လံာ်စီၤပီလူးကွဲးန့ၢ်စီၤတံၤမသ့းအခီၣ်ထံးတဘ့ၣ်

လံာ်စီၤပီလူးကွဲးန့ၢ်စီၤတံၤမသ့းအခီၣ်ထံးတဘ့ၣ်

၁

¹ ယ့ၣ်ရှူးခရံာ်အပှၤတၢ်မၢဖိ, ဒ်ယွၤလၢအအုၣ်က့ၤခီၣ် က့ၤပှၤ, ဒီးယ့ၣ်ရှူးခရံာ်ပတၢ်မုၢ်လၢ်, အတၢ်မၤလိာ်အ သိး, ယၤစီၤပီလူးအံၤ, ² ယစံးဘၣ်ယဖိနီၢ်နီၢ်လၢတၢ်နာ် အပူၤ, စီၤတံၤမသ့းဧၢ, မ်တၢ်ဘျုးတၢ်ဖှိၣ်, တၢ်သူၣ်က ညီၤသးကညီၤ, တၢ်ဃူတၢ်ဖိးလၢပပၢ်ယွၤဒီး ပကစၢ် ယ့ၣ်ရှူးခရံာ်အအိၣ်, ဘၣ်နၤတက့ၢ်. ³ လၢယလဲၤဆူမၤက့းဒနံန့ၣ်, ဒ်ယဃ့ကညးနၤလၢနကအိၣ်ဒံးလၢအ့းဖ့းစူးအပူၤ, ဒ်သိးနကမၤလိာ်ပှၤတနီၤနီၤလၢအသုတသိၣ်က့ၤသီက့ၤတၢ်အဂုၤအဂၤတဂ့ၤ,―

⁴ လၢအသုတသးအိၣ်ပူတဖၣ်, ဒီးတၢ်ဂံၢ်ထံးဃဲၤလာ်လၢ အကတၢၢ်တအိၣ်ဘၣ်တဂ့ၤအသိးန့ၣ်, မၤတက့ၢ်. တၢ် န့ၣ်တဖၣ်တမၤဂၢၢ်မၤကျၢၤဘၣ် ယွၤအလုၢ်အလၢ်လၢ အဘၣ်ဃးဒီးတၢ်နာ်ဘၣ်, အခိၣ်တလိာ်မၤအါထီၣ်တၢ် အ့ၣ်လိာ်ဆိးက့လိာ်န့ၣ်လီၤ.

⁵ တၢ်မၤလိာ်န့ၣ်အကတၢၢ်မ့ၢ်တၢ်အဲၣ်တၢ်ကွံဘၣ်ဃး ဒီးသးကဆှီ, ဒီးသးလၢအသ့ၣ်ညါဒၣ်တၢ်လၢအဂ့ၤ, ဒီး တၢ်နာ်နီၢ်နီၢ်လီၤ. ⁶ တၢ်န့ၣ်တဖၣ်ပှၤတနီၤနီၤဟးကမၣ် ဝဲသတးဒီး, လဲၤကပိာ်ကပၤဆူတၢ်ကတိၤကလီကလီ လီၤ. ⁷ ပှၤတဖၣ်န့ၣ်တၢ်မိၣ်ကဲအသးလၢတၢ်သိၣ်တၢ်သီ သရၣ်ဘၣ်ဆၣ်ဒီး, တၢ်လၢအစံးဝဲမ့ၢ်ဂ့ၤ, တၢ်လၢအက တိၤဆူၣ်လၢအဂ့ၢ်မ့ၢ်ဂ့ၤ, အနၢ်တပၢၢ်ဘၣ်ဝဲဘၣ်. ⁸ ဘၣ် ဆၣ်ဒီးတၢ်သိၣ်တၢ်သီန့ၣ်, ပမ့ၢ်မၤအီၤတီတီလိၤလိၤဒီး, ပသ့ၣ်ညါလၢအမ့ၢ်တၢ်ဂ့ၤလီၤ. ⁹ ပသ့ၣ်ညါတၢ်အံၤ, တၢ် ပာ်လီၤတၢ်သိၣ်တၢ်သီလၢ ပှၤတီပှၤလိၤအဂီၢ်တမ့ၢ် ဘၣ်. မ့ၢ်လၢပှၤမၤကမၣ်တၢ်, ဒီးလၢပှၤတစူၢ်ဘၣ်တၢ်ဘၣ်, လၢပှၤတယူးတယီၣ်ဘၣ်ယွၤ, ဒီးလၢပှၤတၢ်ဒဲးဘးဖိ, လၢပှၤတစီတဆှံဘၣ်, ဒီးလၢပှၤအၢပှၤသီ, လၢပှၤတီၢ် အမိၢ်, ဒီးလၢပှၤတီၢ်အပၢ်, လၢပှၤမၤသံပှၤကညီ,

¹⁰ လၢပှၤမၤကမၣ်မုၣ်ကမၣ်ခွါ, လၢပှၤအဲၣ်ပကၢၤ, လၢပှၤ ဟုၣ်န့ၢ်ပှၤကညီ, လၢပှၤကတိၤတၢ်ကဘျံးကဘျၣ်, လၢ ပှၤတမၤဘၣ်ဝဲဒ်အဆိၣ်တၢ်အသိးတဖၣ်အဂီၢ်လီၤ. ဒီး တၢ်အဂုၤအဂၤ လၢအထီဒါတၢ်သိၣ်တၢ်သီ အဂ့ၤအ ဘၣ်,― ¹¹ ဒ်ယွၤလၢအဘၣ်တၢ်ဆိၣ်ဂ့ၤ, အတၢ်သးခုအက စီၣ်အိၣ်ဒီးအလၤကပီၤ, လၢတၢ်ဟ့ၣ်လီၤလၢယၤအံၤ အသိး, မ့ၢ်အိၣ်ဒီး, လၢအဝဲန့ၣ်အဂီၢ်လီၤ.

¹² ဒီးပကစၢ်ယ့ၣ်ရှူးခရံာ်လၢ အဒုးဆူၣ်ထီၣ်ယဂံၢ်ယ ဘါန့ၣ်, ယစံးထီၣ်ပတြၢၤအဘျုးအဖှိၣ်လီၤ. အဂ့ၢ်ဒ် အံၤ, ပာ်ယၤလၢပှၤအကလုၢ်တီ, ဒီးပာ်ယၤလၢတၢ်မၤ အတၢ်အပူၤလီၤ. ¹³ ယဲဒၣ်အံၤလၢအခီၣ်ထံးန့ၣ်, ယမ့ၢ်ပှၤ ဒုၣ်ဒွဲၣ်တၢ်, ဒီးပှၤမၤအၢမၤသီတၢ်, ဒီးပှၤအဒူလီၤ. ဘၣ် ဆၣ်ဒီးယန့ၢ်ဘၣ်တၢ်သးကညီၤလီၤ. အဂ့ၢ်ဒ်အံၤ, ယတ သ့ၣ်ညါဘၣ်တၢ်ဘၣ်, ဒီးယတနာ်ဘၣ်တၢ်ဘၣ်ဒီး, ယ မၤတၢ်န့ၣ်လီၤ. ¹⁴ ဒီးပကစၢ်အဘျုးအဖှိၣ်အါထီၣ်အါ အါကလဲာ်, အိၣ်ဒီးတၢ်နာ်ဒီးတၢ်အဲၣ်တၢ်ကွံလၢအအိၣ် လၢယ့ၣ်ရှူးခရံာ်အပူၤလီၤ.

¹⁵ တၢ်ကတိၤလၢအမ့ၢ်အတီ, ဒီးဂ့ၤလၢပှၤခဲလၢာ်တူၢ် လိာ်တထံၣ်မ့ၢ်အအံၤ, ယ့ၣ်ရှူးခရံာ်ဟဲလီၤလၢဟီၣ်ခိၣ် ချၢ, ဒ်သိးအကအုၣ်က့ၤခီၣ်က့ၤပှၤတၢ်ဒဲးဘးဖိ, လၢယ မ့ၢ်အဒိၣ်ကတၢၢ်တဂၤလီၤ. ¹⁶ ဘၣ်ဆၣ်ဒီးယဒိးတၢ်သး ကညီၤယၤအဂ့ၢ်မ့ၢ်အအံၤ, ဒ်သိးယ့ၣ်ရှူးခရံာ်ကဒုးနဲၣ် အတၢ်ဝံသးစူၤခဲလၢာ်လၢယၤအဒိၣ်ကတၢၢ်တဂၤအပူၤ လၢယကကဲထီၣ်အဒိအတဲာ်လၢ ပှၤလၢအကနာ်က့ၤ အီၤလၢခံတဖၣ်အဂီၢ်, ဒ်သိးအကန့ၢ်ဘၣ်တၢ်မူအထူအ ယိာ်လီၤ.

¹⁷ ဒီးစီၤပၤအထူအယိာ်, သံတသ့, အိၣ်တဖျါ, ကစၢ်တ ဂၤဃီန့ၣ်, မ်တၢ်ယူးတၢ်ယီၣ်, ဒီးတၢ်လၤကပီၤအိၣ်ဒီး အီၤအစိၤစိၤအဃၣ်ဃၣ်တက့ၢ်. အၤမ့ၣ်.

¹⁸ ဖိစီၤတံၤမသ့းဧၢ, တၢ်မၤလိာ်အံၤယဟ့ၣ်လီၤနၤ, ဒ် တၢ်စံးပာ်လၢဝံအကျိာ်လၢနဂ့ၢ်နကျိၤအသိး, ဒ်သိးလၢ အဃိန့ၣ်နကဒုးတၢ်ဒုးလၢအဂ့ၤ, ¹⁹ ဒီးအိၣ်ဒီးတၢ်နာ်, ဒီး သးလၢအသ့ၣ်ညါဒၣ်တၢ်လၢအဂ့ၤ, လၢပှၤတနီၤနီၤပာ် ကွံာ်ဝဲသတးဒီး, လၢတၢ်နာ်အဂ့ၢ်န့ၣ်အကဘီဟးဂီၤဝဲ လီၤ. ²⁰ စီၤဟူၤမ့းနဲ, ဒီးစီၤအလ့းစၣ်ဒြူးအိၣ်ဝဲလၢအကျါ လီၤ. ဒီးဒ်သိးတၢ်ကသိၣ်လိအီၤလၢအသုတဒုၣ်ဒွဲၣ်တၢ် တဂ့ၤန့ၣ်, ယဟ့ၣ်လီၤကွံာ်လံအီၤဆူမုၣ်ကီၤလံၢ်အစုပူၤ လံ.

၂

¹ မၤသးဒ်န့ၣ်ဒီး, လၢတၢ်ခဲလၢာ်အကျါယမၤလိာ်ဆိ, လၢပှၤကမၤတၢ်ဃ့ကညး, တၢ်ဘါထုကဖၣ်, တၢ်သ ကွံၢ်ကညး, တၢ်စံးထီၣ်ပတြၢၤတၢ်အဘျုးအဖှိၣ်, လၢပှၤ ကညီခဲလၢာ်အဂီၢ်, ² လၢစီၤပၤ, ဒီးကယဲၢ်ပှၤအိၣ်လၢပ ဒိၣ်အလီၢ်အဂီၢ်, ဒ်သိးပကအိၣ်ဂၢၢ်အိၣ်ဘှီၣ်, ဒီးအိၣ်ဃူ အိၣ်ဖိးလၢကယဲၢ်တၢ်ယူးတၢ်ယီၣ်ယွၤ, ဒီးတၢ်ကဒုလီၤ တံၢ်အပူၤလီၤ. ³ အဂ့ၢ်ဒ်အံၤ, တၢ်န့ၣ်မ့ၢ်တၢ်အဂ့ၤ, ဒီးတၢ် ဘၣ်ယွၤအသးလၢအအုၣ်က့ၤခီၣ်က့ၤပှၤလီၤ. ⁴ အဝဲဒၣ် န့ၣ်ဆၢဝဲလၢပှၤကညီခဲလၢာ် ကတုၤလၢတၢ်အုၣ်က့ၤ ခီၣ်က့ၤအီၤ, ဒီးကသ့ၣ်ညါထီၣ်တၢ်မ့ၢ်တၢ်တီန့ၣ်လီၤ.

⁵ အဂ့ၢ်ဒ်အံၤ, ယွၤအိၣ်ဝဲတဂၤ, ဒီးလၢယွၤဒီးပှၤကညီ အဘၢၣ်စၢၤန့ၣ်ပှၤအိၣ်ဝဲတဂၤလီၤ. ⁶ အဝဲဒၣ်န့ၣ်မ့ၢ်ပှၤ ကညီယ့ၣ်ရှူးခရံာ်တဂၤ, လၢအဟ့ၣ်လီၤဒၣ်အသးလၢ တၢ်ပှ့ၤက့ၤလၢပှၤခဲလၢာ်အဂီၢ်, လၢအကဘၣ်အုၣ်အ သးဖဲအမုၢ်အလါဘၣ်န့ၣ်လီၤ. ⁷ ဒီးလၢတၢ်န့ၣ်အဂီၢ် တၢ်ပာ်ယၤလၢပှၤစံၣ်တဲၤတဲလီၤတၢ်, ဒီးပှၤတၢ်မၢဖိ လီၤ. ယကတိၤတၢ်အမ့ၢ်အတီ, ယတကတိၤတၢ်ကဘျံး ကဘျၣ်ဘၣ်, တၢ်ပာ်ယၤလၢပှၤကလုာ်တဖၣ်အသရၣ် လၢတၢ်နာ်ဒီးတၢ်မ့ၢ်တၢ်တီအပူၤလီၤ.

⁸ မၤသးဒ်န့ၣ်ဒီး ယသးအိၣ်လၢပိာ်ခွါတဖၣ်အသးတ ဒိၣ်ထီၣ်ဘၣ်, ဒီးအသးတဒ့ဒီဘၣ်ဒီး, ကယူာ်ထီၣ်အစုစီ ဆှံဒီးဘါထုကဖၣ်တၢ်လၢတၢ်ကိးပူၤဒဲးလီၤ. ⁹ ဒ်န့ၣ်အ သိးလၢပိာ်မုၣ်တဖၣ် ကကူတၢ်သိးတၢ်ဖဲအဂ့ၤအဘၣ်, ဒီးကယၢအသးလၢတၢ်သံၣ်စူးသံၣ်ကျိၤ, ဒီးတၢ်ပာ်အ သးသပှၢ်ပှၢ်လီၤ. လၢအသံၣ်ခိၣ်သူမ့ၢ်ဂ့ၤ, လၢထူဧိၤလွဲ ဧိၤမ့ၢ်ဂ့ၤ, လၢတၢ်မျၢ်ပလဲမ့ၢ်ဂ့ၤ, လၢတၢ်ကူတၢ်သိးအပှ့ၤ ဒိၣ်မ့ၢ်ဂ့ၤ, တမ့ၢ်ဘၣ်. ¹⁰ မ့ၢ်လၢအမၤတၢ်ဂ့ၤ, ဒ်ပိာ်မုၣ်လၢ အအၢၣ်လီၤအီလီၤလၢအယူးယီၣ်ယွၤတဖၣ်, ဂ့ၤမၤဝဲအ သိးန့ၣ်လီၤ.

¹¹ မ်ပိာ်မုၣ်မၤလိတၢ်လၢတၢ်အိၣ်ဘှီၣ်ဒီး စူၢ်တၢ်ခဲလၢာ် အပူၤတက့ၢ်. ¹² ပိာ်မုၣ်သိၣ်လိနဲၣ်လိတၢ်မ့ၢ်ဂ့ၤ, ပာ်ဒိၣ်အ သးလၢပိာ်ခွါအဖိခိၣ်မ့ၢ်ဂ့ၤ, ယတဟ့ၣ်မၤဘၣ်ယဲဘၣ်, မ့မ့ၢ်လၢအကအိၣ်ဘှီၣ်လီၤ. ¹³ အဂ့ၢ်ဒ်အံၤ, တၢ်တ့လီၤဆိ စီၤအၤဒၣ်, ဒီးတ့က့ၤနီၢ်အံၣ်အုလၢခံလီၤ. ¹⁴ ဒီးတၢ်လီန့ၢ် စီၤအၤဒၣ်တမ့ၢ်ဘၣ်, မ့ၢ်ပိာ်မုၣ်ဘၣ်တၢ်လီန့ၢ်အီၤဒီး, လီၤကမၣ်တၢ်လီၤ. ¹⁵ ဘၣ်ဆၣ်ဒီးမ့ၢ်အိၣ်ဝဲဆိးဝဲလၢတၢ် နာ်, ဒီးတၢ်အဲၣ်တၢ်ကွံ, ဒီးတၢ်စီဆှံအပူၤအိၣ်ဒီးတၢ်ပာ် အသးသပှၢ်ပှၢ်ဒီး, ကတုၤလၢတၢ်အုၣ်က့ၤခီၣ်က့ၤ, လၢ အဆံးစၢ်အဖိလီၤ.

၃

¹ တၢ်ကတိၤလၢအမ့ၢ် အတီတထံၣ် မ့ၢ်အအံၤ, ပှၤတ ဂၤဂၤမ့ၢ်ဆၢကဲထီၣ်လၢ ပှၤကွၢ်တၢ်ဒီး, မ့ၢ်အဆၢတၢ်မၤ လၢအဂ့ၤတမံၤလီၤ. ² မၤသးဒ်န့ၣ်ဒီးပှၤကွၢ်တၢ်န့ၣ်ဘၣ် မ့ၢ်ပှၤလၢတၢ်ပာ် တၢ်ကမၣ်လၢအလိၤ အလီၢ်တအိၣ် ဘၣ်, ပှၤအိၣ်ဒီးအမါတဂၤဧိၤ, ပှၤခိးအသး, ပှၤပာ်အသး သပှၢ်ပှၢ်, ပှၤကဒုလီၤတံၢ်, ပှၤအဲၣ်ပှၤတမှံၤ, ပှၤသိၣ်လိ တၢ်သ့လီၤ. ³ တမ့ၢ်ဘၣ်ပှၤအိၣ်လၢစပံးထံအဃၢၤ, ဒီးပှၤ တီၢ်တၢ်ဘၣ်. မ့ၢ်ပှၤပာ်အသးခုၣ်ခုၣ်မုာ်မုာ်, ပှၤတအ့ၣ် လိာ်ဆိးက့ဘၣ်, ပှၤတသးကွံစ့လၢအလၤကပီၤတအိၣ် ဘၣ်, ⁴ ပှၤလၢအစံၣ်ညီၣ်အဟံၣ်ဒၣ်ဝဲဂ့ၤဂ့ၤဘၣ်ဘၣ်, ပှၤ လၢအသိၣ်နၢၤအဖိအလံၤ, အိၣ်ဒီးအသူၣ်ဂၢၢ်သးကျၢၤခဲ လၢာ်လီၤ. ⁵ အဂ့ၢ်ဒ်အံၤ, ပှၤဂ့ၤစံၣ်ညီၣ်အဟံၣ်ဒၣ်ဝဲဒ်လဲၣ် ဒ်လဲၣ်န့ၣ်, မ့ၢ်တသ့ၣ်ညါဘၣ်ဒီး, ကွၢ်ယွၤအတၢ်အိၣ်ဖှိၣ် ကသ့ဒ်လဲၣ်. ⁶ တမ့ၢ်ဘၣ်ပှၤကဲထီၣ်သီအပျဲၢ်အဘီၣ်ဘၣ် ဒ်သိးအသုတပာ်ထီၣ်ထီအသး, ဒီးလီၤတဲာ်ဆူမုၣ်ကီၤ လံၢ်အတၢ်လီၤကမၣ်အပူၤတဂ့ၤလီၤ. ⁷ ဒီးဘၣ်အိၣ်ဒီး တၢ်အုၣ်အသးဂ့ၤလၢပှၤအိၣ်လၢခိစ့ၢ်ကီး, ဒ်သိးတၢ်ဒုၣ် ဒွဲၣ်, ဒီးမုၣ်ကီၤလံၢ်အပျံၤသကွီၤသုတဘၣ်အီၤတဂ့ၤလီၤ.

⁸ ဒ်န့ၣ်အသိးတၢ်အိၣ်ဖှိၣ်အခ့အပှၤတဖၣ်န့ၣ်, ဘၣ်မ့ၢ် ပှၤလၢအသူၣ်ဂၢၢ်သးကျၢၤ, တမ့ၢ်ဘၣ်ပှၤအပျ့ၤခံဘ့ၣ်, ပှၤအီစပံးထံလၢအအါ, ပှၤမၤတၢ်လၢအလၤအကပီၤတ အိၣ်ဒ်သိးအကန့ၢ်စ့ဘၣ်. ⁹ ဒီးဘၣ်ဟံးဃာ်တၢ်ခူသူၣ် ဘၣ်ဃးဒီးတၢ်နာ်, လၢအသးလၢအသ့ၣ်ညါဒၣ်တၢ် လၢအဂ့ၤအပူၤလီၤ. ¹⁰ ဒီးပှၤတဖၣ်အံၤစ့ၢ်ကီး, မ်အဘၣ်ဆိ တၢ်မၤကွၢ်အီၤဒီး, လၢခံက့ၤ, ပာ်တၢ်ကမၣ်လၢအလိၤအ လီၢ်မ့ၢ်တအိၣ်ဘၣ်ဒီး, မ်အမၤတၢ်အိၣ်ဖှိၣ်အခ့အပှၤအ တၢ်တက့ၢ်.

¹¹ ဒ်န့ၣ်အသိးပိာ်မုၣ်တဖၣ်န့ၣ်, ဘၣ်မ့ၢ်ပှၤလၢအသူၣ် ဂၢၢ်သးကျၢၤ, တမ့ၢ်ဘၣ်ပှၤဒုၣ်ဒွဲၣ်တၢ်ဘၣ်, ဘၣ်မ့ၢ်ပှၤခိး အသး, ပှၤလၢအကလုၢ်တီလၢတၢ်ခဲလၢာ်န့ၣ်လီၤ.

¹² တၢ်အိၣ်ဖှိၣ်အခ့အပှၤန့ၣ်, မ်အအိၣ်ဒီးအမါတဂၤဧိၤ တက့ၢ်. မ်အစံၣ်ညီၣ်အဖိအလံၤ, ဒီးအဟံၣ်ဒၣ်ဝဲဂ့ၤဂ့ၤ ဘၣ်ဘၣ်တက့ၢ်. ¹³ အဂ့ၢ်ဒ်အံၤ, ပှၤလၢအမၤတၢ်အိၣ်ဖှိၣ် အခ့အပှၤအတၢ် ဂ့ၤဂ့ၤဘၣ်ဘၣ်တဖၣ်န့ၣ်, န့ၢ်ဘၣ်အ လီၢ်ဂ့ၤလၢအကစၢ်ဒၣ်ဝဲအဂီၢ်, ဒီးအသးခူတလ့ၢ်အါ လၢတၢ်နာ်ယ့ၣ်ရှူးခရံာ်အပူၤလီၤ.

¹⁴ ယမုၢ်လၢ်လၢယကဟဲဆူနအိၣ်ချ့ချ့ဘၣ်ဆၣ်ဒီး, ယ ကွဲးန့ၢ်နၤလၢတၢ်န့ၣ်တဖၣ်, ¹⁵ ဒ်သိးယမ့ၢ်အိၣ်ဃဲးဃဲး နာ်သက့ဒီး, နကသ့ၣ်ညါလၢနဂ့ၤမၤနသးဒ်လဲၣ်ဒ်လဲၣ် လၢယွၤအဟံၣ်ပူၤ, လၢအမ့ၢ်ယွၤလၢအမူဝဲအတၢ်အိၣ် ဖှိၣ်, တၢ်မ့ၢ်တၢ်တီအထူၣ်, ဒီးအခီၣ်ထံးလီၤ. ¹⁶ ဒီးပဘၣ် အၢၣ်လီၤအီလီၤလၢတၢ်ခူသူၣ် ဘၣ်ဃးဒီးတၢ်ယူးတၢ် ယီၣ်ယွၤန့ၣ်, မ့ၢ်အဒိၣ်အယိာ်လီၤ. ယွၤအိၣ်ဖျါထီၣ်လၢ တၢ်ဖံးတၢ်ညၣ်အပူၤ, ဘၣ်တၢ်ပာ်တီပာ်လိၤအီၤလၢသး န့ၣ်, ဘၣ်တၢ်ထံၣ်ဘၣ်အီၤလၢကလူးတဖၣ်, ဘၣ်တၢ် စံၣ်တဲၤတဲလီၤအီၤလၢပှၤကလုာ်တဖၣ်အကျါ, ဘၣ်တၢ် စူၢ်က့ၤနာ်က့ၤအီၤလၢဟီၣ်ခိၣ်ချၢ, ဘၣ်တၢ်ဟံးထီၣ်က့ၤ အီၤဆူတၢ်လၤတၢ်ကပီၤအပူၤန့ၣ်လီၤ.

၄

¹ ဘၣ်ဆၣ်ဒီးသးန့ၣ်စံးဝဲဒၣ်လီၤတံၢ်လီၤဆဲး, လၢပှၤတ နီၤနီၤကကဒံကဒါကွံာ်အသးလၢ တၢ်နာ်အပူၤ လၢခံ လၢလာ်အဆၢအကတီၢ်, ဒီးကနာ်သးတဖၣ်လၢအလီ တၢ်, ဒီးတၢ်ဝံတၢ်နါအတၢ်သိၣ်တၢ်သီ, ² ပှၤလၢအက တိၤတၢ်ကဘျံးကဘျၣ်လၢတၢ်လီတၢ်ဝ့ၤအပူၤ, အိၣ်ဒီး အသးဒၣ်ဝဲလၢအသ့ၣ်ညါဒၣ်တၢ် ဘၣ်ထးကိၢ်ဂီၤန့ၣ် လီၤ. ³ ပှၤလၢအတြီဝဲဒ်သိးပှၤသုတန့ၢ်မါန့ၢ်ဝၤတဂ့ၤ, ဒီးမၤလိာ်ဝဲလၢ ပှၤဘၣ်ဒုၣ်တၢ်အီၣ်လၢယွၤတ့လီၤဝဲဒ် သိးပှၤလၢအစူၢ်က့ၤနာ်က့ၤတၢ်ဒီး သ့ၣ်ညါတၢ်မ့ၢ်တၢ် တီတဖၣ်, ကဒိးန့ၢ်ဝဲဒီးတၢ်စံးထီၣ်ပတြၢၤတၢ်အဘျုးအ ဖှိၣ်လီၤ. ⁴ အဂ့ၢ်ဒ်အံၤ, ကယဲၢ်ယွၤအတၢ်ဘၣ်တ့တမံၤ လၢ်လၢ်မ့ၢ်အဂ့ၤ, ဒီးပှၤမ့ၢ်တူၢ်လိာ်ဒီးတၢ်စံးထီၣ်ပတြၢၤ အဘျုးအဖှိၣ်ဒီး, တဘၣ်ညိကွံာ်တၢ်နီတမံၤဘၣ်. ⁵ အ အဂ့ၢ်ဒ်အံၤ, စီဆှံဝဲလၢယွၤအကလုၢ်အကထါ, ဒီးတၢ် ဘါထုကဖၣ်အဃိလီၤ.

⁶ နမ့ၢ်ဘိးဘၣ်သ့ၣ်ညါ ဒီပုၢ်ဝဲၢ်သ့ၣ်တဖၣ်လၢတၢ်တ ဖၣ်န့ၣ်ဒီး, နကမ့ၢ်ယ့ၣ်ရှူးခရံာ်အခ့အပှၤလၢအဂ့ၤ, လၢ အဘၣ်တၢ်လုၢ်ဒိၣ်ထီၣ်အီၤလၢ တၢ်နာ်အကလုၢ်အက ထါ, ဒီးတၢ်သိၣ်တၢ်သီလၢအဂ့ၤလၢနလူၤတိၢ်န့ၢ်လံအီၤ လံန့ၣ်လီၤ. ⁷ မ့မ့ၢ်ပိာ်မုၣ်သးပှၢ်အပူကလီကလီတဖၣ် န့ၣ်, ညိကွံာ်တက့ၢ်. ဒီးသိၣ်လီၤဒၣ်နသးဆူတၢ်ယူးယီၣ် ယွၤန့ၣ်တက့ၢ်. ⁸ အဂ့ၢ်ဒ်အံၤ, တၢ်သိၣ်လိနီၢ်ခိ, မ့ၢ်အအိၣ် ဒီးအဘျုးအဖှိၣ်တစဲးစဲးလီၤ. မ့မ့ၢ်တၢ်ယူးယီၣ်ယွၤန့ၣ်, အိၣ်ဒီးတၢ်စံးပာ်ဘၣ်ဃးဒီးအအံၤတဃၣ်, ဒီးခဲကိာ်တ ဃၣ်သတးဒီး, အိၣ်ဒီးအဘျုးအဖှိၣ်လၢတၢ်ခဲလၢာ်အ ဂီၢ်လီၤ. ⁹ တၢ်ကတိၤတထံၣ်န့ၣ်, မ့ၢ်အမ့ၢ်အတီ, ဒီးဂ့ၤလၢ ပှၤခဲလၢာ်တူၢ်လိာ်အီၤလီၤ. ¹⁰ အဂ့ၢ်ဒ်အံၤ, လၢတၢ်န့ၣ်အ ဃိဒီး, ပမၤဘှံးပသး, ဒီးပဘၣ်တၢ်ဒုၣ်ဒွဲၣ်လီၤ. အဂ့ၢ်ဒ် အံၤ, ပမုၢ်လၢ်လံတၢ်လၢယွၤလၢအမူဝဲန့ၣ်လံ. အဝဲဒၣ် မ့ၢ်ပှၤအုၣ်က့ၤခီၣ်က့ၤပှၤခဲလၢာ်, လီၤဆီဒၣ်တၢ်ပှၤလၢ အစူၢ်က့ၤနာ်က့ၤတၢ်လီၤ. ¹¹ တၢ်န့ၣ်တဖၣ်မၤလိာ်ဒီးသိၣ်လိတက့ၢ်.― နဲဒၣ်အံၤ, မ်နသုတဒုးမၤတရီတပါနၤလၢနသးစၢ်အဃိ, လၢ ပှၤနီတဂၤတဂ့ၤ. မ့မ့ၢ်မ်နကဲလၢတၢ်အဒိအတဲာ်လၢပှၤ စူၢ်က့ၤနာ်က့ၤတၢ်အမဲာ်ညါလၢတၢ်ကတိၤ, လၢတၢ်ဖံး တၢ်မၤ, လၢတၢ်အဲၣ်တၢ်ကွံ, လၢတၢ်စူၢ်တၢ်နာ်, လၢတၢ် စီဆှံအပူၤတက့ၢ်. ¹³ ယတချုးတုၤဒံးဘၣ်ဒီးပာ်နသးလၢ တၢ်ကွၢ်လံာ်ကွၢ်လဲၢ်, လၢတၢ်သဆၣ်ထီၣ်ပှၤအခံ, လၢ တၢ်သိၣ်က့ၤသီက့ၤတၢ်တက့ၢ်. ¹⁴ တၢ်ဟ့ၣ်လၢအအိၣ် လၢနပူၤ, လၢတၢ်ဟ့ၣ်လီၤနၤ, ဒ်ဝံအကျိာ်အသိး, အိၣ်ဒီး ပသူၣ်က့သးပှၢ်အတၢ်ပာ်စုလၢနလိၤန့ၣ်, နတအံးတ ကွၢ်ဘၣ်ဒီး, နသုတအိၣ်တဂ့ၤ. ¹⁵ တၢ်န့ၣ်တဖၣ်ဆိကမိၣ် ဒီးဟ့ၣ်လီၤနသးလၢအီၤဒ်သိးနတၢ်သ့ထီၣ်ဘၣ်ထီၣ်က အိၣ်ဖျါလၢပှၤခဲလၢာ်အမဲာ်ညါတက့ၢ်. ¹⁶ ပလီၢ်နသး လၢနကစၢ်ဒၣ်နဲအဂ့ၢ်, ဒီးလၢတၢ်သိၣ်တၢ်သီအဂ့ၢ်တ က့ၢ်. အိၣ်လၢအပူၤဆိးလၢအပူၤတက့ၢ်. အဂ့ၢ်ဒ်အံၤ, နမ့ၢ် မၤဒ်န့ၣ်ဒီး, နကအုၣ်က့ၤခီၣ်က့ၤနသးဒၣ်နဲ, ဒီးပှၤလၢအ နၢ်ဟူတၢ်လၢနၤတဖၣ်လီၤ.

၅

¹ ဒူပှၤသးပှၢ်အလိၤတဂ့ၤ. မ့မ့ၢ်ဃ့ကညးအီၤ ဒ်ပၢ်အ သိး, ပိာ်ခွါလၢအသးစၢ်တဖၣ်န့ၣ်, ဒ်ဒီပုၢ်ဝဲၢ်ခွါအသိး,―

² ပိာ်မုၣ်သးပှၢ်တဖၣ်န့ၣ်, ဒ်မိၢ်သ့ၣ်တဖၣ်အသိး, ပိာ်မုၣ် လၢအသးစၢ်တဖၣ်န့ၣ်, ဒ်ဒီပုၢ်ဝဲၢ်မုၣ်အသိးလၢတၢ်စီဆှံ ခဲလၢာ်အပူၤတက့ၢ်. ³ ပှၤမုၣ်ကမဲလၢအမ့ၢ်မုၣ်ကမဲနီၢ် နီၢ်တဖၣ်န့ၣ်, မၤလၤမၤကပီၤအီၤတက့ၢ်. ⁴ မ့မ့ၢ်ပှၤမုၣ်က မဲတဂၤဂၤမ့ၢ်အိၣ်ဒီးအဖိအလံၤမ့ၢ်ဂ့ၤ, အလံၤအလိၤမ့ၢ် ဂ့ၤ, မ်အဝဲသ့ၣ်မၤလိဆိတၢ်ယူးယီၣ်ယွၤလၢအဟံၣ်ဒၣ် ဝဲအပူၤ, ဒီးလိးက့ၤအမိၢ်အပၢ်အဘျုးအဖှိၣ်တက့ၢ်. အဂ့ၢ် ဒ်အံၤ, တၢ်အံၤမ့ၢ်တၢ်ဘၣ်ယွၤအသးလီၤ.

⁵ ဒီးပှၤလၢအမ့ၢ်မုၣ်ကမဲနီၢ်နီၢ်, ဒီးအိၣ်သယုၢ်တဂၤ န့ၣ်, မုၢ်လၢ်တၢ်လၢယွၤအပူၤလံ, ဒီးအိၣ်ဝဲဆိးဝဲလၢတၢ် ဃ့ကညး, ဒီးတၢ်ဘါထုကဖၣ်အပူၤလၢမုၢ်ဆါဒီးလၢမုၢ် နၤလီၤ. ⁶ မ့မ့ၢ်ပိာ်မုၣ်လၢအမုာ်လၤတၢ်န့ၣ်, မူဝဲအဖၢမုၢ် ဒီး, သံလံဝဲလံ. ⁷ ဒီးတၢ်န့ၣ်တဖၣ်မၤလိာ်, ဒ်သိးတၢ်ပာ် တၢ်ကမၣ်လၢအလိၤအလီၢ်သုတအိၣ်တဂ့ၤ. ⁸ ဘၣ်ဆၣ် ဒီးပှၤမ့ၢ်တအံးတကွၢ်ဘၣ်အတၢ်ဒၣ်ဝဲ, လီၤဆီဒၣ်တၢ် အဟံၣ်ဖိဒၣ်ဝဲဒီး, မ့ၢ်အညိကွံာ်တၢ်နာ်ဒီးအၢန့ၢ်ပှၤတ နာ်ဘၣ်တၢ်တက့ၢ်လီၤ.

⁹ ပှၤမုၣ်ကမဲလၢအသး တပှဲၤထီၣ်ဒံးဘၣ်အနံၣ်ဃုဆံ န့ၣ်, မ်ပှၤသုတဆဲးလီၤအမံၤတဂ့ၤ. ပှၤလၢအဝၤအိၣ်တ့ၢ် တဂၤဧိၤ, ¹⁰ ပှၤလၢအမၤတၢ်ဂ့ၤ, ဒီးအိၣ်ဒီးတၢ်အုၣ်အသး လၢအဂီၢ်, မ့ၢ်လုၢ်အီၣ်လုၢ်အီတ့ၢ်အဖိအလံၤ, မ့ၢ်တူၢ်လိာ် တ့ၢ်ပှၤတမှံၤ, မ့ၢ်သ့စီတ့ၢ်ပှၤစီဆှံအခီၣ်, မ့ၢ်မၤစၢၤတ့ၢ်ပှၤ ဘၣ်တၢ်ဖှီၣ်တၢ်နး, မ့ၢ်ဂုာ်မၤတ့ၢ်တၢ်ဂ့ၤခဲလၢာ်ဒီး, မ်ပှၤ ဆဲးလီၤအမံၤတက့ၢ်.

¹¹ မ့မ့ၢ်ပှၤမုၣ်ကမဲလၢအသးစၢ်ဒံးတဖၣ်န့ၣ်, တြီကွံာ် အီၤတက့ၢ်. အဂ့ၢ်ဒ်အံၤ, တုၤအဒိးခရံာ်အတၢ်သိၣ်တၢ် သီတကဲလၢၤဘၣ်ဒီး, ကဆၢန့ၢ်အဝၤ, ¹² ဒီးကဘၣ်တၢ် စံၣ်ညီၣ်ဃၣ်, အဂ့ၢ်ဒ်အံၤ, ညိကွံာ်အကလုၢ်တီလၢအခီၣ် ထံးလီၤ. ¹³ ဒီးတဘျီဃီကမၤလိဝဲဒ်သိးအကဝံသးကၢၣ်, ဒီးလဲၤဝ့ၤဝီၤတဟံၣ်ဘၣ်တဟံၣ် တဟံၣ်ဘၣ်တဟံၣ် လီၤ. ဒီးဝံသးကၢၣ်အခိၣ်တလိာ်, စံးက့ၤပှၤဂၤအတၢ်စံး ဃဲၤ, ဒီးနါစိၤမၤတၢ်, ဒီးကတိၤတၢ်လၢအတဂ့ၤကတိၤ ဘၣ်လီၤ.

¹⁴ မၤသးဒ်န့ၣ်ဒီးယသးအိၣ်လၢ ပှၤမုၣ်ကမဲလၢအသး စၢ်တဖၣ်န့ၣ်, ကန့ၢ်ဝၤ, ဆံးစၢ်အဖိ, ကွၢ်အဟံၣ်အဃီ, ဒီး သုတဟ့ၣ်အလီၢ်လၢဒုၣ်ဒါကဒုၣ်ဒွဲၣ်တၢ်န့ၣ်တဂ့ၤလီၤ.

¹⁵ အဂ့ၢ်ဒ်အံၤ, ခဲကနံၣ်အံၤဒၣ်လဲာ် ပှၤတနီၤနီၤဃၣ်ကပၤ လံအသးထွဲမုၣ်ကီၤလံၢ်အခံလီၤ.

¹⁶ ပှၤလၢအစူၢ်က့ၤနာ်က့ၤတၢ်, ပိာ်မုၣ်မ့ၢ်ဂ့ၤ, ပိာ်ခွါမ့ၢ် ဂ့ၤ, မ့ၢ်အိၣ်ဒီးပှၤမုၣ်ကမဲဒီး, မ်အဝဲဒၣ်မၤစၢၤအီၤတက့ၢ်. ဒီးမ်အသုတမၤဃၢတၢ်အိၣ်ဖှိၣ်အလိၤတဂ့ၤ. ဒ်သိးတၢ် အိၣ်ဖှိၣ်ကမၤစၢၤပှၤလၢအမ့ၢ်ပမုၣ်ကမဲနီၢ်နီၢ်လီၤ. ¹⁷ ပှၤသူၣ်က့သးပှၢ်လၢအကွၢ်တၢ် ဂ့ၤဂ့ၤဘၣ်ဘၣ်တဖၣ်န့ၣ်, မ်ပှၤပာ်အီၤလၢပှၤဂ့ၤန့ၢ်ဘၣ်တၢ်ယူးတၢ်ယီၣ်ခံစး, ဒီးလီၤဆီဒၣ်တၢ်ပှၤလၢအစံၣ်တဲၤတဲလီၤတၢ်အကလုၢ်အကထါ, ဒီးသိၣ်က့ၤသီက့ၤတၢ်တဖၣ်န့ၣ်တက့ၢ်.―

¹⁸ အဂ့ၢ်ဒ်အံၤ, တၢ်ကွဲးအသးစံးဝဲဒၣ်, ဂီၤဖံးလၢအယီၢ်ဘု န့ၣ်, သုတပသံးဃာ်အထးခိၣ်တဂ့ၤ, ဒီးပှၤမၤတၢ်ဖိန့ၣ်, ဂ့ၤန့ၢ်ဘၣ်အဘူးအလဲလီၤ.

¹⁹ တၢ်ပာ်တၢ်ကမၣ်လၢပှၤသူၣ်က့သးပှၢ်အလိၤန့ၣ်, ပှၤ အုၣ်အသးခံဂၤသၢဂၤမ့ၢ်တအိၣ်ဘၣ်ဒီး, သုတတူၢ်လိာ် တဂ့ၤ.

²⁰ ပှၤလၢအမၤကမၣ်တၢ်တဖၣ်န့ၣ်, ဒ်သိးပှၤဂၤကပျံၤ တၢ်ဒီး, သိၣ်ဃီၣ်အီၤလၢပှၤခဲလၢာ်အမဲာ်ညါတက့ၢ်.

²¹ ဒီးယမၤလိာ်နၤလၢယွၤ, ဒီးယ့ၣ်ရှူးခရံာ်, ဒီးကလူးလၢ တၢ်ဃုထၢအီၤတဖၣ်အမဲာ်ညါ, လၢနတစံၣ်ညီၣ်ပာ် ဘၣ်တၢ်ဘၣ်, ဒီးနတမၤတၢ်ဒိၣ်ဆံးအါစှၤနီတမံၤဘၣ် ဒီး, တိၢ်န့ၢ်တၢ်န့ၣ်တဖၣ်တက့ၢ်.

²² ပာ်စုချ့ချ့လၢပှၤအလိၤနီတဂၤတဂ့ၤ. ဒီးပာ်ဘၣ်ဃးန သးဒီးပှၤဂၤအတၢ်ကမၣ်တဂ့ၤ. အိၣ်စီအိၣ်ဆှံနကစၢ်ဒၣ် နဲတက့ၢ်.

²³ အီလၢၤထံတဂ့ၤ. မ့ၢ်နသအိပူၤအဃိ, ဒီးနမၤတကဲ ဘၣ်တလီၢ်လီၢ်တလီၢ်လီၢ်အဃိဒီး, အီစပံးထံတစဲးတ က့ၢ်.

²⁴ ပှၤတနီၤနီၤန့ၣ် အတၢ်ဒဲးဘးအိၣ်ဖျါဝဲဒီး လဲၤပာ်ဆူ တၢ်စံၣ်ညီၣ်လီၤ. ဒီးတနီၤနီၤန့ၣ် အတၢ်ဒဲးဘးပိာ်အခံ လီၤ.

²⁵ ဒ်န့ၣ်သိးစ့ၢ်ကီး တၢ်မၤအဂ့ၤလၢ အအိၣ်ဖျါပာ်ဝဲန့ၣ် အိၣ်ဝဲ, ဒီးတၢ်လၢအတဒ်န့ၣ်အသိးဘၣ်န့ၣ်အိၣ်ခူသူၣ် တသ့ဘၣ်.

၆

¹ ဖဲဒၣ်အကုၢ်အပှၤလၢ အအိၣ်လၢနီၣ်ယိးဘိအဖီလာ် တဖၣ်န့ၣ်, မ်အပာ်အကစၢ်တဖၣ်ဒၣ်ဝဲလၢပှၤဂ့ၤဒိးတၢ် လၤကပီၤခဲလၢာ်တက့ၢ်, ဒ်သိးယွၤအမံၤ, ဒီးအတၢ်သိၣ် တၢ်သီသုတဘၣ်တၢ်ဒုၣ်ဒွဲၣ်တဂ့ၤန့ၣ်လီၤ. ² ဒီးပှၤအိၣ် ဒီးအကစၢ်တဖၣ်လၢအစူၢ်က့ၤနာ်က့ၤတၢ်န့ၣ်, မ်အသု တမၤအီၤတရီတပါ, လၢအမ့ၢ်ဒီပုၢ်ဝဲၢ်အဃိတဂ့ၤ. အခိၣ် တလိာ်, မ်အမၤအတၢ်ဆူၣ်ဒၣ်တၢ်တက့ၢ်. အဂ့ၢ်ဒ်အံၤ, ပှၤလၢအဒိးန့ၢ်တၢ်မၤဂ့ၤအီၤတဖၣ် မ့ၢ်ပှၤလၢအစူၢ်က့ၤ နာ်က့ၤတၢ်, ဒီးပှၤလၢတၢ်အဲၣ်အီၤလီၤ. သိၣ်လိတၢ်အံၤ တဖၣ်ဒီးသဆၣ်ထီၣ်အခံတက့ၢ်.

³ ပှၤမ့ၢ်သိၣ်က့ၤသီက့ၤတၢ်ဂုၤတၢ်ဂၤ, ဒီးတအၢၣ်လီၤ အီလီၤဘၣ်ပကစၢ်ယ့ၣ်ရှူးခရံာ် အကလုၢ်ဂ့ၤအကထါ ဘၣ်, ဒီးတၢ်သိၣ်တၢ်သီဘၣ်ဃးဒီးတၢ်ယူးယီၣ်ယွၤတ ဂၤဂၤဒီး, ⁴ မ့ၢ်အအိၣ်ဒီးအသးကဖိထီၣ်, ဒီးတသ့ၣ်ညါ ဘၣ်တၢ်နီတမံၤဘၣ်. မ့ၢ်အအဲၣ်ဒိးတၢ်သံကွၢ်သံဒိးဒီး တၢ်တဲးလိာ်ဃိလိာ်လၢတၢ်ကတိၤတဖၣ်အဂ့ၢ်, လၢအ မၤအိၣ်ထီၣ်တၢ်သူၣ်က့ၣ်သးက့ၣ်, တၢ်အ့ၣ်လိာ်ဆိးက့, တၢ်ဒုၣ်ဒွဲၣ်, တၢ်ဆိကမိၣ်တၢ်အၢ, ⁵ တၢ်ကတိၤလၢအ တဂိာ်တသီၣ်ဘၣ်တၢ်, ဘၣ်ဃးဒီးပှၤအသူၣ်အၢအသး သီ, ဒီးတအိၣ်ဘၣ်ဒီးတၢ်မ့ၢ်တၢ်တီဘၣ်. ဒီးပာ်တၢ်ယူး ယီၣ်ယွၤလၢတၢ်မၤအါထီၣ်တၢ်လီၤ. ⁶ ဘၣ်ဆၣ်ဒီးတၢ်ယူးယွၤအိၣ်ဒီးသူၣ်မံသးမံန့ၣ်, မ့ၢ်တၢ်မၤအါထီၣ်တၢ် ဒိၣ်မးလီၤ. ⁷ အဂ့ၢ်ဒ်အံၤ, ပတဟဲစိာ်တၢ်ဆူဟီၣ်ခိၣ်နီတ မံၤဘၣ်, ဒီးတၢ်အိၣ်ဖျါဝဲလၢပက့ၤစိာ်တၢ်တသ့စ့ၢ်ကီး ဘၣ်နီတမံၤဘၣ်. ⁸ ဒီးပတၢ်အီၣ်တၢ်အီ, ဒီးပကူပသိးမ့ၢ် အိၣ်ဒီး, ပကသူၣ်မံသးမံလၢတၢ်တဖၣ်န့ၣ်လီၤ. ⁹ မ့မ့ၢ် ပှၤလၢအသါကကဲပှၤအထူးအတီၤတဖၣ်န့ၣ်, လီၤဘၣ် လၢတၢ်လ့ပစီ, ဒီးတၢ်အပျံၤသကွီၤ, ဒီးသးကွံတၢ်အါမံၤ လၢအတဂ့ၤဘၣ်ဒီးမၤအၢတၢ်လီၤ. အဝဲန့ၣ်မၤလီၤဘျၢ ပှၤကညီလၢတၢ်ဟးဂူာ်ဟးဂီၤ, ဒီးတၢ်ဟါမူၤဟါမၢ်အ ပူၤလီၤ. ¹⁰ အဂ့ၢ်ဒ်အံၤ, တၢ်အဲၣ်စ့န့ၣ်, မ့ၢ်တၢ်အၢတၢ်သီခဲ လၢာ်အဂံၢ်လီၤ. အဝဲန့ၣ်ပှၤတနီၤနီၤဆၢန့ၢ်ဘၣ်သတး ဒီး, ဃၣ်ကွံာ်အသးလၢတၢ်နာ်, ဒီးဆဲးဖျိးအသးလၢတၢ် ကိၢ်တၢ်ဂီၤအါမံၤလီၤ.

¹¹ မ့မ့ၢ်နဲဒၣ်, ယွၤအပှၤကညီဧၢ, ဃ့ၢ်ပူၤဖျဲးကွံာ်တၢ်န့ၣ် တဖၣ်တက့ၢ်. ဒီးလူၤတၢ်တီတၢ်လိၤ, တၢ်ယူးယီၣ်ယွၤ, တၢ်စူၢ်တၢ်နာ်, တၢ်အဲၣ်တၢ်ကွံ, တၢ်ဝံသးစူၤ, တၢ်သူၣ်စူၤ သးစူၤသ့ၣ်တဖၣ်တက့ၢ်. ¹² တၢ်နာ်အတၢ်ဒုးလၢအဂ့ၤ န့ၣ်, ဒုးတက့ၢ်. ဂုာ်ဟံးန့ၢ်တၢ်မူအထူအယိာ်တက့ၢ်. တၢ် ကိးတ့ၢ်နၤလၢအဝဲန့ၣ်အဂီၢ်, ဒီးနအၢၣ်လီၤအီလီၤလံ တၢ်အၢၣ်လီၤအီလီၤအဂ့ၤလၢ ပှၤအုၣ်အသးအါဂၤအမဲာ် ညါလီၤ.

¹³ ယမၤလိာ်နၤလၢယွၤလၢ အဒုးမူတၢ်ခဲလၢာ်တဂၤအ မဲာ်ညါ, ဒီးယ့ၣ်ရှူးခရံာ်အမဲာ်ညါ, လၢအအုၣ်အသးလၢ တၢ်အၢၣ်လီၤအီလီၤအဂ့ၤလၢစီၤပီၢ်တံၤပံၤလးအမဲာ်ညါ န့ၣ်, ¹⁴ လၢနကတိၢ်န့ၢ်တၢ်မၤလိာ်လၢတၢ်အမဲၣ်ဒီးတၢ် ပာ်တၢ်ကမၣ်လၢနလိၤအလီၢ်တအိၣ်ဘၣ်, တုၤလၢပ ကစၢ်ယ့ၣ်ရှူးခရံာ်အတၢ်အိၣ်ဖျါန့ၣ်လီၤ. ¹⁵ အဝဲန့ၣ်လၢ အဆၢအကတီၢ်ဒၣ်ဝဲအပူၤန့ၣ်, ပှၤလၢအဘၣ်ဆိၣ်ဂ့ၤ ဆိၣ်ဝါ, လၢအမ့ၢ်ကစၢ်နီၢ်နီၢ်တဂၤဃီ, စီၤပၤတဖၣ်အစီၤ ပၤ, ကစၢ်တဖၣ်အကစၢ်, ¹⁶ ပှၤလၢအသံတသ့ဘၣ်တဂၤ ဃီ, လၢအအိၣ်ဝဲဆိးဝဲလၢတၢ်ကပီၤလၢပှၤသုးဘူးအ သးဆူအအိၣ်တကဲဘၣ်, ပှၤလၢပှၤကညီတထံၣ်ဘၣ်နီ တဂၤဘၣ်, ဒီးထံၣ်ဝဲတသ့ဘၣ်, ကလီၣ်ဖျါထီၣ်လီၤ. အ ဝဲဒၣ်, တၢ်လၤကပီၤ, တၢ်စိတၢ်ကမီၤ, မ်အအိၣ်ဒီးအီၤလီၤ ထူလီၤယိာ်တက့ၢ်. အၤမ့ၣ်.

¹⁷ မၤလိာ်ပှၤအထူးအတီၤလၢတၢ်အိၣ်လၢခိအံၤ, လၢအ သုတပာ်ထီၣ်ထီအသး, ဒီးသနံာ်သန့ၤအသးလၢတၢ် ထူးတၢ်တီၤလၢအတဂၢၢ်တကျၢၤဘၣ်တဂ့ၤ. မ့ၢ်လၢယွၤ လၢအဒုးအိၣ်ထီၣ်ပတၢ်ခဲလၢာ် ထူးထူးတီၤတီၤလၢပ ကမုာ်လၤလၢအပူၤန့ၣ်တဂၤတက့ၢ်. ¹⁸ မၢအမၤဂ့ၤတၢ်, ဒီးထူးထီၣ်တီၤထီၣ်လၢတၢ်မၤဂ့ၤတဖၣ်, ဒီးဟ့ၣ်တၢ်ညီ, ဒီးဟ့ၣ်တၢ်မၤစၢၤလၢပှၤဂၤန့ၣ်, ¹⁹ ဒီးပာ်ဖှိၣ်လၢအဂီၢ်ဒၣ် ဝဲတၢ်အခီၣ်ထံးဂ့ၤလၢခဲကိာ်တဃၣ်အဂီၢ်, ဒ်သိးအက ဂုာ်ဟံးန့ၢ်တၢ်မူအထူအယိာ်န့ၣ်တက့ၢ်လီၤ.

²⁰ စီၤတံၤမသ့းဧၢ, ပၢၤတၢ်လၢတၢ်ဟ့ၣ်လီၤနၤန့ၣ်တ က့ၢ်. ဟးဆှဲးတၢ်အၢတၢ်သီအတၢ်ကတိၤကလီကလီ, ဒီးတၢ်လၢပှၤကိးကမၣ်ဝဲလၢတၢ်သ့ၣ်ညါန့ၣ်, အတၢ် တဲးလိာ်ဃိလိာ်တက့ၢ်. ²¹ တၢ်န့ၣ်ပှၤတနီၤနီၤအၢၣ်လီၤ အီလီၤသတးဒီး, ဃၣ်ကွံာ်အသးလၢတၢ်နာ်လီၤ. တၢ်အ ဘျုးအဖှိၣ်န့ၣ်မ်အအိၣ်ဒီးနၤတက့ၢ်.