1 ПЕТЕР

¹ Масих Иссаны абустолу болгъан мен Петерден Понтда, Галатияда, Кападокияда, Асияда эм Битинияда жайылгъан киргинчилеге салам болсун! ² Нюрден сыйлыланыу бла, сёзге тынгылаугъа эм Масих Иссаны къаны бла бюркюлюуге, Аллах Ата алгъындан билип сайлагъанлагъа: сизге шафауат бла ырахатлыкъ кёп болсун. ³ Бизни Раббийибиз Масих Иссаны Аллахына эм Атасына шукур болсун! Ол Кесини уллу мархаматы бла бизни жангыдан туудургъанды. Масих Иссаны ёлгенледен тиргизип, бизни керти ышаныугъа, ⁴ Бузулмазлыкъ, айыпсыз, чиримезлик мюлк юлюшге жетдиргенди. Ол мюлк юлюш сизге кёкледе сакъланады. ⁵ Сиз ахыр заманда ачылыргъа хазыр болгъан къутхарылыугъа Аллахны кючю бла, ийнаныуугъузну юсю бла сакъланнганласыз. ⁶ Аны себепли энди тюрлю сыналыуладан бираз къыйналыргъа керек эсегиз да, къууаныгъыз. ⁷ Алай бла сизни сыналгъан ийманыгъыз Масих Иссаны келлик заманында сизге махтау, хурмет эм уллулукъ тапдырыр. Ол ийманыгъыз от бла сыналгъан эсе да жоюлгъан алтындан да багъалыды. ⁸ Масихни уа кёрмегенлей сюесиз эм Аны эндиге дери да кёрмей эсегиз да, Анга ийнаныу бла айтылынмагъанча уллу махтаулу къууанч бла къууанасыз. ⁹ Алай бла ийманыгъызны муратына – жанларыгъызны къутхарылыууна жетесиз. ¹⁰ Файгъамбарланы тинтип излеулери да бу къутхарылыуну юсюнден эди. Ала сизге буюрулгъан шафауатны келлигин алгъындан билип айтхандыла. ¹¹ Масихни алада болгъан Нюрю Масихни азап чегеригин эм аны ызындан махтаулу боллугъун алгъындан билдирген заманда, ала ол Нюр къайсы эм не заманны кёргюзтгенин тинтип къарагъандыла. ¹² Кёкледен ийилген Сыйлы Нюр бла Хайыр Хапарны айтханланы энди сизге билдиргенлерини хайыры, аланы кеслерине тюйюл, сизге жарагъаны алагъа ачыкъ болгъанды. Бу затлагъа уа мёлекле да къараргъа талпыйдыла. ¹³ Ол себепден, акъылыгъызны ишге хазыр тутуп, сагъайып туругъуз, Масих Иссаны келиую бла сизге бериллик шафауатха толу ышаныгъыз. ¹⁴ Айтылгъанны этген сабийле кибик, билмей тургъан заманыгъызда сизде болгъан алгъыннгы тыйгъычсызлыкълагъа кёре этмегиз, ¹⁵ Алай а, сизни чакъыргъан Сыйлыдан юлгю алып, кесигиз да хар ишигизде да сыйлы болугъуз; ¹⁶ Нек десегиз Китапда: «Сыйлы болугъуз, нек десегиз Мен сыйлыма», – деп жазылгъанды. ¹⁷ Хар кимни ишлерине кёре бет этип къарамай хукму этген Аллахха «Атабыз» дей эсегиз, сора хаух дунияда айланнган кезиуюгюзню Аллахдан къоркъуу бла ашырыгъыз. ¹⁸ Аталарыгъыздан сизге берилген фана жашаудан, сиз, кюмюш неда алтын кибик чиририк затла бла угъай, ¹⁹ Алай а къыяусуз эм таза къозуну къаны кибик, Масихни багъалы къаны бла жулуннганыгъызны билигиз. ²⁰ Масих а дуния жаратылырдан да алгъа жораланнганды, алай а ахыр заманлада сизни ючюн келгенди. ²¹ Аны ёлгенледен тиргизип, Анга махтау берген Аллахха Аны юсю бла ийнанасыз. Алай бла ийнаныуугъуз эм ышаныуугъуз Аллаххады. ²² Нюрню юсю бла хакъ кертиге боюн салып жанларыгъызны тазалагъансыз, кёзбау суз къарындаш сюйюуге жетгенсиз, алай бла таза жюрекден бир-биригизни сюйгенлей туругъуз. ²³ Сиз чиририк урлукъдан тюйюл, алай а чиримезлик урлукъдан, Аллахны керти эм ёмюрде да болуп турлукъ сёзюню юсю бла жангыдан туугъанласыз. ²⁴ Нек десегиз «хар тюрлю чарх ханс кибикди, адамны хар тюрлю махтауу да хансда гюл кибикди. Ханс къуруйду, аны гюлю да агъады; ²⁵ Раббийни сёзю уа ёмюрде да турады». Ол сёз а бу сизге билдирилген Хайыр Хапарды.

¹ Алай бла хар аманлыкъны, хар хыйлачылыкъны, эки бетлиликни, зарлыкъны, хар тюрлю аман айтыуну къоюп, ² Жангы туугъан сабийле кибик, Аллахны таза сютге ушагъан сёзюн сюйюгюз, аны бла, ёсюп, къутхарылыугъа жетерсиз. ³ Нек десегиз Раббийни ахшылыгъын сиз сынагъансыз. ⁴ Анга – адамла сансыз этген, алай а Аллах сайлагъан, багъалы, тири Ташха – жууукълашыгъыз. ⁵ Кесигиз да, тири ташла кибик, кесикесигизден нюр юй къурагъыз; алай бла сиз, Масих Иссаны юсю бла Аллахны ыразы этерча, нюр къурманла этер ючюн, Аллахха сыйлы къуллукъ этиучюле болурсуз. ⁶ Нек десегиз Китапда: «Ма, Мен Сионда сайланнган багъалы мюйюшню баш ташын салама; Анга ийнаннган айыплы боллукъ тюйюлдю», – деп жазылгъанды. ⁷ Алай бла Ол сизге, ийнаннганлагъа багъалыды, ийнанмагъанлагъа уа, «юй ишлеучюле сансыз этип атхан таш, ма, мюйюшню баш ташы болгъанды» эм «абындырыучу таш эмда чырмаучу къая болгъанды». ⁸ Аллахны Сёзюне боюн салмагъанлай, ала анга абынадыла. Ала бу абыныугъа буюрулгъандыла. ⁹ Сиз а сайланнган тукъумсуз, Патчахны дин къуллукъчуларысыз, сыйлы миллетсиз, Аллахны энчи халкъысыз. Сизни къарангылыкъдан Кесини аламат жарыгъына Чакъыргъанны тамамлылыгъын билдирир ючюн сайланнганласыз. ¹⁰ Сиз бир заманлада халкъ тюйюл эдигиз, энди уа Аллахны халкъысыз; мархамат этилмегенле эдигиз, энди уа мархамат этилгенлесиз. ¹¹ Сюйюлюннгенле! Сизден тилейме, бу дунияда киргинчилеча эм жолоучулача болуп, жаныгъызгъа къажау тургъан чархыгъызны тыйгъычсызлыкъларындан узакъ болугъуз ¹² Эм ийнанмагъан адамланы арасында жашауугъузну хайырлы ишле бла бардырыгъыз, сизге аманлыкъчылагъача аман сёзле айтханла, сизни хайырлы ишлеригизни кёрюп, алагъа жууукълашхан кюнюнде Аллахха махтау салсынла. ¹³ Алай бла Раббий ючюн адамланы хар тюрлю властьларына боюн салыгъыз, патчахха, баш оноучугъача; ¹⁴ Оноучулагъа, аман иш этгенлеге азап салыргъа эм ахшы иш этгенлени махтаргъа андан ийилгенлегеча боюн салыгъыз. ¹⁵ Нек десегиз биз, ахшылыкъ этип, акъылсыз жахил адамланы ауузларын тыяргъа, Аллахны буйругъу алайды. ¹⁶ Азатлача жашагъыз; азатлыкъны, аман ишлени жашырыр ючюн жюрютгенлеча тюйюл, алай а Аллахны къулларыча жашагъыз. ¹⁷ Барына да хурмет этигиз, къарындашлыкъны сюйюгюз, Аллахдан къоркъугъуз, патчахха хурмет этигиз. ¹⁸ Къулла, тамам хурмет этиу бла бийлеригизге боюн салыгъыз, жаланда игилерине бла сабырларына тюйюл, алай а къатыларына да. ¹⁹ Нек десегиз адам, Аллахны эсинде тутуп, терслиги болмай, къыйынлыкъгъа тёзе эсе, Аллах ол затха ыразыды. ²⁰ Нек десегиз сиз аман ишлеригиз ючюн тюйюлюп тёзе эсегиз, андан сизге не махтау? Алай а ахшылыкъ эте эм къыйынлыкъ кёре тёзе эсегиз, Аллах ол затха ыразыды. ²¹ Сиз муну ючюн чакъырылгъансыз; нек десегиз Масих, биз Аны ызындан барыр ючюн, бизни ючюн азап чегип, бизге юлгю къойгъанды. ²² Ол бир тюрлю гюнях этмегенди эм Аны ауузунда жалгъан сёз болмагъанды; ²³ Анга аман айтылгъанда, Ол къайтарып аман айтмагъанды; азап чеге туруп къоркъутмагъанды, алай а Кесин Тюзлюклю Хукмучугъа ышанып бергенди. ²⁴ Биз, гюняхларыбыздан къутулуп, тюзлюк амалтын жашар ючюн, Ол Кеси бизни гюняхларыбызны Кесини чархы бла къачха кётюргенди. Сиз Аны жаралары бла сау этилгенсиз. ²⁵ Нек десегиз сиз ажашып айланнган къойла кибик эдигиз, энди уа жанларыгъызны сакълаучу Сюрюучюге къайтхансыз.

¹ Аны кибик, къатынла, сиз да эрлеригизге боюн салыгъыз; аланы бир-бирлери Аллахны сёзюне тынгыламай эселе да, ² Ала, сизни Аллахдан къоркъгъан таза жашау халыгъызны кёрюп, кеслерине бир сёз да айтылмай, къатынларыны жашау халлары бла ийманнга къайтышсынла. ³ Сизни айбатланыуугъуз тыш сыфатыгъыздан, чачларыгъызны эшгенигизден, алтын затланы такъгъаныгъыздан неда омакъ кийим кийгенигизден эсе, ⁴ Жууаш эм сабыр халыгъызда, жюрегигиздеги таша адамыгъызны ёмюрде да кетмезлик ариулугъу бла болсун. Ол а Аллахны аллында бек багъалыды. ⁵ Алгъын заманда Аллахха ышаннган сыйлы тиширыула да, эрлерине боюн салыу бла кеслерин алай ариу этгендиле. ⁶ Сара, Ибрахимге алай боюн салып, анга «бийим» дегенди; сиз аны сабийлерисиз, ахшылыкъ этип, бир тюрлю къоркъуудан да жунчумай эсегиз. ⁷ Аны кибик, эрле, сиз да къатынларыгъызгъа тюз акъыл бла тап къарагъыз, сизден къарыусуз жанлагъача, алагъа хурмет этигиз; нек десегиз ала шафауат бла берилген жашауда сизни бла бирге юлюшлюледиле. Сора сизни тилеклеригизге тыйгъыч болмаз. ⁸ Ахырында, барыгъыз да бир акъыллы, жазыкъсыныучу, къарындаш сюйюучю, жумушакъ жюрекли, шуёхлукъну сюйюучю, сабыр акъыллы болугъуз. ⁹ Аманлыкъгъа аманлыкъ бла неда аман сёзге аман сёз бла жууап этмегиз. Ол угъай эсенг, алгъыш этигиз; нек десегиз сиз алгъышлы болургъа чакъырылгъансыз. ¹⁰ Ол себепден «жашау сюйген эм огъурлу кюнле кёрюрге сюйген адам аман сёзледен тилин тыйсын, фитна сёзледен ауузун тыйсын, ¹¹ Аманлыкъдан бир жанына турсун эм ахшылыкъ этсин, жарашыулукъ излесин эм аны ючюн кюрешсин. ¹² Нек десегиз Раббийни кёзлери тюзлюклюлеге, Аны къулакълары да аланы тилеклерине айланыпдыла; аманлыкъ этгенлеге уа Раббийни бети къажауду». ¹³ Сора сизге ким аманлыкъ этерикди, сиз ахшылыкъ этерге эриш болсагъыз? ¹⁴ Тюзлюк ючюн азап чеге эсегиз а, сиз насыплысыз, аланы къоркъутууларындан а къоркъмагъыз эм жунчумагъыз. ¹⁵ Раббий Аллахны жюреклеригизде сыйлы тутугъуз. Сизни Аллахха ышаныуугъузну юсюнден сизге соруп билирге излеген хар адамгъа сабырлыкъ бла эм хурметлик бла жууап берирге хар заманда хазыр болугъуз. ¹⁶ Аманлыкъчылагъа кибик, сизге аман айтханла, сизни Масихде огъурлу жашауугъузну айыплагъанла кеслери уялыр ючюн тюз ниетли болугъуз. ¹⁷ Аллах алай буюргъан эсе, аман ишле ючюн азап чекгенден эсе, ахшы ишле ючюн азап чекген игиди. ¹⁸ Нек десегиз Масих да, бизни Аллахха келтирир ючюн, бир кере бизни гюняхларыбыз ючюн азап чекгенди, Тюзлюклю тюзлюксюзле ючюн, чархы бла ёлтюрюлюп, нюрю бла уа тиргизилгенди. ¹⁹ Ол нюрю бла уа Ол ахыратда энди тутмакъда болгъан нюрлеге барып ууаз бергенди. ²⁰ Бу нюрле, бир заманда Нухну кюнлеринде кеме ишленнген кезиуде Аллахны тёзюмлюк бла сакълагъанына къарамай, Анга боюн салмагъан эдиле. Ол кемеде бир къауум адам, тюзюн айтсакъ, сегиз адам суу къыямадан къутулгъандыла. ²¹ Аны кибик, бизни да энди ол халда сууда кёмюлдюрюлгенибиз, чархыбызны кирин жуумакълыкъ тюйюлдю, алай а Аллахха тюз ниетли болургъа сёз бермеклик болуп, Масих Иссаны тиргизилгени бла бизни къутхарады. ²² Масих Исса уа, кёкге чыгъып, Аллахны онг жанындады. Анга мёлекле да, властьла да, кючле да бойсуннгандыла.

¹ Алай бла, Масих бизни ючюн чархы бла азап чекгенине кёре, сиз да ол акъыл бла азап чегерге хазыр болугъуз; нек десегиз чархы бла азап чекген гюнях этиуню къойгъанды. ² Алай бла ол энди чархында къалгъан заманында, адамланы тыйгъычсызлыкъларына кёре тюйюл, Аллахны буйругъуна кёре жашайды. ³ Нек десегиз сиз озгъан заманда жашауугъузда мажюсю талпыу бла адепсизликлеге, тыйгъычсызлыкълагъа, ичгичиликге, ашауда эм ичиуде артыкъ оздурмакълыкъгъа эм жийиргенчли идоллагъа табыныугъа кесигизни берип жашагъаныгъыз боллукъду. ⁴ Сиз ала бла бирге ол хаулеликлеге къатышмагъаныгъыз ючюн, сейирсинип, сизге аман айтадыла. ⁵ Ала саулагъа да, ёлгенлеге да сюд этерге хазыр Болгъаннга жууап берирле. ⁶ Нек десегиз ёлгенлеге да, ала, башха адамла кибик, чархлары бла сюдге тартылсала да, Аллах кибик, нюр бла жашар ючюн, Хайыр Хапар билдирилгенди. ⁷ Болсада барыны да ахыры къаршыды. Алай бла тюз акъыллы болугъуз эм хар заманда да тилек этерге болалырча сагъайып туругъуз. ⁸ Хар неден да бег’а бир-биригизге жюрекден сюймеклигигиз болсун; нек десегиз сюймеклик кёп гюняхланы жабады. ⁹ Тарыкъмай, бир-биригизге къонакъбайлыкъ этигиз. ¹⁰ Хар ким ол алгъан саугъагъыз бла, Аллахны кёп тюрлю шафауатында огъурлу юй жюрютюучюле кибик, бир-биригизге къуллукъ этигиз. ¹¹ Сёлешген адам Аллахны сёзлерин ангылатыр кибик сёлешсин. Къуллукъ этген адам да Аллах берген кючюне кёре къуллукъ этсин. Алай бла Масих Иссаны юсю бла Аллахха хар не жаны бла да махтау салынсын. Махтау да, бийлик да ёмюрледен ёмюрлеге да Аныды. Амин. ¹² Сюйюлюннгенле! Сизни сынаргъа ийилген зулмуну отуна сизге къужур иш болгъанча сейирсинмегиз. ¹³ Алай а сиз Масихни азап чегиулерине къошулгъаныгъыз ючюн къууаныгъыз, Аны аламатлыгъыны ачыкъ кёрюннгенинде да, уллу къууанч этип къууанырыкъсыз. ¹⁴ Масихни аты ючюн сизге аман айта эселе, сиз насыплысыз; нек десегиз махтаулу Нюр, Аллахны Нюрю, сизни юсюгюзде къалады. Ала Анга аман айтадыла, сиз а Аны махтайсыз. ¹⁵ Сизден биригиз да мурдар, неда гудучу, неда аманлыкъчы, неда башханы затына къол узатыучу болуп азапха тюшмесин ансы. ¹⁶ Масихчича азапха тюше эсе уа, уялмасын, алай а аллай къадар ючюн Аллахха махтау салсын. ¹⁷ Нек десегиз сюд этилир заман жетгенди, сюд этилиу а Аллахны юйюрюнден башланырыкъды; сора алгъа бизден башланырыкъ эсе, Аллахны Хайыр Хапарына боюн салмагъанланы ахырлары уа къалай боллукъду? ¹⁸ Тюзлюклю да кючден къутула эсе, сора аллахсыз бла гюняхлы уа къайда боллукъду? ¹⁹ Ол себепден Аллахны буйругъуна кёре азап чекгенле, ахшылыкъ эте, Жаратхан ышаннгылы Аллахха, кеслерини жанларын аманат этсинле.

¹ Мен, бир тамата эм Масихни азап чекгенине шагъат эм ачыллыкъ махтаууна къошулгъан нёгер, сизни таматаларыгъыздан тилейме: ² Аллахны сизде болгъан сюрюуюн кютюгюз; зорсуз, кесигиз сюйюп эм Аллахны ыразы этип, кесигизге хайыр излеген аманлыкъ бла тюйюл, алай а кёл салып къарагъыз. ³ Аллахны халкъына бийлик этмей, алай а сюрюуге юлгю берип къуллукъ этигиз. ⁴ Сюрюучюлени Башчысы келген заман да уа, сиз мууал болмазлыкъ махтау таж алырсыз. ⁵ Аны кибик кичиле да, таматалагъа бойсунугъуз эм барыгъыз да, бир-биригизге бойсунуп, сабыр акъыллылыкъны юсюгюзге кийигиз. Нек десегиз Аллах ёхтемлеге къажау турады, сабырлагъа уа шафауат береди. ⁶ Алай бла Аллахны кючлю къолуну тюбюнде бойсунугъуз, Ол сизни заманында кётюрюр. ⁷ Къайгъыларыгъызны барын да Аны боюнуна салыгъыз, нек десегиз Ол сизни къайгъыгъызны этеди. ⁸ Аязып, сагъайып туругъуз; нек десегиз сизни душманыгъыз ибилис, хырылдагъан аслан кибик, кимни жутарын излеп айланады. ⁹ Дуниядагъы къарындашларыгъыз да аллай азапла чекгенлерин билип, къаты ийнаныу бла ибилисге къажау туругъуз. ¹⁰ Бизни Масих Иссада Кесини ёмюрлюк махтаууна чакъыргъан, шафауатдан толу болгъан Аллах, Ол Кеси, сизни бу аз заманда азап чегиуюгюз бла сизни тамамлы, бегимли, кючлю, къууатлы этсин. ¹¹ Махтау да, бийлик да ёмюрледен ёмюрлеге да Аны болсун. Амин. ¹² Муну къысха жазып, мен сизге, мен ышаннгылы къарындашха санагъан Силуанны къолу бла иеме. Бу сиз ийнанып тургъан Аллахны хакъ керти шафауаты болгъанына шагъатлыкъ этип, сизге кёл этдиреме. ¹³ Сизни кибик сайланнган, Бабилдеги жамауат эм мени жашым Марк сизге салам айтадыла. ¹⁴ Бир-биригизни сюймеклик бла уппа этип саламлашыгъыз. Сизге, Масих Иссада болгъанланы барыгъызгъа да, ырахатлыкъ болсун. Амин.