ТИТГЕ

¹ Аллахны сайлагъанларыны ийманларын эмда Аллахны жолунда хакъ кертини ангылауларын алгъа бардырыр ючюн, Аллахны къулу эм Масих Иссаны абустолу болургъа сайланнган мен Пауулдан салам! ² Абустоллугъум а сёзюнден таймагъан Аллах ёмюрледен да алгъын заманлада берирге айтхан ёмюрлюк жашаугъа ышаныуума таянады. ³ Къутхарыучубуз Аллах, Кесини буйругъу бла манга ышанып берген Хайыр Хапар бла Кесини сёзюн заманында ачыкъ этгенди. ⁴ Экибизде да болгъан ийманда керти жашым Титге, Атабыз Аллахдан эм Къутхарыучубуз Раббий Масих Иссадан шафауат, мархамат эм ырахатлыкъ болсун. ⁵ Мен сени Критде, сен бошалмагъан ишлени битдирир ючюн, санга буюргъаным кибик, битеу шахарлада жамауатлагъа таматала салыр ючюн къойгъан эдим. ⁶ Таматагъа сайланырыкъ адам айыпсыз, бир къатынлы болсун. Аны сабийлери да, хаулелик бла неда боюн салмаулукъ бла айыпланыулары болмагъанла, ийманлыла болургъа керекдиле. ⁷ Нек десенг жамауатны къуллукъчусу, Аллахны юй жюрютюучюсюча айыпсыз болургъа керекди. Бурушакъыл болмагъан, ачыуланыучу болмагъан, ичгичи болмагъан, тюйюшюучю болмагъан, кесине хайырны сюйюучю болмагъан, ⁸ Алай а къонакъ сюйюучю, ахшылыкъны сюйюучю, оюмлу, тюзлюклю, сыйлы, тыйгъылы болургъа, ⁹ Башхаланы тюз юйретиу бла кёллендирирге эмда къажау тургъанланы тюшюндюрюрге кючю болур ючюн, кеси юйретилгенича, Аллахны ышаннгылы сёзюн къаты тутаргъа керекди. ¹⁰ Нек десенг боюн салмагъанла да кёпдюле, бош сёзлюле эм ётюрюкчюле, бегирек да сюннетлиледен. ¹¹ Аллайланы ауузларын тыяргъа керекди. Ала айыплы малкёзлюк бла, жарамагъан затлагъа юйретип, сау юйюрлени терсине бурадыла. ¹² Аланы кеси файгъамбарларындан окъуна биреу: «Критлиле хар заманда да ётюрюкчюледиле, огъурсуз жаныуарладыла, эринчек мухарладыла», – деп айтханды. ¹³ Бу шагъатлыкъ тюздю. Ол себепли аланы къаты айыпла, ала ийманда тюз акъыллы болсунла, ¹⁴ Иудейли таурухлагъа бла хакъ кертини къабыл этмеген адамланы буйрукъларына тынгыламасынла. ¹⁵ Тазалагъа хар зат да тазады; харам болгъанлагъа бла иймансызлагъа уа таза зат жокъду, алай а аланы акъыллары да, жюреклери да харам болгъандыла. ¹⁶ Ала Аллахны билебиз деп айтадыла; ишлери бла уа Аны инкяр этедиле, жийиргенчли, бойсунмаучу эм бир тюрлю ахшы ишге жараусуз адамладыла.

¹ Сен а, тюз окъуугъа не тийишли эсе, аны айт: ² Къарт кишиле тыйгъылы, тийишли, оюмлу, ийманда, сюймекликде, тёзюмде тюз акъыллыла болсунла. ³ Аны кибик къарт къатынла да сыйлылагъа тийишлисича жашасынла, тилчиле болмасынла, ичгичиликге къул болмасынла, игиликге юйретсинле. ⁴ Жаш къатынлагъа эрлерин сюерге, сабийлерин сюерге, ⁵ Оюмлула, тазала, юйюрлерине къараучула, халалла, кеслерини эрлерине бойсунуучула болургъа юйретсинле; Аллахны сёзюне айып тюшмесин. ⁶ Аны кибик жаш уланлагъа да оюмлу болургъа айтып ангылат. ⁷ Хар не жаны бла да кесингде ахшы ишле бла юлгю кёргюзт, устазлыгъынгда таза ниетли, тийишли, бузукъсуз бол. ⁸ Бизге къажау тургъанла бизни терслерге зат тапмай уялырча айыпсыз, тюз акъыллы сёлеше бил. ⁹ Къуллагъа кеслерини бийлерине боюн салыргъа, хар не жаны бла да аланы кёллерине жетерге, аман жууап этмезге, ¹⁰ Урламазгъа, алай а толу ышаннгылы болгъанларын кёргюзтюрге тюшюндюр. Бизни Къутхарыучубуз Аллахны юйретиую къалай аламат болгъаны хар не жаны бла кёрюнюр ючюн, ала алай этсинле. ¹¹ Нек десенг Аллахны битеу адамланы къутхаргъан шафауаты ачыкъ болгъанды. ¹² Бу шафауат а бизни, аллахсызлыкъны эм бу дунияны кюсеулерин къоюп, эндиги ёмюрде оюмлу, тюзлюклю эмда Аллахны жолуна тийишли жашауну бардырыргъа юйретеди. ¹³ Энди уа, мубарек умутубузну толурун, уллу Аллахыбыз эм Къутхарыучубуз Масих Иссаны махтаулу келирин сакълайбыз. ¹⁴ Масих бизни битеу законсузлукъларыбыздан къутхарыр эм тазалар ючюн эмда ахшылыкъ этерге эришген, кесине айырма халкъ этер ючюн, бизни ючюн Кесин къурманнга бергенди. ¹⁵ Быланы айт, хар тюрлю кюч бла тюшюндюр эм айыпла, сени бир киши да сансыз этмесин.

¹ Башчылагъа эмда властьлагъа боюн салыргъа эм айтханларын этерге, хар ахшы ишни этерге хазыр болургъа, ² Бир кишиге да аман айтмазгъа, тырманчыла болмазгъа, алай а тынчла болургъа эм битеу адамлагъа хар тюрлю сабырлыкъ этерге ийманлыланы эслерине сал. ³ Нек десенг биз да бир заманлада оюмсузла, боюн салмагъанла, ажашханла эдик, тюрлю кюсеулеге бла жубанчлагъа къул эдик, аман ниетде бла зарлыкъда жашай эдик, жийиргенчли эдик, бир-бирибизни кёрюп болмай эдик. ⁴ Бизни Къутхарыучубуз Аллахны ахшылыгъы эм адам сюймеклиги келген заманда уа, ⁵ Ол бизни, биз этген тюзлюклю ишле бла тюйюл, алай а Кесини мархаматы бла, Сыйлы Нюр бла жангыдан туудуруу эм жангыртыу хамам бла къутхаргъанды. ⁶ Биз Аны шафауаты бла ариуланып, умутубуз бла ёмюрлюк жашаудан юлюшлю болур ючюн, ⁷ Ол Сыйлы Нюрню бизни Къутхарыучубуз Масих Иссаны юсю бла юсюбюзге эркин къуйгъанды. ⁸ Бу сёз ышаннгылыды. Аллахха ийман салгъанла ахшы ишле этерге къадалыучула болур ючюн, сен бу затланы билдирип бегитиринги сюеме. Бу затла игидиле эм адамлагъа хайырлыдыла. ⁹ Акъылсыз эришиуледен эм генеалогияладан эмда Тауратны Законуну юсюнден даулашыуладан бла къаугъаладан узакъ бол; нек десенг ала файдасыздыла эм бошдула. ¹⁰ Биринчи эм экинчи ангылатханынгдан сора айрылыкъ салгъан адамдан тай. ¹¹ Аллай адам бузулгъанын эм гюнях этгенин бил, ол терс болгъанын кеси кёргюзтеди. ¹² Санга Артемасны неда Тихикни ийсем, манга Никополгъа келирге ашыкъ; нек десенг мен къышны анда ашырыргъа бегим этгенме. ¹³ Закончу Зенасны бла Аполлосну, бир затдан да кереклилери болмазча, ашырыр къайгъыны эт. ¹⁴ Ийманлыланы жашаулары хайырсыз болмаз ючюн, аланы ахшылыкъ этерге, башхаланы эм керекли затларын тындырыргъа юйрет. ¹⁵ Битеу мени бла болгъанла санга салам айтадыла. Бизни сюйген ийманлылагъа салам айт. Аллахны шафауаты сизни барыгъыз бла да болсун. Амин.