2 КОРИНФЛИЛЕГЕ

¹ Аллахны буйругъу бла Масих Иссаны абустолу болгъан мен Пауулдан эм Тимотей къарындашдан Коринфде болгъан Аллахны жамауатына эмда саулай Ахаяда болгъан битеу сыйлылагъа салам! ² Атабыз Аллахдан эм Раббийибиз Масих Иссадан сизге шафауат эм ырахатлыкъ болсун. ³ Бизни Раббийибиз Масих Иссаны Атасы Аллахха, мархаматлы Атагъа эм хар не жаны бла да жюрек жапсарыучу Аллахха шукур болсун. ⁴ Аллах бизни кесибизни жапсаргъан жапсарыу бла биз хар тюрлю къыйынлыкъда болгъанланы жапсарыргъа болалыр ючюн, Аллах бизни хар тюрлю къыйынлыгъыбызда да жапсарады. ⁵ Ол себепден, Масихни къыйналыулары бизде къалай кёп бола эселе да, Масихни юсю бла жапсарылыуубуз да алай кёп болады. ⁶ Биз къыйынлыкъ сынай эсек да, сиз жапсарылыр эм къутхарылыр ючюн сынайбыз. Къутхарылыуугъуз а биз тёзген къыйналыуланы кётюргенигиз бла болады. ⁷ Бизни сизге ышаныуубуз къатыды. Биз жапсарыла эсек да, сизни жапсарылыуугъуз эм къутхарылыуугъуз ючюн жапсарылабыз ; нек десегиз сиз бизни къыйналыуларыбызгъа къошулгъаныгъыз кибик, жапсарылыуубузгъа да къошулгъаныгъызны билебиз. ⁸ Къарындашла, Асияда бизни башыбызгъа келген къыйынлыкъланы сизге билдирмей къояргъа сюймейбиз; нек десегиз биз чексиз ауур эм кючюбюз жетмеген азият лыкъ кёрген эдик, алай бла сау къалыргъа да умутубуз жокъ эди. ⁹ Алай а ичибизден, ёлюмге сюд этилгенибизни сезген эдик; ол а, биз кесибизге ышанмай, ёлгенлени тиргизиучю Аллахха ышаныр ючюн болгъан эди. ¹⁰ Аллах бизни аллай къаршы ёлюмден къутхаргъанды эм къутхарады эм бизни ючюн сизни да тилек этиуюгюзню хайыры бла, мындан арысында да къутхарлыкъды деп, Аллахха ышанабыз. ¹¹ Алай бла, кёп адамланы тилек этиулерини хайырындан, бизге берилген саугъа ючюн кёпле шукур этерикдиле. ¹² Нек десегиз дунияда, бегирек да сизни арагъызда, биз адам акъылманлыкъ бла тюйюл, Аллахны шафауаты бла, Аллахдан келген тюз жюреклилик бла эм ачыкъ кёллюлюк бла жашагъаныбызгъа бизни жюрегибиз шагъатлыкъ этеди. Эмда муну бла махтанабыз. ¹³ Биз сизге, ол сиз окъуп ангылагъандан башха зат жазмайбыз. Бизни бир жаны бла ангылагъаныгъыз кибик, толусунлай ангыларсыз деп, умут этеме. ¹⁴ Алай бла, бизни Раббийибиз Масих Иссаны кюнюнде биз сизни бла махтаннган кибик, сиз да бизни бла махтанырсыз. ¹⁵ Мен бу ышаныу бла, сизни экинчи кере къууандырыр ючюн, алгъын сизге къайтыргъа, ¹⁶ Сора сизни шахарыгъызны юсю бла Македониягъа озаргъа, Македониядан а дагъыда сизге келирге ниет этеме. Сиз да мени Иудеягъа ашырырсыз. ¹⁷ Былай ниет этип, мен терен ойлашмаймы этгенме? Неда планларымы дуния адамы кибик, бирде «Хау, хау», бирде «Угъай, угъай» депми этеме? ¹⁸ Аллахны ышаннгылылыгъыны хакъына айтама, бизни сёзюбюз сизге бирде «хау», бирде «угъай» болмагъанды. ¹⁹ Нек десегиз Аны юсюнден биз – мен, Силуан эмда Тимотей – сизге билдирген, Аллахны Уланы Масих Исса бирде «хау», бирде «угъай» болмагъанды, алай а Анда жангыз «хау» болгъанды. ²⁰ Нек десегиз Аллахны битеу ант бла берген сёзлери Масих Иссада «хау» болгъанды эм бу себепден Аллахны махтауу ючюн биз Масихни юсю бла Аллахха «амин» деп айтабыз. ²¹ Бизни сизни бла бирге Масихде бегимли этген эм бизни майлагъан а Аллахды; ²² Ол бизге мухур салгъанды эм ышандырыр шартха бизни жюреклерибизге Сыйлы Нюрню жерлешдиргенди. ²³ Аллахны жаныма шагъат этеме, мен эндиге дери Коринфге сизни аяп келмей тургъаныма. ²⁴ Бу уа сизни ийманыгъыз бизни оноуубузда болур ючюн кюрешгенден тюйюлдю; алай а, сиз къууаныр ючюн, биз сизни бла бирге ишлеучю нёгерлебиз. Нек десегиз сиз ийманда къаты турасыз.

¹ Алай бла мен кеси-кесимден энди сизге жаныгъызны къыйнау бла келмезге оюм этгенме. ² Нек десегиз мен сизни жаныгъызны къыйнай эсем, сизден, менден жаны къыйналгъанладан башха, мени къууандырлыкъ кимди? ³ Келгенимде, мени къууандырыргъа керек болгъан адамладан жаным къыйналмаз ючюн, мени жазгъаным ма ол эди. Мени къууанчым сизни барыгъызгъа да къууанч болгъанына ийнанып, сизни барыгъызгъа да ышанама. ⁴ Мен сизни жаныгъызны къыйнар ючюн тюйюл, алай а менде сизни сюймеклик къалай толу болгъанын сиз ангылар ючюн, мен сизге уллу къайгъыдан эм жюрегими такъырлыгъындан кёп жилямукъла бла жазгъан эдим. ⁵ Жанымы къыйнагъан а мени жанымы къыйнамагъанды, алай а, бир жанындан, кётюртюп айтмаз ючюн, сизни барыгъызны да жаныгъызны къыйнагъанды. ⁶ Аллайгъа кёпледен бу айыпха тюбетилгени тамамды. ⁷ Алай бла, аны чексиз мудахлыкъ алмаз ючюн, энди сиз аны кечсегиз эм жапсарсагъыз игиди. ⁸ Ол себепден аны сюйгенигизни энтда кёргюзтюрюгюзню сизден тилейме. ⁹ Нек десегиз мен аны жазгъаным, сиз хар не жаны бла да бойсунамысыз деп, сынап билир ючюн эди. ¹⁰ Сиз а кимни не терслигин кече эсегиз, аны мен да кечеме; нек десегиз мен да, кимни не терслигин кечген эсем да, Масихни аллында сизни ючюн кечгенме. ¹¹ Шайтан бизге заран этмез ючюн алай этгенме; нек десегиз аны аман ниетлери бизге белгисиз тюйюлдюле. ¹² Масихни юсюнден Хайыр Хапарны жаяргъа мен Троадагъа келгенимде, Раббий манга эшик ачхан эди. ¹³ Алай болгъанлыкъгъа, къарындашым Титни анда тапмагъаным себепли, кёлюме ырахатлыкъ тапмагъан эдим, алай а, андагъыла бла саламлашып, Македониягъа кетген эдим. ¹⁴ Алай а, Аллахха шукур, Ол бизни хар заманда да Масихни хорламлы барыуунда жюрютеди эм Аны билиуню ариу ийисин бизни юсюбюз бла хар жерде да жаяды. ¹⁵ Нек десегиз биз, къутхарыла тургъанлада эм жоюла тургъанлада Аллахха Масихни ариу ийисибиз: ¹⁶ Бир къауумлагъа ёлюм келтирген ёлюм ийисбиз, башхаларына уа жашау келтирген жашау ийисбиз. Сора бу ишге ким жетишеди? ¹⁷ Нек десегиз биз, кёплеча, Аллахны сёзюн кесибизге файда болур ючюн жюрютюучюле тюйюлбюз, алай а Аллах ийгенле, Масихникиле болуп, Аллахны аллында таза жюрекден айтабыз.

¹ Биз жангыдан кесибизни махтаргъамы башлайбыз? Огъесе биз, бир къауумлача, сизге неда сизден къабыл кёрген письмола иергеми керекбиз? ² Сиз, бизни жюреклерибизде жазылгъан, битеу адамла билген эм окъугъан письмобузсуз. ³ Сиз Масихни письмосу болгъаныгъызны кёргюзтесиз. Ол письмо уа бизни къуллукъ этиуюбюзню юсю бла шакъы бла угъай, жашау бериучю Аллахны Нюрю бла, таш гыйылагъа тюйюл, эт гыйылагъа, адамланы жюреклерине жазылгъанды. ⁴ Масихни юсю бла бизни Аллахха аллай ышаныуубуз барды. ⁵ Бир затны да кеси жетишимибизге санамайма эмда кесибиз жетишимлибиз демейме, бизни жетишимли этген Аллахды. ⁶ Ол бизни, жазылгъан жорукълагъа тюйюл, Сыйлы Нюрге таяннган Жангы Кесаматны къуллукъчулары болургъа жетишимли этгенди. Жазылгъан жорукъ ёлтюреди, Нюр а жашатады. ⁷ Ташлагъа харфла бла жазылгъан, ёлюм келтирген къуллукъ Таурат, аллай бир аламат болуп, Мусаны бети жалан бир аз заманнга нюр жаннганы ючюн, Израиль улулары аны бетине къараялмагъан эселе, ⁸ Сора Сыйлы Нюрню къуллукъ этиую уа андан да аламат болургъа керек тюйюлмюдю? ⁹ Нек десегиз адамны айыбына тюбетиучю къуллукъ аламат эсе, сора аны ариулагъан къуллукъ а андан кёп да аламатды. ¹⁰ Нек десегиз алгъын аламат болгъан зат, андан сора келгенни чексиз аламатлыгъы бла тенглешдирилгенде, аны аламатлыгъы къалмайды. ¹¹ Ол себепден, кёпге бармагъан зат аламат эсе, дайым тургъан а андан кёп да аламатды. ¹² Аллай ышаныуубуз болуп, биз уллу таукеллик бла сёлешебиз. ¹³ Муса бетине жабыу жабып, Израиль улулары аны кёпге бармагъан аламатлыгъыны ахырын кёрмез ючюн этгени кибик этмейбиз. ¹⁴ Алай а аланы акъыллары сокъур болгъанды. Нек десегиз бюгюннге дери да ала Эски Кесаматны окъугъан заманда, акъылларына ол жабыу жабылыпды; ол жабыуну уа Масих кетереди. ¹⁵ Бюгюннге дери да Мусаны Китабы окъулгъан заманда, жабыу аланы жюреклерине жабылгъанлай турады. ¹⁶ Адам Раббийге къайтышса уа, ол жабыу кетериледи. ¹⁷ Раббий Нюрдю. Раббийни Нюрю къайда эсе, азатлыкъ да андады. ¹⁸ Биз а барыбыз да, кюзгюде кибик, ачыкъ бетли болуп, Раббийни аламатлыгъына къарап, Анга ушаш болур ючюн аламатлыкъны бир даражасындан бир даражасына тюрленебиз; бу да Раббийни Нюрюню юсю бла болады.

¹ Аллахны мархаматындан бизни аллай къуллукъ этиуюбюз болгъаны себепли биз мудах болмайбыз. ² Алай а, таша болгъан айыплы ишлени атып, хыйлалыкъ этерге излемей эм Аллахны сёзюн терсине бурмай, хакъ кертини уа ачып, кесибизни хар адамны жюрегине Аллахны аллында ачыкъ этебиз. ³ Хайыр Хапарыбыз жабылып эсе уа, жоюла тургъанлагъа жабылыпды. ⁴ Кёрюнмеген Аллахны сыфаты болгъан Масихни аламатлыгъыны юсюнден Хайыр Хапарны жарыгъы иймансызланы жарытмаз ючюн, бу ёмюрню аллахы аланы акъылларын сокъур этгенди. ⁵ Биз кесибизни юсюбюзден билдирмейбиз, алай а Масих Иссаны Раббий болгъанын билдиребиз; биз а Исса ючюн сизни къулларыгъызбыз. ⁶ Нек десегиз къарангылыкъны ичинден жарыкъгъа жарытыргъа буйрукъ этген Аллах, Масих Иссаны бетинде Аллахны аламатлыгъын билиуюбюз бла бизни жарыкъландырыр ючюн бизни жюреклерибизни жарытханды. ⁷ Бизде артыгъы бла болгъан кючню бизден тюйюл, Аллахдан келгени билинир ючюн а, ол хазнаны биз топуракъ сауутлада кесибизни чархларыбызда жюрютебиз. ⁸ Биз хар жанындан къыйынлыкъ сынайбыз, алай а жунчумайбыз. Биз тюнгюлюрча халдабыз, алай а тюнгюлмейбиз. ⁹ Биз зулмулукъдабыз, алай а атылып къалмагъанбыз. Аякъ тюпге салынабыз, алай а жоюлмайбыз. ¹⁰ Иссаны жашауу бизни чархыбызда ачыкъ кёрюнюр ючюн, Раббий Иссаны ёлюлюгюн хар заманда чархыбызда жюрютебиз. ¹¹ Ол себепден, бизни ёллюк чархыбызда Иссаны жашауу ачыкъ кёрюнюр ючюн, биз саула Исса ючюн тохтаусуз ёлюмге бериле турабыз. ¹² Мынга кёре, бизде ёлюм, сизде уа жашау жюрюйдю. ¹³ Алай а, Китапда: «Мен ийнаннганма эм аны себепли айтханма», – деп жазылгъаны кибик, ийманны ол нюрю бизде болуп, биз да ийнанабыз эм аны себепли айтабыз. ¹⁴ Нек десегиз Раббий Иссаны тиргизген Аллах Иссаны юсю бла бизни да тиргизиригин эм сизни бла бирге Кесини аллына саллыгъын билебиз. ¹⁵ Быланы бары да сизни ючюндю, алай бла Аллахны шафауаты жайылып, дагъыда кёп адамгъа жетип, Аллахха дагъыда кёп махтау салыныр эм шукур этилир ючюндю. ¹⁶ Ол себепден биз мудах болмайбыз; алай а бизни тыш чархыбыз бузула эсе да, ичибиздеги уа кюнден-кюннге жангырады. ¹⁷ Нек десегиз бизни бир кесек заманнга азчыкъ къыйналгъаныбыз бизге мардасыз кёп ёмюрлюк махтау чыгъарады. ¹⁸ Биз кёрюннген затлагъа тюйюл, кёрюнмегенлеге къарайбыз. Нек десегиз кёрюннген затла бир кезиуге деридиле, кёрюнмегенле уа ёмюрлюкгедиле.

¹ Ол себепден бизни жердеги юйюбюз, бу чархыбыз бузулса, бизни Аллахдан кёкледе мекямыбыз, къол бла ишленмеген ёмюрлюк чархыбыз болгъанын билебиз. ² Энди биз ёмюрлюк чархыбызны киерге асыры сюйгенибизден ахтынып турабыз. ³ Нек десегиз кийинип эсек, къымыжа болуп кёрюнмебиз. ⁴ Биз, бу чархыбызда тургъан заманыбызда, ауур жюк тюбюнде ахтынабыз; нек десегиз тешинирге сюймейбиз, ёллюк чархыбызны ёлюмсюзлюк жутар ючюн кийинирге сюебиз. ⁵ Аллах а бизни ма муну ючюн жаратханды эм ышандырыр шартха бизге Нюрюнден бергенди. ⁶ Алай бла, биз хар заманда да тынч кёллю болабыз эм билгенибизча, чархыбызда жашагъаныбызда, Раббийден узакъдабыз. ⁷ Нек десегиз биз, кёрюу бла тюйюл, ийман бла жюрюйбюз. ⁸ Сора биз тынч кёллю болабыз эм, чархыбыздан чыгъып кетип, Раббий бла жашаргъа сюебиз. ⁹ Ол себепден чархыбызда жашап да, андан чыгъа туруп да, Раббийни ыразы этерге эришип кюрешебиз. ¹⁰ Нек десегиз биз, чархыбызда жашагъан заманыбызда, ахшылыкъ неда аманлыкъ этгенибизге кёре тийишлисин алыр ючюн, хар бирибиз да Масихни сюдюню аллында кёрюнюрге керекбиз. ¹¹ Алай бла, Раббийден къоркъууну не болгъанын ангылап, биз адамланы ийнандырабыз, Аллахха уа биз ачыкъбыз, сизни жюреклеригизге да ачыкъбыз деп умут этеме. ¹² Кесибизни сизге жангыдан махтамайбыз, алай а жюреклери бла тюйюл, тыш сыфатлары бла махтаннганлагъа сизни айтыр затыгъыз болур ючюн, бизни бла махтаныргъа сизге сылтау беребиз. ¹³ Акъылыбыздан чыкъгъан эсек, бу Аллах ючюндю; акъылыбыз башыбызда эсе, бу сизни ючюндю. ¹⁴ Нек десегиз бизни жюрютген Масихни сюймеклигиди. Биреулен битеу адамла ючюн ёлгенди, алай эсе, бары да ёлгендиле деп оюм этгенбиз. ¹⁵ Жашагъанла энди кеслери ючюн жашамай, алай а ала ючюн ёлген эм тиргизилген Масих ючюн жашасынла деп, Масих битеу адамла ючюн ёлгенди. ¹⁶ Ол себепден биз, энди бир кишини да тыш сыфатына кёре танымайбыз. Масихни чархына кёре таныгъан эсек да, энди уа алай танымайбыз. ¹⁷ Мынга кёре, ким Масихде эсе, ол жангы жаратылгъан адамды. Буруннгу озгъанды, энди уа хар неда жангыды. ¹⁸ Бары да Масих Иссаны юсю бла бизни Кеси бла жарашдыргъан эм бизге жарашдырыуну къуллугъун берген Аллахданды. ¹⁹ Нек десегиз Аллах, адамланы гюняхларын аланы боюнларына салмай, Масихни юсю бла дунияны Кеси бла жарашдыргъанды эм бизге жарашдырыу сёзюн аманат этгенди. ²⁰ Ол себепден биз Масихни аты бла келечилебиз, Аллах Кеси буйругъун бизни юсюбюз бла айтып ангылатхан кибик ан гылатады. Масихни аты бла тилейбиз: Аллах бла жарашыгъыз. ²¹ Нек десегиз биз Масихни юсю бла Аллахны аллында тюзлюклю болур ючюн, Аллах гюнях не болгъанын билмеген Масихни бизни гюняхларыбыз ючюн къурман этгенди.

¹ Биз а, Аллах бла бирге урунуучулача, Аллахны шафауатын къабыл этгенигиз бошуна болмасын деп, сизге жалбарабыз. ² Нек десегиз Китапда: «Жараулу заманда Мен сени тилегинги эшитгенме эм къутхарылыу кюнде санга болушханма», – деп айтылгъанды. Ма, энди жараулу заман; ма, энди къутхарылыу кюн. ³ Бизни къуллукъ этиуюбюзге айып салынмаз ючюн, биз бир адамгъа да бир зат бла да тыйгъыч этмейбиз. ⁴ Алай а Аллахха къуллукъ этиучюлеча уллу тёзюмлюлюк бла, къыйынлыкълада, кереклиликледе, тарлыкъ халлада, ⁵ Тюйюлюуледе, тюрмеледе, къозгъалыулада, урунуулада, жукъусуз кечеледе, ораза тутуулада, ⁶ Тазалыкъда, билимде, чыдамлылыкъда, ахшылыкъ этиуде, Сыйлы Нюрде, кёзбаусуз сюймекликде, ⁷ Хакъ керти сёзде, Аллахны кючю бла, онг эм сол къолларыбызда тюзлюкню сауутлары бла, ⁸ Махталыуда эм сансызлыкъда, атыбыз аманнга чыкъгъанда да, ариу кёрюннгенде да, хар не жаны бла да кесибизни юлгюге тутабыз. Бизни алдаучулагъа санайдыла, алай а биз кертичибиз. ⁹ Биз белгили тюйюлбюз, алай а бизни таныйдыла; бизни ёлгенлеге санайдыла, алай а ма, биз саубуз; бизге азап саладыла, алай а биз ёлмейбиз; ¹⁰ Мудах кибик кёрюнебиз, алай а хар заманда да къууанабыз. Жарлыбыз, алай а кёплени бай этебиз. Бир затыбыз да жокъду, алай а барына да иебиз. ¹¹ Коринфлиле, биз сизни бла ачыкъ сёлешдик, сизге жюрегибизни ачдыкъ. ¹² Биз сизден сюймеклигибизни аямайбыз, алай а сиз бизден сюймеклигигизни аяйсыз. ¹³ Сабийлеримеча айтама, бизни бла бирча сиз да жюреклеригизни ачыгъыз. ¹⁴ Иймансызла бла бирге боюнсагъа боюнугъузну салмагъыз. Нек десегиз тюзлюклюлюкню законсузлукъ бла бирге не бирикмеклиги барды? Жарыкъны бла къарангыны арасында не бирлик барды? ¹⁵ Масихни бла Белиярны арасында не кесамат барды? Неда ийманлыны иймансыз бла бирге не иши барды? ¹⁶ Аллахны юйюню идолла бла бирге не келишиую барды? Нек десегиз сиз, жашау берген Аллахны юйюсюз: «Алада мекям салып, араларында жюрюрюкме. Мен аланы Аллахы боллукъма, ала да Мени халкъым боллукъдула, – деп Аллахны айтханы кибик. ¹⁷ Сора ол себепден: „Иймансызланы араларындан чыгъыгъыз эмда аладан айырылыгъыз“ дейди Раббий. „Харам затха тиймегиз, Мен сизни къабыл этерикме ¹⁸ Эмда сизге Ата боллукъма, сиз да Мени уланларым бла къызларым боллукъсуз“ дейди битеу дунияны тутхан Раббий».

¹ Алай бла, сюйюлюннгенле, Аллахны бизде аллай ант сёзлери болгъаны себепли, чархыбызны неда нюрюбюзню харам этген хар бир затдан кесибизни тазалайыкъ эмда Аллахдан къоркъуу бла толусунлай Аллахха берилейик. ² Жюреклеригизде бизге жер беригиз. Биз биреуню да инжитмегенбиз, биреуге да заран этмегенбиз, биреуню да къыйынын ашамагъанбыз. ³ Муну сизге айып салыр ючюн айтмайма; нек десегиз мен сизге алгъын, сиз бизни жюреклерибиздесиз, алай бла сизни бла бирге ёлюрге да, жашаргъа да хазырбыз деген эдим. ⁴ Мен сизге бек ышанама, сизни бла кёп махтанама. Мени жюрегим бек жапсарылгъанды. Бизни битеу бу къыйынлыкъларыбыз болгъанлай да, къууанчдан толума. ⁵ Нек десегиз биз Македониягъа келге нибизде, чархыбыз бир тюрлю тынчлыкъ тапмагъан эди, алай а биз хар жанындан да къысылгъан эдик: тышындан – чабыуулла, ичибизде – къоркъуула бар эдиле. ⁶ Алай а унукъгъанланы жапсарыучу Аллах Титни келгени бла бизни жапсаргъан эди ⁷ Эм жаланда аны келгени бла болуп къалмай, алай а ол, сизни итиниуюгюзню, сизни жилягъаныгъызны, сизни, мени ючюн эришгенигизни хапарын бизге айта, сизни ючюн аны жапсарылыуу бла да жапсарылгъанбыз, алай бла мен дагъыда бек къууаннганма. ⁸ Ол себепден, сизге жазып ийгеним бла сизни мудах этген эсем да, сокъуранмайма, алгъын сокъураннган эсем да; нек десегиз ол жазып ийгеним сизни болсада бир кесек заманнга мудах этгенин кёреме. ⁹ Энди мени къууаннганым, сизни жарсыгъаныгъыз ючюн тюйюлдю, алай а жарсыгъаныгъыз сизни тобагъа къайтышдыргъаны ючюндю; нек десегиз Аллах сюйгенча жарсыгъансыз, алай бла бизден не аз да заран кёрмегенсиз. ¹⁰ Нек десегиз Аллахны буйругъу бла болгъан жарсыу адамда ахыры къутхарылыу болгъан, сокъурандырмагъан тобагъа къайтышыулукъ чыгъарады. Дунияны жарсыуу уа ёлюм чыгъарады. ¹¹ Ма ол, сизни Аллах сюйгенча жарсыгъаныгъыз, къарагъыз сизде къаллай къадалыу, къаллай ариуланыу, къаллай ачыуланыу, къаллай къоркъуу, къаллай итиниу, къаллай эришиу, гюнях этгеннге къаллай айып бериу чыгъаргъанды! Бу ишде хар не жаны бла да сиз кесигизни таза этип кёргюзтгенсиз. ¹² Алай бла, мен сизге жазгъан эсем, сора жаннга тийген адам ючюн эм кёлкъалды болгъан адам ючюн жазмагъанма, алай а сизни къайгъыгъызны этгенибиз Аллахны аллында сизге ачыкъ болур ючюн жазгъанма. ¹³ Ол себепден сизни жапсарылыуугъуз бла биз да жапсарылгъанбыз. Андан да бег’а Титни къууаныуу бла къууаннганбыз; нек десегиз сиз барыгъыз да аны кёлюн ырахат этгенсиз. ¹⁴ Алай бла аны аллында сизни ючюн не бла махтаннган эсем да, айыплы болмагъанма; алай а, бизни сизге айтханларыбызны бары да тюз болгъанлары кибик, Титни аллында да бизни махтаныуубуз тюз болуп чыкъгъанды. ¹⁵ Сиз барыгъыз да аны айтханына тынгылагъаныгъызны, аны къоркъуу бла эм титиреу бла къалай къабыл этгенигизни эсине тюшюргенде, аны жюреги сизге дагъыда бек тартады. ¹⁶ Алай бла мен сизге хар не жаны бла да ышаныргъа болаллыгъыма къууанама.

¹ Къарындашла, Македонияны жамауатларына Аллахны берген шафауатыны юсюнден сизге билдиребиз: ² Ала уллу къыйынлыкъла сынагъан эселе да, аланы чексиз къууанчлары эм асыры жарлылыкълары мардасыз чомартлыкъгъа айланнганды. ³ Нек десегиз ала къарыуларына кёре да, къарыуларындан артыкъ да сюйюп игилик этгенлерине мен шагъатма. ⁴ Ала сыйлылагъа болушур ишге къошулургъа энчи эркинлик алыргъа бизден бек жалбарып тилеген эдиле. ⁵ Эм, жаланда биз умут этген зат бла къалмай, ала кеслери-кеслерин бек алгъа Раббийге, андан сора Аллахны буйругъу бла бизге бергендиле. ⁶ Ол себепден арагъызда бу хайырлы ишни башлагъан Титден аны бошарын тилеген эдик. ⁷ Сиз а ийманда, сёз айтыуда, билимде, хар тюрлю ишге къадалыуда эм сиз бизге кёргюзтген сюймекликде, хар неде да онглу болгъаныгъыз кибик, бу хайырлы ишде да онглу болугъуз. ⁸ Муну уа буйрукъча айтмайма, алай а башхаланы къадалып этгенлери бла сизни сюймеклигигизни таза жюрекден болгъанын сынайма. ⁹ Раббийибиз Масих Иссаны шафауатын сиз билесиз: сиз Аны жарлылыгъы бла бай болур ючюн, Ол, бай болгъанынлай, сизни ючюн жарлы болгъанды. ¹⁰ Муну юсюнден насийхат береме, нек десегиз ол сизге хайырлыды. Сиз а муну энди этип башламагъансыз, алай а муну этерге озгъан жылдан бери окъуна сюе эдигиз. ¹¹ Энди уа бу ишни тамам этигиз; сиз сюйюп муну этерге тилегенигиз кибик, онгугъузгъа кёре тамам этерге кюрешигиз. ¹² Нек десегиз биреу бир ишни сюйюп эте эсе, бу аны къолунда болмагъан затына кёре тюйюл, къолунда болгъан затына кёре къабыл этиледи. ¹³ Башхаланы тынчайтып, сизни уа къыйнаргъа изленмейди, алай а тенглик болур ючюн, ¹⁴ Энди сизни артыгъыгъыз аланы кереклилерин толтургъаны кибик, артда уа аланы артыкълары сизни кереклигизни толтурур ючюндю. ¹⁵ Китапда: «Кёп жыйгъан адамны артыгъы болмагъанды, аз жыйгъанны да кемлиги болмагъанды», – деп жазылгъаны кибик, тенглик болсун. ¹⁶ Сизни ючюн алай кюрешиуню Титни жюрегине салгъан Аллахха шукур болсун! ¹⁷ Тит, жангыз биз тилегенни къабыл этип къалмай, кеси да сизни къайгъыгъызны этгени себепли, сизге кеси сюйюп барады. ¹⁸ Аны биргесине биз дагъыда битеу жамауатлада Хайыр Хапарны жайыу бла махталгъан къарындашны иебиз. ¹⁹ Аны юсюне да ол къарындаш, Раббийни Кесине махтау салыныр ючюн эмда сизни болушургъа хазыр болгъаныгъызны кёргюзтюр ючюн, биз этген бу хайырлы къуллукъда жамауатладан бизни жолоучу нёгерибиз болургъа сайланнганды. ²⁰ Бу уллу саугъагъа жууаплы болуп, бизни этген къуллугъубуздан бизге киши гурушха болмаз ючюн сакъ болабыз. ²¹ Нек десегиз биз ахшылыкъ этерге жаланда Раббийни аллында кюрешип къалмай, алай а адамланы алларында да кюрешебиз. ²² Биз кёп кере, кёп ишлени къадалып этиучюсюн сынагъан, энди уа кеси сизге уллу ышаныуу бла андан да бек, ишге къадалгъан къарындашыбызны да ол эки къарындаш бла бирге иебиз. ²³ Тит а мени жолдашымды эмда сизни арагъызда къуллукъ этиучю нёгеримди, къарындашларыбыз а Масихни махтауу, жамауатланы келечилеридиле. ²⁴ Алай бла сизни сюймеклигигизни эмда биз сизни юсюгюзден тюз махтаннганыбызны шартларын жамауатланы аллында алагъа кёргюзтюгюз.

¹ Сыйлылагъа болушлукъ этиуню юсюнден мени сизге жазар керегим жокъду. ² Нек десегиз мен сизни болушургъа хазыр болгъаныгъызны билеме эм, Ахая былтырдан бери окъуна хазырды деп, Македониячыланы алларында сизни бла махтанама эмда сизни эришиуюгюз кёплеге кёл салдыргъанды. ³ Къарындашланы ийгеним а, бу ишде сизни юсюгюзден мени махтаныуум бош болмай, алай а сиз, мен айтхан кибик, хазыр болуп турур ючюн ⁴ Эмда Македониячыла мени бла келип сизни уа хазыр болмай тургъаныгъызлай тапсала, «сиз» демейме, биз аллай бир ышаныулукъ бла махтаннганлай, айыплы болмаз ючюн эди. ⁵ Ол себепден, сизни айтылып билиннген бу ахшылыгъыгъыз, жасакъ жыйгъанча тюйюл, ахшылыкъча болуп, хазыр болур ючюн къарындашла сизге алгъадан барып кереклисин тындырырларын мен аладан тилерге тийишли кёрген эдим. ⁶ Муну сизге айтама: къызгъанып сепген адам аз орур; чомарт сепген а кёп орур. ⁷ Хар ким, жюреги тартханнга кёре, жаны къыйналмай эм зорлукъ бла болмай берсин; нек десегиз сюйюп бергенни сюеди Аллах. ⁸ Сизни хар заманда, хар не жаны бла да хар затыгъыз эркин болуп, сиз хар ахшы ишге чомарт болуп къошулур ючюн, Аллахны сизге хар игиликни кёп этерге кючю барды, ⁹ Китапда: «Ол саугъала юлешгенди, жарлылагъа бергенди; аны тюзлюгю ёмюрде да турлукъду», – деп жазылгъаны кибик. ¹⁰ Урлукъ себиучюге урлукъ Бериучю эм ашаргъа ётмек Бериучю, сизни сепгенигизге элпеклик берир эм сизни тюзлюгюгюзню хайырын кёп этер. ¹¹ Сиз хар заманда чомарт болур ючюн хар не жаны бла да бай этилесиз. Чомартлыгъыгъыз а бизни юсюбюз бла Аллахха шукур этиу чыгъарады. ¹² Бу къуллукъ этиуню иши жаланда сыйлыланы жарлылыкъларына жарагъан бла къалмай, алай а кёпледен Аллахха кёп шукур этиуле чыгъарады. ¹³ Нек десегиз адамла бу къуллукъ этиуню сынамын кёрюп, сиз Масихни Хайыр Хапарын ачыкъ къабыл этип, анга боюн салгъаныгъыз ючюн эм таза жюрекден алагъа эм барысына этген чомартлыгъыгъыз ючюн Аллахха махтау саладыла. ¹⁴ Сизде Аллахны шафауаты мардасыз болгъаны ючюн, сизни кёрюрге сюйюп, сизни ючюн тилек этедиле. ¹⁵ Аны айтып болмазча саугъасы ючюн Аллахха шукур болсун!

¹ Сизни арагъызда кесим уялчакъ болгъан, алай а сизден узакъда таукел болгъан мен Пауул, Масихни жууашлыгъы бла эм тёзюмлюк этиую бла сизге жалбарама: ² Мен сизге келсем, бизни адам табийгъатларына кёре жашагъанлагъа санагъан бир къауумлагъа, таукеллик бла къатылыкъ этерге этген ниетими этдирмегиз деп, сизден тилейме. ³ Нек десегиз биз, чархыбызда жашай эсек да, чархыбызны табийгъатына кёре къазауат этмейбиз. ⁴ Бизни къазауат этген сауутларыбыз чархны сауутлары тюйюлдюле, алай а алада къалаланы бузаргъа Аллахны кючю барды. Биз ала бла бош фикирлени ⁵ Эмда Аллахны билиуге ёхтемлик бла къажау тургъан хар тыйгъычны къоратабыз эм хар тюрлю ойлашыуну Масиххе бойсундуруп жесир этебиз. ⁶ Сизни Масиххе бойсунууугъуз толу болгъан заманда, хар тюрлю бойсунмаулукъну айыбына тюбетирге хазырбыз. ⁷ Адамны тыш сыфатынамы къарайсыз? Мен Масихникиме деп, кесине толу ийнаннган ол кеси-кесинден, ол Масихники болгъаны кибик, биз да Масихникиле болгъаныбызны ойлашсын. ⁸ Раббий бизге сизни бузаргъа тюйюл, къураргъа берген эркинлик бла, мен андан да бек махтансам да, айыплы боллукъ тюйюл эдим. ⁹ Алай а, мен сизни жазып ийгенлерим бла къоркъутургъа кюрешген сунмагъыз. ¹⁰ Нек десегиз биреу: «Жазып ийгенлеринде ол къатыды эм кючлюдю, кеси болгъан заманда уа къолайсызды эм аны сёзге усталыгъы да жокъду», – деп айтады. ¹¹ Аллай адам, биз кесибиз сизде болмай жазып ийген сёзлерибиз бла къаллай эсек да, кесибиз болгъан заманда ишибиз бла да аллай болгъаныбызны билсин. ¹² Нек десегиз кеслери-кеслерин кёргюзтюрге кюрешгенле бла биз кесибизни келишдирип неда тенглешдирип къараргъа базынмайбыз. Ала кеслерин – кеслери бла ёлчелеп тенглешдириулери бла оюмсузлукъ этедиле. ¹³ Биз а мардасыз махтанырыкъ тюйюлбюз, алай а бизге Аллах буюргъан юлюш бла, сизге да жетер кибик, аллай марда бла махтанырыкъбыз. ¹⁴ Биз, сизге жетмегенле кибик, кесибизни кючюбюзню салып кюрешмейбиз, нек десегиз Масихни Хайыр Хапары бла сизге да жетгенбиз. ¹⁵ Биз, мардабызны билмей, башхаланы урунуулары бла махтанмайбыз, алай а сизни ийманыгъызны ёсюую бла сизни арагъызда ишлер жерибизни дагъыда бек кенгертирге умут этебиз. ¹⁶ Алай бла Хайыр Хапарны сизден да ары жаялырбыз эмда башханы ишлеген жеринде тындырылгъан ишле бла махтаныучу болмазбыз. ¹⁷ Махтаннган а, Раббий бла махтансын. ¹⁸ Нек десегиз махтау тийишли, кеси-кесин махтагъан адам тюйюлдю, алай а Раббий кимни махтай эсе олду.

¹ Эй, сиз мени акъылсызлыгъыма бир кесек тёзсегиз эди уа! Алай а сиз манга тёзген да этесиз! ² Мен сизни ючюн Аллахны эришиую бла эришеме; нек десегиз мен сизден бир эрге, Масиххе сёз тауусдургъанма, сизни Аны аллына таза къызлай тапдырыр ючюн кюрешеме. ³ Алай а, жилян кесини хыйлачылыгъы бла Хауаны терилтгени кибик, сизни да акъылларыгъыз, Масиххе тюз ниетлиликден тайып, бузулурла деп къоркъама. ⁴ Нек десегиз ким болсада биреу, сизге келип, биз сизге билдирмеген башха Иссаны билдирип башласа, неда сиз алгъын ал магъан башха нюр алсагъыз неда сиз къабыл этмеген башха хайыр хапарны къабыл этсегиз, сиз анга бек иги тёзесиз. ⁵ Алай а мен, ол «уллу абустолла» дегенлени къатында мени бир затдан да кемлигим жокъду деп ойлашама: ⁶ Мен сёзге уста тюйюл эсем да, билим бла уа алай тюйюлме. Алай а биз хар жанындан да сизге толу белгилибиз. ⁷ Сизни кётюрюр ючюн, кесими чёкдюрюп, Аллахны Хайыр Хапарын сизге хакъсыз билдиргеним себепли гюняхмы этгенме? ⁸ Мен сизге къуллукъ этер ючюн башха жамауатладан хакъ алып алагъа къоранч салгъанма эм сизде болгъан заманымда, керекли болгъан эсем да, биригизге да жюк болмагъанма. ⁹ Нек десегиз мени кереклими Македониядан келген къарындашла толтургъан эдиле, алай бла мен сизни бир зат бла да къыйнамазгъа кюрешгенме эм кюрешген да этерикме. ¹⁰ Масихни менде болгъан тюзлюгю бла айтайым, Ахаяны жерлеринде бу махтау менден сыйырыллыкъ тюйюлдю. ¹¹ Алай нек этеме? Сизни сюймегенимденми? Сизни къалай сюйгеними Аллах биледи! ¹² Алай а махтаннган затлары бла бизге тенг кёрюнюрге сылтау излегенлеге сылтау бермез ючюн, къалай эте эсем да, алай этерикме. ¹³ Нек десегиз аллай жалгъан абустолла, хыйла ишле этиучюле, Масихни абустолларыны сыфатына киредиле. ¹⁴ Ол а сейир тюйюлдю, нек десегиз шайтан кеси жарыкъны мёлегини сыфатына киреди. ¹⁵ Ол себепден а анга къуллукъ этгенле да, кеслерин тюзлюкге къуллукъ этгенлеча кёргюзтгенлери уллу иш тюйюлдю. Аланы ахырлары уа этген ишлерине кёре боллукъду. ¹⁶ Энтда айтайым: мени ким да акъылсызгъа санамасын; алай тюйюл эсе да, мен да бир кесек махтаныр ючюн, мени акъылсызны къабыл этгенча окъуна къабыл этигиз. ¹⁷ Айтханларымы, Раббийге кёре тюйюл, алай а махтаныргъа былай таукел болуп, акъылсызча айтама. ¹⁸ Кёпле адам табийгъатлары бла махтаннганларына кёре, мен да махтанырыкъма. ¹⁹ Нек десегиз сиз, акъыллы адамла, акъылсызлагъа сюйюп тёзесиз! ²⁰ Сизни къул этгенлеге, къыйыныгъызны ашагъанлагъа, сизни алдагъанлагъа, кеслерин ёрге кётюргенлеге, бетигизге ургъанлагъа сиз тёзесиз. ²¹ Айыпха айтама, анга уа бизни кючюбюз жетмегенди! Биреу бир зат бла махтаныргъа базына эсе уа – акъылсызча айтама! – мен да базынама. ²² Ала чюйютлюлемидиле? Мен да чюйютлюме. Израильчилемидиле? Мен да израильчиме. Ибрахимни урлугъумудула? Мен да алайма. ²³ Масихни жумушчуларымыдыла? Акъылдан чыкъгъанча айтама! Мен а бегирек да. Мен кёбюрек да уруннганма, чексиз тюйюлгенме, кёп кере тюрмеде эм кёп кере ёлюмге къаршы болгъанма. ²⁴ Иудейлиледен манга беш кере отуз тогъуз къамичи уруу берилгенди. ²⁵ Юч кере мени таякъла бла тюйгендиле, бир кере ташла бла тюйгендиле, юч кере кеме батханны сынагъанма, бир кече бла бир кюнню ачыкъ тенгизде ашыргъанма. ²⁶ Кёп кере жолоучулукъ этгенме. Баргъан суулада къоркъуулукълагъа, аманлыкъчыладан къоркъуулукълагъа, кеси миллетимден къоркъуулукълагъа, башха миллетлиледен къоркъуулукълагъа, шахарда къоркъуулукълагъа, къум тюзде къоркъуулукълагъа, тенгизде къоркъуулукълагъа, жалгъан къарындашланы араларында къоркъуулукълагъа тюбегенме. ²⁷ Урунуп бек къыйналгъанма, кёп кере жукъусузлукъ, ачлыкъ эм суусаплыкъ сынагъанма. Кёп кере ашсыз эмда сууукълукъда жаланнгач къалгъанма. ²⁸ Мен сынагъан башха затладан сора да, хар кюнден манга адамла басынып, битеу жамауатланы къайгъысын этеме. ²⁹ Ким къарыусуз болады, аны бла мен да къарыусуз болмагъан? Ким териледи, аны ючюн мен жанмагъан? ³⁰ Мен махтаныргъа керек эсем, къарыусузлугъуму кёргюзтген затла бла махтанырыкъма. ³¹ Раббийибиз Масих Иссаны Атасы ёмюрледе да алгъышлы Аллах биледи мени ётюрюк айтмагъанымы. ³² Дамаскда Арета патчахны область таматасы, мени тутар ючюн, Дамаск шахарны сакълагъанды. Мен а четенни ичинде терезе бла шахарны къабыргъасындан энишге тюшюрюлюп, алай бла аны къолуна тюшмей къутулгъанма.

¹ Махтаннганым хайырлы тюйюл эсе да, махтаныргъа керекме; энди мен Раббийни кёргюзюулерини эм билим ачханларыны юсюнден айтырыкъма. ² Масихни болгъан бир адамны таныйма, ол онтёрт жыл мындан алда – чархы бла болгъан эсе да билмейме, чархсыз болгъан эсе да билмейме, Аллах биледи – ючюнчю кёкге дери кётюрюлгенди. ³ Аллай адамны юсюнден билеме – алай а чархы бламы, огъесе чархсызмы, аны уа билмейме, Аллах биледи – ⁴ Ол жаннетге кётюрюлгенди эм тил бла айтылынмазлыкъ, аланы адамгъа айтыргъа амал болмагъан сёзлени эшитгенди. ⁵ Аллай адам бла махтаныргъа болаллыкъма, кесим бла уа, къарыусузлукъларым бла болмаса, махтанырыкъ тюйюлме. ⁶ Алай а, махтаныргъа сюйсем да, акъылсыз боллукъ тюйюлме, нек десегиз тюзюн айтырыкъма. Алай болсада, бир киши да мени, кёргенинден неда эшитгенинден уллугъа санамаз ючюн, мен кесими тыйып турама. ⁷ Эмда мен эсепсиз уллу билим ачылыула бла ёхтемленмез ючюн, манга чархымда уу тиш – мени къыйнаргъа шайтанны мёлеги – берилгенди. ⁸ Мен, андан къутулур ючюн, юч кере Раббийден тилек этген эдим. ⁹ Алай а Раббий манга: «Санга Мени шафауатым тамамды; нек десенг Мени кючюм къарыусузлукъда толу болады», – деп айтханды. Алай бла, Масихни кючю менде турур ючюн, мен бегирек да сюйюп къарыусузлукъларым бла махтанырыкъма. ¹⁰ Ол себепден, Масих ючюн къарыусузлукълада, жаныма тийиуледе, кереклиликледе, зулмулукълада, тарлыкълада мен тынч кёллюлюк этеме; нек десегиз мен къарыусуз болгъан заманымда, кючлюме. ¹¹ Мен, махтана кетип, акъылсызлыкъгъа жетдим: муну сиз этдиргенсиз манга. Кертиси да мени сиз махтаргъа керек эдигиз; нек десегиз кесим сансыз адам болгъанлыкъгъа, ол «уллу абустолланы» къатында мени бир затдан да кемлигим жокъду. ¹² Абустоллугъуму шартлары сизни аллыгъызда хар тюрлю тёзюмлюлюк бла, илишанла бла, сейирликле бла эм къудуретли ишле бла кёргюзтюлгендиле. ¹³ Ол себепден башха жамауатланы къатында сизни не кемлигигиз барды, жаланда мен кесим сизге жюк болмагъаным тюйюл эсе? Аллай терсликни манга кечигиз! ¹⁴ Ма, мен сизге ючюнчю кере барыргъа хазырма, сизге жюк боллукъ да тюйюлме; нек десегиз мен сизни затыгъызны излемейме, сизни излейме. Сабийле ата-аналарына тюйюл, ата-анала сабийлерине мюлк жыяргъа борчлудула. ¹⁵ Мен сизни жаныгъыз ючюн кеси затымы ыразы болуп жоярыкъма эм кесими аздырлыкъма. Сизни чексиз бек сюйгенимлей, сиз мени аз сюерге къалай болалырсыз? ¹⁶ Сёз ючюн мен кесим сизге жюк болмагъанма, алай а, хыйлачы болуп, сизни хыйлалыкъ бла алдагъанма деп айтайыкъ. ¹⁷ Алай а ол мен сизге ийген адамланы юсю бла, мен сизни бир затыгъыздан да хайырланнганмамы? ¹⁸ Мен, Титден сизге барырын тилеп, аны биргесине да къарындашладан бирин ийген эдим. Тит сизни бир затыгъыздан хайырланнганмыды? Биз бирча нюр бла, бирча жол бла жюрюмегенми эдик? ¹⁹ Алыкъа биз жаланда сизни аллыгъызда кесибизни ариулагъанмы сунасыз? Биз муну, Масихникиле болуп, Аллахны аллында айтабыз. Была бары да, сюйюлюннгенле, сиз ийманда кючленир ючюндюле. ²⁰ Нек десегиз мен сизге келсем, сизни мен жаратмагъанла болуп табарма эм сиз да мени сиз жаратмагъан болуп табарсыз: сизде къаугъала, зарлыкъла, ачыуланыула, даулашыула, сёз этиуле, тилчиликле, ёхтемликле, низамсызлыкъла табарма деп къоркъама. ²¹ Энтда келген заманымда, мени Алла хым мени, сизни аллыгъызда ыйлыкъдырыр эм алгъын гюнях этип, этген харамлыкъларындан, саякълыкъларындан, адепсизликлеринден тобагъа къайтышмагъан кёп адам ючюн мен жиляу этерме деп къоркъама.

¹ Энди сизге ючюнчю кере келеме. Эки неда юч шагъатны айтханлары бла хар сёз бегимли боллукъду. ² Мен сизге алгъындан айтханма эм энтда алгъындан, сизде экинчи кере болгъанымдача айтама, энди уа кесим сизде болмай, алгъын гюнях этгенлеге эм битеу къалгъанлагъа жазама, энди сизге келсем, бир кишини аярыкъ тюйюлме. ³ Менде Масихни айтханына, сиз патауа излейсиз. Ол сизге къарыусуз тюйюлдю, алай а сизде кючлюдю. ⁴ Нек десегиз Ол къарыусузлукъдан къачха керилген эсе да, энди Аллахны кючю бла сауду; аны кибик биз да Масихде къарыусуз эсек да, Аллахны кючю бла Аны бла бирге сизни ючюн сау жашарыкъбыз. ⁵ Сиз иймандамысыз – кесигиз-кесигизни сынагъыз, кесигиз-кесигизни тинтип къарагъыз. Масих Иссаны сизде болгъанын сиз кесигиз билмеймисиз? Алай болмаса, сиз сыналыугъа чыдаялмай къалыр эдигиз. ⁶ Биз а сыналыугъа чыдагъаныбызны сиз билирсиз деп умут этеме. ⁷ Сиз бир тюрлю аман иш этмез ючюн, биз Аллахдан тилек этебиз. Бизни сыналыугъа чыдагъаныбызны кёргюзтюр ючюн тюйюл, алай а биз сыналыулагъа чыдаялмагъанча кёрюнсек да, сизни ахшылыкъ этеригизни тилейбиз. ⁸ Нек десегиз бизни хакъ кертиге къажау болургъа тюйюл, жаланда хакъ керти жанлы болургъа кючюбюз барды. ⁹ Биз къарыусуз, сиз а кючлю болгъанда, биз къууанабыз эмда сиз тамамлы болур ючюн тилек этебиз. ¹⁰ Кесим сизни арагъызда болмай муну жазгъаным а, келген заманымда, Раббий манга бузаргъа тюйюл, къураргъа берген эркинлигим бла къатылыкъ этмез ючюндю. ¹¹ Болсада, къарындашла, къууаныгъыз, жетишимли болугъуз, жапсарылыгъыз, бир акъыллы, жарашыулу болугъуз, сюймеклик эмда жарашыулукъ бериучю Аллах а сизни бла боллукъду. ¹² Бир-биригизни сыйлы уппа этиу бла саламлашыгъыз. Битеу сыйлыла сизге салам айтадыла. ¹³ Раббий Масих Иссаны шафауаты да, Аллахны сюймеклиги да, Сыйлы Нюрню бирикдириую да сизни барыгъыз бла да болсун. Амин.