2 ПЕТЕР

¹ Масих Иссаны къулу эм абустолу болгъан мен Шимон Петерден, бизни Аллахыбыз эм Къутхарыучубуз Масих Иссаны тюзлюгю бла бизни бла бирча багъалы ийманны алгъанлагъа салам болсун! ² Аллахны эм бизни Раббийибиз Иссаны билиу бла сизге шафауат эм ырахатлыкъ кёп болсун. ³ Кеси махтауу бла эм ахшылыгъы бла бизни чакъыргъан Аллахны кючю, Аны таныгъаныбыз себепли, бизге жашаугъа бла Аллахны жолунда жюрюуге керекли хар затны бергенди. ⁴ Аланы хайырындан а, бизге бек уллу эм багъалы ант сёзле берилгендиле; алай бла сиз, бу дунияны бийлеп тургъан тыйгъычсызлыкъ бла бет жоюудан кери болуп, ол ант сёзлени юсю бла Аллахны табийгъатына къошулурсуз. ⁵ Ол себепден сиз, мынга битеу кёлюгюзню салып, ийманыгъызда ахшылыкъ этиуню, ахшылыкъ этиуде оюмлулукъну, ⁶ Оюмлулукъда кесигизни тыйыуну, кесигизни тыйыуда тёзюмлюкню, тёзюмлюкде Аллахны жолуна тюзлюкню, ⁷ Тюзлюкде къарындаш сюйюуню, къарындаш сюйюуде сюймекликни кёргюзтюгюз. ⁸ Была сизде бар эселе эм кёп бола эселе, Раббийибиз Масих Иссаны билиуден жетишимсиз эм хайырсыз къаллыкъ тюйюлсюз. ⁹ Кимде была жокъ эселе уа, ол узакъ кёрмеген сокъурду, кесини алгъыннгы гюняхларындан тазаланнганын унутханды. ¹⁰ Ол себепден, къарындашла, чакъырылыуугъузну эм сайланыуугъузну къаты этерге бекден-бек кюрешигиз. Алай этсегиз, бир заманда да тентиремезсиз. ¹¹ Нек десегиз бизни Раббийибиз эм Къутхарыучубуз Масих Иссаны ёмюрлюк Патчахлыгъына эркин эшик сизге алай ачыллыкъды. ¹² Аны ючюн сиз бу затланы биле эсегиз да эм сизде болгъан хакъ керти бла бегимли болгъан эсегиз да, мен сизге аланы эсгертиумю бир заманда да къоярыкъ тюйюлме. ¹³ Бу чархымда болгъан кезиуюмде сизни эсгертиу бла сагъайтыуну тюз кёреме. ¹⁴ Бизни Раббийибиз Масих Исса манга ачыкъ этгени кибик, къысха заманда мен бу дуниядан кетеригими билеме. ¹⁵ Мен бу дуниядан кетгенден сора да, сиз ол затланы хар заманда эсигизде тутар ючюн, энди кюреширикме. ¹⁶ Нек десегиз биз сизге бизни Раббийибиз Масих Иссаны кючюн эм келлигин, ушатылып айтылгъан ётюрюк таурухланы ызындан барып билдирмегенбиз, алай а Аны уллулугъун кеси кёзюбюз бла кёрюп билдиргенбиз. ¹⁷ Нек десегиз уллу эм махтаулу Аллахдан Анга: «Бу Мени ыразылыгъым Анда болгъан, Мени Сюйюлюннген Уланымды», – деген ауаз келген заманда, Ол Аллах Атадан хурмет эм махтау алгъанды. ¹⁸ Кёкледен келген бу ауазны биз Аны бла бирге сыйлы тауда болуп эшитгенбиз. ¹⁹ Аны себепли файгъамбарланы сёзлери бизге бегирек да къаты болгъанды; сиз да, жюреклеригизде танг жарып башлагъынчыгъа эм эрттен жулдуз чыкъгъынчыгъа дери, къарангы жерде жарытхан чыракъгъа ушагъан ол сёзлеге эс бёлгенигизни иги этесиз. ²⁰ Китаплада бир файгъамбар сёзю да кеси аллына ангылатылмагъанын хар затдан да алгъа билигиз. ²¹ Нек десегиз бир заманда да файгъамбарлыкъ адамны излеую бла келмегенди, алай а Аллахны сыйлы адамлары аланы Сыйлы Нюр жюрютгени себепли айтхандыла .

¹ Халкъда жалгъан файгъамбарла да болгъандыла, аны кибик сизде да жалгъан устазла боллукъдула; ала уа, аланы сатып алгъан Раббийни къабыл этмей, заранлы ажашдырыучу окъуула чыгъарып, кеслерикеслерине къысха заманда жоюлууну келтирликдиле. ² Аланы бузукъ ишлерини ызындан да кёпле барлыкъдыла эм аланы хаталарындан Аллахны хакъ керти жолуна аман айтыллыкъды. ³ Малкёзлюклеринден кёзбау сёзле айтып, сизден хайырланырыкъдыла. Алагъа сюд эрттеден хазырды, аланы Жоярыкъ да жукълап турмайды. ⁴ Нек десегиз Аллах, гюнях этген мёлеклени да аямай, алай а, жаханимге атып, къарангылыкъда бугъоула бла байлагъан эмда, азап чекдирир ючюн, сюд кюннге сакъларгъа берген эсе, ⁵ Буруннгу дунияны да аямай, аллахсызланы дуниясына суу къыяма айландыргъан заманында тюзлюкню ууазчысы Нухну юйюрю сегиз жанны уа сакълагъан эсе, ⁶ Содомну бла Гомораны шахарларына да, жокъ этерге сюд этип, аланы кюл этип, келлик заманда боллукъ аллахсызлагъа юлгю кёргюзтген эсе, ⁷ Адепсизлик этген адамланы саякълыкъларындан азиятлыкъ чекген тюзлюклю Лутну уа къутхаргъан эсе – ⁸ Нек десегиз бу тюзлюклю, аланы арасында жашап, законсузлукъ ишлени кёрюп эм эшитип тургъан заманында аны тюзлюклю жаны хар кюн сайын къыйналып тургъанды, – ⁹ Сора Раббий, Аны жолунда жюрюгенлени терилиуден къалай къутхарыргъа, тюзлюксюзлени уа, ¹⁰ Бегирек да гюняхлы табийгъатлары кюсеген харам ишлерини ызындан баргъанланы, Раббийни буйругъун сан этмегенлени, бетсизлени, бурушакъыл адамланы, махтаулулагъа аман айтыргъа къоркъмагъанланы, къыямат кюннге, азап берирге къалай сакъларгъа биледи. ¹¹ Мёлекле уа, аладан эсе къарыулары эм кючлери онглу болуп тургъанлай да, Раббийни аллында алагъа аман айтып терслемейдиле. ¹² Алай а бу адамла табийгъат жюрютген, тутулургъа бла союлургъа туугъан, оюмсуз хайыуанла кибик, ангыламагъан затларына аман айта, кеслерини бет жоюулары бла къырылырла. ¹³ Аман ишлери ючюн алагъа тийишлиси жетер. Нек десегиз ала, кюндюзгю кюнде къайнап, жашауну зауукълукъгъа санайдыла; сизге айып эм бедиш келтиредиле, ала сизни бла ашай-иче тургъан заманларында кеслерини алдаулары бла зауукъ этедиле; ¹⁴ Аланы кёз алларында жаланда саякъ тиширыула эмда тохтаусуз гюнях этиу турадыла; ала бегимсиз адамланы терилтедиле; аланы жюреклери жыртхычлыкъны сюйюуге юйреннгенди. Ала налат адамладыла. ¹⁵ Ала, харам ултханы сюйген Беор улу Биламны жолун тутуп, тюз жолну къоюп ажашхандыла. ¹⁶ Алай а Билам кесини законсузлугъундан айып алгъанды: тилсиз эшек, адам ауаз бла сёлешип, файгъамбарны акъылсызлыгъын тыйгъанды. ¹⁷ Ала суусуз къуюла эмда жел сюрюп айландыргъан туманладыла, алагъа ёмюрлюк къарангыны мутхузлугъу хазырланнганды. ¹⁸ Нек десегиз ала махтанчакълыкъ бла бош сёзле айтып, ажашыуда тургъанладан кючден къутулгъанланы гюняхлы табийгъатларыны кюсеулери бла саякълыкъгъа тутадыла; ¹⁹ Алагъа азатлыкъ берирге айтадыла, кеслери уа чиримекликни къулларыдыла. Нек десегиз ким кимге хорлатхан эсе, ол анга къулду. ²⁰ Нек десегиз бизни Раббийибиз эм Къутхарыучубуз Масих Иссаны билиу бла бу дунияны харам ишлеринден къутулуп, дагъыда жангыдан ала бла къатышып, алагъа хорлата эселе уа, аллайлагъа алгъыннгыдан эсе артдагъы аман болады. ²¹ Тюзлюкню жолун билип, алагъа берилген сыйлы фарыздан артха къайтхандан эсе, ол жолну билмеген болсала, алагъа иги болур эди. ²² Алай а алагъа «ит къусханын жалайды, жууулгъан тонгуз да балчыкъда аунаргъа барады» деп, тюз нарт сёзде айтылгъанча болады.

¹ Сюйюлюннгенле, бу энди сизге экинчи кере жазып ийгенимди, ала бла бу ишлени эсигизге тюшюрюп сизни таза акъылыгъызны сагъайтама. ² Сиз, алгъын сыйлы файгъамбарла айтхан сёзлени, сора Раббийни эм Къутхарыучуну, сизге абустолларыгъызны юсю бла берген фарызын эсигизде тутарыгъызны излейме. ³ Неден да алгъа сиз билигиз, ахыр кюнледе кеслерини кюсеулерини ызындан баргъан хыликкя этиучюле чыгъарыкъдыла. ⁴ Ала: «Раббийни келлигине сёз берилгени не болду? Нек десегиз дуния жаратылгъанлы, аталарыбыз ёлюп башлагъандан берисинде, хар зат алайлай тюрленмей турады», – деп хыликкя этерикдиле. ⁵ Алай ойлашханла, башланнганда Аллахны сёзю бла кёкле бар болгъанларын, жер да суудан эм суу бла къуралгъанын биле тургъанлай унутадыла. ⁶ Аны себепли ол замандагъы дуния суу къыямадан жоюлгъанды. ⁷ Эндиги кёкле бла жер а, отха берилир ючюн, Аллахны ол сёзю бла сакъланып, аллахсыз адамлагъа сюд этилир эм аланы жоюлур кюнлерине дери тутулуп турадыла. ⁸ Сюйюлюннгенле, Раббийни бир кюню, минг жыл кибик, минг жылы да бир кюн кибик болгъанын сиз унутургъа керек тюйюлсюз. ⁹ Раббий Кесини берген сёзюн толтурургъа мычымайды, бир къауумла мычыгъаннга санагъанлары кибик; алай а бизге кёп тёзюп турады. Нек десегиз бир адамны да жоюлурун сюймейди, алай а битеу адамланы тобагъа къайтышырларын сюеди. ¹⁰ Раббийни кюню уа, кечегиде гудучу къалай келе эсе, алай келликди. Ол заманда кёкле таууш этип жокъ боллукъдула, табийгъатны затлары уа жанып бузуллукъдула, жер эм аны юсюнде этилген ишле кюерикдиле. ¹¹ Ала бары да алай бузуллукъ эселе, сора сыйлы жашауда эмда Аллахны жолуна тюз болууда къаллайла болургъа керексиз сиз, ¹² Аллахны кюнюню келирин сюйюп сакълап ашыкъдыргъанла? Ол кюнде уа къабындырылгъан кёкле бузуллукъдула эм табийгъатны затлары жанып эририкдиле. ¹³ Алай болгъанлыкъгъа биз, Аллахны сёз бериуюне кёре, алада тюзлюк болуп турлукъ, жангы кёкню бла жангы жерни сакълайбыз. ¹⁴ Алай бла, сюйюлюннгенле, бу затланы сакълагъаныгъызгъа кёре, Аллахны аллына, харамлыкъсызла эм бузукъсузла эмда ырахатлыкъны сюйюучюле болуп барыргъа кюрешигиз. ¹⁵ Эмда сюйюлюннген къарындашыбыз Пауул, анга берилген акъылманлыкъ бла сизге жазгъаны кибик, Раббийибизни кёп тёзюую бизге къутхарылыу алыргъа онг береди. ¹⁶ Бу затланы юсюнден Пауул битеу жазып ийгенлеринде да айтады. Аны жазгъанларында къыйын ангылашыннган жерле бардыла; жахил эм бегимсиз адамла, Сыйлы Китаплада башха жазылгъанланы этгенлери кибик, быланы да терсине буруп кеслери-кеслерине жоюлуу хазырлайдыла. ¹⁷ Ол себепден, сюйюлюннгенле сиз, быланы алгъындан билип, жорукъну тутмагъанланы ажашыуларыны ызындан бармаз ючюн эмда бегимли болгъаныгъыздан таймаз ючюн сакъ болугъуз. ¹⁸ Алай а Раббийибиз эм Къутхарыучубуз Масих Иссаны шафауаты бла эм Аны билиу бла ёсюгюз. Анга уа энди да, ёмюрлюк кюнде да махтау болсун! Амин.