ЧЮЙЮТЛЕЛЕГЕ

ЧЮЙЮТЛЕЛЕГЕ

¹ Бурун заманладан Аллах аталарыбызгъа файгъамбарланы юсю бла кёп кере эм кёп тюрлю айтып билдиргенди. ² Бу ахыр кюнледе бизге Уланыны юсю бла айтып билдиргенди. Аны уа хар неге да ие этип салгъанды, дунияланы да Аны юсю бла жаратханды. ³ Улан Аллахны аламатлыгъыны нюр жарыгъыды, Ол Аллахны Кесини сыфатыды эм хар нени да Кесини кючлю сёзю бла тутады. Кеси, бизни гюняхларыбыздан тазалап, уллу Аллахны тахтасыны онг жанында бийикде олтургъанды. ⁴ Мёлекледен къаллай бир иги атха ие болгъан эсе, аладан аллай бир уллу болгъанды. ⁵ Нек десегиз Аллах мёлеклени кимине къачан: «Сен Мени Уланымса, Мен Сени бюгюн туудурдум», – эм дагъыда: «Мен Анга ата боллукъма, Ол Манга Улан боллукъду», – деп айтханды? ⁶ Аны кибик, тюнгюч Уланын дуниягъа келтиргенинде: «Аллахны битеу мёлеклери Анга сеждагъа ийилсинле», – дейди. ⁷ Мёлеклени юсюнден а: «Ол Кесини мёлеклерин желлеге ушагъанла эмда Кесине къуллукъ этиучюлени жаннган отха ушагъанла этгенди», – деп айтылгъанды. ⁸ Уланыны юсюнден а: «Эй Аллах, Сени тахтанг ёмюрден ёмюргеди; Патчахлыгъынгы таягъы тюзлюк таягъыды. ⁹ Сен, тюзлюкню сюйюп, законсузлукъну кёрюп болмагъанса; ол себепден Аллах, Сени Аллахынг, къууанчны жауун Сени нёгерлерингден эсе Санга кёп жакъгъанды» ¹⁰ Эм: «Башланнганда Сен, Раббий, жерни къурагъанса, кёкле да Сени къолларынгы ишиди. ¹¹ Ала жоюллукъдула, Сен а хар заманда да турлукъса; ала бары да кийим кибик эски боллукъдула, ¹² Сен аланы къапталныча чулгъарыкъса, ала эски кийимни жангыгъа алышындырылгъаныча алышындырыллыкъдыла. Сен а бир халдаса, Сени жылларынг тауусуллукъ тюйюлдюле», – деп айтылгъанды. ¹³ Аллах мёлеклени кимине къачан: «Мен душманларынгы Сени аякъ тюбюнге салгъынчыгъа дери, Мени онг жанымда олтур», – деп айтханды? ¹⁴ Ала бары да къутхарылыудан юлюшлю боллукълагъа болушур ючюн жиберилген къуллукъ этиучю нюрле тюйюлмюдюле?

¹ Ол себепден биз, тюз жолдан ажашмаз ючюн, эшитгенлерибизге бек эс берирге керекбиз. ² Нек десегиз мёлеклени юслери бла билдирилген сёз къаты болгъан эсе, эм хар тюрлю терслик эм тынгыламаулукъ тюз тийишлисин алгъан эсе, ³ Аллай уллу къутхарыуну сансыз эте эсек, энди биз азапдан къалай къутулурбуз? Ол къутхарыуну бек алгъа Раббий Кеси билдиргенди, бизге да муну Андан кеслери эшитгенле айтып ийнандыргъандыла. ⁴ Аллах да ол хапаргъа илишанла бла, сейирликле бла, кёп тюрлю къудуретли ишле бла эмда Сыйлы Нюрню саугъалары бла шагъатлыкъ этгенди; аланы уа адамлагъа Кеси сюйгенча юлешгенди. ⁵ Нек десегиз биз аны юсюнден айтхан боллукъ дунияны Аллах мёлеклеге бойсундурмагъанды; ⁶ Ол угъай эсенг, биреу бир жерде шагъатлыкъ этип: «Адам неди, Сен аны эсингде тутар кибик? Адам улу да неди, Сен аны къайгъысын этер кибик? ⁷ Сен аны бир аз заманнга мёлекледен алаша этгенсе; артда уа махтау эм хурмет тажны аны башына салып, Кеси къолларынг жаратханлагъа аны башчы этгенсе. ⁸ Хар нени да аны аякъ тюбюне бойсундургъанса», – дегенди. Аллах хар нени да адамгъа бойсундургъанында, анга бойсундурмай бир затны да къоймагъанды. Энди уа алыкъа хар неда адамгъа бойсунуп кёрмейбиз. ⁹ Алай а бир аз заманнга мёлекледен алаша этилген Исса, Аллахны шафауаты бла хар адам амалтын ёлюм татар ючюн ёлюм сынагъаны себепли, махтау эм хурмет таж кийгенин кёребиз. ¹⁰ Нек десегиз хар неда Аны ючюн болгъан эм хар неда Аны юсю бла болгъан Аллах, кёп уланланы махтаулу халгъа жетдирип, аланы къутхарылыуларыны Башчысын азап чегиую бла тамамлы этерге керек эди. ¹¹ Нек десегиз сыйлы этген Исса да, сыйлы этилгенле да, бары да бир Атадандыла. Ол себепден Исса алагъа къарындашларым дерге ыйлыкъсынырыкъ тюйюлдю: ¹² «Сени атынгы Мен къарындашларыма билдирликме, жамауатны арасында Санга зикир айтып махтау саллыкъма», – деп айтады. ¹³ Эм дагъыда: «Мен Анга ышанып турлукъма» эм дагъыда: «Ма, Мен да, Манга Аллах берген сабийлерим да», – деп айтады. ¹⁴ Сабийле уа чархдан бла къандан юлюшлю болгъанлары ючюн, Исса да, ёлюмню бийин – ибилисни, ёлюмню юсю бла къоратыр ючюн, адам табийгъатны Кесине алгъанды. ¹⁵ Муну битеу ёмюрлеринде ёлюмден къоркъууларыны себебинден къул болгъанланы азат этер ючюн этгенди. ¹⁶ Нек десегиз Ол мёлеклеге болушлукъ этмейди, алай а Ибрахимни урлугъуна болушлукъ этеди. ¹⁷ Ол себепден Исса, Аллахха къуллукъ этиую бла мархаматлы эм ышаннгылы Баш Дин Къуллукъчу болуп, халкъны гюняхларын кечдириучю къурман болур ючюн, хар не жаны бла да къарындашларына ушаргъа керек эди. ¹⁸ Нек десегиз Ол Кеси сыналып къыйынлыкъгъа тёзгени кибик, сыналгъанлагъа да болушаллыкъды.

¹ Алай бла, кёкню чакъырыууна къошулгъан сыйлы къарындашла, биз ачыкъ къабыл этген ийманыбызны Келечиси эм Баш Дин Къуллукъчусу болгъан Масих Иссаны ангылагъыз. ² Муса Аллахны битеу юйюнде тюз болгъаны кибик, Исса да Аны Салгъаннга тюздю. ³ Алай а, юйню къурагъан адам юйден эсе багъалы болгъаны кибик, Исса да Мусадан эсе уллу хурмет тийишлиге саналгъанды. ⁴ Нек десегиз хар юйню ким болсада биреу къурайды, хар нени да къурагъан а Аллахды. ⁵ Муса да, билдирилирге керекли сёзлеге шагъатлыкъ этер ючюн, Аллахны битеу юйюнде бир къуллукъчу кибик тюздю. ⁶ Масих а Аллахны юйюнде Уланыча тюздю. Биз таукеллигибизни эм аны бла махтаннган ышаныуубузну ахырына дери къаты сакъласакъ, Аны юйю бизбиз. ⁷ Ол себепден, Сыйлы Нюрню айтханыча, «Бюгюн Аны ауазын эшитсегиз, ⁸ Къум тюзде Аны сынагъан кюнюгюзде, къозгъалгъан заманыгъызда кибик, жюреклеригизни терсакъыл этмегиз. ⁹ Ол къум тюзде аталарыгъыз Мени тинтип сынагъандыла эмда къыркъ жыл Мени ишлерими кёргендиле. ¹⁰ Ол себепден Мен бу тукъумгъа чамланнганма эм: „Тохтаусуз жюреклери бла ажашадыла, ала Мени жолларыма тюшюнмегендиле. ¹¹ Ол себепден, Мен ачыуум бла ант этгенимча, ала Мени берлик ырахатлыгъыма кирлик тюйюлдюле“ дегенме». ¹² Сакъ болугъуз, къарындашла, сизден биреуде да жашау бериучю Аллахдан тайгъан харам эм иймансыз жюрек болмасын. ¹³ Алай а, сизден биреу да гюняхха алдатып терсакъыл болмаз ючюн, заман бошалгъынчы хар кюн сайын бир-биригизге кёл этдиригиз. ¹⁴ Нек десегиз алгъы бурун бизде болгъан ышаныуубузну ахырына дери къаты сакъласакъ, биз Масих бла бир боллукъбуз. ¹⁵ Алгъын айтылгъаныча: «Бюгюн Аны ауазын эшитсегиз, къозгъалгъан заманыгъызда кибик жюреклеригизни терсакъыл этмегиз». ¹⁶ Нек десегиз эшитген заманларында къозгъалгъанла кимле эдиле? Мусаны башчылыгъы бла Мисирден чыкъгъанла тюйюлмю эдиле? ¹⁷ Аллах а къыркъ жыл кимге чамланнганды? Гюнях этип, аланы ёлюклери къум тюзде къалгъан адамлагъа тюйюлмюдю? ¹⁸ Анга боюн салмагъанлагъа тюйюл эсе: «Мени берлик ырахатлыгъыма кирлик тюйюлдюле», – деп кимлеге ант этгенди? ¹⁹ Алай бла ала иймансызлыкъларына кёре киралмай къалгъанларын кёребиз.

¹ Ол себепден, Аны берлик ырахатлыгъына кирирге энтда ант бла берилген сёзню кючю бар заманда, бизден биреу да андан къуру къалмаз ючюн сакъ болайыкъ. ² Нек десегиз къутхарылыуну юсюнден Хайыр Хапар алагъа билдирилгени кибик, бизге да билдирилгенди; алай а ала эшитген сёзню ийман бла къабыл этмегенлери себепли, ол сёз алагъа файда бермегенди. ³ Биз ийнаннганла уа Аны ырахатлыгъына киребиз; нек десегиз Ол: «Мен ачыуум бла ант этгенимча, ала Мени берлик ырахатлыгъыма кирлик тюйюлдюле», – дегенди. Аны ишлери уа дунияны башланнганында окъуна тамам болгъанлай да алай айтханды. ⁴ Нек десегиз бир жерде жетинчи кюнню юсюнден: «Сора Аллах, битеу ишлерин битдирип, жетинчи кюнде ырахат болгъанды», – деп айтылгъанды. ⁵ Эм дагъыда былайда: «Мени берлик ырахатлыгъыма кирлик тюйюлдюле», – деп айтылады. ⁶ Алай бла бир къауумла ол ырахатлыкъгъа ишексиз кирликдиле. Алгъын алагъа хайыр хапар билдирилгенле уа, боюн салмагъанлыкълары ючюн, анга кирмегендиле. ⁷ Ол себепден Аллах, аллай бир кёп заман озгъандан сора, Дауутну юсю бла «бюгюн» деп айтып, дагъыда бир кюнню белгили этеди. Нек десегиз алгъын: «Бюгюн Аны ауазын эшитсегиз, жюреклеригизни терсакъыл этмегиз», – деп айтылгъанды. ⁸ Нек десегиз Иешу алагъа ырахатлыкъ тапдыргъан болса эди, андан сора башха кюнню юсюнден айтылмаз эди. ⁹ Ол себепден Аллахны халкъына энтда шабат кюнюча ырахатлыкъ кюню къалады. ¹⁰ Нек десегиз Аллах, Кесини ишлерин битдирип, ырахат болгъаны кибик, Аны ырахатлыгъына кирген адам да, Кесини ишлерин битдирип, ырахат болады. ¹¹ Алай бла, бизден бир киши да аладан юлгю алып боюн салмаулукъгъа тюшмез ючюн, ол ырахатлыкъгъа кирирге кюрешейик. ¹² Нек десегиз Аллахны сёзю жашайды эм кючлюдю эм хар тюрлю эки ауузлу къылычдан да жютюдю; ол жанны бла нюрню, жиклени бла жиликлени айырыугъа дери ётеди эм жюрекни ойлашыуларына бла ниетлерине сюд этеди. ¹³ Эм жаратылгъанлада Аллахдан жашырылгъан зат жокъду, алай а Аны кёзлерини аллында хар неда жаланды эм ачыкъды: Анга жууап берликбиз. ¹⁴ Алай бла, Аллахны Уланы Исса кёкледен озгъан уллу Баш Дин Къуллукъчубуз болгъанына кёре, ачыкъ къабыл этген ийманыбызны къаты тутайыкъ. ¹⁵ Нек десегиз бизни Баш Дин Къуллукъ чубуз къарыусузлукъларыбызда бизге жазыкъсыналмазча аллай тюйюлдю. Ол хар не жаны бла да бизни кибик сыналгъанды, алай а гюнях этмегенди. ¹⁶ Ол себепден биз мархамат алыр ючюн эм кезиуюнде бизге болушур шафауат табар ючюн, Аллахны шафауат тахтасына таукеллик бла жууукълашайыкъ.

¹ Эски Кесаматха кёре, адамладан сайланнган хар баш дин къуллукъчу саугъала эмда адамланы гюняхларын кечдириучю къурманла келтирирге, Аллахны аллында адамла ючюн къуллукъ этерге сайланады. ² Ол жахиллик этгенлеге эм ажашханлагъа жан аурумакълыкъ этерге болаллыкъды; алай болгъанлыкъгъа ол кеси уа къарыусуз адамды. ³ Эм ол себепден ол, халкъ ючюн да, кеси ючюн да гюняхланы кечдириучю къурманла этерге керекди. ⁴ Эм бир киши да ол даражаны кесикесинден алмайды, алай а, Харунча, Аллах чакъыргъан алады. ⁵ Масих да алай, Баш Дин Къуллукъчу болуу махтауну Кеси-Кесинден алмагъанды, алай а Анга: «Сен Мени Уланымса, Мен бюгюн Сени туудурдум», – деп Ким айтхан эсе да, Ол бергенди; ⁶ Башха жерде да Ол: «Сен Мелкиседекни чынында ёмюрде да Дин Къуллукъчуса», – деп айтады. ⁷ Масих дуниядагъы жашаууну кюнлеринде ачы къычырыкъла бла эм жилямукъла бла Аны ёлюмден къутхараллыкъ Аллахдан дууа этип тилек этгенди эм Аллахха хурмет этгени ючюн Аны тилеги къабыл болгъанды. ⁸ Ол Уланы болгъанлыкъгъа, алай а азаплыкъла чегиую бла бойсунургъа юйреннгенди ⁹ Эм, тамам болуп, Анга бойсуннганланы барына да ёмюрлюк къутхарылыуларын Тындырыучу болгъанды. ¹⁰ Нек десегиз Мелкиседекни чынында Баш Дин Къуллукъчу этерге Аллах Аны Кеси сайлагъанды. ¹¹ Аны юсюнден а бизге кёп айтыргъа керек эди, алай а, сиз тынгылаялмагъанла болуп къалгъаныгъыз себепли, ангылатыргъа къыйынды. ¹² Нек десегиз, заман бла алып къарагъанда, сиз устазла болургъа керек эдигиз; алай а сизни жангыдан Аллахны сёзюню ал башланнганындан юйретирге керекди эмда сизге, къаты аш тюйюл, сют керекди. ¹³ Сют ичип тургъанла уа къагъанакъ сабийледиле, алагъа алыкъа тюзлюклюлюкню юсюнден юйретиу ангылашынмайды. ¹⁴ Къаты аш а жетгенлеге, ангылау бла эбине тюзелип ахшыны бла аманны айырыргъа юйреннгенлеге тийишлиди.

¹ Ол себепден, Масихни юсюнден юйретиуню ал башланнганларын къоюп, тамамлыкъгъа жетерге ашыгъайыкъ эм ёлюм келтирген ишледен тобагъа къайтышыудан бла Аллахха ийнаныудан, ² Кёмюлдюрюлюулени, къолланы салыуну, ёлгенлени тиргизилиулерини эмда ёмюрлюк сюдню юсюнден юйретиуден жангыдан мурдор салмайыкъ. ³ Аллах онг берсе, тамамлыкъгъа да жетербиз. ⁴ Бир кере жарыкъланып, кёкню саугъасындан татып, Сыйлы Нюрден юлюшлю болуп, ⁵ Аллахны ахшы сёзюнден эм боллукъ ёмюрню къудуретлеринден татып, ⁶ Иймандан тайгъанланы жангыдан тобагъа къайтышыу бла жангыртыргъа амал жокъду. Ала жангыдан кеслери-кеслеринде Аллахны Уланын къачха кередиле эм Анга бедиш этедиле. ⁷ Анга кёп кере жаугъан жауунну жутхан эм кимле ючюн ишлене эсе да алагъа тирлик битдирген жер Аллахдан берекет алады. ⁸ Шинжиле бла бош хансла битдирген жер а жараусузду эм налат берилирге къаршыды, аны уа ахыры кюйдюрюлюудю. ⁹ Алай а сюйюлюннгенле, былай айта эсек да, сиз андан игирек халда болгъаныгъызгъа эм къутхарылыуну тутханыгъызгъа толу ийнанабыз. ¹⁰ Нек десегиз Аллах тюзлюксюз тюйюлдю. Сизни урунууугъузну эм сиз Аны сюйген сюймеклигигизни – Аны аты ючюн сыйлылагъа къуллукъ этгенигизни эм энтда эте тургъаныгъызны – Ол унутурукъ тюйюлдю. ¹¹ Сизни хар биригиз да, умут этиуде толу ышаныулу болур ючюн, ахырына дери да аллай эришиулюк этеригизни сюебиз; ¹² Сиз, эринчек болмай, алай а Аллах ант бла сёз берген затладан ийман бла эм тёзюмлюлюк бла юлюшлю болгъанлагъа эниклеригизни сюебиз. ¹³ Аллах, Ибрахимге ант бла сёз бергенинде, ант этерге Кесинден уллу болмагъаны ючюн, Кеси-Кеси бла ант этип: ¹⁴ «Санга мардасыз кёп алгъыш этерикме эм сени тукъумунгу мардасыз кёп этип жаярыкъма», – дегенди. ¹⁵ Сора Ибрахим, кёп тёзюп, анга берирге айтылгъанны алгъанды. ¹⁶ Адамла кеслеринден уллу бла ант этедиле эм ийнандырыр ючюн этилген ант аланы хар даулашыуларын тохтатады. ¹⁷ Ол себепден Аллах да, сёз бергенинден юлюшлюлеге Кесини муратыны тюрленмезлигин кёргюзтюрге сюйюп, арада ант жюрютгенди. ¹⁸ Аллах жалгъан айтыргъа амал жокъду. Ол себепден биз, къутхарылыр ючюн Анга келгенле, уллу таукеллик бла аллыбызда болгъан умутну тутар ючюн, Аллах эки тюрленмезлик затны: сёз бериуюн бла антын жюрютгенди. ¹⁹ Бу умутубуз а жан ючюн къоркъуусуз эм къаты якорь кибикди эм Аллахны табыныучу юйюндеги жабыуну ары жаныны ичине киреди. ²⁰ Ары уа Мелкиседекни чынында ёмюрге да Баш Дин Къуллукъчубуз болгъан Исса бизге жол ачханды.

¹ Мелкиседек Салимни патчахы эм Аллаху-Тааланы дин къуллукъчусу эди. Ибрахим патчахланы хорлагъанындан сора къайтып келе туруп, Мелкиседек, Ибрахимни аллына чыгъып, анга алгъыш этген эди. ² Анга уа Ибрахим хар затындан зекят айырып бергенди. Мелкиседек бек алгъа атыны магъанасына кёре тюзлюкню патчахыды, андан сора да ол Салимни патчахы, алай демеклик ырахатлыкъны патчахыды. ³ Ол атасыз, анасызды; тукъумуну тарыхы жокъду; не кюнлерини башланнганы, не жашаууну ахыры жокъду; Аллахны Уланына ушап, хар заманда да дин къуллукъчу болуп турады. ⁴ Кёремисиз, бу адам къалай уллуду! Атабыз Ибрахим душмандан сыйыргъан хазнасыны айырмасындан анга зекят бергенди. ⁵ Тауратха кёре, Левий улуладан болуп дин къуллукъчулукъну алыучулагъа, халкъдан – алай демеклик, Ибрахимни тукъумундан болгъан кеси къарындашларындан – зекят алыргъа фарыз берилгенди. ⁶ Мелкиседек а, аланы тукъумларындан чыкъмагъанлай, Аллах ант сёзле берген Ибрахимден зекят алып, анга алгъыш этгенди. ⁷ Сёзсюз, уллу кесинден кичиге алгъыш береди. ⁸ Мында зекятны ёллюк адамла аладыла, Мелкиседекни юсюнден а, ол ёмюрде да жашап турады деп, шагъатлыкъ этилгенди. ⁹ Эм, айтып къояргъа, зекят алыучу Левий кеси Ибрахимни юсю бла зекят бергенди. ¹⁰ Нек десегиз Мелкиседек Ибрахимни аллына чыкъгъан заманда, Левий алыкъа атасы Ибрахимни белинде эди. ¹¹ Алай бла, Левийлилени дин къуллукъчулукъларыны юсю бла тамамлыкъ жетишсе эди – нек десегиз Израильни халкъы Тауратны Законун ол дин къуллукъчулукъгъа таянып алгъанды – Харунну чынында аталмагъанлай, Мелкиседекни чынында башха дин къуллукъчу чыгъаргъа энди не кереги бар эди? ¹² Нек десегиз дин къуллукъчулукъ тюрленнген заманда, закон да тюрленирге керекди. ¹³ Ол, бу затла Аны юсюнден айтылгъан, башха тукъумдан болгъанды, ол тукъумдан а бир киши да къурман этилиучю жерде къуллукъ этмей эди. ¹⁴ Нек десегиз бизни Раббийибиз Яхуданы тукъумундан чыкъгъаны белгилиди, ол тукъумгъа уа дин къуллукъчулукъ этиуню юсюнден Муса бир зат да айтмагъанды. ¹⁵ Мелкиседекге ушап, башха дин къуллукъчу келгени себепли, бу айтханыбыз энди бегирек да ачыкъ болуп ангылашынады. ¹⁶ Ол а Тауратны, тукъумну юсюнден фарызына кёре тюйюл, тохтаусуз жашауну кючюне кёре Дин Къуллукъчу болгъанды. ¹⁷ Нек десегиз: «Сен Мелкиседекни чынында ёмюрде да Дин Къуллукъчуса», – деп шагъатлыкъ этилгенди. ¹⁸ Алгъындан болгъан фарызны кетерилиую уа аны къарыусузлугъуну эм файдасызлыгъыны себебинден болады. ¹⁹ Нек десегиз Тауратны Закону бир затны да тамамлыкъгъа жетдирмегенди. Аны орунуна бизге бизни Аллахха жууукълашдыргъан андан да ахшы умут келгенди. ²⁰ Бу иш да ант сёзсюз болмагъанды. ²¹ Нек десегиз левийлиле ант этилмеген дин къуллукъчула эдиле; Исса уа Аны юсюнден: «Раббий ант этгенди эм сокъуранырыкъ тюйюлдю: „Сен Мелкиседекни чынында ёмюрде да Дин Къуллукъчуса“», – деп айтхан Аллахны анты бла Дин Къуллукъчу болгъанды. ²² Исса алай бла эм иги кесаматны боюнуна алгъан Адам болуп къалгъанды. ²³ Андан сора да ол дин къуллукъчула кёп эдиле, нек десегиз хар заманда биреу болуп турургъа ёлюм къоймай эди. ²⁴ Иссаны уа, ёмюрде да жашап тургъаны кибик, ёмюрлюк дин къуллукъчулугъу да барды. ²⁵ Ол себепден Ол Аны юсю бла Аллахха жууукълашханланы толусунлай къутхарыргъа болаллыкъды, нек десегиз, алагъа ёкюллюк этер ючюн, хар заманда да сау жашап турады. ²⁶ Аллай Баш Дин Къуллукъчу бизни кереклибизге болушаллыкъды. Ол сыйлыды, аманлыкъгъа къатышмагъанды, таза айыпсызды, гюняхлыладан айырылгъанды эм кёкледен да бийикде турады. ²⁷ Ол баш дин къуллукъчула алгъа кеслерини гюняхлары ючюн, андан сора уа халкъны гюняхлары ючюн хар кюн сайын къурманла этгенлерича этерге Аны уа кереклиси жокъду; нек десегиз Ол КесиКесин къурман этгени бла муну бир кереге этип бошагъанды. ²⁸ Тауратны Законуна кёре, баш дин къуллукъчугъа къарыусуз адамла салынадыла. Закондан сора берилген ант сёз а ёмюрлюк тамамлыкъгъа жетишген Аллахны Уланын Баш Дин Къуллукъчугъа салгъанды.

¹ Аны юсюнден айтханыбызны эм башы уа буду: кёкледе уллу Аллахны тахтасыны онг жанында олтургъан бизни аллай Баш Дин Къуллукъчубуз барды. ² Эмда Ол, адам къурамай, Раббий къурагъан сыйлы жерде эм хакъ керти чатырда къуллукъ этеди. ³ Хар баш дин къуллукъчу саугъала бла къурманла келтирир ючюн салынады; ол себепден бизни Баш Дин Къуллукъчубуз да къурман келтирирге керек эди. ⁴ Ол, жер башында къалгъан болса эди, сора дин къуллукъчу да боллукъ тюйюл эди; нек десегиз, Тауратны Законуна кёре, къурман келтириучю дин къуллукъчула бардыла. ⁵ Ала кёкдегини юлгюсюне эм ауанасына къуллукъ этедиле, нек десегиз Муса табыныучу чатырны ишлерге башлагъан заманда Аллах анга: «Къара, хар затын да санга тауну башында кёргюзтюлген юлгюге кёре ишле», – деп айтханды. ⁶ Энди уа Исса, эм иги ант сёзле бла бегиген эм иги кесаматны Келечиси болгъаны кибик, жердеги дин къуллукъчуладан айырма къуллукъ да алгъанды. ⁷ Нек десегиз биринчи кесамат кемликсиз болгъан болса эди, сора экинчисине жер излерге керек болмаз эди. ⁸ Алай а файгъамбар, алагъа гурушха этип: «Ма, келедиле кюнле, дейди Раббий, Мен ол заманда Израильни юйюрю бла эм Яхуданы юйюрю бла жангы кесамат этерикме. ⁹ Мен, аланы аталарыны къолларындан тутуп, Мисирни жеринден чыгъаргъан кюнде ала бла этген кесаматымча аллай кесамат боллукъ тюйюлдю; нек десегиз ала Мени ол кесаматыма тюз болмагъандыла, Мен да аланы сан этмей къойгъанма дейди Раббий. ¹⁰ Ол кюнледен сора Израильни юйюрю бла этерик кесаматым ма буду дейди Раббий: Мен законларымы аланы акъылларына саллыкъма эм аланы жюреклерине жазарыкъма эм аланы Аллахлары боллукъма, ала уа Мени халкъым боллукъдула. ¹¹ Эм бир адам да кесини жууугъуна эм кесини къарындашына: Раббийни бил деп юйретирик тюйюлдю; нек десегиз барысы да, гитчеден уллугъа деричи да Мени билликдиле. ¹² Нек десегиз Мен аланы терсликлерине мархаматлы боллукъма эм аланы гюняхларын бла законсузлукъларын мындан арысында эсиме келтирлик тюйюлме», – дейди. ¹³ «Жангы кесамат» деп айтып, биринчини эскилигин кёргюзтгенди; эскирген бла къартайгъан а жокъ этилирге жууукъду.

¹ Биринчи кесаматны да Аллахха къуллукъ этиуню юсюнден жорукълары эмда дуниядагъы табыныучу жери бар эди. ² Бир чатыр къуралгъан эди. Аны «Сыйлы Жер» деп аталгъан биринчи бёлюмюнде чырахтан, стол эмда Аллахха жораланнган ётмекле бар эдиле. ³ Экинчи жабыуну ары жанында уа «Сыйлыланы Сыйлысы» деп аталгъан чатыр бар эди. ⁴ Анда уа алтын ладан ийис этдириучю эм хар жанындан да алтын бла тышланнган кесаматны кюбюрчеги бар эди, ол кюбюрчекде уа ичине манна къуюлгъан алтын сауут, Харунну чакъгъан таягъы эм кесамат жазылгъан гыйы ташла бар эдиле. ⁵ Кюбюрчекни юсюнде уа гюняхланы кечдириучю жерни ауаналары бла жапхан махтаулу Аллахны керупларыны статуялары жерлешип эдиле. Энди уа бу затланы юсюнден толусу бла айтыргъа амал жокъду. ⁶ Бары да алай къуралгъандан сора, дин къуллукъчула, чатырны биринчи бёлюмюне хар заманда кирип, къуллукъларын этедиле. ⁷ Чатырны экинчи бёлюмюне уа жылдан бир кере жангыз баш дин къуллукъчу киреди, ол да кеси ючюн эм халкъны билмей этген гюняхлары ючюн этилген къурман къан бла болмаса ары кирмейди. ⁸ Биринчи чатыр тургъанлыкъдан алыкъа сыйлы жерге жол ачылмагъанын Сыйлы Нюр муну бла кёргюзтеди. ⁹ Бу уа бусагъат заманнга юлгюдю; келтирилип тургъан саугъала бла къурманла Аллахха табыннган адамны жюрегин саулай таза эталмагъанларын кёргюзтеди. ¹⁰ Была жаланда ашарыкъла бла, суусунла бла эм кёп тюрлю жууунуула бла байламлы болуп, жангы низамны башланырына дери салыннган чархны адетлеридиле. ¹¹ Келлик ахшылыкъланы Баш Дин Къуллукъчусу Масих а келгенди. Ол, къол бла ишленмеген, башхача айтханда, бу жаратылгъан дуниядан болмагъан, жердегинден эсе уллу эм тамамлы чатырдан озуп, ¹² Текелени эм бугъаланы къанлары бла тюйюл, алай а Кесини къаны бла сыйлы жерге бир кере кирип, бизге ёмюрлюк къутхарыу алгъанды. ¹³ Нек десегиз бугъаланы бла текелени къанлары эм тиши тананы кюлю, харам болгъанланы юслерине себилгенде, ала сыйлы этилип, чархлары таза бола эсе, ¹⁴ Сора ёмюрлюк Нюр бла Кесин таза айыпсызны Аллахха къурманнга келтирген Масихни къаны уа, биз жашау бериучю Аллахха къуллукъ этер ючюн, жюреклерибизни ёлюм келтирген ишледен бек да тазаларыкъды! ¹⁵ Эм ол себепден, чакъырылгъанла ант сёз бла берилген ёмюрлюк юлюшню алыр ючюн, Масих жангы кесаматны Келечиси болгъанды. Аланы биринчи кесаматны заманында этген гюняхларындан къутхарыр ючюн, Ол жулуучу болуп ёлгенди. ¹⁶ Нек десегиз осуят этилген жерде, осуят этген ёлмей амал жокъду. ¹⁷ Осуят, аны этгенни ёлюмюнден сора жарайды. Осуят этген сау эсе, осуятны кючю жокъду. ¹⁸ Ол себепден биринчи кесамат да къансыз бегим этилмегенди. ¹⁹ Нек десегиз Муса, битеу фарызланы Тауратны Законуна кёре битеу халкъны аллында айтханында, таналаны бла текелени къанларын суу бла эм къызыл жюн бла эм сепгич бла алып, Китапны кесине да, аны кибик битеу халкъны юсюне да сепгенди ²⁰ Эм: «Бу сизге Аллах фарыз этген кесамат къанды», – дегенди. ²¹ Аны кибик чатыргъа да эм Аллахха къуллукъ этерге жюрютюлюучю битеу сауутлагъа да къан бюркгенди. ²² Тауратны Законуна кёре, хазна къалмай хар зат да къан бла тазаланады эм, къан тёгюлмей, гюнях кечилмейди. ²³ Мынга кёре, кёкдеги затланы юлгюлери ол къурманла бла, кёкдеги затла кеслери уа аладан иги къурманла бла тазаланыргъа керек эдиле. ²⁴ Нек десегиз Масих, керти сыйлы жерни юлгюсю болгъан къол бла ишленнген сыйлы жерге тюйюл, алай а энди бизни ючюн Аллахны аллына барыр ючюн, кёкню кесине киргенди. ²⁵ Аны кёкге киргени, баш дин къуллукъчу хар жылдан Эм Сыйлы Жерге башханы къаны бла киргенча, Кесин кёп кере къурманнга келтирир ючюн тюйюлдю. ²⁶ Алайсыз Анга дунияны башланнганындан берисинде кёп кере азап чегерге керек боллукъ эди. Ол а бир кере, ёмюрлени ахырында, Кесини къурманы бла гюняхны жокъ этерге келгенди. ²⁷ Бир кере ёлюрге, андан сора уа сюд этилирге хар адамгъа къадар болгъаны кибик, ²⁸ Масих да алай, кёплени гюняхларын Кесини боюнуна алыр ючюн, Кесин бир кере къурманнга келтиргенди. Экинчи кере уа гюняхдан тазалар ючюн тюйюл, алай а Аны сакълагъанланы къутхарыр ючюн келликди.

¹ Тауратны Закону уа, келлик ахшылыкъланы керти сыфатлары тюйюл, бу затланы жаланда ауанасыды. Ол себепден Закон, хар жылдан тохтаусуз келтирилген бир къурманла бла Аллахха жууукълашханланы бир заманда да тамамлы эталлыкъ тюйюлдю. ² Алайсыз аланы келтириуню къояр эдиле; нек десегиз къурман келтиргенле бир кере тазаланнгандан сора, бир тюрлю гюняхларын сезиулери болмаз эди. ³ Алай а гюняхла бу къурманла бла хар жылдан эсгертиледиле. ⁴ Нек десегиз бугъаланы бла текелени къанлары адамны гюняхларын къурутургъа амал жокъду. ⁵ Ол себепден Масих, дуниягъа киргенинде, былай айтады: «Къурманланы бла саугъаланы Сен унамай къойгъанса, алай а Манга чарх хазырлагъанса. ⁶ Саулай кюйдюрюлген къурманлагъа бла гюнях ючюн кесилген къурманлагъа Сен ыразы болмагъанса. ⁷ Ол заманда Мен: „Ма, китап чулгъамда Мени юсюмден жазылгъаны кибик, Аллахым, Сени буйругъунгу толтурургъа келеме“ деп айтханма», – дейди. ⁸ Алгъын «Не къурманланы, не саугъаланы, не саулай кюйдюрюлген, не гюнях ючюн кесилген къурманланы Сен унамай къойгъанса эм алагъа ыразы болмагъанса», – дегенди. Ол муну бу къурманла Законнга кёре этилгенлерине да къарамай айтханды. ⁹ Андан сора: «Ма, Аллахым, Сени буйругъунгу толтурургъа келеме», – деп къошханды. Экинчисин бегим этер ючюн, биринчисин бузады. ¹⁰ Бу буйрукъгъа кёре уа, биз Масих Исса чархын бир кере къурманнга келтириую бла сыйлы этилгенбиз. ¹¹ Хар дин къуллукъчу хар кюн сайын къуллугъун бардырады эм ала бир заманда да гюняхланы къуруталмазлыкъ бир тюрлю къурманланы кёп кере этип турады. ¹² Исса уа, гюняхла ючюн бир къурман келтирип, ёмюрлюкге Аллахны онг жанында олтургъанды. ¹³ Андан сора Ол, Кесини душманлары Кесини аякъларыны тюбюне салынырын сакълайды. ¹⁴ Нек десегиз Ол, сыйлы этиле тургъанланы, бир къурман келтириую бла ёмюрге да тамамлы этгенди. ¹⁵ Аны юсюнден бизге Сыйлы Нюр да шагъатлыкъ этеди, нек десегиз: ¹⁶ «Ол кюнледен сора ала бла этерик кесаматым ма буду, – дейди Раббий: Мен законларымы аланы жюреклерине саллыкъма эм аланы акъылларына жазарыкъма» дегенинден сора, ¹⁷ «Аланы гюняхларын бла законсузлукъларын мындан арысында эсиме келтирлик тюйюлме», – деп айтады. ¹⁸ Гюняхла кечилген заманда уа ала ючюн къурман келтирирге кереги жокъду. ¹⁹ Ол себепден, къарындашла, Иссаны къаныны болушлугъу бла сыйлы жерге кирирге таукеллигибиз барды. ²⁰ Исса уа, бу жангы эм жашау бериучю жолну бизге сыйлы жердеги жабыуну юсю бла ачханды, ол жол а Исса Кесиди . ²¹ Аллахны юйюнде башчылыкъ этген уллу Дин Къуллукъчубуз барды. ²² Ол себепли таза жюрекден, толу ышаныу бла, жюреклерибизни аман ниетден тазалап эмда чархыбызны ариу суу бла жуууп, Аллахха жууукълашайыкъ. ²³ Ачыкъ къабыл этген умутубузну таймай тутайыкъ, нек десегиз бизге сёз Берген ышаннгылыды. ²⁴ Бир-бирибизни сюймекликге бла хайырлы ишлеге итиндириуге эс бериучюле болайыкъ. ²⁵ Бир къауумланы адетлерича, кесибизни жыйылыуубузну къоймайыкъ, алай а Иссаны келир кюню жууукълашханын эслеуюбюз бла бир-бирибизни бегирек да кёллендирейик. ²⁶ Ол себепден биз, хакъ кертини билип къабыл этгенден сора, кесибиз сюйгенча этип, гюнях эте эсек, сора энди ол гюняхланы бир къурман да жууарыкъ тюйюлдю. ²⁷ Алай болса уа, къоркъуп, сюдню сакълау эмда къажау тургъанланы жутуп къояргъа хазыр болгъан отну къутурууун сакълау къалады. ²⁸ Мусаны законун бузгъан адамгъа эки неда юч шагъатны сёзю бла жан ауруусуз ёлюм азап бериле эсе, ²⁹ Сора Аллахны Уланын аякълары бла малтагъан эмда аны сыйлы этген кесаматны къанын сыйлыгъа санамагъан эм Аллахны шафауатлы Нюрюн хыликкя этген адам къаллай бир уллу азап салынырча терс боллугъун ойлаймысыз? ³⁰ «„Дерт жетдириу Мениди, Мен тийишлисин берирме“ дейди Раббий» эм дагъыда: «Раббий Кесини халкъына сюд этерикди», – деп Ким айтханын биз билебиз. ³¹ Жашау бериучю Аллахны къолларына тюшмеклик къоркъунчлуду! ³² Озгъан кюнлеригизни – сиз жарыкъланнганыгъыздан сора уллу къыйынлыкълагъа тёзген кюнлеригизни – эсигизге тюшюрюгюз. ³³ Бир-бирде халкъны аллында сизни хыликкя эте эдиле, сизге зулму эте эдиле, бир бирде уа ол затланы сынагъанлагъа болуша эдигиз. ³⁴ Нек десегиз сиз мени тутмакълыгъыма да жарсыгъан эдигиз эм сизни кёкледе эм ахшы, ёмюрлюк мюлкюгюз болгъанын билип, сизни мюлкюгюзню чачханларын окъуна къууанч бла къабыл этген эдигиз. ³⁵ Ол себепли уллу саугъасы боллукъ ышаныуугъузну къоймагъыз. ³⁶ Нек десегиз, Аллахны буйругъун толтуруп, Ол берирге айтханны алыр ючюн, сизге тёзюмлюлюк керекди. ³⁷ «Нек десегиз энтда бир аз, бек аз замандан, Келлик келликди, мычырыкъ тюйюлдю. ³⁸ Тюзлюклю адам ийманы бла жашарыкъды. Тайса уа, Мени жаным анга ыразы боллукъ тюйюлдю». ³⁹ Биз а ийманларындан тайып жоюлгъанладан тюйюлбюз, алай а, ийманда туруп, жанларын къутхаргъанладанбыз.

¹ Ийман а умут этгенлерибизге ышаныу эм алыкъа кёрмеген затларыбызгъа толу ийнаныуду. ² Буруннгулула ийманлары бла Аллахны ыразы этгенлерине шагъатлыкъ алгъандыла. ³ Дунияла Аллахны сёзю бла къуралгъанларын ийман бла ангылайбыз, алай бла битеу биз кёрген затла кёрюнмеген затладан жаратылгъандыла. ⁴ Ийманы бла Къабилден эсе Абил Аллахха иги къурман келтиргенди. Ол тюзлюклю болгъанына ийманы бла шагъатлыкъ алгъанды; нек десегиз аны саугъаларыны юсюнден Аллах ыразы болгъанына шагъатлыкъ этгенди. Абил ёлген эсе да, ийманы бла ол энтда айтып турады. ⁵ Ийманы бла Ханох, ёлюм кёрмей дуниядан кёчюрюлгенди. Аны бир киши да табалмагъанды, нек десегиз Аллах аны кёчюргенди. Кесини кёчюрюлюрюнден алгъа ол, Аллахны ыразы этгенине шагъатлыкъ алгъанды. ⁶ Ийманынг болмаса, Аллахны ыразы этерге амал жокъду. Ол себепден Аллахха жууукълашхан Аны бар болгъанына эм Аны излегенлеге Ол тийишлисин бергенине ийнаныргъа керекди. ⁷ Ийманы бла Нух, алыкъа кёрюнмеген болумланы юсюнден билим алып, Аллахха хурмет этиую бла кесини юйюрюн къутхарыргъа кеме хазырлагъанды. Аны бла ол битеу дунияны терслегенди эм ийманнга таяннган тюзлюклюлюкден юлюшлю болгъанды. ⁸ Ийманы бла Ибрахим, кесине юлюшге аллыкъ жерине барыргъа чакъырылгъанында, Аллахха бойсуннганды эм, къайры барлыгъын да билмегенлей, жолгъа чыкъгъанды. ⁹ Ийманы бла ол, Аллах анга берирге ант бла сёз берген жерде, киши жериндеча тургъанды эм ол ант сёз бла берилген жерден аны бла бирге юлюшлю болгъан Исхакъ бла эм Якъуп бла чатырлада жашагъанды. ¹⁰ Нек десегиз ол аны устасы да, къураучусу да Аллах болгъан, къаты мурдору болгъан шахарны сакълагъанды. ¹¹ Ийманы бла Сара кеси да, къаратон болгъанынлай да, бууаз болургъа кюч алгъанды эм жылларыны заманы озгъандан сора къозлагъанды, нек десегиз ол, сёз берген Аллахха ышана эди. ¹² Эм ол себепден биреуден, ол бек къартайгъан кишиден, кёкдеги жулдузла чакълы эм тенгизни жагъасында юзмезни саны болмагъанча аллай бир кёп туугъанды. ¹³ Ала бары да, берирге ант бла сёз берилгенлени алмагъанлай, ийман бла ёлгендиле, алай а, аланы узакъдан кёрюп, къууанып, кеслерини юслеринден: «Бу дунияда жолоучулабыз эм киргинчилебиз», – деп ачыкъ айтхандыла. ¹⁴ Алай айтханла ата журтларын излегенлерин кёргюзтедиле. ¹⁵ Аланы акъылларында, кеслери андан чыкъгъан ата журтлары болса эди, сора ары къайтыргъа заман табар эдиле. ¹⁶ Алай а ала эм игисине, башхача айтханда, кёкдегине итиннгендиле. Ол себепден Аллах, Кесине аланы Аллахы атагъанындан ыйлыкъсынмайды, нек десегиз Ол алагъа шахар хазырлагъанды. ¹⁷ Ийманы бла Ибрахим сыналгъан заманында Исхакъны къурманнга келтиргенди. Ант сёз берилген Ибрахим жангыз уланын къурман эте эди. ¹⁸ Аны юсюнден а: «Сени урлугъунг Исхакъдан аталлыкъды», – деп айтылгъанды. ¹⁹ Нек десегиз ол, ёлгенледен тиргизирге да Аллахны кючю жетерикди деп, ойлагъанды. Ол себепден, тюзюн айтханда, Исхакъны ёлюмден кери алгъанды. ²⁰ Ийманы бла Исхакъ боллукъ затланы юсюнден Якъупха бла Эсаугъа алгъыш бергенди. ²¹ Ийманы бла Якъуп, ёле туруп, Юсюпню эки жашына алгъыш бергенди эм кесини таягъыны башына таянып сежда этгенди. ²² Ийманы бла Юсюп да, дуниядан кете туруп, Израильни уланларыны Мисирден чыгъарыкъларын эслерине салгъанды эм кесини сюеклерини юсюнден осуят этгенди. ²³ Ийман бла Мусаны атасы-анасы, ол туугъанда, юч ай аны букъдуруп тургъандыла. Нек десегиз ала, аны аламат сабий болгъанын кёрюп, патчахны буйругъундан къоркъмагъандыла. ²⁴ Ийманы бла Муса, акъыл-балыкъ болгъанында, фыргъауунну къызыны жашы атны жюрютюрге унамай тохтагъанды. ²⁵ Бир кесек заманнга гюняхлы зауукъланыудан эсе, Аллахны халкъы бла азап чегиуню сюйгенди. ²⁶ Эм Мисирни хазналарындан эсе, Масих ючюн ыйлыкъдырылгъанын кесине уллу байлыкъгъа санагъанды; нек десегиз ол аллыкъ саугъасына къарагъанды. ²⁷ Ийманы бла ол, патчахны чамланыуундан къоркъмай, Мисирни къойгъанды; нек десегиз ол, Кёрюнмегенни кёргенча, чыдамлы болгъанды. ²⁸ Тюнгючлени къыргъан мёлек Израильлилеге тиймез ючюн, Муса, ийманы бла Къутхарылыу къурман этдирип, аны къанын эшиклени башларына бюркдюргенди ²⁹ Ийманлары бла ала Къызыл тенгизден къургъакъ жерден ётген кибик ётгендиле. Аны уа сынап, мисирлиле тенгизге батхандыла. ³⁰ Ийман бла жети кюнню тёгерегине айланыудан сора Иерихон шахарны къабыргъалары оюлгъандыла. ³¹ Ийманы бла саякъ тиширыу Рахап, тасхачыланы жарашыулукъ бла къабыл этип, аланы башха жол бла ашыргъаны ючюн, иймансызла бла жоюлмагъанды. ³² Сора энтда не айтайым? Гидеонну юсюнден, Баракны юсюнден, Самсонну эм Ифтахны юсюнден, Дауутну юсюнден, Шамайылны эм башха файгъамбарланы юслеринден хапар айтыргъа заманым жетмез. ³³ Ала ийман бла патчахлыкъланы хорлагъандыла, жашауда тюзлюк этгендиле, ант сёз бла берилгенлени алгъандыла, асланланы ауузларын байлагъандыла, ³⁴ Кючлю отну ёчюлтгендиле, къылычны ауузундан къутулгъандыла, къарыусузлукъларында кюч алгъандыла, къазауатда къаты болгъандыла, душманланы аскерлерин къыстагъандыла. ³⁵ Тиширыула кеслерини ёлгенлерин тиргизилип алгъандыла. Башхалары уа азат болууну къабыл этмегендиле; тиргизилип, жашауну игисине жетер ючюн, азап чегип ёлгендиле. ³⁶ Бир къауумлары хыликкя этилип тюйюлгендиле, аны юсюне да бугъоула эм тутмакълыкъла сынагъандыла. ³⁷ Ташла бла тюйюлюп ёлтюрюлгендиле, быхчы бла кесилгендиле, азапха салыннгандыла, къылыч бла тууралгъандыла, къой бла эчки териле кийип, ауаралыкъда айланнгандыла, къытлыкълагъа, къыйынлыкълагъа, зулмулукълагъа тёзгендиле. ³⁸ Битеу дуния алагъа тийишли тюйюл эди. Ала уа жерни къум тюзлеринде, тауларында, дорбунларында эм къая тешиклеринде ауаралыкъда айланнгандыла. ³⁹ Была бары да ийманлары ючюн Аллахны ыразы этгенлерине шагъатлыкъ алгъандыла, алай а аладан бири да ант бла сёз берилгенни алмагъанды. ⁴⁰ Нек десегиз ала бизсиз тамамлыкъгъа жетмез ючюн, Аллах бизни ючюн андан да игисин хазырлагъанды.

¹ Бизни тёгерегибизде булутла кибик алай кёп шагъатла бардыла! Ол себепден битеу бизге чырмау болгъан затланы, бизни бийлеп тургъан битеу гюняхларыбызны юсюбюзден атайыкъ эмда бизге белгиленнген жолубузда тёзюмлюк бла барайыкъ. ² Ийманыбызны башчысы эм тамамлаучусу болгъан Иссагъа къарайыкъ. Ол, Анга боллукъ къууанч ючюн Кесини ыйлыкъдырылыууна къайгъырмай къоюп, къачны юсюнде ёлюмге тёзгенди, энди уа Аллахны тахтасыны онг жанында олтурады. ³ Сиз, онгсуз болуп кёлюгюз мугурланмаз ючюн, гюняхлыланы Кесине аллай къаты къажау турууларына тёзген Иссаны юсюнден ойлашыгъыз. ⁴ Сизге алыкъа гюняхха къажау къазауат этип ёлюмге дери чыдаргъа тюшмегенди. ⁵ Эм сизге уланларынача айтылгъан бу жапсарыуну унутхансыз: «Жашым! Раббийни азап салып юйретиуюне терс къарама эм Ол сени айыбынгы ачыкъ этген заманда мудах болма. ⁶ Нек десенг Раббий сюйген адамына азап берип юйретеди, къабыл этген хар уланын тюеди», – деп айтылгъанды. ⁷ Азапха тёзюуюгюз сизни юйретилиуюгюзню бир кесегиди. Аллах сизге уланларынача къарайды. Нек десегиз атасы анга азап салып юйретмеген улан бармыды? ⁸ Барына да бирча болгъан азапны сынамай эсегиз, сора сиз законсуз туугъан сабийлесиз, уланлары уа тюйюлсюз. ⁹ Эмда биз, бу дуниядагъы аталарыбыздан азап чегип, алагъа хурмет этген эсек, сора жашар ючюн, нюрлени Атасына уа дагъыда бек боюн салыргъа керек тюйюлбюзмю? ¹⁰ Ала, кеслери сюйгенча этип, бизни аз кюнле ючюн азапландырып юйретгендиле. Аллах а, биз Аны сыйлылыгъына къатышыр ючюн, бизни хайыргъа азапландырып юйретеди. ¹¹ Хар азап, эндиги заманда къууанч тюйюл, жарсыуча кёрюнеди. Артда уа аны юсю бла юйреннгенлеге тюзлюклюлюкню ырахатлыкъ тирлигин береди. ¹² Ол себепли къарыусуз къолларыгъызны эм къалтырагъан тобукъларыгъызны кючлендиригиз. ¹³ Акъсагъан адам жолдан ажашмай, сау болур ючюн тюз жюрюгюз. ¹⁴ Битеу адамла бла жарашыулу жашаргъа эмда сыйлы болургъа кюрешигиз; сыйлы болмаса, бир киши да Раббийни кёрлюк тюйюлдю. ¹⁵ Сакъ болугъуз, бир киши да Аллахны шафауатындан къуру къалмасын, бир тюрлю ачы тамыр чыгъып, заран этмесин эм кёплени харам этмесин. ¹⁶ Сизни арагъызда бир тюрлю саякъ неда Эсауча Аллахдан узакъ болгъан адам болмасын. Эсау бир ашарыкъ ючюн кесини тюнгюч эркинлигин сатханды. ¹⁷ Сиз билесиз, андан сора ол атасыны алгъышын алыргъа сюйюп, тилеги къабыл болмай къалгъанды. Аны жилямукълары бла окъуна тилеген эсе да, атасыны фикирин тюрлендиралмагъанды. ¹⁸ Сиз жууукълашхан, не сезилген эм от жаннган Синай тау, не къарангылыкъ эм мутхузлукъ, не уллу жел тюйюлдю, ¹⁹ Не быргъы таууш эм сёлешген ауаз тюйюлдю. Ол ауазны эшитгенле алагъа андан ары сёз бардырылмазын тилегендиле. ²⁰ Нек десегиз ала: «Таугъа жаныуар окъуна тийсе да, аны ташла бла тюйюп неда садакъ бла уруп ёлтюрюрге керекди», – деген фарызгъа чыдаялмагъандыла. ²¹ Ол кёрюнюу аллай бир бек къоркъуулу болгъанындан, Муса да: «Мен бек къоркъуудама эм титиреудеме», – дегенди. ²² Алай а сиз Сион таугъа эм жашау бериучю Аллахны шахарына, кёкдеги Иерусалимге эм санаусуз мёлеклеге, ²³ Кёкледе атлары жазылгъан тюнгючлени къууанч этген жыйылыууна эм жамауатына, барыны да Сюдюсю Аллахха, тамамлыкъгъа жетишген тюзлюклюлени нюрлерине, ²⁴ Жангы кесаматны Келечиси Иссагъа эмда Абилни къанындан эсе игисин айтхан бюркюлген къаннга жууукълашхансыз. ²⁵ Сакъ болугъуз, быланы Айтханны къабыл этмей къоймагъыз. Нек десегиз ала, жер башында айтханнга тынгыламагъанлары ючюн, жазадан къутулмагъан эселе, сора бегирек да биз, кёкледен бизге Айтханны къабыл этмей къойсакъ, жазадан къутуллукъ тюйюлбюз. ²⁶ Ол заманда Аны ауазы жерни титиретгенди, энди уа Ол: «Энтда бир кере жерни титиретген бла да къоймай, кёкню да титиретирикме», – деп сёз бергенди. ²⁷ «Энтда бир кере» деген сёзле, титиретилген – жаратылгъан затланы кетерилликлерин эмда титиремезлик затланы дайым къаллыкъларын кёргюзтедиле. ²⁸ Ол себепли биз, титиремезлик патчахлыкъны алгъаныбызгъа кёре, Аллахны шафауатын тутайыкъ; аны бла уа Аллахны сыйлы кёрюу бла эм Аллахдан къоркъуу бла Аны ыразы этип къуллукъ этейик. ²⁹ Нек десегиз бизни Аллахыбыз кюйдюрюп бошаучу отду.

¹ Сизни арагъызда къарындаш сюйюу дайым болсун. ² Къонакъ сюйюуню унутмагъыз, нек десегиз алай этиучю бир къауумла билмегенлей мёлеклеге къонакъбайлыкъ этгендиле. ³ Тюрмедегилени эсигизде тутугъуз, сиз кесигиз да, ала бла тутмакъда болгъан кибик, алагъа алай болушугъуз. Зулмулукъ сынагъанлагъа болушугъуз. Алагъа кеси-кесигизге къайгъыргъанча къайгъырыгъыз. ⁴ Некях барыгъызда да багъалы кёрюлсюн эмда жатхан жеригиз айыпсыз болсун; саякълагъа бла зийначылагъа уа Аллах сюд этерикди. ⁵ Ахча сюйюу къылыгъыгъыз болмасын, болгъан затыгъыз бла ыразы болуп туругъуз. Нек десегиз Ол Кеси: «Сени къоярыкъ тюйюлме эм атарыкъ тюйюлме», – дегенди. ⁶ Ол себепден биз: «Раббий манга болушлукъчуду, къоркъурукъ да тюйюлме. Адам манга не этерикди?» – деп таукел айтабыз. ⁷ Сизге Аллахны сёзюн билдирген оноучуларыгъызны эсигизде тутугъуз эм аланы жашауларыны ахырына къарап, аланы ийманларындан юлгю алыгъыз. ⁸ Масих Исса тюрленмейди, тюнене да, бюгюн да эм ёмюрде да Ол Кесиди. ⁹ Тюрлю къужур окъуулагъа кесигизни бермегиз. Нек десегиз жюреклеригизни Аллахны шафауаты бла кючлендирмеклик игиди, энчи ашарыкъла бла тюйюл, алагъа ышаннганла аладан хайыр алмагъандыла. ¹⁰ Табыныучу чатырда къуллукъ этгенле андан ашаргъа эркинликлери болмагъан, бизни аллай къурман этилиучю жерибиз барды. ¹¹ Баш дин къуллукъчу, адамланы гюняхларындан тазалар ючюн, хайыуанланы къанларын сыйлы жерге кийиреди, аланы мыллыклары уа ыстауатдан тышында кюйдюрюледиле. ¹² Муну кибик, Исса да, Кесини къаны бла халкъны сыйлы этер ючюн, шахарны къабагъындан тышында азап чекгенди. ¹³ Алай бла, Аны ючюн бедишлик этилгенибизге тёзе, ыстауатдан тышына чыгъып, Анга барайыкъ. ¹⁴ Нек десегиз мында ёмюрлюк шахарыбыз жокъду, алай а боллукъ шахарны излейбиз. ¹⁵ Ол себепден Иссаны юсю бла Аллахха къурман орунуна тохтаусуз махтау салып, Аны атына барына да эшитдирип шукур этип турайыкъ. ¹⁶ Ахшылыкъ этиуню эм бир-биригиз бла бирикмекликни унутмагъыз; нек десегиз аллай къурманла Аллахны ыразы этедиле. ¹⁷ Жамауатларыгъызны оноучуларына бойсунугъуз эм айтханларын этигиз; нек десегиз ала сизни ючюн жууап берирге борчлулача тохтаусуз сизни жанларыгъызны къайгъысын этип турадыла. Ала къуллукъларын, ахтынып этмей, къууанып этсинле; нек десегиз, аны ахтынып этселе, сизге файда болмаз. ¹⁸ Бизни ючюн да тилек этигиз. Биз жюрегибизни таза тутабыз эм хар не жаны бла да кесибизни тюз жюрютюрге кюрешебиз деп толу ийнанабыз. ¹⁹ Бегирек да, мен сизге терк къайтарылыр ючюн, тилек этеригизни тилейме. ²⁰ Къойланы уллу Сюрюучюсю болгъан бизни Раббийибиз Масих Иссаны ёмюрлюк кесамат къаны бла ёлгенледен тиргизген, ырахатлыкъ бериучю Аллах а, ²¹ Кесин ыразы этген ишлени Масих Иссаны юсю бла сизде чыгъарып, сиз Аны буйругъун толтурур ючюн, сизни хар тюрлю ахшы ишде тамамлы этсин. Анга ёмюрледен ёмюрлеге махтау болсун! Амин. ²² Къарындашла, сизден тилейме, бу насийхат сёзюмю тёзюмлюк бла къабыл этигиз; мен а сизге кёп да жазмагъанма. ²³ Къарындашыбыз Тимотей эркин болгъанын билигиз. Ол къысха заманда бери келсе, мен да аны бла бирге сизни кёрюрге барырма. ²⁴ Битеу оноучуларыгъызгъа эм битеу сыйлылагъа салам айтыгъыз. Италиядан келгенле сизге салам айтадыла. ²⁵ Аллахны шафауаты сизни барыгъыз бла да болсун. Амин.