РИМЛИЛЕГЕ

РИМЛИЛЕГЕ

¹ Масих Иссаны къулу, Аллахны Хайыр Хапарын билдирирге сайланып, абустол болургъа чакъырылгъан мен Пауулдан салам! ² Аллах Кесини файгъамбарларыны юсю бла Сыйлы Китаплада алгъындан берирге айтып сёз берген ол Хайыр Хапар ³ Кесини Уланы Раббийибиз Масих Иссаны юсюнденди. Ол, адам табийгъатына кёре, Дауутну урлугъундан туугъанды. ⁴ Эм Кесини кючю бла, сыйлы Нюрюне кёре, ёлгенледен тиргизилгенини юсю бла, Аллахны Уланы болгъаны ачыкъ болгъанды. ⁵ Битеу миллетледен адамланы ийманнга бойсундурур ючюн, Масихни юсю бла эм аны аты ючюн Аллахны шафауатын эм абустоллукъ алгъанбыз. ⁶ Сиз да аланы араларындасыз, Масих Исса чакъыргъанласыз. ⁷ Римде жашагъан, Аллах сюйген, сыйлы болургъа чакъырылгъанланы барына: Атабыз Аллахдан эм Раббий Масих Иссадан сизге шафауат эм ырахатлыкъ болсун. ⁸ Хар неден да алгъа, сизни ийнаныуугъуз битеу дунияда билдирилгени себепли, сизни барыгъыз ючюн Масих Иссаны юсю бла Аллахыма шукур этеме. ⁹ Аны Уланыны юсюнден Хайыр Хапарны берип, мен Анга нюрюм бла къуллукъ этген Аллах, мен дайым сизни эсимде тутханыма шагъатды. ¹⁰ Мен тилек этген хар заманда, Аллахны буйругъу бла энди сизге келирге манга онг болур ючюн тилек этеме. ¹¹ Нек десегиз, сиз ийманда бегимли болур ючюн, сизге нюр жанындан бир фахму берир мурат бла сизни кёрюрге бек сюеме, ¹² Алай демеклик, мен сизни арагъызда болгъанда мен сизни, сиз да мени, бирбирибизни ийманы бла кёлленирбиз. ¹³ Къарындашла, сизге билдирмей къояргъа сюймейме, башха миллетледе болгъаны кибик, сизде да хайырым болур ючюн, мен сизге келирге кёп кере ниет этгенме, алай а эндиге дери окъуна чырмаулагъа жолугъуп тургъанма. ¹⁴ Мен греклилеге да, варварлагъа да, билимлилеге да, жахиллеге да борчлума; ¹⁵ Алай бла, манга жетгенден, мен сизге, Римде жашагъанлагъа да, Хайыр Хапарны берирге хазырма. ¹⁶ Мен Масихни Хайыр Хапарын билдирирге ыйлыкъсынмайма; нек десегиз ол бек алгъа иудейлилени, андан сора уа башха миллетлилени, хар ийнаннганны къутхарыргъа Аллахны кючюдю. ¹⁷ Хайыр Хапарда Аллахны тюзлюклюлюгю, Китапда: «Тюзлюклю ийманы бла жашарыкъды», – деп жазылгъаны кибик, ачыкъ этиледи. Тюзлюклюлюк жаланда ийман бла болады. ¹⁸ Хакъ кертиге аманлыкъ бла чырмау этген адамланы битеу аллахсызлыкъларына бла аманлыкъларына къажау кёкден Аллахны чамланыуу ачылады. ¹⁹ Нек десегиз Аллахны юсюнден билирге керекли затла алагъа ачыкъ этилгендиле. Аллах алагъа ачыкъ этгенди. ²⁰ Нек десегиз Аны кёрюнмегени, Аны ёмюрлюк кючю эм Аллахлыгъы, дуния жаратылгъандан жаратылыннганлагъа тинтип къарау бла кёрюнедиле. Алай бла ала жууапсыздыла. ²¹ Алай а ала, Аллахны биле тургъанлай, Анга, Аллахха тийишлисича махтау салмагъанлары эм шукур этмегенлери себепли, кеслерин магъанасыз ойлашыулагъа бергендиле эм аланы ангылаусуз жюреклерин къарангылыкъ басханды. ²² Кеслерине акъылманлабыз деп, акъылдан шашхандыла ²³ Эм ёмюрлюк Аллахны махтауун, чиририк адамгъа, къанатлылагъа, тёрт аякълылагъа, сюркелиучюлеге ушагъан суратлагъа тюрлендиргендиле. ²⁴ Мынга кёре, Аллах, аланы жюреклери талпыгъан жийиргенчли ишлени этерге, кеслери-кеслерини чархларын харам этерге бошлап къойгъанды. ²⁵ Ала Аллахны хакъ кертисин ётюрюкге алышхандыла эм Жаратханнга къуллукъ этерни орунуна жаратылгъаннга табынып, къуллукъ этедиле. Аллах а ёмюрледе да алгъышлыды. Амин. ²⁶ Аны себепли Аллах аланы айыплы тыйгъысызлыкъларына бошлап къойгъанды: аланы тиширыулары табийгъатда тийишли болгъанны жюрютюуню орунуна табийгъатда болмагъанны жюрютгендиле. ²⁷ Аны кибик эр кишиле да, табийгъатда тийишлисича тиширыуну жюрютюуню къоюп, тыйгъычсызлыкъ бла бир-бирлерине къызышхандыла: эр кишиле эр кишилеге бедишлик иш этип, кеслерини ажашыулары ючюн кеслерини чархларында тийишлисин аладыла. ²⁸ Ала Аллахны акъылларында тутаргъа жараулу кёрмегенлери себепли, Аллах аланы жараусуз ойлашыулагъа берип, тийишли болмагъан ишлени этерге бошлап къойгъанды. ²⁹ Алай бла ала хар тюрлю терсликден: саякълыкъдан, хыйлачылыкъдан, жутлукъдан, огъурсузлукъдан толгъандыла; зарлыкъдан, мурдарлыкъдан, къаугъадан, алдаудан, аман ниетден толудула. ³⁰ Аман сёзлю, тилчи, Аллахны кёрюп болмаучу, жюрек къыйнаучу, ёхтем, кеслерин махтаучу, аманлыкъгъа уста, ата-анагъа тынгыламаучу, ³¹ Оюмсуз, антларын бузуучу, сюймеучю, жарашмаучу, мархаматсыз адамладыла. ³² Аллахны, аллай ишлени этиучюле ёлюмге тийишлидиле деген, тюзлюклю хукмусун ала биледиле; алай а аланы кеслери этген бла да къалмай, этгенлеге да ыразы боладыла.

¹ Алай бла сен, ким да бол, башханы терслеучю адам, кечгинликли тюйюлсе. Нек десенг башханы не терслик бла терслей эсенг, кесинги да ол терслик бла терслейсе; не ючюн десенг, башханы терслеп, кесинг да аны этесе. ² Аллай ишлени этиучюлеге кертиси бла да Аллахны сюд этгенин биз а билебиз. ³ Адам, сен, аллай ишлени этгенлени терслеп, кесинг да ол ишлени эте, Аллахны сюдюнден къутулургъа къалай умут этесе? ⁴ Неда Аллахны ахшылыкъдан байлыгъын, сабырлыгъын эм кёп тёзюуюн сансыз этипми къояса, Аллахны ахшылыгъы сени тобагъа къайтарыргъа элтгенин ангыламаймыса? ⁵ Алай а, сени терсакъыллыгъынг бла эм тобагъа къайтышмагъан жюрегинг бла, сен Аллахны тюз сюдю ачылыр чамланыу кюннге кесинг-кесинге ачыу жыяса. ⁶ Ол а хар кимни этген ишлерине кёре тийишлисин берир: ⁷ Тохтамай игилик этип, махтау, хурмет эм ёлюмсюзлюк излегенлеге ёмюрлюк жашау берир; ⁸ Эгоистлеге эм хакъ кертиге боюн салмай, ётюрюкге кеслерин бергенлеге уа ачыу эм чамланыу берир. ⁹ Аманлыкъ этген хар адамны жанына – бек алгъа иудейлиге, андан сора уа башха миллетлиге – палах эм тарлыкъ болур. ¹⁰ Ахшылыкъ этген хар адамгъа уа – бек алгъа иудейлиге, андан сора уа башха миллетлиге – махтау, хурмет эмда ырахатлыкъ болур. ¹¹ Нек десегиз Аллахда бет этип къарау жокъду. ¹² Алада Тауратны Закону болмай гюнях этгенле, Закондан тышында жоюлурла; Законлары болуп гюнях этгенлеге уа Закон бла сюд этилир. ¹³ Нек десегиз Аллахны аллында тюзлюклю болгъанла Законну эшитгенле тюйюлдюле, алай а Законну тутханла тюзге саналлыкъдыла. ¹⁴ Нек десегиз алада Тауратны Закону болмагъан миллетле, кеслерини табийгъатларына кёре, Закон буюргъанланы эте эселе, сора алада Тауратны Закону болмагъанлай, ала кеслери-кеслерине закондула. ¹⁵ Ала Законну буюргъанлары аланы жюреклеринде жазылгъанын кёргюзтедиле; аны юсюнден аланы жюреклери шагъатлыкъ этеди, ойлашыулары да аланы бирде терслейдиле, бирде ариулайдыла. ¹⁶ Мен билдирген Хайыр Хапаргъа кёре, Аллах Масих Иссаны юсю бла адамланы таша ишлерине сюд этерик кюнюнде алай боллукъду. ¹⁷ Ма, сен иудейлиме дейсе эм, Тауратха ышанып, Аллах бла махтанаса, ¹⁸ Аны буйругъун да билесе, игисин ангыларгъа Тауратдан юйреннгенсе ¹⁹ Эм сокъурлагъа жол башчыма, къарангылыкъда тургъанлагъа жарыкъма, ²⁰ Жахиллени насийхатчыларыма, сабийлени устазларыма, Тауратда билимни бла хакъ кертини юлгюсю мендеди деп, кесинге ышанаса. ²¹ Сора сен, башханы юйретип, кесингкесинги уа къалай юйретмейсе? ²² «Урламагъыз», – деп ууаз берип, къалай урлайса? «Зийна этме», – деп къалай зийна этесе? Идолладан жийиргенип, аланы табыныучу юйлерин къалай тонайса? ²³ Таурат бла махтанаса, Тауратны бузууунг бла уа Аллахны ыспассыз къалай этесе? ²⁴ Нек десегиз Китапда жазылгъаны кибик: «Сизни амалтын миллетлени арасында Аллахны атына аман айтылады». ²⁵ Тауратны толтура эсенг, сюннетни файдасы барды; сен Тауратны бузуучу эсенг а, сени сюннетинги магъанасы жокъду. ²⁶ Алай бла, сюннет этилмеген адам Тауратны бегимлерин тута эсе, аны сюннетсизлиги сюннетге саналмазмы? ²⁷ Эм жазылгъан жорукъла бла сюннет адет сенде болуп тургъанлай, сен Тауратны бузуучу адам эсенг, табийгъатдан сюннетсиз болуп, Тауратны тутхан адам сени терслемезми? ²⁸ Нек десенг тышындан иудейли болгъан тюйюлдю иудейли, сюннет да ол тышындан чархына этилген сюннет тюйюлдю. ²⁹ Алай а ол ичинден иудейли болгъан иудейлиди эм сюннетлилик да жазылгъан жорукъла бла тюйюл, жюрекде, нюр бла этилген сюннетлиликди. Анга уа махтау адамладан тюйюлдю, Аллахданды.

¹ Алай бла иудейли болгъанны не онглулугъу барды неда сюннетлиликден не файда барды? ² Хар не жанындан да уллу онглулугъу барды, бегирек да алагъа Аллахны сёзлери ышанып берилгенлери ючюн. ³ Аланы бир къауумлары ийман салмагъан эселе, не болур? Аланы иймансызлыкълары Аллахны ышаннгылылыгъын жокъ этерми? ⁴ Чыртда угъай! Хар адам ётюрюкчю эсе да, Аллахны тюз сёзлю болгъаны билинсин, Китапда: «Сен сёзлерингде тюзлюклю чыгъарыкъса эм сюдюнгде хорларыкъса», – деп жазылгъаны кибик. ⁵ Бизни тюзлюксюзлюгюбюз Аллахны тюзлюгюн ача эсе, не айтайыкъ? Адамланы ойлашыуларына кёре айтама: Аллах чамланыуу бла азап салса терс болурму? ⁶ Чыртда угъай! Аллах дуниягъа алайсыз къалай сюд этер? ⁷ Алай а, Аллахны хакъ кертиси мени ётюрюгюм бла кётюрюлюп, аны бла Аллахха махтау бола эсе, сора дагъыда манга гюняхлыгъача сюд не ючюн этерикди? ⁸ Сора бир къауумла бизге аман айтып, сиз алай юйретесиз деп айтханлары кибик, биз аманлыкъмы этейик андан ахшылыкъ чыкъсын деп? Аллайлагъа тюзлюклю сюд этилликди. ⁹ Энди не айтайыкъ? Биз, иудейлиле, башха миллетлиледен онглубузму? Не аз да угъай! Иудейлиле да, башха миллетлиле да – бары да гюняхны оноуунда болгъанларын биз энди кёргюзтгенбиз, ¹⁰ Китапда жазылгъаны кибик: «Бир да тюзлюклю жокъду; ¹¹ Ангылауу болгъан жокъду; бир киши да Аллахны излемейди; ¹² Бары да жолдан тайгъандыла, бири да къалмай жараусуздула: игилик этген жокъду, жангыз биреу да жокъду». ¹³ «Аланы тамакълары ачыкъ къабырды; тиллери бла алдайдыла». «Жилянны ууу аланы эринлериндеди». ¹⁴ «Аланы ауузлары къаргъышдан бла ачы сёзледен толудула». ¹⁵ «Аланы аякълары къан тёгерге женгилдиле; ¹⁶ Бузуу бла палах этиу аланы жолларындады; ¹⁷ Жарашыулукъну жолларын ала билмейдиле». ¹⁸ «Аланы кёзлерини аллында Аллахдан къоркъуу жокъду». ¹⁹ Алай а, Таурат не айта эсе да ол, Тауратны Законуну оноуунда болгъанлагъа айтханын биз билебиз, алай бла хар аууз да жабылады эм битеу дуния Аллахны аллында терс болуп къалады. ²⁰ Ол себепден Законну буюргъанларын этиу бла, Аллахны аллында, бир адам да ариуланырыкъ тюйюлдю, нек десегиз гюнях Закон бла билинеди. ²¹ Алай а энди, Аллахны Законнга да къарамай адамны ариулауу ачыкъ этилгенди. Аны юсюнден а Таурат да, файгъамбарла да шагъатлыкъ этедиле. ²² Аллах адамланы Масих Иссагъа ийнаныулары бла ариулайды. Муну ийнаннганланы барына да эм барында да этеди. Нек десегиз адам айырыу жокъду. ²³ Барысы да, гюнях этип, Аллахны махтауундан къуру къалгъандыла. ²⁴ Адамла Масих Иссада жулунуулары бла, Аллахны шафауаты бла хакъсыз ариуланадыла. ²⁵ Аллах Масихни, Аны къанына ийнаныуубуз бла гюняхларыбызны кечдирген къурманнга бергенди эм алай бла Кесини тюзлюгюн кёргюзтгенди. Нек десегиз Аллах, бизге тёзюп, алгъын этген гюняхларыбызны кечгенди. ²⁶ Ол муну, тюзлюклю болгъаны ючюн эм Иссагъа ийнаннганны ариулар ючюн, бусагъат заманда Кесини тюзлюгюн кёргюзтюр ючюн этгенди. ²⁷ Къайдады ол – махтанырча зат? Жокъ этилгенди. Къайсы закон бла? Этилген ишлеге таяннган закон бламы? Угъай, жангыз ийманнга таяннган закон бла. ²⁸ Нек десегиз адам, Законну буюргъанларын этиу бла тюйюл, ийман бла ариуланнганын биз билебиз. ²⁹ Аллах жаланда иудейлилени Аллахымыды? Башха миллетлилени да Аллахы тюйюлмюдю? Ишексиз, башха миллетлилени да Аллахыды. ³⁰ Нек десегиз сюннетлилени ийман бла ариуларыкъ бир Аллах сюннетсизлени да ийманны юсю бла ариуларыкъды. ³¹ Алай бла, биз ийман бла Законну жокъму этебиз? Чыртда угъай! Алай а Закон тюздю дейбиз.

¹ Алай бла бизни атабыз Ибрахимни сынагъаныны юсюнден не айтайыкъ? ² Ибрахим ишлери бла ариуланнган эсе, аны махтаныргъа сылтауу болур эди; алай а Аллахны аллында аны махтаныр заты жокъду. ³ Сыйлы Китап не айтады? «Ибрахим Аллахха ийнаннганды, бу да анга тюзлюклюлюкге саналгъанды». ⁴ Ишлегеннге хакъын берген хатыргъа саналмайды, алай а борчха саналады; ⁵ Ишлемеген, алай а аллахсызны Ариулаучугъа ийнаннган адамны уа ийманы тюзлюклюлюкге саналады. ⁶ Аны этген ишлерине къарамай, Аллах аны тюзлюклюге санагъан адамны насыплылыгъын Дауут да былай ангылатады: ⁷ «Насыплыдыла законсузлукълары кечилгенле эм гюняхлары жабылгъанла. ⁸ Раббий аны гюняхын борч этмеген адам насыплыды». ⁹ Бу насыплылыкъ жангыз сюннетлилегеми, огъесе сюннетсизлегедамы бериледи? Биз, Ибрахимни ийманы тюзлюклюлюкге саналгъанды, деп айтабыз. ¹⁰ Не заманда саналгъанды? Сюннет этилгенден сорамы, огъесе сюннет этилгинчими? Сюннет этилгенден сора тюйюл, сюннет этилгинчи саналгъанды. ¹¹ Сюннетсиз болгъанлай, ийман салгъанланы барыны да аталары болур ючюн эм алай бла аланы да ийманлары тюзлюклюлюкге саналыр ючюн, Ибрахим, сюннет этилгинчи, кесинде болгъан ийманы бла тюзлюклю болгъанын кёргюзтген мухургъа сюннет белгини алгъанды. ¹² Алай бла атабыз Ибрахим, жаланда сюннетлилени аталары болуп къалмай, алай а анга сюннет этилгинчи ол тутхан ийманны ызындан баргъан сюннетлилени да аталары болгъанды. ¹³ Нек десегиз Ибрахимге неда аны урлугъуна дунияны иеси болургъа ант сёз, Тауратны Законуну юсю бла берилмегенди, алай а иймандан келген тюзлюклюлюк бла берилгенди. ¹⁴ Законнга ышаннганла дунияны иеси боллукъ эселе, сора ийман бошду, ант сёз да файдасызды; ¹⁵ Нек десегиз Закон Аллахны чамланыуун чыгъарады, алай а закон болмагъан жерде законну бузаргъа да амал жокъду. ¹⁶ Алай бла ант сёз Аллахны шафауатына таянсын эм, Ибрахимни битеу туудукълары ючюн ышаннгылы болсун деп, ийманнга кёре болады. Ибрахимни туудукълары, Законнга ышанып къалмай, алай а алада Ибрахимни ийманы болгъан адамладыла. ¹⁷ Китапда: «Мен сени кёп миллетлеге атагъа салгъанма», – деп жазылгъаны кибик, Ибрахим, ол ийнаннган Аллахны, ёлгенлеге жашау бериучю эмда болунмагъанланы болуннганланыча чакъырыучу Аллахны аллында бизни барыбызны да атабызды. ¹⁸ Ибрахим, ышаннгысыз болумда, кёп миллетлени атасы боллугъуна ышанып ийман салгъанды. «Сени урлугъунг алай кёп боллукъду», – деп айтылгъаннга ийнаннганды. ¹⁹ Мени жюз жылгъа жууукълашхан чархым къуругъанды, Сараны къарыны да къаратонду, – деп ойлашмагъанды эм ийманда къарыусуз болмай тургъанды. ²⁰ Аллахны ант сёзюне ийнанмау бла ишекленмегенди, алай а, Аллахха махтау салып, ийманда кючлю болгъанды. ²¹ Эмда анга берген сёзюн толтурургъа, Аллахны кючю болгъанына толу ышанып тургъанды. ²² Ол себепден ийманы анга тюзлюклюлюкге саналгъанды. ²³ Анга саналгъанды деп, жангыз аны юсюнден жазылмагъанды, ²⁴ Алай а бизни юсюбюзден да жазылгъанды. Раббийибиз Иссаны ёлгенледен тиргизген Аллахха ийнаннганыбыз, бизге да тюзлюклюлюкге саналлыкъды. ²⁵ Исса уа бизни гюняхларыбыз ючюн къурманнга берилгенди эм бизни ариулар ючюн тиргизилгенди.

¹ Ол себепден, ийман бла ариуланып, Раббийибиз Масих Иссаны юсю бла бизни Аллах бла жарашыулугъубуз барды. ² Аны юсю бла уа ийнаныуубуз бла бу биз тургъан шафауатха эркинлик алгъанбыз эм Аллахны махтаууна ышаныу бла махтанабыз. ³ Эм жангыз аны бла тюйюл, алай а къыйынлыкъларыбыз бла да махтанабыз. Нек десегиз къыйынлыкъдан тёзюмлюк, ⁴ Тёзюмлюкден сынамлылыкъ, сынамлылыкъдан ышаныу чыкъгъанын билебиз. ⁵ Ышаныу а айыплы этмейди; нек десегиз бизге берилген Сыйлы Нюрню юсю бла бизни жюреклерибизге Аллахны сюймеклиги къуюлгъанды. ⁶ Кёремисиз Масих, биз алыкъа къарыусуз болгъан заманда, белгили кезиуде аллахсызла ючюн ёлгенди. ⁷ Нек десегиз тюзлюклю ючюн ким ёлюр? Игилик этген адам ючюн киши ёлюрге таукел болурму анса? ⁸ Аллах а бизге Кесини сюймеклигин, биз алыкъа гюняхлы болуп тургъан заманда, Масихни бизни ючюн ёлгени бла кёргюзтгенди. ⁹ Ол себепден бегирек да энди, Аны къаны бла ариуланнгандан сора, Аллахны чамланыуундан Аны юсю бла къутуллукъбуз. ¹⁰ Нек десегиз биз, Аллах бла жау болуп тургъанлай, Аны Уланыны ёлюмю бла Аллах бла жарашхан эсек, бегирек да, жарашхандан сора, Аны жашауу бла къутуллукъбуз; ¹¹ Аны бла да къалмай, алай а бизни энди Аллах бла жарашдыргъан Раббийибиз Масих Иссаны юсю бла Аллахны Кеси бла махтанабыз. ¹² Ол себепден, бир адамны юсю бла гюнях дуниягъа кирип, гюняхны юсю бла уа ёлюм келгени кибик, ёлюм да алай битеу адамлагъа кёчгенди. Нек десегиз бары да гюнях этгендиле. ¹³ Тауратны Законуна дери да дунияда гюнях бар эди, алай а Закон болмагъан заманда гюнях саналмайды. ¹⁴ Алай болгъанлыкъгъа Адам файгъамбардан башлап Мусагъа дери ёлюм Адамны гюняхына ушаш гюнях этмегенлеге окъуна бийлик этгенди. Адам файгъамбар келлик Кишини юлгюсю эди. ¹⁵ Алай а Аллахны шафауат саугъасы Адам файгъамбарны терслиги кибик тюйюлдю. Нек десегиз биреуню гюняхындан кёпле ёлюмге тюшген эселе, сора андан да бег’а Аллахны шафауаты эм бир Адамны, Масих Иссаны шафауаты бла берилген саугъа, кёплеге артыгъы бла жетгенди. ¹⁶ Ол саугъа уа гюнях этген бир адам ючюн сюд этилгенича тюйюлдю; нек десегиз бир аманлыкъ ючюн сюд терслигине тюбетеди, шафауатны саугъасы уа кёп аманлыкъдан да ариулайды. ¹⁷ Нек десегиз бир адамны гюняхындан ол адамны юсю бла ёлюм бийлик этип тургъан эсе, сора андан да бег’а Аллахны бай шафауатын эм тюзлюклюлюкню саугъасын къабыл этгенле бир Кишини – Масих Иссаны юсю бла – жашауда бийлик этерикдиле. ¹⁸ Ол себепден, биреуню терслиги бла битеу адамлагъа сюд этилгени кибик, биреуню тюзлюгю бла да битеу адамланы жашатыр ючюн ариуланыу алай бериледи. ¹⁹ Бир адамны бой салмауу бла кёпле гюняхлы болгъанлары кибик, биреуню бой салыуу бла да кёпле алай тюзлюклю боллукъдула. ²⁰ Тауратны Закону уа, терслик кёп болур ючюн, артда келгенди. Гюнях кёп болгъан жерде уа Аллахны шафауаты андан да кёп болгъанды. ²¹ Алай бла гюнях ёлюмню юсю бла бийлик этгени кибик, Аллахны шафауаты да, бизни Раббийибиз Масих Иссаны юсю бла ёмюрлюк жашау берир ючюн, тюзлюклюлюк бла бийлик этеди.

¹ Сора не айтайыкъ? Аллахны шафауаты кёп болур ючюн, биз гюняхдамы къалайыкъ? Чыртда угъай! ² Биз гюняхха ёлгенбиз, сора энтда гюняхда къалай жашайыкъ? ³ Биз барыбыз да, Масих Иссагъа сууда кёмюлдюрюлюп ийман салгъанла, Аны ёлгенине кёмюлдюрюлгенибизни билмеймисиз? ⁴ Ол себепден, Масих Атаны махтаулу кючю бла ёлгенледен тиргизилгени кибик, биз да жангыргъан жашауда алай жюрюр ючюн, сууда кёмюлдюрюлюуюбюз бла Аны бла ёлюмге кёмюлгенбиз. ⁵ Нек десегиз биз Аны ёлгенича ёлюп Анга къошулгъан эсек, Аны тиргизилгенича да тиргизилип Анга къошулурукъбуз. ⁶ Биз энди гюняхны къуллары болмайыкъ деп, гюняхлы чархларыбыз къорар ючюн бизни эски жашауубуз Масих бла бирге къачха керилгенин билебиз. ⁷ Нек десегиз ёлген адам гюняхдан азат болгъанды. ⁸ Биз Масих бла ёлген эсег’а, Аны бла жашарыгъыбызгъа да ийнанабыз. ⁹ Ёлгенледен тиргизилген Масих энди ёлмезлигин, ёлюмню энди Анга эркинлиги болмагъанын билебиз. ¹⁰ Нек десегиз Аны ёлюмю гюнях ючюн ауал эм ахыр ёлюмдю, Аны жашауу уа Аллах ючюн жашауду. ¹¹ Сиз да алай, кесигизни гюнях ючюн ёлгеннге, Аллах ючюн а Раббийибиз Масих Иссада жашагъаннга санагъыз. ¹² Алай бла, сизни ёллюк чархыгъызда гюнях бийлик этмесин, сиз аны кюсегенлерине бойсунмазча. ¹³ Эмда санларыгъызны гюняхха тюзлюксюзлюкню амалына бермегиз, алай а, ёлгенледен тиргизилгенле кибик, кесигизни Аллахха, санларыгъызны да тюзлюклюлюкню амалына Аллахха беригиз. ¹⁴ Гюнях сизге бийлик этерге керек тюйюлдю; нек десегиз сиз Тауратны Законуну буйругъунда тюйюлсюз, алай а Аллахны шафауатыны оноуундасыз. ¹⁵ Сора не айтайыкъ? Биз, Законну буйругъунда тюйюл, Раббийни шафауатыны оноуунда болгъаныбыз ючюн, гюняхмы этейик? Чыртда угъай! ¹⁶ Сиз, кимге боюн салып, кесигизни кимни айтханын этерге къулгъа бере эсегиз, аны къуллары болгъаныгъызны билмеймисиз? Не ёлюм келтирген гюняхны къулларысыз, неда тюзлюклюлюк келтирген боюн салыуну къулларысыз. ¹⁷ Алай а сиз алгъын гюняхны къуллары болгъан эсегиз да, энди уа сиз кесигизни анга берген окъууну юйретиуюне таза жюрекден тынгылаучу болгъаныгъыз ючюн Аллахха шукур! ¹⁸ Гюняхдан азат этилип, сиз энди тюзлюклюлюкню къуллары болгъансыз. ¹⁹ Сизни адам табийгъатыгъызны къарыусузлугъу ючюн адамланы оюмларына кёре айтама. Сиз санларыгъызны харамлыкъгъа эм законсузлукъ ишлеге къулгъа къалай берип тургъан эсегиз да, энди уа санларыгъызны, сыйлы болур ючюн, тюзлюклюлюкге къулгъа алай беригиз. ²⁰ Нек десегиз сиз гюняхны къуллары болгъан заманыгъызда тюзлюклюлюкден азат эдигиз. ²¹ Сиз энди ала ючюн уялгъан ишлеригизден ол заманда не хайырыгъыз бар эди? Ол ишлени ахыры ёлюмдю. ²² Энди уа, сиз гюняхдан азат этилип, Аллахны къуллары болгъаныгъызгъа кёре, сизни хайырыгъыз сыйлылыкъды, ахыры уа ёмюрлюк жашауду. ²³ Нек десегиз гюнях ючюн тёлеу ёлюмдю, Аллахны саугъасы уа, Раббийибиз Масих Иссада ёмюрлюк жашауду.

¹ Къарындашла – мен Тауратны Законун билгенлеге айтама – сиз Законну адамгъа жаланда ол сау заманда эркинлиги болгъанын билмеймисиз? ² Сёз ючюн, эри болгъан тиширыу Закон бла сау эрине байланыпды; эри ёлсе уа, ол некях законундан эркин болады. ³ Ол себепден, эри сау тургъанлай башха эрге барса, зийначы аталады; эри ёлсе уа, некях законундан эркинди эм башха эрге барса да зийначы боллукъ тюйюлдю. ⁴ Аныча къарындашларым, сиз да башханыкъыла – ёлгенледен тиргизилген Масихникиле болур ючюн – Масихни чархыны юсю бла ёлюп Закондан эркин болгъансыз. Бу да, биз Аллахха къуллукъ этиуюбюзде жетишимли болур ючюндю. ⁵ Нек десегиз биз чархыбызны табийгъатына кёре жашагъан заманда, Закон бла ачыкъ болгъан кемсиз, гюняхлы кюсемекликле бизни санларыбызда жюрюй эдиле, аладан а биз ёлюм келтирген ишле этгенбиз. ⁶ Энди уа, биз ёлюп, алгъын бизни жесир этген Закондан эркин болгъанбыз, жазылгъан жорукъла бла байланнган эски жашауда тюйюл, Сыйлы Нюр берген жангы жашауда Аллахха къуллукъ этер ючюн Закондан азат болгъанбыз. ⁷ Сора не айтайыкъ? Тауратны Закону гюняхмы болду? Чыртда угъай! Алай а мен гюняхны башхадан болмай, Законну юсю бла билгенме; нек десегиз Закон: «Кюсеме», – деп айтмаса эди, мен кюсеуню не болгъанын да ангыламаз эдим. ⁸ Алай а гюнях, бу фарыздан сылтау алып, менде хар тюрлю кюсеуню чыгъаргъанды; нек десегиз Законсуз гюнях ёлюдю. ⁹ Бир заманлада мен Закондан хапарым болмай жашай эдим; фарыз келген заманда уа гюнях тирилгенди, ¹⁰ Мен а ёлгенме. Сора жашатыр ючюн берилген фарыз манга ёлюм келтиргенди. ¹¹ Нек десегиз гюнях, фарыздан сылтау алып, мени терилтгенди эм аны бла ёлтюргенди. ¹² Ол себепден Закон сыйлыды, фарыз да сыйлыды, тюзлюклюдю эм хайырлыды. ¹³ Алай бла хайырлы зат манга ёлюммю келтирди? Чыртда угъай! Алай а гюнях, гюнях болгъаны танылыр ючюн эм фарызны юсю бла мардасыз бек гюняхлы болуп чыгъар ючюн, хайырлы затны болушлугъу бла манга ёлюм сала эди. ¹⁴ Нек десегиз биз билгенликден, Закон нюрденди, мен а чархданма, гюняхха къулгъа сатылгъанма. ¹⁵ Аны себепли не этгеними ангыламайма; нек десегиз этерге сюйгеними этмейме, нени кёрюп болмай эсем да, аны уа этеме. ¹⁶ Сюймеген затымы эте эсем а, Законну хайырлы болгъанына Закон бла келишеме. ¹⁷ Ол себепден а энди мен тюйюл, алай а менде жашагъан гюнях аны этеди. ¹⁸ Нек десегиз менде, алай демеклик адам табийгъатымда хайырлы зат жашамагъанын билеме. Игилик этерге сюйюу менде барды, алай а аны этерге кючюм жокъду. ¹⁹ Игиликни этерге сюйгенимлей да этмейме, аманлыкъны уа этерге сюймегенимлей да этеме. ²⁰ Сора этерге сюймегеними эте эсем а, энди мен тюйюл, алай а менде жашагъан гюнях аны этеди. ²¹ Алай бла мен, игилик этерге сюйген заманымда, манга аманлыкъ этерге тюшген законну кёреме. ²² Нек десегиз, ич адамыма кёре, Аллахны Законунда зауукълукъ табама. ²³ Мени санларымда уа, акъылымдагъы Законнга къажау кюрешип, мени жесир этген башха закон кёреме. ²⁴ Мен харип адам! Ёлюмню оноуунда болгъан бу чархымдан мени ким къутхарыр? ²⁵ Бизни Раббийибиз Масих Иссаны юсю бла Аллахха шукур болсун! Алай бла ол биягъы мен акъылым бла Аллахны Законуна, адам табийгъатым бла уа гюняхны законуна къуллукъ этеме.

¹ Алай бла Масих Иссада болгъанлагъа, адам табийгъатларына кёре тюйюл, алай а Сыйлы Нюрге кёре жашагъанлагъа энди бир тюрлю терслениу жокъду, ² Нек десегиз жашау берген Нюрню закону Масих Иссаны юсю бла мени гюняхны бла ёлюмню законундан азат этгенди. ³ Адам табийгъатдан кючсюзленнген Тауратны Закону эталмагъанны Аллах этгенди; Кесини Уланын, адамны гюняхлы чархына ушагъан чарх бла гюнях ючюн къурман болургъа ийгенди эм гюняхха адам чархында сюд этгенди. ⁴ Тауратны Законуну буйрукълары бизде, чархыбызны табийгъатына кёре тюйюл, Сыйлы Нюрге кёре жашагъанлада толур ючюн Ол алай этгенди. ⁵ Нек десегиз гюняхлы табийгъатына кёре жашагъанла ол табийгъат кюсегенни юсюнден ойлашадыла, Нюрге кёре жашагъанла уа Нюр жанындан ойлашадыла. ⁶ Гюняхлы табийгъатны ойлашыулары ёлюм, Нюрню ойлашыулары уа жашау эм ырахатлыкъды. ⁷ Нек десегиз гюняхлы табийгъатны ойлашыулары Аллахха къажаулукъду; Аллахны Законуна бойсунмайдыла, бойсуналлыкъ да тюйюлдюле. ⁸ Ол себепден гюняхлы табийгъатларыны оноуунда жашагъанла Аллахны ыразы эталлыкъ тюйюлдюле. ⁹ Алай а Аллахны Нюрю сизде жашай эсе, сиз гюняхлы табийгъатыгъызны тюйюл, Нюрню оноуундасыз. Масихни Нюрю анда болмагъан адам а Масихни тюйюлдю. ¹⁰ Масих сизде эсе уа, чархыгъыз гюнях амалтын ёлюдю, нюрюгюз а тюзлюклю болгъаныгъыз ючюн сауду. ¹¹ Иссаны ёлгенледен тиргизген Аллахны Нюрю сизде жашай эсе уа, сора Масихни ёлгенледен тиргизген Аллах, Кесини сизде жашагъан Нюрю бла, сизни ёллюк чархларыгъызгъа да жашау берликди. ¹² Алай бла, къарындашла, биз гюняхлы табийгъатыбызгъа кёре жашарча гюняхлы табийгъатыбызгъа борчлу тюйюлбюз. ¹³ Нек десегиз гюняхлы табийгъатыгъызгъа кёре жашай эсегиз, ёллюксюз; гюняхлы чархыгъызны этген ишлерин Сыйлы Нюрню болушлугъу бла ёлю эте эсегиз а, жашарыкъсыз. ¹⁴ Аллахны Нюрю бла жюрютюлгенле барысы да Аллахны уланларыдыла; ¹⁵ Нек десегиз энтда къоркъуп жашарча сиз къул болур нюрню алмагъансыз, алай а уланлыкъны Нюрюн алгъансыз. Ол Нюр бла уа: «Абба, Ата!» – деп чакъырабыз. ¹⁶ Биз Аллахны сабийлери болгъаныбыз гъа, Ол Нюр Кеси бизни нюрюбюзге шагъатлыкъ этеди. ¹⁷ Сабийлери эсег’а, сора юлюшлюлерибиз. Биз, Масих бла бирге махтаулу болур ючюн, Аны бла бирге азап чеге эсек, Аллахны юлюшлюлерибиз, Масих бла да бирге юлюшлюбюз. ¹⁸ Бизни эндиги бир болжалгъа дери къыйналыуларыбыз, бизге ачыллыкъ махтау бла тенглешдиргенде, бир жукъгъа да саналлыкъ тюйюлдю деп ойлайма. ¹⁹ Аллах жаратхан алам Аллахны уланларыны ачыкъ боллукъларын ышанып сакълайды. ²⁰ Нек десегиз алам фанагъа сюйюп боюн салмагъанды, алай а Аллахны буйругъу бла боюн салгъанды. ²¹ Алам кеси да, чиримекликге къуллукъ этиуден азат болуп, Аллахны сабийлерини махтаулу азатлыкъларына жетеригине ышанып боюн салгъанды. ²² Жаратылгъанла бары да бирге эндиге дери да ынчхагъанларын эм къозлаудан къыйналгъанча къыйналгъанларын билебиз; ²³ Эм жалан жаратылгъанла тюйюл, алай а биз кесибизде Сыйлы Нюрню биринчи хайырлары болгъанлай да, биз да, ичибизден ынчхап, Аллах бизни Кесине улан этерин, чархыбызны жулунурун сакълайбыз. ²⁴ Нек десегиз биз бу ышаныуубуз бла къутхарылгъанбыз. Ышаннган затыбыз кёрюне эсе уа, ол ышаныу тюйюлдю, нек десегиз адам ышаннганын кёре эсе, сора аны энтда ышаныргъа не кереги барды? ²⁵ Алай а кёрмеген затыбызгъа ышана эсек, аны тёзюмлюк бла сакълайбыз. ²⁶ Аны кибик, Сыйлы Нюр да бизни зайифлигибизде бизге болушады: нек десегиз биз нени юсюнден тилек этеригибизни да кереклисича билмейбиз, алай а Нюр Кеси сёз бла айтып ангылатылмазлыкъ ахтыныула бла бизни ючюн ёкюллюк этеди. ²⁷ Нюрню не сагъышы болгъанын, жюреклени Сынаучу уа биледи; нек десегиз Нюр Аллахны буйругъу бла сыйлыла ючюн ёкюллюк этеди. ²⁸ Аллах Аны сюйгенлеге, Аны муратына кёре чакъырылгъанлагъа, хар нени да игиликге болдургъанын билебиз; ²⁹ Нек десегиз Кесини Уланы кёп къарындашланы арасында биринчи туугъан болур ючюн, Аллах кимлени алгъындан билген эсе, аланы Кесини Уланыны сыфатына ушатыргъа алгъындан белгили этгенди. ³⁰ Ол кимлени алгъындан белгили этген эсе, аланы чакъыргъанды; кимлени чакъыргъан эсе, аланы ариулагъанды; кимлени ариулагъан эсе, аланы махтаулу этгенди. ³¹ Сора анга не айтайыкъ? Аллах бизни жанлы эсе, кимди бизге къажау болаллыкъ? ³² Кесини Уланын да аямай, алай а Аны бизни барыбыз ючюн берген Аллах Аны бла бизге хар нени да къалай бермез? ³³ Аллах сайлагъанланы ким терслерикди? Аланы ариулаучу Аллахды. ³⁴ Ким айып этеди? Масих Исса ёлгенди, алай болгъанлыкъгъа тиргизилгенди. Ол Аллахны онг жанындады, Ол бизни ючюн ёкюллюк этеди. ³⁵ Аллахны сюймеклигинден бизни ким айырлыкъды: къайгъымы, неда тарлыкъмы, неда зулмулукъму, неда ачлыкъмы, неда жаланнгачлыкъмы, неда къоркъуулукъму, неда къылычмы? ³⁶ Китапда жазылгъаны кибик: «Сени ючюн бизни хар кюн сайын ёлтюредиле, бизни союллукъ къойлагъа санайдыла». ³⁷ Алай а бу болумланы барысын да бизни Сюйгенни кючю бла хорлайбыз. ³⁸ Ол себепден не ёлюм, не жашау, не мёлекле, не башчыла, не кючле, не эндиги, не боллукъ, ³⁹ Не бийиклик, не теренлик, неда бир башха тюрлю жаратылгъан зат, бизни Раббийибиз Масих Иссада болгъан, Аллахны сюймеклигинден бизни айыралмазлыгъына мен толу ийнанама.

¹ Мен Масихни болуп, тюзюн айтама, ётюрюк айтмайма. Сыйлы Нюрню оноуунда болгъан мени жюрегим да айтханларым тюз болгъанына манга шагъатлыкъ этеди. ² Манга уллу жарсыу барды, мени жюрегим тохтаусуз къыйналып турады. ³ Мени туугъан къарындашларым ючюн – мени бла бир тукъумлу болгъан Израильлиле ючюн – мен кесим, налат болуп, Масихден къысталыргъа сюер эдим. ⁴ Аллах аланы Кесине уланла этгенди, алагъа Кесини аламатлыгъын кёргюзтгенди, ала бла кесаматларын этгенди, алагъа Тауратны, Кесине къуллукъ этдириу низамны эмда ант сёзлени бергенди. ⁵ Уллу атала аланы аталарыдыла. Масих да чархына кёре аладанды. Ол а ёмюрледе да алгъышлы, барыны да башында болгъан Аллахды. Амин. ⁶ Алай а бу, Аллахны сёзю толмагъанды демек тюйюлдю. Нек десегиз Израильден болгъанланы бары тюйюлдю Израильли. ⁷ Ибрахимни урлугъундан болгъанланы да, бары тюйюлдю Ибрахимни сабийлери; алай а: «Сени урлугъунг Исхакъ бла бардырыллыкъды», – деп айтылгъанды. ⁸ Алай демеклик Аллахны сабийлери чархдан жаратылгъан сабийле тюйюлдюле, алай а ант сёз бла берилген сабийле Ибрахимни урлугъуна саналадыла. ⁹ Ант бла берилген сёз а былайды: «Келлик жыл тамам бу заманда келликме эмда Сараны уланы боллукъду». ¹⁰ Эмда жангыз ол тюйюлдю; алай а Рабийгъатны къарынына да атабыз Исхакъдан эки улан бир кезиуге тюшген заманда алай болгъанды. ¹¹ Нек десегиз ала туугъунчу эм не ахшы, не аман этгинчи, Аллах аланы бирин сайлагъанда Аны мураты адамланы этген ишлерине кёре тюйюл, алай а Кесини чакъырыууна кёре болур ючюн, ¹² Рабийгъатха: «Таматасы кичисине къул боллукъду», – деп айтылгъанды, ¹³ Китапда: «Мен Якъупну сюйгенме, Эсауну уа кёрюп болмагъанма», – деп жазылгъаны кибик. ¹⁴ Сора не айтайыкъ? Аллахда тюзсюзлюкмю барды? Чыртда угъай! ¹⁵ Нек десегиз Ол Мусагъа: «Мархамат этеригиме мархамат этерме, жазыкъсынырыгъыма жазыкъсынырма», – деп айтады. ¹⁶ Алай бла сайланыу адамны сюйгенинден неда кюрешгенинден тюйюлдю, мархамат этиучю Аллахданды. ¹⁷ Ол себепден Китап фыргъаууннга: «Сени юсюнгде къудуретими кёргюзтюр ючюн эм битеу жерни юсюнде Мени атым билдирилир ючюн салгъанма Мен сени», – деп айтады. ¹⁸ Алай бла Аллах мархамат этерге сюйгенине мархамат этеди, терсакъыл этерге сюйгенин а терсакъыл этеди. ¹⁹ Сен а манга: «Сора дагъыда не ючюн терслейди? Нек десенг Аны буйругъуна ким къажау туралыр?» – деп айтырса. ²⁰ Адам, сен а кимсе, Аллах бла даулашырча? Ишленнген зат аны ишлегеннге: «Сен мени былай нек этдинг?» – деп айтырмы? ²¹ Къошун ишлеучю, бир балчыкъдан окъуна бир сауутну энчи жюрютюуге, башхасын а сансыз жюрютюуге этерге топурагъына эркин тюйюлмюдю? ²² Сора Аллах, чамланыууна тюберик, жоюлургъа хазырланнган сауутлагъа уллу тёзюмлюк бла чыдагъан эсе, не айтайыкъ? ²³ Ол, махтаулу болургъа алгъындан хазырлап, алагъа мархамат этерик адамларына Кесини махтаууну байлыгъын билдирир ючюн алай этген эсе, не айтайыкъ? ²⁴ Биз да Аллах жангыз иудейлиледен тюйюл, алай а башха миллетледен да чакъыргъан ол адамлабыз, ²⁵ Хошея файгъамбарны китабында да: «Мени халкъым болмагъаннга, „Мени халкъым“ деп, сюйюлюнмегеннге да „сюйюлюннген“ деп атарма» ²⁶ Эм: «Алагъа: „Сиз Мени халкъым тюйюлсюз“ деп айтылгъан жерде, „жашау бериучю Аллахны Уланлары“ деп аталлыкъдыла», – деп айтылгъаны кибик. ²⁷ Иешая уа Израильни юсюнден: «Израиль улуланы саны тенгизни юзмези чакълы окъуна болсада, жангыз да артда къалгъан бек азы къутхарыллыкъды. ²⁸ Нек десегиз Раббий сюд ишин къысха заманда тюзлюк бла этип бошарыкъды, жер башында кесгин иш этерикди », – деп ачыкъ айтады, ²⁹ Дагъыда Иешая: «Неге да кючю жетген Раббий бизге туудукъла къалдырмаса эди, биз Содомча болур эдик эм Гоморагъа ушар эдик», – деп алгъындан билдиргени кибик. ³⁰ Сора не айтайыкъ? Тюзлюклюлюкню излемеген миллетле тюзлюклюлюкге, иймандан келген тюзлюклюлюкге жетгендиле. ³¹ Тюзлюклюлюк бериучю закон излеген Израиль а, бу законнга жетмегенди. ³² Не ючюн? Ийман бла тюйюл, Тауратны Законуну буюргъанларын этиу бла ариуланыргъа кюрешгендиле. ³³ Нек десегиз Китапда: «Ма, Сионда чырмау къая эмда абындырыучу таш салама; Анга ийнаннган ким болсада айыплы боллукъ тюйюлдю», – деп жазылгъаны кибик, ала абындырыучу ташха абыннгандыла.

¹ Къарындашла! Израильни къутхарылырын сюйюп, жюрегими теренинден аны ючюн Аллахдан тилек этеме. ² Нек десегиз Аллах ючюн эришиулюклери болгъанына алагъа шагъатлыкъ этеме, алай а эришиулюклери оюм бла тюйюлдю. ³ Нек десегиз ала, Аллахны берген тюзлюклюлюгюн ангыламай эм кеслери тюзлюклюлюкге жетерге кюрешип, Аллахны берген тюзлюклюлюгюне боюн салмагъандыла. ⁴ Хар ийнаннган ариуланыр ючюн, Масих Тауратны Законун ахырына жетдиргенди. ⁵ Муса Закондан болгъан тюзлюклюлюкню юсюнден: «Законну толтургъан адам аны бла жашау табарыкъды», – деп жазады. ⁶ Иймандан болгъан тюзлюклюлюк а былай айтады: «Сен жюрегингде: кёкге – алай демеклик Масихни тюшюрюрге ким чыгъар?», – деп айтма. ⁷ Неда: «Тюпсюз теренликлеге – алай демеклик Масихни ёлгенледен ёрге кётюрюрге ким тюшер?», – деп айтма. ⁸ Алай а Китап не айтады? «Аллахны сёзю санга жууукъду, сени ауузунгдады эм сени жюрегингдеди». Биз билдирген ийман сёзю ма буду. ⁹ Иссаны Раббий болгъанын ачыкъ айтып, ауузунг бла шагъатлыкъ этсенг, жюрегинг бла да, Аллах Аны ёлгенледен тиргизгенине ийнансанг, къутхарыллыкъса. ¹⁰ Нек десенг адам жюреги бла ийнанып ариуланады, ийнаннганына уа ауузу бла шагъатлыкъ этип къутхарылады. ¹¹ Китапда: «Анга ийнаннган бир адам да айып аллыкъ тюйюлдю» деп айтылады. ¹² Мында иудейлилени бла башха миллетлилени арасында башхалыкъ жокъду; нек десегиз Раббий барысында да бирди, Аны чакъыргъанланы барына да Аны байлыгъы кёпдю. ¹³ «Раббийни атын айтып тилек этген хар адам къутхарыллыкъды». ¹⁴ Алай а Анга ийнанмагъанларын къалай чакъырсынла? Аны юсюнден эшитмегенлерине къалай ийнансынла? Хапар бериучю болмаса къалай эшитсинле? ¹⁵ Сора хапар къалай берсинле, хапар берирге ийилмеселе? Китапда жазылгъаны кибик: «Жарашыулукъну Хайыр Хапарын, ахшылыкъны Хайыр Хапарын билдиргенлени аякълары къалай аламатдыла!» ¹⁶ Алай а Хайыр Хапаргъа битеу бары тынгыламагъандыла. Ол себепден Иешая: «Раббий! Биз берген хапаргъа ким ийнанды?» – деп айтады. ¹⁷ Алай бла ийман Хайыр Хапарны эшитиуденди, эшитиу а Аллахны сёзю билдирилиуюнденди. ¹⁸ Алай а сорама: ала эшитмегенмидиле? Ол угъай эсенг: «Аланы ауазлары битеу жерни юсюнде эшитилгенди эм аланы сёзлери дунияны чегине дери жетгенди». ¹⁹ Энтда сорама: Израиль билмегенмиди? Алай а бек алгъа Муса: «Болмагъан халкъ бла Мен сизде эришлик чыгъарырма, сизни оюмсуз халкъ бла ачыуландырырма», – деп айтады. ²⁰ Иешая уа: «Мени излемегенле Мени тапхандыла, Мени юсюмден сормагъанлагъа Мен ачыкъ болгъанма», – деп таукел айтады. ²¹ Израильни юсюнден а: «Мен сау кюнню бу тынгыламаучу, бойсунмаучу халкъгъа къолларымы узатып тургъанма», – деп айтады.

¹ Алай бла сорама: Аллах Кесини халкъын атыпмы къойгъанды? Чыртда угъай! Нек десегиз мен да Израильлиме, Ибрахимни урлугъунданма, Беняминни тукъумунданма. ² Аллах Кесини алгъындан билген халкъын атмагъанды. Неда Сыйлы Китапда Илиясны юсюнден не айтылгъанын ол Израильден Аллахха къалай тарыгъып: ³ «Раббий! Сени файгъамбарларынгы ёлтюргендиле, Санга къурман этилиучю жерлени бузгъандыла; жангыз мен къалгъанма, мени жанымы да алыргъа излейдиле», – деп айтханын билмеймисиз? ⁴ Аллах а жууабында анга не айтады? «Баалны аллында тобукъланмагъан жети минг адамны Мен Кесиме сакълагъанма», – дейди. ⁵ Аны кибик эндиги заманда да, Аллахны шафауаты бла сайланнган гитче жамауат барды. ⁶ Шафауат бла болгъан эсе уа, сора сууап ишледен тюйюлдю, алайсыз шафауат энди шафауат болмаз эди. ⁷ Сора не? Израиль нени излеген эсе да, анга жетмегенди; сайланнганла уа жетгендиле, къалгъанлары уа терсакъыл болгъандыла. ⁸ Китапда жазылгъаны кибик: «Аллах бюгюннге дери окъуна алагъа жукълатыу халны, кёрмеген кёзлени эм эшитмеген къулакъланы бергенди». ⁹ Дауут да: «Аланы ашлары алагъа тузакъ, къапхан болсун, уругъа жыгъылып, азапларына тюшсюнле! ¹⁰ Аланы кёзлери кёрмез кибик къарангы болсун. Аркъаларын да ёмюрлюкге гуппур эт!» – деп айтханды. ¹¹ Алай бла сорама: ала тайып къалырчамы абынып тыйылгъандыла? Чыртда угъай! Алай а алада эришиулюк чыгъарыр ючюн, аланы этген терсликлеринден, башха миллетлеге къутхарылыу берилгенди. ¹² Сора аланы терсликлери дуниягъа байлыкъ келтирген эсе, аланы жарлы болуулары да башха миллетлеге байлыкъ келтирген эсе, тамамлыкълары уа андан да уллу байлыкъ келтирликди! ¹³ Сизге, башха миллетлилеге айтама: миллетлени абустолуча, къуллукъ этиуюмю мен махтаулу этеме. ¹⁴ Алай бла кеси миллетлилеримде эришиулюк чыгъарып, аладан бир къауумларын къутхарыргъа болурма деп умут этеме. ¹⁵ Нек десегиз аланы къоюлуулары дуниягъа Аллах бла жарашыулукъ келтирген эсе, къабыл этилликлери уа ёлюмден жашаугъа кёчюу тюйюл эсе, неди? ¹⁶ Тылыны башламы сыйлы эсе, саулай да сыйлыды; эм терекни тамыры сыйлы эсе, бутакълары да сыйлыдыла. ¹⁷ Бутакъладан бир бёлеги сыннган эселе уа, сен а, кийик зейтун терек, аланы жерлерине жалгъанып, зейтун терекни тамырына бла суууна ала бла бирча къошулгъан эсенг, ¹⁸ Сора бутакъланы алларында асыры бек махтанма; махтана эсенг а, тамырны сен тутмай, алай а тамыр сени тутханын эсинге тюшюр. ¹⁹ Сен а: «Мен жалгъаныр ючюн сыннгандыла бутакъла», – деп айтырса. ²⁰ Тюздю. Ала иймансызлыкъдан сыннгандыла, сен а ийманынг бла тураса: ёхтем болма, алай а къоркъ. ²¹ Нек десенг Аллах терекни кеси бутакъларын аяп къоймагъан эсе, сора сакъ бол, сени аяп къоярмы? ²² Алай бла Аллахны ахшылыгъын эм къатылыгъын кёресе. Ол тайып къалгъанлагъа къатыды; санга уа, Аны ахшылыгъында турсанг, ахшылыкълыды; турмасанг а, сен да кесилип тюшериксе. ²³ Алай а ала да ийнанмауда турмасала, жангыдан жерлерине жалгъанырыкъдыла; нек десегиз аланы дагъыда жалгъаргъа Аллахны кючю барды. ²⁴ Ол себепден сен, табийгъатда кийик зейтун терекден кесилип, сени табийгъат халингде болмагъан иги зейтун терекге жалгъаннган эсенг, сора бегирек да ол керти бутакъла кеслерини зейтун тереклерине жалгъанырла! ²⁵ Къарындашла, сиз кесигизни уллудан кёрмез ючюн, бу тасханы сизге билдирмей къояргъа сюймейме: Израильни терсакъыл болгъаны жангыз бир заманнга дери, башха миллетлиледен къутхарыллыкъланы саны толгъунчугъа дериди. ²⁶ Алай бла битеу Израиль къутхарыллыкъды, Китапда: «Къутхарыучу Сиондан келликди эмда Якъупдан аллахсызлыкъны кетерликди. ²⁷ Аланы гюняхларын къурутхан заманымда Мени ала бла этерик кесаматым буду», – деп жазылгъаны кибик. ²⁸ Хайыр Хапарны бериу жанындан, сизни ючюн ала жауладыла; сайланыуну жанындан а, аталарыны хурметинден Аллах сюйгенледиле. ²⁹ Нек десегиз Аллахны саугъалары бла чакъырыуу ызына алынмайдыла. ³⁰ Сиз да бир заманлада Аллахха бойсунмай эдигиз, энди уа аланы бойсунмаулары бла Ол сизге мархамат этгенди. ³¹ Муну кибик, Ол, сизге мархамат этгенича, алагъа да мархамат этер ючюн, ала да энди бойсунмаучу болгъандыла. ³² Нек десегиз Аллах, барысына да мархамат этер ючюн, барысын да бойсунмаугъа жесир этгенди. ³³ Эй, Аллахны байлыгъы, терен акъыллылыгъы эм билими къалай чексиз уллуду! Аны къадарлары акъылгъа сыйынмазча, Аны жоллары да тинтип билмезча къалай сейирликдиле! ³⁴ «Раббийни акъылын ким билгенди? Неда Анга ёзюр ким болгъанды?» ³⁵ «Неда алгъындан Анга ким зат бергенди, Ол къайтарып берирге борчлу болур кибик?» ³⁶ Нек десегиз хар неда Анданды, Аны юсю блады эмда Аны ючюндю. Ёмюрледе да махтау Анга болсун. Амин.

¹ Алай бла, къарындашла, Аллахны мархаматлылыгъыны хатыры бла сизден тилейме, кесигизни Аллахха тири, сыйлы, Аны ыразы этиучю къурманнга беригиз. Анга тюз акъыл бла алай къуллукъ этерсиз. ² Эмда бу ёмюрню халы бла келишмегиз, алай а Аллахны ыразы этген ахшылыкълы, тамам толу буйругъу не болгъанын сиз ангылар ючюн акъылыгъызны жангырыуу бла тюрленигиз. ³ Аллах манга берген шафауатха кёре, сизни хар биригизге да айтама: кеси юсюгюзден кереклисинден кёп ойлашмагъыз; алай а Аллах хар биригизге да юлешип берген ийманыгъызны мардасына кёре эслилик бла ойлашыгъыз. ⁴ Нек десегиз, бизни бир чархыбызда кёп санла болуп, алай а битеу санланы ишлери бирча болмагъаны кибик, ⁵ Биз да кёп эсек да, Масихде бир чарх къурайбыз, башха-башха уа бирибиз-бирибизге санлабыз. ⁶ Аллахны бизге берген шафауатына кёре, бизни тюрлю нюр фахмуларыбыз барды. Файгъамбарлыкъ фахмусу болгъан адам, ийманыны мардасына кёре, файгъамбарлыкъ этсин; ⁷ Къуллугъу болгъан, къуллукъ этиуде турсун; устаз эсе устазлыкъ этсин. ⁸ Насийхатчы эсе, насийхат берсин; юлешиучю эсе, чомартлыкъ бла юлешсин; башчы эсе, кёл салып башчылыкъ этсин; мархамат этиу фахмусу болгъан муну жарыкъ кёллюлюк бла этсин. ⁹ Сюймеклигигиз кёзбаусуз болсун. Аманлыкъдан жийиргенигиз, ахшылыкъгъа жабышыгъыз. ¹⁰ Ариу хал бла бир-биригизге къарындаш сюйюучюле болугъуз. Бир-биригизге хурмет этиуде эришигиз. ¹¹ Кёл салыудан къарыусуз болмагъыз, нюр бла жаныгъыз, Раббийге къуллукъ этигиз. ¹² Ышаныу бла къууаныгъыз, къыйынлыкъда тёзюмлю, тилек этиуде тохтаусуз болугъуз. ¹³ Сыйлыланы кереклилерине къайгъырып къарагъыз, къонакъ алыучу болургъа эришигиз. ¹⁴ Сизге зулму этгенлеге алгъыш этигиз; алгъыш этигиз, къаргъыш а этмегиз. ¹⁵ Къууаннганла бла къууаныгъыз, жилягъанла бла жилягъыз. ¹⁶ Кеси арагъызда бир акъыллы болугъуз. Уллу билимлилик этерге кюрешмегиз, алай а сабырлагъа нёгер болугъуз, кесигизни уллудан кёрмегиз. ¹⁷ Бир кишиге да аманлыкъ ючюн къайтарып аманлыкъ этмегиз, алай а битеу адамлагъа иги кёрюннген затланы этерге кюрешигиз. ¹⁸ Сизни жаныгъыздан онг бар эсе, битеу адамла бла жарашыулукъда болугъуз. ¹⁹ Кесигиз ючюн дерт жетдирмегиз, сюйюлюннгенле, алай а муну Аллахны чамланыууна бошлап къоюгъуз. Нек десегиз Китапда: «Дерт жетдириу Мениди, Мен тийишлисин берирме, – дейди Раббий», – деп жазылгъанды. ²⁰ Алай бла душманынг ач эсе, анга ашат; суусап эсе, анга ичир. Нек десенг муну этип, сен аны башына жаннган кесеуле жыярса . ²¹ Аманлыкъгъа хорлатма, алай а аманлыкъны игилик бла хорла.

¹ Хар адам баш властьлагъа боюн салсын; нек десегиз Аллахдан болмагъан власть жокъду, болгъан властьла уа Аллах жанындан салыннгандыла. ² Ол себепден властьха къажау болгъан, Аллах салгъаннга къажау болады; къажау болгъанла уа кеслери-кеслерине айып алырла. ³ Нек десегиз башчылыкъ этиучюле иги ишле ючюн къоркъунчлу тюйюлдюле, алай а аман ишле ючюн къоркъунчлудула. Сюемисе властьдан къоркъмазгъа? Игилик эт, сора андан махтау алырса. ⁴ Нек десенг башчы санга игилик болур ючюн Аллахны жумушчусуду. Аманлыкъ эте эсенг а, къоркъ! Нек десенг ол къылычны бош жюрютмейди, аманлыкъ этгеннге дерт жетдирип азап берир ючюн ол Аллахны жумушчусуду. ⁵ Ол себепден, азапдан къоркъуп боюн салгъан бла да къалмай, алай а бетсинип боюн салыргъа керекди. ⁶ Жасакъ да сиз аны ючюн бересиз; башчыла, Аллахны жумушчулары болуп, тохтаусуз аны бла кюрешедиле. ⁷ Алай бла хар кимге тийишлисин беригиз: жасакъ тийишлиге – жасакъ; хакъ тийишлиге – хакъ; къоркъуу тийишлиге – къоркъуу; хурмет тийишлиге – хурмет. ⁸ Бир-биригизни сюйюуден башха бир кишиге бир затдан борчлу болуп къалмагъыз; нек десегиз башханы сюйген, Тауратны Законун толтургъанды. ⁹ Нек десегиз: «Зийна этме», «Ёлтюрме», «Урлама», «Жалгъан шагъатлыкъ этме», «Башханы затын кюсеме» деген эмда битеу къалгъан фарызла: «Жууугъунгу, кесингкесинги сюйгенча сюй» деген сёз бла къысха ангылатылады. ¹⁰ Сюймеклик жууугъуна аманлыкъ этмейди, алай бла сюймеклик Тауратны Законун толтурууду. ¹¹ Сиз, жашагъан заманны ангылап, алай этигиз. Энди бизге жукъудан уяныр сагъат келгенди. Нек десегиз ийман салгъан заманыбыздан эсе, къутхарылыуубуз энди жууукъду. ¹² Кече озгъанды, кюн а жууукълашханды: алай бла, къарангылыкъны ишлерин атып, жарыкъны сауутларын юсюбюзге киейик. ¹³ Не тойгъа-оюннга эм ичгичиликге, не хаулеликге эм адепсизликге, не къаугъалагъа эм зарлыкъгъа кесибизни бермегенлей, кюндюзгю кюндеча, кесибизни иги низам бла тутайыкъ. ¹⁴ Алай бла Раббийибиз Масих Иссаны кюбеча юсюгюзге кийигиз эмда гюняхлы табийгъатыгъызны кюсегенлерине бой салыуну ойламагъыз.

¹ Ийманы къарыусуз адамны фикирлени юсюнден даулашмай къабыл этигиз. ² Нек десегиз биреу хар нени да ашаргъа жарагъанына толу ийнанады, къарыусуз а жаланда тахта кёгетле ашайды. ³ Хар нени да ашагъан адам ашамагъанны сансыз этмесин; ашамагъан да ашагъанны терслемесин. Нек десенг Аллах аны къабыл этгенди. ⁴ Кимсе сен, башханы къулун терслеген? Къулну ариулагъан да, терсге санагъан да кесини бийиди. Эмда къул тюз болуп чыгъарыкъды, нек десенг аны ариуларгъа Аллахны кючю барды. ⁵ Биреу кюнню кюнден айырып башха кёреди, башхасы уа хар кюнню да бирчагъа санайды. Хар ким кеси акъылы ийнандыргъанча этсин. ⁶ Кюнлени айыргъан адам Раббий ючюн айырады. Кюнлени айырмагъан адам да Раббий ючюн айырмайды. Хар нени да ашагъан адам Раббий ючюн ашайды, нек десенг Аллахха шукур этеди. Бир къауум затланы ашамагъан адам да Раббий ючюн ашамайды эм Аллахха шукур этеди. ⁷ Бизден бир киши да кеси ючюн жашамайды эм бир киши да кеси ючюн ёлмейди. ⁸ Жашай эсек да, Раббий ючюн жашайбыз, ёле эсек, Раббий ючюн ёлебиз. Ол себепден, жашай эсек, неда ёле эсек да, хар заманда да Раббийнибиз. ⁹ Нек десегиз Масих, ёлгенлеге да, саулагъа да бийлик этер ючюн, ёлюп тиргизилгенди эм жангыдан сау болгъанды. ¹⁰ Сен а къарындашынгы нек терслейсе эмда къарындашынгы нек сансыз этесе? Биз барыбыз да Масихни сюдюню аллына тюшерикбиз. ¹¹ Нек десегиз Китапда: «„Мен жашауум бла ант этеме“, дейди Раббий, „Мени аллымда хар тобукъ сеждагъа ийилликди эм хар тил да Мени Аллах болгъанымы айтып шагъатлыкъ этерикди“», – деп жазылгъанды. ¹² Алай бла, бизни хар бирибиз да Аллахха кеси ючюн жууап берликди. ¹³ Мындан арысында уа бир-бирибизни терслеуню къояйыкъ, андан эсе уа къарындашха тыйгъыч болмазгъа неда аны абындырлыкъ зат этмезге ойлашайыкъ. ¹⁴ Кеси-кесинде харам зат болмагъанын билеме эм Раббий Иссаны болуп мынга толу ийнанама. Алай а не затны да харамгъа санагъан адамгъа ол зат харамды. ¹⁵ Сен ашагъан зат ючюн къарындашынгы жаны къыйнала эсе уа, сен энди сюймеклик бла этмейсе; Масих аны ючюн ёлген адамны, сен ашынг бла жойма! ¹⁶ Сизни ахшылыгъыгъыз аманланмасын. ¹⁷ Нек десегиз Аллахны Патчахлыгъы аш бла суусун тюйюлдю, алай а тюзлюклюлюк, жарашыулукъ эмда Сыйлы Нюрде къууанчды. ¹⁸ Муну бла Масиххе ким къуллукъ эте эсе да, ол Аллахны ыразы этеди эм адамла къабыл кёрюрге тийишлиди. ¹⁹ Алай бла жарашыулукъ келтирген эм бир-бирибизни нюр бла кючлендириуге жарагъан затланы излейик. ²⁰ Аш ючюн Аллахны ишин бузма! Хар аш да тазады, алай а кесини ашагъан заты бла башхалагъа тыйгъыч болгъан адам аманлыкъ этеди. ²¹ Къарындашынга тыйгъыч боллукъ, аны абындырлыкъ неда къарыусуз этерик бир зат ны этгенден эсе, эт ашамагъан, чагъыр ичмеген эм аллай бир затны да этмеген игиди. ²² Сени ийнаныуунгму барды? Аны Аллахны аллында кеси-кесингде тут. Кеси къабыл кёрген затдан кесин терслемеген адам насыплыды. ²³ Шупха этген адам а, аны ашай эсе, терс болады, нек десегиз ийнаныуу бла ашамайды. Ийнаныу бла этилмеген хар зат да гюняхды. ²⁴ Мен жайгъан Хайыр Хапар бла эм Масих Иссаны билдириу бла, аны юсюнден ёмюрлюк заманладан да айтылмай тургъан тасханы ачылыуу бла сизни бегимли этерге Аллахны кючю барды. ²⁵ Ол тасха уа энди баям этилгенди эмда ёмюрлюк Аллахны буйругъуна кёре файгъамбарланы жазгъанлары бла битеу миллетлеге ийманнга боюн салдырыр ючюн билдирилгенди. ²⁶ Терен акъыллы бир Аллахха, Масих Иссаны юсю бла ёмюрледе да махтау болсун. Амин.

¹ Биз, ийманы къарыулула, кесибиз сюйгенни этмей, къарыусузланы зайифликлерин кётюрюрге борчлубуз. ² Бизни хар бирибиз да, жууугъун нюр бла бегимли этер ючюн, анга игилик болсун деп, жууугъуну кёлюне жараргъа керекди. ³ Нек десегиз Масих да Кесини кёлюне жараргъа кюрешмегенди, алай а: «Санга аман айтыучуланы бедиш сёзлери Мени юсюме тюшгендиле», – деп жазылгъаныча болгъанды. ⁴ Битеу алгъындан жазылгъанла уа, бизге акъыл юйретир ючюн, биз Сыйлы Китапладан алгъан тёзюмлюлюк бла эм кёл этиу бла бизни ышаныуубуз болур ючюн жазылгъандыла. ⁵ Тёзюмлюлюк бериучю эм кёл этдириучю Аллах а, Масих Иссаны юйретиуюне кёре, сизни арагъызда бир акъыллы болууну сизге берсин. ⁶ Алай бла бир ниетли болуп, бир аууздан бизни Раббийибиз Масих Иссаны Атасы Аллахха махтау салырсыз. ⁷ Ол себепден Масих, Аллахха махтау бо лур ючюн, сизни къабыл этгени кибик, сиз да бир-биригизни къабыл этигиз. ⁸ Айтханым буду: Масих Исса Аллахны ышаннгылы болгъанын кёргюзтюр ючюн иудейлилеге къуллукъ этиучю болгъанды. Ол аланы аталарына берилген ант сёзле толсунла ⁹ Эм башха миллетле да Аллахны мархаматы ючюн Анга махтау салсынла деп, алай этгенди. Китапда жазылгъаны кибик: «Аны ючюн Санга миллетлени арасында шукур этерикме эм Сени атынга зикир айтырыкъма». ¹⁰ Эм дагъыда: «Эй миллетле, Аны халкъы бла бирге къууаныгъыз!» ¹¹ Эмда: «Битеу миллетле, Раббийге шукур этигиз, битеу халкъла, Анга махтау салыгъыз!» – деп айтылады. ¹² Иешая да: «Ишайны тамырындан Биреу келликди, миллетлеге башчылыкъ этерге турлукъду. Миллетле Анга ышанырыкъдыла», – деп айтады. ¹³ Умут берген Аллах, сиз Сыйлы Нюрню кючюнден ышаныу бла бай болур ючюн ийманда сизни хар тюрлю къууанчдан эм ырахатлыкъдан толтурсун. ¹⁴ Мен кесим да, къарындашларым, сиз игилик этиуден эм хар тюрлю билимден толу болгъаныгъызгъа эмда бир-биригизге насийхат берирге болаллыгъыгъызгъа толу ийнанама. ¹⁵ Алай а, къарындашларым, манга Аллахдан берилген шафауат бла бир къауум затланы сизни эсигизге тюшюрюр ючюн, сизге бираз таукеллик бла жазгъанма. ¹⁶ Аллахны шафауаты бла мен Масих Иссагъа миллетледе къуллукъ этиучю болгъанма. Миллетле Сыйлы Нюр бла сыйлы болуп, Аллахны ыразы этген къурман болур ючюн, мен Аллахны Хайыр Хапарын дин къуллукъчуча жаяма. ¹⁷ Алай бла, мен Масих Иссаны болуп, Аллахха этген къуллугъум бла махтаналлыкъма. ¹⁸ Нек десегиз Масих миллетлени ийманнга бойсундурур ючюн, мени юсюм бла, сёз бла эм иш бла, илишанланы эм сейирлик ишлени кючю бла, Аллахны Нюрюню кючю бла этгенледен башха бир затны да айтыргъа таукел болаллыкъ тюйюлме. ¹⁹ Алай бла, мен, Иерусалимден башлап Иллириягъа дери айланып, Масихни Хайыр Хапарын хар жерде жайгъанма. ²⁰ Аны юсюне да мен, башха адам салгъан мурдорну юсюнде къурамаз ючюн, Хайыр Хапарны Масихни аты белгили болмагъан жерледе жаяргъа кюрешгенме, ²¹ Китапда: «Аны хапарын билмегенле кёрлюкдюле, эшитмегенле да билликдиле», – деп жазылгъаны кибик. ²² Ма бу уа манга, сизге келирге кёп кере чырмау болгъанды. ²³ Энди уа, бу къыраллада мен урунмагъан жер къалмай, сизге уа кёп жылладан бери келирге сюйюп тургъаным себепли, ²⁴ Испаниягъа барыргъа тебиреген заманымда сизге келликме. Ол себепден, алайтын барып, сизни кёрюрме эм сизни кёрюп бираз зауукъ этгенден сора уа, сиз мени ары ашырырсыз деп умут этеме. ²⁵ Энди уа мен, сыйлыланы кереклилерине бир кесек жарар ючюн, Иерусалимге барама. ²⁶ Нек десегиз Македонияны бла Ахаяны жамауатлары Иерусалимде сыйлыланы арасында жарлылагъа бираз болушургъа къабыл кёргендиле. ²⁷ Хау, къабыл кёргендиле. Кертиси да алагъа борчлудула. Нек десегиз миллетле аланы нюр жанындан игиликлерине къошулгъан эселе, сора аланы дуния жанындан кереклилерине жараргъа да керекдиле. ²⁸ Ол ишни толтуруп, жыйылгъан садакъаны алагъа тюз тапдыргъандан сора, мен сизни жерлени юсю бла Испаниягъа кетерме. ²⁹ Сизге келген заманымда уа, Масихни Хайыр Хапарыны толу ахшылыгъы бла келлигими да билеме. ³⁰ Алай болсада, къарындашла, мени бла бирге мени ючюн Аллахдан тилек этерге кюреширигизни, Раббийибиз Масих Исса бла эм Сыйлы Нюрню сюймеклиги бла сизден тилейме. ³¹ Мен Иудеядагъы иймансызладан къу тулур ючюн эм мени Иерусалимдеги жамауатха къуллукъ этиуюмю сыйлыла къабыл этер ючюн ³² Эмда Аллах буюрса, мен сизге къууанч бла келип, сизни бла жюрегим ырахат болур ючюн тилек этигиз. ³³ Ырахатлыкъ бериучю Аллах сизни барыгъыз бла да болсун. Амин.

¹ Бизни эгечибиз, Кенхреяны жамауатыны болушлукъчусу, Фибини сизге танытып иеме: ² Сыйлылагъа тийишлисича Раббий ючюн аны къабыл этигиз, сизде ол не керекли болсада болушугъуз; нек десегиз ол кеси кёплеге да, мени кесиме да болушлукъчу болуп тургъанды. ³ Масих Иссада мени биргеме уруннган нёгерлерим Прискилагъа бла Акилагъа салам айтыгъыз. ⁴ Ала мени жаным ючюн кеслерини башларын да аямагъандыла, алагъа жангыз мен ыспас этип къалмай, алай а башха миллетледен болгъан жамауатла барысы да ыспас этедиле. Аланы юйдеги жамауатларына да салам айтыгъыз. ⁵ Ахиячыладан Масиххе бек алгъа ийнаннган, мен сюйюучю Эпенетге салам айтыгъыз. ⁶ Бизни ючюн кёп уруннган Мариямгъа салам айтыгъыз. ⁷ Мени жууукъларым эм мени бла бирге тюрмеде болгъан, абустолланы арасында махтаулу болгъан эм Масиххе менден да алгъа ийнаннган Андроникге бла Юниягъа салам айтыгъыз. ⁸ Раббийни жолунда багъалы шуёхум Ампилиятха салам айтыгъыз. ⁹ Масихни жолунда бизни бла уруннган нёгерибиз Урбаннга эм мени багъалы шуёхум Стахисге салам айтыгъыз. ¹⁰ Масихни жолунда сыналгъан Апеллисге салам айтыгъыз. Аристобулну юйдегилеринден болгъанлагъа салам айтыгъыз. ¹¹ Мени жууугъум Иродийоннга салам айтыгъыз. Наркисни юйдегилеринден Раббийде болгъанларына салам айтыгъыз. ¹² Раббий ючюн уруннган Трифенагъа бла Трифосагъа салам айтыгъыз. Раббий ючюн кёп уруннган багъалы шуёхум Персидагъа салам айтыгъыз. ¹³ Раббий сайлагъан Руфха эм аны манга да аналыкъ этген анасына салам айтыгъыз. ¹⁴ Асинкритге, Флегоннга, Эрмасха, Патробасха, Эрмисге эм ала бла болгъан башха къарындашлагъа салам айтыгъыз. ¹⁵ Филологга эм Юлиягъа, Нирейге эм аны эгечине, Олимпасха эм битеу ала бла болгъан сыйлылагъа салам айтыгъыз. ¹⁶ Бир-биригизни сыйлы уппа этиу бла саламлашыгъыз. Масихни битеу жамауатлары сизге салам айтадыла. ¹⁷ Къарындашла, сизден тилейме, ол сиз юйреннген окъуугъа къарамагъанлай, сизни арагъызда айырылыула чыгъаргъанладан эм чырмау этгенледен кесигизни сакълагъыз эм аладан бир жанына туругъуз. ¹⁸ Нек десегиз аллай адамла бизни Раббийибиз Масих Иссагъа къуллукъ этмейдиле, алай а кеслерини къарынларына къуллукъ этедиле; ала кёзбаулукъ бла эм сёзге усталыкъ бла хыйласыз адамланы жюреклерин терилтедиле. ¹⁹ Сизни ийманнга боюн салгъаныгъыз барыбызгъа да белгилиди. Ол себепден мен сизни ючюн къууанама, алай а сизни ахшылыкъгъа акъыллы, аманлыкъгъа уа хыйласыз болуругъузну сюеме. ²⁰ Ырахатлыкъ бериучю Аллах а, шайтанны къысха заманда сизни аякъ тюбюгюзде ууатырыкъды. Раббийибиз Масих Иссаны шафауаты сизни бла болсун! Амин. ²¹ Мени биргеме уруннган нёгерим Тимотей эм Лукий, мени жууукъларым Ясон эм Сосипатер сизге салам айтадыла. ²² Мен, бу къагъытны жазгъан Тертий да, Раббийде сизге салам айтама. ²³ Мени эм битеу жамауатны къонакъбайы Гай сизге салам айтады. Шахарны казнасын сакълаучу Эраст эм Кууарт къарындаш сизге салам айтадыла. ²⁴ Бизни Раббийибиз Масих Иссаны шафауаты сизни барыгъыз бла да болсун. Амин.