2 ФЕСАЛОНИКАЧЫЛАГЪА

¹ Пауулдан, Силуандан эм Тимотейден, Атабыз Аллахны эм Раббий Масих Иссаны Фесалоникадагъы жамауатына салам! ² Атабыз Аллахдан эм Раббийибиз Масих Иссадан сизге шафауат эм ырахатлыкъ болсун. ³ Къарындашла, биз дайым сизни ючюн Аллахха тийишлисича шукур этерге керекбиз; нек десегиз сизни ийманыгъыз ёседи эм хар биригизде бир-биригизни сюймеклик сизни барыгъызны да арагъызда кёп болады. ⁴ Алай бла, биз кесибиз Аллахны жамауатларында сизни бла махтанабыз, сиз сынагъан битеу зулмулукълада эм къайгъылада сизни тёзюмюгюз бла эм ийманыгъыз бла махтанабыз. ⁵ Бу Аллахны тюзлюклю хукмусуну илишаныды. Ахырында, сиз аны ючюн азап чекген Аллахны Патчахлыгъына тийишли болурсуз. ⁶ Нек десегиз сизге азап бергенлеге азап бериу, ⁷ Азап чекген сизге уа бизни бла бирге ырахатлыкъ бериу Аллахны аллында тюз ишди. Бу Раббий Иссаны къудуретли мёлеклери бла кёкден келген заманында боллукъду. ⁸ Ол Аллахны билмегенлеге эм Раббийибиз Масих Иссаны Хайыр Хапарына бойсунмагъанлагъа жаннган отда жаза берликди. ⁹ Ала къыямат кюн Раббийни бетинден эм Аны махтаулу къудуретинден узакъда, ёмюрлюк жоюлуу азапха тюшерикдиле. ¹⁰ Быланы бары да Раббий Кесини сыйлы халкъында махтаулу болургъа эмда битеу ийманлыларын сейирсиндирирге келген кюнюнде боллукъду. Сиз а ийманлыласыз; нек десегиз бизни шагъатлыгъыбызгъа ийнаннгансыз. ¹¹ Ол себепден сизни ючюн хар заманда да тилек этебиз; Аллахыбыз сизни чакъырылыуугъузгъа тийишли кёрсюн эм ахшылыкъ этерге хар ниетигизни эм иймандан келген ишигизни Кесини къудурети бла тамам этсин деп тилейбиз. ¹² Раббийибиз Масих Иссаны аты сизде махтаулу болсун, сиз да Аллахыбызны эм Раббийибиз Масих Иссаны шафауаты бла Раббий Иссада махтаулу болугъуз деп тилек этебиз.

¹ Сизден тилейбиз, къарындашла, бизни Раббийибиз Масих Исса бизни Кесини биргесине алыргъа келлигине ишек болмагъыз. ² Раббийни кюню келгенди деп айтхан бир нюр, бир хапар, неда биз жазып ийген кибик жазып ийилген сизни акъылыгъызны чыртда тентиретмесин эмда жунчутмасын. ³ Сизни бир киши да бир да терилтмесин; нек десегиз, алгъы бурун иймандан тайыу болгъунчу эм ол гюняхлы адам – жоюлургъа сюд этилген адам – ачыкъ болгъунчу, ол кюн келлик тюйюлдю, ⁴ Ол адам а аллах аталгъан, неда адамла табыннган хар затха къажау турлукъду эм барындан да кесин уллугъа санарыкъды, алай бла ол, кесин Аллах сундуруп, Аллах кибик, Аллахны табыныучу юйюнде олтурлукъду. ⁵ Мен алгъын сизде болгъан заманымда бу затланы сизге айтханым сизни эсигизде тюйюлмюдю? ⁶ Заманында ачыкъ этиллик бу адамны энди не тыйып тургъанын сиз билесиз. ⁷ Нек десегиз законсузлукъну жашыртын кючю энди бардырылады, алай а энди аны тыйып тургъан ортадан алыннгынчы тыйып турлукъду. ⁸ Сора ол заманда законсузлукъчу ачыллыкъды, аны уа Раббий Исса Кесини ауузуну солууу бла ёлтюрлюкдю эм Кесини келгенини кёрюнюую бла жокъ этерикди. ⁹ Законсузлукъчуну келлиги шайтанны ишиди. Ол, хар тюрлю жалгъан къудуретле, илишанла, сейирликле кёргюзтюп, жоюла тургъанланы алдагъан хар тюрлю аманлыкъ бла келликди. ¹⁰ Хакъ кертини сюерге эмда аны юсю бла къутхарылыу алыргъа унамагъанла жоюллукъдула. ¹¹ Ол себепден Аллах аланы ажашыргъа эм ётюрюкге ийнаныргъа бошлап къоярыкъды. ¹² Алай бла, хакъ кертиге ийнанмай, ётюрюкню сюйгенлени барына да сюд этилликди. ¹³ Биз а хар заманда сизни ючюн Аллахха шукур этерге керекбиз, Раббий сюйген къарындашла; нек десегиз Аллах сизни, Нюр бла сыйлы болууугъузну эм хакъ кертиге ийнаныуугъузну юсю бла, къутхарыргъа алгъындан сайлагъанды . ¹⁴ Сиз Раббийибиз Масих Иссаны махтаууна жетер ючюн, бизни сизге Хайыр Хапарны билдириуюбюз бла ол къутхарылыугъа сизни чакъыргъанды. ¹⁵ Алай бла, къарындашла, къаты туругъуз эм сиз не сёз бла, неда бизни жазып ийгенибиз бла юйреннген окъууугъузну тутугъуз. ¹⁶ Бизни Раббийибиз Масих Исса Кеси эм бизни сюйюп шафауаты бла ёмюрлюк жапсарылыуну эмда ахшы умутну берген бизни Атабыз Аллах, ¹⁷ Сизни жюреклеригизни жапсарсын эм хар ахшы сёзде эм ахшы ишде бегимли этсин.

¹ Алай бла бизни ючюн тилек этигиз, къарындашла. Раббийни сёзю сиздеча жайылсын эмда махтаулу болсун деп ² Эмда биз аман эм хыйлачы адамладан къутулайыкъ деп тилек этигиз; нек десегиз ийман барында тюйюлдю. ³ Алай а, сизни бегимли этерик эм ибилисден сакъларыкъ Раббий ышаннгылыды. ⁴ Биз сизге буюргъанны сиз толтургъаныгъызгъа эм толтурлугъугъузгъа бизни Раббийден сизге ышаныуубуз барды. ⁵ Раббий а сизни жюреклеригизни Аллахны сюймеклигине эм Масихни тёзюмюне бурсун. ⁶ Раббийибиз Масих Иссаны аты бла, къарындашла, сизге фарыз этебиз, сиз бизден эшитген юйрениуню тутмай, ишлемей бош айланнган хар къарындашдан узакъ болугъуз. ⁷ Сиз бизге къалай эниклерге керегигизни кесигиз билесиз; нек десегиз биз сизде болгъаныбызда, ишлемей бош айланнганла тюйюл эдик. ⁸ Биреуде да алайлай ётмек ашамагъанбыз, алай а, сизден биригизни да къыйнамаз ючюн, иш бла эм урунуу бла кече да, кюн да кюрешгенбиз. ⁹ Аны уа бизни эркинлигибиз болмагъандан этмегенбиз, алай а сиз бизге эниклер ючюн кесибизни сизге юлгюге берирге этгенбиз. ¹⁰ Нек десегиз биз сизде болгъан заманыбызда, сизге: «Ишлерге сюймеген адам ашамасын», – деген фарызны берген эдик. ¹¹ Алай а сизде бир къауумла бош айланадыла, бир жерде да ишлемейдиле эмда башхаланы ишлерине бурунларын сугъадыла деп эшитебиз. ¹² Аллайлагъа биз Раббийибиз Масих Иссаны аты бла айтабыз, ала, дауурсуз ишлеп, кеслерини къыйынларын ашасынла деп буюрабыз. ¹³ Сиз а, къарындашла, ахшылыкъ этиуден безмегиз. ¹⁴ Бу жазып ийгенибизде бизни сёзюбюзге тынгыламагъан ким болсада, аны эсге алып къоюгъуз эм аны уялтыр ючюн аны бла шуёхлукъ жюрютмегиз. ¹⁵ Аны душманнга уа санамагъыз, алай а къарындашхача акъыл юйретигиз. ¹⁶ Ырахатлыкъ бериучю Раббий а Кеси хар заманда да, хар не жаны бла да сизге ырахатлыкъ берсин. Раббий сизни барыгъыз бла да болсун! ¹⁷ Мен Пауул кеси къолум бла салам бериуюм хар жазып ийгенимде да белгиге жюрюйдю. Мен былай жазама: ¹⁸ Раббийибиз Масих Иссаны шафауаты сизни барыгъыз бла да болсун. Амин.