1 ФЕСАЛОНИКАЧЫЛАГЪА

¹ Пауулдан, Силуандан эм Тимотейден, Аллах Атада эм Раббий Масих Иссада болгъан фесалоникачыланы жамауатына салам! Атабыз Аллахдан эм Раббийибиз Масих Иссадан сизге шафауат эм ырахатлыкъ болсун. ² Тилеклерибизде сизни эсибизге келтирип, хар заманда сизни барыгъыз ючюн да Аллахха шукур этебиз. ³ Сизни ийманыгъыз бла этген ишлеригизни, сюймеклигигиз бла урунууугъузну эмда Раббийибиз Масих Иссагъа ышаныуугъуздан келген тёзюмлюлюгюгюзню Атабыз Аллахны аллында тохтаусуз эсибизде тутабыз. ⁴ Аллах сюйген къарындашла, Ол сизни сайлагъанын билебиз. ⁵ Нек десегиз бизни сизге Хайыр Хапарны жайгъаныбыз жаланда сёз бла болуп къалмагъанды, алай а кюч бла эм Сыйлы Нюр бла эм толу ышаныу бла болгъанды; биз сизни ючюн сизни арагъызда къалай болгъаныбызны сёзсюз сиз кесигиз билесиз. ⁶ Сиз да бизге эм Раббийге эниклеучюле болгъансыз; кёп къыйынлыкъла сынагъан эсегиз да, Сыйлы Нюр берген къууанч бла Аллахны сёзюн къабыл этгенсиз. ⁷ Алай бла сиз битеу Македонияда эм Ахаяда болгъан ийманлылагъа юлгю болгъансыз. ⁸ Нек десегиз Раббийни сёзю сизден жаланда Македонияда бла Ахаяда жайылып къалмагъанды, алай а сизни Аллахха ийнаннганыгъызны хапары хар жерде да эшитилгенди, алай бла аны юсюнден бизни айтыргъа кереклибиз жокъду. ⁹ Нек десегиз адамла кеслери бизни къалай сюйюп къабыл этгенигизни айтадыла. Сиз, жашау бериучю хакъ керти Аллахха къуллукъ этер ючюн ¹⁰ Эм Кесини ёлгенледен тиргизген Уланыны – келлик чамланыудан бизни къутхарыучу Иссаны – кёкледен келлигин сакълар ючюн, идоллагъа табыныуну къоюп, Аллахха къалай къайтышханыгъызны айтадыла.

¹ Бизни сизге келгенибиз жараусуз болмагъанын, къарындашла, сиз кесигиз да билесиз; ² Сиз билгенча, алгъын Филипийде азап чегип ыйлыкъдырылгъан эдик, алай а, уллу къажаулукъгъа да къарамай, Аллахны Хайыр Хапарын сизге билдирирге Аллахыбыздан таукеллик алгъан эдик. ³ Нек десегиз бизни чакъырыуубузда не ажашыулукъ, не аман ниетлилик жокъду неда биз сизни алдаргъа кюрешмейбиз. ⁴ Алай а Аллах, Хайыр Хапарны жаяргъа бизге ышанып тийишли кёргени кибик, биз да, адамланы тюйюл, алай а бизни жюреклерибизни сынаучу Аллахны ыразы этерге кюрешип айтабыз. ⁵ Нек десегиз сиз билгенча, бир заманда да сизни аллыгъызда бизни не кёзбау сёзлерибиз, не кесибизге хайыр излеуюбюз болмагъанына Аллах шагъатды. ⁶ Адамладан махтау излемейбиз – не сизден, не башхаладан. ⁷ Биз, Масихни абустоллары кибик, сизден болушлукъ излерге боллукъ эдик, алай а, ана гитче сабийлерине ариу къарагъанча, сизни арагъызда алай жууаш болгъанбыз. ⁸ Алай бла биз, сизге кёл салыуубуздан, сизге Аллахны Хайыр Хапарын бергенибиз бла да къалмай, алай а жанларыбызны да берирге ыразы эдик, нек десегиз сиз бизге сюйюмлю болгъан эдигиз. ⁹ Ишексиз, къарындашла, бизни урунууубуз эм къыйналгъаныбыз сизни эсигиздеди: сизден биригизни да къыйнамаз ючюн, биз, кече да, кюн да ишлеп, сизге Аллахны Хайыр Хапарын алай билдирген эдик. ¹⁰ Сизни – ийнаннганланы – аллыгъызда биз къалай сыйлы, тюзлюклю эм айыпсыз жашагъаныбызгъа сиз шагъатсыз, Аллах да шагъатды. ¹¹ Нек десегиз сиз билесиз, сизни хар биригизден да, ата кесини сабийлеринден тилегенча, ¹² Биз сизден, сизни Кесини Патчахлыгъына эм махтаууна чакъыргъан Аллахха тийишли жашарыгъызны жалбарып тилеген эдик, сизни кёллендирип ийнандыргъан эдик. ¹³ Ол себепден биз дайым Аллахха шукур этебиз. Сиз бизден эшитген Аллахны сёзюн къабыл этгенигизде муну адамны сёзюча тюйюл, алай а, кертиси бла да болгъаны кибик, Аллахны сёзюча къабыл этгенсиз. Сиз ийманлылада жюрюген да ол сёздю. ¹⁴ Ол себепден сиз, къарындашла, Аллахны Иудеядагъы жамауатларындан – Масих Иссаны жамауатларындан – юлгю алгъансыз; нек десегиз, ала иудейлиледен сынагъан кибик, сиз да кеси миллетлилеригизден зулмулукъ сынагъансыз. ¹⁵ Иудейлиле уа Раббий Иссаны да, файгъамбарланы да ёлтюргендиле, бизни да къыстагъандыла, Аллахны да ыразы этмейдиле, битеу адамлагъа да къажау турадыла. ¹⁶ Нек десегиз башха миллетлиле къутхарылыр ючюн, алагъа айтыргъа иудейлиле бизге чырмау этедиле. Алай этип, хар заманда кеслерини гюняхларыны мардасын толтурадыла, алай а Аллахны ахыргъы чамланыуу алагъа энди жууукълашханды. ¹⁷ Биз а, къарындашла, бир кесек заманнга сизден, жюрегибиз бла тюйюл, бетибиз бла айырылып, уллу итиниу бла сизни бетигизни кёрюрге бегирек да кюрешгенбиз. ¹⁸ Алай бла биз – мен Пауул бир ненча кере – сизге барыргъа тебиреген эдик, алай а шайтан бизге чырмау салгъан эди. ¹⁹ Ол себепден кимди бизни ышаныуубуз, неда къууанчыбыз, неда Раббийибиз Масих Иссаны келген заманында Аны аллында махтау тажыбыз? Сиз тюйюлмюсюз? ²⁰ Сиз бизни махтауубуз эм къууанчыбызсыз.

¹ Ол себепден, андан кёп тёзмей, биз Афинада жангыз къалыргъа ыразы эдик ² Эмда сизни бегимли этер ючюн эм сизни ийманыгъызда кёллендирир ючюн, къарындашыбыз эм Аллахха къуллукъ этиучю, Масихни Хайыр Хапарын жайыуда нёгерибиз Тимотейни ийген эдик. ³ Аны бу азапладан бир киши да тентиремесин деп ийген эдик, нек десегиз бизге къадар алай болгъанын сиз кесигиз билесиз. ⁴ Биз сизде болгъан заманыбызда да, азап чегерикбиз деп айтып, алгъындан сизге билдирген эдик эм сиз билгенча алай болгъанды. ⁵ Ол себепден мен да, андан кёп тёзмей, терилтиучю сизни терилтип, бизни урунууубуз файдасыз болупму къалды деп, ийманыгъыздан хапар билир ючюн Тимотейни ийген эдим. ⁶ Энди уа, Тимотей сизден бизге келип, сизни ийманыгъызны эм сюймеклигигизни юсюнден эмда сиз хар заманда бизни игилик бла эсигизде тутуп, биз сизни кёрюрге бек сюйгенибизча, сиз да бизни кёрюрге сюйгенигизден иги хапар келтиргенди. ⁷ Ол себепден биз, битеу бу къыйынлыкъларыбызда эм кереклилигибизде да, къарындашла, сизни ийманыгъыз кючленнгени ючюн, сизни бла жапсарылабыз. ⁸ Сиз Раббийден таймай турсагъыз, биз энди жашайбыз. ⁹ Биз Аллахыбызны аллында сизни ючюн къууаннган битеу къууанчыбызны себебинден, сизни ючюн Аллахха къаллай шукур эталлыкъбыз? ¹⁰ Сизни бетигизни кёрюр ючюн эм ийманыгъызда кемликни толтурур ючюн кече да, кюн да къадалып тилек этебиз. ¹¹ Бизни Атабыз Аллах Кеси да эм бизни Раббийибиз Масих Исса да бизни жолубузну сизге бурсун. ¹² Сизни уа Раббий бир-биригизни да, битеу адамланы да сюймеклигигизни, биз сизни сюйген марда бла кёбейтип артыкъ этсин. ¹³ Раббийибиз Масих Исса, сизни жюреклеригизни кючлендирип, битеу сыйлылары бла келишинде Атабыз Аллахны аллында сыйлылыкъда айыпсыз этсин. Амин.

¹ Къарындашла, сиз къалай жашаргъа эмда Аллахны къалай ыразы этерге керек болгъаныгъызгъа бизден юйреннгенсиз. Сиз да алай жашайсыз. Ахырында бу ишде андан да бек жетишимли болугъуз деп, сизден Раббий Иссаны аты бла тилейбиз эм жалбарабыз. ² Нек десегиз биз сизге Раббий Иссадан къаллай фарызла бергенибизни сиз билесиз. ³ Нек десегиз Аллах сизни сыйлы болуругъузну эмда сиз саякълыкъдан кесигизни тыярыгъызны сюеди. ⁴ Сизни хар биригиз да кесини чархын сыйлылыкъда эм намыслылыкъда тутаргъа юйренсин. ⁵ Аллахны билмеген миллетлеча, чархыгъызны тыйгъычсызлыгъын этмегиз. ⁶ Сизден биригиз да бу ишде къарындашына аманлыкъ этмесин эмда анга хыйла этмесин. Биз алгъын да сизге айтханыбыз эм шагъатлыкъ этгенибиз кибик, Раббий битеу ол затла ючюн адамлагъа азап саллыкъды. ⁷ Нек десегиз Аллах бизни харамлыкъгъа тюйюл, сыйлы жашаугъа чакъыргъанды. ⁸ Алай бла, бу юйретиуню къабыл этмеген, адамны тюйюл, алай а бизге Кесини Сыйлы Нюрюн берген Аллахны къабыл этмей къояды. ⁹ Къарындаш сюйюуню юсюнден а сизге жазаргъа кереклиси да жокъду, нек десегиз сиз кесигиз Аллахдан бир-биригизни сюерге юйреннгенсиз. ¹⁰ Кертиси бла да сиз саулай Македониядагъы битеу къарындашланы сюесиз. Къарындашла, сизге жалбарабыз, бу ишде андан да бек жетишимли болугъуз, ¹¹ Бизни сизге фарыз этгенибиз кибик тынч жашаргъа, кесигизни ишигизни этерге эм кеси къолларыгъыз бла ишлерге къадалып кюрешигиз. ¹² Сиз, ийнанмагъан адамланы аллында иги адеплилик этип, бир затдан да керекли болмазча алай жашагъыз. ¹³ Къарындашла, ышаныулары болмагъан башха адамлача, сиз бушуу этмез ючюн ёлгенлени юсюнден сизге билдирмей къояргъа сюймейме. ¹⁴ Нек десегиз биз Иссаны ёлгенине эм тиргизилгенине ийнанабыз. Ма анга кёре, Иссагъа ийнанып ёлгенлени да Аллах Аны биргесине келтирликди. ¹⁵ Муну бизге Раббий Кеси айтханды, энди биз да сизге айтабыз: биз, жашагъанла, Раббийни келлик заманына дери сау къалгъанла, ёлгенледен алгъа боллукъ тюйюлбюз. ¹⁶ Нек десегиз Аллахны буйругъу бла, баш мёлекни ауазы эм Аллахны сур быргъысыны тауушу эшитилген заманда Раббий Кеси кёкден тюшерикди эмда Масиххе ийнанып ёлгенле алгъа тиргизилликдиле. ¹⁷ Андан сора биз, сау къалгъанла, ала бла бирге Раббийге хауада тюбер ючюн, булутлада кётюрюллюкбюз, алай бла хар заманда да Раббий бла боллукъбуз. ¹⁸ Ол себепли бир-биригизни бу сёзле бла жапсарыгъыз.

¹ Заманланы бла болжалланы юсюнден а сизге жазаргъа кереклиси да жокъду, къарындашла; ² Нек десегиз Раббийни кюню, кече гудучу келген кибик алай келлигин, сиз кесигиз ишексиз билесиз. ³ Ол себепден, не заманда: «Мамырлыкъ эм къоркъуусузлукъ», – деп айтсала, ол заманда бууаз къатыннга къозлау къыйынлыкъ келгени кибик, билмей тургъанлай, алагъа жоюлуу келликди, къутуллукъ да тюйюлдюле. ⁴ Алай а сиз, къарындашла, ол кюн сизге билмей тургъаныгъызлай, гудучу кибик тюберча къарангыда тюйюлсюз. ⁵ Нек десегиз сиз барыгъыз да жарыкъны уланларысыз эм кюнню уланларысыз: биз кечени неда къарангыны уланлары тюйюлбюз. ⁶ Алай бла башхалача жукъламайыкъ, алай а сагъайып эм аязып турайыкъ. ⁷ Нек десегиз жукълагъанла кече жукълайдыла, ичип эсиргенле да кече ичип эсиредиле. ⁸ Биз а кюндюзню уланлары эсек, юсюбюзге ийманны бла сюймекликни кюбесин, башыбызгъа да къутхарылыугъа ышаныуну темир бёркюн кийип аязып турайыкъ. ⁹ Нек десегиз Аллах бизни чамланыууна тюйюл, алай а бизни Раббийибиз Масих Иссаны юсю бла къутхарылыуну алыргъа буюргъанды. ¹⁰ Сагъайып тура эсек да, неда жукълай эсек да, Масих, биз Аны бла бирге жашар ючюн, бизни ючюн ёлгенди. ¹¹ Ол себепден, сиз этгенигиз кибик, бирбиригизни жапсарыгъыз эм нюр жанындан бегимли этигиз. ¹² Къарындашла, сизде уруннганланы эм Раббийни жолунда сизге башчылыкъ этгенлени эм сизге насийхат бергенлени ариу кёрюрюгюзню сизден тилейбиз. ¹³ Аланы ишлери ючюн сюймеклик бла алагъа бегирек да хурмет этигиз. Кеси арагъызда жарашыулу болугъуз. ¹⁴ Дагъыда сизден тилейбиз, къарындашла, ишлемей бош айланнганлагъа айтып ангылатыгъыз, кёлсюзлени жапсарыгъыз, къарыусузлагъа болушугъуз, барысына да кёп тёзюмлю болугъуз. ¹⁵ Сакъ болугъуз, бир киши да аманлыкъгъа аманлыкъ бла жууап этмесин; алай а хар заманда бир-биригизге да эм барына да ахшылыкъны излегиз. ¹⁶ Хар заманда къууаныгъыз. ¹⁷ Тохтаусуз тилек этигиз. ¹⁸ Хар болумда да шукур этигиз; нек десегиз сиз Масих Иссада тура эсегиз, сизни юсюгюзден Аллахны буйругъу алайды. ¹⁹ Нюрню ёчюлтмегиз. ²⁰ Файгъамбарлыкъланы сансыз этмегиз. ²¹ Хар нени да сынагъыз, ахшысын тутугъуз. ²² Хар тюрлю аманлыкъдан тыйылыгъыз. ²³ Ырахатлыкъ бериучю Аллах а Кеси сизни толусунлай сыйлы этсин эм сизни нюрюгюз да, жаныгъыз да, чархыгъыз да, Раббийибиз Масих Иссаны келиуюнде къыяусуз болур ючюн, битеу саулай сакълансын. ²⁴ Сизни чакъыргъан Аллах ышаннгылыды, Ол аны этерикди. ²⁵ Къарындашла! Бизни ючюн тилек этигиз. ²⁶ Битеу къарындашлагъа сыйлы уппа этиу бла салам айтыгъыз. ²⁷ Бу жазып ийгеними битеу сыйлы къарындашлагъа окъуругъузну Раббийни хакъы бла сизден тилейме. ²⁸ Раббийибиз Масих Иссаны шафауаты сизни бла болсун. Амин.