၣ် မ့ၢ်အဘၣ်မနုၤလဲၣ်.
11 ဒီးစီၤပၤမၢလီၤတၢ်ဆူပှၤလုၢ်တၢ်အဒိၣ်စီၤစၤဒိး, ဒီး စီၤအ့ဘယၤသၢ်အအိၣ်, ဒီးစံးဝဲဒၣ်, ကတိၤတၢ်ဒီးယူ ဒၤအပှၤသူၣ်က့သးပှၢ်ဒီးစံး, သုမ့ၢ်ပှၤအခံကတၢၢ်လၢ အကဒုးဟဲက့ၤစီၤပၤဆူအဟံၣ်န့ၣ်မ့ၢ်အဘၣ်မနုၤလဲၣ်. အဂ့ၢ်ဒ်အံၤ, အံၣ်စရ့လးခဲလၢာ်အတၢ်ကတိၤဟဲနုာ် လၢစီၤပၤအအိၣ်, ဆူအဟံၣ်ပူၤလီၤ. 12 သုမ့ၢ်ယဒီပုၢ်ဝဲၢ် သုမ့ၢ်ယဃံဒီးယညၣ်လီၤ. ဒီးသုမ့ၢ်ပှၤအခံကတၢၢ်လၢ အကဟဲက့ၤစိာ်စီၤပၤန့ၣ်မ့ၢ်အဘၣ်မနုၤလဲၣ်. 13 ဒီးစံး ဘၣ်စီၤဧမါစၤ, နမ့ၢ်ယဃံဒီးယညၣ်တမ့ၢ်ဘၣ်ဧါ. နမ့ၢ် တကဲထီၣ်ဘၣ်ပှၤသုးမုၢ်အခိၣ်တထံၣ်ဃီလၢ စီၤယိၤ အာ်အလီၢ်ဘၣ်ဒီး, မ်ယွၤမၤယၤဒ်န့ၣ်ဒီးအါန့ၢ်အန့ၣ် တက့ၢ်လီၤ.
14 ဒီးဒုးသကူးယူဒၤအပှၤကညီအသးခဲလၢာ် ဒ်ပှၤတ ဂၤဃီအသိးန့ၣ်လီၤ. ဒီးအဝဲသ့ၣ်မၢလီၤတၢ်ဆူစီၤပၤ အအိၣ်ဒီးစံးဝဲဒၣ်, ဟဲက့ၤနဲ, ဒီးနခ့နပှၤခဲလၢာ်တက့ၢ်.
15 ဒီးစီၤပၤဟဲက့ၤကဒါက့ၤ, ဒီးဟဲတုၤလၢယၢ်ဒ့ၢ်အနံၤ လီၤ. ဒီးယူဒၤဟဲဆူကံးလကၤလးဒ်သိးအကလဲၤသ ဂၢၢ်စီၤပၤ, ဒ်သိးအကဆှၢစီၤပၤခီဂာ်ယၢ်ဒ့ၣ်လီၤ.
16 ဒီးပှၤဘံၣ်ယၤမံၣ်ဖိစီၤက့ရၤအဖိခွါ စီၤၡံမံၤလၢအ ဘၣ်ဃးဒီးဘၤဃူရံၣ်တဂၤမၤချ့ချ့, ဒီးဟဲလီၤဒီးယူဒၤ အပှၤကညီဒ်သိးအကသဂၢၢ်စီၤပၤဒၤဝံးလီၤ. 17 ဒီးဘံၣ် ယၤမံၣ်အပှၤကညီတကထိ, ဒီးစီၤစီလူးအပှၤဟံၣ်ဖိ အခ့အပှၤစီၤစံဘၤ, ဒီးအဖိခွါတဆံယဲၢ်ဂၤ, ဒီးအကုၢ်အ ပှၤခံဆံအိၣ်ဒီးအီၤ, ဒီးအဝဲသ့ၣ်တဖၣ်န့ၣ်ခီဂာ်ယၢ်ဒ့ၣ် ဆူစီၤပၤအအိၣ်လီၤ.
18 ဒီးချံတဘ့ၣ်ခီဂာ်တၢ် ဒ်သိးအကဒုးခီဂာ်စီၤပၤအပှၤ ဟံၣ်ဖိ, ဒီးဒ်သိးအကမၤတၢ်ဂ့ၤလၢစီၤပၤအမဲာ်လီၤ, ဒီး စီၤက့ရၤအဖိခွါစီၤၡံမံၤ ထိၣ်လီၤပှီၤအသးလၢစီၤပၤအ မဲာ်ညါဖဲအကခီဂာ်တ့ၢ်ယၢ်ဒ့ၢ်လီၤ. 19 ဒီးစံးဘၣ်စီၤပၤ မ်ယကစၢ်အသုတပာ်တၢ်ဒဲးဘးလၢယလိၤတဂ့ၤ, ဒီး မ်နသုတသ့ၣ်နီၣ်ထီၣ်က့ၤတၢ်လၢနခ့နပှၤ မၤအၢလၢ မုၢ်တနံၤလၢယကစၢ်စီၤပၤ ဟးထီၣ်လၢယရူၤၡလ့ၣ်အ ပူၤတဂ့ၤ. မ်စီၤပၤအသုတပာ်အီၤလၢအသးကံၢ်ပူၤတ ဂ့ၤ. 20 အဂ့ၢ်ဒ်အံၤ, နကုၢ်နပှၤသ့ၣ်ညါဝဲလၢယမၤက မၣ်ဘၣ်လံတၢ်လံ. ဒီးကွၢ်ကွၢ်, ယဟဲလီၤဆိလၢကယဲၢ် ယိၤသးအပှၤဟံၣ်ဖိအကျါ လၢမုၢ်မဆါတနံၤအံၤဒ်သိး ယကသဂၢၢ်ယကစၢ်စီၤပၤလီၤ.
21 ဒီးနီၢ်စရူယၤအဖိခွါ စီၤအဘံၡဲစံးဆၢတၢ်ဒီးစံးဝဲဒၣ်, စီၤၡံမံၤကဘၣ်တၢ်မၤသံအီၤလၢ တၢ်တမံၤအံၤအဃိ, တမ့ၢ်ဘၣ်ဧါ. အဂ့ၢ်ဒ်အံၤ, ဆိၣ်အၢယွၤအပှၤဒိးဖှူအသး လီၤ.
22 ဒီးစီၤဒၤဝံးစံးဝဲဒၣ်, ဒ်သိးသုကကဲယဒုၣ်ယဒါလၢမုၢ် မဆါတနံၤအံၤ, သုဘၣ်ဃးဒီးယၤဒ်လဲၣ်, နီၢ်စရူယၤ အဖိခွါသ့ၣ်ဧၢ. ပှၤကဘၣ်တၢ်မၤသံအီၤတဂၤဂၤလၢ မုၢ်မဆါတနံၤအံၤလၢအံၣ်စရ့လးအကျါန့ၣ်ဧါ. ယမ့ၢ် စီၤပၤလၢအံၣ်စရ့လးအဖီခိၣ် လၢမုၢ်မဆါတနံၤအံၤယ တသ့ၣ်ညါဘၣ်ဧါ.
23 ဒီးစီၤပၤစံးဘၣ်စီၤၡံမံၤ, နတသံဘၣ်ဘၣ်, ဒီးစီၤပၤ ဆိၣ်တၢ်ဒီးအီၤလီၤ.
24 ဒီးစီၤစီလူးအဖိခွါ, စီၤမဖံဘိရှ့းဟဲလီၤသဂၢၢ်စီၤပၤ, ဒီးတကတဲာ်ကတီၤဘၣ်အခီၣ်, ဒီးတကတဲာ်ကတီၤ ဘၣ်အခၣ်ဆူၣ်, ဒီးတဆှုၣ်ဘၣ်အကူအသိးလၢမုၢ်တ နံၤလၢစီၤပၤဟးထီၣ်ကွံာ်တုၤလီၤမုၢ်တနံၤ လၢအဟဲ က့ၤကဒါက့ၤမုာ်မုာ်န့ၣ်လီၤ.
25 ဒီးတုၤအတုၤလၢယရူၤၡလ့ၣ် ဒ်သိးအကသဂၢၢ်စီၤ ပၤဒီး, တၢ်မၤအသးလၢစီၤပၤစံးဘၣ်အီၤ, နတလဲၤဘၣ် ဒီးယၤဘၣ်န့ၣ်မ့ၢ်အဘၣ်မနုၤလဲၣ်, စီၤမဖံဘိၤရှ့းဧၢ.
26 ဒီးစံးဆၢဝဲဒၣ်, ယကစၢ်စီၤပၤဧၢ, ယခ့ယပှၤလီန့ၢ် ယၤလီၤ. အဂ့ၢ်ဒ်အံၤ, နခ့နပှၤစံးဝဲဒၣ်, ယကဂီၤကၢ်က ကသ့ၣ်ယီၤဒီးဒိးအီၤ, ဒီးလဲၤဆူစီၤပၤအအိၣ်လီၤ. အဂ့ၢ် ဒ်အံၤ, နခ့နပှၤအခီၣ်ဟးဂီၤလီၤ. 27 ဒီးအဝဲဒၣ်န့ၢ်ကတိၤ ခဲၣ်နခ့နပှၤလၢယကစၢ်စီၤပၤအမဲာ်ညါလီၤ. ဒီးယက စၢ်စီၤပၤမ့ၢ်ဒ်ယွၤအကလူးတဂၤအသိးလီၤ. ဒီးမၤတၢ် လၢအဂ့ၤလၢနမဲာ်တက့ၢ်. 28 အဂ့ၢ်ဒ်အံၤ, ယပၢ်အပှၤ ဟံၣ်ဖိခဲလၢာ်မ့ၢ်ပှၤသံဖိလၢ ယကစၢ်စီၤပၤအမဲာ်ညါ လီၤ. ဘၣ်ဆၣ်ဒီးနပာ်နခ့နပှၤလၢအအီၣ်တၢ်လၢနစီၢ် နီၤခိၣ်ဒၣ်နဲတဖၣ်အကျါလီၤ. ဒီးယကကိးထီၣ်ဒံးဆူ စီၤပၤ, အလီၢ်အိၣ်ဒံးမနုၤတမံၤလဲၣ်.
29 ဒီးစီၤပၤစံးဘၣ်အီၤ, နကတိၤဒံးလၢနတၢ်န့ၣ်အဂ့ၢ် အကျိၤဒံးမ့ၢ်အဘၣ်မနုၤလဲၣ်. ယစံး, နဲဒၣ်ဒီးစီၤစံဘၤ န့ၣ်ဘၣ်နီၤဖးဟီၣ်ခိၣ်အဆၢလီၤ.
30 ဒီးစီၤမဖံဘိရှ့းစံးဘၣ်စီၤပၤ, ကဟံးန့ၢ်ဒၣ်ဝဲလၢတၢ် ခဲလၢာ်တက့ၢ်. မ့ၢ်စီၤပၤဟဲက့ၤကဒါက့ၤလံဆူအဟံၣ် ဒၣ်ဝဲမုာ်မုာ်အဃိလီၤ.
31 ဒီးပှၤကံးလဧးဖိစီၤဘၢ် စံးလဲဟဲလီၤလၢရိကလံၣ်, ဒီးလဲၤခီဂာ်ယၢ်ဒ့ၣ်ဆူစီၤပၤအအိၣ်, ဒ်သိးအကဆှၢအီၤ ခီဂာ်ယၢ်ဒ့ၣ်လီၤ.
32 ဒီးစီၤဘၢ်စံးလဲအသးပှၢ်တ့ၢ်အနံၣ်ဃိးဆံ, ဒီးကတဲာ် ကတီၤစီၤပၤအတၢ်အီၣ်တၢ်အီလၢ အအိၣ်လၢမၤဃ န့ၤအဖၢမုၣ်န့ၣ်လီၤ. အဂ့ၢ်ဒ်အံၤ, မ့ၢ်ပှၤအဒိၣ်အထီဖး ဒိၣ်လီၤ.
33 ဒီးစီၤပၤစံးဘၣ်စီၤဘၢ်စံးလဲ, ဟဲခီဂာ်တၢ်ဒီးယၤတ က့ၢ်. ဒီးယကဒုးအီၣ်ဒုးအီနၤလၢယရူၤၡလ့ၣ်အပူၤန့ၣ် လီၤ.
34 ဒီးစီၤဘၢ်စံးလဲစံးဘၣ်စီၤပၤ, ဒ်သိးယကလဲၤထီၣ်ဒီး စီၤပၤဆူယရူၤၡလ့ၣ်ဒီး, ယမူဒံးအနံၣ်အလါအမုၢ်နံၤ တဖၣ်န့ၣ်မ့ၢ်အိၣ်ဒံးဆံးအါလဲၣ်. 35 တၢ်လၢမုၢ်မဆါတ နံၤအံၤယသးပှၢ်တ့ၢ်အနံၣ်ဃိးဆံလီၤ. ယနီၤဖးတၢ်ဂ့ၤ ဒီးတၢ်အၢအဆၢန့ၣ်ဘၣ်ကကဲဧါ. တၢ်လၢယအီၣ်ယ အီန့ၣ်နခ့နပှၤလ့ၣ်ကွၢ်ဘၣ်ကကဲဧါ. ပိာ်မုၣ်မၤထါအ သီၣ်မ့ၢ်ဂ့ၤ, ပိာ်ခွါမၤထါအသီၣ်မ့ၢ်ဂ့ၤ, ယနၢ်ဟူကဲဒံး ဧါ. ဒီးနခ့နပှၤကကဲဒံးလၢတၢ်ဝံတၢ်ဃၢလၢစီၤပၤအ ဂီၢ်မ့ၢ်အဘၣ်မနုၤလဲၣ်. 36 နခ့နပှၤကလဲၤခီဂာ်ယၢ်ဒ့ၣ် တစဲးဖိဒီးစီၤပၤ, ဒီးစီၤပၤကဟ့ၣ်ကၣ်ယၤလၢ တၢ်အ ဘူးအလဲအံၤမ့ၢ်အဘၣ်မနုၤလဲၣ်. 37 ဒုးက့ၤက့ၤနခ့နပှၤ, ဒီးယကသံလၢယဝ့ၢ်ဒၣ်ယဲအပူၤ, အိၣ်ဒီးယမိၢ်ယပၢ် အသွၣ်ခိၣ်လီၤ. ဒီးကွၢ်ကွၢ်, နခ့နပှၤစီၤကံမဟၣ်လီၤ. အဝဲဒၣ်ကခီဂာ်ဒၣ်ဝဲဒီး ယကစၢ်စီၤပၤ, ဒီးမၤအီၤလၢ တၢ်လၢအဂ့ၤလၢနမဲာ်တက့ၢ်.
38 ဒီးစီၤပၤစံးဝဲဒၣ်, စီၤကံမဟၣ်ဘၣ်လဲၤခီဂာ်တၢ်ဒီး ယၤ, ဒီးယကမၤအီၤလၢ တၢ်လၢအဂ့ၤလၢနမဲာ်, ဒီးဖဲ ဒၣ်တၢ်လၢနဃုထၢဃ့လၢယၤ တမံၤလၢ်လၢ်န့ၣ်ယ ကမၤနၤလီၤ.
39 ဒီးပှၤဂီၢ်မုၢ်ခဲလၢာ်လဲၤခီဂာ်ယၢ်ဒ့ၣ်, ဒီးတုၤစီၤပၤခီ ဂာ်ဝံၤဒီး, စီၤပၤနၢမူစီၤဘၢ်စံးလဲ, ဒီးဆိၣ်ဂ့ၤအီၤ, ဒီးက့ၤ က့ၤဝဲဆူအလီၢ်ဒၣ်ဝဲန့ၣ်လီၤ.
40 ဒီးစီၤပၤလဲၤတၢ်ဆူကံးလကၤလး, ဒီးစီၤကံမဟၣ် လဲၤဒီးအီၤ, ဒီးယူဒၤအပှၤဂီၢ်မုၢ်ခဲလၢာ်ဆှၢစီၤပၤ, ဒီး အံၣ်စရ့လးအပှၤဂီၢ်တဝာ်စ့ၢ်ကီးလီၤ.
41 ဒီးကွၢ်ကွၢ်, အံၣ်စရ့လးအပှၤဂီၢ်မုၢ်ခဲလၢာ်ဟဲဝဲဆူစီၤ ပၤအအိၣ်, ဒီးစံးဘၣ်စီၤပၤ, ပဒီပုၢ်ဝဲၢ်, ယူဒၤအပှၤကညီ ဟုၣ်န့ၢ်နၤ, ဒီးဟဲစိာ်ခီဂာ်စီၤပၤလၢယၢ်ဒ့ၣ်, ဒီးအပှၤ ဟံၣ်ဖိ, ဒီးစီၤဒၤဝံးအပှၤကညီအိၣ်ဒီးအီၤခဲလၢာ်န့ၣ်မ့ၢ် အဘၣ်မနုၤလဲၣ်.
42 ဒီးယူဒၤအပှၤကညီခဲလၢာ် စံးဆၢအံၣ်စရ့လးအပှၤ ကညီ, အဂ့ၢ်ဒ်အံၤ, စီၤပၤမ့ၢ်ပဘူးပတံၢ်လီၤ. သုးသး ထီၣ်ပှၤလၢတၢ်အံၤအဃိ, မ့ၢ်အဘၣ်မနုၤလဲၣ်. မ့ၢ်ပအီၣ် စီၤပၤအတၢ်ဧါ. ဒီးမ့ၢ်အဟ့ၣ်လီၤပှၤလၢတၢ်မံၤမံၤဧါ.
43 ဒီးအံၣ်စရ့လးအပှၤကညီ စံးဆၢယူဒၤအပှၤကညီ, ဒီး စံးဝဲဒၣ်, လၢစီၤပၤအပူၤန့ၣ်ပအိၣ်ဒီးပဂီၢ်ဆံဆဲၣ်ဂီၢ်ဒီး ပအိၣ်ဒီးတၢ်ဘၣ်ဃးဒီး စီၤဒၤဝံးအါန့ၢ်သုတက့ၢ်လီၤ. ဒီးသုတပးကဲဘၣ်ပှၤမ့ၢ်အဘၣ်မနုၤလဲၣ်. ပကတိၤဆိ တၢ်လၢတၢ်ဒုးဟဲက့ၤစီၤပၤ အဂ့ၢ်အကျိၤတမ့ၢ်ဘၣ်ဧါ. ဒီးယူဒၤအပှၤကညီအတၢ်ကတိၤတဖၣ်န့ၣ် ဆူၣ်န့ၢ် အံၣ်စရ့လးအတၢ်ကတိၤတဖၣ်တက့ၢ်န့ၣ်လီၤ.
20၂၀
1 ဒီးပှၤဘလးယဧၤလးဖိအိၣ်ဝဲဖဲန့ၣ်တဂၤ, ဒီးအမံၤမ့ၢ် စီၤၡဘၤ, ဒီးပှၤဘံၣ်ယၤမံၣ်ဖိစီၤဘံးကြံၤအဖိခွါလီၤ. ဒီး အဝဲဒၣ်န့ၣ်အူကွဲၤ, ဒီးစံးဝဲဒၣ်, ပဂီၢ်တအိၣ်ဘၣ်လၢစီၤ ဒၤဝံးအပူၤ, ဒီးပန့ၢ်သါတၢ်တအိၣ်ဘၣ်လၢစီၤယံးၡဲအ ဖိခွါအပူၤဘၣ်. တဂၤဆူအဒဲဒၣ်ဝဲတဂၤဆူအဒဲဒၣ်ဝဲ တက့ၢ်, အံၣ်စရ့လးဧၢ.
2 ဒီးအံၣ်စရ့လးအပှၤကညီခဲလၢာ် ဟးထီၣ်ကွံာ်လၢ တၢ်ပိာ်စီၤဒၤဝံးအခံ, ဒီးလဲၤပိာ်စီၤဘံးကြံၤအဖိခွါစီၤၡ ဘၤအခံလီၤ. ဒီးယူဒၤအပှၤကညီစဲဘူးဒီးအစီၤပၤလၢ ယၢ်ဒ့ၣ်ပၢၢ်လၢယရူၤၡလ့ၣ်လီၤ.
3 ဒီးစီၤဒၤဝံးဟဲဆူအဟံၣ်လၢယရူၤၡလ့ၣ်အပူၤ, ဒီးစီၤ ပၤဟံးန့ၢ်အသံၣ်မါဆံဆဲၣ်ဂၤ လၢအပာ်လီၤတဲာ်ပၢၤ ဟံၣ်, ဒီးပာ်အီၤလၢတၢ်ပၢၤအီၤအဟံၣ်ပူၤ, ဒီးလုၢ်အီၣ် အီၤလီၤ. ဘၣ်ဆၣ်ဒီးတလဲၤနုာ်ဘၣ်ဆူအအိၣ်ဘၣ်, ဒီး ဘၣ်တၢ်ကးတံာ်ဃာ်ဝဲတုၤမုၢ်တနံၤလၢအသံ, ဒီးအိၣ် မုၣ်ကမဲလီၤ.
4 ဒီးစီၤပၤစံးဘၣ်စီၤဧမါစၤ, ဒုးအိၣ်ဖှိၣ်န့ၢ်ယၤလၢယူ ဒၤအပှၤကညီ လၢသၢနံၤအတီၢ်ပူၤ, ဒီးဆၢထၢၣ်နဲဖဲ အံၤတက့ၢ်.
5 ဒီးစီၤဧမါစၤလဲၤဒုးအိၣ်ဖှိၣ်ယူဒၤအပှၤကညီ, ဒီးအိၣ် ယံာ်န့ၢ်တၢ်သ့ၣ်ပာ်မုၢ်တနံၤလၢ တၢ်သ့ၣ်ပာ်ဝဲလၢအ ဂီၢ်တက့ၢ်လီၤ.
6 ဒီးစီၤဒၤဝံးစံးဘၣ်စီၤအဘံၡဲၤ, ခဲကနံၣ်အံၤ, စီၤဘံး ကြံၤအဖိခွါစီၤၡဘၤကမၤအၢပှၤနးန့ၢ်စီးအးဘၡါလိၣ် တက့ၢ်လီၤ. ဟံးန့ၢ်နကစၢ်အခ့အပှၤ, ဒီးလူၤအီၤတ က့ၢ်. ကလဲၤနုာ်လၢဝ့ၢ်အိၣ်ဒီးအခိၣ်ဒူ, ဒီးကပူၤဖျဲးဘၣ် ဖုးဒီးပှၤလီၤ.
7 ဒီးစီၤယိၤအာ်အပှၤကညီတဖၣ် လဲၤပိာ်အခံ, ဒီးပှၤ ကရံသးဖိ, ဒီးပှၤပလ့သးဖိ, ဒီးပှၤအဆူၣ်ခဲလၢာ်, ဒီးဟး ထီၣ်ဝဲလၢယရူၤၡလ့ၣ် ဒ်သိးအကလူၤစီၤဘံးကြံၤအဖိ ခွါစီၤၡဘၤန့ၣ်လီၤ.
8 ဖဲအအိၣ်လၢလၢၢ်ဖးဒိၣ်လၢအအိၣ်ဝဲလၢကံးဘိၣ်ဒီး, စီၤဧမါစၤဟဲသဂၢၢ်အီၤလီၤ. ဒီးစီၤယိၤအာ်အဆ့လၢအ သိးဝဲန့ၣ်ကံၢ်တူာ်အသး, ဒီးနးတဘ့ၣ်ကံၢ်ဃာ်အသး လၢအယီၢ်တကိးလၢအတြိးပူၤ, ဒီးလဲၤဝဲအဖၢမုၢ်န့ၣ် ဒီးလီၤတဲာ်ကွံာ်ဝဲလီၤ. 9 ဒီးစီၤယိၤအာ်စံးဘၣ်စီၤဧမါ စၤ, နအိၣ်မုာ်စ့ၢ်ကီးဧါ, ယဒီပုၢ်ဝဲၢ်ဧၢ. ဒီးစီၤယိၤအာ် ဟံးဃာ်စီၤဧမါစၤအခၣ်ဆူၣ်လၢအစုထွဲ, ဒ်သိးအက နၢမူအီၤလီၤ.
10 ဒီးစီၤဧမါစၤတကွၢ်ဟုၣ်ဘၣ် နးတဘ့ၣ်လၢအအိၣ်ဝဲ လၢစီၤယိၤအာ်အစုပူၤဘၣ်. ဒီးအဝဲဒၣ်ဆဲးအီၤလၢအ ဝဲန့ၣ်လၢအဟၢဖၢပူၤ, ဒီးအပှံာ်ဟဲလီၤလဲာ်လၢဟီၣ် ခိၣ်, ဒီးတဆဲးလၢၤဘၣ်, ဒီးသံဝဲလီၤ. ဒီးစီၤယိၤအာ်, ဒီးအဒီပုၢ်ဝဲၢ်စီၤအဘံၡဲၤလူၤစီၤဘံးကြံၤအဖိခွါစီၤၡဘၤ လီၤ.
11 ဒီးစီၤယိၤအာ်အပှၤကညီတဂၤဆၢထၢၣ်လၢအဃၢၤ. ဒီးစံးဝဲဒၣ်, ပှၤလၢအဘၣ်အသးလၢစီၤယိၤအာ်, ဒီးပှၤ လၢအအိၣ်ဝဲလၢစီၤဒၤဝံးအဂီၢ်န့ၣ် မ်အပိာ်စီၤယိၤအာ် အခံတက့ၢ်.
12 ဒီးစီၤဧမါစၤကလိာ်လၢအသွံၣ်ပူၤ လၢကျဲအသးကံၢ် ပူၤန့ၣ်လီၤ. ဒီးတုၤပှၤတဂၤန့ၣ်ထံၣ်ဘၣ်ဝဲလၢပှၤဂီၢ်မုၢ် ခဲလၢာ်အိၣ်ကတီၢ်ဝဲဒီး, စိာ်ထီၣ်ကွံာ်စီၤဧမါစၤလၢ ကျဲမုၢ်ဆူပှၢ်လၢ်ကျါ, ဒီးလုးဘၢအီၤလၢယၣ်တဘ့ၣ်ဖဲ အထံၣ်ဘၣ်ဝဲလၢကယဲၢ်ပှၤလၢ အဟဲဆူအအိၣ်တဂၤ လၢ်လၢ်အိၣ်ကတီၢ်န့ၣ်လီၤ.
13 တုၤအဘၣ်တၢ်စိာ်ကွံာ်အီၤလၢကျဲမုၢ်ဒီး, ပှၤဂီၢ်မုၢ်ပိာ် စီၤယိၤအာ်အခံ, ဒ်သိးအကလူၤစီၤဘံးကြံၤအဖိခွါစီၤ ၡဘၤန့ၣ်လီၤ.
14 ဒီးလဲၤခီဂာ်အံၣ်စရ့လးအဒူၣ်ခဲလၢာ် ပၢၢ်လၢအၤဘ့ၤ လးဒီးဘ့ၤသမၤကၤ, ဒီးကယဲၢ်ပှၤဘ့ၢ်ဖိ, ဒီးအဝဲသ့ၣ်တ ဖၣ်န့ၣ်အိၣ်ဖှိၣ်ရိဖှိၣ်, ဒီးလဲၤပိာ်အခံစ့ၢ်ကီးလီၤ.
15 ဒီးအဝဲသ့ၣ်ဟဲဝီၤဃာ်အီၤလၢ အၤဘ့ၤလးဘ့ၤသမၤ ကၤအပူၤ, ဒီးမၤထီၣ်တၢ်ခိၣ်ဒူထီဒါဝ့ၢ်, ဒီးအိၣ်ဝဲလၢ တၢ်အကျိပူၤ, ဒီးပှၤဂီၢ်မုၢ်ခဲလၢာ်လၢအအိၣ်ဒီးစီၤယိၤ အာ်မၤဘၣ်ဒိဝ့ၢ်အခိၣ်ဒူဒ်သိးအကမၤလီၤပှီၢ်အီၤလီၤ.
16 ဒီးပှၤပိာ်မုၣ်လၢအကူၣ်တၢ်သ့တဂၤ ကိးထီၣ်လၢဝ့ၢ် ပူၤ, ကနၣ်, ကနၣ်တက့ၢ်. စံးလၢ်စီၤယိၤအာ်, ဟဲဖဲအံၤ ဒ်သိးယကကတိၤတၢ်ဒီးနၤတက့ၢ်.
17 ဒီးတုၤအဟဲဘူးဒီးအီၤဒီး, ပိာ်မုၣ်န့ၣ်စံးဝဲဒၣ်, နမ့ၢ်စီၤ ယိၤအာ်န့ၣ်ဧါ. ဒီးစံးဝဲဒၣ်, ယၤလီၤ. ဒီးပိာ်မုၣ်စံးဘၣ် အီၤ. ကနၣ်နကုၢ်ပိာ်မုၣ်အကလုၢ်တက့ၢ်. ဒီးစံးဝဲဒၣ်, ယနၢ်ဟူလံ.
18 ဒီးကတိၤဝဲ, ဒီးစံးဝဲဒၣ်, ပှၤကတိၤတၢ်ကတိၤလၢအ ခီၣ်ထံး, ဒီးစံးဝဲဒၣ်, ကသံကွၢ်တၢ်လၢအၤဘ့ၤလးသ ပှၢ်တၢၢ်, ဒီးတၢ်ကတၢၢ်ဝဲဒ်န့ၣ်လီၤ. 19 ယဲဒၣ်အံၤယမ့ၢ် ပှၤအဃူအဖိးဖိ, ဒီးပှၤအမ့ၢ်အတီဖိလၢအံၣ်စရ့လးအ ကျါလီၤ. နဃုမၤဟးဂီၤဝ့ၢ်တဖျၢၣ်, ဒီးတၢ်အမိၢ်လၢ အံၣ်စရ့လးအပူၤလီၤ. နကယူၢ်လီၤကွံာ်ယွၤအတၢ်န့ၢ် သါန့ၣ်မ့ၢ်အဘၣ်မနုၤလဲၣ်.
20 ဒီးစီၤယိၤအာ်စံးဆၢတၢ်, ဒီးစံးဝဲဒၣ်, ယယူၢ်လီၤကွံာ် တၢ်မ့ၢ်ဂ့ၤ, ယမၤဟးဂီၤကွံာ်တၢ်မ့ၢ်ဂ့ၤ, မ်ယသုတမၤ တဂ့ၤ. 21 တၢ်တမံၤန့ၣ်တမ့ၢ်ဘၣ်ဒ်န့ၣ်ဘၣ်, မ့ၢ်ပှၤက စၢၢ်အ့ဖရဲၣ်ဖိ, စီၤဘံးကြံၤအဖိခွါအမံၤစီၤၡဘၤယူာ် ထီၣ်အစုထီဒါစီၤပၤဒၤဝံးလီၤ. ထဲဟ့ၣ်လီၤကွံာ်အီၤတ က့ၢ်. ဒီးယကဟးထီၣ်ကွံာ်လၢဝ့ၢ်န့ၣ်လီၤ. ဒီးပိာ်မုၣ်န့ၣ် စံးဘၣ်စီၤယိၤအာ်, ကွၢ်ကွၢ်, တၢ်ကကွံာ်လီၤအခိၣ်လၢ ဝ့ၢ်ခိၣ်ဒူန့ၣ်ဆူနအိၣ်လီၤ.
22 ဒီးပိာ်မုၣ်န့ၣ်လဲၤဝဲဒီးအတၢ်ကူၣ်သ့ ဆူပှၤဂီၢ်မုၢ်ခဲ လၢာ်အအိၣ်, ဒီးတၢ်ဒီၣ်တဲာ်ကွံာ် စီၤဘံးကြံၤအဖိခွါ စီၤၡဘၤအခိၣ်, ဒီးကွံာ်လီၤကွံာ်အီၤဆူစီၤယိၤအာ်အ အိၣ်လီၤ. ဒီးအဝဲဒၣ်အူကွဲၤ, ဒီးပှၤဟးထီၣ်ကွံာ်လၢ ဝ့ၢ်န့ၣ်တဂၤဆူအဒဲဒၣ်ဝဲတဂၤဆူအဒဲဒၣ်ဝဲန့ၣ်လီၤ. ဒီး စီၤယိၤအာ်က့ၤက့ၤဝဲဆူ ယရူၤၡလ့ၣ်ဆူစီၤပၤအအိၣ် လီၤ.
23 ဒီးစီၤယိၤအာ်အိၣ်ဝဲလၢ အံၣ်စရ့လးအပှၤသုးမုၢ်ခဲ လၢာ်အဖီခိၣ်, ဒီးစီၤယဟိၤယဒါအဖိခွါစီၤဘနါယၤ အိၣ်ဝဲလၢပှၤကရံသးဖိအဖီခိၣ်, ဒီးလၢပှၤပလ့သးဖိ အဖီခိၣ်လီၤ. 24 ဒီးစီၤအဒိၤရၣ်အိၣ်ဝဲလၢတၢ်ဟ့ၣ်သွဲအ ဖီခိၣ်, ဒီးစီၤအဃံလူးအဖိခွါစီၤယဟိၡဖးမ့ၢ်ပှၤကွဲးနီၣ် တၢ်လီၤ. 25 ဒီးစီၤၡဝၤမ့ၢ်ပှၤကွဲးလံာ်, ဒီးစီၤစၤဒိး, ဒီး စီၤအ့ဘယၤသၢ်မ့ၢ်ပှၤလုၢ်တၢ်အဒိၣ်လီၤ. 26 ဒီးပှၤယၤ အံၢ်ဖိစီၤဧံရၤမ့ၢ်ပှၤအဒိၣ်လၢစီၤဒၤဝံးအဂီၢ်လီၤ.
21၂၁
1 ဒီးလၢစီၤဒၤဝံးအမုၢ်နံၤတဖၣ်န့ၣ် တၢ်သၣ်ဝံၤလီၤဒိ အိၣ်သၢနံၣ်, တနံၣ်ဘၣ်တနံၣ်လီၤ. ဒီးစီၤဒၤဝံးသံကွၢ် တၢ်လၢယွၤ, ဒီးယွၤစံးဆၢဝဲဒၣ်, မ့ၢ်လၢစီၤစီလူးအဃိ, ဒီးလၢအပှၤဟံၣ်ဖိဘၣ်ဃးဒီးတၢ်သွံၣ်အဃိ, လၢအမၤ သံပှၤကံးဘိၣ်ဖိအဃိလီၤ.
2 ဒီးစီၤပၤကိးန့ၢ်ပှၤကံးဘိၣ်ဖိ ဒီးစံးဘၣ်အီၤ, (ဒီးပှၤ ကံးဘိၣ်ဖိဘၣ်ဃးဒီးပှၤအံၣ်စရ့လးဖိတမ့ၢ်ဘၣ်. မ့ၢ် အဘၣ်ဃးဒီး တၢ်အိၣ်လီၤတဲာ်လၢပှၤအမိၢ်ဖိ, ဒီးပှၤ အံၣ်စရ့လးဖိဆိၣ်တၢ်ဒီးအီၤလီၤ. ဒီးစီၤစီလူးဃုမၤသံ အီၤလၢအသးဆူၣ်လၢပှၤအံၣ်စရ့လးဖိ ဒီးပှၤယူဒၤဖိအ ဂီၢ်လီၤ.) 3 ဒီးစီၤဒၤဝံးစံးလၢပှၤကံးဘိၣ်ဖိ, ယကမၤ လၢသုဂီၢ်န့ၣ်မ့ၢ်မနုၤတမံၤလဲၣ်. ဒီးယကမၤတၢ်ပူၤဖျဲး ဒ်သိးသုကဆိၣ်ဂ့ၤယွၤအတၢ်န့ၢ်သါန့ၣ် လၢမနုၤတမံၤ လဲၣ်.
4 ဒီးပှၤကံးဘိၣ်ဖိစံးဆၢအီၤ, ကျိၣ်ဧိၤစ့ဧိၤမ့ၢ်ဂ့ၤ, ထူဧိၤ လွဲဧိၤမ့ၢ်ဂ့ၤ, ပတဟံးန့ၢ်ဘၣ်လၢစီၤစီလူးဒီးလၢအပှၤ ဟံၣ်ဖိဘၣ်, ဒီးနတဘၣ်မၤသံဘၣ်ပှၤလၢအံၣ်စရ့လး အပူၤလၢပဂီၢ်နီၤတဂၤဘၣ်. ဒီးစံးဝဲဒၣ်, တၢ်လၢသု ကစံးန့ၣ်ယကမၤလၢသုဂီၢ်လီၤ.
5 ဒီးစံးဆၢစီၤပၤ, ပှၤလၢအမၤလၢာ်ပှၤ, ဒီးကူၣ်မၤဟး ဂီၤပှၤ, ဒ်သိးပသုတအိၣ်လၢၤဘၣ်လၢ အံၣ်စရ့လးအ ထံအကီၢ်တဂ့ၤန့ၣ်, 6 မ်တၢ်ဟ့ၣ်လီၤကွံာ်အဖိခွါနွံဂၤ လၢပှၤတက့ၢ်. ဒီးပကစၢၢ်သံအီၤလၢယွၤအဂီၢ်လၢကံး ဘဧၤဘၣ်ဃးဒီးစီၤစီလူးလၢယွၤဃုထၢန့ၣ်လီၤ. ဒီးစီၤ ပၤစံးဝဲဒၣ်, ယကဟ့ၣ်လီၤအီၤလီၤ.
7 ဒီးစီၤပၤသးလီစီၤစီလူးအဖိခွါ စီၤယိနၤသၣ်အဖိခွါ စီၤမဖံဘိၤရှ့းလၢယွၤအတၢ်ဆိၣ် လၢအအိၣ်ဝဲလၢအ ဘၢၣ်စၢၤအဃိ, လၢစီၤဒၤဝံးဒီးစီၤစီလူးအဖိခွါစီၤယိ နၤသၣ်အဘၢၣ်စၢၤန့ၣ်လီၤ.
8 ဒီးစီၤပၤဟံးန့ၢ်စီၤအၤယၤအဖိမုၣ်, နီၢ်ရံးစဖၤအဖိခွါ ခံဂၤလၢအဆံးစၢ်န့ၢ်စီၤစီလူးအဂီၢ်, စီၤအၢ်မိၤနံ, ဒီးစီၤ မဖံဘိးရှ့း, ဒီးစီၤစီလူးအဖိမုၣ် နီၢ်မ့ရာ်အဖိခွါယဲၢ်ဂၤ လၢအဆံးစၢ်န့ၢ် ပှၤမဃိလၤဖိစီၤဘၢ်စံးလဲအဖိခွါစီၤဧ့ ဒြံအ့လးအဂီၢ်လီၤ.
9 ဒီးဟ့ၣ်လီၤကွံာ်အီၤဆူ ပှၤကံးဘိၣ်ဖိအစုပူၤ, ဒီးအဝဲ သ့ၣ်စၢၣ်သံအီၤလၢကစၢၢ်လိၤလၢယွၤအမဲာ်ညါ, ဒီး လီၤဃံၤဝဲနွံဂၤတဘျီဃီ, ဒီးဘၣ်တၢ်မၤသံအီၤလၢတၢ် ကူးဘုအမုၢ်နံၤတဖၣ်လၢတၢ်အခီၣ်ထံးလၢ တၢ်ကူးဆိဘု မုယီၤန့ၣ်လီၤ.
10 ဒီးစီၤအၤယၤအဖိမုၣ် နီၢ်ရံးစဖၤဟံးန့ၢ်ထၢၣ်အတၢ် ကံးညာ်, ဒီးဒါလီၤဝဲလၢလၢၢ်လိၤလၢအဂီၢ်, လၢတၢ် ကူးဆိဘုတုၤထံလီၤလၢမူခိၣ် လၢပှၤတဖၣ်န့ၣ်အလိၤ, ဒီးလၢမုၢ်ဆါခီတဒုးဟဲထိၣ်ဧိၤလံၣ်ဧိၤလၢတၢ်ဖးဖီ, ဒီး လၢမုၢ်နၤန့ၣ်တဒုးဟဲဆၣ်ဖိကီၢ်ဖိလၢပှၢ်လၢ်ကျါဘၣ်.
11 ဒီးပှၤစံးဘၣ်စီၤဒၤဝံးလၢ တၢ်လၢစီၤစီလူးအသံၣ်မါ စီၤအၤယၤအဖိမုၣ်နီၢ်ရံးစဖၤမၤဝဲန့ၣ်လီၤ.
12 ဒီးစီၤဒၤဝံးလဲၤဟံးန့ၢ်စီၤစီလူးအဃံ. ဒီးအဖိခွါစီၤယိ နၤသၣ်အဃံလၢယၤဘ့ၣ် ကံးလဧးအပှၤကညီလၢအ ဟုၣ်န့ၢ်အီၤလၢဘ့ၤသၡၣ်အကျဲပူၤ, ဖဲပှၤဖလ့ၡသးဖိစဲ ထီၣ်အီၤလၢ ပှၤဖလ့ၡသးဖိမၤသံစီၤစီလူးလၢကံးလ ဘိအလီၢ်ခံန့ၣ်လီၤ. 13 ဒီးဟဲစိာ်စီၤစီလူးအဃံ, ဒီးအဖိ ခွါစီၤယိနၤသၣ်အဃံဖဲန့ၣ်, ဒီးထၢဖှိၣ်ပှၤလၢတၢ်စၢၣ် သံအီၤတဖၣ်အဃံလီၤ.
14 ဒီးပှၤခူၣ်လီၤကွံာ်စီၤစီလူး, ဒီးအဖိခွါစီၤယိနၤသၣ် အဃံလၢဘံၣ်ယၤမံၣ်အကီၢ်ပူၤ လၢစ့လၤအပူၤလၢအ ပၢ်စီၤကံၣ်အသွၣ်ခိၣ်ပူၤလီၤ. ဒီးပှၤမၤကယဲၢ်တၢ်လၢ စီၤပၤမၤလိာ်ဝဲခဲလၢာ်လီၤ. လၢခံက့ၤဒီးယွၤဒိကနၣ် တၢ်လၢကီၢ်အဂီၢ်န့ၣ်လီၤ.
15 ဒီးပှၤဖလ့ၡသးဖိဒုးဒံးသုဒီးအံၣ်စရ့လး, ဒီးစီၤဒၤဝံး လဲၤလီၤဒီးအခ့အပှၤအိၣ်ဒီးအီၤ, ဒီးဒုးသုးဒီးပှၤဖလ့ၡ သးဖိ, ဒီးစီၤဒၤဝံးလီၤဘှါဝဲလီၤ. 16 ဒီးစီၤယံၡဘနိးလၢ အအိၣ်လၢပှၤနီၢ်ဒိၣ်အကျါ, (အဘီလီၤသယၢၢ်တိၢ် သၢကယၤ)ကံၢ်ဃာ်အသးဒီးတၢ်အသီ. ဒီးသါကမၤ သံစီၤဒၤဝံးလီၤ. 17 ဒီးနီၢ်စရူယၤအဖိခွါစီၤအဘံၡဲမၤစၢၤ အီၤ, ဒီးကျီကွံာ်ပှၤဖလ့ၡသးဖိ, ဒီးမၤသံအီၤလီၤ. တုၤ နုၤတစုစီၤဒၤဝံးအပှၤကညီတဖၣ် ဆိၣ်တၢ်ဒီးအီၤ, ဒီး စံးဝဲဒၣ်, နတလဲၤထီၣ်လၢၤဘၣ်နဲဒီးပှၤဆူတၢ်ဒုးသုး အပူၤ, ဒ်သိးနသုတမၤခံးလီၤ အံၣ်စရ့လးအတၢ်ကပီၤ တဂ့ၤန့ၣ်လီၤ.
18 ဒီးလၢတၢ်န့ၣ်တဖၣ်အလီၢ်ခံ တၢ်မၤအသးလၢတၢ် ဒုးကဒီးသုးဒီးပှၤဖလ့ၡသးဖိလၢကိာ်အပူၤလီၤ. တုၤ နုၤတဘျီပှၤဃူၡသးဖိစီၤစံၤဘကဲကျီကွံာ် စီၤစာ်လၢ အအိၣ်လၢပှၤနီၢ်ဒိၣ်အဖိခွါအကျါလီၤ.
19 မၤကဒီးတစု တၢ်ဒုးသုးဒီးပှၤဖလ့ၡသးဖိလၢကိာ်အ ပူၤ, ဒီးပှၤဘ့ၤသလ့ဃ့ၣ်ဖိစီၤယၤရ့အိရကံၣ်အဖိခွါစီၤ အ့လဃၤန့ၣ်ကျီကွံာ်ပှၤဘၣ်ဃးဒီး ပှၤကံးတံးဖိစီၤကၤ လယး, ဒီးအဘီအတိၢ်မၤသး ဒ်ပှၤထါထၣ်အနီၣ်ဘိ အသိးန့ၣ်လီၤ.
20 မၤကဒီးတစုတၢ်ဒုးသုးလၢကၤသးအပူၤ, ဒီးပှၤအ နီၢ်ဒိၣ်အိၣ်ဝဲဒီးအစုမုၢ်ဃုဘိလၢအစု, ဒီးအခီၣ်မုၢ်ဃု ဘိလၢအခီၣ်, ခဲလၢာ်မ့ၢ်ခံဆံလွံၢ်ဘိလီၤ. ဒီးအဝဲဒၣ် အိၣ်ဖျဲၣ်ဝဲလၢနီၢ်ဒိၣ်အဂီၢ်လီၤ. 21 ဒီးတုၤအမၤတရီတ ပါအံၣ်စရ့လးဒီး, ဒီးစီၤဒၤဝံးအဒီပုၢ်ဝဲၢ်စီၤၡံမၤအဖိခွါ, စီၤယိနၤသၣ်ကျီကွံာ်အီၤလီၤ.
22 အဝဲသ့ၣ်လွံၢ်ဂၤန့ၣ်အိၣ်ဖျဲၣ် လၢပှၤနီၢ်ဒိၣ်လၢကၤသး အပူၤအဂီၢ်, ဒီးလီၤဃံၤဝဲလၢစီၤဒၤဝံးအစုပူၤဒီးလၢအ ခ့အပှၤတဖၣ်အစုပူၤလီၤ.
22၂၂
1 မုၢ်တနံၤလၢ ယွၤမၤပူၤမၤဖျဲးအီၤလၢအဒုၣ်အဒါခဲ လၢာ်အစုပူၤ, ဒီးလၢစီၤစီလူးအစုပူၤန့ၣ်စီၤဒၤဝံးကတိၤ တၢ်ဒီးယွၤလၢတၢ်သးဝံၣ်အံၤအတၢ်ကတိၤ ဒီးစံးဝဲ ဒၣ်,
2 ယွၤမ့ၢ်ယလ့, ဒီးယတိာ်, ဒီးတၢ်မၤပူၤမၤဖျဲးယၤ,
3 ယလၢၢ်အကစၢ်, ယကသန့ၤယသးလၢအီၤ, ယကတီၤတဘ့ၣ်, ယတၢ်အုၣ်က့ၤခီၣ်က့ၤယၤအနၢၤ, ယတၢးထီၣ်ထီ, ယအိၣ်တဒၢအလီၢ်, ယပှၤအုၣ်က့ၤခီၣ်က့ၤယၤ, နအုၣ်က့ၤခီၣ်က့ၤယၤလၢတၢ်မၤဆူၣ်လီၤ.
4 ယကိးထီၣ်ယွၤလၢအဘၣ်တၢ်စံးထီၣ်ပတြၢၤ, ဒီးယကတုၤလၢတၢ်အုၣ်က့ၤခီၣ်က့ၤလၢယဒုၣ်ယဒါ လီၤ.
5 တၢ်သံအလပီဝါခိၣ်အိၣ်ဝးတရံးယၤ, ဒီးတၢ်မၤဟးဂီၤအထံကျိမၤပျံၤမၤဖုးယၤ,
6 တၢ်ပျုၤပူၤအပျံၤတဖၣ်အိၣ်ဝးတရံးယၤ, တၢ်သံအပျံၤသကွီၤတဖၣ်လဲၤဘျီယၤလီၤ.
7 တုၤယဘၣ်တၢ်ကိၢ်တၢ်ဂီၤဒီး, ယကိးထီၣ်ယွၤ, ဒီးယကဃ့ကညးတၢ်လၢယကစၢ်လီၤ. ဒီးကနၣ်ဝဲယကလုၢ်လၢအနူၢ်ပူၤ, ဒီးယဃ့ကညးတၢ်လဲၤနုာ်လၢအနၢ်ပူၤလီၤ.
8 ဒီးဟီၣ်ခိၣ်ဟူးဝးဝဲ, ဒီးဆှဲးဆှိးဝဲ, မူခိၣ်အခီၣ်ထံးတဖၣ်ဟူးဝးဝဲ,
9 ဒီးသုးအသးလီၤ. အဂ့ၢ်ဒ်အံၤ, အသးထီၣ်ဝဲလီၤ. မ့ၢ်အူခုၣ်ဟဲထီၣ်လၢအနါဒ့ပူၤ, ဒီးမ့ၣ်အူလၢအထးခိၣ်အီၣ်တၢ်, မ့ၣ်အူကဖးဆိၣ်ကဲၤအသးလၢအီၤလီၤ.
10 ဒီးမၤသကူးလီၤမူခိၣ်ဒီးဟဲလီၤ, ဒီးတၢ်ခံးသူအိၣ်ဝဲလၢအခီၣ်အဖီလာ်,
11 ဒီးဒိးခ့ရူာ်ဒီးယူၤဝဲ, ဒီးတၢ်ထံၣ်အီၤလၢကလံၤအဒံးဆ့အဖီခိၣ်လီၤ.
12 ပာ်တၢ်ခံးလၢအဒဲအိၣ်ဝးတရံးအီၤ, ထံခံးသူတၢ်အၢၣ်တီၣ်လၢမူကပိာ်လိၤလီၤ.
13 လၢတၢ်ကဲၤဆှုၣ်ဆှုၣ်လၢအမဲာ်ညါ, မ့ၣ်အူကဖးဆိၣ်ကဲၤထီၣ်အသးလီၤ.
14 ဒီးယွၤမၢလီသီၣ်လၢမူခိၣ်, ဒီးတၢ်ထီကတၢၢ်တဂၤဒုးသီၣ်ထီၣ်အကလုၢ်,
15 ခးဝဲအပျၢ်တဖၣ်, ဒီးမၤပြံပြါအီၤ, ခးဝဲအလီဝၢ်အဒံးတဖၣ်, ဒီးမၤဃၣ်အီၤလီၤ.
16 ဒီးပီၣ်လဲၣ်အကျိၤတဖၣ်ဖျါဝဲ, ဒီးဟီၣ်ခိၣ်အခီၣ်ထံးတဖၣ်အိၣ်ဖျါထီၣ်ဝဲ, လၢယွၤသိၣ်ဃီၣ်တၢ်အဃိ, လၢအနါဒ့အူသဖှိတၢ်တဘျီအဃိလီၤ.
17 မၢလီၤတၢ်လၢတၢ်ထီၣ်ထီ, ဟံးန့ၢ်ထီၣ်ယၤ, ထုးထီၣ်ယၤလၢထံအအါအကျါ,
18 ဒီးမၤပူၤဖျဲးယၤလၢယဒုၣ်ယဒါအဆူၣ်တဂၤ, ဒီးလၢပှၤလၢအသးဟ့ယၤတဖၣ်လီၤ. အဂ့ၢ်ဒ်အံၤ, အဝဲသ့ၣ်ဆူၣ်န့ၢ်ယၤတက့ၢ်လီၤ.
19 လၢယတၢ်နးတၢ်ဖှီၣ်အမုၢ်နံၤန့ၣ်လဲၤဘျီယၤလီၤ. ဘၣ်ဆၣ်ဒီးယွၤမ့ၢ်တၢ်အိၣ်အလီၢ်လၢယဂီၢ်,
20 ဒီးဒုးဟးထီၣ်ယၤဆူအလီၢ်ဖးလဲၢ်, မၤပူၤမၤဖျဲးယၤ, အဂ့ၢ်ဒ်အံၤ, ဘၣ်အသးလၢယၤလီၤ.
21 ယွၤဟ့ၣ်ကၣ်တၢ်လၢယၤဒ်ယတၢ်တီတၢ်လိၤအသိး, ဒ်ယစုကဆှီအသိးန့ၢ်ဒုးန့ၢ်ဆၢယၤလၢတၢ်လီၤ.
22 အဂ့ၢ်ဒ်အံၤ, ယတိၢ်န့ၢ်လံယွၤအကျဲတဖၣ်လံ. ယတမၤကမၣ်ဘၣ်ယကစၢ်ဘၣ်.
23 အဂ့ၢ်ဒ်အံၤ, အတၢ်စံၣ်ညီၣ်ခဲလၢာ်အိၣ်လၢယမဲာ် ညါ, ဒီးအတၢ်မၤလိာ်တဖၣ်န့ၣ် ယတလုၣ်သ့ၣ်ခါပတာ် ဘၣ်.
24 ဒီးယလၢထီၣ်ပှဲၤထီၣ်လၢအမဲာ်ညါ, ဒီးယဟးဆှဲးယတၢ်အၢလီၤ.
25 မၤသးဒ်န့ၣ်ဒီးယွၤဟ့ၣ်ကၣ်တၢ်လၢယၤ ဒ်ယတၢ်တီ တၢ်လိၤအသိး, ဒ်ယစုကဆှီလၢအမဲာ်ညါအသိးန့ၣ်လီၤ.
26 လၢပှၤအဂ့ၤန့ၣ်နကပာ်ဂ့ၤနသး, လၢပှၤအလၢအပှဲၤန့ၣ်နကပာ်လၢပာ်ပှဲၤနသး,
27 လၢပှၤအကဆှီန့ၣ်နကပာ်ကဆှီနသး, လၢပှၤအကီန့ၣ်နကပာ်ကီနသးလီၤ.
28 ဒီးနကအုၣ်က့ၤခီၣ်က့ၤ ပှၤဂီၢ်မုၢ်အဘၣ်နးဘၣ်ဖှီၣ်, မ့မ့ၢ်နမဲာ်အိၣ်လၢ ပှၤထီၣ်ထီအလိၤဒီးနကဆိၣ်လီၤ အီၤလီၤ.
29 အဂ့ၢ်ဒ်အံၤ, နမ့ၢ်ယမ့ၣ်အူဒၢ, ယွၤဧၢ, ဒီးယွၤယကစၢ်ကမၤကပီၤထီၣ်ယတၢ်ခံးန့ၣ်လီၤ.
30 အဂ့ၢ်ဒ်အံၤ, ယဃ့ၢ်နုာ်ဖျိပှၤတဖုလၢနၤလံ. ယစံၣ်ကပာ်တၢ်အဒူၣ်လၢယကစၢ်တဂၤန့ၣ်လီၤ.
31 တၢ်လၢယွၤန့ၣ်, အကျဲမ့ၢ်အလၢအပှဲၤလီၤ. ယွၤအကလုၢ်န့ၣ်ဘၣ်တၢ်မၤပှံၢ်စီအီၤလီၤ. မ့ၢ်ဝဲကတီၤတဘ့ၣ်, လၢကယဲၢ်ပှၤလၢအတန့ၤအသး လၢအီၤလီၤ.
32 ဒီးလၢယွၤအမဲာ်ညါန့ၣ်မ့ၢ်မတၤမ့ၢ်ကစၢ်တဂၤလဲၣ်. လၢပကစၢ်အဖီခိၣ်န့ၣ်မ့ၢ်မတၤမ့ၢ်လၢၢ်တဂၤလဲၣ်.
33 ယွၤမ့ၢ်ယတိာ်ခၢၣ်သနၢၢ်, ဒီးအဝဲဒၣ်ဆှၢပှၤအလၢအပှဲၤန့ၣ်လၢအကျဲပူၤလီၤ.
34 မၤယခီၣ်ဒ်တၤယုၢ်မိၢ်အခီၣ်အသိး, ဒီးဒုးဆၢထၢၣ်ယၤလၢယလီၢ်ထီၣ်ထီလီၤ.
35 သိၣ်လိယစုလၢယကဒုးတၢ်, ဒီးချံၣ်တိၢ်ဘၣ်ကၢ်ကွံာ်အသးလၢယစုလီၤ.
36 ဒီးနဟ့ၣ်လီၤယၤလၢ နတၢ်အုၣ်က့ၤခီၣ်က့ၤအက တီၤ, ဒီးနဆီၣ်လီၤနသးန့ၣ်မၤဒိၣ်ထီၣ်ယၤလီၤ.
37 နမၤလဲၢ်ထီၣ်ယခါတၢ်, ဒီးယခီၣ်ဒ့တကနိးဘၣ်.
38 ယလူၤယဒုၣ်ယဒါ, ဒီးမၤဟးဂီၤအီၤ, ဒီးယတချုးမၤလၢာ်အီၤဒီး, ယတဟဲကဒါက့ၤဘၣ်.
39 ယမၤလၢာ်အီၤ, ဒီးယဆဲးအီၤ, ဒီးတဂဲၤဆၢထၢၣ်ဘၣ်, လီၤဃံၤဝဲလၢယခီၣ်အဖီလာ်လီၤ.
40 ဒီးနကံၢ်တူာ်ယယီၢ်ဒ့ဒီးဂံၢ်ဒီးဘါ လၢဒုးသုးအဂီၢ်, နမၤကိာ်လီၤပှၤလၢ အဂဲၤဆၢထၢၣ်ထီဒါယၤလၢယ ဖီလာ်,
41 နဟ့ၣ်လီၤယၤလၢယဒုၣ်ယဒါအကိာ်, ပှၤလၢအသးဟ့ယၤတဖၣ်ယမၤဟးဂီၤကွံာ်အီၤလီၤ.
42 ကွၢ်ဝဲ, ဒီးတၢ်အုၣ်က့ၤခီၣ်က့ၤတအိၣ်ဘၣ်, ဆူယွၤန့ၣ်, ဒီးတစံးဆၢဘၣ်ဝဲဘၣ်.
43 ဒီးယမၤလီၤကလဲအီၤ ဒ်ဟီၣ်ခိၣ်အကမူၣ်အသိးန့ၣ်, ဒ်ကျဲအကပံာ်အသိးန့ၣ်, ယယီၢ်တံၢ်အီၤ, ယမၤပြံပြါ အီၤလီၤ.
44 နမၤပူၤမၤဖျဲးယၤလၢ ယပှၤဂီၢ်မုၢ်အတၢ်အ့ၣ်လိာ်န့ၣ်, နပာ်ယၤလၢပှၤကလုာ်တဖၣ်အခိၣ်, ပှၤဂီၢ်မုၢ်လၢယတသ့ၣ်ညါတ့ၢ်အီၤန့ၣ် ကမၤယတၢ် လီၤ.
45 ပှၤတခီဘီမုၢ်ဖိကဆီၣ်လီၤအသးလၢယဖီလာ်, တုၤအနၢ်ဟူတၢ်လၢအနၢ်ဒီး ကဒိကနၣ်ယကလုၢ် လီၤ.
46 ပှၤတခီဘီမုၢ်ဖိကလီၤညွံးကွံာ်, ဒီးကဟဲထီၣ်ကနိးကစုာ် လၢအလီၢ်ကးတံာ်ဃာ်တ ဖၣ်အပူၤလီၤ.
47 ယွၤမူဝဲ, ဒီးမ်ယလၢၢ်ဘၣ်တၢ်စံးထီၣ်ပတြၢၤတက့ၢ်, ဒီးတၢ်အုၣ်က့ၤခီၣ်က့ၤယၤအလၢၢ်အကစၢ်န့ၣ်, မ်အဘၣ်တၢ်ပာ်ထီၣ်ထီအီၤတက့ၢ်.
48 ပှၤလၢအမၤဆၢတၢ်အၢလၢယဂီၢ်န့ၢ်မ့ၢ်ယွၤ, ဒီးမၤနၢၤမၤဃၣ်ပှၤဂီၢ်မုၢ်လၢအဖီလာ်,
49 ဒီးဟံးထီၣ်က့ၤယၤလၢယဒုၣ်ယဒါအစုပူၤ, ဒီးနပာ်ယၤထီၣ်ထီန့ၢ်ပှၤလၢအဂဲၤထၢၣ်ထီဒါယၤ, နမၤပူၤမၤဖျဲးယၤဒီးပှၤမၤအၢတၢ်လီၤ.
50 မၤသးဒ်န့ၣ်ဒီးယကစံးထီၣ်ပတြၢၤနၤလၢပှၤကလုာ်တဖၣ်အကျါ, ယွၤဧၢ, ဒီးယကသးဝံၣ်ထီၣ်နမံၤလီၤ.
51 မ့ၢ်တၢ်အုၣ်က့ၤခီၣ်က့ၤအတၢးထီလၢအစီၤပၤအဂီၢ်, ဒီးမၤတၢ်ဘျုးတၢ်ဖှိၣ်လၢအပှၤဒိးဖှူအသးတဂၤ, လၢစီၤဒၤဝံးအချံအသၣ်လီၤစိၤလီၤထီလီၤ.
23၂၃
1 အဝဲအံၤမ့ၢ်စီၤဒၤဝံးအတၢ်ကတိၤလၢခံကတၢၢ်လီၤ. စီၤယံးၡဲအဖိခွါစီၤဒၤဝံးစံးဝဲဒၣ်, ပှၤလၢတၢ်ပာ်အီၤထီၣ်ထီ, ပှၤလၢအဒိးဖှူအသးလၢစီၤယၤကိာ်အကစၢ်, ဒီးအံၣ်စရ့လးအပှၤသးဝံၣ်တၢ်မုာ်မုာ်တဂၤစံးဝဲဒၣ်,
2 ယွၤအသးကတိၤတၢ်ဒီးယၤ, ဒီးအကလုၢ်အိၣ်ဝဲလၢယပျ့ၤလိၤလီၤ.
3 အံၣ်စရ့လးအကစၢ်စံးဝဲဒၣ်, အံၣ်စရ့လးအလၢၢ်စံးဘၣ်ယၤ, ပှၤလၢအပၢပှၤကညီတီတီလိၤလိၤတဂၤ, ဒီးပၢဝဲလၢတၢ်ပျံၤယွၤန့ၣ်,
4 ကဒ်တၢ်ကပီၤလၢမုၢ်ဂီၤ, တုၤမုၢ်ဟဲထီၣ်အသိး, မုၢ်ဂီၤလၢတၢ်အၢၣ်တအိၣ်ဘၣ်, ကပီၤထီၣ်ဝဲဆှုၣ်ဆှုၣ်, ဒ်နီၣ်ဧိၤမံၤဧိၤလၢ ဟီၣ်ခိၣ်တၢ်ဟဲစူၤအလီၢ်ခံအသိး လီၤ.
5 ယဟံၣ်တဒ်န့ၣ်အသိးဘၣ်ဒီးယွၤဘၣ်ဆၣ်ဒီး, မၤတၢ်အၢၣ်လီၤအီလီၤအထူအယိာ်ဒီးယၤ, ဒီးကတဲာ်ကတီၤအသးလၢတၢ်ခဲလၢာ်ဒီးကျၢၤဝဲလီၤ. မ့ၢ်ယတၢ်အုၣ်က့ၤခီၣ်က့ၤခဲလၢာ်, ဒီးကယဲၢ်ယဆၢတၢ်တမံၤလၢ်လၢ်န့ၣ်, ကဒုးကဲထီၣ်, တမ့ၢ်ဘၣ်ဧါ.
6 ဒီးပှၤဘလးယဧၤလးဖိကဒ်တၤဆှုၣ်တၤမဲ, လၢတၢ်သုးကွံာ်အီၤအသိးန့ၣ်ခဲလၢာ်, အဂ့ၢ်ဒ်အံၤ, ပှၤတဟံးဘၣ်ဝဲလၢအစုဘၣ်,
7 ပှၤလၢအထိးအီၤန့ၣ် ဘၣ်ပှဲၤဝဲဒီးထးဒီးဘီအတိၢ်, ဒီးကဘၣ်တၢ်အီၣ်ကွံာ်အီၤခဲလၢာ် လၢမ့ၣ်အူဖဲအလီၢ် န့ၣ်လီၤ.
8 အအံၤ မ့ၢ်ပှၤအဆူၣ်လၢအအိၣ်ဒီး စီၤဒၤဝံးတဖၣ်အ မံၤ, ပှၤတၤဃကးမိၣ်ဖိလၢအဆ့ၣ်နီၤလၢ အလီၢ်ဆ့ၣ်နီၤ န့ၣ်မ့ၢ်အအိၣ်လၢသၢဂၤအကျါလီၤ. အဝဲဒၣ်န့ၢ်မ့ၢ်ပှၤ ဧ့စ့ၢ်ဖိစီၤဧဒံနိၤလၢအယူာ်ထီၣ်အဘီတစု, ဒီးမၤသံပှၤ ကညီဃိးကယၤတဘျီဃီလီၤ.
9 ဒီးလၢအလီၢ်ခံန့ၣ် ပှၤအဃိဃးဖိစီၤဒိဒိၤအဖိခွါစီၤအ လၤဧစၢ်တဂၤအိၣ်ဝဲလၢ ပှၤအဆူၣ်သၢဂၤအကျါလၢ အအိၣ်ဒီးစီၤဒၤဝံးဖဲအကတိၤတရီတပါ ပှၤဖလ့ၡသး ဖိလၢအအိၣ်ဖှိၣ်ရိဖှိၣ်ဒ်သိးအကဒုးတၢ်, ဒီးပှၤအံၣ်စ ရ့လးဖိအပှၤကညီဟးထီၣ်ကွံာ်န့ၣ်လီၤ. 10 ဂဲၤဆၢထၢၣ် ဝဲ, ဒီးကျီကွံာ်ပှၤဖလ့ၡသးဖိတုၤအစုဘှံးဒီး အစုစဲဘူး ဒီးအနး, ဒီးတၢ်လၢမုၢ်တနံၤန့ၣ် ယွၤအုၣ်က့ၤခီၣ်က့ၤ တၢ်ဖးဒိၣ်, ဒီးပှၤဂီၢ်မုၢ်ဟဲက့ၤပိာ်အခံထဲအကဂုာ်န့ၢ် တၢ်ဧိၤလီၤ.
11 ဒီးလၢအလီၢ်ခံန့ၣ် ပှၤဟရၢ်ဖိစီၤအက့အဖိခွါ စီၤၡး မၤတဂၤအိၣ်လီၤ. ဒီးပှၤဖလ့ၡသးဖိအိၣ်ဖှိၣ်ရိဖှိၣ်တဖု ဖဲဟီၣ်ခိၣ်အကဝီၤပှဲၤဒီးပထိးအမုၢ်, ဒီးပှၤဂီၢ်မုၢ်ဃ့ၢ်လၢ ပှၤဖလ့ၡသးဖိအမဲာ်ညါ, 12 ဒီးအဝဲဒၣ်တဂၤန့ၣ်ပာ်ဆၢ ထၢၣ်အသးလၢဟီၣ်ခိၣ်အကဝီၤအသးကံၢ်ပူၤ, ဒီးမၤ ပူၤဖျဲးတၢ်, ဒီးကျီကွံာ်ပှၤဖလ့ၡသးဖိ, ဒီးယွၤမၤတၢ်အုၣ် က့ၤခီၣ်က့ၤဖးဒိၣ်လီၤ.
13 ဒီးပှၤသၢဂၤလၢပှၤအခိၣ်သၢဆံအကျါန့ၣ် လဲၤလီၤ ဒီးလၢကူးဘုအကတီၢ်န့ၣ် ဟဲဆူစီၤဒၤဝံးအအိၣ်လၢ တၢ်အိပူၤဧဒူးလၣ်အပူၤ, ဒီးပှၤဖလ့ၡသးဖိတဖုသူၣ်ဒဲ လၢကစၢၢ်ကဆူးရၤဖၤအပူၤလီၤ.
14 ဒီးအကတီၢ်ဖဲန့ၣ် စီၤဒၤဝံးအိၣ်ဝဲလၢတိာ်ပူၤ, ဒီးပှၤဖ လ့ၡသးဖိအပှၤပၢၤတၢ်ဖိတတီၤ အိၣ်ဝဲလၢဘ့ၤသလ့ ဃ့ၢ်အပူၤလီၤ. 15 ဒီးစီၤဒၤဝံးစံးဆၢတၢ်ဒီးစံးဝဲဒၣ်, မ့မ တၤကဒုးအီယၤလၢ ဘ့ၤသလ့ဃ့ၣ်အထံပူၤအထံလၢ အအိၣ်ဝဲလၢပဲတရီအဃၢၤန့ၣ်တဂၤလဲၣ်.
16 ဒီးပှၤအဆူၣ်သၢဂၤန့ၣ် ဃ့ၢ်ဖျိပှၤဖလ့ၡသးဖိအသုး မုၢ်, ဒီးဒၢၣ်ထံလၢဘ့ၤသလ့ဃ့ၣ်အထံပူၤလၢအအိၣ် လၢပဲတရီအဃၢၤ, ဒီးဟံးန့ၢ်ဝဲ, ဒီးစိာ်ဝဲဆူစီၤဒၤဝံးအ အိၣ်လီၤ. ဘၣ်ဆၣ်ဒီးစီၤဒၤဝံးတအီဘၣ်. ဒီးလူလီၤဝဲ လၢယွၤအဂီၢ်လီၤ. 17 ဒီးစံးဝဲဒၣ်, မ်ယသုတမၤဒ်အံၤတ ဂ့ၤ, ယွၤဧၢ, တၢ်အံၤမ့ၢ်ပှၤအသွံၣ်လၢအလဲၤမၤန့ၢ်ဝဲလၢ အသးသမူလီၤ. ဒီးအီဝဲအသးတအိၣ်ဘၣ်. ပှၤအဆူၣ် သၢဂၤန့ၣ်မၤတၢ်န့ၣ်တဖၣ်လီၤ.
18 ဒီးနီၢ်စရူယၤအဖိခွါစီၤယိၤအာ်အဒီပုၢ်ဝဲၢ် စီၤအဘံ ၡဲၤမ့ၢ်တၢ်အခိၣ်လၢသၢဂၤအကျါ, ဒီးယူာ်ထီၣ်အစုထီ ဒါပှၤသၢကယၤ, ဒီးမၤသံအီၤ, ဒီးအမံၤအိၣ်ဝဲလၢပှၤ သၢဂၤအကျါလီၤ. 19 လၢပှၤသၢဂၤအကျါန့ၣ် အလၤ ကပီၤဒိၣ်ကတၢၢ်တမ့ၢ်ဘၣ်ဧါ. ဒီးကဲထီၣ်ဝဲလၢအခိၣ် လီၤ. ဒီးတဟဲနုာ်ဘၣ်လၢသၢဂၤန့ၣ်အကျါဘၣ်.
20 ဒီးပှၤအဆူၣ်ပှၤကၤဘစ့လးဖိ, ပှၤအဆူၣ်အဖိခွါစီၤ ဘနါယၤန့ၣ်, မၤတ့ၢ်တၢ်ဖးဒိၣ်အါမံၤ, မၤသံပှၤမိၤ အးဖိခံဂၤလၢအလီၤဂာ်ဒီးခ့ယုၢ်လီၤ. အဝဲဒၣ်လဲၤလီၤ စ့ၢ်ကီး, ဒီးကျီကွံာ်ခ့ယုၢ်တဒုလၢတၢ်ပူၤအသးကံၢ်ပူၤ ဖဲတၢ်ဟဲစူၤမူခိၣ်ဖီအခါန့ၣ်လီၤ.
21 ဒီးအဝဲဒၣ်ကျီကွံာ် ပှၤအဲၤကူပတူးဖိလၢအက့ၢ်အဂီၤ ဂ့ၤ, ဒီးဘီအိၣ်ဝဲလၢပှၤအဲၤကူပတူးဖိအစုပူၤတဘ့ၣ်, ဒီး လဲၤလီၤဝဲဆူအအိၣ်, အိၣ်ဒီးအနီၣ်ထိးဘိလၢအစုပူၤ, ဒီးဂုာ်န့ၢ်ဘီတဘ့ၣ်လၢပှၤအဲၤကူပတူးဖိအစုပူၤ, ဒီးမၤ သံအီၤလၢအဘီဒၣ်ဝဲန့ၣ်လီၤ.
22 စီၤယဟိၤယဒါအဖိခွါ စီၤဘနါယၤတဂၤမၤတၢ်န့ၣ် တဖၣ်ဒီးအမံၤအိၣ်ဝဲလၢ ပှၤအဆူၣ်သၢဂၤအကျါ လီၤ. 23 ဒီးအလၤကပီၤဒိၣ်န့ၢ်ပှၤသၢဆံတက့ၢ်. ဘၣ်ဆၣ် ဒီး, တဟဲနုာ်ဘၣ်လၢပှၤသၢဂၤအကျါဘၣ်. ဒီးစီၤဒၤဝံး ပာ်အီၤလၢပှၤပၢၤတၢ်ဖိအဖီခိၣ်လီၤ.
24 ဒီးလၢပှၤသၢဆံအကျါန့ၣ်, အိၣ်ဝဲလၢစီၤယိၤအာ်အ ဒီပုၢ်ဝဲၢ်စီၤဧစၤအ့လးတဂၤ, ဒီးစီၤဒိဒိၤအဖိခွါစီၤအ့လ ဃၤနၣ်ဘၣ်ဃးဒီးဘ့ၤသလ့ဃ့ၣ်တဂၤ, 25 ပှၤဃရိးဖိစီၤ ၡးမၤတဂၤ, ပှၤဃရိးဖိစီၤအလံကၤတဂၤ, 26 ပှၤပးလ တံၤဖိစီၤဃ့လ့းတဂၤ, ပှၤတကိၤဖိစီၤဧံးက့ၣ်အဖိခွါစီၤ ဧံရၤတဂၤ, 27 ပှၤဧၤနသိးဖိစီၤအဘံၤဧ့စၢ်တဂၤပှၤဃူသ ၡသးဖိစီၤမၤဘူနဲၤတဂၤ, 28 ပှၤအဃိဃးဖိစီၤစးလမိၣ် တဂၤ, ပှၤနတိဖၤဖိစီၤမၤဟရဲတဂၤ, 29 ပှၤနတဖၤဖိစီၤ ဘၤနါအဖိခွါစီၤဃ့လ့ာ်တဂၤ, စီၤရံဘဲၤအဖိခွါစီၤအံ တဲၤလၢကံဘဧၤဘၣ်ဃးဒီး ပှၤဘံၣ်ယၤမံၣ်ဖိတဂၤ,―
30 ပှၤပံးရသိၣ်ဖိစီၤဘနါယၤတဂၤ, စီၤဟံးဒဲဘၣ်ဃးဒီး ကၤဧၣ်အထံကျိတဖၣ်တဂၤ, 31 ပှၤဧၤရဘၤဖိစီၤအဘံ ဧၤလဘိၣ်တဂၤ, ပှၤတၢ်ဃူၣ်ဖိစီၤဧၤစမၤဝ့းတဂၤ,―
32 ပှၤၡၤလဘိၣ်ဖိစီၤအ့လံယဘၤတဂၤ, လၢစီၤယၤရှ့ၣ် အဖိခွါအကျါစီၤယိနၤသၣ်တဂၤ, 33 ပှၤဟရၢ်ဖိစီၤၡးမၤ တဂၤ, ပှၤဟရၢ်ဖိစီၤၡၤရၢ်အဖိခွါစီၤအဃံအၣ်တဂၤ,―
34 ပှၤမၤကၤဖိတဂၤအဖိခွါစီၤအဃၤစဘဲအဖိခွါ စီၤအလံၤ ဖ့လ့းတဂၤ, ပှၤကံလိၣ်ဖိစီၤအဃံသဖ့ၤလးအဖိခွါစီၤ အလံဧၣ်တဂၤ, 35 ပှၤကၢ်မ့ၤလးဖိစီၤဃ့ၤစရ့တဂၤ, ပှၤ အၢ်ဘၤဖိစီၤပရဲတဂၤ, 36 စီၤနၤသၣ်အဖိခွါစီၤယံးက့လး ဘၣ်ဃးဒီးစိဘၤတဂၤ, ပှၤကးဖိစီၤဘၤနံတဂၤ, 37 ပှၤ ဧၣ်မိၣ်ဖိစီၤစ့လ့းတဂၤ, နီၢ်စရူယၤအဖိခွါစီၤယိၤအာ် အပှၤစိာ်အစုကဝဲၤပှၤဘအ့ရိးဖိစီၤနၤဃရဲတဂၤ, 38 ပှၤ ယံသၢ်ဖိစီၤဧံရၤတဂၤ, ပှၤယံသၢ်ဖိစီၤကၢ်ရ့းတဂၤ,―
39 ပှၤဃ့ၤသးဖိစီၤအူၤရံယၤတဂၤ ခဲလၢာ်န့ၣ်အိၣ်ဝဲသၢ ဆံသၢဂၤလီၤ.
24၂၄
1 ဒီးယွၤအသးထီၣ်ဘၣ်ကဒီး အံၣ်စရ့လး, ဒီးထိၣ်ဂဲၤ စီၤဒၤဝံးထီဒါအီၤ, ဒီးစံးဝဲ, လဲၤဂံၢ်အံၣ်စရ့လးဖိ, ဒီးယူဒၤ ဖိန့ၣ်တက့ၢ်.
2 ဒီးစီၤပၤစံးဘၣ်ပှၤသုးမုၢ်အခိၣ်လၢအအိၣ်ဒီးအီၤ, စီၤ ယိၤအာ်, လဲၤလၢအံၣ်စရ့လးအဒူၣ်တဖၣ်အကျါလၢ ဒၣ်ပၢၢ်လၢဘ့ၢ်ၡဘၤ, ဒီးဂံၢ်ပှၤဂီၢ်မုၢ်ဒ်သိးယကသ့ၣ် ညါပှၤဂီၢ်မုၢ်အတၢ်ဂံၢ်တက့ၢ်.
3 ဒီးစီၤယိၤအာ်စံးဘၣ်စီၤပၤ, ပှၤဂီၢ်မုၢ်မ့ၢ်အိၣ်ပှဲၤအံၤပှဲၤ နုၤန့ၣ်ဒီး, မ်ယွၤမၤအါထီၣ်အလီၢ်အစးတကယၤ, ဒီး မ်ပကစၢ်စီၤပၤကထံၣ်ဘၣ်ဝဲတက့ၢ်. ဘၣ်စီၤပၤအသး လၢတၢ်တမံၤန့ၣ်မ့ၢ်အဘၣ်မနုၤလဲၣ်.
4 ဘၣ်ဆၣ်ဒီးစီၤပၤအတၢ်ကတိၤ ဆူၣ်န့ၣ်စီၤယိၤအာ်, ဒီးပှၤသုးမုၢ်အခိၣ်တဖၣ်အတၢ်ကတိၤ, ဒီးစီၤယိာ်အာ်, ဒီးပှၤသုးမုၢ်အခိၣ်တဖၣ်ဟးဝဲလၢ စီၤပၤအအိၣ်, ဒ်သိး အကဂံၢ်အံၣ်စရ့လးလီၤ.
5 ဒီးလဲၤခီဂာ်ယၢ်ဒ့ၣ်, ဒီးသူၣ်ဒဲလၢဧရိၤဧ့ၢ်လၢဝ့ၢ်အစု ထွဲတခီလၢအအိၣ်ဝဲလၢ ကးအပၢၤခိၣ်အသးကံၢ်ပူၤ, ဒီးဆူယၤစ့ၢ်လီၤ.
6 ဒီးဟဲဝဲဆူကံးလဧး, ဒီးဆူကီၢ်တၤဃတံၣ်ဃီဒၡံၤ, ဒီး ဟဲဝဲဆူဒၣ်ယၤဧၣ်, ဒီးလဲၤတရံးဝဲဆူစံဒိၣ်, 7 ဒီးဟဲဝဲဆူ စိၢ်အတိာ်, ဒီးဆူပှၤဃံၤဝံဖိအဝ့ၢ်ခဲလၢာ်, ဒီးဆူပှၤကနၤ ဧၣ်ဖိအအိၣ်, ဒီးဟးထီၣ်ဝဲဆူယူဒၤလၢကလံၤထံးတခီ ဆူဘ့ၢ်ၡဘၤလီၤ.
8 ဒီးလဲၤတၢ်လၢကီၢ်ပူၤဒီဘ့ၣ်ညါဝံၤဒီး, လါခွံလါဒီးအ နံၤခံဆံအကတၢၢ်န့ၣ်ဟဲက့ၤဝဲဆူယရူၤၡလ့ၣ်လီၤ.
9 ဒီးစီၤယိၤအာ်ဟ့ၣ်လီၤစီၤပၤလၢ ပှၤဂီၢ်မုၢ်အတၢ်ဂံၢ်, ဒီးပှၤအဆူၣ်လၢအဘီၣ်ထီၣ်နးလၢ အံၣ်စရ့လးအပူၤ အိၣ်ဃိးကလီၤ, ဒီးယူဒၤအပှၤကညီအိၣ်ယဲၢ်ကလီၤ လီၤ.
10 ဒီးလၢအဂံၢ်ပှၤဂီၢ်မုၢ်အလီၢ်ခံန့ၣ်, စီၤဒၤဝံးအသးသိၣ် ဃီၣ်အီၤ, ဒီးစီၤဒၤဝံးစံးဘၣ်ယွၤ, ယမၤတၢ်န့ၣ်သတး ဒီး, ယမၤကမၣ်လံဖးဒိၣ်လံ. ဒီးခဲကနံၣ်အံၤပျၢ်လၢ် နခ့နပှၤအတၢ်ဒဲးဘးတက့ၢ်, ယွၤဧၢ. အဂ့ၢ်ဒ်အံၤ, ယမၤ လံပှၤဟးဂီၤဖိအတၢ်ဒိၣ်ဒိၣ်ကလဲာ်လံ. 11 ဒီးစီၤဒၤဝံးဂဲၤဆၢထၢၣ်လၢမုၢ်ဂီၤ, ဒီးယွၤအကလုၢ်ဘၣ်ဝံကး, စီၤဒၤဝံးအပှၤထံၣ်တၢ်တဂၤ, ဒီးစံးဝဲဒၣ်,―
12 လဲၤစံးဘၣ်စီၤဒၤဝံး, ယွၤစံးဝဲဒ်အံၤ, ယပာ်တၢ်သၢမံၤ လၢနမဲာ်ညါလီၤ. ဃုထၢတမံၤမံၤလၢအကျါတက့ၢ်. ဒီးယကပာ်တၢ်န့ၣ်တမံၤလၢနဂီၢ်လီၤ.
13 ဒီးစီၤကးဟဲဆူစီၤဒၤဝံးအအိၣ်ဒီးဒုးနဲၣ်အီၤ, ဒီးစံးဘၣ် အီၤ, တၢ်သၣ်ဝံၤလီၤဒိနွံနံၣ်ကဟဲနုာ်လၢနကီၢ်ပူၤဧါ, မ့တမ့ၢ်ဘၣ်နကဃ့ၢ်သၢလါ လၢနဒုၣ်နဒါအမဲာ်ညါဖဲ အလူၤနၤဧါ. မ့တမ့ၢ်ဘၣ်တၢ်သံသတြိာ်ကအိၣ်သၢသီ လၢနကီၢ်ပူၤဧါ, ဒီးခဲကနံၣ်အံၤသ့ၣ်ညါဒီးကွၢ်, ယက စံးဘၣ်က့ၤပှၤလၢအမၢလီၤယၤဒ်လဲၣ်.
14 ဒီးစီၤဒၤဝံးစံးဘၣ်စီၤကးန့ၣ် တၢ်မၤကိၢ်မၤဂီၤယၤဒိၣ် မးလီၤ. မ်ပလီၤဘၣ်လၢယွၤအစုပူၤတက့ၢ်. အဂ့ၢ်ဒ်အံၤ, အသးအိၣ်ပှၤဒိၣ်နီၢ်မးလီၤ. ဒီးမ်ယသုတလီၤဘၣ်လၢ ပှၤကညီအစုပူၤတဂ့ၤ.
15 ဒီးယွၤမၢလီၤတၢ်သံသတြိာ်လၢ အံၣ်စရ့လးအဖီခိၣ် လၢမုၢ်ဂီၤပၢၢ်လၢအကတီၢ်လၢတၢ်သ့ၣ်ဖးဝဲ, ဒီးပှၤသံဝဲ လၢပှၤဂီၢ်မုၢ်အကျါလၢဒၣ် ပၢၢ်လၢဘ့ၢ်ၡဘၤနွံကလး လီၤ.
16 ဒီးတုၤကလူးတဂၤယူာ်ထီၣ်အစုလၢ ယရူၤၡလ့ၣ်အ ဖီခိၣ်ဒ်သိးအကမၤဟးဂီၤဝဲဒီး, ယွၤပီၢ်ယၢ်လီၤက့ၤအ သးလၢတၢ်အၢန့ၣ်, ဒီးစံးဘၣ်ကလူးလၢအမၤဟးဂီၤ ပှၤဂီၢ်မုၢ်တဂၤန့ၣ်, အါလံ. ယၤလီၤက့ၤနစုတက့ၢ်. ဒီး ယွၤအကလူးန့ၣ် အိၣ်ဝဲလၢပှၤယဘူၣ်ဖိစီၤအၤရနၤအ ကြဲၢ်ဃၢၤလီၤ.
17 ဒီးတုၤအထံၣ်ဘၣ်ဝဲလၢ ကလူးကျီကွံာ်ပှၤဂီၢ်မုၢ်ဒီး, စီၤဒၤဝံးကတိၤတၢ်ဒီးယွၤ, ဒီးစံးဝဲဒၣ်, ကွၢ်ကွၢ်, ယမၤ ကမၣ်လံတၢ်လံ. ဒီးယမၤလံတၢ်အၢလံ. မ့မ့ၢ်သိတ ဖၣ်အံၤမ့ၢ်အမၤမနုၤတမံၤလဲၣ်. မ်နစုအိၣ်လၢ်လၢယ ဖီခိၣ်, ဒီးလၢယပၢ်အပှၤဟံၣ်ဖိအဖီခိၣ်တက့ၢ်.
18 ဒီးတၢ်လၢမုၢ်တနံၤန့ၣ် စီၤကးဟဲဆူစီၤဒၤဝံးအအိၣ် ဒီးစံးဘၣ်အီၤ, လဲၤထီၣ်, မၤထီၣ်တၢ်လုၢ်လီၢ်လၢယွၤ အဂီၢ်လၢပှၤယဘူၣ်ဖိစီၤအၤရနၤအကြဲၢ်ပူၤတက့ၢ်.
19 ဒီးစီၤဒၤဝံးမၤဝဲ ဒ်စီၤကးအကလုၢ်အသိးန့ၣ်, ဒီးလဲၤ ထီၣ်ဝဲဒ်ယွၤမၤလိာ်တၢ်အသိးန့ၣ်လီၤ.
20 ဒီးစီၤအၤရနၤကွၢ်ဝဲ, ဒီးထံၣ်ဘၣ်စီၤပၤဒီးအခ့အပှၤ ဟဲဆူအအိၣ်, ဒီးစီၤအၤရနၤလဲၤထီၣ်, ဒီးတီၤလီၤကဒွံ ကျိာ်, ဒီးကျးလီၤအမဲာ်ဆူဟီၣ်ခိၣ်လၢစီၤပၤအမဲာ်ညါ လီၤ.
21 ဒီးစီၤအၤရနၤစံးဝဲဒၣ်, ယကစၢ်စီၤပၤဟဲဆူအခ့အပှၤ အအိၣ်မ့ၢ်အဘၣ်မနုၤလဲၣ်. ဒီးစီၤဒၤဝံးစံးဝဲဒၣ်, ဒ်သိး ယကပှ့ၤန့ၢ်ကြဲၢ်လၢနၤ, ဒ်သိးယကမၤထီၣ်တၢ်လုၢ်လီၢ် လၢယွၤအဂီၢ် ဒ်သိးတၢ်ကတြီတၢ်သံသတြိာ်လၢပှၤဂီၢ် မုၢ်န့ၣ်လီၤ.
22 ဒီးစီၤအၤရနၤစံးဘၣ်စီၤဒၤဝံး, မ်ယကစၢ်စီၤပၤဟံးန့ၢ် တၢ်, ဒီးလုၢ်တၢ်လၢအဂ့ၤလၢအမဲာ်တက့ၢ်. ကွၢ်ကွၢ်, ဂီၤဖံးလၢတၢ်လုၢ်မ့ၣ်အူအဂီၢ်, ဒီးနီၣ်တီၢ်ဘု, ဒီးဂီၤဖံးအ ပိးအလီတဖၣ်လၢ သ့ၣ်မုၣ်အဂီၢ်န့ၣ်အိၣ်ဝဲလီၤ. 23 တၢ် ခဲလၢာ်အံၤ, စီၤပၤဧၢ, အၤရနၤဟ့ၣ်စီၤပၤလီၤ. ဒီးစီၤ အၤရနၤစံးဘၣ်စီၤပၤ, မ်ယွၤနကစၢ်ဘၣ်အသးလၢနၤ တက့ၢ်.
24 ဒီးစီၤပၤစံးဘၣ်စီၤအၤရနၤ, တမ့ၢ်ဘၣ်. ယကပှ့ၤတၢ် လၢနၤလၢတၢ်ပှ့ၤသပှၢ်တၢၢ်လီၤ. ဒီးယတလုၢ်တၢ်လုၢ် မ့ၣ်အူလၢယွၤယကစၢ်လၢတၢ်လၢယန့ၢ်ဘၣ် ကလီ ကလီဘၣ်. ဒီးစီၤဒၤဝံးပှ့ၤကြဲၢ်န့ၣ်, ဒီးဂီၤဖံးတဖၣ်လၢ စ့ၡက့လးယဲၢ်ဆံလီၤ.
25 ဒီးစီၤဒၤဝံးမၤထီၣ်တၢ်လုၢ်လီၢ်ဖဲန့ၣ် လၢယွၤအဂီၢ်, ဒီးလုၢ်တၢ်လုၢ်မ့ၣ်အူ, ဒီးတၢ်လုၢ်မၤဃူမၤဖိးလီၤ. ဒီး ယွၤဒိကနၣ်တၢ်ဘါထုကဖၣ်လၢကီၢ်အဂီၢ်န့ၣ်, ဒီးတၢ် သံသတြိာ်ဟါမၢ်လၢအံၣ်စရ့လးအကျါန့ၣ်လီၤ.