ГАЛАТИЯЛЫЛАГЪА

ГАЛАТИЯЛЫЛАГЪА

¹ Адамла сайламагъан эм адамны юсю бла сайланмагъан, алай а Масих Исса эм Аны ёлгенледен тиргизген Аллах Ата сайлагъан мен абустол Пауулдан ² Эм битеу мени биргеме болгъан къарындашладан Галатияны жамауатларына салам! ³ Аллах Атадан эм Раббийибиз Масих Иссадан сизге шафауат эм ырахатлыкъ болсун, ⁴ Атабыз Аллахны буйругъуна кёре, Масих, бу эндиги огъурсуз ёмюрден бизни къутхарыр ючюн, бизни гюняхларыбыз ючюн Кеси-Кесин бергенди. ⁵ Аллахха ёмюрледе да махтау болсун. Амин. ⁶ Масихни шафауаты бла сизни чакъыргъан Аллахдан сиз алай терк башха хайыр хапаргъа ётгенигизге сейирсинеме. ⁷ Керти да башха хайыр хапар жокъду, алай а сизни жунчутхан эм Масихни Хайыр Хапарын терсине бурургъа сюйген адамла бардыла ансы. ⁸ Алай а биз окъуна неда кёкден мёлек келип, биз сизге айтхан Хайыр Хапаргъа къажау болгъан хапарны айтса, анга налат болсун! ⁹ Биз алгъын айтханыбыз кибик, мен энди дагъыда айтама: сиз къабыл этген Хайыр Хапаргъа къажау болгъан хапарны сизге ким айта эсе да, анга налат болсун! ¹⁰ Мен энди адамланы ыразылыгъынмы, огъесе Аллахны ыразылыгъынмы излейме? Адамланы кёллерине жетергеми кюрешеме? Мен энтда адамланы кёллерине жетсем эди, Масихни къулу болмаз эдим. ¹¹ Къарындашла, мен жайгъан Хайыр Хапар адамдан чыкъмагъанын сизге билдиреме. ¹² Нек десегиз мен ол Хайыр Хапарны адамдан алмагъанма эмда аны манга адам юйретмегенди, аны манга Масих Исса ачып билдиргенди. ¹³ Мени иудейлиликде болгъан алгъыннгы жашау халымы, мен Аллахны жамауатын бек къыйнагъанымы эм чачханымы, сиз эшитгенсиз. ¹⁴ Мен, аталарымдан къалгъан адетле ючюн мардасыз эришип кюрешиучю болуп, иудейлиликде мени миллетимде тенглерими кёбюсюнден эсе бек жетишимли болгъан эдим. ¹⁵ Анамы къарынында заманымдан мени сайлагъан эм Кесини шафауаты бла мени чакъыргъан Аллах а, ¹⁶ Мен Аны Хайыр Хапарын миллетлеге жаяр ючюн, Кесини Уланын манга ачаргъа ыразы болгъанында, мен ол сагъат окъуна инсанла бла кенгешмегенме. ¹⁷ Эмда Иерусалимге, менден алгъа болгъан абустоллагъа бармагъанлай, Аравиягъа баргъанма эм дагъыда Дамаскга къайтханма. ¹⁸ Артда, юч жыл озгъандан сора, мен Иерусалимге Петер бла кёрюшюрге баргъан эдим эм аны бла онбеш кюн тургъан эдим. ¹⁹ Къалгъан абустолладан а Раббийни къарындашы Якъупдан башха кишини да кёрмегенме. ²⁰ Ма, мени сизге жазгъанларым ётюрюк болмагъанларын Аллахны аллында айтама. ²¹ Андан сора мен Сирия бла Киликия къыраллагъа кетген эдим. ²² Иудеяда Масихни жамауатларына мен кесим белгили тюйюл эдим. ²³ Алай а, алгъын алагъа зулму этген, ол жокъ этерге кюрешген иймандан энди хайыр хапар береди деп эшитип, ²⁴ Ала мени ючюн Аллахха махтау сала эдиле.

¹ Артда, онтёрт жылдан сора, мен Барнаба бла Титни да биргеме алып, дагъыда Иерусалимге баргъан эдим. ² Баргъанымда уа билим ачылыу бла баргъан эдим. Андагъылагъа, артыгъыракъ да, бек белгилилеге, миллетлеге Хайыр Хапарны билдириуюмю юсюнден, мен бошму кюрешеме неда бошму кюрешген болурма деп айтхан эдим. ³ Алай болгъанлыкъгъа ала мени биргеме болгъан Титге, ол грекли болсада, сюннет этдир деп къысмагъандыла. ⁴ Алай а бизни Масих Иссада болгъан азатлыгъыбызгъа къараргъа жашыртын келип, бизни къул этер ючюн, хыйлалыкъ бла келген жалгъан къарындашла бар эдиле. ⁵ Хайыр хапарны хакъ тюзлюгю сизде сакъланыр ючюн, биз алагъа бир сагъатха да хорлатмагъанбыз эм бой салмагъанбыз. ⁶ Белгилиле да не тюрлю жаны бла да къалай болгъан эселе да, манга башхалыгъы жокъду, Аллах адамны тыш сыфатына къарамайды. Белгилиле да мени айтханларыма бир зат да къошмагъандыла. ⁷ Ол угъай эсенг, Хайыр Хапарны сюннетлилеге жаяргъа Петерге ышанып берилгени кибик, манга да сюннетсизлеге жаяргъа берилгенин кёргендиле. ⁸ Нек десегиз сюннетлилеге абустол болургъа Петерге кюч берген Аллах, манга да башха миллетлилеге абустол болургъа кюч бергенди. ⁹ Жамауатны чигинжилерине саналгъан Якъуп, Кефа эм Ахия, Аллахны манга берген шафауатын билгенлеринде, бирикмеклигибизни белгисине манга бла Барнабагъа онг къолларын бергендиле. Биз башха миллетлеге, ала уа сюннетлилеге барыргъа бегим этгендиле. ¹⁰ Бизден жаланда жарлыланы унутмазы бызны тилегендиле, мен да аны тамам этерге кюрешгенме. ¹¹ Петер Антиохиягъа келген заманда уа, ол кёлкъалдыгъа тюшгени себепли, мен кесим анга къажау тургъан эдим. ¹² Нек десегиз бир къауумла Якъупдан келгинчиге дери, Петер башха миллетлиле бла бирге ашап тургъан эди. Ала келгенде уа, сюннетлиледен къоркъуп, бугъунуп эм къатышмай, бир жанына туруп башлагъан эди. ¹³ Аны бла бирге башха иудейлиле да эки бетлилик этген эдиле, алай бла аланы эки бетлилик этиулерине Барнаба окъуна къошулгъан эди. ¹⁴ Аланы, Хайыр Хапарны хакълыгъы бла тюз этмегенлерин кёргенимде уа, мен Петерге, бары да тургъанлай: «Сен, иудейли болгъанынглай, иудейлича жашамай, башха миллетлилеча жашай эсенг, сора башха миллетлилени иудейлилеча жашагъыз деп нек къысаса? ¹⁵ Биз, башха миллетлиледен болгъан гюняхлыла угъай, иудейли болуп туугъанлабыз. ¹⁶ Алай болгъанлыкъгъа уа, адам Тауратны фарызларын тутуу бла угъай, жаланда Масих Иссагъа ийнаныуу бла ариуланнганын билебиз. Аны ючюн биз да, Тауратны фарызларын тутууубуз бла тюйюл, Масиххе ийнаныуубуз бла ариуланыр ючюн Масих Иссагъа ийнаннганбыз. Нек десегиз Тауратны фарызларын тутууу бла бир адам да ариуланаллыкъ тюйюлдю. ¹⁷ Масихде ариуланыуну излеп, биз кесибиз да гюняхлы болуп чыкъгъан эсек, сора Масих гюняхны къуллукъчусумуду? Чыртда угъай! ¹⁸ Мен бузгъанымы жангыдан къурай эсем, сора мен законну бузуучу болгъанымы кёргюзтеме. ¹⁹ Мен, Аллах ючюн жашаргъа болалыр ючюн, Тауратны Законуну болушлугъу бла Тауратны Законуна ёлгенме. Мен Масих бла бирге къачха керилгенме. ²⁰ Сора энди уа мен жашамайма, алай а менде Масих жашайды. Энди чархымда жашай эсем а, сора мени сюйюп, Кесин мени ючюн берген Аллахны Уланына ийнаныуум бла жашайма. ²¹ Аллахны шафауатын къабыл этмей къоймайма. Адам Законну юсю бла ариуланала эсе уа, сора Масих керексизге ёлгенди», – деген эдим.

¹ Эй ангылаусуз Галатиялыла! Масих Исса сизни кёзлеригизни аллында къачха керилген халда суратланнганлай да, сиз хакъ кертиге боюн салмазгъа сизге ким хыйны этгенди? ² Сизден жаланда муну билирге сюеме: сиз Сыйлы Нюрню Тауратны фарызларын тутууугъуз бламы, огъесе Хайыр Хапарны эшитип анга ийнаныуугъуз бламы алгъансыз? ³ Сиз аллай ангылаусузламысыз? Нюр бла башлап, энди адамны кюч салыуу бламы бошаргъа кюрешесиз? ⁴ Сизни ол къадар къыйынлыкъгъа тёзгенигиз керексизгеми болду? Кертиси да была бары да керексизге тюйюлдюле. ⁵ Сизге Сыйлы Нюрню берген эм сизни арагъызда къудуретли ишле этген Аллах, быланы Тауратны фарызларын тутханыгъыз ючюнмю, огъесе сиз Хайыр Хапаргъа тынгылап анга ийнаннганыгъыз ючюнмю этеди? ⁶ Сёз ючюн, Ибрахим Аллахха ийнаннганды, ийнаныуу да анга тюзлюклюлюкге саналгъанды. ⁷ Алай бла, Ибрахимни керти уланлары ийнаннганла болгъанларын билигиз. ⁸ Сыйлы Китап да, Аллах башха миллетлилени да ийман бла ариуларыгъын алгъындан кёрюп, Ибрахимге: «Сени юсюнг бла битеу миллетлеге ыразылыкъ берилликди», – деп Хайыр Хапарны алгъындан билдиргенди. ⁹ Алай бла ийман салгъанлагъа ийманлы Ибрахим бла бирге ыразылыкъ бериледи. ¹⁰ Тауратны фарызларын тутуугъа ышаннганла уа бары да налат боладыла. Нек десегиз Китапда: «Таурат китапда жазылгъанланы барын да хар заманда да этип толтурмагъан хар адам налатды», – деп жазылгъанды. ¹¹ Тауратны Закону бла уа Аллахны аллында бир киши да ариуланмагъаны ачыкъды; нек десегиз «тюзлюклю адам ийманы бла сау жашарыкъды». ¹² Закон а ийманнга таянмайды; алай а аны фарызларын ким этип толтурса, ол аны бла сау жашарыкъды. ¹³ Ибрахимге берилген ыразылыкъ Масих Иссаны юсю бла башха миллетлеге да жайылыр ючюн эм Аллах берирге айтхан Сыйлы Нюрню биз ийманыбыз бла алыр ючюн, ¹⁴ Масих бизни ючюн налатлы болуп, Законну налатындан бизни жулгъанды. Нек десегиз Китапда: «Терекге асылгъан хар адам налатды», – деп жазылгъанды. ¹⁵ Къарындашла! Адамланы ойлашыуларына кёре айтама: адам бегим этген кесаматны окъуна киши бузмайды эм анга зат къошмайды. ¹⁶ Алай а Ибрахимге эм аны урлугъуна ант сёзле берилгендиле. Кёплегеча: «эм туудукъларына», – деп айтылмагъанды, алай а жангызны юсюнден айтылгъанча: «эм сени урлугъунга», – деп айтылгъанды, ол а Масихди. ¹⁷ Мен муну айтама, Масихни юсюнден Аллах алгъын бегим этген кесаматны, тёрт жюз бла отуз жылдан сора келген Тауратны Закону бузмайды, ол себепден ант бла берилген сёзню кючю кетмейди. ¹⁸ Нек десегиз биз юлюшлю боллукъ саугъа Законнга таяна эсе, сора энди ант бла берилген сёзге таянмайды; алай а Аллах саугъасын Ибрахимге ант сёз бла бергенди. ¹⁹ Алай эсе, Тауратны Закону не ючюн берилгенди? Ол а терсликлени ачыкъ этер ючюн кесаматха къошулуп берилгенди. Аны кючю, ант сёз Анга берилген эм Ибрахимни урлугъундан болгъан Масихни келир заманына дери баргъанды. Закон мёлеклени юсю бла келечини къолу бла берилгенди. ²⁰ Жангыз бир адам ючюн келечи болмайды, Аллах а бирди. ²¹ Алай бла Аллахны ант бла берген сёзлерине Тауратны Закону къажаумуду? Чыртда угъай! Нек десегиз жашау берирге болаллыкъ закон берилсе эди, сора кертиси да адам закон бла ариуланыр эди. ²² Алай а, Аллахны ант сёз бла берирге айтханы ийнаннганлагъа, Масих Иссагъа ийнаныулары бла берилир ючюн, Сыйлы Китап бары да гюняхны жесиридиле деп билдиргенди. ²³ Ийман келгинчи уа, биз, Законну тутмагъына салынып, боллукъ ийманны ачылыр заманына дери Законну жесири болуп тургъанбыз. ²⁴ Алай бла, биз ийманыбыз бла ариуланыр ючюн, Закон, сабийлени жюрютюучю къулча, бизни Масиххе элтиучю жол эди. ²⁵ Ийман келгенден сора уа, биз энди, сабийлени жюрютюучю къулнуча, Законну оноуунда тюйюлбюз. ²⁶ Нек десегиз Масих Иссагъа ийнаныуугъуз бла сиз барыгъыз да Аллахны уланларысыз. ²⁷ Сиз барыгъыз да, сууда кёмюлдюрюлюп, Масих бла бирлешгенле, Масиххе кийиннгенсиз . ²⁸ Энди не иудейлини, не греклини, не къулну, не азатны, не эр кишини, не тиширыуну башхалыгъы жокъду; нек десегиз Масих Иссада сиз барыгъыз да бирсиз. ²⁹ Сиз Масихни эсегиз а, сора сиз Ибрахимни урлугъусуз эм Аллахны ант сёз бла берирге айтханындан юлюшлю боллукъ туудукъласыз.

¹ Энтда айтайым: туудукъ, барына да ие эсе да, сабий заманында аны къулдан бир башхалыгъы жокъду. ² Ол атасы салгъан болжалгъа дери анга къарагъан адамлагъа бла юй жюрютюучюлеге бойсунуп турады. ³ Биз да аны кибик, «сабийликде» болгъан заманыбызда, бу дунияны башланнгыч жорукъларына бойсунуп тургъанбыз. ⁴ Заманны толулугъу келгенде уа, Аллах, къатындан туугъан эмда Законнга кёре жашагъан Кесини Уланын, ⁵ Ол Законну оноуунда болгъанланы жулур ючюн эмда биз уланлыкъны эркинлигин алыр ючюн, ийгенди. ⁶ Сиз а уланлары болгъаныгъыз себепли, Аллах сизни жюреклеригизге: «Абба, Атам!», – деп къычыргъан Кесини Уланыны Нюрюн ийгенди. ⁷ Ол себепден сен энди къул тюйюлсе, уланыса; уланы эсенг а, сора Масих Иссаны юсю бла Аллахны туудугъуса . ⁸ Алгъын, Аллахны билмеген заманыгъызда уа, сиз кертиси бла аллах болмагъан затлагъа къуллукъ этип тургъансыз. ⁹ Энди уа, сиз Аллахны билесиз неда тюзюн айтханда, Аллах сизни биледи. Алай эсе дагъыда ол къарыусуз эм файдасыз башланнгыч жорукълагъа не ючюн къайтасыз? Кесигизни энтда жангыдан алагъа къул этергеми сюесиз? ¹⁰ Белгили кюнлеге, айлагъа, кезиулеге эм жыллагъа уллу магъана бересиз! ¹¹ Мен сизде бошму уруннганма деп, сизни ючюн къоркъама. ¹² Къарындашла, сизден тилейме, мени кибик болугъуз, нек десегиз мен да сизни кибикме. Сиз бир зат бла да мени жюрегими къыйнамагъансыз. ¹³ Мен Хайыр Хапарны сизге биринчи кере чархымы къарыусузлугъу бла бергеними сиз билесиз. ¹⁴ Алай а сиз, мени сынаргъа мени чархымда болгъан къарыусузлугъум ючюн мени сансыз этмегенсиз эм менден жийиргенмегенсиз. Алай а мени, Аллахны мёлегин къабыл этгенча, Масих Иссаны къабыл этгенча къабыл этген эдигиз. ¹⁵ Сиз къалай зауукълу эдигиз! Амалыгъыз болса эди, сиз кёзлеригизни чыгъарып манга берирге угъай дерик тюйюл эдигиз деп, сизни юсюгюзден шагъатлыкъ этеме. ¹⁶ Алай бла, сизге хакъ кертини айтханым ючюн, мен сизни душманыгъызмы болдум? ¹⁷ Сизни кеслерине бурургъа эришгенле аман ниет этип эришедиле. Сиз да алагъа эришир ючюн, сизни бизден айырыргъа излейдиле. ¹⁸ Ахшылыкъгъа эришген, жаланда мени сизде болгъан заманымда болуп къалмай, хар заманда да игиди. ¹⁹ Сабийлерим, Масих сизни жашау халыгъызда кёрюннгюнчюге дери, мен сизни ючюн энтда жангыдан къозлау азапдама! ²⁰ Мен энди сизде болуп, сизге ауазымы тюрлендирирге сюер эдим, нек десегиз мен сизге не болгъанын ангыламайма. ²¹ Сиз, Тауратны Законуну оноуунда болургъа сюйгенле, айтыгъыз манга: сиз Тауратны не айтханын билмеймисиз? ²² Нек десегиз Ибрахимни эки уланы болгъанды, бири – къарауашдан, экинчиси уа – азат тиширыудан деп жазылгъанды. ²³ Алай а къарауашдан болгъан улан, къалгъан адамлача туугъанды; азат тиширыудан болгъан улан а ант сёзге кёре туугъанды. ²⁴ Муну юсюнде башха магъана барды. Ол тиширыула эки кесаматны белгилейдиле. Бири Синай тауданды, къул боллукъ уланла туудурады; ол а Хажарды. ²⁵ Ол себепден, Хажар Аравияда Синай тауну магъанасын кёргюзтеди эм эндиги Иерусалимге ушашды; нек десегиз ол кесини сабийлери бла къул болупду. ²⁶ Бийикдеги Иерусалим а азатды, ол бизни барыбызгъа да анады. ²⁷ Нек десегиз Китапда: «Къууанч эт, сабий тапмагъан къаратон къатын! Къууанып къычыр, къозлаудан къыйналмагъан! Нек десенг эри болгъандан эсе, къоюлгъанны кёпдю сабийи», – деп жазылгъанды. ²⁸ Къарындашла, биз, Исхакъча, ант сёзге кёре туугъан сабийлебиз . ²⁹ Алай а ол заманда къалгъан адамлача туугъан, Сыйлы Нюрню кючю бла туугъанны къуугъаны кибик, энди да алайды. ³⁰ Китаб’а не айтады? «Къарауашны да, аны уланын да къыста; нек десенг къарауашны уланы азатны уланы бла бирге мюлкге ие боллукъ тюйюлдю», – дейди. ³¹ Ол себепден, къарындашла, биз къарауашны сабийлери тюйюлбюз, азат къатынны сабийлерибиз.

¹ Алай бла бизге Масих берген азатлыкъда туругъуз эм энтда жангыдан къул болууну боюнсасын боюнугъузгъа такъмагъыз. ² Ма, мен Пауул сизге айтама: сиз сюннет этиле эсегиз, сизге Масихден бир тюрлю хайыр боллукъ тюйюлдю. ³ Сюннет этдирген хар адамгъа, ол Тауратны битеу фарызларын толтурургъа керекди деп энтда шагъатлыкъ этеме. ⁴ Сиз, Таурат бла кесигизни ариуларгъа кюрешгенле, Масихден къуру къалгъансыз, Аллахны шафауатындан айырылгъансыз, ⁵ Биз а ариуланнганыбыздан келген умутну толурун Сыйлы Нюрге ышанып сакълайбыз. ⁶ Нек десегиз Масих Иссада не сюннетлиликни, не сюннетсизликни кючю жокъду, алай а кюч сюймеклик бла жюрюген иймандады. ⁷ Сиз тап бара эдигиз. Сизни хакъ кертиге бойсуннганыгъызны ким тохтатды? ⁸ Аллай ийнандырыу сизни чакъыргъан Аллахдан тюйюлдю. ⁹ Аз ачытхыч битеу тылыны ачытады. ¹⁰ Мен сизни юсюгюзден, сиз башха тюрлю ойлашмазсыз деп, Раббийге базынып турама; сизни жунчутхан а, ол ким болсада, кесини айыбына тюберикди. ¹¹ Сора къарындашларым, мен энтда сюннет этилирге керекди деп ууаз бере эсем, манга энтда зулму нек этедиле? Алай болса къачны бедишлиги кетерилир эди. ¹² Ой, сизни къозгъагъанла кеслери-кеслерин бичге эдиле! ¹³ Азатлыкъгъа чакъырылгъансыз сиз, къарындашла. Сизни бу азатлыгъыгъыз гюняхлы табийгъатыгъызны сюйгенин этерге сылтау болмасын анса; алай а сюймеклик бла бир-биригизге къуллукъ этигиз. ¹⁴ Нек десегиз битеу Таурат: «Жууугъунгу кесинг-кесинги сюйгенча сюй», – деген бир сёз бла тамам болады. ¹⁵ Сиз бир-биригизни къаба эм ашай эсегиз а, сора сиз бир-биригизни жокъ этмез ючюн сакъ болугъуз. ¹⁶ Мен айтама: Сыйлы Нюрге кёре жашагъыз, сора сиз гюняхлы табийгъатыгъызны кюсегенин этмезсиз. ¹⁷ Нек десегиз адамны гюняхлы табийгъаты, Нюр кёрюп болмагъанны сюеди, Нюр да гюняхлы табийгъат кёрюп болмагъанны сюеди. Ала бир-бирлерине къажаудула, алай бла сиз этерге сюйгенигизни этмейсиз. ¹⁸ Сиз Нюр бла жюрюй эсегиз а, сора сиз Законну оноуунда тюйюлсюз. ¹⁹ Адамны гюняхлы табийгъатыны ишлери белгилидиле. Ала: зийначылыкъ, саякълыкъ, харамлыкъ, адепсизлик, ²⁰ идоллагъа табынмакълыкъ, хыйнычылыкъ, душманчылыкъ, тюйюшюу, зарлыкъ, ачыуланыу, даулашыула, келишмеулюкле, айрылыкъла, ²¹ Жутлукъ, мурдарлыкъ, ичгичилик, къутуруулукъ эмда алагъа ушагъан затла. Сизге алгъын айтханымча энтда айтама, алай этиучюле Аллахны Патчахлыгъындан юлюшлю боллукъ тюйюлдюле. ²² Сыйлы Нюрню битими уа: сюймеклик, къууанч, жарашыулукъ, тёзюмлюлюк, ахшылыкъ, огъурлулукъ, ышаннгылылыкъ, ²³ Жууашлыкъ, кесин тыймакълыкъ. Аллайлагъа къажау закон жокъду. ²⁴ Масихникиле уа, кеслерини гюняхлы табийгъатларын кюсеулери бла эм итиниулери бла бирге къачха кергендиле. ²⁵ Биз Нюр бла жашай эсек, сора Нюрню оноуунда жюрюрге керекбиз. ²⁶ Уллу кёллюлюк этмейик, бир-бирибизни къанын бузмайыкъ, бир-бирибизге зарланмайыкъ.

¹ Къарындашла! Бир адамны бир тюрлю гюняхха тюшгени ачыкъ болса, сиз, Сыйлы Нюрге тынгылагъанла, аллайны жууаш хал бла тюзетигиз. Сиз да терилмез ючюн кесигизге сакъ болугъуз. ² Бир-биригизни къыйынлыгъын кётюрюгюз, алай бла Масихни Законун толтурурсуз. ³ Нек десегиз сансыз адам болгъанынлай, кесин бир затха санагъан адам, кесикесин алдайды. ⁴ Хар ким кесини ишин сынасын, ол заманда аны махтауу башхада тюйюл, жаланда кесинде боллукъду. ⁵ Нек десегиз хар ким кесини жюгюн кётюрлюкдю. ⁶ Аллахны Сёзюне юйретилген адам, юйретгеннге хар ахшы затындан да юлешип берсин. ⁷ Ажашмагъыз, Аллахны алдаргъа амал жокъду. Адам не сепсе, аны орур: ⁸ Кесини гюняхлы табийгъаты ючюн сеп ген гюняхлы табийгъатындан чиримекликни орур, Нюр ючюн сепген а Нюрден ёмюрлюк жашау орур. ⁹ Ахшылыкъ этиуден безмейик; нек десегиз жунчуп къалмасакъ, заманы келгенде орурбуз. ¹⁰ Алай бла, онгубуз болгъанда, барына да, артыгъыракъ да ийманда кесибизникилеге ахшылыкъ этейик. ¹¹ Кёремисиз, мен сизге кесими къолум бла къалай уллу харфла бла жазгъанма! ¹² Адам табийгъатлары бла махтаныргъа сюйгенлени сизге сюннет этилигиз деп къысханлары уа, жаланда Масихни къачы амалтын зулмулукъ кёрмез ючюндю. ¹³ Нек десегиз сюннет этилгенле кеслери да Тауратны Законун тутмайдыла, алай а сизни чархыгъыз бла махтаныр ючюн сизни сюннет этилиригизни сюедиле. ¹⁴ Мен а, Раббийибиз Масих Иссаны къачындан башха бир зат бла да, бир заманда да махтанмам. Аны къачыны юсю бла уа бу дуния манга ёлюдю, мен да бу дуниягъа ёлюме. ¹⁵ Нек десегиз Масих Иссада сюннетлиликни да, сюннетсизликни да магъанасы жокъду, жаланда магъаналы болгъан – жангыдан жаратылыуду. ¹⁶ Бу жорукъ бла жюрюгенлеге да, Аллахны Израилине да ырахатлыкъ эм ахшылыкъ келсин! ¹⁷ Алай а, мени бир киши да жарсытмасын; нек десегиз Раббий Иссаны жараларын мен чархымда жюрютеме. ¹⁸ Бизни Раббийибиз Масих Иссаны шафауаты сизни нюрюгюз бла болсун, къарындашла. Амин.