လံာ်စီၤပၤအခီၣ်ထံးတဘ့ၣ်.

လံာ်စီၤပၤအခီၣ်ထံးတဘ့ၣ်.

၁

¹ ဒီးစီၤဒၤဝံးအသးပှၢ်တ့ၢ်လံ. လဲၤနုာ်လံလၢနံၣ်တဖၣ် အကျါလံ. ဒီးပှၤလုးဘၢအီၤလၢတၢ်အကူအသိး, ဒီးတ လၢၤထီၣ်ဘၣ်.

² ဒီးအခ့အပှၤစံးဘၣ်အီၤ, မ်ပှၤဃုန့ၢ်ပှၤမုၣ်လိၣ်ဘိလၢ အသးစၢ်တဂၤလၢ ယကစၢ်စီၤပၤအဂီၢ်, ဒီးမ်အဆၢ ထၢၣ်လၢစီၤပၤအမဲာ်ညါ, ဒီးမ်အကဲထီၣ်အတံၤသကိး, ဒီးမ်အမံလၢနသးနါပှၢ်အပူၤ ဒ်သိးယကစၢ်စီၤပၤက လၢၤထီၣ်တက့ၢ်လီၤ.

³ ဒီးပှၤဃုဝဲလၢပမုၣ်လိၣ်ဘိအဃံအလၤလၢ အံၣ်စရ့ လးအကီၢ်ဃၢၤခဲလၢာ်, ဒီးထံၣ်န့ၢ်ဝဲလၢပှၤရှူန့ၣ်ဖိနီၢ်အ ဘံရှး, ဒီးဟဲစိာ်အီၤဆူစီၤပၤအအိၣ်လီၤ.

⁴ ဒီးပိာ်မုၣ်ဖိသၣ်န့ၣ်အက့ၢ်အဂီၤဂ့ၤမးလီၤ. ကဲထီၣ်စီၤ ပၤအတံၤသကိး, ဒီးမၤအခ့အပှၤအတၢ်န့ၣ်လီၤ. ဒီးစီၤ ပၤတသ့ၣ်ညါဘၣ်အီၤဘၣ်.

⁵ ဒီးနီၢ်ဃးကံၤအဖိခွါ စီၤအဒိနံၤယၤပာ်ထီၣ်ထီအသး ဒီးစံးဝဲဒၣ်, ယကကဲထီၣ်စီၤပၤလီၤ. ဒီးကတဲာ်ကတီၤ လ့ၣ်ကဟၣ်တဖၣ်, ဒီးပှၤဒိးကသ့ၣ်တဖၣ်, ဒီးပှၤယဲၢ်ဆံ လၢအကဃ့ၢ်ဝဲလၢအမဲာ်ညါလီၤ.

⁶ ဒီးအပၢ်တမၤတမုာ်ဘၣ်အဝဲဒၣ်အသးလၢ အစံးဘၣ် အီၤလၢနမၤဒ်န့ၣ် မ့ၢ်အဘၣ်မနုၤလဲၣ်န့ၣ်နီတဘျီဘၣ်. ဒီးအက့ၢ်အဂီၤဂ့ၤမးစ့ၢ်ကီးလီၤ. ဒီးအိၣ်ဖျဲၣ်ဝဲလၢစီၤအး ဘၡါလိၣ်အလီၢ်ခံန့ၣ်လီၤ. ⁷ ဒီးကတိၤတၢ်ဒီးနီၢ်စရူယၤ အဖိခွါစီၤယိၤအာ်, ဒီးပှၤလုၢ်တၢ်အဒိၣ် စီၤအ့ဘယၤ သၢ်, ဒီးအဝဲသ့ၣ်တဖၣ်န့ၣ် ပိာ်စီၤအဒိနံယၤအခံ, ဒီးမၤ စၢၤအီၤလီၤ.

⁸ မ့မ့ၢ်ပှၤလုၢ်တၢ်အဒိၣ်စီၤစၤဒိး, ဒီးစီၤယဟိယဒါအဖိ ခွါစီၤဘနါယၤ, ဒီးဝံနၤသၣ်, ဒီးစီၤၡံမံၤ, ဒီးစီၤရ့ဧံၤ, ဒီးစီၤ ဒၤဝံးအပှၤအဆူၣ်သ့ၣ်တဖၣ်န့ၣ် တအိၣ်ဘၣ်ဒီးစီၤအဒိ နံၤယၤဘၣ်လီၤ.

⁹ ဒီးစီၤအဒိနံၤယၤမၤသံသိ, ဒီးဂီၤဖံး, ဒီးဂီၤဖံးဖိအဘီၣ် လၢလၢၢ်စိၤဃ့လ့းအဃၢၤလၢအအိၣ်ဝဲဖဲ ဧ့ၣ်ရိၤက့လး, ဒီးကိးန့ၢ်အဒီပုၢ်ဝဲၢ်ခဲလၢာ်, စီၤပၤအဖိခွါတဖၣ်, ဒီးယူ ဒၤအပှၤကညီခဲလၢာ်, စီၤပၤအခ့အပှၤလီၤ.

¹⁰ မ့မ့ၢ်ဝံနၤသၣ်, ဒီးစီၤဘနါယၤ, ဒီးပှၤအဆူၣ်တဖၣ်, ဒီး အဒီပုၢ်ဝဲၢ်စီၤၡလိၤမိၤန့ၣ်တကိးဘၣ်ဝဲဘၣ်.

¹¹ ဒီးစီၤနၤသၣ်ကတိၤတၢ်ဒီး စီၤၡလိၤမိၤအမိၢ်နီၢ်ဘၤသ ရှ့ဘၤ, ဒီးစံးဝဲဒၣ်, နတနၢ်ဟူဘၣ်လၢနီၢ်ဃးကံၤအဖိခွါ စီၤအဒိနံၤယၤကဲစီၤပၤ, ဒီးပကစၢ်စီၤဒၤဝံးတသ့ၣ်ညါ ဘၣ်ဧါ. ¹² ဒီးခဲကနံၣ်အံၤဟဲ, ဒုးကူၣ်လၢ်ယၤလၢနၤ, ဒ်သိးနကမၤပူၤဖျဲးနသးသမူ, ဒီးနဖိခွါစီၤၡလိၤမိၤအသး သမူန့ၣ်တက့ၢ်. ¹³ ဟဲ, ဒီးလဲၤနုာ်ဆူစီၤဒၤဝံးအအိၣ်, ဒီး စံးဘၣ်အီၤ, ယကစၢ်စီၤပၤဧၢ, နဆိၣ်တၢ်ဒီးနကုၢ်ပိာ်မုၣ် ဒီးစံး, နဖိခွါစီၤၡလိၤမိၤကကဲစီၤပၤလၢယလီၢ်ခံ သပှၢ် တၢၢ်ဒီးကဆ့ၣ်နီၤလၢယလီၢ်ပစိာ်န့ၣ်တမ့ၢ်ဘၣ်ဧါ. ဒီး စီၤအဒိနံၤယၤကဲစီၤပၤန့ၣ် မ့ၢ်အဘၣ်မနုၤလဲၣ်. ¹⁴ ကွၢ် ကွၢ်, နကတိၤတၢ်ဒီးစီၤပၤအဖၢမုၢ်ဒီး, ယကဟဲစ့ၢ်ကီး လၢနလီၢ်ခံ, ဒီးမၤဂၢၢ်မၤကျၢၤနတၢ်ကတိၤလီၤ.

¹⁵ ဒီးနီၢ်ဘၤသရှ့ၤဘၤ လဲနုာ်ဆူစီၤပၤအအိၣ်ဆူဒၢးပူၤ, ဒီးစီၤပၤအသးပှၢ်ဒိၣ်နီၢ်မးလီၤ. ဒီးပှၤရှူန့ၣ်ဖိနီၢ်အဘံၡး န့ၣ်မၤစီၤပၤအခ့အပှၤအတၢ်လီၤ. ¹⁶ ဒီးနီၢ်ဘၤသရှ့ၤဘၤ ဆုးလီၤအခိၣ်, ဒီးတီၤလီၤကဒွံကျိာ်လၢစီၤပၤအမဲာ်ညါ, ဒီးစီၤပၤစံးဝဲဒၣ်, ဘၣ်နသးလၢမနုၤလဲၣ်. ဒီးစံးဘၣ်အီၤ, ယကစၢ်ဧၢ, ¹⁷ နဆိၣ်တၢ်ဒီးနကုၢ်ပိာ်မုၣ်လၢယွၤနကစၢ် အမဲာ်ညါ, ဒီးနစံး, နဖိခွါစီၤၡလိၤမိၤကကဲစီၤပၤလၢယ လီၢ်ခံသပှၢ်တၢၢ်, ဒီးကဆ့ၣ်နီၤလၢယလီၢ်ပစိာ်လီၤ. ¹⁸ ဒီး ခဲကနံၣ်အံၤ, ကွၢ်ကွၢ်, စီၤအဒိနံယၤကဲစီၤပၤ, ဒီးခဲကနံၣ် အံၤယကစၢ်စီၤပၤဧၢ, နတသ့ၣ်ညါဘၣ်. ¹⁹ ဒီးမၤသံလံ ဂီၤဖံး, ဒီးဂီၤဖံးဖိအဘီၣ်, ဒီးသိအါအါကလဲာ်, ဒီးကိးန့ၢ် လံစီၤပၤအဖိခွါခဲလၢာ်, ဒီးပှၤလုၢ်တၢ်အဒိၣ်စီၤအ့ဘယၤ သၢ်, ဒီးပှၤသုးမုၢ်အခိၣ်စီၤယိၤအာ်လီၤ. မ့မ့ၢ်နခ့နပှၤစီၤ ၡလိၤမိၤန့ၣ်တကိးဘၣ်ဝဲဘၣ်.

²⁰ ဒီးနဲဒၣ်အံၤယကစၢ်စီၤပၤဧၢ, အံၣ်စရ့လးအမဲာ်ခဲလၢာ် အိၣ်ဝဲလၢနလိၤ, ဒ်သိးလၢယကစၢ်စီၤပၤအလီၢ်ခံန့ၣ် မတၤမတၤကဆ့ၣ်နီၤလၢအလီၢ်ပစိာ်န့ၣ် နကစံးဘၣ် အီၤလီၤ. ²¹ နမ့ၢ်တမၤဘၣ်ဒ်န့ၣ်ဒီး တုၤယကစၢ်စီၤပၤ ကမံဒီးအပၢ်တဖၣ်ဒီး, တၢ်ကမၤအသးလၢတၢ်ကပာ် ယၤဒီးယဖိခွါလၢပှၤတၢ်ဒဲးဘးဖိလီၤ.

²² ဒီးကွၢ်ကွၢ်, ကတိၤဝဲဒီးစီၤပၤအဖၢမုၢ်ဒီး, ဝံနၤသၣ်ဟဲ နုာ်ဝဲစ့ၢ်ကီးလီၤ. ²³ ဒီးပှၤဒုးနဲၣ်စီၤပၤ, ဒီးစံးဝဲဒၣ်, ကွၢ်ကွၢ်, ဝံနၤသၣ်လီၤ. ဒီးဟဲနုာ်ဝဲလၢစီၤပၤအအိၣ်ဒီးတီၤလီၤက ဒွံကျိာ်ကျးလီၤအမဲာ်လၢဟီၣ်ခိၣ်လီၤ.

²⁴ ဒီးစီၤနၤသၣ်စံးဝဲဒၣ်, ယကစၢ်စီၤပၤဧၢ, နစံးလၢစီၤအ ဒိနံၤယၤကကဲစီၤပၤလၢယလီၢ်ခံ, ဒီးကဆ့ၣ်နီၤလၢယ လီၢ်ပစိာ်န့ၣ်စ့ၢ်ကီးဧါ. ²⁵ အဂ့ၢ်ဒ်အံၤ, လဲၤလီၤမုၢ်မဆါ အံၤဒီး မၤသံဂီၤဖံး, ဒီးဂီၤဖံးဖိအဘီၣ်, ဒီးသိအါအါက လဲာ်, ဒီးကိးန့ၢ်စီၤပၤအဖိခွါခဲလၢာ်, ပှၤသုးမုၢ်အခိၣ်တ ဖၣ်, ဒီးပှၤလုၢ်တၢ်အဒိၣ်, စီၤအ့ဘယၤသၢ်, ဒီးကွၢ်ကွၢ်, အဝဲသ့ၣ်တဖၣ်န့ၣ် အီၣ်တၢ်ဒီးအီတၢ်လၢအမဲာ်ညါ, ဒီး စံးဝဲဒၣ်, မ်စီၤအဒိနံၤယၤမူဝဲတက့ၢ်. ²⁶ မ့မ့ၢ်တၢ်လၢယၤ အံၤ, ယဲဒၣ်နခ့နပှၤ, ဒီၤပှၤလုၢ်တၢ်အဒိၣ်စီၤစၤဒိး, ဒီးစီၤ ယဟိၤယဒါအဖိခွါစီၤဘနါယၤ, ဒီးနခ့နပှၤစီၤၡလိၤမိၤ န့ၣ် တကိးဘၣ်ဝဲဘၣ်, ²⁷ ဒီးမ့ၢ်တၢ်တမံၤအံၤမၤအသး လၢယကစၢ်စီၤပၤ, ဒီးမ့ၢ်မတၤမတၤကဆ့ၣ်နီၤလၢယ ကစၢ်စီၤပၤအလီၢ်ပစိာ်လၢအလီၢ်ခံန့ၣ် နတဘိးဘၣ် သ့ၣ်ညါနဲနခ့နပှၤစ့ၢ်ကီးဘၣ်ဧါ.

²⁸ ဒီးစီၤပၤဒၤဝံးစံးဆၢတၢ်, ဒီးစံးဝဲဒၣ်, ကိးန့ၢ်ယၤလၢ နီၢ်ဘၤသရှ့ၤဘၤတက့ၢ်. ဒီးအဝဲဒၣ်ဟဲနုာ်လၢစီၤပၤအ အိၣ်, ဒီးဆၢထၢၣ်လၢစီၤပၤအမဲာ်ညါလီၤ.

²⁹ ဒီးစီၤပၤဆိၣ်တၢ်ဒီးစံးဝဲဒၣ်, ယွၤလၢအပှ့ၤက့ၤယသး လၢကယဲၢ်တၢ်နးတၢ်ဖှီၣ်အပူၤန့ၣ်မူဝဲ, ³⁰ ဒ်ယဆိၣ်တၢ် ဒီးနၤလၢယွၤအံၣ်စရ့လးအကစၢ်အမဲာ်ညါ, ဒီးစံး, နဖိ ခွါစီၤၡလိၤမိၤကကဲထီၣ်စီၤပၤလၢ ယလီၢ်ခံသပှၢ်တၢၢ်, ဒီးကဆ့ၣ်နီၤလၢယလီၢ်ပစိာ် လၢယလီၢ်အသိးန့ၣ်လၢ မုၢ်မဆါတနံၤအံၤယကမၤသပှၢ်တၢၢ်ဒ်န့ၣ်အသိးလီၤ.

³¹ ဒီးနီၢ်ဘၤသရှ့ၤဘၤဆုးလီၤအခိၣ် ကျးလီၤအမဲာ်လၢ ဟီၣ်ခိၣ်, ဒီးတီၤလီၤကဒွံကျိာ်လၢစီၤပၤအမဲာ်ညါ, ဒီးစံး ဝဲဒၣ်, မ်ယကစၢ်စီၤပၤဒၤဝံးမူဝဲလီၤထူလီၤယိာ်တက့ၢ်.

³² ဒီးစီၤဒၤဝံးစံးဝဲဒၣ်, ကိးန့ၢ်ယၤလၢပှၤလုၢ်တၢ်အဒိၣ် စီၤစၤဒိး, ဒီးဝံနၤသၣ်, ဒီးစီၤယဟိၤယဒါအဖိခွါစီၤဘနါ ယၤတက့ၢ်. ဒီးအဝဲသ့ၣ်ဟဲဆူစီၤပၤအအိၣ်လီၤ.

³³ ဒီးစီၤပၤစံးဘၣ်အီၤ, ဟံးန့ၢ်သုကစၢ်အခ့အပှၤအိၣ်ဒီး သု, ဒီးဒုးဒိးယဖိခွါစီၤၡလိၤမိၤလၢယကသ့ၣ်လၤဒၣ် ယဲ, ဒီးဒုးလဲၤအီၤဆူကံဃိၣ်တက့ၢ်. ³⁴ ဒီးမ်ပှၤလုၢ်တၢ်အ ဒိၣ်စီၤစၤဒိး, ဒီးဝံနၤသၣ်ဖှူအီၤလၢစီၤပၤလၢအံၣ်စရ့လး အဖီခိၣ်ဖဲန့ၣ်တက့ၢ်. ဒီးအူကွဲၤ, ဒီးစံး, မ်စီၤပၤၡလိၤမိၤမူ ဝဲတက့ၢ်. ³⁵ ဒီးသုဘၣ်ဟဲထီၣ်လၢအလီၢ်ခံ ဒ်သိးအက ဟဲဆ့ၣ်နီၤလၢယလီၢ်ပစိာ်လီၤ. ဒီးအဝဲဒၣ်ကကဲထီၣ်စီၤပၤလၢယလီၢ်, ဒီးယမၤလိာ်ယဲဒ်သိးအကကဲထီၣ် လၢအံၣ်စရ့လး, ဒီးယူဒၤအခိၣ်လီၤ.

³⁶ ဒီးစီၤယဟိၤယဒါအဖိခွါစီၤဘနါယၤ စံးဆၢစီၤပၤဒီး စံးဝဲဒၣ်, အၤမ့ၣ်, ယကစၢ်စီၤပၤအကစၢ်ယွၤန့ၣ် မ်အစံး ဒ်န့ၣ်အသိးတက့ၢ်. ³⁷ ဒ်ယွၤအိၣ်တ့ၢ်ဝဲဒီးယကစၢ်စီၤပၤ အသိးန့ၣ် မ်အအိၣ်ဒီးစီၤၡလိၤမိၤဒ်န့ၣ်အသိးတက့ၢ်. ဒီး မ်အမၤအလီၢ်ပစိာ်ဒိၣ်န့ၢ် ယကစၢ်စီၤပၤအလီၢ်ပစိာ်န့ၣ် တက့ၢ်.

³⁸ ဒီးပှၤလုၢ်တၢ်အဒိၣ်စီၤစၤဒိး, ဒီးဝံနၤသၣ်, ဒီးစီၤယဟိၤ ယဒါအဖိခွါစီၤဘနါယၤ, ဒီးပှၤကရံသးဖိ, ဒီးပှၤပလ့ သးဖိလဲၤလီၤဝဲ, ဒီးဒုးဒိးစီၤၡလိၤမိၤလၢစီၤဒၤဝံးအက သ့ၣ်လၤ, ဒီးဟဲစိာ်အီၤဆူကံဃိၣ်လီၤ.

³⁹ ဒီးပှၤလုၢ်တၢ်အဒိၣ်စီၤစၤဒိးဟံးန့ၢ် သိအနၢၤတကျီ လၢဒဲပူၤ, ဒီးဖှူစီၤၡလိၤမိၤ, ဒီးပှၤအူကွဲၤ, ဒီးပှၤဂီၢ်မုၢ်ခဲ လၢာ်စံးဝဲဒၣ်, မ်စီၤပၤစီၤၡလိၤမိၤမူဝဲတက့ၢ်. ⁴⁰ ဒီးပှၤဂီၢ် မုၢ်ခဲလၢာ်ဟဲပိာ်ထီၣ်အခံ, ဒီးပှၤဂီၢ်မုၢ်အူပံ, ဒီးသးခုလၢ တၢ်သးခုဖးဒိၣ်, ဒီးဟီၣ်ခိၣ်တသြီထီၣ်လၢအသီၣ်လီၤ.

⁴¹ ဒီးစီၤအဒိနံယၤ, ဒီးကယဲၢ်ပှၤလၢအဒိးကိးအသးခဲ လၢာ်လၢအအိၣ်ဒီးအီၤန့ၣ်နၢ်ဟူဝဲဖဲအအီၣ်တၢ်ဝံၤဝဲ, ဒီး စီၤယိၤအာ်နၢ်ဟူကွဲၤအသီၣ်, ဒီးစံးဝဲဒၣ်, ဝ့ၢ်တၢထီၣ်တၢ လီၤအသီၣ်န့ၣ်မ့ၢ်မနုၤလဲၣ်.

⁴² ဒီးကတိၤတၢ်အဖၢမုၢ်ဒီး, ကွၢ်ကွၢ်, ပှၤလုၢ်တၢ်အဒိၣ် စီၤအ့ဘယၤသၢ်အဖိခွါစီၤယိနၤသၣ်ဟဲဝဲ, ဒီးစီၤအဒိနံၤ ယၤစံးဘၣ်အီၤ, ဟဲနုာ်တက့ၢ်. အဂ့ၢ်ဒ်အံၤ, နမ့ၢ်ပှၤအ ဝ့ၤ, ဒီးစိာ်တၢ်အကစီၣ်အဂ့ၤလီၤ.

⁴³ ဒီးစီၤယိနၤသၣ်စံးဆၢတၢ် ဒီးစံးဘၣ်စီၤအဒိနံၤယၤ, မ့ၢ်မးပကစၢ်စီၤပၤဒၤဝံး ပာ်လံစီၤၡလိၤမိၤလၢစီၤပၤ လီၤ. ⁴⁴ ဒီးစီၤပၤမၢလီၤဒီးအီၤလၢ ပှၤလုၢ်တၢ်အဒိၣ်စီၤ စၤဒိး, ဒီးဝံနၤသၣ်, ဒီးစီၤယဟိၤယဒါအဖိခွါစီၤဘနါ ယၤ, ဒီးပှၤကရံသးဖိ, ဒီးပှၤပလ့သးဖိ, ဒီးအဝဲသ့ၣ်တဖၣ် န့ၣ်ဒုးဒိးအီၤလၢစီၤပၤအကသ့ၣ်လၤန့ၣ်, ⁴⁵ ဒီးပှၤလုၢ် တၢ်အဒိၣ်စီၤစၤဒိး, ဒီးဝံနၤသၣ်န့ၣ်ဖှူအီၤလၢစီၤပၤလၢ ကံဃိၣ်အပူၤ, ဒီးဟဲက့ၤထီၣ်ဖဲန့ၣ်လၢ အသူၣ်ခုသးခု, ဒီးဝ့ၢ်တသြီထီၣ်လီၤ. အန့ၣ်မ့ၢ်တၢ်သီၣ်လၢသုနၢ်ဟူ လီၤ.

⁴⁶ ဒီးစီၤၡလိၤမိၤဆ့ၣ်နီၤလၢ ဘီဧိၤမုၢ်ဧိၤအလီၢ်ပစိာ်စ့ၢ် ကီးလီၤ. ⁴⁷ ဒီးစီၤပၤအခ့အပှၤဟဲစံးထီၣ်ပတြၢၤပကစၢ် စီၤပၤဒၤဝံး, ဒီးစံးဝဲဒၣ်, မ်နကစၢ်မၤစီၤၡလိၤမိၤအမံၤဂ့ၤ န့ၢ်နမံၤ, ဒီးမၤအလီၢ်ပစိာ်ဒိၣ်န့ၢ်နလီၢ်ပစိာ်န့ၣ်တက့ၢ်. ဒီးစီၤပၤဘူၣ်ထီၣ်ဘါထီၣ်လၢအလီၢ်မံပူၤလီၤ. ⁴⁸ ဒီးစီၤ ပၤစံးစ့ၢ်ကီးဒ်အံၤ, ယွၤအံၣ်စရ့လးအကစၢ်လၢအပာ်ပှၤ တဂၤဆ့ၣ်နီၤလၢယလီၢ်ပစိာ်လၢ မုၢ်မဆါတနံၤအံၤ, ဒီး ယမဲာ်ထံၣ်ဘၣ်ဝဲန့ၣ်, မ်အဘၣ်တၢ်စံးထီၣ်ပတြၢၤအီၤ တက့ၢ်.

⁴⁹ ဒီးပှၤလၢအဒိးကိးအသးလၢ အအိၣ်ဝဲဒီးစီၤအဒိနံၤယၤ ခဲလၢာ်န့ၣ်ပျံၤတၢ်, ဒီးဂဲၤဆၢထၢၣ်, ဒီးလဲၤတၢ်တဂၤအ ကျဲဒၣ်ဝဲ, တဂၤအကျဲဒၣ်ဝဲန့ၣ်လီၤ.

⁵⁰ ဒီးစီၤအဒိနံၤယၤပျံၤတၢ် လၢစီၤၡလိၤမိၤအဃိ, ဒီးဂဲၤ ဆၢထၢၣ်, ဒီးလဲၤတၢ်, ဒီးဟံးဃာ်တၢ်လုၢ်လီၢ်အနၢၤတ ဖၣ်န့ၣ်လီၤ.

⁵¹ ဒီးပှၤဒုးနဲၣ်စီၤၡလိၤမိၤဒီးစံးဝဲဒၣ်, ကွၢ်ကွၢ်, စီၤအဒိနံၤ ယၤပျံၤစီၤၡလိၤမိၤဒီးကွၢ်ကွၢ်, ဟံးဃာ်ဝဲလၢတၢ်လုၢ် လီၢ်အနၢၤတဖၣ်, ဒီးစံးဝဲဒၣ်, မ်စီၤၡလိၤမိၤဆိၣ်တၢ်ဒီး ယၤလၢမုၢ်မဆါတနံၤအံၤလၢအတမၤသံဘၣ်အခ့အပှၤ လၢနးဘၣ်န့ၣ်တက့ၢ်.

⁵² ဒီးစီၤၡလိၤမိၤစံးဝဲဒၣ်, မ့ၢ်ကဲထီၣ်ပှၤအဂ့ၤအဘၣ်ဒီး အခိၣ်သူတဘိဧိၤတလီၤတဲာ်ဘၣ်ဆူဟီၣ်ခိၣ်ဘၣ်. မ့မ့ၢ် တၢ်အၢမ့ၢ်အိၣ်လၢအပူၤဒီး, ကဘၣ်သံလီၤ.

⁵³ ဒီးစီၤၡလိၤမိၤမၢလီၤတၢ်, ဒီးပှၤဟဲစိာ်လီၤအီၤလၢတၢ် လုၢ်လီၢ်, ဒီးဟဲဝဲ, ဒီးတီၤလီၤကဒွံကျိာ်လၢစီၤၡလိၤမိၤ အမဲာ်ညါ, ဒီးစီၤၡလိၤမိၤစံးဘၣ်အီၤ, လဲၤဆူနဟံၣ်တ က့ၢ်.

၂

¹ ဒီးစီၤဒၤဝံးအမုၢ်နံၤလၢအကသံန့ၣ် သုးဘူးအသး, ဒီး မၤလိာ်အဖိခွါစီၤၡလိၤမိၤ, ဒီးစံးဝဲဒၣ်, ² ယပိာ်ပှၤဟီၣ် ခိၣ်ဖိခဲလၢာ်အကျဲလီၤ. ပာ်ဆူၣ်နသး, ဒီးပာ်ပိာ်ခွါနသး တက့ၢ်. ³ ဒီးကွၢ်ယွၤနကစၢ်အတၢ်ကွၢ်, ဒ်သိးနကပိာ်အ ကျဲတဖၣ်, ဒီးတိၢ်န့ၢ်အတၢ်မၤလိာ်, ဒီးအတၢ်သိၣ်တၢ် သီ, ဒီးအတၢ်စံၣ်ညီၣ်, ဒီးအတၢ်အုၣ်အသး, ဒ်တၢ်ကွဲး အသးလၢစီၤမိၤရှ့အတၢ်သိၣ်တၢ်သီအပူၤ, ဒ်သိးနက ဘီၣ်ထီၣ်ညီထီၣ်လၢကယဲၢ်တၢ်လၢနမၤအီၤ, ဒီးလၢက ယဲၢ်တၢ်လၢနဃၣ်နသးဆူအအိၣ်န့ၣ်တက့ၢ်. ⁴ ဒ်သိး ယွၤကဒုးအိၣ်ဂၢၢ်ဆိးကျၢၤအတၢ်ကတိၤလၢ အကတိၤ တၢ်လၢယဂ့ၢ်ယကျိၤ, ဒီးစံးဝဲဒၣ်, နဖိနလံၤမ့ၢ်တိၢ်န့ၢ်အ ကျဲဒ်သိးအကလဲၤတၢ်လၢ ယမဲာ်ညါလၢတၢ်မ့ၢ်တၢ်တီ, လၢအသးဒီးဖျၢၣ်ညါ, ဒီးလၢအသးတုၤအလၢာ်ဒီး, (စံး ဝဲဒၣ်,) ပှၤဘၣ်ဃးဒီးနၤလၢအံၣ်စရ့လးအလီၢ်ပစိာ်န့ၣ် တလီၤတူာ်ဘၣ်လီၤ.

⁵ ဒီးနီၢ်စရူယၤအဖိခွါစီၤယိၤအာ်မၤယၤဒ်လဲၣ်န့ၣ် နသ့ၣ် ညါစ့ၢ်ကီးလီၤ. မၤသံအံၣ်စရ့လးအပှၤသုးမုၢ်အခိၣ်ခံဂၤ, စီၤန့ၢ်အဖိခွါစီၤအဘံန့ၢ်, ဒီးစီၤဃ့သ့ၢ်အဖိခွါစီၤဧမါစၤ, ဒီးမၤသံဝဲ, ဒီးဂၢ်လီၤတၢ်ဒုးသုးအတၢ်သွံၣ်လၢတၢ်ဃူ တၢ်ဖိးအပူၤ, ဒီးပာ်တၢ်ဒုးသုးအတၢ်သွံၣ်လၢအယီၢ်တ ကိးအလိၤလၢအအိၣ်ဝဲလၢအယီၢ်ဒ့, ဒီးလၢအခီၣ်ဖံး ပူၤလၢအအိၣ်ဝဲလၢအခီၣ်န့ၣ်လီၤ.

⁶ ဒီးမၤတၢ်ဒ်နတၢ်ကူၣ်သ့အသိးန့ၣ်, ဒီးဒုးလဲၤလီၤအ ခိၣ်ဝါဆူပျုၤပူၤအိၣ်ဒီးတၢ်ဃူတၢ်ဖိးတဂ့ၤ.

⁷ ဒီးမၤဘျုးမၤဖှိၣ်ပှၤကံလဧးဖိ စီၤဘၢ်စံးလဲအဖိခွါတ ဖၣ်, ဒီးဒုးအိၣ်အီၤလၢပှၤလၢအအီၣ်တၢ်လၢနစီၢ်နီၤခိၣ် တဖၣ်အကျါန့ၣ်တက့ၢ်. အဂ့ၢ်ဒ်အံၤ, လၢယဃ့ၢ်လၢန ဒီပုၢ်ဝဲၢ်စီၤအးဘၡါလိၣ်အမဲာ်ညါန့ၣ် ဟဲဝဲဆူယအိၣ် ဒ်န့ၣ်လီၤ.

⁸ ဒီးကွၢ်ကွၢ်, ပှၤဘံၣ်ယၤမံၣ်ဖိစီၤက့ရၤအဖိခွါစီၤၡံမံၤ ဘၣ်ဃးဒီးဘၤဃူရံၣ်တဂၤလၢ အဆိၣ်အၢယၤလၢတၢ် ဆိၣ်အၢလၢမုၢ်တနံၤလၢ ယလဲၤဆူမၤဃန့ၤအပူၤန့ၣ် အိၣ်ဝဲဒီးနၤလီၤ. ဘၣ်ဆၣ်ဒီးဟဲလီၤသဂၢၢ်ယၤဖဲယၢ်ဒ့ၣ်, ဒီးယဆိၣ်တၢ်ဒီးအီၤလၢယွၤအမဲာ်ညါ, ဒီးစံး, ယတမၤ သံဘၣ်နၤလၢနးဘၣ်. ⁹ ဒီးခဲကနံၣ်အံၤပာ်အီၤလၢအ တၢ်ဒဲးဘးတအိၣ်ဘၣ်န့ၣ်တဂ့ၤ. အဂ့ၢ်ဒ်အံၤ, နကူၣ်တၢ် သ့နဲ, ဒီးနကမၤအီၤဒ်လဲၣ်ဒ်လဲၣ်န့ၣ်နသ့ၣ်ညါလီၤ. ဒုး လဲၤလီၤအခိၣ်ဝါဆူပျုၤပူၤလၢတၢ်သွံၣ်အပူၤန့ၣ်တက့ၢ်.

¹⁰ ဒီးစီၤဒၤဝံးမံဝဲဒီးအပၢ်တဖၣ်, ဒီးပှၤခူၣ်လီၤကွံာ်အီၤလၢ စီၤဒၤဝံးအဝ့ၢ်ပူၤန့ၣ်လီၤ.

¹¹ ဒီးမုၢ်နံၤတဖၣ်လၢ စီၤဒၤဝံးကဲစီၤပၤလၢအံၣ်စရ့လးအ ဖီခိၣ်န့ၣ် မ့ၢ်အနံၣ်လွံၢ်ဆံလီၤ. ကဲစီၤပၤနွံနံၣ်လၢဃ့ ဘြိၣ်အပူၤ, ဒီးကဲစီၤပၤသၢဆံသၢနံၣ်လၢယရူၤၡလ့ၣ် အပူၤလီၤ.

¹² ဒီးစီၤၡလိၤမိၤဆ့ၣ်နီၤဝဲလၢ အပၢ်စီၤဒၤဝံးအလီၢ်ပစိာ်, ဒီးအဘီအမုၢ်ဂၢၢ်ထီၣ်ကျၢၤထီၣ်ဒိၣ်မးလီၤ.

¹³ ဒီးနီၢ်ဃးကံၤအဖိခွါစီၤအဒိနံၤယၤ ဟဲဆူစီၤၡလိၤမိၤ အမိၢ်နီၢ်ဘၤသရှ့ၤဘၤအအိၣ်, ဒီးအဝဲဒၣ်စံးဘၣ်အီၤ, န ဟဲမုာ်မုာ်စ့ၢ်ကီးဧါ. ဒီးစံးဆၢဝဲဒၣ်, မုာ်မုာ်လီၤ. ¹⁴ ဒီးစံးဝဲ ဒၣ်, ယကတိၤတၢ်ဒီးနၤအလီၢ်အိၣ်, ဒီးစံးဝဲဒၣ်, ကတိၤ တၢ်တက့ၢ်, ¹⁵ ဒီးစံးဝဲဒၣ်, နသ့ၣ်ညါလၢဘီဧိၤမုၢ်ဧိၤမ့ၢ် ယတၢ်လီၤ. ဒီးအံၣ်စရ့လးခဲလၢာ်ပာ်အမဲာ်လၢယလိၤ ဒ်သိးယကကဲထီၣ်စီၤပၤလီၤ. ဒီးဘီဧိၤမုၢ်ဧိၤဃၣ်ကဒါ က့ၤအသး, ဒီးကဲထီၣ်ဝဲလၢယဒီပုၢ်ဝဲၢ်အတၢ်လီၤ. အဂ့ၢ် ဒ်အံၤ, ကဲထီၣ်အတၢ်လၢယွၤလီၤ. ¹⁶ ဒီးခဲကနံၣ်အံၤယ ကဃ့တၢ်တမံၤလၢနၤ, ဃၣ်ကွံာ်နမဲာ်တဂ့ၤ. ဒီးအဝဲဒၣ် စံးဘၣ်အီၤ, ကတိၤတၢ်တက့ၢ်.

¹⁷ ဒီးစံးဝဲဒၣ်, ကတိၤလၢ်ဒီးစီၤပၤၡလိၤမိၤ, (အဂ့ၢ်ဒ်အံၤ, တဃၣ်ကွံာ်အမဲာ်လၢနၤဘၣ်), ဒ်သိးအကဟ့ၣ်လီၤယၤ လၢပှၤရှူန့ၣ်ဖိနီၢ်အဘံၡးလၢယမါတက့ၢ်.

¹⁸ ဒီးနီၢ်ဘၤသရှ့ၤဘၤစံးဝဲဒၣ်, ဂ့ၤလံ, ယကကတိၤတၢ်ဒီး စီၤပၤလၢနဂီၢ်လီၤ.

¹⁹ ဒီးနီၢ်ဘၤသရှ့ၤဘၤလဲၤဆူစီၤပၤၡလိၤမိၤအအိၣ် ဒ်သိး အကကတိၤတၢ်လၢ စီၤအဒိနံၤယၤအဂီၢ်, ဒီးစီၤပၤဂဲၤ ဆၢထၢၣ်သဂၢၢ်အီၤ, ဒီးဆုးလီၤအခိၣ်, ဒီးဆ့ၣ်နီၤလၢအ လီၢ်ပစိာ်, ဒီးဒုးပာ်လီၤပှၤလၢလီၢ်ပစိာ်လၢစီၤပၤအမိၢ်အ ဂီၢ်, ဒီးအဝဲဒၣ်ဆ့ၣ်နီၤလၢအစုထွဲလီၤ.

²⁰ ဒီးစံးဝဲဒၣ်, ယဃ့တၢ်ဃ့အဆံးတမံၤလၢနၤ, ဃၣ်ကွံာ် နမဲာ်တဂ့ၤ. ဒီးစီၤပၤစံးဝဲဒၣ်, ဃ့တက့ၢ်, ယမိၢ်ဧၢ, အဂ့ၢ် ဒ်အံၤ, ယတဃၣ်ကွံာ်ယမဲာ်ဘၣ်.

²¹ ဒီးစံးဝဲဒၣ်, ဟ့ၣ်လီၤပှၤရှူန့ၣ်ဖိနီၢ်အဘံၡးလၢနဒီပုၢ်ဝဲၢ် စီၤအဒိနံၤယၤလၢအမါတက့ၢ်.

²² ဒီးစီၤပၤၡလိၤမိၤစံးဆၢတၢ်, ဒီးစံးဘၣ်အမိၢ်, ဒီးနဃ့ ပှၤရှူန့ၣ်ဖိနီၢ်အဘံၡးလၢစီၤအဒိနံၤယၤအဂီၢ် မ့ၢ်အဘၣ် မနုၤလဲၣ်. ဃ့စ့ၢ်ကီးဘီဧိၤမုၢ်ဧိၤလၢအဂီၢ်တက့ၢ်. အဂ့ၢ် ဒ်အံၤ, အဝဲဒၣ်န့ၣ်မ့ၢ်ယဝဲၢ်လီၤ. ဒီးဃ့လၢအဂီၢ်, ဒီးလၢ ပှၤလုၢ်တၢ်အဒိၣ် စီၤအ့ဘယၤသၢ်အဂီၢ်, ဒီးလၢနီၢ်စရူ ယၤအဖိခွါစီၤယိၤအာ်အဂီၢ်န့ၣ်တက့ၢ်.

²³ ဒီးစီၤၡလိၤမိၤဆိၣ်တၢ်လၢယွၤအမဲာ်ညါ, ဒီးစံးဝဲဒၣ်, တၢ်ကတိၤတထံၣ်အံၤ, စီၤအဒိနံၤယၤမ့ၢ်တကတိၤဘၣ် ထီဒါအသးသမူဒၣ်ဝဲဘၣ်ဒီး, မ်ယွၤမၤယၤဒ်န့ၣ်ဒီးအါ န့ၢ်အန့ၣ်တက့ၢ်. ²⁴ ဒီးခဲကနံၣ်အံၤယွၤမူဝဲလၢအဒုးအိၣ် ဂၢၢ်ဆိးကျၢၤယၤ, ဒီးပာ်ထီၣ်ထီယၤလၢယပၢ်စီၤဒၤဝံး အလီၢ်ပစိာ်အဖီခိၣ်, ဒီးမၤယၤလၢဟံၣ်တဖျၢၣ် ဒ်အစံး ပာ်အသိးန့ၣ်, စီၤအဒိနံၤယၤကဘၣ်တၢ်မၤသံအီၤလၢ မုၢ်မဆါတနံၤအံၤလီၤ.

²⁵ ဒီးစီၤပၤၡလိၤမိၤမၢလီၤစီၤယဟိၤယဒါအဖိခွါ စီၤဘ နါယၤ, ဒီးအဝဲဒၣ်ကျီကွံာ်အီၤ, ဒီးသံဝဲလီၤ.

²⁶ ဒီးစီၤပၤစံးဘၣ်ပှၤလုၢ်တၢ်အဒိၣ် စီၤအ့ဘယၤသၢ်, ဟး ထီၣ်ကွံာ်ဆူဧၤနသိး, ဆူနဟီၣ်ခိၣ်အကဝီၤဒၣ်နဲတက့ၢ်. အဂ့ၢ်ဒ်အံၤ, နမ့ၢ်တၢ်သံအပှၤကညီဘၣ်ဆၣ်ဒီး, ယတ ဒုးမၤသံဘၣ်နၤလၢမုၢ်မဆါတနံၤအံၤဘၣ်. အဂ့ၢ်ဒ်အံၤ, နစိာ်ကစၢ်ယွအတလါ လၢယပၢ်စီၤဒၤဝံးအမဲာ်ညါ လီၤ. ဒီးအဂ့ၢ်ဒ်အံၤ, နဘၣ်တၢ်နးတၢ်ဖှီၣ်လၢကယဲၢ်တၢ် နးတၢ်ဖှီၣ်အပူၤလၢအဘၣ်ယပၢ်လီၤ.

²⁷ ဒီးစီၤၡလိၤမိၤဟီထီၣ်ကွံာ်စီၤအ့ဘယၤသၢ်လၢ ပှၤလုၢ် တၢ်အဒိၣ်အလီၢ်လၢယွၤအမဲာ်ညါ, ဒ်သိးအကမၤလၢ ထီၣ်ပှဲၤထီၣ်ယွၤအကလုၢ်ကထါ လၢအကတိၤတၢ်လၢ စီၤဧ့လံၤအပှၤဟံၣ်ဖိအဂ့ၢ်အကျိၤလၢၡံလိၤအပူၤလီၤ.

²⁸ ဒီးတၢ်အကစီၣ်န့ၣ်ဟူဝဲဆူ စီၤယိၤအာ်အအိၣ်လီၤ. အ ဂ့ၢ်ဒ်အံၤ, စီၤယိၤအာ်တဃၣ်ဘၣ်အသးဆူ စီၤအးဘၡါ လိၣ်အလီၢ်ခံဘၣ်ဆၣ်ဒီး, ဃၣ်အသးဆူစီၤအဒိနံၤယၤ အလီၢ်ခံန့ၣ်လီၤ. ဒီးစီၤယိၤအာ်ဃ့ၢ်ဝဲဆူယွၤအဒဲပူၤ, ဒီး ဟံးဃာ်တၢ်လုၢ်လီၢ်အနၢၤတဖၣ်လီၤ.

²⁹ ဒီးပှၤစံးဘၣ်စီၤပၤၡလိၤမိၤ လၢစီၤယိၤအာ်ဃ့ၢ်လံဆူ ယွၤအဒဲပူၤ, ဒီးကွၢ်ကွၢ်, အိၣ်ဝဲလၢတၢ်လုၢ်လီၢ်အဃၢၤ လီၤ. ဒီးစီၤၡလိၤမိၤမၢလီၤစီၤယဟိၤယဒါအဖိခွါစီၤဘ နါယၤ, ဒီးစံးဝဲဒၣ်, လဲၤကျီကွံာ်အီၤတက့ၢ်.

³⁰ ဒီးစီၤဘနါယၤဟဲဆူယွၤအဒဲပူၤ, ဒီးစံးဘၣ်အီၤ, စီၤပၤ စံးတၢ်ဒ်အံၤ, ဟဲထီၣ်တက့ၢ်. ဒီးစံးဝဲဒၣ်, ယတဟဲဘၣ်. ယကသံဖဲအံၤလီၤ. ဒီးစီၤဘနါယၤစိာ်တၢ်ကတိၤန့ၣ် ဆူစီၤပၤအအိၣ်, ဒီးစံးဝဲဒၣ်, စီၤယိၤအာ်စံးဝဲဒ်အံၤ, ဒီးစံး ဆၢယၤဒ်အံၤလီၤ.

³¹ ဒီးစီၤပၤစံးဘၣ်အီၤ, မၤအီၤဒ်အစံးဝဲအသိးန့ၣ်, ကျီကွံာ် အီၤ, ဒီးခူၣ်လီၤကွံာ်အီၤ, ဒ်သိးနကသုးကွံာ်တၢ်သွံၣ်လၢ အတၢ်ဒဲးဘးတအိၣ်ဘၣ်လၢစီၤယိၤအာ် ဒုးလူလီၤဝဲ န့ၣ်လၢယၤ, ဒီးလၢယပၢ်အပှၤဟံၣ်ဖိန့ၣ်တက့ၢ်. ³² ဒီး ယွၤကဒုးဟဲက့ၤအသွံၣ်လၢအခိၣ်ဒၣ်ဝဲ, ပှၤလၢအကျီ ကွံာ်ပှၤခံဂၤလၢအတီန့ၢ်ဒီးဂ့ၤန့ၢ်အကစၢ်ဒၣ်ဝဲ, ဒီးမၤသံ အီၤလၢနး, (ယပၢ်စီၤဒၤဝံးတသ့ၣ်ညါဘၣ်), အံၣ်စရ့ လးအပှၤသုးမုၢ်အခိၣ်စီၤန့ၢ်အဖိခွါစီၤအဘံန့ၢ်, ဒီးယူ ဒၤအပှၤသုးမုၢ်အခိၣ်စီၤယ့သၢ်အဖိခွါ စီၤဧမါစၤလီၤ.―

³³ အသွံၣ်ကဟဲက့ၤဘၣ်စီၤယိၤအာ်အခိၣ် ဒီးအချံအသၣ် အခိၣ်လီၤထူလီၤယိာ်လီၤ. မ့မ့ၢ်လၢစီၤဒၤဝံးအလိၤ, ဒီး လၢအချံအသၣ်အလိၤ, ဒီးလၢအပှၤဟံၣ်ဖိအလိၤ, ဒီး လၢအလီၢ်ပစိာ်အဖီခိၣ်န့ၣ် တၢ်ဃူတၢ်ဖိးကအိၣ်အစိၤ စိၤအဃၣ်ဃၣ်လၢယွၤလီၤ

³⁴ ဒီးစီၤယဟိၤယဒါအဖိခွါ စီၤဘနါယၤလဲၤထီၣ်, ဒီးကျီ ကွံာ်အီၤ, ဒီးမၤသံအီၤ, ဒီးပှၤခူၣ်လီၤကွံာ်အီၤလၢအဟံၣ် ဒၣ်ဝဲလၢပှၢ်လၢ်ကျါန့ၣ်လီၤ.

³⁵ ဒီးစီၤပၤပာ်ထီၣ်စီၤယဟိၤယဒါအဖိခွါ စီၤဘနါယၤ လၢအလီၢ်လၢပှၤသုးမုၢ်အဖီခိၣ်, ဒီးစီၤပၤပာ်ပှၤလုၢ်တၢ် အဒိၣ်စီၤစၤဒိးလၢစီၤအ့ဘယၤသၢ်အလီၢ်န့ၣ်လီၤ.

³⁶ ဒီးစီၤပၤမၢလီၤတၢ် ဒီးကိးန့ၢ်စီၤၡံမံၤ, ဒီးစံးဘၣ်အီၤ, သူၣ်နဟံၣ်လၢယရူၤၡလ့ၣ်အပူၤ, ဒီးအိၣ်ဖဲန့ၣ်တက့ၢ်, ဒီးဟးထီၣ်ဖဲန့ၣ်နီတပူၤတဂ့ၤ. ³⁷ ဒီးမုၢ်တနံၤလၢနဟး ထီၣ်, ဒီးခီဂာ်ထံကျိကံၤဒြိၣ်ဒီး, တၢ်ကမၤအသးလၢ နကသ့ၣ်ညါသပှၢ်တၢၢ်လၢနဘၣ်သံနီၢ်နီၢ်လီၤ. နသွံၣ် ကအိၣ်လၢနခိၣ်ဒၣ်နဲလီၤ.

³⁸ ဒီးစီၤၡံမံၤစံးဆၢစီၤပၤ, တၢ်ကတိၤန့ၣ်ဂ့ၤလံ. ဒ်ယက စၢ်စီၤပၤစံးဝဲအသိးန့ၣ်နခ့နပှၤကမၤဒ်န့ၣ်သိးလီၤ. ဒီးစီၤ ၡံမံၤအိၣ်ဝဲလၢယရူၡလ့ၣ်အပူၤအါနံၤအါသီလီၤ.

³⁹ ဒီးသၢနံၣ်အကတၢၢ်န့ၣ် တၢ်မၤအသးလၢစီၤၡံမံၤအ ကုၢ်ခံဂၤဃ့ၢ်ထီၣ်ကွံာ်ဆူကၤသးအစီၤပၤ စီၤမၤကၤအ ဖိခွါစီၤအၤကံၣ်အအိၣ်, ဒီးပှၤဒုးနဲၣ်စီၤၡံမံၤ, ဒီးစံးဝဲဒၣ်, ကွၢ်ကွၢ်, နကုၢ်နပှၤန့ၣ်အိၣ်ဝဲလၢကၤသးအပူၤလီၤ.

⁴⁰ ဒီးစီၤၡံမံၤဂဲၤဆၢထၢၣ်, ဒီးဂီၤကၢ်ကသ့ၣ်ယီၤဒီးလဲၤဝဲ ဆူကၤသး, ဆူစီၤအၤကံၣ်အအိၣ်, ဒ်သိးအကဃုန့ၢ်အ ကုၢ်အပှၤလီၤ. ဒီးစီၤၡံမံၤလဲၤတၢ်, ဒီးဟဲစိာ်အကုၢ်အ ပှၤလၢကၤသးအပူၤလီၤ.

⁴¹ ဒီးပှၤစံးဘၣ်စီၤၡလိၤမိၤလၢ စီၤၡံမံၤလဲၤထီၣ်လၢယ ရူၡလ့ၣ်ဆူကၤသး, ဒီးဟဲက့ၤကဒါက့ၤဝဲလီၤ. ⁴² ဒီးစီၤပၤမၢလီၤတၢ်, ဒီးကိးန့ၢ်စီၤၡံမံၤ, ဒီးစံးဘၣ်အီၤ, ယဒုးဆိၣ်နၤလၢယွၤအမဲာ်ညါ, ဒီးယအုၣ်ယသးဒီးနၤ, ဒီးစံး, မုၢ်တနံၤလၢနဟးထီၣ်ကွံာ်, ဒီးလဲၤတၢ်ဖဲအံၤဖဲနုၤန့ၣ်နကသ့ၣ်ညါသပှၢ်တၢၢ်လၢနသံနီၢ်နီၢ်, တမ့ၢ်ဘၣ်ဧါ. ဒီးနစံးဆၢယၤ, တၢ်ကတိၤလၢယနၢ်ဟူန့ၣ်ဂ့ၤလံ.―

⁴³ ဒီးနတတိၢ်န့ၢ်ဘၣ်တၢ်ဆိၣ်ဘၣ်ဃးဒီးယွၤ, ဒီးတၢ်မၤ လိာ်လၢယမၤလိာ်နၤန့ၣ်မ့ၢ်အဘၣ်မနုၤလဲၣ်.

⁴⁴ ဒီးစီၤပၤစံးဘၣ်စီၤၡံမံၤ, နသ့ၣ်ညါလၢနသးကံၢ်ပူၤက ယဲၢ်တၢ်အၢလၢနမၤယပၢ်စီၤဒၤဝံး, ဒီးယွၤအကဒုးဟဲ က့ၤကဒါက့ၤနတၢ်အၢလၢနခိၣ်ဒၣ်နဲန့ၣ်လီၤ. ⁴⁵ ဒီးစီၤ ပၤၡလိၤမိၤကဘၣ်တၢ်ဆိၣ်ဂ့ၤအီၤ, ဒီးစီၤဒၤဝံးအလီၢ် ပစိာ်ကအိၣ်ဂၢၢ်ဆိးကျၢၤ လၢယွၤအမဲာ်ညါလီၤစိၤလီၤ ထီလီၤ.

⁴⁶ ဒီးစီၤပၤမၤလိာ် စီၤယဟိယဒါအဖိခွါစီၤဘနါယၤ, ဒီး အဝဲဒၣ်ဟးထီၣ်, ဒီကျီကွံာ်အီၤ, ဒီးသံဝဲလီၤ. ဒီးဘီဧိၤ မုၢ်ဧိၤဂၢၢ်ဝဲကျၢၤဝဲလၢစီၤၡလိၤမိၤအစုပူၤလီၤ.

၃

¹ ဒီးစီၤၡလိၤမိၤဒီသိၣ်ဒီသီဒီး အဲၤကူပတူးအစီၤပၤဖး ရိၤ, ဒီးဟံးန့ၢ်ဖၤရိၤအဖိမုၣ်, ဒီးဟဲစိာ်အီၤဆူစီၤဒၤဝံးအ ဝ့ၢ်ပူၤတုၤအမၤဝံၤအဟံၣ်ဒၣ်ဝဲ, ဒီးယွၤအဟံၣ်, ဒီးဝ့ၢ်ခိၣ် ဒူဝးတရံးယရူၤၡလ့ၣ်လီၤ.

² ထဲပှၤဂီၢ်မုၢ်လုၢ်တၢ်လၢ တၢ်အလီၢ်ထီၣ်ထီတဖၣ်အ ဖီခိၣ်လီၤ. အဂ့ၢ်ဒ်အံၤ, တၢ်တမၤဒံးဘၣ်ဟံၣ်လၢယွၤအ မံၤအဂီၢ်ဘၣ်တုၤလီၤလၢမုၢ်နံၤတဖၣ်န့ၣ်လီၤ.

³ ဒီးစီၤၡလိၤမိၤအဲၣ်ယွၤ, ဒီးလဲၤတၢ်လၢအပၢ်စီၤဒၤဝံး အတၢ်မၤလိာ်အပူၤ, ထဲအလုၢ်တၢ်ဒီးဆိၣ်ကဲၤတၢ်နၢမူ လၢတၢ်အလီၢ်ထီၣ်ထီတဖၣ်အဖီခိၣ်လီၤ.

⁴ ဒီးစီၤပၤလဲၤဆူကံးဘိၣ်အပူၤ ဒ်သိးအကလုၢ်တၢ်ဖဲန့ၣ် လီၤ. အဂ့ၢ်ဒ်အံၤ, တၢ်အလီၢ်ထီၣ်ထီဖးဒိၣ်အိၣ်ဝဲဖဲန့ၣ် တပူၤလီၤ. စီၤၡလိၤမိၤလုၢ်ထီၣ်တၢ်လုၢ်မ့ၣ်အူအကထိ လၢတၢ်လုၢ်လီၢ်အဖီခိၣ်လီၤ.

⁵ ယွၤလီၣ်ဖျါထီၣ်အသးလၢ စီၤၡလိၤမိၤအမဲာ်ညါလၢ တၢ်မံမီၢ်အပူၤလၢမုၢ်နၤလၢကံးဘိၣ်အပူၤလီၤ. ဒီးယွၤ စံးဝဲဒၣ်, ယကဟ့ၣ်လီၤနၤလၢမနုၤလဲၣ်န့ၣ်ဃ့တက့ၢ်.

⁶ ဒီးစီၤၡလိၤမိၤစံးဝဲဒၣ်, နမၤဘျုးမၤဖှိၣ်ယပၢ်နခ့နပှၤ စီၤဒၤဝံးဒိၣ်ဒိၣ်ကလဲာ်, ဒ်အလဲၤတၢ်လၢနမဲာ်ညါလၢ တၢ်မ့ၢ်တၢ်တီအပူၤ, ဒီးလၢတၢ်တီတၢ်လိၤအပူၤ, ဒီးလၢ အသးလိၤဒီးနၤအသိးန့ၣ် ဒီးနတိၢ်န့ၢ်တၢ်ဘျုးတၢ်ဖှိၣ် ဖးဒိၣ်အံၤလၢအဂီၢ်, ဒီးနဟ့ၣ်လီၤအီၤလၢအဖိခွါလၢအ ဆ့ၣ်နီၤလၢအလီၢ်ပစိာ်အဖီခိၣ် ဒ်လၢမုၢ်မဆါတနံၤအံၤ အသိးန့ၣ်လီၤ. ⁷ ဒီးခဲကနံၣ်အံၤ, ယွၤကစၢ်ဧၢ, နပာ်လီၤ နခ့နပှၤလၢ စီၤပၤလၢအပၢ်စီၤဒၤဝံးအလီၢ်, ဒီးယမ့ၢ်ဖိ သၣ်အဆံး, ဒီးယလဲၤထီၣ်ဟဲနုာ်န့ၣ် ယတသ့ၣ်ညါ ဘၣ်, ⁸ ဒီးနခ့နပှၤအိၣ်ဝဲလၢနပှၤဂီၢ်မုၢ်လၢနဃုထၢအီၤ အသးကံၢ်ပူၤ, ပှၤဂီၢ်မုၢ်ဖးဒိၣ်လၢပှၤဂံၢ်အီၤဒွးအီၤတသ့ ဘၣ်, လၢအအိၣ်အါကဲၣ်ဆိးအဃိန့ၣ်လီၤ. ⁹ မၤသးဒ် န့ၣ်ဒီး ဟ့ၣ်လီၤနခ့နပှၤအသူၣ်ဆးသးဆး, ဒ်သိးအက စံၣ်ညီၣ်နပှၤဂီၢ်မုၢ်, ဒ်သိးအကနီၤဖးတၢ်ဂ့ၤဒီးတၢ်အၢ အဆၢန့ၣ်တက့ၢ်. အဂ့ၢ်ဒ်အံၤ, မ့ၢ်မတၤစံၣ်ညီၣ်ပှၤဂီၢ်မုၢ် ဖးဒိၣ်အံၤကသ့တဂၤလဲၣ်.

¹⁰ ဒီးတၢ်ကတိၤန့ၣ် ဂ့ၤဝဲလၢယွၤအမဲာ်လၢစီၤၡလိၤမိၤ ဃ့တၢ်တမံၤန့ၣ်လီၤ.

¹¹ ဒီးယွၤစံးဘၣ်အီၤ, မ့ၢ်နဃ့တၢ်တမံၤအံၤ, ဒီးတဃ့ဘၣ် အါနံၤအါသီလၢနဂီၢ်ဘၣ်, ဒီးတဃ့ဘၣ်တၢ်ထူးတၢ် တီၤလၢနဂီၢ်, ဒီးတဃ့ဘၣ်နဒုၣ်နဒါတဖၣ်အသးသမူ ဘၣ်, ဒီးမ့ၢ်နဃ့သူၣ်ဆးနသးဆးဒ်သိးနကတိၢ်န့ၢ်တၢ် စံၣ်ညီၣ်ဒီး, ¹² ကွၢ်ကွၢ်, ယမၤလံတၢ်ဒ်နတၢ်ကတိၤအ သိးန့ၣ်လံ. ကွၢ်ကွၢ်, ယဟ့ၣ်လီၤနၤလၢနသးလၢအကူၣ် တၢ်သ့, ဒီးနသူၣ်ဆးနသးဆး, တုၤပှၤဒ်နၤအသိးတ အိၣ်ဘၣ်လၢနမဲာ်ညါ, ဒီးလၢနလီၢ်ခံန့ၣ် ပှၤတဂဲၤဆၢ ထၢၣ်ဘၣ်ဒ်နၤအသိးဘၣ်. ¹³ ဒီးယဟ့ၣ်လီၤစ့ၢ်ကီးနၤ လၢတၢ်လၢနတဃ့ဘၣ်, တၢ်ထူးတၢ်တီၤ, ဒီးတၢ်လၤ ကပီၤ, တုၤပှၤလၢစီၤပၤတဖၣ်အကျါန့ၣ် တဒ်သိးဘၣ် ဒီးနၤနီတဂၤဘၣ်တစိၤဒၣ်နၤလီၤ.

¹⁴ ဒီးနမ့ၢ်ပိာ်ယကျဲတဖၣ်, ဒီးတိၢ်န့ၢ်ယတၢ်သိၣ်တၢ်သီ, ဒီးယတၢ်မၤလိာ်, ဒ်နပၢ်စီၤဒၤဝံး လဲၤတၢ်အသိးန့ၣ်ဒီး, ယကဒုးအိၣ်ကၢအိၣ်ခိးနၤလီၤ.

¹⁵ ဒီးစီၤၡလိၤမိၤဖုသံနီၣ်ထီၣ်, ဒီးကွၢ်ကွၢ်, မ့ၢ်တၢ်မံမီၢ် လီၤ. ဒီးဟဲဝဲဆူယရူၤၡလ့ၣ်, ဒီးဆၢထၢၣ်လၢယွၤအတၢ် အၢၣ်လီၤအီလီၤအတလါအမဲာ်ညါ, ဒီးလုၢ်တၢ်လုၢ်မ့ၣ် အူ, ဒီးတၢ်လုၢ်မၤဃူမၤဖိးတၢ်, ဒီးမၤတၢ်အီၣ်တၢ်အီအ ဘူၣ်လၢအခ့အပှၤခဲလၢာ်အဂီၢ်လီၤ.

¹⁶ ဒီးပှၤဃဲသဲမုၣ်ခံဂၤ ဟဲဆူစီၤပၤအအိၣ်, ဒီးဆၢထၢၣ် လၢအမဲာ်ညါလီၤ.

¹⁷ ဒီးပိာ်မုၣ်တဂၤစံးဝဲဒၣ်, အိ, ယကစၢ်ဧၢ, ယဲဒၣ်ဒီးပိာ် မုၣ်တဂၤအံၤ, ပအိၣ်ပဆိးလၢဟံၣ်တဖျၢၣ်ဃီ, ဒီးယဆံး စၢ်န့ၢ်ယဖိတဂၤအိၣ်ဒီးအီၤလၢဟံၣ်ပူၤန့ၣ်လီၤ. ¹⁸ ဒီးယ ဆံးစၢ်န့ၢ်တၢ်အလီၢ်ခံသၢနံၤတနံၤန့ၣ် တၢ်မၤအသးလၢ ပိာ်မုၣ်တဂၤအံၤ ဆံးစၢ်န့ၢ်တၢ်စ့ၢ်ကီး, ဒီးပအိၣ်တပူၤ ဃီ, ဒီးပှၤတမှံၤတအိၣ်ဘၣ်ဒီးပှၤဘၣ်, အိၣ်ထဲပဝဲဒၣ်ခံ ဂၤလၢဟံၣ်ပူၤလီၤ. ¹⁹ ဒီးပိာ်မုၣ်တဂၤအံၤ အဖိသံဝဲလၢ မုၢ်နၤလီၤ. အဂ့ၢ်ဒ်အံၤ, ကျံၤသံဘၣ်အီၤလီၤ. ²⁰ ဒီးဂဲၤဆၢ ထၢၣ်ဝဲလၢဖးဖီမုၢ်, ဒီးဟံးန့ၢ်ယဖိလၢယကပၤထံး, ဒီး နကုၢ်ပိာ်မုၣ်မံသပ့ၤ, ဒီးပာ်ဝဲလၢအသးနါပှၢ်, ဒီးပာ်အ ဖိသံတဂၤလၢယသးနါပှၢ်အပူၤလီၤ. ²¹ ဒီးမုၢ်ဆ့ၣ်ထီၣ် န့ၣ် ယဂဲၤဆၢထၢၣ်ဒ်သိးယကဒုးအီၣ်နုၢ်ယဖိ, ဒီးကွၢ်, သံလံဝဲလံ. ဒီးလၢမုၢ်ဂီၤန့ၣ်ယကွၢ်ထံကွၢ်ဆး, ဒီးကွၢ် ကွၢ်, တမ့ၢ်ဘၣ်ယဖိလၢယဆံးစၢ်န့ၢ်အီၤဘၣ်.

²² ဒီးပိာ်မုၣ်အဝဲတဂၤစံးဝဲဒၣ်, တမ့ၢ်ဘၣ်. ဖိလၢအမူတ ဂၤမ့ၢ်ယဖိ, ဒီးတၢ်အသံတဂၤန့ၣ်မ့ၢ်နဖိလီၤ. ဒီးအဝဲတ ဂၤန့ၣ်စံးဝဲဒၣ်, တမ့ၢ်ဘၣ်. တၢ်အသံမ့ၢ်နဖိ, ဒီးဖိလၢအ မူတဂၤမ့ၢ်ယဖိလီၤ. ဒီးကတိၤဝဲဒ်န့ၣ်လၢစီၤပၤအမဲာ် ညါလီၤ.

²³ ဒီးစီၤပၤစံးဝဲဒၣ်, အဝဲတဂၤစံးဝဲ, တၢ်လၢအမူဝဲန့ၣ်မ့ၢ် ယဖိ, ဒီးနဲနဖိမ့ၢ်တၢ်သံလီၤ. ဒီးအဝဲတဂၤစံးဝဲ, တမ့ၢ် ဘၣ်. နဖိမ့ၢ်တၢ်သံ, ဒီးယဖိမ့ၢ်တၢ်လၢအမူတဂၤန့ၣ်လီၤ.

²⁴ ဒီၤစီၤပၤစံးဝဲဒၣ်, ဟဲစိာ်န့ၢ်ယၤလၢနးတဘ့ၣ်တက့ၢ်. ဒီးပှၤဟဲစိာ်နးတဘ့ၣ်ဆူစီၤပၤအမဲာ်ညါလီၤ.

²⁵ ဒီးစီၤပၤစံးဝဲဒၣ်, ဖှဲးသ့ၣ်ဖးဖိသၣ်လၢအမူန့ၣ်ခံခီ, ဒီး ဟ့ၣ်လီၤအီၤတဂၤတခီတဂၤတခီတက့ၢ်.

²⁶ ဒီးပိာ်မုၣ်လၢဖိသၣ်လၢအမူဝဲ မ့ၢ်အတၢ်တဂၤန့ၣ်က တိၤတၢ်ဒီးစီၤပၤ, (အဂ့ၢ်ဒ်အံၤ, အသးအိၣ်အဖိ,) ဒီးစံး ဝဲဒၣ်, ယကစၢ်ဧၢဟ့ၣ်လီၤအီၤလၢဖိသၣ်လၢအမူဝဲ, ဒီး မၤသံအီၤလ့ၤတက့ၤတဂ့ၤ. ဒီးအဝဲတဂၤန့ၣ်စံးဝဲဒၣ်, ယ တၢ်ဂ့ၤဂ့ၤ, နတၢ်ဂ့ၤဂ့ၤ, မ်အသုတမ့ၢ်တဂ့ၤ. ဖှဲးသ့ၣ်ဖး အီၤတက့ၢ်.

²⁷ ဒီးစီၤပၤစံးဆၢတၢ်ဒီးစံးဝဲဒၣ်, ဟ့ၣ်လီၤအီၤလၢဖိသၣ် လၢအမူဝဲတက့ၢ်. ဒီးမၤသံအီၤလ့ၤတက့ၤတဂ့ၤ. အဝဲဒၣ် န့ၣ်မ့ၢ်အမိၢ်လီၤ.

²⁸ ဒီးအံၣ်စရ့လးခဲလၢာ်နၢ်ဟူတၢ်စံၣ်ညီၣ် လၢစီၤပၤစံၣ် ညီၣ်ဝဲ, ဒီးပျံၤစီၤပၤလီၤ. အဂ့ၢ်ဒ်အံၤ, ထံၣ်ဘၣ်ဝဲလၢယွၤ အတၢ်ကူၣ်သ့အိၣ်ဒီးအီၤ, ဒ်သိးအကစံၣ်ညီၣ်တၢ်လီၤ.

၄

¹ ဒီးစီၤပၤၡလိၤမိၤကဲစီၤပၤလၢ အံၣ်စရ့လးခဲလၢာ်အဖီ ခိၣ်လီၤ.

² ဒီးအအံၤမ့ၢ်အပဒိၣ်ဖးဒိၣ်လၢအအိၣ်ဒီးအီၤလီၤ. ပှၤ လုၢ်တၢ်အဒိၣ်စီၤစၤဒိးအဖိခွါစီၤဧစၤရယၤ, ³ ဒီးစီၤၡံၡၤ အဖိခွါစီၤအလံၤဃိရ့ာ်, ဒီးစီၤအဃံယၤမ့ၢ်ပှၤကွဲးလံာ်, စီၤအဃံလူးအဖိခွါစီၤယဟိၡဖးမ့ၢ်ပှၤကွဲးနီၣ်တၢ်, ⁴ ဒီး စီၤယဟိၤယဒါအဖိခွါ စီၤဘနါယၤအိၣ်ဝဲလၢပှၤသုးမုၢ် အဖီခိၣ်, ဒီးစီၤစၤဒိး, ဒီးစီၤအ့ဘယၤသၣ်မ့ၢ်ပှၤလုၢ်တၢ် အဒိၣ်လီၤ. ⁵ ဒီးစီၤနၤသၣ်အဖိခွါ စီၤဧစၤရယၤအိၣ်ဝဲ လၢပဒိၣ်တဖၣ်အဖီခိၣ်, ဒီးစီၤနၤသၣ်အဖိခွါစီၤစၤဘူး မ့ၢ်ပဒိၣ်ဖးဒိၣ်အဒိၣ်ကတၢၢ်, စီၤပၤအတံၤသကိးလီၤ.―

⁶ ဒီးစီၤအဃံၡၢ်အိၣ်ဝဲလၢ ပှၤဟံၣ်ဖိအဖီခိၣ်, ဒီးစီၤဧၤဘ ဒါအဖိခွါစီၤအဒိၤနံရၣ်အိၣ်ဝဲလၢ တၢ်ဟ့ၣ်သွဲအဖီခိၣ် လီၤ.

⁷ ဒီးစီၤၡလိၤမိၤအိၣ်ဒီးအပဒိၣ်ဖးဒိၣ်တဆံခံဂၤ လၢအံၣ် စရ့လးခဲလၢာ်အဖီခိၣ်, လၢအကတဲာ်ကတီၤစီၤပၤဒီး အပှၤဟံၣ်ဖိအတၢ်အီၣ်တၢ်အီလီၤ. တနံၣ်အတီၢ်ပူၤန့ၣ် ကတဲာ်ကတီၤတၢ်တဂၤတလါတဂၤတလါစုာ်စုာ်လီၤ.

⁸ ဒီးအအံၤမ့ၢ်အမံၤ, စီၤဃူၢ်အဖိခွါလၢကစၢၢ်အ့ဖရဲၣ်အလိၤ, ⁹ စီၤဒ့က့ၢ်အဖိ ခွါလၢမၤကးအပူၤ, ဒီးလၢၡလးဘံၣ်အပူၤ, ဒီးဘ့ၤသရှ့ မ့ၣ်အပူၤ, ဒီးအ့လိၣ်ဘ့ၤသဃၤနၣ်အပူၤ, ¹⁰ စီၤဃ့စ့းအ ဖိခွါလၢအရူဘိးအပူၤ, အဝဲဒၣ်အိၣ်ဒီးစိကိၤ, ဒီးကီၢ်ဃ့ ဖ့ၢ်ဒီဘ့ၣ်ညါ, ¹¹ ဒီးစီၤအဘံနဒာ်အဖိခွါလၢဒိၢ်အကီၢ်ပူၤ ဒီဘ့ၣ်ညါ, အဝဲန့ၢ်ဘၣ်စီၤၡလိၤမိၤအဖိမုၣ်နီၢ်တၤဖးလၢ အမါ, ¹² စီၤအဃံလူးအဖိခွါစီၤဘၤနါအိၣ်ဒီးတၤနးဒီး မကံးဒိၤ, ဒီးဘ့ၤသၡၣ်လၢအအိၣ်လၢ စြတၤနၤအဃၢၤ, လၢယံးစရ့လးအဖီလာ် လၢဘ့ၤသၡၣ်ပၢၢ်လၢအၤဘ့ လးမဃိလး, ပၢၢ်လၢယးနၣ်ဝၢ်ဘးခီလီၤ. ¹³ စီၤက့ဘ့ၢ် အဖိခွါလၢရၤမိးကံးလဧးအပူၤ, အဝဲဒၣ်အိၣ်ဒီးစီၤမနၤ ရှ့အဖိခွါစီၤယၤအံၢ်အဝ့ၢ်တဖၣ် လၢအအိၣ်ဝဲလၢကံး လဧးအပူၤ, ဒီးအဝဲဒၣ်အိၣ်စ့ၢ်ကီးဒီးကီၢ်အၢ်ကိးလၢအ အိၣ်ဝဲလၢဘၤၡၣ်အပူၤ, ဝ့ၢ်ဖးဒိၣ်ဃုဆံအိၣ်ဒီးအခိၣ်ဒူ, ဒီးတြဲၤအနီၣ်ဘိတိၢ်လီၤ. ¹⁴ စီၤဧံးဒိၤအဖိခွါစီၤအဃံနဒာ် အိၣ်ဒီးမၤဃန့ၤ, ¹⁵ ဒီးစီၤအဃံမ့ၤဧးအိၣ်ဝဲလၢနးသၤလံ အပူၤ, အဝဲဒၣ်စ့ၢ်ကီးန့ၢ်ဘၣ် စီၤၡလိၤမိၤအဖိမုၣ်နီၢ်ဘၤ စမးလၢအမါလီၤ. ¹⁶ ဒီးစီၤဃူၡဲၤအဖိခွါစီၤဘၤနါအိၣ်ဝဲ လၢအၤရှ့ၢ်အပူၤ, ဒီးလၢဧၤလိးအပူၤ, ¹⁷ ဒီးစီၤပၤရူၤအဖိ ခွါစီၤယဟိၡဖးလၢယးစၣ်ကၢ်အပူၤ, ¹⁸ စီၤအ့လၤအဖိ ခွါစီၤၡံးမံၤလၢဘံၣ်ယၤမံၣ်အပူၤ, ¹⁹ ဒီးစီၤအူရံၤယၤအဖိ ခွါစီၤက့ဘ့ၢ်လၢကီၢ်ကံးလဧၤအပူၤ, ပှၤအမိၢ်ဖိအစီၤပၤ စံဃိၣ်အကီၢ်, ဒီးဘၤၡၣ်အစီၤပၤဧိာ်, ဒီးအဝဲဒၣ်မ့ၢ်ပဒိၣ် တဂၤဧိၤလၢကီၢ်တဘ့ၣ်န့ၣ်လီၤ.

²⁰ ယူဒၤဒီးအံၣ်စရ့လးန့ၣ် အါဝဲဒ်မဲးဧိၤဟီၣ်ဧိၤလၢပီၣ် လဲၣ်နံၤအသိးန့ၣ်ဒီးအီၣ်ဝဲ, ဒီးအီဝဲ, ဒီးသးခုဝဲလီၤ.

²¹ ဒီးစီၤၡလိၤမိၤကဲစီၤပၤလၢ ဘီမုၢ်ခဲလၢာ်အဖီခိၣ်လၢ အအိၣ်ဝဲလၢထံမိၢ်ပှၢ်ပၢၢ်လၢပှၤဖလ့ၡသးဖိအကီၢ်, ဒီး ပၢၢ်လၢအဲၤကူပတူးအဃၢၤလီၤ. ဒီးပှၤဟဲစိာ်ဝဲလၢခိၣ် ဖးတဖၣ်, ဒီးမၤစီၤၡလိၤမိၤအတၢ်တစိၤဒၣ်အီၤလီၤ.

²² ဒီးစီၤၡလိၤမိၤအတၢ်အီၣ်လၢ မုၢ်တနံၤအဂီၢ်န့ၣ်မ့ၢ်ကိၣ် ကမူၣ်ပြံကဒံအကိၢ်သၢဆံ, ဒီးကိၣ်ကမူၣ်အကိၢ်ဃု ဆံ, ²³ ဂီၤဖံးဘီၣ်ဆံဆဲၣ်ဒု, ဒီးဂီၤဖံးလၢတဖုအကျါခံ ဆံ, ဒီးသိတကယၤ, ဒီးတၤယုၢ်, ဒီးတၤဟိစဘံ, ဒီးတၤ ယုၢ်ယးပမိၢ်, ဒီးထိၣ်ဖိလံၣ်ဖိအဘီၣ်လီၤ.

²⁴ အဂ့ၢ်ဒ်အံၤ, ပၢတၢ်လၢကီၢ်ဒီဘ့ၣ်ညါလၢ အအိၣ်ဝဲလၢ ထံမိၢ်ပှၢ်အအံၤတခီလၢတံပစၤပၢၢ်လၢဂါစၤ, လၢက ယဲၢ်စီၤပၤအဖီခိၣ်, အိၣ်လၢထံမိၢ်ပှၢ်အအံၤတခီလီၤ. ဒီး တၢ်ဃူတၢ်ဖိးအိၣ်ဝဲလၢ အကီၢ်အဃၢၤတပူၤလၢ်လၢ် ဝးတရံးဝဲလီၤ.

²⁵ ဒီးလၢစီၤၡလိၤမိၤအမုၢ်နံၤခဲလၢာ်န့ၣ် ယူဒၤဒီးအံၣ်စ ရ့လးအိၣ်ခၢၣ်သနၢၢ်, ပှၤအိၣ်ဝဲလၢစပံးမုၢ်, ဒီးပှၤအိၣ်ဝဲ လၢအချၢၣ်ဒၢအဖီလာ်စုာ်စုာ်လၢဒၣ် ပၢၢ်လၢဘ့ၢ်ၡဘၤ လီၤ.

²⁶ ဒီးစီၤၡလိၤမိၤအိၣ်ဝဲဒီးကသ့ၣ်အဒၢလွံၢ်ကထိ လၢအ လ့ၣ်ကဟၣ်အဂီၢ်, ဒီးပှၤကသ့ၣ်သုးဖိတကလးခံကထိ လီၤ.

²⁷ ဒီးပဒိၣ်ဖးဒိၣ်တဖၣ်န့ၣ် ကတဲာ်ကတီၤတၢ်အီၣ်လၢ စီၤပၤၡလိၤမိၤအဂီၢ်, ဒီးလၢကယဲၢ်ပှၤလၢအဟဲဝဲဆူစီၤ ပၤၡလိၤမိၤအစီၢ်နီၤခိၣ်အဂီၢ်လီၤ. တဂၤလၢအလါဒၣ်ဝဲ တဘ့ၣ်အပူၤန့ၣ်, ဒီးတၢ်လၢအတအါဘၣ်တမံၤမံၤန့ၣ် တအိၣ်ဘၣ်နီတမံၤဘၣ်.

²⁸ ဒီးပှၤဟဲစိာ်ဘုမုယီၤ, ဒီးလီၢ်ဧိၤဒံးဧိၤလၢကသ့ၣ်, ဒီး ကသ့ၣ်အချ့တဖၣ်အဂီၢ်ဆူအလီၢ်ဖဲန့ၣ်, တဂၤဒ်တၢ် စံၣ်ညီၣ်အီၤအသိးန့ၣ်စုာ်စုာ်လီၤ.

²⁹ ဒီးယွၤဟ့ၣ်လီၤစီၤၡလိၤမိၤလၢအတၢ်ကူၣ်သ့, ဒီးအ သူၣ်ဆးသးဆးဒိၣ်ဒိၣ်ကလဲာ်, ဒီးအသးဖးလဲၢ်, ဒ်မဲးဧိၤ ဟီၣ်ဧိၤလၢပီၣ်လဲၣ်နံၤအသိးန့ၣ်လီၤ.

³⁰ ဒီးစီၤၡလိၤမိၤအတၢ်ကူၣ်သ့ ဒိၣ်န့ၢ်ပှၤမုၢ်ထီၣ်ဖိအတၢ် ကူၣ်သ့, ဒီးအဲၤကူပတူးအတၢ်ကူၣ်သ့ခဲလၢာ်န့ၣ်တ က့ၢ်လီၤ. ³¹ ဒီးအကူၣ်တၢ်သ့ဂ့ၤန့ၢ်ပှၤကညီခဲလၢာ်, ဂ့ၤ န့ၢ်ပှၤအ့စရၤဃးဖိစီၤအ့သၣ်, ဒီးစီၤဟ့မၣ်, ဒီးစီၤကးလ ကိးလး, ဒီးစီၤဒၢ်ဒၤ, စီၤမၤဃိလးအဖိခွါတဖၣ်န့ၣ်တ က့ၢ်လီၤ. ဒီးအမံၤဟူထီသါလီၤလၢကယဲၢ်ပှၤကလုာ်ခဲ လၢာ်အကျါဝးတရံးဝဲလီၤ.

³² ဒီးကတိၤဒိတၢ်အထံၣ်သၢကထိ, ဒီးအလံာ်ထါန့ၣ် အိၣ်ဝဲတကထိယဲၢ်တီၤလီၤ.

³³ ဒီးကတိၤတၢ်လၢသ့ၣ်အဂ့ၢ်အကျိၤလၢ သ့ၣ်ဆှိးအ့ရ့း အိၣ်ဝဲလၢ လဘၤနိၣ်ပၢၢ်လၢသ့ၣ်ကဖျီၣ်အ့စိၤလၢအမဲ ထီၣ်လၢတၢ်ဒူၣ်အလိၤလီၤ. ဒီးကတိၤဝဲလၢဆၣ်ဖိကီၢ် ဖိအဂ့ၢ်အကျိၤ, ဒီးလၢထိၣ်ဖိလံၣ်ဖိအဂ့ၢ်အကျိၤ, ဒီးလၢ တၢ်စွါအဂ့ၢ်အကျိၤ, ဒီးလၢဒ့ၣ်ဧိၤညၣ်ဧိၤအဂ့ၢ်အကျိၤ လီၤ.

³⁴ ဒီးပှၤဟဲဝဲလၢပှၤကလုာ်ခဲလၢာ်အကျါ ဒ်သိးအကနၢ် ဟူစီၤၡလိၤမိၤအတၢ်ကူၣ်သ့, လၢကယဲၢ်ဟီၣ်ခိၣ်အစီၤ ပၤအအိၣ်လၢအနၢ်ဟူတ့ၢ်လၢ အတၢ်ကူၣ်သ့အဂ့ၢ်အ ကျိၤလီၤ.

၅

¹ ဒီးစိၢ်အစီၤပၤဃံရၣ် မၢလီၤအခ့အပှၤဆူစီၤၡလိၤမိၤ အအိၣ်လီၤ. (အဂ့ၢ်ဒ်အံၤ, နၢ်ဟူဝဲလၢပှၤဖှူတ့ၢ်အီၤလၢ စီၤပၤလၢအပၢ်အလီၢ်လီၤ.) အဂ့ၢ်ဒ်အံၤ, စီၤဃံရၣ်န့ၣ်မ့ၢ် ပှၤလၢအအဲၣ်စီၤဒၤဝံးတဘိယူၢ်ဃီလီၤ.

² ဒီးစီၤၡလိၤမိၤမၢလီၤတၢ်ဆူ စိၤဃံရၣ်အအိၣ်ဒီးစံးဝဲ ဒၣ်, ³ နသ့ၣ်ညါလၢယပၢ်စီၤဒၤဝံးမၤဟံၣ်လၢယွၤအက စၢ်အမံၤအဂီၢ်တသ့ဘၣ်လၢ တၢ်ဒုးသုးလၢအအိၣ်ဝးတ တရံးအီၤအဃိ တုၤလီၤယွၤပာ်လီၤအီၤလၢအခီၣ်ညါ သးအဖီလာ်လီၤ. ⁴ ဒီးခဲကနံၣ်အံၤယွၤဒုးအိၣ်ဘှံးယၤ ကိးခီဒဲး, ဒီးတၢ်အဒုၣ်အဒါတအိၣ်ဘၣ်, ဒီးပှၤတဘၣ် တၢ်အၢဘၣ်လီၤ. ⁵ ဒီးကွၢ်ကွၢ်, ယစံးလၢယကမၤဟံၣ် လၢယွၤယကစၢ်အမံၤအဂီၢ်, ဒ်ယွၤကတိၤတၢ်ဒီးယပၢ် စီၤဒၤဝံးအသိး, ဒီးစံးဝဲဒၣ်, နဖိခွါလၢယကပာ်လၢနလီၢ် ပစိာ်လၢနလီၢ်တဂၤန့ၣ် ကမၤဟံၣ်လၢယမံၤအဂီၢ်အဝဲ ဒၣ်လီၤ. ⁶ ဒီးခဲကနံၣ်အံၤမၤလိာ်တၢ်လၢပှၤကကူၣ်သ့ၣ် ဆှိအ့ရ့းလၢလဘၤနိၣ်အလိၤလၢယဂီၢ်တက့ၢ်. ဒီးယ ခ့ယပှၤကအိၣ်ဒီးနခ့နပှၤ, ဒီးယကဟ့ၣ်နၤလၢနခ့နပှၤ အဘူးအလဲ, ဒ်ကယဲၢ်တၢ်လၢ နကစံးတၢ်အသိးန့ၣ် လီၤ. အဂ့ၢ်ဒ်အံၤနသ့ၣ်ညါလၢပှၤစိးပျၤသ့ၣ်ဒ်ပှၤစံဒိၣ် ဖိအသိးတအိၣ်ဘၣ်လၢပကျါဘၣ်.

⁷ ဒီးတုၤစီၤဃံရၣ်နၢ်ဟူ စီၤၡလိၤမိၤအတၢ်ကတိၤဒီး, တၢ်မၤအသးလၢအသးခုဒိၣ်ဒိၣ်ကလဲာ်, ဒီးစံးဝဲဒၣ်, ယွၤ လၢအဟ့ၣ်လီၤစီၤဒၤဝံးအဖိခွါ လၢအကူၣ်တၢ်သ့လၢ ပှၤဂီၢ်မုၢ်ဖးဒိၣ်အံၤအဖီခိၣ်န့ၣ် မ်အဘၣ်တၢ်စံးထီၣ်ပ တြၢၤအီၤတက့ၢ်.

⁸ ဒီးစီၤဃံရၣ်မၢလီၤတၢ်ဆူစီၤၡလိၤမိၤအအိၣ်, ဒီးစံးဝဲ ဒၣ်, ယနၢ်ဟူတၢ်လၢနမၢလီၤတၢ်ဆူယအိၣ် အဂ့ၢ်အ ကျိၤ, ဒီးယကမၤကယဲၢ်တၢ်လၢအဘၣ်နသးလၢသ့ၣ် ဆှိအ့ရ့း, ဒီးသ့ၣ်ဆှိန့ၣ်ခဲလၢာ်လီၤ. ⁹ ယခ့ယပှၤကဟဲ စိာ်အီၤလၢလဘၤနိၣ်ပၢၢ်လၢပီၣ်လဲၣ်, ဒီးယကဆှၢအီၤ လၢပီၣ်လဲၣ်ပူၤလၢထိတုၤအလီၢ်ဖဲနကဒုးနဲၣ်ယၤ, ဒီးယ ကမၢအထိးထီၣ်ဖဲန့ၣ်, ဒီးနကဟံးန့ၢ်အီၤ, ဒီးနမ့ၢ်ဟ့ၣ် တၢ်အီၣ်လၢယပှၤဟံၣ်ဖိဒီး, နကမၤတၢ်လၢအဘၣ်ယ သးလီၤ.

¹⁰ ဒီးစီၤဃံရၣ်ဟ့ၣ်လီၤစီၤၡလိၤမိၤလၢ သ့ၣ်ဆှိအ့ရ့းတ တဖၣ်ဒီးသ့ၣ်ဆှိတဖၣ်, ကယဲၢ်တၢ်လၢအဘၣ်အသး လီၤ.

¹¹ ဒီးစီၤၡလိၤမိၤဟ့ၣ်လီၤစီၤဃံရၣ်လၢ ဘုကၠူၣ်အကိၢ် ခံကလးလၢအပှၤဟံၣ်ဖိအတၢ်အီၣ်အဂီၢ်, ဒီးသိဆှံအ ကိၢ်ခံဆံလီၤ. စီၤၡလိၤမိၤဟ့ၣ်လီၤဝဲလၢစီၤဃံရၣ်တနံၣ် ဘၣ်တနံၣ်ဒ်န့ၣ်လီၤ.

¹² ဒီးယွၤဟ့ၣ်လီၤစီၤၡလိၤမိၤလၢ တၢ်ကူၣ်သ့ဒ်အစံးပာ် တၢ်အသိးန့ၣ်, ဒီးစီၤဃံရၣ်ဒီးစီၤၡလိၤမိၤအိၣ်ဃူလိာ်ဖိး လိာ်အသး, ဒီးအၢၣ်လီၤအီလီၤလိာ်အသးခံဂၤလိာ်လီၤ.

¹³ ဒီးစီၤပၤၡလိၤမိၤ မၢပှၤမၤတၢ်လၢအဟ့ၣ်သွဲအလီၢ်, ဒီးတၢ်လၢအမၤဝဲန့ၣ်မ့ၢ်ပှၤကညီသၢကလးလီၤ. ¹⁴ ဒီးမၢ လီၤအီၤဆူလဘၤနိၣ်, တလါပှၤကညီတကလး, တလါ ပှၤကညီတကလးဒ်အတီၤအသိးန့ၣ်လီၤ. အိၣ်ဝဲလၢ လဘၤနိၣ်အလိၤတလါ, ဒီးအိၣ်ဝဲလၢဟံၣ်ပူၤခံလါ, ဒီး စီၤအဒိၤနံရၣ်အိၣ်ဝဲလၢ ပှၤမၤတၢ်လၢအဟ့ၣ်သွဲအလီၢ် အဖီခိၣ်လီၤ.

¹⁵ ဒီးစီၤၡလိၤမိၤအိၣ်ဒီးပှၤဝံတၢ်ယိးတၢ် နွံကလးလၢအ ဝံတၢ်ယိးတၢ်, ဒီးပှၤလၢအကူာ်သ့ၣ်လၢကစၢၢ်လိၤအိၣ် ဝဲဃိးကလးလီၤ. ¹⁶ ဒီးလၢစီၤၡလိၤမိၤအပဒိၣ်ဖးဒိၣ်လၢ အအိၣ်ဝဲလၢတၢ်မၤအဖီခိၣ်အမဲာ်ညါန့ၣ် ပဒိၣ်အိၣ်သၢ ကထိသၢကယၤလၢအပၢပှၤလၢအမၤတၢ်လီၤ.

¹⁷ ဒီးစီၤပၤမၤလိာ်တၢ်, ဒီးပှၤဟဲစိာ်လၢၢ်ဖးဒိၣ်, ဒီးလၢၢ် လၢအလုၢ်ဒိၣ်ပှ့ၤဒိၣ်, လၢၢ်စိးပျၤအသးတဖၣ်န့ၣ် ဒ်သိး အကပာ်လီၤဟံၣ်အခီၣ်ထံးန့ၣ်လီၤ. ¹⁸ ဒီးစီၤၡလိၤမိၤအ ပှၤမၤတၢ်သ့, ဒီးစီၤဃံရၣ်အပှၤမၤတၢ်သ့, ဒီးပှၤဃီလၢၢ် တဖၣ်န့ၣ်စိးပျၤဝဲ, ဒီးကတဲာ်ကတီၤသ့ၣ်ဒီးလၢၢ်ဒ်သိး အကမၤဟံၣ်န့ၣ်လီၤ.

၆

¹ ဒီးလၢပှၤအံၣ်စရ့လးဟဲထီၣ်လၢ ကီၢ်အဲၤကူပတူးအ လီၢ်ခံအနံၣ်လွံၢ်ကယၤဃိးဆံနံၣ်တနံၣ် လၢစီၤၡလိၤမိၤ ကဲစီၤပၤလၢအံၣ်စရ့လးအဖီခိၣ် လွံၢ်နံၣ်တနံၣ်လၢလါ စံာ်အပူၤလၢအမ့ၢ်လါခံလါတလါန့ၣ် တၢ်မၤအသး လၢစီၤၡလိၤမိၤမၤသီယွၤအဟံၣ်လီၤ.

² ဒီးဟံၣ်လၢစီၤၡလိၤမိၤမၤဝဲလၢယွၤအဂီၢ်န့ၣ် အထီမ့ၢ် အပျၢ်ဃုဆံ, ဒီးအဒီၣ်ဃီၤအပျၢ်ခံဆံ, ဒီးအကစီၤထီၣ်အ ပျၢ်သၢဆံလီၤ.

³ ဒီးပျဲၢ်စီၢ်လၢဟံၣ်အနူၢ်အမဲာ်ညါန့ၣ် အထီမ့ၢ်အပျၢ်ခံ ဆံ, တုၤသိးသိးဒီးဟံၣ်အဒီၣ်ဃီၤဒီးအဒီၣ်ဃီၤမ့ၢ်အပျၢ် တဆံလၢဟံၣ်အမဲာ်ညါလီၤ. ⁴ ဒီးမၤတၢ်ထူၣ်ဖျိအံၣ်လၢ အချၢ, ဒီးလဲၢ်လၢအပူၤတဖၣ်လၢဟံၣ်အဂီၢ်လီၤ.

⁵ ဒီးမၤဒၢးဖိစဲဘူးဒီးဟံၣ်အဒူၣ်ဝးတရံးဝဲ, ဟံၣ်အဒူၣ် ဝးတရံးဝဲလၢနူၢ်အဃၢၤ, ဒီးလၢတၢ်ကတိၤတၢ်အလီၢ် အဃၢၤလီၤ. ဒီးမၤဒၢးဖိတရံးဝဲလီၤ.

⁶ ဒီးဒၢးအဖီလာ်ကတၢၢ်တဆီန့ၣ် အဒီၣ်ဃီၤမ့ၢ်ယဲၢ်ပျၢ်, ဒီးဒၢးအခၢၣ်သးတဆီန့ၣ် အဒီၣ်ဃီၤမ့ၢ်ဃုပျၢ်, ဒီးဒၢး သၢဆီတဆီန့ၣ်အဒီၣ်ဃီၤမ့ၢ်နွံပျၢ်လီၤ. အဂ့ၢ်ဒ်အံၤ, လၢ ဟံၣ်အချၢန့ၣ်မၤဝဲလၢခီၣ်အအံၣ်တဖၣ် ဝးတရံးဝဲ, ဒ် သိးကျိၤတဖၣ် အသုတဘၣ်တၢ်မၤဃာ်အီၤလၢဟံၣ်ဒူၣ် ပူၤတဂ့ၤလီၤ.

⁷ ဒီးတုၤအမၤဟံၣ်ဒီး, ပှၤမၤဝဲလၢလၢၢ်ကတဲာ်ကတီၤ အသးလၢပှၤတချုးဟဲစိာ်ဒံးဘၣ်ဖဲန့ၣ်, ဒီးတုၤအမၤဟံၣ် ဒီး, ခံၣ်ဒူၣ်မ့ၢ်ဂ့ၤ, ကွါမ့ၢ်ဂ့ၤ, ထီရီၤတၢ်အဃၢၤအဃိၢ် ထးမ့ၢ်ဂ့ၤ, အသီၣ်တဟူဘၣ်လၢဟံၣ်ပူၤဘၣ်.

⁸ ဒီးဒၢးအခၢၣ်သးတဆီအပဲတရီန့ၣ် အိၣ်ဝဲလၢဟံၣ် အကပၤလၢစုထွဲတခီ, ဒီးပှၤလဲၤထီၣ်ဆူတၢ်ခၢၣ်သး တဆီလၢဃီပဝံာ်, ဒီးလၢတၢ်ခၢၣ်သးတဆီဆူတၢ်သၢ ဆီတဆီန့ၣ်လီၤ.

⁹ ဒီးမၤဟံၣ်, ဒီးမၤဝံၤဝဲ, ဒီးမၤဟံၣ်ခိၣ်လၢကျိၤ, ဒီးသ့ၣ် ဆှိအ့ရ့းသ့ၣ်ဘၣ်လီၤ.

¹⁰ ဒီးမၤဒၢးဖိလၢဟံၣ်ဒီဖျၢၣ်ညါအဃၢၤ, အကစီၤထီၣ် ယဲၢ်ပျၢ်, ဒီးတန့ၤအသးလၢဟံၣ်န့ၣ်အိၣ်ဒီးသ့ၣ်ဆှိးအ့ရ့း လီၤ. ဒီးယွၤအကလုၢ်ဘၣ် စီၤၡလိၤမိၤဒီးစံးဝဲဒၣ်, ¹¹ တၢ် လၢဟံၣ်လၢနမၤအံၤ နမ့ၢ်လဲၤတၢ်လၢယတၢ်သိၣ်တၢ် သီအပူၤ, ဒီးမၤယတၢ်စံၣ်ညီၣ်, ဒီးတိၢ်န့ၢ်ယတၢ်မၤလိာ်ခဲ လၢာ်ဒ်သိးနကလဲးတၢ်လၢအပူၤဒီး, ယကဒုးကဲထီၣ် ယတၢ်ကတိၤလၢနဂီၢ် လၢယကတိၤတၢ်ဒီး စီၤဒၤဝံး န့ၣ်လီၤ.― ¹³ ဒီးယကအိၣ်လၢအံၣ်စရ့လးအကျါ, ဒီးယ တလဲၤသဒၣ်ဘၣ်ယပှၤဂီၢ်မုၢ်အံၣ်စရ့လးဘၣ်.

¹⁴ ဒီးစီၤၡလိၤမိၤမၤဟံၣ်ဒီးမၤဝံၤအီၤလီၤ.

¹⁵ ဒီးမၤဟံၣ်ဒူၣ်လၢအပူၤလၢ သ့ၣ်ဆှိအ့ရ့းသ့ၣ်ဘၣ်, လၢ ဟံၣ်အဃီပၢၢ်လၢဟံၣ်ခိၣ်လၢအပူၤန့ၣ် ဒီးမၤကျၢၢ်ဘၢ အီၤလၢအပူၤလၢသ့ၣ်, ဒီးမၤကျၢၢ်ဘၢဟံၣ်အဃီလၢ သ့ၣ်ဆှိအသ့ၣ်ဘၣ်လီၤ.

¹⁶ ဒီးလၢဟံၣ်အဃီပၢၢ်လၢဟံၣ်အခိၣ်, မၤတၢ်ပၢၢ်လၢ အကပၤတဖၣ်လၢသ့ၣ်ဆှိအ့ရ့းအသ့ၣ်ဘၣ်, အပျၢ်ခံဆံ လီၤ. မၤဝဲလၢအပူၤ, ဒီးမၤဝဲလၢတၢ်ကတိၤတၢ်အလီၢ် အဂီၢ်, လၢတၢ်အလီၢ်စီဆှံကတၢၢ်အလီၢ်အဂီၢ်လီၤ. ¹⁷ ဒီး ဟံၣ်, (အဝဲဒၣ်န့ၣ်မ့ၢ်နူၢ်) အိၣ်ဝဲအပျၢ်လွံၢ်ဆံလၢအမဲာ် ညါလီၤ.

¹⁸ ဒီးဟံၣ်အသ့ၣ်ဆှိအ့ရ့းလၢအပူၤန့ၣ် စိးပျၤအသးအိၣ် ဒီးခီခးဖးကိးအသၣ်, ဒီးဖီဖးအသးလီၤ. မ့ၢ်သ့ၣ်ဆှိအ့ ရ့းခဲလၢာ်လီၤ. လၢၢ်တအိၣ်ဖျါဘၣ်.

¹⁹ ဒီးမၤတၢ်ကတိၤတၢ်အလီၢ်လၢဟံၣ်ပူၤ, ဒ်သိးအက ပာ်ယွၤအတၢ်အၢၣ်လီၤအီလီၤအတလါဖဲန့ၣ်လီၤ.

²⁰ ဒီးတၢ်ကတိၤတၢ်အလီၢ်လၢအမဲာ်ညါန့ၣ် အထီမ့ၢ် အပျၢ်ခံဆံ, ဒီးအဒီၣ်ဃီမ့ၢ်အပျၢ်ခံဆံ, ဒီးအကစီၤထီၣ် မ့ၢ်အပျၢ်ခံဆံလီၤ. ဒီးပီၤဝဲလၢထူစီ, ဒီးကျးဃာ်တၢ်လုၢ် လီၢ်လၢသ့ၣ်ဆှိအ့ရ့းလီၤ.

²¹ ဒီးစီၤၡလိၤမိၤပီၤဟံၣ်အပူၤလၢထူစီ, ဒီၤမၤတၢ်အဒူၣ် လၢပျံၤသွဲထူလၢတၢ်ကတိၤတၢ်အလီၢ် အမဲာ်ညါလီၤ. ဒီးပီၤဝဲလၢထူလီၤ.

²² ဒီးပီၤဟံၣ်ဒီဖျၢၣ်ညါလၢထူ တုၤအမၤဟံၣ်ဝံၤဒီဖျၢၣ် ညါလီၤ. ဒီးပီၤတၢ်လုၢ်လီၢ်လၢအအိၣ်ဝဲလၢတၢ်ကတိၤ တၢ်အလီၢ်အဃၢၤလၢထူဒီဖျၢၣ်ညါလီၤ.

²³ ဒီးတ့ခ့ရူာ်လၢတၢ်ကတိၤတၢ်အလီၢ် ပူၤလၢသ့ၣ်စၤ ယံးခံဂၤလီၤ. အထီမ့ၢ်ဆံဆဲၣ်ပျၢ်လီၤ. ²⁴ ဒီးခ့ရူာ်အဒံး ဆ့တခီမ့ၢ်ယဲၢ်ပျၢ်, ဒီးခ့ရူာ်အဒံးဆ့တခီဒၣ်မ့ၢ်ယဲၢ်ပျၢ်, လၢအဒံးဆ့တခီအကတၢၢ် ပၢၢ်လၢအဒံးဆ့တခီဒၣ်အ ကတၢၢ်န့ၣ်မ့ၢ်ဆံဆဲၣ်ပျၢ်လီၤ. ²⁵ ဒီးခ့ရူာ်တဂၤဒၣ်န့ၣ်မ့ၢ် ဆံဆဲၣ်ပျၢ်လီၤ. ခ့ရူာ်ခံဂၤလၢာ်န့ၣ်မ့ၢ်အပျၢ်ပှဲၤသိးသိး, ဒီးအဒိၣ်ထဲသိးသိးလီၤ. ²⁶ ခ့ရူာ်တဂၤန့ၣ် အထီမ့ၢ်ဆံ ဆဲၣ်ပျၢ်, ဒီးခ့ရူာ်တဂၤဒၣ်န့ၣ် မ့ၢ်ဒ်သိးလိာ်အသးလီၤ.

²⁷ ဒီးပာ်ခ့ရူာ်တဖၣ်န့ၣ် လၢဟံၣ်လၢညါတဖျၢၣ်အပူၤ, ဒီးခ့ရူာ်တဖၣ်ယူာ်ထီၣ်အဒံးဆ့, ဒီးတဂၤအဒံးဆ့ထိး တၢ်အဒူၣ်, ဒီးခ့ရူာ်တဂၤဒၣ်အဒံးဆ့ထိးတၢ်အဒူၣ်အ ဂၤ, ဒီးအဒံးဆ့ထိးလိာ်အသးလၢ ဟံၣ်အသးကံၢ်ပူၤန့ၣ် လီၤ. ²⁸ ဒီးပီၤခ့ရူာ်လၢထူလီၤ.

²⁹ ဒီးစိးပျၤဟံၣ်အဒူၣ်ဝးတရံးဝဲခဲလၢာ် လၢခ့ရူာ်အဂီၤ, ဒီးသ့ၣ်စူၣ်ပလိၣ်အဂီၤ, ဒီးဖီဖးအသးအဂီၤတဖၣ်လၢ ညါဒီးလၢခိလီၤ.

³⁰ ဒီးဟံၣ်အဃီပီၤဝဲလၢထူလၢညါဒီးလၢခိလီၤ.

³¹ ဒီးလၢတၢ်ကတိၤတၢ် အလီၢ်အကျဲစၢၤအဂီၢ်န့ၣ် တ့ တြဲၤလၢသ့ၣ်စၤယံးလီၤ. ကျဲစၢၤအကျိၤထံးဒီးကျဲစၢၤ အထူၣ်န့ၣ်တုၤသိးဟံၣ်ဒူၣ်ယဲၢ်ပူတပူလီၤ.

³² တြဲၤခံဘ့ၣ်န့ၣ်မ့ၢ်သ့ၣ်စၤယံး, ဒီးစိးပျၤခ့ရူာ်, ဒီးသ့ၣ်စူၣ် ပလိၣ်, ဒီးဖီဖးအသးလၢအလိၤ, ဒီးပီၤဝဲလၢထူ, ဒီးကျး ဃာ်ခ့ရူာ်, ဒီးသ့ၣ်စူၣ်ပလိၣ်လၢထူလီၤ.

³³ ဒီးမၤသ့ၣ်စၤယံးအထူၣ်တဖၣ် လၢနူၢ်အကျဲစၢၤအဂီၢ် လီၤ. တုၤသိးအဒူၣ်လွံၢ်ပူတပူလီၤ. ³⁴ တြဲၤခံဘ့ၣ်န့ၣ်မ့ၢ်သ့ၣ်ဆှိလီၤ. တြဲၤတဘ့ၣ်အလၣ်ခံခီတလ့ၣ်ဝဲ, ဒီးတြဲၤတဘ့ၣ်ဒၣ်အလၣ်ခံခီတလ့ၣ်ဝဲလီၤ.―

³⁵ ဒီးစိၤပျၤခ့ရူာ်, ဒီးသ့ၣ်စူၣ်ပလိၣ်, ဒီးဖီဖးအသးလၢအလိၤ ဒီးကျးဃာ်ဝဲလၢထူ ဘၣ်လိာ်အသးဒီးတၢ်စိးပျၤအသး လီၤ.

³⁶ ဒီးမၤတၢ်အဂၢၤလၢညါ လၢလၢၢ်စိးပျၤအသးသၢဂ့ၢ်, ဒီးသ့ၣ်ဆှိအ့ရ့းအကျီတဂ့ၢ်လီၤ.

³⁷ ဒီးလွံၢ်နံၣ်တနံၣ်လၢလါစံာ်အပူၤန့ၣ် ပှၤပာ်လီၤယွၤ အဟံၣ်အခီၣ်ထံးလီၤ.

³⁸ ဒီးအနံၣ်တဆံတနံၣ်အနံၣ်လၢ လါဘူလးအပူၤန့ၣ် (အဝဲန့ၣ်မ့ၢ်လါဃိးလါတလါ) ပှၤမၤဟံၣ်ဝံၤဝဲ, ဒ်က ယဲၢ်တၢ်ကတိၤအသိး, ဒီးဒ်ကယဲၢ်တၢ်စံၣ်ညီၣ်ခဲလၢာ် အသိးန့ၣ်လီၤ. ဒီးမၤဟံၣ်န့ၣ်နွံနံၣ်လီၤ.

၇

¹ ဒီးစီၤၡလိၤမိၤမၤအဟံၣ်ဒၣ်ဝဲတဆံသၢနံၣ်, ဒီးမၤဝံၤ အဟံၣ်ခဲလၢာ်လီၤ.

² ဒီးမၤဟံၣ်လၢလဘၤနိၣ် အပှၢ်လၢ်ကျါတဖျၢၣ်လီၤ. အထီမ့ၢ်အပျၢ်တကယၤ, ဒီးအဒီၣ်ဃီၤမ့ၢ်အပျၢ်ယဲၢ်ဆံ, ဒီးအကစီၤထီၣ်အပျၢ်သၢဆံလီၤ. အိၣ်ဝဲလၢသ့ၣ်ဆှိအ့ ရ့းအထူၣ်လွံၢ်ဂ့ၢ်အဖီခိၣ်, ဒီးကျိၤသ့ၣ်ဆှိအ့ရ့းတဖၣ် အိၣ်ဝဲလၢတဖၣ်အဖီခိၣ်လီၤ.

³ ဒီးအခိၣ်အိၣ်ဝဲဒီးသ့ၣ်ဆှိအ့ရ့းလၢ ကျိၤတဖၣ်အဖီခိၣ် လၢအအိၣ်ဝဲလၢထူၣ်လွံၢ်ဆံယဲၢ်ထူၣ်အဖီခိၣ်, တဂ့ၢ် တဆံယဲၢ်ထူၣ်, တဂ့ၢ်တဆံယဲၢ်ထူၣ်လီၤ.

⁴ ဒီးတၢ်ထူၣ်ဖျိအိၣ်ဝဲသၢဂ့ၢ်, ဒီးဆၢညါလိာ်အသးသၢ ဂ့ၢ်လီၤ.

⁵ ဒီးတြဲၤ, ဒီးတၢ်ထူၣ်ဖျိ, ဒီးကျဲစၢၤခဲလၢာ် မ့ၢ်တၢ်လွံၢ်နၢၣ် လီၤ. ဒီးဆၢညါလိာ်အသးသၢဂ့ၢ်လီၤ.

⁶ ဒီးမၤဝဲလၢတၢ်ပျဲၢ်စီၢ်လၢထူၣ်တဖၣ်န့ၣ်လီၤ. အထီမ့ၢ် အပျၢ်ယဲၢ်ဆံ, ဒီးအဒီၣ်ဃီၤမ့ၢ်အပျၢ်သၢဆံလီၤ. ဒီးတၢ် ပျဲၢ်စီၢ်အိၣ်ဝဲလၢအမဲာ်ညါ, ဒီးထူၣ်တဖၣ်, ဒီးကျိၤတီၣ် အိၣ်ဝဲလၢအမဲာ်ညါလီၤ.

⁷ ဒီးမၤပျဲၢ်စီၢ်လၢလီၢ်ပစိာ်အဂီၢ် ဖဲအကစံၣ်ညီၣ်တၢ်, တၢ်စံၣ်ညီၣ်အပျဲၢ်စီၢ်လီၤ. ဒီးမၤအခိၣ်လၢသ့ၣ်ဆှိအ့ရ့း လၢဃီအဝဲတခီပၢၢ်လၢဃီအဝဲတခီလီၤ.

⁸ ဒီးအဟံၣ်ဖဲ အအိၣ်ဝဲဆိးဝဲလၢအပူၤတဖျၢၣ်န့ၣ် အိၣ် ဒီးအဂၢၤလၢပျဲၢ်စီၢ်လၢညါတခီ, လၢတၢ်မၤအီၤဒ်န့ၣ်သိး လီၤ. ဒီးစီၤၡလိၤမိၤမၤဟံၣ်တဖျၢၣ်လၢဖၤရိၤအဖိမုၣ်လၢ အန့ၢ်တ့ၢ်အီၤလၢအမါတဂၤအဂီၢ်လီၤဂာ်ပျဲၢ်စီၢ်အံၤလီၤ.

⁹ တၢ်တဖၣ်အံၤခဲလၢာ် မ့ၢ်လၢၢ်လၢအပှ့ၤဒိၣ်, ဒ်လၢၢ်စိး ပျၤအသးအတၢ်ထိၣ်အသိး ဘူးဝဲလၢလွးလၢညါဒီးလၢ ခိ, လၢအခီၣ်ထံးပၢၢ်လၢအခိၣ်စိၣ်, ဒီးအိၣ်လၢခိဆူအ ဂၢၤဖးဒိၣ်တခီမၤသးဒ်န့ၣ်သိးလီၤ.

¹⁰ ဒီးအခီၣ်ထံးန့ၣ် မ့ၢ်လၢလၢၢ်အပှ့ၤဒိၣ်, လၢၢ်ဖးဒိၣ်, လၢၢ်ဆံဆဲၣ်ပျၢ်, ဒီးလၢၢ်ဃိးပျၢ်လီၤ.

¹¹ ဒီးလၢထးခီန့ၣ် မ့ၢ်လၢလၢၢ်အပှ့ၤဒိၣ်ဒ်လၢလၢၢ်စိးပျၤ အသးအတၢ်ထိၣ်အသိးန့ၣ်, ဒီးသ့ၣ်ဆှိအ့ရ့းလီၤ.

¹² ဒီးဂၢၤဖးဒိၣ်အိၣ်ဝးတရံးဝဲ, အိၣ်ဒီးလၢၢ်စိးပျၤအသး န့ၣ်သၢဂ့ၢ်, ဒီးကျိၤသ့ၣ်ဆှိးအ့ရ့းတဂ့ၢ်လၢယွၤအဟံၣ် အဂၢၤလၢညါအဂီၢ်, ဒီးလၢဟံၣ်အပျဲၢ်စီၢ်အဂီၢ်လီၤ.

¹³ ဒီးစီၤပၤၡလိၤမိၤမၢလီၤတၢ်, ဒီးဟဲစိာ်စီၤဃံရၣ်တဂၤ လၢစိၢ်အပူၤလီၤ. ¹⁴ အဝဲန့ၣ်မ့ၢ်ပှၤမုၣ်ကမဲပှၤနးသၤလံ အဒူၣ်ဖိတဂၤအဖိခွါ, ဒီးအပၢ်မ့ၢ်ပှၤစိၢ်ဖိ, ပှၤမၤတၢ်သ့ လၢတိၢ်, လၢပှဲၤဒီးတၢ်ကူၣ်သ့, ဒီးအသူၣ်ဆးအသးဆး, ဒီးကယဲၢ်တၢ်မၤလၢတိၢ်န့ၣ်သ့ၣ်ညါဝဲလီၤ. ဒီးဟဲဝဲဆူ စီၤပၤၡလိၤမိၤအအိၣ်ဒီးမၤအတၢ်မၤခဲလၢာ်လီၤ.

¹⁵ ဒီးသိန့ၢ်ထူၣ်တိၢ်ခံထူၣ်လီၤ. တထူၣ်အထီတဆံဃိး ပျၢ်, တထူၣ်အထီတဆံဃိးပျၢ်, ဒီးပျံၤအထီတဆံခံပျၢ် ဘံဝးတရံးထူၣ်တထူၣ်လီၤ.

¹⁶ ဒီးမၤတၢ်အခိၣ်လၢ တိၢ်ပှံၢ်အသးခံဖျၢၣ်, ဒ်သိးအက ပာ်အီၤလၢထူၣ်တဖၣ်အဖီခိၣ်လီၤ. တၢ်အခိၣ်တဖျၢၣ်အ ထီမ့ၢ်ယဲၢ်ပျၢ်, ဒီးတၢ်အခိၣ်တဖျၢၣ်အထီမ့ၢ်ယဲၢ်ပျၢ်လီၤ.

¹⁷ ဒီးမၤဝဲစၤအမဲာ်, ဒီးပျံၤတဖၣ်လၢပျံၤသွဲလၢတၢ်အခိၣ် အဂီၢ်လၢအအိၣ်ဝဲလၢထူၣ်တဖၣ်အဖီခိၣ်, နွံဘ့ၣ်နွံဘိ လၢခိၣ်တဖျၢၣ်အဂီၢ်, ဒီးနွံဘ့ၣ်နွံဘိလၢခိၣ်တဖျၢၣ်ဒၣ် အဂီၢ်လီၤ.

¹⁸ ဒီးမၤဝဲထူၣ်တဖၣ်လီၤ. ဒီးတၢ်အဂ့ၢ်ခံဂ့ၢ်အိၣ်ဝးတရံး ဝဲ, လၢစၤအတၢ်မၤတဘ့ၣ်အဖီခိၣ် ဒ်သိးအကကျၢၢ် ဘၢတၢ်အခိၣ်လၢအအိၣ်ဝဲလၢအဖီခိၣ် လၢသလဲသၣ် န့ၣ်အိၣ်ဝဲခံကယၤလၢခံဂ့ၢ်အပူၤဝးတရံးဝဲလၢ တၢ်အ ခိၣ်တဖျၢၣ်ဒၣ်အလိၤလီၤ.

¹⁹ ဒီးတၢ်အခိၣ်တဖၣ်လၢအအိၣ်ဝဲလၢ ထူၣ်အဖီခိၣ်န့ၣ် မ့ၢ်ဖီဒ့ၣ်ညါအဂီၤလွံၢ်ပျၢ်လၢပျဲၢ်စီၢ်အပူၤလီၤ.

²⁰ ဒီးတၢ်အခိၣ်တဖၣ်လၢထူၣ်ခံထူၣ်အဖီခိၣ်န့ၣ် အိၣ်ဒီး သလဲသၣ်လၢအဖီခိၣ်စ့ၢ်ကီးလီၤ. အိၣ်သဃီၤဒီးအဖျၢၣ် လၢအအိၣ်ဝဲလၢစၤအတၢ်မၤအဃၢၤ, ဒီးသလဲသၣ်န့ၣ် အိၣ်ဝဲခံကယၤလၢခံဂ့ၢ်အပူၤဝးတရံးဝဲလၢ တၢ်အခိၣ် တဖျၢၣ်ဒၣ်အလိၤလီၤ.

²¹ ဒီးပာ်ထူၣ်တဖၣ်န့ၣ် ထူၣ်ကလာ်လၢနူၢ်အပျဲၢ်စီၢ်ပူၤ လီၤ. ဒီးပာ်ထူၣ်လၢစုထွဲတခီထူၣ်ကလာ်, ဒီးယုၢ်ဝဲအ မံၤလၢယၤကံၣ်, ဒီးပာ်ထူၣ်လၢစုစ့ၣ်တခီထူၣ်ကလာ်, ဒီးယုၢ်ဝဲအမံၤလၢဘိၤဧးလီၤ.

²² ဒီးဖီဒ့ၣ်ညါအတၢ်ဂီၤအိၣ်ဝဲလၢ ထူၣ်တဖၣ်အဖီခိၣ် လီၤ. ဒီးတၢ်မၤထူၣ်တဖၣ်န့ၣ်ဝံၤဝဲလီၤ.

²³ ဒီးသိန့ၢ်ပီၣ်လဲၣ်တဖျၢၣ်လီၤ. အဘၢၣ်စၢၤလၢအဃၢၤ တခီပၢၢ်လၢအဃၢၤအဝဲတခီမ့ၢ်အပျၢ်တဆံလီၤ. မ့ၢ်တၢ် ဖျၢၣ်သလၢၣ်ဝးတရံးဝဲ, ဒီးအကစီၤထီၣ်မ့ၢ်ယဲၢ်ပျၢ်, ဒီး ပျံၤအထီအပျၢ်သၢဆံဝးတရံးအီၤလီၤ.

²⁴ ဒီးလၢအခိၣ်ဒူအဖီလာ်ဝးတရံးဝဲန့ၣ် အိၣ်ဝဲဒီးခီခးဖး ကိး, တပျၢ်ဆံဆဲၣ်ဖျၢၣ်, တပျၢ်ဆံဆဲၣ်ဖျၢၣ်ဝးတရံးပီၣ် လဲၣ်ဒီဖျၢၣ်ညါလီၤ. လၢပီၣ်လဲၣ်ဘၣ်သိအသးန့ၣ်ခီခး ဖးကိးတဖၣ်န့ၣ်သိအသးလၢခံဂ့ၢ်လီၤ.

²⁵ ဒီးအိၣ်ဝဲလၢဂီၤဖံးတဆံခံဒုအဖီခိၣ်လီၤ. သၢဒုကွၢ်ဝဲ ဆူကလံၤစိး, ဒီးသၢဒုကွၢ်ဝဲဆူမုၢ်နုာ်, ဒီးသၢဒုကွၢ်ဝဲဆူ ကလံၤထံး, ဒီးသၢဒုကွၢ်ဝဲဆူမုၢ်ထီၣ်လီၤ. ဒီးပီၣ်လဲၣ်န့ၣ် အိၣ်ဝဲလၢအဖီခိၣ်, ဒီးအခံန့ၣ်အိၣ်ဆူတၢ်အပူၤတခီလီၤ.

²⁶ ဒီးအတီၣ်မ့ၢ်တဖံး, ဒီးအခိၣ်ဒူမၤအသးဒ်သလၢအခိၣ် ဒူအသိးအိၣ်ဝဲဒိးဖီဒ့ၣ်ညါအဖီတဖၣ်, ဒီးတြီၢ်ဝဲလၢဘၤ သးခံကထိလီၤ.

²⁷ ဒီးမၤဝဲလၢတၢ်ခီၣ်တိၢ်တဆံလီၤ. ဒီးခီၣ်တဖျၢၣ်န့ၣ် အထီမ့ၢ်လွံၢ်ပျၢ်, ဒီးအဒီၣ်ဃီၤမ့ၢ်လွံၢ်ပျၢ်, ဒီးအကစီၤထီၣ် မ့ၢ်သၢပျၢ်လီၤ.

²⁸ ဒီးခီၣ်တဖၣ်အတၢ်မၤန့ၣ်အမ့ၢ်အအံၤ, အိၣ်ဒီးခီၣ်ကျီၤ တဖၣ်, ဒီးခီၣ်ကျီၤန့ၣ် အိၣ်ဝဲလၢခီၣ်အဆၢအဘၢၣ်စၢၤ န့ၣ်လီၤ.

²⁹ ဒီးလၢခီၣ်ကျီၤအလိၤလၢအအိၣ်ဝဲလၢ အခီၣ်အဆၢ အဘၢၣ်စၢၤန့ၣ်ခ့ယုၢ်, ဂီၤဖံး, ဒီးခ့ရူာ်တဖၣ်အိၣ်ဝဲ, ဒီး လၢခ့ယုၢ်ဒီးဂီၤဖံးအဖီခိၣ်ဒီးအဖီလာ်န့ၣ် ခီၣ်အဆၢအိၣ် ဝဲဒီးဖီလီၤစဲၤတဖၣ်လီၤ. ³⁰ ဒီးကယဲၢ်တၢ်အခီၣ်အိၣ်ဝဲဒီး လ့ၣ်ဖံဘၣ်တိၢ်လွံၢ်ဘ့ၣ်, ဒီးအဝၣ်ရိကိၢ်လီၤ. ဒီးအသ နၢၣ်လွံၢ်သနၢၣ်န့ၣ်အိၣ်ဝဲဒီးတၢ်လၢအဖီလာ်လီၤ. လၢ သရာ်န့ၣ်အဖီလာ်တၢ်အိၣ်လၢအဖီလာ် သိအသးအိၣ် ဝဲဖဲဖီလီၤစဲၤတဖၣ်အဃၢၤကိးပူၤဒဲးလီၤ.

³¹ ဒီးတၢ်အအိပူၤအိၣ်ဝဲလၢအခိၣ်ဒီး လၢအဖီခိၣ်န့ၣ်မ့ၢ် တပျၢ်လီၤ. အအိပူၤန့ၣ်မ့ၢ်တၢ်ကဝီၤကျီၤဒ်တၢ်အခီၣ်အ တၢ်မၤအသိးန့ၣ်, တပျၢ်ဒီးတထါ, ဒီးတၢ်အိပူၤလၢအ ခိၣ်န့ၣ်အိၣ်ဝဲဒီးတၢ်ဂီၤဒီးအခီၣ်ကျီၤလီၤ. ဖျၢၣ်သလၢၣ် တမ့ၢ်ဘၣ်, မ့ၢ်တၢ်လွံၢ်နၢၣ်လီၤ.

³² ဒီးလၢတၢ်ခီၣ်ကျီၤအဖီလာ်န့ၣ် လ့ၣ်ဖံဘၣ်လွံၢ်ဘ့ၣ် အိၣ်, ဒီးလ့ၣ်ဝၣ်ရိစဲဘူးဒီးတၢ်အခီၣ်, ဒီးလ့ၣ်ဖံဘၣ်န့ၣ် အထီမ့ၢ်တပျၢ်ဒီးတထါလီၤ.

³³ ဒီးလ့ၣ်ဖံဘၣ်အတၢ်မၤန့ၣ် မၤသးဒ်လ့ၣ်ကဟၣ်သုး အတၢ်မၤအသိးန့ၣ်လီၤ. အလ့ၣ်ဝၣ်ရိ, ဒီးအလ့ၣ်အခိၣ် ကျၢၢ်, ဒီးအလ့ၣ်အခီၣ်ကျီၤ, ဒီးအလ့ၣ်အဒံးသ့ၣ်တဖၣ် န့ၣ်မ့ၢ်တၢ်သိအသးခဲလၢာ်လီၤ.

³⁴ ဒီးတၢ်ပာ်လၢအဖီလာ်လွံၢ်ဖျၢၣ် အိၣ်ဝဲလၢတၢ်အခီၣ် တဖျၢၣ်အသနၢၣ်လွံၢ်သနၢၣ်အဂီၢ်, ဒီးတၢ်ပာ်လၢအဖီ လာ်တဖၣ်န့ၣ်ဘၣ်ဃးဒီးတၢ်အခီၣ်လီၤ.

³⁵ ဒီးလၢတၢ်အခီၣ်အဖီခိၣ်န့ၣ် တၢ်ကဝီၤအသးကစီၤ ထီၣ်တထါအိၣ်ဝဲ, ဒီးတၢ်လၢခီၣ်အခိၣ်, ဒီးတၢ်အဆၢ, ဒီးတၢ်အခီၣ်ကျီၤန့ၣ်မ့ၢ်တၢ်တမံၤဃီလီၤ.

³⁶ ဒီးလၢတၢ်အဆၢအလိၤန့ၣ်, ဒီးလၢတၢ်အခီၣ်ကျီၤအ လိၤန့ၣ်ကွဲးဝဲလၢခ့ရူာ်, ခ့ယုၢ်, ဒီးသ့ၣ်စူၣ်ပလိၣ်ဒ်အလီၢ် အိၣ်ကလီအိၣ်ဝဲအသိးန့ၣ်ဒီးဝးတရံးဝဲလီၤ.

³⁷ ဒ်န့ၣ်အသိးမၤဝဲလၢတၢ်အခီၣ်ဆံဆဲၣ်ဖျၢၣ်လီၤ. အိၣ် ဝဲဒီးအနီၣ်ထိၣ်တမံၤဃီ, အထိၣ်တုၤသိးသိး, အဒိၣ်ထဲ သိးသိးလီၤ.

³⁸ ဒီးမၤသရာ်တိၢ်ဆံဆဲၣ်ဖျၢၣ်လီၤ. သရာ်တဖျၢၣ်တြီၢ် ဝဲလၢဘၤသးလွံၢ်ဆံစုာ်စုာ်လီၤ. သရာ်တဖျၢၣ်န့ၣ်မ့ၢ် လွံၢ်ပျၢ်ကိးဖျၢၣ်ဒဲးလီၤ. သရာ်တဖျၢၣ်အိၣ်ဝဲလၢခီၣ်တ ဖျၢၣ်အဖီခိၣ်န့ၣ်ကိးဖျၢၣ်ဒဲးလီၤ.

³⁹ ဒီးပာ်လီၤတၢ်အခီၣ်ယဲၢ်ဖျၢၣ်လၢ ဟံၣ်အစုထွဲတခီ, ဒီးယဲၢ်ဖျၢၣ်လၢဟံၣ်အစုစ့ၣ်တခီ, ဒီးပာ်လီၤပီၣ်လဲၣ်လၢ ဟံၣ်အစုထွဲတခီ လၢမုၢ်ထီၣ်သဃီၤဒီးကလံၤထံးတခီ န့ၣ်လီၤ.

⁴⁰ ဒီးစီၤဃံရၣ်မၤဝဲလၢသရာ်, ဒီးတပူာ်, ဒီးသလၢတဖၣ် န့ၣ်လီၤ. ဒီးစီၤဃံရၣ်မၤဝံၤတၢ်မၤလၢအမၤလၢစီၤၡလိၤ မိၤအဂီၢ်လၢယွၤအဟံၣ်အဂီၢ်, ⁴¹ ထူၣ်ခံထူၣ်န့ၣ်, ဒီးသ ရာ်လၢတၢ်အခိၣ်အဂီၢ် လၢအအိၣ်ဝဲလၢထူၣ်အဖီခိၣ်, ဒီးစၤအတၢ်မၤခံဘ့ၣ် ဒ်သိးအကကျၢၢ်ဘၢတၢ်အခိၣ်ခံ ဖျၢၣ်အသရာ်ခံဖျၢၣ်လၢအအိၣ်ဝဲလၢထူၣ်အဖီခိၣ်န့ၣ်,―

⁴² ဒီးသလဲသၣ်လွံၢ်ကယၤလၢ စၤအတၢ်မၤအဂီၢ်, သလဲ သၣ်ခံဂ့ၢ်လၢစၤအတၢ်မၤတဘ့ၣ်အဂီၢ်, ဒ်သိးအကကျၢၢ် ဘၢတၢ်အခိၣ်အသရာ်ခံဖျၢၣ်အိၣ်ဝဲလၢထူၣ်တဖၣ်အဖီ ခိၣ်န့ၣ်, ⁴³ ဒီးတၢ်အခီၣ်ဆံဆဲၣ်ဖျၢၣ်, ဒီးသရာ်ဆံဆဲၣ် ဖျၢၣ်လၢအအိၣ်ဝဲလၢခီၣ်တဖၣ်အဖီခိၣ်, ⁴⁴ ဒီးပီၣ်လဲၣ်တ ဖျၢၣ်, ဒီးဂီၤဖံးတဆံခံဒုအိၣ်ဝဲလၢ ပီၣ်လဲၣ်အဖီလာ်,―

⁴⁵ ဒီးသပၢၤတဖၣ်, ဒီးတပူာ်တဖၣ်, ဒီးသလၢတဖၣ်လီၤ. ဒီးကယဲၢ်တၢ်အပိးအလီ လၢဃံရၣ်မၤဝဲလၢစီၤပၤၡလိၤ မိၤအဂီၢ်, လၢယွၤအဟံၣ်အဂီၢ်န့ၣ်မ့ၢ်ဝဲတိၢ်စီလီၤ.

⁴⁶ စီၤပၤသိးအီၤလၢယၢ်ဒ့ၣ်အပျီပူၤ, လၢကပံာ်ကျါလၢ စူးကိၤသးဒိးစၢ်သးအဘၢၣ်စၢၤလီၤ.

⁴⁷ ဒီးတၢ်ဖိတၢ်လံၤန့ၣ် မ့ၢ်အအိၣ်အါအါကလဲာ်ဒီး, စီၤ ၡလိၤမိၤတစီၤဘၣ်အီၤ, ဒီးတိၢ်အလီၤတယၢၢ်ဒ်လဲၣ်ဒ် လဲၣ်န့ၣ်တဃုဘၣ်ဝဲဘၣ်.

⁴⁸ ဒီးစီၤၡလိၤမိၤတ့ကယဲၢ်ယွၤအဟံၣ်အပီးအလီ, တၢ် လုၢ်အလီၢ်လၢထူ, ဒီးစီၢ်နီၤခိၣ်ဖဲတၢ်မဲာ်ညါကိၣ်အိၣ်, လၢထူ, ⁴⁹ ဒီးမ့ၣ်အူဒၢလၢထူစီယဲၢ်ဖျၢၣ်လၢစုထွဲ, ဒီးယဲၢ် ဖျၢၣ်လၢစုစ့ၣ်လၢတၢ်ကတိၤတၢ်အလီၢ်အမဲာ်ညါ, ဒီး သံၣ်ဧိၤဖီဧိၤ, ဒီးမ့ၣ်အူဒၢဖိ, ဒီးနီၣ်တံာ်မ့ၣ်အူလၢထူ,―

⁵⁰ ဒီးလီခီတဖၣ်, ဒီးနီၣ်တံာ်ကွံာ်တၢ်, ဒီးသလၢ, ဒီးနီၣ် တၢၤ, ဒီးသပၢၤမ့ၣ်အူသ့ၣ်တဖၣ်န့ၣ်လၢထူစီ, ဒီးပးတၣ် လၢထူလၢဟံၣ်လၢညါ, တၢ်အလီၢ်စီဆှံကတၢၢ်, လၢ အတြဲၤအဂီၢ်ဒီးလၢဟံၣ်အတြဲၤအဂီၢ်, ဒ်ပစံးတၢ်အသိး, နူၢ်န့ၣ်လီၤ.

⁵¹ ဒီးစီၤၡလိၤမိၤမၤဝံၤတၢ်မၤခဲလၢာ် လၢယွၤအဟံၣ်အ ဂီၢ်လီၤ. ဒီးစီၤၡလိၤမိၤဟဲစိာ်နုာ်တၢ်တဖၣ်လၢအပၢ်မၤ ဘူၣ်ဝဲလီၤ. ဒီးကျိၣ်ဧိၤစ့ဧိၤ, ထူဧိၤလွဲဧိၤ, ဒီးတၢ်ဖိတၢ် လံၤ, ဒီးပာ်ဝဲလၢတၢ်လုၢ်ဒိၣ်ပှ့ၤဒိၣ်အကျါ လၢယွၤအ ဟံၣ်ပူၤလီၤ.

၈

¹ တုၤနုၤတစုစီၤၡလိၤမိၤဒုးအိၣ်ဖှိၣ်ရိဖှိၣ် အံၣ်စရ့လးအ ပှၤသူၣ်က့သးပှၢ်, ဒီးအဒူၣ်တဖၣ်အခိၣ်တဖၣ်, ပှၤအံၣ် စရ့လးအပၢ်အခိၣ်တဖၣ် ဆူစီၤပၤၡလိၤမိၤအအိၣ်လၢ ယရူၤၡလ့ၣ်အပူၤ, ဒ်သိးအကဟဲစိာ်ယွၤအတၢ်အၢၣ် လီၤအီလီၤအတလါလၢစီၤဒၤဝံးအဝ့ၢ်ပူၤလီၤ. (အဝဲန့ၣ် မ့ၢ်စံယိၣ်လီၤ.)

² ဒီးအံၣ်စရ့လးအပှၤကညီခဲလၢာ် အိၣ်ဖှိၣ်ရိဖှိၣ်ဆူစီၤ ပၤၡလိၤမိၤအအိၣ်လၢတၢ်မၤဘူၣ်အပူၤ, လၢလါအ့သၤ နံၣ်အပူၤလီၤ.(အဝဲန့ၣ်မ့ၢ်လါပှဲၤထီၣ်နွံလါတလါလီၤ.)

³ ဒီးအံၣ်စရ့လးအပှၤသူၣ်က့သးပှၢ်ဟဲဝဲခဲလၢာ်, ဒီးပှၤ လုၢ်တၢ်အဒိၣ်ဟံးထီၣ်တလါန့ၣ်, ⁴ ဒီးဟဲစိာ်ထီၣ်ယွၤ အတလါ, ဒီးအတၢ်အိၣ်ဖှိၣ်အဒဲ, ဒီးတၢ်ဖိတၢ်လံၤစီဆှံ လၢအအိၣ်ဝဲလၢဒဲပူၤခဲလၢာ်လီၤ. အဝဲတဖၣ်န့ၣ်မ့ၢ်ပှၤ လုၢ်တၢ်အဒိၣ်, ဒီးပှၤလ့ၤဝံဖိဟဲစိာ်ဝဲလီၤ.

⁵ ဒီးစီၤပၤၡလိၤမိၤဒီးအံၣ်စရ့လး အတၢ်အိၣ်ဖှိၣ်ခဲလၢာ် လၢအအိၣ်ဖှိၣ်ဆူအအိၣ်န့ၣ် အိၣ်ဝဲဒီးအီၤလၢတလါအ မဲာ်ညါ, ဒီးလုၢ်သိ, ဒီးဂီၤဖံးအါအါကလဲာ်, ဒီးမ့ၢ်အအိၣ် ဆံးအါဆံးအါ ပှၤစံးတသ့ဘၣ်လၢအအိၣ်ဂီၢ်မုၢ်အဃိ လီၤ.

⁶ ဒီးပှၤလုၢ်တၢ်အဒိၣ် ဟဲစိာ်ယွၤအတၢ်အၢၣ်လီၤအီလီၤ အတလါဆူအလီၢ်လၢတၢ်ကတိၤတၢ်အလီၢ် လၢဟံၣ် ပူၤဆူတၢ်အလီၢ်စီဆှံကတၢၢ်လၢ ခ့ရူာ်အဒံးဆ့အဖီလာ် လီၤ.

⁷ အဂ့ၢ်ဒ်အံၤ, ခ့ရူာ်ယူာ်ထီၣ်အဒံးဆ့ခံခီလၢတလါအ ဖီခိၣ်, ဒီးခ့ရူာ်ကျၢၢ်ဘၢတလါ, ဒီးအနီၣ်ယိးဘိအဖီခိၣ် လီၤ.

⁸ ဒီးထုးထီၣ်နီၣ်ယိးဘိ, ဒီးနီၣ်ယိးဘိအစိးနါတဖၣ်အိၣ် ဖျါဝဲလၢတၢ်အလီၢ်စီဆှံအပူၤ လၢတၢ်ကတိၤတၢ်အလီၢ် အမဲာ်ညါ, ဒီးတအိၣ်ဖျါဘၣ်လၢခိ, ဒီးအိၣ်ဝဲဖဲန့ၣ်တုၤ မုၢ်မဆါတနံၤအံၤလီၤ.

⁹ ဒီးအိၣ်ဝဲလၢတလါပူၤ ထဲလၢၢ်ဘ့ၣ်ဘၣ်ခံဘ့ၣ်လၢစီၤ မိၤရှ့ပာ်ဖဲန့ၣ်လၢဃိးရ့း, ဖဲယွၤအၢၣ်လီၤအီလီၤတၢ်ဒီးပှၤ အံၣ်စရ့လးဖိ, ဖဲအဟဲထီၣ်လၢကီၢ်အဲၤကူပတူးအပူၤန့ၣ် လီၤ. ¹⁰ ဒီးတၢ်မၤအသး ဖဲပှၤလုၢ်တၢ်အဒိၣ် ဟဲထီၣ်က့ၤလၢတၢ်အလီၢ်စီဆှံဒီး, တၢ်အၢၣ်န့ၣ်ပှဲၤယွၤအဟံၣ်ပူၤလီၤ.―

¹¹ ဒီးပှၤလုၢ်တၢ်အဒိၣ်န့ၣ် ဆၢထၢၣ်မၤတၢ်တသ့ဘၣ်လၢ တၢ်အၢၣ်အဃိလီၤ. အဂ့ၢ်ဒ်အံၤ, ယွၤအလၤကပီၤမၤပှဲၤ ယွၤအဟံၣ်ပူၤလီၤ.

¹² တုၤနုၤတစုစီၤၡလိၤမိၤစံးဝဲဒၣ်, ယွၤစံးလၢသါကအိၣ် ကဆိးလၢတၢ်ခံးတီၣ်အပူၤလီၤ. ¹³ ယမၤနဟံၣ်တဖျၢၣ် သပှၢ်တၢၢ် ဒ်သိးနကအိၣ်လၢအပူၤ, တၢ်အလီၢ်လီၤစံာ် လၢနကအိၣ်ကဆိးလၢအပူၤလီၤထူလီၤယိာ်လီၤ.

¹⁴ ဒီးစီၤပၤဃၣ်ဃီၤအမဲာ်ဒီး ဆိၣ်ဂ့ၤအံၣ်စရ့လးအတၢ် အိၣ်ဖှိၣ်ခဲလၢာ်, (ဒီးအံၣ်စရ့လးအတၢ်အိၣ်ဖှိၣ်ဆၢထၢၣ် ခဲလၢာ်,) ¹⁵ ဒီးစံးဝဲဒၣ်, ယွၤအံၣ်စရ့လးအကစၢ်လၢအ ကတိၤလၢအထးခိၣ်ဒီးယပၢ်စီၤဒၤဝံး, ဒီးမၤပှဲၤထီၣ်ဝဲ လၢအစုန့ၣ်တဂၤ, မ်အဘၣ်တၢ်စံးထီၣ်ပတြၢၤတက့ၢ်. ဒီးစံးဝဲဒၣ်, ¹⁶ လၢမုၢ်တနံၤလံၤလံၤလၢယဟဲစိာ်ယပှၤ ဂီၢ်မုၢ်အံၣ်စရ့လးလၢ အဲၤကူပတူးအပူၤန့ၣ် ယတဃု ထၢဘၣ်ဝ့ၢ်လၢအံၣ်စရ့လးအဒူၣ်ခဲလၢာ်အကျါ လၢပှၤ ကမၤဟံၣ်ဒ်သိးယမံၤကအိၣ်လၢအပူၤ, နီတဖျၢၣ်ဘၣ်. မ့မ့ၢ်ယဃုထၢစီၤဒၤဝံးဒ်သိးအကအိၣ်လၢ ယပှၤဂီၢ်မုၢ် အံၣ်စရ့လးအဖီခိၣ်လီၤ.

¹⁷ ဒီးအိၣ်ဝဲလၢယပၢ်စီၤဒၤဝံးအသးလၢ အကမၤဟံၣ် လၢယွၤအံၣ်စရ့လး အကစၢ်အမံၤအဂီၢ်လီၤ. ¹⁸ ဒီးယွၤ စံးဘၣ်ယပၢ်စီၤဒၤဝံး, မ့ၢ်တၢ်အိၣ်လၢနသးလၢနကမၤ ဟံၣ်လၢယမံၤအဂီၢ်ဒီး, နမၤတၢ်ဂ့ၤလၢအအိၣ်လၢနသး အဃိလီၤ. ¹⁹ ဘၣ်ဆၣ်ဒီးနတဘၣ်မၤဘၣ်ဟံၣ်န့ၣ်ဘၣ်. မ့မ့ၢ်နဖိခွါလၢအကဟဲထီၣ်လၢ နယီၢ်ဒ့ပူၤတဂၤန့ၣ်အ ဝဲဒၣ်ကမၤဟံၣ်တဖျၢၣ်န့ၣ်လၢယဂီၢ်လီၤ. ²⁰ ဒီးယွၤမၤ လၢမၤပှဲၤအကလုၢ်လၢအကတိၤဝဲ, ဒီးယဂဲၤဆၢထၢၣ် လၢယပၢ်စီၤဒၤဝံးအလီၢ်, ဒီးဆ့ၣ်နီၤလၢအံၣ်စရ့လးအ လီၢ်ပစိာ်အဖီခိၣ်ဒ်ယွၤစံးပာ်တၢ်အသိး, ဒီးမၤဟံၣ်လၢ ယွၤ, အံၣ်စရ့လးအကစၢ်အမံၤအဂီၢ်လီၤ. ²¹ ဒီးယပာ်အ လီၢ်ဖဲန့ၣ်လၢတလါအဂီၢ် ဖဲယွၤအတၢ်အၢၣ်လီၤအီလီၤ အိၣ်လၢအပူၤလၢအအၢၣ်လီၤအီလီၤဒီးပပၢ်တဖၣ် ဖဲအ ဟဲစိာ်အီၤလၢကီၢ်အဲၤကူပတူးအပူၤန့ၣ်လီၤ.

²² ဒီးစီၤၡလိၤမိၤဆၢထၢၣ်လၢ ယွၤအတၢ်လုၢ်လီၢ်အမဲာ် ညါလၢအံၣ်စရ့လးအတၢ်အိၣ်ဖှိၣ်ခဲလၢာ်အမဲာ်ညါ, ဒီး ယူာ်ထီၣ်အစုဆူမူခိၣ်, ²³ ဒီးစံးဝဲဒၣ်, ယွၤအံၣ်စရ့လးအ ကစၢ်ဧၢ, လၢမူခိၣ်ထး, ဒီးလၢဟီၣ်ခိၣ်လာ်, ကစၢ်ဒ်နၤ အသိးန့ၣ်တအိၣ်ဘၣ်, လၢအတိၢ်န့ၢ်တၢ်အၢၣ်လီၤအီ လီၤ, ဒီးတၢ်ဘျုးတၢ်ဖှိၣ်ဒီးနခ့နပှၤလၢအလဲၤတၢ်လၢန မဲာ်ညါဒီးအသးဒီဖျၢၣ်ညါ, ²⁴ လၢအတိၢ်န့ၢ်တၢ်ဒီးနခ့ နပှၤယပၢ်စီၤဒၤဝံးလၢတၢ်လၢနစံးပာ်လၢအီၤလီၤ. ဒီးန ကတိၤတၢ်လၢနထးခိၣ်, ဒီးနမၤလၢထီၣ်ပှဲၤထီၣ်တၢ် လၢနစု, ဒ်လၢမုၢ်မဆါတနံၤအံၤအသိးန့ၣ်လီၤ.

²⁵ ဒီးခဲကနံၣ်အံၤယွၤအံၣ်စရ့လးအကစၢ်ဧၢ, တိၢ်န့ၢ်တၢ် ဒီးနခ့နပှၤယပၢ်စီၤဒၤဝံး လၢတၢ်လၢနကတိၤတၢ်ဒီးအီၤ တက့ၢ်. နစံး, ပှၤဘၣ်ဃးဒီးနၤလၢအကဆ့ၣ်နီၤလၢအံၣ် စရ့လးအလီၢ်ပစိာ်တဂၤတဟါမၢ်ဘၣ်လၢ ယမဲာ်ညါ ဘၣ်ထဲအံၤတမံၤ, မ်နဖိနလံၤတိၢ်န့ၢ်အကျဲဒ်သိးအက လဲၤတၢ်လၢယမဲာ်ညါဒ်နလဲၤတၢ်လၢယမဲာ်ညါ အသိး န့ၣ်တက့ၢ်.

²⁶ ဒီးခဲကနံၣ်အံၤအံၣ်စရ့လးအကစၢ်ဧၢ, မ်နမၤတီလၢ် နကလုၢ်လၢနကတိၤတၢ်လၢနခ့နပှၤ ယပၢ်စီၤဒၤဝံးတ က့ၢ်. ²⁷ အဂ့ၢ်ဒ်အံၤ, ကစၢ်ကအိၣ်ကဆိးနီၢ်နီၢ်လၢဟီၣ်ခိၣ် ချၢစ့ၢ်ကီးဧါ. ကွၢ်ကွၢ်, မူခိၣ်ဒီးမူခိၣ်အထီကတၢၢ်န့ၣ်တ တြီၢ်ဘၣ်လၢနဂီၢ်ဘၣ်. ဟံၣ်လၢယမၤတဖျၢၣ်အံၤဆံး န့ၢ်အန့ၣ်ဆံးဒိၣ်လဲၣ်.

²⁸ ဒီးဃၣ်ဃီၤနမဲာ်ဆူနခ့နပှၤအတၢ်ထုကဖၣ်, ဒီးအဃ့ ကညးတၢ်, ယွၤယကစၢ်ဧၢ, ဒိကနၣ်တၢ်ကိးပသူထီၣ်, ဒီးတၢ်ဘါထုကဖၣ်လၢ နခ့နပှၤဘါထုကဖၣ်လၢနမဲာ် ညါလၢမုၢ်မဆါတနံၤအံၤ, ²⁹ ဒ်သိးနမဲာ်ကအိၣ်အိးထီၣ် အသးဆူဟံၣ်တဖျၢၣ်အံၤ လၢမုၢ်ဆါဆဲးလၢမုၢ်နၤဆူ တၢ်အလီၢ်လၢနစံးလၢအဂ့ၢ်, ယမံၤကအိၣ်ဖဲန့ၣ်, ဒ်သိး နကဒိကနၣ်တၢ်ထုကဖၣ် လၢနခ့နပှၤထုကဖၣ်ဝဲဆူ တၢ်အလီၢ်အံၤတက့ၢ်.

³⁰ တုၤအဘါထုကဖၣ်တၢ်ဆူတၢ်အလီၢ်အံၤဒီး, ဒိကနၣ် နခ့နပှၤ, ဒီးနပှၤဂီၢ်မုၢ်အံၣ်စရ့လးအဃ့ကညးတၢ်, ဒီး ဒိကနၣ်တၢ်လၢမူခိၣ်, နအိၣ်နဆိးအလီၢ်, ဒီးတုၤနနၢ်ဟူ တၢ်ဒီး, ပျၢ်တၢ်တက့ၢ်.

³¹ ပှၤတဂၤမ့ၢ်မၤကမၣ်ပှၤလၢအဃၢၤ, ဒီးအဝဲဒၣ်ဃ့တၢ် ဆိၣ်လီၤအသးလၢအီၤ, ဒီးဒုးဆိၣ်တၢ်, ဒီးတၢ်ဆိၣ်န့ၣ် ဟဲဝဲလၢနတၢ်လုၢ်လီၢ်အမဲာ်ညါလၢဟံၣ်တဖျၢၣ်အံၤအ ပူၤဒီး, ³² ဒိကနၣ်တၢ်နဲလၢမူခိၣ်အပူၤ, ဒီးမၤတၢ်, ဒီးစံၣ် ညီၣ်နခ့နပှၤ, ဒ်သိးနကဟ့ၣ်တၢ်ဒဲးဘးလၢပှၤတတီတ လိၤ, ဒ်သိးနကဟ့ၣ်အကျဲလၢအခိၣ်ဒၣ်ဝဲအဖီခိၣ်, ဒီးဒ် သိးနကပာ်တီပာ်လိၤပှၤတီပှၤလိၤ, ဒ်သိးနကဟ့ၣ်လီၤ အီၤလၢတၢ်ဒ်အတၢ်တီတၢ်လိၤအသိးန့ၣ်တက့ၢ်.

³³ တုၤနပှၤဂီၢ်မုၢ်အံၣ်စရ့လး ဘၣ်တၢ်ကျီကွံာ်အီၤလၢအ ဒုၣ်အဒါအမဲာ်ညါလၢအမၤကမၣ်ဘၣ်နၤအဃိ, ဒီးဃၣ် ဃီၤအသးဆူနအိၣ်, ဒီးအၢၣ်လီၤအီလီၤနမံၤ, ဒီးဘါထု ကဖၣ်တၢ်, ဒီးဃ့ကညးတၢ်လၢနၤလၢဟံၣ်အံၤအပူၤ ဒီး, ³⁴ ဒိကနၣ်နဲလၢမူခိၣ်, ဒီးပျၢ်ပှၤဂီၢ်မုၢ်အံၣ်စရ့လးအ တၢ်ဒဲးဘး, ဒီးဒုးဟဲက့ၤအီၤဆူကီၢ်လၢနဟ့ၣ်လီၤအပၢ် တဖၣ်န့ၣ်တက့ၢ်.

³⁵ တုၤမူခိၣ်ကးတံာ်ဃာ်အသးဒီး တၢ်တဟဲစူၤဘၣ်လၢ အဝဲသ့ၣ်မၤကမၣ်ဘၣ်နၤအဃိဒီး, မ့ၢ်ဘါထုကဖၣ်ဝဲ ဆူဟံၣ်အံၤ, ဒီးအၢၣ်လီၤအီလီၤနမံၤ, ဒီးတုၤနမၤနးမၤဖှီၣ် အီၤဒီး, မ့ၢ်ဃၣ်ကွံာ်အသးလၢအတၢ်ဒဲးဘးဒီး, ³⁶ ဒိက နၣ်နဲလၢမူခိၣ်, ဒီးပျၢ်နခ့နပှၤ, ဒီးနပှၤဂီၢ်မုၢ်အံၣ်စရ့လး အတၢ်ဒဲးဘး, ဒ်သိးနကသိၣ်သိအီၤလၢကျဲအဂ့ၤလၢ အကပိာ်ဝဲ, ဒီးဒုးဟဲလီၤတၢ်စူၤလၢနကီၢ်ပူၤ လၢနဟ့ၣ် လီၤတ့ၢ်ပှၤဂီၢ်မုၢ်လၢတၢ်န့ၢ်သါအဂီၢ်န့ၣ်တက့ၢ်.

³⁷ တၢ်သၣ်ဝံၤလီၤဒိမ့ၢ်အိၣ်လၢကီၢ်ပူၤ, တၢ်သံသတြိာ်, ကလံၤအူမၤဟးဂီၤတၢ်, ဘုအတၢ်ဆါ, ဒွဲၣ်အၢ်ဘၤမ့ၢ် အိၣ်, ဒီးဒွဲၣ်ဃစံမ့ၢ်အိၣ်, ဒီးအဒုၣ်အဒါမ့ၢ်ကဝီၤဃာ်အီၤ လၢအကီၢ်အပဲတရီပူၤ, ဒီးဖဲဒၣ်တၢ်တီၢ်, ဒီးဖဲဒၣ်တၢ် ဆါတမံၤမံၤမ့ၢ်အိၣ်ဒီး, ³⁸ ကယဲၢ်တၢ်ထုကဖၣ်, ကယဲၢ် တၢ်ဃ့ကညးလၢပှၤတဂၤဂၤမ့ၢ်ဂ့ၤ, လၢနပှၤဂီၢ်မုၢ်အံၣ် စရ့လးခဲလၢာ်မ့ၢ်ဂ့ၤ, မၤဝဲလၢအသ့ၣ်ညါအသးအတၢ် တီၢ်အဖၢမုၢ်န့ၣ်, ဒီးယူာ်ထီၣ်အစုဆူဟံၣ်အံၤဒီး, ³⁹ ဒိက နၣ်နဲလၢမူခိၣ်နအိၣ်နဆိးအလီၢ်, ဒီးပျၢ်တၢ်, ဒီးမၤတၢ်, ဒီးဟ့ၣ်လီၤပှၤကညီလၢ နသ့ၣ်ညါအသးတဂၤလၢ်လၢ် ဒ်အကျဲအသိးန့ၣ်တက့ၢ်. အဂ့ၢ်ဒ်အံၤ, နသ့ၣ်ညါပှၤက ညီဖိအသးခဲလၢာ်နဲဒၣ်တဂၤဃီဧိၤလီၤ. ⁴⁰ ဒ်သိးအက ပျံၤနၤကယဲၢ်မုၢ်နံၤမုၢ်နၤလၢအမူဝဲလၢကီၢ်ပူၤ လၢနဟ့ၣ် လီၤပပၢ်တဖၣ်န့ၣ်တက့ၢ်.

⁴¹ ဒီးပှၤတခီဘီမုၢ်ဖိစ့ၢ်ကီး လၢအတမ့ၢ်ဘၣ်နပှၤဂီၢ်မုၢ် အံၣ်စရ့လးအဖိဘၣ်, ဒီးဟဲဝဲလၢထံယံၤကီၢ်ယံၤလၢန မံၤအဃိန့ၣ်, ⁴² (အဂ့ၢ်ဒ်အံၤ, ပှၤကနၢ်ဟူလၢနမံၤဒိၣ်, ဒီး နစုဆူၣ်, ဒိးနစုဒုၣ်ယူာ်ထီၣ်အသးအဂ့ၢ်အကျိၤလီၤ.) တုၤအဟဲဘါထုကဖၣ်ဆူဟံၣ်အံၤဒီး, ⁴³ ဒိကနၣ်နဲလၢ မူခိၣ်နအိၣ်နဆိးအလီၢ်, ဒီးမၤတၢ်ဒ်ကယဲၢ်တၢ်ပှၤတခီ ဘီမုၢ်ဖိန့ၣ်ကိးထီၣ်ဆူနၤ တမံၤလၢ်လၢ်အသိး, ဒ်သိးပှၤ ဂီၢ်မုၢ်ခဲလၢာ် လၢဟီၣ်ခိၣ်ချၢကသ့ၣ်ညါနမံၤ, ဒီးပျံၤနၤ ဒ်နပှၤဂီၢ်မုၢ်အံၣ်စရ့လးအသိးန့ၣ်, ဒီးဒ်သိးအကသ့ၣ် ညါလၢဟံၣ်တဖျၢၣ်အံၤ လၢယမၤအီၤဘၣ်တၢ်ကိးအီၤ လၢနမံၤန့ၣ်တက့ၢ်.

⁴⁴ နပှၤဂီၢ်မုၢ်မ့ၢ်လဲၤထီၣ်ဒုးတၢ်ဒီးအဒုၣ်အဒါဒီး, ဖဲနဒၣ် နမၢလီၤအီၤန့ၣ်ဒီး, မ့ၢ်ဘါထုကဖၣ်ယွၤဆူဝ့ၢ်တဖျၢၣ် လၢနဃုထၢအီၤ, ဒီးဆူဟံၣ်လၢယမၤလၢနမံၤအဂီၢ်န့ၣ် ဒီး, ⁴⁵ ဒိကနၣ်နဲလၢမူခိၣ်အတၢ်ထုကဖၣ်, ဒီးအတၢ်ဃ့ ကညးတၢ်, ဒီးစံၣ်ညီၣ်တၢ်လၢအဂီၢ်တက့ၢ်.

⁴⁶ မ့ၢ်မၤကမၣ်ဘၣ်နၤဒီး, (အဂ့ၢ်ဒ်အံၤ, ပှၤလၢအတမၤက မၣ်ဘၣ်တၢ်ဘၣ်တအိၣ်ဘၣ်.) ဒီးနသးထီၣ်ဘၣ်အီၤ, ဒီး နဟ့ၣ်လီၤကွံာ်အီၤလၢအဒုၣ်အဒါ, ဒီးတၢ်စိာ်မၢကဲကုၢ် အီၤလၢအဒုၣ်အဒါအကီၢ်ပူၤလၢအယံၤမ့ၢ်ဂ့ၤ, လၢအ ဘူးမ့ၢ်ဂ့ၤဒီး, ⁴⁷ မ့ၢ်ဟဲက့ၤကဒါက့ၤလၢအသးလၢကီၢ်ပူၤ ဖဲတၢ်စိာ်မၢကဲကုၢ်အီၤ, ဒီးပီၢ်ယၢ်လီၤက့ၤအသး, ဒီးဃ့ ကညးနၤလၢပှၤအကီၢ်ပူၤလၢ အစိာ်မၢကဲကုၢ်အီၤ, ဒီး စံးဝဲ, ပမၤကမၣ်လံတၢ်လံ, ဒီးမၤလံတၢ်အၢလံ, ဒီးမၤ လံတၢ်ဒဲးဘးလံ, ⁴⁸ ဒီးဟဲက့ၤကဒါက့ၤဆူနအိၣ်လၢအ သးဒီဖျၢၣ်ညါ, ဒီးလၢအသးတုၤလၢာ်လၢအဒုၣ်အဒါ အကီၢ်ပူၤလၢအစိာ်မၢကဲကုၢ်အီၤ, ဒီးမ့ၢ်ဘါထုကဖၣ် တၢ်ဆူအကီၢ်လၢနဟ့ၣ်လၢအပၢ်တဖၣ်, ဆူဝ့ၢ်လၢန ဃုထၢအီၤ, ဒီးဆူဟံၣ်လၢယမၤလၢနမံၤအဂီၢ်ဒီး, ⁴⁹ ဒိ ကနၣ်နဲအတၢ်ဘါထုကဖၣ်, ဒီးအတၢ်ဃ့ကညးလၢမူ ခိၣ်နအိၣ်နဆိးအလီၢ်, ဒီးစံၣ်ညီၣ်တၢ်လၢအဂီၢ်, ⁵⁰ ဒီးမၤ ပူၤမၤဖျဲးနပှၤဂီၢ်မုၢ်လၢအမၤကမၣ်ဘၣ်နၤ, ဒီးပျၢ်ကယဲၢ် အတၢ်ကမၣ်လၢအမၤကမၣ်ဘၣ်နၤခဲလၢာ်, ဒီးဟ့ၣ်လီၤ အီၤလၢတၢ်သးကညီၤအီၤလၢ ပှၤလၢအစိာ်မၢကဲကုၢ် အီၤတဖၣ်အမဲာ်ညါ, ဒ်သိးအကသးကညီၤအီၤန့ၣ်တ က့ၢ်. ⁵¹ အဂ့ၢ်ဒ်အံၤ, မ့ၢ်ဝဲလၢနပှၤဂီၢ်မုၢ်ဒီးနတၢ်န့ၢ်သါ လၢအဟဲစိာ်လၢအဲၤကူပတူးအပူၤ, လၢဖၣ်ကပူၤထး အသးကံၢ်ပူၤလီၤ. ⁵² ဒ်သိးနမဲာ်ကအိးထီၣ်အသးလၢန ခ့နပှၤအဃ့ကညးတၢ်အဂီၢ်, ဒီးလၢနပှၤဂီၢ်မုၢ်အံၣ်စရ့ လးအဃ့ကညးတၢ်အဂီၢ်, ဒ်သိးနကဒိကနၣ်အကလုၢ် လၢကယဲၢ်တၢ်လၢအဃ့ဝဲလၢနၤလီၤ.

⁵³ အဂ့ၢ်ဒ်အံၤ, နမၤလီၤဖးကွံာ်အီၤဒီးကယဲၢ်ပှၤဂီၢ်မုၢ်လၢ ဟီၣ်ခိၣ်ချၢဒ်သိးအကကဲထီၣ်နတၢ်န့ၢ်သါ, ဒ်နကတိၤ တၢ်လၢနခ့နပှၤစီၤမိၤရှ့အစုပူၤ ဖဲနဟဲစိာ်ပပၢ်တဖၣ်လၢ အဲၤကူပတူးအပူၤန့ၣ်, ကစၢ်ဧၢ.

⁵⁴ ဒီးတုၤစီၤၡလိၤမိၤဘါထုကဖၣ် ကယဲၢ်တၢ်ဘါထုက ဖၣ်န့ၣ်ဒီး တၢ်ဃ့ကညးတၢ်ခဲလၢာ်လၢယွၤဝံၤဒီး, တၢ် မၤအသးလၢအဂဲၤဆၢထၢၣ်လၢ ယွၤအတၢ်လုၢ်လီၢ်အ မဲာ်ညါဖဲအချံးလီၤအခီၣ် အိၣ်ဒီးအစုယူာ်ထီၣ်အသးဆူ မူခိၣ်, ⁵⁵ ဒီးဆၢထၢၣ်ဝဲ, ဒီးဆိၣ်ဂ့ၤကယဲၢ်အံၣ်စရ့လး အတၢ်အိၣ်ဖှိၣ်ခဲလၢာ်, လၢအကလုၢ်အသီၣ်ဖးဒိၣ်, ဒီး စံးဝဲဒၣ်, ⁵⁶ ယွၤလၢအဟ့ၣ်လီၤတၢ်အိၣ်ဘှံးလၢအပှၤဂီၢ် မုၢ်အံၣ်စရ့လးဒ်ကယဲၢ်တၢ်လၢ အကတိၤတ့ၢ်တၢ်အသိး န့ၣ်မ်အဘၣ်တၢ်စံးထီၣ်ပတြၢၤအီၤတက့ၢ်. လၢကယဲၢ် တၢ်ကတိၤဂ့ၤလၢအကတိၤတၢ်လၢအခ့အပှၤစီၤမိၤရှ့အ စုပူၤခဲလၢာ်အကျါန့ၣ် တလီၤတဲာ်ဘၣ်နီတထံၣ်ဘၣ်.

⁵⁷ ဒီးမ်ယွၤပကစၢ်အိၣ်ဒီးပှၤ ဒ်အအိၣ်ဒီးပပၢ်တဖၣ်အ သိးန့ၣ်တက့ၢ်. မ်အသုတလဲၤသဒၣ်ဘၣ်ပှၤ, မ်အသုတ ဟးထီၣ်ကွံာ်လၢပအိၣ်တဂ့ၤ, ⁵⁸ မ်အဘိးဃၣ်ပသးဆူ အအိၣ်ဒ်သိးပကပိာ်အကျဲခဲလၢာ်, ဒီးတိၢ်န့ၢ်အတၢ်သိၣ် တၢ်သီ, ဒီးအတၢ်မၤလိာ်, ဒီးအတၢ်စံၣ်ညီၣ်လၢအမၤ လိာ်ပပၢ်တဖၣ်န့ၣ်တက့ၢ်.

⁵⁹ ဒီးတၢ်ကတိၤတဖၣ်အံၤလၢ ယဃ့ကညးတၢ်လၢအီၤ လၢယွၤအမဲာ်ညါန့ၣ် မ်အအိၣ်ဘူဒီးယွၤပကစၢ်လၢမုၢ် ဆါဒီးလၢမုၢ်နၤ, ဒ်သိးအကစံၣ်ညီၣ်တၢ်လၢအခ့အပှၤ အဂီၢ်, ဒီးလၢအပှၤဂီၢ်မုၢ်ခဲလၢာ်အဂီၢ်, တနံၤဒ်တနံၤ အတၢ်ဒၣ်ဝဲအသိးန့ၣ်, ⁶⁰ ဒ်သိးပှၤဂီၢ်မုၢ်လၢဟီၣ်ခိၣ်ချၢ ခဲလၢာ်ကသ့ၣ်ညါလၢယွၤမ့ၢ်ကစၢ်, လၢအဂၤတအိၣ် ဘၣ်န့ၣ်တက့ၢ်.

⁶¹ မၤသးဒ်န့ၣ်ဒီး မ်သုသးလၢထီၣ်ပှဲၤထီၣ်လၢယွၤပက စၢ်အမဲာ်ညါ, ဒ်သိးသုကလဲၤတၢ်လၢအတၢ်သိၣ်တၢ် သီအပူၤ, ဒီးတိၢ်န့ၢ်အတၢ်မၤလိာ်, ဒ်လၢမုၢ်မဆါတနံၤ အံၤအသိးန့ၣ်တက့ၢ်.

⁶² ဒီးစီၤပၤဒီးအံၣ်စရ့လးခဲလၢာ်အိၣ်ဒီးအီၤန့ၣ် လုၢ်တၢ် လၢယွၤအမဲာ်ညါလီၤ.

⁶³ ဒီးစီၤၡလိၤမိၤလုၢ်တၢ်လုၢ်မၤဃူမၤဖိး လၢအလုၢ်ဝဲလၢ ယွၤ, ဂီၤဖံးခံကလးခံကထိ, ဒီးသိတကလီၤခံကလး လီၤ. ဒီးစီၤပၤဒီးပှၤအံၣ်စရ့လးဖိခဲလၢာ်ပာ်ဟံၣ်န့ၣ်လၢ ယွၤအဂီၢ်လီၤ.

⁶⁴ ဒီးတၢ်လၢမုၢ်တနံၤန့ၣ် စီၤပၤပာ်စီဆှံဂၢၤအသးကံၢ် ပူၤလၢအအိၣ်ဝဲလၢ ယွၤအဟံၣ်အမဲာ်ညါလီၤ. အဂ့ၢ်ဒ် အံၤ, လုၢ်တၢ်လုၢ်မ့ၣ်အူ, ဒီးတၢ်မၤဘူၣ်ကိၣ်, ဒီးတၢ်လုၢ် မၤဃူမၤဖိးအသိဖဲန့ၣ်လီၤ. အဂ့ၢ်ဒ်အံၤ, တၢ်လုၢ်လီၢ်တိၢ် လၢအအိၣ်ဝဲလၢယွၤအမဲာ်ညါန့ၣ် ဒ်သိးအကဒိးန့ၢ်တၢ် လုၢ်မ့ၣ်အူ, ဒီးတၢ်မၤဘူၣ်ကိၣ်, ဒီးတၢ်လုၢ်မၤဃူမၤဖိး အသိန့ၣ်ဆံးကဲၣ်ဆိးလီၤ.

⁶⁵ အကတီၢ်ဖဲန့ၣ်စီၤၡလိၤမိၤမၤတၢ်ဘူၣ်, ဒီးအံၣ်စရ့လး ခဲလၢာ်အိၣ်ဒီးအီၤ, တၢ်အိၣ်ဖှိၣ်ဖးဒိၣ်လၢတၢ်ဟဲနုာ်လၢ ဃမါသးပၢၢ်လၢအဲၤကူပတူးအထံကျိ, လၢယွၤပကစၢ် အမဲာ်ညါနွံနံၤဒီးနွံနံၤတဆံလွံၢ်နံၤလီၤ.

⁶⁶ ဒီးဃိးနံၤတနံၤန့ၢ်ပျၢ်ပှၤဂီၢ်မုၢ်, ဒီးအဝဲသ့ၣ်တဖၣ်န့ၣ် ဆိၣ်ဂ့ၤစီၤပၤ, ဒီးလဲၤဝဲဆူအဒဲပူၤလၢအသူၣ်ခုအသးခု, ဒီးလၢအသူၣ်ဖှံအသးညီလၢ ကယဲၢ်တၢ်အဂ့ၤလၢယွၤ မၤဝဲ, လၢအခ့အပှၤစီၤဒၤဝံး, ဒီးအပှၤဂီၢ်မုၢ်အံၣ်စရ့လး အဃိန့ၣ်လီၤ.

၉

¹ ဒီးတုၤစီၤၡလိၤမိၤမၤယွၤအဟံၣ်ဝံၤဒီး, ဒီးစီၤပၤအဟံၣ်, ဒီးကယဲၢ်စီၤၡလိၤမိၤ အတၢ်ဆၢလၢအဘၣ်အသး လၢ အကမၤဝဲဒီး, ² တၢ်မၤအသးလၢယွၤလီၣ်ဖျါထီၣ်အသး လၢစီၤၡလိၤမိၤအမဲာ်ညါပှဲၤထီၣ်ခံဘျီတဘျီ, ဒ်အအိၣ် ဖျါလၢအမဲာ်ညါလၢကံးဘိၣ်အသိးန့ၣ်လီၤ. ³ ဒီးယွၤစံး ဘၣ်အီၤ, ယနၢ်ဟူလံနဘါထုကဖၣ်တၢ်ဒီး နဃ့က ညးတၢ်လၢနမၤလၢယမဲာ်ညါ, ယမၤစီဆှံလံဟံၣ်တ ဖျၢၣ်အံၤလၢနမၤအီၤ ဒ်သိးယကပာ်ယမံၤဖဲန့ၣ်လီၤထူ လီၤယိာ်, ဒီးယမဲာ်ဒီးယသးကအိၣ်ဖဲန့ၣ် ကိးမုၢ်နံၤမုၢ် နၤဒဲးလီၤ.

⁴ ဒီးနမ့ၢ်လဲၤတၢ်လၢယမဲာ်ညါ, ဒ်နပၢ်စီၤဒၤဝံးလဲၤတၢ် အသိးလၢနသးဒီဖျၢၣ်, ဒီးလၢတၢ်တီတၢ်လိၤအပူၤဒ်သိး နကမၤကယဲၢ်တၢ်လၢယမၤလိာ်နၤ, ဒီးတိၢ်န့ၢ်ယတၢ် သိၣ်တၢ်သီ, ဒီးယတၢ်စံၣ်ညီၣ်တဖၣ်န့ၣ်ဒီး, ⁵ ယက ဒုးအိၣ်ဂၢၢ်ဆိးကျၢၤနဘီနမုၢ်အလီၢ်ပစိာ်လၢ အံၣ်စရ့ လးအဖီခိၣ်လီၤထူလီၤယိာ်, ဒ်ယကတိၤတၢ်ဒီးနပၢ်စီၤ ဒၤဝံးအသိးန့ၣ်ဒီးယစံး, ပှၤလၢအဘၣ်ဃးဒီးနၤလၢအံၣ် စရ့လးအလီၢ်ပစိာ်အဖီခိၣ်တလီၤတုာ်ဘၣ်ဝဲဘၣ်. ⁶ မ့မ့ၢ်သုမ့ၢ်ဂ့ၤ, သုဖိသုလံၤမ့ၢ်ဂ့ၤ, မ့ၢ်ဃၣ်ကွံာ်လၢတၢ်ပိာ်ယခံသပှၢ်တၢၢ်, ဒီးတတိၢ်န့ၢ်ဘၣ်ယတၢ်သိၣ်တၢ်သီ, ဒီးယတၢ်မၤလိာ်လၢယပာ်လီၤလၢသုမဲာ်ညါဘၣ်, ဒီးလဲၤမၤကစၢ်အဂၤတဖၣ်အတၢ်, ဒီးဘါထီၣ်အီၤဒီး,―

⁷ ယကဒီၣ်တဲာ်အံၣ်စရ့လးဒီးအကီၢ်လၢ ယဟ့ၣ်လီၤအီၤ, ဒီးဟံၣ်လၢယမၤစီဆှံအီၤ လၢယမံၤအဂီၢ်တဖျၢၣ်အံၤ, ယကညိကွံာ်လၢယမဲာ်ညါ, ဒီးအံၣ်စရ့လးကကဲထီၣ် တၢ်ကတိၤဒိအလီၢ်, ဒီးတၢ်ဒုၣ်ဒွဲၣ်အလီၢ်လၢပှၤကိးက လုာ်ဒဲးအမဲာ်ညါလီၤ.

⁸ ဒီးဟံၣ်ထီအံၤကယဲၢ်ပှၤလၢ အလဲၤပူၤကွံာ်အီၤကပာ် အသးကမၢကမၣ်, ဒီးၡံ, ဒီးကစံး, ယွၤမၤတၢ်ဒ်အံၤသိး လၢကီၢ်အံၤ, ဒီးဟံၣ်အံၤမ့ၢ်အဘၣ်မနုၤလဲၣ်.

⁹ ဒီးပှၤကစံးဆၢဝဲ, မ့ၢ်အလဲၤသဒၣ်ယွၤအကစၢ်လၢအ ဟဲစိာ်အပၢ်လၢကီၢ်အဲၤကူပတူးအပူၤ, ဒီးဟံးန့ၢ်အက စၢ်အဂၤ, ဒီးဘါထီၣ်အီၤ, ဒီးမၤအတၢ်လီၤ. မ်ဒ်န့ၣ်ဒီး ယွၤဒုးဟဲဘၣ်အီၤလၢကယဲၢ်တၢ်အၢအံၤလီၤ.

¹⁰ ဒီးလၢအနံၣ်ခံဆံအကတၢၢ်န့ၣ် တုၤစီၤၡလိၤမိၤမၤတ့ၢ် ယွၤအဟံၣ်, ဒီးစီၤပၤအဟံၣ်ဒၣ်ဝဲခံဖျၢၣ်ဒီး, ¹¹ စိၢ်အစီၤပၤ စီၤဃံရၣ်ဟ့ၣ်လီၤစီၤၡလိၤမိၤလၢသ့ၣ်ဆှိအ့ရ့း, ဒီးသ့ၣ် ဆှိ, ဒီးထူဧိၤလွဲဧိၤဒ်ကယဲၢ်တၢ်ဘၣ်အသး အသိးန့ၣ် လီၤ. တၢ်မၤအသးလၢစီၤပၤၡလိၤမိၤဟ့ၣ်လီၤစီၤဃံရၣ် လၢဝ့ၢ်ခံဆံလၢကီၢ်ကၤလံၤလါအပူၤလီၤ. ¹² ဒီးစီၤဃံရၣ် ဟဲဝဲလၢစိၢ်အပူၤ ဒ်သိးအကကွၢ်ဝ့ၢ်တဖၣ်လၢစီၤၡလိၤ မိၤဟ့ၣ်လီၤအီၤ, ဒီးတဘၣ်ဘၣ်အသးဘၣ်. ¹³ ဒီးစံးဝဲ ဒၣ်, ဝ့ၢ်တဖၣ်အံၤနဟ့ၣ်လီၤယၤမ့ၢ်ဝ့ၢ်မနုၤလဲၣ်, ယဒီပုၢ် ဝဲၢ်ဧၢ. ဒီးယုၢ်ဝဲအမံၤလၢကၤဘူလးတုၤမုၢ်မဆါတနံၤ အံၤလီၤ.

¹⁴ ဒီးစီၤဃံရၣ်ဟ့ၣ်ယုၢ်စီၤပၤလၢ ထူအကံကၢ်ဃုဆံလီၤ.

¹⁵ ဒီးစီၤၡလိၤမိၤမၢပှၤဟ့ၣ်သွဲအဂ့ၢ်ဒ်အံၤ, ဒ်သိးအကမၤ ယွၤအဟံၣ်, ဒီးအဟံၣ်ဒၣ်ဝဲ, ဒီးမံးလိၤ, ဒီးယရူၤၡလ့ၣ်အ ခိၣ်ဒူ, ဒီးဃါစိၢ်, ဒီးမကံးဒိၤ, ဒီးက့စ့ၢ်လီၤ. ¹⁶ အဲၤကူပတူး အစီၤပၤဖၤရိၤလဲၤတၢ်, ဒီးမၤန့ၢ်က့စ့ၢ်, ဒီးဆူးထီၣ်ကွံာ်ဝဲ လၢမ့ၣ်အူ, ဒီးမၤသံပှၤကနၤဧၣ်ဖိလၢအအိၣ်ဝဲဆိးဝဲလၢ ဝ့ၢ်ပူၤ, ဒီးဟ့ၣ်လီၤဝဲလၢတၢ်ဟ့ၣ်လၢအဖိမုၣ်စီၤၡလိၤမိၤ အမါလီၤ.

¹⁷ ဒီးစီၤၡလိၤမိၤတ့က့စ့ၢ်, ဒီးဘ့ၤသဃိရိၣ်လၢအဖီလာ် တဖျၢၣ်, ¹⁸ ဒီးဘဧၤလး, ဒီးတးဒမိၢ်လၢပှၢ်မုၢ်ကနၢလၢ ကီၢ်ပူၤန့ၣ်လီၤ. ¹⁹ ဒီးကယဲၢ်ဝ့ၢ်ပာ်ဖှိၣ်တၢ်လၢအအိၣ် ဒီးစီၤၡလိၤမိၤ, ဒီးဝ့ၢ်တဖၣ်လၢအလ့ၣ်ကဟၣ်အဂီၢ်, ဒီး တၢ်လၢစီၤၡလိၤမိၤဆၢမၤဝဲ လၢယရူၤၡလ့ၣ်အပူၤ, ဒီး လၢလဘၤနိၣ်အလိၤ, ဒီးလၢအကီၢ်ပူၤဒီဘ့ၣ်ညါလၢ အပၢဝဲန့ၣ်လီၤ.

²⁰ ကယဲၢ်ပှၤလၢအအိၣ်လီၤတဲာ်လၢပှၤအမိၢ်ဖိ, ပှၤဃ့ၤ သးဖိ, ပှၤပရးစၤဖိ, ပှၤဃံၤဝံဖိ, ဒီးပှၤယဘူၣ်ဖိ, လၢအတ ဘၣ်ဃးဘၣ်ဒီးပှၤအံၣ်စရ့လးဖိဘၣ်န့ၣ်, ²¹ အဖိအလံၤ လၢအအိၣ်လီၤတဲာ်ဝဲလၢကီၢ်ပူၤလၢ ပှၤအံၣ်စရ့လးဖိ မၤဟးဂီၤအီၤလၢာ်တသ့ဘၣ်န့ၣ် စီၤၡလိၤမိၤမၢအမၤ တၢ်လၢဟ့ၣ်သွဲအလီၢ်တုၤမုၢ်မဆါတနံၤအံၤလီၤ.

²² ဒီးပှၤအံၣ်စရ့လးဖိန့ၣ်စီၤၡလိၤမိၤတမၢအကဲကုၢ်ဘၣ်. မ့မ့ၢ်အဝဲသ့ၣ်တဖၣ်န့ၣ် မ့ၢ်ပှၤသုးဖိတဖၣ်, ဒီးအခ့အ ပှၤတဖၣ်, ဒီးအပဒိၣ်တဖၣ်, ဒီးအပှၤသုးဖိအခိၣ်တဖၣ်, ဒီးအလ့ၣ်ကဟၣ်အခိၣ်တဖၣ်, ဒီးအပှၤကသ့ၣ်သုးတ ဖၣ်လီၤ.

²³ ပဒိၣ်ဖးဒိၣ်လၢအအိၣ်ဝဲလၢ စီၤၡလိၤမိၤအတၢ်မၤအ ဖီခိၣ်န့ၣ် မ့ၢ်ပှၤယဲၢ်ကယၤယဲၢ်ဆံလၢအပၢပှၤလၢအမၤ တၢ်လီၤ.

²⁴ မ့မ့ၢ်ဖၤရိၤအဖိမုၣ်ဟဲထီၣ်လၢစီၤဒၤဝံးအဝ့ၢ်ပူၤ ဆူအ ဟံၣ်လၢအမၤဝဲလၢအဂီၢ်လီၤ. တုၤနုၤတစုတ့ဝဲလၢမံး လိၤလီၤ.

²⁵ ဒီးစီၤၡလိၤမိၤလုၢ်တၢ်လုၢ်မ့ၣ်အူ, ဒီးတၢ်လုၢ်မၤဃူမၤ ဖိးလၢတၢ်လုၢ်လီၢ်အဖီခိၣ်လၢ အမၤဝဲလၢယွၤအဂီၢ်တ နံၣ်သၢဘျီ, ဒီးဆိၣ်ကဲၤတၢ်နၢမူလၢတၢ်လုၢ်လီၢ်အဖီခိၣ် လၢအအိၣ်ဝဲလၢယွၤအမဲာ်ညါလီၤ. ဒီးမၤဟံၣ်ဝံၤဝဲလီၤ.

²⁶ ဒီးစီၤၡလိၤမိၤမၤကဘီတဘ့ၣ်လၢ ဧ့းစယိၣ်က့ဘ့ၢ်အ ပူၤလၢအအိၣ်ဝဲဖဲအ့လိးလၢပီၣ်လဲၣ်အနံၤလၢ ကီၢ်အ ဒိၣ်အပူၤလီၤ.

²⁷ ဒီးစီၤဃံရၣ်မၢလီၤအခ့အပှၤ, ပှၤကဘီဖိလၢအသ့ၣ် ညါပီၣ်လဲၣ်တဖၣ်အိၣ်လၢကဘီပူၤ အိၣ်ဒီးစီၤၡလိၤမိၤ အခ့အပှၤလီၤ.

²⁸ ဒီးဟဲဝဲဆူအိဖ့ၢ်, ဒီးဟဲစိာ်ဖဲန့ၣ်ထူအကံကၢ်တကယၤ ခံဆံ, ဒီးဟဲစိာ်ဝဲဆူစီၤပၤၡလိၤမိၤအအိၣ်လီၤ.

၁၀

¹ ဒီးတုၤၡဘၤအနီၢ်ပၤမုၣ် နၢ်ဟူစီၤၡလိၤမိၤအကစီၣ်လၢ ယွၤအမံၤအဂ့ၢ်အကျိၤဒီး, ဟဲဝဲဒ်သိးအကမၤကွၢ်အီၤလၢ တၢ်ကတိၤအဒိၣ်အယိာ်တဖၣ်လီၤ.

² ဒီးဟဲဝဲဆူယရူၤၡလ့ၣ် အိၣ်ဒီးအပှၤပိာ်အခံအါအါက လဲာ်, ဒီးကီၤလၤအူးလၢအစိာ်တၢ်နၢမူ, ဒီးထူဧိၤလွဲဧိၤ အါအါကလဲာ်, ဒီးတၢ်မျၢ်တဖၣ်, ဒီးဟဲဝဲဆူစီၤၡလိၤမိၤ အအိၣ်, ဒီးကတိၤတၢ်ဒီးအီၤလၢ ကယဲၢ်တၢ်လၢအအိၣ် ဝဲလၢအသးကံၢ်ပူၤအဂ့ၢ်အကျိၤလီၤ.

³ ဒီးစီၤၡလိၤမိၤဒုးနဲၣ်အီၤလၢ တၢ်ဘၣ်ဃးဒီးအတၢ်က တိၤခဲလၢာ်, ဒီးတၢ်တအိၣ်တဒၢဘၣ်ဒီးစီၤပၤလၢအတ စံးဘၣ်အီၤနီတမံၤဘၣ်.

⁴ ဒီးတုၤၡဘၤအနီၢ်ပၤမုၣ်န့ၣ် ထံၣ်ဘၣ်ကယဲၢ်စီၤၡလိၤ မိၤအတၢ်ကူၣ်သ့, ဒီးဟံၣ်လၢအမၤဝဲန့ၣ်, ⁵ ဒီးတၢ်အီၣ် လၢအစီၢ်နီၤခိၣ်အဖီခိၣ်, ဒီးအခ့အပှၤဆ့ၣ်နီၤဝဲ, ဒီးအပှၤ မၤအတၢ်ဆၢထၢၣ်, ဒီးအကူအသိး, ဒီးအပှၤစိာ်အလီ ခီ, ဒီးအတၢ်လဲၤထီၣ်ဆူယွၤအဟံၣ်သတးဒီး အသးတ အိၣ်လၢၤဘၣ်လၢအပူၤဘၣ်.

⁶ ဒီးစံးဘၣ်စီၤပၤ, တၢ်ကတိၤလၢယနၢ်ဟူလၢယကီၢ် ဒၣ်ယဲအပူၤလၢနတၢ်ကတိၤအဂ့ၢ်အကျိၤ, ဒီးလၢနကူၣ် တၢ်သ့အဂ့ၢ်အကျိၤန့ၣ်မ့ၢ်အမ့ၢ်အတီလီၤ. ⁷ ဘၣ်ဆၣ် ဒီးယတချုးဟဲဒံးဘၣ်, ဒီးယမဲာ်တချုးထံၣ်ဒံးဘၣ်ဒီး, ယတနာ်ဘၣ်ယဲဘၣ်. ဒီးကွၢ်ကွၢ်, ပှၤတစံးဘၣ်ယၤလၢ တဝာ်ဘၣ်. နတၢ်ကူၣ်သ့, ဒီးနတၢ်ဂ့ၤဒိၣ်န့ၢ်တၢ်အက စီၣ်လၢယနၢ်ဟူတက့ၢ်လီၤ.

⁸ နပှၤကညီဘၣ်ဆိၣ်ဂ့ၤဝဲလီၤ. နခ့နပှၤတဖၣ်အံၤ, ပှၤ လၢအဆၢထၢၣ်လၢနမဲာ်ညါတထံၣ်ဃီ, ပှၤလၢအနၢ် ဟူနတၢ်ကူၣ်သ့န့ၣ်ဘၣ်ဆိၣ်ဂ့ၤဝဲလီၤ. ⁹ ယွၤနကစၢ်လၢ အဘၣ်အသးလၢနၤ ဒ်သိးအကဟ့ၣ်နဆ့ၣ်နီၤလၢအံၣ် စရ့လးအလီၢ်ပစိာ်အဖီခိၣ်န့ၣ် မ်အဘၣ်တၢ်စံးထီၣ်ပ တြၢၤအီၤတက့ၢ်. မ့ၢ်ယွၤအဲၣ်အံၣ်စရ့လးလီၤထူလီၤယိာ် သတးဒီး, ပာ်နၤလၢစီၤပၤဒ်သိးနကစံၣ်ညီၣ်တၢ်, ဒီးမၤ တၢ်တီတၢ်လိၤလီၤ.

¹⁰ ဒီးဟ့ၣ်လီၤစီၤပၤလၢထူအကံကၢ်တကယၤခံဆံ, ဒီး တၢ်နၢမူအါအါကလဲာ်, ဒီးတၢ်မျၢ်တဖၣ်လီၤ. တၢ်နၢမူ အါအါကလဲာ်ထဲသိးဒီးၡဘၤအနီၢ်ပၤမုၣ် ဟ့ၣ်စီၤၡလိၤ မိၤန့ၣ်တဟဲလၢၤဝဲဘၣ်.

¹¹ ဒီးစီၤဃံရၣ်အကဘီလၢ အဟဲစိာ်ထူဧိၤလွဲဧိၤလၢအိ ဖ့ၢ်န့ၣ်ဟဲစိာ်စ့ၢ်ကီးသ့ၣ်အလၤမူးအါအါကလဲာ်, ဒီးတၢ် မျၢ်တဖၣ်လၢအိဖ့ၢ်လီၤ.

¹² ဒီးစီၤပၤတ့ထူၣ်ဖိတဖၣ်လၢ သ့ၣ်အလၤမူးလၢယွၤအ ဟံၣ်အဂီၢ်, ဒီးတ့စ့ၢ်ကီးတနၢ်, ဒီးသီတူၢ်လၢပှၤသးဝံၣ် တၢ်ဖိအဂီၢ်လီၤ. သ့ၣ်အလၤမူးထဲသိးဒီးအဝဲန့ၣ်တဟဲ လၢၤဘၣ်, ဒီးတၢ်တထံၣ်လၢၤဘၣ်တုၤမုၢ်မဆါတနံၤ အံၤဘၣ်လီၤ.

¹³ ဒီးစီၤပၤၡလိၤမိၤဟ့ၣ်လီၤၡဘၤအနီၢ်ပၤမုၣ် လၢတၢ် လၢအဟ့ၣ်ဒၣ်တၢ်မဲာ်ညါ ကယဲၢ်တၢ်လၢအဘၣ်အသး ဖဲဒၣ်အဃ့တၢ်တမံၤလၢ်လၢ်လီၤ. ဒီးဃၣ်အသးဒီးက့ၤ က့ၤဆူအလီၢ်ဒၣ်ဝဲ, အဝဲဒၣ်ဒီးအခ့အပှၤလီၤ.

¹⁴ ဒီးထူဧိၤလွဲဧိၤလၢအဟဲဆူ စီၤၡလိၤမိၤအအိၣ်လၢတ နံၣ်အတီၢ်ပူၤန့ၣ် လီၤ. တယၢၢ်ဃုကယၤဃုဆံဃုကံကၢ် လီၤ. ¹⁵ လၢန့ၣ်အမဲာ်ညါအိၣ်ဒံးတၢ်လၢပှၤဃုထၢဖိ, ဒီး လၢပှၤကၤတၢ်ဖိ, ဒီးလၢဧ့ရ့းအစီၤပၤခဲလၢာ်, ဒီးလၢ ထံဧိၤကီၢ်ဧိၤအပဒိၣ်ဖးဒိၣ်တဖၣ်န့ၣ်လီၤ.

¹⁶ ဒီးစီၤၡလိၤမိၤတ့ကတီၤဖးဒိၣ် ခံကယၤလၢထူကိၢ် လိၣ်လီၤ. ထူအၡက့းလးဃုကယၤ အိၣ်ဝဲလၢကတီၤ တဘ့ၣ်အပူၤလီၤ.

¹⁷ ဒီးတ့ကတီၤဖိလၢထူကိၢ်လိၣ်သၢကယၤလီၤ. ထူအ ၡက့လးသၢကယၤအိၣ်ဝဲလၢ ကတီၤတဘ့ၣ်အပူၤလီၤ. ဒီးစီၤပၤပာ်ဝဲလၢ လဘၤနိၣ်အပှၢ်လၢ်ကျါအဟံၣ်ပူၤန့ၣ် လီၤ.

¹⁸ ဒီးစီၤပၤတ့လီၢ်ပစိာ်ဖးဒိၣ်လၢကဆီမဲ, ဒီးပီၤဝဲလၢထူ စီလီၤ. ¹⁹ ဒီးလီၢ်ပစိာ်န့ၣ်အိၣ်ဝဲဒီးအဃီဃုသွါ, ဒီးလီၢ်ပ စိာ်အဖီခိၣ်န့ၣ်ကဝီၤဝဲလၢ အချၢဃံ, ဒီးအစုဖံးအိၣ်ဝဲဖဲ လီၢ်ဆ့ၣ်နီၤလၢအဝဲတခီ, ဒီးလၢအဝဲတခီ, ဒီးခ့ယုၢ်ခံဒု ဆၢထၢၣ်ဝဲဖဲစုဖံးအဃၢၤလီၤ. ²⁰ ဒီးခ့ယုၢ်တဆံခံဒုဆၢ ထၢၣ်ဖဲဃီဃုသွါအဝဲတခီအဖီခိၣ် ဒီးလၢအဝဲတခီအဖီ ခိၣ်လီၤ. တၢ်တတ့ဘၣ်တၢ်ဒ်န့ၣ်သိးလၢ ဘီမုၢ်နီတဘီ မုၢ်အပူၤဘၣ်လီၤ.

²¹ ဒီးကယဲၢ်စီၤပၤအလီခီအီတၢ်န့ၣ် မ့ၢ်ထူခဲလၢာ်လီၤ. ဒီးကယဲၢ်လီခီအိၣ်ဝဲလၢ လဘၤနိၣ်အပှၢ်လၢ်ကျါအ ဟံၣ်ပူၤန့ၣ်မ့ၢ်ထူစီၤခဲလၢာ်လီၤ. တတ့ဘၣ်လၢစ့နီတ ဘ့ၣ်နီတဖျၢၣ်ဘၣ်. လၢစီၤၡလိၤမိၤအမုၢ်နံၤတဖၣ်န့ၣ် တၢ်တပာ်ကဲဘၣ်စ့ဘၣ်လီၤ.

²² အဂ့ၢ်ဒ်အံၤ, စီၤပၤအိၣ်ဒီးကဘီတၢ်ၡံၣ်လၢပီၣ်လဲၣ်ပူၤ အိၣ်ဒီးစီၤဃံရၣ်အကဘီလီၤ. သၢနံၣ်တစုန့ၣ်ကဘီတၢ် ၡံၣ်ဟဲစိာ်ထူဧိၤလွဲဧိၤ, ဒီးကျိၣ်ဧိၤစ့ဧိၤ, ဒီးကဆီမဲ, ဒီး ကယူၤဖၣ်တဖၣ်, ဒီးထိၣ်ပှာ်တဖၣ်လီၤ.

²³ ဒီးစီၤၡလိၤမိၤဒိၣ်န့ၢ်ကယဲၢ်စီၤပၤလၢ ဟီၣ်ခိၣ်ချၢလၢ အစုလီၢ်အခီၣ်ခိၣ်, ဒီးလၢအတၢ်ကူၣ်သ့န့ၣ်လီၤ. ²⁴ ဒီး ဟီၣ်ခိၣ်ဖိဃုစီၤၡလိၤမိၤအမဲာ်ခဲလၢာ် ဒ်သိးအကနၢ်ဟူ အတၢ်ကူၣ်သ့လၢယွၤပာ်လီၤဝဲလၢအသးကံၢ်ပူၤလီၤ.

²⁵ ဒီးပှၤဟဲစိာ်အခိၣ်ဖးစုာ်စုာ်, လၢလီခီစ့, ဒီးလီခီထူ, ဒီး တၢ်အကူအသိး, ဒီးတၢ်သဃိး, ဒီးတၢ်နၢမူ, ဒီးကသ့ၣ် ဒီးကသ့ၣ်လၤသ့ၣ်တဖၣ်န့ၣ်တနံၣ်ဘၣ်တနံၣ်လီၤ.

²⁶ ဒီးစီၤၡလိၤမိၤပာ်ဖှိၣ်လ့ၣ်ကဟၣ်, ဒီးပှၤကသ့ၣ်သုးဖိ, ဒီးအိၣ်ဝဲဒီးလ့ၣ်ကဟၣ်တကထိလွံၢ်ကယၤ, ဒီးပှၤသုး ဖိတကလးခံကထိ, ဒီးပာ်ဝဲလၢလ့ၣ်ကဟၣ်အဝ့ၢ်တ ဖၣ်အပူၤ, ဒီးအိၣ်ဒီးစီၤပၤလၢယရူၤၡလ့ၣ်အပူၤလီၤ.

²⁷ ဒီးစီၤပၤပာ်ကျိၣ်ဧိၤစ့ဧိၤလၢ ယရူၤၡလ့ၣ်ဒ်လၢၢ်တဖၣ် အသိး, ဒီးပာ်သ့ၣ်ဆှိအ့ရ့းအါအါကလဲာ်ဒ်သိးဝံာ်လၢ တၢ်ပျီပူၤအသိးန့ၣ်လီၤ.

²⁸ ဒီးတၢ်ဟဲစိာ်ကသ့ၣ်လၢအဲၤကူပတူးအပူၤ လၢစီၤၡ လိၤမိၤအဂီၢ်လီၤ. စီၤပၤအပှၤကၤတၢ်ဖိတူၢ်လိာ်အီၤလၢ တၢ်အဖုတဖၣ်, တဖုဒီးတဖုအိၣ်ဒီးအပှၤဒၣ်ဝဲစုာ်စုာ် လီၤ.

²⁹ ဒီးပှၤလဲၤတၢ်, ဒီးဟဲစိာ်လ့ၣ်ကဟၣ်တဆိလၢအဲၤကူ ပတူးအပူၤ လၢစ့ဃုကယၤအဂီၢ်, ဒီးကသ့ၣ်တဒုလၢတ ကယၤယဲၢ်ဆံအဂီၢ်လီၤ. ဒ်န့ၣ်အသိးဟဲစိာ်ဝဲလၢအစု ပူၤလၢပှၤဃ့ၤသးဖိအစီၤပၤတဖၣ်ခဲလၢာ်အဂီၢ်, ဒီးလၢ စူၤရံအစီၤပၤတဖၣ်အဂီၢ်လီၤ.

၁၁

¹ ဒီးစီၤပၤၡလိၤမိၤအဲၣ်ပှၤတခီဘီမုၢ်ဖိ အပိာ်မုၣ်အါဂၤ လီၤ. လၢဖၤရိၤအဖိမုၣ်အမဲာ်ညါန့ၣ်ပှၤမိၤအးမုၣ်, ပှၤဧၣ် မိၣ်မုၣ်, ပှၤအဒိၣ်မုၣ်, ပှၤစံဒိၣ်မုၣ်, ပှၤဃ့ၤသးမုၣ်, ² လၢ ပှၤကလုာ်အကျါ လၢယွၤစံးပှၤအံၣ်စရ့လးဖိလၢအဂ့ၢ် န့ၣ်, သုတဘၣ်လဲၤနုာ်ဆူအအိၣ်ဘၣ်, ဒီးအဝဲသ့ၣ်တ ဖၣ်န့ၣ် တဘၣ်ဟဲနုာ်ဆူသုအိၣ်ဘၣ်, ကဘိးဃၣ်ကွံာ် သုသးထွဲအကစၢ်တဖၣ်အခံန့ၣ်လီၤ. ဒီးစီၤၡလိၤမိၤဘျုး အသးဒီးအီၤလၢတၢ်အဲၣ်လီၤ.

³ ဒီးအိၣ်ဝဲဒီးအမါနွံကယၤ, စီၤပၤအဖိမုၣ်တဖၣ်, ဒီးအသံၣ်မါသၢကယၤ, ဒီးအမါတဖၣ်န့ၣ်ဘိးဃၣ်ကွံာ်အ သးလီၤ. ⁴ ဒီးစီၤၡလိၤမိၤအသးပှၢ်အကတီၢ်န့ၣ်တၢ်မၤ အသးလၢအမါတဖၣ် ဘိးဃၣ်ကွံာ်အသးထွဲကစၢ်အ ဂၤတဖၣ်အခံ, ဒီးအသးတအိၣ်ဒီဖျၢၣ်ဒီးယွၤအကစၢ်, ဒ်အပၢ်စီၤဒၤဝံးအသးအသိးန့ၣ်ဘၣ်.

⁵ ဒီးစီၤၡလိၤမိၤလဲၤပိာ်ပှၤစံဒိၣ်ဖိ အကစၢ်မုၢ်ဧၤၡတြိးအ ခံ, ဒီးပှၤဧၣ်မိၣ်ဖိအတၢ်သးဘၣ်အၢ, မိလးအခံလီၤ. ⁶ ဒီးစီၤၡလိၤမိၤမၤတၢ်အၢလၢယွၤအမဲာ်, ဒီးတပိာ်ထွဲယွၤအခံလၢလၢပှဲၤပှဲၤ ဒ်အပၢ်စီၤဒၤဝံးအသိးန့ၣ်ဘၣ်.―

⁷ တုၤနုၤတစုစီၤၡလိၤမိၤမၤတၢ်အလီၢ်ထီၣ်ထီလၢ မိၤအး အတၢ်သးဘၣ်အၢ, ကမိၣ်အဂီၢ်လၢကစၢၢ်အိၣ်လၢယ ရူၤၡလ့ၣ်အမဲာ်ညါအလိၤ, ဒီးလၢပှၤဧၣ်မိၣ်ဖိအတၢ်သး ဘၣ်အၢ, မိလးအဂီၢ်လီၤ.

⁸ ဒီးမၤဝဲဒ်န့ၣ်အသိးလၢ ကယဲၢ်အပှၤတခီဘီမုၢ်ဖိအမါ အဂီၢ်လၢအဆိၣ်ကဲၤတၢ်နၢမူ, ဒီးလုၢ်တၢ်လၢကစၢ်အ ဂၤတဖၣ်လီၤ.

⁹ ဒီးယွၤအသးထီၣ်ဘၣ်စီၤၡလိၤမိၤလီၤ. အဂ့ၢ်ဒ်အံၤ, အ သးဃၣ်ကွံာ်လံအသးလၢ ယွၤအံၣ်စရ့လးအကစၢ်အ အိၣ်လၢအအိၣ်ဖျါလၢအမဲာ်ညါခံဘျီလံ. ¹⁰ ဒီးမၤလိာ်ဝဲ လၢတၢ်တမံၤန့ၣ်အဂ့ၢ်အကျိၤ, ဒ်သိးအသုတပိာ်ကစၢ် အဂၤတဖၣ်အခံတဂ့ၤလီၤ. ဒီးတတိၢ်န့ၢ်ဘၣ်တၢ်လၢ ယွၤမၤလိာ်အီၤလီၤ.

¹¹ ဒီးယွၤစံးဘၣ်စီၤၡလိၤမိၤ, မ့ၢ်နမၤတၢ်အံၤ, ဒီးနတတိၢ် န့ၢ်ဘၣ်ယတၢ်အၢၣ်လီၤအီလီၤဘၣ်, ဒီးယတၢ်သိၣ်တၢ် သီလၢယမၤလိာ်နၤဘၣ်ဒီး, ယကထုးထီၣ်ကွံာ်ဘီမုၢ် လၢနအိၣ်, ဒီးဟ့ၣ်လီၤအီၤလၢ နကုၢ်နပှၤတဂၤသပှၢ် တၢၢ်လီၤ. ¹² ဘၣ်ဆၣ်ဒီးလၢနမုၢ်နံၤတဖၣ်အပူၤန့ၣ်ယ တမၤဘၣ်, လၢနပၢ်စီၤဒၤဝံးအဃိလီၤ. ယကထုးထီၣ် ကွံာ်အီၤလၢနဖိခွါအစုပူၤလီၤ. ¹³ မ့ၢ်နာ်သက့ဒ်န့ၣ်ဒီး ယတထုးထီၣ်ကွံာ်ဘီမုၢ်ခဲလၢာ်ဘၣ်. ယကဟ့ၣ်လီၤ ပှၤတဒူၣ်လၢနဖိခွါလၢယခ့ယပှၤစီၤဒၤဝံးအဃိ, ဒီးလၢ ယရူၤၡလ့ၣ်အဃိလၢယဃုထၢအီၤလီၤ.

¹⁴ ဒီးယွၤထိၣ်ဂဲၤထီၣ်တၢ်အဒုၣ်အဒါလၢ စီၤၡလိၤမိၤအ ဂီၢ်, လၢပှၤအဒိၣ်ဖိစီၤဟၤဒးလီၤ. အဝဲဒၣ်န့ၣ်မ့ၢ်ပှၤလၢ စီၤပၤအချံအသၣ်အကျါလၢအဒိၣ်အပူၤလီၤ.

¹⁵ ဒီးစီၤဒၤဝံးအိၣ်ဝဲလၢအဒိၣ်အပူၤ, ဒီးစီၤယိၤအာ်, ပှၤ သုးမုၢ်အခိၣ်လဲၤထီၣ်ခူၣ်လီၤကွံာ် ပှၤဘၣ်တၢ်မၤသံအီၤ, လၢအကျီကွံာ်ပှၤပိာ်ခွါခဲလၢာ် လၢအဒိၣ်အပူၤအလီၢ်ခံ န့ၣ်, ¹⁶ (အဂ့ၢ်ဒ်အံၤ, စီၤယိၤအာ်အိၣ်ဖဲန့ၣ်ဒီးအံၣ်စရ့လး ခဲလၢာ်ဃုလါတုၤအဒီၣ်တဲာ်ကွံာ် ကယဲၢ်ပှၤပိာ်ခွါလၢ အဒိၣ်အပူၤန့ၣ်,) ¹⁷ တၢ်မၤအသးလၢ စီၤဟၤဒးဃ့ၢ်ထီၣ် ကွံာ်, အဝဲဒၣ်ဒီးပှၤအဒိၣ်ဖိအပၢ်အခ့အပှၤတနီၤနီၤ, ဒ် သိးအကလဲၤလီၤဆူအဲၤကူပတူးအပူၤ, ဒီးစီၤဟးဒ့မ့ၢ် ဖိဆံးလီၤ.

¹⁸ ဒီးဂဲၤဆၢထၢၣ်ဟးထီၣ်လၢမံးဒယၣ်အပူၤ, ဒီးဟဲဝဲဆူ ပၤရၣ်အပူၤ, ဒီးမၤန့ၢ်ပှၤကညီလၢပၤရၣ်အပူၤ, ဒီးဟဲဝဲဆူ ကီၢ်အဲၤကူပတူးအပူၤ, ဆူအဲၤကူပတူးအစီၤပၤဖၤရိၤအ အိၣ်လၢအဟ့ၣ်လီၤအီၤလၢအဟံၣ်တဖျၢၣ်, ဒီးမၤလိာ် လၢအကန့ၢ်တၢ်အီၣ်, ဒီးဟ့ၣ်လီၤအီၤလၢဟီၣ်ခိၣ်လီၤ.

¹⁹ ဒီးစီၤဟၤဒးထံၣ်န့ၢ်တၢ်ဘျုးတၢ်ဖှိၣ်လၢ ဖၤရိၤအမဲာ် ဒိၣ်မးလီၤ. ဒီးဟ့ၣ်လီၤအမါလၢအမါဒၣ်ဝဲအဒီပုၢ်ဝဲၢ်မုၣ်, နီၢ်ပၤမုၣ်တၤပါန့ၤအဒီပုၢ်ဝဲၢ်မုၣ်လီၤ.

²⁰ ဒီးနီၢ်တၤပါန့ၤအဒီပုၢ်ဝဲၢ်မုၣ်န့ၣ် ဆံးစၢ်န့ၢ်အီၤလၢအ ဖိခွါစီၤကနူးဘး, ဒီးနီၢ်တၤပါန့ၤဒုးဖှၣ်အနုၢ်လၢ ဖၤရိၤ အဟံၣ်ပူၤ, ဒီးစီၤကနူဘးန့ၣ်အိၣ်ဝဲလၢဖၤရိၤအဟံၣ်ဖိ အကျါ, လၢဖၤရိၤအဖိခွါအကျါန့ၣ်လီၤ.

²¹ ဒီးစီၤဟၤဒးန့ၣ်နၢ်ဟူဝဲလၢ အဲၤကူပတူးအပူၤလၢစီၤ ဒၤဝံးမံဝဲဒီးအပၢ်တဖၣ်, ဒီးလၢပှၤသုးမုၢ်အခိၣ်စီၤယိၤ အာ်သံလံန့ၣ်လီၤ. ဒီးစီၤဟၤဒးစံးလၢဖၤရိၤ, ပျၢ်ယၤဒ်သိး ယကလဲၤထီၣ်ဆူယကီၢ်ဒၣ်ယဲတက့ၢ်.

²² ဖၤရိၤစံးဘၣ်အီၤ, ဘၣ်ဆၣ်ဒီးကွၢ်ကွၢ်, နဃုလဲၤထီၣ် ဆူနကီၢ်ဒၣ်နဲန့ၣ် တၢ်လၢနန့ၢ်ဘၣ်အလီၢ်အိၣ်လၢနတ န့ၢ်ဘၣ်န့ၣ် မ့ၢ်အအိၣ်ဒံးမနုၤတမံၤလဲၣ်, ဒီးစံးဆၢဝဲဒၣ်, တအိၣ်ဘၣ်တၢ်နီတမံၤဘၣ်. ဘၣ်ဆၣ်ဒီးပျၢ်, ဒီးပျၢ်ယၤ တက့ၢ်.

²³ ဒီးယွၤထိၣ်ဂဲၤထီၣ်ကဒီးအဒုၣ်အဒါလၢ စီၤအလံဒၤ အဖိခွါစီၤရစိၣ်, လၢအဃ့ၢ်ထီၣ်ကွံာ်လၢအကစၢ်စိဘၤ အစီၤပၤဟးဒးဧ့စ့ၢ်အအိၣ်လီၤ.

²⁴ ဒီးတုၤစီၤဒၤဝံးမၤသံပှၤတဖၣ်, ဒီးအဝဲဒၣ်ဒုးအိၣ်ဖှိၣ် ပှၤကညီဆူအအိၣ်, ဒီးကဲထီၣ်ပှၤတဖုအခိၣ်, ဒီးလဲၤဝဲ ဆူဒၤမ့ၤစ့းအပူၤ, ဒီးအိၣ်ဝဲဆိးဝဲဖဲန့ၣ်, ဒီးကဲစီၤပၤလၢ ဒၤမ့ၤစ့းအပူၤလီၤ. ²⁵ ဒီးမ့ၢ်အံၣ်စရ့လးအဒုၣ်အဒါလၢ စီၤၡလိၤမိၤအမုၢ်နံၤခဲလၢာ်အပူၤ, လၢတၢ်အၢလၢစီၤဟၤ ဒးမၤဝဲအမဲာ်ညါ, ဒီးသးဟ့အံၣ်စရ့လး, ဒီးကဲစီၤပၤလၢ စူၤရံအဖီခိၣ်န့ၣ်လီၤ.

²⁶ ဒီးစီၤနဘးအဖိခွါစီၤယၤရၤဘၣ်, ပှၤအ့ဖရးသးဖိဘၣ် ဃးဒီးစရ့ဒၤ, စီၤၡလိၤမိၤအကုၢ်အပှၤတဂၤစ့ၢ်ကီး(အမိၢ် အမံၤမ့ၢ်နီၢ်စရူဧၤပှၤမုၣ်ကမဲတဂၤ,) ယူာ်ထီၣ်အစုထီ ဒါဘၣ်စီၤပၤလီၤ.

²⁷ ဒီးယူာ်ထီၣ်အစုထီဒါစီၤပၤအဂ့ၢ်မ့ၢ်အအံၤ, စီၤၡလိၤ မိၤမၤမံးလိၤ, ဒီးဘှီက့ၤတၢ်ဘၢၣ်ဖျိလၢ အပၢ်စီၤဒၤဝံးအ ဝ့ၢ်ပူၤ, ²⁸ ဒီးပှၤကညီစီၤယၤရၤဘၣ်တဂၤန့ၣ် မ့ၢ်ပှၤအ ဆူၣ်, ပှၤအဂံၢ်ဆူၣ်အဘါဆူၣ်, ဒီးစီၤၡလိၤမိၤထံၣ်ဘၣ် ဝဲလၢပှၤဖိၣ်သၣ်ခွါတဂၤန့ၣ် မ့ၢ်ပှၤလၢအခုမၤတၢ်, ဒီး စီၤၡလိၤမိၤပာ်အီၤလၢ ကယဲၢ်ယိၤသးအပှၤဟံၣ်ဖိအဝံ တၢ်ယိးတၢ်အဖီခိၣ်လီၤ.

²⁹ ဒီးအကတီၢ်ဖဲန့ၣ် တၢ်မၤအသးလၢစီၤယၤရၤဘၣ်ဟး ထီၣ်လၢယရူၤၡလ့ၣ်, ဒီးပှၤၡံလိၤဖိဝံအဃံယၤထံၣ်န့ၢ် အီၤလၢကျဲပူၤ, ဒီးကၤဝဲလၢယၣ်အသီတဘ့ၣ်, ဒီးအဝဲ သ့ၣ်အိၣ်ဝဲလၢပှၢ်လၢ်ကျါခံဂၤဧိၤလီၤ.

³⁰ ဒီးစီၤအဃံယၤဖီၣ်ဃာ်ယၣ်သီတဘ့ၣ်လၢ အအိၣ်ဝဲ လၢအလိၤ, ဒီးဖှီဝဲလၢတဆံခံက့, ³¹ ဒီးစံးဘၣ်စီၤယၤ ရၤဘၣ်, ဟံးန့ၢ်ဆံဆဲၣ်က့အံၤတက့ၢ်. အဂ့ၢ်ဒ်အံၤ, ယွၤ အံၣ်စရ့လးအကစၢ်စံးဝဲဒ်အံၤ, ကွၢ်ကွၢ်, ယကထုးထီၣ် ကွံာ်ဘီမုၢ်လၢစီၤၡလိၤမိၤအစုပူၤ, ဒီးယကဟ့ၣ်လီၤပှၤ ဆံဆဲၣ်ဒူၣ်လၢနၤလီၤ. ³² ဒီးအဝဲဒၣ်န့ၣ်ကအိၣ်ဒီးပှၤတ ဒူၣ်လၢယခ့ယပှၤစီၤဒၤဝံးအဃိ, ဒီးလၢယရူၤၡလ့ၣ်အ ဃိ, ဝ့ၢ်လၢယဃုထၢအီၤလၢကယဲၢ်အံၣ်စရ့လးအဒူၣ် အကျါန့ၣ်လီၤ. ³³ အဂ့ၢ်ဒ်အံၤ, လဲၤသဒၣ်လံယၤလံ. ဒီး ဘူၣ်ထီၣ်ဘါထီၣ်ပှၤစံဒိၣ်ဖိအကစၢ်မုၣ်ဧၤၡတြိး, ပှၤမိၤ အးဖိအကစၢ်ကမိၣ်, ပှၤဧၣ်မိၣ်ဖိအကစၢ်မိလး, ဒီးတ ပိာ်ဘၣ်ယကျဲတဖၣ် ဒ်သိးအကမၤတၢ်လၢအလိၤလၢ ယမဲာ်ဒီးတိၢ်န့ၢ်ယတၢ်သိၣ်တၢ်သီဒီး ယတၢ်စံၣ်ညီၣ်, ဒ်အပၢ်စီၤဒၤဝံးအသိးန့ၣ်ဘၣ်လီၤ.

³⁴ ဒီးယတဟံးန့ၢ်ဘၣ်ဘီမုၢ်ဒီဘ့ၣ်ညါ လၢအစုပူၤဘၣ်, ဒီးယကပာ်အီၤလၢအခိၣ်တစိၤဒၣ်အီၤ လၢယခ့ယပှၤ စီၤဒၤဝံးအဃိ လၢယဃုထၢအီၤလၢအတိၢ်န့ၢ်ယတၢ် မၤလိာ်ဒီး ယတၢ်သိၣ်တၢ်သီတဂၤအဃိန့ၣ်လီၤ. ³⁵ ဒီး ယကဟံးန့ၢ်ဘီမုၢ်န့ၣ်လၢအဖိခွါအစုပူၤ, ဒီးယကဟ့ၣ် လီၤအီၤလၢနၤ, ပှၤဆံဆဲၣ်ဒူၣ်လီၤ. ³⁶ ဒီးယကဟ့ၣ်အဖိ ခွါလၢပှၤတဒူၣ်ဒ်သိးယခ့ယပှၤ စီၤဒၤဝံးကအိၣ်ဒီးအ တၢ်ကပီၤတဖျၢၣ်လၢယမဲာ်ညါတထံၣ်ဃီ လၢယရူၤၡ လ့ၣ်အပူၤ, ဝ့ၢ်တဖျၢၣ်လၢယဃုထၢအီၤဒ်သိးယကပာ် ယမံၤလၢအပူၤန့ၣ်လီၤ.

³⁷ ဒီးယကဟံးန့ၢ်နၤ, ဒီးနကကဲစီၤပၤဒ်ကယဲၢ်တၢ်လၢ နသးဆၢတၢ်အသိးန့ၣ်, ဒီးနကကဲထီၣ်စီၤပၤလၢအံၣ် စရ့လးအဖီခိၣ်လီၤ.

³⁸ ဒီးနမ့ၢ်ဒိကနၣ်ကယဲၢ်တၢ်လၢယမၤလိာ်နၤ, ဒီးပိာ်ယ ကျဲတဖၣ်, ဒီးမၤတၢ်လၢအလိၤလၢယမဲာ်, ဒ်သိးနက တိၢ်န့ၢ်ယတၢ်မၤလိာ်ဒီး ယတၢ်သိၣ်တၢ်သီ, ဒ်ယခ့ယ ပှၤစီၤဒၤဝံးမၤဝဲအသိးန့ၣ်ဒီး, တၢ်ကမၤအသးလၢယက အိၣ်ဒီးနၤ, ဒီးယကသူၣ်န့ၢ်နၤလၢဟံၣ်ကျၢၤတဟံၣ်, ဒ် ယသူၣ်န့ၢ်လၢစီၤဒၤဝံးအဂီၢ်, ဒီးယကဟ့ၣ်အံၣ်စရ့လး လၢနၤလီၤ. ³⁹ ဒီးလၢတၢ်တမံၤန့ၣ်အဃိ ယကမၤနးမၤ ဖှီၣ်စီၤဒၤဝံးအချံအသၣ်လီၤ. ဘၣ်ဆၣ်ဒီးလီၤထူလီၤယိာ် တမ့ၢ်ဘၣ်.

⁴⁰ ဒီးစီၤၡလိၤမိၤဃုမၤသံစီၤယၤရၤဘၣ်, ဒီးစီၤယၤရၤဘၣ် ဂဲၤဆၢထၢၣ်, ဒီးဃ့ၢ်ကွံာ်ဆူအဲၤကူပတူးအပူၤ, ဆူအဲၤ ကူပတူးအစီၤပၤစီၤၡံၡးအအိၣ်, ဒီးအိၣ်လၢအဲၤကူပတူး အပူၤတုၤစီၤၡလိၤမိၤသံဝဲလီၤ.

⁴¹ ဒီးတၢ်အိၣ်လီၤတဲာ်ဘၣ်ဃးဒီးစီၤၡလိၤမိၤ, ဒီးကယဲၢ် တၢ်လၢအမၤဝဲခဲလၢာ်, ဒီးအတၢ်ကူၣ်သ့န့ၣ်ကွဲအသး လၢလံာ်ၡလိၤမိၤအတၢ်မၤ, တမ့ၢ်ဘၣ်ဧါ.

⁴² ဒီးမုၢ်နံၤတဖၣ်လၢ စီၤၡလိၤမိၤကဲစီၤပၤလၢ ယရူၤၡ လ့ၣ်အပူၤလၢအံၣ်စရ့လးခဲလၢာ်အဖီခိၣ်န့ၣ် မ့ၢ်အနံၣ် လွံၢ်ဆံလီၤ.

⁴³ ဒီးစီၤၡလိၤမိၤမံဝဲဒီးအပၢ်တဖၣ်, ဒီးပှၤခူၣ်လီၤကွံာ်အီၤ လၢအပၢ်စီၤဒၤဝံးအဝ့ၢ်ပူၤ, ဒီးအဖိခွါစီၤရဃၤဘၣ်ကဲစီၤ ပၤလၢအလီၢ်န့ၣ်လီၤ.

၁၂

¹ ဒီးစီၤရဃၤဘၣ်လဲၤဝဲဆူၡက့ၣ်လီၤ. အဂ့ၢ်ဒ်အံၤ, အံၣ် စရ့လးခဲလၢာ် ဟဲဆူၡက့ၣ်ဒ်သိးအကပာ်အီၤလၢစီၤပၤ လီၤ. ² ဒီးတုၤစီၤနဘးအဖိခွါစီၤယၤရၤဘၣ်လၢအအိၣ် ဒံးလၢအဲၤကူပတူးအပူၤန့ၣ် နၢ်ဟူတၢ်ဒီး, (အဂ့ၢ်ဒ်အံၤ, ဃ့ၢ်ဝဲလၢစီၤၡလိၤမိၤအအိၣ်, ဒီးစီၤယၤရၤဘၣ်အိၣ်ဝဲဆိး ဝဲအဲၤကူပတူးအပူၤလီၤ.) ³ တၢ်မၤအသးလၢပှၤမၢလီၤ တၢ်ဒီးကိးက့ၤအီၤ, ဒီးစီၤယၤရၤဘၣ်, ဒီးအံၣ်စရ့လးအ တၢ်အိၣ်ဖှိၣ်ခဲလၢာ်ဟဲဝဲ, ဒီးကတိၤတၢ်ဒီးစီၤရဃၤဘၣ်, ဒီးစံးဝဲဒၣ်, ⁴ နပၢ်မၤကီပနီၣ်ယိးဘိ, ဒီးနဲဒၣ်ခဲကနံၣ် အံၤနပၢ်အတၢ်မၤကီ, ဒီးအနီၣ်ယိးဘိဃၢလၢအပာ်လၢ ပလိၤအံၤမၤဖှံထီၣ်တက့ၢ်. ဒီးပကမၤနတၢ်လီၤ.

⁵ ဒီးစံးဘၣ်အီၤ, ဟးထီၣ်သၢနံၤ, ဒီးဟဲက့ၤကဒါက့ၤဆူ ယအိၣ်တက့ၢ်. ဒီးပှၤဂီၢ်မုၢ်ဟးထီၣ်ဝဲလီၤ.

⁶ ဒီးစီၤပၤရဃၤဘၣ်ကူၣ်လိာ်အသးဒီး ပှၤသးပှၢ်တဖၣ် လၢအဆၢထၢၣ်လၢစီၤၡလိၤမိၤအမဲာ်ညါ လၢအမူဒံးအ ဖၢမုၢ်, ဒီးစံးဝဲဒၣ်, သုကူၣ်လိာ်သုသးဒ်သိးယကစံးဆၢ ပှၤဂီၢ်မုၢ်အံၤဒ်လဲၣ်.

⁷ ဒီးအဝဲသ့ၣ်ကတိၤတၢ်, ဒီးစံးဝဲဒၣ်, နမ့ၢ်ကဲထီၣ်ပှၤဂီၢ် မုၢ်အခ့အပှၤလၢမုၢ်မဆါတနံၤအံၤ, ဒီးမၤအတၢ်, ဒီးစံး ဆၢအီၤ, ဒီးကတိၤတၢ်ကတိၤဂ့ၤဒီးအီၤဒီး, ကကဲထီၣ်ဝဲ လၢနခ့နပှၤလီၤထူလီၤယိာ်လီၤ.

⁸ ဘၣ်ဆၣ်ဒီးလဲၤသဒၣ်ပှၤသူၣ်က့သးပှၢ် အတၢ်ကူၣ် လၢအကူၣ်လိာ်ဝဲဒီးအီၤ, ဒီးကူၣ်လိာ်အသးဒီးပှၤအသး စၢ်လၢအဒိၣ်ထီၣ်ဃုာ်ဒီးအီၤ, လၢအဆၢထၢၣ်လၢအ မဲာ်ညါလီၤ.

⁹ ဒီးစံးလၢအီၤ, ပှၤဂီၢ်မုၢ်အံၤလၢအကတိၤတၢ်ဒီးယၤဒီး စံး, မၤဖှံထီၣ်နီၣ်ယိးဘိလၢနပၢ်ပာ်လၢပလိၤတက့ၢ်န့ၣ်, ဒ်သိးယကစံးဆၢအီၤဒီး, သုကူၣ်စၢၤတၢ်ဒ်လဲၣ်.

¹⁰ ဒီးပှၤအသးစၢ်လၢအဒိၣ်ထီၣ်ဃုာ်ဒီးအီၤ, ကတိၤတၢ် ဒီးအီၤဒီးစံးဝဲဒၣ်, နဘၣ်စံးဆၢပှၤဂီၢ်မုၢ်လၢအကတိၤ တၢ်ဒီးနၤဒီးစံး, နပၢ်မၤပနီၣ်ယိးဘိဃၢ, မ့မ့ၢ်နဲဒၣ်မၤ ဖှံထီၣ်အီၤလၢပဂီၢ်တက့ၢ်န့ၣ်, နဘၣ်စံးဆၢအီၤဒ်အံၤ, ယ စုဆၣ်တီၣ်န့ၢ်ယပၢ်အယီၢ်ဒ့တက့ၢ်လီၤ. ¹¹ ဒီးခဲကနံၣ် အံၤယပၢ်ပာ်နီၣ်ယိးဘိအဃၢလၢသုလိၤ, ဒီးယဲဒၣ်အံၤ ယကပာ်တၢ်အါထီၣ်လၢသုနီၣ်ယိးဘိအလိၤလီၤ. ယ ပၢ်သိၣ်ဃီၣ်သုလၢနီၣ်ဖျ့, ဒီးယဲဒၣ်အံၤယကသိၣ်ဃီၣ် သုလၢပတ့ၤချဲးလီၤ.

¹² ဒီးစီၤယၤရၤဘၣ်ဒီးပှၤဂီၢ်မုၢ်ခဲလၢာ် ဟဲဝဲဆူစီၤရဃၤ ဘၣ်အအိၣ်လၢသၢနံၤတနံၤန့ၣ်, ဒ်စီၤပၤစံးတ့ၢ်, ဒီးစံးဝဲ, ဟဲက့ၤဆူယအိၣ်လၢသၢနံၤတနံၤတက့ၢ်အသိးန့ၣ်လီၤ. ¹³ ဒီးစီၤပၤစံးဆၢပှၤဂီၢ်မုၢ်ကီကီကလဲာ်, ဒီးလဲၤသဒၣ်ပှၤသူၣ်က့သးပှၢ်အတၢ်လၢအကူၣ်လိာ်အသးဒီးအီၤလီၤ―

¹⁴ ဒီးကတိၤဒီးအီၤ, ဒ်ပှၤအသးစၢ်ကူၣ်စၢၤတၢ်အသိးန့ၣ်, ဒီးစံးဝဲဒၣ်, ယပၢ်မၤသုနီၣ်ယိးဘိဃၢ, ဒီးယဲဒၣ်အံၤယ ကပာ်တၢ်အါထီၣ်လၢသုနီၣ်ယိးဘိအလိၤလီၤ. ယပၢ် သိၣ်ဃီၣ်သုလၢနီၣ်ဖျ့ဒီးယဲဒၣ်အံၤ ယကသိၣ်ဃီၣ်သု လၢပတ့ၤချဲးလီၤ.

¹⁵ ဒီးစီၤပၤတဒိကနၣ်ဘၣ်ပှၤဂီၢ်မုၢ်အကလုၢ်ဘၣ်. အဂ့ၢ် ဒ်အံၤ, တၢ်ဟဲဝဲလၢယွၤ, ဒ်သိးအကမၤလၢထီၣ်ပှဲၤထီၣ် အတၢ်ကတိၤလၢယွၤကတိၤဝဲ ဒီးစီၤနဘးအဖိခွါစီၤယၤ ရၤဘၣ်လၢပှၤၡံလိၤဖိစီၤအဃံယၤအစုပူၤလီၤ.

¹⁶ ဒီးအံၣ်စရ့လးခဲလၢာ်ထံၣ်ဝဲလၢ စီၤပၤတဒိကနၣ်အ ကလုၢ်ဘၣ်. ဒီးပှၤဂီၢ်မုၢ်စံးဆၢစီၤပၤ, ဒီးစံးဝဲဒၣ်, ပဂီၢ် အိၣ်လၢစီၤဒၤဝံးအပူၤမနုၤတမံၤလဲၣ်. ဒီးပန့ၢ်သါတၢ် တအိၣ်ဘၣ်လၢစီၤယံးၡဲအဖိခွါအပူၤဘၣ်. ဆူသုဒဲတ ဖၣ်အပူၤတက့ၢ်, အံၣ်စရ့လးဧၢ. ခဲကနံၣ်အံၤ, ကွၢ်နဟံၣ် ဒၣ်နဲ, စီၤဒၤဝံးဧၢ. ဒီးအံၣ်စရ့လးဟးဝဲဆူအဒဲပူၤလီၤ.

¹⁷ ဒီးပှၤအံၣ်စရ့လးဖိလၢ အအိၣ်ဝဲဆိးဝဲလၢယူဒၤအဝ့ၢ် တဖၣ်အပူၤန့ၣ်စီၤရဃၤဘၣ်ကဲစီၤပၤလၢအဖီခိၣ်လီၤ.

¹⁸ ဒီးစီၤရဃၤဘၣ်မၢလီၤစီၤအဒိၤရၣ်လၢ အအိၣ်ဝဲလၢ တၢ်ဟ့ၣ်သွဲအဖီခိၣ်, ဒီးအံၣ်စရ့လးခဲလၢာ်ကွံာ်အီၤလၢ လၢၢ်, ဒီးသံဝဲလီၤ. ဒီးစီၤရဃၤဘၣ်လဲၤဝဲချ့ချ့ဒ်သိးအက ဒိးအလ့ၣ်ကဟၣ်, ဒ်သိးအကဃ့ၢ်ဝဲဆူယရူၤၡလ့ၣ် လီၤ. ¹⁹ ဒီးအံၣ်စရ့လးပူထီၣ်စီၤဒၤဝံးအပှၤဟံၣ်ဖိတုၤမုၢ် မဆါတနံၤအီၤ.

²⁰ ဒီးတၢ်မၤအသးတုၤအံၣ်စရ့လးခဲလၢာ် နၢ်ဟူဝဲလၢစီၤ ယၤရၤဘၣ်ဟဲက့ၤကဒါက့ၤဒီး, အဝဲသ့ၣ်တဖၣ်မၢလီၤ တၢ်, ဒီးကိးန့ၢ်အီၤဆူတၢ်အိၣ်ဖှိၣ်အအိၣ်, ဒီးပာ်အီၤလၢ စီၤပၤလၢအံၣ်စရ့လးခဲလၢာ်အဖီခိၣ်လီၤ. ပှၤလူၤစီၤဒၤ ဝံးအပှၤဟံၣ်ဖိအိၣ်ထဲယူဒၤတဒူၣ်ဧိၤလီၤ.

²¹ ဒီးစီၤရဃၤဘၣ်ဟဲတုၤဝဲလၢယရူၤၡလ့ၣ်အပူၤ, ဒီးဒုး အိၣ်ဖှိၣ်ရိဖှိၣ်ယူဒၤအပှၤဟံၣ်ဖိခဲလၢာ်, ဒီးစီၤဘံၣ်ယၤ မံၣ်အဒူၣ်ပှၤသုးဖိလၢတၢ်ဃုထၢအီၤ, တကလီၤဃိးက လး, ဒ်သိးအကဒုးတၢ်ဒီးအံၣ်စရ့လးအပှၤဟံၣ်ဖိ, ဒ်သိး အကဒုးဟဲက့ၤဘီမုၢ်ဟး ဆူစီၤၡလိၤမိၤအဖိခွါစီၤရဃၤ ဘၣ်အအိၣ်လီၤ.

²² ဒီးယွၤအကလုၢ်လီၤဘၣ်ယွၤအပှၤကညီ စီၤၡမၤယၤ, ဒီးစံးဝဲဒၣ်, ²³ ကတိၤတၢ်ဒီးယူဒၤအစီၤပၤစီၤၡလိၤမိၤအ ဖိခွါစီၤရဃၤဘၣ်, ဒီးယူဒၤဒီးဘံၣ်ယၤမံၣ်အပှၤဟံၣ်ဖိ ဖိခဲလၢာ်, ဒီးပှၤဂီၢ်မုၢ်လၢအအိၣ်လီၤတဲာ်, ဒီးစံး, ²⁴ ယွၤ စံးဝဲဒ်အံၤ, သုတလဲၤထီၣ်, ဒီးသုတဒုးသုးဒီးသုဒီပုၢ်ဝဲၢ် ပှၤအံၣ်စရ့လးဖိတဂ့ၤ. က့ၤက့ၤတဂၤဆူအဟံၣ်ဒၣ်ဝဲ, တဂၤဆူအဟံၣ်ဒၣ်ဝဲတက့ၢ်. အဂ့ၢ်ဒ်အံၤ, တၢ်တမံၤအံၤ ဟဲလၢယၤလီၤ. ဒီးဒိကနၣ်ယွၤအကလုၢ်, ဒီးက့ၤက့ၤဝဲ ဒ်သိးကဟးထီၣ်, ဒ်ယွၤအကလုၢ်အသိးန့ၣ်လီၤ.

²⁵ ဒီးစီၤယၤရၤဘၣ်တ့ၡက့ၣ်လၢ ကစၢၢ်အ့ဖရဲၣ်အလိၤ, ဒီးအိၣ်ဝဲဆိးဝဲဖဲန့ၣ်, ဒီးဟးထီၣ်ဖဲန့ၣ်ဒီးတ့ပနူၤအ့လး လီၤ. ²⁶ ဒီးစီၤယၤရၤဘၣ်စံးလၢအသးကံၢ်ပူၤ, ခဲကနံၣ်အံၤဘီမုၢ်အံၤကက့ၤက့ၤဆူ စီၤဒၤဝံးအပှၤဟံၣ်ဖိအအိၣ်လီၤ.―

²⁷ ပှၤဂီၢ်မုၢ်အံၤမ့ၢ်လဲၤထီၣ်ဒ်သိးအကလုၢ်တၢ်လၢ ယွၤအ ဟံၣ်ပူၤလၢယရူၤၡလ့ၣ်အပူၤဒီး, ပှၤဂီၢ်မုၢ်အံၤအသးက က့ၤကဒါက့ၤဆူအကစၢ်အအိၣ်, ဆူယူဒၤအစီၤပၤရဃၤ ဘၣ်အအိၣ်, ဒီးကမၤသံယၤ, ဒီးကက့ၤကဒါက့ၤဆူယူ ဒၤအစီၤပၤရဃၤဘၣ်အအိၣ်လီၤ.

²⁸ ဒီးစီၤပၤကူၣ်လိာ်အသးဒီးတၢ်, ဒီးတ့ဂီၤဖံးဖိလၢထူခံ ဒု, ဒီးစံးဝဲဒၣ်, သုလဲၤထီၣ်တၢ်ဆူယရူၤၡလ့ၣ်မ့ၢ်တၢ်အါ ကဲၣ်ဆိးလီၤ. ကွၢ်ကွၢ်, အံၣ်စရ့လးဧၢ, နကစၢ်တဖၣ်လၢ အဟဲစိာ်နၤလၢအဲၤကူပတူးအပူၤန့ၣ်တက့ၢ်.

²⁹ ဒီးပာ်လီၤအတဒုလၢဘ့ၤသ့လးအပူၤ, ဒီးအဝဲတဒု လၢဒၣ်အပူၤလီၤ. ³⁰ ဒီးတၢ်တမံၤန့ၣ်ကဲထီၣ်တၢ်ဒဲးဘး လီၤ. အဂ့ၢ်ဒ်အံၤ, ပှၤဂီၢ်မုၢ်လဲၤထီၣ်ဆူတဒုအအိၣ်ပၢၢ် လၢဒၣ်လီၤ.

³¹ ဒီးမၤဟံၣ်လၢတၢ်အလီၢ်ထီၣ်ထီတဖၣ်, ဒီးပာ်ပှၤလုၢ် တၢ်အဒိၣ်လၢပှၤဂီၢ်မုၢ်ဖိလၢအတမ့ၢ်ဘၣ်လၢ စီၤလ့ၤဝံ အဖိခွါအကျါဘၣ်.

³² ဒီးစီၤယၤရၤဘၣ်မၤတၢ်မၤဘူၣ်လၢ လါဃိးလါတလါ အပူၤ, ပှဲၤထီၣ်တဆံယဲၢ်နံၤတနံၤန့ၣ်မၤသးဒ်တၢ်မၤဘူၣ် လၢယူဒၤအပူၤအသိးန့ၣ်, ဒီးလုၢ်တၢ်လၢတၢ်လုၢ်လီၢ် အဖီခိၣ်, (မၤဝဲဒ်န့ၣ်သိးလၢဘ့ၤသ့လးအပူၤ,)ဒီးဂီၤဖံး ဖိလၢအတ့ဝဲန့ၣ်လုၢ်အီၤလၢတၢ်, ဒီးပာ်လီၤတၢ်အလီၢ် ထီၣ်ထီလၢအမၤဝဲတဖၣ်န့ၣ် အပှၤလုၢ်တၢ်အဒိၣ်တဖၣ် လၢဘ့ၤသ့လးအပူၤလီၤ.

³³ ဒီးလုၢ်တၢ်လၢတၢ်လုၢ်လီၢ်အဖီခိၣ် လၢအမၤဝဲလၢ ဘ့ၤသ့လးအပူၤလၢလါဃိးလါတလါ, တဆံယဲၢ်နံၤ တနံၤ, လါလၢအပာ်လၢအသးဒၣ်ဝဲ, ဒီးပာ်တၢ်မၤဘူၣ် လၢပှၤအံၣ်စရ့လးဖိအဂီၢ်, ဒီးလုၢ်တၢ်လၢတၢ်လုၢ်လီၢ် အဖီခိၣ်န့ၣ်, ဒီးဆိးကဲၤတၢ်နၢမူလီၤ.

၁၃

¹ ဒီးကွၢ်ကွၢ်, ယွၤအပှၤကညီတဂၤ ဟဲထီၣ်လၢယွၤအ ကလုၢ်ကထါလၢယူဒၤဆူဘ့ၤသ့လးအပူၤ, ဒီးစီၤယၤ ရၤဘၣ်ဆၢထၢၣ်ဝဲလၢတၢ်လုၢ်လီၢ်အဃၢၤ ဒ်သိးအက ဆိၣ်ကဲၤတၢ်နၢမူလီၤ.

² ဒီးကိးထီၣ်ဝဲထီဒါတၢ်လုၢ်လီၢ် လၢယွၤအကလုၢ်က ထါ, ဒီးစံးဝဲဒၣ်, တၢ်လုၢ်လီၢ်ဧၢ, တၢ်လုၢ်လီၢ်ဧၢ, ယွၤစံး ဒ်အံၤ, ကွၢ်ကွၢ်, ဖိသၣ်တဂၤကအိၣ်ဖျဲၣ်ဝဲလၢစီၤဒၤဝံးအ ဟံၣ်, အမံၤစီၤယိၤၡံယၤ, ဒီးကလုၢ်တၢ်အလီၢ်ထီၣ်ထီ အပှၤလုၢ်တၢ်အဒိၣ်တဖၣ် လၢနဖီခိၣ်, ပှၤလၢအဆိၣ် ကဲၤတၢ်နၢမူလၢနဖီခိၣ်, ဒီးမ့ၣ်အူကအီၣ်, ပှၤကညီအ ဃံအကွဲလၢအဖီခိၣ်လီၤ.

³ ဒီးတၢ်လၢမုၢ်တနံၤန့ၣ် ဟ့ၣ်လီၤတၢ်ပနီၣ်, ဒီးစံးဝဲဒၣ်, အအံၤမ့ၢ်တၢ်အပနီၣ်လၢယွၤကတိၤတၢ်, ကွၢ်ကွၢ်, တၢ် လုၢ်လီၢ်ကသ့ၣ်ဖး, ဒီးဖၣ်ဆါလၢအအိၣ်လၢအဖီခိၣ် ကဘၣ်တၢ်ဂၢ်လီၤကွံာ်အသးလီၤ.

⁴ ဒီးတုၤစီၤပၤယၤရၤဘၣ် နၢ်ဟူယွၤအပှၤကညီအတၢ် ကတိၤလၢအကိးထီဒါတၢ်လုၢ်လီၢ်လၢ ဘ့ၤသ့လးအ ပူၤန့ၣ်ဒီး, တၢ်မၤအသးလၢအယူာ်ထီၣ်အစုလၢတၢ်လုၢ် လီၢ်အဃၢၤ, ဒီးစံးဝဲဒၣ်, ဖီၣ်ဃာ်အီၤတက့ၢ်. ဒီးအစု လၢအယူာ်ထီၣ်ထီဒါအီၤန့ၣ်, ဃ့ထီၣ်ကွံာ်, ဒီးယၤလီၤ က့ၤတသ့ဘၣ်လီၤ.

⁵ ဒီးတၢ်လုၢ်လီၢ်န့ၣ်သ့ၣ်ဖး, ဒီးဖၣ်ဆါဘၣ်ဂၢ်လီၤကွံာ် အသးလၢတၢ်လုၢ်လီၢ်အဖီခိၣ်, ဒ်တၢ်အပနီၣ်လၢယွၤ အပှၤကညီဟ့ၣ်လီၤဝဲလၢယွၤအကလုၢ်အသိးန့ၣ်လီၤ.

⁶ ဒီးစီၤပၤစံးဆၢယွၤအပှၤကညီ, ဒီးစံးဝဲဒၣ်, ဃ့ကညး တၢ်လၢယွၤနကစၢ်အမဲာ်ညါ, ဒီးဘါထုကဖၣ်န့ၢ်ယဂီၢ် ဒ်သိးယကန့ၢ်က့ၤယစုတက့ၢ်. ဒီးယွၤအပှၤကညီဃ့က ညးယွၤ, ဒီးစီၤပၤန့ၢ်က့ၤအစု, ဒီးကဲထီၣ်ဝဲဒ်လီၢ်လီၢ်လီၤ.

⁷ ဒီးစီၤပၤစံးဘၣ်ယွၤအပှၤကညီ, ဟဲဒီးယၤဆူယဟံၣ်, ဒီးဒုးဆူၣ်ထီၣ်နသးတက့ၢ်. ဒီးယကဟ့ၣ်လီၤနၤလၢ တၢ်လီၤ.

⁸ ဒီးယွၤအပှၤကညီန့ၣ်စံးလၢစီၤပၤ, နမ့ၢ်ဟ့ၣ်လီၤယၤ လၢနဟံၣ်တဝာ်ညါဒီး, ယတလဲၤနုာ်ဘၣ်ဒီးနၤ, ဒီးယ တအီၣ်ကိၣ်, ဒီးယတအီဘၣ်ထံ လၢတၢ်အလီၢ်အံၤ ဘၣ်. ⁹ အဂ့ၢ်ဒ်အံၤ, ယွၤအကလုၢ်မၤလိာ်ယၤဒ်န့ၣ်အသိး ဒီးစံးဝဲဒၣ်, အီၣ်ကိၣ်တဂ့ၤ, ဒီးအီထံတဂ့ၤ, ဒီးက့ၤကဒါ က့ၤလၢကျဲလၢနဟဲန့ၣ်တဂ့ၤ.

¹⁰ ဒီးက့ၤက့ၤဝဲလၢအကျဲတဘိဒၣ်, ဒီးတမ့ၢ်ဘၣ်လၢကျဲ လၢအဟဲဆူဘ့ၤသ့လးဘၣ်.

¹¹ ဒီးဝံသးပှၢ်တဂၤအိၣ်ဝဲဆိးဝဲလၢ ဘ့ၤသ့လးအပူၤ, ဒီး အဖိခွါတဖၣ်ဟဲ, ဒီးစံးဘၣ်အီၤလၢကယဲၢ်တၢ်မၤလၢ ယွၤအပှၤကညီမၤဝဲလၢမုၢ်တနံၤန့ၣ်လၢ ဘ့ၤသ့လးအ ပူၤလီၤ. တၢ်ကတိၤလၢအစံးလၢစီၤပၤန့ၣ်စံၣ်တဲၤတဲလီၤ စ့ၢ်ကီးအပၢ်လီၤ.

¹² ဒီးအပၢ်စံးဘၣ်အီၤ, လဲၤဝဲကျဲမနုၤလဲၣ်. ဒီးအဖိခွါတ ဖၣ်ထံၣ်ဘၣ်ကျဲလၢယွၤအပှၤကညီလၢ အဟဲဝဲလၢယူ ဒၤတဂၤန့ၣ်လဲၤတၢ်လီၤ. ¹³ ဒီးစံးဘၣ်အဖိခွါတဖၣ်န့ၣ် ဂီၤကၢ်ကသ့ၣ်ယီၤတက့ၢ်. ဒီးအဝဲသ့ၣ်ဂီၤကၢ်ကသ့ၣ်ယီၤလၢအဂီၢ်, ဒီးဒိးဝဲလီၤ.―

¹⁴ ဒီးလူၤပိာ်ယွၤအပှၤကညီအခံ, ဒီးထံၣ်န့ၢ်အီၤဆ့ၣ်နီၤ လၢသ့ထိးဖၣ်အဖီလာ်, ဒီးစံးဘၣ်အီၤ, နမ့ၢ်ယွၤအပှၤ ကညီလၢအဟဲလၢယူဒၤစ့ၢ်ကီးဧါ. ဒီးစံးဝဲဒၣ်, ယၤလီၤ.

¹⁵ ဒီးစံးဘၣ်အီၤ, ဟဲဒီးယၤဆူယဟံၣ်, ဒီးအိၣ်ကိၣ်တ က့ၢ်.

¹⁶ ဒီးစံးဝဲဒၣ်, ယက့ၤဒီးနၤ, ဒီးလဲၤနုာ်ဒီးနၤတသ့ဘၣ်. ဒီးယတအီၣ်ဘၣ်ကိၣ်, ဒီးယတအီဘၣ်ထံဒီးနၤလၢအ လီၢ်အံၤဘၣ်. ¹⁷ အဂ့ၢ်ဒ်အံၤတၢ်စံဘၣ်ယၤလၢယွၤအက လုၢ်, နတဘၣ်အီၣ်ကိၣ်, ဒီးနတဘၣ်အီထံဖဲန့ၣ်ဘၣ်, ဒီးနတဘၣ်ဃၣ်ဃီၤဒ်သိးနကပိာ်ကျဲလၢနဟဲန့ၣ်ဘၣ်.

¹⁸ ဒီးစံးဘၣ်အီၤ, ယဲဒၣ်အံၤယမ့ၢ်ဝံစ့ၢ်ကီးဒ်နၤအသိး, ဒီးကလူးတဂၤကတိၤတၢ်ဒီးယၤလၢ ယွၤအကလုၢ်, ဒီး စံးဝဲဒၣ်, ဟဲစိာ်အီၤဆူနဟံၣ်ဒ်သိးအကအီၣ်ကိၣ်, ဒီး ဒီးအီထံတက့ၢ်. ဒီးကတိၤကဘျံးကဘျၣ်တၢ်ဒီးအီၤလီၤ.

¹⁹ ဒီးအဝဲဒၣ်က့ၤဒီးအီၤ, ဒီးအီၣ်ကိၣ်လၢအဟံၣ်ပူၤ, ဒီး အီထံလီၤ.

²⁰ ဒီးလၢပှၤတဖၣ်ဆ့ၣ်နီၤလၢ စီၢ်နီၤခိၣ်အဃၢၤအဖၢမုၢ် ဒီး, တၢ်မၤအသးလၢယွၤအကလုၢ်ဘၣ်ဝံလၢအဟဲက့ၤ စိာ်အီၤ, ²¹ ဒီးကိးထီၣ်ဝဲဆူယွၤအပှၤကညီလၢအဟဲလၢ ယူဒၤဒီးစံးဝဲဒၣ်, ယွၤစံးဒ်အံၤ, မ့ၢ်နပူထီၣ်ယွၤအထးခိၣ်, ဒီးတတိၢ်န့ၣ်ဘၣ်တၢ်မၤလိာ်လၢ ယွၤနကစၢ်မၤလိာ် နၤ, ²² ဒီးဟဲက့ၤကဒါက့ၤ, ဒီးအီၣ်ကိၣ်ဒီးအီထံလၢအ လီၢ်ဖဲယွၤစံးဘၣ်နၤ, အီၣ်ကိၣ်တဂ့ၤ, အီထံတဂ့ၤန့ၣ်ဒီး, နစိၣ်တဟဲဘၣ်ဆူနပၢ်တဖၣ်အသွၣ်ခိၣ်ပူၤဘၣ်.

²³ ဒီးလၢအအီၣ်ကိၣ်အလီၢ်ခံ, ဒီးလၢအအီထံအလီၢ်ခံ န့ၣ်တၢ်မၤအသးလၢအဝဲဒၣ် ဂီၤကၢ်ကသ့ၣ်ယီၤလၢဝံ လၢအဟဲက့ၤစိာ်တ့ၢ်အီၤတဂၤအဂီၢ်န့ၣ်လီၤ.

²⁴ ဒီးလဲၤဝဲ, ဒီးခ့ယုၢ်ဘၣ်သဃိာ်အီၤလၢကျဲပူၤ, ဒီးမၤသံ အီၤ, ဒီးအစိၣ်အိၣ်ကွံာ်တ့ၢ်အသးဖဲကျဲပူၤ, ဒီးကသ့ၣ် ယီၤဆၢထၢၣ်လၢအဃၢၤ, ဒီးခ့ယုၢ်န့ၣ်ဆၢထၢၣ်ဝဲလၢ အစိၣ်အဃၢၤစ့ၢ်ကီးလီၤ.

²⁵ ဒီးကွၢ်ကွၢ်, ပှၤကညီလဲၤပူၤကွံာ်, ဒီးထံၣ်ဘၣ်အစိၣ် အိၣ်ကွံာ်တ့ၢ်အသးဖဲန့ၣ်လၢကျဲပူၤ, ဒီးခ့ယုၢ်ဆၢထၢၣ် လၢအဃၢၤ, ဒီးဟဲစံးဝဲဘၣ်တဲဘၣ်ဝဲဖဲဝ့ၢ်ပူၤ, ဖဲဝံသး ပှၢ်အိၣ်ဝဲဆိးဝဲလၢအပူၤလီၤ.

²⁶ ဒီးဝံလၢအဟဲက့ၤစိာ်အီၤလၢကျဲန့ၣ်နၢ်ဟူဝဲ, ဒီးစံးဝဲ ဒၣ်, မ့ၢ်လၢယွၤအပှၤကညီလၢအပူထီၣ်ယွၤအအထး ခိၣ်, ဒီးယွၤဟ့ၣ်လီၤကွံာ်အီၤလၢခ့ယုၢ်လၢအအ့ၣ်ဖှီကွံာ် အီၤ, ဒီးမၤသံအီၤဒ်ယွၤအကလုၢ်လၢ အကတိၤတၢ်ဒီး အီၤအသိးန့ၣ်လီၤ.

²⁷ ဒီးကတိၤတၢ်ဒီးအဖိခွါတဖၣ်ဒီးစံးဝဲဒၣ်, ဂီၤကၢ်က သ့ၣ်ယီၤတက့ၢ်. ဒီးအဝဲသ့ၣ်ဂီၤကၢ်ဝဲလီၤ.

²⁸ ဒီးလဲၤဝဲဒီးထံၣ်န့ၢ်အစိၣ် အိၣ်ကွံာ်တ့ၢ်အသးလၢကျဲ ပူၤ, ဒီးကသ့ၣ်ယီၤ, ဒီးခ့ယုၢ်ဆၢထၢၣ်ဝဲလၢအစိၣ်အ ဃၢၤ, ဒီးခ့ယုၢ်တအီၣ်ဘၣ်အစိၣ်, ဒီးတအ့ၣ်ဖှီဘၣ်က သ့ၣ်ယီၤဘၣ်.

²⁹ ဒီးဝံတဂၤန့ၣ်ဟံးန့ၢ်ယွၤအပှၤကညီအစိၣ်, ဒီးပာ်ဝဲ လၢကသ့ၣ်ယီၤအလိၤ, ဒီးဟဲက့ၤစိာ်ဝဲ, ဒီးဝံသးပှၢ်ဟဲ က့ၤဆူဝ့ၢ်ပူၤ, ဒ်သိးအကဟီၣ်ဝဲ, ဒီးခူၣ်လီၤကွံာ်အီၤ လီၤ.

³⁰ ဒီးပာ်အစိၣ်လၢအသွၣ်ခိၣ်ဒၣ်ဝဲအပူၤ, ဒီးဒဲလီၤအသး နါပှၢ်လၢအဖီခိၣ်, ဒီးစံးဝဲဒၣ်, အၣ်လါ, အၣ်လါ, ယဒီပုၢ် ဝဲၢ်ဧၢ, ³¹ ဒီးလၢအခူၣ်လီၤကွံာ်အီၤအလီၢ်ခံန့ၣ် တၢ်မၤ အသးလၢကတိၤတၢ်ဒီး အဖိခွါတဖၣ်ဒီး စံးဘၣ်အီၤ, တုၤယသံဒီး, ခူၣ်လီၤကွံာ်ယၤလၢ တၢ်သွၣ်ခိၣ်အပူၤဖဲ ယွၤအပှၤကညီအိၣ်ခူၣ်လီၤအသး လၢအပူၤန့ၣ်တက့ၢ်. ပာ်ယဃံလၢအဃံအဃၢၤန့ၣ်တက့ၢ်. ³² အဂ့ၢ်ဒ်အံၤ, တၢ် ကတိၤလၢအကိးထီၣ်ယွၤအကလုၢ်ထီဒါ တၢ်လုၢ်လီၢ် လၢဘ့ၤသ့လးအပူၤ, ဒီးထီဒါဟံၣ်လၢတၢ်အလီၢ်ထီၣ် ထီခဲလၢာ် လၢအအိၣ်ဝဲလၢၡၤမရံအဝ့ၢ်တဖၣ်အပူၤန့ၣ် ကလၢထီၣ်ပှဲၤထီၣ်သပှၢ်တၢၢ်လီၤ.

³³ တၢ်တမံၤအံၤအလီၢ်ခံန့ၣ် စီၤယၤရၤဘၣ်တဟဲက့ၤက ဒါက့ၤလၢအကျဲအၢဘၣ်, ဒီးပာ်က့ၤပှၤလၢပှၤဂီၢ်မုၢ်အ ကျါလၢပှၤလၢအလီၢ်ထီၣ်ထီ အပှၤလုၢ်တၢ်အဒိၣ်လီၤ. ဒီးဖဲဒၣ်ပှၤလၢအဘၣ်အသးန့ၣ် ပာ်ဝဲဒ်သိးအကဲထီၣ် တၢ်အလီၢ်ထီၣ်ထီအပှၤလၢ်တၢ်အဒိၣ်လီၤ.

³⁴ ဒီးတၢ်တမံၤအံၤ ကဲထီၣ်တၢ်ဒဲဘးလၢစီၤယၤရၤဘၣ် အဟံၣ်အဂီၢ်, တုၤတၢ်ဒီၣ်တဲာ်ကွံာ်အီၤ, ဒီးမၤဟးဂီၤ ကွံာ်အီၤလၢဟီၣ်ခိၣ်ချၢန့ၣ်လီၤ.

၁၄

¹ အကတီၢ်ဖဲန့ၣ်ဒီး, စီၤယၤရၤဘၣ်အဖိခွါစီၤအဘံယၤ ဆါထီၣ်ဝဲလီၤ. ² ဒီးစီၤယၤရၤဘၣ်စံးဘၣ်အမါ, ဂဲၤဆၢ ထၢၣ်လၢ်တက့ၢ်. ဒီးမၤလီၤဆီနသးဒ်သိးပှၤသုတသ့ၣ် ညါလၢနမ့ၢ်စီၤယၤရၤဘၣ်အမါတဂ့ၤ. ဒီးလဲၤဆူၡံလိၤ တက့ၢ်. ကွၢ်ကွၢ်, ဝံအဃံယၤလၢအစံးဘၣ်ယၤလၢယ ကကဲထီၣ်စီၤပၤလၢပှၤဂီၢ်မုၢ်အံၤအဖီခိၣ်န့ၣ် အိၣ်ဖဲန့ၣ် လီၤ.

³ ဒီးဟံးန့ၢ်ကိၣ်ဆံဆဲၣ်လိၣ်, ဒီးကိၣ်ဘ့ၣ်ဘၣ်တဖၣ်ဒီး ကနဲစီတပလီလၢနစုပူၤ, ဒီးလဲၤဆူအအိၣ်, ဒီးဖိသၣ်က မၤသးဒ်လဲၣ်ဒ်လဲၣ်န့ၣ်ကစံးဘၣ်နၤလီၤ.

⁴ ဒီးစီၤယၤရၤဘၣ်အမါမၤဝဲဒ်န့ၣ်, ဒီးဂဲၤဆၢထၢၣ်, ဒီး လဲၤဝဲဆူၡံလိၤ, ဒီးဟဲဆူစီၤအဃံယၤအဟံၣ်လီၤ. ဒီးစီၤ အဃံယၤထံၣ်တၢ်တသ့ဘၣ်. အဂ့ၢ်ဒ်အံၤ, အမဲာ်ယုာ် လၢအသးပှၢ်အဃိလီၤ.

⁵ ဒီးယွၤစံးဘၣ်စီၤအဃံယၤ, ကွၢ်ကွၢ်, စီၤယၤရၤဘၣ်အ မါဟဲဃ့တၢ်လၢနၤလၢအဖိအဂီၢ်လီၤ. အဂ့ၢ်ဒ်အံၤ, ဘၣ် တၢ်ဆါလီၤ. ဒီးနဘၣ်စံးဘၣ်အီၤဒ်အံၤ, အဂ့ၢ်ဒ်အံၤ, တၢ်ကမၤအသးတုၤအဟဲနုာ်ဒီး, ကလီၤပျိာ်အသးလၢ ပိာ်မုၣ်အဂၤတဂၤလီၤ.

⁶ ဒီးတုၤစီၤအဃံယၤနၢ်ဟူအခီၣ်အသီၣ်ဖဲအဟဲနုာ်လၢ လၢတြဲၤအပူၤဒီး, တၢ်မၤအသးလၢအစံးဝဲဒၣ်, စီၤယၤ ရၤဘၣ်အမါဧၢ, ဟဲနုာ်တက့ၢ်. နမၤလီၤပျိာ်နသးလၢ ပှၤဂၤမ့ၢ်အဘၣ်မနုၤလဲၣ်. တၢ်မၢလီၤယၤဆူနအိၣ်ဒီး တၢ်အဃၢလီၤ. ⁷ လဲၤစံးဘၣ်စီၤယၤရၤဘၣ်, ယွၤအံၣ်စ ရ့လးအကစၢ်စံးဝဲဒ်အံၤ, မ့ၢ်ယပာ်ထီၣ်ထီနၤလၢပှၤဂီၢ် မုၢ်အကျါ, ဒီးပာ်နၤလၢယပှၤဂီၢ်မုၢ်အံၣ်စရ့လးအဖီ ခိၣ်, ⁸ ဒီးထုးန့ၢ်ဘီမုၢ်လၢစီၤဒၤဝံးအပှၤဟံၣ်ဖိ, ဒီးဟ့ၣ် လီၤလၢနၤ, ဒီးနတဒ်ဘၣ်ယခ့ယပှၤစီၤဒၤဝံးလၢအတိၢ် န့ၢ်ယတၢ်သိၣ်တၢ်သီ, ဒီးလူၤယၤလၢအသးဒီဖျၢၣ်ညါ အသိး, ဒ်သိးအကမၤထဲတၢ်အလိၤလၢယမဲာ်ဘၣ်,―

⁹ ဒီးနမၤတၢ်အၢနးန့ၢ် ကယဲၢ်ပှၤလၢအအိၣ်ဝဲလၢနမဲာ် ညါ, ဒီးနလဲၤတၢ်, ဒီးတ့ကစၢ်အဂၤတဖၣ်, ဒီးတၢ်ဂီၤ သိအသး, ဒီးမၤသးထီၣ်ယၤ, ဒီးကွံာ်တ့ၢ်ကွံာ်ယၤလၢ နချၢဃံန့ၣ်လီၤ. ¹⁰ မၤသးဒ်န့ၣ်ဒီး, ကွၢ်ကွၢ်, ယကဒုးဟဲ ဘၣ်တၢ်အၢလၢစီၤယၤရၤဘၣ်အပှၤဟံၣ်ဖိ, ဒီးလၢစီၤ ယၤရၤဘၣ်န့ၣ် ယကဒီၣ်တဲာ်ကွံာ်ကယဲၢ်ပိာ်ခွါ, ပှၤလၢ အဘၣ်ကးတံာ်ဃာ်အခံ, ဒီးအိၣ်လီၤတဲာ်သဘျ့လၢ အံၣ်စရ့လးအပူၤ, ဒီးယကဟံးထီၣ်ကွံာ်စီၤယၤရၤဘၣ် အတၢ်အိၣ်လီၤတဲာ်, ဒ်ပှၤဟံးထီၣ်ကွံာ်တၢ်အ့ၣ်တၢ်ဆံၣ် တုၤအလၢာ်အသိးန့ၣ်လီၤ. ¹¹ ဒီးပှၤဘၣ်ဃးဒီးစီၤယၤရၤ ဘၣ်လၢအသံဝဲလၢဝ့ၢ်ပူၤန့ၣ်ထွံၣ်ကအီၣ်ကွံာ်အီၤ, ဒီး ပှၤလၢအသံဝဲလၢပှၢ်လၢ်ကျါန့ၣ်, ထိၣ်ဧိၤလံၣ်ဧိၤလၢ တၢ်ဖးဖီကအီၣ်ကွံာ်အီၤလီၤ. အဂ့ၢ်ဒ်အံၤ, ယွၤကတိၤ တ့ၢ်ဝဲလီၤ.

¹² ဒီးဂဲၤဆၢထၢၣ်နဲ, ဒီးက့ၤဆူနဟံၣ်ဒၣ်နဲတက့ၢ်. တုၤန ခီၣ်နုာ်ဘၣ်လၢဝ့ၢ်ပူၤဒီး, ဖိသၣ်ကသံဝဲလီၤ. ¹³ ဒီးအံၣ် စရ့လးကဒဲလီၤအသးနါပှၢ်, ဒီးခူၣ်လီၤကွံာ်အီၤလီၤ. အ ဂ့ၢ်ဒ်အံၤ, လၢပှၤဘၣ်ဃးဒီးစီၤယၤရၤဘၣ်အကျါန့ၣ်ထဲ အဝဲဒၣ်ကဟဲဆူသွၣ်ခိၣ်ပူၤဧိၤလီၤ. အဂ့ၢ်ဒ်အံၤ, တၢ်ထံၣ် န့ၢ်တၢ်ဂ့ၤ လၢယွၤအဂီၢ်လၢ အဝဲဒၣ်အပူၤ လၢယၤရၤ ဘၣ်အပှၤဟံၣ်ဖိအကျါလီၤ.

¹⁴ ဒီးယွၤကဒုးဂဲၤဆၢထၢၣ်စီၤပၤလၢ အံၣ်စရ့လးအဖီ ခိၣ်လၢအဂီၢ်လၢ အကဒီၣ်တဲာ်ကွံာ် ယၤရၤဘၣ်အပှၤ ဟံၣ်ဖိလၢမုၢ်တနံၤန့ၣ်, ဒီးမနုၤလဲၣ်, ခဲကနံၣ်အံၤဒၣ် လဲာ်လီၤ. ¹⁵ ဒီးယွၤကကျီကွံာ်အံၣ်စရ့လးဒ်တပိၢ်ဟူးဝး ဝဲလၢထံကျါအသိးန့ၣ်, ဒီကထဲးကွံာ်အံၣ်စရ့လးလၢကီၢ်ဂ့ၤတဘ့ၣ်အံၤအပူၤလၢအဟ့ၣ်လီၤအပၢ်တဖၣ်, ဒီးကမၤလီၤပြံလီၤပြါအီၤလၢထံမိၢ်ပှၢ်အဝၢ်ဘးခီလီၤ. အဂ့ၢ်ဒ်အံၤ, တ့န့ၢ်အရှ့ရၤလၢအဂီၢ်, ဒီးမၤသးထီၣ်ယွၤလီၤ.― ¹⁶ ဒီးကဟ့ၣ်လီၤကွံာ်အံၣ်စရ့လးလၢ စီၤယၤရၤ ဘၣ်အတၢ်ဒဲးဘးအဃိ, လၢအမၤတၢ်ဒဲးဘး, ဒီးဒုးမၤ အံၣ်စရ့လးလၢတၢ်ဒဲးဘးလီၤ.

¹⁷ ဒီးစီၤယၤရၤဘၣ်အမါဂဲၤဆၢထၢၣ်, ဒီးဟးထီၣ်ကွံာ်, ဒီးဟဲဆူတံးရစၢ်လီၤ. ဖဲအတုၤလၢကျဲစၢၤအကျိၤထံးဒီး ဖိသၣ်သံဝဲလီၤ. ¹⁸ ဒီးခူၣ်လီၤကွံာ်အီၤ, ဒီးအံၣ်စရ့လးခဲ လၢာ်ဒဲလီၤအသးနါပှၢ်, ဒီးဟီၣ်ဝဲလၢအဃိ, ဒ်ယွၤအက လုၢ်လၢအကတိၤတၢ်လၢအခ့အပှၤ ဝံအဃံယၤအစုပူၤ အသိးန့ၣ်လီၤ.

¹⁹ ဒီးတၢ်အိၣ်လီၤတဲာ်ဘၣ်ဃးဒီး စီၤယၤရၤဘၣ်လၢအ ဒုးသုးအဂ့ၢ်အကျိၤ, လၢအမၤစီၤပၤအတၢ်အဂ့ၢ်အကျိၤ န့ၣ်, ကွၢ်ကွၢ်, ကွဲးအသးလၢအံၣ်စရ့လးအစီၤပၤအလံာ် ကွဲးနီၣ်တၢ်အပူၤန့ၣ်လီၤ.

²⁰ ဒီးမုၢ်နံၤတဖၣ်လၢစီၤယၤရၤဘၣ်ကဲစီၤပၤန့ၣ် မ့ၢ်ခံဆံ ခံနံၣ်, ဒီးမံဝဲဒီးအပၢ်တဖၣ်, ဒီးအဖိခွါစီၤနၤဒးကဲထီၣ်စီၤ ပၤလၢအလီၢ်လီၤ.

²¹ ဒီးစီၤၡလိၤမိၤအဖိခွါစီၤရဃၤ ဘၣ်ကဲစီၤပၤလၢယူဒၤ အပူၤလီၤ. လၢစီၤရဃၤဘၣ်ကဲသီစီၤပၤန့ၣ်အသးပှၢ်လွံၢ် ဆံတနံၣ်, ဒီးကဲစီၤပၤတဆံနွံနံၣ်လၢယရူၤၡလ့ၣ်အပူၤ, ဝ့ၢ်လၢယွၤဃုထၢ လၢအံၣ်စရ့လးအဒူၣ်ခဲလၢာ်အကျါ ဒ် သိးအကပာ်အမံၤဖဲန့ၣ်လီၤ. ဒီးအမိၢ်အမံၤန့ၣ်မ့ၢ်နီၢ် နၤဧမၤ, ပှၤဧၣ်မိၣ်မုၣ်လီၤ.

²² ဒီးပှၤယူဒၤဖိမၤတၢ်အၢလၢယွၤအမဲာ်ညါ, ဒီးထိၣ်ဂဲၤ ယွၤအသးက့ၣ်လၢအတၢ်ဒဲးဘးလၢအမၤဝဲလၢ အပၢ် တဖၣ်မၤတ့ၢ်ခဲလၢာ်အဖီခိၣ်န့ၣ်လီၤ. ²³ အဝဲသ့ၣ်တဖၣ် န့ၣ်မၤစ့ၢ်ကီးဝဲလၢအလီၢ်ထီၣ်ထီတဖၣ်, ဒီးတၢ်ဂီၤ, ဒီး အရှ့ရၤလၢတၢ်စိခိၣ်ထီခဲလၢာ်အလိၤ, ဒီးလၢသ့ၣ်သံ ကစဲာ်ခဲလၢာ်အဖီလာ်လီၤ.

²⁴ ဒီးပှၤအဲၣ်ပကၢၤဖိအိၣ်စ့ၢ်ကီၤဝဲလၢ ထံဧိၤကီၢ်ဧိၤအ ပူၤ, ဒီးမၤဝဲဒ်ကယဲၢ်တၢ်သးဘၣ်အၢတဖၣ် ဘၣ်ဃးဒီး ပှၤကလုာ်တဖၣ်လၢယွၤဟီထီၣ်ကွံာ်အီၤ လၢပှၤအံၣ်စ ရ့လးဖိအမဲာ်ညါအသိးန့ၣ်လီၤ.

²⁵ ဒီးတၢ်မၤအသးလၢ စီၤပၤရဃၤဘၣ်အနံၣ်ပှဲၤထီၣ် ယဲၢ်နံၣ်တနံၣ်န့ၣ် အဲၤကူပတူးအစီၤပၤၡံၡးဟဲထီဒါယ ရူၤၡလ့ၣ်လီၤ. ²⁶ ဒီးဟံးထီၣ်ကွံာ်ယွၤအဟံၣ်အတၢ်လုၢ် ဒိၣ်ပှ့ၤဒိၣ်, ဒီးစီၤပၤအဟံၣ်အတၢ်လုၢ်ဒိၣ်ပှ့ၤဒိၣ်, ဒီးစိာ် ထီၣ်ကွံာ်ဝဲခဲလၢာ်, ဒီးစိာ်ထီၣ်ကွံာ် ကယဲၢ်ကတီၤထူ လၢစီၤၡလိၤမိၤမၤဝဲခဲလၢာ်လီၤ.

²⁷ ဒီးစီၤပၤရဃၤဘၣ်တ့ကတီၤတိၢ်လၢအလီၢ်, ဒီးဟ့ၣ် လီၤအီၤလၢပှၤပၢၤတၢ်ဖိအခိၣ်အစုပူၤ, လၢအပၢၤစီၤပၤ အဟံၣ်အတြဲၤလီၤ.

²⁸ ဒီးတုၤစီၤပၤလဲၤနုာ်လၢယွၤအဟံၣ်ပူၤဒီး, တၢ်မၤအ သးလၢပှၤပၢၤတၢ်ဖိစိာ်ဝဲဒီးအီၤ, ဒီးဟဲက့ၤစိာ်အီၤဆူပှၤ ပၢၤတၢ်ဖိအဒၢးပူၤလီၤ.

²⁹ ဒီးတၢ်အိၣ်လီၤတဲာ်ဘၣ်ဃးဒီးစီၤရယၤဘၣ်, ဒီးက ယဲၢ်တၢ်လၢအမၤဝဲန့ၣ်ကွဲးအသးလၢ ယူဒၤအစီၤပၤအ လံာ်ကွဲးနီၣ်တၢ်အပူၤ, တမ့ၢ်ဘၣ်ဧါ.

³⁰ ဒီးတၢ်ဒုးသုးအိၣ်ဝဲလၢစီၤရဃၤဘၣ်, ဒီးစီၤယၤရၤ ဘၣ်အဘၢၣ်စၢၤတစိၤဒၣ်အီၤလီၤ.

³¹ ဒီးစီၤရဃၤဘၣ်မံဝဲဒီးအပၢ်တဖၣ်ဒီး ပှၤခူၣ်လီၤကွံာ် အီၤဒီးအပၢ်တဖၣ်လၢစီၤဒၤဝံးအဝ့ၢ်ပူၤလီၤ. အမိၢ်အမံၤ မ့ၢ်နီၢ်နၤဧမၤပှၤဧၣ်မိၣ်ဖိ, ဒီးအဖိခွါစီၤအဘံယၣ်ကဲထီၣ် စီၤပၤလၢအလီၢ်န့ၣ်လီၤ.

၁၅

¹ ဒီးစီၤနဘးအဖိခွါ စီၤပၤယၤရၤဘၣ်အနံၣ်ပှဲၤထီၣ်တ ဆံဃိးနံၣ်တနံၤန့ၣ်စီၤအဘံယၣ်ကဲထီၣ်စီၤပၤ လၢယူ ဒၤအဖီခိၣ်န့ၣ်လီၤ. ² ဒီးကဲစီၤပၤသၢနံၣ်လၢယရူၤၡလ့ၣ် အပူၤ, ဒီးအမိၢ်အမံၤမ့ၢ်နီၢ်မၤကၤ, စီၤအးဘၡါလိၣ်အဖိ မုၣ်န့ၣ်လီၤ.

³ ဒီးလဲၤဝဲလၢအပၢ်အတၢ်ဒဲးဘးလၢ အမၤဝဲလၢအမဲာ် ညါခဲလၢာ်အပူၤ, ဒီးအသးတလၢတပှဲၤဘၣ်ဒီးယွၤဒ်အ ပၢ်စီၤဒၤဝံးအသးအသိးန့ၣ်ဘၣ်. ⁴ ဘၣ်ဆၣ်ဒီးလၢစီၤ ဒၤဝံးအဃိန့ၣ်ယွၤ, အကစၢ်ဟ့ၣ်လီၤအီၤလၢမ့ၣ်အူဒၢ တဖျၢၣ်လၢယရူၤၡလ့ၣ်အပူၤ ဒ်သိးအကပာ်လီၤအဖိခွါ လၢအလီၢ်ခံန့ၣ် ဒီးမၤဂၢၤမၤကျၢၤယရူၤၡလ့ၣ်န့ၣ်လီၤ.

⁵ အဂ့ၢ်ဒ်အံၤ, စီၤဒၤဝံးမၤတၢ်အလိၤလၢယွၤအမဲာ်, ဒီး တဃၣ်ကွံာ်အသးလၢတၢ်လၢအမၤလိာ်အီၤ နီတမံၤ တစိၤဒၣ်အီၤလီၤ. ဃၣ်ကွံာ်အသးထဲလၢတၢ်ဘၣ်ဃး ဒီးပှၤဃ့ၤသးဖိစီၤအူၤရံယၤတမံၤဧိၤလီၤ.

⁶ ဒီးတၢ်ဒုးသုးအိၣ်ဝဲလၢစီၤရဃၤဘၣ် ဒီးစီၤယၤရၤဘၣ် အဘၢၣ်စၢၤတစိၤဒၣ်အီၤလီၤ.

⁷ ဒီးတၢ်အိၣ်လီၤတဲာ်ဘၣ်ဃးဒီး စီၤအဘံယၣ်, ဒီးက ယဲၢ်တၢ်လၢအမၤဝဲန့ၣ်ကွဲးအသးလၢ ယူဒၤအစီၤပၤအ လံာ်ကွဲးနီၣ်တၢ်အပူၤ, တမ့ၢ်ဘၣ်ဧါ. ဒီးတၢ်ဒုးသုးအိၣ် ဝဲလၢစီၤအဘံယၣ်ဒီးစီၤယၤရၤဘၣ်အဘၢၣ်စၢၤန့ၣ်လီၤ.

⁸ ဒီးစီၤအဘံယၣ်မံဝဲဒီးအပၢ်တဖၣ်, ဒီးပှၤခူၣ်လီၤကွံာ် အီၤလၢစီၤဒၤဝံးအဝ့ၢ်ပူၤ, ဒီးအဖိခွါစီၤအၤစါကဲထီၣ်စီၤ ပၤလၢအလီၢ်လီၤ.

⁹ ဒီးအံၣ်စရ့လးအစီၤပၤစီၤယၤရၤဘၣ်အနံၣ် ပှဲၤထီၣ်ခံ ဆံ, စီၤအၤစါကဲထီၣ်စီၤပၤလၢယူဒၤအဖီခိၣ်န့ၣ်လီၤ.

¹⁰ ဒီးကဲစီၤပၤလၢယရူၤၡလ့ၣ်အပူၤလွံၢ်ဆံတနံၣ်, ဒီးအ မိၢ်အမံၤမ့ၢ်နီၢ်မၤကၤ, စီၤအးဘၡါလိၣ်အဖိမုၣ်လီၤ.

¹¹ ဒီးစီၤအၤစါမၤတၢ်လၢအလိၤလၢယွၤအမဲာ်, ဒ်အပၢ် စီၤဒၤဝံးအသိးန့ၣ်လီၤ. ¹² ဒီးမၤဟးဂီၤကွံာ်ပှၤအဲၣ်ပကၢၤ ဖိလၢကီၢ်ပူၤန့ၣ်, ဒီးသုးကွံာ်တၢ်ဂီၤ လၢအပၢ်တ့ဝဲခဲ လၢာ်လီၤ. ¹³ ဒီးသုးကွံာ်အမိၢ်နီၢ်မၤကၤဒၣ်လဲာ်လၢနီၢ် ပၤမုၣ်အလီၢ်လၢအတ့အရှ့ရၤအဂီၤအဃိန့ၣ်လီၤ. ဒီးစီၤ အၤစါမၤဟးဂီၤကွံာ်အတၢ်ဂီၤ, ဒီးဆူးထီၣ်ကွံာ်အီၤလၢ ထံကျိကံဒြိၣ်အနံၤလီၤ.

¹⁴ ဒီးတၢ်အလီၢ်ထီၣ်ထီတဖၣ်န့ၣ် တဘၣ်တၢ်သုးကွံာ် ဘၣ်. ဘၣ်ဆၣ်ဒီးစီၤအၤစါ အသးအိၣ်ဝဲဒီဖျၢၣ်ညါဒီး ယွၤတစိၤဒၣ်အီၤလီၤ. ¹⁵ ဒီးဟဲစိာ်တၢ်လၢအပၢ်မၤဘူၣ် ဝဲ, ဒီးတၢ်လၢအမၤဘူၣ်အကစၢ်ဒၣ်ဝဲတဖၣ် ဆူယွၤအ ဟံၣ်ပူၤ, ကျိၣ်ဧိၤစ့ဧိၤ, ဒီးထူဧိၤလွဲဧိၤ, ဒီးတၢ်အဃၢၤအ ဃိၢ်လီၤ.

¹⁶ ဒီးတၢ်ဒုးသုးအိၣ်ဝဲလၢ စီၤအၤစါဒီးအံၣ်စရ့လးအစီၤ ပၤဘါၡၤတစိၤဒၣ်အီၤလီၤ. ¹⁷ ဒီးအံၣ်စရ့လးအစီၤပၤဘါ ၡၤန့ၣ်လဲၤထီဒါယူဒၤ, ဒီးတ့ရၤမါဒ်သိးအကတြီပှၤလဲၤ ထီၣ်ဒီးဟဲနုာ်လၢယူဒၤအစီၤပၤအၤစါအအိၣ်လီၤ.

¹⁸ ဒီးစီၤအါစၤဟံးန့ၢ်ကျိၣ်ဧိၤစ့ဧိၤ, ဒီးထူဧိၤလွဲဧိၤ, လၢအ အိၣ်လီၤတဲာ်လၢယွၤအဟံၣ်ပူၤ အပာ်ဖှိၣ်အလီၢ်, ဒီးလၢ စီၤပၤအဟံၣ်ပူးအပာ်ဖှိၣ်အလီၢ်, ဒီးဟ့ၣ်လီၤအီၤလၢအ ခ့အပှၤအစုပူၤ, ဒီးစီၤပၤအၤစါဟ့ၣ်ယုၢ်အီၤဆူစူၤရံအစီၤ ပၤဘ့ၣ်ဟဒး, စီၤတၤဘြံမိၣ်အဖိခွါ, စီၤဃ့စိၣ်အဖိခွါလၢ အအိၣ်ဝဲဆိးဝဲလၢဒၤမ့ၤစ့းအပူၤ, ဒီးစံးဝဲဒၣ်, ¹⁹ တၢ်အၢၣ် လီၤအီလီၤအိၣ်ဝဲဒီးယၤဒီးနၤ, ဒီးယပၢ်ဒီးနပၢ်လီၤ. ကွၢ်, ကွၢ်, ယဟ့ၣ်ယုၢ်နၤလၢခိၣ်ဖး, ကျိၣ်ဧိၤစ့ဧိၤ, ဒီးထူဧိၤ လွဲဧိၤလီၤ. ဟဲဒီးမၤဟးဂီၤနတၢ်အၢၣ်လီၤအီလီၤဒီးအံၣ် စရ့လးအစီၤပၤဘါၡၤ ဒ်သိးအကဟးထီၣ်ကွံာ်လၢယ အိၣ်တက့ၢ်.

²⁰ ဒီးစီၤဘ့ၣ်ဟဒးဒိကနၣ်စီၤပၤအၤစါအကလုၢ်, ဒီးမၢ လီၤပှၤသုးမုၢ်အခိၣ်တဖၣ်လၢ အအိၣ်ဒီးအီၤထီဒါအံၣ်စ ရ့လးအဝ့ၢ်တဖၣ်, ဒီးကျီကွံာ်ဧံၤယိၣ်, ဒီးဒၣ်, ဒီးအၤဘ့ၤ လးဘ့ၤသမၤကၤ, ဒီးကံးန့ၤရ့သးဒီဘ့ၣ်ညါ, ဒီးကီၢ်နး သးလံဒီဘ့ၣ်ညါလီၤ.

²¹ ဒီးတုၤစီၤဘါၡၤနၢ်ဟူဝဲဒီး, တၢ်မၤအသးလၢအတ့ရၤ မါန့ၣ်အိၣ်ကတီၢ်ဝဲ, ဒီးအိၣ်ဝဲလၢတံးရစၢ်အပူၤလီၤ.

²² ဒီးစီၤပၤအၤစါဒုးကိးထီၣ်တၢ် လၢယူဒၤဒီဘ့ၣ်ညါ (တဒုးပူၤဒုးဖျဲဘၣ်နီတဂၤဘၣ်), ဒီးပှၤစိာ်ထီၣ်ကွံာ်ရၤ မါအလၢၢ်တဖၣ်, ဒီးအသ့ၣ်တဖၣ်လၢစီၤဘါၡၤမၤဝဲ လၢအီၤလီၤ. ဒီးစီၤပၤအၤစါတ့က့ဘၤဘံၣ်ယၤမံၣ်, ဒီးမံး စပၤလၢအီၤလီၤ.

²³ ဒီးတၢ်အိၣ်လီၤတဲာ်ဘၣ်ဃးဒီးစီၤအၤစါ, ဒီးအစိအ ကမီၤခဲလၢာ်, ဒီးကယဲၢ်တၢ်လၢအမၤဝဲဒီးခူဧိၤဝ့ၢ်ဧိၤလၢ အတ့ဝဲန့ၣ်ကွဲးအသးလၢယူဒၤစီၤပၤအလံာ်ကွဲးနီၣ်တၢ် အပူၤ, တမ့ၢ်ဘၣ်ဧါ. ဘၣ်ဆၣ်ဒီးလၢအသးပှၢ်အကတီၢ် န့ၣ်အခီၣ်ဆါလီၤ.

²⁴ ဒီးစီၤအၤစါမံဝဲဒီးအပၢ်တဖၣ်, ဒီးပှၤခူၣ်လီၤကွံာ်အီၤ ဒီးအပၢ်တဖၣ်လၢအပၢ်စီၤဒၤဝံးအဝ့ၢ်ပူၤ, ဒီးအဖိခွါစီၤ ယဟိၡၤဖးကဲထီၣ်စီၤပၤလၢအလီၢ်န့ၣ်လီၤ.

²⁵ ဒီးယူဒၤအစီၤပၤအၤစါ အနံၣ်ပှဲၤထီၣ်ခံနံၣ်တနံၣ်န့ၣ် စီၤယၤရၤဘၣ်အဖိခွါစီၤနၤဒးကဲသီစီၤပၤလၢ အံၣ်စရ့ လးအဖီခိၣ်, ဒီးကဲစီၤပၤလၢအံၣ်စရ့လးအဖီခိၣ်ခံနံၣ် လီၤ. ²⁶ ဒီးမၤတၢ်အၢလၢယွၤအမဲာ်ညါ, ဒီးလဲၤတၢ်လၢ အပၢ်အကျဲပူၤ, ဒီးလၢအတၢ်ဒဲးဘးအပူၤလၢအဒုးမၤ အံၣ်စရ့လးလၢတၢ်ဒဲးဘးလီၤ.

²⁷ ဒီးစီၤယံးစၣ်ကၢ်အပှၤဟံၣ်ဖိ စီၤအဃံယၤအဖိခွါစီၤ ဘါၡၤကူၣ်ထီၣ်တၢ်ထီဒါအီၤ, ဒီးစီၤဘါၡၤကျီကွံာ်အီၤ လၢကံးဘသိၣ်အပူၤလၢ အဘၣ်ဃးဒီးပှၤဖလ့ၡသးဖိ, (အဂ့ၢ်ဒ်အံၤ, စီၤနၤဒး, ဒီးအံၣ်စရ့လးခဲလၢာ်ကဝီၤဃာ် ကံးဘသိၣ်), ²⁸ ဒီးလၢယူဒၤအစီၤပၤအၤစါအနံၣ်ပှဲၤထီၣ် သၢနံၣ်တနံၣ်န့ၣ် စီၤဘါၡၤမၤသံအီၤ, ဒီးကဲထီၣ်စီၤပၤ လၢအလီၢ်န့ၣ်လီၤ.

²⁹ ဒီးတုၤအကဲစီၤပၤဒီး, တၢ်မၤအသးလၢအကျီကွံာ်စီၤ ယၤရၤဘၣ်အပှၤဟံၣ်ဖိခဲလၢာ်, မၤဟးဂီၤကွံာ်အီၤ, တ ပာ်လီၤတဲာ်ဘၣ်ပှၤအသါလၢ စီၤယၤရၤဘၣ်အဂီၢ်နီတ ဂၤဘၣ်, ဒ်ယွၤအကလုၢ်လၢအကတိၤဝဲလၢအခ့အပှၤ, ပှၤၡံလိၤဖိ စီၤအဃံယၤအစုပူၤအသိးန့ၣ်လီၤ. ³⁰ မ့ၢ်စီၤ ယၤရၤဘၣ်အတၢ်ဒဲးဘး, ဒီးလၢအဒုးမၤအံၣ်စရ့လး လၢတၢ်ဒဲးဘးလၢအတၢ်ထိၣ်ဂဲၤလၢ အထိၣ်ဂဲၤ ယွၤအံၣ်စရ့လးအကစၢ် အသးထီၣ်န့ၣ်အဃိလီၤ.

³¹ ဒီးတၢ်အိၣ်လီၤတဲာ်ဘၣ်ဃးဒီး စီၤနၤဒး, ဒီးကယဲၢ် တၢ်လၢအမၤဝဲခဲလၢာ်, ကွဲးအသးလၢအံၣ်စရ့လးအစီၤ ပၤအလံာ်ကွဲးနီၣ်တၢ်အပူၤ, တမ့ၢ်ဘၣ်ဧါ.

³² ဒီးတၢ်ဒုးသုးအိၣ်ဝဲလၢ စီၤအၤစါဒီးအံၣ်စရ့လးအစီၤ ပၤဘါၡၤတစိၤဒၣ်အီၤလီၤ.

³³ ဒီးလၢယူဒၤအစီၤပၤအၤစါ အနံၣ်ပှဲၤထီၣ်သၢနံၣ်တ နံၣ်န့ၣ် စီၤအဃံယၤအဖိခွါ စီၤဘါၡၤကဲသီစီၤပၤလၢ အံၣ်စရ့လးခဲလၢာ်အဖီခိၣ် လၢတံးရစၢ်အပူၤခံဆံလွံၢ် နံၣ်လီၤ. ³⁴ ဒီးမၤတၢ်အၢလၢယွၤအမဲာ်ညါ, ဒီးလဲၤတၢ် လၢစီၤယၤရၤဘၣ်အကျဲ, ဒီးလၢအတၢ်ဒဲးဘးအပူၤလၢ အဒုးမၤအံၣ်စရ့လးလၢတၢ်ဒဲးဘးလီၤ.

၁၆

¹ ဒီးယွၤအကလုၢ်လီၤဘၣ်လၢ စီၤဃနၤနံအဖိခွါစီၤယ့ၤ ဟူထီဒါစီၤဘါၡၤ, ဒီးစံးဝဲဒၣ်. ² မ့ၢ်ယပာ်ထီၣ်ထီနၤလၢ ဟီၣ်ခိၣ်အကမူၣ်အပူၤ, ဒီးပာ်နၤလၢတၢ်အခိၣ်လၢယ ပှၤဂီၢ်မုၢ်အံၣ်စရ့လးအဖီခိၣ်, ဒီးနလဲၤတၢ်လၢစီၤယၤရၤ ဘၣ်အကျဲပူၤ, ဒီးဒုးမၤယပှၤဂီၢ်မုၢ်အံၣ်စရ့လးလၢတၢ် ဒဲးဘးဒ်သိးနကထိၣ်ဂဲၤယသးထီၣ် လၢအတၢ်ဒဲးဘးအ ဃိဒီး, ³ ကွၢ်ကွၢ်, ယကစိာ်ထီၣ်ကွံာ်စီၤဘါၡၤအဖိအ လံၤ, ဒီးအပှၤဟံၣ်ဖိအဖိအလံၤ, ဒီးယကပာ်နဟံၣ်ဒ် စီၤနဘးအဖိခွါစီၤယၤရၤဘၣ်အဟံၣ်အသိးန့ၣ်လီၤ. ⁴ ဒီး ပှၤဘၣ်ဃးဒီးစီၤဘါၡၤလၢအသံဝဲလၢဝ့ၢ်ပူၤန့ၣ် ထွံၣ်က အီၣ်ကွံာ်အီၤ, ဒီးပှၤဘၣ်ဃးဒီးအီၤလၢအသံဝဲလၢပှၢ်လၢ် ကျါန့ၣ်ထိၣ်ဧိၤလံၣ်ဧိၤလၢတၢ်ဖးဖီကအီၣ်ကွံာ်အီၤလီၤ.

⁵ ဒီးတၢ်အိၣ်လီၤတဲာ်ဘၣ်ဃးဒီးစီၤဘါၡၤ, ဒီးတၢ်လၢ အမၤဝဲ, ဒီးအစိကမီၤန့ၣ်ကွဲးအသးလၢအံၣ်စရ့လးအ စီၤပၤအလံာ်ကွဲးနီၣ်တၢ်အပူၤ, တမ့ၢ်ဘၣ်ဧါ.

⁶ ဒီးစီၤဘါၡၤမံဝဲဒီးအပၢ်တဖၣ်, ဒီးပှၤခူၣ်လီၤကွံာ်အီၤ လၢတံးရစၢ်အပူၤ, ဒီးအဖိခွါစီၤအ့လၤကဲထီၣ်စီၤပၤလၢ အပၢ်အလီၢ်န့ၣ်လီၤ.

⁷ မၤကဒီးလၢစီၤဃနၤနံအဖိခွါ ဝံယ့ၤဟူအစုပူၤန့ၣ်ယွၤ အကလုၢ်အိၣ်ထီၣ်ထီဒါစီၤဘါၡၤ, ဒီးထီဒါအပှၤဟံၣ် ဖိလၢကယဲၢ်တၢ်အၢလၢ အမၤဝဲလၢယွၤအမဲာ်ညါလၢ အထိၣ်ဂဲၤအသးထီၣ်လၢအတၢ်မၤလၢအစု, လၢအလီၤ ဂာ်စီၤယၤရၤဘၣ်အပှၤဟံၣ်ဖိအသိးန့ၣ်အဃိ, ဒီးလၢ အမၤသံအီၤအဃိလီၤ.

⁸ ဒီးလၢယူဒၤအစီၤပၤအၤစါအနံၣ်ပှဲၤထီၣ် ခံဆံဃုနံၣ် တနံၣ်န့ၣ် စီၤဘါၡၤအဖိခွါစီၤအ့လၤ ကဲသီစီၤပၤလၢ အံၣ်စရ့လးအဖီခိၣ်လၢတံးရစၢ်အပူၤခံနံၣ်လီၤ.

⁹ ဒီးအခ့အပှၤ, အလ့ၣ်ကဟၣ်ခံပူတပူအခိၣ်, စီၤစံၣ်ရံၤ ကူၣ်ထီၣ်တၢ်ထီဒါအီၤဖဲအအီမူၤအသးလၢ အပှၤကွၢ် အဟံၣ်လၢတံးရစၢ်စီၤအၢ်စၤအဟံၣ်ပူၤလၢ တံးရစၢ်အ ဖၢမုၢ်န့ၣ်လီၤ.

¹⁰ ဒီးယူဒၤအစီၤပၤအၤစါ အနံၣ်ပှဲၤထီၣ်ခံဆံနွံနံၣ်တနံၣ် န့ၣ်စီၤစံၣ်ရံၤလဲၤနုာ်, ဒီးကျီကွံာ်အီၤ, ဒီးမၤသံအီၤ, ဒီး ကဲထီၣ်စီၤပၤလၢအလီၢ်လီၤ.

¹¹ ဒီးတုၤအကဲစီၤပၤ, တုၤအဆ့ၣ်နီၤလၢအလီၢ်ပစိာ်န့ၣ် ဒီး, တၢ်မၤအသးလၢအမၤသံ စီၤဘါၡၤအပှၤဟံၣ်ဖိခဲ လၢာ်လီၤ. အဘူးအတံၢ်မ့ၢ်ဂ့ၤ, အတံၤသကိးမ့ၢ်ဂ့ၤ, တ ပာ်လီၤတဲာ်ဘၣ်ပှၤဘၣ်ဃးဒီးအီၤလၢအမ့ၢ် ပှၤပိာ်ခွါနီ တဂၤဘၣ်.

¹² ဒီးစီၤစံၣ်ရံၤမၤဟးဂီၤကွံာ် စီၤဘါၡၤအပှၤဟံၣ်ဖိခဲ လၢာ်, ဒ်ယွၤအကလုၢ်ကထါလၢအကတိၤထီဒါစီၤဘါ ၡၤလၢဝံယ့ၤဟူအစုပူၤအသိးန့ၣ်လီၤ. ¹³ မ့ၢ်စီၤဘါၡၤအဖိ ခွါစီၤအ့လၤအတၢ်ဒဲးဘးခဲလၢာ် လၢအမၤတၢ်ဒဲးဘး, ဒီးဒုးမၤအံၣ်စရ့လးလၢတၢ်ဒဲးဘးလၢ အထိၣ်ဂဲၤယွၤ အံၣ်စရ့လးအကစၢ်အသးထီၣ် လၢအတၢ်ကလီကလီ န့ၣ်အဂ့ၢ်လီၤ.

¹⁴ ဒီးတၢ်အိၣ်လီၤတဲာ်ဘၣ်ဃးဒီးစီၤအ့လၤ, ဒီးကယဲၢ် တၢ်လၢအမၤဝဲခဲလၢာ်န့ၣ် ကွဲးအသးလၢအံၣ်စရ့လးအ စီၤပၤအလံာ်ကွဲးနီၣ်တၢ်အပူၤ, တမ့ၢ်ဘၣ်ဧါ.

¹⁵ လၢယူဒၤအစီၤပၤအၤစါအနံၣ်ပှဲၤထီၣ် ခံဆံနွံနံၣ်န့ၣ် စီၤစံၣ်ရံၤကဲစီၤပၤလၢတံးရစၢ်အပူၤနွံသီလီၤ. ဒီးပှၤဂီၢ် မုၢ်သူၣ်ဒဲထီဒါကံးဘသိၣ်လၢ အဘၣ်ဃးဒီးပှၤဖလ့ၡ ဖိန့ၣ်လီၤ.

¹⁶ ဒီးပှၤဂီၢ်မုၢ်လၢအသူၣ်ဒဲန့ၣ် နၢ်ဟူပှၤစံးလၢစီၤစံၣ်ရံၤ ကူၣ်ထီၣ်တၢ်အၢ, ဒီးမၤသံစ့ၢ်ကီးစီၤပၤန့ၣ်လီၤ. ဒီးအံၣ် စရ့လးခဲလၢာ်ပာ်ပှၤသုးမုၢ်အခိၣ်စီၤဧိၣ်ရံၤလၢ စီၤပၤ လၢအံၣ်စရ့လးအဖီခိၣ်လၢပှၤသူၣ်ဒဲအလီၢ် ပူၤလၢမုၢ် တနံၤဃီန့ၣ်လီၤ.

¹⁷ ဒီးစီၤဧိၣ်ရံၤလဲၤထီၣ်လၢကံးဘသိၣ်, ဒီးအံၣ်စရ့လးခဲ လၢာ်အိၣ်ဒီးအီၤ, ဒီးကဝီၤဃာ်တံးရစၢ်လီၤ. ¹⁸ ဒီးတုၤစီၤ စံၣ်ရံၤထံၣ်ဘၣ်ဝဲလၢ ပှၤမၤန့ၢ်ဝ့ၢ်ဒီး, တၢ်မၤအသးလၢ အလဲၤနုာ်ဝဲလၢစီၤပၤအဟံၣ်အနူၢ်ပူၤဒီး ဆူးထီၣ်ကွံာ် စီၤပၤအဟံၣ်လၢအဖီခိၣ်လၢမ့ၣ်အူ, ဒီးသံဝဲလီၤ. ¹⁹ မ့ၢ်အ တၢ်ဒဲးဘးလၢအမၤဝဲလၢအမၤတၢ်အၢလၢ ယွၤအမဲာ် လၢအလဲၤတၢ်လၢ စီၤယၤရၤဘၣ်အကျဲပူၤ, ဒီးလၢအ တၢ်ဒဲးဘးအပူၤလၢအမၤဝဲလၢ အဒုးမၤအံၣ်စရ့လးလၢ တၢ်ဒဲးဘးအဃိလီၤ.

²⁰ ဒီးတၢ်အိၣ်လီၤတဲာ်ဘၣ်ဃးဒီး စီၤစံၣ်ရံၤ, ဒီးအတၢ် ကူၣ်ထီၣ်တၢ်အၢလၢအကူၣ်ထီၣ်ဝဲန့ၣ် ကွဲးအသးလၢ အံၣ်စရ့လးအစီၤပၤအလံာ်ကွဲးနီၣ်တၢ်အပူၤ, တမ့ၢ်ဘၣ် ဧါ.

²¹ တုၤနုၤတစုပှၤအံၣ်စရ့လး အပှၤဂီၢ်မုၢ်လီၤမုၢ်လီၤဖး လၢခံဖုလီၤ. ပှၤဂီၢ်မုၢ်တဝာ်လူၤစီၤကံနးအဖိခွါစီၤတံး ဘနံၤ ဒ်သိးအကပာ်အီၤလၢစီၤပၤ, ဒီးတဝာ်လူၤစီၤဧိၣ် ရံၤလီၤ.

²² ဒီးပှၤဂီၢ်မုၢ်လၢအလူၤစီၤဧိၣ်ရံၤန့ၣ် ဆူၣ်န့ၢ်ပှၤဂီၢ်မုၢ် လၢအလူၤစီၤကံနးအဖိခွါစီၤတံးဘနံၤတက့ၢ်လီၤ. ဒီးစီၤ တံးဘနံၤသံဝဲ, ဒီးစီၤဧိၣ်ရံၤကဲထီၣ်စီၤပၤလီၤ.

²³ လၢယူဒၤအစီၤပၤအၤစါ အနံၣ်ပှဲၤထီၣ်သၢဆံတနံၣ် အနံၣ်န့ၣ်စီၤဧိၣ်ရံၤကဲသီစီၤပၤလၢ အံၣ်စရ့လးအဖီခိၣ် တဆံခံနံၣ်လီၤ. ကဲစီၤပၤလၢတံးရစၢ်အပူၤဃုနံၣ်လီၤ.

²⁴ ဒီးပှ့ၤန့ၢ်ကစၢၢ်ၡၤမရံလၢစီၤရှ့မ့ၢ်လၢစ့ခံကံကၢ်, ဒီးတ့ ဝ့ၢ်လၢကစၢၢ်လိၤ, ဒီးယုၢ်ဝ့ၢ်လၢအတ့ဝဲအမံၤလၢၡၤမ ရံ, ဒ်သိးဒီးကစၢၢ်အကစၢ်စီၤရှ့မ့ၢ်အမံၤလီၤ. ²⁵ ဒီးစီၤဧိၣ်ရံၤမၤတၢ်အၢလၢယွၤအမဲာ်, ဒီးမၤတၢ်အၢန့ၢ်ကယဲၢ်ပှၤလၢအအိၣ်တ့ၢ်ဝဲလၢ အမဲာ်ညါတက့ၢ်လီၤ.―

²⁶ ဒီးလဲၤဝဲလၢစီၤနဘးအဖိခွါ စီၤယၤရၤဘၣ်အကျဲဒီဘိ ညါ, ဒီးလၢအတၢ်ဒဲးဘးအပူၤလၢ အဒုးမၤအံၣ်စရ့လး လၢတၢ်ဒဲးဘး လၢအထိၣ်ဂဲၤယွၤအံၣ်စရ့လး အကစၢ် အသးထီၣ်လၢအတၢ်ကလီကလီလီၤ.

²⁷ ဒီးတၢ်အိၣ်လီၤတဲာ်ဘၣ်ဃးဒီး စီၤဧိၣ်ရံၤလၢအမၤဝဲ, ဒီးအတၢ်မၤဆူၣ်လၢအမၤဝဲန့ၣ် ကွဲးအသးလၢအံၣ်စရ့ လးအစီၤပၤအလံာ်ကွဲးနီၣ်တၢ်အပူၤ, တမ့ၢ်ဘၣ်ဧါ.

²⁸ ဒီးစီၤဧိၣ်ရံၤမံဝဲ ဒီးအပၢ်တဖၣ်, ဒီးပှၤခူၣ်လီၤကွံာ်အီၤ လၢၡၤမရံအပူၤ, ဒီးအဖိခွါစီၤအၤဃာ်ကဲထီၣ်စီၤပၤလၢ အလီၢ်န့ၣ်လီၤ.

²⁹ ဒီးလၢယူဒၤအစီၤပၤအၤစါအနံၣ်ပှဲၤထီၣ် သၢဆံဃိး နံၣ်တနံၣ်န့ၣ်စီၤဧိၣ်ရံၤအဖိခွါစီၤအၤဃာ် ကဲသီစီၤပၤ လၢအံၣ်စရ့လးအဖီခိၣ်, ဒီးစီၤဧိၣ်ရံၤအဖိခွါစီၤအၤဃာ် ကဲစီၤပၤလၢအံၣ်စရ့လးအဖီခိၣ် လၢၡၤမရံအပူၤခံဆံခံ နံၣ်လီၤ.

³⁰ ဒီးစီၤဧိၣ်ရံၤအဖိခွါစီၤအၤဃာ် မၤတၢ်အၢလၢယွၤအ မဲာ်ညါနးန့ၢ် ကယဲၢ် ပှၤလၢအအိၣ်ဝဲ လၢအမဲာ်ညါခဲ လၢာ်တက့ၢ်လီၤ.

³¹ ဒီးတၢ်မၤအသးလၢအပာ်အလဲၤတၢ်လၢ စီၤနဘးအ ဖိခွါစီၤယၤရၤဘၣ်အတၢ်ဒဲးဘးအပူၤ လၢတၢ်အဖှံ, ဒီး ဟံးန့ၢ်အမါလၢပှၤစံဒိၣ်ဖိအစီၤပၤ အ့သဘၤလးအဖိမုၣ် နီၢ်အံၤစ့ဘ့ၤလး, ဒီးလဲၤဝဲ, ဒီးမၤဘဧၤလးအတၢ်, ဒီးဘူၣ်

³² ထီၣ်ဘါထီၣ်အီၤလီၤ. ဒီးမၤတၢ်လုၢ်လီၢ်လၢဘဧၤလး အဂီၢ်လၢဘဧၤလးအဟံၣ်ပူၤလၢအမၤဝဲလၢ ၡၤမရံအ ပူၤလီၤ.

³³ ဒီးစီၤအၤဃာ်တ့အရှ့ရၤအဂီၤ, ဒီးတၢ်ထိၣ်ဂဲၤယွၤအံၣ် စရ့လးအကစၢ်အသးထီၣ်န့ၣ် စီၤအၤဃာ်မၤအါန့ၢ်က ယဲၢ်အံၣ်စရ့လးအစီၤပၤလၢအအိၣ်ဝဲလၢ အမဲာ်ညါခဲ လၢာ်တက့ၢ်လီၤ.

³⁴ လၢအမုၢ်နံၤတဖၣ်န့ၣ် ပှၤဘ့ၤသ့လးဖိစီၤဃံၤအ့လး တ့ယရံၤဃိလီၤ. ပာ်ဝဲအခီၣ်ထံးလၢအဖိဝဲၢ်ကိစီၤအဘံ ရၣ်, ဒီးဘိးဆၢထၢၣ်အတြဲၤလၢအဖိသဒါစီၤစကံာ်, ဒ် ယွၤအကလုၢ်လၢအကတိၤဝဲလၢ စီၤနိၣ်အဖိခွါစီၤယိၤ ရှူအစုပူၤန့ၣ်လီၤ.

၁၇

¹ ဒီးပှၤတံးရှ့ဘးဖိစီၤအ့ၤလံယၤ လၢအအိၣ်ဝဲဆိးဝဲလၢ ပှၤကံးလဧးဖိအကျါန့ၣ်စံးဘၣ်စီၤအၤဃာ်, ယွၤအံၣ်စ ရ့လးအကစၢ်မူဝဲလၢ ယဆၢထၢၣ်လၢအမဲာ်ညါန့ၣ်, တၢ်လၢနံၣ်တဖၣ်အံၤပစီၤထံမ့ၢ်ဂ့ၤ, တၢ်စူၤမ့ၢ်ဂ့ၤ, မ့တ မ့ၢ်ဘၣ်လၢယထးခိၣ်ဒီး, တအိၣ်ဘၣ်လီၤ. ² ဒီးယွၤအကလုၢ်ဘၣ်အီၤ, ဒီးစံးဝဲဒၣ်, ³ ဟးထီၣ်ဖဲအံၤ, ဒီးဃၣ်နသးဆူမုၢ်ထီၣ်တခီ, ဒီးပာ်ခူသူၣ်နသးလၢထံ ကျိကရံသးအနံၤ, လၢအအိၣ်ဝဲလၢယၢ်ဒ့ၣ်အမဲာ်ညါ တက့ၢ်. ⁴ ဒီးကမၤအသးလၢနကအီတၢ်လၢထံကျိအ ပူၤ, ဒီးယမၤလိာ်တ့ၢ်စိးဝၣ်ဃး ဒ်သိးအကဘုၣ်အီၣ် နၤဖဲန့ၣ်လီၤ.

⁵ ဒီးလဲၤဝဲဒီးမၤဝဲ ဒ်ယွၤအကလုၢ်အသိးန့ၣ်, ဒီးလဲၤဝဲ, ဒီးအိၣ်ဝဲလၢထံကရံသးအနံၤလၢအအိၣ်ဝဲလၢ ယၢ်ဒ့ၣ် အမဲာ်ညါလီၤ. ⁶ ဒီးစိးဝၣ်ဃးဟဲစိာ်န့ၢ်အီၤလၢကိၣ်ဒီး တၢ်ညၣ်လၢမုၢ်ဂီၤ, ဒီးကိၣ်ဒီးတၢ်ညၣ်လၢမုၢ်ဟါ, ဒီးအီ တၢ်လၢထံကျိပူၤန့ၣ်လီၤ.

⁷ ဒီးလၢမုၢ်နံၤတဖၣ်အကတၢၢ်န့ၣ် တၢ်မၤအသးလၢ ထံလီၤသံးကွံာ်လၢထံကျိပူၤလီၤ. အဂ့ၢ်ဒ်အံၤ, တၢ်တဟဲ စူၤဘၣ်လၢကီၢ်ပူၤဘၣ်. ဒီးယွၤအကလုၢ်ဘၣ်အီၤဒီးစံးဝဲဒၣ်, ⁸ ဂဲၤဆၢထၢၣ် လဲၤဆူစၤရဖၤသး လၢအဘၣ်ဃးဒီးစံဒိၣ်, ဒီးအိၣ်ဖဲန့ၣ် တက့ၢ်. ကွၢ်ကွၢ်, ယမၤလိာ်ပှၤမုၣ်ကမဲတဂၤဖဲန့ၣ်ဒ်သိး အကလုၢ်အီၣ်နၤလီၤ.

¹⁰ ဒီးဂဲၤဆၢထၢၣ်, ဒီးလဲၤဝဲဆူစၤရဖၢသး, ဒီးလဲၤဆူဝ့ၢ် အပဲတရီ, ဒီးကွၢ်ကွၢ်, ပှၤမုၣ်ကမဲတဂၤအိၣ်ဖဲန့ၣ်ထၢ ထီၣ်သ့ၣ်မုၣ်ဒ့လီၤ. ဒီးကိးန့ၢ်ဝဲ, ဒီးစံးဝဲဒၣ်, ဟဲစိာ်န့ၢ်လၢ် ယၤလၢထံတစဲးလၢလီခီပူၤ ဒ်သိးယကအီတၢ်တက့ၢ်.

¹¹ ဒီးလဲၤဝဲဒ်သိးအကဟဲစိာ် ဒီးအဝဲဒၣ်ကိးဆူအအိၣ်, ဟဲစိာ်န့ၢ်လၢ်ယၤလၢကိၣ်တစဲးလၢနစုပူၤတက့ၢ်.

¹² ဒီးစံးဝဲဒၣ်, ယွၤနကစၢ်မူဝဲန့ၣ်, ယကိၣ်ဘ့ၣ်ဘၣ်တ အိၣ်ဘၣ်, အိၣ်ထဲကိၣ်အကမူၣ်တတၢၤဒုၣ်လၢ ထံဒၢ သ့ၣ်အပူၤ, ဒီးသိတစဲးလၢပလီပူၤ, ဒီးကွၢ်ကွၢ်, ယထၢ ထီၣ်သ့ၣ်မုၣ်ဒ့ခံဘိ, ဒ်သိးယကလဲၤနုာ်, ဒီးကတဲာ်က တီၤလၢယဂီၢ်, ဒီးလၢယဖိခွါအဂီၢ်, ဒ်သိးအကအီၣ် တၢ်, ဒီးသံလီၤ.

¹³ ဒီးစီၤအ့လံယၤစံးဘၣ်အီၤ, ဘၣ်ယိၣ်တဂ့ၤ, မၤဒ်န စံးတၢ်အသိးန့ၣ်တက့ၢ်. ဘၣ်ဆၣ်ဒီး မၤဆိကိၣ်ဘ့ၣ် ဘၣ်အဖိတဘ့ၣ်လၢအီၤလၢယဂီၢ်, ဒီးဟဲစိာ်ဆူယအိၣ် ဝံၤဒီးမၤက့ၤလၢနဂီၢ်ဒီးလၢနဖိခွါအဂီၢ်တက့ၢ်. ¹⁴ အဂ့ၢ် ဒ်အံၤ, ယွၤအံၣ်စရ့လးအကစၢ်စံးဒ်အံၤ, ထံဒၢသ့ၣ်အ အကိၣ်ကမူၣ်တလၢာ်, ဒီးပလီအသိတလီၤစှၤဘၣ်တုၤ ယွၤကမၢတၢ်ဟဲစူၤလၢဟီၣ်ခိၣ်ချၢလီၤ.

¹⁵ ဒီးလဲၤဝဲ, ဒီးမၤတၢ်ဒ်စီၤအ့လံယၤအကလုၢ်အသိးန့ၣ်, ဒီးအဝဲဒၣ်ဒီးအပှၤဟံၣ်ဖိအီၣ်တၢ်မုၢ်နံၤတဖၣ်လီၤ.

¹⁶ ထံဒၢသ့ၣ်အကိၣ်ကမူၣ်တလၢာ်ဘၣ်, ဒီးလီခီအသိ တလီၤစှၤဘၣ်, ဒ်ယွၤအကလုၢ်လၢအကတိၤဝဲလၢစီၤ အ့ၤလံယၤအစုပူၤအသိးန့ၣ်လီၤ.

¹⁷ ဒီးလၢတၢ်န့ၣ်တဖၣ်အလီၢ်ခံ တၢ်မၤအသးလၢဟံၣ် အကစၢ်ပိာ်မုၣ်န့ၣ် အဖိခွါဆါထီၣ်ဝဲ, ဒီးဆါဝဲနးနးက လဲာ်တုၤအသါတအိၣ်လၢၤဘၣ်လၢအပူၤဘၣ်. ¹⁸ ဒီးပိာ် မုၣ်န့ၣ်စံးလၢစီၤအ့ၤလံယၤ, တၢ်ဘၣ်ဃးဒီးယၤဒီးနၤမ့ၢ် မနုၤလဲၣ်, ယွၤအပှၤကညီဧၢ, နဟဲဒုးသ့ၣ်နီၣ်ထီၣ်က့ၤ ယတၢ်ဒဲးဘး, ဒီးမၤသံယဖိခွါစ့ၢ်ကီးဧါ.

¹⁹ ဒီးအဝဲဒၣ်စံးဘၣ်အီၤ, ဟ့ၣ်လီၤယၤလၢနဖိခွါတက့ၢ်. ဒီးဟံးထီၣ်ဝဲလၢ အသးနါပှၢ်အပူၤ, ဒီးစိာ်ထီၣ်ဝဲဆူဒၢး လၢထးခီတတီၤ, ဖဲအအိၣ်အဆိးဝဲ, ဒီးပာ်လီၤအီၤလၢ အလီၢ်မံဒၣ်ဝဲန့ၣ်လီၤ.

²⁰ ဒီးကိးထီၣ်ဆူယွၤ, ဒီးစံးဝဲဒၣ်, ယွၤယကစၢ်ဧၢ, နဒုး ဟဲစ့ၢ်ကီးတၢ်အၢလၢပှၤမုၣ်ကမဲအလိၤလၢ ယအိၣ်ယ ဆိးဒီးအီၤ, ဒီးမၤသံအဖိခွါစ့ၢ်ကီးဧါ, ²¹ ဒီးစူၣ်ထီၣ်အသး လၢဖိသၣ်အဖီခိၣ်သၢဘျီ, ဒီးကိးထီၣ်ဆူယွၤ, ဒီးစံးဝဲ ဒၣ်, ယွၤယကစၢ်ဧၢ, မ်ဖိသၣ်အသးဟဲက့ၤဆူအပူၤ တက့ၢ်.

²² ဒီးယွၤဒိကနၣ်စီၤအ့ၤလံယၤအကလုၢ်, ဒီးဖိသၣ်အ သးဟဲက့ၤကဒါက့ၤလၢအပူၤ, ဒီးမူထီၣ်က့ၤဝဲလီၤ. ²³ ဒီးစီၤအ့လံၤယၤ ဟံးန့ၢ်ဖိသၣ်, ဒီးစိာ်လီၤအီၤလၢအဒၢးပူၤဆူဟံၣ်ပူၤ, ဒီးဟ့ၣ်လီၤဝဲလၢအမိၢ်, ဒီးစီၤအ့ၤလံယၤစံးဝဲဒၣ်, ကွၢ်ကွၢ်, နဖိခွါမူဝဲလီၤ.

²⁴ ဒီးပိာ်မုၣ်န့ၣ်စံးလၢ စီၤအ့ၤလံယၤ, ခဲကနံၣ်အံၤယ သ့ၣ်ညါလၢတၢ်အံၤလၢနမ့ၢ်ယွၤအပှၤကညီ, ဒီးလၢယွၤ အကလုၢ်လၢနထးခိၣ်မ့ၢ်တၢ်အမ့ၢ်အတီလီၤ.

၁၈

¹ ဒီးလၢအါနံၤအါသီန့ၣ် တၢ်မၤအသးလၢယွၤအက လုၢ်ဘၣ်စီၤအ့ၤလံယၤလၢသၢနံၣ်တနံၣ်အပူၤန့ၣ်, ဒီးစံး ဝဲဒၣ်, လဲၤဒုးနဲၣ်နသးလၢစီၤအၤဃာ်, ဒီးယကဒုးဟဲစူၤ တၢ်လၢဟီၣ်ခိၣ်ချၢလီၤ.

² ဒီးစီၤအ့ၤလံယၤလဲၤဝဲဒၣ် ဒ်သိးအကဒုးနဲၣ်အသးလၢ စီၤအၤဃာ်လီၤ. ဒီးတၢ်သၣ်ဝံၤလီၤဒိအိၣ်ဝဲလၢၡၤမရံအ ပူၤနးမးလီၤ. ³ ဒီးစီၤအၤဃာ်ကိးန့ၢ် စီၤဧိၤဒယၤလၢအအိၣ်ဝဲလၢအဟံၣ်အဖီခိၣ်လီၤ. (ဒီးဧိၤဘါဒယၤပျံၤယွၤဒိၣ်မးလီၤ.―

⁴ ဒီးလၢနီၢ်အံၤစ့ဘ့ၤလး ဒီၣ်တဲာ်ကွံာ်ယွၤအဝံတဖၣ်န့ၣ် တၢ်မၤအသးလၢ စီၤဧိၤဘါဒယၤဟံးန့ၢ်ဝံတကယၤ, ဒီး ပာ်ခူသူၣ်အီၤလၢတၢ်အိပူၤ, ယဲၢ်ဆံတပူၤ, ယဲၢ်ဆံတပူၤ, ဒီးလုၢ်အီၣ်လုၢ်အီဝဲလၢကိၣ်ဒီးထံလီၤ.)

⁵ ဒီးစီၤအၤဃာ်စံးဘၣ်စီၤဧိၤဘါဒယၤ, လဲၤတၢ်လၢကီၢ် ပူၤဒီဘ့ၣ်ညါ, ဆူကယဲၢ်ထံထီၣ်ပၢၢ်တပူၤလၢ်လၢ်, ဒီး ဆူကယဲၢ်ထံကျိတကျိလၢ်လၢ်တက့ၢ်. ဘၣ်တဘၣ်ပ ကထံၣ်နယၢ်န့ၢ်နီၣ်ဧိၤမံၤဧိၤ, ဒီးဒုးမူဒံးကသ့ၣ်, ဒီးကသ့ၣ် လၤ, ဒ်သိးပဆၣ်ဖိကီၢ်ဖိအဒၢအသုတလၢာ်ကွံာ်တဂ့ၤ.

⁶ ဒီးနီၤဖးကီၢ်လၢအဘၢၣ်စၢၤ ဒ်သိးအကလဲၤခီဂာ်ဝဲ, ဒီးစီၤအၤဃာ်လဲၤဝဲလၢကျဲတဘိ, ဒီးစီၤဧိၤဘါဒယၤလဲၤ ဝဲလၢကျဲတဘိဒၣ်လီၤ.

⁷ ဒီးစီၤဧိၤဘါဒယၤအိၣ်ဝဲလၢကျဲန့ၣ်, ဒီးကွၢ်ကွၢ်, စီၤ အ့ၤ လံယၤ ဘၣ်သဃိာ်ဒီးအီၤ, ဒီးအဝဲဒၣ်ကွၢ်နီၣ်အီၤ, ဒီး ထိၣ်လီၤပှီၤအသးလၢအမဲာ်ညါ ဒီးစံးဝဲဒၣ်, နမ့ၢ်က စၢ်စီၤအ့ၤလံယၤဧါ.

⁸ ဒီးစံးဘၣ်အီၤ, ယၤလီၤ. လဲၤစံးဘၣ်တဲဘၣ်နကစၢ်, ကွၢ်ကွၢ်, စီၤအ့ၤလံယၤန့ၣ်တက့ၢ်.

⁹ ဒီးစံးဝဲဒၣ်, ယမၤကမၣ်တၢ်ဒ်သိးနကဟ့ၣ်လီၤကွံာ်န ခ့နပှၤလၢစီၤအၤဃာ်အစုပူၤ ဒ်သိးအကမၤသံယၤလၢ မနုၤတမံၤလဲၣ်, ¹⁰ ယွၤနကစၢ်မူဝဲန့ၣ်, ပှၤတကလုာ်မ့ၢ် ဂ့ၤ, ဘီမုၢ်မ့ၢ်ဂ့ၤ, လၢယကစၢ်တမၢလီၤတၢ်လဲၤဃုနၤ လၢအပူၤတအိၣ်ဘၣ်. ဒီးတုၤပှၤစံးတအိၣ်ဘၣ်ဒီး, ဘီ မုၢ်မ့ၢ်ဂ့ၤ, ပှၤတကလုာ်မ့ၢ်ဂ့ၤ, ဒုးဆိၣ်အီၤလၢအတထံၣ် န့ၢ်ဘၣ်နၤဖဲန့ၣ်ဘၣ်. ¹¹ ဒီးခဲကနံၣ်အံၤနစံး, လဲၤစံးဘၣ် တဲဘၣ်နကစၢ်, ကွၢ်ကွၢ်, စီၤအ့ၤလံယၤန့ၣ်တက့ၢ်လီၤ.

¹² ဒီးတုၤယဟးထီၣ်လၢနအိၣ်ဒီး တၢ်ကမၤအသးလၢ ယွၤအသးကစိာ်ကွံာ်နၤဖဲယတသ့ၣ်ညါဘၣ်, ဒီးယလဲၤ ဒုးနဲၣ်စီၤအၤဃာ်, ဒီးတထံၣ်န့ၢ်ဘၣ်နၤဘၣ်. ဒီးကမၤ သံယၤလီၤ. ဒီးလၢယဖိၣ်သၣ်ခွါထီၣ်လံၤလံၤန့ၣ်နခ့န ပှၤပျံၤယွၤလီၤ. ¹³ လၢနီၢ်အံၤစ့ဘ့ၤလးမၤသံယွၤအဝံတ ဖၣ်န့ၣ်တၢ်လၢယမၤလၢယပာ်ခူသူၣ် ပှၤကညီတက ယၤလၢယကစၢ်အဝံတဖၣ်အကျါလၢ တၢ်အိပူၤယဲၢ် ဆံတပူၤ, ယဲၢ်ဆံတပူၤ, ဒီးယကလုၢ်အီၣ်လုၢ်အီအီၤဒီး ကိၣ်ဒီးထံန့ၣ်တၢ်တစံးဘၣ်တဲဘၣ် ယကစၢ်ဘၣ်ဧါ.―

¹⁴ ဒီးခဲကနံၣ်အံၤနစံး, လဲၤစံးဘၣ်နကစၢ်, ကွၢ်ကွၢ်, စီၤအ့ၤ လံယၤန့ၣ်တက့ၢ်လီၤ. ဒီးကမၤသံယၤလီၤ.

¹⁵ ဒီးစီၤအ့ၤလံယၤစံးဝဲဒၣ်, တၢ်သုးမုၢ်အယွၤလၢယဆၢ ထၢၣ်လၢအမဲာ်ညါမူဝဲဒီး, ယကဒုးနဲၣ်ယသးလၢအီၤ လၢမုၢ်မဆါတနံၤအံၤလီၤ.

¹⁶ ဒီးစီၤဧိၤဘါဒယၤလဲၤသဂၢၢ်စီၤအၤဃာ်, ဒီးစံးဘၣ် အီၤ, ဒီးစီၤအၤဃာ်လဲၤသဂၢၢ်စီၤအ့ၤလံယၤလီၤ.

¹⁷ ဒီးတုၤစီၤအၤဃာ် ထံၣ်ဘၣ်စီၤအ့ၤလံယၤဒီး, တၢ်မၤ အသးလၢစီၤအၤဃာ်စံးဘၣ်အီၤ, မ့ၢ်နၤ, ပှၤလၢအမၤ တံာ်တာ်အံၣ်စရ့လးတဂၤန့ၣ်ဧါ.

¹⁸ ဒီးစံးဘၣ်အီၤ, ယတမၤတံာ်တာ်ဘၣ် အံၣ်စရ့လး ဘၣ်. မ့မ့ၢ်နၤဒီးနပၢ်အပှၤဟံၣ်ဖိတဖၣ် မၤတံာ်တာ်ဝဲ လၢသုလဲၤသဒၣ်ယွၤအတၢ်မၤလိာ်, ဒီးပိာ်ဘဧၤလးတ ဖၣ်အခံန့ၣ်အဃိလီၤ.

¹⁹ ဒီးခဲကနံၣ်အံၤ မၤလီၤတၢ်ဒုးအိၣ်ဖှိၣ် အံၣ်စရ့လးခဲ လၢာ်, ဒီးဘဧၤလးအဝံလွံၢ်ကယၤယဲၢ်ဆံ, ဒီးအရှ့ရၤအ ဝံလွံၢ်ကယၤလၢအအီၣ်တၢ်လၢ နီၢ်အံၤစ့ဘ့ၤလးအစီၢ် နီၤခိၣ်သ့ၣ်တဖၣ်ဆူ ယအိၣ်လၢ ကစၢၢ်ကၢ်မ့ၤလးအ လိၤတက့ၢ်.

²⁰ ဒီးစီၤအၤဃာ်မၢလီၤတၢ်ဆူ ပှၤအံၣ်စရ့လးဖိခဲလၢာ်, ဒီးဒုးအိၣ်ဖှိၣ်ဝံတဖၣ်လၢကစၢၢ်ကၢ်မ့ၤလးအလိၤလီၤ.

²¹ ဒီးစီၤအ့လံယၤဟဲဆူပှၤဂီၢ်မုၢ်ခဲလၢာ်အအိၣ် ဒီးစံးဝဲ ဒၣ်, သုကလဲၤတကျဲၢ်တကျဲၢ်လၢတၢ်ခံမံၤအဘၢၣ်စၢၤ အံၤဆံးယံာ်လဲၣ်. ယွၤမ့မ့ၢ်ကစၢ်ဒီး, လူၤအီၤတက့ၢ်. မ့မ့ၢ်ဘဧၤလးမ့မ့ၢ်ကစၢ်ဒီး, လူအီၤတက့ၢ်. ဒီးပှၤဂီၢ်မုၢ် တစံးဆၢဘၣ်အီၤနီတဘီဘၣ်.

²² ဒီးစီၤအ့ၤလံယၤစံးဘၣ်ပှၤဂီၢ်မုၢ်, ယဲဒၣ်အံၤယအိၣ် လီၤတဲာ်ယွၤအဝံတဂၤဃီလီၤ. မ့မ့ၢ်ဘဧၤလးအဝံန့ၣ် မ့ၢ်ပှၤကညီလွံၢ်ကယၤယဲၢ်ဆံလီၤ. ²³ ဒုးဟ့ၣ်အီၤလၢပ ဂီၤဖံးခံဒု, ဒီးမ်အဃုထၢဂီၤဖံးတဒုလၢအဂီၢ်ဒၣ်ဝဲ, ဒီးဒီၣ် တဲာ်ကွံာ်အီၤတကူာ်တကူာ်, ဒီးပာ်ထီၣ်အီၤလၢသ့ၣ်မုၣ် အဖီခိၣ်, ဒီးတပာ်ဘၣ်မ့ၣ်အူလၢအဖီလာ်ဘၣ်န့ၣ်တ က့ၢ်. ဒီးယကတဲာ်ကတီၤဂီၤဖံးတဒုဒၣ်န့ၣ်, ဒီးပာ်ထီၣ် လၢသ့ၣ်မုၣ်အဖီခိၣ်, ဒီးယတပာ်ဘၣ်မ့ၣ်အူလၢအဖီ လာ်ဘၣ်လီၤ.

²⁴ ဒီးသုဝဲသ့ၣ်တဖၣ်န့ၣ် ကိးထီၣ်လၢသုကစၢ်တဖၣ်အ အမံၤ, ဒီးယဲဒၣ်အံၤယကကိးထီၣ်လၢယွၤအမံၤ, ဒီးက စၢ်လၢအစံးဆၢတၢ်လၢမ့ၣ်အူတဂၤ, ကကဲထီၣ်ဒၣ်ဝဲ လၢကစၢ်တက့ၢ်. ဒီးပှၤဂီၢ်မုၢ်ခဲလၢာ်စံးဆၢတၢ်ဒီးစံးဝဲ ဒၣ်, ကတိၤတၢ်န့ၣ်ဂ့ၤလံ.

²⁵ ဒီးစီၤအ့ၤလံယၤစံးဘၣ်လဧၤလးအဝံတဖၣ်, ဃုထၢ ဂီၤဖံးတဒုလၢသုဂီၢ်ဒၣ်သုဝဲ, ဒီးကတဲာ်ကတီၤဆိတၢ် တက့ၢ်. အဂ့ၢ်ဒ်အံၤ, သုမ့ၢ်ပှၤအါဂၤလီၤ. ဒီးကိးထီၣ်သု ကစၢ်တဖၣ်အမံၤတက့ၢ်. ဒီးပာ်လီၤမ့ၣ်အူတဂ့ၤ.

²⁶ ဒီးအဝဲသ့ၣ်ဟံးန့ၢ်ဂီၤဖံးတဒုလၢ တၢ်ဟ့ၣ်လီၤအီၤ, ဒီး ကတဲာ်ကတီၤဝဲ, ဒီးကိးထီၣ်ဘဧၤလးအမံၤလၢမုၢ်ဂီၤ တုၤလၢမုၢ်ထူၣ်, ဒီးစံးဝဲဒၣ်, ဘဧၤလးဧၢ, ကနၣ်ပကလုၢ် တက့ၢ်. ဒီးတၢ်အကလုၢ်တအိၣ်ဘၣ်, ဒီးတၢ်တစံးဆၢ ဘၣ်ဝဲဘၣ်. ဒီးစံၣ်ထီၣ်ဝဲလၢတၢ်လုၢ်လီၢ်အဖီခိၣ်လၢ အမၤတ့ၢ်ဝဲလီၤ.

²⁷ ဒီးလၢမုၢ်ထူၣ်န့ၣ် တၢ်မၤအသးလၢစီၤအ့ၤလံယၤဒုၣ် ဒွဲၣ်အီၤ, ဒီးစံးဝဲဒၣ်, ကိးပသူထီၣ်တက့ၢ်. အဂ့ၢ်ဒ်အံၤ, မ့ၢ်ဝဲလၢကစၢ်တဂၤလီၤ. မ့ၢ်အဆိကမိၣ်တၢ်လီၤ. မ့တ မ့ၢ်ဘၣ်ဒ်န့ၣ်ဒီး, မ့ၢ်အလဲၤနုာ်ကးတံာ်ဃာ်အခံလီၤ. မ့ တမ့ၢ်ဘၣ်ဒ်န့ၣ်ဒီး, မ့ၢ်အလဲၤတၢ်လီၤ. ဘၣ်တဘၣ်မံသ ပ့ၤဝဲ, ဒီးတၢ်ဘၣ်ထိၣ်ဂဲၤအီၤလီၤ.

²⁸ ဒီးပှၤကိးပသူထီၣ်, ဒီးဂဲာ်လီၤအသးလၢဃဲာ်လၢဒီဒ် အလုၢ်အလၢ်အသိးန့ၣ် တုၤအသွံၣ်ဟဲထီၣ်လၢအလိၤ လီၤ.

²⁹ ဒီးတုၤမုၢ်ထူၣ်ပူၤကွံာ်ဒီး, တၢ်မၤအသးလၢအဝဲသ့ၣ် တဖၣ်န့ၣ်ကတိၤတၢ်လၢဝံအကျိာ် တုၤလီၤလၢတၢ်လုၢ် တၢ်အကတီၢ်ဘၣ်ဝဲ, ဒီးတၢ်အကလုၢ်တအိၣ်ဘၣ်, ဒီး တၢ်တစံးဆၢဘၣ်တၢ်ဘၣ်, ဒီးတၢ်တပးကဲဘၣ်တၢ် ဘၣ်လီၤ.

³⁰ ဒီးစီၤအ့ၤလံယၤစံးဘၣ်ပှၤဂီၢ်မုၢ်ခဲလၢာ်, ဟဲဘူးဒီးယၤ တက့ၢ်. ဒီးပှၤဂီၢ်မုၢ်ခဲလၢာ်ဟဲဘူးဒီးအီၤလီၤ. ဒီးမၤက့ၤ ဝဲလၢယွၤအတၢ်လုၢ်လီၢ်လၢအလီၤပှီၢ်န့ၣ်လီၤ. ³¹ ဒီးစီၤ အ့ၤလံယၤဟံးန့ၢ်လၢၢ်တဆံခံဖျၢၣ် ဒ်ဒူၣ်တဖၣ်ဘၣ်ဃး ဒီးစီၤယၤကိာ်အဖိခွါအတၢ်ဂံၢ်အသိးန့ၣ်, စီၤယၤကိာ် လၢယွၤအကလုၢ်ဘၣ်အီၤဒီးစံးဝဲဒၣ်, အံၣ်စရ့လးက ကဲထီၣ်နမံၤလီၤ.

³² ဒီးမၤတၢ်လုၢ်လီၢ်လၢၢ်တဖၣ်လၢယွၤအမံၤ, ဒီးမၤတၢ် ကျိၤဝးတရံး တၢ်လုၢ်လီၢ်လၢ အကတြီၢ်တၢ်ချံခံနာ် လီၤ. ³³ ဒီးကတဲာ်ကတီၤသ့ၣ်မုၣ်, ဒီးဒီၣ်တဲာ်ဂီၤဖံးတ ကူာ်တကူာ်, ဒီးပာ်ဝဲလၢသ့ၣ်မုၣ်အဖီခိၣ်, ဒီးစံးဝဲဒၣ်, မၤပှဲၤထံစဲၤလွံၢ်ဖျၢၣ်လၢထံ, ဒီးလူလီၤလၢတၢ်လုၢ်မ့ၣ် အူအဖီခိၣ်, ဒီးလၢသ့ၣ်မုၣ်အဖီခိၣ်န့ၣ်တက့ၢ်.

³⁴ ဒီးစံးဝဲဒၣ်, မၤခံဘျီတဘျီတက့ၢ်. ဒီးမၤဝဲခံဘျီတဘျီ လီၤ. ဒီးစံးဝဲဒၣ်, မၤသၢဘျီတဘျီတက့ၢ်. ဒီးမၤသၢဘျီ တဘျီလီၤ. ³⁵ ဒီးထံယွၤလီၤဝးတရံးတၢ်လုၢ်လီၢ်, ဒီးမၤ ပှဲၤတၢ်ကျိၤန့ၣ်လၢထံစ့ၢ်ကီးလီၤ.

³⁶ ဒီးတၢ်မၤအသးလၢ တၢ်လုၢ်တၢ်အကတီၢ်ဘၣ်ဒီး, ဝံ အ့ၤလံယၤဟဲဘူးဒီးစံးဝဲဒၣ်, ယွၤ, စီၤအၤဘြၤဟၣ်, ဒီးစီၤ အံၤစဲး, ဒီးစီၤအံၣ်စရ့လးအကစၢ်ဧၢ, လီၣ်ဖျါထီၣ်လၢမုၢ် မဆါတနံၤအံၤ, လၢနမ့ၢ်ကစၢ်လၢအံၣ်စရ့လးအကျါ, ဒီးလၢယမ့ၢ်နခ့နပှၤ, ဒီးလၢယမၤတၢ်တဖၣ်အံၤခဲလၢာ် လၢနကလုၢ်န့ၣ်တက့ၢ်. ³⁷ ဒိကနၣ်ယကလုၢ်, ယွၤဧၢ, ဒိကနၣ်ယကလုၢ်ဒ်သိးပှၤဂီၢ်မုၢ်အံၤကသ့ၣ်ညါလၢနမ့ၢ် ကစၢ်ယွၤ, ဒီးလၢနဘိးဃၣ်ကဒါက့ၤအသးလံန့ၣ်တ က့ၢ်.

³⁸ ဒီးယွၤအမ့ၣ်အူလီၤတဲာ်ဝဲ, ဒီးအီၣ်ကွံာ်တၢ်လုၢ်မ့ၣ် အူ, ဒီးသ့ၣ်မုၣ်, ဒီးလၢၢ်ဧိၤလ့ဧိၤ, ဒီးဟီၣ်ခိၣ်အကမူၣ်, ဒီးလ့ၣ်ထီၣ်ကွံာ်ထံ လၢအအိၣ်ဝဲလၢတၢ်ကျိၤပူၤ န့ၣ် လီၤ.

³⁹ ဒီးတုၤပှၤဂီၢ်မုၢ်ခဲလၢာ်ထံၣ်ဘၣ်ဝဲဒီး, ထိၣ်လီၤပှီၤအ သးလၢအမဲာ်, ဒီးစံးဝဲဒၣ်, ယွၤဝဲဒၣ်မ့ၢ်ကစၢ်, ယွၤဝဲဒၣ် မ့ၢ်ကစၢ်လီၤ.

⁴⁰ ဒီးစီၤအ့ၤလံယၤစံးဘၣ်အီၤ ဟံးဃာ်ဘဧၤလးအဝံတ ဖၣ်န့ၣ်တက့ၢ်. ဒုးပူၤဖျဲးအီၤနီတဂၤတဂ့ၤ. ဒီးအဝဲသ့ၣ် ဟံးဃာ်အီၤ, ဒီးစီၤအ့ၤလံယၤစိာ်ထီၣ်အီၤဆူထံကျိကံ ၡိၣ်, ဒီးမၤသံအီၤဖဲန့ၣ်လီၤ.

⁴¹ ဒီးစီၤအ့ၤလံယၤစံးဘၣ်စီၤအၤဃာ်, လဲၤထီၣ်, အီၣ်တၢ် ဒီးအီတၢ်တက့ၢ်. အဂ့ၢ်ဒ်အံၤ, တၢ်ဟဲစူၤအါအါကလဲာ် အသီၣ်အိၣ်လီၤ.

⁴² ဒီးစီၤအၤဃာ်လဲၤထီၣ်ဝဲ ဒ်သိးအကအီၣ်တၢ်ဒီးအီတၢ် လီၤ. ဒီးစီၤအ့ၤလံယၤလဲၤထီၣ်ဘးကၢ်မ့ၤလးကစၢၢ်အ ဒီခိၣ်, ဒီးထိၣ်လီၤပှီၤအသးလၢဟီၣ်ခိၣ်, ဒီးပာ်အမဲာ်လၢ အခီၣ်လ့ၢ်ခိၣ်အကဆူးလီၤ. ⁴³ ဒီးစံးဘၣ်အခ့အပှၤ, လဲၤ ထီၣ်လၢ်, ဒီးကွၢ်တၢ်ဆူပီၣ်လဲၣ်န့ၣ်တက့ၢ်. ဒီးလဲၤထီၣ် ဝဲ, ဒီးကွၢ်ဝဲ, ဒီးစံးဝဲဒၣ်, တၢ်တအိၣ်ဘၣ်. ဒီးစံးဝဲဒၣ်, လဲၤ ကဒီးနွံဘျီတက့ၢ်.

⁴⁴ ဒီးလၢအလဲၤထီၣ်နွံဘျီတဘျီန့ၣ် တၢ်မၤအသးလၢ အစံးဝဲဒၣ်, ကွၢ်ကွၢ်, တၢ်အၢၣ်ဖိထီၣ်လၢပီၣ်လဲၣ်ပူၤဒ် ပှၤကညီအစုလၣ်အသိးန့ၣ်လီၤ. ဒီးစံး, လဲၤစံးဘၣ်စီၤ အၤဃာ်, ကတဲာ်ကတီၤတၢ်, ဒီးလဲၤလီၤတက့ၢ်. ဒ်သိး တၢ်ဟဲစူၤအသုတတြီနၤတဂ့ၤ.

⁴⁵ ဒီးလၢအကတီၢ်အဖၢမုၢ်န့ၣ်, တၢ်မၤအသးလၢမူခိၣ် သူထီၣ်လၢတၢ်အၢၣ်သူဒီးကလံၤ, ဒီးတၢ်ဟဲစူၤဖးဒိၣ် လီၤ. ဒီးစီၤအၤဃာ်ဒိးတၢ်, ဒီးလဲၤဝဲဆူယံးစရ့လးလီၤ.

⁴⁶ ဒီးယွၤအစုအိၣ်ဝဲလၢ စီၤအ့ၤလံယၤအလိၤ, ဒီးအဝဲဒၣ် ကံၢ်တူာ်ထီၣ်အယီၢ်ဒ့, ဒီးဃ့ၢ်ဝဲလၢစီၤအၤဃာ်အမဲာ် ညါဆူတၢ်လဲၤနုာ်လၢယံးစရ့လးလီၤ.

၁၉

¹ ဒီးစီၤအၤဃာ်စံးဘၣ် နီၢ်အံၤစ့ဘ့ၤလးလၢကယဲၢ်တၢ် လၢစီၤအ့ၤလံယၤမၤဝဲ, ဒီးကယဲၢ်တၢ်ဘၣ်ဃးဒီးအမၤ သံဝံခဲလၢာ်လၢနးလီၤ.

² ဒီးနီၢ်အံၤစ့ဘ့ၤလးမၢကလူးတဂၤ ဆူစီၤအ့ၤလံယၤအ အိၣ်, ဒီးစံးဝဲဒၣ်, တုၤခဲဂီၤဆၢအလီၢ်ခဲအံၤ, ယမ့ၢ်တပာ် ဘၣ်နသးဒ်ပှၤတဂၤလၢအကျါအသိးန့ၣ်ဘၣ်ဒီး, မ်က စၢ်တဖၣ်မၤယၤဒ်န့ၣ်သိး, ဒီးနးန့ၢ်အန့ၣ်တက့ၢ်.

³ ဒီးအဝဲဒၣ်ထံၣ်ဘၣ်ဝဲ, ဒီးလဲၤတၢ်လၢအသးသမူအ ဂီၢ်, ဒီးဟဲဆူဘ့ၢ်ၡဘၤလၢအဘၣ်ဃးဒီးယူဒၤ, ဒီးပာ်လီၤ တဲာ်အခ့အပှၤဖဲန့ၣ်လီၤ. ⁴ ဒီးလဲၤဝဲအကစၢ်ဒၣ်ဝဲတနံၤ ကျဲလၢပှၢ်မုၢ်ကနၢ, ဒီးဟဲဆ့ၣ်နီၤလၢပထိးသ့ၣ်ရီသ့ၣ် အဖီလာ်, ဒီးဃ့ဝဲလၢအသးဒ်သိးအကသံလီၤ. ဒီးစံးဝဲ ဒၣ်, အါလံ. ခဲကနံၣ်အံၤ, ယွၤဧၢ, ဟံးထီၣ်ယသးတက့ၢ်. အဂ့ၢ်ဒ်အံၤ, ယတဂ့ၤန့ၢ်ဘၣ်ယပၢ်တဖၣ်ဘၣ်.

⁵ ဒီးမံလီၤ, ဒီးမံသပ့ၤလၢ သ့ၣ်ပထိးသ့ၣ်ရီသ့ၣ်အဖီ လာ်, ဒီးကွၢ်ကွၢ်, ကလူးတဂၤထိးဘၣ်အီၤဒီးစံးဘၣ် အီၤ, ဂဲၤဆၢထၢၣ်အီၣ်တၢ်တက့ၢ်.

⁶ ဒီးကွၢ်ဝဲ, ဒီးကွၢ်ကွၢ်, ကိၣ်ဘ့ၣ်ဘၣ်တဘ့ၣ်ကုၢ်အသး လၢလၢၢ်ကိၢ်အဖီခိၣ်, ဒီးထံတပလီအိၣ်ဝဲလၢအခိၣ်အ ဃၢၤလီၤ. ဒီးအီၣ်တၢ်, ဒီးအီတၢ်, ဒီးမံလီၤကဒီးလီၤ.

⁷ ဒီးယွၤအကလူးဟဲက့ၤခံဘျီတဘျီ, ဒီးထိးဘၣ်အီၤ, ဒီးစံးဝဲဒၣ်, ဂဲၤဆၢထၢၣ်အီၣ်တၢ်တက့ၢ်. အဂ့ၢ်ဒ်အံၤ, ကျဲ ဧိၤကပူၤဧိၤယံၤကဲၣ်ဆိးလၢနဂီၢ်လီၤ.

⁸ ဒီးဂဲၤဆၢထၢၣ်, ဒီးအီၣ်တၢ်ဒီးအီတၢ်, ဒီးလဲၤဝဲလၢတၢ် အီၣ်န့ၣ်အဂံၢ်အဘါအနံၤလွံၢ်ဆံ ဒီးအနၤလွံၢ်ဆံပၢၢ်လၢ ကစၢ်အကစၢၢ်ဃိးရ့းန့ၣ်လီၤ.

⁹ ဒီးဟဲဝဲဖဲန့ၣ်ဆူတၢ်အိပူၤ, ဒီးအိၣ်ဝဲဖဲန့ၣ် သီတနၤ ကျၢၤ, ဒီးကွၢ်ကွၢ်, ယွၤအကလုၢ်ဘၣ်အီၤ, ဒီးစံးဘၣ်အီၤ, တၢ်ဘၣ်ဃးဒီးနၤဖဲအံၤအိၣ်မနုၤလဲၣ်, စီၤအ့ၤလံယၤဧၢ.

¹⁰ ဒီးစံးဝဲဒၣ်, ယသးဆူၣ်လၢယွၤတၢ်သုးမုၢ်အကစၢ်အ ဂီၢ်ဆူၣ်ဆူၣ်ကလဲာ်လီၤ. အဂ့ၢ်ဒ်အံၤ, ပှၤအံၣ်စရ့လးဖိ လဲၤသဒၣ်နတၢ်အၢၣ်လီၤအီလီၤ, မၤလီၤပှီၢ်ကွံာ်နတၢ် လုၢ်လီၢ်, ဒီးမၤသံနဝံတဖၣ်လၢနး, ဒီးအိၣ်လီၤတဲာ်ထဲ ယၤတဂၤဧိၤလီၤ. ဒီးအဝဲသ့ၣ်တဖၣ်န့ၣ်ဃုယသးသမူ ဒ်သိးအကဟံးထီၣ်ကွံာ်အီၤလီၤ.

¹¹ ဒီးစံးဘၣ်အီၤ, ဟးထီၣ်ဒီးဆၢထၢၣ်လၢကစၢၢ်လိၤ, လၢယွၤအမဲာ်ညါတက့ၢ်. ဒီးကွၢ်ကွၢ်, ယွၤလဲၤပူၤကွံာ်, ဒီးကလံၤမုၢ်ဆူၣ်မၤသ့ၣ်ဖးကစၢၢ်တဖၣ်, ဒီးမၤလီၤက လဲလၢၢ်တဖၣ်လၢယွၤအမဲာ်ညါလီၤ. ယွၤတအိၣ်ဘၣ် လၢကလံၤန့ၣ်အပူၤဘၣ်. ဒီးလၢကလံၤအလီၢ်ခံန့ၣ် ဟီၣ်ခိၣ်ဟူးဝးဝဲလီၤ. ယွၤတအိၣ်ဘၣ်လၢဟီၣ်ခိၣ်ဟူးဝး န့ၣ်အပူၤဘၣ်. ¹² ဒီးလၢဟီၣ်ခိၣ်ဟူးဝးအလီၢ်ခံန့ၣ်မ့ၣ်အူ ကဲၤထီၣ်လီၤ. ယွၤတအိၣ်ဘၣ်လၢမ့ၣ်အူန့ၣ်အပူၤဘၣ်, ဒီးလၢမ့ၣ်အူအလီၢ်ခံန့ၣ်တၢ်အသီၣ်ဖိနဲဒီး ကပုာ်လုး အိၣ်ထီၣ်လီၤ.

¹³ ဒီးတုၤစီၤအ့ၤလံယၤနၢ်ဟူဒီး, တၢ်မၤအသးလၢအကး ဘၢအမဲာ်လၢအယၣ်ပူၤ, ဒီးလဲၤထီၣ်, ဒီးဆၢထၢၣ်လၢ တၢ်အိပူၤအခိၣ်ထိးလီၤ. ဒီးကွၢ်ကွၢ်, တၢ်သီၣ်အိၣ်ထီၣ် ဒီးအီၤ, ဒီးစံးဝဲဒၣ်, တၢ်ဘၣ်ဃးဒီးနၤဖဲအံၤအိၣ်မနုၤလဲၣ်, စီၤအ့ၤလံယၤဧၢ.

¹⁴ ဒီးစံးဝဲဒၣ်, ယသးဆူၣ်လၢယွၤတၢ်သုးမုၢ်အကစၢ်အ ဂီၢ်ဆူၣ်ဆူၣ်ကလဲာ်လီၤ. အဂ့ၢ်ဒ်အံၤ, ပှၤအံၣ်စရ့လးဖိ လဲၤသဒၣ်နတၢ်အၢၣ်လီၤအီလီၤ, မၤလီၤပှီၢ်ကွံာ်နတၢ် လုၢ်အလီၢ်, ဒီးမၤသံဝံတဖၣ်လၢနး, ဒီးအိၣ်လီၤတဲာ် ထဲယၤတဂၤဧိၤလီၤ. ဒီးအဝဲသ့ၣ်တဖၣ်န့ၣ် ဃုယသး သမူဒ်သိးအကဟံးထီၣ်ကွံာ်အီၤလီၤ.

¹⁵ ဒီးယွၤစံးဘၣ်အီၤ, လဲၤတၢ်, က့ၤပိာ်နကျဲဆူဒၤမ့ၤစ့း အပှၢ်မုၢ်ကနၢ, ဒီးတုၤနဟဲတုၤဒီး, ဖှူစီၤဃစ့လးလၢစီၤ ပၤလၢစူၤရံအဖီခိၣ်တက့ၢ်. ¹⁶ ဒီးစီၤနံၣ်ၡံၤအဖိခွါစီၤယ့ၤ ဟူန့ၣ်နဘၣ်ဖှူအီၤလၢစီၤပၤလၢအံၣ်စရ့လးအဖီခိၣ်, ဒီး စီၤၡၤဖးအဖိခွါစီၤအလံၤၡါဘၣ်ဃးဒီး အၤဘ့လးမဃိ လၤတဂၤန့ၣ်နဘၣ်ဖှူအီၤလၢဝံလၢနလီၢ်လီၤ.

¹⁷ ဒီးတၢ်ကမၤအသးလၢပှၤလၢအပူၤဖျဲးဒီး စီၤဃစ့လး အနးန့ၣ်စီၤယ့ၤဟူကမၤသံအီၤ, ဒီးပှၤလၢအပူၤဖျဲးဒီးစီၤ ယ့ၤဟူအနးန့ၣ်စီၤအလံၤၡါကမၤသံအီၤလီၤ.

¹⁸ ဒီးယပာ်လီၤတဲာ်ပှၤနွံကထိလၢ အံၣ်စရ့လးအကျါ လီၤ. ကယဲၢ်အခီၣ်လ့ၢ်ခိၣ်ခဲလၢာ်တချံးလီၤဘၣ်အသး လၢဘဧၤလးအမဲာ်ညါ, ဒီးကယဲၢ်အထးခိၣ်ခဲလၢာ်တ နၢမူဘၣ်အီၤဘၣ်လီၤ.

¹⁹ ဒီးဟးထီၣ်ဖဲန့ၣ်, ဒီးထံၣ်န့ၢ်စီၤၡၤဖးအဖိခွါစီၤအလံၤ ၡါလၢအထဲၣ်တၢ်ဒီးတၢ်တဆံခံဆိလၢအမဲာ်ညါ, ဒီးအ ဝဲဒၣ်အိၣ်ဒီးအတၢ်တဆံခံဆိတဆိ, ဒီးစီၤအ့ၤလံယၤ လဲၤပူၤကွံာ်အီၤ, ဒီးကွံာ်ဃီၤအယၣ်လၢအလိၤလီၤ. ²⁰ ဒီး အဝဲဒၣ်လဲၤသဒၣ်ဂီၤဖံးတဖၣ်, ဒီးဃ့ၢ်ပိာ်စီၤအ့ၤလံယၤ အခံ, ဒီးစံးဝဲဒၣ်, ဒုးနၢမူယၤလၢယမိၢ်ယပၢ်တက့ၢ်. ဒီး ယကပိာ်နခံလီၤ. ဒီးစံးဘၣ်အီၤ, က့ၤကဒါက့ၤတက့ၢ်. အဂ့ၢ်ဒ်အံၤ, ယမၤနၤလၢမနုၤလဲၣ်.

²¹ ဒီးက့ၤကဒါက့ၤလၢအအိၣ်, ဒီးဟံးန့ၢ်ဂီၤဖံးတဆိ, ဒီး မၤသံအီၤ, ခီဖျိအညၣ်လၢဂီၤဖံးအဃၢၤအဃိၢ်, ဒီးဟ့ၣ် လီၤပှၤဂီၢ်မုၢ်, ဒီးအဝဲသ့ၣ်အီၣ်ဝဲ, ဒီးဂဲၤဆၢထၢၣ်, ဒီးလူၤ ပိာ်စီၤအ့ၤလံယၤအခံ, ဒီးမၤအခ့အပှၤအတၢ်လီၤ.

၂၀

¹ ဒီးစူၤရံအစီၤပၤဘ့ၣ်ဟဒး ဒုးအိၣ်ဖှိၣ်အပှၤသုးမုၢ်ခဲ လၢာ်, ဒီးစီၤပၤသၢဆံဂၤအိၣ်ဒီးအီၤ, ဒီးကသ့ၣ်တဖၣ်, ဒီးလ့ၣ်ကဟၣ်တဖၣ်န့ၣ်လီၤ. ဒီးလဲၤထီၣ်, ဒီးကဝီၤဃာ် ၡၤမရံ, ဒီးဒုးတၢ်ဒီးအီၤလီၤ.

² ဒီးမၢလီၤကလူးတဖၣ်ဆူ အံၣ်စရ့လးအစီၤပၤအၤ ဃာ်အအိၣ်လၢဝ့ၢ်ပူၤ, ဒီးစံးဘၣ်အီၤ, စီၤဘ့ၣ်ဟဒးစံးဒ် အံၤ, ³ နကျိၣ်နစ့, ဒီးနထူနလွဲမ့ၢ်ယတၢ်, ဒီးနဖိနမါ, ဒီး နဖိနလံၤအဂ့ၤတဖၣ်မ့ၢ်ယတၢ်လီၤ.

⁴ ဒီးအံၣ်စရ့လးအစီၤပၤစံးဆၢဝဲဒၣ်, ဒီးစံး, ယကစၢ်စီၤ ပၤဧၢ, ဒ်နကလုၢ်အသိးန့ၣ်ယဲဒၣ်အံၤယမ့ၢ်နတၢ်ဒီးက ယဲၢ်တၢ်လၢအိၣ်ဒီးယၤခဲလၢာ်လီၤ.

⁵ ဒီးကလူးတဖၣ်န့ၣ်ဟဲက့ၤကဒီး, ဒီးစံးဝဲဒၣ်, စီၤဘ့ၣ် ဟဒးစံးတၢ်ဒ်အံၤ, ဒီးစံးဝဲဒၣ်, ယမၢလီၤတၢ်ဆူနအိၣ်ဒီး စံးလၢနဘၣ်ဟ့ၣ်ယၤလၢနကျိၣ်နစ့, ဒီးနထူနလွဲ, ဒီးန ဖိနမါ, ဒီးနဖိနလံၤ, ⁶ ဒီးခဲဂီၤဆၢအလီၢ်ခဲအံၤ, ယကမၢ လီၤယခ့ယပှၤ, ဒီးကဃုတၢ်လၢနဟံၣ်ပူၤ, ဒီးလၢနခ့န ပှၤအဟံၣ်ပူၤ, ဒီးတၢ်ကမၤအသးလၢကယဲၢ်တၢ်အဘၣ် နမဲာ်တမံၤလၢ်လၢ်န့ၣ် ကပာ်ဝဲလၢနစုပူၤ, ဒီးစိာ်ထီၣ် ကွံာ်ဝဲလီၤ.

⁷ ဒီးအံၣ်စရ့လးအစီၤပၤကိးန့ၢ်ထံဧိၤကီၢ်ဧိၤ အသူၣ်က့ အသးပှၢ်ခဲလၢာ်ဒီးစံးဝဲဒၣ်, သ့ၣ်ညါလၢ်, ဒီးကွၢ်လၢအ ဝဲတဂၤအံၤဃုတၢ်အၢတက့ၢ်. အဂ့ၢ်ဒ်အံၤ, မၢလီၤတၢ်ဆူ ယအိၣ်လၢအကန့ၢ်ဘၣ်ယဖိယမါ, ဒီးယဖိယလံၤ, ဒီး ယကျိၣ်ယစ့, ဒီးယထူယလွဲ, ဒီးယတတြီဘၣ်အီၤဘၣ်.

⁸ ဒီးပှၤသူၣ်က့သးပှၢ်ခဲလၢာ်, ဒီးပှၤဂီၢ်မုၢ်ခဲလၢာ်စံးဘၣ် အီၤ, ဒိကနၣ်အကလုၢ်တဂ့ၤ. ဒီးအၢၣ်လီၤအီလီၤတၢ် တဂ့ၤ.

⁹ ဒီးစံးဘၣ်စီၤဘ့ၣ်ဟဒးအကလူးတဖၣ်, စံးဘၣ်ယက စၢ်စီၤပၤန့ၣ်, ကယဲၢ်တၢ်လၢနမၢလီၤတၢ်ဆူနခ့နပှၤအ အိၣ်လၢနဂီၢ်လၢအခီၣ်ထံးတဘျီ ခဲလၢာ်န့ၣ်ယမၤလီၤ. မ့မ့ၢ်တၢ်အံၤတမံၤန့ၣ်, ယမၤတသ့ဘၣ်. ဒီးကလူးတဖၣ် န့ၣ်ဟးထီၣ်ကွံာ်, ဒီးဟဲကဒီးဒီးတၢ်ကတိၤလီၤ.

¹⁰ ဒီးစီၤဘ့ၣ်ဟဒးမၢလီၤတၢ်ဆူအအိၣ်ဒီးစံးဝဲဒၣ်, ၡၤမ ရံအဟီၣ်ခိၣ်အကမူၣ်မ့ၢ်အါလၢ ကယဲၢ်ပှၤဂီၢ်မုၢ်ဖဲယ ခီၣ်ထံးလၢအတၢၤဒုၣ်အဂီၢ်ဒီး, မ်ကစၢ်တဖၣ်မၤယၤဒ် န့ၣ်ဒီးအါန့ၢ်အန့ၣ်တက့ၢ်.

¹¹ ဒီးအံၣ်စရ့လးအစီၤပၤစံးဆၢတၢ်ဒီးစံးဝဲဒၣ်, ပှၤလၢ အသိးထီၣ်အစုကဝဲၤန့ၣ်, မ်အသုတပာ်ကဖၢလၢအသး ဒ်ပှၤလၢအဘ့ၣ်ကွံာ်အီၤအသိးန့ၣ်တဂ့ၤ.

¹² ဒီးတုၤအနၢ်ဟူတၢ်ကတိၤန့ၣ်ဒီး, တၢ်မၤအသးလၢအ ဝဲဒၣ်အီတၢ်, အဝဲဒၣ်ဒီးစီၤပၤတဖၣ်လၢအဒဲပူၤ, ဒီးစံး ဘၣ်အခ့အပှၤ, ကတီၤထီၣ်သုသးတက့ၢ်. ဒီးကတီၤ ထီၣ်အသးထီဒါဝ့ၢ်န့ၣ်လီၤ.

¹³ ဒီးကွၢ်ကွၢ်, ဝံတဂၤဟဲဆူအံၣ်စရ့လးအစီၤပၤအၤဃာ် အအိၣ်, ဒီးစံးဝဲဒၣ်, ယွၤစံးဝဲဒ်အံၤ, ပှၤဂီၢ်မုၢ်ခဲလၢာ်အံၤ နထံၣ်ဘၣ်လံဧါ. ကွၢ်ကွၢ်, ယကဟ့ၣ်လီၤကွံာ်အီၤလၢ နစုပူၤလၢမုၢ်မဆါတနံၤအံၤ, ဒီးနကသ့ၣ်ညါလၢယမ့ၢ် ယွၤလီၤ.

¹⁴ ဒီးစီၤအၤဃာ်စံးဝဲဒၣ်, လၢမတၤတဂၤလဲၣ်. ဒီးစံးဝဲ ဒၣ်, ယွၤစံးဝဲဒ်အံၤ, လၢထံဧိၤကီၢ်ဧိၤပဒိၣ်ဖးဒိၣ်တဖၣ် အပှၤဖိၣ်သၣ်ခွါလီၤ. ဒီးစံးဝဲဒၣ်, မ့ၢ်မတၤကကတဲာ် ကတီၤ ထီၣ်တၢ်ဒုးသုးန့ၣ်တဂၤလဲၣ်. ဒီးစံးဝဲဒၣ်, နၤလီၤ.

¹⁵ ဒီးဂံၢ်ထံဧိၤကီၢ်ဧိၤအပဒိၣ်ဖးဒိၣ်တဖၣ် အပှၤဖိၣ်သၣ် ခွါ, ဒီးအိၣ်ဝဲခံကယၤသၢဆံဂၤ, ဒီးလၢခံက့ၤဒီး, ဂံၢ်ပှၤဂီၢ် မုၢ်ခဲလၢာ်, ကယဲၢ်ပှၤအံၣ်စရ့လးဖိ, ဒီးအိၣ်ဝဲပှၤနွံကထိ လီၤ.

¹⁶ ဒီးမုၢ်ထူၣ်န့ၣ်ဟးထီၣ်ဝဲ, ဒီးစီၤဘ့ၣ်ဟဒးအီမူၤအသး လၢဒဲပူၤ, အဝဲဒၣ်ဒီးစီၤပၤတဖၣ်, စီၤပၤသၢဆံခံဂၤလၢ အမၤစၢၤအီၤလီၤ.

¹⁷ ဒီးကီၢ်ပဒိၣ်ဖးဒိၣ်တဖၣ် အပှၤဖိၣ်သၣ်ခွါဟးထီၣ်ဆိ, ဒီးစီၤဘ့ၣ်ဟဒးမၢလီၤတၢ်, ဒီးတၢ်ဒုးနဲၣ်အီၤ, ဒီးစံးဝဲဒၣ်, ပှၤကညီတဖၣ်ဟဲထီၣ်လၢၡၤမရံအပူၤလီၤ.

¹⁸ ဒီးစံးဝဲဒၣ်, မ့ၢ်ဟဲလၢတၢ်ဃူတၢ်ဖိးအဂီၢ်ဒီး, ဖီၣ်န့ၢ်မူ ဒံးအီၤတက့ၢ်.

¹⁹ ဒီးကီၢ်အပဒိၣ်ဖးဒိၣ်တဖၣ် အပှၤဖိၣ်သၣ်ခွါဟဲထီၣ် လၢဝ့ၢ်ပူၤ, ဒီးပှၤသုးမုၢ်လၢအပိာ်အခံလီၤ. ²⁰ ဒီးမၤသံ တဂၤအပှၤကညီတဂၤ, တဂၤအပှၤကညီတဂၤ, ဒီးပှၤစူၤ ရံဖိဃ့ၢ်ဝဲ, ဒီးအံၣ်စရ့လးလူၤအီၤ, ဒီးစူၤရံအစီၤပၤဘ့ၣ် ဟဒးပူၤဖျဲးဝဲလၢ ကသ့ၣ်လိၤအိၣ်ဒီးပှၤကသ့ၣ်သုးဖိတ ဖၣ်လီၤ.

²¹ ဒီးအံၣ်စရ့လးအစီၤပၤလဲၤထီၣ်ဝဲ, ဒီးကျီကွံာ်ကသ့ၣ်, ဒီးလ့ၣ်ကဟၣ်, ဒီးကျီကွံာ်ပှၤစူၤရံဖိလၢ တၢ်ကျီကွံာ်ဖး ဒိၣ်လီၤ.

²² ဒီးဝံတဂၤန့ၣ် ဟဲဝဲဆူအံၣ်စရ့လးအစီၤပၤအအိၣ်, ဒီး စံးဘၣ်အီၤ, လဲၤမၤဆူၣ်ထီၣ်နသး, ဒီးသ့ၣ်ညါ, ဒီးကွၢ် တၢ်လၢနမၤတၢ်တဖၣ်န့ၣ်တက့ၢ်. အဂ့ၢ်ဒ်အံၤ, တုၤနံၣ် ဆၢအလီၢ်ဒီး, စူၤရံအစီၤပၤကဟဲထီဒါကဒီးနၤလီၤ.

²³ ဒီးစူၤရံအီၤပၤအခ့အပှၤစံးဘၣ်အီၤ, အဝဲသ့ၣ်တဖၣ် အကစၢ်တဖၣ်န့ၣ် မ့ၢ်ကစၢၢ်ကလိအကစၢ်လီၤ. မၤသး ဒ်န့ၣ်ဒီးဆူၣ်န့ၢ်ပှၤတက့ၢ်လီၤ. ဒီးမ်ပဒုးသုးဒီးအီၤလၢ တၢ်ပျီပူၤတက့ၢ်. မ့ၢ်မးပကဆူၣ်န့ၢ်အီၤတက့ၢ်လီၤ. ²⁴ ဒီး မၤတၢ်အံၤ, သုးကွံာ်စီၤပၤ, တဂၤလၢအလီၢ်ဒၣ်ဝဲ, တဂၤ လၢအလီၢ်ဒၣ်ဝဲ, ဒီးပာ်သုးဖိအခိၣ်လၢအလီၢ်န့ၣ်တ က့ၢ်. ²⁵ ဒီးဂံၢ်န့ၢ်ပှၤသုးမုၢ်ပှဲၤသိးသိးဒီးပှၤသုးမုၢ်လၢအ လီၤဃံၤန့ၣ်လၢနဂီၢ်တက့ၢ်. ကသ့ၣ်တဒုလၢကသ့ၣ် တဒုအလီၢ်, ဒီးလ့ၣ်ကဟၣ်တဆိလၢလ့ၣ်ကဟၣ်တ ဆိအလီၢ်, ဒီးပကဒုးတၢ်ဒီးအီၤလၢတၢ်ပျီပူၤလီၤ. မ့ၢ်မး ပကဆူၣ်န့ၢ်အီၤတက့ၢ်လီၤ. ဒီးဒိကနၣ်အကလုၢ်, ဒီးမၤ ဝဲဒ်န့ၣ်လီၤ.

²⁶ ဒီးတုၤနံၣ်ဆၢအလီၢ်ဒီး, တၢ်မၤအသးလၢစီၤဘ့ၣ်ဟ ဒးဂံၢ်ပှၤစူၤရံဖိ, ဒီးလဲၤဝဲဆူအဖ့းဒ်သိးအကဒုးတၢ်ဒီး အံၣ်စရ့လးလီၤ. ²⁷ ဒီးပှၤအံၣ်စရ့လးဖိဘၣ်တၢ်ဂံၢ်အီၤ, ဒီးအိၣ်ဝဲခဲလၢာ်, ဒီးလဲၤထီဒါအီၤ, ဒီးပှၤအံၣ်စရ့လးဖိ သူၣ်ဒဲလၢအမဲာ်ညါ ဒ်မဲာ်တဲးလဲးဖိခံဖုဆံးကိာ်အသိး န့ၣ်, ဒီးပှၤစူၤရံဖိမၤပှဲၤကီၢ်ပူၤန့ၣ်လီၤ.

²⁸ ဒီးယွၤအပှၤကညီတဂၤဟဲဝဲ, ဒီးကတိၤတၢ်ဒီးအံၣ်စ ရ့လးအစီၤပၤ, ဒီးစံးဝဲဒၣ်, ယွၤစံးဒ်အံၤ, မ့ၢ်ပှၤစူၤရံဖိစံး တ့ၢ်, ယွၤမ့ၢ်ကစၢၢ်ကလိအကစၢ်, ဒီးတမ့ၢ်ဘၣ်ပျီအက စၢ်ဘၣ်ဒီး, ယကဟ့ၣ်လီၤပှၤဂီၢ်မုၢ်ဖးဒိၣ်အံၤလၢနစုပူၤ လီၤ. သုကသ့ၣ်ညါလၢယမ့ၢ်ယွၤလီၤ.

²⁹ ဒီးသူၣ်ဒဲသဃီၤလိာ်အသးနွံနံၤ, ဒီးနွံနံၤတနံၤန့ၣ်သုး ဘူးဃီၤလိာ်အသး, ဒီးဒုးလိာ်အသးလီၤ. ဒီးပှၤအံၣ်စရ့ လးဖိမၤသံပှၤစူၤရံဖိ, ပှၤခီၣ်သုးဖိတကလီၤလၢမုၢ်တနံၤ အတီၢ်ပူၤန့ၣ်လီၤ. ³⁰ ဒီးပှၤအိၣ်လီၤတဲာ်တဖၣ်န့ၣ်ဃ့ၢ်ဝဲ ဆူအဖ့း, ဆူဝ့ၢ်ပူၤ, ဒီးတၢ်ဒူၣ်တဒူၣ်လီၤပှီၢ်ဝဲလၢပှၤခံက လးနွံကထိအဖီခိၣ် လၢအအိၣ်လီၤတဲာ်န့ၣ်လီၤ. ဒီး စီၤဘ့ၣ်ဟဒးဃ့ၢ်ထီၣ်ကွံာ်, ဒီးဟဲနုာ်လၢဝ့ၢ်ပူၤ ဆူဒၢး လၢညါခီတဒၢးအပူၤလီၤ.

³¹ ဒီးအခ့အပှၤစံးဘၣ်အီၤ, ကွၢ်ကွၢ်, ပနၢ်ဟူလၢအံၣ်စရ့ လးအပှၤဟံၣ်ဖိအစီၤပၤတဖၣ် မ့ၢ်စီၤပၤလၢအသးက ညီၤတၢ်လီၤ. ဒုးပာ်ပှၤလၢထၢၣ်တၢ်ကံးညာ်လၢပယီၢ် ဒ့, ဒီးပျံၤလၢပခိၣ်, ဒီးဒုးလဲၤထီၣ်ပှၤဆူအံၣ်စရ့လးအစီၤ ပၤအအိၣ်တက့ၢ်. ဘၣ်တဘၣ်ကဒုးမူဒံးနသးသမူလီၤ.

³² ဒီးကံၢ်တူာ်အယီၢ်ဒ့လၢထၢၣ်တၢ်ကံးညာ်, ဒီးပာ်ပျံၤ လၢအခိၣ်, ဒီးဟဲဝဲဆူအံၣ်စရ့လးအစီၤပၤအအိၣ်, ဒီးစံး ဝဲဒၣ်, နခ့နပှၤစီၤဘ့ၣ်ဟဒးစံးဝဲဒၣ်, မ်နဒုးမူဒံးယၤတ က့ၢ်. ဒီးစံးဝဲဒၣ်, မ့ၢ်အမူဒံးစ့ၢ်ကီးဧါ. မ့ၢ်ဝဲလၢယဒီပုၢ် ဝဲၢ်လီၤ.

³³ ဒီးပှၤကညီတဖၣ်န့ၣ် ကနၣ်ထံအတၢ်ကတိၤ, ဒီးဖီၣ် ဃာ်ဝဲပစုၢ်ပတ့ၤ, ဒီးစံးဝဲဒၣ်, နဒီပုၢ်ဝဲၢ်စီၤဘ့ၣ်ဟဒးလီၤ. ဒီးစံးဝဲဒၣ်, လဲၤ, ဟဲစိာ်အီၤတက့ၢ်. ဒီးစီၤဘ့ၣ်ဟဒးဟဲ ထီၣ်ဆူအအိၣ်, ဒီးအဝဲဒၣ်ဒုးဟဲထီၣ်အီၤဆူလ့ၣ်ကဟၣ် အပူၤလီၤ.

³⁴ ဒီးစီၤဘ့ၣ်ဟဒးစံးဘၣ်အီၤ, ဝ့ၢ်တဖၣ်လၢယပၢ်ဟံးန့ၢ် လၢနပၢ်န့ၣ်ယကဟ့ၣ်က့ၤ, ဒီးနကမၤကျဲဧိၤကပူၤဧိၤ လၢဒၤမ့ၤစ့းအပူၤ ဒ်ယပၢ်မၤဝဲလၢၡၤမရံအပူၤအသိးန့ၣ် လီၤ. ဒီးစံးဝဲဒၣ်, ယကပျၢ်နၤဒီးတၢ်အၢၣ်လီၤအီလီၤအံၤ လီၤ. ဒီးအၢၣ်လီၤအီလီၤဒီးအီၤ, ဒီးပျၢ်အီၤလီၤ.

³⁵ ဒီးပှၤလၢဝံအဖိခွါအကျါတဂၤ စံးဘၣ်ပှၤလၢအဃၢၤ တဂၤလၢယွၤအကလုၢ်, တီၢ်လၢ်ယၤတက့ၢ်. ဒီးပှၤတ ဂၤတီၢ်အီၤန့ၣ်ဂ့ၢ်လိာ်ဝဲလီၤ.

³⁶ ဒီးစံးဘၣ်အီၤ, မ့ၢ်နတဒိကနၣ်ဘၣ်ယွၤအကလုၢ်ဘၣ် ဒီး, ကွၢ်ကွၢ်, တုၤနဟးထီၣ်ကွံာ်လၢယအိၣ်ဒီး, ခ့ယုၢ်တ ဒုကမၤသံနၤလီၤ. ဒီးတုၤအဟးထီၣ်ကွံာ်လၢအအိၣ်ဒီး, ခ့ယုၢ်တဒုထံၣ်န့ၢ်အီၤ, ဒီးမၤသံအီၤလီၤ.

³⁷ ဒီးထံၣ်န့ၢ်ပှၤတဂၤဒၣ်, ဒီးစံးဝဲဒၣ်, တီၢ်လၢ်ယၤတ က့ၢ်. ဒီးပှၤတဂၤန့ၣ်တီၢ်အီၤ, ဒီးတီၢ်နုာ်ဝဲလီၤ.

³⁸ ဒီးဝံတဂၤန့ၣ်ဟးထီၣ်ကွံာ်, ဒီးအိၣ်ခိးစီၤပၤလၢကျဲအ ဃၢၤ, ဒီးမၤလီၤဆီအသးအိၣ်ဒီးဖၣ်ဆါလၢအမဲာ်လိၤ လီၤ.

³⁹ ဒီးတုၤစီၤပၤလဲၤပူၤဒီး, ကိးထီၣ်ဝဲဆူစီၤပၤ, ဒီးစံးဝဲဒၣ်, နခ့နပှၤလဲၤဝဲဆူတၢ်ဒုးသုးအကျါ, ဒီးကွၢ်ကွၢ်, ပှၤတဂၤ ဃၣ်အသး, ဒီးဟဲစိာ်ပှၤတဂၤဆူယအိၣ်, ဒီးစံးဝဲဒၣ်, ပၢၤ ပှၤတဂၤအံၤတက့ၢ်. မ့ၢ်တအိၣ်ဘၣ်သပှၢ်တၢၢ်ဒီး, နသး သမူဘၣ်အိၣ်လၢအသးသမူအလီၢ်လီၤ. မ့တမ့ၢ်ဘၣ်ဒ် န့ၣ်ဒီးနဘၣ်လိးစ့တကံကၢ်လီၤ.

⁴⁰ ဒီးနခ့နပှၤမၤတၢ်ဖဲအံၤဖဲနုၤအဖၢဖုၢ်ဒီး, အဝဲဒၣ်တ အိၣ်ဘၣ်လီၤ. ဒီးအံၣ်စရ့လးအစီၤပၤစံးဘၣ်အီၤ, နတၢ် စံၣ်ညီၣ်ကအိၣ်ဒ်န့ၣ်လီၤ. နစံၣ်ညီၣ်လီၤနသးနကစၢ် ဒၣ်နဲလီၤ.

⁴¹ ဒီးအဝဲဒၣ်မၤချ့ချ့, ဒီးတြူာ်ကွံာ်ဖၣ်ဆါ လၢအမဲာ် လိၤ, ဒီးအံၣ်စရ့လးအစီၤပၤကွၢ်နီၣ်အီၤလၢ အမ့ၢ်လၢဝံ တဖၣ်အကျါလီၤ.

⁴² ဒီးစံးဘၣ်အီၤ, ယွၤစံးဝဲဒ်အံၤ, မ့ၢ်နပျၢ်ပှၤတဂၤလၢ ယပာ်လီၤ လၢတၢ်ဟးဂီၤကွံာ်အဂီၢ်ဒီး, နသးသမူက အိၣ်လၢအသးသမူအလီၢ်, ဒီးနပှၤဂီၢ်မုၢ်လၢအဝဲဒၣ်အ ပှၤဂီၢ်မုၢ်အလီၢ်လီၤ.

⁴³ ဒီးအံၣ်စရ့လးအစီၤပၤလဲၤဝဲဆူအဟံၣ်ဒီး အမဲာ်ထီၣ် ဂီၤ, ဒီးအသးဒိၣ်ထီၣ်, ဒီးဟဲဝဲဆူၡၤမရံလီၤ.

၂၁

¹ ဒီးလၢတၢ်တဖၣ်န့ၣ်အလီၢ်ခံ တၢ်မၤအသးလၢပှၤယံး စရ့လးဖိစီၤနၤဘိးအိၣ်ဒီးစပံးအလီၢ်လၢ ယံးစရ့လးအ ပူၤ, အိၣ်ဘူးဒီးၡၤမရံအစီၤပၤစီၤအၤဃာ်အနူၢ်လီၤ.

² ဒီးစီၤအၤဃာ်ကတိၤတၢ်ဒီးစီၤနၤဘိးဒီးစံးဝဲဒၣ်, ဟ့ၣ် ယၤလၢနစပံးအလီၢ်, ဒ်သိးအကဲထီၣ်တၢ်ဒိးတၢ်လၣ် အလီၢ်လၢယဂီၢ်တက့ၢ်, အဂ့ၢ်ဒ်အံၤ, အိၣ်ဘူးဒီးယဟံၣ် လီၤ. ဒီးယကဟ့ၣ်လီၤနၤလၢ စပံးအလီၢ်တလီၢ်ဂ့ၤန့ၢ် အန့ၣ်တက့ၢ်လီၤ. မ့ၢ်ဂ့ၤလၢနမဲာ်ဒီး, ယကဟ့ၣ်လီၤ နၤလၢစ့ဖဲအကြၢးလီၤ.

³ ဒီးစီၤနၤဘိးစံးဘၣ်စီၤအၤဃာ်, မ်ယွၤအသုတဒုးဟ့ၣ် ယၤလၢယပၢ်အဟ့ၣ်သါတၢ်လၢနၤတဂ့ၤ.

⁴ ဒီးစီၤအၤဃာ်ဟဲဆူအဟံၣ်လၢအမဲာ်ထီၣ်ဂီၤ, ဒီးအ သးဒိၣ်ထီၣ်လၢတၢ်ကတိၤလၢ ပှၤယံးစရ့လးဖိစီၤနၤ ဘိးကတိၤတၢ်ဒီးအီၤအဃိလီၤ. အဂ့ၢ်ဒ်အံၤ, စံးဝဲဒၣ်, ယ တဟ့ၣ်နၤလၢယပၢ်အတၢ်ဟ့ၣ်သါဘၣ်လီၤ. ဒီးမံလီၤ လၢအလီၢ်မံပူၤ, ဒီးဃၣ်ကဒါကွံာ်အမဲာ်, ဒီးအီၣ်တၢ်န့ၣ် အသးတအိၣ်ဘၣ်.

⁵ ဒီးအမါနီၢ်အံၤစ့ဘ့ၤလးဟဲဆူအအိၣ်, ဒီးစံးဘၣ်အီၤ, နသးတမုာ်ဘၣ်, ဒီးနတအီၣ်ဘၣ်တၢ်န့ၣ်မ့ၢ်အဘၣ်မ နုၤလဲၣ်.

⁶ ဒီးစံးဘၣ်အီၤ, မ့ၢ်ယကတိၤတၢ်ဒီးပှၤယံးစရ့လးဖိစီၤ နၤဘိး, ဒီးယစံးလၢအီၤ, ဟ့ၣ်ယၤလၢနစပံးအလီၢ်လၢ စ့တက့ၢ်. မ့တမ့ၢ်ဘၣ်ဒ်န့ၣ်ဒီး ယကဟ့ၣ်လီၤနၤလၢ စပံးအလီၢ်တလီၢ်လၢအဂီၢ်လီၤ. ဒီးစံးဝဲဒၣ်, ယတဟ့ၣ် ဘၣ်နၤလၢယစပံးအလီၢ်ဘၣ်.

⁷ ဒီးအမါနီၢ်အံၤစ့ဘ့ၤလးစံးဘၣ်အီၤ, ခဲကနံၣ်အံၤနပၢ အံၣ်စရ့လးအဘီအမုၢ်စ့ၢ်ကီးဧါ. ဂဲၤဆၢထၢၣ်အီၣ်တၢ်, ဒီးပာ်နသးမုာ်မုာ်တက့ၢ်. ယကဟ့ၣ်နၤလၢပှၤယံးစရ့ ဖိစီးနၤဘိးအစပံးအလီၢ်န့ၣ်လီၤ.

⁸ ဒီးကွဲးလံာ်လၢစီၤအၤဃာ်အမံၤ, ဒီးစဲဃာ်ပနီၣ်အီၤ လၢအနီၣ်စဲဃာ်ပနီၣ်, ဒီးဟ့ၣ်ယုၢ်လံာ်န့ၣ်ဆူပှၤသူၣ် က့သးပှၢ်, ဒီးပဒိၣ်တဖၣ်လၢအအိၣ်ဝဲလၢအဝ့ၢ်ပူၤဒီး စီၤနၤဘိးလီၤ.

⁹ ဒီးကွဲးဝဲလၢလံာ်ပူၤ, ဒီးစံးဝဲဒၣ်, ကိးထီၣ်တၢ်ဒုၣ်တၢ် အီၣ်, ဒီးပာ်ထီၣ်ထီစီၤနၤဘိးလၢပှၤဂီၢ်မုၢ်အကျါ, ¹⁰ ဒီး ပာ်ပှၤဘလးယဧၤလးဖိခံဂၤလၢအမဲာ်ညါ ဒ်သိးအက အုၣ်အသးထီဒါအီၤ, ဒီးစံး, နဒုၣ်ဒွဲၣ်ယွၤဒီးစီၤပၤလီၤ န့ၣ်, ဒီးစိာ်ထီၣ်ကွံာ်အီၤ, ဒီးကွံာ်အီၤလၢလၢၢ်တုၤအသံ တက့ၢ်.

¹¹ ဒီးဝ့ၢ်အပှၤကညီအပှၤသူၣ်က့သးပှၢ်, ဒီးပဒိၣ်တဖၣ် လၢပှၤဝ့ၢ်ဖိအကျါန့ၣ်မၤဝဲ ဒ်နီၢ်အံၤစ့ဘ့ၤလးမၢလီၤတၢ် အသိး, ဒ်အကွဲးဝဲလၢလံာ်ပူၤလၢအဟ့ၣ်ယုၢ်ဝဲအသိး န့ၣ်လီၤ. ¹² ဒီးကိးထီၣ်တၢ်ဒုၣ်တၢ်အီၣ်, ဒီးပာ်ထီၣ်ထီ စီၤနၤဘိးလၢပှၤဂီၢ်မုၢ်အကျါန့ၣ်လီၤ.

¹³ ဒီးပှၤဘလးယဧၤလးဖိခံဂၤ ဟဲဆ့ၣ်နီၤလၢအမဲာ်ညါ, ဒီးပှၤဘလးယဧၤလးဖိအုၣ်အသးထီဒါအီၤ, ထီဒါစီၤ နၤဘိးလၢပှၤဂီၢ်မုၢ်အမဲာ်ညါ, ဒီးစံးဝဲဒၣ်, စီၤနၤဘိးဒုၣ် ဒွဲၣ်ယွၤ, ဒီးစီၤပၤလီၤ. ဒီးပှၤစိာ်ထီၣ်ကွံာ်အီၤလၢဝ့ၢ်အ ချၢလၢခိ, ဒီးကွံာ်အီၤလၢလၢၢ်တုၤအသံလီၤ.

¹⁴ ဒီးမၢလီၤတၢ်ဆူနီၢ်အံၤစ့ဘ့ၤလးအအိၣ်, ဒီးစံးဝဲဒၣ်, စီၤနၤဘိးဘၣ်တၢ်ကွံာ်အီၤလၢလၢၢ်, ဒီးသံဝဲလီၤ.

¹⁵ ဒီးတုၤနီၢ်အံၤစ့ဘ့ၤလးနၢ်ဟူဝဲလၢ စီၤနၤဘိးဘၣ်တၢ် ကွံာ်အီၤလၢလၢၢ်, ဒီးသံဝဲဒီး, တၢ်မၤအသးလၢနီၢ်အံၤစ့ ဘ့ၤလးစံးဘၣ်စီၤအၤဃာ်, ဂဲၤဆၢထၢၣ်မၤန့ၢ်ပှၤယံးစ ရ့လးဖိ စီၤနၤဘိးအစပံးလီၢ်လၢ အတအၢၣ်လီၤဟ့ၣ် နၤဘၣ်လၢစ့အဃိန့ၣ်တက့ၢ်. အဂ့ၢ်ဒ်အံၤ, စီၤနၤဘိးမူဝဲ တမ့ၢ်ဘၣ်, မ့ၢ်အသံလီၤ.

¹⁶ ဒီးတုၤစီၤအၤဃာ်နၢ်ဟူဝဲလၢစီၤနၤဘိးသံဝဲဒီး, တၢ်မၤ အသးလၢစီၤအၤဃာ်ဂဲၤဆၢထၢၣ် ဒ်သိးအကလဲၤလီၤ ဆူပှၤယံးစရ့လးဖိစီၤနၤဘိးအစပံးလီၢ်, ဒ်သိးအကမၤ န့ၢ်အီၤလီၤ.

¹⁷ ဒီးယွၤအကလုၢ်ဘၣ်ပှၤတံးၡဘးဖိစီၤအ့ၤလံယၤ, ဒီး စံးဝဲဒၣ်, ¹⁸ လဲၤလီၤသဂၢၢ်အံၣ်စရ့လးအစီၤပၤအၤဃာ် လၢၡၤမရံအပူၤန့ၣ်တက့ၢ်. ကွၢ်ကွၢ်, အိၣ်ဝဲလၢစီၤနၤဘိး အစပံးအလီၢ်ပူၤ, ဖဲအလဲၤလီၤမၤန့ၢ်အီၤလီၤ. ¹⁹ ဒီးန ဘၣ်ကတိၤတၢ်ဒီးအီၤ, ဒီးစံး, ယွၤစံးဒ်အံၤ, နမၤသံတၢ် ဒီး, မၤန့ၢ်တၢ်စ့ၢ်ကီးဧါ. ဒီးနဘၣ်ကတိၤတၢ်ဒီးအီၤဒီးစံး, ယွၤစံးဒ်အံၤ, ဖဲအလီၢ်ပူၤလၢထွံၣ်တဖၣ်လ့ၣ်စီၤနၤဘိး အသွံၣ်န့ၣ် ထွံၣ်တဖၣ်ကလ့ၣ်နသွံၣ်, နဝဲဒၣ်လဲာ်လီၤ.

²⁰ ဒီးစီၤအၤဃာ်စံးဝဲဒၣ်, နထံၣ်န့ၢ်ယၤဧါ, ယဒုၣ်ယ ဒါဧၢ. ဒီးစံးဝဲဒၣ်, ယထံၣ်န့ၢ်လီၤ. အဂ့ၢ်ဒ်အံၤ, နဆါကွံာ် နသးဒ်သိးနကမၤတၢ်အၢလၢယွၤအမဲာ်လီၤ. ²¹ ကွၢ်ကွၢ်, ယကဒုးဟဲဘၣ်နၤလၢတၢ်အၢ, ဒီးယကဟံးထီၣ်နစၢၤ နသွဲၣ်, ဒီးယကဒီၣ်တဲာ်စီၤအၤဃာ်လၢကယဲၢ်ပိာ်ခွါ, ဒီးပှၤလၢတၢ်ကးတံာ်ဃာ်အခံ, ဒီးပှၤလၢအအိၣ်လီၤ တဲာ်သဘျ့လၢအံၣ်စရ့လးအပူၤလီၤ. ²² ဒီးယကပာ်န ဟံၣ်ဒ်စီၤနဘးအဖိခွါ စီၤယၤရၤဘၣ်အဟံၣ်အသိးန့ၣ်, ဒီးဒ်စီၤအဃံယၤအဖိခွါစီၤဘါၡၤအဟံၣ်အသိး လၢတၢ် သးထီၣ်အလီၢ်အဃိ လၢနထိၣ်ဂဲၤယွၤအသးထီၣ်လၢ အီၤ, ဒီးဒုးမၤအံၣ်စရ့လးလၢတၢ်ဒဲးဘးန့ၣ်လီၤ.

²³ ဒီၤယွၤကတိၤတၢ်လၢနီၢ်အံၤစ့ဘ့ၤလးအဂ့ၢ်, ဒီးစံးဝဲ ဒၣ်, ထွံၣ်တဖၣ်ကအီၣ်နီၢ်အ့ၤစ့ဘ့ၤလးလၢယံးစရ့လး အခိၣ်ဒူအဃၢၤန့ၣ်လီၤ.

²⁴ ဒီးပှၤဘၣ်ဃးဒီးစီၤအၤဃာ် လၢအသံဝဲလၢဝ့ၢ်ပူၤန့ၣ် ထွံၣ်တဖၣ်ကအီၣ်ကွံာ်အီၤ, ဒီးပှၤလၢအသံဝဲလၢပှၢ်လၢ် ကျါန့ၣ်ထိၣ်ဧိၤလံၣ်ဧိၤလၢမူကပိာ်လိၤတဖၣ် ကအီၣ် ကွံာ်အီၤလီၤ.

²⁵ မ့ၢ်မးပှၤထဲသိးဒီးစီၤအၤဃာ်လၢ အဆါကွံာ်အသးဒ် သိးအကမၤတၢ်အၢလၢယွၤအမဲာ်, လၢအမါနီၢ်အံၤစ့ ဘ့ၤလးထိၣ်ဂဲၤအီၤန့ၣ်တအိၣ်ဘၣ်. ²⁶ ဒီးမၤတၢ်သးဘၣ် အၢဒိၣ်မးလၢအပိာ်တၢ်ဂီၤအခံ ဒ်ကယဲၢ်တၢ်အၢလၢပှၤ အမိၢ်ဖိမၤဝဲအသိးလၢယွၤဟီထီၣ်ကွံာ်အီၤလၢ ပှၤအံၣ် စရ့လးဖိအမဲာ်ညါလီၤ.

²⁷ ဒီးတုၤစီၤအၤဃာ်နၢ်ဟူတၢ်ကတိၤန့ၣ်ဒီး, တၢ်မၤအ သးလၢအဖှီဝဲအဆ့, ဒီးပာ်ထၢၣ်တၢ်ကံးညာ်လၢအညၣ် လိၤ, ဒီးလဲၤဝဲကဒုကဒုလီၤ.

²⁸ ဒီးယွၤအကလုၢ်ဘၣ်ပှၤတံးၡဘၤဖိ စီၤအ့ၤလံယၤဒီး စံးဝဲဒၣ်, ²⁹ နထံၣ်ဘၣ်လၢစီၤအၤဃာ်ဆီၣ်လီၤအသးလၢ ယမဲာ်ညါဒီး, ယတဒုးဟဲဘၣ်တၢ်အၢလၢအမုၢ်နံၤတ ဖၣ်အပူၤဘၣ်. လၢအဖိခွါအမုၢ်နံၤတဖၣ်န့ၣ် ယကဒုး ဟဲဘၣ်တၢ်အၢန့ၣ်လၢအဟံၣ်လီၤ.

၂၂

¹ ဒီးသၢနံၣ်အတီၢ်ပူၤန့ၣ် တၢ်ဒုးသုးတအိၣ်ဘၣ်လၢစူၤ ရံဒီးအံၣ်စရ့လးအဘၢၣ်စၢၤဘၣ်.

² ဒီးသၢနံၣ်တနံၣ်န့ၣ် တၢ်မၤအသးလၢယူဒၤအစီၤပၤ စီၤယဟိၡၤဖးဟဲလီၤဆူအံၣ်စရ့လးအစီၤပၤအအိၣ်လီၤ.

³ ဒီးအံၣ်စရ့လးအစီၤပၤစံးလၢအခ့အပှၤ, ရၤမိးလၢကံး လဧးမ့ၢ်ပတၢ်, ဒီးပအိၣ်ဃိကလာ်, ဒီးတဟံးန့ၢ်ဘၣ် အီၤလၢစူၤရံအစီၤပၤအစုပူၤန့ၣ်သုတသ့ၣ်ညါဘၣ်ဧါ.

⁴ ဒီးစံးလၢစီၤယဟိၡၤဖး, နကလဲၤဒုးတၢ်ဒီးယၤဆူရၤ မိးကံးလဧးန့ၣ်ဧါ. ဒီးစီၤယဟိၡၤဖးစံးဆၢအံၣ်စရ့လး အစီၤပၤ, ယဲဒၣ်အံၤယမၤသးဒ်နၤအသိးန့ၣ်, ယပှၤဂီၢ် မုၢ်ဒ်နပှၤဂီၢ်မုၢ်အသိးန့ၣ်, ယကသ့ၣ်ဒ်နကသ့ၣ်အသိး န့ၣ်လီၤ.

⁵ ဒီးစီၤယဟိၡၤဖးစံးဘၣ်အံၣ်စရ့လးအစီၤပၤ, သံကွၢ် လၢ်လၢယွၤအကလုၢ်အကထါ လၢမုၢ်မဆါတနံၤအံၤ တက့ၢ်.

⁶ ဒီးအံၣ်စရ့လးအစီၤပၤဒုးအိၣ်ဖှိၣ်ရိဖှိၣ်ဝံတဖၣ် ပှၤလွံၢ် ကယၤဃၣ်ဃၣ်, ဒီးစံးလၢအီၤ, ယဘၣ်လဲၤထီၣ်ဆူရၤ မိးကံးလဧးဒ်သိးယကဒုးတၢ်, ယဘၣ်အိၣ်လဲၣ်. ဒီးစံး ဝဲဒၣ်, လဲၤထီၣ်တက့ၢ်. အဂ့ၢ်ဒ်အံၤ, ယွၤကဟ့ၣ်လီၤ ကွံာ်အီၤလၢစီၤပၤအစုပူၤလီၤ.

⁷ ဒီးစီၤယဟိၡၤဖးစံးဝဲဒၣ်, ယွၤအဝံတအိၣ်လၢၤဘၣ်ဖဲ အံၤတဂၤဒ်သိးပကသံကွၢ်အီၤစ့ၢ်ကီးဧါ.

⁸ ဒီးအံၣ်စရ့လးအစီၤပၤစံးဘၣ်စီၤယဟိၡၤဖး, ပှၤလၢ ပကသံကွၢ်ယွၤလၢအီၤအိၣ်ဒံးတဂၤ, စီၤယံးမလၤအဖိ ခွါစီၤမံၤကါယၤလီၤ. ဘၣ်ဆၣ်ဒီးယသးဟ့အီၤလီၤ. အ ဂ့ၢ်ဒ်အံၤ, ကတိၤတၢ်လၢဝံအကျိာ်လၢတၢ်ဂ့ၤလၢယဂ့ၢ် ယကျိၤတမ့ၢ်ဘၣ်, မ့ၢ်တၢ်အၢလီၤ. ဒီးစီၤယဟိၡၤဖးစံးဝဲ ဒၣ်, မ်စီၤပၤအသုတစံးဒ်န့ၣ်တဂ့ၤ.

⁹ ဒီးအံၣ်စရ့လးအစီၤပၤကိးန့ၢ်ပှၤဒ့ဒံၣ်တဂၤ, ဒီးစံးဝဲ ဒၣ်, ဒုးဟဲစီၤယံးမလၤအဖိခွါစီၤမံၤကါယၤချ့ချ့တက့ၢ်.

¹⁰ ဒီးအံၣ်စရ့လးအစီၤပၤ ဒီးယဟိၡဖးကၤတ့ၢ်အယၣ် လၢတၢ်အလီၢ်ဖဲတၢ်လဲၤနုာ်ဆူၡၤမရံအပဲတရီပူၤ, ဒီး ဆ့ၣ်နီၤတဂၤလၢအလီၢ်ပစိာ်, တဂၤလၢအလီၢ်ပစိာ်န့ၣ်, ဒီးဝံခဲလၢာ်ကတိၤတၢ်လၢဝံအကျိာ်လၢအမဲာ်ညါလီၤ.

¹¹ ဒီးစီၤကနၤနါအဖိခွါစီၤစံးဒကံယၤတဂၤ တ့နၢၤထး တဖၣ်လၢအဂီၢ်, ဒီးစံးဝဲဒၣ်, ယွၤစံးဒ်အံၤ, နကဘျၢၣ် ပှၤစူၤရံဖိလၢအဝဲအံၤ, တုၤနမၤလၢာ်ကွံာ်အီၤလီၤ. ¹² ဒီး ဝံခဲလၢာ်န့ၣ်ကတိၤတၢ်လၢဝံအကျိာ် ဒ်န့ၣ်အသိး, ဒီးစံး ဝဲဒၣ်, လဲၤထီၣ်ဆူရၤမိးကံးလဧး, ဒီးဘီၣ်ထီၣ်ညီထီၣ် တက့ၢ်. အဂ့ၢ်ဒ်အံၤ, ယွၤကဟ့ၣ်လီၤကွံာ်အီၤလၢစီၤပၤ အစုပူၤလီၤ.

¹³ ဒီးကလူးတဂၤန့ၣ်လၢအလဲၤကိးန့ၢ် စီၤမံၤကါယၤက တိၤတၢ်ဒီးအီၤ, ဒီးစံးဝဲဒၣ်, ကွၢ်ကွၢ်, ဝံတဖၣ်အတၢ်က တိၤမ့ၢ်တၢ်ဂ့ၤလၢစီၤပၤအဂ့ၢ် လၢအထးခိၣ်တပူၤဃီ လီၤ. မ်နတၢ်ကတိၤကမၤသးဒ်ပှၤလၢအကျါတဂၤအ တၢ်ကတိၤအသိးန့ၣ်, ဒီးကတိၤတၢ်ဂ့ၤတက့ၢ်.

¹⁴ ဒီးစီၤမံၤကါယၤစံးဝဲဒၣ်, ယွၤမူဝဲန့ၣ်, တၢ်လၢယွၤစံး ဘၣ်ယၤန့ၣ်ယကတိၤတၢ်န့ၣ်လီၤ.

¹⁵ ဒီးဟဲဝဲဆူစီၤပၤအအိၣ်, ဒီးစီၤပၤစံးဝဲ, စီၤမံၤကါယၤ ဧၢ, ပဘၣ်လဲၤထီၣ်ထီဒါရၤမိးကံးလဧး ဒ်သိးပကဒုး သုး, ပဘၣ်အိၣ်လဲၣ်. ဒီးစံးဘၣ်အီၤ, လဲၤထီၣ်ဒီးဘီၣ် ထီၣ်ညီထီၣ်တက့ၢ်. အဂ့ၢ်ဒ်အံၤ, ယွၤကဟ့ၣ်လီၤကွံာ်ဝဲ ဆူစီၤပၤအစုပူၤလီၤ.

¹⁶ ဒီးစီၤပၤစံးဘၣ်အီၤ, ဒ်သိးနကစံးဘၣ်ယၤထဲတၢ်မ့ၢ် တၢ်တီလၢယွၤအမံၤန့ၣ်ယဘၣ်ဒုးဆိၣ်နၤပှံၤဘျီလဲၣ်.

¹⁷ ဒီးစံးဝဲဒၣ်, ယထံၣ်ဘၣ်အံၣ်စရ့လးခဲလၢာ်လီၤပြံလီၤ ပြါလၢကစၢၢ်လိၤ, ဒ်သိလၢအပှၤကွၢ်သိတအိၣ်ဘၣ်အ သိးန့ၣ်, ဒီးယွၤစံးဝဲဒၣ်, အဝဲသ့ၣ်တဖၣ်အံၤအကစၢ် တအိၣ်ဘၣ်. မ်ပှၤက့ၤက့ၤတဂၤဆူအဟံၣ်ဒၣ်ဝဲ, တဂၤ ဆူအဟံၣ်ဒၣ်ဝဲ, မုာ်မုာ်တက့ၢ်.

¹⁸ ဒီးအံၣ်စရ့လးအစီၤပၤစံးဘၣ် စီၤယဟိၡၤဖး, ယစံး ဘၣ်နၤလၢအတကတိၤဘၣ်လၢ ဝံအကျိာ်လၢတၢ်ဂ့ၤ လၢယဂ့ၢ်ဘၣ်, မ့ၢ်လၢတၢ်အၢတခီ, တမ့ၢ်ဘၣ်ဧါ.

¹⁹ ဒီးစံးဝဲဒၣ်, မၤသးဒ်န့ၣ်ဒီး ဒိကနၣ်ယွၤအကလုၢ်တ က့ၢ်. ယထံၣ်ဘၣ်ယွၤဆ့ၣ်နီၤလၢအလီၢ်ပစိာ်, ဒီးမူခိၣ် အသုးမုၢ်ခဲလၢာ်ဆၢထၢၣ်လၢအဃၢၤ, လၢအစုထွဲ, ဒီး လၢအစုစ့ၣ်လီၤ.

²⁰ ဒီးယွၤစံးဝဲဒၣ်, မ့ၢ်မတၤကလွဲန့ၢ်စီၤအၤဃာ်ဒ်သိးအ ကလဲၤထီၣ်, ဒီးလီၤဃံၤလၢရၤမိးကံးလဧးအပူၤတဂၤ လဲၣ်. ဒီးတဂၤစံးဒ်အံၤ, ဒီးတဂၤစံးဒ်နုၤလီၤ.

²¹ ဒီးတဂၤဟဲထီၣ်, ဒီးဆၢထၢၣ်လၢယွၤအမဲာ်ညါ, ဒီးစံး ဝဲဒၣ်, ယကလွဲန့ၢ်အီၤလီၤ.

²² ဒီးယွၤစံးလၢအီၤ, လၢမနုၤတမံၤလဲၣ်. ဒီးစံးဘၣ်အီၤ, ယကလဲၤထီၣ်, ဒီးယကကဲထီၣ်သးကဘျံးကဘျၣ်လၢ အဝံခဲလၢာ်အကိာ်ပူၤလီၤ. ဒီးစံးဝဲဒၣ်, နကလွဲန့ၢ်အီၤ, ဒီးမၤဃၣ်တၢ်စ့ၢ်ကီးလီၤ. လဲၤထီၣ်ဒီးမၤဒ်န့ၣ်တက့ၢ်.

²³ ဒီးခဲကနံၣ်အံၤ, ကွၢ်ကွၢ်, ယွၤပာ်သးကဘျံးကဘျၣ် လၢနဝံခဲလၢာ်အံၤအကိာ်ပူၤ, ဒီးယွၤကတိၤတၢ်အၢလၢ နဂ့ၢ်နကျိၤလီၤ.

²⁴ ဒီးစီၤကနၤနါအဖိခွါ စီၤစံးဒကံယၤသုးဘူးအသး, ဒီး ဒဲစီၤမံၤကါယၤအဘိးပၤ, ဒီးစံးဝဲဒၣ်, ဒ်သိးအကကတိၤ တၢ်ဒီးနၤဒီး, ယွၤအသးဟးထီၣ်လၢယၤဖဲလဲၣ်ခီလဲၣ်.

²⁵ ဒီးစီၤမံၤကါယၤစံးဝဲဒၣ်, ကွၢ်ကွၢ်, မုၢ်တနံၤလၢနက လဲၤနုာ်လၢဒၢးလၢညါခီတဒၢး ဒ်သိးနကပာ်ခူသူၣ်န သးန့ၣ်နကသ့ၣ်ညါလီၤ.

²⁶ ဒီးအံၣ်စရ့လးအစီၤပၤစံးဝဲဒၣ်, ဟံးန့ၢ်စီၤမံၤကါယၤ, ဒီးစိာ်ကဒါက့ၤအီၤဆူဝ့ၢ်အခိၣ် စီၤအၤမိၣ်, ဒီးစီၤပၤအဖိ ခွါစီၤယိၤအၣ်အအိၣ်, ²⁷ ဒီးစံး, စီၤပၤစံးဒ်အံၤ, ပာ်ပှၤတ ဂၤအံၤလၢဃိာ်ပူၤ, ဒီးလုၢ်အီၣ်လုၢ်အီအီၤလၢတၢ်နး တၢ်ဖှီၣ်အကိၣ်, ဒီးတၢ်နးတၢ်ဖှီၣ်အထံတုၤယဟဲက့ၤ မုာ်မုာ်တက့ၢ်.

²⁸ ဒီးစီၤမံၤကါယၤစံးဝဲဒၣ်, နမ့ၢ်ဟဲက့ၤမုာ်မုာ်ဒီး, ယွၤ တကတိၤဘၣ်လၢယၤဘၣ်. ဒီးစံးဝဲဒၣ်, ပှၤဂီၢ်မုၢ်သ့ၣ် ဧၢ, ဒိကနၣ်ကိးဂၤဒဲးတက့ၢ်.

²⁹ ဒီးအံၣ်စရ့လးအစီၤပၤ, ဒီးယူဒၤအစီၤပၤစီၤယဟိၡၤ ဖးလဲၤထီၣ်ဆူရၤမိးကံလဧးအပူၤလီၤ.

³⁰ ဒီးအံၣ်စရ့လးအစီၤပၤ စံးဘၣ်စီၤယဟိၡၤဖး. ယက မၤလီၤဆီယသး, ဒီးလဲၤနုာ်လၢဒုးသုးအပူၤလီၤ. မ့မ့ၢ် နဲဒၣ်အံၤ, ကၤနယၣ်တက့ၢ်. ဒီးအံၣ်စရ့လးအစီၤပၤ မၤလီၤဆီအသး, ဒီးလဲၤနုာ်လၢတၢ်ဒုးသုးအပူၤလီၤ.

³¹ ဒီးစူၤရံအစီၤပၤ မၤလိာ်အခိၣ်သၢဆံဂၤလၢအပၢအ လ့ၣ်ကဟၣ်တဖၣ် ဒီးစံးဝဲဒၣ်, အဒိၣ်ဂ့ၤ, အဆံးဂ့ၤ, ဒုး တၢ်ဒီးအီၤတဂ့ၤ. ဒုးတၢ်ထဲလၢ အံၣ်စရ့လးအစီၤပၤ တဂၤဧိၤတက့ၢ်.

³² ဒီးတုၤလ့ၣ်ကဟၣ်အခိၣ်တဖၣ် ထံၣ်ဘၣ်စီၤယဟိၡၤ ဖးဒီး, တၢ်မၤအသးလၢအစံးဝဲဒၣ်, မ့ၢ်ဝဲလၢအံၣ်စရ့ လးအစီၤပၤလီၤ. ဒီးဃၣ်အသးဒ်သိးအကဒုးတၢ်ဒီး အီၤ, ဒီးစီၤယဟိၡၤဖးကိးထီၣ်တၢ်လီၤ.

³³ ဒီးတုၤလ့ၣ်ကဟၣ်အခိၣ်တဖၣ်ထံၣ်ဘၣ်ဝဲလၢအတ မ့ၢ်ဘၣ်အံၣ်စရ့လး အစီၤပၤဒီး, တၢ်မၤအသးလၢအ ဝဲသ့ၣ်က့ၤကဒါက့ၤလၢအလူၤအီၤလီၤ.

³⁴ ဒီးပှၤတဂၤ ခးတၢ်တဘျီလၢ အသးဒီဖျၢၣ်, ဒီးဘၣ် အံၣ်စရ့လးအစီၤပၤလၢ အသဃိးအဆၢ, ဒီးအဝဲဒၣ်စံး လၢအလ့ၣ်ကဟၣ်အခိၣ်, ဃၣ်ဃီၤနစု, ဒီးစိာ်ထီၣ် ကွံာ်ယၤလၢပှၤသုးမုၢ်အကျါတက့ၢ်. အဂ့ၢ်ဒ်အံၤ, ယ ဘၣ်တၢ်ဆဲးလီၤ.

³⁵ ဒီးတၢ်ဒုးသုးအါထီၣ်လၢမုၢ်တနံၤန့ၣ် ဒီးပှၤဝံၣ်ဆၢ ထၢၣ်စီၤပၤလၢ အလ့ၣ်ကဟၣ်အပူၤထီဒါပှၤစူၤရံဖိ, ဒီး သံဝဲလၢမုၢ်ဟါ, ဒီးအသွံၣ်ယွၤလီၤလၢအပူၤလီၢ် ဆူ လ့ၣ်ကဟၣ်အသးကံၢ်ပူၤလီၤ.

³⁶ ဒီးတုၤမုၢ်လီၤနုာ်ဃၣ်ဃၣ်ဒီး, တၢ်ကိးထီၣ်လဲၤသကုၤ ပှၤသုးမုၢ်, ဒီးစံးဝဲဒၣ်, တဂၤဆူအဝ့ၢ်ဒၣ်ဝဲ, တဂၤဆူ အဝ့ၢ်ဒၣ်ဝဲ, ဒီးတဂၤဆူအကီၢ်ဒၣ်ဝဲ, တဂၤဆူအကီၢ် ဒၣ်ဝဲန့ၣ်တက့ၢ်.

³⁷ ဒီးတုၤစီၤပၤသံဝဲဒီး, ပှၤစိာ်အီၤဆူၡၤမရံ, ဒီးခူၣ်လီၤ ကွံာ်စီၤပၤလၢၡၤမရံအပူၤလီၤ.

³⁸ ဒီးပှၤသ့ကွံာ်လ့ၣ်ကဟၣ်လၢၡၤမရံအနိၣ်ပူၤ, ဒီးထွံၣ် တဖၣ်လ့ၣ်ကွံာ်အသွံၣ်, ဒီးသ့ကွံာ်အသဃိး, ဒ်ယွၤ အကလုၢ်ကထါလၢအကတိၤဝဲအသိးန့ၣ်လီၤ.

³⁹ ဒီးတၢ်အိၣ်လီၤတဲာ်ဘၣ်ဃးဒီးစီၤအၤဃာ်, ဒီးကယဲၢ် တၢ်လၢအမၤဝဲ, ဒီးဟံၣ်ကဆီမဲလၢအသူၣ်ဝဲ, ဒီးက ယဲၢ်ဝ့ၢ်လၢအတ့ဝဲခဲလၢာ်န့ၣ် ကွဲးအသးလၢ အံၣ်စရ့ လးအစီၤပၤအလံာ်ကွဲးနီၣ်တၢ်အပူၤ, တမ့ၢ်ဘၣ်ဧါ.

⁴⁰ ဒီးစီၤအၤဃာ်မံဝဲဒီးအပၢ်တဖၣ်, ဒီးအဖိခွါစီၤအဃၤ စယၤကဲထီၣ်စီၤပၤလၢအလီၢ်လီၤ.

⁴¹ ဒီးလၢအံၣ်စရ့လးအစီၤပၤအၤဃာ် အနံၣ်ပှဲၤထီၣ်လွံၢ် နံၣ်တနံၣ်န့ၣ် စီၤအၤစါအဖိခွါစီၤယဟိၡၤဖး ကဲသီစီၤ ပၤလၢယူဒၤအဖီခိၣ်လီၤ.

⁴² ဒီးလၢစီၤယဟိၡၤဖးကဲသီစီၤပၤန့ၣ် အသးပှၢ်တ့ၢ်သၢ ဆံယဲၢ်နံၣ်, ဒီးကဲစီၤပၤလၢယရူၤၡလ့ၣ်အပူၤန့ၣ် ခံဆံ ယဲၢ် နံၣ်လီၤ. ဒီးအမိၢ်အမံၤမ့ၢ်နီၢ်ဧစူဘၤ, စီၤၡံးလဃံအ ဖိမုၣ်လီၤ.

⁴³ ဒီးပိာ်အပၢ် စီၤအၤစါအကျဲခဲလၢာ်, ဒီးတဃၣ်ကွံာ် ဘၣ်အသးလၢ အမၤတၢ်ဂ့ၤလၢ ယွၤအမဲာ်ဘၣ်. ဘၣ် ဆၣ်ဒီးတၢ်တမၤဟးဂီၤဘၣ်တၢ်အလီၢ်ထီၣ်ထီဘၣ်. ပှၤ ဂီၢ်မုၢ်လုၢ်ဒံးတၢ်ဒီးဆိၣ်ကဲၤဒံး တၢ်နၢမူလၢတၢ်အလီၢ် ထီၣ်ထီန့ၣ်လီၤ.

⁴⁴ ဒီးစီၤယဟိၡၤဖး မၤတၢ်ဃူလိာ်ဖိးလိာ်ဒီးအံၣ်စရ့လး အစီၤပၤလီၤ.

⁴⁵ ဒီးတၢ်အိၣ်လီၤတဲာ်ဘၣ်ဃးဒီးစီၤယဟိၡၤဖး, ဒီးတၢ် အစိအကမီၤလၢအဒုးနဲၣ်ဝဲ, ဒီးအဒုးသုးအဂ့ၢ်န့ၣ်ကွဲး အသးလၢယူဒၤအစီၤပၤ အလံာ်ကွဲးနီၣ်တၢ်အပူၤ, တ မ့ၢ်ဘၣ်ဧါ.

⁴⁶ ဒီးပှၤအဲၣ်ပကၢၤဖိလၢ အအိၣ်လီၤတဲာ်လၢအပၢ်စီၤ အၤစါအမုၢ်နံၤတဖၣ်န့ၣ် သုးကွံာ်ဝဲလၢကီၢ်ပူၤလီၤ.

⁴⁷ ဒီးစီၤပၤတအိၣ်ဘၣ်လၢအဒိၣ်အပူၤဘၣ်, ပဒိၣ်ဖးဒိၣ် တဂၤမ့ၢ်စီၤပၤလီၤ.

⁴⁸ ဒီးစီၤယဟိၡၤဖးတ့ကဘီတၢ်ၡံၣ် ဒ်သိးအကလဲၤဆူ အိဖ့ၢ်လၢထူဧိၤလွဲဧိၤအဂီၢ်လီၤ. ဘၣ်ဆၣ်ဒီးတလဲၤဘၣ် ဝဲဘၣ်. အဂ့ၢ်ဒ်အံၤ, ကဘီဟးဂီၤလၢ ဧ့းစယိၣ်က့ဘ့ၢ် အပူၤလီၤ.

⁴⁹ တုၤနုၤတစုစီၤအၤဃာ်အဖိခွါစီၤအဃၤစယၤ စံးလၢ စီၤယဟိၡၤဖး, ဒုးလဲၤယခ့ယပှၤ ဒီးနခ့နပှၤလၢက ဘီပူၤတက့ၢ်. ဒီးစီၤယဟိၡၤဖးတအၢၣ်လီၤဘၣ်ဝဲဘၣ်.

⁵⁰ ဒီးစီၤယဟိၡၤဖးမံဝဲဒီးအပၢ်တဖၣ်, ဒီးပှၤခူၣ်လီၤကွံာ် အီၤဒီးအပၢ်တဖၣ်လၢအပၢ်စီၤဒၤဝံးအဝ့ၢ်ပူၤ, ဒီးအဖိ ခွါစီၤယဟိရၣ်ကဲထီၣ်စီၤပၤလၢအလီၢ်န့ၣ်လီၤ.

⁵¹ ဒီးလၢယူဒၤအစီၤပၤ စီၤယဟိၡၤဖးအနံၣ်ပှဲၤထီၣ်တ ဆံနွံနံၣ်တနံၣ်န့ၣ် စီၤအၤဃာ်အဖိခွါ စီၤအဃၤစယၤ ကဲသီစီၤပၤလၢ အံၣ်စရ့လးအဖီခိၣ်လၢၡၤမရံအပူၤ, ဒီး ကဲစီၤပၤလၢအံၣ်စရ့လးအဖီခိၣ်န့ၣ်ခံနံၣ်လီၤ. ⁵² ဒီးမၤ တၢ်အၢလၢယွၤအမဲာ်ဒီးပိာ်အပၢ်အကျဲ, ဒီးအမိၢ်အကျဲ, ဒီးစီၤနဘးအဖိခွါ စီၤယၤရၤဘၣ်အကျဲ, လၢအဒုးမၤ အံၣ်စရ့လးလၢတၢ်ဒဲးဘးလီၤ.

⁵³ ဒီးမၤဘဧၤလးအတၢ်, ဒီးဘူၣ်ထီၣ်ဘါထီၣ်အီၤ, ဒီး ဒုးသးထီၣ်ယွၤအံၣ်စရ့လးအကစၢ်, ဒ်ကယဲၢ်တၢ်လၢ အပၢ်မၤတ့ၢ်အသိးန့ၣ်လီၤ.