လံာ်စီၤပီလူးကွဲးန့ၢ်ပှၤသ့းစၤလနံဖိ အခီၣ်ထံးတဘ့ၣ်

လံာ်စီၤပီလူးကွဲးန့ၢ်ပှၤသ့းစၤလနံဖိ အခီၣ်ထံးတဘ့ၣ်

၁

¹ စီၤပီလူး, ဒီးစီၤစံလၤ, ဒီးစီၤတံၤမသ့း, စံးဘၣ်တၢ်အိၣ် ဖှိၣ်လၢသ့းစၤလနံ, လၢပၢ်ယွၤဒီးကစၢ်ယ့ၣ်ရှူးခရံာ်အ ပူၤန့ၣ်, မ်တၢ်ဘျုးတၢ်ဖှိၣ်, ဒီးတၢ်ဃူတၢ်ဖိးလၢပပၢ်ယွၤ ဒီးကစၢ်ယ့ၣ်ရှူးခရံာ်န့ၣ်ဘၣ်သုတက့ၢ်.

² ပသ့ၣ်နီၣ်ထီၣ်က့ၤသုလၢပတၢ်ထုကတဖၣ်အပူၤ, ဒီး ပစံးထီၣ်ပတြၢၤယွၤအဘျုးတထံၣ်ဃီလၢ သုခဲလၢာ်အ ဃိလီၤ. ³ ပသ့ၣ်နီၣ်ထီၣ်က့ၤတဘိယူၢ်ဃီ, သုတၢ်မၤ ဘၣ်ဃးဒီးတၢ်နာ်, ဒီးသုတၢ်ကျဲးစၢး ဘၣ်ဃးဒီးတၢ် အဲၣ်တၢ်ကွံ, ဒီးသုတၢ်ဝံသးစူၤ ဘၣ်ဃးဒီးတၢ်မုၢ်လၢ် လၢအအိၣ်လၢပကစၢ်ယ့ၣ်ရှူးခရံာ်အပူၤလၢယွၤဒီးပပၢ် အမဲာ်ညါလီၤ. ⁴ အဂ့ၢ်ဒ်အံၤ, ဒီပုၢ်ဝဲၢ်လၢယွၤအဲၣ်အီၤ သ့ၣ်ဧၢ, ပသ့ၣ်ညါသုဘၣ်တၢ်ဃုထၢက့ၤသုလီၤ. ⁵ အဂ့ၢ် ဒ်အံၤ, ပတၢ်သးခုအကစီၣ်အိၣ်ထဲတၢ်ကတိၤလၢသုဂီၢ် တမ့ၢ်ဘၣ်. မ့ၢ်အအိၣ်စ့ၢ်ကီးဒီးတၢ်စိတၢ်ကမီၤ, ဒီးသးစီ ဆှံ, ဒီးတၢ်နာ်အလၢအပှဲၤလၢအအါ, ဒ်သုသ့ၣ်ညါလၢ ပမ့ၢ်ပှၤဒ်လဲၣ်ဒ်လဲၣ်လၢသုကျါ, ဒီးလၢသုဂီၢ်အသိးန့ၣ် လီၤ. ⁶ ဒီးသုဒိးန့ၢ်တၢ်အကလုၢ်အကထါလၢတၢ်နးတၢ် ဖှီၣ်အါအပူၤ, အိၣ်ဒီးသးစီဆှံအတၢ်သးခုသတးဒီးသု ကဲထီၣ်ပှၤကွၢ်လိပှၤဒီးကစၢ်န့ၣ်လီၤ. ⁷ မၤသးဒ်န့ၣ်ဒီး သုကဲထီၣ်တၢ်အဒိအတဲာ်လၢပှၤစူၢ်က့ၤနာ်က့ၤတၢ်လၢ မၤက့းဒနံဒီးအဃါယၤခဲလၢာ်အဂီၢ်လီၤ. ⁸ အဂ့ၢ်ဒ်အံၤ, ကစၢ်အကလုၢ်ကထါဟူထီသါလီၤလၢ သုအိၣ်ထဲလၢ မၤက့းဒနံဒီးအဃါယၤအပူၤဧိၤတမ့ၢ်ဘၣ်, မ့ၢ်သုနာ်က့ၤ ယွၤန့ၣ်ဟူထီၣ်သါလီၤဝဲကိးပူၤဒဲး တုၤပစံးတၢ်အလီၢ် တအိၣ်ဘၣ်နီတမံၤဘၣ်. ⁹ အဂ့ၢ်ဒ်အံၤပှၤတဖၣ်အကစၢ် ဒၣ်ဝဲစံၣ်တဲၤတဲလီၤလၢ ပလဲၤနုာ်လၢသုကျါမ့ၢ်တၢ်ဒ် လဲၣ်ဒ်လဲၣ်, ဒီးလၢသုဃၣ်ကွံာ်သုသးလၢတၢ်ဂီၤဆူယွၤ အအိၣ် ဒ်သိးသုကမၤယွၤလၢအမူဝဲ ဒီးမ့ၢ်တၢ်နီၢ်နီၢ်တ ဂၤအတၢ်, ¹⁰ ဒီးဒ်သိးသုကကွၢ်လၢ်အဖိခွါလၢမူခိၣ်, လၢ အဒုးဂဲၤဆၢထၢၣ်က့ၤအီၤလၢတၢ်သံ, ယ့ၣ်ရှူး, လၢအထုး ထီၣ်ကွံာ်ပှၤလၢတၢ်သးဒိၣ် လၢအကဟဲဝဲအပူၤ တဂၤ အကျဲလီၤ.

၂

¹ အဂ့ၢ်ဒ်အံၤ, ပုၢ်သ့ၣ်ဝဲၢ်သ့ၣ်ဧၢ, သုသ့ၣ်ညါသုကစၢ် ဒၣ်သုဝဲ, လၢပလဲၤနုာ်ဆူသုအိၣ်တမ့ၢ်ဘၣ်တၢ်ကလီက လီဘၣ်. ² မ့မ့ၢ်ဒ်သုသ့ၣ်ညါအသိး, ပဘၣ်တၢ်နးတၢ်ဖှီၣ်, ဒီးတၢ်မၤအၢမၤနးပှၤလၢဖံလံးပံၤအပူၤ နာ်သက့ဒီး. ပ အိၣ်ဒီးပသးခူတလ့ၢ်လၢပယွၤအပူၤ ဒ်သိးပကစံၣ်တဲၤ တဲလီၤသုလၢယွၤအတၢ်သးခုအကစီၣ်, လၢတၢ်ဂ့ၤလိာ် ဘှီလိာ်အါအါကလဲာ်အပူၤလီၤ. ³ အဂ့ၢ်ဒ်အံၤ, ပသဆၣ် ထီၣ်သုခံန့ၣ်တဟဲဘၣ်လၢတၢ်နာ်ကမၣ်, တၢ်အဲၣ်တ လ့ၤအဲၣ်တဘီ, ဒီးတၢ်လီတၢ်ဝ့ၤဘၣ်. ⁴ မ့မ့ၢ်ဒ်ယွၤပာ်ပှၤ လၢအဂ့ၤအးလီၤ တၢ်သးခုအကစီၣ်လၢ ပစုပူၤအသိး န့ၣ်, ပကတိၤတၢ်ဒ်န့ၣ်သိးလီၤ. ဒ်သိးပကမၤဘၣ်ပှၤက ညီအသးတမ့ၢ်ဘၣ်, မ့ၢ်ယွၤလၢအမၤကွၢ်ပသူၣ်ပသးတ ဂၤအသးလီၤ. ⁵ အဂ့ၢ်ဒ်အံၤ, ဒ်သုသ့ၣ်ညါတၢ်အသိးန့ၣ်, ပတကတိၤလွဲဘၣ်တၢ်နီတစုဘၣ်, ပတသးကွံဘၣ်တၢ် ဘၣ်ဃးဒီးတၢ်လီတၢ်ဝ့ၤဘၣ်, ယွၤမ့ၢ်တၢ်အုၣ်အသးလၢ ပဂီၢ်လီၤ. ⁶ ပမ့ၢ်ခရံာ်အပှၤတၢ်မၢဖိသတးဒီး, ပပာ် ဒိၣ်ပာ်ထီပသးသ့ဘၣ်ဆၣ်ဒီးလၢသုမ့ၢ်ဂ့ၤ, လၢပှၤဂၤမ့ၢ် ဂ့ၤ, ပတဃုဘၣ်တၢ်လၤတၢ်ကပီၤလၢပှၤကညီဘၣ်. ⁷ မ့ မ့ၢ်ပမ့ၢ်ပှၤအသးစူၤလၢသုကျါ ဒ်ပှၤကွၢ်ဖိ အံးက့ၤကွၢ် က့ၤအဖိဒၣ်ဝဲအသိးလီၤ. ⁸ ဒ်န့ၣ်အသိး, မ့ၢ်ပအဲၣ်သုဒီး, ပသးအိၣ်ထဲလၢ ပကဟ့ၣ်သုလၢယွၤအတၢ်သးခုအက စီၣ်ဧိၤတမ့ၢ်ဘၣ်, မ့ၢ်လၢပသးသမူဒၣ်လဲာ်စ့ၢ်ကီးလီၤ. အဂ့ၢ်ဒ်အံၤ, သုမ့ၢ်ပှၤလၢပအဲၣ်အီၤလီၤ. ⁹ အဂ့ၢ်ဒ်အံၤ, ပုၢ် သ့ၣ်ဝဲၢ်သ့ၣ်ဧၢ, ပမၤတၢ်သပှၢ်ပှၢ်ဒီးပမၤတၢ်တုၤတၢ်ဘှံး ပသးန့ၣ်, သုသ့ၣ်နီၣ်ထီၣ်က့ၤလီၤ. ပမၤတၢ်လၢမုၢ်ဆါ ဆဲးလၢမုၢ်နၤ, ဒ်သိးပသုတပာ်တၢ်ဃၢလၢသုလိၤနီတ ဂၤတဂ့ၤဒီး, ပစံၣ်တဲၤတဲလီၤသုလၢ ယွၤအတၢ်သးခုအ ကစီၣ်န့ၣ်လီၤ.

¹⁰ သုမ့ၢ်ပှၤအုၣ်အသး, ဒီးယွၤစ့ၢ်ကီး, လၢပအိၣ်စီစီဆှံ ဆှံ, ဒီးတီတီလိၤလိၤ, ဒီးတၢ်ပာ်တၢ်ကမၣ်လၢပလိၤအ လီၢ်တအိၣ်ဘၣ်လၢပှၤစူၢ်က့ၤနာ်က့ၤသုဝဲအကျါဒ်လဲၣ် ဒ်လဲၣ်န့ၣ်လီၤ. ¹¹ ဒ်န့ၣ်အသိး, သုသ့ၣ်ညါလၢပသဆၣ် ထီၣ်သုခံတဂၤဒီးတဂၤ, ဒီးပမၤမုာ်ထီၣ်က့ၤသုသး, ဒီးပ အုၣ်ပသးလၢသုဒ်လဲၣ်ဒ်လဲၣ်, ဒ်ပၢ်မၤအဖိဒၣ်ဝဲအသိး,― ¹² ဒ်သိးသုကလဲၤတၢ်ဒ်အကြၢးဒီးယွၤလၢအကိးက့ၤသုဆူ အဘီအမုၢ်, ဒီးအလၤကပီၤအပူၤအသိးန့ၣ်လီၤ.

¹³ မ်ဒ်န့ၣ်ဒီး, ပစံးထီၣ်ပတြၢၤယွၤအဘျုးအဖှိၣ်တထံၣ် ဃီစ့ၢ်ကီးလီၤ. အဂ့ၢ်ဒ်အံၤ, လၢသုဒိးန့ၢ်ယွၤအကလုၢ်အ ကထါလၢသုနၢ်ဟူလၢပှၤန့ၣ် သုတဒိးန့ၢ်ဘၣ်အီၤဒ်ပှၤ ကညီအကလုၢ်အသိးဘၣ်. မ့မ့ၢ်သုဒိးန့ၢ်အီၤဒ်အမ့ၢ်နီၢ် နီၢ်အသိး, လၢယွၤလၢအမၤတၢ်လၢပှၤစူၢ်က့ၤနာ်က့ၤ တၢ်သုဝဲအပူၤအကလုၢ်န့ၣ်လီၤ. ¹⁴ အဂ့ၢ်ဒ်အံၤ, ပုၢ်သ့ၣ်ဝဲၢ် သ့ၣ်ဧၢ, သုကဲထီၣ်ပှၤကွၢ်လိယွၤအတၢ်အိၣ်ဖှိၣ်တဖၣ် လၢယ့ၣ်ရှူးခရံာ်အပူၤလၢကီၢ်ယူဒၤလီၤ. အဂ့ၢ်ဒ်အံၤ, သု ဘၣ်တၢ်စ့ၢ်ကီးလၢသုပှၤကလုာ်ဒၣ်သုဝဲအစုပူၤ, ဒ်အဝဲ သ့ၣ်ဘၣ်တၢ်လၢပှၤယူဒၤဖိအစုပူၤ, ¹⁵ လၢအမၤသံကစၢ် ယ့ၣ်ရှူးဒီးဝံတဖၣ်, ဒီးမၤအၢမၤနးပှၤ, ဒီးတလူၤဘၣ်ယွၤ အသးဘၣ်, ဒီးကဲထီၣ်ပှၤခဲလၢာ်အဒုၣ်အဒါတဖၣ်, ¹⁶ ဒီး တြီပှၤ ဒ်သိးပသုတစံၣ်တဲၤတဲလီၤတၢ်လၢပှၤကလုာ်တ ဖၣ်လၢအကတုၤလၢ တၢ်အုၣ်က့ၤခီၣ်က့ၤအီၤတဂ့ၤသ တးဒီး, မၤပှဲၤထီၣ်အတၢ်ကမၣ်တဘိယူၢ်ဃီလီၤ. ဘၣ် ဆၣ်ဒီးတၢ်သးဒိၣ်ထီၣ် ဟဲဘၣ်လၢအလိၤတုၤအလၢာ် န့ၣ်လီၤ.

¹⁷ ဒီးပုၢ်သ့ၣ်ဝဲၢ်သ့ၣ်ဧၢ, ပဝဲဒၣ်အံၤပလီၤဖးဒီးသုတမ့ၢ် ဘၣ်လၢပသူၣ်ပသးဘၣ်, မ့ၢ်လၢပမဲာ်န့ၣ်လီၤ. ဒီးပသး သယုၢ်ဘၣ်သုဒိၣ်မး, ဒီးဒ်သိးပကထံၣ်ဘၣ်သုမဲာ်ဒီး, ပ ကျဲးစၢးတၢ်သပှၢ်ပှၢ်လီၤ. ¹⁸ မၤသးဒ်န့ၣ်ဒီး, ပသးအိၣ်လၢ ပကလဲၤဆူသုအိၣ်, ယၤစီၤပီလူး, တဘျီဒီးခံဘျီ, ဒီးမုၣ် ကီၤလံၢ်တြီပှၤလီၤ. ¹⁹ အဂ့ၢ်ဒ်အံၤ, ပတၢ်မုၢ်လၢ်မ့ၢ်ဂ့ၤ, ပတၢ်သးခုမ့ၢ်ဂ့ၤ, ပတၢ်သူၣ်ဖှံသးညီအခိၣ်သလုးမ့ၢ်ဂ့ၤ, မ့ၢ်တၢ်မနုၤလဲၣ်. မ့ၢ်သုဝဲလၢကစၢ်ယ့ၣ်ရှူးခရံာ်အမဲာ် ညါဖဲအဟဲန့ၣ်တမ့ၢ်ဘၣ်ဧါ. ²⁰ အဂ့ၢ်ဒ်အံၤ, သုဝဲဒၣ်အံၤ, သုမ့ၢ်ပလၤကပီၤ, ဒီးပတၢ်သးခုန့ၣ်လီၤ.

၃

¹ မၤသးဒ်န့ၣ်ဒီးတုၤပအိၣ်တကဲလၢၤဘၣ်ဒီး, ဘၣ်ပ သးလၢ ပကအိၣ်လီၤတဲာ်တဂၤဃီလၢအၤသ့ၣ်အပူၤ,―

² ဒီးပမၢလီၤယွၤအခ့အပှၤ, ဒီးပှၤမၤဃုာ်တၢ်ဒီးပှၤလၢခ ရံာ်အတၢ်သးခုအကစီၣ်အပူၤ ပဒီပုၢ်ဝဲၢ်စီၤတံၤမသ့းတ ဂၤ, လဲၤဆူသုအိၣ်ဒ်သိးအကဒုးဆူၣ်ထီၣ်သုဂံၢ်သုဘါ, ဒီးသဆၣ်ထီၣ်သုခံလၢသုတၢ်နာ်အဂ့ၢ်အကျိၤ, ³ ဒ်သိး ပှၤသုတဟူးတဝးလၢ တၢ်နးတၢ်ဖှီၣ်တဖၣ်အံၤအဃိနီ တဂၤတဂ့ၤလီၤ. အဂ့ၢ်ဒ်အံၤ, သုသ့ၣ်ညါသုကစၢ်ဒၣ်သု ဝဲ, လၢတၢ်ပာ်လီၤပှၤလၢတၢ်အံၤအဂီၢ်လီၤ. ⁴ အဂ့ၢ်ဒ်အံၤ, လၢပအိၣ်ဒီးသုဒၣ်လဲာ်န့ၣ်, ပစံးပာ်သုလၢပကဘၣ်တၢ် နးတၢ်ဖှီၣ်, ဒ်တၢ်မၤအသး, ဒီးသုသ့ၣ်ညါအသိးန့ၣ် လီၤ. ⁵ မ်ဒ်န့ၣ်ဒီးတုၤယအိၣ်တကဲလၢၤဘၣ်ဒီး, ယမၢလီၤ တၢ်ဒ်သိးယကသ့ၣ်ညါသုတၢ်နာ်န့ၣ်လီၤ. အဂ့ၢ်ဒ်အံၤ, ပှၤလ့ပစီတၢ်တဂၤကလ့ပစီဘၣ်ဖုးသုသတးဒီး, ပတၢ် မၤကကဲထီၣ်လၢတၢ်ကလီကလီလီၤ.

⁶ မ့မ့ၢ်ခဲကနံၣ်အံၤ, စီၤတံၤမသ့းဟဲလၢ သုအိၣ်ဆူပ အိၣ်ဒီးစံးဘၣ်တဲဘၣ်ပှၤလၢတၢ်သးခုအကစီၣ်ဘၣ်ဃး ဒီးသုတၢ်နာ်, ဒီးသုတၢ်အဲၣ်တၢ်ကွံ, ဒီးသုတၢ်သ့ၣ်နီၣ် ထီၣ်က့ၤပှၤကစီဒီတဘိယူၢ်ဃီ, ဒီးသုဆၢထံၣ်ဘၣ်ပှၤဒ် ပဆၢထံၣ်ဘၣ်စ့ၢ်ကီးသုအသိးလီၤ. ⁷ မၤသးဒ်န့ၣ်ဒီး, ပုၢ် သ့ၣ်ဝဲၢ်သ့ၣ်ဧၢ, ပသးမုာ်ထီၣ်က့ၤလၢသုဂ့ၢ်လၢပတၢ်နး တၢ်ဖှီၣ်, ဒီးပတၢ်ကိၢ်တၢ်ဂီၤခဲလၢာ်အပူၤ, လၢသုတၢ်နာ် အဃိလီၤ. ⁸ အဂ့ၢ်ဒ်အံၤ, ခဲကနံၣ်အံၤ, သုမ့ၢ်အိၣ်ဂၢၢ်ဆိး ကျၢၤလၢကစၢ်အပူၤဒီး, ပမူပဝဲလီၤ. ⁹ အဂ့ၢ်ဒ်အံၤ, လၢ တၢ်သးခုခဲလၢာ်, လၢပသးခုလၢသုဃိလၢယွၤအမဲာ် ညါအဃိန့ၣ်, ပကဟ့ၣ်ဆၢ တၢ်စံးထီၣ်ပတြၢၤယွၤအ ဘျုးအဖှိၣ်လၢမနုၤတမံၤလဲၣ်. ¹⁰ ပဘါထုကဖၣ်သပှၢ်ပှၢ် လၢမုၢ်နၤဒီးလၢမုၢ်ဆါဒ်သိးပကထံၣ်ဘၣ်သုမဲာ်, ဒီးမၤ လၢထီၣ်ပှဲၤထီၣ်တၢ်လၢ အတလၢတပှဲၤဒံးဘၣ်လၢသု တၢ်နာ်အပူၤလီၤ.

¹¹ ဒီးယွၤအကစၢ်ဒၣ်ဝဲ, ပပၢ်တဂၤ, ဒီးပကစၢ်ယ့ၣ်ရှူး န့ၣ်, မ်အဟ့ၣ်လီၤပကျဲလီၤဟိဆူသုအိၣ်တက့ၢ်. ¹² ဒီးမ် ကစၢ်ဒုးအါထီၣ်သုတၢ်အဲၣ်လိာ်ကွံလိာ်သုသး, ဒီးသု တၢ်အဲၣ်ပှၤခဲလၢာ်အဂီၢ်, လၢလၢပှဲၤပှဲၤ, ဒ်ပအဲၣ်အသိး န့ၣ်တက့ၢ်. ¹³ ဒ်သိးဖဲပကစၢ်ယ့ၣ်ရှူးခရံာ်ဟဲအိၣ်ဒီးအပှၤ စီဆှံခဲလၢာ်ဒီး, သုသးကအိၣ်ဂၢၢ်ဆိးကျၢၤလၢတၢ်စီဆှံ အပူၤလၢယွၤဒီးပပၢ်အမဲာ်ညါ, ဒီးတၢ်ပာ်တၢ်ကမၣ်လၢ သုလိၤအလီၢ်သုတအိၣ်တဂ့ၤလီၤ.

၄

¹ ဒီးတၢ်ကတိၤလၢခံကတၢၢ်, ပုၢ်သ့ၣ်ဝဲၢ်သ့ၣ်ဧၢ, သုဂ့ၤ လဲၤဒ်လဲၣ်ဒ်လဲၣ်, ဒီးမၤဘၣ်ယွၤအသး, ဒ်သုဒိးန့ၢ်တၢ် လၢပအိၣ်ဒီးသုလဲၤတၢ်အသိး, ပဃ့ကညးသု, ဒီးသ ဆၣ်ထီၣ်သုခံလၢကစၢ်ယ့ၣ်ရှူးအပူၤ, ဒ်သိးသုကမၤအါ ထီၣ်န့ၣ်လီၤ. ² အဂ့ၢ်ဒ်အံၤ, ပဟ့ၣ်လီၤသုတၢ်မၤလိာ်မနုၤ မနုၤလၢကစၢ်ယ့ၣ်ရှူးအအိၣ်န့ၣ်သုသ့ၣ်ညါလီၤ. ³ အဂ့ၢ် ဒ်အံၤ, ယွၤအတၢ်ဘၣ်အသးန့ၣ်မ့ၢ်တၢ်အံၤ, ဒ်သိးသုက စီကဆှံ, ဒီးသုကဟးဆှဲးတၢ်မၤကမၣ်မုၣ်ကမၣ်ခွါ, ⁴ ဒ် သိးသုဝဲတဂၤဒီးတဂၤ, ကသ့ၣ်ညါဟံးဃာ်အသပၢၤဒၣ် ဝဲလၢတၢ်စီဆှံဒီးတၢ်လၤကပီၤအပူၤလီၤ. ⁵ လၢသးကွံ တၢ်ဘၣ်ဃးဒီးတၢ်ကလုာ်ကလိၤ, ဒ်ပှၤကလုာ်တဖၣ် လၢအတသ့ၣ်ညါဘၣ်ယွၤအသိးတမ့ၢ်ဘၣ်, ⁶ ဒ်သိးပှၤ သုတမၤကမၣ်, ဒီးလီန့ၢ်အဒီပုၢ်ဝဲၢ်အတၢ်နီတဂၤတဂ့ၤ လီၤ. အဂ့ၢ်ဒ်အံၤ, ယွၤမ့ၢ်တၢ်မၤဆၢမၤကၣ်တၢ်လၢတၢ် န့ၣ်တဖၣ်ခဲလၢာ်, ဒ်ပစံးပာ်စ့ၢ်ကီးသု, ဒီးအုၣ်ပသးအ သိးန့ၣ်လီၤ. ⁷ အဂ့ၢ်ဒ်အံၤ, တမ့ၢ်ဘၣ်ယွၤကိးက့ၤပှၤဆူ တၢ်အဲၣ်တလ့ၤအဲၣ်တဘီအပူၤဘၣ်. မ့ၢ်ဆူတၢ်စီဆှံအ ပူၤလီၤ. ⁸ မၤသးဒ်န့ၣ်ဒီး, ပှၤလၢအတပးလ့ၢ်ပးကါဘၣ် တၢ်ဘၣ်, တမ့ၢ်ဘၣ်အတပးလ့ၢ်ပးကါဘၣ်ပှၤကညီဘၣ်, မ့ၢ်ယွၤလၢအဟ့ၣ်လီၤစ့ၢ်ကီးသုလၢအသးစီဆှံလီၤ.

⁹ မ့မ့ၢ်ဒီပုၢ်ဝဲၢ်အဲၣ်လိာ်အသးအဂ့ၢ်အကျိၤန့ၣ်, ယကွဲး န့ၢ်သုအလီၢ်တအိၣ်ဘၣ်. အဂ့ၢ်ဒ်အံၤ, သုကစၢ်ဒၣ်သုဝဲ, သုဘၣ်တၢ်သိၣ်လိသုလၢယွၤ ဒ်သိးသုကအဲၣ်လိာ်ကွံ လိာ်သုသးလီၤ. ¹⁰ အဂ့ၢ်ဒ်အံၤ, သုမၤတၢ်အံၤလၢဒီပုၢ်ဝဲၢ်ခဲ လၢာ်အိၣ်လၢမၤက့းဒနံဒီကီၢ်ညါစ့ၢ်ကီးလီၤ. ဘၣ်ဆၣ် ဒီးပုၢ်သ့ၣ်ဝဲၢ်သ့ၣ်ဧၢ, ပဃ့ကညးသု ဒ်သိးသုကမၤအါ ထီၣ်အါထီၣ်လီၤ. ¹¹ ဒီးပလီၢ်သုသးသပှၢ်ပှၢ်လၢသုက အိၣ်ဂၢၢ်အိၣ်ဘှီၣ်, ဒီးမၤသုတၢ်ဒၣ်သုဝဲ, ဒီးမၤတၢ်ဖံးတၢ် လၢသုစုဒၣ်သုဝဲ, ဒ်ပမၤလိာ်တ့ၢ်သုအသိးန့ၣ်, ¹² ဒ်သိး သုကလဲၤတၢ်ဂ့ၤဂ့ၤဘၣ်ဘၣ်လၢ ပှၤအိၣ်လၢခိအမဲာ်ညါ ဒီးသုန့ၢ်ဘၣ်တၢ်အလီၢ်သုတအိၣ်နီတမံၤတဂ့ၤလီၤ.

¹³ ဒီးပုၢ်သ့ၣ်ဝဲၢ်သ့ၣ်ဧၢ, တဘၣ်ဘၣ်ပသးလၢသုတသ့ၣ် ညါဘၣ်ပှၤလၢအမံအဂ့ၢ်အကျိၤန့ၣ်, ဒ်သိးသုသးသုတ တအုး, ဒ်ပှၤဂၤလၢအတၢ်မုၢ်လၢ်တအိၣ်ဘၣ်အသိးန့ၣ် တဂ့ၤ. ¹⁴ အဂ့ၢ်ဒ်အံၤ, ပမ့ၢ်စူၢ်က့ၤနာ်က့ၤလၢယ့ၣ်ရှူးသံဝဲ, ဒီးဂဲၤဆၢထၢၣ်က့ၤဝဲဒီး, ပှၤလၢအမံလၢယ့ၣ်ရှူးအပူၤတ ဖၣ်န့ၣ်, ယွၤကဒုးဟဲက့ၤထီၣ်အီၤလၢအသိးဒ်န့ၣ်အသိး စ့ၢ်ကီးလီၤ.

¹⁵ အဂ့ၢ်ဒ်အံၤ, ပစံးဘၣ်သုလၢတၢ်အံၤ, လၢယွၤအက လုၢ်အကထါအပူၤ, လၢပှၤလၢအမူ, ဒီးအိၣ်တုၤကစၢ်ဟဲ က့ၤန့ၣ်ပဝဲဒၣ်အံၤ, ပတလဲၤထီၣ်လၢပှၤလၢအမံတဖၣ် အမဲာ်ညါဘၣ်. ¹⁶ အဂ့ၢ်ဒ်အံၤ, ကစၢ်အကစၢ်ဒၣ်ဝဲကဟဲ လီၤလၢမူခိၣ်အိၣ်ဒီးတၢ်ကိးပသူ, ဒီးကလူးအခိၣ်တဂၤ အကလုၢ်သီၣ်, ဒီးအိၣ်ဒီးယွၤအကွဲၤဒီး, ပှၤလၢအသံလၢ ခရံာ်အပူၤတဖၣ်န့ၣ်ကဂဲၤဆၢထၢၣ်ဆိဝဲ, ¹⁷ တုၤနုၤတစု, ပှၤလၢအမူဒီးအိၣ်ဒံးပဝဲဒၣ်အံၤ, တၢ်ကထုးထီၣ်န့ၢ်ပှၤ တပူၤဃီဒီးအဝဲသ့ၣ်, ဆူတၢ်အၢၣ်အပူၤ, ဒ်သိးပကသ ဂၢၢ်ကစၢ်လၢမူကပိာ်လိၤ, ဒီးပကအိၣ်ဒီးကစၢ်အစိၤစိၤ အဃၣ်ဃၣ်ဒ်န့ၣ်လီၤ.

¹⁸ မၤသးဒ်န့ၣ်ဒီး, မၤမုာ်ထီၣ်လိာ်သုသးလၢတၢ်ကတိၤ တဖၣ်အံၤတက့ၢ်.

၅

¹ ဒီးပုၢ်သ့ၣ်ဝဲၢ်သ့ၣ်ဧၢ, အမုၢ်အလါဒီးအဆၢအကတီၢ် အဂ့ၢ်အကျိၤန့ၣ်, တၢ်ကွဲးန့ၢ်သုအလီၢ်တအိၣ်ဘၣ်. ² အ ဂ့ၢ်ဒ်အံၤ, သုသ့ၣ်ညါသုကစၢ်ဒၣ်သုဝဲလီၤတံၢ်လီၤဆဲး, လၢကစၢ်အမုၢ်နံၤန့ၣ် ဟဲဝဲဒ်တၢ်ဘျၣ် လၢမုၢ်နၤအသိး လီၤ. ³ တုၤပှၤစံးလၢတၢ်ဃူတၢ်ဖိးဒီးတၢ်ဂၢၢ်တၢ်ကျၢၤ အိၣ်ဝဲဒီး, တၢ်ဟးဂူာ်ဟးဂီၤဟဲဘၣ်အီၤတကီၢ်ခါ, ဒ်တၢ် ဟုးဆါဘၣ်ပိာ်မုၣ်လၢအဒၢထီၣ်အသိးန့ၣ်, ဒီးထူၣ်ဖျဲး တသ့ဘၣ်လီၤ.

⁴ မ့မ့ၢ်သုဝဲ, ပုၢ်သ့ၣ်ဝဲၢ်သ့ၣ်ဧၢ, သုတအိၣ်ဘၣ်လၢတၢ် ခံးကျါဒ်သိးမုၢ်နံၤန့ၣ်ကချုးန့ၢ်သု ဒ်တၢ်ဘျၣ်အသိးန့ၣ် ဘၣ်. ⁵ အဂ့ၢ်ဒ်အံၤ, သုမ့ၢ်ပှၤတၢ်ကပီၤဖိ, ဒီးပှၤမုၢ်ဆါဖိခဲ လၢာ်လီၤ. တမ့ၢ်ဘၣ်ပဘၣ်ဃးဒီးမုၢ်နၤဒီးတၢ်ခံးန့ၣ် ဘၣ်. ⁶ မၤသးဒ်န့ၣ်ဒီး, မ်ပသုတမံသပ့ၤဒ်ပှၤဂၤအသိးန့ၣ် တဂ့ၤ, ဒီးမ်ပဆိးသီဒီးကီၤပသးတက့ၢ်. ⁷ အဂ့ၢ်ဒ်အံၤ, ပှၤ လၢအမံတဖၣ်န့ၣ်မံဝဲလၢမုၢ်နၤ, ဒီးပှၤလၢအအီမူၤသံး တဖၣ်န့ၣ်, အီမူၤသံးလၢမုၢ်နၤလီၤ. ⁸ မ့မ့ၢ်ပှၤလၢအဘၣ် ဃးဒီးမုၢ်ဆါပဝဲဒၣ်အံၤ, မ်ပကီၤပသးတက့ၢ်. သိးထီၣ် တၢ်နာ်ဒီးတၢ်အဲၣ်တၢ်ကွံအသဃိးတက့ၢ်. ဒီးကုာ်ထီၣ် တၢ်မုၢ်လၢ် ဘၣ်ဃးဒီးတၢ်အုၣ်က့ၤခီၣ်က့ၤ အခိၣ်ကုာ် သုးန့ၣ်တက့ၢ်. ⁹ အဂ့ၢ်ဒ်အံၤ, ယွၤတပာ်ပှၤလၢပကဘၣ် တၢ်သးဒိၣ်ထီၣ်အဂီၢ်ဘၣ်. မ့ၢ်လၢပကတုၤလၢတၢ်အုၣ် က့ၤခီၣ်က့ၤအဂီၢ်, လၢပကစၢ်ယ့ၣ်ရှူးခရံာ်အဃိ, ¹⁰ လၢ အဒိးသံအသးလၢပဂီၢ်, ဒ်သိး, ပဖုသံနီၣ်မ့ၢ်ဂ့ၤ, ပမံသပ့ၤ မ့ၢ်ဂ့ၤ, ပကမူဃုာ်ဒီးအီၤလီၤ. ¹¹ မၤသးဒ်န့ၣ်ဒီးမၤမုၣ်ထီၣ် လိာ်သုသး, ဒီးမၤထီၣ်မၤထီလိာ်သုသးသကိးသကိး, ဒ် သုမၤစ့ၢ်ကီးအသိးန့ၣ်တက့ၢ်.

¹² ဒီးပုၢ်သ့ၣ်ဝဲၢ်သ့ၣ်ဧၢ, ပှၤလၢအမၤတၢ်လၢသုကျါ, ဒီး အိၣ်လၢသုဖီခိၣ်လၢကစၢ်အပူၤ, ဒီးသိၣ်က့ၤသီက့ၤသု တဖၣ်န့ၣ်, ပဃ့ကညးသုဒ်သိးသုကသ့ၣ်ညါအီၤ, ¹³ ဒီး ပာ်ဒိၣ်အီၤလၢတၢ်အဲၣ်တၢ်ကွံအပူၤလၢ အမၤတၢ်အ ဃိဒိၣ်မးလီၤ. ဒီးအိၣ်ဃူလိာ်ဖိးလိာ်သုသးသကိးသကိး တက့ၢ်.

¹⁴ ဒီးပုၢ်သ့ၣ်ဝဲၢ်သ့ၣ်ဧၢ, ပဃ့ကညးသု, ပှၤလၢအတဒိ ကနၣ်ဘၣ်တဖၣ်န့ၣ်, သိၣ်က့ၤသီက့ၤအီၤတက့ၢ်. ပှၤလၢ အသးတခုဘၣ်တဖၣ်န့ၣ်, မၤမုာ်ထီၣ်အီၤတက့ၢ်. ပှၤလၢ အဂံၢ်စၢ်ဘါစၢ်တဖၣ်န့ၣ်, မၤစၢၤအီၤတက့ၢ်. ဝံသးစူၤပှၤ ခဲလၢာ်တက့ၢ်. ¹⁵ ဒ်သိးပှၤသုတမၤဆၢတၢ်အၢလၢပှၤနီ တဂၤတဂ့ၤဒီး, ကွၢ်သုဝဲတက့ၢ်, အခိၣ်တလိာ်, ဖဲအဘၣ် ဃးဒီးသုဝဲသ့ၣ်သကိးသကိးမ့ၢ်ဂ့ၤ, ဖဲအဘၣ်ဃးဒီးပှၤခဲ လၢာ်မ့ၢ်ဂ့ၤ, လူၤတၢ်ဂ့ၤတၢ်ဝါတထံၣ်ဃီတက့ၢ်. ¹⁶ သူၣ်ဖှံ သးညီတဘိယူၢ်ဃီတက့ၢ်. ¹⁷ ဘါထုကဖၣ်တၢ်တထံၣ် ဃီတက့ၢ်. ¹⁸ လၢတၢ်ခဲလၢာ်အပူၤန့ၣ်, စံးထီၣ်ပတြၢၤ တၢ်အဘျုးအဖှိၣ်တက့ၢ်. အဂ့ၢ်ဒ်အံၤ, အဝဲန့ၣ်မ့ၢ်တၢ် ဘၣ်ယွၤအသးလၢယ့ၣ်ရှူးခရံာ်အပူၤလၢသုဂီၢ်လီၤ. ¹⁹ သုတမၤလီၤပံာ်ကွံာ်သးန့ၣ်တဂ့ၤ.―သုတမၤတရီ တပါတၢ်ကတိၤလၢဝံအကျိာ်တဂ့ၤ. ²¹ ပစီကွၢ်တၢ်ခဲ လၢာ်, ဟံးဃာ်တၢ်အဂ့ၤတက့ၢ်. ²² ဟးဆှဲးတၢ်အၢလၢ ကိးတၢ်အက့ၢ်အဂီၤဒဲးတက့ၢ်. ²³ ဒီးတၢ်ဃူတၢ်ဖိးအက စၢ်ဒၣ်ဝဲန့ၣ်, မ်အမၤစီဆှံသုလၢလၢပှဲၤပှဲၤတက့ၢ်. ဒီးမ် တၢ်အံးက့ၤကွၢ်က့ၤသုဒီဂၤညါ, ဒ်သိးသုသး, ဒီးသုသး သမူ, ဒီးသုနီၢ်ခိခဲလၢာ်ကအိၣ်လၢတၢ်ပာ်တၢ်ကမၣ်အ လီၢ်တအိၣ်ဘၣ်, ဖဲပကစၢ်ယ့ၣ်ရှူးခရံာ်ဟဲက့ၤန့ၣ်တ က့ၢ်. ²⁴ ပှၤလၢအကိးန့ၢ်သုမ့ၢ်ပှၤလၢအကလုၢ်တီ, ဒီးအဝဲ ဒၣ်ကမၤစ့ၢ်ကီးဝဲန့ၣ်လီၤ. ²⁵ ပုၢ်သ့ၣ်ဝဲၢ်သ့ၣ်ဧၢ, ဘါထုကဖၣ်လၢပဂီၢ်တက့ၢ်. ²⁶ နၢမူပဒီပုၢ်ဝဲၢ်ခဲလၢာ်လၢတၢ်နၢမူစီဆှံတက့ၢ်. ²⁷ ဒ်သိးပှၤကဖးလံာ်တဘ့ၣ်အံၤလၢ ဒီပုၢ်ဝဲၢ်စီဆှံခဲလၢာ် အမဲာ်ညါဒီး, ယမၤလိာ်သုလၢကစၢ်အမဲာ်ညါလီၤ.

²⁸ ပကစၢ်ယ့ၣ်ရှူးခရံာ်အဘျုးအဖှိၣ်, မ်အအိၣ်ဒီးသုတ က့ၢ်. [အၤမ့ၣ်].