ФИЛИПИЙЛИЛЕГЕ

ФИЛИПИЙЛИЛЕГЕ

¹ Масих Иссаны къуллары мен Пауулдан бла Тимотейден Филипийдеги жамауатны къуллукъчулары бла эм болушлукъчулары бла бирге Масих Иссада болгъан битеу сыйлылагъа салам! ² Атабыз Аллахдан эм Раббийибиз Масих Иссадан сизге шафауат эм ырахатлыкъ болсун. ³ Сизни хар эсиме тюшюргеним сайын, Аллахыма шукур этеме. ⁴ Биринчи кюнден башлап эндиге дери окъуна сиз Хайыр Хапарны жаяргъа къошулгъаныгъыз ючюн, ⁵ Барыгъыз ючюн да хар дууамда дайым къууанч бла тилек этеме. ⁶ Сизде огъурлу ишни этип башлагъан Аллах аны Масих Иссаны келир кюнюне дери битдирлигине толу ийнанама. ⁷ Мени сизге алай ышаныргъа толу сылтауум барды. Нек десегиз мен сизни жюрегимде тутама, тутмакъда болгъанымда да, Хайыр Хапарны къоруулап бегимли этгенимде да, сиз барыгъыз да мени бла бирге Аллахны шафауатында нёгерлеримсиз. ⁸ Мен сизни барыгъызгъа да Масих Иссаны сюймеклиги бла тансыкъ болгъаныма Аллах шагъатды. ⁹ Эмда сиз игисин сынап билир ючюн, сизни сюймеклигигиз билим бла эм хар тюрлю сезим бла энтда бекден-бек ёссюн деп, ¹⁰ Аллахха ыспас-махтау салыныр ючюн, сиз Масих Иссадан келген тюзлюклюлюкню битимлеринден толу болуп, ¹¹ Масихни кюнюнде таза эм айыпсыз болугъуз деп тилек этеме. ¹² Къарындашла, мени болум халларым Хайыр Хапарны жайыуда уллу жетишимли болургъа жарагъанларын билиригизни сюеме. ¹³ Алай бла мени Масих ючюн тутмакъ болгъаным битеу императорну тоханасындагъылагъа эм битеу къалгъанлагъа ачыкъ болгъанды ¹⁴ Эм къарындашланы кёбюсю, мени тутмакълыгъымы кёргенлеринде, Раббийге ышанып, дагъыда бек таукеллик бла Аллахны сёзюн къоркъуусуз билдирип башлагъандыла. ¹⁵ Болсада бир къауумла аны зарлыкъ бла эм эришиу бла этедиле, башхала уа ахшы ниет бла Масихни билдиредиле. ¹⁶ Биринчиле Масихни таза жюрекден тюйюл, мени тутмакълыгъымда къыйынлыгъымы кёп этер ючюн, эгоистлик бла билдиредиле. ¹⁷ Башхала уа, мен Хайыр Хапарны къорууларгъа салыннганымы билип, муну сюймеклик бла этедиле. ¹⁸ Хатасы жокъду! Аман ниет бла эсе да, таза жюрекден эсе да, Масихни юсюнден айтадыла. Мен анга да къууанама эм къууанырыкъма. ¹⁹ Нек десегиз сизни тилегигизни хайыры бла эм Масих Иссаны Нюрюню болушлугъу бла бу мени къутхарылырыма себеп боллугъун билеме. ²⁰ Мен бир затдан да айыплы болмазлыгъыма, алай а жашасам да, ёлсем да, Масих, хар замандача, энди да мени чархымда уллу махтау табар ючюн, мени толу таукеллигим боллугъуна умутум эм ышаныуум барды. ²¹ Нек десегиз манга жашау Масихди, ёлюм да хайырды. ²² Алыкъа чархымда жашарыкъ эсем, хайырлы ишле этерикме. Алай а нени сайларгъа билмейме. ²³ Мени жюрегим экисине да тартады: бу дуниядан кетип, Масих бла болургъа да сюеме, нек десегиз ол неден да игиди. ²⁴ Алыкъа чархымда жашагъаным а сизге керекди. ²⁵ Мен анга толу ийнанып жашарыгъымы эм, сиз ийманда алгъа барып къууаныр ючюн, ²⁶ Мен энтда сизге келгенде, сизни Масих Иссада къууанчыгъыз мени юсюм бла андан да кёп болур ючюн, сизни барыгъыз бла да боллугъуму билеме. ²⁷ Не болсада Масихни Хайыр Хапарына тийишли жашагъыз ансы; мен келип сизни кёрсем да неда келмесем да, сизни юсюгюзден, сизни бир нюрде къаты тургъаныгъызны эм бир акъыллы болуп Хайыр Хапарны ийманы ючюн кюрешгенигизни ²⁸ Эмда сизге къажау тургъанладан бир жаны бла да къоркъмагъаныгъызны эшитейим. Алай этиуюгюз алагъа жоюлурларын, сизге уа къутхарылырыгъызны кёргюзтген илишанды. ²⁹ Нек десегиз Масихни хатеринден сизге жаланда Анга ийнаныргъа тюйюл, алай а Аны ючюн къыйналыргъа да берилгенди. ³⁰ Мен алгъын тюбеген къыйынлыкъланы сиз кёргенсиз эм мен бусагъатда сынагъан къыйынлыкъларымы эшитгенсиз, алагъа сиз да тюбейсиз.

¹ Алай бла, Масихден бир тюрлю кёллениуюгюз бар эсе, сюймекликден бир тюрлю жюрек жапсарылыуугъуз бар эсе, Сыйлы Нюр бла бир тюрлю биригиуюгюз бар эсе, бир тюрлю жумушакъ жюреклилигигиз эм жазыкъсыныуугъуз бар эсе, ² Сора мени къууанчымы толтуругъуз: акъылыгъыз бир болсун, ол сюймеклигигиз да болсун, бир ниетли эм бир фикирли болугъуз. ³ Даулашыргъа сюйюу бла неда кесигизге махтау излеу бла бир затны да этмегиз, алай а сабыр акъыллылыкъ бла бир-биригизни кесигизден уллу кёрюгюз. ⁴ Хар ким жаланда кесини къайгъысын этип къоймасын, алай а хар ким башхаланы къайгъысын да этсин. ⁵ Масих Иссада болгъан акъыл сизде да болсун: ⁶ Ол, Кесини табийгъатына кёре Аллах болгъанлыкъгъа, Аллах бла тенг болгъанын кёргюзтюрге кюрешмегенди. ⁷ Алай а, Кесине къулну табийгъатын алып, адамлагъа ушашлы болуп, Кеси-Кесин сансыз этгенди. ⁸ Сыфаты бла да адамча болуп, ёлюмге дери эм къачда ёлюмге дери окъуна бойсунуп, Кесин жууаш этгенди. ⁹ Ол себепден Аллах да Аны ёрге кётюргенди эм Анга битеу атладан да уллу ат бергенди. ¹⁰ Кёкде, жерде эмда жерни тюбюнде болгъанланы барысы да Иссаны атыны аллында тобукъланырыкъдыла ¹¹ Эм, Аллах Ата махталыр ючюн, хар тил да Масих Иссаны Раббий болгъанына шагъатлыкъ этерикди. ¹² Алай бла, сюйюлюннгенлерим, сиз хар заманда бойсуннганыгъыз кибик, жаланда мен сизде болгъан заманда болуп къалмай, бегирек да энди мен сизде болмагъан заманда, кесигизни къутхарылыуугъузну къоркъуу бла эм титиреу бла толу этигиз. ¹³ Нек десегиз сизде итиниуню да, ишлеуню да Аллах Кесини ыразылыгъы бла чыгъарады. ¹⁴ Сиз, гурушхасыз эм таза жюрекли болуп, терс эм бузукъ тёлюню арасында Аллахны айыпсыз сабийлери болур ючюн, ¹⁵ Хар нени да тарыкъмай эм даулашмай этигиз. Ол тёлюню арасында сиз, жашау берген сёзню къаты тутуп, дунияда жулдузлача жарыйсыз. ¹⁶ Алай этсегиз, мен бош кюрешмегеними эм бош урунмагъанымы кёрюп, Масихни къайтыр кюнюнде къууанырма. ¹⁷ Алай а мен сизни къурманыгъызны – сиз аны бла Аллахха къуллукъ этген ийманыгъызны – юсюне къурманча жанымы берирге тюшсе да, къууанама эм сизни къууанчыгъызгъа къошулама. ¹⁸ Аны кибик, сиз да къууаныгъыз эм мени къууанчыма къошулугъуз. ¹⁹ Мен, Раббий Иссагъа ышанып, сизге къысха заманда Тимотейни иерге мурат этеме эмда ол, сизден хапар келтирип, кёлюмю ырахат этер деп умут этеме. ²⁰ Нек десегиз аны кибик таза жюрекден сизни къайгъыгъызны этген мени бир адамым да жокъду. ²¹ Нек десегиз бары да Масих Иссаны ыразы этерге угъай, кеслери сюйгенча этерге излейдиле. ²² Тимотейни тийишлилиги уа сизге белгилиди; нек десегиз ол Хайыр Хапарны жайыу ишде манга, жаш атасына жумуш этгенча, жумуш этгенди. ²³ Алай бла, манга не боллугъун билгенимлей, олсагъат окъуна аны сизге иерге умут этеме. ²⁴ Мен, Раббийге ышанып, кесим да къысха заманда сизге келлигиме толу ийнанама. ²⁵ Алай а, керекли болгъанымда, манга болушургъа сиз ийген келечини – биргеме ишлеген, биргеме кюрешген къарындашым Эпафродитни сизге иерге тийишли кёргенме; ²⁶ Нек десегиз ол сизни барыгъызгъа да бек тансыкъ болгъан эди эм аны ауругъан хапары сизге жетгенине бек жарсый эди. ²⁷ Кертиси бла, ол ёлюрге жетип ауругъан эди; алай а Аллах анга мархамат этгенди эм жаланда анга тюйюл, алай а, мени жарсыуума жарсыу къошулмаз ючюн, манга да мархамат этгенди. ²⁸ Ол себепден, сиз энтда аны кёрюп къууаныр ючюн эм мени да жарсыуум азайыр ючюн, мен аны сизге теркирек иеме. ²⁹ Аны уа Раббийде хар тюрлю къууанч бла къабыл этигиз эм аллайлагъа хурмет этигиз. ³⁰ Нек десегиз ол, сиз жетишалмагъан болушлукъну манга этер ючюн, кеси жанын къоркъуугъа салып, Масихни иши ючюн ёлюмге къаршы эди.

¹ Ахырында, къарындашларым, Раббийде къууаныгъыз. Ол затланы юсюнден сизге къайтарып жазаргъа манга къыйын тюйюлдю, сизни уа къорууланыуугъуз мындады. ² Итледен – аман ишле этиучю адамладан – кесигизни сакълагъыз, сюннетни жакъчыларындан кесигизни сакълагъыз. ³ Нек десегиз керти сюннетлиле бизбиз, Аллахха нюр бла къуллукъ этиучюле, Масих Исса бла махтаннганла эм ышаныуубуз адам табийгъатыбызгъа болмагъанла. ⁴ Алай а мен адам табийгъатыма ышаныргъа да болаллыкъ эдим. Адам табийгъатына ышаныргъа умут этген башха адам бар эсе уа, мен бегирек да болаллыкъ эдим. ⁵ Сегизинчи кюн сюннет этилгенме, Израильни тукъумунданма, Беняминни туудукъларынданма, чюйютлюледен чюйютлюме, Тауратны законун тутууну юсюнден айтсагъ’а, фарисей эдим. ⁶ Мен эришлик бла Аллахны Жамауатына зулму этиучю эдим. Тауратха таяннган тюзлюклюлюкге кёре уа айыпсыз эдим. ⁷ Алай а мен ол заманда онглулукъгъа санагъан хар затны энди Масих ючюн файдасызгъа санайма. ⁸ Эмда мен, Аны ючюн хар нени да атып къойгъан Раббийим Масих Иссаны билиуню онглулугъу бла тенглешдиргенде, хар нени да файдасызгъа санайма эм Масихни табар ючюн ⁹ Эмда Аны бла бир болур ючюн, хар нени да багушха санайма. Энди мени Тауратны Законуна таяннган энчи тюзлюклюлюгюм жокъду; Масиххе ийнаныуну юсю бла, ийманны ахырында Аллахдан берилген тюзлюклюлюгюм барды. ¹⁰ Масихни ёлюмюнде Анга ушап, Аны билирге, Аны тиргизилиуюню кючюн эм Аны азап чегиулерине къошулууну магъанасын билирге ¹¹ Эм алай бла ёлгенлени тиргизилиуюне жетерге сюеме. ¹² Муну уа мен энди жетгенме деп неда тамам болгъанма деп айтмайма; алай а, Масих Исса мени тапханда, манга белгилеген саугъаны табар ючюн кюрешеме. ¹³ Къарындашла, мен кесими жетгеннге санамайма; алай а, озгъанны унутуп эм алгъа узатылып, ¹⁴ Муратыма жетерге, Масих Иссаны юсю бла Аллах мени бийикге чакъыргъанында, манга белгилеген саугъагъа жетерге кюрешеме. ¹⁵ Алай бла, бизде тамамлы болгъан ким болсада, алай ойлашсын; сиз не затдан башха тюрлю ойлаша эсегиз да, Аллах аны да сизге ачыкъ этер. ¹⁶ Алай а, биз неге жетген эсек да, алай ойлашыргъа эм аны жоругъу бла жашаргъа керекбиз. ¹⁷ Къарындашла, манга эниклегиз эм биз сизге берген юлгюге кёре жашагъанлагъа къарагъыз. ¹⁸ Нек десегиз кёпле, аланы юсюнден мен сизге кёп кере айта тургъанма, энди уа жилямукъларым бла окъуна айтама, Масихни къачыны душманлары кибик жашайдыла. ¹⁹ Аланы ахырлары жоюлууду, аланы аллахлары аланы къарынларыды, ала бедишлиликлери бла махтанадыла, аланы ойлашыулары жангыз бу дунияны юсюнденди. ²⁰ Бизни уа жашарыгъыбыз кёкледеди, биз а андан Къутхарыучубузну, Раббийибиз Масих Иссаны келлигин сакълайбыз; ²¹ Ол а, хар нени да Кесине бойсундурургъа болаллыкъ кючюн жюрютюую бла бизни фана чархыбызны тюрлендирип, Кесини махтаулу чархына ушаш этерикди.

¹ Алай бла, мен сюйген эм кёрюрге термилген къарындашларым, мени къууанчым эм тажым, Раббийде алай къаты туругъуз, сюйюлюннгенле. ² Эводиядан бла Синтихийден тилейме, Раббийникиле болуп бир акъыллы болсунла. ³ Эй, тюз ниетли нёгерим, сенден да тилейме, Хайыр Хапарны жайыуда мени бла, Клемент бла эм атлары жашау китапда жазылгъан мени къалгъан нёгерлерим бла бирге уруннган бу тиширыулагъа болушлукъ эт. ⁴ Хар заманда да Раббийде къууаныгъыз! Энтда айтама: къууаныгъыз! ⁵ Сизни тёзюмлюлюгюгюз битеу адамлагъа белгили болсун. Раббий жууукъду. ⁶ Бир зат ючюн да къайгъы этмегиз, алай а, хар заманда да дууа этип эм тилек этип, шукур бла кесигизни кереклигизни Аллахха айтыгъыз. ⁷ Алай бла хар акъылдан да бийик, Аллахны ырахатлыгъы сизни жюреклеригизни эм ойлашыуларыгъызны Масих Иссада сакълар. ⁸ Ахырында, къарындашларым, керти, хурметге тийишли, тюзлюклю, таза, сюйюмлю эмда ариу кёрюлген не эсе да, ахшы эмда махтаугъа тийишли не эсе да, аны юсюнден ойлашыгъыз. ⁹ Сиз неге юйреннген эсегиз, менден не къабыл этген эсегиз эм не эшитген эм кёрген эсегиз, аны этигиз; сора ырахатлыкъ берген Аллах сизни бла болур. ¹⁰ Сиз энтда жангыдан мени къайгъымы этип башлагъаныгъыз ючюн, мен Раббийде бек къууаннганма. Сиз алгъын да къайгъымы эте эдигиз, алай а болумланы тап болмагъанлары сизге тыйгъыч болгъан эдиле. ¹¹ Муну уа керекли болгъаным ючюн айтмайма, нек десегиз мен болгъан затым бла кёлюм ырахат болургъа юйреннгенме. ¹² Такъырлыкъда да жашай билеме, элпекликде да жашай билеме. Хар неге да эм хар не жанындан да, тояргъа да, ачлыкъгъа тёзерге да, элпекликде эм жокълукъда болургъа да юйреннгенме. ¹³ Мени кючлендирген Масих Иссаны юсю бла хар неге да болаллыкъма. ¹⁴ Болсада жарсыуумда манга болушханыгъызны сиз иги этген эдигиз. ¹⁵ Хайыр Хапарны жайып башлагъан заманымда, мен Македониядан чыкъгъанда, жаланда сизден башха бир жамауат да бирбирибизге болушууда манга къошулмагъанын сиз Филипийлиле билесиз. ¹⁶ Сиз Фесалоникагъа да мени кереклиме бир да эки да болушлукъ ийген эдигиз. ¹⁷ Муну айтханым, кесиме болушлукъ излегенден тюйюлдю, алай а сизге жараулу хайырлы ишлеригизни кёп болурларын излейме. ¹⁸ Мен барын да алгъанма эм хар неден да толума; Эпафродитни къолу бла сизни ийгенигизни, ариу ийисли тютюн чыгъыу кибик, Аллах иги кёрген, къабыл къурманны алып, мен ыразыма. ¹⁹ Мени Аллахым, Кесини аламат байлы гъына кёре, Масих Иссаны юсю бла сизни хар кереклигизни толтурур. ²⁰ Атабыз Аллахха уа ёмюрледен ёмюрлеге махтау болсун! Амин. ²¹ Масих Иссада болгъан хар сыйлыгъа салам айтыгъыз. Мени биргеме болгъан къарындашла сизге салам иедиле. ²² Битеу сыйлыла, артыгъыракъ да императорну тоханасында ишлегенле, сизге салам айтадыла. ²³ Бизни Раббийибиз Масих Иссаны шафауаты сизни барыгъыз бла да болсун. Амин.