2 ТИМОТЕЙГЕ

¹ Масих Иссада болгъан, ант бла берилген жашаугъа кёре, Аллахны буйругъу бла Масих Иссаны абустолу мен Пауулдан ² Сюйюлюннген уланым Тимотейге салам! Аллах Атадан эм Раббийибиз Масих Иссадан санга шафауат, мархамат, ырахатлыкъ болсун. ³ Кече да, кюн да тилеклеримде дайым сени эсиме келтирип, ата-бабаларымча, таза жюрек бла мен Анга къуллукъ этген Аллахха шукур этеме. ⁴ Сени жилямукъларынгы эсиме тюшюрген заманымда, мен, къууанчдан толур ючюн, сени кёрюрге термилеме. ⁵ Сени кёзбаусуз ийманынгы эсиме тюшюреме; ол алгъын сени къарт ананг Лоидада эм кеси ананг Эвникеде болгъан бирча ийманны сенде да болгъанына толу ийнанама. ⁶ Ол себепден мен сени юсюнге къолларымы салгъанда, Аллахны санга берген саугъасын къыздырыргъа сени эсинге салама. ⁷ Нек десенг Аллах бизге къоркъакълыкъны нюрюн тюйюл, алай а къудуретни эм сюймекликни эмда тыйгъылылыкъны нюрюн бергенди. ⁸ Алай бла Раббийибиз Масих Иссагъа шагъатлыкъ этмекден, не Аны ючюн тутмакъ болгъан менден ыйлыкъсынма; алай а Аллахны кючюне ышанып Масихни Хайыр Хапарын жайыуда мени бла бирге азап чек. ⁹ Аллах, бизни ишлерибизге кёре тюйюл, Кесини муратына эм шафауатына кёре бизни къутхарып, сыйлы жашаугъа чакъыргъанды. Ол шафауат бизге Масих Иссада ёмюрледен да алгъын берилгенди, ¹⁰ Алай а энди Аны келгени бла ачыкъ этилгенди. Бизни Къутхарыучубуз Масих Исса ёлюмню жокъ этгенди. Ол, Хайыр Хапарны юсю бла, жашауну эм ёлюмсюзлюкню кёргюзтгенди. ¹¹ Мен бу Хайыр Хапарны миллетлеге билдириучю абустол эм устаз болургъа сайланнганма. ¹² Аны себепли къыйналама мен былай; алай а ыйлыкъсынмайма. Нек десенг мен билеме Кимге ийнаннганымы эм Ол манга ышанып бергенин ол Кюннге сакъларгъа Аны кючю болгъанына толу ийнанама. ¹³ Ийман бла эм Масих Иссада болгъан сюймеклик бла сен менден эшитген тюз сёзлени юлгюсюн тут. ¹⁴ Санга ышанып берилген огъурлу окъууну бизде жашагъан Сыйлы Нюрню болушлугъу бла сакъла! ¹⁵ Битеу асиячыла мени атып къойгъанларын сен билесе, Фигел бла Эрмоген да ала бла бирге. ¹⁶ Онисифорну юйюрюне Раббий ахшылыкъ берсин; ол мени кёп кере тынчайтханды эм мени тутмакълыгъымдан ыйлыкъсынмагъанды. ¹⁷ Ол Римде болгъан заманында мени уллу къадалып излеп тапханды. ¹⁸ Раббий Кесини келген кюнюнде анга мархамат этсин. Ол манга Эфесде къаллай бир болушханын а сен иги билесе.

¹ Алай бла, жашым, Масих Иссада болгъан шафауат бла кючлю бол. ² Эм кёп шагъатланы къатында менден эшитгенинги башхаланы да юйретирге болаллыкъ ышаннгылы адамлагъа аманат эт. ³ Алай бла, Масих Иссаны ахшы аскерчисича, мени бла бирге азиятлыкъ чегиуге тёз. ⁴ Бир аскерчи да кесин граждан ишле бла байламайды, кесини командирин ыразы этерге къадалып кюрешеди. ⁵ Спортсмен да эришиуню жорукъларын буза эсе, саугъа аллыкъ тюйюлдю. ⁶ Жерге уруннган адам жыйылгъан тирликден юлюшюн биринчи болуп алыргъа керекди. ⁷ Мен не айтханымы эсле. Раббий санга хар не жаны бла да ангылаулукъ берсин. ⁸ Мен Хайыр Хапарда ачыкълагъанымча, Дауутну урлугъундан болгъан, ёлгенледен тиргизилген Масих Иссаны хар заманда эсингде тут. ⁹ Ол Хайыр Хапар ючюн а мен аманлыкъчы кибик тутмакълыкъгъа дери окъуна азап чегеме. Алай а Аллахны сёзюне тутмакълыкъ жокъду. ¹⁰ Ол себепден Аллах сайлагъанла, Масих Исса алагъа берлик къутхарыуну эм ёмюрлюк махтауну алсынла деп, ала ючюн хар неге да тёземе. ¹¹ Бу сёз ышаннгылыды: биз Аны бла ёлген эсек, сора Аны бла жашарыкъбыз. ¹² Тёзе эсек, Аны бла патчахлыкъ этерикбиз; Аны инкяр этсег’а, Ол да бизни инкяр этерикди. ¹³ Биз ышаннгылы тюйюл эсек да, Ол а ышаннгылыды; нек десенг Кесин инкяр эталлыкъ тюйюлдю. ¹⁴ Муну ийманлыланы эслерине сал, сёзлени юсюнден даулаш чыгъармазгъа Раббийни аллында аладан къаты тиле. Ол затдан а не аз да файда келмейди, тынгылагъанланы жюреклерин бузады ансы. ¹⁵ Хакъ керти сёзню тюз юйретип, кесинги Аллахха тийишли, ыйлыгъыр бир заты да болмагъан ишлеучюча тапдырыргъа кюреш. ¹⁶ Жараусуз бош сёзледен а узакъ бол; нек десенг ала аллахсызлыкъда дагъыда бек жетишимли боллукъдула, ¹⁷ Аланы сёзлери да рак кибик жайыллыкъды. Именей бла Филит да аллайладыла. ¹⁸ Ала, тиргизилиу болуп бошагъанды деп, хакъ кертиден тайгъандыла эмда бир къауумланы ийманларын бузадыла. ¹⁹ Алай а Аллахны къаты мурдору бек турады. Аны юсюнде: «Раббий Кесиникилени биледи» эм: «Раббийни атына ийнанып шагъатлыкъ этген хар адам аманлыкъдан артха турсун», – деп жазылгъан мухур барды. ²⁰ Уллу юйде уа, алтын бла кюмюш сауутладан сора да, агъач эм къошун сауутла да бардыла; аланы бирлери ыспаслы жюрютюуде, башхалары уа ыспассыз жюрютюудедиле. ²¹ Алай бла адам кесин аманлыкъларындан тазалагъан эсе, ол, ыспаслы жюрютюлюрча, сыйлы, бийине жараулу эмда хар тюрлю ахшы ишге хазыр сауут боллукъду. ²² Жаш адамлада болуучу кюсеуледен къачып къутул, алай а Раббийни таза жюрекден чакъыргъанланы барысы бла бирге тюзлюкню, ийманны, сюймекликни, жарашыулукъну тут. ²³ Ангылаусуз эм жахил даулашыулагъа къатышма, ала къаугъала туудургъанларын сен билесе. ²⁴ Раббийни къулуна уа къаугъачы болургъа жарамайды, алай а барына да жумушакъ, юйретирге билген, тёзюмлю болургъа, ²⁵ Къажау тургъанланы сабырлыкъ бла тюшюндюрюрге керекди, тобагъа къайтышып, хакъ кертини билирге Аллах алагъа онг берир эсе уа деп. ²⁶ Эмда аланы кесини эркинлигинде тутхан ибилисни тузагъындан ала азат болур эселе уа деп.

¹ Ахыр кюнледе къыйын заманла келлигин бил. ² Нек десенг адамла, кеслерин бек сюйюучюле, ахчаны сюйюучюле, махтанчакъла, ёхтемле, аман сёзчюле, ата-аналарына бойсунмаучула, игиликни билмегенле, Аллахха хурмет этмеучюле, сюймекликлери болмагъанла, ³ Жарашмаучула, тилчиле, тыйгъысызла, кюйсюз къатыла, ахшылыкъны сюймеучюле, ⁴ Сатлыкъла, оюмсузла, кётенлиле, Аллахны сюйгенден эсе да бек, нафысына берилиуню сюйюучюле, ⁵ Кеслерин Аллахны жолунда жюрюгенле кибик кёргюзтюп, ол жолну кючюн а инкяр этгенле боллукъдула. Аллай адамладан узакъ бол. ⁶ Юйлеге жашыртын кирип, гюняхларында батып тургъан, тюрлю кюсеулери бла жюрюген, ⁷ Хар заманда окъугъан эм бир заманда да хакъ кертини билиуге жеталмагъан зайиф тиширыуланы алдагъанла да аладандыла. ⁸ Яннис бла Ямбрис Мусагъа къажау болгъанлары кибик, бу адамла да хакъ кертиге къажау турадыла. Аланы акъыллары бузукъ болгъанды, ала ийманда сыналыугъа чыдаялмагъанладыла. ⁹ Алай а была кёпге жетиширик тюйюлдюле; нек десенг Яннисни бла Ямбрисни болгъаны кибик быланы да акъылсызлыкълары барыны да аллында ачыкъ боллукъду. ¹⁰ Сен а юйретиуюмю, жашаууму, муратымы, ийманымы, тёзюмлюлюгюмю, сюймеклигими, ¹¹ Сынагъан зулмулукъларымы эм къыйынлыкъларымы, Антиохияда, Иконияда, Листрада башыма келген къыйынлыкъланы кёрюп тургъанса. Мен къаллай зулмулукъла сынагъан эсем да, Раббий мени аланы барындан да къутхаргъанды. ¹² Алай а, Аллахны жолунда жюрюп, Масих Иссагъа ийнаныуларына кёре жашаргъа сюйгенле бары да зулмулукъ сынарыкъдыла. ¹³ Огъурсуз адамла бла терсине юйретиучюле уа ажашдыра эм ажаша, амандан аман бола барлыкъдыла. ¹⁴ Сен а юйреннген эмда толу ийнаннган затларынга тюз къал, нек десенг быланы кимден юйреннгенинги билесе. ¹⁵ Андан сора да сен сабийлигингден окъуна Сыйлы Китапланы билесе. Ала уа Масих Иссагъа ийнаныуунг бла сени терен акъыллы этип къутхарылыугъа жетдираллыкъдыла. ¹⁶ Битеу Сыйлы Китапла Аллахдан илхам алгъандыла эм юйретиуге, айыплаугъа, тюзетиуге, тюзлюклюлюкге тюшюндюрюуге хайырлыдыла. ¹⁷ Быланы юсю бла Аллахны адамы хар ахшы ишге хазыр болуп тамамлы болады.

¹ Алай бла Аллахны аллында эм Кесини келген заманында Кесини Патчахлыгъында, саулагъа да, ёлгенлеге да сюд этерик Раббийибиз Масих Иссаны аллында санга буюрама: ² Аллахны сёзюн билдир, заманында да, замансыз да бу ишни бардыр, адамланы тёзюмлюлюк бла юйретип айыпла, тый эмда кёллендир. ³ Нек десенг адамла тюз окъууну эшитирге да сюймеген заман келликди. Ала кеслери кюсеген затланы этип, эшитирге сюйген затларын айтырыкъ устазла, чакъырып, алагъа тынгыларыкъдыла ⁴ Эм, хакъ кертиге къулакъ салмай, бош таурухлагъа тынгыларыкъдыла. ⁵ Алай а сен хар не жаны бла да сакъ бол, къыйынлыкълагъа тёз, Хайыр Хапарчылыкъны ишин эт, къуллукъ этиуюнгю толтур. ⁶ Нек десенг мен энди къурман болама, мени бу дуниядан кетер заманым жетгенди. ⁷ Мен ахшы кюрешни бардыргъанма, жолуму бошагъанма, ийманымы сакълагъанма. ⁸ Энди уа манга тюзлюкню тажы хазырланады, аны уа, ол Кюнде манга тюзлюклю Сюдю Раббий берликди эм жаланда манга тюйюл, алай а Аны келирин сюйгенлени барына да. ⁹ Къысха заманда манга келирге кюреш. ¹⁰ Нек десенг Димас, эндиги ёмюрню сюйюп, мени къоюп, Фесалоникагъа кетгенди. Крескент Галатиягъа, Тит Далматиягъа кетгенди. Мени биргеме жангыз Лука къалгъанды. ¹¹ Маркны алып биргенге келтир, нек десенг ол мени къуллукъ этиуюмде манга кёп болушады. ¹² Тихикни мен Эфесге ийгенме. ¹³ Келген заманынгда, мен Троадада Карпны юйюнде къойгъан жамычымы эм китапланы, артыгъыракъ да тери китапланы келтир. ¹⁴ Багъырчы Аскендир манга кёп заран этгенди. Раббий анга, этген ишлерине кёре жетишдирир. ¹⁵ Андан сен да кесинги сакъла, нек десенг ол бизни сёзлерибизге бек къажаулукъ этгенди. ¹⁶ Мен сюдде берген биринчи жууабымда мени бир киши да жакъламагъанды, алай а бары да мени къоюп кетгендиле. Аны ючюн аланы боюнларына гюнях салынмасын! ¹⁷ Алай а, Хайыр Хапар мени юсюм бла толусунлай билдирилир ючюн эм аны битеу миллетле эшитир ючюн, Раббий, къатымда туруп, мени кючлендиргенди, мен да асланны жаякъларындан къутулгъанма. ¹⁸ Раббий мени хар аман ишден да къутхарлыкъды эм Кесини Кёкдеги Патчахлыгъына сакъларыкъды. Анга махтау ёмюрледен ёмюрлеге болсун. Амин. ¹⁹ Прискилагъа бла Акилагъа эм Онисифорну юйюрюне салам айт. ²⁰ Эраст Коринфде къалгъанды, Трофимни уа, ауруп тургъанлай, Милитде къойгъанма. ²¹ Къыш тюшгюнчю, келирге кюреш. Эбул, Пуд, Лин, Клаудия эм битеу къарындашла санга салам айтадыла. ²² Раббий Масих Исса сени нюрюнг бла болсун. Аллахны шафауаты сизни бла болсун. Амин.