လံာ်စီၤပီလူးကွဲးန့ၢ်ပှၤကရံၣ်သူးဖိပှဲၤထီၣ်ခံဘ့ၣ်တဘ့ၣ်.

လံာ်စီၤပီလူးကွဲးန့ၢ်ပှၤကရံၣ်သူးဖိပှဲၤထီၣ်ခံဘ့ၣ်တဘ့ၣ်.

၁

¹ ယ့ၣ်ရှူးခရံာ်အတၢ်မၢဖိ ဖဲဒၣ်ယွၤအသး, ယၤ, စီၤပီ လူး, ဒီးဒီပုၢ်ဝဲၢ်စီၤတံၤမသ့း, စံးဘၣ်ယွၤအတၢ်အိၣ် ဖှိၣ်လၢအအိၣ်လၢကရံၣ်သူးအပူၤ, ဒီးကယဲၢ်ပှၤစီဆှံ ခဲလၢာ်လၢအအိၣ်လၢအဃါယၤဒီကီၢ်ညါန့ၣ်, ² မ်တၢ် ဘျုးတၢ်ဖှိၣ်, ဒီးတၢ်ဃူတၢ်ဖိးလၢပပၢ်ယွၤ, ဒီးကစၢ် ယ့ၣ်ရှူးခရံာ်အအိၣ်န့ၣ်ဘၣ်သုတက့ၢ်.

³ ယွၤပကစၢ်ယ့ၣ်ရှူးခရံာ်အပၢ်, တၢ်သးကညီၤအပၢ်, ဒီးတၢ်မၤမုာ်ခဲလၢာ်အကစၢ်, မ်အဘၣ်တၢ်စံးထီၣ်ပ တြၢၤအီၤတက့ၢ်. ⁴ အဝဲဒၣ်မၤမုာ်ထီၣ်ပှၤလၢ ပတၢ်နး တၢ်ဖှီၣ်ခဲလၢာ်အပူၤ, ဒ်သိးပကမၤမုာ်ထီၣ်ပှၤလၢအ ဘၣ်တၢ်နးတၢ်ဖှီၣ်တမံၤမံၤ, လၢတၢ်မုာ်လၢယွၤမၤမုာ် ပသးန့ၣ်လီၤ. ⁵ အဂ့ၢ်ဒ်အံၤ, ဒ်ခရံာ်အတၢ်နးတၢ်ဖှီၣ်အါ ဝဲဂီၢ်ဝဲလၢပပူၤအသိးန့ၣ်, တၢ်မၤမုာ်ထီၣ်ပှၤလၢခရံာ် အဃိ, အါဝဲဂီၢ်ဝဲဒ်န့ၣ်အသိးလီၤ.

⁶ ဒီးပမ့ၢ်ဘၣ်တၢ်နးတၢ်ဖှီၣ်ဒီး, မ့ၢ်တၢ်မၤမုာ်ထီၣ်က့ၤ သု, ဒီးတၢ်အုၣ်က့ၤခီၣ်က့ၤသုဂီၢ်, ဒီးပမ့ၢ်ဘၣ်တၢ်မၤမုာ် ထီၣ်က့ၤပှၤဒီး, မ့ၢ်တၢ်မၤမုာ်ထီၣ်က့ၤလၢအကဲထီၣ်ဝဲ လၢသုဝံသးစူၤတၢ်နးတၢ်ဖှီၣ် တမံၤဃီလၢပဘၣ်ပဝဲ စ့ၢ်ကီးန့ၣ်လီၤ. ဒီးပတၢ်မုၢ်လၢ်လၢသုဂီၢ်န့ၣ် အိၣ်ဂၢၢ် ဆိးကျၢၤလီၤ. ⁷ အဂ့ၢ်ဒ်အံၤ, ပသ့ၣ်ညါ, ဒ်သုဘၣ်ဃး ဒီးတၢ်နးတၢ်ဖှီၣ်အသိးန့ၣ်, သုဘၣ်ဃးစ့ၢ်ကီးဒီးတၢ် မၤမုာ်ထီၣ်က့ၤန့ၣ်လီၤ. ⁸ အဂ့ၢ်ဒ်အံၤ, ပုၢ်သ့ၣ်ဝဲၢ်သ့ၣ်ဧၢ, ပသးတအိၣ်ဘၣ်လၢ သုတသ့ၣ်ညါဘၣ်တၢ်နးတၢ် ဖှီၣ်လၢအဘၣ်ပှၤလၢအၤစံ, လၢပဘၣ်တၢ်နးကဲၣ်ဆိး တုၤပဒိးတကဲဘၣ်, တုၤဒၣ်လဲာ်ပတမုၢ်လၢ်လၢၤဘၣ် လၢပကမူဘၣ်. ⁹ မ့မ့ၢ်ပအိၣ်ဒီးတၢ်စံၣ်ညီၣ်သံပှၤလၢ ပပူၤဒၣ်ပဝဲ, ဒ်သိးပသုတနာ်လီၤပသးတဂ့ၤ, မ့ၢ်ယွၤ, လၢအမၤဂဲၤဆၢထၢၣ်က့ၤပှၤသံန့ၣ်လီၤ. ¹⁰ အဝဲဒၣ်ထုး ထီၣ်ပှၤလၢတၢ်သံဆူၣ်ပှဲၤန့ၣ်, ဒီးခဲကနံၣ်အံၤထုးထီၣ် ပှၤ, ဒီးမ့ၢ်သုမၤစၢၤဃုာ်စ့ၢ်ကီးလၢတၢ်ထုကဖၣ်အဃိ ဒီး, ပမုၢ်လၢ်လၢအကထုးထီၣ်ဒံးပှၤ, ¹¹ ဒ်သိးပဘၣ် ဘျုးဘၣ်ဖှိၣ်လၢပှၤအါဂၤအဃိဒီး, ပှၤအါဂၤကစံးထီၣ် ပတြၢၤတၢ်အဘျုးအဖှိၣ်လၢပဃိလီၤ.

¹² အဂ့ၢ်ဒ်အံၤ, ပပာ်ပသးကဖၢလၢအလီၢ်မ့ၢ်အအံၤ, ပ သးလၢအသ့ၣ်ညါဒၣ်တၢ်န့ၣ်, အုၣ်အသးလၢပမၤတၢ် လၢဟီၣ်ခိၣ်ချၢ, ဒီးအါတက့ၢ်လၢသုဂီၢ်မ့ၢ်လၢတၢ်စီ ဆှံဒီးတၢ်တီတၢ်လိၤဘၣ်ဃးဒီးယွၤအပူၤ, တမ့ၢ်ဘၣ် လၢတၢ်ကူၣ်သ့ဘၣ်ဃးဒီးတၢ်ဖံးတၢ်ညၣ်ဘၣ်, မ့ၢ်လၢ ယွၤအဘျုးအဖှိၣ်လီၤ. ¹³ အဂ့ၢ်ဒ်အံၤ, ပကွဲးန့ၢ်သုထဲ တၢ်တဖၣ်လၢသုဖး, ဒီးသုအၢၣ်လီၤအီလီၤ, ဒီးယမုၢ် လၢ်လၢသုကအၢၣ်လီၤတုၤအကတၢၢ်န့ၣ်လီၤ. ¹⁴ ဒ်န့ၣ် သိးစ့ၢ်ကီး, သုအၢၣ်လီၤအီလီၤတ့ၢ်တနီၤ လၢပမ့ၢ်သု ပာ်သုသးကဖၢလၢအလီၢ်, ဒ်သုမ့ၢ်စ့ၢ်ကီးလၢပတၢ်အ သိး, လၢကစၢ်ယ့ၣ်ရှူးခရံာ်အမုၢ်တနံၤန့ၣ်လီၤ.

¹⁵ ဒီးလၢတၢ်နာ်အံၤအပူၤ ယပာ်လီၤယသးလၢယက လဲၤဆိတက့ၢ်ဆူသုအိၣ်, ဒ်သိးသုကန့ၢ်ဘၣ်တၢ်ဘျုး ခံဘျီတဘျီလီၤ. ¹⁶ ဒီးယကလဲၤပူၤကွံာ်သုဆူမၤက့းဒ နံ, ဒီးယကဟဲက့ၤကဒါလၢမၤက့းဒနံဆူသုအိၣ်, ဒီး သုကဆှၢယၤလၢညါဆူကီၢ်ယူဒၤလီၤ. ¹⁷ မၤသးဒ်န့ၣ် ဒီး, ယသးအိၣ်ဒ်န့ၣ်, မ့ၢ်ယမၤမှံတၢ်န့ၣ်ဧါ. တၢ်လၢ ယတိာ်န့ၣ်, မ့ၢ်ယတိာ်ဒ်တၢ်ဖံးတၢ်ညၣ်အသိး, ဒ်သိး တၢ်မ့ၢ်လီၤမ့ၢ်လီၤ, ဒီးတၢ်တမ့ၢ်ဘၣ်တမ့ၢ်ဘၣ်န့ၣ်, က အိၣ်ဒီးယၤန့ၣ်ဧါ. ¹⁸ ဘၣ်ဆၣ်ဒီး, ဒ်ယွၤမၤအကလုၢ်တီ အသိးန့ၣ်, ပကတိၤတၢ်ဒီးသုတမ့ၢ်ဘၣ်, တၢ်မ့ၢ်ဒီး တၢ်တမ့ၢ်ဘၣ်န့ၣ်ဘၣ်. ¹⁹ အဂ့ၢ်ဒ်အံၤ, ယွၤအဖိခွါယ့ၣ် ရှူးခရံာ်, လၢပဝဲဒၣ်, ယၤဒီးစီၤစံၤလဝ့နုၤ, ဒီးစီၤတံၤမ သ့း, စံၣ်တဲၤတဲလီၤအီၤလၢသုကျါ, တကဲထီၣ်တၢ် မ့ၢ်ဒီးတၢ်တမ့ၢ်ဘၣ်န့ၣ်ဘၣ်. မ့ၢ်တၢ်မ့ၢ်ကဲထီၣ်လံလၢ အဝဲဒၣ်အပူၤလီၤ. ²⁰ အဂ့ၢ်ဒ်အံၤ, ဖဲဒၣ်ယွၤစံးပာ်တၢ် တဖၣ်, မ့ၢ်တၢ်မ့ၢ်လၢအဝဲဒၣ်အပူၤ, သတးဒီး, မ့ၢ်စ့ၢ် ကီးအၤမ့ၣ်လၢအဝဲဒၣ်အဃိ, လၢယွၤအလၤကပီၤအ ဂီၢ်လၢပဝဲဒၣ်အဃိလီၤ. ²¹ ဒီးပှၤလၢအမၤအိၣ်စံာ်အိၣ် ကျၢၤပှၤဒီးသုလၢခရံာ်အပူၤ, ဒီးဖှူပှၤန့ၣ်, မ့ၢ်ယွၤ,―

²² လၢအစဲဃာ်ပနီၣ်ပှၤ, ဒီးဟ့ၣ်လီၤသးအတၢ်ဟ့ၣ်ကီၤ လၢပသးကံၢ်ပူၤလီၤ.

²³ ဒီးယကိးထီၣ်ယွၤဒ်သိးအကအုၣ်အသးလၢ ယသး အဖီခိၣ်, လၢယသးလီသုအဃိဒီး, ယတဟဲဒံးဘၣ်ဆူ ကရံၣ်သူးဘၣ်လီၤ. ²⁴ တမ့ၢ်ဘၣ်လၢပကဲကစၢ်လၢသု တၢ်နာ်အဖီခိၣ်ဘၣ်, မ့ၢ်ပမ့ၢ်ပှၤမၤစၢၤသုသးခုတၢ်လီၤ. အဂ့ၢ်ဒ်အံၤ, သုအိၣ်ဆၢထၢၣ်လၢတၢ်နာ်လီၤ.

၂

¹ ဒီးယကစၢ်ဒၣ်ယဲအဂီၢ်ယစံၣ်ညီၣ် တၢ်အံၤလၢယတ လဲၤကဒီးဆူသုအိၣ်, လၢတၢ်သူၣ်အုးသးအုးဘၣ်,―

² အဂ့ၢ်ဒ်အံၤ, ယမ့ၢ်မၤသးအုးသုဒီး, မ့တမ့ၢ်ဘၣ်ပှၤလၢ ယမၤသးအုးအီၤဒီး, မ့ၢ်မတၤကမၤသးခုယၤတဂၤ လဲၣ်, ³ ဒီးယနာ်သုခဲလၢာ်, လၢယသးခုတၢ်န့ၣ်မ့ၢ် သုဝဲသ့ၣ်ခဲလၢာ်လၢသးခုတၢ်သတးဒီး, ဒ်သိးတုၤယ ဟဲဒီး, ပှၤလၢအဂ့ၤမၤသးခုယၤ, သုတမၤသးအုးယၤ တဂ့ၤဒီး, ယကွဲးတ့ၢ်တၢ်အံၤတမံၤလီၤ. ⁴ အဂ့ၢ်ဒ်အံၤ, ယကွဲးန့ၢ်တ့ၢ်သုလၢယသူၣ်ကိၢ်သးဂီၤ, ဒီးသူၣ်အုးသး အုးနးနးကလဲာ်, အိၣ်ဒီးမဲာ်ထံမဲာ်နိလၢအအါ, ဒ်သိး သုကသးအုးတမ့ၢ်ဘၣ်, မ့ၢ်ဒ်သိးသုကသ့ၣ်ညါလၢ ယအဲၣ်သုအါဒိၣ်မးအဂ့ၢ်လီၤ.

⁵ ဘၣ်ဆၣ်ဒီးပှၤတဂၤ မ့ၢ်ဒုးအိၣ်ထီၣ်လံတၢ်သးအုးလံ ဒီး, မ့ၢ်အမၤသးအုးယၤထဲတနီၤ, ဒ်သိးယသုတပာ် တၢ်ဃၢဒိၣ်ကဲၣ်ဆိးလၢ သုဝဲခဲလၢာ်အလိၤတဂ့ၤ လီၤ. ⁶ ပှၤဒ်န့ၣ်သိးတဂၤအတၢ်ဒဲးဘးလၢ ပှၤအါဂၤ ဟ့ၣ်ဝဲန့ၣ်, အါလံလၢအဂီၢ်လံ. ⁷ အခိၣ်တလိာ်, ဒ်သိး ပှၤဒ်န့ၣ်အသိး အသုတလီၤဘျၢလၢ တၢ်သးအုးဒိၣ် ကဲၣ်ဆိးတဂ့ၤဒီး, သုပျၢ်အတၢ်ကမၣ်, ဒီးမၤမုာ်က့ၤအီၤ န့ၣ်, ဂ့ၤဒၣ်တၢ်တက့ၢ်လီၤ. ⁸ မၤသးဒ်န့ၣ်ဒီး, ယဃ့ ကညးသုလၢသုကမၤဂၢၢ်မၤကျၢၤ တၢ်အဲၣ်တၢ်ကွံလၢ အီၤလီၤ.

⁹ အဂ့ၢ်ဒ်အံၤ, လၢတၢ်ခဲလၢာ်န့ၣ်, မ့ၢ်သုကဒိကနၣ်တ ဒိကနၣ်လဲၣ်န့ၣ်, ဒ်သိးယကသ့ၣ်ညါလၢတၢ်မၤကွၢ် သုအဃိဒီး, ယကွဲးတၢ်န့ၣ်လီၤ. ¹⁰ ဒီးပှၤလၢသုပျၢ်အ တၢ်တမံၤမံၤဒီး, ယပျၢ်စ့ၢ်ကီးယဲလီၤ. အဂ့ၢ်ဒ်အံၤ, ယမ့ၢ် ပျၢ်တၢ်တမံၤမံၤဒီး, ယပျၢ်တၢ်လၢသုဃိ, လၢခရံာ်အ မဲာ်ညါ, ¹¹ ဒ်သိးမုၣ်ကီၤလံၢ်သုတမၤန့ၢ်အလီၢ်လၢပဖီ ခိၣ်တဂ့ၤလီၤ. အဂ့ၢ်ဒ်အံၤ, ပသ့ၣ်ညါအတၢ်ကူၣ်တၢ် ဖးလီၤ. ¹² ဒီးတုၤယဟဲဆူတြိၤအါလၢခရံာ် အတၢ်သးခုကစီၣ် အဂီၢ်ဒီး, ¹³ တၢ်အိးထီၣ်န့ၢ်ယၤလၢတြဲၤတဘ့ၣ်လၢကစၢ်အပူၤဘၣ်ဆၣ်ဒီး, မ့ၢ်ယတထံၣ်န့ၢ်ဘၣ်ယဒီပုၢ်ဝဲၢ်စီၤတံတူးဘၣ်ဒီး, ယသးတမုာ်ဘၣ်. ဒီးယဟးဖးဒီးအီၤ ဒီးယလဲၤဆူမၤက့းဒနံလီၤ. ¹⁴ ဒီးယွၤလၢအဒုးနဲၣ်ဖျါ ထီၣ်အတၢ်မၤနၢၤပှၤလၢခရံာ်အပူၤတဘိယူၢ်ဃီ, ဒီး လီၣ်ဖျါထီၣ်အတၢ်သ့ၣ်ညါအတၢ်နၢမူ ကိးပူၤဒဲးလၢ ပစုပူၤန့ၣ်, မ်ပှၤစံးထီၣ်ပတြၢၤအဘျုးအဖှိၣ်တက့ၢ်.―

¹⁵ အဂ့ၢ်ဒ်အံၤ, လၢပှၤလၢအတုၤလၢ တၢ်အုၣ်က့ၤခီၣ်က့ၤ အဂီၢ်, ဒီးလၢပှၤလၢအတုၤလၢတၢ်ဟးဂီၤအဂီၢ်, ပမ့ၢ် ခရံာ်အတၢ်နၢမူလၢယွၤအမဲာ်ညါလီၤ. ¹⁶ လၢပှၤအံၤ အဂီၢ်ပမ့ၢ်တၢ်သံအနၢမူဆူတၢ်သံလီၤ. မ့မ့ၢ်လၢအဝဲ သ့ၣ်အဂီၢ်, ပမ့ၢ်တၢ်မူအနၢမူဆူတၢ်မူလီၤ. ဒီးလၢတၢ် အံၤအဂီၢ်, မ့ၢ်မတၤမၤတၢ်သ့တဂၤလဲၣ်. ¹⁷ အဂ့ၢ်ဒ်အံၤ, ပဝဲဒၣ်အံၤ, ပတဒ်သိးဘၣ်ဒီးပှၤအါဂၤလၢအမၤကျီၣ် ကျဲယွၤအကလုၢ်အကထါအသိးဘၣ်. မ့မ့ၢ်ဒ်ပှၤအတီ အလိၤ, ဒ်ပှၤလၢအဘၣ်ဃးဒီးယွၤအသိးဒီး, ပစံၣ်တဲၤ တဲလီၤတၢ်လၢခရံာ်အပူၤ, လၢယွၤအမဲာ်ညါလီၤ.

၃

¹ မ့ၢ်ပမၤထီၣ်သီကဒီး တၢ်စံးထီၣ်ပတြၢၤလီၤက့ၤပသး န့ၣ်ဧါ. မ့ၢ်ပန့ၢ်လံာ်တူၢ်လိာ်တၢ်, ဒ်ပှၤတနီၤနီၤအသိး ဆူသုအိၣ်မ့ၢ်ဂ့ၤ, လံာ်တူၢ်လိာ်တၢ်လၢသုအိၣ်မ့ၢ်ဂ့ၤ, အလီၢ်အိၣ်ဧါ. ² သုဝဲသ့ၣ်, သုမ့ၢ်ပလံာ်ကွဲးအသးလၢ ပသးအလိၤ, ဒီးပှၤကညီသ့ၣ်ညါဝဲ ဒီးဖးဝဲခဲလၢာ် လီၤ. ³ သုအိၣ်ဖျါလၢသုမ့ၢ်ခရံာ်အလံာ်လၢပမၤအီၤ, အိၣ်ကွဲးအသးလၢ ကသံၣ်ထံတမ့ၢ်ဘၣ်, မ့ၢ်လၢယွၤ လၢအမူဝဲတဂၤန့ၣ်အသး, လၢလၢၢ်ဘ့ၣ်ဘၣ်အလိၤ တမ့ၢ်ဘၣ်, မ့ၢ်လၢသးအဖံးအညၣ် ဘ့ၣ်ဘၣ်အလိၤ လီၤ. ဒီးပအိၣ်ဒီးတၢ်နာ်ယွၤဒ်န့ၣ်လၢခရံာ်အဃိလီၤ. ⁴ တ မ့ၢ်ဘၣ်ပသ့တၢ်လၢပကစၢ်ဒၣ်ပဝဲလၢ ပကကူၣ်တၢ် တမံၤမံၤဒ်လၢပကစၢ်ဒၣ်ပဝဲအသိးဘၣ်. မ့မ့ၢ်ပသ့တၢ် န့ၣ်မ့ၢ်လၢယွၤလီၤ. ⁶ ဒီးအဝဲဒၣ်မၤသ့ထီၣ်ပှၤ, ဒ်သိးပ ကကဲထီၣ်တၢ်အၢၣ်လီၤအီလီၤအသီ အခ့အပှၤဘၣ် ဃးဒီးလံာ်ဖျၢၣ်တမ့ၢ်ဘၣ်, မ့ၢ်အဘၣ်ဃးဒီးသးလီၤ. အဂ့ၢ်ဒ်အံၤ, လံာ်ဖျၢၣ်မၤသံတၢ်, မ့မ့ၢ်သးန့ၣ်မၤမူတၢ် လီၤ.

⁷ ဘၣ်ဆၣ်ဒီးတၢ်မၤလိာ်ဘၣ်ဃးဒီးတၢ်သံ, ကွဲးအသး လၢလၢၢ်အလိၤ, မ့ၢ်အိၣ်ဒီးအလၤအကပီၤတုၤဒၣ်လဲာ် ပှၤအံၣ်စရ့လးဖိ ကွၢ်ထံကွၢ်ဆးစီၤမိၤရှ့ အမဲာ်တကဲ ဘၣ်လၢအမၤအလၤကပီၤလၢအကဟါမၢ်တ့ၢ်ဝဲအဃိ ဒီး, ⁸ တၢ်မၤလိာ်ဘၣ်ဃးဒီးသးကအိၣ်အလၤအကပီၤ ဒိၣ်န့ၢ်အန့ၣ်တက့ၢ်, တမ့ၢ်ဘၣ်ဧါ. ⁹ အဂ့ၢ်ဒ်အံၤ, တၢ် မၤလိာ်ဘၣ်ဃးဒီးတၢ်စံၣ်ညီၣ်ဃၣ် မ့ၢ်အိၣ်ဒီးအလၤ အကပီၤဒီး, တၢ်မၤလိာ်ဘၣ်ဃးဒီးတၢ်တီတၢ်လိၤ, အ လၤအကပီၤအိၣ်ဒိၣ်န့ၢ်အါန့ၢ်အန့ၣ်တက့ၢ်လီၤ. ¹⁰ အ ဂ့ၢ်ဒ်အံၤ, တၢ်လၢအအိၣ်တ့ၢ်ဒီးအလၤကပီၤန့ၣ်, အလၤ ကပီၤတအိၣ်လၢၤဘၣ်, လၢတၢ်အိၣ်ဒီးအလၤကပီၤ ဒိၣ်ဝဲန့ၣ်အဃိလီၤ. ¹¹ အဂ့ၢ်ဒ်အံၤ, တၢ်လၢအဟါမၢ်မ့ၢ် အိၣ်ဒီးအလၤကပီၤဒီး, တၢ်လၢအအိၣ်ဝဲဆိးဝဲန့ၣ်, အိၣ် ဒီးအလၤကပီၤဒိၣ်န့ၢ်အါန့ၢ်အန့ၣ်တက့ၢ်လီၤ.

¹² မၤသးဒ်န့ၣ်ဒီး ပအိၣ်ဒီးတၢ်မုၢ်လၢ်ထဲထဲအံၤဒီး, ပက တိၤတၢ်လၢတၢ်အိၣ်ဖျါဖးဒိၣ်လီၤ. ¹³ ဒီးတမ့ၢ်ဘၣ်ဒ်စီၤ မိၤရှ့လၢအကျၢၢ်ဘၢထီၣ်အမဲာ်, ဒ်သိးပှၤအံၣ်စရ့လး ဖိသုတကွၢ်ထံတၢ်လၢအဟါမၢ်န့ၣ် အကတၢၢ်တဂ့ၤ, အသိးဘၣ်, ¹⁴ ဘၣ်ဆၣ်ဒီးအဝဲသ့ၣ်အသးသ့ၣ်ညါနၢ် ပၢၢ်တၢ်န့ၣ်, ကိၤထီၣ်လီၤ. ¹⁵ အဂ့ၢ်ဒ်အံၤ, တုၤမုၢ်မဆါ တနံၤအံၤ, လၢပှၤဖးလံာ်တၢ်အၢၣ်လီၤအီလီၤလီၢ်လံၤ န့ၣ်ဒီး, နီၣ်ကျၢၢ်ဘၢမဲာ်အံၤ, အိၣ်ဒၣ်တၢ်, ဒီးတအိၣ်ဖျါ ထီၣ်ဘၣ်လၢ တၢ်အံၤလၢထီၣ်ပှဲၤထီၣ်လၢခရံာ်အပူၤ ဘၣ်. ¹⁶ ဘၣ်ဆၣ်ဒီးတုၤမုၢ်မဆါတနံၤအံၤ, တုၤပှၤဖး စီၤမိၤရှ့ဒီး, နီၣ်ကျၢၢ်ဘၢမဲာ်န့ၣ်အိၣ်လၢအသးအလိၤ လီၤ. ဘၣ်ဆၣ်ဒီးတုၤမ့ၢ်အဃၣ်က့ၤအသးဆူကစၢ်အ အိၣ်ဒီး, တၢ်ဟံးထီၣ်ကွံာ်နီၣ်ကျၢၢ်ဘၢမဲာ်န့ၣ်လီၤ.

¹⁷ ဒီးကစၢ်မ့ၢ်သးန့ၣ်, ဒီးဖဲဒၣ်ကစၢ်အသးအိၣ်ဝဲန့ၣ်, တၢ်ထူၣ်ဖျဲးအိၣ်ဝဲလီၤ. ¹⁸ မ့မ့ၢ်ပဝဲဒၣ်ခဲလၢာ်အံၤ, ပမဲာ် တကျၢၢ်ဘၢဘၣ်ဒီး, ပကွၢ်ကစၢ်အလၤကပီၤဒ်လၢမဲာ် ထံကလၤအပူၤအသိးသတးဒီး, ပဘၣ်တၢ်လဲလိာ်ပ သးဆူတၢ်အက့ၢ်အဂီၤတမံၤဃီအံၤ, လၢတၢ်လၤကပီၤ ဆူတၢ်လၤကပီၤ, ဒ်လၢကစၢ်အသးအသိးန့ၣ်လီၤ.

၄

¹ မၤသးဒ်န့ၣ်ဒီးပအိၣ်ဒီးတၢ်မၤအံၤဒီး, ဒ်ပဘၣ်တၢ်သး ကညီၤအသိး, ပတလီၤဘှံးဘၣ်. ² မ့ၢ်ပညိကွံာ်တၢ်ခူ သူၣ်ဘၣ်ဃးဒီးတၢ်မဲာ်ဆှး, ဒီးပတလဲၤဘၣ်လၢတၢ် လီတၢ်ဝ့ၤဘၣ်, ဒီးပတကျီၣ်ကျဲဘၣ်ယွၤအကလုၢ်အ ကထါဘၣ်. မ့မ့ၢ်ပာ်ဖျါထီၣ်တၢ်မ့ၢ်တၢ်တီသတးဒီး, ပ ဒုးဘၣ်ကယဲၢ်ပှၤကညီအသး လၢအသ့ၣ်ညါဒၣ်တၢ် လၢပှၤ, လၢယွၤအမဲာ်ညါလီၤ. ³ ဘၣ်ဆၣ်ဒီးပတၢ်သး ခုအကစီၣ်မ့ၢ်အိၣ်ကျၢၢ်ဘၢဒီး, မ့ၢ်အအိၣ်ကျၢၢ်ဘၢလၢ ပှၤတုၤတၢ်ဟးဂီၤတဖၣ်အမဲာ်ညါလီၤ. ⁴ လၢအဝဲသ့ၣ် အပူၤဟီၣ်ခိၣ်အကစၢ်မၤခံးပှၤလၢ အတစူၢ်တနာ်ဘၣ် အသး, ဒ်သိးခရံာ်လၢအမ့ၢ်ယွၤအက့ၢ်အဂီၤတဂၤန့ၣ် အလၤကပီၤ, အတၢ်သးခုအကစီၣ်အတၢ်ကပီၤ, သုတ ကပီၤထီၣ်ဘၣ်အီၤတဂ့ၤလီၤ. ⁵ အဂ့ၢ်ဒ်အံၤ, ပတစံၣ် တဲၤတဲလီၤပကစၢ်ဒၣ်ပဝဲဘၣ်, မ့ၢ်ကစၢ်ယ့ၣ်ရှူးခရံာ်, ဒီးပကစၢ်ဒၣ်ပဝဲလၢသုခ့သုပှၤလၢ ယ့ၣ်ရှူးအဃိလီၤ.―

⁶ အဂ့ၢ်ဒ်အံၤ, ယွၤလၢအစံးကဲထီၣ်တၢ်ကပီၤလၢတၢ်ခံး အပူၤတဂၤန့ၣ် ကပီၤထီၣ်လၢပသးကံၢ်ပူၤ, လၢတၢ်က ပီၤဘၣ်ဃးဒီးတၢ်သ့ၣ်ညါယွၤအလၤကပီၤ, လၢအကဲၤ ကပီၤလၢယ့ၣ်ရှူးအမဲာ်အလိၤအဃိလီၤ.

⁷ ဘၣ်ဆၣ်ဒီးပအိၣ်ဒီး တၢ်လုၢ်ဒိၣ်ပှ့ၤဒိၣ်အံၤ, လၢသ ပၢၤဟီၣ်ခိၣ်အပူၤ, ဒ်သိးအစိအကမီၤဒိၣ်ကဲၣ်ဆိးအံၤ, ကဘၣ်ဃးဒီးယွၤ, ဒီးတမ့ၢ်ဘၣ်ပှၤဘၣ်လီၤ. ⁸ တၢ်မၤ တံာ်တာ်ပှၤလၢတၢ်ကိးမံၤဒဲးဘၣ်ဆၣ်ဒီး, တၢ်ဆီၣ် အံၣ်လီၤပတၢ်တမ့ၢ်ဘၣ်. ပကမၤဒ်လဲၣ်ပကူၣ်တဘၣ် ဘၣ်, မ့မ့ၢ်ပတၢ်မုၢ်လၢ်တဟါမၢ်ဘၣ်. ⁹ တၢ်မၤအၢမၤ နးပှၤဘၣ်ဆၣ်ဒီး, တၢ်တလဲၤသဒၣ်ဘၣ်ပှၤဘၣ်. တၢ် မၤလီၤဃံၤပှၤဘၣ်ဆၣ်ဒီး, ပတဟးဂီၤဘၣ်. ¹⁰ ပစိာ်ယ့ၣ် ရှူးအတၢ်ဒိးသံအသး လၢပနီၢ်ခိတဘိယူၢ်ဃီ, ဒ်သိး ယ့ၣ်ရှူးအတၢ်မူကအိၣ်ဖျါထီၣ်စ့ၢ်ကီး လၢပနီၢ်ခိလီၤ.―

¹¹ အဂ့ၢ်ဒ်အံၤ, ပှၤလၢအမူပဝဲဒၣ်အံၤ, ပဘၣ်တၢ်ဟ့ၣ် လီၤပှၤဆူတၢ်သံ, လၢယ့ၣ်ရှူးအဃိတဘိယူၢ်ဃီ, ဒ်သိး ယ့ၣ်ရှူးအတၢ်မူကအိၣ်ဖျါထီၣ် လၢပဖံးပညၣ် လၢအ သံသ့အံၤအပူၤလီၤ. ¹² မၤသးဒ်န့ၣ်ဒီးတၢ်သံန့ၣ်မၤတၢ် လၢပပူၤ, မ့မ့ၢ်တၢ်မူန့ၣ်လၢသုပူၤလီၤ.

¹³ ပအိၣ်ဒီးတၢ်နာ်အသးတမံၤဃီ ဒ်တၢ်ကွဲးအသးအ သိး, ယနာ်တၢ်သတးဒီး, ယကတိၤတၢ်လီၤ.+ စံး. ၁၁၆း၁၀|Ps.116.10ဒီးပဝဲဒၣ်အံၤ, ပနာ်တၢ်သတးဒီး, ပကတိၤ တၢ်စ့ၢ်ကီးလီၤ. ¹⁴ အဂ့ၢ်ဒ်အံၤ, ပသ့ၣ်ညါလၢပှၤလၢအ ဒုးဂဲၤဆၢထၢၣ်က့ၤကစၢ်ယ့ၣ်ရှူး, ကဒုးဂဲၤဆၢထၢၣ် က့ၤပှၤစ့ၢ်ကီးဒီးယ့ၣ်ရှူး, ဒီးကပာ်ပှၤဒီးသုလၢအမဲာ် ညါလီၤ. ¹⁵ အဂ့ၢ်ဒ်အံၤ, တၢ်ခဲလၢာ်မ့ၢ်လၢသုဂီၢ်, ဒ်သိး တၢ်အဘျုးအဖှိၣ်လၢအအါထီၣ်လၢ ပှၤအါဂၤအဃိ, ကဒုးအါထီၣ်တၢ်စံးထီၣ်ပတြၢၤ တၢ်အဘျုးအဖှိၣ်လၢ ယွၤအလၤကပီၤအဂီၢ်လီၤ.

¹⁶ မၤသးဒ်န့ၣ်ဒီးပတလီၤဘှံးဘၣ်. ပနီၢ်လၢခိအံၤမ့ၢ်ဟး ဂီၤဘၣ်ဆၣ်ဒီး, ပနီၢ်လၢညါန့ၣ်ဘၣ်တၢ်မၤထီၣ်က့ၤ အီၤတနံၤဘၣ်တနံၤလီၤ. ¹⁷ အဂ့ၢ်ဒ်အံၤ, တၢ်နးတၢ်ဖှီၣ် ဘၣ်ပှၤဘီၣ်သလီၣ်, လၢအအိၣ်တစိၢ်ဖိအံၤ, မၤန့ၢ်ပှၤ လၢတၢ်လၤတၢ်ကပီၤအထူအယိာ် လၢအအါန့ၢ်ဃၢ န့ၢ်ဒိၣ်ဒိၣ်ကလဲာ်တက့ၢ်လီၤ. ¹⁸ အဂ့ၢ်ဒ်အံၤ, ပတကွၢ် ဘၣ်တၢ်လၢအအိၣ်ဖျါဘၣ်, မ့ၢ်တၢ်လၢအတအိၣ်ဖျါ ဘၣ်လီၤ. အဂ့ၢ်ဒ်အံၤ, တၢ်လၢအအိၣ်ဖျါန့ၣ်အိၣ်တစိၢ် ဖိဧိၤလီၤ. မ့မ့ၢ်တၢ်လၢအတအိၣ်ဖျါဘၣ်န့ၣ်, အိၣ်ဝဲလီၤ ထူလီၤယိာ်လီၤ.

၅

¹ အဂ့ၢ်ဒ်အံၤ, ပသ့ၣ်ညါလၢပဟံၣ်ဘၣ်ဃးဒီးဟီၣ်ခိၣ်, ပဒဲအံၤ, မ့ၢ်လီၤပှီၢ်ကွံာ်ဒီး, ပအိၣ်ဒီးပဟံၣ်လၢအဘၣ် ဃးဒီးယွၤ, လၢတၢ်တမၤဘၣ်လၢပစုဘၣ်, အိၣ်ဝဲလီၤ ထူလီၤယိာ်လၢမူခိၣ်လီၤ. ² အဂ့ၢ်ဒ်အံၤ, ပကအုကစွါ လၢအဝဲအံၤအပူၤ, ဒီးပဆၢကူဆၢသိးတီၣ်သပှၢ်ပှၢ်ပ ဟံၣ်လၢမူခိၣ်လီၤ. ³ ပမ့ၢ်ကူထီၣ်သိးထီၣ်စ့ၢ်ကီးဒီး, တၢ်တထံၣ်န့ၢ်ဘၣ်ပအိၣ်ဘ့ၣ်ဆ့ဘၣ်. ⁴ အဂ့ၢ်ဒ်အံၤ, ပှၤအိၣ်လၢဒဲပူၤပဝဲဒၣ်အံၤ, ဘၣ်ဝံတၢ်ဃၢဒီး, ပကအု ကစွါတၢ်လီၤ. ဘၣ်ပသးလၢပဘ့ၣ်လီၤကွံာ်တၢ်ကူတၢ် သိးတမ့ၢ်ဘၣ်. မ့မ့ၢ်ဘၣ်ပသးလၢပကကူသိးတၢ်, ဒ် သိးတၢ်သံသ့အံၤကလီၤဘျၢဝဲလၢတၢ်မူလီၤ. ⁵ ဒီးပှၤ လၢအကတဲာ်ကတီၤပှၤလၢတၢ်န့ၣ်ဒၣ်လဲာ်အဂီၢ်, မ့ၢ် ယွၤလၢအဟ့ၣ်လီၤစ့ၢ်ကီးပှၤလၢ သးအတၢ်ဟ့ၣ်ကီၤ န့ၣ်လီၤ. ⁶ မၤသးဒ်န့ၣ်ဒီး, ပသးခူတလ့ၢ်တထံၣ်ဃီ, ဒီးပသ့ၣ်ညါလၢဖဲပအိၣ်လၢ ပဟံၣ်လၢနီၢ်ခိအံၤဒီး, ပ အိၣ်ယံၤဒီးကစၢ်လီၤ. ⁷ အဂ့ၢ်ဒ်အံၤ, ပလဲၤတၢ်လၢတၢ် နာ်, တမ့ၢ်ဘၣ်လၢထံၣ်ဘၣ်တၢ်ဘၣ်. ⁸ ဒီးပအိၣ်ဒီးပ သးခူတလ့ၢ်, ဒီးဘၣ်ပသးလၢပအိၣ်ယံၤဒီးပနီၢ်ခိဒီး အိၣ်ဒီးကစၢ်လီၤ. ⁹ မၤသးဒ်န့ၣ်ဒီးပအိၣ်ဒီးကစၢ်မ့ၢ်ဂ့ၤ, ပအိၣ်ယံၤမ့ၢ်ဂ့ၤ, ဒ်သိးကဘၣ်အသးလၢပှၤဒီး, ပမၤတၢ်သပှၢ်ပှၢ်လီၤ.―

¹⁰ အဂ့ၢ်ဒ်အံၤ, ပဘၣ်အိၣ်ဖျါလၢခရံာ်စံၣ်ညီၣ်တၢ်အလီၢ် ပစိာ်အမဲာ်ညါခဲလၢာ်, ဒ်သိးပကဒိးတၢ်ဂ့ၤမ့ၢ်ဂ့ၤ, တၢ်အၢမ့ၢ်ဂ့ၤ, ဒ်ပမၤတၢ်လၢနီၢ်ခိအသိးန့ၣ်လီၤ.

¹¹ မၤသးဒ်န့ၣ်ဒီးပသ့ၣ်ညါတၢ်ပျံၤဘၣ်ဃးဒီး ကစၢ်သ တးဒီး, ပသဆၣ်ထီၣ်ပှၤကညီအခံ, မ့မ့ၢ်ပအိၣ်ဖျါလံ လၢယွၤအမဲာ်ညါလံ. ဒီးယမုၢ်လၢ်လၢပအိၣ်ဖျါလံလၢ သုသးလၢအသ့ၣ်ညါဒၣ်တၢ်အမဲာ်ညါစ့ၢ်ကီးလံ. ¹² အ ဂ့ၢ်ဒ်အံၤ, ပစံးထီၣ်ပတြၢၤကဒီးပသးလၢသုမဲာ်ညါတ မ့ၢ်ဘၣ်, မ့ၢ်ပဟ့ၣ်သုလီၢ်လၢသုကပာ်သုသးကဖၢလၢ လၢပဃိ, ဒ်သိးသုကတြီဆၢပှၤလၢအပာ်အသးကဖၢ လၢ, ထဲတၢ်အိၣ်ဖျါအဃိ, ဒီးတမ့ၢ်ဘၣ်လၢသးအဃိ ဘၣ်, အဂီၢ်လီၤ. ¹³ အဂ့ၢ်ဒ်အံၤ, ပမ့ၢ်ပျုၢ်ဒီး, မ့ၢ်လၢယွၤအ ဂီၢ်, ပသးမ့ၢ်ဆးဒီး, မ့ၢ်လၢသုဂီၢ်လီၤ. ¹⁴ အဂ့ၢ်ဒ်အံၤ, ခရံာ်အတၢ်အဲၣ်တၢ်ကွံထိၣ်ဂဲၤပှၤ, လၢပဆိကမိၣ်တၢ် ဒ်အံၤ, ပှၤတဂၤမ့ၢ်သံလၢပှၤခဲလၢာ်အဂီၢ်ဒီး, မ့ၢ်မးပှၤ ခဲလၢာ်သံတ့ၢ်လံလီၤ. ¹⁵ ဒီးပှၤတဂၤသံဝဲလၢပှၤခဲလၢာ် အဂီၢ်, ဒ်သိးပှၤလၢအမူဝဲတဖၣ်, သုတမူလၢၤလၢအ ဂီၢ်ဒၣ်ဝဲတဂ့ၤ, မ့ၢ်လၢပှၤလၢအဒိးသံအသးလၢအဃိ, ဒီးဂဲၤဆၢထၢၣ်က့ၤဝဲတဂၤအဂီၢ်လီၤ. ¹⁶ မၤသးဒ်န့ၣ်ဒီး တုၤအံၤဆူညါပတသ့ၣ်ညါဘၣ်ပှၤကညီဒ် တၢ်ဖံးတၢ် ညၣ်အသိး, နီတဂၤဘၣ်. ပမ့ၢ်သ့ၣ်ညါတ့ၢ်ခရံာ်ဒၣ် လဲာ်ဒ်တၢ်ဖံးတၢ်ညၣ်အသိးဘၣ်ဆၣ်ဒီး, ခဲကနံၣ်အံၤ ပတသ့ၣ်ညါလၢၤဘၣ်အီၤဘၣ်. ¹⁷ မၤသးဒ်န့ၣ်ဒီးပှၤတ ဂၤမ့ၢ်အိၣ်လၢခရံာ်အပူၤဒီး, မ့ၢ်အမ့ၢ်တၢ်တ့အသီလီၤ. တၢ်လီၢ်လံၤတဖၣ်ပူၤကွံာ်ဝဲ, ကွၢ်ကွၢ်တၢ်ခဲလၢာ်ကဲ လၢအသီလံ. ¹⁸ ဒီးတၢ်ခဲလၢာ်ဟဲလၢယွၤလၢအမၤဘၣ် လိာ်က့ၤပှၤဒီးအကစၢ်ဒၣ်ဝဲ လၢခရံာ်အဃိ, ဒီးဟ့ၣ်လီၤ ပှၤလၢတၢ်မၤဘၣ်လိာ်က့ၤန့ၣ်အတၢ်မၤ, ¹⁹ ဒ်ပစံးတၢ် အသိး, ယွၤအိၣ်လၢခရံာ်အပူၤဒီး, မၤဘၣ်လိာ်က့ၤဟီၣ် ခိၣ်ဒီးအကစၢ်ဒၣ်ဝဲ, ဒီးတပာ်ဘၣ်တၢ်ကမၣ်လၢအ လိၤဘၣ်, ဒီးဟ့ၣ်လီၤတၢ်မၤဘၣ်လိာ်က့ၤအကလုၢ်အ ကထါလၢပှၤလီၤ.

²⁰ မၤသးဒ်န့ၣ်ဒီးပဝဲဒၣ်အံၤ, ပမ့ၢ်အကလူးလၢခရံာ် အဂီၢ်, ဒီးတၢ်မၤအသးဒ်ယွၤဃ့ကညးတၢ်လၢပစုပူၤအ သိးဒီး, ပဃ့ကညးတၢ်လၢခရံာ်အဂီၢ်, အိၣ်ဘၣ်လိာ် က့ၤသုသးဒီးယွၤတက့ၢ်. ²¹ အဂ့ၢ်ဒ်အံၤ, ပှၤလၢအတ သ့ၣ်ညါဘၣ်တၢ်ဒဲးဘးန့ၣ်, တၢ်ပာ်က့ၤအီၤလၢတၢ်ဒဲး ဘးလၢပဂီၢ်, ဒ်သိးပကကဲလၢယွၤအတၢ်တီတၢ်လိၤ လၢအပူၤလီၤ.

၆

¹ ဒီးပမ့ၢ်ပှၤမၤဃုာ်တၢ်စ့ၢ်ကီး, ဒီးပဃ့ကညးသု, ဒ်သိး သုသုတဒိးန့ၢ်ယွၤအဘျုးအဖှိၣ်ကလီကလီတဂ့ၤလီၤ.―

² အဂ့ၢ်ဒ်အံၤ, စံးဝဲဒၣ်, လၢအကတီၢ်အဂ့ၤအဘၣ်န့ၣ်, ယဒိကနၣ်နကလုၢ်, ဒီးလၢတၢ်အုၣ်က့ၤခီၣ်က့ၤ အမုၢ်နံၤ, ယမၤစၢၤနၤ လီၤ.+ ၡါ. ၄၉း၈|Isa.49.8*.ကွၢ်ကွၢ်, ခဲကနံၣ်အံၤမ့ၢ်တၢ်အကတီၢ်အဂ့ၤအဘၣ်, ကွၢ် ကွၢ်, ခဲကနံၣ်အံၤမ့ၢ်တၢ်အုၣ်က့ၤခီၣ်က့ၤ အမုၢ်နံၤန့ၣ် လီၤ. ³ ဒ်သိးတၢ်အခ့အပှၤအတၢ်မၤသုတဘၣ်တၢ်ပာ် တၢ်ကမၣ်လၢအလိၤတဂ့ၤဒီး, ပတဟ့ၣ်ဘၣ်တၢ်လီၤက မၣ်အလီၢ်လၢတၢ်နီတမံၤဘၣ်. ⁴ မ့မ့ၢ်ပပာ်ဖျါထီၣ်ပသး လၢပမ့ၢ်ယွၤအခ့အပှၤလၢတၢ်ခဲလၢာ်အပူၤ, လၢတၢ်ဝံ သးစူၤလၢအအါ, လၢတၢ်နးတၢ်ဖှီၣ်အပူၤ, လၢတၢ်ဖီၣ် တၢ်ယာ်အပူၤ, လၢတၢ်ကီတၢ်ခဲအပူၤ, ⁵ လၢတၢ်တီၢ်တၢ် ဝ့ၤအပူၤ, လၢပဘၣ်ဃိာ်အပူၤ, လၢတၢ်တၢထီၣ်တၢလီၤ အပူၤ, လၢတၢ်ဖံးတၢ်မၤအပူၤ, လၢတၢ်ဆိးသီအပူၤ, လၢ တၢ်ဒုၣ်တၢ်အီၣ်တၢ်အီအပူၤ, ⁶ လၢတၢ်စီဆှံအပူၤ, လၢ တၢ်သ့ၣ်ညါအပူၤ, လၢတၢ်ဝံသးစူၤဃဲးဃဲးအပူၤ, လၢ တၢ်မၤဂ့ၤတၢ်အပူၤ, လၢသးစီဆှံအပူၤ, လၢတၢ်အဲၣ်တၢ် ကွံနီၢ်နီၢ်အပူၤ, ⁷ လၢတၢ်မ့ၢ်တၢ်တီအကလုၢ်အကထါ အပူၤ, လၢယွၤအစိအကမီၤအပူၤ, လၢတၢ်တီတၢ်လိၤအ စုကဝဲၤ, အိၣ်ဝဲလၢစုစ့ၣ်ဒီးစုထွဲ, ⁸ လၢပဘၣ်တၢ်လၤက ပီၤ, ဒီးလၢပဘၣ်တၢ်တရီတပါ, လၢပဘၣ်တၢ်ဟူထီသါ လီၤလၢအအၢ, ဒီးလၢပဘၣ်တၢ်ဟူထီသါလီၤလၢအဂ့ၤ ဒ်ပှၤလီတၢ်အသိး, ဘၣ်ဆၣ်ဒီးမ့ၢ်ပှၤအတီ, ⁹ ဒ်ပှၤလၢပှၤ ဂၤတသ့ၣ်ညါဘၣ်အီၤအသိး, ဘၣ်ဆၣ်ဒီး, မ့ၢ်ပှၤလၢ တၢ်သ့ၣ်ညါထံအီၤ, ဒ်ပှၤဘၣ်သံအသိး, ဒီးကွၢ်ကွၢ်ပမူ လီၤ, ဒ်ပှၤလၢအဘၣ်တၢ်သိၣ်ဃီၣ်အီၤအသိး, ဘၣ်ဆၣ် ဒီးတၢ်တမၤသံဘၣ်အီၤဘၣ်, ¹⁰ ဒ်ပှၤလၢအသးအုးအ သိး, ဘၣ်ဆၣ်ဒီးသးခုဝဲတထံၣ်ဃီ, ဒ်ပှၤဖှီၣ်ဖိယာ်ဖိအ သိး, ဘၣ်ဆၣ်ဒီးဒုးထူးဒုးတီၤပှၤအါဂၤ, ဒ်ပှၤလၢအတၢ် တအိၣ်ဘၣ်နီတမံၤဘၣ်အသိး, ဘၣ်ဆၣ်ဒီးအိၣ်ဒီးတၢ်ခဲ လၢာ်လီၤ.

¹¹ ပှၤကရံၣ်သူးဖိသ့ၣ်ဧၢ, ပထးခိၣ်အိၣ်အိးထီၣ်အသး လၢသုဂီၢ်, ပသးအိးလဲၢ်ထီၣ်အသးလီၤ. ¹² တမ့ၢ်ဘၣ်သု ဘၣ်တၢ်မၤအံၣ်မၤဆံးသုလၢပပူၤဘၣ်, မ့ၢ်သုဘၣ်တၢ် မၤအံၣ်မၤဆံးသုလၢသုဟၢဖၢဒၣ်သုဝဲအပူၤလီၤ. ¹³ ယ ကတိၤတၢ်ဒ်လၢယဖိအသိး လၢတၢ်ဟ့ၣ်ဆၢတၢ်တမံၤ ဃီအံၤအဂီၢ်, မၤလဲၢ်ထီၣ်သုသးစ့ၢ်ကီးတက့ၢ်.

¹⁴ သုတယိးနီၣ်ယိးဘိ ဖုၣ်ထံၣ်ဖုၣ်ထီဒီးပှၤလၢအတစူၢ် တနာ်ဘၣ်တဖၣ်န့ၣ်တဂ့ၤ. အဂ့ၢ်ဒ်အံၤ, တၢ်တီတၢ်လိၤ န့ၣ်, ဘၣ်ဃးဒီးတၢ်တတီတလိၤဘၣ်ဒ်လဲၣ်, ဒီးတၢ်က ပီၤရ့လိာ်အသးဒီးတၢ်ခံးဒ်လဲၣ်. ¹⁵ ဒီးခရံာ်ဘၣ်လိာ်ဒီးဘ လးယဧၤလးဒ်လဲၣ်, ဒီးပှၤလၢအစူၢ်က့ၤနာ်က့ၤတၢ်, န့ၢ် ဘၣ်ဃုာ်အဂီၢ်ဒီးပှၤလၢအတစူၢ်တနာ်ဘၣ်ဒ်လဲၣ်, ဒီး ယွၤအတၢ်လုၢ်အဟံၣ်ဘၣ်လိာ်အသးဒီးတၢ်ဂီၤလၢမနုၤ တမံၤလဲၣ်. ¹⁶ အဂ့ၢ်ဒ်အံၤ, သုမ့ၢ်ယွၤလၢအမူဝဲတဂၤအ တၢ်လုၢ်အဟံၣ်လီၤ. ဒ်ယွၤစံးဝဲအသိး, ယကအိၣ်လၢအ ပူၤဒီးယကလဲၤတၢ်ဒီးအီၤ, ဒီးယကကဲထီၣ်အကစၢ်, ဒီး အဝဲသ့ၣ်ကကဲလၢယပှၤဂီၢ်မုၢ်လီၤ.+ ၃မိၤ. ၂၆း၁၁|Lev.26.11*.

¹⁷ မၤသးဒ်န့ၣ်ဒီးယွၤစံးဝဲဒၣ်, ဟးထီၣ်လၢအကျါ, ဒီး အိၣ်လီၤဆီတက့ၢ်. ဒီးထိးဘၣ်တၢ်တကဆှီဘၣ်န့ၣ်တ ဂ့ၤ. ဒီးယကတူၢ်လိာ်သု, ¹⁸ ဒီးယကကဲလၢသုပၢ်, ဒီးသု ကကဲလၢယဖိမုၣ်, ဒီးယဖိခွါတဖၣ်လီၤ, ယွၤလၢအသ့ တၢ်လၢာ်စံးဝဲဒၣ်.+ ၡါ. ၅၂း၁၁, ၁၂|Isa.52.11-Isa.52.12*. ၂မူၤ. ၇း၁၄|2Sam.7.14*.

၇

¹ မၤသးဒ်န့ၣ်ဒီးပှၤသးဘိသ့ၣ်သုဧၢ, ပအိၣ်ဒီးတၢ်စံး ပာ်တဖၣ်အံၤဒီး, မ်ပမၤကဆှီပသးလၢကယဲၢ်တၢ်ဃံၣ် တၢ်မူး, ဘၣ်ဃးဒီးပဖံးပညၣ်, ဒီးပသူၣ်ပသးခဲလၢာ်တ က့ၢ်. ဒီးလၢတၢ်ပျံၤယွၤအပူၤန့ၣ်, မ်ပမၤလၢထီၣ်ပှဲၤထီၣ် တၢ်စီဆှံတက့ၢ်.

² တူၢ်လိာ်ပှၤတက့ၢ်. ပတမၤဘၣ်ပှၤလၢတၢ်တတီတ လိၤနီတဂၤဘၣ်, ပတလီန့ၢ်ပှၤအတၢ်နီတဂၤဘၣ်. ³ ယ စံးတၢ်အံၤဒ်သိးယကစံၣ်ညီၣ်ဃၣ်သုတမ့ၢ်ဘၣ်. အဂ့ၢ် ဒ်အံၤ, ယစံးတ့ၢ်လံသုအိၣ်လၢပသးလၢပကသံဃုာ်, ဒီး မူဃုာ်ဒီးသုလီၤ. ⁴ ယသးခူတလ့ၢ်ဒိၣ်မးလၢသုဂ့ၢ်, ယ ပာ်ယသးကဖၢလၢဒိၣ်မးလၢသုဃိ, တၢ်မၤမုာ်ထီၣ်က့ၤ ယၤအိၣ်ပှဲၤယပူၤ, ယသးခုဒိၣ်မးလၢပတၢ်နးတၢ်ဖှီၣ်ခဲ လၢာ်အပူၤလီၤ.

⁵ အဂ့ၢ်ဒ်အံၤ, လၢပဟဲတုၤလၢမၤက့းဒနံ, ပဖံးပညၣ်တ အိၣ်ဘှံးဘၣ်လ့ၤတက့ၤဘၣ်, မ့ၢ်ပဘၣ်တၢ်နးတၢ်ဖှီၣ် လၢတၢ်ခဲလၢာ်လီၤ. လၢခိမ့ၢ်တၢ်ဒုးတၢ်ယၤ, လၢညါမ့ၢ် တၢ်ပျံၤတၢ်ဖုးလီၤ. ⁶ ဘၣ်ဆၣ်ဒီးယွၤလၢအမၤမုာ်ထီၣ် က့ၤပှၤလၢအဘၣ် တၢ်ဆီၣ်လီၤအီၤတဖၣ်န့ၣ်, မၤမုာ် ထီၣ်က့ၤပှၤလၢစီၤတံတူးဟဲတုၤအဃိလီၤ. ⁷ ဒီးထဲအဟဲ တုၤဧိၤတမ့ၢ်ဘၣ်. မ့ၢ်လၢတၢ်မၤမုာ်, လၢအဝဲဒၣ်ဘၣ် တၢ်မၤမုာ်အီၤလၢသုဂ့ၢ်န့ၣ်စ့ၢ်ကီးလီၤ. ဒီးတုၤအစံးဘၣ် တဲဘၣ်ပှၤလၢသုဆၢတၢ်သပှၢ်ပှၢ်, သုသးအုး, သုးသးဂဲၤ လိာ်လၢယၤဒီး, ယသးခုဒိၣ်န့ၢ်အန့ၣ်တက့ၢ်လီၤ. ⁸ အ ဂ့ၢ်ဒ်အံၤ, မ့ၢ်ယမၤသးအုးသုလၢယလံာ်တဘ့ၣ်ဒီး, ယပီၢ် ယၢ်လီၤက့ၤတ့ၢ်ယသးနာ်သက့ဒီး, ယတပီၢ်ယၢ်လီၤ က့ၤလၢၤဘၣ်ယသးဘၣ်. အဂ့ၢ်ဒ်အံၤ, ယထံၣ်လၢလံာ် တဘ့ၣ်န့ၣ် မၤသးအုးသုဘၣ်ဆၣ်ဒီး, မ့ၢ်တစိၢ်ဖိဧိၤ လီၤ. ⁹ ခဲကနံၣ်အံၤယသးခုလၢသုဘၣ်တၢ်သးအုးတမ့ၢ် ဘၣ်, မ့ၢ်လၢသုသးအုးတုၤလၢတၢ်ပီၢ်ယၢ်လီၤက့ၤသုသး အဃိန့ၣ်လီၤ. အဂ့ၢ်ဒ်အံၤ, သုသးအုးန့ၣ်ဘၣ်ဃးဒီးယွၤ, ဒ်သိးသုသုတဘၣ်တၢ်ဆံးလီၤစှၤလီၤလၢပဃိ, နီတမံၤ တဂ့ၤန့ၣ်လီၤ. ¹⁰ အဂ့ၢ်ဒ်အံၤ, တၢ်သးအုးဘၣ်ဃးဒီးယွၤ န့ၣ်, ဒုးအိၣ်ထီၣ်တၢ်ပီၢ်ယၢ်လီၤက့ၤပသး တုၤလၢတၢ် အုၣ်က့ၤခီၣ်က့ၤလၢ ပသးအုးလၢအဃိအလီၢ်တအိၣ် ဘၣ်. မ့မ့ၢ်တၢ်သးအုးဘၣ်ဃးဒီးဟီၣ်ခိၣ်န့ၣ်, ဒုးအိၣ် ထီၣ်တၢ်သံလီၤ.

¹¹ အဂ့ၢ်ဒ်အံၤ, ကွၢ်ကွၢ်, တၢ်အံၤတမံၤဒၣ်ဝဲ, လၢသုသး အုးဘၣ်ဃးဒီးယွၤအဃိဒီး, မ့ၢ်အဒုးအိၣ်ထီၣ်သုကျဲးစၢး တၢ်သပှၢ်ပှၢ်ဆံးအါလဲၣ်. မ့ၢ်လံ, သုကတိၤပူၤဖျဲးတၢ်, မ့ၢ် လံ, သုသးဟ့တၢ်, မ့ၢ်လံ, သုပျံၤတၢ်, မ့ၢ်လံ, သုဆၢတၢ် သပှၢ်ပှၢ်, မ့ၢ်လံ, သုသးဂဲၤလိာ်, မ့ၢ်လံ, သုဟ့ၣ်ဆၢတၢ် န့ၣ်ဆံးဒိၣ်လဲၣ်. လၢတၢ်ခဲလၢာ်အပူၤ, သုပာ်ဖျါသုသး လၢသုစီဆှံလၢတၢ်အံၤအဂ့ၢ်လီၤ. ¹² မ်ဒ်န့ၣ်ဒီးယကွဲးတ့ၢ် သုလံာ်တဘ့ၣ်, တမ့ၢ်ဘၣ်လၢပှၤမၤတၢ်တတီတလိၤ ဘၣ်တဂၤန့ၣ်အဃိဘၣ်, ဒီးတမ့ၢ်ဘၣ်လၢပှၤဘၣ်တၢ် မၤအီၤတတီတလိၤအဃိဘၣ်, မ့ၢ်ဒ်သိးသုကျဲးစၢးတၢ် လၢပဂီၢ်, ကအိၣ်ဖျါလၢယွၤအမဲာ်ညါ, လၢသုဂီၢ်လီၤ.

¹³ မၤသးဒ်န့ၣ်ဒီး, ပဘၣ်တၢ်မၤမုာ်ထီၣ်က့ၤလံပှၤလံ. ဒီး လၢပဘၣ်တၢ်မၤမုာ်ထီၣ်က့ၤပှၤန့ၣ် ပသးခုထီၣ်လၢစီၤ တံတူးသးခုအဃိအါဒိၣ်န့ၢ်အန့ၣ်တက့ၢ်လီၤ. အဂ့ၢ်ဒ် အံၤ, အဝဲဒၣ်အသးဒိးတၢ်ဒုးအိၣ်ဘှံးဝဲ, လၢသုဃိခဲ လၢာ်လီၤ. ¹⁴ အဂ့ၢ်ဒ်အံၤ, ယမ့ၢ်ပာ်ယသးကဖၢလၢလၢ သုဂ့ၢ်သုကျိၤတမံၤမံၤလၢအဝဲဒၣ်အမဲာ်ညါဒီး, ယမဲာ်တ ဆှးဘၣ်. အဂ့ၢ်ဒ်အံၤ, ဒ်ပကတိၤတၢ်မ့ၢ်တၢ်တီခဲလၢာ် လၢသုဂ့ၢ်အသိး, ပပာ်ပသးကဖၢလၢလၢစီၤတံတူးအ မဲာ်ညါအံၤ, ကဲစ့ၢ်ကီးလၢတၢ်မ့ၢ်တၢ်တီလီၤ. ¹⁵ ဒီးအဝဲ ဒၣ်န့ၣ်သ့ၣ်နီၣ်ထီၣ်သုစူၢ်တၢ်ခဲလၢာ်, ဒီးသုတူၢ်လိာ်အီၤ အိၣ်ဒီးတၢ်ပျံၤဒီးတၢ်ကနိးကစုာ်သတးဒီး, အဲၣ်သုကွံ သုလၢအသူၣ်ကံၢ်အသးလဲဒိၣ်မးလီၤ.

¹⁶ ယသးခုလၢယနာ်သုလၢတၢ်ခဲလၢာ်အဃိလီၤ.

၈

¹ ဒီးပုၢ်သ့ၣ်ဝဲၢ်သ့ၣ်ဧၢ, ပဘိးဘၣ်သ့ၣ်ညါသုလၢယွၤအ ဘျုးအဖှိၣ်လၢ တၢ်ဟ့ၣ်လၢ တၢ်အိၣ်ဖှိၣ်တဖၣ်လၢမၤ က့းဒနံအဂ့ၢ်လီၤ. ² အဝဲသ့ၣ်ဘၣ်တၢ်မၤကွၢ်အီၤဖးဒိၣ် လၢတၢ်နးတၢ်ဖှီၣ်အဖၢမုၢ်ဒီး, အတၢ်သးခုဒိၣ်ဝဲ, ဒီးဒ်အ တၢ်ဖှီၣ်တၢ်ယာ်ယိာ်ဝဲအသိးန့ၣ်, မၤဘူၣ်တၢ်လၢအအါ ထူးထူးတီၤတီၤလီၤ. ³ အဂ့ၢ်ဒ်အံၤ, ယအုၣ်ယသးလၢအ ဝဲသ့ၣ်အဂီၢ်, လၢအသးအိၣ်ပာ်မၤဝဲဖဲအသ့, အခိၣ်တ လိာ်အါန့ၢ်အသ့တၢ်တက့ၢ်လီၤ. ⁴ ဒီးဃ့ကညးပှၤအါ အါကလဲာ်လၢတၢ်ဘျုးဒီးတၢ်မၤဃုာ်ဘၣ်ဃးဒီးတၢ်မၤ စၢၤပှၤစီဆှံတမံၤအံၤလီၤ. ⁵ ဒီးမၤဝဲဖဲဒၣ်ပမုၢ်လၢ်တၢ်အ သိးတမ့ၢ်ဘၣ်, မ့ၢ်အဟ့ၣ်လီၤဆိအသးလၢကစၢ်, ဒီးလၢ ပဝဲဒၣ်, ဖဲယွၤအသးလီၤ. ⁶ မ်ဒ်န့ၣ်ဒီးပဃ့ကညးစီၤတံ တူး ဒ်သိးအကမၤပှဲၤထီၣ်တၢ်ဘျုးတမံၤအံၤလၢသုကျါ တုၤအကတၢၢ်စ့ၢ်ကီး, ဒ်အမၤထီၣ်သီအသိးန့ၣ်လီၤ.

⁷ ဘၣ်ဆၣ်ဒီးဒ် သုမၤအါအါလၢတၢ်ခဲလၢာ်အသိးန့ၣ်, လၢတၢ်နာ်, ဒီးလၢတၢ်ကတိၤ, ဒီးလၢတၢ်သ့ၣ်ညါ, ဒီး လၢတၢ်မၤသပှၢ်ပှၢ်ခဲလၢာ်, ဒီးလၢသုအဲၣ်ပှၤကွံပှၤအ သိးန့ၣ်ဒီး, မၤအါထီၣ်တၢ်ဘျုးတၢ်ဖှိၣ်တမံၤအံၤစ့ၢ်ကီး တက့ၢ်. ⁸ တမ့ၢ်ဘၣ်ယကတိၤတၢ်လၢတၢ်မၤလိာ်ဘၣ်, မ့ၢ်လၢပှၤဂၤဂုာ်မၤတၢ်အဃိ, ဒီးယမၤကွၢ်သုလၢသုတၢ် အဲၣ်တၢ်ကွံမ့ၢ်နီၢ်နီၢ်ဧါန့ၣ်ဒ်သိးကအိၣ်ဖျါထီၣ်လီၤ.―

⁹ အဂ့ၢ်ဒ်အံၤ, သုသ့ၣ်ညါပကစၢ်ယ့ၣ်ရှူးခရံာ်အဘျုးအ ဖှိၣ်, လၢအထူးဝဲတီၤဝဲဘၣ်ဆၣ်ဒီး, ကဲထီၣ်ဝဲလၢအဖှီၣ် အယာ်လၢသုဂီၢ်, ဒ်သိးသုကထူးထီၣ်တီၤထီၣ်, လၢအဝဲ ဒၣ်အတၢ်ဖှီၣ်တၢ်ယာ်အဃိလီၤ. ¹⁰ ယဟ့ၣ်လီၤယတၢ် ဆိကမိၣ်လၢတၢ်တမံၤအံၤလီၤ. အဂ့ၢ်ဒ်အံၤ, တၢ်အံၤမ့ၢ် တၢ်ဘျုးလၢသုဂီၢ်လီၤ. အဂ့ၢ်ဒ်အံၤ, သုမၤထီၣ်သီ, အခိၣ် တလိာ်သုသးအိၣ်ပာ်လၢမငါတနံၣ်လံၤလံၤလီၤ. ¹¹ မၤ သးဒ်န့ၣ်ဒီးခဲကနံၣ်အံၤ, ဂ့ၤလၢသုမၤတုၤအကဲထီၣ်လီၤ. ဒ်သိး, ဒ်သုသးအိၣ်ထီၣ်ဒၣ်တၢ်အသိးန့ၣ်, ဖဲဒၣ်သုတၢ် အိၣ်ဝဲဒီး, သုကမၤတုၤအကဲထီၣ်စ့ၢ်ကီးတက့ၢ်. ¹² အဂ့ၢ် ဒ်အံၤ, သးမ့ၢ်အိၣ်ဒီး, တၢ်တူၢ်လိာ်ဝဲဒ်ပှၤအတၢ်အိၣ်ဝဲအ သိး, ဒ်အတၢ်တအိၣ်ဘၣ်အသိး, တမ့ၢ်ဘၣ်.

¹³ အဂ့ၢ်ဒ်အံၤ, ဒ်သိးပှၤဂၤကဘၣ်တၢ်ညီ, ဒီးသုကဘၣ် တၢ်ကီန့ၣ်, တဘၣ်ဘၣ်ယသးဘၣ်. ¹⁴ မ့ၢ်ဒ်သိးတၢ်က အိၣ်ဒ်သိးသိးလီၤ. ခဲကနံၣ်အံၤသုတၢ်အါကမၤစၢၤပှၤ ဂၤအတၢ်ဖှီၣ်တၢ်ယာ်, ဒ်သိးအဝဲသ့ၣ်အတၢ်အါကမၤ စၢၤစ့ၢ်ကီးသုတၢ်ဖှီၣ်တၢ်ယာ်သတးဒီး, တၢ်ကအိၣ်ဒ် သိးသိးလိာ်အသးလီၤ. ¹⁵ ဒ်တၢ်ကွဲးအသးအသိး, ပှၤလၢ အတၢ်အိၣ်အါန့ၣ်, အတၢ်တအိၣ်ဘျဲၣ်ဘၣ်, ဒီးပှၤလၢ အတၢ်အိၣ်စှၤန့ၣ်, တစှၤဘၣ်ဝဲဘၣ်. ¹⁶ ဒီးမ်ပှၤစံးထီၣ်ပတြၢၤယွၤ အဘျုးအဖှိၣ်လၢ အဟ့ၣ် လီၤစီၤတံတူးအသးဂုာ်မၤတၢ်လၢသုဂီၢ်အဃိတက့ၢ်.

¹⁷ အဂ့ၢ်ဒ်အံၤ, တူၢ်လိာ်တၢ်သဆၣ်ထီၣ်အခံယၢာ်. ဘၣ် ဆၣ်ဒီးမ့ၢ်အသးအိၣ်ပာ်ဒၣ်ဝဲအါတက့ၢ်ဒီး, အကစၢ်ဒၣ် ဝဲလဲၤဒၣ်တၢ်ဆူသုအိၣ်လီၤ. ¹⁸ ဒီးပမၢလီၤဃုာ်ဒီးအီၤဒီ ပုၢ်ဝဲၢ်, လၢတၢ်စံးထီၣ်ပတြၢၤအီၤလၢတၢ်သးခုအကစီၣ် အပူၤ, လၢတၢ်အိၣ်ဖှိၣ်ခဲလၢာ်အကျါလီၤ. ¹⁹ ဒီးထဲန့ၣ်ဧိၤ တမ့ၢ်ဘၣ်, အဝဲဒၣ်မ့ၢ်ပှၤလၢတၢ်အိၣ်ဖှိၣ်တဖၣ်ဃုထၢ အီၤ, လၢအကလဲၤဒီးပှၤ, ဒီးစိာ်တၢ်ဘျုးအံၤလၢပမၤအီၤ လၢကစၢ်အလၤကပီၤ, ဒီးပဆၢမၤဒၣ်တၢ်အဂ့ၢ်စ့ၢ်ကီး လီၤ. ²⁰ အဂ့ၢ်ဒ်အံၤ, ပပလီၢ်ပသးဒ်သိးပှၤသုတပာ်တၢ် ကမၣ်လၢပလိၤလၢပဟ့ၣ်တၢ်အါအံၤအဃိတဂ့ၤလီၤ.―

²¹ အဂ့ၢ်ဒ်အံၤ, ပဃုမၤတၢ်ဂ့ၤထဲကစၢ်အမဲာ်ညါဧိၤတမ့ၢ် ဘၣ်, မ့ၢ်လၢပှၤကညီအမဲာ်ညါစ့ၢ်ကီးလီၤ.

²² ဒီးပမၢလီၤအဝဲသ့ၣ်, ပဒီပုၢ်ဝဲၢ်လၢပမၤကွၢ်အီၤလၢ တၢ်အါမံၤအပူၤ, ဒီးအိၣ်ဖျါလၢအမ့ၢ်ပှၤကျဲးစၢးတၢ်သ ပှၢ်ပှၢ်တဂၤလီၤ. ဒီးခဲကနံၣ်အံၤမ့ၢ်အနာ်သုသပှၢ်တၢၢ်အ ဃိဒီး, ကဂုာ်ကျဲးစၢးတၢ်အါန့ၢ်အန့ၣ်တက့ၢ်လီၤ. ²³ တၢ် လၢစီၤတံတူးတဂၤအဂ့ၢ်န့ၣ်, အဝဲဒၣ်မ့ၢ်ယဂိၤမီၣ်လၢအ မၤဃုာ်တၢ်ဒီးယၤလၢတၢ်ဘၣ်ဃးဒီးသုလီၤ. ဒီးပဒီပုၢ် ဝဲၢ်တဖၣ်န့ၣ်, အဝဲသ့ၣ်မ့ၢ်တၢ်အိၣ်ဖှိၣ်တဖၣ်အတၢ်မၢဖိ, ခရံာ်အလၤကပီၤလီၤ. ²⁴ မၤသးဒ်န့ၣ်ဒီးမၤဖျါထီၣ်သုတၢ် အဲၣ်တၢ်ကွံ, ဒီးပတၢ်စံးထီၣ်ပတြၢၤသုအဂ့ၢ်လၢအီၤ, ဒီး လၢတၢ်အိၣ်ဖှိၣ်တဖၣ်အမဲာ်ညါတက့ၢ်.

၉

¹ အဂ့ၢ်ဒ်အံၤ, တၢ်မၤစၢၤပှၤစီဆှံတဖၣ်အဂ့ၢ်န့ၣ်, ယကွဲး န့ၢ်သုအလီၢ်တအိၣ်ဘၣ်. ² အဂ့ၢ်ဒ်အံၤ, ယသ့ၣ်ညါသု သးအိၣ်ပာ်, ဒီးယပာ်ယသးကဖၢလၢလၢပှၤမၤက့းဒနံ ဖိတဖၣ်အကျါလၢသုဂ့ၢ်, လၢအဃါယၤအိၣ်ကတဲာ်က တီၤပာ်လံအသးတနံၣ်လံ, ဒီးသုသးဂဲၤလိာ်တၢ်အံၤ, ကဲ လၢတၢ်ထိၣ်ဂဲၤထီၣ်ပှၤအါဂၤအသးလံ. ³ ဘၣ်ဆၣ်ဒီး ယမၢလီၤပဒီပုၢ်ဝဲၢ်, ဒ်သိးပတၢ်ပာ်ပသးကဖၢလၢလၢ သုဂ့ၢ်လၢတၢ်အံၤအဃိ, သုတကဲလၢတၢ်ကလီကလီ တဂ့ၤ, ဒ်သိး, ဒ်ပစံးတ့ၢ်အသိး, သုကအိၣ်ကတီၤသုသး လီၤ. ⁴ မ့တမ့ၢ်ဘၣ်ဒီး, ပှၤမၤက့းဒနံဖိမ့ၢ်ဟဲဒီးယၤဒီး, က ထံၣ်န့ၢ်သုတအိၣ်ကတဲာ်ကတီၤဘၣ်သုသး, ဒီးပဝဲဒၣ် (ဒ်သိးပသုတစံးလၢသု), ကမဲာ်ဆှးလၢတၢ်ပာ်ပသးက ဖၢလၢအံၤအဃိဘၣ်ဖုးလီၤ.

⁵ မၤသးဒ်န့ၣ်ဒီး, ယဆိကမိၣ်အလီၢ်အိၣ်လၢယကသ ဆၣ်ထီၣ်ဒီပုၢ်ဝဲၢ်တဖၣ်အခံ, ဒ်သိးကလဲၤပာ်ဆူသုအိၣ်, ဒီးကတဲာ်ကတီၤပာ်သု တၢ်ဆိၣ်ဂ့ၤလၢတၢ်စံးပာ်တ့ၢ် လၢအဂ့ၢ်, ဒ်သိးအကအိၣ်ကတဲာ်ကတီၤအသးဒ်တၢ် ဆိၣ်ဂ့ၤတၢ်အသိး, တမ့ၢ်ဘၣ်ဒ်တၢ်ပံာ်တၢ်ကီဘၣ်အ သိးန့ၣ်ဘၣ်. ⁶ ယစံးတၢ်တဘီအံၤ, ပှၤလၢအဖှံတၢ်စှၤ န့ၣ်, ကကူးစ့ၢ်ကီးတၢ်စှၤဒီးပှၤလၢအဖှံတၢ်အါန့ၣ်, က ကူးစ့ၢ်ကီးတၢ်အါလီၤ.+ ကတိၤ. ၂၂း၉|Prov.22.9*.⁷ ပှၤတဂၤဒီး တဂၤ, ဒ်အတိာ်ဝဲလၢအသးကံၢ်ပူၤအသိးန့ၣ်, တမ့ၢ် ဘၣ်လၢတၢ်သးအုးဒီးတၢ်မၢဆူၣ်ဘၣ်ဒီး, မ်အဟ့ၣ်တၢ် ကိးဂၤဒဲးတက့ၢ်.

⁸ အဂ့ၢ်ဒ်အံၤ, ယွၤဘၣ်အသးလၢပှၤလၢအဟ့ၣ်ညီတၢ် လီၤ. ဒီးယွၤမၤလၢထီၣ်ပှဲၤထီၣ်ကယဲၢ်တၢ်ဘျုးတၢ်ဖှိၣ် လၢသုပူၤသ့, ဒ်သိးသုတၢ်တမံၤလၢ်လၢ်လၢတၢ်ခဲလၢာ် အပူၤလၢထီၣ်ပှဲၤထီၣ်တထံၣ်ဃီဒီး, သုကအါထီၣ်လၢ တၢ်မၤဂ့ၤကိးမံၤဒဲးလီၤ. ⁹ ဒ်တၢ်ကွဲးအသးအသိး, ဖှံလံတၢ်လံ, ဟ့ၣ်လံတၢ်လၢပှၤဖှီၣ်ဖိယာ်ဖိလံ. အ တၢ်တီတၢ်လိၤကအိၣ်ဝဲဆိးဝဲလီၤထူလီၤယိာ်လီၤ.+ စံး. ၁၁၂း၉|Ps.112.9*.―

¹⁰ ဒီးပှၤလၢအဟ့ၣ်လီၤတၢ်ချံလၢပှၤဖှံတၢ်အဂီၢ်, ဒီးကိၣ် လၢပှၤအီၣ်တၢ်အဂီၢ်, ကမၤပှဲၤထီၣ်သုတၢ်ချံ, ဒီးမၤအါ ထီၣ်သုတၢ်တီတၢ်လိၤအတၤသၣ်န့ၣ်စ့ၢ်ကီးလီၤ. ¹¹ ဒီး သုဘၣ် တၢ်မၤထူးထီၣ်တီၤထီၣ်သုလၢတၢ်ခဲလၢာ်လၢ ကယဲၢ်တၢ်ဟ့ၣ်ညီန့ၣ်, မၤထီၣ်တၢ်စံးထီၣ်ပတြၢၤယွၤ လၢပဝဲဒၣ်အဃိလီၤ. ¹² အဂ့ၢ်ဒ်အံၤ, တၢ်မၤလၢတၢ်ဟ့ၣ် အံၤ, တမ့ၢ်ဘၣ်ထဲတၢ်မၤစၢၤပှၤစီဆှံလၢအဘၣ်ဖှီၣ်ဘၣ် ယာ်ဧိၤဘၣ်, မ့ၢ်အကဲလၢတၢ်စံးထီၣ်ပတြၢၤယွၤအဘျုး အဖှိၣ်, လၢပှၤအါဂၤအဃိစ့ၢ်ကီးလီၤ. ¹³ အဂ့ၢ်ဒ်အံၤ, လၢ တၢ်မၤစၢၤအံၤ ဒုးနဲၣ်သုစူၢ် သုတၢ်အၢၣ်လီၤအီလီၤဘၣ် ဃးဒီးခရံာ်အတၢ်သးခုကစီၣ်သတးဒီး, အဝဲသ့ၣ်စံး ထီၣ်ပတြၢၤယွၤ, လၢသုဟ့ၣ်ညီတၢ်လၢအီၤ, ဒီးလၢပှၤခဲ လၢာ်အဃိလီၤ. ¹⁴ ဒီးမ့ၢ်ယွၤအဘျုးအဖှိၣ်ဖးဒိၣ်အိၣ်လၢ သုလိၤဒီး, အဝဲသ့ၣ်ဘါထုကဖၣ်န့ၢ်သုဂီၢ်, ဒီးသးသယုၢ် သုဒိၣ်နီၢ်မးလီၤ. ¹⁵ မ်ပှၤစံးထီၣ်ပတြၢၤယွၤလၢအတၢ် ဟ့ၣ်လၢပစံးတသ့ဘၣ်တမံၤ, အဃိန့ၣ်တက့ၢ်.

၁၀

¹ ဒီးယၤစီၤပီလူး, ယကစၢ်ဒၣ်ယဲအံၤ, ယဃ့ကညးသု လၢခရံာ်အတၢ်သူၣ်စူၤသးစူၤ, ဒီးအတၢ်ဝံသးစူၤအဃိ လီၤ. ဖဲယအိၣ်လၢသုကျါန့ၣ်, ယဆီၣ်လီၤယသး, မ့မ့ၢ် ယအိၣ်တပူၤဒၣ်န့ၣ်, ယပာ်ဒူယသးလၢသုလိၤလီၤ.―

² ဘၣ်ဆၣ်ဒီး, ယဃ့ကညးသုဒ်သိးတုၤယဟဲအိၣ်ဒီးသု ဒီး, ယသုတပာ်ဒူယသးဒ်ယဆိကမိၣ်ယဘၣ်ပာ်ဒူယ သးလၢပှၤတနီၤနီၤအလိၤ လၢအစံးလၢပလဲၤတၢ်ဒ်တၢ် ဖံးတၢ်ညၣ်အသိးန့ၣ်, တဂ့ၤလီၤ. ³ အဂ့ၢ်ဒ်အံၤ, ပလဲၤတၢ် လၢတၢ်ဖံးတၢ်ညၣ်အပူၤဘၣ်ဆၣ်ဒီး, ပတဒုးတၢ်ဒ်တၢ် ဖံးတၢ်ညၣ်အသိးဘၣ်. ⁴ အဂ့ၢ်ဒ်အံၤ, ပဒုးတၢ်အစုကဝဲၤ တဖၣ်န့ၣ်, တဘၣ်ဃးဘၣ်ဒီးတၢ်ဖံးတၢ်ညၣ်ဘၣ်, မ့ၢ် တၢ်စိတၢ်ကမီၤလၢယွၤအပူၤ, တုၤအမၤလီၤပှီၢ်တိာ်အဒိၣ် အထီတဖၣ်, ⁵ ဒီးတ့ၢ်လီၤကွံာ်တၢ်ကူၣ်တၢ်ဖးတဖၣ်, ဒီး ကယဲၢ်တၢ်ပာ်ထီၣ်ထီအသးထီဒါတၢ်သ့ၣ်ညါယွၤန့ၣ်, ဒီးမၢကဲကုၢ် ကယဲၢ်တၢ်ဆိကမိၣ်တမံၤလၢ်လၢ်ဆူတၢ် စူၢ်ခရံာ်အပူၤလီၤ. ⁶ ဒီးပအိၣ်ကတဲာ်ကတီၤပသးလၢပ ကဟ့ၣ်ကၣ်ကယဲၢ်တၢ်တစူၢ်ဘၣ်ခဲလၢာ်, ဖဲအကတီၢ် လၢသုစူၢ်တၢ်န့ၣ်လၢထီၣ်ပှဲၤထီၣ်လီၤ.

⁷ မ့ၢ်သုကွၢ်တၢ်ဒ်တၢ်အိၣ်ဖျါအသိးန့ၣ်ဧါ. ပှၤတဂၤဂၤ မ့ၢ်ဆိကမိၣ်လီၤအသးလၢအမ့ၢ်ခရံာ်အတၢ်ဒီး, မ်အဆိ ကမိၣ်ကဒီးလၢအသး, လၢဒ်အမ့ၢ်ခရံာ်အတၢ်အသိး န့ၣ်, ပမ့ၢ်စ့ၢ်ကီးပဝဲလီၤ. ⁸ အဂ့ၢ်ဒ်အံၤ, ယမ့ၢ်ပာ်ယသးက ဖၢလၢအါထီၣ်ဒံးလၢ တၢ်အစိအကမီၤလၢကစၢ်ဟ့ၣ် လီၤပှၤ, လၢတၢ်မၤဟးဂီၤသုအဂီၢ်တမ့ၢ်ဘၣ်, မ့ၢ်လၢတၢ် မၤထီၣ်မၤထီသုအဂီၢ်, နာ်သက့ဒီးယတမဲာ်ဆှးဘၣ်,―

⁹ ဒ်သိးယသုတလီၤဂာ်လၢယကမၤပျံၤသုလၢယလံာ်တ ဖၣ်န့ၣ်တဂ့ၤလီၤ. ¹⁰ အဂ့ၢ်ဒ်အံၤ, ပှၤစံးဝဲ, အလံာ်တဖၣ်မ့ၢ် တၢ်အဃၢ, ဒီးအိၣ်ဒီးအစိအကမီၤလီၤ. မ့မ့ၢ်အနီၢ်ခိအ တၢ်အိၣ်ဝဲန့ၣ်, မ့ၢ်တၢ်ဂံၢ်စၢ်ဘါစၢ်, ဒီးအတၢ်ကတိၤတ ဂိာ်ဘၣ်တၢ်နီတမံၤဘၣ်. ¹¹ မ်ပှၤဒ်န့ၣ်သိးတဖၣ်ဆိက မိၣ်တၢ်အံၤ, ဖဲဒၣ်ပမ့ၢ်တၢ်လၢ တၢ်ကတိၤလၢလံာ်ပူၤ လၢပအိၣ်တပူၤဒၣ်န့ၣ်ဒီး, ပကမ့ၢ်တၢ်စ့ၢ်ကီးလၢတၢ်မၤ အပူၤ, ဖဲပအိၣ်ဒီးသုန့ၣ်တက့ၢ်.

¹² အဂ့ၢ်ဒ်အံၤ, ပဂံၢ်ဃုာ်ပသးဒီးပှၤလၢအစံးထီၣ်ပတြၢၤ လီၤအသးမ့ၢ်ဂ့ၤ, ဒီးထိၣ်သတြီၤဃုာ်ပသးဒီးအီၤမ့ၢ်ဂ့ၤ န့ၣ်, တဘူၣ်ဘၣ်. မ့မ့ၢ်အဝဲသ့ၣ်ထိၣ်သတြီၤလိာ်အသး သကိးသကိးဒီးကွၢ်သတြီၤလိာ်အသးသကိးသကိးဒီး, အတၢ်ကူၣ်သ့ကူၣ်ဘၣ်တအိၣ်ဘၣ်. ¹³ မ့မ့ၢ်ပဝဲဒၣ်အံၤ, ပပာ်ပသးကဖၢလၢလၢ တၢ်ပူၤကွံာ်နီၣ်ထိၣ်န့ၣ်တမ့ၢ် ဘၣ်. မ့မ့ၢ်ဒ်နီၣ်ထိၣ်တၢ်အတၢ်ဘျၢ, ဖဲယွၤထိၣ်န့ၢ်ပဂီၢ် လၢနီၣ်ထိၣ်န့ၣ်, ပၢၢ်စ့ၢ်ကီးဆူသုအိၣ်လီၤ. ¹⁴ အဂ့ၢ်ဒ်အံၤ, ပထုးထီထီၣ်ပသး ဒ်ပတတုၤဘၣ်လၢသုအိၣ်အသိးတ မ့ၢ်ဘၣ်. အဂ့ၢ်ဒ်အံၤ, ပစံၣ်တဲၤတဲလီၤခရံာ်အတၢ်သးခု အကစီၣ်ဒီး, ပတုၤစ့ၢ်ကီးလၢသုအိၣ်လီၤ. ¹⁵ ပပာ်ပသး ကဖၢလၢလၢတၢ်ပူၤကွံာ်ပနီၣ်ထိၣ်, ဒ်ပစံးတၢ်အသိး, ပှၤဂၤအတၢ်ဖံးတၢ်မၤ, တမ့ၢ်ဘၣ်, မ့ၢ်ပမုၢ်လၢ်လၢသုတၢ် စူၢ်တၢ်နာ်မ့ၢ်အါထီၣ်ဒီး, ပတၢ်ကဒိၣ်ထီၣ်လၢသုပူၤဖဲပ တၢ်ဘျၢအသိးအါအါကလဲာ်လီၤ. ¹⁶ ဒ်သိးပကပာ်ပသး ကဖၢလၢ, လၢပှၤဂၤအတၢ်ဘျၢလၢတၢ်အိၣ်ကတဲာ်က တီၤပာ်အသးလၢပဂီၢ်တမ့ၢ်ဘၣ်, မ့ၢ်ဒ်သိးပကစံၣ်တဲၤ တဲလီၤတၢ်သးခုအကစီၣ်လၢ အလဲၤပူၤကွံာ်သုအိၣ်အ လီၢ်န့ၣ်လီၤ. ¹⁷ မ့မ့ၢ်ပှၤလၢအပာ်အသးကဖၢလၢန့ၣ်, မ် အပာ်အသးကဖၢလၢလၢကစၢ်အပူၤတက့ၢ်. ¹⁸ အဂ့ၢ်ဒ် အံၤ, ပှၤလၢအစံးထီၣ်ပတြၢၤလီၤအသး, ဘၣ်တၢ်အသး တမ့ၢ်ဘၣ်, မ့ၢ်ပှၤလၢကစၢ်စံးထီၣ်ပတြၢၤအီၤလီၤ.

၁၁

¹ ဘၣ်ယသးလၢ သုကဝံသးစူၤယၤလၢ ယတၢ်ဟးဂီၤ တစဲးလီၤ. ဒီးဝံသးစူၤယၤတက့ၢ်. ² အဂ့ၢ်ဒ်အံၤ, ယသး က့ၣ်သုလၢတၢ်သးက့ၣ်ဘၣ်ဃးဒီးယွၤလီၤ. အဂ့ၢ်ဒ်အံၤ, ယဒုးအဲၣ်တီသုဒီးဝၤတဂၤ, ဒ်သိးယကပာ်သုလၢမုၣ်က နီၤစီဆှံလၢခရံာ်အမဲာ်ညါလီၤ. ³ ဘၣ်ဆၣ်ဒီးဒ်ဂုၢ်လီန့ၢ် နီၢ်အံၣ်အုလၢအတၢ်လီတၢ်ဝ့ၤအသိးန့ၣ်, ယဘၣ်ယိၣ် လၢတၢ်ကမၤဟးဂီၤကွံာ်သုသးလၢ တၢ်တီတၢ်လိၤဘၣ် ဃးဒီးခရံာ်လီၤ. ⁴ အဂ့ၢ်ဒ်အံၤ, ပှၤလၢအဟဲန့ၣ်, မ့ၢ်စံၣ် တဲၤတဲလီၤယ့ၣ်ရှူးအဂၤတဂၤ, လၢပတစံၣ်တဲၤတဲလီၤ ဘၣ်ပဝဲမ့ၢ်ဂ့ၤ, သုမ့ၢ်ဒိးန့ၢ်သးအဂၤ, လၢသုတဒိးန့ၢ်ဒံး ဘၣ်မ့ၢ်ဂ့ၤ, သုမ့ၢ်တူၢ်လိာ်တၢ်သးခုအကစီၣ်အဂၤ, လၢ သုတတူၢ်လိာ်ဒံးဘၣ်မ့ၢ်ဂ့ၤဒီး, ဂ့ၤလၢသုဝံသးစူၤတၢ် လီၤ. ⁵ အဂ့ၢ်ဒ်အံၤ, ယဆိကမိၣ်လီၤယသးလၢယတဆံး န့ၢ်ဘၣ်ပှၤတၢ်မၢဖိလၢအဒိၣ်ကတၢၢ်တဖၣ်န့ၣ်, လၢတၢ် နီတမံၤဘၣ်လီၤ. ⁶ ဒီးယမ့ၢ်ပှၤအမံၤလၢတၢ်ကတိၤနာ် သက့ဒီး, ယတမ့ၢ်ဘၣ်လၢတၢ်သ့ၣ်ညါန့ၣ်ဘၣ်. မ့မ့ၢ် လၢတၢ်ခဲလၢာ်အပူၤ, ပဒုးအိၣ်ဖျါထီၣ်အီၤလၢသုဂီၢ်လၢ ပှၤခဲလၢာ်အကျါလီၤ.

⁷ မ့ၢ်ယစံၣ်တဲၤတဲလီၤသုလၢ ယွၤအတၢ်သးခုအကစီၣ် လၢအဘူးအလဲတအိၣ်ဘၣ်, ဒီးဆီၣ်လီၤယသးဒ်သိးသု ကဘၣ်တၢ်ထီၣ်ထီဒီး, မ့ၢ်ယမၤကမၣ်တၢ်ဧါ. ⁸ ယဂုာ် န့ၢ်တၢ်အိၣ်ဖှိၣ်အဂုၤအဂၤတဖၣ်အတၢ်, ဒီးဟံးန့ၢ်တၢ်အ ဘူးအလဲဒ်သိးယကမၤသုတၢ်လီၤ. ⁹ ဒီးဖဲယအိၣ်ဒီးသု အဖၢမုၢ်ဒီး, ယတၢ်တလၢတပှဲၤဘၣ်ဆၣ်ဒီး, ယတအိၣ် ဃၢလၢသုလိၤနီတဂၤဘၣ်. အဂ့ၢ်ဒ်အံၤ, ယတၢ်တလၢ ဘၣ်တဖၣ်န့ၣ်, ဒီပုၢ်ဝဲၢ်လၢအဟဲလၢမၤက့းဒနံတဖၣ်, မၤပှဲၤထီၣ်ဝဲလီၤ. ဒီးဒ်သိးယသုတမၤဃၢယတၢ်လၢသု လိၤလၢတၢ်နီတမံၤတဂ့ၤဒီး, ယပလီၢ်ယသးဒီးယကပ လီၢ်ဒံးယသးလီၤ.

¹⁰ ဒ်ခရံာ်အတၢ်မ့ၢ်တၢ်တီအိၣ်လၢယပူၤအသိးန့ၣ်, ယ ပာ်ယသးကဖၢလၢလၢကီၢ်အဃါယၤအပူၤန့ၣ်, ယတ တူၢ်မးတၢ်တြီယၤလၢပှၤနီတဂၤဘၣ်. ¹¹ မ့ၢ်အဘၣ်မနုၤ လဲၣ်, မ့ၢ်ယတအဲၣ်ဘၣ်သုအဃိဧါ. ယွၤသ့ၣ်ညါဝဲဒၣ် လီၤ. ¹² ဘၣ်ဆၣ်ဒီးတၢ်လၢယမၤန့ၣ်, ယကမၤဒံးစ့ၢ်ကီး, ဒ်သိးယကမၤတူာ်ကွံာ်ပှၤအလီၢ်လၢအဃုအလီၢ်, ဒ်သိး တၢ်လၢအဝဲသ့ၣ်ပာ်အသးကဖၢလၢလၢအဃိန့ၣ်, အဝဲ သ့ၣ်ကအိၣ်ဖျါဒ်ပဝဲအသိးလီၤ. ¹³ အဂ့ၢ်ဒ်အံၤ, ပှၤဒ်န့ၣ် သိးတဖၣ်, မ့ၢ်ပှၤတၢ်မၢဖိအဘျၣ်, ပှၤမၤလီတၢ်, ဒီးပျိာ်လဲ အသးလၢခရံာ်အပှၤတၢ်မၢဖိလီၤ. ¹⁴ ဒီးပကမၢကမၣ်အ လီၢ်တအိၣ်ဘၣ်. အဂ့ၢ်ဒ်အံၤ, မုၣ်ကီၤလံၢ်အကစၢ်ဒၣ် လဲာ်, ပျိာ်လဲအသးလၢတၢ်ကပီၤအကလူးလီၤ. ¹⁵ မၤသး ဒ်န့ၣ်ဒီး, အခ့အပှၤတဖၣ်မ့ၢ်ပျိာ်လဲအသးလၢတၢ်တီတၢ် လိၤအခ့အပှၤဒီး, တမ့ၢ်ဘၣ်တၢ်ဒိၣ်တၢ်မုၢ်ဘၣ်. အဝဲ သ့ၣ်အကတၢၢ်ကမ့ၢ်ဝဲဒ်အတၢ်မၤအသိးန့ၣ်လီၤ.

¹⁶ ယစံးကဒီး, မ်ပှၤသုတဆိကမိၣ်ယၤလၢပှၤဟးဂီၤဖိနီ တဂၤတဂ့ၤ. မ့တမ့ၢ်ဘၣ်ဒ်န့ၣ်ဒီးဒ်သိးယကပာ်ယသး ကဖၢလၢတစဲးဒီး, တူၢ်လိာ်ယၤဒ်ပှၤဟးဂီၤဖိအသိးတ က့ၢ်. ¹⁷ တၢ်လၢယကတိၤ, ယတကတိၤဘၣ်ဒ်ကစၢ်အ ဂ့ၢ်အသိးဘၣ်, မ့ၢ်ဒ်ပှၤဟးဂီၤဖိအသိး, လၢတၢ်ပာ်ယသး ကဖၢလၢအါကဲၣ်ဆိးအံၤအဃိလီၤ. ¹⁸ မ့ၢ်ပှၤပာ်အသး ကဖၢလၢလၢတၢ်ဖံးတၢ်ညၣ်အဃိအါဂၤသတးဒီး, ယဲ ဒၣ်အံၤ, ယကပာ်ယသးကဖၢလၢစ့ၢ်ကီးလီၤ. ¹⁹ အဂ့ၢ်ဒ် အံၤ, သုမ့ၢ်ပှၤကူၣ်ဘၣ်ကူၣ်သ့အဃိဒီး, သုဝံသးစူၤပှၤ ဟးဂီၤဖိ, ခုၣ်ခုၣ်မုာ်မုာ်လီၤ. ²⁰ အဂ့ၢ်ဒ်အံၤ, ပှၤတဂၤဂၤမ့ၢ် မၢသုကဲကုၢ်, ပှၤတဂၤဂၤမ့ၢ်အီၣ်ကွံာ်သုတၢ်, ပှၤတဂၤဂၤ မ့ၢ်ဟံးန့ၢ်သုတၢ်, ပှၤတဂၤဂၤမ့ၢ်ပာ်ထီၣ်ထီအသး, ပှၤတ ဂၤဂၤမ့ၢ်ဒဲသုမဲာ်ဒီး, သုဝံသးစူၤတၢ်လီၤ.

²¹ ယကတိၤတၢ်လၢတၢ်ဒုၣ်ဒွဲၣ်အဂ့ၢ်, ဒ်ပမ့ၢ်ပှၤလၢအ ဂံၢ်စၢ်အဘါစၢ်အသိးလီၤ. ဘၣ်ဆၣ်ဒီးပှၤဂၤပာ်အသးခူ တလ့ၢ်လၢတၢ်တမံၤမံၤအဃိမ့ၢ်ဘူၣ်ဒီး, ယဲဒၣ်အံၤ, ယ ပာ်ယသးခူတလ့ၢ်စ့ၢ်ကီးလီၤ. (ယကတိၤတၢ်ဒ်ပှၤဟး ဂီၤဖိအသိး)အဝဲသ့ၣ်မ့ၢ်ပှၤဧ့ၤဘြံၤဖိဧါ. ²² ယဲဒၣ်အံၤ, ယ မ့ၢ်စ့ၢ်ကီးလီၤ. မ့ၢ်ပှၤအံၣ်စရ့လးဖိဧါ. ယဲဒၣ်အံၤ, ယမ့ၢ် စ့ၢ်ကီးလီၤ. မ့ၢ်စီၤအၤဘြၤဟၣ်အချံအသၣ်ဧါ. ယဲဒၣ်အံၤ ယမ့ၢ်စ့ၢ်ကီးလီၤ. ²³ မ့ၢ်ခရံာ်အခ့အပှၤဧါ. (ယကတိၤတၢ် ဒ်ပှၤဟးဂီၤဖိအသိး,) ယဲဒၣ်အံၤယဒိၣ်န့ၢ်အန့ၣ်တက့ၢ် လီၤ. လၢတၢ်ဖံးတၢ်မၤအပူၤန့ၣ်, အါတက့ၢ်, လၢတၢ်တီၢ် တၢ်ဝ့ၤအပူၤန့ၣ်အါတက့ၢ်ဒိၣ်မး, လၢဃိာ်ပူၤန့ၣ်အဘျီ အါတက့ၢ်, လၢတၢ်သံအပူၤန့ၣ်, တလီၢ်လီၢ်တလီၢ်လီၢ် လီၤ. ²⁴ ပှၤယူဒၤဖိတီၢ်ယၤအဘီလွံၢ်ဆံစှၤလီၤတဘီ, ယဲၢ် စုလီၤ. ယဘၣ်တၢ်တီၢ်ယၤလၢနီၣ်က့သၢစု, ယဘၣ်တၢ် ကွံာ်ယၤလၢလၢၢ်တစု, ²⁵ ယဘၣ်ကဘီဟးဂီၤသၢစု, ယ အိၣ်လၢပီၣ်လဲၣ်ပူၤတနံၤဒီးတနၤလီၤ. ²⁶ ယလဲၤတၢ်က့ၤ တၢ်တလီၢ်လီၢ်တလီၢ်လီၢ်, ယဘူးတ့ၢ်ဒီးတၢ်နးတၢ်ဖှီၣ် လၢထံမိၢ်ပှၢ်တဖၣ်, ယဘူးတ့ၢ်ဒီးတၢ်နးတၢ်ဖှီၣ်လၢတ မျိးတမျာ်, ယဘူးတ့ၢ်ဒီးတၢ်နးတၢ်ဖှီၣ်လၢပှၤတကလုာ် ဒၣ်ယဲ, ယဘူးတ့ၢ်ဒီးတၢ်နးတၢ်ဖှီၣ်လၢပှၤကလုာ်တဖၣ် ယဘူးတ့ၢ်ဒီးတၢ်နးတၢ်ဖှီၣ်လၢဝ့ၢ်ပူၤ, ယဘူးတ့ၢ်ဒီးတၢ် နးတၢ်ဖှီၣ်လၢပှၢ်မုၢ်ကနၢ, ယဘူးတ့ၢ်ဒီးတၢ်နးတၢ်ဖှီၣ် လၢပီၣ်လဲၣ်ပူၤ, ယဘူးတ့ၢ်ဒီးတၢ်နးတၢ်ဖှီၣ်လၢဒီပုၢ်ဝဲၢ် အဘျၣ်အကျါ, ²⁷ လၢတၢ်သူၣ်အုးတၢ်သးအုး, ဒီးတၢ် လီၤဘှံးလီၤတီၤအပူၤ, လၢတၢ်ဆိးသီတလီၢ်လီၢ်တလီၢ် လီၢ်အပူၤ, လၢတၢ်သၣ်ဝံၤယသးဒီးတၢ်သူယသးလၢထံ အပူၤ, လၢတၢ်ဒုၣ်တၢ်အီၣ်တၢ်အီတလီၢ်လီၢ်တလီၢ်လီၢ် အပူၤ, လၢတၢ်ဂိၢ်, ဒီးတၢ်အိၣ်ဘ့ၣ်ဆ့အပူၤလီၤ. ²⁸ လၢ တၢ်အိၣ်လၢခိအမဲာ်ညါတဖၣ်န့ၣ်, တၢ်ဘၣ်ယိၣ်ဘၣ် ဃးဒီးတၢ်အိၣ်ဖှိၣ်ခဲလၢာ် ဆီၣ်သနံးယၤကိးမုၢ်နံၤမုၢ်နၤ ဒဲးလီၤ. ²⁹ မ့ၢ်မတၤအဂံၢ်စၢ်အဘါစၢ်ဒီး, ယဂံၢ်တစၢ်ယ ဘါတစၢ်ဘၣ်တဂၤလဲၣ်. မ့ၢ်မတၤလီၤကမၣ်တၢ်, ဒီးယ သးတကိၢ်ဘၣ်တဂၤလဲၣ်. ³⁰ ယတပာ်ယသးကဖၢလၢ ဒီးယအိၣ်မ့ၢ်တသ့ဘၣ်ဒီး, ယကပာ်ယသးကဖၢလၢ, လၢတၢ်ဘၣ်ဃးဒီးယဂံၢ်စၢ်ဘါစၢ်လီၤ. ³¹ ပကစၢ်ယ့ၣ်ရှူး ခရံာ်အပၢ်, ယွၤလၢအဘၣ်တၢ်ဆိၣ်ဂ့ၤအစိၤစိၤအဃၣ် ဃၣ်, သ့ၣ်ညါဝဲလၢ ယတကတိၤဘၣ်တၢ်ကဘျံးက ဘျၣ်ဘၣ်လီၤ. ³² လၢဒၤမ့ၤစ့းအပူၤန့ၣ်ပဒိၣ်လၢစီၤပၤအ ရံတၢ်အဖီလာ်တဂၤ, တၢ်မိၣ်ဟံးဃာ်အသးလၢယၤဒီး, ခိးဝ့ၢ်ဒၤမ့ၤစ့းဒီးသုးဖိတဖုသတးဒီး, ³³ တၢ်စဲၤလီၤယၤ လၢတၢ်ထူၣ်ဖျိ, လၢစဲာ်ပူၤလၢဝ့ၢ်ခိၣ်ဒူန့ၣ်, ဒီးယဃ့ၢ်ပူၤ ဖျဲးအစုပူၤန့ၣ်လီၤ.

၁၂

¹ ယပာ်ယသးကဖၢလၢ တဂ့ၤတဘၣ်ဘၣ်လၢ ယဂီၢ် ဘၣ်. ဒီးယကလဲၤလၢညါဆူတၢ်ထံၣ်တၢ်လၢညါခီ, ဒီး ကစၢ်အတၢ်လီၣ်ဖျါတဖၣ်န့ၣ်အဂ့ၢ်လီၤ. ² အိၣ်တ့ၢ်တ ဆံလွံၢ်နံၣ်န့ၣ်, ယသ့ၣ်ညါပှၤကညီအိၣ်လၢခရံာ်အပူၤ တဂၤ, မ့ၢ်အိၣ်နီၢ်ခိယတသ့ၣ်ညါဘၣ်, မ့ၢ်တအိၣ်နီၢ်ခိယ တသ့ၣ်ညါဘၣ်, ယွၤသ့ၣ်ညါဝဲ, ပှၤဒ်န့ၣ်တဂၤန့ၣ်ဘၣ် တၢ်ထုးန့ၢ်အီၤဆူမူခိၣ်သၢတီၤတတီၤလီၤ. ³ ဒီးယသ့ၣ် ညါပှၤကညီဒ်န့ၣ်တဂၤ, မ့ၢ်အိၣ်နီၢ်ခိတအိၣ်နီၢ်ခိလဲၣ် န့ၣ်, ယတသ့ၣ်ညါဘၣ်, ယွၤသ့ၣ်ညါဝဲလီၤ. ⁴ အဝဲဒၣ် န့ၣ်, ဘၣ်တၢ်ထုးန့ၢ်အီၤဆူပၤရဒံစူး, ဒီးနၢ်ဟူတၢ်ကတိၤ လၢပှၤစံးတသ့ဘၣ်, ဒီးတဂ့ၤကတိၤဘၣ်ပှၤကညီဘၣ်.

⁵ ယကပာ်ယသးကဖၢလၢလၢပှၤဒ်န့ၣ်သိးတဂၤအဃိ လီၤ. မ့မ့ၢ်လၢယဂ့ၢ်ယကျိၤဒၣ်ယဲ, ယကပာ်ယသးကဖၢ လၢ, ထဲယဂံၢ်စၢ်ယဘါစၢ်အဃိလီၤ. ⁶ အဂ့ၢ်ဒ်အံၤ, ယ သးမ့ၢ်အိၣ်နာ်သက့လၢ ယကပာ်ယသးကဖၢလၢဘၣ် ဆၣ်ဒီး, ယတမ့ၢ်ဘၣ်ပှၤဟးဂီၤဖိဘၣ်. အဂ့ၢ်ဒ်အံၤ, မ့ၢ်ယ ကစံးတၢ်မ့ၢ်တၢ်တီလီၤ. ဘၣ်ဆၣ်ဒီးဒ်သိးပှၤသုတဆိ ကမိၣ်ယၤလၢယဒိၣ်န့ၢ်တၢ်လၢအထံၣ်တၢ်လၢယၤ, ဒီး နၢ်ဟူတၢ်လၢယၤန့ၣ်တဂ့ၤဒီး, ယဆိတ့ၢ်လီၤ. ⁷ ဒီးဒ်သိး ယသုတပာ်ထီၣ်ထီယသးဒိၣ်ကဲၣ်ဆိး, လၢယထံၣ်တၢ် လၢညါခီအါအဃိတဂ့ၤဒီး, တၢ်ဟ့ၣ်ယၤလၢတၤဆှုၣ် အိၣ်လၢယဖံးယညၣ်အကျါ, ဒ်ပစံးတၢ်အသိး, မုၣ်ကီၤ လံၢ်အကလူးဒ်သိးအကထိဘၣ်ယၤ, ဒ်သိးယသုတပာ် ယသးထီကဲၣ်ဆိးတဂ့ၤလီၤ. ⁸ လၢတၢ်န့ၣ်အဂ့ၢ်, ဒ်သိး အကဟးဖးဒီးယၤဒီး, ယဃ့ကညးကစၢ်သၢစုလီၤ. ⁹ ဒီး အဝဲဒၣ်စံးဘၣ်ယၤ, ယဘျုးယဖှိၣ်အါလံလၢနဂီၢ်လံ. အ ဂ့ၢ်ဒ်အံၤ, ယစိယကမီၤလၢထီၣ်ပှဲၤထီၣ်လၢတၢ်အဂံၢ်စၢ် အဘါစၢ်အပူၤလီၤ. မၤသးဒ်န့ၣ်ဒီး, ဒ်သိးခရံာ်အစိအက မီၤကအိၣ်ကဆိးလၢယလိၤဒီး, ယသးခုဒီး, ယကပာ်ယ သးကဖၢလၢလၢယဂံၢ်စၢ်ဘါစၢ်အဃိလီၤ.

¹⁰ မၤသးဒ်န့ၣ်ဒီး ဘၣ်ယသးလၢ ယဂံၢ်စၢ်ယဘါစၢ်အ ပူၤ, လၢတၢ်မၤယၤတရီတပါအပူၤ, လၢတၢ်ဖှီၣ်တၢ်ယာ် အပူၤ, လၢတၢ်မၤအၢမၤသီယၤအပူၤ, လၢတၢ်ကီတၢ်ခဲ အပူၤလၢခရံာ်အဃိလီၤ. အဂ့ၢ်ဒ်အံၤ, တုၤယဂံၢ်စၢ်ယ ဘါစၢ်ဒီး, ယအိၣ်ဒီးယစိယကမီၤလီၤ.

¹¹ ယကဲထီၣ်လံပှၤဟးဂီၤဖိလံ, မ့ၢ်သုမၢဆူၣ်ယၤလီၤ. အ ဂ့ၢ်ဒ်အံၤ, ဂ့ၤလၢယဘၣ်တၢ်စံးထီၣ်ပတြၢၤယၤလၢသုတ ခီလီၤ. အဂ့ၢ်ဒ်အံၤ, ယတမ့ၢ်ဘၣ်တၢ်နီတမံၤဘၣ်နာ်သ က့ဒီး, ယတအိၣ်ဘၣ်လၢပှၤတၢ်မၢဖိအဒိၣ်ကတၢၢ်တ ဖၣ်န့ၣ်အလီၢ်ခံနီတစဲးဘၣ်. ¹² မ့ၢ်မးတၢ်ပနီၣ်ဘၣ်ဃးဒီး ပှၤတၢ်မၢဖိမၤအသးလၢသုကျါ, လၢတၢ်ဝံသးစူၤကိးအ မံၤဒဲး, လၢတၢ်လီၤလိၢ်လီၤလး, ဒီးတၢ်လီၤလးလီၤဆီ, ဒီး တၢ်အစိအကမီၤတဖၣ်လီၤ. ¹³ မ့တမ့ၢ်ဘၣ်တၢ်လၢယ တအိၣ်ဃၢဘၣ်လၢသုလိၤဘၣ်ဒီး, သုအိၣ်လၢတၢ်အိၣ် ဖှိၣ်အဂၤတဖၣ်အဖီလာ်, လၢမနုၤတမံၤလဲၣ်. ပျၢ်ယတၢ် ကမၣ်တမံၤအံၤတက့ၢ်.

¹⁴ ကွၢ်ကွၢ်, ယအိၣ်ကတဲာ်ကတီၤယသးလၢယကလဲၤ ဆူသုအိၣ်ပှဲၤထီၣ်သၢစုတစုအံၤ, ဒီးယတအိၣ်ဃၢဘၣ် လၢသုလိၤဘၣ်. အဂ့ၢ်ဒ်အံၤ, ယဃုသုတၢ်တမ့ၢ်ဘၣ်, မ့ၢ် သုလီၤ. အဂ့ၢ်ဒ်အံၤ, အဖိဂ့ၤပာ်ဖှိၣ်တၢ်လၢအမိၢ်အပၢ်အ ဂီၢ်, တမ့ၢ်ဘၣ်, မ့ၢ်အမိၢ်အပၢ်လၢအဖိအဂီၢ်လီၤ. ¹⁵ ဒီးယ အဲၣ်သုဒံးဒိၣ်ထီၣ်, သုအဲၣ်ယၤဒံးဆံးလီၤနာ်သက့ဒီး, ယ သးခုဒီး, ယကလၢာ်တၢ်, ဒီးဒိးတၢ်လၢာ်ယသးလၢသု သးအဂီၢ်လီၤ. ¹⁶ ဘၣ်ဆၣ်ဒီးကမ့ၢ်ဒၣ်ဝဲ, ယတအိၣ်ဃၢ လၢသုလိၤဘၣ်. ဘၣ်ဆၣ်ယလွဲတၢ်သတးဒီး, ယမၤန့ၢ် သုလၢတၢ်လီတၢ်ဝ့ၤလီၤ. ¹⁷ လၢပှၤလၢယမၢလီၤဆူသု အိၣ်တဂၤဂၤအစုပူၤန့ၣ်, မ့ၢ်ယလီန့ၢ်သုတၢ်တမံၤမံၤ ဧါ. ¹⁸ ယကညးစီၤတံတူး, ဒီးယမၢဒီပုၢ်ဝဲၢ်တဂၤလဲၤဒီး အီၤလီၤ. မ့ၢ်စီၤတံတူးလီန့ၢ်သုတၢ်တမံၤမံၤဧါ. ပလဲၤတၢ် ဒီးပသးတဖျၢၣ်ဃီ, လၢခီၣ်ယီၢ်လီၢ်တပူၤဃီ, တမ့ၢ်ဘၣ် ဧါ.

¹⁹ မၤကဒီးတစု, မ့ၢ်သုဆိကမိၣ်လၢပကတိၤပူၤဖျဲးပသး လၢသုမဲာ်ညါန့ၣ်ဧါ. ပကတိၤတၢ်လၢယွၤအမဲာ်ညါလၢ ခရံာ်အပူၤလီၤ. ဒီးသးဘိသ့ၣ်ဧၢ, ပကတိၤတၢ်ခဲလၢာ် လၢသုကထီၣ်သုကထီအဂီၢ်လီၤ. ²⁰ အဂ့ၢ်ဒ်အံၤ, ယဘၣ် ယိၣ်လၢယမ့ၢ်ဟဲတုၤလၢသုအိၣ်ဒီး, ယကထံၣ်န့ၢ်သုဒ် တၢ်တမိၣ်ထံၣ်ဘၣ်ယသးအသိး, ဒီးသုကထံၣ်န့ၢ်ယၤဒ် သုသးတမိၣ်ထံၣ်ဘၣ်ယၤအသိး, ဒ်ပစံးတၢ်အသိး, တၢ် အ့ၣ်လိာ်ဆိးက့လိာ်, တၢ်သူၣ်က့ၣ်သးက့ၣ်, တၢ်သူၣ်ဒိၣ် သးဟ့, တၢ်ခိးထဲသိးလိာ်အသး, တၢ်စံးအၢစံးသီ, တၢ် ဒုၣ်ဒွဲၣ်လၢအခူသူၣ်, တၢ်ပာ်အသးကဖၢလၢ, တၢ်တၢ ထီၣ်တၢလီၤသ့ၣ်တဖၣ်, ကအိၣ်ဘၣ်ဖုးလၢသုကျါလီၤ.

²¹ ဒီးယမ့ၢ်ဟဲတုၤကဒီးတစုဒီး, မ့ၢ်ပှၤလၢအမၤကမၣ်တ့ၢ် တၢ်အါဂၤ, ဒီးတပီၢ်ယၢ်လီၤက့ၤအသးဘၣ်လၢအတၢ် အဲၣ်တလ့ၤအဲၣ်တဘီ, ဒီးအတၢ်မၤကမၣ်မုၣ်ကမၣ်ခွါ, ဒီးအတၢ်မၤထွဲအသးကလိၢ်ကလ့ၤအခံ, အဃိဒီးယသး ကအုးဒီး ယကစၢ် ကဆီၣ်လီၤဘၣ်ဖုးယၤလၢသုကျါ လီၤ.

၁၃

¹ ယဟဲဆူသုအိၣ်အအံၤမ့ၢ်သၢစုတစုလီၤ. မ့ၢ်ပှၤခံဂၤ သၢဂၤအုၣ်အသးသတးဒီး, တၢ်ကတိၤကဂၢၢ်ကကျၢၤ ဝဲကိးအထံၣ်ဒဲးလီၤ. ² ယစံးဘၣ်တ့ၢ်တဘျီ, ဒီးခဲကနံၣ် အံၤ, ယအိၣ်လီၤဖးဒီးသုဒီး, ယစံးပာ်ကဒီးဒ်ယအိၣ်တ့ၢ် ဒီးသုခံစုတစုအသိး, ပှၤလၢအမၤကမၣ်တ့ၢ်တၢ်, ဒီးပှၤ အဂၤခဲလၢာ်, ယမ့ၢ်ဟဲကဒီးတစုဒီး, ယတပျဲဘၣ်အီၤ ဘၣ်. ³ အဂ့ၢ်ဒ်အံၤ, သုဃုတၢ်အုၣ်အသးလၢအဒုးနဲၣ် လၢခရံာ်ကတိၤတၢ်လၢယပူၤလီၤ. အဝဲဒၣ်အဂံၢ်စၢ်အ ဘါစၢ်လၢသုဂီၢ်တမ့ၢ်ဘၣ်. မ့ၢ်အအိၣ်ဒီးအစိအကမီၤ လၢသုကျါလီၤ. ⁴ အဂ့ၢ်ဒ်အံၤ, ဒိးသံအသးလၢထူၣ်စုညါ အလိၤလၢတၢ်ဂံၢ်စၢ်ဘါစၢ်အဃိနာ်သက့ဒီး, မ့ၢ်အမူဝဲလၢယွၤအစိအကမီၤလီၤ. အဂ့ၢ်ဒ်အံၤ, ပဝဲဒၣ်အံၤ, ပဂံၢ် စၢ်ပဘါစၢ်လၢအပူၤစ့ၢ်ကီးဘၣ်ဆၣ်ဒီး, မ့ၢ်ယွၤအစိအ ကမီၤသတးဒီး, ပကမူဃုာ်ဒီးအီၤလၢသုဂီၢ်လီၤ.

⁵ သုဝဲဒၣ်အံၤ သုအိၣ်လၢတၢ်နာ်အပူၤ, သုတအိၣ် ဘၣ်လဲၣ်န့ၣ်, သံကွၢ်သံဒိးလီၤသုသးတက့ၢ်. ပစီကွၢ် လီၤသုသးတက့ၢ်. မ့ၢ်သုတသ့ၣ်ညါလီၤဘၣ်သုသး, လၢ သုမ့တမ့ၢ်ဘၣ်ပှၤလၢ အဘၣ်တၢ်ညိကွံာ်အီၤဘၣ်ဒီး, ယ့ၣ်ရှူးခရံာ်အိၣ်လၢသုပူၤန့ၣ်ဘၣ်ဧါ. ⁶ ဒီးယမုၢ်လၢ် လၢသုကသ့ၣ်ညါလၢ ပတမ့ၢ်ပှၤဘၣ်တၢ်ညိကွံာ်အီၤ ဘၣ်.

⁷ ဒီးပဘါထုကဖၣ်လၢယွၤ ဒ်သိးသုသုတမၤတၢ်အၢ တၢ်သီနီတမံၤတဂ့ၤလီၤ. ဒ်သိးပကအိၣ်ဖျါပဝဲ, လၢပှၤ ဘၣ်တၢ်တူၢ်လိာ်အီၤန့ၣ်တမ့ၢ်ဘၣ်. မ့ၢ်ဒ်သိးပမ့ၢ်ပဝဲပှၤ လီၤဂာ်လၢတၢ်ညိကွံာ်အီၤနာ်သက့ဒီး, သုကမၤတၢ်ဂ့ၤ တၢ်ဘၣ်သုဝဲလီၤ. ⁸ အဂ့ၢ်ဒ်အံၤ, ပမၤတၢ်ထီဒါတၢ်မ့ၢ် တၢ်တီတသ့ဘၣ်နီတမံၤဘၣ်. မ့ၢ်လၢတၢ်မ့ၢ်တၢ်တီအ ဂီၢ်လီၤ. ⁹ အဂ့ၢ်ဒ်အံၤ, တုၤပဂံၢ်စၢ်ပဘါစၢ်, ဒီးသုဂံၢ်ဆူၣ် ဘါဆူၣ်ဒီး, ပသးခုလီၤ. ဒီးပဘါထုကဖၣ်စ့ၢ်ကီး, လၢသု ကလၢထီၣ်ပှဲၤထီၣ်လီၤ.

¹⁰ လၢတၢ်န့ၣ်အဃိ, ယလီၤဖးဒီးသုအဖၢမုၢ်ဒီး, ယကွဲး တၢ်တဖၣ်အံၤဒ်သိးယမ့ၢ်အိၣ်က့ၤဒီးသုဒီး, ယသုတမၤ ဆူၣ်မၤစိးဒီးတၢ်အစိအကမီၤလၢ ကစၢ်ဟ့ၣ်ယၤလၢ တၢ်မၤထီၣ်မၤထီအဂီၢ်, ဒီးတမ့ၢ်ဘၣ်လၢတၢ်မၤဟးဂီၤ အဂီၢ်ဘၣ်လီၤ.

¹¹ တၢ်ကတိၤလၢခံကတၢၢ်န့ၣ်, ပုၢ်သ့ၣ်ဝဲၢ်သ့ၣ်ဧၢ, မ်သု သူၣ်ခုသးခုတက့ၢ်. မ်သုလၢထီၣ်ပှဲၤထီၣ်တက့ၢ်. မ်တၢ် မၤခုၣ်မၤမုာ်သုသးတက့ၢ်. မ်သုအိၣ်သုသးတဖျၢၣ်ဃီ တက့ၢ်. မ်သုအိၣ်ဃူအိၣ်ဖိးတက့ၢ်. ဒီးတၢ်အဲၣ်တၢ်ကွံ, ဒီးတၢ်ဃူတၢ်ဖိးအကစၢ်န့ၣ်, ကအိၣ်ဒီးသုလီၤ. ¹² ကတိၤ ဒိၣ်လိာ်သုသးဒီးတၢ်နၢမူစီဆှံတက့ၢ်. ¹³ ပှၤစီဆှံခဲလၢာ် န့ၣ်ကတိၤဒိၣ်သုလီၤ.

¹⁴ ကစၢ်ယ့ၣ်ရှူးခရံာ်အဘျုးအဖှိၣ်, ဒီးယွၤအတၢ်အဲၣ် တၢ်ကွံ, ဒီးသးစီဆှံအတၢ်ရ့လိာ်န့ၣ်, မ်အအိၣ်ဒီးသုခဲ လၢာ်တက့ၢ်. [အၤမ့ၣ်].