ЭФЕСЛИЛЕГЕ

¹ Аллахны буйругъу бла Масих Иссаны абустолу болгъан мен Пауулдан Масих Иссагъа ийман салгъан, Эфесдеги сыйлылагъа салам! ² Атабыз Аллахдан эм Раббийибиз Масих Иссадан сизге шафауат эм ырахатлыкъ болсун. ³ Масихни юсю бла бизге кёкледе хар тюрлю нюр ахшылыкъны берген бизни Раббийибиз Масих Иссаны Атасы Аллахха махтау болсун! ⁴ Биз сюймеклик бла Аны аллында сыйлы эм айыпсыз болур ючюн, Ол бизни дуния жаратылырдан да алгъа Масихде сайлагъанды. ⁵ Ол Кесини сюйген Уланында бизге кёргюзтген аламат шафауат махталыр ючюн, ⁶ Кесини ыразы болгъан буйругъу бла, Масих Иссаны юсю бла бизни Кесине улан этерге алгъындан белгилегенди. ⁷ Ол хар тюрлю акъылманлыкъ бла эм ангылаулукъ бла бизни артыгъы бла саугъалагъан шафауатыны байлыгъыны хайырындан, ⁸ Масихни юсю бла, Аны къаны бла биз жулуннганбыз, гюняхларыбыздан кечилгенбиз. ⁹ Аллах Масихде алгъындан салгъан Кесини ыразылыгъы бла, Кесини буйругъуну сырын бизге ачыкъ этгенди. ¹⁰ Заман толгъанда, Ол, муратына кёре, кёкледе эмда жерде болгъанланы барысын да Масихни башчылыгъы бла бирлешдирликди. ¹¹ Хар нени да Кесини сюйюп этген буйругъуна тап келтирген Аллахны муратына кёре, биз алгъындан белгиленип Масихни юсю бла Аны энчи халкъы этилгенбиз. ¹² Алай бла биз, Масиххе эрттеден ышаннганла, Аллахны аламатлыгъына махтау салыныр ючюн жашайыкъ. ¹³ Сиз да Масихде, хакъ кертини юсюнден сёзню – сизни къутхарылыуугъузну Хайыр Хапарын – эшитип анга ийнаннганыгъызда, ант сёз бла берилген Сыйлы Нюр бла мухурланнгансыз. ¹⁴ Сыйлы Нюр а, Аллахны халкъыны жулунуруна дери, бизге къаллыкъ затланы ышандырыр шартыды; алай бла Аллахны аламатлыгъына махтау салынсын. ¹⁵ Ол себепден мен да, сизни Масих Иссагъа ийнаннганыгъызны эм битеу сыйлыланы сюйгенигизни эшитгенимден бери, ¹⁶ Тилеклеримде сизни эсимде тутуп сизни ючюн дайым Аллахха шукур этеме. ¹⁷ Раббийибиз Масих Иссаны Аллахы, махтаулу Ата, сиз Аны таныр ючюн сизни акъылман этерик эм сизге билим ачарыкъ Нюрюн берсин деп тилейме. ¹⁸ Аны чакъырыуундан келген умутну, Ол сыйлы халкъына юлюшге берирге сёз берген аламат байлыкъны ¹⁹ Эм Аны бизде, ийнаннганлада болгъан къудуретини мардасыз уллулугъун сиз ангылар ючюн жюреклеригизни кёзлерин жарытсын деп тилейме. ²⁰ Ол къудурет, Аллах, Масихни ёлгенледен тиргизип, кёкледе Кесини онг жанында олтуртхан заманында Масихде кёргюзтген деменгили кючю этгенча ишле этеди. ²¹ Аллах, Масихни битеу башчыладан да, властьладан да, кючледен да, бийликледен да эм бу ёмюрде болуп къалмай, алай а боллукъ ёмюрде да аталгъан хар тюрлю атдан да ёрге кётюргенди. ²² Эм битеу барын да Аны аякъ тюбюне бойсундургъанды эм Аны битеу барындан да уллугъа салып, Аны Жамауатына баш этгенди. ²³ Ол Жамауат а Аны чархыды, барын да хар не бла да Толтургъанны толулугъуду.

¹ Терсликлеригиз бла эм гюняхларыгъыз бла ёлю болгъаныгъызлай, Аллах сизни тирилтгенди. ² Бир заманлада сиз бу гюняхлада жашагъансыз, бу дунияны адети бла, хауада бийлик этген башчыны – Аллахха бойсунмаучу адамлада энди ишин этген нюрню – ызындан баргъансыз. ³ Бир заманлада биз барыбыз да аллайла эдик, гюняхлы табийгъатыбыз сюйгенни эм акъылыбызгъа келгенни этип, адам табийгъатыбызны кюсегенлерине кёре жашай эдик. Бизни барыбызны да Аллахны чамланыуу сакълай эди. ⁴ Алай болгъанлыкъгъа мархаматы бай Аллах, бизни алай уллу сюйгени ючюн, ⁵ Терсликлерибиз бла ёлю болгъаныбызлай, бизге Масих бла жашау бергенди. Сиз Аны шафауаты бла къутхарылгъансыз. ⁶ Аллах бизни Масих Исса бла бирге тиргизгенди эмда Аны бла бирге кёкледе олтурур жер бергенди. ⁷ Ол, Масих Иссада бизге этген игилик бла, Кесини шафауатыны мардасыз уллу байлыгъын келлик ёмюрледе кёргюзтюр ючюн алай этгенди. ⁸ Нек десегиз сиз Аны шафауаты бла, ийнаныуугъузну юсю бла къутхарылгъансыз, ол да сиз жетишген зат тюйюлдю, Аллахны саугъасыды. ⁹ Бир адам да махтанмаз ючюн, ол сууап ишле бла жетишген зат тюйюлдю. ¹⁰ Нек десегиз биз Аллахны чыгъармасыбыз, Масих Иссада ахшы ишле этерге жаратылгъанбыз. Биз жашауубузну ол ишлени этип ашырыр ючюн Аллах аланы бизге этерге алгъындан буюргъанды. ¹¹ Алай бла сиз, башха миллетлиледен туугъанла, бир заманлада не болгъаныгъызны, чархларына къолла бла сюннет этилип, сюннетли атлы болгъанла сизге сюннетсизле атагъанларын эсигизде тутугъуз. ¹² Сиз ол заманда Масихсиз эдигиз; Израильни жамауатындан тышхы эдигиз, Аллахны ант сёз бла этген кесаматларындан юлюшсюз эдигиз, умутугъуз жокъ эди эм бу дунияда Аллахдан къуру эдигиз. ¹³ Энди уа Масих Иссада сиз, бир заманлада узакъ болгъанла, Масихни къаны бла жууукъ болгъансыз. ¹⁴ Нек десегиз бизни бир-бирибиз бла жарашдыргъан Олду. Ол, Тауратны Законун фарызлары эм жорукълары бла бирге къурутуп, ¹⁵ Эки къауумубузну да бир этгенди, Ке сини чархы бла арабызда тургъан тыйгъычны, душманчылыкъны кетергенди. ¹⁶ Ол, эки къауумубуздан да Кеси-Кесинде бир жангы адамны болдуруп, жарашыулукъ къурар ючюн эм душманчылыкъны къачны юсюнде жокъ этип, къачны юсю бла бир чархда эки къауумубузну да Аллах бла жарашдырыр ючюн алай этгенди. ¹⁷ Эмда, келип, сизге узакълагъа да, жууукълагъа да жарашыулукъну Хайыр Хапарын бергенди. ¹⁸ Нек десегиз Аны юсю бла эки къауумубузну да, бир Нюрде Атагъа барыргъа жолубуз барды. ¹⁹ Алай бла сиз энди тыш адамла эм киргинчиле тюйюлсюз, алай а сыйлыла бла бир халкъсыз эм Аллахны юйюрюсюз. ²⁰ Абустолла бла файгъамбарла салгъан мурдорну юсюнде бегимли болгъансыз, Масих Исса уа Кеси мюйюшню баш ташыды. ²¹ Аны юсюнде уа битеу мекям, ариу тап къаланып ёсюп, Раббийде сыйлы юй болады. ²² Аны юсюнде сиз да бирге къуралып Сыйлы Нюрню юсю бла Аллахны жашагъан жери болгъансыз.

¹ Ол себепден а мен, Пауул, сиз башха миллетлиле ючюн Масих Иссагъа жесир болгъанма. ² Аллах шафауатын сизге билдирирге мени боюнума салгъанын сиз эшитген болурсуз: ³ Мен башында къысха жазгъаным кибик, Аллах сырын туура манга ачыкъ этип билдиргенди. ⁴ Сиз, муну окъуп, Масихни сырын ангылагъанымы сезерге боллукъсуз. ⁵ Адам улуланы алгъыннгы туудукъларына билдирилмеген, энди уа Масихни сыйлы абустолларына бла файгъамбарларына Сыйлы Нюрню юсю бла ачыкъ этилген сыр а ма буду: ⁶ Башха миллетлиле да, Хайыр Хапарны жайылыуу бла, Израиль бла бирча игиликге ие боладыла, бир чархны санлары болуп, Аллахны Масих Иссада ант сёз бла бергенинден юлюшлю боладыла. ⁷ Аллахны менде жюрюген кючю бла манга берген шафауатыны саугъасы бла мен ол Хайыр Хапарны жайыучу жумушчу болгъанма. ⁸ Сыйлыланы битеу барындан да эм гитче болгъанымлай, Масихни акъылгъа сыйынмагъан байлыгъыны юсюнден башха миллетлеге хайыр хапар берирге ⁹ Эм хар нени да Масих Иссаны юсю бла жаратхан Аллахда, ёмюрлюкден жашырылып болгъан сыр къалай къуралгъанын барына да ачыкъларгъа манга шафауат берилгенди. ¹⁰ Аллах, Кесини кёп тюрлю акъылманлыгъы энди Жамауатыны юсю бла кёкледеги башчылагъа бла властьлагъа белгили болур ючюн, алай этгенди. ¹¹ Бу, Аллахны ёмюрледен да алгъа этген эм бизни Раббийибиз Масих Иссада толтургъан планыды. ¹² Масихде уа, бизни Анга ийнаныуубуз бла, Аллахха таукеллик бла эм ышаныу бла жууукълашыргъа амалыбыз барды. ¹³ Мынга кёре сизден тилейме, мен сизни ючюн сынагъан къайгъыларым ючюн мудах болмагъыз, ала уа сизге махтау тапдырадыла. ¹⁴ Ол себепден, кёкледе да, жерде да хар тюрлю аталыкъ да Андан аталгъан, ¹⁵ Бизни Раббийибиз Масих Иссаны Атасыны аллында тобукъланама. ¹⁶ Ол, Кесини аламатлыгъыны байлыгъындан, Кесини Нюрю бла ич адамыгъызда кюч берип, сизни бегитсин, ¹⁷ Ийманыгъыз бла Масих жюреклеригизде жашасын деп тилейме. ¹⁸ Сиз сюймекликде тамырланып эм мурдорлу болуп, битеу сыйлыла бла бирге, Масихни сюймеклиги къалай кенг, узун, терен эмда бийик болгъанын ангыларыгъызны, ¹⁹ Ангылаудан озгъан бу сюймекликни билиригизни эм алай бла Аллахны битеу толулугъу бла толуругъузну тилейме. ²⁰ Бизде жюрюген кючю бла, бизни тилегенибизден да неда ойлашыуубуздан да бек аламат кёп эталлыкъ Аллахха, ²¹ Жамауатында эм Масих Иссада битеу туудукълада, ёмюрден ёмюрге ыспас-махтау болсун! Амин.

¹ Алай бла мен, Раббий ючюн тутмакъ болуп сизден тилейме, сиз алгъан чакъырылыуугъузгъа тийишли жашагъыз. ² Хар тюрлю сабыр акъыллылыкъ бла, жууашлыкъ бла эмда тёзюмлюлюк бла бирбиригизге сюймеклик бла жумушакълыкъ этигиз, ³ Бир-биригиз бла жарашыулукъну тутуп, Сыйлы Нюрде бирликни сакъларгъа кюрешигиз. ⁴ Сиз чакъырылгъаныгъызда бир умутха чакъырылгъаныгъыз кибик, Нюр бирди, чарх да бирди, ⁵ Раббий бирди, ийман бирди, сууда кёмюлдюрюлюу бирди, ⁶ Барыбызны да Аллахыбыз эм Атабыз бирди, Ол а барыбызгъа да бийлик этеди, барыбызны юсюбюз бла иш этеди эм барыбызда да барды. ⁷ Масихни берген саугъасыны мардасына кёре бизни хар бирибизге да шафауат берилгенди. ⁸ Ол себепден Китапда: «Бийикге чыгъып, жесирлени жесирлегенди эм адамлагъа саугъала бергенди», – деп айтылгъанды. ⁹ «Чыкъгъанды» дегенни магъанасы, Масих алгъын жерни тюп къатларына да тюшгени тюйюл эсе, неди? ¹⁰ Энишге тюшген да, битеу аламны толтурур ючюн кёкледен да бийикге чыкъгъан да Олду. ¹¹ Ол а, бирлени абустолла этип, башхаланы файгъамбарла этип, башхаланы Хайыр Хапарны жайыучула этип, дагъыда башхаланы кютюучюле эм устазла этип салгъанды. ¹² Сыйлыла тамамлы болуп, къуллукъ этер ючюн эмда Масихни чархы ёсер ючюн, алай этгенди. ¹³ Муну ахырында барыбыз да ийманда эм Аллахны Уланын билиуде бирликге, тамам кишиликге, Масихни толулугъуну тамам мардасына жетербиз. ¹⁴ Алай бла биз энди адамланы фитначылыкълары эм хыйлачылыкъгъа усталыкъ лары бла бизни ажашдырыргъа кюрешгенхар тюрлю окъууланы толкъунлары эм желлери чайкъалтып ары бла бери ауа тургъан сабийле болмайыкъ. ¹⁵ Алай а биз сюймеклик бла хакъ кертини тутуп, хар не жаны бла да ёсюп Масиххе жетейик. Ол а чархны башыды. ¹⁶ Аны оноуунда битеу чарх, хар тюрлю жалгъагъан байламлыкъланы болушлугъу бла къуралып эм къошулуп, хар санны тап ишлеую бла ёсюм алады эм алай бла кесикесин сюймекликде ёсдюрюп кючлендиреди. ¹⁷ Ол себепден мен айтама эм Раббийни хатыры бла тилейме, сиз энди, башха миллетле кеслерини акъылларыны магъанасызлыгъы бла этгенча этмегиз. ¹⁸ Аланы акъыллары къарангы болгъанды, ичлериндеги жахилликлерини эм жюреклерини сезимсизлигини себебинден, Аллахны жашауундан тышында къалгъандыла. ¹⁹ Ала битеу сезимлиликлерин ташлап, кеслерин адепсизликге бергендиле, алай бла хар тюрлю харамлыкъны къанмай этедиле. ²⁰ Сиз а алай тюйюлсюз, сиз Масихни юсюнден билгенсиз. ²¹ Бир ишексиз, сиз Аны юсюнден эшитгенсиз эм Аны жолуна юйреннгенсиз, нек десегиз хакъ керти Иссадады. ²² Алай бла, алдаулу кюсеуледен чирий тургъан эски адамлыгъыгъызны алгъыннгы жашау халын къоюгъуз, ²³ Акъылыгъызны нюрю бла уа жангырыгъыз ²⁴ Эм хакъ керти тюзлюклюлюк бла эмда сыйлылыкъ бла Аллахха ушатылып жаратылгъан жангы адамлыкъгъа кийинигиз. ²⁵ Ол себепден, ётюрюкню къоюп, хар ким кесини жууугъуна кертини айтыгъыз; нек десегиз биз барыбыз да бир чархны санларыбыз. ²⁶ Ачыуланып гюнях этмегиз. Сизни ачыуланыуугъузда кюн батмасын. ²⁷ Эмда ибилисге жер бермегиз. ²⁸ Урлагъан адам энди урламасын. Андан эсе, кесини къоллары бла хайыр этип, урунсун, керекли болгъан адамгъа да берир заты болсун. ²⁹ Сизни ауузугъуздан бир тюрлю аман сёз чыкъмасын, жаланда, кереклисича, эшитгенлени нюр жанындан ёсдюрюп, алагъа шафауат тапдырырча ахшы сёз чыкъсын. ³⁰ Эмда Аллахны Сыйлы Нюрюн жарсытмагъыз. Ол сизни гюняхларыгъыздан азат болур кюнюгюзге мухурлагъанды. ³¹ Хар тюрлю дерт тутуу, къутуруу, ачыуланыу, къычырыу, аман сёлешиу эмда хар тюрлю аман ниет сизден къорасынла; ³² Алай а бир-биригизге халал, жазыкъсыныучу болугъуз; Аллах сизге Масихде кечгинлик бергени кибик, сиз да бир-биригизге кечгинлик беригиз.

¹ Алай бла, Аллахны сюйюлюннген сабийлери кибик, Аллахдан юлгю алыгъыз. ² Масих, бизни сюйюп, Кесин бизни ючюн Аллахха саугъагъа эм ариу ийисли къурманнга бергени кибик, сиз да алай, сюймекликни жолунда жюрюгюз. ³ Саякълыкъны эм хар тюрлю харамлыкъны эм жыртхычлыкъны сизде атлары айтылыргъа окъуна жарарыкъ тюйюлдю, была сыйлылагъа тийишли ишле тюйюлдюле. ⁴ Аны кибик сылыкъ сёзлюлюк, бош сёзлюлюк эм адепсиз кюлкючюлюк сизге ушагъылы тюйюлдюле, андан эсе заманыгъызны Аллахха шукур этиуге беригиз. ⁵ Нек десегиз бир тюрлю саякъ, неда харам адамны, неда идоллагъа табыныучу бла бирча болгъан жыртхыч адамны, Масихни эмда Аллахны Патчахлыгъындан юлюшю болмагъанын билигиз. ⁶ Бир киши да сизни бош сёзле бла терилтмесин; нек десегиз бойсунмагъан адамланы юслерине, аллай затла ючюн Аллахны чамланыуу келеди. ⁷ Мынга кёре, алагъа нёгер болмагъыз. ⁸ Сиз бир заманлада къарангылыкъ эдигиз, энди уа Раббийде жарыкъсыз. Жарыкъны сабийлерича жашагъыз. ⁹ Нек десегиз Нюрню битими хар тюрлю игиликде, тюзлюклюлюкде эм кертиликде кёрюнеди. ¹⁰ Аллах нени ахшы кёргенин сынап билигиз. ¹¹ Эм къарангылыкъны хайырсыз ишлерине къатышмагъыз, алай а аланы ачыкъ этигиз. ¹² Нек десегиз аллай адамланы ташада этген ишлерин айтыргъа да айыпды. ¹³ Алай а жарыкъ ачыкъ этген хар зат кёрюнеди, нек десегиз хар затны да ачыкъ этип кёргюзтген жарыкъды. ¹⁴ Ол себепден: «Тур, эй жукълап тургъан, ёлгенледен тиргизил, Масих сени жарытыр», – деп айтылады. ¹⁵ Алай бла, къарагъыз, сакъ болуп, акъылсызлача угъай, акъыллылача жашагъыз, ¹⁶ Замандан тап хайырланыгъыз, нек десегиз кюнле огъурсуз кюнледиле. ¹⁷ Ол себепден оюмсуз болмагъыз, алай а Аллахны буйругъу не болгъанын ангылагъыз. ¹⁸ Эм чагъыр ичип эсирмегиз, нек десегиз андан хаулелик болады; алай а Сыйлы Нюрден толугъуз, ¹⁹ Бир-биригизни Забур бла гимнле бла эмда Сыйлы Нюр учундургъан зикир айтыула бла юйрете, битеу жюрегигизден Раббийге зикир айтыгъыз эмда махтау салыгъыз. ²⁰ Хар заманда хар зат ючюн да Раббийибиз Масих Иссаны аты бла Аллах Атагъа шукур этигиз. ²¹ Аллахдан къоркъууугъуз бла бир-биригизге бойсунугъуз. ²² Къатынла! Сиз эрлеригизге Раббийгеча бойсунугъуз. ²³ Нек десегиз Масих Кесини чархыны – Жамауатыны башы эмда Къутхарыучусу болгъаны кибик, эр да къатыныны башыды. ²⁴ Алай а, Жамауат Масиххе къалай бойсуна эсе да, къатынла да кеслерини эрлерине хар не жанындан да алай бойсунургъа керекдиле. ²⁵ Эрле! Масих Кесини Жамауатын сюйюп Кесин аны ючюн къурманнга бергени кибик, сиз да къатынларыгъызны сюйюгюз. ²⁶ Масих Жамауатын суу бла жуууп, Аллахны сёзю бла тазалап сыйлы этер ючюн, ²⁷ Аны тамгъасы неда кемлиги, неда аны кибик бир заты болмай, алай а ол сыйлы эм айыпсыз болсун деп, аны Кесини аллына махтаулу Жамауат этип салыр ючюн, Кесин къурманнга бергенди. ²⁸ Эрле, кеслерини чархларын сюйгенлери кибик, кеслерини къатынларын алай сюерге борчлудула. Кесини къатынын сюйген адам кеси-кесин сюеди. ²⁹ Нек десегиз бир адамны бир заманда кесини чархына кёрюп болмаулугъу болмагъанды, алай а анга ашатады эм аны жылытады, Раббий да Кесини Жамауатына алай этеди. ³⁰ Нек десегиз биз Аны чархыны санларыбыз, Аны этинденбиз эм Аны сюеклеринденбиз. ³¹ «Анга кёре, адам атасын бла анасын къояр да, къатынына къошулур, сора экиси бир чарх болурла». ³² Муну сыры уллуду, мен а Масихни эмда Аны Жамауатыны юсюнден айтама. ³³ Сизни хар биригиз да кесини къатынын кеси-кесин сюйгени кибик алай сюйсюн, къатын да эрине хурмет этсин.

¹ Сабийле, Раббийникиле болуп, ата-аналарыгъызны айтханларын этиучюле болугъуз, нек десегиз бу сизни борчугъузду. ² «Атанга бла ананга хурмет эт» деген бу фарыз: ³ «Алай этсенг, санга ахшылыкъ боллукъду эмда жер башында кёп жашарыкъса», – деп ант сёз берилген биринчи фарызды. ⁴ Атала, сиз да, сабийлеригизни инжитмегиз, алай а аланы Раббийни юйретиую бла эм акъыл бериую бла ёсдюрюгюз. ⁵ Къулла, бу дуниядагъы бийлеригизге хурмет бла эм къоркъуу бла, таза жюрегигизден, Масиххе бойсуннганча бойсунугъуз. ⁶ Адамлагъа кёзбау этиучюлеча, жаланда иги жумушчула кибик кёрюнюу бла тюйюл, алай а Масихни къуллары кибик, таза жюрекден Аллахны буйругъун толтуругъуз. ⁷ Адамлагъача тюйюл, Раббийге къуллукъ этгенча, къадалып къуллукъ этигиз. ⁸ Хар ким, къул эсе неда азат эсе да, этген ахшылыгъына кёре Раббийден тийишлисин аллыгъын билигиз. ⁹ Бийле, сиз да къулларыгъызгъа иги къарагъыз, алагъа къатылыкъ этиуню къоюгъуз; сизни кесигизни да, аланы да башыгъызда кёкледе Раббий болгъанын эмда Ол адамланы бирин-биринден башха этмей къарагъанын билигиз. ¹⁰ Ахырында, къарындашларым, Раббий бла эм Аны къудуретини кючю бла къарыуланыгъыз. ¹¹ Ибилисни хыйлаларына сиз къажау турургъа болалыр ючюн, Аллах берген битеу сауутланы юсюгюзге кийигиз. ¹² Нек десегиз бизни къазауатыбыз адамлагъа къажау къазауат тюйюлдю, алай а башчылагъа къажау, властьлагъа къажау, къарангылыкъны бу ёмюрлю дуния оноучуларына къажау, тюп кёкледеги огъурсуз нюрлеге къажау къазауатды. ¹³ Аны себепли, сиз, огъурсуз кюнде чыдап эм барын да хорлап, таймай турургъа болалыр ючюн, Аллах берген битеу сауутланы алыгъыз. ¹⁴ Алай бла, белигизге кертиликни белибауун къысып, юсюгюзге тюзлюклюлюкню кюбесин кийип ¹⁵ Эм аякъларыгъызгъа жарашыулукъну Хайыр Хапарын жаяргъа хазырлыкъны кийип, къаты туругъуз. ¹⁶ Барындан да бег’а ийманны къоруулаучу сауутун алыгъыз, аны бла уа ибилисни битеу къызгъан окъларын ёчюлтюрге болаллыкъсыз. ¹⁷ Къутхарылыуну темир бёркюн кийигиз эмда Сыйлы Нюрню къылычын, Аллахны сёзюн алыгъыз. ¹⁸ Хар тюрлю дууа этиу бла эм тилек этиу бла хар заманда Сыйлы Нюрню болушлугъу бла тилек этигиз эм ол мурат бла битеу сыйлыла ючюн да толу чыдамлылыкъ бла тилек этип, сагъайып туругъуз. ¹⁹ Эм мени ючюн да тилек этигиз; мен Хайыр Хапарны сырын таукеллик бла ачыкъ билдирирге манга сёз берилир ючюн, ²⁰ Мен аны ючюн келечилигими тутмакълыкъда толтургъан Хайыр Хапарны мен, манга тийишлисича, таукеллик бла билдирир ючюн тилек этигиз. ²¹ Сиз да мени болумуму эм ишлерими халын билир ючюн, сюйюлюннген къарындаш эм Раббийге тюз къуллукъ этген Тихик сизге барындан да хапар берир. ²² Аны уа мен сизге ийгеним, сиз бизни хапарыбызны билир ючюн эмда ол сизни жюреклеригизни жапсарыр ючюндю. ²³ Къарындашлагъа Атабыз Аллахдан эм Раббийибиз Масих Иссадан ийман бла ырахатлыкъ эм сюймеклик болсун. ²⁴ Аллахны шафауаты бизни Раббийибиз Масих Иссаны таймай сюйгенлени барысы бла да болсун. Амин.