БИЛИМ АЧХАНЫ

¹ Масих Иссаны билим ачханы. Аллах муну, къысха заманда боллукъ затланы, Кесини къулларына билдирир ючюн, Иссагъа бергенди. Ол да Кесини мёлегини юсю бла ийип, муну Кесини къулу Ахиягъа кёргюзтгенди. ² Ол да Аллахны сёзюне эм Масих Иссаны шагъатлыгъына эм не кёргенине шагъатлыкъ этгенди. ³ Бу файгъамбарлыкъны сёзлерин окъугъан эм тынгылагъанла эм мында жазылгъанланы тутханла насыплыдыла, нек десегиз заман жууукъду. ⁴ Мен Ахиядан Асияда болгъан жети жамауатха салам! Бар Болуп Тургъандан, Бар Болгъандан эм Бар Болуп Турлукъдан, Аны тахтасыны аллында болгъан жети нюрден ⁵ Эм тюз шагъат болгъан, ёлгенледен биринчи болуп тиргизилген, дунияны патчахларыны Бийи Масих Иссадан сизге шафауат эм ырахатлыкъ болсун. Бизни сюйген, Кесини къаны бла гюняхларыбыздан бизни азат этген ⁶ Эм бизни Кесини Атасы Аллахха къуллукъ этиуде патчахла эм дин къуллукъчула этген Масиххе ёмюрледен ёмюрлеге махтау эм къудурет болсун! Амин. ⁷ Ма, булутла бла келеди! Аны хар кёз да, Аны чанчханла да кёрлюкдюле; Аны ючюн дунияны битеу миллетлери сарнап жилярыкъдыла. Алайды. Амин. ⁸ «Альфа да, Омега да, ауалы да, ахыры да Менме», – дейди Бар Болгъан, Бар Болуп Тургъан эм Бар Болуп Турлукъ, битеу дунияны тутхан Раббий Аллах. ⁹ Масих Иссаны азап чегиуюне, патчахлыгъына эм тёзюмюне сизни бла къатышхан мен, Ахия къарындашыгъыз, Аллахны сёзю ючюн эм Масих Иссаны шагъатлыгъы ючюн Патмос атлы айрыкамда тутмакъ эдим. ¹⁰ Раббийни кюнюнде мен Сыйлы Нюрню оноуунда эдим эм артымдан сур быргъы ауазыча уллу ауаз: «Альфа да, Омега да, Биринчи да, Ахыргъы да Менме. ¹¹ Бу кёргенинги китапха жаз эм Асияда болгъан жети жамауатха: Эфесге, Измирге, Бергамагъа, Тиатирагъа, Сардисге, Филадельфиягъа эм Лаодикиягъа жибер», – деп айтханын эшитдим. ¹² Мени бла сёлешген кимни ауазы болгъанын кёрюр ючюн, айланып къарадым; къарагъанымлай, жети алтын чырахтан кёрдюм ¹³ Эм жети чырахтанны араларында жерге дери жетген узун кийим кийген эм кёкюрегине дери белине алтын белибау къысылгъан Адам Улуна ушагъан Биреуню кёрдюм. ¹⁴ Аны башы эм чачлары акъ жюн кибик эм къар кибик акъ эди; Аны кёзлери да отну жилтини кибик эди; ¹⁵ Аны аякълары да печьде къыздырылгъан сыйдам жезге ушай эдиле, Аны ауазы да кёп сууланы тауушу кибик эди; ¹⁶ Онг къолунда жети жулдузну тута эди; Аны ауузундан эки жаны да жютю къылыч чыгъа эди; Аны бети да битеу кючю бла жарыгъан кюн кибик эди. ¹⁷ Аны кёргенимде, ёлгенча болуп, Аны аякъларына аудум. Ол, онг къолун мени юсюме салып, манга былай айтды: «Къоркъма! Биринчи да, Ахыргъы да Менме. ¹⁸ Сау Менме. Ёлген да болгъанма; ма къара, ёмюрледен ёмюрлеге да саума. Амин. Ахыратны эм ёлюмню ачхычлары Мендедиле. ¹⁹ Алай бла кёргенлеринги, энди болгъан затланы эм мындан сора боллукъланы жаз. ²⁰ Сен Мени онг къолумда кёрген жети жулдузну эм жети алтын чырахтанны тасхасы буду: жети жулдуз жети жамауатны мёлеклеридиле; ол сен кёрген жети чырахтан а жети жамауатды».

¹ «Эфесдеги жамауатны мёлегине былай жаз: жети жулдузну онг къолунда Тутхан, жети алтын чырахтанны араларында Жюрюген былай айтады: ² „Сени ишлеринги, урунууунгу, чыдамлылыгъынгы эмда сен аман адамлагъа тёзмегенинги билеме. Ала абустол болмагъанлай, кеслерине абустол атагъанланы сынагъанса эмда аланы ётюрюкчю болгъанларын ангылагъанса. ³ Сен кёпню сынагъанса, тёзюмюнг да барды эм Мени атым ючюн уруннганса, болалмай да къалмагъанса. ⁴ Алай а санга къажау айтыр затым барды: сен кесинги биринчи сюймеклигинги къойгъанса. ⁵ Алай бла къайдан энишге жыгъылгъанынгы эсинге тюшюр, тобагъа къайтыш эм алгъын этген ишлеринги эт; алай болмаса уа, къысха заманда санга келликме эм, тобагъа къайтышмасанг, сени чырахтанынгы жеринден тайдырлыкъма. ⁶ Болсада сен Николайчыланы ишлерин кёрюп болмагъанынгы тюз этесе, аланы уа Мен да кёрюп болмайма. ⁷ Нюрню жамауатлагъа не айтханын къулагъы болгъан эшитсин: хорлагъаннга Аллахны жаннетини арасындагъы жашау терегинден ашаргъа эркинлик берликме“». ⁸ «Измирдеги жамауатны мёлегине да былай жаз: Биринчи эм Ахыргъы, Ол ёлюп, сау болгъан былай айтады: ⁹ „Сени ишлеринги, азап чекгенинги эм жарлылыгъынгы билеме. Алай а сен байса! Кеслерини юслеринден, биз иудейлилебиз деп, сизге аман айтханланы да билеме. Ала иудейли тюйюлдюле, шайтанны жыйымдыгъыдыла . ¹⁰ Сен сынарыкъ къыйынлыкъладан къоркъма. Ма, ибилис, сизни сынар ючюн, сизни арагъыздан бир къауумланы тюрмеге саллыкъды эм он кюн къыйынлыкъда боллукъсуз. Ёлюрге керек болсанг да тюз бол, сора санга жашауну тажын берликме. ¹¹ Нюрню жамауатлагъа не айтханын къулагъы болгъан эшитсин: хорлагъан экинчи ёлюмден заран кёрлюк тюйюлдю“». ¹² «Бергамадагъы жамауатны мёлегине да былай жаз: эки ауузлу жютю къылычы болгъан былай айтады: ¹³ „Сени ишлеринги эм жашагъан жеринги билеме; шайтанны тахтасы андады. Алай болгъанлыкъгъа Мени атымы къаты тутаса эм арагъызда – шайтан жашагъан жерде ёлтюрюлген Мени тюз шагъатым Антипаны кюнлеринде окъуна манга ийнаныудан таймагъанса. ¹⁴ Алай а санга къажау айтыр бир аз затым да барды: сизни арагъызда Биламны юйретиуюн тутханла бардыла. Ол, Израил улуланы терилтип, алагъа идоллагъа этилген къурманланы этлерин ашатыргъа эм аланы саякъ этерге Балакъны юйретгенди. ¹⁵ Аны кибик арагъызда да Николайчыланы юйретиулерин тутханла бардыла, аны уа Мен кёрюп болмайма. ¹⁶ Ол себепден тобагъа къайтыш! Алай этмесенг а, къысха заманда санга келип, ала бла ауузумдагъы къылыч бла къазауат этерикме. ¹⁷ Нюрню жамауатлагъа не айтханын, къулагъы болгъан эшитсин: хорлагъаннга жашырын сакъланнган маннаны ашаргъа эркинлик берликме эм анга жангы ат жазылгъан акъ таш берликме; ол атны уа ташны алгъан адамдан башха бир киши да билмейди“». ¹⁸ «Тиатираны жамауатыны мёлегине да былай жаз: Аны кёзлери отну жилтини кибик болгъан, аякълары да сыйдам жезге ушагъан, Аллахны Уланы былай айтады: ¹⁹ „Сени ишлеринги, сюймеклигинги, къуллукъ этиуюнгю, ийманынгы, тёзюмюнгю эмда сени артдагъы ишлеринг алгъыннгыларынгдан уллу болгъанын да билеме. ²⁰ Алай а санга къажау айтыр затым да барды: сен кесине файгъамбар атагъан къатын Изабелни, Мени къулларымы саякълыкъ этерге эм идоллагъа этилген къурманланы этлерин ашаргъа юйретирге эм ажашдырыргъа бошлап къояса. ²¹ Аны саякълыкъ этиуюнден тобагъа къайтышыргъа Мен анга заман бергенме, алай а ол тобагъа къайтышыргъа унамайды. ²² Ма, Мен аны азап тёшекге тюшюрлюкме эм аны бла зийна этгенлени да, кеслерини ишлери ючюн, тобагъа къайтышмасала, уллу азапха тюшюрлюкме. ²³ Аны сабийлерин да ёлюм бла къырлыкъма эм Мен адамланы жюреклерин бла кёллериндегин сынаучу болгъанымы битеу жамауатла ангыларла эм сизни хар биригизге да этген ишлеригизге кёре тийишлисин берирме. ²⁴ Сизге уа эм Тиатирада болгъан башхалагъа, ол окъууну тутмагъанлагъа эм шайтанны теренликлери аталгъан затланы билмегенлеге, ²⁵ Мен келгинчи, ол сизде болгъанны тутугъуз, ансы юсюгюзге башха жюк саллыкъ тюйюлме, – деп айтама. ²⁶ Хорлагъан эм Мени ишлерими ахырына дери бардыргъан адамгъа, Атам Манга бергенича, битеу миллетлени оноуун берликме; ²⁷ Ол аланы темир таякъ бла кютерикди, ала къошун сауутла кибик сынарыкъдыла. ²⁸ Хорлагъаннга эрттен жулдузну да берликме. ²⁹ Нюрню жамауатлагъа не айтханын, къулагъы болгъан эшитсин“».

¹ «Сардисдеги жамауатны мёлегине да былай жаз: Аллахны жети нюрю эм жети жулдуз Анда болгъан былай айтады: „Сени ишлеринги билеме; сен, сау кибик, ат жюрютесе, алай а сен ёлюсе. ² Уян эмда къалгъан ёле тургъанны кючлендир; нек десенг мени Аллахымы аллында сени ишлеринг тамамлы болмагъанларын кёргенме. ³ Сен не къабыл этгенинги эмда эшитгенинги эсинге тюшюр эм сакъла эмда тобагъа къайтыш. Уянмасанг а, Мен сени юсюнге гудучуча келирме эм сени юсюнге къайсы сагъатда келлигими сен билмезсе. ⁴ Болсада сенде, Сардисде, кеслерини кийимлерин харам этмеген бир бёлек адам барды. Ала акъ кийимлери бла Мени бир геме жюрюрюкдюле; нек десенг ала мынга тийишлидиле. ⁵ Хорлагъан акъ кийимле киерикди; аны атын жашауну китабындан кетерлик тюйюлме эм аны атын Атамы аллында бла Аны мёлеклерини аллында ачыкъ айтырыкъма. ⁶ Нюрню жамауатлагъа не айтханын къулагъы болгъан эшитсин“». ⁷ «Филадельфиядагъы жамауатны мёлегине да былай жаз: Сыйлы, Хакъ Керти, Анда Дауутну ачхычы болгъан, Ол ачса, бир киши да жапмазлыкъ, жапса, бир киши да ачмазлыкъ былай айтады: ⁸ „Сени ишлеринги билеме; ма, Мен сени аллынгда эшик ачханма, аны бир киши да жабаллыкъ тюйюлдю; сени кючюнг азды, алай а Мени сёзюмю сакълагъанса эм Мени атымы инкяр этмегенсе. ⁹ Ма, Мен шайтанны жыйымдыгъына былай этерикме, кеслерине иудейлилебиз – деп, алай а аллайла болмай, ётюрюк айтханлагъа, – ма, Мен, ала келип сени аякъларынгы аллында баш урурча, алай этерикме эмда Мен сени сюйгеними билликдиле. ¹⁰ Сен, мени сёзюмю сакълап, тёзюмлюк этгенинг ючюн, Мен да, сени жер башында жашагъанланы сынар ючюн, битеу дуниягъа келлик сынау сагъатдан сакъларма. ¹¹ Ма, кёп турмай келликме! Тажынгы киши алып къачмаз ючюн, болгъан затынгы тутуп тур. ¹² Хорлагъанны Аллахымы табыныучу юйюнде чигинжи этерикме эмда ол энди андан тышына чыгъарыкъ тюйюлдю; эмда аны юсюне Аллахымы атын эм Аллахымы шахарыны, кёкден Аллахымдан энишге тюшген жангы Иерусалимни атын эм Мени жангы атымы жазарыкъма. ¹³ Нюрню жамауатлагъа не айтханын къулагъы болгъан эшитсин“». ¹⁴ «Лаодикиядагъы жамауатны мёлегине да былай жаз: Аллахны жаратханын Башлатыучу, тюз эм хакъ керти Шагъат Амин былай айтады: ¹⁵ „Сени ишлеринги билеме: сен не сууукъ, не исси тюйюлсе; ой, сен не сууукъ неда исси болсанг эди уа! ¹⁶ Алай а сен не исси, не сууукъ болмай, жылы болгъанынг себепли, сени ауузумдан атарыкъма. ¹⁷ Нек десенг сен: Мен байма, бай болгъанма, бир керекли затым да жокъду, – дейсе; сен а насыпсыз да, жазыкъ да, факъыр да, сокъур да, къымыжа да болгъанынгы уа билмейсе. ¹⁸ Сен бай болур ючюн, отда тазаланнган алтынны эм кийинир ючюн, къымыжалыгъынгы уятлыгъы кёрюнмез ючюн, акъ кийимни Менден алыргъа санга акъыл юйретеме; кёрюр ючюн да, кёзлеринге кёз дарман сюрт. ¹⁹ Мен, сюйген адамларымы бетлерине айтама эм азап берип юйретеме. Алай бла эришиучю бол эм тобагъа къайтыш. ²⁰ Ма, эшикни къатында сюелип, аны къагъып турама: Мени ауазымы эшитип, эшигин ким ачса да, аны къатына кирликме эм аны бла, ол да Мени бла ушхууур ашарыкъбыз. ²¹ Мен хорлап, Атамы биргесине Аны тахтасында олтургъаным кибик, хорлагъаннга да Мени биргеме Мени тахтамда олтурургъа эркинлик берликме. ²² Нюрню жамауатлагъа не айтханын, къулагъы болгъан эшитсин“».

¹ Андан сора мен къарап, кёкде ачылып тургъан эшик кёрдюм эм сур быргъы тауушуча мен эшитип, мени бла сёлешген алгъыннгы ауаз: «Бери чыкъ, мындан сора неле боллукъларын санга кёргюзтейим», – деди. ² Олсагъат мен Сыйлы Нюрню оноуунда болуп, кётюрюлдюм; сора ма, кёкде тахта тура эди эм тахтада Олтургъан бар эди. ³ Ол Олтургъанны кёрюмю яспис бла сардис ташха ушай эди эм тахтаны тёгерегинде, кёрюмю изумрудха ушагъан тейри къылыч бар эди. ⁴ Ол тахтаны тёгерегинде да жыйырма тёрт тахта тура эдиле. Тахталада уа мен жыйырма тёрт тамата олтуруп тургъанларын кёрдюм; ала уа акъ кийимле кийип эдиле эм башларында алтын тажлары бар эди. ⁵ Баш тахтадан да шыбылала бла кёк кю кюреген тауушла эм ауазла чыгъа эдиле, тахтаны аллында да жети от чыракъ жана эдиле; ала уа Аллахны жети нюрюдюле. ⁶ Тахтаны аллында да, кристаллгъа ушагъан мияла тенгиз; тахтаны арасында да, тахтаны тёгерегинде да, алларында да, артларында да кёзледен толу болгъан тёрт хайыуан бар эди. ⁷ Биринчи хайыуан асланнга ушай эди, экинчи хайыуан бугъа танагъа ушай эди, ючюнчю хайыуанны адамныча бети бар эди, тёртюнчю хайыуан учхан къушха ушай эди. ⁸ Ол тёрт хайыуандан хар бирини тёгерегинде алтышар къанаты бар эди, аланы ичлери уа кёзледен толу эди; аланы не кюндюз, не кече тынчлыкълары болмай: «Бар Болгъан, Бар Болуп Тургъан эм Бар Болуп Турлукъ, битеу дунияны тутхан Раббий Аллах сыйлыды, сыйлыды, сыйлыды!» – деп къычырып турадыла. ⁹ Сора хайыуанла, ёмюрледен ёмюрлеге жашагъан, тахтада Олтургъаннга махтау да, хурмет да, шукур да берген заманда, ¹⁰ Жыйырма тёрт тамата, тахтада Олтургъанны аллында жерге къапланып, ёмюрледен ёмюрлеге Жашагъаннга сежда этедиле эм тажларын тахтаны аллына салып, былай айтадыла: ¹¹ «Я Раббий Аллахыбыз, хурметни да, махтауну да, кючню да алыргъа тийишли Сенсе; хар нени да Сен жаратханса эм хар неда Сени буйругъунг бла бар болуп турады эм жаратылгъанды», – дейдиле.

¹ Сора мен тахтада Олтургъанны онг къолунда, ичинде да тышында да жазылгъан, анга жети мухур салыннган китапны кёрдюм. ² Сора мен кючлю мёлекни уллу ауазы бла: «Бу китапны ачаргъа эм аны мухурларын алыргъа тийишли кимди?» – деп билдиргенин кёрдюм. ³ Алай а не кёкде, не жер башында, не жер тюбюнде биреу да ол китапны ачаргъа не анга къараргъа болалмады. ⁴ Ол китапны ачаргъа эм окъургъа эм анга къараргъа окъуна тийишли бир киши да табылмагъанына мен кёп жилядым. ⁵ Сора таматаладан бирлери манга: «Жиляма! Ма, Дауутну Тамыры, Яхуданы тукъумундан болгъан Аслан хорлагъанды, Ол бу китапны ачаргъа эм аны жети мухурун алыргъа болаллыкъды», – деди. ⁶ Сора мен, къарап, тахтаны эм тёрт хайыуанны арасында эмда таматаланы арасында тургъан, боюну кесилгеннге ушаш Къозуну кёрдюм; Аны жети мюйюзю эм жети кёзю бар эди; была да, Аллахны битеу дуниягъа ийген жети Нюрюдю. ⁷ Сора Къозу, келип, тахтада Олтургъанны онг къолундан китапны алды. ⁸ Ол китапны алгъан заманда, тёрт хайыуан бла жыйырма тёрт тамата Къозуну аллында жерге къапландыла; хар бирини да къолунда арфа эм ариу ийисли фимиамдан толу алтын аякъ бар эди, была уа сыйлыланы тилеклеридиле. ⁹ Эмда жангы зикир айтадыла: «Сен тийишлисе китапны алыргъа эм аны юсюнден мухурларын ачаргъа; нек десенг Сен союлгъанса эм Кесинги къанынг бла хар тукъумдан эм хар тилден, хар халкъдан эм хар миллетден бизни Аллахха жулугъанса ¹⁰ Эмда Аллахыбыз ючюн бизни патчахла эм дин къуллукъчула этгенсе; биз жер башында патчахлыкъ этерикбиз», – дейдиле. ¹¹ Сора тахтаны бла хайыуанланы эм таматаланы тёгерегинде, мен кёп мёлеклени кёрдюм эм ауазларын эшитдим. Аланы саны тул-тубан эм минг-мингле эдиле. ¹² Ала уллу ауаз бла: «Союлгъан Къозу къудуретни да, байлыкъны да, акъылманлыкъны да, кючню да, хурметни да, махтауну да, алгъышны да алыргъа тийишлиди!» – дей эдиле. ¹³ Эм кёкде эм жер башында, жерни тюбюнде эм тенгизде хар жаратылгъан, битеу алада болгъанла: «Тахтада Олтургъаннга эм Къозугъа алгъыш да, хурмет да, махтау да, бийлик да ёмюрледен ёмюрлеге да болсун!» – деп айтханларын мен эшитдим. ¹⁴ Эм тёрт хайыуан да: «Амин», – дедиле. Жыйырма тёрт тамата да жерге къапланып, ёмюрледен ёмюрлеге Жашагъаннга сежда этдиле.

¹ Сора Къозу жети мухурдан бирин ачханын кёрдюм эм тёрт хайыуандан бирлери кёк кюкюрегеннге ушагъан ауазы бла: «Кел да къара!» – дегенин эшитдим. ² Мен, къарап, акъ атны кёрдюм. Аны юсюнде да садакъ жаясы болгъан атлы бар эди. Анга таж берилди эмда ол хорлаучу кибик хорлар ючюн чыкъды. ³ Къозу экинчи мухурну ачхан заманда, экинчи хайыуанны: «Кел да къара!» – дегенин эшитдим. ⁴ Сора башха ат, къызыл ат чыкъды. Ол атха миннгеннге дуниядан ырахатлыкъны алыргъа эркинлик берилди. Алай бла адамла бир-бирлерин ёлтюрлюкдюле. Атлыгъа уллу къылыч да берилди. ⁵ Къозу ючюнчю мухурну ачхан заманда, ючюнчю хайыуанны: «Кел да къара!» – дегенин эшитдим. Мен, къарап, къара атны кёрдюм. Ол атха миннгенни къолунда ёлчеую бар эди. ⁶ Сора тёрт хайыуанны арасындан: «Бир хиникс будай бир динаргъа эм юч хиникс арпа бир динаргъа; зейтун жаугъа бла чагъыргъа уа заран салма!» – деп айтхан ауазны эшитдим. ⁷ Къозу тёртюнчю мухурну ачхан заманда, тёртюнчю хайыуанны: «Кел да къара!» – деп айтхан ауазын эшитдим. ⁸ Мен, къарап, саз атны кёрдюм. Ол атха миннгенни аты Ёлюм эди. Ахырат да аны ызындан бара эди. Ала, къылыч бла эм ачлыкъ бла, ауруула бла эм жерни жаныуарлары бла адамланы ёлтюрюр ючюн, алагъа жерни тёрт юлюшюнден бирини эркинлиги берилгенди. ⁹ Къозу бешинчи мухурну ачхан заманда, къурман этилиучю жерни тюбюнде Аллахны Сёзю ючюн эм кеслерини этген шагъатлыкълары ючюн ёлтюрюлгенлени жанларын кёрдюм. ¹⁰ Сора ала уллу ауаз бла: «Эй сыйлы эм хакъ керти Бийибиз, жер башында жашагъанлагъа бизни къаныбыз ючюн къачаннга дери сюд этмей эм дерт жетдирмей турлукъса?» – деп къычыра эдиле. ¹¹ Сора аланы хар бирине акъ кийимле берилдиле эмда алагъа, энтда бир кесек заманнга, аланы бирге уруннган нёгерлери эм къарындашлары ала кибик ёлтюрюлюп, санны толтургъунчу тынчайыргъа деп айтылды. ¹² Къозу алтынчы мухурну ачхан заманда, мен, къарап, уллу жер тебиу болгъанын кёр дюм. Кюн да къара зыбыр чепкен кибик къарангы болуп къалды, ай да къан кибик болуп къалды. ¹³ Эм инжир терекни кючлю жел силкиндиргенинде бишмеген инжирлерин агъызгъанча, кёкдеги жулдузла да жерге къуюлдула. ¹⁴ Кёк да, чулгъамча чулгъанып, тас болду эм хар тау да, хар айрыкам да кеслерини жерлеринден тебиредиле. ¹⁵ Эм жерни патчахлары да, бийле да, байла да, аскер командирле да, къарыулула да эм хар къул да, хар азат да дорбунлагъа бла тау ауузлагъа къачып букъдула ¹⁶ Эм таулагъа бла ташлагъа: «Бизни юсюбюзге ауугъуз, тахтада Олтургъанны бетинден эм Къозуну чамланыуундан бизни букъдуругъуз! ¹⁷ Аны уллу чамланыу кюню келгенди, сора ким чыдаяллыкъды?» – дейдиле.

¹ Андан сора мен тёрт мёлекни жерни тёрт мюйюшюнде тургъанларын кёрдюм. Ала, не жерге, не тенгизге, не бир тюрлю терекге жел урмаз ючюн, жерни тёрт желин тутуп тура эдиле. ² Сора мен кюн чыкъгъан жанындан кётюрюлген эм жашау бериучю Аллахны мухуру анда болгъан башха мёлекни кёрдюм. Эмда алагъа жерге бла тенгизге заран салыргъа эркинлик берилген тёрт мёлекге ол уллу ауазы бла: ³ «Биз Аллахыбызны къулларыны мангылайларына мухур салгъынчы не жерге, не тенгизге, не тереклеге заран салмагъыз!» – деп къычырды. ⁴ Сора мен мухур салыннганланы санын эшитдим: мухур салыннганла битеу Израильни тукъумларындан жюз къыркъ тёрт минг адам бола эдиле. ⁵ Яхуданы тукъумундан онеки минг адамгъа мухур салынды, Рубенни тукъумундан онеки минг адамгъа мухур салынды, Гадны тукъумундан онеки минг адамгъа мухур салынды, ⁶ Ашерни тукъумундан онеки минг адамгъа мухур салынды, Нафталини тукъумундан онеки минг адамгъа мухур салынды, Манашени тукъумундан онеки минг адамгъа мухур салынды, ⁷ Шимонну тукъумундан онеки минг адамгъа мухур салынды, Левийни тукъумундан онеки минг адамгъа мухур салынды, Иссахарны тукъумундан онеки минг адамгъа мухур салынды, ⁸ Забулонну тукъумундан онеки минг адамгъа мухур салынды, Юсюпню тукъумундан онеки минг адамгъа мухур салынды, Беняминни тукъумундан онеки минг адамгъа мухур салынды. ⁹ Андан сора мен, къарап, хар миллетден эм хар тукъумдан, хар халкъдан эм хар тилден болгъан, аланы уа бир киши да санаргъа болалмагъан бек кёп адамла тахтаны аллында эм Къозуну аллында тургъанларын кёрдюм. Ала акъ кийимле кийип эдиле эмда къолларында хурма терек бутакълары бар эдиле. ¹⁰ Эм, къууанып, уллу ауаз бла: «Къутхарыу тахтада олтургъан Аллахыбызны эм Къозуну къолундады!» – дей эдиле. ¹¹ Битеу мёлекле да тахтаны бла таматаланы эм тёрт хайыуанны тёгереклеринде тура эдиле; сора, тахтаны аллында бетлери бла жерге къапланып, Аллахха сежда этип: ¹² «Амин! Алгъыш да, махтау да, акъылманлыкъ да, шукур да, хурмет да, къудурет да, кюч да ёмюрледен ёмюрлеге да Аллахыбызныды! Амин», – дей эдиле. ¹³ Сора, сёз башлап, ол таматаладан бири манга: «Бу акъ кийимле кийгенле кимледиле эм къайдан келгендиле?» – деп сорду. ¹⁴ Мен анга: «Жюйюсхан, сен билесе», – дедим. Ол да манга: «Была ол уллу азапдан келгенледиле; ала, Къозуну къаны бла кеслерини кийимлерин жуууп, аны бла кийимлерин акъ этгендиле; ¹⁵ Ол себепден ала Аллахны тахтасыны аллында турадыла эм Аны табыныучу юйюнде кече да, кюн да Анга къуллукъ этедиле эм тахтада Олтургъан чатырын аланы юслерине керликди. ¹⁶ Ала энди не ач, не суусап боллукъ тюйюлдюле, аланы кюн да, бир тюрлю иссилик да кюйдюрлюк тюйюлдю; ¹⁷ Нек десенг тахтаны арасындагъы Къозу аланы кютерикди эм жашау суу шауданлагъа жюрютюрюкдю эмда Аллах аланы кёзлеринден хар тюрлю жилямукъну сюртюрюкдю», – деди.

¹ Къозу жетинчи мухурну ачхан заманда, жарым сагъатха чакълы кёкде тауушсузлукъ болду. ² Сора мен ала Аллахны аллында тургъан жети мёлекни кёрдюм; алагъа жети сур быргъы берилди. ³ Сора башха мёлек, къолунда ладан кюйдюрюлюучю алтын саууту бла келип, къурман этилиучю жерни аллында тохтады. Ол, битеу сыйлыланы тилеклери бла, тахтаны аллында болгъан алтын къурман жерни юсюне салыр ючюн, анга кёп ладан берилди. ⁴ Сора ладанны тютюню сыйлыланы тилеклери бла мёлекни къолундан Аллахны аллына чыкъды. ⁵ Сора мёлек, ладан кюйдюрюлюучю сауутну алып, аны къурман этилиучю жердеги отдан толтуруп, жер юсюне атды; ол заманда ауазла, кёк кюкюреуле, шыбылала болдула эмда жер тепди. ⁶ Сора жети мёлек къолларындагъы жети сур быргъыны согъаргъа хазырландыла. ⁷ Биринчи мёлек сур быргъысын сокъду. Сора, къан бла къатышхан буз бла от болуп, жерге жаудула; жерни ючден бири эм тереклени ючден бири кюйдю эм битеу жашил кырдык кюйдю. ⁸ Экинчи мёлек сур быргъысын сокъду. От жаннган уллу тауча бир зат тенгизни ичине атылды. Сора тенгизни ючден бири къан болуп къалды ⁹ Эмда тенгизде жашагъан жаратылгъан жанланы ючден бири ёлдю, кемелени да ючден бири жоюлду. ¹⁰ Ючюнчю мёлек сур быргъысын сокъду. Сора чыракъча жаннган уллу жулдуз, кёкден тюшюп, сууланы бла суу чыкъгъан жерлени ючден бирини юсюне тюшдю. ¹¹ Ол жулдузну аты Полыньди; сууланы ючден бири да полыньча ачы болду эм адамладан кёбюсю сууладан ёлдюле; нек десегиз суула ачы болгъан эдиле. ¹² Тёртюнчю мёлек сур быргъысын сокъду. Сора кюнню ючден бирине да, айны ючден бирине да, жулдузланы ючден бирине да за ран тюшдю, алай бла аланы ючден бирлери къарангы болду; кечени кибик кюндюзню да ючден бири жарыкъсыз къалды. ¹³ Сора мен бир къушну кёкню ортасында учханын кёрдюм эмда уллу ауазы бла: «Юч мёлекни, ала согъарыкъ къалгъан сур быргъы тауушларындан, жер башында жашагъанлагъа палах, палах, палах!» – дегенин эшитдим.

¹ Бешинчи мёлек сур быргъысын сокъду. Сора мен, кёкден жерге тюшген жулдузну кёрдюм. Ол жулдузгъа тюпсюз теренликлени къуюсуну ачхычы берилди. ² Жулдуз ол къуюну ачханда, къуюдан уллу печьни тютюню кибик тютюн чыкъды; къуюдан чыкъгъан тютюнден кюн бла хауа мутхуз болуп къалдыла. ³ Тютюнню ичинден жер башына мачала чыкъдыла. Сора алагъа жердеги акъыраплада болгъан кюч кибик кюч берилди. ⁴ Мачалагъа, жерни кырдыгына эм бир тюрлю ёсюмлюкге эм бир тюрлю терекге заран этмезге, жаланда мангылайларында Аллахны мухуру болмагъан адамлагъа заран этерге деп айтылды. ⁵ Мачалагъа ол адамланы ёлтюрюрге тюйюл, жаланда беш ай къыйнаргъа эркинлик берилгенди; аланы къыйнаулары да, акъырап къапхан адамны къыйналгъаны кибикди. ⁶ Ол кюнледе адамла ёлюм излерикдиле, алай а аны табарыкъ тюйюлдюле; ёлюрге сюерикдиле, алай а ёлюм аладан къачарыкъды. ⁷ Мачаланы сыфатлары урушха хазырланнган атлагъа ушай эди; аланы башларында алтындан болгъаннга ушагъан тажла кибик затла бар эдиле, аланы бетлери уа адамланы бетлери кибик эдиле. ⁸ Аланы чачлары да тиширыуланы чачлары кибик эдиле, аланы тишлери уа, асланланы тишлери кибик эдиле. ⁹ Аланы юслеринде темир кюбеле кибик кюбеле бар эдиле. Аланы къанатларыны тауушлары уа бек кёп атла урушха чапхан заманда ат арбаланы тауушлары кибик эдиле. ¹⁰ Аланы акъырапланы къуйрукълары кибик къуйрукълары бар эдиле, аланы къуйрукъларында да уу тишлери бар эди; аланы эркинликлери уа адамлагъа беш ай заран этерге эди. ¹¹ Алагъа бийлик этген патчах а тюпсюз теренликлени мёлеги эди; аны аты чюйютча Абадонду, грекча уа Аполлионду. ¹² Бир палах озду; ма, аны ызындан энтда эки палах келеди. ¹³ Алтынчы мёлек сур быргъысын сокъду. Сора мен, Аллахны аллында тургъан алтын къурман жерни тёрт мюйюзюнден бир ауаз, ¹⁴ Сур быргъысы болгъан алтынчы мёлекге: «Уллу Евфрат сууну къатында байланнган тёрт мёлекни эркин эт!» – дегенин эшитдим. ¹⁵ Сора адамланы ючден бирин къырыр ючюн, тамам ол сагъатха, ол кюннге, ол айгъа, ол жылгъа хазырланнган тёрт мёлек эркин этилдиле. ¹⁶ Атлы аскерлени саны эки жюз миллион эди; мен аланы санын эшитдим. ¹⁷ Мен кёрюнюуде атланы эм аланы юслеринде атлыланы алай кёрдюм: атлыланы юслеринде отдан, гиацинтден эм кукуртдан кюбелери бар эди. Атланы башлары асланланы башлары кибик эдиле; аланы ауузларындан от, тютюн эм кукурт чыгъа эди. ¹⁸ Аланы ауузларындан чыкъгъан бу юч палахдан – отдан, тютюнден эм кукуртдан – адамланы ючден бири ёлдю; ¹⁹ Нек десегиз атланы кючлери аланы ауузларында бла къуйрукъларында эди. Аланы къуйрукълары жилянлагъа ушай эдиле, ол къуйрукъланы уа башлары бар эди; ала была бла заран сала эдиле. ²⁰ Бу палахладан ёлмей къалгъан адамла уа кеслерини къоллары бла этген ишлеринден тобагъа къайтышмадыла; жинлеге табыныуну, алтындан, кюмюшден, багъырдан, ташдан эм агъачдан ишленнген, ала уа не кёрюрге, не эшитирге, не жюрюрге болалмагъан идоллагъа табыныуну къоймадыла. ²¹ Ала не адам ёлтюрюулеринден, не хыйны этиулеринден, не саякълыкъ этиулеринден, не уручулукъларындан тобагъа къайтышмадыла.

¹ Сора мен юсюне булут кийген башха кючлю мёлекни кёкден тюшгенин кёрдюм; аны башында тейри къылыч бар эди, аны бети кюн кибик эди, аны аякълары да от чигинжиле кибик эдиле; ² Аны къолунда ачылып тургъан китапчыкъ бар эди. Сора ол кесини онг аягъын тенгизни юсюне, сол аягъын а жерни юсюне салды, ³ Эмда уллу ауазы бла аслан ёкюрген кибик къычырды. Ол къычыргъан заманда уа, жети кёк кюкюреу кеслерини ауазлары бла сёлешдиле. ⁴ Жети кёк кюкюреу кеслерини ауазлары бла сёлешген заманда, мен жазаргъа хазырландым; алай а кёкден манга: «Жети кёк кюкюреуню не айтханларын эсинге алып къой, аланы жазгъан а этме!» – деген бир ауаз эшитдим. ⁵ Сора, мен аны тенгизни бла жерни юсюнде тургъанын кёрген мёлек кесини къолун кёкге кётюрюп, ⁶ Кёкню эм анда болгъанланы, жерни эм аны юсюнде болгъанланы, тенгизни эм аны ичинде болгъанланы Жаратхан, ёмюрледен ёмюрлеге Жашагъан бла ант этип: «Энди кечигиу боллукъ тюйюлдю! ⁷ Жетинчи мёлекни ауазыны кюнлеринде уа, ол сур быргъы сокъгъан заманда, Аллах Кесини файгъамбар къулларына хайыр хапар билдиргени кибик, Аллахны жашырын планы тамамланырыкъды», – деди. ⁸ Сора ол, мен кёкден эшитген ауаз, дагъыда мени бла сёлешип башлап: «Бар, ачылып тургъан китапчыкъны, тенгизни бла жерни юсюнде тургъан мёлекни къолундан ал», – деди. ⁹ Сора мен, мёлекге барып, анга: «Бер манга китапчыкъны», – дедим. Ол манга: «Муну ал да аша; бу сени къарынынгда ачы боллукъду, ауузунгда уа бал кибик татлы боллукъду», – деди. ¹⁰ Мен китапчыкъны мёлекни къолундан алдым да, аны ашадым. Ол мени ауузумда бал кибик татлы эди; аны жутханымда уа, къарынымда ачы болду. ¹¹ Сора ол манга: «Сен энтда кёп халкъланы, миллетлени, тиллени эм патчахланы юсюнден файгъамбарлыкъ этерге керексе», – деди .

¹ Сора манга таякъгъа ушагъан бир аршын берилди эм былай айтылды: «Тур, Аллахны табыныучу юйюн да, къурман этилиучю жерни да, анда табыннганланы да ёлчеле. ² Табыныучу юйюню тыш арбазын а къой, аны ёлчелеме; нек десенг ол миллетлеге берилгенди. Ала сыйлы шахарны къыркъ эки ай малтарыкъдыла. ³ Сора эки шагъатыма файгъамбарлыкъ этерге кюч берликме, ала, зыбыр чепкен кийимле кийип, минг эки жюз алтмыш кюнню файгъамбарлыкъ этерикдиле». ⁴ Жер юсюню Аллахыны аллында тургъан эки зейтун терек эм эки чырахтан быладыла. ⁵ Алагъа заран этерге сюйген ким болса да, аланы ауузларындан от чыгъып, ол душманланы кюйдюрлюкдю; алагъа заран этерге сюйген адам былай ёлтюрюллюкдю. ⁶ Ала файгъамбарлыкъ этген кюнледе жауун жаумаз ючюн, кёкню жабаргъа аланы эркинликлери барды эм сууланы къан этерге эм сюйген заманларында жерге хар тюрлю палах бла заран салыргъа эркинликлери барды. ⁷ Ала кеслерини шагъатлыкъларын бошагъандан сора уа, тюпсюз теренликледен чыкъгъан жаныуар ала бла къазауат этерикди, аланы хорларыкъды эм аланы ёлтюрлюкдю. ⁸ Аланы ёлюклерин уллу шахарны орамында къоярыкъды; ол шахар а нюр жаны бла Содом эмда Мисир атлыды, бизни Раббийибиз да ол шахарда къачха керилгенди. ⁹ Битеу халкъладан, тукъумладан, тилледен эм миллетледен болгъан адамла юч кюн бла жарымгъа аланы ёлюклерине къарап турлукъдула эм аланы ёлюклерин къабыргъа салыргъа къоярыкъ тюйюлдюле. ¹⁰ Эм жер башында жашагъанла аланы ёлгенлерине къууанырыкъдыла эм байрам этерикдиле эм бир-бирлерине саугъала иерикдиле; нек десегиз бу эки файгъамбар жер башында жашагъанлагъа азап бере эдиле. ¹¹ Алай а юч кюн бла жарымдан сора Аллахдан алагъа жашау нюр кирди, ала экиси да аякъ юсюне турдула эмда алагъа къарап тургъан адамлагъа уллу къоркъуу тюшдю. ¹² Сора ол эки файгъамбар кёкден алагъа: «Бери ёрге чыгъыгъыз!», – деген уллу ауазны эшитдиле. Сора ала булут ичинде кёкге чыкъдыла, аланы душманлары да алагъа къарап къалдыла. ¹³ Эм олсагъат окъуна уллу жер тебиу болду эм шахарны ондан бири бузулду. Ол жер тепген заманда жети минг адам жоюлду; къалгъанланы да къоркъуу алып, кёкдеги Аллахха махтау салдыла. ¹⁴ Экинчи палах озду; ма, бусагъат ючюнчю палах келеди. ¹⁵ Сора жетинчи мёлек сур быргъысын сокъду эмда кёкде: «Дунияны патчахлыгъы бизни Раббийибизни эм Аны Масихини патчахлыгъы болду; Ол ёмюрледен ёмюрлеге патчахлыкъ этерикди», – деген уллу ауазла эшитилдиле. ¹⁶ Эмда Аллахны аллында кеслерини тахталарында олтургъан жыйырма тёрт тамата да, бетлери бла жерге къапланып, Аллахха сежда этдиле эм: ¹⁷ «Эй Бар Болгъан, Бар Болуп Тургъан эм Бар Болуп Турлукъ, битеу дунияны тутхан Раббий Аллах, Санга шукур этебиз; Сен Кесинги уллу кючюнгю алып, патчахлыкъ этерге башладынг. ¹⁸ Миллетле къутургъандыла; алай а башларына Сени чамланыуунг келгенди эм ёлгенлеге сюд этер заман, Сени къулларынга – файгъамбарлагъа, сыйлылагъа эмда Сени атынгдан къоркъгъан гитчелеге эм уллулагъа – тийишлилерин берир эм жерни жойгъанланы жояр заман келди», – дей эдиле. ¹⁹ Сора Аллахны кёкдеги табыныучу юйю ачылды, Аны табыныучу юйюнде Аны кесаматыны кюбюрчеги кёрюндю. Ол заманда шыбылала, ауазла, кёк кюкюреуле болдула, жер тепди эмда уллу буз урду.

¹ Сора кёкде уллу илишан, кюнню юсюне кийген къатын кёрюндю; аны аякъларыны тюбюнде ай, аны башында да онеки жулдуздан таж бар эди. ² Къатын бууаз эди эм къозлау ауруудан къыйналып къычыра эди. ³ Сора кёкде башха илишан: жети башлы, он мюйюзлю, аны башларында да жети тажы болгъан уллу къызыл аждагъан кёрюндю. ⁴ Аны къуйругъу кёкден жулдузланы ючден бирин алып кетип, аланы жерге атханды. Бу аждагъан, ол къозларыкъ къатынны къозлагъан заманында аны сабийин жутуп къояр ючюн, аны аллында тохтады. ⁵ Сора ол къатын улан сабий тапды; ол сабий а битеу миллетлени темир таякъ бла кютерикди. Алай а сабий олсагъат окъуна Аллахха, Аны тахтасына алынды. ⁶ Къатын а къум тюзге къачды. Ол анда минг эки жюз алтмыш кюн асыралыр ючюн, анга Аллахдан хазырланнган жер барды. ⁷ Сора кёкде къазауат болду: Микайыл бла аны мёлеклери аждагъаннга къажау къазауат эте эдиле, аждагъан бла аны мёлеклери да алагъа къажау къазауат эте эдиле, ⁸ Алай а чыдаялмадыла, алагъа энди кёкде жер табылмады. ⁹ Сора ибилис эм шайтан аталгъан уллу аждагъан, битеу дунияны алдатыучу буруннгу жилян жер юсюне атылды, аны мёлеклери да аны бла бирге атылдыла. ¹⁰ Сора мен кёкде былай айтхан уллу ауаз эшитдим: «Энди бизни Аллахыбызны къутхарыуу да, кючю да, патчахлыгъы да эм аны Масихини оноуу да келди; нек десегиз къарындашларыбыздан тил этиучю, Аллахыбызны аллында аладан кече да, кюн да тил этиучю энишге атылгъанды. ¹¹ Ала Къозуну къаны бла эм кеслерини шагъатлыкъ сёзлери бла аны хорлагъандыла, ала жанларын аямагъандыла эмда ёлюмден артха турмагъандыла. ¹² Алай бла, кёкле эм алада жашагъанла къууанч этигиз! Жерде бла тенгизде жашагъанлагъа уа – палах; нек десегиз ибилис, анга заман аз къалгъанын билип, сизге уллу къутурууу бла тюшгенди!» ¹³ Аждагъан, жер юсюне атылгъанын кёргенинде уа, ол улан сабий тапхан къатынны ызындан болуп башлады. ¹⁴ Къатын жилянны аллындан къум тюзге, анда юч жыл бла жарым заманнга асы ралыр жерине учуп кетер ючюн, анга уллу къушну эки къанаты берилди. ¹⁵ Сора жилян, къатынны суу бла алып кетер ючюн, кесини ауузундан сууну, баргъан сууча, къатынны ызындан жиберди. ¹⁶ Алай а къатыннга жер болушду, аждагъан ауузундан ийген сууну жер ауузун ачып жутуп къойду. ¹⁷ Сора аждагъан къатыннга къутуруп къалды эм Аллахны фарызларын сакълагъан эмда Масих Иссагъа шагъатлыкъ этиуню бардыргъан, ол къатынны урлугъундан болгъан башхала бла къазауат этерге кетди.

¹ Сора мен тенгизни юзмезинде тохтадым эмда жети башлы эм он мюйюзлю бир жаныуарны тенгизден чыгъып келгенин кёрдюм; аны мюйюзлеринде он тажы бар эди, аны башларында уа кяфыр атлары бар эдиле. ² Ол мен кёрген жаныуар барсха ушай эди; аны аякълары айыуну аякълары кибик эдиле, гемхоту уа асланны гемхоту кибик эди. Аждагъан анга кесини кючюн да, тахтасын да, уллу власть да берди. ³ Сора мен, аны башларындан бири ёлюр жаралы болгъан кибик кёрдюм, алай а ол ёлюр жара сау болду. Битеу жер башында жашагъанла, сейирсинип, жаныуарны ызындан кетдиле эмда жаныуаргъа властьны берген аждагъаннга баш урдула ⁴ Эм жаныуаргъа да баш уруп: «Бу жаныуар кибик ким барды эм муну бла ким уруш эталлыкъды?» – дедиле. ⁵ Жаныуаргъа ёхтем эм кяфыр сёзле сёлешген аууз берилди эм анга къыркъ эки айгъа бардырыргъа власть берилди. ⁶ Сора ол Аллахха аман айтыргъа, Аны атына да, Аны юйюне да, кёкде жашагъанлагъа да аман айтыргъа ауузун ачды. ⁷ Сора анга сыйлыла бла къазауат этерге эм аланы хорларгъа эркинлик берилди; анга хар тукъумну да, хар халкъны да, хар тилни да, хар миллетни да бийлерге власть берилди. ⁸ Жер башында жашагъанла барысы да, аланы атлары дуния жаратылгъандан бери союлгъан Къозуну жашау китабында жазылып болмагъанла анга баш урлукъдула. ⁹ Къулагъы болгъан адам эшитсин. ¹⁰ Жесирге элтген адам, ол кеси да жесирликге кетер; къылыч бла ёлтюрген адам, ол кеси да къылыч бла ёлтюрюлюр . Бу болумлада сыйлыла тёзюмлю болуп ийманда турургъа керекдиле. ¹¹ Сора мен башха жаныуарны жерден чыгъып келгенин кёрдюм; аны къозу мюйюзлеге ушагъан эки мюйюзю бар эди, алай а аждагъанча сёлеше эди. ¹² Ол биринчи жаныуарны битеу властын аны аты бла жюрютеди эм битеу жерни да, анда жашагъанланы да, аны ёлюр жарасы сау болгъан биринчи жаныуаргъа баш урдурады; ¹³ Эмда уллу илишанла этеди, алай бла адамланы алларында кёкден жерге от да жаудурады. ¹⁴ Эм анга жаныуарны аты бла этерге берилген илишанла бла ол жер башында жашагъанланы терилтеди. Жер башында жашагъанлагъа къылыч жарасы болуп сау тургъан жаныуарны суратын ишлеп, монумент этигиз деп буюрады. ¹⁵ Сора анга жаныуарны суратына солуу берип, суратны сёлешдирирге эм жаныуарны суратына баш урмагъан хар адамны ёлтюртюрге кюч берилди. ¹⁶ Экинчи жаныуар дагъыда гитчелеге эм уллулагъа, байлагъа эм жарлылагъа, азатлагъа эм къуллагъа – барыны да онг къолларына неда мангылайларына тамгъа салдырлыкъды; ¹⁷ Алай бла ол тамгъасы болгъан неда жаныуарны аты, неда аны атыны саны анда болгъан адамдан башха бир кишиге да не алыргъа, не сатаргъа эркинлик боллукъ тюйюлдю. ¹⁸ Муну ангылар ючюн, акъылманлыкъ керекди. Акъылы болгъан адам жаныуарны санын санасын; нек десенг ол адам санды. Аны саны алты жюз алтмыш алтыды.

¹ Сора мен, къарап, Къозу Сион тауну башында тургъанын кёрдюм. Аны биргесине да, Аны Атасыны аты аланы мангылайларында жазылгъан жюз къыркъ тёрт минг адам тура эдиле. ² Сора мен, уллу сууланы тауушуча, уллу кёк кюкюреген тауушча кёкден ауаз эшитдим. Мен эшитген ауаз, арфаларын сокъгъан арфачыланы ауазларына ушай эди. ³ Ала тахтаны эм тёрт хайыуанны аллында эм таматаланы аллында жангы зикир айтадыла; ол зикирге уа, жер башындан сатып алыннган бу жюз къыркъ тёрт минг адамдан башха бир киши да юйреналмады. ⁴ Бу адамла кеслерин къатынла бла харам этмегенледиле; нек десегиз ала таптаза адамладыла. Ала, Къозу къайры барса да, Аны ызындан баргъанладыла. Ала, Аллахха бла Къозугъа тюнгючлеча, адамланы арасындан сатып алыннгандыла. ⁵ Аланы ауузларында хыйлалыкъ жокъду, Аллахны тахтасыны аллында ала айыпсыздыла. ⁶ Сора мен кёкню арасында учхан башха мёлекни кёрдюм. Ол мёлег’а, жер башында жашагъанлагъа – хар миллетге эм тукъумгъа, хар тилге эм хар халкъгъа – билдирир ючюн, ёмюрлюк Хайыр Хапарны къолунда тутуп тура эди. ⁷ Ол мёлек уллу ауазы бла: «Аллахдан къоркъугъуз! Анга махтау салыгъыз! Нек десегиз Аны сюд этер заманы келгенди. Кёкню да, жерни да, тенгизни да, суу чыкъгъан жерлени да Жаратханнга сежда этигиз!» – дей эди. ⁸ Башха мёлек да аны ызындан учуп: «Жоюлду! Уллу шахар Бабил жоюлду! Нек десегиз ол кесини саякълыгъыны къутургъан чагъырындан битеу миллетлеге ичиргенди!» – деди. ⁹ Ючюнчю мёлек да, аланы ызларындан учуп, уллу ауазы бла: «Жаныуаргъа эм аны суратына баш ургъан эм аны тамгъасын кесини мангылайына неда къолуна къабыл этген ким болсада, ¹⁰ Ол Аллахны чамланыуууну чагъырын, Аны ачыу аягъында хазырланнган таза чагъырны ичерикди эмда сыйлы мёлеклени бла Къозуну аллында отда бла кукуртда азап чегерикди. ¹¹ Аланы чекген азапларыны тютюню ёмюрледен ёмюрлеге чыгъып турлукъду, жаныуаргъа бла аны суратына баш ургъанла эм аны атыны тамгъасын къабыл этгенле, не кече, не кюндюз тынчлыкъ табарыкъ тюйюлдюле», – деди. ¹² Бу болумлада Аллахны фарызларын эм Иссагъа ийнаныуну сакълагъан сыйлыла тёзюмлю болургъа керекдиле. ¹³ Сора мен: «Былай жаз: мындан арысында Раббийге ийнаныулары бла ёлгенле насыплыдыла!» – деп кёкден манга айтхан ауазны эшитдим. «Алайды, – дейди Нюр, – Ала урунууларын бошап тынчайырыкъдыла, аланы этген ишлери да аланы ызларындан барлыкъдыла». ¹⁴ Сора мен, къарап, бир акъ булут кёрдюм. Булутну юсюнде Адам Улуна ушагъан Биреулен олтура эди. Аны башында алтын таж, Аны къолунда да жютю оракъ бар эди. ¹⁵ Сора башха мёлек табыныучу юйден чыгъып, уллу ауазы бла булут юсюнде Олтургъаннга: «Орагъынгы узат да ор! Оракъла заманы келгенди. Нек десенг жер башында тирлик жетгенди», – деп къычырды. ¹⁶ Сора булут юсюнде Олтургъан Кесини орагъын жер юсюне атды эмда жерни тирлиги орулду. ¹⁷ Кёкдеги табыныучу юйден дагъыда башха мёлек чыкъды, аны къолунда да жютю оракъ бар эди. ¹⁸ Сора отну бийлерге эркинлиги болгъан башха мёлек, къурман этилиучю жерден чыгъып, уллу къычырыу бла жютю орагъы болгъаннга: «Жютю орагъынгы узат да, жер башындагъы жюзюм чопалланы кесип жый! Нек десенг жюзюмлери бишгендиле», – деп къычырды. ¹⁹ Сора мёлек, орагъын жер юсюне атып, жер башындагъы жюзюмню, кесип жыйып, Аллахны чамланыуууну уллу жюзюм сыгъыучусуна атды. ²⁰ Жюзюм сыгъыучуда жюзюмле шахардан тышында малтандыла. Жюзюм сыгъыучудан чыкъгъан ол къан ырхыны узунлугъу минг алтыжюз стадия эди, теренлиги уа атланы жюгенлерине жете эди.

¹ Сора мен кёкде башха уллу эм сейир илишан, жети ахыргъы палахланы келтирген жети мёлекни кёрдюм. Аллахны чамланыуу бу палахла бла бошалады. ² Дагъыда мен от бла къатышдырылгъан мияла тенгиз кибик бир зат кёрдюм эм жаныуарны да, аны суратын да, аны тамгъасын да, аны атыны санын да хорлагъанла Аллахны арфаларын да тутуп, бу мияла тенгизни юсюнде тургъанларын кёрдюм. ³ Ала, Аллахны къулу Мусаны зикирин эм Къозуну зикирин айтып: «Битеу дунияны тутхан Раббий Аллах! Сени ишлеринг уллудула эм аламатдыла! Миллетлени Патчахы! Сени жолларынг тюзлюклюдюле эм хакъ кертидиле! ⁴ Я Раббий! Сенден къоркъмазлыкъ эм Сени атынга махтау салмазлыкъ кимди? Нек десенг таза сыйлы жангыз Сенсе. Битеу миллетле, келип, Сени аллынгда сеждагъа барлыкъдыла; нек десенг Сени сюдлеринг ачыкъ болгъандыла», – дейдиле. ⁵ Андан сора мен къарап, табыныучу юйню – кёкдеги шагъатлыкъ чатырны – ачылгъанын кёрдюм. ⁶ Эмда жети палах келтирген жети мёлек таза, жылтырагъан акъ гетен кийимле кийип, беллерине да кёкюреклерине дери жетген алтын белибаула къысып, табыныучу юйден чыкъдыла. ⁷ Сора тёрт хайыуандан бирлери, ёмюрледен ёмюрлеге жашап тургъан Аллахны чамланыууундан толгъан жети алтын аякъны жети мёлекге берди. ⁸ Табыныучу юй Аллахны махтаууну эм къудуретини тютюнюнден толду эм, жети мёлекни жети палахы бошалгъынчы, бир киши да табыныучу юйге киралмады.

¹ Сора мен табыныучу юйден чыкъгъан уллу ауаз жети мёлекге: «Барыгъыз, Аллахны жети чамланыу аягъын жер юсюне къуюгъуз!» – деп айтханын эшитдим. ² Биринчи мёлек, барып, кесини аягъын жер юсюне къуйду: жаныуарны тамгъасын жюрютген эм аны суратына баш ургъан адамлада кюйсюз эм жийиргенчли ирин этген жарала болдула. ³ Экинчи мёлек кесини аягъын тенгизге къуйду: сора тенгиз ёлюкню къаны кибик, къан болду эм тенгизде жаны болгъан хар зат ёлдю. ⁴ Ючюнчю мёлек кесини аягъын баргъан суулагъа эм суу чыкъгъан жерлеге къуйду: была да къан болуп къалдыла. ⁵ Сора мен сууланы мёлегини: «Эй Бар Болгъан эм Бар Болуп Тургъан сыйлы Раббий! Сен тюзлюклюсе! Сен тюз сюд этесе. ⁶ Ала сыйлыланы эмда файгъамбарланы къанларын тёкгенлери ючюн, Сен алагъа ичерге къан бердинг; ала мынга тийишлидиле», – дегенин эшитдим. ⁷ Сора къурман этилиучю жерден башха мёлек: «Эй, битеу дунияны тутхан Раббий Аллах! Сени хукмуларынг хакъ кертидиле эм тюзлюклюдюле!» – деп айтханын эшитдим. ⁸ Тёртюнчю мёлек кесини аягъын кюнню юсюне къуйду, сора кюннге адамланы от бла кюйдюрюрге кюч берилди. ⁹ Уллу иссилик адамланы кюйдюре эди эм бу палахланы эркинлиги Анда болгъан Аллахны атына ала аман айта эдиле. Алай болгъанлыкъгъа тобагъа къайтышыргъа эм Аллахха махтау салыргъа уа унамадыла. ¹⁰ Бешинчи мёлек кесини аягъын жаныуарны тахтасына къуйду, сора аны патчахлыгъы къарангы болуп къалды. Адамла термилиулеринден тиллерин къаба эдиле, ¹¹ Термилиулеринден эм жараларындан кёкдеги Аллахха аман айта эдиле эмда кеслерини ишлеринден тобагъа къайтышыргъа унамадыла. ¹² Алтынчы мёлек кесини аягъын уллу Евфрат суууна къуйду: кюн чыкъгъан жанындан келген патчахлагъа жол хазыр болур ючюн, Евфратны сууу къуруду. ¹³ Сора мен аждагъанны ауузундан, жаныуарны ауузундан эм жалгъан файгъамбарны ауузундан чыкъгъан макъалагъа ушаш юч харам нюр кёрдюм. ¹⁴ Ала – сейир илишанла этген, жин нюрле эдиле; ала чыгъып, битеу дунияны тутхан Аллахны ол уллу кюнюнде боллукъ къазауатха битеу дунияны патчахларын жыяргъа бара эдиле. ¹⁵ «Ма, гудучуча келеме! Сагъайып тургъан эм къымыжа болуп жюрюмез ючюн эм уятлыгъы кёрюнмез ючюн, кесини кийимин юсюнде сакълагъан насыплыды», – дейди Исса. ¹⁶ Сора аланы чюйютча Хармагедон атлы жерге жыйдыла. ¹⁷ Жетинчи мёлек кесини аягъын хауагъа къуйду; сора кёкдеги табыныучу юйде тахтадан: «Болуп бошалды!» – деген уллу ауаз чыкъды. ¹⁸ Сора шыбылала, кёк кюкюреуле, ауазла чыкъдыла эм жер башында адамла жаратылгъандан бери болмагъанча аллай уллу жер тебиу болду. Алай уллу, аллай кючлю жер тебиу болду! ¹⁹ Уллу шахар да ючге бёлюндю, миллетлени шахарлары да оюлдула, уллу Бабил да Аллахны аллында эсге тюшюрюлдю, анга Аллахны чамланыуууну кючлю чагъыр аягъы берилди. ²⁰ Хар айрыкам да къачды, таула да жокъ болдула. ²¹ Кёкден адамланы юсюне хар гырты талант тенгли болгъан буз да жауду. Ол буздан болгъан палах ючюн адамла Аллахха аман айта эдиле; нек десегиз андан болгъан палах бек къыйын эди.

¹ Сора жети аякъны жюрютген жети мёлекден бирлери келди эм, мени бла сёлешип манга: «Кел, мен санга кёп сууланы юсюнде олтургъан уллу саякъ къатыннга боллукъ сюдню кёргюзтейим. ² Жерни патчахлары аны бла саякълыкъ этгендиле эм аны саякълыгъыны чагъырындан жер башында жашагъанла ичип эсиргендиле», – деди. ³ Сора мёлек мени Сыйлы Нюрню оноуунда къум тюзге элтди. Анда мен кяфыр атладан топ-толу болгъан жети башлы, он мюйюзлю къызыл жаныуарны юсюне минип тургъан къатынны кёрдюм. ⁴ Къатын къызгъылдым бла къызыл кийим кийип эди, алтын бла, багъалы ташла бла эм инжиле бла айбатланып эди эмда къолунда жийиргенчли затладан, кесини саякълыгъыны кирлеринден толгъан алтын аякъны тута эди. ⁵ Аны мангылайында да: «Уллу Бабил, саякъ къатынланы бла жерни жийиргенчликлерини анасы», – деген таша магъаналы ат жазылып эди. ⁶ Къатын сыйлыланы эм Иссаны шагъатларыны къанларындан эсирип болгъанын кёрдюм эм, аны кёргенде, бек сейирсиндим. ⁷ Сора мёлек манга: «Сен не сейирсинесе? Мен санга бу къатынны эм аны жюрютген жети башлы эм он мюйюзлю жаныуарны тасхасын айтайым. ⁸ Ол сен кёрген жаныуар бар эди эм жокъду, тюпсюз теренликледен чыгъарыкъды эм жоюлуугъа кетерикди. Жер башында жашагъанладан атлары дуния жаратылгъандан бери жашау китабында жазылмагъан адамла жаныуарны алгъын болгъанын энди уа жокълугъун кёргенде хайран боллукъдула. Алай а ол энтда бир кере чыгъарыкъды. ⁹ Муну ангылар ючюн, акъылманлыкъ керекди. Жети баш юслеринде къатын олтургъан жети тауду ¹⁰ Эм жети патчахды. Аладан бешиси тайдырылгъандыла, бири турады, бири уа алыкъа келмегенди; келсе да, кёп турлукъ тюйюлдю. ¹¹ Алгъын болуп, энди уа жокъ болгъан жаныуар, сегизинчи патчахды; жетисинден бириди эмда жоюлуугъа кетерикди. ¹² Ол сен кёрген он мюйюз да он патчахды, ала уа алыкъа патчахлыкъны алмагъандыла, алай а патчах болуу властьны жаныуар бла бирге бир сагъатха аллыкъдыла. ¹³ Аланы ниетлери бирди эм кеслерини кючлерин эм властьларын жаныуаргъа берликдиле. ¹⁴ Ала Къозу бла къазауат этерикдиле, Къозу аланы хорларыкъды; нек десенг Ол бийлени Бийиди эм патчахланы Патчахыды, Аны бла болгъанла да чакъырылгъанладыла, сайланнганладыла эм ийманлыладыла», – деди. ¹⁵ Сора мёлек манга: «Анда саякъ къатын олтургъан, ол сен кёрген суула уа халкъла эм тайпала, миллетле эм тилледиле. ¹⁶ Ол сен жаныуарда кёрген он мюйюз, саякъ къатынны кёрюп болмай къаллыкъдыла, аны чачарыкъдыла, къымыжа этерикдиле, этин ашарыкъдыла эмда аны отда кюйдюрлюкдюле. ¹⁷ Нек десенг Аллах аланы жюреклерине, Кесини буйругъун толтурур ючюн, бир ниет ли болургъа эм Аллахны сёзлери толгъунчугъа дери кеси патчахлыкъларын жаныуаргъа берирге салгъанды. ¹⁸ Ол сен кёрген къатын а, дунияны патчахларына патчахлыкъ этген уллу шахарды», – деди.

¹ Андан сора мен кёкден тюшюп келе тургъан эмда уллу кючю болгъан башха мёлекни кёрдюм; аны аламатлыгъындан жер жарый эди. ² Сора ол уллу ауазы бла, бек къычырып: «Жоюлду! Уллу саякъ Бабил жоюлду! Ол жинлени мекямы эм хар тюрлю харам нюрню къысылыр жери, хар тюрлю харам эм жийиргенчли къанатлыны уясы болду; нек десенг кесини саякълыкъ этиуюню къутургъан чагъырындан битеу миллетлеге ичиргенди. ³ Жерни патчахлары аны бла саякълыкъ этгендиле, жерни саудюгерлери да аны уллу къайнауундан байыкъгъандыла», – деди. ⁴ Сора мен кёкден башха ауазны былай айтханын эшитдим: «Эй халкъым, сиз аны гюняхларына къатышмаз ючюн эм ол тюберик палахлагъа жолукъмаз ючюн чыгъыгъыз андан! ⁵ Нек десегиз аны гюняхлары кёкге дери жетгендиле, Аллах аны этген аманлыкъларын эсине тюшюргенди. ⁶ Аны сизге этгени кибик, сиз да анга этигиз эм аны ишлерине кёре анга эки къаты жетдиригиз; ол сизге чагъыр хазырлагъан аякъда анга эки кере хазырлагъыз. ⁷ Ол къаллай бир махталып эм къайнап жашагъан эсе да, анга аллай бир къыйынлыкъ бла ачыу беригиз. Нек десегиз ол кесини жюрегинде: „Патчах болуп олтурама, тул къатын тюйюлме, бушуу да кёрлюк тюйюлме!“ – дейди. ⁸ Муну ючюн башына келлик палахла – ёлюм, бушуу эм ачлыкъ – бир кюнню ичинде келликдиле. Ол отда да кюйдюрюллюкдю, нек десегиз анга сюд этген Раббий Аллахны кючю кёпдю. ⁹ Аны бла зийна этген эм къайнап жашагъан жерни патчахлары, аны жаннганыны тютюнюн кёргенде, анга сарнап жилярыкъдыла. ¹⁰ Аны тюбеген азабындан къоркъгъанларындан узакъда тохтап: „Палах, палах санга, уллу шахар, кючлю шахар Бабил! Нек десенг санга этиллик сюд бир сагъатны ичинде келди“, – дерикдиле. ¹¹ Жерни саудюгерлери да анга сарнап жилярыкъдыла, нек десенг аланы сатлыкъ затларын энди бир киши да алмайды. ¹² Алтын эм кюмюш затланы, багъалы ташланы, инжилени, ариу гетен къумачланы, дарийни, къызгъылдым бла къызыл къумачны, хар тюрлю ариу ийисли терекни, пил сюекден ишленнген хар тюрлю затны, бек багъалы агъачладан, жезден, темирден эм мермер ташдан ишленнген хар тюрлю затны, ¹³ Тарчынны, къакъуланы, фимиамны, ариу ийисли жауну, ладанны, чагъырны, зейтун жауну, таза унну, будайны, тууарланы, къойланы, атланы, арбаланы, къулланы эм адам жанланы энди бир киши да алмайды. ¹⁴ Сени жанынг сюйюучю кёгетле да сенде къалмадыла, сени битеу байлыгъынг бла аламатлыгъынг сенден кетди, сен энди аланы табарыкъ тюйюлсе. ¹⁵ Бу затланы барысы бла сатыу этип Бабилни хайырындан байыкъгъанла, аны тюбеген азабындан къоркъгъанларындан, узакъда тохтарыкъдыла эм сарнап жиляп: ¹⁶ „Палах, палах санга, ариу гетенден, къызгъылдым бла къызыл къумачдан кийим кийген, алтын бла, багъалы ташла бла, инжиле бла жасаннган уллу шахар! ¹⁷ Нек десенг быллай уллу байлыкъ бир сагъатны ичинде жоюлду!“» – дерикдиле. Битеу кеме жюрютюучюле, битеу кеме жолоучула, битеу кемечиле эм битеу тенгизде саудюгерлик этиучюле, узакъда тохтап ¹⁸ Эм аны жаннганыны тютюнюн кёрюп: «Бу уллу шахаргъа къайсы шахар ушайды?» – деп къычырыкъ этдиле. ¹⁹ Эм кеслерини башларына кюл къуюп, жиляп эм сарнап: «Палах, палах санга, уллу шахар! Сени багъалы затларынг бла тенгизде кемелери болгъанла байыкъгъандыла, энди уа бир сагъатны ичинде чачылдынг. ²⁰ Кёк да, сыйлы абустолла да, файгъамбарла да, аны башына келгеннге къууаны гъыз; нек десегиз Аллах анга сюд этип, дертигизни жетдиргенди», – деп къычырыкъ этдиле. ²¹ Сора бир кючлю мёлек, уллу тирмен ташха ушагъан бир ташны кётюрюп, былай айтып, тенгизге атды: «Уллу шахар Бабил ма былай къызыу атыллыкъды эм мындан арысында аны бир киши табарыкъ тюйюлдю. ²² Арфа сокъгъанланы, жырлагъанланы, сыбызгъы эм быргъы сокъгъанланы ауазлары энди сенде эшитиллик тюйюлдюле; энди сенде бир тюрлю санагъатны, бир тюрлю устасы боллукъ тюйюлдю эм энди сенде тирмен тауушу да эшитиллик тюйюлдю; ²³ Энди сенде чыракъ жарыгъы да чыгъарыкъ тюйюлдю; энди сенде киеуню бла келинни ауазлары эшитиллик тюйюлдюле. Нек десенг сени саудюгерлеринг жерни бийлери эдиле эм сени хыйнычылыгъынг бла битеу миллетле ажашыугъа тюшгендиле. ²⁴ Ол шахарда файгъамбарланы, сыйлыланы эм битеу жер башында ёлтюрюлгенлени къанлары табылгъанды».

¹ Андан сора мен кёкде кёп халкъны ауазы кибик уллу ауаз эшитдим, ала: «Халелуя ! Къутхарыу да, махтау да, хурмет да, кюч да Раббийибизниди ; ² Нек десегиз Аны сюдлери хакъ кертидиле эм тюзлюклюдюле! Ол, кесини саякълыгъы бла жер юсюн жойгъан уллу саякъ къатыннга сюд этгенди эм Кесини къулларыны къанларыны дертин анга жетдиргенди», – дедиле. ³ Экинчи кере да: «Халелуя! Аны тютюню ёмюрледен ёмюрлеге чыгъып турлукъду», – дедиле. ⁴ Ол заманда жыйырма тёрт тамата бла тёрт хайыуан жерге къапланып, тахтада олтургъан Аллахха сеждагъа бардыла эм: «Амин! Халелуя!» – дедиле. ⁵ Сора тахтадан: «Аллахыбызгъа махтау салыгъыз, Аны битеу къуллары да, Андан къоркъгъанла да, гитчеле да, уллула да!» – деген ауаз чыкъды. ⁶ Сора мен кёп халкъны ауазына, кёп сууланы тауушуна, уллу кёк кюкюреулени ауазына ушаш ауазланы: «Халелуя! Битеу дунияны тутхан Раббий Аллахыбыз патчахлыкъ этеди. ⁷ Сюйюнейик, къууанч этейик эмда Анга махтау салайыкъ! Нек десегиз Къозуну той сагъаты келгенди, Аны къатыны кесин хазырлагъанды! ⁸ Анга киерге таза, жылтырауукъ, ариу гетен кийим берилди», – дегенлерин эшитдим. Ариу гетен а – сыйлыланы этген тюзлюклю ишлериди. ⁹ Сора мёлек манга: «Жаз: Къозуну некях тоюна чакъырылгъанла насыплыдыла!» – деди. Дагъыда манга: «Была хакъ керти сёзледиле, Аллахны сёзлеридиле», – деди. ¹⁰ Мен, анга сежда этер ючюн, аны аякъларына аудум; алай а ол манга: «Къара, этме алай! Мен да сени кибик эм Иссагъа шагъатлыкъ этиуню бардыргъан къарындашларынг кибик Аллахны къулума. Сежданы Аллахха эт, нек десенг Иссагъа шагъатлыкъ этиу файгъамбарлыкъны нюрюдю», – деди. ¹¹ Сора мен кёк ачылгъанын эм анда акъ ат тургъанын кёрдюм. Атха минип тургъанны аты Тюздю эм Хакъ Кертиди. Ол, тюзлюк бла сюд этип, къазауат этеди. ¹² Аны кёзлери отну жилтини кибикдиле, Аны башында кёп таж барды; Аны юсюне Кесинден башха бир киши билмеген ат жазылыпды. ¹³ Ол, къаннга боялгъан кийим кийип эди. Анга «Аллахны Сёзю» деген ат берилгенди. ¹⁴ Кёкдеги аскерле да, таза, ариу акъ гетен кийим кийип, акъ атлагъа минип, Аны ызындан бара эдиле. ¹⁵ Ол миллетлени хорлар ючюн, Аны ауузундан а жютю къылыч чыгъады. Ол Кеси аланы темир таякъ бла кютерикди; Ол битеу дунияны тутхан Аллахны ачыу эм чамланыу чагъырыны жюзюм сыгъыучусун малтарыкъды. ¹⁶ Аны кийиминде бла базыкъ бутунда: патчахланы Патчахы эм бийлени Бийи деген ат жазылыпды. ¹⁷ Сора мен кюнню юсюнде тургъан бир мёлекни кёрдюм; ол уллу ауазы бла, кёкню арасында учхан битеу къанатлылагъа: «Учуп келигиз, ¹⁸ Патчахланы, кючлюлени, командирлени, атланы бла алагъа миннгенлени этлерин, битеу азатланы эм къулланы, гитчелени эм уллуланы этлерин ашар ючюн, Аллахны уллу ушхуууруна жыйылыгъыз!» – деп къычырды. ¹⁹ Сора мен жаныуарны да, дунияны патчахларын да, аланы аскерлерин да, атха минип Тургъан бла эм Аны аскери бла къазауат этерге жыйылып тургъанларын кёрдюм. ²⁰ Сора жаныуар да, аны бла бирге аны аллында сейир илишанла кёргюзтген, ол илишанла бла жаныуарны тамгъасын къабыл этгенлени эм аны суратына баш ургъанланы терилтген жалгъан файгъамбар да тутулдула; ала экиси да саулай, кукурт жаннган от кёлге атылдыла. ²¹ Къалгъанлары уа, атха минип Тургъанны ауузундан чыкъгъан къылыч бла ёлтюрюлдюле; битеу къанатлыла да аланы этлеринден тойдула.

¹ Сора мен кёкден тюшген бир мёлекни кёрдюм; аны къолунда тюпсюз теренликлени ачхычы эм бир уллу сынжыр бар эди. ² Ол ибилис эм шайтан болгъан аждагъанны, буруннгулу жилянны тутуп, аны минг жылгъа бугъоулады. ³ Аны тюпсюз теренликлеге атып, тутмакъ этди эмда аны юсюне мухур салды, алай бла, ол, минг жыл бошалгъынчы, энди миллетлени алдаргъа болалмады. Андан сора уа ол бир кесек заманнга эркин этилирге керекди. ⁴ Сора мен тахталаны да, алада олтургъанланы да кёрдюм. Сюд этерге алагъа эркинлик берилген эди. Иссагъа этген шагъатлыкълары эм Аллахны Сёзю ючюн башлары кесилгенлени жанларын да кёрдюм. Ала уа жаныуаргъа да, аны суратына да сежда этмеген эдиле эм аны тамгъасын не кеслерини мангылайларына, не къолларына къабыл этмеген эдиле. Ала тирилдиле эм Масих бла бирге минг жыл патчахлыкъ этдиле. ⁵ Бу биринчи тиргизилиудю. Къалгъан ёлгенле уа минг жыл бошалгъынчы тирилмедиле. ⁶ Биринчи тиргизилиуге къошулгъан насыплыды эм сыйлыды; экинчи ёлюмню алагъа эркинлиги жокъду, алай а ала Аллахны эм Масихни дин къуллукъчулары боллукъдула эмда Аны бла бирге минг жыл патчахлыкъ этерикдиле. ⁷ Минг жыл бошалгъандан сора уа, шайтан, тутмагъындан эркин этилликди эм жерни тёрт мюйюшюнде болгъан миллетлени – Яжуж бла Мажужну терилтирге чыгъарыкъды эм аланы къазауат этерге жыярыкъды; аланы саны тенгизни юзмези кибикди. ⁸ Ала, жерни кенглигине чыгъып, сыйлыланы ыстауатын эм сюйюлюннген шахарны къуршаларыкъдыла. ⁹ Алай а кёкден, Аллахдан от тюшюп, аланы кюйдюрюп бошарыкъды. ¹⁰ Аланы терилтген ибилис а, от бла кукурт кёлге атыллыкъды; жаныуар бла жалгъан файгъамбар да андадыла. Ала кече да, кюн да ёмюрледен ёмюрлеге азап чегерикдиле. ¹¹ Сора мен уллу акъ тахтаны эм анда Олтургъанны кёрдюм; Аны бетинден кёк да, жер да къачдыла эм алагъа жер табылмады. ¹² Эмда мен ёлгенлени, уллуланы эм гитчелени Аллахны аллында тургъанларын кёрдюм. Сора китапла ачылдыла. Аты жашау китабы болгъан башха китап да ачылды. Ёлгенлеге уа китаплада жазылгъанла бла, кеслерини этген ишлерине кёре сюд этиле эди. ¹³ Ол заманда тенгиз кесинде болгъан ёлгенлени берди, ёлюм да, ахырат да алада болгъан ёлгенлени бердиле; хар кимге да кесини этген ишлерине кёре сюд этилди. ¹⁴ Андан сора ёлюм да, ахырат да от кёлге атылдыла. От кёл экинчи ёлюмдю. ¹⁵ Сора жашау китабында аты жазылмагъан хар адам от кёлге атылды.

¹ Сора мен жангы кёкню бла жангы жерни кёрдюм; нек десегиз алгъыннгы кёк бла алгъыннгы жер озгъан эдиле, энди тенгиз да жокъ эди. ² Сора мен, Ахия, сыйлы шахарны, жангы Иерусалимни кёрдюм; ол, кесини эрине айбатланып хазырланнган келин кибик кёкден, Аллахдан тюшюп келе эди. ³ Дагъыда мен тахтадан уллу ауазны: «Ма, Аллахны чатыры адамланы арасындады. Ол ала бла жашарыкъды; ала Аны халкъы боллукъдула, Аллах Кеси да, ала бла болуп, аланы Аллахы боллукъду. ⁴ Аллах аланы кёзлеринден хар жилямукъларын сюртюрюкдю, энди ёлюм боллукъ тюйюлдю. Не бушуу, не ачы къычырыкъ, не ауруу энди боллукъ тюйюлдю; нек десенг алгъыннгы озгъанды», – дегенин эшитдим. ⁵ Сора тахтада Олтургъан: «Ма, хар нени да жангы этеме», – деди. Эмда манга: «Быланы жаз, нек десенг бу сёзле хакъ кертидиле эм тюздюле», – деди. ⁶ Дагъыда манга: «Тамам болду! Альфа да, Омега да, ауалы да, ахыры да Менме; суусап болуп термилгеннге жашау сууну шауданындан хакъсыз берликме. ⁷ Хорлагъан барындан да юлюшлю боллукъду. Мен аны Аллахы боллукъма, ол да Манга улан боллукъду. ⁸ Къоркъакъланы, иймансызланы, харамланы, мурдарланы, саякъланы, хыйнычыланы, идоллагъа табыныучуланы эм битеу ётюрюкчюлени къадарлары уа от бла кукурт жаннган кёлдеди; бу экинчи ёлюмдю», – деди. ⁹ Сора жети ахыргъы палахладан толгъан жети аякъны жюрютген жети мёлекден бирлери, мени къатыма келип, манга сёлешип: «Кел, мен санга, Къозуну къатыны боллукъ келинни кёргюзтейим», – деди. ¹⁰ Сора мёлек, мени Сыйлы Нюрню оноуунда, уллу, бийик таугъа чыгъарып, манга, кёкден, Аллахдан энишге тюшген, уллу, сыйлы Иерусалим шахарны кёргюзтдю. ¹¹ Ол шахар Аллахны аламатлыгъындан жарый эди; аны жарыгъы, кристаллча кёрюннген яспис таш кибик бек багъалы ташны жарыгъына ушай эди. ¹² Шахарны уллу, бийик къабыргъасы, онеки къабагъы бар эди. Къабакъланы къатында онеки мёлек тура эди. Къабакъланы юсюнде Израиль улуларыны онеки тукъумуну атлары жазылып эдиле. ¹³ Кюн чыкъгъан жанындан юч къабагъы, шимал жанындан юч къабагъы, къыбыла жанындан юч къабагъы, кюн батхан жанындан юч къабагъы бар эди. ¹⁴ Шахарны къабыргъасы онеки мурдорну юсюнде ишленнген эди, аланы юсюнде да Къозуну онеки абустолуну атлары жазылып эди. ¹⁵ Мени бла сёлешген мёлекни къолунда, шахарны эм аны къабакъларын эмда аны къабыргъасын ёлчелер ючюн, алтын аршыны бар эди. ¹⁶ Шахар тёрт мюйюшлю болуп салыннганды, аны узунлугъу да кенглигине тенгди. Ол аршын бла шахарны ёлчеледи, аны хар жаны да онеки минг стадия эди; узунлугъу да, кенглиги да, бийиклиги да тенг эдиле. ¹⁷ Аны къабыргъасын да ёлчеледи, аны кенглиги да адамны ёлчеую бла жюз къыркъ тёрт къары эди, мёлекни ёлчеую да алайды. ¹⁸ Аны къабыргъасы ясписден ишленнгенди, шахар а таза миялагъа ушагъан таза алтын эди. ¹⁹ Шахарны къабыргъасыны мурдорлары хар тюрлю багъалы ташла бла жасаннгандыла: биринчи мурдору – ясписден, экинчиси – сапфирден, ючюнчюсю – халкидондан, тёртюнчюсю – жашил изумруддан, ²⁰ Бешинчиси – сардониксден, алтынчысы – сардисден, жетинчиси – хризолифден, сегизинчиси – кёк изумруддан, тогъузунчусу – топасдан, онунчусу – сары изумруддан, онбиринчиси – гиацинтден, онекинчиси – аметистден эди. ²¹ Онеки къабагъ’а – онеки инжиден эди, хар къабакъ бир сау инжиден эди. Шахарны орамы, жарыкъ мияла кибик – таза алтындан эди. ²² Бу шахарда табыныучу юй кёрмедим; нек десенг аны табыныучу юйю – битеу дунияны тутхан Раббий Аллахды эм Къозуду. ²³ Шахарны не кюн, не ай жарытыр кереклиси жокъ эди; нек десегиз Аллахны аламатлыгъы аны жарыта эди, аны чырагъы да Къозу эди. ²⁴ Къутхарылгъан миллетле аны жарыгъында жашарыкъдыла, дунияны патчахлары да кеслерини махтауларын Аны ичине келтирликдиле. ²⁵ Кюндюз аны къабакълары жабыллыкъ тюйюлдюле, анда кече уа боллукъ тюйюлдю. ²⁶ Битеу миллетлени махтауларын эм сыйларын аны ичине келтирликдиле; ²⁷ Аны ичине бир тюрлю харам зат эм жийиргенчли ишге бла ётюрюкге кесин берген бир киши да кирлик тюйюлдю; жаланда атлары, Къозуну жашау китабында жазылгъанла кирликдиле.

¹ Сора мёлек манга Аллахны эм Къозуну тахтасындан чыкъгъан, кристалл кибик жарыкъ, жашау сууну баргъан ариу сууун кёргюзтдю. ² Шахарны орамыны арасында, баргъан сууну ары эм бери жанында, онеки кере кёгет берген, хар айгъа кёгетин берген жашау тереги бар эди; терекни чапыракълары уа миллетлени саулукълу этер ючюн эди. ³ Энди бир тюрлю налат зат боллукъ тюйюлдю; алай а анда Аллахны эм Къозуну тахтасы боллукъду эмда Аны къуллары Анга къуллукъ этип турлукъдула. ⁴ Ала Аны бетин кёрлюкдюле эмда Аны аты аланы мангылайларында жазылып боллукъду. ⁵ Анда кече боллукъ тюйюлдю эм не чыракъны, не кюнню жарыгъы керекли боллукъ тюйюлдюле; нек десегиз Раббий Аллах аланы жарытады. Ала ёмюрледен ёмюрлеге патчахлыкъ этерикдиле. ⁶ Сора мёлек манга: «Бу сёзле тюздюле эм хакъ кертидиле эмда сыйлы файгъамбарланы Раббий Аллахы, къысха заманда боллукъ затланы Кесини къулларына кёргюзтюр ючюн, Кесини мёлегин ийгенди», – деди. ⁷ «Ма, терк келликме! Бу китапны файгъамбарлыкъ сёзлерин тутхан насыплыды», – дейди Исса. ⁸ Быланы кёрген эм эшитген мен Ахияма. Эшитген эм кёрген заманымда уа, быланы кёргюзтген мёлекге сежда этер ючюн, аны аякъларына аудум. ⁹ Алай а ол манга: «Къара, этме алай! Нек десенг мен сени кибик эм сени къарындашларынг файгъамбарла эмда бу китапны сёзлерин тутханла кибик Аллахны къулума. Сежданы Аллахха эт!» – деди. ¹⁰ Сора манга: «Бу китапны файгъамбарлыкъ сёзлерине мухур салма, нек десенг заман жууукъду. ¹¹ Тюзлюксюзлюк этиучю дагъыда тюзлюксюзлюк этсин, харам адам дагъыда харам болсун. Тюзлюклю уа дагъыда тюзлюк этсин, сыйлы дагъыда сыйлы болсун», – деди. ¹² «Ма, терк келликме! Мени берлик саугъам Мени биргемеди, хар кимге этген ишлерине кёре тийишлисин берликме. ¹³ Альфа да, Омега да, ауалы да, ахыры да, биринчи да, артдагъы да Менме. ¹⁴ Аланы жашау терегине эркинликлери болур ючюн эм шахаргъа къабакъла бла кирир ючюн, кеслерини кийимлерин жуугъанла насыплыдыла. ¹⁵ Ит адамла эм хыйнычыла, саякъ адамла эм мурдарла, идоллагъа табыныучула эм ётюрюкню сюйюучю эм этиучю хар адам шахардан тышындадыла. ¹⁶ Мен Исса, жамауатланы юсюнден бу шагъатлыкъланы сизге билдирирге Кесими мёлегими ийгенме. Мен – Дауутну тамырыма эм туудугъума, жарыкъ танг жулдузма». ¹⁷ Нюр да, келин да: «Кел!» – дейдиле. Эшитген да: «Кел!» – десин. Суусап болуп термилген келсин, алыргъа сюйген да жашау сууун хакъсыз алсын. ¹⁸ Эм мен да бу китапны файгъамбарлыкъ сёзлерин эшитген хар адамгъа шагъатлыкъ этеме: былагъа ким зат къошса, анга Аллах бу китапда жазылгъан палахланы къошар; ¹⁹ Эм бу файгъамбарлыкъ китапны сёзлеринден ким зат къоратса, Аллах аны жашау терекден, сыйлы шахардан эм бу китапда жазылгъан затладан юлюшюн къоратыр. ²⁰ Бу затлагъа шагъатлыкъ Этген: «Ма, терк келликме!» – дейди. Амин. Я Раббий Исса, кел! ²¹ Бизни Раббийибиз Масих Иссаны шафауаты сизни барыгъыз бла да болсун. Амин.