1 ТИМОТЕЙГЕ

¹ Бизни Къутхарыучубуз Аллахны эм бизни ышаннганыбыз Раббий Масих Иссаны буйругъу бла Масих Иссаны абустолу мен Пауулдан ² Ийманда керти уланым Тимотейге салам! Атабыз Аллахдан эм Раббийибиз Масих Иссадан санга шафауат, мархамат эм ырахатлыкъ болсун. ³ Македониягъа кете туруп, мен сенден тилегенимча энтда да тилейме: Эфесде къал эмда жалгъан окъуула жайгъан адамланы тый. Ала бош таурухла бла эм ахыры болмагъан генеалогияла бла кюрешмесинле деп буюр. ⁴ Бу затла Аллахны ийманнга таяннган низамына къуллукъ этиуден эсе, даулашыуланы кёп чыгъарадыла. ⁵ Бу буйрукъну мураты уа таза жюрекден бла ахшы ниетден эм кёзбаусуз иймандан келген сюймекликди. ⁶ Бир къауумла, уа быланы къоюп, бош жаншаугъа тайгъандыла. ⁷ Ала Таурат устазла болургъа сюедиле, алай а не нени юсюнден айтханларын, не нени кертиди деп бегитгенлерин ангыламайдыла. ⁸ Тауратны Законундан тюз хайырланнган адамгъа Законну ахшы болгъанын биз билебиз. ⁹ Закон а тюзлюклюле ючюн тюйюл, алай а законну бузуучула эм боюн салмагъанла ючюн, иймансызла эм гюняхлыла ючюн, Аллахха хурмет этмеучюле эм харам болгъанла ючюн, атасын бла анасын инжитиучюле ючюн, адам ёлтюрюучюле ючюн, ¹⁰ Саякъ жюрюучюле ючюн, эр кишиле бла жатышыучу эр кишиле ючюн, къул сатыучула ючюн, ётюрюкчюле ючюн, антларын бузуучула ючюн эм тюз окъуугъа къажау болгъан битеу затла ючюн салыннганын билебиз. ¹¹ Бу затла алгъышлы Аллахны манга ышанып берилген махтаулу Хайыр Хапарына келишген затла тюйюлдюле. ¹² Манга кюч берген Раббийибиз Масих Иссагъа шукур этеме; нек десегиз Ол мени, ышаннгылыгъа санап, къуллукъ этерге салгъанды. ¹³ Мен алгъын аман айтыучу эм зулмучу эмда жюрек къыйнаучу эдим. Алай а Аллах манга мархамат этгенди; нек десегиз ол затланы, билмегенлей, ийнанмагъан заманымда этгенме. ¹⁴ Алай а ийман бла эм Масих Иссада болгъан сюймеклик бла бирге Раббийибизни шафауаты манга толу берилгенди. ¹⁵ «Масих Исса дуниягъа гюняхлыланы къутхарыр ючюн келгенди», – деген сёз ышаннгылыды эм хар жаны бла да къабыл этилирге тийишлиди. Аланы барындан да эм аман а менме. ¹⁶ Алай а Масих Исса, Анга ийнанып ёмюрлюк жашау аллыкъ адамлагъа мени юлгю этип, мардасыз тёзюмюн мени юсюмде биринчи кёргюзтюр ючюн, манга мархамат этгенди. ¹⁷ Ёмюрлени Патчахына, ёлмезлик, кёрюнмеген, терен акъыллы бир Аллахха уа хурмет да, махтау да ёмюрледен ёмюрлеге болсун! Амин. ¹⁸ Жашым Тимотей, сени юсюнгден алгъын айтылгъан файгъамбарлыкъ сёзлеге таянып, сен ахшы аскерчи кибик кюрешир ючюн, ол сёзлеге кёре санга ышанып бу буйрукъну береме. ¹⁹ Ийманда къаты тур эмда жюрегинги тазалыкъда сакъла; аны уа бир къауумла, къабыл этмей къойгъанлары ючюн, ийман жанындан кеме батыу палах сынагъандыла. ²⁰ Именей бла Аскендир да аллайладыла. Кяфырлыкъ этмезге юйренсинле деп, аланы мен шайтаннга бергенме.

¹ Алай бла хар неден да алгъа, биз Аллахны жолуна толусунлай берилип, жашауубузну тийишлилик бла тынч эм къайгъысыз ашырыр ючюн, ² Битеу адамла ючюн, патчахла ючюн эм битеу къыралланы оноучулары ючюн, тилекле, дууала, ёкюллюкле, шукурла этилсинле деп тилейме. ³ Нек десегиз ол игиди эм бизни Къутхарыучу Аллахыбыз анга ыразыды. ⁴ Ол а битеу адамланы къутхарылырларын эм хакъ кертини билиуге жетерлерин сюеди. ⁵ Нек десегиз Аллах бирди, Аллахны бла адамланы арасында келечи да бирди, Ол а Адам Масих Иссады. ⁶ Ол, битеу адамланы жууар ючюн, КесиКесин къурманнга бергенди, кезиуюнде этилген шагъатлыкъ буду. ⁷ Аны ючюн мен Хайыр Хапарны жайыучу эмда абустол болургъа сайланнганма – Масихники болуп тюзюн айтама, ётюрюк айтмайма – миллетлени ийманнга эмда хакъ кертиге юйретген устаз болургъа сайланнганма. ⁸ Алай бла, эр кишиле хар жерде да, ачыуланыусуз эм ишеклениусюз таза жюреклилик бла къолларын ёрге тутуп тилек этерлерин сюеме. ⁹ Аны кибик, тиширыула да, ушагъылы кийинип, уялчакълыкъ бла эм оюмлулукъ бла, не чачларын эшиу бла, не алтын бла, не инжи бла, не багъалы кийим бла тюйюл, ¹⁰ Алай а, Аллахны жолунда жюрюйбюз деп шагъатлыкъ этген тиширыулагъа тийишлисича, кеслерин хайырлы ишле бла ариу этсинле. ¹¹ Тиширыу дауурсузлукъ бла эм толу бойсунуу бла юйренсин. ¹² Тиширыугъа юйретирге неда эрине башчылыкъ этерге эркинлик бермейме, тиширыу дауурсузлукъ бла тынгыласын. ¹³ Нек десегиз алгъа Адам жаратылгъанды, Хауа уа артда жаратылгъанды ¹⁴ Эмда Адам сукъланып алданмагъанды, алай а тиширыу, сукъланып алданып, терсликге тюшгенди. ¹⁵ Алай болгъанлыкъгъа тиширыу оюмлулукъ бла ийманда, сюймекликде эмда сыйлылыкъда турса, Сабийни табыууну юсю бла къутхарыллыкъды.

¹ Жамауатха къуллукъчулукъ этерге итиннген адам ахшы ишни сюеди деген сёз тюздю. ² Алай а къуллукъчу айыпсыз болургъа керекди, бир къатынны эри тыйгъылы, оюмлу, адепли, къонакъ сюйюучю, юйретирге болаллыкъ, ³ Ичгичи болмагъан, тюйюшюучю болмагъан, кесине хайырны сюйюучю болмагъан, алай а тынч, жарашыулукъну сюйюучю, ахча сюйюучю болмагъан, ⁴ Кесини юйюрюн иги жюрютген, хар тюрлю тийишлилик бла сабийлерин кесине бойсундуруп тутхан адам болургъа керекди. ⁵ Нек десегиз кесини юйюрюн жюрюте билмеген адам Аллахны Жамауатыны къайгъысын этерикмиди? ⁶ Жангы ийнаннганладан болургъа да керек тюйюлдю; алай болмаса, ёхтемленип, ибилис бла бирге терсликге тюшер. ⁷ Тёгерекдегиле да анга иги шагъатлыкъ этерге керекдиле; алайсыз ол, терсленип, ибилисни тузагъына тюшер. ⁸ Жамауатны болушлукъчулары да тийишли болургъа керекдиле; эки тилли болмагъанла, чагъыргъа ёч болмагъанла, кеслерине хайырны сюйюучю болмагъанла, ⁹ Ийманны тасхасын таза жюрекде сакълаучула болургъа керекдиле. ¹⁰ Аллайланы алгъа сынаргъа, сора, айыпсыз болсала уа, къуллукъ этерге къояргъа керекди. ¹¹ Аны кибик аланы къатынлары да, жамауатда болушлукъчулукъ этген тиширыула да тийишли болургъа керекдиле, тилчи болмагъанла, адеплиле, хар не жаны бла да ышаннгылы болгъанла болургъа керекдиле. ¹² Жамауатны болушлукъчусу бир къатынны эри, сабийлерин да, юйюрюн да иги жюрютген адам болургъа керекди. ¹³ Нек десегиз ахшы къуллукъ этген болушлукъчула, Масих Иссагъа ийнаныуларында толу даражагъа эмда уллу таукелликге жетедиле. ¹⁴ Къысха заманда санга келирге умут этеме. ¹⁵ Мычысам а, сен Аллахны юйюрюнде къалай этерге тийишли болгъанын билир ючюн, быланы санга жазама. Ол юйюр жашау бериучю Аллахны Жамауатыды, хакъ кертини тамалыды эм чигинжисиди. ¹⁶ Сёзсюз, Аллахны жолуну тасхасы уллуду: Аллах адам чархы бла Кесин ачыкъ этгенди, Кесин Сыйлы Нюр бла тюз кёргюзтгенди, мёлеклеге кёрюннгенди, миллетле арасында билдирилгенди, дунияда ийман бла къабыл этилгенди, жер башындан махтау бла кётюрюлгенди.

¹ Сыйлы Нюр а ахыргъы заманлада бир къауумла иймандан таярыкъдыла, терилтиучю нюрлеге эм жин окъуулагъа тынгыларыкъдыла деп ачыкъ айтады. ² Аллай окъуула уятлары кюйюп жокъ болгъан ётюрюкчю эки бетлилени юсю бла келликдиле. ³ Ала адамланы некяхлы болуудан эмда ийманлыла эм хакъ кертини билгенле шукур этип ашасынла деп Аллах жаратхан тюрлю затланы ашаудан тыяргъа буйрукъ этерикдиле. ⁴ Аллахны хар жаратхан заты ахшыды эм шукур этиу бла къабыл этиле эсе, бир зат да адам унамазлыкъ зат тюйюлдю. ⁵ Нек десегиз ол Аллахны сёзю бла эм тилек этиу бла сыйлы болады. ⁶ Къарындашлагъа быланы ангылатсанг, ийманны эм сен ызындан баргъан ахшы окъууну сёзлери бла ёсдюрюлюп, Масих Иссаны ахшы жумушчусу боллукъса. ⁷ Жараусуз къатын таурухлагъа заманын гы къоратма, кесинги Аллахны жолунда жюрюрге юйрет. ⁸ Нек десенг чархын юйретиуню файдасы азды, Аллахны жолунда жюрюмеклиг’а Аны берген сёзюне кёре бизге хар не жаны бла да, эндиги жашауда да, ёмюрлюк жашауда да файдалыды. ⁹ Бу сёз ышаннгылыды эм хар ким да къабыл этерге тийишлиди. ¹⁰ Биз аны ючюн урунабыз эм аман сёзлеге тёзебиз. Нек десенг жашау бериучю Аллахха ышанабыз; Ол а битеу адамланы, бегирек да ийманлыланы Къутхарыучусуду. ¹¹ Бу затлагъа адамланы тюшюндюрюп юйрет. ¹² Сени жашлыгъынгы бир киши да сансыз этмесин; алай а сёз айтыуда, жашауда, сюймекликде, нюрде, ийманда, тазалыкъда ийманлылагъа юлгю бол. ¹³ Мен келгинчи, Сыйлы Китапланы жамауатха окъуу бла, насийхат бериу бла, юйретиу бла кюреш. ¹⁴ Жамауатны таматалары сени юсюнге къолларын салып тилек этгенде, файгъамбарлыкъ сёз бла санга берилген эм энтда сенде болгъан нюр пахмуну сансыз этип къойма. ¹⁵ Бу затланы юсюнден къайгъыр, къуллукъ этиуюнге толусунлай берил, сора сени жетишиминг барына да ачыкъ болур. ¹⁶ Кесинги да, сен юйретген окъууну да тинтип ойлап къара эмда ол окъуугъа тюз бол. Алай этсенг, кесинги да, санга тынгылагъанланы да къутхарлыкъса.

¹ Тамата кишилеге айып салма, алай а алагъа атангача айтып ангылат. Жаш адамлагъа да къарындашларынгача, ² Тамата къатынлагъа, анангача, жаш къызлагъа да хар тюрлю тазалыкъ бла эгечлерингеча айтып ангылат. ³ Жууукълары болмагъан башсыз къатынланы къайгъысын эт. ⁴ Башсыз къатынны сабийлери неда туудукълары бар эсе уа, ала, алгъа кеслерини юйюрлерине болушуп, Аллахны жолунда жюрюрге эм къартларына тийишлисин берирге юйренсинле. Аллахны излегени олду. ⁵ Жууугъу болмагъан башсыз къатын эм жангыз къалгъан тиширыу Аллахха ышанады эм кече да, кюн да дууа этип эм тилек этип турады. ⁶ Нафысына берилген башсыз къатын а саудан ёлгенди. ⁷ Ала айыпсыз болур ючюн, бу затлагъа аланы тюшюндюр. ⁸ Кесиникилеге эм бегирек да юйдегилерине къайгъырмагъан адам а, иймандан чыкъгъанды эм иймансыздан да аманды. ⁹ Хайырлы ишлери бла белгили болгъан, бир эрге баргъан, алтмыш жылдан аз болмагъан башсыз къатын ¹⁰ Сабийлерин ёсдюрген эсе, къонакъбайлыкъ этген эсе, сыйлыланы аякъларын жуугъан эсе, къыйынлыкъда жашагъанлагъа болушхан эсе эм хар тюрлю ахшы ишни къадалып этген эсе, аны аты башсыз къатынланы дефтерине жазылсын. ¹¹ Къарт болмагъан башсыз къатынланы уа къабыл этме; нек десенг аланы табийгъат кюсеулери аланы Масиххе къуллукъ этерге берилгенликлерин хорлагъанда, ала эрге барыргъа сюедиле. ¹² Алай бла ала алгъын берген сёзлерин бузгъанлары себепли айыпларына тюбейдиле. ¹³ Андан сора да ала, ишлемей тургъанлары себепли, юйлеге кирип айланыргъа юйренедиле эм бош тургъан бла да къалмай, алай а жаншакъ да боладыла, башхаланы ишлерине къатышадыла эм жарамагъан затланы айтадыла. ¹⁴ Ол себепден мен жаш, тул къатынланы некяхлы болурларын, сабийле табарларын, юйлерин тутарларын эм душманнга аман айтыргъа бир тюрлю сылтау бермезлерин сюеме. ¹⁵ Нек десенг энди бир къауумла шайтанны ызындан терсине кетгендиле. ¹⁶ Жууукъларыны арасында башсыз къатын болгъан ийманлы киши неда ийманлы тиширыу, ала Жамауатха жюк болмаз ючюн, аланы кереклилерине къараргъа керекдиле. Жамауат а жууукълары болмагъан башсыз къатынлагъа къараргъа керекди. ¹⁷ Жамауатха иги башчылыкъ этген таматалагъа, бегирек да Аллахны сёзюн жайыу бла эм юйретиу бла уруннганлагъа, энчи хурмет этилсин. ¹⁸ Нек десенг Сыйлы Китап: «Ындыр басхан ёгюзню ауузун байлама» эм: «Уруннган кесини хакъын алыргъа тийишлиди», – деп айтады. ¹⁹ Жамауатны таматасын терслеуню эки неда юч шагъатсыз къабыл этме. ²⁰ Гюнях этгенлени барысыны да аллында айтып уялт, къалгъанла да гюнях этиуден къоркъсунла. ²¹ Аллахны, Раббий Масих Иссаны эмда сайланнган мёлеклени аллында сенден бек тилейме, бу буйрукъларымы, биреуге терс къарау бла неда жакъ басыу бла бир зат да этмей толтур. ²² Бир кишини юсюне да ашыгъышлыкъ бла къолларынгы салма эм башхаланы гюняхларына къошулуучу болма, кесинги таза сакъла. ²³ Мындан арысында жаланда суу ичип турма, алай а ашхынынг ючюн эм сени терк-терк ауруй тургъанынг ючюн бир азчыкъ чагъыр да ич. ²⁴ Бир къауум адамланы гюняхлары ачыкъдыла эм тюзюнлей терсликлерине тюшюрюрге элтедиле, бир къауумланы гюняхлары уа артда ачыкъ боладыла. ²⁵ Аны кибик ахшы ишле да ачыкъдыла; алай тюйюл эселе да, жашырылып къалыргъа болаллыкъ тюйюлдюле.

¹ Аллахны атына эм окъуууна аман айтылмаз ючюн, къулла кеслерини бийлерин хар не жаны бла да хурмет тийишлиге санасынла. ² Ийманлы бийлери болгъан къулла да, алагъа сансыз къараргъа керек тюйюлдюле, нек десенг ала къарындашладыла; алай а ала ийманлыла эм сюйюлюннгенле болуп эмда алагъа игилик этип тургъанлары ючюн, алагъа андан да иги къуллукъ этерге керекдиле. Бу затлагъа юйрет эм ангылат. ³ Башха затлагъа юйретген эмда тюз сёзлени – Раббийибиз Масих Иссаны сёзлерин – эм Аллахны жолун тутууну юсюнден юйретиуюн къабыл этмеген адам ёхтемди, ⁴ Бир зат да билмейди, алай а даулашыргъа эм сёзлени юсюнден къаугъа чыгъарыргъа ёч болгъанды. Ол затладан а зарлыкъ, эришлик, аман айтыула, хыйлачы шупхала чыгъадыла, ⁵ Хакъ кертиден узакъ болгъан, бузукъ акъыллы адамланы арасында керексиз даулашыула чыгъадыла. Ала Аллахны жолун жаланда кеслерине файда тюшюрюр ючюн жюрютедиле. Аллайладан узакъ бол. ⁶ Болгъан затларынг бла ыразы болуп жашап, Аллахны жолунда жюрюмеклиг’а уллу хайыр тапмакълыкъды. ⁷ Нек десенг биз дуниягъа бир зат да келтирмегенбиз, андан бир зат да элталмазлыгъыбыз да ачыкъды. ⁸ Ашыбыз бла кийимибиз бар эсе, аны бла ыразы болуп турайыкъ. ⁹ Байыгъыргъа сюйгенле уа алданыугъа эм тузакъгъа эмда кёп, магъанасыз заранлы сукъланыулагъа тюшедиле, ол затла уа адамланы палахха бла жоюлуугъа тюбетедиле. ¹⁰ Нек десенг битеу аманлыкъланы тамыры ахча сюймекликди, анга бир къауумла кеслерин берип иймандан тайгъандыла эм кеслери-кеслерин кёп къайгъылагъа салгъандыла. ¹¹ Сен а Аллахны адамыса, ол затладан къач, алай а тюзлюклюлюкде, Аллахны жолунда, ийманда, сюймекликде, тёзюмлюкде, сабырлыкъда жюрю. ¹² Ийман ючюн ахшы кюреш, ёмюрлюк жашауну тут; сен а анга чакъырылгъанса эмда кёп шагъатланы аллында огъурлу ийманны ачыкъ къабыл этгенсе. ¹³ Барына да жашау берген Аллахны аллында эм Понтий Пилатны аллында огъурлу иймандан шагъатлыкъ этген Масих Иссаны аллында санга буюрама. ¹⁴ Раббийибиз Масих Иссаны келирине дери Аллахны фарызын таза айыпсыз сакъла. ¹⁵ Аны келгенин а алгъышлы бир Шах, патчахланы Патчахы, бийлеге бийлик этген Раббий кезиуюнде ачарыкъды. ¹⁶ Ёлюмсюзлюк жангыз Андады, Кеси да адам къатына баралмазлыкъ жарыкъда жашайды. Аны уа бир адам да кёрмегенди эм кёраллыкъ да тюйюлдю. Хурмет да, ёмюрлюк къудурет да Аны болсун! Амин. ¹⁷ Бу ёмюрде байлагъа айтып ангылат, ала кеслерин уллудан кёрмесинле эм ышаннгысыз байлыкъларына ышанмасынла, алай а бизге зауукълукъгъа хар затны да эркин берген жашау бериучю Аллахха ышансынла. ¹⁸ Ала ахшылыкъ этип, хайырлы ишле бла бай болсунла, чомарт эм илеш болсунла. ¹⁹ Алай бла кеслерине келлик заманнга бегимли мурдор боллукъ хазна жыярла эм аны бла ёмюрлюк жашаугъа жетерле. ²⁰ Эй Тимотей! Санга ышанып берилген окъууну тут. Жараусуз, бош сёзледен эмда адамланы жангылып «илму» дегенлерини бир-бирлерине къажау фикирлеринден тай. ²¹ Бир къауумла ол «илму» деген бла къадалып кюрешедиле, ол а аланы иймандан тайдырады. Аллахны шафауаты сизни бла болсун. Амин.