КОЛОСЛУЛАГЪА

КОЛОСЛУЛАГЪА

¹ Аллахны буйругъу бла Масих Иссаны абустолу болгъан мен Пауулдан эм Тимотей къарындашдан, ² Масих Иссагъа ийнаннган, Колосдагъы сыйлы къарындашлагъа – салам! ³ Атабыз Аллахдан эм Раббийибиз Масих Иссадан сизге шафауат эм ырахатлыкъ болсун. Хар заманда сизни ючюн тилек этип, Раббийибиз Масих Иссаны Атасы Аллахха шукур этебиз; ⁴ Нек десегиз сизни Масих Иссагъа ийнаннганыгъызны эм битеу сыйлыланы сюйгенигизни эшитгенбиз. ⁵ Ийманыгъыз бла сюймеклигигиз кёкледе сизге хазырланнган умутдан тууады. Ол умутну болгъанын, сиз хакъ керти сёзден – алгъын сизге билдирилген Хайыр Хапардан – эшитгенсиз. ⁶ Ол Хайыр Хапар, сиз Аллахны шафауатыны юсюнден эшитген эм аны керти ангылагъан кюнден башлап, сизни арагъызда этгени кибик, битеу дунияда да битим береди эм жайылады. ⁷ Муну бизни сюйюлюннген иш нёгерибиз Эпафрасдан юйреннгенсиз. Ол Масихни сизни ючюн уруннган, ышаннгылы къулуду. ⁸ Сизни Сыйлы Нюрден туугъан сюймеклигигизни да бизге ол билдиргенди. ⁹ Ол себепден биз да, муну эшитген кюнюбюзден башлап, сизни ючюн тохтамай дууа этип, сиз нюр жанындан хар тюрлю акъылманлыкъ бла эм ангылау бла Аллахны буйругъун толу билир ючюн тилек этебиз. ¹⁰ Сиз Раббийге тийишли жашап, хар не жаны бла да Аны ыразы этип, хар ахшы иш бла битим берип, Аллахны билиу бла ёсер ючюн, ¹¹ Аны махтаулу къудурети сизни толу кючлендирир эм хар не жаны бла да чыдамлы, тёзюмлю эмда къууанчлы этер ючюн ¹² Эмда сыйлыланы жарыкъда юлюшлерине къошулургъа бизни чакъыргъан Аллах Атагъа сиз шукур этер ючюн тилек этебиз. ¹³ Ол бизни, къарангылыкъны оноуундан къутхарып, Кесини Сюйюлюннген Уланыны Патчахлыгъына кийиргенди. ¹⁴ Аллахны Уланында уа Аны къаны бла бизге жулунуу, гюняхларыбыздан кечилиу барды. ¹⁵ Ол а кёрюнмеген Аллахны сыфатыды, Тюнгюч Уланды, хар жаратылгъан затха иеди. ¹⁶ Нек десегиз кёкледе болгъан да, жерде болгъан да, кёрюннген да, кёрюнмеген да хар неда Аны юсю бла жаратылгъанды; патчахлыкъламы, бийликлеми, башчыламы, властьламы – бары да Аны юсю бла эм Аны ючюн жаратылгъанды. ¹⁷ Ол хар неден да алгъады эм хар неда Аны юсю бла бар болуп турады. ¹⁸ Эмда Ол Кесини чархыны – Жамауатыны башыды; башланыу Анданды, хар неде де да биринчилик Аны болур ючюн ёлгенледен биринчи тиргизилген да Олду. ¹⁹ Нек десегиз Иссада хар тюрлю толулукъну болурун Ата иги кёргенди. ²⁰ Алай бла Аны, къачны юсюнде тёгюлген къаныны болушлугъу бла, Аллах, кёкледегилени да, жердегилени да – барын да, Аны юсю бла Кеси бла жарашдырып, ырахатлыкъ бергенди. ²¹ Сиз да, этген аман ишлеригиз себепли, бир заманлада акъылыгъыз бла Аллахдан узакъ эм Аны душманлары эдигиз. ²² Энди уа Масих, сизни сыйлы, бузукъсуз эм терсликсиз этип Аллахны аллына чыгъарыр ючюн, Кесини эт чархыны ёлюмю бла сизни Аллах бла жарашдыргъанды. ²³ Ийманда бек эм къаты болуп турургъа эмда сиз эшитген Хайыр Хапаргъа ышаныудан таймай турургъа керексиз ансы. Мен, Пауул, кёкню тюбюнде жаратылгъанланы барына да билдирилген ол Хайыр Хапарны жумушчусу болгъанма. ²⁴ Энди мен сизни ючюн азап чекгениме къууанама эмда Масих Кесини чархы – жамауаты ючюн сынагъан къыйынлыкъланы жетмегенлерин мен чархымда толтурама. ²⁵ Аллах сизни ючюн манга берген къуллукъ бла ол Жамауатны жумушчусу болгъанма. Къуллугъум, Аллахны Сёзюн – ²⁶ Озгъан ёмюрледен бла тукъумладан жашырылгъан, энди уа Аны сыйлыларына ачыкъ этилген тасханы – хар жерде да билдириудю. ²⁷ Аллах, бу тасхада битеу миллетлеге къаллай бай махтауу болгъанын, сыйлылагъа кёргюзтюрге сюйгенди. Бу тасха уа Масихни сизде болгъаныды, сизни махтаулу болуругъузну умутуду. ²⁸ Биз да Масихни билдиребиз; хар адамны Масих Иссаны юсю бла тамам этип, Аллахны аллына чыгъарыр ючюн, хар адамгъа насийхат беребиз, хар адамны да хар тюрлю акъылманлыкъгъа юйретебиз. ²⁹ Масихни менде жюрюген деменгили кючю бла, мен муну ючюн урунуп кюрешеме.

¹ Сизни ючюн эм Лаодикияда болгъанла ючюн эмда мени бетден-бетге танымагъанланы бары ючюн да къаллай уллу кюрешиуюм болгъанын сиз билиригизни сюеме. ² Аланы жюреклери жапсарылып, сюймеклик бла бирлешип, хар не жаны бла да толу ангылаудан бай болуп, ала Аллах Атаны тасхасын – Масихни ангылар ючюн алай этеме. ³ Масихде уа битеу акъылманлыкъны бла билимни хазнасы жашырылыпды. ⁴ Мен муну сизге, бир киши да сизни алдау сёзле бла терилтмесин деп айтама. ⁵ Нек десегиз мен чархым бла сизни биргегизге тюйюл эсем да, нюрюм бла уа сизни блама; сизни тап къуралгъаныгъызны эм сизни Масиххе ийнаныуугъуз къаты болгъанын кёрюп, къууанама. ⁶ Ол себепден, сиз Раббий Масих Иссаны къалай къабыл этген эсегиз да, Аны жолунда алай жюрюгюз. ⁷ Масихде тамырланып эм бегинип эмда ийман бла кючленип, сиз юйреннгенигизча, Аллахха шукур этиу бла ийманда жетишимли болугъуз. ⁸ Къарындашла, сакъ болугъуз, Масиххе кёре тюйюл, адамланы адетлерине эм бу дунияны башланнгыч жорукъларына кёре, философия бла эм бош терилтиучю сёзле бла сизни бир киши да жесир этмесин. ⁹ Нек десегиз Аллахлыкъны битеу толулугъу сан бла Масихде жашайды. ¹⁰ Сизни да Масихде толулугъугъуз барды, Ол а битеу башчылагъа эм властьлагъа башды. ¹¹ Масихникиле болгъаныгъызда, сизге да къол бла этилмеген сюннет, Масих этген сюннет этилгенди; ол сюннет а чархыгъызны гюняхлы табийгъатын кетериуюгюздю. ¹² Сууда кёмюлдюрюлген заманыгъызда сиз Масихни биргесине кёмюлгенсиз эм ол заманда Аны ёлгенледен тиргизген Аллахны кючюне ийнаныуугъуз бла, сиз Аны бла бирге тиргизилгенсиз. ¹³ Сиз алгъын терсликлеригиз бла эм сюннетсиз, гюняхлы табийгъатыгъыз бла ёлю эдигиз, Аллах а сизге Масих бла бирге жашау бергенди. Ол бизни битеу терсликлерибизни кечгенди. ¹⁴ Жорукълары бла бизге къажау жазылгъан эмда терслигибизни кёргюзтген борч къагъытны къоратып, аны арадан алып, чюйле бла къачха ургъанды. ¹⁵ Башчыланы бла властьланы кючлерин сыйырып, аланы къачны юсюнде хорлап, барыны да аллында аланы бедишлик этгенди. ¹⁶ Алай бла аш ючюн, неда суусун ючюн, неда бир тюрлю байрам ючюн, неда жангы айны хурметлеу ючюн, неда шабат кюн ючюн сизни бир киши да терслемесин. ¹⁷ Была бары да боллукъну ауанасыдыла, барыны да керти магъанасы уа Масихди. ¹⁸ Бир киши да кеси аллына сабыр акъыллылыкъ этиую бла эм мёлеклеге табыныуу бла, зауукъланып, кесини кёрген кёрюнюулерине ышанып эмда кесини табийгъат акъылы бла керексиз ёхтемленип, сизни терилтип, аллыкъ саугъагъыздан къуру къалдырмасын. ¹⁹ Аллай адам, чархны Башы – Масихни тутмайды; битеу чарх а жиклерини эм байламлыкъларыны болушлугъу бла ол Башдан кереклисин алып, бир-бирине бегип, Аллах берген ёсюм бла ёседи. ²⁰ Алай бла, сиз Масих бла ёлюп бу дунияны башланнгыч жорукъларындан азат болгъан эсегиз, сора сиз, бу дунияда жашагъанлача: ²¹ «муну тутма», «аны ашама», «мынга тийме» деген бегимлени нек тутасыз? ²² Ол бегимле бары да хайырланыудан чириген затланы юсюндендиле, жаланда адамланы фарызлары эм юйретиулеридиле. ²³ Ишексиз, жалгъан динчиликни, кеси аллына сабыр акъыллылыкъ этиуню эмда чархын къыйнамакълыкъны юсюнден айтсагъ’а, ол бегимле акъылманлыкъча кёрюнедиле. Алай болгъанлыкъгъа адам табийгъатны тыйгъысызлыгъын хорларгъа уа аланы кючлери жокъду.

¹ Ол себепден, сиз Масих бла тиргизилген эсегиз, сора кёкдегин излегиз, анда Масих Аллахны онг жанында олтурады. ² Жердегини юсюнден угъай, кёкдегини юсюнден ойлашыгъыз. ³ Нек десегиз сиз ёлгенсиз, сизни жашауугъуз да Масих бла бирге Аллахда жашырылыпды. ⁴ Сизни жашауугъуз Масих кёрюннгенде уа, сиз да ол заманда Аны бла бирге махтау бла кёрюнюрсюз. ⁵ Алай бла, бу дуниядагъы гюняхлы санларыгъызны ишлерин: саякълыкъны, харамлыкъны, тыйгъысызлыкъны, аман кюсеулени эмда ол идолгъа табыныу болгъан жутлукъну ёлю этигиз. ⁶ Ол затла ючюн а бойсунмаучу адамлагъа Аллахны чамланыуу келеди. ⁷ Бир заманлада, аланы араларында жашагъан заманыгъызда, сиз да ол жоллада жюрюгенсиз. ⁸ Энди уа сиз ачыуланыу, къутуруу, аман ниет, аман айтыу, ауузугъуздан чыкъгъан адепсиз сёзле кибик затланы барын да къоюгъуз. ⁹ Бир-биригизге ётюрюк айтмагъыз, нек десегиз сиз эски адамлыгъыгъызны аны адетлери бла бирге атхансыз ¹⁰ Эмда жангы адамлыкъны кийгенсиз. Ол а аны Жаратханны сыфатыча, толу билимге жетер ючюн жангыра турады. ¹¹ Жангы адамлыкъда уа не грекли, не иудейли, не сюннетли, не сюннетсиз, варвар, скиф, къул, азат айырыу жокъду, алай а хар не жаны бла да хар неда Масихди. ¹² Алай бла, сюйюлюннген сыйлыла, Аллах сайлагъанлача, жумушакъ жюреклиликни, жазыкъсыныулукъну, сабыр акъыллылыкъны, жууашлыкъны, кёп тёзюмлюлюкню юсюгюзге кийигиз. ¹³ Бир-биригизге жумушакълыкъ этигиз эм биреуню-биреуден тарыгъыуу бар эсе, Масихни сизге кечгинлик бергени кибик, сиз да алай кечгинлик беригиз. ¹⁴ Барындан да бег’а сюймекликни кийигиз; нек десегиз сюймеклик толу бирликни тапдыргъан байламлылыкъды. ¹⁵ Сизни жюреклеригизде Аллахны ырахатлыгъы бийлик этсин. Сиз да, бир чархны санлары болуп, ол ырахатлыкъгъа чакъырылгъансыз. Шукур этиучюле болугъуз. ¹⁶ Масихни сёзю сизде битеу байлыгъы бла жерлешсин. Хар тюрлю акъылманлыкъ бла бир-биригизни юйретип акъыл беригиз. Зикирле, гимнле эмда Сыйлы Нюр учундургъан назмула айта, жюреклеригизде Раббийге шукур этип зикир айтыгъыз. ¹⁷ Эм сёз бла неда иш бла сиз не эте эсегиз да, барын да Раббий Масих Иссаны аты бла, Аны юсю бла Аллах Атагъа шукур этип тындырыгъыз. ¹⁸ Къатынла, Раббийникилеге ушагъылы болгъаны кибик, эрлеригизге бойсунугъуз. ¹⁹ Эрле, къатынларыгъызны сюйюгюз эм алагъа къаты болмагъыз. ²⁰ Сабийле, ата-аналарыгъызны хар не жаны бла да айтханларын этиучюле болугъуз, нек десегиз мынга Раббий бек ыразыды. ²¹ Атала, сабийлеригизни инжитмегиз, аланы жюреклери сууумасынла. ²² Къулла, дуниядагъы бийлеригизге хар не жаны бла да бойсунугъуз. Адамлагъа кёзбау этиучюлеча, жаланда иги жумушчула кибик кёрюнюу бла угъай, алай а таза жюрекден, Аллахдан къоркъуп этигиз. ²³ Эм хар этген затыгъызны, адамлагъа этгенча угъай, Раббийге этгенча, кёлюгюз бла этигиз. ²⁴ Раббий сизге сакълагъан саугъаны аллыгъыгъызны эсигизде тутугъуз, нек десегиз сиз Раббий Масиххе къуллукъ этесиз. ²⁵ Терс этген адам а, кесини терслигине кёре тийишлисин алыр, Аллахда бет этип къарау жокъду.

¹ Бийле, сизни да кёкледе Бийигиз болгъанын билип, къулларыгъызгъа тюзлюк бла эм тенглик бла къарагъыз. ² Тилек этиуде тохтаусуз болугъуз, сагъайып туругъуз, хар заманда да шукур этигиз. ³ Аны кибик, биз Аллахны сёзюн жайып, мен аны ючюн тутмакъ болгъан Масихни тасхасын билдирир ючюн, Аллах бизге эшик ачсын деп, бизни ючюн да тилек этигиз. ⁴ Мен аны кереклисича билдирип, ачыкъ этер ючюн тилек этигиз. ⁵ Замандан тап хайырланып, ийнанмагъан адамла бла тюбешгенде, акъыллылыкъ кёргюзтюгюз. ⁶ Сизни сёзюгюз туз бла жарашдырылгъанча хар заманда да шафауат бла болсун; алай бла сиз хар кимге да къалай жууап этеригизни билирсиз. ⁷ Раббийни жолунда иш нёгер эм ышаннгылы къуллукъ этген сюйюлюннген къарындаш Тихик, мени юсюмден барын да сизге айтыр. ⁸ Аны уа мен сизге, ол сизни халыгъызны билир эм сизни жюреклеригизни жапсарыр ючюн иеме. ⁹ Аны бла бирге, сизден болгъан бизни сюйюлюннген ышаннгылы къарындашыбыз Онисимни да иеме. Битеу мындагъы болумланы юсюнден ала сизге айтырла. ¹⁰ Мени бла бирге тутмакъда болгъан Аристарх эмда Барнабаны жууугъу Марк сизге салам айтадыла. Маркны юсюнден мен сизге билдирген эдим. Ол сизге келсе, аны къабыл этигиз. ¹¹ Иуст аталгъан Исса да сизге салам айтады. Ала экиси да сюннетлиледендиле. Мени жапсарып, Аллахны Патчахлыгъы ючюн уруннган нёгерлерим жангыз аладыла. ¹² Масих Иссаны къулу, сиз тамамлы болур ючюн эм Аллахны ыразы этген хар затдан толур ючюн, сизни ючюн хар заманда да тилек этип кюрешиучю сизни Эпафрас сизге салам айтады. ¹³ Сизни ючюн эм Лаодикияда бла Иераполда болгъанла ючюн аны уллу эришип къайгъырыуу болгъанына мен шагъатлыкъ этеме. ¹⁴ Сюйюлюннген дохтур Лука эмда Димас сизге салам айтадыла. ¹⁵ Лаодикиядагъы къарындашлагъа эм Нимфагъа эм аны юйдеги жамауатына салам айтыгъыз. ¹⁶ Мени бу жазып ийгеним, сизде окъулгъандан сора, ол Лаодикияны жамауатында да окъулурну къайгъысын этигиз; Лаодикиядан келгенни уа сиз да окъугъуз. ¹⁷ Архипге: сен Раббийни жолунда алгъан къуллугъунгу толтурургъа сакъ бол деп айтыгъыз. ¹⁸ Мен – Пауул – къолум бла салам жазама. Мени тутмакълыгъымы эсигизде тутугъуз. Аллахны шафауаты сизни барыгъыз бла да болсун. Амин.